Месяца марта в 9-й день

На Го́споди, воззва́х: предваряет самогласен дне, дважды, и мученичен, и подобны Триоди 3, и святых мучеников на 4.

Стихиры самогласны.

Глас 2. Иоанна монаха:

Терпя́ще настоя́щая до́блественне, / ра́дующеся наде́емыми, / друг ко дру́гу глаго́лаху святи́и му́ченицы: / не бо риз совлачи́мся, / но ве́тхаго челове́ка отлага́ем. / Люта́ зима́, но сла́док рай, / боле́знен лед, но сла́дко восприя́тие, / не уклони́мся у́бо, о во́ини! / Ма́ло претерпи́м, / да венцы́ побе́дными увязе́мся / от Христа́ Бо́га и Спа́са душ на́ших.

Ме́щуще одея́ния вся, / входя́ще без тре́пета во е́зеро, / друг ко дру́гу глаго́лаху святи́и му́ченицы: / за рай, его́же погуби́хом, / риз тле́нных днесь не пощади́м, / зми́я ра́ди иногда́ тлетво́рнаго облече́ни бы́вше, / совлеце́мся ны́не за всех воскресе́ние, / пренебреже́м лед раста́ющийся и плоть возненави́дим, / да венцы́ побе́дными увязе́мся / от Христа́ Бо́га и Спа́са душ на́ших.

Ви́дяще я́ко наслажде́ние му́ки, / теку́ще ко е́зеру студену́, я́ко к теплоте́, / глаго́лаху святи́и му́ченицы: / не устраши́мся часа́ зи́мнаго, / да стра́шныя гее́нны огня́ убежи́м; / сожжена́ бу́ди нога́, / да ликовству́ет ве́чно, / рука́ же отъе́млема, / да возде́ется ко Го́споду. / И не пощади́м естества́ умира́ющаго, / изво́лим смерть, да венцы́ побе́дными увязе́мся / от Христа́ Бо́га и Спа́са душ на́ших.

Слава, глас тойже, первую стихиру: Терпя́ще настоя́щая до́блественне, / ра́дующеся наде́емыми, / друг ко дру́гу глаго́лаху святи́и му́ченицы: / не бо риз совлачи́мся, / но ве́тхаго челове́ка отлага́ем. / Люта́ зима́, но сла́док рай, / боле́знен лед, но сла́дко восприя́тие, / не уклони́мся у́бо, о во́ини! / Ма́ло претерпи́м, / да венцы́ побе́дными увязе́мся / от Христа́ Бо́га и Спа́са душ на́ших.

И ныне, Богородичен: Пре́йде сень зако́нная, / благода́ти прише́дши, / я́коже бо купина́ не сгара́ше опаля́ема, / та́ко Де́ва родила́ еси́ / и Де́ва пребыла́ еси́. / Вме́сто столпа́ о́гненнаго, / пра́ведное возсия́ Со́лнце: / вме́сто Моисе́я, Христо́с, / Спасе́ние душ на́ших.

Вход. Прокимен. И чтения дне, и святы́х три.

Проро́чества Иса́иина чте́ние

Та́ко глаго́лет Госпо́дь: вси язы́цы собра́шася вку́пе, и соберу́тся кня́зи от них. Кто возвести́т сия́ в них? Или́, я́же от нача́ла, кто слы́шана сотвори́т вам? Да приведу́т свиде́тели своя́, и оправдя́тся, и да услы́шат, и да реку́т и́стину. Бу́дите Ми свиде́тели, и Аз Свиде́тель, глаго́лет Госпо́дь Бог, и о́трок его́же избра́х. Да позна́ете, и ве́руете Ми, и разуме́ете, я́ко Аз есмь, пре́жде Мене́ не бысть ин бог, и по Мне не бу́дет. Аз есмь Бог, и несть ра́зве Мене́ спаса́яй. Аз возвести́х и спасо́х, уничижи́х и не бе в вас чу́ждий. Вы Мне свиде́тели, и Аз Госпо́дь Бог, и еще́ от нача́ла Аз есмь, и несть от рук Мои́х избавля́яй. Сотворю́, и кто отврати́т то? Си́це глаго́лет Госпо́дь Бог, избавля́яй вас Святы́й Изра́илев.

Ис.43:9–14

Прему́дрости Соломо́новы чте́ние

Пра́ведных ду́ши в руце́ Бо́жией, и не прико́снется их му́ка. Непщева́ни бы́ша во очесе́х безу́мных умре́ти, и вмени́ся озлобле́ние исхо́д их. И е́же от нас ше́ствие сокруше́ние, они́ же суть в ми́ре. И́бо пред лице́м челове́ческим, а́ще и му́ку прии́мут, упова́ние их безсме́ртия испо́лнено. И в ма́ле нака́зани бы́вше, вели́кими благоде́тельствовани бу́дут, я́ко Бог искуси́ я́ и обре́те их досто́йны Себе́. Я́ко зла́то в горни́ле искуси́ их и, я́ко всепло́дие же́ртвенное, прия́т я́. И во вре́мя посеще́ния их возсия́ют и, я́ко и́скры по сте́блию, потеку́т. Су́дят язы́ком и облада́ют людьми́, и воцари́тся Госпо́дь в них во ве́ки. Наде́ющиися Нань разуме́ют и́стину, и ве́рнии в любви́ пребу́дут Ему́; я́ко благода́ть и ми́лость в преподо́бных Его́ и посеще́ние во избра́нных Его́.

Прем.3:1–9

Прему́дрости Соломо́новы чте́ние

Пра́ведницы во ве́ки живу́т, и в Го́споде мзда их, попече́ние их у Вы́шняго. Сего́ ра́ди прии́мут Ца́рствие благоле́пия, и вене́ц добро́ты от руки́ Госпо́дни, зане́ десни́цею покры́ет я́ и мы́шцею защити́т их. Прии́мет всеору́жие рве́ние Свое́, и вооружи́т тварь в месть враго́м. Облече́тся в броня́ пра́вды, и возложи́т шлем, суд нелицеме́рен. Прии́мет щит непобеди́мый преподо́бие, поостри́т же напра́сный гнев во ору́жие, спобо́рет же с ним мир на безу́мныя. По́йдут праволу́чныя стре́лы мо́лниины и, я́ко от благокру́гла лу́ка облако́в, на наме́рение полетя́т. И от каменоме́тныя я́рости испо́лнь паду́т гра́ды, вознегоду́ет на них вода́ морска́я, ре́ки же потопя́т я́ на́гло. Сопроти́в ста́нет им дух си́лы и, я́ко ви́хор, разве́ет их, и опустоши́т всю зе́млю беззако́ние, и злоде́йство преврати́т престо́лы си́льных. Слы́шите у́бо, ца́рие, и разуме́йте, навы́кните судии́ конце́в земли́. Внуши́те, держа́щии мно́жества и гордя́щиися о наро́дех язы́к. Я́ко дана́ есть от Го́спода держа́ва вам и си́ла от Вы́шняго.

Прем.5:15–24, 6:1–3

И прочее последование преждесвященныя. Аще же не совершается Литургия преждесвященная, пое́м на стиховне Триоди самогласен дне, дважды, и мученичен.

Слава, святы́х, глас 6:

В песнопе́ниих восхва́лим, ве́рнии, / страстоте́рпцев четы́редесять му́чеников / и к ним сладкопе́сненно возопии́м, глаго́люще: / ра́дуйтеся, страда́льцы Христо́вы, / Иси́хие, Мели́тоне, Ира́клие, / Смара́где и До́мне, / Евни́ке, Уа́ле и Вивиа́не, / Кла́вдие и При́ске. / Ра́дуйтеся, Феоду́ле, Евти́хие и Иоа́нне, / Ксанфи́е, Илиа́не, Сиси́ние, / Кири́е, Агги́е, Ае́тие и Фла́вие. / Ра́дуйтеся, Ака́кие, Екди́кие, Лисима́хе, / Алекса́ндре, Или́е и Горго́ние, / Фео́филе, Дометиа́не, и Боже́ственный Га́ие, и Горго́ние. / Ра́дуйтеся, Евти́хие и Афана́сие, / Кири́лле и Сакердо́не, / Нико́лае и Вале́рие, / Филокти́ме, Севериа́не и Худи́е. / Я́ко иму́щии дерзнове́ние ко Христу́ Бо́гу на́шему, / му́ченицы всечестни́и, / Того́ приле́жно моли́те / спасти́ся ве́рою соверша́ющим всечестну́ю па́мять ва́шу.

И ныне, Богородичен, глас тойже: Богоро́дице, Ты еси́ лоза́ и́стинная, / возрасти́вшая нам Плод живота́, / Тебе́ мо́лимся: / моли́ся, Влады́чице, со святы́ми апо́столы / поми́ловати ду́ши на́ша.

По Ны́не отпуща́еши: тропарь, глас 1:

Боле́зньми святы́х, и́миже о Тебе́ пострада́ша, / умоле́н бу́ди, Го́споди, / и вся на́ша боле́зни исцели́, / Человеколю́бче, мо́лимся.

Ин тропарь, глас 1:

Страстоте́рпцы всечестни́и, / во́ини Христо́вы четы́редесяте, / тве́рдии ору́жницы, / сквозе́ бо огнь и во́ду проидо́сте / и А́нгелом согра́ждане бы́сте, / с ни́миже моли́теся Христу́ о и́же ве́рою хва́лящих вас. / Сла́ва Да́вшему вам кре́пость, / сла́ва Венча́вшему вас, / сла́ва Подава́ющему ва́ми всем исцеле́ния.

Ин тропарь, глас 3:

Страстоте́рпцы Христо́вы четы́редесяте, / во гра́де Севасти́йстем му́жественно пострада́вшии, / чрез огнь и во́ду проше́дший, / в поко́й ве́чный вше́дшии, / моли́теся о нас ко Го́споду, / да жизнь ми́рну сохрани́т / и ду́ши на́ша спасе́т, я́ко Человеколюбец.

Слава, и ныне, Богородичен.

Ектении, и три поклоны великия, и отпуст.

На Бог Госпо́дь:

тропарь святых дважды, глас 1:

Боле́зньми святы́х, и́миже о Тебе́ пострада́ша, / умоле́н бу́ди, Го́споди, / и вся на́ша боле́зни исцели́, / Человеколю́бче, мо́лимся.

Слава, и ныне, Богородичен: Гаврии́лу, веща́вшу Тебе́, Де́во, ра́дуйся, / со гла́сом воплоща́шеся всех Влады́ка, / в Тебе́, Святе́м Киво́те, / я́коже рече́ пра́ведный Дави́д; / яви́лася еси́ ши́ршая небе́с, / поноси́вши Зижди́теля Твоего́. / Сла́ва Все́льшемуся в Тя, / сла́ва Проше́дшему из Тебе́, / слава Свободи́вшему нас рождество́м Твои́м.

И обычныя кафизмы. По 1-й и по 2-й кафизмах седальны Триоди. Ектении же не глаголем. По 3-й же кафизме глаголет иерей ектению малую.

Таже седален, глас 4.

Подобен: Яви́лся еси́ днесь:

Честну́ю твердь церко́вную, / я́ко зве́зды велича́йшия, просвеща́ете при́сно и ве́рныя озаря́ете, / му́ченицы Боже́ственнии Христо́вы четы́редесяте.

Слава, глас тойже. Подобен: Вознесы́йся:

Му́жественнейшим по́мыслом преше́дше муче́ние, чу́днии страстоте́рпцы, / сквозе́ огнь и во́ду проидо́сте и премину́сте ко спасе́ния широте́, / насле́дие прие́мше Небе́сное Ца́рство, / в не́мже твори́те о нас Боже́ственных мольбы́, / му́дрии четы́редесяте.

И ныне, Богородичен: Е́же благода́рно воспева́ти от се́рдца / и испроси́ти приле́жно, Богоро́дице, Твоя́ ми́лости, Влады́чице, / рабы́ Твоя́ зову́щия и глаго́лющия: / Пресвята́я Де́во, предвари́ и изба́ви от враг неви́димых и ви́димых / и вся́каго преще́ния, / Ты бо еси́ на́ше заступле́ние.

Аще ли суббота, кроме первыя недели поста

По 1-й кафизме седален: Честну́ю твердь: дважды.

Слава, и ныне, Богородичен: В кров Твой, Пречи́стая Де́во, прибега́ющих / мольбу прие́млеши от нас: / не преста́й моля́щи Человеколю́бца спасти́ рабы́ Твоя́.

По 2-й кафизме, седален: Му́жественнейшим по́мыслом: дважды. Слава, и ныне, Богородичен: Е́же благода́рно:

Полиелей и величание:

Велича́ем вас, / страстоте́рпцы святи́и четы́редесяте, / и чтем честна́я страда́ния ваша, / я́же за Христа́ / претерпе́ли есте́.

Псалом избранный

1 лик Бог нам Прибе́жище и Си́ла. 2 Помо́щник в ско́рбех обре́тших ны зело́. 1 Сего́ ра́ди не убои́мся, внегда́ смуща́ется земля́. 2podpis Бо́же, кто уподо́бится Тебе́; да не премолчи́ши, ниже́ укроти́ши, Бо́же. 1 Я́ко се врази́ Твои́ возшуме́ша, и ненави́дящии Тя воздвиго́ша главу́. 2 На лю́ди Твоя́ лука́вноваша во́лею, и совеща́ша на святы́я Твоя́. 1 Положи́ша тру́пия рабо́в Твои́х, бра́шна пти́цам небе́сным. 2 Пло́ти преподо́бных Твои́х звере́м земны́м. 1 Пролия́ша кровь их я́ко во́ду. 2podpis Я́ко Тебе́ ра́ди умерщвля́еми есмы́ весь день. 1 Вмени́хомся я́ко о́вцы заколе́ния. 2 Положи́л еси́ нас в при́тчу во язы́цех. 1 И бых я́звен весь день. 2 Разже́гл еси́ ны, я́коже разжиза́ется сребро́. 1 Проидо́хом сквозе́ огнь и во́ду, и изве́л еси́ нас в поко́й. 2 Весели́теся о Го́споде, и ра́дуйтеся пра́веднии. 1 Я́ко Госпо́дь в ро́де пра́ведных. 2 И насле́дие их в век бу́дет. 1 Воззва́ша пра́веднии и Госпо́дь услы́ша их. 2 Свет возсия́ пра́веднику и пра́вым се́рдцем весе́лие. 1 В па́мять ве́чную бу́дет пра́ведник. 2 Святы́м, и́же суть на земли́ Его́, удиви́ Госпо́дь вся хоте́ния Своя́ в них. 1 Ди́вен Бог во святы́х Свои́х. 2 Пра́ведник я́ко фи́никс процвете́т, я́ко кедр, и́же в Лива́не, умно́жится. 1 Возвесели́тся пра́ведник о Го́споде и упова́ет на Него́. 2 И похва́лятся вси пра́вии се́рдцем.

Сла́ва, и ны́не: Аллилу́иа, трижды.

По полиелеи седален, глас 5.

Подобен: Собезнача́льное:

Святы́х му́ченик удобре́ние, четверосве́тлое се и Богосо́бранное, / четы́редесяти мно́жество во́ин вои́стинну, / мра́зом же и огне́м искуси́вшеся, му́дрии, / показа́шася во́ини всех Царя́ Христа́, / Его́же и мо́лят спасти́ся нам. [Дважды.]

Слава, и ныне, Богородичен: Себе́ пре́жде Суда́ ны́не пла́чу, / помышля́я моя́ дела́ лука́вая и лю́тая / и прегреше́ний глубину́, совозра́стшую мне от ю́ности, Чи́стая, / и сподавля́ющую ум, / но Твои́м предста́тельством оставле́ние мне пода́ждь / и спасе́ние улучи́ти сподоби.

Степенна, 1-й антифон 4-го гласа:

От ю́ности моея́ / мно́зи бо́рют мя стра́сти, / но Сам мя заступи́, / и спаси́, Спа́се мой. Ненави́дящии Сио́на, / посрами́теся от Го́спода, / я́ко трава́ бо огне́м / бу́дете изсо́хше.

Сла́ва, и ны́не: Святы́м Ду́хом / вся́ка душа́ живи́тся, / и чистото́ю возвыша́ется, / светле́ется Тро́ическим Еди́нством священнота́йне.

Прокимен, глас 4:

Проидо́хом сквозе́ огнь и во́ду, / и изве́л ны еси́ в поко́й. Стих: Разже́гл ны еси́, я́коже разжиза́ется сребро́.

Другий прокимен: Вся́кое дыха́ние / да хва́лит Го́спода. Стих: Хвали́те Бо́га во святы́х Его́, хвали́те Его́ в утверже́нии си́лы Его́.

Евангелие от Луки, зачало 106

Рече́ Госпо́дь Свои́м ученико́м: внемли́те от челове́к, возложа́т на вы ру́ки своя́ и иждену́т, предаю́ще на со́нмища и темни́цы, ведо́мы к царе́м и влады́кам, и́мене Моего́ ра́ди, прилучи́тся же вам во свиде́тельство. Положи́те у́бо на сердца́х ва́ших, не пре́жде поуча́тися отвещава́ти. Аз бо дам вам уста́ и прему́дрость, е́йже не возмо́гут проти́витися или́ отвеща́ти вси противля́ющиися вам. Пре́дани же бу́дете и роди́тели, и бра́тиею, и ро́дом, и дру́ги, и умертвя́т от вас. И бу́дете ненави́дими от всех и́мене Моего́ ра́ди. И влас главы́ ва́шея не поги́бнет. В терпе́нии ва́шем стяжи́те ду́шы ва́ша.

Лк.21:12–19

По 50-м псалме

Слава: Моли́твами святы́х му́ченик, / Ми́лостиве, очи́сти / мно́жества согреше́ний на́ших.

И ныне: Моли́твами Богоро́дицы, / Ми́лостиве, очи́сти / мно́жества согреше́ний на́ших.

Таже, глас 6: Поми́луй мя, Бо́же, / по вели́цей ми́лости Твое́й / и по мно́жеству щедро́т Твои́х / очи́сти беззако́ние мое́.

И стихира самогласна, глас 2:

Проро́чески у́бо вопия́ше Дави́д во псалме́х: / проидо́хом сквозе́ огнь и во́ду, / и изве́л ны еси́ в поко́й. / Вы же, му́ченицы Христо́вы, / саме́ми де́лы сло́во исполня́юще, / проидо́сте сквозе́ огнь и во́ду и внидо́сте в Ца́рство Небе́сное. / Те́мже моли́теся, четы́редесяте су́ще страда́льцы, / дарова́ти нам ве́лию ми́лость.

Канона два мучеников на 8. Первый канон, егоже краегранесие: Боговенча́нный полк пою́ му́чеников. Иоанна монаха. Глас 2.

Песнь 1

Ирмос: Гряди́те, лю́дие, / пои́м песнь Христу́ Бо́гу, / разде́льшему мо́ре и наста́вльшему лю́ди, / я́же изведе́ из рабо́ты еги́петския, / я́ко просла́вися.

Боговенча́нный полк пою́ му́чеников Христо́вых, Богодухнове́нными пе́сньми, четы́редесяти, / ле́тнюю па́мять све́тло торжеству́яй, / я́ко просла́вися.

На земли́ всего́ отве́ргшеся именова́ния, / изво́лиша четы́редесяте христоиме́нное зва́ние, / и́мже ны́не в Вы́шних живу́т.

Су́щии во Христе́, плоть и мир возненави́девше, / ве́тхаго у́бо челове́ка совлеко́стеся со привре́менною оде́ждею, / во оде́жду же нетле́ния облеко́стеся.

Богородичен: Кто изрещи́ Твое́ по досто́инству возмо́жет па́че сло́ва зача́тие? / Бо́га бо родила́ еси́ пло́тию, Пречи́стая, / нам я́вльшагося, Спа́са всех нас.

Другий канон, егоже краегранесие:

Боговенча́нный полк пою́ му́ченик.

Кир Феофана, глас и ирмос тойже

Бо́га нам, му́ченицы четы́редесяте, / ны́не благопреме́нна сотвори́те моли́твами ва́шими, / чи́стою се́рдца любо́вию призыва́ющим вас.

На Небесе́х трисо́лнечнаго сия́ния заря́ми просвеща́еми, четы́редесяте, / на земли́ изме́рзшия зимо́ю напа́стей, / покры́йте ны, пою́щия вы.

Неразори́ма благоче́стия и непоколеби́мая Це́ркве забра́ла, четы́редесяте, / христоимени́тое зва́ние лю́те смуща́емаго ны́не умири́те.

Богородичен: Преесте́ственно над все́ми су́щаго родила́ еси́ Зижди́теля и Го́спода, / плоть бы́вша нас ра́ди, челове́к, / Де́во Богоро́дице Ма́ти Неискусому́жная.

Катавасия: Отве́рзу уста́ моя́, / и напо́лнятся Ду́ха, / и сло́во отры́гну Цари́це Ма́тери, / и явлю́ся, све́тло торжеству́я, / и воспою́, ра́дуяся, Тоя́ чудеса́.

Песнь 3

Ирмос: Утверди́ нас в Тебе́, Го́споди, / Дре́вом умерщвле́й грех, / и страх Твой всади́ / в сердца́ нас, пою́щих Тя.

Во́инство, и жизнь, и красоту́ теле́с, / и бога́тство пренебре́гше, / благосла́внии четы́редесять Христа́ вме́сто всех насле́доваша.

Ка́мением неща́дно четы́редесяте повеле́нием бие́ми мучи́телевым, / мета́ния Бо́жиим Ду́хом на повелева́ющий возвраща́хуся.

Глаго́лаше на самаго́, мучи́телевыми устна́ми змий созда́вшаго хулу́, / но того́ богобо́рная уста́ на му́ченики ка́меньми сокруша́ются.

Богородичен: Без се́мене во утро́бе Бо́га зачала́ еси́ / и ро́ждши несказа́нно вопло́щшася, / на Него́же зре́ти не сме́ют, Чи́стая, Небе́сныя си́лы, Присноде́во.

Ин, ирмос тойже.

Во́инство му́ченическое / и спряже́нный ли́че му́ченик венцено́сец, Влады́це предстоя́ще, / восхваля́ющия вы при́сно спаса́йте.

Е́зером страсте́й обурева́емии и волно́ю напа́стей лю́тых, / к вам, четы́редесятем Христо́вым во́ином, прибега́ем.

В не́дрех Авраа́мовых согрева́емии и сла́вною оде́ждею украша́емии, / зимо́ю обстоя́ния свя́занных разреши́ти помоли́теся.

Богородичен: Утвержде́ние бу́ди, и прибе́жище, и покро́в, Де́во Богоневе́сто, / ве́рою к Тебе́ прибега́ющим / и Бо́жию Тя Ма́терь испове́дающим.

Катавасия: Твоя́ песносло́вцы, Богоро́дице, / живы́й и незави́стный Исто́чниче, / лик себе́ совоку́пльшия, духо́вно утверди́, / в Боже́ственней Твое́й сла́ве / венце́в сла́вы сподо́би.

Седален, глас 8.

Подобен: Прему́дрости:

Христу́ вво́инившеся му́ченически, / врага́ низложи́вше страда́льчески, / де́лы испо́лнисте проро́ка глаго́лы: / сквозе́ бо огнь и во́ду му́жески проидо́сте, / поко́й обре́тше, жизнь нетле́нную. / Те́мже Небе́сными укра́шшеся венцы́, / с ли́ки весели́теся безпло́тных, блаже́ннии страстоте́рпцы прехва́льнии, / моли́те Христа́ Бо́га грехо́в оставле́ние дарова́ти / чту́щим любо́вию святу́ю па́мять ва́шу.

Слава, и ныне, Богородичен: В напа́сти многоплете́нныя впад от враг ви́димых и неви́димых, / бу́рею одержи́м безчи́сленных согреше́ний мои́х, / и я́ко к те́плому заступле́нию и покро́ву моему́, Чи́стая, / ко приста́нищу притека́ю Твоея́ бла́гости. / Те́мже, Пречи́стая, из Тебе́ Воплоще́нному безсе́менно / моли́ся приле́жно о всех рабе́х Твои́х, / непреста́нно моля́щих Ти ся, Богоро́дице Пречи́стая, / моля́щи Его́ при́сно согреше́ний оставле́ние дарова́ти / воспева́ющим досто́йно сла́ву Твою́.

Песнь 4

Ирмос: Услы́шах, Го́споди, / слух Твоего́ смотре́ния / и просла́вих Тя, / Еди́не Человеколю́бче.

Умовре́дуете, – глаго́лаху страда́льцы, – / стра́нную тщету́ всу́е простира́юще, пребезбо́жнейшии.

Изощре́ны мечи́, и зве́ри, и огнь, и крест святы́м / Христо́вы гони́тели простира́ху.

Стра́шен нам, – глаго́лаху страда́льцы, – огнь гее́нский, / ны́нешняго же, я́ко клевре́та, не убои́мся.

Да отъя́ты бу́дут ру́ки, сожже́на же бу́ди нога́, – / святи́и вопия́ху, – / нетле́нны бо сия́ па́ки прии́мем.

Богородичен: Мо́лим Тя, Пречи́стая, Бо́га безсе́менно заче́ншую, / при́сно моли́тися за рабы́ Твоя́.

Ин, ирмос тойже.

Просвеще́ние нам, му́ченицы, от Бо́га бы́сте, / в сия́ние бо облеко́стеся неприсе́нное.

Богоизбра́нный, моли́ся, собо́ре му́ченик венцено́сный, / изба́вити бед воспева́ющия тя.

Свет непристу́пный, святи́и, Христо́в ви́дети сподо́бльшеся, / су́щия во тьме сия́ти удосто́йте.

Облиста́юще, сла́внии, мы́сленным Христа́ светонаставле́нием, / к зари́ Боже́ственней руково́дствуйте.

Богородичен: Песносло́вяще, Чи́стая, из утро́бы Твоея́ вопло́щшагося, / Тя славосло́вим, я́ко Бо́жию Ма́терь.

Катавасия: Седя́й в Сла́ве / на Престо́ле Божества́ / во о́блаце ле́гце, / прии́де Иису́с Пребоже́ственный, / Нетле́нною Дла́нию / и спасе́ зову́щия: / сла́ва, Христе́, си́ле Твое́й.

Песнь 5

Ирмос: Све́та Пода́телю и веко́в Тво́рче, Го́споди, / во све́те Твои́х повеле́ний наста́ви нас: / ра́зве бо Тебе́, ино́го бо́га не зна́ем.

Неи́стовством пребезу́мным гони́телей / страда́льцы под возду́хом на сту́дени обноществова́ти осуди́вшеся, / воспева́ху пе́ние Бо́гу благода́рственное.

Ра́дующеся четы́редесяте Христо́вы му́ченицы, / боле́зненный претерпе́вше лед, во е́зере стоя́ще, / наде́ждею Боже́ственных венце́в укрепля́еми.

Смех предлага́ется четы́редесятем Христо́вым му́чеником, / уда́влен быв пре́жде гнездя́щийся в вода́х змий, / пагуборо́дныя бо кре́пости лиши́ся.

Богородичен: Тебе́, ро́ждшей Христа́, всех Зижди́теля, зове́м: / ра́дуйся, Чи́стая, ра́дуйся, возсия́вшая Свет нам, / ра́дуйся, вме́щшая Бо́га Невмести́маго.

Ин, ирмос тойже.

Неи́стовства ерети́ческаго, четы́редесяте, / и ны́не изба́вите Христо́ву честну́ю Це́рковь, / в не́йже ро́ждшеся, в толи́ко досто́инство и сла́ву премину́сте.

Я́вльшеся нам, четы́редесяте Христо́вы му́ченицы Богоза́рнии, / огневи́днии свети́льницы, / просвеща́ют ве́рным благоче́стия путь спаси́тельный.

От земли́ преста́вистеся к Небе́сней се́ни, му́ченицы, / иде́же Христу́ Подвигополо́жнику предстоя́ще, / Боже́ственныя мя ра́дости улучи́ти сподо́бите.

Богородичен: Я́ко непостижи́мое и неудобозри́мое вся́кому, Влады́чице, / е́же па́че ума́ та́инство, Отрокови́це, Боже́ственнаго Твоего́ рождества́, / су́щаго бо вои́стинну Бо́га нам родила́ еси́.

Катавасия: Ужасо́шася вся́ческая / о Боже́ственней сла́ве Твое́й: / Ты бо, Неискусобра́чная Де́во, / име́ла еси́ во утро́бе над все́ми Бо́га / и родила́ еси́ Безле́тнаго Сы́на,/ всем воспева́ющим Тя / мир подава́ющая.

Песнь 6

Ирмос: В бе́здне грехо́вней валя́яся, / неизсле́дную милосе́рдия Твоего́ призыва́ю бе́здну: / от тли, Бо́же, мя возведи́.

Ра́достне началозло́бный восхити́, я́ко от двоюна́десяти Иу́ду окая́ннаго, / и от Еде́ма челове́ка, от четы́редесяти отпа́дшаго.

Безсту́ден сый, всу́е шата́яся, / я́коже бо разбо́йником и Матфи́ем пе́рвее, / та́ко и ны́не мучи́тель стрегу́щаго зва́нием осуди́ся.

Суему́дренный и рыда́ния досто́ин, и́же живото́в обои́х погреши́, / огне́м бо раста́яся и ко огню́ оты́де негаси́мому.

Богородичен: Неискусому́жно, Де́во, родила́ еси́ / и ве́чнуеши Де́ва, явля́ющи и́стиннаго Божества́, / Сы́на и Бо́га Твоего́, о́бразы.

Ин, ирмос тойже.

Бо́дрствующии и тре́звеннии храни́телие ро́да челове́ческаго яви́стеся, держа́внии, / и моли́твенницы моле́ний, / помо́щницы же печа́льных поста́вистеся.

Непристу́пными сия́юще добро́тами в Це́ркви Христо́ве, всехва́льнии, / искуше́ний изба́вите с любо́вию вас почита́ющих.

Беся́щихся мучи́телей всеизря́днии дре́вле потреби́телие пре́лести бы́сте / и нам ны́не по́мощь ско́рая и стена́ бу́дите.

Богородичен: На Тя упова́ние возложи́х, Ма́ти Присноде́во, спасе́ния моего́ / и Тя Предста́тельницу положи́х жи́зни, / тве́рду же и непоколеби́му.

Катавасия: Боже́ственное сие́ и всечестно́е / соверша́юще пра́зднество, / Богому́дрии, Богома́тере, / прииди́те, рука́ми воспле́щим, / от Нея́ ро́ждшагося Бо́га сла́вим.

Кондак, глас 6.

Подобен: Е́же о нас:

Все во́инство ми́ра оста́вльше, / на Небесе́х Влады́це прилепи́стеся, / страстоте́рпцы Госпо́дни четы́редесять, / сквозе́ огнь бо и во́ду проше́дше, блаже́ннии, / досто́йно восприя́сте сла́ву с Небе́с / и венце́в мно́жество.

Икос: На престо́ле непристу́пнем седя́щему, / просте́ршему Не́бо, я́ко ко́жу, / и зе́млю утверди́вшему, / и собра́вшему во́ды в со́нмы их, / вся от не су́щих сотво́ршему бы́ти / и всем подаю́щу дыха́ние и живо́т, / прие́млющему от Арха́нгел пе́ние, и от А́нгел покланя́емому, / и от всех сла́вимому, Христу́ Вседержи́телю, / Зижди́телю и Бо́гу на́шему, припа́даю, недосто́йный, / принося́ мое́ моле́ние, сло́ва благода́ти прошу́: / да возмогу́ благоче́стно воспе́ти и аз святы́я, / я́же Сам показа́в победи́тели, / дарова́в им сла́ву с Небе́с и венце́в мно́жество.

Песнь 7

Ирмос: О́бразу злато́му, на по́ле Деи́ре служи́му, / трие́ Твои́ о́троцы небрего́ша безбо́жнаго веле́ния, / посреде́ же огня́ вве́ржени, ороша́еми, поя́ху: / благослове́н еси́, Бо́же оте́ц на́ших.

Ужасе́ся, зря венцы́, страж четы́редесяти, / и, отри́нув любожи́зненное, впери́ся раче́нием явле́нныя Твоея́ сла́вы, / и с му́ченики поя́ше: / благослове́н еси́, Бо́же оте́ц на́ших.

В ба́ню прите́к душетле́нну, умерщвля́ется жизнолю́бный; / христолю́бец же, хи́щник изря́днейший ви́денных быв, / я́коже в ба́ни нетле́ния с му́ченики поя́ше: / благослове́н еси́, Бо́же оте́ц на́ших.

Огню́ мы́сленному, возжже́ну во уме́х четы́редесяти, / многоко́зненное нече́ствующих попаля́шеся безу́мие, / я́коже не́кий воск та́емь. / Тебе́ же, Христе́, воспева́ху: / благослове́н еси́, Бо́же оте́ц на́ших.

Я́ко зело́ светла́, благоле́пна же, Христе́, Креста́ Твоего́ си́ла, / проти́вными венцы́ плету́щи четы́редесятим му́чеником. / Во́ду бо и огнь проше́дше, в нетле́нии зову́т: / благослове́н еси́, Бо́же оте́ц на́ших.

Богородичен: Тя купину́ Моисе́й в горе́ Сина́йстей огнепали́мую, Чи́стая, предзря́ше, / поне́сшую неопа́льно нестерпи́мую зарю́ неизрече́ннаго Существа́, / соедини́вшагося дебельству́ пло́ти, / еди́ныя в ней святы́х Ипоста́сей.

Ин, ирмос тойже.

Наста́ све́тло ле́тняя ва́ша па́мять, всебога́тии, / просвеща́ющи дале́че сия́ющая поста́ све́тлостию. / Сию́ пра́зднующе ве́рою, с ва́ми воспева́ем: / благослове́н еси́, Бо́же оте́ц на́ших.

Реши́телие страсте́й и свети́льницы, издале́ча сия́ющии, / ми́ра очище́ние, пре́лести разруше́ние, / велегла́снии и́стины пропове́дницы, / лжи прогони́телие всем яви́стеся, пою́ще: / благослове́н еси́, Бо́же оте́ц на́ших.

Свети́ла мы́сленная, сия́юще нам, яви́стеся, му́ченицы, / обурева́емыя спаса́ете и наставля́ете пла́вающия, / жития́ волну́ющияся бу́рею, Христу́ воспева́юще: / благослове́н еси́, Бо́же оте́ц на́ших.

Красно́ Бо́гу и А́нгелом возжеле́нно, / четы́редесяте Богособра́нное, и Богодухнове́нное, и пресве́тлое ополче́ние, / Боже́ственное и стра́шное всеору́жие вопию́ще и глаго́люще: / благослове́н еси́, Бо́же оте́ц на́ших.

Богородичен: Свети́льник Све́та, и о́блак све́тел, / и свяще́ния ме́сто показа́ся, Неискусобра́чная, / и́бо святы́х Свята́го Сло́ва прия́т несказа́нно. / Его́же пою́ще, взыва́ем: / благослове́н еси́, Бо́же оте́ц на́ших.

Катавасия: Не послужи́ша тва́ри Богому́дрии, / па́че Созда́вшаго, / но о́гненное преще́ние му́жески попра́вше, / ра́довахуся, пою́ще: / препе́тый отце́в Госпо́дь и Бог благослове́н еси́.

Песнь 8

Ирмос: В пещь о́гненную ко отроко́м евре́йским снизше́дшаго / и пла́мень в ро́су прело́жшаго Бо́га, / по́йте, дела́, я́ко Го́спода, / и превозноси́те во вся ве́ки.

Неи́стовно страда́льцем поусти́в враг вся́ко зда́ние, все́ми постыде́ся, / четы́редесять бо непреста́нно пою́т Го́спода / и превозно́сят во вся ве́ки.

Неми́лостивно за Христа́ теле́с ва́ших у́ды сокру́шшеся, / всесожже́ние Боже́ственно принесо́стеся Бо́гу, / со А́нгелы при́сно ликуете, му́ченицы, пою́ще Христа́ во ве́ки вся.

Кре́постию смы́сла, его́же роди́, на ра́мена взе́мши, христолюби́вая ма́ти, / благоче́стия плод прино́сит, с му́ченики му́ченика, / священноде́йству Авраа́мову подо́бящися.

К непреста́нней жи́зни правоте́чно, о сы́не, твори́ ше́ствие, – / христолюби́вая ма́ти христолюби́вому де́тищу вопия́ше, – / не терплю́ тебе́ второ́е, Подвигополо́жнику Христу́ яви́тися.

Богородичен: И́же в не́дрех О́тчих / неразде́льно же Сы́на седя́щаго, в веще́ственнем чре́ве Твое́м все́льшася, Чи́стая, / пое́м, Де́во Богоневе́сто, и превозно́сим во вся ве́ки.

Ин, ирмос тойже.

Претво́ршеся к жи́зни и́стинней, е́же о Христе́ ны́не сокрове́нней, / к зи́мней и боле́зненней кончи́не, до́блии, кре́пко вда́стеся, / спасе́ния и оставле́ния прося́ще нам.

От земли́ к Небе́сным преше́дше, страда́льцы венцено́сцы, / Це́ркви му́ченик победоно́сных ли́че, / бед, страсте́й, обстоя́ний избавле́ния проси́те нам и спасе́ния.

Расто́рг сме́рти у́зы Спас, страда́льцем побе́ды подаде́ на смерть, / четы́редесять бо, мра́зом согрева́еми, поя́ху / и спасе́ния всем ве́рным прося́ще.

Напа́стей прило́ги, нападе́ние страсте́й, де́монов искуше́ния / Боже́ственный страстоно́сец лик моли́твою изыма́ет я́ве / от пою́щих Христа́ во ве́ки.

Богородичен: Умерщвле́ныя и к пе́рсти сме́ртней и тле́нию сведе́ныя воскреси́ла еси́, / Еди́на, Нача́льника жи́зни ро́ждши, Христа́ Бо́га на́шего, / Влады́чице Де́во, Чи́стая Богороди́тельнице.

Катавасия: О́троки благочести́выя в пещи́ / Рождество́ Богоро́дичо спасло́ есть, / тогда́ у́бо образу́емое, / ны́не же де́йствуемое, / вселе́нную всю воздвиза́ет пе́ти Тебе́: / Го́спода по́йте дела́ / и превозноси́те Его́ во вся ве́ки.

Песнь 9

Ирмос: От Бо́га Бо́га Сло́ва, / неизрече́нною му́дростию прише́дшаго обнови́ти Ада́ма, / я́дию в тле́ние па́дшаго лю́те, / от святы́я Де́вы неизрече́нно воплоти́вшагося нас ра́ди, / ве́рнии, единому́дренно пе́сньми велича́ем.

За Христа́ обнажи́вшеся и ка́мением бие́ни бы́вше, / возду́шную претерпе́сте зи́мность, / водны́й лед и сокруше́ние уде́с и, огне́м опа́льшеся, / в ре́чней сия́ете быстрине́ издале́ча, / я́коже свети́ла, му́ченицы четы́редесяте.

Жезл си́лы Боже́ственныя, крест стяжа́вше, / вопия́ху Христу́ страда́льцы четы́редесяте: / Влады́ко Всеси́льный Победи́телю, руко́ю Тво́ею да венча́емся, / да вси Тя пе́сньми непреста́нно велича́ем.

Я́ко боле́знен у́бо лед, я́коже зело́ безме́рна лю́тость, / ю́же претерпе́сте, мра́за, но сла́док рай, / Авраа́мова бо не́дра патриа́рха гре́ют вас в се́лех ве́чных, му́ченицы четы́редесяте.

Победи́вше страда́ньми и венцы́ прии́мше от Боже́ственныя Влады́чни десни́цы, / ны́не дарова́ти моли́теся мир ми́ру и нам спасе́ние, му́ченицы четы́редесяте.

Богородичен: Неве́сто Ма́ти Де́во, / А́нгельская мно́жества Твоего́ мо́лят Сы́на, / приими́ моле́ние на́ше, еди́на наде́жде ве́рных, / и мир ми́ру и нам спасе́ние, Тебе́ лю́бящим, да́руй.

Ин, ирмос тойже.

Преесте́ственныя зари́, и ра́дости несказа́нныя, и сла́вы сподо́бистеся улучи́ти, / ны́не же любо́вию чту́шия вас / напа́стей, и бед, и лука́вствия изба́вите вра́жия, / Христо́вы во́ини, му́ченицы четы́редесяте.

Си́лу, пребога́тии, Боже́ственную с Небесе́ прие́мше и кре́пость, соу́зницы Христо́вы, / льсти прогони́телие бы́сте, отгоня́ще вся́ку и́дольскую мглу непостоя́нную / и просвеща́юще мир, му́ченицы четы́редесяте.

Укра́шшеся добро́тою честна́го муче́ния / и Боже́ственнаго прича́стницы бы́вше естества́, / вои́стинну ра́дуетеся, Све́ту сраствори́вшеся светле́йшему и чи́стому, / Христо́вы во́ини, му́ченицы четы́редесяте.

Ны́не Христу́ предстоя́ще благочести́вым дерзнове́нием / и отону́ду Божества́ све́том облиста́еми, сла́внии, / восхваля́ющия вы заре́ю освети́тися трисия́нною / приле́жно моли́те, му́ченицы четы́редесяте.

Богородичен: Я́вльшийся, Де́во, души́ моея́ примра́к / све́та Твоего́ невеще́ственными блиста́ньми озари́, две́ре Боже́ственнаго Све́та, / и огня́ ве́чнаго изба́витися сподо́би, Чи́стая, / ве́рою и любо́вию пе́сньми Тя велича́ющаго.

Катавасия: Всяк земноро́дный / да взыгра́ется, Ду́хом просвеща́емь, / да торжеству́ет же Безпло́тных умо́в естество́, / почита́ющее свяще́нное торжество́ Богома́тере, / и да вопие́т: / ра́дуйся, Всеблаже́нная, / Богоро́дице Чи́стая Присноде́во.

Светилен.

Подобен: Жены́, услы́шите:

Десяти́цу четверочи́сленную, победоно́сный полк, / во́инство святы́х му́ченик воспои́м досто́йно, / огне́м бо, и сту́дению, и водо́ю посрами́ша вражде́бных полки́ / и от Христа́ Спа́са венцы́ прия́ша сла́вы.

Слава: Лик четверодесяточи́сленный му́чеников четы́редесяти, / Пребоже́ственныя Тро́ицы доброде́телей четвери́чных, / огня́, возду́ха, воды́ и земли́, стихи́й четы́рех, / пе́сньми Боже́ственными да воспое́тся, / я́ко за Христа́ пострада́вший, всех Влады́це.

И ныне, Богородичен: Влады́ку всея́ тва́ри ро́ждши, Ма́ти Де́во, / и вся́ческих, я́ко су́щи Отрокови́ца, / о Влады́чице Богоро́дице, страсте́й мучи́тельствующих мя исхити́ / и проводи́ к милосе́рдия осия́нию / и к прекра́сной па́сце воскре́сшаго Сы́на Твоего́.

На хвалитех стихиры на 4, глас 5.

Подобен: Ра́дуйся, по́стников:

Прииди́те, му́ченический, бра́тие, / с похвала́ми воспои́м полк, / мра́зом и огне́м опа́льшийся / и пре́лести зи́му разжже́нною ре́вностию попали́вший, / во́инство до́блественнейшее, свяще́ннейший собо́р, / защище́ние же неразруши́мо и непобеди́мо, / ве́ры забра́ла и храни́тели, / му́ченик четы́редесяти лик Боже́ственный, / Це́ркве хода́тая, / си́льне моля́щия Христа́ / низпосла́ти душа́м на́шим мир и ве́лию ми́лость. [Дважды.]

Ра́дуйся, собо́ре кре́пкий и терпели́вый / и победи́тельное ополче́ние, / столпы́ благоче́стия, / во́ини Христо́вы, / тве́рдии ору́жницы и непобеди́мии, / умо́м преси́льнии и душе́ю му́жественнейшии, / вои́стинну Боже́ственнии, / Бо́гу возжеле́нный лик святы́й, / Богоизбра́нный сонм, му́ченицы четы́редесяте, / и́же ра́вны страда́нием, ра́вны и нра́вом, / и, ра́вныя и венцы́ прие́мше, / Христа́ моли́те / дарова́ти душа́м на́шим мир и ве́лию ми́лость.

Ра́дуйся, победоно́сное мно́жество, / и́же на бране́х до́бле му́жествовавше, / зве́зды, проше́дше сквозе́ огнь и сту́день / и водны́й лед разсы́павше, / зе́млю онебеси́вше и вся просвети́вше, / в не́дрех Авраа́мовых ны́не гре́емии / и со А́нгельскими лику́юще во́инствы, / му́ченицы четы́редесяте, / цве́ти, дыха́ющии благово́ние су́що духо́внаго раздая́ния, / Христа́ моли́те / душа́м на́шим дарова́ти ве́лию ми́лость.

Слава, глас тойже, самогласен. Иоанна монаха: Страстоте́рпцы Христо́вы, / всечестны́й пост све́тльший / соде́ласте па́мятию ва́шего сла́внаго страда́ния, / четы́редесять бо су́ще, четыредеся́тницу освяща́ете, / спаси́тельней стра́сти уподо́бившеся / ва́шим за Христа́ страда́нием. / Те́мже, иму́ще дерзнове́ние, / моли́теся в ми́ре дости́гнути нам / в тридне́вное воскресе́ние Бо́га и Спа́са душ на́ших.

И ныне, Богородичен: Блажи́м Тя, Богоро́дице Де́во, / и сла́вим Тя, ве́рнии, по до́лгу, / град непоколеби́мый, / сте́ну необори́мую, / тве́рдую Предста́тельницу и прибе́жище душ на́ших.

На стиховне,

в Триоди самогласен, дважды, и мученичен

Слава, святых, глас 2, самогласен. И́стины ча́шею от свои́х крове́й, / огне́м муче́ний и водны́м ле́дом ве́рныя напои́ша / четверочи́сленная бо десяти́ца, пою́ще песнь Спа́су, / еди́н у́бо ум всем, / в телесе́х же мно́зех принесо́шася Христу́, / и богоневе́стная ма́ти / христолюби́ваго о́трока на ра́мена взе́мши, глаго́лаше: / гряди́, страда́льче, и постражди́ с про́чими.

И ныне, Богородичен: Непроходи́мая врата́, / та́йно запеча́тствованная, / благослове́нная Богоро́дице Де́во, / приими́ моле́ния на́ша / и принеси́ Твоему́ Сы́ну и Бо́гу, / да спасе́т Тобо́ю ду́ши на́ша.

Таже, Бла́го есть: Трисвятое, тропарь, ектения и три поклоны великий, час 1-й с кафизмою, и отпуст. Во время же свое бывают 3-й, 6-й и 9-й часы, по чину их с кафизмами, и блаженны поскору и прочее. На коемждо часе по 3 поклоны великия.

По обычной кафизме, на Го́споди, воззва́х: ставим стихов 10. И поем Триоди самогласен дне, дважды, и мученичен, и подобны 3. И святых мучеников 4.

Стихиры, глас 1:

Лик четверодесятосия́нный, / во́инство все богособра́нное / спросия́ посту́ страда́ньми чеcтны́ми, / освеща́ющ и просвеща́ющ, ду́ши на́ша. [Дважды.]

Глас 2: Е́зеро, я́ко рай, и зи́мность, я́ко зной, / му́ченицы вмени́ша, Христе́ Бо́же, / не устраши́ша по́мысла их томи́телей преще́ния, / не убоя́шася, до́блии, мук приложе́ний, / оружено́сный стяжа́вше Крест, / тем бо врага́ я́ко кре́пцыи победи́ша, / те́мже и венцы́ прия́ша благода́ти.

Четверодесяточи́сленный лик му́ченик / кто не воспое́т? / В во́ду бо е́зера внидо́ша де́рзостне / и, мра́зом стесня́еми, / песнь воспева́ху Го́споду: / еда́ в река́х прогне́ваешися на ны, Го́споди? / Еда́ в река́х прогне́ваешися на ны, Человеколю́бче? / Облегчи́ тя́жесть и го́ресть возду́ха, / свое́ю бо кро́вию обагри́шася на́ши но́ги, / и введи́ ны, Бо́же, в ве́чныя Твоя́ кро́вы, / да не́дро ны согре́ет патриа́рха Авраа́ма.

Слава, глас тойже. Проро́чески у́бо вопия́ше Дави́д во псалме́х: / проидо́хом сквозе́ огнь и во́ду, / и изве́л ны еси́ в поко́й. / Вы же, му́ченицы Христо́вы, / саме́ми де́лы сло́во исполня́юще, / проидо́сте сквозе́ огнь и во́ду / и внидо́сте в Ца́рство Небе́сное. / Те́мже моли́теся, четы́редесяте су́ще страда́льцы, / дарова́ти нам ве́лию ми́лость.

И ныне, Богородичен: Все упова́ние мое́ на Тя возлага́ю, / Ма́ти Бо́жия, / сохрани́ мя под кро́вом Твои́м.

Аще к среде или к пятку, Крестобогородичен.

Подобен: Егда́ от Дре́ва:

Доса́ды претерпе́вшаго мно́ги / и на Крест вознесе́наго вся́ческих Творца́ / ви́девши, Пречи́стая, стеня́ше, глаго́лющи: / препе́тый Го́споди, Сы́не и Бо́же Мой, / ка́ко почести́ хотя́ созда́ние Твое́, Влады́ко, / терпи́ши пло́тию безче́стие? / Сла́ва мно́гому милосе́рдию и соше́ствию Твоему́, Человеколю́бче.

Вход со Евангелием. Прокимен дне и чтения Триоди. И Да испра́вится моли́тва моя́:

Посем прокимен, глас 5: Ты, Го́споди, сохрани́ши ны / и соблюде́ши ны от ро́да сего́ и во век. Стих: Спаси́ мя, Го́споди, я́ко оскуде́ преподо́бный.

Апостол ко Евреем, зачало 331

Бра́тие, толи́к иму́ще облежа́щь нас о́блак свиде́телей, го́рдость вся́ку отло́жше и удобь обстоя́тельный грех, терпе́нием да тече́м на предлежа́щий нам по́двиг, взира́юще на нача́льника ве́ры и соверши́теля Иису́са, И́же вме́сто предлежа́щия Ему́ ра́дости претерпе́ крест, о срамоте́ неради́в, одесну́ю же Престо́ла Бо́жия се́де. Помы́слите у́бо таково́е Пострада́вшаго от гре́шник на Себе́ прекосло́вие, да не стужа́ете си, душа́ми свои́ми ослабля́еми. Не у до кро́ве ста́сте, проти́ву греха́ подвиза́ющеся, и забы́сте утеше́ние, е́же вам я́ко сыно́м глаго́лет: сы́не мой, не пренемога́й наказа́нием Госпо́дним, ниже́ ослабе́й, от Него́ облича́емь. Его́же бо лю́бит Госпо́дь, наказу́ет: бие́т же вся́каго сы́на, его́же прие́млет. А́ще наказа́ние терпите́, я́коже сыново́м обрета́ется вам Бог. Кото́рый бо есть сын, его́же не наказу́ет оте́ц? А́ще же без наказа́ния есте́, ему́же прича́стницы бы́ша вси, у́бо прелюбоде́йчищи есте́, а не сы́нове. К сим, пло́ти на́шей отца́ име́хом наказа́теля, и срамля́хомся, не мно́го ли па́че повине́мся Отцу́ духово́м и жи́ви бу́дем? Они́ бо в ма́ло дней, я́коже го́де им бе, нака́зоваху нас, а Сей на по́льзу, да причасти́мся святы́ни Его́.

Евр.12:1–10

Аллилуия, глас 4: Воскли́кните Го́сподеви, вся земля́, по́йте же и́мени Его́. Стих: Я́ко искуси́л ны еси́, Бо́же, разже́гл ны еси́, я́коже разжиза́ется сребро́.

Евангелие от Матфея, зачало 80

Рече́ Госпо́дь при́тчу сию́: уподо́бися Ца́рствие Небе́сное челове́ку домови́ту, и́же изы́де ку́пно у́тро ная́ти де́латели в виногра́д свой, и совеща́в с де́латели по пе́нязю на день, посла́ их в виногра́д свой. И изше́д в тре́тий час, ви́де и́ны стоя́щя на то́ржищи пра́здны, и тем рече́: иди́те и вы в виногра́д мой, и е́же бу́дет пра́вда, дам вам. Они́ же идо́ша. Па́ки же изше́д в шесты́й и девя́тый час, сотвори́ та́коже. Во еди́ный же на́десять час изше́д, обре́те други́я стоя́щя пра́здны и глаго́ла им: что зде стоите́ весь день пра́здни? Глаго́лаша ему́: я́ко никто́же нас ная́т. Глаго́ла им: иди́те и вы в виногра́д мой, и е́же бу́дет пра́ведно, прии́мете. Ве́черу же бы́вшу, глаго́ла господи́н виногра́да к приста́внику своему́: призови́ де́латели и даждь им мзду, наче́н от после́дних до пе́рвых. И прише́дше и́же во единыйна́десять час, прия́ша по пе́нязю. Прише́дше же пе́рвии мня́ху вя́щше прия́ти, и прия́ша и ти́и по пе́нязю. Прие́мше же ропта́ху на господи́на, глаго́люще, я́ко си́и после́днии еди́н час сотвори́ша, и ра́вны нам сотвори́л их еси́, поне́сшым тяготу́ дне и вар. Он же отвеща́в рече́ еди́ному их: дру́же, не оби́жу тебе́, не по пе́нязю ли совеща́ со мно́ю? Возьми́ твое́ и иди́, хощу́ же и сему́ после́днему да́ти, я́коже и тебе́. Или́ несть ми леть сотвори́ти, е́же хощу́ во свои́х ми? А́ще о́ко твое́ лука́во есть, я́ко аз благ есмь? Та́ко бу́дут после́днии пе́рви, и пе́рвии после́дни, мно́зи бо суть зва́ни, ма́ло же избра́нных.

Мф.20:1–16

И прочее Божественная Литургия преждесвященных.

Причастен:

Ра́дуйтеся, пра́веднии, о Го́споде, / пра́вым подоба́ет похвала́. / Аллилу́иа, трижды.