Месяца января в 5 день

На Го́споди, воззва́х: стихиры мучеников 3,

глас 4. Подобен: Я́ко до́бля:

Фео́ну и Феопе́мпта му́дрыя воспои́м: / Христо́вым бо догма́том повину́ющеся, / служе́ние вся́ко нечести́вое све́тло упраздни́вше, / свя́те, и че́стне, и благонаде́жне послужи́ша, / Еди́наго Бо́га и Го́спода пред лице́м мучи́телей благодерзнове́нно испове́дающе, / и венча́еми свы́ше.

Жития́, до́лу влеку́щая, и пи́щи наслажде́ние, / и цвету́щую сла́ву, всехва́льнии, оста́вивше я́ко привре́менну, / Христу́ прилепи́стеся, / Того́ добро́тою кра́сною распала́еми, / и принесо́стеся, я́ко сладково́ннии шипцы́, / и венце́м нетле́ннаго Ца́рствия Боголе́пно венча́стеся.

И́же мир возненави́девше, / преми́рни яви́стеся, / в Це́ркви перворо́дных совокупи́стеся / и со А́нгелы поете́ песнь нетле́нную, / пред Бо́гом предстоя́ще вку́пе, / скве́рную и́дольскую лесть отри́нувше, / мучи́телей безу́мие му́ченически посрами́сте.

Ины стихиры преподобныя, глас 1.

Подобен: Небе́сных чино́в:

Сла́вы отце́в вои́стинну возжела́вши, / сла́ву нетле́нную возлюби́ла еси́, / те́мже отсту́пльши сла́дких, / те́ло твое́ боле́знем всем отдала́ еси́. / И ны́не боле́зней прие́млеши возме́здие / со Христо́м ца́рствующи.

И́же И́ова попусти́в испроси́вшему, / и тя искуси́ти хотя́, я́ко зла́то, / оста́ви те́ло твое́ ну́ждею лука́ваго, / те́мже ты, посрами́вши терпе́нием неду́гов искуси́теля, / побе́ды венце́м венча́лася еси́.

Жениха́ кра́сную добро́ту возжела́вши, Христа́, / и уневе́ститися Сему́ ты восхоте́вши все́ми ви́ды благи́х, / боле́зньми воздержа́ния тебе́ украси́ла еси́, / те́мже ны́не с Ним ца́рствуеши, в черто́зе Его́.

Слава, и ныне, глас 6: Гото́вися, Иорда́не реко́: / се бо прихо́дит Христо́с Бог крести́тися от Иоа́нна, / да змие́в неви́димый главы́ сокруши́т Божество́м в вода́х твои́х. / Ра́дуйся, пусты́не Иорда́нская, / го́ры, игра́йте с весе́лием: / прихо́дит бо Ве́чный Живо́т воззва́ти Ада́ма. / Глас вопию́щаго, возопи́й, о Иоа́нне Предте́че: / угото́вайте пути́ Госпо́дни / и стези́ Его́ пра́вы соде́лайте.

На стиховне стихиры, глас 6.

Подобен: Тридне́вен:

Земля́ и назе́мная, игра́йте и ра́дуйтеся, / Пото́к сла́дости в реце́ креща́ется, / излия́ние изсуша́я зло́бы, / и источа́ет Боже́ственное оставле́ние.

Стих: Сего́ ра́ди помяну́х Тя от земли́ Иорда́нски и Ермонии́мски.

Све́та сый пода́тель Иису́с, не тре́буя крести́тися, / пло́тию восхо́дит на Иорда́нския струи́, / просвети́ти су́щия во тьме хотя́. / Ве́рою Сего́ усе́рдно сря́щем.

Стих: Ви́деша Тя во́ды, Бо́же, / ви́деша Тя во́ды, и убоя́шася.

Поне́с раба́ зрак, / предгряде́ши крести́тися, Христе́, от раба́ / во Иорда́нских струя́х, / избавля́я от рабо́ты ве́тхаго греха́, / и освяща́я и просвеща́я нас.

Слава, и ныне, глас 6: Да возра́дуется пусты́ня Иорда́нова, / и да процвете́т я́ко крин, / глас бо вопию́щаго услы́шан бысть в ней, / угото́вайте путь Госпо́день. / Го́ры бо поста́вивый ста́вилом, и удо́лия ме́рилом, / вся исполня́яй, я́ко Бог, креща́ется от раба́, / обнищава́ти нача́т бога́тныя да́ры да́руяй. / Услы́ша Е́ва, в печа́лех роди́ши ча́да. / Ны́не же услы́ша Де́ва: ра́дуйся, Обра́дованная, Госпо́дь с Тобо́ю, / име́яй ве́лию ми́лость.

Тропарь, глас 4:

Возвраща́шеся иногда́ Иорда́н река́ ми́лотию Елиссе́евою, / возне́сшуся Илии́, / и разделя́хуся во́ды сю́ду и сю́ду, / и бысть ему́ сух путь, и́же мо́крый, / во о́браз вои́стинну Креще́ния, / и́мже мы теку́щее жития́ прехо́дим ше́ствие: / Христо́с яви́ся во Иорда́не освяти́ти во́ды.

Канон, [егоже краегранесие: И днесь же суббо́ту пою́ вели́кую]. Ирмос по дважды: тропари же на 6, и паки тойже ирмос оба лика вкупе. Глас 6.

Песнь 1

Ирмос: Волно́ю морско́ю / Покры́вшаго дре́вле гони́теля мучи́теля, / Иорда́нския струи́ спря́товает и кры́ет, / мое́ ны́не очища́я челове́ческим очище́нием, / сла́вно бо просла́вися.

Го́споди Бо́же мой, / светоиме́нное пе́ние и предпра́зднственную песнь Тебе́ пое́м, / Боже́ственным явле́нием та́инственно обно́вльшему нас / и к све́тлости Боже́ственней возводя́щему.

Горе́ преве́чна и до́ле но́во я́вльшася Тя, / преми́рная и земна́я, Спа́се, ужаса́хуся зря́ще, / и е́же па́че сло́ва Твое́ воспева́ху снизше́ствие.

Да Твоея́ сла́вы вся́ческая испо́лниши, / Тебе́ Сама́го истощи́л еси́ да́же и до ра́бия о́браза. / Ны́не же дла́ни раба́ подклоня́еши главу́ ра́бски, / мое́ назда́ние благоутро́бно очища́я.

Песнь 3

Ирмос: Тебе́, на вода́х / Основа́вшаго всю зе́млю неодержи́мо, / тварь, ви́девши пло́тию кры́емаго в вода́х, / у́жасом мно́гим содержа́шеся: / несть свят, па́че Тебе́, Го́споди, – взыва́ющи.

О́бразы пе́рвее проро́ками показа́л еси́ Твоего́ Богоявле́ния, / ны́не сокрове́нная де́йствами сказа́л еси́, / явль та́йны челове́ком днесь, подая́ но́вое возрожде́ние.

Простре́ Иорда́н во́ды, я́ко плещи́, / с тре́петом прия́ти Зижди́теля, теле́сно креща́емаго и вся освяща́ющаго: / несть свят, па́че Тебе́, Го́споди, – взыва́ющия.

Ве́лие ко спасе́нию напу́тие креще́нием подае́т Христо́с / чу́вствующим Его́ Боже́ственное осия́ние, с весе́лием пою́щим: / несть свят, па́че Тебе́, Го́споди Человеколю́бче.

Песнь 4

Ирмос: Е́же ко Креще́нию Твое́ прише́ствие прови́дя, Авваку́м, / ужа́сся, вопия́ше: / на мо́ре ко́ни Твоя́, / во́ды мно́ги наве́л еси́, Спа́се, смуща́ющия.

Я́вльшуся Тебе́ те́лом, освяти́ся земля́, / во́ды благослови́шася, Не́бо просвети́ся, / род же челове́ков го́рькаго мучи́тельства вра́жия изба́вися.

Глаго́лом Боже́ственным ны́не Предте́ча из пусты́ни гряде́т ко Иорда́ну, глаго́ля: / пока́йтеся, прибли́жися бо Небе́сное Ца́рство, / призыва́я вся к сла́ве Бо́жией.

Превраще́й пе́рвее мо́ре в су́шу, и исто́чники от несеко́маго источи́в, / прегреше́ний очище́ние ны́не содева́ет во Иорда́нских струя́х огне́м Ду́ха.

Песнь 5

Ирмос: Богоявле́ния Твоего́, Христе́, / к нам ми́лостивно бы́вшаго, / Иса́ия, Свет ви́дев Невече́рний, / из но́щи у́треневав, взыва́ше: / просвеще́ннии, прииди́те, омы́йтеся водо́ю Боже́ственною / и Ду́хом я́ве и ду́шу, и те́ло очи́стите.

Новотвори́ши земноро́дныя, Нов Ада́м быв Соде́тель, / огне́м, и Ду́хом, и водо́ю стра́нное соверша́я возрожде́ние / и обновле́ние чу́дное, кроме́ сокруше́ния / и горни́л Креще́нием Богоде́тельным новотворя́.

Ду́хом ду́ши новотвори́ши, водо́ю же освяща́еши те́ло сложе́ное, / живо́тна назида́я челове́ка: / сугу́бому бо сро́дная потре́бно, лечбы́ му́дрым про́мыслом прино́сиши, / я́ко Врач теле́с и душ.

От Чи́стыя, проше́д, рожде́йся из Отца́ пре́жде веко́в, / к су́щему из непло́дныя прише́л еси́, прося́ я́ко Челове́к Креще́ния, / но от воды́ та́инственно Ду́хом соде́лал еси́, Спа́се, многоча́дну Це́рковь, пе́рвее безча́дную.

Песнь 6

Ирмос: Ят бысть, / но не удержа́н стра́хом Боже́ственный Крести́тель: / а́ще бо и спря́товается прибли́житися Огню́ се́но, / но, слыша́в: оста́ви ны́не, – тече́, повеле́ние исполня́я я́ко раб, / Боже́ственному же, свы́ше свиде́тельствующему гла́су, / услы́ша Сы́на Преве́чнаго.

Написа́лся, но не порабо́тился еси́, ке́саревым повеле́нием повину́яся: а́ще бо и от рабо́ты утеше́ние нам подая́, / во́льно повину́ешися и да́ньствуеши дидра́хму, / но зако́ном греха́ пе́рвее про́данныя ны свободи́л еси́ ны́не / и сыноположе́ния удосто́ил еси́.

Ца́рствуеши, но не ми́рски, естество́м сый Царь, / а́ще бо и по пло́ти от пле́мене Дави́дова роди́вся, / престо́л ца́рствия, Спа́се, сего́ прия́л еси́, но сво́йственну и́маши держа́ву Ца́рствуя со Отце́м пре́жде веко́в, при́сно / и во ве́ки с Ду́хом.

Царь у́бо, ми́ра Нача́льник и су́щих в вода́х дре́вле пронарече́ся, / но удавля́ется Твои́м очище́нием / и низлага́ется я́ко езе́рский пе́рвее легео́н. / Рук же Твои́х, Спа́се, созда́ние, порабоще́нное от него́, / держа́вною Твое́ю руко́ю свобожде́ния сподо́бил еси́.

Песнь 7

Ирмос: Неизрече́нное чу́до: / в пещи́ Изба́вивый преподо́бныя о́троки из пла́мене преклоня́ет верх / и про́сит Креще́ния от раба́, / очища́я вопию́щия: / Изба́вителю, Бо́же, благослове́н еси́.

Сече́тся струя́ пе́рвее ми́лотию Иорда́нская, прообразу́ющи Креще́ние Твое́, / и́мже и страсте́й растерза́ется хито́н, / и нетле́ния оде́жда самотвори́тся вопию́щим Бо́гу: / благослове́н еси́.

Бо́га́тна струя́, в себе́ бо прие́мше креща́ема Соде́теля, / показа́ся исто́чник живо́тныя воды́ на спасе́ние нас, песнопою́щих: / Изба́вителю Бо́же, благослове́н еси́.

Ме́ртвость Боже́ственную знамени́тельне образу́юще, / погруже́нием в воде́ трикра́тным в Креще́нии Христу́ совостае́м, / тридне́вному воста́нию приобща́ющеся, и вопию́ще Христу́: / благослове́н еси́ во ве́ки.

Еди́на благода́ть Отца́, Сы́на же и Ду́ха соверша́ющая / да́ром жела́ющия ве́рно Боже́ственнаго Креще́ния, / сыноположе́ния восприе́мшия власть, е́же вопи́ти: / Бо́же, благослове́н еси́.

Песнь 8

Ирмос: Ужасни́ся, боя́йся, Не́бо, / и да подви́жатся основа́ния земли́: / се бо водо́ю облачи́тся / Опали́вый водо́ю пре́жде пра́веднаго же́ртву пресла́вно. / Его́же, о́троцы, благослови́те, / свяще́нницы, воспо́йте, / лю́дие, превозноси́те во вся ве́ки.

Избавле́ние гряде́т Христо́с Креще́нием пода́ти всем ве́рным: / сим бо Ада́ма очища́ет, па́дшаго возвыша́ет, / низло́жшаго мучи́теля посрамля́ет, Небеса́ отверза́ет, / Ду́ха Боже́ственнаго низво́дит / и нетле́ния прича́стие да́рует.

Преста́ лесть вра́жия, глас бо вопию́щаго в пусты́ни: / путь Госпо́день, – зове́т, – угото́вайте / и вся стези́ Его́ пра́вы твори́те, – повелева́ет, / дебрь бо смиря́ется, естество́ земны́х возвыша́ется, / гора́ и холм же враго́в понижа́ется.

О, пресла́вных даро́в! / О, Боже́ственныя благода́ти и несказа́нныя любве́! / Се бо водо́ю очища́ет мя, огне́м просвеща́ет мя / и Ду́хом Боже́ственным соверша́ет мя Соде́тель и Влады́ка, / ны́не во Иорда́не в мое́ обле́кся естество́, Безгре́шный.

Песнь 9

Ирмос: Не рыда́йте всу́е, / отча́яния тенета́ми удавля́еми, челове́цы, пови́ннии злых, / но во умиле́нии души́ присту́пим Очища́ющему вся, / я́ко Еди́ному Чи́стому / и Даю́щему проще́ние Креще́нием.

Во стра́ннем Твое́м Рождестве́ пе́рвее из Де́вы преесте́ственно удиви́л еси́, Сло́ве Бо́жий. / Ны́не же велича́ем, ве́лие та́инство соверша́я пресла́вно прича́стием честны́м, / купе́ль многоча́дну Боже́ственным Ду́хом.

Земля́ освяти́ся Рождество́м Твои́м святы́м, Сло́ве, / пове́дающим Небесе́м звездо́ю сла́ву Твою́. / Ны́не же водно́е естество́ благослови́ся, Тебе́ пло́тию кре́щшуся, / и род земноро́дных к пе́рвому взы́де па́ки благоро́дию.

Да ра́дуется земля́ вся, Не́бо да весели́тся, / мир да игра́ет, ре́ки да пле́щут руко́ю, / исто́чницы и езе́ра, бе́здны, моря́ да сра́дуются: / прихо́дит бо Христо́с Ада́ма очи́стити и спасти́ Боже́ственным Креще́нием.

И паки ирмос. И поклон.

На Бог Госпо́дь,

тропарь предпразднства, трижды, глас 4:

Возвраща́шеся иногда́ Иорда́н река́ ми́лотию Елиссе́евою, / возне́сшуся Илии́, / и разделя́хуся во́ды сю́ду и сю́ду, / и бысть ему́ сух путь, и́же мо́крый, / во о́браз вои́стинну Креще́ния, / и́мже мы теку́щее жития́ прехо́дим ше́ствие: / Христо́с яви́ся во Иорда́не освяти́ти во́ды. (3)

По 1-м стихословии седален, глас 1.

Подобен: Лик А́нгельский:

Весели́ся, реко́ Иорда́не, / в тебе́ бо всех Творе́ц прихо́дит во́лею / Креще́ние прия́ти от раба́, я́ко Благоутро́бен. / Красу́йся, лику́й, Ада́ме, и Е́во прама́ти: / прии́де избавле́ние всех, Бог Преблаги́й.

Слава, и ныне, глас и подобен тойже:

Пото́к сла́дости Влады́ка сый, предгряде́т во струя́х ре́чных крести́тися, / напои́ти мя хотя́ очище́ния вода́ми. / Его́же зря, Иоа́нн вопия́ше: / ка́ко ру́ку мою́ на верх Твой простру́, / Его́же трепе́щут вся́ческая?

По 2-м стихословии седален, глас 3.

Подобен: Красоте́ де́вства:

Ада́мову наготу́ одева́я, Благоутро́бне, во оде́жду сла́вы, / хо́щеши обнажи́тися пло́тию во Иорда́не реце́. / О, чудесе́ пресла́внаго! / Ка́ко Тя поды́мет вода́, Влады́ко Го́споди, / вода́ми покрыва́ющаго превы́спренняя? – я́коже пи́шет. / Пое́м, Иису́се Благоде́телю, вси Твое́ явле́ние.

Слава, и ныне, глас тойже.

Подобен: Боже́ственныя ве́ры:

Ве́лие Со́лнце во Иорда́не просия́ти гряде́т, / е́же из Де́вы, из о́блака возсия́вшее, Христо́с Бог наш, / грехо́вный отгоня́ мрак и ми́ра просвеща́я концы́, / Его́же осия́ния получи́ти благоче́стно помо́лимся, / прося́ще прия́ти ве́лию ми́лость.

Каноны три: предпразднства со ирмосом на 6: ирмос по дважды: мучеников и преподобныя два канона на 8: писаны в Минеи. Канон предпразднства, глас 1.

Песнь 1

Ирмос: Го́рькия рабо́ты изба́влься, Изра́иль / непроходи́мое про́йде, я́ко су́шу, / врага́ зря потопля́ема, / песнь я́ко Благоде́телю пое́т Бо́гу, / чудоде́ющему мы́шцею высо́кою, / я́ко просла́вися.

Христо́с гряде́т ко Креще́нию, / Христо́с ко Иорда́ну прихо́дит, / Христо́с на́ша в воде́ погреба́ет ны́не грехи́, я́ко Благ, / с весе́лием воспои́м Ему́, я́ко просла́вися.

Да кропя́т, веселя́щеся, о́блацы весе́лие ве́чное: / Христо́с Иису́с предгряде́т вода́ми Иорда́нскими пото́ки грехо́вныя потопи́ти, / просвеще́ние всем да́руя.

Се Свет явля́ется, / се Очище́ние показу́ется, / се Спас предстои́т просия́ти су́щим во тьме Боже́ственныя зари́. / Сего́ помышле́ньми чи́стыми ра́достно поды́мем.

Ин канон мучеников, глас 7.

Песнь 1

Ирмос: Пои́м Го́сподеви, / погрузи́вшему всю си́лу фарао́нову в мо́ри, / побе́дную песнь, / я́ко просла́вися.

Гряди́те, ве́рнии, согла́сно пра́зднуим препросла́вленную па́мять страда́льцев, / в пе́снех духо́вных славосло́вяще Христа́.

Страстоте́рпцы Христо́вы и ве́ры тве́рдии побо́рницы, / на нече́стие ополчи́вшеся кре́пко, враги́ победи́ша.

Нечести́вый гони́тель и ве́ры Христо́вы чуждь, / на страстоте́рпцы разгне́вався, злочести́вый ве́рою упражня́ется.

Богородичен: Па́ству, ю́же стяжа́ла еси́, Богороди́тельнице, / сию́ спаса́й от вся́кия ну́жды, моля́щи Спа́са и Бо́га на́шего.

Ин канон преподобныя, глас 2

Ирмос: Гряди́те, лю́дие, / пои́м песнь Христу́ Бо́гу, / разде́льшему мо́ре и наста́вльшему лю́ди, я́же изведе́ из рабо́ты еги́петския, / я́ко просла́вися.

Венча́ти твою́ пе́сньми па́мять прихожду́, / тебе́ наде́явся, несмы́сленный и весь нечи́стый, / но даждь ми сло́во му́дрости и ра́зума твои́ми мольба́ми.

Весь ум к Боже́ственней высоте́ взе́мши / и благи́х бе́здну и наслажде́ний позна́вши бла́гость, / вся претерпе́ла еси́, приклю́чшаяся тебе́.

Ум к Бо́гу впери́вши Вы́шнему, / те́ло твое́, влеку́щее к до́льним, воздержа́нием и боле́зньми облегчи́ла еси́, / жела́ющи вели́кия сла́вы.

Богородичен: Пребы́в, е́же бе, и воплоти́вся из утро́бы Твоея́, / е́же бе́хом дарова́ нам пе́рвое, от пе́рсти бы́вшим, / изба́вив прегреше́ний, Богороди́тельнице.

Песнь 3

Ирмос: Не му́дростию и бога́тством да хва́лится сме́ртный свои́м, / но ве́рою Госпо́днею, / правосла́вно взыва́я Христу́ Бо́гу / и поя́ при́сно: / на ка́мени Твои́х за́поведей утверди́ мя, Влады́ко.

Пре́жде веко́в седя́й со Отце́м и Ду́хом, / ны́не в после́дняя из Де́вы вопло́щся, я́коже весть, / Христо́с гряде́т ко Креще́нию, / безсме́ртие Боже́ственною ба́нею всем подая́.

Водо́ю погребсти́ на́ша грехи́ хотя́ во Иорда́нских струя́х / за милосе́рдие ми́лости, Христо́с Бог предгряде́т / и назида́ет истле́вшия ны Креще́нием.

Обнаже́ние сту́дное покрыва́я Ада́ма пра́отца, / обнажа́ешися во́льно и струя́ми Иорда́нскими Тебе́ Сама́го покрыва́еши, / вода́ми превы́спренняя покрыва́я, Христе́, Еди́не Многоми́лостиве.

Ин. Ирмос: Утверди́ся се́рдце мое́ в Го́споде, / вознесе́ся рог мой в Бо́зе мое́м, / разшири́шася на враги́ моя́ уста́ моя́, / возвесели́хся о спасе́нии Твое́м.

Благоче́стия и ве́ры предста́тели, Боже́ственныя страда́льцы восхва́лим, / Феопе́мпта и Фео́ну пресла́внаго.

Пра́вило, и о́браз, и начерта́ние я́вльшеся, Христо́вы великому́ченицы, / святы́х бы́ша путевожди́ ко страда́нию.

Ревну́юще сих доброде́тельному жи́тельству, му́ченицы, / ку́пно на суди́щи предстоя́ще, взыва́ху: / христиа́не есмы́ вси.

Богородичен: Роди́лся еси́ из Де́вы несказа́нно, / яви́лся еси́, я́коже благоволи́л еси́, Человеколю́бче, / и мир обнови́л еси́, Го́споди.

Ин. Ирмос: Утверди́ нас в Тебе́:

Не пощаде́ла еси́ пло́ти мно́гими я́звами, / ниже́ весьма́ неоде́ржно друча́емыя, к боле́знем воздержа́ния, / искуси́тель в ни́хже отрева́шеся.

Ше́ствие те́сное жи́зни хода́тайственно нетле́нныя и Боже́ственныя ты изво́лила еси́, / широ́кое оплева́вши, / его́же ничто́же го́рше вои́стинну ум иму́щему.

Горя́щу ю́ностному цве́ту отбеже́ тесното́ю и боле́зньми воздержа́ния / и пале́ние оче́с твои́х сле́зными тече́нии угаси́л еси́.

Богородичен: Сло́во, вопло́щшеся из Тебе́, Всечи́стая, / пло́ти скве́рну хотя́ омы́ти о́бразом очище́ния, / тече́ние водно́е диви́тся.

Катавасия: Утверди́ нас в Тебе́, Го́споди, / Дре́вом умерщвле́й грех, / и страх Твой всади́ / в сердца́ нас, пою́щих Тя.

Кондак предпразднства, глас 2.

Подобен: Вы́шних ища́:

Всех, Христе́, Благоутро́бне, отъе́мляй прегреше́ний мно́жество / ми́лости ра́ди безме́рныя, / Иорда́нскими вода́ми крести́тися гряде́ши, я́ко Челове́к, / оде́ждею мя одева́я, / сла́вы дре́вния обнаже́нна лю́те.

Таже седален мученика, глас 1.

Подобен: Гроб Твой:

Феопе́мпт, яви́вся святи́тель су́щих до́ле, / с Фео́ною ку́пно тве́рдым и сострада́льцем, / мучи́телем противле́ния не терпя́щим, ураня́ется: / Тя, – ра́дуяся, вопия́, – чту Еди́наго, / погре́бшаго во Иорда́нских струя́х земны́х прегреше́ния.

Ин седален преподобныя, глас 5.

Подобен: Собезнача́льное:

По́стных превзошла́ еси́ ты терпе́ния боле́знь, / на Небесе́х наслажда́ешися бо́льшия оби́тели / и лу́чшия зари́ испо́лнилася еси́, / зане́ му́жески жесто́кий ше́ствовала еси́ путь, победи́вши настоя́щая, / и А́нгелом уподо́билася еси́, / и ны́не сла́вы причаща́ешися тех.

Слава, и ныне, предпразднства, глас 1.

Подобен: Гроб Твой:

Вели́кий Дождь к ре́чным струя́м предгряде́т, / пло́тию крести́тися восхоте́в. / К Нему́же Боже́ственный Предте́ча, ужаса́яся, глаго́лаше: / ка́ко крещу́ Тя, скве́рны не иму́ща весьма́? / Ка́ко простру́ мою́ десни́цу на главу́, ея́же трепе́щут вся́ческая?

Песнь 4

Ирмос: Слы́ша дре́вле Авваку́м, Христе́, чу́дный Твой слух / и стра́хом взыва́ше: / от ю́га Бог прии́дет и Святы́й от горы́ приосене́нныя ча́щи / спасти́ пома́занныя. / Сла́ва си́ле Твое́й, Го́споди.

Во́ду почерпи́те Жи́зни, / се ны́не прии́де ми́ра Река́ и́стинно / изсуши́ти му́тныя неве́рия во́ды и просвеще́ние источи́ти пою́щим Ему́: / сла́ва си́ле Твое́й, Го́споди.

Весели́ся, пусты́ня, я́же пре́жде жа́ждущая, / естество́ все челове́ческое: / ны́не яви́ся Пото́к сла́дости, Иорда́нскими вода́ми реша́я зной греха́. / Ему́же пое́м ве́рно: / сла́ва си́ле Твое́й, Го́споди.

Вопию́щаго глас проро́чески пусты́м возшуме́ помышле́нием: / угото́вайте пути́ пра́выя Христу́ гряду́щему, глаго́лющ, / я́ко да Креще́нием очи́стит обветша́вшия ны, / разреша́я пе́рвое осужде́ние.

Ин. Ирмос: Услы́шах слух Твой и убоя́хся, / разуме́х дела́ Твоя́ / и ужасо́хся, Го́споди.

Всю напои́ша вселе́нную словесы́ Боже́ственными / Христо́вы великому́ченицы / и лесть упраздни́ша.

Бо́га́тство некрадо́мо обрето́ша вои́стинну страстоте́рпцы, / бога́тство, сла́ву и све́тлость земны́х оплева́ша.

Вооружи́вшеся страстоте́рпцы Христо́вым ору́жием, / мучи́телево суровство́ все в сем низложи́ша.

Богородичен: Ма́ти Чи́стая, / Благослове́нная Свята́я Де́во, / пою́щия Тя спаса́й от вся́каго обстоя́ния.

Ин. Ирмос: Прише́л еси́ от Де́вы, / не хода́тай, ни А́нгел, но Сам, Го́споди, вопло́щся, / и спасл еси́ всего́ мя, челове́ка. / Тем зову́ Ти: сла́ва си́ле Твое́й, Го́споди.

Ты, телесе́ преизря́дствующи добро́тами, / была́ еси́ мно́гим отречена́, не полу́чшим раче́ния. / Те́мже, изнури́вши себе́, причасти́лася еси́ Боже́ственный красоты́.

Претерпе́ла еси́, я́ко И́ов, теле́сное озлобле́ние, / не изрекла́ еси́ сло́ва, кончи́ну привлача́щаго, / ле́том и естество́м же преше́дши, Боже́ственное прия́ла еси́ жили́ще.

Уедини́ся от сро́дников, и роди́телей, и стяжа́ния, / Христа́ еди́наго и́шущи некрадо́мо бога́тство и неиждива́емое, / с Ни́мже Вы́шния сла́вы яви́лася еси́ прича́стница.

Богородичен: Рождество́ Твое́ Ада́ма от тли изба́ви, кроме́ тле́ния человекоде́льнаго, / и́бо па́че челове́ка бысть зача́тие. / Те́мже тле́ния и зол мя, Отрокови́це, изба́ви.

Песнь 5

Ирмос: Свет Твой незаходи́мый возсия́й, Христе́, / в сердца́ ве́рно пою́щих Тя, / мир подава́яй нам па́че ума́. / Тем от но́щи неве́дения ко дню све́том Твои́м теку́ще, / славосло́вим Тя, Человеколю́бче.

Ми́ра, Христе́, сый Царь, / вражды́ средосте́ние разори́л еси́, / пло́ти подо́бием яви́вся су́щим на земли́. / Те́мже прише́ствие Твое́ ви́дев, Иоа́нн дивля́шеся со стра́хом, / рукоположи́ти Тя повелева́емь.

Змие́в главы́ сокруши́ти Христо́с спеша́, / ны́не гряде́т вода́ми и трепе́щущему вопие́т Крести́телю: / простри́ твою́ ру́ку, и прикосни́ся верху́ Моему́, / и у́жас отряси́, соверша́я повеле́нное.

Сказа́ше проро́к благода́ть иногда́ Креще́ния Боже́ственным Ду́хом, / порази́в Иорда́нския струи́ ми́лотию, я́же раздели́шася, / нам путетворя́щия возрожде́ние Боже́ственное в них я́вльшагося Христа́.

Ин. Ирмос: У́тренююще, Сло́ве, в сла́ву Твою́ и хвалу́, / восхваля́ем непреста́нно о́браз Креста́ Твоего́, / Его́же дал еси́ нам ору́жие в по́мощь.

Му́дрии страда́льцы, ве́ры ору́жницы, / му́ки до́блественне враго́в пребеззако́нных победи́вше, ку́пно венцы́ прия́ша.

Ни ласка́ние, ни лесть, / ни сла́ва земны́х возмо́же отсещи́ ве́ры ва́шея тече́ние, страда́льцы, / те́мже и ра́дуетеся.

Предстоя́ще престо́лу сла́вы Госпо́дни, / со А́нгелы непреста́нно моли́теся / да́ти прегреше́ний очище́ние ве́рою пою́щим вас.

Богородичен: Всесвята́я Де́во Обра́дованная, / ро́ждшая в ле́те Сло́во па́че сло́ва, / моли́ Его́ спасти́ ду́ши на́ша.

Ин. Ирмос: Све́та Пода́телю / и веко́в Тво́рче, Го́споди, / во све́те Твои́х повеле́ний наста́ви нас: / ра́зве бо Тебе́, ино́го бо́га не зна́ем.

Храм была́ еси́ обита́ющаго в чи́стых ду́сех Сло́ва, му́драя, / осия́ла бо еси́ ты воздержа́ния мно́гими боле́зньми души́ твоея́ добро́ту, пресла́вная.

Плоть умертви́ла еси́, обагре́нную есте́ственною благода́тию боле́зньми мно́гими, / уясня́ющи па́че све́том доброде́телей душе́вный о́браз, / све́тло сия́ющий.

Вещь телесе́ души́ твоея́ ко Христу́ жела́нием распали́вши, / ты ны́не с невеще́ственными невеще́ственно вои́стинну А́нгелы сра́дуешися, / Бо́га смотря́ющи.

Богородичен: Главы́ сокруши́ Глава́ благочести́вых, Всечи́стая, / струя́ми ны́не гнездя́щихся змие́в, / Рожде́йся из Твоея́ утро́бы без се́мене вои́стинну.

Песнь 6

Ирмос: Весь от страсте́й безме́рных содержу́ся / и ки́том зол снизпадо́х, / но возведи́ из истле́ния мя, Бо́же, / я́коже пре́жде Ио́ну, / и ве́рою безстра́стие ми да́руй, / я́ко да во гла́се хвале́ния и спасе́ния ду́хом пожру́ Ти.

Милосе́рдие щедро́т Христо́с показу́я, / в ра́бии зра́це Непреме́нный прихо́дит к рабу́, прося́ Креще́ния, / от рабо́ты восхища́я челове́чество, / Его́же уди́влься прише́ствию, ужаса́ется и стра́хом одержи́м быва́ет.

Ка́ко Тя ре́чныя струи́ прии́мут, нестерпи́маго Огня́, ны́не иду́ща? / Ка́ко обнаже́ние Небе́снии ви́дят А́нгели? / Ка́ко ру́ку Иоа́нн простре́т на Тя, / Сло́ве Бо́жий Пребезнача́льне, / того́ от земли́ созда́вшаго?

Мо́ре разделя́ется, бежа́ще, показа́ но́вым лю́дем Боже́ственное прехожде́ние, / е́же соде́ла в реце́, пло́тию прише́д, / И́же из ка́мене пресла́вно источи́в во́ду. / Сего́ я́ко Бо́га просла́вим, на́ше сокруше́ние назда́вшаго.

Ин. Ирмос: Ио́на из чре́ва а́дова вопия́ше: / возведи́ от тли живо́т мой. / Мы же Тебе́ вопие́м: / Всеси́льне Спа́се, поми́луй нас.

Упраздни́ша и́дольскую лесть му́ченицы, на суди́щи стра́ждуще, / и нече́стие все потреби́ша от земли́ страда́нием свои́м.

Предпоста́ви враг и гони́тель ве́ры своя́ служи́тели / мечми́, я́коже а́гнцы, убива́ти вас го́рько, му́ченицы сла́внии.

Я́коже ви́де лик святы́х мучи́тели, вооруже́нныя мечми́, му́жески вопия́ше: / во́ини Христо́вы есмы́, о мучи́телю!

Богородичен: Его́же родила́ еси́, Богоро́дице, несказа́нно, Бо́га на́шего, / моля́щи не преста́й изба́вити от бед пою́щия Тя, Чи́стая Присноде́во.

Ин. Ирмос: В бе́здне грехо́вней валя́яся:

Просвети́вшися заре́ю духо́вною, / вся́кое наслажде́ние отри́нула еси́ плотско́е, я́ко но́щно, / до́брых бо уязви́лася еси́ жела́нием.

Облиста́ твоя́ светоно́сная днесь па́мять, / издале́ча просвеща́ющи душ омраче́ние, / мона́хов подвиза́ющихся удобре́ние.

Чистоту́ де́вства соблюла́ еси́, почита́ющи черто́г нетле́нный: / Христа́ бо жела́нием разжегла́ся еси́, / стра́ннаго Жениха́ твоего́.

Богородичен: Да сла́вы испо́лнимся, / прии́де в безсла́вное челове́чество сла́вы Госпо́дь. / Я́коже челове́к, мы́емь, / Твой Сын челове́ки просла́ви.

Катавасия: В бе́здне грехо́вней валя́яся, / неизсле́дную милосе́рдия Твоего́ призыва́ю бе́здну: / от тли, Бо́же, мя возведи́.

Кондак предпразднства, глас 4:

Во струя́х днесь Иорда́нских быв, Госпо́дь / Иоа́нну вопие́т: / не убо́йся крести́ти Мя, / спасти́ бо приидо́х / Ада́ма первозда́ннаго.

Икос: Не истязу́ю тя, Крести́телю, преде́лы преходи́ти, / не глаго́лю тебе́: / рцы Ми, я́же глаго́леши беззако́нным и учи́ши гре́шники. / То́чию крести́ Мя молча́ и ча́я, я́же от Креще́ния: / прии́меши бо сего́ ра́ди досто́инство, е́же не бысть А́нгелом, / и́бо всех проро́ков бо́льша тя сотворю́. / От о́ных у́бо ни еди́н я́ве Мя ви́де, / но во о́бразех, и се́нех, и гада́ниих, / ты же пред тобо́ю стоя́ща ви́дел еси́, / спасти́ бо приидо́х Ада́ма первозда́ннаго.

Песнь 7

Ирмос: Проидо́ша, я́ко черто́г, пе́щный пла́мень нестерпи́мый / и́же за благоче́стие иногда́ о́троцы святи́и, показа́вшеся я́ве, / и, согла́сно воспева́юще, песнь поя́ху: / отце́в Бо́же, благослове́н еси́.

Христо́с спасе́ние яви́ся, просвеще́ние да́руя. / Да ра́дуется Не́бо, о́блацы же да кропя́т и́стинно пра́вду, взыва́ющим: / отце́в Бо́же, благослове́н еси́.

Руно́, е́же прови́де Гедео́н, полна́ ча́ша воды́ иска́павшия / я́ве Твое́ Креще́ние ска́зоваше, Христе́, е́же подае́ши, крести́вся, воспева́ющим: / отце́в Бо́же, благослове́н еси́.

Сла́ныя безча́дствующия Елиссе́й исцеля́я во́ды, / благоча́дие честны́я купе́ли прообрази́, хотя́щее бы́ти та́инственно, воспева́ющим: / отце́в Бо́же, благослове́н еси́.

Ин. Ирмос: Пещь горя́щую ороси́л еси́, Спа́се, / о́троки спасл еси́, пою́щия и глаго́лющия: / благослове́н еси́ во ве́ки, / Го́споди Бо́же оте́ц на́ших.

Коне́ц муче́ния прия́сте ку́пно, / мече́м умерщвля́еми с жена́ми и детьми́, Христу́ вопию́ще: / благослове́н еси́, Го́споди Бо́же оте́ц на́ших.

Ра́довахуся святи́и, зря́ще себе́, мечи́ скончава́емыя, / и ве́рою взыва́ху: / благослове́н еси́, Го́споди Бо́же оте́ц на́ших.

Нечести́вых свере́пство потреби́ся от земли́, / и бо́зи падо́ша на зе́млю / и сокруши́шася му́ченик испове́данием, и венцы́ прия́ша.

Богородичен: Спаса́й па́ству Твою́, Всесвята́я Чи́стая, от вся́каго обстоя́ния, / я́ко еди́на Предста́тельница ро́да на́шего, / Благослове́нная Богоро́дице Всепе́тая.

Ин. Ирмос: Богопроти́вное веле́ние / беззако́ннующаго мучи́теля высо́к пла́мень вознесло́ есть. / Христо́с же простре́ Богочести́вым отроко́м ро́су духо́вную, / Сын благослове́н и препросла́влен.

Зле умышля́я, сопроти́вный души́ твоея́ кре́пость умягчи́ти неду́гами покуша́шеся, / и И́ова прирази́выйся терпе́нию, му́дре боле́зньми отража́шеся, / твои́м терпе́нием, му́драя, уязвля́яся.

Твоя́ ны́не уклони́ся от треволне́ний жития́ к благоути́шному душа́ приста́нищу, / бога́та су́щи добро́тами в Боже́ственных пребыва́ниих, му́драя, / иде́же проугото́вися твои́м терпеливострада́нием мно́гим поко́ище.

Му́дре наста́вила еси́ во о́бщем житии́, ме́сто, глаго́лющи, измени́ти никогда́же, / вели́ких бо хода́тайственно воздая́ний терпе́ние, / словесы́ же и делесы́ по́льзовати мона́шествующия вои́стинну не облени́лася еси́.

Богородичен: Водно́е естество́ от греха́ мя измыва́ет / Рождества́ Твоего́ па́че естества́ му́дростию, / Бо́га бо очище́ние, Творца́ све́та, очища́ет, Богоневе́сто, / мно́гими оскверни́вшагося, Де́во, согреше́ньми.

Песнь 8

Ирмос: Чу́да преесте́ственнаго пока́за о́браз, огнеро́сная пещь дре́вле: / огнь бо не опали́ ю́ныя де́ти, / Христо́во явля́я безсе́менное от Де́вы Боже́ственное Рождество́. / Тем, воспева́юще, воспои́м: / да благослови́т тварь вся Го́спода, и превозно́сит во вся ве́ки.

Хвалу́ велегла́сно Влады́це возсле́м: / прии́де, яви́ся, / восхо́дит на во́ды, и обнажа́ется, Не́бо о́блаки одева́яй, / и креща́ется, очища́я ны воспева́ющия: / да благослови́т тварь вся Го́спода и превозно́сит во вся ве́ки.

Прииди́те мы́сленно, ко Иорда́ну и́дем, / виде́ние ве́лие в нем у́зрим, / Иису́с бо, просвеще́ние, прихо́дит и раба́ преклоня́ется дла́ни, с тре́петом вопию́ща: / да благослови́т тварь вся Го́спода и превозно́сит во вся ве́ки.

Угль, Его́же прови́де Иса́ия, / в вода́х Иорда́нских разгоре́вся, / попали́ вещь всю грехо́в и подаде́ сокруше́нным назда́ние. / Те́мже, воспева́юще, воспое́м: / да благослови́т тварь вся Го́спода и превозно́сит во вся ве́ки.

Ин. Ирмос: Еди́наго Безнача́льнаго Царя́ Сла́вы, / Его́же благословя́т Небе́сныя си́лы / и трепе́щут чи́ни А́нгельстии, / по́йте, свяще́нницы, / лю́дие, превозноси́те Его́ во ве́ки.

Еди́наго Благоутро́бнаго Царя́ Сла́вы испове́дающе, / му́дрии страда́льцы прия́ша по́чести побе́ды, вопию́ще благодерзнове́нно: / лю́дие, превозноси́те Его́ во ве́ки.

Тве́рдо проти́вишася Христо́вы страда́льцы к мучи́телем, / стра́ждуще до́блественне, победи́ша и́дольскую лесть, вопию́ще благодерзнове́нно: / лю́дие, превозноси́те во вся ве́ки.

Я́коже адама́нта, до́блии ору́жницы, / мучи́телей преще́ния и му́ки победи́вше, ра́достно вопия́ху: / по́йте, свяще́нницы, лю́дие, превозноси́те Го́спода во ве́ки.

Богородичен: Еди́наго Благоутро́бнаго Преве́чнаго Сло́ва, / из Де́вы в после́дняя ро́ждшагося и спа́сшаго челове́ческий род, / по́йте, свяще́нницы, лю́дие, превозноси́те Его́ во ве́ки.

Ин. Ирмос: В пещь о́гненную:

На земли́ живу́щи, к земли́ блаже́нных вои́стинну дости́гнута вожделе́ла еси́, / иде́же чи́ни А́нгельстии, преподо́бных и по́стников, дев, живу́ще, / ве́чно песносло́вят Христа́ во ве́ки вся.

Добро́тою естества́ лу́чши мно́гих су́щи, о души́ попекла́ся еси́, / я́ко вид добро́ты душе́вныя му́дре сохрани́вши, / те́мже добро́ту теле́сную угаси́вши, / распали́лася еси́ воздержа́нием души́ твоея́.

Бодр ум к Бо́гу преусе́рдием душе́вным ты стяжа́вши, / ко́зни льсти́ваго мудреца́ злых до конца́ успи́ла еси́, сла́вная, / и ны́не, у́спши, живе́ши во ве́ки.

Богородичен: Обнови́ти земны́я Сын Твой восхоте́в, / ко Иорда́ну я́ко Челове́к тщи́тся, Чи́стая, кра́йния ра́ди любве́: / та́мо бо всех сокру́шшаго сотре́, обновля́ет моли́твами Твои́ми мир.

Катавасия: В пещь о́гненную ко отроко́м евре́йским снизше́дшаго / и пла́мень в ро́су прело́жшаго Бо́га, / по́йте, дела́, я́ко Го́спода, / и превозноси́те во вся ве́ки.

Песнь 9

Ирмос: Неизглаго́ланное Де́вы та́инство: / Небо бо Сия́, и Престо́л Херуви́мский, / и светоно́сный Черто́г показа́ся / Христа́ Бо́га Вседержи́теля, / Сию́ благоче́стно я́ко Богоро́дицу велича́ем.

Та́инство стра́нное зрю и пресла́вное: / Иису́с гряде́т во́лею к реце́ Иорда́ну, вопия́ Иоа́нну: / твою́ десни́цу Ми, дру́же, взаи́мствуй, / стра́шная соверша́ющему лю́дем Мои́м в снабде́ние.

Пусты́нная Иорда́нская да процвету́т, / и́же во тьме лежа́щии, вели́к яви́ся вам Свет. / Ви́девше, взыгра́йте: / Христо́с от Галиле́и приходя́й, пло́тию крести́тися от раба́ хо́щет.

Возвесели́ся ны́не, Иорда́не, и лику́й, / Иоа́нне, взыгра́й, вся вселе́нная ра́дуйся: / се яви́ся Христо́с, и обнажа́ется и креща́ется, / во оде́жду облача́я нетле́ния челове́чество.

Ин. Ирмос: Па́че естества́ Ма́терь и по естеству́ Де́ву, / Еди́ну в жена́х Благослове́нную, / пе́сньми, ве́рнии, Богоро́дицу велича́ем.

Попра́вше вся идолослуже́ния ве́рою страстоте́рпцы Христо́вы, / Боже́ственное тече́ние сконча́вше благоче́стно и ве́рою утверди́ша.

Земна́я вся презре́вше ве́рою страстоте́рпцы Христо́вы, вку́пе усе́рдно пострада́вше, / от Бо́га прия́ша врачева́ния.

Страстоте́рпцы му́жески вооружи́вшеся ве́рою, / Госпо́дним кресто́м ополче́ния низложи́ша вра́жия и венцы́ прия́ша.

Богородичен: Во чре́ве заче́ншая непостижи́мое Сло́во / и Сие́ без се́мене нам ро́ждшая, / моли́ приле́жно спасти́ся душа́м на́шим.

Ин. Ирмос: Безнача́льна Роди́теля:

Уясни́вшися добро́тами де́вства, сла́вная, / тебе́ саму́ю украси́ла еси́ венце́м воздержа́тельнаго жития́, / те́мже сугу́бым венце́м венча́ тя стра́нный Жени́х твой, / Его́же уязви́лася еси́ ты любо́вию.

Наде́жда не посрами́, Синклитики́е, тя, всечестна́я, бу́дущих, / ю́же име́ла еси́ в се́рдце твое́м: / ны́не бо прия́ла еси́ боле́зней воздая́ния от Спа́са, / за я́же воздержа́ния всяк вид прешла́ еси́.

В кре́пость и утвержде́ние, честна́я, Христа́ оде́ялася еси́ / и в зе́млю ты киче́ние пони́зила еси́ глаго́лавшаго на Высоту́ непра́вду. / Те́мже тя венце́м побе́ды украси́ побе́ды Пода́тель Иису́с.

Богородичен: О Тебе́ пра́отца паде́ние кре́пость прия́т, / поити́ да́льше кре́пости не иму́щее: / Креще́нием бо Сы́на Твоего́ вся́ка зло́ба ны́не погрузи́ся. / Те́мже вино́вну Тя очище́ния пропове́даем.

Катавасия: Безнача́льна Роди́теля Сын, Бог и Госпо́дь, / вопло́щся от Де́вы, нам яви́ся / омраче́нная просвети́ти, собра́ти расточе́нная. / Тем Всепе́тую Богоро́дицу велича́ем.

Светилен.

Подобен: Ду́хом во святи́лищи:

Я́ко ви́де Тя обнаже́на Иорда́н, / с тре́петом к су́щему от непло́дове рече́: / оста́ви, о Иоа́нне, крести́тися Го́спода, / огне́м и Ду́хом очища́ющаго всю тварь, / на сие́ бо прии́де, освяти́ти земны́я и во́дное естество́.

Слава, и ныне: Из Де́вы возсия́вый в Вифлее́ме пло́тию / ко Иорда́ну ны́не тщи́тся, скве́рну отмы́ти земноро́дных, / к све́ту приводя́ во тьме су́щия Креще́нием Боже́ственным.

На хвалитех стихиры, на 4, глас 6.

Подобен: А́нгельския предыди́те си́лы:

Что не домышля́ешися, Крести́телю, смотре́ния, / е́же соверша́ю за всех спасе́ние? / Дре́вняя оста́ви ны́не, и помышля́й поле́зная. / Ве́руй Бо́гу соше́дшему / и, приступи́в, Мне послужи́: / Бог бо приидо́х за благоутро́бие / Ада́ма очи́стити от паде́ния.

Взе́мляй на́ша грехи́ на ра́мена, / прише́л еси́, Иису́се, к струя́м Иорда́нским, / аз же ужасо́хся Твоего́ стра́шнаго прише́ствия. / Ка́ко у́бо ми вели́ши крести́ти Тя? / Сам мя очи́стити прише́л еси́. / И ка́ко Креще́ния от Мене́ про́сиши, / всех Очище́ние?

Естества́ Моего́ непости́жное Сло́во, / в ра́бий же зрак оде́явся, / приидо́х на Иорда́н, / ника́коже Мене́ отрецы́ся. / Гряди́, не бо́йся, прибли́жися ко Мне, / десни́цу на верх Мой положи́в, возопи́й: / благослове́н, явле́йся Бо́же наш, сла́ва Тебе́.

О, па́че ума́, безме́рныя Твоея́ нищеты́, Сло́ве Бо́жий! / Мене́ ра́ди, па́дшаго, / позна́х Тя, за милосе́рдие во Ада́ма обле́кшася / и су́щия от Ада́ма обновля́юща, / и повину́яйся Твоему́ веле́нию, ве́рно зову́ Тебе́: / благослове́н, явле́йся Бо́же наш, сла́ва Тебе́.

Слава, глас и подобен тойже:

С тре́петом служа́ Иоа́нн Влады́це, / ра́дуется душе́ю и вопие́т с весе́лием: / сра́дуйтеся мне, вси ро́ди пра́отца, / прии́де бо ча́яние на́ше, / при́иде на Иорда́н Христо́с, / вся от греха́ Ада́мова очи́стити, я́ко Благоутро́бен.

И ныне, глас и подобен тойже:

Воспои́м, лю́дие, Рожде́нному от Де́вы / и в реце́ кре́щшемуся Иорда́не, / и к Нему́ возопии́м: / Царю́ вся́кия тва́ри, / да́руй нам неосужде́нно / чи́стою со́вестию ве́рно дости́гнути / Твое́ свято́е из ме́ртвых тридне́вное воста́ние.

На стиховне стихиры, глас 2.

Подобен: До́ме Евфра́фов:

Се Царь, / се ча́яние Изра́илево прии́де. / Лю́дие, ра́дуйтеся, / Свет бо явля́ется.

Стих: Сего́ ра́ди помяну́х Тя / от земли́ Иорда́нски и Ермонии́мски.

Узре́ся су́щим / на земли́ с пло́тию, / Боже́ственный ны́не Свет / су́щим во тьме яви́ся, / и всем благода́ть возсия́.

Стих: Ви́деша Тя во́ды, Бо́же, / ви́деша Тя во́ды и убоя́шася.

Свети́льниче Све́ту, / заре́ Со́лнцу, / предтече́ Сло́ву, / дру́же Жениху́, / проро́че, послужи́.

Слава, и ныне, глас 8. Анатолиево:

Иоа́нне Крести́телю, / во утро́бе позна́вый Мя, А́гнца, / на реце́ Ми послужи́, / со А́нгелы Ми слу́жбу принеси́: / просте́р, косни́ся руко́ю твое́ю верху́ Моему́ пречи́стому / и, егда́ у́зриши го́ры трепе́щущия / и Иорда́н возвраща́ющся, с си́ми возопи́й: / воплоти́выйся от Де́вы в на́ше спасе́ние, / Го́споди, сла́ва Тебе́.

По Бла́го есть: Трисвятое. По О́тче наш, тропарь. Таже ектении: И отпуст.