Мѣ́сѧца тогѡ́же въ г҃і-й де́нь. Ст҃ы́хъ мꙋ́чєникъ, є҆рмѵ́ла и҆ стратоні́ка.
Въ сі́й же де́нь пое́тсѧ слꙋ́жба и҆ ст҃ы́хъ ѻ҆тє́цъ въ сїна́и и҆ раі́ѳѣ и҆збїе́нныхъ.
На Гдⷭ҇и, воззва́хъ, стїхи̑ры мꙋ́ченикѡвъ, гла́съ д҃.
Подо́бенъ: Да́лъ є҆сѝ зна́менїе.
Є҆рмѵ́лъ сла́вный, и҆ бг҃омꙋ́дрый стратоні́къ, ꙳ дво́ица чꙋ̑днаѧ, ꙳ трⷪ҇цꙋ несозда́ннꙋю и҆сповѣ́дающе, ꙳ многобо́жнꙋю ле́сть ꙳ по мно́гихъ ра́нахъ и҆ мꙋ́кахъ побѣди́ша, ꙳ и҆ побѣ́ды вѣнце́мъ вѣнча́вшесѧ, ꙳ мо́лѧтсѧ дарова́ти ꙳ концє́мъ ми́ръ и҆ ми́лость.
Сло́ва бы́въ, мꙋ́чениче, ꙳ слꙋжи́тель, є҆рмѵ́ле, ꙳ и҆збра́нїе бжⷭ҇твеннагѡ дх҃а, ꙳ тече́нїемъ кро́ве ꙳ свѧще́нїѧ ѻ҆де́ждꙋ ѡ҆багри́въ, ꙳ свѧще́ннѣйшꙋ и҆́стиннѡ ꙳ и҆ свѣтлѣ́йшꙋ сїю̀ соверши́лъ є҆сѝ. ꙳ и҆ ны́нѣ въ црⷭ҇твїѧ мы́слєннаѧ преше́лъ є҆сѝ, ꙳ мл҃твенникъ чтꙋ́щихъ тѧ̀ быва́ѧ теплѣ́йшїй.
Ѻ҆ско́рды претерпѣ́вше, ꙳ повелѣ́ньми мꙋ́чащагѡ, ꙳ въ ко́шницꙋ вве́ржени бы́сте, ꙳ и҆ кончи́нꙋ блаже́ннꙋ ꙳ и҆ ᲂу҆давле́нїе во́дъ ѻ҆́ба прїе́мше, ꙳ многоко́зненнаго врага̀ си́ми мꙋ́дрѣ ᲂу҆дави́сте. ꙳ и҆ ны́нѣ жи́тельствꙋете прера́достнѡ на нб҃сѣ́хъ, ꙳ ѡ҆ всѣ́хъ молѧ́щесѧ, ꙳ страда́льцы до́блѣйшїи.
Стїхи̑ры прпⷣбныхъ, гла́съ и҃. Подо́бенъ: Что̀ ва́съ нарече́мъ, ст҃і́и.
Вельмѝ подвиза́стесѧ, ст҃і́и, ꙳ ва́рварское претерпѣ́сте наше́ствїе до́блественнѣ, ꙳ дꙋ́шы преда́вше мечє́мъ ᲂу҆се́рднѡ, ꙳ мꙋ́ченическими ᲂу҆вѧзо́стесѧ вѣнцы̀, ꙳ со а҆́гг҃лы водворѧ́етесѧ досто́йнѡ. ꙳ мно́го ва́ше терпѣ́нїе, и҆ бѡ́льша дарова̑нїѧ: ꙳ моли́те спасти́сѧ дꙋша́мъ на́шымъ.
Преподо́бнїи хрⷭ҇то́ви подвиза́стесѧ, ꙳ привре́мєннаѧ пренебре́гше житїѧ̀ во́лею, ꙳ плотско́е покори́сте мꙋдрова́нїе до́блественнѣ, ꙳ и҆ мєчѝ ѡ҆ хрⷭ҇тѣ̀ сконча́вшесѧ, ꙳ со а҆́гг҃лы водворѧ́етесѧ досто́йнѡ. тѣ́мже ва́шѧ па̑мѧти чествꙋ́юще, мо́лимсѧ: ꙳ моли́те спасти́сѧ дꙋша́мъ на́шымъ.
До́брѣ жи́тельствовасте, ст҃і́и, ꙳ мꙋ́ченичєскимъ подвигѡ́мъ ᲂу҆подо́бльшесѧ до́блественнѡ, ꙳ вѣнцы̀ съ небесѐ прїѧ́сте: ꙳ зако́ннѡ мечѝ и҆ вы̀ пренебрего́сте, ꙳ ꙗ҆́кѡ сі́и мꙋ̑ки попра́ша, ꙳ да кꙋ́пнѡ ѡ҆дѣ́етесѧ ꙳ вѣнце́мъ страда́нїѧ: ꙳ моли́те спасти́сѧ дꙋша́мъ на́шымъ.
Сла́ва, гла́съ и҃. Стꙋді́тово:
Преподо́бнїи ѻ҆ц҃ы̀, поꙋчи́вшесѧ де́нь и҆ но́щь въ зако́нѣ гдⷭ҇ни, сподо́бистесѧ дре́ва живо́тнагѡ снасажде́нни бы́ти, и҆ пло́дъ ва́шегѡ страда́нїѧ вѣнцы̀ процвѣтѐ: дерзнове́нїе и҆мꙋ́ще къ подвигополо́жникꙋ бг҃ꙋ, и҆ на́мъ и҆спроси́те ѡ҆чище́нїе и҆ ве́лїю ми́лость.
И҆ ны́нѣ, гла́съ то́йже:
Гдⷭ҇и, и҆спо́лнити хотѧ̀, ꙗ҆̀же ᲂу҆ста́вилъ є҆сѝ ѿ вѣ́ка, ѿ всеѧ̀ тва́ри слꙋжи́тели та́йны твоеѧ̀ прїѧ́лъ є҆сѝ, ѿ а҆́гг҃лъ гаврїи́ла, ѿ человѣ̑къ дв҃ꙋ, ѿ нб҃съ ѕвѣздꙋ̀, и҆ ѿ во́дъ і҆ѻрда́нъ, въ не́мже беззако́нїе мїрско́е потреби́лъ є҆сѝ, сп҃се на́шъ, сла́ва тебѣ̀.
На стїхо́внѣ стїхи̑ры, гла́съ в҃. Подо́бенъ: До́ме є҆ѵфра́ѳовъ:
Ꙗ҆ви́сѧ ѻ҆ч҃еское ꙳ сїѧ́нїе сла́вы ꙳ во і҆ѻрда́нскихъ стрꙋѧ́хъ, ꙳ креще́нїемъ ѡ҆чища́ющее ꙳ скве́рнꙋ дꙋ́шъ на́шихъ.
Сті́хъ: Мо́ре ви́дѣ и҆ побѣжѐ, і҆ѻрда́нъ возврати́сѧ вспѧ́ть.
Прїимѝ раболе́пнѡ, ꙳ прⷪ҇ро́че і҆ѡа́нне, ꙳ и҆зба́вителѧ мі́ра, ꙳ и҆ крестѝ зижди́телѧ, ꙳ человѣ́кѡвъ на ѡ҆бновле́нїе.
Сті́хъ: Что́ ти є҆́сть, мо́ре, ꙗ҆́кѡ побѣ́гло є҆сѝ; и҆ тебѣ̀ і҆ѻрда́не, ꙗ҆́кѡ возврати́лсѧ є҆сѝ вспѧ́ть;
Прїи́де просвѣще́нїе, ꙳ и҆збавле́нїе ꙗ҆ви́сѧ ꙳ во і҆ѻрда́нскихъ стрꙋѧ́хъ: ꙳ сни́демсѧ ѡ҆чи́ститисѧ ꙳ и҆ воспѣ́ти чл҃вѣколю́бца.
Сла́ва, гла́съ и҃:
Равноа́гг҃льное житїѐ жи́тельствовавше болѣ́зньми по́стническими, ѻ҆ц҃ы̀ преподо́бнїи, воздержа́нїемъ тѣ́ло порабо́тивше, повинꙋ́сте дꙋ́хꙋ, дѣ́лателе бы́вше за́повѣдей гдⷭ҇нихъ. началоѻбра́знꙋю добро́тꙋ зра́ка сохрани́сте, и҆ страда́льчєскїѧ по́двиги ѿ по́стническихъ по́тѡвъ соверши́сте, и҆ сꙋгꙋ́быми вѣнцы̀ ᲂу҆краси́вшесѧ, прилѣ́жнѡ сп҃са моли́те спасти́сѧ на́мъ.
И҆ ны́нѣ, гла́съ то́йже:
А҆́гг҃льскаѧ вѡ́инства ᲂу҆жасо́шасѧ ѡ҆ ви́димѣмъ дне́сь во і҆ѻрда́нѣ, на́гꙋ стоѧ́щꙋ тѝ, сп҃се, въ вода́хъ, и҆ пречи́стый ве́рхъ тво́й прекло́ншꙋ крести́тисѧ ѿ і҆ѡа́нна. тебѣ́ бо ѡ҆бнища́вшꙋ во́лею, мі́ръ ѡ҆богати́сѧ: гдⷭ҇и, сла́ва тебѣ̀.
Тропа́рь мꙋ́ченикѡвъ, гла́съ д҃:
Мꙋ́чєницы твоѝ, гдⷭ҇и, во страда́нїихъ свои́хъ вѣнцы̀ нетлѣ̑нныѧ ѿ тебє̀ бг҃а на́шегѡ: и҆мꙋ́ще бо крѣ́пость твою̀, мꙋчи́телей низложи́ша, сокрꙋши́ша и҆ де́мѡнѡвъ немѡщны́ѧ де́рзѡсти. тѣ́хъ моли́твами спасѝ дꙋ́шы на́шѧ.
Сла́ва, ѻ҆ц҃є́въ, гла́съ то́йже:
Бж҃е ѻ҆тє́цъ на́шихъ, творѧ́й при́снѡ съ на́ми по твое́й кро́тости, не ѿста́ви ми́лость твою̀ ѿ на́съ: но моли́твами и҆́хъ въ ми́рѣ ᲂу҆пра́ви живо́тъ на́шъ.
И҆ ны́нѣ, пра́здника. Тропа́рь, гла́съ а҃:
Во і҆ѻрда́нѣ креща́ющꙋсѧ тебѣ̀, гдⷭ҇и, трⷪ҇ческое ꙗ҆ви́сѧ поклоне́нїе: роди́телевъ бо гла́съ свидѣ́тельствоваше тебѣ̀, возлю́бленнаго тѧ̀ сн҃а и҆менꙋ́ѧ: и҆ дх҃ъ въ ви́дѣ голꙋби́нѣ, и҆звѣ́ствоваше словесѐ ᲂу҆твержде́нїе. ꙗ҆вле́йсѧ хрⷭ҇тѐ бж҃е, и҆ мі́ръ просвѣще́й, сла́ва тебѣ̀.
На ᲂу҆́трени.
По а҃-й стїхоло́гїи сѣда́ленъ, гла́съ г҃. Подо́бенъ: Дв҃а дне́сь:
Влⷣка дне́сь на і҆ѻрда́нъ прїи́де, крести́всѧ въ вода́хъ ѿ бж҃е́ственнагѡ прⷣте́чи, свы́ше же ѻ҆ц҃ъ свидѣ́тельствоваше: се́й є҆́сть сн҃ъ мо́й, ѡ҆ не́мже благоизво́лихъ, и҆ дх҃ъ ꙗ҆ви́сѧ стра́ннымъ ви́домъ голꙋби́нымъ надъ ни́мъ.
Сла́ва, и҆ ны́нѣ, то́йже.
По в҃-й стїхоло́гїи сѣда́ленъ, гла́съ и҃. Подо́бенъ: Премꙋ́дрости:
І҆ѻрда́нъ стрꙋѧ́ми слꙋ́житъ, и҆ і҆ѡа́ннъ простира́етъ рꙋ́кꙋ тлѣ́ннꙋю, ꙗ҆́вльшꙋсѧ тебѣ̀, неви́диме, пло́тїю ко креще́нїю: но ѻ҆́въ ᲂу҆́бѡ возвраща́шесѧ вспѧ́ть со стра́хомъ, ѻ҆́въ же а҆́бїе держа́ше съ тре́петомъ тѧ̀ нетлѣ́ннаго. Вои́стиннꙋ а҆́гнецъ бж҃їй, и҆сто́чникъ присноживо́тный, и҆сто́чники же и҆ морѧ̀ и҆ человѣ́ки ѡ҆свѧти́въ: трⷪ҇ца бо просїѧ̀, свы́ше сн҃а тѧ̀ и҆менꙋ́етъ роди́тель, и҆ ст҃ы́й дх҃ъ схо́дитъ.
Сла́ва, и҆ ны́нѣ, то́йже.
Канѡ́нъ пра́здника, на ѕ҃.
Гла́съ в҃. Пѣ́снь а҃. І҆рмо́съ:
Ше́ствꙋетъ морскꙋ́ю волнѧ́щꙋюсѧ бꙋ́рю, сꙋ́шꙋ а҆́бїе і҆и҃ль ꙗ҆́вльшꙋюсѧ: чермны́й же по́нтъ трїста́ты є҆гѵ́пєтскїѧ покры̀ кꙋ́пнѡ, водостла́ненъ гро́бъ, си́лою крѣ́пкою десни́цы влⷣчни.
Оу҆́трꙋ ꙗ҆́вльшꙋсѧ человѣ́кѡмъ свѣтоно́снꙋ, ны́нѣ ѿ пꙋсты́ни къ вода́мъ і҆ѻрда̑нскимъ, цр҃ю̀, преклони́лъ є҆сѝ сл҃нца твою̀ вы́ю, ли́ка мра́чна родонача́льника и҆схи́тити, скве́рны же всѧ́кїѧ ѡ҆чи́стити тва́рь.
Безнача́льне, стрꙋѧ́мъ спогре́бшасѧ тебѣ̀, сло́ве, но́ваго прево́диши и҆стлѣ́вшаго ле́стїю: сегѡ̀ несказа́ннѡ ѿ ѻ҆ц҃а̀ прїе́мъ гла́съ держа́венъ: се́й возлю́бленный, ра́венъ же мѝ є҆́сть ѻ҆́трокъ є҆стество́мъ.
И҆́нъ канѡ́нъ мꙋ́ченикѡвъ, є҆гѡ́же краегране́сїе:
Твои́хъ чествꙋ́ю мꙋ́чєникъ, сп҃се, сла́вꙋ. І҆ѡ́сифъ.
Гла́съ и҃. Пѣ́снь а҃. І҆рмо́съ:
Пои́мъ гдⷭ҇еви всѝ лю́дїе, въ мо́ри чермнѣ́мъ фараѡ́на погрꙋзи́вшемꙋ, побѣ́днꙋю пѣ́снь пою́ще, ꙗ҆́кѡ просла́висѧ.
Честны̑ѧ ꙗ҆́коже ѕвѣ́зды бг҃осїѧ̑нныѧ, тве́рди мꙋ́дрїи цр҃кве ꙗ҆ви́стесѧ, ѡ҆зарѧ́юще ны̀ бжⷭ҇твенными свѣтлостьмѝ, мꙋ́чєницы.
Ꙗ҆ви́стесѧ ꙗ҆́коже ᲂу҆́глїе мы́сленное, возжже́ни ѻ҆гне́мъ дх҃а, сла́внїи, и҆ і҆́дѡльское ѻ҆гни́ще стрꙋѧ́ми крове́й ᲂу҆гаси́сте.
Вода́ми потоплѧ́еми хрⷭ҇та̀ ра́ди, въ вода́хъ на́ше нече́стїе погрꙋзи́вшагѡ, безбо́жїѧ рѣ́ки, мꙋ́чєницы, и҆зсꙋши́сте.
Бг҃оро́диченъ:
Оу҆ста́ви моѧ̑ грѣхѡ́вныѧ пото́ки, ꙗ҆́же сме́ртнꙋю тлю̀ ржⷭ҇тво́мъ твои́мъ ᲂу҆вѧди́вши, и҆ ᲂу҆миле́нїе мѝ да́ждь, бг҃ороди́тельнице всенепоро́чнаѧ.
И҆́нъ канѡ́нъ преподо́бныхъ, є҆гѡ́же краегране́сїе:
Страда́нїе воспѣ́ти ѻ҆ц҃є́въ сла́вꙋ вели́кꙋю. І҆ѡ́сифъ.
Гла́съ д҃. Пѣ́снь а҃. І҆рмо́съ:
Мо́рѧ чермнꙋ́ю пꙋчи́нꙋ невла́жными стопа́ми дре́внїй пѣшеше́ствовавъ і҆и҃ль, крестоѻбра́зными мѡѷсе́овыма рꙋка́ма, а҆мали́ковꙋ си́лꙋ въ пꙋсты́ни побѣди́лъ є҆́сть.
Воздержа́нїемъ свѣтови́дни бы́вше, бл҃же́ннѣйшїи, бг҃ови́дни ꙗ҆ви́стесѧ ꙗ҆́вѣ и҆стоще́нїемъ кро́ве. тѣ́мже сра́дꙋетесѧ по́стникѡмъ хрⷭ҇тѡ́вымъ и҆ мꙋ́ченикѡмъ.
Мо́ремъ сле́зъ пе́рвѣе ᲂу҆дави́сте фараѡ́на, мꙋ́дрїи, мы́сленнаго, кро́вными по́слѣжде тече́ньми погꙋби́сте, и҆ безвѣ́стїю препосла́сте.
Просвѣща́ѧ свѣтода́вецъ гдⷭ҇ь ва́ше поще́нїе терпѣ́нїемъ, ᲂу҆гѡ́дницы хрⷭ҇тѡ́вы, свѣтоза́рно содѣ́ла и҆ ꙗ҆́вственно страда́нїе, па́че зарѝ со́лнечныѧ сїѧ́ющее.
Бг҃оро́диченъ:
Сы́й по є҆стествꙋ̀ гдⷭ҇ь, всѣ̑мъ невмѣсти́мь, въ тебѣ̀ вмѣща́етсѧ, влⷣчце, чл҃вѣ́къ благоꙋтро́бїемъ бы́въ, да человѣ́ки за неизрече́нное чл҃вѣколю́бїе спасе́тъ.
Пѣ́снь г҃. І҆рмо́съ:
Є҆ли́цы дре́внихъ и҆зрѣши́хомсѧ сѣ́тей, бра́шенъ львѡ́въ сотре́нныхъ члено́вными, ра́дꙋимсѧ и҆ разшири́мъ ᲂу҆ста̀, сло́во плетꙋ́ще ѿ слове́съ сладкопѣ́нїѧ, и҆́мже къ на́мъ наслажда́етсѧ дарова́нїй.
Оу҆мерщвле́нїе пе́рвѣе насади́вый тва́ри, ѕвѣ́рѧ ѕлодѣ́йственнагѡ воѡбра́жсѧ въ є҆стество̀, ѡ҆мрача́етсѧ плотски́мъ прише́ствїемъ, ᲂу҆́трꙋ ꙗ҆́вльшꙋсѧ, прирази́всѧ влⷣцѣ, сокрꙋши́ти свою̀ вражде́бнꙋю главꙋ̀.
Влече́тъ къ себѣ̀ бг҃озда́нное є҆стество̀, ᲂу҆тро́бы мꙋчи́телѧ, погребе́нное предѣ́лы: ражда́етсѧ па́ки земноро́дныхъ ѡ҆бновле́нїе, дѣ́ло держа́вно соверша́ѧ влⷣка, прїи́де бо то́е ѡ҆чи́стити хотѧ̀.
И҆́нъ. І҆рмо́съ:
Стра́хъ тво́й, гдⷭ҇и, всадѝ въ сердца̀ ра̑бъ твои́хъ, и҆ бꙋ́ди на́мъ ᲂу҆твержде́нїе, тѧ̀ во и҆́стинѣ призыва́ющихъ.
Текꙋ́щихъ непостоѧ́тельное возненави́дѣвше, бꙋ́дꙋщихъ возжела́сте нетлѣ́нное наслажде́нїе, до́блїи страда́льцы хрⷭ҇та̀ всецр҃ѧ̀.
Мꙋ́жески проти́вистесѧ, бг҃омꙋ́дрїи, пребеззако́ннѡ повелѣва́ющемꙋ нече́стїю покори́тисѧ, и҆ побѣ́ды съ нб҃сѐ прїѧ́сте вѣнцы̀.
Трє́бища пре́лести низложи́сте, нелє́стны же хрⷭ҇тѡ́вы мч҃ницы себѐ воздвиго́сте хра́мы чє́стны и҆ столпы̀ бг҃оразꙋ́мїѧ.
Бг҃оро́диченъ:
Ѻ҆рꙋ́жїе пре́жде ѡ҆браща́емо вхо́ды мнѣ̀ дае́тъ, стыдѧ́щисѧ пробо́дшагѡ, дв҃о мт҃и, копїѧ̀, и҆з̾ тебє̀ рожде́ннагѡ.
И҆́нъ. І҆рмо́съ:
Не мꙋ́дростїю, и҆ си́лою, и҆ бога́тствомъ хва́лимсѧ, но тобо́ю ѻ҆́ч҃ею ѵ҆поста́сною мꙋ́дростїю, хрⷭ҇тѐ: нѣ́сть бо ст҃ъ, па́че тебє̀, чл҃вѣколю́бче.
Сокрꙋше́нною мы́слїю бг҃ꙋ ᲂу҆годи́вше, сокрꙋши́сте вра́жїе велехвале́нїе, бл҃же́ннїи, мече́мъ сокрꙋша́еми и҆ ᲂу҆мерщвлѧ́еми.
Смотрѧ́юще пребыва́ющихъ мꙋ́дрїи, присносꙋ́щное, нестоѧ́нныхъ и҆ тлѣ́нныхъ до́лꙋ влекꙋ́що ѿри́нꙋсте: тѣ́мже ᲂу҆блажа́етесѧ, прпⷣбномꙋ́чєницы.
Зако́нꙋ бжⷭ҇твенномꙋ бл҃гопоко́рною мы́слїю повинꙋ́вшесѧ, плотскі̑ѧ сла̑сти воздержа́нїемъ погꙋби́сте, и҆ ны́нѣ пострада́вше, сла́вꙋ ᲂу҆лꙋчи́сте.
Бг҃оро́диченъ:
Прест҃а́ѧ, прест҃о́е сло́во ро́ждшаѧ, ѡ҆свѧтѝ на́шѧ и҆ дꙋ́шы и҆ тѣлеса̀ блажа́щихъ тѧ̀ всенепоро́чнꙋю.
Конда́къ, гла́съ в҃. Подо́бенъ: Вы́шнихъ и҆щѧ̀:
Ѿ мїрскі́ѧ молвы̀ и҆збѣго́сте, и҆ къ ти́хомꙋ приста́нищꙋ преста́вистесѧ, мч҃ничества кровьмѝ и҆ по́стничества трꙋда́ми вѣнча́еми. тѣ́мже и҆ показа́стесѧ мч҃никѡвъ и҆ преподо́бныхъ є҆диновсє́льницы.
І҆́косъ:
Ꙗ҆̀же на землѝ ᲂу҆мертви́вше ᲂу҆́ды, жизноно́сною ме́ртвостїю хрⷭ҇та̀ и҆ бг҃а стрⷭ҇ть и҆з̾ѡбрази́сте, пе́рвѣе въ до́брѣмъ поще́нїи, и҆ второ́е па́ки во страда́нїи. тѣ́мже и҆ са́мъ сꙋгꙋ̑бы вѣнцы̀ низпосла̀ глава́мъ ва́шымъ, ѻ҆ц҃ы̀, ᲂу҆гото́вивъ жили́ще нбⷭ҇ное и҆ мѣ́сто вѣ́чное: и҆дѣ́же ны́нѣ ра́дꙋющесѧ ꙗ҆ви́стесѧ мꙋ́ченикѡвъ и҆ преподо́бныхъ є҆диновсє́льницы.
Сѣда́ленъ, гла́съ а҃. Подо́бенъ: Гро́бъ тво́й:
Въ вода́хъ кꙋ́пнѡ блаже́нный коне́цъ прїѧ́сте, мꙋ́дрїи, и҆ въ ни́хъ велїа́ра погрꙋзи́вше бл҃года́тїю бг҃а на́шегѡ, мч҃ницы: тѣ́мже вѣнцы̀ ꙗ҆́кѡ побѣдоно́сцы прїе́мше, ра́дꙋетесѧ со а҆́гг҃льскими ли́ки, съ ни́миже на́съ помина́йте.
Сла́ва, прпⷣбныхъ, гла́съ д҃. Подо́бенъ: Ско́рѡ предварѝ:
Ꙗ҆́кѡ пресє́льницы ꙗ҆влѧ́еми и҆ прише́льцы на землѝ, кꙋ́щы водрꙋзи́вше въ пꙋсты́нѧхъ, ꙗ҆́вѣ пости́стесѧ, прпⷣбнїи, нагото́ю ᲂу҆краси́вшесѧ добродѣ́телей ѻ҆де́ждею, соѻбра́зни бы́вше хрⷭ҇то́выхъ стрⷭ҇те́й. тѣ́мже и҆ претерпѣ́сте ва́рварское заколе́нїе.
И҆ ны́нѣ, то́йже подо́бенъ:
Стрꙋи̑ ѡ҆свѧти́лъ є҆сѝ і҆ѻрда̑нскїѧ, держа́вꙋ сокрꙋши́лъ є҆сѝ грѣхо́внꙋю, хрⷭ҇тѐ бж҃е на́шъ, преклони́лъ є҆сѝ дла́ни себѐ предте́чевѣ, и҆ спа́слъ є҆сѝ ѿ ле́сти человѣ́ческїй ро́дъ. тѣ́мже тѧ̀ мо́лимъ: спасѝ дꙋ́шы на́шѧ.
Пѣ́снь д҃. І҆рмо́съ:
Ѻ҆гне́мъ ѡ҆чи́щсѧ та́йнагѡ зрѣ́нїѧ, поѧ̀ прⷪ҇ро́къ человѣ́кѡвъ новодѣ́йство, возглаша́етъ гла́съ, дх҃омъ пле́щꙋщъ, воплоще́нїе ꙗ҆влѧ́ющь неизрече́нна сло́ва, и҆́мже си́льныхъ держа̑вы сотро́шасѧ.
По́сланъ ѿ ѻ҆ц҃а̀ пресвѣ́тлое сло́во, но́щи ѿгна́ти ѕломра́чное стремле́нїе, и҆ и҆скорени́ти грѧде́ши человѣ́кѡвъ грѣхѝ, сы́ны же привлещѝ твои́мъ креще́нїемъ, бл҃же, свѣ̑тлы, ѿ стрꙋ́й і҆ѻрда́нскихъ.
Са́мое прови́дѣвъ нарече́нное сло́во, ꙗ҆́снѡ проповѣ́дникъ вопїе́тъ тва́ри: се́й пре́жде менє̀, вторы́й пло́тїю, соѻбра́зенъ просїѧ̀ бжⷭ҇твенною си́лою, вражде́бный на́шъ ѿѧ́ти грѣ́хъ.
Па́жить ᲂу҆ себє̀ животво́рнꙋ носѧ̀, ᲂу҆ловлѧ́етъ ѕмїє́въ, гнѣ́здамъ натека́ѧ, мно́гими сѣтьмѝ, низлага́ѧ бг҃ъ сло́во: запина́етъ же ᲂу҆ѧзви́вшаго всемі́рный ро́дъ, сего̀ потре́бль и҆збавлѧ́етъ тва́рь.
И҆́нъ. І҆рмо́съ:
Оу҆слы́шахъ, гдⷭ҇и, смотре́нїѧ твоегѡ̀ та́инство, разꙋмѣ́хъ дѣла̀ твоѧ̑, и҆ просла́вихъ твоѐ бжⷭ҇тво̀.
Ꙗ҆́кѡ сло́ва слꙋжи́тель, словесы̀ твои́ми безслове́сное ѡ҆бличи́лъ є҆сѝ, мꙋ́чениче є҆рмѵ́ле, неразꙋ́мїе беззако́ннꙋющихъ, ᲂу҆се́рднѣйше.
Є҆ди́но є҆стество̀ бжⷭ҇тва̀, є҆ди́нꙋ вла́сть и҆ гдⷭ҇ство, бг҃омꙋ́дрїи, проповѣ́давше, многобо́жнꙋю ле́сть преѡби́дѣсте.
Повѣ́шенъ и҆ стро́ганъ, и҆ ра́нами ѡ҆ѕлоблѧ́емь, непрекло́ненъ пребы́лъ є҆сѝ, страстоте́рпче, бг҃омꙋ́дре мꙋ́чениче є҆рмѵ́ле.
Бг҃оро́диченъ:
Оу҆ны́нїемъ дре́млюща, и҆ грѣхо́мъ спокрыва́ема, къ покаѧ́нїю мѧ̀, пречⷭ҇таѧ, ꙗ҆́кѡ сло́ва мт҃и, воззовѝ.
И҆́нъ. І҆рмо́съ:
Вознесе́на тѧ̀ ви́дѣвши цр҃ковь на крⷭ҇тѣ̀, сл҃нце пра́ведное, ста̀ въ чи́нѣ свое́мъ, досто́йнѡ взыва́ющи: сла́ва си́лѣ твое́й, гдⷭ҇и.
Не страстьмѝ тѣле́сными побѣди́вшесѧ, врага̀ побѣди́ли є҆стѐ: и҆ ᲂу҆мертви́вшесѧ мече́мъ, всеблаже́ннїи, къ жи́зни небе́снѣй ра́дꙋющесѧ кꙋ́пнѡ преста́вистесѧ.
Оу҆тꙋчни́стесѧ ꙗ҆́кѡ а҆́гнцы воздержа́нїемъ, и҆ ꙗ҆́кѡ ѻ҆внѝ назнамени́тїи, рꙋка́ми кровопі́йцъ волкѡ́въ ᲂу҆бїе́ни бы́сте, и҆ совершє́нна заколє́нїѧ, преподо́бнїи, хрⷭ҇тꙋ̀ приведо́стесѧ.
Свѧще́нницы же и҆ ста́рцы и҆ ю҆́ноши, и҆̀же въ раі́ѳѣ и҆ сїна́и горѣ̀ живꙋ́щїи, мꙋ́чєницы бы́ша, прпⷣбнѡ жи́вше, и҆ нꙋ́жднѡ ᲂу҆ме́рше.
Бг҃оро́диченъ:
Новодѣ́лаетъ человѣ́чество, но́въ млⷣнецъ превѣ́чный гдⷭ҇ь ꙗ҆ви́всѧ ѿ дв҃ы, и҆ чл҃вѣ́къ бы́въ, томꙋ̀ воспои́мъ: сла́ва си́лѣ твое́й, гдⷭ҇и.
Пѣ́снь є҃. І҆рмо́съ:
Врага̀ те́мнагѡ и҆ ѡ҆скверне́ннагѡ ꙗ҆́да ѡ҆чище́нїемъ дх҃а и҆змове́ни, къ но́вой приста́хомъ небла́зненной стезѝ, вводѧ́щей въ непристꙋ́пнꙋю ра́дость, є҆ди́нѣмъ пристꙋ́пнꙋ, и҆̀мже бг҃ъ примири́сѧ.
Ви́дѣвъ зижди́тель, во мра́цѣ прегрѣше́нїй плени́цами неизбѣ́жными, є҆го́же воѡбразѝ пє́рсты, поставлѧ́етъ на ѻ҆бою̀ ра̑мꙋ воздви́гъ горѣ̀, ны́нѣ во многотекꙋ́щихъ вода́хъ ѡ҆мыва́ѧ стꙋда̀ дре́внѧгѡ, а҆да́мова ѕла́гѡ нра́ва.
Со благоче́стїемъ притеце́мъ прилѣ́жнѡ ко и҆сто́чникѡмъ пречи̑стымъ тече́нїѧ спаси́тельнагѡ, сло́во ᲂу҆смотрѧ́юще ѿ нетлѣ́нныѧ, почерпа̑ла приносѧ́ще жа́жди бж҃е́ственныѧ, мі́рꙋ сла́достнѣ и҆сцѣлѧ́ѧ недꙋ́гъ.
И҆́нъ. І҆рмо́съ:
Вскꙋ́ю мѧ̀ ѿри́нꙋлъ є҆сѝ ѿ лица̀ твоегѡ̀, свѣ́те незаходи́мый, и҆ покры́ла мѧ̀ є҆́сть чꙋжда́ѧ тма̀ ѻ҆каѧ́ннаго; но ѡ҆брати́ мѧ, и҆ къ свѣ́тꙋ за́повѣдей твои́хъ пꙋти̑ моѧ̑ напра́ви, молю́сѧ.
Мꙋ́къ ѻ҆́блацы, мꙋ́чєницы всехва́льнїи, не покры́ша ва́шегѡ мꙋ́жества: па́че со́лнца бо ꙗ҆ви́сѧ бл҃гоче́стїѧ сїѧ́нїемъ, бл҃гочести̑выѧ свѣтоводѧ́щее, и҆ де́мѡнскїй мра́къ ѿе́млющее.
Преше́дше предѣ́лы человѣ́чества, бг҃облаже́ннїи, и҆ па́че є҆сте́ственномꙋ соедини́вшесѧ соверше́нными чище́ньми, гѡ́рькїѧ мꙋ̑ки и҆ строга̑нїѧ и҆ ра̑ны претерпѣ́сте ᲂу҆ма̀ тве́рдостїю.
Крѣ́пкѡ сопроти́вилсѧ є҆сѝ, мꙋ́чениче, сꙋдѧ́щемꙋ, сла́вне є҆рмѵ́ле, и҆ гла́съ слы́шати съ нб҃сѐ, преблаже́нне, сподо́билсѧ є҆сѝ, зовꙋ́щемꙋ любо́вїю прибли́житисѧ ꙗ҆́кѡ подвигополо́жникꙋ, и҆ сегѡ̀ ᲂу҆крѣплѧ́ющемꙋ мꙋ́ченики.
Бг҃оро́диченъ:
Ꙗ҆́кѡ добра̀, ꙗ҆́кѡ красна̀, ꙗ҆́кѡ чистото́ю ѡ҆блиста́ющи, кра́снаго добро́тою воплоти́ла є҆сѝ сло́ва и҆ родила̀ є҆сѝ, є҆́же бы́ти всѣ̑мъ бг҃одѣ́льнѡ, дв҃о мт҃и, подаю́щаго бога́тствомъ бла́гости.
И҆́нъ. І҆рмо́съ:
Ты̀, гдⷭ҇и, мо́й свѣ́тъ, въ мі́ръ прише́лъ є҆сѝ, свѣ́тъ ст҃ы́й, ѡ҆браща́ѧй и҆зъ мра́чна невѣ́дѣнїѧ вѣ́рою воспѣва́ющыѧ тѧ̀.
Ра́й сла́дости, жи́зни дре́во гдⷭ҇а, ꙗ҆ви́стесѧ посредѝ и҆мѣ́ѧй ва́шꙋ ꙗ҆́кѡ же́ртвꙋ кро́вь прїи́мшаго.
Крове́й то́ки со сле́зными смѣси́вше стрꙋѧ́ми, бг҃оно́сцы, многоѻбра́знаго ѕмі́ѧ въ си́хъ погрꙋзи́сте.
Красотꙋ̀ бж҃їю зрѣ́ти сподо́бистесѧ, вѣ́чное весе́лїе вмѣ́стѡ трꙋдѡ́въ и҆ болѣ́зней, блаже́ннїи, прїѧ́сте.
Бг҃оро́диченъ:
Родила̀ є҆сѝ бг҃а, па́че сло́ва и҆ мы́сли, и҆ пребыла̀ є҆сѝ по рождествѣ̀, ꙗ҆́кѡ пре́жде ржⷭ҇тва̀ дв҃а, чи́стаѧ бг҃ора́дованнаѧ.
Пѣ́снь ѕ҃. І҆рмо́съ:
Вожделѣ́ннагѡ ꙗ҆́вствова со всебл҃же́ннымъ гла́сомъ ѻ҆ц҃ъ, є҆го́же и҆зъ чре́ва ѿры́гнꙋ: є҆́й, глаго́летъ, се́й соесте́ственъ сн҃ъ сы́й свѣтоза́ренъ, произни́че и҆зъ человѣ́ча ро́да: сло́во же моѐ жи́во, и҆ чл҃вѣ́къ промышле́нїемъ.
Ѿ глꙋби́ннагѡ льва̀, тревече́рнїй стра́ннѣ прⷪ҇ро́къ во внꙋ́треннихъ валѧ́ѧсѧ, а҆́бїе произы́де, пакибытїѧ̀ спасе́нїе, ѿ ѕмі́ѧ человѣкоꙋбі́йцы, всѣ̑мъ пред̾ѧвлѧ́ѧ въ послѣ̑днѧѧ лѣ̑та.
Ѿве́рстꙋ нб҃ꙋ всесвѣ́тлыхъ писа́нїй, ᲂу҆чени́къ зри́тъ ѿ ѻ҆ц҃а̀ посыла́емь: пребыва́ющъ же дх҃ъ на пречи́стѣмъ сло́вѣ, наше́дъ ꙗ҆́кѡ го́лꙋбь неизрече́ннымъ ѻ҆́бразомъ, лю́демъ же ꙗ҆влѧ́етсѧ, прише́дшымъ ко влⷣцѣ.
И҆́нъ. І҆рмо́съ:
Моли́твꙋ пролїю̀ ко гдⷭ҇ꙋ, и҆ томꙋ̀ возвѣщꙋ̀ печа̑ли моѧ̑, ꙗ҆́кѡ ѕѡ́лъ дꙋша̀ моѧ̀ и҆спо́лнисѧ, и҆ живо́тъ мо́й а҆́дꙋ прибли́жисѧ, и҆ молю́сѧ, ꙗ҆́кѡ і҆ѡ́на: ѿ тлѝ, бж҃е, возведи́ мѧ.
Во́дъ животво́рныхъ и҆спо́лнившесѧ, въ рѣ̑чныѧ вве́ржени бы́сте стрꙋи̑, и҆ въ ни́хъ прїе́мше кончи́нꙋ, ѕло́бы предста́телѧ ᲂу҆дави́сте, всехва́льнїи: и҆ ны́нѣ на́мъ и҆сцѣле́нїй пото́ки и҆сточа́ете.
Въ ко́шницꙋ вве́ржени бы́вше, ᲂу҆се́рднѡ преда́стесѧ глꙋбинѣ̀, страстоте́рпцы, и҆ къ жи́зни вознесо́стесѧ бжⷭ҇твеннѣй, ꙗ҆̀же ѿ вѣ́ка ва́ми надѣ́ємаѧ ѡ҆брѣ́тше ра́достнѡ, велемꙋ́дрїи ст҃і́и мꙋ́чєницы.
Ꙗ҆ви́лсѧ є҆сѝ въ го́рцѣй мꙋ́цѣ мꙋ́чимь, и҆ па́лицами бїе́мь, стратоні́че мч҃ниче, терпѣ́нїѧ неѡбори́мь сто́лпъ возвы́шенъ степе́немъ вѣ́ры, сопротивле́нїе гони́телей потреблѧ́ѧ и҆ словесы̀ и҆ дѣѧ́ньми.
Бг҃оро́диченъ:
Стра̑сти немощны́ѧ дꙋшѝ моеѧ̀, и҆ болѣ́знь се́рдца, дв҃о, и҆ ᲂу҆ма̀ преложє́нїѧ многоѻбра̑знаѧ, ꙗ҆́кѡ ми́лостива, прест҃а́ѧ, и҆сцѣлѝ, и҆ ᲂу҆ти́ши лю́тое ѕѡ́лъ мои́хъ волне́нїе, молю́сѧ.
И҆́нъ. І҆рмо́съ:
Пожрꙋ́ ти со гла́сомъ хвале́нїѧ, гдⷭ҇и, цр҃ковь вопїе́тъ тѝ, ѿ бѣсо́вскїѧ кро́ве ѡ҆чи́щшисѧ, ра́ди ми́лости ѿ ре́бръ твои́хъ и҆сте́кшею кро́вїю.
Ѿве́ргше пристра́стїѧ ᲂу҆́зы по́стничествомъ, нꙋ́жнѣйшею сме́ртїю ᲂу҆́зъ тѣле́сныхъ разрѣши́стесѧ, и҆ нерѣши́мою любо́вїю свѧза́стесѧ зижди́телѧ.
Ꙗ҆́кѡ го́ры высѡ́кїѧ жи́тельствомъ ꙗ҆́вльшесѧ, ѡ҆б̾ѧ́ти го́ры, и҆ созда́нїе всѐ претѧ́щаго си́лою хрⷭ҇то́вою подъ но́ги покори́сте.
Вода́ми напои́вшесѧ сле́зъ, бл҃же́ннїи, ꙗ҆́кѡ землѧ̀ добра́ же и҆ тꙋ́чна, мꙋче́нїѧ кла́съ плодоноси́сте, въ жи́тницахъ вѣ́чныхъ хрⷭ҇тꙋ̀ соблюда́емый.
Бг҃оро́диченъ:
Оу҆спѝ страсте́й пло́ти моеѧ̀ во́лны, неꙋсы́пною твое́ю, дв҃о, моли́твою, молю́сѧ, и҆ не да́ждь грѣхо́внымъ ᲂу҆снꙋ́ти мнѣ̀ сно́мъ тѧжча́йшимъ.
Конда́къ, гла́съ д҃:
Ꙗ҆ви́лсѧ є҆сѝ дне́сь вселе́ннѣй, и҆ свѣ́тъ тво́й, гдⷭ҇и, зна́менасѧ на на́съ, въ ра́зꙋмѣ пою́щихъ тѧ̀: прише́лъ є҆сѝ и҆ ꙗ҆ви́лсѧ є҆сѝ свѣ́тъ непристꙋ́пный.
І҆́косъ:
Галїле́и ꙗ҆зы́честѣй, завꙋлѡ́нстѣй странѣ̀ и҆ нефѳали́мстѣй землѝ, ꙗ҆́коже речѐ прⷪ҇ро́къ, свѣ́тъ вели́къ возсїѧ̀ хрⷭ҇то́съ. Ѡ҆мрачє́ннымъ свѣтла̀ ꙗ҆ви́сѧ зарѧ̀, и҆з̾ виѳлее́ма ѡ҆блиста́ющаѧ, па́че же и҆зъ мр҃і́и гдⷭ҇ь, все́й вселе́ннѣй возсїѧва́етъ лꙋчы̀ сл҃нце пра́вды. Тѣ́мже, и҆̀же ѿ а҆да́ма, назі́и, прїиди́те, всѝ, ѡ҆блече́мсѧ въ него̀, да согрѣ́емсѧ: покрыва́етъ бо нагі̑ѧ и҆ просвѣща́етъ тє́мныѧ. Прише́лъ є҆сѝ и҆ ꙗ҆ви́лсѧ є҆сѝ свѣ́тъ непристꙋ́пный.
Пѣ́снь з҃. І҆рмо́съ:
Ѡ҆палѝ стрꙋе́ю ѕмі́євы главы̑ пе́щный высо́кїй пла́мень, ю҆́ношы носѧ́щъ благочести̑выѧ, ᲂу҆ти́шивый неꙋдободержи́мꙋю мглꙋ̀ и҆з̾ грѣха̀, всю́ же ѡ҆мыва́етъ росо́ю дх҃а.
Тебѐ живописꙋ́ющїй а҆ссѷрі́йскїй пла́мень ᲂу҆жа́сенъ поставлѧ́еши, въ ро́сꙋ преведе́нъ. тѣ́мже вода̀ ны́нѣ, ꙗ҆́коже пла́мень, ѡ҆дѣва́ѧй вре́днꙋю ѕло́бꙋ, хрⷭ҇тѐ, прикрове́ннꙋю ѡ҆палѧ́етъ, ѿ поползнове́нныѧ стезѝ призыва́ющи.
Раздѣ́льшꙋсѧ і҆ѻрда́нꙋ дре́вле, по сꙋ́хꙋ прехо́дѧтъ лю́дїе і҆и҃льстїи, тебѐ держа́внѣйшаго, содержа́ща тва́рь некосни́тельнѣ, ны́нѣ въ вода́хъ написꙋ́ющїи, къ нетлѣ́ннѣй и҆ поле́знѣй стезѝ.
Вѣ́мы пе́рвѣе всепа́гꙋбный пото́пъ, ми́лостивнѡ тѧ̀ всѣ́хъ во тлю̀ привестѝ, ѽ тревели̑каѧ сотворѧ́ѧ, и҆ стра̑ннаѧ! ны́нѣ же пото́пльша, хрⷭ҇тѐ, грѣ́хъ за бл҃госе́рдїе и҆ человѣ́ческое спасе́нїе.
И҆́нъ. І҆рмо́съ:
Ѻ҆́троцы є҆вре́йстїи въ пещѝ попра́ша пла́мень дерзнове́ннѡ, и҆ на ро́сꙋ ѻ҆́гнь преложи́ша вопїю́ще: бл҃гослове́нъ є҆сѝ, гдⷭ҇и бж҃е, во вѣ́ки.
Теча́ше медото́чное ѿ ᲂу҆́стъ твои́хъ сло́во, го́ресть ᲂу҆ны́нїѧ стратоні́ка, твоегѡ̀ сострада́льца, ᲂу҆кроща́ющее, вопїю́щагѡ, є҆рмѵ́ле: бж҃е, бл҃гослове́нъ є҆сѝ во вѣ́ки.
Же́злъ си́лы держѧ̀, спаси́тельный кре́стъ, до́блїй мꙋ́чениче, жезло́мъ бїє́нїѧ терпи́ши ᲂу҆се́рднѡ, воспѣва́ѧ творцꙋ̀ твоемꙋ̀, є҆рмѵ́ле: бж҃е, бл҃гослове́нъ є҆сѝ.
Спасы́й ѿ чре́ва ки́това содержи́маго прⷪ҇ро́ка пресла́внѡ, ѿ рѣ́чныхъ во́дъ ва́шѧ спаса́етъ побѣдонѡ́сныѧ мѡ́щи, по кончи́нѣ, страда́льцы.
Бг҃оро́диченъ:
Разрѣша́ѧ є҆́ѵинꙋ клѧ́твꙋ, во всенепоро́чнꙋю всели́лсѧ є҆сѝ дв҃ꙋ, бл҃гослове́нїѧ и҆сто́чники и҆сточа́ѧ вопїю́щымъ: бл҃гослове́нъ є҆сѝ, гдⷭ҇и бж҃е, во вѣ́ки.
И҆́нъ. І҆рмо́съ:
Въ пещѝ а҆враа́мстїи ѻ҆́троцы персі́дстѣй, любо́вїю благоче́стїѧ па́че, не́жели пла́менемъ ѡ҆палѧ́еми, взыва́хꙋ: бл҃гослове́нъ є҆сѝ въ хра́мѣ сла́вы твоеѧ̀, гдⷭ҇и.
Просвѣще́ни воздержа́нїѧ свѣтлостьмѝ и҆ страда́ньми свѧще́нными, мꙋ́чєницы, ꙗ҆вле́ннѡ ѡ҆свѧща́еми, преидо́сте къ свѣ́тꙋ незаходи́момꙋ, и҆ днѐ сы́нове бы́сте.
Во́лею сꙋ́щихъ въ мі́рѣ сла́дкихъ ᲂу҆странѧ́ющесѧ, стра́ннѡ человѣ́кѡмъ ꙗ҆́вльшемꙋсѧ пло́тїю, присво́истесѧ, пребыва̑ющаѧ и҆ неистлѣва̑ющаѧ блага̑ѧ наслѣ́довавше, преподо́бнїи.
Бжⷭ҇твенный па́ѵелъ и҆ і҆ѡа́ннъ, и҆ ѳеодꙋ́лъ, ні́лъ, и҆ вкꙋ́пѣ всѝ всесла́внѡ и҆ ᲂу҆ме́рше и҆ пожи́вше, да ᲂу҆блажа́тсѧ пѡ́стницы и҆ сла́внїи мч҃ницы.
Бг҃оро́диченъ:
Тѧ̀ ма́ннꙋ жи́зни во чре́вѣ твое́мъ носѧ́щꙋю, дре́вле маннопрїе́мнаѧ ста́мна, ꙗ҆́кѡ вои́стиннꙋ проѡбража́ше ꙗ҆вле́ннѡ: бл҃гослове́нна ты̀ въ жена́хъ є҆сѝ, всенепоро́чнаѧ влⷣчце.
Пѣ́снь и҃. І҆рмо́съ:
Свобо́дна ᲂу҆́бѡ тва́рь познава́етсѧ, и҆ сы́нове свѣ́та пре́жде ѡ҆мраче́ннїи: є҆ди́нъ сте́нетъ тмы̀ предста́тель. Ны́нѣ да благослови́тъ ᲂу҆се́рднѡ вино́внаго, пре́жде ѻ҆каѧ́нное ꙗ҆зы́кѡвъ всенаслѣ́дїе.
Трїѐ бг҃ови́днїи во ѻ҆гнѝ ѡ҆роша́еми ѡ҆зарѧ́ющесѧ тремѝ всесвѣ́тлѣ свѧты́нѧми, ꙗ҆́вѣ пока́зовахꙋ превы́шнее є҆стество̀ смѣше́нїемъ человѣ́ческимъ, ѻ҆гнепалѧ́щее росо́ю ми́лостивнѡ всѧ́кꙋ па́гꙋбнꙋю ле́сть.
Да ᲂу҆бѣли́тсѧ всѧ́кое земно́е є҆стество̀, ѿ паде́нїѧ ны́нѣ на нб҃о возводи́мо: и҆́мже бо всѧ̑ соблюда́ютсѧ сло́вомъ, текꙋ́щими стрꙋѧ́ми ѡ҆мы́вшисѧ, согрѣше́нїй пре́жнихъ ᲂу҆бѣжѐ, пресвѣ́тлѡ и҆змове́но.
И҆́нъ. І҆рмо́съ:
Седмери́цею пе́щь халде́йскїй мꙋчи́тель бг҃очести̑вымъ неи́стовнѡ разжжѐ, си́лою же лꙋ́чшею спасє́ны сїѧ̑ ви́дѣвъ, творцꙋ̀ и҆ и҆зба́вителю вопїѧ́ше: ѻ҆́троцы, благослови́те, свѧще́нницы, воспо́йте, лю́дїе, превозноси́те во всѧ̑ вѣ́ки.
Терпи́ши, бїе́мь и҆ лю́тѣ стрꙋ́жемь, слота́ми болѣ́зней ѡ҆крꙋжа́емь, сла́вный є҆рмѵ́ле: стратоні́ка же наста́вникъ бо бл҃гоче́стїѧ подвигѡ́мъ бы́лъ є҆сѝ, съ ни́мже и҆ вопїѧ́лъ є҆сѝ: свѧще́нницы, благослови́те, лю́дїе, превозноси́те гдⷭ҇а во вѣ́ки.
Непрекло́ннїи мꙋдрова́нїемъ, и҆ до́блїи страда́нїемъ, и҆ нбⷭ҇ныхъ дарѡ́въ досто́йни, ка́менїе честно́е и҆ вѣ́рныхъ предстѡ́лпїѧ, ка́менїю, повелѣ́ни бы́вше, не принесо́ша че́сти, бг҃ꙋ же всѣ́хъ вопїѧ́хꙋ влⷣцѣ: лю́дїе, превозноси́те є҆го̀ во вѣ́ки.
Твоѧ̑ ре́бра ноготьмѝ стрꙋжѧ̀ мꙋчи́тель, и҆ мєчѝ неми́лостивнѡ ссѣка́ѧ тѧ̀, ᲂу҆ма̀ не ᲂу҆кра́де, ᲂу҆крѣпле́на бжⷭ҇твенною любо́вїю, и҆ и҆зба́вителѧ насмотрѧ́юща добро́тꙋ: є҆мꙋ́же ны́нѣ со дерзнове́нїемъ предстоѧ̀, взыва́еши: лю́дїе, превозноси́те гдⷭ҇а во вѣ́ки.
Бг҃оро́диченъ:
Сы́й по всемꙋ̀ соверше́нъ и҆ є҆стество́мъ непристꙋ́пный ꙗ҆ви́сѧ пристꙋ́пенъ мнѣ̀, пло́тїю ѡ҆бложе́нъ и҆зъ тебє̀, неискꙋсобра́чнаѧ, є҆го́же прилѣ́жнѡ молѝ, беззако́нїй мои́хъ бре́мѧ росточи́ти и҆ спастѝ пѣснопою́ща: сщ҃е́нницы, бл҃гослови́те, лю́дїе, превозноси́те гдⷭ҇а во вѣ́ки.
И҆́нъ. І҆рмо́съ:
Рꙋ́цѣ распросте́ръ данїи́лъ, львѡ́въ зїѧ̑нїѧ въ ро́вѣ затчѐ: ѻ҆́гненнꙋю же си́лꙋ ᲂу҆гаси́ша, добродѣ́телїю препоѧ́савшесѧ, благоче́стїѧ рачи́тели ѻ҆́троцы, взыва́юще: благослови́те, всѧ̑ дѣла̀ гдⷭ҇нѧ, гдⷭ҇а.
Велича́йшїй ли́къ по́стническими доблестьмѝ ᲂу҆кра́шенъ, преподо́бныхъ дне́сь всѧ̑ лико́вники бжⷭ҇твєнныѧ показꙋ́етъ, восхвалѧ́ющыѧ ᲂу҆́бѡ того̀, хрⷭ҇тꙋ́ же пою́щыѧ: бл҃гослови́те, всѧ̑ дѣла̀ гдⷭ҇нѧ, гдⷭ҇а.
Закла́ни бы́сте, ꙗ҆́коже а҆́гнцы, ва́рварскими мечи̑ ссѣка́еми: и҆ приведо́стесѧ совершє́нна закла́вшемꙋсѧ сло́вꙋ заколє́нїѧ, и҆ въ ски́нїихъ перворо́дныхъ всели́стесѧ, пѣснопою́ще: бл҃гослови́те, всѧ̑ дѣла̀ гдⷭ҇нѧ, гдⷭ҇а.
На́зи всѧ́кїѧ сꙋ́ще сла́дости, пра́ѻц҃ы ѡ҆бнажи́вшаго, ѻ҆ц҃ы̀ преподо́бнїи, ѕлѣ́йшаго врага̀ ѡ҆бнажи́сте: ѻ҆де́ждꙋ же свѧще́ннꙋ ꙗ҆́кѡ пострада́вше прїи́мше, сего̀ въ стꙋ́дъ, мꙋ́дрїи, ѡ҆блеко́сте.
Бг҃оро́диченъ:
Ѿверза́етсѧ па́ки тебє̀ ра́ди дре́внїй ра́й, и҆ въ ѻ҆́нь вво́дитсѧ пре́жде ѡ҆сꙋжде́нный человѣ́къ, и҆ ѡ҆божа́етсѧ и҆́стиннѣйше, бг҃облагода́тнаѧ чⷭ҇таѧ, человѣ́кѡвъ на ѡ҆бновле́нїе вопїю́щихъ: бл҃гослови́те, всѧ̑ дѣла̀ гдⷭ҇нѧ, гдⷭ҇а.
Пѣ́снь ѳ҃. І҆рмо́съ:
Ѽ па́че ᲂу҆ма̀ ржⷭ҇тва̀ твоегѡ̀ чꙋде́съ, невѣ́сто всечⷭ҇таѧ, мт҃и бл҃гослове́ннаѧ! є҆́юже полꙋчи́вше всесоверше́нное спасе́нїе, досто́йнѡ хва́лимъ, ꙗ҆́кѡ бл҃годѣ́телѧ, да́ръ носѧ́ще пѣ́снь благодаре́нїѧ.
Оу҆вѣ́дѣхомъ мѡѷсе́ю кꙋпино́ю ꙗ҆влє́ннаѧ, грѧдѝ стра́нными ᲂу҆ста́вы содѣ́ланнаѧ: ꙗ҆́кѡ бо спасе́сѧ ѻ҆́гнь носѧ́щи дв҃а, свѣтоно́сна ро́ждши бл҃годѣ́телѧ, во і҆ѻрда́нскихъ же стрꙋѧ́хъ ꙗ҆вле́нна.
Помазꙋ́еши соверша́ѧ человѣ́ческое сꙋщество̀, цр҃ю̀ безнача́льне, дх҃а ѻ҆бще́нїемъ, стрꙋѧ́ми чⷭ҇тыми ѿмы́въ: и҆ тмы̀ крѣ́пость же посра́мль возвы́шеннꙋю, ны́нѣ въ безпреста́ннѣмъ возда́ти житїѝ.
И҆́нъ. І҆рмо́съ:
Оу҆страши́сѧ всѧ́къ слꙋ́хъ неизрече́нна бж҃їѧ снизхожде́нїѧ, ꙗ҆́кѡ вы́шнїй во́лею сни́де да́же и҆ до пло́ти, ѿ дв҃и́ческагѡ чре́ва бы́въ чл҃вѣ́къ. тѣ́мже пречⷭ҇тꙋю бцⷣꙋ, вѣ́рнїи, велича́емъ.
Вѣ́триломъ мч҃ницы хрⷭ҇тѡ́вы мꙋ́къ преплы́вше пꙋчи́нꙋ, ᲂу҆стреми́стесѧ ко приста́нищємъ поко́ѧ, и҆дѣ́же мч҃никѡвъ ли́ки, пра́ведныхъ собо́ри: и҆дѣ́же незаходи́мый свѣ́тъ, и҆ ра́дость пра́зднꙋющихъ въ дс҃ѣ.
Дне́сь па́мѧть свѧще́ннꙋю страда́нїѧ ва́шегѡ, всеблаже́ннїи, цр҃ковь хрⷭ҇то́ва соверша́ющи, пра́зднꙋетъ ра́достный и҆ свѣтоно́сный пра́здникъ, бг҃а велича́ющи, вѣнцеда́вца ва́шего, велича́ющаго ва́съ, ꙗ҆́кѡ ᲂу҆го́дники.
Взѧ́стесѧ къ пресвѣ́тлѣй свидѣ́тельства и҆́стиннѡ высотѣ̀, ст҃і́и, и҆ воспрїѧ́сте жела́нїѧ кра́й, и҆́стиннѡ бл҃же́ннїи црⷭ҇твїе бж҃їе прїе́мше недви́жимое, мч҃ниче стратоні́че съ є҆рмѵ́ломъ мꙋ́дрымъ и҆ бг҃оразꙋ́мнымъ.
Бг҃оро́диченъ:
Пощади́ мѧ, сп҃се, рожде́йсѧ и҆ сохрани́вый ро́ждшꙋю тѧ̀ нетлѣ́ннꙋ по рождествѣ̀, є҆гда̀ сѧ́деши сꙋди́ти дѣла̀ моѧ̑, беззакѡ́нїѧ презира́ѧ и҆ грѣхѝ моѧ̑, ꙗ҆́кѡ безгрѣ́шенъ, ꙗ҆́кѡ бг҃ъ ми́лостивъ и҆ чл҃вѣколю́бецъ.
И҆́нъ. І҆рмо́съ:
Ка́мень нерꙋкосѣ́чный ѿ несѣко́мыѧ горы̀ тебє̀, дв҃о, краеꙋго́льный ѿсѣче́сѧ, хрⷭ҇то́съ, совокꙋпи́вый разстоѧ̑щаѧсѧ є҆стества̑. тѣ́мъ веселѧ́щесѧ, тѧ̀, бцⷣе, велича́емъ.
Свѧщеннослѡ́вїи преподо́бными свѧщє́нныѧ, прїиди́те, ѻ҆ц҃ы̀, въ раі́ѳѣ и҆ въ сїна́и пожи́вшыѧ въ преподо́бїи, благоче́стнѡ пострада́вшыѧ велегла́снѡ велича́емъ.
Тѣ́ло и҆ дꙋ́шꙋ гдⷭ҇ꙋ ѡ҆свѧти́сте преподо́бнѡ, воздержа́нїѧ пѡ́ты ѡ҆свѧти́вшесѧ, и҆ кро́вными течє́нїи и҆зсꙋши́вше ва́рварскїѧ ѕло́бы мо́ре.
Бг҃осїѧ́ннаѧ ва́ша па́мѧть, восто́ками просвѣща́ема, за хрⷭ҇та̀ ва́шихъ болѣ́зней, помышлє́нїѧ всѣ́хъ, блаже́ннїи, ѡ҆зарѧ́етъ бл҃года́тїю вседѣ́телѧ и҆ бжⷭ҇твеннагѡ дх҃а.
Бг҃оро́диченъ:
Трепе́щꙋтъ херꙋві́ми, зрѧ́ще на ни́хъ неизглаго́ланнымъ сло́вомъ сѣдѧ́щаго сло́ва, ма́терними рꙋка́ми млⷣнца держи́ма твои́ми, прест҃а́ѧ влⷣчце, вы́шши всѧ́кїѧ тва́ри.
Свѣти́ленъ. Подо́бенъ: Дх҃омъ во свѧти́лищи:
Болѣ́зньми по́стничества ѕлонача́льнаго ѕмі́ѧ до конца̀ ᲂу҆би́сте, при кончи́нѣ же вѣне́цъ мꙋче́нїѧ прїѧ́сте, ѻ҆ц҃є́въ похвало̀ и҆ мꙋ́ченикѡвъ сла́ва, и҆̀же въ раі́ѳѣ и҆ сїна́и всесвѧще́нное мно́жество чꙋ́дныхъ ѻ҆ц҃є́въ.
Сла́ва, и҆ ны́нѣ, пра́здника:
Свѣ́та незаходи́магѡ бы́сть настоѧ́щїй де́нь: хрⷭ҇то́съ бо и҆́стина прїи́де ны́нѣ и҆ ꙗ҆ви́сѧ, ѱалмы̀ того̀ досто́йнѡ и҆ пѣ́сньми воспои́мъ, ꙗ҆́кѡ содѣ́телѧ же и҆ влⷣкꙋ. ѽ но́вагѡ та́инства! а҆да́мовъ творе́цъ во́лею чл҃вѣ́къ ꙗ҆ви́сѧ.
На стїхо́внѣ стїхи̑ры, гла́съ ѕ҃. Подо́бенъ: А҆́гг҃льскїѧ:
Прїиди́те, и҆ мы̀ въ чꙋ́вствѣ се́рдца притеце́мъ, вѣ́рнїи, къ стрꙋѧ́мъ і҆ѻрда̑нскимъ, и҆ хрⷭ҇та̀ ви́дѣвше пло́тїю креща́ема ѿ і҆ѡа́нна предте́чи, ны́нѣ съ ни́мъ славосло́вѧще, томꙋ̀ возопїи́мъ: бл҃гослове́нъ, ꙗ҆вле́йсѧ бж҃е на́шъ, сла́ва тебѣ̀.
Сті́хъ: Мо́ре ви́дѣ и҆ побѣжѐ, і҆ѻрда́нъ возврати́сѧ вспѧ́ть.
І҆ессе́евъ ны́нѣ прозѧбѐ же́злъ, бжⷭ҇твенный кївѡ́тъ и҆ ма́нны прїѧ́телище, и҆з̾ негѡ́же произы́де цвѣ́тъ жи́зни нетлѣ́нный: є҆гѡ́же і҆ѻрда́нъ ᲂу҆боѧ́всѧ, и҆ і҆ѡа́ннъ рꙋко́ю прикоснꙋ́всѧ хрⷭ҇тꙋ̀ зовѧ́ше: бл҃гослове́нъ, ꙗ҆вле́йсѧ бж҃е на́шъ, сла́ва тебѣ̀.
Сті́хъ: Что́ ти є҆́сть, мо́ре, ꙗ҆́кѡ побѣ́гло є҆сѝ; и҆ тебѣ̀ і҆ѻрда́не, ꙗ҆́кѡ возврати́лсѧ є҆сѝ вспѧ́ть.
Воспо́йте пѣ̑сни, нбⷭ҇ныѧ си̑лы, по́йте, человѣ́цы, и҆ ра́дꙋйтесѧ согла́снѡ: се́ бо влⷣка, ѻ҆́ч҃ее сїѧ́нїе, грѧде́тъ къ стрꙋѧ́мъ і҆ѻрда̑нскимъ, да крести́тсѧ ѿ раба̀. Лю́дїе, воззове́мъ: бл҃гослове́нъ, ꙗ҆вле́йсѧ бж҃е на́шъ, сла́ва тебѣ̀.
Сла́ва, гла́съ и҃:
Бл҃же́нни є҆стѐ, преподо́бнїи и҆ мꙋ́чєницы хрⷭ҇та̀ бг҃а: преподо́бнїи ᲂу҆́бѡ, ꙗ҆́кѡ пра́вды ра́ди и҆згна́стесѧ: мч҃ницы же, ꙗ҆́кѡ ме́чь ва́съ не разлꙋчѝ ѿ любвѐ хрⷭ҇то́вы: и҆ сегѡ̀ ра́ди ра́дꙋетесѧ, ꙗ҆́кѡ мно́га мзда̀ ва́ша на нб҃сѣ́хъ.
И҆ ны́нѣ, гла́съ то́йже:
Дне́сь тва́рь просвѣща́етсѧ, дне́сь всѧ́чєскаѧ веселѧ́тсѧ, нбⷭ҇наѧ вкꙋ́пѣ и҆ земна̑ѧ, а҆́гг҃ли и҆ человѣ́цы смѣша́ютсѧ: и҆дѣ́же бо цр҃е́во прише́ствїе, и҆ чи́нъ прихо́дитъ. Теце́мъ ᲂу҆́бѡ на і҆ѻрда́нъ, и҆ ви́димъ всѝ і҆ѡа́нна, ка́кѡ креща́етъ ве́рхъ нерꙋкотворе́нный и҆ безгрѣ́шный. Тѣ́мже а҆пⷭ҇льскїй гла́съ припѣва́юще, согла́снѡ возопїи́мъ: ꙗ҆ви́сѧ бл҃года́ть бж҃їѧ, спаси́тельнаѧ всѣ̑мъ человѣ́кѡмъ, ѡ҆зарѧ́ющаѧ и҆ подаю́щаѧ вѣ̑рнымъ ве́лїю ми́лость.
На лїтꙋргі́и бл҃жє́нна, пра́здника пѣ́снь и҃ на д҃: и҆ ѻ҆ц҃є́въ пѣ́снь ѕ҃, на д҃ Прокі́менъ, гла́съ з҃: Честна̀ предъ гдⷭ҇емъ сме́рть преподо́бныхъ є҆гѡ̀. Сті́хъ: Что̀ возда́мъ гдⷭ҇еви ѡ҆ всѣ́хъ, ꙗ҆̀же воздаде́ ми; А҆пⷭ҇толъ къ ри́млѧнѡмъ, зача́ло ч҃ѳ. А҆ллилꙋ́їа, гла́съ д҃. Воззва́ша првⷣнїи, и҆ гдⷭ҇ь ᲂу҆слы́ша и҆̀хъ. Є҆ѵⷢ҇лїе лꙋкѝ, зача́ло к҃д. Прича́стенъ: Ра́дꙋйтесѧ, пра́веднїи, ѡ҆ гдⷭ҇ѣ: