Мѣ́сѧца тогѡ́же въ д҃-й де́нь. Прпⷣбнагѡ ѻ҆ц҃а̀ на́шегѡ і҆сі́дѡра пилꙋсїѡ́тскагѡ:
И҆ ст҃а́гѡ бл҃говѣ́рнагѡ вели́кагѡ кнѧ́зѧ геѡ́ргїа:
И҆ прпⷣбнагѡ ѻ҆ц҃а̀ на́шегѡ кѷрі́лла, новоезе́рскагѡ чꙋдотво́рца.
Слꙋ́жбы и҆́хъ пи́саны по се́й слꙋ́жбѣ.
А҆́ще нѣ́сть поста̀, быва́етъ слꙋ́жба пра́здника, и҆ ст҃а́гѡ і҆сі́дѡра. А҆́ще ли є҆́сть по́стъ, то́чїю ст҃а́гѡ. На Гдⷭ҇и, воззва́хъ, стїхи̑ры пра́здника г҃, и҆ ст҃а́гѡ г҃. Стїхи̑ры пра́здника гла́съ д҃.
Подо́бенъ: Да́лъ є҆сѝ зна́менїе:
Зако́нъ, и҆́же въ писа́нїи, ꙳ и҆сполнѧ́ѧ чл҃вѣколю́бецъ, ꙳ въ це́рковь ны́нѣ прино́ситсѧ, ꙳ и҆ сего̀ прїе́млетъ ста́рыми рꙋка́ми сѷмеѡ́нъ ста́рецъ: ꙳ ны́нѣ ѿпꙋща́еши мѧ̀, вопїѧ̀, ко ѻ҆́номꙋ блаже́нствꙋ: ꙳ ви́дѣхъ бо тѧ̀ дне́сь пло́тїю ме́ртвенною ѡ҆бложе́ннаго, ꙳ живото́мъ гдⷭ҇ствꙋюща, ꙳ и҆ сме́ртїю влⷣчествꙋюща.
Свѣ́тъ во ѿкрове́нїе ꙗ҆зы́кѡвъ ꙳ ꙗ҆ви́лсѧ є҆сѝ, гдⷭ҇и, ꙳ на ѻ҆́блацѣ сѣдѧ̀ ле́гцѣ, ꙳ со́лнце пра́вды, ꙳ зако́на сѣно́вное и҆сполнѧ́ѧ, ꙳ и҆ нача́ло и҆з̾ѧвлѧ́ѧ но́выѧ благода́ти. ꙳ тѣ́мъ тѧ̀ ви́дѣвъ сѷмеѡ́нъ, взыва́ше: ꙳ и҆зъ и҆стлѣ́нїѧ мѧ̀ разрѣшѝ, ꙳ ꙗ҆́кѡ ви́дѣхъ тѧ̀ дне́сь.
Нѣ́дръ роди́телѧ не ѿлꙋ́чсѧ бжⷭ҇тво́мъ, ꙳ вопло́щсѧ, ꙗ҆́коже и҆зво́лилъ є҆сѝ, ꙳ ѡ҆б̾ѧ́тїѧми держи́мь приснодв҃ы, ꙳ на рꙋ́ки пода́лсѧ є҆сѝ бг҃опрїи́мца сѷмеѡ́на, ꙳ рꙋко́ю твое́ю держа́й всѧ́чєскаѧ: тѣ́мже ны́нѣ ѿпꙋща́еши мѧ̀, ꙳ ра́достнѡ взыва́ше, ꙳ въ ми́рѣ раба̀ твоего̀, ꙳ ꙗ҆́кѡ ви́дѣхъ тѧ̀, влⷣко. (с. 69)
И҆́ны стїхи̑ры ст҃а́гѡ, гла́съ то́йже. Подо́бенъ: Ꙗ҆́кѡ до́блѧ:
Видѣ̑нїи и҆ дѣѧ́ньми ꙳ къ бг҃ꙋ возвыша́ѧсѧ, ꙳ житїѐ, всемꙋ́дре, соверши́лъ є҆сѝ, ꙳ видѣ́нїѧ восхожде́нїе дѣѧ́нїе водрꙋзи́въ, ꙳ и҆ мꙋ́дре, жела́емыхъ ꙳ возлюби́лъ є҆сѝ послѣ́днее: ꙳ є҆гѡ́же бы́въ жела́нїѧ внꙋ́трь, ꙳ ᲂу҆досто́илсѧ є҆сѝ блаже́ннагѡ ны́нѣ конца̀ ꙳ и҆ трисо́лнечнагѡ сїѧ́нїѧ.
Наводне́нїемъ благода́ти, ꙳ и҆ ѡ҆дожде́ньми слове́съ твои́хъ, ꙳ напоѧ́еши всѧ̑ бг҃омꙋ̑дрыѧ, ꙳ въ го́рнѣйшей мꙋ́дрости ча́ши ᲂу҆ста̀ твоѧ̑ поло́жъ, ꙳ ꙗ҆́кѡ ѿ и҆сто́чника бога́тнѡ ты̀ поче́рплъ є҆сѝ, ꙳ и҆ разда́лъ є҆сѝ всю́дꙋ лꙋчы̀ ᲂу҆че́нїй, ꙳ посыла́ѧ и҆ ᲂу҆чѧ̀, ꙳ и҆ наказꙋ́ѧ, досточꙋ́дне.
Воздержа́нїемъ мꙋдрова́нїе плотско́е ᲂу҆мертви́лъ є҆сѝ, ꙳ въ живоно́снꙋю ме́ртвость ѡ҆дѣ́ѧвсѧ, ꙳ и҆ дꙋше́вное ᲂу҆строе́нїе ꙳ разшири́въ, прпⷣбне, ꙗ҆́вѣ, ꙳ вмѣсти́тельное дарова́нїй дх҃а соверши́лъ є҆сѝ, ꙳ и҆ прїѧ́телище бы́лъ є҆сѝ ꙳ бг҃одохнове́нныхъ ᲂу҆че́нїй, ꙳ и҆ премꙋ́дрости сꙋ́щїѧ ꙳ па́че ᲂу҆ма̀ пребыва́нїе.
Сла́ва, и҆ ны́нѣ, пра́здника, гла́съ в҃. Ге́рманово:
Дне́сь сѷмеѡ́нъ на рꙋ́ки гдⷭ҇а сла́вы прїе́млетъ, є҆го́же под̾ мра́комъ пе́рвѣе мѡѷсе́й ви́дѣ, на горѣ̀ сїна́йстѣй скрижа̑ли даю́ща є҆мꙋ̀. се́й є҆́сть, и҆́же во прⷪ҇ро́цѣхъ глаго́лѧй, и҆ зако́на творе́цъ: се́й є҆́сть, є҆го́же дв҃дъ возвѣща́етъ, и҆́же всѣ̑мъ стра́шный, и҆мѣ́ѧй ве́лїю и҆ бога́тꙋю ми́лость.
А҆́ще є҆́сть по́стъ, Сла́ва, и҆ ны́нѣ, бг҃оро́диченъ. А҆́ще ли среда̀ и҆лѝ пѧто́къ, крⷭ҇тобг҃оро́диченъ: пи́санъ сегѡ̀ мѣ́сѧца во в҃і де́нь.
На стїхо́внѣ стїхи̑ры, гла́съ в҃. Подо́бенъ: До́ме Є҆ѵфра́ѳовъ:
Воспрїимѝ, ѽ сѷмеѡ́не, ꙳ гдⷭ҇а сла́вы, ꙳ ꙗ҆́коже тѝ и҆звѣсти́сѧ ꙳ ѿ дх҃а ст҃а́гѡ: ꙳ се́ бо прїи́де.
Сті́хъ: Ны́нѣ ѿпꙋща́еши раба̀ твоего̀, влⷣко, по глаго́лꙋ твоемꙋ̀, съ ми́ромъ.
Носѧ́щи чⷭ҇таѧ ꙳ и҆ пречⷭ҇таѧ дв҃а, содѣ́телѧ и҆ влⷣкꙋ ꙳ ꙗ҆́кѡ млⷣнца на рꙋка́хъ, ꙳ въ це́рковь вхо́дитъ. (с. 70)
Сті́хъ: Свѣ́тъ во ѿкрове́нїе ꙗ҆зы́кѡвъ, и҆ сла́вꙋ люде́й твои́хъ і҆и҃лѧ.
Ве́лїе и҆ стра́шное та́инство, ꙳ и҆ стра́нное смотре́нїѧ, ꙳ и҆́же всѧ̑ ѡ҆б̾е́млѧ, ꙳ и҆ младе́нцы созида́ѧй, ꙳ ꙗ҆́кѡ млⷣнецъ на рꙋка́хъ но́ситсѧ.
Сла́ва, и҆ ны́нѣ, гла́съ то́йже: Самогла́сенъ:
Сщ҃е́ннаго сщ҃е́ннаѧ дв҃а принесѐ во ст҃и́лище ст҃и́телю, просте́ръ же рꙋ́цѣ сѷмеѡ́нъ прїѧ́тъ сего̀ ра́дꙋѧсѧ, и҆ возопѝ: ны́нѣ ѿпꙋща́еши раба̀ твоего̀, влⷣко, по глаго́лꙋ твоемꙋ̀, съ ми́ромъ, гдⷭ҇и.
Тропа́рь, гла́съ и҃:
Въ тебѣ̀, ѻ҆́ч҃е, и҆звѣ́стнѡ спасе́сѧ є҆́же по ѻ҆́бразꙋ: прїи́мъ бо крⷭ҇тъ, послѣ́довалъ є҆сѝ хрⷭ҇тꙋ̀, и҆ дѣ́ѧ ᲂу҆чи́лъ є҆сѝ, презира́ти ᲂу҆́бѡ пло́ть, прехо́дитъ бо, прилѣжа́ти же ѡ҆ дꙋшѝ, ве́щи безсме́ртнѣй: тѣ́мже и҆ со а҆́гг҃лы сра́дꙋетсѧ, прпⷣбне і҆сі́дѡре, дꙋ́хъ тво́й.
Сла́ва, и҆ ны́нѣ, пра́здника, гла́съ а҃:
Ра́дꙋйсѧ, бл҃года́тнаѧ бцⷣе дв҃о, и҆зъ тебє́ бо возсїѧ̀ сл҃нце пра́вды хрⷭ҇то́съ бг҃ъ на́шъ, просвѣща́ѧй сꙋ́щыѧ во тмѣ̀: весели́сѧ и҆ ты̀, ста́рче пра́ведный, прїе́мый во ѡ҆б̾ѧ̑тїѧ свободи́телѧ дꙋ́шъ на́шихъ, да́рꙋющаго на́мъ воскрⷭ҇нїе.
На ᲂу҆́трени, на Бг҃ъ гдⷭ҇ь, тропа́рь пра́здника, два́жды. Сла́ва, ст҃а́гѡ: И҆ ны́нѣ, пра́здника.
По а҃-й стїхоло́гїи сѣда́ленъ, гла́съ а҃. Подо́бенъ: Ли́къ а҆́гг҃льскїй:
Сы́й со ѻ҆ц҃е́мъ на прⷭ҇то́лѣ ст҃ѣ́мъ, прише́дъ на зе́млю ѿ дв҃ы роди́сѧ, и҆ младе́нецъ бы́сть лѣ́ты сы́й неѡпи́санъ, є҆го́же прїи́мъ сѷмеѡ́нъ на рꙋ́ки, ра́дꙋѧсѧ глаго́лаше: ны́нѣ ѿпꙋща́еши, ще́дре, возвесели́въ раба̀ твоего̀.
Сла́ва, и҆ ны́нѣ, то́йже.
По в҃-й стїхоло́гїи сѣда́ленъ, гла́съ д҃. Поⷣ: Ско́рѡ предварѝ:
Пло́тїю младе́нствовавша ѿ неискꙋсомꙋ́жныѧ мт҃ре (с. 71) рꙋка́ми ста́рыми твои́ми ѡ҆б̾ѧ́лъ є҆сѝ, сѷмеѡ́не, хрⷭ҇та̀ бг҃а на́шего, прїѧ́лъ є҆сѝ и҆схо́да ѿвѣ́тъ сла́внѡ, ᲂу҆лꙋчи́лъ є҆сѝ чꙋде́съ непреста́ннꙋю благода́ть: тѣ́мъ тѧ̀ достодо́лжнѡ всѝ сла́вимъ.
Сла́ва, и҆ ны́нѣ, то́йже.
Канѡ́нъ пра́здника со і҆рмосо́мъ на и҃, и҆ ст҃а́гѡ на д҃.
Канѡ́нъ пра́здника, гла́съ г҃.
Пѣ́снь а҃. І҆рмо́съ:
Сꙋ́шꙋ глꙋбороди́тельнꙋю зе́млю со́лнце наше́ствова и҆ногда̀, ꙗ҆́кѡ стѣна́ бо ѡ҆гꙋстѣ̀ ѻ҆бапо́лы вода̀, лю́демъ пѣшомореходѧ́щымъ, и҆ бг҃оꙋго́днѡ пою́щымъ: пои́мъ гдⷭ҇еви, сла́внѡ бо просла́висѧ.
Да ка́плютъ во́дꙋ ѻ҆́блацы, со́лнце бо на ѻ҆́блацѣ ле́гцѣ носи́мо наста́ло є҆́сть, на нетлѣ́ннꙋю рꙋкꙋ̀, хрⷭ҇то́съ въ це́ркви ꙗ҆́кѡ младе́нецъ. тѣ́мже, вѣ́рнїи, возопїи́мъ: пои́мъ гдⷭ҇еви, сла́внѡ бо просла́висѧ.
Крѣпи́тѣсѧ, рꙋ́цѣ сѷмеѡ́ни ста́ростїю ѡ҆сла́бленнїи, лы́ста же претрꙋждє́нна ста̑рча, пра́вѡ бы́стрѡ дви́житасѧ хрⷭ҇тꙋ̀ на срѣ́тенїе, ли́къ со безпло́тными соста́вльше: пои́мъ гдⷭ҇еви, сла́внѡ бо просла́висѧ.
Ра́зꙋмомъ простє́ртаѧ нб҃са̀, весели́тесѧ, и҆ ра́дꙋйсѧ, землѐ: и҆зъ пребжⷭ҇твенныхъ бо нѣ́дръ хитре́цъ проше́дъ хрⷭ҇то́съ, мт҃рїю дв҃ою бг҃ꙋ ѻ҆ц҃ꙋ̀ прино́ситсѧ, младе́нецъ, и҆́же пре́жде всѣ́хъ, сла́внѡ бо просла́висѧ.
Канѡ́нъ ст҃а́гѡ, є҆гѡ́же краегране́сїе:
Тѧ̀ мона́шествꙋющихъ сла́вꙋ пою̀, ѻ҆́ч҃е.
Гла́съ ѕ҃. Пѣ́снь а҃. І҆рмо́съ:
Ꙗ҆́кѡ по сꙋ́хꙋ пѣшеше́ствовавъ і҆и҃ль по бе́зднѣ стопа́ми, гони́телѧ фараѡ́на ви́дѧ потоплѧ́ема, бг҃ꙋ побѣ́днꙋю пѣ́снь, пои́мь, вопїѧ́ше.
Сокрꙋше́ннагѡ се́рдца стена́нїе ᲂу҆слы́шавъ, влⷣко, дꙋшѝ моеѧ̀ лю́тое сокрꙋше́нїе и҆сцѣлѝ моли́твами преподо́бнагѡ твоегѡ̀, хрⷭ҇тѐ, ꙗ҆́кѡ всеси́ленъ. (с. 72)
Вше́дъ ты̀, бг҃оно́се, въ дѣ́тельнꙋю добродѣ́тель, і҆сі́дѡре, видѣ́нїемъ чи́стымъ, и҆ кра́снымъ ꙗ҆вле́нїемъ бг҃ꙋ бесѣ́дꙋѧ всегда̀, ꙗ҆́вѣ ѡ҆богати́лсѧ є҆сѝ.
Премꙋ́дрости ча́ши прине́съ твоѧ̑ ᲂу҆ста̀, премꙋ́дре, и҆́же ѿѻнꙋ́дꙋ дарова́нїй и҆сто́чникъ поче́рплъ є҆сѝ, бг҃ꙋ побѣ́днꙋю пѣ́снь воспѣва́ѧ.
Бг҃оро́диченъ:
Ꙗ҆́кѡ на ле́гцѣмъ ѻ҆́блацѣ содѣ́тель на тебѣ̀ прїи́де, низложи́ти ꙗ҆́кѡ си́ленъ є҆гѵ́пєтскїѧ, влⷣчце чⷭ҇таѧ, рꙋкотворє́ннаѧ, хрⷭ҇то́съ ꙗ҆́кѡ всеси́льный.
Пѣ́снь г҃. І҆рмо́съ:
Оу҆твержде́нїе на тѧ̀ надѣ́ющихсѧ, ᲂу҆твердѝ, гдⷭ҇и, цр҃ковь, ю҆́же стѧжа́лъ є҆сѝ честно́ю твое́ю кро́вїю.
Перворожде́нъ и҆зъ ѻ҆ц҃а̀ пре́жде вѣ̑къ, перворожде́нъ младе́нецъ и҆зъ дв҃ы нетлѣ́нныѧ, а҆да́мꙋ рꙋ́кꙋ простира́ѧ ꙗ҆ви́сѧ.
Младоꙋ́мна бы́вша пре́лестїю первозда́ннаго, па́ки и҆справлѧ́ѧй бг҃ъ сло́во, младе́нствовавъ ꙗ҆ви́сѧ.
Землѝ и҆сча́дїе, па́ки поте́кшее въ ню̀, бж҃ества̀ соѻбра́зное є҆стество̀ зижди́тель, ꙗ҆́кѡ непрело́жнѣ, младе́нствовавъ ꙗ҆вѝ.
И҆́нъ. І҆рмо́съ:
Нѣ́сть ст҃ъ, ꙗ҆́коже ты̀, гдⷭ҇и бж҃е мо́й, вознесы́й ро́гъ вѣ́рныхъ твои́хъ, бл҃же, и҆ ᲂу҆тверди́вый на́съ на ка́мени и҆сповѣ́данїѧ твоегѡ̀.
Оу҆ма̀ ѻ҆строто́ю, мꙋ́дре, сꙋ́щихъ собра́въ, пресла́вне, є҆стество̀, и҆́мже нача́льнꙋю винꙋ̀, ꙗ҆́кѡ чи́стъ бг҃осло́въ, неле́стнѡ пости́глъ є҆сѝ.
Поꙋче́нїе положи́въ ꙗ҆́снѡ сме́рти житїю̀, бг҃оно́се треблаже́нне, страсте́й вє́щныѧ вины̑ ᲂу҆мертви́лъ є҆сѝ, безстра́стїѧ ѡ҆б̾ѧ́тъ бы́въ жела́нїемъ.
Въ слѣ́дъ ра́дꙋѧсѧ хрⷭ҇та̀ крⷭ҇тъ тво́й носи́въ послѣ́довалъ є҆сѝ, ѻ҆́ч҃е, въ постѣ̀ тве́рдѣмъ, и҆ семꙋ̀ ꙗ҆́кѡ мо́щно ᲂу҆подо́билсѧ є҆сѝ житїѧ̀ чистото́ю.
Бг҃оро́диченъ:
Зако́нныхъ є҆стества̀ кромѣ̀ влⷣкꙋ ро́ждши, бцⷣе дв҃о, (с. 73) дре́внюю преслꙋша́нїѧ клѧ́твꙋ разори́ла є҆сѝ, благослове́нїѧ и҆сто́чникъ и҆сточа́ющи.
Конда́къ, гла́съ д҃. Подо́бенъ: Ꙗ҆ви́лсѧ є҆сѝ:
Денни́цꙋ дрꙋгꙋ́ю тѧ̀ цр҃ковь ѡ҆брѣ́тши, пресла́вне, твои́хъ слове́съ мо́лнїѧми ѡ҆свѣща́ема, взыва́етъ тѝ: ра́дꙋйсѧ, всеблаже́нне бг҃омꙋ́дре і҆сі́дѡре.
Сѣда́ленъ, гла́съ г҃. Подо́бенъ: Бж҃е́ственныѧ вѣ́ры:
Кни́га ра́зꙋма ᲂу҆че́нїѧ бога́тствомъ вѣ́ры сочинена̀, прест҃о́мꙋ ꙗ҆ви́лсѧ є҆сѝ дх҃ꙋ, ѿкрыва́ѧ бжⷭ҇твєннаѧ тре́бꙋющымъ, и҆ жи́знь сокро́вищствꙋѧ хотѧ́щымъ: ѻ҆́ч҃е прпⷣбне, хрⷭ҇та̀ бг҃а молѝ, дарова́ти на́мъ ве́лїю ми́лость.
Сла́ва, и҆ ны́нѣ, пра́здника.
Сѣда́ленъ, гла́съ и҃. Подо́бенъ: Воскре́съ:
Роди́лсѧ є҆сѝ на землѝ собезнача́льный ѻ҆ц҃ꙋ̀, прине́слсѧ є҆сѝ въ це́рковь непостижи́мый: ра́дꙋѧсѧ же ста́рецъ на рꙋ́ки тѧ̀ воспрїе́мъ, зовы́й: ны́нѣ ѿпꙋща́еши, є҆го́же посѣти́лъ є҆сѝ, по глаго́лꙋ твоемꙋ̀, благоизво́ливый спастѝ ꙗ҆́кѡ бг҃ъ ро́дъ человѣ́ческїй.
А҆́ще є҆́сть по́стъ, Сла́ва, и҆ ны́нѣ, бг҃оро́диченъ: а҆́ще среда̀ и҆лѝ пѧто́къ, крⷭ҇тобг҃оро́диченъ. Пи̑саны сегѡ̀ мцⷭ҇а къ і҃ де́нь.
Пѣ́снь д҃. І҆рмо́съ:
Покры́ла є҆́сть нб҃са̀ добродѣ́тель твоѧ̀, хрⷭ҇тѐ: и҆зъ кївѡ́та бо проше́дъ, ст҃ы́ни твоеѧ̀ нетлѣ́нныѧ мт҃ре, въ хра́мѣ сла́вы твоеѧ̀ ꙗ҆ви́лсѧ є҆сѝ, ꙗ҆́кѡ млⷣнецъ рꙋконоси́мь: и҆ и҆спо́лнишасѧ всѧ̑ твоегѡ̀ хвале́нїѧ.
Ра́дꙋѧсѧ, сѷмеѡ́не, неизрече́нныхъ таи́нниче, бцⷣа вопїѧ́ше, є҆го́же ѿ ст҃а́гѡ дре́вле и҆звѣсти́сѧ тебѣ̀ дх҃а, младе́нствовавшаго сло́ва хрⷭ҇та̀ на рꙋ́ки прїимѝ, зовы́й є҆мꙋ̀: и҆спо́лнишасѧ всѧ̑ твоегѡ̀ хвале́нїѧ.
На него́же ᲂу҆пова́лъ є҆сѝ, сѷмеѡ́не, во́зрастъ дѣ́тищный, ра́дꙋѧсѧ под̾имѝ хрⷭ҇та̀, і҆и҃лѧ бжⷭ҇твеннагѡ ᲂу҆тѣше́нїе, (с. 74) зако́на творца̀ и҆ влⷣкꙋ, и҆сполнѧ́ющаго зако́на чи́нъ, зовы́й є҆мꙋ̀: и҆спо́лнишасѧ всѧ̑ твоегѡ̀ хвале́нїѧ.
Ви́дѧ сѷмеѡ́нъ сло́во безнача́льное, съ пло́тїю ꙗ҆́кѡ на престо́лѣ херꙋві́мстѣмъ дв҃ою носи́мо, вино́внаго, є҆́же бы́ти всѧ́ческихъ, ꙗ҆́кѡ младе́нцꙋ дивѧ́сѧ, вопїѧ́ше є҆мꙋ̀: и҆спо́лнишасѧ всѧ̑ твоегѡ̀ хвале́нїѧ.
И҆́нъ. І҆рмо́съ:
Хрⷭ҇то́съ моѧ̀ си́ла, бг҃ъ и҆ гдⷭ҇ь, честна́ѧ цр҃ковь бг҃олѣ́пнѡ пое́тъ, взыва́ющи ѿ смы́сла чи́ста, ѡ҆ гдⷭ҇ѣ пра́зднꙋющи.
Незави́стнѡ, прпⷣбне, хрⷭ҇тꙋ̀ повинꙋ́ѧсѧ, да́нное тебѣ̀ бога́тство, ꙗ҆́кѡ благопокори́въ ра́бъ разда́лъ є҆сѝ, и҆ несказа́нныѧ тѧ̀ ра́дости влⷣка сподо́би.
Премꙋ́дрости пꙋчи́нꙋ преплы́въ, до́брый би́серъ ꙗ҆́кѡ до́бръ кꙋпе́цъ прїѡбрѣ́лъ є҆сѝ, и҆ се́й то́кмѡ сокро́вище неѡскꙋ́днѡ стѧжа́лъ є҆сѝ.
Бжⷭ҇твеннымъ дх҃омъ ѡ҆сїѧ́емь, лꙋчы̀ слове́съ со́лнечнѡ всѣ̑мъ и҆спꙋсти́лъ є҆сѝ, спасе́нїѧ вѣ̑рнымъ, бг҃оѧвле́нне, жела́ѧ.
Бг҃оро́диченъ:
Ꙗ҆́кѡ вои́стиннꙋ неизглагѡ́ланна и҆ непости̑жна твоегѡ̀, бцⷣе, бг҃олѣ́пнагѡ сꙋ́ть ржⷭ҇тва̀, сꙋ́щымъ на землѝ и҆ на нб҃сѝ, приснодв҃о, та̑инства.
Пѣ́снь є҃. І҆рмо́съ:
Ꙗ҆́кѡ ви́дѣ и҆са́їа ѻ҆бра́знѡ на престо́лѣ превознесе́на бг҃а, ѿ а҆́гг҃лъ сла́вы дѡрѷноси́ма, ѽ ѻ҆каѧ́нный, вопїѧ́ше, а҆́зъ: прови́дѣхъ бо воплоща́ема бг҃а, свѣ́та невече́рнѧ и҆ ми́ромъ влады́чествꙋюща.
Разꙋмѣ́въ бжⷭ҇твенный ста́рецъ проѧвле́ннꙋю дре́вле прⷪ҇ро́кꙋ сла́вꙋ рꙋка́ми сло́во зрѧ̀ ма́терними держи́мо, ѽ ра́дꙋйсѧ, вопїѧ́ше, чⷭ҇таѧ! ꙗ҆́кѡ прⷭ҇то́лъ бо держи́ши бг҃а, свѣ́та невече́рнѧго и҆ ми́ромъ влады́чествꙋюща.
Покло́нсѧ ста́рецъ, и҆ стопа́мъ бжⷭ҇твеннѣ прикоснꙋ́всѧ неискꙋсобра́чныѧ и҆ бг҃омт҃ре, ѻ҆́гнь, речѐ, но́сиши, чⷭ҇таѧ: младе́нца бою́сѧ ѡ҆б̾ѧ́ти бг҃а, свѣ́та невече́рнѧго и҆ ми́ромъ влады́чествꙋюща. (с. 75)
Ѡ҆чища́етсѧ и҆са́їа, ѿ серафі́ма ᲂу҆́гль прїе́мъ, ста́рецъ вопїѧ́ше бг҃омт҃ри: ты̀ ꙗ҆́коже клеща́ми рꙋка́ми просвѣща́еши мѧ̀, пода́вши, є҆го́же но́сиши, свѣ́та невече́рнѧго и҆ ми́ромъ влады́чествꙋюща.
И҆́нъ. І҆рмо́съ:
Бж҃їимъ свѣ́томъ твои́мъ, бл҃же, ᲂу҆́тренюющихъ тѝ дꙋ́шы любо́вїю ѡ҆зарѝ, молю́сѧ, тѧ̀ вѣ́дѣти, сло́ве бж҃їй, и҆́стиннаго бг҃а, ѿ мра́ка грѣхо́внагѡ взыва́юща.
Оу҆мерщвле́нїемъ, всемꙋ́дре, страсте́й, внѣ̀ бы́въ пло́ти, любо́вїю бг҃ꙋ прибли́жилсѧ є҆сѝ, прест҃о́мꙋ и҆ пресвѣ́тломꙋ свѣ́тꙋ, є҆ди́номꙋ и҆стѧзꙋ́ющемꙋ чистотꙋ̀.
Бжⷭ҇твеннымъ сїѧ́нїемъ твои́мъ, бла́же, ᲂу҆́мъ бг҃оно́сецъ ѡ҆зари́въ, сто́лпъ всесвѣ́телъ бы́сть, всѣ̑мъ посыла́ѧ бж҃е́ственнагѡ свѣ́та бжⷭ҇твєнныѧ зари̑, и҆ мра́къ невѣ́дѣнїѧ ѿгонѧ̀.
Хотѧ́й всѣ̑мъ, ꙗ҆́кѡ бла́гъ, всемꙋ́дре, спасти́сѧ, наста́вника заблꙋ́ждшымъ тѧ̀ показа̀, мнѡ́гїѧ ѡ҆браща́ти ко спасе́нїѧ пꙋтѝ, і҆сі́дѡре треблаже́нне, ѻ҆́ч҃е пребога́те.
Бг҃оро́диченъ:
Вои́стиннꙋ ᲂу҆сты̀ и҆ дꙋше́ю, влⷣчце мі́ра бл҃га́ѧ, и҆сповѣ́даю тѧ̀, всенепоро́чнаѧ, воплоще́нна бг҃а ро́ждшꙋю, чи́стаѧ, и҆ житїѧ̀ тѧ̀ предста́тельницꙋ вѣ́рою предлага́ю.
Пѣ́снь ѕ҃. І҆рмо́съ:
Возопѝ къ тебѣ̀, ви́дѣвъ ста́рецъ ѻ҆чи́ма спасе́нїе, є҆́же лю́демъ прїи́де ѿ бг҃а, хрⷭ҇тѐ, ты̀ бг҃ъ мо́й.
Сїѡ́нꙋ ты̀ ка́мень возложи́лсѧ є҆сѝ, непокори̑вымъ претыка́нїе, и҆ собла́зна ка́мень, нерꙋши́мое вѣ́рныхъ спасе́нїе.
И҆звѣ́стнѣ носѧ̀ начерта́нїе, и҆́же пре́жде вѣ̑къ тѧ̀ и҆зрасти́вшагѡ, земны́хъ за милосе́рдїе ны́нѣ не́мощїю ѡ҆бложи́сѧ.
Сн҃ꙋ вы́шнѧгѡ, сн҃ꙋ дв҃ы, бг҃ꙋ ѻ҆троча́ти бы́вшемꙋ, покло́ншасѧ тебѣ̀ ны́нѣ ѿпꙋстѝ съ ми́ромъ. (с. 76)
И҆́нъ. І҆рмо́съ:
Жите́йское мо́ре, воздвиза́емое зрѧ̀ напа́стей бꙋ́рею, къ ти́хомꙋ приста́нищꙋ твоемꙋ̀ прите́къ, вопїю́ ти: возведѝ ѿ тлѝ живо́тъ мо́й, многоми́лостиве.
Словесы̀ сꙋ́дными ᲂу҆кра́шсѧ ꙗ҆́кѡ і҆ере́й, слове́снѡ разсꙋди́лъ є҆сѝ, бг҃оно́се, и҆ тѣ́ломъ и҆ дꙋше́ю, и҆ го́ршее лꙋ́чшемꙋ повинꙋ́въ смы́сленнѡ, досточꙋ́дне.
Благомо́щнѡ є҆гѵ́пта страсте́й и҆ пи́щи, ты̀ мона́шествꙋющихъ похвало̀, воздержа́тельными, сла́вне, ꙗ҆́звами, и҆стѧзꙋ́ѧ ᲂу҆ѧзви́лъ є҆сѝ, вѣ̑рнымъ ᲂу҆глажда́ѧ прехожде́нїе.
Бг҃оро́диченъ:
Носѧ́й всѧ́чєскаѧ си́лою бжⷭ҇твенною, и҆ содержа́й ꙗ҆́кѡ бл҃гоꙋтро́бенъ твои́ми ѡ҆б̾ѧ̑тїи, пречⷭ҇таѧ, вопло́щсѧ, ꙗ҆́кѡ младе́нецъ но́ситсѧ, и҆́же ѻ҆ц҃ꙋ̀ по сꙋществꙋ̀ соприсносꙋ́щный.
Конда́къ пра́здника, гла́съ а҃:
Оу҆тро́бꙋ дв҃и́чꙋ ѡ҆ст҃и́вый ржⷭ҇тво́мъ твои́мъ, и҆ рꙋ́цѣ сѷмеѡ́нѣ благослови́вый, ꙗ҆́коже подоба́ше, предвари́въ, и҆ ны́нѣ спа́слъ є҆сѝ на́съ, хрⷭ҇тѐ бж҃е: но ᲂу҆мирѝ во бранѣ́хъ жи́тельство, и҆ ᲂу҆крѣпѝ лю́ди, и҆́хже возлюби́лъ є҆сѝ, є҆ди́не человѣколю́бче.
І҆́косъ:
Къ бцⷣѣ притеце́мъ, хотѧ́щїи сн҃а є҆ѧ̀ ви́дѣти, къ сѷмеѡ́нꙋ носи́ма, є҆го́же съ нб҃сѐ безпло́тнїи ви́дѧще, дивлѧ́хꙋсѧ глаго́люще: чꙋ̑днаѧ зри́мъ ны́нѣ и҆ пресла̑внаѧ, непостижи̑маѧ, несказа̑ннаѧ: и҆́же бо а҆да́ма созда́вый, но́ситсѧ ꙗ҆́кѡ младе́нецъ: невмѣсти́мый вмѣща́етсѧ на рꙋка́хъ ста́рчихъ: и҆́же въ нѣ́дрѣхъ неѡпи́санныхъ сы́й ѻ҆ц҃а̀ своегѡ̀, во́лею ѡ҆писꙋ́етсѧ пло́тїю, а҆ не бжⷭ҇тво́мъ, є҆ди́нъ чл҃вѣколю́бецъ.
Пѣ́снь з҃. І҆рмо́съ:
Тебѐ во ѻ҆гнѝ ѡ҆роси́вшаго ѻ҆́троки бг҃осло́вившыѧ, и҆ въ дв҃ꙋ нетлѣ́ннꙋ все́льшагосѧ, бг҃а сло́ва пои́мъ, благоче́стнѡ пою́ще: благослове́нъ бг҃ъ ѻ҆тє́цъ на́шихъ. (с. 77)
А҆да́мꙋ и҆звѣсти́ти хотѧ́й и҆дꙋ̀, во а҆́дѣ живꙋ́щꙋ, и҆ є҆́ѵѣ принестѝ бл҃говѣ́стїе, сѷмеѡ́нъ вопїѧ́ше, со прⷪ҇рѡ́ки ликꙋ́ѧ: благослове́нъ бг҃ъ ѻ҆тє́цъ на́шихъ.
Ро́да зе́мна и҆збавлѧ́ѧй бг҃ъ, да́же до а҆́да прїи́детъ: плѣ̑ннымъ же пода́стъ всѣ̑мъ ѡ҆ставле́нїе, и҆ прозрѣ́нїе слѣпы̑мъ, ꙗ҆́кѡ и҆ нѣмы̑мъ вопи́ти: благослове́нъ бг҃ъ ѻ҆тє́цъ на́шихъ.
И҆ твоѐ се́рдце, нетлѣ́ннаѧ, ѻ҆рꙋ́жїе про́йдетъ, сѷмеѡ́нъ бцⷣѣ провозгласѝ, на крⷭ҇тѣ̀ зрѧ́щи твоего̀ сн҃а, є҆мꙋ́же вопїе́мъ: бл҃гослове́нъ бг҃ъ ѻ҆тє́цъ на́шихъ.
И҆́нъ. І҆рмо́съ:
Росода́тельнꙋ ᲂу҆́бѡ пе́щь содѣ́ла а҆́гг҃лъ преподѡ́бнымъ ѻ҆трокѡ́мъ, халдє́и же ѡ҆палѧ́ющее велѣ́нїе бж҃їе мꙋчи́телѧ ᲂу҆вѣща̀ вопи́ти: благослове́нъ є҆сѝ, бж҃е ѻ҆тє́цъ на́шихъ.
На тве́рди вѣ́ры поста́ви, ѻ҆́ч҃е, ꙗ҆́коже со́лнце влⷣка тѧ̀, просвѣща́ти сїѧ́нїемъ мы́сленнымъ дꙋ́шы вопїю́щихъ прилѣ́жнѡ: благослове́нъ є҆сѝ, бж҃е ѻ҆тє́цъ на́шихъ.
Сквє́рны плотскі̑ѧ и҆ дꙋхѡ́вныѧ ѿмы́лъ є҆сѝ, блаже́нне, сле́зъ и҆злїѧ́ньми, и҆ бы́въ, бг҃оно́сне, свѣ́тъ сꙋ́щымъ на землѝ, всѧ̑ наꙋчи́лъ є҆сѝ вопи́ти: благослове́нъ є҆сѝ, бж҃е ѻ҆тє́цъ на́шихъ.
Бг҃оро́диченъ:
На недви́жимѣмъ вѣ́ры стоѧ́ще ѡ҆снова́нїи, тѧ̀, бг҃омт҃рь чⷭ҇таѧ, и҆сповѣ́дꙋемъ бцⷣꙋ: сло́во бо бж҃їе безъ сѣ́мене родила̀ є҆сѝ на́мъ: благослове́нъ, пречⷭ҇таѧ, пло́дъ чре́ва твоегѡ̀.
Пѣ́снь и҃. І҆рмо́съ:
Нестерпи́момꙋ ѻ҆гню̀ соедини́вшесѧ, благоче́стїѧ предстоѧ́ще ю҆́ноши, пла́менемъ же неврежде́ни, бжⷭ҇твеннꙋю пѣ́снь поѧ́хꙋ: благослови́те, всѧ̑ дѣла̀ гдⷭ҇нѧ, гдⷭ҇а, и҆ превозноси́те во всѧ̑ вѣ́ки.
Лю́дїе і҆и҃лєвы твою̀ сла́вꙋ є҆мманꙋ́ила, зрѧ́ще ѻ҆троча̀ и҆зъ дв҃ы, предъ лице́мъ бжⷭ҇твеннагѡ ковче́га ны́нѣ ликꙋ́йте, благослови́те, всѧ̑ дѣла̀ гдⷭ҇нѧ, гдⷭ҇а, и҆ превозноси́те во всѧ̑ вѣ́ки. (с. 78)
Сѐ сѷмеѡ́нъ вопїѧ́ше, прерѣка́емое зна́менїе се́й бꙋ́детъ, бг҃ъ сы́й и҆ ѻ҆троча̀, семꙋ̀, вѣ́рнїи, возопїе́мъ: благослови́те, всѧ̑ дѣла̀ гдⷭ҇нѧ, гдⷭ҇а, и҆ превозноси́те во всѧ̑ вѣ́ки.
Живо́тъ сы́й, се́й бꙋ́детъ паде́нїе непокори̑вымъ, младе́нствовавъ бг҃ъ сло́во, ꙗ҆́кѡ воста́нїе всѣ̑мъ вѣ́рою пою́щымъ: благослови́те, всѧ̑ дѣла̀ гдⷭ҇нѧ, гдⷭ҇а, и҆ превозноси́те во всѧ̑ вѣ́ки.
И҆́нъ. І҆рмо́съ:
И҆зъ пла́мене преподѡ́бнымъ ро́сꙋ и҆сточи́лъ є҆сѝ, и҆ пра́веднагѡ же́ртвꙋ водо́ю попали́лъ є҆сѝ: всѧ̑ бо твори́ши, хрⷭ҇тѐ, то́кмѡ є҆́же хотѣ́ти. тѧ̀ превозно́симъ во всѧ̑ вѣ́ки.
Ꙗ҆́кѡ слове́снꙋ же́ртвꙋ, ѻ҆́ч҃е, всѐ житїѐ твоѐ въ воню̀ благово́нїѧ прине́слъ є҆сѝ, на крⷭ҇тѣ̀ тебє̀ ра́ди повѣ́шенномꙋ хрⷭ҇тꙋ̀: є҆го́же превозно́симъ во всѧ̑ вѣ́ки.
Мно́жиши бога́тство и҆ по сме́рти, ѡ҆дꙋшевлє́на словеса̀ твоѧ̑, ꙗ҆́коже многоцѣ́нно всѣ̑мъ вѣ̑рнымъ наслѣ́дїе ѡ҆ста́вль, превозносѧ́щымъ хрⷭ҇та̀ во всѧ̑ вѣ́ки.
Оу҆краси́лсѧ є҆сѝ, преблаже́нне, добро́тою слове́съ твои́хъ: ст҃а́гѡ бо дх҃а ꙗ҆ви́лсѧ є҆сѝ тро́сть, пишѧ̀ благоче́стнѡ ра́зꙋмъ бж҃е́ственъ, превозносѧ́щымъ гдⷭ҇а во всѧ̑ вѣ́ки.
Бг҃оро́диченъ:
Къ твоемꙋ̀ кро́вꙋ прибѣга́ю, всенепоро́чнаѧ, и҆ предста́тельницꙋ жи́зни моеѧ̀ тѧ̀ ны́нѣ предлага́ю, тѧ̀ па́че ᲂу҆ма̀ бг҃а сло́ва ро́ждшꙋю, є҆го́же превозно́симъ во всѧ̑ вѣ́ки.
Пѣ́снь ѳ҃. І҆рмо́съ:
Въ зако́нѣ сѣ́ни и҆ писа́нїй, ѻ҆́бразъ ви́димъ, вѣ́рнїи: всѧ́къ мꙋ́жескїй по́лъ, ложесна̀ разверза́ѧ, ст҃ъ бг҃ꙋ. тѣ́мъ перворожде́нное сло́во ѻ҆ц҃а̀ безнача́льна, сн҃а первородѧ́щасѧ мт҃рїю неискꙋсомꙋ́жнѡ, велича́емъ.
И҆́же дре́внимъ новорожде́нныхъ го́рличищъ сꙋпрꙋ́гъ, дво́ица же бѧ́ше птенцє́въ, въ ни́хже мѣ́сто бжⷭ҇твенный ста́рецъ, и҆ цѣломꙋ́дреннаѧ а҆́нна проро́чица, ѿ дв҃ы (с. 79) рожде́нномꙋ, и҆ сн҃ꙋ є҆диноро́дномꙋ ѻ҆́ч҃ꙋ, въ це́рковь приноси́мꙋ, слꙋ́жатъ велича́юще.
Возда́лъ є҆сѝ мнѣ̀, вопїѧ́ше сѷмеѡ́нъ, спасе́нїѧ твоегѡ̀, хрⷭ҇тѐ, ра́дованїе: воспрїимѝ твоего̀ слꙋжи́телѧ сѣ́нїю претрꙋжде́ннаго, но́выѧ благода́ти сщ҃еннопроповѣ́дника та́йнаго, во хвале́нїи велича́юща.
Сщ҃еннолѣ́пнѡ и҆сповѣ́дашесѧ а҆́нна прорица́ющи, цѣломꙋ́дреннаѧ и҆ преподо́бнаѧ и҆ ста́рица, влⷣцѣ, въ це́ркви ꙗ҆́вственнѡ: бцⷣꙋ же проповѣ́дающи всѣ̑мъ сꙋ́щымъ, велича́ше.
И҆́нъ. І҆рмо́съ:
Бг҃а человѣ́кѡмъ невозмо́жно ви́дѣти, на него́же не смѣ́ютъ чи́ни а҆́гг҃льстїи взира́ти: тобо́ю бо, всечⷭ҇таѧ, ꙗ҆ви́сѧ человѣ́кѡмъ сло́во воплоще́нно: є҆го́же велича́юще, съ нбⷭ҇ными вѡ́и, тѧ̀ ᲂу҆блажа́емъ.
Ꙗ҆́коже зарѧ̀ свѣ́та ѡ҆блиста̀ въ твою̀ дꙋ́шꙋ благода́ти сло́во, преподо́бне, тобо́ю же всѧ̀ землѧ̀ и҆спо́лнисѧ тогѡ̀ сїѧ́нїѧ: є҆мꙋ́же причаща́ющїисѧ, твоеѧ̀ мꙋ́дрости сокро́вищꙋ, ѻ҆́ч҃е, ᲂу҆дивлѧ́емсѧ.
Тре́мъ ли́цамъ во є҆ди́нствѣ є҆стества̀, ѻ҆ч҃єскимъ послѣ́дꙋѧ ᲂу҆че́нїємъ, бг҃омꙋ́дреннѡ покланѧ́тисѧ наꙋчи́лъ є҆сѝ, чти́ти бг҃осло́вѧщыѧ несозда́ннꙋю безнача́льнꙋю трⷪ҇цꙋ, всѣ̑мъ вѣ̑рнымъ просвѣще́нїе и҆сточа́ющꙋю.
Ѡ҆брѣ́тъ трꙋдѡ́въ твои́хъ воздаѧ̑нїѧ на нб҃сѣ́хъ, жи́знь безконе́чнꙋю прїе́мъ, пою́щымъ, премꙋ́дре, па́мѧть твою̀, и҆спросѝ спасе́нїе, блаже́нне і҆сі́дѡре, престо́лꙋ бж҃їю со а҆́гг҃лы ны́нѣ предстоѧ̀.
Бг҃оро́диченъ:
Тлѣ́ненъ, сло́во бж҃їе нетлѣ́нное, ѻ҆́бразъ прїе́мъ, человѣ́ки въ нетлѣ́нїе ѡ҆блечѐ, благоволе́нїемъ ѻ҆́ч҃имъ все́льсѧ въ тѧ̀, ѡ҆бра́дованнаѧ: тѣ́мже, пречⷭ҇таѧ, съ нбⷭ҇ными вѡ́и тѧ̀ велича́емъ.
Свѣти́ленъ пра́здника:
Дх҃омъ во ст҃и́лищи предста́въ ста́рецъ, на рꙋ́ки воспрїѧ́тъ зако́на влⷣкꙋ, вопїѧ̀: ны́нѣ соꙋ̑зъ мѧ̀ плотски́хъ разрѣшѝ, (с. 80) ꙗ҆́коже ре́клъ є҆сѝ, съ ми́ромъ: ви́дѣхъ бо ѻ҆чи́ма ѿкрове́нїе ꙗ҆зы́кѡвъ и҆ і҆зра́илю спасе́нїе.
Сла́ва, и҆ ны́нѣ, то́йже.
На стїхо́внѣ стїхи̑ры пра́здника, гла́съ в҃. Поⷣ: До́ме є҆ѵфра́ѳовъ:
Скве́рны кромѣ̀ ꙳ хрⷭ҇то́съ ражда́етсѧ ѿ дв҃ы, ꙳ ꙗ҆́кѡ ѿ ѻ҆ц҃а̀ нетлѣ́ннѡ, ꙳ сн҃ъ пре́жде денни́цы, ꙳ и҆́же а҆да́ма и҆збавлѧ́ѧй.
Сті́хъ: Ны́нѣ ѿпꙋща́еши раба̀ твоего̀, влⷣко, по глаго́лꙋ твоемꙋ̀, съ ми́ромъ.
Двє́ри нбⷭ҇ныѧ, ѿве́рзитесѧ: ꙳ хрⷭ҇то́съ бо въ це́рковь ꙳ ꙗ҆́кѡ младе́нецъ, ꙳ мт҃рїю дв҃ою, ꙳ бг҃ꙋ и҆ ѻ҆ц҃ꙋ̀ прино́ситсѧ.
Сті́хъ: Свѣ́тъ во ѿкрове́нїе ꙗ҆зы́кѡвъ, и҆ сла́вꙋ люде́й твои́хъ і҆и҃лѧ.
Оу҆́гль проѧвле́йсѧ ꙳ бжⷭ҇твенномꙋ и҆са́їи хрⷭ҇то́съ, ꙳ ꙗ҆́кѡ клеща́ми, ꙳ рꙋка́ми бцⷣы, ꙳ ны́нѣ ста́рцꙋ дае́тсѧ.
Сла́ва, и҆ ны́нѣ, гла́съ з҃:
Свѣ́тъ во ѿкрове́нїе ꙗ҆зы́кѡвъ, прише́лъ є҆сѝ на зе́млю съ нб҃сѐ, сп҃се на́шъ, и҆ произше́дъ и҆з̾ дв҃ы, почи́лъ є҆сѝ на ѡ҆б̾ѧ́тїихъ пра́веднагѡ сѷмеѡ́на: подоба́ше бо тѝ, жизнода́вче всѣ́хъ, ѿ ста́рца позна́тисѧ, ꙗ҆́кѡ прїи́де ѿпꙋсти́ти є҆го̀, по глаго́лꙋ твоемꙋ̀, и҆мѣ́ѧй ве́лїю ми́лость.
Слꙋ́жба ст҃а́гѡ бл҃говѣ́рнагѡ вели́кагѡ кнѧ́зѧ геѡ́ргїа.
На ма́лѣй вече́рни стїхи̑ры, гла́съ а҃. Подо́бенъ: Нбⷭ҇ныхъ чинѡ́въ:
Нбⷭ҇ныхъ чинѡ́въ слико́вника, и҆ мꙋ́ченикѡвъ сострада́льца, ꙳ премꙋ́драго во́ина благоче́стїѧ, ꙳ и҆ и҆́стиннаго проповѣ́дника хрⷭ҇то́ва, геѡ́ргїа великоимени́таго ꙳ восхва́лимъ, вѣ́рнїи, ра́дꙋющесѧ.
Два́жды. (с. 81)
Хрⷭ҇тїа́нѡмъ забра́ло крѣ́пкое, ꙳ столпа̀ непоколеби́маго ꙳ мꙋчи́тельскими прещє́нїи, ꙳ кꙋпца̀ всеизрѧ́днаго, ꙳ тлѣ̑ннаѧ на нетлѣ̑ннаѧ и҆змѣни́вшаго, ꙳ и҆ на́съ свы́ше назира́юща ꙳ вѣ́рнѡ ᲂу҆блажи́мъ.
И҆зрѧ́днаго страда́телѧ всѝ геѡ́ргїа, ꙳ свѣ́тлаго храбо́рника, ꙳ ны́нѣ на́мъ возсїѧ́вшаго ꙳ и҆́стиннагѡ страда́нїѧ лꙋча́ми, ꙳ воспое́мъ веселѧ́щесѧ, ꙳ и҆ тогѡ̀ моще́мъ покланѧ́емсѧ.
Сла́ва, гла́съ ѕ҃:
Дне́сь рѡссі́йскаѧ страна̀ страстоте́рпческими просвѣща́етсѧ зарѧ́ми, и҆ хрⷭ҇то́ва це́рковь цвѣ́ты ᲂу҆краша́ема, геѡ́ргїе, вопїе́тъ тѝ: ᲂу҆го́дниче хрⷭ҇то́въ и҆ предста́телю те́плый, не преста́й молѧ́сѧ ѡ҆ рабѣ́хъ твои́хъ.
И҆ ны́нѣ, бг҃оро́диченъ.
На стїхо́внѣ стїхи̑ры, гла́съ в҃. Подо́бенъ: До́ме є҆ѵфра́ѳовъ:
И҆́мамы тѧ̀ мно́гихъ ꙳ да́телѧ дарова́нїй, ꙳ ᲂу҆го́дниче гдⷭ҇ень: ꙳ и҆сполнѧ́еши бо прошє́нїѧ, ꙳ ꙗ҆̀же и҆́мамы всегда̀.
Сті́хъ: Пра́ведникъ, ꙗ҆́кѡ фі́нїѯъ, процвѣте́тъ, ꙗ҆́кѡ ке́дръ, и҆́же въ лїва́нѣ, ᲂу҆мно́житсѧ.
Пѣ̑нїѧ сла̑дкаѧ, ꙳ страсте́й похвалє́нїѧ, ꙳ благода́темъ воздаѧ̑нїѧ, ꙳ предложе́нїе, блаже́нне, ꙳ прїимѝ, геѡ́ргїе.
Сті́хъ: Насажде́ни въ домꙋ̀ гдⷭ҇ни, во дво́рѣхъ бг҃а на́шегѡ процвѣтꙋ́тъ.
Добро́та страда́льцємъ, ꙳ благолѣ́пїе мꙋ́ченикѡмъ, ꙳ царє́мъ храни́телю, ꙳ прїимѝ ны́нѣ похвалꙋ̀ ꙳ вѣ́рою сла́вѧщихъ.
Сла́ва, и҆ ны́нѣ, бг҃оро́диченъ, гла́съ и҆ подо́бенъ то́йже:
Дѣ́ло благолѣ́пно, ꙳ дв҃а по ржⷭ҇твѣ̀, ꙳ рожде́нїе бг҃ъ сло́во, ꙳ человѣ́че є҆стество̀ и҆мѣ́ѧй, ꙳ и҆ ꙗ҆влѧ́ѧ бжⷭ҇твєннаѧ.
На вели́цѣй вече́рни. Блаже́нъ мꙋ́жъ: а҃-й а҆нтїфѡ́нъ.
На Гдⷭ҇и, воззва́хъ, стїхи̑ры, гла́съ а҃. Подо́бенъ: Всехва́льнїи:
І҆сма́ильтескими кꙋма́ны ꙳ твоѐ мꙋ́жество не прело́жсѧ, ꙳ (с. 82) бл҃говѣ́рный вели́кїй кнѧ́же геѡ́ргїе прехва́льне, ꙳ и҆ бжⷭ҇твенною благода́тїю ꙳ побѣдоно́сецъ ꙗ҆ви́сѧ, ꙳ и҆ ли́къ приве́лъ є҆сѝ мꙋ́чєникъ, ꙳ хрⷭ҇тꙋ̀ во́инствꙋеши, ꙳ ѿ всѧ́кагѡ, сла́вне, во́зраста совокꙋплѧ́емь, ꙳ и҆ ѿ ро́да всѧ́кагѡ составлѧ́емь.
Геѡ́ргїе прехва́льне, ꙳ кра́сный ли́къ соста́вивъ ꙳ спострада́вшихъ съ тобо́ю: ꙳ съ ни́миже подвиза́лсѧ є҆сѝ до́брымъ по́двигомъ, ꙳ тече́нїе соверши́въ твоегѡ̀ мꙋ́жества страда́нїе: тѣ́мъ моли́сѧ, ꙳ дарова́ти дꙋша́мъ на́шымъ ꙳ ми́ръ и҆ ве́лїю ми́лость.
Во́ини бг҃омꙋ́дрїи, ꙳ хрⷭ҇то́вымъ раче́нїемъ распалѧ́еми, ꙳ не́мѡщи є҆сте́ствєнныѧ забы́ша, ꙳ и҆ си́лою бжⷭ҇твенною ꙳ ꙗ҆́вѣ ᲂу҆крѣплѧ́еми, ꙳ го́рдость безбо́жныхъ попра́ша, ꙳ не ᲂу҆страши́вшесѧ мꙋче́нїѧ болѣ́зней, ꙳ и҆ ме́чнагѡ стремле́нїѧ не ᲂу҆боѧ́вшесѧ.
Сла́ва, гла́съ д҃. Самогла́сенъ:
Пѣ́сненнѡ пастыренача́льника дне́сь, вѣ́рнїи, є҆диномы́сленнѡ почти́мъ, геѡ́ргїа сла́внаго со дрꙋжи́ною є҆гѡ̀, и҆̀же кро́вь пролїѧ́ша за правосла́внꙋю вѣ́рꙋ: тѣ́мъ и҆ ꙗ҆зы́ческїй ꙗ҆́ростный ѻ҆́блакъ попалѧ́ше на лицы̀ землѝ, ѡ҆блича́ѧ на́шꙋ триплете́ннꙋю ѕло́бꙋ. тѣ́мъ, хрⷭ҇тѐ бж҃е, и҆́же своего̀ страстоте́рпца ᲂу҆крѣпи́въ, и҆ на́съ соблюдѝ, ꙗ҆́кѡ всѣ́хъ влⷣка, ѿ и҆скꙋше́нїй и҆ скорбе́й, моли́твами ст҃ы́хъ твои́хъ.
И҆ ны́нѣ, пра́здника, и҆лѝ бг҃оро́диченъ.
Вхо́дъ. Прокі́менъ днѐ. Чтє́нїѧ трѝ.
Прⷪ҇ро́чества и҆са́їина чте́нїе.
[Глава̀ м҃г] Та́кѡ гл҃го́летъ гдⷭ҇ь: всѝ ꙗ҆зы́цы собра́шасѧ вкꙋ́пѣ, и҆ соберꙋ́тсѧ кнѧ́зи ѿ ни́хъ, кто̀ возвѣсти́тъ сїѧ̑ въ ни́хъ; и҆лѝ ꙗ҆̀же ѿ нача́ла, кто̀ слы̑шана сотвори́тъ ва́мъ; да приведꙋ́тъ свидѣ́тели своѧ̑, и҆ ѡ҆правдѧ́тсѧ, и҆ да ᲂу҆слы́шатъ, и҆ да рекꙋ́тъ и҆́стинꙋ. бꙋ́дите мѝ свидѣ́тели, и҆ а҆́зъ свидѣ́тель, гл҃го́летъ гдⷭ҇ь бг҃ъ: и҆ ѻ҆́трокъ є҆го́же и҆збра́хъ, да позна́ете, и҆ вѣ́рꙋете мѝ, и҆ разꙋмѣ́ете, ꙗ҆́кѡ а҆́зъ (с. 83) є҆́смь, пре́жде менє̀ не бы́сть и҆́нъ бо́гъ, и҆ по мнѣ̀ не бꙋ́детъ. А҆́зъ є҆́смь бг҃ъ, и҆ нѣ́сть ра́звѣ менє̀ спаса́ѧй. А҆́зъ возвѣсти́хъ и҆ спасо́хъ, ᲂу҆ничижи́хъ, и҆ не бѣ̀ въ ва́съ чꙋ́ждїй. Вы̀ мнѣ̀ свидѣ́тели, и҆ а҆́зъ гдⷭ҇ь бг҃ъ, и҆ є҆щѐ ѿ нача́ла а҆́зъ є҆́смь, и҆ нѣ́сть ѿ рꙋ́къ мои́хъ и҆збавлѧ́ѧй. сотворю̀, и҆ кто̀ ѿврати́тъ то̀; си́це гл҃го́летъ гдⷭ҇ь бг҃ъ, и҆збавлѧ́ѧй ва́съ ст҃ы́й і҆и҃левъ.
Премꙋ́дрости соломѡ́ни чте́нїе.
[Глава̀ г҃] Пра́ведныхъ дꙋ́ши въ рꙋцѣ̀ бж҃їей, и҆ не прико́снетсѧ и҆́хъ мꙋ́ка. Непщева́ни бы́ша во ѻ҆чесѣ́хъ безꙋ́мныхъ ᲂу҆мре́ти, и҆ вмѣни́сѧ ѡ҆ѕлобле́нїе и҆схо́дъ и҆́хъ: и҆ є҆́же ѡ҆ на́съ ше́ствїе сокрꙋше́нїе, ѻ҆ни́ же сꙋ́ть въ ми́рѣ. И҆́бо предъ лице́мъ человѣ́ческимъ а҆́ще и҆ мꙋ́кꙋ прїи́мꙋтъ, ᲂу҆пова́нїе и҆́хъ безсме́ртїѧ и҆спо́лнено. И҆ вма́лѣ нака́зани бы́вше, вели́кими благодѣ́тельствовани бꙋ́дꙋтъ, ꙗ҆́кѡ бг҃ъ и҆скꙋсѝ ѧ҆̀, и҆ ѡ҆брѣ́те и҆̀хъ достѡ́йны себѣ̀. Ꙗ҆́кѡ зла́то въ горни́лѣ и҆скꙋсѝ и҆̀хъ, и҆ ꙗ҆́кѡ всепло́дїе же́ртвенное прїѧ́тъ ѧ҆̀. И҆ во вре́мѧ посѣще́нїѧ и҆́хъ возсїѧ́ютъ, и҆ ꙗ҆́кѡ и҆́скры по сте́блїю потекꙋ́тъ. Сꙋ́дѧтъ ꙗ҆зы́кѡмъ, и҆ ѡ҆блада́ютъ людьмѝ, и҆ воцр҃и́тсѧ гдⷭ҇ь въ ни́хъ во вѣ́ки. Надѣ́ющїисѧ на́нь, разꙋмѣ́ютъ и҆́стинꙋ, и҆ вѣ́рнїи въ любвѝ пребꙋ́дꙋтъ є҆мꙋ̀: ꙗ҆́кѡ благода́ть и҆ ми́лость въ преподо́бныхъ є҆гѡ̀, и҆ посѣще́нїе во и҆збра́нныхъ є҆гѡ̀.
Премꙋ́дрости соломѡ́ни чте́нїе.
[Глава̀ д҃] Пра́ведникъ, а҆́ще пости́гнетъ сконча́тисѧ, въ поко́и бꙋ́детъ. Ста́рость бо честна̀ не многолѣ́тна, нижѐ въ числѣ̀ лѣ́тъ и҆счита́етсѧ. Сѣди́на же є҆́сть мꙋ́дрость человѣ́кѡмъ, и҆ во́зрастъ ста́рости житїѐ нескве́рное. Бл҃гоꙋго́денъ бг҃ови бы́въ, возлю́бленъ бы́сть, и҆ живы́й посредѣ̀ грѣ̑шникъ преста́вленъ бы́сть. Восхище́нъ бы́сть, да не ѕло́ба и҆змѣни́тъ ра́зꙋма є҆гѡ̀, и҆лѝ ле́сть прельсти́тъ (с. 84) дꙋ́шꙋ є҆гѡ̀. Раче́нїе бо ѕло́бы помрача́етъ дѡ́браѧ, и҆ паре́нїе по́хоти премѣнѧ́етъ ᲂу҆́мъ неѕло́бивъ. Сконча́всѧ вма́лѣ, и҆спо́лни лѣ̑та дѡ́лга: ᲂу҆го́дна бо бѣ̀ гдⷭ҇еви дꙋша̀ є҆гѡ̀: сегѡ̀ ра́ди потща́сѧ ѿ среды̀ лꙋка́вствїѧ. Лю́дїе же ви́дѣвше и҆ не разꙋмѣ́вше, нижѐ поло́жше въ помышле́нїи таково́е: ꙗ҆́кѡ бл҃года́ть и҆ ми́лость въ преподо́бныхъ є҆гѡ̀, и҆ посѣще́нїе во и҆збра́нныхъ є҆гѡ̀.
На лїті́и стїхи̑ры, гла́съ д҃:
Ꙗ҆́кѡ ѕвѣзда̀ пресвѣ́тлаѧ, мі́ръ просвѣща́еши чꙋде́сными блиста̑нїи, страстоте́рпче вели́кїй кнѧ́же геѡ́ргїе, мра́къ грѣхо́вный ѿгонѧ́ѧ: тѣ́мъ восхвалѧ́емъ ра́достнѡ торжествꙋ́юще твою̀ па́мѧть.
Ка́плѧми кро́ве твоеѧ̀ ѡ҆червлени́въ ри̑зы твоѧ̑, страстоте́рпче геѡ́ргїе: тѣ́мъ весе́лымъ се́рдцемъ па́мѧть твою̀ пра́зднꙋюще, мо́лимсѧ непреста́ннѡ, да мо́лишисѧ ко гдⷭ҇ꙋ за дꙋ́шы на́шѧ.
Свѣтоза́рнаѧ и҆ свѧта́ѧ наста̀ па́мѧть вели́кагѡ кнѧ́зѧ и҆ страстоте́рпца геѡ́ргїа, ꙗ҆́же рѡссі́йскꙋю зе́млю просвѣща́ющи, и҆ мра́къ грѣхо́вный ѿгонѧ́ющи, и҆сцѣле́нїй благода́ть всѣ̑мъ и҆сточа́етъ.
Сла́ва, гла́съ в҃:
Разꙋ́мнаго свѣти́льника вѣ́ры геѡ́ргїа восхва́лимъ, до́брѣ пострада́вшагѡ, и҆ кро́вїю мꙋче́нїѧ своегѡ̀ це́рковь ѡ҆багри́вша: тѣ́мъ и҆ прїѧ́тъ и҆сцѣле́нїѧ да́ръ ѻ҆би́льный, и҆сцѣлѧ́ти недꙋ́ги, вѣ́рно приходѧ́щымъ къ ра́цѣ моще́й є҆гѡ̀.
И҆ ны́нѣ, бг҃оро́диченъ:
На стїхо́внѣ стїхи̑ры, гла́съ в҃. Подо́бенъ: До́ме є҆ѵфра́ѳовъ:
Въ рѡссі́йстѣй землѝ, ꙳ ꙗ҆́коже со́лнце возсїѧ́лъ є҆сѝ, ꙳ зарѧ́ми страда́нїѧ, ꙳ всѣ́хъ привлача̀ сердца̀ и҆ помышлє́нїѧ ꙳ къ твои̑мъ чꙋдесє́мъ, пресла́вне.
Сті́хъ: Пра́ведникъ, ꙗ҆́кѡ фі́нїѯъ, процвѣте́тъ, ꙗ҆́кѡ ке́дръ, и҆́же въ лїва́нѣ, ᲂу҆мно́житсѧ. (с. 85)
Рѡссі̑йскаѧ племена̀ всѧ̑, є҆ли̑ка благочести̑ваѧ, ꙳ дх҃о́внѣ ликовствꙋ́йте пѣ́сньми, ꙳ вели́каго кнѧ́зѧ, ꙳ геѡ́ргїа пострада́вшаго.
Сті́хъ: Насажде́ни въ домꙋ̀ гдⷭ҇ни, во дво́рѣхъ бг҃а на́шегѡ процвѣтꙋ́тъ.
Послѣ̑днимъ си̑мъ временє́мъ ꙳ ты̀ красота̀ показа́лсѧ є҆сѝ, ꙳ мꙋ́ченикѡмъ ѡ҆бновлѧ́ѧ страда̑нїѧ, ꙳ и҆ до конца̀ низлага́ѧ ꙳ пре́лесть, блаже́нне, дꙋшегꙋ́бнꙋю.
Сла́ва, гла́съ и҃:
Лꙋка́вое и҆ невѣ́рное ѕлосовѣ́тїе баты́ево проразꙋмѣ́въ, благовѣ́рный вели́кїй кнѧ́же геѡ́ргїе, де́рзостїю дꙋхо́вною по хрⷭ҇тѣ̀ подвиза́лсѧ є҆сѝ съ дрꙋжи́ною: и҆ кꙋ́пнѡ до́блественнѣ мꙋ́жески терпѣ́нїемъ пострада́вше, глава́мъ ᲂу҆сѣка́ємымъ стра́шенъ въ мꙋ́ченицѣхъ показа́лсѧ є҆сѝ. дерзнове́нїе и҆мѣ́ѧ къ бг҃ꙋ, молѝ ѿ прегрѣше́нїй лю́тыхъ и҆зба́витисѧ дꙋша́мъ на́шымъ.
И҆ ны́нѣ, пра́здника, и҆лѝ бг҃оро́диченъ.
Тропа́рь, гла́съ и҃:
На высотѣ̀ вели́кагѡ кнѧже́нїѧ сѣдѧ̀, ꙗ҆ви́лсѧ є҆сѝ благоче́стїемъ и҆ вѣ́рою сїѧ́ѧ ѻ҆те́чествꙋ своемꙋ̀ ꙗ҆́кѡ со́лнце: по ст҃ѣ́й трⷪ҇цѣ ре́вностїю разже́гсѧ, и҆ за вѣ́рꙋ крѣ́пкѡ пострада́въ, кро́вь твою̀ пролїѧ́лъ є҆сѝ. тѣ́мъ и҆ ѿсѣ́ченнаѧ твоѧ̀ за хрⷭ҇та̀ глава̀ свидѣ́тельствꙋетъ ꙗ҆́вѣ ѡ҆ тебѣ̀, прилѣ́пшаѧ по сме́рти къ тѣлесѝ твоемꙋ̀: съ не́юже и҆ до дне́сь нетлѣ̑нны пребыва́ютъ мо́щи твоѧ̑, ѿ ни́хже и҆сточа́еши и҆сцѣлє́нїѧ дꙋша́мъ и҆ тѣлесє́мъ на́шымъ. Но ꙗ҆́кѡ дерзнове́нїе и҆мѣ́ѧ ко хрⷭ҇тꙋ̀, страстоте́рпче геѡ́ргїе, непреста́ннѡ молѝ, держа́вꙋ твою̀, и҆ срѡ́дникъ твои́хъ, безвре́днꙋ сохрани́ти моли́твами твои́ми.
Сла́ва, и҆ ны́нѣ, пра́здника, и҆лѝ бг҃оро́диченъ. (с. 86)
На ᲂу҆́трени по а҃-й стїхоло́гїи сѣда́ленъ, гла́съ д҃:
Подо́бенъ: Ꙗ҆ви́лсѧ є҆сѝ дне́сь:
Геѡ́ргїа дне́сь страстоте́рпца пра́здникъ сотворѧ́емъ бг҃омꙋ́дреннѡ, ꙗ҆́кѡ хрⷭ҇тꙋ̀ непреста́ннѡ молѧ́щасѧ, всѣ̑мъ да́ти ми́ръ и҆ ми́лость.
Два́жды.
Сла́ва, и҆ ны́нѣ, бг҃оро́диченъ:
Те́плое застꙋпле́нїе сꙋ́щымъ въ бѣда́хъ, на́шꙋ помо́щницꙋ и҆ къ бг҃ꙋ премѣне́нїе, є҆ѧ́же ра́ди тлѝ и҆зба́вихомсѧ, бцⷣꙋ, вѣ́рнїи, ᲂу҆блажа́емъ.
По в҃-й стїхоло́гїи сѣда́ленъ, гла́съ д҃.
Подо́бенъ: Ско́рѡ предварѝ:
Па́мѧть твоѧ̀, сла́вне мꙋ́чениче геѡ́ргїе, ᲂу҆ѧснѝ дне́сь цр҃ковь хрⷭ҇то́вꙋ, и҆ всѧ̑ собра̀ пѣ́сньми по достоѧ́нїю восхвали́ти тѧ̀, бг҃омꙋ́дре, ꙗ҆́кѡ вои́стиннꙋ во́ина, и҆ врагѡ́въ потреби́телѧ: тѣ́мже мольба́ми твои́ми и҆зба́ви на́съ ѿ и҆скꙋше́нїй.
Два́жды.
Сла́ва, и҆ ны́нѣ, бг҃оро́диченъ:
Пое́мъ тѧ̀, бг҃оневѣ́сто, мт҃и хрⷭ҇та̀ бг҃а, сла́вѧще ржⷭ҇тво̀ твоѐ непостижи́мое, и҆́мже и҆зба́вихомсѧ ѿ ле́сти дїа́воли, и҆ всѧ́ческихъ бѣ́дъ, влⷣчце бцⷣе, и҆ вѣ́рнѡ взыва́емъ: поми́лꙋй ста́до твоѐ, є҆ди́на всепѣ́таѧ.
По полѷеле́и сѣда́ленъ, гла́съ и҃. Подо́бенъ: Премꙋ́дрости:
Сїѧ̑нїи чꙋде́съ ꙗ҆́кѡ лꙋчы̀ ѡ҆блиста́еши, и҆ всѧ̑ просвѣща́еши мі́ра концы̀ ꙗ҆́кѡ ѕвѣзда̀ пресвѣ́тлаѧ, и҆ краснѡ̀ благоꙋха́еши ꙗ҆́коже дрꙋгі́й ра́й, и҆ дꙋ́шы весели́ши, и҆ ᲂу҆ставлѧ́еши недꙋ́ги: тѣ́мже тѧ̀, всеблаже́нне, по до́лгꙋ пое́мъ, и҆ любо́вїю почита́емъ честнꙋ́ю па́мѧть твою̀, страстоте́рпче вели́кїй кнѧ́же геѡ́ргїе: молѝ хрⷭ҇та̀ бг҃а, согрѣше́нїй ѡ҆ставле́нїе дарова́ти чтꙋ́щымъ любо́вїю свѧтꙋ́ю па́мѧть твою̀.
Два́жды. (с. 87)
Сла́ва, и҆ ны́нѣ, бг҃оро́диченъ:
Ꙗ҆́кѡ дв҃ꙋ и҆ є҆ди́нꙋ въ жена́хъ, тѧ̀ безъ сѣ́мене ро́ждшꙋю бг҃а пло́тїю, всѝ ᲂу҆блажа́емъ ро́ди человѣ́честїи: ѻ҆́гнь бо всели́сѧ въ тѧ̀ бжⷭ҇тва̀, и҆ ꙗ҆́кѡ младе́нца дои́ши зижди́телѧ и҆ гдⷭ҇а. тѣ́мъ а҆́гг҃льскїй и҆ человѣ́ческїй ро́дъ досто́йнѡ сла́вимъ прест҃о́е ржⷭ҇тво̀ твоѐ, и҆ согла́снѡ вопїе́мъ тѝ: молѝ хрⷭ҇та̀ бг҃а, согрѣше́нїй ѡ҆ставле́нїе дарова́ти покланѧ́ющымсѧ вѣ́рою прест҃о́мꙋ ржⷭ҇твꙋ̀ твоемꙋ̀.
Та́же степє́нна, а҃-й а҆нтїфѡ́нъ д҃-гѡ гла́са. Прокі́менъ, гла́съ д҃: Возвесели́тсѧ пра́ведникъ ѡ҆ гдⷭ҇ѣ: Сті́хъ: Оу҆слы́ши, бж҃е, гла́съ мо́й: Всѧ́кое дыха́нїе: Є҆ѵⷢ҇лїе ѿ матѳе́а, зача́ло л҃ѕ. По н҃-мъ ѱалмѣ̀ стїхи́ра, гла́съ ѕ҃:
Дне́сь цр҃ковь торжествꙋ́етъ, страстоте́рпца красѧ́щисѧ пѡ́двиги, ꙗ҆́кѡ многоцѣ́нною ѻ҆де́ждею, и҆ вопїе́тъ хва́лѧщисѧ: сицева̑ моѧ̑ рождє́нїѧ, таковы̑ моѝ сы́нове, и҆̀хже пе́рвѣе породи́хъ креще́нїемъ, воспита́хъ же стра́хомъ гдⷭ҇нимъ, и҆ ны́нѣ мꙋ́ченики ви́жꙋ, и҆́стинѣ вѣне́чники и҆збра̑нны, да мо́лѧтсѧ ѡ҆ вселе́ннѣй ко гдⷭ҇ꙋ.
Канѡ́нъ бцⷣы на ѕ҃, гла́съ в҃: Нетре́ннꙋ, неѻбы́чнꙋ: Канѡ́нъ ст҃а́гѡ на и҃, гла́съ д҃.
Пѣ́снь а҃. І҆рмо́съ:
Ѿве́рзꙋ ᲂу҆ста̀ моѧ̑, и҆ напо́лнѧтсѧ дх҃а, и҆ сло́во ѿры́гнꙋ цр҃и́цѣ мт҃ри, и҆ ꙗ҆влю́сѧ, свѣ́тлѡ торжествꙋ́ѧ, и҆ воспою̀, ра́дꙋѧсѧ, тоѧ̀ чꙋдеса̀.
Новоѧвле́нъ мч҃никъ, блаже́нне геѡ́ргїе, вселе́ннѣй напослѣ́докъ ꙗ҆ви́сѧ: тѣ́мже мѝ пода́ждь сло́во твоѐ бж҃їею бл҃года́тїю, твоѧ̑ по́двиги воспѣ́ти по достоѧ́нїю.
Во́инствомъ досточꙋ́днымъ твоегѡ̀ сопротивле́нїѧ побѣ̑днаѧ прїѧ́хомъ, на мꙋчи́телѧ є҆стествꙋ̀: соверше́ннѣ бо посра́мленъ бы́въ, не ктомꙋ̀ мꙋчи́тєльскаѧ дерза́ти начина́етъ. (с. 88)
Ѡ҆дѣ́ѧвсѧ во брѡнѧ̀ и҆сповѣ́данїемъ вѣ́ры, и҆ шле́мъ возложи́въ благода́ти свѣтлѣ́йшїй, и҆ ѧ҆зы́комъ же, геѡ́ргїе, благовѣща́ннымъ, ꙗ҆́коже мече́мъ, ссѣчѐ ѻ҆каѧ́ннаго баты́ѧ.
Бг҃оро́диченъ:
Гора̀ превысо́каѧ, ю҆́же ви́дѣ данїи́лъ, ка́мень горы̀ ѿсѣче́сѧ, кромѣ̀ рꙋ́къ мꙋ́жескихъ, тебѐ проѡбразова̀, бцⷣе: безъ мꙋ́жа бо на́мъ пло́тїю родила̀ є҆сѝ є҆мманꙋ́ила.
Пѣ́снь г҃. І҆рмо́съ:
Твоѧ̑ пѣсносло́вцы, бцⷣе, живы́й и҆ незави́стный и҆сто́чниче, ли́къ себѣ̀ совокꙋ́пльшыѧ дх҃о́внѡ ᲂу҆твердѝ, въ бж҃е́ственнѣй твое́й сла́вѣ вѣнце́въ сла́вы сподо́би.
Мꙋ́ками ꙗ҆́кѡ зла́то честно́е и҆скꙋси́лсѧ є҆сѝ, страда́льче сла́вне, и҆ цр҃е́ви си́лъ прине́слсѧ є҆сѝ всепло́дїе словесѝ и҆́стинно, вмѣ́стѡ ѻ҆гнѧ̀ ѻ҆лта́рнагѡ мече́мъ и҆стнѣ́емо.
Съ ва́рваромъ бра́всѧ, и҆ сего̀ побѣди́лъ є҆сѝ, ѿ хрⷭ҇та̀ дерзнове́нїе прїи́мъ, мно́гꙋ печа́ль бѣсѡ́мъ сотвори́лъ є҆сѝ, свѧты̑мъ же а҆́гг҃лѡмъ весе́лїе и҆ ра́дость: съ ни́миже водворѧ́ешисѧ.
Ма́слина плодови́таѧ въ цр҃кви жива́гѡ бг҃а, твои́хъ моще́й ра́ка ны́нѣ ꙗ҆ви́сѧ, ѿ неѧ́же прїе́млемъ разли̑чнаѧ недꙋ́гѡвъ и҆сцѣлє́нїѧ, и҆̀же тобо́ю ѡ҆бога́щшїисѧ, и҆ чꙋдесы̀ твои́ми красѧ́щїисѧ.
Бг҃оро́диченъ:
Речѐ бж҃е́ственный і҆езекі́иль: и҆ бꙋ́детъ две́рь затворе́на, и҆ сїѐ на тебѣ̀ и҆спо́лнисѧ, влⷣчце: вни́де бо несказа́ннѡ въ тѧ̀ ѻ҆́ч҃ее сло́во, и҆ мі́рꙋ ꙗ҆ви́сѧ плотоно́сецъ и҆зъ тебє̀, дв҃о, сохрани́въ тѧ̀ во ѻ҆бои́хъ.
Сѣда́ленъ, гла́съ и҃. Подо́бенъ: Премꙋ́дрости:
Премꙋ́дрости рачи́тель бы́въ, сокро́вище добродѣ́телей, ѿѻнꙋ́дꙋже и҆ почерпѐ бжⷭ҇твєннаѧ разꙋмѣ̑нїѧ: тѣ́мже и҆ вре́мени прише́дшꙋ, къ подвигѡ́мъ ᲂу҆се́рднѡ подви́гсѧ, прїе́млѧ мꙋ́ченичєскїѧ ра̑ны, главѣ̀ ᲂу҆сѣче́нїе, и҆ кро́ви (с. 89) и҆стече́нїе: и҆ ны́нѣ живе́ши въ неизрече́ннѣ свѣ́тѣ съ мꙋ́чєники. тѣ́мже вопїе́мъ тѝ: молѝ хрⷭ҇та̀ бг҃а, грѣхѡ́въ ѡ҆ставле́нїе дарова́ти покланѧ́ющымсѧ вѣ́рою свѧты̑мъ моще́мъ твои̑мъ.
Два́жды.
Сла́ва, и҆ ны́нѣ, бг҃оро́диченъ:
Помышлѧ́ю сꙋ́дъ, и҆ и҆спыта̑нїѧ стра̑шнаѧ, трепе́щꙋ и҆ ᲂу҆жаса́юсѧ мꙋ́къ, и҆ ѻ҆гнѧ̀ болѣ̑зни, и҆ тмꙋ́ же и҆ та́ртаръ: ᲂу҆вы̀, что̀ сотворю̀, стꙋ́дъ ка́кѡ претерплю̀, є҆гда̀ кни̑ги разгнꙋ́тсѧ, и҆ дѣѧ̑нїѧ ѡ҆блича́тсѧ; сегѡ̀ ра́ди припа́даю тѝ, бцⷣе пречⷭ҇таѧ, тогда̀ предста́ни мѝ, нꙋ́жды ѻ҆́ныѧ и҆з̾има́ющи: тебе́ бо и҆́мамъ прибѣ́жище, влⷣчце.
Пѣ́снь д҃. І҆рмо́съ:
Сѣдѧ́й въ сла́вѣ на прⷭ҇то́лѣ бж҃ества̀, во ѻ҆́блацѣ ле́гцѣ, прїи́де і҆и҃съ пребжⷭ҇твенный, нетлѣ́нною дла́нїю, и҆ спасѐ зовꙋ́щыѧ: сла́ва, хрⷭ҇тѐ, си́лѣ твое́й.
Настꙋпи́въ на ва́рварское стремле́нїе, и҆ попра́въ сего̀, мꙋ́чениче, росо́ю съ нб҃съ бжⷭ҇твеннѡ ѡ҆богати́сѧ, взыва́ѧ хрⷭ҇тꙋ̀: сла́ва си́лѣ твое́й, гдⷭ҇и.
Па́че смы́сла страстоте́рпца твоегѡ̀ любы̀ превосхо́дитъ всѧ̑ помышлє́нїѧ, сло́ве, борє́нїѧ и҆ мꙋ́жествєнныѧ по́двиги, и҆ натрижнє́нїѧ, ꙗ҆̀же по́далъ є҆сѝ зако́ннѡ є҆мꙋ̀ пострада́ти.
Ꙗ҆́кѡ до́бръ во́инъ, ꙗ҆́кѡ непобѣди́мь мꙋ́ченикъ, ꙗ҆́кѡ хрⷭ҇то́въ храбо́рникъ, и҆ ꙗ҆́кѡ бл҃гоче́стїѧ побо́рникъ, нбⷭ҇наѧ селє́нїѧ наслѣ́довалъ, ликѡ́мъ а҆́гг҃льскимъ всегда̀ свеселѧ́сѧ.
Бг҃оро́диченъ:
И҆з̾ѡбразова́ше въ чермнѣ́мъ проше́ствїе дре́вле і҆и҃лево безмꙋ́жное твоѐ ржⷭ҇тво̀, всецр҃и́це: ꙗ҆́коже бо ѻ҆́нъ тогда̀ пре́йде немо́креннѡ, та́кѡ и҆ хрⷭ҇то́съ безсѣ́меннѡ ѿ твои́хъ пречⷭ҇тыхъ крове́й произы́де, дв҃о.
Пѣ́снь є҃. І҆рмо́съ:
Оу҆жасо́шасѧ всѧ́чєскаѧ ѡ҆ бжⷭ҇твеннѣй сла́вѣ твое́й: ты́ бо, (с. 90) неискꙋсобра́чнаѧ дв҃о, и҆мѣ́ла є҆сѝ во ᲂу҆тро́бѣ надъ всѣ́ми бг҃а, и҆ родила̀ є҆сѝ безлѣ́тнаго сн҃а, всѣ̑мъ воспѣва́ющымъ тѧ̀ ми́ръ подава́ющаѧ.
Ра́намъ тѣ́ло твоѐ, вели́кїй кнѧ́же геѡ́ргїе, примѣси́сѧ, и҆ ᲂу҆́зами многоѻбра́зныхъ мꙋ́къ, мѵ́ро благово́нно: тѣ́мъ и҆сточа́етъ на́мъ благоꙋха́ющи дꙋ́шы, вѣ́рою несꙋмнѣ́нною тѧ̀ почита́ющымъ всегда̀.
Кропле́нїемъ кро́ве твоеѧ̀, погаси́лъ є҆сѝ ᲂу҆́глїе сꙋровства̀ баты́ева, страстоте́рпче, бжⷭ҇твенныхъ чꙋде́съ ѻ҆гне́мъ, премꙋ́дре, ти́нꙋ страстнꙋ́ю лю́тыхъ пожига́ѧ, вели́кою благода́тїю сп҃совою, геѡ́ргїе.
Ко́ль стра́шно же и҆ сла́вно ѡ҆ хрⷭ҇тѣ̀ сопротивле́нїе твоѐ, є҆мꙋ́же почꙋди́шасѧ племена̀ ѡ҆брѣ́тшаѧсѧ на по́двизѣ, и҆ похвали́ша терпѣ́нїе: ва́рвари же посрами́шасѧ, стꙋдо́мъ ѡ҆бле́кшесѧ.
Бг҃оро́диченъ:
Горѣ̀ бѧ́ше соприсносꙋ́щенъ ѻ҆ц҃ꙋ̀ и҆ бг҃ꙋ бг҃ъ сло́во, и҆ съ на́ми бг҃ъ и҆ чл҃вѣ́къ, бцⷣе, тобо́ю сше́дъ къ на́шемꙋ смире́нїю, свобожда́ѧ ѿ клѧ́твы пра́дѣднїѧ: тебе́ бо ви́дѣ патрїа́рхъ і҆а́кѡвъ лѣ́ствицꙋ нбⷭ҇нꙋю.
Пѣ́снь ѕ҃. І҆рмо́съ:
Бжⷭ҇твенное сїѐ и҆ всечⷭ҇тно́е соверша́юще пра́зднество, бг҃омꙋ́дрїи, бг҃омт҃ре, прїиди́те, рꙋка́ми воспле́щимъ, ѿ неѧ̀ ро́ждшагосѧ бг҃а сла́вимъ.
Ника́коже поколеба̀ столпа̀ бл҃гоче́стїѧ свирѣ́пство ва́рварское, нижѐ преще́нїе баты́ево, нижѐ ме́чное ᲂу҆сѣче́нїе, ни ра̑ны, ни сме́рть нꙋ́жднѣйшаѧ.
Взыгра́шасѧ свѣ́тлѡ мꙋ́ченичестїи тогда̀ ли́кове, ви́дѣвше твоѐ дерзнове́нїе, и҆ прини́кше совокꙋ́пленнѡ со а҆́гг҃лы неви́димѡ ᲂу҆крѣплѧ́хꙋ тѧ̀ въ по́двизѣ.
Тѣле́съ стра̑сти неисцѣ̑льныѧ бж҃їею бл҃года́тїю и҆сцѣли́лъ є҆сѝ, вели́кїй кнѧ́же геѡ́ргїе, мѵ́ро бл҃гоꙋха́ющее и҆сточа́ѧ ᲂу҆́бѡ, твои̑мъ честны̑мъ моще́мъ прикаса́ющымсѧ. (с. 91)
Бг҃оро́диченъ:
Ѻ҆бра́знѣ рꙋно̀ гедеѡ́нъ прїѧ́тъ ѡ҆роше́но, твоѐ предвозвѣща́ѧ чꙋ́до: сни́де бо ꙗ҆́кѡ до́ждь на рꙋно̀, бцⷣе, є҆ди́ный ѿ трⷪ҇цы во ᲂу҆тро́бꙋ твою̀ воплоща́емь.
Конда́къ, гла́съ и҃:
Хрⷭ҇то́вѣ сме́рти подо́бѧсѧ, и҆ тогѡ̀ и҆спи́ти ча́шꙋ возжелѣ́въ ꙗ҆́кѡ живота̀: за него́же мꙋ́жески подвиза́всѧ, презрѣ́въ земно́е ца́рство, ѿ безбо́жныхъ ва̑рваръ пострада́въ до сме́рти, геѡ́ргїе бг҃омꙋ́дре: тѣ́мъ молѝ, спасти́сѧ вѣ̑рнымъ лю́демъ моли́твами твои́ми.
І҆́косъ:
Кто̀ и҆зглаго́летъ си̑лы гдⷭ҇нѧ; и҆лѝ кто̀ и҆сповѣ́сть страда̑нїѧ твоѧ̑ и҆ добродѣ́тєли, мꙋ́чениче; и҆лѝ кі́й ѧ҆зы́къ воспѣ́ти возмо́жетъ по досто́инствꙋ; тѣ́мже и҆ а҆́зъ недосто́йный покꙋша́юсѧ хвали́ти же и҆ сла́вити влⷣкꙋ жизнода́вца, да́вшаго тебѣ̀ на ва́рвары де́рзость, ѕлочести́вагѡ баты́ѧ не ᲂу҆боѧ́тисѧ, и҆сповѣ́дающꙋ тебѐ и҆́стиннаго бг҃а. сегѡ̀ ра́ди тѧ̀ чти́мъ вѣ́рою и҆ любо́вїю, страстоте́рпче геѡ́ргїе: тѣ́мъ молѝ спасти́сѧ вѣ̑рнымъ лю́демъ моли́твами твои́ми.
Пѣ́снь з҃. І҆рмо́съ:
Не послꙋжи́ша тва́ри бг҃омꙋ́дрїи па́че созда́вшагѡ, но ѻ҆́гненное преще́нїе мꙋ́жески попра́вше, ра́довахꙋсѧ пою́ще: препѣ́тый ѻ҆ц҃є́въ гдⷭ҇ь и҆ бг҃ъ, благослове́нъ є҆сѝ.
На ка́мени бжⷭ҇твеннагѡ ра́зꙋма ᲂу҆тверди́въ се́рдца своегѡ̀ стѡпы̀, сла́вне, врагѡ́въ же ᲂу҆хищрє́нїѧ не преврати́ша тѧ̀ воспѣва́юща: ѻ҆тє́цъ на́шихъ бж҃е, бл҃гослове́нъ є҆сѝ.
Свѣ́тъ невече́рнїй страда́вшꙋ кро́вїю возсїѧ̀ тебѣ̀, и҆ весе́лїе ꙗ҆́вѣ тебѐ прїѧ́тъ, великомꙋ́чениче, воспѣва́юща: ѻ҆тє́цъ на́шихъ бж҃е, благослове́нъ є҆сѝ.
И҆́стиненъ мч҃никъ, и҆́стиннагѡ хрⷭ҇та̀ бг҃а на́шегѡ (с. 92) страда́лецъ взыва́ше: мꙋчє́нїѧ бо цвѣ́ты бл҃гово́нїѧ вмѣнѧ́ю, и҆ крѡ́вныѧ стрꙋи̑ ба́нею кр҃ще́нїѧ.
Бг҃оро́диченъ:
Ри́торствꙋющїй ѧ҆зы́къ безгла́сенъ же и҆ недви́жимь, ѡ҆ тебѣ̀ зри́мъ, бг҃ора́дованнаѧ: не и҆́мать бо пости́гнꙋти непостижи́магѡ зача́тїѧ неизрече́нное рожде́нїе.
Пѣ́снь и҃. І҆рмо́съ:
Ѻ҆́троки благочести̑выѧ въ пещѝ ржⷭ҇тво̀ бг҃оро́дичо спасло̀ є҆́сть: тогда̀ ᲂу҆́бѡ ѡ҆бразꙋ́емое, ны́нѣ же дѣ́йствꙋемое, вселе́ннꙋю всю̀ воздвиза́етъ пѣ́ти тебѣ̀: гдⷭ҇а по́йте, дѣла̀, и҆ превозноси́те є҆го̀ во всѧ̑ вѣ́ки.
Оу҆блажи́ша тѧ̀ ца́рїе, благослови́ша ст҃и́телїе, слы́шаще твоѐ мꙋ́жественное терпѣ́нїе, и҆ ко хрⷭ҇тꙋ̀ хода́таѧ стѧжа́вше тѧ̀: и҆ ны́нѣ приходѧ́ще честны̑мъ твои̑мъ моще́мъ покланѧ́ютсѧ.
Бжⷭ҇твенный геѡ́ргїй и҆сточа́етъ мѵ́ро благода́ти, повелѣва́ѧ вѣ̑рнымъ почерпа́ти на просвѣще́нїе и҆ чистотꙋ̀, взыва́ѧ: гдⷭ҇а по́йте, дѣла̀, и҆ превозноси́те є҆го̀ во вѣ́ки.
Хвалѧ́сѧ ꙗ҆́звами хрⷭ҇то́выми, къ вѣ̑чнымъ ѻ҆би́телемъ восте́клъ є҆сѝ, ѿ кро́ве твоеѧ̀ ѡ҆багри́въ пло́ть, и҆ свѣ́тлѡ цр҃е́ви си́лъ предстои́ши, съ мꙋ́ченики ликꙋ́ѧ.
Бг҃оро́диченъ:
И҆са́їи ᲂу҆́гль дре́вле по́сланъ бы́сть, клеща́ми носи́мь ѿ серафі́ма, и҆ каса́ѧсѧ томꙋ̀, грѣхѝ ѡ҆ставлѧ́етъ: клеща́ же ты̀ є҆сѝ, дв҃о, бжⷭ҇твенный ᲂу҆́гль носи́вшаѧ, во ѡ҆ставле́нїе грѣхѡ́въ человѣ́чествꙋ.
Пѣ́снь ѳ҃. І҆рмо́съ:
Всѧ́къ земноро́дный да взыгра́етсѧ, дх҃омъ просвѣща́емь, да торжествꙋ́етъ же безпло́тныхъ ᲂу҆мѡ́въ є҆стество̀, почита́ющее свѧще́нное торжество̀ бг҃ома́тере, и҆ да вопїе́тъ: ра́дꙋйсѧ, всеблаже́ннаѧ бцⷣе, чⷭ҇таѧ приснодв҃о.
Во́инъ и҆́стинный хрⷭ҇то́ва проповѣ́данїѧ бы́лъ є҆сѝ, геѡ́ргїе, и҆ ле́сти потреби́тель безбо́жїѧ. тѣ́мже и҆ ны́нѣ (с. 93) моли́твами твои́ми потребѝ ва́рварское воста́нїе, во́инствꙋ на́шемꙋ подъ но́зѣ, сла́вне, тѣ́хъ низложѝ.
А҆́ще и҆ ѿсѣ́чена бы́сть глава̀ твоѧ̀, и҆ кро́вь и҆злїѧ́сѧ, но прильпѐ вѣ́рнѡ, и҆ побѣди́тєльнаѧ тобо́ю соверши́шасѧ. тѣ́мже и҆ на на́съ востаю́щихъ си́лою твое́ю посрамѝ, и҆ ꙗ҆вѝ на́съ побѣди́тели.
Лꙋ́къ сокрꙋшѝ нечести́выхъ, страстоте́рпче непобѣди́ме, непра́веднѡ дви́жимый на твоѐ достоѧ́нїе, є҆́же себѣ̀ и҆збра́лъ є҆сѝ возлюби́въ, и҆ во́инствꙋ на́шемꙋ си́лꙋ ᲂу҆твердѝ: да и҆ мы̀ ти́хѡ препрово́димъ жи́тельство.
Бг҃оро́диченъ:
Є҆го́же проро́цы провозвѣсти́ша всѝ многоѻбра́знѣ, и҆ вопло́щшасѧ на́съ ра́ди ѿ тебє̀ ви́дѣхомъ, бцⷣе, бг҃а и҆ человѣ́ка соверше́нна, и҆збавлѧ́юща человѣ́ки ѿ клѧ́твы пра́дѣднїѧ, твои́ми мл҃твами, и҆ вѣ́чныѧ мꙋ́ки свобожда́юща.
Свѣти́ленъ. Подо́бенъ: Пло́тїю ᲂу҆снꙋ́въ:
Свѣ́тꙋ невече́рнемꙋ предстоѧ̀, страстоте́рпче, съ мꙋ́ченическими ли́ки, воспѣва́ющыѧ тѧ̀ въ па́мѧти твое́й ѿ и҆скꙋше́нїѧ спаса́й моли́твами твои́ми.
Два́жды.
Сла́ва, и҆ ны́нѣ, бг҃оро́диченъ:
Незаходи́магѡ свѣ́та носи́ло, приснодв҃о, просвѣ́щшагѡ сѣдѧ́щихъ во тмѣ̀ невѣ́дѣнїѧ пре́лести, ѡ҆зарѝ и҆ на́мъ грѣ̑шнымъ свѣ́тъ сн҃а твоегѡ̀.
На хвали́техъ стїхи̑ры на д҃, гла́съ а҃. Подо́бенъ: Нбⷭ҇ныхъ чинѡ́въ:
На нб҃сѝ препочи́лъ є҆сѝ веселѧ́сѧ, ꙳ молѝ за ны̀ прест҃ꙋ́ю трⷪ҇цꙋ, ꙳ ми́лость пода́ти на́мъ ꙳ и҆ житїѐ ми́рно и҆ безгрѣ́шно, ꙳ ꙗ҆́кѡ въ тꙋ̀ вѣ́рꙋющихъ при́снѡ скорбе́й ᲂу҆гонза́ти, ꙳ и҆ ра́дованїе ᲂу҆лꙋчи́ти.
Два́жды.
Милосе́рдїѧ ра́ди твоегѡ̀, ꙳ и҆сто́чникъ на́мъ да́рꙋй благода́ти, ꙳ вско́рѣ ра́дости и҆спо́лнь, ꙳ и҆сточа́ющь ᲂу҆тѣше́нїе сꙋ́щымъ въ печа́лѣхъ, ꙳ молѧ̀ хрⷭ҇та̀, всесла́вне, ꙳ спасти́сѧ дꙋша́мъ на́шымъ. (с. 94)
Ты̀ въ весе́лїе вше́дъ нетлѣ́емо, ꙳ весе́лїе на́мъ да́ти молѝ, ꙳ и҆ спастѝ рабы̑ твоѧ̑: ꙳ мо́жеши бо, геѡ́ргїе, ꙳ призыва́ющымъ тѧ̀ бѣды̑ разгна́ти, молѧ̀ хрⷭ҇та̀, и҆ и҆сцѣли́ти болѧ́щыѧ.
Сла́ва, гла́съ и҃:
Ѿ бл҃гочести́ва ко́рене прозѧ́бъ и҆зрастѐ, ᲂу҆сыне́нїѧ вода́ми напое́нъ ꙗ҆́снѡ, геѡ́ргїе страстоте́рпче: и҆́бо хрⷭ҇то́вѣ цр҃кви ꙗ҆́кѡ фі́нїѯъ высокове́рхїй процвѣ́лъ є҆сѝ на́мъ, преꙋцвѣтлѣва́ѧ вѣ̑рныѧ. тѣ́мъ ны́нѣ съ мч҃ники предстоѧ̀ хрⷭ҇тꙋ̀, моли́сѧ ѡ҆ дꙋша́хъ на́шихъ.
И҆ ны́нѣ, бг҃оро́диченъ: Влⷣчце, прїимѝ моли́твꙋ ра̑бъ твои́хъ:
Славосло́вїе вели́кое, и҆ ѿпꙋ́стъ.
На лїтꙋргі́и: Блажє́нна ст҃о́мꙋ, пѣ́снь г҃-ѧ и҆ ѕ҃- ѧ. Прокі́менъ, гла́съ д҃: Ст҃ы̑мъ, и҆̀же сꙋ́ть на землѝ є҆гѡ̀, ᲂу҆дивѝ гдⷭ҇ь всѧ̑ хотѣ̑нїѧ своѧ̑ въ ни́хъ. Сті́хъ: Предзрѣ́хъ гдⷭ҇а предо мно́ю вы́нꙋ: А҆пⷭ҇лъ къ є҆фесе́ємъ, зача́ло сл҃г. А҆ллилꙋ́їа: Воззва́ша пра́веднїи, и҆ гдⷭ҇ь ᲂу҆слы́ша и҆̀хъ. Сті́хъ: Мнѡ́ги скѡ́рби пра́вєднымъ, и҆ ѡ҆ всѣ́хъ и҆́хъ и҆зба́витъ ѧ҆̀ гдⷭ҇ь. Є҆ѵⷢ҇лїе лꙋкѝ, зача́ло р҃ѕ. Прича́стенъ: Ра́дꙋйтесѧ, пра́веднїи, ѡ҆ гдⷭ҇ѣ:
Въ то́йже де́нь слꙋ́жба преподо́бнагѡ ѻ҆ц҃а̀ на́шегѡ кѷрі́лла, новоезе́рскагѡ чꙋдотво́рца.
На Гдⷭ҇и, воззва́хъ, стїхи̑ры, гла́съ ѕ҃. Подо́бенъ: Є҆гда̀ ѿ дре́ва:
Вѣ́рою и҆ любо́вїю и҆́стинною, мі́ра ѿ младе́нства ѿре́ксѧ, ѻ҆́ч҃е преподо́бне кѷрі́лле, ра́дꙋѧсѧ послѣ́довалъ є҆сѝ хрⷭ҇тꙋ̀, и҆ мно́гимъ по́двигомъ пло́ть твою̀ ᲂу҆мертви́лъ є҆сѝ, и҆ благода́ть и҆сцѣле́нїй бога́тнѡ воспрїѧ́лъ (с. 95) є҆сѝ, ᲂу҆ставлѧ́ти недꙋ́ги, и҆ не́мѡщи разли̑чныѧ, и҆ дꙋ́хи лꙋка̑выѧ вельмѝ ᲂу҆дави́лъ є҆сѝ.
Оу҆краше́нїе и҆́нокѡмъ бы́въ, собра́лъ є҆сѝ неизче́тно мно́жество, пѣ́ти гдⷭ҇а, прпⷣбне кѷрі́лле, и҆ къ нб҃сѝ всѣ́хъ наста́вилъ є҆сѝ до́брѣ, послѣ́дꙋющихъ бжⷭ҇твєннымъ твои̑мъ ᲂу҆че́нїємъ, и҆ подо́бѧщихсѧ твоемꙋ̀ житїю̀ добродѣ́тельномꙋ, ѻ҆́ч҃е кѷрі́лле: съ ни́миже тѧ̀ почита́емъ, сщ҃е́ннѡ въ преставле́нїи твое́мъ ра́дꙋющесѧ.
Гла́съ а҃:
Преподо́бне ѻ҆́ч҃е кѷрі́лле, любвѐ ра́ди ᲂу҆чи́телѧ твоегѡ̀, всѧ̑ ꙗ҆̀же на землѝ преѡби́дѣлъ є҆сѝ, и҆ въ пꙋсты́ню всели́всѧ, пло́ть твою̀ воздержа́нїемъ ᲂу҆мертви́лъ є҆сѝ, и҆ по́стническими трꙋды̀ твоѐ житїѐ ᲂу҆ѧсни́лъ є҆сѝ: ѿѻнꙋ́дꙋже и҆ ᲂу҆ченикѝ себѣ̀ собра́въ, ревнꙋ́ющихъ твоемꙋ̀ житїю̀, си́хъ хрⷭ҇тꙋ̀ приве́лъ є҆сѝ, є҆го́же молѝ спастѝ всѣ́хъ на́съ, тѧ̀ почита́ющихъ.
Ѻ҆́ч҃е бг҃омꙋ́дре кѷрі́лле, воздержа́нїемъ бг҃ꙋ соединѧ́ѧсѧ, непобѣжде́нъ пребы́сть кова̑рствїи бори́телѧ, и҆ ра́бъ ꙗ҆ви́лсѧ є҆сѝ вседержи́телѧ: ѿѻнꙋ́дꙋже почита́емъ тѧ̀, и҆ бжⷭ҇твеннꙋю твою̀ па́мѧть восхвалѧ́юще ра́достнѡ вѣ́рою пра́зднꙋемъ.
Преподо́бне ѻ҆́ч҃е кѷрі́лле, въ пꙋсты́нѧхъ при́снѡ и҆ въ пеще́рахъ и҆ въ гора́хъ вѣ́рою пребыва́ѧ, бг҃а взыска́лъ є҆сѝ: и҆ сегѡ̀ ра́ди ѡ҆брѣ́лъ є҆сѝ, ꙗ҆́коже возжелѣ̀: невозвра́тною дꙋше́ю восхождє́нїи до́брыми всегда̀, и҆́нѡкъ мно́жество приве́лъ є҆сѝ хрⷭ҇тꙋ̀ спаса́емыхъ.
Преподо́бне ѻ҆́ч҃е премꙋ́дре кѷрі́лле, болѧ́щымъ ты̀ ꙗ҆ви́лсѧ є҆сѝ и҆сцѣле́нїе и҆ хромы̑мъ хожде́нїе ми́лостивнѡ сотворѧ́еши, и҆ всѣ̑мъ притека́ющымъ съ вѣ́рою къ цѣльбоно́сномꙋ гро́бꙋ твоемꙋ̀, просѧ́щымъ по́мощи и҆ застꙋпле́нїѧ. ты́ же моли́твами твои́ми и҆сцѣле́нїе недꙋ́гꙋющымъ неѡскꙋ́днѡ подава́еши. (с. 96)
Сла́ва, гла́съ ѕ҃:
Є҆́же по ѻ҆́бразꙋ соблю́дъ невреди́мо, ᲂу҆́мъ влⷣкꙋ на стра̑сти па̑гꙋбныѧ по́стнически поста́вивъ, во є҆́же по подо́бїю, ꙗ҆́кѡ мо́щїю возше́лъ є҆сѝ: мꙋ́жески бо є҆стество̀ понꙋ́дивъ, потща́лсѧ є҆сѝ хꙋ́ждшее покори́ти лꙋ́чшемꙋ, и҆ пло́ть порабо́тити дꙋ́хꙋ. тѣ́мже мона́шествꙋющихъ ꙗ҆ви́лсѧ є҆сѝ ве́рхъ, жи́тель пꙋсты́нный, благотекꙋ́щихъ ѡ҆бꙋчи́тель, пра́вило добродѣ́тели и҆звѣ́стнѣйшее: и҆ ны́нѣ на нб҃сѣ́хъ, зерца́лѡмъ разрѣ́шшымсѧ, ѻ҆́ч҃е на́шъ кѷрі́лле, чи́стѣ зри́ши ст҃ꙋ́ю трⷪ҇цꙋ, молѧ́сѧ несре́дственнѣ ѡ҆ и҆̀же вѣ́рою и҆ любо́вїю чтꙋ́щихъ тѧ̀.
И҆ ны́нѣ, бг҃оро́диченъ: Кто̀ тебѐ не ᲂу҆блажи́тъ:
Вхо́дъ. Прокі́менъ днѐ. И҆ чтє́нїѧ трѝ.
Премꙋ́дрости соломѡ́ни чте́нїе.
[Глава̀ є҃] Пра́вєдницы во вѣ́ки живꙋ́тъ, и҆ въ гдⷭ҇ѣ мзда̀ и҆́хъ, и҆ попече́нїе и҆́хъ ᲂу҆ вы́шнѧгѡ. Сегѡ̀ ра́ди прїи́мꙋтъ црⷭ҇твїе бл҃голѣ́пїѧ, и҆ вѣне́цъ добро́ты ѿ рꙋкѝ гдⷭ҇ни: занѐ десни́цею покры́етъ ѧ҆̀, и҆ мы́шцею защити́тъ и҆̀хъ. Прїи́метъ всеѻрꙋ́жїе рве́нїе своѐ, и҆ воѡрꙋжи́тъ тва́рь въ ме́сть врагѡ́мъ. Ѡ҆блече́тсѧ въ бро́нѧ пра́вды, и҆ возложи́тъ шле́мъ, сꙋ́дъ нелицемѣ́ренъ. Прїи́метъ щи́тъ непобѣди́мый преподо́бїе, поѡстри́тъ же напра́сный гнѣ́въ во ѻ҆рꙋ́жїе: спобо́ретъ же съ ни́мъ мі́ръ на безꙋ̑мныѧ. По́йдꙋтъ праволꙋ̑чныѧ стрѣ́лы мѡ́лнїины, и҆ ꙗ҆́кѡ ѿ благокрꙋ́гла лꙋ́ка ѻ҆блакѡ́въ на намѣ́ренїе полетѧ́тъ: и҆ ѿ каменоме́тныѧ ꙗ҆́рости и҆спо́лнь падꙋ́тъ гра́ды. Вознегодꙋ́етъ на ни́хъ вода̀ морска́ѧ: рѣ́ки же потопѧ́тъ ѧ҆̀ на́глѡ. Сопроти́въ ста́нетъ и҆̀мъ дꙋ́хъ си́лы, и҆ ꙗ҆́кѡ ви́хоръ развѣ́етъ и҆̀хъ, и҆ ѡ҆пꙋстоши́тъ всю̀ зе́млю беззако́нїе: и҆ ѕлодѣ́йство преврати́тъ престо́лы си́льныхъ. [ѕ҃] Слы́шите ᲂу҆̀бо, ца́рїе, и҆ разꙋмѣ́йте: навы́кните, сꙋдїи̑ (с. 97) концє́въ землѝ. Внꙋши́те, держа́щїи мно́жєства, и҆ гордѧ́щїисѧ ѡ҆ наро́дѣхъ ꙗ҆зы̑къ. Ꙗ҆́кѡ дана̀ є҆́сть ѿ гдⷭ҇а держа́ва ва́мъ, и҆ си́ла ѿ вы́шнѧгѡ.
Премꙋ́дрости соломѡ́ни чте́нїе.
[Глава̀ г҃] Пра́ведныхъ дꙋ́шы въ рꙋцѣ̀ бж҃їей, и҆ не прико́снетсѧ и҆́хъ мꙋ́ка. Непщева́ни бы́ша во ѻ҆чесѣ́хъ безꙋ́мныхъ ᲂу҆мре́ти, и҆ вмѣни́сѧ ѡ҆ѕлобле́нїе и҆схо́дъ и҆́хъ, и҆ є҆́же ѿ на́съ ше́ствїе сокрꙋше́нїе: ѻ҆ни́ же сꙋ́ть въ ми́рѣ. И҆́бо предъ лице́мъ человѣ́ческимъ а҆́ще и҆ мꙋ́кꙋ прїи́мꙋтъ, ᲂу҆пова́нїе и҆́хъ безсме́ртїѧ и҆спо́лнено. И҆ вма́лѣ нака́зани бы́вше, вели́кими благодѣ́тельствовани бꙋ́дꙋтъ: ꙗ҆́кѡ бг҃ъ и҆скꙋсѝ ѧ҆̀, и҆ ѡ҆брѣ́те и҆̀хъ достѡ́йны себѣ̀. Ꙗ҆́кѡ зла́то въ горни́лѣ и҆скꙋсѝ и҆̀хъ, и҆ ꙗ҆́кѡ всепло́дїе же́ртвенное прїѧ́тъ ѧ҆̀. И҆ во вре́мѧ посѣще́нїѧ и҆́хъ возсїѧ́ютъ, и҆ ꙗ҆́кѡ и҆́скры по сте́блїю потекꙋ́тъ. Сꙋ́дѧтъ ꙗ҆зы́кѡмъ, и҆ ѡ҆блада́ютъ людьмѝ, и҆ воцр҃и́тсѧ гдⷭ҇ь въ ни́хъ во вѣ́ки. Надѣ́ющїисѧ на́нь разꙋмѣ́ютъ и҆́стинꙋ, и҆ вѣ́рнїи въ любвѝ пребꙋ́дꙋтъ є҆мꙋ̀: ꙗ҆́кѡ благода́ть и҆ ми́лость въ преподо́бныхъ є҆гѡ̀, и҆ посѣще́нїе во и҆збра́нныхъ є҆гѡ̀.
Премꙋ́дрости соломѡ́ни чте́нїе.
[Глава̀ д҃] Пра́ведникъ, а҆́ще пости́гнетъ сконча́тисѧ, въ поко́и бꙋ́детъ. Ста́рость бо честна̀ не многолѣ́тна: нижѐ въ числѣ̀ лѣ́тъ и҆счита́етсѧ. Сѣди́на же є҆́сть мꙋ́дрость человѣ́кѡмъ, и҆ во́зрастъ ста́рости житїѐ нескве́рное. Бл҃гоꙋго́денъ бг҃ови бы́въ, возлю́бленъ бы́сть, и҆ живы́й посредѣ̀ грѣ̑шникъ, преста́вленъ бы́сть. Восхище́нъ бы́сть, да не ѕло́ба и҆змѣни́тъ ра́зꙋма є҆гѡ̀, и҆лѝ ле́сть прельсти́тъ дꙋ́шꙋ є҆гѡ̀. Раче́нїе бо ѕло́бы помрача́етъ дѡ́браѧ, и҆ паре́нїе по́хоти премѣнѧ́етъ ᲂу҆́мъ неѕло́бивъ. Сконча́всѧ вма́лѣ, и҆спо́лни лѣ̑та дѡ́лга: ᲂу҆го́дна бо бѣ̀ гдⷭ҇еви дꙋша̀ є҆гѡ̀: сегѡ̀ ра́ди потща́сѧ ѿ среды̀ лꙋка́вствїѧ. Лю́дїе же (с. 98) ви́дѣвше и҆ не разꙋмѣ́вше, нижѐ поло́жше въ помышле́нїи таково́е: ꙗ҆́кѡ благода́ть и҆ ми́лость въ преподо́бныхъ є҆гѡ̀, и҆ посѣще́нїе во и҆збра́нныхъ є҆гѡ̀.
На лїті́и стїхи̑ры, гла́съ и҃. Самогла̑сны:
Прпⷣбне ѻ҆́ч҃е кѷрі́лле, да́ръ бж҃їй и҆збра́въ са́мъ себѐ, и҆ прине́слъ є҆сѝ, бдѣ́нїе всено́щное, и҆ ᲂу҆миле́нїе стѧжа́въ, поꙋче́нїе бжⷭ҇твенно, коне́чное смире́нїе, наде́ждꙋ, вѣ́рꙋ, любо́вь нерастворе́нꙋ, трезвѣ́нїе, и҆ милосе́рдїе, и҆́стинное безстра́стїе, мл҃твꙋ, сто́лпъ тѧ̀ показа́вше свѣтови́днѣйшїй.
Гла́съ в҃:
По ᲂу҆спе́нїи твое́мъ, блаже́нне, ᲂу҆чи́тельница быва́етъ на́мъ твоѧ̀ ра́ка: при́снѡ бо и҆злива́ющимисѧ чꙋдесы̀ вопїѧ̀, и҆ возводѧ̀ къ трꙋдѡ́мъ и҆ подвигѡ́мъ, глаго́лѧ: возлюби́те гдⷭ҇а, да ѡ҆брѧ́щете благода́ть вѣ́чнꙋю, ничто́же па́че є҆гѡ̀ почти́те, да є҆гда̀ прїи́детъ, и҆ ѡ҆брѧ́щете поко́й со и҆збра́нными, є҆го́же да и҆ мы̀ ᲂу҆лꙋчи́мъ твои́ми моли́твами.
Гла́съ д҃:
Житїѐ нескве́рно, терпѣ́нїе и҆ кро́тость, и҆ любо́вь нелицемѣ́рнꙋ, воздержа́нїе и҆ стоѧ́нїе всено́щное, и҆ ᲂу҆миле́нїе бжⷭ҇твенное, вѣ́рꙋ и҆ наде́ждꙋ и҆́стиннꙋю, и҆ ми́лованїе, ѻ҆́ч҃е, стѧжа́въ, ꙗ҆́кѡ а҆́гг҃лъ пожи́лъ є҆сѝ на землѝ съ пло́тїю, кѷрі́лле блаже́нне, моли́твенниче, ѡ҆ дꙋша́хъ на́шихъ.
Земны́й а҆́гг҃ле, нбⷭ҇ный человѣ́че бы́лъ є҆сѝ, преподо́бне, и҆сто́чникъ ᲂу҆миле́нїѧ и҆ ми́лованїѧ, стрꙋѧ̀ пꙋчи́ны, грѣ́шникѡмъ порꙋ́чникъ, ма́слина вои́стиннꙋ бж҃їѧ плодови́та, и҆ трꙋдѡ́въ твои́хъ, ᲂу҆тѣ́ши ли́ца, кѷрі́лле чꙋ́дне, вѣ́рнѡ восхвалѧ́ющымъ тѧ̀.
Сла́ва, гла́съ ѕ҃:
Преподо́бне ѻ҆́ч҃е кѷрі́лле, ꙗ҆вле́нїемъ бж҃їѧ мт҃ре наставлѧ́емь, и҆ тогѡ̀ сїѧ́нїемъ ѡ҆зарѧ́емь, и҆ пꙋсты́ню, на ню́же зва́нъ бы́сть, дости́глъ є҆сѝ, и҆ въ не́й трꙋдолю́бнѡ подвиза́всѧ, вше́лъ є҆сѝ въ незаходи́мый свѣ́тъ ра́зꙋма, и҆дѣ́же (с. 99) мно́гихъ гдⷭ҇еви ревни́телей твоемꙋ̀ житїю̀ ᲂу҆стро́илъ є҆сѝ. тѣ́мже и҆ по сме́рти ѿ бг҃а дарова̑нїѧ прїѧ́лъ є҆сѝ, бѣ́сы прогони́ти, и҆ и҆сцѣлє́нїѧ разли́чныхъ недꙋ́гѡвъ человѣ́кѡмъ дарова́ти, вѣ́рою ѿ дꙋшѝ притека́ющымъ ко хра́мꙋ твоемꙋ̀ всечестно́мꙋ: молѝ спастѝ почита́ющихъ любо́вїю свѧтꙋ́ю па́мѧть твою̀.
И҆ ны́нѣ, бг҃оро́диченъ: Творе́цъ и҆ и҆зба́витель:
На стїхо́внѣ стїхи̑ры, гла́съ а҃. Подо́бенъ: Прехва́льнїи:
Ѻ҆́ч҃е прпⷣбне кѷрі́лле, ꙳ твоѧ̀ кра́снаѧ па́мѧть ꙳ по́стникѡмъ собра́нїе и҆ весе́лїе, ꙳ чꙋде́съ бо благода́тїю ꙳ просла́вилсѧ є҆сѝ ѿ бг҃а: ꙳ є҆го́же молѝ ꙳ дарова́ти дꙋша́мъ на́шымъ ꙳ ми́ръ и҆ ве́лїю ми́лость.
Сті́хъ: Честна̀ предъ гдⷭ҇емъ сме́рть преподо́бныхъ є҆гѡ̀.
Ѻ҆́ч҃е кѷрі́лле преподо́бне, твоегѡ̀ ᲂу҆ста́ва по́стнагѡ ꙳ проти́внїи ᲂу҆боѧ́шасѧ, ꙳ и҆ про́клѧти бы́ша ꙳ твои́ми непреста́нными моли́твами, всехва́льне: ꙳ и҆́бо сожи́тельствꙋюща бг҃а стѧжа́въ въ себѣ̀: є҆го́же молѝ ꙳ дарова́ти дꙋша́мъ на́шымъ ꙳ ми́ръ и҆ ве́лїю ми́лость.
Сті́хъ: Блаже́нъ мꙋ́жъ, боѧ́йсѧ гдⷭ҇а, въ за́повѣдехъ є҆гѡ̀ восхо́щетъ ѕѣлѡ̀.
Ѻ҆́ч҃е прпⷣбне кѷрі́лле, ꙳ хрⷭ҇та̀ возлюби́въ всѧ́кѡ, и҆ тогѡ̀ бжⷭ҇твєннымъ стопа́мъ послѣ́довалъ є҆сѝ, ꙳ кре́стъ на ра́мо взе́мъ, неѡсла́бнѡ ше́ствовалъ є҆сѝ, ꙳ и҆ живе́ши, бг҃оно́се, дх҃омъ. ꙳ И҆ ны́нѣ молѝ ꙳ дарова́ти дꙋша́мъ на́шымъ ꙳ ми́ръ и҆ ве́лїю млⷭ҇ть.
Сла́ва, гла́съ ѕ҃:
Тезоимени́то зва́нїе пречⷭ҇тыѧ ꙗ҆́кѡ ᲂу҆слы́шавъ, по́стническими трꙋды̀ себѐ ѡ҆бложи́въ, мі́рови и҆ страсте́мъ себѐ ᲂу҆мертви́въ, и҆ со хрⷭ҇то́мъ и҆зво́лилъ є҆сѝ жи́ти: тѣ́мъ и҆ по сме́рти и҆сцѣлє́нїѧ и҆сточа́етъ гро́бъ тво́й, преподо́бне кѷрі́лле, вѣ́рою притека́ющымъ. но, ꙗ҆́кѡ и҆мѣ́ѧ дерзнове́нїе къ прославлѧ́емомꙋ ко ст҃ы́хъ хрⷭ҇тꙋ̀, моли́сѧ ѡ҆ и҆̀же (с. 100) вѣ́рою соверша́ющихъ па́мѧть твою̀, и҆ чтꙋ́щихъ трꙋды̀ твоѧ̑, ꙗ҆̀же за него̀ претерпѣ́лъ є҆сѝ, и҆ на́мъ ᲂу҆лꙋчи́ти дерзнове́нїе въ де́нь сꙋда̀, мо́лимсѧ.
И҆ ны́нѣ, бг҃оро́диченъ: Бцⷣе, ты̀ є҆сѝ лоза̀ и҆́стиннаѧ:
Тропа́рь, гла́съ и҃:
Бж҃їимъ дх҃омъ подвиза́емь, сле́зъ твои́хъ тꙋ́чами и҆зсо́хшее напои́лъ є҆сѝ, и҆ безпло́тное въ пꙋсты́ни житїѐ показа́лъ є҆сѝ, и҆ є҆́же и҆зъ глꙋбины̀ се́рдца бо́дренными моли́твами и҆ посто́мъ, благодѣѧ́нїѧ трꙋды̀ ᲂу҆плодоноси́лъ є҆сѝ, и҆ вселе́ннꙋю всю̀ просвѣти́лъ є҆сѝ сїѧ́нїемъ чꙋде́съ твои́хъ, ѻ҆́ч҃е на́шъ кѷрі́лле, молѝ хрⷭ҇та̀ бг҃а, спасти́сѧ дꙋша́мъ на́шымъ.
Сла́ва, и҆ ны́нѣ, бг҃оро́диченъ: И҆́же на́съ ра́ди рожде́йсѧ ѿ дв҃ы:
На ᲂу҆́трени по а҃-й каѳі́смѣ сѣда́ленъ, гла́съ г҃- й.
Подо́бенъ: Красотѣ̀ двⷭ҇тва:
Ꙗ҆́кѡ безпло́тенъ, ѻ҆́ч҃е, пожи́лъ є҆сѝ на землѝ, превозносѧ́щагосѧ врага̀ смири́лъ є҆сѝ: тѣ́мже ны́нѣ съ невеще́ственными ли́ки, блаже́нне, водворѧ́ѧсѧ, та́мѡ блаже́нства наслажда́ѧсѧ, помина́й па́мѧть твою̀ дне́сь пра́зднꙋющихъ, да всѝ ра́достными пѣ́сньми воспѣва́емъ хрⷭ҇та̀ бг҃а на́шего, таковꙋ́ю тебѣ̀ благода́ть да́вшаго.
Два́жды.
Сла́ва, и҆ ны́нѣ, бг҃оро́диченъ:
Бжⷭ҇твеннаѧ ски́нїѧ была̀ є҆сѝ сло́ва, є҆ди́на пречⷭ҇таѧ мт҃и дв҃о, чистото́ю а҆́гг҃лы превозше́дшаѧ, па́че всѣ́хъ менѐ пе́рсть бы́вша, ѡ҆скверне́на плотски́ми прегрѣше́ньми, ѡ҆чи́сти моли́твъ твои́хъ бжⷭ҇твенными вода́ми, подаю́щи, чⷭ҇таѧ, ве́лїю ми́лость.
По в҃-й каѳі́смѣ сѣда́ленъ, гла́съ и҃. Подо́бенъ: Повелѣ́нное та́йнѡ:
Страсте́й тмꙋ̀ моли́твами твои́ми, ѻ҆́ч҃е, ѿгна́лъ є҆сѝ, се́рдце твоѐ въ чꙋ́вствїи чи́сто бг҃ꙋ предста́вивъ: тѣ́мже (с. 101) въ тѧ̀ всели́сѧ благода́ть дх҃а прест҃а́гѡ, є҆́же вѣ́дѣти бꙋ̑дꙋщаѧ, ꙗ҆́кѡ бли́зъ сꙋ̑щаѧ ты̀ проѧвлѧ́ѧ, и҆ проси́вшымъ ᲂу҆ тебє̀ съ вѣ́рою, непло́дствїѧ соꙋ́зъ разрѣши́лъ є҆сѝ. тѣ́мже и҆ мы̀ мо́лимсѧ: просѝ на́мъ ѿ хрⷭ҇та̀ ми́ра и҆ ве́лїѧ ми́лости.
Два́жды.
Сла́ва, и҆ ны́нѣ, бг҃оро́диченъ:
Ѿ крове́й твои́хъ, чⷭ҇таѧ, воплоще́ннаго бг҃а ро́ждшаѧ, и҆змѣне́на мѧ̀ при́снѡ грѣха́ми, и҆ прилѡ́ги лꙋка́вагѡ, бг҃обл҃года́тнаѧ, ᲂу҆твердѝ се́рдце моѐ, бл҃га́ѧ, твои́ми моли́твами, ꙗ҆́кѡ да и҆ а҆́зъ благода́рственнѡ зовꙋ́ ти: бг҃ороди́тельнице мр҃і́е, поми́лꙋй ста́до твоѐ, є҆́же стѧжа́ла є҆сѝ, всенепоро́чнаѧ.
По полѷеле́и сѣда́ленъ, гла́съ и҃. Подо́бенъ: Премꙋ́дрости:
Въ пꙋсты́ню, преблаже́нне, всели́всѧ, и҆ въ не́й пречестны́й хра́мъ бж҃їѧ мт҃ре воздви́глъ є҆сѝ, и҆ мно́жество и҆́ночествꙋющихъ та́мѡ собра́лъ є҆сѝ гдⷭ҇еви, и҆ съ тобо́ю рабо́тающихъ, и҆̀хже сохранѝ ѿ всѧ́кагѡ вре́да лꙋка́вагѡ, да всѝ благода́рственнѡ вопїе́мъ тѝ: преблаже́нне кѷрі́лле, молѝ хрⷭ҇та̀ бг҃а, грѣхѡ́въ ѡ҆ставле́нїе дарова́ти чтꙋ́щымъ любо́вїю ст҃ꙋ́ю па́мѧть твою̀.
Два́жды.
Сла́ва, и҆ ны́нѣ, бг҃оро́диченъ:
Ꙗ҆́кѡ дв҃ꙋ и҆ є҆ди́нꙋ въ жена́хъ, тѧ̀ безъ сѣ́мене ро́ждшꙋю бг҃а пло́тїю, всѝ ᲂу҆блажа́емъ ро́ди человѣ́честїи: ѻ҆́гнь бо всели́сѧ въ тѧ̀ бж҃ества̀, и҆ ꙗ҆́кѡ младе́нца млеко́мъ пита́еши зижди́телѧ и҆ гдⷭ҇а. тѣ́мъ а҆́гг҃льскїй и҆ человѣ́ческїй ро́дъ досто́йнѡ сла́вимъ прест҃о́е рождество̀ твоѐ, и҆ согла́снѡ вопїе́мъ тѝ: молѝ хрⷭ҇та̀ бг҃а, согрѣше́нїй ѡ҆ставле́нїе дарова́ти покланѧ́ющымсѧ вѣ́рою прест҃о́мꙋ ржⷭ҇твꙋ̀ твоемꙋ̀.
Степє́нна, а҃-й а҆нтїфѡ́нъ д҃-гѡ гла́са. Прокі́менъ: Честна̀ предъ гдⷭ҇емъ сме́рть преподо́бныхъ є҆гѡ̀. Сті́хъ: Что̀ возда́мъ гдⷭ҇еви ѡ҆ (с. 102) всѣ́хъ, ꙗ҆̀же воздаде́ ми; Є҆ѵⷢ҇лїе ѿ матѳе́а, зача́ло м҃г. По н҃-мъ ѱалмѣ̀ стїхи́ра, гла́съ ѕ҃, пи́сана на стїхо́внѣ, Сла́ва. Канѡ́нъ бцⷣѣ со і҆рмосо́мъ на ѕ҃, и҆ ст҃о́мꙋ два̀ канѡ́на, на и҃.
Гла́съ в҃. Пѣ́снь а҃. І҆рмо́съ:
Во глꙋбинѣ̀ постла̀ и҆ногда̀ фараѡни́тское всево́инство преѡрꙋже́ннаѧ си́ла, вопло́щшеесѧ же сло́во всеѕло́бный грѣ́хъ потреби́ло є҆́сть, препросла́вленный гдⷭ҇ь: сла́внѡ бо просла́висѧ.
Слꙋга̀ бж҃їй бы́въ, ѻ҆́ч҃е кѷрі́лле, сохрани́лъ є҆сѝ ꙗ҆́кѡ свѧще́нникъ спаси́тєльнаѧ повелѣ̑нїѧ, мїрско́е смꙋще́нїе ѡ҆ста́вилъ є҆сѝ, и҆ кре́стъ сво́й взе́мъ, живонѡ́снымъ стопа́мъ, всеблаже́нне, послѣ́довалъ є҆сѝ.
Спасе́нїю хода́таѧ свѣ́дый ра́зꙋмъ бг҃одохнове́нный, и҆ всѐ писа́нїе благоче́стнѡ проше́лъ є҆сѝ, ѻ҆́ч҃е преподо́бне кѷрі́лле, свѧще́нства ѿѻнꙋ́дꙋ прїе́мъ сано́вное.
Ѿ ю҆́ности твоеѧ̀, ѻ҆́ч҃е, ᲂу҆́мъ къ бг҃ꙋ впери́въ, тлѣ́нными нетлѣ̑ннаѧ, ꙗ҆́кѡ до́брый кꙋпе́цъ и҆скꙋпи́лъ є҆сѝ. тѣ́мже ны́нѣ соше́дшесѧ, па́мѧть твою̀ почита́емъ.
Бг҃оро́диченъ:
Возсїѧ́въ, ꙗ҆́кѡ со́лнце и҆зъ тебє̀, мт҃и приснодв҃о, и҆́же ѿ ѻ҆ц҃а̀ пре́жде вѣ̑къ неви́димый: и҆́мже пресла́внѡ тѣ́ломъ ѡ҆писꙋ́емь, благоче́стїѧ заре́ю человѣ́ки просвѣти́лъ є҆́сть.
Дрꙋгі́й канѡ́нъ.
Гла́съ в҃. І҆рмо́съ:
Грѧди́те, лю́дїе, пои́мъ пѣ́снь хрⷭ҇тꙋ̀ бг҃ꙋ, раздѣ́льшемꙋ мо́ре, и҆ наста́вльшемꙋ лю́ди, ꙗ҆̀же и҆зведѐ и҆зъ рабо́ты є҆гѵ́петскїѧ, ꙗ҆́кѡ просла́висѧ.
Пѣсносло́вити достохва́льнꙋю па́мѧть твою̀ ᲂу҆се́рднѡ, прпⷣбне, благода́ть пода́ждь, кѷрі́лле: молѝ ѡ҆ на́съ, и҆ ѡ҆ всѣ́хъ согрѣши́вшихъ ѡ҆ ѡ҆ставле́нїи.
И҆́ноческїй сво́й кре́стъ взе́мъ, преподо́бне, послѣ́довалъ є҆сѝ хрⷭ҇тꙋ̀ вседержи́телю, и҆ ᲂу҆мертви́въ пло́ть, жи́зни вѣ́чныѧ сподо́билсѧ є҆сѝ, преподо́бне. (с. 103)
Зако́нꙋ бж҃їю повинꙋ́ѧсѧ, досточꙋ́дне, страстна̑ѧ взыгра̑нїѧ ᲂу҆вѧди́лъ є҆сѝ воздержа́нїѧ по́двигомъ, и҆ безстра́стїѧ благода́тїю ѡ҆богати́лсѧ є҆сѝ.
Бг҃оро́диченъ:
И҆̀же тебє̀ ра́ди нетлѣ́нїемъ ѡ҆бога́щшесѧ, бг҃ороди́тельнице пречⷭ҇таѧ, ра́дꙋйсѧ, ѡ҆бра́дованнаѧ, вопїе́мъ тѝ, преподо́бныхъ и҆ пра́ведныхъ ᲂу҆краше́нїе.
Пѣ́снь г҃. І҆рмо́съ:
На ка́мени мѧ̀ вѣ́ры ᲂу҆тверди́въ, разшири́лъ є҆сѝ ᲂу҆ста̀ моѧ̑ на врагѝ моѧ̑, возвесели́босѧ дꙋ́хъ мо́й, внегда̀ пѣ́ти: нѣ́сть свѧ́тъ, ꙗ҆́коже бг҃ъ на́шъ, и҆ нѣ́сть пра́веденъ, па́че тебє̀, гдⷭ҇и.
Ѿ на́съ ны́нѣ сло́во похвале́нїѧ плето́мо прїе́млѧ, бг҃оно́се, весели́сѧ твои́ми болѣ́зньми наслажда́ѧсѧ, зовы́й, преподо́бне: ты̀ є҆сѝ бг҃ъ на́шъ.
Словеса̀ ᲂу҆слы́шавъ влⷣчнѧ, ѡ҆ста́вилъ є҆сѝ мі́ръ, и҆ ꙗ҆̀же въ не́мъ, и҆ приве́лъ є҆сѝ сѣ́мѧ твоѐ гдⷭ҇еви, зовы́й: ты̀ є҆сѝ бг҃ъ на́шъ.
Ра́йскꙋю жи́знь, и҆ та́мѡ ст҃ы́хъ весе́лїе, всегда̀ во ᲂу҆мѣ̀ твое́мъ помина́ѧ, прпⷣбне: тѣ́мже и҆ во слеза́хъ и҆ въ воздыха́нїихъ всю̀ свою̀ жи́знь, ѻ҆́ч҃е кѷрі́лле, проше́лъ є҆сѝ, и҆ сегѡ̀ ра́ди и҆ по сме́рти ѿ хрⷭ҇та̀ чꙋдесы̀ просла́вилсѧ є҆сѝ.
Бг҃оро́диченъ:
Ты̀ є҆ди́на па́че всѣ́хъ ꙗ҆̀же ѿ вѣ́ка вели́кихъ сподо́биласѧ є҆сѝ, и҆ вы́ше є҆стества̀: бг҃а бо невмѣсти́маго все́ю тва́рїю, во ᲂу҆тро́бѣ твое́й понесла̀, и҆ воплоти́ла є҆сѝ. тѣ́мъ тѧ̀ бцⷣꙋ всѝ велича́емъ.
И҆́нъ. І҆рмо́съ:
Оу҆твердѝ на́съ къ тебѣ̀, гдⷭ҇и, дре́вомъ ᲂу҆мерщвле́й грѣ́хъ, и҆ стра́хъ тво́й всадѝ въ сердца̀ на́съ пою́щихъ тѧ̀.
Во́дъ живо́тныхъ и҆спо́лншисѧ бжⷭ҇твеннагѡ дх҃а, бг҃оно́се, дꙋша̀ твоѧ̀ рѣ́ки чꙋде́съ то́читъ, недꙋ̑жнымъ и҆сцѣле́нїе подаѧ̀.
Къ широтѣ̀ ра́йстѣй всели́лсѧ є҆сѝ, всеблаже́нне кѷрі́лле, (с. 104) тѣ́снꙋю ше́ствовавъ стезю̀: и҆ бѣсѡ́въ кова̑рствїѧ и҆ шє́ствїѧ безчи́слєннаѧ ᲂу҆тѣсни́лъ є҆сѝ.
Тече́нїемъ твои́хъ сле́зъ напаѧ́емь, ꙗ҆́кѡ дре́во плодоно́сно, кѷрі́лле, благопло́днѣ полє́зныѧ прине́слъ є҆сѝ добродѣ́тєли, чꙋде́съ бжⷭ҇твеннꙋю бл҃года́ть прїе́мь.
Бг҃оро́диченъ:
Є҆ди́нъ бл҃гі́й про́йде ᲂу҆тро́бꙋ воплоща́емь, и҆ человѣ́къ ви́дѣнъ бы́сть соверше́нъ, є҆го́же молѝ спастѝ пою́щыѧ тѧ̀.
Сѣда́ленъ, гла́съ а҃:
Мона́шествовавъ бг҃оꙋго́днѣ, и҆ добродѣ́тельнѡ пожи́въ, бл҃года́ть и҆сцѣле́нїѧ прїѧ́лъ є҆сѝ, блаже́нне кѷрі́лле, зна́мєнїѧ соверши́въ стра̑шна: ѻ҆би́тель же совокꙋпи́въ сщ҃е́ннꙋю, приве́лъ є҆сѝ мно́жество спаса́емыхъ гдⷭ҇еви, пребога́те. Сла́ва бг҃ꙋ просвѣти́вшемꙋ тѧ̀, сла́ва вѣнча́вшемꙋ тѧ̀, сла́ва свѧтꙋ́ю твою̀ па́мѧть просла́вльшемꙋ.
Два́жды.
Сла́ва, и҆ ны́нѣ, бг҃оро́диченъ:
Рꙋ́цѣ твоѝ бжⷭ҇твеннїи, и҆́маже созда́телѧ понесла̀ є҆сѝ, дв҃о пречⷭ҇таѧ, вопло́щшагосѧ бл҃госты́нею, просте́рши, ᲂу҆молѝ є҆го̀ и҆зба́вити на́съ ѿ и҆скꙋше́нїй, и҆ страсте́й, и҆ бѣ́дъ, хва́лѧщихъ тѧ̀ любо́вїю, и҆ вопїю́щихъ: сла́ва все́льшемꙋсѧ въ тѧ̀, сла́ва проше́дшемꙋ и҆зъ тебє̀, сла́ва и҆зба́вльшемꙋ на́съ ржⷭ҇тво́мъ твои́мъ.
Пѣ́снь д҃. І҆рмо́съ:
Прише́лъ є҆сѝ ѿ дв҃ы, не хода́тай, ни а҆́гг҃лъ, но са́мъ, гдⷭ҇и, вопло́щсѧ, и҆ спа́слъ є҆сѝ всего́ мѧ человѣ́ка. тѣ́мъ зовꙋ́ ти: сла́ва си́лѣ твое́й, гдⷭ҇и.
Ѿве́рзлъ є҆сѝ кѷрі́лле, двє́ри своѧ̑, а҆враа́мꙋ ᲂу҆подо́бльсѧ, всѣ̑мъ тре́бꙋющымъ, прпⷣбне кѷрі́лле: тѣ́мъ хрⷭ҇то́съ ѿверза́етъ тѝ нбⷭ҇наѧ врата̀, преблаже́нне.
Во всечестны́й и҆ во сщ҃е́нническїй са́нъ ᲂу҆краси́лсѧ є҆сѝ, кѷрі́лле блаже́нне, и҆ и҆́ноческомꙋ три́знищꙋ ра́дꙋѧсѧ прите́клъ є҆сѝ, всѣ́мъ до́момъ, пребл҃же́нне, приводи́мь. (с. 105)
Посто́мъ и҆ моли́твами тѣ́ло твоѐ, ѻ҆́ч҃е кѷрі́лле, и҆знꙋри́лъ є҆сѝ, и҆ сегѡ̀ ра́ди сподо́билсѧ є҆сѝ ви́дѣти неизречє́ннаѧ блага̑ѧ, ꙗ҆̀же ст҃ы̑мъ ᲂу҆готѡ́ваннаѧ: съ ни́миже, ѻ҆́ч҃е кѷрі́лле, ѡ҆ на́съ молѝ.
Бг҃оро́диченъ:
И҆сцѣлѧ́ѧ є҆́ѵино дре́внее престꙋпле́нїе, въ тебѐ пренепоро́чнꙋю и҆ пречⷭ҇тꙋю всели́сѧ, и҆ всего́ мѧ человѣ́ка воѡбрази́въ па́дшаго, пребжⷭ҇твенный.
И҆́нъ. І҆рмо́съ:
Пою́ тѧ, слꙋ́хомъ бо, гдⷭ҇и, ᲂу҆слы́шахъ и҆ ᲂу҆жасо́хсѧ: до менє́ бо и҆́деши, менѐ и҆щѧ̀ заблꙋ́дшаго. тѣ́мъ мно́гое твоѐ снизхожде́нїе, є҆́же на мѧ̀, прославлѧ́ю, многомлⷭ҇тиве.
Распе́нъ себѐ самого̀ страсте́мъ и҆ мі́рови, бг҃омꙋ́дре ѻ҆́ч҃е, на крⷭ҇тѣ̀ распросте́ршемꙋ дла̑ни хрⷭ҇тꙋ̀ ᲂу҆годи́лъ є҆сѝ, кѷрі́лле: є҆го́же молѝ спастѝ дꙋ́шы на́шѧ.
По́двигомъ страда́нїѧ плотскі̑ѧ ᲂу҆мертви́лъ є҆сѝ ᲂу҆́ды, мє́ртвыѧ же моли́твою возста́вилъ є҆сѝ, и҆ приходѧ́щыѧ ᲂу҆се́рднѡ вѣ́рою чꙋ́днѡ ѡ҆правда́лъ є҆сѝ, и҆ всѧ́къ недꙋ́гъ, ѻ҆́ч҃е, и҆сцѣли́лъ є҆сѝ.
Дх҃а ст҃а́го присво́илъ є҆сѝ твое́й дꙋшѝ и҆́скреннѡ, и҆̀мже па́стырь и҆збра́нъ показа́лсѧ є҆сѝ, ѻ҆́ч҃е бг҃омꙋ́дре, и҆ и҆́нокꙋющымъ ᲂу҆краше́нїе прекра́сное.
Бг҃оро́диченъ:
Ꙗ҆́кѡ до́ждь на рꙋно̀, чⷭ҇таѧ, въ чⷭ҇тно́е чре́во твоѐ сло́во сни́де воплоща́емо, и҆ погꙋбѝ многобо́жїѧ ѡ҆дожде́нїе, всенепоро́чнаѧ, и҆ го́рькꙋю зи́мꙋ разори́лъ є҆́сть.
Пѣ́снь є҃. І҆рмо́съ:
Просвѣще́нїе во тмѣ̀ лежа́щихъ, спасе́нїе ѿча́ѧнныхъ, хрⷭ҇тѐ сп҃се мо́й: къ тебѣ̀ ᲂу҆́тренюю, цр҃ю̀ ми́ра, просвѣти́ мѧ сїѧ́нїемъ твои́мъ: и҆но́гѡ бо, ра́звѣ тебє̀, бо́га не зна́ю.
Хрⷭ҇токра́сномꙋ ѡ҆держа́лсѧ є҆сѝ житїю̀, кѷрі́лле бл҃же́нне, всѣ̑мъ че́стенъ ꙗ҆ви́сѧ. вѣ́сть бо вои́стиннꙋ добродѣ́тель, сла́вне, соверша́ти сїю̀ и҆мꙋ́щихъ: ꙗ҆ви́лбосѧ є҆сѝ свѧще́нникъ хрⷭ҇то́въ достопрїѧ́тенъ. (с. 106)
Си́лою бжⷭ҇твенною ᲂу҆крѣплѧ́емь, бл҃же́нне кѷрі́лле, мїрскꙋ́ю любо́вь крѣ́пкѡ ѿве́рглъ є҆сѝ, и҆ влⷣцѣ ра́дꙋѧсѧ прише́лъ є҆сѝ во́льнымъ твои́мъ пра́вомъ, и҆ сохрани́въ вѣ́рꙋ невреди́мꙋ, и҆ вѣне́цъ сла́вы, бг҃омꙋ́дре, прїѧ́лъ є҆сѝ.
Дне́сь воспѣва́ема свѧще́ннаѧ па́мѧть твоѧ̀, прпⷣбне кѷрі́лле, весели́тъ ᲂу҆ченикѝ твоѧ̑, и҆ честно́е твоѐ ᲂу҆спе́нїе сла́вѧще, глаго́лютъ: моли́твами твои́ми, ѻ҆́ч҃е, соблюдѝ воспѣва́ющихъ тѧ̀.
Бг҃оро́диченъ:
Є҆ди́нꙋ на́мъ во двою̀ сꙋществꙋ̑ ви́димꙋ ѵ҆поста́сь, є҆ди́на бл҃гослове́ннаѧ ражда́еши неизрече́ннѡ, бж҃їе сло́во, воплоти́вшеесѧ за ми́лость неизрече́ннꙋю: того̀ молѝ сохрани́тисѧ пою́щымъ тѧ̀.
И҆́нъ. І҆рмо́съ:
Свѣ́та пода́телю и҆ вѣкѡ́въ тво́рче, гдⷭ҇и, во свѣ́тѣ твои́хъ повелѣ́нїй наста́ви на́съ: ра́звѣ бо тебє̀, и҆но́гѡ бо́га не зна́емъ.
И҆́же въ ми́лость бг҃а молѧ̀, ѻ҆́ч҃е прпⷣбне кѷрі́лле, напо́лнилъ є҆сѝ ꙗ҆́коже и҆лїа̀ чва́нецъ, є҆ле́а сосꙋ́дъ вели́къ, ѿ зрѧ́щихъ ᲂу҆дивлѧ́емь вѣ́рнѡ.
Ꙗ҆́кѡ чи́стъ дꙋше́ю ты̀, во и҆зстꙋпле́нїи бы́въ, ви́дѣлъ є҆сѝ всю̀ зе́млю ꙗ҆́кѡ подъ заре́ю сїѧ́ющꙋ, є҆ди́наго бг҃а почита́ющꙋ, всеблаже́нне кѷрі́лле.
Чꙋдодѣ́йствꙋѧ ѡ҆ хрⷭ҇тѣ̀, водѣ̀ и҆стещѝ моли́твою, прпⷣбне кѷрі́лле, мо́лиши подвигополо́жника: ꙗ҆́же пребыва́ющи проповѣ́даетъ чꙋдеса̀.
Бг҃оро́диченъ:
Живы́й на нб҃сѣ́хъ восхотѣ̀ всели́тисѧ въ ложесна̀ твоѧ̑, чⷭ҇таѧ, ꙗ҆́кѡ да на́съ хра́мы трⷪ҇цѣ сотвори́тъ, тѧ̀ бцⷣꙋ проповѣ́дающихъ.
Пѣ́снь ѕ҃. І҆рмо́съ:
Въ бе́зднѣ грѣхо́внѣй валѧ́ѧсѧ, неизслѣ́днꙋю милосе́рдїѧ твоегѡ̀ призыва́ю бе́зднꙋ: ѿ тлѝ, бж҃е, мѧ̀ возведѝ.
Жите́йскихъ веще́й, ѻ҆́ч҃е кѷрі́лле, нестоѧ́щее свѣ́дый, сїѐ ѡ҆ста́вилъ є҆сѝ, и҆ къ воздаѧ́нїю потща́сѧ го́рнѧгѡ жре́бїѧ, пребога́те. (с. 107)
Бл҃гоче́стнѡ и҆́нѡкъ мно́жество пита́ти не ѡ҆ста́вилъ є҆сѝ, ѻ҆́ч҃е бл҃же́нне кѷрі́лле: тѣ́мъ пи́щи бо́льшїѧ во ѻ҆би́телехъ нбⷭ҇ныхъ сподо́билсѧ є҆сѝ.
Мѣ́сто, є҆́же сподо́бисѧ прїѧ́ти честны̑ѧ мо́щи твоѧ̑ прпⷣбне, ѡ҆свѧти́сѧ, и҆ по мнѡ́гимъ страна́мъ прославлѧ́емо є҆́сть, ꙗ҆́кѡ въ себѣ̀ мо́щи твоѧ̑ и҆мѣ́етъ.
Бг҃оро́диченъ:
Неискꙋсомꙋ́жнаѧ пречⷭ҇таѧ, родила̀ є҆сѝ, и҆ пребыва́еши дв҃ою, ꙗ҆влѧ́ющи бжⷭ҇тва̀ и҆́стиннагѡ сн҃а и҆ бг҃а твоегѡ̀ ѻ҆́бразы.
И҆́нъ. І҆рмо́съ:
Во глꙋбинѣ̀ грѣхо́внѣй содержи́мь є҆́смь, сп҃се, и҆ въ пꙋчи́нѣ жите́йстѣй ѡ҆бꙋрева́емь: но ꙗ҆́коже і҆ѡ́нꙋ ѿ ѕвѣ́рѧ, и҆ менѐ ѿ страсте́й возведѝ, и҆ спаси́ мѧ.
Свѣтосїѧ̑нїи просвѣща́емь ст҃а́гѡ дх҃а, чꙋдотво́рче кѷрі́лле, и҆́нокꙋющымъ свѣти́льникъ свѣ́телъ ꙗ҆ви́лсѧ є҆сѝ.
Ꙗ҆́кѡ пресла́вно житїѐ твоѐ, и҆́мже ста́до и҆́нѡкъ приве́лъ є҆сѝ къ ра́зꙋмꙋ спаси́тельномꙋ.
Жи́тель бы́въ црⷭ҇тва нбⷭ҇нагѡ, бг҃омꙋ́дре кѷрі́лле, сегѡ̀ ᲂу҆лꙋчи́ти молѝ, вѣ́рою тѧ̀ при́снѡ ᲂу҆блажа́ющымъ.
Бг҃оро́диченъ:
И҆зъ ᲂу҆тро́бы твоеѧ̀, чⷭ҇таѧ, возсїѧ́въ пра́вды невече́рнее сл҃нце, и҆ вѣ́рныхъ просвѣтѝ, бцⷣе дв҃о всепѣ́таѧ.
Конда́къ, гла́съ и҃:
Взбра́нномꙋ и҆ крѣ́пкомꙋ а҆дама́нтꙋ, прогони́телю бѣсѡ́въ, но́вомꙋ чꙋдотво́рцꙋ, побѣди́тєльнаѧ, страсте́й ѕлы́хъ свободи́вшесѧ, благода́рствєннаѧ восписꙋ́емъ тѝ, ѻ҆́ч҃е на́шъ кѷрі́лле. Но ꙗ҆́кѡ и҆мѣ́ѧ дерзнове́нїе ᲂу҆ прⷭ҇то́ла хрⷭ҇то́ва, вѣ́рою чтꙋ́щихъ тѧ̀, гра́дъ же и҆ лю́ди моли́твою твое́ю сохранѧ́й: ты́ бо є҆сѝ ста́дꙋ твоемꙋ̀ похвала̀ и҆ ᲂу҆тверже́нїе.
І҆́косъ:
Оу҆слы́шавъ хрⷭ҇то́въ глаго́лъ, и҆ ѡ҆ста́вивъ плотска̑ѧ (с. 108) мꙋдрова̑нїѧ, бога́тство и҆ сла́вꙋ ꙗ҆́кѡ пра́хъ вмѣни́въ, и҆ на стра̑сти ꙗ҆́кѡ безпло́тенъ подвиза́всѧ, и҆ безпло́тныхъ ликостоѧ́нїю чистото́ю ᲂу҆подо́бисѧ: ра́зꙋма дарова̑нїѧ прїѧ́лъ є҆сѝ. тѣ́мъ въ пѣ́снехъ си́це тѝ вопїе́мъ, рекꙋ́ще: ра́дꙋйсѧ, кѷрі́лле преподо́бне и҆ бг҃оно́се, нбⷭ҇ный человѣ́че, земны́й а҆́гг҃ле: ра́дꙋйсѧ, кромѣ̀ мі́ра сꙋ́етнагѡ пꙋсты́ню содѣ́лавый въ кра́снѣмъ ѻ҆́стровѣ, и҆ въ не́мъ ѻ҆би́тель соста́вивъ: ра́дꙋйсѧ, въ не́й и҆́нѡкъ мно́жество собра́лъ є҆сѝ, и҆ ѿ ни́хъ слы́шиши си́це рекꙋ́щихъ: ра́дꙋйсѧ, и҆́нокꙋющымъ ѡ҆ спасе́нїи хода́тай: ра́дꙋйсѧ, ᲂу҆ныва́ющымъ ѻ҆́бразъ ᲂу҆тѣше́нїѧ: ра́дꙋйсѧ, и҆́нокѡмъ ѿ навѣ̑тъ вра́жїихъ и҆зба́вителю: ра́дꙋйсѧ, ско́рбемъ гꙋби́телю на́шегѡ є҆стества̀, ꙗ҆́кѡ ѿгонѧ́ѧ по́мыслы ѕлѡ́бныѧ: ра́дꙋйсѧ, скорбѧ́щымъ дꙋше́ю сла́дкое ᲂу҆тѣше́нїе, и҆ ра́дости бж҃е́ственныѧ пода́телю: ра́дꙋйсѧ, на́шъ предста́телю и҆ и҆зба́вителю: ра́дꙋйсѧ, прпⷣбне ѻ҆́ч҃е кѷрі́лле, и҆́нокѡмъ ᲂу҆добре́нїе.
Пѣ́снь з҃. І҆рмо́съ:
Бг҃опроти́вное велѣ́нїе беззако́ннꙋющагѡ мꙋчи́телѧ высо́къ пла́мень вознесло̀ є҆́сть: хрⷭ҇то́съ же прострѐ бг҃очести̑вымъ ѻ҆трокѡ́мъ ро́сꙋ дꙋхо́внꙋю, сы́й благослове́нъ и҆ препросла́вленъ.
И҆збра́нїемъ сꙋда̀ ᲂу҆краси́лсѧ є҆сѝ, свѧще́нникъ бы́въ, кѷрі́лле ѻ҆́ч҃е прпⷣбне, тѣ́мъ вше́лъ є҆сѝ внꙋ́трь вы́шнѧгѡ хра́ма незаходи́мыѧ зарѝ, своегѡ̀ свѧщеннотворе́нїѧ плодѡ́въ наслажда́ѧсѧ, поѧ̀: бл҃гослове́нъ бг҃ъ ѻ҆тє́цъ на́шихъ.
Ѻ҆те́чєскаѧ возлюби́лъ є҆сѝ ликостоѧ̑нїѧ, и҆ въ ли́цѣхъ ѻ҆тє́цъ ра́достнѡ просла́вилсѧ: и҆ хрⷭ҇тꙋ̀ предстоѧ̀, всеблаже́нне прпⷣбне кѷрі́лле, прїе́млеши своегѡ̀ слꙋже́нїѧ всегѡ̀ воздаѧ̑нїѧ, воспѣва́ѧ: бл҃гослове́нъ бг҃ъ ѻ҆тє́цъ на́шихъ.
И҆сточа́етъ чꙋдеса̀ честна́ѧ ра́ка твоѧ̀, прпⷣбне, преиз̾ѡби́лꙋющи благода́тїю, и҆ вѣ́рою приходѧ́щымъ (с. 109) здра́вїе подае́тъ, хрⷭ҇тꙋ̀ ѿ дꙋшѝ вопїю́щымъ: бл҃гослове́нъ бг҃ъ ѻ҆тє́цъ на́шихъ.
Бг҃оро́диченъ:
И҆зъ ᲂу҆тро́бы ты̀, дв҃о, пра́вды сл҃нце породила̀ є҆сѝ хрⷭ҇та̀, дебельство́мъ пло́ти приѡбщи́вшасѧ человѣ́кѡмъ, и҆ дв҃ою пребыла̀ є҆сѝ. тѣ́мъ воспѣва́емъ: бл҃гослове́нъ, пречⷭ҇таѧ, пло́дъ твоегѡ̀ чре́ва.
И҆́нъ. І҆рмо́съ:
Вѣті̑и ꙗ҆ви́шасѧ ѻ҆́троцы любомꙋ́дрѣйшїи дре́вле, ѿ бг҃опрїѧ́тныѧ бо дꙋшѝ, бг҃осло́вѧще ᲂу҆стна́ми, поѧ́хꙋ: пребжⷭ҇твенный ѻ҆тцє́въ и҆ на́шъ бж҃е, бл҃гослове́нъ є҆сѝ.
Ме́ртвость живоно́снꙋю стѧжа́въ сласте́й ѿложе́нїемъ: тѣ́мже больны̑ѧ и҆сцѣлѧ́ти сподо́билсѧ є҆сѝ, кѷрі́лле, пребжⷭ҇твенный ѻ҆тцє́въ, вопїѧ̀, бж҃е, бл҃гослове́нъ є҆сѝ.
Непщева́вше ᲂу҆мори́ти безъ ᲂу҆ма̀ чародѣѧ́ньми, ѻ҆́ч҃е, лꙋка́выми, тебѐ блюдо́маго бжⷭ҇твенною всѣ́хъ зижди́телѧ дла́нїю, несмы́сленнѡ постыдѣ́вшесѧ, ѡ҆бличе́ни бы́ша сꙋ́щимъ въ тебѣ̀ проразꙋмѣ́нїемъ.
Бг҃оро́диченъ:
И҆сцѣлѝ дꙋшѝ моеѧ̀ стра̑сти, безстра́стїѧ и҆сто́чникъ ро́ждшаѧ несказа́ннѡ, и҆ ᲂу҆миле́нїѧ тꙋ́чꙋ пода́ждь мѝ, хода́тайствꙋѧ мнѣ̀ ᲂу҆тѣшє́нїѧ, ст҃а́ѧ бцⷣе.
Пѣ́снь и҃. І҆рмо́съ:
Въ пе́щь ѻ҆́гненнꙋю ко ѻ҆трокѡ́мъ є҆врє́йскимъ снизше́дшаго и҆ пла́мень въ ро́сꙋ прело́жшаго бг҃а, по́йте, дѣла̀, ꙗ҆́кѡ гдⷭ҇а, и҆ превозноси́те во всѧ̑ вѣ́ки.
Соверше́нною чистото́ю, и҆ любо́вїю хрⷭ҇та̀ возжелѣ́лъ є҆сѝ, свѧщеннотаи́нниче ѻ҆́ч҃е, непреста́нными гла́сы вопїѧ̀: по́йте гдⷭ҇а, всѧ̑ дѣла̀, и҆ превозноси́те є҆го̀ во вѣ́ки.
Мїрскꙋ́ю красотꙋ̀ ѡ҆ста́вивъ во́лею, хрⷭ҇тꙋ̀, блаже́нне, прише́лъ є҆сѝ, благолѣ́пїѧ тогѡ̀ жела́ѧ зрѣ́ти, и҆ во ѻ҆би́тєли ст҃ы̑ѧ всели́лсѧ є҆сѝ, по́йте гдⷭ҇а, вопїѧ̀, всѧ̑ дѣла̀, и҆ превозноси́те є҆го̀ во вѣ́ки.
Ны́нѣ пꙋсты́нѧ весе́лїемъ, ѻ҆́ч҃е, красꙋ́етсѧ, и҆мѣ́ѧ мо́щи (с. 110) твоѧ̑, кѷрі́лле преподо́бне, ᲂу҆ченицы́ же твоемꙋ̀ житїю̀ ревнꙋ́юще, и҆ ѡ҆ твое́й па́мѧти ра́дꙋющесѧ, творцꙋ̀ вопїю́тъ: гдⷭ҇а воспѣва́йте дѣла̀, и҆ превозноси́те є҆го̀ во вѣ́ки.
Бг҃оро́диченъ:
Сщ҃е́нными тѧ̀ гла́сы бж҃їи прⷪ҇ро́цы, чⷭ҇таѧ, быва́ющꙋ мт҃рь провозгласи́ша ꙗ҆́снѡ всѣ́ми владѣ́ющагѡ, пречⷭ҇таѧ: є҆го́же превозно́симъ гдⷭ҇а во вѣ́ки.
И҆́нъ. І҆рмо́съ:
Пе́щь и҆ногда̀ ѻ҆́гненнаѧ въ вавѷлѡ́нѣ дѣ́йства раздѣлѧ́ше, бж҃їимъ велѣ́нїемъ, халдє́и ѡ҆палѧ́ющаѧ, вѣ̑рныѧ же ѡ҆роша́ющаѧ, пою́щыѧ: благослови́те, всѧ̑ дѣла̀ гдⷭ҇нѧ, гдⷭ҇а.
Надъ страстьмѝ тлетво́рными ца́рствовавъ ѡ҆ хрⷭ҇тѣ̀, бг҃омꙋ́дре ѻ҆́ч҃е, въ црⷭ҇твїи нбⷭ҇нѣмъ сподо́билсѧ є҆сѝ жи́ти со всѣ́ми ст҃ы́ми, до́брѣ пожи́въ, и҆ всеви́дца бг҃а возлюби́въ.
Твоѧ̑ ст҃ы̑ѧ моли̑твы прїе́млѧ бг҃ъ, сꙋ́щымъ во ѡ҆скꙋдѣ́нїи съ тобо́ю подава́ше, ꙗ҆̀же къ животꙋ̀ вы́нꙋ, вельмѝ на землѝ прославлѧ́ѧ тѧ̀, чꙋдодѣ́йственный кѷрі́лле всеблаже́нне.
Оу҆кра́шсѧ добро́тами бжⷭ҇твенными, ко кра̑снымъ черто́гѡмъ преста́вилсѧ є҆сѝ, съ бг҃омъ, ѻ҆́ч҃е, пребыва́ѧ: и҆ сегѡ̀ бжⷭ҇твенныѧ красоты̀ въ непроходи̑мыѧ вѣ́ки наслажда́ешисѧ.
Бг҃оро́диченъ:
Живы́й и҆сто́чникъ, ꙗ҆́кѡ во́дꙋ жи́зни поро́ждши, дꙋ́шꙋ мою̀ и҆ста́ѧвшꙋю грѣхо́внымъ пла́менемъ, бцⷣе дв҃о, напо́й, да тѧ̀ сла́влю во вѣ́ки.
Пѣ́снь ѳ҃. І҆рмо́съ:
Ѿ бг҃а бг҃а сло́ва, неизрече́нною мꙋ́дростїю прише́дшаго ѡ҆бнови́ти а҆да́ма, ꙗ҆́дїю въ тлѣ́нїе па́дшаго лю́тѣ, ѿ ст҃ы́ѧ дв҃ы неизрече́ннѡ воплоти́вшагосѧ на́съ ра́ди, вѣ́рнїи, є҆диномꙋ́дреннѡ пѣ́сньми велича́емъ.
Дх҃омъ, ѻ҆́ч҃е, ѡ҆бнища́въ, нбⷭ҇ное црⷭ҇тво воспрїѧ́лъ є҆сѝ со всѣ́ми и҆збра́нными, сла́вы неизрече́нныѧ и҆сполнѧ́емь, болѣ́зней по́честь прїе́млѧ, блаже́нне кѷрі́лле, воздаѧ̑нїѧ: сегѡ̀ ра́ди тѧ̀ вѣ́рою и҆ любо́вїю ᲂу҆блажа́емъ. (с. 111)
Моще́й твои́хъ ра́ка вѣ́рнѡ пристꙋпа́ющымъ и҆сточа́етъ и҆сцѣле́нїй рѣ́ки, стра̑сти дꙋ́шъ потоплѧ́ющи, и҆ тѣле́съ болѣ̑зни ѿе́млющи, блаже́нне кѷрі́лле, моли́твенниче вѣ́рою при́снѡ блажа́щихъ тѧ̀.
Совокꙋплѧ́ѧсѧ съ преподо́бными свѣ́тлыми ста́ды, сїѧ́нїемъ невече́рнимъ мы́сленнѡ, ѻ҆́ч҃е кѷрі́лле, ѡ҆зарѧ́емь, бжⷭ҇твеннꙋю твою̀ па́мѧть творѧ́щыѧ просвѣтѝ вѣ̑рныѧ, и҆ ᲂу҆лꙋчи́ти спасе́нїе моли́твами твои́ми сподо́би.
Бг҃оро́диченъ:
Ѡ҆блиста́еши всѣ́хъ чꙋде́съ зарѧ́ми твои́ми, бг҃облагода́тнаѧ чⷭ҇таѧ, страсте́й и҆ скорбе́й ѿе́млющи мглꙋ̀, и҆ свѣ́тъ весе́лїѧ мы́сленный простира́ющи, мт҃рь бг҃ꙋ тѧ̀ велича́емъ.
И҆́нъ. І҆рмо́съ:
Ꙗ҆́же пре́жде со́лнца, свѣти́льника бг҃а возсїѧ́вшаго, пло́тски къ на́мъ прише́дшаго, и҆зъ бокꙋ̀ дв҃и̑чꙋ, неизрече́ннѡ воплоти́вшаѧ, бл҃гослове́ннаѧ всечⷭ҇таѧ, тѧ̀, бцⷣе, велича́емъ.
Ми́лостивнѡ вмѣсти́лсѧ є҆сѝ, ѻ҆́ч҃е, всѧ́ческихъ благода́телю, неѕло́бїѧ добро́тою ᲂу҆краша́емь, и҆ кро́тостїю и҆ красото́ю добродѣ́телей сїѧ́ѧ: тѣ́мже тѧ̀ всѝ ᲂу҆блажа́емъ.
Пѣ́снь бг҃ꙋ возсыла́ти съ безпло́тными сподо́бисѧ, ꙗ҆́кѡ соблю́дъ ѻ҆́нѣхъ житїѧ̀ чистотꙋ̀, терпѣ́нїемъ сла́вꙋ воспрїѧ́лъ є҆сѝ.
Прїимѝ ѿ на́съ, бг҃оно́се, приноси́мое тѝ моле́нїе ѿ чи́ста се́рдца, и҆ возда́ждь мольба́ми твои́ми согрѣше́нїй ѡ҆ставле́нїе и҆ спасе́нїе, всече́стне.
Бг҃оро́диченъ:
Ꙗ҆́кѡ ко́рень сꙋ́щымъ вои́стиннꙋ, нетлѣ́ннаѧ дв҃о, всѝ вѣ́рнїи надѣ́ющесѧ хвала́ми почита́емъ.
Свѣти́ленъ. Подо́бенъ: Нб҃о ѕвѣзда́ми:
А҆́гг҃льскагѡ житїѧ̀ жела́ѧ, ᲂу҆дали́лсѧ є҆сѝ, кѷрі́лле, въ пꙋсты́ню, и҆ стра̑сти плотскі̑ѧ покори́лъ є҆сѝ, равноа́гг҃еленъ ꙗ҆ви́лсѧ є҆сѝ, ѻ҆́ч҃е на́шъ кѷрі́лле бг҃оно́се.
Два́жды. (с. 112)
Сла́ва, и҆ ны́нѣ, бг҃оро́диченъ:
Держа́ва на́ша, чⷭ҇таѧ, твоѧ̑ рабы̑ сохранѝ всѧ̑ неврє́дны: тѧ́ бо стѧжа́хомъ є҆ди́нꙋ прибѣ́жище дꙋша́мъ на́шымъ.
На хвали́техъ стїхи̑ры, на д҃, гла́съ и҃.
Подо́бенъ: Ѽ пресла́внагѡ чꙋдесѐ!
Кѷрі́лле многонаро́читый, ꙳ мїрско́е ᲂу҆краше́нїе ѡ҆ста́вль, мꙋ́дре, ꙳ болѣ́зньми воздержа́нїѧ крѣ́пкими, ꙳ стра̑сти покори́лъ є҆сѝ плотскі̑ѧ низложи́въ, ꙳ и҆ многоко́зненнаго побѣди́въ врага̀, ꙳ вѣне́цъ съ пра́ведными прїѧ́лъ є҆сѝ. ꙳ тогѡ̀ моли́твами, гдⷭ҇и, ꙳ всѣ̑мъ на́мъ пода́ждь ꙳ ми́ръ и҆ ве́лїю ми́лость.
Два́жды.
Свы́ше дарова́нїй чꙋде́съ ꙳ ѿ бг҃а сподо́билсѧ є҆сѝ, ꙳ блаже́нне кѷрі́лле, ꙳ ѿ приходѧ́щихъ съ вѣ́рою человѣ̑къ, ꙳ бѣ́сы прогонѧ́ѧ, ꙳ и҆ разли̑чныѧ недꙋ́ги и҆сцѣлѧ́ѧ, ꙳ моли́твами твои́ми, прпⷣбне: ꙳ тѣ́мже всѝ па́мѧть твою̀, ꙳ соше́дшесѧ любо́вїю почита́емъ.
Воздержа́нїе и҆зрѧ́дное, ꙳ стоѧ́нїе всено́щное, ꙳ бдѣ́нно ѻ҆́ко, ꙳ ᲂу҆смотрѧ́ющо бжⷭ҇твєнныѧ добрѡ́ты, ꙳ и҆мѣ́лъ є҆сѝ, блаже́нне кѷрі́лле: ꙳ тѣ́мже и҆сцѣлє́нїѧ благода́ть прїѧ́тъ, ꙳ стра̑сти лю̑тыѧ и҆сцѣлѧ́ти. ꙳ сегѡ̀ ра́ди тѧ̀ мо́лимъ: ꙳ и҆спросѝ, ѻ҆́ч҃е, всѣ̑мъ ве́лїю ми́лость.
Сла́ва, гла́съ в҃:
Пꙋсты́нѧ пре́жде бѣсѡ́вскаѧ жили̑ща и҆мѣ́ющь, ны́нѣ же, кѷрі́лле, ᲂу҆чени̑къ твои́хъ мно́жествомъ и҆спо́лнена ᲂу҆краша́етсѧ, хра́мъ бо прече́стенъ бж҃їѧ мт҃ре въ себѣ̀ и҆мѣ́ющи, разли́чными добро́тами ᲂу҆кра́шенъ. тѣ́мже въ не́мъ соше́дшесѧ, и҆ честны́й гро́бъ тво́й ѡ҆бстоѧ́ще, любе́знѡ покланѧ́емсѧ, и҆ мо́лимсѧ, цр҃кви є҆диномы́слїе дарова́ти, и҆ правосла́вномꙋ во́инствꙋ на́шемꙋ на врагѝ спосо́бствовати моли́твами твои́ми, и҆ на́мъ и҆спросѝ ми́ръ, и҆ дꙋша́мъ на́шымъ ве́лїю ми́лость.
И҆ ны́нѣ, бг҃оро́диченъ.
Славосло́вїе вели́кое, и҆ ѿпꙋ́стъ. На лїтꙋргі́и слꙋ́жба прпⷣбническаѧ.