Мѣ́сѧца тогѡ́же въ к҃г-й де́нь. Ст҃а́гѡ сщ҃енномꙋ́ченика полѷка́рпа, є҆пⷭ҇кпа смѵ́рнскагѡ.

На Гдⷭ҇и, воззва́хъ, стїхи̑ры, гла́съ а҃. Подо́бенъ: Нбⷭ҇ныхъ чинѡ́въ:

Со безпло́тными совокꙋпи́лсѧ є҆сѝ, ꙳ на землѝ живы́й, и҆ съ ни́ми непреста́ннѡ слꙋ́жиши трⷪ҇цѣ ꙳, ѻ҆́ч҃е бг҃облаже́нне. (с. 353) тѣ́мже при́снѡ ꙳ ꙗ҆́кѡ нбⷭ҇ный человѣ́къ живы́й въ вы́шнихъ, ꙳ тайнонаꙋча́еши сꙋ́щыѧ на землѝ ꙳ бжⷭ҇твєннымъ та́йнамъ.

Хрⷭ҇то́ва дѣ́ланїѧ ꙳ розга̀ бг҃онасажде́ннаѧ, ꙳ словє́сныѧ бжⷭ҇твєнныѧ ꙳ предлага́ѧ гре́зны, ꙗ҆ви́лсѧ є҆сѝ, бг҃облаже́нне: ꙳ ѿ ни́хже честнꙋ́ю почерпа́емъ сла́дость вѣ́рнѡ, ꙳ и҆ се́рдцемъ бо вселе́ннꙋю поꙋчє́нїѧ твоѧ̑ прино́симъ.

Бжⷭ҇твеннымъ сїѧ́нїемъ ѡ҆зарѧ́емь, ꙳ ѻ҆гне́мъ веще́ственнымъ снѣда́емо тѣ́ло, ꙳ къ невеще́ственнѣй преста́вилсѧ є҆сѝ, ѻ҆́ч҃е, зарѝ: ꙳ и҆ да́ждь разрѣше́нїе моли́твами твои́ми, ꙳ страсте́й мра́чнꙋю но́щь просвѣща́ѧ, ꙳ мꙋ́дре, дꙋ́шъ на́шихъ.

Сла́ва, и҆ ны́нѣ, бг҃оро́диченъ. Подо́бенъ: то́йже:

Прегрѣше́нїй пꙋчи́ною ѡ҆бꙋрева́емь, ꙳ къ ти́хомꙋ приста́нищꙋ прибѣ́гъ, ꙳ пречⷭ҇тѣй моли́твѣ твое́й, ꙳ бг҃ороди́тельнице, взыва́ю тѝ: спаси́ мѧ, ꙳ крѣ́пкꙋю твою̀ десни́цꙋ просте́рши рабꙋ̀ твоемꙋ̀, ꙳ всенепоро́чнаѧ.

Крⷭ҇тобг҃оро́диченъ. Подо́бенъ:

Воздви́жена ꙗ҆́кѡ ви́дѣ на крⷭ҇тѣ̀ а҆́гнца, ꙳ непоро́чнаѧ дв҃а пла́чꙋщи вопїѧ́ше: ꙳ сла́дкое моѐ ча́до, ꙳ что̀ но́вое и҆ пресла́вное видѣ́нїе; ꙳ ка́кѡ содержа́й всѧ́чєскаѧ го́рстїю, ꙳ на дре́вѣ пригвожда́ешисѧ пло́тїю;

Тропа́рь, гла́съ д҃:

И҆ нра́вѡмъ прича́стникъ, и҆ престо́лѡмъ намѣ́стникъ а҆пⷭ҇лѡмъ бы́въ, дѣѧ́нїе ѡ҆брѣ́лъ є҆сѝ, бг҃одꙋхнове́нне, въ видѣ́нїѧ восхо́дъ. сегѡ̀ ра́ди сло́во и҆́стины и҆справлѧ́ѧ, и҆ вѣ́ры ра́ди пострада́лъ є҆сѝ да́же до кро́ве, сщ҃енномꙋ́чениче полѷка́рпе: молѝ хрⷭ҇та̀ бг҃а, спасти́сѧ дꙋша́мъ на́шымъ.

На ᲂу҆́трени канѡ́нъ, є҆гѡ́же краегране́сїе:

Бжⷭ҇твеннагѡ полѷка́рпа въ пѣ́снехъ восхвалѧ́ю. Ѳеофа́ново.

Гла́съ в҃. Пѣ́снь а҃. І҆рмо́съ:

Грѧди́те, лю́дїе, пои́мъ пѣ́снь хрⷭ҇тꙋ̀ бг҃ꙋ, раздѣ́льшемꙋ мо́ре, и҆ наста́вльшемꙋ лю́ди, ꙗ҆̀же и҆зведѐ и҆з̾ рабо́ты є҆гѵ́петскїѧ, ꙗ҆́кѡ просла́висѧ. (с. 354)

Хрⷭ҇то́вымъ свѣтоли́тїемъ сїѧ́ѧ, и҆ тогѡ̀ просвѣще́нїемъ, ѻ҆́ч҃е, наполнѧ́емь, ѡ҆мраче́ннꙋю дꙋ́шꙋ мою̀ ѡ҆зарѝ, бг҃омꙋ́дре, моли́твами твои́ми.

Просвѣще́нїе спаси́тельнагѡ проповѣ́данїѧ, чи́стое се́рдце твоѐ, ꙗ҆́коже зерца́ло нескве́рно, ѻ҆́ч҃е, ѡ҆блиста́въ зари̑ всѣ̑мъ просїѧ̀.

Зако́на но́вагѡ столпописа́нїе ты̀ бы́лъ є҆сѝ напи́сано и҆мѣ́ѧ, ѻ҆́ч҃е, не черни́ломъ, но дх҃омъ бжⷭ҇твеннымъ, бл҃года́ти бжⷭ҇твенное є҆ѵⷢ҇лїе.

Бг҃оро́диченъ:

Бг҃а и҆зъ тебє̀ воплоще́нна вѣ́дꙋще, безъ хотѣ́нїѧ плотска́гѡ, сꙋ́ща пре́жде тва́ри, и҆ пре́жде всѣ́хъ вѣ̑къ, вои́стиннꙋ бцⷣꙋ тѧ̀ и҆сповѣ́дꙋемъ.

Пѣ́снь г҃. І҆рмо́съ:

Оу҆твердѝ на́съ въ тебѣ̀, гдⷭ҇и, дре́вомъ ᲂу҆мерщве́й грѣ́хъ, и҆ стра́хъ твоѝ всадѝ въ сердца̀ на́съ пою́щихъ тѧ̀.

Ма́слина, ѱало́мски рещѝ, плодови́та бы́лъ є҆сѝ, полѷка́рпе бг҃оѧвле́нне, въ домꙋ̀ гдⷭ҇а твоегѡ̀ весе́лїе носѧ̀ проповѣ́данїѧ.

Напра́вилъ є҆сѝ ᲂу҆се́рднѡ, бг҃облаже́нне, ᲂу҆́мъ тво́й повелѣ́нїемъ сп҃совымъ, по досто́инствꙋ бы́лъ є҆сѝ тогѡ̀ цр҃кве па́стырь и҆зрѧ́денъ.

Всецѣ́лꙋю тебѐ сама́го хрⷭ҇тꙋ̀ прине́слъ є҆сѝ, ꙗ҆́кѡ жи́вꙋ же́ртвꙋ мꙋче́нїемъ, со́вѣсти свидѣ́тельствомъ предпострада́въ, всебл҃же́нне, по́стничествомъ.

Бг҃оро́диченъ:

Оу҆мерщвле́нїѧ на́шегѡ пе́рсть ѿтрѧсла̀ є҆сѝ, ро́ждши и҆́стиннѡ безсме́ртїе, и҆ ѻ҆дє́жды на́мъ и҆стка́ла є҆сѝ нетлѣ́нїѧ, дв҃о, ржⷭ҇тво́мъ твои́мъ.

Сѣда́ленъ, гла́съ и҃. Подо́бенъ: Премꙋ́дрости:

Бл҃года́тный гро́здъ въ дꙋшѝ вои́стиннꙋ воздѣ́лавъ, (с. 355) ѻ҆́ч҃е мꙋ́дре, ꙗ҆́кѡ вїно̀ и҆сточи́лъ є҆сѝ вѣ́ры сло́во, веселѧ́щее всѣ́хъ вѣ́рныхъ мы̑сли, и҆ чꙋде́съ ꙗ҆ви́лсѧ є҆сѝ непреходи́ма пꙋчи́на: тѣ́мже и҆ мꙋ́ченикѡвъ ꙗ҆ви́лсѧ є҆сѝ ᲂу҆добре́нїе, ѻ҆гне́мъ скончава́емь, и҆ свѣ́та сподоблѧ́емь присносꙋ́щнагѡ, полѷка́рпе, молѝ хрⷭ҇та̀ бг҃а, прегрѣше́нїй ѡ҆ставле́нїе дарова́ти пра́зднꙋющымъ любо́вїю свѧтꙋ́ю па́мѧть твою̀.

Сла́ва, и҆ ны́нѣ, бг҃оро́диченъ:

Помышле́ньми поползнꙋ́всѧ лꙋка́выми, во глꙋбинꙋ̀ впадо́хъ грѣхо́внꙋю, и҆ стенѧ̀ взыва́ю тѝ ѿ се́рдца, пречⷭ҇таѧ: на мнѣ̀ ᲂу҆дивѝ бога́тꙋю ми́лость, и҆ твоегѡ̀ милосе́рдїѧ неизмѣ́рнꙋю пꙋчи́нꙋ, и҆ щедро́тъ твои́хъ неизче́тное бога́тство: и҆ да́ждь мѝ покаѧ́нїе, и҆ прегрѣше́нїй, проще́нїе, да любо́вїю взыва́ю тебѣ̀: молѝ хрⷭ҇та̀ бг҃а, прегрѣше́нїй ѡ҆ставле́нїе дарова́ти мѝ, тѧ́ бо наде́ждꙋ и҆мѣ́ю ра́бъ тво́й.

Крⷭ҇тобг҃оро́диченъ:

А҆́гнца и҆ па́стырѧ и҆ и҆зба́вителѧ а҆́гница зрѧ́щи на крⷭ҇тѣ̀, восклица́ше пла́чꙋщи, и҆ го́рькѡ рыда́ющи вопїѧ́ше: мі́ръ ᲂу҆́бѡ ра́дꙋетсѧ, прїе́млѧй тобо́ю и҆збавле́нїе, ᲂу҆тро́ба же моѧ̀ гори́тъ, зрѧ́щи твоѐ распѧ́тїе, є҆́же терпи́ши за милосе́рдїе ми́лости. долготерпѣли́ве гдⷭ҇и, ми́лости бе́здно, и҆ и҆сто́чниче неисчерпа́емый, ᲂу҆милосе́рдисѧ, и҆ да́рꙋй прегрѣше́нїй ѡ҆ставле́нїе вѣ́рою пою́щымъ бжⷭ҇твєнныѧ стрⷭ҇ти твоѧ̑.

Пѣ́снь д҃. І҆рмо́съ:

Оу҆слы́шахъ, гдⷭ҇и, слꙋ́хъ твоегѡ̀ смотре́нїѧ, и҆ просла́вихъ тѧ̀, є҆ди́не чл҃вѣколю́бче.

Многопло́дный добродѣ́телей, добропло́дный са́дъ влⷣцѣ ꙗ҆ви́лсѧ є҆сѝ, ѻ҆́ч҃е полѷка́рпе.

Всесожже́нїе соверше́нно, и҆ чи́ста же́ртва прине́слсѧ є҆сѝ сп҃сꙋ всѣ́хъ, ѻ҆́ч҃е полѷка́рпе. (с. 356)

Пѣсносло́вимъ, сла́вне, дꙋшѝ твоеѧ̀ крѣ́пкое терпѣ́нїе, и҆ твои́хъ пѡ́двигъ до́блесть.

Бг҃оро́диченъ:

Просвѣтѝ, чⷭ҇таѧ, ѡ҆мраче́ннꙋю дꙋ́шꙋ мою̀ свѣ́томъ твои́мъ, ꙗ҆́же свѣ́тъ ро́ждшаѧ присносꙋ́щный.

Пѣ́снь є҃. І҆рмо́съ:

Свѣ́та пода́телю и҆ вѣкѡ́въ тво́рче, гдⷭ҇и, во свѣ́тѣ твои́хъ повелѣ́нїй наста́ви на́съ: ра́звѣ бо тебє̀, и҆но́гѡ бо́га не зна́емъ.

Заре́ю дꙋхо́вною просвѣща́емь ᲂу҆́мъ, прпⷣбне, ѻ҆бра́знѡ ѻ҆гне́мъ ѡ҆палѧ́емь ꙗ҆́вѣ наꙋчи́лсѧ є҆сѝ, ѻ҆гне́мъ, бг҃омꙋ́дре, твоегѡ̀ сконча́нїѧ.

Стрꙋю̀ прїѧ́лъ є҆сѝ жи́зни, ꙗ҆́кѡ ѿ пото́ка пи́щи, премꙋ́дре, ᲂу҆ченико́мъ возлю́бленнымъ наꙋче́нъ бы́въ, поче́рпшимъ премꙋ́дрости бе́зднꙋ.

Бога́тство и҆ сла́вꙋ свѣ́тлꙋ, и҆ долготꙋ̀ житїѧ̀, и҆ жи́знь нетлѣ́ннꙋ, и҆́стиннаѧ мꙋ́дрость хрⷭ҇то́съ, тебѣ̀ дарова̀, ѻ҆́ч҃е, ꙗ҆́кѡ вельмѝ того̀ возлю́бльшемꙋ.

Бг҃оро́диченъ:

Ве́тхїй де́ньми, ꙗ҆́коже на рꙋно̀ до́ждь, пречⷭ҇таѧ, въ твоѐ чре́во сни́де ѡ҆свѧще́нное, и҆ но́въ ꙗ҆ви́сѧ а҆да́мъ чл҃вѣколю́бецъ.

Пѣ́снь ѕ҃. І҆рмо́съ:

Въ бе́зднѣ грѣхо́внѣй валѧ́ѧсѧ, неизслѣ́днꙋю милосе́рдїѧ твоегѡ̀ призыва́ю бе́зднꙋ: ѿ тлѝ, бж҃е, мѧ̀ возведѝ.

Оу҆мертви́всѧ, бг҃оглаго́ливе, мі́рꙋ всемꙋ̀, є҆ди́номꙋ же хрⷭ҇тꙋ̀ живы́й пребыва́ѧ: и҆ къ немꙋ̀ преше́лъ є҆сѝ, жи́зненное нетлѣ́нїе прїе́млѧ.

Благоѻбра́знѡ ходѧ̀, бл҃же́нне, ча́до же свѣ́та и҆ ми́ра ꙗ҆влѧ́ѧсѧ, нощна́го пе́рвенца, и҆ бори́телѧ позна́лъ є҆сѝ маркїѡ́на.

Наꙋча́еми, ѻ҆́ч҃е, словесы̀ твои́ми, всѧ́кꙋ побѣжда́емъ (с. 357) скве́рнꙋю є҆́ресь, и҆ лꙋка̑ваѧ сѡ́нмища, два̀ вводѧ́щихъ нача̑ла ѕлочести́выхъ.

Бг҃оро́диченъ:

Грѣ́хъ мі́ра взе́млющаго, чⷭ҇таго а҆́гнца заче́нши, всенепоро́чнаѧ, согрѣше́нїй проще́нїе молѝ дарова́ти рабѡ́мъ твои̑мъ.

Конда́къ, гла́съ а҃. Подо́бенъ: Ли́къ а҆́гг҃льскїй:

Плоды̀ словє́сныѧ гдⷭ҇еви приносѧ̀, полѷка́рпе мꙋ́дре, добродѣ́телей жє́ртвы, тѣ́мже и҆ ѿ бг҃а досто́инъ і҆ера́рхъ просла́вилсѧ є҆сѝ. сегѡ̀ ра́ди дне́сь просвѣ́щшесѧ твои́ми словесы̀, воспѣва́емъ твою̀ достохва́льнꙋю па́мѧть, сла́вѧще гдⷭ҇а.

І҆́косъ:

Мꙋ́дрости благосты́ню поче́рпъ, ѿ тоѧ̀, ѻ҆́ч҃е, напо́лнилъ є҆сѝ бг҃оразꙋ́мїѧ ста́до твоѐ: и҆ всест҃а́гѡ и҆ неизрече́ннагѡ бжⷭ҇тва̀ трисо́лнечное ѡ҆блиста́лъ є҆сѝ, ѻ҆ц҃а̀ нерожде́нїе, сн҃а же рожде́нїе, и҆ и҆схожде́нїе дх҃а, є҆ди́но бжⷭ҇тво̀, є҆ди́нꙋ сла́вꙋ ꙗ҆́снѡ наꙋчи́лъ є҆сѝ, и҆ і҆́дѡльское безбо́жїе и҆зъ ко́рене посѣ́клъ є҆сѝ: плоды́ же зрѣ̑лы дꙋ́шы вѣ́рꙋющихъ приводѧ̀ къ не́й, сла́вне, въ ню́же крести́хомсѧ, въ ню́же и҆ вѣ́рꙋемъ, сла́вѧще гдⷭ҇а.

Пѣ́снь з҃. І҆рмо́съ:

Ѻ҆́бразꙋ злато́мꙋ, на по́лѣ деи́рѣ слꙋжи́мꙋ, трїѐ твоѝ ѻ҆́троцы небрего́ша безбо́жнагѡ велѣ́нїѧ, посредѣ́ же ѻ҆гнѧ̀ вве́ржени, ѡ҆роша́еми поѧ́хꙋ: бл҃гослове́нъ є҆сѝ, бж҃е ѻ҆тє́цъ на́шихъ.

Тве́рдымъ по́мысломъ горѧ́щїй пла́мень преминꙋ́лъ є҆сѝ, сла́вне, ꙗ҆́кѡ трїѐ ѻ҆́троцы пе́щь ѻ҆гне́мъ невеще́ственнымъ ѡ҆роша́еми, посреди́ же ѻ҆гнѧ̀ взыва́ѧ, неѡпали́мь пребы́лъ є҆сѝ: бл҃гослове́нъ є҆сѝ, бж҃е ѻ҆тє́цъ на́шихъ.

Блаже́нъ є҆сѝ, и҆ добро̀ тебѣ̀ є҆́сть, ны́нѣ все́льшемꙋсѧ, и҆дѣ́же пра́ведныхъ селє́нїѧ, и҆дѣ́же мꙋ́чєникъ вѡ́инства, и҆дѣ́же мꙋ́дрыхъ а҆пⷭ҇лѡвъ ли́цы взыва́ютъ: бл҃гослове́нъ є҆сѝ, бж҃е ѻ҆тє́цъ на́шихъ. (с. 358)

Неплѡ́дныѧ пе́рвѣе многоплѡ́дны хрⷭ҇тꙋ̀ дꙋ́шы приве́лъ є҆сѝ, воздѣ́ланїемъ дꙋхо́внымъ ᲂу҆равни́въ, и҆ благокла́сно си̑мъ предлага́ѧ сѣ́мѧ, и҆ наказꙋ́ѧ пою́щыѧ съ тобо́ю: бл҃гослове́нъ є҆сѝ, бж҃е ѻ҆тє́цъ на́шихъ.

Бг҃оро́диченъ:

Ты̀ є҆ди́на бг҃ꙋ, всѧ́чєскаѧ мꙋ́дрѣ содѣ́лавшемꙋ, мт҃и ꙗ҆ви́ласѧ є҆сѝ неискꙋсобра́чнаѧ, дв҃о мт҃и всечⷭ҇таѧ. тѣ́мже благоче́стнѡ тебѣ̀, всенепоро́чнаѧ, взыва́юще, пое́мъ: бл҃гослове́на, ꙗ҆́же бг҃а пло́тїю ро́ждшаѧ.

Пѣ́снь и҃. І҆рмо́съ:

Въ пе́щь ѻ҆́гненнꙋю ко ѻ҆трокѡ́мъ є҆врє́йскимъ снизше́дшаго, и҆ пла́мень въ ро́сꙋ прело́жшаго бг҃а, по́йте, дѣла̀, ꙗ҆́кѡ гдⷭ҇а, и҆ превозноси́те во всѧ̑ вѣ́ки.

Сщ҃еннодѣ́йствовавъ, сла́вне, хрⷭ҇то́вꙋ та́йнꙋю слꙋ́жбꙋ, слове́сное ѻ҆вча̀ себѐ приве́лъ є҆сѝ бг҃ꙋ же́ртвꙋ прїѧ́тнꙋ и҆ благоꙋго́днꙋ, всепло́днꙋ, полѷка́рпе требл҃же́нне.

Ю҆́ношское въ сѣди́нѣ, и҆ глꙋбоча́йшее мꙋ́жество показа́лъ є҆сѝ: крⷭ҇тною си́лою воздви́глъ є҆сѝ себѐ къ бж҃е́ствєннымъ подвигѡ́мъ, бг҃омꙋ́дре, свѧщенномꙋ́ченикѡвъ хрⷭ҇то́выхъ сла́ва, преподо́бне.

Оу҆твержда́емь крⷭ҇то́мъ, и҆ ст҃и́тельскою красото́ю досто́йнѡ ѡ҆блече́нъ, ѻ҆́ч҃е, въ цр҃ковь бж҃їю вше́лъ є҆сѝ твое́ю кро́вїю пастыренача́льникꙋ хрⷭ҇тꙋ̀ ꙗ҆ви́тисѧ.

За хрⷭ҇та̀ закла́всѧ, ꙗ҆́коже знамени́тъ ѻ҆ве́нъ, сщ҃енноѧвле́нне, подо́бникъ ꙗ҆ви́лсѧ є҆сѝ страда́нїємъ є҆гѡ̀, и҆ сла́вы бы́лъ є҆сѝ соприча́стникъ, и҆ црⷭ҇твїѧ є҆гѡ̀ снаслѣ́дникъ.

Бг҃оро́диченъ:

Свѣтови́дѣнъ сто́лпъ ѻ҆́гненъ, и҆ ѻ҆́блакъ свѣ́телъ, предводѧ́щь къ нбⷭ҇номꙋ наслѣ́дїю, бг҃ороди́тельнице чⷭ҇таѧ, бꙋ́ди мѝ, дв҃о всенепоро́чнаѧ, въ пꙋсты́ни житїѧ̀ заблꙋжде́нномꙋ. (с. 359)

Пѣ́снь ѳ҃. І҆рмо́съ:

Ѿ бг҃а бг҃а сло́ва, неизрече́нною мꙋ́дростїю прише́дшаго ѡ҆бнови́ти а҆да́ма, ꙗ҆́дїю въ тлѣ́нїе па́дшаго лю́тѣ, ѿ ст҃ы́ѧ дв҃ы неизрече́ннѡ воплоти́вшагосѧ на́съ ра́ди, вѣ́рнїи, є҆диномꙋ́дреннѡ пѣ́сньми велича́емъ.

Свѣтоно́снаѧ твоѧ̀, ѻ҆́ч҃е, возсїѧ́вши па́мѧть, просвѣща́етъ дꙋ́шы благоче́стнѡ сїю̀ соверша́ющихъ, чꙋ́дне: и҆ прича́стники бжⷭ҇твеннагѡ свѣтоѧвле́нїѧ сїѧ̑ соверша́етъ: ю҆́же досто́йнѡ, бг҃омꙋ́дре, пѣ́сньми ᲂу҆блажа́емъ.

Съ вы́шними ли́ки ст҃ы́хъ а҆́гг҃лъ прⷭ҇то́лꙋ влⷣчнемꙋ предстоѧ̀, сего̀ молѝ дости́гнꙋти на́мъ спаси́тельнꙋю стрⷭ҇ть и҆ тогѡ̀ воскрⷭ҇нїе, свѣ́тлѡ добродѣ́телей многоѻбра̑зныѧ ви́ды соверша́ющыѧ.

Вѣнцено́сца тѧ̀, ѻ҆́ч҃е, и҆ по́чести побѣ́дꙋ прїи́мша, бжⷭ҇твенныѧ десни́цы, и҆ по́двиги сконча́вша, и҆ свѣ́та и҆сполнѧ́ема, вѣ́рꙋюще, полѷка́рпе мꙋ́дре, моли́твенника хрⷭ҇тꙋ̀ тѧ̀ ᲂу҆се́рднѡ предлага́емъ.

Бг҃оро́диченъ:

Ꙗ҆́кѡ бцⷣꙋ тѧ̀, дв҃о, и҆ мт҃рь сло́ва, и҆ хода́таицꙋ сꙋ́щꙋю на́мъ, присносꙋ́щныѧ и҆ бжⷭ҇твенныѧ жи́зни, ꙗ҆́кѡ пра́вды сл҃нце возсїѧ́вшꙋю на́мъ, вѣ́рнїи, є҆диномꙋ́дреннѡ пѣ́сньми велича́емъ.

Свѣти́ленъ. Подо́бенъ: Посѣти́лъ ны̀:

Бг҃осло́вномꙋ ᲂу҆ч҃никꙋ̀ ᲂу҆чени́къ бы́въ, полѷка́рпе, мно́гъ пло́дъ гдⷭ҇ꙋ вѣ́рныхъ приве́лъ є҆сѝ: себе́ же самого̀ всепло́дїе прине́слъ є҆сѝ ѡ҆ твое́мъ ста́дѣ, и҆ ны́нѣ моли́сѧ за всѧ̑ ны̀.

Бг҃оро́диченъ:

Щедрѡ́ты твоѧ̑, бж҃е, на лю́ди и҆ ста́до твоѐ низпослѝ, моли́твами пречⷭ҇тыѧ твоеѧ̀ мт҃ре, и҆ всѣ́хъ ст҃ы́хъ твои́хъ, и҆ на́мъ всѣ̑мъ да́рꙋй вели́кꙋю твою̀ ми́лость.