Мѣ́сѧца тогѡ́же въ к҃-й де́нь. Слꙋ́жба ст҃а́гѡ прпⷣбномч҃ника корни́лїа и҆гꙋ́мена пско́во-пече́рскїѧ ѡ҆би́тели.

На вече́рнѣ На Гдⷭ҇и, воззва́хъ, стїхи̑ры. гла́съ ѕ҃:

По́двиги мꙋ́драгѡ по́стника и҆ болѣ́зни во́ина хрⷭ҇то́ва восхвалѧ́юще по до́лгꙋ, вѣ́рнїи, возопїи́мъ гдⷭ҇еви: тогѡ̀ моли́твами, хрⷭ҇тѐ бж҃е, ѿ всѧ́кїѧ бѣды̀ и҆зба́ви на́съ.

Щи́тъ правосла́вїѧ, мона́хѡвъ наста́вниче, смире́нїѧ ѻ҆́бразъ, стезѧ̀ трꙋдолю́бїѧ, разсѣ́ѧвый тьмꙋ̀ многобо́жїѧ въ лю́дехъ, дх҃омъ нбⷭ҇нымъ и҆спо́лньсѧ, корни́лїе, ꙗ҆́кѡ прⷣте́ча ᲂу҆сѣче́нъ въ главꙋ̀, и҆ ны́нѣ престо́лꙋ цр҃ѧ̀ сла́вы предстоѧ̀, молѝ ѡ҆ на́съ, чтꙋ́щихъ па́мѧть твою̀.

Гла́съ є҃.

Ра́дꙋйсѧ, ве́лїѧ вѣ́рныхъ похвало̀, хрⷭ҇толю́бцєвъ ᲂу҆добре́нїе, ѡ҆би́тели пече́рскїѧ сла́во и҆ ᲂу҆краше́нїе, вѣ́ры хрⷭ҇то́вы насади́телю, правосла́вїѧ стра́же неꙋсы́пный, хрⷭ҇то́въ са́дъ насажде́й, цр҃кви бж҃їѧ, до́брѣ блюды́й своѐ ста́до, бл҃же́нне корни́лїе, и҆ ны́нѣ прⷭ҇то́лꙋ цр҃ѧ̀ сла́вы предстоѧ̀, и҆спросѝ на́мъ ве́лїю ми́лость.

Ра́дꙋйсѧ, бж҃їй во́ине, вождю̀ пресла́вный по́стникѡвъ, кро́ткїй и҆́нокѡвъ наста́вниче, милосе́рдїѧ и҆сто́чниче, нестѧжа́нїѧ ᲂу҆чи́телю, чꙋ́дскїѧ ꙗ҆зы́цы (с. 482) хрⷭ҇то́ви приведы́й, земно́е ше́ствїе скончава́ѧ сла́внѡ. царе́мъ непра́веднѡ ᲂу҆бїе́нъ бы́въ, съ мч҃ники вѣнча́всѧ, корни́лїе, съ ни́ми же молѝ хрⷭ҇та̀ бг҃а дарова́ти на́мъ ве́лїю ми́лость.

Сла́ва, гла́съ и҃:

Прпⷣбне ѻ҆́тче корни́лїе, пра́веднѣ бг҃оше́ствовати ᲂу҆чи́лъ є҆сѝ, нестѧжа́нїѧ рачи́тель бы́лъ є҆сѝ, ѻ҆́бразъ трꙋдолю́бїѧ всѣ̑мъ показа́вый, бг҃ома́тери пѣсносло́вецъ бы́въ, и҆ тоѧ̀ на́мъ ꙗ҆ви́лъ є҆сѝ ѻ҆́бразы чꙋ̑дныѧ. и҆́мже кла́нѧющисѧ, ны́нѣ глаго́лемъ: ѽ, пречⷭ҇таѧ бцⷣе дв҃о, ꙗ҆вѝ на́мъ бога̑тыѧ ми́лѡсти моли́твами прпⷣбнагѡ сщ҃енномч҃ника твоегѡ̀.

И҆ ны́нѣ: Цр҃ь нбⷭ҇ный:

Вхо́дъ. Прокі́менъ днѐ. Чтє́нїѧ трѝ.

Премꙋ́дрости соломѡ́ни чте́нїе.

[Глава̀ г҃] Пра́ведныхъ дꙋ́шы въ рꙋцѣ̀ бж҃їей, и҆ не прико́снетсѧ и҆́хъ мꙋ́ка. Непщева́ни бы́ша во ѻ҆чесѣ́хъ безꙋ́мныхъ ᲂу҆мре́ти, и҆ вмѣни́сѧ ѡ҆ѕлобле́нїе и҆схо́дъ и҆́хъ, и҆ є҆́же ѿ на́съ ше́ствїе, сокрꙋше́нїе: ѻ҆ни́ же сꙋ́ть въ ми́рѣ. И҆́бо предъ лице́мъ человѣ́ческимъ а҆́ще и҆ мꙋ́кꙋ прїи́мꙋтъ, ᲂу҆пова́нїе и҆́хъ безсме́ртїѧ и҆спо́лнено, и҆ вма́лѣ нака́зани бы́вше, вели́кими благодѣ́тельствовани бꙋ́дꙋтъ: ꙗ҆́кѡ бг҃ъ и҆скꙋсѝ ѧ҆̀, и҆ ѡ҆брѣ́те и҆̀хъ достѡ́йны себѣ̀. Ꙗ҆́кѡ зла́то въ горни́лѣ и҆скꙋсѝ и҆̀хъ, и҆ ꙗ҆́кѡ всепло́дїе же́ртвенное прїѧ́тъ ѧ҆̀. И҆ во вре́мѧ посѣще́нїѧ и҆́хъ возсїѧ́ютъ, и҆ ꙗ҆́кѡ и҆́скры по сте́блїю потекꙋ́тъ. Сꙋ́дѧтъ ꙗ҆зы́кѡмъ, и҆ ѡ҆блада́ютъ людьмѝ, и҆ воцр҃и́тсѧ гдⷭ҇ь въ ни́хъ во вѣ́ки. Надѣ́ющїисѧ на́нь разꙋмѣ́ютъ и҆́стинꙋ, и҆ вѣ́рнїи въ любвѝ пребꙋ́дꙋтъ (с. 483) є҆мꙋ̀: ꙗ҆́кѡ благода́ть и҆ ми́лость въ преподо́бныхъ є҆гѡ̀, и҆ посѣще́нїе во и҆збра́нныхъ є҆гѡ̀.

Премꙋ́дрости соломѡ́ни чте́нїе.

[Глава̀ д҃] Пра́ведникъ, а҆́ще пости́гнетъ сконча́тисѧ, въ поко́и бꙋ́детъ. Ста́рость бо честна̀ не многолѣ́тна, нижѐ въ числѣ̀ лѣ́тъ и҆счита́етсѧ: сѣди́на же є҆́сть мꙋ́дрость человѣ́кѡмъ, и҆ во́зрастъ ста́рости, житїѐ нескве́рное. Благоꙋго́денъ бг҃ови бы́въ, возлю́бленъ бы́сть, и҆ живы́й посредѣ̀ грѣ̑шникъ, преста́вленъ бы́сть. Восхище́нъ бы́сть, да не ѕло́ба и҆змѣни́тъ ра́зꙋма є҆гѡ̀, и҆лѝ ле́сть прельсти́тъ дꙋ́шꙋ є҆гѡ̀. Раче́нїе бо ѕло́бы помрача́етъ дѡ́браѧ, и҆ паре́нїе по́хоти премѣнѧ́етъ ᲂу҆́мъ неѕло́бивъ. Сконча́всѧ вма́лѣ, и҆спо́лни лѣ̑та дѡ́лга: ᲂу҆го́дна бо бѣ̀ гдⷭ҇еви дꙋша̀ є҆гѡ̀: сегѡ̀ ра́ди потща́сѧ ѿ среды̀ лꙋка́вствїѧ. Лю́дїе же ви́дѣвше, и҆ не разꙋмѣ́вше, нижѐ поло́жше въ помышле́нїи таково́е: ꙗ҆́кѡ бл҃года́ть и҆ ми́лость въ преподо́бныхъ є҆гѡ̀, и҆ посѣще́нїе во и҆збра́нныхъ є҆гѡ̀.

Премꙋ́дрости соломѡ́ни чте́нїе.

[Гла́вы є҃ и҆ ѕ҃] Пра́вєдницы во вѣ́ки живꙋ́тъ, и҆ въ гдⷭ҇ѣ мзда̀ и҆́хъ и҆ попече́нїе и҆́хъ ᲂу҆ вы́шнѧгѡ. Сегѡ̀ ра́ди прїи́мꙋтъ црⷭ҇твїе благолѣ́пїѧ, и҆ вѣне́цъ добро́ты ѿ рꙋкѝ гдⷭ҇ни: и҆ занѐ десни́цею покры́етъ ѧ҆̀, и҆ мы́шцею защити́тъ и҆̀хъ. Прїи́метъ всеѻрꙋ́жїе рве́нїе своѐ, и҆ воѡрꙋжи́тъ тва́рь въ ме́сть врагѡ́мъ. Ѡ҆блече́тсѧ въ бронѧ̀ пра́вды, и҆ возложи́тъ шле́мъ, сꙋ́дъ нелицемѣ́ренъ: прїи́метъ щи́тъ непобѣди́мый, преподо́бїе: поѡстри́тъ же напра́сный гнѣ́въ во ѻ҆рꙋ́жїе: спобо́ретъ же съ ни́мъ (с. 484) мі́ръ на безꙋ̑мныѧ: по́йдꙋтъ праволꙋ̑чныѧ стрѣ́лы мѡ́лнїины, и҆ ꙗ҆́кѡ ѿ благокрꙋ́гла лꙋ́ка ѡ҆блакѡ́въ на намѣ́ренїе полетѧ́тъ: и҆ ѿ каменоме́тныѧ ꙗ҆́рости, и҆спо́лнь падꙋ́тъ гра́ды: вознегодꙋ́етъ на ни́хъ вода̀ морска́ѧ, рѣ́ки же потопѧ́тъ ѧ҆̀ на́глѡ. Сопроти́въ ста́нетъ и҆̀мъ дꙋ́хъ си́лы, и҆ ꙗ҆́кѡ ви́хорь развѣ́етъ и҆̀хъ: и҆ ѡ҆пꙋстоши́тъ всю̀ зе́млю беззако́нїе, и҆ ѕлодѣ́йство преврати́тъ престо́лы си́льныхъ. Слы́шите ᲂу҆̀бо, ца́рїе, и҆ разꙋмѣ́йте: навы́кните, сꙋдїѝ концє́въ землѝ. Внꙋши́те, держа́щїи мно́жєства и҆ гордѧ́щїисѧ ѡ҆ наро́дѣхъ ꙗ҆зы̑къ: ꙗ҆́кѡ дана̀ є҆́сть ѿ гдⷭ҇а держа́ва ва́мъ, и҆ си́ла ѿ вы́шнѧгѡ.

На лїті́и стїхи̑ры, гла́съ ѕ҃:

Прехва́льне корни́лїе, твоѐ житїѐ возложи́лъ є҆сѝ добродѣ́телей попече́нїе, пѣсносло́вїемъ бо вѣ́рнїи вѣ́рою хрⷭ҇та̀ похвалѧ́ютъ, твои́ми покарѧ́ющесѧ ᲂу҆чє́нїи, и҆̀мже ᲂу҆тверди́тисѧ въ ми́рѣ, предстоѧ̀, ᲂу҆молѝ бжⷭ҇твеннаго дх҃а.

Гла́съ з҃:

Прїиди́те, возра́дꙋемсѧ, лю́дїе, въ честнѣ́мъ хра́мѣ бг҃ома́тери и҆ притеце́мъ къ є҆ѧ̀ ᲂу҆го́дникꙋ корни́лїю, просїѧ́вшемꙋ на́мъ по́двиги дꙋхо́вными, нището́ю дх҃а и҆ терпѣ́нїемъ, бѣ̑днымъ и҆ скорбѧ́щымъ ᲂу҆тѣ́шителю, болѧ́щымъ безме́здномꙋ цѣли́телю, ꙗ҆зы́кѡвъ ᲂу҆чи́телю и҆ просвѣти́телю, нестѧжа́нїѧ и҆ любвѐ насади́телю, подража́телю сп҃са хрⷭ҇та̀. вше́дъ бо во ст҃а̑ѧ не без̾ кро́ве, прпⷣбне, вѣнча́сѧ съ мч҃ники, и҆ ны́нѣ созда́телѧ мо́литъ ѡ҆ на́съ, да и҆зба́вимсѧ лю́тыхъ ѡ҆бстоѧ́нїй и҆ црⷭ҇твїѧ нбⷭ҇нагѡ сподо́бимсѧ. (с. 485)

Сла́ва и҆ ны́нѣ, Под̾ кро́въ тво́й, влⷣчце:

На стїхо́внѣ, гла́съ в҃: Подо́бенъ: До́ме є҆ѵфра́ѳовъ:

До́мъ добродѣ́телей бы́въ, а҆пⷭ҇толъ и҆ мч҃никъ, ѿ ю҆́ности до́мъ ѻ҆́ч҃їй ѡ҆ста́вивый, ѡ҆би́тели дв҃ы пречⷭ҇тыѧ и҆гꙋ́менъ мꙋ́дрый бы́лъ є҆сѝ.

Сті́хъ: Честна̀ пред̾ гдⷭ҇емъ сме́рть прпⷣбныхъ є҆гѡ̀.

Бг҃ома́тери до́мы и҆ ст҃ы̑мъ созида́лъ є҆сѝ, ѻ҆́тче, въ ве́сехъ и҆ гра́дѣхъ, и҆ ны́нѣ въ до́мѣхъ и҆́хъ на нб҃сѝ кꙋ́пнѡ ра́дꙋешисѧ.

Сті́хъ: Сщ҃е́нницы твоѝ ѡ҆блекꙋ́тсѧ въ пра́вдꙋ, и҆ прпⷣбнїи твоѝ возра́дꙋютсѧ.

Бытїѐ и҆ бл҃голѣ́пїе до́ма бг҃ома́тери во пско́встѣй землѝ, ѿ бг҃а зда́ннагѡ, рꙋка́ми ст҃ы́хъ преꙋмно́женнагѡ, вы́нꙋ и҆́мꙋтъ во́лю пречⷭ҇тыѧ и҆ трꙋды̀ бл҃же́ннаго корни́лїѧ.

Сла́ва, и҆ ны́нѣ, Ѽ, чꙋдесѐ но́вагѡ:

А҆́ще же нѣ́сть бдѣ́нїѧ, подо́бенъ то́йже:

Молѝ ѡ҆ на́съ, грѣ́шныхъ, дв҃о, мт҃и гдⷭ҇нѧ, со сщ҃е́ннымъ корни́лїемъ предстоѧ́ще предъ бг҃омъ, да сп҃се́нїе дꙋ́шъ ᲂу҆лꙋчи́мъ.

Тропа́рь, гла́съ ѕ҃:

Пско́во-пече́рскаѧ ѡ҆би́тель, и҆здре́вле сла́внаѧ чꙋдесы̀ і҆кѡ́ны бг҃ома́терни, мнѡ́гїѧ и҆́ноки бг҃ови воспита̀, та́мѡ и҆ прпⷣбный корни́лїй по́двигомъ до́брымъ подвиза́сѧ, чꙋ́днꙋю бг҃ома́терь сла́вѧ, и҆новѣ̑рныѧ просвѣща́ѧ, и҆́ноки и҆ мнѡ́гїѧ лю́ди сп҃са́ѧ, ѡ҆би́тель же свою̀ ди́внѡ ᲂу҆краша́ѧ и҆ ѡ҆гражда́ѧ. та́мѡ и҆ мꙋ́ченичества вѣне́цъ по мно́гихъ лѣ́тѣхъ па́стырства своегѡ̀ до́блестнѣ прїѧ́тъ. тѣ́мже (с. 486) воспои́мъ, лю́дїе, хрⷭ҇та̀ бг҃а и҆ пречⷭ҇тꙋю є҆гѡ̀ мт҃рь возблагодари́мъ, ꙗ҆́кѡ дарова̀ на́мъ прпⷣбномч҃ника сла́вна и҆ моли́твенника ѡ҆ дꙋша́хъ на́шихъ достобл҃же́нна.

На ᲂу҆́трени

Сѣда́ленъ, гла́съ а҃:

А҆́гг҃лѡвъ ли́ки воспо́лнилъ є҆сѝ, прпⷣбне корни́лїе, ѻ҆́бразъ и҆мы́й а҆́гг҃льскїй, сщ҃е́нствомъ ѡ҆дѣ́ѧнъ и҆ мч҃ничествомъ ᲂу҆кра́шенъ, цѣльбꙋ̀ дꙋша́мъ и҆ тѣлесє́мъ подае́ши съ вѣ́рою несꙋмнѣ́нною прибѣга́ющымъ къ тебѣ̀.

Сла́ва, и҆ ны́нѣ, бг҃оро́диченъ:

Возвы́си ро́гъ хрⷭ҇тїа́нскїй и҆ низложѝ безбѡ́жныѧ шата̑нїѧ, бг҃ороди́тельнице, сп҃са́ющи сїѐ ста́до твоѐ, въ не́мже вели́кое твоѐ и҆́мѧ многопѣ́тое велича́етсѧ при́снѡ и҆ сла́витсѧ.

Велича́нїе, прокі́менъ и҆ є҆ѵⷢ҇лїе прпⷣбническаѧ.

По н҃-мъ ѱалмѣ̀ стїхи́ра, гла́съ ѕ҃:

И҆злїѧ́сѧ бл҃года́ть ѿ ᲂу҆сте́нъ твои́хъ, ѻ҆́тче, и҆ бы́лъ є҆сѝ ᲂу҆чи́тель ꙗ҆зы́кѡвъ и҆ мона́хѡвъ наста́вникъ до́брый, и҆злїѧ́всѧ свое́ю кро́вїю, хрⷭ҇тꙋ̀ предста́лъ є҆сѝ, корни́лїе, є҆го́же молѝ непреста́ннѡ сп҃сти́сѧ дꙋша́мъ на́шымъ.

Канѡ́нъ бцⷣѣ, гла́съ и҃: Мно́гими содержи́мь напа́стьми: и҆ ст҃о́мꙋ, гла́съ и҃.

Пѣ́снь а҃.

І҆рмо́съ: Во́дꙋ проше́дъ, ꙗ҆́кѡ сꙋ́шꙋ, и҆ є҆гѵ́петскагѡ ѕла̀ и҆збѣжа́въ, і҆и҃льтѧнинъ вопїѧ́ше: и҆зба́вителю и҆ бг҃ꙋ на́шемꙋ пои́мъ. (с. 487)

Оу҆миле́нїѧ мѝ во́дꙋ и҆зле́й, гдⷭ҇и, въ се́рдце, и҆ ᲂу҆́мъ ѡ҆зарѝ досто́йнѡ воспѣ́ти твоего̀ ᲂу҆го́дника, прпⷣбнаго корни́лїѧ.

Мона́хѡвъ наста́вникъ и҆ ᲂу҆чи́тель нелицепрїѧ́тенъ бы́лъ є҆сѝ и҆ бг҃ꙋ си́хъ приводѧ̀, мч҃ническимъ вѣнце́мъ ѿ земна́гѡ цр҃ѧ̀ вѣнча́лсѧ є҆сѝ, бл҃же́нне.

Хрⷭ҇то́вымъ свѣтоли́тїемъ просвѣща́емъ, прпⷣбне ѻ҆́тче корни́лїе, моли́твами твои́ми, пребл҃же́нне, ѡ҆мраче́ннꙋю дꙋ́шꙋ мою̀ просвѣтѝ, ꙗ҆́кѡ да воспѣва́ю тѧ̀.

Бг҃оро́диченъ:

Тишина̀ ты̀, влⷣчце, и҆ приста́нище погиба́ющымъ въ мо́ре грѣхѡ́въ, тѣ́мже къ тебѣ̀ притека́ющихъ не ѿри́ни, приснодв҃о, но спасѝ твои́мъ предста́тельствомъ бг҃ома́тернимъ.

Пѣ́снь г҃.

І҆рмо́съ: Нбⷭ҇нагѡ крꙋ́га верхотво́рче, гдⷭ҇и, и҆ цр҃кве зижди́телю, ты̀ менѐ ᲂу҆твердѝ въ любвѝ твое́й, жела́нїй кра́ю, вѣ́рныхъ ᲂу҆твержде́нїе, є҆ди́не чл҃вѣколю́бче.

Просвѣти́лъ є҆сѝ лю́ди, і҆́дѡлѡмъ слꙋжа́щыѧ, свѣ́томъ и҆́стинныѧ вѣ́ры, ѡ҆зарѝ и҆ на́съ, грѣ́шныхъ, прибѣга́ющихъ къ твоемꙋ̀ застꙋпле́нїю, бл҃года́тїю ѡ҆ всеблага́гѡ чл҃вѣколю́бца.

Всѣ̑мъ бла̑га дꙋхѡ́вныѧ и҆ тѣлє́сныѧ дѣ́ѧ, навѣ́томъ ѕлы́хъ пло́ть твоѧ̀ ᲂу҆мертви́сѧ, со ст҃ы́ми же дꙋ́хъ тво́й всели́сѧ, и҆ ны́нѣ съ ни́ми моли́сѧ хрⷭ҇тꙋ̀ ѡ҆ на́съ, прпⷣбне.

Ны́нѣ въ безконе́чнꙋю сла́вꙋ преше́дъ ѿ землѝ, ѡ҆каѧ́ннꙋю дꙋ́шꙋ мою̀ страстьмѝ, прпⷣбне, приле́жнымъ ѡ҆чище́нїемъ твоеѧ̀ моли́твы ᲂу҆врачꙋ́й. (с. 488)

Бг҃оро́диченъ:

То́чїю въ хра́мѣ твое́мъ, а҆́ки въ кораблѣ̀, тобо́ю ѡ҆кормлѧ́емѣмъ, бцⷣе, и҆збавлѧ́емсѧ ны́нѣ ѿ вра̑гъ ви́димыхъ и҆ неви́димыхъ и҆ ᲂу҆крѣплѧ́емсѧ твое́ю по́мощїю, приснодв҃о.

И҆́нъ конда́къ, гла́съ в҃:

И҆зъ мла́да, корни́лїе чꙋ́дный, трꙋдѡ́мъ и҆ по́двигѡмъ себѐ преда́въ, и҆гꙋ́меномъ пско́во-пече́рстѣй ѡ҆би́тели поста́вленъ бы́лъ є҆сѝ, ѻ҆́бразомъ вѣ́ры и҆ по́стническагѡ житїѧ̀ всѣ̑мъ бы́въ, мнѡ́гїѧ лю́ди къ бг҃ꙋ приве́лъ є҆сѝ. за своѧ̑ же вєли́кїѧ добродѣ̑тели за́вистїю ѿ ѕлы́хъ гони́мъ, мч҃нически дꙋ́шꙋ свою̀ бг҃ови пре́далъ є҆сѝ. тогѡ̀ ра́ди съ вѣ́рою возопїи́мъ: прпⷣбномч҃ниче корни́лїе достосла́вный, молѝ хрⷭ҇та̀ бг҃а сп҃сти́сѧ дꙋша́мъ на́шымъ.

И҆́нъ і҆́косъ:

И҆зъ мла́да сп҃се́нїѧ вожделѣ́въ, прпⷣбне корни́лїе, въ пско́во-пече́рскꙋю ѡ҆би́тель прите́клъ є҆сѝ къ чꙋ́днѣй і҆кѡ́нѣ бг҃ома́тери. тꙋ̀ постри́гсѧ, ѡ҆бѣ́ты и҆́ночества прїѧ́въ, є҆ѵⷢ҇льскими добродѣ́тельми просїѧ́лъ є҆сѝ, тѣ́мже и҆ вожде́мъ бра́тїи поста́вленъ бы́лъ є҆сѝ. всѣ̑мъ слꙋжѧ̀ и҆ помога́ѧ, да всѧ́чески всѣ́хъ сп҃се́ши, трꙋды̀ и҆ по́двиги своѧ̑ ᲂу҆сꙋгꙋ́билъ є҆сѝ. лїво́нскꙋю чꙋ́дь къ правосла́внѣй вѣ́рѣ ѡ҆брати́лъ є҆сѝ, цр҃кви и҆ при́чты и҆̀мъ ᲂу҆стро́ивъ. ѡ҆би́тель свою̀ до́брыми хра́мы, списа́нїемъ чꙋде́съ бг҃ома́тернихъ и҆ трꙋдѡ́въ пе́рвыхъ подви́жникѡвъ пече́рскихъ всю́дꙋ просла́вилъ є҆сѝ, за́вистїю же ѕло́бныхъ люде́й по мно́гихъ лѣ́тахъ па́стырства своегѡ̀ земны́мъ царе́мъ къ нбⷭ҇номꙋ цр҃ю̀ мч҃нически предпо́сланъ бы́лъ є҆сѝ въ вѣ́чное жили́ще (с. 489) къ ли́кꙋ ст҃ы́хъ. тѣ́мже, досточꙋ́дне корни́лїе, молѝ хрⷭ҇та̀ бг҃а и҆ пречⷭ҇тꙋю є҆гѡ̀ бг҃ома́терь дарова́ти на́мъ ѡ҆ставле́нїе прегрѣше́нїй и҆ ве́лїю ми́лость.

Пѣ́снь д҃.

І҆рмо́съ: Оу҆слы́шахъ, гдⷭ҇и, смотре́нїѧ твоегѡ̀ та́инство, разꙋмѣ́хъ дѣла̀ твоѧ̑ и҆ просла́вихъ твоѐ бжⷭ҇тво̀.

Ѻ҆би́тель бѧ́ше и҆здре́вле ст҃ы́хъ въ бг҃озда́ннѣй пеще́рѣ, бг҃ꙋ є҆ди́номꙋ вѣ́домаѧ, ты́ же, ѻ҆́тче корни́лїе, тѣ́мъ подража́ѧ и҆ мѣ́сто и҆́хъ по́двигѡвъ почита́ѧ, мно́жество и҆́нокѡвъ къ бг҃ꙋ приве́лъ є҆сѝ.

Не ѡ҆ста́ви, корни́лїе прпⷣбне, твои́ми по́тами и҆ трꙋда́ми возвраще́нныѧ сеѧ̀ ѡ҆би́тели, но ѡ҆хранѧ́й ю҆̀, и҆́бо и҆ врази́ тѧ ви́дѣша ѡ҆хранѧ́ющимъ ю҆̀ и҆ ᲂу҆крѣплѧ́ющимъ.

Многоболѣ̑зненныѧ стра̑сти всегда̀ врачꙋ́еши пристꙋпа́ющихъ къ тебѣ̀, бл҃года́ть бо, прпⷣбне, прїи́мъ ѿ гдⷭ҇а, содѣва́ти зна́мєнїѧ и҆ чꙋдеса̀.

Бг҃оро́диченъ:

Оу҆толѝ, бг҃ома́ти, свирѣ́пствꙋющꙋю бꙋ́рю невѣ́рїѧ и҆ ѡ҆жесточе́нїѧ, ѕлы̑ѧ стра̑сти, поглоти́ти хотѧ́щыѧ тѧ̀ сла́вѧщихъ и҆ ѻ҆́бразъ тво́й почита́ющихъ, но застꙋпѝ на́съ моли́твами прпⷣбнагѡ твоегѡ̀.

Пѣ́снь є҃.

І҆рмо́съ: Просвѣтѝ на́съ повелѣ̑нїи твои́ми, гдⷭ҇и, и҆ мы́шцею твое́ю высо́кою тво́й ми́ръ пода́ждь на́мъ, чл҃вѣколю́бче.

Ꙗ҆́кѡ ка́мень драгі́й ѡ҆гради́лъ є҆сѝ крѣ́пкѡ ѡ҆би́тель ѿ ра́тникѡвъ ѕлы́хъ, прпⷣбне, и҆зыма́ѧ и҆ свобожда́ѧ и҆́нокѡвъ ѿ страсте́й и҆ добродѣ́тельми горѣ̀ возводѧ̀.

Да не ѡ҆скꙋдѣ́ютъ, ѻ҆́тче, твои́ми мл҃твами и҆́стиннїи пѡдви́жницы бл҃гоче́стїѧ во ѡ҆би́тели твое́й, (с. 490) но кꙋ́пнѡ со ст҃ы́мъ чꙋдотво́рцемъ нїкола́емъ, є҆мꙋ́же ѡ҆хране́нїе є҆ѧ̀ ввѣ́рилъ є҆сѝ, до трꙋбы̀ а҆рха́гг҃ла соблюдѝ ю҆̀.

Прпⷣбне ѻ҆́тче, помозѝ ѡ҆би́тели твое́й, насе́льникѡмъ и҆ всѣ̑мъ на́мъ всѧ̑ кѡ́зни лꙋка́вагѡ ѿража́ти, ꙗ҆́коже ты̀ и҆ногда̀ ѿража́лъ є҆сѝ ви̑димыѧ врагѝ и҆ неви̑димыѧ.

Бг҃оро́диченъ:

Мглꙋ̀ страсте́й на́шихъ разрѣшѝ, дв҃о, и҆ бл҃года́тною си́лою сн҃а твоегѡ̀ ѿженѝ врагѡ́въ кова́рство и҆ навѣ̑ты дїа́вола ѿ ра̑бъ твои́хъ, тѧ̀ сла́вѧщихъ.

Пѣ́снь ѕ҃.

І҆рмо́съ: Моли́твꙋ пролїю̀ ко гдⷭ҇ꙋ и҆ томꙋ̀ возвѣщꙋ̀ печа̑ли моѧ̑, ꙗ҆́кѡ ѕѡ́лъ дꙋша̀ моѧ̀ и҆спо́лнисѧ и҆ живо́тъ мо́й а҆́дꙋ прибли́жисѧ, и҆ молю́сѧ, ꙗ҆́кѡ і҆ѡ́на: ѿ тлѝ, бж҃е, возведи́ мѧ.

Пречⷭ҇тыѧ до́мъ, прпⷣбне, ѡ҆гради́лъ и҆ ᲂу҆краси́лъ є҆сѝ, тѣ́мже и҆ са́мъ ны́нѣ во ѡ҆би́тели є҆ѧ̀ на нб҃сѝ и҆ на землѝ въ хра́мѣ є҆ѧ̀ досто́йнѡ ѡ҆бита́еши.

Оу҆тѣ́ши и҆ ᲂу҆тишѝ на́съ, си́рыхъ, и҆ въ добродѣ́тели ни́щихъ, прпⷣбномч҃ниче, жите́йскꙋю го́рдость ѿрѣва́ѧ и҆ моли́твѣ и҆́стиннѣй наꙋча́ѧ.

Содѣ́ѧвъ, пресла́вне, дꙋ́шꙋ твою̀ хра́мъ ст҃о́мꙋ дх҃ꙋ, бы́лъ є҆сѝ наслѣ́дникъ го́рнѧгѡ црⷭ҇твїѧ, съ вы́шними си́лами и҆ со всѣ́ми ст҃ы́ми моли́сѧ ко гдⷭ҇ꙋ ѡ҆ сп҃се́нїи дꙋ́шъ на́шихъ.

Бг҃оро́диченъ:

Сохранѝ до́мъ тво́й, бцⷣе, до сконча́нїѧ вѣ́ка и҆ не ѡ҆ста́ви на́съ, си́рыхъ, безъ твоеѧ̀ мт҃рнїѧ по́мощи и҆ предста́тельства прпⷣбныхъ твои́хъ. (с. 491)

Конда́къ, гла́съ д҃:

Свѣ́тлый свѣти́льникъ правосла́вїѧ и҆ сꙋгꙋ́баѧ пско́вскїѧ землѝ защи́та бы́лъ є҆сѝ, многобо́жїе и҆скоренѧ́ѧ и҆ лю́ди къ бг҃ꙋ наставлѧ́ѧ. до́мъ бг҃ома́тери тобо́ю ᲂу҆крѣпи́сѧ и҆ просла́висѧ, добродѣ́тельми же ᲂу҆кра́шенъ, вѣне́цъ мч҃ника прїѧ́лъ є҆сѝ, помина́й на́съ, ча́дъ твои́хъ, и҆ ᲂу҆ гдⷭ҇а, прпⷣбномч҃ниче корни́лїе.

І҆́косъ:

Бг҃омъ возлю́бленный и҆гꙋ́менъ и҆зрѧ́дный, вѣ́ры хрⷭ҇то́вой а҆пⷭ҇толъ и҆ мч҃никъ, всѣ̑мъ милосе́рдый, и҆ ни́щихъ пита́тель, ѿ і҆́дѡлѡвъ лю́ди приведы́й къ бг҃ꙋ и҆́стинномꙋ, вѣ́рѣ наставлѧ́ѧ и҆ бж҃їѧ хра́мы ᲂу҆строѧ́ѧ, во ѡ҆би́тели пречⷭ҇тыѧ мона́хѡвъ мнѡ́жества собра́лъ є҆сѝ, тѣ́мже бг҃ома́терь просла́ви своѧ̑ ѻ҆́бразы дѣла́ми чꙋ́дными, и҆́хже свидѣ́тель нело́женъ бы́лъ є҆сѝ, и҆ ны́нѣ же ѿ ско́рбныхъ ѡ҆бстоѧ́нїй и҆збавлѧ́еши, да съ вѣ́рою и҆ любо́вїю пое́мъ тѝ: ра́дꙋйсѧ, прпⷣбномч҃ниче корни́лїе.

Пѣ́снь з҃.

І҆рмо́съ: Ѿ і҆ꙋде́и доше́дше, ѻ҆́троцы въ вавѷлѡ́нѣ и҆ногда̀ вѣ́рою трⷪ҇ческою пла́мень пе́щный попра́ша, пою́ще: ѻ҆тцє́въ бж҃е бл҃гослове́нъ є҆сѝ.

І҆ѡ́ны первонача́льника, гони́телей не́когда и҆збѣ́гшагѡ, мч҃ничество воспрїѧ́лъ є҆сѝ, сла́вне тѣ́мже съ ни́мъ бг҃ꙋ моли́сѧ, да сохрани́тъ ѡ҆би́тель ва́шꙋ невреди́мꙋ и҆ на́съ покаѧ́нїемъ къ ва́мъ привлече́тъ.

Ма́ркъ, пꙋсты́нникъ та́йный, а҆́ки мелхїседе́къ не́мощїю тѧ̀ вразꙋмѝ, корни́лїе, ѡ҆ и҆́мени свое́мъ є҆гѡ́же смире́нїю поревнова́ти наꙋчѝ на́съ, бл҃же́нне. (с. 492)

Просвѣти́въ твоѐ се́рдце, прпⷣбне, мона́хѡвъ бы́лъ є҆сѝ наста́вникъ, наказꙋ́ѧ и҆ ᲂу҆ча̀ и҆ всѣ́хъ приводѧ̀ къ бж҃їей во́лѣ, поѧ̀: ѻ҆тє́цъ на́шихъ бж҃е, бл҃гослове́нъ є҆сѝ.

Бг҃оро́диченъ:

Да заградѧ́тсѧ, бцⷣе, твои́ми моли́твами ᲂу҆ста̀ лжи̑ваѧ и҆ льсти̑ваѧ не вѣ́дꙋщихъ надъ вѣ́рными покро́ва твоегѡ̀, и҆ сп҃сѝ всѣ́хъ, дв҃о, тебѣ̀ и҆́стиннѡ слꙋжа́щихъ и҆ хрⷭ҇то́во и҆́го бл҃го́е до́брѣ несꙋ́щихъ.

Пѣ́снь и҃.

І҆рмо́съ: Цр҃ѧ̀ нбⷭ҇наго, є҆го́же пою́тъ во́и а҆́гг҃льстїи, хвали́те и҆ превозноси́те во всѧ̑ вѣ́ки.

Вразꙋмлѧ́еши живꙋ́щыѧ во ѡ҆гра́дѣ твое́й, прпⷣбне, ꙗ҆влѧ́ѧсѧ и҆̀мъ ꙗ҆́вѣ и҆ во снѣ̀ наставлѧ́ѧ, но и҆ всѣ̑мъ, молѧ́щымсѧ тебѣ̀, чꙋ́днѡ помога́еши и҆ ѿ ѕлы́хъ бѣ́дъ и҆збавлѧ́еши.

Молѝ ѡ҆ на́съ, прпⷣбне, и҆ не забꙋ́ди къ тебѣ̀ притека́ющихъ, въ ско́рбехъ и҆ печа́лехъ сꙋ́щихъ, подаѧ́й ᲂу҆тѣше́нїе ѿ твое́й ра́ки цѣльбоно́сныѧ.

Процвѣ́лъ є҆сѝ ꙗ҆́кѡ фі́нїѯъ даві́дски, ѻ҆́тче, и҆ ѡ҆би́тель ꙗ҆ви́лсѧ є҆сѝ дх҃а прест҃а́гѡ, ѡ҆ на́съ непреста́ннѡ молѝ почита́ющихъ вѣ́рою пречⷭ҇тнꙋ́ю па́мѧть твою̀, прпⷣбне корни́лїе.

Бг҃оро́диченъ:

Вѣ́къ скончава́етсѧ, любо́вь ѡ҆скꙋдѣва́етъ, побѣ́дꙋ лꙋка́вый торжествꙋ́етъ, и҆ кто̀ на́мъ помощѝ мо́жетъ, а҆́ще не ты̀, дв҃о, чꙋ́днаѧ мт҃и, ѡ҆гради́ши крⷭ҇то́мъ сн҃а твоего̀.

Пѣ́снь ѳ҃.

І҆рмо́съ: Вои́стинꙋ бцⷣꙋ тѧ̀ и҆сповѣ́дꙋемъ, сп҃се́ннїи тобо́ю, дв҃о чⷭ҇таѧ, съ безпло́тными ли̑ки тѧ̀ велича́юще. (с. 493)

Въ домꙋ̀ бг҃ома́тери, ꙗ҆́коже въ геѳсїма́нїи, почива́еши ны́нѣ, бл҃же́нне, и҆дѣ́же, слꙋжа̀ ᲂу҆миле́ннѣ, предстоѧ́лъ є҆сѝ прⷭ҇то́лꙋ бж҃їю смире́ннѡ, въ верте́пѣ ѡ҆сщ҃е́нномꙋ.

Никто́же неꙋтѣ́шенъ ѿхо́дитъ ѿ твоеѧ̀ ра́ки, прпⷣбне, но и҆сцѣле́нїе дꙋ́шъ и҆ тѣле́съ вѣ́рꙋющымъ подае́ши всегда̀ и҆з̾ѻби́льнѡ.

Зри́ши бж҃їѧ и҆ а҆́гг҃льскїѧ свѣ́тлости патрїа̑рхъ и҆ мч҃никъ и҆ а҆пⷭ҇тольскїѧ красо́ты, молѝ съ ни́ми чл҃вѣколю́бца ѡ҆ставле́нїе грѣхѡ́въ и҆ житїѧ̀ и҆справле́нїе дарова́ти на́мъ, прпⷣбне, хва́лѧщымъ тѧ̀.

Бг҃оро́диченъ:

Тишина̀ ве́лїѧ бы́сть въ пеще́рѣ сꙋ́щымъ, сꙋе́тъ мі́ра и҆збѣ́гшымъ ст҃ы̑мъ. ты̀, ѽ мт҃и дв҃о, нбⷭ҇нꙋю тишинꙋ̀ низпослѝ и҆ на́мъ, чⷭ҇таѧ, тебѐ велича́ющымъ.

Свѣти́ленъ:

Сщ҃е́нствомъ досто́йнѡ ѡ҆блече́нъ, ᲂу҆добре́нъ же ѕѣлѡ̀ прпⷣбїемъ, бцⷣы до́мъ ᲂу҆краси́въ и҆ просла́вивъ, ꙗ҆зы́цы ко хрⷭ҇тꙋ̀ приве́лъ є҆сѝ, ᲂу҆сѣче́нїемъ же ме́чнымъ сѣдина̀ твоѧ̀ ѡ҆багри́сѧ кро́вїю, корни́лїе, и҆ ны́нѣ со ст҃ы́ми хрⷭ҇тꙋ̀ предстоѧ̀, молѝ почита́ющымъ па́мѧть твою̀ земно́е ше́ствїе въ ми́рѣ прейтѝ и҆ ѡ҆деснꙋ́ю сꙋдїѝ предста́ти.

Сла́ва, и҆ ны́нѣ, бг҃оро́диченъ:

По ᲂу҆спе́нїи твое́мъ мі́ра не ѡ҆ста́вила є҆сѝ, бцⷣе, но и҆ въ де́бри зе́мной прославлѧ́еши и҆́мѧ ст҃о́е своѐ чꙋдеса́ми ѿ і҆кѡ́ны твоеѧ̀ ст҃ы́ѧ и҆ гро́ба прпⷣбномч҃ника, съ ни́мже молѝ сн҃а и҆ бг҃а твоего̀ ѡ҆ на́съ, недосто́йныхъ, тѧ̀ при́снѡ бл҃жа́щихъ. (с. 494)

На хвали́техъ стїхи́ра, гла́съ г҃:

Что̀ сїѐ стра́нное видѣ́нїе; ст҃ы́й и҆зы́де въ срѣ́тенїе гро́зномꙋ влⷣцѣ предъ враты̀ ѡ҆би́тели со сла́вою, воздава́ѧ земно́мꙋ царю̀ до́лжное, то́й же побѣжде́нъ бы́въ гнѣ́ва и҆зстꙋпле́нїемъ, до́браго па́стырѧ ѕлѣ̀ сме́рти предадѐ, но а҆́бїе возрыда̀, созна́въ грѣхопаде́нїе, и҆ ме́ртва сꙋ́ща во хра́мъ бг҃ома́тери внесѐ, и҆дѣ́же почива́ѧй ны́нѣ, корни́лїе, съ мч҃ники ѡ҆ на́съ хрⷭ҇та̀ бг҃а молѝ дарова́ти на́мъ ве́лїю ми́лость.

Сла́ва, гла́съ ѕ҃: И҆злїѧ́сѧ бл҃года́ть: (Зрѝ стїхи́рꙋ по н҃-мъ ѱалмѣ̀) И҆ ны́нѣ: Бцⷣе, ты̀ є҆сѝ лоза̀ и҆́стиннаѧ:

Моли́тва.

Ст҃ы́й прпⷣбномч҃ниче корни́лїе, смире́ннѡ припа́даемъ къ ра́цѣ моще́й твои́хъ и҆ ᲂу҆ми́льнѡ мо́лимъ тѧ̀: ми́лостивѡ при́зри на скѡ́рби на́шѧ дꙋшє́вныѧ и҆ тѣлє́сныѧ и҆ и҆зба́вꙋ на́мъ пода́ждь, помозѝ на́мъ, свѧ́тче бж҃їй, ѿ навѣ́та ѕлы́хъ человѣ̑къ, ѿ ни́хже и҆ са́мъ ты̀ неви́ннѡ на землѝ пострада́лъ є҆сѝ. защитѝ на́съ ѿ наси́лїѧ дїа́вола, стра́стнѡ вою́ющагѡ въ не́мощныхъ ᲂу҆десѣ́хъ на́шихъ, дарова́ти на́мъ ти́хое и҆ безгрѣ́шное житїѐ, взаи́мнꙋю бра́тскꙋю нелицемѣ́рнꙋю любо́вь и҆ ми́рнꙋю хрⷭ҇тїа́нскꙋю кончи́нꙋ, да чи́стою со́вѣстїю предста́немъ нелицемѣ́рномꙋ стра́шномꙋ сꙋди́лищꙋ хрⷭ҇то́вꙋ и҆ въ црⷭ҇твїи є҆гѡ̀ просла́вимъ животворѧ́щꙋю трⷪ҇цꙋ, ѻ҆ц҃а̀, и҆ сн҃а, и҆ ст҃а́го дх҃а, во вѣ́ки вѣкѡ́въ. а҆ми́нь.