Мѣ́сѧца а҆́ѵгꙋста въ и҃-й де́нь Слꙋ́жба на пренесе́нїе чⷭ҇тны́хъ и҆ многоцѣле́бныхъ моще́й прпⷣбныхъ и҆ бг҃оно́сныхъ ѻ҆тє́цъ на́шихъ зѡсі́мы и҆ савва́тїа, солове́цкихъ нача́льникѡвъ, но́выхъ чꙋдотво́рцєвъ.
На ма́лѣй вече́рни, на Гдⷭ҇и воззва́хъ, стїхи̑ры на д҃, гла́съ а҃:
Подо́бенъ: Нбⷭ҇ныхъ чинѡ́въ:
На нб҃о возносѧ̑щаѧ крилѣ̀ є҆ѵⷢ҇льскихъ до́блестей, воспрїи́мше ѻ҆тцы̀ ст҃і́и, премі́рныхъ достиго́сте, и҆ та́мѡ водворѧ́ющесѧ, зѡсі́мо и҆ савва́тїе, наслажда́етесѧ неизрече́нныхъ бла̑гъ.
Нбⷭ҇ныхъ бла̑гъ жела́юще, мїрска̑ѧ сла̑дкаѧ ѿверго́сте, ненасы́тимыѧ сла́дости рачи́телїе бы́сте, а҆́лчбою и҆ жа́ждею томѧ̀ себѐ, є҆́же ны́нѣ вои́стиннꙋ ѡ҆брѣто́сте, ѻ҆тцы̀ прпⷣбнїи зѡсі́мо и҆ савва́тїе.
Дѡ́льнѧѧ, ꙗ҆́кѡ преходѧ̑щаѧ, ѿве́ргше разꙋ́мнѡ, вы̑шнѧѧ при́снѡ пребыва́ющаѧ возлюби́сте, бл҃же́ннїи ѻ҆тцы̀ зѡсі́мо и҆ савва́тїе, и҆ та́мѡ водворѧ́етесѧ, добродѣ́телей восхожде́ньми.
Воздержа́нїемъ сла́сти попра́сте, и҆ сле́зными и҆сто́чники, пла́мень погаси́сте страсте́й: тѣ́мже зе́млю ны́нѣ кро́ткихъ наслѣ́довавше, свеселѧ́етесѧ прпⷣбнымъ и҆ првⷣнымъ, ѻ҆тцы̀ ст҃і́и зѡсі́мо и҆ савва́тїе.
Сла́ва, гла́съ в҃:
Прїиди́те по́стническое сосло́вїе, дне́сь ᲂу҆бл҃жи́мъ, и҆̀хже вои́стиннꙋ бл҃же́нныхъ ѻ҆тє́цъ: по́стникѡмъ бо ᲂу҆добре́нїе ꙗ҆ви́шасѧ, добродѣ́тельми ᲂу҆краси́вшесѧ и҆зрѧ́днѡ, тѣ́мже любо́вїю соше́дшесѧ, дх҃о́внѣ торжествꙋ́имъ, къ ни̑мже возопїе́мъ: ѽ прпⷣбнїи ѻ҆тцы̀, зѡсі́мо и҆ савва́тїе, ꙗ҆́кѡ и҆мꙋ́ще дерзнове́нїе ко хрⷭ҇тꙋ̀ бг҃ꙋ, ми́ръ и҆ ѡ҆ставле́нїе и҆спроси́те, любо́вїю чтꙋ́щымъ всечⷭ҇тнꙋ́ю па́мѧть ва́шꙋ.
И҆ ны́нѣ, пра́здника. На стїхо́внѣ стїхи̑ры, гла́съ в҃.
Подо́бенъ: До́ме є҆ѵфра́ѳовъ:
До́мъ добродѣ́телей, вы̀ показа́стесѧ, и҆ прїѧ́телище дарова́нїємъ, ѻ҆тцы̀ прпⷣбнїи, зѡсі́мо и҆ савва́тїе.
Сті́хъ: Чⷭ҇тна̀ пред̾ гдⷭ҇емъ сме́рть прпⷣбныхъ є҆гѡ̀.
Страсте́й побѣди́тели, пло́ти томи́тели, ѧ҆зы́кꙋ воздержа́тели, сласте́мъ ᲂу҆мертви́тели бы́сте, прпⷣбнїи зѡсі́мо и҆ савва́тїе.
Сті́хъ: Бл҃же́нъ мꙋ́жъ боѧ́йсѧ гдⷭ҇а, въ за́повѣдехъ є҆гѡ̀ восхо́щетъ ѕѣлѡ̀.
Чи́стыми ва́шими мл҃твами, бг҃ови прибли́жившесѧ, бл҃года́ть и҆мѣ́ете, нечи̑стыѧ ѿгонѧ́ти дꙋ́хи ѿ человѣ́къ, прпⷣбнїи ѻ҆тцы̀ зѡсі́мо и҆ савва́тїе.
Сла́ва, и҆ ны́нѣ:
Ѡ҆бра́дованнаѧ ра́дꙋйсѧ, ꙗ҆́же ра́дость мі́рꙋ ро́ждшаѧ, хрⷭ҇та̀ жизнода́вца, и҆ прама́тернюю, дв҃о, печа́ль ѿе́мшаѧ.
Тропа́рь, гла́съ и҃:
Ꙗ҆́кѡ свѣти́льницы ꙗ҆ви́стесѧ всесвѣ́тлїи, во ѻ҆то́цѣ ѻ҆кїа́на мо́рѧ, прпⷣбнїи ѻ҆тцы̀ зѡсі́мо и҆ савва́тїе: вы́ бо крⷭ҇тъ хрⷭ҇то́въ на ра́мо взе́мше, ᲂу҆се́рднѡ томꙋ̀ послѣ́довасте, и҆ чистото́ю бг҃ови прибли́жившесѧ, ѿѻнꙋ́дꙋже си́лами чꙋде́съ ѡ҆богати́стесѧ. тѣ́мъ и҆ мы̀ любе́знѡ притека́емъ къ ра́камъ чⷭ҇тны́хъ моще́й ва́шихъ, и҆ ᲂу҆ми́льнѡ глаго́лемъ: ѽ прпⷣбнїи, моли́те хрⷭ҇та̀ бг҃а, сп҃сти́сѧ дꙋша́мъ на́шымъ.
Сла́ва, и҆ ны́нѣ, пра́здника.
На вели́цѣй вече́рни, на Гдⷭ҇и воззва́хъ, стїхи̑ры на і҃, пра́здника д҃, и҆ ст҃ы́мъ на ѕ҃.
Стїхи̑ры прпⷣбномꙋ зѡсі́мѣ, гла́съ и҃:
Подо́бенъ: Ѽ пресла́внагѡ чꙋдесѐ:
Ѻ҆́тче прпⷣбне зѡсі́мо! впери́въ ᲂу҆́мъ тво́й къ бг҃ꙋ вѣ́рою, мїрска́гѡ смѣше́нїѧ, возгнꙋша́лсѧ є҆сѝ непостоѧ́ннагѡ: и҆ крⷭ҇тъ тво́й взе́мъ, всеви́дцꙋ послѣ́довалъ є҆сѝ, тѣ́ло непокори́вое, пѡ́двиги воздержа́нїѧ, по́мыслы порабо́тивъ, си́лою бж҃е́ственнагѡ дх҃а.
Ѻ҆́тче бг҃омꙋ́дре зѡсі́мо! ты̀ ѿ ᲂу҆тро́бы ма́терни, хрⷭ҇тꙋ̀ прибли́жилсѧ є҆сѝ, и҆ всѣ́мъ смы́сломъ томꙋ̀ прилѣжа́лъ є҆сѝ, и҆ ѿ твои́хъ пѡ́двигъ бг҃ꙋ вседержи́телю, плоды̀ достѡ́йныѧ прине́слъ є҆сѝ прпⷣбне, добродѣ́тельными цвѣ́ты ᲂу҆краша́емь: тѣ́мъ бл҃ги́хъ наслажде́нїе воспрїѧ́лъ є҆сѝ досточꙋ́дне.
Прпⷣбне ѻ҆́тче, премꙋ́дре зѡсі́мо, болѧ́щымъ ты̀ ꙗ҆ви́лсѧ є҆сѝ и҆сцѣле́нїе, и҆ хромы̑мъ хожде́нїе, и҆ всѣ̑мъ притека́ющымъ съ вѣ́рою, къ цѣльбоно́сномꙋ гро́бꙋ твоемꙋ̀, и҆ просѧ́щымъ по́мощи и҆ застꙋпле́нїѧ, мл҃твами твои́ми, и҆сцѣле́нїе неѡскꙋ́днѡ подава́еши.
И҆́ны стїхи̑ры прпⷣбномꙋ савва́тїю, гла́съ в҃: Подо́бенъ: Є҆гда̀ ѿ дре́ва:
Є҆гда̀ ᲂу҆ѧзви́лсѧ є҆сѝ бж҃е́ственнымъ жела́нїемъ, тогда̀ всѧ̑ ꙗ҆̀же въ мі́рѣ кра̑снаѧ нивочто́же вмѣни́въ, во слѣ́дъ сп҃си́телѧ поше́лъ є҆сѝ: бога́тство мимотекꙋ́щее презрѣ́лъ є҆сѝ до́блественнѣ, сла́вꙋ же и҆ могꙋ́щество, ꙗ҆́кѡ ничто́же сꙋ́ще, ѡ҆плева́лъ є҆сѝ. молѝ, мо́лимъ тѧ̀, сп҃стѝ и҆ просвѣти́ти дꙋ́шы на́шѧ.
Є҆гда̀ вше́лъ є҆сѝ въ кїнові́ю савва́тїе, тогда̀ своеѧ̀ во́ли до конца̀ совле́кшисѧ, въ послꙋша́нїи пре́былъ є҆сѝ непререка́тельнѣ, и҆ всѣ̑мъ покарѧ́ѧсѧ трꙋжда́лсѧ є҆сѝ, доса̑ды же и҆ безчє́стїѧ прїе́млѧ въ ра́дованїи: тѣ́мже и҆ гдⷭ҇ь, зрѧ̀ твоѐ ѻ҆́тче смире́нїе бл҃го, прославлѧ́етъ тѧ̀.
Є҆гда̀ ѻ҆бѣ́ты и҆́ночества гдⷭ҇ви возда́лъ є҆сѝ, тогда̀ ᲂу҆́мное ѻ҆́ко бо́дрственнѡ на нб҃о впери́въ, мы́слєнныѧ врагѝ слеза́ми потопи́лъ є҆сѝ: и҆ непоро́чнѡ ходи́ти въ пꙋте́хъ зако́на гдⷭ҇нѧ, дꙋ́шꙋ ᲂу҆тверди́вши савва́тїе, дерзнове́нїе къ бг҃ꙋ стѧжа́лъ є҆сѝ. сегѡ̀ ра́ди мо́лимъ тѧ̀, того̀ молѝ сп҃стѝ и҆ просвѣти́ти дꙋ́шы на́шѧ.
Сла́ва, гла́съ а҃:
Дне́сь пресвѣ́тлаѧ на́мъ наста̀ па́мѧть, прпⷣбныхъ ѻ҆тє́цъ на́шихъ зѡсі́мы и҆ савва́тїа, ю҆́же соше́дшесѧ досто́йнѡ почти́мъ, во ѱалмѣ́хъ и҆ пѣ́снехъ и҆ пѣ́нїихъ дх҃о́вныхъ взыва́юще, и҆ тѣ́хъ чꙋдє́снымъ ра́камъ предстоѧ́ще, си́це рце́мъ: ра́дꙋйтасѧ сокро́вища неистощи́магѡ храни̑ла. ра́дꙋйтасѧ и҆мꙋ́щыѧ и҆сто́чника (с. 633) въ себѣ̀ приснотекꙋ́щаго. ра́дꙋйтасѧ превожделѣ̑нныѧ на́мъ ра́цѣ носѧ́щыѧ вселюбе́зныхъ ѻ҆тє́цъ цѣльбонѡ́сныѧ мо́щи. ра́дꙋйтасѧ люботрꙋ́дныѧ плѡ́ти показꙋ́ющыѧ. ра́дꙋйтасѧ бл҃гоꙋха́ющыѧ на́мъ сщ҃є́нныѧ а҆рѡма́ты. ѽ чꙋдотвори̑вы ра̑цѣ, цѣлꙋ́юще ва́съ прїе́млемъ бл҃года́ть, и҆ бл҃года́телѧ бг҃а прославлѧ́емъ, прославлѧ́ющаго рабы̑ своѧ̑ бога́тыми дарова́нїи, вопїю́ще є҆мꙋ̀: ѡ҆ всѣ́хъ бл҃гі́й гдⷭ҇и, сла́ва тебѣ̀.
И҆ ны́нѣ, пра́здника:
Вхо́дъ, прокі́менъ днѐ, и҆ чтє́нїѧ г҃.
Премꙋ́дрости соломѡ́новы чте́нїе, главы̑ є҃ и҆ ѕ҃:
Првⷣницы во вѣ́ки живꙋ́тъ, и҆ въ гдⷭ҇ѣ мзда̀ и҆́хъ, и҆ попече́нїе и҆́хъ ᲂу҆ вы́шнѧгѡ. сегѡ̀ ра́ди прїи́мꙋтъ црⷭ҇твїе бл҃голѣ́пїѧ, и҆ вѣне́цъ добро́ты ѿ рꙋкѝ гдⷭ҇ни: занѐ десни́цею покры́етъ ѧ҆̀, и҆ мы́шцею защити́тъ и҆̀хъ. прїи́метъ всеѻрꙋ́жїе рве́нїе своѐ, и҆ воѻрꙋжи́тъ тва́рь въ ме́сть врагѡ́мъ. Ѡ҆блече́тсѧ въ бронѧ̀ пра́вды, и҆ возложи́тъ шле́мъ, сꙋ́дъ нелицемѣ́ренъ. прїи́метъ щи́тъ непобѣди́мый преподо́бїе: поѡстри́тъ же напра́сный гнѣ́въ во ѻ҆рꙋ́жїе: спобо́ретъ же съ ни́мъ мі́ръ на безꙋ̑мныѧ. по́йдꙋтъ праволꙋ̑чныѧ стрѣ̑лы мѡ́лнїины, и҆ ꙗ҆́кѡ ѿ бл҃гокрꙋ́гла лꙋ́ка ѻ҆блакѡ́въ, на намѣ́ренїе полетѧ́тъ. И҆ ѿ каменоме́тныѧ ꙗ҆́рости и҆спо́лнь падꙋ́тъ гра́ды: вознегодꙋ́етъ на ни́хъ вода̀ морска́ѧ, рѣ̑ки же потопѧ́тъ ѧ҆̀ на́глѡ. сопроти́въ ста́нетъ и҆̀мъ дꙋ́хъ си́лы, и҆ ꙗ҆́кѡ ви́хоръ развѣ́етъ и҆̀хъ: и҆ ѡ҆пꙋстоши́тъ всю̀ зе́млю беззако́нїе, и҆ ѕлодѣ́йство преврати́тъ престо́лы си́льныхъ. Слы́шите ᲂу҆́бѡ ца́рїе и҆ разꙋмѣ́йте, навы́кните сꙋдїи̑ концє́въ землѝ. внꙋши́те держа́щїи мно́жества, и҆ гордѧ́щїисѧ ѡ҆ наро́дѣхъ ꙗ҆зы̑къ: ꙗ҆́кѡ дана̀ є҆́сть ѿ гдⷭ҇а держа́ва ва́мъ, и҆ си́ла ѿ вы́шнѧгѡ.
Премꙋ́дрости соломѡ́новы чте́нїе, глава̀ г҃:
Првⷣныхъ дꙋ́шы въ рꙋцѣ̀ бж҃їей, и҆ не прико́снетсѧ и҆́хъ мꙋ́ка. непщева́ни бы́ша во ѻ҆чесѣ́хъ безꙋ́мныхъ ᲂу҆мре́ти, и҆ вмѣни́сѧ ѡ҆ѕлобле́нїе и҆схо́дъ и҆́хъ: и҆ є҆́же ѿ на́съ ше́ствїе, сокрꙋше́нїе, ѻ҆ни́ же сꙋ́ть въ ми́рѣ. И҆́бо пред̾ лице́мъ человѣ́ческимъ, а҆́ще и҆ мꙋ́кꙋ прїи́мꙋтъ, ᲂу҆пова́нїе и҆́хъ безсме́ртїѧ и҆спо́лнено, и҆ вма́лѣ нака́зани бы́вше, вели́кими бл҃годѣ́тельствовани бꙋ́дꙋтъ: ꙗ҆́кѡ бг҃ъ и҆скꙋсѝ и҆̀хъ, и҆ ѡ҆брѣ́те и҆̀хъ достѡ́йны себѣ̀. ꙗ҆́кѡ зла́то въ горни́лѣ и҆скꙋсѝ и҆̀хъ, и҆ ꙗ҆́кѡ всепло́дїе же́ртвенное прїѧ́тъ ѧ҆̀. И҆ во вре́мѧ посѣще́нїѧ и҆́хъ возсїѧ́ютъ, и҆ ꙗ҆́кѡ и҆́скры по сте́блїю потекꙋ́тъ. Сꙋ́дѧтъ ꙗ҆зы́кѡмъ и҆ ѡ҆блада́ютъ людьмѝ, и҆ воцр҃и́тсѧ гдⷭ҇ь въ ни́хъ во вѣ́ки. Надѣ́ющїисѧ на́нь, разꙋмѣ́ютъ и҆́стинꙋ, и҆ вѣ́рнїи въ любвѝ пребꙋ́дꙋтъ є҆мꙋ̀: ꙗ҆́кѡ бл҃года́ть и҆ млⷭ҇ть въ прпⷣбныхъ є҆гѡ̀, и҆ посѣще́нїе во и҆збра́нныхъ є҆гѡ̀.
Премꙋ́дрости соломѡ́новы чте́нїе, глава̀ д҃:
Првⷣникъ а҆́ще пости́гнетъ сконча́тисѧ, въ поко́и бꙋ́детъ. ста́рость бо честна̀ не многолѣ́тна, нижѐ въ числѣ̀ лѣ́тъ и҆счита́етсѧ: сѣди́на же є҆́сть мꙋ́дрость человѣ́кѡмъ, и҆ во́зрастъ ста́рости житїѐ нескве́рное. бл҃гоꙋго́денъ бг҃ови бы́въ, возлю́бленъ бы́сть, и҆ живы́й посредѣ̀ грѣ́шникъ преста́вленъ бы́сть: восхище́нъ бы́сть, да не ѕло́ба и҆змѣни́тъ ра́зꙋма є҆гѡ̀, и҆лѝ ле́сть прельсти́тъ дꙋ́шꙋ є҆гѡ̀. раче́нїе бо ѕло́бы помрача́етъ дѡ́браѧ, и҆ паре́нїе по́хоти премѣнѧ́етъ ᲂу҆́мъ неѕло́бивъ. Сконча́всѧ вма́лѣ, и҆спо́лни лѣ̑та дѡ́лга: ᲂу҆го́дна бо бѣ̀ гдⷭ҇ви дꙋша̀ є҆гѡ̀: сегѡ̀ ра́ди потща́сѧ ѿ среды̀ лꙋка́вствїѧ. лю́дїе же ви́дѣвше, и҆ не разꙋмѣ́вше, нижѐ поло́жше въ помышле́нїи таково́е: ꙗ҆́кѡ бл҃года́ть и҆ млⷭ҇ть въ прпⷣбныхъ є҆гѡ̀, и҆ посѣще́нїе во и҆збра́нныхъ є҆гѡ̀.
На лїті́и стїхи̑ры, гла́съ а҃.
Прпⷣбне ѻ҆́тче савва́тїе, соше́дшесѧ любо́вїю въ па́мѧть твою̀, ко всечⷭ҇тнѣ́й и҆ чꙋдотво́рнѣй тѝ ра́цѣ, свѣ́тлѡ торжествꙋ́юще, и҆ во гла́сѣхъ пѣ́сненныхъ пою́ще, вопїе́мъ: моли́сѧ гдⷭ҇ви, поми́ловатисѧ дꙋша́мъ на́шымъ.
Свѣ́тлаѧ па́мѧть твоѧ̀ прпⷣбне ѻ҆́тче зѡсі́мо, на́мъ сердца̀ просвѣща́еть: зрѧ́ще бо чⷭ҇тнꙋ́ю тѝ ра́кꙋ, врачевство̀ страстє́мъ не ᲂу҆до́бь цѣли́мымъ, прославлѧ́емъ просла́вльшаго тѧ̀ гдⷭ҇а, и҆ твоѧ̑ трꙋды̀ и҆ по́двиги вѣнча́вша бл҃года́тїю. ᲂу҆се́рднѡ и҆ мы̀ подвигѡ́мъ и҆ трꙋдѡ́мъ є҆́мшесѧ, твое́ю стезе́ю позна́хомъ ходи́ти во слѣ́дъ хрⷭ҇тꙋ̀ бг҃ꙋ, є҆го́же молѝ, сп҃стѝ и҆ просвѣти́ти дꙋ́шы на́шѧ.
Гла́съ в҃.
Предстоѧ́ще гро́бꙋ знаменоно́сномꙋ прпⷣбнагѡ ѻ҆тца̀ на́шегѡ, ѽ празднолю́бцы, возопїе́мъ похва́льными гла̑сы глаго́люще: ка́кѡ тѧ̀ ᲂу҆бл҃жи́мъ савва́тїе, на землѝ пожи́вша па́че человѣ́ка, и҆ въ вы́шнихъ бл҃жи́маго, со всѣ́ми ᲂу҆го́ждшими гдⷭ҇ви; съ ни́ми же предстоѧ̀ во свѣ́тѣ бж҃е́ственнѣмъ, молѝ, мо́лимъ тѧ̀, и҆зба́витисѧ на́мъ ѿ собла̑знъ льсти́вагѡ, и҆ сп҃сти́сѧ дꙋша́мъ на́шымъ.
По ᲂу҆спе́нїи твое́мъ бл҃же́нне зѡсі́мо, ᲂу҆чи́тельница на́мъ быва́етъ твоѧ̀ ра́ка. при́снѡ бо и҆злива́ющимисѧ чꙋдесы̀ вопїе́тъ: возлюби́те гдⷭ҇а, да ѡ҆брѧ́щете бл҃года́ть вѣ́чнꙋю: и҆ ничто́же па́че є҆гѡ̀ почти́те, да є҆гда̀ прїи́детъ, ѡ҆брѧ́щете поко́й со и҆збра́нными є҆гѡ̀. є҆го́же да ᲂу҆лꙋчи́мъ твои́ми мл҃твами.
Гла́съ д҃:
Дне́сь соше́дшесѧ бра́тїе, дх҃о́внѣ почти́мъ прпⷣбныхъ ѻ҆тє́цъ зѡсі́мꙋ и҆ савва́тїа, и҆̀же посто́мъ тѣлеса̀ своѧ̑ и҆знꙋри́ша, воздержа́нїемъ стра́сти потреби́ша, и҆ бдѣ́нїемъ ᲂу҆́мъ ѡ҆чи́стиша, мл҃твами же дꙋ́шы просвѣти́ша, нището́ю бога́тство прїѧ́ша бл҃года́ти, и҆ послꙋша́нїемъ бг҃а бл҃гопослꙋ́шна стѧжа́ша, чистото́ю жили́ще прест҃а́гѡ дх҃а бы́ша. и҆́хже ра́ди врагѡ́въ шата́нїѧ хрⷭ҇то́съ низложи́въ, да́рꙋетъ и҆ на́мъ ве́лїю млⷭ҇ть.
Сла́ва, гла́съ и҃:
Мона́хѡвъ мно́жество, наста́вники ва́съ чте́мъ ѻ҆тцы̀ ст҃і́и, ва́ми бо пꙋ́ть пра́вый вои́стиннꙋ ходи́ти позна́хомъ. бл҃же́ни є҆стѐ, ꙗ҆́кѡ хрⷭ҇тꙋ̀ рабо́тасте, и҆ вра́жїю ѡ҆бличи́сте си́лꙋ, а҆́гг҃лѡмъ собесѣ̑дницы, и҆ ст҃ы̑мъ соприча̑стницы и҆ првⷣнымъ. съ ни́ми же моли́тесѧ гдⷭ҇ви, поми́ловатисѧ дꙋша́мъ на́шымъ.
И҆ ны́нѣ, пра́здника. На стїхо́внѣ стїхи̑ры, гла́съ и҃.
Подо́бенъ: Ѽ пресла́внагѡ чꙋдесѐ.
Прїиди́те и҆ прїими́те бра́тїе, лїю́щїѧсѧ бл҃года̑ти, ѿ гро́ба прпⷣбнагѡ ѻ҆тца̀ савва́тїа, то́й бо подвиза́сѧ без̾ лѣ́ности, во вре́меннѣй жи́зни, и҆ ꙗ҆́кѡ безпло́тенъ во пло́ти поживѐ: тѣ́мже и҆ прїѧ́тъ да́ры ѿ хрⷭ҇та̀ бг҃а, и҆ на́мъ про́ситъ ѡ҆чище́нїѧ, и҆ ве́лїѧ млⷭ҇ти.
Сті́хъ: Чⷭ҇тна̀ пред̾ гдⷭ҇емъ:
Цѣльбоно́сномꙋ твоемꙋ̀ гро́бꙋ ѻ҆́тче на́шъ зѡсі́мо, всѧ́къ приходѧ́й съ вѣ́рою, не посрами́тсѧ: прїе́млетъ бо, и҆́хже тре́бꙋетъ, прославлѧ́ющꙋ тѧ̀ гдⷭ҇ꙋ, ꙗ҆́кѡ бл҃гоꙋго́дна раба̀ бы́вша своемꙋ̀ влⷣцѣ, и҆ тогѡ̀ за́пѡвѣди сохра́ньша. тѣ́мже тѧ̀ чти́мъ и҆ ᲂу҆бл҃жа́емъ.
Сті́хъ: Бл҃же́нъ мꙋ́жъ боѧ́йсѧ гдⷭ҇а:
И҆сто́чникъ приснотекꙋ́щїй, врачевства̀ безме́зднагѡ, гро́бъ тво́й досточꙋ́дне ѻ҆́тче савва́тїе: ѽ вели́кїѧ бл҃года́ти, ѽ си́лы живоно́снагѡ мертвеца̀! є҆гѡ́же мл҃твами і҆и҃се цр҃ю̀, сп҃сѝ дꙋ́шы на́шѧ, ꙗ҆́кѡ є҆ди́нъ млⷭ҇рдъ.
Сла́ва, гла́съ д҃:
Возвесели́сѧ ꙗ҆вле́ннѡ хрⷭ҇то́ва цр҃кве чⷭ҇тна́ѧ, и҆ торжествꙋ́й свѣ́тлѡ: возсїѧ́ бо дне́сь пресвѣ́тлаѧ, и҆ всепра́зднственнаѧ па́мѧть [пренесе́нїѧ чⷭ҇тны́хъ моще́й] прпⷣбныхъ и҆ бг҃обл҃же́нныхъ ѻ҆тє́цъ зѡсі́мы и҆ савва́тїа. и҆́маши бо въ себѣ̀ принесе́нное неистощи́мое сокро́вище, пречⷭ҇тны̑ѧ и҆ всебога̑тыѧ ра̑ки моще́й прпⷣбныхъ зѡсі́мы и҆ савва́тїа: ѡ҆бл҃гоꙋха́ющи вѣ̑рнымъ, и҆ веселѧ́щи дꙋшє́внаѧ чꙋ̑вства и҆ тѣлє́снаѧ, и҆ и҆сцѣлє́нїѧ подаю́щи, и҆ просѧ́щи ѿ бг҃а ве́лїѧ млⷭ҇ти, ꙗ҆́кѡ да млⷭ҇тивъ бꙋ́детъ на́мъ въ де́нь сꙋ́дный.
И҆ ны́нѣ, пра́здника. По а҃-й каѳі́смѣ, сѣда́ленъ, гла́съ а҃:
Житїѐ на землѝ бл҃гоче́стнѡ сконча́сте, чи́сто селе́нїе ст҃о́мꙋ дх҃ꙋ ꙗ҆ви́стесѧ, просвѣща́юще и҆̀же вѣ́рою приходѧ́щихъ къ чⷭ҇тны̑мъ мощє́мъ ва́шымъ, бл҃же́ннїи, моли́те влⷣкꙋ хрⷭ҇та̀ бг҃а, просвѣти́ти дꙋ́шы пра́зднꙋющихъ всечⷭ҇тнꙋ́ю па́мѧть ва́шꙋ, бг҃омꙋ́дрїи зѡсі́мо и҆ савва́тїе.
Два́жды.
Сла́ва, и҆ ны́нѣ, пра́здника.
По в҃-й каѳі́смѣ, сѣда́ленъ, гла́съ є҃:
По́стники гдⷭ҇ни пѣ́сньми почти́мъ, ᲂу҆мертви́вшихъ всѧ̑ прило́ги страстє́мъ, воздержа́нїемъ и҆ тве́рдымъ терпѣ́нїемъ, вои́стиннꙋ посрами́вше ѕѣлѡ̀ проти́внаго, и҆ всю̀ горды́ню є҆гѡ̀.
Два́жды.
Сла́ва, и҆ ны́нѣ, пра́здника.
По полѷеле́и, сѣда́ленъ, гла́съ и҃:
Є҆гда̀ бл҃же́ннїи къ бж҃е́ственномꙋ жела́нїю ᲂу҆́мъ сво́й впери́сте, тогда̀ ѡ҆ста́висте до́лꙋ влекꙋ́щее мꙋдрова́нїе, и҆ въ пꙋсты́ню всели́стесѧ въ морскі́й ѻ҆́стровъ, и҆дѣ́же процвѣто́сте, ꙗ҆́кѡ ке́дръ добродѣ́тели прекра́сный, страсте́й и҆скорени́вше те́рнїе, и҆ въ не́мъ насади́сте плоды̀ трꙋдѡ́въ свои́хъ: тѣ́мже и҆ пожа́сте рꙋкоѧ́тїе, неѿе́млемо бога́тство на нб҃сѣ́хъ. зѡсі́мо и҆ савва́тїе прпⷣбнїи, моли́те хрⷭ҇та̀ бг҃а, согрѣше́нїй ѡ҆ставле́нїе пода́ти, чтꙋ́щымъ любо́вїю ст҃ꙋ́ю па́мѧть ва́шꙋ.
Два́жды.
Сла́ва, и҆ ны́нѣ, пра́здника.
Прокі́менъ: Чⷭ҇тна̀ пред̾ гдⷭ҇емъ: Є҆ѵⷢ҇лїе ѿ матѳе́а, зача́ло м҃г.
По н҃-мъ ѱалмѣ̀, стїхи́ра, гла́съ ѕ҃:
Прпⷣбнїи ѻ҆тцы̀, слꙋ́хъ сво́й смире́ннѡ є҆ѵⷢ҇лїю хрⷭ҇то́вꙋ преклони́вше, призыва́нїе ѿ вы́шнѧгѡ во ѻ҆би́тєли нбⷭ҇ныѧ прїѧ́ли, и҆ томꙋ̀ вѣ́рнѡ послѣ́дꙋюще, мі́ра кра̑снаѧ во ᲂу҆ме́ты вмѣни́вше, є҆ди́ныѧ добро́ты вожделѣ́сте хрⷭ҇та̀: є҆мꙋ́же прилѣ́жнѡ моли́тесѧ, низпосла́ти мі́рови ми́ръ, и҆ цр҃квамъ є҆диномы́слїе, во́инствꙋ на́шемꙋ побѣ́дное на врагѝ ѡ҆доле́нїе, и҆ дꙋша́мъ на́шымъ ве́лїю млⷭ҇ть.
Канѡ́нъ пра́здника, со і҆рмосо́мъ на ѕ҃:
и҆ прпⷣбнымъ ѻ҆тцє́мъ на и҃, гла́съ в҃.
Пѣ́снь а҃. І҆рмо́съ:
Грѧди́те лю́дїе пои́мъ пѣ́снь хрⷭ҇тꙋ̀ бг҃ꙋ, раздѣ́льшемꙋ мо́ре, и҆ наста́вльшемꙋ лю́ди, ꙗ҆̀же и҆зведѐ и҆з̾ рабо́ты є҆гѵ́петскїѧ, ꙗ҆́кѡ просла́висѧ.
Просвѣще́нїемъ трисо́лнечнагѡ бж҃ества̀, ѡ҆зари́вшесѧ премꙋ́дрїи, свѣти̑ла ꙗ҆ви́стесѧ ѡ҆сїѧва́юща всю́дꙋ: тѣ́мъ и҆ на́съ те́мностїю страсте́й ѡ҆мраче́нныхъ, просвѣще́нїемъ бл҃года́ти ѡ҆зари́ти помоли́тесѧ, и҆ дꙋша́мъ полꙋчи́ти сп҃сє́нїѧ.
Свѣ́томъ бж҃е́ственныѧ бл҃года́ти просвѣща́еми, зѡсі́мо и҆ савва́тїе пребл҃же́ннїи, вѣ́рнѡ свѣтоно́снꙋю ва́шꙋ па́мѧть торжествꙋ́ющихъ, просвѣти́те, и҆ ѿ тьмы̀ грѣхо́вныѧ, мл҃твами свои́ми прпⷣбнїи и҆зба́вите.
Дх҃ꙋ ст҃о́мꙋ хра́мъ премꙋ́дрїи бы́сте, и҆ къ немꙋ̀ всѐ дх҃о́вное жела́нїе ѡ҆брати́сте, и҆ сегѡ̀ ра́ди кро́ткихъ зе́млю наслѣ́довасте: дꙋше́внꙋю на́шꙋ стра́стнꙋю бꙋ́рю прпⷣбнїи ᲂу҆кроти́те, да въ тишинѣ̀ бж҃е́ственнѣй бы́вше, пѣсносло́вимъ ва́шѧ по́двиги.
Бг҃оро́диченъ:
Лю́тыми страсте́й навѣ́ты, ѡ҆бꙋрева́емь є҆́смь ѻ҆трокови́це, и҆ прило́ги грѣхо́вными погрꙋжа́емь: къ твоемꙋ̀ є҆ди́номꙋ ти́хомꙋ и҆ невла́емомꙋ приста́нищꙋ, любо́вїю прибѣга́ю всепѣ́таѧ, ᲂу҆ще́дривъ сп҃си́ мѧ приснодв҃о.
Катава́сїа пра́здника. Пѣ́снь г҃. І҆рмо́съ:
На ка́мени мѧ̀ вѣ́ры ᲂу҆тверди́въ, разшири́лъ є҆сѝ ᲂу҆ста̀ моѧ̑ на врагѝ моѧ̑ возвесели́ бо сѧ дꙋ́хъ мо́й, внегда̀ пѣ́ти: нѣ́сть ст҃ъ, ꙗ҆́коже бг҃ъ на́шъ, и҆ нѣ́сть првⷣнъ, па́че тебѐ гдⷭ҇и.
Высото́ю смире́нїѧ ᲂу҆краша́еми, зѡсі́мо и҆ савва́тїе прпⷣбнїи, и҆ всѐ ᲂу҆́бѡ жела́нїе ко влⷣцѣ своемꙋ̀ простро́сте, ꙗ҆́рѡстнаѧ же движє́нїѧ на врагѝ воѡрꙋжи́сте, со и҆зрѧ́дными дѣ́лы свои́ми, посто́мъ и҆ мл҃твами.
Пло́тей свои́хъ воста́нїѧ, крѣ́пкимъ поще́нїемъ прпⷣбнїи ᲂу҆мертви́вше, ѻ҆би́телище бы́сте влⷣчне: є҆го́же ᲂу҆моли́те и҆зба́витисѧ скорбе́й, и҆ мꙋчи́тельства страсте́й, съ вѣ́рою притека́ющымъ къ ва́мъ пребл҃же́ннїи.
И҆мꙋ́щи споспѣшествꙋ́ющꙋ бж҃е́ственнꙋю си́лꙋ, и҆сцѣлє́нїѧ безчи́слєннаѧ и҆сточа́ютъ мо́щи ва́шѧ, зѡсі́мо и҆ савва́тїе прпⷣбнїи: ѿгонѧ́ютъ ѿ человѣ̑къ болѣ̑зни тѣлє́сныѧ, и҆ дꙋшє́вныѧ стра̑сти врачꙋ́ютъ, по́двиги ва́шими всечⷭ҇тні́и.
Бг҃оро́диченъ:
Трꙋжда́етъ мѧ̀ бꙋ́рѧ грѣхо́внаѧ, и҆ возмꙋще́нїе безмѣ́стныхъ помышле́нїй: ᲂу҆млⷭ҇рдисѧ всенепоро́чнаѧ, (с. 640) и҆ рꙋ́кꙋ мѝ по́мощи ꙗ҆́кѡ млⷭ҇тива прострѝ, ꙗ҆́кѡ да сп҃ссѧ велича́ю тѧ̀.
Конда́къ, и҆ і҆́косъ пра́здника. Сѣда́ленъ, гла́съ д҃:
Жите́йское мо́ре воздержа́нїемъ безбѣ́днѡ преплы́вше, и҆ ко приста́нищꙋ мы́сленномꙋ безстра́стїѧ ра́дꙋющесѧ доидо́сте, прпⷣбнїи ѻ҆тцы̀ зѡсі́мо и҆ савва́тїе, бг҃омꙋ́дрїи и҆ пребл҃же́ннїи: моли́те хрⷭ҇та̀ бг҃а, сп҃сти́сѧ дꙋша́мъ на́шымъ.
Сла́ва, и҆ ны́нѣ, пра́здника.
Пѣ́снь д҃. І҆рмо́съ:
Прише́лъ є҆сѝ ѿ дв҃ы, не хода́тай, ни а҆́гг҃лъ, но са́мъ гдⷭ҇и вопло́щьсѧ, и҆ сп҃слъ є҆сѝ всего́ мѧ человѣ́ка. тѣ́мъ зовꙋ́ ти: сла́ва си́лѣ твое́й гдⷭ҇и.
Оу҆мо́мъ и҆ дꙋше́ю пред̾ ѡ҆чи́стившесѧ прпⷣбнїи, пре́лесть дꙋшепа́гꙋбнꙋю всеконе́чнѣ ѿ себѐ ѿве́ргше, и҆ чꙋ̑вства своѧ̑ къ немꙋ́тнѣй тишинѣ̀ ᲂу҆пра́висте, во ѻ҆то́къ морскі́й премꙋ́дрїи всели́стесѧ, воспѣва́юще: сла́ва си́лѣ твое́й гдⷭ҇и.
Закѡ́ны но́выми и҆ ве́тхимъ завѣ́томъ, ра́зꙋма ст҃ы́хъ поꙋча́ющесѧ, зѡсі́мо и҆ савва́тїе прпⷣбнїи: всѧ́кїѧ добродѣ́тели ѻ҆́бразъ навы́кше, мꙋ́дрѣй пчелѣ̀ подо́бѧщесѧ, и҆ прїѧ́телище и҆зрѧ́дно дх҃ꙋ ст҃о́мꙋ премꙋ́дрїи бы́сте, воспѣва́юще: сла́ва си́лѣ твое́й гдⷭ҇и.
Всѧ́ческими прпⷣбнїи свѣтѧ́щесѧ чꙋдодѣ́йствы, и҆ бж҃е́ственною ѡ҆зарѧ́еми бл҃года́тїю, всѣ̑мъ позна́стесѧ сокро́вище и҆сцѣле́нїй неистощи́мо, страсте́й ѿгонѧ́ете ѡ҆мраче́нїе, и҆ вра́жїѧ низлага́ете ѡ҆полчє́нїѧ, воспѣва́юще: сла́ва си́лѣ твое́й гдⷭ҇и.
Бг҃оро́диченъ:
И҆з̾ ᲂу҆тро́бы твоеѧ̀ чⷭ҇тыѧ ѻ҆трокови́це, возсїѧ́въ бж҃е́ственное сл҃нце, и҆́же сꙋ́щихъ во тьмѣ̀ многобо́жїѧ просвѣтѝ, и҆ въ сѣ́ни сме́ртнѣй сѣдѧ́щихъ влⷣчце, ѡ҆сїѧ̀, є҆мꙋ́же воспѣва́юще зове́мъ: сла́ва си́лѣ твое́й гдⷭ҇и.
Пѣ́снь є҃. І҆рмо́съ:
Просвѣще́нїе во тьмѣ̀ лежа́щихъ, сп҃се́нїе ѿча́ѧнныхъ хрⷭ҇тѐ сп҃се мо́й, къ тебѣ̀ ᲂу҆́тренюю цр҃ю̀ ми́ра, просвѣти́ мѧ сїѧ́нїемъ твои́мъ: и҆но́гѡ бо ра́звѣ тебѐ бг҃а не зна́ю.
Тѣ́сный предпоче́тше, простра́нномꙋ пꙋтѝ прпⷣбнїи: и҆ ра́дꙋющесѧ, во ѻ҆то́цѣ морстѣ́мъ всѧ́чески ᲂу҆тѣснѧ́еми, претерпѣ́сте, бж҃е́ственными поꙋче́нїи дꙋ́шы своѧ̑ ѡ҆чища́юще, и҆ добро́тꙋ бж҃їю неизглаго́ланнꙋю, при́снѡ взира́юще пребл҃же́ннїи.
Неѕло́биви и҆ кро́тцы и҆ млⷭ҇тиви прпⷣбнїи бы́сте: тѣ́мже бл҃года́ть и҆ млⷭ҇ть ѿ бг҃а свы́ше прїе́мше, млⷭ҇тивнѡ на́съ просвѣща́йте, любо́вїю ст҃ꙋ́ю па́мѧть ва́шꙋ почита́ющихъ.
Ꙗ҆́кѡ вели́кое сл҃нце, вели́чїемъ пѡ́двигъ ва́шихъ возсїѧ́сте на́мъ, зѡсі́мо и҆ савва́тїе прпⷣбнїи, земны́ѧ ѡ҆сїѧва́юще концы̀, и҆ всѧ̑ просвѣща́юще свѣ́томъ бг҃оразꙋ́мїѧ. тѣ́мъ мо́лимъ вы̀, просвѣти́те на́шъ ра́зꙋмъ ѻ҆тцы̀ пребл҃же́ннїи.
Бг҃оро́диченъ:
Ѿ мно́жества востаю́щихъ на ны̀, въ болѣ́зни и҆счезѐ живо́тъ на́шъ, погрѧзо́хомъ въ про́пасти безчи́сленныхъ согрѣше́нїй. сп҃си́ ны влⷣчце и҆ возведѝ ꙗ҆́кѡ млⷭ҇тива всенепоро́чнаѧ: тебе́ бо и҆́мамы є҆ди́нꙋ предста́тельницꙋ непобѣди́мꙋ, рабѝ твоѝ.
Пѣ́снь ѕ҃. І҆рмо́съ:
Въ бе́зднѣ грѣхо́внѣй валѧ́ѧсѧ, неизслѣ́днꙋю млⷭ҇рдїѧ твоегѡ̀ призыва́ю бе́зднꙋ, ѿ тлѝ бж҃е мѧ̀ возведѝ.
Є҆ѵⷢ҇льски прпⷣбнїи хрⷭ҇та̀ возлю́бльше, мі́ра ѿврати́стесѧ, въ непрохѡди́мыѧ же, и҆ въ пꙋсты̑ѧ ѡ҆то́ки заше́дше, є҆ди́номꙋ влⷣцѣ своемꙋ̀ прилѣпи́стесѧ: ѿ негѡ́же и҆ трꙋдѡ́мъ воздаѧ́нїе прїе́мше, животꙋ̀ вѣ́чномꙋ ꙗ҆́вѣ причасти́вшесѧ, за пою́щыѧ вы̀ моли́тесѧ.
Бг҃омꙋ́дрыми по́мыслы преꙋдобри́вшесѧ прпⷣбнїи, и҆ всѧ̑ ꙗ҆̀же на землѝ льстѧ̑щаѧ, ꙗ҆́кѡ ᲂу҆ме́ты вмѣни́вше, къ нестарѣ́ющемꙋ преста́вистесѧ бл҃же́нствꙋ, съ ли́ки во свѣ́тѣ безпло́тныхъ си́лъ, ѡ҆ бз҃ѣ при́снѡ сликовствꙋ́юще пребл҃же́ннїи.
Стра̑нна и҆ пресла́вна прпⷣбнїи ѡ҆ бз҃ѣ содѣва́юще чꙋдеса̀, всѣ̑мъ и҆̀же въ мо́ри пла́вающымъ, и҆ ѕлѣ̀ стра́ждꙋщымъ, призыва́еми, ско́рѡ предстае́те, ѿ бѣ́дъ и҆збавлѧ́юще: и҆ на́съ бѣ́дствꙋющихъ лю́тѣ, и҆ напа́стьми ѡ҆держи́мыхъ, млⷭ҇тивнѡ предста́вше сп҃са́йте пребл҃же́ннїи.
Бг҃оро́диченъ:
Грѣха̀ тѧ́жкое бре́мѧ, є҆́же ѡ҆тѧготѣ̀ на мнѣ̀ пречⷭ҇таѧ, ѡ҆блегчѝ: ты́ бо є҆сѝ предста́тельница грѣ́шникѡмъ пресла́внаѧ, и҆зба́вителѧ и҆ сп҃са ро́ждши земны̑мъ.
Конда́къ, гла́съ в҃:
Хрⷭ҇то́вою любо́вїю ᲂу҆ѧзви́вшесѧ прпⷣбнїи, и҆ тогѡ̀ крⷭ҇тъ на ра́мо взе́мше понеслѝ є҆стѐ, бж҃е́ственнѣ воѡрꙋжи́вшесѧ на неви̑димыѧ врагѝ, и҆ непреста̑нныѧ мл҃твы ꙗ҆́кѡ копїѐ въ рꙋка́хъ и҆мꙋ́ще, крѣ́пкѡ побѣди́ли є҆стѐ бѣсѡ́вскаѧ ѡ҆полчє́нїѧ: бл҃года́ть гдⷭ҇ню прїе́мше цѣли́ти недꙋ́ги дꙋ́шъ и҆ тѣле́съ, притека́ющихъ къ ра́камъ чⷭ҇тны́хъ моще́й ва́шихъ, чꙋде́съ лꙋчы̀ и҆спꙋща́ете всю́дꙋ. тѣ́мъ зове́мъ ва́мъ: ра́дꙋйтесѧ прпⷣбнїи ѻ҆тцы̀ зѡсі́мо и҆ савва́тїе, мона́хѡмъ ᲂу҆добре́нїе.
І҆́косъ:
Кто̀ дово́ленъ и҆зрещѝ ва́шихъ чꙋдодѣѧ́нїй, прпⷣбнїи ѻ҆тцы̀ зѡсі́мо и҆ савва́тїе, мы̀ ᲂу҆́бѡ ра́достїю и҆ бж҃е́ственною любо́вїю почита́юще всехва́льнꙋю и҆ всечⷭ҇тнꙋ́ю па́мѧть ва́шꙋ, ма́лое сїѐ пѣ́нїе прино́симъ: ра́дꙋйтесѧ и҆спо́лненнїи хрⷭ҇то́вы красоты̀, и҆ пресвѣ́тла ѿ негѡ̀ и҆ преиз̾ѡби́льна воспрїи́мшїи воздаѧ̑нїѧ: тѣлесы̀ ᲂу҆́бѡ ва́съ морскі́й ѻ҆́стровъ прїѧ́тъ, дꙋ́шы же са́мое нб҃о, по́чєсти трꙋдѡ́въ свои́хъ прехва́льнїи воспрїе́мше ѿ хрⷭ҇та̀ всѣ́хъ цр҃ѧ̀ и҆ бг҃а. тѣ́мъ мо́лимъ вы̀, посѣща́йте млⷭ҇тивнѡ, и҆ моли́те непреста́ннѡ ѡ҆ всѣ́хъ на́съ.
Пѣ́снь з҃. І҆рмо́съ:
Ѻ҆́бразꙋ злато́мꙋ на по́лѣ деи́рѣ слꙋжи́мꙋ, трїѐ твоѝ ѻ҆́троцы небрего́ша безбо́жнагѡ велѣ́нїѧ, посредѣ́ же ѻ҆гнѧ̀ вве́ржени, ѡ҆роша́еми поѧ́хꙋ: бл҃гослове́нъ є҆сѝ бж҃е ѻ҆тє́цъ на́шихъ.
Въ мл҃твахъ бо́дренное, и҆ въ поще́нїихъ крѣ́пкое, и҆ терпѣ́нїе во и҆скꙋше́нїихъ неѡсла́бное, ᲂу҆ма̀ чистото́ю прпⷣбнїи показа́сте, и҆ земны́хъ досто́йнѡ ѿстꙋ́пльше, нбⷭ҇ное наслажде́нїе ѡ҆брѣто́сте, воспѣва́юще: бл҃гослове́нъ бг҃ъ ѻ҆тє́цъ на́шихъ.
Пло́дъ дꙋхо́вный, и҆ же́ртвꙋ непоро́чнꙋю, житїѐ своѐ прпⷣбнїи влⷣцѣ принесо́сте, въ воздержа́нїи бо всѧ́цѣмъ пожи́сте, ѿ негѡ́же и҆ по́чєсти трꙋдѡ́мъ ꙗ҆́кѡ подвигоподви́жницы воспрїе́мше, дѣ́йствꙋете пресла̑внаѧ чꙋдеса̀, воспѣва́юще: бл҃гослове́нъ бг҃ъ ѻ҆тє́цъ на́шихъ.
Страстьмѝ коле́блющихсѧ, и҆ бꙋ́рею грѣхо́вною прпⷣбнїи погрꙋжа́емыхъ, ꙗ҆́кѡ вели́кое къ бг҃ꙋ дерзнове́нїе и҆мꙋ́ще, рꙋково́дствꙋйте, и҆ всегда̀ премꙋ́дрїи сохранѧ́йте, почита́ющихъ ва́съ бл҃гоче́стнѡ, ꙗ҆́кѡ да воспѣва́емъ: бл҃гослове́нъ бг҃ъ ѻ҆тє́цъ на́шихъ.
Бг҃оро́диченъ:
И҆зба́ви на́съ ѿ напа́стей и҆ скорбе́й, и҆ печа́лей разли́чныхъ, и҆ и҆ноплеме́нныхъ наше́ствїѧ, и҆ междоꙋсо́бныѧ бра́ни, влⷣчце всепѣ́таѧ, ꙗ҆́кѡ да тѧ̀ сла́вимъ, и҆ сн҃ꙋ твоемꙋ̀ взыва́емъ: бл҃гослове́нъ бг҃ъ ѻ҆тє́цъ на́шихъ.
Пѣ́снь и҃. І҆рмо́съ:
Пе́щь и҆ногда̀ ѻ҆́гненнаѧ въ вавѷлѡ́нѣ, дѣ̑йства раздѣлѧ́ше, бж҃їимъ велѣ́нїемъ халдє́и ѡ҆палѧ́ющаѧ, вѣ̑рныѧ же ѡ҆роша́ющаѧ, пою́щыѧ: бл҃гослови́те всѧ̑ дѣла̀ гдⷭ҇нѧ гдⷭ҇а.
Въ пребыва̑лища при́снѡ живꙋ́щаѧ всели́стесѧ прпⷣбнїи, нетлѣ́нныхъ бла̑гъ наслажда́ющесѧ, и҆ трисо́лнечныѧ свѣ́тлости и҆сполнѧ́ющесѧ, на́съ призыва́ющихъ вы̀, те́плымъ предста́тельствомъ ва́шимъ, ѿ всѣ́хъ лю́тыхъ спаса́йте пою́щихъ: бл҃гослови́те всѧ̑ дѣла̀ гдⷭ҇нѧ гдⷭ҇а.
На́мъ и҆̀же любо́вїю почита́ющымъ ва́съ, и҆ чⷭ҇тно́е ва́ше соверша́ющымъ торжество̀, хрⷭ҇тѡ́вы ᲂу҆гѡ́дницы, зѡсі́мо и҆ савва́тїе, прпⷣбнїи ѻ҆тцы̀, согрѣше́нїємъ и҆спроси́те ѡ҆ставле́нїе, и҆ страсте́й премѣне́нїе, и҆ бж҃е́ственнагѡ свѣ́та ѡ҆сїѧ́нїе пою́щымъ: бл҃гослови́те всѧ̑ дѣла̀ гдⷭ҇нѧ гдⷭ҇а.
Ѽ пребезнача́льное є҆стество̀, и҆ трисоста́вное є҆ди́нство, ѻ҆́ч҃е и҆ сн҃е и҆ дш҃е прест҃ы́й, прїимѝ ѡ҆ на́съ мл҃твенники твоѧ̑ прпⷣбныѧ ᲂу҆го́дники, и҆ пода́ждь прегрѣше́нїємъ разрѣше́нїе, и҆ житїю̀ и҆справле́нїе, и҆ ѕлы́хъ ѿчꙋжде́нїе, и҆ сподо́би ны̀ въ ми́рѣ воспѣва́ти твою̀ держа́вꙋ: бл҃гослови́те всѧ̑ дѣла̀ гдⷭ҇нѧ гдⷭ҇а.
Бг҃оро́диченъ:
Ꙗ҆́кѡ є҆ди́на ро́ждши безсѣ́меннымъ ржⷭ҇тво́мъ хрⷭ҇та̀ бг҃а, мт҃и безневѣ́стнаѧ чⷭ҇таѧ, сего̀ млⷭ҇тива сотворѝ влⷣчце, сп҃стѝ рабы̀ ѿ наси́лїѧ и҆ мꙋчи́тельства вра́жїѧ, вопїю́щихъ хрⷭ҇то́ви сн҃ꙋ твоемꙋ̀: бл҃гослови́те всѧ̑ дѣла̀ гдⷭ҇нѧ гдⷭ҇а.
Пѣ́снь ѳ҃. І҆рмо́съ:
Безнача́льна роди́телѧ сн҃ъ, бг҃ъ и҆ гдⷭ҇ь, вопло́щьсѧ ѿ дв҃ы на́мъ ꙗ҆ви́сѧ, ѡ҆мрачє́ннаѧ просвѣти́ти, собра́ти расточє́ннаѧ: тѣ́мъ всепѣ́тꙋю бцⷣꙋ велича́емъ.
Вы́спрь къ бг҃ꙋ и҆мꙋ́ще мы́сль зѡсі́мо и҆ савва́тїе, прпⷣбнїи, земна̑ѧ ѡ҆ста́вльше, нбⷭ҇наѧ воспрїѧ́сте, бг҃ꙋ и҆ сп҃сꙋ̀ ва́съ вельмѝ просла́вльшꙋ, трꙋдѡ́въ ра́ди ва́шихъ, и҆ воздержа́нїѧ неѡсла́бнагѡ: сегѡ̀ ра́ди почита́емъ ва́съ пребл҃же́ннїи.
И҆́хже бла̑гъ прпⷣбнїи полꙋчи́сте, и҆ нбⷭ҇ныѧ сла́вы, є҆ѧ́же ѿ бг҃а сподо́бистесѧ, и҆ є҆мꙋ́же вы́нꙋ предстоитѐ, моли́тесѧ и҆ на́мъ неѿлꙋчє́ннымъ бы́ти, мо́лимъ вы̀, ра́достїю и҆ бж҃е́ственною любо́вїю почита́ющымъ по́двиги ва́шѧ всечⷭ҇тні́и.
Ѽ бж҃е́ствєннаѧ и҆ бг҃омꙋ́драѧ, и҆ сщ҃є́ннаѧ дво́ице, зѡсі́мо и҆ савва́тїе мі́рови ми́рꙋ ѿ бг҃а низпосла́тисѧ и҆спроси́те, цр҃квамъ соедине́нїе и҆ всѣ̑мъ скорбѧ́щымъ ᲂу҆тѣше́нїе и҆ сп҃се́нїе, пребл҃же́ннїи.
Бг҃оро́диченъ:
Пощади́ мѧ хрⷭ҇тѐ сп҃се, пощадѝ мл҃твами ро́ждшїѧ тѧ̀, и҆ всѣ́хъ ст҃ы́хъ твои́хъ: є҆гда̀ сѧ́деши сꙋди́ти дѣлѡ́мъ мои̑мъ, беззакѡ́нїѧ моѧ̑ и҆ грѣхѝ моѧ̀ пре́зри, ꙗ҆́кѡ є҆ди́нъ безгрѣ́шенъ.
Свѣти́ленъ:
Мїрска́гѡ пристра́стїѧ, ꙗ҆́кѡ ѿ скве́рны ᲂу҆клони́вшесѧ, и҆ а҆́лчбою пло́ть ᲂу҆мертви́вше бл҃же́ннїи, нбⷭ҇ною сла́вою со а҆́гг҃лы ѡ҆богати́стесѧ: тѣ́мже непреста́ннѡ ѡ҆ на́съ моли́те хрⷭ҇та̀ бг҃а, прпⷣбнїи зѡсі́мо и҆ савва́тїе.
Два́жды.
Сла́ва, и҆ ны́нѣ, пра́здника.
На хвали́техъ стїхи̑ры, гла́съ и҃.
Подо́бенъ: Ѽ пресла́внагѡ чꙋдесѐ.
И҆мѣ́ѧ бж҃е́ственнꙋю бл҃года́ть ᲂу҆ч҃тлѧ, цѣлоꙋ́мїемъ тѧ̀ наставлѧ́ющꙋ, къ жела́нїю бж҃е́ственномꙋ, ѿню́дꙋже мїрска́гѡ мѧте́жа ѿре́клсѧ є҆сѝ, и҆ болѣ́зненными себѐ трꙋды̀ ᲂу҆мꙋдрѧ́ѧ, покори́лъ є҆сѝ лꙋ́чшемꙋ хꙋ́ждшее, зѡсі́мо прпⷣбне, молѝ сп҃сти́сѧ на́мъ.
Прпⷣбне ѻ҆́тче савва́тїе, любвѐ ра́ди хрⷭ҇то́вы, всѧ̑ ꙗ҆̀же на землѝ презрѣ́лъ є҆сѝ, и҆ въ пꙋсты́ню всели́всѧ, плотскі́ѧ по́хоти мꙋдрова́нїе ᲂу҆мертви́лъ є҆сѝ, по́стническими трꙋды̀ своѐ житїѐ ᲂу҆ѧсни́лъ є҆сѝ: тѣ́мъ и҆ хрⷭ҇то́съ да́ромъ чꙋде́съ ѡ҆богати́ тѧ. помина́й на́съ чтꙋ́щихъ па́мѧть твою̀, досточꙋ́дне.
Добродѣ́тєли стѧжа́лъ є҆сѝ, и҆́миже бг҃ови прибли́житисѧ разꙋмѣва́ѧ, къ немꙋ́же восте́кши, при́снѡ хода́тайствꙋеши ѡ҆ на́съ, є҆́же ми́рнѡ житїѐ преитѝ, и҆ ст҃ы́хъ ра́дости ѻ҆́бщникѡмъ бы́ти.
Прїиди́те всѝ хотѧ́щїи и҆сцѣле́нїѧ, и҆ почерпи́те вїно̀ дꙋ́шы веселѧ́щее, ника́коже сꙋмнѧ́щесѧ: и҆спо́лнь бо чⷭ҇тнѣ́йшаѧ ча́ша, пребл҃же́ннагѡ ѻ҆тца̀ на́шегѡ, и҆злива́етъ всѣ̑мъ приходѧ́щымъ съ вѣ́рою, дꙋша́мъ и҆ тѣлесє́мъ здра́вїе.
Сла́ва, гла́съ и҃:
Мона́хѡвъ мно́жєства, наста́вники ва́съ чте́мъ ѻ҆тцы̀ всечⷭ҇тні́и: ва́ми бо стезе́ю вои́стиннꙋ пра́вою ходи́ти позна́хомъ. бл҃же́ни вы̀ ѡ҆ хрⷭ҇тѣ̀ ᲂу҆крѣпи́вшесѧ, вра́жїю низложи́сте си́лꙋ, а҆́гг҃лѡмъ собесѣ̑дницы, и҆ ст҃ы̑мъ соприча̑стницы прпⷣбнїи ꙗ҆ви́стесѧ, съ ни́миже моли́тесѧ гдⷭ҇ви, поми́ловатисѧ дꙋша́мъ на́шымъ.
И҆ ны́нѣ, пра́здника.
Славосло́вїе вели́кое, и҆ ѿпꙋ́стъ.
На лїтꙋргі́и слꙋ́жба прпⷣбническаѧ.