Мѣ́сѧца тогѡ́же въ д҃-й де́нь. Ст҃ы́хъ седмѝ ѻ҆трокѡ́въ, и҆̀же во є҆фе́сѣ.
Стїхи̑ры, гла́съ а҃. Подо́бенъ: Нбⷭ҇ныхъ чинѡ́въ:
Седмокрꙋ́жный свѣ́щникъ, ꙳ ѡ҆зари́вшїй седмоче́стныхъ ѻ҆́трѡкъ, ꙳ прїиди́те, при́снѡ воспое́мъ па́мѧть, ꙳ вопїю́ще хрⷭ҇тꙋ̀, ꙳ ты̑ѧ вѣнча́вшемꙋ: ꙳ моли́твами и҆́хъ, гдⷭ҇и и҆зба́вителю, ꙳ живо́тъ на́шъ ᲂу҆мирѝ.
И҆̀же по є҆стествꙋ̀ ᲂу҆ме́ршїи, ꙳ па́че є҆стества̀ вои́стиннꙋ ꙗ҆́коже ѿ сна̀ а҆́бїе воста́ша, ꙳ вкꙋ́пѣ се́дмь ѻ҆́троцы бжⷭ҇твеннїи. ꙳ чꙋ́до ᲂу҆жа́сное: ꙳ три́ста бо лѣ́тъ и҆ се́дмьдесѧть и҆ два̀, ꙳ ꙗ҆́коже ме́ртвїи въ пеще́рѣ спа́ша.
Со і҆амвли́хомъ бжⷭ҇твеннымъ, и҆ маѯїмїлїа́номъ, ꙳ мартїнїа́на и҆ і҆ѡа́нна, ꙳ а҆нтѡ́нїа же вкꙋ́пѣ съ дїонѵ́сїемъ почти́мъ ны́нѣ, ꙳ ꙗ҆́кѡ молѧ́щыѧсѧ ѡ҆ на́съ, ꙳ восхвалѧ́юще съ ни́ми ꙳ и҆ мꙋ́драго благоче́стнѡ є҆ѯакꙋстѡдїа́на.
И҆́ны стїхи̑ры бцⷣы, подо́бны:
Препросла́влена є҆сѝ въ ро́ды родѡ́въ, ꙳ дв҃о мт҃и ѻ҆трокови́це бцⷣе марі́е, ꙳ мі́ра предста́тельнице, ꙳ ро́ждшаѧ пло́тїю сн҃а безнача́льнагѡ ѻ҆ц҃а̀, ꙳ соприсносꙋ́щна же дх҃ꙋ вои́стиннꙋ: ꙳ є҆го́же молѝ спастѝ на́съ.
Ѡ҆держи́ми прегрѣше́ньми ненаде́ждными, чⷭ҇таѧ, ꙳ тѧ̀ предста́тельницꙋ є҆ди́нꙋ и҆мꙋ́ще, дв҃о, ꙳ вопїе́мъ благода́рнѡ: ꙳ ѡ҆чи́сти ны̀, прест҃а́ѧ бг҃оневѣ́сто. ꙳ ты́ бо є҆сѝ мі́рꙋ прибѣ́жище, ꙳ и҆ застꙋпле́нїе ро́дꙋ на́шемꙋ.
Согрѣше́нїй пꙋчи́ною ѡ҆бꙋрева́емь, ꙳ въ ти́хое приста́нище чⷭ҇тыѧ моли́твы твоеѧ̀, бг҃ороди́тельнице прибѣ́гъ, ꙳ взыва́ю тѝ: спаси́ мѧ, ꙳ держа́внꙋю твою̀ просте́рши десни́цꙋ ꙳ рабꙋ̀ твоемꙋ̀, пренепоро́чнаѧ.
Сла́ва, и҆ ны́нѣ:
Жезло́мъ твоеѧ̀ моли́твы, ꙳ бг҃ороди́тельнице чⷭ҇таѧ, ꙳ ѕвѣри̑ныѧ стра̑сти ꙳ ѻ҆каѧ́нныѧ дꙋшѝ моеѧ̀ ѿженѝ вско́рѣ, ꙳ ми́рнѡ жи́знь мою̀ ᲂу҆правлѧ́ющи: ꙳ и҆ ст҃о́мꙋ мѧ̀ ста́дꙋ и҆збра́нныхъ твои́хъ ѻ҆ве́цъ причтѝ.
Крⷭ҇тобг҃оро́диченъ:
Оу҆ крⷭ҇та̀ предстоѧ́щи сн҃а и҆ бг҃а твоегѡ̀, ꙳ и҆ долготерпѣ́нїе тогѡ̀ смотрѧ́ющи, ꙳ глаго́лаше пла́чꙋщи мт҃и чи́стаѧ: ꙳ ᲂу҆вы̀ мнѣ̀, ча́до сладча́йшее, ꙳ что̀ сїѧ̑ стра́ждеши непра́веднѡ, ꙳ сло́ве бж҃їй, да спасе́ши человѣ́чество;
Тропа́рь, гла́съ д҃: Мч҃ницы твоѝ, гдⷭ҇и: И҆лѝ се́й, гла́съ то́йже:
Ве́лїѧ вѣ́ры чꙋдесѐ въ пеще́рѣ ꙗ҆́кѡ въ черто́зѣ ца́рскомъ ст҃і́и се́дмь ѻ҆́троцы пребы́ша, и҆ ᲂу҆мро́ша безъ тлѝ, и҆ по мно́зѣхъ временѣ́хъ воста́ша ꙗ҆́кѡ ѿ сна̀, во ᲂу҆вѣре́нїе воскресе́нїѧ всѣ́хъ человѣ́кѡвъ. тѣ́хъ моли́твами, хрⷭ҇тѐ бж҃е, поми́лꙋй на́съ.
На ᲂу҆́трени, ѻ҆́ба канѡ́на ѻ҆ктѡ́иха, и҆ ст҃ы́хъ канѡ́нъ, на д҃,
Гла́съ в҃. Пѣ́снь а҃. І҆рмо́съ:
Грѧди́те, лю́дїе, пои́мъ пѣ́снь хрⷭ҇тꙋ̀ бг҃ꙋ, раздѣ́льшемꙋ мо́ре, и҆ наста́вльшемꙋ лю́ди, ꙗ҆̀же и҆зведѐ и҆з̾ рабо́ты є҆гѵ́петскїѧ, ꙗ҆́кѡ просла́висѧ.
Число́мъ сїѧ́ющыѧ честны̑ѧ дѣ́ти се́дмь, прїиди́те, вѣ́рнѡ почти́мъ: ꙗ҆́кѡ просвѣща́ютъ хрⷭ҇то́вꙋ цр҃ковь свѣти́льники седмосвѣ̑тлыѧ, лꙋ́чшыѧ зако́нныхъ.
И҆̀же въ плотско́е пе́рвѣе ᲂу҆мерщвле́нїе жи́ви сꙋ́ще хрⷭ҇то́во, ѻ҆́троцы се́дмь ѡ҆дѣ́ѧшасѧ, ꙗ҆́коже со́нъ сме́рть пресла́внѡ прїе́мше, ᲂу҆твержда́юще ᲂу҆че́нїе воскрⷭ҇нїѧ.
І҆ерїхѡ́нъ паде́сѧ гла́сомъ трꙋ́бъ седмѝ: пре́лести же возноше́нїе, седмогла́сїемъ ны́нѣ вѣ́ры страда́лєцъ, сни́де до а҆́да и҆ разори́сѧ.
Бг҃оро́диченъ:
Новолѣ́пно ржⷭ҇тво̀ ѡ҆бновлѧ́еши, безневѣ́стнаѧ: и҆́бо ѻ҆ц҃ꙋ̀ собезнача́льное, и҆ бжⷭ҇твенномꙋ дх҃ꙋ соприсносꙋ́щное сло́во и҆зъ тебє̀ воплоти́сѧ, спрѧже́нїѧ не ѡ҆ста́вль.
Пѣ́снь г҃. І҆рмо́съ:
Оу҆твердѝ на́съ въ тебѣ̀, гдⷭ҇и, дре́вомъ ᲂу҆мерщве́й грѣ́хъ, и҆ стра́хъ тво́й всадѝ въ сердца̀ на́съ пою́щихъ тѧ̀.
Ѕвѣ́зды неꙋкло́нны се́дмь, ꙗ҆ви́стесѧ вѣ́рою сїѧ́юще страстоте́рпцы: и҆ и҆̀же ле́сти нырѧ́ющыѧ глꙋбино́ю, къ приста́нищꙋ спаси́тельномꙋ ᲂу҆пра́висте.
Предъ сꙋди́щемъ тве́рдѡ ста́вше ст҃і́и, мꙋчи́телей ꙗ҆́коже и҆ногда̀ маккаве́и, во́инства и҆змѣни́стесѧ тлѣ́нныѧ жи́зни, вво́инившесѧ хрⷭ҇тꙋ̀.
Досто́йнѡ бг҃ꙋ прїѧ́тна ꙗ҆ви́стесѧ же́ртва моли́твы, ст҃і́и ѻ҆́троцы, и҆ воне́ю благоꙋха́нною смра́дъ ѡ҆бличи́вше пре́лести тве́рдѡ.
Бг҃оро́диченъ:
Кꙋпина̀ въ сїна́и проѡбража́ше твоѐ, дв҃о, пресла́вное ржⷭ҇тво̀: ѻ҆гне́мъ бо бжⷭ҇тва̀ не ѡ҆пали́ласѧ є҆сѝ, въ ложесна̀ прїе́мши вѣ́рнѡ.
Сѣда́ленъ, гла́съ д҃. Подо́бенъ: Ско́рѡ предварѝ:
Ꙗ҆́кѡ столпѝ сꙋ́ще цр҃кве хрⷭ҇то́вы, стѣ́ны разверго́сте невѣ́рїѧ тве́рдѡ, седмобра́тнїи мꙋ́чєницы. тѣ́мже пре́жде сме́рти є҆́ллинскїй гнѣ́въ, и҆ па́ки по сме́рти є҆реті́ческꙋю бꙋ́рю ѿгна́вше, и҆ воскресе́нїѧ вѣ́рꙋ ᲂу҆держа́вше, моли́тесѧ вѣ́рою ᲂу҆тверди́тисѧ на́мъ.
Сла́ва, и҆ ны́нѣ, бг҃оро́диченъ:
Дв҃о всенепоро́чнаѧ, ꙗ҆́же пресꙋ́щнаго бг҃а ро́ждшаѧ, со безпло́тными того̀ непреста́ннѡ молѝ, ѡ҆ставле́нїе прегрѣше́нїй, и҆ и҆справле́нїе житїѧ̀ да́ти на́мъ пре́жде конца̀, вѣ́рою и҆ любо́вїю пою́щымъ тѧ̀ по до́лгꙋ, є҆ди́на всепѣ́таѧ.
Крⷭ҇тобг҃оро́диченъ:
На крⷭ҇тѣ́ тѧ возвы́шена ꙗ҆́кѡ ᲂу҆зрѣ̀ пречⷭ҇таѧ мт҃и твоѧ̀, сло́ве бж҃їй, мт҃рски, рыда́ющи вѣща́ше: что̀ но́вое и҆ стра́нное сїѐ чꙋ́до, сн҃е мо́й; ка́кѡ жи́знь всѣ́хъ вкꙋша́еши сме́рти, ѡ҆живи́ти мє́ртвыѧ хотѧ̀, ꙗ҆́кѡ милосе́рдъ;
Пѣ́снь д҃. І҆рмо́съ:
Оу҆слы́шахъ, гдⷭ҇и, сла́вное твоѐ смотре́нїе, и҆ просла́вихъ, человѣколю́бче, непостижи́мꙋю твою̀ си́лꙋ.
Свѧще́нное совокꙋпле́нїе, и҆ число́мъ ꙗ҆́вѣ почте́ное, седмери́цꙋ честны́хъ ѻ҆трокѡ́въ воспое́мъ.
Оу҆мꙋдре́на сꙋ́етїемъ нечести́ваго пре́лести царѧ̀, є҆фе́сстїи ѻ҆́троцы показа́ша безꙋ́мна.
Жє́ртвы пренепорѡ́чныѧ ꙗ҆́кѡ вои́стиннꙋ, и҆ заколє́нїѧ гдⷭ҇нѧ вѣ́рою ꙗ҆ви́стесѧ, ѻ҆́троцы ст҃і́и.
Бг҃оро́диченъ:
Не пре́зри молѧ́щи ѡ҆ на́съ, при́снѡ бл҃гослове́ннаѧ, и҆зба́витисѧ всѧ́кїѧ ско́рби, чⷭ҇таѧ.
Пѣ́снь є҃. І҆рмо́съ:
Свѣ́та пода́телю и҆ вѣкѡ́въ тво́рче, гдⷭ҇и, во свѣ́тѣ твои́хъ повелѣ́нїй наста́ви на́съ: ра́звѣ бо тебє̀ и҆но́гѡ бо́га не зна́емъ.
Нечꙋ́вственнѡ пе́рвѣе, ѻ҆́бщею ᲂу҆ме́рше на землѝ сме́ртїю, па́че є҆стества̀ воскреснꙋ́сте а҆́бїе, ᲂу҆вѣрѧ́юще ꙗ҆́вѣ є҆фе́сстїи ѻ҆́троцы ме́ртвыхъ воскресе́нїе.
Ѡ҆свѧ́щшесѧ бг҃ови и҆сповѣ́данїемъ и҆́стинныѧ вѣ́ры, ꙗ҆́кѡ страда́льцы зако́ннїи гдⷭ҇ни, и҆зба́влени бы́сте мꙋ́дрїи темни́цъ и҆ ра́нъ, и҆ вѣнцы̀ прїѧ́сте.
Побѣди́вше тве́рдѡ і҆́дѡльскꙋю ле́сть, сла́внїи мꙋ́чєницы, и҆ ѿ нечести́выхъ є҆ресе́й ᲂу҆че́нїѧ, сохранѧ́йте при́снѡ и҆сповѣ́дающыѧ ме́ртвыхъ воскресе́нїе.
Бг҃оро́диченъ:
Во двꙋ́хъ є҆стества́хъ, и҆ ѵ҆поста́си є҆ди́нѣй бы́сть, соверше́нъ сы́й чл҃вѣ́къ неслїѧ́ннѡ, и҆ соверше́нъ бг҃ъ, рожде́йсѧ ѿ ст҃ы́ѧ мт҃ре пресꙋ́щный.
Пѣ́снь ѕ҃. І҆рмо́съ:
Въ бе́зднѣ грѣхо́внѣй валѧ́ѧсѧ, неизслѣ́днꙋю милосе́рдїѧ твоегѡ̀ призыва́ю бе́зднꙋ: ѿ тлѝ, бж҃е, мѧ̀ возведѝ.
Бжⷭ҇твенныѧ премꙋ́дрости равночи́сленнїи столпѝ, да восхва́лѧтсѧ ст҃і́и ѻ҆́троцы се́дмь, словесы̀ ꙗ҆́кѡ ка́менїемъ сокрꙋ́шше мꙋчи́телей безбо́жное повелѣ́нїе.
Зако́номъ бжⷭ҇твеннагѡ промышле́нїѧ соблюда́еми, гото́вое прїѧ́сте погребе́нїе пеще́рꙋ, въ не́йже ме́ртви и҆ нетлѣ́нни, многолѣ́тни ст҃і́и ꙗ҆ви́стесѧ.
Нетлѣ́нїѧ воста́сте свидѣ́тели, вѣ́рꙋ ѿгонѧ́юще тлетво́рнꙋю и҆ ме́ртвꙋю, и҆ бг҃ꙋ молѧ́щесѧ ѡ҆ надѣ́ющихсѧ воскресе́нїѧ.
Бг҃оро́диченъ:
Ны́нѣ є҆стество̀ же́нское возра́довасѧ, ны́нѣ печа́ль преста̀, ра́дость же процвѣтѐ: ꙗ҆́кѡ марі́а родѝ ра́дость, сп҃са хрⷭ҇та̀ бг҃а.
Конда́къ, гла́съ д҃. Подо́бенъ: Вознесы́йсѧ:
Мі́ра сꙋ̑щаѧ тлѣ̑ннаѧ презрѣ́вше, и҆ нетлѣ̑нныѧ да́ры прїе́мше, ᲂу҆ме́рше кромѣ̀ тлѣ́нїѧ пребы́ша. тѣ́мже востаю́тъ по мно́гихъ лѣ́тѣхъ, всѐ погре́бше лю́тыхъ невѣ́рїе: ꙗ҆̀же во хвале́нїи дне́сь вѣ́рнїи восхвалѧ́юще, хрⷭ҇та̀ воспои́мъ.
Пѣ́снь з҃. І҆рмо́съ:
Тѣ́лꙋ злато́мꙋ премꙋ̑дрыѧ дѣ́ти не послꙋжи́ша, и҆ въ пла́мень са́ми поидо́ша, и҆ бо́ги и҆́хъ ѡ҆брꙋга́ша, средѝ пла́мене возопи́ша, и҆ ѡ҆росѝ ѧ҆̀ а҆́гг҃лъ: ᲂу҆слы́шасѧ ᲂу҆жѐ ᲂу҆́стъ ва́шихъ моли́тва.
Прїѧ́тєлища бж҃їѧ чи́ста и҆ и҆збра́нна ѻ҆́троцы ꙗ҆ви́шасѧ: и҆́миже преда̑нїѧ є҆ресе́й ѿ цр҃кве ѿго́нѧтсѧ, и҆ правосла́вїе сїѧ́етъ, ꙗ҆́кѡ є҆́сть воскресе́нїе всѧ́кой дꙋши́ же и҆ пло́ти, ꙗ҆́коже роди́сѧ.
Ꙗ҆́кѡ сꙋ́ще твє́рди, пре́жде сме́рти вои́стиннꙋ во страда́нїи свое́мъ ст҃і́и ѻ҆́троцы, а҆́бїе ꙗ҆ви́шасѧ: и҆ по ᲂу҆ме́ртвїи жи́ви сла́вою содержи́ми бжⷭ҇твенною, благоче́стнѡ ᲂу҆вѣ́ривше собо́ю и҆́стинное воскресе́нїе.
Дꙋша́мъ вкꙋ́пѣ и҆ тѣлесє́мъ чꙋ́вствєннымъ бꙋ́детъ воскресе́нїе: ꙗ҆́коже бо не мо́щно безъ тѣ́ла дꙋшѝ въ мі́ръ прїитѝ, си́це ни тѣлесѝ безъ дꙋшѝ, прехва́льнїи глаго́лахꙋ: и҆лѝ просла́витсѧ дꙋша̀, и҆лѝ посрами́тсѧ.
Бг҃оро́диченъ:
Ро́ждшаѧ бг҃а сп҃са всѣ́хъ марі́е, ѿча́ѧнныхъ є҆сѝ и҆справле́нїе, грѣ́шныхъ ѡ҆бновле́нїе, и҆ ненаде́ждныхъ наде́жда, и҆ пою́щихъ по́мощь: бл҃гослове́нъ бг҃ъ ѻ҆тє́цъ на́шихъ.
Пѣ́снь и҃. І҆рмо́съ:
Въ пещѝ ѻ҆́трочестѣй проѡбрази́лъ є҆сѝ и҆ногда̀ твою̀ мт҃рь, гдⷭ҇и, ѻ҆́бразъ же сїѧ̀ и҆зъ ѻ҆гнѧ̀ и҆з̾има́ше, неѡпа́льнѡ входѧ́щыѧ ю҆́же пое́мъ ꙗ҆́вльшꙋюсѧ тобо́ю концє́мъ дне́сь, и҆ превозно́симъ во всѧ̑ вѣ́ки.
Ко́рень го́рести нечести́выхъ возра́стшїй лю́тѣ, бж҃е́ственнїи ѻ҆́троцы, посѣ́кше пре́лєсти є҆́реси, приноша́ютъ пло́дъ вѣ́ры, жи́вы и҆ погре́бшесѧ вѣ́рнѡ, и҆ воскре́сше.
Є҆фе́сскихъ нача́льникѡвъ, ѻ҆́троцы ст҃і́и се́дмь и҆ страстоте́рпцы, хрⷭ҇то́вѣ цр҃кви, и҆ црⷭ҇твꙋ вѣ́рномꙋ, бжⷭ҇твенное ꙗ҆ви́стесѧ ᲂу҆твержде́нїе, є҆го́же превозно́симъ во всѧ̑ вѣ́ки.
Тве́рди ꙗ҆́вльшесѧ на землѝ, и҆ равночи́сленнїи показа́вшесѧ ѕвѣзда́мъ, неле́стное ше́ствїе бжⷭ҇твенныѧ вѣ́ры, ѻ҆́троцы творѧ́ще взыва́хꙋ: тѧ̀ превозно́симъ, хрⷭ҇тѐ, во вѣ́ки.
Бг҃оро́диченъ:
Никто́же поги́бе, чи́стаѧ, вѣ́ры наде́ждꙋ и҆мѣ́ѧ на тѧ̀ правосла́внѡ, мт҃и бж҃їѧ, то́кмѡ за́вистїю ѿмета́ющїисѧ, твоегѡ̀ не покланѧ́тисѧ зра́ка воѡбраже́нїю.
Пѣ́снь ѳ҃. І҆рмо́съ:
Ꙗ҆́же пре́жде со́лнца свѣти́льника бг҃а возсїѧ́вшаго, пло́тски къ на́мъ прише́дшаго и҆зъ бокꙋ̀ дв҃и́чꙋ, неизрече́ннѡ воплоти́вшаѧ бл҃гослове́ннаѧ всечⷭ҇таѧ, тѧ̀, бцⷣе, велича́емъ.
Бога́тство чꙋде́съ, и҆ бжⷭ҇твенныхъ та̑инъ ѿкрове́нїе, ст҃ы́хъ ꙗ҆ви́сѧ ны́нѣ воскресе́нїе: и҆̀же бо и҆ногда̀ є҆сте́ственною пло́тїю ᲂу҆ме́рше сме́ртїю, и҆ нетлѣ́ннѡ ны́нѣ воскресо́ша, ѡ҆дѣ́ѧни ꙗ҆́коже не ᲂу҆ме́рше.
Зва́нїѧ сокро́вище, и҆ вѣ́ры тве́рдое ѡ҆гражде́нїе, ст҃ы́хъ дѣте́й ꙗ҆ви́сѧ пеще́ра, провозвѣща́ѧ бꙋ́дꙋщее всѣ́хъ воскресе́нїе: не четверодне́внаго ла́зарѧ, но вѣ̑чныѧ воскресѝ мертвецы̀.
Вѣнце́мъ мꙋче́нїѧ пострада́вше, зако́ннѡ ѡ҆дѣ́ѧстесѧ ѻ҆́троцы се́дмь, и҆ столпы̀ премꙋ́дрости бж҃їѧ: и҆ ᲂу҆че́нїемъ правосла́вїѧ воста́нїе ꙗ҆ви́сте, ꙗ҆́кѡ цр҃кви побѡ́рницы, и҆ моли́твєнницы воспѣва́ющихъ ва́съ.
Бг҃оро́диченъ:
Тѣ́ло и҆ дꙋ́шꙋ твою̀ нескве́рнѡ бг҃ꙋ соблю́дши, чⷭ҇таѧ, цр҃ь же возжела̀ твоеѧ̀ добро́ты хрⷭ҇то́съ, и҆ мт҃рь своегѡ̀ воплоще́нїѧ показа̀, марі́е пресла́внаѧ, спасе́нїе мнѣ̀ при́снѡ подава́ѧ.
Свѣти́ленъ. Подо́бенъ: Жєны̀ ᲂу҆слы́шите:
Ѻ҆рꙋ́жїемъ честна́гѡ твоегѡ̀ крⷭ҇та̀ воѡрꙋ́жшесѧ стрⷭ҇тоте́рпцы твоѝ, сло́ве, сопроти̑вныѧ си̑лы тве́рдѡ побѣди́ша: и҆ съ тобо́ю, хрⷭ҇тѐ мо́й, всѣ́хъ цр҃ю̀, ца́рствꙋютъ вкꙋ́пѣ.
Бг҃оро́диченъ:
Вои́стиннꙋ бцⷣꙋ тѧ̀ и҆сповѣ́дꙋемъ, влⷣчце, тебє̀ ра́ди спа́сшїисѧ: и҆́бо бг҃а неизрече́ннѡ родила̀ є҆сѝ, разо́ршаго крⷭ҇то́мъ сме́рть, къ себѣ́ же привле́кша собо́ры: съ ни́миже тѧ̀ восхвалѧ́емъ, дв҃о.
На стїхо́внѣ ѻ҆ктѡ́иха. Сла́ва, и҆ ны́нѣ, бг҃оро́диченъ: