Мѣ́сѧца тогѡ́же въ к҃з-й де́нь. Прпⷣбнагѡ ѻ҆ц҃а̀ на́шегѡ пі́мена.

На Гдⷭ҇и, воззва́хъ, стїхи̑ры, гла́съ и҃. Поⷣ: Что̀ вы̀ нарече́мъ:

Что́ тѧ ны́нѣ, пі́мене, и҆менꙋ́емъ; ꙳ мона́хѡвъ ѻ҆́бразъ, и҆ и҆сцѣле́нїй самодѣ́лателѧ, ꙳ воздержа́нїѧ ра́нами стра̑сти ᲂу҆ѧзви́вша дꙋшє́вныѧ, ꙳ граждани́на а҆́гг҃лѡвъ и҆ собесѣ́дника, ꙳ вы́шнїѧ митропо́лїи жи́телѧ, ꙳ добродѣ́телей сосꙋ́дъ, ꙳ и҆ благочести́выхъ ᲂу҆твержде́нїе. ꙳ молѝ спасти́сѧ дꙋша́мъ на́шымъ.

Что́ тѧ ны́нѣ, пі́мене, провѣща́емъ; ꙳ пꙋсты́ни жи́телѧ и҆ безмо́лвїю рачи́телѧ, ꙳ страсте́й и҆скорени́телѧ, и҆ мона́хѡвъ наста́вника, ꙳ наводне́нїе ᲂу҆че́нїй бжⷭ҇твеннагѡ дх҃а, ꙳ свѣти́льника разсꙋжде́нїѧ неꙋсы́пна, ꙳ чꙋдодѣ́йственника и҆́стинна, ꙳ стра̑сти разли̑чныѧ и҆сцѣлѧ́юща. ꙳ молѝ спасти́сѧ дꙋша́мъ на́шымъ.

Свѣти́льникъ разсꙋжде́нїѧ бы́въ, ꙳ ѡ҆зарѧ́ѧ дꙋ́шы пристꙋпа́ющыѧ къ тебѣ̀ вѣ́рнѡ, ꙳ и҆ стезю̀ жи́зни показꙋ́ѧ тѣ̑мъ, мꙋ́дре. ꙳ тѣ́мже тѧ̀ хвала́ми ᲂу҆блажа́емъ, ꙳ соверша́юще ст҃о́е твоѐ торжество̀, ꙳ пі́мене, ѻ҆тцє́въ похвало̀, ꙳ по́стникѡвъ ᲂу҆добре́нїе. ꙳ молѝ спасти́сѧ дꙋша́мъ на́шымъ.

Сла́ва, гла́съ ѕ҃:

Прпⷣбне ѻ҆́ч҃е, во всю̀ зе́млю и҆зы́де вѣща́нїе и҆справле́нїй твои́хъ, тѣ́мъ на нб҃сѣ́хъ ѡ҆брѣ́лъ є҆сѝ мздꙋ̀ трꙋдѡ́въ твои́хъ. дє́мѡнскїѧ погꙋби́лъ є҆сѝ полкѝ, и҆ а҆́гг҃льскїѧ дости́глъ є҆сѝ чи́ны, и҆́хже житїю̀ безъ поро́ка поревнова́лъ є҆сѝ: дерзнове́нїе и҆мѣ́ѧ ко хрⷭ҇тꙋ̀ бг҃ꙋ, ми́ръ и҆спросѝ дꙋша́мъ на́шымъ.

И҆ ны́нѣ, бг҃оро́диченъ, и҆лѝ крⷭ҇тобг҃оро́диченъ. Поⷣ: Тридне́венъ:

Ви́дѧщи тѧ̀ распина́ема, хрⷭ҇тѐ, тебѐ ро́ждшаѧ, вопїѧ́ше: что̀ стра́нное, є҆́же ви́жꙋ, та́инство, сн҃е мо́й; ка́кѡ на дре́вѣ ᲂу҆мира́еши пло́тїю повѣ́шенъ, жи́зни пода́телю;

На стїхо́внѣ, ѻ҆ктѡ́иха. Сла́ва, гла́съ и҃: Самогла́сенъ:

Мона́хѡвъ мно́жества наста́вника тѧ̀ почита́емъ, ѻ҆́ч҃е на́шъ пі́мене: твое́ю бо стезе́ю вои́стиннꙋ пра́вѡ ходи́ти позна́хомъ. блаже́нъ є҆сѝ хрⷭ҇тꙋ̀ рабо́тавъ, и҆ вра́жїю ѡ҆бличи́лъ є҆сѝ си́лꙋ, а҆́гг҃лѡвъ собесѣ́дниче, прпⷣбныхъ соприча́стниче и҆ пра́ведныхъ: съ ни́миже моли́сѧ гдⷭ҇еви, поми́ловатисѧ дꙋша́мъ на́шымъ.

И҆ ны́нѣ, бг҃оро́диченъ, и҆лѝ крⷭ҇тобг҃оро́диченъ.

Подо́бенъ: Ѽ пресла́внагѡ чꙋдесѐ!

А҆́гница, а҆́гнца ꙗ҆́кѡ ви́дѣ ꙳ на дре́вѣ просте́рта во́лею крⷭ҇тнѣмъ, ꙳ вопїѧ́ше мт҃рски, ꙳ болѣ́знꙋющи съ пла́чемъ: ꙳ сн҃е мо́й, что̀ стра́нное сїѐ видѣ́нїе; ꙳ всѣ̑мъ живо́тъ даѧ́й ꙗ҆́кѡ гдⷭ҇ь, ꙳ ка́кѡ ᲂу҆мерщвлѧ́ешисѧ, долготерпѣли́ве, ꙳ земны̑мъ подаѧ̀ воскресе́нїе; ꙳ сла́влю твоѐ мно́гое, бж҃е мо́й, снизхожде́нїе.

Тропа́рь, гла́съ и҃:

Сле́зъ твои́хъ тече́ньми пꙋсты́ни безпло́дное воздѣ́лалъ є҆сѝ, и҆ и҆̀же и҆зъ глꙋбины̀ воздыха́ньми, во сто̀ трꙋдѡ́въ ᲂу҆плодоноси́лъ є҆сѝ, и҆ бы́лъ є҆сѝ свѣти́льникъ вселе́ннѣй, сїѧ́ѧ чꙋдесы̀, пі́мене ѻ҆́ч҃е на́шъ, молѝ хрⷭ҇та̀ бг҃а спасти́сѧ дꙋша́мъ на́шымъ.

На ᲂу҆́трени.

ѻ҆́ба канѡ́на ѻ҆ктѡ́иха, и҆ ст҃а́гѡ на д҃. Творе́нїе ѳеофа́ново,

Гла́съ и҃. Пѣ́снь а҃. І҆рмо́съ:

Пои́мъ гдⷭ҇еви, прове́дшемꙋ лю́ди своѧ̑ сквозѣ̀ чермно́е мо́ре, ꙗ҆́кѡ є҆ди́нъ сла́внѡ просла́висѧ.

Теплото́ю ᲂу҆тѣ́шителѧ, ѻ҆́ч҃е, согрѣва́емо се́рдце твоѐ, ле́дъ де́мѡнскїй страсте́й зи́мꙋ разрꙋшѝ.

Оу҆́глемъ бжⷭ҇твеннагѡ стра́ха ѡ҆пали́въ страсте́й ве́щь, бы́лъ є҆сѝ разсꙋжде́нїѧ свѣти́льникъ, безстра́стїе же, блаже́нне, ѻ҆́гненно.

Носѧ̀ на ра́мѣ, ѻ҆́ч҃е, крⷭ҇тъ тво́й, послѣ́довалъ є҆сѝ зовꙋ́щемꙋ любо́вїю, и҆ свѣти́льникъ мона́хѡвъ бы́лъ є҆сѝ.

Бг҃оро́диченъ:

Всего̀ мѧ̀ спаса́етъ сло́во пребжⷭ҇твенное, бла́гостїю восхотѣ́въ и҆зъ чре́ва твоегѡ̀ воплоти́тисѧ чⷭ҇таѧ мт҃и дв҃о.

Пѣ́снь г҃. І҆рмо́съ:

Ты̀ є҆сѝ ᲂу҆твержде́нїе притека́ющихъ къ тебѣ̀, гдⷭ҇и, ты̀ є҆сѝ свѣ́тъ ѡ҆мраче́нныхъ, и҆ пое́тъ тѧ̀ дꙋ́хъ мо́й.

Стоѧ́нїю всено́щномꙋ твоемꙋ̀ ᲂу҆диви́шасѧ а҆́гг҃ли: и҆́бо тѣ́хъ и҆мѣ́лъ є҆сѝ споспѣ́шникѡвъ, и҆̀же къ бг҃ꙋ въ моли́твахъ.

Слѣпотꙋ̀ ѿтрѧ́слъ є҆сѝ страсте́й ѿ ᲂу҆ма̀ твоегѡ̀ ѻ҆че́съ: тѣ́мже прозира́лъ є҆сѝ чи́стѡ неви́димаго.

Ꙗ҆́кѡ млеко́мъ воздержа́нїѧ воспита́всѧ, пі́мене преподо́бне, на высотꙋ̀ добродѣ́телей возвы́силсѧ є҆сѝ въ соверше́нное безстра́стїе.

Бг҃оро́диченъ:

И҆мѣ́ѧ тѧ̀ помо́щницꙋ, врагѡ́въ стремле́нїѧ, чⷭ҇таѧ, не ᲂу҆бою́сѧ: и҆мѣ́ѧ тѧ̀ предста́тельницꙋ, тѣ́хъ побѣжда́ю полкѝ.

Сѣда́ленъ, гла́съ г҃. Подо́бенъ: Бжⷭ҇твенныѧ вѣ́ры:

Пасо́мъ ѿ гдⷭ҇а, сегѡ̀ ѻ҆вча̀ ꙗ҆ви́лсѧ є҆сѝ кро́тко, сопроти̑вныѧ, блаже́нне, во́лки побѣжда́ѧ, и҆ сконча́въ бж҃е́ственный по́двигъ тво́й, въ нбⷭ҇нꙋю ѡ҆гра́дꙋ всели́лсѧ є҆сѝ, ѻ҆́ч҃е прпⷣбне. хрⷭ҇та̀ бг҃а прилѣ́жнѡ молѝ, дарова́ти на́мъ ве́лїю ми́лость.

Сла́ва, и҆ ны́нѣ, бг҃оро́диченъ:

Бжⷭ҇твеннагѡ є҆стества̀ не ѿлꙋ́чсѧ, пло́ть бы́въ во чре́вѣ твое́мъ: но бг҃ъ вочл҃вѣ́чсѧ и҆ пребы́сть, и҆́же по ржⷭ҇твѣ̀ мт҃рь тѧ̀ дв҃ꙋ, ꙗ҆́кѡ пре́жде ржⷭ҇тва̀ сохрани́въ всенепоро́чнꙋ, є҆ди́нъ гдⷭ҇и: того̀ прилѣ́жнѡ молѝ, дарова́ти на́мъ ве́лїю ми́лость.

Крⷭ҇тобг҃оро́диченъ:

Нескве́рнаѧ а҆́гница сло́ва, нетлѣ́ннаѧ дв҃а мт҃и, на крⷭ҇тѣ̀ зрѧ́щи повѣ́шена, и҆зъ неѧ̀ безъ болѣ́зни прозѧ́бшаго, мт҃рски подо́бнѡ рыда́ющи, вопїѧ́ше: ᲂу҆вы̀ мнѣ̀, ча́до моѐ, ка́кѡ стра́ждеши во́лею, хотѧ̀ и҆зба́вити ѿ страсте́й безче́стїѧ человѣ́ка;

Пѣ́снь д҃. І҆рмо́съ:

Оу҆слы́шахъ, гдⷭ҇и, смотре́нїѧ твоегѡ̀ та́инство, разꙋмѣ́хъ дѣла̀ твоѧ̑, и҆ просла́вихъ твоѐ бж҃ество̀.

Нескве́рное, зерца́ло, ᲂу҆тѣ́шительнꙋю зарю̀ прїе́мъ, бг҃оно́се бы́лъ є҆сѝ, и҆ прїѧ́телище бжⷭ҇твенныхъ восхожде́нїй.

Напаѧ́емо дре́во слеза́ми, ꙗ҆ви́лсѧ є҆сѝ, ѻ҆́ч҃е, высокора́слено, воздержа́нїемъ ᲂу҆добрѧ́емо, и҆ плоды̑ бжⷭ҇твенными направлѧ́емо.

Воздѣ́лалъ є҆сѝ ни́вꙋ твоегѡ̀ ᲂу҆ма̀ болѣ́зньми воздержа́нїѧ, добродѣ́телей кла́съ многопло́денъ и҆ чꙋде́съ благода́ть разплоди́лъ є҆сѝ.

Бг҃оро́диченъ:

Дѣ́вства сосꙋ́де и҆ невмѣсти́магѡ є҆стества̀ селе́нїе, дꙋ́шꙋ мою̀ просвѣтѝ ѡ҆мраче́ннꙋю, бг҃оневѣ́сто.

Пѣ́снь є҃. І҆рмо́съ:

Оу҆́тренююще, вопїе́мъ тѝ, гдⷭ҇и, спаси́ ны: ты́ бо є҆сѝ бг҃ъ на́шъ, ра́звѣ тебє̀ и҆но́гѡ не вѣ́мы.

Ва́ръ поне́съ, сла́вне, дневны́й ра́дости сподо́билсѧ є҆сѝ гдⷭ҇а твоегѡ̀, прпⷣбне.

Воздержа́нїѧ ᲂу҆до́лїй сладково́ненъ прозѧ́блъ є҆сѝ шипо́къ, дыха̑нїи бж҃їѧ ра́зꙋма благово́нствꙋѧ концы̀.

Пе́рвѣе вельмѝ хва́лѧщагосѧ, ѻ҆́ч҃е, ѕмі́ѧ къ землѝ смири́лъ є҆сѝ, смире́нїемъ ѡ҆гра́ждсѧ.

Бг҃оро́диченъ

Дв҃ꙋ по ржⷭ҇твѣ̀ пое́мъ тѧ̀, бцⷣе: ты́ бо бг҃а сло́ва пло́тїю мі́рꙋ родила̀ є҆сѝ.

Пѣ́снь ѕ҃. І҆рмо́съ:

Ри́зꙋ мнѣ̀ пода́ждь свѣ́тлꙋ, ѡ҆дѣѧ́йсѧ свѣ́томъ, ꙗ҆́кѡ ри́зою, многомлⷭ҇тиве хрⷭ҇тѐ бж҃е на́шъ.

Оу҆мертви́въ тѣлє́снаѧ стремлє́нїѧ мно́гими пѡ́двиги, къ жи́зни безсме́ртнѣй ѿше́лъ є҆сѝ, пі́мене досточꙋ́дне.

Воздержа́нїе при́сно, моли́твꙋ и҆ любо́вь нелицемѣ́рнꙋ стѧжа́въ, прпⷣбне, нескве́рно бж҃їе ꙗ҆ви́лсѧ є҆сѝ зерца́ло.

Въ пꙋсты́нѧхъ непрохо́дныхъ живы́й, страсте́й пꙋсто́шныхъ себѐ ѡ҆бнажи́лъ є҆сѝ, и҆ граждани́нъ нбⷭ҇ный бы́лъ є҆сѝ.

Бг҃оро́диченъ:

Ꙗ҆́же є҆ди́на сло́вомъ пло́тїю сло́во ро́ждши, и҆зба́ви, мо́лимсѧ, ѿ сѣте́й вра́жїихъ дꙋ́шы на́шѧ.

Конда́къ, гла́съ д҃. Подо́бенъ: Ꙗ҆ви́лсѧ є҆сѝ:

Свѣ́тлыхъ пѡ́двигъ твои́хъ, прпⷣбне ѻ҆́ч҃е, наста̀ дне́сь ст҃а́ѧ па́мѧть твоѧ̀, дꙋ́шы благочести́выхъ веселѧ́щи, пі́мене бг҃омꙋ́дре, ѻ҆́ч҃е на́шъ прпⷣбне. (с. 525)

І҆́косъ:

Дꙋшетлѣ̑нныѧ сла̑сти, и҆ мѡлвы̀ мїрскі̑ѧ вседꙋ́шнѡ возненави́дѣвъ, и҆ хрⷭ҇та̀ возжела́въ, крⷭ҇тъ є҆гѡ̀ взе́мъ на свою̀ ра́мꙋ, послѣ́довалъ є҆сѝ є҆мꙋ̀, неѡсла́бнымъ жела́нїемъ, и҆ воздержа̑нїи подви́гсѧ, невеще́ственно стѧжа́лъ є҆сѝ житїѐ, въ постѣ́хъ и҆ слеза́хъ и҆ моли́твахъ непреста́нныхъ. тѣ́мже и҆ сп҃съ тебѣ̀ дарова̀ црⷭ҇тво нбⷭ҇ное, сподо́бль незаходи́магѡ свѣ́та, и҆ зарѝ непристꙋ́пныѧ, пі́мене бг҃омꙋ́дре, ѻ҆́ч҃е на́шъ прпⷣбне.

Пѣ́снь з҃. І҆рмо́съ:

Ѻ҆́троцы є҆вре́йстїи въ пещѝ попра́ша пла́мень дерзнове́ннѡ, и҆ на ро́сꙋ ѻ҆́гнь преложи́ша, вопїю́ще: бл҃гослове́нъ є҆сѝ, гдⷭ҇и бж҃е, во вѣ́ки.

Въ бжⷭ҇твенныхъ ᲂу҆пражнѧ́ѧсѧ видѣ́нїихъ, просвѣща́ѧсѧ невеще́ственными зарѧ́ми, и҆ днѐ сы́нъ, и҆ свѣ́тъ сꙋ́щымъ во тмѣ̀ ꙗ҆́кѡ вои́стиннꙋ бы́лъ є҆сѝ, бг҃оно́се, во вѣ́ки.

Взѧ́тсѧ на высотꙋ̀ безстра́стїѧ съ пло́тїю, а҆́гг҃лѡмъ подо́бѧсѧ, раѧ̀ пи́щи бы́лъ є҆сѝ наслѣ́дникъ, взыва́ѧ, блаже́нне: бж҃е, бл҃гослове́нъ є҆сѝ.

Сїѧ́ѧ заре́ю безстра́стїѧ, ѡ҆мрачи́лъ є҆сѝ де́мѡнскаѧ и҆скꙋшє́нїѧ, и҆ си́хъ мно́ги ѡ҆ѕлобле́нїѧ и҆зба́ви вопїю́щыѧ, прпⷣбне: бж҃е бл҃гослове́нъ є҆сѝ.

Бг҃оро́диченъ:

Сѐ, ю҆́же речѐ дв҃ꙋ дх҃омъ вели́кїй и҆са́їа, во чре́вѣ бг҃а зача́тъ и҆ ражда́етъ. є҆мꙋ́же пою́ще зове́мъ: бж҃е, бл҃гослове́нъ є҆сѝ.

Пѣ́снь и҃. І҆рмо́съ:

Безнача́льнаго цр҃ѧ̀ сла́вы, є҆гѡ́же трепе́щꙋтъ нбⷭ҇ныѧ си̑лы, по́йте свѧще́нницы, лю́дїе превозноси́те во всѧ̑ вѣ́ки.

Недрема́ннѡ дꙋше́внꙋю свѣщꙋ̀ є҆ле́емъ твои́хъ пѡ́двигъ соблю́дъ, вше́лъ є҆сѝ съ ра́достїю въ нетлѣ́ненъ черто́гъ, и҆ живе́ши во вѣ́ки.

Не поколеба́ша дꙋшѝ твоеѧ̀ столпа̀ вѣ́тры нечи́стыхъ дꙋхѡ́въ: ᲂу҆тверди́босѧ на ка́мени вѣ́ры, всебл҃же́нне бг҃оно́се.

Ѕлоѻбра́знꙋю страсте́й совле́клъ є҆сѝ ри́зꙋ, ѡ҆бле́клсѧ є҆сѝ, блаже́нне, въ кра́снꙋю ѻ҆де́ждꙋ бжⷭ҇твеннагѡ безстра́стїѧ, хрⷭ҇тꙋ̀ сцрⷭ҇твꙋѧ.

Бг҃оро́диченъ:

Ꙗ҆́кѡ честны́й и҆ превознесе́нный прⷭ҇то́лъ, сꙋ́щꙋю бг҃а вы́шнѧгѡ, воспое́мъ лю́дїе, є҆ди́нꙋ по ржⷭ҇твѣ̀ дв҃ꙋ сохра́ншꙋсѧ.

Пѣ́снь ѳ҃. І҆рмо́съ:

Оу҆страши́сѧ всѧ́къ слꙋ́хъ неизрече́нна бж҃їѧ снизхожде́нїѧ, ꙗ҆́кѡ вы́шнїй во́лею сни́де да́же и҆ до пло́ти, ѿ дв҃и́ческагѡ чре́ва бы́въ чл҃вѣ́къ. тѣ́мже пречи́стꙋю бцⷣꙋ, вѣ́рнїи, велича́емъ.

Заше́лъ є҆сѝ ᲂу҆́бѡ ꙗ҆́коже ѕвѣзда̀ ѿ мі́ра, ᲂу҆ хрⷭ҇та́ же возсїѧ́лъ є҆сѝ, ᲂу҆́мнагѡ вои́стиннꙋ пра́вды, всеблаже́нне, сл҃нца, и҆ ꙗ҆́коже зарю̀ вѣ̑рнымъ, твоѧ̑ ѡ҆ста́вилъ є҆сѝ свѣтови̑дныѧ добродѣ́тєли, ѿе́млющыѧ дꙋ́шъ ѡ҆мраче́нїе.

Честна̀ предъ бг҃омъ твоѧ̀ сме́рть, сла́вне, бы́сть: и҆́бо прпⷣбнѡ на землѝ пожи́лъ є҆сѝ, сегѡ̀ повелѣ̑нїѧ и҆ ѡ҆правда̑нїѧ, пі́мене, соблю́дъ неврє́дна. тѣ́мже возсїѧ̀ ꙗ҆́кѡ пра́ведникꙋ тебѣ̀ свѣ́тъ невече́рнїй.

Бжⷭ҇твенными, ѻ҆́ч҃е, добро́тами наслажда́ѧсѧ, и҆ прича́стїемъ ѡ҆божа́емь, и҆ вели́комꙋ свѣ́тꙋ просвѣще́нъ ны́нѣ предстоѧ̀, и҆ кра́йнимъ жела́нїемъ прибли́жилсѧ є҆сѝ ꙗ҆снѣ́йше. тѧ̀ чтꙋ́щыѧ, пі́мене, и҆ творѧ́щыѧ твою̀ па́мѧть помина́й.

Бг҃оро́диченъ:

Оу҆ста́вила є҆сѝ, є҆ди́на въ жена́хъ, клѧ́твꙋ первозда́нныхъ, бг҃оневѣ́сто, неѡпи́саннаго пло́тїю ро́ждши ѡ҆писꙋ́ема, ѡ҆бнови́ла є҆сѝ зако́ны є҆стества̀, нескве́рнаѧ, разстоѧ́щыѧ пе́рвѣе, пресла́внымъ хода́тайствомъ твои́мъ соедини́ла є҆сѝ.

Свѣти́ленъ. Подо́бенъ: Не́бо ѕвѣзда́ми:

А҆́гг҃льскагѡ житїѧ̀ жела́ѧ, ᲂу҆дали́лсѧ є҆сѝ, пі́мене, въ пꙋсты̑ни, и҆ стра̑сти покори́лъ є҆сѝ плотскі̑ѧ, равноа́гг҃ленъ ꙗ҆ви́лсѧ є҆сѝ, ѻ҆́ч҃е на́шъ бг҃оно́се.

Сла́ва, и҆ ны́нѣ, бг҃оро́диченъ:

Держа́внымъ твои́мъ покро́вомъ ѿ врагѡ́въ навѣ́та на́съ, чⷭ҇таѧ, твоѧ̑ рабы̑ сохранѝ всѧ̑ невре́дны: тебе́ бо стѧжа́хомъ є҆ди́нꙋ прибѣ́жище въ нꙋ́ждахъ.

На лїтꙋргі́и прокі́менъ: Честна̀ предъ гдⷭ҇емъ сме́рть прпⷣбныхъ є҆гѡ̀. Сті́хъ: Что̀ возда́мъ гдⷭ҇еви ѡ҆ всѣ́хъ, ꙗ҆̀же воздаде́ ми; А҆пⷭ҇лъ къ гала́тѡмъ, зача́ло сг҃ї. Є҆ѵⷢ҇лїе матѳе́а, зача́ло і҃. Прича́стенъ: Въ па́мѧть вѣ́чнꙋю: