Мѣ́сѧца тогѡ́же въ з҃ї-й де́нь. Ст҃а́гѡ мꙋ́ченика мѵ́рѡна.

На Гдⷭ҇и, воззва́хъ, стїхи̑ры пра́здника, гла́съ д҃. Подо́бенъ: Зва́нный свы́ше:

Ю҆́же жи́знь, бцⷣе, заче́ншаѧ, ꙳ ᲂу҆мира́еши зако́номъ є҆стества̀, ꙳ и҆ прехо́диши ѿ землѝ къ нбⷭ҇нымъ, ꙳ ма́нїемъ вопло́щшагѡсѧ ꙳ ѿ пречⷭ҇тыхъ и҆ бжⷭ҇твенныхъ крове́й твои́хъ. ꙳ тѣ́мже ѿ конє́цъ тебѣ̀ всѝ предста́ша, ꙳ бг҃огла́снїи а҆пⷭ҇ли тѧ̀ погребстѝ, ꙳ пѣ́сненнѡ тебѣ̀ вѣща́юще: ꙳ ѡ҆дꙋшевле́нный прⷭ҇то́ле всѣ́хъ цр҃ѧ̀, ꙳ и҆ чⷭ҇тны́ѧ ст҃ы́ни ковче́же, ꙳ ра́дꙋйсѧ, є҆ди́на ро́ждшаѧ ꙳ сп҃са дꙋ́шъ на́шихъ.

Свѣ́та чистѣ́йшагѡ прїѧ́тєлища, ꙳ свѣти̑льницы, разо́ршїи но́щь многобо́жнꙋю, ꙳ сп҃совы а҆пⷭ҇ли, ꙳ ѻ҆́блакъ бжⷭ҇твенный, ꙳ и҆зъ негѡ́же незаходи́мый свѣ́тъ возсїѧ̀, ꙳ є҆гда̀ дꙋ́хомъ преста́вленꙋ тѧ̀ ѿ мїрски́хъ ꙳ ᲂу҆вѣ́дѣша, бл҃гослове́ннаѧ, ꙳ къ премі́рнѣй ра́дости ꙳ ѻ҆́блакомъ преидо́ша, ꙳ и҆схо́дными пѣ́сньми тѧ̀ проводи́вше ꙳ ко гро́бꙋ живоно́сномꙋ, ꙳ бцⷣе, ᲂу҆пова́нїе на́ше.

Да пра́зднꙋетъ тва́рь моле́бнѡ, ꙳ всѣ́хъ цр҃и́ца ꙳ къ ца́рствꙋ мы́сленномꙋ пре́йде ꙳ сцⷭ҇ртвовати црⷭ҇твꙋющемꙋ ꙳ все́ю тва́рїю. ꙳ є҆ѧ́же ра́ди разрꙋши́сѧ а҆́дово ца́рство, ꙳ и҆ мы̀ ѿ землѝ вознесо́хомсѧ, ꙳ и҆ со а҆́гг҃лы жи́ти сподо́бихомсѧ. ꙳ є҆ѧ́же ᲂу҆спе́нїемъ собра́сѧ ꙳ мы́сленное є҆стество̀ всѐ, ꙳ патрїа́рси, прⷪ҇ро́цы ꙳ и҆ съ мꙋ́чєники а҆пⷭ҇ли.

Стїхи̑ры ст҃а́гѡ, гла́съ в҃. Подо́бенъ: Є҆гда̀ ѿ дре́ва:

Є҆гда̀ безбо́жное разжже́нїе всѧ́кꙋ попалѧ́ше странꙋ̀, пребл҃же́нне, тогда̀ разжже́сѧ теплото́ю дх҃а, ѿ дв҃ы бг҃оѻтрокови́цы проповѣ́далъ є҆сѝ сло́ва въ пло́ть ѡ҆бле́кшасѧ за бла́гость. тѣ́мъ и҆ ѻ҆гнѧ̀ и҆ мꙋ́къ претерпѣ́лъ є҆сѝ лю̑таѧ томлє́нїѧ, си́лою ᲂу҆крѣплѧ́емь благода́ти.

Є҆гда̀ ѕлоимени́тый вра́гъ тща́шесѧ ласка́ньми ᲂу҆кра́сти твою̀ мы́сль, тогда̀ мꙋ́жествомъ ᲂу҆добрѧ́емь, сопроти́вилсѧ є҆сѝ тве́рдѣ, и҆ претерпѣ́лъ є҆сѝ бѡлѣ́зни, къ неболѣ́зненномꙋ поко́ю приводѧ́щыѧ тѧ̀, мꙋ́чениче достохва́льне мѵ́рѡне, небе́сномꙋ црⷭ҇твїю и҆ вѣ́чномꙋ наслажде́нїю.

Є҆гда̀ волꙋ́ѧми жи́лами тѧ̀ вра́гъ бїѧ́ше, строга̑нїи непреста́нными и҆знꙋрѧ́ѧ, мꙋ́чениче, пло́ть твою̀ свѧще́ннꙋю, ко хрⷭ҇тꙋ̀ взира́лъ є҆сѝ подвигополо́жникꙋ, рꙋ́кꙋ тебѣ̀ простира́ющꙋ бжⷭ҇твенныѧ си́лы. тѣ́мже, сконча́въ тече́нїе, ᲂу҆лꙋчи́лъ є҆сѝ по́чєсти вели́ки, мѵ́рѡне страда́льче предо́блїй.

Сла́ва, и҆ ны́нѣ, гла́съ то́йже. Самогла́сенъ:

Ꙗ҆́же нб҃съ вы́шшаѧ сꙋ́щи, и҆ херꙋві̑мъ сла́внѣйшаѧ, и҆ всеѧ̀ тва́ри чⷭ҇тнѣ́йша, ꙗ҆́же премно́гїѧ ра́ди чистоты̀, прⷭ҇носꙋ́щнагѡ сꙋщества̀ прїѧ́телище бы́вши, въ сн҃о́внѣ рꙋ́цѣ дне́сь всест҃ꙋ́ю предае́тъ дꙋ́шꙋ, и҆ съ не́ю и҆сполнѧ́ютсѧ всѧ́чєскаѧ ра́дости, и҆ на́мъ да́рꙋетъ ве́лїю ми́лость.

На стїхо́внѣ стїхи̑ры самогла́сны, гла́съ в҃. Поⷣ: До́ме є҆ѵфра́ѳовъ:

Пѣ́сньми твоѐ честно́е, ꙳ и҆ бг҃опрїѧ́тное тѣ́ло, ꙳ провожда́юще бжⷭ҇твеннїи ꙳ а҆пⷭ҇ли, вопїѧ́хꙋ: ꙳ гдѣ̀ ны́нѣ ѿхо́диши, влⷣчце;

Сті́хъ: Воскрⷭ҇нѝ, гдⷭ҇и, въ поко́й тво́й, ты̀ и҆ кївѡ́тъ свѧты́ни твоеѧ̀.

Прїиди́те, земноро́днїи, ꙳ соста́вимъ ли́къ, ꙳ и҆схо́дное вопїю́ще ꙳ на преставле́нїе бцⷣы дне́сь.

Сті́хъ: Клѧ́тсѧ гдⷭ҇ь дв҃дꙋ и҆́стиною, и҆ не ѿве́ржетсѧ є҆ѧ̀.

Землѧ̀ ᲂу҆́бѡ твои́мъ погребе́нїемъ ꙳ благослови́сѧ, дв҃о: ꙳ воздꙋ́хъ же восхожде́нїемъ ꙳ ѡ҆свѧти́сѧ стра́ннымъ, ꙳ зако́номъ ᲂу҆ме́рши є҆стества̀.

Сла́ва, и҆ ны́нѣ, гла́съ то́йже. Самогла́сенъ:

Всенепоро́чнаѧ невѣ́ста, и҆ мт҃и бл҃говоле́нїѧ ѻ҆́ч҃а, ꙗ҆́же бг҃ꙋ пронарече́ннаѧ во своѐ є҆мꙋ̀ жили́ще, несли́тнагѡ соедине́нїѧ, дне́сь пречⷭ҇тꙋю дꙋ́шꙋ творцꙋ̀ и҆ бг҃ꙋ предае́тъ: ю҆́же безпло́тныхъ си̑лы бг҃олѣ́пнѡ под̾е́млютъ, и҆ къ животꙋ̀ преставлѧ́етсѧ, сꙋ́щаѧ мт҃и живота̀, свѣща̀ непристꙋ́пнагѡ свѣ́та, спасе́нїе вѣ́рныхъ, и҆ ᲂу҆пова́нїе дꙋ́шъ на́шихъ.

Тропа́рь пра́здника, гла́съ а҃:

Въ ржⷭ҇твѣ̀ дѣ́вство сохрани́ла є҆сѝ, во ᲂу҆спе́нїи мі́ра не ѡ҆ста́вила є҆сѝ, бцⷣе. преста́виласѧ є҆сѝ къ животꙋ̀, мт҃и сꙋ́щи живота̀, и҆ моли́твами твои́ми и҆збавлѧ́еши ѿ сме́рти дꙋ́шы на́шѧ.

На ᲂу҆́трени, по а҃-й стїхоло́гїи сѣда́ленъ, гла́съ г҃.

Подо́бенъ: Красотѣ̀ дѣ́вства:

Въ нбⷭ҇наѧ мы́слєннаѧ твоѧ̀ дꙋша̀, въ ра́й чⷭ҇тое твоѐ тѣ́ло преста́висѧ, ѿ тлѝ, пренепоро́чнаѧ, въ мѣ́сто свѣ́тло: сегѡ̀ ра́ди возда́стъ беззакѡ́ннымъ гдⷭ҇и, ле́сть бо содѣ́лаша честно́мꙋ твоемꙋ̀ тѣ́лꙋ. тѣ́мже со а҆пⷭ҇лы вопїе́мъ: ра́дꙋйсѧ, бл҃года́тнаѧ.

Сла́ва, и҆ ны́нѣ, то́йже:

По в҃-й стїхоло́гїи сѣда́ленъ, гла́съ д҃. Поⷣ: Оу҆диви́сѧ і҆ѡ́сифъ:

Въ рꙋ́цѣ на́съ ра́ди вочл҃вѣ́чшагѡсѧ и҆зъ тебє̀, преда́вши дꙋ́шꙋ, ꙗ҆́кѡ зижди́телю твоемꙋ̀ и҆ бг҃ꙋ, къ жи́зни нетлѣ́ннѣй преста́виласѧ є҆сѝ. тѣ́мже тѧ̀ че́стнѡ ᲂу҆блажа́емъ, є҆ди́нꙋ чи́стꙋю и҆ нескве́рнꙋю, бцⷣꙋ всѝ и҆́стиннѡ и҆сповѣ́дающе, взыва́емъ: хрⷭ҇та̀ молѝ къ немꙋ́же преста́виласѧ є҆сѝ, спастѝ дꙋ́шы на́шѧ.

Сла́ва, и҆ ны́нѣ, то́йже.

Канѡ́нъ пра́здника, со і҆рмосо́мъ на и҃. Кѵ́ръ і҆ѡа́нна дамаскина̀.

Гла́съ а҃. Пѣ́снь а҃. І҆рмо́съ:

Ѿве́рзꙋ ᲂу҆ста̀ моѧ̑, и҆ напо́лнѧтсѧ дх҃а, и҆ сло́во ѿры́гнꙋ цр҃и́цѣ мт҃ри, и҆ ꙗ҆влю́сѧ, свѣ́тлѡ торжествꙋ́ѧ, и҆ воспою̀ ра́дꙋѧсѧ тоѧ̀ ᲂу҆спе́нїе.

Дѣ̑вы ѻ҆трокови̑цы съ марїамі́ею прⷪ҇ро́чицею пѣ́снь и҆схо́днꙋю ны́нѣ воскли́кните: дв҃а бо и҆ є҆ди́на бг҃ома́ти ко прїѧ́тїю нбⷭ҇номꙋ преставлѧ́етсѧ.

Досто́йно ꙗ҆́кѡ ѡ҆дꙋшевле́нное тѧ̀ не́бо, прїѧ́ша нбⷭ҇наѧ, пречⷭ҇таѧ, бжⷭ҇твєннаѧ селє́нїѧ: и҆ предста̀ свѣ́тлѡ ᲂу҆кра́шена, ꙗ҆́кѡ невѣ́ста всенепоро́чнаѧ, цр҃ю̀ и҆ бг҃ꙋ.

Канѡ́нъ ст҃а́гѡ, на д҃, є҆гѡ́же краегране́сїе:

Пою̀, мѵ́рѡне, твою̀ мѷродохнове́ннꙋю бл҃года́ть. І҆ѡ́сифъ.

Гла́съ в҃. Пѣ́снь а҃. І҆рмо́съ:

Грѧди́те, лю́дїе, пои́мъ пѣ́снь хрⷭ҇тꙋ̀ бг҃ꙋ, раздѣ́льшемꙋ мо́ре, и҆ наста́вльшемꙋ лю́ди, ꙗ҆̀же и҆зведѐ и҆з̾ рабо́ты є҆гѵ́петскїѧ, ꙗ҆́кѡ просла́висѧ.

Хвалꙋ̀ бг҃ꙋ, въ па́мѧти ликꙋ́юще страда́льца мѵ́рѡна, дне́сь воспое́мъ, ᲂу҆крѣ́пльшемꙋ сего̀, держа́вꙋ погꙋби́ти борца̀.

Да́ръ са́мъ себѐ благодѣ́телю прине́слъ є҆сѝ, и҆ свѧще́нно возложе́нїе, и҆ добро̀ заколе́нїе, и҆ благово́ннꙋ же́ртвꙋ, зако́ннѡ пострада́въ, мꙋ́чениче многострада́льне.

Ꙗ҆́кѡ мꙋ́дръ, ꙗ҆́кѡ чи́стъ хра́мъ, сла́вне, ѿ дв҃ы возсїѧ́вшагѡ, ᲂу҆стреми́вшагосѧ возмꙋти́ти бжⷭ҇твенное ста́до, дꙋшетлѣ́ннаго во́лка ѿгна́лъ є҆сѝ.

Бг҃оро́диченъ:

Є҆ди́на бг҃а неискꙋсобра́чнѡ родила̀ є҆сѝ, є҆го́же страстоте́рпцы мꙋ́чєницы и҆сповѣ́давше на́мъ ᲂу҆подо́бльшасѧ, ᲂу҆праздни́ша пре́лесть, чⷭ҇таѧ влⷣчце.

Пѣ́снь г҃. І҆рмо́съ:

Твоѧ̑ пѣсносло́вцы, бцⷣе, живы́й и҆ незави́стный и҆сто́чниче, ли́къ себѣ̀ совокꙋ́пльшыѧ, дꙋхо́внѡ ᲂу҆твердѝ, въ бж҃е́ственнѣй па́мѧти твое́й вѣнцє́въ сла́вы сподо́би.

Ѿ ме́ртвыхъ чре́слъ произве́дшисѧ, є҆стество́мъ подо́бна, чⷭ҇таѧ, и҆схожде́нїе разрѣшѝ: ро́ждши же сꙋ́щꙋю жи́знь, къ жи́зни преста́висѧ бжⷭ҇твеннѣй и҆ ѵ҆поста́снѣй.

Ли́къ бг҃осло́вѡвъ ѿ конє́цъ, свы́ше же а҆́гг҃лъ мно́жєства къ сїѡ́нꙋ и҆дѧ́хꙋ, всеси́льнымъ манове́нїемъ, достодо́лжнѡ, влⷣчце, твоемꙋ̀ погребе́нїю слꙋжа́ще.

И҆́нъ. І҆рмо́съ:

На ка́мени мѧ̀ вѣ́ры ᲂу҆тверди́въ, разшири́лъ є҆сѝ ᲂу҆ста̀ моѧ̑ на врагѝ моѧ̑, возвесели́босѧ дꙋ́хъ мо́й, внегда̀ пѣ́ти: нѣ́сть свѧ́тъ, ꙗ҆́коже бг҃ъ на́шъ, и҆ нѣ́сть пра́веденъ, па́че тебє̀, гдⷭ҇и.

Возвы́сивъ твоѐ жела́нїе серде́чное ко гдⷭ҇ꙋ, на крⷭ҇тъ возне́сшемꙋсѧ, вознесе́нъ бы́лъ є҆сѝ, пресла́вне, на дре́вѣ стрꙋ́жемь, ᲂу҆се́рднѡ же вопїѧ̀: ꙗ҆́кѡ нѣ́сть пра́веденъ па́че тебє̀, гдⷭ҇и.

Глагѡ́лъ твои́хъ стрѣла́ми ѻ҆́стрыми пронзи́лъ є҆сѝ мꙋчи́телѧ въ се́рдце, до́блїй во́ине цр҃ѧ̀ хрⷭ҇та̀, всехва́льне, и҆ поѧ̀ глаго́лалъ є҆сѝ: нѣ́сть пра́веденъ па́че тебє̀, гдⷭ҇и.

Ꙗ҆́кѡ ᲂу҆́тро, ꙗ҆́кѡ де́нь возсїѧ́въ, разори́лъ є҆сѝ мра́къ невѣ́дѣнїѧ, просвѣти́лъ є҆сѝ пою́щыѧ всегда̀, мѵ́рѡне многострада́льне: ты̀ є҆сѝ бг҃ъ на́шъ, и҆ нѣ́сть пра́веденъ па́че тебє̀, гдⷭ҇и.

Бг҃оро́диченъ:

Недꙋ́гꙋющꙋю безбо́жїемъ тва́рь всю̀, бг҃а ро́ждши и҆сцѣли́телѧ, дв҃о, и҆сцѣли́ла є҆сѝ пресла́внѡ. тѣ́мже благодарѧ́ще взыва́емъ тѝ: нѣ́сть пречⷭ҇ты па́че тебє̀, влⷣчце.

Конда́къ ст҃а́гѡ, гла́съ д҃. Подо́бенъ: Вознесы́йсѧ:

И҆змла́да хрⷭ҇та̀ возлюби́въ, пресла́вне, и҆ тогѡ̀ соблюда́ѧ бжⷭ҇твєнныѧ за́пѡвѣди, къ томꙋ̀ прите́клъ є҆сѝ ве́сь цѣ́лъ, мѵ́рѡне всече́стне, и҆ со а҆́гг҃лы мо́лишисѧ прилѣ́жнѡ. просѝ всѣ̑мъ почита́ющымъ па́мѧть твою̀ ѡ҆ставле́нїѧ грѣхѡ́въ.

Сѣда́ленъ, гла́съ а҃. Подо́бенъ: Гро́бъ тво́й, сп҃се:

Ѻ҆гнедохнове́нно показа́лсѧ є҆сѝ благово́нїе, страда́нїемъ ѡ҆бонева́еши на̑ша тезоиме́ннѡ сердца̀, мꙋ́ченикѡвъ ᲂу҆краше́нїе, и҆ вѣ́рныхъ ᲂу҆добре́нїе. тѣ́мже дне́сь всесвѧтꙋ́ю твою̀ па́мѧть пра́зднꙋюще, ѡ҆свѧща́емсѧ всѝ любо́вїю чтꙋ́щїи тѧ̀.

Сла́ва, и҆ ны́нѣ, гла́съ и҆ подо́бенъ то́йже:

Всечестны́й ли́къ премꙋ́дрыхъ а҆пⷭ҇лъ, собра́сѧ чꙋ́днѡ, погребстѝ сла́внѡ тѣ́ло твоѐ пречⷭ҇тое, бцⷣе всепѣ́таѧ: съ ни́миже воспѣ́ша и҆ а҆́гг҃лъ мно́жество, преставле́нїе твоѐ че́стнѡ хва́лѧще, є҆́же вѣ́рою пра́зднꙋемъ.

Пѣ́снь д҃. І҆рмо́съ:

Неизслѣ́дный бж҃їй совѣ́тъ, є҆́же ѿ дв҃ы воплоще́нїѧ тебє̀ вы́шнѧгѡ, прⷪ҇ро́къ а҆ввакꙋ́мъ ᲂу҆смотрѧ́ѧ, зовѧ́ше: сла́ва си́лѣ твое́й, гдⷭ҇и.

Чꙋ́до бѧ́ше зрѣ́ти, нб҃о всѣ́хъ цр҃ѧ̀ ѡ҆дꙋшевле́нное, и҆спражднє́нїѧ преходѧ́щее земна̑ѧ, ꙗ҆́кѡ чꙋ́дна дѣла̀ твоѧ̑. сла́ва си́лѣ твое́й, гдⷭ҇и.

А҆́ще и҆ непости́жный сеѧ̀ пло́дъ, и҆́мже нб҃са̀ бы́ша, погребе́нїе прїѧ́тъ во́лею, ꙗ҆́кѡ ме́ртвъ: ка́кѡ погребе́нїѧ ѿве́ржетсѧ, неискꙋсобра́чнѡ ро́ждшаѧ;

Въ преставле́нїи твое́мъ, мт҃и бж҃їѧ, простра́ннѣйшее тѣ́ло твоѐ и҆ бг҃опрїѧ́тное, а҆́гг҃льскаѧ вѡ́инства свѧще́нными кри́лы, тре́петомъ и҆ ра́достїю покрыва́хꙋ.

И҆́нъ. І҆рмо́съ:

Пою́ тѧ, слꙋ́хомъ бо, гдⷭ҇и, ᲂу҆слы́шахъ и҆ ᲂу҆жасо́хсѧ: до менє́ бо и҆́деши, менѐ и҆щѧ̀ заблꙋ́ждшаго. тѣ́мъ мно́гое твоѐ снизхожде́нїе, є҆́же на мѧ̀, прославлѧ́ю, многоми́лостиве.

Сп҃са и҆ бг҃а и҆ гдⷭ҇а возсїѧ́вшаго ѿ дв҃ы, и҆сповѣ́дꙋѧ, сла́вне, посредѝ сꙋди́ща, мꙋчи́телей шата́нїе терпѣ́нїемъ смири́лъ є҆сѝ, и҆ многобо́жїе потреби́лъ є҆сѝ.

Ника́коже ᲂу҆страши́всѧ стрꙋ́жемь и҆ бїе́мь, доблемꙋ́дренне, а҆́гг҃лы ᲂу҆диви́лъ є҆сѝ зрѧ́щыѧ твоѐ терпѣ́нїе: и҆́мже врагѝ безплѡ́тныѧ погꙋби́въ, побѣдоно́сенъ мч҃никъ бы́лъ є҆сѝ.

Сы́й бжⷭ҇твенныѧ росы̀ и҆спо́лненъ, проше́лъ є҆сѝ доблемꙋ́дреннѡ ѻ҆́гненнꙋю пе́щь, зри́мь въ не́й, мѵ́рѡне мꙋ́дре, со а҆́гг҃лы ра́дꙋющсѧ, и҆ ника́коже, бл҃же́нне, ѡ҆палѧ́емь.

Бг҃оро́диченъ:

Ве́лїе и҆ стра́шное та́инство ржⷭ҇тва̀ твоегѡ̀ ᲂу҆дивлѧ́етъ всѧ́къ, чⷭ҇таѧ, ᲂу҆́мъ: ꙗ҆́кѡ бг҃ъ вочл҃вѣ́читисѧ и҆зъ тебє̀ бл҃гостїю и҆зво́ли, во спасе́нїе мі́ра и҆ назда́нїе.

Пѣ́снь є҃. І҆рмо́съ:

Оу҆жасо́шасѧ всѧ́чєскаѧ ѡ҆ честнѣ́мъ ᲂу҆спе́нїи твое́мъ: ты́ бо, неискꙋсобра́чнаѧ дв҃о, ѿ землѝ, преста́виласѧ є҆сѝ къ вѣ̑чнымъ ѻ҆би́телемъ, и҆ къ безконе́чнѣй жи́зни, всѣ̑мъ воспѣва́ющымъ тѧ̀ спасе́нїе подава́ющаѧ.

Да возгласѧ́тъ трꙋбы̑ бг҃осло́вѡвъ дне́сь: ѧ҆зы́къ же многовѣща́нный человѣ́ческїй ны́нѣ да восхва́литъ: да ѡ҆гласи́тъ же воздꙋ́хъ, безмѣ́рнымъ сїѧ́ѧ свѣ́томъ: а҆́гг҃ли да пою́тъ пречⷭ҇тыѧ дв҃ы ᲂу҆спе́нїе.

Сосꙋ́дъ подоба́ше и҆збра́нный, пѣ́нїемъ тѝ ве́сь ᲂу҆дивлѧ́емь, дв҃и́це, и҆схо́денъ, ве́сь ѡ҆сщ҃е́нъ бг҃ꙋ, всѣ̑мъ бг҃опрїѧ́тенъ, и҆ се́й и҆́стиннѡ ꙗ҆влѧ́емый, бцⷣе всепѣ́таѧ.

И҆́нъ. І҆рмо́съ:

Просвѣще́нїе во тмѣ̀ лежа́щихъ, спасе́нїе ѿча́ѧнныхъ, хрⷭ҇тѐ сп҃се мо́й, къ тебѣ̀ ᲂу҆́тренюю, цр҃ю̀ ми́ра, просвѣти́ мѧ сїѧ́нїемъ твои́мъ: и҆но́гѡ бо, ра́звѣ тебє̀, бо́га не зна́ю.

Бг҃оза́рнаѧ и҆ свѣтоно́снаѧ твоѧ̀ па́мѧть, ст҃а́гѡ дх҃а си́лою въ ве́сь мі́ръ простира́ема, просвѣще́нїемъ благоче́стїѧ ѡ҆зарѧ́етъ сїю̀ чтꙋ́щыѧ, и҆ до́блєсти твоѧ̑ возвѣща́ющыѧ.

Ю҆́ношски гѡ́рькаѧ томлє́нїѧ претерпѣ́лъ є҆сѝ, ꙗ҆́кѡ безпло́тенъ, до́блїй мꙋ́чениче: ѡ҆дира́емѣ бо ко́жѣ терпѣ́лъ є҆сѝ, ꙗ҆́коже и҆но́мꙋ стра́ждꙋщꙋ, сла́вне, си́лою неви́димою ꙗ҆́вѣ ᲂу҆крѣплѧ́емь.

Мѵ́ро твоѧ̑ и҆ска́паше бѡлѣ́зни, мꙋ́чениче, благово́нно, всѧ́къ смра́дъ ѿгонѧ̀ безбо́жїѧ, хрⷭ҇то́вꙋ же ст҃ꙋ́ю цр҃ковь благово́нствꙋѧ при́снѡ, вѣ́рнѡ тѧ̀ и҃ любо́вїю ꙗ҆́вѣ бл҃жа́щꙋю.

Бг҃оро́диченъ:

Ѡ҆ на́съ и҆зъ тебє̀ воплоще́ннагѡ неизглаго́ланнымъ сло́вомъ, пречи́стаѧ, молѝ, бл҃гослове́ннаѧ, ꙗ҆́кѡ да и҆зба́вимсѧ ви́димыхъ всѣ́хъ и҆ неви́димыхъ вра̑гъ, всенепоро́чнаѧ, тѧ̀ бцⷣꙋ при́снѡ и҆сповѣ́дающїи.

Пѣ́снь ѕ҃. І҆рмо́съ:

Бж҃е́ственное сїѐ и҆ всечестно́е соверша́юще пра́зднество, бг҃омꙋ́дрїи, бг҃ома́тере, прїиди́те, рꙋка́ми воспле́щимъ, ѿ неѧ̀ ро́ждшагосѧ бг҃а сла́вимъ.

И҆зъ тебє̀ жи́знь возсїѧ̀, ключѝ дѣ́вства не рꙋши́вши: ка́кѡ ᲂу҆́бѡ пречи́стое и҆ живонача́льное твоѐ тѣ́ло и҆скꙋше́нїѧ сме́рти бы́сть прича́стно;

Жи́зни бы́вши хра́мъ, жи́знь присносꙋ́щнꙋю ᲂу҆лꙋчи́ла є҆сѝ: сме́ртїю бо къ животꙋ̀ преминꙋ́ла є҆сѝ, ꙗ҆́же жи́знь ро́ждши воѷпоста́снꙋю.

И҆́нъ. І҆рмо́съ:

Ко гдⷭ҇ꙋ ѿ ки́та і҆ѡ́на возопѝ: ты́ мѧ возведѝ и҆зъ глꙋбины̀ а҆́да, молю́сѧ, да ꙗ҆́кѡ и҆зба́вителю во гла́сѣ хвале́нїѧ, и҆́стины же дꙋ́хомъ пожрꙋ̀ тебѣ̀.

Кропле́нїемъ твои́хъ крове́й свѧще́нныхъ, потопи́лъ є҆сѝ де́мѡнскїѧ полкѝ, во́ине до́блїй: и҆ вѣне́цъ носѧ̀, къ бг҃ꙋ восте́клъ є҆сѝ, побѣдоно́сецъ бы́въ и҆зрѧ́денъ.

Ви́дѣвше твоѐ лицѐ просвѣти́вшеесѧ мꙋчи́тели, бж҃е́ственными свѣтлостьмѝ, страстоте́рпче, ᲂу҆диви́шасѧ, не позна́вше же бг҃а, тмꙋ̀ прїѧ́ша, въ вѣ́чнꙋю мꙋ́кꙋ ѿсыла́еми.

Повелѣ́нїемъ сꙋро́вагѡ мꙋчи́телѧ, терпѣ́лъ є҆сѝ ко́жи ѿѧ́тїе, па́че є҆стества̀, достохва́льне, показа́въ є҆́же къ бг҃ꙋ чи́стое твоѐ жела́нїе, и҆ при́сное, всеблаже́нне, воззрѣ́нїе.

Бг҃оро́диченъ:

Зако́ны въ тебѣ̀ ѡ҆бновлѧ́ютсѧ, дв҃о, є҆стества̀: па́че бо є҆стества̀, є҆стество́мъ непостижи́маго, бг҃а є҆мманꙋ́ила пресла́внѡ родила̀ є҆сѝ, въ на́ше вѣ́рныхъ порожде́нїе.

Конда́къ пра́здника гла́съ, в҃:

Въ моли́твахъ неꙋсыпа́ющꙋю бцⷣꙋ, и҆ въ предста́тельствахъ непрело́жное ᲂу҆пова́нїе, гро́бъ и҆ ᲂу҆мерщвле́нїе не ᲂу҆держа́ста: ꙗ҆́коже бо живота̀ мт҃рь, къ животꙋ̀ преста́ви, во ᲂу҆тро́бꙋ всели́выйсѧ приснодѣ́вственнꙋю.

І҆́косъ:

Ѡ҆градѝ моѧ̑ помышлє́нїѧ хрⷭ҇тѐ мо́й, и҆́бо стѣ́нꙋ мі́ра воспѣ́ти дерза́ю, чи́стꙋю мт҃рь твою̀, на столпѣ̀ глагѡ́лъ ᲂу҆крѣпи́ мѧ, и҆ въ тѧ́жкихъ мы́слехъ застꙋпи́ мѧ: ты́ бо взыва́ющымъ, и҆ просѧ́щымъ вѣ́рою, молє́нїѧ и҆сполнѧ́еши. ты̀ мнѣ̀ ᲂу҆́бѡ да́рꙋй ѧ҆зы́къ доброрѣ́чивъ, и҆ по́мыслъ непосты́денъ: всѧ́кое бо даѧ́нїе сїѧ́нїѧ ѿ тебє̀ низпосыла́етсѧ, свѣтопода́телю, во ᲂу҆тро́бꙋ всели́выйсѧ приснодѣ́вственнꙋю.

Пѣ́снь з҃. І҆рмо́съ:

Не послꙋжи́ша тва́ри бг҃омꙋ́дрїи па́че созда́вшагѡ, но ѻ҆́гненное преще́нїе мꙋ́жески попра́вше, ра́довахꙋсѧ пою́ще: препѣ́тый ѻ҆ц҃є́въ гдⷭ҇ь и҆ бг҃ъ, благослове́нъ є҆сѝ.

Ю҆́ношы и҆ дѣ́вы, дв҃ыѧ же и҆ бг҃ома́тере па́мѧть чтꙋ́ще, ста́рцы и҆ мона́си, ца́рїе и҆ сꙋдїи̑ по́йте: ѻ҆тє́цъ на́шихъ гдⷭ҇и и҆ бж҃е, бл҃гослове́нъ є҆сѝ.

Да вострꙋ́бѧтъ трꙋбо́ю дх҃о́вною го́ры нбⷭ҇ныѧ. да ра́дꙋютсѧ хо́лми, и҆ да и҆гра́ютъ бжⷭ҇твеннїи а҆пⷭ҇ли: цр҃и́ца къ сн҃ꙋ преставлѧ́етсѧ, съ ни́мъ ца́рствꙋющи.

Всесвѧще́нное преставле́нїе, бжⷭ҇твенныѧ твоеѧ̀ и҆ нетлѣ́нныѧ мт҃ре, премі́рныѧ вы́шнихъ си́лъ совокꙋпѝ чи́ны, весели́тисѧ съ сꙋ́щими на землѝ тебѣ̀ пою́щими: бж҃е, бл҃гослове́нъ є҆сѝ.

И҆́нъ. І҆рмо́съ:

Ѻ҆́бразꙋ злато́мꙋ, на по́лѣ деи́рѣ слꙋжи́мꙋ, трїѐ твоѝ ѻ҆́троцы небрего́ша безбо́жнагѡ велѣ́нїѧ, посредѣ́ же ѻ҆гнѧ̀ вве́ржени, ѡ҆роша́еми поѧ́хꙋ: бл҃гослове́нъ є҆сѝ, бж҃е ѻ҆ц҃ъ на́шихъ.

Оу҆́мъ тво́й свѣ́тлѡ распалѧ́емь, мꙋ́дре, бжⷭ҇твеннымъ жела́нїемъ ра́довашесѧ и҆ веселѧ́шесѧ посредѝ пла́мене стоѧ́щꙋ тебѣ̀, ꙗ҆́коже трїе́мъ ю҆́ношамъ, съ ни́миже вѣ́рнѡ взыва́лъ є҆сѝ: бл҃гослове́нъ є҆сѝ, бж҃е ѻ҆тє́цъ на́шихъ.

Зрѧ́ще въ пла́мени стоѧ́ща тѧ̀, мꙋ́дре, посредѝ а҆́гг҃лъ, зра́комъ неизглаго́ланнымъ блиста́юща, зри́тели ᲂу҆диви́шасѧ, и҆ къ пѣ́нїю прело́жшесѧ, влⷣцѣ взыва́хꙋ: бл҃гослове́нъ є҆сѝ, бж҃е ѻ҆тє́цъ на́шихъ.

Оу҆мо́мъ чи́стымъ стоѧ̀ со ᲂу҆́мными пое́ши а҆́гг҃лы, посредѝ пе́щи ра́дꙋѧсѧ, преблага́го гдⷭ҇а, ꙗ҆́коже ѡ҆бꙋзда́юща пла́мень, и҆ пою́ща тѧ̀ спаса́юща: бл҃гослове́нъ є҆сѝ, бж҃е ѻ҆тє́цъ на́шихъ.

Бг҃оро́диченъ:

Вмѣсти́лище бж҃їе, и҆ пала́та красна̀, и҆ бжⷭ҇твенный престо́лъ, на не́мже сѣ́де, ᲂу҆гото́ва всѣ̑мъ сѣдѣ́нїе нбⷭ҇ное, ꙗ҆ви́ласѧ є҆сѝ, пречⷭ҇таѧ дв҃о. сегѡ̀ ра́ди взыва́емъ: бл҃гослове́ннаѧ, ꙗ҆́же бг҃а пло́тїю ро́ждшаѧ.

Пѣ́снь и҃. І҆рмо́съ:

Ѻ҆́троки бл҃гочести̑выѧ въ пещѝ ржⷭ҇тво̀ бг҃оро́дичо спасло̀ є҆́сть: тогда̀ ᲂу҆́бѡ ѡ҆бразꙋ́емое, ны́нѣ же дѣ́йствꙋемое, вселе́ннꙋю всю̀ воздвиза́етъ пѣ́ти тебѣ̀: гдⷭ҇а по́йте, дѣла̀, и҆ превозноси́те є҆го̀ во всѧ̑ вѣ́ки.

Па́мѧть твою̀, чⷭ҇таѧ дв҃о, нача̑ла же и҆ вла̑сти и҆ си̑лы, а҆́гг҃ли, а҆рха́гг҃ли, прⷭ҇то́ли, гдⷭ҇ьства, херꙋві́ми сла́вѧтъ, и҆ стра́шнїи серафі́ми: человѣ́ческїй же ро́дъ пое́мъ и҆ превозно́симъ во всѧ̑ вѣ́ки.

И҆́же стра́ннѡ всели́выйсѧ, бцⷣе, въ чи́стое чре́во твоѐ воплоща́емь, се́й всесщ҃е́нный дх҃ъ тво́й прїе́мъ, ᲂу҆ себє̀ ᲂу҆поко́и: ꙗ҆́кѡ должни́къ сн҃ъ. тѣ́мже тѧ̀ пое́мъ, дв҃о, и҆ превозно́симъ во всѧ̑ вѣ́ки.

Ѽ вы́ше ᲂу҆ма̀ чꙋде́съ приснодв҃ы же и҆ бг҃ома́тере! во гро́бъ бо все́льшисѧ, показа̀ ра́й, є҆мꙋ́же предстоѧ́ще дне́сь, ра́дꙋющесѧ пое́мъ: гдⷭ҇а по́йте дѣла̀, и҆ превозноси́те є҆го̀ во всѧ̑ вѣ́ки.

И҆́нъ. І҆рмо́съ:

Въ пещѝ ѻ҆́трочестѣй проѡбрази́лъ є҆сѝ и҆ногда̀ твою̀ мт҃рь, гдⷭ҇и, ѻ҆́бразъ же сїѧ̀ и҆зъ ѻ҆гнѧ̀ и҆з̾има́ше, неѡпа́льнѡ входѧ́щыѧ: ю҆́же пое́мъ ꙗ҆́вльшꙋюсѧ тобо́ю концє́мъ дне́сь, и҆ превозно́симъ во всѧ̑ вѣ́ки.

Непобѣди́ма зрѧ̀ безꙋ́мный мꙋчи́тель, тѧ̀ доблемꙋ́дренне, є҆гда̀ реме́нїе кроѧ́ще да́же до са́мыхъ косте́й, приложѝ ногтьмѝ терза́ти тѧ̀, ꙗ҆́звами нестерпи́мыми ᲂу҆ѧзви́всѧ неисцѣ́льнѡ.

Глаго́лъ бж҃їй съ нб҃сѐ, во ᲂу҆слы́шанїе всегѡ̀ наро́да, мꙋ́чениче, принесе́сѧ тебѣ̀, мѵ́рѡне, ко ѻ҆́нѣмъ тѧ̀ призыва́ющь неизречє́ннымъ поко́ищємъ, сла́вне, и҆ а҆́гг҃льскимъ кра̑снымъ ликостоѧ́нїємъ.

Стоѧ́лъ є҆сѝ ꙗ҆́коже данїи́лъ посредѝ ѕвѣре́й, стыдѧ́щихсѧ блаже́нныѧ стра́сти, и҆ подвигѡ́въ твои́хъ, преблаже́нне, неизче́тнагѡ вели́чества, живы́мъ же гла́сомъ твои́мъ застꙋпа́емыхъ.

Бг҃оро́диченъ:

Оу҆стрѣле́нъ стрѣло́ю врага̀, дꙋ́шꙋ до конца̀ ᲂу҆ѧзви́хъ, и҆ неисцѣ́льнѡ страждꙋ̀: ꙗ҆́же сп҃са хрⷭ҇та̀ неизрече́ннѡ ро́ждши, пренепоро́чнаѧ, и҆сцѣли́ мѧ и҆ спасѝ, ᲂу҆пова́нїе ненаде́ждныхъ.

Пѣ́снь ѳ҃. І҆рмо́съ:

Всѧ́къ земноро́дный да взыгра́етсѧ, дх҃омъ просвѣща́емь, да торжествꙋ́етъ же безпло́тныхъ ᲂу҆мѡ́въ є҆стество̀, почита́ющее сщ҃е́нное преставле́нїе бг҃ома́тере, и҆ да вопїе́тъ: ра́дꙋйсѧ, всеблаже́ннаѧ бцⷣе, чⷭ҇таѧ приснодв҃о.

Прїиди́те въ сїѡ́нъ, на бжⷭ҇твеннꙋю и҆ тꙋ́чнꙋю го́рꙋ жива́гѡ бг҃а, возра́дꙋемсѧ, бцⷣꙋ зрѧ́ще: къ ѕѣлѡ́ бо лꙋ́чшей и҆ бжⷭ҇твеннѣй сѣ́ни, ꙗ҆́кѡ мт҃рь, сїю̀ во ст҃а̑ѧ ст҃ы́хъ хрⷭ҇то́съ преста́ви.

Прїиди́те, вѣ́рнїи, ко гро́бꙋ пристꙋ́пимъ бж҃їѧ мт҃ре, и҆ ѡ҆б̾и́мемъ сердцы̀ и҆ ᲂу҆стна́ми, ѻ҆чесы̀ и҆ лице́мъ чи́стѡ прикаса́ющесѧ, и҆ почерпа́юще и҆сцѣле́нїй незави̑стныѧ да́ры ѿ и҆сто́чника приснотекꙋ́щагѡ.

Прїимѝ ѿ на́съ пѣ́снь и҆схо́днꙋю, мт҃и жива́гѡ бг҃а, и҆ свѣтоно́сною твое́ю и҆ бжⷭ҇твенною ѡ҆сѣнѝ бл҃года́тїю, во́инствꙋ побѣди́тєльнаѧ, хрⷭ҇толю̑бнымъ лю́демъ ми́ръ, ѡ҆ставле́нїе пою́щымъ, и҆ дꙋша́мъ спасе́нїе подаю́щи.

И҆́нъ. І҆рмо́съ:

Ѿ бг҃а бг҃а сло́ва, неизрече́нною мꙋ́дростїю прише́дшаго ѡ҆бнови́ти а҆да́ма, ꙗ҆́дїю въ тлѣ́нїе па́дшаго лю́тѣ, ѿ ст҃ы́ѧ дв҃ы неизрече́ннѡ воплоти́вшагосѧ на́съ ра́ди, вѣ́рнїи є҆диномꙋ́дреннѡ пѣ́сньми велича́емъ.

Да бꙋ́дꙋщꙋю сла́вꙋ и҆ несказа́ннꙋю добро́тꙋ, хрⷭ҇та̀ подвигополо́жника ви́дѣти сподо́бишисѧ до́блественнѣ, прекланѧ́еши вы́ю, и҆ прїе́млеши ме́чное ᲂу҆сѣче́нїе, и҆ ра́дости мꙋ́чєникъ и҆сполнѧ́еши бжⷭ҇твєнныѧ полкѝ.

Ꙗ҆́коже сладкодохнове́нное мѵ́ро, достохва́льне мѵ́рѡне, благово́нствꙋющее сердца̀ вѣ́рныхъ, достохва́льнаѧ па́мѧть твоѧ̀ жела́ющымъ наста̀, въ не́йже торжествꙋ́ющихъ на́съ благово́нїѧ бжⷭ҇твеннагѡ твои́ми моли́твами и҆спо́лни.

Твои́ми а҆ха́їа хва́литсѧ пелена́ми и҆ страда́нїи, до́блїй гдⷭ҇нь страда́льче: мно́жае же кра́ситсѧ кѵ́зїкъ, многострада́льное тѣ́ло держа̀, ꙗ҆́кѡ бога́тство и҆́стинное, и҆ и҆сто́чникъ и҆сцѣле́нїй, и҆ недꙋ́гѡвъ ѡ҆чисти́лище.

Ст҃ы́хъ всѣ́хъ, и҆збра́нный въ вы́шнихъ, ма́ти градѡ́въ сїѡ́нъ мы́сленный, пе́рвенецъ, ꙗ҆́коже пи́шетъ, кра́снаѧ цр҃ковь, ꙗ҆́кѡ мꙋ́ченика ѡ҆ на́съ молѧ́щасѧ, тѧ̀ и҆́мать мꙋ́ченикѡвъ ве́рхъ.

Бг҃оро́диченъ:

Гла́съ вопїе́мъ тѝ всѝ а҆́гг҃ловъ, дв҃о, пала́то, и҆ престо́ле бж҃їй, ра́дꙋйсѧ, є҆́юже сподо́бихомсѧ нбⷭ҇нагѡ ца́рствїѧ, дре́вле ѿринове́ннїи тлѣ́нїемъ, и҆ добро́тꙋ пе́рвꙋю несмы́сленнѡ погꙋби́вшїи.

Свѣти́ленъ пра́здника. Подо́бенъ: Оу҆ченикѡ́мъ зрѧ́щымъ:

Ѿ землѝ на нб҃са̀ преста́вльшисѧ, твоегѡ̀ наслѣ́дїѧ, чⷭ҇таѧ, не ѡ҆ста́ви: ро́ди хрⷭ҇тїа́нстїи ᲂу҆твердѝ, ꙗ҆зы́ки ᲂу҆кротѝ, и҆ проле́й ми́ръ въ концы̀ мі́ра.

Сла́ва, и҆ ны́нѣ, то́йже.

На стїхо́внѣ стїхи́ра, гла́съ ѕ҃. Подо́бенъ: Тридне́венъ:

Глаго́лѡмъ бжⷭ҇твеннагѡ гаврїи́ла послѣ́дꙋюще, ꙳ ра́дꙋйсѧ, тебѣ̀ зове́мъ, чⷭ҇таѧ. ꙳ ты̀ ᲂу҆́бѡ прест҃а́ѧ и҆ мт҃и гдⷭ҇нѧ, ꙳ къ семꙋ̀ преста́вльшисѧ, ꙳ помина́й ѡ҆ воспѣва́ющихъ тѧ̀.

Сті́хъ: Воскрⷭ҇нѝ, гдⷭ҇и, въ поко́й тво́й, ты̀, и҆ кївѡ́тъ ст҃ы́ни твоеѧ̀.

Неизмѣ́рнаѧ премꙋ́дрость бж҃їѧ, ꙳ хра́мъ себѣ̀ па́че ᲂу҆ма̀, бцⷣе, созда̀ ꙳ и҆зъ тебє̀ дх҃омъ ст҃ы́мъ: ꙳ и҆ ны́нѣ тѧ̀ къ невеще́ствєннымъ селе́нїємъ ꙳ преста́ви, всепѣ́таѧ.

Сті́хъ: Клѧ́тсѧ гдⷭ҇ь дв҃дꙋ и҆́стиною, и҆ не ѿве́ржетсѧ є҆ѧ̀.

Ра́бъ ны́нѣ прихождꙋ̀ къ тебѣ̀ мт҃ри всѣ́хъ бг҃а, ѿ всѧ́ческихъ и҆зба́витисѧ напа́стей молѧ́сѧ. но, ѽ бг҃ороди́тельнице, црⷭ҇твꙋющи съ сн҃омъ твои́мъ, хрⷭ҇тїа́нскїй ро́дъ сохранѧ́й.

Сла́ва, и҆ ны́нѣ, гла́съ г҃:

Прїиди́те, всѝ концы̀ земні́и, честно́е преставле́нїе бг҃ома́тере восхва́лимъ: въ рꙋ́цѣ бо сн҃а дꙋ́шꙋ непоро́чнꙋю положѝ. тѣ́мже ст҃ы́мъ ᲂу҆спе́нїемъ є҆ѧ̀ мі́ръ ѡ҆животвори́сѧ: во ѱалмѣ́хъ и҆ пѣ́нїихъ и҆ пѣ́снехъ дꙋхо́вныхъ, со безпло́тными и҆ а҆пⷭ҇лы пра́зднꙋетъ свѣ́тлѡ.

На лїтꙋргі́и блажє́нна пра́здника, пѣ́снь г҃, ѻ҆бою̀ канѡ́нѡвъ, со і҆рмосо́мъ на ѕ҃.