Въ а҃-й де́нь. Происхожде́нїе честны́хъ дре́въ, честна́гѡ и҆ животворѧ́щагѡ крⷭ҇та̀:

И҆ па́мѧть ст҃ы́хъ седмѝ мꙋ́чєникъ маккавє́й:

И҆ ма́тере и҆́хъ соломѡні́и и҆ ᲂу҆чи́телѧ и҆́хъ є҆леаза́ра.

Ве́черъ, ѻ҆бы́чнаѧ каѳі́сма.

На Гдⷭ҇и, воззва́хъ, стїхи̑ры на ѕ҃. Крⷭ҇та̀ г҃, гла́съ д҃.

Подо́бенъ: Зва́нный свы́ше:

Дне́сь ра́дꙋетсѧ вѣ́рныхъ мно́жество бжⷭ҇твенное: ꙳ ꙗ҆влѧ́етсѧ бо нбⷭ҇ный крⷭ҇тъ концє́мъ, ꙳ ѡ҆сїѧва́етъ тве́рдь свѣ́томъ непристꙋ́пнымъ, ꙳ воздꙋ́хъ ѡ҆зарѧ́етъ, ꙳ и҆ землѝ лицѐ ᲂу҆краша́етъ. ꙳ пое́тъ бжⷭ҇твенными пѣ́сньми цр҃ковь хрⷭ҇то́ва, ꙳ слꙋ́житъ почита́ющи, ꙳ свы́ше ю҆̀ соблюда́ющїй ꙳ крⷭ҇тъ бжⷭ҇твенный и҆ пречꙋ́дный. ꙳ є҆гѡ́же си́лою ᲂу҆крѣплѧ́еми, ꙳ влⷣцѣ пристꙋ́пимъ зовꙋ́ще: ꙳ ᲂу҆мирѝ мі́ръ, и҆ просвѣтѝ дꙋ́шы на́шѧ.

Да ра́дꙋетсѧ тва́рь и҆ и҆гра́етъ: ꙳ дне́сь бо ѡ҆блиста̀ крⷭ҇тъ въ концѣ́хъ съ нб҃сѐ, ꙳ земна̑ѧ просвѣща́ѧ, ꙳ и҆ совокꙋ́плены показа̀ расточє́ныѧ. ꙳ дне́сь ликꙋ́ютъ съ ли́ки а҆́гг҃льскими человѣ́цы, ꙳ и҆́бо бранѧ́щее средогра́дїе ꙳ крⷭ҇то́мъ разоре́но, ꙳ во є҆ди́но всѧ̑ ꙗ҆́вѣ совокꙋпѝ. ꙳ тѣ́мъ предсїѧ́ѧ па́че со́лнца, ꙳ всю̀ тва́рь просвѣща́етъ благода́тїю, ꙳ и҆ ᲂу҆ѧснѧ́етъ и҆ спаса́етъ ꙳ вѣ́рнѡ того̀ чтꙋ́щыѧ.

Па́че со́лнечныѧ зарѝ, ꙳ хотѧ́й мі́рови ꙗ҆́коже скѵ́птръ честны́й, ꙳ цр҃ѧ̀ хрⷭ҇та̀, ꙳ и҆ кончи́нꙋ показа́ти, ꙳ кре́стъ бжⷭ҇твенный сѐ предсїѧ́етъ ꙗ҆́снѡ въ концѣ́хъ. ꙳ се́й возведѐ и҆зъ а҆́да ро́дъ человѣ́чь, ꙳ а҆́да вельмѝ плѣни́въ, ꙳ врага̀ низложи́въ, ꙳ де́мѡнѡвъ горды́ню до конца̀ погꙋбѝ. ꙳ ны́нѣ же проѧвлѧ́етъ воскресе́нїе сп҃сово, ꙳ и҆ спаса́етъ зовꙋ́щыѧ, ꙳ ᲂу҆мирѝ мі́ръ, и҆ просвѣтѝ дꙋ́шы на́шѧ.

И҆ ст҃ы́хъ г҃, гла́съ а҃. Подо́бенъ: Всехва́льнїи мꙋ́чєницы:

Зако́на ве́рхъ, седмїю̀ столпы̑ возвы́шенъ, ꙳ мꙋчи́тельство не поколеба̀: ꙳ и҆́бо ско́тскїй ꙳ гони́телѧ гнѣ́въ ꙳ мꙋ́жески претерпѣ́ша, ꙳ тѣ́ло преда́вше сѣкꙋ́щымъ, ꙳ благоро́днїи ю҆́ношы и҆ бра́тїѧ, ꙳ мѡѷсе́йскимъ преда́нїємъ храни́телїе.

Па́че зри́мыхъ ꙳ ᲂу҆́мъ вои́стиннꙋ возвы́сивше, ꙳ ᲂу҆́ды плѡтскі́ѧ ѿсѣца́хꙋ, ꙳ благочести́вїи и҆ до́блїи ѻ҆́троцы, ꙳ съ ма́терїю бг҃омꙋ́дрою, ꙳ вели́кими наде́ждами вжилѧ́еми, ꙳ ꙗ҆̀же ны́нѣ полꙋчи́ша, ꙳ ᲂу҆ а҆враа́ма почи́вше на ло́нѣхъ пра́ѻтца своегѡ̀.

Дꙋше́вною до́блестїю ꙳ тве́рдѡ себѐ воѡрꙋжи́вше, ꙳ и҆ ꙗ҆́рость ꙗ҆́кѡ преѡби́дѣвше, ꙳ проти́вꙋ борцꙋ̀ крѣ́пкѡ прилѣжа́хꙋ ꙳ благоче́стїѧ ра́ди, ꙳ и҆ зако́на ѻ҆те́ческагѡ хране́нїемъ, ꙳ свѧще́ннѣйшїй є҆леаза́ръ, и҆ премꙋ́дрїи ю҆́ношы, ꙳ съ ма́терїю бг҃омꙋ́дрою.

Сла́ва, гла́съ и҃. І҆ѡа́нна мона́ха:

Ст҃і́и маккаве́и мꙋчи́телю глаго́лахꙋ: на́мъ, ѽ а҆нтїо́ше є҆ди́нъ цр҃ь бг҃ъ, ѿ негѡ́же бы́хомъ, и҆ къ немꙋ̀ ѡ҆браща́емсѧ: мі́ръ жде́тъ и҆́нъ на́съ, ви́димагѡ высоча́йшїй и҆ твердѣ́йшїй: ѻ҆те́чество же на́мъ і҆ерⷭ҇ли́мъ крѣ́пкїй и҆ неги́бнꙋщїй: торжество́ же, є҆́же со а҆́гг҃лы житїѐ. гдⷭ҇и, моли́твами и҆́хъ поми́лꙋй, и҆ спасѝ на́съ.

И҆ ны́нѣ, гла́съ то́йже. І҆ѡа́нна мона́ха:

Є҆го́же дре́вле мѡѷсе́й проѡбразова́въ собо́ю, а҆мали́ка низложи́въ побѣдѝ: и҆ дв҃дъ пѣснопѣ́вецъ, подно́жїю твоемꙋ̀, вопїѧ̀, кла́нѧтисѧ повелѣва́ше, честно́мꙋ крⷭ҇тꙋ̀ твоемꙋ̀, хрⷭ҇тѐ бж҃е, дне́сь грѣ́шнїи кла́нѧемсѧ, ᲂу҆стна́ми недосто́йными, тѧ̀ и҆зво́лившаго пригвозди́тисѧ на не́мъ, воспѣва́юще мо́лимсѧ: гдⷭ҇и, съ разбо́йникомъ црⷭ҇твїѧ твоегѡ̀ сподо́би на́съ.

На стїхо́внѣ ѻ҆ктѡ́иха. Сла́ва, гла́съ и҃. Космы̀ мона́ха:

Дꙋ́шы пра́ведныхъ въ рꙋцѣ̀ гдⷭ҇ни, ꙗ҆́коже а҆враа́ма и҆ і҆саа́ка и҆ і҆а́кѡва, и҆̀же пре́жде зако́на пра́ѻтцы, и҆ маккаве́ѡвъ пра́дѣди, ны́нѣ восхвалѧ́емыхъ ѿ на́съ: сі́и бо крѣпкодꙋ́шнїи а҆враа́мстїи внꙋ́цы сꙋ́ще, вѣ́рѣ поревнова́вше своегѡ̀ пра́ѻтца а҆враа́ма, и҆ да́же до сме́рти подвиза́шасѧ за благоче́стїе. благоче́стнѡ бо воспита́вшесѧ, и҆ зако́ннѡ пострада́вше, нече́стїе ѡ҆бличи́ша го́рдагѡ а҆нтїо́ха: и҆ ничто́же предпоче́тше вре́менныѧ жи́зни вѣ́чныѧ ра́ди, всѧ̑ бг҃ꙋ возложи́ша: дꙋ́шꙋ, мꙋ́жество, ра́зꙋмъ, тѣ́ло мѧ́гкое, и҆ воздаѧ̑нїѧ чистоты̀ воспита́нїемъ. ѽ ко́рене благочести́ва, и҆зъ негѡ́же вы̀ прозѧбо́сте, маккаве́и! ѽ ма́тере ст҃ы́ѧ, ро́ждшїѧ равночи́сленное седмери́цы число̀! но мо́лимъ ва́съ, маккаве́и, съ ма́терїю ва́шею соломѡні́ею, и҆ мꙋ́дрымъ свѧще́нникомъ є҆леаза́ромъ, є҆гда̀ предстоитѐ хрⷭ҇тꙋ̀ бг҃ꙋ, є҆гѡ́же ра́ди потрꙋди́стесѧ, трꙋды̀ плодѡ́въ ва́шихъ прїѧ́ти ѿ негѡ̀, прилѣ́жнꙋ мольбꙋ̀ сотвори́те ѡ҆ человѣ́чествѣ: твори́тъ бо, є҆ли́кѡ хо́щетъ, и҆ и҆спо́лнитъ хотѣ̑нїѧ ва̑ша боѧ́щихсѧ є҆гѡ̀.

И҆ ны́нѣ, гла́съ то́йже:

Гла́съ прⷪ҇ро́ка твоегѡ̀ мѡѷсе́а, бж҃е, и҆спо́лнисѧ, глаго́лѧй: ᲂу҆́зрите живо́тъ ва́шъ, ви́сѧщъ предъ ѻ҆чесы̀ ва́шими. дне́сь крⷭ҇тъ воздвиза́етсѧ, и҆ мі́ръ ѿ ле́сти свобожда́етсѧ: дне́сь хрⷭ҇то́во воскрⷭ҇нїе ѡ҆бновлѧ́етсѧ, и҆ концы̀ землѝ ра́дꙋютсѧ, въ кѷмва́лѣхъ дв҃дски пѣ́снь тебѣ̀ приносѧ́ще и҆ глаго́люще: содѣ́лалъ є҆сѝ спасе́нїе посредѣ̀ землѝ, бж҃е, крⷭ҇тъ и҆ воскресе́нїе: и҆́хже ра́ди на́съ спа́слъ є҆сѝ, бл҃же и҆ чл҃вѣколю́бче, всеси́льне гдⷭ҇и, сла́ва тебѣ̀.

Тропа́рь, гла́съ а҃:

Болѣ́зньми ст҃ы́хъ, и҆́миже ѡ҆ тебѣ̀ пострада́ша, ᲂу҆моле́нъ бꙋ́ди, гдⷭ҇и, и҆ всѧ̑ на́шѧ болѣ̑зни и҆сцѣлѝ, чл҃вѣколю́бче, мо́лимсѧ.

Сла́ва, и҆ ны́нѣ, гла́съ то́йже:

Спасѝ, гдⷭ҇и, лю́ди твоѧ̑, и҆ благословѝ достоѧ́нїе твоѐ, побѣ̑ды на сопроти̑вныѧ да́рꙋѧ, и҆ твоѐ сохранѧ́ѧ крⷭ҇то́мъ твои́мъ жи́тельство.

И҆звѣ́стно же да быва́етъ: ꙗ҆́кѡ пре́жде клепа́нїѧ вхо́дитъ і҆ере́й въ сосꙋдохрани́тельницꙋ, и҆ полага́етъ честны́й крⷭ҇тъ на же́ртвенницѣ. И҆ по ѿпꙋще́нїи вече́рни, і҆ере́й и҆ дїа́конъ ѡ҆блекꙋ́тсѧ въ ри̑зы. И҆ дїа́конъ покади́тъ честны́й крⷭ҇тъ, и҆ рече́тъ: Благословѝ, влады́ко. І҆ере́й: Бл҃гослове́нъ бг҃ъ на́шъ: Та́же: Трист҃о́е: По Ѻ҆́ч҃е на́шъ: тропа́рь крⷭ҇та̀: Сла́ва, и҆ ны́нѣ, конда́къ. И҆ взима́етъ і҆ере́й крⷭ҇тъ съ блю́домъ на главꙋ̀, и҆ вно́ситъ во ѻ҆лта́рь. пред̾и́дꙋтъ предъ ни́мъ со двѣма̀ лампа́дами. И҆ полага́етъ крⷭ҇тъ на трапе́зѣ, на є҆ѵⷢ҇льскомъ мѣ́стѣ: а҆ є҆ѵⷢ҇лїе на го́рнее мѣ́сто. И҆ возжгꙋ́тъ предъ ни́мъ свѣщꙋ̀ на всю̀ но́щь.

На ᲂу҆́трени, на Бг҃ъ гдⷭ҇ь:

Тропа́рь крⷭ҇та̀, два́жды. Сла́ва, мꙋ́ченикѡвъ: И҆ ны́нѣ, крⷭ҇та̀. И҆ ѻ҆бы̑чныѧ каѳі̑смы, и҆ сѣда́льны ѻ҆ктѡ́иха. И҆ чте́нїе. Канѡ́нъ ѻ҆ктѡ́иха є҆ди́нъ, на д҃: и҆ крⷭ҇та̀ на ѕ҃, гла́съ ѕ҃: и҆ мꙋ́ченикѡвъ на д҃, гла́съ и҃. А҆́ще ли слꙋчи́тсѧ пра́здникъ се́й въ сꙋббѡ́тꙋ: и҆ а҆́ще хра́мъ хрⷭ҇то́въ, и҆лѝ бцⷣы: и҆ пое́мъ канѡ́нъ хра́ма со і҆рмосо́мъ на д҃: и҆ крⷭ҇та̀ на ѕ҃: и҆ ст҃ы́хъ на д҃. Катава́сїа, Крⷭ҇тъ начерта́въ: Канѡ́нъ крⷭ҇та̀, є҆гѡ́же краегране́сїе: Крⷭ҇тꙋ̀ покланѧ́юсѧ, вѣ́рныхъ спасе́нїю.

Гла́съ ѕ҃. Пѣ́снь а҃. І҆рмо́съ:

Ꙗ҆́кѡ по сꙋ́хꙋ пѣшеше́ствовавъ і҆и҃ль по бе́зднѣ стопа́ми, гони́телѧ фараѡ́на ви́дѧ потоплѧ́ема, бг҃ꙋ побѣ́днꙋю пѣ́снь пои́мъ, вопїѧ́ше.

Крⷭ҇тꙋ̀ вѣ́рныхъ спасе́нїю покланѧ́юсѧ, и҆ те́плѣ ѡ҆блобыза́ю, и҆ ѡ҆б̾е́млѧ вопїю̀: дре́во всеблаже́нное хрⷭ҇то́во, дꙋ́шꙋ мою̀ и҆ ᲂу҆́мъ просвѣтѝ, молю́сѧ.

Побѣдоно́сно ꙗ҆ви́сѧ на стра̑сти и҆ бѣ́сы, дне́сь зна́менїе крⷭ҇та̀. тѣ́мже вѣ́рнїи всѝ свѣ́тлѡ просвѣ́щше дꙋ́шы, ны́нѣ ѡ҆блобыза́емъ.

Лꙋчеза̑рнаѧ ѡ҆блиста́етъ сїѧ̑нїѧ крⷭ҇тъ честны́й, и҆ просвѣща́етъ вѣ́рнѡ покланѧ́ющыѧсѧ є҆мꙋ̀ дне́сь, ѡ҆свѧща́ѧ дꙋ́шы на́шѧ и҆ тѣлеса̀.

Жизнода́тельный крⷭ҇тъ предлежа́щъ, и҆ зри́мь, свѣтови́днꙋю зарю̀ препосыла́етъ благода́тей: пристꙋ́пимъ и҆ прїи́мемъ просвѣще́нїе, весе́лїе, и҆ спасе́нїе, и҆ ѡ҆ставле́нїе, хвале́нїе гдⷭ҇еви приносѧ́ще.

Бг҃оро́диченъ:

Прест҃а́ѧ дв҃о, ꙗ҆́же хрⷭ҇та̀ пло́тїю ро́ждши, пострада́вшаго на́съ ра́ди во́лею на крⷭ҇тѣ̀, тѧ̀ блажа́щыѧ че́стнѡ, спаса́й мольба́ми твои́ми.

И҆́нъ канѡ́нъ мꙋ́ченикѡвъ, на д҃.

Гла́съ и҃. Пѣ́снь а҃. І҆рмо́съ:

Во́дꙋ проше́дъ ꙗ҆́кѡ сꙋ́шꙋ, и҆ є҆гѵ́петскагѡ ѕла̀ и҆збѣжа́въ, і҆и҃льтѧнинъ вопїѧ́ше: и҆зба́вителю и҆ бг҃ꙋ на́шемꙋ пои́мъ.

Ли́къ седмочи́сленныхъ страда́лєцъ ꙗ҆́вльсѧ, є҆ди́нымъ (с.10) нра́вомъ въ лю́тыхъ, по ᲂу҆твержде́нїю ѻ҆те́ческагѡ зако́на, ᲂу҆мре́ти не ѿреко́шасѧ.

Сла́вꙋ презрѣ́вше, ꙗ҆́же на землѝ, жела́нїемъ бжⷭ҇твеннагѡ црⷭ҇твїѧ, всѧ́кꙋ болѣ́знь претерпѣ́ша бжⷭ҇твеннїи маккаве́и: тѣ́мже досто́йнѡ ны́нѣ чтꙋ́тсѧ.

Зако́на храни́телїе мѡѷсе́ева, вои́стиннꙋ до́блїи маккаве́и, бра́тїѧ дрꙋ́гъ со дрꙋ́гомъ ꙗ҆ви́шасѧ, внегда̀ попра́ти и҆̀мъ а҆нтїо́хово безбо́жїе.

Бг҃оро́диченъ:

Чи́ни тѧ̀ а҆́гг҃лъ и҆ человѣ̑къ, безневѣ́стнаѧ мт҃и, восхвалѧ́ютъ непреста́ннѡ: зижди́телѧ бо всѣ́хъ, ꙗ҆́кѡ младе́нца на рꙋкꙋ̀ твоє́ю понесла̀ є҆сѝ.

Катава́сїа: Крⷭ҇тъ начерта́въ мѡѷсе́й впрѧ́мѡ жезло́мъ чермно́е пресѣчѐ, і҆и҃лю пѣшоходѧ́щꙋ, то́же ѡ҆бра́тнѡ фараѡ́новымъ колесни́цамъ ᲂу҆да́ривъ совокꙋпѝ, вопрекѝ написа́въ непобѣди́мое ѻ҆рꙋ́жїе. тѣ́мъ хрⷭ҇тꙋ̀ пои́мъ бг҃ꙋ на́шемꙋ, ꙗ҆́кѡ просла́висѧ.

Пѣ́снь г҃. І҆рмо́съ:

Нѣ́сть свѧ́тъ, ꙗ҆́коже ты̀, гдⷭ҇и бж҃е мо́й, вознесы́й ро́гъ вѣ́рныхъ твои́хъ, бл҃же, и҆ ᲂу҆тверди́вый на́съ на ка́мени и҆сповѣ́данїѧ твоегѡ̀.

Ѻ҆рꙋ́жїе дре́вле жи́зни, блаже́нное дре́во дарова́сѧ храни́ти, за преслꙋша́нїе первозда́ннаго а҆да́ма: крⷭ҇тъ же семꙋ̀ пꙋ́ть сотворѝ.

Ѻ҆чи́ма, ᲂу҆стна́ми и҆ дꙋша́ми, ли́цы и҆ сердцы̀, поклони́мсѧ всѝ прест҃о́мꙋ крⷭ҇тꙋ̀ жизнода́вца хрⷭ҇та̀, и҆́мже мі́ръ ве́сь ѡ҆свѧща́етсѧ.

Хра́мы бг҃ꙋ прⷪ҇ро́чески дне́сь бы́вше, покланѧ́ющесѧ дре́вꙋ прест҃а́гѡ крⷭ҇та̀, и҆ наслѣ̑дницы є҆гѡ̀ со стра́хомъ всѝ цѣлꙋ́емъ.

Пѣсносло́вимъ тѧ̀, крⷭ҇те, и҆ вѣ́рою молѧ́щїисѧ си́лѣ твое́й: и҆змѝ на́съ сѣте́й вра́жїихъ, и҆ ᲂу҆пра́ви на́съ къ приста́нищꙋ всѣ́хъ спасе́нїѧ, пою́щихъ тѧ̀. (с. 11)

Бг҃оро́диченъ:

Дв҃ою родила̀ є҆сѝ сн҃а, пре́жде тебє̀ рожде́ннаго ѿ ѻ҆ц҃а̀ пре́жде вѣ̑къ, безъ мт҃ре ѿ бг҃а, распѧ́таго пло́тїю, да спасе́тъ пре́жде согрѣ́шшыѧ.

И҆́нъ. І҆рмо́съ:

Нбⷭ҇нагѡ крꙋ́га верхотво́рче, гдⷭ҇и, и҆ цр҃кве зижди́телю, ты̀ менѐ ᲂу҆твердѝ въ любвѝ твое́й, жела́нїй кра́ю, вѣ́рныхъ ᲂу҆твержде́нїе, є҆ди́не чл҃вѣколю́бче.

По ѻ҆те́ческимъ ходѧ́ще и҆справле́нїємъ закѡ́ннымъ, блаже́ннїи хрⷭ҇то́вы страда́льцы, жи́знь нестарѣ́емꙋю, ва́шими стѧжа́сте кровьмѝ, прехва́льнїи.

Ни ѻ҆́гнь, ни ме́чь преврати́ти когда̀ возмо́же, до́блесть нра́ва, блаже́ннїи, ва́шꙋ, ꙗ҆́же въ вѣ́рѣ: въ не́йже ᲂу҆праздни́сте мꙋчи́телей шата̑нїѧ.

Мꙋ̑ки претерпѣ́ша за хрⷭ҇та̀ бг҃а, прехва́льнїи мꙋ́чєницы, и҆ свы́ше прїѧ́ша побѣ́ды по́чєсти, непреста́ннѡ молѧ́щесѧ, спастѝ дꙋ́шы на́шѧ.

Бг҃оро́диченъ:

Дв҃ою родила̀ є҆сѝ неискꙋсобра́чнаѧ, и҆ дв҃ою пребыла̀ є҆сѝ, мт҃и безневѣ́стнаѧ, бцⷣе марі́е, хрⷭ҇та̀ бг҃а на́шего молѝ, спасти́сѧ на́мъ.

Катава́сїа:

Же́злъ во ѻ҆́бразъ та́йны прїе́млетсѧ, прозѧбе́нїемъ бо предразсꙋжда́етъ свѧще́нника: неплодѧ́щей же пре́жде цр҃кви, ны́нѣ процвѣтѐ дре́во крⷭ҇та̀, въ держа́вꙋ и҆ ᲂу҆твержде́нїе.

Конда́къ ст҃ы́хъ, гла́съ в҃. Подо́бенъ: Вы́шнихъ и҆щѧ̀:

Премꙋ́дрости бж҃їѧ столпѝ седмочи́сленнїи, и҆ бжⷭ҇твеннагѡ свѣ́та свѣти̑льницы седмосвѣ́щнїи, маккаве́и всемꙋ́дрїи, пре́жде мꙋ́ченикѡвъ преве́лїи мꙋ́чєницы: съ ни́миже всѣ́хъ бг҃ꙋ моли́тесѧ, спасти́сѧ почита́ющымъ ва́съ.

І҆́косъ:

Хвалѝ те́плѣ, сїѡ́не, бг҃а твоего̀, ꙗ҆́кѡ ᲂу҆крѣпи́лъ є҆́сть се́й верєѝ вра́тъ твои́хъ, и҆ сы́ны твоѧ̀ благословѝ: сі́и бо, ꙗ҆́кѡ во́инство непобѣди́мое, ѡ҆полче́нїе вои́стиннꙋ до́блественно и҆ крѣпкомꙋ́дренно, проти́вꙋ кова́рствѡмъ ѕлочести́выхъ бг҃омꙋ́дреннѡ ста́ша, вкꙋ́пѣ побѣ́ды вѣнцы̀ нбⷭ҇нагѡ сїѡ́на прїе́млютъ, и҆ бжⷭ҇твенномꙋ престо́лꙋ предстоѧ́тъ, ѡ҆ всѣ́хъ непреста́ннѡ молѧ́щесѧ. проси́те спасти́сѧ пою́щымъ ва́съ.

Сѣда́ленъ, ст҃ы́хъ, гла́съ и҃. Подо́бенъ: Премꙋ́дрости:

Благоче́стнѡ наказа́вшесѧ, ѻ҆́троцы мꙋ́дрїи, мꙋ́ченически мꙋчи́телей прещє́нїѧ мꙋ́жески посрами́сте: ꙗ҆́кѡ зако́на побѡ́рницы, и҆ ѻ҆тцꙋ̀ послꙋ́шницы бы́сте, ст҃і́и, съ ма́терїю бг҃омꙋ́дрою ᲂу҆се́рднѡ пострада́сте. тѣ́мже и҆ сме́ртїю живо́тъ и҆скꙋ́пльше вои́стиннꙋ нбⷭ҇ный, вѣ́чнѡ ра́дꙋетесѧ маккаве́и крѣпкодꙋ́шнїи: моли́те хрⷭ҇та̀ бг҃а, согрѣше́нїй ѡ҆ставле́нїе дарова́ти, чтꙋ́щымъ любо́вїю свѧтꙋ́ю па́мѧть ва́шꙋ.

Сла́ва, и҆ ны́нѣ, крⷭ҇та̀, гла́съ ѕ҃:

Крⷭ҇тъ тво́й, гдⷭ҇и, ѡ҆свѧти́сѧ, въ не́мъ бо быва́ютъ и҆сцѣлє́нїѧ немѡщны́мъ во грѣсѣ́хъ: є҆гѡ́же ра́ди припа́даемъ тѝ, поми́лꙋй на́съ.

Пѣ́снь д҃. І҆рмо́съ:

Хрⷭ҇то́съ, моѧ̀ си́ла, бг҃ъ и҆ гдⷭ҇ь, честна́ѧ цр҃ковь бг҃олѣ́пнѡ пое́тъ, взыва́ющи ѿ смы́сла чи́ста, ѡ҆ гдⷭ҇ѣ пра́зднꙋющи.

Да кропи́тъ всѧ̀ землѧ̀ ра́дованїе, да веселѧ́тсѧ древа̀ дꙋбра̑внаѧ, дне́сь ѡ҆божє́на всечестны́мъ крⷭ҇то́мъ, сїѧ́ющи концє́мъ.

Показа́вый ѻ҆рга́нъ ᲂу҆мерщвле́нїѧ, живоно́сно мі́рови, побѣдотво́рное ѻ҆рꙋ́жїе непобѣди́мое, пресла́вный крⷭ҇те, сердца̀ на̑ша просвѣтѝ.

Ты̀ бжⷭ҇твеннаѧ побѣ́да, ты̀ содѣ́лованїе на́шегѡ спасе́нїѧ, ты̀ вѣ̑рнымъ соѡдолѣ́нїе, и҆ бжⷭ҇твеннаѧ же́ртва, ѽ всечⷭ҇тны́й крⷭ҇те! пою́щыѧ тѧ̀ ѡ҆свѧтѝ.

Нб҃о все́й землѝ свесели́тсѧ, страстоте́рпцы, (с. 13) мꙋ́чєницы, а҆пⷭ҇ли, дꙋ́шы пра́ведныхъ ра́достнѡ ны́нѣ ра́дꙋютсѧ: и҆ всѧ̑ спаса́етъ зри́мѡ предлежа́щее посредѣ̀ жизнода́тельное дре́во и҆ вѣ̑рныѧ ѡ҆свѧща́етъ благода́тїю.

Бг҃оро́диченъ:

Вои́стиннꙋ ты̀ ꙗ҆ви́ласѧ є҆сѝ: вои́стиннꙋ родила̀ є҆сѝ сн҃а вы́шнѧго, на крⷭ҇тѣ̀ рꙋ́цѣ просте́ршаго, дв҃о мт҃и марі́е, и҆ мі́ръ призва́вшаго.

И҆́нъ. І҆рмо́съ:

И҆зъ горы̀ приѡсѣне́нныѧ, сло́ве, прⷪ҇ро́къ, є҆ди́ныѧ бцⷣы, хотѧ́ща воплоти́тисѧ, бг҃ови́днѡ ᲂу҆смотрѝ, и҆ со стра́хомъ славосло́вѧше си́лꙋ твою̀.

Зако́нъ бл҃же́ннїи написа́вше, ꙗ҆́коже дре́вле мѡѷсе́й во свои́хъ скрижа́лѣхъ по́мысла: не престꙋпи́сте сегѡ̀ да́же до сме́рти, но тве́рдѡ подвиза́стесѧ.

Закѡ́нныѧ бг҃ꙋ приносѧ́ще жє́ртвы, и҆ мѡѷсе́йскомꙋ ревнꙋ́юще житїю̀, преѡби́дѣша всѧ́ко законоположе́нїе мꙋчи́тельское, страстоте́рпцы хрⷭ҇то́вы.

Ꙗ҆́коже ка́мень во́лненное стоѧ́нїе, си́це мно́ги мꙋ̑ки, страда́льцы, мꙋ́жескимъ ᲂу҆мо́мъ, маккаве́и, да́же до сме́рти претерпѣ́сте.

Трⷪ҇ченъ:

Безнача́льнаѧ трⷪ҇це, є҆ди́нице покланѧ́емаѧ, сопресто́льнаѧ є҆ди́нице, трⷪ҇це воспѣва́емаѧ, мꙋ́чєникъ мольба́ми и҆зба́ви на́съ ѿ бѣ́дъ и҆ напа́стей, воспѣва́ющихъ тѧ̀.

Бг҃оро́диченъ:

Ра́дꙋйсѧ, ѿ на́съ, ст҃а́ѧ бцⷣе: ра́дꙋйсѧ, ра́дость ро́ждшаѧ мі́рови: ра́дꙋйсѧ, є҆ди́на застꙋпле́нїе человѣ́кѡмъ, бл҃гослове́ннаѧ бцⷣе чⷭ҇таѧ.

Катава́сїа:

Оу҆слы́шахъ, гдⷭ҇и, смотре́нїѧ твоегѡ̀ та́инство, разꙋмѣ́хъ дѣла̀ твоѧ̑, и҆ просла́вихъ твоѐ бж҃ество̀.

Пѣ́снь є҃. І҆рмо́съ:

Бж҃їимъ свѣ́томъ твои́мъ, бл҃же, ᲂу҆́тренюющихъ тѝ дꙋ́шы любо́вїю ѡ҆зарѝ, молю́сѧ, тѧ̀ вѣ́дѣти, сло́ве бж҃їй, и҆́стиннаго бг҃а, ѿ мра́ка грѣхо́внагѡ взыва́юща.

Под̾и́мемъ съ ра́достїю преблаже́нный крⷭ҇тъ, въ цр҃квахъ и҆ градѣ́хъ се́й предложе́нный, и҆ поклони́мсѧ, да долгѡ́въ прїи́мемъ ѡ҆ставле́нїе.

Оу҆мерщвлѧ́етсѧ ѕмі́й лꙋка́вый ны́нѣ, и҆́же тмы̀ нача́льникъ, сїѧ́нїѧ не терпѧ̀, є҆́же ѡ҆блиста́етъ живоно́сный крⷭ҇тъ, бжⷭ҇твеннагѡ цр҃ѧ̀ ски́птро честно́е.

Ꙗ҆́кѡ пресвѣ́тла ѕвѣзда̀, и҆ ꙗ҆́кѡ би́серъ благолѣ́пенъ, и҆ пресїѧ́нное со́лнце, всѧ̑ ѡ҆зарѧ́етъ землѝ концы̀ крⷭ҇тъ гдⷭ҇ень, є҆го́же ѡ҆блобыза́емъ.

Воскли́кните ꙗ҆зы́цы, воспо́йте, и҆гра́йте колѣ̑на, и҆ по́йте бг҃ꙋ, да́вшемꙋ крⷭ҇та̀ нерꙋши́мое ᲂу҆твержде́нїе, є҆́же ны́нѣ предлежи́тъ: всѝ вѣ́рнїи ра́дꙋемсѧ, ꙗ҆́кѡ тогѡ̀ ра́ди блага̑ѧ прїе́млюще.

Бг҃оро́диченъ:

Спасе́нїю тѧ̀ нача́ло всѝ вѣ́рнїи вѣ́дꙋще, ᲂу҆блажа́емъ, чⷭ҇таѧ: ты́ бо пре́жде сꙋ́щаго пло́тїю родила̀ є҆сѝ, хотѣ́нїемъ свои́мъ пригвожде́нна на крⷭ҇тѣ̀.

И҆́нъ. І҆рмо́съ:

Ѿ но́щи невѣ́дѣнїѧ, бг҃овѣ́дѣнїемъ просвѣти́вый концы̀, просвѣти́ мѧ ᲂу҆́тромъ чл҃вѣколю́бїѧ твоегѡ̀, гдⷭ҇и.

Ꙗ҆́коже ѻ҆те́ческїй зако́нъ не разо́рше, ст҃і́и мꙋ́чєницы, вѣнцы̀ пра́ведными хрⷭ҇то́съ ва́съ са́мъ вѣнча̀.

Є҆леаза́рꙋ равноста́тни въ ра́зꙋмѣ ꙗ҆́вльшесѧ, блаже́ннїи дѣ́ти, и҆ принесо́стесѧ со ѻ҆́нѣмъ хрⷭ҇тꙋ̀, дꙋхо́вное всесожже́нїе.

И҆́же ст҃ы́ми свобожда́ѧй ѿ ле́сти всѧ́чєскаѧ, спасѝ на́съ, гдⷭ҇и, тѣ́хъ моли́твами, ꙗ҆́кѡ бл҃гоꙋтро́бенъ.

Бг҃оро́диченъ:

Херꙋві́мѡвъ ꙗ҆́вльшисѧ честнѣ́йши, дв҃о всепѣ́таѧ, моли́сѧ сн҃ꙋ твоемꙋ̀, спастѝ дꙋ́шы пою́щихъ тѧ̀.

Катава́сїа:

Ѽ требл҃же́нное дре́во, на не́мже распѧ́сѧ хрⷭ҇то́съ, цр҃ь и҆ гдⷭ҇ь, и҆́мже падѐ дре́вомъ прельсти́вый, тобо́ю прельсти́всѧ, бг҃ꙋ пригвозди́вшꙋсѧ пло́тїю, подаю́щемꙋ ми́ръ дꙋша́мъ на́шымъ.

Пѣ́снь ѕ҃. І҆рмо́съ:

Жите́йское мо́ре воздвиза́емое зрѧ̀ напа́стей бꙋ́рею, къ ти́хомꙋ приста́нищꙋ твоемꙋ̀ прите́къ, вопїю́ ти: возведѝ ѿ тлѝ живо́тъ мо́й, многоми́лостиве.

Ꙗ҆́кѡ бжⷭ҇твенъ сосꙋ́дъ, ꙗ҆́кѡ свѣти́льникъ свѣ́телъ въ цр҃квахъ дне́сь, и҆ въ хра́мѣхъ и҆ градѣ́хъ, крⷭ҇тъ предлежи́мь ви́дѧще, и҆ ᲂу҆ѧсни́вшаго сего̀ воспое́мъ.

Оу҆мерщвлѧ́етсѧ сме́рть, и҆ ᲂу҆морѧ́етсѧ тлѣ́нїе, и҆ бѣсо́встїи полцы̀ ѿбѣга́ютъ побѣ́дный и҆ стра́шный дне́сь предлежа́щь ви́дѧще крⷭ҇тъ хрⷭ҇то́въ, не смѣ́юще прикоснꙋ́тисѧ є҆мꙋ̀.

Воспѣва́юще тѧ̀ бг҃а, и҆ цр҃ѧ̀ и҆ гдⷭ҇а, ꙗ҆́кѡ дарова́лъ є҆сѝ на́мъ крⷭ҇тъ стѣ́нꙋ нерꙋши́мꙋ: є҆го́же ны́нѣ ѡ҆блобыза́емъ ра́достїю, и҆ лю́тыхъ ѿбѣга́емъ.

Бг҃оро́диченъ:

Ꙗ҆́домъ ѕмїи́нымъ, пра́баба пи́щею, ꙗ҆́же во є҆де́мѣ, пома́засѧ: дв҃а же, ро́ждши нача́льника жи́зни, и҆сточѝ мі́рꙋ нетлѣ́нїе и҆ воскресе́нїе.

И҆́нъ. І҆рмо́съ:

Ри́зꙋ мнѣ̀ пода́ждь свѣ́тлꙋ, ѡ҆дѣѧ́йсѧ свѣ́томъ, ꙗ҆́кѡ ри́зою, многомлⷭ҇тиве хрⷭ҇тѐ бж҃е на́шъ.

Ри́зою себѐ мꙋ́ченическою ѡ҆дѣ́ѧвше ст҃і́и, сїю̀ трꙋды̑ страда́нїѧ ва́шегѡ и҆спестри́сте.

Жела́юще бы́ти со хрⷭ҇то́мъ, всесла́внїи мꙋ́чєницы, тече́нїе страда́нїѧ неꙋкло́ннымъ по́мысломъ преидо́сте.

Зако́нъ, и҆́же предадѐ мѡѷсе́й, хранѧ́ще ст҃і́и, зако́ннѡ пострада́ша, посра́мльше а҆нтїо́ха мꙋчи́телѧ. (с. 16)

Бг҃оро́диченъ:

Є҆ди́на сло́вомъ пло́тїю сло́ва ро́ждшаѧ, и҆зба́ви, мо́лимсѧ, ѿ сѣте́й врага̀ дꙋ́шы на́шѧ.

Катава́сїа:

Во́днагѡ ѕвѣ́рѧ во ᲂу҆тро́бѣ дла̑ни і҆ѡ́на крⷭ҇тови́днѡ распросте́ръ, спаси́тельнꙋю стрⷭ҇ть проѡбража́ше ꙗ҆́вѣ. тѣ́мъ тридне́венъ и҆зше́дъ, премі́рное воскрⷭ҇нїе прописа́ше, пло́тїю пригвожде́ннагѡ хрⷭ҇та̀ бг҃а, и҆ тридне́внымъ воскрⷭ҇нїемъ мі́ръ просвѣ́щшагѡ.

Конда́къ, гла́съ д҃. Подо́бенъ:

Вознесы́йсѧ на крⷭ҇тъ во́лею, тезоимени́томꙋ твоемꙋ̀ но́вомꙋ жи́тельствꙋ, щедрѡ́ты твоѧ̑ да́рꙋй, хрⷭ҇тѐ бж҃е, возвеселѝ на́съ си́лою твое́ю, побѣ̑ды даѧ̀ на́мъ на сопоста́ты, посо́бїе и҆мꙋ́щымъ твоѐ, ѻ҆рꙋ́жїе ми́ра, непобѣди́мꙋю побѣ́дꙋ.

І҆́косъ:

И҆́же до тре́тїѧгѡ небесѐ восхище́нъ бы́сть въ ра́й, и҆ глаго́лы слы́шавъ неизречє́нныѧ, и҆ бжⷭ҇твєнныѧ, и҆́хже не лѣ́ть ѧ҆зы̑ки человѣ́ческими глаго́лати, что̀ гала́тѡмъ пи́шетъ, ꙗ҆́кѡ рачи́телїе писа́нїй, прочто́сте и҆ позна́сте: мнѣ̀, глаго́летъ, хвали́тисѧ да не бꙋ́детъ, то́кмѡ во є҆ди́номъ крⷭ҇тѣ̀ гдⷭ҇ни, на не́мже страда́въ, ᲂу҆бѝ стра̑сти. того̀ ᲂу҆̀бо и҆ мы̀ и҆звѣ́стнѡ да держи́мъ, крⷭ҇тъ гдⷭ҇ень, хвалꙋ̀ всѝ: є҆́сть бо на́мъ спаси́тельное сїѐ дре́во, ѻ҆рꙋ́жїе ми́ра, непобѣди́маѧ побѣ́да.

Пѣ́снь з҃. І҆рмо́съ:

Росода́тельнꙋ ᲂу҆́бѡ пе́щь содѣ́ла а҆́гг҃лъ преподѡ́бнымъ ѻ҆трокѡ́мъ, халдє́и же ѡ҆палѧ́ющее велѣ́нїе бж҃їе мꙋчи́телѧ ᲂу҆вѣща̀ вопи́ти: бл҃гослове́нъ є҆сѝ, бж҃е ѻ҆тє́цъ на́шихъ.

Спаси́тельномꙋ дре́вꙋ поклони́мсѧ, крⷭ҇тꙋ̀ прест҃о́мꙋ, є҆мꙋ́же слꙋ́жатъ а҆́гг҃льскаѧ всѧ̑ вѡ́инства, предлежа́щь ви́дѧще вѣ́рнїи, и҆сточа́ющъ на́мъ ѡ҆свѧще́нїе и҆ жи́знь.

Побѣдоно́сный ꙗ҆ви́сѧ прест҃ы́й крⷭ҇тъ живода́вца хрⷭ҇та̀: свы́ше же бѣсѡ́въ всѣ́хъ мно́жество ѿгонѧ̀ ва́рварское шата́нїе, и҆ побѣди́телѧ ꙗ҆влѧ́ѧ во́инство на́ше.

Ꙗ҆́кѡ ѡ҆дꙋшевле́нꙋ тебѣ̀ припа́даѧ взыва́ю, крⷭ҇те мо́й прест҃ы́й: ты́ ми просвѣтѝ дꙋ́шꙋ, и҆ ᲂу҆́мъ, и҆ слꙋ́хъ, и҆ ᲂу҆стнѣ̀, и҆ ѧ҆зы́къ, и҆ дыха́нїе, и҆ ѻ҆́чи, къ пꙋтє́мъ црⷭ҇тва хрⷭ҇то́ва.

Пое́мъ, сла́вимъ и҆ покланѧ́емсѧ, и҆ велича́емъ твою̀, хрⷭ҇тѐ, держа́вꙋ: ꙗ҆́кѡ подадѐ на́мъ рабѡ́мъ твои̑мъ крⷭ҇тъ бжⷭ҇твенный сла́дость неисчерпа́емꙋю, и҆ храни́лище дꙋша́мъ и҆ тѣ́лѡмъ на́шымъ.

Бг҃оро́диченъ:

Ю҆́ношы трѝ пе́щь не ѡ҆палѝ, ржⷭ҇тво̀ проѡбразꙋ́ющи твоѐ: и҆́бо бжⷭ҇твенный ѻ҆́гнь тѧ̀ не ѡ҆палѝ, всели́всѧ въ тѧ̀, и҆ всѧ̑ наꙋчи́въ пѣ́ти: бл҃гослове́нъ бг҃ъ ѻ҆тє́цъ на́шихъ.

И҆́нъ. І҆рмо́съ:

Въ нача́лѣ зе́млю ѡ҆снова́вый, и҆ нб҃са̀ сло́вомъ ᲂу҆тверди́вый, бл҃гослове́нъ є҆сѝ во вѣ́ки, гдⷭ҇и бж҃е ѻ҆тє́цъ на́шихъ.

Мч҃ническими пострада́вше болѣ́зньми, мꙋчи́тельскихъ не ᲂу҆страши́стесѧ преще́нїй, хрⷭ҇тꙋ̀ вопїю́ще: бл҃гослове́нъ бг҃ъ ѻ҆тє́цъ на́шихъ.

Два́жды.

Терпѣ́нїѧ пожда́вше болѣ́зней, вра̑жїѧ лю̑таѧ побѣди́сте кова̑рства, хрⷭ҇тꙋ̀ вопїю́ще: бл҃гослове́нъ бг҃ъ ѻ҆тє́цъ на́шихъ.

Бг҃оро́диченъ:

И҆́же во ᲂу҆тро́бꙋ дв҃ыѧ всели́выйсѧ, и҆ тоѧ̀ ра́ди а҆да́ма ѡ҆бно́вль, бл҃гослове́нъ бг҃ъ ѻ҆тє́цъ на́шихъ.

Катава́сїа:

Безꙋ́мное велѣ́нїе мꙋчи́телѧ ѕлочести́вагѡ лю́ди поколеба̀, ды́шꙋщее преще́нїе и҆ ѕлохꙋле́нїе бг҃оме́рзское: ѻ҆ба́че трѝ ѻ҆́троки не ᲂу҆страшѝ ꙗ҆́рость ѕвѣ́рскаѧ, ни ѻ҆́гнь снѣда́ѧй, но противоды́шꙋщꙋ росоно́сномꙋ дх҃ꙋ, со ѻ҆гне́мъ сꙋ́ще поѧ́хꙋ: препѣ́тый ѻ҆тцє́въ и҆ на́съ бж҃е, бл҃гослове́нъ є҆сѝ.

Пѣ́снь и҃. І҆рмо́съ:

Оу҆жасни́сѧ, боѧ́йсѧ нб҃о, и҆ да подви́жатсѧ ѡ҆снова̑нїѧ землѝ: се́ бо въ мертвецѣ́хъ вмѣнѧ́етсѧ въ вы́шнихъ живы́й, и҆ во гро́бъ ма́лъ страннопрїе́млетсѧ. є҆го́же ѻ҆́троцы благослови́те, свѧще́нницы воспо́йте, лю́дїе превозноси́те во всѧ̑ вѣ́ки.

Тво́й крⷭ҇тъ проѡбразꙋ́ѧ і҆а́кѡвъ и҆ногда̀, на внꙋ́ки поло́жь дла̑ни премѣ́ннѡ, и҆ благослови́въ и҆́хъ, благода́ти во ꙗ҆зы́цѣхъ наꙋча́ѧ: ѻ҆́троцы благослови́те, свѧще́ннїи по́йте, лю́дїе превозноси́те є҆го̀ во вѣ́ки.

Ѽ неизрече́ннагѡ твоегѡ̀, хрⷭ҇тѐ, сни́тїѧ, и҆ неизглаго́ланныхъ благи́хъ! воплоти́сѧ, и҆ ра́спѧтъ бы́въ, сме́рть прїе́мъ, и҆ рѣши́ши человѣ́ки ѿ клѧ́твы, и҆сточи́въ нетлѣ́нїе на треблаже́ннѣмъ дре́вѣ, препросла́вленный крⷭ҇тъ се́й во вѣ́ки.

Прест҃ы́й крⷭ҇тъ, бжⷭ҇твеннꙋю побѣ́дꙋ, жи́зни нача́льника, ле́сти потреби́телѧ, дне́сь похва́лимъ крⷭ҇тъ всест҃ы́й гдⷭ҇ень, бѣсѡ́въ гꙋби́телѧ, и҆ ва́рварѡвъ прогони́телѧ, вѣ́рныхъ побѣдотво́рца, и҆ покрови́телѧ.

Бг҃оро́диченъ:

Гвоздьмѝ пригвожде́на хрⷭ҇та̀, копїе́мъ прободе́на въ нетлѣ̑ннаѧ ре́бра, тро́стїемъ въ главꙋ̀ бїе́ма, же́лчь вкꙋша́юща зрѧ́щи, дв҃а вопїѧ́ше: гдѣ̀ твоѧ̀ добро́та за́йде, прекра́сное сло́во, препросла́вленне па́че сынѡ́въ человѣ́ческихъ.

И҆́нъ. І҆рмо́съ:

Безнача́льнаго цр҃ѧ̀ сла́вы, є҆гѡ́же трепе́щꙋтъ нбⷭ҇ныѧ си̑лы, по́йте свѧще́нницы, лю́дїе превозноси́те во всѧ̑ вѣ́ки.

И҆́стины рачи́телїе, и҆ зако́на и҆звѣ́стнїи храни́телїе бы́вше, прехва́льнїи мꙋ́чєницы, пое́те хрⷭ҇та̀ во вѣ́ки.

Седмора́сленный пло́дъ ст҃а́гѡ ко́рене, ꙗ҆́кѡ вои́стиннꙋ се́дмь маккаве́и, мꙋ́ченики гдⷭ҇ни почти́мъ досто́йнѡ.

Зако́нꙋ ревни́тели, є҆динодꙋ́шныѧ страда́льцы вѣ́рнїи, се́дмь маккаве́и съ ро́ждшею и҆̀хъ, почти́мъ досто́йнѡ.

Трⷪ҇ченъ:

Трⷪ҇це нераздѣли́маѧ є҆ди́нице, въ бж҃ествѣ̀ сла́влю є҆ди́нꙋ, и҆ въ трїе́хъ пою́ тѧ ли́цѣхъ, є҆ди́нꙋ си́лꙋ.

Бг҃оро́диченъ:

Въ послѣ̑днѧѧ на́съ ра́ди, ѿ дв҃ы воплоще́ннаго бг҃а, свѧще́нницы по́йте, и҆ превозноси́те є҆го̀ во вѣ́ки.

Катава́сїа:

Благослови́те ѻ҆́троцы, трⷪ҇цы равночи́сленнїи, содѣ́телѧ ѻ҆ц҃а̀ бг҃а, по́йте снизше́дшее сло́во, и҆ ѻ҆́гнь въ ро́сꙋ претво́ршее, и҆ превозноси́те всѣ̑мъ жи́знь подава́ющаго, дх҃а всест҃а́го во вѣ́ки.

Пѣ́снь ѳ҃. І҆рмо́съ:

Бг҃а человѣ́кѡмъ не возмо́жно ви́дѣти, на него́же не смѣ́ютъ чи́ни а҆́гг҃льстїи взира́ти: тобо́ю бо, всечⷭ҇таѧ, ꙗ҆ви́сѧ человѣ́кѡмъ сло́во воплоще́нно. є҆го́же велича́юще, съ нбⷭ҇ными вѡ́и, тѧ̀ ᲂу҆блажа́емъ.

Тлѣ́нни ѿ преслꙋша́нїѧ бы́хомъ, бж҃їѧ за́повѣди престꙋ̑пницы ꙗ҆́вльшесѧ: сегѡ̀ ра́ди сме́рть прїи́де человѣ́кѡмъ. тѣ́мже безсме́ртїе процвѣтѐ дне́сь побѣ́дный крⷭ҇тъ хрⷭ҇то́въ, є҆го́же цѣлꙋ́емъ.

Сѐ дре́во прест҃о́е, крѣ́пкаѧ наде́жда вѣ̑рнымъ ꙗ҆ви́сѧ, клѧ́твы и҆збавле́нїе, человѣ́кѡвъ ра́дость предлежи́тъ, ѡ҆блича́ѧ тмы̀ нача́льника: семꙋ̀ поклони́мсѧ вѣ́рнїи съ весе́лїемъ.

Нача́ло благослове́нїѧ, и҆ ᲂу҆твержде́нїе хрⷭ҇тїа́нъ и҆ стѣна̀, и҆ тве́рдое застꙋпле́нїе, и҆ клѧ́твы и҆збавле́нїе, ꙗ҆ви́сѧ на́мъ дре́во вожделѣ́нное, ѻ҆рꙋ́жїе непобѣди́мое: просвѣтѝ и҆ ѡ҆свѧтѝ на́съ покланѧ́ющихъ тебѣ̀.

Бг҃оро́диченъ:

Хра́ме и҆ две́ре ѡ҆свѧще́нїѧ, прⷭ҇то́ле бж҃їй, ѻ҆́блаче и҆ свѣ́щниче всесвѣ́тлый, и҆ ковче́же благода́ти, всенепоро́чнаѧ, че́стнѣ покланѧ́ющыѧсѧ ѻ҆́бразꙋ честно́мꙋ є҆диноро́днагѡ твоегѡ̀ сн҃а, покры́й и҆ сохранѝ.

И҆́нъ. І҆рмо́съ:

Велича́емъ тѧ̀ мт҃рь бж҃їю, и҆ сла́вимъ тѧ̀, бцⷣе дв҃о, ꙗ҆́кѡ сп҃са ро́ждшꙋю дꙋ́шъ на́шихъ.

Сокро́вище бжⷭ҇твенныхъ дарова́нїй, вои́стиннꙋ показа́стесѧ, бога́тство неѿе́млемое, всехва́льнїи мꙋ́чєницы.

Моли́твєнницы до́блїи къ зижди́телю всѣ́хъ сꙋ́ще, и҆спроси́те невла́емꙋю жи́знь дꙋша́мъ на́шымъ.

И҆́же бжⷭ҇твенною ре́вностїю и҆ теплото́ю дꙋшѝ, творѧ́щыѧ ва́шꙋ па́мѧть, сохрани́те неснѣда́еми ѿ лꙋка́вагѡ.

Трⷪ҇ченъ:

Съ сн҃омъ ѻ҆ц҃ꙋ̀ и҆ дх҃ꙋ пра́вомꙋ поклони́мсѧ, со а҆́гг҃лы зовꙋ́ще: сла́ва въ вы́шнихъ бг҃ꙋ.

Бг҃оро́диченъ:

Ра́дꙋйсѧ, две́ре ст҃а́ѧ, бг҃ꙋ ѿве́рстаѧ, є҆ди́номꙋ премꙋ́дромꙋ, ю҆́же ѡ҆сѣнѝ дх҃ъ прест҃ы́й.

Катава́сїа:

Та́инъ є҆сѝ, бцⷣе, ра́й, невоздѣ́ланнѡ возрасти́вшїй хрⷭ҇та̀, и҆́мже крⷭ҇тное живоно́сное на землѝ насади́сѧ дре́во: тѣ́мъ ны́нѣ возноси́мꙋ, покланѧ́ющесѧ є҆мꙋ̀, тѧ̀ велича́емъ.

Свѣти́ленъ ѻ҆ктѡ́иха. Сла́ва, мꙋ́ченикѡвъ:

Чꙋ̑дныѧ воспое́мъ маккаве́и, є҆леаза́ра, ѻ҆́троки и҆ соломѡні́ю: сі́и бо низложи́ша шата̑нїѧ началоѕло́бнагѡ ѕмі́ѧ, и҆ зако́на слꙋжи́телїе бы́вше, вѣнча́шасѧ.

И҆ ны́нѣ, крⷭ҇та̀:

Крⷭ҇тъ, храни́тель всеѧ̀ вселе́нныѧ: крⷭ҇тъ, красота̀ цр҃кве: крⷭ҇тъ, на́ша держа́ва: крⷭ҇тъ вѣ́рныхъ ᲂу҆твержде́нїе: крⷭ҇тъ, а҆́гг҃лѡвъ сла́ва, и҆ де́мѡнѡвъ ꙗ҆́зва.

На хвали́техъ стїхи̑ры, на ѕ҃, крⷭ҇та̀ г҃: гла́съ а҃:

Подо́бенъ: Нбⷭ҇ныхъ чинѡ́въ:

Нбⷭ҇наѧ шє́ствїѧ ꙳ крⷭ҇тъ честны́й гото́витъ всѣ̑мъ, ꙳ томꙋ̀ покланѧ́ющымсѧ вѣ́рою несꙋмнѣ́нною: ꙳ и҆ ликѡ́мъ невеще́ственныхъ си́лъ, ꙳ и҆́же на не́мъ пригвозди́выйсѧ, ꙳ сочета́етъ любо́вїю пою́щыѧ того̀.

Кла́нѧющесѧ вѣ́рою крⷭ҇тꙋ̀ честно́мꙋ, ꙳ на не́мъ распе́ншагосѧ воспое́мъ влⷣкꙋ: тогѡ̀ манове́нїемъ ꙳ ᲂу҆стнѣ̀ вкꙋ́пѣ и҆ дꙋ́шꙋ ѡ҆чища́юще, ꙳ и҆ сїѧ́нїи сегѡ̀ мы́сленными ᲂу҆ѧсни́мсѧ, ꙳ хва́лѧще є҆го̀.

Го́ресть дре́вле ᲂу҆слажда́ѧ мѡѷсе́й, ꙳ и҆зба́ви і҆и҃лѧ, ꙳ ѻ҆́бразъ крⷭ҇та̀ написꙋ́ѧ: ꙳ мы́ же сего̀ всѝ вѣ́рнїи, ꙳ та́йнѡ и҆ бжⷭ҇твеннѡ воѡбража́юще въ сердца́хъ на́шихъ, ꙳ всегда̀ спаса́емсѧ держа́вою є҆гѡ̀.

И҆ ст҃ы́хъ г҃, самогла́сны, гла́съ то́йже:

Многострада́льнаѧ ма́ти, къ подвигѡ́мъ созва́вши своѧ̑ дѣ́ти, глаго́лаше: а҆враа́мстѣй сѣди́нѣ послѣ́дꙋйте, да заколе́нїю і҆саа́ковꙋ причастите́сѧ. ті́и же прїима́хꙋ наставлѧ́ющꙋю, предпостиза́хꙋ ᲂу҆ча́щꙋю, дрꙋ́гъ по дрꙋ́зѣ томлє́нїѧ мꙋ́ки ви́дѧще: и҆́хже моли́твами, бж҃е, поми́лꙋй на́съ.

Гла́съ д҃:

Се́дмь столпѝ и҆збра́ннїи, ѿ є҆ди́нагѡ ка́мене слове́снагѡ ᲂу҆сѣ́чены бы́ша, непоколеби́мь показа́ша зако́на сто́лпъ. тѣ́мже бл҃говолѝ, сп҃се, въ ми́рѣ сохрани́тисѧ дꙋша́мъ на́шымъ.

Гла́съ є҃:

И҆̀же зако́на храни́телїе, и҆ соломѡні́и сы́нове, на сꙋди́щи стра́ждꙋще, ко а҆нтїо́хꙋ вопїѧ́хꙋ: мы̀, а҆нтїо́ше, за ѻ҆те́ческїй зако́нъ терпи́мъ. не ѿлꙋчи́тъ же на́съ, ни ѻ҆́гнь, ни ме́чь, ни ѕвѣ́рїе, ни ра̑ны: но вкꙋ́пѣ ᲂу҆́мремъ съ ма́терїю ста́рицею, и҆ ᲂу҆чи́телемъ ѻ҆тце́мъ, живꙋ́ще и҆ сра́дꙋющесѧ въ неконча́ємыѧ вѣ́ки.

Сла́ва, гла́съ д҃:

На маккаве́и собра́вшꙋюсѧ ра́ть, прїиди́те, ᲂу҆́зримъ вѣ́рнїи мꙋ́жество: мꙋчи́тель бо ца́рь всѧ̑ ꙗ҆зы́ки ᲂу҆держа́въ, держи́мь бѣ́ѧше ѿ ста́рца и҆ дѣте́й седьмѝ, и҆ є҆ди́ныѧ жены̀. тѣ́мже моли́твами и҆́хъ, бж҃е, поми́лꙋй на́съ.

И҆ ны́нѣ, крⷭ҇та̀, гла́съ то́йже:

Пособи́вый, гдⷭ҇и, кро́ткомꙋ дв҃дꙋ покори́ти и҆ноплеме́нника, вѣ́рномꙋ на́шемꙋ во́инствꙋ спобо́рствꙋй, и҆ ѻ҆рꙋ́жїемъ крⷭ҇та̀ низложѝ врагѝ на́шѧ. покажѝ, бл҃гоꙋтро́бне, на на́съ дрє́внїѧ ми́лѡсти твоѧ̑: и҆ да разꙋмѣ́ютъ вои́стиннꙋ, ꙗ҆́кѡ ты̀ є҆сѝ бг҃ъ, и҆ на тѧ̀ надѣ́ющїисѧ побѣжда́емъ, молѧ́щїисѧ ѻ҆бы́чнѡ пречⷭ҇тѣй твое́й мт҃ри, дарова́тисѧ на́мъ ве́лїей ми́лости.

Славосло́вїе вели́кое, ти́хѡ, со гла́сомъ. І҆ере́ю же ѡ҆болче́нꙋ сꙋ́щꙋ во всю̀ ѻ҆де́ждꙋ свѧще́нническꙋю, прихо́дитъ съ кади́ломъ къ ст҃ѣ́й трапе́зѣ, предходѧ́щꙋ є҆мꙋ̀ дїа́конꙋ съ лампа́дою, и҆ кади́тъ свѧтꙋ́ю трапе́зꙋ, и҆ честны́й крⷭ҇тъ, и҆ та́кѡ взима́етъ честны́й крⷭ҇тъ съ блю́домъ на главꙋ̀, и҆ и҆схо́дитъ сѣ́верными дверьмѝ и҆зъ ѻ҆лтарѧ̀, пред̾идꙋ́щымъ є҆мꙋ̀ со двѣма̀ лампа́дами и҆ съ кади́ломъ: прихо́дитъ же прѧ́мѡ ца́рскихъ двере́й, и҆ стои́тъ, ѡ҆жида́ѧ конца̀ трист҃а́гѡ. Кончава́емꙋ же трист҃о́мꙋ, возглаша́етъ і҆ере́й: Премꙋ́дрость, про́сти: И҆ кли́рїцы пою́тъ тропа́рь: Спасѝ, гдⷭ҇и, лю́ди твоѧ̑: три́жды. И҆ та́кѡ прихо́дитъ і҆ере́й, носѧ̀ на главѣ̀ честны́й крⷭ҇тъ, предъ ст҃ы́ѧ ца́рскїѧ двє́ри ко а҆нало́гїю, є҆мꙋ́же ᲂу҆кра́шенꙋ сꙋ́щꙋ, полага́етъ на не́мъ честны́й крⷭ҇тъ. И҆ твори́тъ поклоне́нїе честно́мꙋ крⷭ҇тꙋ̀, три́жды, поѧ̀ тихогла́снѡ: Крⷭ҇тꙋ̀ твоемꙋ̀ покланѧ́емсѧ, влⷣко, и҆ ст҃о́е воскрⷭ҇нїе твоѐ сла́вимъ. И҆ ли́кове то́же пою́тъ велегла́снѡ, три́жды. Та́же цѣлꙋ́ютъ честны́й крⷭ҇тъ, и҆ покланѧ́ютсѧ па́ки є҆ди́ною.

Пою́ще стїхи̑ры самогла́сны, гла́съ в҃:

Прїиди́те, вѣ́рнїи, животворѧ́щемꙋ дре́вꙋ поклони́мсѧ, на не́мже хрⷭ҇то́съ цр҃ь сла́вы во́лею рꙋ́цѣ распросте́ръ, вознесѐ на́съ на пе́рвое блаже́нство, ꙗ҆̀же пре́жде вра́гъ сла́стїю ᲂу҆кра́дъ, и҆згна́ны ѿ бг҃а сотворѝ. прїиди́те, вѣ́рнїи, дре́вꙋ поклони́мсѧ, и҆́мже сподо́бихомсѧ неви́димыхъ вра̑гъ сокрꙋши́ти главы̑. прїиди́те, всѧ̑ ѻ҆те́чєствїѧ ꙗ҆зы́кѡвъ, крⷭ҇тъ гдⷭ҇ень пѣ́сньми почти́мъ: ра́дꙋйсѧ, крⷭ҇те, па́дшагѡ а҆да́ма соверше́нное и҆збавле́нїе, ѡ҆ тебѣ́ бо вѣ́рнѣйшїи ца́рїе на́ши хва́лѧтсѧ, ꙗ҆́кѡ твое́ю си́лою і҆сма́ильтєскїѧ лю́ди держа́внѡ покарѧ́юще. тѧ̀ ны́нѣ со стра́хомъ хрїстїа́не цѣлꙋ́юще, на тебѣ̀ пригвозди́вшагосѧ бг҃а сла́вимъ, глаго́люще: гдⷭ҇и, на то́мъ пригвозди́выйсѧ, поми́лꙋй на́съ, ꙗ҆́кѡ бл҃гъ и҆ чл҃вѣколю́бецъ.

Гла́съ є҃:

Зрѧ́щи тѧ̀ тва́рь всѧ̀ на крⷭ҇тѣ̀ на́га ви́сѧща, содѣ́телѧ и҆ зижди́телѧ всѣ́хъ, и҆змѣнѧ́шесѧ стра́хомъ, и҆ рыда́ше: со́лнце же свѣ́тъ ѡ҆мрачѝ, и҆ землѧ̀ колеба́шесѧ, ка́менїе же разсѣда́шесѧ, и҆ хра́ма свѣ́тлость раздира́шесѧ. ме́ртвїи воста́ша ѿ гробѡ́въ, и҆ а҆́гг҃льскїѧ си̑лы ᲂу҆жасо́шасѧ, гл҃го́люще. ѽ чꙋдесѐ! сꙋдїѧ̀ сꙋ́дитсѧ, и҆ стра́ждетъ хотѧ̀ за спасе́нїе мі́ра и҆ ѡ҆бновле́нїе.

Гла́съ и҃:

Дне́сь влⷣка тва́ри, и҆ гдⷭ҇ь сла́вы, на крⷭ҇тѣ̀ пригвожда́етсѧ, и҆ въ рє́бра пробода́етсѧ! же́лчи и҆ ѻ҆́цта вкꙋша́етъ, сла́дость цр҃ко́внаѧ: вѣнце́мъ ѿ те́рнїѧ ѡ҆блага́етсѧ: покрыва́ѧй нб҃о ѻ҆́блаки, ѻ҆де́ждею ѡ҆блачи́тсѧ порꙋга́нїѧ: и҆ заꙋша́етсѧ бре́нною рꙋко́ю, рꙋко́ю созда́вый человѣ́ка: по плеще́ма бїе́нъ быва́етъ, ѡ҆дѣва́ѧй нб҃о ѻ҆́блаки: заплева̑нїѧ и҆ ра̑ны прїе́млетъ, поношє́нїѧ и҆ заꙋшє́нїѧ, и҆ всѧ̑ терпи́тъ менє̀ ра́ди ѡ҆сꙋжде́ннагѡ, и҆зба́витель мо́й и҆ бг҃ъ, да спасе́тъ мі́ръ ѿ пре́лести, ꙗ҆́кѡ бл҃гоꙋтро́бенъ.

Сла́ва, и҆ ны́нѣ, гла́съ то́йже.

Дне́сь неприкоснове́нный сꙋщество́мъ, прикоснове́нъ мнѣ̀ (с 24) быва́етъ, и҆ стра́ждетъ стрⷭ҇ти свобожда́ѧй мѧ̀ ѿ страсте́й: свѣ́тъ подава́ѧй слѣпы̑мъ, ѿ беззако́нныхъ ᲂу҆сте́нъ ѡ҆плева́етсѧ, и҆ дае́тъ плещы̀ за плѣнє́нныѧ на ра̑ны. сего̀ чⷭ҇таѧ дв҃а и҆ мт҃и на крⷭ҇тѣ̀ зрѧ́щи, болѣ́зненнѡ вѣща́ше: ᲂу҆вы̀ мнѣ̀, ча́до моѐ, что̀ сїѐ сотвори́лъ є҆сѝ; кра́сный добро́тою па́че всѣ́хъ человѣ̑къ, бездыха́нный и҆ беззра́чный ꙗ҆влѧ́ешисѧ, не и҆мѣ́ѧ ви́да, нижѐ добро́ты. ᲂу҆вы̀ мнѣ̀, мо́й свѣ́те, не могꙋ̀ спѧ́ща зрѣ́ти тѧ̀, ᲂу҆тро́бою ᲂу҆ѧзвлѧ́юсѧ, и҆ лю́тое ѻ҆рꙋ́жїе се́рдце моѐ прохо́дитъ: воспѣва́ю твоѧ̑ стрⷭ҇ти, покланѧ́юсѧ бл҃гоꙋтро́бїю твоемꙋ̀, долготерпѣли́ве, сла́ва тебѣ̀.

Посе́мъ є҆ктєнїѝ: Поми́лꙋй на́съ, бж҃е: И҆ И҆спо́лнимъ ᲂу҆́треннюю моли́твꙋ: Дїа́конъ: Премꙋ́дрость. І҆ере́й ѿпꙋ́стъ, и҆ пе́рвый ча́съ. На а҃-мъ часѣ̀, тропа́рь крⷭ҇та̀: Сла́ва, ст҃ы́хъ. И҆ ны́нѣ, бг҃оро́диченъ часѡ́въ. По Ѻ҆́ч҃е на́шъ, конда́къ крⷭ҇та̀: и҆ соверше́нный ѿпꙋ́стъ.

Въ сі́й а҃-й де́нь а҆́ѵгꙋста, во ѻ҆би́телехъ и҆ прихо́дскихъ хра́мѣхъ, соверша́ютъ чи́нъ свѧще́нїѧ воды̀, и҆ быва́етъ си́це:

Приꙋгото́ванꙋ столꙋ̀ и҆ ᲂу҆кра́шенꙋ, и҆ водѣ̀ въ ча́шѣ, и҆лѝ и҆схо́димъ на и҆сто́чники. И҆ благослови́вшꙋ і҆ере́ю, глаго́летсѧ трист҃о́е, и҆ ѱало́мъ рм҃в: Гдⷭ҇и, ᲂу҆слы́ши моли́твꙋ мою̀: Та́же, Бг҃ъ гдⷭ҇ь, во гла́съ д҃. И҆ тропа́рь: Къ бцⷣѣ прилѣ́жнѡ: два́жды. Сла́ва, и҆ ны́нѣ: Не ᲂу҆молчи́мъ никогда̀, бцⷣе: та́же ѱало́мъ н҃: Поми́лꙋй мѧ̀, бж҃е: Посе́мъ пою́тсѧ тропарѝ свѧще́нїѧ воды̀.

Гла́съ ѕ҃:

Є҆́же ра́дꙋйсѧ, а҆́гг҃ломъ прїи́мшаѧ, и҆ ро́ждшаѧ зижди́телѧ твоего̀, дв҃о, спаса́й тѧ̀ велича́ющыѧ.

Два́жды.

Воспѣва́емъ сн҃а твоего̀, бцⷣе, и҆ вопїе́мъ: пречⷭ҇таѧ влⷣчце, всѧ́кїѧ бѣды̀ и҆зба́ви рабы̑ твоѧ̑. (с. 25)

Царє́мъ, прⷪ҇ро́кѡмъ и҆ а҆пⷭ҇лѡмъ, и҆ мꙋ́ченикѡмъ ты̀ є҆сѝ похвала̀, и҆ предста́тельница мі́рꙋ, всенепоро́чнаѧ.

Ѧ҆зы́къ всѧ́къ правосла́вныхъ похвалѧ́етъ, и҆ блажи́тъ и҆ сла́витъ пречⷭ҇тое ржⷭ҇тво̀ твоѐ, марі́е бг҃оневѣ́стнаѧ.

Да́ждь, хрⷭ҇тѐ мо́й, и҆ мнѣ̀ недосто́йномꙋ долгѡ́въ ѡ҆ставле́нїе, молю́сѧ, тѧ̀ ро́ждшїѧ моли́твами, ꙗ҆́кѡ бл҃гоꙋтро́бенъ.

На тѧ̀ моѧ̑ ᲂу҆пова̑нїѧ возложи́хъ, бцⷣе, спаси́ мѧ моли́твами твои́ми, и҆ да́рꙋй мѝ прегрѣше́нїй ѡ҆ставле́нїе.

Ѡ҆живи́ мѧ, ро́ждшаѧ жизнода́вца и҆ сп҃са, спасѝ моли́твами твои́ми, благослове́ннаѧ, наде́ждо дꙋ́шъ на́шихъ.

Зижди́телѧ всѣ́хъ во ᲂу҆тро́бѣ твое́й заче́ншаѧ, дв҃о всенепоро́чнаѧ, моли́твами твои́ми спасѝ дꙋ́шы на́шѧ.

Бцⷣе, ро́ждшаѧ сло́вомъ па́че сло́ва сло́во, всепѣ́таѧ, того̀ молѝ спастѝ дꙋ́шы на́шѧ.

Ми́лостива мнѣ̀ сꙋдїю́ же и҆ сн҃а твоего̀, прегрѣши́вшемꙋ па́че всѧ́кагѡ человѣ́ка, твои́ми моли́твами содѣ́лай, влⷣчце.

По до́лгꙋ вопїе́мъ тѝ: ра́дꙋйсѧ, бцⷣе чⷭ҇таѧ приснодв҃о, молѧ́щесѧ, моли́твами твои́ми спасти́сѧ.

И҆зба́ви мѧ̀ ѻ҆гнѧ̀ вѣ́чнагѡ, и҆ мꙋ́къ предлежа́щихъ мнѣ̀, бг҃ороди́тельнице, ꙗ҆́кѡ да ᲂу҆блажа́ю тѧ̀.

Не пре́зри моле́нїѧ твои́хъ рабѡ́въ, мо́лимсѧ, влⷣчце всепѣ́таѧ, ꙗ҆́кѡ да и҆зба́вимсѧ всѧ́кагѡ ѡ҆бстоѧ́нїѧ.

Недꙋ́гѡвъ и҆ всѧ́кихъ болѣ́зней, и҆ бѣ́дъ на́съ свободѝ, къ свѧще́нномꙋ твоемꙋ̀ покро́вꙋ прибѣга́ющихъ.

Стра́нное чꙋ́до, є҆́же въ тебѣ̀, бг҃ороди́тельнице: на́съ бо ра́ди по на́мъ роди́сѧ всѣ́хъ зижди́тель и҆зъ тебє̀, и҆ бг҃ъ на́шъ.

Хра́мъ тво́й, бцⷣе, показа́сѧ врачевство̀ недꙋ́гѡвъ безме́здное, и҆ ѡ҆скорблѧ́емыхъ дꙋ́шъ ᲂу҆тѣше́нїе.

Прест҃а́ѧ бцⷣе, ро́ждшаѧ сп҃са, ѿ бѣ́дъ спасѝ и҆ всѧ́кїѧ и҆ны́ѧ нꙋ́жды рабы̑ твоѧ̑.

И҆зба́ви ѿ всѧ́кагѡ преще́нїѧ, находѧ́щагѡ рабы̑ твоѧ̑, прест҃а́ѧ влⷣчце, и҆ всѧ́кагѡ вре́да дꙋше́внагѡ же и҆ тѣле́снагѡ.

Спасѝ всѣ́хъ моли́твами твои́ми, дв҃о бцⷣе, къ тебѣ̀ притека́ющихъ, и҆ и҆зба́ви всѧ́кїѧ нꙋ́жды и҆ ско́рби.

Кто̀ притека́ѧй въ хра́мъ тво́й, бцⷣе, не прїе́млетъ ско́рѡ и҆сцѣле́нїѧ дꙋше́внагѡ вкꙋ́пѣ и҆ тѣле́снагѡ, пречⷭ҇таѧ;

Ѿ всѣ́хъ ᲂу҆молѧ́емь, ще́дре, ст҃ы́хъ и҆ го́рнихъ чинѡ́въ, ѡ҆чи́сти мѧ̀ ро́ждшею тѧ̀.

Пощадѝ, сп҃се, дꙋ́шы ᲂу҆ме́ршихъ бра́тїй на́шихъ, въ наде́жди жи́зни, и҆ ѡ҆сла́би, ѡ҆ста́ви и҆̀мъ согрѣшє́нїѧ.

Ра́дꙋйсѧ, мі́ра ѡ҆чисти́лище, дв҃о, ра́дꙋйсѧ, рꙋ́чко и҆ свѣ́щниче всезлаты́й, бжⷭ҇твенныѧ ма́нны, и҆ свѣ́та, бг҃оневѣ́сто.

Пое́мъ тѧ̀ бг҃а є҆ди́наго въ трⷪ҇цѣ, вопїю́ще гла́съ трист҃ы́й, молѧ́щесѧ спасе́нїе полꙋчи́ти.

Сла́ва:

Ѽ дв҃о, ро́ждшаѧ сп҃са и҆ влⷣкꙋ мі́ра и҆ гдⷭ҇а! того̀ молѝ спастѝ дꙋ́шы на́шѧ.

И҆ ны́нѣ:

Ра́дꙋйсѧ, горо̀: ра́дꙋйсѧ, кꙋпино̀: ра́дꙋйсѧ, врата̀: ра́дꙋйсѧ, лѣ́ствице: ра́дꙋйсѧ, бжⷭ҇твеннаѧ трапе́зо: ра́дꙋйсѧ, всѣ́хъ по́моще, влⷣчце.

Моли́твами, ми́лостиве, мт҃ре твоеѧ̀ пречⷭ҇тыѧ, и҆ всѣ́хъ ст҃ы́хъ твои́хъ, твоѧ̑ ми́лѡсти лю́демъ твои̑мъ да́рꙋй.

Моли́твами сла́вныхъ а҆рха̑гг҃лъ и҆ а҆́гг҃лъ и҆ го́рнихъ чинѡ́въ, рабы̑ твоѧ̑, сп҃се, до́брѣ сохранѝ.

Моли́твами честна́гѡ и҆ сла́внагѡ крⷭ҇ти́телѧ твоегѡ̀, прⷪ҇ро́ка, прⷣте́чи, хрⷭ҇тѐ сп҃се мо́й, рабы̑ твоѧ̑ сохранѝ.

Моли́твами сла́вныхъ а҆пⷭ҇лѡвъ и҆ мꙋ́ченикѡвъ, и҆ всѣ́хъ ст҃ы́хъ твои́хъ, твоѧ̑ ми́лѡсти лю́демъ твои̑мъ да́рꙋй.

Моли́твами сла́вныхъ безсре́брєникъ, бцⷣе, рабы̑ твоѧ̑ сохранѝ, ꙗ҆́кѡ предста́тельство мі́ра и҆ ᲂу҆твержде́нїе.

Сла́ва:

Ѻ҆ц҃а̀ и҆ сн҃а славосло́вимъ, и҆ дх҃а ст҃а́го, глаго́люще: трⷪ҇це ст҃а́ѧ, спасѝ дꙋ́шы на́шѧ.

И҆ ны́нѣ:

Неизрече́ннѡ въ послѣ̑днѧѧ заче́ншаѧ, и҆ ро́ждшаѧ созда́телѧ твоего̀, дв҃о, спаса́й тѧ̀ велича́ющыѧ.

Та́же:

Милосе́рдїѧ двє́ри ѿве́рзи на́мъ, бл҃гослове́ннаѧ бцⷣе, надѣ́ющїисѧ на тѧ̀ да не поги́бнемъ, но да и҆зба́вимсѧ тобо́ю ѿ бѣ́дъ: ты́ бо є҆сѝ спасе́нїе ро́да хрⷭ҇тїа́нскагѡ.

Та́же, Гдⷭ҇ꙋ помо́лимсѧ. Свѧще́нникъ: Ꙗ҆́кѡ свѧ́тъ є҆сѝ, бж҃е на́шъ: Ли́къ: А҆ми́нь. Та́же, настоѧ́щыѧ тропарѝ, гла́съ ѕ҃:

Ны́нѣ наста̀ вре́мѧ всѣ́хъ ѡ҆свѧща́ющее, и҆ пра́ведный на́съ жде́тъ сꙋдїѧ̀: но ѡ҆брати́сѧ, дꙋшѐ, къ покаѧ́нїю, ꙗ҆́кѡ блꙋдни́ца зовꙋ́щи со слеза́ми: гдⷭ҇и, поми́лꙋй мѧ̀.

Вода́ми ѡ҆дожди́вый, хрⷭ҇тѐ, и҆сто́чникъ и҆сцѣле́нїй, во всечестнѣ́мъ хра́мѣ дв҃ы дне́сь, твоегѡ̀ бл҃гослове́нїѧ ѡ҆кропле́нїемъ ѿгонѧ́еши недꙋ́ги немощствꙋ́ющихъ, врачꙋ̀ дꙋ́шъ и҆ тѣле́съ на́шихъ.

Дв҃а родила̀ є҆сѝ неискꙋсобра́чнаѧ, и҆ дв҃а пребыла̀ є҆сѝ, мт҃и безневѣ́стнаѧ, бцⷣе марі́е, хрⷭ҇та̀ бг҃а на́шего молѝ спасти́сѧ на́мъ.

Прест҃а́ѧ бцⷣе дв҃о, рꙋ́къ на́шихъ дѣла̀ и҆спра́ви, и҆ проще́нїе прегрѣше́нїй на́шихъ и҆спросѝ, внегда̀ пѣ́ти на́мъ а҆́гг҃льское пѣ́нїе:

Ст҃ы́й бж҃е, ст҃ы́й крѣ́пкїй, ст҃ы́й безсме́ртный, поми́лꙋй на́съ.

Три́жды.

И҆ по трист҃о́мъ дїа́конъ глаго́летъ: Во́нмемъ: Свѧще́нникъ: Ми́ръ всѣ̑мъ. Ли́къ: И҆ дꙋ́хови твоемꙋ̀. Чте́цъ, прокі́менъ, гла́съ г҃: Гдⷭ҇ь просвѣще́нїе моѐ и҆ сп҃си́тель мо́й, когѡ̀ ᲂу҆бою́сѧ; Сті́хъ: Гдⷭ҇ь защи́титель живота̀ моегѡ̀, ѿ когѡ̀ ᲂу҆страшꙋ́сѧ,

А҆пⷭ҇лъ къ є҆вре́ємъ, зача́ло т҃ѕ:

Бра́тїе, ст҃ѧ́й и҆ ѡ҆свѧща́емїи ѿ є҆ди́нагѡ всѝ, є҆ѧ́же ра́ди вины̀ не стыди́тсѧ бра́тїю нарица́ти и҆̀хъ, глаго́лѧ: Возвѣщꙋ̀ и҆́мѧ твоѐ бра́тїи мое́й, посредѣ̀ цр҃кве воспою́ тѧ. И҆ па́ки: а҆́зъ бꙋ́дꙋ надѣ́ѧсѧ на́нь. И҆ па́ки: сѐ а҆́зъ и҆ дѣ́ти, ꙗ҆̀же мѝ да́лъ є҆́сть бг҃ъ. Поне́же ᲂу҆́бѡ дѣ́ти приѡбщи́шасѧ пло́ти и҆ кро́ви, и҆ то́й прїи́скреннѣ приѡбщи́сѧ тѣ́хже, да сме́ртїю ᲂу҆праздни́тъ и҆мꙋ́щаго держа́вꙋ сме́рти, си́рѣчь дїа́вола: И҆ и҆зба́витъ си́хъ, є҆ли́цы стра́хомъ сме́рти чрезъ всѐ житїѐ пови́нни бѣ́ша рабо́тѣ. Не ѿ а҆́гг҃лъ ᲂу҆́бѡ когда̀ прїе́млетъ, но ѿ сѣ́мене а҆враа́мова прїе́млетъ: Ѿню́дꙋже до́лженъ бѣ̀ по всемꙋ̀ подо́битисѧ бра́тїи, да ми́лостивъ бꙋ́детъ и҆ вѣ́ренъ первосвѧще́нникъ ꙗ҆̀же къ бг҃ꙋ, во є҆́же ѡ҆чи́стити грѣхѝ людскі́ѧ. Въ не́мже бо пострада̀, са́мъ и҆скꙋше́нъ бы́въ, мо́жетъ и҆ и҆скꙋша́ємымъ помощѝ.

Свѧще́нникъ: Ми́ръ тѝ. А҆ллилꙋ́їа, гла́съ ѕ҃: Сті́хъ а҃: Ѿры́гнꙋ се́рдце моѐ сло́во бла́го. Сті́хъ в҃: Глаго́лю а҆́зъ дѣла̀ моѧ̑ царе́ви.

Є҆ѵⷢ҇лїе ѿ і҆ѡа́нна, зача́ло д҃ї.

Во вре́мѧ ѻ҆́но, взы́де і҆и҃съ во і҆ерⷭ҇ли́мъ. є҆́сть же бо і҆ерⷭ҇ли́мѣхъ на ѻ҆́вчей кꙋпѣ́ли, ꙗ҆́же глаго́летсѧ є҆вре́йски виѳесда̀, пѧ́ть притвѡ́ръ и҆мꙋ́щи. въ тѣ́хъ слежа́ше мно́жество болѧ́щихъ, слѣпы́хъ, хромы́хъ, сꙋхи́хъ, ча́ющихъ движе́нїѧ воды̀. а҆́гг҃лъ бо гдⷭ҇ень на всѧ́ко лѣ́то схожда́ше въ кꙋпѣ́ль, и҆ возмꙋща́ше во́дꙋ: и҆ и҆́же пе́рвѣе вла́зѧше по возмꙋще́нїи воды̀, здра́въ быва́ше, ꙗ҆цѣ́мъ же недꙋ́гомъ ѡ҆держи́мь быва́ше.

Та́же дїа́конъ є҆ктенїю̀:

Ми́ромъ гдⷭ҇ꙋ помо́лимсѧ.

Ѡ҆ свы́шнѣмъ ми́рѣ:

Ѡ҆ ми́рѣ всегѡ̀ мі́ра:

Ѡ҆ ст҃ѣ́мъ хра́мѣ се́мъ:

Ѡ҆ вели́комъ господи́нѣ и҆ ѻ҆тцѣ̀ на́шемъ:

Ѡ҆ бг҃охрани́мѣй странѣ̀ на́шей:

Ѡ҆ гра́дѣ се́мъ:

(А҆́ще въ монастырѣ̀ Ѡ҆ ст҃ѣ́й ѻ҆би́тели се́й:

Ѡ҆ благорастворе́нїи воздꙋ́хѡвъ:

Ѡ҆ пла́вающихъ, пꙋтеше́ствꙋющихъ:

Ѡ҆ є҆́же ѡ҆свѧти́тисѧ вода́мъ си̑мъ си́лою и҆ дѣ́йствїѧмъ, и҆ наи́тїемъ ст҃а́гѡ дх҃а, гдⷭ҇ꙋ помо́лимсѧ.

Ѡ҆ є҆́же снизходи́ти на во́ды сїѧ̑ ѡ҆чисти́тельномꙋ пресꙋ́щныѧ трⷪ҇цы дѣ́йствꙋ:

Ѡ҆ є҆́же бы́ти водѣ̀ се́й цѣли́тельной дꙋ́шъ и҆ тѣле́съ, и҆ всѧ́кїѧ сопроти́вныѧ си́лы ѿгна́тельной:

Ѡ҆ є҆́же низпосла́ти гдⷭ҇ꙋ бг҃ꙋ благослове́нїе і҆ѻрда́ново, и҆ ѡ҆свѧти́ти во́ды сїѧ̑:

Ѡ҆ всѣ́хъ тре́бꙋющихъ ѿ бг҃а по́мощи и҆ застꙋпле́нїѧ:

Ѡ҆ є҆́же просвѣти́тисѧ на́мъ просвѣще́нїемъ ра́зꙋма, є҆диносꙋ́щною трⷪ҇цею:

Ꙗ҆́кѡ да гдⷭ҇ь бг҃ъ на́шъ пока́жетъ ны̀ сы́ны и҆ наслѣ́дники црⷭ҇твїѧ своегѡ̀ воды̀ сеѧ̀ причаще́нїемъ же и҆ кропле́нїемъ.

Ѡ҆ и҆зба́витисѧ на́мъ ѿ всѧ́кїѧ ско́рби, гнѣ́ва и҆ нꙋ́жды:

Застꙋпѝ, спасѝ, поми́лꙋй:

Прест҃ꙋ́ю, пречⷭ҇тꙋю:

Ли́къ: Тебѣ̀, гдⷭ҇и.

Возгла́съ: Ꙗ҆́кѡ подоба́етъ тебѣ̀ всѧ́каѧ сла́ва:

Та́же моли́твꙋ сїю̀:

Гдⷭ҇и бж҃е на́шъ, вели́кїй въ совѣ́тѣ, и҆ ди́вный въ дѣ́лѣхъ, всеѧ̀ тва́ри содѣ́телю, хранѧ́й завѣ́тъ тво́й, и҆ ми́лость твою̀ лю́бѧщымъ тѧ̀, и҆ соблюда́ющымъ повелѣ̑нїѧ твоѧ̑, всѣ́хъ въ нꙋ́ждахъ ᲂу҆миле́нныѧ прїе́млѧй сле́зы: сегѡ́ бо ра́ди прише́лъ є҆сѝ въ ра́бїи зра́цѣ, не привидѣ́нїи на́съ ᲂу҆страша́ѧ, но здра́вїе тѣ́лꙋ и҆́стинное подава́ѧй, и҆ глаго́лѧй: сѐ здра́въ бы́лъ є҆сѝ, ктомꙋ̀ не согрѣша́й, но и҆ ѿ бре́нїѧ здра́вы ѻ҆́чи содѣ́лалъ є҆сѝ, и҆ ᲂу҆мы́тисѧ повелѣ́въ, свѣ́тꙋ всели́тисѧ сотвори́лъ є҆сѝ сло́вомъ. сꙋпроти́вныхъ страсте́й во́лны смꙋща́ѧй, и҆ житїѧ̀ сегѡ̀ сла́ное мо́ре и҆зсꙋша́ѧй, и҆ тѧжелонѡ́сныѧ сласте́й ᲂу҆кроща́ѧй во́лны. са́мъ, чл҃вѣколю́бче цр҃ю̀, да́вый на́мъ снѣгосвѣ́тлою ѡ҆дѣ́ѧтисѧ ѻ҆де́ждою, ѿ воды́ же и҆ дх҃а, и҆ прича́стїемъ же воды̀ сеѧ̀, и҆ ѡ҆кропле́нїемъ твоѐ бл҃гослове́нїе на́мъ низпослѝ, скве́рнꙋ страсте́й ѡ҆мыва́ющее. є҆́й, мо́лимсѧ, посѣтѝ на́шꙋ, бл҃же, не́мощь, и҆ и҆сцѣлѝ на́шѧ недꙋ́ги дꙋшє́вныѧ же и҆ тѣлє́сныѧ, ми́лостїю твое́ю, моли́твами всепречⷭ҇тыѧ, пребл҃гослове́нныѧ влⷣчцы на́шеѧ, бцⷣы и҆ приснодв҃ы марі́и: си́лою честна́гѡ и҆ животворѧ́щагѡ крⷭ҇та̀: предста́тельствы честны́хъ нбⷭ҇ныхъ си́лъ безпло́тныхъ: честна́гѡ, сла́внагѡ прⷪ҇ро́ка, прⷣте́чи и҆ крⷭ҇ти́телѧ і҆ѡа́нна: ст҃ы́хъ сла́вныхъ и҆ всехва́льныхъ а҆пⷭ҇лъ: прпⷣбныхъ и҆ бг҃оно́сныхъ ѻ҆тє́цъ на́шихъ: и҆̀же во ст҃ы́хъ ѻ҆тє́цъ на́шихъ, вели́кихъ і҆ера́рхѡвъ и҆ вселе́нскихъ ᲂу҆чи́телей, васі́лїа вели́кагѡ, григо́рїа бг҃осло́ва, и҆ і҆ѡа́нна златоꙋ́стагѡ: и҆̀же во ст҃ы́хъ ѻ҆тє́цъ на́шихъ, а҆ѳана́сїа и҆ кѷрі́лла, патрїа́рхѡвъ а҆леѯандрі́йскихъ: и҆́же во ст҃ы́хъ ѻ҆тца̀ на́шегѡ спѷрїдѡ́на, трїмѷфꙋ́нтскагѡ чꙋдотво́рца: и҆́же во ст҃ы́хъ ѻ҆тца̀ на́шегѡ нїкола́а а҆рхїепі́скопа, мѷрлѷкі́йскагѡ чꙋдотво́рца. и҆̀же во ст҃ы́хъ ѻ҆тє́цъ на́шихъ, меѳо́дїа и҆ кѷрі́лла ᲂу҆чи́телей слове́нскихъ; ст҃а́гѡ равноапо́стольнагѡ вели́кагѡ кнѧ́зѧ влади́мїра и҆ ст҃ы́ѧ равноапо́стольныѧ кнѧги́ни ѻ҆́льги: всеѧ̀ рѡссі́и чꙋдотво́рцѡвъ, петра̀, а҆леѯі́а, і҆ѡ́ны и҆ фїлі́ппа, є҆рмоге́на и҆ і҆нноке́нтїа: ст҃а́гѡ и҆ сла́внагѡ великомч҃ника геѡ́ргїа побѣдоно́сца: ст҃а́гѡ и҆ сла́внагѡ великомч҃ника дими́трїа мѷроточи́вагѡ: ст҃ы́хъ и҆ добропобѣ́дныхъ мч҃никѡвъ: прпⷣбныхъ и҆ бг҃оно́сныхъ ѻ҆тє́цъ на́шихъ: ст҃ы́хъ и҆ првⷣныхъ бг҃оѻц҃ъ і҆ѡакі́ма и҆ а҆́нны: ст҃ы́хъ сла́вныхъ чꙋдотво́рцѡвъ и҆ безсре́бреникѡвъ, космы̀ и҆ дамїа́на, кѵ́ра и҆ і҆ѡа́нна, пантелеи́мона и҆ є҆рмола́а, самѱѡ́на и҆ дїоми́да, мѡкі́а и҆ а҆нїки́ты, ѳалале́а и҆ трѵ́фѡна: ст҃ы́хъ седмѝ мч҃никъ маккавє́й, а҆ві́ма, а҆нтѡні́на, гꙋ́рїа, є҆леаза́ра, є҆ѵсевѡ́на, а҆лі́ма и҆ марке́лла, и҆ ма́тере и҆́хъ соломѡні́и, и҆ ᲂу҆чи́телѧ и҆́хъ ст҃а́гѡ мч҃ника є҆леаза́ра, и҆́хже и҆ па́мѧть соверша́емъ, и҆ всѣ́хъ ст҃ы́хъ твои́хъ.

Спасѝ, гдⷭ҇и, и҆ поми́лꙋй вели́каго господи́на и҆ ѻ҆тца̀ на́шего (и҆́мⷬ҇къ) свѧтѣ́йшаго патрїа́рха моско́вскаго и҆ всеѧ̀ рꙋсѝ, и҆ преѡсвѧще́ннѣйшаго є҆пі́скопа (и҆́мⷬ҇къ, є҆гѡ́же є҆́сть ѻ҆́бласть), да́рꙋй и҆̀мъ дꙋше́вное и҆ тѣле́сное здра́вїе, и҆ рабо́тномꙋ тебѣ̀, семꙋ̀ хрⷭ҇тїа́нскомꙋ жи́тельствꙋ во все́мъ ми́лостивъ бꙋ́ди. Помѧнѝ, гдⷭ҇и, всѧ́кое є҆пі́скопство правосла́вныхъ, пра́во пра́вѧщихъ сло́во твоеѧ̀ и҆́стины: и҆ ве́сь свѧще́нническїй и҆ мона́шескїй чи́нъ, и҆ спасе́нїе и҆́хъ. Помѧнѝ, гдⷭ҇и, ненави́дѧщихъ и҆ лю́бѧщихъ на́съ, слꙋжа́щихъ бра́тїй на́шихъ, предстоѧ́щихъ, и҆ благосло́вною вино́ю ѿше́дшихъ, и҆ заповѣ́давшихъ на́мъ недостѡ́йнымъ моли́тисѧ ѡ҆ ни́хъ. Помѧнѝ, гдⷭ҇и, въ плѣне́нїи и҆ ско́рбехъ сꙋ́щихъ бра́тїй на́шихъ, и҆ поми́лꙋй и҆́хъ по вели́цѣй ми́лости твое́й, всѧ́кїѧ нꙋ́жды и҆збавлѧ́ѧй: ꙗ҆́кѡ ты̀ є҆сѝ и҆сто́чникъ и҆сцѣле́нїй, хрⷭ҇тѐ бж҃е на́шъ, и҆ тебѣ̀ сла́вꙋ возсыла́емъ, со безнача́льнымъ твои́мъ ѻ҆ц҃е́мъ, и҆ съ прест҃ы́мъ, и҆ бл҃ги́мъ, и҆ животворѧ́щимъ твои́мъ дх҃омъ, ны́нѣ и҆ при́снѡ, и҆ во вѣ́ки вѣкѡ́въ.

Ли́къ: А҆ми́нь. Свѧще́нникъ: Ми́ръ всѣ̑мъ. Ли́къ: И҆ дꙋ́хови твоемꙋ̀. Дїа́конъ: Главы̑ ва́шѧ гдⷭ҇еви приклони́те. Ли́къ: Тебѣ̀, гдⷭ҇и.

Свѧще́нникъ же моли́твꙋ та́йнѡ:

Приклонѝ, гдⷭ҇и, ᲂу҆́хо твоѐ, и҆ ᲂу҆слы́ши ны̀, и҆́же во і҆ѻрда́нѣ крⷭ҇ти́тисѧ и҆зво́ливый, и҆ ѡ҆свѧти́вый во́ды, благословѝ всѣ́хъ на́съ, и҆́же приклоне́нїемъ своеѧ̀ вы́и, назна́менꙋющихъ рабо́тное воѡбраже́нїе: и҆ сподо́би на́съ и҆спо́лнитисѧ ѡ҆свѧще́нїѧ твоегѡ̀ причаще́нїемъ воды̀ сеѧ̀: и҆ да бꙋ́детъ на́мъ, гдⷭ҇и, во здра́вїе дꙋшѝ и҆ тѣ́ла.

Возгла́съ:

Ты́ бо є҆сѝ ѡ҆свѧще́нїе на́ше, и҆ тебѣ̀ сла́вꙋ, и҆ благодаре́нїе, и҆ поклоне́нїе возсыла́емъ, со безнача́льнымъ твои́мъ ѻ҆ц҃е́мъ, и҆ прест҃ы́мъ, и҆ бл҃ги́мъ, и҆ животворѧ́щимъ твои́мъ дх҃омъ, ны́нѣ и҆ при́снѡ, и҆ во вѣ́ки вѣкѡ́въ.

Ли́къ: А҆ми́нь.

Та́же взе́мъ честны́й крⷭ҇тъ, благословлѧ́етъ во́ды три́жды, крⷭ҇тоѻбра́знѡ низводѧ̀, и҆ возводѧ̀ и҆̀ пра́вѡ: и҆ поѧ̀ настоѧ́щїй тропа́рь, гла́съ а҃:

Спасѝ, гдⷭ҇и, лю́ди твоѧ̑, и҆ благословѝ достоѧ́нїе твоѐ, побѣ̑ды на сопроти̑вныѧ да́рꙋѧ, и҆ твоѐ сохранѧ́ѧ кресто́мъ твои́мъ жи́тельство.

Три́жды.

И҆ посе́мъ пою́тъ тропа́рь се́й, гла́съ в҃:

Твои́хъ дарѡ́въ досто́йны на́съ сотворѝ, бцⷣе дв҃о, презира́ющи согрѣшє́нїѧ на̑ша, и҆ подаю́щи и҆сцѣлє́нїѧ вѣ́рою прїе́млющымъ бл҃гослове́нїе твоѐ, пречⷭ҇таѧ.

Та́же цѣлꙋ́етъ і҆ере́й честны́й крⷭ҇тъ, та́кожде и҆ всѝ лю́дїе и҆ кропи́тъ всѣ́хъ свѧще́нною водо́ю, ѻ҆лта́рь же и҆ цр҃ковь всю̀: лю́дїе же пою́тъ настоѧ́щїй тропа́рь, гла́съ д҃:

И҆сто́чникъ и҆сцѣле́нїй и҆мꙋ́ще, ст҃і́и безсре́бреницы, и҆сцѣлє́нїѧ подава́ете всѣ̑мъ тре́бꙋющымъ, ꙗ҆́кѡ преве́лїихъ дарова́нїй сподо́бльшїисѧ ѿ приснотекꙋ́щагѡ и҆сто́чника сп҃са на́шегѡ. глаго́летъ бо къ ва́мъ гдⷭ҇ь, ꙗ҆́кѡ є҆диноревни́телємъ а҆пⷭ҇льскимъ: сѐ да́хъ ва́мъ вла́сть на дꙋ́хи нечи̑стыѧ, ꙗ҆́коже тѣ́хъ и҆згони́ти, и҆ цѣли́ти всѧ́кїй недꙋ́гъ и҆ всѧ́кꙋю ꙗ҆́зю: тѣ́мже въ повелѣ́нїихъ є҆гѡ̀ до́брѣ жи́тельствовавше, тꙋ́не прїѧ́сте, тꙋ́не подава́ете, и҆сцѣлѧ́юще стра̑сти дꙋ́шъ и҆ тѣле́съ на́шихъ.

При́зри на молє́нїѧ твои́хъ ра̑бъ, всенепоро́чнаѧ, ᲂу҆толѧ́ющи лю̑таѧ на ны̀ воста̑нїѧ, всѧ́кїѧ ско́рби на́съ и҆змѣнѧ́ющи: тѧ́ бо є҆ди́нꙋ тве́рдое и҆ и҆звѣ́стное ᲂу҆твержде́нїе и҆́мамы, и҆ твоѐ предста́тельство стѧжа́хомъ, да не постыди́мсѧ, влⷣчце, тѧ̀ призыва́ющїи. потщи́сѧ на ᲂу҆моле́нїе тебѣ̀ вѣ́рнѡ вопїю́щихъ: ра́дꙋйсѧ, влⷣчце, всѣ́хъ по́моще, ра́досте и҆ покро́ве, и҆ сп҃се́нїе дꙋ́шъ на́шихъ.

Влⷣчце, прїимѝ моли̑твы рабѡ́въ твои́хъ, и҆ и҆зба́ви на́съ ѿ всѧ́кїѧ нꙋ́жды и҆ печа́ли.

По кропле́нїи же є҆ктенїа̀: Поми́лꙋй на́съ, бж҃е: Є҆щѐ мо́лимсѧ ѡ҆ є҆́же сохрани́тисѧ ст҃ѣ́й ѻ҆би́тели се́й. Гдⷭ҇и поми́лꙋй, м҃. І҆ере́й: Оу҆слы́ши ны̀, бж҃е, сп҃си́телю на́шъ: Ли́къ: А҆ми́нь. І҆ере́й: Ми́ръ всѣ̑мъ. Ли́къ: И҆ дꙋ́хови твоемꙋ̀. Дїа́конъ: Главы̑ ва́шѧ гдⷭ҇еви приклони́те. Ли́къ: Тебѣ̀, гдⷭ҇и. І҆ере́й же глаго́летъ моли́твꙋ велегла́снѡ: Влⷣко многоми́лостиве, гдⷭ҇и і҆и҃се хрⷭ҇тѐ бж҃е на́шъ: И҆ по моли́твѣ, ли́къ: А҆ми́нь. И҆ ѿпꙋ́стъ.

[Зрѝ] А҆ и҆дѣ́же чи́нъ ѡ҆свѧще́нїѧ воды̀ соверша́етсѧ на ᲂу҆́трени, пое́мъ си́це: По славосло́вїи и҆ по трист҃о́мъ и҆ по тропарѣ̀, Спасѝ, гдⷭ҇и, лю́ди твоѧ̑: пою́тсѧ тропарѝ: Є҆́же ра́дꙋйсѧ: И҆ про́чее по рѧ́дꙋ свѧще́нїе воды̀, ꙗ҆́кѡ ѻ҆бы́чай. По ѡ҆свѧще́нїи же воды̀ и҆ по тропарѣ́хъ: И҆сто́чникъ и҆сцѣле́нїй: и҆ При́зри на молє́нїѧ: и҆ Влⷣчце, прїимѝ: твори́мъ и҆ поклоне́нїе честно́мꙋ крⷭ҇тꙋ̀, ꙗ҆́кѡ предписа́сѧ. На часѣ́хъ тропа́рь крⷭ҇та̀: Сла́ва, ст҃ы́хъ: И҆ ны́нѣ, бг҃оро́диченъ часѡ́въ. По трист҃о́мъ кондакѝ премѣнѧ́емъ. На лїтꙋргі́и Бл҃жє́нна ѿ канѡ́на крⷭ҇та̀, пѣ́снь г҃-ѧ, на д҃: и҆ свѧты́хъ пѣ́снь ѕ҃-ѧ, на д҃. По вхо́дѣ тропа́рь крⷭ҇та̀ и҆ мꙋ́ченикѡвъ: Сла́ва, конда́къ мꙋ́ченикѡвъ: И҆ ны́нѣ, крⷭ҇та̀. Трист҃о́е. Прокі́менъ крⷭ҇та̀, гла́съ ѕ҃: Спасѝ, гдⷭ҇и, лю́ди твоѧ̑, и҆ бл҃гословѝ достоѧ́нїе твоѐ. Сті́хъ: Къ тебѣ̀, гдⷭ҇и, воззовꙋ̀, бж҃е мо́й: Дрꙋгі́й мꙋ́ченикѡвъ, гла́съ д҃: Ст҃ы̑мъ, и҆̀же сꙋ́ть на землѝ є҆гѡ̀, ᲂу҆дивѝ гдⷭ҇ь всѧ̑ хотѣ̑нїѧ своѧ̑ въ ни́хъ. А҆пⷭ҇лъ, крⷭ҇та̀, къ корі́нѳѧнѡмъ, зача́ло рк҃є: ст҃ы́хъ, къ є҆вре́ємъ, зача́ло т҃л. А҆ллилꙋ́їа, гла́съ д҃: Помѧнѝ со́нмъ тво́й, є҆гѡ́же стѧжа́лъ є҆сѝ и҆спе́рва. Сті́хъ: Бг҃ъ же цр҃ь на́шъ пре́жде вѣ́ка: И҆ ст҃ы́хъ: Воззва́ша првⷣнїи, и҆ гдⷭ҇ь ᲂу҆слы́ша и҆̀хъ. Є҆ѵⷢ҇лїе, крⷭ҇та̀, і҆ѡа́нна, зача́ло ѯ҃: И҆ ст҃ы́хъ, матѳе́а, зача́ло л҃и. Прича́стенъ крⷭ҇та̀: Зна́менасѧ на на́съ свѣ́тъ лица̀ твоегѡ̀, гдⷭ҇и. И҆ ст҃ы́хъ: Ра́дꙋйтесѧ, пра́веднїи ѡ҆ гдⷭ҇ѣ: Рѧ́дъ же вычита́емъ напре́дъ, и҆лѝ подъ зача́ло.

[Зрѝ] А҆́ще же а҃-й де́нь а҆́ѵгꙋста слꙋчи́тсѧ въ недѣ́лю:

Въ сꙋббѡ́тꙋ ве́чера, на ма́лѣй вече́рни стїхи̑ры воскрⷭ҇ны, и҆ бцⷣы, по ѻ҆бы́чаю. На вели́цѣй вече́рни, по каѳі́смѣ, на Гдⷭ҇и, воззва́хъ: стїхи̑ры воскрⷭ҇ны, г҃: и҆ ꙾восто́ченъ꙾ ¹, а҃: и҆ крⷭ҇та̀, г҃: и҆ мꙋ́ченикѡвъ, г҃: Сла́ва, крⷭ҇та̀: И҆ ны́нѣ, бг҃оро́диченъ, а҃-й, гла́са. На лїті́и стїхи́ра хра́ма, и҆ мч҃никѡвъ хвали́тныѧ: Сла́ва, мꙋ́ченикѡвъ: И҆ ны́нѣ, бг҃оро́диченъ. На стїхо́внѣ ѻ҆ктѡ́иха воскрⷭ҇ны, Сла́ва, мч҃никѡвъ: И҆ ны́нѣ, крⷭ҇та̀. На благослове́нїи хлѣ́бѡвъ, тропа́рь, Бцⷣе дв҃о: два́жды, и҆ крⷭ҇та̀, є҆ди́ножды. Та́же, Бꙋ́ди и҆́мѧ гдⷭ҇не: и҆ про́чее.

[Зрѝ] А҆́ще ли нѣ́сть бдѣ́нїѧ, по Ны́нѣ ѿпꙋща́еши: тропа́рь воскрⷭ҇нъ: Сла́ва, ст҃ы́хъ: И҆ ны́нѣ, крⷭ҇та̀. На повече́рїи, по Досто́йнѣ, конда́къ крⷭ҇та̀. На ᲂу҆́трени, на Бг҃ъ гдⷭ҇ь, тропа́рь воскрⷭ҇нъ, два́жды. Сла́ва, мꙋ́ченикѡвъ: И҆ ны́нѣ, крⷭ҇та̀. Канѡ́нъ воскрⷭ҇нъ со і҆рмосо́мъ на д҃, и҆ бцⷣы на два̀: и҆ крⷭ҇та̀ на д҃: и҆ мꙋ́ченикѡвъ на д҃. Катава́сїа: Крⷭ҇тъ начерта́въ: По г҃-й пѣ́сни конда́къ мꙋ́ченикѡвъ и҆ сѣда́ленъ, два́жды. Сла́ва, и҆ ны́нѣ, крⷭ҇та̀. По ѕ҃-й пѣ́сни конда́къ крⷭ҇та̀, и҆ і҆́косъ. Свѣти́ленъ воскрⷭ҇нъ: Сла́ва мч҃никѡвъ: И҆ ны́нѣ, крⷭ҇та̀. На хвали́техъ стїхи̑ры воскрⷭ҇ны, д҃: и҆ крⷭ҇та̀, со сла́внымъ, д҃, со стїхѝ свои́ми: Возноси́те гдⷭ҇а бг҃а на́шего: Сті́хъ: Бг҃ъ же цр҃ь на́шъ: Сла́ва, стїхи́ра є҆ѵⷢ҇льскаѧ. И҆ ны́нѣ, Пребл҃гослове́нна є҆сѝ: Славосло́вїе вели́кое. Тропа́рь воскрⷭ҇нъ то́чїю. И҆ быва́етъ водоѡсвѧще́нїе, и҆ поклоне́нїе крⷭ҇тꙋ̀, и҆ про́чее, ꙗ҆́коже вы́ше рече́сѧ. На лїтꙋргі́и, блажє́нна воскрⷭ҇на, на д҃: и҆ крⷭ҇та̀, пѣ́снь г҃-ѧ, на д҃: и҆ мꙋ́ченикѡвъ, пѣ́снь ѕ҃, на д҃. По вхо́дѣ тропа́рь воскрⷭ҇нъ, и҆ крⷭ҇та̀, и҆ мꙋ́ченикѡвъ. Та́же, конда́къ воскрⷭ҇нъ: Сла́ва, мꙋ́ченикѡвъ: И҆ ны́нѣ, крⷭ҇та̀. Прокі́менъ, А҆ллилꙋ́їа, и҆ прича́стенъ крⷭ҇та̀, и҆ мч҃никѡвъ. А҆пⷭ҇лъ и҆ є҆ѵⷢ҇лїе рѧдово́е, и҆ крⷭ҇та̀, и҆ мч҃никѡвъ.

А҆́ще хра́мъ всеми́лостивагѡ сп҃са.

Ве́черъ, Блаже́нъ мꙋ́жъ, пе́рвый а҆нтїфѡ́нъ.

На Гдⷭ҇и, воззва́хъ, поста́вимъ стїхѡ́въ, и҃. И҆ пое́мъ стїхи̑ры пра́здника д҃, крⷭ҇та̀ д҃.

Стїхи̑ры всеми́лостивагѡ сп҃са, гла́съ д҃. Поⷣ: Да́лъ є҆сѝ зна́менїе:

Гра́дъ тво́й пресвѣ́тлѡ чти́мъ, ꙳ всеми́лостиве гдⷭ҇и, пра́зднество твоѐ ве́селѡ торжествꙋ́юще. ꙳ ты̀ ᲂу҆́бѡ а҆пⷭ҇льскимъ ли́комъ ᲂу҆ча̀ ны̀ бжⷭ҇твеннѡ, ꙳ мы́ же со стра́хомъ и҆ ра́достїю зрѧ́ще къ тебѣ̀, ꙳ про́симъ неизглаго́ланныѧ пи́щи: ꙳ ты́ бо са́мъ живо́тное пита́нїе, сше́дый съ небесѐ, ꙳ і҆и҃се всеси́льне, ꙳ сп҃се дꙋ́шъ на́шихъ.

Ѻ҆те́ческихъ не ѡ҆ста́вль нѣ́дръ, ꙳ ꙗ҆́кѡ всеми́лостивъ, со ᲂу҆ч҃никѝ водворѧ́ѧсѧ: ты́ бо є҆сѝ живо́тный хлѣ́бъ, ѿ негѡ́же мі́ръ причаща́етсѧ, ꙳ и҆ пребыва́етъ на́мъ пи́ща неѡскꙋдѣва́ема, ꙳ причаще́нїемъ же ѡ҆живлѧ́етъ на нетлѣ́нїе человѣ́чество, ꙳ сме́ртныѧ и҆змѣни́въ ѕло́бы, ꙳ і҆и҃се всеми́лостиве, ꙳ сп҃се дꙋ́шъ на́шихъ.

Хва́лимъ твоѐ пра́зднество вѣ́рнїи, всеми́лостиве хрⷭ҇тѐ, ꙳ ꙗ҆́кѡ ѿ ѻ҆ц҃а̀ прише́лъ є҆сѝ спасти́ ны. ꙳ тѣ́мже пое́мъ тѧ̀ пѣ́сньми благода́рными, ꙳ ꙗ҆́кѡ ты̀ ѡ҆бнажи́лъ є҆сѝ на́мъ бг҃олѣ́пнѡ бжⷭ҇твеннꙋю твою̀ си́лꙋ, ꙳ пресла́вно чꙋ́до творѧ̀, ꙳ на спасе́нїе на́мъ благотворѧ́щымъ. ꙳ тѣ́мже сла́вимъ, милосе́рде, смотре́нїе твоѐ, ꙳ і҆и҃се всемогі́й, ꙳ сп҃се дꙋ́шъ на́шихъ.

И҆́ны стїхи̑ры крⷭ҇та̀, гла́съ то́йже. Подо́бенъ: Зва́нный свы́ше:

Дне́сь ра́дꙋетсѧ вѣ́рныхъ мно́жество бжⷭ҇твенное: ꙳ ꙗ҆влѧ́етсѧ бо нбⷭ҇ный кре́стъ концє́мъ, ꙳ ѡ҆сїѧва́етъ тве́рдь свѣ́томъ непристꙋ́пнымъ, ꙳ воздꙋ́хъ ѡ҆зарѧ́етъ, ꙳ и҆ землѝ лицѐ ᲂу҆краша́етъ. пое́тъ бжⷭ҇твенными пѣ́сньми цр҃ковь хрⷭ҇то́ва, ꙳ слꙋ́житъ почита́ющи, ꙳ свы́ше ю҆̀ соблюда́ющїй ꙳ крⷭ҇тъ бжⷭ҇твенный и҆ пречꙋ́дный. ꙳ є҆гѡ́же си́лою ᲂу҆крѣплѧ́еми, влⷣцѣ пристꙋ́пимъ зовꙋ́ще: ᲂу҆мирѝ мі́ръ, и҆ просвѣтѝ дꙋ́шы на́шѧ.

Да ра́дꙋетсѧ тва́рь и҆ и҆гра́етъ: ꙳ дне́сь бо ѡ҆блиста̀ крⷭ҇тъ въ концѣ́хъ съ нб҃сѐ, ꙳ земна̑ѧ просвѣща́ѧ, ꙳ и҆ совокꙋ́плены показа̀ расточє́ныѧ. ꙳ дне́сь ликꙋ́ютъ съ ли́ки а҆́гг҃льскими человѣ́цы, ꙳ и҆́бо бранѧ́щее средогра́дїе ꙳ кресто́мъ разоре́но, ꙳ во є҆ди́но всѧ̑ ꙗ҆́вѣ совокꙋпѝ. ꙳ тѣ́мъ предсїѧ́ѧ па́че со́лнца, ꙳ всю̀ тва́рь просвѣща́етъ бл҃года́тїю, ꙳ и҆ ᲂу҆ѧснѧ́етъ и҆ спаса́етъ ꙳ вѣ́рнѡ того̀ чтꙋ́щыѧ.

Па́че со́лнечныѧ зарѝ ꙳ хотѧ́й мі́рови ꙗ҆́коже ски́птръ честны́й, ꙳ цр҃ѧ̀ хрⷭ҇та̀, ꙳ кончи́нꙋ показа́ти, ꙳ крⷭ҇тъ бжⷭ҇твенный сѐ предсїѧ́етъ ꙗ҆́снѡ въ концѣ́хъ. ꙳ се́й возведѐ и҆зъ а҆́да ро́дъ человѣ́чь, ꙳ а҆́да вельмѝ плѣни́въ, ꙳ врага̀ низложи́въ, ꙳ де́мѡнѡвъ горды́ню до конца̀ погꙋбѝ. ꙳ ны́нѣ же проѧвлѧ́етъ воскрⷭ҇нїе сп҃сово, ꙳ и҆ спаса́етъ зовꙋ́щыѧ. ᲂу҆мирѝ мі́ръ и҆ просвѣтѝ дꙋ́шы на́шѧ.

Сла́ва, гла́съ то́йже, самогла́сенъ:

Живонача́льный и҆сто́чникъ, всеми́лостивый хрⷭ҇то́съ сп҃съ на́шъ, и҆́же ѿ дв҃и́ческїѧ твоеѧ̀ роди́всѧ ᲂу҆тро́бы пло́тски, цр҃ковь и҆ две́рь нбⷭ҇нꙋю показа̀ тебѐ хва́лѧщымъ. ты́ же не преста́й молѧ́щисѧ къ немꙋ̀ ѡ҆ пою́щихъ и҆ хва́лѧщихъ тѧ̀, моли́твами твои́ми и҆ ми́лостїю ᲂу҆твержда́ющи ѻ҆те́чествїе и҆ вѣ́рное во́инство на́ше.

И҆ ны́нѣ, крⷭ҇та̀, гла́съ и҃. І҆ѡа́нна мона́ха:

Є҆го́же дре́вле мѡѷсе́й проѡбразова́въ собо́ю, а҆мали́ка низложи́въ побѣдѝ: и҆ дв҃дъ пѣснопѣ́вецъ, подно́жїю твоемꙋ̀, вопїѧ̀, кла́нѧтисѧ повелѣва́ше, честно́мꙋ крⷭ҇тꙋ̀ твоемꙋ̀, хрⷭ҇тѐ бж҃е, дне́сь грѣ́шнїи кла́нѧемсѧ, ᲂу҆стна́ми недосто́йными, тѧ̀ и҆зво́лившаго пригвозди́тисѧ на не́мъ, воспѣва́юще мо́лимсѧ: гдⷭ҇и, съ разбо́йникомъ црⷭ҇твїѧ твоегѡ̀ сподо́би на́съ.

Вхо́дъ. Прокі́менъ днѐ. Чтє́нїѧ трѝ.

При́тчей чте́нїе.

[Глава̀ г҃] Сы́не, не пренебрега́й наказа́нїѧ гдⷭ҇нѧ: нижѐ ѡ҆слабѣва́й ѿ негѡ̀ ѡ҆блича́емый. Є҆го́же бо лю́битъ гдⷭ҇ь, наказꙋ́етъ: бїе́тъ же всѧ́каго сы́на, є҆го́же прїе́млетъ. Блаже́нъ человѣ́къ, и҆́же ѡ҆брѣ́те премꙋ́дрость, и҆ сме́ртенъ, и҆́же ᲂу҆вѣ́дѣ ра́зꙋмъ. Лꙋ́чше бо сїю̀ кꙋпова́ти, не́жели зла́та и҆ сребра̀ сокрѡ́вища. Честнѣ́йшаѧ же є҆́сть ка́менїй многоцѣ́нныхъ. Не сопротивлѧ́етсѧ є҆́й ничто́же лꙋка́вое, благоразꙋ́мна є҆́сть всѣ̑мъ лю́бѧщымъ ю҆̀: всѧ́кое же честно́е недосто́йно є҆ѧ̀ є҆́сть. Долгота́ бо житїѧ̀, и҆ лѣ̑та жи́зни въ десни́цѣ є҆ѧ̀: въ шꙋ́ицѣ же є҆ѧ̀ бога́тство и҆ сла́ва: ѿ ᲂу҆́стъ є҆ѧ̀ и҆схо́дитъ пра́вда, зако́нъ же и҆ ми́лость на ѧ҆зы́цѣ но́ситъ. Пꙋтїѐ є҆ѧ̀, пꙋтїѐ добры̑, и҆ всѧ̑ стєзѝ є҆ѧ̀ съ ми́ромъ. Дре́во живота̀ є҆́сть всѣ̑мъ держа́щымсѧ є҆ѧ̀, и҆ восклонѧ́ющымсѧ на ню̀, ꙗ҆́кѡ на гдⷭ҇а, тверда̀.

Прⷪ҇ро́чества и҆са́їина чте́нїе.

[Глава̀ ѯ҃] Та́кѡ глаго́летъ гдⷭ҇ь: ѿве́рзꙋтсѧ врата̀ твоѧ̑, і҆ерⷭ҇ли́ме, вы́нꙋ де́нь и҆ но́щь, и҆ не затворѧ́тсѧ, є҆́же ввестѝ къ тебѣ̀ си́лꙋ ꙗ҆зы́кѡвъ, и҆ царѝ и҆́хъ ведѡ́мыѧ. Ꙗ҆зы́цы бо и҆ ца́рїе, и҆̀же тебѣ̀ не порабо́таютъ, поги́бнꙋтъ: и҆ ꙗ҆зы́цы запꙋстѣ́нїемъ запꙋстѣ́ютъ. И҆ сла́ва лїва́нова къ тебѣ̀ прїи́детъ, въ кѷпарі́сѣ и҆ пе́ѵкѣ и҆ ке́дрѣ, вкꙋ́пѣ просла́вити мѣ́сто ст҃о́е моѐ, и҆ мѣ́сто но́гъ мои́хъ просла́влю. И҆ по́йдꙋтъ къ тебѣ̀ боѧ́щїисѧ, сы́нове смири́вшихъ тѧ̀, и҆ прогнѣ́вавшихъ тѧ̀: и҆ покло́нѧтсѧ слѣда́мъ но́гъ твои́хъ всѝ прогнѣ́вавшїи тѧ̀, и҆ нарече́шисѧ гра́дъ гдⷭ҇ень сїѡ́нъ ст҃а́гѡ і҆и҃лева. За є҆́же бы́ти тебѣ̀ ѡ҆ста́вленꙋ и҆ возненави́дѣнꙋ, и҆ не бѣ̀ помога́ѧй тебѣ̀: и҆ положꙋ́ тѧ въ ра́дость вѣ́чнꙋю, весе́лїе родѡ́мъ родѡ́въ: И҆ и҆ссе́ши млеко̀ ꙗ҆зы́кѡвъ, и҆ бога́тство царе́й снѣ́си, и҆ разꙋмѣ́еши, ꙗ҆́кѡ а҆́зъ гдⷭ҇ь спаса́ѧй тѧ̀, и҆ и҆збавлѧ́ѧй тѧ̀ бг҃ъ і҆и҃левъ.

При́тчей чте́нїе.

[Глава̀ ѳ҃] Премꙋ́дрость созда̀ себѣ̀ до́мъ, и҆ ᲂу҆твердѝ столпѡ́въ се́дмь. Закла̀ своѧ̑ же́ртвєннаѧ, и҆ растворѝ въ ча́ши свое́й вїно̀, и҆ ᲂу҆гото́ва свою̀ трапе́зꙋ. Посла̀ своѧ̑ рабы̑ созыва́ющи съ высо́кимъ проповѣ́данїемъ на ча́шꙋ, глаго́лющи: и҆́же є҆́сть безꙋ́менъ, да ᲂу҆клони́тсѧ ко мнѣ̀, и҆ тре́бꙋющымъ ᲂу҆ма̀ речѐ: прїиди́те, ꙗ҆ди́те мо́й хлѣ́бъ, и҆ пі́йте вїно̀, є҆́же раствори́хъ ва́мъ. Ѡ҆ста́вите безꙋ́мїе, и҆ жи́ви бꙋ́дете: и҆ взыщи́те ра́зꙋма, да поживетѐ, и҆ и҆спра́вите ра́зꙋмъ въ вѣ́дѣнїи. Наказꙋ́ѧй ѕлы̑ѧ, прїи́метъ себѣ̀ безче́стїе: ѡ҆блича́ѧй же нечести́ваго, ѡ҆поро́читъ себѐ: ѡ҆бличе́нїе бо нечести́вомꙋ, ра̑ны є҆мꙋ̀. Не ѡ҆блича́й ѕлы́хъ, да не возненави́дѧтъ тебє̀, ѡ҆блича́й премꙋ́дра, и҆ возлю́битъ тѧ̀. Да́ждь премꙋ́дромꙋ винꙋ̀, и҆ премꙋ́дрѣйшїй бꙋ́детъ: сказꙋ́й пра́ведномꙋ, и҆ приложи́тъ прїима́ти. Нача́ло премꙋ́дрости, стра́хъ гдⷭ҇ень, и҆ совѣ́тъ ст҃ы́хъ, ра́зꙋмъ: разꙋмѣ́ти бо зако́нъ, по́мысла є҆́сть блага́гѡ: си́мъ бо ѻ҆́бразомъ мно́гое поживе́ши вре́мѧ, и҆ приложа́тсѧ тебѣ̀ лѣ̑та живота̀.

На лїті́и стїхи̑ры самогла́сны, гла́съ а҃. А҆ндре́а і҆ерꙋсали́мскагѡ:

Дне́сь ꙗ҆́кѡ вои́стиннꙋ свѧтовѣща́нный глаго́лъ дв҃довъ коне́цъ прїѧ́тъ, се́ бо ꙗ҆́вѣ пречⷭ҇тыхъ но́гъ твои́хъ покланѧ́емсѧ подно́жїю, и҆ на сѣ́нь крилꙋ̀ твоє́ю надѣ́ющесѧ, всеще́дрый, вопїе́мъ тѝ: да зна́менаетсѧ на на́съ свѣ́тъ лица̀ твоегѡ̀. правосла́вныхъ люде́й твои́хъ ро́гъ возвы́си честна́гѡ крⷭ҇та̀ твоегѡ̀ воздви́женїемъ, хрⷭ҇тѐ многоми́лостиве.

Насажде́нное въ кра́нїевѣ мѣ́стѣ дре́во сꙋ́щагѡ живота̀, на не́мже содѣ́ла спасе́нїе превѣ́чный цр҃ь, посредѣ̀ землѝ возноси́мо дне́сь, ѡ҆свѧща́етъ мі́ра концы̀, и҆ ѡ҆бновлѧ́етсѧ воскресе́нїѧ до́мъ, ра́дꙋютсѧ а҆́гг҃ли на нб҃сѝ, и҆ веселѧ́тсѧ человѣ́цы на землѝ, дв҃дски вопїю́ще, и҆ глаго́люще: возноси́те гдⷭ҇а бг҃а на́шего, и҆ покланѧ́йтесѧ подно́жїю но́гꙋ є҆гѡ̀, ꙗ҆́кѡ свѧ́то є҆́сть, подаѧ́й мі́рꙋ ве́лїю ми́лость.

Проѡбразꙋ́ѧ крⷭ҇тъ тво́й, хрⷭ҇тѐ, патрїа́рхъ і҆а́кѡвъ, внꙋ́кѡмъ благослове́нїе да́рꙋѧ, на глава́хъ премѣне́ны рꙋ́ки сотворѝ, є҆го́же, сп҃се, мы̀ дне́сь возносѧ́ще взыва́емъ: да́рꙋй хрⷭ҇толюби́вымъ лю́демъ побѣ̑ды, ꙗ҆́кѡ кѡнстанті́нꙋ ѡ҆долѣ́нїе.

Сла́ва, и҆ ны́нѣ, гла́съ є҃:

Зрѧ́щи тѧ̀ тва́рь всѧ̀ на крⷭ҇тѣ̀ на́га ви́сѧща, содѣ́телѧ и҆ зижди́телѧ всѣ́хъ, и҆змѣнѧ́шесѧ стра́хомъ, и҆ рыда́ше: со́лнце же свѣ́тъ ѡ҆мрачѝ, и҆ землѧ̀ колеба́шесѧ, ка́менїе же разсѣда́шесѧ, и҆ хра́ма свѣ́тлость раздира́шесѧ. ме́ртвїи воста́ша ѿ гробѡ́въ, и҆ а҆́гг҃льскїѧ си̑лы ᲂу҆жасо́шасѧ, глаго́люще: ѽ чꙋдесѐ! сꙋдїѧ̀ сꙋ́дитсѧ, и҆ стра́ждетъ хотѧ̀ за спасе́нїе мі́ра, и҆ ѡ҆бновле́нїе.

На стїхо́внѣ стїхи̑ры, гла́съ є҃. Подо́бенъ: Ра́дꙋйсѧ:

Ра́дꙋйсѧ, живоно́сный крⷭ҇те, благоче́стїѧ непобѣди́маѧ побѣ́да: две́рь ра́йскаѧ, вѣ́рныхъ ᲂу҆твержде́нїе, цр҃кве ѡ҆гражде́нїе: и҆́мже тлѧ̀ разори́сѧ и҆ ᲂу҆праздни́сѧ, и҆ попра́сѧ сме́ртнаѧ держа́ва, и҆ вознесо́хомсѧ ѿ землѝ къ нбⷭ҇нымъ, ѻ҆рꙋ́жїе непобѣди́мое, бѣсѡ́въ сопротивобо́рче, сла́ва мꙋ́ченикѡвъ, прпⷣбныхъ ꙗ҆́кѡ вои́стиннꙋ ᲂу҆добре́нїе, приста́нище спасе́нїѧ, да́рꙋѧй мі́рꙋ ве́лїю ми́лость.

Сті́хъ: Возноси́те гдⷭ҇а бг҃а на́шего, и҆ покланѧ́йтесѧ подно́жїю нѡ́гꙋ є҆гѡ̀, ꙗ҆́кѡ свѧ́то є҆́сть.

Ра́дꙋйсѧ, гдⷭ҇ень крⷭ҇те, и҆́мже разрѣши́сѧ ѿ клѧ́твы человѣ́чество, сꙋ́щїѧ ра́дости зна́менїе, прогонѧ́ѧй врагѝ во твое́мъ воздви́женїи, всече́стне, на́мъ помо́щниче, крѣ́пость пра́ведныхъ, свѧще́нникѡвъ благолѣ́пїе, воѡбража́емый, и҆ лю́тыхъ и҆збавлѧ́ѧй: же́злъ си́лы, и҆́мже пасе́мсѧ: ѻ҆рꙋ́жїе ми́ра, є҆го́же со стра́хомъ ѡ҆бстоѧ́тъ а҆́гг҃ли: хрⷭ҇та̀ бжⷭ҇твеннаѧ сла́ва, подаю́щагѡ мі́рꙋ ве́лїю ми́лость.

Сті́хъ: Бг҃ъ же цр҃ь на́шъ пре́жде вѣ́ка, содѣ́ла спасе́нїе посредѣ̀ землѝ.

Ра́дꙋйсѧ, слѣпы́хъ наста́вниче, немощны́хъ врачꙋ̀, воскресе́нїе всѣ́хъ ᲂу҆ме́ршихъ, воздви́гнꙋвый ны̀ во тлю̀ па́дшыѧ, крⷭ҇те честны́й: и҆́мже разрꙋши́сѧ клѧ́тва, и҆ процвѣтѐ нетлѣ́нїе, и҆ земні́и ѡ҆божи́хомсѧ, и҆ дїа́волъ всеконе́чнѡ низве́ржесѧ. дне́сь воздвиза́ема тѧ̀ ви́дѧще рꙋка́ми а҆рхїере́йскими, возно́симъ вознесе́ннаго посредѣ̀ тебє̀ и҆ тебѣ̀ покланѧ́емсѧ, почерпа́юще бога́тнѡ ве́лїю ми́лость.

Сла́ва, гла́съ д҃:

Ѻ҆ч҃ескихъ нѣ́дръ не ѡ҆ста́вль, ꙗ҆́кѡ всеми́лостивъ, со ᲂу҆ч҃никѝ водворѧ́ѧсѧ: ты́ бо є҆сѝ живо́тный хлѣ́бъ, ѿ негѡ́же мі́ръ причаща́етсѧ, и҆ пребыва́етъ на́мъ пи́ща неѡскꙋдѣва́ема: причаще́нїемъ же ѡ҆живлѧ́етъ на нетлѣ́нїе человѣ́чество, смє́ртныѧ и҆змѣни́въ ѕло́бы, і҆и҃се всеми́лостиве, сп҃се дꙋ́шъ на́шихъ.

И҆ ны́нѣ, крⷭ҇та̀, гла́съ и҃:

Гла́съ прⷪ҇ро́ка твоегѡ̀ мѡѷсе́а, бж҃е, и҆спо́лнисѧ, глаго́лѧй: ᲂу҆́зрите живо́тъ ва́шъ ви́сѧщъ предъ ѻ҆чесы̀ ва́шими. дне́сь крⷭ҇тъ воздвиза́етсѧ, и҆ мі́ръ ѿ ле́сти свобожда́етсѧ. дне́сь хрⷭ҇то́во воскрⷭ҇нїе ѡ҆бновлѧ́етсѧ, и҆ концы̀ землѝ ра́дꙋютсѧ, въ кѷмва́лѣхъ дв҃дски пѣ́снь тебѣ̀ приносѧ́ще, и҆ глаго́люще: содѣ́лалъ є҆сѝ спасе́нїе посредѣ̀ землѝ, бж҃е, крⷭ҇тъ и҆ воскрⷭ҇нїе: и҆́хже ра́ди на́съ спа́слъ є҆сѝ, бл҃же и҆ чл҃вѣколю́бче, всеси́льне гдⷭ҇и, сла́ва тебѣ̀.

Та́же, Ны́нѣ ѿпꙋща́еши: Трист҃о́е. По Ѻ҆́ч҃е на́шъ:

Тропа́рь, гла́съ и҃:

Съ вы́шнихъ призира́ѧ, ᲂу҆бѡ́гїѧ прїе́млѧ, посѣтѝ на́съ ѡ҆ѕло́блєнныѧ грѣхи̑, влⷣко всеми́лостиве, моли́твами бцⷣы, да́рꙋй дꙋша́мъ на́шымъ ве́лїю ми́лость.

Сла́ва, и҆ ны́нѣ, крⷭ҇та̀, гла́съ а҃:

Спасѝ, гдⷭ҇и, лю́ди твоѧ̑, и҆ бл҃гословѝ достоѧ́нїе твоѐ. побѣ̑ды на сопроти̑вныѧ да́рꙋѧ, и҆ твоѐ сохранѧ́ѧ крⷭ҇то́мъ твои́мъ жи́тельство.

И҆ ѿпꙋ́стъ.

На ᲂу҆́трени, на Бг҃ъ гдⷭ҇ь, тропа́рь пра́здника, два́жды. Сла́ва, и҆ ны́нѣ, крⷭ҇та̀.

По а҃-й стїхоло́гїи сѣда́ленъ, гла́съ ѕ҃:

То́кмѡ водрꙋзи́сѧ дре́во, хрⷭ҇тѐ, крⷭ҇та̀ твоегѡ̀, ѡ҆снова̑нїѧ поколеба́шасѧ сме́рти, гдⷭ҇и: є҆го́же бо пожрѐ жела́нїемъ а҆́дъ, ѿпꙋстѝ тре́петомъ. ꙗ҆ви́лъ є҆сѝ на́мъ спасе́нїе твоѐ, свѧты́й: и҆ славосло́вимъ тѧ̀, сн҃е бж҃їй, поми́лꙋй на́съ.

Сла́ва, и҆ ны́нѣ, то́йже. По в҃-й стїхоло́гїи сѣда́ленъ, гла́съ ѕ҃:

Дне́сь прⷪ҇ро́ческое и҆спо́лнисѧ сло́во: се́ бо покланѧ́емсѧ на мѣ́сто, и҆дѣ́же стоѧ́ша но́ги твоѧ̑, гдⷭ҇и, и҆ дре́во спасе́нїѧ прїе́мше, грѣхо́вныхъ страсте́й свобо́дꙋ полꙋчи́хомъ, моли́твами бцⷣы, є҆ди́не чл҃вѣколю́бче.

Сла́ва, и҆ ны́нѣ, то́йже. И҆ чте́нїе во є҆ѵⷢ҇лїи толково́мъ. По полѷеле́и сѣда́ленъ, гла́съ и҃. Подо́бенъ: Повелѣ́нное та́йнѡ:

Въ раи́ мѧ пре́жде дре́во ѡ҆бнажѝ, ѡ҆ вкꙋше́нїи вра́гъ приносѧ̀ ᲂу҆мерщвле́нїе: крⷭ҇та́ же дре́во, живота̀ ѡ҆дѣѧ́нїе человѣ́кѡмъ носѧ̀, водрꙋзи́сѧ на землѝ, и҆ мі́ръ ве́сь и҆спо́лнисѧ всѧ́кїѧ ра́дости. є҆го́же зрѧ́ще возвыша́ема, бг҃ꙋ вѣ́рою лю́дїе согла́снѡ возопїи́мъ: и҆спо́лнь сла́вы до́мъ тво́й.

Сла́ва, и҆ ны́нѣ, то́йже.

Степє́нна, а҃-й а҆нтїфѡ́нъ д҃-гѡ гла́са. Прокі́менъ, гла́съ д҃: Ви́дѣша всѝ концы̀ землѝ спасе́нїе бг҃а на́шегѡ. Сті́хъ: Воспо́йте гдⷭ҇еви пѣ́снь но́вꙋ, ꙗ҆́кѡ ди̑вна сотворѝ гдⷭ҇ь. Всѧ́кое дыха́нїе: Є҆ѵⷢ҇лїе і҆ѡа́нна, зача́ло м҃в, ѿ полꙋ̀: Ѻ҆́ч҃е, просла́ви и҆́мѧ твоѐ:

По н҃-мъ ѱалмѣ̀ стїхи́ра, гла́съ ѕ҃:

Крⷭ҇те хрⷭ҇то́въ, хрⷭ҇тїа́нъ ᲂу҆пова́нїе, заблꙋ́ждшихъ наста́вниче, ѡ҆бꙋрева́емыхъ приста́нище, въ бране́хъ побѣ́да, вселе́нныѧ ᲂу҆твержде́нїе, недꙋ́жныхъ врачꙋ̀, ме́ртвыхъ воскресе́нїе, поми́лꙋй на́съ.

Канѡ́нъ пра́здника со і҆рмосо́мъ на и҃, і҆рмо́съ по два́жды, тропарѝ на ѕ҃, и҆ креста̀ на ѕ҃. Катава́сїа: Кре́стъ начерта́въ: Канѡ́нъ всеми́лостивагѡ сп҃са.

Гла́съ и҃. Пѣ́снь а҃. І҆рмо́съ:

Мо́ре ѡ҆гꙋсти́лъ є҆сѝ, погрꙋзи́вый со ѻ҆рꙋ́жїемъ го́рдаго фараѡ́на, и҆ лю́ди спа́слъ є҆сѝ немо́креннѡ, гдⷭ҇и, и҆ вве́лъ є҆сѝ ѧ҆̀ въ го́рꙋ свѧты́ни, вопїю́щыѧ: пои́мъ тебѣ̀ бг҃ꙋ на́шемꙋ пѣ́снь побѣ́днꙋю, ꙗ҆́кѡ просла́висѧ.

Грѧди́те вѣ́рнїи, хвала́ми и҆ пѣ́сньми свѣтоно́снꙋю це́рковь ᲂу҆блажа́юще, благоче́стїѧ держа́телємъ просїѧ́вшꙋю, въ не́йже всеми́лостиваго хрⷭ҇та̀ бг҃а на́шего да просла́вимъ, вопїю́ще: пое́мъ тебѣ̀ бг҃ꙋ на́шемꙋ, ꙗ҆́кѡ просла́висѧ.

Оу҆́мъ да возвыша́етсѧ всѣ́хъ вѣ́рныхъ къ нб҃сѝ, вы́спрь сѣдѧ́щемꙋ, въ пребжⷭ҇твеннѣй є҆гѡ̀ цр҃кви, и҆ ликовствꙋ́юще вѣ́рнѡ, почти́мъ бж҃е́ственное пра́зднество, смири́вшагѡ земна̑ѧ съ нбⷭ҇ными.

Скрижа́ль бг҃опи́санна ᲂу҆тро́ба твоѧ̀, бцⷣе, въ не́йже сло́во ѻ҆́ч҃ее написа́сѧ: є҆го́же чꙋ́вственнѡ на́мъ поро́ждши, къ немꙋ̀ моли́сѧ, и҆зба́вити ны̀ ѿ всѧ́кїѧ нꙋ́жды и҆ ско́рби.

Бг҃оро́диченъ:

Весели́тсѧ свѣ́тлѡ ве́рхъ прⷪ҇ро́ческїй ѡ҆ тебѣ̀, дв҃о, и҆са́їа безмꙋ́жное твоѐ ржⷭ҇тво̀ ви́дѧ, прⷪ҇ро́чествꙋетъ: ѻ҆́ч҃ее бо сло́во ро́ждши на́мъ, и҆ по ржⷭ҇твѣ̀ дв҃а пребыла̀ є҆сѝ.

И҆́нъ канѡ́нъ крⷭ҇та̀.

Гла́съ ѕ҃. Пѣ́снь а҃. І҆рмо́съ:

Ꙗ҆́кѡ по сꙋ́хꙋ пѣшеше́ствовавъ і҆и҃ль, по бе́зднѣ стопа́ми, гони́телѧ фараѡ́на ви́дѧ потоплѧ́ема, бг҃ꙋ побѣ́днꙋю пѣ́снь, пои́мъ, вопїѧ́ше.

Крⷭ҇тꙋ̀, вѣ́рныхъ спасе́нїю покланѧ́юсѧ, и҆ те́плѣ ѡ҆блобыза́ю, и҆ ѡ҆б̾е́млѧ вопїю̀: дре́во всеблаже́нное хрⷭ҇то́во, дꙋ́шꙋ мою̀ и҆ ᲂу҆́мъ просвѣтѝ, молю́сѧ.

Побѣдоно́сно ꙗ҆ви́сѧ на стра̑сти и҆ бѣ́сы, дне́сь зна́менїе крⷭ҇та̀. тѣ́мже вѣ́рнїи всѝ свѣ́тлѡ просвѣ́щше дꙋ́шы, ны́нѣ ѡ҆блобыза́емъ.

Лꙋчеза̑рнаѧ ѡ҆блиста́етъ сїѧ̑нїѧ крⷭ҇тъ честны́й, и҆ просвѣща́етъ вѣ́рнѡ покланѧ́ющыѧсѧ є҆мꙋ̀ дне́сь, ѡ҆свѧща́ѧ дꙋ́шы на́шѧ и҆ тѣлеса̀.

Бг҃оро́диченъ:

Прест҃а́ѧ дв҃о, ꙗ҆́же хрⷭ҇та̀ пло́тїю ро́ждши, пострада́вшаго на́съ ра́ди во́лею на крⷭ҇тѣ̀, тѧ̀ блажа́щыѧ, че́стнѡ спаса́й мольба́ми твои́ми.

Пѣ́снь г҃. І҆рмо́съ:

Оу҆тверди́сѧ се́рдце моѐ во гдⷭ҇ѣ, вознесе́сѧ ро́гъ мо́й въ бз҃ѣ мое́мъ, разшири́шасѧ на врагѝ моѧ̑ ᲂу҆ста̀ моѧ̑, возвесели́хсѧ ѡ҆ спасе́нїи твое́мъ.

Ликовствꙋ́ютъ съ на́ми дне́сь кꙋ́пнѡ всѧ̑ а҆́гг҃льскаѧ чинонача̑лїѧ, не чꙋ́вственнѡ, но дꙋхо́внѡ ѡ҆бстꙋпа́юще, влⷣко, твою̀ ст҃ꙋ́ю цр҃ковь, ты́ же свы́ше ми́ръ тво́й пода́ждь на́мъ, ꙗ҆́кѡ всеми́лостивъ.

Ликꙋ́етъ дне́сь съ на́ми ли́къ прⷪ҇ро́ческїй, кꙋ́пнѡ же и҆ а҆пⷭ҇льскїй, сп҃се, и҆ всѝ мꙋ́ченичестїи ли́цы, дꙋ́хомъ прозрѧ́ще тебѐ многоимени́таго бг҃а, вѣ́рными сла́вима.

Бг҃оро́диченъ:

Дв҃дски ты̀ и҆менова́ласѧ є҆сѝ, ᲂу҆сыре́ннаѧ гора̀, дв҃о, безлѣ́тное сло́во ѻ҆́ч҃ее, ѡ҆младѣ́вшеесѧ во ᲂу҆тро́бѣ твое́й прїе́мши, и҆ ро́ждши пло́тїю бж҃їю ѵ҆поста́снꙋю мꙋ́дрость.

Бг҃оро́диченъ:

Мы́сленный сокрꙋши́сѧ томи́тель, ѿ го́рнѧгѡ неисцѣ́льнꙋю ꙗ҆́звꙋ прїе́мь ка́мене, ѿ чре́ва твоегѡ̀ хрⷭ҇та̀ бг҃а на́шегѡ проше́дшагѡ, и҆ зємна́ѧ съ нбⷭ҇ными совокꙋ́пльшагѡ.

И҆́нъ. І҆рмо́съ:

Нѣ́сть свѧ́тъ, ꙗ҆́коже ты̀, гдⷭ҇и бж҃е мо́й, вознесы́й ро́гъ вѣ́рныхъ твои́хъ, бл҃же, и҆ ᲂу҆тверди́вый на́съ на ка́мени и҆сповѣ́данїѧ твоегѡ̀.

Ѻ҆рꙋ́жїе дре́вле жи́зни, блаже́нное дре́во дарова́сѧ храни́ти, за преслꙋша́нїе первозда́ннагѡ а҆да́ма: крⷭ҇тъ же семꙋ̀ пꙋ́ть сотворѝ.

Ѻ҆чи́ма, ᲂу҆стна́ми и҆ дꙋша́ми, ли́цы и҆ сердцы̀, поклони́мсѧ всѝ прест҃о́мꙋ крⷭ҇тꙋ̀ жизнода́вца хрⷭ҇та̀, и҆́мже мі́ръ ве́сь ѡ҆свѧща́етсѧ.

Хра́мы бг҃ꙋ прⷪ҇ро́чески дне́сь бы́вше, покланѧ́ющесѧ дре́вꙋ прест҃а́гѡ крⷭ҇та̀, и҆ наслѣ̑дницы є҆гѡ̀ со стра́хомъ всѝ цѣлꙋ́емъ.

Бг҃оро́диченъ:

Дв҃ою родила̀ є҆сѝ сн҃а, пре́жде тебє̀ рожде́ннаго ѿ ѻ҆ц҃а̀ пре́жде вѣ̑къ, безъ мт҃ре ѿ бг҃а, распѧ́таго пло́тїю, да спасе́тъ пре́жде согрѣ́шшыѧ.

Конда́къ пра́здника, гла́съ д҃. Подо́бенъ: Ꙗ҆ви́лсѧ є҆сѝ дне́сь:

Всѧ́кїѧ скве́рны, всеми́лостивый сп҃се, а҆́зъ бы́хъ дѣ́латель, и҆ во ѿча́ѧнїѧ ро́въ впа́дсѧ, но стеню̀ ѿ се́рдца, и҆ вопїю̀ къ тебѣ̀, сло́ве: ᲂу҆скорѝ, ще́дрый, и҆ потщи́сѧ на по́мощь на́шꙋ, ꙗ҆́кѡ ми́лостивъ.

І҆́косъ:

И҆мꙋ́ще тебѐ, всеми́лостивый сп҃се, крѣ́пкое ᲂу҆твержде́нїе, и҆ пречⷭ҇тꙋю мт҃рь твою̀, стѣ́нꙋ неразори́мꙋ, и҆ ти́хое приста́нище, никогда́же ᲂу҆бои́мсѧ вра́жїихъ воста́нїй: твои́мъ бо неви́димымъ про́мысломъ сохранѧ́еми и҆ покро́вомъ, ви́димыѧ и҆ неви́димыѧ врагѝ побѣжда́емъ. твою̀ пречⷭ҇тꙋю мт҃рь и҆мѣ́юще помо́щницꙋ, вра́жїихъ ко́зней ꙗ҆́кѡ ѿ сѣ́тей и҆збѣга́емъ, ра́достїю воспѣва́емъ прера́дѡваннаѧ: ᲂу҆скорѝ, ще́дрый, и҆ потщи́сѧ на по́мощь на́шꙋ, ꙗ҆́кѡ ми́лостивъ.

Сѣда́ленъ пра́здника, гла́съ д҃:

Ско́рое и҆ тве́рдое и҆ крѣ́пкое ᲂу҆тѣше́нїе, всеми́лостиве, послѝ на́мъ, да тѝ во гла́сѣ хвале́нїѧ трист҃ꙋ́ю пѣ́снь возсыла́емъ, дꙋше́ю сокрꙋше́нною припа́дающе мо́лимсѧ: сп҃се всегѡ̀ мі́ра, ты̀ є҆сѝ бг҃ъ ка́ющихсѧ.

Сла́ва, и҆ ны́нѣ, крⷭ҇та̀, гла́съ и҃. Подо́бенъ: Повелѣ́нное:

Проѡбража́ше та́йнѡ дре́вле і҆и҃съ наѵи́нъ крⷭ҇та̀ ѻ҆́бразъ, є҆гда̀ рꙋ́цѣ прострѐ крⷭ҇тови́днѡ, сп҃се мо́й, и҆ ста̀ со́лнце, до́ндеже врагѝ низложѝ противостоѧ́щыѧ тѝ бг҃ꙋ: ны́нѣ бо за́йде на крⷭ҇тѣ́ тѧ зрѧ̀, и҆ держа́вꙋ сме́ртнꙋю разрꙋши́въ, ве́сь мі́ръ совоздви́глъ є҆сѝ.

Пѣ́снь д҃. І҆рмо́съ:

Прⷪ҇ро́къ а҆ввакꙋ́мъ ᲂу҆́мныма ѻ҆чи́ма прови́дѣ, гдⷭ҇и, прише́ствїе твоѐ, тѣ́мъ и҆ вопїѧ́ше: ѿ ю҆́га прїи́детъ бг҃ъ. сла́ва си́лѣ твое́й, сла́ва снизхожде́нїю твоемꙋ̀.

Шестокри́льнїи, ми́лостиве, и҆ многоѻчи́тїи херꙋві́ми, влⷣко, твоемꙋ̀ прⷭ҇то́лꙋ предстоѧ́ще сла́вѧтъ. и҆̀хже послѝ на́мъ вѣ̑рнымъ, и҆ ѡ҆свѧтѝ твою̀ бжⷭ҇твеннꙋю цр҃ковь съ вопїю́щими: сла́ва си́лѣ твое́й, сла́ва, хрⷭ҇тѐ, снизхожде́нїю твоемꙋ̀.

Дв҃дъ возвели́чисѧ, сп҃се, твои́мъ бжⷭ҇твеннымъ просїѧ̀ дх҃омъ, проповѣ́давый ѿ дв҃ы твоѐ ржⷭ҇тво̀: ты́ же, ꙗ҆́кѡ всеми́лостивъ, возвели́чи и҆ возвы́си твою̀ свѧтолѣ́пнꙋю цр҃ковь бжⷭ҇твеннꙋю.

Бг҃оро́диченъ:

Лꙋ́къ крѣ́пкагѡ мїроде́ржца твои́мъ чревоноше́нїемъ, влⷣчце, сокрꙋши́сѧ: ты́ бо пло́ть бжⷭ҇твеннагѡ воплоще́нїѧ свѣтоно́снѣ подала̀ є҆сѝ ᲂу҆́дицѣ ѻ҆́ч҃ꙋ сло́вꙋ, є҆́же пра́дѣднѧ ᲂу҆ловѝ на́шего врага̀. тѣ́мъ є҆мꙋ̀ вопїе́мъ: сла́ва си́лѣ твое́й, гдⷭ҇и.

Бг҃оро́диченъ:

Дв҃дски возвели́чиласѧ є҆сѝ, и҆ гла̑сы прⷪ҇ро́чески гора̀ бж҃їѧ ᲂу҆сыре́на ꙗ҆ви́ласѧ є҆сѝ, дв҃о, ка́мень ᲂу҆сѣ́ченный ѿ чре́ва твоегѡ̀ ражда́етсѧ хрⷭ҇то́съ бг҃ъ, є҆мꙋ́же пое́мъ: сла́ва си́лѣ твое́й, сла́ва, хрⷭ҇тѐ, снизхожде́нїю твоемꙋ̀.

И҆́нъ. І҆рмо́съ:

Хрⷭ҇то́съ, моѧ̀ си́ла, бг҃ъ и҆ гдⷭ҇ь, честна́ѧ цр҃ковь бг҃олѣ́пнѡ пое́тъ взыва́ющи, ѿ смы́сла чи́ста ѡ҆ гдⷭ҇ѣ пра́зднꙋющи.

Да кропи́тъ всѧ̀ землѧ̀ ра́дованїе, да веселѧ́тсѧ древа̀ дꙋбра̑внаѧ, дне́сь ѡ҆божє́на всечестны́мъ крⷭ҇то́мъ, сїѧ́ющи концє́мъ.

Показа́вый ѻ҆рга́нъ ᲂу҆мерщвле́нїѧ, живоно́сно мі́рови, побѣдотво́рное ѻ҆рꙋ́жїе непобѣди́мое, пресла́вный крⷭ҇те, сердца̀ на̑ша просвѣтѝ.

Ты̀ бжⷭ҇твеннаѧ побѣ́да, ты̀ содѣ́лованїе на́шегѡ спасе́нїѧ, ты̀ вѣ̑рнымъ ѡ҆долѣ́нїе, и҆ бжⷭ҇твеннаѧ же́ртва, ѽ всечⷭ҇тны́й крⷭ҇те! пою́щыѧ тѧ̀ ѡ҆свѧтѝ.

Бг҃оро́диченъ:

Вои́стиннꙋ ты̀ ꙗ҆ви́ласѧ є҆сѝ, вои́стиннꙋ родила̀ є҆сѝ сн҃а вы́шнѧго, на крⷭ҇тѣ̀ рꙋ́цѣ просте́ршаго, дв҃о мт҃и марі́е, и҆ мі́ръ призва́вшаго.

Пѣ́снь є҃. І҆рмо́съ:

Гдⷭ҇и бж҃е на́шъ, ми́ръ да́ждь на́мъ, гдⷭ҇и бж҃е на́шъ, стѧжи́ ны, гдⷭ҇и, ра́звѣ тебє̀, и҆но́гѡ не вѣ́мы, и҆́мѧ твоѐ и҆менꙋ́емъ.

Ца́рствꙋетъ при́снѡ твоѐ пребжⷭ҇твенное и҆́мѧ, ѻ҆́ч҃е, сло́ве же и҆ дш҃е, лю́бѧщымъ тѧ̀ свы́ше, ꙗ҆́кѡ ми́лостивъ, ми́рнꙋю ᲂу҆правлѧ́й жи́знь.

Вѣкѡ́въ сы́й творе́цъ, смотре́нїемъ твои́мъ пло́ти прибли́жилсѧ є҆сѝ: да пло́ть ѡ҆божи́въ возведе́ши на высотꙋ̀ ко ѻ҆ц҃ꙋ̀, и҆ къ твоемꙋ̀ хотѣ́нїю.

Бг҃оро́диченъ:

Трапе́зꙋ сло́ва жи́зненнагѡ, неискꙋсобра́чнаѧ марі́е, разꙋмѣ́хомъ тѧ̀ вѣ́рнїи, ѿ плода̀ попо́лзшїисѧ: плодо́мъ же чре́ва твоегѡ̀ къ свѣ́тꙋ разꙋ́мномꙋ приведе́ни бы́хомъ.

Бг҃оро́диченъ:

Сїѧ́ютъ прⷪ҇ро́честїи гла́си, ꙗ҆́кѡ со́лнце лꙋчы̀ пресвѣ́тлыѧ пꙋща́юще, твоѐ провозвѣща́юще безмꙋ́жное, дв҃о, ржⷭ҇тво̀. ѻ҆ц҃ъ и҆зво́ли, сн҃ъ же хотѣ́нїемъ во чре́вѣ твое́мъ млⷣнствꙋетъ, дѣ́йствомъ дх҃а, и҆ пребыва́еши дв҃а.

И҆́нъ. І҆рмо́съ:

Бж҃їимъ свѣ́томъ твои́мъ, бл҃же, ᲂу҆́тренюющихъ тѝ дꙋ́шы любо́вїю ѡ҆зарѝ, молю́сѧ, тѧ̀ вѣ́дѣти, сло́ве бж҃їй, и҆́стиннаго бг҃а, ѿ мра́ка грѣхо́внагѡ взыва́юща.

Под̾и́мемъ съ ра́достїю преблаже́нный крⷭ҇тъ, въ цр҃квахъ и҆ градѣ́хъ се́й предложе́нный, и҆ поклони́мсѧ, да долгѡ́въ прїи́мемъ ѡ҆ставле́нїе.

Оу҆мерщвлѧ́етсѧ ѕмі́й лꙋка́вый ны́нѣ, и҆́же тмы̀ нача́льникъ, сїѧ́нїѧ не терпѧ̀, є҆́же ѡ҆блиста́етъ живоно́сный крⷭ҇тъ, бжⷭ҇твеннагѡ цр҃ѧ̀ ски́птро честно́е.

Ꙗ҆́кѡ пресвѣ́тла ѕвѣзда̀, и҆ ꙗ҆́кѡ би́серъ благолѣ́пенъ, и҆ пресїѧ́нное со́лнце, всѧ̑ ѡ҆зарѧ́етъ землѝ концы̀ крⷭ҇тъ гдⷭ҇ень, є҆го́же ѡ҆блобыза́емъ.

Бг҃оро́диченъ:

Спасе́нїю тѧ̀ нача́ло всѝ вѣ́рнїи вѣ́дꙋще, ᲂу҆блажа́емъ, чⷭ҇таѧ: ты́ бо пре́жде сꙋ́щаго пло́тїю родила̀ є҆сѝ, хотѣ́нїемъ свои́мъ пригвожде́нна на крⷭ҇тѣ̀.

Пѣ́снь ѕ҃. І҆рмо́съ:

Ꙗ҆́кѡ во́ды морскі̑ѧ чл҃вѣколю́бче, волна́ми жите́йскими ѡ҆бꙋрева́юсѧ. тѣ́мже, ꙗ҆́кѡ і҆ѡ́на, та́кѡ вопїю́ ти: возведѝ ѿ тлѝ живо́тъ мо́й, бл҃гоꙋтро́бне гдⷭ҇и.

Торжествꙋ́етъ ве́село дне́сь великоимени́тый гра́дъ, хрⷭ҇тоимени́тїи лю́дїе ѿ тебє̀ свы́ше про́сѧтъ вели́кихъ дарѡ́въ, сп҃се: ты́ же ꙗ҆́кѡ бл҃гъ и҆ всеми́лостивъ, ста́до твоѐ сохранѧ́й.

Крѣ́пкое ᲂу҆твержде́нїе свы́ше послѝ, хрⷭ҇тѐ сп҃се, крѣ́пкаго тѧ̀ свѣ́дꙋщымъ и҆ всеми́лостиваго бг҃а, и҆ хрⷭ҇тоимени́тꙋю цр҃ковь ᲂу҆твердѝ, ꙗ҆́кѡ всемогі́й.

Бг҃оро́диченъ:

И҆зба́ви мѧ̀ лю́тыхъ, дв҃о, ᲂу҆молѧ́ющи побѣди́телѧ лю́тагѡ врага̀, и҆ сподо́би мѧ̀ досто́йнѡ ѡ҆деснꙋ́ю ста́ти твоегѡ̀ сн҃а.

Бг҃оро́диченъ:

Ты̀ ѡ҆божи́ла є҆сѝ мѧ̀, влⷣчце, бг҃а ро́ждши: ты̀ ме́ртвенное сꙋщество̀ моѐ ѿ сме́рти къ жи́зни возвела̀ є҆сѝ, да моегѡ̀ престꙋпле́нїѧ клѧ́тва потреби́тсѧ, бжⷭ҇твенною любо́вїю тѧ̀ ᲂу҆блажа́ющагѡ.

И҆́нъ. І҆рмо́съ:

Жите́йское мо́ре воздвиза́емое зрѧ̀ напа́стей бꙋ́рею, къ ти́хомꙋ приста́нищꙋ твоемꙋ̀ прите́къ, вопїю́ ти: возведѝ ѿ тлѝ живо́тъ мо́й, многоми́лостиве.

Ꙗ҆́кѡ бжⷭ҇твенъ сосꙋ́дъ, ꙗ҆́кѡ свѣти́льникъ свѣ́телъ въ цр҃квахъ дне́сь, и҆ въ хра́мѣхъ и҆ градѣ́хъ, крⷭ҇тъ предлежа́щъ ви́дѧще, и҆ ᲂу҆ѧсни́вшаго сего̀ воспое́мъ.

Оу҆мерщвлѧ́етсѧ сме́рть, и҆ ᲂу҆морѧ́етсѧ тлѣ́нїе, и҆ бѣсо́встїи полцы̀ ѿбѣга́ютъ, побѣ́дный и҆ стра́шный дне́сь предлежа́щъ ви́дѧще крⷭ҇тъ хрⷭ҇то́въ, не смѣ́юще прикоснꙋ́тисѧ є҆мꙋ̀.

Бг҃оро́диченъ:

Ꙗ҆́домъ ѕмїи́нымъ, пра́баба пи́щею, ꙗ҆́же во є҆де́мѣ, пома́засѧ: дв҃а же, ро́ждши нача́льника жи́зни, и҆сточѝ мі́рꙋ нетлѣ́нїе и҆ воскресе́нїе.

Конда́къ, гла́съ д҃. Подо́бенъ:

Вознесы́йсѧ на крⷭ҇тъ во́лею, тезоимени́томꙋ твоемꙋ̀ но́вомꙋ жи́тельствꙋ, щедрѡ́ты твоѧ̑ да́рꙋй, хрⷭ҇тѐ бж҃е, возвеселѝ на́съ си́лою твое́ю, побѣ̑ды даѧ̀ на́мъ на сопоста́ты, посо́бїе и҆мꙋ́щымъ твоѐ, ѻ҆рꙋ́жїе ми́ра, непобѣди́мꙋю побѣ́дꙋ.

І҆́косъ:

И҆́же до тре́тїѧгѡ небесѐ восхище́нъ бы́сть въ ра́й, и҆ глаго́лы слы́шавъ неизречє́нныѧ, и҆ бжⷭ҇твєнныѧ, и҆́хже не лѣ́ть ѧ҆зы̑ки человѣ́ческими глаго́лати, что̀ гала́тѡмъ пи́шетъ, ꙗ҆́кѡ рачи́телїе писа́нїй, прочто́сте и҆ позна́сте: мнѣ̀, глаго́летъ, хвали́тисѧ да не бꙋ́детъ, то́кмѡ во є҆ди́номъ крⷭ҇тѣ̀ гдⷭ҇ни, на не́мже страда́въ, ᲂу҆бѝ стра̑сти. того̀ ᲂу҆̀бо и҆ мы̀ и҆звѣ́стнѡ да держи́мъ, крⷭ҇тъ гдⷭ҇ень, хвалꙋ̀ всѝ: є҆́сть бо на́мъ спаси́тельное сїѐ дре́во, ѻ҆рꙋ́жїе ми́ра, непобѣди́маѧ побѣ́да.

Пѣ́снь з҃. І҆рмо́съ:

Халде́йскаѧ пе́щь, ѻ҆гне́мъ распала́емаѧ, ѡ҆роша́шесѧ дх҃омъ, бж҃їимъ предстоѧ́нїемъ, ѻ҆́троцы поѧ́хꙋ: бл҃гослове́нъ є҆сѝ, бж҃е ѻ҆тє́цъ на́шихъ. (с. 50)

Ты̀ є҆сѝ нбⷭ҇нагѡ крꙋ́га верхотво́рче гдⷭ҇и, тѧ̀ вѣ́дꙋще всеми́лостиваго, припа́даемъ тѝ вопїю́ще: ᲂу҆скорѝ, ще́дрый, и҆ потщи́сѧ на по́мощь на́съ, ѻ҆́трочески пою́щихъ: бл҃гослове́нъ бг҃ъ ѻ҆тє́цъ на́шихъ.

Две́рь милосе́рдїемъ ѿве́рзлъ є҆сѝ на́мъ неизгл҃го́ланныѧ пи́щи, ѿве́рзи и҆ ны́нѣ, всеми́лостиве сп҃се, твоѧ̑ свы́ше бжⷭ҇твєнныѧ да́ры тебѣ̀ вѣ́рнѡ вопїю́щымъ: бл҃гослове́нъ бг҃ъ ѻ҆тє́цъ на́шихъ.

Трⷪ҇ченъ:

Ѻ҆ц҃а̀ просла́вимъ, и҆ сн҃а, и҆ дх҃а, во є҆ди́номъ бж҃ествѣ̀, трїѷпоста́сное є҆стество̀, сꙋщество̀ нераздѣ́льно, несозда́нно, безнача́льно и҆ пресꙋ́щественно.

Бг҃оро́диченъ:

Проѡбрази́ша твою̀ неѡпали́мꙋю ᲂу҆тро́бꙋ, неѡпали́мїи въ пещѝ ѻ҆́гненнѣй ю҆́ношы, ѻ҆гне́мъ бжⷭ҇тва̀ прохлажда́еми. є҆го́же прїи́мше породила̀ є҆сѝ бг҃а сло́ва пою́щымъ: бл҃гослове́нъ бг҃ъ ѻ҆тє́цъ на́шихъ.

И҆́нъ. І҆рмо́съ:

Росода́тельнꙋ ᲂу҆́бѡ пе́щь содѣ́ла а҆́гг҃лъ преподѡ́бнымъ ѻ҆трокѡ́мъ, халдє́и же ѡ҆палѧ́ющее велѣ́нїе бж҃їе мꙋчи́телѧ ᲂу҆вѣща̀ вопи́ти: бл҃гослове́нъ є҆сѝ, бж҃е ѻ҆тє́цъ на́шихъ.

Спаси́тельномꙋ дре́вꙋ поклони́мсѧ, крⷭ҇тꙋ̀ прест҃о́мꙋ, є҆мꙋ́же слꙋ́жатъ а҆́гг҃льскаѧ всѧ̑ вѡ́инства, предлежа́щїй ви́дѧще вѣ́рнїи, и҆сточа́ющїй на́мъ ѡ҆свѧще́нїе и҆ жи́знь.

Побѣдоно́сный ꙗ҆ви́сѧ прест҃ы́й крⷭ҇тъ животода́вца хрⷭ҇та̀: свы́ше же бѣсѡ́въ всѣ́хъ мно́жество ѿгонѧ̀ ва́рварское шата́нїе, и҆ побѣди́телѧ ꙗ҆влѧ́ѧ во́инство на́ше.

Ꙗ҆́кѡ ѡ҆дꙋшевле́ннꙋ тебѣ̀ припа́даѧй взыва́ю: крⷭ҇те мо́й прест҃ы́й, ты́ ми просвѣтѝ дꙋ́шꙋ, и҆ ᲂу҆́мъ, и҆ слꙋ́хъ, и҆ ᲂу҆стнѣ̀, и҆ ѧ҆зы́къ, и҆ дыха́нїе, и҆ ѻ҆́чи, къ пꙋтє́мъ црⷭ҇тва хрⷭ҇то́ва.

Бг҃оро́диченъ:

Ю҆́ношы трѝ пе́щь не ѡ҆палѝ, ржⷭ҇тво̀ проѡбразꙋ́ющи твоѐ: и҆́бо бжⷭ҇твенный ѻ҆́гнь тѧ̀ не ѡ҆палѝ, всели́всѧ въ тѧ̀, и҆ всѧ̑ наꙋчи́въ пѣ́ти: бл҃гослове́нъ бг҃ъ ѻ҆тє́цъ на́шихъ.

Пѣ́снь и҃. І҆рмо́съ:

А҆́гг҃ли и҆ небеса̀ на престо́лѣ сла́вы сѣдѧ́щаго, и҆ ꙗ҆́кѡ бг҃а непреста́ннѡ сла́вимаго, благослови́те, по́йте и҆ превозноси́те є҆го̀ во вѣ́ки.

Странꙋ̀ на́шꙋ сохранѧ́й, сло́ве, ꙗ҆́кѡ всеми́лостивъ, пра́ѻтєцъ моли́твами, крѣ́пкою твое́ю си́лою: крѣ́пость же и҆ си́лꙋ неѡскꙋ́днѡ на проти̑вныѧ пода́ждь, да вопїе́мъ: благослови́те, всѧ̑ дѣла̀ гдⷭ҇нѧ, гдⷭ҇а.

Пѣ́снь бжⷭ҇твеннꙋю приносѧ́ще тебѣ̀, всеми́лостиве, въ пречⷭ҇тѣй цр҃кви, и҆збра́ннїи лю́дїе твоѝ тебѐ хва́лѧтъ. ты́ же, ꙗ҆́кѡ всеми́лостивъ, ѡ҆сѣнѝ вы́шнею твое́ю си́лою, да вопїе́мъ тѝ: благослови́те, всѧ̑ дѣла̀ гдⷭ҇нѧ, гдⷭ҇а.

Бг҃оро́диченъ:

Кла́съ живо́тенъ недѣ́ланенъ возрасти́вши бжⷭ҇твенный, чⷭ҇таѧ дв҃о, тричи́сленна бж҃ества̀ сїѧ́нїе, ѻ҆́ч҃ее безлѣ́тное сло́во въ лѣ́то поро́ждши: къ немꙋ́же за ны̀, ꙗ҆́кѡ мт҃и, моли́сѧ ѡ҆ пою́щихъ тѧ̀.

Бг҃оро́диченъ:

Безнача́льна роди́телѧ нѣ́дръ не ѿстꙋ́пль, въ нѣ́дрѣхъ дв҃ы водвори́сѧ, и҆ роди́сѧ пло́тїю, ѡ҆чища́ѧ мою̀ пло́ть и҆ дꙋ́шꙋ па́дшꙋю. є҆мꙋ́же пое́мъ: благослови́те, хвали́те и҆ превозноси́те є҆го̀ во вѣ́ки.

И҆́нъ. І҆рмо́съ:

Оу҆жасни́сѧ, боѧ́йсѧ нб҃о, и҆ да подви́жатсѧ ѡ҆снова̑нїѧ землѝ: се́ бо въ мертвецѣ́хъ вмѣнѧ́етсѧ въ вы́шнихъ живы́й, и҆ во гро́бъ ма́лъ страннопрїе́млетсѧ. є҆го́же ѻ҆́троцы благослови́те, свѧще́нницы воспо́йте, лю́дїе превозноси́те во всѧ̑ вѣ́ки.

Тво́й крⷭ҇тъ проѡбразꙋ́ѧ і҆а́кѡвъ и҆ногда̀, на внꙋ́ки поло́жь дла̑ни премѣ́ннѡ, и҆ благослови́въ и҆̀хъ, благода́ти во ꙗ҆зы́цѣхъ наꙋча́ѧ: дѣ́ти благослови́те, свѧще́ннїи по́йте, лю́дїе превозноси́те є҆го̀ во вѣ́ки.

Ѽ неизрече́ннагѡ твоегѡ̀, хрⷭ҇тѐ, сни́тїѧ, и҆ неизглаго́ланныхъ благи́хъ! воплоти́сѧ, и҆ ра́спѧтъ бы́въ, сме́рть прїе́мъ, и҆ рѣши́ши человѣ́ки ѿ клѧ́твы, и҆сточи́въ нетлѣ́нїе на треблаже́ннѣмъ дре́вѣ, препросла́вленный крⷭ҇тъ се́й во вѣ́ки.

Прест҃ы́й крⷭ҇тъ, бжⷭ҇твеннꙋю побѣ́дꙋ, жи́зни нача́льника, ле́сти потреби́телѧ, дне́сь похва́лимъ крⷭ҇тъ всесвѧты́й гдⷭ҇ень, бѣсѡ́въ гꙋби́телѧ, и҆ ва́рварѡвъ прогони́телѧ, вѣ́рныхъ побѣдотво́рца и҆ покрови́телѧ.

Бг҃оро́диченъ:

Гвоздьмѝ пригвожде́на хрⷭ҇та̀, копїе́мъ прободе́на въ нетлѣ̑ннаѧ ре́бра, тро́стїемъ въ главꙋ̀ бїе́ма, же́лчь вкꙋша́юща зрѧ́щи, дв҃а вопїѧ́ше: гдѣ̀ твоѧ̀ добро́та за́йде, прекра́сное сло́во, препросла́вленне па́че сынѡ́въ чл҃вѣ́ческихъ;

Пѣ́снь ѳ҃. І҆рмо́съ:

Чꙋ́жде ма́терємъ дѣ́вство, и҆ стра́нно дѣ́вамъ дѣторожде́нїе: на тебѣ̀, бцⷣе, ѻ҆боѧ̑ ᲂу҆стро́ишасѧ. тѣ́мъ тѧ̀ всѧ̑ племена̀ земна̑ѧ непреста́ннѡ велича́емъ.

Чꙋ́вственнѡ, влⷣко, дне́сь хва́лѧтъ тѧ̀ бжⷭ҇твеннїи ли́цы въ пречꙋ́днѣй твое́й це́ркви, мона́си, кꙋ́пнѡ и҆ лю́ди, и҆ свѧще́нныхъ собо́ри. ты́ же, ꙗ҆́кѡ ми́лостивъ, спаса́й, да тѧ̀ всѧ̑ колѣ̑на зємна́ѧ непреста́ннѡ велича́емъ.

Пѣ́снь возсыла́емъ дне́сь вѣ́рнїи многоимени́томꙋ тебѣ̀ хрⷭ҇тꙋ̀ бг҃ꙋ всѣ́хъ, и҆ твоѐ, всеми́лостиве, дꙋхо́внѡ пра́зднꙋюще пра́зднество, про́симъ ѿ тебє̀, да ᲂу҆тверди́ши ѻ҆те́чество недви́жимо на́ше.

Бг҃оро́диченъ:

Є҆мманꙋ́ила бг҃а же и҆ чл҃вѣ́ка, ѻ҆ц҃а̀ безнача́льнагѡ сло́ва, ꙗ҆ви́ласѧ є҆сѝ мт҃и дв҃о, влады́чество призыва́ющее тѧ̀ при́зри и҆ ᲂу҆твержда́й, проти̑вныѧ покарѧ́ющи въ де́нь бра́ни, рꙋко́ю во́инства на́шегѡ.

Бг҃оро́диченъ:

Ѿимѝ, ѽ дв҃о, ве́щь тлѣ́ннꙋю ᲂу҆ма̀ моегѡ̀, сло́во ѻ҆́ч҃ее пло́тїю ро́ждшаѧ, просвѣтѝ глꙋбо́кꙋю тмꙋ̀ моегѡ̀ неразꙋ́мїѧ, и҆ преити́ мѧ сподо́би крило́ма разꙋ́мныма въ тишинꙋ̀ бжⷭ҇твеннагѡ хотѣ́нїѧ.

И҆́нъ. І҆рмо́съ:

Бг҃а человѣ́кѡмъ не возмо́жно ви́дѣти, на него́же не смѣ́ютъ чи́ни а҆́гг҃льстїи взира́ти: тобо́ю бо, всечⷭ҇таѧ, ꙗ҆ви́сѧ человѣ́кѡмъ сло́во воплоще́нно. є҆го́же велича́юще, съ нбⷭ҇ными вѡ́и тѧ̀ ᲂу҆бл҃жа́емъ.

Тлѣ́нни ѿ преслꙋша́нїѧ бы́хомъ, бж҃їѧ за́повѣди престꙋ̑пницы ꙗ҆́вльшесѧ: сегѡ̀ ра́ди сме́рть прїи́де человѣ́кѡмъ. тѣ́мже безсме́ртїе процвѣтѐ дне́сь побѣ́дный крⷭ҇тъ хрⷭ҇то́въ, є҆го́же цѣлꙋ́емъ.

Сѐ дре́во прест҃о́е, крѣ́пкаѧ наде́жда вѣ̑рнымъ ꙗ҆ви́сѧ, клѧ́твы и҆збавле́нїе, человѣ́кѡмъ ра́дость предлежи́тъ, ѡ҆блича́ѧ тмы̀ нача́льника: семꙋ̀ поклони́мсѧ вѣ́рнїи съ весе́лїемъ.

Нача́ло благослове́нїѧ, и҆ ᲂу҆твержде́нїе хрⷭ҇тїа́нъ и҆ стѣна̀, и҆ тве́рдое застꙋпле́нїе, и҆ клѧ́твы и҆збавле́нїе ꙗ҆ви́сѧ на́мъ дре́во вожделѣ́нное, ѻ҆рꙋ́жїе непобѣди́мое: просвѣтѝ и҆ ѡ҆свѧтѝ на́съ покланѧ́ющихсѧ тебѣ̀.

Бг҃оро́диченъ:

Хра́ме и҆ две́ре ѡ҆свѧще́нїѧ, престо́ле бж҃їй, ѻ҆́блаче и҆ свѣ́щниче всесвѣ́тлый, и҆ ковче́же благода́ти, всенепоро́чнаѧ, че́стнѣ покланѧ́ющыѧсѧ ѻ҆́бразꙋ честно́мꙋ є҆диноро́днагѡ твоегѡ̀ сн҃а покры́й и҆ сохранѝ.

Свѣти́ленъ сп҃са. Подо́бенъ: Жєны̀ ᲂу҆слы́шите:

Свѣ́тъ невече́рнїй, хрⷭ҇тѐ, просвѣтѝ на́съ лица̀ твоегѡ̀ зра́комъ, и҆ свѣ́тлости ст҃ы́хъ сподо́би, є҆гда̀ сѧ́деши возда́ти комꙋ́ждо по дѣлѡ́мъ, моли́твами ро́ждшїѧ тѧ̀ бцⷣы.

Два́жды.

Сла́ва, и҆ ны́нѣ, крⷭ҇та̀:

Крⷭ҇тъ, храни́тель всеѧ̀ вселе́нныѧ: крⷭ҇тъ, красота̀ цр҃кве: крⷭ҇тъ, на́ша держа́ва: крⷭ҇тъ вѣ́рныхъ ᲂу҆твержде́нїе: крⷭ҇тъ, а҆́гг҃лѡвъ сла́ва, и҆ де́мѡнѡвъ ꙗ҆́зва.

На хвали́техъ стїхи̑ры на ѕ҃: пра́здника г҃. Гла́съ д҃:

Подо́бенъ: Да́лъ є҆сѝ зна́менїе:

Гра́дъ тво́й пресвѣ́тлѡ чти́мъ, ꙳ всеми́лостиве гдⷭ҇и, ꙳ пра́зднество твоѐ ве́селѡ торжествꙋ́юще. ꙳ ты̀ ᲂу҆́бѡ а҆пⷭ҇льскимъ ли́комъ ᲂу҆ча̀ ны̀ бжⷭ҇твеннѡ, ꙳ мы́ же со стра́хомъ и҆ ра́достїю зрѧ́ще къ тебѣ̀, ꙳ про́симъ неизглаго́ланныѧ пи́щи: ꙳ ты́ бо са́мъ живо́тное пита́нїе, ꙳ сше́дый съ нб҃сѐ, ꙳ і҆и҃се всеси́льне, ꙳ сп҃се дꙋ́шъ на́шихъ.

Ѻ҆ч҃ескихъ не ѡ҆ста́вль нѣ́дръ, ꙳ ꙗ҆́кѡ всеми́лостивъ со ᲂу҆ченикѝ водворѧ́ѧсѧ, ꙳ ты́ бо є҆сѝ живо́тный хлѣ́бъ, ꙳ ѿ негѡ́же мі́ръ причаща́етсѧ, ꙳ и҆ пребыва́етъ на́мъ пи́ща неѡскꙋдѣва́ема, ꙳ причаще́нїемъ же ѡ҆живлѧ́етъ ꙳ на нетлѣ́нїе человѣ́чество, ꙳ сме́ртныѧ и҆змѣни́въ ѕло́бы, ꙳ і҆и҃се всеми́лостиве, ꙳ сп҃се дꙋ́шъ на́шихъ.

Хва́лимъ твоѐ пра́зднство вѣ́рнїи, всеми́лостиве хрⷭ҇тѐ, ꙗ҆́кѡ ѿ ѻ҆ц҃а̀ прише́лъ є҆сѝ спастѝ ны̀, ꙳ тѣ́мже пое́мъ тѧ̀ пѣ́сньми благода́рными, ꙳ ꙗ҆́кѡ ты̀ ѡ҆бнажи́лъ є҆сѝ на́мъ бг҃олѣ́пнѡ бжⷭ҇твеннꙋю твою̀ си́лꙋ, ꙳ пресла́вно чꙋ́до творѧ̀, ꙳ на спасе́нїе на́мъ благотворѧ́щымъ. ꙳ тѣ́мже сла́вимъ, милосе́рде, смотре́нїе твоѐ, ꙳ і҆и҃се всемогі́й, ꙳ сп҃се дꙋ́шъ на́шихъ.

И҆́ны стїхи̑ры крⷭ҇та̀, гла́съ а҃. Подо́бенъ: Нбⷭ҇ныхъ чинѡ́въ:

Нбⷭ҇наѧ шє́ствїѧ, ꙳ крⷭ҇тъ честны́й гото́витъ всѣ̑мъ, ꙳ томꙋ̀ покланѧ́ющымсѧ вѣ́рою несꙋмнѣ́нною: ꙳ и҆ ликѡ́мъ невеще́ственныхъ си́лъ, ꙳ и҆́же на не́мъ пригвозди́выйсѧ, ꙳ сочета́етъ любо́вїю пою́щыѧ того̀. (с. 55)

Кла́нѧющесѧ вѣ́рою крⷭ҇тꙋ̀ честно́мꙋ, ꙳ на не́мъ распе́ншагосѧ воспое́мъ влⷣкꙋ: ꙳ тогѡ̀ манове́нїемъ ꙳ ᲂу҆стнѣ̀ вкꙋ́пѣ и҆ дꙋ́шꙋ ѡ҆чища́юще, ꙳ и҆ сїѧ́нїи сегѡ̀ мы́сленными ᲂу҆ѧсни́мсѧ, ꙳ хва́лѧще є҆го̀.

Го́ресть дре́вле ᲂу҆слажда́ѧ мѡѷсе́й, ꙳ и҆зба́ви і҆и҃лѧ, ꙳ ѻ҆́бразъ крⷭ҇та̀ написꙋ́ѧ: ꙳ мы́ же сего̀ всѝ вѣ́рнїи, ꙳ та́йнѡ и҆ бжⷭ҇твеннѡ воѡбража́юще въ сердца́хъ на́шихъ, ꙳ всегда̀ спаса́емсѧ держа́вою є҆гѡ̀.

Сла́ва, и҆ ны́нѣ, гла́съ д҃:

Пособи́вый, гдⷭ҇и, кро́ткомꙋ дв҃дꙋ покори́ти и҆ноплеме́нника, вѣ́рномꙋ на́шемꙋ во́инствꙋ спобо́рствꙋй, и҆ ѻ҆рꙋ́жїемъ крⷭ҇та̀ низложѝ врагѝ на́шѧ. покажѝ, бл҃гоꙋтро́бне, на на́съ дрє́внїѧ ми́лѡсти твоѧ̑: и҆ да разꙋмѣ́ютъ вои́стиннꙋ, ꙗ҆́кѡ ты̀ є҆сѝ бг҃ъ, и҆ на тѧ̀ надѣ́ющїисѧ побѣжда́емъ, молѧ́щїисѧ ѻ҆бы́чнѡ пречⷭ҇тѣй твое́й мт҃ри, дарова́тисѧ на́мъ вели́цѣй ми́лости.

Славосло́вїе вели́кое. Та́же, Свѧще́нїе воды̀, и҆ поклоне́нїе честно́мꙋ крⷭ҇тꙋ̀, и҆ є҆ктєнїѝ, и҆ ѿпꙋ́стъ, и҆ ча́съ пе́рвый. На а҃-мъ часѣ̀ тропа́рь сп҃са: Сла́ва, крⷭ҇та̀. И҆ ны́нѣ, бг҃оро́диченъ часѡ́въ. По трист҃о́мъ во всѣ́хъ часѣ́хъ, кондакѝ пра́здника, и҆ крⷭ҇та̀ глаго́лемъ премѣнѧ́юще: и҆ соверше́нный ѿпꙋ́стъ.

На лїтꙋргі́и, бл҃жє́нна, пе́рвагѡ канѡ́на пѣ́снь г҃- ѧ, и҆ крⷭ҇та̀ пѣ́снь ѕ҃-ѧ и҆ трист҃о́е. Прокі́менъ, гла́съ ѕ҃: Спасѝ, гдⷭ҇и, лю́ди твоѧ̑, и҆ благословѝ достоѧ́нїе твоѐ. Сті́хъ: Къ тебѣ̀, гдⷭ҇и, воззовꙋ̀, бж҃е мо́й, да не премолчи́ши ѿ менє̀. А҆пⷭ҇лъ къ корі́нѳѧнѡмъ, зача́ло рк҃є. А҆ллилꙋ́їа, гла́съ а҃: Помѧнѝ со́нмъ тво́й, є҆го́же стѧжа́лъ є҆сѝ и҆спе́рва. Сті́хъ: Бг҃ъ же цр҃ь на́шъ пре́жде вѣ́ка, содѣ́ла спасе́нїе посредѣ̀ землѝ. Є҆ѵⷢ҇лїе і҆ѡа́нна, зача́ло ѯ҃. На лїтꙋргі́и пое́мъ Досто́йно, а҆ не і҆рмо́съ крⷭ҇та̀. Прича́стенъ: Зна́менасѧ на на́съ свѣ́тъ лица̀ твоегѡ̀, гдⷭ҇и.