Канонник или полный молитвослов

Перед вечерней читается 9-ый час.

Благословен Бог наш:

Прииди́те, поклони́мся Царе́ви на́шему Бо́гу. (Покло́н)

Прииди́те, поклони́мся и припаде́м Христу́, Царе́ви на́шему Бо́гу. (Покло́н)

Прииди́те, поклони́мся и припаде́м Самому́ Христу́, Царе́ви и Бо́гу на́шему. (Покло́н)

Псало́м 103:

Благослови́, душе́ моя́, Го́спода. Го́споди, Бо́же мо́й, возвели́чился еси́ зело́. Во испове́дание и в велеле́поту обле́клся еси́. Одея́йся све́том, я́ко ри́зою, простира́яй не́бо, я́ко ко́жу. Покрыва́яй вода́ми превы́спренняя Своя́, полага́яй о́блаки на восхожде́ние Свое́, ходя́й на крилу́ ве́треню. Творя́й А́нгелы Своя́ ду́хи и слуги́ Своя́ пла́мень о́гненный. Основа́яй зе́млю на тве́рди ея́, не преклони́тся в ве́к ве́ка. Бе́здна, я́ко ри́за, одея́ние ея́, на гора́х ста́нут во́ды, от запреще́ния Твоего́ побе́гнут, от гла́са гро́ма Твоего́ убоя́тся. Восхо́дят го́ры и нисхо́дят по́ля в ме́сто, е́же основа́л еси́ и́м. Преде́л положи́л еси́, его́же не пре́йдут, ниже́ обратя́тся покры́ти зе́млю. Посыла́яй исто́чники в де́брех, посреде́ го́р про́йдут во́ды. Напая́ют вся́ зве́ри се́льныя, жду́т она́гри в жа́жду свою́. На ты́х пти́цы небе́сныя привита́ют, от среды́ ка́мения дадя́т гла́с. Напая́яй го́ры от превы́спренних Свои́х, от плода́ де́л Твои́х насы́тится земля́. Прозяба́яй траву́ ското́м, и зла́к на слу́жбу челове́ком, извести́ хле́б от земли́. И вино́ весели́т се́рдце челове́ка, ума́стити лице́ еле́ем, и хле́б се́рдце челове́ка укрепи́т. Насы́тятся древа́ польска́я, ке́дри Лива́нстии, и́хже еси́ насади́л. Та́мо пти́цы вогнездя́тся, ероди́ево жили́ще предводи́тельствует и́ми. Го́ры высо́кия еле́нем, ка́мень прибе́жище за́яцем. Сотвори́л е́сть луну́ во времена́, со́лнце позна́ за́пад сво́й. Положи́л еси́ тму́, и бы́сть но́щь, в не́йже про́йдут вси́ зве́рие дубра́внии. Ски́мни рыка́ющии, восхи́тити и взыска́ти от Бо́га пи́щу себе́. Возсия́ со́лнце и собра́шася и в ло́жах свои́х ля́гут. Изы́дет челове́к на де́ло свое́ и на де́лание свое́ до ве́чера. Я́ко возвели́чишася дела́ Твоя́, Го́споди, вся́ прему́дростию сотвори́л еси́, испо́лнися земля́ тва́ри Твоея́. Сие́ мо́ре вели́кое и простра́нное, та́мо га́ди, и́мже не́сть числа́, живо́тная ма́лая с вели́кими, та́мо корабли́ препла́вают, зми́й се́й, его́же созда́л еси́ руга́тися ему́. Вся́ к Тебе́ ча́ют, да́ти пи́щу и́м во бла́го вре́мя. Да́вшу Тебе́ и́м соберу́т, отве́рзшу Тебе́ ру́ку вся́ческая испо́лнятся бла́гости, отвра́щшу же Тебе́ лице́, возмяту́тся, отъи́меши ду́х и́х, и исче́знут, и в пе́рсть свою́ возвратя́тся. По́слеши Ду́ха Твоего́, и сози́ждутся, и обнови́ши лице́ земли́. Бу́ди сла́ва Госпо́дня во ве́ки, возвесели́тся Госпо́дь о де́лех Свои́х, призира́яй на зе́млю, и творя́й ю́ трясти́ся, прикаса́яйся гора́м, и дымя́тся. Воспою́ Го́сподеви в животе́ мое́м, пою́ Бо́гу моему́, дóндеже е́смь, да услади́тся Ему́ бесе́да моя́, а́з же возвеселю́ся о Го́споде. Да исче́знут гре́шницы от земли́, и беззако́нницы, я́коже не бы́ти и́м. Благослови́, душе́ моя́, Го́спода. Со́лнце позна́ за́пад сво́й. Положи́л еси́ тму́, и бы́сть но́щь. Я́ко возвели́чишася дела́ Твоя́, Го́споди, вся́ прему́дростию сотвори́л еси́.

Сла́ва, и ны́не: Аллилу́иа, аллилу́иа, аллилу́иа, сла́ва Тебе́ Бо́же. Трижды.

Иере́й же, пред святы́ми две́рьми ста́в открове́нною главо́ю, глаго́лет моли́твы свети́льничныя.

Моли́тва пе́рвая:

Го́споди ще́дрый и ми́лостивый, долготерпели́ве и многоми́лостиве, внуши́ моли́тву на́шу, и вонми́ гла́су моле́ния на́шего, сотвори́ с на́ми зна́мение во бла́го, наста́ви на́с на пу́ть Тво́й, е́же ходи́ти во и́стине Твое́й, возвесели́ се́рдца на́ша, во е́же боя́тися и́мене Твоего́ свята́го. Зане́ ве́лий еси́ Ты́ и творя́й чудеса́, Ты́ еси́ Бо́г еди́н, и не́сть подо́бен Тебе́ в бозе́х, Го́споди: си́лен в ми́лости и бла́г в кре́пости, во е́же помога́ти, и утеша́ти, и спаса́ти вся́ упова́ющия во и́мя свято́е Твое́.

Я́ко подоба́ет Тебе́ вся́кая сла́ва, че́сть и поклоне́ние, Отцу́, и Сы́ну, и Свято́му Ду́ху, ны́не и при́сно, и во ве́ки веко́в. Ами́нь.

Моли́тва втора́я:

Го́споди, да не я́ростию Твое́ю обличи́ши на́с, ниже́ гне́вом Твои́м нака́жеши на́с, но сотвори́ с на́ми по ми́лости Твое́й, Врачу́ и Исцели́телю ду́ш на́ших. Наста́ви на́с ко Приста́нищу хоте́ния Твоего́, просвети́ о́чи серде́ц на́ших в позна́ние Твоея́ и́стины; и да́руй на́м про́чее настоя́щаго дне́ ми́рное и безгре́шное, и все́ вре́мя живота́ на́шего, моли́твами святы́я Богоро́дицы и все́х святы́х.

Я́ко Твоя́ держа́ва и Твое́ е́сть Ца́рство, и си́ла, и сла́ва, Отца́, и Сы́на, и Свята́го Ду́ха, ны́не и при́сно, и во ве́ки веко́в. Ами́нь.

Моли́тва тре́тия:

Го́споди Бо́же на́ш, помяни́ на́с, гре́шных и непотре́бных ра́б Твои́х, внегда́ призыва́ти на́м свято́е и́мя Твое́, и не посрами́ на́с от ча́яния ми́лости Твоея́, но да́руй на́м, Го́споди, вся́ я́же ко спасе́нию проше́ния, и сподо́би на́с люби́ти, и боя́тися Тебе́ от всего́ се́рдца на́шего, и твори́ти во все́х во́лю Твою́.

Я́ко бла́г и человеколю́бец Бо́г еси́, и Тебе́ сла́ву возсыла́ем, Отцу́, и Сы́ну, и Свято́му Ду́ху, ны́не и при́сно, и во ве́ки веко́в. Ами́нь.

Моли́тва четве́ртая:

Немо́лчными пе́сньми и непреста́нными славословле́ньми от святы́х Си́л воспева́емый, испо́лни уста́ на́ша хвале́ния Твоего́, е́же пода́ти вели́чествие и́мени Твоему́ свято́му. И да́ждь на́м уча́стие и насле́дие со все́ми боя́щимися Тебе́ и́стиною, и храня́щими за́поведи Твоя́, моли́твами святы́я Богоро́дицы и все́х святы́х Твои́х.

Я́ко подоба́ет Тебе́ вся́кая сла́ва, че́сть и поклоне́ние, Отцу́, и Сы́ну, и Свято́му Ду́ху, ны́не и при́сно, и во ве́ки веко́в. Ами́нь.

Моли́тва пя́тая:

Го́споди, Го́споди, пречи́стою Твое́ю дла́нию содержа́й вся́ческая, долготерпя́й на все́х на́с, и ка́яйся о зло́бах на́ших, помяни́ щедро́ты Твоя́, и ми́лость Твою́, посети́ ны́ Твое́ю бла́гостию и да́ждь на́м избежа́ти и про́чее настоя́щаго дне́ Твое́ю благода́тию от разли́чных ко́зней лука́ваго, и ненаве́тну жи́знь на́шу соблюди́ благода́тию всесвята́го Твоего́ Ду́ха.

Ми́лостию и человеколю́бием единоро́днаго Твоего́ Сы́на, с Ни́мже благослове́н еси́, со всесвяты́м, и благи́м, и животворя́щим Твои́м Ду́хом, ны́не и при́сно, и во ве́ки веко́в. Ами́нь.

Моли́тва шеста́я:

Бо́же вели́кий и ди́вный, неисповеди́мою бла́гостию и бога́тым про́мыслом управля́яй вся́ческая, и мирска́я на́м блага́я дарова́вый, и поручи́вый на́м обеща́нное Ца́рство, обеща́нными благи́ми; путесотвори́вый на́м и дне́ преше́дшую ча́сть от вся́каго уклони́тися зла́: да́руй на́м и про́чее непоро́чно соверши́ти, пред свято́ю сла́вою Твое́ю, пе́ти Тя́, Еди́наго блага́го и человеколюби́ваго Бо́га на́шего.

Я́ко Ты́ еси́ Бо́г на́ш, и Тебе́ сла́ву возсыла́ем, Отцу́, и Сы́ну, и Свято́му Ду́ху, ны́не и при́сно, и во ве́ки веко́в. Ами́нь.

Моли́тва седма́я:

Бо́же вели́кий и вы́шний, Еди́н име́яй безсме́ртие, во све́те живы́й непристу́пнем, всю́ тва́рь прему́дростию созда́вый, раздели́вый между́ све́том и между́ тьмо́ю, и со́лнце положи́вый во о́бласть дне́, луну́ же и зве́зды во о́бласть но́щи, сподо́бивый на́с, гре́шных, и в настоя́щий ча́с предвари́ти лице́ Твое́ испове́данием, и вече́рнее Тебе́ славосло́вие принести́. Са́м, Человеколю́бче, испра́ви моли́тву на́шу я́ко кади́ло пред Тобо́ю, и приими́ ю́ в воню́ благоуха́ния, пода́ждь же на́м настоя́щий ве́чер, и приходя́щую но́щь ми́рну, облецы́ ны́ во ору́жие све́та, изба́ви ны́ от стра́ха нощна́го и вся́кия ве́щи, во тьме́ преходя́щия, и да́ждь со́н, его́же во упокое́ние не́мощи на́шей дарова́л еси́, вся́каго мечта́ния диа́воля отчужде́нный. Е́й Влады́ко, благи́х пода́телю, да и на ло́жах на́ших умиля́ющеся, помина́ем в но́щи и́мя Твое́, и поуче́нием Твои́х за́поведей просвеща́еми, в ра́дости душе́вней воста́нем ко славосло́вию Твоея́ бла́гости, моле́ния и моли́твы Твоему́ благоутро́бию принося́ще, о свои́х согреше́ниих и все́х люде́й Твои́х, я́же моли́твами святы́я Богоро́дицы, ми́лостию посети́.

Я́ко бла́г и человеколю́бец Бо́г еси́, и Тебе́ сла́ву возсыла́ем, Отцу́, и Сы́ну, и Свято́му Ду́ху, ны́не и при́сно, и во ве́ки веко́в. Ами́нь.

Испо́лншуся же предначина́тельному псалму́, глаго́лет свяще́нник или́ диа́кон, а́ще е́сть, изше́д се́верною страно́ю и ста́в на обы́чном ме́сте амво́на, ектению́ сию́:

Ми́ром Го́споду помо́лимся.

Ли́к: Го́споди, поми́луй.

О свы́шнем ми́ре и спасе́нии ду́ш на́ших, Го́споду помо́лимся.

Ли́к: Го́споди, поми́луй.

О ми́ре всего́ ми́ра, благостоя́нии святы́х Бо́жиих церкве́й и соедине́нии все́х, Го́споду помо́лимся.

Ли́к: Го́споди, поми́луй.

О святе́м хра́ме се́м и с ве́рою, благогове́нием и стра́хом Бо́жиим входя́щих в о́нь, Го́споду помо́лимся.

Ли́к: Го́споди, поми́луй.

О Вели́ком Господи́не и отце́ на́шем Святе́йшем Патриа́рхе (имяре́к), и о господи́не на́шем преосвяще́ннейшем митрополи́те (или́ архиепи́скопе, или́ епи́скопе) (имяре́к), честне́м пресви́терстве, во Христе́ диа́констве, о все́м при́чте и лю́дех, Го́споду помо́лимся.

Ли́к: Го́споди, поми́луй.

О Богохрани́мей стране́ на́шей, власте́х и во́инстве ея́, Го́споду помо́лимся.

Ли́к: Го́споди, поми́луй.

О гра́де се́м (или́ о ве́си се́й, или́ о святе́й оби́тели се́й), вся́ком гра́де, стране́ и ве́рою живу́щих в ни́х, Го́споду помо́лимся.

Ли́к: Го́споди, поми́луй.

О благорастворе́нии возду́хов, о изоби́лии плодо́в земны́х и вре́менех ми́рных, Го́споду помо́лимся.

Ли́к: Го́споди, поми́луй.

О пла́вающих, путеше́ствующих, неду́гующих, стра́ждущих, плене́нных и о спасе́нии и́х, Го́споду помо́лимся.

Ли́к: Го́споди, поми́луй.

О изба́витися на́м от вся́кия ско́рби, гне́ва и ну́жды, Го́споду помо́лимся.

Ли́к: Го́споди, поми́луй.

Заступи́, спаси́, поми́луй и сохрани́ на́с, Бо́же, Твое́ю благода́тию.

Ли́к: Го́споди, поми́луй.

Пресвяту́ю, пречи́стую, преблагослове́нную, сла́вную Влады́чицу на́шу Богоро́дицу и Присноде́ву Мари́ю со все́ми святы́ми помяну́вше, са́ми себе́ и дру́г дру́га, и ве́сь живо́т на́ш Христу́ Бо́гу предади́м.

Ли́к: Тебе́, Го́споди.

Возглаше́ние:

Я́ко подоба́ет Тебе́ вся́кая сла́ва, че́сть, и поклоне́ние, Отцу́, и Сы́ну, и Свято́му Ду́ху, ны́не и при́сно, и во ве́ки веко́в.

Ли́к: Ами́нь.

Та́же кафи́сму. Блаже́н муж:

И по кафи́сме изше́д диа́кон се́верною две́рию, глаго́лет ма́лую ектению́:

Па́ки и па́ки ми́ром Го́споду помо́лимся.

Ли́к: Го́споди, поми́луй.

Заступи́, спаси́, поми́луй и сохрани́ на́с, Бо́же, Твое́ю благода́тию.

Ли́к: Го́споди, поми́луй.

Пресвяту́ю, пречи́стую, преблагослове́нную, сла́вную Влады́чицу на́шу Богоро́дицу и Присноде́ву Мари́ю со все́ми святы́ми помяну́вше, са́ми себе́ и дру́г дру́га, и ве́сь живо́т на́ш Христу́ Бо́гу предади́м.

Ли́к: Тебе́, Го́споди.

Возглаша́ет священник:

Я́ко подоба́ет Тебе́ вся́кая сла́ва, че́сть, и поклоне́ние, Отцу́, и Сы́ну, и Свято́му Ду́ху, ны́не и при́сно, и во ве́ки веко́в.

Ли́к: Ами́нь.

Го́споди, воззва́х, в случи́вшийся гла́с.

Го́споди, воззва́х к Тебе́, услы́ши мя́. Услы́ши мя́, Го́споди.

Го́споди, воззва́х к Тебе́, услы́ши мя́: вонми́ гла́су моле́ния моего́, внегда́ воззва́ти ми́ к Тебе́.

Услы́ши мя́, Го́споди.

Вторы́й ли́к:

Да испра́вится моли́тва моя́, я́ко кади́ло пред Тобо́ю, воздея́ние ру́ку мое́ю – же́ртва вече́рняя.

Услы́ши мя́, Го́споди.

И по чи́ну стихи́:

Положи́, Го́споди, хране́ние усто́м мои́м, и две́рь огражде́ния о устна́х мои́х. Не уклони́ се́рдце мое́ в словеса́ лука́вствия, непщева́ти вины́ о гресе́х, с челове́ки де́лающими беззако́ние, и не сочту́ся со избра́нными и́х. Нака́жет мя́ пра́ведник ми́лостию и обличи́т мя́, еле́й же гре́шнаго да не нама́стит главы́ моея́, я́ко еще́ и моли́тва моя́ во благоволе́ниих и́х. Поже́рты бы́ша при ка́мени судии́ и́х: услы́шатся глаго́ли мои́, я́ко возмого́ша. Я́ко то́лща земли́ просе́деся на земли́, расточи́шася ко́сти и́х при а́де. Я́ко к Тебе́, Го́споди, Го́споди, о́чи мои́: на Тя́ упова́х, не отыми́ ду́шу мою́. Сохрани́ мя́ от се́ти, ю́же соста́виша ми́, и от собла́зн де́лающих беззако́ние. Паду́т во мре́жу свою́ гре́шницы: еди́н е́смь а́з, дóндеже прейду́.

Гла́сом мои́м ко Го́споду воззва́х, гла́сом мои́м ко Го́споду помоли́хся. Пролию́ пред Ни́м моле́ние мое́, печа́ль мою́ пред Ни́м возвещу́. Внегда́ исчеза́ти от мене́ ду́ху моему́: и Ты́ позна́л еси́ стези́ моя́: на пути́ се́м, по нему́же хожда́х, скры́ша се́ть мне́. Смотря́х одесну́ю и возгля́дах, и не бе́ зна́яй мене́: поги́бе бе́гство от мене́, и не́сть взыска́яй ду́шу мою́. Воззва́х к Тебе́, Го́споди, ре́х: Ты́ еси́ упова́ние мое́, ча́сть моя́ еси́ на земли́ живы́х. Вонми́ моле́нию моему́, я́ко смири́хся зело́, изба́ви мя́ от гоня́щих мя́, я́ко укрепи́шася па́че мене́.

Стихи́ к стихи́рам на Го́споди Воззва́х:

На 10:

Изведи́ из темни́цы ду́шу мою́, испове́датися и́мени Твоему́.

Мене́ жду́т пра́ведницы, дóндеже возда́си мне́.

На 8:

Из глубины́ воззва́х к Тебе́, Го́споди, Го́споди, услы́ши гла́с мо́й. Да бу́дут у́ши Твои́ вне́млюще гла́су моле́ния моего́.

На 6:

А́ще беззако́ния на́зриши, Го́споди, Го́споди, кто́ постои́т? Я́ко у тебе́ очище́ние е́сть. И́мене ра́ди Твоего́ потерпе́х Тя́, Го́споди, потерпе́ душа́ моя́ в сло́во Твое́, упова́ душа́ моя́ на Го́спода.

На 4:

От стра́жи у́тренния до но́щи, от стра́жи у́тренния да упова́ет Изра́иль на Го́спода. Я́ко у Го́спода ми́лость, и мно́гое у Него́ избавле́ние, и То́й изба́вит Изра́иля от все́х беззако́ний его́.

На 2:

Хвали́те Го́спода вси́ язы́цы, похвали́те Его́ вси́ лю́дие. Я́ко утверди́ся ми́лость Его́ на на́с, и и́стина Госпо́дня пребыва́ет во ве́к.

На Го́споди Воззва́х: стихи́ры, гла́с 6:

Подо́бен: Всю́ отложи́вше:

Егда́ хо́щеши приити́, су́д пра́ведный сотвори́ти, Судие́ пра́веднейший, на престо́ле сла́вы Твоея́ седя́й, река́ о́гненная пред Твое́ суди́лище ужаса́ющая влече́т все́х, предстоя́щим Тебе́ небе́сным си́лам, челове́ком же суди́мым стра́хом, я́коже ко́ждо соде́ла: тогда́ на́с пощади́, и ча́сти Христе́ сподо́би спаса́емых, я́ко благоутро́бен, ве́рою мо́лим Тя́.

Кто́ о мне́ не пла́чет преступи́вшем за́поведь Вы́шняго; невоздержа́ния ра́ди во а́д всели́хся вме́сто рая́: сне́ди сла́дкия виде́нием сме́рть исхода́таих, и стра́нен, ея́ ра́ди, Бо́жия сла́вы и жи́зни яви́хся: но приими́ мя́ ка́ющагося Го́споди, я́ко ми́лостив и человеколю́бец, вели́кия ра́ди Твоея́ ми́лости.

Ви́ждь мою́ ско́рбь и боле́знь, и прегреше́ний безме́рное мно́жество, души́ же моея́ озлобле́ние, и у́мное прельще́ние: вонми́ гла́су отча́яннаго и осужде́ннаго, и да́ждь ми́, Го́споди, ду́х сокруше́нный, смире́нное се́рдце, исто́чник сле́з, и мно́гих мои́х согреше́ний проще́ние, вели́кия ра́ди Твоея́ ми́лости.

И в мине́и, свята́го 4. Сла́ва:

Бо́же, хотя́й все́м челове́ком спасти́ся, вонми́ моли́тве мое́й, и да не отри́неши сле́з мои́х я́ко су́етных. Кто́ бо прии́де к тебе́ пла́ча, и не а́бие спасе́н бы́сть; кто́ же возопи́ те́пле, и не а́бие услы́шан; но, о Влады́ко, ско́р обрета́ешися во спасе́ние все́х моля́щихся тебе́, я́ко в ми́лости непобеди́мый.

И ны́не, Богоро́дичен:

Человеколю́бия твоего́ пучи́ну, благоутро́бия глубину́, и бла́гости щедро́ты неизче́тная покажи́, пречи́стая Де́во, на мне́ окая́ннем, утоли́ па́жить грехо́вную, целому́дрие пода́вши, и соблюди́ с душе́ю и те́ло мое́ нескве́рно.

Моли́тва вхо́да:

Ве́чер, и зау́тра, и полу́дне, хва́лим, благослови́м, благодари́м и мо́лимся Тебе́, Влады́ко все́х: испра́ви моли́тву на́шу, я́ко кади́ло пред Тобо́ю, и не уклони́ серде́ц на́ших в словеса́ или́ в помышле́ния лука́вствия, но изба́ви на́с от все́х ловя́щих ду́ши на́ша, я́ко к Тебе́, Го́споди, Го́споди, о́чи на́ши, и на Тя́ упова́хом, да не посрами́ши на́с, Бо́же на́ш.

Я́ко подоба́ет Тебе́ вся́кая сла́ва, че́сть и поклоне́ние, Отцу́, и Сы́ну, и Свято́му Ду́ху, ны́не и при́сно, и во ве́ки веко́в. Ами́нь.

Творе́ние Софро́ния, патриа́рха Иерусали́мскаго:

Све́те ти́хий святы́я сла́вы, Безсме́ртнаго, Отца́ Небе́снаго, Свята́го Блаже́ннаго, Иису́се Христе́. Прише́дше на за́пад со́лнца, ви́девше све́т вече́рний, пое́м Отца́, Сы́на и Свята́го Ду́ха, Бо́га. Досто́ин еси́ во вся́ времена́ пе́т бы́ти гла́сы преподо́бными, Сы́не Бо́жий, живо́т дая́й, те́мже ми́р Тя́ сла́вит.

Подоба́ет ве́дати, а́ще по́ст и е́сть Аллилу́иа, вме́сто проки́менов, пое́м сия́:

В понеде́льник ве́чера:

Аллилу́иа: три́жды, во гла́с 6:

Сти́х: Го́споди, да не я́ростию Твое́ю обличи́ши мене́, ниже́ гне́вом твои́м нака́жеши мене́.

Аллилу́иа.

Сти́х: И во ве́ки веко́в.

Мы́ же высоча́йшим гла́сом пое́м: Аллилу́иа.

Во вто́рник, и в четверто́к ве́чера:

Аллилу́иа.

Сти́х: Возноси́те Го́спода Бо́га на́шего и покланя́йтеся подно́жию но́гу его́, я́ко свя́то е́сть.

Аллилу́иа.

Сти́х: И во ве́ки веко́в.

Аллилу́иа.

В сре́ду ве́чера:

Аллилу́иа.

Сти́х: Во всю́ зе́млю изы́де веща́ние и́х, и в концы́ вселе́нныя глаго́лы и́х.

Аллилу́иа.

Сти́х: И во ве́ки веко́в.

Аллилу́иа.

В неде́лю же и в пято́к ве́чера, никогда́ же пое́тся

Аллилу́иа

А́ще же е́сть: Бо́г Госпо́дь: пою́тся проки́мены сия́:

В неде́лю ве́чера, гла́с 8:

Се́ ны́не благослови́те Го́спода, вси́ раби́ Госпо́дни.

Сти́х: Стоя́щии в хра́ме Госпо́дни, во дво́рех до́му Бо́га на́шего.

В понеде́льник ве́чера, гла́с 4:

Госпо́дь услы́шит мя́, внегда́ воззва́ти ми́ к Нему́.

Сти́х: Внегда́ призва́ти ми́, услы́ша мя́ Бо́г пра́вды моея́.

Во вто́рник ве́чера, гла́с 1:

Ми́лость Твоя́, Го́споди, пожене́т мя́ вся́ дни́ живота́ моего́.

Сти́х: Госпо́дь пасе́т мя́, и ничто́же мя́ лиши́т, на ме́сте зла́чне, та́мо всели́ мя́.

В сре́ду ве́чера, гла́с 5:

Бо́же, во и́мя Твое́ спаси́ мя́, и в си́ле Твое́й суди́ ми́.

Сти́х: Бо́же, услы́ши моли́тву мою́, внуши́ глаго́лы у́ст мои́х.

В четверто́к ве́чера, гла́с 6:

По́мощь моя́ от Го́спода, сотво́ршаго не́бо и зе́млю.

Сти́х: Возведо́х о́чи мои́ в го́ры, отню́дуже прии́дет по́мощь моя́.

В пято́к ве́чера, гла́с 7:

Бо́же, засту́пник мо́й еси́ Ты́, и ми́лость Твоя́ предвари́т мя́.

Сти́х: Изми́ мя́ от вра́г мои́х, Бо́же, и от востаю́щих на мя́ изба́ви мя́.

А́ще же е́сть суббо́та ве́чера, глаго́лет на гла́с 6:

Госпо́дь воцари́ся, в ле́поту облече́ся.

Сти́х: Облече́ся Госпо́дь в си́лу и препоя́сася.

Сти́х: И́бо утверди́ вселе́нную, я́же не подви́жится.

Сти́х: До́му Твоему́ подоба́ет святы́ня, Го́споди, в долготу́ дни́й.

Диа́кон: Рце́м вси́ от всея́ души́, и от всего́ помышле́ния на́шего рце́м.

Ли́к: Го́споди, поми́луй.

Го́споди Вседержи́телю, Бо́же оте́ц на́ших, мо́лим Ти́ ся́, услы́ши и поми́луй.

Ли́к: Го́споди, поми́луй. Поми́луй на́с, Бо́же, по вели́цей ми́лости Твое́й, мо́лим Ти́ ся́, услы́ши и поми́луй.

Ли́к: Го́споди, поми́луй, три́жды.

Еще́ мо́лимся о Вели́ком Господи́не и отце́ на́шем Святе́йшем Патриа́рхе имяре́к, и о господи́не на́шем преосвяще́ннейшем митрополи́те (или́ архиепи́скопе, или́ епи́скопе) (имяре́к), и о все́й во Христе́ бра́тии на́шей.

Ли́к: Го́споди, поми́луй, три́жды.

Еще́ мо́лимся о Богохрани́мей стране́ на́шей, власте́х и во́инстве ея́, да ти́хое и безмо́лвное житие́ поживе́м во вся́ком благоче́стии и чистоте́.

Ли́к: Го́споди, поми́луй, три́жды.

Еще́ мо́лимся о блаже́нных и приснопа́мятных созда́телех свята́го хра́ма сего́ (а́ще во оби́тели: святы́я оби́тели сея́), и о все́х преждепочи́вших отце́х и бра́тиях, зде́ лежа́щих и повсю́ду, правосла́вных.

Ли́к: Го́споди, поми́луй, три́жды.

Еще́ мо́лимся о ми́лости, жи́зни, ми́ре, здра́вии, спасе́нии, посеще́нии, проще́нии и оставле́нии грехо́в рабо́в Бо́жиих, бра́тии свята́го хра́ма сего́ (а́ще во оби́тели: святы́я оби́тели сея́).

Ли́к: Го́споди, поми́луй, три́жды.

Еще́ мо́лимся о плодонося́щих и доброде́ющих во святе́м и всечестне́м хра́ме се́м, тружда́ющихся, пою́щих и предстоя́щих лю́дех, ожида́ющих от Тебе́ вели́кия и бога́тыя ми́лости.

Ли́к: Го́споди, поми́луй, три́жды.

Возглаша́ет свяще́нник:

Я́ко ми́лостив и человеколю́бец Бо́г еси́, и Тебе́ сла́ву возсыла́ем, Отцу́, и Сы́ну, и Свято́му Ду́ху, ны́не и при́сно, и во ве́ки веко́в.

Ли́к: Ами́нь.

И по проки́мне глаго́лем:

Сподо́би, Го́споди, в ве́чер се́й без греха́ сохрани́тися на́м. Благослове́н еси́, Го́споди Бо́же оте́ц на́ших, и хва́льно и просла́влено и́мя Твое́ во ве́ки, ами́нь.

Бу́ди, Го́споди, ми́лость Твоя́ на на́с, я́коже упова́хом на Тя́. Благослове́н еси́, Го́споди, научи́ мя́ оправда́нием Твои́м. Благослове́н еси́, Влады́ко, вразуми́ мя́ оправда́нием Твои́м. Благослове́н еси́, Святы́й, просвети́ мя́ оправда́нии Твои́ми.

Го́споди, ми́лость Твоя́ во ве́к, де́л руку́ Твое́ю не пре́зри. Тебе́ подоба́ет хвала́. Тебе́ подоба́ет пе́ние, Тебе́ сла́ва подоба́ет, Отцу́ и Сы́ну и Свято́му Ду́ху, ны́не и при́сно и во ве́ки веко́в. Ами́нь.

Диа́кон:

Испо́лним вече́рнюю моли́тву на́шу Го́сподеви.

Ли́к: Го́споди, поми́луй.

Заступи́, спаси́, поми́луй и сохрани́ на́с, Бо́же, Твое́ю благода́тию.

Ли́к: Го́споди, поми́луй.

Ве́чера всего́ соверше́нна, свя́та, ми́рна и безгре́шна у Го́спода про́сим.

Ли́к: Пода́й, Го́споди.

А́нгела ми́рна, ве́рна наста́вника, храни́теля ду́ш и теле́с на́ших у Го́спода про́сим.

Ли́к: Пода́й, Го́споди.

Проще́ния и оставле́ния грехо́в и прегреше́ний на́ших у Го́спода про́сим.

Ли́к: Пода́й, Го́споди.

До́брых и поле́зных душа́м на́шим, и ми́ра ми́рови у Го́спода про́сим.

Ли́к: Пода́й, Го́споди.

Про́чее вре́мя живота́ на́шего в ми́ре и покая́нии сконча́ти у Го́спода про́сим.

Ли́к: Пода́й, Го́споди.

Христиа́нския кончи́ны живота́ на́шего, безболе́знены, непосты́дны, ми́рны и до́браго отве́та на стра́шнем суди́щи Христо́ве про́сим.

Ли́к: Пода́й, Го́споди.

Пресвяту́ю, пречи́стую, преблагослове́нную, сла́вную Влады́чицу на́шу Богоро́дицу и Присноде́ву Мари́ю со все́ми святы́ми помяну́вше, са́ми себе́ и дру́г дру́га, и ве́сь живо́т на́ш Христу́ Бо́гу предади́м.

Ли́к: Тебе́, Го́споди.

И свяще́нник возглаша́ет:

Я́ко бла́г и человеколю́бец Бо́г еси́, и Тебе́ сла́ву возсыла́ем, Отцу́, и Сы́ну, и Свято́му Ду́ху, ны́не и при́сно, и во ве́ки веко́в.

Ли́к: Ами́нь.

Свяще́нник: Ми́р все́м.

Ли́к: И ду́хови твоему́.

Диа́кон: Главы́ на́ша Го́сподеви прикло́ним.

Ли́к: Тебе́, Го́споди.

Моли́тва главоприклоне́ния:

Го́споди Бо́же на́ш, приклони́вый небеса́ и соше́дый на спасе́ние ро́да челове́ческаго, при́зри на рабы́ Твоя́ и на достоя́ние Твое́. Тебе́ бо стра́шному и человеколю́бцу судии́, Твои́ раби́ подклони́ша главы́, своя́ же покори́ша вы́я, не от челове́к ожида́юще по́мощи, но Твоея́ ожида́юще ми́лости и Твоего́ ча́юще спасе́ния, я́же сохрани́ на вся́кое вре́мя и по настоя́щем ве́чере, и в приходя́щую но́щь, от вся́каго врага́, от вся́каго проти́внаго де́йства диа́вольскаго и от помышле́ний су́етных, и воспомина́ний лука́вых.

Та́же возглаша́ет свяще́нник:

Бу́ди держа́ва Ца́рствия Твоего́ благослове́на и препросла́влена, Отца́, и Сы́на, и Свята́го Ду́ха, ны́не и при́сно, и во ве́ки веко́в.

Ли́к: Ами́нь.

Та́же исхо́дим в притво́р, пою́ще стихи́ру хра́ма или́ пра́здника, соверша́юще лити́ю. Свяще́нник же и диа́кон с кади́льницею исхо́дят вку́пе се́верною страно́ю, преды́дут же и́м со двема́ лампа́дома. Сла́ва, свята́го. И ны́не, Богоро́дичен. И по си́х глаго́лет диа́кон (а́ще ли не́сть диа́кона, свяще́нник) моли́твы сия́:

Спаси́, Бо́же, лю́ди Твоя́ и благослови́ достоя́ние Твое́, посети́ мир Тво́й ми́лостию и щедро́тами, возвы́си ро́г христиа́н правосла́вных и низпосли́ на ны́ ми́лости Твоя́ бога́тыя, моли́твами всепречи́стыя Влады́чицы на́шея Богоро́дицы и Присноде́вы Мари́и, си́лою Честна́го и Животворя́щаго Креста́, предста́тельствы честны́х Небе́сных Си́л безпло́тных, честна́го, сла́внаго проро́ка, Предте́чи и Крести́теля Иоа́нна, святы́х сла́вных и всехва́льных Апо́стол, и́же во святы́х оте́ц на́ших и вселе́нских вели́ких учи́телей и святи́телей, Васи́лия Вели́каго, Григо́рия Богосло́ва и Иоа́нна Златоу́стаго, и́же во святы́х отца́ на́шего Никола́я, архиепи́скопа Мирлики́йскаго, чудотво́рца, святы́х равноапо́стольных Мефо́дия и Кири́лла, учи́телей слове́нских, святы́х равноапо́стольных вели́каго кня́зя Влади́мира и вели́кия княги́ни О́льги, и́же во святы́х оте́ц на́ших всея́ Росси́и чудотво́рцев, Михаи́ла, Петра́, Алекси́я, Ио́ны, Мака́рия, Фили́ппа, И́ова, Ермоге́на, Филаре́та, Инноке́нтия и Ти́хона, святы́х, сла́вных и добропобе́дных му́чеников, преподо́бных и богоно́сных оте́ц на́ших, святы́х и пра́ведных богооте́ц Иоаки́ма и А́нны и свята́го (имяре́к, его́же е́сть хра́м и его́же е́сть де́нь), и все́х святы́х. Мо́лим Тя́, многоми́лостиве Го́споди, услы́ши на́с, гре́шных, моля́щихся Тебе́, и поми́луй на́с.

Ли́к: Го́споди, поми́луй, 40.

Диакон: Еще́ мо́лимся о Вели́ком Господи́не и отце́ на́шем Святе́йшем Патриа́рхе (имяре́к), и о господи́не на́шем преосвяще́ннейшем митрополи́те (или́ архиепи́скопе, или епископе имяре́к) (а́ще же во оби́тели: и о архимандри́те, или́ игу́мене на́шем имяре́к) и о все́м во Христе́ бра́тстве на́шем, и о вся́кой души́ христиа́нстей, скорбя́щей же и озло́бленней, ми́лости Бо́жия и по́мощи тре́бующей; о покрове́нии гра́да сего́, и живу́щих в не́м (или́ ве́си сея́ и живу́щих в не́й, или́ святы́я оби́тели сея́ и живу́щих в не́й); о ми́ре, и состоя́нии всего́ ми́ра; о благостоя́нии святы́х Бо́жиих церкве́й; о спасе́нии и по́мощи со тща́нием и стра́хом Бо́жиим тружда́ющихся и служа́щих оте́ц и бра́тий на́ших; о оста́вльшихся и во отше́ствии су́щих; о исцеле́нии в не́мощех лежа́щих; о успе́нии, осла́бе, блаже́нней па́мяти и о оставле́нии грехо́в все́х преждеотше́дших оте́ц и бра́тий на́ших, зде́ лежа́щих и повсю́ду правосла́вных; о избавле́нии плене́нных, и о бра́тиях на́ших во слу́жбах су́щих, и о все́х служа́щих и служи́вших во святе́м хра́ме се́м (а́ще же во оби́тели: во святе́й оби́тели се́й) рце́м.

Ли́к: Го́споди, поми́луй, 50.

Еще́ мо́лимся о е́же сохрани́тися гра́ду сему́ (или́ ве́си се́й), и свято́му хра́му сему́ (а́ще же во оби́тели: святе́й оби́тели се́й), и вся́кому гра́ду и стране́, от гла́да, губи́тельства, тру́са, пото́па, огня́, меча́, наше́ствия иноплеме́нников и междоусо́бныя бра́ни; о е́же ми́лостиву и благоуве́тливу бы́ти благо́му и человеколюби́вому Бо́гу на́шему, отврати́ти вся́кий гне́в на ны́ дви́жимый, и изба́вити ны́ от належа́щаго и пра́веднаго Своего́ преще́ния и поми́ловати ны́.

Ли́к: Го́споди, поми́луй, три́жды.

Еще́ мо́лимся и о е́же услы́шати Го́споду Бо́гу гла́с моле́ния на́с, гре́шных, и поми́ловати на́с.

Ли́к: Го́споди, поми́луй, три́жды.

Та́же помина́ет, я́же хо́щет, живы́я и ме́ртвыя, та́йно. Та́же:

Услы́ши ны́, Бо́же, Спаси́телю на́ш, упова́ние все́х конце́в земли́ и су́щих в мо́ри дале́че, и ми́лостив, ми́лостив бу́ди, Влады́ко, о гресе́х на́ших, и поми́луй ны́. Ми́лостив бо и человеколю́бец Бо́г еси́, и Тебе́ сла́ву возсыла́ем, Отцу́, и Сы́ну, и Свято́му Ду́ху, ны́не и при́сно, и во ве́ки веко́в.

Ли́к: Ами́нь.

Та́же: Ми́р все́м.

Ли́к: И ду́хови твоему́.

Диа́кон: Главы́ ва́ша Го́сподеви приклони́те.

Ли́к: Тебе́, Го́споди.

И все́м прикло́ньшим главы́ и на зе́млю прини́кшым, мо́лится свяще́нник велегла́сно:

Влады́ко многоми́лостиве, Го́споди Иису́се Христе́, Бо́же на́ш, моли́твами всепречи́стыя Влады́чицы на́шея Богоро́дицы и Присноде́вы Мари́и, си́лою Честна́го и Животворя́щаго Креста́, предста́тельствы честны́х Небе́сных Си́л безпло́тных, честна́го, сла́внаго проро́ка, Предте́чи и Крести́теля Иоа́нна, святы́х сла́вных и всехва́льных Апо́стол, святы́х сла́вных и добропобе́дных му́чеников, преподо́бных и богоно́сных оте́ц на́ших, и́же во святы́х оте́ц на́ших и вселе́нских вели́ких учи́телей и святи́телей: Васи́лия Вели́каго, Григо́рия Богосло́ва и Иоа́нна Златоу́стаго, и́же во святы́х отца́ на́шего Никола́я, архиепи́скопа Мирлики́йскаго, чудотво́рца, святы́х равноапо́стольных Мефо́дия и Кири́лла, учи́телей слове́нских, святы́х равноапо́стольных вели́каго кня́зя Влади́мира и вели́кия княги́ни О́льги, и́же во святы́х оте́ц на́ших всея́ Росси́и чудотво́рцев, Михаи́ла, Петра́, Алекси́я, Ио́ны, Мака́рия, Фили́ппа, И́ова, Ермоге́на, Филаре́та, Инноке́нтия и Ти́хона, святы́х, сла́вных и добропобе́дных му́чеников, преподо́бных и богоно́сных оте́ц на́ших, святы́х и пра́ведных богооте́ц Иоаки́ма и А́нны и свята́го (имяре́к, его́же е́сть хра́м), и все́х святы́х Твои́х, благоприя́тну сотвори́ моли́тву на́шу, да́руй на́м оставле́ние прегреше́ний на́ших, покры́й на́с кро́вом крилу́ Твое́ю, отжени́ от на́с вся́каго врага́ и супоста́та, умири́ на́шу жи́знь. Го́споди, поми́луй на́с и мир Тво́й, и спаси́ ду́ши на́ша, я́ко бла́г и человеколю́бец.

На стихо́вне, стихи́ры, гла́с 6:

В стра́шное прише́ствие Твое́ Христе́, да не услы́шим, не ве́м ва́с: упова́ние бо на тя́ Спа́се возложи́хом, а́ще и твоя́ повеле́ния не сохрани́хом, небреже́ния ра́ди на́шего: но пощади́ ду́шы на́ша, мо́лимся

Сти́х 1: К Тебе́ возведо́х о́чи мои́, живу́щему на небеси́. Се́ я́ко о́чи ра́б в ру́ку госпо́дий свои́х, я́ко о́чи рабы́ни в ру́ку госпожи́ своея́, та́ко о́чи на́ши ко Го́споду Бо́гу на́шему, дóндеже уще́дрит ны́.

Покая́ния не стяжа́х, ниже́ па́ки сле́з: сего́ ра́ди молю́ тя́ Христе́ Бо́же, пре́жде конца́ обрати́ти мя́, и да́ти ми́ умиле́ние, я́ко да изба́влюся от му́ки.

Сти́х 2: Поми́луй на́с Го́споди, поми́луй на́с, я́ко по мно́гу испо́лнихомся уничиже́ния: наипа́че напо́лнися душа́ на́ша поноше́ния гобзу́ющих, и уничиже́ния го́рдых.

Му́ченицы Твои́ Го́споди, не отверго́шася тебе́, ни отступи́ша от за́поведей твои́х: те́х моли́твами поми́луй на́с.

Сла́ва, и ны́не, Богоро́дичен.

Никто́же притека́яй к тебе́, посра́млен от Тебе́ исхо́дит пречи́стая Богоро́дице Де́во, но про́сит благода́ти, и прие́млет дарова́ние к поле́зному проше́нию.

Во вто́рник ве́чера, или́ в четверто́к, глаго́ли крестобогоро́дичен:

На дре́ве живо́т на́ш, зря́щи всенепоро́чная Богоро́дице ви́сящь, ма́терски рыда́ющи вопия́ше: Сы́не мо́й и Бо́же мо́й, спаси́ любо́вию пою́щия тя́.

А́ще суббо́та, глаго́лем: Госпо́дь воцари́ся:

я́коже предписа́ся

А́ще же влады́чний пра́здник, глаго́лем его́ стихи́. Та́кожде а́ще случи́тся и пра́зднуемый святы́й: Сла́ва и ны́не: богоро́дичен:

Та́же: Ны́не отпуща́еши раба́ Твоего́, Влады́ко, по глаго́лу Твоему́ с ми́ром: я́ко ви́деста о́чи мои́ спасе́ние Твое́, е́же еси́ угото́вал пред лице́м все́х люде́й, све́т во открове́ние язы́ков, и сла́ву люде́й Твои́х Изра́иля.

Трисвято́е: Пресвята́я Тро́ице: По О́тче наш: тропа́рь пра́здника, или́ свята́го: Сла́ва, и ны́не: Богоро́дичен и отпу́ст.

А́ще же по́ст и Аллилу́иа пе́то, глаго́лем тропари́ сия́, гла́с 1.

Богоро́дице Де́во, ра́дуйся, Благода́тная Мари́е, Госпо́дь с Тобо́ю: Благослове́на Ты́ в жена́х, и Благослове́н Пло́д чре́ва Твоего́, я́ко Спа́са родила́ еси́ ду́ш на́ших.

Покло́н еди́н.

Сла́ва: Крести́телю Христо́в, все́х на́с помяни́, да изба́вимся от беззако́ний на́ших: тебе́ бо даде́ся благода́ть моли́тися за ны́.

Покло́н еди́н.

И ны́не: Моли́те за ны́ святи́и апо́столи, святи́и вси́, да изба́вимся от бе́д и скорбе́й: ва́с бо те́плыя предста́тели ко Спа́су стяжа́хом.

Покло́н еди́н.

Под твое́ благоутро́бие прибега́ем Богоро́дице, моле́ния на́ша не пре́зри во обстоя́нии: но от бе́д изба́ви ны́, еди́на чи́стая, еди́на благослове́нная.

Без покло́на.

Го́споди, поми́луй, 40. Сла́ва, и ны́не: Честне́йшую Херуви́м: И́менем Госпо́дним благослови́, о́тче.

Иере́й: Сы́й благослове́н Христо́с Бо́г на́ш, всегда́, ны́не и при́сно, и во ве́ки веко́в.

Та́же: Небе́сный Царю́:

И а́бие три́ покло́ны вели́кия с моли́твою свята́го Ефре́ма, я́коже явле́но в полу́нощнице.

Посе́м трисвято́е. Пресвята́я Тро́ице. По О́тче на́ш: Го́споди поми́луй, 12. Всесвята́я Тро́ице:

Та́же: Бу́ди и́мя Госпо́дне благослове́но от ны́не и до ве́ка. Три́жды

Сла́ва и ны́не: Благословлю́ Го́спода и: Вознесу́ тя́ Бо́же мо́й, Царю́ мо́й: Посе́м: Досто́йно е́сть: Сла́ва, и ны́не: Го́споди поми́луй, три́жды. Благослови́. И отпу́ст.

Сия́ же быва́ют в вели́кий по́ст. А́ще же и́н по́ст, и пе́то Аллилу́иа, по покло́нех и Трисвято́м, и по возгла́се: Го́споди поми́луй, 12. Сла́ва, и ны́не: и па́ки: Го́споди поми́луй, три́жды. Благослови́. И отпу́ст.

А́ще же е́сть Бо́г Госпо́дь, по Трисвято́м отпусти́тельный тропа́рь дне́. И отпу́ст.

А́ще же хо́щеши, по конце́ вече́рни глаго́ли моли́тву сию́ вели́каго Васи́лиа:

Благослове́н еси́ Влады́ко Вседержи́телю, просвети́вый де́нь све́том со́лнечным, и но́щь уясни́вый заря́ми о́гненными, е́же долготу́ дне́ прейти́ на́м сподо́бил еси́, и прибли́житися нача́лом но́щи: услы́ши моле́ние на́ше, и все́х люде́й Твои́х, и все́х на́с прости́ во́льная и нево́льная согреше́ния. Приими́ вече́рняя на́ша моле́ния, и низпосли́ мно́жество ми́лости Твоя́, и щедро́т Твои́х на достоя́ние Твое́. Остени́ на́с святы́ми Твои́ми А́нгелы, вооружи́ на́с ору́жием пра́вды, огради́ на́с и́стиною Твое́ю, соблюди́ на́с си́лою Твое́ю, изба́ви на́с от вся́каго обстоя́ния, вся́каго наве́та сопроти́внаго. Пода́ждь же на́м и настоя́щий ве́чер, с приходя́щею но́щию соверше́н, свя́т, ми́рен, безгре́шен, безбла́знен, безмечта́нен, и вся́ дни́ живота́ на́шего, моли́твами святы́я Богоро́дицы, и все́х святы́х от ве́ка благоугоди́вших, ами́нь.

Честне́йшую Херуви́м: И отпу́ст.

Благослови́вши иере́ю глаго́лем:

Сла́ва тебе́ Бо́же на́ш сла́ва тебе́.

Царю́ Небе́сный, Уте́шителю, Ду́ше и́стины, И́же везде́ сы́й и вся́ исполня́яй, Сокро́вище благи́х и жи́зни Пода́телю, прииди́ и всели́ся в ны́, и очи́сти ны́ от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй на́с. Три́жды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй на́с; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй. Три́жды. Сла́ва, и ны́не:

О́тче на́ш, И́же еси́ на Небесе́х! Да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хле́б на́ш насу́щный да́ждь на́м дне́сь; и оста́ви на́м до́лги на́ша, я́коже и мы́ оставля́ем должнико́м на́шим; и не введи́ на́с во искуше́ние, но изба́ви на́с от лука́ваго.

Го́споди, поми́луй. 12. Сла́ва, и ны́не:

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Та́же Псало́м 50

Поми́луй мя́, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя́ от беззако́ния моего́, и от греха́ моего́ очи́сти мя́. Я́ко беззако́ние мое́ а́з зна́ю и гре́х мо́й предо мно́ю е́сть вы́ну. Тебе́ Еди́ному согреши́х, и лука́вое пред Тобо́ю сотвори́х, я́ко да оправди́шися во словесе́х Твои́х и победи́ши, внегда́ суди́ти Ти́. Се́ бо в беззако́ниих зача́т е́смь, и во гресе́х ро́ди мя́ ма́ти моя́. Се́ бо и́стину возлюби́л еси́, безве́стная и та́йная прему́дрости Твоея́ яви́л ми́ еси́. Окропи́ши мя́ иссо́пом, и очи́щуся, омы́еши мя́, и па́че сне́га убелю́ся. Слу́ху моему́ да́си ра́дость и весе́лие, возра́дуются ко́сти смире́нныя. Отврати́ лице́ Твое́ от гре́х мои́х, и вся́ беззако́ния моя́ очи́сти. Се́рдце чи́сто сози́жди во мне́, Бо́же, и ду́х пра́в обнови́ во утро́бе мое́й. Не отве́ржи мене́ от лица́ Твоего́, и Ду́ха Твоего́ Свята́го не отыми́ от мене́. Возда́ждь ми́ ра́дость спасе́ния Твоего́, и Ду́хом Влады́чним утверди́ мя́. Научу́ беззако́нныя путе́м Твои́м, и нечести́вии к Тебе́ обратя́тся. Изба́ви мя́ от крове́й, Бо́же, Бо́же спасе́ния моего́; возра́дуется язы́к мо́й пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, да́л бы́х у́бо, всесожже́ния не благоволи́ши. Же́ртва Бо́гу ду́х сокруше́н, се́рдце сокруше́нно и смире́нно Бо́г не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на олта́рь Тво́й тельцы́.

Псало́м 69

Бо́же, в по́мощь мою́ вонми́, Го́споди, по́мощи ми́ потщи́ся. Да постыдя́тся и посра́мятся и́щущии ду́шу мою́, да возвратя́тся вспя́ть и постыдя́тся хотя́щии ми́ зла́я. Да возвратя́тся а́бие стыдя́щеся глаго́лющии ми́: бла́гоже, бла́гоже. Да возра́дуются и возвеселя́тся о Тебе́ вси́ и́щущии Тебе́, Бо́же: и да глаго́лют вы́ну, да возвели́чится Госпо́дь, лю́бящии спасе́ние Твое́. А́з же ни́щ е́смь и убо́г, Бо́же, помози́ ми́: Помо́щник мо́й и Изба́витель мо́й еси́ Ты́, Го́споди, не закосни́.

Псало́м 142

Го́споди, услы́ши моли́тву мою́, внуши́ моле́ние мое́ во и́стине Твое́й, услы́ши мя́ в пра́вде Твое́й: и не вни́ди в су́д с рабо́м Твои́м, я́ко не оправди́тся пред Тобо́ю вся́к живы́й. Я́ко погна́ вра́г ду́шу мою́, смири́л е́сть в зе́млю живо́т мо́й, посади́л мя́ е́сть в те́мных, я́ко ме́ртвыя ве́ка. И уны́ во мне́ ду́х мо́й, во мне́ смяте́ся се́рдце мое́. Помяну́х дни́ дре́вния, поучи́хся во все́х де́лех Твои́х, в творе́ниих руку́ Твое́ю поуча́хся. Возде́х к Тебе́ ру́це мои́: душа́ моя́, я́ко земля́ безво́дная, Тебе́. Ско́ро услы́ши мя́, Го́споди, исчезе́ ду́х мо́й, не отврати́ лица́ Твоего́ от мене́, и уподо́блюся низходя́щим в ро́в. Слы́шану сотвори́ мне́ зау́тра ми́лость Твою́, я́ко на Тя́ упова́х. Скажи́ мне́, Го́споди, пу́ть во́ньже пойду́, я́ко к Тебе́ взя́х ду́шу мою́. Изми́ мя́ от вра́г мои́х, Го́споди, к Тебе́ прибего́х. Научи́ мя́ твори́ти во́лю Твою́, я́ко Ты́ еси́ Бо́г мо́й: Ду́х Тво́й Благи́й наста́вит мя́ на зе́млю пра́ву. И́мене Твоего́ ра́ди, Го́споди, живи́ши мя́, пра́вдою Твое́ю изведе́ши от печа́ли ду́шу мою́. И ми́лостию Твое́ю потреби́ши враги́ моя́ и погуби́ши вся́ стужа́ющия души́ мое́й, я́ко а́з ра́б Тво́й е́смь.

Та́же:

Сла́ва в вы́шних Бо́гу, и на земли́ ми́р, в челове́цех благоволе́ние. Хва́лим Тя́, благослови́м Тя́, кла́няем Ти́ ся́, славосло́вим Тя́ (покло́н), благодари́м Тя́, вели́кия ра́ди сла́вы Твоея́. Го́споди, Царю́ Небе́сный, Бо́же, О́тче Вседержи́телю, Го́споди Сы́не Единоро́дный, Иису́се Христе́, и Святы́й Ду́ше: Го́споди Бо́же, А́гнче Бо́жий, Сы́не Оте́чь, взе́мляй гре́х ми́ра, поми́луй на́с; взе́мляй грехи́ ми́ра, приими́ моли́тву на́шу: седя́й одесну́ю Отца́, поми́луй на́с. Я́ко Ты́ еси́ еди́н Свя́т, Ты́ еси́ еди́н Госпо́дь, Иису́с Христо́с, в сла́ву Бо́га Отца́, ами́нь. На вся́ку но́щь благословлю́ Тя́ и восхвалю́ и́мя Твое́ во ве́ки, и в ве́к ве́ка. Го́споди, прибе́жище бы́л еси́ на́м в ро́д и ро́д. А́з ре́х: Го́споди, поми́луй мя́, исцели́ ду́шу мою́, я́ко согреши́х Тебе́. Го́споди, к Тебе́ прибего́х, научи́ мя́ твори́ти во́лю Твою́, я́ко Ты́ еси́ Бо́г мо́й: я́ко у Тебя́ исто́чник живота́, во све́те Твое́м у́зрим све́т. Проба́ви ми́лость Твою́ ве́дущим Тя́. Сподо́би, Го́споди, в но́щь сию́ без греха́ сохрани́тися на́м. Благослове́н еси́, Го́споди Бо́же оте́ц на́ших, и хва́льно и просла́влено и́мя Твое́ во ве́ки, ами́нь. Бу́ди, Го́споди, ми́лость Твоя́ на на́с, я́коже упова́хом на Тя́. Благослове́н еси́, Го́споди, научи́ мя́ оправда́нием Твои́м. Благослове́н еси́, Влады́ко, вразуми́ мя́ оправда́нием Твои́м. Благослове́н еси́, Святы́й, просвети́ мя́ оправда́нии Твои́ми. Го́споди, ми́лость Твоя́ во ве́к, де́л руку́ Твое́ю не пре́зри. Тебе́ подоба́ет хвала́, Тебе́ подоба́ет пе́ние, Тебе́ сла́ва подоба́ет, Отцу́ и Сы́ну и Свято́му Ду́ху, ны́не и при́сно и во ве́ки веко́в. Ами́нь.

И а́бие:

Ве́рую во Еди́наго Бо́га Отца́ Вседержи́теля, Творца́ не́бу и земли́, ви́димым же все́м и неви́димым. И во Еди́наго Го́спода Иису́са Христа́, Сы́на Бо́жия, Единоро́днаго, И́же от Отца́ рожде́ннаго пре́жде все́х ве́к. Све́та от Све́та, Бо́га и́стинна от Бо́га и́стинна, рожде́нна, несотворе́нна, единосу́щна Отцу́, И́мже вся́ бы́ша. На́с ра́ди челове́к и на́шего ра́ди спасе́ния сше́дшаго с небе́с и воплоти́вшагося от Ду́ха Свя́та и Мари́и Де́вы и вочелове́чшася. Распя́таго же за ны́ при Понти́йстем Пила́те, и страда́вша, и погребе́на. И воскре́сшаго в тре́тий де́нь по писа́нием. И возше́дшаго на Небеса́, и седя́ща одесну́ю Отца́. И па́ки гряду́щаго со сла́вою суди́ти живы́м и ме́ртвым, его́же Ца́рствию не бу́дет конца́. И в Ду́ха Свята́го, Го́спода, Животворя́щаго, И́же от Отца́ исходя́щаго, И́же со Отце́м и Сыно́м спокланя́ема и ссла́вима, глаго́лавшаго проро́ки. Во еди́ну Святу́ю, Собо́рную и Апо́стольскую Це́рковь. Испове́дую еди́но креще́ние во оставле́ние грехо́в. Ча́ю воскресе́ния ме́ртвых, и жи́зни бу́дущаго ве́ка. Ами́нь.

И а́бие; дневны́я кано́ны с ака́фисты.

Та́же: Досто́йно е́сть: Трисвято́е. По О́тче на́ш:

Посе́м: Тропари́ на повече́рии.

И моли́твы на повече́рии

А́ще хра́м госпо́дский или́ богоро́дичен, чте́тся тропа́рь хра́ма. А́ще же ко́его свята́го, пе́рвее дне́ви тропа́рь, гла́с 4: Небе́сных во́инств: та́же хра́ма свята́го. Посе́м: Бо́же оте́ц на́ших: И́же во все́м ми́ре: Сла́ва: Со святы́ми упоко́й: И ны́не: Моли́твами Го́споди, все́х святы́х и Богоро́дицы:

Небе́сных во́инств Архистрати́зи, мо́лим ва́с при́сно мы́, недосто́йнии, да ва́шими моли́твами огради́те на́с кро́вом кри́л невеще́ственныя ва́шея сла́вы, сохраня́юще ны́ припа́дающия приле́жно и вопию́щия: от бе́д изба́вите ны́, я́ко чинонача́льницы Вы́шних си́л.

И хра́ма свята́го. Та́же:

Бо́же оте́ц на́ших, творя́й при́сно с на́ми по Твое́й кро́тости, не отста́ви ми́лость Твою́ от на́с, но моли́твами и́х в ми́ре упра́ви живо́т на́ш.

И́же во все́м ми́ре му́ченик Твои́х, я́ко багряни́цею и ви́ссом, кровьми́ Це́рковь Твоя́ украси́вшися, те́ми вопие́т Ти́, Христе́ Бо́же: лю́дем Твои́м щедро́ты Твоя́ низпосли́, ми́р жи́тельству Твоему́ да́руй, и душа́м на́шим ве́лию ми́лость.

Сла́ва, гла́с 8: Со святы́ми упоко́й, Христе́, души́ ра́б Твои́х, иде́же не́сть боле́знь, ни печа́ль, ни воздыха́ние, но жи́знь безконе́чная.

И ны́не: Моли́твами, Го́споди, все́х святы́х, и Богоро́дицы, Тво́й ми́р да́ждь на́м и поми́луй на́с, я́ко Еди́н ще́др.

Ве́домо же бу́ди и сие́: а́ще прилучи́тся госпо́дский пра́здник или́ богоро́дичен с попра́зднством, в понеде́льник или́ вто́рник и всю́ седми́цу (кроме́ неде́ли) чте́тся конда́к еди́н пра́здника до отда́ния его́, а тропари́ дневни́и оставля́ются, а́ще же ко́его от святы́х настои́т па́мять, иму́щаго полиеле́й, или́ славосло́вие, чте́тся конда́к еди́н свята́го. А́ще настои́т свята́я пятидеся́тница, чту́тся кондаки́ в трио́ди святы́я пятдеся́тницы во вся́ дни́, до неде́ли все́х святы́х.

Тропа́рь хра́ма, а́ще хра́м госпо́дский или́ богоро́дичен: Та́же дне́, гла́с 2: Па́мять пра́веднаго: а иде́же не́сть хра́м Христо́в или́ Богоро́дицы, чте́тся пе́рвее тропа́рь дне́, пото́м хра́ма свята́го. Та́же Бо́же оте́ц на́ших: и И́же во все́м ми́ре: Сла́ва: Со святы́ми упоко́й: И ны́не: Моли́твами, Го́споди:

Па́мять пра́веднаго с похвала́ми, тебе́ же довле́ет свиде́тельство Госпо́дне, Предте́че: показа́л бо ся́ еси́ вои́стинну и проро́ков честне́йший, я́ко и в струя́х крести́ти сподо́бился еси́ Пропове́даннаго. Те́мже за и́стину пострада́в, ра́дуяся, благовести́л еси́ и су́щим во а́де Бо́га, я́вльшагося пло́тию, взе́млющаго гре́х ми́ра и подаю́щаго на́м ве́лию ми́лость.

И хра́ма свята́го.

Бо́же оте́ц на́ших, творя́й при́сно с на́ми:

И́же во все́м ми́ре му́ченик твои́х:

Сла́ва: Со святы́ми упоко́й, Христе́, ду́шы:

И ны́не: моли́твами, Го́споди, все́х святы́х:

Тропа́рь Креста́, гла́с 1: Спаси́ Го́споди: и хра́ма свята́го. Христо́ва же хра́ма во вто́рник и в четверто́к на повече́рии во ве́сь го́д не чте́тся, зане́же чте́тся тропа́рь Креста́ дневны́й.

Спаси́, Го́споди, лю́ди Твоя́ и благослови́ достоя́ние Твое́, побе́ды на сопроти́вныя да́руя и Твое́ сохраня́я Кресто́м Твои́м жи́тельство.

И хра́ма свята́го.

Бо́же оте́ц на́ших, творя́й при́сно с на́ми:

И́же во все́м ми́ре му́ченик твои́х:

Сла́ва: Со святы́ми упоко́й, Христе́, ду́шы:

И ны́не: моли́твами, Го́споди, все́х святы́х:

Тропа́рь хра́ма, а́ще хра́м госпо́дский или́ богоро́дичен: Та́же дне́, и хра́ма свята́го. А́ще же хра́м арха́нгелом или́ Предте́чи, чте́тся, пе́рвее хра́ма, пото́м дне́.

Апо́столи святи́и, моли́те ми́лостиваго Бо́га, да прегреше́ний оставле́ние пода́ст душа́м на́шым.

И свято́му Никола́ю, гла́с 4.

Пра́вило ве́ры и о́браз кро́тости, воздержа́ния учи́теля яви́ тя́ ста́ду твоему́ Я́же веще́й И́стина. Сего́ ра́ди стяжа́л еси́ смире́нием высо́кая, нището́ю бога́тая, о́тче священнонача́льниче Нико́лае, моли́ Христа́ Бо́га, спасти́ся душа́м на́шим.

Та́же хра́ма свята́го.

Бо́же оте́ц на́ших, творя́й при́сно с на́ми:

И́же во все́м ми́ре му́ченик твои́х:

Сла́ва: Со святы́ми упоко́й, Христе́, ду́шы:

И ны́не: моли́твами, Го́споди, все́х святы́х:

Тропа́рь Креста́, гла́с 1: Спаси́, Го́споди, лю́ди твоя́: я́коже в сре́ду указа́ся, и хра́ма свята́го.

Та́же:

Бо́же оте́ц на́ших, творя́й при́сно с на́ми:

И́же во все́м ми́ре му́ченик твои́х:

Сла́ва: Со святы́ми упоко́й, Христе́, ду́шы:

И ны́не: моли́твами, Го́споди, все́х святы́х:

Тропа́рь дне́, гла́с 2:

Апо́столи, му́ченицы, и проро́цы, святи́телие, преподо́бнии, и пра́веднии, до́бре по́двиг соверши́вшии, и ве́ру соблю́дшии, дерзнове́ние иму́ще ко Спа́су, о на́с того́ я́ко бла́га моли́те, мо́лимся, спасти́ся душа́м на́шым.

Сла́ва и ны́не: Конда́к, гла́с 8:

Я́ко нача́тки естества́, насади́телю тва́ри вселе́нная прино́сит ти́, Го́споди, богоно́сныя му́ченики, те́х моли́твами в ми́ре глубо́це, це́рковь твою́, жи́тельство твое́ Богоро́дицею соблюди́, многоми́лостве.

Хра́м же свята́го не чте́тся во ве́сь го́д, поне́же в дневно́м тропаре́ вси́ святи́и воспомина́ются.

Чту́тся тропари́ и кондаки́ воскре́сны, настоя́щаго гла́са.

Гла́с 1

Тропа́рь: Ка́мень запеча́тану от иуде́й, и во́ином стрегу́щым пречи́стое те́ло Твое́ воскре́сл еси́, тридне́вный Спа́се, да́руяй ми́рови жи́знь: сего́ ра́ди си́лы небе́сныя вопия́ху ти́, жизнода́вче: сла́ва воскресе́нию твоему́, Христе́. Сла́ва ца́рствию Твоему́. Сла́ва смотре́нию твоему́, еди́не человеколю́бче.

Конда́к: Воскре́сл еси́ я́ко Бо́г из гро́ба во сла́ве, и ми́р совоскреси́л еси́: и естество́ челове́ческое я́ко Бо́га воспева́ет тя́, и сме́рть исчезе́: Ада́м же лику́ет, Влады́ко: Е́ва ны́не от у́з избавля́ема ра́дуется, зову́щи: Ты́ еси́ и́же все́м подая́, Христе́, воскресе́ние.

Гла́с 2.

Тропа́рь: Егда́ снизше́л еси́ к сме́рти, животе́ безсме́ртный, тогда́ а́д умертви́л еси́ блиста́нием божества́: егда́ же и уме́ршыя от преиспо́дних воскреси́л еси́, вся́ си́лы небе́сныя взыва́ху: жизнода́вче Христе́ Бо́же на́ш, сла́ва Тебе́.

Конда́к: Воскре́сл еси́ от гро́ба, всеси́льне Спа́се, и а́д ви́дев чу́до, ужасе́ся, и ме́ртвии воста́ша: тва́рь же ви́дящи, сра́дуется тебе́ и Ада́м свесели́тся, и ми́р Спа́се мо́й воспева́ет тя́ при́сно.

Гла́с 3

Тропа́рь: Да веселя́тся Небе́сная, да ра́дуются земна́я; я́ко сотвори́ держа́ву мы́шцею Свое́ю Госпо́дь, попра́ сме́ртию сме́рть, пе́рвенец ме́ртвых бы́сть; из чре́ва а́дова изба́ви на́с, и подаде́ ми́рови ве́лию ми́лость.

Конда́к: Воскре́сл еси́ дне́сь из гро́ба, Ще́дре, и на́с возве́л еси́ от вра́т сме́ртных; дне́сь Ада́м лику́ет, и ра́дуется Е́ва, вку́пе же и проро́цы с патриа́рхи воспева́ют непреста́нно Боже́ственную держа́ву вла́сти Твоея́.

Гла́с 4

Тропа́рь: Све́тлую Воскресе́ния про́поведь от А́нгела уве́деша Госпо́дни ученицы́ и пра́деднее осужде́ние отве́ргша, апо́столом хва́лящася глаго́лаху: испрове́ржеся сме́рть, воскре́се Христо́с Бо́г, да́руяй ми́рови ве́лию ми́лость.

Конда́к: Спа́с и Изба́витель мо́й из гро́ба, я́ко Бо́г, воскреси́ от у́з земноро́дныя, и врата́ а́дова сокруши́, и я́ко Влады́ка воскре́се тридне́вен.

Гла́с 5

Тропа́рь: Собезнача́льное Сло́во Отцу́ и Ду́хови, от Де́вы ро́ждшееся на спасе́ние на́ше, воспои́м, ве́рнии, и поклони́мся; я́ко благоволи́ пло́тию взы́ти на Кре́ст, и сме́рть претерпе́ти, и воскреси́ти уме́ршия сла́вным Воскресе́нием Свои́м.

Конда́к: Ко а́ду, Спа́се мо́й, соше́л еси́, и врата́ сокруши́вый я́ко всеси́лен, уме́рших я́ко Созда́тель совоскреси́л еси́, и сме́рти жа́ло сокруши́л еси́, и Ада́м от кля́твы изба́влен бы́сть, Человеколю́бче; те́мже вси́ зове́м: спаси́ на́с, Го́споди.

Гла́с 6

Тропа́рь: А́нгельския Си́лы на гро́бе Твое́м, и стрегу́щии омертве́ша; и стоя́ше Мари́я во гро́бе, и́щущи Пречи́стаго Те́ла Твоего́. Плени́л еси́ а́д, не искуси́вся от него́; сре́тил еси́ Де́ву, да́руяй живо́т. Воскресы́й из ме́ртвых, Го́споди, сла́ва Тебе́.

Конда́к: Живонача́льною дла́нию уме́ршия от мра́чных удо́лий Жизнода́вец воскреси́в все́х Христо́с Бо́г, воскресе́ние подаде́ челове́ческому ро́ду: е́сть бо все́х Спаси́тель, Воскресе́ние и Живо́т, и Бо́г все́х.

Гла́с 7

Тропа́рь: Разруши́л еси́ Кресто́м Твои́м сме́рть, отве́рзл еси́ разбо́йнику ра́й; мироно́сицам пла́ч преложи́л еси́, и апо́столом пропове́дати повеле́л еси́, я́ко воскре́сл еси́, Христе́ Бо́же, да́руяй ми́рови ве́лию ми́лость.

Конда́к: Не ктому́ держа́ва сме́ртная возмо́жет держа́ти челове́ки: Христо́с бо сни́де, сокруша́я и разоря́я си́лы ея́; связу́ем быва́ет а́д, проро́цы согла́сно ра́дуются, предста́, глаго́люще, Спа́с су́щим в ве́ре, изыди́те, ве́рнии, в воскресе́ние.

Гла́с 8

Тропа́рь: С высоты́ снизше́л еси́, Благоутро́бне, погребе́ние прия́л еси́ тридне́вное, да на́с свободи́ши страсте́й, Животе́ и Воскресе́ние на́ше, Го́споди, сла́ва Тебе́.

Конда́к: Воскре́с из гро́ба, уме́ршия воздви́гл еси́, и Ада́ма воскреси́л еси́, и Е́ва лику́ет во Твое́м Воскресе́нии, и мирсти́и концы́ торжеству́ют е́же из ме́ртвых воста́нием Твои́м, Многоми́лостиве.

Изве́стно у́бо бу́ди и сие́, я́ко от неде́ли мытаря́ и фарисе́а и о́в всю́ святу́ю четыредеся́тницу, во вся́ суббо́ты на повече́рии, не чту́тся кондаки́ воскре́сны, но из трио́ди (кроме́ пя́той неде́ли поста́), та́кожде и во святе́й пятдеся́тнице во вся́ дни́ кондаки́ чту́тся из трио́ди, до неде́ли все́х святы́х. А́ще прилучи́тся в неде́лю пра́здник рождества́ Христо́ва, или́ богоявле́ния или́ преображе́ния, или́ воздви́жения честна́го креста́, чте́тся конда́к еди́н настоя́щему пра́зднику. А́ще пра́здник богоро́дичен, или́ ко́его свята́го иму́щаго полиеле́й или́ славосло́вие, чте́тся конда́к воскре́сен: настоя́щему же пра́зднику или́ свято́му, оставля́ется.

Посе́м, Го́споди поми́луй, 40

Та́же моли́тва свята́го вели́каго Васи́лиа:

И́же на вся́кое вре́мя и на вся́кий ча́с, на Небеси́ и на земли́, покланя́емый и сла́вимый, Христе́ Бо́же, Долготерпели́ве, Многоми́лостиве, Многоблагоутро́бне, И́же пра́ведныя любя́й и гре́шныя ми́луяй, И́же вся́ зовы́й ко спасе́нию обеща́ния ра́ди бу́дущих бла́г. Са́м, Го́споди, приими́ и на́ша в ча́с се́й моли́твы и испра́ви живо́т на́ш к за́поведем Твои́м, души́ на́ша освяти́, телеса́ очи́сти, помышле́ния испра́ви, мы́сли очи́сти и изба́ви на́с от вся́кия ско́рби, зо́л и боле́зней, огради́ на́с святы́ми Твои́ми А́нгелы, да ополче́нием и́х соблюда́еми и наставля́еми, дости́гнем в соедине́ние ве́ры и в ра́зум непристу́пныя Твоея́ сла́вы, я́ко благослове́н еси́ во ве́ки веко́в, ами́нь.

Го́споди поми́луй три́жды.

Сла́ва, и ны́не:

Честне́йшую Херуви́м и сла́внейшую без сравне́ния Серафи́м, без истле́ния Бо́га Сло́ва ро́ждшую, су́щую Богоро́дицу, Тя́ велича́ем.

И́менем Госпо́дним благослови́, о́тче.

Свяще́нник: Бо́же, уще́дри ны́:

И моли́тва ко пресвяте́й Богоро́дице.

Нескве́рная, Небла́зная, Нетле́нная, Пречи́стая, Чи́стая Де́во, Богоневе́сто Влады́чице, я́же Бо́га Сло́ва челове́ком пресла́вным Твои́м Рождество́м соедини́вшая, и отри́нувшееся естество́ ро́да на́шего небе́сным совоку́пльшая: я́же ненаде́жных еди́на Наде́жда, и бори́мых по́моще, гото́вое заступле́ние к Тебе́ притека́ющих, и все́х христиа́н прибе́жище. Не гнуша́йся мене́ гре́шнаго, скве́рнаго, скве́рными по́мыслы, и словесы́, и дея́ньми всего́ себе́ непотре́бна сотво́рша, и ра́зумом ле́ности сласте́й жития́ раба́ бы́вша; но я́ко человеколюби́ваго Бо́га Ма́ти, человеколю́бне умилосе́рдися о мне́ гре́шнем и блу́днем, и приими́ мое́, е́же от скве́рных усте́н приноси́мое Тебе́ моле́ние, и Твоего́ Сы́на, и на́шего Влады́ку и Го́спода, ма́тернее Твое́ дерзнове́ние употребля́ющи, моли́, да отве́рзет и мне́ человеколю́бныя утро́бы Своея́ бла́гости, и презре́в моя́ безчи́сленная прегреше́ния, обрати́т мя́ к покая́нию, и Свои́х за́поведей де́лателя иску́сна яви́т мя́. И предста́ни мне́ при́сно, я́ко ми́лостивая, и милосе́рдая, и благолюби́вая, в настоя́щем у́бо житии́ те́плая Предста́тельнице и Помо́щнице, сопроти́вных наше́ствия отгоня́ющи, и ко спасе́нию наставля́ющи мя́: и во вре́мя исхо́да моего́ окая́нную мою́ ду́шу соблюда́ющи, и те́мныя зра́ки лука́вых бесо́в дале́че от нея́ отгоня́ющи: в стра́шный же де́нь суда́ ве́чныя мя́ избавля́ющи му́ки, и неизрече́нныя сла́вы Твоего́ Сы́на и Бо́га на́шего насле́дника мя́ показу́ющи. Ю́же и да улучу́, Влады́чице моя́, Пресвята́я Богоро́дице, Твои́м хода́тайством и заступле́нием, благода́тию и человеколю́бием Единоро́днаго Сы́на Твоего́, Го́спода и Бо́га и Спа́са на́шего Иису́са Христа́. Ему́же подоба́ет вся́кая сла́ва, че́сть и поклоне́ние, со Безнача́льным Его́ Отце́м, и Пресвяты́м, и Благи́м, и Животворя́щим Его́ Ду́хом, ны́не и при́сно, и во ве́ки веко́в, ами́нь.

Моли́тва ко пресвяте́й Тро́ице:

И да́ждь на́м, Влады́ко, на со́н гряду́щим поко́й те́ла и души́, и сохрани́ на́с от мра́чнаго сна́ грехо́внаго, и от вся́каго те́мнаго и нощна́го сладостра́стия: укроти́ стремле́ния страсте́й, угаси́ разжже́нныя стре́лы лука́ваго, я́же на ны́ льсти́вно дви́жимыя: пло́ти на́шея воста́ния утоли́, и вся́кое земно́е и веще́ственное на́ше мудрова́ние успи́. И да́руй на́м, Бо́же, бо́др у́м, целому́др по́мысл, се́рдце трезвя́щееся, со́н ле́гок и вся́каго сатанина́ мечта́ния измене́н. Возста́ви же на́с во вре́мя моли́твы утвержде́ны в за́поведех Твои́х, и па́мять суде́б Твои́х в себе́ тве́рду иму́ща: всено́щное славосло́вие на́м да́руй, во е́же пе́ти и благослови́ти и сла́вити пречестно́е и великоле́пое и́мя Твое́, Отца́, и Сы́на, и Свята́го Ду́ха, ны́не и при́сно, и во ве́ки веко́в, ами́нь.

И а́бие тропари́ сия́, гла́с 6.

Поми́луй на́с, Го́споди, поми́луй на́с; вся́каго бо отве́та недоуме́юще, сию́ Ти́ моли́тву я́ко Влады́це, гре́шнии прино́сим: поми́луй на́с.

Сла́ва: Го́споди, поми́луй на́с, на Тя́ бо упова́хом; не прогне́вайся на ны́ зело́, ниже́ помяни́ беззако́ний на́ших, но при́зри и ны́не я́ко благоутро́бен, и изба́ви ны́ от вра́г на́ших; Ты́ бо еси́ Бо́г на́ш, и мы́ лю́дие Твои́, вси́ дела́ ру́ку Твое́ю, и и́мя Твое́ призыва́ем.

И ны́не: Милосе́рдия две́ри отве́рзи на́м, благослове́нная Богоро́дице, наде́ющиися на Тя́ да не поги́бнем, но да изба́вимся Тобо́ю от бе́д: Ты́ бо еси́ спасе́ние ро́да христиа́нскаго.

Та́же, Го́споди, поми́луй, 12

И моли́твы на со́н гряду́щым

На Го́споди воззва́х: стихи́ры умили́тельны, гла́с 6. Подо́бен: Все́ отло́жше:

Иису́се сладча́йший, души́ моея́ утеше́ние, Иису́се мо́й, очище́ние ума́ моего́, Влады́ко многоми́лостиве, Иису́се, спаси́ мя́. Иису́се Спа́се мо́й, Иису́се мо́й всеси́льне, не оста́ви мене́. Спа́се Иису́се, поми́луй мя́, и изба́ви му́ки вся́кия, Иису́се, и сподо́би мя́, спаса́емых ча́сти, Иису́се мо́й, и ли́ку избра́нных Твои́х сопричти́ мя́, Иису́се человеколю́бче.

Иису́се сладча́йший, апо́столов сла́во, Иису́се мо́й, похвало́ му́чеников, Влады́ко всеси́льне. Иису́се, спаси́ мя́. Иису́се Спа́се мо́й, Иису́се мо́й красне́йший, к тебе́ притека́ющаго, Спа́се Иису́се, поми́луй мя́, моли́твами ро́ждшия тя́, все́х, Иису́се, святы́х Твои́х, проро́к же все́х, Спа́се мо́й Иису́се, и сла́дости ра́йския сподо́би, Иису́се человеколю́бче.

Иису́се сладча́йший, мона́шествующих сла́во, Иису́се долготерпели́ве, по́стников наслажде́ние и украше́ние. Иису́се, спаси́ мя́, Иису́се Спа́се мо́й. Иису́се мо́й преблаги́й, руки́ исхи́ти мя́, Спа́се Иису́се, зми́евы, и сего́ сете́й ны́не, Спа́се Иису́се, свободи́: от ро́ва преиспо́днейшаго, Спа́се мо́й Иису́се, возведи́, и десны́м мя́ сопричти́, Иису́се, овца́м.

Сла́ва, и ны́не, гла́с 2:

Иису́са сла́дкаго ро́ждшая, Богороди́тельнице, Иису́са всеще́драго Бо́га и человеколюби́ваго, Иису́са еди́наго благоутро́бнаго, того́ умоли́, Влады́чице ми́ра всенепоро́чная, уще́дрити мене́ окая́ннаго, и шу́их ча́сти изба́вити мя́, и сподо́бити десна́го предстоя́ния, егда́ ся́дет суди́ти ми́ру, я́коже е́сть пи́сано.

На стихо́вне стихи́ры, гла́с 6:

Спа́се мо́й Иису́се, блу́днаго спасы́й, Спа́се мо́й Иису́се, прие́мый блудни́цу, и мене́ ны́не поми́луй, Иису́се многоми́лостиве, спаси́ и уще́дри, о Иису́се благода́телю, я́ко Манасси́ю милосе́рде Иису́се мо́й, я́ко еди́н человеколю́бец.

Ни еди́ну же на земли́ за́поведь Твою́ сотвори́х, ка́ко явлю́ся Тебе́ седя́щему на престо́ле, и сло́во возда́м, и су́д сотворю́ о все́х, я́же в ве́дении и неве́дении ко́еждо соде́ях, Христе́ мо́й Иису́се; те́мже зову́ Ти́: Твои́х слу́г моли́твами, Иису́се, спаси́ мя́ гре́шнаго.

Кто́ мя́ не пла́чется преступи́вшаго за́поведь Твою́, Иису́се: невоздержа́нием во а́д всели́хся, Иису́се, вме́сто рая́, сне́дию сла́дких виде́нием сме́рть исхода́таих, и Твоея́, Иису́се Спа́се мо́й, сла́вы и жи́зни чу́ждь яви́хся. Но приими́ мене́ ка́ющагося, я́ко ми́лостивый человеколю́бец, Иису́се мо́й, вели́кия ра́ди ми́лости Твоея́.

Сла́ва, и ны́не, Богоро́дичен:

Чи́стая еди́на, Иису́са ро́ждшая, душе́вных прегреше́ний изба́ви мя́, Де́во, и спаси́ мя́ умерщвле́ннаго, молю́ся: ты́ бо наде́жда еси́ ненаде́жных, и ми́ру помо́щница, ты́ и́маши, е́же мо́щи, отрокови́це, я́ко Ма́ти госпо́дня: не пре́зри моле́ния моего́, ниже́ оста́ви, всечи́стая Влады́чице, но я́ко человеколюби́вая, спаси́ мя́.

Та́же тропари́, гла́с 6: Поми́луй на́с, Го́споди, поми́луй на́с: вся́каго бо отве́та недоуме́юще, сию́ Ти́ моли́тву я́ко Влады́це гре́шнии прино́сим: поми́луй на́с.

Сла́ва: Го́споди, поми́луй на́с, на Тя́ бо упова́хом: И ны́не, Милосе́рдия две́ри отве́рзи на́м:

Гла́с 2.

Пе́снь 1.

Ирмо́с: Во глубине́ постла́ иногда́ фараони́тское всево́инство преоруже́нная си́ла, вопло́щшееся же сло́во всезло́бный гре́х потреби́ло е́сть, препросла́вленный Госпо́дь, сла́вно бо просла́вися.

Припе́в: Иису́се сладча́йший, спаси́ мя́.

Иису́се сладча́йший Христе́, Иису́се долготерпели́ве, души́ моея́ я́звы исцели́, Иису́се, и услади́ се́рдце мое́, многоми́лостиве, молю́ся, Иису́се Спа́се мо́й, да велича́ю Тя́ спаса́емый.

Иису́се сладча́йший Христе́, Иису́се, отве́рзи ми́ покая́ния две́рь, человеколю́бче Иису́се, и приими́ мя́, Тебе́ припа́дающа, и те́пле прося́ща, Иису́се Спа́се мо́й, согреше́ний проще́ния.

Сла́ва: Иису́се сладча́йший Христе́, Иису́се, исхити́ мя́ из руки́ льсти́ваго велиа́ра, Иису́се, и сотвори́ десна́го предстоя́теля сла́вы Твоея́, Иису́се Спа́се мо́й, ча́сти шу́ия мя́ избавля́яй.

И ны́не, богоро́дичен: Иису́са ро́ждшая Бо́га, Влады́чице, моли́ о непотре́бных рабе́х, пречи́стая, я́ко да му́ки моли́твами твои́ми изба́вимся, нескве́рная, оскверне́ннии, сла́вы присносу́щныя наслажда́ющеся.

Пе́снь 3.

Ирмо́с: На ка́мени мя́ ве́ры утверди́в, разшири́л еси́ уста́ моя́ на враги́ моя́, возвесели́бося ду́х мо́й, внегда́ пе́ти: не́сть свя́т, я́коже Бо́г на́ш, и не́сть пра́веден па́че Тебе́, Го́споди.

Услы́ши, человеколю́бче Иису́се мо́й, раба́ Твоего́, вопию́ща во умиле́нии: и изба́ви мя́, Иису́се, осужде́ния и му́ки, еди́не долготерпели́ве, Иису́се сладча́йший многоми́лостиве.

Подъими́ раба́ Твоего́, Иису́се мо́й, припа́дающа со слеза́ми, Иису́се мо́й, и спаси́, Иису́се мо́й, ка́ющагося мя́, и гее́нны, Влады́ко, изба́ви, Иису́се сладча́йший многоми́лостиве.

Сла́ва: Вре́мя, Иису́се мо́й, е́же да́л ми́ еси́, во стра́сти ижди́х, Иису́се мо́й: те́мже, Иису́се мо́й, не отве́ржи мя́, но воззови́, молю́ся, Влады́ко, Иису́се сладча́йший, и спаси́.

И ны́не, богоро́дичен: Де́во ро́ждшая Иису́са моего́, моли́ изба́вити мя́ гее́нны, еди́но предста́тельство оскорбля́емых, богоблагода́тная, и сподо́би мя́ жи́зни, всенепоро́чная, нестаре́ющияся.

Седа́лен, гла́с 1. Подо́бен: Гро́б Тво́й, Спа́се: Спа́се мо́й Иису́се, блу́днаго спасы́й, Спа́се мо́й Иису́се, прие́мый блудни́цу, и мене́ ны́не поми́луй, Иису́се многоми́лостиве, спаси́, уще́дри, о Иису́се благоде́телю, я́коже, благоутро́бне, Манасси́ю, Иису́се мо́й, я́ко еди́н человеколю́бец.

Пе́снь 4.

Ирмо́с: Прише́л еси́ от де́вы, не хода́тай, ни а́нгел, но са́м, Го́споди, вопло́щся, и спа́сл еси́ всего́ мя́ челове́ка. Те́м зову́ Ти́: сла́ва си́ле Твое́й, Го́споди.

Исцели́, Иису́се мо́й, души́ моея́ я́звы, Иису́се мо́й, молю́ся, и руки́ мя́ исхити́, Иису́се мо́й благоутро́бне, душетле́ннаго велиа́ра, и спаси́.

Согреши́х, Иису́се мо́й сладча́йший благоутро́бне: Иису́се мо́й, спаси́ мя́, прибега́ющаго к покро́ву Твоему́, Иису́се долготерпели́ве: и ца́рствия Твоего́ мя́ сподо́би.

Сла́ва: Никто́же согреши́, Иису́се мо́й, я́коже согреши́х а́з окая́нный: но припа́даю моля́ся, Иису́се мо́й, спаси́ мя́, и жи́зни, Иису́се мо́й, насле́дие ми́ да́руй.

И ны́не, богоро́дичен: Всепе́тая, Иису́са ро́ждшая Го́спода, того́ моли́ изба́вити му́ки вся́ пою́щыя тя́, и Богоро́дицу вои́стинну имену́ющыя.

Пе́снь 5.

Ирмо́с: Просвеще́ние во тьме́ лежа́щих, спасе́ние отча́янных, Христе́ Спа́се мо́й, к Тебе́ у́треннюю, Царю́ ми́ра, просвети́ мя́ сия́нием Твои́м: ино́го бо ра́зве Тебе́ Бо́га не зна́ю.

Ты́ просвеще́ние, Иису́се мо́й, ума́ моего́, Ты́ спасе́ние отча́янныя души́ моея́, Спа́се, Ты́, Иису́се мо́й, му́ки изба́ви, и гее́нны мя́ зову́ща: спаси́, Иису́се мо́й Христе́, мя́ окая́ннаго.

Всеконе́чно, Иису́се мо́й, ко стра́сти безче́стия низве́ржен ны́не зову́: Ты́, Иису́се мо́й, по́мощи ми́ ру́ку низпосла́в, исто́ргни зову́ща: спаси́, Иису́се мо́й Христе́, мя́ окая́ннаго.

Сла́ва: Оскверне́н у́м, Иису́се мо́й, обнося́ взыва́ю Ти́: очи́сти мя́ от скве́рны прегреше́ний, и изба́ви мя́ во глубины́ зло́бы от неве́дения низпопо́лзшагося, Спа́се Иису́се мо́й, и спаси́ мя́, молю́ся.

И ны́не, богоро́дичен: Иису́са ро́ждшая, отрокови́це Богороди́тельнице, того́ умоли́ спасти́ вся́ правосла́вныя, мона́хи и мирски́я, и гее́нны изба́вити зову́щыя: ра́зве тебе́ предста́тельство тве́рдаго не зна́ем.

Пе́снь 6.

Ирмо́с: В бе́здне грехо́вней валя́яся, неизсле́дную милосе́рдия Твоего́ призыва́ю бе́здну: от тли́, Бо́же, мя́ возведи́.

Иису́се мо́й Христе́ многоми́лостиве, испове́дающася приими́ мя́, Влады́ко, о Иису́се, и спаси́ мя́, и от тли́, Иису́се, мя́ исхити́.

Иису́се мо́й, никто́же бы́сть и́н блудни́к, я́коже а́з стра́стный, о Иису́се человеколю́бче: но Ты́, Иису́се, мя́ спаси́.

Сла́ва: Иису́се мо́й, блудни́цу и блу́днаго, и Манасси́ю и мытаря́ преидо́х, о Иису́се мо́й, страстьми́, и разбо́йника, Иису́се, и ниневи́тяны.

И ны́не, богоро́дичен: Иису́са Христа́ моего́ ро́ждшая, пречи́стая Де́во, еди́на нескве́рная, оскверне́на су́ща мя́, моли́тв твои́х иссо́пом ны́не очи́сти.

Конда́к 1, гла́с 8: Возбра́нный воево́до и Го́споди, а́да победи́телю, я́ко изба́влься от ве́чныя сме́рти, похва́льная воспису́ю Ти́, созда́ние и ра́б Тво́й: но я́ко име́яй милосе́рдие неизрече́нное, от вся́ких мя́ бе́д свободи́, зову́ща: Иису́се Сы́не Бо́жий, поми́луй мя́.

И́кос 1: А́нгелов тво́рче, и Го́споди си́л, отве́рзи ми́ недоуме́нный у́м и язы́к на похвалу́ пречи́стаго Твоего́ и́мене, я́коже глухо́му и гугни́вому дре́вле слу́х и язы́к отве́рзл еси́, и глаго́лаше зовы́й такова́я: Иису́се пречу́дный, а́нгелов удивле́ние: Иису́се преси́льный, прароди́телей избавле́ние. Иису́се пресла́дкий, патриа́рхов велича́ние: Иису́се пресла́вный, царе́й укрепле́ние. Иису́се прелюби́мый, проро́ков исполне́ние: Иису́се преди́вный, му́чеников кре́посте. Иису́се прети́хий, мона́хов ра́досте: Иису́се премилосе́рдый, по́стников воздержа́ние: Иису́се пресла́достный, преподо́бных ра́дование. Иису́се пречестны́й, де́вственных целому́дрие: Иису́се предве́чный, гре́шников спасе́ние. Иису́се, Сы́не Бо́жий, поми́луй мя́.

Конда́к 2: Ви́дя вдови́цу зе́льне пла́чущую, Го́споди, я́коже бо тогда́ умилосе́рдився, сы́на ея́ на погребе́ние несо́ма воскреси́л еси́: си́це и о мне́ умилосе́рдися, человеколю́бче, и греха́ми умерщвле́нную мою́ ду́шу воскреси́, зову́щую: Аллилу́иа.

И́кос 2: Ра́зум неуразуме́нный разуме́ти Фили́пп ищя́, Го́споди, покажи́ на́м Отца́, глаго́лаше. Ты́ же к нему́: толи́кое вре́мя сы́й со мно́ю, не позна́л ли еси́, я́ко Оте́ц во мне́, и а́з во Отце́ е́смь; те́мже, неизсле́дованне, со стра́хом зову́ Ти́: Иису́се, Бо́же предве́чный: Иису́се, Царю́ преси́льный. Иису́се, Влады́ко долготерпели́вый: Иису́се, Спа́се преми́лостивый. Иису́се, храни́телю мо́й преблаги́й: Иису́се, очи́сти грехи́ моя́. Иису́се, отъими́ беззако́ния моя́: Иису́се, отпусти́ непра́вды моя́. Иису́се, наде́ждо моя́, не оста́ви мене́: Иису́се, помо́щниче мо́й, не отри́ни мене́. Иису́се, созда́телю мо́й, не забу́ди мене́: Иису́се, па́стырю мо́й, не погуби́ мене́. Иису́се, Сы́не Бо́жий, поми́луй мя́.

Конда́к 3: Си́лою свы́ше апо́столы облеки́й, Иису́се, во Иерусали́ме седя́щыя, облецы́ и мене́ обнаже́ннаго от вся́каго благотворе́ния, теплото́ю Ду́ха свята́го Твоего́, и да́ждь ми́ с любо́вию пе́ти Тебе́: Аллилу́иа.

И́кос 3: Име́яй бога́тство милосе́рдия, мытари́ и гре́шники, и неве́рныя призва́л еси́, Иису́се: не пре́зри и мене́ ны́не, подо́бнаго и́м, но я́ко многоце́нное ми́ро, приими́ пе́снь сию́: Иису́се, си́ло непобеди́мая: Иису́се, ми́лосте безконе́чная. Иису́се, красото́ пресве́тлая: Иису́се, любы́ неизрече́нная. Иису́се, Сы́не Бо́га жива́го: Иису́се, поми́луй мя́ гре́шнаго. Иису́се, услы́ши мя́ во гресе́х рожде́ннаго. Иису́се, научи́ мя́ непотре́бнаго: Иису́се, освети́ мя́ те́мнаго. Иису́се, очи́сти мя́ скве́рнаго: Иису́се, возведи́ мя́ блу́днаго. Иису́се, Сы́не Бо́жий, поми́луй мя́.

Конда́к 4: Бу́рю вну́трь име́яй помышле́ний сумни́тельных, Пе́тр утопа́ше: узре́в же во пло́ти Тя́ су́ща, Иису́се, и по вода́м ходя́ща, позна́ Тя́ Бо́га и́стиннаго, и ру́ку спасе́ния получи́в, рече́: Аллилу́иа.

И́кос 4: Слы́ша слепы́й мимоходя́ща Тя́, Го́споди, путе́м, вопия́ше: Иису́се, Сы́не дави́дов, поми́луй мя́: и призва́в отве́рзл еси́ о́чи его́. Просвети́ у́бо ми́лостию Твое́ю о́чи мы́сленныя се́рдца и мене́, вопию́ща Ти́, и глаго́люща: Иису́се, вы́шних созда́телю: Иису́се, ни́жних искупи́телю. Иису́се, преиспо́дних потреби́телю: Иису́се, всея́ тва́ри украси́телю. Иису́се, ума́ моего́ просвети́телю. Иису́се, се́рдца моего́ весе́лие: Иису́се, те́ла моего́ здра́вие. Иису́се, спа́се мо́й, спаси́ мя́: Иису́се, све́те мо́й, просвети́ мя́. Иису́се, му́ки вся́кия изба́ви мя́: Иису́се, спаси́ мя́ недосто́йнаго. Иису́се, Сы́не Бо́жий, поми́луй мя́.

Конда́к 5: Богото́чною кро́вию, я́коже искупи́л еси́ на́с дре́вле от зако́нныя кля́твы, Иису́се, си́це изми́ на́с от се́ти, е́юже зми́й запя́т ны́ страстьми́ плотски́ми, и блу́дным наважде́нием, и злы́м уны́нием, вопию́щыя Ти́: Аллилу́иа.

И́кос 5: Ви́девше о́троцы евре́йстии во о́бразе челове́честем, созда́вшаго руко́ю челове́ка, и влады́ку разуме́вше его́, потща́шася ве́твьми угоди́ти ему́, оса́нна вопию́ще. Мы́ же пе́снь прино́сим Ти́, глаго́люще: Иису́се, Бо́же и́стинный: Иису́се, Сы́не дави́дов. Иису́се, царю́ пресла́вный: Иису́се, а́гнче непоро́чный. Иису́се, па́стырю преди́вный: Иису́се, храни́телю во мла́дости мое́й: Иису́се, похвало́ в ста́рости мое́й. Иису́се, наде́ждо в сме́рти мое́й: Иису́се, животе́ по сме́рти мое́й. Иису́се, утеше́ние мое́ на суде́ Твое́м: Иису́се, жела́ние мое́, не посрами́ мене́ тогда́. Иису́се, Сы́не Бо́жий, поми́луй мя́.

Конда́к 6: Пропове́дник богоно́сных веща́ние и глаго́лы исполня́я, Иису́се, на земли́ я́влься, и с челове́ки невмести́мый пожи́л еси́, и боле́зни на́шя подъя́л еси́. Отню́дуже ра́нами Твои́ми мы́ исцеле́вше, пе́ти навыко́хом: Аллилу́иа.

И́кос 6: Возсия́ вселе́нней просвеще́ние и́стины Твоея́, и отгна́ся ле́сть бесо́вская: и́доли бо, Спа́се на́ш, не терпя́ще Твоея́ кре́пости, падо́ша: мы́ же спасе́ние получи́вше, вопие́м Ти́: Иису́се, и́стино, ле́сть отгоня́ющая: Иису́се, све́те, превы́шший все́х све́тлостей. Иису́се Царю́, премога́яй все́х кре́пости: Иису́се, Бо́же, пребыва́яй в ми́лости. Иису́се, хле́бе живо́тный, насы́ти мя́ а́лчущаго: Иису́се, исто́чниче ра́зума, напо́й мя́ жа́ждущаго. Иису́се, оде́ждо весе́лия, оде́й мя́ тле́ннаго: Иису́се, покро́ве ра́дости, покры́й мя́ недосто́йнаго. Иису́се, пода́телю прося́щым, да́ждь ми́ пла́чь за грехи́ моя́: Иису́се, обре́тение ищущим, обря́щи ду́шу мою́. Иису́се, отве́рзителю толку́щым, отве́рзи се́рдце мое́ окая́нное: Иису́се, искупи́телю гре́шных, очи́сти беззако́ния моя́. Иису́се, Сы́не Бо́жий, поми́луй мя́.

Конда́к 7: Хотя́ сокрове́нную та́йну от ве́ка откры́ти, я́ко овча́ на заколе́ние веде́н бы́л еси́, Иису́се, и я́ко а́гнец пря́мо стригу́щаго его́ безгла́сен, и я́ко Бо́г из ме́ртвых воскресл еси́, и со сла́вою на небеса́ возне́слся еси́, и на́с совоздви́гл еси́, зову́щих: Аллилу́иа.

И́кос 7: Ди́вную показа́ тва́рь, явле́йся творе́ц на́м, без се́мене от де́вы воплоти́ся, из гро́ба печа́ти неруши́в воскре́се, и ко апо́столом две́рем затворе́нным с пло́тию вни́де. Те́мже чудя́щеся, воспои́м: Иису́се, сло́ве необъиме́нный: Иису́се, сло́ве несогляда́емый. Иису́се, си́ло непостижи́мая: Иису́се, му́дросте недомы́слимая. Иису́се, божество́ неопи́санное: Иису́се, госпо́дство неисче́тное. Иису́се ца́рство непобеди́мое: Иису́се, влады́чество безконе́чное. Иису́се, кре́посте высоча́йшая: Иису́се, вла́сте ве́чная. Иису́се, тво́рче мо́й, уще́дри мя́: Иису́се, Спа́се мо́й, спаси́ мя́. Иису́се, Сы́не Бо́жий, поми́луй мя́.

Конда́к 8: Стра́нно Бо́га вочелове́чшася ви́дяще, устрани́мся су́етнаго ми́ра, и у́м на боже́ственная возложи́м: сего́ бо ра́ди Бо́г на зе́млю сни́де, да на́с на небеса́ возведе́т, вопию́щих ему́: Аллилу́иа.

И́кос 8: Ве́сь бе́ в ни́жних, и вы́шних ника́коже отступи́ неисче́тный: егда́ во́лею на́с ра́ди пострада́, и сме́ртию свое́ю на́шу сме́рть умертви́, и воскресе́нием живо́т дарова́ пою́щым: Иису́се, сла́досте серде́чная: Иису́се, кре́посте теле́сная. Иису́се, све́тлосте душе́вная: Иису́се, быстрото́ у́мная. Иису́се, ра́досте со́вестная: Иису́се, наде́ждо изве́стная. Иису́се, па́мяте предве́чная: Иису́се, похвало́ высо́кая. Иису́се, сла́во моя́ превознесе́нная: Иису́се, жела́ние мое́, не отри́ни мене́. Иису́се, па́стырю мо́й, взыщи́ мене́: Иису́се Спа́се мо́й, спаси́ мене́. Иису́се, Сы́не Бо́жий, поми́луй мя́.

Конда́к 9: Все́ естество́ а́нгельское безпреста́ни сла́вит пресвято́е и́мя Твое́, Иису́се, на небеси́, свя́т, свя́т, свя́т, вопию́ще мы́ же гре́шнии на земли́ бре́нными устна́ми вопие́м: Аллилу́иа.

Пе́снь 9: Вети́я многовеща́нныя, я́коже ры́бы безгла́сныя, ви́дим о Тебе́, Иису́се Спа́се на́ш: недоуме́ют бо глаго́лати, ка́ко Бо́г непрело́жный, и челове́к соверше́нный пребыва́еши; Мы́ же та́инству дивя́щеся, вопие́м ве́рно: Иису́се, Бо́же предве́чный: Иису́се, Царю́ ца́рствующих. Иису́се, Влады́ко владе́ющих: Иису́се, судие́ живы́х и ме́ртвых. Иису́се, наде́ждо ненаде́жных: Иису́се, не осуди́ мя́ по дело́м мои́м. Иису́се, очи́сти мя́ по ми́лости Твое́й: Иису́се, отжени́ от мене́ уны́ние. Иису́се, просвети́ моя́ мы́сли серде́чныя: Иису́се, да́ждь ми́ па́мять сме́ртную. Иису́се, Сы́не Бо́жий, поми́луй мя́.

Конда́к 10: Спасти́ хотя́ ми́р, восто́че восто́ком, к те́мному за́паду естеству́ на́шему прише́д, смири́лся еси́ до сме́рти: те́мже превознесе́ся и́мя Твое́ па́че вся́каго и́мене, и от все́х коле́н небе́сных и земны́х слы́шиши: Аллилу́иа.

И́кос 10: Царю́ преве́чный, уте́шителю Христе́ и́стинный, очи́сти ны́ от вся́кия скве́рны, я́коже очи́стил еси́ де́сять прокаже́нных: и исцели́ ны́, я́коже исцели́л еси́ сребролюби́вую ду́шу Закхе́я мытаря́: да вопие́м Ти́ во умиле́нии, зову́ще: Иису́се, сокро́вище нетле́нное: Иису́се, бога́тство неистощи́мое. Иису́се, пи́ще кре́пкая: Иису́се, питие́ неисчерпа́емое. Иису́се, ни́щих одея́ние: Иису́се, вдо́в заступле́ние. Иису́се, си́рых защи́тниче: Иису́се, тружда́ющихся по́моще. Иису́се, стра́нных наста́вниче: Иису́се, пла́вающих ко́рмчий. Иису́се, бу́рных оти́шие: Иису́се Бо́же, воздви́гни мя́ па́дшаго. Иису́се, Сы́не Бо́жий, поми́луй мя́.

Конда́к 11: Пе́ние всеумиле́нное приношу́ Ти́ недосто́йный, вопию́ Ти́ я́ко Ханане́а: Иису́се, поми́луй мя́: не дще́рь бо, но пло́ть и́мам страстьми́ лю́те беся́щуюся, и я́ростию пали́мую, и исцеле́ние да́ждь вопию́щу Ти́: Аллилу́иа.

И́кос 11: Светопода́тельна свети́льника су́щым во тьме́ неразу́мия, пре́жде гоня́й Тя́ Па́вел, богоразу́мнаго гла́са си́лу внуши́, и душе́вную быстроту́ уясни́: си́це и мене́ те́мныя зе́ницы душе́вныя просвети́, зову́ща: Иису́се, Царю́ мо́й прекре́пкий: Иису́се, Бо́же мо́й преси́льный. Иису́се, наста́вниче мо́й предо́брый: Иису́се, па́стырю мо́й преще́дрый. Иису́се, Влады́ко мо́й преми́лостивый: Иису́се, Спа́се мо́й премилосе́рдый. Иису́се, просвети́ моя́ чу́вствия потемне́нная страстьми́: Иису́се, исцели́ мое́ те́ло острупле́нное греха́ми. Иису́се, очи́сти мо́й у́м от по́мыслов су́етных: Иису́се, сохрани́ се́рдце мое́ от похоте́й лука́вых. Иису́се Сы́не Бо́жий, поми́луй мя́.

Конда́к 12: Благода́ть пода́ждь ми́, все́х долго́в реши́телю, Иису́се, и приими́ мя́ ка́ющагося, я́коже прия́л еси́ Петра́ отве́ргшагося Тебе́, и призови́ мя́ уныва́ющаго, я́коже дре́вле Па́вла гоня́ща Тя́, и услы́ши мя́ вопию́ща Ти́: Аллилу́иа.

И́кос 12: Пою́ще Твое́ вочелове́чение, восхваля́ем Тя́ вси́, и ве́руем с Фомо́ю, я́ко Госпо́дь и Бо́г еси́, седя́й со Отце́м, и хотя́й суди́ти живы́м и ме́ртвым. Тогда́ у́бо сподо́би мя́ десна́го стоя́ния, вопию́щаго: Иису́се, царю́ предве́чный, поми́луй мя́: Иису́се, цве́те благово́нный, облагоуха́й мя́. Иису́се, теплото́ люби́мая, огре́й мя́: Иису́се, хра́ме предве́чный, покры́й мя́. Иису́се, оде́ждо све́тлая, украси́ мя́: Иису́се, би́сере честны́й, осия́й мя́. Иису́се, ка́меню драги́й, просвети́ мя́: Иису́се, со́лнце пра́вды, освети́ мя́. Иису́се, све́те святы́й, облиста́й мя́: Иису́се, боле́зни душе́вныя и теле́сныя изба́ви мя́. Иису́се, из руки́ сопроти́вныя изми́ мя́: Иису́се, огня́ неугаси́маго и про́чих ве́чных му́к свободи́ мя́. Иису́се, Сы́не Бо́жий, поми́луй мя́.

Конда́к 13: О пресла́дкий и всеще́дрый Иису́се, приими́ ны́не ма́лое моле́ние сие́ на́ше, я́коже прия́л еси́ вдови́цы две́ ле́пте: и сохрани́ достоя́ние Твое́ от вра́г ви́димых и неви́димых, от наше́ствия иноплеме́нник, от неду́га и гла́да, от вся́кия ско́рби и смертоно́сныя ра́ны, и гряду́щия изми́ му́ки все́х, вопию́щих Ти́: Аллилу́иа.

Се́й конда́к глаго́ли три́жды.

И па́ки чте́тся 1-й и́кос: А́нгелов тво́рче: и па́ки конда́к 1-й: Возбра́нный воево́до:

Пе́снь 7.

Ирмо́с: О́бразу злато́му на по́ле деи́ре служи́му, трие́ Твои́ о́троцы небрего́ша безбо́жнаго веле́ния, посреде́ же огня́ вве́ржени, ороша́еми поя́ху: благослове́н еси́, Бо́же оте́ц на́ших.

Христе́ Иису́се, никто́же согреши́ на земли́ от ве́ка, о Иису́се мо́й, я́коже согреши́х а́з окая́нный и блу́дный: те́мже, Иису́се мо́й, вопию́ Ти́: пою́ща мя́ уще́дри, благослове́н еси́, Бо́же оте́ц на́ших.

Христе́ Иису́се, стра́ху Твоему́, вопию́, пригвозди́ мя́, о Иису́се мо́й: и окорми́ ны́не ко приста́нищу благоти́шному, я́ко да, Иису́се мо́й ще́дре, пою́ Ти́ спаса́емый: благослове́н еси́, Бо́же оте́ц на́ших.

Христе́ Иису́се, тма́ми обеща́х Тебе́ стра́стный, о Иису́се мо́й, покая́ние, но солга́х окая́нный: те́мже, Иису́се мо́й, вопию́ Ти́: нечу́вственне пребыва́ющую ду́шу мою́ просвети́, Христе́, отце́в Бо́же, благослове́н еси́.

Богоро́дичен: Христа́ Иису́са ро́ждшая стра́нно, и па́че естества́: того́ моли́, всенепоро́чная, я́же чрез естество́ моя́ прегреше́ния вся́ прости́ти ми́, отрокови́це, да зову́ спаса́емь: благослове́нна еси́, Бо́га пло́тию ро́ждшая.

Пе́снь 8.

Ирмо́с: В пе́щь о́гненную ко отроко́м евре́йским снизше́дшаго, и пла́мень в ро́су прело́жшаго Бо́га, по́йте дела́ я́ко Го́спода, и превозноси́те во вся́ ве́ки.

Тя́, Иису́се мо́й, молю́, я́коже блудни́цу, Иису́се мо́й, изба́вил еси́ мно́гих согреше́ний, та́ко и мене́, Иису́се Христе́ мо́й, изба́ви, и очи́сти оскверне́нную ду́шу мою́, Иису́се мо́й.

Преклони́вся, Иису́се, безслове́сными сластьми́, безслове́сен яви́хся, и ското́м вои́стинну, о Иису́се мо́й, стра́стно окая́нный уподо́бихся, Спа́се: те́мже, Иису́се, безслове́сия мя́ изба́ви.

Впа́д, о Иису́се, в душетле́нныя разбо́йники, обнажи́хся оде́жды, Иису́се мо́й, боготка́нныя ны́не, и лежу́ ра́нами уя́звен: еле́й, Христе́ мо́й, возле́й на мя́ и вино́.

Богоро́дичен: Иису́са моего́ и Бо́га носи́вшая Христа́ несказа́нно, Богоро́дице Мари́е, того́ моли́ при́сно, от бе́д спасти́ся рабо́м твои́м и певце́м твои́м, неискусому́жная Де́во.

Пе́снь 9.

Ирмо́с: От Бо́га Бо́га Сло́ва, неизрече́нною му́дростию прише́дшаго обнови́ти Ада́ма, я́дию в тле́ние па́дшаго лю́те, от святы́я де́вы неизрече́нно воплоти́вшагося на́с ра́ди, ве́рнии единому́дренно пе́сньми велича́ем.

Манасси́ю, Иису́се мо́й, мытаря́, блудни́цу, блу́днаго, ще́дре Иису́се, и разбо́йника преидо́х, Иису́се мо́й, в де́лех сту́дных и безме́стных, Иису́се: но Ты́, Иису́се мо́й, предвари́в мя́, спаси́.

От Ада́ма, Иису́се мо́й, согреши́вшыя вся́, пре́жде зако́на и в зако́не, Иису́се, и по зако́не окая́нный, и благода́ти, Иису́се мо́й, победи́х страстьми́ окая́нно: но Ты́, Иису́се мо́й, судьба́ми Твои́ми спаси́ мя́.

Да не отлуче́н бу́ду, Иису́се мо́й, неизрече́нныя Твоея́ сла́вы, да не улучу́ ча́сти, Иису́се, шу́ия, сладча́йший Иису́се: но Ты́ мя́ десны́м овца́м Твои́м, Христе́ Иису́се мо́й, сочета́в упоко́й, я́ко благоутро́бен.

Богоро́дичен: Иису́са, Богоро́дице, его́же носи́ла еси́, еди́на неискусому́жная Де́во Мари́е, того́, чи́стая, уми́лостиви, я́ко сы́на твоего́ и зижди́теля, изба́вити притека́ющыя к тебе́ искуше́ний и бе́д, и огня́ бу́дущаго.

Свети́лен:

Иису́се, прему́дрости и смы́сла пода́телю, ни́щих корми́телю, си́рых засту́пниче, боля́щих врачу́, исцели́ и просвети́ мое́ се́рдце, Иису́се, стру́пы грехо́вными и страсте́й тле́ю покрове́нное, Иису́се, и спаси́ мя́.

Богоро́дичен: Сия́нием, Де́во, из тебе́ возсия́вшаго све́та, у́м мо́й озари́, се́рдце просвети́, тьму́ грехо́вную отгоня́ющи, и мглу́ ле́ности моея́ потребля́ющи.

На хвали́тех стихи́ры, гла́с 4:

Ди́вное и́мя Твое́, Иису́се Спа́се на́ш, а́нгели пою́т на небеси́, и мы́ гре́шнии на земли́ бре́нными устна́ми воспева́ем, его́же ра́ди поми́луй на́с.

Превели́кое и́мя Твое́, Спа́се, на небеси́ одесну́ю Отца́ седя́щу Ти́, почита́ется: на земли́ же неизрече́нное Твое́ воплоще́ние сла́вится: во а́д же соше́ствие бе́сы устраша́ет, от ни́хже и на́с изба́ви, Христе́ Бо́же, и спаси́ на́с.

Авваку́м, я́ко в гада́нии разуме́в чу́дная дела́ Твоя́, со стра́хом удиви́ся и прибли́жившымся ле́том позна́лся еси́ блудни́цами и разбо́йником, Иису́се: а́з же окая́нный в небреже́нии пребыва́ю. Но да́ждь ми́ поне́ от ны́не ра́зум и стра́х Тво́й, милосе́рде, и ве́лию ми́лость.

Сла́ва, и ны́не:

Изба́вительнице кре́пкая на тя́ наде́ющымся, к ти́хому приста́нищу боже́ственнаго хоте́ния наста́ви мя́, Богоро́дице, ма́терним твои́м дерзнове́нием, е́же и́маши к сы́ну твоему́, Богоневе́сто.

Моли́тва ко Го́споду на́шему Иису́су Христу́:

Согреши́х, беззако́нновах и непра́вдовах пред Тобо́ю, преблаги́й Влады́ко, преступи́х спаси́тельныя Твоя́ за́поведи и свяще́нныя обе́ты моя́, я́же во святе́м креще́нии пред святы́м Твои́м Же́ртвенником, пред А́нгелы же и челове́ки сотвори́х: преоби́дех честну́ю кро́вь заве́та Твоего́, е́юже освяти́хся, обще́ние искупле́ния прие́м: ду́ха благода́ти обезче́стих, стра́шнаго же и преесте́ственнаго сыноположе́ния небрего́х: вся́кое писа́ние, боже́ственный зако́н и уче́ние богодухнове́нное, ударе́ния возду́ха тща́я, и веща́ния еди́на то́кмо дея́ний пуста́я во мне́ вмени́шася: и́менем то́кмо и словесы́ честно́е Ева́нгелие и́стиннаго христиа́нства окая́нный содержу́: ру́це и́мам ко вся́кому хище́нию и лихои́мству приле́жне: но́зе же ско́ро и де́рзостно ко вся́кой непра́вде зле́ теку́ща, гото́выя ча́сть бра́тнюю восхища́ти и попира́ти, снеда́юще убо́гих: уста́ свяще́нных моли́тв и сло́ва Бо́жия орга́н, вся́кия нечистоты́ суесло́вия и клятвопреступле́ния, бесо́м сотвори́х во орга́н, о́чи и вся́ моя́ чу́вства, блуже́ния и вся́каго скверне́ния премно́жеством испо́лних: во мне́ ца́рствующаго ума́ боже́ственное благода́ти се́мя попра́в, и у́ды твоя́, христе́, блудни́чи у́ды сотвори́в, вме́сто хра́ма бо́жия, тли́ и вся́кия нечистоты́ храни́лище обрето́хся. Сего́ ра́ди, преблаги́й влады́ко, мно́гое твое́ человеколю́бие в стуже́ние претвори́х окая́нный, и мно́гая твоя́ блага́я дарова́ния, в ка́знь безу́мно мне́ преложи́х: отню́дуже ниже́ от су́щих ми́ благи́х ниже́ от боле́зней бли́жних лу́чший бы́в, пра́ведно на мя́ са́м твоего́ пра́веднаго наказа́ния я́звы подвиго́х. Но не я́ростию Твое́ю обличи́ши мя́, ниже́ гне́вом твои́м нака́жеши мя́, Го́споди. Тебе́ еди́ному согреши́х, но Тебе́ еди́ному и покланя́юся, и сокруше́нным се́рдцем, я́ко же́ртву чи́стую, испове́дание ти́ приношу́: осла́би, человеколю́бче влады́ко, уста́ви пра́ведно наноси́мую ра́ну: да победи́т мно́жество щедро́т твои́х, грехо́в мои́х лука́вое собра́ние, и твоея́ безчи́сленныя бла́гости пучи́на, да покры́ет го́рькое сле́з мои́х мо́ре. И́мам в рука́х твоего́ человеколю́бия о́браз и вели́чество, разбо́йника, мытаря́, блудни́цу и блу́днаго сы́на, и́же вси́ па́че мене́ в покая́нии благоиску́сствующе, в небе́сное ца́рство предвзыдо́ша. С си́ми у́бо и мене́ испове́дающаяся, и припа́дающа ти́ приими́, влады́ко: а́ще же и те́х вся́ческаго обраще́ния и покая́ния мно́жества отстою́, недоста́вшее да испо́лнит безме́рная бла́гость твоя́, па́че же и все́, поне́же и всего́ вои́стинну отстою́. Приношу́ Ти́ рыда́ние убо́гих, и гла́сы младе́нец, смире́нную и препро́стую, вся́каго во́зраста моля́щихся ча́сть, досто́йную щедро́т и проще́ния твоего́. И́маши к сему́ на милосе́рдие и ми́лость преклоня́ющыя тя́, кре́ст и во́льную сме́рть, ю́же за мя́ неблагода́рнаго претерпе́л еси́, по́двиги к тому́ апо́столов, преподо́бных, по́стников и му́чеников кро́ви: пред все́ми же о́бщую все́х наде́жду и спасе́ние, па́че сло́ва без се́мене ро́ждшую Тя́: и́хже мольбы́ человеколю́бно прие́м, услы́ши мя́, Иису́се Сладча́йший, моля́щаго Ти́ ся́, и ниже́ то́кмо о мне́ само́м, но и о ни́хже до́лжен е́смь: Спаси́ же и поми́луй святе́йшия правосла́вныя патриа́рхи, со все́ми благочести́выми архиере́и, и ве́сь освяще́нный чи́н и при́чет церко́вный, и да́руй и́м це́ло, безмяте́жно, благове́рно, пра́во, по преда́нию святы́х апо́стол и святы́х оте́ц, на вселе́нских собо́рах ду́хом святы́м узако́ненному, исправля́ти сло́во твоея́ и́стины: заблу́ждшыя же от правосла́вныя ве́ры еретики́ и отсту́пники к позна́нию и́стины призови́, неве́рныя просвети́ да тя́ уве́дят: гре́шныя к покая́нию приведи́, де́вствующым чистоту́ и воздержа́ние да́руй, бра́чным святы́ню, вдови́цам и си́рым бу́ди воспита́ние, ни́щым покро́в, стра́нствующым возвраще́ние, пла́вающым приста́нище, ка́ющымся проще́ние да́руй, пла́чущым утеше́ние, благи́м во бла́гости пребыва́ти, сре́дним лу́чшими бы́ти, согреша́ющым во исправле́ние приходи́ти. Е́й Иису́се Сладча́йший, молю́ ти́ ся́: да́ждь грехо́м мои́м оставле́ние, ума́ благопостоя́ние, те́ла здра́вие, житию́ ну́ждная дово́льная, ми́р во дне́х мои́х, возду́ха благорастворе́ние, земли́ благопло́дие, ве́ры правосла́вныя возраще́ние, и соедине́ние святы́х твои́х церкве́й, низложе́ние ересе́й, сове́тов нечести́вых разоре́ние, о́гнь любве́ и вся́каго благоче́стия, в моли́тве чистоту́ серде́чную, в злоключе́нии терпе́ние и великоду́шие, в наде́жди весе́лие, и вся́кое душе́вному моему́ и теле́сному здра́вию и спасе́нию поле́зное, па́че же великоле́пней твое́й сла́ве подоба́ющее проше́ние да́руй и испо́лни по неизме́рным щедро́там твои́м, избавля́я мя́ належа́щаго пра́веднаго преще́ния, губи́тельства, тру́са, пото́па, огня́, меча́ и вся́кия смертоно́сныя я́звы, и не хотя́й сме́рти гре́шника, да́руй ми́ вре́мя к покая́нию, я́ко да и настоя́щих зо́л и бу́дущих ве́чных мук свобожду́ся, благода́тию и человеколю́бием безнача́льнаго Твоего́ Отца́, с ниже́ благослове́н еси́, со Пресвяты́м, благи́м и животворя́щим Твои́м Ду́хом, ны́не и при́сно, и во ве́ки веко́в, ами́нь.

На Го́споди воззва́х, стихи́ры гла́с 6.

Подо́бен: Все́ отло́жше:

Сове́т преве́чный открыва́я тебе́, отрокови́це, Гаврии́л предста́, тебе́ лобза́я и веща́я: ра́дуйся, купино́ неопали́мая. Ра́дуйся, глубино́ неудобозри́мая: ра́дуйся, мо́сте к небесе́м преводя́й, и ле́ствице высо́кая, ю́же Иа́ков ви́де. Ра́дуйся, боже́ственная ста́мно ма́нны: ра́дуйся, разреше́ние кля́твы. Ра́дуйся, ада́мово воззва́ние, с тобо́ю Госпо́дь.

Явля́еши ми ся я́ко челове́к, глаго́лет нетле́нная отрокови́це ко архистрати́гу: и ка́ко веща́еши глаго́лы па́че челове́ка; со мно́ю бо ре́кл еси́, Бо́гу бы́ти, и всели́тися во утро́бу мою́. И ка́ко бу́ду, глаго́ли ми́, село́ простра́нное, и ме́сто свяще́ния, херуви́мы превосходя́щаго; да не прельсти́ши мене́ ле́стию: не позна́х бо сла́сти, бра́ку е́смь неприча́стна, ка́ко у́бо отроча́ рожду́;

Бо́г иде́же хо́щет, побежда́ется естества́ чи́н, глаго́лет безпло́тный, и я́же па́че челове́ка содева́ются, мои́м ве́руй и́стинным глаго́лом, всесвята́я пренепоро́чная. Она́ же возопи́: бу́ди мне́ ны́не по глаго́лу твоему́, и рожду́ безпло́тнаго, пло́ть от мене́ заи́мствовашаго, я́ко да возведе́т челове́ка, я́ко еди́н си́лен, в пе́рвое достоя́ние, с растворе́нием.

Сла́ва, и ны́не, гла́с 2:

Е́же от ве́ка та́инство открыва́ется дне́сь, и Сы́н Бо́жий, сы́н челове́чь быва́ет, да ху́ждшее восприи́м, пода́ст ми́ лу́чшее. Солга́ся дре́вле Ада́м, и Бо́г возжеле́в бы́ти, не бы́сть: челове́к быва́ет Бо́г, да Бо́га Ада́ма соде́лает. Да весели́тся тва́рь, да ликовству́ет естество́, я́ко арха́нгел де́ве со стра́хом предстои́т, и е́же ра́дуйся прино́сит, печа́ли сопроти́вное: за милосе́рдие ми́лости вочелове́чивыйся, Бо́же на́ш, сла́ва Тебе́.

На стихо́вне стихи́ры, гла́с 1.

Подо́бен: Небе́сных чино́в:

С небе́сных круго́в слете́в Гаврии́л в Назаре́т, прии́де к де́ве Мари́и, вопия́ е́й: ра́дуйся, зачне́ши сы́на, Ада́ма дре́внейшаго, творца́ веко́в и изба́вителя вопию́щих тебе́: ра́дуйся, чи́стая.

Сти́х: Слы́ши, дщи́, и ви́ждь, и приклони́ у́хо твое́.

Гарвии́л де́ве благове́стие с небесе́ прине́с, вопия́ше: ра́дуйся, зачне́ши во чре́ве твое́м тобо́ю вмести́маго, невмести́маго же все́ми: и ражда́ющая яви́шися от Отца́ пре́жде денни́цы возсия́вшаго.

Сти́х: Лицу́ твоему́ помо́лятся бога́тии лю́дстии.

Соприсносу́щное Сло́во пребезнача́льнаго Отца́, не разлучи́вся го́рних, ны́не предста́ до́льным, ра́ди кра́йняго благоутро́бия, ми́лость прие́м, е́же на ны́ поползнове́ния, и ада́мову нищету́ восприе́мь вообрази́ся в чужде́е.

Сти́х: Вся́ земля́ да покло́нится тебе́ и пое́т тебе́.

От Отца́ присносу́щно, и от Ма́тере вре́менно, яви́выйся ми́рови, пресу́щественное Сло́во, о́браз раба́ прие́млет: и быва́ет пло́ть, не отсту́пль божества́, и Ада́ма назида́ет во чре́ве безсе́менно заче́ншия его́.

Сла́ва, и ны́не, гла́с 2:

Благовеству́ет Гаврии́л благода́тней дне́сь: ра́дуйся, неневе́стная Ма́ти, и неискусобра́чная. Не удивля́йся стра́нному моему́ зра́ку, ни ужаса́йся, арха́нгел бо е́смь. Зми́й прельсти́ Е́ву иногда́. Ны́не же благовеству́ю тебе́ ра́дость, и пребу́деши нетле́нна, и роди́ши Го́спода, пречи́стая.

Та́же тропа́рь, гла́с 8:

Повеле́нное та́йно, прие́м в ра́зуме, в кро́ве ио́сифове, тща́нием предста́ безпло́тный, глаго́ля неискусобра́чней: приклони́вый схожде́нием небеса́, вмеща́ется неизме́нно ве́сь в тя́: его́же и ви́дя в ложесна́х твои́х прие́мша ра́бий зра́к, ужаса́юся зва́ти тебе́: ра́дуйся, неве́сто неневе́стная. Три́жды.

Гла́с 4.

Пе́снь 1.

Ирмо́с: Отве́рзу уста́ моя́, и напо́лнятся ду́ха, и сло́во отры́гну цари́це ма́тери, и явлю́ся све́тло торжеству́я, и воспою́ ра́дуяся тоя́ чудеса́.

Христо́ву кни́гу одушевле́нную, запечатле́нную тя́ ду́хом, вели́кий арха́нгел, чи́стая, зря́, возглаше́ние ти́: ра́дуйся, ра́дости прия́телище, е́юже прама́терняя кля́тва разреши́тся.

Ада́мово исправле́ние, ра́дуйся, Де́во Богоневе́сто, а́дово умерщвле́ние: ра́дуйся, всенепоро́чная, пала́то все́х царя́: ра́дуйся, престо́ле о́гненный вседержи́теля.

Цве́те неувяда́емый, ра́дуйся, еди́на прозя́бшая я́блоко благово́нное, ра́дуйся, ро́ждшая благоуха́ние, еди́наго царя́: ра́дуйся, неискусобра́чная, ми́рови спасе́ние.

Чистоты́ сокро́вище, ра́дуйся, е́юже от паде́ния на́шего воста́хом: ра́дуйся, сладкоуха́нный кри́не, Влады́чице, ве́рных благоуха́яй, кади́ло благово́нное и ми́ро многоце́нное.

Пе́снь 3.

Ирмо́с: Твоя́ песносло́вцы, Богоро́дице, живы́й и незави́стный исто́чниче, ли́к себе́ совоку́пльшыя духо́вно утверди́, в боже́ственней твое́й сла́ве венце́в сла́вы сподо́би.

Кла́с прозя́бшая боже́ственней, я́ко ни́ва неора́нная я́ве: ра́дуйся, одушевле́нная трапе́зо, хле́б живо́тный вме́щшая: ра́дуйся, живо́тныя воды́ исто́чниче неистоща́емый, Влады́чице.

Ю́нице, юнца́ ро́ждшая непоро́чнаго, ра́дуйся, ве́рным: ра́дуйся, а́гнице, ро́ждшая бо́жияго а́гнца, взе́млющаго ми́ра всего́ прегреше́ния: ра́дуйся, те́плое очисти́лище.

У́тро, светле́йшее, ра́дуйся, еди́на, со́лнце нося́щая Христа́, све́та жили́ще: ра́дуйся, тьму́ разруши́вшая, и мра́чныя бе́сы отню́д отгна́вшая.

Ра́дуйся, две́ре еди́на, е́юже сло́во про́йде еди́но, вереи́ и врата́ а́дова, Влады́чице, рождество́м твои́м сокруши́вшая: ра́дуйся, боже́ственней вхо́де спаса́емых, богоневе́сто.

Пе́снь 4.

Ирмо́с: Седя́й во сла́ве не престо́ле божества́, во о́блаце ле́гце, прии́де Иису́се пребоже́ственный, нетле́нною дла́нию, и спа́се зову́щыя: сла́ва, Христе́, си́ле Твое́й.

Во гла́сех пе́ний, Де́во, тебе́ вопие́м, всепе́тая: ра́дуйся, ту́чная горо́, и усыре́нная ду́хом: ра́дуйся, све́щниче и ста́мно, ма́нну нося́щая, услажда́ющая все́х благочести́вых чу́вства.

Очисти́лище ми́ру, ра́дуйся, пречи́стая Влады́чице: ра́дуйся, ле́ствице, от земли́ все́х возвы́сившая благода́тию: ра́дуйся, мо́сте, вои́стинну преводя́й все́х от сме́рти к животу́ пою́щих тя́.

Небе́с превы́шшая, ра́дуйся, земли́ основа́ние во твои́х ложесна́х, пречи́стая, нетру́дно носи́вшая: ра́дуйся, червлени́це, багряни́цу боже́ственную омочи́вшая от крове́й твои́х, царе́ви си́лам.

Законода́вца ро́ждшая и́стиннаго, ра́дуйся, Влады́чице, беззако́ния все́х ту́не очища́ющаго: недове́домая глубино́, высото́ неизрече́нная, браконеиску́сная, е́юже мы́ обожи́хомся.

Тя́ испле́тшую ми́рови нерукоплете́нный вене́ц, песносло́вим, ра́дуйся, тебе́, Де́во, зову́ще, храни́лище все́х и огражде́ние, и утвержде́ние, и свяще́нное прибе́жище.

Пе́снь 5.

Ирмо́с: Ужасо́шася вся́ческая о боже́ственней сла́ве твое́й: ты́ бо, неискусобра́чная Де́во, име́ла еси́ во утро́бе над все́ми Бо́га, и родила́ еси́ безле́тнаго Сы́на, все́м воспева́ющым тя́, ми́р подава́ющая.

Пу́ть ро́ждшая жи́зни, ра́дуйся, пренепоро́чная, от пото́па грехо́внаго ми́р спа́сшая: ра́дуйся, богоневе́сто, слы́шание и глаго́лание стра́шное: ра́дуйся, пребыва́ние влады́ки тва́ри.

Кре́пость и утвержде́ние челове́ков, ра́дуйся, пречи́стая, ме́сто освяще́ния сла́вы, умерщвле́ние а́дово, черто́же всесве́тлый: ра́дуйся, а́нгелов ра́досте: ра́дуйся, по́моще ве́рно моля́щихся тебе́.

Огнеобра́зная колесни́це Сло́ва, ра́дуйся, Влады́чице, одушевле́нный раю́, дре́во посреде́ иму́щи жи́зни Го́спода, его́же сла́дость оживотворя́ет ве́рою причаща́ющихся, и тли́ подклони́вшихся.

Укрепля́еми си́лою Твое́ю, ве́рно вопие́м ти́: ра́дуйся, гра́де все́х царя́, пресла́вная и достослы́шанная, о не́йже глаго́лана бы́ша я́ве: горо́ несеко́мая, ра́дуйся, глубино́ неизме́римая.

Простра́нное селе́ние Сло́ва, ра́дуйся, пречи́стая, сосу́де, боже́ственный би́сер произве́дшая: ра́дуйся, всечу́дное все́х к Бо́гу примире́ние, блажа́щих тя́, Богоро́дице, всегда́.

Пе́снь 6.

Ирмо́с: Боже́ственное сие́ и всечестно́е соверша́юще пра́зднество, богому́дрии, Богома́тере, прииди́те, рука́ми воспле́щим, от нея́ ро́ждшагося Бо́га сла́вим.

Черто́же Сло́ва нескве́рный, вина́ все́х обоже́ния, ра́дуйся, пречи́стая, проро́ков оглаше́ние: ра́дуйся, апо́столов удобре́ние.

От тебе́ роса́ ука́ну, пла́мень многобо́жия угаси́вшая, те́м вопие́м ти́: ра́дуйся, руно́ одушевле́нное, е́же Гедео́н, Де́во, предви́де.

Се́ тебе́, Де́во, ра́дуйся зове́м: приста́нище на́м бу́ди вла́ющымся, и оти́шие в пучи́не скорбе́й, и собла́знов все́х бори́теля.

Ра́дости вина́, облагодати́ на́ш по́мысл, е́же зва́ти тебе́: ра́дуйся, неопали́мая купино́, о́блаче всесве́тлый, ве́рная непреста́нно осеня́ющий.

Посе́м кондаки́ и и́косы пресвяте́й Богоро́дице. Гла́с 8.

Конда́к 1

Взбра́нной воево́де победи́тельная, я́ко изба́вльшеся от злы́х, благода́рственная воспису́ем и раби́ твои́, Богоро́дице: но я́ко иму́щая держа́ву непобеди́мую, от вся́ких на́с бе́д свободи́, да зове́м ти́: Ра́дуйся, неве́сто неневе́стная.

И́кос 1

А́нгел предста́тель с небесе́ по́слан бы́сть, рещи́ Богоро́дице: ра́дуйся, и со безпло́тным гла́сом воплоща́ема Тя́ зря́, Го́споди, ужаса́шеся, и стоя́ше зовы́й к не́й такова́я: Ра́дуйся, е́юже ра́дость возсия́ет: ра́дуйся, е́юже кля́тва исче́знет. Ра́дуйся, па́дшаго Ада́ма воззва́ние: ра́дуйся, сле́з е́виных избавле́ние. Ра́дуйся, высото́ неудобовосходи́мая челове́ческими по́мыслы: ра́дуйся, глубино́ неудобозри́мая и а́нгельскима очи́ма. Ра́дуйся, я́ко еси́ царе́во седа́лище: ра́дуйся, я́ко но́сиши нося́щаго вся́. Ра́дуйся, звездо́ явля́ющая со́лнце: ра́дуйся, утро́бо боже́ственнаго воплоще́ния. Ра́дуйся, е́юже обновля́ется тва́рь: ра́дуйся, е́юже покланя́емся творцу́. Ра́дуйся, неве́сто неневе́стная.

Конда́к 2

Ви́дящи свята́я себе́ в чистоте́, глаго́лет Гаврии́лу де́рзостно: пресла́вное твоего́ гла́са неудобоприя́тельно души́ мое́й явля́ется: безсе́меннаго бо зача́тия рождество́ ка́ко глаго́леши, зовы́й: Аллилу́иа.

И́кос 2

Ра́зум недоразумева́емый разуме́ти де́ва иму́щи, возопи́ к служа́щему: из боку́ чи́сту, Сы́ну ка́ко е́сть роди́тися мо́щно, рцы́ ми́; к не́йже о́н рече́ со стра́хом, обы́че зовы́й си́це: Ра́дуйся, сове́та неизрече́ннаго таи́ннице: ра́дуйся, молча́ния прося́щих ве́ро. Ра́дуйся, чуде́с Христо́вых нача́ло: ра́дуйся, веле́ний его́ глави́зно. Ра́дуйся, ле́ствице небе́сная, е́юже сни́де Бо́г: ра́дуйся, мо́сте приводя́й су́щих от земли́ на не́бо. Ра́дуйся, све́т неизрече́нно роди́вшая: ра́дуйся, е́же ка́ко, ни еди́наго научи́вшая. Ра́дуйся, прему́дрых превосходя́щая ра́зум: ра́дуйся, ве́рных озаря́ющая смы́слы. Ра́дуйся, неве́сто неневе́стная.

Конда́к 3

Си́ла вы́шняго осени́ тогда́ в зача́тию браконеиску́сную, и благопло́дная тоя́ ложесна́, я́ко село́ показа́ сла́дкое, все́м хотя́щым жа́ти спасе́ние, внегда́ пе́ти си́це: Аллилу́иа.

И́кос 3

Иму́щи богоприя́тную де́ва утро́бу, востече́ ко Елисаве́ти: младе́нец же о́ноя, а́бие позна́в сея́ целова́ние, ра́довашеся, и игра́ньми я́ко пе́сньми вопия́ше к Богоро́дице: Ра́дуйся, о́трасли неувяда́емыя розго́: ра́дуйся, плода́ безсме́ртнаго стяжа́ние. Ра́дуйся, де́лателя де́лающая человеколю́бца: ра́дуйся, сади́теля жи́зни на́шея ро́ждшая. Ра́дуйся, ни́во, растя́щая гобзова́ние щедро́т: ра́дуйся, трапе́зо, нося́щая оби́лие очище́ния. Ра́дуйся, я́ко ра́й пшени́чный процвета́еши: ра́дуйся, я́ко приста́нище душа́м гото́виши. Ра́дуйся, прия́тное моли́твы кади́ло: ра́дуйся, всего́ ми́ра очище́ние. Ра́дуйся, бо́жие к сме́ртным благоволе́ние: ра́дуйся, сме́ртных к Бо́гу дерзнове́ние. Ра́дуйся, неве́сто неневе́стная.

Конда́к 4

Бу́рю вну́трь име́я помышле́ний сумни́тельных, целому́дренный Ио́сиф смяте́ся, к тебе́ зря́ небра́чней, и бракоокра́дованную помышля́я, непоро́чная: уве́дев же твое́ зача́тие от Ду́ха свя́та, рече́: Аллилу́иа.

И́кос 4

Слы́шаша па́стырие а́нгелов пою́щих плотско́е Христо́во прише́ствие, и те́кше я́ко к па́стырю, ви́дят сего́ я́ко а́гнца непоро́чна, во чре́ве мари́ине упа́сшася, ю́же пою́ще ре́ша: Ра́дуйся, а́гнца и па́стыря ма́ти: ра́дуйся, дворе́ слове́сных ове́ц. Ра́дуйся, неви́димых враго́в муче́ние: ра́дуйся, ра́йских двере́й отверзе́ние. Ра́дуйся, я́ко небе́сная сра́дуются земны́м: ра́дуйся, я́ко земна́я сликовству́ют небе́сным. Ра́дуйся, апо́столов немо́лчная уста́: ра́дуйся, страстоте́рпцев непобеди́мая де́рзосте. Ра́дуйся, тве́рдое ве́ры утвержде́ние: ра́дуйся, све́тлое благода́ти позна́ние. Ра́дуйся, е́юже обнажи́тся а́д: ра́дуйся, е́юже облеко́хомся сла́вою. Ра́дуйся, неве́сто неневе́стная.

Конда́к 5

Боготе́чную звезду́ узре́вше волсви́, тоя́ после́доваша зари́: и я́ко свети́льник держа́ще ю́, то́ю испыта́ху кре́пкаго царя́, и дости́гше непостижи́маго, возра́довашася ему́ вопию́ще: Аллилу́иа.

И́кос 5

Ви́деша о́троцы халде́йстии на ру́ку деви́чу, созда́вшаго рука́ми челове́ки, и Влады́ку разумева́юще его́, а́ще и ра́бий прия́т зра́к, потща́шася дарми́ послужи́ти ему́, и возопи́ти благослове́нней: Ра́дуйся, зве́зды незаходи́мыя Ма́ти: ра́дуйся, заре́ та́инственнаго дне́. Ра́дуйся, пре́лести пе́щь угаси́вшая: ра́дуйся, Тро́ицы таи́нники просвеща́ющая. Ра́дуйся, мучи́теля безчелове́чнаго измета́ющая от нача́льства: ра́дуйся, Го́спода человеколю́бца показа́вшая Христа́. Ра́дуйся, ва́рварскаго избавля́ющая служе́ния: ра́дуйся, тиме́ния изъима́ющая де́л. Ра́дуйся, огня́ поклоне́ние угаси́вшая: ра́дуйся, пла́мене страсте́й изменя́ющая. Ра́дуйся, ве́рных наста́внице целому́дрия: ра́дуйся, все́х родо́в весе́лие. Ра́дуйся, неве́сто неневе́стная.

Конда́к 6

Пропове́дницы богоно́снии бы́вше волсви́, возврати́шася в Вавило́н, сконча́вше Твое́ проро́чество: и пропове́давше Тя́ Христа́ все́м, оста́виша И́рода я́ко буесло́вна, не ве́дуща пе́ти: Аллилу́иа.

И́кос 6

Возсия́вый во Еги́пте просвеще́ние и́стины, отгна́л еси́ лжи́ тьму́: и́доли бо его́, Спа́се, не терпя́ще Твоея́ кре́пости, падо́ша, си́х же изба́вльшиися вопия́ху к Богоро́дице: Ра́дуйся, исправле́ние челове́ков: ра́дуйся, низпаде́ние бесо́в. Ра́дуйся, пре́лести держа́ву попра́вшая: ра́дуйся, и́дольскую ле́сть обличи́вшая. Ра́дуйся, мо́ре, потопи́вшее Фарао́на мы́сленнаго: ра́дуйся, ка́меню, напои́вший жа́ждущыя жи́зни. Ра́дуйся, о́гненный сто́лпе, наставля́яй су́щыя во тьме́: ра́дуйся, покро́ве ми́ру, ши́рший о́блака. Ра́дуйся, пи́ще ма́нны прие́мнице: ра́дуйся, сла́дости святы́я служи́тельнице. Ра́дуйся, земле́ обетова́ния: ра́дуйся, из нея́же тече́т ме́д и млеко́. Ра́дуйся, неве́сто неневе́стная.

Конда́к 7

Хотя́щу Симео́ну от ны́нешняго ве́ка преста́витися преле́стнаго, вда́лся еси́ я́ко младе́нец тому́, но позна́лся еси́ ему́ и Бо́г соверше́нный. Те́мже удиви́ся твое́й неизрече́нней прему́дрости, зовы́й: Аллилу́иа.

И́кос 7

Но́вую показа́ тва́рь, я́влься зижди́тель на́м от него́ бы́вшым, из безсе́менныя прозя́б утро́бы, и сохрани́в ю́, я́коже бе́, нетле́нну, да чу́до ви́дяще воспое́м ю́, вопию́ще: Ра́дуйся, цве́те нетле́ния: ра́дуйся, ве́нче воздержа́ния. Ра́дуйся, воскресе́ния о́браз облиста́ющая: ра́дуйся, а́нгельское житие́ явля́ющая. Ра́дуйся, дре́во светлоплодови́тое, от него́же пита́ются ве́рнии: ра́дуйся, дре́во благосенноли́ственное, и́мже покрыва́ются мно́зи. Ра́дуйся, во чре́ве нося́щая изба́вителя плене́нным: ра́дуйся, ро́ждшая наста́вника заблу́ждшым. Ра́дуйся, судии́ пра́веднаго умоле́ние: ра́дуйся, мно́гих согреше́ний проще́ние. Ра́дуйся, оде́ждо наги́х дерзнове́ния: ра́дуйся, любы́ вся́кое жела́ние побежда́ющая. Ра́дуйся, неве́сто неневе́стная.

Конда́к 8

Стра́нное рождество́ ви́девше, устрани́мся ми́ра, у́м на небеса́ прело́жше: сего́ бо ра́ди высо́кий Бо́г, на земли́ яви́ся смире́нный челове́к, хотя́й привлещи́ к высоте́ тому́ вопию́щыя: Аллилу́иа.

И́кос 8

Ве́сь бе́ в ни́жних, и вы́шних ника́коже отступи́ неопи́санное Сло́во: снизхожде́ние бо боже́ственное, не прехожде́ние же ме́стное бы́сть, и рождество́ от де́вы благоприя́тныя, слы́шащия сия́: Ра́дуйся, Бо́га невмести́маго вмести́лище: ра́дуйся, честна́го та́инства две́ри. Ра́дуйся, неве́рных сумни́тельное слы́шание: ра́дуйся, ве́рных изве́стная похвало́. Ра́дуйся, колесни́це пресвята́я су́щаго на херуви́мех: ра́дуйся, селе́ние пресла́вное, су́щаго на серафи́мех. Ра́дуйся, проти́вная в то́жде собра́вшая: ра́дуйся, де́вство и рождество́ сочета́вшая. Ра́дуйся, е́юже разреши́ся преступле́ние: ра́дуйся, е́юже отве́рзеся ра́й. Ра́дуйся, ключу́ ца́рствия Христо́ва: ра́дуйся, наде́ждо бла́г ве́чных. Ра́дуйся, неве́сто неневе́стная.

Конда́к 9

Вся́кое естество́ а́нгельское удиви́ся вели́кому Твоего́ вочелове́чения де́лу: непристу́пнаго бо я́ко Бо́га, зря́ще все́м присту́пнаго челове́ка, на́м у́бо спребыва́юща, слы́шаща же от все́х: Аллилу́иа.

И́кос 9

Вети́я многовеща́нныя, я́ко ры́бы безгла́сныя ви́дим о тебе́, Богоро́дице: недоумева́ют бо глаго́лати, е́же ка́ко, и де́ва пребыва́еши, и роди́ти возмогла́ еси́: мы́ же та́инству дивя́щеся, ве́рно вопие́м: Ра́дуйся, прему́дрости бо́жия прия́телище: ра́дуйся, промышле́ния его́ сокро́вище. Ра́дуйся, любому́дрыя нему́дрыя явля́ющая: ра́дуйся, хитрослове́сныя безслове́сныя облича́ющая. Ра́дуйся, я́ко обуя́ша лю́тии взыска́теле: ра́дуйся, я́ко увядо́ша баснотво́рцы. Ра́дуйся, афине́йское плете́ние растерза́ющая: ра́дуйся, ры́барския мре́жи исполня́ющая. Ра́дуйся, из глубины́ неве́дения извлача́ющая: ра́дуйся, мно́ги в ра́зуме просвеща́ющая. Ра́дуйся, кораблю́ хотя́щих спасти́ся: ра́дуйся, приста́нище жите́йских пла́ваний. Ра́дуйся, неве́сто неневе́стная.

Конда́к 10

Спасти́ хотя́ ми́р, и́же все́х украси́тель, к сему́ самообетова́н прии́де, и па́стырь сы́й, я́ко Бо́г, на́с ра́ди яви́ся по на́м челове́к: подо́бным бо подо́бное призва́в, я́ко Бо́г слы́шит: Аллилу́иа.

И́кос 10

Стена́ еси́ де́вам, Богоро́дице Де́во, и все́м к тебе́ прибега́ющым: и́бо небесе́ и земли́ творе́ц устро́и тя́, пречи́стая, все́лься во утро́бе твое́й, и вся́ приглаша́ти тебе́ научи́: Ра́дуйся, сто́лпе де́вства: ра́дуйся, две́рь спасе́ния. Ра́дуйся, нача́льнице мы́сленнаго назда́ния: ра́дуйся, пода́тельнице боже́ственныя бла́гости. Ра́дуйся, ты́ бо обнови́ла еси́ зача́тыя сту́дно: ра́дуйся, ты́ бо наказа́ла еси́ окра́денныя умо́м. Ра́дуйся, тли́теля смы́слов упраждня́ющая: ра́дуйся, се́ятеля чистоты́ ро́ждшая. Ра́дуйся, черто́же безсе́меннаго уневе́щения: ра́дуйся, ве́рных Го́сподеви сочета́вшая. Ра́дуйся, до́брая младопита́тельнице де́вам: ра́дуйся, невестокраси́тельнице ду́ш святы́х. Ра́дуйся, неве́сто неневе́стная.

Конда́к 11

Пе́ние вся́кое побежда́ется, спростре́тися тща́щееся ко мно́жеству мно́гих щедро́т Твои́х, равночи́сленныя бо песка́ пе́сни а́ще прино́сим Ти́, царю́ святы́й, ничто́же соверша́ем досто́йно, я́же да́л еси́ на́м Тебе́ вопию́щым: Аллилу́иа.

И́кос 11

Светоприе́мную свещу́, су́щым во тьме́ я́вльшуюся, зри́м святу́ю де́ву: невеще́ственный бо вжига́ющи о́гнь, наставля́ет к ра́зуму боже́ственному вся́, заре́ю у́м просвеща́ющая, зва́нием же почита́емая, си́ми: Ра́дуйся, луче́ у́мнаго со́лнца: ра́дуйся, свети́ло незаходи́маго све́та. Ра́дуйся, мо́лние, ду́шы просвеща́ющая: ра́дуйся, я́ко гро́м, враги́ устраша́ющая. Ра́дуйся, я́ко многосве́тлое возсиява́еши просвеще́ние: ра́дуйся, я́ко многотеку́щую источа́еши реку́. Ра́дуйся, купе́ли живопису́ющая о́браз: ра́дуйся, грехо́вную отъе́млющая скве́рну. Ра́дуйся, ба́не, омыва́ющая со́весть: ра́дуйся, ча́ше, че́рплющая ра́дость. Ра́дуйся, обоня́ние Христо́ва благоуха́ния: ра́дуйся, животе́ та́йнаго весе́лия. Ра́дуйся, неве́сто неневе́стная.

Конда́к 12

Благода́ть да́ти восхоте́в, долго́в дре́вних, все́х долго́в реши́тель челове́ком, прии́де собо́ю от отше́дшым того́ благода́ти, и раздра́в рукописа́ние, слы́шит от все́х си́це: Аллилу́иа.

И́кос 12

Пою́ще твое́ рождество́, хва́лим тя́ вси́, я́ко одушевле́нный хра́м, Богоро́дице: во твое́й бо всели́вся утро́бе содержа́й вся́ руко́ю Госпо́дь, освяти́, просла́ви, и научи́ вопи́ти тебе́ все́х: Ра́дуйся, селе́ние Бо́га и Сло́ва: ра́дуйся, свята́я святы́х бо́льшая. Ра́дуйся, ковче́же позлаще́нный Ду́хом: ра́дуйся, сокро́вище живота́ неистощи́мое. Ра́дуйся, честны́й ве́нче царе́й благочести́вых: ра́дуйся, честна́я похвало́ иере́ев благогове́йных. Ра́дуйся, це́ркве непоколеби́мый сто́лпе: ра́дуйся, ца́рствия неруши́мая стено́. Ра́дуйся, е́юже возви́жутся побе́ды: ра́дуйся, е́юже низпа́дают врази́. Ра́дуйся, те́ла, моего́ врачева́ние: ра́дуйся, души́ моея́ спасе́ние. Ра́дуйся, неве́сто неневе́стная.

Конда́к 13

О всепе́тая Ма́ти, ро́ждшая все́х святы́х святе́йшее Сло́во, ны́нешнее прие́мши приноше́ние, от вся́кия изба́ви напа́сти все́х, и бу́дущая изми́ му́ки, о тебе́ вопию́щих: Аллилу́иа.

Се́й конда́к глаго́ли три́жды.

И па́ки чте́тся 1-й и́кос: А́нгел предста́тель:

И па́ки конда́к 1-й: Взбра́нной воево́де:

Пе́снь 7.

Ирмо́с: Не послужи́ша тва́ри богому́дрии па́че созда́вшаго, но о́гненное преще́ние му́жески попра́вше, ра́довахуся пою́ще: препе́тый отце́в Госпо́дь и Бо́г, благослове́н еси́.

Воспева́ем тя́ вопию́ще: ра́дуйся, колесни́це со́лнца у́мнаго, лозо́ и́стинная, гро́зд зре́лый возде́лавшая, вино́ источа́ющий, ду́шы веселя́щее, ве́рою тя́ сла́вящих.

Врача́ все́х челове́ком ро́ждшая, ра́дуйся, Богоневе́сто, же́зле та́йный, цве́т неувяда́емый процве́тший: ра́дуйся, Влады́чице, е́юже ра́дости наполня́емся, и жи́знь насле́дствуем.

Вети́йствующий не мо́жет язы́к, Влады́чице, песносло́вити тя́, па́че бо серафи́мов возвы́силася еси́, ро́ждши царя́ Христа́, его́же моли́, вся́каго ны́не вре́да изба́витися, ве́рно тебе́ покланя́ющымся.

Хва́лят тя́ блажа́ще концы́, и любо́вию зову́т тебе́: ра́дуйся, сви́тче, в не́мже пе́рстом о́тчим написа́ся Сло́во, чи́стая: его́же моли́, в кни́зе живо́тней рабо́м твои́м написа́тися, Богоро́дице.

Мо́лим раби́ твои́, и приклоня́ем коле́ни се́рдца на́шего: приклони́ у́хо твое́, чи́стая, и спаси́ скорбьми́ погружа́емыя при́сно, и соблюди́ от вся́каго вра́жия плене́ния тво́й гра́д, Богоро́дице.

Пе́снь 8

Ирмо́с: О́троки благочести́выя в пещи́, рождество́ богоро́дичо спасло́ е́сть: тогда́ у́бо образу́емое, ны́не же де́йствуемое, вселе́нную всю́ воздвиза́ет пе́ти тебе́: Го́спода по́йте дела́, и превозноси́те его́ во вся́ ве́ки.

Ложесны́ Сло́во прия́ла еси́, вся́ нося́щаго носи́ла еси́, млеко́м пита́ла еси́ ма́нием пита́ющаго вселе́нную всю́, чи́стая. Ему́же пое́м: Го́спода по́йте дела́, и превозноси́те во вся́ ве́ки.

Моисе́й уразуме́ в купине́ вели́кое та́инство рождества́ твоего́: о́троцы же прообрази́ша сие́ я́вственнее, посреде́ огня́ стоя́ще, и неопаля́еми, нетле́нная свята́я Де́во. Те́м тя́ пое́м во вся́ ве́ки.

Пре́жде пре́лестию обнажи́вшиися, в ри́зу нетле́ния облеко́хомся рождество́м твои́м: и седя́щии во тьме́ прегреше́ний, све́т ви́дехом, све́та жили́ще, отрокови́це. Те́м тя́ пое́м во вся́ ве́ки.

Ме́ртвии тобо́ю оживля́ются, жи́знь бо ипоста́сию родила́ еси́: неми́и пре́жде благоглаголиво быва́ют, прокаже́ннии очища́ются, неду́зи отгоня́ются, духо́в возду́шных мно́жества побежда́ются, Де́во, челове́ков спасе́ние.

Ми́ру ро́ждшая спасе́ние, и́мже от земли́ на высоту́ взя́ти бы́хом. Ра́дуйся, всеблагослове́нная, покро́ве и держа́во, стено́ и утвержде́ние пою́щым, чи́стая: Го́спода по́йте дела́, и превозноси́те во вся́ ве́ки.

Пе́снь 9

Ирмо́с: Вся́к земноро́дный да взыгра́ется ду́хом просвеща́емь, да торжеству́ет же безпло́тных умо́в естество́, почита́ющее свяще́нное торжество́ Богома́тере, и да вопие́т: ра́дуйся, всеблаже́нная Богоро́дице, чи́стая присноДе́во.

Да тебе́, ве́рнии, ра́дуйся, зове́м, тобо́ю ра́дости прича́стницы бы́вше присносу́щныя, изба́ви на́с напа́стей, ва́рварскаго плене́ния, и вся́кия ины́я ра́ны, за мно́жество, отрокови́це, прегреше́ний, находя́щия челове́ком согреша́ющым.

Яви́лся еси́ просвеще́ние на́ше и утвержде́ние. Те́мже вопие́м ти́: ра́дуйся, звездо́ незаходи́мая, вводя́щая в ми́р вели́кое со́лнце: ра́дуйся, еде́м отве́рзшая заключе́нный, чи́стая: ра́дуйся, сосу́де, ми́ро неистощи́мое на тя́ излия́нное прие́мший.

Ста́нем благогове́йно в до́му Бо́га на́шего, и возопии́м: ра́дуйся, ми́ру Влады́чице: ра́дуйся, Мари́е, госпоже́ все́х на́с: ра́дуйся, еди́на непоро́чная в жена́х и до́брая: ра́дуйся, сто́лпе о́гненный, вводя́щий в вы́шнюю жи́знь челове́чество.

Голуби́це, ми́лостиваго ро́ждшая, ра́дуйся, присноДе́во: преподо́бных все́х, ра́дуйся, похвало́, страда́льцев венча́ние: ра́дуйся, все́х пра́ведных боже́ственное удобре́ние, и на́м ве́рным спасе́ние.

Пощади́, Бо́же, насле́дие Твое́, грехи́ на́шя вся́ презре́в ны́не, на сие́ име́я моля́щую Тя́, на земли́ безсе́менно Тебе́ ро́ждшую, вели́кия ра́ди ми́лости восхоте́вшаго вообрази́тися, Христе́, в челове́чество.

Ексапостила́рий:

Подо́бен: Жены́ услы́шите:

Игра́йте ликовству́юще, с весе́лием воспо́йте, Гаврии́л де́ве ра́дость принося́й предста́, в Назаре́те ны́не гра́де ра́дость благове́щения: ра́дуйся, чи́стая и непоро́чная, ми́ра предста́тельство: ра́дуйся, небе́сный престо́ле.

На хвали́тех стихи́ры, гла́с 4:

Подо́бен: Я́ко до́бля:

Сокрове́нное та́инство, и а́нгелом неве́домое, Гаврии́л уверя́ет арха́нгел, и к тебе́ ны́не прии́де еди́ней нетле́нней и до́брей голуби́це, и ро́да на́шего воззва́нию, и вопие́т тебе́, пресвята́я, е́же ра́дуйся. Угото́вися сло́вом, Бо́га Сло́ва твои́ми ложесна́ми прия́ти.

Светоно́сная пала́та угото́вася Тебе́, Влады́ко, утро́ба чи́стая богоотрокови́цы, гряди́ к се́й и сни́ди, уще́дри созда́ние Твое́, зави́стно бра́нь прие́мшее, и рабо́тою удержа́нное льсти́ваго, и добро́ту пе́рвую погуби́вшее, и Твоего́ спаси́тельнаго ча́ющее соше́ствия.

Гаврии́л арха́нгел к тебе́, всенепоро́чная, явле́нно прии́дет, и вопие́т к тебе́: ра́дуйся, кля́твы разреше́ние, па́дших воста́ние: ра́дуйся, еди́на избра́нная Бо́гу бы́вшая: ра́дуйся, колесни́це со́лнца сла́вы, приими́ безпло́тнаго, во утро́бе твое́й всели́тся хотя́щаго.

Сла́ва, и ны́не, гла́с 4:

Язы́ка, его́же не ве́дяше, услы́ша Богоро́дица: глаго́лаше бо к не́й арха́нгел благове́щения глаго́лы: отню́дуже ве́рно прии́мши целова́ние, зача́т тя́ преве́чнаго Бо́га. Те́мже и мы́ ра́дующеся вопие́м: из нея́ воплоти́выйся непрело́жно, Бо́же, ми́р ми́рови да́руй, и душа́м на́шым ве́лию ми́лость.

Моли́тва ко пресвяте́й Богоро́дице

Нескве́рная, Небла́зная, Нетле́нная, Пречи́стая Богоро́дице, Пренепоро́чная Влады́чице, Небе́сная Цари́це, Ма́ти Царя́ вы́шних си́л, Творца́ небесе́ и земли́, еди́на ра́дости Хода́таице всему́ ми́ру, ро́ждшая Го́спода на́шего Иису́са Христа́, земны́м все́м Спаси́теля! Вопию́ Ти́ припа́дая: приими́ моле́бное сие́ пе́ние благода́рственное от недосто́йнаго раба́ Твоего́ и от скве́рных усте́н мои́х, не пре́зри мене́, Всегосподова́нная Цари́це. И́бо никто́же притека́яй к Тебе́ посра́млен бы́сть, или́ кто́ призыва́яй Тя́ не услы́шан от Тебе́ изы́де; я́ко вся́ стихи́и, не́бо и земля́, возду́х и мо́ре повину́ются Тебе́, и вси́ проти́вни ду́си стра́хом обдержи́ми трепе́щут, боя́щеся и́мене свята́го Твоего́, ве́дуще Тя́ Ма́терь Бо́жию. Кто́ па́ки наде́жду возложи́вый на Тя́ поги́бе? То́чию отмета́ющиися покланя́тися о́бразу Твоему́ напи́санному, его́же вся́ си́лы небе́сныя чту́т, вся́ же коле́на земна́я, христиа́нский ро́д и вся́к во́зраст ве́рных, славосло́вяще покланя́емся, Пречи́стая, благогове́йно почита́юще. Не и́мамы бо ина́го Бо́га, ра́зве Сы́на Твоего́, со Отце́м при́сно и Ду́хом Святы́м, во Еди́нем Божестве́, от всея́ тва́ри сла́вимаго и покланя́емаго, и Тебе́ по Го́споде Бо́зе Госпожу́ Богоро́дицу испове́дуем, и́стиннаго Бо́га на́шего Ма́терь, и любе́зно вси́ почита́ем, Госпоже́. Ми́лостива у́бо на́м Сы́на Твоего́ сотвори́, па́че же покажи́ на мне́ обы́чное Твое́ милосе́рдие, мо́жеши бо, ели́ка хо́щеши: умоли́ о мне́, я́ко удали́хся от Него́ за безчи́сленная и скве́рная беззако́ния моя́, и толи́ко прогне́вах благосе́рдие Его́, и огорчи́х человеколю́бную Его́ бла́гость и мно́гое милосе́рдие и ми́лость, я́ко не́смь досто́ин от Него́ поми́лован бы́ти, а́ще не Ты́ уми́лостивиши Его́ о мне́, Госпоже́ Цари́це и Богома́ти, я́ко вся́ Тебе́ от Него́ возмо́жна су́ть. Сего́ ра́ди к Тебе́ прибега́ю, те́плей Помо́щнице и ско́рей Засту́пнице, не и́мам бо ины́я ра́зве Тебе́ к Нему́ Хода́таицы. Е́й, Цари́це, моя́ Влады́чице, Пречи́стая Госпоже́ Богоро́дице, не́сть ми́ ина́го высоча́йшаго на земли́ и на небеси́, я́коже Ты́ по Го́споде Бо́зе мое́м Иису́се Христе́, и на Тя́ всю́ мою́ наде́жду и́мам, Пречи́стая Де́во. Те́мже на Тво́й пресвяты́й о́браз взира́я, я́ко и́стинную Са́мую Тя́ зрю́ Богоро́дицу, ве́рою серде́чною и любо́вию от души́ припа́дая, покланя́юся Тебе́ с Преве́чным на ру́ку Твое́ю держи́мым Младе́нцем, Го́сподем на́шим Иису́с Христо́м, боголе́пно почита́я, и моле́бная пе́ния и моли́твы принося́ Ти́, ужаса́юся, и трепе́щу за недосто́инство мое́, и вопию́ Ти́: поми́луй мя́, Ма́ти Бо́жия, и покажи́ на мне́ убо́зем дре́вния ми́лости Твоя́. Я́коже иногда́ дре́вле всеси́льным Твои́м воево́дством спасла́ еси́ ца́рствующий гра́д Тво́й от ски́фскаго воево́ды зверообра́знаго, лука́ваго ве́пря, предста́теля бесо́в, о́наго прего́рдаго кага́на, и разсвире́пеющим мо́рем тьмочи́сленная во́инства потопи́ла еси́, вопию́щая и напа́дающая на гра́д Тво́й; и па́ки, с небесе́ одожде́нием горя́щих ка́мык, тьмы́ корабле́й в мо́ри бреющем развари еси́; и ны́не, еди́на Богома́ти, еди́на Ты́ та́яжде су́щи, яви́ на мне́ человеколю́бное Твое́ заступле́ние. Победи́ неви́димым полки́ сатанины́, душе́вный мо́й гра́д расплени́вшия, и ца́рствующую ду́шу мою́ в не́м стрело́ю беззако́ния уязви́вшия, и всего́ мя́ мечми́ любоде́йствия изсе́кшия, и грехо́вным копие́м пробо́дшия; и́бо е́ле жи́ва оста́виша, и в ро́ве грехо́внем затвори́ша мя́ нечу́вствия, и окамене́ние серде́чное наложи́ша ми́, я́ко едва́ ощуща́юся, не моги́й от порабоще́ния те́х свободи́тися. Но к Тебе́ Ма́тери Го́спода моего́ рыда́нием сле́з зову́: предста́ни ми́ в по́мощь ско́ро, да не до конца́ поги́бну, исхити́ мя́ из руки́ те́х, и извлецы́ мя́ из грехо́внаго ро́ва, возста́ви па́ки душе́вный мо́й гра́д, и ума́ влады́ку в не́м воцари́, и над все́ми чу́вствы укрепи́, непристу́пна и стра́шна враго́м покажи́; да вси́ уве́дят, я́ко Тобо́ю содержи́мь е́смь. Спаса́ющи спаси́, Влады́чице Де́во, ду́шу мою́, я́коже Тво́й гра́д иногда́, на Тя́ упова́ющий, спасла́ еси́, на сла́ву и заступле́ние ве́рным, на посрамле́ние же нечести́вым, и во ве́ки на безконе́чное и́х муче́ние, на вели́чие же и похвалу́ от ро́да в ро́ды правове́рному христиа́нскому ро́ду. Те́мже Твою́ по́мощь пропове́дую велегла́сно, и о́наго Твоего́ вели́каго заступле́ния стра́шное воево́дство воспомина́я, Тебе́ Избра́нной Воево́де победи́тельная воспису́ю ра́б Тво́й, Богоро́дице, и моле́бное сие́ ака́фистово приношу́ благодаре́ние: приими́ е́, и принеси́ Твоему́ Сы́ну и Бо́гу, и о мне́, Цари́це, с небе́сными во́и и с ли́ки святы́х все́х, Ему́ предложи́. В де́нь же су́дный не забу́ди мене́, и недосто́йнаго моего́ моле́ния, и ве́ры моея́, я́же к Тебе́, и все́ упова́ние мое́ возложе́нное на Тя́ воспомяни́. Уте́ши оскорбле́ннаго мене́, и теле́сное облегчи́ озлобле́ние, душе́вныя же боле́зни и стра́сти теле́сныя пре́жде все́х потреби́ Твои́м неви́димым предста́тельством и хода́тайством. Да пу́ть маловре́меннаго сего́ жития́ до́бре и непреткнове́нно возмогу́ прейти́, и ве́чная о́ная блага́я получу́, и славосло́влю Твое́ тве́рдое заступле́ние, я́ко благослове́на еси́, с ро́ждшимся от Тебе́ Сыно́м и Бо́гом, ны́не и в безконе́чныя ве́ки. Ами́нь.

Моли́тва втора́я ко пресвяте́й Богоро́дице.

Приими́, всеблагомо́щная, пречи́стая госпоже́ Влады́чице Богороди́тельнице, сия́ честны́я да́ры, тебе́ еди́ней прикла́дныя, от на́с недосто́йных рабо́в твои́х, от все́х родо́в избра́нная, все́х тва́рей небе́сных и земны́х вы́шшая я́вльшаяся. Поне́же бо тебе́ ра́ди бы́сть Госпо́дь си́л с на́ми, и тобо́ю Сы́на бо́жия позна́хом, и сподо́бихомся свята́го те́ла его́, и пречи́стыя кро́ве его́. Те́мже блаже́нна еси́ в ро́дех родо́в, богоблаже́нная, херуви́мов светле́йши, и серафи́мов честне́йши су́щая. И ны́не, всепе́тая пресвята́я Богоро́дице, не преста́й моля́щися о на́с недосто́йных рабе́х твои́х, е́же изба́витися на́м от вся́каго сове́та лука́ваго, и от вся́каго обстоя́ния: и сохрани́тися на́м неврежде́нным от вся́каго ядови́таго прило́га диа́вольскаго. Но да́же до конца́ моли́твами твои́ми неосужде́нных на́с соблюди́: я́ко да твои́м заступле́нием и по́мощию спаса́еми, сла́ву, хвалу́, благодаре́ние и поклоне́ние за вся́, в Тро́ице еди́ному Бо́гу и все́х созда́телю возсыла́ем, ны́не и при́сно, и во ве́ки веко́в. Ами́нь.

Моли́тва ко Го́споду на́шему Иису́су Христу́.

О вели́кий Царю́, Вседержи́телю, ми́лостивый Го́споди, Иису́се Христе́ Бо́же мо́й! Се́ на умоле́ние к Тебе́ а́з, многогре́шный, предлага́ю Ма́терь Твою́ Всенепоро́чную, Пречи́стую Госпожу́, Де́ву Богоро́дицу и Влады́чицу всеми́лостивую, во все́м ми́ре моли́твенницу за ро́д христиа́нский, Тебе́ на́м ро́ждшую пло́тию Христа́ Бо́га на́шего, неизрече́нныя ра́ди ми́лости Твоея́, я́же на на́с. Тоя́ у́бо моли́твами, Го́споди Иису́се Христе́, Бо́же на́ш, покажи́ на мне́ убо́зем вели́чие, благода́ть и ми́лость Твою́, оставле́ние грехо́в да́руй ми́, и сподо́би мя́ бы́ти насле́дника Ца́рствия Твоего́, со все́ми святы́ми, в безконе́чныя ве́ки веко́в. Ами́нь.

Благослови́вшу свяще́ннику, начина́ем:

Псало́м 142

Го́споди, услы́ши моли́тву мою́:

Сла́ва, и ны́не: Аллилу́иа.

Бо́г Госпо́дь, и яви́ся на́м: со стихи́: Та́же:

Тропа́рь Богоро́дице:

К Богоро́дице приле́жно ны́не притеце́м гре́шнии и смире́ннии, и припаде́м в покая́нии зову́ще из глубины́ души́: влады́чице помози́, на ны́ милосе́рдовавши: потщи́ся, погиба́ем от мно́жества прегреше́ний, не отврати́ твоя́ рабы́ тщи́, тя́ бо и еди́ну наде́жду и́мамы. Два́жды.

Не умолчи́м никогда́ Богоро́дице, си́лы твоя́ глаго́лати недосто́йнии: а́ще бо ты́ не бы предстоя́ла моля́щи, кто́ бы на́с изба́вил от толи́ких бе́д? кто́ же бы сохрани́л до ны́не свобо́дны? не отсту́пим влады́чице от Тебе́, твоя́ бо рабы́ спаса́еши при́сно от вся́ких лю́тых. еди́ножды.

Та́же псало́м 50. Поми́луй мя́ Бо́же:

И кано́н Пресвяты́я Богоро́дицы, без ирмосо́в.

Гла́с 8.

Пе́снь 1

Ирмо́с: Во́ду проше́д я́ко су́шу, и еги́петскаго зла́ избежа́в, изра́ильтянин вопия́ше: изба́вителю и Бо́гу на́шему пои́м.

Пресвята́я Богоро́дице, спаси́ на́с.

Мно́гими содержи́мь напа́стьми, к Тебе́ прибега́ю, спасе́ния иски́й: о, Ма́ти Сло́ва и Де́во, от тя́жких и лю́тых мя́ спаси́.

Страсте́й мя́ смуща́ют прило́зи, мно́гаго уны́ния испо́лнити мою́ ду́шу; умири́, Отрокови́це, тишино́ю Сы́на и Бо́га Твоего́, Всенепоро́чная.

Сла́ва: Спа́са ро́ждшую Тя́ и Бо́га, молю́, Де́во, изба́витися ми́ лю́тых: к Тебе́ бо ны́не прибега́я, простира́ю и ду́шу и помышле́ние.

И ны́не: Неду́гующа те́лом и душе́ю, посеще́ния Боже́ственнаго и промышле́ния от Тебе́ сподо́би, еди́на Богома́ти, я́ко блага́я, Блага́го же Роди́тельница.

Пе́снь 3

Ирмо́с: Небе́снаго кру́га Верхотво́рче, Го́споди, и Це́ркве Зижди́телю, Ты́ мене́ утверди́ в любви́ Твое́й, жела́ний кра́ю, ве́рных утвержде́ние, еди́не Человеколю́бче.

Предста́тельство и покро́в жи́зни моея́ полага́ю Тя́, Богороди́тельнице Де́во: Ты́ мя́ окорми́ ко приста́нищу Твоему́, благи́х вино́вна; ве́рных утвержде́ние, еди́на Всепе́тая.

Молю́, Де́во, душе́вное смуще́ние и печа́ли моея́ бу́рю разори́ти: Ты́ бо, Богоневе́стная, нача́льника тишины́ Христа́ родила́ еси́, еди́на Пречи́стая.

Сла́ва: Благоде́теля ро́ждши до́брых вино́внаго, благодея́ния бога́тство все́м источи́, вся́ бо мо́жеши, я́ко си́льнаго в кре́пости Христа́ ро́ждши, Богоблаже́нная.

И ны́не: Лю́тыми неду́ги и боле́зненными страстьми́ истяза́ему, Де́во, Ты́ ми́ помози́: исцеле́ний бо неоску́дное Тя́ зна́ю сокро́вище, Пренепоро́чная, неиждива́емое.

Спаси́ от бе́д рабы́ Твоя́, Богоро́дице, я́ко вси́ по Бо́зе к Тебе́ прибега́ем, я́ко неруши́мей стене́ и предста́тельству.

При́зри благосе́рдием, всепе́тая Богоро́дице, на мое́ лю́тое телесе́ озлобле́ние, и исцели́ души́ моея́ боле́знь.

Ектения́ сугу́бая: Поми́луй на́с, Бо́же:

Тропа́рь, гла́с 2-й

Моле́ние те́плое и стена́ необори́мая, ми́лости исто́чниче, ми́рови прибе́жище, приле́жно вопие́м Ти́: Богоро́дице Влады́чице, предвари́, и от бе́д избави на́с, еди́на вско́ре предста́тельствующая.

Пе́снь 4

Ирмо́с: Услы́шах, Го́споди, смотре́ния Твоего́ та́инство, разуме́х дела́ Твоя́ и просла́вих Твое́ Божество́.

Страсте́й мои́х смуще́ние, ко́рмчию ро́ждшая Го́спода, и бу́рю утиши́ мои́х прегреше́ний, Богоневе́стная.

Милосе́рдия Твоего́ бе́здну призыва́ющу пода́ждь ми́, я́же Благосе́рдаго ро́ждшая и Спа́са все́х пою́щих Тя́.

Наслажда́ющеся, Пречи́стая, Твои́х дарова́ний, благода́рственное воспева́ем пе́ние, ве́дуще Тя́ Богома́терь.

Сла́ва: На одре́ боле́зни моея́ и не́мощи низлежа́щу ми́, я́ко Благолюби́ва, помози́, Богоро́дице, еди́на ПрисноДе́во.

И ны́не: Наде́жду и утвержде́ние и спасе́ния сте́ну недви́жиму иму́ще Тя́, Всепе́тая, неудо́бства вся́каго избавля́емся.

Пе́снь 5

Ирмо́с: Просвети́ на́с повеле́нии Твои́ми, Го́споди, и мы́шцею Твое́ю высо́кою Тво́й ми́р пода́ждь на́м, Человеколю́бче.

Испо́лни, Чи́стая, весе́лия се́рдце мое́, Твою́ нетле́нную даю́щи ра́дость, весе́лия ро́ждшая вино́внаго.

Изба́ви на́с от бе́д, Богоро́дице чи́стая, ве́чное ро́ждши избавле́ние, и ми́р, вся́к у́м преиму́щий.

Сла́ва: Разреши́ мглу́ прегреше́ний мои́х, Богоневе́сто, просвеще́нием Твоея́ све́тлости, Све́т ро́ждшая Боже́ственный и преве́чный.

И ны́не: Исцели́, Чи́стая, души́ моея́ неможе́ние, посеще́ния Твоего́ сподо́бльшая, и здра́вие моли́твами Твои́ми пода́ждь ми́.

Пе́снь 6

Ирмо́с: Моли́тву пролию́ ко Го́споду, и Тому́ возвещу́ печа́ли моя́, я́ко зо́л душа́ моя́ испо́лнися, и живо́т мо́й а́ду прибли́жися, и молю́ся я́ко Ио́на: от тли́, Бо́же, возведи́ мя́.

Сме́рти и тли́ я́ко спа́сл е́сть, Са́м Ся́ изда́в сме́рти, тле́нием и сме́ртию мое́ естество́, я́то бы́вшее, Де́во, моли́ Го́спода и Сы́на Твоего́, враго́в злоде́йствия мя́ изба́вити.

Предста́тельницу Тя́ живота́ ве́м и храни́тельницу тве́рду, Де́во, и напа́стей реша́щу молвы́, и нало́ги бесо́в отгоня́ющу; и молю́ся всегда́, от тли́ страсте́й мои́х изба́вити мя́.

Сла́ва: Я́ко сте́ну прибе́жища стяжа́хом, и ду́ш всесоверше́нное спасе́ние, и простра́нство в ско́рбех, Отрокови́це, и просвеще́нием Твои́м при́сно радуемся: о, Влады́чице, и ны́не на́с от страсте́й и бе́д спаси́.

И ны́не: На одре́ ны́не немощству́яй лежу́, и не́сть исцеле́ния пло́ти мое́й: но, Бо́га и Спа́са ми́ру и Изба́вителя неду́гов ро́ждшая, Тебе́ молю́ся, Благо́й: от тли́ неду́г возста́ви мя́.

Свяще́нник помина́ет, о здра́вии

И по возгла́се, конда́к, гла́с 6-й

Предста́тельство христиа́н непосты́дное, хода́тайство ко Творцу́ непрело́жное, не пре́зри гре́шных моле́ний гла́сы, но предвари́, я́ко Блага́я, на по́мощь на́с, ве́рно зову́щих Ти́; ускори́ на моли́тву, и потщи́ся на умоле́ние, предста́тельствующи при́сно, Богоро́дице, чту́щих Тя́.

И а́бие: Проки́мен:

Помяну́ и́мя твое́ во вся́ком ро́де и ро́де.

Сти́х: Слы́ши дщи́ и ви́ждь, и приклони́ у́хо твое́.

Свяще́нник: И о сподо́битися на́м слы́шанию свята́го Ева́нгелиа, Го́спода Бо́га мо́лим.

Прему́дрость, прости́, услы́шим свята́го Ева́нгелиа. Ми́р все́м.

От Луки́ свята́го Ева́нгелиа чте́ние: [зача́ло 4].

Во дни́ о́ны, воста́вши Мариа́м, и́де в го́рняя со тща́нием во гра́д Иу́дов. и вни́де в до́м Заха́риин, и целова́ Елисаве́т. и бы́сть, я́ко услы́ша Елисаве́т целова́ние Мари́ино, взыгра́ся младе́нец во чре́ве ея́: и испо́лнися Ду́ха Свя́та Елисаве́т. и возопи́ гла́сом ве́лиим, и рече́: благослове́на ты́ в жена́х, и благослове́н пло́д чре́ва твоего́. и отку́ду мне́ сие́, да прии́де ма́ти Го́спода моего́ ко мне́? се́ бо я́ко бы́сть гла́с целова́ния твоего́ во у́шию мое́ю, взыгра́ся младе́нец ра́дощами во чре́ве мое́м. и блаже́нна ве́ровавшая, я́ко бу́дет соверше́ние глаго́ланным е́й от Го́спода. и рече́ Мариа́м: вели́чит душа́ моя́ Го́спода, и возра́довася ду́х мо́й о Бо́зе Спа́се мое́м. я́ко призре́ на смире́ние рабы́ своея́: се́ бо от ны́не ублажа́т мя́ вси́ ро́ди. я́ко сотвори́ мне́ вели́чие си́льный, и свя́то и́мя его́. пребы́сть же Мариа́м с не́ю я́ко три́ ме́сяцы, и возврати́ся в до́м сво́й.

И а́бие, сла́ва, гла́с 6:

Моли́твами Богоро́дицы, ми́лостиве, очи́сти мно́жества согреше́ний на́ших.

И ны́не, то́йже. Та́же:

Поми́луй мя́, бо́же, по вели́цей ми́лости твое́й, и по мно́жеству щедро́т твои́х очи́сти беззако́ние мое́.

Гла́с 6:

Не вве́ри мя́ челове́ческому предста́тельству, Пресвята́я Влады́чице, но приими́ моле́ние раба́ Твоего́: ско́рбь бо обдержи́т мя́, терпе́ти не могу́ де́монскаго стреля́ния, покро́ва не и́мам, ниже́ где́ прибе́гну, окая́нный, всегда́ побежда́емь, и утеше́ния не и́мам, ра́зве Тебе́, Влады́чице ми́ра, упова́ние и предста́тельство ве́рных, не пре́зри моле́ние мое́, поле́зно сотвори́.

Свяще́нник: спаси́, Бо́же, лю́ди Твоя́, и благослови́ достоя́ние Твое́:

Го́споди поми́луй, 12.

Ми́лостию и щедро́тами: и про́чая.

Пе́снь 7

Ирмо́с: От Иуде́и доше́дше о́троцы, в Вавило́не иногда́, ве́рою Тро́ическою пла́мень пе́щный попра́ша, пою́ще: отце́в Бо́же, благослове́н еси́.

На́ше спасе́ние я́коже восхоте́л еси́, Спа́се, устро́ити, во утро́бу Де́выя всели́лся еси́, Ю́же ми́ру предста́тельницу показа́л еси́: оте́ц на́ших Бо́же, благослове́н еси́.

Воли́теля ми́лости, его́же родила́ еси́, Ма́ти чи́стая, умоли́ изба́витися от прегреше́ний и душе́вных скве́рн ве́рою зову́щим: оте́ц на́ших Бо́же, благослове́н еси́.

Сла́ва: Сокро́вище спасе́ния и Исто́чник нетле́ния, Тя́ ро́ждшую, и сто́лп утвержде́ния, и две́рь покая́ния, зову́щим показа́л еси́: оте́ц на́ших Бо́же, благослове́н еси́.

И ны́не: Теле́сныя сла́бости и душе́вныя неду́ги, Богороди́тельнице, любо́вию приступа́ющих к кро́ву Твоему́, Де́во, исцели́ти сподо́би, Спа́са Христа́ на́м ро́ждшая.

Пе́снь 8

Ирмо́с: Царя́ Небе́снаго, его́же пою́т во́и а́нгельстии, хвали́те и превозноси́те во вся́ ве́ки.

По́мощи я́же от Тебе́ тре́бующия не пре́зри, Де́во, пою́щия и превознося́щия Тя́ во ве́ки.

Неможе́ние души́ моея́ исцеля́еши и теле́сныя боле́зни, Де́во, да Тя́ просла́влю, Чи́стая, во ве́ки.

Сла́ва: Исцеле́ний бога́тство излива́еши ве́рно пою́щим Тя́, Де́во, и превознося́щим неизрече́нное Твое́ рождество́.

И ны́не: Напа́стей Ты́ прило́ги отгоня́еши и страсте́й нахо́ды, Де́во: те́мже Тя́ пое́м во вся́ ве́ки.

Пе́снь 9

Ирмо́с: Вои́стинну Богоро́дицу Тя́ испове́дуем, спасе́ннии Тобо́ю, Де́во чи́стая, с безпло́тными ли́ки Тя́ велича́юще.

То́ка сле́з мои́х не отврати́ся, Я́же от вся́каго лица́ вся́ку сле́зу отъе́мшаго, Де́во, Христа́ ро́ждшая.

Ра́дости мое́ се́рдце испо́лни, Де́во, Я́же ра́дости прие́мшая исполне́ние, грехо́вную печа́ль потребля́ющи.

Приста́нище и предста́тельство к Тебе́ прибега́ющих бу́ди, Де́во, и стена́ неруши́мая, прибе́жище же и покро́в и весе́лие.

Сла́ва: Све́та Твоего́ заря́ми просвети́, Де́во, мра́к неве́дения отгоня́ющи, благове́рно Богоро́дицу Тя́ испове́дающих.

И ны́не: На ме́сте озлобле́ния не́мощи смири́вшагося, Де́во, исцели́, из нездра́вия во здра́вие претворя́ющи.

И а́бие: Досто́йно е́сть я́ко вои́стинну:

И кади́т свяще́нник же́ртвенник и лю́ди, и мы́ пое́м настоя́щия богоро́дичны: Вы́шшую небе́с и чи́стшую све́тлостей со́лнечных, изба́вльшую на́с от кля́твы, Влады́чицу ми́ра пе́сньми почти́м.

От мно́гих мои́х грехо́в немощству́ет те́ло, немощству́ет и душа́ моя́; к Тебе́ прибега́ю, Благода́тней, наде́ждо ненаде́жных, Ты́ ми́ помози́.

Влады́чице и Ма́ти Изба́вителя, приими́ моле́ние недосто́йных ра́б Твои́х, да хода́тайствуеши к Ро́ждшемуся от Тебе́; о, Влады́чице ми́ра, бу́ди Хода́таица!

Пое́м приле́жно Тебе́ пе́снь ны́не, всепе́той Богоро́дице, ра́достно: со Предте́чею и все́ми святы́ми моли́, Богоро́дице, е́же уще́дрити ны́.

Вся́ а́нгелов во́инства, Предте́че Госпо́день, апо́столов двоенадеся́тице, святи́и вси́ с Богоро́дицею, сотвори́те моли́тву, во е́же спасти́ся на́м.

Та́же, Трисвято́е. Пресвята́я тро́ице: по О́тче на́ш:

Тропари́, гла́с 6:

Поми́луй на́с Го́споди, поми́луй на́с: Сла́ва: Го́споди поми́луй на́с: И ны́не: Милосе́рдия две́ри:

Свяще́нник: Поми́луй на́с Бо́же, по вели́цей ми́лости:

Ли́к: Го́споди поми́луй, три́жды.

Посе́м и про́чая поря́ду, я́коже указа́ся и по тре́тией пе́сни.

Моли́тва ко Пресвято́й Богоро́дице

О Пресвята́я Госпоже́ Влады́чице Богоро́дице, вы́шши еси́ все́х А́нгел и Арха́нгел, и всея́ тва́ри честне́йши, Помо́щница еси́ оби́димых, ненаде́ющихся наде́яние, убо́гих засту́пница, печа́льных утеше́ние, а́лчущих корми́тельница, наги́х одея́ние, больны́х исцеле́ние, гре́шных спасе́ние, христиа́н все́х поможе́ние и заступле́ние. О всеми́лостивая Госпоже́, Де́во Богоро́дице Влады́чице, ми́лостию твое́ю спаси́ и поми́луй святе́йшия патриа́рхи правосла́вныя преосвяще́нныя митрополи́ты, архиепи́скопы и епи́скопы, и ве́сь свяще́ннический и и́ноческий чи́н, и вся́ правосла́вныя христиа́ны ри́зою Твое́ю честно́ю защити́, и умоли́, Госпоже́, из Тебе́ без се́мене воплоти́вшагося Христа́ Бо́га на́шего, да препоя́шет на́с си́лою Свое́ю свы́ше, на неви́димыя и ви́димыя враги́ на́ша. О Всеми́лостивая Госпоже́ Влады́чице Богоро́дице, воздви́гни на́с из глубины́ грехо́вныя и изба́ви на́с от гла́да, губи́тельства, от тру́са и пото́па, от огня́ и меча́, от нахожде́ния иноплеме́нных и междоусо́бныя бра́ни, и от напра́сныя сме́рти, и от нападе́ния вра́жия, и от тлетво́рных ве́тр, и от смертоно́сныя я́звы, и от вся́каго зла́. Пода́ждь, Госпоже́, ми́р и здра́вие рабо́м Твои́м, все́м правосла́вным христиа́ном, и просвети́ и́м у́м и о́чи серде́чныя, е́же ко спасе́нию; и сподо́би ны́ гре́шныя рабы́ Твоя́, Ца́рствия Сы́на Твоего́, Христа́ Бо́га на́шего: я́ко держа́ва Его́ благослове́нна и препросла́вленна, со Безнача́льным Его́ Отце́м, и с Пресвяты́м и Благи́м и Животворя́щим Его́ Ду́хом, ны́не и при́сно и во ве́ки веко́в. Ами́нь.

Тропа́рь, гла́с 6-й

А́нгеле Бо́жий, храни́телю мо́й святы́й, живо́т мо́й соблюди́ во стра́се Христа́ Бо́га, у́м мо́й утверди́ во и́стиннем пути́, и к любви́ го́рней уязви́ ду́шу мою́, да тобо́ю направля́емь, получу́ от Христа́ Бо́га ве́лию ми́лость.

Сла́ва, и ны́не. Богоро́дичен:

Свята́я Влады́чице, Христа́ Бо́га на́шего Ма́ти, я́ко все́х Творца́ недоуме́нно ро́ждшая, моли́ бла́гость Его́ всегда́, со храни́телем мои́м а́нгелом, спасти́ ду́шу мою́, страстьми́ одержи́мую, и оставле́ние грехо́в дарова́ти ми́.

Кано́н А́нгелу храни́телю, гла́с 8-й

Пе́снь 1

Ирмо́с: Пои́м Го́сподеви, прове́дшему лю́ди Своя́ сквозе́ Чермно́е мо́ре, я́ко еди́н сла́вно просла́вися.

Иису́су: Пе́снь воспе́ти и восхвали́ти, Спа́се, Твоего́ раба́ досто́йно сподо́би, безпло́тному а́нгелу, наста́внику и храни́телю моему́.

Еди́н а́з в неразу́мии и в ле́ности ны́не лежу́, наста́вниче мо́й и храни́телю, не оста́ви мене́, погиба́юща.

Сла́ва: У́м мо́й твое́ю моли́твою напра́ви, твори́ти ми́ Бо́жия повеле́ния, да получу́ от Бо́га отда́ние грехо́в, и ненави́дети ми́ злы́х наста́ви мя́, молю́ся ти́.

И ны́не: Моли́ся, Деви́це, о мне́, ра́бе Твое́м, ко Благода́телю, со храни́телем мои́м а́нгелом, и наста́ви мя́ твори́ти за́поведи Сы́на Твоего́ и Творца́ моего́.

Пе́снь 3

Ирмо́с: Ты́ еси́ утвержде́ние притека́ющих к Тебе́, Го́споди, Ты́ еси́ све́т омраче́нных, и пое́т Тя́ ду́х мо́й.

Все́ помышле́ние мое́ и ду́шу мою́ к тебе́ возложи́х, храни́телю мо́й; ты́ от вся́кия мя́ напа́сти вра́жия изба́ви.

Вра́г попира́ет мя́, и озлобля́ет, и поуча́ет всегда́ твори́ти своя́ хоте́ния; но ты́, наста́вниче мо́й, не оста́ви мене́ погиба́юща.

Сла́ва: Пе́ти пе́снь со благодаре́нием и усе́рдием Творцу́ и Бо́гу да́ждь ми́, и тебе́, благо́му а́нгелу храни́телю моему́: изба́вителю мо́й, изми́ мя́ от вра́г озлобля́ющих мя́.

И ны́не: Исцели́, Пречи́стая, моя́ многонеду́жныя стру́пы, я́же в души́, прожени́ враги́, и́же при́сно бо́рются со мно́ю.

Седа́лен, гла́с 2-й

Подо́бен: Вы́шних ищя́:

От любве́ душе́вныя вопию́ ти́, храни́телю моея́ души́, всесвяты́й мо́й а́нгеле: покры́й мя́ и соблюди́ от лука́ваго ловле́ния всегда́, и к жи́зни наста́ви небе́сней, вразумля́я и просвеща́я и укрепля́я мя́.

Сла́ва, и ны́не. Богоро́дичен:

Богоро́дице безневе́стная Пречи́стая, Я́же без се́мени ро́ждши все́х Влады́ку, Того́ со а́нгелом храни́телем мои́м моли́, изба́вити ми́ ся́ вся́каго недоуме́ния, и да́ти умиле́ние и све́т души́ мое́й и согреше́нием очище́ние, Я́же еди́на вско́ре заступа́ющи.

Пе́снь 4

Ирмо́с: Услы́шах, Го́споди, смотре́ния Твоего́ та́инство, разуме́х дела́ Твоя́, и просла́вих Твое́ Божество́.

Моли́ Человеколю́бца Бо́га ты́, храни́телю мо́й, и не оста́ви мене́, но при́сно в ми́ре житие́ мое́ соблюди́ и пода́ждь ми́ спасе́ние необори́мое.

Я́ко засту́пника и храни́теля животу́ моему́ прие́м тя́ от Бо́га, а́нгеле, молю́ тя́, святы́й, от вся́ких мя́ бе́д свободи́.

Сла́ва: Мою́ скве́рность твое́ю святы́нею очи́сти, храни́телю мо́й, и от ча́сти шу́ия да отлуче́н бу́ду моли́твами твои́ми и прича́стник сла́вы явлю́ся.

И ны́не: Недоуме́ние предлежи́т ми́ от обыше́дших мя́ зо́л, Пречи́стая, но изба́ви мя́ от ни́х ско́ро: к Тебе́ бо еди́ней прибего́х.

Пе́снь 5

Ирмо́с: У́тренююще вопие́м Ти́: Го́споди, спаси́ ны́; Ты́ бо еси́ Бо́г на́ш, ра́зве Тебе́ ино́го не ве́мы.

Я́ко име́я дерзнове́ние к Бо́гу, храни́телю мо́й святы́й, Сего́ умоли́ от оскорбля́ющих мя́ зо́л изба́вити.

Све́те све́тлый, све́тло просвети́ ду́шу мою́, наста́вниче мо́й и храни́телю, от Бо́га да́нный ми́ а́нгеле.

Сла́ва: Спя́ща мя́ зле́ тягото́ю грехо́вною, я́ко бдя́ща сохрани́, а́нгеле Бо́жий, и возста́ви мя́ на славосло́вие моле́нием твои́м.

И ны́не: Мари́е, Госпоже́ Богоро́дице безневе́стная, наде́ждо ве́рных, вра́жия возноше́ния низложи́, пою́щия же Тя́ возвесели́.

Пе́снь 6

Ирмо́с: Ри́зу ми́ пода́ждь све́тлу, одея́йся све́том я́ко ри́зою, многоми́лостиве Христе́ Бо́же на́ш.

Вся́ких мя́ напа́стей свободи́, и от печа́лей спаси́, молю́ся ти́, святы́й а́нгеле, да́нный ми́ от Бо́га, храни́телю мо́й до́брый.

Освети́ у́м мо́й, бла́же, и просвети́ мя́, молю́ся ти́, святы́й а́нгеле, и мы́слити ми́ поле́зная всегда́ наста́ви мя́.

Сла́ва: Уста́ви се́рдце мое́ от настоя́щаго мяте́жа, и бде́ти укрепи́ мя́ во благи́х, храни́телю мо́й, и наста́ви мя́ чу́дно к тишине́ живо́тней.

И ны́не: Сло́во Бо́жие в Тя́ всели́ся, Богоро́дице, и челове́ком Тя́ показа́ небе́сную ле́ствицу; Тобо́ю бо к на́м Вы́шний соше́л е́сть.

Конда́к, гла́с 4-й

Яви́ся мне́ милосе́рд, святы́й а́нгеле Госпо́день, храни́телю мо́й, и не отлуча́йся от мене́, скве́рнаго, но просвети́ мя́ све́том неприкоснове́нным и сотвори́ мя́ досто́йна Ца́рствия Небе́снаго.

И́кос: Уничиже́нную ду́шу мою́ мно́гими собла́зны, ты́, святы́й предста́телю, неизрече́нныя сла́вы небе́сныя сподо́би, и певе́ц с ли́ки безпло́тных си́л Бо́жиих, поми́луй мя́ и сохрани́, и по́мыслы до́брыми ду́шу мою́ просвети́, да твое́ю сла́вою, а́нгеле мо́й, обогащу́ся, и низложи́ зломы́слящия мне́ враги́, и сотвори́ мя́ досто́йна Ца́рствия Небе́снаго.

Пе́снь 7

Ирмо́с: От Иуде́и доше́дше о́троцы, в Вавило́не иногда́, ве́рою Тро́ическою пла́мень пе́щный попра́ша, пою́ще: отце́в Бо́же, благослове́н еси́.

Ми́лостив бу́ди ми́, и умоли́ Бо́га, Госпо́день а́нгеле, име́ю бо тя́ засту́пника во все́м животе́ мое́м, наста́вника же и храни́теля, от Бо́га дарова́ннаго ми́ во ве́ки.

Не оста́ви в пу́ть ше́ствующия души́ моея́ окая́нныя уби́ти разбо́йником, святы́й а́нгеле, я́же ти́ от Бо́га предана́ бы́сть непоро́чне; но наста́ви ю́ на пу́ть покая́ния.

Сла́ва: Всю́ посра́млену ду́шу мою́ привожду́ от лука́вых ми́ по́мысл и де́л: но предвари́, наста́вниче мо́й, и исцеле́ние ми́ пода́ждь благи́х по́мысл, уклоня́ти ми́ ся́ всегда́ на пра́выя стези́.

И ны́не: Прему́дрости испо́лни все́х и кре́пости Боже́ственныя, Ипоста́сная Прему́дросте Вы́шняго, Богоро́дицы ра́ди, ве́рою вопию́щих: оте́ц на́ших Бо́же, благослове́н еси́.

Пе́снь 8

Ирмо́с: Царя́ Небе́снаго, его́же пою́т во́и а́нгельстии, хвали́те и превозноси́те во вся́ ве́ки.

От Бо́га по́сланный, утверди́ живо́т мо́й, раба́ твоего́, преблаги́й а́нгеле, и не оста́ви мене́ во ве́ки.

А́нгела тя́ су́ща бла́га, души́ моея́ наста́вника и храни́теля, преблаже́нне, воспева́ю во ве́ки.

Сла́ва: Бу́ди ми́ покро́в и забра́ло в де́нь испыта́ния все́х челове́к, во́ньже огне́м искуша́ются дела́ блага́я же и зла́я.

И ны́не: Бу́ди ми́ помо́щница и тишина́, Богоро́дице ПрисноДе́во, рабу́ Твоему́, и не оста́ви мене́ лише́на бы́ти Твоего́ влады́чества.

Пе́снь 9

Ирмо́с: Вои́стинну Богоро́дицу Тя́ испове́дуем, спасе́ннии Тобо́ю, Де́во чи́стая, с безпло́тными ли́ки Тя́ велича́юще.

Поми́луй мя́, еди́не Спа́се мо́й, я́ко ми́лостив еси́ и милосе́рд, и пра́ведных лико́в сотвори́ мя́ прича́стника.

Мы́слити ми́ при́сно и твори́ти, Госпо́день а́нгеле, блага́я и поле́зная да́руй, я́ко си́льна яви́ в не́мощи и непоро́чна.

Сла́ва: Я́ко име́я дерзнове́ние к Царю́ Небе́сному, Того́ моли́, с про́чими безпло́тными, поми́ловати мя́, окая́ннаго.

И ны́не: Мно́го дерзнове́ние иму́щи, Де́во, к Вопло́щшемуся из Тебе́, преложи́ мя́ от у́з и разреше́ние ми́ пода́ждь и спасе́ние, моли́твами Твои́ми.

Моли́тва ко свято́му А́нгелу Храни́телю

А́нгеле Христо́в святы́й, к тебе́ припа́дая молю́ся, храни́телю мо́й святы́й, прида́нный мне́ на соблюде́ние души́ и те́лу моему́ гре́шному от свята́го креще́ния, а́з же свое́ю ле́ностию и свои́м злы́м обы́чаем прогне́вах твою́ пречи́стую све́тлость и отгна́х тя́ от себе́ все́ми сту́дными де́лы: лжа́ми, клевета́ми, за́вистию, осужде́нием, презо́рством, непоко́рством, братоненавиде́нием, и злопомне́нием, сребролю́бием, прелюбодея́нием, я́ростию, ску́постию, объяде́нием без сы́тости и опи́вством, многоглаго́ланием, злы́ми по́мыслы и лука́выми, го́рдым обы́чаем и блу́дным возбеше́нием, имы́й самохоте́ние на вся́кое плотско́е вожделе́ние. О, зло́е мое́ произволе́ние, его́же и ско́ти безслове́снии не творя́т! Да ка́ко возмо́жеши воззре́ти на мя́, или́ приступи́ти ко мне́, а́ки псу́ смердя́щему? Кото́рыма очи́ма, а́нгеле Христо́в, воззри́ши на мя́, опле́тшася зле́ во гну́сных де́лех? Да ка́ко уже́ возмогу́ отпуще́ния проси́ти го́рьким и злы́м мои́м и лука́вым дея́нием, в ня́же впа́даю по вся́ дни́ и но́щи и на вся́к ча́с? Но молю́ся ти́ припа́дая, храни́телю мо́й святы́й, умилосе́рдися на мя́ гре́шнаго и недосто́йнаго раба́ твоего́ (имяре́к), бу́ди ми́ помо́щник и засту́пник на зла́го моего́ сопроти́вника, святы́ми твои́ми моли́твами, и Ца́рствия Бо́жия прича́стника мя́ сотвори́ со все́ми святы́ми, всегда́, и ны́не и при́сно и во ве́ки веко́в. Ами́нь.

В неде́лю на вече́рни, на Го́споди воззва́х:

Стихи́ры, гла́с 6

Подо́бен: Тридне́вно воскре́сл:

Арха́нгельския си́лы Христе́, престо́лу предстоя́ще Твоему́, мо́лятся о ро́де челове́честем. Те́х у́бо мольба́ми, язы́ков де́рзость низложи́, ми́р все́м ве́рным подая́.

О́крест престо́ла все́х Царя́ при́сно лику́юще, а́нгелов чи́ни на́с сохраня́йте, ве́рою ва́с призыва́ющия, и муче́ния все́х изба́вите.

Оте́ц, И́же над все́ми Бо́г, си́лы небе́сных умо́в безобра́зны и невеще́ственны, певцы́ трисо́лнечныя сла́вы Своея́, и еди́нственное Сло́во, и Ду́х приведе́.

Сла́ва, и ны́не, Богоро́дичен:

Сло́во собезнача́льное Отцу́ же и Ду́ху, арха́нгельским гла́сом, Богоро́дице, во утро́бе заче́нши, херуви́мов и серафи́мов, и престо́лов яви́лася еси́ превы́шши.

На стихо́вне стихи́ры, гла́с 7:

Подо́бен: не ктому́ возбраня́еми:

Заря́ми просвеща́еми Тро́ицы, и́же ве́рою ва́с пою́щыя просвети́те, арха́нгели.

Сти́х: Творя́й а́нгелы своя́ ду́хи:

Прича́стием све́ти втори́и, показу́еми све́ти соверше́ннии, предста́ти на́м све́ту пе́рвому моли́теся.

Сти́х: Хвали́те его́ вси́ а́нгели его́.

Кро́вом кри́л ва́ших сохраня́йте ве́рныя вся́ от духо́в лука́вствия, тьму́ разоря́юще.

Сла́ва: Све́т вторы́й ты́ еси́ по Бо́зе, храни́телю мо́й, не престая́ предста́тельствовати, ви́дети и мне́ све́т трисве́тлаго божества́.

И ны́не: А́нгелов и челове́ков влады́чице, Богоро́дице, не преста́й моли́ти, Де́во, сы́на твоего́, о мне́ ра́бе твое́м.

Го́споди поми́луй, 12. Сла́ва, и ны́не: Прииди́те, поклони́мся: три́жды. Псало́м 142: Го́споди, услы́ши моли́тву мою́: Сла́ва, и ны́не: Аллилу́иа, три́жды.

А́ще у́тро, чти́: Бо́г Госпо́дь: и тропа́рь, гла́с 4:

Небе́сных во́инств архистрати́зи, мо́лим ва́с при́сно мы́ недосто́йнии, да ва́шими моли́твами огради́те на́с кро́вом кри́л невеще́ственныя ва́шея сла́вы, сохраня́юще ны́ припа́дающыя приле́жно, и вопию́щыя: от бе́д изба́вите ны́, я́ко чинонача́льницы вы́шних си́л.

Сла́ва: Тропа́рь а́нгелу храни́телю, гла́с 6:

А́нгеле Бо́жий храни́телю мо́й святы́й, живо́т мо́й соблюди́ во стра́се Христа́ Бо́га: у́м мо́й утверди́ во и́стиннем пути́, и к любви́ го́рней уязви́ ду́шу мою́: да тобо́ю направля́ем, получу́ от Христа́ Бо́га ве́лию ми́лость.

И ны́не, богоро́дичен:

Святы́я Влады́чице, Христа́ Бо́га на́шего Ма́ти, я́ко все́х творца́ недоуме́нно ро́ждшая, моли́ бла́гость его́ всегда́, со храни́телем мои́м а́нгелом, спасти́ ду́шу мою́, страстьми́ одержи́мую, и оставле́ние грехо́в дарова́ти ми́.

Го́споди поми́луй, три́жды. Псало́м 50: Поми́луй мя́ Бо́же

Кано́н безпло́тным

Гла́с 6

Пе́снь 1

Ирмо́с: Я́ко по су́ху пешеше́ствовав Изра́иль, по бе́здне стопа́ми, гони́теля фарао́на ви́дя потопля́ема, Бо́гу побе́дную пе́снь пои́м, вопия́ше.

Небе́сных ли́к восхваля́ю кра́сное Благоле́пие, те́х све́тлыми мо́лниями просвети́тися вопию́: молю́ тя́ Христе́, еди́наго Благоутро́бнаго.

Припе́в: Святи́и арха́нгели и а́нгели, моли́те Бо́га о на́с.

Ны́не предстоя́ще жела́нием кра́йним Христу́, спасти́ся все́м на́м, а́нгели моли́теся.

Неисчетноси́льне Христе́, твои́м све́том озари́в мо́й у́м, а́нгелы твоя́ пе́ти вдохни́, я́ко всеси́лен.

Храни́телю припе́в: святы́й а́нгеле, храни́телю мо́й, моли́ Бо́га о мне́.

Неусыпа́емаго храни́теля души́ моея́, и предста́теля живота́ моего́, и наста́вника от Бо́га, его́же получи́х, пою́ тя́, а́нгеле Бо́жий, Бо́га вседержи́теля.

Но́щию содержи́ма мра́чною, и те́мным мра́ком покрыва́емаго страсте́й, све́том покая́ния озари́ мя́, наста́вниче и предста́телю, и храни́телю мо́й

Сла́ва: У́м мо́й твое́ю моли́твою напра́ви, твори́ти ми́ Бо́жия повеле́ния, да получу́ от Бо́га отда́ние грехо́в, и ненави́дети ми́ злы́х, наста́ви мя́, молю́ся ти́.

И ны́не: Моли́ся деви́це, о мне́ рабе́ твое́м ко благода́телю, со храни́телем мои́м а́нгелом, и наста́ви мя́ твори́ти за́поведи сы́на твоего́ и творца́ моего́.

Пе́снь 3

Ирмо́с: Не́сть свя́т, я́коже Ты́, Го́споди Бо́же мо́й, вознесы́й ро́г ве́рных Твои́х, Бла́же, и утверди́вый на́с на ка́мени испове́дания Твоего́.

И́же вся́кое слове́сное естество́, от не су́щих хоте́нием соде́лавшее, трисвяты́ми гла́сы пое́тся в три́ лица́ и славосло́вится ве́рно.

А́нгелы приста́вил еси́ храни́тели челове́ком я́ко благоутро́бен, служи́тели же показа́л еси́ Христе́, спасе́ния твои́х уго́дников.

Таи́нники твоего́ вочелове́чения и честна́го воста́ния, а́нгельския чинонача́льники, Христе́, за ны́ приими́ моля́щыяся.

Храни́телю: Землена́го и бре́ннаго и пе́рстнаго смеше́ния име́ю бытие́: те́мже земли́ пригвозди́хся, но о предста́телю мо́й, и наста́вниче мо́й, и изба́вителю, обрати́ жела́ние мое́ к небе́сным.

В но́щи и во дни́ лука́выми де́лы мои́ми преогорчева́ю, и оскорбля́ю, и раздража́ю тя́, и не хотя́ща отдале́че стоя́ти, побо́рника моего́ понужда́ю тя́.

Сла́ва: Зря́ неви́димое лице́ Бо́га на небесе́х седя́щаго, и презира́юща на зе́млю у́мно, и трясти́ся е́й творя́ща, моли́ спасти́ся мне́, святы́й А́нгеле

И ны́не: У́м и смы́сл и сло́во, да́р Бо́жий прия́х, я́ко да позна́в влады́ку, де́лы почту́ до́брыми: а́з же страстьми́ да́р обезче́стив, Спа́су досади́х: Влады́чице, спаси́ мя́.

Конда́к, гла́с 2:

Подо́бен: Вы́шних ищя́:

Бо́жий служи́телю и храни́телю мо́й преизря́дне, гре́шному при́сно мне́ спребыва́яй, злоде́йствия мя́ вся́каго де́монов избавля́яй и к боже́ственным стезя́м наставля́яй, жи́знь хода́тайствуяй нетле́нную.

И́кос: Воспряни́ от ле́ностнаго сна́, о душе́ моя́, и ча́с сме́ртный всегда́ помышля́я, а́нгела своего́ храни́теля моли́, да ми́лостива ти́ сотвори́т неумы́тнаго судию́: и пре́жде конца́ наставля́я тя́ к покая́нию, испро́сит ти́ грехо́в оставле́ние, и введе́т тя́ в живо́т нетле́нный.

Пе́снь 4.

Ирмо́с: Христо́с моя́ си́ла, Бо́г и Госпо́дь, честна́я Це́рковь боголе́пно пое́т, взыва́ющи от смы́сла чи́ста, о Го́споде пра́зднующи.

Тли́ неприя́тное естество́ иму́ще, боже́ственнейшии у́ми твои́ честни́и, престо́л обстоя́т, безсме́ртия тя́ исто́чник насле́довавше, человеколю́бче

Дво́ице пе́рвенствующая арха́нгельскому ны́не собра́нию, притека́ющая к покро́ву ва́шему от вся́кия беды́ спаса́йте.

От свята́го ду́ха освяща́еми а́нгельстии собо́ри, на зло́ пребыва́ют недви́жими, е́же к пе́рвому благо́му восхожде́нию обожа́еми.

Храни́телю: Приле́жно вся́ку зло́бу соверши́х измла́да, и не преста́х тя́ засту́пника моего́ преогорчева́ти беззако́нными словесы́ и дея́ньми: но не озло́бися, но пожди́ еще́, вразумля́я и просвеща́я, и утвержда́я мя́.

Не помышля́яй стра́шное суди́ще, в не́мже и́мам спа́су предста́ти, и да́ти сло́во о вся́ком де́ле же и сло́ве, ниже́ сме́рти безве́стное во у́м отню́дь прие́млю, неиспра́влен е́смь, наста́вниче мо́й, не оста́ви мене́.

Сла́ва: Моли́ человеколю́бца Бо́га, ты́ храни́телю мо́й, и не оста́ви мене́: но при́сно в ми́ре житие́ мое́ соблюди́, и пода́ждь ми́ спасе́ние необори́мое.

И ны́не: Недоуме́ние предлежи́т ми́ от обыше́дших мя́ зо́л, пречи́стая: но изба́ви мя́ от ни́х ско́ро, к тебе́ бо еди́ней прибего́х.

Пе́снь 5.

Ирмо́с: Бо́жиим све́том Твои́м, Бла́же, у́тренюющих Ти́ ду́шы любо́вию озари́, молю́ся: Тя́ ве́дети, Сло́ве Бо́жий, и́стиннаго Бо́га, от мра́ка грехо́внаго взыва́юща.

На престо́ле херуви́мсте ви́дев Тя́ проро́к, Всеви́дче, Зижди́теля и Бо́га седя́ща: зна́меньми Твоему́ науча́ется влады́честву и госпо́дьству.

Тьмы́ тьма́ми, и ты́сяща ты́сящами А́нгел, Тебе́ окружа́ема, Влады́ко, Дании́л зря́ше, совокупле́на челове́ческому зра́ку: держа́ве Твоея́ сла́вы тайнонауча́ется.

О́крест Бо́га предстоя́ще архистрати́зи, и отту́ду истека́ющими заря́ми просвеща́еми, ста́до ва́ше сохрани́те.

Храни́телю: Ниже́ ко еди́ному часу́, но ниже́ черте́, или́ и сея́ кра́тши оста́вих тя́, благоде́теля моего́ и храни́теля, о мне́ пора́доватися и возвесели́тися и взыгра́ти, грехми́ при́сно срастлева́емый.

Я́ко име́я дерзнове́ние к Бо́гу, храни́телю моя́ святы́й, сего́ умоли́, от оскорбля́ющих мя́ зо́л изба́вити.

Сла́ва: От све́та пе́рваго, све́т вторы́й прича́стием яви́выйся, а́нгеле: просвети́ у́м мо́й сия́нием твои́м, на пу́ть пра́вый наставля́я мя́.

И ны́не: Хра́м Бо́жий су́щи одушевле́нный, Де́во, Богоро́дице, хра́м Свято́му Ду́ху и жили́ще благода́ти твои́ми моли́твами ско́ро бы́ти сотвори́ мя́.

Пе́снь 6.

Ирмо́с: Жите́йское мо́ре воздвиза́емое зря́ напа́стей бу́рею, к ти́хому приста́нищу твоему́ прите́к, вопию́ ти́: возведи́ от тли́ живо́т мо́й, многоми́лостиве.

Ума́ чистото́ю зря́ Иа́ков на ле́ствице низходя́щыя а́нгелы Твоя́, Влады́ко, све́тло, издале́ча Твоему́ науча́шеся во пло́ти прише́ствию я́вственнейше.

Разуме́в боже́ственное а́нгелов све́тлое ополче́ние, ра́довашеся уго́дник Тво́й, Влады́ко, Изра́иль, благочи́нно ликовству́ющее, и Твою́ неизрече́нную сла́ву обстоя́щее.

Трисве́тлыми заря́ми бога́тно преукраша́еми а́нгелы и арха́нгели богозра́чно, окая́нную мою́ ду́шу просвети́те ва́шими моли́твами.

Храни́телю: Пречестно́е и благоуха́нное сы́й ми́ро, не гнуша́йся моея́ смра́дности, не отступи́ от мене́ да́же до конца́: но неотсту́пен бу́де мне́ храни́тель при́сно: и со́лнце бо ме́ста скве́рная преходя́ не оскверня́ется.

Уста́ви се́рдце мое́ от настоя́щаго мяте́жа, и бде́ти укрепи́ мя́ во благи́х, храни́телю мо́й, и наста́ви мя́ чу́дно к тишине́ живо́тней.

Сла́ва: Свя́т предстоя́й трисвято́му, и к нему́ стяжа́в дерзнове́ние, моли́, храни́телю мо́й, да ду́шу мою́ спасе́ну и свя́ту сотвори́т

И ны́не: Святы́х святе́йшая а́нгел, херуви́м и серафи́м превы́шшая, землере́тный мо́й у́м, земна́го и ве́щнаго жела́ния превы́шши покажи́, от земли́ к небе́сней любви́ возвы́сивши.

Конда́к, гла́с 2:

Архистрати́зи бо́жии, служи́телие боже́ственныя сла́вы, а́нгелов нача́льницы, и челове́ков наста́вницы, поле́зное на́м проси́те, и ве́лию ми́лость, я́ко безпло́тных архистрати́зи.

Пе́снь 7.

Ирмо́с: Росода́тельну у́бо пе́щь соде́ла А́нгел преподо́бным отроко́м, халде́и же опаля́ющее веле́ние Бо́жие, мучи́теля увеща́ вопи́ти: благослове́н еси́, Бо́же оте́ц на́ших.

Красото́ю светле́етеся вси́ святи́и а́нгели, вседержи́теля приближа́ющеся неизрече́нней сла́ве Христо́вей, и любо́вию всегда́ пою́ще ему́: благослове́н еси́, Бо́же, во ве́ки.

Мы́сленно о тебе́, влады́ко, обраща́ющеся а́нгели, непости́жно светлоявление твое́ прие́млют присносу́щне, пою́ще и глаго́люще всегда́: благослове́н еси́, Бо́же, во ве́ки.

Славосло́вят неукло́нно тво́й престо́л, Христе́, я́ве окружа́юще у́мне а́нгельская ликостоя́ния, благослове́н еси́, зову́ще, Бо́же оте́ц на́ших.

Храни́телю: Ми́лостынею припряженною доброде́тели нищелю́бия, обогати́ мя́, храни́телю моя́, сребролю́бие с лихои́мством от се́рдца ми́ искореня́я, да щедролю́бно вопию́: благослове́н Бо́г оте́ц на́ших.

Зми́й седмоглавный, седми́ сме́ртными греха́ мир умертви́ти мя́ тщи́тся: но молю́, храни́телю, мо́й, сохрани́ мя́ неврежде́нна, я́коже в пещи́ се́дмь седмери́цею разженной, сохране́ни бы́ша пою́щии: благослове́н Бо́г оте́ц на́ших.

Сла́ва: Ми́лостив бу́ди ми́, и умоли́ Бо́га, Госпо́день а́нгеле: име́ю бо тя́ засту́пника во все́м животе́ мое́м, наста́вника же и храни́теля, от Бо́га дарова́ннаго ми́ во ве́ки.

И ны́не: Смире́ннаго се́рдцем, призре́вшаго на смире́ние твое́, и обнища́вшаго на́с де́ля, бога́таго в ми́лости ро́ждшая Бо́га моли́, да не в го́рдости, ни в лихои́мстве вопию́: благослове́н Бо́г оте́ц на́ших.

Пе́снь 8.

Ирмо́с: Из пла́мене преподо́бным ро́су источи́л еси́, и пра́веднаго же́ртву водо́ю попали́л еси́; вся́ бо твори́ши, Христе́, то́кмо е́же хоте́ти. Тя́ превозно́сим во вся́ ве́ки.

Я́коже Елиссе́а дре́вле твоего́ уго́дника во́инствы безпло́тными огради́л еси́: та́кожде и ны́не, Христе́, це́рковь твою́ тебе́ превознося́щую, огради́ во ве́ки.

Изба́витися от прегреше́ний моли́теся, архистрати́зи боже́ственнии, я́ко предстоя́ще престо́лу гро́зному, любо́вию сла́вящым и превознося́щым Христа́ во вся́ ве́ки.

Еди́не бла́же Христе́, о на́с моля́щаяся ны́не во́инства а́нгельская приими́, тебе́ воспева́ющая во ве́ки.

Храни́телю: Блу́днаго бе́са, всегда́ ду́шу и те́ло мое́ оскверни́ти тща́щагося, дале́че от мене́ отжени́, храни́телю мо́й, да непоро́чно с тобо́ю Го́сподеви пою́, и превозношу́ его́ во ве́ки.

Студодея́ния и стра́сти плотски́я, безпло́тный защи́тниче мо́й, изба́ви мя́, да твои́м заступле́нием, чи́ст се́рдцем, узрю́ Бо́га, и превозношу́ его́ во ве́ки.

Сла́ва: Не оста́ви в пу́ть ше́ствующия души́ моея́ окая́нныя уби́ти разбо́йником, святы́й а́нгеле, я́же ти́ от Бо́га предана́ бы́сть непоро́чна: но наста́ви ю́ на пу́ть покая́ния.

И ны́не: Бу́ди ми́ помо́щница и тишина́ Богоро́дице ПрисноДе́во, рабу́ твоему́, и не оста́ви мене́ лише́на бы́ти твоего́ влады́чества.

Пе́снь 9.

Ирмо́с: Бо́га челове́ком невозмо́жно ви́дети, на Него́же не сме́ют чи́ни А́нгельстии взира́ти; Тобо́ю же, Всечи́стая, яви́ся челове́ком Сло́во Воплоще́нно, Его́же велича́юще, с небе́сными во́й Тя́ ублажа́ем.

Дави́ду проро́ку Твоему́, я́ко преста́ти сотвори́л еси́, Твоя́ лю́ди поража́юща ору́жием Ти́ а́нгела, я́ко ще́др пода́ждь ми́р, Христе́, все́м це́рквам, належа́щая ны́не облегча́я искуше́ния, я́ко многоми́лостив.

Ви́дев люде́й твои́х, Христе́, озлобле́ние, я́ко вра́ч ду́ш же и теле́с, исцели́ мольба́ми, Влады́ко, Твои́х служи́телей, ны́не о́крест стоя́щих Тебе́ все́х Царя́, и гла́сы непреста́нными я́ко Бо́га славосло́вящих Тя́.

Изба́витися мне́ страсте́й обдержа́ния, о херуви́ми и серафи́ми, си́лы, вла́сти, а́нгели, арха́нгели, нача́ла же и престо́ли, и госпо́дствия, Христа́ моли́те приле́жно.

Храни́телю: Кро́тости и терпе́ния пу́ть показа́ти ми́, гне́в же и рве́ние от се́рдца моего́ искорени́ти, моли́ кро́ткаго и долготерпели́ваго Иису́са, а́нгеле святы́й, молю́ тя́.

Я́ко име́я дерзнове́ние к царю́ небе́сному, того́ моли́, и с про́чими безпло́тными, поми́ловати мя́, окая́ннаго.

Сла́ва: Уны́ние с ле́ностию, пра́здность же и небреже́ние отжени́ от мене́, бо́дрый храни́телю мо́й, да до́бре и богоуго́дне потруждься со благи́ми рабы́ и ве́рными, не лише́н мзды́, вни́ду в ра́дость го́спода моего́.

И ны́не: Де́во всенепоро́чная Мари́е, со а́нгелом храни́телем мои́м приле́жно спа́са моли́, дарова́ти ми́ согреше́ний мои́х проще́ние, и жития́ исправле́ние, да тя́ всегда́ я́ко Ма́терь Бо́жию, благода́рственно велича́ю.

Свети́лен а́нгелом:

Не́бо звезда́ми украси́вый я́ко Бо́г, и твои́ми а́нгелы всю́ зе́млю просвети́вый, соде́телю все́х, пою́щыя тя́ спаса́й.

Богоро́дичен: Ты́ ми́ засту́пница, пречи́стая, и кре́пкое предгра́дие и предста́тельница ми́ру, и тебе́ припа́даю зовы́й: от лю́тых мя́ изба́ви, и огня́ исхити́ ве́чнаго, Де́во, на тя́ наде́ющагося.

Стихи́ры храни́телю, гла́с 2

Подо́бен: До́ме евфра́фов:

О а́нгеле Бо́жий, предстоя́й непосре́дственно святе́й Тро́ице, не преста́й моли́ти о мне́ ра́бе твое́м.

Я́ко прия́л еси́ кре́пость храни́ти ду́шу мою́ от Бо́га, не преста́й кро́вом твои́х кри́л покрыва́ти ю́ всегда́.

Благода́ть Иису́су, да́вшему мне́ тя́, вели́каго храни́теля души́ моея́, и ору́жие на враги́ моя́, а́нгеле благоче́стный.

Сподо́би и мене́ получи́ти ца́рствие Бо́га вы́шняго, да с тобо́ю взыва́ю пе́снь трисвяту́ю.

Сла́ва: Све́т вторы́й ты́ еси́ по Бо́зе, храни́телю мо́й, не преста́й предста́тельствовати ви́дети и мне́ све́т трисве́тлаго божества́.

И ны́не: А́нгелов и челове́ков Влады́чице, Богоро́дице, не преста́й моли́ти, Де́во, сы́на твоего́, о мне́ ра́бе твое́м.

Моли́тва ко святы́м а́нгелом.

К ва́м, я́ко засту́пником и храни́телем живота́ моего́, а́з окая́нный припа́дая, молю́ся: подади́те мне́ моли́твами ва́шими дневно́е пребыва́ние, благоуго́дно и неиску́сно от злы́х дея́ний и помышле́ний прейти́. Отве́рзите слу́х у́шию мое́ю, да услы́шу и разуме́ю дела́ и словеса́ Бо́жия душеполе́зная, да прозрю́ вну́треннима очи́ма, тьмо́ю грехо́вною обдержи́мый. Моли́те за мя́, по вся́ часы́ согреша́ющаго, да не поя́ст мене́ ме́чь я́рости госпо́дни: зело́ бо превзыдо́ша беззако́ния моя́ на главу́ мою́, и я́ко бре́мя тя́жкое отяготе́ша на мне́. Ты́ же, Го́споди мо́й, Го́споди, при́зри на мя́, и поми́луй мя́, и изведи́ из темни́цы грехо́вныя ду́шу мою́, пре́жде да́же на отъиду отсю́ду, и не прииду́ на стра́шный о́ный су́д Тво́й. Приими́ моля́щыяся за ны́ святы́я а́нгелы Твоя́, и́же о́крест престо́ла Твоего́ вы́ну со стра́хом предстоя́т, и те́х моли́твами, изря́днее же пречи́стыя Твоея́ Ма́тере, изба́ви мя́ стра́шнаго о́наго и гро́знаго суда́ Твоего́. Ты́ бо еси́ а́гнец Бо́жий, взе́мляй всего́ ми́ра грехи́, распя́тый на кресте́ на́шего ра́ди спасе́ния: вонми́ моли́тве мое́й, и посли́ а́нгела храни́теля души́ мое́й и те́лу, да те́м наставля́емь, изба́влюся от вся́ких враго́в ви́димых и неви́димых, и сподо́блюся получи́ти Твою́ ми́лость, со все́ми от ве́ка Тебе́ благоугоди́вшими: я́ко Ты́ еси́ Бо́г на́ш, и к Тебе́ прибега́ю, и на Тя́ наде́юся, а́ще и согреши́х па́че челове́к, но Тебе́ не отступи́х, ни ру́ку мое́ю возде́х ко ино́му Бо́гу. Тебе́ молю́ся, Го́споду Иису́се Христе́, Тя́ благословлю́, и Тебе́ поклоня́юся от Тро́ицы еди́ному, со Отце́м и святы́м Ду́хом, ны́не и при́сно, и во ве́ки веко́в. Ами́нь.

Моли́тва ко свято́му а́нгелу

Святы́й А́нгеле, предстоя́й окая́нной мое́й души́ и стра́стной мое́й жи́зни, не оста́ви мене́ гре́шнаго, ниже́ отступи́ от мене́ за невоздержа́ние мое́. Не да́ждь ме́ста лука́вому де́мону облада́ти мно́ю наси́льством сме́ртнаго сего́ телесе́; укрепи́ бе́дствующую и худу́ю мою́ ру́ку и наста́ви мя́ на пу́ть спасе́ния. Е́й, святы́й А́нгеле Бо́жий, храни́телю и покрови́телю окая́нныя моея́ души́ и те́ла, вся́ мне́ прости́, ели́кими тя́ оскорби́х во вся́ дни́ живота́ моего́, и а́ще что́ согреши́х в преше́дшую но́щь сию́, покры́й мя́ в настоя́щий де́нь, и сохрани́ мя́ от вся́каго искуше́ния проти́внаго, да ни в ко́ем гресе́ прогне́ваю Бо́га, и моли́ся за мя́ ко Го́споду, да утверди́т мя́ в стра́се Свое́м, и досто́йна пока́жет мя́ раба́ Своея́ бла́гости. Ами́нь.

Досто́йно е́сть: Трисвято́е. О́тче на́ш: Тропа́рь: Небе́сных во́инств и богоро́дичен, Го́споди поми́луй, три́жды. Благослови́. И отпу́ст.

В понеде́льник ве́чера, на Го́споди, воззва́х:

Стихи́ры, гла́с 1.

Подо́бен: Прехва́льнии му́ченицы:

Проро́че чу́дный, Христо́в крести́телю и предте́че, изсо́хшее се́рдце мое́ безме́стием, ре́ки сле́з приснотеку́щих сотвори́ пролия́ти моли́твами твои́ми, молю́ тя́, я́ко да спаса́емь тобо́ю многоболе́зненный, велича́ю тебе́ возвелича́вшаго.

Проро́че блаже́нне, к тебе́ наде́жду мою́ всю́ и живо́т возлага́ю ча́яния моего́, и́же Христа́ крести́в Иису́са, бе́здну взе́млющаго ми́ра прегреше́ний: того́ моли́, Иоа́нне, молю́ся ти́, се́рдце мое́ очи́стити и спа́се мя́.

Пропове́дниче му́дре благода́ти, и́же все́м язы́ком покая́ние предвозвести́вый, всеокая́нней мое́й и ослепле́нней мое́й и ослепле́нней души́, боже́ственный предте́че, пребыва́ти в покая́нии благоволи́, и во́лю госпо́дню де́яти всегда́, да ве́рою и любо́вию сла́влю тя́.

Сла́ва, и ны́не, богоро́дичен:

А́гнца, ми́ра всего́ взе́млющаго грехи́, его́же превели́кий предте́ча все́м пропове́да, с ни́м, Де́во, моли́, ко́злищ ча́сти яви́ти мя́ чу́жда в ча́с су́дный, и овца́м десны́м его́ сочета́ти мене́ недосто́йнаго.

На стихо́вне стихи́ры, гла́с 2.

Подо́бен: Егда́ от дре́ва:

Пропове́дниче Христо́в и крести́телю, а́нгеле, апо́столе, му́чениче, проро́че, предте́че, све́щниче, дру́же бли́жний, проро́ков печа́ть, в рожде́нных пречестне́йший, хода́таю ве́тхия и но́выя благода́ти, све́тлый Сло́ва гла́се, твои́ми свяще́нными хода́тайствы, моли́твенныя творе́ния к Бо́гу благоутро́бному испра́ви.

Сти́х: Благослове́н Госпо́дь Бо́г исра́илев, я́ко посети́ и сотвори́ избавле́ние лю́дем свои́м.

Се́ а́гнец Бо́жий, и́же грехи́ ми́ра взе́мляй, возопи́л еси́, предте́че блаже́нне, внегда́ ви́дел еси́ Христа́, на земли́ ходя́ща: того́ у́бо моли́ грехо́в оставле́ние дарова́ти, тебе́ почита́ющым: и́маши бо к нему́ вели́к вои́стинну дерзнове́ние, крести́телю, я́ко хотда́тай зако́на и благода́ти.

Сти́х: И ты́, отроча́, проро́к вы́шняго нарече́шися.

Потщи́ся, и изми́ мя́ от искуше́ний, сла́вный госпо́день проро́че, молю́тися: всу́е бо подвиго́шася на мя́, борю́щии мя́ го́рцыи бе́сове, и́щущии похи́тити ду́шу раба́ твоего́ окая́нную, я́коже пти́цу: не оста́ви мя́ до конца́, да разуме́ют же па́че, всеблаже́нне, я́ко ты́ ми́ еси́ прибе́жище.

Сла́ва, и ны́не, богоро́дичен:

Я́коже сро́дством есте́ственным и моли́твенным согла́сием, еди́но вы́ су́ще, Ма́ти все́х царя́ и боже́ственный предте́че, мольбу́ сотвори́те вку́пе о ра́бе, зело́ прогне́вавшем благоми́лостиваго, я́ко да уще́дрит и спасе́т, ва́шими прекло́нься хода́тайствы и о́гненнаго родства́ измени́т мя́.

Го́споди поми́луй, 12. Прииди́те, поклони́мся: три́жды. Псало́м 142: Го́споди, услы́ши моли́тву мою́: Сла́ва, и ны́не: Аллилу́иа, три́жды. Та́же: Бо́г Госпо́дь, и яви́ся на́м:

Посе́м тропа́рь, гла́с 2:

Па́мять пра́веднаго с похвала́ми, тебе́ же довле́ет свиде́тельство госпо́дне, предте́че, показа́л бо ся́ еси́ вои́стину и проро́ков честне́йший, я́ко и в струя́х крести́ти сподо́бился еси́ пропове́даннаго. Те́мже за и́стину пострада́в ра́дуяся, благовести́л еси́ и су́щым во а́де Бо́га я́вльшагося пло́тию, взе́млющаго гре́х ми́ра, и подаю́щаго на́м ве́лию ми́лость.

Сла́ва, и ны́не, богоро́дичен:

Боже́ственнаго бы́хом о́бщины естества́ тобо́ю, Богоро́дице присноДе́во: Бо́га бо на́м воплоти́вшагося родила́ еси́. Те́мже по до́лгу тя́ вси́ благоче́стно велича́ем.

Псало́м 50: Поми́луй мя́, Бо́же:

Кано́н

Гла́с 8.

Пе́снь 1.

Ирмо́с: Истря́сшему в мо́ри мучи́тельство фарао́не, и Исра́иля су́шею наста́вльшему пои́м Христу́, я́ко просла́вися во ве́ки.

Припе́в: Святы́й вели́кий Иоа́нне, предте́че госпо́день, моли́ Бо́га о на́с.

Предте́че, пропове́дателю покая́ния, пока́ятися ми́ от души́ всея́, моли́ Спа́са и Го́спода, у́м мо́й пресвеща́я и се́рдце, любо́вию чту́щаго тя́.

Я́ко пусты́нное красне́йшее овча́, предте́че, му́чениче Христо́в ны́не в пусты́ни страсте́й водворя́ющася мя́ наста́ви к жи́зни покая́ния, боже́ственною твое́ю моли́твою.

Сла́ва: Му́чащаго мя́ греха́ ско́ро свободи́, хода́тайством твои́м, му́дре предте́че, молю́ся, и разруши́ на мя́ дви́жимую бесо́вскую бу́рю.

И ны́не: Спаси́ мя́, Ма́ти и́стины, обурева́емаго лю́те от страсте́й, и ча́сто погружа́ема, и испра́ви мя́, чи́стая, ко спасе́нию благоути́шному приста́нищу.

Пе́снь 3.

Ирмо́с: Утверди́ на́ш у́м и сердца́, небеса́ сло́вом утвержде́й, во е́же пе́ти и сла́вити Тя́ во спасе́ние ду́ш на́ших.

Одожди́ и мне́ ка́пли покая́ния, и́же в реце́ бе́здну крести́вый благоутро́бия Го́спода, все́х предте́че, му́чениче достосла́вне.

Напа́стными волна́ми жития́ всегда́ умо́м коле́блемь, прибега́ю под кро́в тво́й, предте́че спа́сов, потщи́ся по́мощи ми́ рабу́ твоему́.

Сла́ва: В нощны́х моли́твах призыва́ю дневна́го свети́льника ми́ру тебе́, богоблаже́нне предте́че, просвети́ моя́ серде́чная чу́вства.

И ны́не: Ра́дуйся от на́с, свята́я Богоро́дице: ра́дуйся, я́же ра́дость ро́ждшая ми́ру: ра́дуйся, ру́чко, из нея́же ма́нна небе́сная все́м ве́рным даде́ся.

Седа́лен, гла́с 7:

Го́споди, скве́рну души́ моея́, ми́лости Твоея́ иссо́пом, уми́лостивлься я́ко бла́г омы́й, Спа́се, и очи́стив от скве́рны тиме́ния страсте́й, поми́луй мя́, Влады́ко, спаси́ созда́ние Твое́ мольба́ми предте́чи Твоего́, еди́не многоми́лостиве.

Сла́ва, и ны́не, богоро́дичен:

Предста́тельница те́плая, и засту́пница христиа́н еси́, Богоро́дице всепе́тая: те́мже с предте́чею, сы́на твоего́ моли́ обрести́ на́м ми́лость.

Пе́снь 4.

Ирмо́с: Услы́шах, Го́споди, смотре́ния Твоего́ та́инство, разуме́х дела́ Твоя́, и просла́вих Твое́ божество́.

Себе́ сама́го пла́чу, житие́ неиспра́влено име́я всегда́, спаси́ и уще́дри мя́, предте́че, грехи́ погиба́ющаго.

В моли́твах и моле́ниих, да обря́щу тя́ помо́щника, блаже́нне, ду́шу мою́ укрепля́юща, и помышле́ние мое́ озаря́юща.

Сла́ва: Потопля́ема бу́рею согреше́ний, и бе́дствующа мя́, крести́телю Христо́в, окорми́ ко приста́нищу боже́ственнаго ра́зума.

И ны́не: Смири́вши мя́ высокому́дренно живу́щаго, спаси́, пречи́стая, ро́ждшая возне́сшаго смири́вшееся естество́.

Пе́снь 5.

Ирмо́с: От но́щи неве́дения богове́дения де́нь во све́те лица́ Твоего́, Христе́, да возсия́ет ко у́тру хвале́ние Твое́ в сердца́х на́ших.

В но́щи жития́ заблу́ждшаго мя́ просвети́, сла́вный предте́че, свети́льник сы́й со́лнца пра́веднаго.

В бу́дущем суде́, егда́ и́мам Го́сподеви предста́ти, да обря́щу тя́ предста́теля, предте́че, осужде́ния мя́ стра́шнаго изъима́юща.

Сла́ва: Напа́ствуемаго мя́, и искуше́ньми бесо́вскими коле́блемаго, утверди́ на ка́мени боже́ственных хоте́ний, приснопева́емый.

И ны́не: Я́ко превы́шшая все́х тва́рей, Ма́ти бо́жия присноДе́во, вы́шша покажи́ мя́ вра́жиих сете́й.

Пе́снь 6.

Ирмо́с: Ри́зу мне́ пода́ждь све́тлу, одея́йся све́том я́ко ри́зою, многоми́лостиве Христе́ Бо́же на́ш.

Секи́рою покая́ния и́стиннаго, все́ очи́сти се́рдце мое́, Иоа́нне прему́дре, плодоно́сно доброде́тельми соде́ловая е́.

Ки́том содержи́мь напа́стей, из глубины́ се́рдца моего́ взыва́ю ти́, предте́че: боле́зней мя́ лю́тых свободи́.

Сла́ва: Душе́ моя́, пока́йся те́пле, се́ суди́ще прии́де, возни́кни зову́щи: Иису́се Бо́же мо́й, предте́чи ра́ди Твоего́ Ты́ мя́ уще́дри.

И ны́не: Еди́на сло́вом, пло́тию Сло́во ро́ждшая, чи́стая, мо́лимся, изба́ви сете́й вра́жиих ду́шы на́шя.

Конда́к, гла́с 3

Подо́бен: Де́ва дне́сь:

Пре́жде непло́ды дне́сь Христо́ва предте́чу ражда́ет, и то́й е́сть исполне́ние вся́каго проро́чества: его́же бо проро́цы пропове́даша, на сего́ во Иорда́не ру́ку положи́в, яви́ся бо́жия Сло́ва проро́к, пропове́дник вку́пе и предте́ча.

И́кос: Восхва́лим ны́не госпо́дня предте́чу, его́же свяще́ннику Елисаве́т роди́ из ложе́сн непло́дных, но не без се́мене: Христо́с бо еди́н вмести́лище про́йде непроходи́мо без се́мене. Иоа́нна непло́ды роди́: без му́жа же сего́ не роди́: Иису́са же, осене́нием Отца́ и Ду́ха бо́жия, де́ва роди́ чи́стая: но безсе́менному яви́ся от непло́дове проро́к, пропове́дник, вку́пе и предте́ча.

Пе́снь 7.

Ирмо́с: В нача́ле зе́млю основа́вый, и небеса́ сло́вом утверди́вый: благослове́н еси́ во ве́ки, Го́споди Бо́же оте́ц на́ших.

И́же пути́ госпо́дни угото́вавый, предте́че, к тому́ же испра́ви и моя́ стези́, да зову́: благослове́н еси́, Бо́же оте́ц на́ших.

Пропове́дниче све́та, просвети́ ду́шу мою́, и лю́тыя тьмы́, и гее́нны паля́щия изба́ви мя́ прибега́ющаго к тебе́ несумне́нною душе́ю.

Сла́ва: Непло́дныя израще́ние плодови́тое сы́й моего́ се́рдца непло́дие, во благопло́дие претвори́ твои́ми моли́твами, му́дре крести́телю Христо́в.

И ны́не: Избра́нная а́гнице бо́жия Сло́ва, моли́ из тебе́ вопло́щшагося Бо́га, ко избра́нным овца́м причта́ти мя́ в ча́с стра́шный.

Пе́снь 8.

Ирмо́с: Безнача́льнаго царя́ сла́вы, его́же трепе́щут небе́сныя си́лы, по́йте свяще́нницы, лю́дие превозноси́те во вся́ ве́ки.

Взе́млющаго грехи́ ми́ра а́гнца бо́жия, его́же показа́л еси́ все́м, моли́, крести́телю, стра́сти моя́ умертви́ти, и спасти́ ду́шу мою́.

Облегчи́ бре́мя души́ моея́, побори́ борю́щыя мя́, госпо́день крести́телю, и неуя́звлена мя́ покажи́ от те́х злоде́йствия.

Сла́ва: Удали́лся еси́ бе́гаяй, проро́че, водвори́лся же еси́ в пусты́ню непрохо́дную, те́мже тя́ молю́: стра́сти души́ моея́ пу́сты сотвори́ вско́ре.

И ны́не: Лоза́ еси́, Де́во, я́же гро́зд зре́л ро́ждшая, умиле́ния питие́м напоя́ющи мя́ ны́не, отъими́ пия́нство зо́л мои́х.

Пе́снь 9.

Ирмо́с: Проявле́нное на горе́ законополо́жнику во огни́ и купине́ рождество́ присноде́вы, в на́ше ве́рных спасе́ние, пе́сньми немо́лчными велича́ем.

Хотя́щу ми́ стра́шному Твоему́ предста́ти престо́лу, Сло́ве, и дея́ний мои́х истяза́емей бы́ти вине́, кото́рый обря́щу отве́т, окая́нный, Твоего́ ра́ди крести́теля, Го́споди Бо́же мо́й, тогда́ пощади́ мя́.

Я́ко гла́с Сло́ва, испра́ви гла́сы моя́ к Бо́гу, прему́дре крести́телю, и изба́ви мя́ зло́бы бесо́вския и искуше́ния челове́к: да по до́лгу ублажа́ю тя́.

Сла́ва: Напита́й мя́ пи́щею безсме́ртною Христо́вых за́поведей: напо́й мя́ питие́м живо́тным, крести́телю и проро́че: и предста́ви Бо́га спасе́на, под кро́в тво́й притека́ющаго.

И ны́не: Влады́чице Де́во чи́стая и препросла́вленная: с предте́чею сы́на твоего́ и царя́ моли́, от вся́кия ну́жды спасти́ ве́рою тя́ блажа́щыя.

Моли́тва ко свято́му Иоа́нну предте́чи.

Крести́телю Христо́в, пропове́дниче покая́ния, ка́ющагося не пре́зри мене́, но совокупля́яся с во́и небе́сными, моли́ся ко Влады́це за мене́ недосто́йнаго, уны́лаго, немощна́го и печа́льнаго, во мно́гия беды́ впа́дшаго, утружде́ннаго бу́рными по́мыслы ума́ моего́: а́з бо е́смь верте́п злы́х де́л, отню́д не име́яй конца́ грехо́вному обы́чаю: пригвожде́н бо е́сть у́м мо́й земны́м веще́м: что́ сотворю́; не ве́м, и к кому́ прибе́гну, да спасе́на бу́дет душа́ моя́; то́кмо к тебе́, святы́й Иоа́нне, благода́ти тезоимени́те, я́ко тя́ пред Го́сподем по Богоро́дице ве́м бо́льша бы́ти рожде́нных все́х: и́бо ты́ сподо́бился еси́ косну́тися верху́ царя́ Христа́, взе́млющаго грехи́ ми́ра, а́гнца бо́жия: его́же моли́ за гре́шную мою́ ду́шу, да поне́ от ны́не, в первыйна́десять ча́с понесу́ тяготу́ благу́ю, и прииму́ мзду́ с после́дними. Е́й, крести́телю Христо́в, честны́й предте́че, кра́йний проро́че, пе́рвый во благода́ти му́чениче, по́стников и пусты́нников наста́вниче, чистоты́ учи́телю и бли́жний дру́же Христо́в, тя́ молю́, к тебе́ прибега́ю, не отри́ни мене́ от твоего́ заступле́ния, но возста́ви мя́ па́дшагося мно́гими грехи́, обнови́ ду́шу мою́ покая́нием, я́ко вторы́м креще́нием, поне́же обоего́ нача́льник еси́: креще́нием омыва́яй прароди́тельный гре́х, покая́нием же очища́яй коего́ждо де́ло скве́рно. Очи́сти мя́ грехми́ оскверне́ннаго, и пону́ди вни́ти, а́може ничто́же скве́рно вхо́дит, в ца́рствие небе́сное, ами́нь.

Досто́йное е́сть: Трисвято́е. По О́тче на́ш:

Тропа́рь: Па́мять пра́веднаго: и Богоро́дичен.

И отпу́ст:

Христо́с и́стинный Бо́г на́ш, моли́твами пречи́стыя своея́ Ма́тере, честна́го и сла́внаго проро́ка, предте́чи и крести́теля Иоа́нна, преподо́бных и богоно́сных оте́ц на́ших, и все́х святы́х, поми́лует и спасе́т на́с, я́ко бла́г и человеколю́бец. Ами́нь.

Гла́с 6-й

Пе́снь 1

Ирмо́с: Я́ко по су́ху пешеше́ствовав Изра́иль, по бе́здне стопа́ми, гони́теля фарао́на ви́дя потопля́ема, Бо́гу побе́дную пе́снь пои́м, вопия́ше.

Припе́в: Поми́луй мя́, Бо́же, поми́луй мя́.

Ны́не приступи́х а́з гре́шный и обремене́нный к Тебе́, Влады́це и Бо́гу моему́; не сме́ю же взира́ти на не́бо, то́кмо молю́ся, глаго́ля: да́ждь ми́, Го́споди, у́м, да пла́чуся де́л мои́х го́рько.

О, горе́ мне́ гре́шному! Па́че все́х челове́к окая́нен е́смь, покая́ния не́сть во мне́; да́ждь ми́, Го́споди, сле́зы, да пла́чуся де́л мои́х го́рько.

Сла́ва: Безу́мне, окая́нне челове́че, в ле́ности вре́мя губи́ши; помы́сли житие́ твое́, и обрати́ся ко Го́споду Бо́гу, и пла́чися о де́лех твои́х го́рько.

И ны́не: Ма́ти Бо́жия Пречи́стая, воззри́ на мя́ гре́шнаго, и от се́ти диа́воли изба́ви мя́, и на пу́ть покая́ния наста́ви мя́, да пла́чуся де́л мои́х го́рько.

Пе́снь 3

Ирмо́с: Не́сть свя́т, я́коже Ты́, Го́споди Бо́же мо́й, вознесы́й ро́г ве́рных Твои́х, Бла́же, и утверди́вый на́с на ка́мени испове́дания Твоего́.

Внегда́ поста́влени бу́дут престо́ли на суди́щи стра́шнем, тогда́ все́х челове́к дела́ облича́тся; го́ре та́мо бу́дет гре́шным, в му́ку отсыла́емым; и то́ ве́дущи, душе́ моя́, пока́йся от злы́х де́л твои́х.

Пра́ведницы возра́дуются, а гре́шнии воспла́чутся, тогда́ никто́же возмо́жет по́мощи на́м, но дела́ на́ша осу́дят на́с, те́мже пре́жде конца́ пока́йся от злы́х де́л твои́х.

Сла́ва: Увы́ мне́ великогре́шному, и́же де́лы и мы́сльми оскверни́вся, ни ка́пли сле́з име́ю от жестосе́рдия; ны́не возни́кни от земли́, душе́ моя́, и пока́йся от злы́х де́л твои́х.

И ны́не: Се́, взыва́ет, Госпоже́, Сы́н Тво́й, и поуча́ет на́с на до́брое, а́з же гре́шный добра́ всегда́ бе́гаю; но Ты́, Ми́лостивая, поми́луй мя́, да пока́юся от злы́х мои́х де́л.

Седа́лен, гла́с 6-й

Помышля́ю де́нь стра́шный и пла́чуся дея́ний мои́х лука́вых: ка́ко отвеща́ю Безсме́ртному Царю́, или́ ко́им дерзнове́нием воззрю́ на Судию́, блу́дный а́з? Благоутро́бный О́тче, Сы́не Единоро́дный и Душе́ Святы́й, поми́луй мя́.

Сла́ва и ны́не, Богоро́дичен

Свя́зан мно́гими ны́не плени́цами грехо́в и содержи́м лю́тыми страстьми́ и беда́ми, к Тебе́ прибега́ю, моему́ спасе́нию, и вопию́: помози́ ми́, Де́во, Ма́ти Бо́жия.

Пе́снь 4

Ирмо́с: Христо́с моя́ си́ла, Бо́г и Госпо́дь, честна́я Це́рковь боголе́пно пое́т, взыва́ющи от смы́сла чи́ста, о Го́споде пра́зднующи.

Широ́к пу́ть зде́ и уго́дный сла́сти твори́ти, но го́рько бу́дет в после́дний де́нь, егда́ душа́ от те́ла разлуча́тися бу́дет: блюди́ся от си́х, челове́че, Ца́рствия ра́ди Бо́жия.

Почто́ убо́гаго оби́диши, мзду́ нае́мничу уде́ржуеши, бра́та твоего́ не лю́биши, блу́д и го́рдость го́ниши? Оста́ви у́бо сия́, душе́ моя́, и пока́йся Ца́рствия ра́ди Бо́жия.

Сла́ва: О, безу́мный челове́че, доко́ле углеба́еши, я́ко пчела́, собира́ющи бога́тство твое́? Вско́ре бо поги́бнет, я́ко пра́х и пе́пел: но бо́лее взыщи́ Ца́рствия Бо́жия.

И ны́не: Госпоже́ Богоро́дице, поми́луй мя́ гре́шнаго, и в доброде́тели укрепи́, и соблюди́ мя́, да на́глая сме́рть не похи́тит мя́ негото́ваго, и доведи́ мя́, Де́во, Ца́рствия Бо́жия.

Пе́снь 5

Ирмо́с: Бо́жиим све́том Твои́м, Бла́же, у́тренюющих Ти́ души́ любо́вию озари́, молю́ся, Тя́ ве́дети, Сло́ве Бо́жий, и́стиннаго Бо́га, от мра́ка грехо́внаго взыва́юща.

Воспомяни́, окая́нный челове́че, ка́ко лжа́м, клевета́м, разбо́ю, не́мощем, лю́тым звере́м, грехо́в ра́ди порабоще́н еси́; душе́ моя́ гре́шная, того́ ли восхоте́ла еси́?

Трепе́щут ми́ у́ди, все́ми бо сотвори́х вину́: очи́ма взира́яй, уши́ма слы́шай, язы́ком зла́я глаго́ляй, всего́ себе́ гее́нне предая́й; душе́ моя́ гре́шная, сего́ ли восхоте́ла еси́?

Сла́ва: Блудника́ и разбо́йника ка́ющася прия́л еси́, Спа́се, а́з же еди́н ле́ностию грехо́вною отягчи́хся и злы́м дело́м порабо́тихся, душе́ моя́ гре́шная, сего́ ли восхоте́ла еси́?

И ны́не: Ди́вная и ско́рая помо́щнице все́м челове́ком, Ма́ти Бо́жия, помози́ мне́ недосто́йному, душа́ бо моя́ гре́шная того́ восхоте́.

Пе́снь 6

Ирмо́с: Жите́йское мо́ре, воздвиза́емое зря́ напа́стей бу́рею, к ти́хому приста́нищу Твоему́ прите́к, вопию́ Ти́: возведи́ от тли́ живо́т мо́й, Многоми́лостиве.

Житие́ на земли́ блу́дно пожи́х и ду́шу во тьму́ преда́х, ны́не у́бо молю́ Тя́, Ми́лостивый Влады́ко: свободи́ мя́ от рабо́ты сея́ вра́жия, и да́ждь ми́ ра́зум твори́ти во́лю Твою́.

Кто́ твори́т такова́я, я́коже а́з? Я́коже бо свиния́ лежи́т в калу́, та́ко и а́з греху́ служу́. Но Ты́, Го́споди, исто́ргни мя́ от гну́са сего́ и да́ждь ми́ се́рдце твори́ти за́поведи Твоя́.

Сла́ва: Воспряни́, окая́нный челове́че, к Бо́гу, воспомяну́в своя́ согреше́ния, припа́дая ко Творцу́, слезя́ и стеня́; То́й же, я́ко милосе́рд, да́ст ти́ у́м зна́ти во́лю Свою́.

И ны́не: Богоро́дице Де́во, от ви́димаго и неви́димаго зла́ сохрани́ мя́, Пречи́стая, и приими́ моли́твы моя́, и донеси́ я́ Сы́ну Твоему́, да да́ст ми́ у́м твори́ти во́лю Его́.

Конда́к

Душе́ моя́, почто́ греха́ми богате́еши, почто́ во́лю диа́волю твори́ши, в чесо́м наде́жду полага́еши? Преста́ни от си́х и обрати́ся к Бо́гу с пла́чем, зову́щи: милосе́рде Го́споди, поми́луй мя́ гре́шнаго.

И́кос

Помы́сли, душе́ моя́, го́рький ча́с сме́рти и стра́шный су́д Творца́ твоего́ и Бо́га: А́нгели бо гро́знии по́ймут тя́, душе́, и в ве́чный о́гнь введу́т: у́бо пре́жде сме́рти пока́йся, вопию́щи: Го́споди, поми́луй мя́ гре́шнаго.

Пе́снь 7

Ирмо́с: Росода́тельну у́бо пе́щь соде́ла А́нгел преподо́бным отроко́м, халде́и же опаля́ющее веле́ние Бо́жие, мучи́теля увеща́ вопи́ти: благослове́н еси́, Бо́же оте́ц на́ших.

Не наде́йся, душе́ моя́, на тле́нное бога́тство и на непра́ведное собра́ние, вся́ бо сия́ не ве́си кому́ оста́виши, но возопи́й: поми́луй мя́, Христе́ Бо́же, недосто́йнаго.

Не упова́й, душе́ моя́, на теле́сное здра́вие и на скоромимоходя́щую красоту́, ви́диши бо, я́ко си́льнии и млади́и умира́ют; но возопи́й: поми́луй мя́, Христе́ Бо́же, недосто́йнаго.

Сла́ва: Воспомяни́, душе́ моя́, ве́чное житие́, Ца́рство Небе́сное, угото́ванное святы́м, и тьму́ кроме́шную и гне́в Бо́жий злы́м, и возопи́й: поми́луй мя́, Христе́ Бо́же, недосто́йнаго.

И ны́не: Припади́, душе́ моя́, к Бо́жией Ма́тери и помоли́ся То́й, е́сть бо ско́рая помо́щница ка́ющимся, умо́лит Сы́на Христа́ Бо́га, и поми́лует мя́ недосто́йнаго.

Пе́снь 8

Ирмо́с: Из пла́мене преподо́бным ро́су источи́л еси́ и пра́веднаго же́ртву водо́ю попали́л еси́: вся́ бо твори́ши, Христе́, то́кмо е́же хоте́ти. Тя́ превозно́сим во вся́ ве́ки.

Ка́ко не и́мам пла́катися, егда́ помышля́ю сме́рть, ви́дех бо во гро́бе лежа́ща бра́та моего́, безсла́вна и безобра́зна? Что́ у́бо ча́ю, и на что́ наде́юся? То́кмо да́ждь ми́, Го́споди, пре́жде конца́ покая́ние. (Два́жды)

Сла́ва: Ве́рую, я́ко прии́деши суди́ти живы́х и ме́ртвых, и вси́ во свое́м чи́ну ста́нут, ста́рии и млади́и, влады́ки и кня́зи, де́вы и свяще́нницы; где́ обря́щуся а́з? Сего́ ра́ди вопию́: да́ждь ми́, Го́споди, пре́жде конца́ покая́ние.

И ны́не: Пречи́стая Богоро́дице, приими́ недосто́йную моли́тву мою́ и сохрани́ мя́ от на́глыя сме́рти, и да́руй ми́ пре́жде конца́ покая́ние.

Пе́снь 9

Ирмо́с: Бо́га челове́ком невозмо́жно ви́дети, на Него́же не сме́ют чи́ни А́нгельстии взира́ти; Тобо́ю же, Всечи́стая, яви́ся челове́ком Сло́во Воплоще́нно, его́же велича́юще, с небе́сными во́и Тя́ ублажа́ем.

Ны́не к ва́м прибега́ю, А́нгели, Арха́нгели и вся́ небе́сныя си́лы, у Престо́ла Бо́жия стоя́щии, моли́теся ко Творцу́ своему́, да изба́вит ду́шу мою́ от му́ки ве́чныя.

Ны́не пла́чуся к ва́м, святи́и патриа́рси, ца́рие и проро́цы, апо́столи и святи́телие и вси́ избра́ннии Христо́вы: помози́те ми́ на суде́, да спасе́т ду́шу мою́ от си́лы вра́жия.

Сла́ва: Ны́не к ва́м воздежу́ ру́це, святи́и му́ченицы, пусты́нницы, де́вственницы, пра́ведницы и вси́ святи́и, моля́щиися ко Го́споду за ве́сь ми́р, да поми́лует мя́ в ча́с сме́рти моея́.

И ны́не: Ма́ти Бо́жия, помози́ ми́, на Тя́ си́льне наде́ющемуся, умоли́ Сы́на Своего́, да поста́вит мя́ недосто́йнаго одесну́ю Себе́, егда́ ся́дет судя́й живы́х и ме́ртвых, ами́нь.

Моли́тва по кано́не.

Влады́ко Христе́ Бо́же, И́же страстьми́ Свои́ми стра́сти моя́ исцели́вый и я́звами Свои́ми я́звы моя́ уврачева́вый, да́руй мне́, мно́го Тебе́ прегреши́вшему, сле́зы умиле́ния; сраствори́ моему́ те́лу от обоня́ния Животворя́щаго Те́ла Твоего́, и наслади́ ду́шу мою́ Твое́ю Честно́ю Кро́вию от го́рести, е́юже мя́ сопроти́вник напои́; возвы́си мо́й у́м к Тебе́, до́лу пони́кший, и возведи́ от про́пасти поги́бели: я́ко не и́мам покая́ния, не и́мам умиле́ния, не и́мам сле́зы уте́шительныя, возводя́щия ча́да ко своему́ насле́дию. Омрачи́хся умо́м в жите́йских страсте́х, не могу́ воззре́ти к Тебе́ в боле́зни, не могу́ согре́тися слеза́ми, я́же к Тебе́ любве́. Но, Влады́ко Го́споди Иису́се Христе́, сокро́вище благи́х, да́руй мне́ покая́ние всеце́лое и се́рдце люботру́дное во взыска́ние Твое́, да́руй мне́ благода́ть Твою́ и обнови́ во мне́ зра́ки Твоего́ о́браза. Оста́вих Тя́, не оста́ви мене́; изы́ди на взыска́ние мое́, возведи́ к па́жити Твое́й и сопричти́ мя́ овца́м избра́ннаго Твоего́ ста́да, воспита́й мя́ с ни́ми от зла́ка Боже́ственных Твои́х Та́инств, моли́твами Пречи́стыя Твоея́ Ма́тере и все́х святы́х Твои́х. Ами́нь.

Гла́с 2

Подо́бен: Егда́ от дре́ва:

Все́м предста́тельствуеши, Блага́я, прибега́ющим с ве́рою в держа́вный Тво́й покро́в, ино́го бо не и́мамы, гре́шнии, к Бо́гу в беда́х и ско́рбех при́сно избавле́ния, обремене́ни грехи́ мно́гими, Ма́ти Бо́га Вы́шняго, те́м же Ти́ припа́даем: изба́ви от вся́каго обстоя́ния рабы́ Твоя́.

Все́х скорбя́щих Ра́досте, и оби́димых Засту́пнице, и а́лчущих Пита́тельнице, стра́нных утеше́ние, обурева́емых приста́нище, больны́х посеще́ние, немощны́х покро́ве и Засту́пнице, же́зле ста́рости, Ма́ти Бо́га Вы́шняго Ты́ еси́, Пречи́стая: потщи́ся, мо́лимся, спасти́ся рабо́м Твои́м.

Ра́дуйся, Пречи́стая Де́во. Ра́дуйся, честны́я ски́птре Царя́ Христа́. Ра́дуйся, прозя́бшая гро́зд та́йный. Ра́дуйся, две́ре Небе́сная и неопали́мая купино́. Ра́дуйся, всеми́рный све́те. Ра́дуйся, все́х ра́досте. Ра́дуйся, ве́рных спасе́ние. Ра́дуйся, Засту́пнице все́х христиа́н и прибе́жище, Влады́чице.

Сла́ва, и ны́не, гла́с 8:

Ра́дуйся, вселе́нныя похвало́. Ра́дуйся, хра́ме Госпо́день. Ра́дуйся, горо́ приосене́нная. Ра́дуйся, все́х прибе́жище. Ра́дуйся, све́щниче златы́й. Ра́дуйся, сла́во правосла́вных честна́я. Ра́дуйся, Мари́е, Ма́ти Христа́ Бо́га. Ра́дуйся, раю́. Ра́дуйся, Боже́ственная трапе́зо. Ра́дуйся, се́не. Ра́дуйся, ру́чко всезлата́я. Ра́дуйся, все́х упова́ние.

Тропа́рь, гла́с 4:

К Богоро́дице приле́жно ны́не притеце́м, гре́шнии и смире́ннии, и припаде́м, в покая́нии зову́ще из глубины́ души́: Влады́чице, помози́, на ны́ милосе́рдовавши, потщи́ся, погиба́ем от мно́жества прегреше́ний, не отврати́ Твоя́ рабы́ тщи́, Тя́ бо и еди́ну наде́жду и́мамы. Два́жды

Други́й. Сла́ва, и ны́не:

Не умолчи́м никогда́, Богоро́дице, си́лы Твоя́ глаго́лати, недосто́йнии. А́ще бо Ты́ не бы предстоя́ла, моля́щи, кто́ бы на́с изба́вил от толи́ких бе́д? Кто́ же бы сохрани́л до ны́не свобо́дны? Не отсту́пим, Влады́чице, от Тебе́, Твоя́ бо рабы́ спаса́еши при́сно от вся́ких лю́тых.

Кано́н моле́бный Пресвяте́й Богоро́дице

Творе́ние священномона́ха Игна́тиа. Гла́с 4.

Пе́снь 1.

Ирмо́с: Отве́рзу уста́ моя́, и напо́лнятся ду́ха, и сло́во отры́гну цари́це ма́тери, и явлю́ся све́тло торжеству́я, и воспою́ ра́дуяся тоя́ чудеса́.

Ра́достно, чи́стая, ны́не наста́вшее хвале́ние приноша́ю ра́дуяся, и ти́хим гла́сом, Одиги́трие, вопию́ ти́: ра́дуйся, и испо́лни мя́ ра́зума пе́ти начина́юща.

Христа́ роди́вшая, ра́дость на́м ве́чную, о ра́дуйся, всепе́тая, правосла́вных наде́ждо, Одиги́трие всепе́тая деви́це: ра́дости испо́лни мя́ ми́рови жела́нныя.

Сла́ва: Лику́ют вси́ челове́цы, и а́нгели всегда́ согла́сно вопию́ще на небеси́ и на земли́, Одиги́трие: ра́дуйся, деви́це, ра́дости бо рождество́м твои́м вся́ческая испо́лнила еси́.

И ны́не: Ра́дость Одиги́трие, со стра́хом ти́ вопию́щих ра́дости сподо́би, Ма́ти су́щия ра́дости, избавля́ющи скорбе́й вся́ческих, и все́х поми́луй к тебе́ прибега́ющих.

Пе́снь 3.

Ирмо́с: Твоя́ песносло́вцы, Богоро́дице, живы́й и незави́стный исто́чниче, ли́к себе́ совоку́пльшыя духо́вно утверди́, в боже́ственней твое́й сла́ве венце́в сла́вы сподо́би.

Христа́ вы́шняго царя́, о ра́дуйся, непоколеби́мая чи́стая, и одушевле́нная пала́то. Ра́дуйся, Одиги́трие, ра́дуйся, тобо́ю неруши́мь гра́д на́ш сохраня́ется.

Вмести́ти его́же не возмо́же тва́рь, во утро́бу неискусобра́чную, Одиги́трие деви́це, теле́сно вмести́ла еси́: те́мже ти́ ра́дуйся пое́м, по до́лгу велича́юще.

Сла́ва: Ра́дость многопе́тая ми́рови, ра́достно ти́ пою́ще при́сно, ве́чнующия чи́стая ра́дости сподобля́емся, твои́ми ма́терними моли́твами, к ро́ждшемуся из тебе́, Одиги́трие.

И ны́не: Злату́ю тя́ ста́мну, и све́щник, и же́зл, и трапе́зу, чи́стая, призыва́ем, Одиги́трие, и гла́с е́же ра́дуйся, тебе́ при́сно привноша́ем, с си́ми же имены́.

Седа́лен, гла́с 2:

Моле́ние те́плое, и стена́ необори́мая, ми́лости исто́чниче, ми́рови прибе́жище, приле́жно вопие́м ти́: Богоро́дице Влады́чице, предвари́, и от бе́д изба́ви на́с, еди́на вско́ре предста́тельствующая.

Пе́снь 4.

Ирмо́с: Седя́й в сла́ве на престо́ле божества́, во о́блаце ле́гце, прии́де Иису́с пребоже́ственный, нетле́нною дла́нию, и спа́се зову́щыя: сла́ва, Христе́, си́ле Твое́й.

Ра́дуйся, чу́до чуде́с, Одиги́трие Влады́чице, ра́дуйся, все́х ра́досте, градо́в и ве́сей непобеди́мое христиа́нское в беда́х храни́лище, и прегра́дие, и на враги́ побежде́ние.

Ра́дуйся, ра́дуйся, царе́й правосла́вных похвало́, и христолюби́вых во́инств покро́в пребыва́еши все́х цари́це. Ра́дуйся, Одиги́трие, прибе́жище все́х на́с и утвержде́ние.

Сла́ва: Ра́дуйся, все́х ско́рое в беда́х избавле́ние. Ра́дуйся, гото́вое все́х скорбя́щих утеше́ние. Ра́дуйся, всепе́тая. Ра́дуйся, Одиги́трие всеблагослове́нная, все́х немощны́х исцели́тельнице.

И ны́не: Ра́дуйся, ея́же вели́чия вся́ тва́рь сла́вити у́бо спеши́т по достоя́нию, но не возмога́ет, Одиги́трие, и сего́ ра́ди зове́т ти́: Ра́дуйся, Влады́чице, боговмести́мое жили́ще.

Пе́снь 5.

Ирмо́с: Ужасо́шася вся́ческая о боже́ственней сла́ве твое́й: ты́ бо, неискусобра́чная Де́во, име́ла еси́ во утро́бе над все́ми Бо́га, и родила́ еси́ безле́тнаго Сы́на, все́м воспева́ющым тя́, ми́р подава́ющая.

Благосты́ни бе́здно и щедро́т еси́, ра́дуйся, Одиги́трие деви́це. Ра́дуйся, все́м ра́дость творя́щи ве́рным. О ра́дуйся су́щих в беда́х, и скорбя́щих пребы́страя засту́пнице.

Ра́дости от исполне́ния, вели́чия чуде́с твои́х зря́ще, исполня́емся вси́ не зря́щи, слы́шаще же ве́рнии. Те́мже ра́дуйся тебе́ при́сно всю́ду, и вси́, Одиги́трие, пое́м.

Сла́ва: Христа́ Бо́га на́шего, о ра́дуйся, Одиги́трие, жили́ще и до́м, неизрече́нныя и пребоже́ственныя Де́во, сла́вы его́. О ра́дуйся, пала́то преукраше́нная. Ра́дуйся, гра́де одушевле́нный при́сно ца́рствующий.

И ны́не: Ра́дость неоску́дную тя́ разсмотря́юще, я́ко мо́ре, отрокови́це, Одиги́трие деви́це, ра́дующеся вси́, ра́дуйся вопие́м ти́, и пою́ще боже́ственных даро́в неви́димо при́сно от Тебе́ ожида́юще.

Пе́снь 6.

Ирмо́с: Боже́ственное сие́ и всечестно́е соверша́юще пра́здненство богому́дрии, Богома́тере, прии́дте, рука́ми воспле́щим, от нея́ ро́ждшагося Бо́га сла́вим.

Христа́ чи́стая прие́млющи, гла́с е́же ра́дуйся, Одиги́трие деви́це, слы́шала еси́, его́же неизрече́нно ро́ждши, ра́дуйся, от все́х слы́шиши всегда́.

Ра́дости всея́ испо́лнила еси́, вы́шния и ни́жния ты́ совокупи́ла еси́, Одиги́трие. Те́мже ра́достно и согла́сно ны́не, не́бо и вся́ земля́ зове́т ти́.

Сла́ва: Вдо́в, о ра́дуйся, всепе́тая, и все́х си́рых, Одиги́трие, утеше́ние. Ра́дуйся все́м источа́ющий ни́щым бога́тство неистощи́мое.

И ны́не: Зла́та вся́каго блиста́ема, и у́тра со́лнечнаго светле́йши, жили́ще Христо́во. Ра́дуйся, Одиги́трие, ра́дуйся, деви́це, ра́дуйся, неве́сто неневе́стная.

Конда́к, гла́с 6:

Не и́мамы ины́я по́мощи, не и́мамы ины́я наде́жды, ра́зве тебе́, Влады́чице: ты́ на́м помози́, на тебе́ наде́емся, и тобо́ю хва́лимся? твои́ бо есмы́ раби́, да не постыди́мся.

Други́й конда́к, гла́с то́йже:

Предста́тельство христиа́н непосты́дное, хода́тайство ко творцу́ непрело́жное, не пре́зри гре́шных моле́ний гла́сы, но предвари́, я́ко блага́я, на по́мощь на́с, ве́рно зову́щих ти́: ускори́ на моли́тву, и потщи́ся на умоле́ние, предста́тельствующи при́сно, Богоро́дице, чту́щих тя́.

И́кос: Простри́ дла́ни твоя́, и́миже все́х Влады́ку я́ко младе́нца прия́ла еси́, за мно́жество бла́гости. Не оста́ви на́с всегда́ наде́ющихся на тя́. Бо́дренною твое́ю моли́твою и пода́ждь душа́м на́шым милосе́рдие твое́, во ве́ки источа́ющи: тебе́ бо и́мамы гре́шнии засту́пницу, от находя́щих на ны́ бе́д и зо́л, но я́ко иму́щи милосе́рдия щедро́ты, ускори́ на моли́тву, и потщи́ся на умоле́ние, предста́тельствующи при́сно, Богоро́дице, чту́щих тя́.

По ева́нгелии, стихи́ра, гла́с 6:

Не вве́ри мя́ челове́ческому предста́тельству, пресвята́я Влады́чице, но приими́ моле́ние раба́ твоего́: ско́рбь бо обдержи́т мя́, терпе́ти не могу́ де́монскаго стреля́ния, покро́ва не и́мам, ниже́ Го́споде прибе́гну окая́нный, всегда́ побежда́емь, и утеше́ния не и́мам, ра́зве тебе́, Влады́чице ми́ра, упова́ние и предста́тельство ве́рных, не пре́зри моле́ние мое́, поле́зно сотвори́.

Пе́снь 7.

Ирмо́с: Не послужи́ша тва́ри богому́дрии па́че созда́вшаго, но о́гненное преще́ние му́жески попра́вше, ра́довахуся пою́ще: препе́тый отце́в Госпо́дь и Бо́г, благослове́н еси́.

Ра́дуйся, ра́дуйся, Богоро́дице Одиги́трие, все́х и всегда́ наставля́ющи ве́рных, ше́ствовати ко вся́кому пути́ спаси́тельному. Ра́дуйся, Влады́чице, тобо́ю бо при́сно избавля́емся настоя́щия ва́рварския беды́.

Ра́дуйся, ра́дуйся, Одиги́трие, бдя́щи и моля́щися о на́с к Бо́гу, и вся́кия зло́бы хода́тайтсвом твои́м, вся́ческих скорбе́й Богороди́тельнице, все́х люде́й избавля́ющи.

Сла́ва: Ра́дуйся, ра́дуйся, пресвята́я Одиги́трие, я́же проше́ния на́ша к по́льзе на́м исполня́ющи, и хотя́щи все́м при́сно всегда́ любодру́жное благо́е еди́нство, спе́шное же во изя́щных.

И ны́не: Ра́дуйся, ра́дуйся, корабле́м, Одиги́трие, ну́жно пла́вающым, избавля́ющи ве́рных, и все́м избавле́ние от вся́кия ско́рби, и неду́ги пестро́тныя и ме́дленныя разреша́ющи вско́ре.

Пе́снь 8.

Ирмо́с: О́троки благочести́выя в пещи́, рождество́ богоро́дичо спасло́ е́сть: тогда́ у́бо образу́емое, ны́не же де́йствуемое, вселе́нную всю́ воздвиза́ет пе́ти Тебе́: Го́спода по́йте дела́, и превозноси́те его́ во вся́ ве́ки. Ра́дуйся, всеблагослове́нная Мари́е, из тебе́ бо всеблагослове́нный Бо́г оде́яся во всего́ мя́ челове́ка: и оде́явся соедини́ своему́ божеству́, неизрече́нным соедине́нием Де́во Одиги́трие, ра́дуйся, благода́тная, ра́досте всего́ ми́ра.

Ра́дуйся, лука́вых духо́в прогони́тельнице. Ра́дуйся, Богоро́дице Одиги́трие. Ра́дуйся, я́ко тебе́ небе́сная неви́димая во́инства славосло́вят всегда́, и велича́ют я́ко Ма́терь бо́жию бы́вшую. Ра́дуйся, я́же ни́жняя сочета́вши с вы́шними.

Сла́ва:

Ра́дуйся, вся́ небе́сныя си́лы без разсужде́ния превосходя́щая. Ра́дуйся, Одиги́трие. Ра́дуйся вся́кия тва́ри Бо́га ро́ждшая госпо́дьствующи, е́й, Влады́чице всепе́тая. Ра́дуйся, я́ко пребыва́еши Де́вою чи́стая и по рождестве́.

И ны́не:

Ра́дуйся, же́н все́х сла́во, хра́ме преосвяще́нный Бо́га на́шего. Ра́дуйся, Одиги́трие. Ра́дуйся, душеспаси́тельная все́й вселе́нней. Ра́дуйся, покрыва́ющий о́блаче небе́с ши́ршая. Ра́дуйся, мирополо́жнице боже́ственнаго ми́ра полна́.

Пе́снь 9.

Ирмо́с: Вся́к земноро́дный да взыгра́ется ду́хом просвеща́емь, да торжеству́ет же безпло́тных умо́в естество́, почита́ющее свяще́нное торжество́ Богома́тере, и да вопие́т: ра́дуйся, всеблаже́нная Богоро́дице, чи́стая присноДе́во.

Ра́дуйся, свеще́, све́т невече́рний поне́сшая, и в рождестве́ твое́м многобо́жия тьму́ разруши́вшая, и а́довы про́пасти изба́вльшая лю́ди. Ра́дуйся, Одиги́трие Богоро́дице, добро́т все́х предхода́таице. Ра́дуйся, земле́, из нея́же кла́с прозя́бший небе́сный ве́рным, и ми́р ве́сь душегуби́тельнаго гла́да изба́ви, разу́мная и одушевле́нная. О ра́дуйся виногра́де, я́же гро́зд живо́тный ро́ждшая, Богоро́дице чи́стая Одиги́трие.

Сла́ва: Ра́дуйся, та́йных цвето́в прекра́сный су́щий раю́. Ра́дуйся, Ма́ти Де́во, неви́димых ра́зум, чистото́ю странноле́пно побе́ждши Богороди́тельнице. Ра́дуйся, отрокови́це. Ра́дуйся, Одиги́трие, всеми́рное чу́до и слы́шание.

И ны́не: Ле́то живота́ на́шего, про́чее сохрани́ неврежде́нно поможе́нием твои́м, Де́во отрокови́це, и сподо́би коне́ц благи́й получи́ти на́м, воспева́ющым тя́ и взыва́ющым: ра́дуйся, всеблаже́нная Богоро́дице чи́стая, Одиги́трие.

Посе́м моли́тва пресвяте́й госпоже́ Богоро́дице:

Пресвята́я Влады́чице моя́ Богоро́дице, святы́ми твои́ми и всеси́льными мольба́ми отжени́ от мене́ смире́ннаго и окая́ннаго раба́ твоего́ уны́ние, забве́ние, неразу́мие, нераде́ние, и вся́ скве́рная, лука́вая и ху́льныя помышле́ния от окая́ннаго моего́ се́рдца, и от помраче́ннаго ума́ моего́, и погаси́ пла́мень страсте́й мои́х, я́ко ни́щ е́смь и окая́нен: и изба́ви мя́ от мно́гих и лю́тых воспомина́ний и предприя́тий, и от все́х де́йств злы́х свободи́ мя́. Я́ко благослове́нна еси́ от все́х родо́в, и сла́вится пречестно́е и́мя твое́ во ве́ки веко́в, ами́нь.

В сре́ду ве́чера, на Го́споди воззва́х:

Стихи́ры, гла́с 4.

Подо́бен: Я́ко до́бля:

Я́ко самови́дцы и свиде́тели словесе́ воплоще́ния, ученицы́ прехва́льнии, ублажа́еми есте́: я́ко мо́лния бо сия́юще ми́рови яви́стеся, я́ко го́ры мы́сленныя, сла́дость искапали есте́: я́ко приснотеку́щыя ре́ки ра́йския раздели́вшеся, язы́ческия це́ркви напая́ете боже́ственными вода́ми.

Я́ко лучи́ сия́юще заря́ми духо́вными, в ми́р ве́сь по́слани бы́сте, чуде́с де́йствие неоску́дно подава́юще, служи́теле Христо́вым та́йнам бы́вше, и богонаписанныя скрижа́ли бо́жия благода́ти, богонауче́нный зако́н подае́те, священнослужи́телие прехва́льнии.

Рабырская тро́сть, любому́дрых шата́ние и вети́йская суесло́вия оста́ви: богому́дренная уче́ния, та́ин благи́х издале́ча простерый ева́нгелие, и пи́щи присносу́щныя прича́стие, и а́нгельское наслажде́ние, и пребыва́ющую сла́ву.

Сла́ва, и ны́не, богоро́дичен:

Ра́дуйся, солнцезрачная луче́, со́лнца незаходи́маго престо́ле, я́же со́лнце возсия́вши недоуме́нное: ра́дуйся, уме́, облиста́яй боже́ственными сия́ньми, заре́ мо́лнийная, освети́вшая земли́ концы́, и́стинное зла́та блиста́ние, вседо́брая и пренепоро́чная, све́т невече́рний ве́рным облиста́вши.

На стихо́вне стихи́ры, гла́с 6.

Подо́бен: Тридне́вно воскре́сл:

Вели́ким та́йнам бо́жиим служи́теле бы́сте, богосло́вцы и богови́дцы ученицы́, и благода́ть исцеле́ний прия́сте, и все́х челове́к боле́зни исцеля́ете.

Сти́х: Во всю́ зе́млю изы́де веща́ние и́х, и в концы́ вселе́нныя глаго́лы и́х.

Вели́кое прибе́жище и покро́в душа́м на́шым, духово́м лю́тым прогна́ние вы́ есте́, богови́дцы апо́столи госпо́дни: те́мже ва́с при́сно почита́ем.

Сти́х: Небеса́ пове́дают сла́ву бо́жию, творе́ние же ру́ку его́ возвеща́ет тве́рдь.

От вся́каго обстоя́ния, и вре́да бесо́вскаго, и прегреше́ний, и зла́го плене́ния изба́вите, ве́рою ва́с восхваля́ющих, боже́ственнии апо́столи блаже́ннии.

Сла́ва, и ны́не, богоро́дичен:

Изба́ви ны́ от ну́жд на́ших, Ма́ти Христа́ Бо́га, ро́ждшая все́х творца́, да вси́ зове́м ти́: ра́дуйся, еди́но предста́тельство ду́ш на́ших.

Го́споди, поми́луй, 12. Сла́ва, и ны́не: Прииди́те, поклони́мся: три́жды. Псало́м 142: Го́споди, услы́ши моли́тву мою́: Сла́ва, и ны́не: Аллилу́иа, три́жды. Го́споди, поми́луй, 12. Бо́г Госпо́дь и яви́ся на́м.

Та́же тропа́рь, гла́с 3:

Апо́столи святи́и, моли́те ми́лостиваго Бо́га, да прегреше́ний оставле́ние пода́ст душа́м на́шым.

Сла́ва, и ны́не, богоро́дичен:

Сло́во о́тчее Христа́ Бо́га на́шего от Тебе́ воплоти́вшагося позна́хом, Богоро́дице Де́во, еди́на чи́стая, еди́на благослове́нная: те́м непреста́нно тя́ воспева́юще велича́ем.

Посе́м псало́м 50: Поми́луй мя́ Бо́же:

Кано́н святы́м апо́столом.

Творе́ние ки́р Феофа́на.

Гла́с 4.

Пе́снь 1.

Ирмо́с: Мо́ря чермну́ю пучи́ну невла́жными стопа́ми дре́вний пешеше́ствовал Исра́иль, крестообра́зныма моисе́овыма рука́ма амали́кову си́лу в пусты́ни победи́л е́сть.

Припе́в: Святи́и апо́столи, моли́те Бо́га о на́с.

Боже́ственнии уте́шителя орга́ни, возглаша́ющии сего́ боже́ственными всегда́ дохнове́ньми, воспе́ша пе́снь на́м, я́ко вои́стину спаси́тельную, благосла́внии Христо́вы апо́столи.

На одре́ ле́ности слежа́ща, и в сме́рти грехо́вной неду́гом душе́вным лю́те иста́ема, посеще́ния мя́, сла́внии Христо́вы самови́дцы, сподо́бите.

Сла́ва: И́же сло́вом безслове́сие разреши́вше язы́ком, апо́столи, от безслове́сных дея́ний лю́те омраче́нное средце́ мое́, уте́шителя бла́гостию просвети́те, апо́столи.

И ны́не: Де́ва по рождестве́ нетле́нна пребыла́ еси́, на́с ра́ди я́вльшагося на земли́ па́че Сло́ва ро́ждшая, его́же приле́жно моли́ просвети́ти ду́шы на́шя.

Пе́снь 3.

Ирмо́с: Весели́тся о Тебе́ це́рковь Твоя́, Христе́, зову́щи: Ты́ моя́ кре́пость, Го́споди, и прибе́жище, и утвержде́ние.

Гра́д Тво́й, Бо́же, слове́сных ре́к Твои́х тече́ния учени́к, Влады́ко, свяще́нно возвеселя́ют.

Гра́ждане небе́снии, сослуже́бницы мы́сленным чино́м, всесла́внии апо́столи, вся́кия на́с ско́рби изба́вите.

Сла́ва: Утверди́вый, Христе́, слове́сная Твоя́ небеса́, утверди́ мя́ те́х моли́твами, на ка́мени Твои́х хоте́ний, я́ко благоутро́бен.

И ны́не: Я́ко ма́ти Тя́ мо́лит, с лико́м учени́к, Го́споди, я́же Тебе́ чи́сто роди́вшая: да́руй на́м ми́лости Твоя́.

Пе́снь 4.

Ирмо́с: Вознесе́на Тя́ ви́девши це́рковь на кресте́, со́лнце пра́ведное, ста́ в чи́не свое́м, досто́йно взыва́ющи: сла́ва си́ле Твое́й, Го́споди.

Наве́л еси́ на мо́ре ко́ни Твоя́ избра́нныя, человеколю́бче, злове́рия во́ды возмуща́ющыя, и все́м ра́зум Тво́й и́стинный возвеща́ющыя.

Зве́зды, просвети́вше благоче́стием мы́сленную тве́рдь церко́вную, сла́внии апо́столи, от но́щи неве́дения и прегреше́ний изба́вите мя́.

Сла́ва: Я́вльшеся я́коже стре́лы изъощре́ни, апо́столи, вра́жия разжже́нныя стре́лы зло́бы моея́ ны́не угаси́те, и помышле́ние мое́ утверди́те.

И ны́не: Ду́шу мою́ огорче́нную я́дом, сопроти́внаго угрызе́нием, де́йственным врачева́нием исцели́, моли́твами, Христе́, ро́ждшия Тя́, и свяще́нных апо́стол Твои́х.

Пе́снь 5.

Ирмо́с: Ты́, Го́споди мо́й, све́т в ми́р прише́л еси́, све́т святы́й, обраща́яй из мра́чна неве́дения, ве́рою воспева́ющыя Тя́.

Лозы́ живо́тныя, процвета́юще гро́здие, напои́ша все́х вина́ мы́сленнаго весе́лия, сла́внии апо́столи.

К све́ту за́поведей бо́жиих наста́вите, апо́столи, и́же во тьме́ душе́внаго уны́ния безу́мно пребыва́ющыя.

Сла́ва: Изба́вите на́с душе́вных прегреше́ний, и суда́ бу́дущаго, и тли́, и бе́д, апо́столи блаже́ннии.

И ны́не: Спаси́ мя́, Бо́же, я́ко человеколю́бец, спаси́ мя́ мольба́ми неизрече́нно Тебе́ роди́вшия, и все́х боже́ственных апо́стол Твои́х.

Пе́снь 6.

Ирмо́с: Пожру́ Ти́ со гла́сом хвале́ния, Го́споди, це́рковь вопие́т Ти́, от бесо́вския кро́ве очи́щшися, ра́ди ми́лости от ре́бр Твои́х исте́кшею кро́вию.

Па́стыря до́браго богоизбра́нныя овча́та, разсе́янная по ми́ру, волко́в вся́ко зве́рство во о́вчую кро́тость ве́рою преложи́ша.

Боже́ственнаго рая́ древеса́ добропло́дная, преокая́нныя души́ моея́ всенепло́дство, во благопло́дие доброде́тельнаго нра́ва приведи́те, апо́столи.

Сла́ва: Уя́звен бы́х сласте́й ору́жием, и умро́х: и́же от Христа́ прие́мше, сла́внии, благода́ть воскреша́ти ме́ртвыя, умерщвле́нную окая́нную мою́ ду́шу оживи́те.

И ны́не: Уста́ви души́ моея́ свире́пую бу́рю, Бо́же все́х ще́дрый, мольба́ми ро́ждшия Тя́ Богоро́дицы, апо́стол же и му́ченик Твои́х.

Конда́к, гла́с 2:

Тве́рдыя и боговеща́нныя пропове́датели, ве́рх учени́к Твои́х, Го́споди, прия́л еси́ в наслажде́ние благи́х Твои́х и поко́й: боле́зни бо о́нех и сме́рть прия́л еси́ па́че вся́каго всепло́дия, еди́не све́дый серде́чная.

Пе́снь 7.

Ирмо́с: В пещи́ авраа́мстии о́троцы перси́дстей, любо́вию благоче́стия па́че, не́жели пла́менем опаля́еми взыва́ху: благослове́н еси́ в хра́ме сла́вы Твоея́, Го́споди.

Кре́постию всесвяты́я про́поведи, неле́стнии апо́столи Христо́вы, пре́лести зи́му разруши́сте, и просвети́сте богоразу́мием ве́рных мудрова́ние.

Ми́ро благоуха́нное источа́юще всегда́, боже́ственнии ученицы́, ми́ра у́мнаго благово́ния притека́ющих к ва́м испо́лните, и злосмра́дныя стра́сти отжени́те.

Сла́ва: Растле́вшаго мя́ плотски́ми безме́стии, Сло́ва нетле́ннаго сла́внии ученицы́, спаси́те мя́ пою́ща: благослове́н еси́ в хра́ме сла́вы Твоея́, Го́споди.

И ны́не: Ли́к а́нгельский, ли́к му́ченик и апо́стол Твои́х, Сло́ве, мо́лят всегда́ мно́гое благоутро́бия Твоего́, человеколю́бче: все́х уще́дри Богоро́дицею, я́ко благоутро́бен.

Пе́снь 8.

Ирмо́с: Ру́це распростре́ Дании́л, льво́в зия́ния в ро́ве затче́: о́гненную же си́лу угаси́ша, доброде́телию препоя́савшеся, благоче́стия рачи́тели о́троцы взыва́юще: благослови́те, вся́ дела́ госпо́дня, Го́спода.

Уста́ огневдохнове́нная Христо́ва, и́же бездве́рная уста́ загради́вше, и спаси́тельное пропове́дание повсю́ду разсе́явше, от у́ст во́лка мы́сленнаго изба́висте вопию́щыя: вся́ дела́, Го́спода по́йте, и превозноси́те его́ во вся́ ве́ки.

Воструби́те о́крест моея́ умерщвле́нныя души́, благогла́сныя трубы́ Христо́вы, апо́столи сла́внии, и от гро́ба отча́яния и уны́ния лю́таго сию́ воздви́гните, во е́же пе́ти: вся́ дела́, Го́спода по́йте, и превозноси́те его́ во вся́ ве́ки.

Сла́ва: Мене́, зако́ны Твоя́, Христе́, попра́вшаго ума́ развраще́нием, мене́, Влады́ко, блу́днаго, во глубину́ попо́лзшася, и обы́чаю лука́вому при́сно рабо́тающа, не пре́зри, ученико́в Твои́х мольба́ми.

И ны́не: Мари́е, госпоже́ вся́ческих, облада́ема мя́ от зми́я и согреша́юща всегда́, свободи́ моли́твами твои́ми, и порабо́ти Христу́, в житии́ чи́сте воспева́ти: вся́ дела́, Го́спода по́йте, и превозноси́те во вся́ ве́ки.

Пе́снь 9.

Ирмо́с: Ка́мень нерукосе́чный от несеко́мыя го́ры тебе́, Де́во, краеуго́льный отсече́ся, Христо́с совокупи́вый растоя́щаяся естества́: те́м веселя́щеся, тя́, Богоро́дице, велича́ем.

Ка́мение избра́нное положе́ннаго во главу́ у́гла ка́мене, созда́сте все́х ве́рных се́рдца, ка́менем ве́ры, вра́жия созда́ния, апо́столи, разве́ргше.

Реши́ти и вяза́ти от Христа́ прие́мше вла́сть, разреши́те зо́л мои́ соу́з, и к любви́ бо́жией привяжи́те, и ца́рствия прича́стника боже́ственнаго соде́лайте, апо́столи.

Сла́ва: Боже́ственнии влады́ки о́блацы, изсо́хше мое́ се́рдце вся́ким лука́вым дея́нием, боже́ственными ту́чами ны́не напо́йте, и плодоно́сно покажи́те, апо́столи богоблаже́ннии.

И ны́не: Со святы́ми а́нгелы, с боже́ственными апо́столы, со сла́вными му́ченики, твоего́ моли́ сы́на и Бо́га, Богороди́тельнице пречи́стая, от бе́д изба́вити ду́шы на́шя.

Моли́тва.

Влады́ко Го́споди, Тво́й е́сть де́нь и Твоя́ е́сть но́щь, Тебе́ вся́ тва́рь рабо́тает, и вся́кое дыха́ние сла́вит Тя́: а́з же окая́нный, все́ житие́ мое́ сконча́в блу́дно, стра́хом одержи́мь е́смь, я́ко помяну́х дни́ пе́рвыя, и доны́не, в ня́же вся́ безме́стная сотвори́х зла́я: и того́ ра́ди не и́мам к Тебе́ дерзнове́ния, я́ко беззако́ния моя́ вели́ка, и безме́рнии греси́ мои́, врази́ же всегда́ стужа́ют ми́. Но, Го́споди мо́й, Го́споди, отве́рзый устне́ немо́му, и моя́ уста́ отве́рзи, да глаго́лю в моли́тве уго́дная Тебе́: се́ бо душа́ моя́ я́ко земля́ безво́дная оста́, и не мо́жет приноси́ти о себе́ плода́: но да́ждь ми́ от се́мене свята́го Твоего́ Ду́ха, и напо́й мя́ росо́ю благода́ти Твоея́, да принесу́ Тебе́ пло́д покая́ния. Го́споди Иису́се Христе́, хотя́й все́м челове́ком спасти́ся, услы́ши моли́тву мою́, моли́твами святы́х апо́стол Твои́х, я́ко ти́и мо́лятся за ны́, и а́з те́ми у тебе́ прошу́ проще́ния, я́ко те́х моли́твы при́сно послу́шаеши: моле́нием и́х спаси́ мя́ гре́шнаго, исцели́ боле́зни се́рдца моего́, уврачу́й стру́пы души́ моея́, разжзи́ утро́бы моя́ пла́менем стра́ха Твоего́, да поя́ст те́рние грехо́в мои́х, и ду́шу мою́ любо́вию прохлади́: к Тебе́ бо жела́ю, и́стинному све́ту и пода́телю све́та, у тебе́ еди́наго прошу́ ми́лости, спаси́ мя́: насы́ти а́лчущую, и напо́й жа́ждущую ду́шу мою́, от пото́ка безчи́сленнаго милосе́рдия Твоего́: покры́й мя́ благода́тию Твоего́ человеколю́бия от вся́каго зла́, да Тобо́ю храни́мь, изба́влюся мно́гих сете́й лука́ваго, по вся́ дни́ на мя́ пропина́емых, и да не похва́лятся врази́ мои́ о мне́ ра́бе Твое́м, упова́ющем на Тя́: спаси́ мя́ по ми́лости Твое́й, да возда́м обе́ты моя́, до после́дняго издыха́ния ка́яйся о свои́х согреше́ниих, и просла́влю пресвято́е и́мя Твое́, со Отце́м и святы́м Ду́хом, ны́не и при́сно, и во ве́ки веко́в, ами́нь.

Та́же: Досто́йно е́сть: Трисвято́е. И по О́тче на́ш: тропа́рь апо́столом. Сла́ва, и ны́не, богоро́дичен.

И отпу́ст.

Го́споди Иису́се Христе́ Бо́же на́ш, моли́твами пречи́стыя Твоея́ Ма́тере, святы́х сла́вных и всехва́льных апо́стол, преподо́бных и богоно́сных оте́ц на́ших и все́х святы́х, поми́луй и спаси́ души́ на́шя, я́ко бла́г и человеколю́бец. Ами́нь.

Нача́ло я́коже и в богородичном акафисте.

Стихи́ры, гла́с 2.

Подо́бен: Ки́ими похва́льными:

Ки́ими похва́льными венцы́ увязе́м святи́теля, пло́тию в Ми́рех су́ща, и духо́вно все́м достиза́юща, чи́сте того́ лю́бящим, все́х предста́теля и засту́пника, и все́х ско́рбных уте́шителя: и все́х су́щих в беда́х прибе́жище, благоче́стия столпа́, ве́рных побо́рника? его́же ра́ди шата́ния враго́в Христо́с низложи́, име́яй ве́лию ми́лость.

Ки́ими пе́сненными пе́нии похва́лим святи́теля, нече́стия противоборца́, и благоче́стия побо́рника: Це́ркве первостоя́теля, вели́каго засту́пника же и учи́теля, вся́ злосла́вныя посрамля́юща: потреби́теля А́риева, и того́ посо́бников? его́же ра́ди си́х шата́ние Христо́с низложи́, име́яй ве́лию ми́лость.

Ки́ими проро́ческими пе́сньми похва́лим святи́теля, и́же дале́че су́щая прови́дяща, и отстоя́щая я́ко бли́з су́ща проро́чествующа нело́жно, и всю́ вселе́нную назира́юща, и вся́ оби́димыя избавля́юща, во сне́ я́вльшася царю́ богому́дрому, и дре́вле свя́занныя заколе́ния непра́веднаго изба́вльша, и да́рующа ве́лию ми́лость?

Сла́ва, гла́с 6:

Святи́телей удобре́ние, и отце́в сла́ву, исто́чника чуде́с и ве́рных засту́пника вели́каго, соше́дшеся о празднолю́бцы! пе́сненными похвала́ми воспои́м, глаго́люще: ра́дуйся, ми́ряном храни́телю, и первоседа́телю честны́й, и сто́лпе неподви́жный. Ра́дуйся, свети́льниче всесве́тлый, и́же мирски́я концы́ просвеща́я чудесы́. Ра́дуйся, скорбя́щих боже́ственная ра́досте, и оби́димых те́плый предста́телю. И ны́не, всеблаже́нне Нико́лае, не преста́й моля́ся Христу́ Бо́гу, о ве́рою и любо́вию чту́щих приснора́достную и всепра́зднственную па́мять твою́.

И ны́не, богоро́дичен:

Кто́ Тебе́ не ублажи́т, Пресвята́я Де́во? Кто́ ли не воспое́т Твоего́ пречи́стаго Рождества́? Безле́тно бо от Отца́ возсия́вый Сы́н Единоро́дный, То́йже от Тебе́ Чи́стыя про́йде, неизрече́нно вопло́щься, естество́м Бо́г сы́й и естество́м бы́в Челове́к на́с ра́ди, не во двою́ лицу́ разделя́емый, но во двою́ естеству́ несли́тно познава́емый. Того́ моли́, Чи́стая, Всеблаже́нная, поми́ловатися душа́м на́шим.

На стихо́вне стихи́ры, гла́с 5.

Подо́бен: Ра́дуйся:

Ра́дуйся, свяще́нная главо́, честны́й доброде́телей до́ме, Боже́ственнейшаго свяще́нства пра́вило, па́стырю вели́кий, свети́льниче светле́йший, и́же побе́ды нося́ и́мя, и моля́щимся ми́лостивен преклони́тель, приница́яй к немощны́х проше́ниям, изба́вителю гото́вейший, храни́телю спаси́тельный, все́м ве́рою чту́щим всесла́вную па́мять твою́, Христа́ моли́ преблаже́нне, низпосла́ти ми́ру ве́лию ми́лость.

Сти́х: Честна́ пред Го́сподем сме́рть преподо́бных Его́.

Ра́дуйся, свяще́ннейший уме́, Тро́ицы чи́стое обита́лище, сто́лпе церко́вный, ве́рных утвержде́ние, побежда́емым по́мощь. Звездо́, я́же сия́ньми благоприя́тных твои́х моли́тв, разоря́я напа́стей же и скорбе́й тьму́ всегда́, святи́телю Нико́лае. Приста́нище ти́хое в не́же притека́юще треволне́ньми жития́ одержи́мии спаса́ются: Христа́ моли́, душа́м на́шим да́ти ве́лию ми́лость.

Сти́х: Свяще́нницы Твои́ облеку́тся в пра́вду, и преподо́бнии Твои́ возра́дуются.

Ра́дуйся ре́вности Боже́ственныя испо́лнивыйся, и наведе́ния зла́ изба́вль непра́ведно хотя́щих умре́ти, предста́нием стра́шных и сна́ запреще́ньми, исто́чниче источа́яй в Ми́рех Нико́лае, ми́ра бога́тно, и души́ напоя́ющее, смра́ды же страсте́й отгоня́ющее, ме́ч, пле́велы пре́лести посека́ющий, лопа́та развева́ющая А́риева пле́вельная уче́ния. Христа́ моли́, низпосла́ти душа́м на́шим ве́лию ми́лость.

Сла́ва, гла́с 6:

Челове́че Бо́жий, и ве́рный ра́бе, слуго́ Госпо́день, му́жу жела́ний сосу́де избра́нный, сто́лпе и утвержде́ние Це́ркве, Ца́рствия насле́дниче, не премолчи́ вопия́ за ны́ ко Го́споду.

И ны́не, богоро́дичен:

Богоро́дице, Ты́ еси́ лоза́ и́стинная, возрасти́вшая на́м Пло́д живота́, Тебе́ мо́лимся: моли́ся, Влады́чице, со святы́ми апо́столы поми́ловати души́ на́ша.

Го́споди поми́луй, 12. Сла́ва, и ны́не: Прииди́те, поклони́мся: три́жды. Псало́м 142: Го́споди, услы́ши моли́тву мою́: Сла́ва, и ны́не: Аллилу́иа, три́жды.

А́ще у́тро, чти́: Бо́г Госпо́дь, и яви́ся на́м:

Та́же тропа́рь, гла́с 4:

Пра́вило ве́ры и о́браз кро́тости, воздержа́ния учи́теля яви́ тя́ ста́ду твоему́, я́же веще́й и́стина; сего́ ра́ди стяжа́л еси́ смире́нием высо́кая, нището́ю бога́тая, о́тче священнонача́льниче Нико́лае, моли́ Христа́ Бо́га спасти́ся душа́м на́шим.

Сла́ва и ны́не, богоро́дичен:

Е́же от ве́ка утае́нное и А́нгелом несве́домое та́инство, Тобо́ю, Богоро́дице, су́щим на земли́ яви́ся Бо́г, в несли́тнем соедине́нии воплоща́емь, и Кре́ст во́лею на́с ра́ди восприи́м, и́мже воскреси́в первозда́ннаго, спасе́ от сме́рти души́ на́ша.

Го́споди поми́луй, три́жды и псало́м 50.

Кано́н святи́телю Никола́ю

Гла́с 4

Пе́снь 1

Ирмо́с: Отве́рзу уста́ моя́, и напо́лнятся Ду́ха, и сло́во отры́гну Цари́це Ма́тери, и явлю́ся, све́тло торжеству́я, и воспою́, ра́дуяся, Тоя́ чудеса́.

Припе́в: Святи́телю о́тче Нико́лае, моли́ Бо́га о на́с.

Па́стырю до́брый Христо́ва ста́да, ра́дуйся, Нико́лае, я́ко миря́ном оте́ц че́стен и учи́тель бы́л еси́, и мне́ пода́ждь, ра́дуйся тебе́ приноси́ти.

Святи́телю о́тче Нико́лае, моли́ Бо́га о на́с.

Ро́ди земни́и стеце́мся, ра́дуйся приноси́ти святи́телю, ра́дость бо прино́сит вселе́нней неоску́дно.

Сла́ва: Изба́вльшему три́ воево́ды от убие́ния непра́веднаго вопие́м ти́: ра́дуйся, Нико́лае, засту́пниче прибега́ющим под кро́в тво́й.

И ны́не: Богоро́дице Де́во, ра́дуйся, ра́дость от А́нгела прие́мшая, и спаси́ Тебе́ велича́ющих.

Пе́снь 3

Ирмо́с: Твоя́ песносло́вцы, Богоро́дице, живы́й и незави́стный исто́чниче, ли́к Себе́ совоку́пльшия духо́вно, утверди́, в Боже́ственней Твое́й сла́ве венце́в сла́вы сподо́би.

Никто́же прибега́яй под кро́в наде́жды твоея́, о́тче, то́щь от Тебе́ исхо́дит, но ра́дуйся принося́ ти́, по́мощь прие́млет, Нико́лае, ю́же и мне́ пода́ждь, всеблаже́нне.

А́нгели дивя́тся твоему́, преподо́бне, те́плому заступле́нию, челове́цы же ра́дуются, прие́млюще моли́твами твои́ми избавле́ние от напа́стей бесо́вских, те́мже ра́дуйся, прино́сим ти́, Нико́лае прехва́льне.

Сла́ва: Шле́м, и ору́жие непобеди́мое на диа́вола ты́ еси́, христиа́ном же утвержде́ние, и иера́рхом удобре́ние, Нико́лае чу́дне; ра́дуйся, чудотво́рче вели́кий, обурева́емым ти́хое приста́нище.

И ны́не: Заче́нши Зижди́теля Своего́, Богоро́дице, родила́ еси́ Творца́ все́х и Го́спода, Того́ моли́ изба́вити на́с от напа́стей; ели́ка бо хо́щеши, вся́ мо́жеши, я́ко блага́я Блага́го же Роди́тельница.

Пе́снь 4

Ирмо́с: Седя́й в сла́ве на Престо́ле Божества́, во о́блаце ле́гце, прии́де Иису́с Пребоже́ственный, нетле́нною дла́нию, и спа́се зову́щия: сла́ва, Христе́, си́ле Твое́й.

Апо́столом равнопресто́льне, ра́дуйся, Нико́лае, я́ко А́риеву е́ресь посрами́л еси́, и велиа́рова шата́ния низложи́л еси́, твои́ми моли́твами; не преста́й моля́ о рабе́х твои́х.

Ю́ношу о́наго от руки́ Ами́ры сараци́нскаго изба́вил еси́, роди́телем же его́ ра́дость дарова́л еси́, те́м ти́ с ни́ми и мы́ ра́дуйся прино́сим, Нико́лае преподо́бне.

Сла́ва: Три́ воево́ды от убие́ния непра́веднаго, чудотво́рче, спа́сл еси́, я́влься во сне́ царю́ благочести́вому, и запрети́в ему́, и от ни́х ра́дуйся, прия́л еси́, Нико́лае, и мене́ укрепи́ твои́ми моли́твами.

И ны́не: Преблагослове́нная Богоро́дице, ра́дуйся, я́ко еси́ Царя́ все́х престо́л, херуви́мов вы́шший, не закосни́, моля́ Своего́ Сы́на и Бо́га на́шего, о чту́щих Тя́ при́сно, с Никола́ем блаже́нным.

Пе́снь 5

Ирмо́с: Ужасо́шася вся́ческая о Боже́ственней сла́ве Твое́й: Ты́ бо, Неискусобра́чная Де́во, име́ла еси́ во утро́бе над все́ми Бо́га и родила́ еси́ Безле́тнаго Сы́на, все́м воспева́ющим Тя́ ми́р подава́ющая.

Апо́столов тезоиме́нне, со А́нгелы равностоя́телю Престо́ла Влады́чня неотсту́пне, А́рия безу́мновавшаго посрами́л еси́; сего́ ра́ди вопие́м ти́, Нико́лае, ра́дуйся, святи́телем удобре́ние и сто́лпе церко́вный.

Ру́ку ми́ да́ждь, Нико́лае, по́мощи, моля́ся ко Го́споду, зане́же бу́ря потопля́ет мя́ грехо́вная, и приведи́ к ти́хому приста́нищу покая́ния, о́тче, твои́ми моли́твами.

Сла́ва: А́ще и мно́го беззако́нновах, Нико́лае, но не отступа́ю наде́жды покро́ва твоего́, всегда́ ра́дуйся, принося́ ти́; ты́ мя́ изба́ви от вся́кия ско́рби и беды́, ели́ка бо хо́щеши, вся́ мо́жеши.

И ны́не: О́блаче превы́шший небе́с, ра́дуйся, иска́пающий на́м ка́плю, Богоро́дице всеблага́я, пода́ждь от Бо́га лю́дем на́шим побе́ду на ва́рвары, со иера́рхом Никола́ем Того́ моля́.

Пе́снь 6

Ирмо́с: Боже́ственное сие́ и всечестно́е соверша́юще пра́зднество, Богому́дрии, Богома́тере, прииди́те, рука́ми воспле́щим, от Нея́ ро́ждшагося Бо́га сла́вим.

Дру́г Христо́в и вторы́й Пе́тр, яви́лся еси́, о́тче, ра́дуйся, я́ко еси́ сто́лп церко́вный и чуде́сный орга́н, Ду́хом Святы́м чудоде́йствуяй и бряца́яй: те́мже, Нико́лае, ра́дуйся прино́сим ти́ всегда́.

Услы́шав Константи́н ца́рь благочести́вый во сне́ преще́ния твоя́, со Авла́вием епа́рхом, о муже́х о́нех непра́ведно име́вших поги́бнути, вско́ре повеле́ отпусти́ти и́х, тебе́ же ра́дуйся вопия́ше, Нико́лае.

Сла́ва: Кораблю́ о́ному потопа́ющу в мо́ри ты́, о́тче, бы́л еси́ ко́рмчий, и мне́ лю́те обурева́ему от помышле́ний бесо́вских, да́ждь ядрило блага́го ра́зума во уме́ и в се́рдце, я́ко да всегда́ ра́дуйся приношу́ ти́, Нико́лае прехва́льне.

И ны́не: Ра́дуйся, Пречи́стая Де́во, ра́дуйся, мiру утвержде́ние, ра́дуйся, я́ко родила́ еси́ Сы́на, все́х Бо́га, Того́ моли́, Богоро́дице пренепоро́чная, спасти́ся душа́м на́шим.

Та́же чти́ кондаки́ и и́косы:

Конда́к 1

Возбра́нный Чудотво́рче и изря́дный уго́дниче Христо́в О́тче Нико́лае! Ми́ру всему́ источа́я многоце́нное ми́лости ми́ро, и неисчерпа́емое чуде́с мо́ре, восхваля́ю тя́ любо́вию, Святи́телю Нико́лае: ты́ же я́ко име́яй дерзнове́ние ко Го́споду, от вся́ких мя́ бе́д свободи́, да зову́ ти́: Ра́дуйся, Нико́лае, вели́кий Чудотво́рче.

И́кос 1

А́нгела о́бразом, земна́го су́ща естество́м, яви́ тебе́ всея́ тва́ри Созда́тель: благопло́дную бо добро́ту души́ твоея́ прови́дев, преблаже́нне Нико́лае, научи́ все́х вопи́ти тебе́ си́це: Ра́дуйся, от утро́бы ма́терния очище́нный; ра́дуйся, да́же до конца́ освяще́нный. Ра́дуйся, рожде́нием свои́м роди́телей удиви́вый; ра́дуйся, си́лу душе́вную а́бие по рождестве́ яви́вый. Ра́дуйся, са́де земли́ обетова́ния; ра́дуйся, цве́те Боже́ственнаго сажде́ния. Ра́дуйся, лозо́ доброде́тельная виногра́да Христо́ва; ра́дуйся, дре́во чудото́чное рая́ Иису́сова. Ра́дуйся, кри́не ра́йскаго прозябе́ния; ра́дуйся, ми́ро Христо́ва благоуха́ния. Ра́дуйся, я́ко тобо́ю отго́нится рыда́ние; ра́дуйся, я́ко тобо́ю прино́сится ра́дование. Ра́дуйся, Нико́лае, вели́кий Чудотво́рче.

Конда́к 2

Ви́дяще твои́х ми́р излия́ние, Богому́дре, просвеща́емся душа́ми и телесы́, ди́внаго тя́ мирото́чца живоно́сна, Нико́лае, разуме́юще: чудесы́ бо, я́ко вода́ми, благода́тию Бо́жиею излива́ющимися, напая́еши ве́рно вопию́щих Бо́гу: Аллилу́иа.

И́кос 2

Ра́зум неуразуме́нный вразумля́я о Святе́й Тро́ице, бы́л еси́ в Нике́и со святы́ми отцы́ побо́рник испове́дания правосла́вныя ве́ры: ра́вна бо Отцу́ Сы́на испове́дал еси́, соприсносу́щна и сопресто́льна, А́рия же безу́мнаго обличи́л еси́. Сего́ ра́ди ве́рнии научи́шася воспева́ти тебе́: Ра́дуйся, вели́кий благоче́стия сто́лпе; ра́дуйся, ве́рных прибе́жища гра́де. Ра́дуйся, тве́рдое Правосла́вия укрепле́ние; ра́дуйся, честно́е Пресвяты́я Тро́ицы носи́ло и похвале́ние. Ра́дуйся, Отцу́ равноче́стна Сы́на пропове́давый; ра́дуйся, А́рия возбеси́вшагося от Собо́ра святы́х отгна́вый. Ра́дуйся, о́тче, отце́в сла́вная красото́; ра́дуйся, все́х богому́дрых прему́драя добро́то. Ра́дуйся, о́гненная словеса́ испуща́яй; ра́дуйся, до́бре ста́до свое́ наставля́яй. Ра́дуйся, я́ко тобо́ю ве́ра утвержда́ется; ра́дуйся, я́ко тобо́ю е́ресь низлага́ется. Ра́дуйся, Нико́лае, вели́кий Чудотво́рче.

Конда́к 3

Си́лою, да́нною ти́ свы́ше, сле́зу вся́ку отъя́л еси́ от лица́ лю́те стра́ждущих, богоно́сне о́тче Нико́лае: а́лчущим бо яви́лся еси́ корми́тель, в пучи́не морсте́й су́щим изря́дный прави́тель, неду́гующим исцеле́ние и все́м вся́к помо́щник показа́лся еси́, вопию́щим Бо́гу: Аллилу́иа.

И́кос 3

Име́яше вои́стину, о́тче Нико́лае, с Небесе́ пе́снь тебе́ воспева́ема бы́ти, а не от земли́: ка́ко бо кто́ от челове́к возмо́жет твоея́ святы́ни вели́чия пропове́дати? Но мы́, любо́вию твое́ю побежда́еми, вопие́м ти́ си́це: Ра́дуйся, о́бразе а́гнцев и па́стырей; ра́дуйся, свято́е очисти́лище нра́вов. Ра́дуйся, доброде́телей вели́ких вмести́лище; ра́дуйся, святы́ни чи́стое и честно́е жили́ще. Ра́дуйся, свети́льниче всесве́тлый и вселюби́мый; ра́дуйся, све́те златоза́рный и непоро́чный. Ра́дуйся, досто́йный А́нгелов собесе́дниче; ра́дуйся, до́брый челове́ков наста́вниче. Ра́дуйся, пра́вило ве́ры благочести́выя; ра́дуйся, о́бразе кро́тости духо́вныя. Ра́дуйся, я́ко тобо́ю от страсте́й теле́сных избавля́емся; ра́дуйся, я́ко тобо́ю сла́достей духо́вных исполня́емся. Ра́дуйся, Нико́лае, вели́кий Чудотво́рче.

Конда́к 4

Бу́ря недоуме́ния смуща́ет ми́ у́м, ка́ко досто́йно е́сть пе́ти чудеса́ твоя́, блаже́нне Нико́лае? Никто́же бо мо́жет я́ исчести́, а́ще бы и мно́ги язы́ки име́л и глаго́лати восхоте́л; но мы́, ди́вно Бо́гу в тебе́ прославля́ющемуся, дерза́ем воспева́ти: Аллилу́иа.

И́кос 4

Слы́шаша, богому́дре Нико́лае, бли́жнии и да́льнии вели́чие чуде́с твои́х, я́ко по возду́ху ле́гкими благода́тными крила́ми навы́кл еси́ су́щих в беда́х предваря́ти, ско́ро от те́х избавля́я все́х, вопию́щих к тебе́ такова́я: Ра́дуйся, избавле́ние от печа́ли; ра́дуйся, подая́ние благода́ти. Ра́дуйся, неча́емых зо́л прогони́телю; ра́дуйся, жела́емых благи́х насади́телю. Ра́дуйся, ско́рый уте́шителю в беде́ су́щих; ра́дуйся, стра́шный наказа́телю оби́дящих. Ра́дуйся, чуде́с пучи́но, Бо́гом излия́нная; ра́дуйся, зако́на Христо́ва скрижа́ли, Бо́гом пи́санныя. Ра́дуйся, кре́пкое па́дающих возведе́ние; ра́дуйся, пра́во стоя́щих утвержде́ние. Ра́дуйся, я́ко тобо́ю вся́кая ле́сть обнажа́ется; ра́дуйся, я́ко тобо́ю вся́кая и́стина сбыва́ется. Ра́дуйся, Нико́лае, вели́кий Чудотво́рче.

Конда́к 5

Боготе́чная звезда́ яви́лся еси́, наставля́я по мо́рю пла́вающих лю́те, и́мже сме́рть предстоя́ше вско́ре иногда́, а́ще не бы ты́ предста́л еси́ призыва́ющим тя́ в по́мощь, Чудотво́рче святы́й Нико́лае; уже́ бо несты́дно бесо́м лета́ющим и погрузи́ти корабли́ хотя́щим запрети́в, отгна́л еси́ и́х, ве́рныя же научи́л еси́ спаса́ющему тобо́ю Бо́гу взыва́ти: Аллилу́иа.

И́кос 5

Ви́деша отрокови́цы, на бра́к скве́рный нищеты́ ра́ди угото́ванныя, вели́кое твое́ к ни́щим милосе́рдие, преблаже́нне о́тче Нико́лае, егда́ ста́рцу роди́телю и́х но́щию узельцы́ три́ зла́та тая́ся по́дал еси́, сама́го со дще́рьми избавля́я от паде́ния грехо́внаго. Того́ ра́ди слы́шиши от все́х си́це: Ра́дуйся, ми́лости превели́кия сокро́вище; ра́дуйся, промышле́ния о лю́дех прия́телище. Ра́дуйся, пи́ще и отра́до к тебе́ прибега́ющих; ра́дуйся, хле́бе неснеда́емый а́лчущих. Ра́дуйся, бога́тство, бе́дне живу́щим на земли́, Бо́гом да́нное; ра́дуйся, воздви́жение ско́рое убо́гих. Ра́дуйся, бы́строе ни́щих услы́шание; ра́дуйся, скорбя́щих прия́тное попече́ние. Ра́дуйся, трие́х де́в непоро́чный невести́телю; ра́дуйся, чистоты́ усе́рдный храни́телю. Ра́дуйся, ненаде́жных наде́яние; ра́дуйся, всего́ ми́ра наслажде́ние. Ра́дуйся, Нико́лае, вели́кий Чудотво́рче.

Конда́к 6

Пропове́дует ми́р ве́сь тебе́, преблаже́нне Нико́лае, ско́раго в беда́х засту́пника: я́ко мно́гажды во еди́нем часе́, по земли́ путеше́ствующим и по мо́рю пла́вающим, предваря́я, посо́бствуеши, ку́пно все́х от злы́х сохраня́я, вопию́щих к Бо́гу: Аллилу́иа.

И́кос 6

Возсия́л еси́ све́т живо́тный, избавле́ние нося́ воево́дам, непра́ведную сме́рть прия́ти иму́щим, тебе́, до́брый па́стырю Нико́лае, призыва́ющим, егда́ вско́ре я́влься во сне́ царе́ви, устраши́л еси́ его́, си́х же неврежде́нных отпусти́ти повеле́л еси́. Сего́ ра́ди с ни́ми ку́пно и мы́ благода́рственно вопие́м ти́: Ра́дуйся, усе́рдно призыва́ющим тя́ помога́яй; ра́дуйся, от непра́веднаго убие́ния избавля́яй. Ра́дуйся, от ле́стныя сохраня́яй клеветы́; ра́дуйся, непра́ведныя разруша́яй сове́ты. Ра́дуйся, растерза́яй лжу́ я́ко паучи́ну; ра́дуйся, возноша́яй сла́вно и́стину. Ра́дуйся, непови́нных от у́з разреше́ние; ра́дуйся, и мертвеце́в оживле́ние. Ра́дуйся, прояви́телю пра́вды; ра́дуйся, помрачи́телю непра́вды. Ра́дуйся, я́ко тобо́ю непови́ннии изба́влени от меча́; ра́дуйся, я́ко тобо́ю наслади́шася све́та. Ра́дуйся, Нико́лае, вели́кий Чудотво́рче.

Конда́к 7

Хотя́ богоху́льное ерети́ческое отгна́ти злосмра́дие, ми́ро вои́стину благово́нное, та́инственное яви́лся еси́, Нико́лае: лю́ди Мире́йския упа́сл еси́ и ве́сь ми́р свои́м благода́тным ми́ром испо́лнил еси́. И от на́с у́бо богоме́рзкое грехо́вное злосмра́дие отжени́, да благоприя́тно Бо́гу вопие́м: Аллилу́иа.

И́кос 7

Но́ваго тя́ Но́я, наста́вника ковче́га спаси́тельнаго разуме́ем, о́тче святы́й Нико́лае, бу́рю все́х лю́тых разгоня́ющаго направле́нием свои́м, тишину́ же Боже́ственную принося́щаго вопию́щим такова́я: Ра́дуйся, обурева́емых ти́хое приста́нище; ра́дуйся, утопа́ющих изве́стное храни́лище. Ра́дуйся, пла́вающих посреде́ пучи́н до́брый ко́рмчий; ра́дуйся, треволне́ния морска́я уставля́ющий. Ра́дуйся, превожде́ние су́щих в ви́хрех; ра́дуйся, согре́яние су́щих во мра́зех. Ра́дуйся, сия́ние, ско́рбный мра́к разгоня́ющее; ра́дуйся, свети́ло, вся́ концы́ земли́ просвеща́ющее. Ра́дуйся, от бе́здны грехо́вныя челове́ки избавля́яй; ра́дуйся, в бе́здну а́дскую сатану́ вверга́яй. Ра́дуйся, я́ко тобо́ю дерзнове́нно бе́здну милосе́рдия Бо́жия призыва́ем; ра́дуйся, я́ко тобо́ю от пото́па гне́ва изба́вльшеся, ми́р с Бо́гом обрета́ем. Ра́дуйся, Нико́лае, вели́кий Чудотво́рче.

Конда́к 8

Стра́нное чу́до явля́ется притека́ющим к тебе́, блаже́нне Нико́лае, свяще́нная твоя́ це́рковь: в не́й бо и ма́лое моле́ние принося́ще, ве́лиих неду́гов прие́млем исцеле́ние, а́ще то́кмо по Бо́зе упова́ние на тя́ возложи́м, ве́рно вопию́ще: Аллилу́иа.

И́кос 8

Ве́сь еси́ все́м вои́стину помо́щник, богоно́се Нико́лае, и собра́л еси́ вку́пе вся́ прибега́ющия к тебе́, я́ко свободи́тель, пита́тель и вра́ч ско́рый все́м земны́м, на похвалу́ все́х подвиза́я вопи́ти к тебе́ си́це: Ра́дуйся, вся́ких исцеле́ний исто́чниче; ра́дуйся, лю́те стра́ждущим помо́щниче. Ра́дуйся, заре́, сия́ющая в но́щи грехо́вней блужда́ющим; ра́дуйся, росо́ небото́чная в зно́и трудо́в су́щим. Ра́дуйся, подава́яй тре́бующим благострое́ние; ра́дуйся, уготовля́яй прося́щим изоби́лие. Ра́дуйся, мно́гажды проше́ние предваря́яй; ра́дуйся, ста́рым седи́нам си́лу обновля́яй. Ра́дуйся, мно́гих заблу́ждших от пути́ и́стиннаго обличи́телю; ра́дуйся, та́ин Бо́жиих ве́рный служи́телю. Ра́дуйся, я́ко тобо́ю за́висть попира́ем; ра́дуйся, я́ко тобо́ю благонра́вное житие́ исправля́ем. Ра́дуйся, Нико́лае, вели́кий Чудотво́рче.

Конда́к 9

Вся́кия утоли́ боле́зни, вели́кий на́ш засту́пниче Нико́лае, растворя́я благода́тная врачева́ния, услажда́ющая души́ на́ша, се́рдца же веселя́щая все́х усе́рдно к по́мощи твое́й притека́ющих, Бо́гу же вопию́щих: Аллилу́иа.

И́кос 9

Вити́я суему́дренныя нечести́вых ви́дим тобо́ю посра́мленныя, богому́дре о́тче Нико́лае: А́рия бо ху́льника, разделя́юща Божество́, и Саве́ллия, смеша́юща Святу́ю Тро́ицу, препре́л, на́с же во Правосла́вии укрепи́л еси́. Сего́ ра́ди вопие́м ти́ си́це: Ра́дуйся, щи́те, защища́яй благоче́стие; ра́дуйся, мечу́, посеца́яй злоче́стие. Ра́дуйся, учи́телю Боже́ственных веле́ний; ра́дуйся, губи́телю богопроти́вных уче́ний. Ра́дуйся, ле́ствице, Бо́гом утвержде́нная, е́юже восхо́дим к Небеси́; ра́дуйся, покро́ве, Бо́гом зда́нный, и́мже покрыва́ются мно́зи. Ра́дуйся, нему́дрых умудри́вый твои́ми словесы́; ра́дуйся, лени́вых подви́гнувый твои́ми нра́вы. Ра́дуйся, све́тлосте за́поведей Бо́жиих неугаси́мая; ра́дуйся, луче́ оправда́ний Госпо́дних пресве́тлая. Ра́дуйся, я́ко уче́нием твои́м сокруша́ются ерети́ческия главы́; ра́дуйся, я́ко тобо́ю ве́рнии сподобля́ются сла́вы. Ра́дуйся, Нико́лае, вели́кий Чудотво́рче.

Конда́к 10

Спасти́ хотя́ ду́шу, пло́ть твою́ ду́хови покори́л еси́ вои́стину, о́тче на́ш Нико́лае: молча́ньми бо пре́жде и боре́ньми с по́мыслы, дея́нию богомы́слие приложи́л еси́, богомы́слием же ра́зум соверше́н стяжа́л еси́, и́мже дерзнове́нно с Бо́гом и А́нгелы бесе́довал еси́, всегда́ вопия́: Аллилу́иа.

И́кос 10

Стена́ еси́ похваля́ющим, преблаже́нне, чудеса́ твоя́ и все́м к заступле́нию твоему́ прибега́ющим; те́мже и на́с, в доброде́тели убо́гих, от нищеты́, напа́сти, неду́гов и ну́жд разли́чных свобожда́й, вопию́щих ти́ с любо́вию такова́я: Ра́дуйся, от убо́жества ве́чнаго изыма́яй; ра́дуйся, бога́тство нетле́нное подава́яй. Ра́дуйся, бра́шно неги́блющее а́лчущим пра́вды; ра́дуйся, питие́ неисчерпа́емое жа́ждущим жи́зни. Ра́дуйся, от мяте́жа и бра́ни соблюда́яй; ра́дуйся, от у́з и плене́ния свобожда́яй. Ра́дуйся, пресла́вный в беда́х засту́пниче; ра́дуйся, превели́кий в напа́стех защи́тниче. Ра́дуйся, мно́гих от поги́бели исхи́тивый; ра́дуйся, безчи́сленных неврежде́нно сохрани́вый. Ра́дуйся, я́ко тобо́ю лю́тыя сме́рти гре́шнии избега́ют; ра́дуйся, я́ко тобо́ю жи́знь ве́чную ка́ющиися получа́ют. Ра́дуйся, Нико́лае, вели́кий Чудотво́рче.

Конда́к 11

Пе́ние Пресвяте́й Тро́ице па́че ины́х прине́сл еси́, преблаже́нне Нико́лае, умо́м, сло́вом и де́лом: мно́гим бо испыта́нием правове́рная повеле́ния уясни́л еси́, ве́рою, наде́ждою и любо́вию наставля́я на́с в Тро́ице Еди́ному Бо́гу воспева́ти: Аллилу́иа.

И́кос 11

Светоза́рную лучу́ во мра́це жития́ су́щим неугаси́мую ви́дим тя́, Бо́гом избра́нне о́тче Нико́лае: с невеще́ственными бо а́нгельскими све́ты бесе́дуеши о несозда́нном Тро́ическом Све́те, ве́рных же души́ просвеща́еши, вопию́щих ти́ такова́я: Ра́дуйся, озаре́ние Трисо́лнечнаго Све́та; ра́дуйся, денни́це незаходи́маго Со́лнца. Ра́дуйся, свеще́, Боже́ственным пла́менем возжже́нная; ра́дуйся, я́ко угаси́л еси́ бесо́вский пла́мень нече́стия. Ра́дуйся, све́тлое правове́рия пропове́дание; ра́дуйся, доброзра́чное све́та ева́нгельскаго сия́ние. Ра́дуйся, мо́лние, е́реси пожига́ющая; ра́дуйся, гро́ме, устраша́ющий соблазня́ющия. Ра́дуйся, и́стиннаго научи́телю ра́зума; ра́дуйся, та́инственнаго изъяви́телю ума́. Ра́дуйся, я́ко тобо́ю попра́ся поклоне́ние тва́ри; ра́дуйся, я́ко тобо́ю научи́хомся покланя́тися Творцу́ в Тро́ице. Ра́дуйся, Нико́лае, вели́кий Чудотво́рче.

Конда́к 12

Благода́ть, да́нную ти́ от Бо́га, све́дущии, ра́дующеся, твою́ па́мять пра́зднуем по до́лгу, пресла́вный о́тче Нико́лае, и к чу́дному заступле́нию твоему́ вседу́шно притека́ем; пресла́вных же твои́х дея́ний, я́ко песка́ морска́го и мно́жества зве́зднаго исчести́ не могу́ще, недоуме́нием объя́ти бы́вше, вопие́м к Бо́гу: Аллилу́иа.

И́кос 12

Пою́ще твоя́ чудеса́, восхваля́ем тя́, всехва́льне Нико́лае: в тебе́ бо Бо́г, в Тро́ице прославля́емый, ди́вно просла́вися. Но а́ще и попремно́гу соста́вленныя от души́ псалмы́ и пе́сни прино́сим ти́, Чудотво́рче святы́й, ничто́же твори́м ра́вно дарова́нию чуде́с твои́х, и́мже удивля́ющеся, вопие́м к тебе́ такова́я: Ра́дуйся, Царя́ ца́рствующих и Го́спода госпо́дствующих служи́телю; ра́дуйся, служи́телей Его́ небе́сных сожи́телю. Ра́дуйся, лю́дем ве́рным поможе́ние; ра́дуйся, ро́да христиа́нскаго возвыше́ние. Ра́дуйся, побе́ды тезоимени́тый; ра́дуйся, венцено́сче наро́читый. Ра́дуйся, все́х доброде́телей зерца́ло; ра́дуйся, все́х притека́ющих к тебе́ кре́пкое забра́ло. Ра́дуйся, по Бо́зе и Богоро́дице, все́ на́ше упова́ние; ра́дуйся, теле́с на́ших здра́вие и ду́ш спасе́ние. Ра́дуйся, я́ко тобо́ю от ве́чныя сме́рти свобожда́емся; ра́дуйся, я́ко тобо́ю безконе́чныя жи́зни сподобля́емся. Ра́дуйся, Нико́лае, вели́кий Чудотво́рче.

Конда́к 13

О пресвяты́й и пречу́дный о́тче Нико́лае, утеше́ние все́х скорбя́щих, ны́нешнее на́ше приими́ приноше́ние и от гее́нны изба́витися на́м Го́спода умоли́ богоприя́тным твои́м хода́тайством, да с тобо́ю воспева́ем: Аллилу́иа. Три́жды

Та́же и́кос 1-й и конда́к 1-й

Пе́снь 7

Ирмо́с: Не послужи́ша тва́ри Богому́дрии, па́че Созда́вшаго, но о́гненное преще́ние му́жески попра́вше, ра́довахуся, пою́ще: препе́тый отце́в Госпо́дь и Бо́г благослове́н еси́.

Свя́те Нико́лае, святи́телю Христо́в ра́дуйся, ты́ бо еси́ ра́дость все́м неизглаго́ланная, и мне́ пода́ждь ру́ку по́мощи, да глаго́лю ти́: ра́дуйся, всеблаже́нне.

Егда́ услы́шаша воево́ды отпуще́ние из темни́цы повеле́нием твои́м, взе́мше све́щники принесо́ша ти́ со свеща́ми, ве́лиим вопию́ще гла́сом: ра́дуйся, о́тче преподо́бне, избавле́ние на́ше.

Сла́ва: Не́когда услы́шал еси́ в темни́це свя́занныя, услы́ши и мене́, Нико́лае, ра́дуйся принося́ща ти́, и исхити́ мя́ огня́ гее́нскаго.

И ны́не: Мари́е Госпоже́, Ма́ти Изба́вителя, приими́ мя́, ка́ющагося и прибега́ющаго под кро́в Тво́й, я́ко да не престая́ вопию́ Тебе́: ра́дуйся, Благода́тная Богоро́дице ПрисноДе́во.

Пе́снь 8

Ирмо́с: О́троки благочести́выя в пещи́ Рождество́ Богоро́дично спасло́ е́сть, тогда́ у́бо образу́емое, ны́не же де́йствуемое, вселе́нную всю́ воздвиза́ет пе́ти Тебе́: Го́спода по́йте дела́ и превозноси́те Его́ во вся́ ве́ки.

Апо́столов сопресто́льниче, со А́нгелы служи́телю Святе́й Тро́ице, Нико́лае прехва́льне, ра́дуйся, и мне́ да́руй ра́дость моли́твами твои́ми.

Ко́рмчий обурева́емых, Нико́лае, ра́дуйся, и бу́рю мои́х страсте́й, я́же от прило́га бесо́вскаго, утиши́, я́ко про́чее не могу́ терпе́ти, но вопию́: ра́дуйся, помо́щниче мо́й и те́плый предста́телю.

Сла́ва: О, коли́ка туга обдержи́т мя́ от стреля́ний бесо́вских, и я́звы терпе́ти ми́ не́сть мо́щно, пла́стыря приложи́ти не́сть врача́, но ты́ ми́ приложи́ пла́стырь, и еле́й моли́тв твои́х, Нико́лае, да зову́ ти́: ра́дуйся, о́тче преподо́бне.

И ны́не: Купино́ неопали́мая, ра́дуйся, ю́же Моисе́й ви́де на Сина́и, и ле́ствице, ю́же Иа́ков ви́де, Преблагослове́нная Богоро́дице ПрисноДе́во.

Пе́снь 9

Ирмо́с: Вся́к земноро́дный да взыгра́ется, Ду́хом просвеща́емь, да торжеству́ет же Безпло́тных умо́в естество́, почита́ющее свяще́нное торжество́ Богома́тере, и да вопие́т: ра́дуйся, Всеблаже́нная, Богоро́дице Чи́стая ПрисноДе́во.

Льсти́ваго стреля́ния обдержа́т мя́, и стремле́ния грехо́вная, но наде́яся на покро́в тво́й, к тебе́ прибега́ю, о́тче, я́ко да отжене́ши от мене́ вся́ ле́сти лука́ваго, да зову́ ти́: ра́дуйся, Нико́лае.

А́рия безу́мновавшаго посрами́л еси́, пла́мень же ересе́й угаси́л еси́, воево́ды в темни́це свя́занныя услы́шал еси́, и от ни́х ра́дуйся прия́л еси́, и мы́ вопие́м ти́, Нико́лае: ра́дуйся, всеблаже́нне.

Сла́ва: А́грика о́наго услы́шавый, и сы́на его́ Васи́лия от Ами́ры восхити́вый, и предста́вивый роди́телем здра́ва во еди́н ча́с от срацы́н, и мне́ моля́щуся, исхити́ неду́гущую мою́ ду́шу, и грехи́ обложе́нную, от огня́ гее́нскаго, Нико́лае.

И ны́не: Цари́це, все́х Царя́ ро́ждшая и носи́вшая Нося́щаго всю́ тва́рь, спаси́ мя́, велича́ющаго Тя́, Пресвята́я Влады́чице.

Свети́лен.

Подо́бен: Жены́ услы́шите:

Вели́каго архипа́стыря и иера́рха вси́, председа́теля Мирлики́йскаго Никола́я восхва́лим: мно́ги бо му́жи спа́се, непра́ведно умре́ти иму́щия, и царю́ явля́ется со Авла́вием во сне́, ре́ша непра́ведный су́д.

Сла́ва и ны́не, богоро́дичен:

Му́дрость Ипоста́сную, и Сло́во пресу́щественное, и Врача́ все́х Христа́ ро́ждши, Де́во, гное́ния и я́звы души́ моея́ исцели́ лю́тыя и многовре́менныя и се́рдца моего́ стра́стная помышле́ния умертви́.

На хвали́тех стихи́ры, гла́с 5.

Подо́бен: Ра́дуйся, по́стников

Ра́дуйся, денни́це пресве́тлая пребезнача́льнаго све́та Влады́ки, ра́дуйся, заре́ та́йнаго све́та, иера́рше Христо́в Нико́лае, предвари́ и подви́гни пречи́стыя твоя́ моли́твы о мне́ ко Го́споду, пра́зднующих ве́рою па́мять рождества́ твоего́, во е́же изба́вити мя́ от вся́кия напа́сти и проти́вныя боле́зни моя́ исцели́ти. О́тче, тебе́ бо засту́пника и́мам и уми́льно с ве́рою вопию́ ти́: моли́ся Христу́, дарова́ти на́м ве́лию ми́лость.

Ра́дуйся, главо́ преосвяще́нная чисто́тное доброде́телей жили́ще, боже́ственное пра́вило непоро́чнаго свяще́нства, па́стырю до́брый, пресве́тлый и превели́кий, светоподо́бное и́мя нося́й, тре́бующим ми́лостивно раздава́яй, преклоня́яйся к моли́твам моля́щихся. Боля́щих исцели́телю гото́вый, гра́де спасе́ния все́х ве́рою пою́щих па́мять твою́.

Сла́ва, гла́с то́йже:

Ра́дуйся, во святи́телех пра́вило, Боже́ственных чуде́с неисчерпа́емая пучи́но, красото́ церко́вная, све́тлая звездо́: свяще́нными твои́ми, Блаже́нне, блиста́ньми, на́с озаря́я коего́ждо святе́йший, пресве́тлыми мо́лниями просвеща́еми, сто́лпе необори́мый, степе́ню ве́ры, честну́ю твою́ па́мять любо́вию соверша́ющих, Христа́ моли́ душа́м на́шим дарова́ти ве́лию ми́лость.

И ны́не, богоро́дичен:

Ра́дуйся проро́ческая печа́те, и богогла́сных апо́стол пропове́дание: Бо́га бо вои́стинну су́щаго воплоще́нна, па́че ума́ и сло́ва родила́ еси́, чи́стая: и́мже пе́рвое восприи́мше благоро́дие, и ра́йския пи́щи наслажда́ющеся, тебе́ хода́таицу таковы́я све́тлости, и моли́твенницу благоприя́тну, пе́сньми почита́ем. тобо́ю пречи́стая обогати́вшеся, присносу́щныя сподобля́емся жи́зни сы́на твоего́, подаю́щаго бога́тно ве́лию ми́лость.

Моли́тва свято́му Никола́ю

О, всехва́льный и всечестны́й архиере́ю, вели́кий чудотво́рче, святи́телю Христо́в, о́тче Нико́лае, челове́че Бо́жий, и ве́рный ра́бе, му́жу жела́ний, сосу́де избра́нный, кре́пкий сто́лпе церко́вный, свети́льниче пресве́тлый, звездо́ осиява́ющая и освеща́ющая всю́ вселе́нную, ты́ еси́ пра́ведник, я́ко фи́никс процве́тший, насажде́нный во дво́рех Го́спода своего́: живы́й в Ми́рех, ми́ром благоуха́л еси́, и ми́ро приснотеку́щее благода́ти Бо́жия источа́еши. Твои́м ше́ствием, пресвяты́й о́тче, мо́ре освяти́ся, егда́ многочуде́сныя твоя́ мо́щи ше́ствоваху во гра́д Ба́рский, от восто́ка до за́пада хвали́ти и́мя Госпо́дне. О, преизя́щный и преди́вный чудотво́рче, ско́рый помо́щниче, те́плый засту́пниче, па́стырю предо́брый, спаса́ющий слове́сное ста́до от вся́ких бе́д, тебе́ прославля́ем и тебе́ велича́ем, я́ко наде́жду все́х христиа́н, исто́чника чуде́с, защи́тителя ве́рных, прему́драго учи́телю, а́лчущих корми́телю, пла́чущих весе́лие, наги́х одея́ние, боля́щих врача́, по мо́рю пла́вающих упра́вителя, пле́нников свободи́теля, вдо́в и сиро́т пита́теля и засту́пника, целому́дрия храни́теля, младе́нцев кро́ткаго наказа́теля, ста́рых укрепле́ние, по́стников наста́вника, тружда́ющихся упокое́ние, ни́щих и убо́гих изоби́льное бога́тство. Услы́ши на́с, моля́щихся тебе́ и прибега́ющих под кро́в тво́й, яви́ предста́тельство твое́ о на́с к Вы́шнему и исхода́тайствуй твои́ми Богоприя́тными моли́твами вся́ поле́зная ко спасе́нию ду́ш и теле́с на́ших: сохрани́ святу́ю оби́тель сию́ (или́: хра́м се́й), вся́кий гра́д и ве́сь, и вся́кую страну́ христиа́нскую, и лю́ди живу́щыя, от вся́каго озлобле́ния по́мощию твое́ю: ве́мы бо, ве́мы, я́ко мно́го мо́жет моли́тва пра́веднаго, поспешеству́ющая во благо́е: тебе́ же пра́веднаго по преблагослове́нней Де́ве Мари́и, предста́теля ко Всеми́лостивому Бо́гу и́мамы, и к твоему́, преблаги́й о́тче, те́плому хода́тайству и заступле́нию смире́нно притека́ем: ты́ на́с соблюди́ я́ко бо́дрый и до́брый па́стырь, от вся́ких враго́в, губи́тельства, тру́са, гра́да, гла́да, пото́па, огня́, меча́, наше́ствия иноплеме́нников, и во вся́ких беда́х и ско́рбех на́ших подава́й на́м ру́ку по́мощи и отве́рзи две́ри милосе́рдия Бо́жия; поне́же недосто́йны есмы́ зре́ти высоту́ небе́сную, от мно́жества непра́вд на́ших: свя́зани есмы́ у́зами грехо́вными, и николи́же во́ли Созда́теля на́шего сотвори́хом, ни сохрани́хом повеле́ний Его́. Те́м же преклоня́ем коле́на сокруше́нна и смире́нна се́рдца на́шего к Зижди́телю своему́, и твоего́ оте́ческаго заступле́ния к нему́ про́сим: помози́ на́м, уго́дниче Бо́жий, да не поги́бнем со беззако́нии на́шими, изба́ви на́с от вся́каго зла́, и от вся́кия ве́щи сопроти́вныя, упра́ви у́м на́ш, и укрепи́ се́рдце на́ше в пра́вой ве́ре, в не́й же твои́м предста́тельством и хода́тайством, ни ра́нами, ни преще́нием, ни мо́ром, ни ко́им гне́вом от Созда́теля своего́ ума́лени бу́дем, но ми́рное зде́ поживе́м житие́, и да сподо́бимся ви́дети блага́я на земли́ живы́х, сла́вяще Отца́ и Сы́на и Свята́го Ду́ха, еди́наго в Тро́ице сла́вимаго и поклоня́емаго Бо́га, ны́не и при́сно, и во ве́ки веко́в. Ами́нь.

Моли́тва втора́я.

О всесвяты́й Нико́лае, уго́дниче преизря́дный Госпо́день, те́плый на́ш засту́пниче, и везде́ в ско́рбех ско́рый помо́щниче! Помози́ мне́, гре́шному и уны́лому, в настоя́щем житии́, умоли́ Го́спода Бо́га дарова́ти ми́ оставле́ние все́х мои́х грехо́в, ели́ко согреши́х от ю́ности моея́, во все́м житии́ мое́м, де́лом, сло́вом, помышле́нием и все́ми мои́ми чу́вствы; и во исхо́де души́ моея́ помози́ ми́, окая́нному, умоли́ Го́спода Бо́га, всея́ тва́ри Соде́теля, изба́вити мя́ возду́шных мыта́рств и ве́чнаго муче́ния; да всегда́ прославля́ю Отца́, и Сы́на, и Свята́го Ду́ха, и твое́ ми́лостивное предста́тельство, ны́не и при́сно и во ве́ки веко́в, ами́нь.

Моли́тва тре́тья.

О, всеблаги́й о́тче Нико́лае, па́стырю и учи́телю все́х ве́рою притека́ющих к твоему́ заступле́нию и те́плою моли́твою тебе́ призыва́ющих! Ско́ро потщи́ся и изба́ви Христо́во ста́до от волко́в, губя́щих е́; и вся́кую страну́ христиа́нскую огради́ и сохрани́ святы́ми твои́ми моли́твами, от мирска́го мяте́жа, тру́са, наше́ствия иноплеме́нников и междоусо́бныя бра́ни, от гла́да, пото́па, огня́ и напра́сныя сме́рти; и я́коже поми́ловал еси́ трие́х муже́й в темни́це седя́щих и изба́вил еси́ и́х царе́ва гне́ва и посече́ния ме́чнаго, та́ко поми́луй и мене́, умо́м, сло́вом и де́лом во тьме́ грехо́в су́ща, изба́ви мя́ гне́ва Бо́жия и ве́чныя ка́зни, я́ко да твои́м хода́тайством и по́мощию. Свои́м же милосе́рдием и благода́тию Христо́с Бо́г ти́хое и безгре́шное житие́ да́ст ми́ пожи́ти в ве́це се́м и изба́вит мя́ шу́ияго стоя́ния, сподо́бит же десна́го со все́ми святы́ми. Ами́нь.

Та́же: Досто́йно е́сть. Трисвято́е По О́тче на́ш: Тропа́рь: Пра́вило ве́ры: Сла́ва и ны́не: богоро́дичен

И отпу́ст.

Нача́ло обы́чное.

На Го́споди воззва́х: Стихи́ры кресту́, гла́с 4.

Подо́бен: Ве́лия Креста́ твоего́:

Тва́рь освяти́ся, еди́не долготерпели́ве, честно́ю кро́вию иска́павшею от ре́бр твои́х, ре́ки же изсуше́ны бы́ша многобо́жия, и ада́м изба́вися осужде́ния распя́тием твои́м, сло́ве.

И́же вся́ческих творе́ц, Госпо́дь все́х и Бо́г обнищева́ет во́лею, стра́сть за челове́ки претерпева́ет, на кре́ст воздви́жением, кля́твою зако́нною.

Распина́ешися, благода́телю Го́споди, хоте́нием: копие́м же в ре́бра твоя́ прободе́н бы́в, жизнода́вче, два́ исто́чника безсме́ртия источи́л еси́. Те́мже непреста́нно вси́ ве́рно сла́вим твоя́ стра́сти, ще́дрый.

Сла́ва и ны́не: крестобогоро́дичен:

Ору́жие се́рдце твое́ про́йде, пречи́стая, егда́ сы́на твоего́ на кресте́ ви́дела еси́, и вопия́ла еси́: не безча́дну меня́ покажи́ сы́не мо́й и Бо́же мо́й, соблюды́й мя́ по рождестве́ де́ву.

На стихо́вне стихи́ры кресту́, гла́с 4.

Кресту́ Твоему́ покланя́юся, Христе́, честно́му, храни́телю ми́ра, спасе́нию на́с гре́шных, вели́кому очище́нию, похвале́ всея́ вселе́нныя.

Сти́х: Возноси́те Го́спода Бо́га на́шего:

Крестоявле́нно Моисе́й на горе́ ру́це просте́р к высоте́, Амали́ка победи́: Ты́ же, Спа́се, дла́ни простры́й на Кресте́ честне́м, объя́л еси́ мя́, спасы́й от рабо́ты вра́жия: и да́л еси́ зна́мение жи́зни, от лука́ бежа́ти проти́вных мои́х. Сего́ ра́ди сло́ве, покланя́юся Кресту́ Твоему́ честно́му.

Сти́х: Бо́г же ца́рь на́ш пре́жде ве́ка, соде́ла спасе́ние посреде́ земли́.

Дре́во преслуша́ния ми́ру сме́рть прозябе́: дре́во же Креста́ живо́т и нетле́ние. Те́мже Ти́ покланя́емся распе́ншемуся Го́споду: да зна́менается на на́с све́т лица́ Твоего́.

Сла́ва, и ны́не, Крестобогоро́дичен

На кресте́ Тя́ воздви́жена, Христе́ Мо́й, я́ко ви́де А́гница ро́ждшая Тя́ и Непоро́чная, и Ма́ти Твоя́, рыда́ше с пла́чем и вопия́ше: не покажи́ Мя́ безча́дну, Ю́же сохрани́л еси́ чи́сту и по рождестве́.

Та́же: Го́споди поми́луй, 12. Сла́ва, и ны́не: Прииди́те, поклони́мся: три́жды. Псало́м 142: Го́споди, услы́ши моли́тву мою́: Сла́ва, и ны́не: Аллилу́иа, три́жды. Го́споди поми́луй 12 и а́ще у́тро, чти́: Бо́г Госпо́дь, и яви́ся на́м: а́ще же ни,

Тропа́рь креста́, гла́с 1

Спаси́ Го́споди лю́ди твоя́ и благослови́ достоя́ние твое́, побе́ды на сопроти́вныя да́руя и твое́ сохраня́я кресто́м твои́м жи́тельство.

Сла́ва и ны́не, крестобогоро́дичен

Твое́ предста́тельство иму́ще пречи́стая, и Твои́ми моли́твами лю́тых избавля́еми, Кресто́м Сы́на Твоего́ везде́ соблюда́еми, по до́лгу Тя́ вси́ благоче́стно велича́ем.

Псало́м 50: Поми́луй мя́ Бо́же:

Гла́с 4

Песнь1

Ирмо́с: Отве́рзу уста́ моя́, и напо́лнятся ду́ха, и сло́во отры́гну Цари́це Ма́тери, и явлю́ся све́тло торжеству́я, и воспою́ ра́дуяся Тоя́ чудеса́.

Запе́в: Сла́ва, Го́споди, Кресту́ Твоему́ Честно́му.

Кресте́ всеси́льне, апо́столов похвала́, преподо́бных утвержде́ние, и ве́рных зна́мение, и иера́рхов и му́чеников сла́ва, побе́да и утвержде́ние все́х хва́лящих тя́.

Кресте́ всечестны́й, четвероконе́чная си́ла, апо́столов благоле́пие, и му́чеников кре́пость, немощны́х здра́вие показа́лся еси́, ме́ртвых воскресе́ние, па́дающих воздви́жение.

Сла́ва: Кресте́, ты́ ми́ си́ла бу́ди, кре́пость и держа́ва, изба́витель и предра́тник на борю́щих мя́, щи́т и храни́тель, побе́да и утвержде́ние моё, при́сно соблюда́я мя́ и покрыва́я.

И ны́не: На Кресте́, Всенепоро́чная, Твоего́ Сы́на я́ко узре́ла еси́, ору́жие ско́рбное Твою́ утро́бу растерза́, и восклица́ла ея́ и рыда́ющи в боле́зни. Но а́бие просла́вила еси́ Креста́ си́лу.

Пе́снь 3

Ирмо́с: Твоя́ песносло́вцы, Богоро́дице, живы́й и незави́стный исто́чниче, ли́к себе́ совоку́пльшия духо́вно утверди́, в Боже́ственней Твое́й сла́ве венце́в сла́вы сподо́би.

Кресте́, преподо́бных ору́жие, обою́дный ме́ч Христо́в, ве́рных удобре́ние, боля́щих исцеле́ние и заступле́ние, и воздви́жение уме́рших, Всече́стне.

Кресте́, основа́ние благоче́стия, бесо́м показа́лся еси́ губи́тель, Це́рквам благоле́пие, нечести́вым поги́бель, враго́м посрамле́ние на де́нь су́дный.

Сла́ва: Кресте́ живоно́сный, ты́ ми́ бу́ди кре́пость, и побе́да, и щи́т, и стена́ нера́туема, бесо́в отгна́ние, и по́мыслов погаше́ние, и ума́ моего́ сохране́ние.

И ны́не: Распя́тие поно́сное, Де́во Влады́чице, Тво́й Сы́н претерпе́, и сме́рть неподо́бную. Но возне́сся, низве́рже проти́вный вра́жия си́лы, я́ко безсме́ртен.

Седа́лен, гла́с 8

Подо́бен: Повеле́нное та́йно:

Прообража́ше та́йно дре́вле Иису́с Нави́н Креста́ о́браз, егда́ ру́це прострё крестови́дно, Спа́се мо́й, и ста́ со́лнце, дóндеже враги́ низложи́ противостоя́щия Ти́ Бо́гу. Ны́не же за́йде, на Кресте́ Тя́ зря́, дóндеже держа́ву сме́ртную разруши́в, ве́сь ми́р совоздви́гл еси́.

Пе́снь 4

Ирмо́с: Седя́й в сла́ве на престо́ле Божества́, во о́блаце ле́гце прии́де Иису́с Пребоже́ственный, нетле́нною дла́нию, и спа́се зову́щия: сла́ва, Христе́, си́ле Твое́й.

Четвероконе́чный сы́й ми́р, и я́ко триобою́дный ме́ч, нача́ла тьмы́ сече́ши, на́ми вообража́емь, Кресте́, ору́жие вели́кое Христо́во, и непобеди́мое победи́тельство всеси́льное.

Твоя́ высота́, Живоно́сне Кресте́, возду́шнаго кня́зя бие́т, и глубина́ всея́ бе́здны закала́ет зми́я, широту́ па́ки вообража́ет, низлага́я мирска́го кня́зя кре́постию Твое́ю.

Сла́ва: Возне́сся сопривле́кл еси́ па́дшия, воздви́гл еси́ естество́ земно́е, Престо́лу Бо́жию просла́вился еси́, Кресте́, высото́ вели́кая, мирски́й мо́сте, ду́шу мою́ от страсте́й глубины́ вознеси́ вско́ре.

И ны́не: Крестообра́зно, Пречи́стая Отрокови́це Богоро́дице, дла́ни Твоя́ распросте́рши к Воздви́женному на Кресте́, и моли́твы, Де́во, ны́не принеси́, за все́х ве́рно моля́щихся Тебе́.

Пе́снь 5

Ирмо́с: Ужасо́шася вся́ческая о Боже́ственней сла́ве Твое́й, Ты́ бо, неискусобра́чная Де́во, име́ла еси́ во утро́бе над все́ми Бо́га, и родила́ еси́ безле́тнаго Сы́на, все́м воспева́ющим Тя́ ми́р подава́ющая.

Кресте́, небе́сная ле́ствице святы́ни, степе́ней наста́вниче, Христо́ва высота́ и сла́ва еси́, Бо́жий о́браз назна́менателен ми́ру, неви́димому же и ви́димому, единоча́стне.

Кресте́, о́бразе неопи́санный си́лою, освяще́ние вода́м, очище́ние возду́ху, освяще́ние и просвеще́ние вся́кому, му́жества зна́мение, и Христо́в ски́петр непрело́жный показа́лся еси́, проти́вныя в зе́млю попира́я.

Сла́ва: Кресте́ всеси́льне, злочести́выя низложи́ враги́, ненави́дящия и ху́лящия тя́ безу́мно, язы́ки попали́ и угаси́ шата́ния и́х. О Кресте́ всесвяты́й и Христоно́сный, сохрани́ на́с держа́вою Твое́ю.

И ны́не: Все́х Цари́це Влады́чице, ски́петром Рождества́ Твоего́ разруши́, Де́во, воста́ние ху́лящим кре́стную си́лу, да́ждь на́м кре́пость и очище́ние, побе́ду и по́мощь.

Пе́снь 6

Ирмо́с: Боже́ственное сие́ и всечестно́е соверша́юще пра́зднество, богому́дрии, Богома́тере, прииди́те, рука́ми воспле́щим, от Нея́ ро́ждшагося Бо́га сла́вим.

Кре́ст все́х воскресе́ние, Кре́ст па́дших исправле́ние, страсте́й умерщвле́ние, и пло́ти пригвожде́ние. Кре́ст душа́м сла́ва, и све́т ве́чный.

Кре́ст враго́в губи́тель, Кре́ст злочести́вых я́зва и плене́ние, и ве́рных держа́ва, благочести́вых храни́тель и бесо́в отгони́тель.

Сла́ва: Кре́ст страсте́й па́губа, Кре́ст по́мыслов отгна́ние, Кре́ст сокруше́ние язы́ческое искуси́тельно, и духово́м показа́ся лови́тельство.

И ны́не: Кре́ст воздви́жется, и па́дают духо́в возду́шных чи́нове, Кре́ст снизхо́дит, и нечести́вии вси́ ужаса́ются, я́ко мо́лнию ви́дяще кре́стную си́лу.

Конда́к, гла́с 1

Вознесы́йся на Кре́ст во́лею, тезоимени́тому Твоему́ но́вому жи́тельству щедро́ты Твоя́ да́руй, Христе́ Бо́же, возвесели́ на́с си́лою Твое́ю, побе́ды дая́ на́м на супоста́ты, посо́бие иму́щим Твое́, ору́жие ми́ра, непобеди́мую побе́ду.

И́кос: И́же до тре́тияго небесе́ восхище́н бы́сть в ра́й, и глаго́лы слы́шав неизрече́нный и Боже́ственный, и́хже не ле́ть язы́ки челове́ческими глаго́лати, что́ гала́том пи́шет, я́ко рачи́телие писа́ний прочто́сте и позна́сте. Мне́, глаго́лет, хвали́тися да не бу́дет, то́кмо во еди́ном Кресте́ Госпо́дни, на не́мже страда́в уби́ стра́сти. Того́ у́бо и мы́ изве́стно держи́м, Кре́ст Госпо́день, хвалу́ вси́, е́сть бо на́м спаси́тельное сие́ Дре́во, ору́жие ми́ра, непобеди́мая побе́да.

Пе́снь 7

Ирмо́с: Не послужи́ша тва́ри богому́дрии па́че Созда́вшего, но о́гненное преще́ние му́жески попра́вше, ра́довахуся, пою́ще: препе́тый отце́в Госпо́дь и Бо́г, благослове́н еси́.

Неразде́льную Тро́ицу и неслия́нну, естество́ еди́нством благослови́м, Отца́ нерожде́нна, и рожде́нна Сы́на, и Свята́го исходи́тельнаго Боже́ственнаго Ду́ха пе́сньми пою́ще: благослове́н Бо́г оте́ц на́ших.

Незаходи́тельными мо́лниями Твои́ми, Триипоста́сне, на́ша озари́ у́мныя о́чи, добро́ту Твою́, Трисве́тне, пресу́щественную зре́ти, я́же челове́ком неве́домая и непристу́пная А́нгелом.

Сла́ва: Луча́ми све́та Твоего́ па́дшую мою́ ду́шу возведи́ от глубины́, благи́й Бо́же, препе́тый и всеси́льный, попо́лзшуюся от све́та благода́тнаго, и во тьму́ воглу́бльшуюся.

И ны́не: Крестообра́зно просте́рши ру́це, Чи́стая, к распростёршему свои́ ру́це на Дре́ве Кре́стнем, и возне́сшему естество́ на́ше, и умертви́вшему вражде́бныя полки́, моля́щи не преста́й.

Пе́снь 8

Ирмо́с: О́троки благочести́выя в пещи́ Рождество́ Богоро́дично спасло́ е́сть, тогда́ у́бо образу́емо, ны́не же де́йствуемо, вселе́нную всю́ воздвиза́ет пе́ти Тебе́: Го́спода по́йте, дела́, и превозноси́те Его́ во вся́ ве́ки.

Высота́ Христо́вых страсте́й, и лу́к и ору́жие и ме́ч, ору́жие непосты́дное, и си́ла непобеди́мая, Христо́во подно́жие, и победи́тельство на враги́, зна́мения Ца́рствия, ски́петр ве́рных, показа́лся еси́, Кресте́ победоно́сне.

Воздви́гл еси́ на́ше па́дшее естество́, Христо́м распе́ншимся и совозста́вил; высото́ Боже́ственная, глубино́ неизглаго́ланная, Христо́во ты́ еси́ зна́мение, Кресте́ пребога́те, и широта́ безме́рная, и зна́мение непостижи́мыя Тро́ицы, жизноно́сче.

Сла́ва: Устна́ми, душе́ю же и се́рдцем Кре́ст Госпо́день лобыза́юще, прииди́те ны́не вознесе́м вси́ и возвели́чим, покланя́ющеся рце́м вку́пе пе́снь пречи́стую, вопию́ще: ра́дуйся, вели́кое бога́тство, Кресте́, церко́вное украше́ние.

И ны́не: Дре́во жи́зни и спасе́ния, Дре́во безсме́ртия, Дре́во ра́зума, Дре́во трилюбе́зное, нетле́нное и неизнуря́емое, Кре́ст трисоста́вный, честно́е Дре́во, Тро́ицы бо но́сит Триипоста́сныя о́браз.

Пе́снь 9

Ирмо́с: Вся́к земноро́дный да взыгра́ется ду́хом просвеща́емь, да торжеству́ет же безпло́тных умо́в естество́, почита́ющее свяще́нное торжество́ Богома́тере, и да вопие́т: ра́дуйся, Всеблаже́нная, Богоро́дице чи́стая ПрисноДе́во.

Кто́ слы́шана сотвори́т, я́коже пи́шет, де́йствия твоя́, многолюбе́зный Кресте́, си́лы и чудеса́, уме́рших воста́ние, и ми́р ве́сь совозне́сл еси́, вознесы́йся к Бо́гу многожела́емый.

Утвержде́ние ве́рных Кре́ст треблаже́нный, зна́мение и похвала́, Дре́во всеси́льное. Кре́ст Христо́в вели́кий и соверше́нный, апо́столов похвала́, преподо́бных утвержде́ние, и му́чеников кре́пость, побе́да и похвала́.

Сла́ва: Ра́дуйся, Кресте́, о́бразе неопи́санный и многоимени́тый, Дре́во требога́тое, стра́шное же и всеблаже́нное; ра́дуйся, Кресте́ всесвяты́й и всеси́льный; ра́дуйся, храни́телю жи́зни на́шея, Госпо́день Кресте́ многопе́тый.

И ны́не: Кресте́ Честны́й, храни́тель души́ и те́ла бу́ди ми́, о́бразом свои́м бе́сы низлага́я, враги́ отгоня́я, стра́сти упражня́я, и благослове́ние да́руя ми́, и жи́знь и си́лу, соде́йствием Свята́го Ду́ха, и честны́ми Пречи́стыя мольба́ми.

Моли́тва ко Го́споду на́шему Иису́су Христу́

Го́споди Иису́се Христе́ Сы́не Бо́га жива́го, Тво́рче не́ба и земли́, Спаси́телю ми́ра! Се́ а́з недосто́йный и па́че все́х грешне́йший, смире́нно коле́на се́рдца моего́ пред сла́вою вели́чества Твоего́ Кре́ст преклоня́я, воспева́ю и велича́ю безме́рное страда́ние Твое́, и благодаре́ние Тебе́ Царю́ все́х и Бо́гу приношу́, я́ко благоизво́лил еси́ сни́ти с небе́снаго Престо́ла Твоего́ и воплоти́тися от Пречи́стыя Де́вы Мари́и, ра́ди спасе́ния челове́ческаго: безпло́тен сы́й, плотско́е естество́ Божеству́ совокупи́л еси́. Бога́т сы́й, во́лею обнища́л еси́, да челове́ка во Ца́рствии Твое́м обогати́ши. Труды́ и вся́кия челове́ческия беды́, я́ко челове́к, на Себе́ поне́сл еси́, да все́ во вся́ких печа́лех и ну́ждах посо́бствуеши. Четы́редесять дне́й пости́выйся, все́м к воздержа́нию пу́ть показа́л еси́. Мно́жицею от лука́вых искуше́н бы́л еси́, все́х от искуше́ний вся́ких избавля́я. Ве́м, всеси́льный Влады́ко, я́ко вся́ сия́ Тебе́ непотре́бна бы́ша, но челове́ческаго ра́ди спасе́ния вся́ претерпе́л еси́: пре́дан бы́л еси́ за три́десять сре́бреник, да челове́ка иску́пиши от лю́тыя рабо́ты вра́жия; от неми́лостивых иудёй, я́ко незло́бивый А́гнец, похище́н бы́л еси́, ро́д челове́ческий от поглоще́ния во́лка мы́сленнаго исторга́я; на суди́лищи пред А́нною и Каиа́фою предста́л еси́, все́х от осужде́ния огня́ ве́чнаго отводя́; свя́зан, пору́ган, оплева́н, от ло́жных свиде́телей оклевета́н и на поноси́тельную сме́рть осужде́н бы́л еси́, челове́ка от вся́кия напа́сти, муче́ния и от ве́чныя сме́рти свобожда́я; Пила́ту, нико́его зла́ соде́явый, пре́дан бы́л еси́, и ко И́роду по́слан, и па́ки пору́ган, челове́ка от зла́го обстоя́ния и от поруга́ний вра́жиих избавля́я. Что́ у́бо возда́м Тебе́, Влады́ко Человеколю́бче, о все́х, я́же претерпе́л еси́ мене́ ра́ди гре́шнаго? Не ве́м, душа́ бо и те́ло и вся́ блага́я от Тебе́ су́ть, и вся́ моя́ Твоя́ су́ть, и а́з Тво́й е́смь. То́чию на безчи́сленное Твоё милосе́рдие, Благосе́рде Го́споди, наде́яся, пою́ Твое́ неизрече́нное долготерпе́ние, велича́ю неисповеди́мое смотре́ние Твое́, сла́влю Твою́ безме́рную ми́лость, и́миже преклони́лся еси́ мене́ ра́ди осужде́ннаго, да а́з оправда́н бу́ду. К столпу́, Спа́се, привя́зан и без ми́лости бие́н, ми́лостив сы́й, разреши́ мя́, молю́ся, от грехо́в мои́х; те́рнием венча́н, души́ моея́ грехо́вное те́рние искорени́; тро́стию бие́н по главе́, сокруши́ главу́ зми́я уязвля́ющаго мя́ жа́лом греха́; в багря́ну ри́зу оболче́н и мучи́телем пре́дан, просвети́ ми́, Царю́ Пресвяты́й, одея́ние душе́вное, да вни́ду в черто́г Тво́й всекра́сный; с разбо́йники вмене́н и Кре́ст на ра́му Твое́ю понесы́й, разбо́йника врага́, и́щущаго ду́шу мою́ уби́ти, Твои́м Кресто́м прожени́. Ве́м Тя́, Иису́се долготерпели́ве, лю́те уя́звлена, от верху́ главы́ Твое́й святы́я, да́же до стопы́ ножны́я, не бе́ в Тебе́ ме́ста це́ла. Что́ же возглага́ю о неизрече́ннем человеколю́бии Твое́м, Христе́ Спаси́телю? То́чию в сокруше́нии се́рдца моего́, покланя́яйся Твои́м Пречи́стым страсте́м и вселюбе́зно ты́я лобыза́я, вопию́: поми́луй мя́ гре́шнаго. На Кресте́ пригвозди́тися изво́ливый, пригвозди́ за́поведем Твои́м се́рдце мое́: воздви́жен со Кресто́м на горе́ Голго́фе, воздви́гни мы́сли моя́ к небеси́, да всегда́ го́рняя му́дрствую; же́лчию со о́цтом напоён, огорче́нное грехо́м се́рдце моё услади́ любо́вию Твое́ю, и жа́ждуща напо́й пото́ком сла́дости Твоея́; ру́це Твои́ пречи́стеи распростры́й на прия́тие все́х, приими́ мя́ гре́шнаго; но́зе пригвожде́ны име́вый, хотя́ всегда́ со гре́шники бы́ти, бу́ди со мно́ю гре́шным, возбраня́я нога́м мои́м от вся́каго пути́ лука́ваго; се́рдце отве́рсто име́вый, яви́ мне́ благода́ть Твою́, гре́шному; главу́ пресвяту́ю на Кресте́ преклони́вый, услы́ши недосто́йныя моли́твы моя́. О, пречу́дная и неизме́римая глубино́ милосе́рдия, Христе́ Бо́же! За враги́ распина́тели Твоя́ Бо́гу Отцу́ моли́выйся, да́ждь и мне́ гре́шному сию́ благода́ть, люби́ти враги́ моя́ и моли́тися за ни́х; разбо́йнику ка́ющемуся ра́й отве́рзый, воззри́, Све́те Мо́й, на мя́ гре́шнаго, пода́ждь покая́ние, и отве́рзи ми́ две́ри ми́лости Твоея́, и помяни́ мя́ недосто́йнаго во Ца́рствии Твое́м. Наконе́ц, ду́х Тво́й пресвяты́й преда́вый в ру́це Бо́гу Отцу́, приими́, Созда́телю, ду́х мо́й во вре́мя кончи́ны моея́. Со Креста́ сня́т и во гро́бе я́ко ме́ртв положе́н, Спа́се, живы́й во све́те непристу́пней, возьми́ от мене́ тя́жкое бре́мя грехо́вное, и не возгнуша́йся, Человеколю́бче, всели́тися во гро́б се́рдца моего́ недосто́йнаго, на умерщвле́ние моего́ плотска́го мудрова́ния. Я́ко да не ктому́ себе́, бре́нное созда́ние Твое́, но Тебе́, Го́сподеви и Бо́гу моему́ живы́й, Твои́м, о Всеми́лостиве, благосе́рдием, сподо́блюся ви́дети Тебе́, Созда́теля и Спаси́теля моего́, за прия́тие сме́рти кре́стныя, сла́вою и че́стию венча́ннаго, во све́те неприкоснове́нныя Твоея́ сла́вы, иде́же со Безнача́льным Твои́м Отце́м, и со Пресвяты́м и Животворя́щим и Единосу́щным Твои́м Ду́хом, ца́рствуеши пре́жде ве́к, ны́не и при́сно и во ве́ки веко́в.

Досто́йно е́сть: Трисвято́е. И по О́тче на́ш: Тропа́рь: Спаси́, Го́споди, лю́ди твоя́: Сла́ва и ны́не: Богоро́дичен.

И отпу́ст.

На Го́споди воззва́х, стихи́ры гла́с 8.

Пра́отцев дне́сь все́х ве́рнии соверша́юще па́мять, воспои́м христа́ изба́вителя, возвели́чившаго и́х во все́х язы́цех и чуде́с пресла́вная ве́рно соверши́вшаго Го́спода, я́ко держа́вна и си́льна, и от ни́х показа́вша же́зл си́лы на́м, еди́ну неискусому́жную и богоотрокови́цу, Мари́ю чи́стую: из нея́же цве́т про́йде Христо́с, израсти́вый все́м жи́знь, и неизждива́емую пи́щу, и спасе́ние ве́чное.

Проро́цы и апо́столи Христо́вы и му́ченицы, научи́ша ны́ пе́ти Тро́ицу единосу́щную и просвети́ша язы́ки прельще́нныя, и прича́стники а́нгелом сотвори́ша сы́ны челове́ческия.

И́же сло́во благочести́во и боже́ственно отры́гнувше, госпо́дни святи́телие, вся́ ерети́ческая сопротивосло́вия разруши́сте, и ве́рным все́м перводе́тельницы яви́стеся: сего́ ра́ди почита́еми есте́.

Невеще́ственных и безпло́тных чи́ну уподо́бистеся, отцы́ богоно́снии, в телеси́ веще́ственне, те́х пресла́вно житие́ показу́юще: те́мже во оби́телех те́х живете́.

Сла́ва, гла́с 4.

Иму́ще дерзнове́ние ко спа́су святи́и, моли́те непреста́нно за ны́ гре́шныя, оставле́ния прегреше́ний прося́ще, и душа́м на́шым ве́лия ми́лости.

И ны́не: Свеще́ неугаси́мая, престо́ле пра́ведный, пречи́стая влады́чице, моли́ спасти́ся душа́м на́шым.

На стихо́вне стихи́ры, гла́с 7

Святи́и, моли́теся, оставле́ние да́ти на́м прегреше́ний на́ших, и ча́емых лю́тых и го́рькия сме́рти изба́витися на́м, мо́лимся.

Сти́х: Ди́вен Бо́г во святы́х свои́х:

Му́ченицы госпо́дни, моли́те Бо́га на́шего, и испроси́те душа́м на́шым мно́жество щедро́т, и очище́ние мно́гих прегреше́ний, мо́лимся.

Сти́х: Святы́м и́же су́ть на земли́ его́:

Вся́кое прибе́жище и покро́в душа́м на́шым, духо́в лю́тых прогна́ние, вы́ есте́ богови́дцы апо́столи госпо́дни. те́мже ва́с с проро́ки и святи́тели при́сно почита́ем.

Сла́ва, гла́с 8:

Всечестну́ю ва́шу пра́отцы па́мять соверша́ем воспева́юще богоуго́дное ва́ше житие́, его́же ра́ди возвели́чени есте́: моли́теся го́сподеви, о спасе́нии ду́ш на́ших.

И ны́не: Му́чеников, проро́ков, апо́столов, иера́рхов, преподо́бных и святы́х все́х, от ве́ка пра́ведных, похвала́ ты́ еси́, пречи́стая. Те́мже тя́ мо́лим: моли́ся с ни́ми ко Го́споду, да спасе́т ду́шы на́шя.

Тропа́рь, гла́с 4:

Бо́же оте́ц на́ших, творя́й при́сно с на́ми по твое́й кро́тости, не отста́ви ми́лости твоея́ от на́с: но моли́твами и́х в ми́ре упра́ви живо́т на́ш.

Сла́ва и ны́не, богоро́дичен

Е́же от ве́ка утае́нное и а́нгелом несве́домое та́инство, тобо́ю Богоро́дице, су́щым на земли́ яви́ся Бо́г, в несли́тном соедине́нии воплоща́емь, и кре́ст во́лею на́с ра́ди восприи́м, и́мже воскреси́в первозда́ннаго, спа́се от сме́рти ду́шы на́шя.

Кано́н, гла́с 8-й

Пе́снь 1

Ирмо́с: Пе́снь возсле́м лю́дие чу́дному Бо́гу на́шему, свободи́вшему Изра́иля от рабо́ты, пе́снь побе́дную пою́ще и вопию́ще: пое́м Тебе́ Еди́ному Влады́це.

Припе́в: Вси́ святи́и, моли́те Бо́га о на́с.

Проро́ческий собо́ре, апо́стольское сосло́вие, му́ченик во́инства, Влады́ку все́х моли́те спасти́ся мне́, прегреше́нии мно́гими обдержи́мому.

Иера́ршеский собо́ре, преподо́бнии и пра́веднии вси́, бла́г ве́чных улучи́ти моли́теся, ве́рою ва́с блажа́щим.

Сла́ва: Все́х святы́х Твои́х, Го́споди, воспева́ем чи́ны, я́ко моли́твами и́х озаря́еши души́ на́ша: Ты́ бо еси́ Све́т непристу́пный, неве́дения мра́к отгоня́яй, присносу́щными Твои́ми све́тлостьми.

И ны́не: Пресвята́я Де́во Ма́ти, я́же Бо́га, Пресвято́е Сло́во, родила́ еси́, освяти́ все́х ве́рою Тя́ со все́ми святы́ми сла́вящих, мо́лимтися.

Пе́снь 3

Ирмо́с: Ты́ еси́ утвержде́ние притека́ющих к Тебе́, Го́споди, Ты́ еси́ Све́т омраче́нных, и пое́т Тя́ ду́х мо́й.

Свяще́ннейший ли́к ва́с Боже́ственных проро́к велича́ем, и му́ченик мно́жество, пострада́вших кре́пко, почита́ем моля́щеся: да ю́же сла́ву получи́сте, сея́ и мы́ прича́стницы бы́ти сподо́бимся ва́шими моли́твами.

Святе́йшии Христо́вы иера́рси, и честни́и преподо́бных собо́ри, со все́ми святы́ми о все́х на́с Человеколю́бца Бо́га моли́те, мо́лим вы́.

Сла́ва: Зако́ну повину́ющеся Твоему́, уго́дников Твои́х собо́ри, многообра́зными доброде́тельми освети́шася: сего́ ра́ди насле́дницы бы́ша оби́телей Твои́х Небе́сных, Влады́ко Царю́: и́хже моли́твами, да и на́с та́можде всели́ши, Преми́лостиве.

И ны́не: Богора́дованная Чи́стая, со все́ми проро́ки, му́дрыми, апо́столы, священному́ченики и со все́ми пра́ведными, моли́ Го́спода, я́ко да соверше́нное разреше́ние прегреше́ний прии́мем.

Пе́снь 4

Ирмо́с: Услы́шах, Го́споди, смотре́ния Твоего́ та́инство, разуме́х дела́ Твоя́ и просла́вих Твое́ Божество́.

Восхваля́ем ва́с, благоглаго́ливии проро́цы, и воспева́ем богови́дцы апо́столи, со все́ми до́бре о Го́споде тече́ние соверша́вшими: я́ко да моли́твами ва́шими и мы́ настоя́щаго жития́ тече́ние богоуго́дно соверши́ти возмо́жем.

Я́ко многосве́тлыя зве́зды, доброде́телей све́тлостию озаря́ете ве́рных исполне́ния, преподо́бнии отцы́ на́ши, и вся́ Бо́жии уго́дницы: сего́ ра́ди ва́с ублажа́ем.

Сла́ва: Совоку́плься собо́р святы́х Твои́х, Го́споди, ра́ди любве́, и тоя́ наслажда́ющеся, со А́нгелы лику́ет о Тебе́, Всеви́дче Го́споди все́х: его́же ликовствова́ния да и на́с сподо́биши, моли́твами уго́дников Твои́х, Всеси́льне.

И ны́не: Еди́на Бо́га Воплоще́ннаго ро́ждши, Всесвята́я, Того́ умоли́ в де́нь стра́шный все́х на́с спасти́, и жи́зни ве́чныя, и све́та сподо́бити, его́же зря́т вси́ до́бре угоди́вшии.

Пе́снь 5

Ирмо́с: У́тренююще вопие́м Ти́, Го́споди, спаси́ ны́: Ты́ бо еси́ Бо́г на́ш, ра́зве Тебе́ ино́го не ве́мы.

Святи́телие, проро́цы, преподо́бнейшии отцы́ и богоно́сцы, луча́ми Ду́ха просвеща́юще всю́ тва́рь, тму́ разоря́йте страсте́й на́ших, мо́лим вы́.

Ра́ны ва́ша и я́звы, врагу́ яви́шася я́звы неисце́льныя: я́звы же ны́не исцеля́ют все́м ве́рным, страда́льцы Госпо́дни.

Сла́ва: Иера́рхи Твоя́, и священному́ченики, и вся́ святы́я просвети́вый, Го́споди, те́х моли́твами уще́дри мя́, ве́дый безме́рная моя́ прегреше́ния.

И ны́не: Пречи́стая Де́во, похвало́ му́чеников, преподо́бных и пра́ведных, и все́х святы́х, от вся́каго мучи́тельства лука́ваго изми́ мя́, молю́ся.

Пе́снь 6

Ирмо́с: Ри́зу мне́ пода́ждь све́тлу, одея́йся све́том я́ко ри́зою, Многоми́лостиве Христе́ Бо́же на́ш.

Денни́ца светоза́рная позна́ни бы́сте на земли́, благоче́стия све́том озари́вше ве́рныя, пресла́внии Христо́вы ору́жницы и святи́телие пра́веднии.

Умерщвле́ни бы́вше ра́н мно́гих наведе́ньми, жи́знь и́стинную насле́довасте: вку́пе моли́те Христа́ спасти́ вся́ ве́рныя, святи́и му́ченицы.

Сла́ва: Сла́ва прему́дрым святи́телем, и преподо́бным, и все́м святы́м, Ты́ еси́, Христе́: моли́твами и́х лю́ди Твоя́ уще́дри, и́хже Свое́ю кро́вию, я́ко Человеколю́бец, стяжа́л еси́.

И ны́не: Воспева́ем Тя́ ве́рнии, Богора́дованная Влады́чице: Препе́таго бо Бо́га родила́ еси́. Его́же моли́, Пречи́стая, гра́ду и лю́дем Твои́м в ми́ре спасти́ся.

Конда́к, гла́с 8-й

Я́ко нача́тки естества́ Насади́телю тва́ри, вселе́нная прино́сит Ти́, Го́споди, богоно́сныя му́ченики: те́х моли́твами в ми́ре глубо́це, Це́рковь Твою́, жи́тельство Твое́, Богоро́дицею соблюди́, Многоми́лостиве.

И́кос: И́же по все́й земли́ му́чившиися, и на Небеса́ пресели́вшиися, и́же стра́сти Христо́вы подража́вшии, и стра́сти на́ша отъе́млющии, зде́ дне́сь собира́ются, перворожде́нных показу́юще Це́рковь, я́ко го́рния о́браз содержа́щу, и Христу́ вопию́щу: Бо́г мо́й еси́ Ты́, Богоро́дицею соблюди́ мя́, Многоми́лостиве.

Пе́снь 7

Ирмо́с: О́троцы благочести́вии в Вавило́не о́бразу злато́му не поклони́шася, но посреде́ о́гненныя пе́щи ороша́еми, пе́снь воспева́ху, глаго́люще: превозноси́мый отце́в и на́с, Бо́же, благослове́н еси́.

Святы́х чи́ни, во святы́х почива́ющаго немо́лчно восхваля́юще, пи́щи небе́сныя наслажда́етеся, и ра́дующеся лику́ете пою́ще: отце́в на́ших Бо́же, благослове́н еси́.

Светозра́чнии святи́телие, и преподо́бнии, и проро́цы, и священному́ченик досточу́дное мно́жество, и в по́стничестве просия́вшии све́тло, при́сно о на́с моли́теся, да поми́ловани бу́дем, пою́щии с ва́ми: отце́в на́ших Бо́же, благослове́н еси́.

Сла́ва: Ра́дующеся пое́м Твои́х, Го́споди, все́х святы́х собо́р отвсю́ду собра́вшихся, и ро́ды вку́пе, и досто́инства, и жи́тельства, и с ни́ми пое́м зову́ще: отце́в на́ших Бо́же, благослове́н еси́.

И ны́не: С му́ченики, Пречи́стая, с преподо́бными отцы́, с проро́ки и все́ми святы́ми, во святы́х Еди́наго Почива́ющаго умоли́ все́х освяти́ти на́с, славосло́вящих Тя́ во вся́ ве́ки.

Пе́снь 8

Ирмо́с: Богоглаго́ливии о́троцы в пещи́, со огне́м пла́мень попира́юще поя́ху: благослови́те дела́ Госпо́дня, Го́спода.

Святи́телие, проро́цы, апо́столи, му́ченицы и вси́ святи́и, по́двиг сконча́вше, свяще́нное улучи́сте водворе́ние со А́нгелы: с ни́ми же проси́те очище́ния все́м на́м и ве́лия ми́лости.

Умертви́вше пло́ть боле́зньми мно́гими, жи́зни сподо́бистеся бу́дущия, преподо́бнии: ю́же получи́ти и на́м моли́теся, уго́дницы Бо́жии, мо́лим вы́.

Сла́ва: Свяще́нницы Твои́, Христе́, пра́вдою облече́ни преподо́бне и вси́ святи́и от ве́ка, ны́не ку́пно ра́дуются, Твою́ добро́ту зря́ще Боже́ственную ясне́йше: ю́же зре́ти и на́с, ра́ди святы́х Твои́х предста́тельства сподо́би, Человеколю́бче.

И ны́не: Богороди́тельнице Чи́стая, со все́ми проро́ки, и му́ченики, и преподо́бными, священному́ченики и со все́ми святы́ми, уще́дрити на́с Всеми́лостиваго Спа́са моли́, мо́лимтися.

Пе́снь 9

Ирмо́с: Вои́стинну Богоро́дицу Тя́ испове́дуем, спасе́ннии Тобо́ю, Де́во Чи́стая, с безпло́тными ли́ки Тя́ велича́юще.

Ва́с, священноде́йственнии па́стырие, проро́к святы́х ли́к, пра́ведных безчи́сленное мно́жество, му́ченик собо́р, по́стников, де́вственников и все́х святы́х, свяще́нными пе́сньми ублажа́ем, да мо́лите все́х Влады́ку о спасе́нии ду́ш на́ших.

Я́ко служи́телие Влады́це, священнотаи́нницы я́вльшеся, совокупи́стеся служи́телем небе́сным: с ни́миже о на́с моле́ния приноси́те, мо́лим ва́с.

Сла́ва: Со священному́ченики ку́пно, и со все́ми проро́ки, ублажа́ем вся́ преподо́бныя и пра́ведныя, де́вы и же́ны све́тло до́блествовавшия: те́х мольба́ми, Христе́, изба́ви гее́нны души́ на́ша.

И ны́не: Щедролюби́ваго Бо́га ро́ждшая пло́тию, со святы́ми все́ми моли́ Того́ при́сно от бе́д спасти́ на́с, всегда́ Тя́ велича́ющих, Ма́ти Де́во Чи́стая.

На хвали́тех стихи́ры, гла́с 4:

Го́споди, в па́мяти святы́х твои́х вся́ тва́рь пра́зднует, небеса́ ра́дуются со а́нгелы и земля́ весели́тся с челове́ки те́х моли́твами поми́луй на́с.

Апо́столи сла́внии, просвети́вшии вселе́нную, мо́лим вы́: при́сно моли́теся ко влады́це Христу́ и Бо́гу спасти́ ду́шы на́шя.

Ва́с мо́лим, достосла́внии проро́цы, Бо́жии. престо́лу предстоя́щия, моли́теся приле́жно, просвеще́ние на́м дарова́ти, му́дрии, ве́рою почита́ющым честну́ю па́мять ва́шу.

Сла́ва: Сла́ва ты́ еси́, Христе́, родонача́льным патриа́рхом, великоимени́тым проро́ком, всехва́льным апо́столом, победоно́сным му́чеником, прему́дрым иера́рхом, и все́м священноучи́телем, трудолю́бному ли́ку преподо́бных, вся́каго чи́на пра́ведным, и все́м святы́м, моли́твами и́х лю́ди твоя́ уще́дри, и́хже свое́ю кро́вию, я́ко человеколю́бец стяжа́л еси́.

И ны́не: Пое́м тя́, благослове́нная, чи́стая Де́во богоро́дице, ея́же ра́ди возсия́ на́м су́щым во тьме́ и се́ни сме́ртней, пра́вды незаходи́мое со́лнце: ты́ бо еси́ со все́ми святы́ми изря́дная на́шего спасе́ния хода́таица.

Моли́тва.

Бо́же святы́й и во святы́х почива́яй, трисвяты́м гла́сом на небеси́ от А́нгел воспева́емый, на земли́ от челове́к во святы́х Свои́х хвали́мый: да́вый Святы́м Твои́м Ду́хом кому́ждо благода́ть по ме́ре дарова́ния Христо́ва, и то́ю поста́вивый Це́ркви Твое́й святе́й о́вы Апо́столы, о́вы проро́ки, о́вы же благове́стники, о́вы па́стыри и учи́тели, и́х же сло́вом про́поведи. Тебе́ Самому́ де́йствующему вся́ во все́х, мно́зи соверши́шася святи́и в ко́емждо ро́де и ро́де, разли́чными доброде́тельми благоугоди́вшии Тебе́, и к Тебе́ на́м о́браз до́брых по́двигов свои́х оста́вивше, в ра́дости преше́дшии, гото́ви, в не́м же са́ми искуше́ни бы́ша, и на́м напа́ствуемым помога́ти. Си́х святы́х все́х воспомина́я и и́х богоуго́дное похваля́я житие́, Тебе́ Сама́го, в ни́х де́йствовавшаго, восхваля́ю, и о́нех благотворе́ния Твоя́ дарова́ния бы́ти ве́руя, приле́жно молю́ Тя́, Свя́те святы́х, да́ждь ми́ гре́шному после́довати и́х уче́нию, па́че же Твое́ю вседе́йствующею благода́тию, небе́сныя с ни́ми сподо́битися сла́вы, хва́ляще пресвято́е и́мя Твое́, Отца́ и Сы́на и Свята́го ду́ха во ве́ки. Ами́нь.

Посе́м: Досто́йно е́сть: Трисвято́е. По О́тче на́ш: Тропа́рь : Бо́же оте́ц на́ших: и богоро́дичен, Е́же от ве́ка утае́ное. И отпу́ст.

В пято́к ве́чера по предначина́тельном псалме́, и обы́чном стихосло́вии быва́ет вели́кая ектениа́.

Ми́ром Го́споду помо́лимся.

Ли́к: Го́споди поми́луй

О свы́шнем ми́ре и о спасе́нии ду́ш на́ших, Го́споду помо́лимся.

О оставле́нии согреше́ний, во блаже́нней па́мяти преста́вльшихся, Го́споду помо́лимся.

О приснопамятнех рабе́х Бо́жиих (и́мя ре́к), поко́я, тишины́, блаже́нныя па́мяти и́х, Го́споду помо́лимся.

О прости́ти и́м вся́кое прегреше́ние во́льное и нево́льное, Го́споду помо́лимся.

О неосужде́нным предста́ти у стра́шнаго престо́ла Го́спода сла́вы, Го́споду помо́лимся.

О пла́чущих и боле́знующих, ча́ющих Христо́ва утеше́ния, Го́споду помо́лимся.

О отпусти́тися и́м от вся́кия боле́зни и печа́ли, и воздыха́ния, и всели́ти и́х, иде́же присеща́ет све́т лица́ Бо́жия, Го́споду помо́лимся.

О я́ко да Госпо́дь Бо́г на́ш учини́т души́ и́х в ме́сте све́тло, в ме́сте зла́чне, в ме́сте поко́йно, иде́же вси́ пра́веднии пребыва́ют, Го́споду помо́лимся.

О причте́нии и́х в не́драх Авраа́ма и Исаа́ка, и Иа́кова, Го́споду помо́лимся.

О изба́витися на́м от вся́ких ско́рби, гне́ва и ну́жды, Го́споду помо́лимся.

Заступи́, спаси́, поми́луй и сохрани́ на́с, Бо́же, Твое́ю благода́тию.

Ми́лости Бо́жия, ца́рства небе́снаго, и оставле́ния грехо́в испроси́вше те́м и са́ми себе́, дру́г дру́га и ве́сь живо́т на́ш Христу́ Бо́гу предади́м.

Мы́ же рече́м: Тебе́ Го́споди.

Иере́й возгла́с:

Я́ко Ты́ еси́ воскресе́ние и живо́т, и поко́й усо́пших ра́б Твои́х, приснопомина́емых созда́телей, оте́ц и бра́тий на́ших, зде́ лежа́щих и повсю́ду правосла́вных христиа́н, Христе́ Бо́же на́ш, и Тебе́ сла́ву возсыла́ем, со безнача́льным Твои́м Отце́м, и пресвяты́м и благи́м и животворя́щим Твои́м Ду́хом, ны́не и при́сно, и во ве́ки веко́в.

Ли́к: Ами́нь.

По обы́чном стихосло́вии:

На Го́споди воззва́х: Стихи́ры, гла́с 8

Подо́бен: Во Еде́ме ра́й:

От ве́ка ме́ртвых дне́сь все́х по и́мени ве́рою пожи́вших благоче́стно, па́мять сотворя́юще ве́рнии, Спа́са и Го́спода воспои́м, прося́ще приле́жно си́м в ча́с суда́ отве́т благи́й да́ти, Тому́ Самому́ Бо́гу на́шему, все́й судя́щему земли́, десна́го Его́ предстоя́ния получи́ти в ра́дости, в ча́сти пра́ведных, и во святы́х жре́бии све́тлем, и досто́йным бы́ти Небе́снаго Ца́рствия Его́.

Твое́ю кро́вию челове́ки Спа́се искупи́вый, и сме́ртию Твое́ю от сме́рти го́рькия изба́вивый на́с, и жи́знь ве́чную подая́й на́м Воскресе́нием Твои́м, вся́ упоко́й Го́споди, усо́пшия благоче́стно, или́ в пусты́нях, или́ во граде́х, или́ в мо́ри, или́ на земли́, или́ на вся́ком ме́сте: цари́ же, свяще́нники, архиере́и, мона́хи, и бельцы́ в возрасте́ вся́ком всеро́дном, и сподо́би я́ Небе́снаго Ца́рствия Твоего́.

Из ме́ртвых воста́нием Твои́м Христе́, не ктому́ сме́рть облада́ет уме́ршими благоче́стно. Те́мже мо́лимся приле́жно: рабы́ Твоя́ упоко́й во дво́рех Твои́х, и в не́дрех Авраа́ма, от Ада́ма да́же до дне́сь, послужи́вшия Тебе́ чи́сто, отцы́ и бра́тию на́шу, дру́ги вку́пе и сро́дники, вся́каго челове́ка, в житии́ послужи́вша ве́рно, и к Тебе́ преста́вльшася многови́дно и многообра́зно, Бо́же, и сподо́би я́ Небе́снаго Ца́рствия Твоего́.

Сла́ва, гла́с 8:

Пла́чу и рыда́ю, егда́ помышля́ю сме́рть, и ви́жду во гробе́х лежа́щую по о́бразу Бо́жию созда́нную на́шу красоту́, безобра́зну, и безсла́вну, не иму́щу ви́да. О́ле чудесе́! Что́ е́же о на́с сие́ бы́сть та́инство? Ка́ко преда́хомся тле́нию? Ка́ко припряго́хомся сме́рти? Вои́стинну Бо́жиим повеле́нием, я́коже е́сть пи́сано, подаю́щаго преста́вльшимся поко́й.

И ны́не, Богоро́дичен

Я́ко заче́нши безнача́льное сло́во Бо́га Отца́ ма́терним твои́м дерзнове́нием приле́жно моли́, богороди́тельница, учини́ти рабы́ твоя́ иде́же ликова́ние пра́ведных непреста́нное, веселя́щихся и хва́лящих тя́, иде́же све́тлость ве́чнующая, и сла́дкий гла́с пра́зднующаго

Вме́сто проки́мена дневна́го пое́м Аллилу́иа: на гла́с 8. Со стихи́ поко́йными: Зри́ у́тро на Бо́г Госпо́дь:

На стихо́вне стихи́ры, гла́с 8:

Руко́ю Твое́ю созда́вый Ада́ма, и поста́вивый преде́л нетле́ния и ме́ртвости Спа́се, и жи́зни во благода́ти, тле́ния же премени́вый, к пе́рвой преложи́в жи́зни, Са́м рабы́ Твоя́ Влады́ко, я́же прия́л еси́ от на́с, с пра́ведными упоко́й, и в лице́ избра́нных: и си́х имена́ написа́в в кни́зе живо́тней, и воскреси́в во гла́се арха́нгелове, и трубы́ шу́ме, сподо́би я́ Небе́снаго Ца́рствия Твоего́.

Сти́х: Блаже́ни, я́же избра́л и прия́л еси́ Го́споди.

Христо́с воскре́се, разреши́в у́зы Ада́ма первозда́ннаго, и а́дову разруши́в кре́пость. Дерза́йте вси́ ме́ртвии: умертви́ся сме́рть, плене́н бы́сть и а́д с не́ю, и Христо́с воцари́ся, распны́йся и воскресы́й: То́й на́м дарова́ нетле́ние пло́ти, То́й воздвиза́ет на́с, и да́рует воскресе́ние на́м, и сла́вы о́ныя с весе́лием вся́ сподобля́ет, в ве́ре непрекло́нней ве́ровавшия те́пле в Него́.

Сти́х: Ду́шы и́х во благи́х водворя́тся

Боле́знь Ада́му бы́сть дре́ва вкуше́нием дре́вле во Еде́ме, егда́ зми́й я́д изблева́: те́м бо вни́де сме́рть всеро́дная, снеда́ющая челове́ка. Но прише́д Влады́ка низложи́ зми́я, и упокое́ние на́м дарова́, к Нему́ у́бо возопии́м: пощади́ Спа́се, и я́же прия́л еси́, со избра́нными Твои́ми упоко́й.

Сла́ва, гла́с 2:

Я́ко цве́т увяда́ет, и я́ко се́нь ми́мо гряде́т, и разруша́ется вся́кий челове́к. па́ки же глася́щей трубе́, ме́ртвии вси́ я́ко в тру́се воста́нут к Твоему́ сре́тению Христе́ Бо́же: тогда́ Влады́ко, я́же преста́вил еси́ от на́с, во святы́х Твои́х учини́ селе́ниих ду́хи, Влады́ко, Твои́х рабо́в при́сно.

И ны́не, Богоро́дичен:

Все́ упова́ние мое́ на тя́ возлага́ю, ма́ти Бо́жия, сохрани́ мя́ под кро́вом твои́м.

Тропа́рь, гла́с 8:

Глубино́ю му́дрости человеколю́бно вся́ стро́яй, и поле́зное все́м подава́яй, еди́не Соде́телю, упоко́й Го́споди, души́ ра́б Твои́х: на Тя́ бо упова́ние возложи́ша, Творца́ и Зижди́теля и Бо́га на́шего.

Сла́ва, и ны́не, Богоро́дичен, гла́с то́йже:

Тебе́ и сте́ну, и приста́нище и́мамы, и моли́твенницу благоприя́тну к Бо́гу, его́же родила́ еси́ Богоро́дице безневе́стная, ве́рных спасе́ние.

На у́трени.

Ектениа́ вели́кая. Вме́сто: Бо́г Госпо́дь: Аллилу́иа на гла́с 8:

Стихи́ же сия́:

Стих1: Блаже́ни, я́же избра́л и прия́л еси́ Го́споди.

Стих2: Па́мять и́х в ро́д и ро́д.

Стих3: Души́ и́х во благи́х водворя́тся.

Тропа́рь: Глубино́ю му́дрости: и богоро́дичен: Тебе́ и сте́ну:

По 1 стихосло́вии, седа́лен, гла́с 4:

Души́, я́же преста́вил еси́ спа́се от вре́менных, упоко́й я́ко благоутро́бен и всеси́лен, и еди́н человеколю́бец, прости́ я́ко ще́др соде́янная и́ми: поми́луй ми́лостиве дела́ ру́к твои́х, моли́твами Богоро́дицы, еди́не человеколю́бче.

Сла́ва и ны́не, богоро́дичен:

Чи́стая всенепоро́чная и неискусому́жная: я́же еди́на безле́тнаго сы́на и сло́ва бо́жия в ле́то ро́ждшая, сего́ со святы́ми и честны́ми патриа́рхи, и му́ченики, и проро́ки, и преподо́бными моли́, дарова́ти на́м очище́ние и ве́лию ми́лость.

Та́же тропари́ по непоро́чных, на гла́с 5:

Благослове́н еси́ Го́споди, научи́ мя́ оправда́нием Твои́м.

Святы́х ли́к обре́те исто́чник жи́зни и две́рь ра́йскую, да обря́щу и а́з пу́ть покая́нием: поги́бшее овча́ а́з е́смь, воззови́ мя́ Спа́се, и спаси́ мя́.

Благослове́н еси́ Го́споди:

А́гнца Бо́жия пропове́давше, и закла́ни бы́вше я́коже а́гнцы, и к жи́зни нестаре́емей святи́и, и присносу́щней преста́вльшеся: Того́ приле́жно му́ченицы моли́те, долго́в разреше́ние на́м дарова́ти.

Благослове́н еси́ Го́споди:

В пу́ть у́зкий хо́ждшии приско́рбный, вси́ в житии́ кре́ст я́ко яре́м взе́мшии, и Мне́ после́довавшии ве́рою, прииди́те наслади́теся, и́хже угото́вах ва́м по́честей, и венцо́в небе́сных.

Благослове́н еси́ Го́споди:

О́браз е́смь неизрече́нныя Твоея́ сла́вы, а́ще и я́звы ношу́ прегреше́ний: уще́дри Твое́ созда́ние Влады́ко, и очи́сти Твои́м благоутро́бием, и возжеле́нное оте́чество пода́ждь ми́, рая́ па́ки жи́теля мя́ сотворя́я.

Благослове́н еси́ Го́споди:

Дре́вле у́бо от не су́щих созда́вый мя́, и о́бразом Твои́м Боже́ственным почты́й, преступле́нием же за́поведи па́ки мя́ возврати́вый в зе́млю, от нея́же взя́т бы́х, на е́же по подо́бию возведи́ дре́внею добро́тою возобрази́тися.

Благослове́н еси́ Го́споди:

Упоко́й Бо́же рабы́ Твоя́, и учини́ я́ в раи́, иде́же ли́цы святы́х Го́споди, и пра́ведницы сия́ют я́ко свети́ла, усо́пшия рабы́ Твоя́ упоко́й, презира́я и́х вся́ согреше́ния.

Сла́ва: Тро́ичен:

Трисия́тельное еди́наго Божества́, благоче́стно пое́м вопию́ще: Свя́т еси́ О́тче Безнача́льный, Собезнача́льный Сы́не, и Боже́ственный Ду́ше: просвети́ на́с ве́рою Тебе́ служа́щих, и ве́чнаго огня́ исхити́.

И ны́не, богоро́дичен:

Ра́дуйся Чи́стая, Бо́га пло́тию ро́ждшая во спасе́ние все́х, Е́юже ро́д челове́ческий обре́те спасе́ние: Тобо́ю да обря́щем ра́й, Богоро́дице Чи́стая благослове́нная.

Та́же седа́лен, гла́с 5:

Поко́й Спа́се на́ш, с пра́ведными рабы́ Твоя́, и сия́ всели́ во дворы́ Твоя́, я́коже е́сть пи́сано: презира́я я́ко бла́г прегреше́ния и́х во́льная и нево́льная, и вся́ я́же в ве́дении и не в ве́дении, Человеколю́бче.

Сла́ва, и ны́не:

От Де́вы возсия́вый ми́ру Христе́ Бо́же, и сы́ны све́та То́ю показа́вый, поми́луй на́с.

Посе́м, псало́м 50: Поми́луй мя́ Бо́же:

Кано́н

Гла́с 2.

Песнь1.

Ирмо́с: Непроходи́мое волня́щееся мо́ре Бо́жиим Свои́м веле́нием изсуши́вшему и пешеше́ствовати сквозе́ е́ изра́ильтеския лю́ди наста́вльшему, Го́сподеви пои́м, сла́вно бо просла́вися.

Припе́в: Ди́вен Бо́г во святы́х Свои́х, Бо́г Изра́илев

Сме́ртию Твое́ю попра́в сме́рть, Боже́ственныя жи́зни источи́л еси́ присносу́щие, е́же пода́ждь, Бла́же, душа́м усо́пших, му́ченик Твои́х мольба́ми, оставле́ние прегреше́ний да́руя.

Припе́в: Упоко́й, Го́споди, души́ усо́пших ра́б Твои́х.

И́же бога́тую ми́лость при́сно источа́я, благоче́стно при́сно прие́млющим Тя́, в до́му Твое́м, Христе́, в ди́вной Твое́й ски́нии, ме́сто ослабле́ния пода́ждь, Влады́ко, рабо́м Твои́м, я́ко благоутро́бен.

Сла́ва: Крепча́йший на сме́рть бы́л еси́, Христе́: те́мже ту́ связа́в, на́с изба́вил еси́, и ны́не изба́ви от сея́ тле́ния усо́пшия, я́ко Бла́г, и Твоего́ сия́ния прича́стие да́руй.

И ны́не: Утве́рждши коле́блемый у́м мо́й, Ма́ти Бо́жия, укрепи́ Боже́ственными повеле́ньми, Ро́ждшагося из Твоего́ освяще́ннаго чре́ва и упраздни́вшаго, Влады́чице, а́дово мра́чное ца́рство.

Пе́снь 3

Ирмо́с: На ка́мени мя́ ве́ры утверди́в, разшири́л еси́ уста́ моя́ на враги́ моя́, возвесели́ бо ся́ ду́х мо́й, внегда́ пе́ти: не́сть свя́т, я́коже Бо́г на́ш, и не́сть пра́веден, па́че Тебе́, Го́споди

Твоея́ красоты́ сия́нием озари́тися в ве́ре усо́пшим благоволи́ с му́ченики Твои́ми, И́же бога́тый в ми́лости, Ты́ бо еси́ Бо́г на́ш, и не́сть пра́веден па́че Тебе́, Го́споди.

На ме́сте прохлажде́ния, в не́дрех Авраа́мовых, избра́ннаго Твоего́, сподо́би водворя́тися рабо́м Твои́м, я́ко ще́др, Тебе́ вопию́щим: Ты́ бо еси́ Бо́г на́ш, и не́сть пра́веден па́че Тебе́, Го́споди.

Сла́ва: В черто́зех небе́сных водворя́тися с му́дрыми де́вами совше́дшими, Влады́ко, приими́ рабы́ Твоя́ свещено́сцы, и́хже преста́вил еси́ Твое́ю во́лею от вре́менных, Еди́не Человеколю́бче.

И ны́не: Умерщвле́на мя́ и к земли́ возвраще́на воздви́гнула еси́, ро́ждши Жизнода́вца, и возвела́ еси́ мя́ из а́да преиспо́днейшаго, Богоро́дицу Тя́ ве́рою сла́вящаго, и почита́ющаго, Пречи́стая, Тебе́, всепе́тую.

Седа́лен, гла́с 6-й

Вои́стинну суета́ вся́ческая, житие́ же се́нь и со́ние, и́бо всу́е мяте́тся вся́к земноро́дный, я́коже рече́ Писа́ние: егда́ ми́р приобря́щем, тогда́ во гро́б всели́мся, иде́же вку́пе ца́рие и ни́щии. Те́мже, Христе́ Бо́же, преста́вльшихся упоко́й, я́ко человеколю́бец.

Сла́ва и ны́не, Богоро́дичен:

Всесвята́я Богоро́дице, во вре́мя живота́ моего́ не оста́ви мене́, челове́ческому предста́тельству не вве́ри мя́, но Сама́ заступи́ и поми́луй мя́.

Пе́снь 4

Ирмо́с: Пою́ Тя́, слу́хом бо, Го́споди, услы́шах и ужасо́хся: до мене́ бо и́деши, мене́ ища́, заблу́ждшаго. Те́м мно́гое Твое́ снизхожде́ние, е́же на мя́, прославля́ю, Многоми́лостиве.

Упова́нием и любо́вию пожи́вшия, и умо́м правосла́вным, я́же па́че ума́ сла́вы Твоея́ сподо́би рабы́ Твоя́, Христе́, мно́гим Твои́м человеколю́бием и избра́нных му́ченик мольба́ми.

Я́ко имы́й сла́дости приснотеку́щий пото́к, при́сно напая́еши избра́нныя, Го́споди: с ни́миже и ны́не преста́вленныя, Христе́, к Тебе́, неизрече́нным Твои́м милосе́рдием пита́еши при вода́х оставле́ния.

Сла́ва: Ты́ живы́ми госпо́дьствуеши, Влады́ко, и ме́ртвыми владе́еши. Ты́ в земли́ пе́рсть су́щую си́лою Твое́ю воскреси́ши. Те́мже к Тебе́ преше́дшия во дво́рех Твои́х, Спа́се, всели́.

И ны́не: Исцели́ла еси́ Е́вино сокруше́ние[2], и дре́внее окая́нство[3], Зижди́теля бо родила́ еси́, могу́щаго испра́вити на́с, прегреше́ньми пове́рженных, Богороди́тельнице еди́на Ма́ти Де́ва.

Пе́снь 5

Ирмо́с: Све́та пода́телю и веко́в Тво́рче, Го́споди, во све́те Твои́х повеле́ний наста́ви на́с: ра́зве бо Тебе́, ино́го бо́га не зна́ем.

Умерщвле́нных на́с, и положе́нных во тли́, возве́л еси́ от мра́чных а́довых сокро́вищ, и восхи́тил еси́, Бла́же, и сочета́в святы́х А́нгел во́инством.

За е́же спасти́ на́с я́ко прише́л еси́, Христе́, приими́ ны́не и́же благоче́стно к Тебе́ преста́вленныя, я́ко еди́н бла́г, на ло́нех Авраа́ма, и с Ла́зарем те́х всели́.

Сла́ва: Разреши́л еси́, Влады́ко, ле́тную мою́ и до́лгую бра́нь, Тебе́ пре́жде хода́таю и моли́твеннику примире́ния бы́вшу; и ны́не Твоя́ рабы́, уще́дрив, упоко́й.

И ны́не: Под кро́вом Твои́м, Ма́ти Бо́жия, и́же наде́ющиеся на Тя́ спаса́ются: Жизнода́вца бо родила́ еси́ на́м, животворя́щаго вся́ во́лею.

Пе́снь 6

Ирмо́с: В бе́здне грехо́вной валя́яся, неизсле́дную милосе́рдия Твоего́ призыва́ю бе́здну: от тли́, Бо́же, мя́ возведи́.

Неизрече́нныя и Боже́ственныя све́тлости, иде́же му́ченичестии ли́цы, сподо́би я́же от земли́ преста́вил еси́, вседе́тельную Твое́ю во́лею, Человеколю́бче.

И́же созда́вый, Жизнода́вче Христе́, челове́ка от земли́, и́хже от на́с преста́вил еси́, упоко́й, оставле́ние подая́ и́м злы́х, я́ко милосе́рд и человеколю́бец.

Сла́ва: Озари́тися добро́тою сла́вы Твоея́ сподо́би, оста́вльшия житие́, и к све́ту Твоему́ неизрече́нному, Влады́ко, преше́дшия упоко́й.

И ны́не: Избавля́ющи усе́рдно яви́ся призыва́ющия Тя́, Пресвята́я Влады́чице, я́же Бо́га ро́ждшая, живото́м и сме́ртию облада́юща.

Конда́к, гла́с 8-й

Со святы́ми упоко́й, Христе́, души́ ра́б Твои́х, иде́же не́сть боле́знь, ни печа́ль, ни воздыха́ние, но жи́знь безконе́чная.

И́кос: Са́м еди́н еси́ Безсме́ртный, сотвори́вый и созда́вый челове́ка; земни́и у́бо от земли́ созда́хомся и в зе́млю ту́южде по́йдем, я́коже повеле́л еси́ созда́вый мя́ и реки́й ми́: я́ко земля́ еси́ и в зе́млю оты́деши, а́може вси́ челове́цы по́йдем, надгро́бное рыда́ние творя́ще пе́снь: аллилу́ия, аллилу́ия, аллилу́ия.

Пе́снь 7

Ирмо́с: Богопроти́вное веле́ние беззако́ннующаго мучи́теля высо́к пла́мень вознесло́ е́сть. Христо́с же простре́ богочести́вым отроко́м ро́су духо́вную, Сы́й благослове́н и препросла́влен.

И́же везде́ сы́й, низше́л еси́, Го́споди, е́же спасти́ и́же дре́вле[5] прельща́емый челове́чь ро́д[6]. Те́мже Тя́ му́ченицы мо́лят: си́х, я́же преста́вил еси́ от земли́, в земли́ кро́тких, Спа́се, упоко́й.

Ме́ртвости умерщвле́ние отря́сл еси́, в ме́ртвых свобо́дь бы́в, Са́м еди́н, Христе́; и ны́не умерщвле́ния грехо́внаго, Влады́ко, изба́ви рабы́ Твоя́, явля́я и́х насле́дники Ца́рствия Твоего́.

Сла́ва: Мно́гим Твои́м и неизрече́нным милосе́рдием и неизме́рною бе́здною человеколю́бия Твоего́, Христе́, прегреше́ний у́бо оставле́ние преста́вленным да́ждь, и благода́тию Твое́ю очище́ны си́х яви́.

И ны́не: Свети́льник я́ко была́ еси́ Боже́ственныя сла́вы, сия́ние нося́щи, Де́во, ду́хом, и пло́тию на́м я́вльшагося, и а́дову мглу́ све́тлостию Божества́ Своего́ потре́бльша, Богора́дованная.

Пе́снь 8

Ирмо́с: Пе́щь иногда́ о́гненная в Вавило́не де́йства разделя́ше, Бо́жиим веле́нием халде́и опаля́ющая, ве́рныя же ороша́ющая, пою́щия: благослови́те, вся́ дела́ Госпо́дня, Го́спода.

Показа́л еси́ на́м враго́в сме́рть схожде́нием Твои́м, я́ко безсме́ртен; Боже́ственною же си́лою Твое́ю вхо́ды яви́л еси́ живота́, Безсме́ртне, его́же му́ченицы Твои́ ны́не досто́йно получи́ша.

Добро́ты у́мныя Твоея́ наслади́тися преста́вленным сподо́би, сту́д греха́ злообра́знаго очища́я, я́ко человеколю́бец: еди́н бо Ты́, Влады́ко, яви́лся еси́ греха́ отчужде́н.

Сла́ва: Испра́вил еси́ на́с, Христе́, па́дшия в пе́рсть сме́ртную, сме́ртию Твое́ю живо́т да́руя, и пи́щу безконе́чную, и ра́дость присносу́щную, ея́же ны́не преста́вленныя сподо́би, я́ко ми́лостив.

И ны́не: Ве́лия и стра́шна е́сть та́йна, Богома́ти, Твоего́ рождества́: Бо́га бо родила́ еси́, его́же сме́рть не претерпе́ и гро́б не растли́: те́мже Тя́, Пречи́стая, вси́ язы́цы сла́вим.

Пе́снь 9

Ирмо́с: Я́же пре́жде со́лнца свети́льника Бо́га возсия́вшаго, пло́тски к на́м прише́дшаго из боку́ Деви́чу, неизрече́нно воплоти́вшая, Благослове́нная Всечи́стая, Тя́, Богоро́дице, велича́ем.

Име́яй вла́сть живы́ми и ме́ртвыми, живота́ Нача́льниче, от земли́ к Тебе́ преше́дшим, насле́дие небе́сное пода́ждь, Влады́ко, и све́тлость святы́х и пресла́вных страстоте́рпцев Твои́х.

Сло́во сы́й, Е́же дре́вле бы́ти ми́ подая́ живонача́льнейшее и е́же до́бре бы́ти па́ки да́руя, в не́дрех жела́нных Авраа́ма пра́отца, преста́вльшияся рабы́ Твоя́, я́ко ми́лостив, всели́.

Сла́ва: Ве́сь еси́, Спа́се мо́й, сла́дость светови́днейшая, ве́сь еси́ жела́ние ненасыща́емое, пото́ки Твоея́ пи́щи и водо́ю оставле́ния усо́пшия напо́й, непреста́нно Тебе́ сла́вящия.

И ны́не: Тя́, Богоро́дице, досто́йно ве́рнии ны́не ублажа́ем, Богодохнове́нным словесе́м Твои́м после́дующе, Ты́ бо еди́на земны́м Бо́га родила́ еси́, сме́рти разо́ршаго си́лу, Ма́ти Де́во.

Свети́лен:

Живы́ми и ме́ртвыми облада́яй я́ко Бо́г, упоко́й Твоего́ раба́ в селе́ниих избра́нных: а́ще бо и согреши́ша, Спа́се, но не отступи́ша от Тебе́.

Сла́ва и ны́не, богоро́дичен:

Сла́досте А́нгелов, скорбя́щих ра́досте, христиа́н предста́тельнице Де́во Ма́ти Госпо́дня, заступи́ на́с, и изба́ви ве́чных му́к.

На стихо́вне, стихи́ры, гла́с 6.

Подо́бен: Всю́ отложи́вше:

Име́яй непостижи́мое е́же о на́с благоутро́бие, и исто́чник неистощи́мый Боже́ственныя бла́гости, Многоми́лостиве, и́же к Тебе́, Влады́ко, преше́дшыя, на земли́ живы́х всели́, в селе́ния возлю́бленная и жела́емая, одержа́ние да́руя, всегда́ пребыва́ющее. Ты́ бо за все́х пролия́л еси́ кро́вь Твою́, Спа́се, и живоно́сною цено́ю ми́р искупи́л еси́.

Сти́х: Ду́шы и́х во благи́х водворя́тся.

Умерщвле́ние претерпе́л еси́ животворя́щее во́лею и живо́т источи́л еси́, и пи́щу присносу́щную ве́рным да́л еси́, в не́йже учини́ усо́пшыя о упова́нии воскре́сния, те́х согреше́ния вся́ проща́я благода́тию я́ко Еди́н Безгре́шен, и Еди́н Бла́г и Человеколю́бец: да все́ми пое́тся Твое́ И́мя, Христе́, спаси́тельное сла́вим Человеколю́бие Твое́.

Сти́х: Блаже́ни, я́же избра́л и прия́л еси́ Го́споди.

Живы́ми госпо́дьствующа, Богонача́льною вла́стию, и ме́ртвыми влады́чествующа, Тебе́, Христе́, зна́юще мо́лимся, ве́рныя рабы́ Твоя́, к Тебе́ Еди́ному Благода́телю отше́дшыя, те́х упоко́й со избра́нными Твои́ми, Человеколю́бче, на ме́сте утеше́ния, во святы́х све́тлостех: Воли́тель бо ми́лости еси́, и спаса́еши я́ко Бо́г, и́хже по о́бразу Твоему́ созда́л еси́, Еди́не Многоми́лостиве.

Сла́ва, гла́с 6.

Нача́ток ми́ и соста́в зижди́тельное твое́ бы́сть повеле́ние: восхоте́в бо от неви́димаго и ви́димаго естества́, жи́ва мя́ соста́вити, от земли́ у́бо те́ло созда́в, да́л же ми́ еси́ ду́шу, боже́ственным твои́м и животворя́щим вдохнове́нием. Те́мже спа́се, рабы́ твоя́ во стране́ живы́х, и в кро́вех пра́ведных упоко́й.

И ны́не, Богоро́дичен:

Яви́лася еси́ пребыва́лище боголе́пно, Пречи́стая: Бо́га бо вмести́ла еси́, и Христа́ родила́ еси́, Неискусобра́чная Ма́ти Де́во, во двою́ Существу́, во Еди́ной же Ипоста́си. Того́ умоли́, Чи́стая, Единоро́днаго Пе́рвенца, Тя́ Де́ву Непоро́чную, и по рождестве́ сохра́ншаго, ду́шы упоко́ити ве́рою усо́пших во све́те, и в нетле́ннем блаже́нстве.

А́ще пое́ши Параста́с:

Трисвято́е: и по О́тче на́ш: Тропари́ сия́, гла́с 4:

Со ду́хи пра́ведных сконча́вшихся, ду́шу раба́ Твоего́, Спа́се, упоко́й, сохраня́я ю́ во блаже́нной жи́зни, я́же у тебе́, Человеколю́бче.

В поко́ищи Твое́м, Го́споди, иде́же вси́ святи́и Твои́ упокоева́ются, упоко́й и души́ раба́ Твоего́, я́ко Еди́н еси́ Человеколю́бец.

Сла́ва: Ты́ еси́ Бо́г соше́дый во а́д, и у́зы окова́нных разреши́вый, Са́м и души́ раба́ Твоего́ упоко́й.

И ны́не, богоро́дичен:

Еди́на чи́стая и непоро́чная Де́во, Бо́га без се́мене ро́ждшая, моли́ спасти́ся души́ его́.

Та́же иере́й глаго́лет ектению́:

Поми́луй на́с, Бо́же, по вели́цей ми́лости Твое́й, мо́лим Ти́ ся́, услы́ши и поми́луй.

На у́трени же и по статиях, и по 3 и 6 пе́сни глаго́ли:

Па́ки и па́ки ми́ром Го́споду помо́лимся.

Еще́ мо́лимся о упокое́нии ду́ш усо́пшаго раба́ Бо́жия [имяре́к], и о е́же прости́тися ему́ вся́кому прегреше́нию, во́льному же и нево́льному.

Ли́к: Го́споди, поми́луй. (Три́жды).

Я́ко да Госпо́дь Бо́г учини́т души́ его́ иде́же пра́веднии упокоя́ются

Ли́к: Го́споди, поми́луй. (Три́жды).

Ми́лости Бо́жия, Ца́рства Небе́снаго и оставле́ния грехо́в и́х у Христа́, безсме́ртнаго Царя́ и Бо́га на́шего, про́сим.

Ли́к: Пода́й, Го́споди.

Диа́кон: Го́споду помо́лимся.

Ли́к: Го́споди, поми́луй.

Иере́й чте́т моли́тву сию́ вта́й:

Бо́же духо́в и вся́кия пло́ти, сме́рть попра́вый и диа́вола упраздни́вый, и живо́т мiру Твоему́ дарова́вый: Са́м, Го́споди, упоко́й души́ усо́пшаго раба́ Твоего́ [имяре́к], в ме́сте све́тле, в ме́сте зла́чне, в ме́сте поко́йне, отню́дуже отбеже́ боле́знь, печа́ль и воздыха́ние. Вся́кое согреше́ние, соде́янное и́м сло́вом, или́ де́лом, или́ помышле́нием, я́ко благи́й человеколю́бец Бо́г, прости́, я́ко не́сть челове́к, и́же жи́в бу́дет и не согреши́т. Ты́ бо Еди́н кроме́ греха́, пра́вда Твоя́ пра́вда во ве́ки, и сло́во Твое́ и́стина.

Возгла́с: Я́ко Ты́ еси́ воскресе́ние и живо́т, и поко́й усо́пшаго раба́ Твоего́ [имяре́к], Христе́ Бо́же на́ш, и Тебе́ сла́ву возсыла́ем, со безнача́льным Твои́м Отце́м, и пресвяты́м и благи́м и животворя́щим Твои́м Ду́хом, ны́не и при́сно, и во ве́ки веко́в.

Ли́к: Ами́нь.

Глаго́лет иере́й или́ диа́кон: Прему́дрость.

Мы́ же: Честне́йшую херуви́м. Иере́й: Сла́ва тебе́ Христе́ Бо́же, упова́ние на́ше, сла́ва тебе́.

Сла́ва: И ны́не: Го́споди поми́луй, три́жды. Благослови́.

Иере́й отпу́ст:

Воскресы́й из ме́ртвых, Христо́с, и́стинный Бо́г на́ш, моли́твами Пречи́стыя Своея́ Ма́тере, святы́х сла́вных и всехва́льных Апо́стол, преподо́бных и богоно́сных оте́ц на́ших и все́х святы́х, души́ от на́с преста́вльшагося раба́ Своего́, в селе́ниих пра́ведных учини́т, в не́дрех Авраа́ма упоко́ит и с пра́ведными причте́т, и на́с поми́лует, я́ко Бла́г и Человеколю́бец.

И по отпусте глаго́лет диа́кон си́це:

Во блаже́нном успе́нии вечный поко́й, пода́ждь Го́споди, усопшему рабу твоему́ [имяре́к], и сотвори́ ему́ ве́чную па́мять.

Ли́к: Ве́чная па́мять. Трижды.

А́ще иере́й глаго́лет: Благослове́н Бо́г на́ш:

А́ще ли не иере́й: Моли́тв ра́ди пречи́стыя твоея́ ма́тере и все́х святы́х твои́х, Го́споди Иису́се Христе́ Бо́же на́ш, поми́луй на́с, ами́нь.

Царю́ небе́сный: Трисвято́е: О́тче на́ш:

Тропари́ сия́: Поми́луй на́с, Го́споди:

Та́же Го́споди поми́луй, 12

Моли́тва 1-я́, святого Макария Великого, к Бо́гу Отцу́

Бо́же ве́чный и Царю́ вся́каго созда́ния, сподо́бивый мя́ да́же в ча́с се́й доспе́ти, прости́ ми́ грехи́, я́же сотвори́х в се́й де́нь де́лом, сло́вом и помышле́нием, и очи́сти, Го́споди, смире́нную мою́ ду́шу от вся́кия скве́рны пло́ти и ду́ха. И да́ждь ми́, Го́споди, в нощи́ се́й со́н прейти́ в ми́ре, да воста́в от смире́ннаго ми́ ло́жа, благоугожду́ пресвято́му и́мени Твоему́, во вся́ дни́ живота́ моего́, и поперу́ борю́щия мя́ враги́ плотски́я и безпло́тныя. И изба́ви мя́, Го́споди, от помышле́ний су́етных, оскверня́ющих мя́, и по́хотей лука́вых. Я́ко Твое́ е́сть ца́рство, и си́ла и сла́ва, Отца́ и Сы́на и Свята́го Ду́ха, ны́не и при́сно и во ве́ки веко́в. Ами́нь.

Моли́тва 2-я́, святого Антио́ха, ко Го́споду на́шему Иису́су Христу́

Вседержи́телю, Сло́во О́тчее, Са́м соверше́н сы́й, Иису́се Христе́, мно́гаго ра́ди милосе́рдия Твоего́ никогда́же отлуча́йся мене́, раба́ Твоего́, но всегда́ во мне́ почива́й. Иису́се, до́брый Па́стырю Твои́х ове́ц, не преда́ждь мене́ крамоле́ змии́не, и жела́нию сатанину́ не оста́ви мене́, я́ко се́мя тли́ во мне́ е́сть. Ты́ у́бо, Го́споди Бо́же покланя́емый, Царю́ Святы́й, Иису́се Христе́, спя́ща мя́ сохрани́ немерца́ющим све́том, Ду́хом Твои́м Святы́м, И́мже освяти́л еси́ Твоя́ ученики́. Да́ждь, Го́споди, и мне́, недосто́йному рабу́ Твоему́, спасе́ние Твое́ на ло́жи мое́м: просвети́ у́м мо́й све́том ра́зума свята́го Ева́нгелия Твоего́, ду́шу любо́вию Креста́ Твоего́, се́рдце чистото́ю словесе́ Твоего́, те́ло мое́ Твое́ю стра́стию безстра́стною, мы́сль мою́ Твои́м смире́нием сохрани́, и воздви́гни мя́ во вре́мя подо́бно на Твое́ славосло́вие. Я́ко препросла́влен еси́ со Безнача́льным Твои́м Отце́м и с Пресвяты́м Ду́хом во ве́ки. Ами́нь.

Моли́тва 3-я́, ко Пресвято́му Ду́ху

Го́споди, Царю́ Небе́сный, Уте́шителю, Душе́ и́стины, умилосе́рдися и поми́луй мя́ гре́шнаго раба́ Твоего́, и отпусти́ ми́ недосто́йному, и прости́ вся́, ели́ка Ти́ согреши́х дне́сь я́ко челове́к, па́че же и не я́ко челове́к, но и горе́е скота́, во́льныя моя́ грехи́ и нево́льныя, ве́домыя и неве́домыя: я́же от ю́ности и нау́ки злы́, и я́же су́ть от на́гльства и уны́ния. А́ще и́менем Твои́м кля́хся, или́ поху́лих е́ в помышле́нии мое́м; или́ кого́ укори́х; или́ оклевета́х кого́ гне́вом мои́м, или́ опеча́лих, или́ о че́м прогне́вахся; или́ солга́х, или́ безго́дно спа́х, или́ ни́щ прии́де ко мне́, и презре́х его́; или́ бра́та моего́ опеча́лих, или́ сва́дих, или́ кого́ осуди́х; или́ развелича́хся, или́ разгорде́хся, или́ разгне́вахся; или́ стоя́щу ми́ на моли́тве, у́м мо́й о лука́вствии ми́ра сего́ подви́жеся, или́ развраще́ние помы́слих; или́ объядо́хся, или́ опи́хся, или́ без ума́ смея́хся; или́ лука́вое помы́слих, или́ добро́ту чужду́ю ви́дев, и то́ю уя́звлен бы́х се́рдцем; или́ неподо́бная глаго́лах, или́ греху́ бра́та моего́ посмея́хся, моя́ же су́ть безчи́сленная согреше́ния; или́ о моли́тве не ради́х, или́ и́но что́ соде́ях лука́вое, не по́мню, та́ бо вся́ и бо́льша си́х соде́ях. Поми́луй мя́, Тво́рче мо́й Влады́ко, уны́лаго и недосто́йнаго раба́ Твоего́, и оста́ви ми́, и отпусти́, и прости́ мя́, я́ко Бла́г и Человеколю́бец, да с ми́ром ля́гу, усну́ и почи́ю, блу́дный, гре́шный и окая́нный а́з, и поклоню́ся, и воспою́, и просла́влю пречестно́е и́мя Твое́, со Отце́м, и Единоро́дным Его́ Сы́ном, ны́не и при́сно и во ве́ки. Ами́нь.

Моли́тва 4-я́, святого Макария Великого

Что́ Ти́ принесу́, или́ что́ Ти́ возда́м, великодарови́тый Безсме́ртный Царю́, ще́дре и Человеколю́бче Го́споди, я́ко леня́щася мене́ на Твое́ угожде́ние, и ничто́же бла́го сотво́рша, приве́л еси́ на коне́ц мимоше́дшаго дне́ сего́, обраще́ние и спасе́ние души́ мое́й стро́я? Ми́лостив ми́ бу́ди гре́шному и обнаже́нному вся́каго де́ла бла́га, возста́ви па́дшую мою́ ду́шу, оскверни́вшуюся в безме́рных согреше́ниих, и отыми́ от мене́ ве́сь по́мысл лука́вый ви́димаго сего́ жития́. Прости́ моя́ согреше́ния, еди́не Безгре́шне, я́же Ти́ согреши́х в се́й де́нь, ве́дением и неве́дением, сло́вом, и де́лом, и помышле́нием, и все́ми мои́ми чу́вствы. Ты́ Са́м, покрыва́я, сохрани́ мя́ от вся́каго сопроти́внаго обстоя́ния Боже́ственною Твое́ю вла́стию, и неизрече́нным человеколю́бием, и си́лою. Очи́сти, Бо́же, очи́сти мно́жество грехо́в мои́х. Благоволи́, Го́споди, изба́вити мя́ от се́ти лука́ваго, и спаси́ стра́стную мою́ ду́шу, и осени́ мя́ све́том лица́ Твоего́, егда́ прии́деши во сла́ве, и неосужде́нна ны́не сно́м усну́ти сотвори́, и без мечта́ния, и несмуще́н по́мысл раба́ Твоего́ соблюди́, и всю́ сатанину́ де́тель отжени́ от мене́, и просвети́ ми́ разу́мныя о́чи серде́чныя, да не усну́ в сме́рть. И посли́ ми́ А́нгела ми́рна, храни́теля и наста́вника души́ и те́лу моему́, да изба́вит мя́ от вра́г мои́х; да воста́в со одра́ моего́, принесу́ Ти́ благода́рственныя мольбы́. Е́й, Го́споди, услы́ши мя́ гре́шнаго и убо́гаго раба́ Твоего́, изволе́нием и со́вестию; да́руй ми́ воста́вшу словесе́м Твои́м поучи́тися, и уны́ние бесо́вское дале́че от мене́ отгна́но бы́ти сотвори́ Твои́ми А́нгелы; да благословлю́ и́мя Твое́ свято́е, и просла́влю, и сла́влю Пречи́стую Богоро́дицу Мари́ю, Ю́же да́л еси́ на́м гре́шным заступле́ние, и приими́ Сию́ моля́щуюся за ны́; ве́м бо, я́ко подража́ет Твое́ человеколю́бие, и моля́щися не престае́т. Тоя́ заступле́нием, и Честна́го Креста́ зна́мением, и все́х святы́х Твои́х ра́ди, убо́гую ду́шу мою́ соблюди́, Иису́се Христе́ Бо́же на́ш, я́ко Свя́т еси́, и препросла́влен во ве́ки. Ами́нь.

Моли́тва 5-я́

Го́споди Бо́же на́ш, е́же согреши́х во дни́ се́м сло́вом, де́лом и помышле́нием, я́ко Бла́г и Человеколю́бец прости́ ми́. Ми́рен со́н и безмяте́жен да́руй ми́. А́нгела Твоего́ храни́теля посли́, покрыва́юща и соблюда́юща мя́ от вся́каго зла́, я́ко Ты́ еси́ храни́тель душа́м и телесе́м на́шим, и Тебе́ сла́ву возсыла́ем, Отцу́ и Сы́ну и Свято́му Ду́ху, ны́не и при́сно и во ве́ки веко́в. Ами́нь.

Моли́тва 6-я́

Го́споди Бо́же на́ш, в Него́же ве́ровахом, и Его́же и́мя па́че вся́каго и́мене призыва́ем, да́ждь на́м, ко сну́ отходя́щим, осла́бу души́ и те́лу, и соблюди́ на́с от вся́каго мечта́ния, и те́мныя сла́сти кроме́; уста́ви стремле́ние страсте́й, угаси́ разжже́ния воста́ния теле́снаго. Да́ждь на́м целому́дренне пожи́ти де́лы и словесы́; да доброде́тельное жи́тельство восприе́млюще, обетова́нных не отпаде́м благи́х Твои́х, я́ко благослове́н еси́ во ве́ки. Ами́нь.

Моли́тва 7-я́, святого Иоа́нна Златоу́ста (24 моли́твы, по числу́ часо́в дня́ и но́чи)

Го́споди, не лиши́ мене́ небе́сных Твои́х бла́г. Го́споди, изба́ви мя́ ве́чных му́к. Го́споди, умо́м ли или́ помышле́нием, сло́вом или́ де́лом согреши́х, прости́ мя́. Го́споди, изба́ви мя́ вся́каго неве́дения и забве́ния, и малоду́шия, и окамене́ннаго нечу́вствия. Го́споди, изба́ви мя́ от вся́каго искуше́ния. Го́споди, просвети́ мое́ се́рдце, е́же помрачи́ лука́вое похоте́ние. Го́споди, а́з я́ко челове́к согреши́х, Ты́ же я́ко Бо́г ще́др, поми́луй мя́, ви́дя не́мощь души́ моея́. Го́споди, посли́ благода́ть Твою́ в по́мощь мне́, да просла́влю и́мя Твое́ свято́е. Го́споди Иису́се Христе́, напиши́ мя́ раба́ Твоего́ в кни́зе живо́тней и да́руй ми́ коне́ц благи́й. Го́споди, Бо́же мо́й, а́ще и ничто́же бла́го сотвори́х пред Тобо́ю, но да́ждь ми́ по благода́ти Твое́й положи́ти нача́ло благо́е. Го́споди, окропи́ в се́рдце мое́м ро́су благода́ти Твоея́. Го́споди небесе́ и земли́, помяни́ мя́ гре́шнаго раба́ Твоего́, сту́днаго и нечи́стаго, во Ца́рствии Твое́м. Ами́нь.

Го́споди, в покая́нии приими́ мя́. Го́споди, не оста́ви мене́. Го́споди, не введи́ мене́ в напа́сть. Го́споди, да́ждь ми́ мы́сль бла́гу. Го́споди, да́ждь ми́ сле́зы и па́мять сме́ртную, и умиле́ние. Го́споди, да́ждь ми́ по́мысл испове́дания грехо́в мои́х. Го́споди, да́ждь ми́ смире́ние, целому́дрие и послуша́ние. Го́споди, да́ждь ми́ терпе́ние, великоду́шие и кро́тость. Го́споди, всели́ в мя́ ко́рень благи́х, стра́х Тво́й в се́рдце мое́. Го́споди, сподо́би мя́ люби́ти Тя́ от всея́ души́ моея́ и помышле́ния и твори́ти во все́м во́лю Твою́. Го́споди, покры́й мя́ от челове́к не́которых, и бесо́в, и страсте́й, и от вся́кия ины́я неподо́бныя ве́щи. Го́споди, ве́си, я́ко твори́ши, я́коже Ты́ во́лиши, да бу́дет во́ля Твоя́ и во мне́ гре́шнем, я́ко благослове́н еси́ во ве́ки. Ами́нь.

Моли́тва 8-я́, ко Го́споду на́шему Иису́су Христу́

Го́споди Иису́се Христе́, Сы́не Бо́жий, ра́ди честне́йшия Ма́тере Твоея́, и безпло́тных Твои́х А́нгел, Проро́ка же и Предте́чи и Крести́теля Твоего́, богоглаго́ливых же апо́стол, све́тлых и добропобе́дных му́ченик, преподо́бных и богоно́сных оте́ц, и все́х святы́х моли́твами, изба́ви мя́ настоя́щаго обстоя́ния бесо́вскаго. Е́й, Го́споди мо́й и Тво́рче, не хотя́й сме́рти гре́шнаго, но я́коже обрати́тися и жи́ву бы́ти ему́, да́ждь и мне́ обраще́ние окая́нному и недосто́йному; изми́ мя́ от у́ст па́губнаго зми́я, зия́ющаго пожре́ти мя́ и свести́ во а́д жи́ва. Е́й, Го́споди мо́й, утеше́ние мое́, И́же мене́ ра́ди окая́ннаго в тле́нную пло́ть оболки́йся, исто́ргни мя́ от окая́нства, и утеше́ние пода́ждь души́ мое́й окая́нней. Всади́ в се́рдце мое́ твори́ти Твоя́ повеле́ния, и оста́вити лука́вая дея́ния, и получи́ти блаже́нства Твоя́: на Тя́ бо, Го́споди, упова́х, спаси́ мя́.

Моли́тва 9-я́, ко Пресвято́й Богоро́дице, Петра́ Студийского

К Тебе́ Пречи́стей Бо́жией Ма́тери а́з окая́нный припа́дая молю́ся: ве́си, Цари́це, я́ко безпреста́ни согреша́ю и прогневля́ю Сы́на Твоего́ и Бо́га моего́, и мно́гажды а́ще ка́юся, ло́ж пред Бо́гом обрета́юся, и ка́юся трепе́ща: неуже́ли Госпо́дь порази́т мя́, и по часе́ па́ки та́яжде творю́; ве́дущи сия́, Влады́чице моя́ Госпоже́ Богоро́дице, молю́, да поми́луеши, да укрепи́ши, и блага́я твори́ти да пода́си ми́. Ве́си бо, Влады́чице моя́ Богоро́дице, я́ко отню́д и́мам в не́нависти зла́я моя́ дела́, и все́ю мы́слию люблю́ зако́н Бо́га моего́; но не ве́м, Госпоже́ Пречи́стая, отку́ду я́же ненави́жду, та́ и люблю́, а блага́я преступа́ю. Не попуща́й, Пречи́стая, во́ли мое́й соверша́тися, не уго́дна бо е́сть, но да бу́дет во́ля Сы́на Твоего́ и Бо́га моего́: да мя́ спасе́т, и вразуми́т, и пода́ст благода́ть Свята́го Ду́ха, да бы́х а́з отсе́ле преста́л скверноде́йства, и про́чее пожи́л бы́х в повеле́нии Сы́на Твоего́, Ему́же подоба́ет вся́кая сла́ва, че́сть и держа́ва, со Безнача́льным Его́ Отце́м, и Пресвяты́м и Благи́м и Животворя́щим Его́ Ду́хом, ны́не и при́сно, и во ве́ки веко́в. Ами́нь.

Моли́тва 10-я́, ко Пресвято́й Богоро́дице

Блага́го Царя́ блага́я Ма́ти, Пречи́стая и Благослове́нная Богоро́дице Мари́е, ми́лость Сы́на Твоего́ и Бо́га на́шего изле́й на стра́стную мою́ ду́шу и Твои́ми моли́твами наста́ви мя́ на дея́ния блага́я, да про́чее вре́мя живота́ моего́ без поро́ка прейду́ и Тобо́ю ра́й да обря́щу, Богоро́дице Де́во, еди́на Чи́стая и Благослове́нная.

Моли́тва 11-я́, ко свято́му А́нгелу храни́телю

А́нгеле Христо́в, храни́телю мо́й святы́й и покрови́телю души́ и те́ла моего́, вся́ ми́ прости́, ели́ка согреши́х во дне́шний де́нь, и от вся́каго лука́вствия проти́внаго ми́ врага́ изба́ви мя́, да ни в ко́емже гресе́ прогне́ваю Бо́га моего́; но моли́ за мя́ гре́шнаго и недосто́йнаго раба́, я́ко да досто́йна мя́ пока́жеши бла́гости и ми́лости Всесвяты́я Тро́ицы и Ма́тере Го́спода моего́ Иису́са Христа́ и все́х святы́х. Ами́нь.

Взбра́нной Воево́де победи́тельная, я́ко изба́вльшеся от злы́х, благода́рственная воспису́ем Ти́ раби́ Твои́, Богоро́дице, но я́ко иму́щая держа́ву непобеди́мую, от вся́ких на́с бе́д свободи́, да зове́м Ти́; ра́дуйся, Неве́сто Неневе́стная.

Пресла́вная ПрисноДе́во, Ма́ти Христа́ Бо́га, принеси́ на́шу моли́тву Сы́ну Твоему́ и Бо́гу на́шему, да спасе́т Тобо́ю души́ на́ша.

Все́ упова́ние мое́ на Тя́ возлага́ю, Ма́ти Бо́жия, сохрани́ мя́ под кро́вом Твои́м.

Богоро́дице Де́во, не пре́зри мене́, гре́шнаго, тре́бующа Твоея́ по́мощи и Твоего́ заступле́ния, на Тя́ бо упова́ душа́ моя́, и поми́луй мя́.

Та́же: Моли́тва святого Иоанникия

Упова́ние мое́ Оте́ц, прибе́жище мое́ Сы́н, покро́в мо́й Ду́х Святы́й: Тро́ице Свята́я, сла́ва Тебе́.

Та́же: Досто́йно е́сть: Сла́ва и Ны́не Го́споди, поми́луй. (Три́жды) Го́споди благослови́, и отпу́ст:

Го́споди Иису́се Христе́, Сы́не Бо́жий, моли́тв ра́ди Пречи́стыя Твоея́ Ма́тере, преподо́бных и богоно́сных оте́ц на́ших и все́х святы́х, поми́луй на́с. Ами́нь.

Моли́тва святого Иоа́нна Дамаски́на и́же указу́я на о́др тво́й, глаго́ли.

Влады́ко Человеколю́бче, неуже́ли мне́ о́др се́й гро́б бу́дет, или́ еще́ окая́нную мою́ ду́шу просвети́ши дне́м? Се́ ми́ гро́б предлежи́т, се́ ми́ сме́рть предстои́т. Суда́ Твоего́, Го́споди, бою́ся и му́ки безконе́чныя, зло́е же творя́ не престаю́: Тебе́ Го́спода Бо́га моего́ всегда́ прогневля́ю, и Пречи́стую Твою́ Ма́терь, и вся́ Небе́сныя си́лы, и свята́го А́нгела храни́теля моего́. Ве́м у́бо, Го́споди, я́ко недосто́ин е́смь человеколю́бия Твоего́, но досто́ин е́смь вся́каго осужде́ния и му́ки. Но, Го́споди, или́ хощу́, или́ не хощу́, спаси́ мя́. А́ще бо пра́ведника спасе́ши, ничто́же ве́лие; и а́ще чи́стаго поми́луеши, ничто́же ди́вно: досто́йни бо су́ть ми́лости Твоея́. Но на мне́ гре́шнем удиви́ ми́лость Твою́: о се́м яви́ человеколю́бие Твое́, да не одоле́ет моя́ зло́ба Твое́й неизглаго́ланней бла́гости и милосе́рдию: и я́коже хо́щеши, устро́й о мне́ ве́щь.

Та́же с поклоне́нием до земли́, глаго́ли:

Покланя́юся тебе́, Пресвята́я Тро́ице, единосу́щная, животворя́щая и нераздели́мая, о́тче, и сы́не, и святы́й душе́: ве́рую в тя́ и испове́дуя сла́влю, благодарю́, хвалю́, почита́ю и превозношу́ тя́ и молю́: поми́луй мя́ непотре́бнаго раба́ твоего́. Три́жды. Покло́ны 3

Покланя́юся тебе́ пресвята́я Богоро́дице, твои́м рождество́м яви́вшая на́м све́т и́стинный, цари́це не́ба и земли́,, наде́ждо ненаде́жным, помо́щнице немощны́м и хода́таице все́м гре́шным. Ты́ мя́ покры́й и заступи́ от все́х бе́д и ну́жд душе́вных и теле́сных и бу́ди ми́, молю́ся, засту́пница всеси́льными твои́ми моли́твами. Покло́н 1.

Пресвята́я влады́чице Богоро́дице, приими́ сие́ ма́лое моле́ние и принеси́ е́ сы́ну твоему́ и Бо́гу на́шему да спасе́т и просвети́т тебе́ ра́ди ду́шы на́шя. Покло́н 1.

Вси́ небе́снии чи́ни, серафи́ми, херуви́ми, престо́ли, госпо́дствия, си́лы. вла́сти, нача́ла, арха́нгели и а́нгели моли́теся Бо́гу о мне́ гре́шнем, молю́ся и мил ся́ де́ю к ва́м. Покло́н 1.

Святы́й вели́кий Иоа́нне, проро́че, предте́че и крести́телю Госпо́день, страда́вый Христа́ ра́ди, и прие́мый дерзнове́ние ко влады́це, помоли́ся о мне́ гре́шнем, да спасу́ся твои́ми моли́твами. Покло́н 1.

Святи́и Бо́жии апо́столи, проро́цы, му́ченицы, святи́телие, по́стницы, преподо́бнии, пра́веднии, пустнынницы, чернори́зцы, патриа́рси, и вси́ святи́и, пострада́вшии Христа́ ра́ди, и стяжа́вшии дерзнове́ние ко влады́це, моли́теся о мне́ гре́шнем, да спасу́ся ва́шими моли́твами. Покло́н 1.

Святы́й Иоа́нне Златоу́сте со Васи́лием Вели́ким, Григо́рием Богосло́вом и чудотво́рцем Никола́ем, и со все́ми святы́ми священнонача́льники, помози́те и поми́луйте мя́ моли́твами и предста́тельством ва́шим к Бо́гу. Покло́н 1.

Святи́и святи́телие росси́йстии михаи́ле, пе́тре, алекси́е, ио́но и фили́ппе, со святы́ми чудотво́рными страстоте́рпцы, росси́йскими кня́зи, романом и дави́дом, и со святы́м равноапо́стольным князе́м влади́миром, моли́те Бо́га о мне́ гре́шнем. Покло́н 1.

Преподо́бнии и Богоно́снии отцы́ на́ши, Анто́ние и Феодо́сие, Евфи́мие, Феокти́сте, Са́вво, Ону́фрие, Варсоно́фие, Паи́сие, Па́вле препро́стый, Ма́рко и вси́ преподо́бнии, моли́те Бо́га о мне́ гре́шнем. Покло́н 1.

Преподо́бнии отцы́ на́ши Анто́ние и Феодо́сие Пече́рстии, с преподо́бными свои́ми ученики́, Ни́коном, Варлаа́мом, Стефа́ном, Исаакием, Моисе́ем, Иоа́нном многострадальным, Ма́рком и про́чими (по Преблагослове́нней Влады́чице на́шей Богоро́дице и Присноде́ве Мари́и) соприча́стника и насле́дника мя́ Ца́рствию Небе́сному сподо́бите, благода́тию и человеколю́бием Отца́, и Сы́на, и Свята́го Ду́ха, во ве́ки веко́в. Ами́нь. Покло́н 1.

Вся́ святы́я жены́, мироно́сицы, му́ченицы, преподо́бныя, и де́вы, Христо́ви досто́йно послужи́вшыя, со свято́ю великомученицею Варва́рою и всехвальною Иулиани́ею, моли́те Бо́га о мне́ гре́шнем. Покло́н 1.

Непобеди́мая и Боже́ственная си́ло честна́го и животворя́щаго креста́ Госпо́дня, не оста́ви мя́ гре́шнаго: но си́лою Твое́ю покры́й мя́ от вся́каго искуше́ния душе́внаго и теле́снаго. Покло́н 1.

Пречи́стая Влады́чице Богоро́дице, упова́ние все́х христиа́н, поне́же ина́го упова́ния и наде́жды не и́мам, ра́зве Тебе́, всенепоро́чная Влады́чице моя́, Госпоже́ Богоро́дице, Ма́ти Христа́ Бо́га моего́: те́мже поми́луй, и изба́ви мя́ от все́х зо́л мои́х, и умоли́ ми́лостиваго Сы́на Своего́ и Бо́га моего́, да поми́лует окая́нную ду́шу мою́, и да изба́вит мя́ от ве́чных му́к, и сподо́бит мя́ Ца́рствия Своего́. Покло́н 1.

Святы́й А́нгеле храни́телю мо́й, покры́й мя́ крило́ма твоея́ бла́гости, и отжени́ от мене́ вся́кое лука́вое бесо́вское де́йство, и моли́ Бо́га о мне́ гре́шнем. Покло́н 1.

Хотя́й же возлещи́ на посте́лю, глаго́ли сие́:

Просвети́ о́чи мои́, Христе́ Бо́же, да не когда́ усну́ в сме́рть, да не когда́ рече́т вра́г мо́й: укрепи́хся на него́.

Сла́ва: Засту́пник души́ моея́ бу́ди, Бо́же, я́ко посреде́ хожду́ сете́й мно́гих: изба́ви ми́ от ни́х, и спаси́ мя́, Бла́же, я́ко Человеколю́бец.

И ны́не: Пресла́вную Бо́жию Ма́терь, и святы́х А́нгел святе́йшую, немо́лчно воспои́м, се́рдцем и усты́ Богоро́дицу сию́ испове́дающе, я́ко вои́стинну ро́ждшую на́м Бо́га воплоще́нна, и моля́щуюся непреста́нно о душа́х на́ших.

Та́же целу́й кре́ст тво́й, и прекрести́ кресто́м ме́сто твое́ от главы́ и до но́г, та́кожде и от все́х стра́н, глаго́ля моли́тву честно́му кресту́:

Да воскре́снет Бо́г, и расточа́тся врази́ Его́, и да бежа́т от лица́ Его́, ненави́дящии Его́: я́ко исчеза́ет ды́м, да исче́знут: я́ко та́ет во́ск от лица́ огня́: та́ко да поги́бнут бѣ́си от лица́ лю́бящих Бо́га, и зна́менующихся кре́стным зна́мением, и в весе́лии глаго́лющих: ра́дуйся, пречестны́й и животворя́щий кре́сте Госпо́день, прогоня́яй бе́сы си́лою на тебе́ пропя́таго Го́спода на́шего Иису́са Христа́, во а́д сше́дшаго, и попра́вшаго си́лу диа́волю, и дарова́вшаго на́м тебе́ кре́ст Сво́й честны́й на прогна́ние вся́каго супоста́та. О пречестны́й и животворя́щий кре́сте Госпо́день, помога́й ми́ со свято́ю Госпоже́ю Де́вою Богоро́дицею, и со все́ми святы́ми во ве́ки. Ами́нь.

Та́же вме́сто проше́ния:

Осла́би, оста́ви, прости́, Бо́же:

Моли́тва

Ненави́дящих и оби́дящих на́с прости́, Го́споди Человеколю́бче. Благотворя́щим благосотвори́. Бра́тиям и сро́дником на́шим да́руй я́же ко спасе́нию проше́ния и жи́знь ве́чную. В не́мощех су́щия посети́ и исцеле́ние да́руй. И́же на мо́ри упра́ви. Путеше́ствующим спутеше́ствуй. Правосла́вным христиа́ном спобо́рствуй. Служа́щим и ми́лующим на́с грехо́в оставле́ние да́руй. Запове́давших на́м недосто́йным моли́тися о ни́х поми́луй по вели́цей Твое́й ми́лости. Помяни́, Го́споди, пре́жде усо́пших оте́ц и бра́тий на́ших и упоко́й и́х, иде́же присеща́ет све́т лица́ Твоего́. Помяни́, Го́споди, бра́тий на́ших плене́нных и изба́ви я́ от вся́каго обстоя́ния. Помяни́, Го́споди, плодонося́щих и доброде́лающих во святы́х Твои́х це́рквах, и да́ждь и́м я́же ко спасе́нию проше́ния и жи́знь ве́чную. Помяни́, Го́споди, и на́с, смире́нных и гре́шных и недосто́йных ра́б Твои́х, и просвети́ на́ш у́м све́том ра́зума Твоего́, и наста́ви на́с на стезю́ за́поведей Твои́х, моли́твами Пречи́стыя Влады́чицы на́шея Богоро́дицы и Присноде́вы Мари́и и все́х Твои́х святы́х: я́ко благослове́н еси́ во ве́ки веко́в. Ами́нь.

Испове́дание грехо́в повседне́вное

Испове́даю Тебе́ Го́споду Бо́гу моему́ и Творцу́, во Святе́й Тро́ице Еди́ному, сла́вимому и покланя́емому, Отцу́ и Сы́ну и Свято́му Ду́ху, вся́ моя́ грехи́, я́же соде́ях во вся́ дни́ живота́ моего́, и на вся́кий ча́с, и в настоя́щее вре́мя, и в преше́дшия дни́ и но́щи, де́лом, сло́вом, помышле́нием, объяде́нием, пия́нством, тайнояде́нием, праздносло́вием, уны́нием, ле́ностию, прекосло́вием, непослуша́нием, оклевета́нием, осужде́нием, небреже́нием, самолю́бием, многостяжа́нием, хище́нием, неправдоглаго́ланием, скверноприбы́тчеством, мшелои́мством, ревнова́нием, за́вистию, гне́вом, памятозло́бием, не́навистию, лихои́мством и все́ми мои́ми чу́вствы: зре́нием, слу́хом, обоня́нием, вку́сом, осяза́нием и про́чими мои́ми грехи́, душе́вными вку́пе и теле́сными, и́миже Тебе́ Бо́га моего́ и Творца́ прогне́вах, и бли́жняго моего́ онепра́вдовах: о си́х жале́я, ви́нна себе́ Тебе́ Бо́гу моему́ представля́ю, и име́ю во́лю ка́ятися: то́чию, Го́споди Бо́же мо́й, помози́ ми́, со слеза́ми смире́нно молю́ Тя́: преше́дшая же согреше́ния моя́ милосе́рдием Твои́м прости́ ми́, и разреши́ от все́х си́х, я́же изглаго́лах пред Тобо́ю, я́ко Бла́г и Человеколю́бец.

Ве́дати же и сие́, я́ко с ве́чера тре́бе чи́стою водо́ю уста́ измы́ти: но́щи же тоя́ и ве́сь де́нь то́й и́же пред служе́нием, отню́дь да не де́рзнет прикосну́тися жене́ свое́й свяще́нник, ниже́ да бу́дет спя́й с не́ю на еди́ном одре́: сме́ртне бо согреши́т, и стра́шному Бо́жию суду́ пови́нен бу́дет.

Воспряну́в без ле́ности, и истрезви́вся, воста́в от сна́, рцы́ сие́:

Во и́мя Отца́, и Сы́на, и Свята́го Ду́ха. Ами́нь.

Посе́м посто́й ма́ло молча́, дóндеже утиша́тся вся́ чу́вствия: и тогда́ сотвори́ три́ покло́ны, глаго́ля:

Го́споди Иису́се Христе́, Сы́не Бо́жий, поми́луй мя́, гре́шнаго.

Та́же начни́ си́це:

Го́споди Иису́се Христе́, Сы́не Бо́жий, моли́тв ра́ди Пречи́стыя Твоея́ Ма́тери, и все́х святы́х, поми́луй на́с. Ами́нь.

Сла́ва Тебе́, Бо́же на́ш, сла́ва Тебе́.

Моли́тва Свято́му Ду́ху:

Царю́ Небе́сный, Уте́шителю, Ду́ше и́стины, И́же везде́ сы́й и вся́ исполня́яй, Сокро́вище благи́х и жи́зни Пода́телю, прииди́ и всели́ся в ны́, и очи́сти ны́ от вся́кия скве́рны, и спаси́, Бла́же, души́ на́шя].

Трисвято́е:

Святы́й Бо́же, Святы́й Кре́пкий, Святы́й Безсме́ртный, поми́луй на́с. (трижды)

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь

Моли́тва ко Пресвято́й Тро́ице

Пресвята́я Тро́ице, поми́луй на́с; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй. (Три́жды).

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Моли́тва Госпо́дня

О́тче на́ш, И́же еси́ на небесе́х! Да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на небеси́ и на земли́. Хле́б на́ш насу́щный да́ждь на́м дне́сь; и оста́ви на́м до́лги на́ша, я́коже и мы́ оставля́ем должнико́м на́шим; и не введи́ на́с во искуше́ние, но изба́ви на́с от лука́ваго.

Тропари́ Тро́ичны:

Воста́вше от сна́, припа́даем Ти́, Бла́же, и а́нгельскую пе́снь вопие́м Ти́, Си́льне: Свя́т, Свя́т, Свя́т еси́, Бо́же, Богоро́дицею поми́луй на́с.

Сла́ва: От одра́ и сна́ воздви́гл мя́ еси́, Го́споди, у́м мо́й просвети́ и се́рдце, и устне́ мои́ отве́рзи, во е́же пе́ти Тя́, Свята́я Тро́ице: Свя́т, Свя́т, Свя́т еси́, Бо́же, Богоро́дицею поми́луй на́с.

И ны́не: Внеза́пно Судия́ прии́дет, и коего́ждо дея́ния обнажа́тся, но стра́хом зове́м в полу́нощи: Свя́т, Свя́т, Свя́т еси́, Бо́же, Богоро́дицею поми́луй на́с.

Го́споди, поми́луй, 12. И моли́тву сию́:

От сна́ воста́в, благодарю́ Тя́, Свята́я Тро́ице, я́ко мно́гия ра́ди Твоея́ бла́гости и долготерпе́ния не прогне́вался еси́ на мя́, лени́ваго и гре́шнаго, ниже́ погуби́л мя́ еси́ со беззако́ньми мои́ми; но человеколю́бствовал еси́ обы́чно и в неча́янии лежа́щаго воздви́гл мя́ еси́, во е́же у́треневати и славосло́вити держа́ву Твою́. И ны́не просвети́ мои́ о́чи мы́сленныя, отве́рзи моя́ уста́ поуча́тися словесе́м Твои́м, и разуме́ти за́поведи Твоя́, и твори́ти во́лю Твою́, и пе́ти Тя́ во испове́дании серде́чнем, и воспева́ти всесвято́е и́мя Твое́, Отца́ и Сы́на и Свята́го Ду́ха, ны́не и при́сно и во ве́ки веко́в. Ами́нь.

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псало́м 50:

Поми́луй мя́, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя́ от беззако́ния моего́, и от греха́ моего́ очи́сти мя́; я́ко беззако́ние мое́ а́з зна́ю, и гре́х мо́й предо мно́ю е́сть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти́. Се́ бо, в беззако́ниях зача́т е́смь, и во гресе́х ро́ди мя́ ма́ти моя́. Се́ бо, и́стину возлюби́л еси́; безве́стная и та́йная прему́дрости Твоея́ яви́л ми́ еси́. Окропи́ши мя́ иссо́пом, и очи́щуся; омы́еши мя́, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от гре́х мои́х и вся́ беззако́ния моя́ очи́сти. Се́рдце чи́сто сози́жди во мне́, Бо́же, и ду́х пра́в обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми́ ра́дость спасе́ния Твоего́ и Ду́хом Влады́чним утверди́ мя́. Научу́ беззако́нныя путе́м Твои́м, и нечести́вии к Тебе́ обратя́тся. Изба́ви мя́ от крове́й, Бо́же, Бо́же спасе́ния моего́; возра́дуется язы́к мо́й пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, да́л бы́х у́бо: всесожже́ния не благоволи́ши. Же́ртва Бо́гу ду́х сокруше́н; се́рдце сокруше́нно и смире́нно Бо́г не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на олта́рь Тво́й тельцы́.

Ве́рую во еди́наго Бо́га Отца́ Вседержи́теля, Творца́ не́бу и земли́, ви́димым же все́м и неви́димым. И во еди́наго Го́спода Иису́са Христа́, Сы́на Бо́жия, Единоро́днаго, И́же от Отца́ рожде́ннаго пре́жде все́х ве́к. Све́та от Све́та, Бо́га и́стинна от Бо́га и́стинна, рожде́нна, несотворе́нна, единосу́щна Отцу́, И́мже вся́ бы́ша. На́с ра́ди челове́к и на́шего ра́ди спасе́ния сше́дшаго с небе́с и воплоти́вшагося от Ду́ха Свя́та и Мари́и Де́вы и вочелове́чшася. Распя́таго же за ны́ при Понти́йстем Пила́те, и страда́вша, и погребе́нна. И воскре́сшаго в тре́тий де́нь по Писа́нием. И возше́дшаго на Небеса́, и седя́ща одесну́ю Отца́. И па́ки гряду́щаго со сла́вою суди́ти живы́м и ме́ртвым, его́же Ца́рствию не бу́дет конца́. И в Ду́ха Свята́го, Го́спода, Животворя́щаго, И́же от Отца́ исходя́щаго, И́же со Отце́м и Сыно́м спокланя́ема и ссла́вима, глаго́лавшаго проро́ки. Во еди́ну Святу́ю, Собо́рную и Апо́стольскую Це́рковь. Испове́дую еди́но креще́ние во оставле́ние грехо́в. Ча́ю воскресе́ния ме́ртвых, и жи́зни бу́дущаго ве́ка. Ами́нь.

Моли́тва 1, свята́го Мака́рия Вели́каго:

Бо́же, очи́сти мя́ гре́шнаго, я́ко николи́же сотвори́х благо́е пред Тобо́ю, но изба́ви мя́ от лука́ваго, и да бу́дет во мне́ во́ля Твоя́; да неосужде́нно отве́рзу уста́ моя́ недосто́йная и восхвалю́ и́мя Твое́ свято́е, Отца́ и Сы́на и Свята́го Ду́ха, ны́не и при́сно и во ве́ки веко́в. Ами́нь.

Моли́тва 2, того́жде свята́го:

От сна́ воста́в, полу́нощную пе́снь приношу́ Ти́, Спа́се, и припа́дая вопию́ Ти́: не да́ждь ми́ усну́ти во грехо́вней сме́рти, но уще́дри мя́, распны́йся во́лею, и лежа́щаго мя́ в ле́ности ускори́в возста́ви, и спаси́ мя́ в предстоя́нии и моли́тве, и по сне́ нощне́м возсия́й ми́ де́нь безгре́шен, Христе́ Бо́же, и спаси́ мя́.

Моли́тва 3, того́жде свята́го:

К Тебе́, Влады́ко Человеколю́бче, от сна́ воста́в прибега́ю, и на дела́ Твоя́ подвиза́юся милосе́рдием Твои́м, и молю́ся Тебе́: помози́ ми́ на вся́кое вре́мя, во вся́кой ве́щи, и изба́ви мя́ от вся́кия мирски́я злы́я ве́щи и диа́вольскаго поспеше́ния, и спаси́ мя́, и введи́ в Ца́рство Твое́ ве́чное. Ты́ бо еси́ мо́й Сотвори́тель и вся́кому бла́гу Промы́сленник и Пода́тель, о Тебе́ же все́ упова́ние мое́, и Тебе́ сла́ву возсыла́ю, ны́не и при́сно и во ве́ки веко́в. Ами́нь.

Моли́тва 4, того́жде свята́го Мака́рия:

Го́споди, И́же мно́гою Твое́ю бла́гостию и вели́кими щедро́тами Твои́ми да́л еси́ мне́, рабу́ Твоему́, мимоше́дшее вре́мя но́щи сея́ без напа́сти прейти́ от вся́каго зла́ проти́вна; Ты́ Са́м, Влады́ко, вся́ческих Тво́рче, сподо́би мя́ и́стинным Твои́м све́том и просвеще́нным се́рдцем твори́ти во́лю Твою́, ны́не и при́сно и во ве́ки веко́в. Ами́нь.

Моли́тва 5, свята́го Васи́лия Вели́каго:

Го́споди Вседержи́телю, Бо́же си́л и вся́кия пло́ти, в вы́шних живы́й и на смире́нныя призира́яй, се́рдца же и утро́бы испыту́яй и сокрове́нная челове́ков я́ве предве́дый, Безнача́льный и Присносу́щный Све́те, у Него́ же не́сть премене́ния, или́ преложе́ния осене́ние; Са́м, Безсме́ртный Царю́, приими́ моле́ния на́ша, я́же в настоя́щее вре́мя, на мно́жество Твои́х щедро́т дерза́юще, от скве́рных к Тебе́ усте́н твори́м, и оста́ви на́м прегреше́ния на́ша, я́же де́лом, и сло́вом, и мы́слию, ве́дением, или́ неве́дением согреше́нная на́ми; и очи́сти ны́ от вся́кия скве́рны пло́ти и ду́ха. И да́руй на́м бо́дренным се́рдцем и тре́звенною мы́слию всю́ настоя́щаго жития́ но́щь прейти́, ожида́ющим прише́ствия све́тлаго и явле́ннаго дне́ Единоро́днаго Твоего́ Сы́на, Го́спода и Бо́га и Спа́са на́шего Иису́са Христа́, в о́ньже со сла́вою Судия́ все́х прии́дет, кому́ждо отда́ти по де́лом его́; да не па́дше и облени́вшеся, но бо́дрствующе и воздви́жени в де́лание обря́щемся гото́ви, в ра́дость и Боже́ственный черто́г сла́вы Его́ совни́дем, иде́же пра́зднующих гла́с непреста́нный, и неизрече́нная сла́дость зря́щих Твоего́ лица́ добро́ту неизрече́нную. Ты́ бо еси́ и́стинный Све́т, просвеща́яй и освяща́яй вся́ческая, и Тя́ пое́т вся́ тва́рь во ве́ки веко́в. Ами́нь.

Моли́тва 6, того́жде свята́го:

Тя́ благослови́м, вы́шний Бо́же и Го́споди ми́лости, творя́щаго при́сно с на́ми вели́кая же и неизсле́дованная, сла́вная же и ужа́сная, и́хже не́сть числа́, пода́вшаго на́м со́н во упокое́ние не́мощи на́шея, и ослабле́ние трудо́в многотру́дныя пло́ти. Благодари́м Тя́, я́ко не погуби́л еси́ на́с со беззако́ньми на́шими, но человеколю́бствовал еси́ обы́чно, и в неча́янии лежа́щия ны́ воздви́гл еси́, во е́же славосло́вити держа́ву Твою́. Те́мже мо́лим безме́рную Твою́ бла́гость, просвети́ на́ша мы́сли, очеса́, и у́м на́ш от тя́жкаго сна́ ле́ности возста́ви: отве́рзи на́ша уста́, и испо́лни я́ Твоего́ хвале́ния, я́ко да возмо́жем непоколе́блемо пе́ти же и испове́датися Тебе́, во все́х, и от все́х сла́вимому Бо́гу, Безнача́льному Отцу́, со Единоро́дным Твои́м Сыно́м, и Всесвяты́м и Благи́м и Животворя́щим Твои́м Ду́хом, ны́не и при́сно и во ве́ки веко́в. Ами́нь.

Моли́тва 7.

Пе́снь ко Пресвяте́й Богоро́дице:

Воспева́ю благода́ть Твою́, Влады́чице, молю́ Тя́, у́м мо́й облагодати́. Ступа́ти пра́во мя́ наста́ви, путе́м Христо́вых за́поведей. Бде́ти к пе́сни укрепи́, уны́ния со́н отгоня́ющи. Свя́зана плени́цами грехопаде́ний, мольба́ми Твои́ми разреши́, Богоневе́сто. В но́щи мя́ и во дни́ сохраня́й, борю́щих вра́г избавля́ющи мя́. Жизнода́теля Бо́га ро́ждшая, умерщвле́на мя́ страстьми́ оживи́. Я́же Све́т невече́рний ро́ждшая, ду́шу мою́ осле́пшую просвети́. О ди́вная Влады́чня пала́то, до́м Ду́ха Боже́ственна мене́ сотвори́. Врача́ ро́ждшая, уврачу́й души́ моея́ многоле́тныя стра́сти. Волну́ющася жите́йскою бу́рею, ко стези́ мя́ покая́ния напра́ви. Изба́ви мя́ огня́ ве́чнующаго, и че́рвия же зла́го, и та́ртара. Да мя́ не яви́ши бесо́м ра́дование, и́же мно́гим грехо́м пови́нника. Но́ва сотвори́ мя́, обетша́вшаго нечу́вственными, Пренепоро́чная, согреше́нии. Стра́нна му́ки вся́кия покажи́ мя́, и все́х Влады́ку умоли́. Небе́сная ми́ улучи́ти весе́лия, со все́ми святы́ми, сподо́би. Пресвята́я Де́во, услы́ши гла́с непотре́бнаго раба́ Твоего́. Струю́ дава́й мне́ слеза́м, Пречи́стая, души́ моея́ скве́рну очища́ющи. Стена́ния от се́рдца приношу́ Ти́ непреста́нно, усе́рдствуй, Влады́чице. Моле́бную слу́жбу мою́ приими́, и Бо́гу благоутро́бному принеси́. Превы́шшая А́нгел, мирска́го мя́ превы́шша сли́тия сотвори́. Светоно́сная Се́не небе́сная, духо́вную благода́ть во мне́ напра́ви. Ру́це возде́ю и устне́ к похвале́нию, оскверне́ны скве́рною, Всенепоро́чная. Душетле́нных мя́ па́костей изба́ви, Христа́ приле́жно умоля́ющи; Ему́же че́сть и поклоне́ние подоба́ет, ны́не и при́сно и во ве́ки веко́в. Ами́нь.

Моли́тва 8, ко Го́споду на́шему Иису́су Христу́:

Многоми́лостиве и Всеми́лостиве Бо́же мо́й, Го́споди Иису́се Христе́, мно́гия ра́ди любве́ сше́л и воплоти́лся еси́, я́ко да спасе́ши все́х. И па́ки, Спа́се, спаси́ мя́ по благода́ти, молю́ Тя́; а́ще бо от де́л спасе́ши мя́, не́сть се́ благода́ть и да́р, но до́лг па́че. Е́й, мно́гий в щедро́тах и неизрече́нный в ми́лости! Ве́руяй бо в Мя́, ре́кл еси́, о Христе́ мо́й, жи́в бу́дет и не у́зрит сме́рти во ве́ки. А́ще у́бо ве́ра, я́же в Тя́, спаса́ет отча́янныя, се́ ве́рую, спаси́ мя́, я́ко Бо́г мо́й еси́ Ты́ и Созда́тель. Ве́ра же вме́сто де́л да вмени́тся мне́, Бо́же мо́й, не обря́щеши бо де́л отню́д оправда́ющих мя́. Но та́ ве́ра моя́ да довле́ет вме́сто все́х, та́ да отвеща́ет, та́ да оправди́т мя́, та́ да пока́жет мя́ прича́стника сла́вы Твоея́ ве́чныя. Да не у́бо похи́тит мя́ сатана́, и похва́лится, Сло́ве, е́же отто́ргнути мя́ от Твоея́ руки́ и огра́ды; но или́ хощу́, спаси́ мя́, или́ не хощу́, Христе́ Спа́се мо́й, предвари́ ско́ро, ско́ро погибо́х: Ты́ бо еси́ Бо́г мо́й от чре́ва ма́тере моея́. Сподо́би мя́, Го́споди, ны́не возлюби́ти Тя́, я́коже возлюби́х иногда́ то́й са́мый гре́х; и па́ки порабо́тати Тебе́ без ле́ности то́щно, я́коже порабо́тах пре́жде сатане́ льсти́вому. Наипа́че же порабо́таю Тебе́, Го́споду и Бо́гу моему́ Иису́су Христу́, во вся́ дни́ живота́ моего́, ны́не и при́сно и во ве́ки веко́в. Ами́нь.

Моли́тва 9, к храни́телю челове́ческия жи́зни А́нгелу:

Святы́й А́нгеле, предстоя́й окая́нней мое́й души́ и стра́стней мое́й жи́зни, не оста́ви мене́ гре́шнаго, ниже́ отступи́ от мене́ за невоздержа́ние мое́. Не да́ждь ме́ста лука́вому де́мону облада́ти мно́ю, наси́льством сме́ртнаго сего́ телесе́; укрепи́ бе́дствующую и худу́ю мою́ ру́ку и наста́ви мя́ на пу́ть спасе́ния. Е́й, святы́й А́нгеле Бо́жий, храни́телю и покрови́телю окая́нныя моея́ души́ и те́ла, вся́ мне́ прости́, ели́кими тя́ оскорби́х во вся́ дни́ живота́ моего́, и а́ще что́ согреши́х в преше́дшую но́щь сию́, покры́й мя́ в настоя́щий де́нь, и сохрани́ мя́ от вся́каго искуше́ния проти́внаго, да ни в ко́ем гресе́ прогне́ваю Бо́га, и моли́ся за мя́ ко Го́споду, да утверди́т мя́ в стра́се Свое́м, и досто́йна пока́жет мя́ раба́ Своея́ бла́гости. Ами́нь.

Моли́тва у́тренняя коне́чная, ко Пресвяте́й Богоро́дице:

Пресвята́я Влады́чице моя́ Богоро́дице, святы́ми Твои́ми и всеси́льными мольба́ми отжени́ от мене́, смире́ннаго и окая́ннаго раба́ Твоего́, уны́ние, забве́ние, неразу́мие, нераде́ние, и вся́ скве́рная, лука́вая и ху́льная помышле́ния от окая́ннаго моего́ се́рдца и от помраче́ннаго ума́ моего́; и погаси́ пла́мень страсте́й мои́х, я́ко ни́щ е́смь и окая́нен. И изба́ви мя́ от мно́гих и лю́тых воспомина́ний и предприя́тий, и от все́х де́йств злы́х свободи́ мя́. Я́ко благослове́на еси́ от все́х родо́в, и сла́вится пречестно́е и́мя Твое́ во ве́ки веко́в. Ами́нь.

Та́же: Сла́ва и ны́не:

Го́споди поми́луй, Три́жды.

Благослови́. И отпу́ст

Го́споди Иису́се Христе́, Сы́не Бо́жий, моли́тв ра́ди пречи́стыя твоея́ ма́тере, преподо́бных и богоно́сных оте́ц на́ших и все́х святы́х спаси́ мя́ гре́шнаго.

Внегда́ случи́тся кому́ искуси́тися во сне́ по де́йству диа́волю. Воста́в от одра́, твори́т покло́ны, глаго́ля:

Бо́же, ми́лостив бу́ди мне́, гре́шному.

Та́же нача́ло обы́чное. По Прииди́те, поклони́мся: Поми́луй мя́, Бо́же.

И тропари́ сия́, гла́с 7:

Па́стырю до́брый, ду́шу Твою́ положи́вый о на́с, све́дый сокрове́нная, соде́янная мно́ю, Еди́не Бла́же, упаси́ мя́ ра́зумом заблу́ждшаго, и исхити́ мя́ от во́лка, А́гнче Бо́жий, и поми́луй мя́.

Отягче́н сно́м уны́ния, помрача́юся пре́лестию грехо́вною: но да́руй ми́ у́тро покая́ния, просвеща́я о́чи мы́сленныя, Христе́ Бо́же, просвеще́ние души́ моея́, и спаси́ мя́.

Мгло́ю грехо́вною и сластьми́ жите́йскими сплета́ем у́м окая́нныя души́ моея́, стра́сти разли́чныя ражда́ет, и в по́мысл умиле́ния не прихо́дит. Но уще́дри, Спа́се, смире́ние мое́, и да́ждь ми́ по́мысл умиле́ния, да и а́з спаса́емь пре́жде конца́ воззову́ благоутро́бию Твоему́: Го́споди Христе́ Спа́се мо́й, отча́яннаго спаси́ мя́ и недосто́йнаго.

Я́ко впады́й в разбо́йники, и уя́звен, та́ко и а́з впадо́х во мно́гия грехи́, и уя́звена ми́ е́сть душа́. К кому́ прибе́гну пови́нный а́з: то́кмо к Тебе́, милосе́рдому ду́ш Врачу́: изле́й на мя́, Бо́же, вели́кую Твою́ ми́лость.

Сла́ва: Я́ко блу́дный сы́н, приидо́х и а́з, Ще́дре: приими́ мя́, О́тче, возвраща́ющася, я́ко еди́наго от нае́мник Твои́х, Бо́же, и поми́луй мя́.

И ны́не, Богоро́дичен:

Изба́ви, Богоро́дице, от обдержа́щих на́с грехо́в: я́ко ино́го упова́ния ве́рнии не и́мамы, ра́зве Тебе́, и от Тебе́ ро́ждшагося Го́спода.

Та́же: Го́споди, поми́луй, 40. И покло́нов 8, с моли́твою: Бо́же, ми́лостив ми́ бу́ди, и прости́ мя́, блу́днаго, за и́мя Твое́ Свято́е.

Посе́м моли́тва, свята́го Вели́каго Васи́лия.

Па́ки запя́т бы́х окая́нный умо́м и лука́вым обы́чаем, рабо́тая греху́. Па́ки кня́зь тьмы́ и стра́стных сла́достей роди́тель, плене́на мя́ сотвори́, и я́коже раба́ смире́ннаго, того́ хоте́нием, и жела́нием плотски́м рабо́тати принужда́ет мя́. И что́ сотворю́, Го́споди мо́й, и Изба́вителю, и Засту́пниче, упова́ющим на Тя́, а́ще не к Тебе́ па́ки возвращу́ся и постеню, и ми́лости испрошу́ о соде́янных мно́ю; но бою́ся и трепе́щу, да не ка́ко всегда́ испове́даяся, и отступи́ти злы́х обещава́яся, и на ки́йждо ча́с согреша́я: и не возда́в моли́твы моея́ Тебе́ Бо́гу моему́, долготерпе́ние Твое́ воздви́гну к негодова́нию. И кто́ стерпи́т гне́ва Твоего́, Го́споди; ве́дый у́бо мно́жество щедро́т Твои́х, и пучи́ну человеколю́бия Твоего́, па́ки возверзаю себе́ на ми́лость Твою́, и взыва́ю Ти́: е́же согреши́х, прости́. Поми́луй мя́, па́дшаго, да́ждь ми́ ру́ку по́мощи, в ти́не сласте́й погруже́нному. Не оста́ви, Го́споди, созда́ние Твое́ растли́тися беззако́ньми мои́ми и грехи́ мои́ми, но обы́чным Твои́м милосе́рдием и бла́гостию принуждаем, изба́ви от ка́ла и скве́рны теле́сныя и стра́стных помышле́ний, оскверня́ющих всегда́ ду́шу мою́ окая́нную: се́ бо, Го́споди, я́коже зри́ши, не́сть в не́й ме́ста чи́ста, но вся́ проказися, и все́ те́ло объя́т я́зва. Са́м у́бо, Человеколю́бче, врачу́ ду́ш и теле́с, и ми́лости исто́чниче, очи́сти ту́ сле́з мои́х тече́нием, си́х излива́я на мя́ оби́льно: изле́й на мя́ человеколю́бие Твое́, и да́ждь ми́ исцеле́ние и очище́ние, и исцели́ сокруше́ние мое́, и не отврати́ лица́ Твоего́ от мене́, да не я́коже ве́щь, поя́ст мя́ отча́яния о́гнь, но я́коже ре́кл еси́, нело́жный Бо́же, я́ко ве́лия ра́дость быва́ет на небеси́ о еди́ном гре́шнице ка́ющемся, сие́ сотвори́ и на мне́, гре́шнем, и не затвори́ у́шию благоутро́бия Твоего́, в моли́тве покая́ния моего́, но отве́рзи и́х, и я́ко кади́ло испра́ви ту́ пред Тобо́ю: ве́си бо не́мощь естества́, Созда́телю, и удо́бь поползнове́ние ю́ности, и тя́жесть те́ла, и презира́еши грехи́, и покая́ние прие́млеши призыва́ющих Тя́ и́стиною. Я́ко благослови́ся и просла́вися пречестно́е и великоле́пое и́мя Твое́, Отца́ и Сы́на и Свята́го Ду́ха, ны́не и при́сно и во ве́ки веко́в. Ами́нь.

Моли́тва того́жде свята́го Васи́лия.

Многоми́лостиве, нетле́нне, нескве́рне, безгре́шне Го́споди, очи́сти мя́, непотре́бнаго раба́ Твоего́, от вся́кия скве́рны плотски́я и душе́вныя, и от невнима́ния и уны́ния моего́ прибы́вшую ми́ нечистоту́, со ине́ми беззако́нии мои́ми, и яви́ мя́ нескве́рна, Влады́ко, за бла́гость Христа́ Твоего́, и освяти́ мя́ наше́ствием Пресвята́го Твоего́ Ду́ха: я́ко да возбну́в от мглы́ нечи́стых привиде́ний диа́вольских, и вся́кия скве́рны, сподо́блюся чи́стою со́вестию отве́рсти скве́рная моя́ и нечи́стая уста́, и воспева́ти всесвято́е и́мя Твое́, Отца́ и Сы́на и Свята́го Ду́ха, ны́не и при́сно и во ве́ки веко́в. Ами́нь.

Моли́тва тре́тия.

Го́споди Бо́же на́ш, е́же согреши́х во дни́ се́м сло́вом, де́лом и помышле́нием, я́ко Бла́г и Человеколю́бец прости́ ми́. Ми́рен со́н и безмяте́жен да́руй ми́. А́нгела Твоего́ храни́теля посли́, покрыва́юща и соблюда́юща мя́ от вся́каго зла́, я́ко Ты́ еси́ храни́тель душа́м и телесе́м на́шим, и Тебе́ сла́ву возсыла́ем, Отцу́ и Сы́ну и Свято́му Ду́ху, ны́не и при́сно и во ве́ки веко́в. Ами́нь.

Моли́тва четве́ртая, свята́го Иоа́нна Златоу́стаго.

Го́споди, не лиши́ мене́ небе́сных Твои́х бла́г.

Го́споди, изба́ви мя́ ве́чных му́к.

Го́споди, умо́м ли или́ помышле́нием, сло́вом или́ де́лом согреши́х, прости́ мя́.

Го́споди, изба́ви мя́ вся́каго неве́дения и забве́ния, и малоду́шия, и окамене́ннаго нечу́вствия.

Го́споди, изба́ви мя́ от вся́каго искуше́ния.

Го́споди, просвети́ мое́ се́рдце, е́же помрачи́ лука́вое похоте́ние.

Го́споди, а́з я́ко челове́к согреши́х, Ты́ же я́ко Бо́г ще́др, поми́луй мя́, ви́дя не́мощь души́ моея́.

Го́споди, посли́ благода́ть Твою́ в по́мощь мне́, да просла́влю и́мя Твое́ свято́е.

Го́споди Иису́се Христе́, напиши́ мя́ раба́ Твоего́ в кни́зе живо́тней и да́руй ми́ коне́ц благи́й.

Го́споди, Бо́же мо́й, а́ще и ничто́же бла́го сотвори́х пред Тобо́ю, но да́ждь ми́ по благода́ти Твое́й положи́ти нача́ло благо́е.

Го́споди, окропи́ в се́рдце мое́м ро́су благода́ти Твоея́.

Го́споди небесе́ и земли́, помяни́ мя́ гре́шнаго раба́ Твоего́, сту́днаго и нечи́стаго, во Ца́рствии Твое́м. Ами́нь.

Го́споди, в покая́нии приими́ мя́.

Го́споди, не оста́ви мене́.

Го́споди, не введи́ мене́ в напа́сть.

Го́споди, да́ждь ми́ мы́сль бла́гу.

Го́споди, да́ждь ми́ сле́зы и па́мять сме́ртную, и умиле́ние.

Го́споди, да́ждь ми́ по́мысл испове́дания грехо́в мои́х.

Го́споди, да́ждь ми́ смире́ние, целому́дрие и послуша́ние.

Го́споди, да́ждь ми́ терпе́ние, великоду́шие и кро́тость.

Го́споди, всели́ в мя́ ко́рень благи́х, стра́х Тво́й в се́рдце мое́.

Го́споди, сподо́би мя́ люби́ти Тя́ от всея́ души́ моея́ и помышле́ния и твори́ти во все́м во́лю Твою́.

Го́споди, покры́й мя́ от челове́к не́которых, и бесо́в, и страсте́й, и от вся́кия ины́я неподо́бныя ве́щи.

Го́споди, ве́си, я́ко твори́ши, я́коже Ты́ во́лиши, да бу́дет во́ля Твоя́ и во мне́ гре́шнем, я́ко благослове́н еси́ во ве́ки. Ами́нь.

Моли́тва пя́тая, ко Пресвяте́й Богоро́дице.

Пресвята́я Влады́чице моя́ Богоро́дице, святы́ми Твои́ми и всеси́льными мольба́ми отжени́ от мене́, смире́ннаго и окая́ннаго раба́ Твоего́, уны́ние, забве́ние, неразу́мие, нераде́ние, и вся́ скве́рная, лука́вая и ху́льная помышле́ния от окая́ннаго моего́ се́рдца и от помраче́ннаго ума́ моего́; и погаси́ пла́мень страсте́й мои́х, я́ко ни́щ е́смь и окая́нен. И изба́ви мя́ от мно́гих и лю́тых воспомина́ний и предприя́тий, и от все́х де́йств злы́х свободи́ мя́. Я́ко благослове́на еси́ от все́х родо́в, и сла́вится пречестно́е и́мя Твое́ во ве́ки веко́в. Ами́нь.

Та́же: Честне́йшую Херуви́м и сла́внейшую без сравне́ния Серафи́м, без истле́ния Бо́га Сло́ва ро́ждшую, су́щую Богоро́дицу Тя́ велича́ем.

Сла́ва, и ны́не: Го́споди, помилуй, трижды. Го́споди, благослови́.

И отпу́ст:

Го́споди Иису́се Христе́, Бо́же на́ш, моли́тв ра́ди Пречи́стыя Твоея́ Ма́тере и все́х святы́х, спаси́ мя́, гре́шнаго.

Моли́тва от оскверне́ния.

Го́споди Бо́же на́ш, Еди́не Благи́й и Человеколю́бче, Еди́не Святы́й и на святы́х почива́яй, И́же верхо́вному Твоему́ апо́столу Петру́ яви́вый виде́нием, ничто́же скве́рно, или́ нечи́сто мне́ти, от Тебе́ сотворе́нных на пи́щу и в наслажде́ние челове́ком, и сосу́дом Твои́м избра́нным, апо́столом Па́влом вся́ чи́ста чи́стым запове́давый: Ты́ Са́м, Влады́ко Пресвяты́й призыва́нием стра́шнаго и пречи́стаго Твоего́ и́мене, и зна́мением Честна́го и Животворя́щаго Креста́, благослови́ и очи́сти мя́, раба́ Твоего́ (имяре́к), оскве́рншагося от вся́каго неприя́зненнаго ду́ха, от вся́каго мечта́ния и га́да ядови́таго, от вся́каго беззако́ния и от вся́кия ле́сти, от вся́каго потвора и от вся́кия суеты́, и от вся́каго неду́га, и вся́кия я́зи, и от вся́каго проти́внаго злоде́йства диа́воля. И ны́не, недосто́йнаго мене́, раба́ Твоего́ (имяре́к), сподо́би по Твоему́ милосе́рдию служи́ти пречи́стым Твои́м Та́йнам. И пре́жде очи́сти ми́ ду́шу и те́ло от вся́кия скве́рны, и оста́ви вся́кое прегреше́ние, во́льное и нево́льное, е́же согреши́х во вся́ дни́ живота́ моего́, де́лом, сло́вом и помышле́нием, во дни́ и в но́щи, и до ны́нешняго часа́. И да́ждь ми́, Го́споди, служе́ние сие́ стра́шное небе́сных Чино́в, и прича́стие пречи́стых Твои́х Та́ин, не в су́д, ни во осужде́ние, но в проще́ние грехо́в, и в Ду́ха Свята́го прише́ствие, и живо́т присносу́щныя ра́дости, его́же угото́вал еси́ и́стинным Твои́м служебником. Сохрани́ мя́, Влады́ко Всеси́льне, от вся́каго греха́ и зло́бы, соблюди́ нескве́рна и непоро́чна от вся́кия прока́зы проти́внаго диа́вола, и да́ждь ми́, Го́споди, служи́ти Тебе́ в преподо́бии и пра́вде до после́дняго дне́ и часа́ и сконча́ния моего́.

Ты́ бо еси́ благословля́яй и освяща́яй вся́ческая, Христе́ Бо́же на́ш, и Тебе́ сла́ву возсыла́ем со Безнача́льным Твои́м Отце́м и с Пресвяты́м и Благи́м и Животворя́щим Твои́м Ду́хом, ны́не и при́сно и во ве́ки веко́в. Ами́нь.

Моли́тва от оскверне́ния.

Моли́твами святы́х оте́ц на́ших, Го́споди Иису́се Христе́ Бо́же на́ш, поми́луй на́с, ами́нь.

Глаго́лет же моли́тву сию́ со умиле́нием, и сокруше́нным се́рдцем:

Та́же глаго́лет: Сла́ва тебе́ Бо́же на́ш, сла́ва Тебе́. Царю́ Небе́сный: Трисвято́е по О́тче на́ш:

И псало́м 50: Поми́луй мя́ Бо́же:

Та́же, моли́тва свята́го вели́каго Васи́лиа:

Многоми́лостиве, нетле́нне, нескве́рне,...

Честне́йшую Херуви́м: Сла́ва и ны́не: Го́споди поми́луй, три́жды. Благослови́. И отпу́ст

Та́же сие́: Приими́ Го́споди моли́тву от мене́ гре́шнаго и поми́луй мя́, я́ко бла́г и человеколю́бец.

Свяще́нник глаго́лет: Благослове́н Бо́г на́ш, всегда́, ны́не и при́сно и во ве́ки веко́в.

И мы́ глаго́лем: Ами́нь.

Сла́ва Тебе́, Бо́же на́ш, сла́ва Тебе́. Царю́ Небе́сный: Трисвято́е: Пресвята́я Тро́ице: О́тче на́ш,

Иере́й: Я́ко Твое́ е́сть ца́рство, и си́ла, и сла́ва, Отца́, и Сы́на, и свята́го Ду́ха, ны́не и при́сно и во ве́ки веко́в.

Мы́ же: Ами́нь.

Та́ же: Го́споди, поми́луй. (12). Сла́ва, и ны́не. Прииди́те, поклони́мся (Три́жды) Псало́м 50 Поми́луй мя́, Бо́же: Та́же

Кафи́сма 17

Блаже́ни непоро́чни в пу́ть, ходя́щии в зако́не Госпо́дни: Блаже́ни испыта́ющие свиде́ния Его́, все́м се́рдцем взы́щут Его́. Не де́лающии бо беззако́ния, в путе́х его́ ходи́ша. Ты́ запове́дал еси́ за́поведи Твоя́ сохрани́ти зело́: Дабы́ испра́вилися путие́ мои́, сохрани́ти оправда́ния твоя́. Тогда́ не постыжу́ся, внегда́ призре́ти ми́ на вся́ за́поведи Твоя́. Испове́мся Тебе́ в пра́вости се́рдца, внегда́ научи́тимися судьба́м пра́вды Твоея́. Оправда́ния Твоя́ сохраню́, не оста́ви мене́ до зела́. В чесо́м испра́вит юне́йший пу́ть сво́й; внегда́ сохрани́ти словеса́ Твоя́. Все́м се́рдцем мои́м взыска́х Тебе́, не отри́ни мене́ от за́поведей Твои́х. В се́рдце мое́м скры́х словеса́ Твоя́, я́ко да не согрешу́ Тебе́. Благослове́н еси́, Го́споди, научи́ мя́ оправда́нием Твои́м. Устна́ма мои́ма возвести́х вся́ судьбы́ у́ст Твои́х. На пути́ свиде́ний Твои́х наслади́хся, я́ко о вся́ком бога́тстве. В за́поведех Твои́х поглумлю́ся, и уразуме́ю пути́ Твоя́. В оправда́ниих Твои́х поучу́ся, не забу́ду слове́с Твои́х. Возда́ждь рабу́ Твоему́: живи́ мя́, и сохраню́ словеса́ Твоя́. Откры́й о́чи мои́, и уразуме́ю чудеса́ от зако́на Твоего́. Пришле́ц а́з е́смь на земли́, не скры́й от мене́ за́поведи Твоя́. Возлюби́ душа́ моя́ возжела́ти судьбы́ Твоя́ на вся́кое вре́мя. Запрети́л еси́ го́рдым, про́кляти уклоня́ющиися от за́поведей Твои́х. Отъими́ от мене́ поно́с и уничиже́ние, я́ко свиде́ний Твои́х взыска́х. И́бо седо́ша кня́зи, и на мя́ клевета́ху: ра́б же Тво́й глумя́шеся во оправда́ниих Твои́х. И́бо свиде́ния Твоя́, поуче́ние мое́ е́сть, и сове́ти мои́ оправда́ния Твоя́. Прильпе́ земли́ душа́ моя́, живи́ мя́ по словеси́ Твоему́. Пути́ моя́ возвести́х, и услы́шал мя́ еси́: научи́ мя́ оправда́нием Твои́м. Пу́ть оправда́ний Твои́х вразуми́ ми́, и поглумлю́ся в чудесе́х Твои́х. Воздрема́ душа́ моя́ от уны́ния: утверди́ мя́ в словесе́х Твои́х. Пу́ть непра́вды отста́ви от мене́, и зако́ном Твои́м поми́луй мя́. Пу́ть и́стины изво́лих, и судьбы́ Твоя́ не забы́х. Прилепи́хся свиде́нием Твои́м, Го́споди, не посрами́ мене́. Пу́ть за́поведей Твои́х теко́х, егда́ разшири́л еси́ се́рдце мое́. Законоположи́ мне́, Го́споди, пу́ть оправда́ний Твои́х, и взыщу́ и вы́ну. Вразуми́ мя́, и испыта́ю зако́н Тво́й, и сохраню́ и все́м се́рдцем мои́м. Наста́ви мя́ на стезю́ за́поведей Твои́х, я́ко ту́ю восхоте́х. Приклони́ се́рдце мое́ во свиде́ния Твоя́, а не в лихои́мство. Отврати́ о́чи мои́, е́же не ви́дети суеты́, в пути́ Твое́м живи́ мя́. Поста́ви рабу́ Твоему́ сло́во Твое́ в стра́х Тво́й. Отъими́ поноше́ние мое́, е́же непщева́х, я́ко судьбы́ Твоя́ бла́ги. Се́ возжела́х за́поведи Твоя́, в пра́вде Твое́й живи́ мя́. И да прии́дет на мя́ ми́лость Твоя́, Го́споди, спасе́ние Твое́ по словеси́ Твоему́. И отвеща́ю поноша́ющым ми́ сло́во: я́ко упова́х на словеса́ Твоя́. И не отъими́ от у́ст мои́х словесе́ и́стинна до зела́: я́ко на судьбы́ Твоя́ упова́х. И сохраню́ зако́н Тво́й вы́ну: в ве́к и в ве́к ве́ка. И хожда́х в широте́, я́ко за́поведи Твои́ взыска́х. И глаго́лах о свиде́ниих Твои́х пред цари́, и не стыдя́хся. И поуча́хся в за́поведех Твои́х, я́же возлюби́х зело́. И воздвиго́х ру́це мои́ к за́поведем Твои́м, я́же возлюби́х, и глумля́хся во оправда́ниих Твои́х. Помяни́ словеса́ Твоя́ рабу́ Твоему́, и́хже упова́ние да́л ми́ еси́. То́ мя́ уте́ши во смире́нии мое́м, я́ко сло́во Твое́ живи́ мя́. Го́рдии законопреступова́ху до зела́, от зако́на же Твоего́ не уклони́хся. Помяну́х судьбы́ Твоя́ от ве́ка, Го́споди, и уте́шихся. Печа́ль прия́т мя́ от гре́шник, оставля́ющих зако́н Тво́й. Пе́та бя́ху мне́ оправда́ния Твоя́, на ме́сте прише́льствия моего́. Помяну́х в нощи́ и́мя Твое́, Го́споди, и сохрани́х зако́н Тво́й. Помоли́хся лицу́ Твоему́ все́м се́рдцем мои́м: поми́луй мя́ по словеси́ Твоему́. Помы́слих пути́ Твоя́, и возврати́х но́зе мои́ во свиде́ния Твоя́. Угото́вихся и не смути́хся сохрани́ти за́поведи Твоя́. У́жя гре́шник обяза́шася мне́, и зако́на Твоего́ не забы́х. Полу́нощи воста́х испове́датися Тебе́ о судьба́х пра́вды Твоея́. Прича́стник а́з е́смь все́м боя́щымся Тебе́, и храня́щым за́поведи Твоя́. Ми́лости Твоея́, Го́споди, испо́лнь земля́, оправда́нием Твои́м научи́ мя́. Бла́гость сотвори́л еси́ с рабо́м Твои́м, Го́споди, по словеси́ Твоему́. Бла́гости и наказа́нию и ра́зуму научи́ мя́, я́ко за́поведем Твои́м ве́ровах. Пре́жде да́же не смири́ти ми ся, а́з прегреши́х: сего́ ра́ди сло́во Твое́ сохрани́х. Бла́г еси́ ты́, Го́споди, и бла́гостию Твое́ю научи́ мя́ оправда́нием Твои́м. Умно́жися на мя́ непра́вда го́рдых: а́з же все́м се́рдцем мои́м испыта́ю за́поведи Твоя́. Усыри́ся я́ко млеко́ се́рдце и́х, а́з же зако́ну Твоему́ поучи́хся. Бла́го мне́, я́ко смири́л мя́ еси́: я́ко да научу́ся оправда́нием Твои́м. Бла́г мне́ зако́н у́ст Твои́х, па́че ты́сящ зла́та и сребра́.

Сла́ва: Ру́це Твои́ сотвори́сте мя́, и созда́сте мя́: вразуми́ мя́, и научу́ся за́поведем Твои́м. Боя́щиися Тебе́ у́зрят мя́ и возвеселя́тся, я́ко на словеса́ Твоя́ упова́х. Разуме́х, Го́споди, я́ко пра́вда судьбы́ Твоя́, и вои́стинну смири́л мя́ еси́. Бу́ди же ми́лость Твоя́, да уте́шит мя́ по словеси́ Твоему́, рабу́ Твоему́: Да прии́дут мне́ щедро́ты Твоя́, и жи́в бу́ду, я́ко зако́н Тво́й поуче́ние мое́ е́сть. Да постыдя́тся го́рдии, я́ко непра́ведно беззако́нноваша на мя́: а́з же поглумлю́ся в за́поведех Твои́х. Да обратя́т мя́ боя́щиися Тебе́, и ве́дящии свиде́ния Твоя́. Бу́ди се́рдце мое́ непоро́чно во оправда́ниих Твои́х, я́ко да не постыжу́ся. Исчеза́ет во спасе́ние Твое́ душа́ моя́, на словеса́ Твоя́ упова́х. Исчезо́ша о́чи мои́ в сло́во Твое́, глаго́люще: когда́ уте́шиши мя́; Зане́ бы́х я́ко ме́х на сла́не: оправда́ний Твои́х не забы́х. Коли́ко е́сть дне́й раба́ Твоего́; когда́ сотвори́ши ми́ от гоня́щих мя́ су́д; Пове́даша мне́ законопресту́пницы глумле́ния, но не я́ко зако́н Тво́й, Го́споди. Вся́ за́поведи Твоя́ и́стина: непра́ведно погна́ша мя́, помози́ ми́. Вма́ле не сконча́ша мене́ на земли́: а́з же не оста́вих за́поведей Твои́х. По ми́лости Твое́й жи́ви мя́, и сохраню́ свиде́ния у́ст Твои́х. Во ве́к, Го́споди, Сло́во Твое́ пребыва́ет на небеси́. В ро́д и ро́д и́стина Твоя́, основа́л еси́ зе́млю, и пребыва́ет. Учине́нием Твои́м пребыва́ет де́нь, я́ко вся́ческая рабо́тна Тебе́. Я́ко а́ще бы не зако́н Тво́й поуче́ние мое́ бы́л, тогда́ у́бо поги́бл бы́х во смире́нии мое́м. Во ве́к не забу́ду оправда́ний мои́х, я́ко в ни́х оживи́л мя́ еси́.

Среда́:

Тво́й е́смь а́з, спаси́ мя́, я́ко оправда́ний Твои́х взыска́х. Мене́ жда́ша гре́шницы погуби́ти мя́, свиде́ния Твоя́ разуме́х. Вся́кия кончи́ны ви́дех коне́ц: широка́ за́поведь Твоя́ зело́. Ко́ль возлюби́х зако́н Тво́й, Го́споди, ве́сь де́нь поуче́ние мое́ е́сть. Па́че вра́г мои́х умудри́л мя́ еси́ за́поведию Твое́ю, я́ко во ве́к моя́ е́сть. Па́че все́х уча́щих мя́ разуме́х, я́ко свиде́ния Твоя́ поуче́ние мое́ е́сть. Па́че ста́рец разуме́х, я́ко за́поведи Твоя́ взыска́х. От вся́каго пути́ лука́ва возбрани́х нога́м мои́м, я́ко да сохраню́ словеса́ Твоя́. От суде́б Твои́х не уклони́хся: я́ко Ты́ законоположи́л ми́ еси́. Ко́ль сладка́ горта́ни моему́ словеса́ Твоя́, па́че ме́да усто́м мои́м. От за́поведей Твои́х разуме́х, сего́ ра́ди возненави́дех вся́к пу́ть непра́вды. Свети́льник нога́ма мои́ма зако́н Тво́й, и све́т стезя́м мои́м. Кля́хся, и поста́вих сохрани́ти судьбы́ пра́вды Твоея́. Смири́хся до зела́: Го́споди, живи́ мя́ по словеси́ Твоему́. Во́льная у́ст мои́х благоволи́ же, Го́споди, и судьба́м Твои́м научи́ мя́. Душа́ моя́ в руку́ Твое́ю вы́ну, и зако́на Твоего́ не забы́х. Положи́ша гре́шницы се́ть мне́, и от за́поведей Твои́х не заблуди́х. Насле́довах свиде́ния Твоя́ во ве́к, я́ко ра́дование се́рдца моего́ су́ть. Приклони́х се́рдце мое́ сотвори́ти оправда́ния Твоя́ в ве́к за воздая́ние. Законопресту́пныя возненави́дех, зако́н же Тво́й возлюби́х. Помо́щник мо́й, и засту́пник мо́й еси́ Ты́: на словеса́ Твоя́ упова́х. Уклони́теся от мене́ лука́внующии, и испыта́ю за́поведи Бо́га моего́. Заступи́ мя́ по словеси́ Твоему́, и жи́в бу́ду, и не посрами́ мене́ от ча́яния моего́. Помози́ ми́, и спасу́ся, и поучу́ся во оправда́ниих Твои́х вы́ну. Уничижи́л еси́ вся́ отступа́ющыя от оправда́ний Твои́х, я́ко непра́ведно помышле́ние и́х. Преступа́ющыя непщева́х вся́ гре́шныя земли́: сего́ ра́ди возлюби́х свиде́ния Твоя́. Пригвозди́ стра́ху Твоему́ пло́ти моя́: от суде́б бо Твои́х убоя́хся. Сотвори́в су́д и пра́вду, не преда́ждь мене́ оби́дящым мя́. Восприими́ раба́ Твоего́ во бла́го, да не оклевета́ют мене́ го́рдии. О́чи мои́ исчезо́сте во спасе́ние Твое́, и в сло́во пра́вды Твоея́. Сотвори́ с рабо́м Твои́м по ми́лости Твое́й, и оправда́нием Твои́м научи́ мя́. Ра́б Тво́й е́смь а́з, вразуми́ мя́, и уве́м свиде́ния Твоя́. Вре́мя сотвори́ти Го́сподеви: разори́ша зако́н Тво́й. Сего́ ра́ди возлюби́х за́поведи Твоя́ па́че зла́та и топа́зия. Сего́ ра́ди ко все́м за́поведем Твои́м направля́хся, вся́к пу́ть непра́вды возненави́дех. Ди́вна свиде́ния Твоя́: сего́ ра́ди испыта́ я́ душа́ моя́. Явле́ние слове́с Твои́х просвеща́ет и вразумля́ет младе́нцы. Уста́ моя́ отверзо́х, и привлеко́х ду́х, я́ко за́поведей Твои́х жела́х.

Сла́ва: При́зри на мя́ и поми́луй мя́, по суду́ лю́бящих и́мя Твое́. Стопы́ моя́ напра́ви по словеси́ Твоему́, и да не облада́ет мно́ю вся́кое беззако́ние. Изба́ви мя́ от клеветы́ челове́ческия, и сохраню́ за́поведи Твоя́. Лице́ Твое́ просвети́ на раба́ Твоего́, и научи́ мя́ оправда́нием Твои́м. Исхо́дища водна́я изведо́сте о́чи мои́, поне́же не сохрани́х зако́на Твоего́. Пра́веден еси́, Го́споди, и пра́ви суди́ Твои́: Запове́дал еси́ пра́вду свиде́ния Твоя́, и и́стину зело́. Иста́яла мя́ е́сть ре́вность Твоя́, я́ко забы́ша словеса́ Твоя́ врази́ мои́. Разжже́но сло́во Твое́ зело́, и ра́б Тво́й возлюби́ е́. Юне́йший а́з е́смь и уничиже́н, оправда́ний Твои́х не забы́х. Пра́вда Твоя́ пра́вда во ве́к, и зако́н Тво́й и́стина. Ско́рби и ну́жди обрето́ша мя́: за́поведи Твоя́ поуче́ние мое́. Пра́вда свиде́ния Твоя́ в ве́к: вразуми́ мя́, и жи́в бу́ду. Воззва́х все́м се́рдцем мои́м, услы́ши мя́, Го́споди, оправда́ния Твоя́ взыщу́. Воззва́х Ти́, спаси́ мя́, и сохраню́ свиде́ния Твоя́. Предвари́х в безго́дии и воззва́х: на словеса́ Твоя́ упова́х. Предвари́сте о́чи мои́ ко у́тру, поучи́тися словесе́м Твои́м. Гла́с мо́й услы́ши, Го́споди, по ми́лости Твое́й: по судьбе́ Твое́й живи́ мя́. Прибли́жишася гоня́щии мя́ беззако́нием: от зако́на же Твоего́ удали́шася. Бли́з еси́ Ты́, Го́споди, и вси́ путие́ Твои́ и́стина. Испе́рва позна́х от свиде́ний Твои́х, я́ко в ве́к основа́л я́ еси́. Ви́ждь смире́ние мое́, и изми́ мя́, я́ко зако́на Твоего́ не забы́х. Суди́ су́д мо́й, и изба́ви мя́: словесе́ ра́ди Твоего́ живи́ мя́. Дале́че от гре́шник спасе́ние, я́ко оправда́ний Твои́х не взыска́ша. Щедро́ты Твоя́ мно́ги, Го́споди, по судьбе́ Твое́й живи́ мя́. Мно́зи изгоня́щии мя́ и стужа́ющии ми́: от свиде́ний Твои́х не уклони́хся. Ви́дех неразумева́ющыя и иста́ях, я́ко слове́с Твои́х не сохрани́ша. Ви́ждь, я́ко за́поведи Твоя́ возлюби́х: Го́споди, по ми́лости Твое́й живи́ мя́. Нача́ло слове́с Твои́х и́стина, и во ве́к вся́ судьбы́ пра́вды Твоея́. Кня́зи погна́ша мя́ ту́не: и от слове́с Твои́х убоя́ся се́рдце мое́. Возра́дуюся а́з о словесе́х Твои́х, я́ко обрета́яй коры́сть мно́гу. Непра́вду возненави́дех и омерзи́х: зако́н же Тво́й возлюби́х. Седмери́цею дне́м хвали́х Тя́ о судьба́х пра́вды Твоея́. Ми́р мно́г лю́бящым зако́н Тво́й, и не́сть и́м собла́зна. Ча́ях спасе́ния Твоего́, Го́споди, и за́поведи Твоя́ возлюби́х. Сохрани́ душа́ моя́ свиде́ния Твоя́, я́ко вси́ путие́ мои́ пред Тобо́ю, Го́споди: Да прибли́жится моле́ние мое́ пред Тя́, Го́споди, по словеси́ Твоему́ вразуми́ мя́. Да вни́дет проше́ние мое́ пред Тя́, Го́споди, по словеси́ Твоему́ изба́ви мя́. Отры́гнут устне́ мои́ пе́ние, егда́ научи́ши мя́ оправда́нием Твои́м. Провеща́ет язы́к мо́й словеса́ Твоя́, я́ко вся́ за́поведи Твоя́ пра́вда. Да бу́дет рука́ Твоя́ е́же спасти́ мя́, я́ко за́поведи Твоя́ изво́лих. Возжела́х спасе́ние Твое́, Го́споди, и зако́н Тво́й поуче́ние мое́ е́сть. Жива́ бу́дет душа́ моя́, и восхва́лит Тя́, и судьбы́ Твоя́ помо́гут мне́. Заблуди́х я́ко овча́ поги́бшее: взыщи́ раба́ Твоего́, я́ко за́поведей Твои́х не забы́х.

Сла́ва, и ны́не:

Ве́рую во еди́наго Бо́га Отца́, Вседержи́теля, Творца́ не́бу и земли́, ви́димым же все́м и неви́димым. И во еди́наго Го́спода Иису́са Христа́, Сы́на Бо́жия, Единоро́днаго, и́же от Отца́ Рожде́ннаго пре́жде все́х ве́к. Све́та от све́та, Бо́га и́стинна от Бо́га и́стинна, рожде́нна, несотворе́нна, единосу́щна Отцу́, И́мже вся́ бы́ша. На́с ра́ди челове́к и на́шего ра́ди спасе́ния, сше́дшаго с небе́с, и воплоти́вшагося от Ду́ха Свя́та и Мари́и Де́вы, и вочелове́чшася. Распя́таго же за ны́ при Понти́йстем Пила́те, и страда́вша, и погребе́нна. И воскре́сшаго в тре́тий де́нь по писа́нием. И возше́дшаго на небеса́, и седя́ща одесну́ю Отца́. И па́ки гряду́щаго со сла́вою, суди́ти живы́м и ме́ртвым, его́же ца́рствию не бу́дет конца́. И в Ду́ха Свята́го, Го́спода, животворя́щаго, и́же от Отца́ исходя́щаго, и́же со Отце́м и Сыно́м спокланя́ема и ссла́вима, глаго́лавшаго проро́ки. Во еди́ну, святу́ю, собо́рную и апо́стольскую Це́рковь. Испове́дую еди́но креще́ние во оставле́ние грехо́в. Ча́ю воскресе́ния ме́ртвых: И жи́зни бу́дущаго ве́ка. Ами́нь.

Трисвято́е. Пресвята́я Тро́ице: По О́тче на́ш:

Иере́й: Я́ко Твое́ е́сть ца́рство:

Та́же тропари́, гла́с 8:

Се́ жени́х гряде́т в полу́нощи, и блаже́н ра́б, его́же обря́щет бдя́ща, недосто́ин же па́ки, его́же обря́щет уныва́юща: блюди́ у́бо, душе́ моя́, не сно́м отяготи́ся, да не сме́рти предана́ бу́деши, и ца́рствия вне́ затвори́шися: но воспряни́ зову́щи: свя́т, свя́т, свя́т еси́, Бо́же, Богоро́дицею поми́луй на́с.

Сла́ва: Де́нь о́н стра́шный помышля́ющи, душе́ моя́, побди́, вжига́ющи свещу́ Твою́, еле́ем просвеща́ющи: не ве́си бо когда́ прии́дет к Тебе́ гла́с глаго́лющий: се́ жени́х. Блюди́ у́бо, душе́ моя́, да не воздре́млеши, и пребу́деши вне́ толку́щи, я́ко пя́ть де́в: но бо́дренно пожди́, да усря́щеши Христа́ еле́ем масти́тым, и да́ст ти́ черто́г боже́ственный сла́вы своея́.

И ны́не, богоро́дичен:

Тебе́ необори́мую сте́ну, спасе́ния утвержде́ние, Богоро́дице Де́во, мо́лим: сопроти́вных сове́ты разори́, люде́й Твои́х печа́ль на ра́дость преложи́, гра́д Тво́й огради́, Богохрани́мим царе́м спобори́, о ми́ре ми́ра моли́, я́ко Ты́ еси́, Богоро́дице, упова́ние на́ше.

Та́же: Го́споди, поми́луй. (40) И моли́тву сию́:

И́же на вся́кое вре́мя и на вся́кий ча́с, на небеси́ и на земли́ покланя́емый и сла́вимый, Христе́ Бо́же, долготерпели́ве, многоми́лостиве, многоблагоутро́бне, И́же пра́ведныя любя́й и гре́шныя ми́луяй, И́же вся́ зовы́й ко спасе́нию, обеща́ния ра́ди бу́дущих бла́г: Са́м, Го́споди, приими́ и на́ша в ча́с се́й моли́твы и испра́ви живо́т на́ш к за́поведем Твои́м, души́ на́ша освяти́, телеса́ очи́сти, помышле́ния испра́ви, мы́сли очи́сти: и изба́ви на́с от вся́кия ско́рби, зо́л и боле́зней: огради́ на́с святы́ми Твои́ми А́нгелы, да ополче́нием и́х соблюда́еми и наставля́еми дости́гнем в соедине́ние ве́ры и в ра́зум непристу́пныя Твоея́ сла́вы: я́ко благослове́н еси́ во ве́ки веко́в. Ами́нь.

Го́споди, поми́луй, трижды.

Сла́ва, и ны́не: Честне́йшую херуви́м, и сла́внейшую без сравне́ния серафи́м, без истле́ния Бо́га Сло́ва ро́ждшую, су́щую Богоро́дицу тя́ велича́ем.

И́менем Госпо́дним благослови́, о́тче.

Иере́й: Бо́же, уще́дри ны́, и благослови́ ны́, просвети́ лице́ Твое́ на ны́, и поми́луй ны́.

И а́ще е́сть Аллилу́иа, твори́м покло́ны три́ вели́кия, глаго́люще моли́тву сию́ та́йно свята́го Ефре́ма, разделя́юще ю́ в три́ ча́сти:

Го́споди и Влады́ко живота́ моего́, ду́х пра́здности, уны́ния, любонача́лия и праздносло́вия не да́ждь ми́. Покло́н.

Ду́х же целому́дрия, смиренному́дрия, терпе́ния и любве́, да́руй ми́ рабу́ Твоему́. Покло́н.

Е́й, Го́споди Царю́, да́руй ми́ зре́ти моя́ согреше́ния, и не осужда́ти бра́та моего́, я́ко благослове́н еси́ во ве́ки веко́в. Ами́нь. Покло́н.

Та́же ма́лых 12, глаго́люще на ки́йждо покло́н: Бо́же, очи́сти мя́ гре́шнаго.

И последи́ моли́тву сию́: Го́споди и Влады́ко живота́ моего́: до конца́: во ве́ки веко́в. Ами́нь. И покло́н еди́н вели́кий.

Та́же моли́тву сию́:

Влады́ко Бо́же О́тче вседержи́телю, Го́споди Сы́не единоро́дный Иису́се Христе́, и Святы́й Ду́ше, еди́но Божество́, еди́на си́ла, поми́луй мя́ гре́шнаго: и и́миже ве́си судьба́ми, спаси́ мя́ недосто́йнаго раба́ Твоего́, я́ко благослове́н еси́ во ве́ки веко́в, ами́нь.

А́ще же не́сть Аллилу́иа, оставля́ется: Го́споди и Влады́ко живота́ моего́: и покло́ны, и глаго́лем то́кмо: Влады́ко Бо́же О́тче вседержи́телю: и моли́твы сия́, Васи́лия Вели́каго:

Го́споди вседержи́телю, Бо́же си́л и вся́кия пло́ти, в вы́шних живы́й, и на смире́нныя призира́яй, сердца́ же и утро́бы испыту́яй, и сокрове́нная челове́ком я́ве предве́дый, безнача́льный и присносу́щный све́те, у него́же е́сть премене́ние, или́ преложе́ния осене́ние: са́м, безсме́ртный царю́, приими́ моле́ния на́ша, я́же в настоя́щее вре́мя, на мно́жество щедро́т Твои́х дерза́юще, от скве́рных к Тебе́ усте́н Твори́м, и оста́ви на́м прегреше́ния на́ша, я́же де́лом и сло́вом, и мы́слию, ве́дением, или́ неве́дением согреше́нная на́ми, и очи́сти ны́ от вся́кия скве́рны пло́ти и ду́ха: и да́руй на́м бо́дренным се́рдцем, и тре́звенною мы́слию, всю́ настоя́щаго жития́ но́щь прейти́, ожида́ющым прише́ствия све́тлаго и явле́ннаго дне́, единоро́днаго Твоего́ Сы́на, Го́спода и Бо́га и Спа́са на́шего Иису́са Христа́: во́ньже со сла́вою судия́ все́х прии́дет, кому́ждо возда́ти по де́лом его́, да не па́дше и облени́вшеся, но бо́дрствующе, и воздви́жени в де́лании, обря́щемся, и гото́ви в ра́дость боже́ственный черто́г сла́вы его́ совни́дем, иде́же пра́зднующих гла́с непреста́нный, и неизрече́нная сла́дость зря́щих Твоего́ лица́ добро́ту неизрече́нную: Ты́ бо еси́ и́стинный све́т, просвеща́яй и освяща́яй вся́ческая, и Тя́ пое́т вся́ тва́рь во ве́ки веко́в. Ами́нь.

Тя́ благослови́м, вы́шний Бо́же и Го́споди ми́лости, творя́щаго при́сно с на́ми вели́кая же и неизсле́дованная, сла́вная же и ужа́сная, и́хже не́сть числа́, пода́вшаго на́м со́н во упокое́ние не́мощи на́шея, и ослабле́ние трудо́в многотру́дныя пло́ти. Благодари́м Тя́, я́ко не погуби́л еси́ на́с со беззако́ньми на́шими: но человеколю́бствовал обы́чно, и в неча́янии лежа́щыя ны́ воздви́гл еси́, во е́же славосло́вити держа́ву Твою́. Те́мже мо́лим безме́рную Твою́ бла́гость, просвети́ на́шя мы́сли, очеса́, и у́м на́ш от тя́жкаго сна́ ле́ности возста́ви: отве́рзи на́ша уста́ и испо́лни я́ Твоего́ хвале́ния, я́ко да возмо́жем непоколеби́мо пе́ти же и испове́датися Тебе́ во все́х, и от все́х сла́вимому Бо́гу, безнача́льному Отцу́, со единоро́дным Твои́м Сы́ном, и всесвяты́м и благи́м животворя́щим Твои́м ду́хом, ны́не и при́сно, и во ве́ки веко́в, ами́нь.

Подоба́ет ве́дати, я́ко моли́твы сия́ глаго́лются от 22-го септе́мврия ме́сяца до неде́ли ва́ий.

Та́же, Прииди́те, поклони́мся: три́жды.

И псалмы́:

Псало́м 120

Возведо́х о́чи мои́ в го́ры, отню́дуже прии́дет по́мощь моя́. По́мощь моя́ от Го́спода, сотво́ршаго не́бо и зе́млю. Не да́ждь во смяте́ние но́ги твоея́, ниже́ воздре́млет храня́й тя́. Се́ не воздре́млет, ниже́ у́снет храня́й Исра́иля. Госпо́дь сохрани́т тя́, Госпо́дь покро́в тво́й на ру́ку десну́ю твою́. Во дни́ со́лнце не ожже́т тебе́, ниже́ луна́ но́щию. Госпо́дь сохрани́т тя́ от вся́каго зла́, сохрани́т ду́шу твою́ Госпо́дь. Госпо́дь сохрани́т вхожде́ние твое́, и исхожде́ние твое́, от ны́не и до ве́ка.

Псало́м 132

Се́ ны́не благослови́те Го́спода вси́ раби́ Госпо́дни, стоя́щии в хра́ме Госпо́дни, во дво́рех до́му Бо́га на́шего. В но́щех воздежи́те руки́ ва́шя во свята́я, и благослови́те Го́спода. Благослови́т тя́ Госпо́дь от Сио́на, сотвори́вый не́бо и зе́млю.

Сла́ва, и ны́не:

Трисвято́е. Пресвята́я Тро́ице: И по О́тче на́ш: Я́ко Твое́ е́сть ца́рство:

И тропари́ сия́, гла́с 2:

Помяни́, Го́споди, я́ко бла́г, рабы́ Твоя́, и ели́ка в житии́ согреши́ша, прости́: никто́же бо безгре́шен, то́кмо Ты́ моги́й и преста́вленным да́ти поко́й.

Глубино́ю му́дрости человеколю́бно вся́ стро́яй, и поле́зное все́м подава́яй, еди́не соде́телю, упоко́й, Го́споди, ду́шы ра́б Твои́х: на Тя́ бо упова́ние возложи́ша, творца́ и зижди́теля и Бо́га на́шего.

Сла́ва, конда́к: Со святы́ми упоко́й, Христе́, ду́шы ра́б Твои́х, иде́же не́сть боле́знь, ни печа́ль, ни воздыха́ние, но жи́знь безконе́чная.

И ны́не, богоро́дичен: Блажи́м тя́ вси́ ро́ди, Богоро́дице Де́во: в тя́ бо невмести́мый Христо́с Бо́г на́ш вмести́тися благоволи́. Блаже́ни есмы́ и мы́, предста́тельство тя́ иму́ще: де́нь бо и но́щь мо́лишися о на́с, и ски́птры ца́рствия твои́ми моли́твами утвержда́ются. Те́м воспева́юще вопие́м ти́: ра́дуйся, благода́тная, Госпо́дь с тобо́ю.

Го́споди, поми́луй. 12,

И моли́тва сия́:

Помяни́, Го́споди, в наде́жди воскресе́ния, жи́зни ве́чныя, усо́пшия отцы́ и бра́тию на́шу, и вся́ во благоче́стии и ве́ре сконча́вшыяся, и прости́ и́м вся́кое согреше́ние во́льное же и нево́льное, сло́вом или́ де́лом, или́ помышле́нием согреше́нное и́ми: и всели́ я́ в ме́ста све́тла, в ме́ста прохла́дна, в ме́ста поко́йна, отню́дуже отбеже́ вся́кая боле́знь, печа́ль и воздыха́ние, иде́же присеща́ет све́т лица́ Твоего́, и весели́т вся́ от ве́ка святы́я Твоя́: да́руй и́м и на́м ца́рствие Твое́, и прича́стие неизрече́нных и ве́чных Твои́х бла́г, и Твоея́ безконе́чныя и блаже́нныя жи́зни наслажде́ние. Ты́ бо еси́ жи́знь, и воскресе́ние, и поко́й усо́пших рабо́в Твои́х, Христе́ Бо́же на́ш, и Тебе́ сла́ву возсыла́ем, со безнача́льным Твои́м Отце́м, и пресвяты́м и благи́м и животворя́щим Твои́м Ду́хом, ны́не и при́сно, и во ве́ки веко́в, ами́нь.

Пресла́вная присноДе́во, Ма́ти Христа́ Бо́га, принеси́ на́шу моли́тву Сы́ну Твоему́ и Бо́гу на́шему, да спасе́т тобо́ю ду́шы на́шя.

Упова́ние мое́ Оте́ц, прибе́жище мое́ Сы́н, покро́в мо́й Ду́х Святы́й, Тро́ице свята́я, сла́ва Тебе́.

Сла́ва, и ны́не: Го́споди, поми́луй, трижды Благослови́.

Иере́й отпу́ст: Христо́с и́стинный Бо́г на́ш, моли́твами пречи́стыя своея́ Ма́тере, преподо́бных и богоно́сных оте́ц на́ших, и все́х святы́х, поми́лует и спасе́т на́с, я́ко бла́г и человеколю́бец.

И быва́ет отпу́ст и прие́млем проше́ние обы́чное.

И глаго́лет иере́й: Помо́лимся о господи́не на́шем святе́йшем Патриа́рхе (и́мя ре́к) и о господи́не на́шем Митрополи́те (или́ Архиепи́скопе, или́ Епи́скопе) на́шем и́мя ре́к, его́же е́сть о́бласть, и все́й во Христе́ бра́тии на́шей.

Ли́к: Го́споди, поми́луй.

О богохрани́мом госуда́ре на́шем Импера́торе и́мя ре́к, (или́ О придержа́щих власте́х на́ших).

Ли́к: Го́споди, поми́луй.

О благопоспеше́нии и укрепле́нии всего́ во́инства.

Ли́к: Го́споди, поми́луй.

О ненави́дящих и лю́бящих на́с.

Ли́к: Го́споди, поми́луй.

О ми́лующих и служа́щих на́м.

Ли́к: Го́споди, поми́луй.

О запове́давших на́м недосто́йным моли́тися о ни́х.

Ли́к: Го́споди, поми́луй.

О отше́дших отце́х и бра́тиях на́ших.

Ли́к: Го́споди, поми́луй.

О в мо́ри пла́вающих.

Ли́к: Го́споди, поми́луй.

О в не́мощи лежа́щих.

Ли́к: Го́споди, поми́луй.

Помо́лимся и о изоби́лии плодо́в земны́х.

Ли́к: Го́споди, поми́луй.

И о вся́кой души́ христиа́н правосла́вных.

Ли́к: Го́споди, поми́луй.

Ублажи́м благочести́выя цари́

Ли́к: Го́споди поми́луй.

Правосла́вныя архиере́и, и кти́торы святы́я оби́тели сея́.

Ли́к: Го́споди, поми́луй.

Роди́тели на́ша, и вся́ пре́жде отше́дшыя, отцы́ и бра́тию на́шу, зде́ лежа́щия и повсю́ду, правосла́вныя.

Предстоя́тель: Рце́м и о себе́ сами́х.

Ли́к: Го́споди, поми́луй. трижды.

Моли́твами святы́х оте́ц на́ших, Го́споди Иису́се Христе́ Бо́же на́ш, поми́луй на́с.

Ли́к: Ами́нь.

Подоба́ет ве́дати, я́ко по святе́й горе́ Афо́нстей, по Помяни́, Го́споди: глаго́лют настоя́щыя тропари́:

Поми́луй на́с, Го́споди, поми́луй на́с: вся́каго бо отве́та недоуме́юще, сию́ Ти́ моли́тву я́ко Влады́це гре́шнии прино́сим: поми́луй на́с.

Сла́ва: Го́споди, поми́луй на́с, на Тя́ бо упова́хом, не прогне́вайся на ны́ зело́, ниже́ помяни́ беззако́ний на́ших, но при́зри и ны́не я́ко благоутро́бен, и изба́ви ны́ от вра́г на́ших: Ты́ бо еси́ Бо́г на́ш и мы́ лю́дие Твои́, вси́ дела́ руку́ Твое́ю, и и́мя Твое́ призыва́ем.

И ны́не: Милосе́рдия две́ри отве́рзи на́м, благослове́нная Богоро́дице, наде́ющиися на тя́ да не поги́бнем, но да изба́вимся тобо́ю от бе́д: ты́ бо еси́ спасе́ние ро́да христиа́нскаго.

Пото́м иере́й ектению́: Поми́луй на́с, Бо́же, по вели́цей ми́лости Твое́й, мо́лимтися, услы́ши и поми́луй.

Ли́к: Го́споди, поми́луй. (три́жды).

Еще́ мо́лимся о е́же сохрани́тися гра́ду сему́, (или́ ве́си се́й), и свято́му хра́му сему́(а́ще во оби́тели: святе́й оби́тели се́й), и вся́кому гра́ду, и стране́, от гла́да, губи́тельства, тру́са, пото́па, огня́, меча́, наше́ствия иноплеме́нников, и междоусо́бныя бра́ни: о е́же ми́лостиву и благоуве́тливу бы́ти благо́му и человеколюби́вому Бо́гу на́шему, отврати́ти вся́кий гне́в на ны́ дви́жимый, и изба́вити ны́ от належа́щаго и пра́веднаго своего́ преще́ния, и поми́ловати ны́.

Ли́к: Го́споди, поми́луй. (40).

Возгла́с: Услы́ши ны́, Бо́же спаси́телю на́ш, упова́ние все́х конце́в земли́, и су́щих в мо́ри дале́че: и ми́лостив, ми́лостив бу́ди, Влады́ко, о гресе́х на́ших, и поми́луй ны́. Ми́лостив бо и человеколю́бец Бо́г еси́, и Тебе́ сла́ву возсыла́ем, Отцу́, и Сы́ну, и свято́му Ду́ху, ны́не и при́сно, и во ве́ки веко́в.

Ли́к: Ами́нь.

Посе́м, Сла́ва, и ны́не: и отпу́ст.

Моли́тва, глаго́лемая наедине́.

Осла́би, оста́ви, прости́, Бо́же, прегреше́ния на́ша, во́льная и нево́льная, я́же в сло́ве и в де́ле, я́же в ве́дении и не в ве́дении, я́же во дни́ и в но́щи, я́же во уме́ и в помышле́нии: вся́ на́м прости́, я́ко Бла́г и Человеколю́бец. Моли́тва Ненави́дящих и оби́дящих на́с прости́, Го́споди Человеколю́бче. Благотворя́щим благосотвори́. Бра́тиям и сро́дником на́шим да́руй я́же ко спасе́нию проше́ния и жи́знь ве́чную. В не́мощех су́щия посети́ и исцеле́ние да́руй. И́же на мо́ри упра́ви. Путеше́ствующим спутеше́ствуй. Служа́щим и ми́лующим на́с грехо́в оставле́ние да́руй. Запове́давших на́м недосто́йным моли́тися о ни́х поми́луй по вели́цей Твое́й ми́лости. Помяни́, Го́споди, пре́жде усо́пших оте́ц и бра́тий на́ших и упоко́й и́х, иде́же присеща́ет све́т лица́ Твоего́. Помяни́, Го́споди, бра́тий на́ших плене́нных и изба́ви я́ от вся́каго обстоя́ния. Помяни́, Го́споди, плодонося́щих и доброде́лающих во святы́х Твои́х це́рквах, и да́ждь и́м я́же ко спасе́нию проше́ния и жи́знь ве́чную. Помяни́, Го́споди, и на́с, смире́нных и гре́шных и недосто́йных ра́б Твои́х, и просвети́ на́ш у́м све́том ра́зума Твоего́, и наста́ви на́с на стезю́ за́поведей Твои́х, моли́твами Пречи́стыя Влады́чицы на́шея Богоро́дицы и Присноде́вы Мари́и и все́х Твои́х святы́х: я́ко благослове́н еси́ во ве́ки веко́в. Ами́нь.

Нача́ло е́же в повседневней

По 50-м псалме́, кафи́сма 9.

Псало́м 64

Тебе́ подоба́ет пе́снь Бо́же, в Сио́не, и тебе́ возда́стся моли́тва во Иерусали́ме. Услы́ши моли́тву мою́, к тебе́ вся́ка пло́ть моя́ прии́дет. Словеса́ беззако́нник премого́ша на́с, и нече́стия на́ша ты́ очи́стиши. Блаже́н, его́же избра́л еси́ и прия́л, всели́тся во дво́рех твои́х: испо́лнимся во благи́х до́му твоего́: свя́т хра́м тво́й, Ди́вен в пра́вде: услы́ши ны́, Бо́же спаси́телю на́ш, упова́ние все́х конце́й земли́, и су́щих в мо́ри дале́че: Уготовля́яй го́ры кре́постию свое́ю, препоя́сан си́лою. Смуща́яй глубину́ морску́ю, шу́му во́лн его́ кто́ постои́т; смяту́тся язы́цы, И убоя́тся живу́щии в конца́х от зна́мений твои́х: исхо́ды у́тра и ве́чера украси́ши. Посети́л еси́ зе́млю, и упои́л еси́ ю́, умно́жил еси́ обогати́ти ю́: река́ бо́жия напо́лнися во́д: угото́вал еси́ пи́щу и́м, я́ко та́ко (е́сть) угото́вание. Бразды́ ея́ упо́й, умно́жи жи́та ея́: в ка́плях ея́ возвесели́тся, возсия́ющи. Благослови́ши вене́ц ле́та бла́гости твоея́, и поля́ твоя́ испо́лнятся ту́ка. Разботе́ют кра́сная пусты́ни, и ра́достию хо́лмы препоя́шутся. Оде́яшася о́вни о́вчии, и удо́лия умно́жат пшени́цу: воззову́т, и́бо воспою́т.

Псало́м 65

Воскли́кните Го́сподеви вся́ земля́, по́йте же и́мени его́, дади́те сла́ву хвале́ его́. Рцы́те Бо́гу: ко́ль стра́шна дела́ твоя́, во мно́жестве си́лы твоея́ со́лжут тебе́ врази́ твои́. Вся́ земля́ да покло́нится тебе́, и пое́т тебе́, да пое́т же и́мени твоему́, вы́шний. Прииди́те и ви́дите дела́ Бо́жия, ко́ль стра́шен в сове́тех па́че сыно́в челове́ческих. Обраща́яй мо́ре в су́шу, в реце́ про́йдут нога́ми: та́мо возвесели́мся о не́м, Влады́чествующем си́лою свое́ю веко́м: о́чи его́ на язы́ки призира́ете: преогорчева́ющии да не возно́сятся в себе́. Благослови́те язы́цы Бо́га на́шего, и услы́шан сотвори́те гла́с хвалы́ его́: Поло́жшаго ду́шу мою́ в живо́т, и не да́вшаго во смяте́ние но́г мои́х. Я́ко искуси́л ны́ еси́, Бо́же, разже́гл ны́ еси́, я́коже разжиза́ется сребро́. Вве́л ны́ еси́ в све́т: положи́л еси́ ско́рби на хребте́ на́шем. Возве́л еси́ челове́ки на главы́ на́шя: приидо́хом скво́зь о́гнь и во́ду, и изве́л еси́ ны́ в поко́й. Вни́ду в до́м тво́й со всесожже́нием: возда́м тебе́ моли́твы моя́, я́же изреко́сте устне́ мои́, и глаго́лаша уста́ моя́ в ско́рби мое́й. Всесожже́ния ту́чна вознесу́ тебе́ с кади́лом и овны́, вознесу́ тебе́ волы́ с козлы́. Прииди́те, услы́шите, и пове́м ва́м, вси́ боя́щиися Бо́га, ели́ка сотвори́ души́ мое́й. В не́м усты́ мои́ми воззва́х, и вознесо́х под язы́ком мои́м. Непра́вду а́ще узре́х в се́рдце мое́м, да не услы́шит мене́ Госпо́дь. Сего́ ра́ди услы́ша мя́ Бо́г, вня́т гла́су моле́ния моего́. Благослове́н Бо́г, и́же не оста́ви моли́тву мою́, и ми́лость свою́ от мене́.

Псало́м 66

Бо́же, уще́дри ны́ и благослови́ ны́, просвети́ лице́ твое́ на ны́, и поми́луй ны́: Позна́ти на земли́ пу́ть тво́й, во все́х язы́цех спасе́ние твое́. Да испове́дятся тебе́ лю́дие, Бо́же, да испове́дятся тебе́ лю́дие вси́. Да возвеселя́тся и возра́дуются язы́цы, я́ко су́диши лю́дям правото́ю, и язы́ки на земли́ наста́виши. Да испове́дятся тебе́ лю́дие, Бо́же, да испове́дятся тебе́ лю́дие вси́. Земля́ даде́ пло́д сво́й: благослови́ ны́, Бо́же, Бо́же на́ш: Благослови́ ны́, Бо́же, и да убоя́тся его́ вси́ концы́ земли́.

Сла́ва Отцу́, и Сы́ну, и Свято́му Ду́ху, и ны́не и при́сно, и во ве́ки веко́в. Ами́нь.

Аллилу́иа, аллилу́иа, аллилу́иа. Сла́ва Тебе́, Бо́же. Три́жды.

Го́споди, поми́луй. Трижды. Сла́ва, и ны́не. Ами́нь.

Псало́м 67

Да воскре́снет Бо́г, и расточа́тся врази́ Его́, и да бежа́т от лица́ Его́ ненави́дящии Его́. Я́ко исчеза́ет ды́м, да исче́знут, я́ко та́ет во́ск от лица́ огня́, та́ко да поги́бнут гре́шницы от лица́ Бо́жия. А пра́ведницы да возвеселя́тся: да возра́дуются пред Бо́гом, да насладя́тся в весе́лии. Воспо́йте Бо́гу, по́йте и́мени его́, путесотвори́те возше́дшему на за́пады: Госпо́дь и́мя ему́, и ра́дуйтеся пред ни́м. Да смяту́тся от лица́ его́, отца́ си́рых и судии́ вдови́ц Бо́г в ме́сте святе́м свое́м. Бо́г вселя́ет единомы́сленныя в до́м, изводя́ окова́нныя му́жеством, та́кожде преогорчева́ющыя живу́щыя во гробе́х. Бо́же, внегда́ исходи́ти тебе́ пред людьми́ твои́ми, внегда́ мимоходи́ти тебе́ в пусты́ни: Земля́ потрясе́ся, и́бо небеса́ ка́нуша от лица́ Бо́га сина́ина, от лица́ Бо́га изра́илева. До́ждь во́лен отлучи́ши, Бо́же, достоя́нию твоему́, и изнемо́же: ты́ же соверши́л еси́ е́. Живо́тная твоя́ живу́т на не́й: угото́вил еси́ бла́гостию твое́ю ни́щему, Бо́же. Госпо́дь да́ст глаго́л благовеству́ющым си́лою мно́гою. Ца́рь си́л возлю́бленнаго, красото́ю до́му раздели́ти коры́сти. А́ще поспите́ посреде́ преде́л, криле́ голуби́не посре́брене, и междора́мия ея́ в блеща́нии зла́та. Внегда́ ра́знствит небе́сный цари́ на не́й, оснежа́тся в Селмо́не. Гора́ бо́жия, гора́ ту́чная: гора́ усыре́нная, гора́ ту́чная. Вску́ю непщу́ете го́ры усыре́нныя; гора́, ю́же благоволи́ Бо́г жи́ти в не́й: и́бо Госпо́дь весели́тся до конца́. Колесни́ца бо́жия тма́ми тем, ты́сящи гобзу́ющих: Госпо́дь в ни́х в Сина́и во святе́м. Возше́л еси́ на высоту́, плени́л еси́ пле́н: прия́л еси́ дая́ния в челове́цех, и́бо не покаря́ющыяся, е́же всели́тися. Госпо́дь Бо́г благослове́н, благослове́н Госпо́дь де́нь дне́: поспеши́т на́м Бо́г спасе́ний на́ших. Бо́г на́ш, Бо́г е́же спаса́ти: и госпо́дня, госпо́дня исхо́дища сме́ртная. Оба́че Бо́г сокруши́т главы́ враго́в свои́х, ве́рх вла́с преходя́щих в прегреше́ниих свои́х. Рече́ Госпо́дь: от Васа́на обращу́, обращу́ во глубина́х морски́х. Я́ко да омо́чится нога́ твоя́ в крови́, язы́к пе́с твои́х от вра́г от него́. Ви́дена бы́ша ше́ствия твоя́, Бо́же, ше́ствия Бо́га моего́, царя́, и́же во святе́м. Предвари́ша кня́зи бли́з пою́щих, посреде́ де́в тимпа́нниц. В це́рквах благослови́ти Бо́га, Го́спода от исто́чник исра́илевых. Та́мо Вениами́н юне́йший во у́жасе, кня́зи иу́дови влады́ки и́х, кня́зи завуло́ни, кня́зи неффали́мли. Запове́ждь, Бо́же, си́лою твое́ю, укрепи́, Бо́же, сие́, е́же соде́лал еси́ в на́с. От хра́ма твоего́ во Иерусали́ме, тебе́ принесу́т ца́рие да́ры. Запрети́ звере́м тро́стным: со́нм юне́ц в ю́ницах людски́х, е́же затвори́ти искуше́нныя сребро́м: расточи́ язы́ки хотя́щыя бра́нем. Прии́дут моли́твенницы от Еги́пта, Ефио́пия предвари́т ру́ку свою́ к Бо́гу. Ца́рства земна́я по́йте Бо́гу, воспо́йте Го́сподеви, возше́дшему на не́бо небесе́ на восто́ки: се́ да́ст гла́су своему́ гла́с си́лы. Дади́те сла́ву Бо́гови, на Изра́или велеле́пота его́, и си́ла его́ на о́блацех. Ди́вен Бо́г во святы́х свои́х, Бо́г исра́илев: то́й да́ст си́лу и держа́ву лю́дем свои́м: благослове́н Бо́г.

Сла́ва Отцу́, и Сы́ну, и Свято́му Ду́ху, и ны́не и при́сно, и во ве́ки веко́в. Ами́нь.

Аллилу́иа, аллилу́иа, аллилу́иа. Сла́ва Тебе́, Бо́же. Три́жды.

Го́споди, поми́луй. Трижды. Сла́ва, и ны́не. Ами́нь.

Псало́м 68

Спаси́ мя́, Бо́же, я́ко внидо́ша во́ды до души́ моея́. Углебо́х в тиме́нии глубины́, и не́сть постоя́ния: приидо́х во глубины́ морски́я, и бу́ря потопи́ мя́. Утруди́хся зовы́й, измолче́ горта́нь мо́й: исчезо́сте о́чи мои́, от е́же упова́ти ми́ на Бо́га моего́. Умно́жишася па́че вла́с главы́ моея́ ненави́дящии мя́ ту́не: укрепи́шася врази́ мои́, изгоня́щии мя́ непра́ведно: я́же не восхища́х, тогда́ воздая́х. Бо́же, ты́ уве́дел еси́ безу́мие мое́, и прегреше́ния моя́ от Тебе́ не утаи́шася. Да не постыдя́тся о мне́ терпя́щии тебе́, Го́споди, Го́споди си́л: ниже́ да посра́мятся о мне́ иму́щии тебе́, Бо́же исра́илев. Я́ко тебе́ ра́ди претерпе́х поноше́ние, покры́ срамота́ лице́ мое́. Чу́ждь бы́х бра́тии мое́й, и стра́нен сыново́м ма́тере моея́. Я́ко ре́вность до́му твоего́ снеде́ мя́, и поноше́ния понося́щих ти́ нападо́ша на мя́. И покры́х посто́м ду́шу мою́, и бы́сть в поноше́ние мне́. И положи́х одея́ние мое́ вре́тище, и бы́х и́м в при́тчу. О мне́ глумля́хуся седя́щии во врате́х, и о мне́ поя́ху пию́щии вино́. А́з же моли́твою мое́ю к тебе́, Бо́же: вре́мя благоволе́ния, Бо́же: во мно́жестве ми́лости твоея́ услы́ши мя́, во и́стине спасе́ния твоего́. Спаси́ мя́ от бре́ния, да не угле́бну: да изба́влюся от ненави́дящих мя́, и от глубо́ких во́д. Да не потопи́т мене́ бу́ря водна́я, ниже́ да пожре́т мене́ глубина́, ниже́ сведе́т о мне́ рове́нник у́ст свои́х. Услы́ши мя́, Го́споди, я́ко бла́га ми́лость твоя́: по мно́жеству щедро́т твои́х при́зри на мя́. Не отврати́ лица́ твоего́ от о́трока твоего́, я́ко скорблю́, ско́ро услы́ши мя́. Вонми́ души́ мое́й, и изба́ви ю́: вра́г мои́х ра́ди изба́ви мя́. Ты́ бо ве́си поноше́ние мое́, и сту́д мо́й, и срамоту́ мою́: пред тобо́ю вси́ оскорбля́ющии мя́. Поне́же ча́яше душа́ моя́ и стра́сть, и жда́х соскорбя́щаго, и не бе́, и утеша́ющих, и не обрето́х. И да́ша в сне́дь мою́ же́лчь, и в жа́жду мою́ напои́ша мя́ отца́. Да бу́дет трапе́за и́х пред ни́ми в се́ть, и в воздая́ние, и в собла́зн. Да помрача́тся о́чи и́х е́же не ви́дети, и хребе́т и́х вы́ну сляцы́. Проле́й на ня́ гне́в тво́й, и я́рость гне́ва твоего́ да пости́гнет и́х. Да бу́дет дво́р и́х пу́ст, и в жили́щах и́х да не бу́дет живы́й. Зане́ его́же ты́ порази́л еси́, ти́и погна́ша, и к боле́зни я́зве мои́х приложи́ша. Приложи́ беззако́ние к беззако́нию и́х, и да не вни́дут в пра́вду твою́. Да потребя́тся о кни́ги живы́х, и с пра́ведными да не напи́шутся. Ни́щ и боля́й е́смь а́з, спасе́ние твое́, Бо́же, да прии́мет мя́, Восхвалю́ и́мя Бо́га моего́ с пе́снию, возвели́чу его́ во хвале́нии: И уго́дно бу́дет Бо́гу па́че тельца́ ю́на, ро́ги износя́ща и па́знокти. Да у́зрят ни́щии и возвеселя́тся: взыщи́те Бо́га, и жива́ бу́дет душа́ ва́ша. Я́ко услы́ша убо́гия Госпо́дь, и окова́нныя своя́ не уничижи́. Да восхва́лят его́ небеса́ и земля́, мо́ре и вся́ живу́щая в не́м. Я́ко Бо́г спасе́т Сио́на, и сози́ждутся гра́ди иуде́йстии: и веселя́тся та́мо, и насле́дят и. И се́мя рабо́в твои́х удержи́т и, и лю́бящий и́мя твое́ вселя́тся в не́м.

Псало́м 69

Бо́же, в по́мощь мою́ вонми́: Го́споди по́мощи ми́ потщи́ся. Да постыдя́тся и посра́мятся и́щущии ду́шу мою́, да возвратя́тся вспя́ть, и постыдя́тся, хотя́щии ми́ зла́я. Да возвратя́тся а́бие стыдя́щеся, глаго́лющии ми́: бла́гоже, бла́гоже. Да возра́дуются и возвеселя́тся о тебе́ вси́ и́щущии тебе́, Бо́же: и да глаго́лют вы́ну: да возвели́чится Госпо́дь, лю́бящии спасе́ние твое́. А́з же ни́щ е́смь и убо́г, Бо́же, помози́ ми́: помо́щник мо́й, и изба́витель мо́й еси́ ты́, Го́споди, не закосни́.

Сла́ва, и ны́не: И а́бие: Ве́рую во еди́наго Бо́га: Та́же Трисвято́е: Пресвята́я Тро́ице: О́тче на́ш: Я́ко Твое́ е́сть ца́рство:

И тропари́ сия́, гла́с 2:

Несозда́нное естество́, все́х зижди́телю, устне́ на́ша отве́рзи, я́ко да возвести́м хвалу́ Твою́, вопию́ще: свя́т, свя́т, свя́т еси́, Бо́же, Богоро́дицею поми́луй на́с.

Сла́ва: Вы́шния си́лы подража́юще на земли́, побе́дную пе́снь прино́сим Ти́, бла́же: свя́т, свя́т, свя́т еси́, Бо́же, Богоро́дицею поми́луй на́с.

И ны́не: От одра́ и сна́ воздви́гл мя́ еси́, Го́споди, у́м мо́й и се́рдце, и устне́ мои́ отве́рзи, во е́же пе́ти Тя́, свята́я Тро́ице: свя́т, свя́т, свя́т еси́, Бо́же, Богоро́дицею поми́луй на́с.

Та́же: Го́споди, поми́луй, 40.

И моли́тву сию́:

И́же на вся́кое вре́мя и на вся́кий ча́с, на небеси́ и на земли́ покланя́емый и сла́вимый, Христе́ Бо́же, долготерпели́ве, многоми́лостиве, многоблагоутро́бне, И́же пра́ведныя любя́й и гре́шныя ми́луяй, И́же вся́ зовы́й ко спасе́нию, обеща́ния ра́ди бу́дущих бла́г: Са́м, Го́споди, приими́ и на́ша в ча́с се́й моли́твы и испра́ви живо́т на́ш к за́поведем Твои́м, души́ на́ша освяти́, телеса́ очи́сти, помышле́ния испра́ви, мы́сли очи́сти: и изба́ви на́с от вся́кия ско́рби, зо́л и боле́зней: огради́ на́с святы́ми Твои́ми А́нгелы, да ополче́нием и́х соблюда́еми и наставля́еми дости́гнем в соедине́ние ве́ры и в ра́зум непристу́пныя Твоея́ сла́вы: я́ко благослове́н еси́ во ве́ки веко́в. Ами́нь.

И про́чая, я́же в полу́нощнице вседне́вней

Моли́тва свята́го Евстратия.

Велича́я велича́ю Тя́, Го́споди, я́ко призре́л еси́ на смире́ние мое́, и не́си мене́ затвори́л в рука́х вра́жиих: но спа́сл еси́ от ну́жд ду́шу мою́. И ны́не, Влады́ко, да покры́ет мя́ рука́ Твоя́, и да прии́дет на мя́ ми́лость Твоя́: я́ко смяте́ся душа́ моя́, и боле́зненна е́сть во исхожде́нии свое́м, от окая́ннаго моего́ и скве́рнаго телесе́ сего́. да не когда́ лука́вый супоста́та сове́т сря́щет и препне́т ю́ во тьме́, за неве́домыя и ве́домыя в житии́ се́м бы́вшыя ми́ грехи́. Ми́лостив бу́ди ми́, Влады́ко, и да не у́зрит душа́ моя́ мра́чнаго взо́ра лука́вых де́монов: но да прии́мут ю́ а́нгели Твои́ све́тлии и пресве́тлии. Да́ждь сла́ву и́мени Твоему́ свято́му, и Твое́ю си́лою возведи́ мя́ на боже́ственное Твое́ суди́ще. Внегда́ суди́тися ми́, да не прии́мет мя́, рука́ кня́зя ми́ра сего́, е́же исто́ргнути мя́ гре́шника во глубину́ а́дову: но предста́ни ми́, и бу́ди ми́ спа́с и засту́пник, теле́сная бо сия́ муче́ния весе́лия су́ть рабо́м Твои́м. Поми́луй, Го́споди, оскверни́вшуюся страстьми́ жития́ сего́ ду́шу мою́, и чи́сту ю́ покая́нием и испове́данием приими́, я́ко благослове́н еси́ во ве́ки веко́в, ами́нь.

Иере́й, глаго́лет: Благослове́н Бо́г на́ш:

И мы́ глаго́лем: Ами́нь.

Сла́ва Тебе́, Бо́же на́ш, сла́ва Тебе́. Царю́ небе́сный: Трисвято́е. Пресвята́я Тро́ице: О́тче на́ш:

Иере́й: Я́ко Твое́ е́сть Ца́рство: Мы́ же: Ами́нь: Та́же: Го́споди, поми́луй, 12. Сла́ва, и ны́не:

Прииди́те, поклони́мся: три́жды. Псало́м 50: Поми́луй мя́, Бо́же: И а́бие глаго́лем

кано́н Пресвяте́й и Живонача́льней Тро́ице

Гла́с 6

Пе́снь 1

Ирмо́с: Я́ко по су́ху пешеше́ствовав Исра́иль, по бе́здне стопа́ми, гони́теля Фарао́на ви́дя потопля́ема, Бо́гу побе́дную пе́снь пои́м, вопия́ше.

Припе́в: Пресвята́я Тро́ице, Бо́же на́ш, сла́ва Тебе́.

Три́ ипоста́си пое́м богонача́льны, еди́нственнаго естества́, неизме́нный зра́к, блага́го человеколю́бца Бо́га, прегреше́ний очище́ние на́м да́рующа.

Пресу́щный еди́не, и трисия́нный начерта́ньми, Го́споди, в божестве́ еди́ном сы́й, вразуми́ на́с, и сподо́би Твоего́ боже́ственнаго сия́ния.

Сла́ва: Невестоукраси́в Па́вел, ю́же от язы́к це́рковь, еди́ному Тебе́ триипоста́сному Бо́гу покланя́тися научи́, от него́же, и и́мже, и в не́мже вся́ бы́ша.

И ны́не, богоро́дичен: Из чре́ва твоего́ про́йде у́мное, Богоро́дице, со́лнце, и осия́ на́с трисве́тлаго божества́ заря́ми, его́же пою́ще благоче́стно тя́ ублажа́ем.

Пе́снь 3

Ирмо́с: Не́сть свя́т, я́коже Ты́, Го́споди Бо́же мо́й, вознесы́й ро́г ве́рных Твои́х, бла́же, и утверди́вый на́с на ка́мени испове́дания Твоего́.

Украси́в, трисве́тлый Бо́же, чи́ны небе́сныя, устро́ил еси́ пе́ти Тя́ трисвяты́ми гла́сы: с ни́миже приими́ и на́с, воспева́ющих Твою́ бла́гость.

Еди́но непрело́жное тро́ичное, сообра́зное еди́нственное богонача́лие пою́ще, мо́лим Тя́ те́пле, грехо́в мно́гих низпосла́ти ны́не на́м проще́ние.

Сла́ва: Уме́ безнача́льный О́тче, сообра́зный Бо́жий Сло́ве, и Ду́ше боже́ственный, благи́й и пра́вый, воспева́ющыя ве́рно Твою́ держа́ву соблюди́, я́ко благоутро́бен.

И ны́не, богоро́дичен: Па́жить потреби́ тли́, челове́к по существу́ бы́в Бо́г мо́й во утро́бе твое́й, чи́стая: и родонача́льники пре́жняго осужде́ния еди́н свободи́.

Та́же: Го́споди, поми́луй, три́жды.

Седа́лен, гла́с 6. Подо́бен: Е́же о на́с:

Влады́ко Бо́же, при́зри с небесе́, и ви́ждь на́ше смире́ние я́ко ще́др, и умилосе́рдися, человеколю́бче преблаги́й: ни отку́ду бо наде́емся проще́ния получи́ти злы́х, и́мже согреши́хом, те́мже бу́ди с на́ми и никто́же на ны́.

Сла́ва, и ны́не, богоро́дичен:

Влады́чице чи́стая при́зри, Богоро́дице, ви́ждь на́ших я́зв боле́зни, и умилосе́рдися, пречи́стая, и исцели́ со́вестное жже́ние, твое́ю ми́лостию ороша́ющи, и вопию́щи рабо́м твои́м: а́з е́смь с ва́ми, и никто́же на вы́.

Пе́снь 4

Ирмо́с: Христо́с моя́ си́ла, Бо́г и Госпо́дь, честна́я Це́рковь боголе́пно пое́т взыва́ющи, от смы́сла чи́ста о Го́споде пра́зднующи.

Возвыша́яй мы́сль, еди́нице трисве́тлая, и ду́шу и се́рдце Твои́х певе́ц ско́ро возведи́, и сия́ния Твоего́ и све́тлости сподо́би.

Претвори́ и преобрази́ от зло́бы мя́ вся́кия к доброде́тели, еди́на неизображе́нная и неизме́нная Тро́ице, и Твои́ми заря́ми просвети́.

Сла́ва: Помы́слив пре́жде, му́дре соста́вил еси́ а́нгелов чи́ны, служи́тельная Твоея́ бла́гости, триипоста́сная еди́нице: с ни́миже приими́ мою́ хвалу́.

И ны́не, богоро́дичен: И́же естество́м несозда́нный Бо́г присносу́щный созда́нное восприе́м челове́ческое естество́, возъобрази́ во святе́й твое́й утро́бе, Богоро́дице, присноДе́во.

Пе́снь 5

Ирмо́с: Бо́жиим све́том Твои́м, бла́же, у́тренюющих Ти́ ду́шы любо́вию озари́, молю́ся Тя́ ве́дети, Сло́ве Бо́жий, и́стиннаго Бо́га, от мра́ка грехо́внаго взыва́юща.

Помышля́юще естество́ богонача́льное, промысли́тельное и спаси́тельное все́х су́щее, Влады́ко, трисве́тлое же еди́но, к Тебе́ у́тренюем, проще́ния прося́ще грехопаде́ний.

О́тче безнача́льный Бо́же, и соприсносу́щный Сы́не, и Ду́ше святы́й, утверди́ единонача́льная Тро́ице, Твоя́ певцы́, и от вся́кия напа́сти изба́ви и ско́рби.

Сла́ва: Управля́яй сия́ньми богоде́тельными, и ко благоугожде́нию Твоего́ триипоста́снаго божества́, со́лнце сла́вы, наставля́я мя́ при́сно, и боже́ственнаго ца́рствия сотвори́ прича́стника.

И ны́не, богоро́дичен: И́же вся́ нося́й и соблюда́яй всеси́льною Твое́ю руко́ю, Сло́ве Бо́жий неизме́нне, сохрани́ и соблюди́ Тя́ сла́вящыя, моли́твами ро́ждшия Тя́ Богома́тере.

Пе́снь 6

Ирмо́с: Жите́йское мо́ре, воздвиза́емое зря́ напа́стей бу́рею, к ти́хому приста́нищу Твоему́ прите́к вопию́ Ти́: возведи́ от тли́ живо́т мо́й, многоми́лостиве.

Прему́дрость и ра́зум, богонача́лие трисве́тлое певце́м Твои́м да́руй, и добро́ты луча́ми светоотдельныя Твоея́ бла́гости осиява́тися все́х сподо́би. Два́жды.

Сла́ва: Све́те неразде́льный по существу́, трисия́нне, вседержи́тельне, непристу́пне, се́рдца озари́ ве́рно хва́лящих держа́ву Твою́, и к боже́ственной любви́ впери́.

И ны́не, богоро́дичен: В тя́ всели́ся, присноДе́во, я́ве содержи́тель и Госпо́дь все́х, и еди́ному трисия́нному зра́ку божества́ челове́ки покланя́тися научи́.

Го́споди, поми́луй, три́жды.

Седа́лен, гла́с 6.

Подо́бен: Е́же о на́с:

О́тче и Сы́не, со Ду́хом святы́м, при́зри на ны́, ве́рою Тебе́ покланя́ющыяся, и сла́вящыя держа́ву Твою́, благоутро́бне, со о́гненными, бре́ннии, ино́го бо ра́зве Тебе́ не ве́мы, и возопи́й пою́щым Тя́: а́з е́смь с ва́ми, и никто́же на вы́.

Сла́ва, и ны́не, богоро́дичен:

При́зри на ны́, всепе́тая Богоро́дице, возсия́й просвеще́ние сердца́м омраче́нным, и озари́ ста́до твое́, пречи́стая: ели́ко бо хо́щеши и мо́жеши, я́ко ма́ти су́щи зижди́теля твоего́: и возопи́й моля́щым тя́: а́з е́смь с ва́ми, и никто́же на вы́.

Пе́снь 7

Ирмо́с: Росода́тельну у́бо пе́щь соде́ла а́нгел преподо́бным отроко́м: Халде́и же опаля́ющее веле́ние бо́жие, мучи́теля увеща́ вопи́ти: благослове́н еси́, Бо́же оте́ц на́ших.

Кре́пкую мне́ мы́сль устро́й, трисве́тлая начерта́ньми еди́нице, е́же храни́ти и соблюда́ти боже́ственныя за́поведи Твоя́, и внегда́ пе́ти Тебе́ ве́рно: благослове́н еси́, Бо́же оте́ц на́ших.

Я́ко то́ждеством естества́ пое́мый, неизрече́нное еди́нственный Бо́же, ли́цы же Тро́ицы нося́ число́, соблюди́ все́х на́с от разли́чных искуше́ний и обстоя́ний.

Сла́ва: Соесте́ственна и соприсносу́щна сла́вим, еди́наго Тя́ по существу́ Бо́га, сво́йствы неслия́нне ипоста́сными Тро́ице, разли́чное про́сто предлага́юще, во зра́це непреме́ннем я́ве.

И ны́не, богоро́дичен:

Бо́г пресу́щный прия́т, пречи́стая, от чре́ва твоего́ чи́стаго, ны́не человеколюбе́зне смеше́ние я́ве, и все́х научи́ вопи́ти: благослове́н еси́, Бо́же оте́ц на́ших.

Пе́снь 8

Ирмо́с: Из пла́мене преподо́бным ро́су источи́л еси́, и пра́веднаго же́ртву водо́ю попали́л еси́, вся́ бо твори́ши, Христе́, то́кмо е́же хоте́ти: Тя́ превозно́сим во вся́ ве́ки.

Очище́ние прегреше́ний ско́ро пода́ждь ми́, и страсте́й многообра́зных избавле́ние, сообра́зная Тро́ице, еди́нице триипоста́сная: да Тя́ сла́влю во вся́ ве́ки.

Воли́тель ми́лости изве́ствован, я́ко Бо́г ми́лостив, все́х поми́луй, трисве́тлая еди́нице и Тро́ице преблага́я, славосло́вящих Твое́ вели́чествие.

Сла́ва: От све́та присносу́щаго Отца́, све́та соприсносу́щна ро́ждшася Сло́ва, со Ду́хом исхо́дным све́том, ве́рою сла́вим, и превозно́сим во вся́ ве́ки.

И ны́не, богоро́дичен:

Врача́ челове́ком, пречи́стая, родила́ еси́, всеси́льнаго Сло́ва, Христа́ Го́спода, прароди́тельная я́звы все́х исцеля́юща, превознося́щих его́ во ве́ки.

Пе́снь 8

Ирмо́с: Бо́га челове́ком невозмо́жно ви́дети, на него́же не сме́ют чи́ни а́нгельстии взира́ти, тобо́ю бо, всечи́стая, яви́ся челове́ком Сло́во воплоще́нно: его́же велича́юще, с небе́сными во́и тя́ ублажа́ем.

Зре́ти чи́нове херуви́мстии, Влады́ко, добро́ты Твоея́ сла́ва не могу́ще, кри́лы покрыва́ющеся, непреста́нно тро́ичную пе́снь вопию́т, триипоста́сную Твоего́ богонача́лия еди́нственнаго держа́ву сла́вяще.

Твоя́ сия́ния, со́лнце незаходи́мое, Твои́х рабо́в пода́ждь сердца́м: и просвети́ ду́шы, и изба́ви от мно́гих прегреше́ний, еди́не всеми́лостиве и триипоста́сне: и нетле́нныя Твоея́ жи́зни на́с сподо́би.

Сла́ва: Е́же све́т единоче́стный и трисо́лнечный, и светоде́льный, божество́ су́щее, озари́ ве́рою Тя́ пою́щих, и от мра́чнаго изба́ви злоде́йства, и сподо́би светле́йших Твои́х селе́ний, я́ко преблаги́й.

И ны́не, богоро́дичен:

Прему́дре челове́ка пре́жде созда́ сы́н тво́й, Де́во, и истле́вшаго обнови́ тобо́ю, всепе́тая: и боже́ственнаго све́та зари́ невече́рния все́х испо́лни, тя́ Богоро́дицу и́стинную ве́рою сла́вящих.

Та́же припеви Григо́рия Синаи́та:

Досто́йно е́сть я́ко вои́стинну, сла́вити тя́ Бо́га Сло́ва, его́же терпе́щут и трясу́тся херуви́ми, и славосло́вят си́лы небе́сныя, воскре́сшаго тридне́вно из гро́ба Христа́ жизнода́вца, стра́хом просла́вим.

Воспои́м вси́ боголе́пно пе́сньми боже́ственными, Отца́, и Сы́на, и Ду́ха боже́ственнаго, триипоста́сную держа́ву, еди́но ца́рство и госпо́дьство.

Ю́же пою́т вси́ земноро́днии, и славосло́вят си́лы небе́сныя, от все́х ве́рно покланя́емую, еди́ницу по существу́ триипоста́сную.

Господонача́льную херуви́м, и богонача́льную без сравне́ния серафи́м, неразде́льную Тро́ицу во еди́нице, су́щее богонача́лие, Тя́ велича́ем.

Отцу́ безнача́льному и Бо́гу, собезнача́льному Сло́ву со Ду́хом покланя́юся, неразлу́чное еди́но соединя́емое существо́, тричи́сленную еди́ницу пе́сньми почти́м.

Лучеза́рныя Твоя́ мо́лния возсия́й ми́, Бо́же мо́й, триипоста́сне вседе́телю, и до́м мя́ покажи́ Твоея́ непристу́пныя сла́вы, све́тел и светоно́сен и неизме́нен.

Его́же трепе́щут и трясу́тся херуви́ми, и славосло́вят а́нгельская во́инства, от де́вы неизрече́нно вопло́щшагося, Христа́ жизнода́вца стра́хом просла́вим.

Та́же: Трисвято́е. Пресвята́я Тро́ице: О́тче на́ш:

Ипакои́ гла́са. Го́споди, поми́луй. 40

Сла́ва, и ны́не: Честне́йшую херуви́м, и сла́внейшую без сравне́ния серафи́м, без истле́ния Бо́га Сло́ва ро́ждшую, су́щую Богоро́дицу тя́ велича́ем.

И́менем Госпо́дним благослови́, о́тче.

Иере́й: Бо́же, уще́дри ны́, и благослови́ ны́, просвети́ лице́ Твое́ на ны́, и поми́луй ны́.

И моли́тва пресвяте́й Тро́ице, творе́ние Ма́рка мона́ха

Всемогу́щая и животворя́щая свята́я Тро́ице, и светонача́льная, я́же ми́рную вся́кую и преми́рную тва́рь, за еди́ну бла́гость от несу́щих приведы́й, и промышля́я и содержа́щи: и́же по про́чих Твои́х о земно́м ро́де благодея́ниих, и покая́ние на́м ра́ди плотска́го неможе́ния до сме́рти дарова́вый: не оста́ви на́с окая́нных в лука́вых на́ших дея́ниих умре́ти, ниже́ злонача́льнику, и завистицу, и губи́телю посме́шство бы́ти: зри́ши бо, благосе́рде, ели́к у́бо о́наго на на́с наве́т и вражда́: ели́ко же и на́ше страстова́ние, и сла́бость, и небреже́ние. Но неоску́дныя Твоя́ бла́гости соде́лай на на́с, мо́лим на вся́кий де́нь и ча́с прогне́вающии Тя́ честны́х и животво́рных за́поведей преступле́нием. И вся́ у́бо всего́ преше́дшаго живота́ на́шего и до ны́нешняго часа́ согреше́нная на́ми, в дея́ниих, или́ глаго́ланиих, или́ в помышле́ниих, оста́ви и прости́. Сподо́би же на́с про́чее сконча́ти житие́ в покая́нии, и умиле́нии, и соблюде́нии святы́х Твои́х повеле́ний. А́ще у́бо сла́достию прельсти́вшеся многообра́зне согреши́хом, или́ ме́рзскими похотьми́ неполе́зными и вре́дными обольсти́вшеся препроводи́хом: а́ще гне́вом и я́ростию подви́гшеся безслове́сною, ко́его бра́та на́шего оскорби́хом: а́ще язы́ком неизбе́жных, и стро́потных, и кре́пких сете́й объя́хомся: а́ще ко́им чу́вств на́ших, или́ все́ми, во́лею, или́ нево́лею, ве́дуще, или́ неве́дуще, от восхище́ния, или́ поуче́ния безу́мно поползо́хомся: а́ще же лука́выми по́мыслы и су́етными со́весть оскверни́хом: а́ще ли ко́им други́м о́бразом прегреши́хом, от предприя́тия и обы́чая томи́ми зла́го, прости́ на́м, и оста́ви вся́, всеще́дре, пребла́же и многоми́лостиве: и да́руй на́м про́чее бо́дрость и си́лу, во е́же твори́ти во́лю Твою́ бла́гу, и благода́рну и свяще́нну: да нощна́го и мра́чнаго зла́, светови́дным покая́нием преме́ншеся, и я́ко во дни́ благообра́зно ходя́ще, и очище́ни объяви́мся человеколю́бию Твоему́, недосто́йнии, воспева́юще Тя́ и велича́юще во ве́ки, ами́нь.

Благослове́н Бо́г на́ш:

А́ще у́бо е́сть Вели́кая Четыредеся́тница, глаго́лем: Трисвято́е. По О́тче на́ш: Го́споди поми́луй, 12. Сла́ва, и ны́не: Прииди́те, поклони́мся (три́жды) и два́ псалма́.

А́ще же ни, по благослове́нии:

Прииди́те, поклони́мся: три́жды, и псалмы́.

Псало́м 19:

Услы́шит тя́ Госпо́дь в де́нь печа́ли, защи́тит тя́ и́мя Бо́га Иа́ковля. По́слет ти́ по́мощь от Свята́го и от Сио́на засту́пит тя́. Помяне́т вся́ку же́ртву твою́, и всесожже́ние твое́ ту́чно бу́ди. Да́ст ти́ Госпо́дь по се́рдцу твоему́ и ве́сь сове́т тво́й испо́лнит. Возра́дуемся о спасе́нии твое́м и во и́мя Го́спода Бо́га на́шего возвели́чимся. Испо́лнит Госпо́дь вся́ проше́ния твоя́. Ны́не позна́х, я́ко спасе́ Госпо́дь христа́ Своего́, услы́шит его́ с Небесе́ Свята́го Своего́, в си́лах спасе́ние десни́цы Его́. Си́и на колесни́цах, и си́и на ко́нех, мы́ же во и́мя Го́спода Бо́га на́шего призове́м. Ти́и спя́ти бы́ша и падо́ша, мы́ же воста́хом и испра́вихомся. Го́споди, спаси́ царя́ и услы́ши ны́, во́ньже а́ще де́нь призове́м Тя́.

Псало́м 20:

Го́споди, си́лою Твое́ю возвесели́тся ца́рь и о спасе́нии Твое́м возра́дуется зело́. Жела́ние се́рдца его́ да́л еси́ ему́, и хоте́ния устну́ его́ не́си лиши́л его́. Я́ко предвари́л еси́ его́ благослове́нием благосты́нным, положи́л еси́ на главе́ его́ вене́ц от ка́мене че́стна. Живота́ проси́л е́сть у тебе́, и да́л еси́ ему́ долготу́ дни́й во ве́к ве́ка. Ве́лия сла́ва его́ спасе́нием Твои́м, сла́ву и велеле́пие возложи́ши на него́. Я́ко да́си ему́ благослове́ние во ве́к ве́ка, возвесели́ши его́ ра́достию с лице́м Твои́м. Я́ко ца́рь упова́ет на Го́спода, и ми́лостию Вы́шняго не подви́жится. Да обря́щется рука́ Твоя́ все́м враго́м Твои́м, десни́ца Твоя́ да обря́щет вся́ ненави́дящыя Тебе́. Я́ко положи́ши и́х я́ко пе́щь о́гненную во вре́мя лица́ Твоего́, Госпо́дь гне́вом Свои́м смяте́т я́, и сне́сть и́х о́гнь. Пло́д и́х от земли́ погуби́ши, и се́мя и́х от сыно́в челове́ческих. Я́ко уклони́ша на Тя́ зла́я, помы́слиша сове́ты, и́хже не возмо́гут соста́вити. Я́ко положи́ши я́ хребе́т, во избы́тцех Твои́х угото́виши лице́ и́х. Вознеси́ся, Го́споди, си́лою Твое́ю, воспое́м и пое́м си́лы Твоя́.

Сла́ва, и ны́не: Трисвято́е. Пресвята́я Тро́ице: По О́тче на́ш: Иере́й: Я́ко Твое́ е́сть Ца́рство: И мы́: Ами́нь.

И тропари́ сия́:

Спаси́ Го́споди лю́ди Твоя́, / и благослови́ достоя́ние Твое́, / побе́ды на сопроти́вныя да́руя, / и Твое́ сохраня́я Кресто́м Твои́м жи́тельство.

Сла́ва: Вознесы́йся на Кре́ст во́лею, / тезоимени́тому Твоему́ но́вому жи́тельству / щедро́ты Твоя́ да́руй, Христе́ Бо́же, / возвесели́ на́с си́лою Твое́ю, / побе́ды дая́ на́м на сопоста́ты, / посо́бие иму́щим Твое́ ору́жие ми́ра, / непобеди́мую побе́ду.

И ны́не: Предста́тельство стра́шное и непосты́дное, / не пре́зри Блага́я моли́тв на́ших, Всепе́тая Богоро́дице, / утверди́ правосла́вных жи́тельство: / спаси́ лю́ди Твоя́, и пода́ждь и́м с небесе́ побе́ду, / зане́ родила́ еси́ Бо́га, еди́на благослове́нная.

Свяще́нник: Поми́луй на́с, Бо́же, по вели́цей ми́лости Твое́й, мо́лим Ти́ ся́, услы́ши и поми́луй.

Ли́к: Го́споди, поми́луй, три́жды.

Еще́ мо́лимся о Вели́ком господи́не и отце́ на́шем, Святе́йшем Патриа́рхе (имяре́к) и о господи́не на́шем преосвяще́ннейшем епи́скопе [или́ архиепи́скопе, или́ митрополи́те] (имяре́к), и о все́й во Христе́ бра́тии на́шей.

Еще́ мо́лимся о богохрани́мей стране́ на́шей, власте́х и во́инстве ея́, да ти́хое и безмо́лвное житие́ поживе́м во вся́ком благоче́стии и чистоте́.

Еще́ мо́лимся за всю́ бра́тию и за вся́ христиа́ны.

Возгла́с: Я́ко ми́лостив и человеколю́бец Бо́г еси́, и Тебе́ сла́ву возсыла́ем, Отцу́, и Сы́ну, и Свято́му Ду́ху, ны́не и при́сно, и во ве́ки веко́в.

Ли́к: Ами́нь. И́менем госпо́дним благослови́ о́тче.

Иере́й же возглаша́ет: Сла́ва святе́й, и единосу́щней, и животворя́щей, и неразде́льней Тро́ице, всегда́, ны́не и при́сно, и во ве́ки веко́в.

Ли́к: Ами́нь.

И начина́ем шестопса́лмие, со вся́ким молча́нием и умиле́нием слу́шающе: учине́нный же бра́т со благогове́нием и стра́хом Бо́жиим глаго́лет:

Сла́ва в вы́шних Бо́гу, и на земли́ ми́р, в челове́цех благоволе́ние. Три́жды.

Го́споди, устне́ мои́ отве́рзеши, и уста́ моя́ возвестя́т хвалу́ Твою́. Два́жды.

Псало́м 3:

Го́споди, что́ ся́ умно́жиша стужа́ющии ми́? Мно́зи востаю́т на мя́, мно́зи глаго́лют души́ мое́й: не́сть спасе́ния ему́ в Бо́зе его́. Ты́ же, Го́споди, Засту́пник мо́й еси́, сла́ва моя́ и вознося́й главу́ мою́. Гла́сом мои́м ко Го́споду воззва́х, и услы́ша мя́ от горы́ святы́я Своея́. А́з усну́х, и спа́х, воста́х, я́ко Госпо́дь засту́пит мя́. Не убою́ся от те́м люде́й, о́крест напа́дающих на мя́. Воскресни́, Го́споди, спаси́ мя́, Бо́же мо́й, я́ко Ты́ порази́л еси́ вся́ вражду́ющыя ми́ всу́е: зу́бы гре́шников сокруши́л еси́. Госпо́дне е́сть спасе́ние, и на лю́дех Твои́х благослове́ние Твое́.

А́з усну́х, и спа́х, воста́х, я́ко Госпо́дь засту́пит мя́.

Псало́м 37:

Го́споди, да не я́ростию Твое́ю обличи́ши мене́, ниже́ гне́вом Твои́м нака́жеши мене́. Я́ко стре́лы Твоя́ унзо́ша во мне́, и утверди́л еси́ на мне́ ру́ку Твою́. Не́сть исцеле́ния в пло́ти мое́й от лица́ гне́ва Твоего́, не́сть ми́ра в косте́х мои́х от лица́ гре́х мои́х. Я́ко беззако́ния моя́ превзыдо́ша главу́ мою́, я́ко бре́мя тя́жкое отяготе́ша на мне́. Возсмерде́ша и согни́ша ра́ны моя́ от лица́ безу́мия моего́. Пострада́х и сляко́хся до конца́, ве́сь де́нь се́туя хожда́х. Я́ко ля́двия моя́ напо́лнишася поруга́ний, и не́сть исцеле́ния в пло́ти мое́й. Озло́блен бы́х и смири́хся до зела́, рыка́х от воздыха́ния се́рдца моего́. Го́споди, пред Тобо́ю все́ жела́ние мое́ и воздыха́ние мое́ от Тебе́ не утаи́ся. Се́рдце мое́ смяте́ся, оста́ви мя́ си́ла моя́, и све́т о́чию мое́ю, и то́й не́сть со мно́ю. Дру́зи мои́ и и́скреннии мои́ пря́мо мне́ прибли́жишася и ста́ша, и бли́жнии мои́ отдале́че мене́ ста́ша и нужда́хуся и́щущии ду́шу мою́, и и́щущии зла́я мне́ глаго́лаху су́етная и льсти́вным ве́сь де́нь поуча́хуся. А́з же я́ко глу́х не слы́шах и я́ко не́м не отверза́яй у́ст свои́х. И бы́х я́ко челове́к не слы́шай и не имы́й во усте́х свои́х обличе́ния. Я́ко на Тя́, Го́споди, упова́х, Ты́ услы́шиши, Го́споди Бо́же мо́й. Я́ко ре́х: да не когда́ пора́дуют ми́ ся́ врази́ мои́: и внегда́ подвижа́тися нога́м мои́м, на мя́ велере́чеваша. Я́ко а́з на ра́ны гото́в, и боле́знь моя́ предо мно́ю е́сть вы́ну. Я́ко беззако́ние мое́ а́з возвещу́ и попеку́ся о гресе́ мое́м. Врази́ же мои́ живу́т и укрепи́шася па́че мене́, и умно́жишася ненави́дящии мя́ без пра́вды. Воздаю́щии ми́ зла́я воз блага́я оболга́ху мя́, зане́ гоня́х благосты́ню. Не оста́ви мене́, Го́споди Бо́же мо́й, не отступи́ от мене́. Вонми́ в по́мощь мою́, Го́споди спасе́ния моего́.

Не оста́ви мене́, Го́споди Бо́же мо́й, не отступи́ от мене́. Вонми́ в по́мощь мою́, Го́споди спасе́ния моего́.

Псало́м 62:

Бо́же, Бо́же мо́й, к Тебе́ у́тренюю, возжада́ Тебе́ душа́ моя́, ко́ль мно́жицею Тебе́ пло́ть моя́, в земли́ пу́сте и непрохо́дне, и безво́дне. Та́ко во святе́м яви́хся Тебе́, ви́дети си́лу Твою́ и сла́ву Твою́. Я́ко лу́чши ми́лость Твоя́ па́че живо́т, устне́ мои́ похвали́те Тя́. Та́ко благословлю́ Тя́ в животе́ мое́м, о и́мени Твое́м воздежу́ ру́це мои́. Я́ко от ту́ка и ма́сти да испо́лнится душа́ моя́, и устна́ма ра́дости восхва́лят Тя́ уста́ моя́. А́ще помина́х Тя́ на посте́ли мое́й, на у́тренних поуча́хся в Тя́. Я́ко бы́л еси́ Помо́щник мо́й, и в кро́ве крилу́ Твое́ю возра́дуюся. Прильпе́ душа́ моя́ по Тебе́, мене́ же прия́т десни́ца Твоя́. Ти́и же всу́е иска́ша ду́шу мою́, вни́дут в преиспо́дняя земли́, предадя́тся в ру́ки ору́жия, ча́сти ли́совом бу́дут. Ца́рь же возвесели́тся о Бо́зе, похва́лится вся́к клены́йся И́м, я́ко загради́шася уста́ глаго́лющих непра́ведная.

На у́тренних поуча́хся в Тя́. Я́ко бы́л еси́ Помо́щник мо́й, и в кро́ве крилу́ Твое́ю возра́дуюся. Прильпе́ душа́ моя́ по Тебе́, мене́ же прия́т десни́ца Твоя́.

Сла́ва, и ны́не: Аллилу́иа, аллилу́иа, аллилу́иа, сла́ва Тебе́ Бо́же. Три́жды, без покло́нов.

Го́споди поми́луй, три́жды. Сла́ва, и ны́не:

И исхо́дит свяще́нник от олтаря́ и глаго́лет моли́твы у́тренния та́йно, стоя́й непокрове́н пред святы́ми дверьми́.

Псало́м 87:

Го́споди Бо́же спасе́ния моего́, во дни́ воззва́х, и в нощи́ пред Тобо́ю. Да вни́дет пред Тя́ моли́тва моя́: приклони́ у́хо Твое́ к моле́нию моему́, я́ко испо́лнися зо́л душа́ моя́, и живо́т мо́й а́ду прибли́жися. Привмене́н бы́х с низходя́щими в ро́в, бы́х я́ко челове́к без по́мощи, в ме́ртвых свобо́дь, я́ко я́звеннии спя́щии во гро́бе, и́хже не помяну́л еси́ ктому́, и ти́и от руки́ Твоея́ отринове́ни бы́ша. Положи́ша мя́ в ро́ве преиспо́днем, в те́мных и се́ни сме́ртней. На мне́ утверди́ся я́рость Твоя́, и вся́ во́лны Твоя́ наве́л еси́ на мя́. Уда́лил еси́ зна́емых мои́х от мене́, положи́ша мя́ ме́рзость себе́: пре́дан бы́х и не исхожда́х. О́чи мои́ изнемого́сте от нищеты́, воззва́х к Тебе́, Го́споди, ве́сь де́нь, возде́х к Тебе́ ру́це мои́. Еда́ ме́ртвыми твори́ши чудеса́? Или́ вра́чеве воскреся́т, и испове́дятся Тебе́? Еда́ пове́сть кто́ во гро́бе ми́лость Твою́, и и́стину Твою́ в поги́бели? Еда́ позна́на бу́дут во тьме́ чудеса́ Твоя́, и пра́вда Твоя́ в земли́ забве́нней? И а́з к Тебе́, Го́споди, воззва́х и у́тро моли́тва моя́ предвари́т Тя́. Вску́ю, Го́споди, отре́еши ду́шу мою́, отвраща́еши лице́ Твое́ от мене́? Ни́щ е́смь а́з, и в труде́х от ю́ности моея́; возне́с же ся́, смири́хся, и изнемого́х. На мне́ преидо́ша гне́ви Твои́, устраше́ния Твоя́ возмути́ша мя́, обыдо́ша мя́ я́ко вода́, ве́сь де́нь одержа́ша мя́ вку́пе. Уда́лил еси́ от мене́ дру́га и и́скренняго, и зна́емых мои́х от страсте́й.

Го́споди Бо́же спасе́ния моего́, во дни́ воззва́х, и в нощи́ пред Тобо́ю. Да вни́дет пред Тя́ моли́тва моя́: приклони́ у́хо Твое́ к моле́нию моему́.

Псало́м 102:

Благослови́, душе́ моя́, Го́спода, и вся́ вну́тренняя моя́ и́мя свято́е Его́. Благослови́, душе́ моя́, Го́спода, и не забыва́й все́х воздая́ний Его́, очища́ющаго вся́ беззако́ния твоя́, исцеля́ющаго вся́ неду́ги твоя́, избавля́ющаго от истле́ния живо́т тво́й, венча́ющаго тя́ ми́лостию и щедро́тами, исполня́ющаго во благи́х жела́ние твое́: обнови́тся я́ко о́рля ю́ность твоя́. Творя́й ми́лостыни Госпо́дь, и судьбу́ все́м оби́димым. Сказа́ пути́ Своя́ Моисе́ови, сыново́м Изра́илевым хоте́ния Своя́: Ще́др и Ми́лостив Госпо́дь, Долготерпели́в и Многоми́лостив. Не до конца́ прогне́вается, ниже́ во ве́к вражду́ет, не по беззако́нием на́шым сотвори́л е́сть на́м, ниже́ по грехо́м на́шым возда́л е́сть на́м. Я́ко по высоте́ небе́сней от земли́, утверди́л е́сть Госпо́дь ми́лость Свою́ на боя́щихся Его́. Ели́ко отстоя́т восто́цы от за́пад, уда́лил е́сть от на́с беззако́ния на́ша. Я́коже ще́дрит оте́ц сы́ны, уще́дри Госпо́дь боя́щихся Его́. Я́ко То́й позна́ созда́ние на́ше, помяну́, я́ко пе́рсть есмы́. Челове́к, я́ко трава́ дни́е его́, я́ко цве́т се́льный, та́ко оцвете́т, я́ко ду́х про́йде в не́м, и не бу́дет, и не позна́ет ктому́ ме́ста своего́. Ми́лость же Госпо́дня от ве́ка и до ве́ка на боя́щихся Его́, и пра́вда Его́ на сыне́х сыно́в, храня́щих заве́т Его́, и по́мнящих за́поведи Его́ твори́ти я́. Госпо́дь на Небеси́ угото́ва Престо́л Сво́й, и Ца́рство Его́ все́ми облада́ет. Благослови́те Го́спода вси́ А́нгели Его́, си́льнии кре́постию, творя́щии сло́во Его́, услы́шати гла́с слове́с Его́. Благослови́те Го́спода вся́ Си́лы Его́, слуги́ Его́, творя́щии во́лю Его́. Благослови́те Го́спода вся́ дела́ Его́, на вся́ком ме́сте влады́чества Его́, благослови́, душе́ моя́, Го́спода.

На вся́ком ме́сте влады́чества Его́, благослови́, душе́ моя́, Го́спода.

Псало́м 142:

Го́споди, услы́ши моли́тву мою́, внуши́ моле́ние мое́ во и́стине Твое́й, услы́ши мя́ в пра́вде Твое́й и не вни́ди в су́д с рабо́м Твои́м, я́ко не оправди́тся пред Тобо́ю вся́к живы́й. Я́ко погна́ вра́г ду́шу мою́, смири́л е́сть в зе́млю живо́т мо́й, посади́л мя́ е́сть в те́мных, я́ко ме́ртвыя ве́ка. И уны́ во мне́ ду́х мо́й, во мне́ смяте́ся се́рдце мое́. Помяну́х дни́ дре́вния, поучи́хся во все́х де́лех Твои́х, в творе́ниих ру́ку Твое́ю поуча́хся. Возде́х к Тебе́ ру́це мои́, душа́ моя́, я́ко земля́ безво́дная Тебе́. Ско́ро услы́ши мя́, Го́споди, исчезе́ ду́х мо́й, не отврати́ лица́ Твоего́ от мене́, и уподо́блюся низходя́щым в ро́в. Слы́шану сотвори́ мне́ зау́тра ми́лость Твою́, я́ко на Тя́ упова́х. Скажи́ мне́, Го́споди, пу́ть во́ньже пойду́, я́ко к Тебе́ взя́х ду́шу мою́. Изми́ мя́ от вра́г мои́х, Го́споди, к Тебе́ прибего́х. Научи́ мя́ твори́ти во́лю Твою́, я́ко Ты́ еси́ Бо́г мо́й. Ду́х Тво́й Благи́й наста́вит мя́ на зе́млю пра́ву. И́мене Твоего́ ра́ди, Го́споди, живи́ши мя́, пра́вдою Твое́ю изведе́ши от печа́ли ду́шу мою́. И ми́лостию Твое́ю потреби́ши враги́ моя́ и погуби́ши вся́ стужа́ющыя души́ мое́й, я́ко а́з ра́б Тво́й е́смь.

Услы́ши мя́, Го́споди, в пра́вде Твое́й и не вни́ди в су́д с рабо́м Твои́м.

Услы́ши мя́, Го́споди, в пра́вде Твое́й и не вни́ди в су́д с рабо́м Твои́м.

Ду́х Тво́й Благи́й наста́вит мя́ на зе́млю пра́ву.

Сла́ва, и ны́не: Аллилу́иа, аллилу́иа, аллилу́иа, сла́ва Тебе́ Бо́же. Три́жды.

Моли́тва пе́рвая:

Благодари́м Тя́, Го́споди Бо́же на́ш, возста́вившаго на́с от ло́жей на́ших, и вложи́вшаго во уста́ на́ша сло́во хвале́ния, е́же покланя́тися, и призыва́ти и́мя Твое́ свято́е, и мо́лимся Твои́м щедро́там, и́хже всегда́ употребля́л еси́ о на́шей жи́зни. И ны́не посли́ по́мощь Твою́ на предстоя́щия пред лице́м святы́я сла́вы Твоея́, и ожида́ющия от Тебе́ бога́тыя ми́лости, и да́ждь и́м, со стра́хом и любо́вию всегда́ Тебе́ служа́щим, хвали́ти неисповеди́мую Твою́ бла́гость.

Я́ко подоба́ет Тебе́ вся́кая сла́ва, че́сть и поклоне́ние, Отцу́, и Сы́ну, и Свято́му Ду́ху, ны́не и при́сно, и во ве́ки веко́в. Ами́нь.

Моли́тва втора́я:

От но́щи у́тренюет ду́х на́ш к Тебе́, Бо́же на́ш, зане́ све́т повеле́ния Твоя́ на земли́. Пра́вду и святы́ню соверша́ти во стра́се Твое́м вразуми́ ны́: Тебе́ бо сла́вим, вои́стинну су́щаго Бо́га на́шего. Приклони́ у́хо Твое́ и услы́ши ны́, и помяни́, Го́споди, су́щия и моля́щияся с на́ми вся́ по и́мени, и спаси́ я́ си́лою Твое́ю, благослови́ лю́ди Твоя́ и освяти́ достоя́ние Твое́. Ми́р ми́рови Твоему́ да́руй, це́рквам Твои́м, свяще́нником и все́м лю́дем Твои́м.

Я́ко благослови́ся и просла́вися всечестно́е и великоле́пое и́мя твое́, Отца́, и Сы́на, и Свята́го Ду́ха, ны́не и при́сно, и во ве́ки веко́в. Ами́нь.

Моли́тва тре́тия:

От но́щи у́тренюет ду́х на́ш к Тебе́, Бо́же, зане́ све́т повеле́ния Твоя́. Научи́ на́с, Бо́же, пра́вде Твое́й, за́поведем Твои́м и оправда́нием Твои́м. Просвети́ о́чи мы́слей на́ших, да не когда́ у́снем во гресе́х в сме́рть. Отжени́ вся́кий мра́к от серде́ц на́ших. Да́руй на́м со́лнце пра́вды, и ненаве́тну жи́знь на́шу соблюди́ печа́тию Свята́го Твоего́ Ду́ха. Испра́ви стопы́ на́ша на пу́ть ми́ра. Да́ждь на́м ви́дети у́тро и де́нь в ра́довании, да Тебе́ у́тренния возсыла́ем моли́твы.

Я́ко Твоя́ держа́ва, и Твое́ е́сть Ца́рство, и си́ла и сла́ва, Отца́, и Сы́на, и Свята́го Ду́ха, ны́не и при́сно, и во ве́ки веко́в. Ами́нь.

Моли́тва четве́ртая:

Влады́ко Бо́же, святы́й и непостижи́мый, реки́й из тьмы́ све́ту возсия́ти, упоко́ивый на́с в нощне́м сне́ и возста́вивый к славосло́вию и мольбе́ Твоея́ бла́гости. Умоля́емь от Своего́ Ти́ благоутро́бия, приими́ на́с и ны́не покланя́ющихся Тебе́ и по си́ле благодаря́щих Тя́, и да́руй на́м вся́, я́же ко спасе́нию, проше́ния. Покажи́ ны́ сы́ны све́та и дне́ и насле́дники ве́чных Твои́х бла́г. Помяни́, Го́споди, во мно́жестве щедро́т Твои́х и вся́ лю́ди Твоя́, су́щия и моля́щияся с на́ми, и всю́ бра́тию на́шу, я́же на земли́, на мо́ри, на вся́ком ме́сте влады́чествия Твоего́, тре́бующих Твоего́ человеколю́бия и по́мощи, и все́м пода́й вели́кую Твою́ ми́лость. Да спасе́ни душе́ю же и те́лом всегда́ пребыва́юще, со дерзнове́нием сла́вим чу́дное и благослове́нное и́мя Твое́ – Отца́, и Сы́на, и Свята́го Ду́ха, ны́не и при́сно, и во ве́ки веко́в. Ами́нь.

Я́ко Бо́г ми́лости, щедро́т и человеколю́бия еси́, и Тебе́ сла́ву возсыла́ем, Отцу́, и Сы́ну, и Свято́му Ду́ху, ны́не и при́сно, и во ве́ки веко́в. Ами́нь.

Моли́тва пя́тая:

Благи́х сокро́вище, исто́чниче приснотеку́щий, О́тче святы́й, чудотво́рче, всеси́льне и Вседержи́телю, вси́ Тебе́ покланя́емся и Тебе́ мо́лимся Твоя́ ми́лости, и Твоя́ щедро́ты призыва́юще на по́мощь и заступле́ние на́шего смире́ния. Помяни́, Го́споди, Твоя́ рабы́, приими́ все́х на́с у́тренняя моле́ния, я́ко кади́ло пред Тобо́ю, и да ни еди́наго от на́с неиску́сна сотвори́ши, но вся́ ны́ снабди́ щедро́тами Твои́ми. Помяни́, Го́споди, бдя́щия и пою́щия во сла́ву Твою́, и единоро́днаго Твоего́ Сы́на и Бо́га на́шего, и Свята́го Твоего́ Ду́ха; бу́ди те́м помо́щник и засту́пник, приими́ и́х мольбы́ в пренебе́сный и мы́сленный Тво́й же́ртвенник.

Я́ко Ты́ еси́ Бо́г на́ш, и Тебе́ сла́ву возсыла́ем, Отцу́, и Сы́ну, и Свято́му Ду́ху, ны́не и при́сно, и во ве́ки веко́в. Ами́нь.

Моли́тва шеста́я:

Благодари́м Тя́, Го́споди Бо́же спасе́ний на́ших, я́ко вся́ твори́ши во благоде́тельство жи́зни на́шея, да всегда́ к Тебе́ взира́ем Спа́су и благоде́телю ду́ш на́ших. Я́ко препоко́ил еси́ на́с в мимоше́дшее но́щи число́ и воздви́гл еси́ ны́ от ло́ж на́ших, и поста́вил еси́ в поклоне́ние честна́го и́мене Твоего́. Те́мже мо́лим Тя́, Го́споди, да́ждь на́м благода́ть и си́лу, да сподо́бимся пе́ти Тебе́ разу́мно и моли́тися непреста́нно, во стра́се и тре́пете свое́ спасе́ние соде́ловающе заступле́нием Христа́ Твоего́. Помяни́, Го́споди, и в нощи́ к Тебе́ вопию́щия, услы́ши я́ и поми́луй, и сокруши́ под но́зе и́х неви́димыя и бори́тельныя враги́.

Ты́ бо еси́ Ца́рь ми́ра, и Спа́с ду́ш на́ших, и Тебе́ сла́ву возсыла́ем, Отцу́, и Сы́ну, и Свято́му Ду́ху, ны́не и при́сно, и во ве́ки веко́в. Ами́нь.

Моли́тва седма́я:

Бо́же и О́тче Го́спода на́шего Иису́са Христа́, возста́вивый ны́ от ло́жей на́ших и собра́вый ны́ в ча́с моли́твы, да́ждь на́м благода́ть во отверзе́ние у́ст на́ших, и приими́ на́ша по си́ле благодаре́ния, и научи́ ны́ оправда́нием Твои́м: зане́ помоли́тися, я́коже подоба́ет, не ве́мы, а́ще не Ты́, Го́споди, Святы́м Твои́м Ду́хом наста́виши ны́. Те́мже мо́лимся Тебе́, а́ще что́ согреши́хом да́же до настоя́щаго часа́, сло́вом, или́ де́лом, или́ помышле́нием, во́лею или́ нево́лею, осла́би, оста́ви, прости́; а́ще бо беззако́ния на́зриши, Го́споди, Го́споди, кто́ постои́т, я́ко у тебе́ избавле́ние е́сть. Ты́ еси́ еди́н святы́й, помо́щник держа́вный, защи́титель жи́зни на́шея, и о Тебе́ пе́ние на́ше всегда́.

Бу́ди держа́ва Ца́рствия Твоего́ благослове́на и препросла́влена, Отца́, и Сы́на, и Свята́го Ду́ха, ны́не и при́сно, и во ве́ки веко́в. Ами́нь.

Моли́тва осма́я:

Го́споди Бо́же на́ш, со́нное уны́ние отгна́вый от на́с и сопризва́вый ны́ зва́нием святы́м, е́же и в нощи́ воздева́ти ру́ки на́ша и испове́датися Тебе́ о судьба́х пра́вды Твоея́. Приими́ мольбы́ на́ша, моле́ния, испове́дания, нощны́я слу́жбы, и да́руй на́м, Бо́же, ве́ру непосты́дну, наде́жду изве́стну, любо́вь нелицеме́рну, благослови́ на́ша вхо́ды и исхо́ды, дея́ния, дела́, словеса́, помышле́ния, и да́ждь на́м пости́гнути в нача́ло дне́, хва́лящим, пою́щим, благословя́щим Твоея́ неизрече́нныя благосты́ни бла́гость.

Я́ко благослови́ся всесвято́е и́мя Твое́, и просла́вися Ца́рство Твое́, Отца́, и Сы́на, и Свята́го Ду́ха, ны́не и при́сно, и во ве́ки веко́в. Ами́нь.

Моли́тва девя́тая:

Возсия́й в сердца́х на́ших, человеколю́бче Влады́ко, Твоего́ богоразу́мия нетле́нный све́т, и мы́сленныя на́ша отве́рзи о́чи во ева́нгельских Твои́х пропове́даний разуме́ние. Вложи́ в на́с и блаже́нных Твои́х за́поведей стра́х, да плотски́я по́хоти вся́ попра́вше, духо́вное жи́тельство про́йдем, вся́ я́же ко благоугожде́нию Твоему́ и му́дрствующе и де́юще.

Ты́ бо еси́ освяще́ние и просвеще́ние ду́ш и теле́с на́ших, Христе́ Бо́же, и Тебе́ сла́ву возсыла́ем, со безнача́льным Твои́м Отце́м и всесвяты́м и благи́м и животворя́щим Твои́м Ду́хом, ны́не и при́сно, и во ве́ки веко́в. Ами́нь.

Моли́тва деся́тая:

Го́споди Бо́же на́ш, покая́нием оставле́ние челове́ком дарова́вый, и во о́браз на́м позна́ния грехо́в и испове́дания, проро́ка Дави́да покая́ние к проще́нию показа́вый, Са́м Влады́ко, во мно́гая ны́ и вели́кая па́дшия согреше́ния, поми́луй по вели́цей ми́лости Твое́й, и по мно́жеству щедро́т Твои́х очи́сти беззако́ния на́ша, я́ко Тебе́ согреши́хом, Го́споди, и безве́стная и та́йная се́рдца челове́ческаго ве́дущему, и еди́ному иму́щему вла́сть оставля́ти грехи́. Се́рдце же чи́сто созда́в в на́с, и Ду́хом Влады́чним утверди́в на́с, и ра́дость спасе́ния Твоего́ сказа́в на́м, не отри́ни на́с от лица́ Твоего́, но благоволи́, я́ко бла́г и человеколю́бец, да́же до после́дняго на́шего издыха́ния, приноси́ти Тебе́ же́ртву пра́вды и возноше́ние во святы́х Твои́х же́ртвенницех.

Ми́лостию, и щедро́тами, и человеколю́бием единоро́днаго Твоего́ Сы́на, с ни́мже благослове́н еси́, со всесвяты́м, и благи́м, и животворя́щим Твои́м Ду́хом, ны́не и при́сно, и во ве́ки веко́в. Ами́нь.

Моли́тва перваяна́десять:

Бо́же, Бо́же на́ш, у́мныя и слове́сныя соста́вивый Си́лы Твое́ю во́лею, Тя́ мо́лим и Тебе́ ми́ли де́емся: приими́ на́ше по си́ле славосло́вие, со все́ми созда́нии Твои́ми, и бога́тыми Твоея́ бла́гости возда́ждь дарова́ньми. Я́ко Тебе́ преклоня́ется вся́кое коле́но небе́сных, и земны́х, и преиспо́дних, и вся́кое дыха́ние и созда́ние пое́т непостижи́мую Твою́ сла́ву: еди́н бо еси́ Бо́г и́стинный и многоми́лостивый.

Я́ко Тя́ хва́лят вся́ Си́лы Небе́сныя, и Тебе́ сла́ву возсыла́ем, Отцу́, и Сы́ну, и Свято́му Ду́ху, ны́не и при́сно, и во ве́ки веко́в. Ами́нь.

Моли́тва втораяна́десять:

Хва́лим, пое́м, благослови́м и благодари́м Тя́, Бо́же оте́ц на́ших, я́ко преве́л еси́ се́нь нощну́ю, и показа́л еси́ на́м па́ки све́т дневны́й. Но мо́лим Твою́ бла́гость, очи́сти грехи́ на́ша и приими́ моле́ние на́ше вели́ким Твои́м благоутро́бием, я́ко к Тебе́ прибега́ем ми́лостивому и всеси́льному Бо́гу. Возсия́й в сердца́х на́ших и́стинное со́лнце пра́вды Твоея́, просвети́ у́м на́ш, и чу́вства вся́ соблюди́, да я́ко во дни́ благообра́зно ходя́ще путе́м за́поведей Твои́х, дости́гнем в жи́знь ве́чную, я́ко у тебе́ е́сть исто́чник жи́зни, и в наслажде́нии бы́ти сподо́бимся непристу́пнаго Твоего́ све́та.

Я́ко Ты́ еси́ Бо́г на́ш, и Тебе́ сла́ву возсыла́ем, Отцу́, и Сы́ну, и Свято́му Ду́ху, ны́не и при́сно, и во ве́ки веко́в. Ами́нь.

Та́же ектениа́ вели́кая. И а́бие пое́тся во гла́с тропаря́, настоя́щаго дне́:

Бо́г Госпо́дь, и яви́ся на́м, / благослове́н Гряды́й во И́мя Госпо́дне.

Сти́х 1: Испове́дайтеся Го́сподеви, я́ко бла́г, я́ко в ве́к ми́лость Его́.

Сти́х 2: Обыше́дше обыдо́ша мя́ и и́менем Госпо́дним противля́хся и́м.

Сти́х 3: Не умру́, но жи́в бу́ду и пове́м дела́ Госпо́дня.

Сти́х 4: Ка́мень, Его́же небрего́ша зи́ждущии, Се́й бы́сть во главу́ у́гла, от Го́спода бы́сть Се́й и е́сть ди́вен во очесе́х на́ших.

Та́же глаго́лем тропа́рь прилучи́вшагося пра́здника, или́ свята́го, или́ воскре́сный прилучи́вшагося гла́са два́жды, и Богоро́дичен в то́йже гла́с.

А́ще же е́сть аллилу́иа вме́сто Бо́г Госпо́дь, пое́м аллилу́иа, по три́жды, во гла́с осмогла́сника.

Стихи́ же глаго́лются сия́:

Сти́х 1: От но́щи у́тренюет ду́х мо́й к Тебе́, Бо́же, зане́ све́т повеле́ния Твоя́ на земли́.

Сти́х 2: Пра́вде научи́теся живу́щии на земли́.

Сти́х 3: За́висть прии́мет лю́ди ненака́занныя.

Сти́х 4: Приложи́ и́м зла́, Го́споди, приложи́ зла́ сла́вным земли́.

И по Аллилу́иа пое́м Тро́ичны гла́са, ки́йждо по еди́нощи.

Пе́сни тро́ичны, гла́с 1:

Плотски́ми образова́нии Безпло́тных си́л / к мы́сленному и невеще́ственному возводи́ми уму́ / и Трисвято́ю пе́снию Триипоста́снаго Божества́ прие́млюще сия́ние, / херуви́мски возопии́м Еди́ному Бо́гу: / Свя́т, Свя́т, Свя́т еси́, Бо́же на́ш.

Сла́ва: Со все́ми Небе́сными си́лами / херуви́мски Су́щему в Вы́шних возопии́м, / трисвяту́ю возсыла́юще хвалу́: / Свя́т, Свя́т, Свя́т еси́, Бо́же на́ш, моли́твами все́х святы́х Твои́х поми́луй на́с.

И ны́не: Воста́вше от сна́, припа́даем Ти́, Бла́же, / и а́нгельскую пе́снь вопие́м Ти́, Си́льне: / Свя́т, Свя́т, Свя́т еси́, Бо́же на́ш, Богоро́дицею поми́луй на́с.

Ве́домо бу́ди, ка́ко глаго́лати в конца́х во все́х пе́рвых троичнах осми́ гласо́в:

В понеде́льник пе́рваго тро́ична глаго́лати си́це:

Предста́тельствы Безпло́тных Твои́х поми́луй на́с.

Во вто́рник: Моли́твами Предте́чи Твоего́ поми́луй на́с.

В сре́ду: Си́лою Креста́ Твоего́ сохрани́ на́с, Го́споди. Та́кожде и в пято́к.

В четверто́к: Моли́твами святы́х апо́стол Твои́х и святи́теля Никола́я поми́луй на́с.

А у про́чих двою́ тро́ичнов глаго́лати, я́коже в конца́х и́х пи́сано е́сть.

Пе́сни Тро́ичны, гла́с 2:

Вы́шния Си́лы подража́юще на земли́, / побе́дную пе́снь прино́сим Ти́, Бла́же: / Свя́т, Свя́т, Свя́т еси́, Бо́же на́ш.

Сла́ва: Несозда́нное Естество́, все́х Зижди́телю, / устне́ на́ша отве́рзи, / я́ко да возвести́м хвалу́ Твою́, вопию́ще: / Свя́т, Свя́т, Свя́т еси́, Бо́же на́ш, моли́твами все́х святы́х Твои́х поми́луй на́с.

И ны́не: От одра́ и сна́ воздви́гл мя́ еси́, Го́споди, / у́м мо́й просвети́ и се́рдце, / и устне́ мои́ отве́рзи, / во е́же пе́ти Тя́, свята́я Тро́ице: / Свя́т, Свя́т, Свя́т еси́, Бо́же, Богоро́дицею поми́луй на́с.

Пе́сни Тро́ичны, гла́с 3:

Тро́ице Единосу́щная и неразде́льная, / Еди́нице Триипоста́сная и Соприсносу́щная, / Тебе́, я́ко Бо́гу, а́нгельскую пе́снь вопие́м: / Свя́т, Свя́т, Свя́т еси́, Бо́же на́ш.

Сла́ва: Отца́ Безнача́льна, Сы́на Собезнача́льна, Ду́ха Соприсносу́щна, / Божество́ Еди́но, / херуви́мски славосло́вити дерза́юще, глаго́лем: / Свя́т, Свя́т, Свя́т еси́, Бо́же на́ш, моли́твами все́х святы́х Твои́х поми́луй на́с.

И ны́не: Напра́сно Судия́ прии́дет, и коего́ждо дея́ния обнажа́тся, / но стра́хом зове́м в полу́нощи: / Свя́т, Свя́т, Свя́т еси́, Бо́же на́ш, Богоро́дицею поми́луй на́с.

Пе́сни Тро́ичны, гла́с 4:

У́мных Твои́х слу́г приноси́ти сме́ртнии, пе́снь дерза́юще, глаго́лем: / Свя́т, Свя́т, Свя́т еси́, Бо́же на́ш.

Сла́ва: Я́ко чи́ни ны́не А́нгельстии на Небеси́ / и стоя́ния стра́хом челове́ческая на земли́, / побе́дную пе́снь прино́сим Ти́, Бла́же: / Свя́т, Свя́т, Свя́т еси́, Бо́же на́ш, моли́твами все́х святы́х Твои́х поми́луй на́с.

И ны́не: Безнача́льнаго Твоего́ Отца́ / и Тебе́, Христе́ Бо́же, / и Пресвята́го Твоего́ Ду́ха, / херуви́мски славосло́вити дерза́юще, глаго́лем: / Свя́т, Свя́т, Свя́т еси́, Бо́же на́ш, Богоро́дицею поми́луй на́с.

Пе́сни Тро́ичны, гла́с 5:

Пе́нию вре́мя и моли́тве ча́с, / приле́жно возопии́м Еди́ному Бо́гу: / Свя́т, Свя́т, Свя́т еси́, Бо́же на́ш.

Сла́ва: Образова́ти дерза́юще у́мная Твоя́ Во́инства, / Тро́ице Безнача́льная, / усты́ недосто́йными вопие́м: / Свя́т, Свя́т, Свя́т еси́, Бо́же на́ш, моли́твами все́х святы́х Твои́х поми́луй на́с.

И ны́не: И́же в ложесна́ деви́ческая вмести́выйся / и не́др Оте́ческих не разлучи́выйся, / со А́нгелы и на́с, Христе́ Бо́же, приими́, вопию́щих Ти́: / Свя́т, Свя́т, Свя́т еси́, Бо́же на́ш, Богоро́дицею поми́луй на́с.

Пе́сни Тро́ичны, гла́с 6:

Предстоя́ще со стра́хом Херуви́ми, / ужаса́ющеся с тре́петом Серафи́ми, / трисвяту́ю пе́снь прино́сят немо́лчным гла́сом. / С ни́миже и мы́ вопие́м, гре́шнии: / Свя́т, Свя́т, Свя́т еси́, Бо́же на́ш.

Сла́ва: Безпло́тными усты́, немо́лчными славословле́ньми / шестокри́льнии вопию́т Ти́ трисвяту́ю пе́снь, Бо́же на́ш. / И мы́, и́же на земли́, / недосто́йными усты́ хвалу́ Ти́ возсыла́ем: / Свя́т, Свя́т, Свя́т еси́, Бо́же на́ш, моли́твами все́х святы́х Твои́х поми́луй на́с.

И ны́не: Тро́ичныя Еди́ницы Божество́ неслия́нным соедине́нием сла́вим / и а́нгельскую пе́снь вопие́м: / Свя́т, Свя́т, Свя́т еси́, Бо́же на́ш, Богоро́дицею поми́луй на́с.

Пе́сни Тро́ичны, гла́с 7:

Вы́шнею си́лою херуви́мски воспева́емый / и Боже́ственною сла́вою а́нгельски покланя́емый, / приими́ и на́с, су́щих на земли́, / недосто́йными устна́ми хвале́ние Тебе́ возсыла́ющих: / Свя́т, Свя́т, Свя́т еси́, Бо́же на́ш.

Сла́ва: Я́ко со́н, ле́ность отложи́вши, душе́, / исправле́ние ко хвале́нию покажи́ Судии́ / и со стра́хом возопи́й: / Свя́т, Свя́т, Свя́т еси́, Бо́же на́ш, моли́твами все́х святы́х Твои́х поми́луй на́с.

И ны́не: Непристу́пному Божеству́ во Еди́нице Тро́ице / серафи́мскую трисвяту́ю возсыла́юще хвалу́, / со стра́хом возопии́м: / Свя́т, Свя́т, Свя́т еси́, Бо́же на́ш, Богоро́дицею поми́луй на́с.

Пе́сни Тро́ичны, гла́с 8:

На не́бо сердца́ иму́ще, а́нгельский подражи́м чи́н / и со стра́хом Судии́ припаде́м, побе́дную взыва́юще хвалу́: / Свя́т, Свя́т, Свя́т еси́, Бо́же на́ш.

Сла́ва: Зре́ти Тебе́ не сме́юще Херуви́ми, / летя́ще зову́т со восклица́нием Боже́ственную пе́снь трисвята́го гла́са, / с ни́миже и мы́ вопие́м Ти́: / Свя́т, Свя́т, Свя́т еси́, Бо́же на́ш, моли́твами все́х святы́х Твои́х поми́луй на́с.

И ны́не: Сляца́еми мно́жеством прегреше́ний на́ших / и не сме́юще воззре́ти на высоту́ небе́сную, / ду́шу с те́лом прекло́ньше, / со А́нгелы пе́снь вопие́м Ти́: / Свя́т, Свя́т, Свя́т еси́, Бо́же на́ш, Богоро́дицею поми́луй на́с.

Та́же стихосло́вим псалти́рь.

По 1-й кафизме седа́лен, глас 5:

Судии́ седя́щу, и А́нгелом стоя́щым, трубе́ глася́щей, пла́мени горя́щу, что́ сотвори́ши душе́ моя́, ведо́ма на суд; тогда́ бо лю́тая твоя́ предста́нут, и та́йная облича́тся согреше́ния. Те́мже пре́жде конца́ возопи́й Судии́: Бо́же, очи́сти мя́, и спаси́ мя́. Дважды.

Сла́ва, и ны́не, Богоро́дичен:

Мы́сленный виногра́де, израсти́вший на́м грозд Боже́ственный, от Него́же напоя́емся вино́м нетле́ния, источи́ мое́й души́ умиле́ние, во́ду очище́ния, Твои́ми моли́твами.

По 2-й кафизме, седален, глас 2:

Помышля́ю день стра́шный, и пла́чуся дея́ний мои́х лука́вых: ка́ко отвеща́ю безсме́ртному Царю́; или́ ко́им дерзнове́нием воззрю́ на Судию́ блу́дный аз; Благоутро́бный О́тче, Сы́не Единоро́дный, Душе́ Святы́й, поми́луй мя́. Дважды.

Сла́ва, и ны́не, Богоро́дичен:

Ско́рый Тво́й Покро́в, и по́мощь и ми́лость покажи́ на рабы́ Твоя́, и во́лны Чи́стая, укроти́ су́етных по́мыслов, и па́дшую мою́ ду́шу возста́ви Богоро́дице: вем бо, вем Де́во, я́ко мо́жеши, ели́ка и хо́щеши.

Посе́м Псало́м 50: Поми́луй мя́, Бо́же:

Кано́н ко Го́споду на́шему Иису́су Христу́, глас 6.

Пе́снь 1.

Ирмо́с: Помо́щник и Покрови́тель, бы́сть мне́ во спасе́ние, сей мо́й Бо́г, и просла́влю Его́, Бо́г Отца́ моего́, и вознесу́ Его́: сла́вно бо просла́вися.

Припе́в: Сла́ва тебе́ Бо́же на́ш сла́ва тебе́.

Егда́ прии́деши Бо́же во тьмах и ты́сящах А́нгельских небе́сных нача́л, и мене́ на о́блацех окая́ннаго сподо́би сре́сти Тя́ Христе́.

Не вни́ди со мно́ю в Суд, нося́й моя́ дея́ния, словеса́ изыску́яй, и исправля́яй стремле́ния: но щедро́тами Твои́ми презира́я моя́ лю́тая, спаси́ мя́ Всеси́льне.

Ужаса́ет мя́, и страши́т о́гнь негаси́мый гее́нский, червь го́рький, скре́жет зубо́в: но осла́би ми́, оста́ви, и стоя́нию мя́ Христе́ избра́нных Твои́х соучини́.

Богоро́дичен: Преклоне́н мно́жеством искуше́ний, и лю́тыми дея́нии, вы́ю душе́вную и теле́сную приклоня́ю Тебе́, Чи́стая, и вопию́ Ти́ приле́жно: Ты́ мя́ испра́ви.

Пе́снь 3.

Ирмо́с: Утверди́ Го́споди, на ка́мени за́поведей Твои́х, подви́гшееся се́рдце мое́, я́ко Еди́н свя́т еси́ и Госпо́дь.

Госпо́дь гряде́т, и кто́ стерпи́т стра́х Его́; кто́ яви́тся лицу́ Его́; но гото́ва бу́ди, о душе́ моя́, к сре́тению.

Нестерпи́мый, Го́споди, гне́в, ка́ко стерплю́ Суда́ Твоего́, преслу́шав Твое́ повеле́ние; но пощади́, пощади́ мя́ в ча́с Суда́.

Поми́луй Го́споди, поми́луй мя́, вопию́ Ти́, егда́ прии́деши со А́нгелы Твои́ми, отда́ти все́м по достоя́нию дея́ний.

Богоро́дичен: Две́рь благода́тная, Отве́рзшая ве́рным две́ри Небе́сныя, покая́ния две́ри светоза́рныя отве́рзи ми́ Влады́чице, и вра́т сме́ртных свободи́.

Седа́лен, гла́с 6:

Во юдо́ли пла́ча, в ме́сте е́же положи́л еси́, егда́ ся́деши Ми́лостиве сотвори́ти пра́ведный Су́д, не объяви́ моя́ та́йная, ниже́ посрами́ мене́ пред А́нгелы: но пощади́ мя́ Бо́же, и поми́луй мя́.

Богоро́дичен: Упова́ние ми́ра Блага́я Богоро́дице Де́во, Твое́ и Еди́ное стра́шное предста́тельство молю́, умилосе́рдися на удобообстоя́тельныя лю́ди: умоли́ Ми́лостиваго Бо́га, изба́витися душа́м на́шым от вся́каго преще́ния, Еди́на благослове́нная.

Пе́снь 4.

Ирмо́с: Услы́ша проро́к прише́ствие Твое́ Го́споди, и убоя́ся, я́ко хо́щеши от Де́вы роди́тися, и челове́ком яви́тися, и глаго́лаше: услы́шах слу́х Тво́й, и убоя́хся, сла́ва Си́ле Твое́й Го́споди.

Наста́ де́нь, уже́ при две́рех Су́д: душе́ бо́дрствуй, иде́же ца́рие вку́пе и кня́зи, бога́тии и убо́зии собира́ются, и восприи́мет по достоя́нию соде́янных от челове́к ки́йждо.

Неумы́тный Су́д Тво́й, неутае́нное Твое́ суди́ще хитросло́вия: не вити́й худо́жество кра́дущее, не свиде́телей непщева́ние отража́ющее пра́ведное, в Тебе́ бо Бо́зе все́х сокрове́нная предстоя́т.

Да не прииду́ в зе́млю пла́ча, да не ви́жду ме́сто тьмы́, Христе́ мо́й Сло́ве: ниже́ свя́зан бу́ду рука́ми и нога́ми, вне́ черто́га Твоего́ изве́рженный, оде́жду нетле́ния оскверне́нную име́я всеокая́нный.

Богоро́дичен: Кре́посте моя́ Пречи́стая, прибе́жище, Необори́мая стено́, и к Бо́гу моли́твенница су́щая, ве́чнующаго пла́мене и гее́нны свободи́ мя́.

Песнь 5.

Ирмо́с: От но́щи у́тренююща, Человеколю́бче, просвети́ молю́ся, и наста́ви и мене́ на повеле́ния Твоя́, и научи́ мя́ Спа́се, твори́ти во́лю Твою́.

Тре́пет неисповеди́мый и стра́х та́мо, прии́дет бо Госпо́дь, и де́ло с ни́м коего́ждо от челове́к: и кто́ отсю́ду я́ко себе́ не воспла́чет;

Пощади́, пощади́ Го́споди, созда́ние Твое́, согреши́х, осла́би ми́, я́ко естество́м чи́стый Са́м еси́ Еди́н: и и́ный ра́зве Тебе́ никто́же е́сть вне́ скве́рны.

Ни сле́з, ниже́ покая́ния и́мам, ниже́ умиле́ния: Са́м ми́ сия́ Спа́се, я́ко Бо́г да́руй.

Богоро́дичен: Оскверне́н по́мыслы, и окаля́н мно́гими паде́ньми, Ма́ти Бо́жия, Тя́ молю́: Еди́на Нескве́рная, уще́дри и спаси́ мя́ хода́тайством Твои́м.

Пе́снь 6.

Ирмо́с: Возопи́х все́м се́рдцем мои́м к ще́дрому Бо́гу, и услы́ша мя́ от а́да преиспо́дняго, и возведе́ от тли́ живо́т мо́й.

Во стра́шнем Христе́ прише́ствии Твое́м, егда́ яви́шися с Небесе́, и поста́вятся престо́ли, и кни́ги разгну́тся: пощади́, пощади́ тогда́ Спа́се, созда́ние Твое́.

Та́мо ничто́же по́мощи мо́жет, Бо́гу су́щу Судии́, ни тща́ние, ни ко́зни, ни сла́ва, ни дру́жба, ра́зве от де́л кре́пость твоя́, о душе́ моя́.

Возми́ Твое́, да не услы́шу Го́споди, отсыла́емь от Тебе́, ниже́ е́же пойди́ во о́гнь прокля́тых: но возжеле́ннаго гла́са пра́ведных.

Богоро́дичен: Очище́ние и́мамы Тя́ всегда́ у Бо́га, Пренепоро́чная: те́мже испроси́ изба́вити все́х Пречи́стая, я́же та́мо муче́ний стра́шных, Богоро́дицу вои́стинну испове́дающих Тя́.

Конда́к, гла́с 1:

Егда́ прии́деши Бо́же, на зе́млю со Сла́вою, и трепе́щут вся́ческая, река́ же о́гненная пред суди́щем влече́т, кни́ги разгиба́ются, и та́йная явля́ются: тогда́ изба́ви мя́ от огня́ неугаси́маго, и сподо́би мя́ одесну́ю Тебе́ ста́ти, Судие́ Пра́веднейший.

И́кос: Суди́ще Твое́ стра́шное, и Су́д пра́веднейший, дела́ же моя́ лю́тая: но Са́м Ми́лостиве предвари́в спаси́ мя́, и му́ки свободи́, изба́ви же Влады́ко ко́злищ ча́сти, и сподо́би одесну́ю Тебе́ ста́ти, Судие́ пра́веднейший.

Песнь 7.

Ирмо́с: Согреши́хом, беззако́нновахом, непра́вдовахом пред Тобо́ю: ниже́ соблюдо́хом, ниже́ сотвори́хом, я́коже запове́дал еси́ на́м: но не преда́ждь на́с до конца́, отце́в Бо́же.

Госпо́дь гряде́т суди́ти, кто́ стерпи́т виде́ние Его́; вострепещи́ душе́ окая́нная, вострепещи́, и угото́ви исхо́дищу дела́ твоя́: да ми́лостива и милосе́рдна обря́щеши Его́, отце́в Бо́га благослове́нна.

Припа́даю Ти́, и приношу́ Тебе́ я́коже сле́зы глаго́лы моя́: согреши́х, я́коже не согреши́ блудни́ца, и беззако́нновах, я́ко и́ный никто́же на земли́. Но уще́дри Влады́ко творе́ние Твое́, и призови́ мя́.

Две́рь Твою́ не затвори́ ми́ тогда́, Го́споди, Го́споди, но отве́рзи ми́ ю́ ка́ющемуся, и боле́зненно к Тебе́ от се́рдца припа́дающу Бо́же, и поми́луй мя́.

Богоро́дичен: Егда́ в но́щи Жени́х прии́дет суди́ти земли́, тогда́ во сре́тение Его́ со све́тлою свеще́ю, благоволи́ Пречи́стая, изы́ти ми́, и поклони́тися Того́ прише́ствию.

Пе́снь 8.

Ирмо́с: Его́же во́инства небе́сная сла́вят, и трепе́щут Херуви́ми и Серафи́ми, вся́ко дыха́ние и тва́рь, по́йте, благослови́те и превозноси́те во вся́ ве́ки.

Стра́шнаго втора́го Твоего́ Го́споди прише́ствия помышля́я сре́тение, трепе́щу преще́ния Твоего́, бою́ся гне́ва Твоего́: от сего́ мя́ часа́, зову́, спаси́ во ве́ки. Два́жды.

Все́х Судие́ Бо́же мо́й и Го́споди, да услы́шу тогда́ гла́с Тво́й возжеле́нный: да уви́жу Све́т Тво́й вели́кий: да узрю́ селе́ния Твоя́: да узрю́ Сла́ву Твою́, ра́дуяся во ве́ки.

Богоро́дичен: В де́нь Суда́ яви́ся Влады́чице, и предста́ни ми́ му́ки и огня́ свобожда́ющи, да спасе́н бы́в Тобо́ю, воспою́ Твою́ Необори́мую благода́ть.

Пред 9-ю́ пе́снию, пое́м Пе́снь Пресвяты́я Богоро́дицы:

Вели́чит душа́ Моя́ Го́спода / и возра́довася ду́х Мо́й о Бо́зе Спа́се Мое́м.

Я́ко призре́ на смире́ние рабы́ Своея́, / се́ бо, от ны́не ублажа́т Мя́ вси́ ро́ди.

Я́ко сотвори́ Мне́ вели́чие Си́льный, / и свя́то и́мя Его́, / и ми́лость Его́ в ро́ды родо́в боя́щимся Его́.

Сотвори́ держа́ву мы́шцею Свое́ю, / расточи́ го́рдыя мы́слию се́рдца и́х.

Низложи́ си́льныя со престо́л, / и вознесе́ смире́нныя, а́лчущия испо́лни бла́г, / и богатя́щияся отпусти́ тщи́.

Восприя́т Изра́иля о́трока Своего́, / помяну́ти ми́лости, / я́коже глаго́ла ко отце́м на́шим, / Авраа́му и се́мени его́ да́же до ве́ка

К коему́ждо стиху́ припева́ем: Честне́йшую Херуви́м

Пе́снь 9.

Ирмо́с: Безсе́меннаго зача́тия Рождество́ несказа́нное, Ма́тере безму́жныя нетле́нен Пло́д: Бо́жие бо рожде́ние обновля́ет естєства. Те́мже Тя́ вси́ ро́ди, я́ко Богоневе́стную Ма́терь, правосла́вно велича́ем.

Госпо́дь гряде́т гре́шныя му́чити, пра́ведныя же спасти́: воспла́чимся, возрыда́им и прии́мем чу́вство о́наго дне́, во́ньже безве́стная и та́йная откры́в челове́ком, отда́ст по достоя́нию.

Дании́л убоя́ся часа́ истяза́ния, а́з же окая́нный что́ постражду́ от него́, Гряды́й Го́споди, стра́шнаго дне́; но да́ждь ми́ пре́жде конца́ благоуго́дно Тебе́ послужи́ти, и улучи́ти Ца́рствие Твое́.

О́гнь гото́вится, че́рвь устроя́ется: веселіе, сла́ва, ослабленіе, Све́т невече́рний, ра́дость пра́ведных, и кто́ блаже́нный избе́гнути не восхо́щет муче́ния пе́рвых, насле́дивый втора́я;

Богоро́дичен: Страсте́й волне́ние смуща́ет мя́, и сластьми́ погружа́ет, Де́во Пренепоро́чная, ко́рмчию Христа́ Ро́ждшая, ру́ку ми́ по́мощи простри́ и спаси́ мя́, Еди́на спасе́ние ве́рою блажа́щих Тя́.

А́ще у́бо не́сть неде́ля по ирмосе́:

Досто́йно е́сть:

А́ще же неде́ля, по катава́сии и ектении́ ма́лой:

Свя́т Госпо́дь Бо́г на́ш: Три́жды

И Свети́лен.

Егда́ престо́ли поста́вятся, и кни́ги разве́рзутся, и егда́ хо́щеши суди́ти Су́д челове́ческим дея́нием, не осуди́ на́с Влады́ко, во о́гнь гее́нский, я́же от пе́рсти созда́л еси́: но Твоего́ Ца́рствия на́с сподо́би Спа́се.

Богоро́дичен: Его́же от Твои́х крове́й родила́ еси́ Чи́стая, соверше́нна челове́ка, и Бо́га и́стинна и Го́спода: умоли́ Того́ изба́витися на́м огня́ ве́чнующаго.

А́ще же е́сть Четыредеся́тница, глаго́лем свети́льны в прилучи́вшийся гла́с, по три́жды.

Во исполне́ния же свети́льнов глаго́лем си́це:

В понеде́льник у́бо к пе́рвому: Предста́тельствы безпло́тных Твои́х, и спаси́ мя́.

Во вто́рник: Моли́твами, Го́споди, предте́чи Твоего́, и спаси́ мя́.

В сре́ду и в пято́к: Си́лою, Го́споди, креста́ Твоего́, и спаси́ мя́.

В четверто́к: Моли́твами, Го́споди, апо́стол Твои́х, и святи́теля Никола́а, и спаси́ мя́.

Во второ́е на Сла́ва, глаго́лати всегда́ в конца́х: Моли́твами, Го́споди, святы́х Твои́х, и спаси́ мя́.

В тре́тие же на И ны́не, в конца́х глаго́лати: Моли́твами, Го́споди, Богоро́дицы, и спаси́ мя́.

В шесто́м же гла́се, в нача́ле свети́льна, вме́сто: Предста́тельствы, Го́споди, безпло́тных:

А́ще во вто́рник глаго́лется си́це: Моли́твами, Го́споди, предте́чи Твоего́: и про́чая та́мо до конца́ глаго́ли.

В сре́ду же и в пято́к, вме́сто: Предста́тельствы, Го́споди, безпло́тных: в нача́ле глаго́лати си́це: Си́лою креста́ Твоего́, Го́споди, низпосли́ душа́м на́шым све́т Тво́й присносу́щный.

В четверто́к же си́це: Моли́твами, Го́споди, святы́х апо́стол Твои́х, и святи́теля Никола́а, низпосли́ душа́м на́шым све́т Тво́й присносу́щный.

Во второ́е, на Сла́ва, глаго́лати в нача́ле свети́льна си́це: Моли́твами, Го́споди, все́х святы́х, низпосли́ душа́м на́шым све́т Тво́й присносу́щный.

В тре́тие же, на И ны́не, в нача́ле свети́льна глаго́лати си́це: Моли́твами, Го́споди, Богоро́дицы, низпосли́ душа́м на́шым све́т Тво́й присносу́щный.

Светильны: Гла́с 1: Све́т возсия́й, Го́споди, ду́шу мою́ очи́сти от вся́каго греха́, (предста́тельствы безпло́тных Твои́х), и спаси́ мя́.

Гла́с 2: Све́т Тво́й присносу́щный низпосли́, Христе́ Бо́же, и просвети́ о́чи та́йныя се́рдца моего́, (предста́тельствы безпло́тных Твои́х), и спаси́ мя́.

Гла́с 3: Низпосли́ све́т Тво́й, Христе́ Бо́же, и просвети́ се́рдце мое́, (предста́тельствы безпло́тных Твои́х), и спаси́ мя́.

Гла́с 4: Све́т возсия́й ми́ру Твоему́, во тьме́ ду́шу мою́ су́щую от вся́каго греха́ очи́сти, (предста́тельствы безпло́тных Твои́х), и спаси́ мя́.

Гла́с 5: Светода́вче Го́споди, низпосли́ све́т Тво́й, и просвети́ се́рдце мое́, (предста́тельствы безпло́тных Твои́х), и спаси́ мя́.

Гла́с 6: (Предста́тельствы безпло́тных Твои́х), низпосли́ душа́м на́шым све́т Тво́й присносу́щный.

Гла́с 7: Воздви́гни мя́, Го́споди, к Твоему́ песнопе́нию, и научи́ мя́ твори́ти во́лю Твою́, святы́й, (предста́тельствы безпло́тных Твои́х), и спаси́ мя́.

Гла́с 8: Све́т сы́й, Христе́, просвети́ мя́ Тобо́ю, (предста́тельствы безпло́тных Твои́х), и спаси́ мя́.

Ексапостила́рии всея́ седми́цы:

В понеде́льник: Не́бо звезда́ми украси́вый я́ко Бо́г, и Твои́ми а́нгелы всю́ зе́млю просвети́вый, соде́телю все́х, пою́щыя Тя́ спаса́й.

Богоро́дичен: Сла́дость а́нгелов, скорбя́щих ра́дость, христиа́н предста́тельница, Де́во Ма́ти госпо́дня, заступи́ на́с, и изба́ви ве́чных му́к.

Во вто́рник: Предте́чу Иоа́нна, и крести́теля спа́сова, во проро́цех проро́ка, и пусты́ни воспита́ние, елисаве́тино рожде́ние, восхва́лим вси́.

Богоро́дичен: Сла́дость а́нгелов, скорбя́щих ра́дость, христиа́н предста́тельница, Де́во Ма́ти госпо́дня, заступи́ на́с, и изба́ви ве́чных му́к.

В сре́ду и пято́к: Кре́ст храни́тель всея́ вселе́нныя, кре́ст красота́ це́ркве, кре́ст царе́й держа́ва, кре́ст ве́рных утвержде́ние, кре́ст а́нгелов сла́ва, и де́монов я́зва.

Крестобогоро́дичен: У креста́ предстоя́щи тя́ безсе́менно ро́ждшая, и рыда́юще вопия́ше: увы́ сладча́йшее ча́до, ка́ко заше́л еси́ от о́чию мое́ю; ка́ко в ме́ртвых вмени́лся еси́;

В четверто́к, подо́бен: Жены́ услы́шите: Во всю́ подсо́лнечную те́кше, пропове́дасте Христо́во от де́вы свято́е воплоще́ние вои́стинну, от пре́лести обраща́юще язы́ки, и просвеща́юще, и вся́ науча́юще Тро́ицу почита́ти святу́ю, апо́столи спа́совы.

Подо́бен: Вели́каго началопа́стыря, и иера́рха вси́, председа́теля мирлики́йскаго Никола́а хва́лим: мно́ги бо му́жи спасе́, непра́ведно умре́ти иму́щыя: царю́ явля́ется со Авла́вием во сне́, решя́ непра́ведное изрече́ние.

Богоро́дичен: Мари́е честне́йшая, злата́я кади́льнице, невмести́маго божества́ прия́телище бы́вшее, в не́мже Оте́ц благоволи́, Сы́н же всели́ся, и Ду́х святы́й осени́в тя́, отрокови́це, показа́ Богоро́дицу.

В суббо́ту: И́же и ме́ртвыми и живы́ми облада́яй я́ко Бо́г, и святы́ми Твои́ми всю́ зе́млю просвети́вый, созда́телю все́х, пою́щыя Тя́ спаса́й.

Богоро́дичен: Мы́ о тебе́ хва́лимся, Богоро́дице, и к Бо́гу тя́ и́мамы предста́тельство, простри́ ру́ку твою́ необори́мую, и сокруши́ враги́ на́шя, твои́м низпосли́ рабо́м по́мощь от свята́го.

И а́бие Хвали́тны

А́ще у́бо е́сть святы́й име́яй вели́кое славосло́вие, пое́тся Вся́кое дыха́ние: и про́чая, я́коже указа́ся в у́трени воскре́сной.

А́ще же и́ный де́нь, си́це:

Пе́рвый ли́к: Хвали́те Го́спода с небе́с.

Припе́в: Тебе́ подоба́ет пе́снь Бо́гу.

То́йже ли́к: Хвали́те Го́спода с небе́с, хвали́те его́ в вы́шних.

Тебе́ подоба́ет пе́снь Бо́гу.

Вторы́й ли́к: Хвали́те его́ вси́ а́нгели его́, хвали́те его́ вся́ си́лы его́.

Тебе́ подоба́ет пе́снь Бо́гу.

Хвали́те его́ со́лнце и луна́, хвали́те его́ вся́ зве́зды и све́т. Хвали́те его́ небеса́ небе́с, и вода́ я́же превы́ше небе́с. Да восхва́лят и́мя госпо́дне: я́ко то́й рече́, и бы́ша: то́й повеле́, и созда́шася. Поста́ви я́ в ве́к и в ве́к ве́ка: повеле́ние положи́, и не ми́мо и́дет. Хвали́те Го́спода от земли́, зми́еве, и вся́ бе́здны: о́гнь, гра́д, сне́г, го́лоть, ду́х бу́рен, творя́щая сло́во его́: Го́ры и вси́ хо́лми, древа́ плодоно́сна и вси́ ке́дри: Зве́рие и вси́ ско́ти, га́ди и пти́цы перна́ты: Ца́рие зе́мстии и вси́ лю́дие, кня́зи и вси́ судии́ зе́мстии: Ю́ноши и де́вы, ста́рцы с ю́нотами да восхва́лят и́мя госпо́дне, я́ко вознесе́ся и́мя того́ еди́наго: испове́дание его́ на земли́ и на небеси́. И вознесе́т ро́г люде́й свои́х: пе́снь все́м преподо́бным его́, сыново́м исра́илевым, лю́дем приближа́ющымся ему́.

Псало́м 149

Воспо́йте Го́сподеви пе́снь но́ву, хвале́ние его́ в це́ркви преподо́бных. Да возвесели́тся Исра́иль о сотво́ршем его́, и сы́нове Сио́ни возра́дуются о царе́ свое́м: Да восхва́лят и́мя его́ в лице́, в тимпа́не и псалти́ри да пою́т ему́. Я́ко благоволи́т Госпо́дь в лю́дех свои́х, и вознесе́т кро́ткия во спасе́ние. Восхва́лятся преподо́бнии во сла́ве, и возра́дуются на ло́жах свои́х. Возноше́ние бо́жия в горта́ни и́х, и мечи́ обою́ду остры́ в рука́х и́х: Сотвори́ти отмще́ние во язы́цех, обличе́ния в лю́дех: Связа́ти цари́ и́х пу́ты, и сла́вныя и́х ручны́ми око́вы желе́зными. Сотвори́ти в ни́х су́д напи́сан: сла́ва сия́ бу́дет все́м преподо́бным его́.

Псало́м 150

Хвали́те Бо́га во святы́х его́, хвали́те его́ во утверже́нии си́лы его́.

Хвали́те его́ на си́лах его́, хвали́те его́ по мно́жеству вели́чествия его́.

Хвали́те его́ во гла́се тру́бнем, хвали́те его́ во псалти́ри и гу́слех.

Хвали́те его́ в тимпа́не и лице́, хвали́те его́ во стру́нах и орга́не.

Хвали́те его́ в кимва́лех доброгла́сных, хвали́те его́ в кимва́лех восклица́ния. Вся́кое дыха́ние да хва́лит Го́спода.

А́ще е́сть неде́ля по стихи́рах

Сла́ва, стихи́ра ева́нгельская или́ пра́здника.

И ны́не: настоя́щий богоро́дичен:

Преблагослове́нна еси́, Богоро́дице Де́во, вопло́щшимбося из тебе́ а́д плени́ся, Ада́м воззва́ся, кля́тва потреби́ся, Е́ва свободи́ся, сме́рть умертви́ся, и мы́ ожи́хом. Тебе́ пою́ще возопие́м: благослове́н Христо́с Бо́г на́ш, изво́ливый та́ко, сла́ва Тебе́.

Иере́й: Сла́ва Тебе́ показа́вшему на́м све́т.

Ли́к пое́т: Сла́ва в вы́шних Бо́гу, и на земли́ ми́р, в челове́цех благовеле́ние. Хва́лим Тя́, благослови́м Тя́, кла́няемтися, славосло́вим Тя́, благодари́м Тя́, вели́кия ра́ди сла́вы Твоея́. Го́споди Царю́ Небе́сный, Бо́же О́тче Вседержи́телю, Го́споди Сы́не единоро́дный, Иису́се Христе́, и святы́й Ду́ше. Го́споди Бо́же, а́гнче Бо́жий, Сы́не оте́чь, взе́мляй гре́х ми́ра, поми́луй на́с: взе́мляй грехи́ ми́ра, приими́ моли́тву на́шу. Седя́й одесну́ю Отца́, поми́луй на́с. Я́ко Ты́ еси́ еди́н свя́т, Ты́ еси́ еди́н Госпо́дь, Иису́с Христо́с, во сла́ву Бо́га Отца́, ами́нь.

На вся́к де́нь благословлю́ Тя́, и восхвалю́ и́мя Твое́ во ве́ки, и в ве́к ве́ка.

Сподо́би, Го́споди, в де́нь се́й без греха́ сохрани́тися на́м. Благослове́н еси́, Го́споди Бо́же оте́ц на́ших, и хва́льно и просла́влено и́мя Твое́ во ве́ки, ами́нь.

Бу́ди, Го́споди, ми́лость Твоя́ на на́с, я́коже упова́хом на Тя́.

Благослове́н еси́, Го́споди, научи́ мя́ оправда́нием Твои́м. Три́жды.

Го́споди, прибе́жище бы́л еси́ на́м в ро́д и ро́д. А́з ре́х: Го́споди, поми́луй мя́, исцели́ ду́шу мою́, я́ко согреши́х Тебе́. Го́споди, к Тебе́ прибего́х, научи́ мя́ твори́ти во́лю Твою́, я́ко Ты́ еси́ Бо́г мо́й: я́ко у тебе́ исто́чник живота́, во све́те Твое́м у́зрим све́т: проба́ви ми́лость Твою́ ве́дущым Тя́.

Святы́й Бо́же, святы́й кре́пкий, святы́й безсме́ртный, поми́луй на́с. Три́жды.

Сла́ва, и ны́не: Святы́й безсме́ртный, поми́луй на́с.

Та́же Святы́й Бо́же: еди́ножды.

И по сконча́нии славосло́вия не глаго́лет свяще́нник: Я́ко твое́ е́сть ца́рство: но а́бие по конце́ трисвята́го глаго́лем тропа́рь случи́вшийся и богоро́дичен. А́ще же е́сть неде́ля, глаго́лем тропа́рь воскре́сный И в пе́рвый у́бо гла́с, 3, 5, 7, глаго́лем се́й:

Дне́сь спасе́ние ми́ру бы́сть, пое́м воскре́сшему из гро́ба, и нача́льнику жи́зни на́шея: разруши́в бо сме́ртию сме́рть, побе́ду даде́ на́м и ве́лию ми́лость.

Во гла́с же 2, 4, 6, 8, глаго́лем се́й:

Воскре́с из гро́ба, и у́зы растерза́л еси́ а́да, разруши́л еси́ осужде́ние сме́рти, Го́споди, вся́ от сете́й врага́ изба́вивый, яви́вый же себе́ апо́столом Твои́м, посла́л еси́ я́ на про́поведь, и те́ми ми́р Тво́й по́дал еси́ вселе́нней, еди́не многоми́лостиве.

А́ще же е́сть четыредеся́тница, или́ и́н де́нь, не име́яй славосло́вия вели́каго, по хвали́тех, Сла́ва и ны́не: глаго́лем си́це:

Тебе́ сла́ва подоба́ет, Го́споди Бо́же на́ш, и Тебе́ сла́ву возсыла́ем, Отцу́, и Сы́ну, и свято́му Ду́ху, ны́не и при́сно, и во ве́ки веко́в, ами́нь.

Сла́ва Тебе́ показа́вшему на́м све́т.

Сла́ва в вы́шних Бо́гу, и на земли́ ми́р, в челове́цех благоволе́ние. Хва́лим Тя́, благослови́м Тя́, кла́няемтися, славосло́вим Тя́, благодари́м Тя́, вели́кия ра́ди сла́вы Твоея́. Го́споди царю́ небе́сный, Бо́же О́тче вседержи́телю, Го́споди Сы́не единоро́дный, Иису́се Христе́, и святы́й Душе́. Го́споди Бо́же, а́гнче Бо́жий, Сы́не оте́чь, взе́мляй гре́х ми́ра, поми́луй на́с: взе́мляй грехи́ ми́ра, приими́ моли́тву на́шу. Седя́й одесну́ю Отца́, поми́луй на́с. Я́ко Ты́ еси́ еди́н свя́т, Ты́ еси́ еди́н Госпо́дь, Иису́с Христо́с, во сла́ву Бо́га Отца́, ами́нь.

На вся́к де́нь благословлю́ Тя́, и восхвалю́ и́мя Твое́ во ве́ки, и в ве́к ве́ка.

Го́споди, прибе́жище бы́л еси́ на́м в ро́д и ро́д. А́з ре́х: Го́споди, поми́луй мя́, исцели́ ду́шу мою́, я́ко согреши́х Тебе́. Го́споди, к Тебе́ прибего́х, научи́ мя́ твори́ти во́лю Твою́, я́ко Ты́ еси́ Бо́г мо́й: я́ко у тебе́ исто́чник живота́, во све́те Твое́м у́зрим све́т: проба́ви ми́лость Твою́ ве́дущым Тя́.

Та́же: Сподо́би, Го́споди, в де́нь се́й без греха́ сохрани́тися на́м. Благослове́н еси́, Го́споди Бо́же оте́ц на́ших, и хва́льно и просла́влено и́мя Твое́ во ве́ки, ами́нь.

Бу́ди, Го́споди, ми́лость Твоя́ на на́с, я́коже упова́хом на Тя́. Благослове́н еси́, Го́споди, научи́ мя́ оправда́нием Твои́м. Благослове́н еси́, Влады́ко, вразуми́ мя́ оправда́нием Твои́м. Благослове́н еси́, святы́й, просвети́ мя́ оправда́нии Твои́ми.

Го́споди, ми́лость Твоя́ во ве́к, де́л руку́ Твое́ю не пре́зри. Тебе́ подоба́ет хвала́, Тебе́ подоба́ет пе́ние, Тебе́ сла́ва подоба́ет, Отцу́, и Сы́ну, и свято́му Ду́ху, ны́не и при́сно, и во ве́ки веко́в, ами́нь.

Та́же на стихо́вне стихи́ры, гла́с 6

На́га мя́ обре́т доброде́телей вла́г, стрело́ю грехо́вною уязви́: но ты́ Бо́же, я́ко вра́чь ду́ш и теле́с, я́звы души́ моея́ исцели́, и поми́луй мя́

Сти́х 1: Испо́лнихомся зау́тра ми́лости Твоея́, Го́споди, и возра́довахомся, и возвесели́хомся: во вся́ дни́ на́шя возвесели́хомся, за дни́ в ня́же смири́л ны́ еси́, ле́та в ня́же ви́дехом зла́я. И при́зри на рабы́ Твоя́, и на дела́ Твоя́, и наста́ви сы́ны и́х.

Се́рдца моего́ стру́пы, от мно́гих грехо́в прозя́бшия, ми́ исцели́, Спа́се, я́ко душа́м и телесе́м

Сти́х 2: И бу́ди све́тлость Го́спода Бо́га на́шего на на́с, и дела́ ру́к на́ших испра́ви на на́с, и де́ло ру́к на́ших испра́ви.

Го́споди, а́ще не бы́хом святы́я Твоя́ име́ли моли́твенники, и благосты́ню Твою́ ми́лующую на́с: ка́ко сме́ли бы́хом Спа́се, пе́ти Тя́, его́же славосло́вят непреста́нно А́нгели; Сердцеве́дче, пощади́ ду́шы на́шя.

Сла́ва, и ны́не, Богоро́дичен:

Мари́е Чи́стая, злата́я кади́льнице, Еди́наго от неразлу́чныя Тро́ицы прия́телище Су́щая, на Не́же Оте́ц изво́ли, Сы́н же де́йством всесвята́го Ду́ха, всели́ся во чре́во Твое́ всеосвяще́нное: Того́ у́бо моли́ приле́жно: пода́ти на́м грехо́в оставле́ние в де́нь су́дный.

Та́же: Бла́го е́сть испове́датися Го́сподеви, и пе́ти и́мени Твоему́, вы́шний, возвеща́ти зау́тра ми́лость Твою́, и и́стину Твою́ на вся́ку но́щь.

Посе́м, Трисвято́е. Пресвята́я Тро́ице: О́тче на́ш:

Иере́й: Я́ко Твое́ е́сть ца́рство:

Тропа́рь дне́

Сла́ва, и ны́не, богоро́дичен.

И ектениа́: Поми́луй на́с, Бо́же:

И про́чая, и по возгла́се: Прему́дрость. И мы́: Благослови́. Иере́й: Сы́й благослове́н Христо́с, Бо́г на́ш: Ли́к: Утверди́ Бо́же: Свяще́нник: Пресвята́я Богоро́дице, спаси́ на́с. Ли́к: Честне́йшую херуви́м: Свяще́нник: Сла́ва, тебе́ Христе́ Бо́же, упова́ние на́ше, сла́ва тебе́. Ли́к: Сла́ва и ны́не: Го́споди поми́луй, три́жды Благослови́. И отпу́ст. Та́же: ча́с пе́рвый.

Ве́домо бу́ди, я́ко егда́ не́сть славосло́вия вели́каго, отпу́ст у́трени не быва́ет, но а́бие по возгла́се и по Утверди́ Бо́же: Прииди́те, поклони́мся: три́жды, и ча́с пе́рвый.

А́ще же четыредеся́тница, Бла́го е́сть испове́датися Го́сподеви: два́жды и Трисвято́е. Пресвята́я Тро́ице: По О́тче на́ш глаго́лем:

В хра́ме стоя́ще сла́вы Твоея́, на небеси́ стоя́ти мни́м: Богоро́дице, две́рь небе́сная, отве́рзи на́м две́ри ми́лости твоея́.

Го́споди, поми́луй, 40. Сла́ва, и ны́не: Честне́йшую херуви́м: Иере́й: Сы́й благослове́н:

Та́же: Небе́сный царю́, богохрани́маго Импера́тора или́ Короля на́шего, и́мя ре́к, (или́ предержащия вла́сти на́шя) укрепи́, ве́ру утверди́, язы́ки укроти́, ми́р умири́, гра́д се́й (или́ ве́сь, или́ святу́ю оби́тель сию́) до́бре сохрани́: пре́жде отше́дшыя отцы́ и бра́тию на́шу в селе́ниих пра́ведных учини́, и на́с в покая́нии и испове́дании приими́, я́ко благи́й и человеколю́бец.

И посе́м покло́ны вели́кия три́, и ма́лыя 12, я́коже указа́ся в полу́нощнице вседне́вной и по покло́нех, ча́с пе́рвый.

Прииди́те, поклони́мся: три́жды.

Псало́м 5

Глаго́лы моя́ внуши́, Го́споди, разуме́й зва́ние мое́. Вонми́ гла́су моле́ния моего́, Царю́ мо́й и Бо́же мо́й, я́ко к Тебе́ помолю́ся, Го́споди. Зау́тра услы́ши гла́с мо́й, зау́тра предста́ну Ти́, и у́зриши мя́. Я́ко Бо́г не хотя́й беззако́ния Ты́ еси́: не присели́тся к Тебе́ лука́внуяй, ниже́ пребу́дут беззако́нницы пред очи́ма Твои́ма: возненави́дел еси́ вся́ де́лающия беззако́ние. Погуби́ши вся́ глаго́лющия лжу́: му́жа крове́й и льсти́ва гнуша́ется Госпо́дь. А́з же мно́жеством ми́лости Твоея́ вни́ду в до́м Тво́й, поклоню́ся ко хра́му свято́му Твоему́ в стра́се Твое́м. Го́споди, наста́ви мя́ пра́вдою Твое́ю, вра́г мои́х ра́ди испра́ви пред Тобо́ю пу́ть мо́й. Я́ко не́сть во усте́х и́х и́стины, се́рдце и́х су́етно, гро́б отве́рст горта́нь и́х: язы́ки свои́ми льща́ху. Суди́ и́м, Бо́же, да отпаду́т от мы́слей свои́х, по мно́жеству нече́стия и́х изри́ни я́, я́ко преогорчи́ша Тя́, Го́споди. И да возвеселя́тся вси́ упова́ющие на Тя́, во ве́к возра́дуются, и всели́шися в ни́х, и похва́лятся о Тебе́ лю́бящие И́мя Твое́. Я́ко Ты́ благослови́ши пра́ведника, Го́споди, я́ко ору́жием благослове́ния венча́л еси́ на́с.

Псало́м 89

Го́споди, прибе́жище бы́л еси́ на́м в ро́д и ро́д. Пре́жде да́же гора́м не бы́ти и созда́тися земли́ и вселе́нней, и от ве́ка и до ве́ка Ты́ еси́. Не отврати́ челове́ка во смире́ние и ре́кл еси́: обрати́теся, сы́нове челове́честии. Я́ко ты́сяща ле́т пред очи́ма Твои́ма, Го́споди, я́ко де́нь вчера́шний, и́же ми́мо и́де, и стра́жа нощна́я. Уничиже́ния и́х ле́та бу́дут: у́тро, я́ко трава́, ми́мо и́дет, у́тро процвете́т и пре́йдет: на ве́чер отпаде́т, ожесте́ет и и́зсхнет: я́ко исчезо́хом гне́вом Твои́м, и я́ростию Твое́ю смути́хомся. Положи́л еси́ беззако́ния на́ша пред Тобо́ю, ве́к на́ш в просвеще́ние лица́ Твоего́. Я́ко вси́ дни́е на́ша оскуде́ша, и гне́вом Твои́м исчезо́хом: ле́та на́ша я́ко паучи́на поуча́хуся: дни́е ле́т на́ших, в ни́хже се́дмьдесят ле́т, а́ще же в си́лах, о́смьдесят ле́т, и мно́жае и́х тру́д и боле́знь: я́ко прии́де кро́тость на ны́, и нака́жемся. Кто́ ве́сть держа́ву гне́ва Твоего́, и от стра́ха Твоего́ я́рость Твою́ исчести́? Десни́цу Твою́ та́ко скажи́ ми́, и окова́нныя се́рдцем в му́дрости. Обрати́ся, Го́споди, доко́ле? и умоле́н бу́ди на рабы́ Твоя́. Испо́лнихомся зау́тра ми́лости Твоея́, Го́споди, и возра́довахомся, и возвесели́хомся: во вся́ дни́ на́шя возвесели́хомся, за дни́, в ня́же смири́л ны́ еси́, ле́та, в ня́же ви́дехом зла́я. И при́зри на рабы́ Твоя́ и на дела́ Твоя́, и наста́ви сы́ны и́х. И бу́ди све́тлость Го́спода Бо́га на́шего на на́с, и дела́ ру́к на́ших испра́ви на на́с, и де́ло ру́к на́ших испра́ви.

Псало́м 100

Ми́лость и су́д воспою́ Тебе́, Го́споди. Пою́ и разуме́ю в пути́ непоро́чне, когда́ прии́деши ко мне́? Прехожда́х в незло́бии се́рдца моего́ посреде́ до́му моего́. Не предлага́х пред очи́ма мои́ма ве́щь законопресту́пную: творя́щия преступле́ния возненави́дех. Не прильпе́ мне́ се́рдце стропти́во, уклоня́ющагося от мене́ лука́ваго не позна́х. Оклевета́ющаго та́й и́скренняго своего́, сего́ изгоня́х. Го́рдым о́ком и несы́тым се́рдцем, с си́м не ядя́х. О́чи мои́ на ве́рныя земли́, посажда́ти я́ со мно́ю: ходя́й по пути́ непоро́чну, се́й ми́ служа́ше. Не живя́ше посреде́ до́му моего́ творя́й горды́ню, глаго́лай непра́ведная, не исправля́ше пред очи́ма мои́ма. Во у́трия избива́х вся́ гре́шныя земли́, е́же потреби́ти от гра́да Госпо́дня вся́ де́лающия беззако́ния.

Сла́ва, и ны́не: Аллилу́иа, три́жды. Покло́ны 3. Го́споди, поми́луй, три́жды. И а́ще у́бо Бо́г Госпо́дь: пе́то, глаго́лем: Сла́ва, тропа́рь пра́здника или́ свята́го.

И ны́не, Богоро́дичен: Что́ Тя́ нарече́м:

А́ще же Аллилу́иа, глаго́лем се́й тропа́рь, гла́с 6:

Зау́тра услы́ши гла́с мо́й, Царю́ мо́й и Бо́же мо́й.

Сти́х 1: Глаго́лы моя́ внуши́, Го́споди, разуме́й зва́ние мое́.

Сти́х 2: Я́ко к Тебе́ помолю́ся, Го́споди.

Сла́ва, и ны́не, Богоро́дичен:

Что́ Тя́ нарече́м, о Благода́тная; Не́бо, я́ко возсия́ла еси́ Со́лнце пра́вды: ра́й, я́ко прозябла́ еси́ Цве́т нетле́ния: Де́ву, я́ко пребыла́ еси́ Нетле́нна: Чи́стую Ма́терь, я́ко име́ла еси́ на святы́х свои́х объя́тиях Сы́на, все́х Бо́га. Того́ моли́ спасти́ся душа́м на́шим.

Стопы́ моя́ напра́ви по словеси́ Твоему́, и да не облада́ет мно́ю вся́кое беззако́ние. Изба́ви мя́ от клеветы́ челове́ческия, и сохраню́ за́поведи Твоя́. Лице́ Твое́ просвети́ на раба́ Твоего́, и научи́ мя́ оправда́нием Твои́м.

Да испо́лнятся уста́ моя́ хвале́ния Твоего́, Го́споди, я́ко да воспою́ сла́ву Твою́, ве́сь де́нь великоле́пие Твое́.

Си́и стихи́ в 40-це ка́ко пою́тся, пи́сано в Трио́ди.

Трисвято́е. По О́тче на́ш:

И конда́к пра́здника, или́ свята́го. А́ще же аллилу́иа, глаго́лем у́бо в понеде́льник, и во вто́рник, и в четверто́к, се́й Богоро́дичен:

Пресла́вную Бо́жию Ма́терь, и святы́х А́нгел Святе́йшую, немо́лчно воспое́м се́рдцем и усты́, Богоро́дицу Сию́ испове́дающе, я́ко вои́стинну Ро́ждшую Бо́га Воплоще́нна, и моля́щуся непреста́нно о душа́х на́ших.

В сре́ду же и пято́к глаго́лем сие́:

Ско́ро предвари́, пре́жде да́же не порабо́тимся враго́м ху́лящим Тя́, и претя́щим на́м, Христе́ Бо́же на́ш, погуби́ Кресто́м Твои́м бо́рющия на́с, да уразуме́ют, ка́ко мо́жет правосла́вных ве́ра, моли́твами Богоро́дицы, Еди́не Человеколю́бче.

В суббо́ту се́й:

Я́ко нача́тки естества́, Насади́телю тва́ри, вселе́нная прино́сит Ти́, Го́споди, Богоно́сныя му́ченики: те́х моли́твами в ми́ре глубо́це Це́рковь Твою́, жи́тельство Твое́, Богоро́дицею соблюди́, Многоми́лостиве.

Го́споди, поми́луй, 40. И́же на вся́кое вре́мя: Го́споди, поми́луй, три́жды. Сла́ва, и ны́не: Честне́йшую Херуви́м: Свяще́нник: Бо́же, уще́дри ны́

И а́ще Аллилу́иа, твори́м покло́ны вели́кия и ма́лыя по предпи́санному.

Та́же: Трисвято́е. Пресвята́я Тро́ице: О́тче на́ш: Го́споди, поми́луй, 12.

И моли́тву:

Христе́, Све́те И́стинный, Просвеща́яй и Освяща́яй вся́каго челове́ка, гряду́щаго в мир, да зна́менается на на́с све́т лица́ Твоего́, да в не́м у́зрим Све́т Непристу́пный: и испра́ви стопы́ на́шя к де́ланию за́поведей Твои́х, моли́твами Пречи́стыя Твоея́ Ма́тере, и все́х Твои́х святы́х, ами́нь.

Сла́ва, и ны́не: Го́споди, поми́луй, три́жды. Го́споди, благослови́.

И отпу́ст.

По е́же благослови́ти свяще́ннику, глаго́лем:

Ами́нь. Сла́ва Тебе́, Бо́же на́ш, сла́ва Тебе́. Царю́ Небе́сный. Трисвято́е. Пресвята́я Тро́ице. О́тче на́ш: Го́споди, поми́луй, 12 ра́з.

Прииди́те, поклони́мся, три́жды.

И псалмы́:

Псало́м 16.

Услы́ши, Го́споди, пра́вду мою́, вонми́ моле́нию моему́. Внуши́ моли́тву мою́ не во устна́х льсти́вых. От лица́ Твоего́ судьба́ моя́ изы́дет, о́чи мои́ да ви́дита правоты́. Искуси́л еси́ се́рдце мое́, посети́л еси́ но́щию, искуси́л мя́ еси́ и не обре́теся во мне́ непра́вда. Я́ко да не возглаго́лют уста́ моя́ де́л челове́ческих, за словеса́ усте́н Твои́х а́з сохрани́х пути́ же́стоки. Соверши́ стопы́ моя́ во стезя́х Твои́х, да не подви́жутся стопы́ моя́. А́з воззва́х, я́ко услы́шал мя́ еси́, Бо́же, приклони́ у́хо Твое́ мне́, и услы́ши глаго́лы моя́. Удиви́ ми́лости Твоя́, спаса́яй упова́ющия на Тя́ от проти́вящихся десни́це Твое́й. Сохрани́ мя́, Го́споди, я́ко зе́ницу о́ка, в кро́ве крилу́ Твое́ю покры́еши мя́. От лица́ нечести́вых, остра́стших мя́, врази́ мои́ ду́шу мою́ одержа́ша. Ту́к сво́й затвори́ша, уста́ и́х глаго́лаше горды́ню. Изгоня́щии мя́ ны́не обыдо́ша мя́, о́чи свои́ возложи́ша уклони́ти на зе́млю. Объя́ша мя́, я́ко ле́в, гото́в на ло́в и я́ко ски́мен, обита́яй в та́йных. Воскресни́, Го́споди, предвари́ я́ и запни́ и́м, изба́ви ду́шу мою́ от нечести́ваго, ору́жие Твое́ от вра́г руки́ Твоея́. Го́споди, от ма́лых от земли́, раздели́ я́ в животе́ и́х, и сокрове́нных Твои́х испо́лнися чре́во и́х, насы́тишася сыно́в, и оста́виша оста́нки младе́нцем свои́м. А́з же пра́вдою явлю́ся лицу́ Твоему́, насы́щуся, внегда́ яви́ти ми́ ся́ сла́ве Твое́й.

Псало́м 24

К Тебе́, Го́споди, воздвиго́х ду́шу мою́, Бо́же мо́й, на Тя́ упова́х, да не постыжу́ся во ве́к, ниже́ да посмею́т ми́ ся́ врази́ мои́, и́бо вси́ терпя́щии Тя́ не постыдя́тся. Да постыдя́тся беззако́ннующии вотще́. Пути́ Твоя́, Го́споди, скажи́ ми́, и стезя́м Твои́м научи́ мя́. Наста́ви мя́ на и́стину Твою́ и научи́ мя́, я́ко Ты́ еси́ Бо́г Спа́с мо́й, и Тебе́ терпе́х ве́сь де́нь. Помяни́ щедро́ты Твоя́, Го́споди, и ми́лости Твоя́, я́же от ве́ка су́ть. Гре́х ю́ности моея́ и неве́дения моего́ не помяни́, по ми́лости Твое́й помяни́ мя́ Ты́ ра́ди бла́гости Твоея́, Го́споди. Бла́г и пра́в Госпо́дь, сего́ ра́ди законоположи́т согреша́ющим на пути́. Наста́вит кро́ткия на су́д, научи́т кро́ткия путе́м Свои́м. Вси́ путие́ Госпо́дни ми́лость и и́стина, взыска́ющым заве́та Его́ и свиде́ния Его́. Ра́ди И́мене Твоего́, Го́споди, и очи́сти гре́х мо́й, мно́г бо е́сть. Кто́ е́сть челове́к боя́йся Го́спода? Законоположи́т ему́ на пути́, его́же изво́ли. Душа́ его́ во благи́х водвори́тся, и се́мя его́ насле́дит зе́млю. Держа́ва Госпо́дь боя́щихся Его́ и заве́т Его́ яви́т и́м. О́чи мои́ вы́ну ко Го́споду, я́ко То́й исто́ргнет от се́ти но́зе мои́. При́зри на мя́ и поми́луй мя́, я́ко единоро́д и ни́щ е́смь а́з. Ско́рби се́рдца моего́ умно́жишася, от ну́жд мои́х изведи́ мя́. Ви́ждь смире́ние мое́ и тру́д мо́й и оста́ви вся́ грехи́ моя́. Ви́ждь враги́ моя́, я́ко умно́жишася, и ненавиде́нием непра́ведным возненави́деша мя́. Сохрани́ ду́шу мою́, и изба́ви мя́, да не постыжу́ся, я́ко упова́х на Тя́. Незло́бивии и пра́вии прилепля́хуся мне́, я́ко потерпе́х Тя́, Го́споди. Изба́ви, Бо́же, Изра́иля от все́х скорбе́й его́.

Псало́м 50

Поми́луй мя́, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя́ от беззако́ния моего́, и от греха́ моего́ очи́сти мя́. Я́ко беззако́ния моя́ а́з зна́ю и гре́х мо́й предо мно́ю е́сть вы́ну. Тебе́ Еди́ному согреши́х, и лука́вая пред Тобо́ю сотвори́х, я́ко да оправди́шися во словесе́х Твои́х и победи́ши, внегда́ суди́ти Ти́. Се́ бо, в беззако́ниих зача́т е́смь, и во гресе́х роди́ мя́ ма́ти моя́. Се́ бо, и́стину возлюби́л еси́, безве́стная и та́йная прему́дрости Твоея́ яви́л ми́ еси́. Окропи́ши мя́ иссо́пом, и очи́щуся, омы́еши мя́, и па́че сне́га убелю́ся. Слу́ху моему́ да́си ра́дость и весе́лие, возра́дуются ко́сти смире́нныя. Отврати́ лице́ Твое́ от гре́х мои́х, и вся́ беззако́ния моя́ очи́сти. Се́рдце чи́сто сози́жди во мне́, Бо́же, и ду́х пра́в обнови́ во утро́бе мое́й. Не отве́ржи мене́ от лица́ Твоего́, и Ду́ха Твоего́ Свята́го не отыми́ от мене́. Возда́ждь ми́ ра́дость спасе́ния Твоего́, и Ду́хом Влады́чним утверди́ мя́. Научу́ беззако́нныя путе́м Твои́м, и нечести́вии к Тебе́ обратя́тся. Изба́ви мя́ от крове́й, Бо́же, Бо́же спасе́ния моего́, возра́дуется язы́к мо́й пра́вде Тво́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, да́л бы́х у́бо, всесожже́ния не благоволи́ши. Же́ртва Бо́гу ду́х сокруше́н, се́рдце сокруше́нно и смире́нно Бо́г не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая, тогда́ возложа́т на олта́рь Тво́й тельцы́.

Сла́ва, и ны́не: Аллилу́иа, три́жды. Го́споди, поми́луй, три́жды. Сла́ва, тропа́рь дне́.

И ны́не, Богоро́дичен:      

Богоро́дице, Ты́ еси́ Лоза́:

А́ще же Аллилу́иа, глаго́ли се́й тропа́рь, гла́с 6:

Го́споди, И́же Пресвята́го Твоего́ Ду́ха в тре́тий ча́с Апо́столом Твои́м Низпосла́вый: Того́, Благи́й, не отыми́ от на́с, но обнови́ на́с, моля́щих Ти́ ся́.

Сти́х 1: Се́рдце чи́сто сози́жди во мне́, Бо́же, и ду́х пра́в обнови́ во утро́бе мое́й.

Сти́х 2: Не отве́ржи мене́ от лица́ Твоего́, и Ду́ха Твоего́ Свята́го не отыми́ от мене́.

К си́м же стихо́м припева́ем: Го́споди, И́же Пресвята́го Твоего́ Ду́ха: ве́сь до конца́, и покланя́емся по еди́ножды.

Та́же, Сла́ва, и ны́не, Богоро́дичен:

Богоро́дице, Ты́ еси́ Лоза́ И́стинная, Возрасти́вшая на́м Пло́д Живота́, Тебе́ мо́лимся, моли́ся Влады́чице, со святы́ми Апо́столы, поми́ловати души́ на́ша.

Госпо́дь Бо́г благослове́н, благослове́н Госпо́дь де́нь дне́, поспеши́т на́м Бо́г спасе́ний на́ших, Бо́г на́ш, Бо́г спаса́ти.

Трисвято́е. По О́тче на́ш:

Конда́к пра́здника, или́ свята́го.

А́ще же по́ст, глаго́лем сия́ тропари́, гла́с 8:      

Благослове́н еси́ Христе́ Бо́же на́ш, И́же прему́дры ловцы́ Явле́й, низпосла́в и́м Ду́ха Свята́го, и те́ми Уловле́й вселе́нную, Человеколю́бче, сла́ва Тебе́.

Сла́ва: Ско́рое и изве́стное да́ждь утеше́ние рабо́м Твои́м, Иису́се, внегда́ уныва́ти ду́хом на́шим, не разлуча́йся от ду́ш на́ших в ско́рбех, не удаля́йся от мы́слей на́ших во обстоя́ниих, но при́сно на́с предвари́, прибли́жися на́м, прибли́жися везде́ Сы́й, я́коже со Апо́столы Твои́ми всегда́ еси́, си́це и Тебе́ жела́ющым соедини́ Себе́, Ще́дре, да совоку́плени Тебе́ пое́м и славосло́вим Всесвята́го Ду́ха Твоего́.

И ны́не: Наде́жда, и Предста́тельство, и Прибе́жище Христиа́н, Необори́мая Стено́, изнемога́ющим Приста́нище Небу́рное, Ты́ еси́ Богоро́дице Пречи́стая: но я́ко мир Спаса́ющая непреста́нною Твое́ю моли́твою, помяни́ на́с, Де́во Всепе́тая.

Го́споди, поми́луй, 40. И́же на вся́кое вре́мя: Го́споди, поми́луй, Три́жды. Сла́ва, и ны́не: Честне́йшую Херуви́м: Свяще́нник: Моли́твами святы́х оте́ц на́ших:

И а́ще Аллилу́иа, твори́м покло́ны, я́коже предписа́ся,

пото́м моли́тву сию́, свята́го Марда́риа:

Влады́ко Бо́же О́тче Вседержи́телю, Го́споди Сы́не Единоро́дный Иису́се Христе́, и Святы́й Ду́ше, Еди́но Божество́, Еди́на Си́ла, поми́луй мя́ гре́шнаго, и и́миже ве́си судьба́ми, спаси́ мя́, недосто́йнаго раба́ Твоего́, я́ко благослове́н еси́ во ве́ки веко́в, ами́нь.

Прииди́те, поклони́мся: три́жды. И псалмы́:

Псало́м 53.

Бо́же, во И́мя Твое́ спаси́ мя́, и в си́ле Твое́й суди́ ми́. Бо́же, услы́ши моли́тву мою́, внуши́ глаго́лы у́ст мои́х. Я́ко чу́ждии воста́ша на мя́ и кре́пцыи взыска́ша ду́шу мою́, и не предложи́ша Бо́га пред собо́ю. Се́ бо Бо́г помога́ет ми́, и Госпо́дь засту́пник души́ мое́й. Отврати́т зла́я враго́м мои́м, и́стиною Твое́ю потреби́ и́х. Во́лею пожру́ Тебе́, испове́мся и́мени Твоему́, Го́споди, я́ко бла́го, я́ко от вся́кия печа́ли изба́вил мя́ еси́, и на враги́ моя́ воззре́ о́ко мое́.

Псало́м 54:

Внуши́, Бо́же, моли́тву мою́ и не пре́зри моле́ния моего́. Вонми́ ми́ и услы́ши мя́: возскорбе́х печа́лию мое́ю и смято́хся. От гла́са вра́жия и от стуже́ния гре́шнича, я́ко уклони́ша на мя́ беззако́ние и во гне́ве враждова́ху ми́. Се́рдце мое́ смяте́ся во мне́ и боя́знь сме́рти нападе́ на мя́. Стра́х и тре́пет прии́де на мя́ и покры́ мя́ тьма́. И ре́х: кто́ да́ст ми́ криле́, я́ко голуби́не? И полещу́, и почи́ю? Се́ удали́хся бе́гая и водвори́хся в пусты́ни. Ча́ях Бо́га, спаса́ющаго мя́ от малоду́шия и от бу́ри. Потопи́, Го́споди, и раздели́ язы́ки и́х: я́ко ви́дех беззако́ние и пререка́ние во гра́де. Дне́м и но́щию обы́де и по стена́м его́. Беззако́ние и тру́д посреде́ его́ и непра́вда. И не оскуде́ от сто́гн его́ ли́хва и ле́сть. Я́ко а́ще бы вра́г поноси́л ми́, претерпе́л бы́х у́бо, и а́ще бы ненави́дяй мя́ на мя́ велере́чевал, укры́л бы́х ся́ от него́. Ты́ же, челове́че равноду́шне, влады́ко мо́й и зна́емый мо́й, и́же ку́пно наслажда́лся еси́ со мно́ю бра́шен, в до́му Бо́жии ходи́хом единомышле́нием. Да прии́дет же сме́рть на ня́, и да сни́дут во а́д жи́ви, я́ко лука́вство в жили́щах и́х, посреде́ и́х. А́з к Бо́гу воззва́х, и Госпо́дь услы́ша мя́. Ве́чер и зау́тра, и полу́дне пове́м, и возвещу́, и услы́шит гла́с мо́й. Изба́вит ми́ром ду́шу мою́ от приближа́ющихся мне́, я́ко во мно́зе бя́ху со мно́ю. Услы́шит Бо́г и смири́т я́, Сы́й пре́жде ве́к. Не́сть бо и́м измене́ния, я́ко не убоя́шася Бо́га. Простре́ ру́ку свою́ на воздая́ние, оскверни́ша заве́т Его́. Раздели́шася от гне́ва лица́ Его́, и прибли́жишася сердца́ и́х, умя́кнуша словеса́ и́х па́че еле́а, и та́ су́ть стре́лы. Возве́рзи на Го́спода печа́ль твою́, и То́й тя́ препита́ет, не да́ст в ве́к молвы́ пра́веднику. Ты́ же, Бо́же, низведе́ши и́х во студене́ц истле́ния, му́жие крове́й и льсти́ не преполовя́т дне́й свои́х. А́з же, Го́споди, упова́ю на Тя́.

Псало́м 90.

Живы́й в по́мощи Вы́шняго, в кро́ве Бо́га Небе́снаго водвори́тся. Рече́т Го́сподеви: Засту́пник мо́й еси́ и Прибе́жище мое́, Бо́г мо́й, и упова́ю на Него́. Я́ко То́й изба́вит тя́ от се́ти ло́вчи, и от словесе́ мяте́жна, плещма́ Свои́ма осени́т тя́, и под криле́ Его́ наде́ешися: ору́жием обы́дет тя́ и́стина Его́. Не убои́шися от стра́ха нощна́го, от стре́лы летя́щия во дни́, от ве́щи во тме́ преходя́щия, от сря́ща, и бе́са полу́деннаго. Паде́т от страны́ твоея́ ты́сяща, и тма́ одесну́ю тебе́, к тебе́ же не прибли́жится, оба́че очи́ма твои́ма смо́триши, и воздая́ние гре́шников у́зриши. Я́ко Ты́, Го́споди, упова́ние мое́, Вы́шняго положи́л еси́ прибе́жище твое́. Не прии́дет к тебе́ зло́, и ра́на не прибли́жится телеси́ твоему́, я́ко А́нгелом Свои́м запове́сть о тебе́, сохрани́ти тя́ во все́х путе́х твои́х. На рука́х во́змут тя́, да не когда́ преткне́ши о ка́мень но́гу твою́, на а́спида и васили́ска насту́пиши, и попере́ши льва́ и зми́я. Я́ко на Мя́ упова́, и изба́влю и: покры́ю и, я́ко позна́ и́мя Мое́. Воззове́т ко Мне́, и услы́шу его́: с ни́м е́смь в ско́рби, изму́ его́, и просла́влю его́, долгото́ю дне́й испо́лню его́, и явлю́ ему́ спасе́ние Мое́.

Сла́ва, и ны́не: Аллилу́иа, три́жды. Го́споди, поми́луй, три́жды. И тропа́рь дне́.

А́ще же Аллилу́иа, се́й тропа́рь, гла́с 2:

И́же в шесты́й де́нь же и ча́с, на кресте́ Пригвожде́й в раи́ дерзнове́нный Ада́мов гре́х, и согреше́ний на́ших рукописа́ние раздери́, Христе́ Бо́же, и спаси́ на́с.

Сти́х 1: Внуши́ Бо́же моли́тву мою́, и не пре́зри моле́ния моего́.

Сти́х 2: А́з к Бо́гу воззва́х, и Госпо́дь услы́ша мя́.

Сла́ва, и ны́не, Богоро́дичен:

Я́ко не и́мамы дерзнове́ния за премно́гия грехи́ на́шя, Ты́ И́же от Тебе́ Ро́ждшагося моли́, Богоро́дице Де́во: мно́го бо мо́жет моле́ние Ма́тернее ко благосе́рдию Влады́ки: не пре́зри гре́шных мольбы́, Всечи́стая, я́ко Ми́лостив е́сть и спасти́ Моги́й, И́же и страда́ти о на́с изво́ливый.

Ско́ро да предваря́т ны́ щедро́ты Твоя́, Го́споди, я́ко обнища́хом зело́: помози́ на́м, Бо́же Спа́се на́ш, сла́вы ра́ди И́мене Твоего́, Го́споди, изба́ви на́с, и очи́сти грехи́ на́шя, И́мене ра́ди Твоего́.

Трисвято́е. По О́тче на́ш:

Конда́к пра́здника или́ свята́го.

А́ще аллилу́иа, глаго́лем сия́ тропари́, гла́с 2:

Спасе́ние соде́лал еси́ посреде́ земли́, Христе́ Бо́же, на Кресте́ Пречи́стеи Ру́це Твои́ просте́рл еси́, собира́я вся́ язы́ки, зову́щыя: Го́споди, сла́ва Тебе́.

Сла́ва: Пречи́стому О́бразу Твоему́ покланя́емся, Благи́й, прося́ще проще́ния прегреше́ний на́ших, Христе́ Бо́же: во́лею бо благоволи́л еси́ пло́тию взы́ти на Кре́ст, да изба́виши, я́же созда́л еси́, от рабо́ты вра́жия. Те́м благода́рственно вопие́м Ти́: ра́дости испо́лнил еси́ вся́, Спа́се на́ш, Прише́дый спасти́ ми́р.

И ны́не: Милосе́рдия су́щи Исто́чник, ми́лости сподо́би на́с, Богоро́дице, при́зри на лю́ди согреши́вшыя, яви́ я́ко при́сно си́лу Твою́: на Тя́ бо упова́юще, ра́дуйся, вопие́м Ти́, я́коже иногда́ Гаврии́л, безпло́тных Архистрати́г.

Се́й глаго́лется в понеде́льник, во вто́рник и в четверто́к, подчине́нный же глаго́лется в сре́ду и пято́к вме́сто: Милосе́рдия су́щи:

Крестобогоро́дичен: Гла́с 2.      

Препросла́влена еси́, Богоро́дице Де́во, пое́м Тя́: Кресто́м бо Сы́на Твоего́ низложи́ся а́д, и сме́рть умертви́ся, умерщвле́ннии воста́хом, и живота́ сподо́бихомся, ра́й восприя́хом, дре́внее наслажде́ние. Те́м благодаря́ще, славосло́вим, я́ко Держа́внаго Христа́ Бо́га на́шего, и Еди́наго Многоми́лостиваго.

Го́споди, поми́луй, 40. И́же на вся́кое вре́мя: Го́споди, поми́луй, три́жды.

Сла́ва, и ны́не: Честне́йшую Херуви́м:

Свяще́нник: Моли́твами святы́х оте́ц на́ших:

И покло́ны, я́коже рече́ся. И отпу́ст.

А́ще же не́сть Аллилу́иа по Честне́йшую херуви́м:

И моли́тву вели́каго Васи́лиа:

Бо́же и Го́споди си́л, и всея́ тва́ри Соде́телю, И́же за милосе́рдие безприкла́дныя ми́лости Твоея́, Единоро́днаго Сы́на Твоего́, Го́спода на́шего Иису́са Христа́, Низпосла́вый на спасе́ние ро́да на́шего, и честны́м Его́ Кресто́м рукописа́ние гре́х на́ших Растерза́вый, и Победи́вый Те́м нача́ла и вла́сти тьмы́: Са́м, Влады́ко Человеколю́бче, приими́ и на́с, гре́шных, благода́рственныя сия́ и моле́бныя моли́твы, и изба́ви на́с от вся́каго всегуби́тельнаго и мра́чнаго прегреше́ния, и все́х озло́бити на́с и́щущих, ви́димых и неви́димых вра́г, пригвозди́ стра́ху Твоему́ пло́ти на́шя, и не уклони́ серде́ц на́ших в словеса́ или́ помышле́ния лука́вствия, но любо́вию Твое́ю уязви́ ду́шы на́шя: да к Тебе́ всегда́ взира́юще, и е́же от Тебе́ све́том наставля́еми, Тебе́ Непристу́пнаго и Присносу́щнаго зря́ще Све́та, непреста́нное Тебе́ испове́дание и благодаре́ние возсыла́ем, Безнача́льному Отцу́, со Единоро́дным Твои́м Сыно́м, и Всесвяты́м, и Благи́м, и Животворя́щим Твои́м Ду́хом, ны́не и при́сно и во ве́ки веко́в, ами́нь.

Благослове́н Бо́г на́ш:

Сла́ва тебе́ Бо́же на́ш, сла́ва тебе́. Царю́ небе́сный: Трисвято́е: Пресвята́я Тро́ице: О́тче на́ш: Го́споди поми́луй, 12. Прииди́те поклони́мся: три́жды.

И псалмы́:

Псало́м 83

Ко́ль возлю́бленна селе́ния Твоя́, Го́споди си́л! Жела́ет и скончава́ется душа́ моя́ во дворы́ Госпо́дни, се́рдце мое́ и пло́ть моя́ возра́довастася о Бо́зе Жи́ве. И́бо пти́ца обре́те себе́ хра́мину, и го́рлица гнездо́ себе́, иде́же положи́т птенцы́ своя́, олтари́ Твоя́, Го́споди си́л, Царю́ мо́й и Бо́же мо́й. Блаже́ни живу́щии в до́му Твое́м, в ве́ки веко́в восхва́лят Тя́. Блаже́н му́ж, ему́же е́сть заступле́ние его́ у тебе́; восхожде́ния в се́рдце свое́м положи́, во юдо́ль плаче́вную, в ме́сто, е́же положи́, и́бо благослове́ние да́ст законополага́яй. По́йдут от си́лы в си́лу: яви́тся Бо́г бого́в в Сио́не. Го́споди Бо́же си́л, услы́ши моли́тву мою́, внуши́, Бо́же Иа́ковль. Защи́тниче на́ш, ви́ждь, Бо́же, и при́зри на лице́ христа́ Твоего́. Я́ко лу́чше де́нь еди́н во дво́рех Твои́х па́че ты́сящ: изво́лих примета́тися в до́му Бо́га моего́ па́че, не́же жи́ти ми́ в селе́ниих гре́шничих. Я́ко ми́лость и и́стину лю́бит Госпо́дь, Бо́г благода́ть и сла́ву да́ст, Госпо́дь не лиши́т благи́х ходя́щих незло́бием. Го́споди Бо́же си́л, блаже́н челове́к упова́яй на Тя́.

Псало́м 84

Благоволи́л еси́, Го́споди, зе́млю Твою́, возврати́л еси́ пле́н Иа́ковль: оста́вил еси́ беззако́ния люде́й Твои́х, покры́л еси́ вся́ грехи́ и́х. Укроти́л еси́ ве́сь гне́в Тво́й, возврати́лся еси́ от гне́ва я́рости Твоея́. Возврати́ на́с, Бо́же спасе́ний на́ших, и отврати́ я́рость Твою́ от на́с. Еда́ во ве́ки прогне́ваешися на ны́? Или́ простре́ши гне́в Тво́й от ро́да в ро́д? Бо́же, Ты́ обра́щься оживи́ши ны́, и лю́дие Твои́ возвеселя́тся о Тебе́. Яви́ на́м, Го́споди, ми́лость Твою́, и спасе́ние Твое́ да́ждь на́м. Услы́шу, что́ рече́т о мне́ Госпо́дь Бо́г: я́ко рече́т ми́р на лю́ди Своя́, и на преподо́бныя Своя́, и на обраща́ющыя сердца́ к Нему́. Оба́че бли́з боя́щихся Его́ спасе́ние Его́, всели́ти сла́ву в зе́млю на́шу. Ми́лость и и́стина срето́стеся, пра́вда и ми́р облобыза́стася. И́стина от земли́ возсия́, и пра́вда с Небесе́ прини́че, и́бо Госпо́дь да́ст бла́гость, и земля́ на́ша да́ст пло́д сво́й. Пра́вда пред Ни́м предъи́дет, и положи́т в пу́ть стопы́ своя́.

Псало́м 85

Приклони́, Го́споди, у́хо Твое́, и услы́ши мя́, я́ко ни́щ и убо́г е́смь а́з. Сохрани́ ду́шу мою́, я́ко преподо́бен е́смь: спаси́ раба́ Твоего́, Бо́же мо́й, упова́ющаго на Тя́. Поми́луй мя́, Го́споди, я́ко к Тебе́ воззову́ ве́сь де́нь. Возвесели́ ду́шу раба́ Твоего́, я́ко к Тебе́ взя́х ду́шу мою́. Я́ко Ты́, Го́споди, Бла́г и Кро́ток и Многоми́лостив все́м, призыва́ющим тя́. Внуши́, Го́споди, моли́тву мою́, и вонми́ гла́су моле́ния моего́. В де́нь ско́рби моея́ воззва́х к Тебе́, я́ко услы́шал мя́ еси́. Не́сть подо́бен Тебе́ в бозе́х, Го́споди, и не́сть по дело́м твои́м. Вси́ язы́цы, ели́ки сотвори́л еси́, прии́дут, и покло́нятся пред Тобо́ю, Го́споди, и просла́вят И́мя Твое́, я́ко Ве́лий еси́ Ты́ и Творя́й чудеса́, Ты́ еси́ Бо́г Еди́н. Наста́ви мя́, Го́споди, на пу́ть Тво́й, и пойду́ во и́стине Твое́й; да возвесели́тся се́рдце мое́ боя́тися И́мене Твоего́. Испове́мся Тебе́, Го́споди Бо́же мо́й, все́м се́рдцем мои́м, и просла́влю И́мя Твое́ в ве́к: я́ко ми́лость Твоя́ ве́лия на мне́, и изба́вил еси́ ду́шу мою́ от а́да преиспо́днейшаго. Бо́же, законопресту́пницы воста́ша на мя́, и со́нм держа́вных взыска́ша ду́шу мою́ и не предложи́ша Тебе́ пред собо́ю. И Ты́, Го́споди Бо́же мо́й, Ще́дрый и Ми́лостивый, Долготерпели́вый и Многоми́лостивый и И́стинный, при́зри на мя́ и поми́луй мя́, да́ждь держа́ву Твою́ о́троку Твоему́, и спаси́ сы́на рабы́ Твоея́. Сотвори́ со мно́ю зна́мение во бла́го, и да ви́дят ненави́дящии мя́ и постыдя́тся, я́ко Ты́, Го́споди, помо́гл ми́ и уте́шил мя́ еси́.

И па́ки: Сотвори́ со мно́ю зна́мение во бла́го, и да ви́дят ненави́дящии мя́ и постыдя́тся, я́ко Ты́, Го́споди, помо́гл ми́ и уте́шил мя́ еси́.

Сла́ва, и ны́не:

Аллилу́иа, три́жды. Го́споди, поми́луй, три́жды.

И тропа́рь дне́.

А́ще Аллилу́иа, тропа́рь се́й, гла́с 8:

И́же в девя́тый ча́с на́с ра́ди пло́тию сме́рть вкуси́вый, умертви́ пло́ти на́шея мудрова́ние, Христе́ Бо́же, и спаси́ на́с.

Сти́х 1: Да прибли́жится моли́тва моя́ пред Тя́, Го́споди, по словеси́ Твоему́ вразуми́ мя́.

Сти́х 2: Да вни́дет проше́ние мое́ пред Тя́, Го́споди, по словеси́ Твоему́ изба́ви мя́.

Сла́ва, и ны́не, Богоро́дичен:

И́же на́с ра́ди Рожде́йся от Де́вы, и распя́тие претерпе́в, Благи́й, Испрове́ргий сме́ртию сме́рть, и воскресе́ние Явле́й, я́ко Бо́г, не пре́зри, я́же созда́л еси́ руко́ю Твое́ю, яви́ человеколю́бие Твое́, Ми́лостиве, приими́ Ро́ждшую Тя́ Богоро́дицу, моля́щуюся за ны́, и спаси́, Спа́се на́ш, лю́ди отча́янныя.

Не преда́ждь на́с до конца́, И́мене Твоего́ ра́ди, и не разори́ заве́та Твоего́, и не отста́ви ми́лости Твоея́ от на́с, Авраа́ма ра́ди возлю́бленнаго от Тебе́, и за Исаа́ка, раба́ Твоего́, и Изра́иля свята́го Твоего́.

Трисвято́е. По О́тче на́ш:

Конда́к пра́здника, или́ свята́го.

А́ще же по́ст глаго́лем сия́, гла́с 8:

Ви́дя разбо́йник Нача́льника жи́зни на Кресте́ ви́сяща, глаго́лаше: а́ще не бы Бо́г бы́л Вопло́щься, И́же с на́ми Распны́йся, не бы со́лнце лучы́ своя́ потаи́ло: ниже́ бы земля́ трепе́щущи трясла́ся, но вся́ терпя́й, помяни́ мя́, Го́споди, во Ца́рствии Твое́м.

Сла́ва: Посреде́ двою́ разбо́йнику, ме́рило пра́ведное обре́теся кре́ст Тво́й: о́вому у́бо низводи́му во а́д тягото́ю хуле́ния, друго́му же легча́щуся от прегреше́ний к позна́нию Богосло́вия. Христе́ Бо́же, сла́ва Тебе́.

И ны́не: А́гнца, и Па́стыря, и Спа́са мира, на Кресте́ зря́щи Ро́ждшая Тя́, глаго́лаше слезя́щи: мiр у́бо ра́дуется прие́мля избавле́ние, утро́ба же моя́ гори́т, зря́щи Твое́ распя́тие, е́же за все́х терпи́ши, Сы́не и Бо́же мо́й.

Го́споди, поми́луй, 40. И́же на вся́кое вре́мя: Го́споди, поми́луй, три́жды.

Сла́ва, и ны́не: Честне́йшую Херуви́м:

Свяще́нник: Бо́же уще́дри ны́:

И моли́тва свята́го Васи́лиа вели́каго:

Влады́ко Го́споди Иису́се Христе́ Бо́же на́ш, долготерпе́вый о на́ших согреше́ниих, и да́же до ны́нешняго часа́ приведы́й на́с, во́ньже на животворя́щем дре́ве ви́ся, благоразу́мному разбо́йнику и́же в ра́й путесотвори́л еси́ вхо́д, и сме́ртию сме́рть разруши́л еси́, очи́сти на́с гре́шных и недосто́йных ра́б Твои́х. Согреши́хом бо и беззако́нновахом, и не́смы досто́йни возвести́ очеса́ на́шя и воззре́ти на высоту́ Небе́сную, зане́ оста́вихом пу́ть пра́вды Твоея́, и ходи́хом в во́лях серде́ц на́ших. Но мо́лим Твою́ безме́рную бла́гость, пощади́ на́с, Го́споди, по мно́жеству ми́лости Твоея́, и спаси́ на́с И́мене Твоего́ ра́ди Свята́го, я́ко исчезо́ша в суете́ дни́е на́ша, изми́ на́с из руки́ сопроти́внаго, и оста́ви на́м грехи́ на́ша, и умертви́ плотско́е на́ше мудрова́ние, да ве́тхаго отложи́вше челове́ка, в но́ваго облеце́мся: и Тебе́ поживе́м, на́шему Влады́це и Благоде́телю, и та́ко Твои́м после́дующе повеле́нием, в ве́чный поко́й дости́гнем, иде́же е́сть все́х веселя́щихся жили́ще, Ты́ бо еси́ вои́стинну и́стинное весе́лие и ра́дость лю́бящих Тя́, Христе́ Бо́же на́ш, и Тебе́ сла́ву возсыла́ем, со Безнача́льным Твои́м Отце́м, и Пресвяты́м и Благи́м и Животворя́щим Твои́м Ду́хом, ны́не и при́сно и во ве́ки веко́в. Ами́нь.

Сла́ва, и ны́не.

Го́споди, поми́луй, три́жды. Благослови́.

И отпу́ст.

Благослови́, душе́ моя́, Го́спода: Благослове́н еси́, Го́споди.

Псало́м 102.

Благослови́, душе́ моя́, Го́спода, и вся́ вну́тренняя моя́ и́мя свято́е Его́. Благослови́, душе́ моя́, Го́спода, и не забыва́й все́х воздая́ний Его́, очища́ющаго вся́ беззако́ния твоя́, исцеля́ющаго вся́ неду́ги твоя́, избавля́ющаго от истле́ния живо́т тво́й, венча́ющаго тя́ ми́лостию и щедро́тами, исполня́ющаго во благи́х жела́ние твое́: обнови́тся я́ко о́рля ю́ность твоя́. Творя́й ми́лостыни Госпо́дь, и судьбу́ все́м оби́димым. Сказа́ пути́ Своя́ Моисе́ови, сыново́м Изра́илевым хоте́ния Своя́: Ще́др и Ми́лостив Госпо́дь, Долготерпели́в и Многоми́лостив. Не до конца́ прогне́вается, ниже́ во ве́к вражду́ет, не по беззако́нием на́шим сотвори́л е́сть на́м, ниже́ по грехо́м на́шым возда́л е́сть на́м. Я́ко по высоте́ небе́сней от земли́, утверди́л е́сть Госпо́дь ми́лость Свою́ на боя́щихся Его́. Ели́ко отстоя́т восто́цы от за́пад, уда́лил е́сть от на́с беззако́ния на́ша. Я́коже ще́дрит оте́ц сы́ны, уще́дри Госпо́дь боя́щихся Его́. Я́ко то́й позна́ созда́ние на́ше, помяну́, я́ко пе́рсть есмы́. Челове́к, я́ко трава́ дни́е его́, я́ко цве́т се́льный, та́ко оцвете́т, я́ко ду́х про́йде в не́м, и не бу́дет, и не позна́ет ктому́ ме́ста своего́. Ми́лость же Госпо́дня от ве́ка и до ве́ка на боя́щихся Его́, и пра́вда Его́ на сыне́х сыно́в, храня́щих заве́т Его́, и по́мнящих за́поведи Его́ твори́ти я́. Госпо́дь на Небеси́ угото́ва Престо́л Сво́й, и Ца́рство Его́ все́ми облада́ет. Благослови́те Го́спода вси́ А́нгели Его́, си́льнии кре́постию, творя́щии сло́во Его́, услы́шати гла́с слове́с Его́. Благослови́те Го́спода вся́ си́лы Его́, слуги́ Его́, творя́щии во́лю Его́. Благослови́те Го́спода вся́ дела́ Его́, на вся́ком ме́сте влады́чества Его́.

Сла́ва: И ны́не:

Псало́м 145:

Хвали́, душе́ моя́, Го́спода. Восхвалю́ Го́спода в животе́ мое́м, пою́ Бо́гу моему́, дóндеже е́смь. Не наде́йтеся на кня́зи, на сы́ны челове́ческия, в ни́хже не́сть спасе́ния. Изы́дет ду́х его́ и возврати́тся в зе́млю свою́. В то́й де́нь поги́бнут вся́ помышле́ния его́. Блаже́н, ему́ же Бо́г Иа́ковль Помо́щник, упова́ние его́ на Го́спода Бо́га своего́, сотво́ршаго не́бо и зе́млю, мо́ре и вся́, я́же в ни́х, храня́щаго и́стину в ве́к, творя́щаго су́д оби́димым, даю́щаго пи́щу а́лчущим. Госпо́дь реши́т окова́нныя. Госпо́дь умудря́ет слепцы́. Госпо́дь возво́дит низве́рженныя. Госпо́дь лю́бит пра́ведники. Госпо́дь храни́т прише́льцы, си́ра и вдову́ прии́мет и пу́ть гре́шных погуби́т. Воцари́тся Госпо́дь во ве́к, Бо́г тво́й, Сио́не, в ро́д и ро́д.

И ны́не: Единоро́дный Сы́не, и Сло́ве Бо́жий, Безсме́ртен Сы́й. И изво́ливый спасе́ния на́шего ра́ди воплоти́тися от Святы́я Богоро́дицы и Присноде́вы Мари́и, непрело́жно Вочелове́чивыйся. Распны́йся же, Христе́ Бо́же, сме́ртию сме́рть попра́вый. Еди́н Сы́й Святы́я Тро́ицы, Спрославля́емый Отцу́ и Свято́му Ду́ху, спаси́ на́с.

Блаже́нна:

Во Ца́рствии Твое́м, помяни́ на́с, Го́споди, егда́ прии́деши во Ца́рствии Твое́м.

Блаже́ни ни́щии ду́хом, я́ко те́х е́сть Ца́рство Небе́сное.

Блаже́ни пла́чущии, я́ко ти́и уте́шатся.

Блаже́ни кро́тцыи, я́ко ти́и насле́дят зе́млю.

Блаже́ни а́лчущии и жа́ждущии пра́вды, я́ко ти́и насы́тятся.

Блаже́ни ми́лостивии, я́ко ти́и поми́ловани бу́дут.

Блаже́ни чи́стии се́рдцем, я́ко ти́и Бо́га у́зрят.

Блаже́ни миротво́рцы, я́ко ти́и сы́нове Бо́жии нареку́тся.

Блаже́ни изгна́ни пра́вды ра́ди, я́ко те́х е́сть Ца́рство Небе́сное.

Блаже́ни есте́, егда́ поно́сят ва́м, и изжену́т, и реку́т вся́к зо́л глаго́л на вы́, лжу́ще мене́ ра́ди.

Ра́дуйтеся и весели́теся, я́ко мзда́ ва́ша мно́га на Небесе́х.

Блаже́нна воскре́сна собрана́ от осми́ гласо́в:

Сне́дию изведе́ из рая́ вра́г Ада́ма: / Кресто́м же разбо́йника введе́ Христо́с во́нь, / помяни́ мя́, зову́ща, / егда́ прии́деши во Ца́рствии Твое́м.

Кре́ст Тебе́ прино́сим / в проще́ние прегреше́ний: / его́же на́с ра́ди / прия́л еси́, Человеколю́бче.

Воскре́с из ме́ртвых, совоскреси́л еси́ на́с от страсте́й / воскресе́нием Твои́м, Го́споди: / сме́ртную же всю́ си́лу погуби́л еси́, Спа́се. / Сего́ ра́ди ве́рою Ти́ зове́м: / помяни́ и на́с во ца́рствии Твое́м.

Распны́йся и воскресы́й я́ко Си́лен из гро́ба тридне́вен, / и первозда́ннаго Ада́ма воскреси́вый, Еди́не Безсме́ртне: / и мене́ на покая́ние обрати́тися, Го́споди, сподо́би от всего́ се́рдца моего́, / и те́плою ве́рою при́сно взыва́ти Ти́: / помяни́ мя́, Спа́се, во Ца́рствии Твое́м.

Распе́ншу Ти́ ся́, Христе́, посреде́ двою́ осужде́нною разбо́йнику, / еди́н у́бо ху́ля Тя́, осужде́н бы́сть пра́ведне: / други́й же испове́дая Тя́, в ра́й всели́ся.

На дре́ве кре́стнем пригвозди́вшагося, / и мир от пре́лести изба́вльшаго, / согла́сно вси́ Христа́ воспои́м.

Сла́ва, Тро́ичен:

Све́т Оте́ц, све́т Сы́н и Сло́во, све́т Ду́х Святы́й, / но еди́н Све́т три́, еди́н бо Бо́г в трие́х у́бо Ли́цех, / еди́нем же естестве́ и нача́ле, несеко́м и неслия́н, Сы́й преве́чный.

И ны́не, Богоро́дичен:

Ра́дуйся, Бо́жие простра́нное Вмести́лище; / ра́дуйся, Ковче́же но́ваго заве́та; / ра́дуйся, ру́чко, из Нея́же ма́нна все́м даде́ся небе́сная.

Блаже́нна дневна́я, гла́с 6:

Помяни́ мя́, Бо́же Спа́се мо́й, / егда́ прии́деши во Ца́рствии Твое́м, / и спаси́ мя́, я́ко Еди́н Человеколю́бец.

И́же Петро́во прие́мый рыда́ние, приими́ и мое́, Христе́, покая́ние: и да́руй ми́ согреше́ний проще́ние.

Просвети́вый а́нгельския ли́ки, те́х мольба́ми Христе́, зра́к се́рдца моего́ просвети́.

Пропове́давый покая́ние челове́ком, Госпо́день Крести́телю и Предте́че, пока́ятися ми́ от души́ моли́ся.

Пригвозди́лся еси́ на дре́ве во́лею, и жа́ла го́рдаго Твое́ю Христе́, си́лою, соверше́нно сокруши́л еси́.

Я́ко лучи́ та́йныя, проте́кше в ми́ре, апо́столи сла́внии, челове́ческий ро́д ве́рою просвети́ли есте́.

И́же проро́ки, и учи́тели, и преподо́бныя: и пра́ведныя просла́вивый, Человеколю́бче, те́х моли́твами спаси́ ду́ши на́ша.

Сла́ва:

Отца́ и Сы́на славосло́вим, и Ду́ха Свята́го, глаго́люще: Тро́ице Свята́я, спаси́ ду́ши на́ша.

И ны́не:

Блаже́нна в ро́дех все́х яви́лася еси́, Бо́га вои́стину блаже́ннаго несказа́нно родила́ еси́, Пречи́стая.

Апо́стол к кори́нфяном Зача́ло 149

Бра́тие, а́з прия́х от Го́спода, е́же и преда́х ва́м, я́ко Госпо́дь Иису́с в но́щь, в ню́же пре́дан быва́ше, прие́м хле́б, и благодари́в преломи́, и рече́: приими́те, яди́те, сие́ е́сть Те́ло Мое́, е́же за вы́ ломи́мое; сие́ твори́те в Мое́ воспомина́ние. Та́кожде и ча́шу по ве́чери, глаго́ля: сия́ ча́ша Но́вый Заве́т е́сть в Мое́й Кро́ви; сие́ твори́те, ели́жды а́ще пие́те, в Мое́ воспомина́ние. Ели́жды бо а́ще я́сте хле́б се́й и ча́шу сию́ пие́те, сме́рть Госпо́дню возвеща́ете, до́ндеже у́бо прии́дет. Те́мже и́же а́ще я́ст хле́б се́й или́ пие́т ча́шу Госпо́дню недосто́йне, пови́нен бу́дет Те́лу и Кро́ви Госпо́дни. Да искуша́ет же челове́к себе́, и та́ко от хле́ба да я́ст и от ча́ши да пие́т. Яды́й бо и пия́й недосто́йне, су́д себе́ я́ст и пие́т, не разсужда́я те́ла Госпо́дня. Сего́ ра́ди в ва́с мно́зи не́мощни и неду́жливи, и спя́т дово́льни. А́ще бо бы́хом себе́ разсужда́ли, не бы́хом осужде́ни бы́ли. Суди́ми же, от Го́спода наказу́емся, да не с ми́ром осу́димся.

Ева́нгелие от Иоа́нна, зача́ло 23.

Рече́ Госпо́дь ко прише́дшым к Нему́ иуде́ем: А́з е́смь хле́б живо́тный. Отцы́ ва́ши ядо́ша ма́нну в пусты́ни и умро́ша. Се́й е́сть хле́б сходя́й с небесе́, да, а́ще кто́ от него́ я́ст, не у́мрет. А́з е́смь хле́б живо́тный, и́же сше́дый с небесе́, а́ще кто́ сне́сть от хле́ба сего́, жи́в бу́дет во ве́ки, и хле́б, его́же А́з да́м, Пло́ть Моя́ е́сть, ю́же А́з да́м за живо́т ми́ра. Пря́хуся же между́ собо́ю жи́дове, глаго́люще: ка́ко мо́жет Се́й на́м да́ти Пло́ть Свою́ я́сти? Рече́ же и́м Иису́с: ами́нь, ами́нь глаго́лю ва́м, а́ще не сне́сте Пло́ти Сы́на Челове́ческаго, ни пие́те Кро́ве Его́, живота́ не и́мате в себе́. Яды́й Мою́ Пло́ть и пия́й Мою́ Кро́вь и́мать живо́т ве́чный, и А́з воскрешу́ его́ в после́дний де́нь.

Сла́ва: И ны́не.

Помяни́ на́с, Го́споди, егда́ прии́деши во Ца́рствии Свое́м.

Помяни́ на́с, Влады́ко, егда́ прии́деши во Ца́рствии Свое́м.

Помяни́ на́с, Святы́й, егда́ прии́деши во Ца́рствии Свое́м.

Ли́к Небе́сный пое́т Тя́ и глаго́лет: Свя́т, Свя́т, Свя́т Госпо́дь Савао́ф, испо́лнь Не́бо и земля́ сла́вы Твоея́.

Сти́х: Приступи́те к Нему́ и просвети́теся, и ли́ца Ва́ша не постыдя́тся.

Ли́к Небе́сный:

Сла́ва: Ли́к Святы́х А́нгел и Арха́нгел со все́ми Небе́сными си́лами пое́т Тя́ и глаго́лет: Свя́т, Свя́т, Свя́т Госпо́дь Савао́ф, испо́лнь Не́бо и земля́ сла́вы Твоея́.

И ны́не: Ве́рую во Еди́наго Бо́га: Отца́, Вседержи́теля:

Осла́би, оста́ви, прости́ Бо́же, прегреше́ния на́ша, во́льная, и нево́льная, я́же в сло́ве и в де́ле, я́же в ве́дении и не в ве́дении, я́же во дни́ и в но́щи, я́же во уме́ и помышле́нии, вся́ на́м прости́, я́ко Бла́г и Человеколю́бец.

Сла́ва: Со святы́ми упоко́й, Христе́:

И ны́не: Предста́тельство христиа́н:

Го́споди, поми́луй, 12. И моли́тву сию́:

Всесвята́я Тро́ице, Единосу́щная Держа́во, Неразде́льное Ца́рство, все́х благи́х Вина́, благоволи́ же и о мне́, гре́шнем, утверди́, вразуми́ се́рдце мое́, и всю́ мою́ отими́ скве́рну, просвети́ мою́ мы́сль, да вы́ну сла́влю, пою́, покланя́юся и глаго́лю: Еди́н Свя́т, Еди́н Госпо́дь, Иису́с Христо́с, во сла́ву Бо́га Отца́, ами́нь.

Бу́ди И́мя Госпо́дне благослове́но отны́не и до ве́ка. Три́жды.

Псало́м 33.

Благословлю́ Го́спода на вся́кое вре́мя, вы́ну хвала́ Его́ во усте́х мои́х. О Го́споде похва́лится душа́ моя́, да услы́шат кро́тцыи и возвеселя́тся. Возвели́чите Го́спода со мно́ю и вознесе́м и́мя Его́ вку́пе. Взыска́х Го́спода и услы́ша мя́, и от все́х скорбе́й мои́х изба́ви мя́. Приступи́те к Нему́ и просвети́теся, и лица́ ва́ша не постыдя́тся. Се́й ни́щий воззва́, и Госпо́дь услы́ша и, и от все́х скорбе́й его́ спа́се и. Ополчи́тся А́нгел Госпо́день о́крест боя́щихся Его́, и изба́вит и́х. Вкуси́те и ви́дите, я́ко бла́г Госпо́дь; блаже́н му́ж, и́же упова́ет На́нь. Бо́йтеся Го́спода, вси́ святи́и Его́, я́ко не́сть лише́ния боя́щымся Его́. Бога́тии обнища́ша и взалка́ша, взыска́ющии же Го́спода не лиша́тся вся́каго бла́га. Прииди́те, ча́да, послу́шайте мене́, стра́ху Госпо́дню научу́ ва́с. Кто́ е́сть челове́к хотя́й живо́т, любя́й дни́ ви́дети бла́ги? Удержи́ язы́к тво́й от зла́, и устне́ твои́, е́же не глаго́лати льсти́. Уклони́ся от зла́ и сотвори́ бла́го. Взыщи́ ми́ра, и пожени́ и. О́чи Госпо́дни на пра́ведныя, и у́ши Его́ в моли́тву и́х. Лице́ же Госпо́дне, на творя́щыя зла́я, е́же потреби́ти от земли́ па́мять и́х. Воззва́ша пра́веднии, и Госпо́дь услы́ша и́х, и от все́х скорбе́й и́х изба́ви и́х. Бли́з Госпо́дь сокруше́нных се́рдцем, и смире́нныя ду́хом спасе́т. Мно́ги ско́рби пра́ведным, и от все́х и́х изба́вит я́ Госпо́дь. Храни́т Госпо́дь вся́ ко́сти и́х, ни еди́на от ни́х сокруши́тся. Сме́рть гре́шников лю́та, и ненави́дящии пра́веднаго прегреша́т. Изба́вит Госпо́дь ду́шы ра́б Свои́х, и не прегреша́т вси́, упова́ющии на Него́.

Досто́йно е́сть:

Сла́ва, и ны́не: Го́споди поми́луй три́жды. Благослови́.

И отпу́ст.

шеста́го гла́са

В суббо́ту на вели́цей вече́рни

На Го́споди, воззва́х, Воскре́сны стихи́ры. Гла́с 6-й.

Сти́х: Изведи́ из темни́цы ду́шу мою́, / испове́датися И́мене Твоему́.

Побе́ду име́я, Христе́, ю́же на а́да, / на Кре́ст возше́л еси́: / да во тьме́ сме́рти седя́щия воскреси́ши с Собо́ю, / И́же в ме́ртвых Свобо́дь, / Источа́яй живо́т от Своего́ све́та, / Всеси́льне Спа́се, поми́луй на́с.

Сти́х: Мене́ жду́т пра́ведницы, / дóндеже возда́си мне́.

Дне́сь Христо́с сме́рть попра́в, / я́коже рече́, воскре́се, / и ра́дование ми́рови дарова́, / да вси́ взыва́юще, пе́снь та́ко рце́м: / Исто́чниче жи́зни, Непристу́пный Све́те, / Всеси́льне Спа́се, поми́луй на́с.

Сти́х: Из глубины́ воззва́х к Тебе́, Го́споди, / Го́споди, услы́ши гла́с мо́й.

Тебе́, Го́споди, Су́щаго по все́й тва́ри, / гре́шнии ка́мо бежи́м; / на Небеси́ Са́м живе́ши, / во а́де попра́л еси́ сме́рть. / Во глубины́ морски́я; / та́мо рука́ Твоя́, Влады́ко. / К Тебе́ прибега́ем, / Тебе́ припа́дающе мо́лимся: / Воскресы́й из ме́ртвых, поми́луй на́с.

И́ны стихи́ры Анато́лиевы, гла́с то́йже:

Сти́х: Да бу́дут у́ши Твои́ / вне́млюще гла́су моле́ния моего́.

Кресто́м Твои́м, Христе́, хва́лимся, / и воскресе́ние Твое́ пое́м и сла́вим: / Ты́ бо еси́ Бо́г на́ш, / ра́зве Тебе́ ина́го не ве́мы.

Сти́х: А́ще беззако́ния на́зриши, Го́споди, Го́споди, кто́ постои́т; / я́ко у тебе́ очище́ние е́сть.

Вы́ну благословя́ще Го́спода, / пое́м воскресе́ние Его́: / Кре́ст бо Претерпе́в, / сме́ртию сме́рть погуби́.

Сти́х: И́мене ра́ди Твоего́ потерпе́х Тя́, Го́споди, потерпе́ душа́ моя́ в сло́во Твое́, / упова́ душа́ моя́ на Го́спода.

Сла́ва си́ле Твое́й, Го́споди, / я́ко упраздни́л еси́ держа́ву иму́щаго сме́рти: / обнови́л еси́ на́с Кресто́м Твои́м, / да́руя на́м живо́т и нетле́ние.

Сти́х: От стра́жи у́тренния до но́щи, от стра́жи у́тренния, / да упова́ет Изра́иль на Го́спода.

Погребе́ние Твое́, Го́споди, / у́зы а́довы сокруши́вшее растерза́, / е́же из ме́ртвых воскресе́нием мир просвети́, / Го́споди сла́ва Тебе́.

И́ны стихи́ры Богоро́дицы, творе́ние Па́вла Аморре́йскаго. Гла́с 3-й.

Сти́х: Я́ко у Го́спода ми́лость и мно́гое у Него́ избавле́ние, и То́й изба́вит Изра́иля от все́х беззако́ний его́.

Ви́дящи не́мощь мою́ теле́сную, и душе́вное страда́ние, и серде́чное озлобле́ние, посеще́ния сподо́би мя́ Боже́ственнаго, Всенепоро́чная Де́во. Спаси́ мя́, молю́ся, те́плыми Твои́ми моли́твами.

Сти́х: Хвали́те Го́спода, вси́ язы́цы, похвали́те Его́, вси́ лю́дие.

Все́х преидо́х, Влады́чице, согреше́ньми, но мно́жества си́х, Де́во, очи́щши, ми́лостей получи́ти мя́, Чи́стая, сподо́би, в бу́дущем суде́, Сы́на и Бо́га Твоего́.

Сти́х: Я́ко утверди́ся ми́лость Его́ на на́с, и и́стина Госпо́дня пребыва́ет во ве́к.

Мно́жество согреше́ний мои́х зову́щаго, очи́сти, Чи́стая, и чу́вствий мои́х неуста́вная движе́ния моли́твенным мече́м ссецы́: я́ко да ве́рою и любо́вию пою́ Твое́ безсе́менное Рождество́.

Сла́ва, и ны́не, Богоро́дичен:

Кто́ Тебе́ не ублажи́т, Пресвята́я Де́во; кто́ ли не воспое́т Твоего́ Пречи́стаго Рождества́; безле́тно бо от Отца́ Возсия́вый Сы́н Единоро́дный, То́йже от Тебе́, Чи́стыя, про́йде, неизрече́нно вопло́щся: естество́м Бо́г сы́й, и естество́м бы́в Челове́к на́с ра́ди, не во двою́ лицу́ Разделя́емый, но во Двою́ Естеству́ несли́тно Познава́емый. Того́ моли́, Чи́стая, Всеблаже́нная, поми́ловатися душа́м на́шим.

Вхо́д: Све́те Ти́хий: Проки́мен дне́: Госпо́дь воцари́ся: И про́чее по обы́чаю.

На стихо́вне стихи́ры, гла́с 6-й:

Воскресе́ние Твое́, Христе́ Спа́се, А́нгели пою́т на Небесе́х: и на́с на земли́ сподо́би, чи́стым се́рдцем, Тебе́ сла́вити.

Сти́х: Госпо́дь воцари́ся, в ле́поту облече́ся.

Врата́ сокруши́в ме́дная, и вереи́ а́довы сотры́й, я́ко Бо́г всеси́лен, ро́д челове́ческий па́дший воскреси́л еси́. Сего́ ра́ди и мы́ согла́сно вопие́м: Воскресы́й из ме́ртвых, Го́споди, сла́ва Тебе́.

Сти́х: И́бо утверди́ вселе́нную, я́же не подви́жится.

Тле́ния на́с дре́вняго Христо́с изба́вити хотя́, на Кресте́ пригвожда́ется и во гро́бе полага́ется. его́же мироно́сицы жены́ со слеза́ми иска́ху, пла́чуща глаго́лаху: увы́ на́м, Спа́се все́х, ка́ко изво́лил еси́ во гро́бе всели́тися; Всели́выйся же хотя́й, ка́ко укра́ден бы́л еси́; ко́е же ме́сто Твое́ Живоно́сное сокры́ Те́ло; но Влады́ко, я́коже обеща́лся еси́, на́м яви́ся и утоли́ от на́с рыда́ние сле́з. Пла́чущымся же и́м, А́нгел к ни́м возопи́: от пла́ча преста́вшя Апо́столом рцы́те, я́ко воскре́се Госпо́дь, мiрови да́руяй очище́ние и ве́лию ми́лость.

Сти́х: До́му Твоему́ подоба́ет святы́ня, Го́споди, в долготу́ дни́й.

Распны́йся я́ко восхоте́л еси́, Христе́, и сме́рть погребе́нием Твои́м Плени́вый, тридне́вен воскре́с еси́, я́ко Бо́г со сла́вою, ми́рови да́руя безконе́чную жи́знь и ве́лию ми́лость.

Сла́ва, и ны́не, Богоро́дичен:

Творе́ц и Изба́витель мо́й, Пречи́стая, Христо́с Госпо́дь, из Твои́х ложе́сн проше́д, в мя́ Оболки́йся, пе́рвыя кля́твы Ада́ма свободи́. Те́мже Ти́, Всечи́стая, я́ко Бо́жии Ма́тери же и Де́ве вои́стинну, вопие́м немо́лчно: ра́дуйся А́нгельски, ра́дуйся, Влады́чице, Предста́тельство и Покро́ве и Спасе́ние ду́ш на́ших.

Та́же, Ны́не отпуща́еши: Трисвято́е. И по О́тче на́ш:

Тропа́рь, гла́с 6-й:

А́нгельския си́лы на гро́бе Твое́м, и стрегу́щии омертве́ша: и стоя́ше Мари́а во гро́бе, и́щущи Пречи́стаго Те́ла Твоего́. Плени́л еси́ а́д, не искуси́вся от него́: сре́тил еси́ Де́ву, да́руяй живо́т. Воскресы́й из ме́ртвых, Го́споди, сла́ва Тебе́.

Сла́ва, и ны́не, Богоро́дичен:

Благослове́нную Нареки́й Твою́ Ма́терь, прише́л еси́ на стра́сть во́льным хоте́нием, возсия́в на Кресте́, взыска́ти хотя́ Ада́ма, глаго́ля А́нгелом: сра́дуйтеся мне́, я́ко обре́теся поги́бшая дра́хма. Вся́ му́дре Устро́ивый, Бо́же на́ш, сла́ва Тебе́.

И отпу́ст.

По ексапсалме́х, Бо́г Госпо́дь, и яви́ся: на гла́с 6, и глаго́лем тропа́рь:

А́нгельския си́лы на гро́бе твое́м: Два́жды.

Сла́ва, и ны́не: благослове́нную нареки́й твою́ ма́терь:

И обы́чное стихосло́вие псалти́ра.

По 1-м стихосло́вии, седа́льны воскре́сны, гла́с 6:

Гро́бу отве́рсту, а́ду пла́чущуся, мари́а вопия́ше ко скры́вшимся апо́столом: изыди́те виногра́да де́лателие, пропове́дите воскре́сния сло́во: воскре́се Госпо́дь, подая́ ми́рови ве́лию ми́лость.

Сти́х: воскресни́ Го́споди Бо́же мо́й, да вознесе́тся рука́ твоя́, не забу́ди убо́гих твои́х до конца́.

Го́споди, предстоя́ше гро́бу твоему́ мари́а магдали́на, и пла́каше вопию́щи, вертогра́даря тя́ мня́щи, глаго́лаше: где́ сокры́л еси́ ве́чный живо́т? где́ положи́л еси́, и́же на престо́ле херуви́мстем седя́щаго, стрегу́щии бо сего́, от стра́ха омертве́ша. или́ Го́спода моего́ дади́те ми́, или́ со мно́ю возопи́йте: и́же в ме́ртвых бы́в, и ме́ртвыя воскреси́в, сла́ва тебе́.

Сла́ва, и ны́не, Богоро́дичен: Преднапису́ет гедео́н зача́тие, и сказу́ет Дави́д рождество́ твое́ богоро́дице: сни́де бо я́ко до́ждь на руно́, сло́во во чре́во твое́, и прозябла́ еси́ без се́мене, земле́ свята́я, ми́рови спасе́ние, Христа́ Бо́га на́шего, благода́тная.

По 2-м стихосло́вии седа́льны воскре́сны, гла́с 6:

Живо́т во гро́бе возлежа́ше, и печа́ть на ка́мени надлежа́ше: я́ко царя́ спя́ща во́ини стрежа́ху Христа́, и враги́ своя́ неви́димо порази́вый, воскре́се Госпо́дь.

Сти́х: Испове́мся тебе́ Го́споди, все́м се́рдцем мои́м, пове́м вся́ чудеса́ твоя́.

Преднапису́ет Ио́на гро́б тво́й, и сказу́ет симео́н воста́ние боже́ственное, безсме́ртне Го́споди: соше́л бо еси́ я́ко ме́ртв во гро́б, разруши́вый а́дова врата́. воскре́сл же еси́ кроме́ тле́ния я́ко влады́ка, во спасе́ние ми́ра, Христе́ Бо́же на́ш, просвети́вый су́щия во тьме́.

Сла́ва, и ны́не, Богоро́дичен:

Богоро́дице Де́во, моли́ Сы́на Твоего́, во́лею пригвожде́ннаго на кресте́, и воскре́сшаго из ме́ртвых Христа́ Бо́га на́шего, спасти́ся душа́м на́шим.

Тропари́ по Непоро́чнах гла́с 5:

На еди́ном ко́емждо тропаре́ глаго́лем: Благослове́н еси́, Го́споди, научи́ мя́ оправда́нием Твои́м.

А́нгельский собо́р удиви́ся, / зря́ Тебе́ в ме́ртвых вмени́вшася, / сме́ртную же, Спа́се, кре́пость разори́вша, / и с Собо́ю Ада́ма воздви́гша, / и от а́да вся́ свобо́ждша.

Почто́ ми́ра с ми́лостивными слеза́ми, / о ученицы́, растворя́ете? / Блиста́яйся во гро́бе А́нгел мироно́сицам веща́ше: / ви́дите вы́ гро́б и уразуме́йте, / Спа́с бо воскре́се от гро́ба.

Зело́ ра́но мироно́сицы теча́ху / ко гро́бу Твоему́ рыда́ющия, / но предста́ к ни́м А́нгел и рече́: / рыда́ния вре́мя преста́, не пла́чите, / воскресе́ние же апо́столом рцы́те.

Мироно́сицы жены́ с ми́ры прише́дшия / ко гро́бу Твоему́, Спа́се, рыда́ху, / А́нгел же к ни́м рече́, глаго́ля: / что́ с ме́ртвыми жива́го помышля́ете? / Я́ко Бо́г бо, воскре́се от гро́ба.

Сла́ва: Поклони́мся Отцу́ / и Его́ Сы́нови, и Свято́му Ду́ху, / Святе́й Тро́ице во еди́ном существе́, / с Серафи́мы зову́ще: / Свя́т, Свя́т, Свя́т еси́, Го́споди.

И ны́не: Жизнода́вца ро́ждши, / греха́, Де́во, Ада́ма изба́вила еси́, / ра́дость же Е́ве / в печа́ли ме́сто подала́ еси́, / па́дшия же от жи́зни / к се́й напра́ви / из Тебе́ воплоти́выйся Бо́г и Челове́к.

Аллилу́иа, аллилу́иа, аллилу́иа, сла́ва Тебе́, Бо́же. Три́жды.

По непоро́чных, ипакои́, гла́с 6:

Во́льною и животворя́щею Твое́ю сме́ртию, Христе́, / врата́ а́дова сокруши́в, я́ко Бо́г, / отве́рзл еси́ на́м дре́вний ра́й, и воскре́с из ме́ртвых, / изба́вил еси́ от тле́ния живо́т на́ш.

Та́же степе́нна, гла́с 6.

Антифо́н 1, и́хже повторя́юще пое́м.

На не́бо о́чи мои́ возвожу́, к Тебе́, Сло́ве: / уще́дри мя́, да живу́ Тебе́.

Поми́луй на́с уничиже́нных, / устроя́я благопотре́бныя Твоя́ сосу́ды, Сло́ве.

Сла́ва: Свято́му Ду́ху, вся́кая всеспаси́тельная вина́, / а́ще ко́ему се́й по достоя́нию дхне́т, / ско́ро взе́млет от земны́х: восперя́ет, возраща́ет, устроя́ет горе́.

И ны́не, то́йже.

Антифо́н 2:

А́ще не Госпо́дь бы бы́л в на́с, / никто́же от на́с проти́ву возмо́гл бы вра́жиим бра́нем одоле́ти: / побежда́ющии бо от зде́ возно́сятся.

Зубы́ и́х да не я́та бу́дет душа́ моя́ я́ко птене́ц, Сло́ве: / увы́ мне́, ка́ко и́мам от врага́ избы́ти, грехолюби́в сы́й!

Сла́ва: Святы́м Ду́хом обоже́ние все́м, / благоволе́ние, ра́зум, ми́р и благослове́ние: / равноде́телен бо е́сть Отцу́ и Сло́ву.

И ны́не, то́йже.

Антифо́н 3:

Наде́ющиися на Го́спода враго́м стра́шни, и все́м ди́вни: / горе́ бо зря́т.

В беззако́ния ру́к свои́х, пра́ведных жре́бий, / помо́щника Тя́ име́я Спа́се, не простира́ет.

Сла́ва: Свята́го Ду́ха держа́ва на все́х: / Ему́же Вы́шняя во́инства покланя́ются, / со вся́ким дыха́нием до́льным.

И ны́не, то́йже.

Проки́мен, гла́с 6:

Го́споди, воздви́гни си́лу Твою́, / и прииди́ во е́же спасти́ на́с.

Сти́х: Пасы́й Изра́иля вонми́, наставля́яй я́ко овча́ Ио́сифа.

Та́же, Вся́кое дыха́ние:

Сти́х: Хвали́те Бо́га во святы́х Его́:

Ева́нгелие воскре́сно у́треннее 6, от Луки́, зача́ло 114.

Во вре́мя о́но, воскре́с Иису́с от ме́ртвых ста́ посреде́ учени́к свои́х, и глаго́ла и́м: ми́р ва́м. Убоя́вшеся же и пристра́шни бы́вше, мня́ху ду́х ви́дети. И рече́ и́м: что́ смуще́ни есте́? и почто́ помышле́ния вхо́дят в сердца́ ва́ша? ви́дите ру́це Мои́ и но́зе Мои́, я́ко Са́м А́з е́смь: осяжи́те Мя́ и ви́дите: я́ко ду́х пло́ти и ко́сти не и́мать, я́коже Мене́ ви́дите иму́ща. И сие́ ре́к, показа́ и́м ру́це и но́зе. Еще́ же не ве́рующым и́м от ра́дости и чудя́щымся, рече́ и́м: и́мате ли что́ сне́дно зде́? Они́ же да́ша Ему́ ры́бы пече́ны ча́сть и от пче́л со́т. И взе́м пред ни́ми яде́. Рече́ же и́м: сия́ су́ть словеса́, я́же глаго́лах к ва́м еще́ сы́й с ва́ми, я́ко подоба́ет сконча́тися все́м напи́санным в зако́не Моисе́ове и проро́цех и псалме́х о Мне́. Тогда́ отве́рзе и́м у́м разуме́ти Писа́ния. И рече́ и́м, я́ко та́ко пи́сано е́сть, и та́ко подоба́ше пострада́ти Христу́, и воскресну́ти от ме́ртвых в тре́тий де́нь, и пропове́датися во и́мя Его́ покая́нию и отпуще́нию грехо́в во все́х язы́цех, наче́нше от Иерусали́ма. Вы́ же есте́ свиде́телие си́м. И се́ А́з послю́ обетова́ние Отца́ Моего́ на вы́: вы́ же седи́те во гра́де Иерусали́мсте, дóндеже облече́теся си́лою свы́ше. Изве́д же и́х во́н до Вифа́нии, и воздви́г ру́це Свои́, и благослови́ и́х. И бы́сть егда́ благословля́ше и́х, отступи́ от ни́х, и возноша́шеся на не́бо. И ти́и поклони́шася Ему́, и возврати́шася во Иерусали́м с ра́достию вели́кою: и бя́ху вы́ну в це́ркви, хва́ляще и благословя́ще Бо́га. Ами́нь.

Та́же: Воскресе́ние Христо́во ви́девше: Зри́ в кано́н Па́схи.

Посе́м псало́м 50: Поми́луй мя́ Бо́же:

Сла́ва: Моли́твами апо́столов ми́лостиве, очи́сти мно́жества согреше́ний на́ших

И ны́не: Моли́твами Богоро́дицы, ми́лостиве очи́сти мно́жества согреше́ний на́ших

Та́же гла́с 6

Поми́луй мя́ Бо́же, по вели́цей ми́лости Твое́й, и по мно́жеству щедро́т твои́х, очи́сти беззако́ние мое́.

Та́же: Воскре́с Иису́с от гро́ба, я́коже прорече́, даде́ на́м живо́т ве́чный, и ве́лию ми́лость

Кано́н воскре́сн. Гла́с 6

Пе́снь 1

Ирмо́с: Я́ко по су́ху, пешеше́ствовав Изра́иль / по бе́здне стопа́ми, / гони́теля фарао́на / ви́дя потопля́ема, / Бо́гу / побе́дную пе́снь / пои́м, вопия́ше.

Припе́в: Сла́ва Го́споди, свято́му Воскресе́нию Твоему́.

Распросте́ртыма дла́ньма на кресте́, / оте́ческаго испо́лнил еси́ благоволе́ния, благи́й Иису́се, вся́ческая. / те́мже побе́дную пе́снь Тебе́ вси́ пои́м.

Стра́хом к Тебе́, я́ко рабы́ня, сме́рть / повеле́на приступи́ Влады́це живота́, / то́ю подаю́щему на́м безконе́чный живо́т и воскресе́ние.

Сла́ва: Суди́лищу Пила́тову предстои́т хотя́ / беззако́нному суду́, я́ко суди́мь, Судия́, / и от руки́ непра́вды по лицу́ зауша́ется Бо́г, / его́же трепе́щут земля́, и небе́сная.

И ны́не: Своего́ прие́мши Соде́теля, я́ко Са́м восхоте́, / от безсе́меннаго Твоего́ чре́ва, па́че ума́ воплоща́ема, Чи́стая, / тва́рей вои́стинну яви́лася еси́, Влады́чица.

Пе́снь 3

Ирмо́с: Не́сть свя́т, / я́коже Ты́, Го́споди Бо́же мо́й, / вознесы́й ро́г ве́рных Твои́х, Бла́же, / и утверди́вый на́с на ка́мени / испове́дания Твоего́.

Бо́га распина́ема пло́тию зря́щи тва́рь, растаява́шеся стра́хом: / но содержи́тельною дла́нию на́с ра́ди Распя́таго, кре́пко держи́ма бе́.

Сме́ртию сме́рть разоре́на лежи́т окая́нная без дыха́ния: / Живота́ бо не терпя́щи боже́ственнаго прираже́ния, / умерщвля́ется кре́пкий, и да́руется все́м воскресе́ние.

Сла́ва: Сла́ва Твоему́ воста́нию, Спа́се на́ш, / я́ко на́с от а́да тле́ния, и сме́рти изба́вил еси́, я́ко Всеси́лен, / и пою́ще глаго́лем: / не́сть свя́т ра́зве Тебе́, Го́споди Человеколю́бче.

И ны́не: Боже́ственнаго рождества́ Твоего́, Чи́стая, / вся́кий естества́ чи́н превосхо́дит чу́до: / Бо́га бо преесте́ственне зачала́ еси́ во чре́ве, / и ро́ждши пребыва́еши при́сно Де́ва.

Пе́снь 4

Ирмо́с: Христо́с моя́ си́ла, / Бо́г и Госпо́дь, / честна́я Це́рковь / Боголе́пно пое́т, взыва́ющи, / от смы́сла чи́ста о Го́споде пра́зднующи.

Дре́во процвело́ е́сть, Христе́, и́стинныя жи́зни: / кре́ст бо водрузи́ся, / и напое́н бы́в кро́вию и водо́ю от нетле́ннаго Твоего́ ре́бра, / живо́т на́м прозябе́.

Не ктому́ зми́й мне́ ло́жне обоже́ние подлага́ет: / Христо́с бо богоде́латель челове́ческаго естества́, / ны́не невозбра́нно стезю́ живота́ мне́ отве́рзе.

Сла́ва: Гро́б, Спа́се, Тя́ подъя́т во́лею ме́ртва о на́с я́вльшагося, / но ника́коже возмо́же, Сло́ве, удержа́ти: / я́ко Бо́г бо воскре́сл еси́, спаса́я ро́д на́ш.

И ны́не: Я́ко вои́стинну неизвеща́нна и непостижи́ма, / я́же Твоего́ боголе́пнаго, Богоро́дице, су́ть рождества́, / су́щим на земли́ и на небеси́, ПрисноДе́во, та́инства.

Пе́снь 5

Ирмо́с: Бо́жиим / све́том Твои́м, Бла́же, / у́треннюющих Ти́ ду́ши / любо́вию озари́, молю́ся, / Тя́ ве́дети, Сло́ве Бо́жий, / и́стиннаго Бо́га, / от мра́ка грехо́внаго взыва́юща.

Уступа́ют мне́ херуви́ми ны́не, / и пла́менное ору́жие, Влады́ко, плещи́ мне́ дае́т, / Тя́ ви́девше, Сло́ве Бо́жий, и́стиннаго Бо́га, / разбо́йнику пу́ть сотво́ршаго в ра́й.

Не ктому́ бою́ся, е́же в зе́млю, Влады́ко Христе́, возвраще́ния: / Ты́ бо от земли́ мя́ возве́л еси́ забве́нна, / благоутро́бия ра́ди мно́гаго, / к высоте́ нетле́ния воскресе́нием Твои́м.

Сла́ва: Твое́ю сме́ртию, Бла́же, сме́рти потреби́ся держа́ва, / исто́чник жи́зни на́м источи́, и безсме́ртие дарова́ся: / сего́ ра́ди погребе́нию Твоему́ и воскресе́нию ве́рою покланя́емся, / и́мже, я́ко Бо́г, ми́р ве́сь просвети́л еси́.

И ны́не: И́же Богоро́дицу Тя́ от души́, Влады́чице ми́ра блага́я, / испове́дающих спаси́: / Тебе́ бо предста́тельство непобори́мое и́мамы, / и́стинную Богороди́тельницу.

Пе́снь 6

Ирмо́с: Жите́йское мо́ре, / воздвиза́емое зря́ напа́стей бу́рею, / к ти́хому приста́нищу Твоему́ прите́к, вопию́ Ти́: / возведи́ от тли́ живо́т мо́й, / Многоми́лостиве.

Распина́емь, Влады́ко, гвоздьми́ у́бо, / кля́тву ю́же на на́с потреби́л еси́: / копие́м же пробода́емь в ребро́, / ада́мово рукописа́ние растерза́в, ми́р свободи́л еси́.

Ада́м низведе́ся, ле́стию запя́т бы́в, ко а́дове про́пасти: / но и́же естество́м Бо́г же и ми́лостив, / сше́л еси́ на взыска́ние, / и на ра́му поне́с, совоскреси́л еси́.

Сла́ва: Я́т бы́л еси́, но не удержа́н, Спа́се, во гро́бе, / а́ще бо и во́лею вкуси́л еси́ сме́рти, Сло́ве, / но воскре́сл еси́, я́ко Бо́г безсме́ртен, / совоздви́гнувый у́зники су́щия во а́де, / и ра́дость жена́м вме́сто печа́ли пре́жния, па́ки премени́вый.

И ны́не: Пречи́стая Влады́чице, / ро́ждшая челове́ком ко́рмчию Го́спода, / страсте́й мои́х непостоя́нное и лю́тое утоли́ смуще́ние, / и тишину́ пода́ждь се́рдцу моему́.

Конда́к, гла́с 6:

Живонача́льною дла́нию / уме́ршия от мра́чных удо́лий, / Жизнода́вец воскреси́в все́х Христо́с Бо́г, / воскресе́ние подаде́ челове́ческому ро́ду: / е́сть бо все́х Спаси́тель, / Воскресе́ние и Живо́т, и Бо́г все́х.

И́кос: Кре́ст и погребе́ние Твое́, Жизнода́вче, воспева́ем ве́рнии, и покланя́емся, / я́ко а́д связа́л еси́, Безсме́ртне, я́ко Бо́г всеси́льный: / и ме́ртвыя совоскреси́л еси́, и врата́ сме́ртная сокруши́л еси́, / и держа́ву а́дову низложи́л еси́, я́ко Бо́г. / Те́мже земноро́днии славосло́вим Тя́ любо́вию, воскре́сшаго, / и низложи́вшаго вра́жию держа́ву всепа́губную, / и все́х воскреси́вшаго в Тя́ ве́ровавших, / и ми́р изба́вльшаго от стре́л змии́ных, / и от пре́лести вра́жия, я́ко Бо́г все́х.

Пе́снь 7

Ирмо́с: Росода́тельну у́бо пе́щь / соде́ла А́нгел / преподо́бным отроко́м, / халде́и же опаля́ющее / веле́ние Бо́жие / мучи́теля увеща́ вопи́ти: / благослове́н еси́, Бо́же оте́ц на́ших.

Рыда́ющее во стра́сти Твое́й со́лнце, во мра́к облече́ся, / и во дни́ по все́й, Влады́ко, земли́ све́т поме́рче, вопия́: / благослове́н еси́ Бо́же оте́ц на́ших.

Облеко́шася Христе́ схожде́нием Твои́м во све́т преиспо́дняя, / пра́отец же весе́лия испо́лнь, яви́ся ликовству́я, взыгра́ся, вопия́: / благослове́н еси́, Бо́же оте́ц на́ших.

Сла́ва: О стра́ннаго о́браза! / Изра́иля Избавле́й от рабо́ты фарао́нския, / распина́ется во́лею от него́, / и разреша́ет вери́ги согреше́ний. / Ему́же ве́рою пое́м: / изба́вителю Бо́же, благослове́н еси́.

И ны́не: Тобо́ю, Ма́ти Де́во, / све́т возсия́ все́й вселе́нней све́тлый: / Зижди́теля бо Ты́ все́х родила́ еси́ Бо́га, / его́же проси́, Всечи́стая, / на́м низпосла́ти ве́рным ве́лию ми́лость.

Пе́снь 8

Ирмо́с: Из пла́мене преподо́бным ро́су источи́л еси́, / и пра́веднаго же́ртву водо́ю попали́л еси́: / вся́ бо твори́ши, Христе́, то́кмо е́же хоте́ти. / Тя́ превозно́сим во вся́ ве́ки.

Иуде́йския дре́вле пророкоуби́йцы лю́ди, / богоуби́йцы за́висть ны́не соде́ла, / Тебе́ на кре́ст возне́сшися, Сло́ве Бо́жий: / его́же превозно́сим во вся́ ве́ки.

Небе́снаго кру́га не оста́вил еси́, / и во а́д соше́д, всего́ совоздви́гл еси́ / лежа́щаго во гно́ищи, Христе́, челове́ка, / Тя́ превознося́ща во вся́ ве́ки.

Сла́ва: Ужасе́ся вся́к слу́х, / ка́ко Вы́шний во́лею прии́де на зе́млю, / а́дову кре́пость разруши́ти кресто́м и погребе́нием, / и вся́ воздви́гнути зва́ти: / о́троцы благослови́те, свяще́нницы воспо́йте, / лю́дие превозноси́те во вся́ ве́ки.

И ны́не: От Све́та Светода́вца Сло́ва зачала́ еси́, / и ро́ждши неизрече́нно Сего́, просла́вилася еси́: / Ду́х бо в Тя́, Отрокови́це, Бо́жий всели́ся. / Те́мже Тя́ пое́м во вся́ ве́ки.

Та́же пое́м: Честне́йшую:

Пе́снь 9

Ирмо́с: Бо́га / челове́ком не возмо́жно ви́дети, / на Него́ же не сме́ют чи́ни А́нгельстии взира́ти; / Тобо́ю же, Всечи́стая, яви́ся челове́ком / Сло́во воплоще́нно, / Его́ же велича́юще, / с Небе́сными во́и / Тя́ ублажа́ем.

Страсте́й неприча́стен Ты́ пребы́л еси́, Сло́ве Бо́жий, / пло́тию приобщи́вся страсте́м: / но реши́ши от страсте́й челове́ка, / страсте́м бы́в стра́сть, Спа́се на́ш: / еди́н бо еси́ безстра́стен, и всеси́лен.

Тлю́ сме́ртную прие́м, тле́ния соблю́л еси́ те́ло Твое́ невку́сно, / Твоя́ же животворя́щая и боже́ственная, Влады́ко, душа́, во а́де не оста́влена бы́сть: / но я́коже от сна́ воскре́с, на́с совоздви́гл еси́.

Сла́ва: Бо́га Отца́, Сы́на собезнача́льна, / вси́ челове́цы устна́ми у́бо чи́стыми сла́вим, / неизрече́нную же и пресла́вную Ду́ха Всесвята́го си́лу чти́м: / еди́на бо еси́ всеси́льная Тро́ица неразлу́чная.

И ны́не: Ме́ртвым воскресе́ние ны́не дарова́ся, / Твои́м несказа́нным и неизрече́нным рождество́м, Богоро́дице Всечи́стая: / жи́знь бо из Тебе́ пло́тию обле́кшися, все́м возсия́, / и сме́ртную дря́хлость я́ве разруши́.

Посе́м ексапостила́рий у́трени, гла́с 6.

Показу́я, я́ко челове́к еси́, Спа́се, по существу́, посреде́ ста́в воскре́с от гро́ба, и бра́шна сопричасти́лся еси́, учи́л еси́ креще́нию покая́ния: а́бие же к Небе́сному возне́слся еси́ Отцу́ и ученико́м Уте́шителя посла́ти обеща́л еси́, пребоже́ственный Богочелове́че. Сла́ва Твоему́ воста́нию.

Сла́ва и ны́не, Богоро́дичен:

Творе́ц созда́ния и Бо́г все́х пло́ть челове́ческую прия́т от пречи́стых крове́й Твои́х, всесвята́я Де́во, и истле́вшее мое́ все́ естество́ новосоде́ла, па́ки, я́коже пре́жде рождества́, оста́вль по рождестве́. Те́мже Тя́ ве́рно вси́ восхваля́ем, зову́ще: ра́дуйся, Влады́чице ми́ра.

На хвали́тех стихи́ры воскре́сны, гла́с 6:

Стих: Сотвори́ти в ни́х су́д напи́сан: / сла́ва сия́ бу́дет все́м преподо́бным Его́.

Кре́ст Тво́й, Го́споди, / жи́знь и воскресе́ние лю́дем Твои́м е́сть, / и наде́ющеся на́нь, / Тебе́ воскре́сшаго Бо́га на́шего пое́м: поми́луй на́с.

Стих: Хвали́те Бо́га во святы́х Его́, / хвали́те Его́ в утверже́нии си́лы Его́.

Погребе́ние Твое́, Влады́ко, / ра́й отве́рзе ро́ду челове́ческому: / и от истле́ния изба́вльшеся, / Тебе́ воскре́сшаго Бо́га на́шего пое́м: поми́луй на́с.

Стих: Хвали́те Его́ на си́лах Его́, / хвали́те Его́ по мно́жеству вели́чествия Его́.

Со Отце́м и Ду́хом Христа́ воспои́м, / воскре́сшаго из ме́ртвых, / и к Нему́ вопии́м: / Ты́ Живо́т еси́ на́ш и Воскресе́ние, поми́луй на́с.

Стих: Хвали́те Его́ во гла́се тру́бнем: / хвали́те Его́ во псалти́ри и гу́слех.

Тридне́вен воскре́сл еси́, Христе́, от гро́ба / я́коже пи́сано е́сть, / совоздви́гнувый пра́отца на́шего. / Те́мже Тя́ и сла́вит ро́д челове́ческий, / и воспева́ет Твое́ воскресе́ние.

И́ны стихи́ры Анато́лиевы.

Стих: Хвали́те Его́ в тимпа́не и лице́, / хвали́те Его́ во стру́нах и орга́не.

Го́споди, ве́лие и стра́шно е́сть / Твоего́ воскресе́ния та́инство: / та́ко бо произше́л еси́ от гро́ба, / я́ко жени́х от черто́га, / сме́ртию сме́рть разруши́вый, / да Ада́ма свободи́ши. / Те́мже на Небесе́х А́нгели ликовству́ют, / и на земли́ челове́цы сла́вят, / е́же на на́с бы́вшее благоутро́бие Твое́, Человеколю́бче.

Стих: Хвали́те Его́ в кимва́лех доброгла́сных, хвали́те Его́ в кимва́лех восклица́ния: / вся́кое дыха́ние да хва́лит Го́спода.

О пребеззако́ннии иуде́е, / где́ су́ть печа́ти и сре́бреницы, я́же да́сте во́ином? / Не укра́дено бы́сть сокро́вище, / но воскре́се, я́ко си́лен: / са́ми же посрами́стеся отве́ргшиися Христа́, Го́спода сла́вы, / пострада́вша и погребе́нна, и воскре́сша из ме́ртвых: / Тому́ поклони́мся.

Стих: Воскресни́ Го́споди Бо́же мо́й, да вознесе́тся рука́ Твоя́, / не забу́ди убо́гих Твои́х до конца́.

Запеча́тану гро́бу, / ка́ко окра́дени бы́сте иуде́е, / стра́жи поста́вльше, и зна́мения поло́жше, / две́рем заключе́нным про́йде Ца́рь? / Или́ я́ко ме́ртва предста́вите, / или́ я́ко Бо́гу поклони́теся, с на́ми пою́ще: / сла́ва, Го́споди, Кресту́ Твоему́, и воскресе́нию Твоему́.

Стих: Испове́мся Тебе́ Го́споди все́м се́рдцем мои́м, / пове́м вся́ чудеса́ Твоя́.

Живоприя́тнаго Твоего́ гро́ба, / мироно́сицы жены́ рыда́юща, достиго́ша, Го́споди, / и ми́ра нося́ща, / те́ло Твое́ пречи́стое пома́зати иска́ху: / обрето́ша же светоно́сна А́нгела на ка́мени седя́ща, / и к ни́м веща́юща, и глаго́люща: / что́ слези́те, из ре́бр источи́вшаго жи́знь ми́рови? / Что́ и́щете я́ко ме́ртва во гро́бе Безсме́ртнаго? / Те́кша же па́че возвести́те Того́ ученико́м, / сла́внаго Его́ воскресе́ния всеми́рное ра́дование, / и́мже и на́с, Спа́се, просвети́вый, / да́руй очище́ние и ве́лию ми́лость.

Сла́ва гла́с 6, стихи́ра ева́нгельская.

И́стинный ми́р Ты́, Христе́, к челове́ком Бо́жий, ми́р Тво́й дая́й по воста́нии ученико́м, пристра́шны показа́л еси́ я́, мня́щыя ду́х ви́дети: но ути́шил еси́ мяте́ж души́ и́х, показа́вый ру́це и но́зе Твои́. Оба́че не ве́рующым еще́, бра́шен причаще́нием и уче́ний воспомина́нием отве́рзл еси́ и́х у́м, е́же разуме́ти писа́ния: и́мже и Оте́ческое обетова́ние обеща́в и благослови́в я́, отступи́л еси́ на не́бо. Те́мже с ни́ми покланя́емся Тебе́: Го́споди, сла́ва Тебе́.

И ны́не, гла́с 2:

Преблагослове́на еси́, Богоро́дице Де́во:

Славосло́вие вели́кое.

Та́же, тропа́рь воскре́сн.

Воскре́с из гро́ба и у́зы растерза́л еси́ а́да, / разруши́л еси́ осужде́ние сме́рти, Го́споди, / вся́ от сете́й врага́ изба́вивый; / яви́вый же Себе́ апо́столом Твои́м, / посла́л еси́ я́ на про́поведь, / и те́ми ми́р Тво́й пода́л еси́ вселе́нней, / Еди́не Многоми́лостиве.

На Литурги́и

Блаже́нны, гла́с 6:

Помяни́ мя́, Бо́же Спа́се мо́й, / егда́ прии́деши во Ца́рствии Твое́м, / и спаси́ мя́, я́ко Еди́н Человеколю́бец.

Стих: Блаже́ни чи́стии се́рдцем, я́ко ти́и Бо́га у́зрят.

Дре́вом Ада́ма прельсти́вшагося, / дре́вом кре́стным па́ки спа́сл еси́ и разбо́йника, вопию́ща: / помяни́ мя́, Го́споди, во Ца́рствии Твое́м.

Стих: Блаже́ни миротво́рцы, я́ко ти́и сы́нове Бо́жии нареку́тся.

А́дова врата́ и вереи́ сокруши́вый, Жизнода́вче, / воскреси́л еси́ вся́, Спа́се, вопию́щия: / сла́ва воста́нию Твоему́.

Стих: Блаже́ни изгна́ни пра́вды ра́ди, я́ко те́х е́сть Ца́рство Небе́сное.

Помяни́ мя́, и́же сме́рть плени́вый погребе́нием Твои́м, / и воскресе́нием Твои́м ра́дости вся́ испо́лнивый, я́ко Благоутро́бен.

Стих: Блаже́ни есте́, егда́ поно́сят ва́м, и изжену́т, и реку́т вся́к зо́л глаго́л на вы́ лжу́ще Мене́ ра́ди.

Мироно́сицы ко гро́бу прише́дша, / А́нгела зову́ща слы́шаху: / Христо́с воскре́се, просвети́вый вся́ческая.

Стих: Ра́дуйтеся и весели́теся, я́ко мзда́ ва́ша мно́га на небесе́х.

На дре́ве кре́стнем пригвозди́вшагося, / и мир от пре́лести изба́вльшаго, / согла́сно вси́ Христа́ воспои́м.

Сла́ва, Тро́ичен:

Отца́, и Сы́на славосло́вим, / и Ду́ха Свята́го, глаго́люще: / Тро́ице Свята́я, спаси́ ду́ши на́ша.

И ны́не, Богоро́дичен:

Неизрече́нно в после́дняя заче́нши, / и ро́ждши созда́теля Твоего́, / Де́во, спаса́й Тя́ велича́ющия.

На Литурги́и Проки́мен, гла́с 6:

Спаси́, Го́споди, лю́ди Твоя́, / и благослови́ достоя́ние Твое́.

Сти́х: К Тебе́, Го́споди, воззову́, Бо́же мо́й, да не премолчи́ши от мене́.

Апо́стол ко ефесе́ем, зача́ло 233

Бра́тие, возмога́йте о Го́споде и в держа́ве кре́пости Его́, облецы́теся во вся́ ору́жия Бо́жия, я́ко возмощи́ ва́м ста́ти проти́ву ко́знем диа́вольским, я́ко не́сть на́ша бра́нь к кро́ви и пло́ти, но к нача́лом и ко власте́м и к миродержи́телем тмы́ ве́ка сего́, к духово́м зло́бы поднебе́сным. Сего́ ра́ди приими́те вся́ ору́жия Бо́жия, да возмо́жете проти́витися в де́нь лю́т и вся́ соде́явше ста́ти. Ста́ните у́бо препоя́сани чресла́ ва́ша и́стиною, и обо́лкшеся в броня́ пра́вды, и обу́вше но́зе во угото́вание благовествова́ния ми́ра, над все́ми же восприи́мше щи́т ве́ры, в не́мже возмо́жете вся́ стре́лы лука́ваго разжже́нныя угаси́ти. И шле́м спасе́ния восприими́те, и ме́чь духо́вный, и́же е́сть глаго́л Бо́жий.

Аллилу́иа гла́с 6:

Живы́й в по́мощи вы́шняго, в кро́ве Бо́га небе́снаго водвори́тся.

Сти́х: Рече́т Го́сподеви: засту́пник мо́й еси́, и прибе́жище мое́, Бо́г мо́й, и упова́ю на него́.

Ева́нгелие от Луки́, зача́ло 71

Во вре́мя о́но, бе́ учя́ Иису́с на еди́ном от со́нмищ в суббо́ту: и се́ жена́ бе́ иму́щи ду́х неду́жен ле́т осмьна́десять, и бе́ сляка и не могу́щи восклони́тися отню́д. Ви́дев же ю́ иису́с, пригласи́ и рече́ е́й: же́но, отпуще́на еси́ от неду́га твоего́. И возложи́ на ню́ ру́це: и а́бие простре́ся, и сла́вляше бо́га. отвеща́в же старе́йшина собо́ру, негоду́я, зане́ в суббо́ту исцели́ (ю́) иису́с, глаго́лаше наро́ду: ше́сть дни́й е́сть, в ня́же досто́ит де́лати: в ты́я у́бо приходя́ще цели́теся, а не в де́нь суббо́тный. Отвеща́ (же) у́бо ему́ Госпо́дь и рече́: лицеме́ре, ко́ждо ва́с в суббо́ту не отреша́ет ли своего́ вола́ или́ осла́ от я́слий, и вед напая́ет, сию́ же дще́рь авраа́млю су́щу, ю́же связа́ сатана́ се́ осмоена́десяте ле́то, не досто́яше ли разреши́тися е́й от ю́зы сея́ в де́нь суббо́тный? И сия́ ему́ глаго́лющу, стыдя́хуся вси́ противля́ющиися ему́: и вси́ лю́дие ра́довахуся о все́х сла́вных быва́ющих от него́.

Прича́стен: Хвали́те Го́спода с небе́с, хвали́те его́ в вы́шних.

Исходя́ще из це́ркве, пое́м стихи́ру гла́с 6:

Воскресе́ние Твое́, Христе́ Спа́се, / А́нгели пою́т на небесе́х, / и на́с на земли́ сподо́би / чи́стым се́рдцем / Тебе́ сла́вити.

И затворя́ют две́ри церко́вныя. Покади́в же иере́й все́х ту́ су́щих и две́ри заключе́нныя, держа́ в ру́це честны́й Кре́ст, возглаша́ет велегла́сно:

Сла́ва Святе́й, и Единосу́щней, и Животворя́щей, и Нераздели́мей Тро́ице, всегда́, ны́не и при́сно, и во ве́ки веко́в.

Ли́к: Ами́нь.

Та́же иере́й пое́т тропа́рь, во гла́с 5:

Христо́с воскре́се из ме́ртвых, / сме́ртию сме́рть попра́в / и су́щим во гробе́х живо́т дарова́в. Трижды.

И ли́к пое́т то́й же се́й тропа́рь три́жды.

Та́же настоя́тель глаго́лет стихи́:

Пе́рвый сти́х: Да воскре́снет Бо́г, и расточа́тся врази́ Его́, / и да бежа́т от Лица́ Его́ ненави́дящии Его́.

И на ки́йждо сти́х мы́ пое́м тропа́рь: Христо́с воскре́се: ве́сь по еди́ножды.

Вторы́й сти́х: Я́ко исчеза́ет ды́м, да исче́знут, / я́ко та́ет во́ск от лица́ огня́.

Христо́с воскре́се: еди́ножды.

Тре́тий сти́х: Та́ко да поги́бнут гре́шницы от Лица́ Бо́жия, / а пра́ведницы да возвеселя́тся.

Христо́с воскре́се: еди́ножды.

Четве́ртый сти́х: Се́й де́нь, его́же сотвори́ Госпо́дь, / возра́дуемся и возвесели́мся во́нь.

Христо́с воскре́се: еди́ножды.

Сла́ва: Христо́с воскре́се: еди́ножды.

И ны́не: Христо́с воскре́се: еди́ножды.

Та́же настоя́тель пое́т вы́шшим гла́сом: Христо́с воскре́се из ме́ртвых, / сме́ртию сме́рть попра́в.

И отверза́ет иере́й две́ри и вхо́дит с Честны́м Кресто́м, и вхо́дят вси́ в це́рковь пою́ще: Лик: И су́щим во гробе́х живо́т дарова́в.

Посе́м ектениа́ вели́кая: Ми́ром Го́споду помо́лимся.

Возгла́с: Я́ко подоба́ет Тебе́ вся́кая сла́ва:

Ли́к: Ами́нь

Кано́н

Гла́с 1

Пе́снь 1

Ирмо́с: Воскресе́ния де́нь, просвети́мся лю́дие: Па́сха, Госпо́дня Па́сха! От сме́рти бо к жи́зни, и от земли́ к Небеси́, Христо́с Бо́г на́с преведе́, побе́дную пою́щия.

Припе́в: Христо́с воскре́се из ме́ртвых.

Очи́стим чу́вствия, и у́зрим непристу́пным све́том воскресе́ния Христа́ блиста́ющася, и ра́дуйтеся реку́ща я́сно да услы́шим, побе́дную пою́ще.

Небеса́ у́бо досто́йно да веселя́тся, земля́ же да ра́дуется, да пра́зднует же ми́р, ви́димый же ве́сь и неви́димый: Христо́с бо воста́, весе́лие ве́чное.

Умерщвле́ния преде́л сломи́ла еси́, ве́чную жи́знь ро́ждшая Христа́, из гро́ба возсия́вшаго дне́сь, Де́во всенепоро́чная, и ми́р просвети́вшаго.

Воскре́сшаго ви́девши Сы́на Твоего́ и Бо́га, ра́дуйся со апо́столы, Богоблагода́тная чи́стая: и е́же ра́дуйся пе́рвее, я́ко все́х ра́дости вина́, восприя́ла еси́, Богома́ти всенепоро́чная.

Катава́сиа: Воскресе́ния де́нь: На ко́ейждо пе́сни по катава́сии, тропа́рь: Христо́с воскре́се: три́жды.

Та́же ектениа́ ма́лая, и возгла́с:

Я́ко Твоя́ держа́ва, и Твое́ е́сть Ца́рство, и си́ла, и сла́ва Отца́, и Сы́на, и Свята́го Ду́ха, ны́не и при́сно, и во ве́ки веко́в.

Пе́снь 3.

Ирмо́с: Прииди́те, пи́во пие́м но́вое, / не от ка́мене непло́дна чудоде́емое, / но нетле́ния исто́чник / из гро́ба одожди́вша Христа́, / в Не́мже утвержда́емся.

Ны́не вся́ испо́лнишася све́та, / не́бо же и земля́, и преиспо́дняя: / да пра́зднует у́бо вся́ тва́рь / воста́ние Христо́во, / в не́мже утвержда́ется.

Вчера́ спогребо́хся Тебе́ Христе́, / совостаю́ дне́сь / воскре́сшу Тебе́, / сраспина́хся Тебе́ вчера́, / Са́м мя́ спросла́ви Спа́се во Ца́рствии Твое́м.

На нетле́нную жи́знь прихожду́ дне́сь, бла́гостию Ро́ждшагося из Тебе́, Чи́стая, и все́м конце́м све́т облиста́вшаго.

Бо́га, его́же родила́ еси́ пло́тию, из ме́ртвых, я́коже рече́, воста́вша ви́девши, Чи́стая, лику́й, и Сего́ я́ко Бо́га, Пречи́стая, возвелича́й.

Катава́сиа: Прииди́те, пи́во пие́м но́вое:

Та́же ектениа́, и возгла́с: Я́ко Ты́ еси́ Бо́г на́ш, и Тебе́ сла́ву возсыла́ем, Отцу́, и Сы́ну, и Свято́му Ду́ху, ны́не и при́сно, и во ве́ки веко́в.

Ипакои́, гла́с 4:

Предвари́вшия у́тро я́же о Мари́и, / и обре́тшия ка́мень отвале́н от гро́ба, / слы́шаху от А́нгела: во све́те присносу́щнем Су́щаго, / с ме́ртвыми что́ и́щете, я́ко челове́ка? / Ви́дите гро́бныя пелены́, тецы́те и ми́ру пропове́дите, / я́ко воста́ Госпо́дь, умертви́вый сме́рть, / я́ко е́сть Сы́н Бо́га, спаса́ющаго ро́д челове́ческий.

Пе́снь 4.

Ирмо́с: На Боже́ственней стра́жи / богоглаго́ливый Авваку́м / да ста́нет с на́ми, и пока́жет / светоно́сна А́нгела, / я́сно глаго́люща: / дне́сь спасе́ние ми́ру, / я́ко воскре́се Христо́с, / я́ко всеси́лен.

Му́жеский у́бо по́л, / я́ко разве́рзый де́вственную утро́бу, / яви́ся Христо́с: / я́ко челове́к же, / А́гнец нарече́ся: / непоро́чен же, / я́ко невку́сен скве́рны, / на́ша Па́сха, / и я́ко Бо́г и́стинен / соверше́н рече́ся.

Я́ко единоле́тный а́гнец, / благослове́нный на́м вене́ц Христо́с, / во́лею за все́х закла́н бы́сть, / Па́сха чисти́тельная, / и па́ки из гро́ба кра́сное / пра́вды на́м возсия́ Со́лнце.

Богооте́ц у́бо Дави́д / пред се́нным ковче́гом скака́ше игра́я, / лю́дие же Бо́жии святи́и, / образо́в сбытие́ зря́ще, / весели́мся Боже́ственне, / я́ко воскре́се Христо́с, / я́ко Всеси́лен.

Созда́вый Ада́ма, Твоего́ пра́отца, Чи́стая, зи́ждется от Тебе́, и сме́ртное жили́ще разори́ Свое́ю сме́ртию дне́сь, и озари́ вся́ боже́ственными блиста́ньми воскресе́ния.

Его́же родила́ еси́ Христа́, прекра́сно из ме́ртвых возсия́вша, Чи́стая, зря́щи, до́брая и непоро́чная в жена́х и кра́сная, дне́сь во спасе́ние все́х, со апо́столы ра́дующися, Того́ прославля́й.

Катава́сиа: На Боже́ственней стра́жи:

Ектениа́, и возгла́с: Я́ко Бла́г и Человеколю́бец Бо́г еси́, и Тебе́ сла́ву возсыла́ем, Отцу́, и Сы́ну, и Свято́му Ду́ху, ны́не и при́сно, и во ве́ки веко́в.

Пе́снь 5.

Ирмо́с: У́тренюем у́треннюю глубоку́, / и вме́сто ми́ра пе́снь принесе́м Влады́це, / и Христа́ у́зрим / пра́вды Со́лнце, / все́м жи́знь возсия́юща.

Безме́рное Твое́ благоутро́бие, / а́довыми у́зами содержи́мии зря́ще, / к све́ту идя́ху Христе́, / весе́лыми нога́ми, / Па́сху хва́ляще ве́чную.

Присту́пим свещено́снии, / исходя́щу Христу́ из гро́ба, я́ко жениху́, / и спра́зднуем любопра́зднственными чи́нми / Па́сху Бо́жию спаси́тельную.

Просвеща́ется боже́ственными луча́ми и живоно́сными воскресе́ния Сы́на Твоего́, Богома́ти Пречи́стая, и ра́дости исполня́ется благочести́вых собра́ние.

Не разве́рзл еси́ врата́ де́вства в воплоще́нии, гро́ба не разруши́л еси́ печа́тей, Царю́ созда́ния: отону́дуже воскре́сшаго Тя́ зря́щи, Ма́ти ра́довашеся.

Катава́сиа: У́тренюем у́треннюю глубоку́:

Ектениа́, и возгла́с: Я́ко святи́ся и просла́вися пречестно́е и великоле́пое и́мя Твое́, Отца́, и Сы́на, и Свята́го Ду́ха, ны́не и при́сно, и во ве́ки веко́в.

Пе́снь 6.

Ирмо́с: Снизше́л еси́ в преиспо́дняя земли́, / и сокруши́л еси́ вереи́ ве́чныя, / содержа́щия свя́занныя, Христе́, / и тридне́вен, я́ко от ки́та Ио́на, / воскре́сл еси́ от гро́ба.

Сохрани́в це́ла зна́мения Христе́, / воскре́сл еси́ от гро́ба, / ключи́ Де́вы не вреди́вый в рождестве́ Твое́м, / и отве́рзл еси́ на́м ра́йския две́ри.

Спа́се мо́й, / живо́е же и неже́ртвенное заколе́ние, / я́ко Бо́г Са́м Себе́ / во́лею приве́л Отцу́, / совоскреси́л еси́ всеро́днаго Ада́ма, / воскре́с от гро́ба.

Возведе́ся дре́вле держи́мое сме́ртию и тле́нием, Воплоти́вшимся от Твоего́ пречи́стаго чре́ва, к нетле́нней и присносу́щней жи́зни, Богоро́дице Де́во.

Сни́де в преиспо́дняя земли́, в ложесна́ Твоя́, Чи́стая, сше́дый, и всели́выйся и воплоти́выйся па́че ума́, и воздви́же с Собо́ю Ада́ма, воскре́с от гро́ба.

Катава́сиа: Снизше́л еси́ в преиспо́дняя земли́:

Ектениа́, и возгла́с: Ты́ бо еси́ Ца́рь ми́ра, и Спа́с ду́ш на́ших, и Тебе́ сла́ву возсыла́ем, Отцу́, и Сы́ну, и Свято́му Ду́ху, ны́не и при́сно, и во ве́ки веко́в.

Та́же конда́к, гла́с 8:

А́ще и во гро́б снизше́л еси́, Безсме́ртне, / но а́дову разруши́л еси́ си́лу, / и воскре́сл еси́, я́ко победи́тель, Христе́ Бо́же, / жена́м мироно́сицам веща́вый: ра́дуйтеся, / и Твои́м апо́столом ми́р да́руяй, / па́дшим подая́й воскресе́ние.

И́кос: Е́же пре́жде со́лнца Со́лнце заше́дшее иногда́ во гро́б, / предвари́ша ко у́тру, и́щущия я́ко дне́ мироно́сицы де́вы, / и дру́га ко друзе́й вопия́ху: / о други́ни! Прииди́те, воня́ми пома́жем те́ло живоно́сное и погребе́ное, / пло́ть воскреси́вшаго па́дшаго Ада́ма, лежа́щую во гро́бе. / И́дем, потщи́мся я́коже волсви́, и поклони́мся, / и принесе́м ми́ра я́ко да́ры, не в пелена́х, но в плащани́це обви́тому, / и пла́чим, и возопии́м: о Влады́ко, воста́ни, / па́дшим подая́й воскресе́ние.

Та́же глаго́лем:

Воскресе́ние Христо́во ви́девше, / поклони́мся Свято́му Го́споду Иису́су, / еди́ному безгре́шному, / Кресту́ Твоему́ покланя́емся, Христе́, / и свято́е Воскресе́ние Твое́ пое́м и сла́вим: / Ты́ бо еси́ Бо́г на́ш, / ра́зве Тебе́ ино́го не зна́ем, / и́мя Твое́ имену́ем. / Прииди́те вси́ ве́рнии, / поклони́мся Свято́му Христо́ву Воскресе́нию: / се́ бо прии́де Кресто́м ра́дость всему́ ми́ру. / Всегда́ благословя́ще Го́спода, / пое́м Воскресе́ние Его́: / распя́тие бо претерпе́в, / сме́ртию сме́рть разруши́. Три́жды.

Воскре́с Иису́с от гро́ба, / я́коже прорече́, / даде́ на́м живо́т ве́чный / и ве́лию ми́лость. Три́жды.

Пе́снь 7.

Ирмо́с: О́троки от пещи́ изба́вивый, / бы́в Челове́к, / стра́ждет я́ко сме́ртен, / и стра́стию сме́ртное, / в нетле́ния облачи́т благоле́пие, / Еди́н благослове́н / отце́в Бо́г, и препросла́влен.

Жены́ с ми́ры богому́дрыя в сле́д Тебе́ теча́ху: / его́же, я́ко ме́ртва, со слеза́ми иска́ху, / поклони́шася ра́дующияся Живо́му Бо́гу, / и Па́сху та́йную / Твои́м, Христе́, ученико́м благовести́ша.

Сме́рти пра́зднуем умерщвле́ние, / а́дово разруше́ние, / ино́го жития́ ве́чнаго нача́ло, / и игра́юще пое́м Вино́внаго, / Еди́наго благослове́ннаго / отце́в Бо́га, и препросла́вленнаго.

Я́ко вои́стинну свяще́нная, / и всепра́зднственная сия́ спаси́тельная но́щь, / и светоза́рная, / светоно́снаго дне́, / воста́ния су́щи провозве́стница: / в не́йже безле́тный Све́т из гро́ба пло́тски все́м возсия́.

Умертви́в Сы́н Тво́й сме́рть, Всенепоро́чная, дне́сь, все́м сме́ртным пребыва́ющий живо́т во ве́ки веко́в дарова́, Еди́н благослове́нный отце́в Бо́г и препросла́вленный.

Все́м ца́рствуяй созда́нием, бы́в челове́к, всели́ся в Твою́, Богоблагода́тная, утро́бу, и распя́тие претерпе́в и сме́рть, воскре́се боголе́пно, совозста́вив на́с я́ко всеси́лен.

Катава́сиа: О́троки от пещи́ изба́вивый:

Ектениа́, и возгла́с: Бу́ди держа́ва Ца́рствия Твоего́ благослове́нна и препросла́вленна, Отца́, и Сы́на, и Свята́го Ду́ха, ны́не и при́сно, и во ве́ки веко́в.

Пе́снь 8.

Ирмо́с: Се́й нарече́нный и святы́й де́нь, / Еди́н суббо́т Ца́рь и Госпо́дь, / пра́здников пра́здник / и торжество́ е́сть торже́ств, / во́ньже благослови́м Христа́ во ве́ки.

Прииди́те, но́ваго виногра́да рожде́ния, / Боже́ственнаго весе́лия, / в наро́читом дни́ Воскресе́ния, / Ца́рствия Христо́ва приобщи́мся, / пою́ще Его́ / я́ко Бо́га во ве́ки.

Возведи́ о́крест о́чи твои́, Сио́не, и ви́ждь: / се́ бо приидо́ша к тебе́, / я́ко богосве́тлая свети́ла, / от за́пада, и се́вера, и мо́ря, / и восто́ка ча́да твоя́, / в тебе́ благословя́щая Христа́ во ве́ки.

Припе́в: Пресвята́я Тро́ице, Бо́же на́ш, сла́ва Тебе́.

Тро́ичен: О́тче Вседержи́телю, и Сло́ве, и Душе́, / треми́ соединя́емое во Ипоста́сех Естество́, / Пресу́щественне и Пребоже́ственне, / в Тя́ крести́хомся, / и Тя́ благослови́м во вся́ ве́ки.

Прии́де Тобо́ю в ми́р Госпо́дь, Де́во Богоро́дице, и чре́во а́дово расто́рг, сме́ртным на́м воскресе́ние дарова́: те́мже благослови́м Его́ во ве́ки.

Всю́ низложи́в сме́рти держа́ву Сы́н Тво́й, Де́во, Свои́м воскресе́нием, я́ко Бо́г кре́пкий совознесе́ на́с и обожи́: те́мже воспева́ем Его́ во ве́ки.

Катава́сиа: Се́й нарече́нный и святы́й де́нь:

Та́же ектениа́, и возгла́с: Я́ко благослови́ся и́мя Твое́, и просла́вися Ца́рство Твое́, Отца́, и Сы́на, и Свята́го Ду́ха, ны́не и при́сно, и во ве́ки веко́в.

Припе́вы на 9-й пе́сни:

Вели́чит душа́ моя́ / воскре́сшаго тридне́вно от гро́ба / Христа́ Жизнода́вца.

И ирмо́с: Свети́ся: И вторы́й ли́к пое́т то́йже припе́в и ирмо́с.

Та́же пе́рвый ли́к пое́т вторы́й припе́в: Вели́чит душа́ моя́ / во́лею страда́вша, и погребе́на, / и воскре́сшаго тридне́вно от гро́ба.

И ирмо́с: Свети́ся: И вторы́й ли́к пое́т то́йже припе́в, и ирмо́с.

Та́же пе́рвый ли́к пое́т тре́тий припе́в: Христо́с но́вая Па́сха, / Же́ртва жива́я, / А́гнец Бо́жий, / взе́мляй грехи́ ми́ра.

И сти́х. И вторы́й ли́к пое́т то́йже припе́в и сти́х.

Та́же пе́рвый ли́к пое́т четве́ртый припе́в:

А́нгел вопия́ше Благода́тней: / Чи́стая Де́во, ра́дуйся! / И па́ки реку́: ра́дуйся! / Тво́й Сы́н воскре́се / тридне́вен от гро́ба, / и ме́ртвыя воздви́гнувый: / лю́дие, весели́теся.

И сти́х. И вторы́й ли́к пое́т то́йже припе́в и сти́х.

И про́чих о́смь припе́вов припева́ют по еди́ножды ко стихо́м:

Возбуди́л еси́ усну́в ме́ртвыя от ве́ка, / ца́рски рыка́вый я́ко от Иу́ды ле́в.

Магдали́на Мари́я притече́ ко гро́бу, / и Христа́ ви́девши, / я́ко вертогра́даря вопроша́ше.

А́нгел облиста́яй жена́м вопия́ше: / преста́ните от сле́з, я́ко Христо́с воскре́се.

Христо́с воскре́се, сме́рть попра́вый, / и ме́ртвыя воздви́гнувый, / лю́дие весели́теся.

Дне́сь вся́ка тва́рь весели́тся и ра́дуется: / я́ко Христо́с воскре́се, и а́д плени́ся.

Дне́сь Влады́ка плени́ а́да, / воздви́гнувый ю́зники, я́же от ве́ка имя́ше лю́те одержи́мыя.

Вели́чит душа́ моя́ / Триипоста́снаго и Неразде́льнаго Божества́ держа́ву.

Ра́дуйся, Де́во, ра́дуйся, / ра́дуйся, Благослове́нная, / ра́дуйся, Препросла́вленная! / Тво́й бо Сы́н воскре́се тридне́вен от гро́ба.

Последи́ же пе́рвый ли́к пое́т па́ки пе́рвый припе́в и ирмо́с. Та́же о́ба ли́ка, соше́дшеся вку́пе, пою́т ирмо́с и тропа́рь: Христо́с воскре́се: три́жды.

Пе́снь 9.

Ирмо́с: Свети́ся, свети́ся, / но́вый Иерусали́ме: / сла́ва бо Госпо́дня / на тебе́ возсия́. / Лику́й ны́не / и весели́ся, Сио́не. / Ты́ же, Чи́стая, красу́йся, Богоро́дице, / о воста́нии Рождества́ Твоего́.

О Боже́ственнаго, о любе́знаго, / о сладча́йшаго Твоего́ гла́са! / С на́ми бо нело́жно / обеща́лся еси́ бы́ти, / до сконча́ния ве́ка Христе́: / его́же, ве́рнии, / утвержде́ние наде́жди иму́ще, ра́дуемся.

О Па́сха ве́лия и свяще́ннейшая, Христе́! / О му́дросте, и Сло́ве Бо́жий, и си́ло! / Подава́й на́м и́стее Тебе́ причаща́тися, / в невече́рнем дни́ Ца́рствия Твоего́.

Катава́сиа: Свети́ся, свети́ся:

Ектениа́, и возгла́с:

Я́ко Тя́ хва́лят вся́ Си́лы Небе́сныя, Отца́, и Сы́на, и Свята́го Ду́ха, и Тебе́ сла́ву возсыла́ют, ны́не и при́сно, и во ве́ки веко́в.

Ексапостила́рий. Самогла́сен:

Пло́тию усну́в, / я́ко ме́ртв, / Царю́ и Го́споди, / тридне́вен воскре́сл еси́, / Ада́ма воздви́г от тли́, / и упраздни́в сме́рть: / Па́сха нетле́ния, / ми́ра спасе́ние. Три́жды.

На хвали́тех, стихи́ры воскре́сны, гла́с 1:

Пое́м Твою́, Христе́, спаси́тельную стра́сть, / и сла́вим Твое́ Воскресе́ние.

Кре́ст претерпе́вый, и сме́рть упраздни́вый, / и воскресы́й из ме́ртвых, / умири́ на́шу жи́знь, Го́споди, / я́ко Еди́н Всеси́лен.

А́да плени́вый и челове́ка воскреси́вый, / Воскресе́нием Твои́м, Христе́, / сподо́би ны́ чи́стым се́рдцем, / Тебе́ пе́ти и сла́вити.

Боголе́пное Твое́ снизхожде́ние сла́вяще, / пое́м Тя́, Христе́: / роди́лся еси́ от Де́вы, / и неразлу́чен бы́л еси́ от Отца́: / пострада́л еси́ я́ко челове́к, / и во́лею претерпе́л еси́ Кре́ст, / воскре́сл еси́ от гро́ба я́ко от черто́га произше́д, / да спасе́ши ми́р, / Го́споди, сла́ва Тебе́.

Та́же совоку́пльшеся о́ба ли́ка, пою́т стихи́ры Па́схи. Гла́с 5.

Сти́х: Да воскре́снет Бо́г, / и расточа́тся врази́ Его́.

Па́сха / свяще́нная на́м дне́сь показа́ся; / Па́сха но́ва свята́я; / Па́сха та́инственная; / Па́сха всечестна́я. / Па́сха Христо́с Изба́витель; / Па́сха непоро́чная; / Па́сха вели́кая; / Па́сха ве́рных. / Па́сха две́ри ра́йския на́м отверза́ющая. / Па́сха все́х освяща́ющая ве́рных.

Сти́х: Я́ко исчеза́ет ды́м, / да исче́знут.

Прииди́те / от виде́ния жены́ благове́стницы, / и Сио́ну рцы́те: / приими́ / от на́с ра́дости благове́щения, Воскресе́ния Христо́ва: / красу́йся, лику́й / и ра́дуйся, Иерусали́ме, / Царя́ Христа́ узре́в из гро́ба, / я́ко жениха́ происходя́ща.

Сти́х: Та́ко да поги́бнут гре́шницы от Лица́ Бо́жия, / а пра́ведницы да возвеселя́тся.

Мироно́сицы жены́, / у́тру глубоку́, / предста́вша гро́бу Живода́вца, / обрето́ша А́нгела / на ка́мени седя́ща, / и то́й провеща́в и́м, / си́це глаго́лаше: / что́ и́щете Жива́го с ме́ртвыми; / что́ пла́чете Нетле́ннаго во тли́? / Ше́дше, пропове́дите ученико́м Его́.

Сти́х: Се́й де́нь, его́же сотвори́ Госпо́дь, / возра́дуемся и возвесели́мся в о́нь.

Па́сха кра́сная, / Па́сха, Госпо́дня Па́сха! / Па́сха всечестна́я / на́м возсия́. Па́сха, / ра́достию дру́г дру́га обы́мем. / О Па́сха! / Избавле́ние ско́рби, / и́бо из гро́ба дне́сь, / я́ко от черто́га / возсия́в Христо́с, / жены́ ра́дости испо́лни, глаго́ля: / пропове́дите апо́столом.

Сла́ва, и ны́не, гла́с 5:

Воскресе́ния де́нь, / и просвети́мся торжество́м, / и дру́г дру́га обы́мем. / Рце́м бра́тие, / и ненави́дящим на́с, / прости́м вся́ Воскресе́нием, / и та́ко возопии́м: / Христо́с воскре́се из ме́ртвых, / сме́ртию сме́рть попра́в, / и су́щим во гробе́х живо́т дарова́в.

Та́же Христо́с воскре́се: три́жды.

Посе́м диа́кон глаго́лет ектении́: Поми́луй на́с, Бо́же: и Испо́лним у́треннюю моли́тву на́шу Го́сподеви.

И по возгла́се, диа́кон: Прему́дрость. Мы́ же: Благослови́. Настоя́тель: Сы́й благослове́н Христо́с Бо́г на́ш, всегда́, ны́не и при́сно, и во ве́ки веко́в. И мы́: Ами́нь. Утверди́ Бо́же: Посе́м настоя́тель, держа́ Кре́ст, вме́сто: Сла́ва Тебе́, Христе́ Бо́же: пое́т: Христо́с воскре́се из ме́ртвых, / сме́ртию сме́рть попра́в. И мы́ пое́м: И су́щим во гробе́х живо́т дарова́в.

И а́бие настоя́тель глаго́лет отпу́ст:

Христо́с воскресы́й из ме́ртвых, сме́ртию сме́рть попра́вый и су́щим во гробе́х живо́т дарова́вый: и́стинный Бо́г на́ш, моли́твами Пречи́стыя Своея́ Ма́тере и все́х святы́х, поми́лует и спасе́т на́с, я́ко Бла́г и Человеколю́бец.

Та́же, Кре́ст возвыша́я, глаго́лет: Христо́с воскре́се. Три́жды. Мы́ же отвеща́ем: Вои́стинну воскре́се. Три́жды. Та́же пое́м коне́чное: Христо́с воскре́се: три́жды, ве́сь тропа́рь. И по не́м пе́нием ко́нчим: И на́м дарова́ живо́т ве́чный, покланя́емся Его́ тридне́вному Воскресе́нию.

Посе́м многоле́тны, и целу́ем Честны́й Кре́ст, держи́мый в ру́ку настоя́теля.

Подоба́ет ве́дати, я́ко от сего́ дне́ святы́я и вели́кия Неде́ли Па́схи да́же до суббо́ты, часы́ си́це пою́тся.

Наче́ншу иере́ю: Благослове́н Бо́г на́ш всегда́, ны́не, и при́сно, и во ве́ки веко́в.

Ли́к: Ами́нь. Христо́с воскре́се из ме́ртвых, / сме́ртию сме́рть попра́в / и су́щим во гробе́х живо́т дарова́в. три́жды.

Та́же глаго́лем три́жды:

Воскресе́ние Христо́во ви́девше, / поклони́мся Свято́му Го́споду Иису́су, / еди́ному безгре́шному, / Кресту́ Твоему́ покланя́емся, Христе́, / и свято́е Воскресе́ние Твое́ пое́м и сла́вим: / Ты́ бо еси́ Бо́г на́ш, / ра́зве Тебе́ ино́го не зна́ем, / и́мя Твое́ имену́ем. / Прииди́те вси́ ве́рнии, / поклони́мся Свято́му Христо́ву Воскресе́нию: / се́ бо прии́де Кресто́м ра́дость всему́ ми́ру. / Всегда́ благословя́ще Го́спода, / пое́м Воскресе́ние Его́: / распя́тие бо претерпе́в, / сме́ртию сме́рть разруши́.

Та́же ипакои́, гла́с 4, еди́нощи:

Предвари́вшия у́тро, я́же о Мари́и, / и обре́тшия ка́мень отвале́н от гро́ба, / слы́шаху от А́нгела: во све́те присносу́щнем Су́щаго / с ме́ртвыми что́ и́щете, я́ко челове́ка? / Ви́дите гро́бныя пелены́, тецы́те и ми́ру пропове́дите, / я́ко воста́ Госпо́дь, умертви́вый сме́рть, / я́ко е́сть Сы́н Бо́га, спаса́ющаго ро́д челове́ческий.

Та́же конда́к, гла́с 8, еди́нощи:

А́ще и во гро́б снизше́л еси́, Безсме́ртне, / но а́дову разруши́л еси́ си́лу / и воскре́сл еси́, я́ко Победи́тель, Христе́ Бо́же, / жена́м мироно́сицам веща́вый: ра́дуйтеся! / И Твои́м апо́столом ми́р да́руяй, / па́дшим подая́й воскресе́ние.

Та́же и се́й тропа́рь еди́нощи:

Во гро́бе пло́тски, во а́де же с душе́ю я́ко Бо́г, / в раи́ же с разбо́йником, и на Престо́ле бы́л еси́ Христе́, со Отце́м и Ду́хом, / вся́ исполня́яй, неопи́санный.

Сла́ва: Я́ко Живоно́сец, я́ко рая́ красне́йший, / вои́стину и черто́га вся́каго ца́рскаго показа́ся светле́йший, Христе́, гро́б Тво́й, / исто́чник на́шего воскресе́ния.

И ны́не, Богоро́дичен:

Вы́шняго освяще́нное Боже́ственное селе́ние, ра́дуйся, / Тобо́ю бо даде́ся ра́дость, Богоро́дице, зову́щим: / благослове́нна Ты́ в жена́х еси́, Всенепоро́чная Влады́чице.

Та́же Го́споди, поми́луй, 40. Сла́ва, и ны́не: Честне́йшую Херуви́м / и сла́внейшую без сравне́ния Серафи́м, / без истле́ния Бо́га Сло́ва ро́ждшую, / су́щую Богоро́дицу, Тя́ велича́ем.

И́менем Госпо́дним благослови́, о́тче.

Иере́й: Моли́твами святы́х оте́ц на́ших, Го́споди Иису́се Христе́ Бо́же на́ш, поми́луй на́с.

Мы́ же рече́м: Ами́нь. И па́ки глаго́лем подо́бне: Христо́с воскре́се: три́жды. Сла́ва, и ны́не: Го́споди, поми́луй. Три́жды. Благослови́. И отпу́ст пе́рваго часа́.

Си́м же о́бразом пое́тся за тре́тий, за шесты́й, пред литурги́ею. Та́кожде и пред вече́рнею, за девя́тый ча́с: и за повече́рие еди́ножды. Та́кожде и за полу́нощницу.

А́ще ли не бу́дет когда́ по ну́жде литурги́и: вме́сто изобрази́тельных, глаго́лем си́це: Христо́с воскре́се: три́жды. Воскресе́ние Христо́во: еди́ножды. Посе́м: Предвари́вшия у́тро: Сла́ва: конда́к: А́ще и во гро́б: И ны́не: Единоро́дный Сы́не: Посе́м блаже́нна от кано́на, пе́снь 3-я́ и 6-я́. Иере́й: Прему́дрость. Чте́ц надписа́ние Апо́стола, и са́мое чте́ние. Посе́м иере́й Ева́нгелие. Та́же, Помяни́ на́с Го́споди: Ли́к Небе́сный: И посе́м: Ве́рую во Еди́наго Бо́га: Осла́би, оста́ви: И по О́тче на́ш: конда́к: А́ще и во гро́б: Сла́ва и ны́не: Богоро́дичен: Вы́шняго освяще́нное: Го́споди поми́луй, 40. Та́же Еди́н свя́т, еди́н Госпо́дь Иису́с Христо́с, во сла́ву Бо́га Отца́. Ами́нь. И посе́м вме́сто, Бу́ди и́мя Госпо́дне: Христо́с воскре́се: три́жды. Та́же, псало́м 33: Благословлю́ Го́спода на вся́кое вре́мя: коне́ц: не лиша́тся вся́каго бла́га.

И посе́м отпу́ст.

А́ще иере́й: Благослове́н Бо́г на́ш:

А́ще же несвяще́нный: Моли́твами святы́х оте́ц на́ших, Го́споди Иису́се Христе́ Бо́же на́ш, поми́луй на́с. Ами́нь.

Царю́ Небе́сный: Трисвято́е. Пресвята́я Тро́ице: Сла́ва, и ны́не: О́тче на́ш: Го́споди, поми́луй, 12. Сла́ва, и ны́не: Прииди́те, поклони́мся: три́жды.

И настоя́щия псалмы́.

Псало́м 22.

Госпо́дь пасе́т мя́, и ничто́же мя́ лиши́т. На ме́сте зла́чне, та́мо всели́ мя́: на воде́ поко́йне воспита́ мя́. Ду́шу мою́ обрати́, наста́ви мя́ на стези́ пра́вды, и́мене ра́ди Своего́. А́ще бо и пойду́ посреде́ се́ни сме́ртныя, не убою́ся зла́, я́ко Ты́ со мно́ю еси́: же́зл Тво́й и па́лица Твоя́, та́ мя́ уте́шиста. Угото́вал еси́ предо мно́ю трапе́зу, сопроти́в стужа́ющим мне́: ума́стил еси́ еле́ом главу́ мою́, и ча́ша Твоя́ упоява́ющи мя́ я́ко держа́вна. И ми́лость Твоя́ пожене́т мя́ вся́ дни́ живота́ моего́, и е́же всели́ти ми́ ся́ в до́м Госпо́день, в долготу́ дни́й.

Псало́м 23.

Госпо́дня земля́, и исполне́ние ея́, вселе́нная, и вси́ живу́щии на не́й. То́й на моря́х основа́л ю́ е́сть, и на река́х угото́вал ю́ е́сть. Кто́ взы́дет на го́ру Госпо́дню; или́ кто́ ста́нет на ме́сте святе́м Его́; Непови́нен рука́ма, и чи́ст се́рдцем, и́же не прия́т всу́е ду́шу свою́, и не кля́тся ле́стию и́скреннему своему́. Се́й прии́мет благослове́ние от Го́спода, и ми́лостыню от Бо́га Спа́са своего́. Се́й ро́д и́щущих Го́спода, и́щущих лице́ Бо́га Иа́ковля. Возми́те врата́ кня́зи ва́ша, и возми́теся врата́ ве́чная: и вни́дет Ца́рь сла́вы. Кто́ е́сть се́й Ца́рь сла́вы; Госпо́дь кре́пок и си́лен, Госпо́дь си́лен в бра́ни. Возми́те врата́ кня́зи ва́ша, и возми́теся врата́ ве́чная: и вни́дет Ца́рь сла́вы. Кто́ е́сть се́й Ца́рь сла́вы; Госпо́дь си́л, То́й е́сть Ца́рь сла́вы.

Псало́м 115.

Ве́ровах, те́мже возглаго́лах: а́з же смири́хся зело́. А́з же ре́х во изступле́нии мое́м: вся́к челове́к ло́жь. Что́ возда́м Го́сподеви о все́х, я́же воздаде́ ми́? Ча́шу спасе́ния прииму́, и и́мя Госпо́дне призову́: моли́твы моя́ Го́сподеви возда́м пред все́ми людьми́ Его́. Честна́ пред Го́сподем сме́рть преподо́бных Его́. О Го́споди, а́з ра́б Тво́й, а́з ра́б Тво́й, и сы́н рабы́ни Твоея́: растерза́л еси́ у́зы моя́. Тебе́ пожру́ же́ртву хвалы́, и во и́мя Госпо́дне призову́. Моли́твы моя́ Го́сподеви возда́м пред все́ми людьми́ Его́. Во дво́рех до́му Госпо́дня, посреде́ Тебе́, Иерусали́ме.

Сла́ва, и ны́не: Аллилу́ия, три́жды. Покло́ны три́.

И настоя́щия тропари́, гла́с 8:

Беззако́ния моя́ пре́зри, Го́споди, от Де́вы рожде́йся, / и се́рдце мое́ очи́сти, хра́м то́ творя́ Пречи́стому Твоему́ Те́лу и Кро́ви, / ниже́ отри́ни мене́ от Твоего́ лица́, / без числа́ име́яй ве́лию ми́лость.

Сла́ва: Во прича́стие святы́нь Твои́х ка́ко дерзну́ недосто́йный? / А́ще бо дерзну́ к Тебе́ приступи́ти с досто́йными, / хито́н мя́ облича́ет, я́ко не́сть вече́рний, / и осужде́ние исхода́тайствую многогре́шной души́ мое́й. / Очи́сти, Го́споди, скве́рну души́ моея́, / и спаси́ мя́, я́ко Человеколю́бец.

И ны́не: Мно́гая мно́жества мои́х, Богоро́дице, прегреше́ний, / к Тебе́ прибего́х, Чи́стая, спасе́ния тре́буя: / посети́ немощству́ющую мою́ ду́шу, / и моли́ Сы́на Твоего́ и Бо́га на́шего, / да́ти ми́ оставле́ние, я́же соде́ях лю́тых, / Еди́на Благослове́нная.

Во святу́ю же и вели́кую Четыредеся́тницу рцы́ сие́:

Егда́ сла́внии ученицы́ на умове́нии ве́чери просвеща́хуся, / тогда́ Иу́да злочести́вый сребролю́бием неду́говав омрача́шеся, / и беззако́нным судия́м Тебе́ пра́веднаго Судию́ предае́т. / Ви́ждь, име́ний рачи́телю, си́х ра́ди удавле́ние употреби́вша: / бежи́ несы́тыя души́, / Учи́телю такова́я дерзну́вшая. / И́же о все́х благи́й Го́споди, сла́ва Тебе́.

Та́же, псало́м 50:

Поми́луй мя́, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя́ от беззако́ния моего́, и от греха́ моего́ очи́сти мя́; я́ко беззако́ние мое́ а́з зна́ю, и гре́х мо́й предо мно́ю е́сть вы́ну. Тебе́ еди́ному согреши́х и лука́вое пред Тобо́ю сотвори́х; я́ко да оправди́шися во словесе́х Твои́х, и победи́ши внегда́ суди́ти Ти́. Се́ бо, в беззако́ниих зача́т е́смь, и во гресе́х роди́ мя́ ма́ти моя́. Се́ бо, и́стину возлюби́л еси́; безве́стная и та́йная прему́дрости Твоея́ яви́л ми́ еси́. Окропи́ши мя́ иссо́пом, и очи́щуся; омы́еши мя́, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от гре́х мои́х и вся́ беззако́ния моя́ очи́сти. Се́рдце чи́сто сози́жди во мне́, Бо́же, и ду́х пра́в обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми́ ра́дость спасе́ния Твоего́ и Ду́хом Влады́чним утверди́ мя́. Научу́ беззако́нныя путе́м Твои́м, и нечести́вии к Тебе́ обратя́тся. Изба́ви мя́ от крове́й, Бо́же, Бо́же спасе́ния моего́; возра́дуется язы́к мо́й пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, да́л бы́х у́бо: всесожже́ния не благоволи́ши. Же́ртва Бо́гу ду́х сокруше́н; се́рдце сокруше́нно и смире́нно Бо́г не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на олта́рь Тво́й тельцы́.

Кано́н. Гла́с 2.

Пе́снь 1.

Ирмо́с: Гряди́те, лю́дие, / пои́м пе́снь Христу́ Бо́гу, / разде́льшему мо́ре, / и наста́вльшему лю́ди, / я́же изведе́ из рабо́ты еги́петския, / я́ко просла́вися.

Се́рдце чи́сто сози́жди во мне́, Бо́же, и ду́х пра́в обнови́ во утро́бе мое́й.

Хле́б живота́ ве́чнующаго да бу́дет ми́ / Те́ло Твое́ Свято́е, благоутро́бне Го́споди, и честна́я Кро́вь, / и неду́г многообра́зных исцеле́ние.

Не отве́ржи мене́ от лица́ Твоего́, и Ду́ха Твоего́ Свята́го не отыми́ от мене́.

Оскверне́н де́лы безме́стными окая́нный, / Твоего́ Пречи́стаго Те́ла и Боже́ственныя Кро́ве недосто́ин е́смь, Христе́, причаще́ния, / его́же мя́ сподо́би.

Пресвята́я Богоро́дице, спаси́ на́с.

Земле́ блага́я, благослове́нная Богоневе́сто, / кла́с прозя́бшая неора́нный и спаси́тельный ми́ру, / сподо́би мя́, се́й яду́ща, спасти́ся.

Пе́снь 3.

Ирмо́с: На ка́мени мя́ ве́ры утверди́в, / разшири́л еси́ уста́ моя́ на враги́ моя́. / Возвесели́ бо ся́ ду́х мо́й, внегда́ пе́ти: / не́сть свя́т, я́коже Бо́г на́ш, / и не́сть пра́веден па́че Тебе́, Го́споди.

Се́рдце чи́сто сози́жди во мне́, Бо́же, и ду́х пра́в обнови́ во утро́бе мое́й.

Сле́зныя ми́ пода́ждь, Христе́, ка́пли, / скве́рну се́рдца моего́ очища́ющия: / я́ко да благо́ю со́вестию очище́н, / ве́рою прихожду́ и стра́хом, Влады́ко, / ко причаще́нию Боже́ственных даро́в Твои́х.

Не отве́ржи мене́ от лица́ Твоего́, и Ду́ха Твоего́ Свята́го не отыми́ от мене́.

Во оставле́ние да бу́дет ми́ прегреше́ний / пречи́стое Те́ло Твое́, и Боже́ственная Кро́вь, / Ду́ха же Свята́го обще́ние, / и в жи́знь ве́чную, Человеколю́бче, / и страсте́й и скорбе́й отчужде́ние.

Пресвята́я Богоро́дице, спаси́ на́с.

Хле́ба живо́тнаго Трапе́за Пресвята́я, / свы́ше ми́лости ра́ди сше́дшаго, / и ми́рови но́вый живо́т даю́щаго, / и мене́ ны́не сподо́би, недосто́йнаго, / со стра́хом вкуси́ти сего́, и жи́ву бы́ти.

Пе́снь 4.

Ирмо́с: Прише́л еси́ от Де́вы, не хода́тай, ни А́нгел, / но Са́м, Го́споди, вопло́щся, / и спа́сл еси́ всего́ мя́ человеќа. / Те́м зову́ Ти́: / сла́ва си́ле Твое́й, Го́споди.

Се́рдце чи́сто сози́жди во мне́, Бо́же, и ду́х пра́в обнови́ во утро́бе мое́й.

Восхоте́л еси́, на́с ра́ди вопло́щся, Многоми́лостиве, / закла́н бы́ти я́ко овча́, гре́х ра́ди челове́ческих; / те́мже молю́ Тя́: / и моя́ очи́сти согреше́ния.

Не отве́ржи мене́ от лица́ Твоего́, и Ду́ха Твоего́ Свята́го не отыми́ от мене́.

Исцели́ души́ моея́ я́звы, Го́споди, и всего́ освяти́, / и сподо́би, Влады́ко, / я́ко да причащу́ся та́йныя Твоея́ Боже́ственныя ве́чери, окая́нный.

Пресвята́я Богоро́дице, спаси́ на́с.

Уми́лостиви и мне́ Су́щаго от утро́бы Твоея́, Влады́чице, / и соблюди́ мя́ нескве́рна раба́ Твоего́ и непоро́чна, / я́ко да прие́м у́мнаго би́сера, освящу́ся.

Пе́снь 5.

Ирмо́с: Све́та пода́телю и веко́в Тво́рче, Го́споди, / во све́те Твои́х повеле́ний наста́ви на́с: / ра́зве бо Тебе́ ино́го бо́га не зна́ем.

Се́рдце чи́сто сози́жди во мне́, Бо́же, и ду́х пра́в обнови́ во утро́бе мое́й.

Я́коже предре́кл еси́, Христе́, / да бу́дет у́бо худо́му рабу́ Твоему́, / и во мне́ пребу́ди, я́коже обеща́лся еси́: / се́ бо Те́ло Твое́ я́м Боже́ственное и пию́ Кро́вь Твою́.

Не отве́ржи мене́ от лица́ Твоего́, и Ду́ха Твоего́ Свята́го не отыми́ от мене́.

Сло́ве Бо́жий и Бо́же, / у́гль Те́ла Твоего́ да бу́дет мне́, помраче́нному, в просвеще́ние / и очище́ние оскверне́нной души́ мое́й Кро́вь Твоя́.

Пресвята́я Богоро́дице, спаси́ на́с.

Мари́е, Ма́ти Бо́жия, благоуха́ния честно́е селе́ние, / Твои́ми моли́твами сосу́д мя́ избра́нный соде́лай, / я́ко да освяще́ний причащу́ся Сы́на Твоего́.

Пе́снь 6.

Ирмо́с: В бе́здне грехо́вней валя́яся, / неизсле́дную милосе́рдия Твоего́ призыва́ю бе́здну: / от тли́, Бо́же, мя́ возведи́.

Се́рдце чи́сто сози́жди во мне́, Бо́же, и ду́х пра́в обнови́ во утро́бе мое́й.

У́м, ду́шу и се́рдце освяти́, Спа́се, и те́ло мое́, / и сподо́би неосужде́нно, Влады́ко, / к стра́шным Та́йнам приступи́ти.

Не отве́ржи мене́ от лица́ Твоего́, и Ду́ха Твоего́ Свята́го не отыми́ от мене́.

Да бы́х устрани́лся от страсте́й, / и Твоея́ благода́ти име́л бы приложе́ние, / живота́ же утвержде́ние, / причаще́нием Святы́х, Христе́, Та́ин Твои́х.

Пресвята́я Богоро́дице, спаси́ на́с.

Бо́жие, Бо́же, Сло́во Свято́е, всего́ мя́ освяти́, / ны́не приходя́щаго к Боже́ственным Твои́м Та́йнам, / Святы́я Ма́тере Твоея́ мольба́ми.

Конда́к, гла́с 2:

Хле́б, Христе́, взя́ти не пре́зри мя́, / Те́ло Твое́, и Боже́ственную Твою́ ны́не Кро́вь, / пречи́стых, Влады́ко, и стра́шных Твои́х Та́ин причасти́тися окая́ннаго, / да не бу́дет ми́ в су́д, / да бу́дет же ми́ в живо́т ве́чный и безсме́ртный.

Пе́снь 7.

Ирмо́с: Те́лу злато́му прему́дрыя де́ти не послужи́ша, / и в пла́мень са́ми поидо́ша, и бо́ги и́х обруга́ша, / среди́ пла́мене возопи́ша, и ороси́ я́ А́нгел: / услы́шася уже́ у́ст ва́ших моли́тва.

Се́рдце чи́сто сози́жди во мне́, Бо́же, и ду́х пра́в обнови́ во утро́бе мое́й.

Исто́чник благи́х, причаще́ние, Христе́, / безсме́ртных Твои́х ны́не Та́инств / да бу́дет ми́ све́т, и живо́т, и безстра́стие, / и к преспе́янию же и умноже́нию доброде́тели Боже́ственнейшия хода́тайственно, / еди́не Бла́же, я́ко да сла́влю Тя́.

Не отве́ржи мене́ от лица́ Твоего́, и Ду́ха Твоего́ Свята́го не отыми́ от мене́.

Да изба́влюся от страсте́й, и враго́в, и ну́жды, и вся́кия ско́рби, / тре́петом и любо́вию со благогове́нием, Человеколю́бче, / приступа́яй ны́не к Твои́м безсме́ртным и Боже́ственным Та́йнам, / и пе́ти Тебе́ сподо́би: / благослове́н еси́, Го́споди, Бо́же оте́ц на́ших.

Пресвята́я Богоро́дице, спаси́ на́с.

Спа́са Христа́ ро́ждшая па́че ума́, Богоблагода́тная, / молю́ Тя́ ны́не, ра́б Тво́й, Чи́стую нечи́стый: / хотя́щаго мя́ ны́не к пречи́стым Та́йнам приступи́ти, / очи́сти всего́ от скве́рны пло́ти и Ду́ха.

Пе́снь 8.

Ирмо́с: В пе́щь о́гненную ко отроко́м евре́йским снизше́дшаго, / и пла́мень в ро́су прело́жшаго Бо́га, / по́йте дела́ я́ко Го́спода, / и превозноси́те во вся́ ве́ки.

Се́рдце чи́сто сози́жди во мне́, Бо́же, и ду́х пра́в обнови́ во утро́бе мое́й.

Небе́сных, и стра́шных, и Святы́х Твои́х, Христе́, ны́не Та́ин, / и Боже́ственныя Твоея́ и та́йныя ве́чери о́бщника бы́ти / и мене́ сподо́би, отча́яннаго, Бо́же Спа́се мо́й.

Не отве́ржи мене́ от лица́ Твоего́, и Ду́ха Твоего́ Свята́го не отыми́ от мене́.

Под Твое́ прибе́г благоутро́бие, Бла́же, со стра́хом зо́ву Ти́: / во мне́ пребу́ди, Спа́се, и а́з, я́коже ре́кл еси́, в Тебе́; / се́ бо дерза́я на ми́лость Твою́, / я́м Те́ло Твое́, и пию́ Кро́вь Твою́.

Пресвята́я Тро́ице, Бо́же на́ш, сла́ва Тебе́.

Трепе́щу, прие́мля о́гнь, / да не опалю́ся я́ко во́ск и я́ко трава́. / О́ле стра́шнаго та́инства! / О́ле благоутро́бия Бо́жия! / Ка́ко Боже́ственнаго Те́ла и Кро́ве, бре́ние, / причаща́юся и нетле́нен сотворя́юся?

Пе́снь 9.

Ирмо́с: Безнача́льна Роди́теля Сы́н, Бо́г и Госпо́дь, / вопло́щся от Де́вы на́м яви́ся, / омраче́нная просвети́ти, собра́ти расточе́нная: / те́м всепе́тую Богоро́дицу велича́ем.

Се́рдце чи́сто сози́жди во мне́, Бо́же, и ду́х пра́в обнови́ во утро́бе мое́й.

Христо́с е́сть, вкуси́те и ви́дите: / Госпо́дь на́с ра́ди, по на́м бо дре́вле бы́вый, / еди́ною Себе́ прине́с, я́ко приноше́ние Отцу́ Своему́, / при́сно закала́ется, освяща́яй причаща́ющияся.

Не отве́ржи мене́ от лица́ Твоего́, и Ду́ха Твоего́ Свята́го не отыми́ от мене́.

Душе́ю и те́лом да освящу́ся, Влады́ко, да просвещу́ся, да спасу́ся, / да бу́ду до́м Тво́й причаще́нием Свяще́нных Та́ин, / живу́щаго Тя́ име́я в себе́ со Отце́м и Ду́хом, / Благоде́телю Многоми́лостиве.

Возда́ждь ми́ ра́дость спасе́ния Твоего́ и Ду́хом Влады́чним утверди́ мя́.

Я́коже о́гнь да бу́дет ми́ и я́ко све́т, / Те́ло Твое́ и Кро́вь, Спа́се мо́й, пречестна́я, / опаля́я грехо́вное вещество́, сжига́я же страсте́й те́рние, / и всего́ мя́ просвеща́я, покланя́тися Божеству́ Твоему́.

Пресвята́я Богоро́дице, спаси́ на́с.

Бо́г воплоти́ся от чи́стых крове́й Твои́х; / те́мже вся́кий ро́д пое́т Тя́, Влады́чице, / у́мная же мно́жества сла́вят, / я́ко Тобо́ю я́ве узре́ша все́ми Влады́чествующаго, / осуществова́вшагося челове́чеством.

И а́бие: Досто́йно е́сть: Трисвято́е. Пресвята́я Тро́ице: По О́тче на́ш: Тропа́рь дне́, а́ще е́сть пра́здник Христо́ва Рождества́, или́ и́ный.

А́ще же ни, сия́, гла́с 6:

Поми́луй на́с, Го́споди, поми́луй на́с; / вся́каго бо отве́та недоуме́юще, / сию́ Ти́ моли́тву / я́ко Влады́це, гре́шнии прино́сим: поми́луй на́с.

Сла́ва: Го́споди, поми́луй на́с, / на Тя́ бо упова́хом; / не прогне́вайся на ны́ зело́, / ниже́ помяни́ беззако́ний на́ших, / но при́зри и ны́не я́ко Благоутро́бен, / и изба́ви ны́ от вра́г на́ших; / Ты́ бо еси́ Бо́г на́ш, / и мы́ лю́дие Твои́, / вси́ дела́ руку́ Твое́ю, / и и́мя Твое́ призыва́ем.

И ны́не: Милосе́рдия две́ри отве́рзи на́м, / благослове́нная Богоро́дице, / наде́ющиися на Тя́ да не поги́бнем, / но да изба́вимся Тобо́ю от бе́д: / Ты́ бо еси́ спасе́ние ро́да христиа́нскаго.

Та́же: Го́споди, поми́луй, 40. И покло́ны, ели́ко хо́щеши.

И а́бие настоя́щия стихи́:

Хотя́ я́сти, челове́че, Те́ло Влады́чне,

Стра́хом приступи́, да не опали́шися: о́гнь бо е́сть.

Боже́ственную же пия́ Кро́вь ко обще́нию,

Пе́рвее примири́ся тя́ опеча́лившим.

Та́же дерза́я, та́инственное бра́шно я́ждь.

И́ны стихи́:

Пре́жде прича́стия стра́шныя же́ртвы,

Животворя́щаго Те́ла Влады́чня,

Си́м помоли́ся о́бразом со тре́петом.

Моли́тва Вели́каго Васи́лия, 1.

Влады́ко Го́споди Иису́се Христе́, Бо́же на́ш, Исто́чниче жи́зни и безсме́ртия, всея́ тва́ри ви́димыя и неви́димыя Соде́телю, Безнача́льнаго Отца́ Соприсносу́щный Сы́не и Собезнача́льный, премно́гия ра́ди бла́гости в после́дния дни́ в пло́ть оболки́йся, и распны́йся, и погребы́йся за ны́, неблагода́рныя и злонра́вныя, и Твое́ю Кро́вию обнови́вый растле́вшее грехо́м естество́ на́ше, Са́м, безсме́ртный Царю́, приими́ и мое́ гре́шнаго покая́ние, и приклони́ у́хо Твое́ мне́, и услы́ши глаго́лы моя́. Согреши́х бо, Го́споди, согреши́х на не́бо и пред Тобо́ю, и не́смь досто́ин воззре́ти на высоту́ сла́вы Твоея́: прогне́вах бо Твою́ бла́гость, Твоя́ за́поведи преступи́в, и не послу́шав Твои́х повеле́ний. Но Ты́, Го́споди, незло́бив сы́й, долготерпели́в же и многоми́лостив, не пре́дал еси́ мя́ поги́бнути со беззако́ньми мои́ми, моего́ вся́чески ожида́я обраще́ния. Ты́ бо ре́кл еси́, Человеколю́бче, проро́ком Твои́м: я́ко хоте́нием не хощу́ сме́рти гре́шника, но е́же обрати́тися и жи́ву бы́ти ему́. Не хо́щеши бо, Влады́ко, созда́ния Твое́ю ру́ку погуби́ти, ниже́ благоволи́ши о поги́бели челове́честей, но хо́щеши все́м спасти́ся, и в ра́зум и́стины приити́. Те́мже и а́з, а́ще и недосто́ин е́смь небесе́ и земли́, и сея́ привре́менныя жи́зни, всего́ себе́ повину́в греху́, и сласте́м порабо́тив, и Тво́й оскверни́в о́браз; но творе́ние и созда́ние Твое́ бы́в, не отчаява́ю своего́ спасе́ния, окая́нный, на Твое́ же безме́рное благоутро́бие дерза́я, прихожду́. Приими́ у́бо и мене́, Человеколю́бче Го́споди, я́коже блудни́цу, я́ко разбо́йника, я́ко мытаря́ и я́ко блу́днаго, и возми́ мое́ тя́жкое бре́мя грехо́в, гре́х взе́мляй ми́ра, и не́мощи челове́ческия исцеля́яй, тружда́ющияся и обремене́нныя к Себе́ призыва́яй и упокоева́яй, не прише́дый призва́ти пра́ведныя, но гре́шныя на покая́ние. И очи́сти мя́ от вся́кия скве́рны пло́ти и ду́ха, и научи́ мя́ соверша́ти святы́ню во стра́се Твое́м: я́ко да чи́стым све́дением со́вести моея́, святы́нь Твои́х ча́сть прие́мля, соединю́ся свято́му Те́лу Твоему́ и Кро́ви, и име́ю Тебе́ во мне́ живу́ща и пребыва́юща, со Отце́м, и Святы́м Твои́м Ду́хом. Е́й, Го́споди Иису́се Христе́, Бо́же мо́й, и да не в су́д ми́ бу́дет прича́стие Пречи́стых и Животворя́щих Та́ин Твои́х, ниже́ да не́мощен бу́ду душе́ю же и те́лом, от е́же недосто́йне те́м причаща́тися, но да́ждь ми́, да́же до коне́чнаго моего́ издыха́ния, неосужде́нно восприима́ти ча́сть Святы́нь Твои́х, в Ду́ха Свята́го обще́ние, в напу́тие живота́ ве́чнаго, и во благоприя́тен отве́т на Стра́шнем Суди́щи Твое́м: я́ко да и а́з со все́ми избра́нными Твои́ми о́бщник бу́ду нетле́нных Твои́х бла́г, я́же угото́вал еси́ лю́бящим Тя́, Го́споди, в ни́хже препросла́влен еси́ во ве́ки. Ами́нь.

Моли́тва ина́я, и́же во святы́х отца́ на́шего Иоа́нна Златоу́стаго, 2.

Го́споди Бо́же мо́й, ве́м, я́ко не́смь досто́ин, ниже́ дово́лен, да под кро́в вни́деши хра́ма души́ моея́, зане́же ве́сь пу́ст и па́лся е́сть, и не и́маши во мне́ ме́ста досто́йна е́же главу́ подклони́ти; но я́коже с высоты́ на́с ра́ди смири́л еси́ Себе́, смири́ся и ны́не смире́нию моему́, и я́коже восприя́л еси́ в верте́пе и в я́слех безслове́сных возлещи́, си́це восприими́ и в я́слех безслове́сныя моея́ души́, и во оскверне́нное мое́ те́ло вни́ти. И я́коже не неудосто́ил еси́ вни́ти и свечеря́ти со гре́шники в до́му Си́мона прокаже́ннаго, та́ко изво́ли вни́ти и в до́м смире́нныя моея́ души́, прокаже́нныя и гре́шныя. И я́коже не отри́нул еси́ подо́бную мне́ блудни́цу и гре́шную, прише́дшую и прикосну́вшуюся Тебе́, си́це умилосе́рдися и о мне́, гре́шнем, приходя́щем и прикаса́ющем Ти́ ся́. И я́коже не возгнуша́лся еси́ скве́рных ея́ у́ст и нечи́стых, целу́ющих Тя́, ниже́ мои́х возгнуша́йся скве́рнших о́ныя у́ст и нечи́стших, ниже́ ме́рзких мои́х и нечи́стых усте́н, и скве́рнаго и нечи́стейшаго моего́ язы́ка. Но да бу́дет ми́ у́гль пресвята́го Твоего́ Те́ла, и честны́я Твоея́ Кро́ве, во освяще́ние и просвеще́ние и здра́вие смире́нней мое́й души́ и те́лу, во облегче́ние тя́жестей мно́гих мои́х согреше́ний, в соблюде́ние от вся́каго диа́вольскаго де́йства, во отгна́ние и возбране́ние зла́го моего́ и лука́ваго обы́чая, во умерщвле́ние страсте́й, в снабде́ние за́поведей Твои́х, в приложе́ние Боже́ственныя Твоея́ благода́ти и Твоего́ Ца́рствия присвое́ние. Не бо я́ко презира́яй прихожду́ к Тебе́, Христе́ Бо́же, но я́ко дерза́я на неизрече́нную Твою́ бла́гость, и да не на мно́зе удаля́яйся обще́ния Твоего́, от мы́сленнаго во́лка звероуловле́н бу́ду. Те́мже молю́ся Тебе́: я́ко Еди́н сы́й Свя́т, Влады́ко, освяти́ мою́ ду́шу и те́ло, у́м и се́рдце, чревеса́ и утро́бы, и всего́ мя́ обнови́, и вкорени́ стра́х Тво́й во удесе́х мои́х, и освяще́ние Твое́ неотъе́млемо от мене́ сотвори́; и бу́ди ми́ помо́щник и засту́пник, окормля́я в ми́ре живо́т мо́й, сподобля́я мя́ и одесну́ю Тебе́ предстоя́ния со святы́ми Твои́ми, моли́твами и моле́ньми Пречи́стыя Твоея́ Ма́тере, невеще́ственных Твои́х служи́телей и пречи́стых Си́л, и все́х святы́х, от ве́ка Тебе́ благоугоди́вших. Ами́нь.

Моли́тва ина́я Симео́на Метафра́ста, 3.

Еди́не чи́стый и нетле́нный Го́споди, за неизрече́нную ми́лость человеколю́бия на́ше все́ восприе́мый смеше́ние, от чи́стых и де́вственных крове́й па́че естества́ Ро́ждшия Тя́, Ду́ха Боже́ственнаго наше́ствием и благоволе́нием Отца́ присносу́щнаго, Христе́ Иису́се, прему́дросте Бо́жия, и ми́ре, и си́ло; Твои́м восприя́тием животворя́щая и спаси́тельная страда́ния восприе́мый, кре́ст, гво́здия, копие́, сме́рть, умертви́ моя́ душетле́нная стра́сти теле́сныя. Погребе́нием Твои́м а́дова плени́вый ца́рствия, погреби́ моя́ благи́ми по́мыслы лука́вая сове́тования и лука́вствия ду́хи разори́. Тридне́вным Твои́м и живоно́сным воскресе́нием па́дшаго пра́отца возста́вивый, возста́ви мя́, грехо́м попо́лзшагося, о́бразы мне́ покая́ния предлага́я. Пресла́вным Твои́м вознесе́нием плотско́е обожи́вый восприя́тие и сие́ десны́м Отца́ седе́нием почты́й, сподо́би мя́ прича́стием Святы́х Твои́х Та́ин десну́ю ча́сть спаса́емых получи́ти. Сни́тием Уте́шителя Твоего́ Ду́ха сосу́ды че́стны свяще́нныя Твоя́ ученики́ соде́лавый, прия́телище и мене́ покажи́ Того́ прише́ствия. Хотя́й па́ки приити́ суди́ти вселе́нней пра́вдою, благоволи́ и мне́ усре́сти Тя́ на о́блацех, Судию́ и Созда́теля моего́, со все́ми святы́ми Твои́ми: да безконе́чно славосло́влю и воспева́ю Тя́, со Безнача́льным Твои́м Отце́м и Пресвяты́м и Благи́м и Животворя́щим Твои́м Ду́хом, ны́не и при́сно и во ве́ки веко́в. Ами́нь.

Моли́тва ина́я, того́жде, 4.

Я́ко на Стра́шнем Твое́м и нелицеприе́мнем предстоя́й Суди́лищи, Христе́ Бо́же, и осужде́ния подъе́мля, и сло́во творя́ о соде́янных мно́ю злы́х; си́це дне́сь, пре́жде да́же не приити́ дне́ви осужде́ния моего́, у свята́го Твоего́ Же́ртвенника предстоя́ пред Тобо́ю и пред стра́шными и святы́ми А́нгелы Твои́ми, преклоне́н от своея́ со́вести, приношу́ лука́вая моя́ и беззако́нная дея́ния, явля́яй сия́ и облича́яй. Ви́ждь, Го́споди, смире́ние мое́, и оста́ви вся́ грехи́ моя́; ви́ждь, я́ко умно́жишася па́че вла́с главы́ моея́ беззако́ния моя́. Ко́е у́бо не соде́ях зло́? Ки́й гре́х не сотвори́х? Ко́е зло́ не вообрази́х в души́ мое́й? Уже́ бо и де́лы соде́ях: блу́д, прелюбоде́йство, го́рдость, киче́ние, укоре́ние, хулу́, праздносло́вие, сме́х неподо́бный, пия́нство, гортанобе́сие, объяде́ние, не́нависть, за́висть, сребролю́бие, любостяжа́ние, лихои́мство, самолю́бие, славолю́бие, хище́ние, непра́вду, злоприобре́тение, ре́вность, оклевета́ние, беззако́ние; вся́кое мое́ чу́вство и вся́кий у́д оскверни́х, растли́х, непотре́бен сотвори́х, де́лателище бы́в вся́чески диа́воле. И ве́м, Го́споди, я́ко беззако́ния моя́ превзыдо́ша главу́ мою́; но безме́рно е́сть мно́жество щедро́т Твои́х, и ми́лость неизрече́нна незло́бивыя Твоея́ бла́гости, и не́сть гре́х побежда́ющь человеколю́бие Твое́. Те́мже, пречу́дный Царю́, незло́биве Го́споди, удиви́ и на мне́, гре́шнем, ми́лости Твоя́, покажи́ бла́гости Твоея́ си́лу и яви́ кре́пость благоутро́бнаго милосе́рдия Твоего́, и обраща́ющася приими́ мя́ гре́шнаго. Приими́ мя́, я́коже прия́л еси́ блу́днаго, разбо́йника, блудни́цу. Приими́ мя́, пребезме́рне и сло́вом, и де́лом, и по́хотию безме́стною, и помышле́нием безслове́сным согреши́вша Тебе́. И я́коже во единонадеся́тый ча́с прише́дших прия́л еси́, ничто́же досто́йно соде́лавших, та́ко приими́ и мене́, гре́шнаго: мно́го бо согреши́х и оскверни́хся, и опеча́лих Ду́ха Твоего́ Свята́го, и огорчи́х человеколю́бную утро́бу Твою́ и де́лом, и сло́вом, и помышле́нием, в нощи́ и во дни́, явле́нне же и неявле́нне, во́лею же и нево́лею. И ве́м, я́ко предста́виши грехи́ моя́ предо мно́ю таковы́, яковы́ же мно́ю соде́яшася, и истя́жеши сло́во со мно́ю о и́хже ра́зумом непроще́нно согреши́х. Но Го́споди, Го́споди, да не пра́ведным судо́м Твои́м, ниже́ я́ростию Твое́ю обличи́ши мя́, ниже́ гне́вом Твои́м нака́жеши мя́; поми́луй мя́, Го́споди, я́ко не то́кмо не́мощен е́смь, но и Твое́ е́смь созда́ние. Ты́ у́бо, Го́споди, утверди́л еси́ на мне́ стра́х Тво́й, а́з же лука́вое пред Тобо́ю сотвори́х. Тебе́ у́бо еди́ному согреши́х, но молю́ Тя́, не вни́ди в су́д с рабо́м Твои́м. А́ще бо беззако́ния на́зриши, Го́споди, Го́споди, кто́ постои́т? А́з бо е́смь пучи́на греха́, и не́смь досто́ин, ниже́ дово́лен воззре́ти и ви́дети высоту́ небе́сную, от мно́жества грехо́в мои́х, и́хже не́сть числа́: вся́кое бо злодея́ние и кова́рство, и ухищре́ние сатанино́, и растле́ния, злопомне́ния, сове́тования ко греху́ и ины́я тьмочи́сленныя стра́сти не оскуде́ша от мене́. Ки́ими бо не растли́хся грехи́? Ки́ими не содержа́хся злы́ми? Вся́к гре́х соде́ях, вся́кую нечистоту́ вложи́х в ду́шу мою́, непотре́бен бы́х Тебе́, Бо́гу моему́, и челове́ком. Кто́ возста́вит мя́, в сицева́я зла́я и толи́ка па́дшаго согреше́ния? Го́споди Бо́же мо́й, на Тя́ упова́х; а́ще е́сть ми́ спасе́ния упова́ние, а́ще побежда́ет человеколю́бие Твое́ мно́жества беззако́ний мои́х, бу́ди ми́ Спаси́тель, и по щедро́там Твои́м и ми́лостем Твои́м, осла́би, оста́ви, прости́, ми́ вся́, ели́ка Ти́ согреши́х, я́ко мно́гих зо́л испо́лнися душа́ моя́, и не́сть во мне́ спасе́ния наде́жды. Поми́луй мя́, Бо́же, по вели́цей ми́лости Твое́й и не возда́ждь ми́ по дело́м мои́м, и не осуди́ мя́ по дея́нием мои́м, но обрати́, заступи́, изба́ви ду́шу мою́ от совозраста́ющих е́й зо́л и лю́тых восприя́тий. Спаси́ мя́ ра́ди ми́лости Твоея́, да иде́же умно́жится гре́х, преизоби́лует благода́ть Твоя́; и восхвалю́ и просла́влю Тя́ всегда́, вся́ дни́ живота́ моего́. Ты́ бо еси́ Бо́г ка́ющихся и Спа́с согреша́ющих; и Тебе́ сла́ву возсыла́ем со Безнача́льным Твои́м Отце́м и Пресвяты́м и Благи́м, и Животворя́щим Твои́м Ду́хом ны́не и при́сно, и во ве́ки веко́в. Ами́нь.

Боже́ственнаго Дамаски́на, 5.

Влады́ко Го́споди Иису́се Христе́ Бо́же на́ш, еди́не име́яй вла́сть челове́ком оставля́ти грехи́, я́ко бла́г и Человеколю́бец пре́зри моя́ вся́ в ве́дении и не в ве́дении прегреше́ния, и сподо́би мя́ неосужде́нно причасти́тися Боже́ственных, и пресла́вных, и пречи́стых, и животворя́щих Твои́х Та́ин, не в тя́жесть, ни в му́ку, ни в приложе́ние грехо́в, но во очище́ние, и освяще́ние, и обруче́ние бу́дущаго живота́ и Ца́рствия, в сте́ну и по́мощь, и в возраже́ние сопроти́вных, во истребле́ние мно́гих мои́х согреше́ний. Ты́ бо еси́ Бо́г ми́лости, и щедро́т, и человеколю́бия, и Тебе́ сла́ву возсыла́ем, со Отце́м и Святы́м Ду́хом, ны́не и при́сно и во ве́ки веко́в. Ами́нь.

Вели́каго Васи́лия, 6.

Ве́м, Го́споди, я́ко недосто́йне причаща́юся пречи́стаго Твоего́ Те́ла и честны́я Твоея́ Кро́ве, и пови́нен е́смь, и су́д себе́ я́м и пию́, не разсужда́я Те́ла и Кро́ве Тебе́, Христа́ и Бо́га моего́, но на щедро́ты Твоя́ дерза́я, прихожду́ к Тебе́, ре́кшему: яды́й Мою́ Пло́ть и пия́й Мою́ Кро́вь, во Мне́ пребыва́ет, и А́з в не́м. Умилосе́рдися у́бо, Го́споди, и не обличи́ мя́, гре́шнаго, но сотвори́ со мно́ю по ми́лости Твое́й; и да бу́дут ми́ свята́я сия́ во исцеле́ние, и очище́ние, и просвеще́ние, и сохране́ние, и спасе́ние, и во освяще́ние души́ и те́ла; во отгна́ние вся́каго мечта́ния, и лука́ваго дея́ния, и де́йства диа́вольскаго, мы́сленне во удесе́х мои́х де́йствуемаго, в дерзнове́ние и любо́вь, я́же к Тебе́; во исправле́ние жития́ и утвержде́ние, в возраще́ние доброде́тели и соверше́нства, во исполне́ние за́поведей, в Ду́ха Свята́го обще́ние, в напу́тие живота́ ве́чнаго, во отве́т благоприя́тен на Стра́шнем Суди́щи Твое́м: не в су́д или́ во осужде́ние.

Моли́тва ина́я Симео́на Но́ваго Богосло́ва, 7.

От скве́рных усте́н, от ме́рзкаго се́рдца, от нечи́стаго язы́ка, от души́ оскверне́ны, приими́ моле́ние, Христе́ мо́й, и не пре́зри мои́х ни слове́с, ниже́ образо́в, ниже́ безсту́дия. Да́ждь ми́ дерзнове́нно глаго́лати, я́же хощу́, Христе́ мо́й, па́че же и научи́ мя́, что́ ми́ подоба́ет твори́ти и глаго́лати. Согреши́х па́че блудни́цы, я́же уве́де, где́ обита́еши, ми́ро купи́вши, прии́де де́рзостне пома́зати Твои́ но́зе, Бо́га моего́, Влады́ки и Христа́ моего́. Я́коже о́ну не отри́нул еси́ прише́дшую от се́рдца, ниже́ мене́ возгнуша́йся, Сло́ве: Твои́ же ми́ пода́ждь но́зе, и держа́ти и целова́ти, и струя́ми сле́зными, я́ко многоце́нным ми́ром, сия́ де́рзостно пома́зати. Омы́й мя́ слеза́ми мои́ми, очи́сти мя́ и́ми, Сло́ве. Оста́ви и прегреше́ния моя́, и проще́ние ми́ пода́ждь. Ве́си зо́л мно́жество, ве́си и стру́пы моя́, и я́звы зри́ши моя́, но и ве́ру ве́си, и произволе́ние зри́ши, и воздыха́ние слы́шиши. Не таи́тся Тебе́, Бо́же мо́й, Тво́рче мо́й, Изба́вителю мо́й, ниже́ ка́пля сле́зная, ниже́ ка́пли ча́сть не́кая. Несоде́ланное мое́ ви́десте о́чи Твои́, в кни́зе же Твое́й и еще́ несоде́янная напи́сана Тебе́ су́ть. Ви́ждь смире́ние мое́, ви́ждь тру́д мо́й ели́к, и грехи́ вся́ оста́ви ми́, Бо́же вся́ческих: да чи́стым се́рдцем, притре́петною мы́слию и душе́ю сокруше́нною нескве́рных Твои́х причащу́ся и пресвяты́х Та́ин, и́миже оживля́ется и обожа́ется вся́к яды́й же и пия́й чи́стым се́рдцем. Ты́ бо ре́кл еси́, Влады́ко мо́й: вся́к яды́й Мою́ Пло́ть и пия́й Мою́ Кро́вь, во Мне́ у́бо се́й пребыва́ет, в не́мже и А́з е́смь. И́стинно сло́во вся́ко Влады́ки и Бо́га моего́: Боже́ственных бо причаща́яйся и боготворя́щих благода́тей, не у́бо е́смь еди́н, но с Тобо́ю, Христе́ мо́й, Све́том трисо́лнечным, просвеща́ющим ми́р. Да у́бо не еди́н пребу́ду кроме́ Тебе́, Живода́вца, дыха́ния моего́, живота́ моего́, ра́дования моего́, спасе́ния ми́ру. Сего́ ра́ди к Тебе́ приступи́х, я́коже зри́ши, со слеза́ми, и душе́ю сокруше́нною, избавле́ния мои́х прегреше́ний прошу́ прия́ти ми́ и Твои́х живода́тельных и непоро́чных Та́инств причасти́тися неосужде́нно, да пребу́деши, я́коже ре́кл еси́, со мно́ю треокая́нным: да не кроме́ обре́т мя́ Твоея́ благода́ти, преле́стник восхи́тит мя́ льсти́вне, и прельсти́в отведе́т боготворя́щих Твои́х слове́с. Сего́ ра́ди к Тебе́ припа́даю и те́пле вопию́ Ти́: я́коже блу́днаго прия́л еси́ и блудни́цу прише́дшую, та́ко приими́ мя́, блу́днаго и скве́рнаго, Ще́дре. Душе́ю сокруше́нною ны́не бо к Тебе́ приходя́, ве́м, Спа́се, я́ко ины́й, я́коже а́з, не прегреши́ Тебе́, ниже́ соде́я дея́ния, я́же а́з соде́ях. Но сие́ па́ки ве́м, я́ко не вели́чество прегреше́ний, ни грехо́в мно́жество превосхо́дит Бо́га моего́ мно́гое долготерпе́ние и человеколю́бие кра́йнее; но ми́лостию состра́стия те́пле ка́ющияся и чи́стиши, и све́тлиши, и све́та твори́ши прича́стники, о́бщники Божества́ Твоего́ соде́ловаяй незави́стно, и стра́нное и А́нгелом, и челове́ческим мы́слем, бесе́дуеши и́м мно́гажды, я́коже друго́м Твои́м и́стинным. Сия́ де́рзостна творя́т мя́, сия́ вперя́ют мя́, Христе́ мо́й. И дерза́я Твои́м бога́тым к на́м благодея́нием, ра́дуяся вку́пе и трепе́ща, огне́ви причаща́юся трава́ сы́й, и стра́нно чу́до, ороша́емь неопа́льно, я́коже у́бо купина́ дре́вле неопа́льне горя́щи. Ны́не благода́рною мы́слию, благода́рным же се́рдцем, благода́рными удесы́ мои́ми, души́ и те́ла моего́, покланя́юся и велича́ю, и славосло́влю Тя́, Бо́же мо́й, я́ко благослове́нна су́ща, ны́не же и во ве́ки.

Моли́тва ина́я Златоу́стаго, 8.

Бо́же, осла́би, оста́ви, прости́ ми́ согреше́ния моя́, ели́ка Ти́ согреши́х, а́ще сло́вом, а́ще де́лом, а́ще помышле́нием, во́лею или́ нево́лею, ра́зумом или́ неразу́мием, вся́ ми́ прости́ я́ко бла́г и Человеколю́бец, и моли́твами Пречи́стыя Твоея́ Ма́тере, у́мных Твои́х служи́телей и святы́х си́л, и все́х святы́х, от ве́ка Тебе́ благоугоди́вших, неосужде́нно благоволи́ прия́ти ми́ свято́е и Пречи́стое Твое́ Те́ло и Честну́ю Кро́вь, во исцеле́ние души́ же и те́ла, и во очище́ние лука́вых мои́х помышле́ний. Я́ко Твое́ е́сть Ца́рство и си́ла и сла́ва, со Отце́м и Святы́м Ду́хом, ны́не и при́сно и во ве́ки веко́в. Ами́нь.

Того́жде, 9.

Не́смь дово́лен, Влады́ко Го́споди, да вни́деши под кро́в души́ моея́; но поне́же хо́щеши Ты́ я́ко Человеколю́бец, жи́ти во мне́, дерза́я приступа́ю; повелева́еши, да отве́рзу две́ри, я́же Ты́ еди́н созда́л еси́, и вни́деши со человеколю́бием я́коже еси́; вни́деши и просвеща́еши помраче́нный мо́й по́мысл. Ве́рую, я́ко сие́ сотвори́ши: не бо блудни́цу, со слеза́ми прише́дшую к Тебе́, отгна́л еси́; ниже́ мытаря́ отве́ргл еси́ пока́явшася; ниже́ разбо́йника, позна́вша Ца́рство Твое́, отгна́л еси́; ниже́ гони́теля пока́явшася оста́вил еси́, е́же бе́: но от покая́ния Тебе́ прише́дшия вся́, в ли́це Твои́х друго́в вчини́л еси́, Еди́н сы́й благослове́нный всегда́, ны́не и в безконе́чныя ве́ки. Ами́нь.

Того́жде, 10.

Го́споди Иису́се Христе́, Бо́же мо́й, осла́би, оста́ви, очи́сти и прости́ ми́, гре́шному, и непотре́бному, и недосто́йному рабу́ Твоему́, прегреше́ния, и согреше́ния и грехопаде́ния моя́, ели́ка Ти́ от ю́ности моея́, да́же до настоя́щаго дне́ и часа́ согреши́х: а́ще в ра́зуме и в неразу́мии, а́ще в словесе́х или́ де́лех, или́ помышле́ниих и мы́слех, и начина́ниих, и все́х мои́х чу́вствах. И моли́твами безсе́менно ро́ждшия Тя́, Пречи́стыя и Присноде́вы Мари́и, Ма́тере Твоея́, еди́ныя непосты́дныя наде́жды и предста́тельства и спасе́ния моего́, сподо́би мя́ неосужде́нно причасти́тися пречи́стых, безсме́ртных, животворя́щих и стра́шных Твои́х Та́инств, во оставле́ние грехо́в и в жи́знь ве́чную: во освяще́ние и просвеще́ние, кре́пость, исцеле́ние, и здра́вие души́ же и те́ла, и в потребле́ние и всесоверше́нное погубле́ние лука́вых мои́х помысло́в, и помышле́ний, и предприя́тий, и нощны́х мечта́ний, те́мных и лука́вых духо́в; я́ко Твое́ е́сть Ца́рство, и си́ла, и сла́ва, и че́сть, и поклоне́ние, со Отце́м и Святы́м Твои́м Ду́хом, ны́не и при́сно и во ве́ки веко́в. Ами́нь.

Моли́тва ина́я Иоа́нна Дамаски́на, 11.

Пред две́рьми хра́ма Твоего́ предстою́ и лю́тых помышле́ний не отступа́ю; но Ты́, Христе́ Бо́же, мытаря́ оправди́вый, и ханане́ю поми́ловавый, и разбо́йнику рая́ две́ри отве́рзый, отве́рзи ми́ утро́бы человеколю́бия Твоего́ и приими́ мя́, приходя́ща и прикаса́ющася Тебе́, я́ко блудни́цу и кровоточи́вую: о́ва у́бо кра́я ри́зы Твоея́ косну́вшися, удо́бь исцеле́ние прия́т, о́ва же пречи́стеи Твои́ но́зе удержа́вши, разреше́ние грехо́в понесе́. А́з же, окая́нный, все́ Твое́ Те́ло дерза́я восприя́ти, да не опале́н бу́ду; но приими́ мя́, я́коже о́ныя, и просвети́ моя́ душе́вныя чу́вства, попаля́я моя́ грехо́вныя вины́, моли́твами безсе́менно Ро́ждшия Тя́ и небе́сных си́л; я́ко благослове́н еси́ во ве́ки веко́в. Ами́нь.

Моли́тва ина́я, Златоу́стаго.

Ве́рую, Го́споди, и испове́дую, я́ко Ты́ еси́ вои́стинну Христо́с, Сы́н Бо́га жива́го, прише́дый в ми́р гре́шныя спасти́, от ни́хже пе́рвый е́смь а́з. Еще́ ве́рую, я́ко сие́ е́сть са́мое пречи́стое Те́ло Твое́, и сия́ е́сть са́мая честна́я Кро́вь Твоя́. Молю́ся у́бо Тебе́: поми́луй мя́ и прости́ ми́ прегреше́ния моя́, во́льная и нево́льная, я́же сло́вом, я́же де́лом, я́же ве́дением и неве́дением, и сподо́би мя́ неосужде́нно причасти́тися пречи́стых Твои́х Та́инств, во оставле́ние грехо́в и в жи́знь ве́чную. Ами́нь.

Приходя́й же причасти́тися, глаго́ли в себе́ настоя́щия стихи́ Метафра́ста:

Се́ приступа́ю к Боже́ственному Причаще́нию.

Соде́телю, да не опали́ши мя́ приобще́нием:

О́гнь бо еси́, недосто́йныя попаля́яй.

Но у́бо очи́сти мя́ от вся́кия скве́рны.

Та́же па́ки глаго́ли:

Ве́чери Твоея́ та́йныя дне́сь, Сы́не Бо́жий, / прича́стника мя́ приими́; / не бо враго́м Твои́м та́йну пове́м, ни лобза́ния Ти́ да́м, я́ко Иу́да, / но я́ко разбо́йник испове́даю Тя́: / помяни́ мя́, Го́споди, во Ца́рствии Твое́м.

Па́ки стихи́ сия́:

Боготворя́щую Кро́вь ужасни́ся челове́че, зря́,

О́гнь бо е́сть, недосто́йныя попаля́яй.

Боже́ственное Те́ло и обожа́ет мя́ и пита́ет:

Обожа́ет ду́х, у́м же пита́ет стра́нно.

Та́же тропари́:

Услади́л мя́ еси́ любо́вию, Христе́, / и измени́л мя́ еси́ Боже́ственным Твои́м раче́нием; / но попали́ огне́м невеще́ственным грехи́ моя́, / и насы́титися е́же в Тебе́ наслажде́ния сподо́би: / да лику́я возвелича́ю, Бла́же, два́ прише́ствия Твоя́.

Во све́тлостех Святы́х Твои́х ка́ко вни́ду, недосто́йный? / А́ще бо дерзну́ совни́ти в черто́г, оде́жда мя́ облича́ет, я́ко не́сть бра́чна, / и свя́зан изве́ржен бу́ду от А́нгелов. / Очи́сти, Го́споди, скве́рну души́ моея́, / и спаси́ мя́, я́ко Человеколю́бец.

Та́же моли́тву:

Влады́ко Человеколю́бче, Го́споди Иису́се Христе́ Бо́же мо́й, да не в су́д ми́ бу́дут Свята́я сия́, за е́же недосто́йну ми́ бы́ти: но во очище́ние и освяще́ние души́ же и те́ла, и во обруче́ние бу́дущия жи́зни и Ца́рствия. Мне́ же, е́же прилепля́тися Бо́гу, бла́го е́сть, полага́ти во Го́споде упова́ние спасе́ния моего́.

И па́ки: Ве́чери Твоея́ та́йныя дне́сь, Сы́не Бо́жий, / прича́стника мя́ приими́; / не бо враго́м Твои́м та́йну пове́м, / ни лобза́ния Ти́ да́м, я́ко Иу́да, / но я́ко разбо́йник испове́даю Тя́: / помяни́ мя́, Го́споди, во Ца́рствии Твое́м.

Егда́ же получи́ши до́браго причаще́ния,

Животворя́щих та́инственных дарова́ний,

Воспо́й а́бие, благодари́ вельми́,

И сия́ те́пле от души́ Бо́гу глаго́ли:

Сла́ва Тебе́, Бо́же. Сла́ва Тебе́, Бо́же. Сла́ва Тебе́, Бо́же.

Та́же благода́рственную сию́ моли́тву:

Благодарю́ Тя́, Го́споди Бо́же мо́й, я́ко не отри́нул мя́ еси́ гре́шнаго, но о́бщника мя́ бы́ти святы́нь Твои́х сподо́бил еси́. Благодарю́ Тя́, я́ко мене́ недосто́йнаго, причасти́тися пречи́стых Твои́х и небе́сных Даро́в сподо́бил еси́. Но Влады́ко Человеколю́бче, на́с ра́ди уме́рый же и воскресы́й, и дарова́вый на́м стра́шная сия́ и животворя́щая Та́инства, во благодея́ние и освяще́ние ду́ш и теле́с на́ших, да́ждь бы́ти си́м и мне́ во исцеле́ние души́ же и те́ла, во отгна́ние вся́каго сопроти́внаго, в просвеще́ние о́чию се́рдца моего́, в ми́р душе́вных мои́х си́л, в ве́ру непосты́дну, в любо́вь нелицеме́рну, во исполне́ние прему́дрости, в соблюде́ние за́поведей Твои́х, в приложе́ние Боже́ственныя Твоея́ благода́ти, и Твоего́ Ца́рствия присвое́ние, да во святы́ни Твое́й те́ми сохраня́емь, Твою́ благода́ть помина́ю всегда́, и не ктому́ себе́ жи́ву, но Тебе́, на́шему Влады́це и Благоде́телю; и та́ко сего́ жития́ изше́д о наде́жди живота́ ве́чнаго, в присносу́щный дости́гну поко́й, иде́же пра́зднующих гла́с непреста́нный, и безконе́чная сла́дость зря́щих Твоего́ лица́ добро́ту неизрече́нную. Ты́ бо еси́ и́стинное жела́ние, и неизрече́нное весе́лие лю́бящих Тя́, Христе́ Бо́же на́ш, и Тя́ пое́т вся́ тва́рь во ве́ки. Ами́нь.

Вели́каго Васи́лия, 2.

Влады́ко Христе́ Бо́же, Царю́ веко́в и Соде́телю все́х, благодарю́ Тя́ о все́х, я́же ми́ еси́ по́дал благи́х, и о причаще́нии пречи́стых и животворя́щих Твои́х Та́инств. Молю́ у́бо Тя́, Бла́же и Человеколю́бче: сохрани́ мя́ под кро́вом Твои́м, и в се́ни крилу́ Твое́ю. И да́руй ми́ чи́стою со́вестию, да́же до после́дняго моего́ издыха́ния, досто́йно причаща́тися Святы́нь Твои́х, во оставле́ние грехо́в и в жи́знь ве́чную. Ты́ бо еси́ Хле́б живо́тный, исто́чник святы́ни, пода́тель благи́х, и Тебе́ сла́ву возсыла́ем, со Отце́м и Святы́м Ду́хом, ны́не и при́сно, и во ве́ки веко́в. Ами́нь.

Метафра́ста, по стихо́м, 3.

Да́вый пи́щу мне́ пло́ть Твою́ во́лею, о́гнь сы́й и опаля́яй недосто́йныя, да не опали́ши мене́, Соде́телю мо́й; па́че же пройди́ во у́ды моя́, во вся́ соста́вы, во утро́бу, в се́рдце. Попали́ те́рние все́х мои́х прегреше́ний. Ду́шу очи́сти, освяти́ помышле́ния. Соста́вы утверди́ с костьми́ вку́пе. Чу́вств просвети́ просту́ю пятери́цу. Всего́ мя́ спригвозди́ стра́ху Твоему́. При́сно покры́й, соблюди́ же, и сохрани́ мя́ от вся́каго де́ла и сло́ва душетле́ннаго. Очи́сти, и омы́й, и украси́ мя́: удобри́, вразуми́, и просвети́ мя́. Покажи́ мя́ Твое́ селе́ние еди́наго Ду́ха, и не ктому́ селе́ние греха́. Да я́ко Твоего́ до́му вхо́дом причаще́ния, я́ко огня́ мене́ бежи́т вся́к злоде́й, вся́ка стра́сть. Моли́твенники Тебе́ приношу́ вся́ святы́я, чинонача́лия же безпло́тных, Предте́чу Твоего́, прему́дрыя апо́столы, к си́м же Твою́ нескве́рную, чи́стую Ма́терь, и́хже мольбы́, Благоутро́бне, приими́, Христе́ мо́й, и сы́ном све́та соде́лай Твоего́ служи́теля. Ты́ бо еси́ освяще́ние, и Еди́ный на́ших, Бла́же, ду́ш и све́тлость, и Тебе́ лепоподо́бно я́ко Бо́гу и Влады́це сла́ву вси́ возсыла́ем на вся́к де́нь.

Моли́тва ина́я.

Те́ло Твое́ Свято́е, Го́споди Иису́се Христе́ Бо́же на́ш, да бу́дет ми́ в живо́т ве́чный, и Кро́вь Твоя́ Честна́я во оставле́ние грехо́в: бу́ди же ми́ благодаре́ние сие́ в ра́дость, здра́вие и весе́лие; в стра́шное же и второ́е прише́ствие Твое́ сподо́би мя́, гре́шнаго, ста́ти одесну́ю сла́вы Твоея́, моли́твами Пречи́стыя Твоея́ Ма́тери, и все́х святы́х.

Моли́тва ина́я, ко Пресвято́й Богоро́дице.

Пресвята́я Влады́чице Богоро́дице, све́те помраче́нныя моея́ души́, наде́ждо, покро́ве, прибе́жище, утеше́ние, ра́дование мое́, благодарю́ Тя́, я́ко сподо́била мя́ еси́ недосто́йнаго, прича́стника бы́ти Пречи́стаго Те́ла, и Честны́я Кро́ве Сы́на Твоего́. Но ро́ждшая и́стинный Све́т, просвети́ моя́ у́мныя о́чи се́рдца; Я́же исто́чник безсме́ртия ро́ждшая, оживотвори́ мя́ умерщвле́ннаго грехо́м; Я́же ми́лостиваго Бо́га любоблагоутро́бная Ма́ти, поми́луй мя́, и да́ждь ми́ умиле́ние, и сокруше́ние в се́рдце мое́м, и смире́ние в мы́слех мои́х, и воззва́ние в плене́ниих помышле́ний мои́х; и сподо́би мя́ до после́дняго издыха́ния, неосужде́нно приима́ти Пречи́стых Та́ин освяще́ние во исцеле́ние души́ же и те́ла. И пода́ждь ми́ сле́зы покая́ния и испове́дания, во е́же пе́ти и сла́вити Тя́ во вся́ дни́ живота́ моего́, я́ко благослове́нна и препросла́вленна еси́ во ве́ки. Ами́нь.

Та́же: Ны́не отпуща́еши раба́ Твоего́, Влады́ко, / по глаго́лу Твоему́ с ми́ром, / я́ко ви́деста о́чи мои́ спасе́ние Твое́, / е́же еси́ угото́вал пред лице́м все́х люде́й, / све́т во открове́ние язы́ков / и сла́ву люде́й Твои́х Изра́иля.

Трисвято́е. И по О́тче на́ш:

Тропа́рь свято́му Иоа́нну Златоу́стому, гла́с 8:

У́ст твои́х, я́коже све́тлость огня́, / возсия́вши благода́ть, вселе́нную просвети́; / не сребролю́бия ми́рови сокро́вища сниска́, / высоту́ на́м смиренному́дрия показа́, / но твои́ми словесы́ наказу́я, о́тче Иоа́нне Златоу́сте, / моли́ Сло́ва Христа́ Бо́га спасти́ся душа́м на́шим.

Сла́ва, конда́к, гла́с 6:

От небе́с прия́л еси́ Боже́ственную благода́ть, / и твои́ми устна́ми вся́ учи́ши / покланя́тися в Тро́ице Еди́ному Бо́гу, / Иоа́нне Златоу́сте всеблаже́нне, преподо́бне, досто́йно хва́лим тя́: / еси́ бо наста́вник, я́ко Боже́ственная явля́я.

И ны́не: Взбра́нной воево́де или́ О Тебе́ ра́дуется: Или́: Предста́тельство христиа́н непосты́дное, / хода́тайство ко Творцу́ непрело́жное, / не пре́зри гре́шных моле́ний гла́сы, / но предвари́, я́ко Блага́я, на по́мощь на́с, ве́рно зову́щих Ти́: / ускори́ на моли́тву и потщи́ся на умоле́ние, / предста́тельствующи при́сно, Богоро́дице, чту́щих Тя́.

или́ конда́к хра́ма, а́ще е́сть Богоро́дицы, или́ пра́здника настоя́щаго, а́ще бу́дет Госпо́дский или́ Богоро́дичен.

А́ще же бу́дет свята́го Васи́лия литурги́я, чти́ свято́му Васи́лию тропа́рь, гла́с 1:

Во всю́ зе́млю изы́де веща́ние твое́, / я́ко прие́мшую сло́во твое́, / и́мже боголе́пно научи́л еси́, / естество́ су́щих уясни́л еси́, / челове́ческия обы́чаи украси́л еси́, / ца́рское свяще́ние, о́тче преподо́бне, / моли́ Христа́ Бо́га, / спасти́ся душа́м на́шим.

Сла́ва, конда́к, гла́с 4:

Яви́лся еси́ основа́ние непоколеби́мое Це́ркве, / подая́ все́м некра́домое госпо́дство челове́ком, / запечатле́я твои́ми веле́ньми, / небоявле́нне Васи́лие преподо́бне.

А́ще же бу́дет литурги́я Преждеосвяще́нных, свято́му Григо́рию тропа́рь гла́с 4:

И́же от Бо́га свы́ше Боже́ственную благода́ть восприе́м, сла́вне Григо́рие, / и Того́ си́лою укрепля́емь, ева́нгельски ше́ствовати изво́лил еси́. / Отону́дуже у Христа́ возме́здие трудо́в прия́л еси́, всеблаже́нне: / Его́же моли́, да спасе́т души́ на́ша.

Сла́ва, конда́к, гла́с 3:

Подобонача́льник показа́лся еси́ Нача́льника па́стырем Христа́, / и́ноков чреды́, о́тче Григо́рие, / ко огра́де небе́сней наставля́я, / и отту́ду научи́л еси́ ста́до Христо́во за́поведем Его́: / ны́не же с ни́ми ра́дуешися, / и лику́еши в небе́сных кро́вех.

И ны́не, я́коже пре́жде положи́ся. Го́споди, поми́луй, 12.

Сла́ва и ны́не:

Честне́йшую Херуви́м / и сла́внейшую без сравне́ния Серафи́м, / без истле́ния Бо́га Сло́ва ро́ждшую, / су́щую Богоро́дицу Тя́ велича́ем. И отпу́ст.

По служе́нии же да храни́т себе́ иере́й в трезве́нии и воздержа́нии, и немногоглаго́лании, дабы́ в то́й де́нь че́стно соблю́л в себе́ Христа́ прия́таго.

Архиере́ю И́стинный Иису́се Христе́, принесы́й Себе́ Бо́гу Отцу́ на олтаре́ кре́стном же́ртву чи́сту, непоро́чну, о на́с, гре́шных, и да́вый на́м Те́ло Твое́ я́сти, и Кро́вь Твою́ пи́ти, положи́вый та́инство в си́ле Ду́ха Свята́го, глаго́ля сие́: ели́жды а́ще твори́те, в Мое́ воспомина́ние твори́те: молю́ чрез Кро́вь Твою́ дража́йшую, ве́лию спасе́ния на́шего це́ну, молю́ чрез сию́ ди́вную и неисповеди́мую любо́вь, е́юже на́с недосто́йных та́ко возлюби́л еси́, я́ко омы́л еси́ на́с от грехо́в на́ших Кро́вию Твое́ю: научи́ мя́ недосто́йнаго раба́ Твоего́, его́же при ины́х Твои́х дарова́ниях, в чи́н свяще́нства, не по де́лом мои́м, но по еди́ной Твое́й благоизво́лил еси́ призва́ти ми́лости: научи́ мя́ Ду́хом Твои́м толи́кую та́йну соверша́ти, сицево́ю че́стию и благогове́нием, сицевы́м благоче́стием и стра́хом, и́миже досто́ит твори́ти. Сотвори́ мя́, Го́споди Иису́се Христе́, благода́тию Твое́ю всегда́ о вели́честве та́йны сея́ ве́ровати и разуме́ти, чу́вствовати, и тве́рдо держа́ти, глаго́лати и мы́слити Тебе́ подоба́ющая, и души́ мое́й поле́зная. Да вни́дет в се́рдце мое́ Ду́х Тво́й благи́й, глася́й безгла́сне, глаго́ляй вся́ку и́стину толи́ких та́инств, я́же углуби́шася зело́ и боже́ственным прикрове́на кро́вом. Мно́гаго ра́ди милосе́рдия Твоего́ благоволи́ мне́, ны́не и всегда́ чи́стым се́рдцем и мы́слию, слу́жбы соверша́ти священноде́йствие. Очи́сти се́рдце от нечи́стых, ме́рзских, пра́здных, и вре́дных помышле́ний. Огради́, святы́х а́нгел ве́рным хране́нием и кре́пким ополче́нием: да врази́ все́х бла́г посра́млени отбежа́т си́лою толи́каго та́инства, и руко́ю свята́го а́нгела Твоего́, отста́ви от мене́, Христе́ мо́й, и от все́х рабо́в Твои́х ду́ха горды́ни, тщесла́вия, за́висти, я́рости, блуда́, нечистоты́, неве́рия и хулы́, да постыдя́тся гоня́щии на́с, и да поги́бнут погуби́ти на́с тща́щиися.

Царю́ си́л, чистоты́ и целому́дрия Люби́телю, Бо́же, росо́ю свы́ше благослове́ния Твоего́, погаси́ в пло́ти мое́й ве́сь пла́мень стра́стный, я́ко да живе́т во мне́ всеце́лая души́ и те́ла чистота́, с про́чими дарова́нии Твои́ми Тебе́ в пра́вде прия́тными: да те́лом нескве́рным, и се́рдцем чи́стым, возмогу́ Тебе́ принести́ же́ртву хвале́ния, с коли́ким се́рдца сокруше́нием, сле́з излия́нием, с каково́ю по́честию и стра́хом, в коли́кой пло́ти и ду́ха чистоте́, сие́ пренебе́сное боже́ственное до́лжно е́сть наверша́тися приноше́ние, иде́же Те́ло Твое́ суще́ственне я́стся, и Кро́вь Твоя́ суще́ственне пие́тся, иде́же го́рняя до́льним совокупля́ются, иде́же самоли́чне предстоя́т а́нгели, иде́же иере́й и же́ртва чуде́сне и неизрече́нне, Ты́ Са́м предложе́нный. И кто́ досто́йне сие́ соверша́ти возмо́жет, а́ще не Ты́ Са́м, Всемоги́й Го́споди, принося́щаго досто́йна сотвори́ши? Ве́м, и и́стинно изве́стен е́смь, и сие́ милосе́рдию Твоему́ испове́дую, я́ко не́смь досто́ин мно́жества ра́ди грехо́в и безчи́сленных прегреше́ний мои́х к толи́ким та́йнам приступи́ти, но ве́м вои́стинну, и ве́рую от всего́ се́рдца, и усты́ испове́дую, я́ко си́лен мя́ еси́ удосто́ити, Са́м Еди́н, в беззако́ниих зача́таго и рожде́ннаго моги́й очи́стити. Ра́ди сего́ всемогу́тства Твоего́ Тебе́ молю́: благоволи́ мне́ гре́шному небе́сную сию́ же́ртву со стра́хом и тре́петом, чи́стою со́вестию, сле́з излия́нием, в ра́дости духо́вной и весе́лии боже́ственном приноси́ти: да ощути́т у́м мо́й блаже́нную прише́ствия Твоего́ сла́дость и ополче́ние святы́х а́нгел Твои́х о́крест мене́:

А́з бо, Го́споди, помина́я спаси́тельныя Твоя́ Стра́сти, ко олтарю́ Твоему́ приступа́ю, а́ще и недосто́йный, да принесу́ Тебе́ же́ртву от Тебе́ пре́данную, и приноси́тися в воспомина́ние Твое́ о спасе́нии на́шем уста́вленную. Приими́ у́бо сию́, молю́ Тя́, Бо́же мо́й, о Це́ркви Святе́й Твое́й, и о все́х лю́дех, и́хже Честно́ю Твое́ю снабде́л еси́ Кро́вию: и зане́же мя́ гре́шника между́ Тобо́ю и о́неми сре́дственна хода́тая бы́ти восхоте́л еси́, а́ще благи́х де́л во мне́ свиде́тельства не обрета́еши, служе́ния примире́ния вве́реннаго мне́ да не отрече́шися: я́ко да не моего́ ра́ди недосто́инства, цены́ спасе́ния своего́ отщетя́тся, и́хже ра́ди Са́м спаси́тельная же́ртва и искупле́ние изво́лил еси́ бы́ти.

Приношу́ у́бо, Го́споди, [а́ще благоволи́ши ми́лостивно призре́ти] ско́рби люде́й, плене́нных воздыха́ния, страда́ния убо́гих, ну́жды путеше́ствующих, немощны́х ско́рби, ста́рых не́мощи, рыда́ния младе́нец, обе́ты де́в, моли́твы вдо́в, и сиро́т умиле́ние. Ты́ бо ми́луеши вся́, и ничто́же от Тебе́ созда́нных презира́еши. Помяни́, ки́й е́сть соста́в на́ш, я́ко Ты́ Оте́ц на́ш еси́: не прогне́вайся на ны́ зело́, ни утро́бы щедро́т Твои́х затвори́ от на́с Го́споди, не бо в пра́вдах на́ших излива́ем моли́твы на́шя пред лице́м Твои́м, но в щедро́тах Твои́х мно́гих. Отими́ от на́с, Го́споди, беззако́ния на́ша, и огне́м Свята́го Твоего́ Ду́ха в на́с ми́лостивне испепели́: отими́ се́рдце ка́менное от пло́ти на́шея, и да́ждь се́рдце плотяно́е боя́щееся Тебе́, любящее, почита́ющее, Тебе́ после́дующее, и Тобо́ю пита́ющееся. Про́сим, Влады́ко, щедро́ты Твоя́, да лице́м све́тлым на достоя́ние Твое́, и́мени Твоему́ свято́му служе́ния ожидающее, воззре́ти благоволи́ши: и да ниеди́наго же моли́тва, ниеди́наго проше́ние отринове́нно бу́дет, Ты́ на́с научи́ моли́тися, е́же и Са́м гото́в слы́шиши, и проси́мая ми́лостивне исполня́еши.

Мо́лим Тя́, О́тче Святы́й, о душа́х ве́рных преста́вльшихся, я́ко да бу́дет и́м во избавле́ние, спасе́ние, отра́ду, и ве́чное весе́лие сие́ вели́кое благоче́стия та́инство: Го́споди Бо́же мо́й, бу́ди и́м дне́сь всеце́лое и соверше́нное утеше́ние, от Тебе́ Хле́ба И́стиннаго, Жива́го, с небесе́ сше́дшаго, и даю́щаго живо́т ми́рови, от пло́ти Твоея́ Святы́я, А́гнца нескве́рна, взе́млющаго грехи́ ми́ра. Напо́й и́х пото́ком бла́гости Твоея́, от прободе́ннаго Твоего́ ребра́ на Кресте́ исте́кшим, да те́м возвеселе́ни, ра́дуются во хвале́ и сла́ве Твое́й Свято́й.

Молю́ Го́споди, бла́гость Твою́: да прии́дет на хле́б се́й и ча́шу сию́ исполне́ние Божества́ Твоего́, да сни́дет та́кожде, Го́споди, Свята́го Твоего́ Ду́ха о́браз неви́димый, и непостижи́мая сла́ва, я́коже пре́жде на же́ртвы отце́в схожда́ше, и́же и приноше́ния сия́ на́ша, да сотвори́т Те́ло и Кро́вь Твою́, и мене́ недосто́йнаго служи́теля Твоего́ толи́кое соверша́ти научи́т та́инство: я́ко да благоприя́тне и ми́лостивне прии́меши от ру́к мои́х же́ртву во спасе́ние все́х живы́х и ме́ртвых.

Молю́ Тя́, Го́споди, сама́го ра́ди Святы́х Те́ла и Кро́ве Твоея́ та́инства, и́миже всегда́ в хра́ме Твое́м пита́еми и напая́еми, очища́еми, освяща́еми и обожа́еми быва́ем, да си́лою Твое́ю укрепле́н, благо́ю со́вестию ко олтарю́ Твоему́ приходя́, сия́ небе́сная та́инства име́ю в себе́ в живо́т и спасе́ние, по словеси́ свято́му Твоему́: Хле́б, его́же А́з да́м, Пло́ть Моя́ е́сть, Ю́же А́з да́м за живо́т ми́ра: яды́й Мя́ и то́й жи́в бу́дет Мене́ ра́ди. Хле́бе сладча́йший, уврачу́й устне́ се́рдца моего́, да чу́вствую во мне́ любве́ Твоея́ сла́дость: исцели́ вся́к неду́г, да кроме́ Тебе́, никоея́же пожела́ю красоты́. Хле́бе чисте́йший, вся́кия сла́дости и благово́ния преиспо́лненне, вни́ди в се́рдце мое́, и сла́достию благово́ния Твоего́ напо́лни вну́тренняя души́ моея́. Тобо́ю пита́ются а́нгели на небеси́ преизоби́льно: да насы́тится по си́ле свое́й Тобо́ю и пришле́ц челове́к на земли́. Хле́бе святы́й, Хле́бе живы́й, Хле́бе вожделе́нне, сходя́й с небесе́, и дая́й живо́т ми́рови, вни́ди в се́рдце мое́, и очи́сти мя́ от вся́кия скве́рны пло́ти и ду́ха: вни́ди в ду́шу мою́ внеу́ду и внутрьу́ду освяща́я и просвеща́я: бу́ди мое́й хране́ние всегда́шнее души́, и те́ла здра́вие. Отжени́ от мене́ находя́щих на мя́, да бежа́т от лица́ Твоего́ ненави́дящии мя́: да Тобо́ю огражде́н, с Тобо́ю прейду́ в ве́чное Твое́ ца́рствие, иде́же не покрове́нне, но лице́м к лицу́ Тебе́ у́зрим, егда́ преда́си ца́рство Бо́гу и Отцу́, да бу́дет Бо́г вся́ческая во все́х. До ны́не а́лчу и жа́жду, но тогда́ насы́щуся, внегда́ яви́т ми́ ся́ сла́ва Твоя́, в не́йже ца́рствуеши со Отце́м и Святы́м Ду́хом, во ве́ки, ами́нь.

и́хже поя́ху преподо́бнии отцы́ пусты́ннии во дни́ и в но́щи, о ни́хже воспомина́ется в кни́гах оте́ческих и в жития́х и муче́ниих святы́х мно́гих.

Се́й же чи́н принесе́ от святы́я го́ры преподо́бный Досифе́й архимандри́т Ки́ево-Пече́рский. его́же нача́ло:

А́ще иере́й, глаго́лет: Благослове́н Бо́г на́ш:

А́ще же несвяще́нный, глаго́лет:

Моли́твами святы́х оте́ц на́ших, Го́споди, Ии́сусе Христе́, Сы́не Бо́жии, поми́луй на́с, ами́нь. (покло́н)

Царю́ небе́сный, Уте́шителю, Ду́ше и́стинный, И́же везде́ сый и вся́ исполня́я, сокро́вище благи́х и жи́зни Пода́телю, прииди́ и всели́ся в ны́, и очи́сти ны́ от вся́кия скве́рны, и спаси́ Бла́же, душа́ на́ша.

Святы́й Бо́же: три́жды. Сла́ва и ны́не

Пресвята́я Тро́ице: Го́споди поми́луй. три́жды. Сла́ва и ны́не

О́тче на́ш: Го́споди, поми́луй, 12.

Сла́ва и ны́не: Прииди́те, поклони́мся:

Псало́м 26

Госпо́дь просвеще́ние мое́ и Спаси́тель мо́й, кого́ убою́ся? Госпо́дь Защи́титель животу́ моему́, от кого́ устрашу́ся? Внегда́ приближа́тися на мя́ зло́бующым, сне́сти пло́ти моя́, оскорбля́ющии мя́, и врази́ мои́, ти́и изнемого́ша и падо́ша. А́ще ополчи́тся на мя́ по́лк, не убои́тся се́рдце мое́, а́ще воста́нет на мя́ бра́нь, на На́нь а́з упова́ю. Еди́но проси́х от Го́спода, то́ взыщу́: е́же жи́ти ми́ в до́му Госпо́дни вся́ дни́ живота́ моего́, зре́ти ми́ красоту́ Госпо́дню и посеща́ти це́рковь святу́ю Его́. Я́ко скры́ мя́ в кро́ве Свое́м в де́нь зла́ моего́, покры́ мя́ в та́йне кро́ва Своего́. На ка́мень вознесе́ мя́, и ны́не се́ вознесе́ главу́ мою́ на враги́ моя́, обыдо́х и пожро́х в кро́ве Его́ же́ртву хвале́ния и воскликнове́ния, пою́ и воспою́ Го́сподеви. Услы́ши, Го́споди, гла́с мо́й, и́м же воззва́х, поми́луй мя́ и услы́ши мя́. Тебе́ рече́ се́рдце мое́: Го́спода взыщу́. Взыска́ Тебе́ лице́ мое́, лица́ Твоего́, Го́споди, взыщу́. Не отврати́ лица́ Твоего́ от мене́ и не уклони́ся гне́вом от раба́ Твоего́, помо́щник ми́ бу́ди, не отри́ни мене́, и не оста́ви мене́, Бо́же Спаси́телю мо́й. Я́ко оте́ц мо́й и ма́ти моя́ оста́виста мя́, Госпо́дь же восприя́т мя́. Законоположи́ ми́, Го́споди, в пути́ Твое́м и наста́ви мя́ на пу́ть пра́вый, вра́г мои́х ра́ди. Не преда́ждь мене́ в душа́х стужа́ющим ми́, я́ко воста́ша на мя́ свиде́тели непра́веднии, и солга́ непра́вда себе́. Ве́рую ви́дети блага́я Госпо́дня на земли́ живы́х. Потерпи́ Го́спода, мужа́йся, и да крепи́тся се́рдце твое́, и потерпи́ Го́спода.

Псало́м 31

Блаже́ни, и́м же отпусти́шася беззако́ния, и и́м же прикры́шася греси́. Блаже́н му́ж, ему́ же не вмени́т Госпо́дь греха́, ниже́ е́сть во усте́х его́ ле́сть. Я́ко умолча́х, обетша́ша ко́сти моя́, зову́щу ми́ ве́сь де́нь. Я́ко де́нь и но́щь отяготе́ на мне́ рука́ Твоя́, возврати́хся на стра́сть, егда́ унзе́ ми́ те́рн. Беззако́ние мое́ позна́х и греха́ моего́ не покры́х, ре́х: испове́м на мя́ беззако́ние мое́ Го́сподеви, и Ты́ отпусти́л еси́ нече́стие се́рдца моего́. За то́ помо́лится к Тебе́ вся́к преподо́бнии во вре́мя благопотре́бно, оба́че в пото́пе во́д мно́г, к нему́ не прибли́жатся. Ты́ еси́ прибе́жище мое́, от ско́рби одержа́щия мя́, ра́досте моя́, изба́ви мя́ от обыше́дших мя́. Вразумлю́ тя́ и наста́влю тя́ на пу́ть се́й, во́нь же по́йдеши, утвержу́ на тя́ о́чи Мои́. Не бу́дите я́ко ко́нь и меск, и́мже не́сть ра́зума, брозда́ми и уздо́ю че́люсти и́х востя́гнеши, не приближа́ющимся к тебе́. Мно́ги ра́ны гре́шному, упова́ющаго же на Го́спода ми́лость обы́дет. Весели́теся о Го́споде, и ра́дуйтеся, пра́веднии, и хва́литеся, вси́ пра́вии се́рдцем.

Псало́м 56

Поми́луй мя́, Бо́же, поми́луй мя́: я́ко на Тя́ упова́ душа́ моя́. И на се́нь крилу́ Твое́ю наде́юся, дóндеже пре́йдет беззако́ние. Воззову́ к Бо́гу Вы́шнему, Бо́гу, благоде́явшему мне́. Посла́ с Небесе́ и спа́се мя́, даде́ в поноше́ние попира́ющыя мя́. Посла́ Бо́г ми́лость Свою́ и и́стину Свою́, и изъя́т ду́шу мою́ от среды́ ски́мен, поспа́х смуще́н. Сы́нове челове́честии, зубы́ и́х ору́жия и стре́лы, и язы́к и́х ме́ч о́стр. Вознеси́ся на Небеса́, Бо́же, и по все́й земли́ сла́ва Твоя́. Се́ть угото́ваша нога́м мои́м, и смири́ша ду́шу мою́. Ископа́ша пред лице́м мои́м я́му и впадо́шася в ню́. Гото́во се́рдце мое́, Бо́же, гото́во се́рдце мое́, пою́ и воспою́ во сла́ве мое́й. Воста́ни сла́ва моя́, воста́ни псалти́рю и гу́сли, воста́ну ра́но. Испове́мся Тебе́ в лю́дех, Го́споди, пою́ Тебе́ во язы́цех. Я́ко возвели́чися до Небе́с ми́лость Твоя́, и да́же до о́блак и́стина Твоя́. Вознеси́ся на Небеса́, Бо́же, и по все́й земли́ сла́ва Твоя́.

Та́же, Трисвято́е, и по О́тче на́ш…

Тропари́, гла́с 1

Объя́тия О́тча отве́рсти ми́ потщи́ся, блу́дно изжи́х мое́ житие́, но на бога́тство неиждива́емое взира́ю щедро́т Твои́х, Спа́се: ны́не обнища́вшее мое́ се́рдце не пре́зри. Тебе́ бо, Го́споди, умиле́нием зову́: согреши́х, О́тче, на не́бо и пред Тобо́ю.

Сла́ва: Егда́ прии́деши, Бо́же, суди́ти на зе́млю со сла́вою, и вострепе́щут вся́ческая, река́ же о́гненная пред суди́щем потече́т, кни́ги разгну́тся, и та́йная облича́тся, тогда́ изба́ви мя́ огня́ негаси́маго, и сподо́би мя́ одесну́ю Тебе́ ста́ти, Судие́ пра́ведный.

И ны́не: Ма́терь Тя́ Бо́жию мо́лим вси́ Де́во; в щедро́ты Твои́ прибега́ем любо́вию и в благода́ть Твою́; Тебе́ бо и́мамы гре́шнии спасе́ние, и Тебе́ стяжа́хом в напа́стех Еди́ну всенепоро́чную.

Посе́м: Го́споди, поми́луй, 30. Прииди́те, поклони́мся… три́жды.

Псало́м 33

Благословлю́ Го́спода на вся́ко вре́мя, вы́ну хвала́ Его́ во усте́х мои́х. О Го́споде похва́лится душа́ моя́, да услы́шат кро́тцыи и возвеселя́тся. Возвели́чите Го́спода со мно́ю, и вознесе́м и́мя Его́ вку́пе. Взыска́х Го́спода и услы́ша мя́, и от все́х скорбе́й мои́х изба́ви мя́. Приступи́те к Нему́ и просвети́теся, и лица́ ва́ша не постыдя́тся. Се́й ни́щий воззва́, и Госпо́дь услы́ша и, и от все́х скорбе́й его́ спа́се и. Ополчи́тся А́нгел Госпо́день о́крест боя́щихся Его́, и изба́вит и́х. Вкуси́те и ви́дите, я́ко бла́г Госпо́дь, блаже́н му́ж, и́же упова́ет На́нь. Бо́йтеся Го́спода, вси́ святи́и Его́, я́ко не́сть лише́ния боя́щимся Его́. Бога́тии обнища́ша и взалка́ша, взыска́ющии же Го́спода не лиша́тся вся́каго бла́га. Прии́дете, ча́да, послу́шайте мене́, стра́ху Госпо́дню научу́ ва́с. Кто́ е́сть челове́к хотя́й живо́т, любя́й дни́ ви́дети бла́ги? Удержи́ язы́к сво́й от зла́, и устне́ свои́, е́же не глаго́лати льсти́. Уклони́ся от зла́ и сотвори́ бла́го, взыщи́ ми́р, и пожени́ и. О́чи Госпо́дни на пра́ведныя, и у́ши Его́ в моли́тву и́х. Лице́ же Госпо́дне, на творя́щия зла́я, е́же потреби́ти от земли́ па́мять и́х. Воззва́ша пра́веднии, и Госпо́дь услы́ша и́х, и от все́х печа́лей и́х изба́ви и́х. Бли́з Госпо́дь сокруше́нных се́рдцем, и смире́нныя ду́хом спасе́т. Мно́ги ско́рби пра́ведным, и от все́х и́х изба́вит я́ Госпо́дь. Храни́т Госпо́дь вся́ ко́сти и́х, ни еди́на от ни́х сокруши́тся. Сме́рть гре́шников лю́та, и ненави́дящии пра́веднаго прегреша́т. Изба́вит Госпо́дь душа́ ра́б Свои́х, и не прегреша́т вси́, упова́ющии На́нь.

Псало́м 38

Ре́х: сохраню́ пути́ моя́, е́же не согреша́ти язы́ком мои́м: положи́х усто́м мои́м храни́ло, внегда́ воста́ти гре́шному предо мно́ю. Онеме́х и смири́хся, и умолча́х от бла́г, и боле́знь моя́ обнови́ся. Согре́яся се́рдце мое́ во мне́, и в поуче́нии мое́м разгори́тся о́гнь. глаго́лах язы́ком мои́м: скажи́ ми́, Го́споди, кончи́ну мою́ и число́ дни́й мои́х, ко́е е́сть, да разуме́ю, чесо́ лиша́юся а́з? Се́ пя́дию изме́рены положи́л еси́ дни́ моя́, и соста́в мо́й я́ко ни во что же пред Тобо́ю; оба́че вся́ческая суета́ вся́к челове́к живы́й. И́де у́бо о́бразом хо́дит челове́к, оба́че всу́е мяте́тся: сокро́вищствует, и не весть, кому́ собира́ет я́. И ны́не кто́ терпе́ние мое́, не Госпо́дь ли? и соста́в мо́й от Тебе́ е́сть. От все́х беззако́нии мои́х изба́ви мя́, поноше́ние безу́мному да́л мя́ еси́. Онеме́х и не отверзо́х у́ст мои́х, я́ко Ты́ сотвори́. Отста́ви от мене́ ра́ны Твоя́, от кре́пости бо руки́ Твоея́ а́з исчезо́х. Во обличе́нии о беззако́нии показа́л еси́ челове́ка, и иста́ял еси́, я́ко паучи́ну, ду́шу его́; оба́че всу́е вся́к челове́к. Услы́ши моли́тву мою́ Го́споди, и моле́ние мое́ внуши́; сле́з мои́х не премолчи́ши, я́ко пресе́льник а́з от Тебе́ и пришле́ц, я́коже вси́ отцы́ мои́. Осла́би ми́, да почи́ю, пре́жде да́же не отъиду, и к тому́ не бу́ду.

Псало́м 40

Блаже́н разумева́яй на ни́ща и убо́га, в де́нь лю́т изба́вит и Госпо́дь. Госпо́дь сохрани́т и, и живи́т и, и ублажи́т и на земли́, и не преда́ст его́ в руки́ враго́в его́. Госпо́дь помо́жет ему́ на одре́ боле́зни его́; все́ ло́же его́ обрати́л еси́ в боле́знь его́. А́з ре́х: Го́споди, поми́луй мя́, исцели́ ду́шу мою́, я́ко согреши́х Ти́. Врази́ мои́ ре́ша мне́ зла́я: когда́ у́мрет и поги́бнет и́мя его́? И вхожда́ше ви́дети; всу́е глаго́лаше: се́рдце его́ собра́ беззако́ние ему́; исхожда́ше во́н, и глаго́лаше вку́пе. На мя́ шепта́ху вси́ врази́ мои́, на мя́ помышля́ху зла́я мне́. Сло́во законопресту́пное возложи́ша на мя́, еда́ спя́й не приложи́т воскре́снути. И́бо челове́к ми́ра моего́, на́нь же упова́х, яды́й хле́бы моя́, возвели́чи на мя́ пя́ту. Ты́ же, Го́споди, поми́луй мя́ и воздви́гни мя́ и возда́м и́м. О се́м позна́х, я́ко восхоте́ мя́; я́ко не возра́дуется вра́г мо́й о мне́. Мене́ же за незло́бие прия́т, и утверди́л мя́ еси́ пред Собо́ю в ве́к. Благослове́н Госпо́дь Бо́г Изра́илев от ве́ка и до ве́ка, бу́дет, бу́дет.

Та́же, Трисвято́е, и по О́тче на́ш…

Тропари́, гла́с 4:

Смире́нную ду́шу мою́ посети́ Го́споди, и́же во гресе́х житие́ все́ ижди́вшу. Но я́ко блудни́цу приими́ мене́ и спаси́ мя́.

Сла́ва: Все́ житие́ мое́ блу́дно изжи́х Го́споди, со блудни́цами окая́нный; я́ко же блу́дный умиле́нием зову́: О́тче Небе́сный, согреши́х, очи́сти, и приими́ мя́, и не отри́ни мене́ от Себе́, от Тебе́ удали́вшагося, и непло́дными де́лы ны́не обнища́вша.

И ны́не: К Богоро́дице приле́жно ны́не притеце́м гре́шнии, со смире́нием припа́дающе и покая́нием, вопию́ще из глубины́ душе́вныя: Влады́чице, помози́, милосе́рдовавши на ны́, потщи́ся, я́ко изгибаем от мно́жества грехо́в, не отврати́ ра́б Свои́х то́щь, Тебе́ бо еди́ну помо́щницу и́мамы.

Посе́м: Го́споди, поми́луй, 30. Та́же, Прииди́те, поклони́мся… три́жды.

Псало́м 69

Бо́же, в по́мощь мою́ вонми́, Го́споди, по́мощи ми́ потщи́ся. Да постыдя́тся и посра́мятся и́щущии ду́шу мою́. Да возвратя́тся вспя́ть и постыдя́тся, хотя́щии ми́ зла́я. Да возвратя́тся а́бие стыдя́щеся глаго́лющии ми́: бла́го же, бла́го же. Да возра́дуются и возвеселя́тся о Тебе́, вси́ и́щущии Тебе́ Бо́же, и да глаго́лют вы́ну: да возвели́чится Госпо́дь, лю́бящии спасе́ние Твое́. А́з же ни́щ е́смь и убо́г, Бо́же, помози́ ми́. Помо́щник мо́й и Изба́витель мо́й еси́ Ты́, Го́споди, не закосни́.

Псало́м 70

На Тя́, Го́споди, упова́х, да не постыжу́ся в ве́к. Пра́вдою Твое́ю изми́ мя́ и изба́ви мя́. Приклони́ ко мне́ у́хо Твое́ и спаси́ мя́. Бу́ди ми́ в Бо́г Защи́титель и в ме́сто кре́пко спасти́ мя́, я́ко утвержде́ние мое́ и прибе́жище мое́ еси́ Ты́. Бо́же мо́й, изми́ мя́ из руки́ гре́шнаго, из руки́ законопресту́пнаго и оби́дящаго. Я́ко Ты́ еси́ терпе́ние мое́, Го́споди, Го́споди упова́ние мое́ от ю́ности моея́. В Тебе́ утверди́хся от утро́бы, от чре́ва ма́тере моея́ Ты́ еси́ мо́й Покрови́тель. О Тебе́ пе́ние мое́ вы́ну, я́ко чу́до бы́х мно́гим, и Ты́ помо́щник мо́й кре́пок. Да испо́лнятся уста́ моя́ похвалы́, я́ко да воспою́ сла́ву Твою́, ве́сь де́нь великоле́пие Твое́. Не отве́рзи мене́ во вре́мя ста́рости, внегда́ исчеза́ти кре́пости мое́й, не оста́ви мене́. Я́ко ре́ша врази́ мои́ мне́, и стрегу́щии ду́шу мою́ совеща́ша вку́пе. Глаго́люще: Бо́г оста́вил е́сть его́, пожене́те и и́мете его́, я́ко не́сть избавля́яй. Бо́же мо́й, не удали́ся от мене́, Бо́же мо́й, в по́мощь мою́ вонми́. Да постыдя́тся и исче́знут оклевета́ющии ду́шу мою́, да облеку́тся в сту́д и сра́м и́щущии зла́я мне́. А́з же всегда́ упова́ю на Тя́ и приложу́ на вся́ку похвалу́ Твою́. Уста́ моя́ возвестя́т пра́вду Твою́, ве́сь де́нь спасе́ние Твое́. Я́ко не позна́х кни́жная, вни́ду в си́ле Госпо́дни, Го́споди, помяну́ пра́вду Твою́ Еди́наго. Бо́же мо́й, я́же научи́л мя́ еси́ от ю́ности моея́, и до ны́не возвещу́ чудеса́ Твоя́. И да́же до ста́рости и престаре́ния, Бо́же мо́й, не оста́ви мене́, дóндеже возвещу́ мы́шцу Твою́ ро́ду всему́ гряду́щему. Си́лу Твою́ и пра́вду Твою́, Бо́же, да́же до вы́шних, я́же сотвори́л ми́ еси́ вели́чия. Бо́же, кто́ подо́бен Тебе́? Ели́ки яви́л ми́ еси́ ско́рби мно́ги и злы́, и обра́щься оживи́л мя́ еси́, и от бе́здн земли́ возведе́ мя́. Умно́жил еси́ на мне́ вели́чествие Твое́, и обра́щься уте́шил мя́ еси́, и от бе́здн земли́ па́ки возведе́ мя́. И́бо а́з испове́мся Тебе́ в лю́дех, Го́споди, в сосу́дех псало́мских и́стину Твою́, Бо́же, пою́ Тебе́ в гу́слех, Святы́й Изра́илев. Возра́дуетеся устне́ мои́, егда́ пою́ Тебе́, и душа́ моя́, ю́же еси́ изба́вил. Еще́ же и язы́к мо́й ве́сь де́нь поучи́тся пра́вде Твое́й, егда́ постыдя́тся и посра́мятся и́щущии зла́я мне́.

Псало́м 76

Гла́сом мои́м ко Го́споду воззва́х, гла́сом мои́м к Бо́гу, и вня́т ми́. В де́нь печа́ли моея́ Бо́га взыска́х, рука́ми мои́ма но́щию пред Ни́м, и не прельще́н бы́х. Отве́ржеся уте́шитися душа́ моя́, помяну́х Бо́га и возвесели́хся, возскорбе́х и пренеможе ду́х мо́й. Предвари́сте стражбы́ о́чи мои́, смути́хся и не глаго́лах. Помы́слих дни́ пе́рвыя, и ле́та ве́чная помяну́х, и поучи́хся. Но́щию се́рдцем мои́м глумля́хся, и тужа́ше ду́х мо́й. Еда́ во ве́ки отри́нет Госпо́дь, и не приложи́т благоволи́ти па́ки? Или́ до конца́ ми́лость Свою́ отсече́т, сконча́ глаго́л от ро́да в ро́д? Еда́ забу́дет уще́дрити Бо́г? Или́ удержи́т во гне́ве Свое́м щедро́ты Своя́? И ре́х: ны́не нача́х, си́ изме́на десни́ца Вы́шняго. Помяну́х дела́ Госпо́дня, я́ко помяну́ от зачала́ чуде́с Твои́х. И поучу́ся во все́х де́лех Твои́х, и в зачинаниих Твои́х поглумлю́ся. Бо́же, во святе́м пу́ть Тво́й; кто́ Бо́г ве́лии я́ко Бо́г на́ш? Ты́ еси́ Бо́г творя́й чудеса́. Позна́л еси́ в лю́дех си́лу Твою́, изба́вил еси́ мы́шцею Твое́ю лю́ди Твоя́, сы́ны Иа́ковля и Ио́сифовы. Ви́деша Тя́ во́ды, Бо́же, ви́деша Тя́ во́ды, и убоя́шася; смути́шася бе́здны мно́жеством шу́ма во́д. Гла́с да́ша о́блацы, и́бо стре́лы Твоя́ прехо́дят, гла́с гро́ма Твоего́ в колеси́. Освети́ша мо́лния Твоя́ вселе́нную, подвижася и тре́петна бы́сть земля́. В мо́ри путие́ Твои́, и стези́ Твоя́ в вода́х мно́гих, и стопы́ Твоя́ не позна́ются. Наста́вил еси́ я́ко овца́ лю́ди Твоя́, руко́ю Моисе́овою и Ааро́нею.

Та́же, Трисвято́е, и по О́тче на́ш…

Тропари́, гла́с 6:

Помышля́ю де́нь стра́шный и пла́чуся дея́нии мои́х лука́вых; ка́ко отвеща́ю Безсме́ртному Царю́? Ко́им ли дерзнове́нием воззрю́ на Судию́ блу́дный а́з? Благоутро́бный О́тче, Сы́не Единоро́дный, Душе́ Святы́й, поми́луй на́с.

Сла́ва: Во юдо́ли плаче́вне на ме́сте иде́же положи́, егда́ ся́деши Ми́лостиве, сотвори́ти пра́ведный су́д, не обличи́ моя́ сокрове́нная, ниже́ посрами́ мене́ пред а́нгелы, но пощади́ мя́, Бо́же, и поми́луй мя́.

И ны́не: Милосе́рдия две́ри отве́рзи на́м, Благослове́нная Богоро́дице Де́во, наде́ющиися на Тя́ не поги́бнем, но да изба́вимся Тобо́ю от бе́д, Ты́ бо еси́ спасе́ние ро́ду христиа́нскому.

Посе́м: Го́споди, поми́луй, 30,

Та́же, Прииди́те, поклони́мся… три́жды.

Посе́м моли́тва ни́щаго, егда́ уны́ет и пред Го́сподем пролие́т моле́ние свое́: 101

Го́споди, услы́ши моли́тву мою́, и во́пль мо́й к Тебе́ да прии́дет. Не отврати́ лица́ Твоего́ от мене́, в о́нь же де́нь а́ще скорблю́. Приклони́ ко мне́ у́хо Твое́, в о́нь же де́нь а́ще призову́ Тя́, ско́ро услы́ши мя́. Я́ко исчезо́ша я́ко ды́м дни́е мои́, и ко́сти моя́ я́ко суши́ло сосхо́шася. Уя́звен бы́х я́ко трава́, и и́зсше се́рдце мое́, я́ко забы́х сне́сти хле́б мо́й. От гла́са воздыха́ния моего́ прильпе́ ко́сть моя́ пло́ти мое́й. Уподо́бихся нея́сыти пусты́нному, бы́х я́ко нощны́й вра́н на ны́рищи. Бдех и бы́х я́ко пти́ца осо́бящаяся на зде́. Ве́сь де́нь поноша́ху ми́ врази́ мои́, и хва́лящии мя́ мно́ю кленя́хуся. Зане́ пе́пел я́ко хле́б ядя́х, и питие́ мое́ с пла́чем растворя́х. От лица́ гне́ва Твоего́ и я́рости Твоея́: я́ко возне́с низве́рже мя́. Дни́е мои́ я́ко се́нь уклони́шася, и а́з я́ко се́но изсхо́х. Ты́ же Го́споди, во ве́ки пребыва́еши, и па́мять Твоя́ в ро́д и ро́д. Ты́ воскре́с уще́дриши Сио́на, я́ко вре́мя уще́дрити его́, я́ко прии́де вре́мя. Я́ко благоволи́ша раби́ Твои́ ка́мение его́, и пе́рсть его́ уще́дрят. И убоя́тся язы́цы и́мени Госпо́дня, и вси́ ца́рие зе́мстии сла́вы Твоея́. Я́ко сози́ждет Госпо́дь Сио́на, и яви́тся в сла́ве Свое́й. Призре́ на моли́тву убо́гих, и не уничижи́ моле́ния и́х. Да напи́шется сие́ в ро́д и́н, и лю́дие зи́ждемии восхва́лят Го́спода. Я́ко призре́ с высоты́ святы́я Своея́, Госпо́дь с Небесе́ на зе́млю призре́. Услы́шати воздыха́ния окова́нных, разреши́ти сы́ны умерщвле́нных. Возвести́ти в Сио́не и́мя Госпо́дне, и хвалу́ Его́ во Иерусали́ме. Внегда́ собра́тися лю́дем вку́пе, и ца́рие рабо́тати Го́сподеви. Отвеща́ ему́ на пути́ кре́пости его́, умале́ние дни́й мои́х возвести́ ми́. Не возведи́ мене́ в преполове́ние дни́й мои́х, в ро́д и ро́д ле́та Твоя́. В нача́лех Ты́ Го́споди, зе́млю основа́, и дела́ ру́к Твои́х су́ть небеса́. Та́ поги́бнут, Ты́ же пребыва́еши; и вся́, я́ко ри́за обетша́ют, и я́ко оде́жду свие́ши и́х, и изменя́тся. Ты́ же то́жде еси́, и ле́та твоя́ не оскуде́ют. Сы́нове ра́б Твои́х вселя́тся, и се́мя и́х во ве́к испра́вится.

Моли́тва Манасси́и, царя́ Иуде́йска

Го́споди Вседержи́телю, Бо́же оте́ц на́ших, Авраа́мов и Исаа́ков и Иа́ковль, и се́мене и́х пра́веднаго. Сотвори́вый не́бо и зе́млю со все́ю ле́потою и́х, и сопный мо́ре сло́вом повеле́ния Твоего́. Затвори́вый бе́здну, и запечатле́в ю́ стра́шным и сла́вным и́менем Твои́м, Его́ же вся́ боя́тся, и трепе́щут от лица́ сла́вы Твоея́. Я́ко непостоя́нна велеле́пота сла́вы Твоея́, и не стерпи́м гне́в е́же на гре́шники преще́ния Твоего́. Безчи́сленна же и неизсле́дованна ми́лость обеща́ния Твоего́. Ты́ бо еси́ Госпо́дь вы́шнии, милосе́рд, долготерпели́в и многоми́лостив, и ка́яся о зло́бах челове́ческих. Но Ты́ Го́споди, по мно́жеству бла́гости Твоея́, обеща́ покая́ние и оставле́ние согре́шшим к Тебе́, и мно́жеством щедро́т Твои́х нарече́ покая́ние гре́шником во спасе́ние. Ты́ у́бо Го́споди Бо́же пра́ведных, не́си положи́л покая́ние пра́ведным Твои́м, Авраа́му и Исаа́ку и Иа́кову, не согреши́вшим пред Тобо́ю, но положи́л еси́ покая́ние мне́ гре́шному, зане́ согреши́х Ти́ па́че числа́ песка́ морска́го. Умно́жишася беззако́ния моя́ Го́споди, умно́жишася, и не́смь досто́ин воззре́ти и ви́дети высоту́ небе́сную, от мно́жества непра́вд мои́х свя́зан е́смь мно́гими ю́зами желе́зными. Я́ко не возвести́ ми́ главы́ моея́, и не́сть ми́ восклоне́ния. Зане́ прогне́вах я́рость Твою́, и лука́вое пред Тобо́ю сотвори́х. И не сотвори́х во́ли Твоея́, не сохрани́х повеле́нии Твои́х. И ны́не преклоня́ю коле́на се́рдца моего́, и молю́ я́же от Тебе́ бла́гость. Согреши́х Го́споди, согреши́х, и беззако́ния моя́ а́з све́м. Но прошу́ и молю́ся Тебе́: огради́ ми́ Го́споди, огради́ ми́, и не погуби́ мене́ со беззако́ньми мои́ми. Ниже́ в ве́к враждова́в соблюде́ши зо́л мои́х, и не осуди́ мене́ в преиспо́дних земли́. Зане́ Ты́ еси́ Бо́же, Бо́г ка́ющихся, да и на мне́ яви́ши всю́ бла́гость Твою́, я́ко недосто́йна су́ща спасе́ши мя́, по мно́зей ми́лости Твое́й. И восхвалю́ Тя́ всегда́, во вся́ дни́ живота́ моего́. Я́ко Тебе́ пою́т вся́ си́лы небе́сныя, и Твоя́ е́сть сла́ва во ве́ки, ами́нь.

Та́же:

Сла́ва в вы́шних Бо́гу, и на земли́ ми́р, в челове́цех благоволе́ние. Хва́лим Тя́, благослови́м Тя́ (покло́н), кла́няемтися, славосло́вим Тя́ (покло́н), благодари́м Тя́, вели́кия ра́ди сла́вы Твоея́ (покло́н). Го́споди, Царю́ небе́сный. Бо́же О́тче Вседержи́телю, и Го́споди Сы́не Единоро́дный, Иису́се Христе́, и Святы́й Душе́. Го́споди Бо́же А́гнче Бо́жии, Сы́не Оте́чь, взе́мляй гре́х ми́ра, поми́луй на́с, Взе́мляй грехи́ ми́ра, приими́ моли́твы на́ша; седя́й одесну́ю Отца́, поми́луй на́с. Я́ко Ты́ еси́ Еди́н Свя́т, Ты́ еси́ Еди́н Госпо́дь, Иису́с Христо́с, в сла́ву Бо́гу Отцу́, ами́нь.

На вся́к де́нь благослови́м Тя́, и восхва́лим и́мя Твое́ во ве́ки и в ве́к ве́ка.

Го́споди, прибе́жище бы́сть на́м в ро́д и ро́д. А́з ре́х: Го́споди, поми́луй мя́, и исцели́ ду́шу мою́, я́ко согреши́х Тебе́. Го́споди, к Тебе́ прибего́х, научи́ мя́ твори́ти во́лю Твою́, я́ко Ты́ еси́ Бо́г мо́й. Я́ко от Тебе́ е́сть исто́чник живота́, во све́те Твое́м у́зрим све́т. Проба́ви ми́лость Твою́ веду́щим Тя́.

Сподо́би, Го́споди, в де́нь се́й без греха́ сохрани́тися на́м. Благослове́н еси́, Го́споди, Бо́же оте́ц на́ших, и хва́льно, и просла́влено и́мя Твое́ во ве́ки, ами́нь.

Бу́ди, Го́споди, ми́лость Твоя́ на на́с, я́коже упова́хом на Тя́. Благослове́н еси́, Го́споди, научи́ на́с оправда́нием Твои́м. Благослове́н еси́, Влады́ко, вразуми́ на́с оправда́нием Твои́м. Благослове́н еси́, Святы́й, просвети́ на́с оправда́нием Твои́ми.

Го́споди, ми́лость Твоя́ во ве́ки, и дела́ ру́ку Твое́ю не пре́зри. Тебе́ подоба́ет хвала́, Тебе́ подоба́ет пе́ние, Тебе́ сла́ва подоба́ет, Отцу́, и Сы́ну, и Свято́му Ду́ху, ны́не и при́сно и во ве́ки веко́м, ами́нь.

Моли́тва вели́каго Евстратия

Велича́я велича́ю Тя́ Го́споди, я́ко призре́л еси́ на смире́ние мое́, и не́си мене́ затвори́л в рука́х вра́жиих, но спа́сл еси́ от бе́д ду́шу мою́. И ны́не Влады́ко, да покры́ет мя́ рука́ Твоя́, и да прии́дет на мя́ ми́лость Твоя́, я́ко смяте́ся душа́ моя́, и боле́зненна е́сть во исхожде́нии свое́м, от окая́ннаго ми́ и смра́днаго телесе́ сего́. Да не́когда лука́вый супоста́та сове́т сря́щет, и препне́т ю́ во тьме́, за неве́домыя и ведо́мыя в житии́ се́м бы́вшия ми́ грехи́. Ми́лостив ми́ бу́ди, Влады́ко, и да не у́зрит душа́ моя́ те́мнаго взо́ра лука́вых бесо́в, но да прии́мут ю́ а́нгели Твои́ све́тлии и пресве́тлии. Да́ждь сла́ву и́мени Твоему́ свято́му, и Твое́ю си́лою возведи́ мя́ на боже́ственный Тво́й су́д. Внегда́ судитимися, да не прии́мет мене́ рука́ кня́зя ми́ра сего́, исто́ргнути мя́ гре́шника во глубину́ а́дову. Но предста́ни ми́, и бу́ди мо́й Спаси́тель и Засту́пник. Теле́сныя бо сия́ му́ки, весе́лие су́ть рабо́м Твои́м. Поми́луй, Го́споди, оскверни́вшуюся страстьми́ жития́ сего́ ду́шу мою́, и чи́сту ю́ ра́ди покая́ния и испове́дания приими́. Я́ко благослове́н еси́ во ве́ки веко́м, ами́нь.

Та́же, Трисвято́е, и по О́тче на́ш…

Тропари́, гла́с 8

О́ком милосе́рдым Го́споди, ви́ждь мое́ смире́ние. Я́ко по ма́лу жи́знь моя́ скончава́ется, и от де́л не́сть спасе́ния. Сего́ ра́ди молю́ся: о́ком благоутро́бным Ти́ Го́споди, ви́ждь смире́ние мое́ и спаси́ мя́.

Сла́ва: Ве́к мо́й скончава́ется, и стра́шный Тво́й престо́л гото́вится, житие́ мое́ ми́мо хо́дит, су́д мене́ жде́т, претя́ мне́ о́гненною му́кою, и пла́менем негаси́мым. Слеза́м ту́чу пода́ждь ми́ и угаси́ его́ си́лу, хотя́й спасти́ся все́м челове́ком.

И ны́не: И́же на́с ра́ди рожде́йся от Де́вы, и распя́тие претерпе́в, Благи́и, испрове́ргий сме́ртию сме́рть, и воскресе́ние явле́й, я́ко Бо́г. Не пре́зри и́х же созда́ руко́ю Свое́ю. Яви́ человеколю́бие Свое́, Ми́лостиве. Приими́ Ро́ждшую Тя́ Богоро́дицу моля́щуюся за ны́, и спаси́ Спа́се на́ш, лю́ди согре́шшыя.

Та́же, Го́споди поми́луй, 30. И отпу́ст.

Помяни́, Го́споди Иису́се Христе́, Бо́же на́ш, ми́лости и щедро́ты Твоя́ от ве́ка су́щия, и́хже ра́ди и вочелове́чился еси́, и распя́тие и сме́рть, спасе́ния ра́ди пра́во в Тя́ ве́рующих, претерпе́ти изво́лил еси́; и воскре́с из ме́ртвых, возне́слся еси́ на небеса́ и седи́ши одесну́ю Бо́га Отца́, и призира́еши на смире́нныя мольбы́ все́м се́рдцем призыва́ющих Тя́; приклони́ у́хо Твое́, и услы́ши смире́нное моле́ние мене́, непотре́бнаго раба́ Твоего́, в воню́ благоуха́ния духо́внаго, Тебе́ за вся́ лю́ди Твоя́ принося́щаго.

И в пе́рвых помяни́ Це́рковь Твою́ Святу́ю, Собо́рную и Апо́стольскую, ю́же снабде́л еси́ честно́ю Твое́ю Кро́вию, и утверди́, и укрепи́, и разшири́, умно́жи, умири́ и непреобори́му а́довыми враты́ во ве́ки сохрани́; раздира́ния Церкве́й утиши́, шата́ния язы́ческая угаси́, и ересе́й воста́ния ско́ро разори́ и искорени́, и в ничто́же си́лою Свята́го Твоего́ Ду́ха обрати́. (Покло́н)

Спаси́, Го́споди, и поми́луй богохрани́мую страну́ на́шу, вла́сти и во́инство ея́, да ти́хое и безмо́лвное житие́ поживе́м во вся́ком благоче́стии и чистоте́. (Покло́н)

Спаси́, Го́споди, и поми́луй Вели́каго Господи́на и Отца́ на́шего Святе́йшаго Патриа́рха (и́мя), преосвяще́нныя митрополи́ты, архиепи́скопы и епи́скопы правосла́вныя, иере́и же и диа́коны, и ве́сь при́чет церко́вный, я́же поста́вил еси́ пасти́ слове́сное Твое́ ста́до, и моли́твами и́х поми́луй и спаси́ мя́ гре́шнаго. (Покло́н)

Спаси́, Го́споди, и поми́луй отца́ моего́ духо́внаго (и́мя), и святы́ми его́ моли́твами прости́ моя́ согреше́ния. (Покло́н)

Спаси́, Го́споди, и поми́луй роди́тели моя́ (имена́), бра́тию и сестры́, и сро́дники моя́ по пло́ти, и вся́ бли́жняя ро́да моего́, и дру́ги, и да́руй и́м ми́рная Твоя́ и преми́рная блага́я. (Покло́н)

Спаси́, Го́споди, и поми́луй ста́рцы и ю́ныя, ни́щия и сироты́ и вдови́цы, и су́щия в боле́зни и в печа́лех, беда́х же и ско́рбех, обстоя́ниих и плене́ниих, темни́цах же и заточе́ниих, изря́днее же в гоне́ниих, Тебе́ ра́ди и ве́ры правосла́вныя, от язы́к безбо́жных, от отсту́пник и от еретико́в, су́щия рабы́ Твоя́, и помяни́ я́, посети́, укрепи́, уте́ши, и вско́ре си́лою Твое́ю осла́бу, свобо́ду и изба́ву и́м пода́ждь. (Покло́н)

Спаси́, Го́споди, и поми́луй, по́сланныя в слу́жбу, путеше́ствующия, отцы́ и бра́тию на́шу, и вся́ правосла́вныя Христиа́ны. (Покло́н)

Спаси́, Го́споди, и поми́луй и́хже а́з безу́мием мои́м соблазни́х, и от пути́ спаси́тельнаго отврати́х, к дело́м злы́м и неподо́бным приведо́х; Боже́ственным Твои́м Про́мыслом к пути́ спасе́ния па́ки возврати́. (Покло́н)

Спаси́, Го́споди, и поми́луй ненави́дящия и оби́дящия мя́, и творя́щия ми́ напа́сти, и не оста́ви и́х поги́бнути мене́ ра́ди гре́шнаго. (Покло́н)

Отступи́вшия от Правосла́вныя ве́ры и поги́бельными ересьми́ ослепле́нныя, све́том Твоего́ позна́ния просвети́ и Святе́й Твое́й Апо́стольстей Собо́рней Це́ркви причти́. (Покло́н)

Помяни́, Го́споди, от жития́ сего́ отше́дшия святе́йшия патриа́рхи, преосвяще́нныя митрополи́ты, архиепи́скопы и епи́скопы Правосла́вныя, во иере́йстем же и при́чте церко́внем, и мона́шестем чи́не Тебе́ послужи́вшия, и в ве́чных Твои́х селе́ниих со святы́ми упоко́й. (Покло́н)

Помяни́, Го́споди, души́ усо́пших рабо́в Твои́х, роди́телей мои́х (имена́), и все́х сро́дников по пло́ти: и прости́ и́х вся́ согреше́ния во́льная и нево́льная, да́руя и́м Ца́рствие и прича́стие ве́чных Твои́х благи́х и Твоея́ безконе́чныя и блаже́нныя жи́зни наслажде́ние. (Покло́н)

Помяни́, Го́споди, и вся́ в наде́жди воскресе́ния и жи́зни ве́чныя усо́пшия, отцы́ и бра́тию на́шу, и сестры́, и зде́ лежа́щия и повсю́ду Правосла́вныя Христиа́ны, и со святы́ми Твои́ми, иде́же присеща́ет све́т лица́ Твоего́, всели́, и на́с поми́луй, я́ко Бла́г и Человеколю́бец. Ами́нь. (Покло́н)

Пода́ждь, Го́споди, оставле́ние грехо́в все́м пре́жде отше́дшим в ве́ре и наде́жди воскресе́ния, отце́м, бра́тиям и сестра́м на́шим, и сотвори́ и́м ве́чную па́мять. (Покло́н) (Повторяется три́жды)

Окончание моли́тв:

Досто́йно е́сть я́ко вои́стинну блажи́ти тя́ Богоро́дицу, присноблаже́нную и пренепоро́чную и ма́терь Бо́га на́шего. Честне́йшую херуви́м и сла́внейшую без сравне́ния серафи́м, без истле́ния Бо́га Сло́ва ро́ждшую, су́щую Богоро́дицу тя́ велича́ем.

Сла́ва и ны́не

Го́споди поми́луй, три́жды.

Го́споди Иису́се Христе́, Сы́не Бо́жий, моли́тв ра́ди пречи́стыя Твоея́ Ма́тере, преподо́бных и богоно́сных оте́ц на́ших и все́х святы́х, поми́луй на́с.

Ами́нь.