Чин бываемый на произведение игумена

Имеяй произвестися игумен приводимь бывает старшим из иерейскаго чина и протодиаконом ко архиерею среди церкве, идеже архиерей стоит во время входа со Евангелием, и покланяется олтарю и архиерею, по сем же приклоняет главу.

Архиерей знаменует его рукою по главе, трищи.

И полагает на главу его руку, протодиакону глаголющу: Господу помолимся.

Архиерей же глаголет молитву сию:

Боже, всегда человеков спасения промысл творяй и словесную сию паству купно во едино собравый, Сам, Владыко всяческих, безмерным Твоим человеколюбием непорочну сию соблюди, Твоя заповеди непрестанно хранящу, ко еже не погибнути от нея ни единому овчати и от волка расхищену быти; и раба Твоего сего имярек иеромонаха, егоже благоволил еси поставити над нею игумена, достойно покажи Твоея благости и всякими добродетельми украси, да чрез дела своя благий образ сущым под ним будет, якоже тем ревнителем быти непорочнаго его жительства и с ним неосужденно стати Страшному Твоему Судищу.

Возглас: Яко Твое есть Царство и сила и слава, Отца и Сына и Святаго Духа, ныне и присно, и во веки веков.

Певцы: Аминь.

Архиерей: Мир всем.

Певцы: И духови твоему.

Протодиакон: Главы ваша Господеви приклоните.

Певцы: Тебе, Господи.

Архиерей молится тайно:

Приклони, Господи, ухо Твое и услыши моление наше, и покажи раба Твоего сего игумена сея честныя обители, верна и мудра строителя вверившияся ему от Твоея благодати словесныя паствы, творяща во всех волю Твою и достойна Небеснаго Твоего Царствия бываемаго.

Возглас: Благодатию и щедротами и человеколюбием Единороднаго Сына Твоего, с Нимже благословен еси, со Всесвятым и Благим и Животворящим Твоим Духом, ныне и присно и во веки веков.

Певцы: Аминь.

И глаголет протодиакон велегласно: ІІовели, Преосвященнейший владыко.

Архиерей глаголет велегласно же:

Благодать Всесвятаго Духа чрез Нашу мерность производит тя игумена честныя обители Господа Бога и Спаса нашего Иисуса Христа глаголет именование обители [или]: Пресвятыя Владычицы нашея Богородицы глаголет именование обители, или святаго глаголет именование обители.

ЗРИ: аще произведенный во игумены не бысть прежде награжден наперсным игуменским крестом, архиерей зде возложит его нань.

Таже возложа руку архиерей на главу его, возглашает: Аксиос.

И певцы поют: Аксиос, трищи.

ЗРИ: И аще изволит архиерей, абие вручает игумену посох, глаголя: Приими сей жезл… Аще ли же ни, по отпусте литургии творит сие.

И поставляется с прочими игумены по чину, и идут во олтарь царскими дверьми, и действует со служащими по чину.

По скончании же Божественныя литургии произведенный во игумены, облечен во игуменскую мантию, исходит из олтаря и встает за солеей, позади себе имея и неких от братии.

Архиерей исходит святыми враты на солею и, приняв от посошника игуменский жезл, вручает его игумену, возглашая:

Приими сей жезл, имже утверждей паству твою да правиши, яко и слово имаши отдати за ню нашему Богу во дни Суда.

Произведенный игумен лобызает десницу архиереа, приемля жезл. Архиерей же глаголет поучение.