Чин благословения нежилого помещения

Иерей начинает: Благословен Бог наш:

Чтец: Царю Небесный: Трисвятое. Отче наш:

Возглас: Яко Твое есть Царство:

Господи, помилуй (12 раз).

Слава, и ныне:

Приидите, поклонимся Цареви нашему Богу.

Приидите, поклонимся и припадем Христу, Цареви нашему Богу.

Приидите, поклонимся и припадем Самому Христу, Цареви и Богу нашему.

И псалом 90:

Живый в помощи Вышняго, в крове Бога небеснаго водворится. Речет Господеви: заступник мой еси и прибежище мое, Бог мой, и уповаю на Него. Яко Той избавит тя от сети ловчи, и от словесе мятежна, плещма Своима осенит тя, и под криле Его надеешися, оружием обыдет тя истина Его. Не убоишися от страха нощнаго, от стрелы летящия во дни, от вещи во тьме преходящия, от сряща и беса полуденнаго. Падет от страны твоей тысяща, и тьма одесную тебе, к тебе же не приближится, обаче очима твоима смотриши и воздаяние грешников узриши. Яко Ты, Господи, упование мое; Вышняго положил еси прибежище твое. Не приидет к тебе зло, и рана не приближится телеси твоему, яко Ангелом Своим заповесть о тебе, сохранити тя во всех путех твоих. На руках возмут тя, да не когда преткнеши о камень ногу твою; на аспида и василиска наступиши, и попереши льва и змия. Яко на Мя упова, и избавлю и; покрыю и, яко позна имя Мое. Воззовет ко Мне, и услышу его, с ним есмь в скорби, изму его и прославлю его, долготою дней исполню его и явлю ему спасение Мое.

Слава, и ныне: Аллилуиа, аллилуиа, аллилуиа, слава Тебе, Боже. (Трижды)

Тропарь, глас 5:

Благослови, Господи, дом сей,/ и исполни его земных Твоих благ,/ и в нем благочестно хотящих трудитися/ от всякаго злаго обстояния неврежденных сохрани,/ и всякое изобилие небеснаго и земнаго Твоего благословения тем даруй/ и, яко Щедр, помилуй, по велицей Твоей милости.

Прокимен, глас 1: Буди, Господи, милость Твоя на нас,/ якоже уповахом на Тя. Стих: Радуйтеся, праведнии, о Господе, правым подобает похвала.

Евангелие от Матфеа, зачало 24 (7:24–29).

Рече́ Госпо́дь: всяк, и́же слы́шит словеса́ Моя́ сия́ и твори́т я́, уподо́блю его́ му́жу му́дру, и́же созда́ хра́мину свою́ на ка́мени. И сни́де дождь, и приидо́ша ре́ки, и возве́яша ве́три, и нападо́ша на хра́мину ту, и не паде́ся, основана́ бо бе на ка́мени. И всяк слы́шай словеса́ Моя́ сия́, и не творя́ их, уподо́бится му́жу уро́диву, и́ же созда́ хра́мину свою́ на песце́. И сни́де дождь, и приидо́ша ре́ки, и возве́яша ве́три, и опро́шася хра́мине той, и паде́ся, и бе разруше́ние ея́ ве́лие. И бысть егда́ сконча́ Иису́с словеса́ сия́, дивля́хуся наро́ди о уче́нии Его́. Бе бо учя́ их я́ко власть име́я, и не я́ко кни́жницы и фарисе́е.

Таже ектения: Помилуй нас, Боже:

Прилагаем и сия:

Еще молимся Господу Богу о еже низпослати благословение Свое на дом сей и на рабов сих (имярек) и на всех зде благочестно трудитися хотящих, и послати им ангела Своего милостива, соблюдающа и сохраняюща их от всякаго зла, и наставляюща к деланию всех добродетелей, и ко исполнению святых Христовых заповедей, и о еже сохранити их от глада, губительства, труса, потопа, огня, меча, нашествия иноплеменников, и всякия смертоносныя раны и даровати им здравие, и долгоденствием оградити их и во всем ущедрити, рцем вси: Господи, услыши и помилуй.

Возглас: Услыши ны, Боже Спасителю наш, упование всех концев земли и сущих в мори далече, и милостив, милостив буди, Владыко, о гресех наших и помилуй ны, милостив бо и Человеколюбец Бог еси, и Тебе славу возсылаем, Отцу и Сыну и Святому Духу ныне и присно и во веки веков. Аминь.

Молитва

Владыко, Господи Боже наш, на высоких живый и на смиренныя призираяй, мир Твой дивно устроивый и владычествовати человеку в нем повелевый. Сам и ныне зде трудитися хотящия и нами, недостойными, мольбы Тебе и моления приносящия от всякаго зла невредимы соблюди, благословляя их и храмину сию, и ненаветен тех живот всегда сохраняй, изобильно вся благая Твоя им Твоим благословением на пользу подаваяй.

Твое бо есть, еже миловати и спасати ны, Боже наш, и Тебе славу возсылаем, Отцу и Сыну и Святому Духу, ныне и присно и во веки веков. Аминь.

По прочтении молитвы иерей окропляет обиталище, глаголя:

Благословляется дом сей окроплением воды сея священныя, во Имя Отца и Сына и Святаго Духа. Аминь.

Таже отпуст и многолетие.