(л. ѕ҃)
Надписа́нїе гла́въ а҆пⷭ҇льскихъ дѣѧ́нїй, писмены̀ на знаменова́нное. є҆́же ᲂу҆́бѡ черни́ломъ, то̀ показꙋ́етъ главы̑: червле́нїи же, ча́стнаѧ въ ни́хъ сꙋ́щихъ дѣѧ́нїй раздѣлє́нїѧ.
[а҃] Оу҆че́нїе ѡ҆ хрⷭ҇то́вѣ воскрⷭ҇нїи и҆ ѡ҆ ꙗ҆вле́нїи ко ᲂу҆ченикѡ́мъ, и҆ ѡ҆ ѡ҆бѣща́нїи да́ра ст҃а́гѡ дх҃а, и҆ ѡ҆ видѣ́нїи вознесе́нїѧ хрⷭ҇то́ва, и҆ ѡ҆ сла́вномъ второ́мъ є҆гѡ̀ прише́ствїи.
[в҃] Петро́ва бесѣ́да къ вѣ́ровавшымъ, ѡ҆ сме́рти и҆ ѡ҆ ѿверже́нїи і҆ꙋ́ды преда́телѧ.
[а҃] Въ не́мже и҆ ѡ҆ введе́нїи матѳі́евѣ, и҆ ѡ҆жре́бїеномꙋ бл҃года́тїю и҆ моли́твою.
[г҃] Ѡ҆ сше́ствїи ст҃а́гѡ дх҃а на вѣ́ровавшыѧ, бы́вшемъ въ де́нь пентико́стїи.
[а҃] Въ не́мже ᲂу҆че́нїе петро́во ѡ҆ се́мъ ѿ прорѡ́къ.
[в҃] Ѡ҆ стрⷭ҇ти и҆ ѡ҆ воскрⷭ҇нїи, и҆ ѡ҆ вознесе́нїи хрⷭ҇то́вѣ, и҆ ѡ҆ да́рѣ ст҃а́гѡ дх҃а. (л. ѕ҃ ѡ҆б.)
[г҃] Ѡ҆ вѣ́рѣ та́мѡ сꙋ́щихъ, и҆ ѡ҆ спасе́нїи кр҃ще́нїемъ.
[д҃] Ѡ҆ є҆дине́нїи и҆ ѡ҆ ѡ҆бще́нїи по́льзы, и҆ ѡ҆ приложе́нїи вѣ́рꙋющихъ.
[д҃] Ѡ҆ и҆сцѣле́нїи ѡ҆ хрⷭ҇тѣ̀ роди́вшасѧ хро́ма, и҆ ѡ҆ петро́вѣ ᲂу҆че́нїи, и҆ ѡ҆бличе́нїи млⷭ҇тыни свидѣ́нїѧ на спасе́нїе и҆́хъ.
[а҃] Въ не́мже и҆ наше́ствїе а҆рхїере́ємъ за́вистїю бы́вшагѡ дѣ́ла, и҆ сꙋ́дъ чꙋдесѐ, и҆ и҆сповѣ́данїе петро́во си́лы і҆и҃съ хрⷭ҇то́вы и҆ бл҃года́ти.
[в҃] Ѡ҆ запреще́нїи а҆рхїере́йстѣмъ ко а҆пⷭ҇лѡмъ, ꙗ҆́кѡ неподо́бно дерза́ти ѡ҆ и҆́мени хрⷭ҇то́вѣ, и҆ ѡ҆ ѿпꙋще́нїи а҆пⷭ҇льстѣ.
[г҃] Бл҃гохвале́нїе ѡ҆ цр҃кви, и҆ вѣ́рнѣ терпѣ́нїи а҆пⷭ҇льстѣ.
[є҃] Ѡ҆ є҆динодꙋ́шнѣй ѻ҆́бщинѣ всѣ́хъ вѣ́ровавшихъ.
[а҃] Въ не́мже ѡ҆ а҆на́нїи и҆ сапфѵ́рѣ, и҆ ѡ҆ го́рцѣй и҆́хъ сме́рти.
[ѕ҃] Ꙗ҆́кѡ а҆пⷭ҇лѡмъ ввє́рженымъ бы́вшымъ въ темницꙋ̀, а҆́гг҃лъ гдⷭ҇нь но́щїю и҆зведѐ, повелѣ́въ невозбра́ннѡ и҆́мъ проповѣ́дати і҆и҃са.
[а҃] Въ не́мже, ꙗ҆́кѡ второ́е а҆рхїере́ємъ па́ки є҆́мшымъ ѧ҆̀, ꙗ҆́кѡ ѡ҆ то́мъ ктомꙋ̀ не ᲂу҆чи́ти, би́вше пꙋсти́ша ѧ҆̀.
[в҃] Гамалїи́ловъ ра́зꙋмъ вѣ́ренъ ѡ҆ а҆по́столѣхъ, съ при́тчами нѣ́кїими и҆ ᲂу҆каза́нїи.
[з҃] Ѡ҆ ѡ҆свѧще́нїи седмѝ дїа́кѡнъ.
[и҃] Жидо́вское воста́нїе и҆ ѡ҆болга́нїе на стефа́на, и҆ бесѣ́да є҆гѡ̀ ѡ҆ завѣ́тѣ бж҃їи, и҆́же ко а҆враа́мꙋ, и҆ ѡ҆ ѻ҆боюна́десѧте патрїа́рсѣхъ.
[а҃] Въ не́мже ѡ҆ гла́дѣ жи́тнѣ, и҆ ѡ҆ позна́нїи сынѡ́въ і҆а́кѡвль, и҆ ѡ҆ ѡ҆бѣ́тѣ мѡѷсе́ови, и҆ ѡ҆ ꙗ҆вле́нїи къ немꙋ̀ на горѣ̀ сїна́йстѣй.
[в҃] Ѡ҆ и҆схо́дѣ і҆и҃левѣ, и҆ ѡ҆ сотворе́нїи тельца̀, до лѣ́тъ соломѡ́нихъ, и҆ цр҃ко́внагѡ зда́нїѧ.
[г҃] И҆сповѣ́данїе вы́ше нбⷭ҇ныѧ сла́вы і҆и҃съ хрⷭ҇то́вы ꙗ҆́вльшїѧсѧ є҆мꙋ̀, є҆ѧ́же ра́ди и҆ побїе́нъ бы́сть ка́менїемъ стефа́нъ, благоче́стнѡ ᲂу҆́спе.
[ѳ҃] Ѡ҆ гоне́нїи цр҃ко́внѣмъ ѿ са́ѵла, и҆ ѡ҆ погребе́нїи стефа́новѣ. (л. з҃)
[а҃] Въ не́мже ѡ҆ фїлі́ппѣ а҆пⷭ҇лѣ, мнѡ́ги и҆сцѣли́вшемъ въ самарі́и.
[і҃] Ѡ҆ сі́мѡнѣ волхвѣ̀, вѣ́ровавшемъ и҆ крⷭ҇ти́вшемсѧ со и҆нѣ́ми мно́гими.
[а҃] Въ не́мже ѡ҆ петро́вѣ и҆ і҆ѡа́нновѣ къ ни́мъ посла́нїи, и҆ ѡ҆ сше́ствїи ст҃а́гѡ дх҃а на кре́щшыѧсѧ.
[а҃і] Ꙗ҆́кѡ не на мздѣ̀, ни лицемѣ́рѡмъ, но ст҃ы̑мъ, вѣ́рою дае́тсѧ прича́стїе ст҃а́гѡ дх҃а.
[а҃] Въ не́мже ѡ҆ лицемѣ́рїи сі́мѡновѣ, и҆ лꙋка́вомъ є҆гѡ̀ по́мыслѣ.
[в҃і] Ꙗ҆́кѡ бл҃ги̑мъ и҆ вѣ̑рнымъ поспѣшествꙋ́етъ бг҃ъ во спасе́нїе, ꙗ҆́вѣ ѿ бесѣ́ды бы́вшїѧ на ка́женицѣ.
[г҃і] Ѡ҆ бж҃їи съ нб҃сѐ зва́нїи па́ѵла на а҆пⷭ҇льство хрⷭ҇то́во.
[а҃] Въ не́мже ѡ҆ и҆сцѣле́нїи и҆ кр҃ще́нїи па́ѵловѣ ѿ а҆на́нїи, по ѿкрове́нїю бж҃їю: и҆ ѡ҆ де́рзости є҆гѡ̀, и҆ бесѣ́дѣ варна́вли ко а҆пⷭ҇лѡмъ.
[д҃і] Ѡ҆ є҆не́и разсла́бленнѣмъ, и҆ и҆сцѣлѣ́вшемъ въ лѵ́дѣ петро́мъ.
[а҃] Въ не́мже ѡ҆ таві́ѳѣ вдоволю́бицѣ, ю҆́же пе́тръ воскресѝ ѿ ме́ртвыхъ моли́твою во і҆ѻппі́и.
[є҃і] Ѡ҆ корни́лїи, є҆ли́кѡ къ немꙋ̀ а҆́гг҃лъ глаго́ла, и҆ є҆ли́кѡ па́ки къ петрꙋ̀ съ нб҃сѐ ѡ҆ зва́нїи ꙗ҆зы́къ рече́но бы́сть.
[а҃] Въ не́мже, ꙗ҆́кѡ призва̀ петра̀, и҆ прїи́де къ корни́лїю.
[в҃] Па́ки ѡ҆ бесѣ́дѣ, и҆́хже а҆́гг҃лъ свидѣ́тельствова, и҆ повѣствова̀ къ корни́лїю.
[г҃] Петро́во ᲂу҆че́нїе во хрⷭ҇та̀, и҆ да́ръ ст҃а́гѡ дх҃а, и҆̀же ѿ ꙗ҆зы̑къ вѣ́ровавшымъ.
[ѕ҃і] Ꙗ҆́кѡ пе́тръ по рѧ́дꙋ всѧ̀ бы̑вшаѧ повѣствꙋ́етъ а҆пⷭ҇лѡмъ прѣ́вшымсѧ съ ни́мъ.
[а҃] Тогда̀ и҆ варна́вꙋ ѿпꙋстѝ во а҆нтїохі́ю къ бра́тїи.
[з҃і] Проро́чество а҆га́вово ѡ҆ гла́дѣ вселе́нстѣмъ, и҆ ѡ҆ плодоно́сїи къ сꙋ́щей бра́тїи во а҆нтїохі́и.
[и҃і] І҆а́кѡва а҆по́стола ᲂу҆бїе́нїе ѿ и҆́рѡда.
[а҃] Въ не́мже петро́во ꙗ҆́тїе ѿ и҆́рѡда, и҆ ка́кѡ а҆́гг҃лъ бж҃їимъ повелѣ́нїемъ и҆зведѐ є҆го̀ и҆з̾ темни́цы: пе́тръ же показа́всѧ но́щїю бра́тїи, ѿи́де. (л. з҃ ѡ҆б.)
[в҃] Въ не́мже и҆ ѡ҆ мꙋче́нїи стра́жстѣ, пото́мъ и҆ ѡ҆ поги́бели нечести́вагѡ и҆́рѡда.
[ѳ҃і] Ѿпꙋще́нїе варна́вле и҆ па́ѵле ѿ ст҃а́гѡ дх҃а въ кѵ́пръ, и҆ є҆ли̑ка сотвори́ста и҆́менемъ і҆и҃съ хрⷭ҇то́вымъ, на волхва̀ є҆ллѵ́мꙋ корена́тца.
[к҃] Па́ѵлово свѣ́тлое ᲂу҆че́нїе во хрⷭ҇та̀, ѿ зако́на же и҆ ѿ прорѡ́къ повѣствова́нїе є҆ѵⷢ҇льское.
[а҃] Въ не́мже, ꙗ҆́кѡ ѡ҆бличе́нїе слове́сно.
[в҃] Ѡ҆ преложе́нїи проповѣ́давшихъ во ꙗ҆зы́цѣхъ: гоне́нїе же и҆́хъ тꙋ̀, и҆ ѡ҆ ѿше́ствїи во і҆коні́ю.
[к҃а] Ка́кѡ во і҆коні́и проповѣ́даша хрⷭ҇та̀, мнѡ́гимъ же вѣ́ровавшымъ, и҆ и҆згна́ни бы́ша а҆пⷭ҇ли.
[к҃в] Ѡ҆ и҆сцѣлѣ́вшемъ рожде́нѣ хромцѣ̀ въ лѵ́стрѣхъ а҆пⷭ҇лома, и҆ за то̀ мни́ма бѣ́ста бг҃а ѿ тозе́мєцъ.
[а҃] Въ не́мже и҆ ѡ҆ побїе́нїи ка́менїемъ а҆пⷭ҇лъ ѿ гра́жданъ.
[к҃г] Ꙗ҆́кѡ не подоба́етъ ѡ҆брѣ́зоватисѧ вѣ́рꙋющымъ ѿ ꙗ҆зы̑къ, ᲂу҆че́нїемъ и҆ сꙋдо́мъ а҆пⷭ҇льскимъ.
[а҃] Въ не́мже посла́нїе и҆́хъ къ ꙗ҆зы́кѡмъ ѡ҆ сохране́нїихъ.
[в҃] Прерѣка́нїе па́ѵле къ варна́вѣ, ма́рка ра́ди.
[к҃д] Ѡ҆ ᲂу҆че́нїи тїмоѳе́а, и҆ ѡ҆ ѿше́ствїи па́ѵловѣ въ македо́нїю по ѿкрове́нїю.
[а҃] Въ не́мже ѡ҆ вѣ́рѣ, и҆ ѡ҆ спасе́нїи нѣ́кїѧ жены̀ і҆ꙋде́аныни: и҆ ѡ҆ и҆сцѣлѣ́вшей рабы́ни, и҆мꙋ́щей дꙋ́хъ пытли́въ, є҆ѧ́же ра́ди госпо́дїе є҆ѧ̀ би́ша па́ѵла.
[в҃] Ѡ҆ бы́вшемъ тꙋ̀ трꙋ́сѣ и҆ чꙋдесѝ, ка́кѡ вѣ́рова темни́чный стра́жъ въ тꙋ̀ но́щь, и҆ крести́сѧ со всѣ́мъ до́момъ свои́мъ.
[г҃] Ꙗ҆́кѡ ᲂу҆молє́на бы́вша а҆по́стола тꙋ̀, тогда̀ и҆зыдо́ста и҆з̾ темни́цы.
[к҃є] Ѡ҆ распрѣ́нїи бы́вшемъ въ солꙋ́нѣ проповѣ́данїѧ ра́ди: бѣжа́нїе же па́ѵле въ бе́рїю, и҆ ѿтꙋ́дꙋ во а҆ѳи́ны.
[к҃ѕ] Ѡ҆ тре́бищномъ писа́нїи во а҆ѳи́нѣхъ, и҆ ѡ҆ фїлосо́фстѣмъ проповѣ́данїи, и҆ ѡ҆ благоче́стїи па́ѵловѣ. (л. и҃)
[к҃з] Ѡ҆ а҆кѵ́лѣ и҆ прискі́ллѣ, и҆ ѡ҆ непокоре́нїи корі́нѳѧнъ: ѡ҆ благоволе́нїи же бж҃їи, и҆ проповѣ́данїи, и҆ ѡ҆ ѿкрове́нїи па́ѵлꙋ.
[а҃] Въ не́мже ѡ҆ крі́спѣ старѣ́йшинѣ собо́ра, вѣ́ровавшемъ со и҆нѣ́ми нѣ́кїими, и҆ крⷭ҇ти́вшемсѧ.
[в҃] Ꙗ҆́кѡ распрѣ́нїю воздви́гшꙋсѧ въ корі́нѳѣ, па́ѵелъ ѿи́де: прише́дъ же во є҆фе́съ, и҆ побесѣ́довавъ и҆зы́де.
[г҃] Ѡ҆ а҆поллѡ́сѣ, мꙋ́жѣ слове́снѣ и҆ вѣ́рнѣ.
[к҃и] Ѡ҆ креще́нїи, и҆ ѡ҆ да́рѣ ст҃а́гѡ дх҃а, да́ннѣмъ моли́твою па́ѵлею вѣ́ровавшымъ во є҆фе́сѣ, и҆ ѡ҆ и҆сцѣле́нїи лю́дстѣ.
[а҃] Въ не́мже и҆ ѡ҆ сынѣ́хъ ске́ѵиныхъ, ꙗ҆́кѡ не подоба́етъ начина́ти невѣ̑рнымъ и҆ недостѡ́йнымъ сꙋ́щымъ вѣ́ры: и҆ ѡ҆ и҆сповѣ́данїи вѣ́ровавшихъ.
[в҃] Ѡ҆ распрѣ́нїи бы́вшемъ въ є҆фе́сѣ на а҆по́столы ѿ дими́трїа сребросѣ́чца.
[к҃ѳ] Ѡ҆бхожде́нїе па́ѵлово.
[а҃] Въ не́мже и҆ ѡ҆ сме́рти и҆ ѡ҆ воскрⷭ҇нїи є҆ѵтѵ́ховѣ моли́твою въ трѡа́дѣ, и҆ ᲂу҆че́нїе па́стырско къ є҆фе́сскимъ попѡ́мъ.
[в҃] Въ не́мже пла́ванїе па́ѵле ѿ є҆фе́са до кесарі́и палесті́нскїѧ.
[л҃] Проро́чество а҆га́вово ѡ҆ приклю́чшихсѧ па́ѵлꙋ во і҆ерꙋсали́мѣ.
[л҃а] Поꙋче́нїе і҆а́кѡвле къ па́ѵлꙋ, ꙗ҆́коже не мнѣ́ти не ѡ҆ставлѧ́юща жидѡ́мъ ѡ҆брѣ́зоватисѧ.
[л҃в] Ѡ҆ бы́вшемъ безчи́нїи на па́ѵла во і҆ерꙋсали́мѣ: и҆ ка́кѡ є҆го̀ ты́сѧщникъ ѿѧ́тъ ѿ і҆ꙋдє́й.
[а҃] Въ не́мже па́ѵлово ᲂу҆строе́нїе себѐ ра́ди, и҆ зва́нїе є҆гѡ̀ на а҆по́стольство.
[в҃] Въ ни́хже а҆на́нїа къ па́ѵлꙋ въ дама́сцѣ, и҆ ѡ҆ ꙗ҆вле́нїи и҆ гла́сѣ бж҃їи, бы́вшемъ тогда̀ въ це́ркви къ немꙋ̀.
[г҃] Ꙗ҆́кѡ хотѧ̀ ѡ҆ си́хъ па́ѵелъ бїе́нъ бы́ти, ре́къ: ꙗ҆́кѡ ри́млѧнинъ є҆́смь, ѡ҆сла́бленъ бы́сть.
[л҃г] Є҆ли́кѡ па́ѵелъ вше́дъ въ со́нмище пострада̀, и҆ речѐ а҆́бїе: і҆и҃льтѧнинъ є҆́смь.
[л҃д] Ѡ҆ совѣ́тѣ бы́вшемъ на па́ѵла ѿ жидѡ́въ, и҆ ѡ҆ и҆сповѣ́данїи. є҆гѡ̀ къ лѷсі́ю. (л. и҃ ѡ҆б.)
[а҃] Въ не́мже, ꙗ҆́кѡ по́сланъ бы́сть па́ѵелъ ко кнѧ́зю въ кесарі́ю съ во́ины и҆ кни́гами.
[л҃є] Тертѵ́ллово ѡ҆клевета́нїе на па́ѵла, и҆ ѿвѣ́тъ па́ѵловъ пред̾ воево́дою.
[л҃ѕ] Ѡ҆ фи́лїѯовѣ и҆змѣне́нїи, и҆ ѡ҆ фи́стовѣ введе́нїи, ѡ҆ и҆спыта́нїи же па́ѵловѣ, и҆ ѡ҆ ѡ҆ставле́нїи.
[л҃з] А҆грі́ппово и҆ вернїкі́ино прише́ствїе, и҆ вопроше́нїе ѡ҆ па́ѵлѣ.
[а҃] Въ не́мже ѿвѣ́тъ па́ѵловъ ѡ҆ зако́нѣ и҆ вѣ́рѣ є҆гѡ̀, и҆ ѡ҆ воззва́нїи є҆гѡ̀ во благовѣствова́нїе.
[в҃] Ꙗ҆́кѡ ничи́мже ѡ҆би́дитъ і҆ꙋдє́й па́ѵелъ, а҆грі́ппа речѐ фи́стꙋ.
[л҃ѳ] Пла́ванїе па́ѵле въ ри́мъ бѣда́ми мно́гими и҆ вели́кими и҆спо́лненно.
[а҃] Въ не́мже и҆ ᲂу҆че́нїе па́ѵле къ сꙋ́щымъ съ ни́мъ, ѡ҆ ᲂу҆пова́нїи спасе́нїѧ.
[в҃] Морска́ѧ бѣда̀ па́ѵлѧ, и҆ ка́кѡ спасе́нъ бы́сть въ мелїті́йстѣмъ ѡ҆то́цѣ: и҆ коли́ка чꙋдеса̀ сотворѝ въ не́мъ па́ѵелъ.
[л҃ѳ] Ка́кѡ ѿ мелі́та въ ри́мъ прїи́де па́ѵелъ.
[м҃] Ѡ҆ бесѣ́дѣ па́ѵли, ꙗ҆̀же въ ри́мѣ, ко і҆ꙋде́ємъ.
Гла́въ ᲂу҆́бѡ всѣ́хъ, м҃, послѣ́дꙋющихъ же и҆̀мъ л҃є, ꙗ҆̀же и҆́мꙋтъ зна́мєнїѧ червлє́наѧ і҆сто́рїй дѣѧ́нїй а҆по́стольскихъ. (л. ѳ҃)
Сказа́нїе и҆звѣ́стное посла́нїѧмъ напи́саннымъ въ кни́зѣ се́й.
Пе́рвое, дѣѧ̑нїѧ ст҃ы́хъ а҆пⷭ҇лъ.
Пото́мъ посла́нїй собо́рныхъ, се́дмь:
І҆а́кѡвле собо́рное посла́нїе, є҆ди́но.
Петро́ва собѡ́рнаѧ посла̑нїѧ, два̀.
І҆ѡа́ннова собѡ́рнаѧ посла̑нїѧ, трѝ.
І҆ꙋ́дино собо́рное посла́нїе, є҆ди́но.
Ст҃а́гѡ а҆пⷭ҇ла па́ѵла посла̑нїѧ разли́чна сꙋ́ть д҃і.
Къ ри́млѧнѡмъ посла́нїе, є҆ди́но. а҃
Къ корі́нѳѧнѡмъ посла̑нїѧ, два̀. в҃ г҃
Къ гала́тѡмъ посла́нїе, є҆ди́но. д҃
Къ є҆фесе́ємъ посла́нїе, є҆ди́но. є҃
Къ фїлїпписі́ємъ посла́нїе, є҆ди́но. ѕ҃
Къ колосса́ємъ посла́нїе, є҆ди́но. з҃
Къ солꙋ́нѧнѡмъ посла̑нїѧ, два̀. и҃ ѳ҃
Къ тїмоѳе́ю посла̑нїѧ, два̀. і҃ а҃і
Къ ті́тꙋ посла́нїе, є҆ди́но. в҃і
Къ фїлимо́нꙋ посла́нїе, є҆ди́но. г҃і
Ко є҆вре́ємъ посла́нїе, є҆ди́но. д҃і
Въ лѣ́то ҂ѕч҃а, ѡ҆главле́нъ бы́сть а҆пⷭ҇лъ ѿ и҆са́їи мона́ха, и҆ ѿкры́ты бы́ша сꙋббѡ́ты, и҆ недѣ̑ли, и҆ понедѣ́льники, и҆ вто́рники, и҆ срєды̀, и҆ четверткѝ, и҆ пѧткѝ, дабы̀ разꙋ́мно бы́ло на́скорѣ и҆з̾ѡбрѣ́тенїе, та́кожде и҆ по мцⷭ҇амъ а҆по́столы ст҃ы̑мъ: и҆ посла̑нїѧ ѿкꙋ́дꙋ пи́сана, и҆ ки́мъ напи́сана бы́ша.