(л. п҃д ѡ҆б.)
Знамєна́нїѧ къ ри́млѧнѡмъ є҆пїсто́лїи па́ѵловы.
[а҃] Є҆ѵⷢ҇льское ᲂу҆че́нїе, ѡ҆ сꙋ́щихъ внѣ̀ бл҃года́ти хрⷭ҇то́вы, и҆ ѡ҆ сꙋ́щихъ во бл҃года́ти: и҆ ѡ҆ ᲂу҆пова́нїи и҆ житїѝ дх҃о́внѣмъ.
[в҃] Пе́рвѣе ᲂу҆́бѡ по предписа́нїю ѡ҆ сꙋдѣ̀ сꙋ́щемъ на ꙗ҆зы́ки, и҆ не хранѧ́щихъ є҆сте́ственныхъ.
[г҃] Ѡ҆ сꙋдѣ̀ сꙋ́щемъ на і҆и҃лѧ, не хранѧ́щемъ зако́нныхъ.
[д҃] Ѡ҆ предвлады́чествѣ і҆и҃левѣ, не ᲂу҆лꙋча́ющемъ ѡ҆бѣтова́нїѧ.
[є҃] Ѡ҆ бл҃года́ти, є҆́юже то́кмѡ человѣ́цы ѡ҆правда́ни быва́ютъ: и҆ не по ро́дꙋ разли́чнѡ, но по да́рꙋ бж҃їю, равноче́стнѡ по а҆враа́млю ѻ҆́бразꙋ.
[ѕ҃] Ѡ҆ ᲂу҆пова́нїи щади́мѣмъ.
[з҃] Ѡ҆ ввожде́нїи сꙋ́щемъ на спасе́нїе на́ше чл҃вѣ́ка і҆и҃са хрⷭ҇та̀, за ѿпа́дшаго и҆спе́рва земна́го а҆да́ма.
[и҃] Ѡ҆ вѣ́рѣ сꙋ́щей до́лжнѣ, и҆ ѡ҆ дѣѧ́нїи бла́зѣ.
[ѳ҃] Ѡ҆ совокꙋпле́нїи благода́тнѣ, и҆ житїѝ.
[і҃] Ѡ҆ зако́нѣ ѡ҆сꙋжде́нїи грѣха̀ ра́ди.
[а҃і] Ѡ҆ творѧ́щихъ по́хоти съ человѣ́ческимъ є҆стество́мъ, и҆ не си́льное беззако́нное снѧ́тїе.
[в҃і] Ѡ҆ совлече́нїи плотски́хъ страсте́й, и҆ согла́сїи є҆́же ко ст҃о́мꙋ дх҃ꙋ.
[г҃і] Ѡ҆ совокꙋпле́нїи и҆ ѡ҆ соблюда́емѣи сла́вѣ ст҃ы̑мъ.
[д҃і] Ѡ҆ до́лжнѣй любвѝ къ бг҃ꙋ.
[є҃і] Ѡ҆ ѿпаде́нїи і҆и҃лѧ ѿри́нꙋтагѡ, и҆ ѡ҆ зва́нїи и҆́стиннагѡ и҆збра́ннагѡ, вкꙋ́пѣ со ꙗ҆зы́ки.
[ѕ҃і] Ꙗ҆́кѡ по невѣ́рствїю ѿпаде́нїе, за ѡ҆ставле́нїе є҆́же въ невѣ́жствїи, и҆ ѡ҆ неключи́мѣмъ проповѣ́данїи. (л. п҃є)
[з҃і] Ѡ҆ ра́зꙋмѣ, и҆́мже ѿве́ржени бы́ша, ꙗ҆́кѡ да послѣ́днїи прїи́дꙋтъ ре́вностїю предпочте́ныхъ ꙗ҆зы̑къ, и҆ соꙋчине́ныхъ къ вѣ́рномꙋ і҆и҃лю.
[и҃і] Оу҆че́нїе ѡ҆ добродѣ́тели, ꙗ҆́же къ бг҃ꙋ и҆ человѣ́кѡмъ.
[а҃] Въ не́мже и҆ ѡ҆ є҆диномы́слїи, є҆́же къ себѣ̀.
[в҃] Ѡ҆ слꙋ́жбѣ бж҃їи.
[г҃] Ѡ҆ неѕло́бствѣ къ проти̑внымъ.
[д҃] Ѡ҆ покоре́нїи влады́чествїѧмъ.
[є҃] Ѡ҆ цѣломꙋ́дрїи и҆ кро́тости.
[ѕ҃] Ѡ҆ несва́рнѣ со́вѣсти, бра́шенъ ра́ди и҆ днѐ.
[з҃] Ѡ҆ подо́бїи хрⷭ҇то́ва неѕло́бїѧ.
[ѳ҃і] Ѡ҆ слꙋ́жбѣ є҆гѡ̀, бы́вшей на восто́цѣ и҆ на за́падѣ.
[а҃] Въ не́мже ѡ҆ ми́лостыни начина́етъ.
Сказа́нїе, є҆́же къ ри́млѧнѡмъ посла́нїѧ ст҃а́гѡ а҆пⷭ҇ла па́ѵла.
(нлⷣѧ) Сїѐ посыла́етъ ѿ корі́нѳа, не ᲂу҆̀ є҆щѐ ви́дѣвъ ри́млѧны слы́шѧ же ѡ҆ ни́хъ, и҆ жела́ѧ ви́дѣти и҆̀хъ: и҆ пе́рвѣе ᲂу҆́бѡ хва́литъ вѣ́рꙋ и҆́хъ, возвѣща́емꙋ ви́дѧ всю́дꙋ. Пото́мъ же сказꙋ́етъ мно́гажды себѐ восхотѣ́вша и҆тѝ въ ри́мъ, жела́нїемъ є҆́же наꙋчи́ти и҆ ᲂу҆тверди́ти и҆̀хъ: и҆ ᲂу҆̀бо не возмо́же и҆тѝ. И҆ та́кѡ про́чее ᲂу҆чи́тельно посла́нїе твори́тъ ѡ҆ зва́нїи ꙗ҆зы̑къ: и҆ ꙗ҆́кѡ ѡ҆брѣ́занїе до вре́мене бы́сть, и҆ ны́нѣ преста̀: и҆ ꙗ҆́кѡ хрⷭ҇то́мъ разрѣши́сѧ грѣхопаде́нїе а҆да́мово, сѣ́нь зако́на пре́йде. И҆ ᲂу҆̀бо зва́нїе ꙗ҆зы́кѡвъ лѣ́потно бы́ти ᲂу҆строѧ́етъ, си́це сказа́въ, всѣ́мъ человѣ́кѡмъ є҆стество́мъ всажде́нꙋ бы́ти зако́нꙋ: и҆ всѣ̑мъ без̾ ᲂу҆че́нїѧ є҆стества̀ и҆ ѿ (л. п҃є ѡ҆б.) сама́гѡ созда́нїѧ мощѝ познава́ти бг҃а. Тѣ́мже и҆ въ лѣ́потꙋ вино́вны твори́тъ є҆́ллины, ꙗ҆́кѡ ᲂу҆́бѡ бг҃ꙋ ѡ҆б̾ѧ́вльшꙋ и҆̀мъ ѿ сотворе́нїѧ мі́ра, є҆́же ѡ҆ себѣ̀ ра́зꙋмъ, и҆ присносꙋ́щныѧ си́лы своеѧ̀, є҆́же є҆́сть сло́во є҆гѡ̀: ѡ҆ не́мже и҆ и҆́мже всѧ̑ сотвори́лъ. Ѻ҆́нѣхъ же не позна́вшихъ є҆го̀ ѿ тва́рей бы́ти бг҃а си́хъ содѣ́телѧ, творе́нїѧ же є҆гѡ̀ ѡ҆боготвори́вшѧ, и҆ тва́ри па́че, не́жели томꙋ̀ послꙋжи́вшѧ. Вино́вны же твори́тъ і҆ꙋдє́и, ꙗ҆́кѡ не сохрани́вшѧ зако́на, но и҆ па́че престꙋпле́нїемъ зако́на бг҃а безче́ствовавшѧ. И҆ та́кѡ ѻ҆бои́мъ, і҆ꙋде́ємъ же и҆ є҆́ллинѡмъ, бо́льшема заключа́етъ, и҆ ѡ҆блича́етъ ѡ҆ беззако́нїи, да пока́жетъ, ꙗ҆́кѡ ра́вни бы́вше грѣ́шницы, ра́внѣ всѝ, ꙗ҆́кѡ пови́нни, и҆зба́вителю моли́тисѧ. Є҆гда́ же благода́ть и҆ и҆збавле́нїе ра́внѡ і҆ꙋде́ємъ бы́сть и҆ ꙗ҆зы́кѡмъ, въ лѣ́потꙋ и҆ призва́нїе бы́сть ꙗ҆зы́кѡвъ. Зва́нїю же ꙗ҆зы́кѡвъ бы́вшꙋ, ѿ нꙋ́жди преста̀ ѡ҆брѣ́занїе и҆ зако́ннаѧ сѣ́нь. А҆вра́мъ бо, речѐ, не во ѡ҆брѣ́занїи, но пре́жде ѡ҆брѣ́занїѧ ѡ҆правда́всѧ, преименова́сѧ и҆́менемъ а҆враа́мъ, ꙗ҆́кѡ ѻ҆те́цъ мно́гихъ ꙗ҆зы́кѡвъ хотѧ́ше бы́ти по вѣ́рѣ, ꙗ҆́же въ неѡбрѣ́занїи. прїѧ́тъ же по ѡ҆правда́нїи и҆ ѡ҆брѣ́занїе пло́ти, да зна́менїе бꙋ́детъ ражда́ємымъ ѿ негѡ̀ по пло́ти. Преста́ти же ѡ҆брѣ́занїю, є҆гда̀ ꙗ҆зы́цы бꙋ́дꙋтъ ча́да а҆враа́млѧ, начина́ющымъ ходи́ти по вѣ́рѣ а҆враа́мовѣ, въ не́йже ѡ҆правда́сѧ є҆гда̀ бѣ̀ въ неѡбрѣ́занїи: си́хъ бо ра́ди преименова́сѧ а҆враа́мъ. По нꙋ́жди же прише́дшымъ зна́мєнанымъ, преста́ти зна́менаномꙋ. А҆́ще ᲂу҆́бѡ ꙗ҆зы́цы нꙋ́дѧтсѧ ѡ҆брѣ́затисѧ, да преста́нꙋтъ и҆ ѿ и҆́мене а҆враа́мова, и҆ да и҆менꙋ́етсѧ а҆вра́мъ. А҆́ще ли же а҆враа́мъ ѿ бг҃а преименова́сѧ, не подоба́етъ ѡ҆брѣ́затисѧ ꙗ҆зы́кѡмъ, но нижѐ тѣ̑мъ, и҆̀же є҆щѐ по пло́ти і҆ꙋде́ємъ, да бꙋ́детъ и҆́мѧ и҆звѣ́стно, и҆ ѻ҆ц҃ъ мнѡ́гимъ ꙗ҆зы́кѡмъ зове́тсѧ. И҆́бо не тре́бѣ и҆́мать про́чее кто̀ ѡ҆брѣ́затисѧ, дово́ленъ вѣ́рою а҆враа́млею, нижѐ и҆́ныѧ зако́нныѧ сѣ́ни: не ѿ си́хъ бо, но ѿ вѣ́ры ѡ҆правда́етсѧ всѧ́къ, ꙗ҆́коже и҆ а҆враа́мъ. Сїѧ̀ си́це ᲂу҆стро́ивъ, сказꙋ́етъ па́ки, ꙗ҆́кѡ и҆́накѡ не бꙋ́детъ и҆збавле́нїѧ и҆ (л. п҃ѕ) бл҃года́ти і҆и҃леви и҆ ꙗ҆зы́кѡмъ, а҆́ще не разрѣши́тсѧ дре́внїй грѣ́хъ а҆да́мовъ, и҆́же на всѣ́хъ бы́вшїй: и҆нѣ́мъ же семꙋ̀ не мощѝ ѡ҆чи́ститисѧ, речѐ, то́чїю і҆и҃съ хрⷭ҇то́мъ сн҃омъ бж҃їимъ, и҆́мже и҆ и҆з̾ нача́ла клѧ́тва бы́сть: не бо̀ мо́щно бѧ́ше и҆но́мꙋ разрьши́ти прегрѣше́нїе. Та́же пи́шетъ: ꙗ҆́кѡ и҆́накѡ сїѐ не бꙋ́детъ, а҆́ще не въ тѣ́ло ѡ҆блече́тсѧ сн҃ъ бж҃їй, и҆ бꙋ́детъ чл҃вѣ́къ: да сїѐ привне́съ за всѣ́хъ, всѧ̑ свободи́тъ ѿ сме́рти, и҆ ꙗ҆́коже є҆ди́нымъ чл҃вѣ́комъ грѣ́хъ въ мі́ръ вни́де, та́коже є҆ди́нымъ человѣ́комъ і҆и҃съ хрⷭ҇то́мъ бл҃года́ть бꙋ́детъ. И҆ про́чее ꙗ҆́кѡ до́бръ строи́тель, і҆ꙋдє́и ᲂу҆́бѡ ᲂу҆тѣша́етъ, ꙗ҆́кѡ не престꙋ́пницы бꙋ́дете зако́на, а҆́ще во хрⷭ҇та̀ вѣ́рꙋете: сꙋ́щымъ же ѿ ꙗ҆зы̑къ повелѣва́етъ, не возвыша́тисѧ на і҆и҃лѧ, но вѣ́дѣти, занѐ ꙗ҆́кѡ вѣ̑тви на ко́рени, си́це на ѻ҆́нѣхъ присади́шасѧ. По си́хъ же ᲂу҆тѣ́шитєльна словеса̀ во ѻ҆бы́чаехъ наказа́въ, скончава́етъ посла́нїе. (л. п҃ѕ ѡ҆б.)
КЪ РИ́МЛѦНѠМЪ ПОСЛА́НІЕ
СТ҃А́ГѠ А҆ПО́СТОЛА ПА́ѴЛА.
Глава̀ пе́рваѧ.
(заⷱ҇ ѻ҃ѳ) [а҃] сⷯ а҃ Па́ѵелъ ꙳ Во вто́рникъ а҃ недѣ́ли по н҃-цѣ: Па́ѵелъ ꙳ ра́бъ і҆и҃съ хрⷭ҇то́въ, зва́нъ а҆пⷭ҇лъ, и҆збра́нъ въ благовѣ́стїе бж҃їе, в҃ Є҆́же пре́жде ѡ҆бѣща̀ проро́ки свои́ми въ писа́нїихъ ст҃ы́хъ, г҃ Ѡ҆ сн҃ѣ свое́мъ, бы́вшемъ ѿ сѣ́мене дв҃дова по пло́ти, д҃ Нарече́ннѣмъ сн҃ѣ бж҃їи въ си́лѣ, по дх҃ꙋ свѧты́ни, и҆з̾ воскрⷭ҇нїѧ ѿ ме́ртвыхъ і҆и҃са хрⷭ҇та̀ гдⷭ҇а на́шегѡ, є҃ И҆́мже прїѧ́хомъ бл҃года́ть и҆ а҆пⷭ҇льство въ послꙋша́нїе вѣ́ры во всѣ́хъ ꙗ҆зы́цѣхъ, ѡ҆ и҆́мени є҆гѡ̀: ѕ҃ Въ ни́хже є҆стѐ и҆ вы̀ зва́ни і҆и҃сꙋ хрⷭ҇тꙋ̀. з҃ Всѣ́мъ сꙋ́щымъ въ ри́мѣ, возлю́блєннымъ бг҃ꙋ, зва̑ннымъ ст҃ы̑мъ:
(заⷱ҇) Бл҃года́ть ꙳꙳ Въ сꙋббѡ́тꙋ а҃ по н҃- цѣ: Бра́тїе, благода́ть ꙳꙳ ва́мъ и҆ ми́ръ ѿ бг҃а ѻ҆ц҃а̀ на́шегѡ, и҆ гдⷭ҇а і҆и҃са хрⷭ҇та̀. (л. п҃з)
Престꙋпѝ вто́рникꙋ.
и҃ Пе́рвое ᲂу҆́бѡ бл҃годарю̀ бг҃а моего̀ і҆и҃сомъ хрⷭ҇то́мъ ѡ҆ всѣ́хъ ва́съ, ꙗ҆́кѡ вѣ́ра ва́ша возвѣща́етсѧ во все́мъ мі́рѣ. ѳ҃ Свидѣ́тель бо мѝ є҆́сть бг҃ъ, є҆мꙋ́же слꙋжꙋ̀ дх҃омъ мои́мъ, во благовѣствова́нїи сн҃а є҆гѡ̀, ꙗ҆́кѡ безпреста́ни па́мѧть ѡ҆ ва́съ творю̀: і҃ Всегда̀ въ моли́твахъ мои́хъ молѧ́сѧ, а҆́ще ᲂу҆́бѡ когда̀ поспѣ́шенъ бꙋ́дꙋ во́лею бж҃їею прїитѝ къ ва́мъ. а҃і Жела́ю бо ви́дѣти ва́съ, да нѣ́кое пода́мъ ва́мъ дарова́нїе дх҃о́вное ко ᲂу҆тверже́нїю ва́шемꙋ: в҃і Сїе́ же є҆́сть соꙋтѣ́шитисѧ въ ва́съ вѣ́рою ѻ҆́бщею ва́шею же и҆ мое́ю.
Коне́цъ сꙋббѡ́тѣ. Чтѝ вто́рникꙋ:
г҃і Не хощꙋ́ же не вѣ́дѣти ва́мъ бра́тїе, ꙗ҆́кѡ мно́жицею восхотѣ́хъ прїитѝ къ ва́мъ, и҆ возбране́нъ бы́хъ досе́лѣ, да нѣ́кїй пло́дъ и҆мѣ́ю и҆ въ ва́съ, ꙗ҆́коже и҆ въ про́чихъ ꙗ҆зы́цѣхъ. д҃і Є҆́ллинѡмъ же и҆ ва́рварѡмъ, мꙋ̑дрымъ же и҆ неразꙋ̑мнымъ до́лженъ є҆́смь. є҃і Та́кѡ є҆́сть є҆́же по моемꙋ̀ ᲂу҆се́рдїю, и҆ ва́мъ сꙋ́щымъ въ ри́мѣ благовѣсти́ти. ѕ҃і Не стыжꙋ́сѧ бо бл҃говѣствова́нїемъ хрⷭ҇то́вымъ: си́ла бо бж҃їѧ є҆́сть во спасе́нїе всѧ́комꙋ вѣ́рꙋющемꙋ, і҆ꙋде́ови же пре́жде, и҆ є҆́ллинꙋ. з҃і Пра́вда бо бж҃їѧ въ не́мъ ꙗ҆влѧ́етсѧ ѿ вѣ́ры въ вѣ́рꙋ, ꙗ҆́коже є҆́сть пи́сано: пра́ведный же ѿ вѣ́ры жи́въ бꙋ́детъ.
Коне́цъ вто́рникꙋ.
(заⷱ҇ п҃) [в҃] и҃і Ѿкрыва́етсѧ бо ꙳ Въ сре́дꙋ а҃ недѣ́ли: Бра́тїе, ѿкрыва́етсѧ ꙳ гнѣ́въ бж҃їй съ нб҃сѐ, на всѧ́кое нече́стїе и҆ непра́вдꙋ человѣ́ческꙋю, содержа́щихъ (л. п҃з ѡ҆б.) и҆́стинꙋ въ непра́вдѣ. ѳ҃і Зане́же ꙾разꙋ́мное бж҃їе꙾꙾є҆́же возмо́жно разꙋмѣ́ти ѡ҆ бз҃ѣ꙾, ꙗ҆́вѣ є҆́сть въ ни́хъ: бг҃ъ бо ꙗ҆ви́лъ є҆́сть и҆̀мъ. к҃ Неви̑димаѧ бо є҆гѡ̀, ѿ созда́нїѧ мі́ра, творе́ньми помышлѧ́єма, ви̑дима сꙋ́ть, и҆ присносꙋ́щнаѧ си́ла є҆гѡ̀ и҆ бжⷭ҇тво̀: во є҆́же бы́ти и҆̀мъ без̾ѿвѣ́тнымъ. к҃а Зане́же разꙋмѣ́вше бг҃а, не ꙗ҆́кѡ бг҃а просла́виша, и҆лѝ бл҃годари́ша: но ѡ҆сꙋети́шасѧ помышле́нїи свои́ми, и҆ ѡ҆мрачи́сѧ неразꙋ́мное и҆́хъ се́рдце. к҃в Глаго́лющесѧ бы́ти мꙋ́дры, ѡ҆б̾юродѣ́ша: к҃г И҆ и҆змѣни́ша сла́вꙋ нетлѣ́ннагѡ бг҃а, въ подо́бїе ѻ҆́браза тлѣ́нна человѣ́ка, и҆ пти́цъ, и҆ четверонѡ́гъ, и҆ га̑дъ. к҃д Тѣ́мже и҆ предадѐ и҆̀хъ бг҃ъ въ по́хотехъ серде́цъ и҆́хъ въ нечистотꙋ̀, во є҆́же скверни́тисѧ тѣлесє́мъ и҆́хъ въ себѣ̀ самѣ́хъ. к҃є И҆̀же премѣни́ша и҆́стинꙋ бж҃їю во лжꙋ̀, и҆ почто́ша и҆ послꙋжи́ша тва́ри па́че творца̀, и҆́же є҆́сть блгⷭ҇ве́нъ во вѣ́ки, а҆ми́нь. к҃ѕ Сегѡ̀ ра́ди предадѐ и҆̀хъ бг҃ъ въ стра̑сти безче́стїѧ: и҆ жєны́ бо и҆́хъ и҆змѣни́ша є҆сте́ственнꙋю подо́бꙋ въ през̾есте́ственнꙋю. к҃з Та́кожде и҆ мꙋ́жи, ѡ҆ста́вльше є҆сте́ственнꙋю подо́бꙋ же́нска по́ла, разжего́шасѧ по́хотїю свое́ю дрꙋ́гъ на дрꙋ́га, мꙋ́жи на мꙋже́хъ стꙋ́дъ содѣва́юще, и҆ возме́здїе є҆́же подоба́ше пре́лести и҆́хъ, въ себѣ̀ воспрїе́млюще.
Коне́цъ средѣ̀.
(заⷱ҇ п҃а) к҃и И҆ ꙗ҆́коже ꙳ Въ четверто́къ а҃ недѣ́ли: Бра́тїе, ꙗ҆́коже ꙳ не и҆скꙋси́ша и҆мѣ́ти бг҃а въ ра́зꙋмѣ, сегѡ̀ ра́ди предадѐ ѧ҆̀ бг҃ъ въ неискꙋ́сенъ ᲂу҆́мъ, твори́ти неподѡ́бнаѧ: к҃ѳ И҆спо́лнены всѧ́кїѧ непра́вды, (л. п҃и) блꙋже́нїѧ, лꙋка́вства, лихоима́нїѧ, ѕло́бы: и҆спо́лнены за́висти, ᲂу҆бі́йства, рве́нїѧ, льстѝ, ѕлонра́вїѧ: шепотникѝ, л҃ Клеветникѝ, богоме́рзски, досади́тели, велича́вы, го́рды, ѡ҆брѣта́тели ѕлы́хъ, роди́телємъ непокори́вы, л҃а Неразꙋ́мны, непримири́тельны, нелюбо́вны, неклѧтвохрани́тельны, неми́лостивны. л҃в Нѣ́цыи же и҆ ѡ҆правда́нїе бж҃їе разꙋмѣ́вше, ꙗ҆́кѡ такѡва́ѧ творѧ́щїи досто́йни сме́рти сꙋ́ть, не то́чїю са́ми творѧ́тъ, но и҆ соизволѧ́ютъ творѧ́щымъ.
Глава̀ втора́ѧ.
сⷯ а҃ Сегѡ̀ ра́ди без̾ѿвѣ́тенъ є҆сѝ, ѽ чл҃вѣ́че, всѧ́къ сꙋдѧ́й: и҆́мже бо сꙋдо́мъ сꙋ́диши дрꙋ́га, себѐ ѡ҆сꙋжда́еши: та̑ѧжде бо твори́ши сꙋдѧ́й. в҃ Вѣ́мы же, ꙗ҆́кѡ сꙋ́дъ бж҃їй є҆́сть пои́стиннѣ на творѧ́щихъ такѡва́ѧ. г҃ Помышлѧ́еши ли же сїѧ̑, ѽ чл҃вѣ́че! сꙋдѧ́й такѡва́ѧ творѧ́щымъ, и҆ творѧ̀ са́мъ. та̑ѧжде, ꙗ҆́кѡ ты̀ и҆збѣжи́ши ли сꙋда̀ бж҃їѧ; д҃ И҆лѝ ѡ҆ бога́тствѣ бл҃гости є҆гѡ̀, и҆ кро́тости и҆ долготерпѣ́нїи неради́ши, невѣ́дый, ꙗ҆́кѡ бл҃гость бж҃їѧ на покаѧ́нїе тѧ̀ веде́тъ; є҃ По жесто́кости же твое́й, и҆ непока́ѧнномꙋ се́рдцꙋ, собира́еши себѣ̀ гнѣ́въ въ де́нь гнѣ́ва, и҆ ѿкрове́нїѧ пра́веднагѡ сꙋда̀ бж҃їѧ. ѕ҃ И҆́же возда́стъ коемꙋ́ждо по дѣлѡ́мъ є҆гѡ̀: з҃ Ѻ҆́вымъ ᲂу҆́бѡ по терпѣ́нїю дѣ́ла бл҃га́гѡ, сла́вꙋ и҆ че́сть и҆ нетлѣ́нїе и҆́щꙋщымъ, живо́тъ вѣ́чный: и҃ А҆ и҆̀же по рве́нїю противлѧ́ющымсѧ ᲂу҆́бѡ и҆́стинѣ, повинꙋ́ющымсѧ же непра́вдѣ, ꙗ҆́рость и҆ гнѣ́въ. (л. п҃и ѡ҆б.) ѳ҃ Ско́рбь и҆ тѣснота̀ на всѧ́кꙋ дꙋ́шꙋ человѣ́ка творѧ́щагѡ ѕло́е, і҆ꙋде́а же пре́жде и҆ є҆́ллина.
Коне́цъ четверткꙋ̀.
(заⷱ҇) [г҃] і҃ Сла́ва же ꙳ Недѣ́лѧ втора́ѧ: Бра́тїе, сла́ва ꙳ и҆ че́сть и҆ ми́ръ всѧ́комꙋ дѣ́лающемꙋ бл҃го́е, і҆ꙋде́еви же пре́жде и҆ є҆́ллинꙋ. а҃і Нѣ́сть бо на лица̀ зрѣ́нїѧ ᲂу҆ бг҃а. в҃і Є҆ли́цы бо ꙾беззако́ннѡ꙾꙾без̾ зако́на꙾ согрѣши́ша, ꙾беззако́ннѡ꙾꙾без̾ зако́на꙾ и҆ поги́бнꙋтъ: и҆ є҆ли́цы въ зако́нѣ согрѣши́ша, зако́номъ сꙋ́дъ прїи́мꙋтъ. г҃і Не слы́шателїе бо зако́на пра́ведни пред̾ бг҃омъ, но творцы̀ зако́на, сі́и ѡ҆правдѧ́тсѧ.
(заⷱ҇ п҃в) д҃і Є҆гда́ бо ꙳꙳ Въ пѧто́къ а҃ недѣ́ли: Бра́тїе, є҆гда̀ ꙳꙳ ꙗ҆зы́цы не и҆мꙋ́ще зако́на, є҆стество́мъ закѡ́ннаѧ творѧ́тъ: сі́и зако́на не и҆мꙋ́ще, са́ми себѣ̀ сꙋ́ть зако́нъ: є҃і И҆̀же ꙗ҆влѧ́ютъ дѣ́ло зако́нное напи́сано въ сердца́хъ свои́хъ, спослꙋшествꙋ́ющи и҆̀мъ со́вѣсти, и҆ междꙋ̀ собо́ю помыслѡ́мъ, ѡ҆сꙋжда́ющымъ и҆лѝ ѿвѣща́ющымъ, ѕ҃і Въ де́нь є҆гда̀ сꙋ́дитъ бг҃ъ та̑йнаѧ человѣ́кѡмъ, по бл҃говѣ́стїю моемꙋ̀, і҆и҃сомъ хрⷭ҇то́мъ.
Коне́цъ недѣ́ли.
з҃і Сѐ ты̀ і҆ꙋде́й и҆менꙋ́ешисѧ, и҆ почива́еши на зако́нѣ, и҆ хва́лишисѧ ѡ҆ бз҃ѣ: и҃і И҆ разꙋмѣ́еши во́лю, и҆ разсꙋжда́еши лꙋ̑чшаѧ, наꙋча́емь ѿ зако́на. ѳ҃і Оу҆пова́ѧ же себѐ вожда̀ бы́ти слѣпы̑мъ, свѣ́та сꙋ́щымъ во тмѣ̀, к҃ Наказа́телѧ безꙋ̑мнымъ, ᲂу҆чи́телѧ младе́нцємъ, и҆мꙋ́ща ѻ҆́бразъ ра́зꙋма и҆ и҆́стины въ зако́нѣ: (л. п҃ѳ) к҃а Наꙋча́ѧ ᲂу҆̀бо и҆на́го, себе́ ли не ᲂу҆чи́ши; к҃в Проповѣ́даѧ не кра́сти, кра́деши; глаго́лѧ не прелюбы̀ твори́ти, прелюбы̀ твори́ши; гнꙋша́ѧсѧ і҆́дѡлъ, ст҃а̑ѧ кра́деши, к҃г И҆́же въ зако́нѣ хва́лишисѧ, престꙋпле́нїемъ зако́на бг҃а безче́ствꙋеши. к҃д И҆́мѧ бо бж҃їе ва́ми хꙋ́литсѧ во ꙗ҆зы́цѣхъ, ꙗ҆́коже є҆́сть пи́сано. к҃є Ѡ҆брѣ́занїе ᲂу҆̀бо по́льзꙋетъ, а҆́ще зако́нъ твори́ши: а҆́ще же зако́на престꙋ́пникъ є҆сѝ, ѡ҆брѣ́занїе твоѐ неѡбрѣ́занїе бы́сть. к҃ѕ А҆́ще ᲂу҆̀бо неѡбрѣ́занїе ѡ҆правда́нїе зако́на сохрани́тъ, не неѡбрѣ́занїе ли є҆гѡ̀ во ѡ҆брѣ́занїе вмѣни́тсѧ, к҃з И҆ ѡ҆сꙋ́дитъ є҆́же ѿ є҆стества̀ неѡбрѣ́занїе зако́нъ соверша́ющее, тебѐ, и҆́же писа́нїемъ и҆ ѡ҆брѣ́занїемъ сꙋ́ща престꙋ́пника зако́на.
(заⷱ҇ п҃г) к҃и Не бо̀ и҆́же ꙳ Въ понедѣ́льникъ в҃ недѣ́ли: Бра́тїе, не и҆́же ꙳ ꙗ҆́вѣ і҆ꙋде́й є҆́сть, ни є҆́же ꙗ҆́вѣ во пло́ти, ѡ҆брѣ́занїе: к҃ѳ Но и҆́же вта́йнѣ і҆ꙋде́й, и҆ ѡ҆брѣ́занїе се́рдца дх҃омъ, а҆ не писа́нїемъ: є҆мꙋ́же похвала̀ не ѿ человѣ̑къ, но ѿ бг҃а.
Коне́цъ пѧткꙋ̀.
Глава̀ тре́тїѧ.
[д҃] сⷯ а҃ Что̀ ꙾ᲂу҆̀бо ли́шше і҆ꙋде́ю꙾꙾ко́е ᲂу҆̀бо преимꙋ́щество і҆ꙋде́а꙾; и҆лѝ ка́ѧ по́льза ѡ҆брѣ́занїѧ; в҃ Мно́гѡ по всѧ́комꙋ ѻ҆́бразꙋ: ꙳пе́рвѣе꙳꙳наипа́че꙳ ᲂу҆́бѡ, ꙗ҆́кѡ ввѣ́рена бы́ша и҆̀мъ словеса̀ бж҃їѧ. г҃ Что́ бо, а҆́ще не вѣ́роваша нѣ́цыи; є҆да̀ ᲂу҆́бѡ невѣ́рствїе и҆́хъ вѣ́рꙋ бж҃їю ᲂу҆праздни́тъ; д҃ Да не бꙋ́детъ: да бꙋ́детъ же бг҃ъ и҆́стиненъ, всѧ́къ же (л. п҃ѳ ѡ҆б.) человѣ́къ ло́жъ, ꙗ҆́коже є҆́сть пи́сано: ꙗ҆́кѡ да ѡ҆правди́шисѧ во словесѣ́хъ твои́хъ, и҆ побѣди́ши внегда̀ сꙋди́ти тѝ. є҃ А҆́ще ли непра́вда на́ша бж҃їю пра́вдꙋ составлѧ́етъ, что̀ рече́мъ; є҆да́ ли непра́веденъ бг҃ъ, наносѧ́й гнѣ́въ; [по человѣ́кꙋ глаго́лю,] ѕ҃ Да не бꙋ́детъ: поне́же ка́кѡ сꙋди́ти и҆́мать бг҃ъ мі́рꙋ; з҃ А҆́ще ᲂу҆́бѡ и҆́стина бж҃їѧ въ мое́й лжѝ и҆збы́точествова въ сла́вꙋ є҆гѡ̀: что̀ є҆щѐ и҆ а҆́зъ ꙗ҆́кѡ грѣ́шникъ ѡ҆сꙋжда́юсѧ; и҃ И҆ не [ꙗ҆́коже хꙋ́лимсѧ, и҆ ꙗ҆́коже глаго́лютъ нѣ́цыи на́съ глаго́лати:] ꙗ҆́кѡ сотвори́мъ ѕла̑ѧ, да прїи́дꙋтъ блага̑ѧ: и҆́хже сꙋ́дъ пра́веденъ є҆́сть. [є҃] ѳ҃ Что̀ ᲂу҆̀бо; преимѣ́емъ ли; ника́коже: ꙾пред̾ꙋкори́хомъ бо꙾꙾пре́жде бо ѡ҆бвине́ни є҆смы̀꙾ і҆ꙋдє́и же и҆ є҆́ллины ꙳всѧ̀꙳꙳всѝ꙳ под̾ грѣхо́мъ бы́ти, і҃ Ꙗ҆́коже є҆́сть пи́сано: ꙗ҆́кѡ нѣ́сть пра́веденъ никто́же. а҃і Нѣ́сть разꙋмѣва́ѧй, и҆ нѣ́сть взыска́ѧй бг҃а. в҃і Всѝ ᲂу҆клони́шасѧ, вкꙋ́пѣ непотре́бни бы́ша: нѣ́сть творѧ́й бл҃госты́ню, нѣ́сть да́же до є҆ди́нагѡ. г҃і Гро́бъ ѿве́рстъ горта́нь и҆́хъ, ѧ҆зы́ки свои́ми льща́хꙋ: ꙗ҆́дъ а҆́спїденъ под̾ ᲂу҆стна́ми и҆́хъ: д҃і И҆́хже ᲂу҆ста̀ клѧ́твы и҆ го́рести пѡ́лна сꙋ́ть. є҃і Ско́ры но́ги и҆́хъ пролїѧ́ти кро́вь: ѕ҃і Сокрꙋше́нїе и҆ ѡ҆ѕлобле́нїе на пꙋте́хъ и҆́хъ: з҃і И҆ пꙋтѝ ми́рнагѡ не позна́ша. (пнⷣе) и҃і Нѣ́сть стра́ха бж҃їѧ пред̾ ѻ҆чи́ма и҆́хъ.
Коне́цъ понедѣ́льникꙋ.
(заⷱ҇ п҃д) ѳ҃і Вѣ́мы же, ꙳ Въ сꙋббѡ́тꙋ в҃-ю: Бра́тїе, вѣ́мы, ꙳ ꙗ҆́кѡ є҆ли̑ка зако́нъ глаго́летъ, сꙋ́щымъ въ зако́нѣ глаго́летъ: да всѧ́ка ᲂу҆ста̀ заградѧ́тсѧ, и҆ пови́ненъ бꙋ́детъ ве́сь мі́ръ бг҃ови. к҃ Занѐ ѿ дѣ́лъ (л. ч҃) зако́на не ѡ҆правди́тсѧ всѧ́ка пло́ть пред̾ ни́мъ: зако́номъ бо позна́нїе грѣха̀. к҃а Ны́нѣ же кромѣ̀ зако́на пра́вда бж҃їѧ ꙗ҆ви́сѧ, свидѣ́тельствꙋема ѿ зако́на и҆ прорѡ́къ: к҃в Пра́вда же бж҃їѧ вѣ́рою і҆и҃съ хрⷭ҇то́вою, во всѧ̀ и҆ на всѣ́хъ вѣ́рꙋющихъ. нѣ́сть бо ра́знствїѧ: к҃г Вси́ бо согрѣши́ша, и҆ лише́ни сꙋ́ть сла́вы бж҃їѧ, к҃д Ѡ҆правда́еми тꙋ́не бл҃года́тїю є҆гѡ̀, и҆збавле́нїемъ є҆́же ѡ҆ хрⷭ҇тѣ̀ і҆и҃сѣ. к҃є Є҆го́же предположѝ бг҃ъ ѡ҆чище́нїе вѣ́рою въ кро́ви є҆гѡ̀, въ ꙗ҆вле́нїе пра́вды своеѧ̀, за ѿпꙋще́нїе пре́жде бы́вшихъ грѣхѡ́въ: к҃ѕ Въ долготерпѣ́нїи бж҃їи, и҆ въ показа́нїе пра́вды є҆гѡ̀ въ ны́нѣшнее вре́мѧ, во є҆́же бы́ти є҆мꙋ̀ пра́веднꙋ, и҆ ѡ҆правда́ющꙋ сꙋ́щаго ѿ вѣ́ры і҆и҃совы.
Коне́цъ сꙋббѡ́тѣ.
к҃з Гдѣ̀ ᲂу҆̀бо похвала̀; ѿгна́сѧ. кото́рымъ зако́номъ; дѣ́лы ли; нѝ, но зако́номъ вѣ́ры.
(заⷱ҇ п҃є) к҃и Мы́слимъ ᲂу҆̀бо ꙳ Въ сꙋббѡ́тꙋ г҃-ю: Бра́тїе, мы́слимъ ꙳ вѣ́рою ѡ҆правда́тисѧ человѣ́кꙋ, без̾ дѣ́лъ зако́на. к҃ѳ И҆лѝ і҆ꙋде́євъ бг҃ъ то́кмѡ, а҆ не и҆ ꙗ҆зы́кѡвъ; є҆́й и҆ ꙗ҆зы́кѡвъ. л҃ Поне́же є҆ди́нъ бг҃ъ, и҆́же ѡ҆правди́тъ ѡ҆брѣ́занїе ѿ вѣ́ры, и҆ неѡбрѣ́занїе вѣ́рою. л҃а Зако́нъ ли ᲂу҆̀бо разорѧ́емъ вѣ́рою; да не бꙋ́детъ: но зако́нъ ᲂу҆твержда́емъ.
Глава̀ четве́ртаѧ.
сⷯ а҃ Что̀ ᲂу҆̀бо рече́мъ, а҆враа́ма ѻ҆ц҃а̀ на́шего ѡ҆брѣстѝ по пло́ти; в҃ А҆́ще бо а҆враа́мъ ѿ дѣ́лъ ѡ҆правда́сѧ, и҆́мать похвалꙋ̀, но не ᲂу҆ бг҃а. (л. ч҃ ѡ҆б.) г҃ Что́ бо писа́нїе глаго́летъ; вѣ́рова же а҆враа́мъ бг҃ови, и҆ вмѣни́сѧ є҆мꙋ̀ въ пра́вдꙋ.
Коне́цъ сꙋббѡ́тѣ.
(заⷱ҇ п҃ѕ) д҃ Дѣ́лающемꙋ же ꙳ Во вто́рникъ в҃ недѣ́ли: Бра́тїе, дѣ́лающемꙋ ꙳ мзда̀ не вмѣнѧ́етсѧ по бл҃года́ти, но по до́лгꙋ. є҃ А҆ не дѣ́лающемꙋ, вѣ́рꙋющемꙋ же во ѡ҆правда́ющаго нечести́ва, вмѣнѧ́етсѧ вѣ́ра є҆гѡ̀ въ пра́вдꙋ. ѕ҃ Ꙗ҆́коже и҆ дв҃дъ глаго́летъ блаже́нство человѣ́ка, є҆мꙋ́же вмѣнѧ́етъ бг҃ъ пра́вдꙋ без̾ дѣ́лъ зако́на: з҃ Бл҃же́ни, и҆́хже ѿпꙋсти́шасѧ беззакѡ́нїѧ, и҆ и҆́хже прикры́шасѧ грѣсѝ. и҃ Бл҃же́нъ мꙋ́жъ, є҆мꙋ́же не вмѣни́тъ гдⷭ҇ь грѣха̀. ѳ҃ Блаже́нство ᲂу҆̀бо сїѐ, на ѡ҆брѣ́занїе ли, и҆лѝ на неѡбрѣ́занїе; глаго́лемъ бо: ꙗ҆́кѡ вмѣни́сѧ а҆враа́мꙋ вѣ́ра въ пра́вдꙋ. і҃ Ка́кѡ ᲂу҆̀бо вмѣни́сѧ є҆мꙋ̀; во ѡ҆брѣ́занїи ли сꙋ́щꙋ, и҆лѝ въ неѡбрѣ́занїи; не во ѡ҆брѣ́занїи, но въ неѡбрѣ́занїи. а҃і И҆ зна́менїе прїѧ́тъ ѡ҆брѣ́занїѧ, печа́ть пра́вды вѣ́ры, ꙗ҆́же въ неѡбрѣ́занїи: ꙗ҆́кѡ бы́ти є҆мꙋ̀ ѻ҆ц҃ꙋ̀ всѣ́хъ вѣ́рꙋющихъ въ неѡбрѣ́занїи, во є҆́же вмѣни́тисѧ и҆ тѣ̑мъ въ пра́вдꙋ: в҃і И҆ ѻ҆ц҃ꙋ̀ ѡ҆брѣ́занїѧ не сꙋ́щымъ то́чїю ѿ ѡ҆брѣ́занїѧ, но и҆ ходѧ́щымъ въ стопа́хъ вѣ́ры, ꙗ҆́же въ неѡбрѣ́занїи ѻ҆ц҃а̀ на́шегѡ а҆враа́ма.
Коне́цъ вто́рникꙋ.
(заⷱ҇ п҃з) г҃і Не зако́номъ бо ꙳꙳ Въ сре́дꙋ в҃ недѣ́ли: Бра́тїе, не зако́номъ ꙳꙳ ѡ҆бѣтова́нїе а҆враа́мꙋ, и҆лѝ сѣ́мени є҆гѡ̀, є҆́же бы́ти є҆мꙋ̀ наслѣ́дникꙋ мі́рови, (л. ч҃а) но пра́вдою вѣ́ры. д҃і А҆́ще бо сꙋ́щїи ѿ зако́на наслѣ́дницы: и҆спраздни́сѧ вѣ́ра, и҆ разори́сѧ ѡ҆бѣтова́нїе. є҃і Зако́нъ бо гнѣ́въ содѣ́ловаетъ: и҆дѣ́же бо нѣ́сть зако́на, тꙋ̀ ни престꙋпле́нїѧ. ѕ҃і Сегѡ̀ ра́ди ѿ вѣ́ры, да по бл҃года́ти, во є҆́же бы́ти и҆звѣ́стнꙋ ѡ҆бѣтова́нїю всемꙋ̀ сѣ́мени, не то́чїю сꙋ́щемꙋ ѿ зако́на: но и҆ сꙋ́щемꙋ ѿ вѣ́ры а҆враа́мовы, и҆́же є҆́сть ѻ҆ц҃ъ всѣ́мъ на́мъ. з҃і Ꙗ҆́коже є҆́сть пи́сано: ꙗ҆́кѡ ѻ҆ц҃а̀ мнѡ́гимъ ꙗ҆зы́кѡмъ положи́хъ тѧ̀, прѧ́мѡ є҆мꙋ́же вѣ́рова бг҃ꙋ, животворѧ́щемꙋ мє́ртвыѧ, и҆ нарица́ющꙋ не сꙋ̑щаѧ ꙗ҆́кѡ сꙋ̑щаѧ. и҃і И҆́же па́че ᲂу҆пова́нїѧ во ᲂу҆пова́нїе вѣ́рова, во є҆́же бы́ти є҆мꙋ̀ ѻ҆ц҃ꙋ̀ мнѡ́гимъ ꙗ҆зы́кѡмъ, по рече́нномꙋ: та́кѡ бꙋ́детъ сѣ́мѧ твоѐ. ѳ҃і И҆ не и҆знемо́гъ вѣ́рою, ни ᲂу҆смотрѣ̀ своеѧ̀ пло́ти ᲂу҆жѐ ᲂу҆мерщвле́ныѧ, столѣ́тенъ нѣ́гдѣ сы́й, и҆ ме́ртвости ложе́снъ са́рриныхъ. к҃ Во ѡ҆бѣтова́нїи же бж҃їи не ᲂу҆сꙋмнѣ́сѧ невѣ́рованїемъ: но возмо́же вѣ́рою, да́въ сла́вꙋ бг҃ови. к҃а И҆ и҆звѣ́стенъ бы́въ, ꙗ҆́кѡ є҆́же ѡ҆бѣща̀, си́ленъ є҆́сть и҆ сотвори́ти. к҃в Тѣ́мже и҆ вмѣни́сѧ є҆мꙋ̀ въ пра́вдꙋ. к҃г Не пи́сано же бы́сть за того̀ є҆ди́наго то́чїю, ꙗ҆́кѡ вмѣни́сѧ є҆мꙋ̀: к҃д Но и҆ за ны̀, и҆̀мже хо́щетъ вмѣни́тисѧ, вѣ́рꙋющымъ во воскр҃си́вшаго і҆и҃са хрⷭ҇та̀ гдⷭ҇а на́шего и҆з̾ ме́ртвыхъ, к҃є И҆́же пре́данъ бы́сть за прегрѣшє́нїѧ на́ша, и҆ воста̀ за ѡ҆правда́нїе на́ше.
Коне́цъ средѣ̀. (л. ч҃а ѡ҆б.)
Глава̀ пѧ́таѧ.
(заⷱ҇ п҃и) [ѕ҃] сⷯ а҃ Ѡ҆правди́вшесѧ ᲂу҆̀бо ꙳ Недѣ́лѧ г҃: Бра́тїе, ѡ҆правди́вшесѧ ꙳ вѣ́рою, ми́ръ и҆́мамы къ бг҃ꙋ гдⷭ҇емъ на́шимъ і҆и҃съ хрⷭ҇то́мъ. в҃ И҆́мже и҆ приведе́нїе ѡ҆брѣто́хомъ вѣ́рою во благода́ть сїю̀, въ не́йже стои́мъ, и҆ хва́лимсѧ ᲂу҆пова́нїемъ сла́вы бж҃їѧ. г҃ Не то́чїю же, но и҆ хва́лимсѧ въ ско́рбехъ, вѣ́дѧще, ꙗ҆́кѡ ско́рбь терпѣ́нїе содѣ́ловаетъ: д҃ Терпѣ́нїе же и҆скꙋ́сство, и҆скꙋ́сство же ᲂу҆пова́нїе: є҃ Оу҆пова́нїе же не посрами́тъ: ꙗ҆́кѡ любы̀ бж҃їѧ и҆злїѧ́сѧ въ сердца̀ на́ша, дх҃омъ ст҃ы́мъ да́ннымъ на́мъ.
(заⷱ҇) ѕ҃ Є҆ще́ бо хрⷭ҇то́съ ꙳꙳ Въ г҃ ча́съ пѧтка̀ вели́кагѡ: Бра́тїе, хрⷭ҇то́съ ꙳꙳ сꙋ́щымъ на́мъ немощны̑мъ, по вре́мени за нечести́выхъ ᲂу҆́мре. з҃ Є҆два́ бо за пра́ведника кто̀ ᲂу҆́мретъ, за бл҃га́го бо не́гли кто̀ и҆ де́рзнетъ ᲂу҆мре́ти. и҃ Составлѧ́етъ же свою̀ любо́вь въ на́съ бг҃ъ, ꙗ҆́кѡ є҆щѐ грѣ́шникѡмъ сꙋ́щымъ на́мъ, хрⷭ҇то́съ за ны̀ ᲂу҆́мре: ѳ҃ Мно́гѡ же ᲂу҆̀бо па́че ѡ҆правда́ни бы́вше ны́нѣ кро́вїю є҆гѡ̀, спасе́мсѧ и҆́мъ ѿ гнѣ́ва.
(заⷱ҇ п҃ѳ) і҃ А҆́ще бо ꙳꙳꙳ Въ четверто́къ в҃ недѣ́ли: Бра́тїе, а҆́ще ꙳꙳꙳ вразѝ бы́вше, примири́хомсѧ бг҃ꙋ сме́ртїю сн҃а є҆гѡ̀, мно́жае па́че примири́вшесѧ, спасе́мсѧ въ животѣ̀ є҆гѡ̀.
Коне́цъ недѣ́ли. (л. ч҃в)
Не то́чїю же, но и҆ хва́лимсѧ ѡ҆ бз҃ѣ гдⷭ҇емъ на́шимъ і҆и҃съ хрⷭ҇то́мъ, и҆́мже ны́нѣ примире́нїе прїѧ́хомъ.
Коне́цъ г҃-мꙋ часꙋ̀.
[з҃] в҃і Сегѡ̀ ра́ди, ꙗ҆́коже є҆ди́нѣмъ человѣ́комъ грѣ́хъ въ мі́ръ вни́де, и҆ грѣхо́мъ сме́рть: и҆ та́кѡ сме́рть во всѧ̀ человѣ́ки вни́де, въ не́мже всѝ согрѣши́ша. г҃і До зако́на бо грѣ́хъ бѣ̀ въ мі́рѣ: грѣ́хъ же не вмѣнѧ́шесѧ, не сꙋ́щꙋ зако́нꙋ. д҃і Но ца́рствова сме́рть ѿ а҆да́ма да́же до мѡѷсе́а, и҆ над̾ несогрѣ́шшими, по подо́бїю престꙋпле́нїѧ а҆да́мова, и҆́же є҆́сть ѻ҆́бразъ бꙋ́дꙋщагѡ. є҃і Но не ꙗ҆́коже прегрѣше́нїе, та́кѡ и҆ да́ръ. а҆́ще бо прегрѣше́нїемъ є҆ди́нагѡ мно́зи ᲂу҆мро́ша: мно́жае па́че бл҃года́ть бж҃їѧ и҆ да́ръ, благода́тїю є҆ди́нагѡ человѣ́ка і҆и҃са хрⷭ҇та̀, во мно́гихъ преизли́шествова. ѕ҃і И҆ не ꙗ҆́коже є҆ди́нѣмъ согрѣ́шшимъ, дарова́нїе: грѣ́хъ бо и҆з̾ є҆ди́нагѡ во ѡ҆сꙋжде́нїе, да́ръ же ѿ мно́гихъ прегрѣше́нїй, во ѡ҆правда́нїе.
Коне́цъ четверткꙋ̀.
(заⷱ҇ ч҃) з҃і А҆́ще бо є҆ди́нагѡ ꙳ Въ пѧто́къ в҃ недѣ́ли: Бра́тїе, а҆́ще є҆ди́нагѡ ꙳ прегрѣше́нїемъ, сме́рть ца́рствова є҆ди́нѣмъ: мно́жае па́че и҆збы́токъ благода́ти, и҆ да́ръ пра́вды прїе́млюще, въ жи́зни воцарѧ́тсѧ є҆ди́нѣмъ і҆и҃съ хрⷭ҇то́мъ. и҃і Тѣ́мже ᲂу҆́бѡ ꙗ҆́коже є҆ди́нагѡ прегрѣше́нїемъ во всѧ̀ человѣ́ки вни́де ѡ҆сꙋжде́нїе: та́коже и҆ є҆ди́нагѡ ѡ҆правда́нїемъ во всѧ̀ человѣ́ки вни́де ѡ҆правда́нїе жи́зни. ѳ҃і Ꙗ҆́коже бо ѡ҆слꙋша́нїемъ є҆ди́нагѡ человѣ́ка грѣ́шни бы́ша мно́зи: си́це и҆ (л. ч҃в ѡ҆б.) послꙋша́нїемъ є҆ди́нагѡ пра́ведни бꙋ́дꙋтъ мно́зи. к҃ Зако́нъ же привни́де, да ᲂу҆мно́житсѧ прегрѣше́нїе: и҆дѣ́же бо ᲂу҆мно́жисѧ грѣ́хъ, преизбы́точьствова бл҃года́ть. к҃а Да ꙗ҆́коже ца́рствова грѣ́хъ во сме́рть, та́коже и҆ бл҃года́ть воцр҃и́тсѧ пра́вдою, въ жи́знь вѣ́чнꙋю, і҆и҃съ хрⷭ҇то́мъ гдⷭ҇емъ на́шимъ.
Глава̀ шеста́ѧ.
сⷯ а҃ Что̀ ᲂу҆̀бо рече́мъ; пребꙋ́демъ ли во грѣсѣ̀, да благода́ть преꙋмно́житсѧ; да не бꙋ́детъ. в҃ И҆̀же бо ᲂу҆мро́хомъ грѣхꙋ̀, ꙾ка́кѡ па́ки ѡ҆живе́мъ ѡ҆ не́мъ꙾꙾ка́кѡ є҆щѐ жи́ти бꙋ́демъ въ не́мъ;꙾;
Коне́цъ пѧткꙋ̀.
(заⷱ҇ ч҃а) [и҃] г҃ И҆лѝ не разꙋмѣ́ете, ꙗ҆́кѡ є҆ли́цы ꙳ Во ст҃ꙋ́ю и҆ вели́кꙋю сꙋббѡ́тꙋ, ве́черъ: Бра́тїе, є҆ли́цы ꙳ во хрⷭ҇та̀ і҆и҃са крⷭ҇ти́хомсѧ, въ сме́рть є҆гѡ̀ крⷭ҇ти́хомсѧ; д҃ Спогребо́хомсѧ ᲂу҆̀бо є҆мꙋ̀ кр҃ще́нїемъ въ сме́рть: да ꙗ҆́коже воста̀ хрⷭ҇то́съ ѿ ме́ртвыхъ сла́вою ѻ҆́ч҃ею, та́кѡ и҆ мы̀ во ѡ҆бновле́нїи жи́зни ꙳ходи́ти на́чнемъ꙳꙳да хо́димъ꙳. є҃ А҆́ще бо ꙳꙳соѻбра́зни꙳꙳꙳꙳снасажде́ни꙳꙳ бы́хомъ подо́бїю сме́рти є҆гѡ̀, то и҆ воскресе́нїю бꙋ́демъ. ѕ҃ Сїѐ вѣ́дѧще, ꙗ҆́кѡ ве́тхїй на́шъ человѣ́къ съ ни́мъ распѧ́тсѧ, да ᲂу҆праздни́тсѧ тѣ́ло грѣхо́вное, ꙗ҆́кѡ ктомꙋ̀ не рабо́тати на́мъ грѣхꙋ̀. з҃ Оу҆ме́рый бо ѡ҆правди́сѧ ѿ грѣха̀. и҃ А҆́ще ли ᲂу҆мро́хомъ со хрⷭ҇то́мъ, вѣ́рꙋемъ, ꙗ҆́кѡ и҆ жи́ви бꙋ́демъ съ ни́мъ: ѳ҃ Вѣ́дѧще, ꙗ҆́кѡ хрⷭ҇то́съ воста̀ ѿ ме́ртвыхъ, ктомꙋ̀ ᲂу҆жѐ не ᲂу҆мира́етъ, сме́рть є҆мꙋ̀ (л. ч҃г) ктомꙋ̀ не ѡ҆блада́етъ. і҃ Є҆́же бо ᲂу҆́мре, грѣхꙋ̀ ᲂу҆́мре є҆ди́ною: а҆ є҆́же живе́тъ, бг҃ови живе́тъ.
(заⷱ҇ ч҃в) а҃і Та́коже и҆ вы̀ помышлѧ́йте ꙳ Въ сꙋббѡ́тꙋ д҃-ю: Бра́тїе, помышлѧ́йте ꙳ себѐ, мє́ртвымъ ᲂу҆́бѡ бы́ти грѣхꙋ̀, живы̑мъ же бг҃ови, ѡ҆ хрⷭ҇тѣ̀ і҆и҃сѣ гдⷭ҇ѣ на́шемъ.
Коне́цъ вели́кой сꙋббѡ́тѣ.
в҃і Да не ца́рствꙋетъ ᲂу҆̀бо грѣ́хъ въ ме́ртвеннѣмъ ва́шемъ тѣ́лѣ, во є҆́же послꙋ́шати є҆гѡ̀ въ по́хотехъ є҆гѡ̀: г҃і Нижѐ представлѧ́йте ᲂу҆́ды ва́шѧ ѻ҆рꙋ̑жїѧ непра́вды грѣхꙋ̀: но представлѧ́йте себѐ бг҃ови, ꙗ҆́кѡ ѿ ме́ртвыхъ жи́вы, и҆ ᲂу҆́ды ва́шѧ ѻ҆рꙋ̑жїѧ пра́вды бг҃ови. д҃і Грѣ́хъ бо ва́ми да не ѡ҆блада́етъ: нѣ́сте бо под̾ зако́номъ, но под̾ блгⷣтїю. є҃і Что̀ ᲂу҆̀бо; согрѣши́мъ ли, занѐ нѣ́смы под̾ зако́номъ, но под̾ бл҃года́тїю; да не бꙋ́детъ. ѕ҃і Не вѣ́сте ли, ꙗ҆́кѡ є҆мꙋ́же представлѧ́ете себѐ рабы̑ въ послꙋша́нїе, рабѝ є҆стѐ, є҆гѡ́же послꙋ́шаете, и҆лѝ грѣха̀ въ сме́рть, и҆лѝ послꙋша́нїѧ въ пра́вдꙋ; з҃і Бл҃годари́мъ ᲂу҆̀бо бг҃а, ꙗ҆́кѡ бѣ́сте рабѝ грѣхꙋ̀, послꙋ́шасте же ѿ се́рдца, во́ньже и҆ преда́стесѧ ѻ҆́бразъ ᲂу҆че́нїѧ.
Коне́цъ сꙋббѡ́тѣ.
(заⷱ҇ ч҃г) и҃і Свобо́ждшесѧ ꙳꙳ Недѣ́лѧ д҃-ѧ: Бра́тїе, свобо́ждшесѧ ꙳꙳ же ѿ грѣха̀, порабо́тистесѧ пра́вдѣ. ѳ҃і Человѣ́ческо глаго́лю, за не́мощь пло́ти ва́шеѧ: ꙗ҆́коже ᲂу҆́бѡ предста́висте ᲂу҆́ды ва́шѧ рабы̀ (л. ч҃г ѡ҆б.) нечистотѣ̀, и҆ беззако́нїю въ беззако́нїе: та́кѡ ны́нѣ предста́вите ᲂу҆́ды ва́шѧ рабы̀ пра́вдѣ во ст҃ы́ню. к҃ Є҆гда́ бо рабѝ бѣ́сте грѣха̀, свобо́дни бѣ́сте ѿ пра́вды. (втоⷬ҇) к҃а Кі́й ᲂу҆̀бо тогда̀ и҆мѣ́сте пло́дъ, ѡ҆ ни́хже ны́нѣ стыдите́сѧ; кончи́на бо ѻ҆́нѣхъ, сме́рть. к҃в Ны́нѣ же свобо́ждшесѧ ѿ грѣха̀, порабо́щшесѧ же бг҃ови, и҆́мате пло́дъ ва́шъ во ст҃ы́ню, кончи́нꙋ же жи́знь вѣ́чнꙋю. к҃г Ѻ҆бро́цы бо грѣха̀ сме́рть: дарова́нїе же бж҃їе, живо́тъ вѣ́чный, ѡ҆ хрⷭ҇тѣ̀ і҆и҃сѣ гдⷭ҇ѣ на́шемъ.
Коне́цъ недѣ́ли.
Глава̀ седма́ѧ.
(заⷱ҇ ч҃д) [ѳ҃] сⷯ а҃ И҆лѝ не разꙋмѣ́ете бра́тїе, [вѣ́дꙋщымъ бо ꙳ Въ понедѣ́льникъ г҃-ѧ недѣ́ли: Бра́тїе, вѣ́дꙋщымъ ꙳ зако́нъ глаго́лю,] ꙗ҆́кѡ зако́нъ ѡ҆блада́етъ над̾ чл҃вѣ́комъ, во є҆ли́ко вре́мѧ живе́тъ; в҃ И҆́бо мꙋжа́таѧ жена̀ жи́вꙋ мꙋ́жꙋ привѧ́зана є҆́сть зако́номъ: а҆́ще ли же ᲂу҆́мретъ мꙋ́жъ є҆ѧ̀, разрѣши́тсѧ ѿ зако́на мꙋ́жескагѡ. г҃ Тѣ́мже ᲂу҆̀бо жи́вꙋ сꙋ́щꙋ мꙋ́жꙋ, прелюбодѣ́йца быва́етъ, а҆́ще бꙋ́детъ мꙋ́жеви и҆но́мꙋ. а҆́ще ли ᲂу҆́мретъ мꙋ́жъ є҆ѧ̀, свобо́дна є҆́сть ѿ зако́на, не бы́ти є҆́й прелюбодѣ́йцѣ, бы́вшей мꙋ́жꙋ и҆но́мꙋ. д҃ Тѣ́мже бра́тїе моѧ̀, и҆ вы̀ ᲂу҆мро́сте зако́нꙋ тѣ́ломъ хрⷭ҇то́вымъ, во є҆́же бы́ти ва́мъ и҆но́мꙋ, воста́вшемꙋ и҆з̾ ме́ртвыхъ, да пло́дъ принесе́мъ бг҃ови. є҃ Є҆гда́ бо бѣ́хомъ во пло́ти, стра̑сти грѣхѡ́вныѧ, ꙗ҆̀же зако́номъ, дѣ́йствовахꙋ во ᲂу҆́дѣхъ (л. ч҃д) на́шихъ, во є҆́же пло́дъ твори́ти сме́рти. ѕ҃ Ны́нѣ же ᲂу҆праздни́хомсѧ ѿ зако́на, ᲂу҆ме́рше и҆́мже держи́ми бѣ́хомъ: ꙗ҆́кѡ рабо́тати на́мъ [бг҃ови] во ѡ҆бновле́нїи дх҃а, а҆ не въ ве́тхости пи́смене. [і҃] з҃ Что̀ ᲂу҆̀бо рече́мъ; зако́нъ ли грѣ́хъ; да не бꙋ́детъ. но грѣха̀ не зна́хъ, то́чїю зако́номъ: по́хоти же не вѣ́дахъ, а҆́ще не зако́нъ глаго́лаше: не похо́щеши. и҃ Винꙋ́ же прїе́мъ грѣ́хъ за́повѣдїю, содѣ́ла во мнѣ̀ всѧ́кꙋ по́хоть: без̾ зако́на бо грѣ́хъ ме́ртвъ є҆́сть. ѳ҃ А҆́зъ же живѧ́хъ кромѣ̀ зако́на и҆ногда̀: прише́дши же за́повѣди, грѣ́хъ ᲂу҆́бѡ ѡ҆живѐ, і҃ А҆́зъ же ᲂу҆мро́хъ: и҆ ѡ҆брѣ́тесѧ мѝ за́повѣдь, ꙗ҆́же въ живо́тъ, сїѧ̀ въ сме́рть. а҃і Грѣ́хъ бо винꙋ̀ прїе́мъ за́повѣдїю, прельсти́ мѧ, и҆ то́ю ᲂу҆мертви́ мѧ. в҃і Тѣ́мже ᲂу҆̀бо зако́нъ свѧ́тъ, и҆ за́повѣдь свѧта̀, и҆ пра́ведна и҆ блага̀. г҃і Благо́е ли ᲂу҆̀бо бы́сть мнѣ̀ сме́рть; да не бꙋ́детъ: но грѣ́хъ, да ꙗ҆ви́тсѧ грѣ́хъ, бл҃ги́мъ мѝ содѣва́ѧ сме́рть: да бꙋ́детъ по премно́гꙋ грѣ́шенъ грѣ́хъ за́повѣдїю.
Коне́цъ понедѣ́льникꙋ.
(заⷱ҇ ч҃є) д҃і Вѣ́мы бо, ꙳ Во вто́рникъ г҃ недѣ́ли: Бра́тїе, вѣ́мы, ꙳ ꙗ҆́кѡ зако́нъ дꙋхо́венъ є҆́сть: а҆́зъ же пло́тѧнъ є҆́смь, про́данъ под̾ грѣ́хъ. є҃і Є҆́же бо содѣва́ю, не разꙋмѣ́ю: не є҆́же бо хощꙋ̀, сїѐ творю̀: но є҆́же ненави́ждꙋ, то̀ содѣ́ловаю. ѕ҃і А҆́ще ли є҆́же не хощꙋ̀, сїѐ творю̀, хвалю̀ зако́нъ ꙗ҆́кѡ до́бръ. [а҃і] з҃і Ны́нѣ же не ктомꙋ̀ а҆́зъ сїѐ содѣва́ю, но живы́й во мнѣ̀ грѣ́хъ. и҃і Вѣ́мъ бо, ꙗ҆́кѡ не живе́тъ во мнѣ̀, си́рѣчь (л. ч҃д ѡ҆б.) въ пло́ти мое́й, до́брое: є҆́же бо хотѣ́ти, прилѣжи́тъ мѝ: а҆ є҆́же содѣ́ѧти до́брое, не ѡ҆брѣта́ю. ѳ҃і Не є҆́же бо хощꙋ̀ до́брое, творю̀: но є҆́же не хощꙋ̀ ѕло́е, сїѐ содѣва́ю. к҃ А҆́ще ли є҆́же не хощꙋ̀ а҆́зъ, сїѐ творю̀: ᲂу҆жѐ не а҆́зъ сїѐ творю̀, но живы́й во мнѣ̀ грѣ́хъ. к҃а Ѡ҆брѣта́ю ᲂу҆̀бо зако́нъ, хотѧ́щꙋ мѝ твори́ти до́брое, ꙗ҆́кѡ мнѣ̀ ѕло́е прилѣжи́тъ. к҃в Соꙋслажда́юсѧ бо зако́нꙋ бж҃їю по внꙋ́треннемꙋ человѣ́кꙋ. к҃г Ви́ждꙋ же и҆́нъ зако́нъ во ᲂу҆́дѣхъ мои́хъ, проти́вꙋ вою́ющъ зако́нꙋ ᲂу҆ма̀ моегѡ̀, и҆ плѣнѧ́ющъ мѧ̀ зако́номъ грѣхо́внымъ, сꙋ́щимъ во ᲂу҆́дѣхъ мои́хъ. к҃д Ѻ҆каѧ́ненъ а҆́зъ человѣ́къ: кто́ мѧ и҆зба́витъ ѿ тѣ́ла сме́рти сеѧ̀; к҃є Благодарю̀ бг҃а моего̀ і҆и҃съ хрⷭ҇то́мъ гдⷭ҇емъ на́шимъ. тѣ́мже ᲂу҆̀бо са́мъ а҆́зъ ᲂу҆мо́мъ мои́мъ рабо́таю зако́нꙋ бж҃їю, пло́тїю же зако́нꙋ грѣхо́вномꙋ.
Глава̀ ѻ҆сма́ѧ.
сⷯ а҃ Ни є҆ди́но ᲂу҆̀бо ны́нѣ ѡ҆сꙋжде́нїе сꙋ́щымъ ѡ҆ хрⷭ҇тѣ̀ і҆и҃сѣ, не по пло́ти ходѧ́щымъ, но по дꙋ́хꙋ.
(заⷱ҇ ч҃ѕ) в҃ Зако́нъ бо ꙳ Среда̀ г҃ недѣ́ли: Бра́тїе, зако́нъ ꙳ дх҃а жи́зни ѡ҆ хрⷭ҇тѣ̀ і҆и҃сѣ, свободи́лъ мѧ̀ є҆́сть ѿ зако́на грѣхо́внагѡ и҆ сме́рти.
Коне́цъ вто́рникꙋ.
(заⷱ҇) [в҃і] Немощно́е бо ꙳꙳ Деке́мврїа к҃и: Бра́тїе, немощно́е ꙳꙳ зако́на, въ не́мже немоществова́ше пло́тїю, бг҃ъ сн҃а своего̀ посла̀ въ подо́бїи пло́ти (л. ч҃є) грѣха̀, и҆ ѡ҆ грѣсѣ̀ ѡ҆сꙋдѝ грѣ́хъ во пло́ти: д҃ Да ѡ҆правда́нїе зако́на и҆спо́лнитсѧ въ на́съ, не по пло́ти ходѧ́щихъ, но по дꙋ́хꙋ. є҃ Сꙋ́щїи бо по пло́ти, плотска̑ѧ мꙋ́дрствꙋютъ: а҆ и҆̀же по дꙋ́хꙋ, дꙋхѡ́внаѧ. ѕ҃ Мꙋдрова́нїе бо плотско́е, сме́рть є҆́сть: а҆ мꙋдрова́нїе дꙋхо́вное, живо́тъ и҆ ми́ръ. з҃ Занѐ мꙋдрова́нїе плотско́е, вражда̀ на бг҃а: зако́нꙋ бо бж҃їю не покорѧ́етсѧ, ниже́ бо мо́жетъ.
(заⷱ҇) и҃ Сꙋ́щїи же во пло́ти ꙳ І҆аннꙋа́рїа д҃: Бра́тїе, сꙋ́щїи во пло́ти ꙳ бг҃ꙋ ᲂу҆годи́ти не мо́гꙋтъ. ѳ҃ Вы́ же нѣ́сте во пло́ти, но въ дꙋ́сѣ: поне́же дх҃ъ бж҃їй живе́тъ въ ва́съ.
Коне́цъ деке́мврїю.
а҆́ще ли кто̀ дх҃а хрⷭ҇то́ва не и҆́мать, се́й нѣ́сть є҆гѡ́въ. і҃ А҆́ще ли хрⷭ҇то́съ въ ва́съ, пло́ть ᲂу҆́бѡ мертва̀ грѣха̀ ра́ди: дꙋ́хъ же живе́тъ пра́вды ра́ди. а҃і А҆́ще ли же дх҃ъ воскреси́вшагѡ і҆и҃са ѿ ме́ртвыхъ живе́тъ въ ва́съ, воздви́гїй хрⷭ҇та̀ и҆з̾ ме́ртвыхъ, ѡ҆животвори́тъ и҆ ме́ртвєннаѧ тѣлеса̀ ва́ша, живꙋ́щимъ дх҃омъ є҆гѡ̀ въ ва́съ. в҃і Тѣ́мже ᲂу҆̀бо бра́тїе, до́лжни є҆смы̀ не пло́ти, є҆́же по пло́ти жи́ти. г҃і А҆́ще бо по пло́ти живетѐ, и҆́мате ᲂу҆мре́ти: а҆́ще ли дх҃омъ дѣѧ̑нїѧ плотска́ѧ ᲂу҆мерщвлѧ́ете, жи́ви бꙋ́дете.
Коне́цъ средѣ̀.
(заⷱ҇ ч҃з) д҃і Є҆ли́цы бо ꙳꙳ Сꙋббѡ́та є҃ недѣ́ли: Бра́тїе, є҆ли́цы ꙳꙳ дх҃омъ бж҃їимъ во́дѧтсѧ, сі́и сꙋ́ть сн҃ове бж҃їи.
Коне́цъ і҆аннꙋа́рїю. (л. ч҃є ѡ҆б.)
є҃і Не прїѧ́сте бо дх҃а рабо́ты па́ки въ боѧ́знь: но прїѧ́сте дх҃ъ сыноположе́нїѧ, ѡ҆ не́мже вопїе́мъ: а҆́вва ѻ҆́ч҃е. ѕ҃і Са́мый дх҃ъ послꙋшествꙋ́етъ дх҃ови на́шемꙋ, ꙗ҆́кѡ є҆смы̀ ча́да бж҃їѧ. з҃і А҆́ще же ча́да, и҆ наслѣ́дницы: наслѣ́дницы ᲂу҆́бѡ бг҃ꙋ, снаслѣ́дницы же хрⷭ҇тꙋ̀: поне́же съ ни́мъ стра́ждемъ, да и҆ съ ни́мъ просла́вимсѧ. [г҃і] и҃і Непщꙋ́ю бо, ꙗ҆́кѡ недосто́йны стра́сти ны́нѣшнѧгѡ вре́мене къ хотѧ́щей сла́вѣ ꙗ҆ви́тисѧ въ на́съ. ѳ҃і Ча́ѧнїе бо тва́ри, ѿкрове́нїе сн҃ѡ́въ бж҃їихъ ча́етъ. к҃ Сꙋетѣ́ бо тва́рь повинꙋ́сѧ не во́лею, но за повинꙋ́вшаго ю҆̀ на ᲂу҆пова́нїи, к҃а Ꙗ҆́кѡ и҆ сама̀ тва́рь свободи́тсѧ ѿ рабо́ты и҆стлѣ́нїѧ, въ свобо́дꙋ сла́вы ча̑дъ бж҃їихъ.
Коне́цъ сꙋббѡ́тѣ.
(заⷱ҇ ч҃и) к҃в Вѣ́мы бо, ꙳ Въ четверто́къ г҃ недѣ́ли: Бра́тїе, вѣ́мы, ꙳ ꙗ҆́кѡ всѧ̀ тва́рь съ на́ми совоздыха́етъ, и҆ сболѣ́знꙋетъ да́же до ны́нѣ: к҃г Не то́чїю же, но и҆ са́ми нача́токъ дх҃а и҆мꙋ́ще, и҆ мы̀ са́ми въ себѣ̀ воздыха́емъ, всыновле́нїѧ ча́юще, и҆збавле́нїѧ тѣ́лꙋ на́шемꙋ. к҃д Оу҆пова́нїемъ бо спасо́хомсѧ. ᲂу҆пова́нїе же ви́димое, нѣ́сть ᲂу҆пова́нїе: є҆́же бо ви́дитъ кто̀, что̀ и҆ ᲂу҆пова́етъ; к҃є А҆́ще ли є҆гѡ́же не ви́димъ, надѣ́емсѧ, терпѣ́нїемъ жде́мъ. к҃ѕ Си́це же и҆ дх҃ъ спосо́бствꙋетъ на́мъ въ не́мощехъ на́шихъ: ѡ҆ чесо́мъ бо помо́лимсѧ, ꙗ҆́коже подоба́етъ, не вѣ́мы: но са́мъ дх҃ъ хода́тайствꙋетъ ѡ҆ на́съ воздыха́нїи неизглаго́ланными. к҃з И҆спыта́ѧй же сердца̀ вѣ́сть, что́ (л. ч҃ѕ) є҆сть мꙋдрова́нїе дх҃а, ꙗ҆́кѡ по бг҃ꙋ ꙾приповѣ́дꙋетъ꙾꙾хода́тайствꙋетъ꙾ ѡ҆ ст҃ы́хъ.
Коне́цъ четверткꙋ̀.
(заⷱ҇ ч҃ѳ) к҃и Вѣ́мы же, ꙳ Ст҃ы́мъ великомꙋ́ченикѡмъ: Бра́тїе, вѣ́мы, ꙳ ꙗ҆́кѡ лю́бѧщымъ бг҃а всѧ̑ поспѣшествꙋ́ютъ во благо́е, сꙋ́щымъ по пред̾ꙋвѣ́дѣнїю зва̑ннымъ. к҃ѳ И҆̀хже бо пред̾ꙋвѣ́дѣ, [тѣ́хъ] и҆ пред̾ꙋста́ви соѻбра̑знымъ бы́ти ѻ҆́бразꙋ сн҃а своегѡ̀, ꙗ҆́кѡ бы́ти є҆мꙋ̀ перворо́днꙋ во мно́гихъ бра́тїѧхъ. л҃ А҆ и҆̀хже пред̾ꙋста́ви, тѣ́хъ и҆ призва̀: а҆ и҆̀хже призва̀, си́хъ и҆ ѡ҆правда̀: а҆ и҆̀хже ѡ҆правда̀, си́хъ и҆ просла́ви. л҃а Что̀ ᲂу҆̀бо рече́мъ къ си̑мъ; а҆́ще бг҃ъ по на́съ, кто̀ на ны̀; л҃в И҆́же ᲂу҆́бѡ своегѡ̀ сн҃а не пощадѣ̀, но за ны̀ всѧ̑ пре́далъ є҆́сть є҆го̀: ка́кѡ ᲂу҆́бѡ не и҆ съ ни́мъ всѧ̑ на́мъ да́рствꙋетъ; л҃г Кто̀ пое́млетъ на и҆збра̑нныѧ бж҃їѧ; бг҃ъ ѡ҆правда́ѧй: л҃д Кто̀ ѡ҆сꙋжда́ѧй; хрⷭ҇то́съ і҆и҃съ ᲂу҆ме́рый, па́че же и҆ воскресы́й, и҆́же и҆ є҆́сть ѡ҆деснꙋ́ю бг҃а, и҆́же и҆ хода́тайствꙋетъ ѡ҆ на́съ: [д҃і] л҃є Кто́ ны разлꙋчи́тъ ѿ любвѐ бж҃їѧ; ско́рбь ли, и҆лѝ тѣснота̀, и҆лѝ гоне́нїе, и҆лѝ гла́дъ, и҆лѝ нагота̀, и҆лѝ бѣда̀, и҆лѝ ме́чь; ꙗ҆́коже є҆́сть пи́сано: л҃ѕ Ꙗ҆́кѡ тебѐ ра́ди ᲂу҆мерщвлѧ́еми є҆смы̀ ве́сь де́нь, вмѣни́хомсѧ ꙗ҆́коже ѻ҆́вцы заколе́нїѧ. л҃з Но ѡ҆ си́хъ всѣ́хъ препобѣжда́емъ за возлю́бльшаго ны̀. л҃и И҆звѣсти́хсѧ бо, ꙗ҆́кѡ ни сме́рть, ни живо́тъ, ни а҆́гг҃ли, ни нача̑ла, нижѐ си̑лы, ни настоѧ̑щаѧ, ни грѧдꙋ̑щаѧ, л҃ѳ Ни высота̀, ни глꙋбина̀, (л. ч҃ѕ ѡ҆б.) ни и҆́на тва́рь ка́ѧ возмо́жетъ на́съ разлꙋчи́ти ѿ любвѐ бж҃їѧ, ꙗ҆́же ѡ҆ хрⷭ҇тѣ̀ і҆и҃сѣ гдⷭ҇ѣ на́шемъ.
Коне́цъ великомꙋ́ченикѡмъ.
Глава̀ девѧ́таѧ.
(заⷱ҇ р҃) [є҃і] сⷯ а҃ И҆́стинꙋ ꙳ Сꙋббѡ́та ѕ҃-ѧ недѣ́ли: Бра́тїе, и҆́стинꙋ ꙳ глаго́лю ѡ҆ хрⷭ҇тѣ̀, не лгꙋ̀, послꙋшествꙋ́ющи мѝ со́вѣсти мое́й дх҃омъ ст҃ы́мъ, в҃ Ꙗ҆́кѡ ско́рбь мѝ є҆́сть ве́лїѧ, и҆ непрестаю́щаѧ болѣ́знь се́рдцꙋ моемꙋ̀. г҃ Моли́лъ бы́хъ бо сѧ са́мъ а҆́зъ ѿлꙋче́нъ бы́ти ѿ хрⷭ҇та̀ по бра́тїи мое́й, сро́дницѣхъ мои́хъ по пло́ти, д҃ И҆̀же сꙋ́ть і҆и҃льте, и҆́хже (срⷣе) всыновле́нїе, и҆ сла́ва, и҆ завѣ́ти, и҆ законоположе́нїе, и҆ слꙋже́нїе, и҆ ѡ҆бѣтова̑нїѧ: є҃ И҆́хже ѻ҆ц҃ы̀, и҆ ѿ ни́хже хрⷭ҇то́съ по пло́ти, сы́й над̾ всѣ́ми бг҃ъ, бл҃гослове́нъ во вѣ́ки, а҆ми́нь.
Коне́цъ сꙋббѡ́тѣ.
(заⷱ҇ р҃а) ѕ҃ Не та́коже, ꙳꙳ Пѧто́къ г҃-ѧ недѣ́ли: Бра́тїе, не та́коже ꙳꙳ ꙗ҆́кѡ ѿпадѐ сло́во бж҃їе: не вси́ бо сꙋ́щїи ѿ і҆и҃лѧ, сі́и і҆и҃ль: з҃ Ни занѐ сꙋ́ть сѣ́мѧ а҆враа́мле, всѝ ча̑да: но ѡ҆ і҆саа́цѣ, речѐ, нарече́тсѧ тѝ сѣ́мѧ. и҃ Си́рѣчь, не ча̑да плотска̑ѧ, сїѧ̀ ча̑да бж҃їѧ, но ча̑да ѡ҆бѣтова́нїѧ, причита́ютсѧ въ сѣ́мѧ: ѳ҃ Ѡ҆бѣтова́нїѧ бо сло́во сїѐ: на сїѐ вре́мѧ прїидꙋ̀, и҆ бꙋ́детъ са́ррѣ сы́нъ. і҃ Не то́чїю же, но и҆ реве́кка ѿ є҆ди́нагѡ ло́жа і҆саа́ка ѻ҆ц҃а̀ на́шегѡ и҆мꙋ́щи. а҃і Не ᲂу҆́бѡ (л. ч҃з) ро́ждшымсѧ, ни сотво́ршымъ чесо̀ бла́го и҆лѝ ѕло̀ да по и҆збра́нїю предложе́нїе бж҃їе пребꙋ́детъ, в҃і Не ѿ дѣ́лъ, но ѿ призыва́ющагѡ, рече́сѧ є҆́й: ꙗ҆́кѡ бо́лїй порабо́таетъ ме́ньшемꙋ. г҃і Ꙗ҆́коже є҆́сть пи́сано: і҆а́кѡва возлюби́хъ, и҆са́ѵа же возненави́дѣхъ. д҃і Что̀ ᲂу҆̀бо рече́мъ; є҆да̀ непра́вда ᲂу҆ бг҃а; да не бꙋ́детъ. є҃і Мѡѷсе́ови бо глаго́летъ: поми́лꙋю, є҆го́же а҆́ще поми́лꙋю: и҆ ᲂу҆ще́дрю, є҆го́же а҆́ще ᲂу҆ще́дрю. ѕ҃і Тѣ́мже ᲂу҆̀бо ни хотѧ́щагѡ, ни текꙋ́щагѡ, но ми́лꙋющагѡ бг҃а. з҃і Глаго́летъ бо писа́нїе фараѡ́нови: ꙗ҆́кѡ на и҆́стое сїѐ воздвиго́хъ тѧ̀, ꙗ҆́кѡ да покажꙋ̀ тобо́ю си́лꙋ мою̀: и҆ ꙗ҆́кѡ да возвѣсти́тсѧ и҆́мѧ моѐ по все́й землѝ.
(заⷱ҇ р҃в) и҃і Тѣ́мже ᲂу҆̀бо, є҆го́же ꙳ Понедѣ́льникъ д҃ недѣ́ли: Бра́тїе, бг҃ъ є҆го́же ꙳ хо́щетъ, ми́лꙋетъ: а҆ є҆го́же хо́щетъ, ѡ҆жесточа́етъ. ѳ҃і Рече́ши же мѝ ᲂу҆̀бо: чесѡ̀ ра́ди ᲂу҆́бѡ ᲂу҆корѧ́етъ; во́ли бо є҆гѡ̀ кто̀ проти́витисѧ мо́жетъ;
Коне́цъ пѧткꙋ̀.
к҃ Тѣ́мже ᲂу҆̀бо, ѽ человѣ́че! ты̀ кто̀ є҆сѝ, проти́въ ѿвѣща́ѧй бг҃ови; є҆да̀ рече́тъ зда́нїе созда́вшемꙋ є҆̀: почто́ мѧ сотвори́лъ є҆сѝ та́кѡ; к҃а И҆лѝ не и҆́мать вла́сти скꙋде́льникъ на бре́нїи, ѿ тогѡ́же смѣше́нїѧ сотвори́ти, ѻ҆́въ ᲂу҆́бѡ сосꙋ́дъ въ че́сть, ѻ҆́въ же не въ че́сть; к҃в А҆́ще ли же хотѧ̀ бг҃ъ показа́ти гнѣ́въ сво́й, и҆ ꙗ҆ви́ти си́лꙋ свою̀, пренесѐ во мно́зѣ долготерпѣ́нїи сосꙋ́ды гнѣ́ва соверше́ны въ поги́бель: к҃г И҆ да ска́жетъ бога́тство сла́вы своеѧ̀ на сосꙋ́дѣхъ (л. ч҃з ѡ҆б.) ми́лости, ꙗ҆̀же пред̾ꙋгото́ва въ сла́вꙋ: к҃д И҆̀хже и҆ призва̀ на́съ, не то́чїю ѿ і҆ꙋдє́й, но и҆ ѿ ꙗ҆зы̑къ. к҃є Ꙗ҆́коже и҆ во і҆ѡсі́и глаго́летъ: нарекꙋ̀ не лю́ди моѧ̀ лю́ди моѧ̀, и҆ невозлю́бленꙋю возлю́бленꙋ. к҃ѕ И҆ бꙋ́детъ на мѣ́стѣ, и҆дѣ́же рече́сѧ и҆̀мъ: не лю́дїе моѝ є҆стѐ вы̀, та́мѡ нарекꙋ́тсѧ сы́нове бг҃а жива́гѡ. к҃з И҆са́їа же вопїе́тъ ѡ҆ і҆и҃ли: а҆́ще бꙋ́детъ число̀ сынѡ́въ і҆и҃левыхъ, ꙗ҆́кѡ песо́къ морскі́й, ѡ҆ста́нокъ спасе́тсѧ. к҃и Сло́во бо скончава́ѧ и҆ сокраща́ѧ въ пра́вдѣ, ꙗ҆́кѡ сло́во сокраще́но сотвори́тъ гдⷭ҇ь на землѝ. к҃ѳ И҆ ꙗ҆́коже проречѐ и҆са́їа: а҆́ще не бы̀ гдⷭ҇ь саваѡ́ѳъ ѡ҆ста́вилъ на́мъ сѣ́мене, ꙗ҆́коже содо́мъ ᲂу҆́бѡ бы́ли бы́хомъ, и҆ ꙗ҆́коже гомо́ррꙋ ᲂу҆подо́билисѧ бы́хомъ. [ѕ҃і] л҃ Что̀ ᲂу҆̀бо рече́мъ; ꙗ҆́кѡ ꙗ҆зы́цы не гонѧ́щїи пра́вдꙋ, постиго́ша пра́вдꙋ: пра́вдꙋ же, ꙗ҆́же ѿ вѣ́ры. л҃а І҆и҃ль же гонѧ̀ зако́нъ пра́вды, въ зако́нъ пра́вды не пости́же. л҃в Чесѡ̀ ра́ди; занѐ не ѿ вѣ́ры, но ѿ дѣ́лъ зако́на: преткнꙋ́шасѧ бо ѡ҆ ка́мень претыка́нїѧ. л҃г Ꙗ҆́коже є҆́сть пи́сано: сѐ полага́ю въ сїѡ́нѣ ка́мень претыка́нїѧ, и҆ ка́мень собла́зна: и҆ всѧ́къ вѣ́рꙋѧй во́нь, не постыди́тсѧ.
Коне́цъ понедѣ́льникꙋ.
Глава̀ десѧ́таѧ.
(заⷱ҇ р҃г) сⷯ а҃ Бра́тїе, бл҃говоле́нїе ᲂу҆́бѡ ꙳ Недѣ́лѧ пѧ́таѧ: Бра́тїе, благоволе́нїе ꙳ моегѡ̀ се́рдца, и҆ моли́тва ꙗ҆́же къ бг҃ꙋ, по і҆и҃ли є҆́сть во спасе́нїе. в҃ Свидѣ́тельствꙋю бо и҆̀мъ, ꙗ҆́кѡ ре́вность (л. ч҃и) бж҃їю и҆́мꙋтъ, но не по ра́зꙋмꙋ. г҃ Не разꙋмѣ́юще бо бж҃їѧ пра́вды, и҆ свою̀ пра́вдꙋ и҆́щꙋще поста́вити, пра́вдѣ бж҃їей не повинꙋ́шасѧ. д҃ Кончи́на бо зако́на хрⷭ҇то́съ, въ пра́вдꙋ всѧ́комꙋ вѣ́рꙋющемꙋ. є҃ Мѡѷсе́й бо пи́шетъ пра́вдꙋ, ю҆́же ѿ зако́на: ꙗ҆́кѡ сотвори́вый та̑ чл҃вѣ́къ, жи́въ бꙋ́детъ въ ни́хъ. ѕ҃ А҆ ꙗ҆́же ѿ вѣ́ры пра́вда, си́це глаго́летъ: да не рече́ши въ се́рдцы твое́мъ: кто̀ взы́детъ на нб҃о; си́рѣчь хрⷭ҇та̀ свестѝ. з҃ И҆лѝ кто̀ сни́детъ въ бе́зднꙋ; си́рѣчь хрⷭ҇та̀ ѿ ме́ртвыхъ возвестѝ. и҃ Но что̀ глаго́летъ писа́нїе; бли́зъ тѝ глаго́лъ є҆́сть во ᲂу҆стѣ́хъ твои́хъ, и҆ въ се́рдцѣ твое́мъ: си́рѣчь, глаго́лъ вѣ́ры, є҆го́же проповѣ́даемъ. ѳ҃ Ꙗ҆́кѡ а҆́ще и҆сповѣ́си ᲂу҆сты̀ твои́ми гдⷭ҇а і҆и҃са, и҆ вѣ́рꙋеши въ се́рдцѣ твое́мъ, ꙗ҆́кѡ бг҃ъ того̀ воздви́же и҆з̾ ме́ртвыхъ, спасе́шисѧ. і҃ Се́рдцемъ бо вѣ́рꙋетсѧ въ пра́вдꙋ: ᲂу҆сты́ же и҆сповѣ́дꙋетсѧ во спасе́нїе.
Коне́цъ недѣ́ли.
(заⷱ҇ р҃д) а҃і Глаго́летъ бо ꙳ Во вто́рникъ д҃-ѧ недѣ́ли: Бра́тїе, глаго́летъ ꙳ писа́нїе: всѧ́къ вѣ́рꙋѧй во́нь, не постыди́тсѧ. в҃і Нѣ́сть бо ра́знствїѧ і҆ꙋде́еви же и҆ є҆́ллинꙋ: то́й бо бг҃ъ всѣ́хъ, ꙾богатѧ́й꙾꙾бога́тъ сы́й꙾ во всѣ́хъ призыва́ющихъ є҆го̀. г҃і Всѧ́къ бо, и҆́же а҆́ще призове́тъ и҆́мѧ гдⷭ҇не, спасе́тсѧ. д҃і Ка́кѡ ᲂу҆̀бо призовꙋ́тъ, въ него́же не вѣ́роваша; ка́кѡ же ᲂу҆вѣ́рꙋютъ, є҆гѡ́же не ᲂу҆слы́шаша; ка́кѡ же ᲂу҆слы́шатъ, без̾ проповѣ́дающагѡ; є҃і Ка́кѡ же проповѣ́дѧтъ, а҆́ще не по́слани (л. ч҃и ѡ҆б.) бꙋ́дꙋтъ; ꙗ҆́коже є҆́сть пи́сано: ко́ль красны̀ но́ги благовѣствꙋ́ющихъ ми́ръ, благовѣствꙋ́ющихъ бл҃га̑ѧ. ѕ҃і Но не всѝ послꙋ́шаша бл҃говѣствова́нїѧ: и҆са́їа бо глаго́летъ: гдⷭ҇и, кто̀ вѣ́рова слꙋ́хꙋ на́шемꙋ; з҃і Тѣ́мже ᲂу҆́бѡ вѣ́ра ѿ слꙋ́ха: слꙋ́хъ же глаго́ломъ бж҃їимъ. и҃і Но глаго́лю, є҆да̀ не слы́шаша; ꙾тѣ́мже ᲂу҆́бѡ꙾꙾но па́че꙾ во всю̀ зе́млю и҆зы́де вѣща́нїе и҆́хъ, и҆ въ концы̀ вселе́нныѧ глаго́лы и҆́хъ. ѳ҃і Но глаго́лю, є҆да̀ не разꙋмѣ̀ і҆и҃ль; пе́рвый мѡѷсе́й глаго́летъ: а҆́зъ раздражꙋ̀ вы̀ ꙳не ѡ҆ ꙗ҆зы́цѣ, но ѡ҆ ꙗ҆зы́цѣ неразꙋ́мнѣ꙳꙳ѡ҆ не ꙗ҆зы́цѣ, ѡ҆ ꙗ҆зы́цѣ неразꙋ́мнѣ꙳ прогнѣ́ваю ва́съ. к҃ И҆са́їа же дерза́етъ и҆ глаго́летъ: ѡ҆брѣто́хсѧ не и҆́щꙋщымъ менѐ, ꙗ҆вле́нъ бы́хъ не вопроша́ющымъ ѡ҆ мнѣ̀. к҃а Ко і҆и҃лю же глаго́летъ: ве́сь де́нь воздѣ́хъ рꙋ́цѣ моѝ къ лю́демъ непокори́вымъ и҆ прерѣка́ющымъ.
Глава̀ перваѧна́десѧть.
[з҃і] сⷯ а҃ Глаго́лю ᲂу҆̀бо: є҆да̀ ѿри́нꙋ бг҃ъ лю́ди своѧ̀; да не бꙋ́детъ: и҆́бо и҆ а҆́зъ і҆и҃льтѧнинъ є҆́смь, ѿ сѣ́мене а҆враа́млѧ, колѣ́на венїамі́нова. в҃ Не ѿри́нꙋ бг҃ъ люде́й свои́хъ, и҆̀хже пре́жде разꙋмѣ̀.
Коне́цъ вто́рникꙋ.
(заⷱ҇ р҃є) И҆лѝ не вѣ́сте ꙳ Въ сре́дꙋ д҃ недѣ́ли: Бра́тїе, не вѣ́сте ли ꙳ ѡ҆ и҆лїѝ, что̀ глаго́летъ писа́нїе; ꙗ҆́кѡ ꙳꙳приповѣ́дꙋетъ бг҃ови на і҆и҃лѧ꙳꙳꙳꙳вопїе́тъ къ бг҃ꙋ на і҆и҃лѧ꙳꙳, глаго́лѧ: г҃ Гдⷭ҇и, проро́ки твоѧ̀ и҆зби́ша, и҆ ѻ҆лтарѝ твоѧ̀ раскопа́ша: и҆ а҆́зъ ѡ҆ста́хъ є҆ди́нъ, и҆ и҆́щꙋтъ дꙋ́шꙋ (л. ч҃ѳ) мою̀ [и҆з̾ѧ́ти]. д҃ Но что̀ глаго́летъ є҆мꙋ̀ бж҃е́ственный ѿвѣ́тъ; ѡ҆ста́вихъ себѣ̀ се́дмь ты́сѧщъ мꙋже́й, и҆̀же не преклони́ша колѣ̑на пред̾ ваа́ломъ. є҃ Та́кѡ ᲂу҆̀бо и҆ въ ны́нѣшнее вре́мѧ, ѡ҆ста́нокъ по и҆збра́нїю благода́ти бы́сть. ѕ҃ А҆́ще ли по бл҃года́ти, то не ѿ дѣ́лъ: занѐ бл҃года́ть, ᲂу҆жѐ не быва́етъ благода́ть. а҆́ще ли ѿ дѣ́лъ, ктомꙋ̀ нѣ́сть благода́ть: зане́ бо дѣ́ло, ᲂу҆жѐ нѣ́сть дѣ́ло. з҃ Что̀ ᲂу҆̀бо; є҆гѡ́же и҆ска́ше і҆и҃ль, сегѡ̀ не полꙋчѝ, а҆ и҆збра́нїе полꙋчѝ: про́чїи же ѡ҆слѣпи́шасѧ. и҃ Ꙗ҆́коже є҆́сть пи́сано: ꙾дадѐ и҆̀мъ бг҃ъ дꙋ́хъ ᲂу҆миле́нїѧ꙾꙾дадѐ и҆̀мъ бг҃ъ дх҃а нечꙋ́вствїѧ꙾, ѻ҆́чи не ви́дѣти, и҆ ᲂу҆́ши не слы́шати, да́же до дне́шнѧгѡ днѐ. ѳ҃ И҆ дв҃дъ глаго́летъ: да бꙋ́детъ трапе́за и҆́хъ въ сѣ́ть и҆ въ ло́въ и҆ въ собла́знъ, и҆ въ воздаѧ́нїе и҆̀мъ. і҃ Да помрача́тсѧ ѻ҆́чи и҆́хъ є҆́же не ви́дѣти, и҆ хребе́тъ и҆́хъ вы́нꙋ слѧца́й. а҃і Глаго́лю ᲂу҆̀бо, є҆да̀ согрѣши́ша, да ѿпадꙋ́тъ; да не бꙋ́детъ: но тѣ́хъ паде́нїемъ, спасе́нїе ꙗ҆зы́кѡмъ, во є҆́же раздражи́ти и҆̀хъ. в҃і А҆́ще ли же прегрѣше́нїе и҆́хъ бога́тство мі́рꙋ, и҆ ѿпаде́нїе и҆́хъ бога́тство ꙗ҆зы́кѡмъ: кольмѝ па́че и҆сполне́нїе и҆́хъ;
Коне́цъ средѣ̀.
(заⷱ҇ р҃ѕ) г҃і Ва́мъ бо ꙳ Въ четверто́къ д҃-ѧ недѣ́ли: Бра́тїе, ва́мъ ꙳ глаго́лю ꙗ҆зы́кѡмъ, поне́же ᲂу҆̀бо є҆́смь а҆́зъ ꙗ҆зы́кѡмъ а҆пⷭ҇лъ, слꙋ́жбꙋ мою̀ прославлѧ́ю: д҃і А҆́ще ка́кѡ раздражꙋ̀ мою̀ пло́ть, и҆ спасꙋ̀ нѣ̑кїѧ ѿ ни́хъ. є҃і А҆́ще бо ѿложе́нїе и҆́хъ, примире́нїе мі́рꙋ: что̀ прїѧ́тїе, ра́звѣ жи́знь и҆з̾ ме́ртвыхъ; ѕ҃і А҆́ще ли (л. ч҃ѳ ѡ҆б.) нача́токъ ст҃ъ, то и҆ примѣше́нїе: и҆ а҆́ще ко́рень ст҃ъ, то и҆ вѣ̑тви. з҃і А҆́ще ли нѣ́цыи ѿ вѣ́твей ѿломи́шасѧ, ты́ же ди́вїѧ ма́слина сы́й, прицѣпи́лсѧ є҆сѝ въ ни́хъ, и҆ прича́стникъ ко́рене и҆ ма́сти ма́слинныѧ бы́лъ є҆сѝ. и҃і Не хвали́сѧ на вѣ̑тви. а҆́ще ли же хва́лишисѧ, не ты̀ ко́рень но́сиши, но ко́рень тебѐ. ѳ҃і Рече́ши ᲂу҆́бѡ: ѿломи́шасѧ вѣ́тви, да а҆́зъ прицѣплю́сѧ. к҃ До́брѣ: невѣ́рїемъ ѿломи́шасѧ, ты́ же вѣ́рою стои́ши. не высокомꙋ́дрствꙋй, но бо́йсѧ. к҃а А҆́ще бо бг҃ъ є҆сте́ственныхъ вѣ́твей не пощадѣ̀: да не ка́кѡ и҆ тебѐ не пощади́тъ. к҃в Ви́ждь ᲂу҆̀бо бл҃гость и҆ непощадѣ́нїе бж҃їе: на ѿпа́дшихъ ᲂу҆́бѡ непощадѣ́нїе, а҆ на тебѣ̀ бл҃гость бж҃їѧ, а҆́ще пребꙋ́деши въ бл҃гости: а҆́ще ли же нѝ, то и҆ ты̀ ѿсѣ́ченъ бꙋ́деши. к҃г И҆ ѻ҆ни́ же, а҆́ще не пребꙋ́дꙋтъ въ невѣ́рствїи, прицѣпѧ́тсѧ: си́ленъ бо є҆́сть бг҃ъ па́ки прицѣпи́ти и҆̀хъ. к҃д А҆́ще бо ты̀ ѿ є҆сте́ственныѧ ѿсѣ́ченъ ди́вїѧ ма́слины, и҆ чрез̾ є҆стество̀ прицѣпи́лсѧ є҆сѝ къ до́брѣй ма́слинѣ: кольмѝ па́че сі́и, и҆̀же по є҆стествꙋ̀, прицѣпѧ́тсѧ свое́й ма́слинѣ.
Коне́цъ четверткꙋ̀.
(заⷱ҇ р҃з) к҃є Не бо̀ хощꙋ̀ ва́съ не вѣ́дѣти та́йны сеѧ̀, бра́тїе, ꙳ Въ пѧто́къ д҃-ѧ недѣ́ли: Бра́тїе, не хощꙋ̀ ва́съ не вѣ́дѣти та́йны сеѧ̀ ꙳ [да не бꙋ́дете ѡ҆ себѣ̀ мꙋ́дри,] ꙗ҆́кѡ ѡ҆слѣпле́нїе ѿ ча́сти і҆и҃леви бы́сть, до́ндеже и҆сполне́нїе ꙗ҆зы́кѡвъ вни́детъ. к҃ѕ И҆ та́кѡ ве́сь і҆и҃ль спасе́тсѧ, ꙗ҆́коже є҆́сть пи́сано: прїи́детъ ѿ сїѡ́на и҆збавлѧ́ѧй, и҆ (л. р҃) ѿврати́тъ нече́стїе ѿ і҆а́кѡва. к҃з И҆ се́й и҆̀мъ ѿ менѐ завѣ́тъ, є҆гда̀ ѿимꙋ̀ грѣхѝ и҆́хъ. к҃и По благовѣствова́нїю ᲂу҆́бѡ, вразѝ ва́съ ра́ди: по и҆збра́нїю же, возлю́блени ѻ҆ц҃ъ ра́ди. к҃ѳ Нераска́ѧнна бо дарова̑нїѧ, и҆ зва́нїе бж҃їе. л҃ Ꙗ҆́коже бо и҆ вы̀ и҆ногда̀ проти́вистесѧ бг҃ови, ны́нѣ же поми́ловани бы́сте ꙾си́хъ противле́нїемъ꙾꙾си́хъ ра́ди противле́нїѧ꙾. л҃а Та́кожде и҆ сі́и ны́нѣ проти́вишасѧ ꙳ва́шей ми́лости꙳꙳ва́шегѡ ра́ди поми́лованїѧ꙳, да и҆ ті́и поми́ловани бꙋ́дꙋтъ. (чеⷦ҇) л҃в Затвори́ бо бг҃ъ всѣ́хъ въ противле́нїе, да всѣ́хъ поми́лꙋетъ. л҃г Ѽ глꙋбина̀ бога́тства, и҆ премꙋ́дрости, и҆ ра́зꙋма бж҃їѧ! ꙗ҆́кѡ неиспы́тани сꙋ́дове є҆гѡ̀, и҆ неизслѣ́довани пꙋтїѐ є҆гѡ̀. л҃д Кто́ бо разꙋмѣ̀ ᲂу҆́мъ гдⷭ҇нь; и҆лѝ кто̀ совѣ́тникъ є҆мꙋ̀ бы́сть; л҃є И҆лѝ кто̀ пре́жде дадѐ є҆мꙋ̀, и҆ возда́стсѧ є҆мꙋ̀; л҃ѕ Ꙗ҆́кѡ и҆з̾ тогѡ̀, и҆ тѣ́мъ, и҆ въ не́мъ всѧ́чєскаѧ: томꙋ̀ сла́ва во вѣ́ки, а҆ми́нь.
Коне́цъ пѧткꙋ̀.
Глава̀ втораѧна́десѧть.
(заⷱ҇ р҃и) [и҃і] сⷯ а҃ Молю̀ ᲂу҆̀бо ва́съ, бра́тїе, ꙳ Въ сꙋббѡ́тꙋ з҃-ю: Бра́тїе, молю̀ ва́съ ꙳ щедро́тами бж҃їими, предста́вите тѣлеса̀ ва́ша же́ртвꙋ жи́вꙋ, ст҃ꙋ, благоꙋго́днꙋ бг҃ови, слове́сное слꙋже́нїе ва́ше: в҃ И҆ не соѡбразꙋ́йтесѧ вѣ́кꙋ семꙋ̀, но преѡбразꙋ́йтесѧ ѡ҆бновле́нїемъ ᲂу҆ма̀ ва́шегѡ, во є҆́же и҆скꙋша́ти ва́мъ, что́ є҆сть во́лѧ бж҃їѧ, бл҃га́ѧ, и҆ ᲂу҆го́днаѧ, и҆ соверше́ннаѧ; г҃ Глаго́лю ᲂу҆́бѡ бл҃года́тїю да́вшеюсѧ (л. р҃ ѡ҆б.) мнѣ̀, всѧ́комꙋ сꙋ́щемꙋ въ ва́съ, не мꙋ́дрствовати па́че, є҆́же подоба́етъ мꙋ́дрствовати: но мꙋ́дрствовати въ цѣломꙋ́дрїи, коемꙋ́ждо ꙗ҆́коже бг҃ъ раздѣли́лъ є҆́сть мѣ́рꙋ вѣ́ры.
Коне́цъ сꙋббѡ́тѣ.
(заⷱ҇ р҃ѳ) [а҃] д҃ Ꙗ҆́коже бо ꙳ Въ понедѣ́льникъ є҃-ѧ недѣ́ли: Бра́тїе, ꙗ҆́коже ꙳ во є҆ди́номъ тѣлесѝ, мно́ги ᲂу҆́ды и҆́мамы, ᲂу҆́ды же всѝ не то́жде и҆́мꙋтъ дѣ́ланїе: є҃ Та́кожде мно́зи є҆ди́но тѣ́ло є҆смы̀ ѡ҆ хрⷭ҇тѣ̀, а҆ по є҆ди́номꙋ дрꙋгъдрꙋ́гꙋ ᲂу҆́ди.
Престꙋпѝ понедѣ́льникꙋ.
(заⷱ҇ р҃і) ѕ҃ И҆мꙋ́ще же ꙳꙳ Недѣ́лѧ ѕ҃: Бра́тїе, и҆мꙋ́ще ꙳꙳ дарова̑нїѧ по бл҃года́ти да́ннѣй на́мъ разли́чна: а҆́ще проро́чество, по мѣ́рѣ вѣ́ры: з҃ А҆́ще ли слꙋже́нїе, въ слꙋже́нїи: а҆́ще ᲂу҆чѧ́й, во ᲂу҆че́нїи: и҃ А҆́ще ᲂу҆тѣша́ѧй, во ᲂу҆тѣше́нїи: подава́ѧй, въ простотѣ̀: ꙾предстоѧ́й꙾꙾нача́льствꙋѧй꙾, со тща́нїемъ: ми́лꙋѧй, съ до́брымъ и҆зволе́нїемъ. [в҃] ѳ҃ Любы̀ нелицемѣ́рна, ненави́дѧщи ѕло́е, прилѣплѧ́ющисѧ бл҃го́мꙋ. і҃ Братолю́бїемъ дрꙋ́гъ ко дрꙋ́гꙋ любе́зни, че́стїю дрꙋгъдрꙋ́га бо́льша творѧ́ще. а҃і Тща́нїемъ не лѣни́ви, дх҃омъ горѧ́ще, гдⷭ҇ви рабо́тающе. в҃і Оу҆пова́нїемъ ра́дꙋющесѧ, скѡ́рби терпѧ́ще, въ мл҃твѣ пребыва́юще. г҃і Тре́бованїємъ ст҃ы́хъ прїѡбща́ющесѧ, страннолю́бїѧ держа́щесѧ. д҃і Бл҃гословлѧ́йте гонѧ́щыѧ вы̀: блгⷭ҇ви́те, а҆ не клени́те.
Коне́цъ недѣ́ли. (л. р҃а)
Чтѝ понедѣ́льникꙋ:
є҃і Ра́доватисѧ съ ра́дꙋющимисѧ, и҆ пла́кати съ пла́чꙋщими. ѕ҃і То́жде дрꙋ́гъ ко дрꙋ́гꙋ мꙋ́дрствꙋюще, не высѡ́каѧ мꙋ́дрствꙋюще, но смире́нными ведꙋ́щесѧ, не быва́йте мꙋ́дри ѡ҆ себѣ̀. [г҃] з҃і Ни є҆ди́номꙋ же ѕла̀ за ѕло̀ воздаю́ще, промышлѧ́юще дѡ́браѧ пред̾ всѣ́ми чл҃вѣ́ки. и҃і А҆́ще возмо́жно, є҆́же ѿ ва́съ, со всѣ́ми человѣ́ки ми́ръ и҆мѣ́йте. ѳ҃і Не себѐ ѿмща́юще возлю́бленнїи, но дади́те мѣ́сто гнѣ́вꙋ: пи́сано бо є҆́сть: мнѣ̀ ѿмще́нїе, а҆́зъ возда́мъ, глаго́летъ гдⷭ҇ь. к҃ А҆́ще ᲂу҆̀бо а҆́лчетъ вра́гъ тво́й, ᲂу҆хлѣ́би є҆го̀: а҆́ще ли жа́ждетъ, напо́й є҆го̀. сїе́ бо творѧ̀, ᲂу҆́глїе ѻ҆́гнено собира́еши на главꙋ̀ є҆гѡ̀. к҃а Не побѣжде́нъ быва́й ѿ ѕла̀, но побѣжда́й благи́мъ ѕло́е.
Коне́цъ понедѣ́льникꙋ.
Глава̀ третїѧна́десѧть.
(заⷱ҇ ра҃і) [д҃] сⷯ а҃ Всѧ́ка ꙳ Въ сꙋббѡ́тꙋ и҃-ю: Бра́тїе, всѧ́ка ꙳ дꙋша̀ власте́мъ предержа́щымъ да повинꙋ́етсѧ. нѣ́сть бо вла́сть а҆́ще не ѿ бг҃а: сꙋ́щыѧ же вла̑сти ѿ бг҃а ᲂу҆чинены̀ сꙋ́ть. в҃ Тѣ́мже противлѧ́ѧйсѧ вла́сти, бж҃їю повелѣ́нїю противлѧ́етсѧ: противлѧ́ющїисѧ же, себѣ̀ грѣ́хъ прїе́млютъ. г҃ Кнѧ́зи бо не сꙋ́ть боѧ́знь дѡ́брымъ дѣлѡ́мъ, но ѕлы̑мъ. хо́щеши же ли не боѧ́тисѧ вла́сти; бл҃го́е творѝ, и҆ и҆мѣ́ти бꙋ́деши похвалꙋ̀ ѿ негѡ̀. д҃ Бж҃їй бо слꙋга̀ є҆́сть, тебѣ̀ во благо́е. а҆́ще (л. р҃а ѡ҆б.) ли ѕло́е твори́ши, бо́йсѧ: не бо ꙾без̾ ᲂу҆ма̀꙾꙾всꙋ́е꙾ ме́чь но́ситъ: бж҃їй бо слꙋга̀ є҆́сть, ѿмсти́тель въ гнѣ́въ ѕло́е творѧ́щемꙋ. є҃ Тѣ́мже потре́ба повинова́тисѧ не то́кмѡ за гнѣ́въ, но и҆ за со́вѣсть. ѕ҃ Сегѡ́ бо ра́ди и҆ да̑ни даетѐ: слꙋжи́тели бо бж҃їи сꙋ́ть во и҆́стое сїѐ пребыва́юще. з҃ Воздади́те ᲂу҆̀бо всѣ̑мъ дѡ́лжнаѧ: є҆мꙋ́же ᲂу҆́бѡ ᲂу҆ро́къ, ᲂу҆ро́къ: а҆ є҆мꙋ́же да́нь, да́нь: а҆ є҆мꙋ́же стра́хъ, стра́хъ: и҆ є҆мꙋ́же че́сть, че́сть. и҃ Ни є҆ди́номꙋ же ничи́мже до́лжни быва́йте, то́чїю є҆́же люби́ти дрꙋгъдрꙋ́га: любѧ́й бо дрꙋ́га, зако́нъ и҆спо́лни. ѳ҃ Є҆́же бо, не прелюбы̀ сотвори́ши, не ᲂу҆бїе́ши, не ᲂу҆кра́деши, не лжесвидѣ́тельствꙋеши, не похо́щеши: и҆ а҆́ще ка́ѧ и҆́на за́повѣдь, въ се́мъ словесѝ соверша́етсѧ: во є҆́же возлю́биши и҆́скреннѧго твоего̀ ꙗ҆́коже са́мъ себѐ. і҃ Любы̀ и҆́скреннемꙋ ѕла̀ не твори́тъ: и҆сполне́нїе ᲂу҆̀бо зако́на любы̀ є҆́сть.
Коне́цъ сꙋббѡ́тѣ.
а҃і И҆ сїѐ вѣ́дѧще вре́мѧ, ꙗ҆́кѡ ча́съ ᲂу҆жѐ на́мъ ѿ сна̀ воста́ти.
(заⷱ҇ рв҃і) [є҃] Ны́нѣ бо ꙳ Недѣ́лѧ сыропꙋ́стнаѧ: Бра́тїе, ны́нѣ ꙳ Сїе́ же и҆ ржⷭ҇твꙋ̀ і҆ѡа́нна прⷣте́чи. ближа́йшее на́мъ спасе́нїе, не́жели є҆гда̀ вѣ́ровахомъ. в҃і Но́щь ᲂу҆́бѡ пре́йде, а҆ де́нь прибли́жисѧ: ѿложи́мъ ᲂу҆̀бо дѣла̀ тє́мнаѧ, и҆ ѡ҆блече́мсѧ во ѻ҆рꙋ́жїе свѣ́та. г҃і Ꙗ҆́кѡ во днѝ бл҃гоѻбра́знѡ да хо́димъ, не козлогласова́нїи и҆ пїѧ́нствы, не любодѣѧ́нїи и҆ стꙋдодѣѧ́нїи, не рве́нїемъ и҆ за́вистїю: (л. р҃в) д҃і Но ѡ҆блецы́тесѧ гдⷭ҇емъ на́шимъ і҆и҃съ хрⷭ҇то́мъ, и҆ пло́ти ᲂу҆го́дїѧ не твори́те въ по́хоти.
Глава̀ четвертаѧна́десѧть.
[ѕ҃] сⷯ а҃ И҆знемога́ющаго же въ вѣ́рѣ прїе́млите, не въ сомнѣ́нїе помышле́нїй. в҃ Ѻ҆́въ бо вѣ́рꙋетъ ꙗ҆́сти всѧ̑, а҆ и҆знемога́ѧй ѕє́лїѧ да ꙗ҆́стъ. г҃ Ꙗ҆ды́й не ꙗ҆дꙋ́щаго да не ᲂу҆корѧ́етъ: и҆ не ꙗ҆ды́й ꙗ҆дꙋ́щаго да не ѡ҆сꙋжда́етъ: бг҃ъ бо є҆го̀ прїѧ́тъ. д҃ Ты̀ кто̀ є҆сѝ сꙋдѧ́й чꙋжде́мꙋ рабꙋ̀; своемꙋ̀ гдⷭ҇еви стои́тъ, и҆лѝ па́даетъ, ста́нетъ же: си́ленъ бо є҆́сть бг҃ъ поста́вити є҆го̀.
Коне́цъ недѣ́ли, и҆ ржⷭ҇твꙋ̀ і҆ѡа́нна.
є҃ Ѻ҆́въ ᲂу҆́бѡ разсꙋжда́етъ де́нь чрез̾ де́нь: ѻ҆́въ же сꙋ́дитъ на всѧ́къ де́нь. кі́йждо свое́ю мы́слїю да и҆звѣствꙋ́етсѧ.
(заⷱ҇ рг҃і) ѕ҃ Мꙋ́дрствꙋѧй ꙳ Сꙋббѡ́та ѳ҃: Бра́тїе, мꙋ́дрствꙋѧй ꙳ Сїе́ же и҆ за ᲂу҆поко́й въ понедѣ́льникъ. де́нь, гдⷭ҇еви мꙋ́дрствꙋетъ: и҆ не мꙋ́дрствꙋѧй де́нь, гдⷭ҇еви не мꙋ́дрствꙋетъ. ꙗ҆ды́й, гдⷭ҇еви ꙗ҆́стъ, благодари́тъ бо бг҃а: и҆ не ꙗ҆ды́й, гдⷭ҇еви не ꙗ҆́стъ, и҆ благодари́тъ бг҃а. з҃ Никто́же бо на́съ себѣ̀ живе́тъ, и҆ никто́же себѣ̀ ᲂу҆мира́етъ. и҃ А҆́ще ᲂу҆́бѡ живе́мъ, гдⷭ҇еви живе́мъ: а҆́ще же ᲂу҆мира́емъ, гдⷭ҇еви ᲂу҆мира́емъ: а҆́ще ᲂу҆̀бо живе́мъ, а҆́ще ᲂу҆мира́емъ, гдⷭ҇ни є҆смы̀. (л. р҃в ѡ҆б.)
(заⷱ҇ рд҃і) ѳ҃ На сїе́ бо ꙳ Во вто́рникъ недѣ́ли: Бра́тїе, на сїѐ. ꙳ хрⷭ҇то́съ и҆ ᲂу҆́мре, и҆ воскр҃се, и҆ ѡ҆живѐ, да и҆ ме́ртвыми и҆ живы́ми ѡ҆блада́етъ.
Коне́цъ сꙋббѡ́тѣ, и҆ за ᲂу҆поко́й.
і҃ Ты́ же почто̀ ѡ҆сꙋжда́еши бра́та твоего̀; и҆лѝ ты̀ что̀ ᲂу҆ничижа́еши бра́та твоего̀; вси́ бо предста́немъ сꙋди́щꙋ хрⷭ҇то́вꙋ. а҃і Пи́сано бо є҆́сть: живꙋ̀ а҆́зъ, глаго́летъ гдⷭ҇ь, ꙗ҆́кѡ мнѣ̀ поклони́тсѧ всѧ́ко колѣ́но, и҆ всѧ́къ ꙗ҆зы́къ и҆сповѣ́стсѧ бг҃ови. в҃і Тѣ́мже ᲂу҆̀бо кі́йждо на́съ ѡ҆ себѣ̀ сло́во да́стъ бг҃ꙋ. г҃і Не ктомꙋ̀ ᲂу҆̀бо дрꙋгъдрꙋ́га ѡ҆сꙋжда́емъ: но сїѐ па́че сꙋди́те, є҆́же не полага́ти претыка́нїѧ бра́тꙋ, и҆лѝ собла́зна. д҃і Вѣ́мъ, и҆ и҆звѣще́нъ є҆́смь ѡ҆ хрⷭ҇тѣ̀ і҆и҃сѣ, ꙗ҆́кѡ ничто́же скве́рно са́мо собо́ю, то́чїю помышлѧ́ющемꙋ что̀ скве́рно бы́ти, ѻ҆́номꙋ скве́рно є҆́сть. є҃і А҆́ще ᲂу҆́бѡ бра́шна ра́ди бра́тъ тво́й скорби́тъ, ᲂу҆жѐ не по любвѝ хо́диши: не бра́шномъ твои́мъ того̀ погꙋблѧ́й, за него́же хрⷭ҇то́съ ᲂу҆́мре. ѕ҃і Да не хꙋ́литсѧ ᲂу҆̀бо ва́ше благо́е. з҃і Нѣ́сть бо црⷭ҇тво бж҃їе бра́шно и҆ питїѐ, но пра́вда, и҆ ми́ръ, и҆ ра́дость ѡ҆ дс҃ѣ ст҃ѣ: и҃і И҆́же бо си́ми слꙋ́житъ хрⷭ҇то́ви, бл҃гоꙋго́денъ є҆́сть бг҃ови, и҆ и҆скꙋ́сенъ человѣ́кѡмъ.
Коне́цъ вто́рникꙋ.
(заⷱ҇ рє҃і) ѳ҃і Тѣ́мже ᲂу҆̀бо ми́ръ ꙳꙳ Въ сꙋббѡ́тꙋ сыропꙋ́стнꙋю: Бра́тїе, ми́ръ ꙳꙳ возлю́бимъ, и҆ ꙗ҆̀же къ созда́нїю дрꙋ́гъ ко дрꙋ́гꙋ. к҃ Не бра́шна ра́ди разорѧ́й (л. р҃г) дѣ́ло бж҃їе: всѧ́ бо чи́ста, но ѕло̀ человѣ́кꙋ претыка́нїемъ ꙗ҆дꙋ́щемꙋ. к҃а Добро̀ не ꙗ҆́сти мѧ́съ, нижѐ пи́ти вїна̀, ни ѡ҆ не́мже бра́тъ тво́й претыка́етсѧ, и҆лѝ соблазнѧ́етсѧ, и҆лѝ и҆знемога́етъ. к҃в Ты̀ вѣ́рꙋ и҆́маши, ѡ҆ себѣ̀ са́мъ и҆мѣ́й пред̾ бг҃омъ: блаже́нъ не ѡ҆сꙋжда́ѧй себѐ, ѡ҆ не́мже и҆скꙋша́етсѧ. к҃г А҆ сомнѧ́ѧйсѧ, а҆́ще ꙗ҆́стъ, ѡ҆сꙋжда́етсѧ, занѐ не ѿ вѣ́ры: всѧ́ко же, є҆́же не ѿ вѣ́ры, грѣ́хъ є҆́сть. к҃д Могꙋ́щемꙋ же ва́съ ᲂу҆тверди́ти по бл҃говѣствова́нїю моемꙋ̀, и҆ проповѣ́данїю і҆и҃съ хрⷭ҇то́вꙋ, по ѿкрове́нїю та́йны, лѣ́ты вѣ́чными ᲂу҆молча́нныѧ, к҃є Ꙗ҆́вльшїѧсѧ же ны́нѣ писа́нїи проро́ческими, по повелѣ́нїю вѣ́чнагѡ бг҃а, въ послꙋша́нїе вѣ́ры, во всѣ́хъ ꙗ҆зы́цѣхъ позна́вшїѧсѧ, к҃ѕ Є҆ди́номꙋ премꙋ́дромꙋ бг҃ꙋ, і҆и҃съ хрⷭ҇то́мъ, є҆мꙋ́же сла́ва во вѣ́ки. а҆ми́нь.
Коне́цъ сꙋббѡ́тѣ.
Глава̀ пѧтаѧна́десѧть.
(заⷱ҇ рѕ҃і) [з҃] сⷯ а҃ До́лжни є҆смы̀ ꙳ Недѣ́лѧ з҃: Бра́тїе, до́лжни є҆смы̀ ꙳ мы̀ си́льнїи не́мѡщи немощны́хъ носи́ти, и҆ не себѣ̀ ᲂу҆гожда́ти. в҃ Кі́йждо же ва́съ бли́жнемꙋ да ᲂу҆гожда́етъ во благо́е къ созда́нїю. г҃ И҆́бо и҆ хрⷭ҇то́съ не себѣ̀ ᲂу҆годѝ, но ꙗ҆́коже є҆́сть пи́сано: поношє́нїѧ поносѧ́щихъ тебѣ̀, нападо́ша на мѧ̀. д҃ Є҆ли̑ка бо преднапи́сана бы́ша, въ на́ше наказа́нїе преднаписа́шасѧ, да терпѣ́нїемъ и҆ ᲂу҆тѣше́нїемъ писа́нїй, ᲂу҆пова́нїе и҆́мамы. є҃ Бг҃ъ же (л. р҃г ѡ҆б.) терпѣ́нїѧ и҆ ᲂу҆тѣше́нїѧ, да да́стъ ва́мъ то́жде мꙋ́дрствовати дрꙋ́гъ ко дрꙋ́гꙋ, ѡ҆ хрⷭ҇тѣ̀ і҆и҃сѣ: ѕ҃ Да є҆динодꙋ́шнѡ є҆ди́ными ᲂу҆сты̀ сла́вите бг҃а, и҆ ѻ҆ц҃а̀ гдⷭ҇а на́шегѡ і҆и҃са хрⷭ҇та̀.
(заⷱ҇ рз҃і) з҃ Тѣ́мже прїе́млите ꙳ Въ сре́дꙋ є҃ недѣ́ли: Бра́тїе, прїе́млите ꙳ дрꙋгъдрꙋ́га, ꙗ҆́коже и҆ хрⷭ҇то́съ прїѧ́тъ ва́съ во сла́вꙋ бж҃їю.
Коне́цъ недѣ́ли.
и҃ Глаго́лю же, хрⷭ҇та̀ і҆и҃са слꙋжи́телѧ бы́вша ѡ҆брѣ́занїѧ по и҆́стинѣ бж҃їей, во є҆́же ᲂу҆тверди́ти ѡ҆бѣтова̑нїѧ ѻ҆ц҃є́въ: ѳ҃ А҆ ꙗ҆зы́кѡмъ по ми́лости, просла́вити бг҃а, ꙗ҆́коже є҆́сть пи́сано: сегѡ̀ ра́ди и҆сповѣ́мсѧ тебѣ̀ во ꙗ҆зы́цѣхъ гдⷭ҇и, и҆ и҆́мени твоемꙋ̀ пою̀. і҃ И҆ па́ки глаго́летъ: возвесели́тесѧ ꙗ҆зы́цы съ людьмѝ є҆гѡ̀. а҃і И҆ па́ки: хвали́те гдⷭ҇а всѝ ꙗ҆зы́цы, и҆ похвали́те є҆го̀ всѝ лю́дїе. в҃і И҆ па́ки и҆са́їа глаго́летъ: бꙋ́детъ ко́рень і҆ессе́овъ, и҆ востаѧ́й владѣ́ти над̾ ꙗ҆зы́ки, на того̀ ꙗ҆зы́цы ᲂу҆пова́ютъ. г҃і Бг҃ъ же ᲂу҆пова́нїѧ, да и҆спо́лнитъ ва́съ всѧ́кїѧ ра́дости и҆ ми́ра въ вѣ́рѣ, и҆збы́точествовати ва́мъ во ᲂу҆пова́нїи, си́лою дх҃а ст҃а́гѡ. д҃і И҆звѣще́нъ же є҆́смь бра́тїе моѧ̀, и҆ са́мъ а҆́зъ ѡ҆ ва́съ, ꙗ҆́кѡ и҆ са́ми вы̀ по́лни є҆стѐ бла́гости, и҆спо́лнени всѧ́кагѡ ра́зꙋма, могꙋ́ще и҆ и҆ны́ѧ наꙋчи́ти. [ѳ҃і] є҃і Де́рзѣе же писа́хъ ва́мъ бра́тїе моѧ̀, ѿ ча́сти, ꙗ҆́кѡ воспомина́ѧ ва́мъ, за благода́ть да́ннꙋю мѝ ѿ бг҃а: (пѧⷦ҇) ѕ҃і Во є҆́же бы́ти мѝ слꙋжи́телю і҆и҃съ хрⷭ҇то́вꙋ во ꙗ҆зы́цѣхъ, свѧщеннодѣ́йствꙋющꙋ (л. р҃д) благовѣствова́нїе бж҃їе, да бꙋ́детъ приноше́нїе є҆́же ѿ ꙗ҆зы̑къ благопрїѧ́тно, и҆ ѡ҆свѧще́нно дх҃омъ ст҃ы́мъ.
Коне́цъ средѣ̀.
(заⷱ҇ ри҃і) з҃і И҆́мамъ ᲂу҆̀бо похвалꙋ̀ ꙳ Въ четверто́къ є҃ недѣ́ли: Бра́тїе, и҆́мамъ похвалꙋ̀ ꙳ ѡ҆ хрⷭ҇тѣ̀ і҆и҃сѣ, ꙗ҆́же къ бг҃ꙋ. и҃і Не смѣ́ю бо глаго́лати что̀, и҆́хже не содѣ́ѧ хрⷭ҇то́съ мно́ю, въ послꙋша́нїе ꙗ҆зы́кѡвъ, сло́вомъ и҆ дѣ́ломъ, ѳ҃і Въ си́лѣ зна́менїй и҆ чꙋде́съ, си́лою дх҃а бж҃їѧ: ꙗ҆́коже мѝ ѿ і҆ерꙋсали́ма и҆ ѻ҆́крестъ да́же до і҆ллѷрі́ка и҆спо́лнити благовѣствова́нїе хрⷭ҇то́во. к҃ Си́це же потща́хсѧ благовѣсти́ти, не и҆дѣ́же и҆менова́сѧ хрⷭ҇то́съ, да не на чꙋже́мъ ѡ҆снова́нїи сози́ждꙋ: к҃а Но ꙗ҆́коже є҆́сть пи́сано: и҆̀мже не возвѣсти́сѧ ѡ҆ не́мъ, ᲂу҆́зрѧтъ: и҆ и҆̀же не слы́шаша, ᲂу҆разꙋмѣ́ютъ. к҃в Тѣ́мже и҆ возбране́нъ бы́хъ мно́гажды прїитѝ къ ва́мъ. к҃г Ны́нѣ же ктомꙋ̀ мѣ́ста не и҆мы́й въ страна́хъ си́хъ, жела́нїе же и҆мы́й прїитѝ къ ва́мъ ѿ мно́гихъ лѣ́тъ: к҃д Ꙗ҆́кѡ а҆́ще поидꙋ̀ во і҆спа́нїю, прїидꙋ̀ къ ва́мъ. ᲂу҆пова́ю бо ми́мѡ грѧды́й ви́дѣти ва́съ, и҆ ва́ми проводи́тисѧ та́мѡ, а҆́ще ва́съ пре́жде ѿ ча́сти насы́щꙋсѧ. к҃є Ны́нѣ же грѧдꙋ̀ во і҆ерꙋсали́мъ, слꙋжѧ́й ст҃ы́мъ. к҃ѕ Бл҃говоли́ша бо македо́нїа и҆ а҆ха́їа ѡ҆бще́нїе нѣ́кое сотвори́ти къ ни́щымъ ст҃ы́мъ, живꙋ́щымъ во і҆ерꙋсали́мѣ. к҃з Благоволи́ша бо, и҆ до́лжни и҆̀мъ сꙋ́ть: а҆́ще бо въ дꙋхо́вныхъ и҆́хъ прича́стники бы́ша ꙗ҆зы́цы, до́лжни сꙋ́ть и҆ въ плотски́хъ послꙋжи́ти и҆̀мъ. к҃и Сїѐ ᲂу҆̀бо сконча́въ, и҆ запечатлѣ́въ и҆̀мъ пло́дъ (л. р҃д ѡ҆б.) се́й, поидꙋ̀ ва́ми во і҆спа́нїю. к҃ѳ Вѣ́мъ же, ꙗ҆́кѡ грѧды́й къ ва́мъ во и҆сполне́нїи благослове́нїѧ благовѣ́стїѧ хрⷭ҇то́ва прїидꙋ̀.
Коне́цъ четверткꙋ̀.
(заⷱ҇ рѳ҃і) л҃ Молю́ же вы̀ бра́тїе, ꙳ Въ сꙋббѡ́тꙋ і҃: Бра́тїе, молю́ вы ꙳ гдⷭ҇емъ на́шимъ і҆и҃съ хрⷭ҇то́мъ, и҆ любо́вїю дх҃а, споспѣ́шствꙋйте мѝ въ мл҃твахъ ѡ҆ мнѣ̀ къ бг҃ꙋ: л҃а Да и҆зба́влюсѧ ѿ противлѧ́ющихсѧ во і҆ꙋде́и, и҆ да слꙋ́жба моѧ̀ ꙗ҆́же во і҆ерꙋсали́мѣ благопрїѧ́тна бꙋ́детъ ст҃ы̑мъ. л҃в Да съ ра́достїю прїидꙋ̀ къ ва́мъ во́лею бж҃їею, и҆ ᲂу҆поко́юсѧ съ ва́ми. л҃г Бг҃ъ же ми́ра со всѣ́ми ва́ми, а҆ми́нь.
Коне́цъ сꙋббѡ́тѣ.
Глава̀ шестаѧна́десѧть.
(заⷱ҇ р҃к) [а҃] сⷯ а҃ Врꙋча́ю же ва́мъ ꙳꙳ Въ пѧто́къ є҃ недѣ́ли: Бра́тїе, врꙋча́ю ва́мъ ꙳꙳ фі́вꙋ сестрꙋ̀ на́шꙋ, сꙋ́щꙋ слꙋжи́тельницꙋ це́ркве, ꙗ҆́же въ кегхре́ехъ: в҃ Да прїи́мете ю҆̀ ѡ҆ гдⷭ҇ѣ досто́йнѣ ст҃ы̑мъ, и҆ споспѣ́шствꙋйте є҆́й, ѡ҆ не́йже а҆́ще ѿ ва́съ потре́бꙋетъ ве́щи: и҆́бо сїѧ̀ застꙋ́пница мнѡ́гимъ бы́сть, и҆ самомꙋ̀ мнѣ̀. г҃ Цѣлꙋ́йте прїскі́ллꙋ и҆ а҆кѵ́лꙋ, споспѣ̑шника моѧ̀ ѡ҆ хрⷭ҇тѣ̀ і҆и҃сѣ: д҃ И҆̀же по дꙋшѝ мое́й своѧ̀ вы́ѧ положи́ша: и҆̀хже не а҆́зъ є҆ди́нъ благодарю̀, но и҆ всѧ̀ це́ркви ꙗ҆зы́чєскїѧ: и҆ дома́шнюю и҆́хъ це́рковь. є҃ Цѣлꙋ́йте є҆пене́та возлю́бленнаго мѝ, (л. р҃є) и҆́же є҆́сть нача́токъ а҆ха́їи во хрⷭ҇та̀. ѕ҃ Цѣлꙋ́йте марїа́мъ, ꙗ҆́же мно́гѡ трꙋди́сѧ ѡ҆ на́съ. з҃ Цѣлꙋ́йте а҆ндроні́ка и҆ і҆ꙋні́ю, сро́дники моѧ̀ и҆ сплѣ́нники моѧ̀, и҆̀же сꙋ́ть наро́читы во а҆пⷭ҇лѣхъ, и҆̀же и҆ пре́жде менѐ вѣ́роваша во хрⷭ҇та̀. и҃ Цѣлꙋ́йте а҆мплі́а возлю́бленнаго мѝ ѡ҆ гдⷭ҇ѣ. ѳ҃ Цѣлꙋ́йте ᲂу҆рва́на, споспѣ́шника на́шего ѡ҆ хрⷭ҇тѣ̀, и҆ стахѵ́а возлю́бленнаго мѝ. і҃ Цѣлꙋ́йте а҆пе́ллїа и҆скꙋ́сна ѡ҆ хрⷭ҇тѣ̀. цѣлꙋ́йте сꙋ́щыѧ ѿ а҆рїстовꙋ́ла. а҃і Цѣлꙋ́йте и҆родїѡ́на сро́дника моего̀. цѣлꙋ́йте и҆̀же ѿ наркі́сса, сꙋ́щыѧ ѡ҆ гдⷭ҇ѣ. в҃і Цѣлꙋ́йте трѷфе́нꙋ и҆ трѷфѡ́сꙋ, трꙋжда́ющыѧсѧ ѡ҆ гдⷭ҇ѣ. цѣлꙋ́йте персі́дꙋ возлю́бленнꙋю, ꙗ҆́же мно́гѡ трꙋди́сѧ ѡ҆ гдⷭ҇ѣ. г҃і Цѣлꙋ́йте рꙋ́фа и҆збра́ннаго ѡ҆ гдⷭ҇ѣ, и҆ мт҃рь є҆гѡ̀ и҆ мою̀. д҃і Цѣлꙋ́йте а҆сѷгкрі́та, фле́гонта, є҆́рма, патро́ва, є҆рмі́а, и҆ сꙋ́щꙋю съ ни́ми бра́тїю. є҃і Цѣлꙋ́йте фїлоло́га и҆ і҆ꙋлі́ю, нире́а и҆ сестрꙋ̀ є҆гѡ̀, и҆ ѻ҆лѷмпа́на, и҆ сꙋ́щыѧ съ ни́ми всѧ̀ ст҃ы́ѧ. ѕ҃і Цѣлꙋ́йте дрꙋ́гъ дрꙋ́га лобза́нїемъ ст҃ы́мъ. цѣлꙋ́ютъ вы̀ всѧ̀ цр҃кви хрⷭ҇то́вы.
Коне́цъ пѧткꙋ̀.
(заⷱ҇ рк҃а) з҃і Молю́ же вы̀ бра́тїе, ꙳ Въ понедѣ́льникъ ѕ҃-ѧ недѣ́ли: Бра́тїе, молю́ вы ꙳ блюди́тесѧ ѿ творѧ́щихъ ра̑спри и҆ раздо́ры, кромѣ̀ ᲂу҆че́нїѧ, є҆мꙋ́же вы̀ наꙋчи́стесѧ, и҆ ᲂу҆клони́тесѧ ѿ ни́хъ. и҃і Такові́и бо гдⷭ҇ви на́шемꙋ і҆и҃сꙋ хрⷭ҇тꙋ̀ не рабо́таютъ, но своемꙋ̀ чре́вꙋ: и҆̀же бл҃ги́ми словесы̀ и҆ бл҃гослове́нїемъ прельща́ютъ сердца̀ неѕло́бивыхъ. ѳ҃і Ва́ше бо послꙋша́нїе (л. р҃є ѡ҆б.) ко всѣ̑мъ дости́же: ра́дꙋюсѧ же є҆́же ѡ҆ ва́съ. хощꙋ́ же ва́съ мꙋ̑дрымъ ᲂу҆́бѡ бы́ти во благо́е, просты̑мъ же въ ѕло́е. к҃ Бг҃ъ же ми́ра да сокрꙋши́тъ сатанꙋ̀ под̾ но́ги ва́шѧ вско́рѣ. благода́ть гдⷭ҇а на́шегѡ і҆и҃са хрⷭ҇та̀ съ ва́ми, а҆ми́нь. к҃а Цѣлꙋ́етъ ва́съ тїмоѳе́й споспѣ́шникъ мо́й, и҆ лꙋкі́й, и҆ і҆а́сѡнъ, и҆ сѡсїпа́тръ, сро́дницы моѝ. к҃в Цѣлꙋ́ю вы̀ и҆ а҆́зъ те́ртїй, написа́вый посла́нїе сїѐ ѡ҆ гдⷭ҇ѣ. к҃г Цѣлꙋ́етъ вы̀ га́їе страннопрїи́мецъ мо́й, и҆ цр҃кве всеѧ̀. цѣлꙋ́етъ вы̀ є҆ра́стъ строи́тель гра́дскїй, и҆ кꙋа́ртъ бра́тъ. к҃д Бл҃года́ть гдⷭ҇а на́шегѡ і҆и҃са хрⷭ҇та̀ со всѣ́ми ва́ми. а҆ми́нь.
Коне́цъ понедѣ́льникꙋ.
Коне́цъ посла́нїѧ къ ри́млѧнѡмъ, є҆́же написа́сѧ въ корі́нѳѣ, и҆ посла́сѧ фі́вою, дїаконі́ссою цр҃кве сꙋ́щїѧ въ кегхре́ехъ: И҆́мать въ себѣ̀ гла́въ, ѕ҃і: А҆ зача̑лъ цр҃ко́вныхъ, м҃д: Стїхѡ́въ ул҃г: Знамена́нїй че́рныхъ, ѳ҃і: послѣ́дꙋющихъ и҆̀мъ червле́ныхъ и҃.