(л. п҃ ѡ҆б.)
Знамєна́нїѧ і҆ѡа́нновы є҆пїсто́лїи г҃-ѧ.
[а҃] Моли́тва ѡ҆ соверше́нїи, и҆ ѡ҆ похвалѣ̀, и҆ ѡ҆ и҆сповѣ́данїи, и҆ ѡ҆ страннолю́бїи бра́тїи хрⷭ҇та̀ ра́ди.
[а҃] Въ не́мже ѡ҆ развраще́нїи льстѝ, и҆ братоненавидѣ́нїи.
[в҃] Ѡ҆ дими́трїи, є҆мꙋ́же свидѣ́тельствꙋетъ ѡ҆ добродѣ́тели.
[г҃] Ѡ҆ прише́ствїи къ ни́мъ вско́рѣ на по́льзꙋ.
Сказа́нїе і҆ѡа́ннова тре́тїѧгѡ посла́нїѧ.
Є҆́сть посла́нїе сїѐ ѡ҆ страннолю́бїи. И҆ пе́рвѣе ᲂу҆́бѡ хва́литъ га́їа, свидѣ́тельствꙋема ѿ всѣ́хъ ѡ҆ страннолю́бїи: и҆ мо́литъ є҆го̀ въ таково́мъ и҆зволе́нїи пребыва́ти, и҆ прїима́ти и҆ провожда́ти бра́тїю. Па́ки же прино́съ є҆гѡ̀ хва́литъ. Оу҆корѧ́етъ же дїотрефи́са, ꙗ҆́кѡ ни са́мъ дае́тъ ни́щымъ, но и҆ и҆ны̑мъ возбранѧ́етъ, и҆ мно́гѡ блꙋдѧ́ща. Таковы́хъ же глаго́летъ чꙋ́ждихъ бы́ти ѿ и҆́стины, и҆ не вѣ́дѣти бг҃а. Дими́трїа же прїима́ти, свидѣ́тельствꙋѧ є҆гѡ̀ дѡ́браѧ дѣла̀. (л. п҃а)
СОБО́РНОЕ ПОСЛА́НІЕ ТРЕ́ТІЕ
СТ҃А́ГѠ А҆ПО́СТОЛА І҆ѠА́ННА БГ҃ОСЛО́ВА.
Глава̀ пе́рваѧ.
(заⷱ҇ ѻ҃ѕ) [а҃] сⷯ а҃ Ста́рецъ ꙳ Въ понедѣ́льникъ сы́рный: Ста́рецъ ꙳ га́їеви возлю́бленномꙋ, є҆го́же а҆́зъ люблю̀ вои́стиннꙋ. в҃ Возлю́бленне, па́че всѣ́хъ молю́сѧ ѡ҆ тебѣ̀, спѣ́ѧтисѧ тебѣ̀, здра́вствовати, ꙗ҆́коже спѣ́етсѧ тѝ дꙋша̀. г҃ Возра́довахсѧ ѕѣлѡ̀ прише́дшымъ бра́тїѧмъ, и҆ свидѣ́тельствꙋющымъ твою̀ и҆́стинꙋ, ꙗ҆́коже ты̀ во и҆́стинѣ хо́диши. д҃ Бо́льши сеѧ̀ не и҆́мамъ ра́дости, да слы́шꙋ моѧ̀ ча̑да во и҆́стинѣ ходѧ́щѧ. є҃ Возлю́бленне, вѣ́рнѡ твори́ши, є҆́же а҆́ще дѣ́лаеши въ бра́тїю, и҆ въ стра̑нныѧ: ѕ҃ И҆̀же свидѣ́тельствоваша ѡ҆ твое́й любвѝ пред̾ цр҃ковїю, и҆̀хже предпосла́въ досто́йнѡ бг҃ꙋ, до́брѣ твори́ши. з҃ Ѡ҆ и҆́мени бо є҆гѡ̀ и҆зыдо́ша, ничто́же прїе́млюще ѿ ꙗ҆зы̑къ. и҃ Мы̀ ᲂу҆̀бо до́лжни є҆смы̀ прїима́ти таковы́хъ, да поспѣ́шницы бꙋ́демъ и҆́стинѣ. [а҃] ѳ҃ Писа́хъ (л. п҃а ѡ҆б.) цр҃кви: но первстволю́бецъ и҆́хъ дїотрефи́съ не прїе́млетъ на́съ. і҃ Сегѡ̀ ра́ди а҆́ще прїидꙋ̀, воспомѧнꙋ̀ є҆мꙋ̀ дѣла̀, ꙗ҆̀же твори́тъ, словесы̀ лꙋка́выми ᲂу҆корѧ́ѧ на́съ: и҆ недово́ленъ быва́ѧ ѡ҆ си́хъ, ни са́мъ прїе́млетъ бра́тїю, и҆ хотѧ́щымъ возбранѧ́етъ, и҆ ѿ цр҃кве и҆зго́нитъ. а҃і Возлю́бленне, не ᲂу҆подоблѧ́йсѧ ѕло́мꙋ, но бл҃го́мꙋ. бл҃готворѧ́й ѿ бг҃а є҆́сть: а҆ ѕлотворѧ́й, не ви́дѣ бг҃а. [в҃] в҃і Дими́трїеви свидѣ́тельствовасѧ ѿ всѣ́хъ, и҆ ѿ са́мыѧ и҆́стины: и҆ мы́ же свидѣ́тельствꙋемъ, и҆ вѣ́сте, ꙗ҆́кѡ свидѣ́тельство на́ше и҆́стинно є҆́сть. [г҃] г҃і Мнѡ́га и҆мѣ́хъ писа́ти, но не хощꙋ̀ черни́ломъ и҆ тро́стїю писа́ти тебѣ̀. д҃і Оу҆пова́ю же а҆́бїе ви́дѣти тѧ̀, и҆ ᲂу҆сты̀ ко ᲂу҆стѡ́мъ глаго́лати. є҃і Ми́ръ тебѣ̀. цѣлꙋ́ютъ тѧ̀ дрꙋ́зи: цѣлꙋ́й дрꙋ́ги по и҆́мени. а҆ми́нь.
Коне́цъ понедѣ́льникꙋ сы́рномꙋ.
Коне́цъ посла́нїѧ і҆ѡа́ннова тре́тїѧгѡ, и҆мꙋ́щагѡ въ себѣ̀ главꙋ̀ а҃: цр҃ко́вное зача́ло а҃: стїхѡ́въ є҃і: знамена́нїй че́рныхъ г҃: послѣ́дꙋющее же и҆̀мъ червле́ное а҃.