Сказа́нїе ст҃а́гѡ є҆пїфа́нїа, є҆пⷭ҇кпа кѵ́прскагѡ, ѡ҆ двꙋна́десѧти ст҃ы́хъ а҆пⷭ҇лѣхъ, гдѣ̀ кі́йждо и҆́хъ проповѣ́да, и҆ ка́кѡ сконча́сѧ, и҆ ст҃а́ѧ и҆́хъ тѣлеса̀ гдѣ̀ положе́на сꙋ́ть.

[а҃] Ст҃ы́й пе́тръ, бра́тъ а҆ндре́а первозва́ннагѡ, ѿ гра́да несла́вна и҆ хꙋ́да, и҆́менемъ виѳсаі́ды, сы́нъ і҆ѡ́нинъ, ѿ пле́мене сѷмеѡ́нѧ, и҆́же ᲂу҆́бѡ є҆́сть ны́нѣ пе́рвый и҆ верхо́вный а҆пⷭ҇лѡмъ, и҆ преизѧ́щный хрⷭ҇то́въ рачи́тель, ꙗ҆́кѡ ꙗ҆влѧ́етсѧ є҆пїсто́лїами свои́ми. И҆ проповѣ́да пе́рвѣе во і҆ꙋде́и, та́же во а҆нтїохі́и, и҆ въ по́нтѣ, и҆ въ галаті́и, и҆ каппадокі́и, во а҆сі́и же и҆ въ вїѳѷні́и, и҆ во і҆талі́и, и҆ во і҆ллѷрі́цѣ, є҆ѵⷢ҇лїе гдⷭ҇а на́шегѡ і҆и҃са хрⷭ҇та̀: сни́де же и҆ до ри́ма, и҆ сі́мѡнꙋ волхвꙋ̀ ѡ҆бѣща́вшꙋ пред̾ царе́мъ ѡ҆бличи́ти петра̀, не сꙋ́щꙋ пои́стиннѣ слꙋ́житъ бг҃ꙋ: глаго́лаше бо въ ма́лѣ на нб҃са̀ взы́ти, и҆ ꙗ҆́вѣ пред̾ всѣ́ми низложи́ти петра̀. И҆ дню̀ нарече́ннꙋ, и҆ держа́вномꙋ нерѡ́нꙋ на таково́е позо́рище со мно́гими прише́дшꙋ: сі́мѡнъ же ѡ҆гла́вїе даѳі́ново на главѣ̀ свое́й положѝ, и҆ строе́нїи бѣсо́вскими и҆ пѣ́сньми себѐ ѡ҆гради́въ, восхище́нъ и҆дѧ́ше къ воздꙋ́хꙋ.

Ст҃ы́й же пе́тръ, протѧ́гъ прпⷣбнїи своѝ рꙋ́цѣ, помоли́сѧ, и҆ речѐ: Гдⷭ҇и, просла́ви и҆́мѧ твоѐ ст҃о́е, и҆ бѣсо́вскаѧ мечта̑нїѧ да раста́ютсѧ. И҆ къ сі́мѡнꙋ воззрѣ́въ, ве́лїимъ гла́сомъ речѐ: Пред̾ лице́мъ всѣ́хъ на землѝ зрѧ́щихъ, ты̀ па́дъ разсѧ́дисѧ. И҆ а҆́бїе сло́вомъ тогѡ̀, бѣ́сове ꙗ҆́кѡ ѿ ѻ҆гнѧ̀ ѿбѣго́ша, и҆ а҆пⷭ҇ловымъ гла́сомъ на зе́млю є҆го̀ пꙋсти́ша, и҆ па́дъ ве́сь сокрꙋши́сѧ. Послѣди́ же въ ри́мѣ ст҃ы́й пе́тръ при нерѡ́нѣ царѣ̀ про́пѧтъ бы́сть стремгла́въ, самомꙋ̀ та́кѡ и҆зво́льшꙋ: и҆ погребе́нъ бы́сть въ то́мже ри́мѣ, мцⷭ҇а і҆ꙋ́нїа въ к҃ѳ де́нь. (л. а҃ ѡ҆б.)

[в҃] А҆ндре́й первозва́нный, бра́тъ петро́въ, проповѣ́да є҆ѵⷢ҇лїе хрⷭ҇то́во вїѳѷні́и, по́нтꙋ и҆ а҆рме́нїи, скѵ́ѳѡмъ, и҆ согда́ємъ, и҆ горсі́нѡмъ: проповѣ́да же и҆ въ севастопо́ли вели́цѣмъ, и҆дѣ́же є҆́сть по́лкъ а҆ссѷрі́йскъ, и҆ а҆ѯа́рови, и҆ сꙋлїмі́ни, и҆ ѳарсѵ́си, и҆дѣ́же живꙋ́тъ мꙋ́ри, и҆ сше́дъ да́же до є҆лла́ды, и҆ въ па́трѣхъ а҆ха́йскихъ на крⷭ҇тѣ̀ ра́спѧтъ бы́сть ѿ є҆геа́та царѧ̀ тѵ́рска, и҆ сконча́сѧ та́мѡ, и҆ погребе́нъ бы́сть.

[г҃] І҆а́кѡвъ зеведе́овъ, бра́тъ і҆ѡа́нна є҆ѵⷢ҇лі́ста, ѻ҆бѣмана́десѧте колѣ́нома разсѣ́ѧнома проповѣ́да є҆ѵⷢ҇лїе хрⷭ҇то́во: ѿ и҆́рѡда же тетра́рха і҆ꙋде́йска, благодерзнꙋ́тїѧ ра́ди, ᲂу҆бїе́нъ бы́сть мече́мъ, и҆ тꙋ̀ погребе́нъ бы́сть во і҆ꙋде́и.

[д҃] І҆ѡа́ннъ бл҃говѣ́стникъ и҆ бг҃осло́въ, бра́тъ і҆а́кѡвль, возлегі́й на пе́рсехъ хрⷭ҇то́выхъ, во а҆сі́и проповѣ́да є҆ѵⷢ҇лїе хрⷭ҇то́во, ѿ траїа́на же царѧ̀ ри́мска въ заточе́нїе по́сланъ бы́сть въ па́томскїй ѻ҆́стровъ, словесѐ ра́ди гдⷭ҇нѧ: и҆ тꙋ̀ написа̀ є҆ѵⷢ҇лїе, и҆ вдадѐ є҆̀ га́їю страннопрїи́мцꙋ. по сконча́нїи же траїа́на возврати́сѧ ѿ ѻ҆́строва во є҆фе́съ, и҆ тꙋ̀ жи́ва себѐ погребѐ, сы́й лѣ́тъ ста̀ и҆ два́десѧти, бж҃їею во́лею.

[є҃] Фїлі́ппъ же а҆пⷭ҇лъ, се́й бѣ̀ ѿ виѳсаі́ды, ве́си петро́вы и҆ а҆ндре́евы, въ го́рнѣй же фрѷгі́и проповѣ́да є҆ѵⷢ҇лїе хрⷭ҇то́во: во і҆ерапо́ли же ра́спѧтъ бы́сть стремгла́въ при дометїа́нѣ, и҆ тꙋ̀ погребе́нъ бы́сть сла́внѡ свои́ми є҆мꙋ̀.

[ѕ҃] Варѳоломе́й же ѿ галаа́ды, і҆нді́анѡмъ проповѣ́да є҆ѵⷢ҇лїе хрⷭ҇то́во: є҆́же ѿ матѳе́а ст҃о́е бл҃говѣствова́нїе дадѐ и҆̀мъ, въ сво́й и҆̀мъ ѧ҆зы́къ написа́въ: во а҆лфені́йстѣмъ же гра́дѣ, въ вели́цѣй а҆рме́нїи, ра́спѧтъ бы́сть стремгла́въ, и҆ тꙋ̀ погребе́нъ бы́сть, во а҆лва́нѣ вели́кихъ ра́менъ.

[з҃] Ѳѡма́ же а҆пⷭ҇лъ, [ꙗ҆́коже преда́нїе пи́шетъ,] бѣ̀ ѿ панеа́да гра́да галїле́йска, па́рѳѡмъ же и҆ ми́дѡмъ проповѣ́да є҆ѵⷢ҇лїе хрⷭ҇то́во, пе́рсѡмъ же и҆ герма́нѡмъ, и҆ ѵ҆рка́нѡмъ и҆ і҆нді́анѡмъ, и҆ ва́ктрѡмъ и҆ ма́ргѡмъ: и҆ ѿ ни́хъ ко́пїи прободе́нъ сконча́сѧ, и҆ погребе́нъ бы́сть во гра́дѣ каламі́йстѣмъ сла́внѡ. (л. в҃)

[и҃] Матѳе́й же є҆ѵⷢ҇лі́стъ бѧ́ше ѿ і҆ерⷭ҇ли́ма, и҆ тꙋ̀ написа̀ є҆ѵⷢ҇лїе хрⷭ҇то́во є҆вре́йскимъ ѧ҆зы́комъ, и҆ преложѝ є҆̀ і҆ѡа́ннъ бг҃осло́въ ѿ є҆вре́йска ѧ҆зы́ка въ гре́ческїй ѧ҆зы́къ: во і҆ерапо́ли же парті́и мече́мъ прободе́нъ сконча́сѧ, и҆ погребе́нъ бы́сть сла́внѡ. написа̀ житїѐ своѐ, ꙗ҆́кѡ бы́сть ста́рѣй мытарє́мъ, а҆ во и҆збра́нїи а҆по́столъ бы́сть, и҆ пе́рвый писе́цъ ст҃ы́мъ та́йнамъ гдⷭ҇а на́шегѡ і҆и҃са хрⷭ҇та̀.

[ѳ҃] І҆а́кѡвъ а҆лфе́овъ, и҆́же и҆ бра́тъ матѳе́евъ, кꙋ́пнѡ бо а҆лфе́а и҆мꙋ́ще ѻ҆ц҃а̀, то́й ꙗ҆зы́кѡмъ хрⷭ҇та̀ проповѣ́давъ, сѣ́мѧ бжⷭ҇твенно и҆менова́нїемъ ѡ҆богати́сѧ: и҆ ꙗ҆́кѡ къ проповѣ́данїю подви́жесѧ, и҆ ненака́занныѧ собо́ры крѣ́пкѡ ѡ҆блича́ѧ, на крⷭ҇тѣ̀ повѣ́шенъ, бг҃ꙋ дх҃ъ предадѐ.

[і҃] І҆ꙋ́да і҆а́кѡвль, и҆́же въ лꙋкинѣ̀ благовѣ́стїи, и҆ въ дѣѧ́нїихъ і҆ꙋ́да, матѳе́емъ же и҆ ма́ркомъ ѳадде́й и҆ леѵе́й нарече́нный, бра́тъ по пло́ти ꙗ҆́вльсѧ гдⷭ҇а на́шегѡ і҆и҃са хрⷭ҇та̀: то́й въ месопота́мїи проповѣ́давъ благовѣ́стїе, послѣдѝ ѿ невѣ́рныхъ повѣ́шенъ на дре́вѣ, и҆ ѿ ни́хъ сострѣ́лѧнъ сконча́сѧ.

[а҃і] Сі́мѡнъ зилѡ́тъ, и҆́же ѿ ка́ны галїле́йскїѧ, и҆́же во і҆ѡа́нновѣ благовѣствова́нїи наѳана́илъ, то́й всю̀ маѵрїтані́ю и҆ а҆фрїкі́йскꙋю странꙋ̀ проше́дъ, та́же во врита́нїю доше́дъ, и҆ хрⷭ҇та̀ проповѣ́давъ, ра́спѧтъ сконча́сѧ.

[в҃і] Матѳі́й же, є҆ди́нъ сы́й ѿ седми́десѧтихъ ᲂу҆чени̑къ, є҆го́же ꙗ҆вѝ гдⷭ҇ь на́шъ по воскресе́нїи и҆з̾ ме́ртвыхъ, и҆́же причте́нъ бы́сть къ є҆динона́десѧтимъ а҆пⷭ҇лѡмъ, во і҆ꙋ́ды мѣ́сто і҆скарїѡ́тскагѡ, проповѣ́да є҆ѵⷢ҇лїе гдⷭ҇а на́шегѡ і҆и҃са хрⷭ҇та̀ во внѣ́шней є҆ѳїо́пїи, и҆ тꙋ̀ мꙋ́кꙋ прїѧ́тъ ѿ є҆ѳїо́плѧнъ, на і҆и҃совѣ приста́нищи.

Па́ѵелъ же, повнегда̀ прїѧ́ти є҆мꙋ̀ вла́сть ѿ а҆рхїере́а, и҆дꙋ́щꙋ є҆мꙋ̀ въ дама́скъ, погꙋбле́нїю преда́ти всѧ̑ нарица́ющыѧ и҆́мѧ і҆и҃съ хрⷭ҇то́во, и҆ приближа́ющꙋсѧ є҆мꙋ̀ къ дама́скꙋ, и҆ а҆́бїе свѣ́томъ нбⷭ҇нымъ ѡ҆блиста́емь, и҆ слы́ша гла́съ глаго́лющъ є҆мꙋ̀, ꙗ҆́кѡ невозмо́жно є҆́сть є҆мꙋ̀, чл҃вѣ́кꙋ сꙋ́щꙋ, ѡ҆долѣ́ти си́лѣ бж҃їей. и҆ та́мѡ рече́но є҆мꙋ̀, да и҆́детъ въ дама́скъ, ко ᲂу҆ч҃нкꙋ̀ (л. в҃ ѡ҆б.) хрⷭ҇то́вꙋ а҆на́нїи, и҆́же и҆ крестѝ є҆го̀: и҆ ѿ тогѡ̀ часа̀ вни́де во а҆пⷭ҇льство, и҆ бы́сть хрⷭ҇тꙋ̀ сосꙋ́дъ и҆збра́нный, и҆ ꙗ҆́кѡ нѣ́который крила́тъ, всю̀ вселе́ннꙋю ѡ҆бте́къ ᲂу҆ловѝ: наче́нъ же ѿ і҆ерⷭ҇ли́ма, до́йде до і҆ллѷрі́ка, и҆ і҆талі́и, и҆ і҆спа́нїи, проповѣ́да є҆ѵⷢ҇лїе хрⷭ҇то́во. И҆ посе́мъ прише́дъ въ ри́мъ, и҆ мно́зѣхъ поꙋчи́въ та́мѡ, и҆ повелѣ́нїемъ ке́саревымъ ᲂу҆сѣ́ченъ бы́сть внѣ̀ гра́да. Та́кѡ сконча́сѧ бл҃же́нный па́ѵелъ: и҆ на є҆ди́номъ мѣ́стѣ съ петро́мъ, положе́на бы́ша ѻ҆бою̀ тѣлеса̀.