Акафист Пресвятой Богородице в честь иконы Ее «Умягчение злых сердец»

Празднование в Неделю Всех святых

Кондак 1

Избра́нней Деве Марии, превысшей всех дщерей земли́, Матери Сына Божия, егоже даде́ на спасение мира, со умилением взываем: Воззри на многоскорбное житие наше, воспомяни́ скорби и болезни, ихже претерпела еси, яко наша земнородная, и сотвори́ с нами по милосердию Твоему, да зовем Ти: Радуйся, многоскорбная Мати Божия, печаль нашу в радость претворяющая.

Икос 1

Ангел, возвести́вый пастырем Вифлеемским о Рождестве Спасителя мира, и с ним множество небесных сил восхвали́ша Бога, пою́ще: «Слава в вышних Богу, и на земли́ мир, в челове́цех благоволе́ние». Ты же, Мати Божия, не имевшая где главу́ преклони́ти, зане́ не бе места во обителех, роди́ Сына Своего Первенца в верте́пе и, пови́вши Его пелена́ми, положи в я́слех; тем скорбь сердца Твоего познавше, вопием Ти: Радуйся, дыханием Своим Сына Своего возлюбленнаго согревшая; радуйся, Предвечнаго Младенца пелена́ми пови́вшая. Радуйся, Носи́теля вселенныя млеко́м Своим питавшая; радуйся, вертеп в Небо обратившая. Радуйся, престолом херувимским соделавшаяся; радуйся, в Рождестве и по Рождестве Девою пребывшая. Радуйся, многоскорбная Мати Божия, печаль нашу в радость претворяющая.

Кондак 2

Видяще Предвечнаго Младенца, пови́та лежа́ща в я́слех, пришедше поклони́шася Ему пастыри Вифлеемстии и сказа́ша о глаголе, глаго́ланном им ангелом о Отроча́ти. Мариа́м же соблюдаше вся глаголы сия́ в сердце Своем; по прошествии же семи дней бе обрезан Иисус по закону Израильскому, яко человек осьмодневен; воспевающе смирение и терпение Твое, Богородице, пое́м вечному Богу: Аллилуиа.

Икос 2

Разум иму́ща в Боге утвержде́нный и соблюдающа закон Господень, в четыредеся́тый день, егда исполнишася дни очищения, вознесо́ста Иисуса во Иерусалим родители Его, дабы́ поставили Его пред Господом и да́ли за Него жертву по рече́нному в законе Господнем; мы же вопием Тебе си́це: Радуйся, Создателя вселенныя во исполнение закона во храм Иерусалимский принесшая; радуйся, тамо старцем Симеоном радостно сре́тенная. Радуйся, едина Чистая и Преблагословенная в жена́х; радуйся, крест Свой, скорбя́ми преукраше́нный, во смирении несшая. Радуйся, воли Божией николи́же преслушавшая; радуйся, образ терпения и смирения Собою яви́вшая. Радуйся, сосу́де, исполненный благодати Духа Святаго. Радуйся, многоскорбная Мати Божия, печаль нашу в радость претворяющая.

Кондак 3

Силою свыше была еси укрепля́ема, Мати Божия, егда услыша словеса́ старца Симеона, глаголюща: «Се, лежит Сей на паде́ние и на востание многим во Изра́или, и в зна́мение пререка́емо, и Тебе же Само́й душу про́йдет оружие, яко да открыются от многих сердец помышле́ния», и скорбь ве́лия пронзи сердце Богородицы, и возопи в горести Богу: Аллилуиа.

Икос 3

Имея тща́ние погубити Отроча́, посла́ Ирод избити вся дети, сущия в Вифлееме и преде́лех его от двою́ ле́ту и нижа́йше, по времени, е́же испыта́ от волхвов, и се, по повелению Божию, данному чрез ангела во сне старцу Иосифу, бежа́ все святое семейство во Египет и пребысть тамо седмь лет до смерти Ирода. Темже со умилением вопием Ти: Радуйся, всю тесноту странствия понесшая; радуйся, яко все и́доли падо́ша в стране Египетской, не возмо́гше терпети крепости Сына Твоего. Радуйся, с нечестивыми язычники седмь лет пребы́вшая; радуйся, с Предвечным Младенцем Отроком и со Своим Обру́чником в Назарет пришедшая. Радуйся, со старцем Иосифом древоде́лом в нищете жи́вшая; радуйся, все время Свое в трудах проводи́вшая. Радуйся, многоскорбная Мати Божия, печаль нашу в радость претворяющая.

Кондак 4

Буря скорби обдержа́ Пречистую Матерь, егда возвращающимся и́ма из Иерусалима, не обретоста в пути О́трока Иисуса. Сего ра́ди возвращшеся взыска́юще Его, и бысть по трие́х днех обрето́ста Его в церкви, седя́ща посреде́ учи́телей и послушающа их и вопрошающа их. И рече́ к Нему Мати Его: «Чадо, что сотвори на́ма та́ко? Се отец Твой и Аз боля́ще искахом Тебе». И рече́ к ни́ма: «Что яко иска́ста Мене́, не ве́ста ли, яко в тех, я́же Отца Моего суть, досто́ит быти Ми»; и Мати Его соблюдаше вся глаголы сия́ в сердце Своем, вопиющи Богу: Аллилуиа.

Икос 4

Услыша Мати Божия, яко Иисус прохожда́ше всю Галиле́ю, уча́ на со́нмищах их, пропове́даяй Евангелие Царствия и исцеля́я всяк неду́г и всяку язву в людех, и изы́де слух по всей Сири́и, и приведо́ша к Нему боля́щия различными неду́зи, и страстьми́ одержимыя и бе́сами, и разслабленныя, и исцеля́ше их. Ты же, Мати Божия, ве́дущи пророчества, скорбела сердцем, познавши, яко вскоре прии́дет час, егда Сын Твой принесе́т Себе в жертву за грехи́ мира. Темже ублажаем Тя, многострадальная Мати Божия, вопиюще: Радуйся, Сына Своего на служение народу иудейскому отдавшая; радуйся, скорбная сердцем, но покорная воле Божией. Радуйся, мир от потопа греховнаго спасшая; радуйся, главу́ древняго зми́я стершая. Радуйся, Себе в жертву жи́ву Богу принесшая; радуйся, Господь бо с Тобою, Благословенная. Радуйся, многоскорбная Мати Божия, печаль нашу в радость претворяющая.

Кондак 5

Божие Царство на земли проповедуя, облича́ше Иисус гордость фарисе́й, мнивших себя праведными быти. Ти́и же, слушающе притчи Его, разуме́ша, яко о них глаголет, и иска́ша я́ти Его, но убоя́шася народа, поне́же яко пророка Его име́яху; сие́ все ве́дущи, скорбя́ше Богородица о Сыне возлюбленном, страши́ся, да не убию́т Его, в горести вопиющи: Аллилуиа.

Икос 5

Видевше не́цыи от иудеев воскресение Лазаря, идо́ша к фарисеем и реко́ша им, я́же сотвори Иисус, и рече́ Каиафа, архиерей сый лету тому: «У́не есть нам, да един человек у́мрет за люди, а не весь язык погибнет»; от того дня совеща́шася, да убию́т Его; мы же вопием Тебе, Пречистая: Радуйся, Спасителя мира рождшая; радуйся, спасения нашего глави́зно. Радуйся, от рождения Матерью Спасу нашему предызбра́нная; радуйся, Мати Божия, обрече́нная на страдание. Радуйся, Благословенная, Царицею Небесною соделавшаяся; радуйся, вы́ну за нас моля́щаяся. Радуйся, многоскорбная Мати Божия, печаль нашу в радость претворяющая.

Кондак 6

Прежде проповедник Слова Божия, по́слежде предатель – Иуда Искариотский, един от обоюна́десяти апостолов, и́де ко архиере́ом предати Учителя своего; они же слышавше, обра́довашася зело́ и обеща́ша ему сре́бреники дати; Ты же, Мати Божия, скорбя́щи о Сыне Своем возлюбленном, вопияла еси горце Богу: Аллилуиа.

Икос 6

Возсия́ последняя ве́черя учеником Христовым, на нейже Учитель умы́ но́зи им, образ смирения тем показу́я, и рече́ им: «Един от вас предаст Мя, яды́й со Мною». Мы же, го́рю Матери Божией сострадающе, вопием Ей: Радуйся, Мати Божия, му́кой сердечной истомле́нная; радуйся, вся претерпевшая во юдо́ли сей многоскорбней. Радуйся, в молитве успокоение находи́вшая; радуйся, всех скорбя́щих Радосте. Радуйся, утоление наших печалей; радуйся, из тины греховныя нас спасающая. Радуйся, многоскорбная Мати Божия, печаль нашу в радость претворяющая.

Кондак 7

Хотя́й яви́ти любовь Свою к роду человеческому, Господь Иисус Христос на Тайной Ве́чери, благослови́в и преломи́в хлеб, даде́ Своим учеником и апостолом, рек «Приими́те, яди́те, сие́ есть Тело Мое»; и прие́м чашу и хвалу́ воздав, даде́ им, глаголя: «Пи́йте от нея́ вси, сия́ есть Кровь Моя Новаго Завета, я́же за мно́гия изливаемая во оставле́ние грехов». Благодаряще милостиваго Бога за милосердие Его к нам неизрече́нное, пое́м Ему: Аллилуиа.

Икос 7

Новое зна́мение милости Своей яви́ Господь учеником Своим, егда обеща́ послати им Уте́шителя, Духа Истины, И́же от Отца исходит и и́мать свидетельствовати о Нем. Тебе же, Матери Божией, дважды освяще́нной Святым Духом, вопием: Радуйся, Духа Святаго обита́лище; радуйся, черто́же всесветлый. Радуйся, пространное селение Бога Слова; радуйся, бисер Божественный произведшая. Радуйся, Рождеством Твоим райския двери нам отверза́ющая; радуйся, зна́мение милости Божией Собою нам яви́вшая. Радуйся, многоскорбная Мати Божия, печаль нашу в радость претворяющая.

Кондак 8

Странно и прискорбно нам слышати, яко лобза́нием предаде́ Учителя своего и Господа Иуда Искариотский, спи́ра же и ты́сячник и слуги́ иудейския я́ша Ииуса, и связа́ша Его, и ведо́ша к первосвященнику Анне пе́рвее, посе́м же к Каиафе архиере́ови. Мати же Божия, смертнаго совета Сына Своего возлюбленнаго ожидающи, вопияше Богу: Аллилуиа.

Икос 8

Вси иудеи ведо́ша Иисуса от Каиафы в прето́р к Пилату, глаголюще Его злодеем быти. Пилат же, вопроси́в Его, глагола им, яко ни единыя вины́ обретает в Нем; мы же вопием Ти: Радуйся, сердце, горем истерзанное, имевшая; радуйся, сле́зы о Сыне Своем пролива́вшая. Радуйся, все претерпевшая без ропота яко Раба Господня; радуйся, стеня́щая и рьщающая. Радуйся, Царице небесе́ и земли́, приемлющая молитвы раб Своих. Радуйся, многоскорбная Мати Божия, печаль нашу в радость претворяющая.

Кондак 9

Вси ро́ди блажа́т Тя, Честне́йшую херувим и Сла́внейшую без сравнения серафим, Владычицу и Матерь Изба́вителя нашего, Рождеством Своим радость всему миру принесшую, по́слежде скорбь ве́лию имевшую, видящи Сына Своего возлюбленнаго на поруга́ние и бие́ние и смерть пре́даннаго, мы же умиле́нное пение приносим Ти, Пречистая, пою́ще Всемогущему Богу: Аллилуиа.

Икос 9

Вити́и многовеща́ннии не возмогут изрещи́ всех страданий, Тобою перенесе́нных, Спа́се наш, егда воины, спле́тше венец из терния, на главу́ Твою возложи́ша и в ризу багря́ну облеко́ша, глаго́лаху: «Радуйся, Царю Иудейский», и бия́ху Тя по ланитам. Мы же, Мати Божия, страдания Твоя познавающе, вопием Ти: Радуйся, егоже млеко́м Своим питала еси, терзаемаго видевшая; радуйся, багряни́цею и терновным венце́м оде́яннаго зревшая. Радуйся, страданием Его спострадавшая; радуйся, всеми учениками Его оставленнаго видевшая. Радуйся, неправедными судия́ми Его осужденнаго зревшая. Радуйся, многоскорбная Мати Божия, печаль нашу в радость претворяющая.

Кондак 10

Спасти хотя Иисуса, рече́ Пилат иудеом: «Есть обычай нам, да единаго вам отпущу́, хо́щете ли убо отпущу́ вам Царя Иудейскаго?» Вси же возопиша, глаголюще: «Не Его, но Вара́вву!» Воспевающе милосердие Божие, отдавшаго Сына Своего Единороднаго на крестную смерть, да искупи́т ны от вечныя смерти, вопием Ему: Аллилуиа.

Икос 10

Стена и ограждение бу́ди нам, Владычице, изнемогающим от скорби и болезней. Ты бо и Сама страдала еси, слышащи иудеев, вопиющих: «Распни́ Его!» Ныне же услыши нас, вопиющих Ти: Радуйся, Мати милосердия, отъемлющая вся́ку сле́зу от люте стра́ждущих; радуйся, сле́зу умиления нам подающая. Радуйся, погибающих грешников спасающая; радуйся, предста́тельство христиан непостыдное. Радуйся, от страсте́й нас избавляющая; радуйся, сердцу сокруше́нному отраду подающая. Радуйся, многоскорбная Мати Божия, печаль нашу в радость претворяющая.

Кондак 11

Пение всеумиле́нное приносим Спасителю мира, на вольное страдание ше́дшу и Крест Свой не́сшу на Голгофу пропя́ти Его; стоя́ху при Кресте Иисусове Мати Его, Мария Клео́пова и Мария Магдалина. Иисус же, видев Матерь и ученика стоя́ща, егоже любля́ше, глагола Матери Своей: «Же́но, се сын Твой!» Потом глагола ученику: «Се Ма́ти твоя!» И от того часа́ поя́т Ю ученик во своя́си. Ты же, Мати Божия, видящи на Кресте Сына и Господа Своего, терзающися, вопия́ла еси горце Богу: Аллилуиа.

Икос 11

«Све́те Мой, Боже Превечный и Тво́рче всех тварей, Господи, ка́ко те́рпиши страсти на Кресте?» – Чистая Дева, плачущи, глаго́лаше о страннем Твоем Рождестве: «Сыне Мой, паче всех ма́терей возвели́чена бых Аз, но, увы́ Мне, ныне Тя видящи ра́спята, распаля́юся утробою»; мы же сле́зы проливаем, Тебе внимающе, вопием Ти: Радуйся, радости и веселия лише́нная; радуйся, вольная страдания Сына Своего на Кресте видевшая. Радуйся, Чадо Свое возлюбленное уя́звленным зревшая; радуйся, Агница, зря́щи Чадо Свое, яко Агнца, на заколе́ние ведо́ма. Радуйся, Изба́вителя язв душевных и телесных язвами покрытаго видевшая; радуйся, Сына Своего воскресшаго из мертвых зревшая. Радуйся, многоскорбная Мати Божия, печаль нашу в радость претворяющая.

Кондак 12

Благодать пода́ждь нам, Спа́се Всемилостивый, на Кресте Дух Свой испусти́вый и согрешений наших рукописание раздра́вый. «Се, Свет Мой благи́й, Бог Мой угасе́ на Кресте», – Дева стеня́щи глаго́лаше. «Потщи́ся, Ио́сифе, к Пилату приступи́ти и испроси́ сня́ти с древа Учителя Твоего. Уя́звленнаго Тя видевши, без славы, на́га на древе, Чадо Мое, душу Мою про́йде оружие, по прорече́нию праведнаго Симеона», – скорбя́ше Мати Божия, вопиющи: Аллилуиа.

Икос 12

Пою́ще милосердие Твое, Человеколю́бче, покланя́емся богатству милости Твоея́, Владыко. «Создание Твое спасти хотя, смерть подъял еси, – рече́ Пречистая, – но Воскресением Твоим, Спа́се, помилуй всех нас». Мы же Пречистей Матери Твоей со умилением зовем: Радуйся, мертва зря́щи бездыха́нна преблага́го Господа; радуйся, лобза́вшая тело Сына Своего возлю́бленнаго. Радуйся, Света Своего на́га и уя́звленнаго мертвеца зрела еси; радуйся, Света Своего гробу преда́вшая. Радуйся, плащани́цею новою Тело Его обвившая; радуйся, воскресшим Его видевшая. Радуйся, многоскорбная Мати Божия, печаль нашу в радость претворяющая.

Кондак 13

О Всепетая Мати, изнемогавшая от скорби у Креста Сына Своего и Бога, внемли́ воздыханием и слеза́м нашим и изба́ви от скорби, болезней и вечныя смерти всех, уповающих на неизрече́нное Твое милосердие и вопиющих Богу: Аллилуиа.

Этот кондак читается трижды, затем 1-й икос «Ангел, возвестивый...» и 1-й кондак «Избранней Деве Марии...».

Молитва

О многострадальная Мати Божия, Превысшая всех дще́рей земли́ по чистоте Своей и по множеству страданий; Тобою на земли перенесе́нных, приими́ многоболе́зненная воздыхания наша и сохрани нас под кровом Твоея́ милости. Иного бо прибежища и теплаго предста́тельства разве Тебе не ве́мы, но, яко дерзновение иму́щая ко И́же из Тебе Рожденному, помози́ и спаси ны молитвами Своими, да непреткнове́нно достигнем Царствия Небеснаго, иде́же со всеми святыми воспоем в Троице Единаго Бога, ныне и при́сно и во веки веков. Аминь.