Акафист Пресвятой Богородице в честь иконы Ее «Три радости»

Празднование 26 декабря/8 января

Кондак 1

Взбра́нной Воеводе не умолчим никогда глаго́лати мы недостойнии, Всесвятая Дево, рождшая на спасение наше Радость вечную, всякое уныние и печаль отжени́ от нас, да зовем Ти: Радуйся, Радосте наша, во объятиих Своих Радость всего мира носи́вшая.

Икос 1

Тайну от века открывая Тебе, Пренепорочная Дево, Гавриил, безплотных Архистрати́г, со страхом вопияше: «Радуйся, Благодатная, Господь с Тобою!» Мы же, грешнии, нечистыми устна́ми дерзаем вопити Ти си́це: Радуйся, Благословенная в жена́х; радуйся, Богоневе́сто. Радуйся, виноградная лозо́; радуйся, в Рождестве и по Рождестве Дево. Радуйся, Цве́те Неувядаемый; радуйся, чистоты сокровище. Радуйся, кади́ло благовонное; радуйся, ми́ро многоценное. Радуйся, одушевленная трапе́зо; радуйся, света невечерняго жилище. Радуйся, всего мира очищение; радуйся, Радосте наша, во объятиих Своих Радость всего мира носи́вшая.

Кондак 2

Исполни веселия сердце мое, утоли печаль мою, Пресвятая Дево! Просвети светом нетленныя радости мою скорбную душу, да взываю Создателю моему: Аллилуиа.

Икос 2

Разум человеческий не может уразуме́ти, ка́ко Ты, Неискусобрачная Дево, имела еси во утробе над всеми Бога и родила́ еси нетленнаго Сына, темже со страхом взываем Ти: Радуйся, земле́ ненасеянная; радуйся, Купино́ Неопали́мая. Радуйся, глубино́ неудобозримая; радуйся, мо́сте к небесе́м приводя́й. Радуйся, ле́ствице высокая, ю́же Иаков виде; радуйся, Божественная ста́мно манны. Радуйся, разрушение клятвы; радуйся, Адамово воззвание. Радуйся, яко с Тобою Господь; радуйся, тьму греховную разруши́вшая. Радуйся, врата адова сокрушившая; радуйся, Радосте наша, во объятиих Своих Радость всего мира носи́вшая.

Кондак 3

Ты, предста́тельство и покров жизни моея́, Ты, надежда и утверждение мое, Всепетая, исцели мою душу, зараже́нную проказою греховною, да воспою Небесному Жениху во веки: Аллилуиа.

Икос 3

Всевышняго освященное Божественное селение, радуйся, Тобою бо даде́ся радость Богородице зовущим: Радуйся, высшая небес; радуйся, чистейшая светлостей солнечных. Радуйся, пребывание Творца неба и земли́; радуйся, ангелов Радосте. Радуйся, всечудное всех к Богу примирение; радуйся, Честнейшая херувим. Радуйся, Сла́внейшая без сравнения серафим; радуйся, стено́ и защито наша от врагов. Радуйся, демонов поражение и ослепле́ние; радуйся, двери райския нам отверза́ющая. Радуйся, Марие, Госпоже́ всех нас; радуйся, Радосте наша, во объятиих Своих Радость всего мира носи́вшая.

Кондак 4

Унынием и многими скорбьми́ исполнено сердце мое. К кому возопию́, Владычице, к кому прибегну в горести моей, кому возвещу́ печаль мою, кто плач и воздыхание мое услышит, аще не Ты, Богородице, рождшая на радость небесе и земли́ Царя Христа Бога нашего. Емуже пою́т с нами херувими и серафими: Аллилуиа.

Икос 4

Никогда не умолчи́м и не отступим от Тебе, Владычице, Твоя бо рабы спасаеши при́сно от всяких лютых бед и скорбе́й. Темже припа́даем к Тебе и со умилением пое́м: Радуйся, всех скорбя́щих Радосте; радуйся, Взыскание погибших. Радуйся, утоление наших печалей; радуйся, оби́димых Заступнице. Радуйся, алчущих Питательнице; радуйся, странных утешение. Радуйся, обуреваемых пристанище; радуйся, больных посещение. Радуйся, немощны́х покров и Помощнице; радуйся, же́зле старости. Радуйся, Мати Бога нашего; радуйся, Радосте наша, во объятиих Своих Радость всего мира носи́вшая.

Кондак 5

Заступнице мира, возвесели всех прибегающих к Тебе, Матери высшей радости. Покры́й нас честны́м Твоим омофо́ром от всяких бед, напастей, скорбе́й и болезней, да поём Богу: Аллилуиа.

Икос 5

Моление теплое, стено́ необори́мая, милости источниче, всех православных прибежище, Богородице Дево! Приими́ от нас ангельское пение: Радуйся, Радосте и славо верующих; радуйся, чудо чудес. Радуйся, всех святых непрело́жное упование; радуйся, скорое в беда́х избавление. Радуйся, готовое в ну́ждах утешение; радуйся, боговместимое жилище. Радуйся, бездно щедрот и благосты́ни; радуйся, одушевленный храме. Радуйся, сиро́т и вдови́ц сладостное веселие; радуйся, неистощимое богатство. Радуйся, Неве́сто Неневе́стная; радуйся, Радосте наша, во объятиих Своих Радость всего мира носи́вшая.

Кондак 6

Во время живота моего не остави мене́, Мати Божия. И конец благи́й получити мя сподо́би, да взываю Спасителю Богу: Аллилуиа.

Икос 6

Искушения всякаго и страсте́й изба́ви мя, Всенепорочная! Уще́дри, спаси, возвесели мя и от лютых врагов изба́ви и защити, да вы́ну взываю Ти: Радуйся, крепкое и непоколебимое упование наше; радуйся, всех Царице и Владычице. Радуйся, всея́ вселенныя великое сокровище; радуйся, всех верных утверждение. Радуйся, Заступнице усердная рода христианскаго; радуйся, рождшая всех святых Святейшее Слово. Радуйся, небесный престоле; радуйся, источниче неистощимый воды живы́я. Радуйся, ограждение и священное прибежище на Тя надеющихся; радуйся, предста́тельство христиан непостыдное. Радуйся, чаше че́рплющая радость; радуйся, Радосте наша, во объятиих Своих Радость всего мира носи́вшая.

Кондак 7

В час кончины моея́, Всеблага́я, предста́ни мне и убогую мою душу во исходе от окая́ннаго тела моего обрадуй, да воспою́ Победителю смерти и ада: Аллилуиа.

Икос 7

Лица Твоего радостнаго не отврати от Мене́, Богороди́тельнице! Услыши мольбу мою, и вопль мой к Тебе да прии́дет, Дево Пресвятая! Воньже аще день призову Тя, скоро услыши мя, да взываю Ти си́це: Радуйся, торжественное пение ангелов; радуйся, покрове и защищение человеков. Радуйся, апостолов похвало́; радуйся, страдальцев венчание. Радуйся, сто́лпе девства; радуйся, слез Евиных избавление. Радуйся, постников воздержание; радуйся, живота нетленнаго веселие. Радуйся, монахов умиление; радуйся, святителей удобрение. Радуйся, пресвитеров красото́; радуйся, Радосте наша, во объятиих Своих Радость всего мира носи́вшая.

Кондак 8

Со светлою свеще́ю благоволи́ла Пречистая изы́ти во сре́тение Жениха душ наших. Да́руй ми бодрым сердцем и трезвою мыслию нощь настоящаго жития прейти и в радостный чертог славы Его вни́ти и пети Судии́ всех Богу: Аллилуиа.

Икос 8

Едина Непорочная и Чистая Дево, небеснаго веселия улучи́ти со всеми святыми сподо́би всех сро́дников наших, дру́гов и зна́емых. Да упокоит их Господь всесильными Твоими молитвами, Пречистая, в месте све́тле, иде́же несть болезнь, ни печаль, ни воздыхание, но жизнь безконечная. Да простит им Господь всякое согрешение, содеянное ими от юности до смертнаго часа́ их, да взывают и они с нами: Радуйся, во успении своем нас не оставляющая; радуйся, Мати Жизни. Радуйся, избавляющая от смерти ду́ши наша; радуйся, в молитвах неусыпающая Богородице. Радуйся, райстей радости нас приобщающая; радуйся, Бога пло́тию рождшая. Радуйся, от рова погибели нас спасающая; радуйся, радостное упокое́ние всех в вере и надежде скончавшихся. Радуйся, надеждо ненадежных; радуйся, милосердия двери нам отверза́ющая. Радуйся, смертоносный грех разрушающая; радуйся, Радосте наша, во объятиих Своих Радость всего мира носи́вшая.

Кондак 9

О Богороди́тельнице! Изба́ви нас, грешных раб Твоих, гее́нны огненныя, тмы несвети́мыя, му́ки адския и сподо́би жизни нестареющияся, да поем всегда Сладчайшему Иисусу: Аллилуиа.

Икос 9

Пречистая Дево, Своим хода́тайством пред престолом Всевышняго освяти мою душу и тело, ум и сердце, всего мя обнови, украси́, уцелому́дри, просла́ви, спаси, просвети и благослови Своим небесным и земным благословением, да взываю Ти: Радуйся, Неневе́стная Мати и Неискусобрачная; радуйся, яко Тобою Сына Божия позна́хом. Радуйся, Неруши́мая Стено́; радуйся, всесовершенное спасение душ наших. Радуйся, Владычице и Мати Изба́вителя от вечныя смерти; радуйся, Святейшая ангелов. Радуйся, яко воистину из Тебе Господь воцарися и в ле́поту облече́ся; радуйся, греховную отъемлющая скве́рну. Радуйся, у́тра весенняго светлейшая; радуйся, свирепую бурю души́ моея́ укрощающая. Радуйся, моление, души́ озаряющая; радуйся, Радосте наша, во объятиих Своих Радость всего мира носи́вшая.

Кондак 10

Утверди, Богородице Дево, в православии всех российских людей. Покры́й их Твоим честны́м омофо́ром от всякаго зла, да пою́т Богу: Аллилуиа.

Икос 10

Боголюби́вая Дево Марие, Госпоже́ Богородице Безневе́стная, верных спасение и надеждо! Ты имеешь многое дерзновение к Небесному Царю, воплотившемуся из Тебе, изба́ви нас от скорбе́й лютых и печали горькия. Утешения и радости просим у Тебя, Радосте наша, наипаче же вечнаго спасения, умиле́нно взывая: Радуйся, Хлеб жизни, Божественнаго Агнца рождшая; радуйся, лозо́ виноградная, возрастившая нам плод живота. Радуйся, вином небесныя радости нас напоя́ющая; радуйся, Святых, Небесных, Безсмертных и Животворя́щих Страшных Христовых Таин верных сподобля́ющая. Радуйся, света невечерняго Таи́ннице неизрече́нная; радуйся, свете помраче́нныя моея́ души. Радуйся, покрове и надеждо моя; радуйся, прибежище мое. Радуйся, утешение мое; радуйся, радование мое. Радуйся, оживотворяющая мя, умерщвле́ннаго грехи; радуйся, Радосте наша, во объятиих Своих Радость всего мира носи́вшая.

Кондак 11

Дверь небесную верным отверза́ющая, покая́ния двери отве́рзи ми, Богородице, да помилует мя Пра́веднейший Судия́, да не объявит моих тайных прегрешений, не посрами́т мене́ пред ангелами Своими, да пою́ Ему во веки: Аллилуиа.

Икос 11

Очисти мя, Пречистая, от всякия скверны плоти и духа, отжени́ от Мене́ уныние, просвети моя мысли сердечныя, пода́ждь ми память смертную, сохрани сердце мое от похотей лукавых и услыши мя вопиющаго: Радуйся, Царице моя Преблага́я; радуйся, Заступнице моя Преблагословенная. Радуйся, тружда́ющихся Помощнице; радуйся, оби́димых Заступнице. Радуйся, отра́до и утешение плачущих; радуйся, утешение в смерти моей. Радуйся, веселие души моея́; радуйся, красото́ Це́ркве. Радуйся, просвещение ума моего; радуйся, всех христиан утешение. Радуйся, к Богу Молитвеннице и Предста́тельнице крепкая; радуйся, Радосте наша, во объятиих Своих Радость всего мира носи́вшая.

Кондак 12

Во све́тлостех святых Твоих ка́ко вни́ду недостойный аз, Боже, Боже мой! Аще бо дерзну́ совни́ти в чертог, одежда мя обличает, яко несть бра́чна! Просвети одеяние души моея́, Жизнодавче, молитвами Богородицы, да пою́: Аллилуиа.

Икос 12

О небесный, о любезный, о сладчайший Твой глас, веселящий сердца́ наша; с нами бо неложно обещалася еси быти до скончания века, Дево Богородице! По Твоим молитвам слепи́и видят, глуси́и слышат, хроми́и ходят, прокаже́ннии очищаются, алчущии питаются, нази́и одеваются, вдови́цы утешаются, сироты́ радуются, нищии веселятся, грешницы спасаются, убозии ликуют, воспева́юще: Радуйся, одушевленный Божий киво́те; радуйся, Боголюби́вая Царице и Владычице. Радуйся, от глада и губительства, труса и потопа нас спасающая; радуйся, от огня, меча, нашествия иноплеме́нных и междоусобныя брани нас защищающая. Радуйся, бурныя волны житейскаго моря укрощающая; радуйся, всякую слезу с оче́с наших отирающая. Радуйся, яко воистину любовию материнскою нас возлюбившая; радуйся, Пода́тельнице Божественныя благости. Радуйся, во чреве Своем Радость вечную носи́вшая; радуйся, яко тихое пристанище душа́м нашим готовиши. Радуйся, яко всех родов неумолкаемое веселие; радуйся, Радосте наша, во объятиих Своих Радость всего мира носи́вшая.

Кондак 13

О Всепетая Мати, Пречистая Госпоже́, Дево Богородице! Приими́ сие́ ма́лое моление наше, Заступнице крепкая сущих в ско́рбех и печалех; умоляем Честны́м и Животворящим Крестом Сына Твоего, Господа нашего Иисуса Христа, пода́ждь нам дух сокруше́нный, сердце смиренное, сле́зы умиления, многих согрешений наших прощение и радость неувядаемую, да пое́м в горнем Иерусалиме Спасителю Богу: Аллилуиа.

Этот кондак читается трижды, затем 1-й икос «Тайну от века открывая Тебе...» и 1-й кондак «Взбранной Воеводе...».

Молитва

О Пресвятая Дево, Всеблага́го Сына Мати Всеблага́я, царствующаго града и святаго храма сего покро́ве, всем же сущим во гресе́х и ско́рбех верная Предста́тельнице и Заступнице! Не пре́зри моления нас, недостойных раб Твоих, но умоли Сына Твоего и Бога нашего, да всем нам, с верою и умилением пред чудотворным образом Твоим поклоняющимся, по коего́ждо потре́бе радость да́рует: грешником – вседейственное вразумление, покая́ние же и спасение; сущим в ско́рбех и печалех – утешение; в беда́х и озлобле́ниих пребывающим – совершенное от них избытие; малодушным и ненадежным – надежду и терпение; в радости и изобилии живущим – непрестанное Богу благодарение; сущим в болезни – исцеление и укрепление.

О Госпоже́ Пресвята́я, умилосердися ко всем чтущим всечестно́е имя Твое и всем яви́ всемо́щный покров Твой и заступление; от враг видимых и невидимых люди Твоя защити и сохрани. Супружества в любви и единомыслии утверди; младенцы воспитай, юныя уцелому́дри, отве́рзи им ум к восприятию всякаго полезнаго учения; от домашния свары единокровныя люди миром и любовию огради, и всем нам пода́ждь друг ко другу любовь, мир и благочестие, и здравие со долгоденствием; да вси на небеси́ и на земли́ ведят Тя, яко твердую и непостыдную Предста́тельницу рода христианскаго и, сие́ ве́дуще, славят Тя и Тобою Сына Твоего со Безначальным Его Отце́м и Единосущным Его Духом, ныне и при́сно и во веки веков. Аминь.