Акафист Пресвятой Богородице в честь иконы Ее «Призри на смирение»

Празднование 16/29 сентября

Кондак 1

Взбра́нной Воеводе, Владычице нашей Богородице, преславным явле́нием иконы Ея святы́я люди богоспасаемаго града Киева дивно посетившей, благодарственное возглашаем пение. Ты же, яко Всеблага́я Заступница рода христианскаго, от всяких нас бед свободи́, и от всех враг видимых и невидимых защити, да с верою Тебе зовем: Радуйся, Пренепорочная Богородице Дево «При́зри на смирение», с высоты небесныя на смирение рабов Твоих призирающая.

Икос 1

Ангелов Царице и всея́ твари Владычице, Пречистая Дево Богородице, милостивым явле́нием нам образа Твоего святаго, дре́вле богоспасаемый град Псков, а ныне град Киев благодатно озарила еси и струи́ чудес от нея́ источила еси верным. Темже со усердием и любовию припа́дающе ко пречистому Твоему образу, умиленныя моления возсылаем милосердому Твоему к нам заступлению и со страхом зовем: Радуйся, Царице наша Преблага́я, надеждо наша Богородице; радуйся, прия́телище си́рых и странных Предста́тельнице. Радуйся, скорбя́щих Радосте и обидимых Покровительнице; радуйся, Милосердая, яко зри́ши нашу беду, зри́ши нашу скорбь. Радуйся, Милостивая, помогаеши нам, яко не́мощным, окормля́еши нас, яко странных; радуйся, Всеблага́я, яко не и́мамы иныя помощи, разве Тебе, ни иныя Предста́тельницы Радуйся, яко не и́мамы благи́я Уте́шительницы, токмо Тебе, о Богомати; радуйся, Ты босохраняеши нас и покрываеши во веки веков. Радуйся, Пренепорочная Богородице Дево, с высоты небесныя на смирение рабов Твоих призирающая.

Кондак 2

Видяще милосердие Твое неизче́тное, Всенепорочная Владычице, и многая чудеса, Тобою явле́нная и присноявля́емая чрез святы́я иконы Твоя, имиже, яко звезда́ми богосветлыми, весь мир христианский украсила еси, величаем Тя, возвеличившую род наш Твоим благоволе́нием, и с любовию припа́даем к чудотворному образу Твоему, пою́ще Сыну Твоему Христу Богу: Аллилуиа.

Икос 2

Видеша вси ве́рнии лю́дие киевстии святы́й образ Божия Матере, чудесно отобразившийся на стекле киво́та, зело́ удивишася и, с благогове́нием взирающе на цельбоносную икону телесными очесы́, потща́шася Честнейшей херувим и Сла́внейшей без сравнения серафим возопити си́це: Радуйся, образ Твой честны́й предивно, без содействия рук человеческих на стекле киво́та отобразившая; радуйся, всех верных явле́нием сим зело́ возрадовавшая и умили́вшая. Радуйся, Пречистая, призирающи на смирение, слышиши глас наш и вся беззакония наша очищаеши; радуйся, Богороди́тельнице, жизнь нестареющую улучи́ти молитвами Твоими нам помогаеши; радуйся, Дево, живоносным Рождеством Твоим древняго зми́я мертва соделавшая. Радуйся, Слово Отчее рождшая, пламень страстей наших росою молитв Твоих погашающая. Радуйся, блага́я Уте́шительнице, ма́терними молитвами Твоими бури сердец наших утишающая; радуйся, по молитвам рабов Твоих, разрешение многих наших прегрешений подающая. Радуйся, Пренепорочная Богородице Дево, с высоты небесныя на смирение рабов Твоих призирающая.

Кондак 3

Сила Вышняго соде́ла Тя, Благодатная, источник неоскудева́ющ утешения бедствующим. Людем бо нашим, люте стра́ждущим от неверия и заблуждения, благоволи́ла еси милостиво яви́ти благодатное сокровище сие́ – чудотворный образ Твой, во храме Свято-Введе́нстем в зна́мение милости Твоея́ ко земли́ нашей, на защиту от врагов видимых и невидимых. Темже, помощию Божиею подкрепляеми, Спасителю Богу пое́м: Аллилуиа.

Икос 3

Якоже дре́вле царь повеле́ при Ти́хвинстей иконе братии поселитися, и славу Тебе, Пречистей, воспевати и о всем мире молитву приноси́ти, та́ко и ныне повеле́ митрополит Киевский обители зде быти, и братиям, собравшимся пред Твоим новоявле́нным чудным образом, моления о всех людех приноси́ти, и воспевати Ти: Радуйся, освятившая землю Киевскую Своим явле́нием; радуйся, утесняемым осла́бу и свободу да́рующая. Радуйся, ненаказанных Милостивая Наказательнице; радуйся, неразумных Премудрая Вразумительнице. Радуйся, обидимым Всеблага́я Заступнице; радуйся, духа уныния и боя́зни отгнание; радуйся, всех родов земных удивление. Радуйся, Пренепорочная Богородице Дево, с высоты небесныя на смирение рабов Твоих призирающая.

Кондак 4

Яко лучезарную звезду, яко новое зна́мение милости Своея́ яви́ла еси ныне, Пренепорочная Дево, верным богоспасаемаго града Киева честну́ю икону Твою При́зри на смирение в годи́ну новых испытаний, нестрое́ний и злых развращений, врагами веры и отечества нашего воздвиза́емых, да утвердится благочестие и укрепи́тся вера православная в людех. Мы же в сем явле́нии уразумевше зна́мение ве́лие попече́ния Божия о месте сем, с трепетом и благогове́нием глаголем: Ты еси нам щит непобедимый и стена необоримая восхваляющих Тя и воспевающих Богу песнь: Аллилуиа.

Икос 4

Слышавше о дивнем явле́нии святы́я иконы Твоея́ во граде Киеве, Преблагословенная Царице небесе́ и земли́, вси лю́дие притеко́ша во храм Твой, взирающе и дивя́щеся чудеси́ сему́ и со благогове́нием и радостию поклоня́хуся чудотворному образу Твоему, хвале́бне зовуще Ти: Радуйся, обретшая благодать у Бога и паче ангелов и всех святых возвеличенная; радуйся, Мати Божия, крепкаго во бране́х Христа рождшая, избавляющая нас от печалей и лютых нападений вражиих. Радуйся, Живода́вца Христа несказа́нно рождшая, мертвых нас душа́ми оживотворя́ющая; радуйся, Владычице, я́же Пресвятое Слово рождшая, освящающая оскверне́нная сердца́ наша. Радуйся, Милостивая, простирающая нам руку помощи, да спасаеми вы́ну ублажаем Тя; радуйся, Дево Богорадованная, кропле́нием милости Твоея́ у́глие страсте́й наших погашающая. Радуйся, угаснувший светильник сердец наших возжигающая; радуйся, Милостива нам Судию́, Сына Твоего сотворя́ющая. Радуйся, Пренепорочная Богородице Дево, с высоты небесныя на смирение рабов Твоих призирающая.

Кондак 5

Егда яви́ся чудо от иконы Твоея́, ве́рнии возрадовашася, а невернии удивля́хуся: «Ка́ко сие́ может быти?», и испытова́ху сие́, и познава́ху силу Пречистыя, и по недо́лзе времени возгласи́ша вселю́дно, яко сие́ отображение нерукотворно яви́ся. Мы же паки и паки милости Твоей диви́мся: Ка́ко и на наши недостойныя молитвы призира́ет Господь, и слушает проше́ния всех с верою призывающих имя Твое святое, и Сыну же Твоему зовущих: Аллилуиа.

Икос 5

Возсия́ нам благодать светозарная от чудотворныя иконы Твоея́, Богоизбра́нная Отрокови́це, к ней же со слеза́ми припа́дающе, молим Ти ся: Отжени́ о́блак нашедших на ны искушений и бед, да вопием Ти радостно: Радуйся, Всепетая, дверь небесная, отверза́ющая нам дверь спасения; радуйся, Чистая, руку помощи нам простира́ющая и из глубины болезней возводя́щая. Радуйся, Всесвятая, Свет Невеще́ственный рождшая, тмы страсте́й нас свобождающая; радуйся, ангелов радосте, праведников добро́то, верных надеждо и всех нас прибежище. Радуйся, мо́сте, к жизни нестареющей приводя́щий верою и любовию Тя величающия; радуйся, вознося́щая рог верных, пою́щих Тя, Дево, и поклоняющихся честно́му образу Твоему. Радуйся, наставляющая к добродетели Небеснаго Царствия и покоя Божественнаго; радуйся, руку помощи нам подающая и ко пристанищу спасительному направляющая. Радуйся, Пренепорочная Богородице Дево, с высоты небесныя на смирение рабов Твоих призирающая.

Кондак 6

Проповедник неизрече́нных чудес Твоих, Мати Божия, яви́ся святы́й храм Твой во граде Киеве, в нем бо дивное Божие смотре́ние о нас Тобою, Дево Чистая, исполнися, егда сокровенное желание се́рдца нашего укра́сити пречудный лик Твой, драгоценным венце́м из ка́мений честны́х милостиво услышала еси. Мы же, грешнии и недостойнии, прилежно притекающе к преславному образу Твоему, в покая́нии зовем из глубины души: Владычице, спаси ны, погибающия от множества прегреше́ний наших, да вы́ну благодарим и величаем Тя, нашу скорую и дивную Помощницу, пою́ще Богу: Аллилуиа.

Икос 6

Якоже дре́вле иуде́и для ски́нии приноша́ху злато и сребро́, та́ко и лю́дие наши, получающии Тобою исцеления, благодаря́ще Тя, приноша́ху Ти сребро́ и злато, Пречистая ски́ние, и та́ко образ Твой святы́й украси́ся благоле́пными да́ры, ризою драго́ю и венце́м. Мы же вси припа́даем Ти и со слеза́ми вопием та́ко: Радуйся, Богородице Дево, яко и рождаеши, и чиста по Рождестве яви́лася еси; радуйся, Блага́я, дух сокрушения и смирение сердец, ума же чистоту и жития исправление нам подающая. Радуйся, Всенепорочная, прегреше́ний оставле́ние и слез источники нам да́рующая; радуйся, силою молитв Твоих язвы душ наших исцеляющая. Радуйся, боготечная звездо́, к Солнцу правды нас приводя́щая; радуйся, от многих бед и скорбе́й и от му́ки ве́чныя нас избавляющая. Радуйся, Живоносный Источниче нетления и радости, жаждущия ду́ши наша напоя́ющая; радуйся, Всемилостивая, кротким сия́нием Твоим мрак страстей и пороков наших разгоняющая. Радуйся, Пренепорочная Богородице Дево, с высоты небесныя на смирение рабов Твоих призирающая.

Кондак 7

Хотя́й долготерпеливый Господь яви́ти Своего человеколюбия и щедрот неизследи́мую бездну, избра́ Тебе едину в Матерь Себе и сотвори́ Тя людем непреодоле́нное защищение, да аще кто и праведным судом Божиим осуждения достоин яви́тся, оба́че Твоим державным покровом сохраняется на покая́ние, зовы́й: Аллилуиа.

Икос 7

Новая купе́ль Силоа́мская паче оныя древния яви́ся, Пречистая Владычице, храм Введе́ния Твоего, в немже вси ве́рнии поклоняются чудотворней иконе Твоей и молебная пения вы́ну пред тою совершают, да не сокры́т будет источник благодатных врачеваний от всех требующих. Сего ра́ди и мы не таи́м Твоих благодея́ний, Всенепорочная, но благодарственне вопием: Радуйся, А́гнице, рождшая Агнца, взе́млющего грехи мира; радуйся, Дево Пречистая, скве́рну душ наших очищающая. Радуйся, освященная се́не, исцеления от дла́ней Твоих нам точа́щая; радуйся, виноград Божественный, красный грозд израстившая, душа́м нашим дающая питие́ неоскудева́емое. Радуйся, реко́ приснотеку́щая исцелений, и море, вся наша страсти потопля́ющее; радуйся, едина Нетленная, в земне́м житии сем покровом милости Своея́ нас покрывающая. Радуйся, яко Ма́терними молитвами Твоими избавляемся от болезненных напастей и всякаго вреда душевнаго и телеснаго; радуйся, Всеблага́я наша Наставнице, за вся благодея́ния Твоя благодаре́нию нас научающая. Радуйся, Пренепорочная Богородице Дево, с высоты небесныя на смирение рабов Твоих призирающая.

Кондак 8

Все житие наше на земли́ болезней и печали исполнено яви́ся от клеветы, досаждений, укоре́ний и иных многовидных бед и напастей: немощству́ет бо тело, изнемогает и дух наш. К Тебе убо прибегаем, Благодатная, к пречистому образу Твоему припа́дающе: Исполни радости и веселия скорбная сердца́ наша, да вопием вы́ну Богу: Аллилуиа.

Икос 8

Странное виде́ние бысть человеку некоему, егда стоя́ на молитве и за сро́дницу, без покая́ния почи́вшую, молитву принося́, внеза́пу узре́ святы́й образ Твой, Владычице, на стене явле́нный, и а́бие на том же месте саму́ почи́вшую, небесною радостию осия́нную. В виде́нии же сем уразуме́, Мати Света, хода́тайство за живы́х и ме́ртвых, Сыну Твоему вы́ну приноси́мое, исполнися духовныя радости и веселия скорбное сердце его и возопи таковая: Радуйся, от принося́щих Тебе благодарныя да́ры лика Твоего не отвращающая и почившим сро́дником их загробную участь облегчающая; радуйся, уповающим на Тя живота непостыдный конец да́рующая. Радуйся, и по сме́рти за отшедшия на суд Господень ду́ши пред Сыном Твоим неотступно хода́тайствующая; радуйся, о лишении чад скорбя́щих родителей благодатною Твое́ю помощию утешающая. Радуйся, неустанная Молитвеннице наша, тихий и безболезненный отход из сей юдо́ли плача и скорби нам низпосылающая; радуйся, в грозный час смерти о верно чтущих Тя предста́тельствующая и от воздушных мы́тарств избавляющая. Радуйся, Милостивая, милость Свою нам явля́ющая в день испыта́ния, в о́ньже откры́ются вся дела наша добрая же и злая; радуйся, Милосердая, покая́ния грешников не отвергающая и от рова погибели милосердием Твоим исхищающая. Радуйся, Пренепорочная Богородице Дево, с высоты небесныя на смирение рабов Твоих призирающая.

Кондак 9

Все естество́ ангельское похва́льныя песни приносит Тебе, истинней Матери Божией и Заступнице всех приходя́щих к Тебе и прося́щих Твоея́ помощи, яко твердым и крепким Твоим предста́тельством праведных веселиши, грешных заступаеши, печали утоляеши, сро́дником нашим почившим загробную участь облегчаеши, и мо́лишися о всех нас, верою зовущих Сыну Твоему: Аллилуиа.

Икос 9

Человечестии вити́и суему́дрении недоумевают познати Божественную тайну Твоего Присноде́вства, Богородице, ниже́ могут изъясни́ти силу чудотворную, от икон святых Твоих истекающую во исцеление неду́жных и на всякую пользу душевную и телесную человеком. Мы же благоче́стно Матерь и Деву Тя исповедающе, достойно хвалим славный иконы Твоея́ праздник, и, верно поклоняющеся образу Твоему святому, с любовию вопием: Радуйся, Богоневе́сто, Свет рождшая Божественный и Превечный; радуйся, Мати и Дево Преблагослове́нная. Радуйся, ма́терей при́сное радование; радуйся, едина Непорочная и Добрая в жена́х. Радуйся, ангелов славо, веры утверждение и сокровище спасения; радуйся, Царице Небесная, источник нетления и дверь покая́ния. Радуйся, Благосердая Мати всех скорбя́щих и обремене́нных; радуйся, Державная Заступнице рода христианскаго. Радуйся, Пренепорочная Богородице Дево, с высоты небесныя на смирение рабов Твоих призирающая.

Кондак 10

Спасителя падшему человечеству родила́ еси, Всенепорочная Дево, и Сего, яко Младенца, во объятиих Твоих носила еси. егоже Божественное изображение и на честне́й иконе Твоей нам явля́еши и многия милости и щедроты Твоя нам да́руеши. Сего ра́ди с верою и любовию че́ствуем образ чудотворный Твой, Владычице, и молимся Тебе прилежно: Бу́ди покров и защита нам в День Судный, да Твоим ма́терним предста́тельством помилует нас Судия́ Праведный, Сын Твой, и сподо́бит десна́го стоя́ния и пения Ему со всеми избра́нными: Аллилуиа.

Икос 10

Стена и покров граду Пскову даде́ся святая икона Твоя, Царице и Владычице, многажды бо град сей от разорения ра́тнаго сохраня́ла еси. И ныне нас, грешных и недостойных чад Твоих, милостию посетила еси чудным явле́нием пречистаго Твоего образа, и благоутробно прие́млеши пред ним возноси́мыя Тебе от благодарных сердец наших молитвы с пением таковым: Радуйся, якоже дре́вле иконою Успения славный град Киев многажды спасала еси, та́ко и ныне нас пречудною иконою Твое́ю от бед огражда́еши; радуйся, Лавры Киево-Пече́рския славная Строи́тельнице и храмов ея Всечестна́я Украси́тельнице. Радуйся, Хранительнице дивная и иных обителей святых, яко Твое́ю благодатною силою оныя зи́ждутся и преуспева́ют в благочестии; радуйся, прославившая место явле́ния иконы Твоея́ дивными чудоде́йствы и всем милость преизобильную нам показавшая. Радуйся, Богоневе́сто Пречистая, святы́й лик Твой чтущия от осуждения на суде и мук многообразных избавляющая; радуйся, Многомилостивая Покровительнице наша, от пречудныя иконы Твоея́ милости нам неоску́дно источающая. Радуйся, Владычице, всесильными молитвами Твоими ду́ши наша от мрачнаго сна к Твоему славословию возставляющая; радуйся, радосте миру, яко о Тебе радуется ангельский собор и человеческий род. Радуйся, Пренепорочная Богородице Дево, с высоты небесныя на смирение рабов Твоих призирающая.

Кондак 11

Пение молебное наше, с верою и любовию Тебе возноси́мое, милостиво услыши, Госпоже́ Владычице, и утробу щедрот Твоих не затвори́ от нас. Се бо, обнища́вше в добрых де́лех, к сокровищнице милости Твоея́ – чудней иконе Твоей, со усердием притекаем, Всеблага́я, и припа́дающе к ней, молимся: Сохрани ны от тлетворных учений, изба́ви от лукавых совращений, спаси Отечество наше от нестрое́ний и злых нападений вражиих и сподо́би в любви и единомыслии со всеми верными ча́ды Святы́я Христовы Це́ркве благоприя́тно пети Создателю нашему песнь: Аллилуиа.

Икос 11

Светлыми лучами чудес немерцаемо сияет святая икона Твоя, Всенепорочная Богородице Дево, просвещаеши бо нас, помраче́нных греховною мглою, и приво́диши к немо́лчному славословию имене Твоего пресвятаго. Темже и мы, грешнии, радуемся иму́ще таковый залог Твоего к нам благоволе́ния, и Тебе, скорой Помощнице нашей, благодарственно взываем: Радуйся, Царице и Владычице, светом Твоим небесным нас освящающая и под кровом Твоим вы́ну сохраняющая; радуйся, благословенная и препросла́вленная, Мати Неискусому́жная, умерщвле́нныя грехи́ ду́ши наша оживотворя́ющая. Радуйся, Чистая и Непорочная Дево, Ты бо родила́ еси Сына, избавляющаго нас от искушений; радуйся, Всеславная Владычице Богородице, от всяких ны зол и скорбе́й исхищающая и но́зе наша на камени Божественнаго спасения поставля́ющая. Радуйся, Чистая А́гнице, Дево, Мати, Отрокови́це, чи́сты ны сотворяющая от страсте́й телесных; радуйся, Богора́дованная, яко льсти́ваго сетей избавляются вси песносло́вящия Тя. Радуйся, горо́ ве́лия, ю́же Даниил прови́де, из Неяже камень краеугольный – Христос отсечеся; радуйся, Дево Чистая, жезл из ко́рене Иессе́ова цветовозрасти́вшая нам – Всесильнаго Господа. Радуйся, Пренепорочная Богородице Дево, с высоты небесныя на смирение рабов Твоих призирающая.

Кондак 12

Благодати Божия святое и непорочное жилище, Мати Господа вышних сил, не возгнуша́йся похвалы от нас грешных и недостойных, воспевающих милости, от всечестны́я иконы Твоея́ нам явле́нныя, и Твоим невече́рним сиянием озари́ темныя ду́ши наша, приводя́щи к свету Трисо́лнечнаго Божества. В православии укрепи нас, Всеблага́я, и сподо́би до коне́чнаго воздыхания нашего пети немо́лчную песнь Вседержи́телю: Аллилуиа.

Икос 12

Пою́ще песнь хвалы и благодарения Тебе, Богора́дованная Дево, проповедуем велегла́сно величие чудес Твоих и богатство милости Твоея́, на нас и в оте́честве нашем явле́нных, и от глубины сердечныя приносим Тебе со смирением похвальныя да́ры сия́: Радуйся, православия несокрушимая крепосте и оградо; радуйся, Непобедимая Воеводо вождей и во́инств христианских. Радуйся, неложное спасение и Предста́тельнице мира, рождшая Зижди́теля всея́ твари; радуйся, мысленная двере жизни, покая́ния нам двери отверзающая. Радуйся, едина Благословенная, в час смерти темныя зра́ки лукавых бесо́в дале́че от нас прогоняющая; радуйся, едина Милосердая, в страшный День Суда вечныя му́ки нас избавляющая и неизрече́нныя славы Сына Твоего наследники показу́ющая. Радуйся, Всенепорочная, вы́ну человеколюбие Твое явля́ющая и от соблазнов и сете́й вражиих нас свобождающая; радуйся, Пречистая, сотворившая с нами зна́мение во благо, да видят ненавидящии нас и постыдятся. Радуйся, Пренепорочная Богородице Дево, с высоты небесныя на смирение рабов Твоих призирающая.

Кондак 13

О Всепетая Мати Господа нашего Иисуса Христа, неисчерпа́емое море Божественных даро́в Ты еси, Всесвятая Дево! Яко светопода́тельную лампа́ду, еле́ем милости исполненную, созерцаем Тя очеса́ми веры и, кротким сиянием Твоим озаряеми и любовию Твое́ю при́сно согреваемии, Тебе, яко бла́зей Заступнице нашей, со умилением глаголем: Приими́ благоутробно молебное пение наше, пред чудною иконою Твое́ю с верою Тебе возноси́мое, и умоли Владыку, да изба́вит нас, грешных, от вре́менных бед и вечныя му́ки, да спасеннии Тобою, прославим и в будущей жизни всесвятое имя Сына Твоего и Бога нашего, верно зовуще Ему: Аллилуиа.

Этот кондак читается трижды, затем 1-й икос «Ангелов Царице...» и 1-й кондак «Взбранной Воеводе...».

Молитва

О Пресвятая Госпоже́, Дево Богородице, Высшая херуви́м и Сла́внейшая серафи́м, Богоизбра́нная Отрокови́це! При́зри с высоты небесныя милостивым Твоим оком на нас, недостойных рабов Твоих, co умилением и слеза́ми моля́щихся пред пречистым образом Твоим; не лиши нас Твоего заступления и покрова державнаго в странствии сем земне́м, многоско́рбнем и многомяте́жнем. Спаси нас, в погибели и скорби сущих, и воздвигни из глубины греховныя, просвети ум наш, омраче́нный страстьми́, и уврачу́й язвы душ и телес наших. О Всещедрая Мати человеколюби́ваго Владыки! Удиви на нас пребогатыя милости Твоя, укрепи немощну́ю волю нашу к де́ланию заповедей Христовых, умягчи́ окамене́лая сердца́ наша любовию к Богу и ближним, да́руй нам сокрушение сердечное и покая́ние и́стинное, да очистившеся от скве́рны греховныя, сподо́бимся мирныя христианския кончины и добраго ответа на страшнем и нелицеприятнем Суде Господа нашего Иисуса Христа, Емуже со Безначальным Его Отце́м и Пресвятым, Благи́м и Животворящим Духом подобает всякая слава, честь и поклонение, ныне и при́сно и во веки веков. Аминь.