Акафист Пресвятой Богородице в честь иконы Ее «Неупиваемая Чаша»

Празднование 5/18 мая

Кондак 1

Избра́нное и дивное избавление нам дарова́ся – Твой образ честны́й, Владычице Богородице, яко избавльшеся явле́нием его от неду́гов душевных и телесных и скорбных обстояний, благодарственная хваления приносим Ти, Всемилостивая Заступнице. Ты же, Владычице, Неупиваемою Чашею нами именуемая, приклонися благоутробно к нашим воздыханием и воплем сердечным, и избавление пода́ждь стра́ждущим неду́гом пиа́нства, да с верою воззовем Ти: Радуйся, Владычице, Неупиваемая Чаша, духовную жажду нашу утоляющая.

Икос 1

Ангельстии чи́ни и праведников со́нми непрестанно славят Тя, Царицу Богородицу, Хода́таицу о многогрешнем роде христианстем, погрязшем в беззаконии и пребывающем во гресе́х, ибо во утешение и спасение да́руеши ему милость Свою чрез многоименуемыя чудотворныя иконы Твоя, ихже яко звезды небесныя по всей земли́ нашей зрим; к единому же из сих образов, Неупиваемая Чаша именуемому, припа́дающе, из глубины се́рдца взываем Ти: Радуйся, неприступнаго Божества селение; радуйся, непрестанное людей удивление. Радуйся, скорбьми́ грехи наша очищающая; радуйся, печа́льми наша не́мощи врачующая. Радуйся, милость Свою чрез чудотворныя иконы Твоя нам свыше посылающая; радуйся, явле́нием их скорбная сердца́ наша возвеселя́ющая. Радуйся, пречудное всех с Богом примирение; радуйся, гее́нны вечныя избавление. Радуйся, Владычице, Неупиваемая Чаша, духовную жажду нашу утоляющая.

Кондак 2

Видящи, Пресвятая Владычице, ско́рби сердечныя, муки душевныя, искреннее покая́ние людей, одержимых губительным пороком пиа́нства, благоволи́ла еси яви́ти богоспасаемому граду Серпухову милость Свою явле́нием пречуднаго образа Своего Неупиваемая Чаша, да вси к нему припа́дающе с верою и сокруше́нным сердцем, получивше исцеление от тяжкаго неду́га своего, из глубины души вопиют Богу: Аллилуиа.

Икос 2

Разуме́в трикратное явле́ние преподобнаго Варлаа́ма и повеле́ние его в путь шествовати в богоспасаемый град Серпухов, человек некий, страстию пиа́нства одержимый, обре́те тамо в монастыре икону Твою святую, Неупиваемая Чаша именуемую. Мы же, видяще таковое о нас, грешных, попечение, с благогове́нием вопием Ти: Радуйся, чрез благочести́вых людей славу чудес Твоих грешным открывающая; радуйся, Путеводи́тельнице прозорли́вая, путь спасения им показу́ющая. Радуйся, Всеблага́я наша Наставнице, любовию Твое́ю нас привлекающая; радуйся, за вся благодея́ния Твоя благодарению нас науча́ющая. Радуйся, скорбь нашу в радость претворяющая; радуйся, несумне́нною надеждою нас увеселяющая. Радуйся, губительныя страсти наша разруша́ющая; радуйся, благи́м намерением способствующая. Радуйся, Владычице, Неупиваемая Чаша, духовную жажду нашу утоляющая.

Кондак 3

Сила Вышняго и благодать Владычицы укрепля́ше некоего человека, стра́ждущаго недугом пиа́нства, егда он, но́зе разсла́блене иму́ще, и́де во град Серпухов, повеление Богоматере, чрез преподобнаго Варлаа́ма рече́нное, исполняя. Прише́д же во град сей, обре́те икону Пречистыя Богоматере, а́бие исцеле́ от неду́га своего, душевнаго и телеснаго, и из глубины души благо дарственно воззва́ Богу: Аллилуиа.

Икос 3

Иму́ще источник неоскудеваемый, Неупиваемую Чашу небесных дарова́ний, не токмо люди града Серпухова, но и вси православнии христианы иных градо́в и ве́сей, притекающии к Твоему пречудному образу, Неупиваемая Чаша именуемому, и пред сим получивше исцеление, припа́дающе, благодарными усты́ вопиют Ти: Радуйся, купе́ле, в нейже вся ско́рби наша погружаются; радуйся, чаше, е́юже радость спасения нашего восприемлем. Радуйся, наша не́мощи, душевныя и телесныя, врачующая; радуйся, страсти наша силою молитв Твоих укрощающая. Радуйся, коему́ждо, во всякой потребе прося́щим, полезная да́рующая; радуйся, безчисленныя щедроты всем подающая. Радуйся, милости сокровище нам открывающая; радуйся, милосердие к падшим явля́ющая. Радуйся, Владычице, Неупиваемая Чаша, духовную жажду нашу утоляющая.

Кондак 4

Бурю внутрь иму́щии помышле́ний сумнительных, но с искренним покая́нием притекающии к Твоему неизрече́нному милосердию, одержи́мии пиа́нственною страстию, получают исцеление, и из глубины се́рдца вопиют рожденному от Тебе Спасителю нашему: Аллилуиа.

Икос 4

Слыша Господь тяжкия ско́рби, вопли и плач жен, ста́риц, детей, сро́дницы коих обуреваеми суть пиа́нственною страстию, даде́ им, Владычице, Твою икону, от нея́же вси притекающии обретают утешение и радость духовную, и вопиют Ти со слезами: Радуйся, А́гнице, рождшая Агнца, взе́млющаго грехи мира; радуйся, чаше, че́рплющая нам радость от источника безсмертия. Радуйся, скорбных ма́терей утешение; радуйся, безнадежных надеждо. Радуйся, притекающих к Тебе благодатное охране́ние; радуйся, скорбя́щих отра́до и увеселение. Радуйся, волнение страсти пиа́нства утишающая; радуйся, ру́ку помощи Твоея́ требующим простира́ющая. Радуйся, Владычице, Неупиваемая Чаша, духовную жажду нашу утоляющая.

Кондак 5

Яко боготечную звезду, честну́ю икону Твою Ты нам показа́ла еси, Владычице мира, ю́же мы зря́ще, с верою сердечною моля́щеся Тебе, Богородице, глаголем: Исцели пиа́нством и иною болезнию душевною и телесною стра́ждущих, верных же научи воспевати хвалу Богу: Аллилуиа.

Икос 5

Видяще чудеса преславная и зна́мения пречу́дная, бываемая не токмо от иконы Твоей, Богомати, во граде Серпухове явле́нныя, но и от по подобию сея́ иконы списанных изображений, припа́дающе к ним, смиренно вопием Ти: Радуйся, скоропредста́тельная Помощнице усердно к Тебе притекающих; радуйся, благосердная Услышательнице молений наших. Радуйся, град Серпухов благословением Твоим осени́вшая; радуйся, в преде́лех Московских славу чудес Твоих показавшая. Радуйся, всем требующим сокровище исцелений неоску́дное; радуйся, в трезве́нии благоподвиза́ющихся всемо́щная Покровительнице. Радуйся, веду́щим брань проти́ву мира, плоти, диа́вола и пиа́нства добрая Споспе́шнице; радуйся, в мире благочестно живущих усердная Заступнице. Радуйся, Владычице, Неупиваемая Чаша, духовную жажду нашу утоляющая.

Кондак 6

Проповедающе чудеса Твоя, Богороди́тельнице, от иконы Твоея́, Неупиваемая Чаша именуемыя, бываемая, молим Тя, Пречистая, со слеза́ми: Изба́ви всех нас от виннаго пристрастия и от падения греховнаго, научи нас воздержа́нию, подвиза́ющи воспевати Богу: Аллилуиа.

Икос 6

Возсияла еси в светлости Божественныя славы, Дево Богоотрокови́це, на Младенца, Превечнаго Бога, Господа нашего Иисуса Христа, зря́щи, Иже в сосуде, аки в неупиваемой чаше, предстои́т, якоже Тя видим изображе́нную на иконе Твоей, Неупиваемая Чаша та́инственно пронарече́нней, от нея́же избавление от пиа́нственныя срасти притекающим с верою да́руеши, сего ра́ди со слеза́ми приносим Тебе гла́сы немо́лчныя си́це: Радуйся, яко о Тебе радуется и торжествует ангельский собор и человеческий род; радуйся, яко Твоя слава превосходит похвалы́ земныя и небесныя. Радуйся, та́инственным изображением Сына в сосуде Тайну Божественныя Евхари́стии нам открывающая; радуйся, рожденнаго Тобою Агнца, всегда ядо́маго и никогдаже иждива́емаго, нам дивно указующая. Радуйся, чаше жизни и безсмертия, ко вратам вечныя жизни нас приводя́щая; радуйся, источником нетления и радости жаждущия ду́ши напая́ющая. Радуйся, неисчетною благостию не оставляющая самых презренных и отве́рженных; радуйся, от ро́ва погибели милосердием Твоим исхищающая безнадежных. Радуйся, Владычице, Неупиваемая Чаша, духовную жажду нашу утоляющая.

Кондак 7

Хотя человек некий возблагодари́ти Тя, Владычице, за исцеление от неду́га пиа́нства, украси́ Твою пречудную икону, Богомати, во граде Серпухове пребывающую, из глубины се́рдца воспевая Богу: Аллилуиа.

Икос 7

Новое чудо видим, Владычице, от иконы Твоея́ святы́я: стра́ждущий бо неду́гом пиа́нства некий раб Божий Стефа́н, прибега́я к Твоему ма́тернему предста́тельству, от тяжкаго неду́га своего изба́вися, и благодаря Тя, благоле́пными да́ры икону Твою украси́, и припа́дая к ней, со слеза́ми возопи Тебе та́ко: Радуйся, Живоносный Исто́чниче исцелений; радуйся, чаше небесная Божественных дарова́ний. Радуйся, реко́ исцелений приснотеку́щая; радуйся, море, вся наша страсти потопляющее. Радуйся, под тяжестию греха пиа́нства па́дающих ма́тернима рука́ма Твоима возставля́ющая; радуйся, благодарственныя да́ры не отвергающая. Радуйся, сердца́ благочести́вых лю́дей возвеселя́ющая; радуйся, вся блага́я проше́ния наша исполня́ющая. Радуйся, Владычице, Неупиваемая Чаша, духовную жажду нашу утоляющая.

Кондак 8

Странно и сумнительно неверующим слышати, ка́ко икона Твоя святая Неупиваемая Чаша Божественных исцелений источает чудо. Мы же, верующие слову Твоему, Владычице, рече́нному к первопи́санней Твоей иконе: «Благодать Ро́ждшагося от Мене́ и Моя с се́ю иконою да будет», – веруем, яко и сия́ икона Твоя благодать Твою источает. Темже благоговейно покланяющеся, лобызаем ю, вопиюще Богу: Аллилуиа.

Икос 8

Все упование лю́дие, стра́ждущии неду́гом пиа́нства, на Тя, Владычице, возлагают. Приклони́ся к не́мощем и страсте́м нашим, кто бо нас, грешных, изведе́т от рова погибели и нищеты духовныя и телесныя, аще не Ты, Владычице; сего ра́ди, приклоньше колена пред Твоим пречистым образом, вопием Ти та́ко: Радуйся, моления грешников не отвергающая; радуйся, призывающим Тя Свою небесную помощь ниспосылающая. Радуйся, глубину милосердия Твоего грешным показу́ющая; радуйся, отчаянных и безнадежных ободря́ющая. Радуйся, одержимым страстию пиа́нства руку помощи простирающая; радуйся, терпеливых страдальцев благодатными да́ры утешающая. Радуйся, неду́ги наша, душевныя и телесныя, врачующая; радуйся, су́етныя радости мира сего презирати нас научающая. Радуйся, Владычице, Неупиваемая Чаша, духовную жажду нашу утоляющая.

Кондак 9

Всякое естество́ ангельское удиви́ся делу Твоего милосердия, Господи, яко дарова́л еси грешному роду человеческому твердую Заступницу и Помощницу, к нашим не́мощем приклоня́ющуюся и от горькаго неду́га пиа́нства свобождающую, верныя же научающую пети Богу: Аллилуиа.

Икос 9

Вити́и человечестии недоуме́ют восхвали́ти по достоянию славное, Владычице, иконы Твоея́ явле́ние, ниже́ мы, грешнии, от скверных усте́н наших возможем принести достойное похвале́ние Заступнице нашей. Оба́че неисчетная чудеса, иконою Твое́ю явля́емая, видевше, душе́ю и сердцем радующеся, Тебе глаголем: Радуйся, от священнаго лика Твоего чудеса источающая; радуйся, от бед и скорбе́й скоро избавляющая. Радуйся, отвергающих Тя посрамля́ющая; радуйся, от всякаго зла прибегающих к Тебе сохраняющая. Радуйся, кротким сиянием Твоим мрак греха и мглу страстей наших разгоняющая; радуйся, ду́ши наша любовию к Тебе и Сыну Твоему исполняющая. Радуйся, на стезю́ покая́ния нас премудре наставляющая; радуйся, добраго ответа пред Судие́ю Праведным нам усердная Хода́таице. Радуйся, Владычице, Неупиваемая Чаша, духовную жажду нашу утоляющая.

Кондак 10

Спасти хотя́щи многия стра́ждущия неду́гом пиа́нства, чу́дную икону Твою, Богомати, дарова́ла еси, да вси, одержи́мии сею страстию, к чудотворному образу Твоему притекают и, получи́вше исцеление, во умилении взывают Богу: Аллилуиа.

Икос 10

Стена еси и щит, Богомати, людем, стра́ждущим неду́гом пиа́нства, и всем, усердно к Тебе притека́ющим и икону Твою святую благоговейно чтущим, ибо сию́ дарова́ нам благи́х Пода́тель Господь в помощь и врачевство́ от губительныя страсти, и сим внушает нам пети Тебе: Радуйся, отчаянных надеждо и печалей наших утоление; радуйся, болезней душевных и телесных исцеление. Радуйся, нашу скве́рну чистотою Твое́ю очищающая; радуйся, Свое́ю благодатию наше недостоинство просвещающая. Радуйся, бре́ние наше тленное в нетление облека́ющая; радуйся, моления наша Твоим предста́тельством подкрепляющая. Радуйся, в неможе́нии нашем нас утверждающая; радуйся, облегающий нас о́блак страстей скоро разгоня́ющая. Радуйся, Владычице, Неупиваемая Чаша, духовную жажду нашу утоляющая.

Кондак 11

Пение наше смиренное, от полноты любве́ и усердия Тебе приноси́мое, не пре́зри, Чистая, и не отврати́ от отчаявшихся и стра́ждущих неду́гом пиа́нства лика Своего, но помози́ им и нам очиститися от всякия скверны греховныя, да возможем достойно и праведно пети Богу: Аллилуиа.

Икос 11

Светоприе́мную свещу́ зрим Тя, Пресвятая Дево, ибо образ Твой святы́й лучами благодати Твоея́ мглу греховную прогоняет и на светлую стезю́ добродетелей наставляет с верою зовущих Ти таковая: Радуйся, заступлением Твоим от суеты́ мира сего многомятежнаго нас избавляющая; радуйся, прираже́ния страстей плотски́х отражати нам помогающая. Радуйся, мысль бла́гу в сердце наше полагающая; радуйся, нечистую совесть нашу просвещающая. Радуйся, от мучительнаго неду́га пиа́нства страждущих избавляющая; радуйся, к искреннему покая́нию и вразумлению призывающая. Радуйся, души всех озло́бленных умягчающая; радуйся, на помощь Тя призывающих и имя Твое сла́вящих спасающая. Радуйся, Владычице, Неупиваемая Чаша, духовную жажду нашу утоляющая.

Кондак 12

Благодать Божия, присущая иконе Твоей, Неупиваемая Чаша именуемой, влече́т к ней, Владычице, всех скорбя́щих, обездоленных, вдов и ста́риц, а наипаче же всех стра́ждущих неду́гом пиа́нства, и не тще́тни отходят, Пречистая, от неупиваемыя чаши Твоих Божественных дарований, но неоскудно получая цельбы́ чудотворнаго образа Твоего, Всеблага́я, благодарственно поют Богу: Аллилуиа.

Икос 12

Пою́ще Твоя чудеса и ве́лию милость, людем, одержимым страстию пиа́нства, явле́нныя, молим Тя, Владычице, спаси и помилуй, и наста́ви нас на стезю пра́ву, и не остави нас, покро́ва Твоего ищущих и зовущих Ти: Радуйся, воздержанию от греха пиа́нства всех подвиза́ющая; радуйся, от пристрастия к вину росо́ю милости Твоея́ свобождающая. Радуйся, стра́ждущих от тяжкаго греха пиа́нства при́сное врачевание; радуйся, бедствующим в страсте́х скорая Помощнице. Радуйся, малодушных дивное ободре́ние; радуйся, благодушных ве́лия радосте. Радуйся, гордых смиряющая; радуйся, смиренныя возвышающая и всем спасения желающая. Радуйся, Владычице, Неупиваемая Чаша, духовную жажду нашу утоляющая.

Кондак 13

О Премилостивая Мати Сладчайшаго Господа нашего Иисуса Христа! Нынешнее наше услыши моление и изба́ви нас от всех неду́гов, душевных и телесных, наипаче же свободи́ стра́ждущих неду́гом пиа́нства рабов Твоих (имена), да не во зле погибнут, но да спасе́ннии Тобою, при́сно вопиют Богу: Аллилуиа.

Этот кондак читается трижды, затем 1-й икос «Ангельстии чини...» и 1-й кондак «Избранное и дивное...».

Молитва

О Премилостивая Владычице! К Твоему заступлению ныне прибегаем, молений наших не пре́зри, но милостиво услыши нас: жен, детей, ма́терей – и тяжким неду́гом пиа́нства одержи́мых и того ра́ди от матере своея́, Церкве Христовы, и спасения отпа́дающих братии и се́стер и сродник наших исцели. О Милостивая Мати Божия, коснися сердец их и скоро возста́ви от падений греховных, ко спасительному воздержанию приведи их. Умоли Сына Своего, Христа Бога нашего, да простит нам согрешения наша и не отврати́т милости Своея́ от людей Своих, но да укрепи́т нас в трезве́нии и целомудрии. Приими́, Пресвятая Богородице, молитвы ма́терей, о ча́дех своих сле́зы проливающих, жен, о мужех своих рыдающих, чад, си́рых и убогих, заблуждшими оста́вленных, и всех нас, к иконе Твоей припа́дающих. И да прии́дет сей вопль наш, молитвами Твоими, ко Престолу Всевышняго. Покры́й и соблюди нас от лукаваго ловле́ния и всех козней вра́жиих, в страшный же час исхода нашего помози́ пройти непреткнове́нно воздушныя мыта́рства, молитвами Твоими изба́ви нас вечнаго осуждения, да покроет нас милость Божия в нескончаемыя веки веков. Аминь.