Акафист Пресвятой Богородице Светлой Обители странников бездомных

Кондак 1

Избранная от всех родо́в Дево, Мати Господа Бога Вышняго, в лучезарной славе небесной превыше херувимов и серафимов сияющая, Царице и Владычице! Приклони ухо Твое к нам грешным и утоли печаль сердец наших, простри над нами покров Твой честны́й, посети многобедственную жизнь нашу; в стране бо чужде́й суще, не и́мамы иныя помощи, ни и́мамы иныя надежды, разве Тебе, Мати рода нашего. В страсе и трепете пред величием милосердия рода Твоего колена преклоньше, хода́тайства Твоего пред безсмертным Сыном Твоим просим, со умилением зовуще: Радуйся, Светлая Обителе странников бездомных.

Икос 1

Архангел благовестник с небесе́ послан бысть праведному Иоаки́му радость рождества Твоего возвести́ти. И возрадовася старец святы́й, величие Твое в мире Божием прови́дя. Темже и мы с ним радостно Тебе, Богородице, вопием: Радуйся, Пречистая, всех цветов благоуханнейшая; радуйся, кроткаго милосердия двери нам отверзающая. Радуйся, любвеобильная, над всеми нами покров Твой святы́й простирающая; радуйся, Дево светозарная, наша терния опаляющая. Радуйся, Светлая Обителе странников бездомных.

Кондак 2

Видяще Тя, на о́блацех честный покров простирающую и тем нас соблюдающую, благодарственно вопием Богу: Аллилуиа.

Икос 2

Разум наш, обуреваемый помышленьми плотски́ми, вотще́ оковы земны́я сокрушити тщится. Немощни́и и лени́вии, во гресе́х наших валяемся, но слезно к Твоему милосердию взываем: Воздвигни из бездны греховныя, наста́ви нас на путь спасения, да со ангелы Тебе, Мати Пречистая, прославляем: Радуйся, покро́ве наш и спасение, радуйся, грешников Молитвеннице. Радуйся, наша сле́зы утирающая; радуйся, Мати милосердия. Радуйся, живоприемный источниче, нас напаяющий; радуйся, во изгнании нас не оставляющая. Радуйся, Светлая Обителе странников бездомных.

Кондак 3

Сила Вышняго охраня́ше Тя, егда младенческими стопами творила еси восхождение ле́ствицею храма Господня. И мы грешнии, странники бездомнии, держащеся за святы́я ризы Твоя, горестно молим: Возведи нас по ле́ствице спасения, да приблизимся к Престолу Славы Божия, благодарственно зовуще: Аллилуиа.

Икос 3

Иму́щи сердце всех дев чистейшее и разум в горнее устремленный, Дево Марие, в храме Божием пребывающи, о земне́м не помышляющи, все существо Свое к восприятию Царя царей приугото́вала еси. Силы небесныя пред чистотою Твоею преклоняются и весь род человеческий радостную песнь Тебе возсылает: Радуйся, Пречистая Дево, всех дев чистейшая; радуйся, разум плотским грехо́м не повредившая. Радуйся, кроткая лампа́до, всему миру сияющая; радуйся, сердце, всех сердец чистейшее. Радуйся, райское виде́ние, наши духовнеи очи умиляющее; радуйся, красо́то неизрече́нная и неописа́нная. Радуйся, Светлая Обителе странников бездомных.

Кондак 4

Бурю отчаяния в сердцах наших претерпевающе, в скорби жизнь изгнанников во стране чужде́й сконча́вающе, к Тебе, Богородице, прибегаем и смиренно молим: Подай нам силу духа, подай нам кротость и смирение к пренесению всех горестей наших, да воспое́м Богу: Аллилуиа.

Икос 4

Слышащи благу́ю весть, архангелом Гавриилом принесенную, Ты, смиренному́дренно святыню часа́ сего разумевающи, рекла́ еси: «Се Раба Господня, буди Мне по глаголу твоему». Пресвятая Дево, научи и нас хранити покорность воле Божией и безропотно пренести́ Богом низпосылаемая нам испытания, да очистятся огне́м страданий ду́ши наша, да изметутся из сердец наших вся скве́рны грехов наших, да возстанем бо́дри и чисти сердцем, благодарственное хваление си́це Богу возсылающе: Благодарим Тя, Боже, Царю́ небесе́ и земли́, вся Премудростию твое́ю стро́яй и сокровенная человеков я́ве предве́дый, се достойная по делом нашим прие́млем, да будет над нами воля святая Твоя. Тебе же, Преблагословенная Дево, Бога всех рождшая, умиленно прославляем: Радуйся, смиренная Рабо́ Господня, примером Своим нас ободряющая; радуйся, Дево Пресвятая, юность Свою Богу посвятившая. Радуйся, кротосте неизглаго́ланная; радуйся, сто́лпе веры непоколебимый. Радуйся, упование всех конце́в земли́; радуйся, любве́ море неизмеримое. Радуйся, Светлая Обителе странников бездомных.

Кондак 5

Боготечная звезда, волхвом на небеси́ явившаяся и дивный вертеп озарившая, показа́ Царя Славы в я́слех лежаща и с Ним Матерь Его, Деву Чистую и Святую, в сердце своем песни ангелов слагавшую. О Дево кротости и смирения! Вознеси Господу и наше славословие: Аллилуиа.

Икос 5

Видяще волсви́ славу Предвечнаго Младенца Хрисга, нас ради пло́тию рождшагося, воздаша Ему Божеское поклонение. Ангел же Господень, старцу Иосифу я́влься, повеле́ безсмертное Отроча́ и Матерь Его во Египет от ярости Иродовой спасати. Со умилением помышляюще о пуги Твоем, Богородице, многотруднем, мы грешнии смиренно к Тебе прибегаем: облегчи́ и нам путь, терний исполненный, подми́ падающия духом, поддержи слабыя и болящия, простри руку спасения унывающим, отри́ слезы плачущим, соедини разстоящаяся сердца скорбящих, возврати матери сына, возврати брата брату, возврати нам отчизну нашу, кровию истекающую, возврати нам храмы святыя, возврати нам Русь Православную, тысящами свещ и лампад к Богу своя молитвы, яко фимиам, возносящую. О Преславная Всепетая Дево Богородице, во вся прежния дни горестей наших милостиво на нас призиравшая, бу́ди милостива и ныне к нам грешным, по земли́ родной плачущим. Умоли Сына Твоего возврати́ти нам Свою милость, отчизне же нашей ушедшую ея славу, да радостно во умиле́нии сердец наших Тебе вопием: Радуйся, Богородице, материнския слезы собирающая; радуйся, вдови́ц и сирот покрывающая. Радуйся, старцев утешение, радуйся, юности ободрение. Радуйся, убогих призрение; радуйся, всему миру веселие. Радуйся, Светлая Обителе странников бездомных.

Кондак 6

Проповедь любве́, кротости и всепрощения ми́рови возвещающая, со Христом, Сыном Твоим, вся горести земны́я претерпевшая, апостола Иоанна и с ним весь род христианский Своему Материнскому сердцу усыновившая, Присноде́во Пренепорочная, не отврати и нас, во тьме изгнания сущих и утешения материнскаго требующих, да со благодарением Господу зовем: Аллилуиа.

Икос 6

Возсиявшая всей вселенней, яко дивный храм Божий, исполненный Божественныя славы и благодати, о Дево Мати Пречистая, Царице Небесная, Царице человеков и ангелов, апостолов и мучеников! Возсияй и нам путеводною звездою во мраке скорбных дней наших. Возвесели сердца́ наша, во уныние поверженная, просвети умы наша, тьмо́ю отчаяния объя́тыя, возстави силы наша, на чужбине изсякающия, умно́жи веру нашу, укрепи надежду нашу и согрей огне́м пламенныя любве́ ожесточенныя и озлобленныя ду́ши наша, да, зряще Тя, на небесе́х нам внемлющую, молитвенно Тебе зовем: Радуйся, Мати рода христианскаго; радуйся, паче всех светил сияющая. Радуйся, всех добродетелей златы́й ве́нче, радуйся, едина Благословенная, скорбный наш мир в печали посещающая. Радуйся, Светлая Обителе странников бездомных.

Кондак 7

Хотя́щи с Сыном Твоим Единородным до смерти кре́стныя неразлучно быти, воспоследовала еси невинному Страдальцу до самыя Голгофы и у подножия Креста, слышащи вопли со́нмища разъяреннаго, в молчании страдала еси, и Тебе Самой душу про́йде оружие. Темже, дивя́щеся Твоему неизре́ченному Материнскому мужеству зовем Аллилуиа.

Икос 7

Новую весть Тебе, Богородице, Архангел Господень возвести, воскресшаго Сына Твоего радостно прославляя. С Ним и вся воинства небесная велегла́сно славят Безсмертнаго Христа. Сподо́би и нас, Христе Боже, ад сокрушивый и живот вечный ми́рови дарова́вый, сра́доватися днесь Матери Твоей, умиленно Ей восклицающе: Радуйся, Благодатная, Господь с Тобою; радуйся, Чистая Дево, слава бо Господня на Тебе возсия́. Радуйся, Богородице, о возстании Рождества Твоего; радуйся, незаходимая заре́ истины, наше земное странствование освещающая. Радуйся, путеводная звездо́, нас к правде Божией ведущая; радуйся, луче́ райская, наша ду́ши умиротворяющая. Радуйся, Светлая Обителе странников бездомных.

Кондак 8

Странное та́инство и преславное Вознесением Твоим, Христе Боже, миру яви́вый и одесну́ю Бога Отца седы́й, и нам, странником земли́, о селениих райских скорбящим, Уте́шителя Духа истины низпосли́ и всели в ны, Жизнодавче, молитвами Матере Твоея́, да зовем: Аллилуиа.

Икос 8

Весь наш путь страннический, ка́мений и терний исполненный, слезами горести орошающе, к Тебе, Богородице Дево, вопием: Умилосердися над нами, Божественная наша Покровительнице, и приюти под сень свята́го покрова Твоего нас, странников, от пути непосильнаго изнемогающих и успокоения в тихой пристани чающих. Укрепи старцев немощны́х, уврачуй ста́риц болящих, насыти нас, алчущих, напои́ нас, жаждущих. Воодушеви юношей, к светлым подвиго́м стремящихся, вразуми родителей к воспитанию детей своих, сохрани младенцев от всякия беды́ и утверди в духовной правде муже́й и воинов. Осени́ благодатию Твоею наших пастырей духовных, вознеси молитвы наша ко Престолу Всевышняго, да славословим Тя, Матерь Божию, зовуще: Радуйся, путников материнский сосуде терпения и светлое пристанище; радуйся, скорбящих светлая Радосте. Радуйся, младенцев покро́ве и защито; радуйся, правды небесныя Поборнице. Радуйся, непрестанная Хода́таице о душа́х наших; радуйся, надеждою небесных благ верныя возвеселяющая. Радуйся, Светлая Обителе странников бездомных.

Кондак 9

«Всяк, и́же призовет имя Господне, спасется» и «На всякую плоть излию́ от Духа Моего», – рече́ Господь. Ha Тебе же, Мати Божия, благодать Святаго Духа излия́ся превыше всякия меры, зане́ Творца и Зижди́теля нашего вместила еси. Излей же и на наша страждущия ду́ши милость Сына Твоего, да облегче́нным сердцем вопие́м: Аллилуиа.

Икос 9

Святи́и апостоли, ничто́же земное в себе помышляюще, с благоговейным трепетом преславное Успение Твое славят. Царь бо царствующих и Господь господствующих, сошед на землю, восприя́т душу святую Твою и в вели́цей славе вознесе ю на небо, иде́же угото́ва одесну́ю Престола Своего обитель Тебе. И мы, яко овцы разсеянныя, к Твоему милосердию, Богородице, взываем: Пода́ждь пристанище нам, бездомным, собери воедино Отечество наше, посли нам мир и благословение, да молитвенно Тебе поем; Радуйся, нас, погибающих, спасающая; радуйся, с лики святых за нас моля́щаяся. Радуйся, Божественный покро́ве рабом Твоим; радуйся, светлый лик Свой от нас не отвращающая. Радуйся, по Успении Своем мир не оставляющая; радуйся, за ны пред Сыном Твоим предста́тельствующая. Радуйся, Светлая Обителе странников бездомных.

Кондак 10

Спасти хотя́й мир, Пастырю Добрый, всех ко спасению зовы́й и вся к Себе привлека́яй, праведныя любя́й и грешныя ми́луяй, спаси и ны грешныя молитвами Богородицы, да поем Тебе: Аллилуиа.

Икос 10

Стена и предста́тельство всех грешников кающихся, приими́ и наше покаяние, Всеблагая Дево Марие. Умягчи жестокосердыя ду́ши наша, исцели болезненное блуждание умов наших, низвергни гордыя в пучину смирения, подыми горе́ очеса́ наша, земле́ю окованная. Разомкни уста́, в отчаянии сомкнувшаяся, да воспоем Ти славословие: Радуйся, Живо́носный Источниче, нас росою живительною окропляющий; радуйся, во вся ро́ды гласу моля́щихся внемлющая. Радуйся, погибающим руку спасения простирающая; радуйся, Всеблагая, о злобе людсте́й страждущая. Радуйся, цве́те райский; радуйся, двере спасения. Радуйся, Светлая Обителе странников бездомных.

Кондак 11

Пение ангельское провождает праведныя по смерти, оба́че мы, грешнии, где обря́щем спасение, егда кроме́ единаго блага́го дела пред Судие́ю Праведным предстанем? На Тя, Богородице, наша надежда. Спаси Твоим предста́тельством души наша, да поем: Аллилуиа.

Икос 11

Светоприемная Свеще́, во тьме изгнания нам светящая, веди нас к Сыну Твоему, Господу и Спасителю нашему, и, якоже на браке в Кане Галилейстей бедныя люди заступающая показалася еси, глаголюще Сыну Твоему: «Вина́ не и́мут», та́кожде и ныне покажися Заступница за нас, отверженных. Рцы Сыну Твоему: «Господи, отчизны и пристанища не и́мут. Исполни сердца́ их радости и утешения». Мы же, благодарни су́ще, Тебе, Владычще, восклицаем: Радуйся, свете небесный неугасимый; радуйся, одесну́ю Бога Сына Твоего седящая. Радуйся, сил небесных превысшая; радуйся, простых умов утешение. Радуйся, стремление праведных вечное, радуйся, возводящая грешников на небо. Радуйся, Светлая Обителе странников бездомных.

Кондак 12

Благодать Сына Твоего ми́рови явила еси, Присноде́во Пренепорочная, спаси и нас, грешных, зовущих о Тебе: Аллилуиа.

Икос 12

Пою́ще Тя, Благодатная, между́ жена́ми едина Благословенная, Спасителя миру даровавшая и тем вечную славу и поклонение стяжавшая, радостное Ти, Божией Матери, славословие приносим: Радуйся, из Тебе бо возсия Солнце правды, Христос Бог наш; радуйся, непостижимая тайно боговоплощения. Радуйся, Невмести́маго вместившая; радуйся, Безначальнаго родившая. Радуйся, Мати Сло́ва, И́же бе Бог; радуйся, Мати Света, во тьме светящаго, егоже тьма не объят. Радуйся, Светлая Обителе странников бездомных.

Кондак 13

О Всепетая Мати, о Мати, благодати исполненная! Приими́ наше слезное к Тебе моление, е́же в нынешнее время, на милосердие Твое дерзающе, из глубины душевныя Тебе приносим, пою́ще: Аллилуиа.

Этот кондак читается трижды, затем 1-й икос «Архангел благовестник...» и 1-й кондак «Избранная от всех родов...».

Молитва

Что Ти рече́м, Царице наша и Владычице, помышления проницающая и всю нашу жизнь во мгновение ока озирающая? Что можем мы грешнии и нечистии поведати своими скверными усты́ Тебе, Пречистей и Пренепорочней? Не и́мамы словес по достоянию воспети Твое величие у Престола Творца всея́ Вселе́нныя. Не и́мамы силы исчести́ вся дела́ Твоя милосердная, человеков ради соделанная. Предстоим Тебе трепещущии и плачущии, о всей греховной жизни нашей помышляюще. Ве́мы, яко по дело́м кару Божию приемлем, ве́мы, яко недостойни есмы́ под святую сень покрова Твоего вни́ти, но яко мыта́рь, яко разбойник, яко слепцы и прокаже́ннии и мы сокрушенным сердцем горестно Господу взываем: «Боже, милостив бу́ди нам грешным». И Тебе, Пречистая Дево, молим: приими́ вопль и стоны сердец наших и вознеси их ко Престолу Всевышняго. Пове́ждь Сыну Твоему слезное покаяние и печаль сердец наших, да воззрит Он на нас милосердным оком Своим и да́рует нам исполнение молитв наших. Собери нас, якоже матерь собирает птенцов под криле́ свои, и наста́ви нас на путь спасения. Умири́ и благослови страну нашу. Сохрани и утверди первосвятителя нашего и с ним вся священнослужители и верныя слуги́ Це́ркве Христовы. Вразуми всех, да исполнят должную пред Богом и человеки правду, соблюдающе добрая и сокрушающе злая. Помози́ отце́м и ма́терем наста́вити чада своя. Вразуми чад, да чтут родителей своих. Отврати сердца́ наша от греха и зажги в нас огнь свята́го милосердия Твоего. Да возненавидим зло, да у́зрим бездну падения нашего и возлюбим ближняго своего, да отвержемся себе, да во́змем крест свой и по́йдем ко свету истины, просвещающей мир. Сокруши силу зла на земли́ и пролей в умы наша лучу́ разума Христова, да, Тобою спасаеми, зде Отечество, по смерти же рай обря́щем и Триединому Богу хвалу, благодарение и поклонение возсылаем всегда, ныне и при́сно и во веки веков. Аминь.