Собор Волынских святых

День памяти

Жития

Празднование совершается в воспоминание о воссоединении Почаевской Лавры из унии в православие 10 октября 1831 года.

Великими и знаменательными чертами запечатлена история православной церкви на Волыни. Современная первоначальному просвещению славян еще от времени свв. Кирилла и Мефодия, она в течение многих веков жила и развивалась под влиянием самых разнообразных условий: тяжелые смуты княжеских усобиц, жестокое татарское иго, преследования со стороны поляков, латинян и униатов. История Церкви на Волыни богата именами святых: святителей, князей, преподобных, праведных.

20 июля 2012 года Священный Синод Украинской Православной Церкви постановил внести в собор имена 18 новопрославленных мучеников и святителя Петра (Могилы).

Список Святых

Богослужения

Служба святому священномученику Амвросию, епископу Свияжскому

На велицей вечерни

На Господи, воззвах: поставим стихов 8 со стихирами, глас 5.

Подобен: Радуйся:

Радуйся, священномучениче Амвросие, / крест свой взем, Христу последовал еси, / даже до смерти верен пребыв, блаженне. / В смирения ризы облеченный / непрестанныя злохуления бесовския посрамляше, / имея непобедимое оружие — Крест Господень, / имже вооружився к небесным от земли вознеслся еси. / Предстоя же Христу моли о нас, // почитающих память твою. (Дважды)

Радуйся, священномучениче Амвросие, / бисера Христа Единаго в сердце своем ношаше, / о Немже немалорадев, но пострадав радуяся, / в небесных воцарился еси. / О, отче блаженне, / изгнание правды ради, / мучения страх не объят души твоея, / понеже Словом Божиим, / мечем обоюдуострым, / разсекл еси тму неверия. / Радуемся ныне, пребогате, / тя имуще молитвенника, // выну за ны ходатайствующа.

Ины стихиры, глас 8.

Подобен: Что вас наречем, святии:

Что тя ныне именуем, богомудре Амвросие? / Камень, на немже Господь Церковь Свою основа, / юже адовы враты не одолеют. / Мирови светильник на свещнице церковнем сияй / и просвещаяй, приходящих к тебе верою. / Соль земли, яко осоляеши вся концы вселенныя познанием Бога Истиннаго: / вышних селений сожителю, // моли спастися душам нашим.

Что ти ныне провещаем, богомудре Амвросие? / Мученик добльственных сословие умножил еси, / добродетелей сосуде, / исполнь масти благовонныя, / яже слезныя моления / и крови пролитие суть. / Сошедшеся днесь восхвалим тя / победы венец приявша: / елеем радования угобзи сердца наша, язвы грехов носящыя, / да избавимся от тления и бед молитвами твои // совершающе верою всечестную память твою.

Что ти ныне // богомудрие Амвросие, воспети? / Заре ли еси Солнца мысленнаго, / теплоту Духа носяща и вся согревающа? / Свещник позлащенный, / Христа мирови свет являюща, / поборник еси борющим противу злочестия, / в жертву благоприятну себе принесый, / но и ученик множество яве образ предлагая привел еси, / с нимиже моли даровати душам нашим // мир и велию милость.

Что ти ныне принесем, богомудре Амвросие, в похвалу? / Лицы бо ангельстии предъидуще / крепость твою воспевают, хваляще тя, / яко Христу последующа и душу свою полагающа, / пастырю добрый, / о них же Господь Кровь Свою пролия. / Сего ради, стяжав нетленную славу, / венчаешися во граде Царя Небесного: // молися непрестанно, спастися нам.

Что ти ныне воспоим, богомудре Амвросие? / Кровьми ризы своя убеливый / и в небеснем граде вселивыйся. / Имуще таковаго дивнаго угодника, / сосуда добродетелей, благочестивых похваления, / воспоим вернии: / егоже молитвами, Христе, даруй мирови мир // и душам нашим велию милость.

Слава, глас 2:

Духа Святого силою / и непрестанными молениями / омрачение страстей пренемогаше, / сердечною правостию всякое беззаконие отвергая, / тем и явился еси ангелом согражданине, / но освяти всех, борения и подвиги твоя славящих / и веры истинныя познание приемлющих, // укрепляя их в соблюдении повелений спасительных.

И ныне, Богородичен: Прейде сень законная:

Вход. Прокимен дне. Чтения три
(зри Минею общую, последование святителю и мученику)

1. Притчей (гл. 3 и 8): Память праведнаго с похвалами:

2. Премудрости Соломоновы (гл. 3): Праведных души:

3. Премудрости Соломоновы (гл. 4, 6, 7 – 15): Похваляему праведнику:

На литии стихира храма.

Слава святаго, глас 6:

Приидите, мучениколюбцы вси: / стецемся во обитель Свияжскую, / идеже подвигом добрым подвизася святитель Амвросий, / и честную его икону обстояще, воззовем: / радуйся, страдальче неодоленный, / радуйся, обители твоей щит и ограждение, / радуйся, яко со ангелы предстоиши Христу, / Егоже непрестанно моли // даровати душам нашим мир и велию милость.

И ныне, Богородичен: Храм и дверь еси:

На стиховне стихиры, глас 6:

Се, камень, основание града Божия, / невместнаго адовы враты, / исповедительство и мученичество, / Сему ты, отче Амвросие, был еси причастник / и в сонме святых возсиял еси подвигом веры и благочестия. / Престолу же Вышняго / радуяся предстоиши, блаженне, воспевая: / Благословен Господь Бог мой, / научаяй руце мои на ополчение // и персты моя на брань.

Стих: Праведник, яко финикс процветет / и, яко кедр, иже в Ливане, умножится.

Глас первосвятителев услышав, / образодетельне паству призвал еси / в заступление Церкви Православныя, / яже есть Невеста Христова / в Ней же яко крины сельныя благоухают / мученицы и страстотерпцы. / Ты, отче Амвросие, / с ними в равнем достоинстве предстоя, / моля о всех нас, // с верою и любовию почитающих память твою.

Стих: Честна пред Господем / смерть преподобных его.

Ведая реченная Господом, / яко о едином грешнице кающемся велие радование на небеси бывает, / вражеския напасти преборов, / отпадшия во ограду возвратил еси, / темже и паству Христову целу сохранив, / душу свою за ню положил еси. / Но и явился еси столп непоколебимый, святе Амвросие: / на молитвы твоя уповающе, // исповедания твоего твердыню прославляем.

Слава, глас 8:

Видяще яко хулящия Церковь дерзновенно обличаеми бяху, / призываеми тобою есмы, отче святый, к покаянию: / не пристрашен бяше от убивающих телесе, / аще и един оставлен был еси / и хищницы иногда являшася / во овчия кожи облеченныя. / Сего ради ведомь есть // яко великий поборник веры и благочестия.

И ныне, Богородичен, глас 2:

Пастереначальнику Христу последуя, / подвизался еси положити душу твою за чада церковная, / и бяше яко агнец непорочен, священномучениче Амвросие: / на кресте же изнемогая не оставил еси вверенныя ти паствы, / упование на Пречистую возложив. / Сего ради венцем нетления увенчан еси / и престолу Троицы Святыя предстоиши: // молися непрестанно о душах наших.

Тропарь, глас 4:

Днесь светло красуется обитель Свияжская, / веселится и радуется град Казань, / обретши новаго молитвенника и предстателя / чуднаго святителя Амвросия, / веру православную свято соблюдшаго / и венцем мученическим от Христа увенчаннаго, / егоже прославление мы радостно празднующе / вопием усердно: / молися, святителю, о пастве твоей, / яко да избавльшеся от обстояний // улучим от Христа Бога велию милость.

На утрени

По 1-й стихологии седален, глас 4:

Пришлец был еси на земли, богомудре Амвросие, разумевая небесную обитель, аможе стремливо следоваше. Ничему же был еси пристрастен, Господеви последуя, Емуже, яко фимиам благовонен, добродетели принесл еси, быв жертвою благоприятною. Тем и стяжав дерзновение к Нему, моли ныне да отверзет человеколюбныя утробы Своея благости и дарует согрешением прошение.

Слава, и ныне, Богородичен:

Всепречистыя Матере Твоея молитвами, Боже всещедре, Царю Славы, умилостивися, яко Человеколюбец, егда приидеши судити рабы Твоя, и одесную Себе, Пастырю Добрый, постави блаженство наследовати: Ты бо еси Бог наш и иного не вемы.

По 2-й стихологии седален, глас 1:

Днесь отечество Российское зарями страстоносца просвещается, Церковь Божия цветы благовонны украшается: морем веры исповедания прелести угасил еси злословие. Темже Христу приносяще хвалу, всесвятую твою память празднуим.

Слава, и ныне, Богородичен:

Мати Божия Пречистая, оскверненна суща ны молитв Твоих иссопом ныне очисти, презирая вся прегрешения наша и на раны душевныя миро милости возливая: разумеем бо из Тебе Бога воплощенна, Того моли спастися нам.

По полиелеи седален, глас 8.

Подобен: Благословен еси:

В небесную Церковь вшел еси священно, на земли священнодействуя законно. Троице предстоиши, блистании истекающими сияя богатно: молися, блаженне, грехов оставление подати, подвиги твоя прославляющим.

Слава, и ныне, Богородичен:

Не премолчат уста наша, Дево Чистая, Тя прославляющи, от избытка бо сердца глаголют: избави от бед и враг видимых и невидимых, Богородице Владычице, на Тя надежду возлагающих, Едина Заступнице.

Степенна, 1-й антифон 4-го гласа.

Прокимен, глас 8: Господь Заступник мой и прибежище мое, Бог мой, и уповаю на Него.

Стих: Яко на Мя упова и избавлю и, покрыю и, яко позна Имя Мое.

Или глаголи прокимен общий священномученику.

По 50-м псалме стихира, глас 6:

Святителю, наставниче людей богомудрых, / мучениче непобедиме, / сосуд священ Святаго Духа быв, / нас ради страсти претерпевшаго / и бесстрастие источившаго / был еси раб верен: / данный ти талант преумножив, / сонм ученик ко Христу привел еси, / стадо словесных овец, в преподобии и правде.

Канон Богородицы: Воду прошед: на 6.

Таже канон священномученика Амвросия на 8, егоже краегранесие:

Радуйся, верных похваление. Глас 1.

Песнь 1.

Ирмос: Твоя победительная десница:

Страстьми страсти исцеляет Пострадавый о нас, Емуже последовав, мирское все отвергл еси омрачение и страсти претерпев, блаженне, небесному невещественному Свету приближился еси.

Данный талант умножив, яко благий раб, вшел еси в радость Господа. Предстоя же Его престолу непрестай поминати, чтущих святую память твою.

Мудрым девам, во сретение Жениха изшедшим, имущим добродетелей елеа благовонна, подражая возжегши светильник на браки идяше, и дошед же со Христом воцарился еси.

Един бо во Отце, и Сыне, и Дусе славится Бог, тако взывая, богомудре, прославляше Безначальную Троицу, соприсносущну во Едином существе.

Богородичен: Христа изливающи, воду спасения, прибегающих к Тебе прикосновением душ и телес недуги лютыя исцеляеши, яко воистину Источник еси воды живыя, Владычице.

Песнь 3.

Ирмос: Едине ведый человеческаго:

Како нечестивии не ужаснутся? Сердца твоего столпа не потрясоша мук приложение, но паче укрепляшеся в вере. Подвигом твоим беззаконие посрамляемо бывает, верным же есть похваление.

Аще и вся поползновения бесовская поборол еси, но хотяше да вси Христу последуют, якоже следоваше, о сем молити не преставал еси. Тако и ныне в свете непреступнем Живущему присно молишися сонаследником блаженству нам быти.

Непорочное незлобие под нозе твои ветхаго прелести начальника простре и вся его тщетная умышления разруши. Темже ти, яко адаманту веры, вопием: радуйся, Амвросие богомудре.

Богу, тернием венчанному, всю землю украшающу, — раны приемше багряницу поношения носившему последую, — взывал еси, — и прославлю Его, да и Той мя облечет в ризу нетления.

Богородичен: Како утроба раждает нераждающая? В сем Слово вся отеческая веления исполняет, идеже бо хощет Бог побеждается естества чин. Едина вместила еси Невмести маго, неизреченно плотию пришедша, девства же Твоего нерушивша печати. Егоже моли о нас присно, Пренепорочная.

Ин кондак, глас 3:

Днесь архипастырь свияжский Амвросий / с лики новомученик предстоит престолу Божию: / Ангели радуются, / святители со иноки ликовствуют, / мы же бренными устнами смиренно вопием: / молися за ны, отче священный, // верою на земли страдания твоя почитающих.

Седален, глас 6.

Древле людие еврейстии со священницы и книжницы, / да распнется, — вопияху, — Христос, Царь Израилев. / Безумием бо одержани бяху непокоривии, / Тя на смерть предающе: / но путь сотворивый человеком на спасение, / молитвами священномученика Амвросия и Богородицы помилуй нас.

Слава, и ныне, Богородичен:

На покаяние настави нас, Богородице, Мати Дево, / имущих Едину Тя Заступницу: / Сына бо зачала еси, / рожденна прежде век без матере, // прославляющаго православно Тя величающих.

Песнь 4.

Ирмос: Гору Тя благодатию:

Зде венчанный поношения и уничижения венцем, в кровех небесных славы Христовой сиянием озаряется: монахов начальника и верных наставника днесь славим Амвросия небодостойнаго, вкупе Господа прославляюще.

Вся по чину и благообразно устроивый во Свияжстей обители, идеже начальствовати поставлен бе: житие иноков оживотворил еси, древних уставов имея основание. Присно молися наша сердца ревностию по Бозе возгрети.

Пение ти приносящия и любовию славящия поминай, имамы бо тя предстателя и ходатая, во образ благочестия твое житие предлагающе: верныя в добродетели укрепи, на молитвы твоя уповающия от бед сохрани.

Тя Единицу существом пояше, богомудрый Амвросий: чту Отца и Сына и Духа Святаго, яко Троицу в Лицах. Егоже и прославил еси, Боже: безначальную державу Царства Твоего славим во веки.

Богородичен: Доме Божий — страшное и преславное место! Ум человечь не вмещает происшедшая, но видим явно вся бывшая, яже о Тебе, Дево Чистая. Притекающе черпаем, яко в реце приснотекущей, жизни наследие.

Песнь 5.

Ирмос: Просветивши сиянием:

Чистотою ума Живому Богу подвизающеся никакоже погрешил еси противу Церкви, но истину сохранив, верен пребыл еси до смерти, блаженне, и живот безконечный наследовал еси умервщлением.

Не устрашился еси телесе убивающих, к Единому же страхом обдержимь бяше, могущаго и душу во огнь вверзити. Ниже страхом токмо, но и любы преисполнено сердце имяше, еюже движимь, живот свой положил еси.

Ничтоже тебе от любве Божия возмогло разлучити: ни гонения, ни устрашения, ниже умервщление, но вся во уметы вменив, Христа приобрел еси, паче желая телесе разлучитися и с Ним, Единым Богом, воцаритися.

Имже вся соделася божественныя манием державы, Егоже в сердце своем богомудре ношаше и любовию к Нему исполняшеся, Иже заклан быв яко овча, вся от века уготованная исполняя: имамы Единаго Бога Живаго — Отца, и Сына, и Духа Святаго, в Троице славимаго, взывал еси.

Богородичен: Чрево Твое бысть пространнее небес, яко вся рукою содержащаго вместила еси. Воплощеннаго из Тебе, Отроковице, Бога, дивное рождество Твое зряще, величаем.

Песнь 6.

Ирмос: Обыде нас последняя:

Христови сораспялся еси, Тому последуя, яко солнце сияеши богозарны лучи добродетелей испущающи. Единомудренно славящия тя поминай, предстательствуя о пастве Казанстей.

Все мирское попечение поправый, непрестанно Господеви служа и необинуяся нечестие обличая, явился еси столпом веры непоколебимым, молися же еже воспевающих подвиг твой укрепити в Православии.

По завету Христову любити друг друга призывал еси, сам бо любовию божественною исполнен. Чаяше мира водворение во Отечестве, вся к тому прилагая: Спаса явлейся воистину ученик.

Содрагаюся ныне зря уничиженна, Имже в бытие аз приидох, воспеваше блаженный, но вем, яко о мне сия вся быша — живота вечнаго наследие. Восхожду на лобное, поношения приемля и нималы Тебе отметаяся. Господи! Сам мя спрослави.

Богородичен: Трапезо Святая, имущая Хлеб Жизни с небес сшедый: всяк вкушаяй от Него не умирает, но жив бывает. К Тебе притекающе, сего Хлеба вкушение приемлем.

Кондак, глас 5:

Житие свое целомудрием украсив, / правды нравы взыскуя, / мудростию веру сохранил еси, богоблаженне Амвросие, / темже и люди твоя упасл еси. / Но ведый, яко ненавидими бывают вслед Христа грядущий, / в мужестве споследуя Ему, паче сраспятися тщашеся, / и пострадати, и умрети, // да и Той тя прослави.

Икос:

Приидите, о, братие, приидите празднолюбцы, приидите чада верная! Днесь любезно празднующе память дивнаго Амвросия почтим. Кровию Агнчею ризы убеливый и в виссон и багряницу облеченный. Елижды брань противу миродержителей тмы века сего творяше: щитом веры разженныя стрелы лукаваго угаси и мечем духовным, еже есть глагол Божий. Нозе име уготованы во благовествование мира, бде во всяком терпении и молитве о всех на всяко время духом. И ныне, нетленную славу прием, предстоит Престолу Божию. Имамы же его, яко бисера церковнаго ясно сияюща и вся верныя озаряюща светом веры Христовой, достойная не могуще вознести, воскликнем: моли о нас Прославльшаго тя и Пречистую Деву, непрестанное пение ти приносящих.

Песнь 7.

Ирмос: Тебе умную:

Аще зерно пшенично пад на земли умрет, мног плод сотворит, сия реченная Господом исполнив, умерл бе и нас, яко многоценный плод, иже на всяком месте Богови служащих, принесл еси, с тобою воспевающих: благословен Бог и препрославлен.

Души своея не соблюдый в мире сем и всякое блужение подвигом препрения к таинству веры приведый, тем и в живот вечный сохранил себе и Христа приобрел еси, поя Ему: Благословен Господь, хвальный отцев Бог, и препрославлен.

Господеви служа, Тому Единому последоваше, и идеже есть, ту с Ним воцарился еси, и почесть приемши, радуешися Живому Богу, Сия ведуще, зовем: благословен еси, хвальный отцев Боже, и препрославлен.

Един убо Бог Троица, во едином существе певаемая: Безначальное, Присносущное, Несозданное Божество, приходяща и обитель творяща к соблюдающим слово Его и певающим: благословен еси, Боже, во веки.

Богородичен: Исполнив архангеловым гласом реченная, Христа Живнодавца родила еси, Мати Богородице, Едина Благодатная, Тебе славим, Деву Чистую, Ему зовуще: благословен еси, Бог отец наших.

Песнь 8.

Ирмос: В пещи отроцы:

Любовию исполненный, возлюблен был еси паствою и душу, яко пастырь добрый, внушением совести дея, за ню положил еси: готова же бяше и противу власть имущих ити тя защищающи, истиннаго служителя Бога Вышняго.

Царю веков: Нетленному, Невидимому Единому Премудрому Богу служа, всякое грабление дерзновенным глаголом отреял еси, имея веру и совесть благу, юже нецыи отринувше от веры отпадоша: громогласно обличаемыми умервщлен был еси, но в небесных кровех вселився, радостную песнь воспеваеши.

Соблюдающу ти слово терпения, якоже Господь рече, соблюден бе во искушениях пришедших во Отечествие наше вероотступничества ради, и сотворен еси столпом в Церкви, имуща надписание имени Бога Вышняго: яко побеждающа оболчена во одеяние бело.

Троице Простая, Нераздельная, Неслитное Лицы Едино Божество, благословлю Тя в бытие приведша вся и, заповеди сохранших, в живот вечный вводяща, помышляя Амвросий, песнь воспе трегубо в вышних песнословимую.

Богородичен: Молитвами Твоими спасай рабы Твоя от всякия скорби и печали: имамы бо Тя Прибежище и Силу, Богородице, благоприятную молитвенницу, Едина Благословенная.

Песнь 9.

Ирмос: Образ чистаго рождества:

Радостно Господеви благодарение принося, сподобльшаго в гонениях жити, увещавшая рекл еси: всяк в животе согрешаяй в мале страдании и исповедничестве грехов оставление приемлет и вечное блаженство наследит, еже никтоже отъяти возможет.

В осуждении неправеднем мучитель древний бысть посрамлен: явил бо еси непоколебимое веры исповедание, еже есть основание Церкви, в нейже Христос выну вся животворя и одухотворяя пребывает.

Слезныя Владычице моления принося, благодарение вознесл еси, яко покров Свой Пречистый не отлагает от верных раб Своих. Молися присно, отче богомудре, еже спастися нам.

Заступника обретохом, ходатайствы возносяща и державу Отца и Сына и Духа Святаго славити научающа: Троице Единоначальная, от всяких искушений и бед избави, духом покланяющихся Тебе.

Богородичен: Лествице Божественная, Тобою сниде и вся возведе в горняя Господь, Колеснице херувимская, яко носила еси Спаса всех. Егоже, Чистая, моли о славящих Тя.

Светилен.

Да не отымется от нас покров молитв твоих о Церкви Православней и Отечестве нашем: лепо бо есть приносити выну молитвы, Богу предстоя, понеже имаши дерзновение, еже кровию приобрел еси, Христу последуя.

Богородичен:

Приснодево Марие, да не отымется от нас благодатный Твой покров заступничества и помощи: несть бо иныя надежды, кроме Тебе, Владычице, на Тя все упование возложше, возопиим: Невместимаго Едина Сущаго всех Бога во утробе вместив, родила еси, Егоже моли спастися поющим Тя.

На хвалитех стихиры, глас 8.

Подобен: О, преславного чудесе:

О, дивнаго чудесе! / Прославльших житием Его Сам Бог прославляет, / тем являя велию Свою милость. / Вкупе, о, братие, разумно воспоим преславнаго Амвросия, / он же в дому Бога Жива жительствовати научает ны, // смиренно вознося о нас кротостныя моления.

Яко просиятельный светильник, / днесь ликующи Церковь Казанская, / светом Христовым осиявающаго обретает тя / и заповедей Божиих исполнению научающаго / прославляет тя дивнаго во святых: / радуйся, священномучениче Амвросие, // назнаменавый кровию верность свою.

Твоим бо подвигом, о, адаманте веры, / не токмо братию обители Свияжския упасл еси, / но и все пагубное нечестие отступивших преборол еси, / пострадав даже до смерти — смерти же венечныя. / Сего ради припадая молим тя: // предстательствуй присно за ны, светильниче земли Казанския.

От небес прияв божественную благодать, а не от человек, всехвальне, / апостолов преемник был еси: / житием и подвиги Христа распята исповедал еси; / тем и за истину пострадав радуяся, / вселился еси, идеже свет животный, / и сиянием славы памяти твоея // озаряются вселенныя концы.

Слава, глас 6.

Душу свою полагая яко добрый воин любовию, / смирением злопострадати научивый, / мучителева прещения не устрашился еси, / земная и тленная пренебрегше, лести тьму мечем глагола Божия сокрушил еси. / Но сочетавыйся лику божественному, // моли спастися празднующим память твою.

И ныне, Богородичен, глас тойже.

Богородице Владычице, / не презри молений раб Твоих, / приими ны Тебе припадающия и вопиющия: / Лозо истинная, возрастившая Плод живота, / Тебе молимся, Пречистая, / помиловатися душам нашим.

Славословие великое.

На Литургии прокимен и чтения общие священномученику.

Конец, и Богу слава.

Источник: Татмитрополия.ру

Служба преподобному Амфилохию Почаевскому

Текст службы утвержден решением Священного Синода от 14 июля 2018 года (журнал № 61).

Месяца апреля в 29-й день

На малей вечерни

На Господи, воззвах: стихиры на 4, глас 1.

Подобен: Небесных чинов:

Воспети и ублажити по достоянию/ угодника Твоего помози ми, Господи,/ просвети ум мой и мысль,/ да прослaвлю песньми и пеньми/ того преслaвныя подвиги.

Воспоим песньми боголепными/ звезду Почаевскую,/ на тверди Небесней/ лика русских святых светло сияющую,/ дивнаго угодника, Амфилохия чуднаго.

Ныне земля Волынская/ твоими подвиги хвалится и веселится,/ имущи тя, преподобне Амфилохие,/ заступника непостыдна и молитвеника прилежна/ о спасении душ наших.

Скорый помощник людем в болезнех/ и милостивый утешитель в скорбех/ показался еси, преподобне отче наш Амфилохие,/ словом и житием/ святым безсребренником подражаяй.

Слава, глас 6:

Прославляет днесь Русь Святая/ новаго и славнаго чудотворца своего,/ блаженнаго отца нашего Амфилохия,/ иже, многия скорби в житии претерпев,/ ныне многая воздаяния на Небеси приемлет/ и молит Пресвятую Троицу/ о спасении душ наших.

И ныне, Богородичен, глас тойже: Богородице, Ты еси Лоза истинная:

На стиховне стихиры, глас 2.

Подобен: Доме Евфрафов:

Храм Слова Божия/ сердце свое соделал еси,/ блаженне отче Амфилохие,/ молитвенниче о нас предобрый/ и целебниче скорый недугов наших.

Стих: Честна пред Господем/ смерть преподобных Его.

Днесь псаломски воспевает/ земля Волынская/ дивнаго угодника своего/ преподобнаго Амфилохия,/ веры Православныя поборника.

Стих: Блажен муж, бояйся Господа,/ в заповедех Его восхощет зело.

Взыдем на гору Почаевскую/ и поклонимся тамо/ нетленно почивающему/ и благодать источающему/ Амфилохию всеблаженному.

Слава, глас 6:

Приими ныне моления наша, преподобне,/ и прибегающих к тебе не отрини,/ Амфилохие отче наш,/ ты бо обители Почаевския молитвенник/ и всея земли Волынския утверждение.

Слава, и ныне, праздника или Богородичен, глас тойже:

Радуйся, Пречистая Дево,/ Ты бо, гору Почаевскую многими чудесы прославивши,/ преподобных Иова и Амфилохия/ во обители Твоей премудре возрастила еси.

Тропарь зри на велицей вечерни.

На велицей вечерни

На Господи, воззвах: стихиры на 4, глас 8:

Торжествуйте, православных собори,/ веселися, обителе Почаевская,/ в днешний день памяти/ преподобнаго отца Амфилохия,/ иже ныне предстоит Богу,/ яко непреоборимый воин Христов/ и любве сосуд избранный,/ милостивно источающий нам/ благодатныя струи исцелений.

Озарен благодатию свыше,/ прелестей мира избегл еси/ и, шествуя путем доброделания,/ сугубыя благодати сподобился еси,/ юже, яко дар Божественный,/ верным щедро подаеши:/ хромыя исправляя и слепыя просвещая./ Сего ради молим тя, преподобне:/ исцели наша болезни,/ да, сих избавльшеся,/ прославим Христа Бога.

Веры Православныя исповедание/ являя непоколебимо, отче преподобне,/ посрамил еси безбожныя/ и, показуя в себе силу Христову,/ просящим щедро исцеления подавал еси./ Сего ради молитвами твоими/ наша недуги душевныя и телесныя исцели/ и на подвиги благочестия настави.

Подвигом крестоношения/ любве Христовы исполнился еси,/ веры истинныя исповедниче непоколебимый/ и безбожия обличителю неустрашимый./ Темже врач безмездный и наставник богомудрый/ в житии твоем верным явился еси,/ отче преподобне./ Помяни ныне и нас,/ к заступлению твоему прибегающих.

Ины стихиры глас 2:

Приидите, верных собори,/ воспоим заступника и печальника земли нашея,/ преподобнаго Амфилохия,/ и, припадающе к честным мощем его,/ из глубины души воззовем:/ спасай нас, угодниче Христов,/ многими бо обстоянии и бедами/ от врага невидимаго стужаеми есмы.

Монахов украшение и преподобных радование/ явился еси, блаженне отче Амфилохие,/ добродетель бо паче сладостей мирских возлюбил еси,/ еюже, яко одеждею брачною, славно украсився,/ в Небесный чертог вшел еси,/ идеже со Христом ныне ликуеши.

Постом и молитвою, преподобне,/ душу твою ревностне очищая,/ зрети будущая, яко настоящая, сподобился еси,/ смирением же и терпением/ козни бесовския побеждая,/ в меру возраста Христова возшел еси./ Темже и светильник пресветлый/ верным людем явился еси.

Радуется днесь Русь Святая,/ в песнех и пениих воспевающи/ угодника своего новоявленнаго,/ преподобнаго отца нашего Амфилохия,/ иже подвиги своими Царствия Небеснаго достиже,/ идеже с преподобным Иовом/ Владычицу мира молит/ о спасении душ наших.

Слава, глас 8:

Приидите, вернии,/ благодарственное пение вознесем днесь/ всех благих Подателю Богу,/ о множестве благодатных исцелений,/ молитвами преподобнаго Амфилохия щедро подаваемых,/ имиже имя Божие в Лавре Почаевстей прославляется/ и Покров Божия Матере величается./ Сего ради возопиим:/ спасай нас молитвами твоими,/ преподобне отче наш.

И ныне, Богородичен: Царь Небесный: или праздника.

Вход. Прокимен дне. И чтения три преподобническая.

На литии стихиры, глас 1:

Что тя наречем, отче Амфилохие?/ Врача ли благодатнаго,/ зане благодатию исцеляеши недужных множества?/ Исповедника ли непоколебимаго,/ яко гонения и озлобления мужественне претерпел еси?/ Ангела ли земнаго,/ яко молитвенника и хранителя обители Почаевския тя имамы?/ Темже со умилением зовем ти:/ спасай нас молитвами твоими.

Слава, глас 2:

Земля веселится и небо радуется/ в памяти богоблаженнаго Амфилохия,/ той бо с преподобным отцем нашим Иовом/ предстоит Престолу Царя славы/ и молится о всех, любовию его почитающих.

И ныне, Богородичен, глас тойже:

Богородице Дево,/ Ты еси верных спасение/ к предстательству Твоему молитвенно прибегающих/ и Пречистою Приснодевою Тя именующих/ во обители избранней Твоей.

На стиховне стихиры, глас 1.

Подобен: Небесных чинов:

Прииде день памяти твоея, преподобне Амфилохие,/ в немже вернии, собравшеся,/ воспевают подвиги твоя,/ имиже, душу предочистив,/ даров Духа Божия исполнился еси/ и, демонския козни разрушив,/ Бога в Троице прославил еси./ Емуже молися, блаженне,/ о спасении душ наших.

Стих: Честна пред Господем/ смерть преподобных Его.

Ведая краткость жития земнаго,/ ум твой в горняя вперил еси/ и, вся земная в сердцы отметая,/ единаго Бога возлюбил еси,/ Емуже житием богоугодным поработав,/ блаженства вечнаго достигл еси./ Темже молися Христу, преподобне,/ и нам сего достигнути.

Стих: Блажен муж, бояйся Господа,/ в заповедех Его восхощет зело.

Христа всем сердцем возлюбив/ и заповеди Его усердно исполняя,/ на страсти плотския мужественне ополчился еси, блаженне,/ темже и благодати Божия сподобился еси,/ еюже осеняемь, достойно Церкви послужил еси./ Ныне же в Небесных обителех водворяешися/ и молишися о спасении душ наших.

Слава, глас 8:

Троицы поборник славен явився,/ богоносе отче Амфилохие,/ Отцу и Сыну и Духу Святому/ достойне в житии твоем послужил еси/ и, храм Ея святый во обители Почаевстей/ от осквернения и поругания добле защитив,/ лукавыя богоборцы посрамил еси/ и, от диавола много стужаемь,/ силою Божественною вся искушения/ мужественне претерпел еси.

И ныне, Богородичен праздника или предпразднества:

Приидите, поклонимся Деве Богородице,/ носит бо Зиждителя/ и родити Богомладенца в вертепе грядет./ О, чудесе! Како во утробе вмещается,/ Егоже Небеса не могут вместити?/ Како пеленама повивается,/ одеваяй небо облаки?/ Како млеком питается/ Животодавец всея твари?/ Како на руках держится/ рукою содержаяй всю тварь?/ О, великаго таинства и явления досточуднаго!/ Бог человеком, яко Человек является.

Тропарь, глас 4:

Земли Волынския преславна подвижника/ и обители Почаевския достойна насельника,/ людей православных изрядна целителя,/ яви тя Церкви Своей Христос Бог наш,/ преподобне отче Амфилохие,/ Емуже усердно молися/ от навет вражиих свободитися и спастися душам нашим.

На утрени

По 1-м стихословии седальны, глас 1:

Горы и холми взыграйте,/ земле Волынская возвеселися,/ днесь бо, лавра Почаевская утренюющи,/ песнь приносит Владыце:/ воспойте Господеви песнь нову,/ яко дивна сотвори Господь/ и возведе от нас к Едему горнему/ молитвенника за мир неусыпнаго/ Амфилохия богомудраго.

Слава:

Преподобне отче Амфилохие,/ ты, моляся вся дни живота твоего, сице взывал еси:/ Боже, вонми гласу моления моего,/ и да возвеселятся вси уповающии на Тя,/ во век возрадуются, и вселишися в них:/ и похвалятся о Тебе любящии имя Твое,/ яко Ты благословиши праведника, Господи,/ и яко оружием благоволения венчал еси нас.

И ныне, Богородичен или праздника:

Пресвятая Богородице,/ спаси нас, во гресех погибающих,/ в напастех многоразличных пребывающих,/ скорбящих и унывающих,/ во отчаяние впадающих,/ алчущих и наготующих,/ в болезнех изнемогающих/ и радости заступления Твоего чающих.

По 2-м стихословии седальны, глас 2:

Богатством благости, кротости и долготерпения Божия/ на спасения стези наставлен был еси крестом надгробным, Амфилохие преподобне,/ егда очима твоима телесныма/ отца игумена умершаго увидел еси/ и ушима мысленныма слово Христово услышал еси:/ по Мне гряди/ и достойны плоды покаяния сотвори.

Слава:

С любовию взываеши к нам, преподобне:/ вскую любите суету и ищете лжи?/ Вскую глаголите: кто явит нам благая?/ Дщери и сынове человечестии,/ пожрите жертву правды и уповайте на Господа/ и уведите, яко удиви Господь преподобныя Своя/ и знаменася на нас свет лица Божия,/ Господь услышит ны, внегда воззвати нам к Нему.

И ныне, Богородичен или праздника:

Богородице Дево, христианом Помощнице,/ всем ищущим спасения Прибежище,/ подвигом добрым подвизающимся Споборнице,/ на демонская полчища одоление,/ целомудренно живущим благословение,/ молися за ны, да простит нам прегрешения наша.

По полиелеи седален, глас 2:

Приидите на гору Почаевскую,/ постническое сословие и празднолюбцы вси,/ приидите, лик духовный составим/ и к преподобному отцу нашему Амфилохию сице возопиим:/ радуйся, отче священнейший,/ слезами своими фараона мысленнаго потопивый;/ радуйся, тело твое вечныя ради жизни/ пощением и трудами изнуривый;/ радуйся, купно с Иовом святым/ во обители Божия Матере сияяй./ Радуйся, преподобне отче Амфилохие,/ молитвенниче о душах наших.

Слава и ныне, Богородичен:

Предстательство Твое крепкое, Богородице,/ и светлая Твоя слава на горе Почаевстей показася/ в живоносном источнице и чудотворнем образе Твоем,/ сего ради о Тебе ныне хвалимся и веселимся вси,/ яко к Сыну Твоему Христу Богу нашему/ ходатайствуеши о всех, к Тебе прибегающих.

Степенна 1-й антифон 4-го гласа. Прокимен, глас 4: Честна пред Господем/ смерть преподобных Его. Стих: Что воздам Господеви о всех,/ яже воздаде ми? Евангелие от Матфеа, зачало 43.

По 50-м псалме стихира, глас 6:

Днесь благодать Святаго Духа нас собра/ с ликом ангельским/ и собором Волынских святых/ праздновати память/ Амфилохия достохвальнаго,/ той бо молит дерзновенно/ о земли нашей,/ во еже в мире/ и благостоянии ей быти/ и спастися душам нашим.

Канон преподобнаго, глас 1.

Песнь 1

Ирмос: Твоя победительная десница,/ боголепно в крепости прославися:/ та бо, Безсмертне,/ яко всемогущая, противныя сотре,/ израильтяном путь глубины новосоделавшая.

Благодатную помощь Твою, Господи, низпосли нам, во еже воспети угодника Твоего, отца нашего Амфилохия, благочестия подвижника и лавры Почаевския украшение дивное.

Любовь и благочестие родительское, ихже измлада восприем, чрез все житие достойно пронесл еси, от силы в силу восходя духом, блаженне.

Аще и пленен был еси на брани от врагов видимых, но невидимаго плена страстей избежал еси, преподобне, плоть покоряя духу.

Богородичен: Жизнь вечную со святыми желая улучити, Матерь Божию вседушно возлюбил еси, святе,/ и, в дому Ея на горе Почаевстей вселився,/ достойне Богу послужил еси.

Песнь 3

Ирмос: Едине ведый человеческаго существа немощь,/ и милостивно в не воображься,/ препояши мя с высоты силою,/ еже вопити Тебе, Святый:/ одушевленный храме неизреченныя славы Твоея, Человеколюбче.

Егда у гроба настоятеля почившаго молился еси, преподобне, откры Господь тебе суету жития временнаго, темже, помышляя о жизни вечней, начат грехи своя пред всеми исповедати.

Наречен быв, блаженне, Иосиф, еже сказуется приумноженный, сего ради потщался еси благодать в сердцы твоем обильно приумножати.

Егда саном иерейским почтен был еси, святе, тогда молитвы, пощения и подвиги усугубил еси, бесы же, не терпяще добродетельнаго жития твоего, многажды тя хотяху погубити, ты же силою Божиею присно хранимь был еси.

Богородичен: Славнейшая без сравнения Серафим и честнейшая Херувим, Пресвятая Дево, услыши моления и мольбы наша, и помощию Твоею не отступна буди от нас.

Ин кондак, глас 3:

Яко веры Православныя ревнитель/ и благочестнаго жития учитель,/ в болезнех и скорбех изрядный помощник,/ пред Господем предстоиши, преподобне Амфилохие,/ сего ради вопием ти:/ защити обитель, в нейже подвизался еси,/ и спасай нас молитвами твоими, отче блаженне.

Седален, глас 3:

Христовою любовию преисполнився, преподобне Амфилохие,/ Духом Святым ко спасению наставлял еси вопрошающих/ и тако, яко светильник,/ во тьме неведения седящим просиял еси./ Темже молися за ны ко Господу,/ да просветимся и мы Его благодатию.

Слава, и ныне, праздника или Богородичен:

Мати Божия, Покров Твой спасительный миру дольнему с Небесе являющая,/ не остави нас, во гресех погибающих/ и Господа Милосерднаго прогневляющих,/ Егоже моли избавитися нам душепагубнаго заблуждения,/ яко Предстательница наша крепкая и Помощница скорая.

Песнь 4

Ирмос: Гору Тя, благодатию Божиею приосененную,/ прозорливыма Аввакум усмотрев очима,/ из Тебе изыти Израилеву провозглашаше Святому,/ во спасение наше и обновление.

Избранный сосуд Духа Святаго быв, многия болящия благодатию Божию исцелил еси и бесов полки победил еси, отче блаженне. Приими молитвы наша и от язв греховных исцели.

Образ мужества и дерзновения богомудраго в тебе зрим, отче преподобне, храм бо Святыя Троицы от поругания и запустения сохранил еси и верныя люди, в скорби сущия, возвеселил еси.

Токи слез проливал еси, преподобне, о заблуждших чадех Церкве Православныя, временныя блага паче вечных благ возлюбивших.

Богородичен: Чтущих Тя и в песнех величающих, не отрини нас, Пресвятая Дево, иныя бо Ходатаицы и Заступницы разве Тебе не имамы.

Песнь 5

Ирмос: Просветивый сиянием/ пришествия Твоего, Христе,/ и осветивый Крестом Твоим мира концы,/ сердца просвети светом Твоего богоразумия/ православно поющих Тя.

Егда в темницу лютии гонителие всадиша тя к бесным и ума лишенным, тогда смиренне взывал еси, отче блаженне: слава Богу, благодеявшему ми.

Ни скорбь, ни теснота, ни гонения, ни глад, ни нагота, ниже беда, ни мечь, ни ина кая напасть не возможе разлучити тя от любве Божия, отче преподобне.

Ангел земный и человек небесный явился еси, отче, многия бо скорби в житии безропотне понесл еси, темже и воздаяния многа на Небеси восприял еси, блаженне.

Богородичен: Шедше, возвестим всем языком, коликая чудеса сотвори Пресвятая Богородица во уделе Своем Почаевстем и како милует всех, с верою приходящих к Ней.

Песнь 6

Ирмос: Обыде нас последняя бездна,/ несть избавляяй,/ вменихомся, яко овцы заколения./ Спаси люди Твоя, Боже наш,/ Ты бо крепость немощствующих и исправление.

Амфилохий в схиме святей наречен быв, преподобне, труды ко трудом прилагал еси и добродетельми, яко степеньми, во Царствие Небесное восшел еси.

Множество болящих, приходящих к тебе, исцелял еси и страждущих свобождал еси от духов нечистых, кротостию и смирением тех побеждая.

Фесвитянину Илии ревностию подражая, преподобне, любовию божественною сердце твое распалял еси и, в терпении душу твою укрепляя, пророчески вопиял еси: с нами Бог, разумейте языцы и покаряйтеся, яко с нами Бог.

Богородичен: Имя Твое, Пречистая, вси роди православных непрестанно величают, и лицы церковнии сладкогласно воспевают: Богородице Владычице, спаси нас, многими бо напастьми обстоими есмы.

Кондак, глас 2:

Изволением Девы Пречистыя/ в обители Почаевстей вселился еси,/ идеже, подвижническое и скорбное житие провождая,/ даром молитвы умныя обогатился еси/ и Царствия Небеснаго наследник явился еси./ Темже вопием ти:/ радуйся, Амфилохие, отче блаженне,/ целебниче и чудотворче.

Икос:

Сокровища Небеснаго взыскуя, преподобне, Господа Иисуса, яко Бисер Многоценен, обрел еси и, вся Его ради оставив, сторицею в пакибытии приял еси./ Ныне же душею твоею светолучною на Небесех сияя и мощами многоцелебными во обители Почаевстей пребывая, приемлеши целование от почитающих тя и велегласно взывающих: радуйся, Амфилохие, отче блаженне, целебниче и чудотворче.

Песнь 7

Ирмос: Авраамстии отроцы в пещи Троицу прообразивше,/ огненный пламень на росу преложиша/ и, поюще, вопияху:/ благословен еси, Боже отец наших.

Лавра Почаевская, идеже подвизался еси, преподобне, пристанище ти явися, усыпальница же ея мощи твоя прият, иже тридесять лет тамо в земли лежаху и тлению не предахуся.

От веси Малоиловецкия мертвенное тело твое во обитель Почаевскую братия принесоша и во усыпальнице братстей с честию погребоша. Ты же, преподобне, во обителех Небесных пребывая, за ны молишися Богу.

Ходатай к Богу о людех в житии твоем был еси, отче преподобне, и по преставлении ходатайствуеши о всех, с верою ко гробу твоему приходящих, и милостивый послушатель им бываеши.

Богородичен: Испещрена ряснами златыми, яко Царица, Царя и Бога одесную ныне предстоиши, Владычице, молящи о всех, ко образу Твоему на горе Почаевстей притекающих.

Песнь 8

Ирмос: В пещи отроцы Израилевы,/ якоже в горниле,/ добротою благочестия чистее злата блещахуся, глаголюще:/ благословите, вся дела Господня, Господа/ и превозносите во вся веки.

Егда людие, одержимии духи нечистыми, ко гробу твоему притекаху, преподобне, беси, в них сущия, твоея святости терпети не могуще, громкими гласы вопияху, огнем Божия благодати опаляеми.

Преславное чудо о тебе зрим, преподобне, ты бо, яко при жизни, тако и по преставлении, людем страждущим помагаеши и от лютых обстояний с верою приходящих к тебе свобождаеши.

Радости неизглаголанныя исполнишася монаси и мирстии, егда тело твое, преподобне, тридесять лет в земли погребенное, нетленно и благоухания исполнено обретеся.

Богородичен: Едина благословенная и богорадованная Владычице, Яже радость человеком рождши неизреченную, исполни радости сердца наша, да прославим рождшагося от Тебе Христа.

Песнь 9

Ирмос: Образ чистаго Рождества Твоего/ огнепалимая купина показа неопальная;/ и ныне на нас напастей/ свирепеющую угасити, молимся, пещь,/ да Тя, Богородице,/ непрестанно величаем.

Чудеса и исцеления точиши всем, приходящим и усердно молящимся тебе и благоговейно поклоняющимся честным мощем твоим, преподобне отче Амфилохие.

Украшение лавры Почаевския явился еси, преподобне, нетленным бо телом твоим в пещернем храме купно со Иовом преподобным почиваеши и всем, приходящим к тебе, присно помогаеши.

Дал еси знамение, Господи, крест облачный на небеси в день прославления преподобнаго Амфилохия, и сим крестом благословил еси всех, пришедших почтити память угодника Твоего.

Троичен: Нераздельная Троице, во Единице покланяемая, Отче, Сыне и Святый Душе, спаси и сохрани всех почитающих память угодника Твоего Амфилохия.

Богородичен: Едина чистая и непорочная, Бога без семене рождшая, Богородице Владычице, молитвами угодника Твоего Амфилохия покрый и соблюди нас от всякаго зла.

Светилен:

Подвигом добрым подвизався, просиял еси, Амфилохие чудотворче, в земли Волынстей, яко светильник Божественныя благодати, возжженный в лавре Почаевстей. Темже помощию твоею не остави всех, с верою к тебе притекающих.

Слава:

Светильника веры и образ богоугоднаго жития, на горе Почаевстей возсиявшаго, преподобнаго Амфилохия, явил еси нам, Христе Спасе, той бо землю нашу светом Евангелия просвещает и путь спасения нам указует.

И ныне, праздника или Богородичен:

Дево Пресвятая, Сына Божия Единороднаго плотию рождшая, Иже от Отца рожденнаго прежде всех век, моли Духа Святаго благодатию осияти обитель сию и сохранити ю молитвами избранника Твоего, преподобнаго Амфилохия, Бога в Троице Святей почитающаго.

На хвалитех стихиры, глас 5.

Подобен: Радуйся:

Радуйся, обитель Почаевская,/ земли Волынския благое украшение,/ крепосте и утверждение Православия,/ избранный доме Божия Матере,/ источниче благодати с верою притекающим,/ сокровище некрадомое/ мощей преподобных Иова и Амфилохия,/ иже предстоят Престолу Божию/ и молятся о спасении душ наших.

Радуйся, отче Амфилохие,/ благочестия дивный подвижниче,/ уставов отеческих усердный ревнителю,/ иноков лавры Почаевския мудрый наставниче,/ бесных и болящих скорый целебниче,/ веры Православныя твердый исповедниче,/ богоборцев грозный обличителю,/ святыя Руси страже неусыпный/ и теплый молитвенниче о душах наших.

Радуйся, обитель Почаевская,/ из тебе бо произыде благоуханный цвет,/ преподобный Амфилохий,/ иже яви нам плоды Духа:/ радость и любовь,/ мир, долготерпение,/ благость, милосердие,/ веру, кротость, воздержание,/ согрешающих кроткое исправление,/ бремен ближних терпеливное ношение/ и Евангелия Христова исполнение.

Отче блаженне Амфилохие,/ ныне предстоя Престолу Христа Бога,/ утверждение крепкое нам буди,/ к тебе тепле припадающих и глаголющих:/ радуйся, Духа Святаго достойное обиталище,/ радуйся, Девы Всепетыя усердный служителю,/ радуйся, яко многая сердца верою Христовою просветивый,/ радуйся, яко велие дерзновение ко Господу стяжавый./ Темже моли спастися душам нашим.

Слава, глас 8:

Возсия днесь славная память/ достохвальнаго Амфилохия,/ созывающи нас во обитель Почаевскую,/ подвиги и чудеса того прославити/ и хвалу Богу нашему воздати./ Темже, притекающе к честным мощем преподобнаго,/ исцелений дарования приемлем/ и Спаса Христа непрестанно славим.

И ныне Богородичен, глас тойже:

Владычице, приими молитвы раб Твоих/ и избави нас/ от всякия нужды и печали.

На Литургии

Блаженны святаго от канона песни 3-я и 6-я. Прокимен, глас 7: Честна пред Господем/ смерть преподобных Его. Стих: Что воздам Господеви о всех, яже воздаде ми? Апостол к Галатом, зачало 213. Аллилуиа, глас 6: Блажен муж, бояйся Господа. Стих: Сильно на земли будет семя его. Евангелие от Луки, зачало 24. Причастен: В память вечную:

Молитва

О, всеблаженне отче наш Амфилохие, земный Ангеле, небесный человече и Православия в земли Волынской крепкое утверждение! Припадаем к тебе с верою и любовию и молим ти ся прилежно: яви нам, смиренным и грешным, святое твое заступление; се бо грех ради наших не имамы дерзновения просити о нуждах наших Господа и Владыку нашего, но тебе молитвенника благоприятнаго к Нему предлагаем и сице вопием: испроси нам от благости Его благопотребныя дары душам и телесем нашим, веру правую, любовь ко всем нелицемерную, в злостраданиих терпение, тяжкими болезньми одержимым исцеление, под бременем скорбей и напастей падающим и жития своего отчаявшимся скорое облегчение и избавление.

Не забуди, блаженне отче, и обитель Почаевскую, присно тя чтущую, идеже под покровом Пречистыя Богоматере усердно подвизался еси, но всех живущих в ней и на поклонение приходящих невредимы соблюди от искушений диавольских и всякаго зла. Егда же приспеет отшествие наше от временнаго сего жития и к вечности преселение, не лиши помощи твоея Небесныя, но молитвами твоими всех нас приведи в пристанище спасения и наследники сотвори всесветлаго Царствия Христова, да поем и славим неизреченныя щедроты Человеколюбца Бога Отца и Сына и Святаго Духа во веки веков. Аминь.

Служба преподобному и благоверному князю Олегу Брянскому

Текст службы утвержден решением Священного Синода от 14 июля 2018 года (журнал № 61)

Месяца септемврия в 20-й день

На велицей вечерни

На Господи, воззвах: стихиры на 8, глас 2:

Приидите, православных собори,/ восхвалим теплаго заступника Брянския земли,/ преподобнаго благовернаго князя Олега,/ измлада Христа Бога возлюбившаго,/ делами веры заповеди Его исполнившаго,/ монашеское жительство в пределех Брянских устроившаго/ и нам образ добродетели явившаго,/ празднственно почитающим святую память его.

Род правых благословится,/ рече праведный Давид./ Темже величаем днесь благовернаго князя Олега,/ прозябение благочестиваго корене князей Черниговских:/ Николы Святоши и Игоря страстотерпца,/ мученика Михаила и благовернаго Романа,/ сродника преподобныя Евфросинии Суждальския./ С нимиже ныне молися, преподобне,/ о спасении душ наших.

Егда бедство постиже землю Русскую/ и полчища агарянская разоряху ю,/ тогда, паче видимых, на невидимыя враги изшел еси/ и на молитвенней страже Отечества твоего стал еси,/ благоверне княже Олеже,/ воздевая преподобнеи руце к Богу,/ Единому спасти могущему/ и Спасу душ наших.

Первее в смиреннем сердцы обитель Богу сотворивый, преподобне,/ последи обитель первоверховных апостол во граде Брянске основал еси,/ идеже, добре во иноческих подвизех потрудився,/ нам мощи твоя честныя оставил еси,/ душею же во обителех Отца Небеснаго ныне ликовствуя,/ поминай верою и любовию воспевающих тя.

Богомудрый Петропавловския обители первоздателю,/ багряницу княжескую на власяницу иноческую вольне пременив,/ меч духовный мудре носил еси,/ Православие утверждая и вся душевредная посекая,/ ближним же и братии по образу Христову послужил еси,/ темже не престай присно покрывати/ град Брянск и обитель твою.

Слава, глас 8.

Подобен: О, преславнаго чудесе:

Преподобне княже Олеже,/ веры Православныя поборниче,/ благочестия истиннаго проповедниче/ и монахов известное правило,/ како славу мира сего презрел еси/ и узким путем Христу последовал еси?/ Темже и Господь нам тя дарова/ в скорбех скораго помощника/ и молитвенника тепла о душах наших.

И ныне, праздника.

Вход. Прокимен дне. Чтения три преподобническая.

На литии стихиры, глас 2:

Приидите, вернии людие,/ во обитель преподобнаго князя Олега/ и, духовный лик составльше, сице возопиим:/ радуйся, похвало наша и упование,/ и земли Брянския жертва Богу благоуханная,/ моли в мире пребывати всем,/ православно чтущим святую память твою.

Благоверия образ,/ в княжении милосердаго правителя,/ вдов и сирот предстателя,/ нищих питателя и скорбных утешителя,/ иноков правило и целомудрия забрало,/ богомудраго Олега воспоим./ Той бо, таланты богоданныя добре умножив,/ в радость Господа своего вниде/ и дерзновенно молится о душах наших.

Слава, глас 8:

На земли благочестно живя,/ в Горняя выну взирал еси,/ Олеже богоблаженне,/ ныне же с высоты Небесныя призри на нас,/ любовию тя призывающих,/ и споборствуй молитвами твоими,/ воинству же нашему победы на супостаты испроси,/ град твой и обитель, тобою созданную, от скорбей и бед лютых огради,/ молитвенниче наш усердный и скорый помощниче.

И ныне, праздника.

На стиховне стихиры, глас 4:

Мирския суеты Христа ради отрекся,/ первую в земли Брянстей обитель/ во имя первоверховных апостол основал еси,/ благоверный княже Олеже,/ та бо, яко камень краеугольный веры Православныя явися,/ на немже доныне утверждающеся,/ козни вражия заступлением твоим побеждаем.

Стих: Честна пред Господем/ смерть преподобных Его.

Мощи твоя честныя, преподобне княже Олеже,/ в годину безбожных гонений/ под спудом от поругания сохранишася,/ ныне же паки на свещнице обители твоея,/ яко богатое сокровище, нам явишася,/ освящающе и озаряюще благодатною помощию/ верою к ним притекающих.

Стих: Блажен муж, бояйся Господа,/ в заповедех Его восхощет зело.

От юности разум богопросвещенный стяжав/ чтением Божественных словес и писаний отеческих,/ подвигом святых подражати навыкл еси,/ учение правды, яко питие,/ делание же заповедей, яко пищу духовную имея,/ темже Безсмертныя трапезы ныне наслаждаешися.

Слава, глас 6:

Славу мира сего тленнаго/ непреложно отвергнув,/ о спасении людей, Богом ти врученных,/ сердцем отечески болезновал еси,/ молитвою же теплою/ милость Божию призывая/ и не себе угождая,/ апостольски ближних тяготы носил еси./ Темже достойно прославляешися,/ Олеже приснопамятне.

И ныне, праздника.

Тропарь, глас 8:

От юности возлюбив Христа всем сердцем, преподобне,/ славу земную, яко преходящу, оставил еси,/ и царство земное в ничтоже вменив,/ лику инок радостно причелся еси,/ и труды многими град Брянск, аки солнце, пресветло озарил еси:/ тем, быв Троицы украшение,/ моли, княже Олеже, Христа Бога,/ спастися душам нашим.

Ин тропарь, глас тойже:

От юности Христа возлюбив всем сердцем, преподобне,/ славу земную, яко преходящу, оставил еси/ и, царство земное нивочтоже вменив,/ лику иноческому радостно приобщился еси/ и, многими подвиги благодать Святаго Духа стяжав,/ град Брянск, аки солнце, пресветло озарил еси./ Темже моли, княже Олеже, Христа Бога,/ спастися душам нашим.

На утрени

По 1-м стихословии седален, глас 7:

Подвигом добрым подвизався,/ сосуд, благодати Божия исполненный, явился еси, преподобне княже Олеже./ Темже и уготовася тебе венец правды от Подвигоположника Христа Бога нашего./ Мы же, чада твоя, любовию чтуще святую память твою, со умилением зовем:/ молися о нас, святче Божий,/ да слезами покаяния очистим души наша/ и дерзновение улучим в день страшнаго испытания.

Слава, и ныне, праздника.

По 2-м стихословии седален святаго, глас 8:

Течение земное добре скончав,/ веру соблюл еси непорочну, святе Олеже,/ темже прослави тя Бог в чудесех,/ Егоже моли даровати нам грехов прощение,/ воинству нашему на враги победу,/ плененным свобождение, миру умирение/ и христианом в Православии единение.

Слава, и ныне, праздника.

Величание:

Ублажаем тя,/ преподобне благоверне княже Олеже,/ и чтим святую память твою,/ наставниче монахов/ и собеседниче ангелов.

Псалом избранный:

Блажен муж, бояйся Господа, в заповедех Его восхощет зело.

Сильно на земли будет семя его.

Закон Бога его в сердцы его и не запнутся стопы его.

Постави его господина дому своему и князя всему стяжанию своему.

Божии державнии земли зело вознесошася.

По полиелеи седален, глас 4:

Красуйся и ликуй, земле Брянская,/ и да играют чада твоя в тебе,/ светло торжествующе в памяти преподобнаго князя Олега,/ общаго отца нашего и молебника,/ всех бо, притекающих к нему, утешает/ и во благочестии утверждает.

Слава, и ныне, праздника.

Степенна, 1-й антифон 4-го гласа. Прокимен, глас 4: Честна пред Господем/ смерть преподобных Его. Стих: Что воздам Господеви о всех, яже воздаде ми? Всякое дыхание: Евангелие от Матфеа, зачало 43.

По 50-м псалме стихира, глас 6:

Яко добраго древа князей Русских благий плод,/ преподобне княже Олеже,/ стопам святых сродник твоих последовал еси,/ в княжении благоверие соблюдая,/ во иночестве добродетельми чистоту души являя,/ сего ради, яко имаши дерзновение ко Христу Богу,/ моли даровати Отечеству нашему мир/ и душам нашим велию милость.

Канон святаго, глас 4, егоже краегранесие: Заступника земли Брянския верою чтим.

Песнь 1

Ирмос: Моря чермную пучину/ невлажными стопами/ древний пешешествовав Израиль,/ крестообразныма Моисеовыма рукама,/ Амаликову силу в пустыни победил есть.

Припев: Святый благоверный княже Олеже, моли Бога о нас.

Заступника теплаго Брянския земли, князей похвалу и монахов удобрение, преподобнаго Олега воспоим, той бо силою Креста страсти и безплотныя враги победил есть.

Ангельски на земли пожил еси, княже Олеже, благаго корене князей Черниговских доброплодная отрасль быв, и яко воевода Небеснаго Царя, Отечество наше ныне ограждаеши.

Смирению Царя царствующих подражая, власть и честь, славу и богатство Христа ради во уметы вменил еси, и слезами постническими велиарову гордыню потопил еси.

Богородичен: Твоего Печерскаго образа в пределы Брянския пренесение ведая и родителя своего от слепоты исцеление зря, князь Олег воспеваше благодать Твою, Пречистая.

Песнь 3

Ирмос: Веселится о Тебе Церковь Твоя, Христе, зовущи:/ Ты моя крепость, Господи,/ и прибежище, и утверждение.

Утвердил еси землю и люди твоя в вере Православней, преподобне, княжением благозаконным и подвиги монашескими.

Первую в земли Брянстей обитель основал еси, святе Олеже, яко камень краеугольный веры, во имя апостол первоверховных.

Нивы новонасажденныя делатель усердный явился еси, блаженне, темже доныне плодами трудов твоих освящаемся.

Богородичен: Источник исцелений близ Свены реки открыся чудотворная икона Богоматере. Еяже благодатию укрепляемь, князь Олег мир конечне оставил есть.

Кондак и икос праздника, глас 4.

Седален святаго, глас 8:

Смиренномудренно царства земнаго удаливыйся, во иноцех тезоименством царским наречен был еси, княже Олеже, во знамение уготованнаго ти Небеснаго Царствия, идеже ныне, яко царское священие, добродетели возвещаеши Христа Бога, Призвавшаго тя в чудный Свой свет.

Слава, и ныне, праздника.

Песнь 4

Ирмос: Вознесена Тя видевши Церковь на Кресте,/ Солнце Праведное,/ ста в чине своем,/ достойно взывающи:/ слава силе Твоей, Господи.

Крест свой взем, себе и мира отверглся еси, преподобне, и вся козни вражия силою возлюбившаго тя Христа победил еси.

Агарян древле и зловерных нахождение паче меча молитвою отражал еси, и ныне Отечество наше от злых заступлением твоим избави.

Земля Брянская красуется древом, тобою насажденным при исходищих вод Православия, питающим нас и покрывающим.

Богородичен: Егда иноцы созданныя тобою, княже, святыя обители принесоша от Киева икону Пречистыя, тогда сила Ея в чудесех явися.

Песнь 5

Ирмос: Ты, Господи, мой Свет,/ в мир пришел еси,/ Свет Святый,/ обращаяй из мрачна неведения/ верою воспевающия Тя.

Меч Божий обоюдуострый именуем тя, святе, душевредная бо посекаеши: в княжении благоверием, во иночестве же преподобием.

Лице твое в час кончины просветися, богоблаженне Олеже, и яко благий раб и верный в радость Господа твоего вшел еси.

Избавляеши от бед в нощи греховней блуждающих, святче, неба церковнаго кроткая звездо и к Свету Невечернему путеводителю.

Богородичен: Благословенная Владычице, просвети нас светом Сына Твоего, якоже древле очи благовернаго князя Романа.

Песнь 6

Ирмос: Пожру Ти со гласом хваления, Господи,/ Церковь вопиет Ти,/ от бесовския крове очищшися,/ ради милости из ребр Твоих/ истекшею Кровию.

Русская Церковь днесь всех созывает к похвале угодника Христова, преподобнаго князя Олега, от земли Брянския Отечеству нашему возсиявшаго.

Явился еси, преподобне Олеже, Православныя веры правило, монахом образ, людем предстатель теплый, граду и обители твоей ограждение.

Наследие Небесное и чудес благодать, воздаяние от Бога приял еси, святе Олеже, темже не престай милостивно посещати тя почитающия.

Богородичен: Свенския иконы Богоматере явление чудное видев, блаже, купно со отцем твоим, освященным собором и людьми многими благодарение Богу возсылаше.

Кондак, глас 2:

Заступниче теплый Брянския земли,/ преподобне княже Олеже,/ купно со святыми сродники твоими/ Престолу Божию ныне предстоя,/ молитвами твоими Православие утверди,/ ереси и расколы разори,/ Отечеству нашему мир/ и душам нашим полезная испроси.

Икос:

Отверзи честная уста твоя, Олеже благородне, и тайно глаголи во ушеса сердец наших: како, трудом равноапостольнаго Владимира ревнуя, обитель первоверховных апостол во граде Брянске основал еси? Како, Николе Святоше и Игорю страстотерпцу подобяся, мира отверглся еси? Како, последуя прадеду Михаилу, безкровное мученичество в подвизех монашеских восприял еси и благочестие родителя твоего наследовал еси? О, цвете красный древа великаго князей Русских! Молитвами твоими Православие в земли нашей утверди, ереси и расколы разори, Отечеству нашему мир и душам нашим полезная испроси.

Песнь 7

Ирмос: В пещи авраамстии отроцы персидстей,/ любовию благочестия паче,/ нежели пламенем, опаляеми, взываху:/ благословен еси в храме славы Твоея, Господи.

Княжение и род оставил еси, огнем любве Божия распалаяся и крепко подвизаяся в чине монашестем, блаже. Темже и ныне с преподобных лики радуешися.

Избавитися езера огненнаго Человеколюбца Бога моли, преподобне, почитающим любовию святую память твою и добродетелем твоим подражающим.

Якоже злато огнем, душу и тело искусив воздержанием и молитвою, преподобне, в порфире чистоты над страстьми водворился еси.

Богородичен: Вся окрестныя земли, елика виде исцеленныма очима князь Роман, обители Твоей, Владычице, дарова, сын же его себе самаго в жертву Сыну Твоему принесе.

Песнь 8

Ирмос: Руце распростер, Даниил/ львов зияния в рове затче;/ огненную же силу угасиша,/ добродетелию препоясавшеся,/ благочестия рачители,/ отроцы, взывающе:/ благословите, вся дела Господня, Господа.

Елико велик в православном княжении был еси, толико в монашестем делании смирил еси себе, преподобне Олеже, темже и Бог тя превознесе и дарова ти чудес благодать.

Ревность велию показал еси ко благочестию, преизряден быв образ людем и учеником твоим, от младенства бо воспитався в законе Господни, чрез все житие волю Божию исполнити тщался еси.

Одеяния худость не омрачи девственныя красоты души твоея, блаженне, бдение же душевнеи твои очи просвети и труды тяжкия плоть твою духу покориша.

Богородичен: Юже древле избрала еси гору в пределех Брянских во обитель иноком и образом Твоим Свенским освятила еси, Пренепорочная, невредиму сохрани, да воспевается в ней Имя Сына Твоего во веки.

Песнь 9

Ирмос: Камень нерукосечный/ от несекомыя горы, Тебе, Дево,/ краеугольный отсечеся, Христос,/ совокупивый разстоящаяся естества./ Тем, веселящеся, Тя, Богородице, величаем.

Чаянием будущих благ веселяся, тесным и прискорбным путем шествовал еси, воздержанию же, кротости, смирению и послушанию навыкнув, лику святых совокупился еси.

Трудолюбное по Бозе житие от юности возлюбив, преподобне княже, в меру возраста Христова достигл еси и, яко клас зрелый, в Небесныя житницы пожался еси.

Имамы святыя мощи твоя, богоносне княже, яко сокровище неистощимое и утешение велие душам и телесем нашим, темже тя величаем.

Богородичен: Мати Божия Пречистая, молитвами преподобнаго князя Олега и святых сродник его спаси землю Русскую и верныя люди Твоя утеши, иже Тя достойно величают.

Светилен:

Утреневав к Богу выну, тьмы вечныя избегл еси, преподобне княже Олеже, сего ради в час кончины лице твое просветися, и мощи твоя честныя доныне сияют нетлением и чудесы.

Слава, и ныне, праздника.

На хвалитех стихиры, глас 5:

Преподобне княже Олеже,/ Церкве Русския похвало преславная,/ града Брянска стено необоримая,/ Отечества нашего крепкое ограждение,/ ты, богоугодными и добрыми делы/ на свещнице княжения возсиял еси/ и, совершен быти хотяй,/ себе и мира отверглся еси/ и Царствия Небеснаго достигл еси.

Хвала Богу благодействующу,/ глаголал еси, святе Олеже,/ на смертнем одре возлежа,/ зрю уже брег моря житейскаго,/ имже доселе ношашеся моя утлая ладия./ Тем и лице твое радостию Небесною просветися/ и скорбь учеников утешением сим растворися./ Мы же, очима веры зряще нетленную красоту души твоея,/ похвальная ти воспеваем.

Богоносне отче Олеже,/ блажен град твой и обитель, созданная тобою,/ идеже подвизатися изволил еси/ и по смерти мощи твоя святыя оставил еси,/ к нимже припадающе, усердно молим тя:/ не отступай от нас духом,/ побори борющия ны видимыя и невидимыя враги,/ да присно о тебе Бога хвалим.

Слава, глас 6:

Яко заря утренняя/ в земли Брянстей возсиял еси,/ преподобне Олеже,/ князей Русских украшение,/ евангельски два поприща скончал еси,/ в княжении благоверием,/ во иночестве же преподобием,/ тем и сугубый венец от Господа восприял еси,/ Емуже тепле молися о душах наших.

И ныне, праздника.

На Литургии

Блаженны от канона праздника песнь 3-я и святаго песнь 6-я. Прокимен, глас 5: Блажен муж, бояйся Господа,/ в заповедех Его восхощет зело. Стих: Сильно на земли будет семя его, род правых благословится. Апостол к Галатом, зачало 213. Аллилуиа, глас 8: Терпя потерпех Господа, и внят ми, и услыша молитву мою. Стих: Божии державнии земли зело вознесошася. Евангелие от Матфеа, зачало 81. Причастен: В память вечную будет праведник:

Молитва

О, преподобне отче, благоверне княже Олеже, угодниче Христов усердный, молитвенниче ко Господу теплый, защитниче в бедах и утешителю в печалех неустанный! Воззри, преблаженне, милостиво на град твой и виждь чада твоя, смиренно ти припадающая и служити тебе хотящая. Не отвержи требующих твоея помощи, но, яко благодетель и ходатай, моли присно Господа и Бога и Спаса нашего Иисуса Христа, да благословит землю Русскую, в мире и благоденствии сохраняя ю, грады умножая, достояние Свое соблюдая. Вознеси, богоносне отче наш, сие малое моление ко Владыце Христу, да утвердит во Святей Православней Церкви живый дух правыя веры и любве, благочестие непоколебимое, любомудрие, кротостию растворенное; да дарует пастырем ревность попечения о спасении людей, во еже неверующия просветити, заблуждшия наставити, отпадшия обратити и привлещи; изряднее же вся чада Церкве Православныя чисты да сохранит от мирских искушений, похотей плотских, суемудрия, суеверий и наваждений вражеских.

Ей, угодниче Божий, не презри нас, молящихся тебе, но помози нам скорым предстательством твоим, да, всяких бед, напастей и скорбей в сей жизни временней избежавше, кончину непостыдну обрящем и, тако на земли богоугодно поживше, жизни райския на Небеси сподобимся, идеже вкупе с тобою прославим человеколюбие и щедроты в Троице славимаго Бога, Отца и Сына и Святаго Духа, во веки веков. Аминь.

Развернуть

Богослужение сегодня

Тропари, кондаки, молитвы и величания

Тропарь святителю Иннокентию, епископу Иркутскому, глас 3

Свети́льниче Це́ркве пресве́тлый,/ озари́вый луча́ми добро́т твои́х страну́ сию́,/ и исцеле́ньми мно́гими притека́ющих к тебе́ с ве́рою/ Бо́га просла́вивый,/ мо́лим тя, святи́телю о́тче Инноке́нтие,/ огражда́й моли́твами твои́ми град сей// от всех бед и печа́ли.

Перевод: Светильник Церкви преяркий, озаривший лучами добродетелей своих страну эту, и многими исцелениями приходящих к тебе с верой Бога прославивший, молим тебя, святитель отче Иннокентий, охраняй молитвами твоими город этот от всех бед и скорбей.

Тропарь преподобному Феодору, князю Острожскому, Печерскому, в Дальних пещерах, глас 7

Преобрази́л еси́ земна́го княже́ния сла́ву/ во и́ночества о́браз смире́нный,/ и вме́сто враго́в ви́димых/ на неви́димыя ополчи́лся еси́,/ и, обою́ победи́тель кра́сен явля́яся,/ еди́н от чудотво́рец Пече́рских показа́лся еси́;/ те́мже и нам ре́вности Бо́жия дар испроси́,/ братолю́бием сердца́ на́ша просвети́// и ко спасе́нию ве́чному стези́ на́ша, Фео́доре блаже́нне, напра́ви.

Перевод: Ты преобразил славу земного княжения в смиренный образ монашества, и вместо видимых врагов вооружился против невидимых и, явившись прекрасным победителем и тех и других, ты стал одним из чудотворцев Печерских, потому и для нас испроси дар ревности Божией, любовью к ближним сердца наши просвети и ко спасению вечному пути наши, Феодор блаженный, направь.

Тропарь преподобному Стефану, игумену Печерскому, епископу Владимиро-Волынскому, глас 8

Уче́нию повину́яся Богоно́снаго Феодо́сия,/ поста́влен бысть от него́ вождь бы́ти свято́му его́ ста́ду,/ е́же до́бре пасы́й,/ це́рковь Богоро́дицы, во́лею Тоя́ осно́ванную чу́дне,/ соверши́л еси́ благоле́пно,/ приснопа́мятне Стефа́не,// в не́йже нам, моля́щимся, испроси́ от Христа́ Бо́га ве́лию ми́лость.

Перевод: Повинуясь учению Богоносного Феодосия, ты был поставлен им руководить святым его стадом, которое хорошо пас, церковь Богородицы, основанную по Ее воле чудесным образом, ты достойно построил, всегда вспоминаемый Стефан, в ней же нам, молящимся, испроси от Христа Бога великую милость.

Тропарь преподобномученику Макарию, архимандриту Каневскому, глас 4

Христу́, нас ра́ди с Небе́с соше́дшему,/ после́довал еси́ в по́двизех твои́х,/ Мака́рие, о́тче наш./ Его́же моли́ о нас, ублажа́ющих тя,/ проще́ние прегреше́ний дарова́ти нам,/ любо́вию же и смире́нием сердца́ на́ша озари́ти// и спасти́ ду́ши на́ша.

Перевод: Христу, нас ради с Небес сошедшему, ты последовал в подвигах твоих, Макарий, отче наш. Его же моли о нас, прославляющих тебя, прощение прегрешений даровать нам, любовью же и смирением сердца наши озарить и спасти души наши.

Тропарь святителю Фотию Московскому, митрополиту Киевскому и всея Руси, глас 4

Слове́с ева́нгельских послу́шателю/ и Боже́ственных уче́ний рачи́телю,/ прему́дрый наказа́телю,/ всегда́ стра́ху Госпо́дню поуча́яйся,/ в моли́твах к Бо́гу простира́яйся,/ загради́телю уст кривоглаго́лющим сло́во пра́выя ве́ры,/ апо́столом соприча́стниче,/ ве́ре Христо́вой утверди́телю,/ проро́чески веща́телю, святи́телю Фо́тие,/ моли́ Христа́ Бо́га// умири́ти мир и спасти́ ду́ши на́ша.

Перевод:

Словам евангельским послушный и о Божественных учениях заботящийся, премудрый наставник, всегда размышляющий о страхе Господнем, устремляющийся в молитвах к Богу, заграждающий уста искажающим слово православной веры, апостолов преемник, утвердитель веры Христовой, пророчеств известитель, святитель Фотий, моли Христа Бога дать мир всему миру и спасти души наши.

Тропарь благоверному великому князю Андрею Боголюбскому, глас 8

Я́ко благове́рен и пра́веден,/ за любо́вь Христа́ Бо́га от свои́х смерть прия́л еси́,/ кровь свою́ пролия́в,/ я́коже пре́жде сро́дницы твои́ и страстоте́рпцы Бори́с и Глеб,/ и́хже кро́вем совопие́т и твоя́ кровь, свя́те, к Бо́гу,/ я́коже А́веля и Заха́рии пра́ведных,/ благове́рный страстоте́рпче, вели́кий кня́же Андре́е,/ с ни́миже Христа́ Бо́га моли́ о стране́ на́шей, е́же Богоуго́дней бы́ти // и сыново́м росси́йским спасти́ся.

Перевод: Как благоверный и праведный, за любовь Христа Бога от своих ты принял смерть, кровь свою пролив, как прежде родственники твои и страстотерпцы Борис и Глеб, вместе с их кровью вопиет и твоя кровь, святой, к Богу, как Авеля и Захарии праведных (Быт.4:10; Мф.23:35), благоверный страстотерпец, великий князь Андрей, с ними же Христа Бога моли о стране нашей, чтобы ей быть угодной Богу, и сынам российским спастись.

Тропарь святителю Петру Московскому, митрополиту Киевскому и всея Руси чудотворцу, глас 4

Я́же пре́жде безпло́дная земле́,/ ны́не весели́ся:/ се бо Христо́с свети́льника в тебе́ показа́,/ я́ве сия́юща в ми́ре,/ и исцелева́юща неду́ги и боле́зни на́ша./ Сего́ ра́ди лику́й и весели́ся со дерзнове́нием:// святи́тель бо есть Вы́шняго сия́ соде́ловаяй.

Перевод:

Прежде бесплодная земля, ныне веселись: ибо вот, Христос светильник в тебе показал, ярко сияющий в мире и исцеляющий недуги и болезни наши. Потому ликуй и веселись со дерзновением: ибо святитель Всевышнего все это совершающий.

Тропарь преподобному Варлааму, игумену Печерскому, в Ближних пещерах, глас 1

Ми́ра кра́сная и сла́ву его́ оста́вль,/ прите́кл еси́ в пеще́ру,/ иде́же от си́лы преуспева́я в си́лу,/ был еси́ вождь Христо́ва ста́да, всесла́вне Варлаа́ме,/ е́же я́ко упас до́бре, упаси́ и нас, мо́лим тя,// сохраня́я от всех зол, да тя ублажа́ем.

Перевод: Блага мира и славу его оставив, пришел ты в пещеру, где преуспевая от силы в силу (Пс.83:8), был вождем Христова стада, всеми прославляемый Варлаам, которое ты прекрасно упас, так и нас упаси, молим тебя, сохраняя от всех зол, да прославляем тебя.

Тропарь равноапостольному Кириллу Философу, учителю Словенскому, глас 4

От пеле́н приле́жно/ прему́дрость сестру́ себе́ сотвори́в, Богогла́се,/ пресве́тлую ви́дев, я́ко деви́цу чи́сту,/ ю́же прие́м, приведе́,/ я́ко мони́сты златы́ми се́ю укра́сив свою́ ду́шу и ум,/ и обре́теся я́ко други́й Кири́лл, блаже́нне,// ра́зумом и и́менем му́дре.

Перевод: С младенчества настойчиво сделав мудрость своей сестрой (Притч.7:4), проповедник Божий, ты видел ее светлейшей, как непорочную деву, которую ты принял, привел к себе, словно золотым ожерельем украсил ею свою душу и ум, и стал (в монашестве) другим, Кирилл (в миру - Константин), блаженный, мудрый по имени и по разуму.

Тропарь равноапостольным Киpиллу и Мефодию, учителем Словенским, глас 4

Я́ко апо́столом единонра́внии/ и слове́нских стран учи́телие,/ Кири́лле и Мефо́дие Богому́дрии,/ Влады́ку всех моли́те,/ вся язы́ки слове́нския утверди́ти в Правосла́вии и единомы́слии,/ умири́ти мир// и спасти́ ду́ши на́ша.

Перевод:

Апостолам единомысленные и славянских стран учителя, Кирилл и Мефодий Богомудрые, Владыку всего молите все народы славянские в Православии и единомыслии утвердить, миром мир оградить и спасти души наши.

Тропарь преподобному и благоверному князю Олегу Брянскому, глас 8

От ю́ности возлюби́л Христа́ всем се́рдцем, преподо́бне,/ сла́ву земну́ю я́ко преходя́щу оста́вил еси́,/ и ца́рство земно́е в ничто́же вмени́в/ ли́ку и́нок ра́достно приче́лся еси́,/ и труды́ мно́гими град Бря́нск, а́ки со́лнце пресве́тло, озари́л еси́:/ тем быв Тро́ицы украше́ние,// моли́, кня́же Оле́же, Христа́ Бо́га спасти́ся душа́м на́шим.

Перевод:

С юности возлюбил Христа всем сердцем, преподобный, славу земную, как временную, ты оставил, и царство земное посчитав ничем, радостно принял монашество и многими трудами город Брянск, как яркое солнце, озарил ты, потому стал украшением Троицы, моли, князь Олег, Христа Бога о спасении душ наших.

Тропарь преподобному Нестору Летописцу, Печерскому, в Ближних пещерах, глас 4

Вели́ких князе́й ру́сских дея́ния/ и преподо́бных оте́ц Пече́рских жития́ и чудеса́ написа́вый,/ свое́ же, Богому́дре Не́сторе, мно́гих ти ра́ди доброде́телей и́мя/ напи́сано на Небеси́ стяжа́вый,// моли́ и нам написа́тися в Кни́ги Живо́тныя.

Перевод: Великих князей русских деяния и преподобных отцов Печерских жития и чудеса описавший, свое же имя, Богомудрый Нестор, ради многих твоих добродетелей удостоившийся вписать на Небесах, моли и нам быть записанными в Книге Жизни.

Тропарь преподобному Иову, игумену Почаевскому, глас 4

Многострада́льнаго пра́отца долготерпе́ние стяжа́в,/ Крести́телеву воздержа́нию уподобля́яся,/ Боже́ственныя же ре́вности обою́ приобща́яся,/ тех имена́ досто́йно прия́ти сподо́бился еси́/ и и́стинныя ве́ры был еси́ пропове́дник безбоя́знен:/ те́мже мона́хов мно́жества ко Христу́ приве́л еси́/ и вся лю́ди в Правосла́вии утверди́л еси́,/ И́ове преподо́бне о́тче наш,// моли́ спасти́ся душа́м на́шим.

Перевод: Обретя долготерпение много пострадавшего праотца, уподобляясь воздержанию Иоанна Крестителя и приобщаясь ревности по Богу обоих, ты достойно принял их имена и был безбоязненным проповедником истинной веры, потому привел множество монахов ко Христу и людей утвердил в Православии, Иов, преподобный отче наш, молись о спасении наших душ.

Тропарь святителю Киприану Московскому, митрополиту Киевскому и всея Руси, глас 4

И́же от Бо́га свы́ше Боже́ственною благода́тию соверше́н/ и благи́ми нра́вы укра́шен,/ Ду́хом Святы́м просвеще́н,/ соверши́в святы́ню в стра́се Бо́жии,/ сподо́блен бысть благода́ти Боже́ственнаго Ду́ха,/ пасы́й Це́рковь Бо́жию Ру́сския митропо́лии,/ посто́м вся побора́я, волне́ние претерпе́, гоне́ние премину́в,/ свята́го Петра́ митрополи́та всегда́ себе́ в по́мощь призыва́я,/ и сего́ помо́щника име́я,/ и того́ стопа́м после́дуя./ Служи́тель благоприя́тный,/ за́поведи Бо́жия соблюда́я, Ду́хом Бо́жиим наставля́емь,/ просвеща́я ве́рныя лю́ди уче́нием слове́с твои́х,/ поще́нием украси́ житие́ свое́,/ яре́м Госпо́день измла́да восприи́м,/ и па́че всех Христа́ возлюби́./ Того́ ра́ди и архиере́йским седа́лищем почте́н,/ и, я́ко светоза́рное со́лнце, от Се́рбския земли́ происше́д,/ и по вся концы́ Ру́сския земли́ доброде́телию просия́в,/ свети́ло яви́ся ми́рови,/ и преста́вися ко Го́споду от сея́ жи́зни в ве́чный поко́й,/ вели́кий архиере́ю Бо́жий, Киприа́не митрополи́те,/ учи́телю и наста́вниче Ру́сския земли́,/ всегда́ предстоя́ Престо́лу Пресвяты́я Тро́ицы,/ моли́ Го́спода приле́жно/ об архиере́ех и о всех христиа́нех,// да спасе́т тебе́ ра́ди ду́ши на́ша.

Перевод:

Будучи освящен от Бога свыше Божественной благодатью и украшен добродетельным нравом, просвещен Духом Святым, совершив святыню в страхе Божием (2Кор.7:1), ты удостоился благодати Божественного Духа, пасущий Церковь Божию Русской митрополии, постом все побеждая, испытания претерпев, гонения пройдя, святого митрополита Петра всегда себе в помощь призывая и его имея помощником, и следуя по его стопам. Служитель благоугодный, заповеди Божии соблюдая, Духом Божиим наставляем, просвещая верующих учением твоим, пощением украсил жизнь свою, ярмо Господне с молодости подняв и больше всех Христа возлюбив. Потому и архиерейской кафедрой почтен и, как сияющее солнце, произойдя из Сербской земли, во все концы Русской земли добродетелью просияв, ты явился светилом миру и преставился ко Господу от этой жизни в вечный покой, великий архиерей Божий, митрополит Киприан, учитель и наставник Русской земли, всегда предстоя Престолу Пресвятой Троицы, моли Господа усердно об архиереях и обо всех христианах, да спасет по молитвам твоим души наши.

Тропарь благоверному князю Ярополку, в Крещении Петру, Владимиро-Волынскому, глас 4

Я́ко благове́рен и пра́веден,/ за любо́вь Христа́ Бо́га от свои́х си смерть прия́л еси́, Яропо́лче,/ страстоте́рпче святы́й, благове́рный кня́же Волы́нский,/ и пролия́л еси́ кровь твою́,/ я́коже пре́жде сро́дницы твои́ и страстоте́рпцы, Богоблаже́ннии Бори́с и Глеб,/ и́хже подвиго́м ревну́я благоче́стно,/ Го́сподеви взыва́л еси́ усе́рдно:/ да́руй ми кончи́ну, я́коже бра́тиям мои́м,/ да и аз омы́ю грехи́ моя́ кро́вию мое́ю/ и изба́влюся ми́ра сего́ тще́тнаго и мяте́жнаго./ Те́мже, днесь соше́дшеся в па́мять твою́,/ ве́рою и любо́вию сла́вим Го́спода,/ укрепи́вшаго Тебе́ в по́двизе напра́сныя сме́рти,/ я́коже бо а́гнец незло́бивый,/ от раба́ заколе́н еси́,/ и себе́ сама́го же́ртву непоро́чну Го́сподеви прине́сл еси́,/ Его́же моли́, присноблаже́нне,/ спасти́ Оте́чество твое́ // и сыново́м Росси́йским спасти́ся.

Перевод: Как благоверный и праведный, за любовь Христа Бога от своих смерть принял ты, Ярополк, мученик святой, благоверный князь Волынский, и пролил кровь твою, как ранее родственники твои и мученики, Богоблаженные Борис и Глеб, их же подвигам благочестиво ревнуя, к Господу взывал ты усердно: «Даруй мне кончину, как и братьям моим, чтобы и я омыл грехи мои кровью моей и избавился от мира этого тщетного и суетного». Потому сегодня, собравшись в память твою, с верой и любовью прославляем Господа, укрепившего тебя в подвиге внезапной смерти, ибо ты, как невинный агнец, был заколот рабом и самого себя принес в непорочную жертву Господу, Его же моли, вечно блаженный, спасти Отечество твое и сынам Российским спастись.

Тропарь равноапостольному князю Владимиру, во Святом Крещении Василию, глас 1

Я́ко нача́льнику Креще́ния/ и ко́реню ве́ры Боже́ственныя,/ и́долов разруши́телю,/ блаже́нне кня́же Васи́лие равноапо́стольне, вопие́м ти:/ сла́ва вразу́мльшему тя Христу́ Бо́гу,/ сла́ва освяти́вшему тя Креще́нием Свои́м,// сла́ва просвети́вшему тобо́ю всю страну́ Ру́сскую.

Перевод: Как зачинателю Крещения и началу веры Божественной, идолов разрушителю, блаженный равноапостольный князь Василий, взываем к тебе: «Слава вразумившему тебя Христу Богу, слава Освятившему тебя Крещением Своим, слава Просветившему тобой всю страну Русскую».

Ин тропарь равноапостольному князю Владимиру, во Святом Крещении Василию, глас 4

Уподо́бился еси́ купцу́, и́щущему до́браго би́сера,/ славнодержа́вный Влади́мире,/ на высоте́ стола́ седя́ ма́тере градо́в, богоспаса́емаго Ки́ева:/ испыту́я же и посыла́я к Ца́рскому гра́ду/ уве́дети правосла́вную ве́ру,/ обре́л еси́ безце́нный би́сер - Христа́,/ избра́вшаго тя я́ко втора́го Па́вла,/ и оттря́сшаго слепоту́ во святе́й купе́ли,/ душе́вную вку́пе и теле́сную./ Те́мже пра́зднуем твое́ успе́ние,/ лю́дие твои́ су́ще:// моли́ спасти́ся держа́вы твоея́ Росси́йския нача́льником и мно́жеству владо́мых.

Перевод:

Уподобился ты купцу, ищущему хороших жемчужин, славный властитель Владимир, восседая на высоком престоле матери городов, Богоспасаемого Киева: ибо испытывая и посылая в Царьград, узнать о православной вере, обрел ты бесценный жемчуг – Христа, избравшего тебя, как второго Павла; и, как он, стряхнул ты слепоту во святой купели, душевную, и вместе телесную. Потому мы, люди твои, празднуем твое успение; моли о спасении в державе твоей Российской начальствующих и множества ее граждан.

Тропарь равноапостольному Мефодию, архиепископу Моравскому, глас 4

Святи́теля Твоего́, Христе́,/ творя́щим све́тло торжество́ успе́ния/ ми́лость Твою́ свы́ше пода́ждь,/ отве́рзи же Ца́рствия две́ри,/ разреши́ же у́зы на́ша мно́гих грехо́в/ хода́тайством свята́го Твоего́ ученика́,// отца́ на́шего.

Перевод: Служащим светло праздник памяти успения святителя Твоего, Христос, подай милость Твою свыше, открой двери Царствия Небесного, развяжи узы многих наших грехов ходатайством святого Твоего ученика, отца нашего.

Тропарь святителям Киприану, Фотию и Ионе Московским, митрополитам Киевским и всея Руси, на перенесение мощей, глас 8

Я́ко Све́тлаго Со́лнца светоза́рныя зве́зды,/ Тро́ическим Све́том озаря́ете сердца́ ве́рных,/ пренесе́нием честны́х моще́й ва́ших,/ Тро́ицы сосу́ди яви́стеся чи́стии ва́шим житие́м,/ и научи́сте лю́ди тве́рдо ве́ре Христо́ве,/ и скве́рну отгна́сте ва́шими святы́ми за́поведьми,/ и упасо́сте до́бре Христо́во ста́до, пору́ченное вам,/ Богому́дре Киприа́не, со сла́вным Фо́тием и со Ио́ною тве́рдым,// моли́теся Христу́ Бо́гу, да спасе́т ду́ши на́ша.

Перевод:

Как звезды, сияющие от Яркого Солнца, Светом Троицы озаряете сердца верующих перенесением почитаемых мощей ваших. Вы явились чистыми сосудами Троицы в своей жизни и научили людей твердо вере Христовой, и нечистоту отогнали вашими святыми наставлениями, и отлично упасли Христово стадо, порученное вам, Богомудрый Киприан со славным Фотием и с твердым Ионой, молитесь Христу Богу, да спасет души наши.

Тропарь преподобному Николе Святоше, князю Черниговскому, Печерскому чудотворцу, в Ближних пещерах, глас 2

Оте́чество и сла́ву княже́ния твоего́ оста́вил,/ Кня́зю смире́ния, Христо́ви, усе́рдно после́довал еси́,/ преподо́бне о́тче наш Нико́ло;/ тем прия́л еси́ от Него́ ве́чное ца́рство и сла́ву на Небеси́,// иде́же лику́я, помина́й нас чту́щих па́мять твою́ ве́рно.

Перевод: Отечество и славу княжения твоего оставил, Князю смирения, Христу, усердно последовал ты, преподобный отче наш Никола, потому получил от Него вечное царство и славу на Небесах, где радуясь, вспоминай нас, почитающих память твою с верой.

Тропарь святителям Московским, глас 4

Первопресто́льницы Росси́йстии,/ и́стиннии храни́телие апо́стольских преда́ний,/ столпи́ непоколеби́мии, правосла́вия наста́вницы,/ Пе́тре, Алекси́е, Ио́но, Фили́ппе и Ермоге́не,/ Влады́ку всех моли́те/ мир вселе́нней дарова́ти,// и душа́м на́шим ве́лию ми́лость.

Перевод:

Первосвятители Российские, истинные хранители апостольских преданий, непоколебимые столпы, наставники Православия, Петр, Алексей, Иона, Филипп и Ермоген, Владыку всех молите даровать мир вселенной и душам нашим великую милость.

Тропарь преподобномученику Афанасию, игумену Брестскому, глас 2

Блаже́н еси́, о́тче наш Афана́сие,/ я́ко ве́рно пожи́л еси́, стоя́ бо́дренно за святу́ю Правосла́вную ве́ру,/ со умиле́нием при́сно поя́ неседа́льное Пречи́стей,/ запове́дуя никому́же наруша́ти Правосла́вныя ве́ры святы́я,/ пострада́в за свиде́тельство и́стины да́же до сме́рти./ Мы же чту́ще святы́ню твою́,/ со дерзнове́нием взыва́ем ти:/ о́тче наш, преподобному́чениче Афана́сие,// похвало́ и украше́ние на́ше.

Перевод: Блажен ты, отче наш Афанасий, так как ты жил благочестиво, стоя бдительно за Православную веру, со смирением всегда воспевая акафист Пречистой, заповедуя никому не нарушать святой Православной веры, пострадав за свидетельство истины даже до смерти. Мы же, почитая святость твою, с дерзновением взываем к тебе: «Отче наш, преподобномученик Афанасий, ты слава и украшение наше».

Тропарь равноапостольной княгине Ольге, во Святом Крещении Елене, глас 1

Крила́ми богоразу́мия впери́вши твой ум,/ возлете́ла еси́ превы́ше ви́димая тва́ри,/ взыска́вши Бо́га и Творца́ вся́ческих,/ и, Того́ обре́тши, па́ки рожде́ние Креще́нием прия́ла еси́,/ дре́ва живо́тнаго наслажда́ющися, нетле́нна во ве́ки пребыва́еши,// О́льго присносла́вная.

Перевод:

Крыльями Богопознания окрылив свой ум, взлетела ты выше видимого творения, взыскав Бога и Творца всего и, Его обретя, новое рождение получила в Крещении, наслаждаясь Древа Жизни, нетленной во веки пребываешь, Ольга всегда прославляемая.

Тропарь святителю Амфилохию Печерскому, Владимиро-Волынскому, глас 4

От мирска́го мяте́жа изше́д,/ в пеще́рах Ки́евских Феодо́сия блаже́ннаго Богому́дренно всели́лся еси́,/ святи́телю Христо́в, о́тче Амфило́хие,/ и отсю́ду во епи́скопа Богоспаса́емей па́стве Влади́миро-Волы́нстей поста́вленный,/ в труде́х, бде́ниих и поще́ниих свя́то подвиза́лся еси́./ И та́ко дости́г доброде́телей соверше́нства,/ па́ки в пеще́ры святы́я возврати́лся еси́,/ иде́же и дух свой благоче́стно преда́л еси́ Го́сподеви, всече́стне,/ к ли́ку преподо́бных Пече́рских причте́н,/ с ни́ми же моли́ся Христу́, всече́стне,// спасти́ся душа́м на́шим.

Перевод: От мирской суеты удалившись, в пещерах Киевских Феодосия блаженного Богомудро поселился ты, святитель Христов, отче Амфилохий, и там в епископа Богоспасаемой пастве Владимиро-Волынской поставленный, в трудах, бдениях и пощении свято подвизался ты. И так достигнув совершенства добродетелей, снова в пещеры святые возвратился, где и дух свой благочестиво предал ты Господу, почитаемый, к лику преподобных Печерских причтенный, с ними же молись Христу, почитаемый, о спасении душ наших.

Тропарь Собору Волынских святых, глас 4

Приспе́ день све́тлаго торжества́,/ лю́дии Волы́нстии ра́дуются,/ и с ни́ми вся Росси́йская Це́рковь ликовству́ет/ во псалме́х и пе́ниих, и пе́снех духо́вных,/ днесь бо, я́коже со́лнце незаходи́мое,/ всем возсия́ па́мять/ святы́х и Богому́жных уго́дников и чудотво́рцев Волы́нских/ святи́теля Стефа́на чу́днаго,/ иера́рхом Волы́нским первопресто́льника,/ и свята́го благове́рнаго Яропо́лка/, блаже́ннаго страда́льца Богому́жнаго,/ и с ни́ми Амфило́хия, святи́теля Волы́нскаго,/ и победоно́снаго Фео́дора, Остро́жскаго кня́зя Богодарова́ннаго,/ и преподо́бнаго И́ова Поча́евскаго присноблаже́ннаго/, и́хже моли́твами, Го́споди,/ зе́млю оте́ческую на́шу в Правосла́вии и ми́ре утверди́,/ и спаси́ всех иму́ще ку́пно о нас Моли́твенницу усе́рдную,/ Пресвяту́ю Ма́терь Свою́ Богоро́дицу,/ благода́тне сия́ющую в цельбоно́сней стопе́ Свое́й/ и чудотво́рней ико́не на горе́ Поча́евстей/ и заступле́ньми про́чих уго́дников Волы́нския па́ствы,/ Иулиа́нии, блаже́нныя де́вы Ольша́нския,// и свята́го преподобному́ченика Мака́рия, архимандри́та О́вручскаго.

Перевод:

Настал день светлого торжества, люди Волынские радуются, и с ними вся Российская Церковь ликует в псалмопениях и песнопениях духовных, ибо сегодня, как незаходящее солнце, всем воссияла память святых и Богомудрых угодников и чудотворцев Волынских: святителя Стефана удивительного, первопрестольника иерархов Волынских, и святого благоверного Ярополка, блаженного мученика Богомудрого, и с ними Амфилохия, святителя Волынского, и победоносного Феодора, Острожского князя Богодарованного, и преподобного Иова Почаевского вечноблаженного, по их молитвам, Господи, землю отечества нашего в Православии и мире утверди, и спаси всех по молитвам усердным Пречистой Матери Своей Богородицы, благодатью сияющей в подающей исцеления стопе Своей и чудотворной иконе на горе Почаевской, и защитой других служителей Волынской паствы, Иулиании, блаженной девы Ольшанской, и святого преподобномученика Макария, архимандрита Овручского.

Тропарь святителю Нифонту, епископу Новгородскому, глас 3

Я́ко сый нра́вом правосла́вных/ Восто́чныя Це́ркве преда́ний и́стинный защи́тник,/ сподо́бился еси́ вели́каго во отце́х Феодо́сия/ ви́дети по сме́рти, я́ко жи́ва,/ возвеща́юща тебе́ Ца́рствия Небе́снаго насле́дие,/ его́же неизрече́нных добро́т/ ны́не с ним неразлу́чно наслажда́яся,// моли́ и о нас, ча́дех свои́х, Ни́фонте прехва́льне.

Перевод: Поскольку ты по образу действий был истинным защитником православных преданий Восточной Церкви, ты удостоился видеть великого из отцов - Феодосия - после его смерти, как живого, возвещающего тебе наследие Царствия Небесного. Его же неизреченных красот неразлучно наслаждаясь, моли и о нас, детях твоих, Нифонт, достойный всяческих похвал.

Тропарь праведной Иулиании деве, княжне Ольшанской, глас 8

Я́ко непоро́чная неве́ста Нетле́ннаго Жениха́ Христа́,/ пра́ведная де́во Иулиани́е,/ с све́тлою свеще́ю до́брых дел вошла́ еси́ в черто́г Его́ Небе́сный/ и та́мо со святы́ми блаже́нства ве́чнаго наслажда́ешися./ Те́мже моли́, Его́же возлюби́ла еси́/ и Ему́же де́вство твое́ обручи́ла еси́,// спасти́ ду́ши на́ша.

Перевод: Как непорочная невеста Нетленного Жениха Христа, праведная дева Иулиания, с яркою свечой добрых дел вошла ты в чертог Его Небесный и там со святыми наслаждаешься вечным блаженством. Потому моли, Кого ты возлюбила и Ему же девство свое обручила, о спасении душ наших.

Тропарь преподобному Амфилохию Почаевскому, глас 4

Земли́ Волы́нския пресла́вна подви́жника/ и оби́тели Поча́евския досто́йна насельника/ люде́й правосла́вных изря́дна цели́теля/ яви́ тя́ Це́ркви Свое́й Христо́с Бо́г на́ш,/ преподо́бне о́тче Амфило́хие,/ Ему́ же усе́рдно моли́ся/ от наве́т вра́жиих свободи́тися// и спасти́ся душа́м на́шим.

Перевод: Земли Волынской преславного подвижника и обители Почаевской достойного монаха, людей православных прекрасного целителя, явил тебя Церкви Своей Христос Бог наш, преподобный отче Амфилохий, Ему же усердно молись от козней вражеских нам освободиться и спастись душам нашим.

Тропарь святителю Феогносту, митрополиту Киевскому и всея Руси, глас 4

Измла́да, преподо́бне, приле́жно подвиза́вся,/ вся́ зако́ны Боже́ственныя позна́л еси́,/ хра́мов Бо́жиих строи́тель,/ и защи́тник па́ствы твоея́ яви́ся,/ Те́мже я́ко престо́ла святи́теля Петра́ насле́дника,/ и святи́теля вели́каго чту́ще тя́,/ мо́лим ча́да твоя́, блаже́нне:/ от все́х бе́д изба́ви на́с/ я́же ко Христу́ моли́твами твои́ми,// святи́телю Христо́в Феогно́сте, о́тче на́ш.

Перевод: С молодости, преподобный, прилежно подвизался, все законы Божественные познал ты, храмов Божиих строителем и защитником паствы своей ты был, потому, как наследника престола святителя Петра, тебя, как великого святителя, почитаем и молим, чада твои, блаженный, от всех бед избавь нас молитвами твоими ко Христу, святитель Христов Феогност, отче наш.

Ин тропарь преподобному Феодору, князю Острожскому, Печерскому, в Дальних пещерах, глас 4

Кня́жеских дароноше́ний и всего́ су́етствия мирска́го спе́шне отве́ргся,/ Бо́жиих же дарова́ний, прему́дре Фео́доре, преи́скренне сподо́битися жела́я,/ прия́л еси́ и́ноческий о́браз/ и, в нем смире́нным послуша́нием и безмо́лвным житие́м Царю́ Небе́сному благоугожда́я,/ получи́л еси́ от Него́ безсме́ртныя да́ры,/ и́хже и нам, чту́щим тя,// получи́ти моли́ся.

Перевод: От княжеских даров и всей мирской суеты ты поспешил отказаться, Божиих же дарований, премудрый Феодор, с искренней верой желая удостоиться, ты принял монашество и в нем смиренным послушанием и безмолвной жизнью Царю Небесному благоугождая, получил от Него бессмертные дары, их же и нам, почитающим тебя, получить молись.

Ин тропарь преподобному Феодору, князю Острожскому, Печерскому, в Дальних пещерах, глас 4

Я́ко благочести́ваго ко́рене пречестна́я о́трасль был еси́,/ блаже́нне Фео́доре,/ яви́ бо тя Христо́с/ я́ко вои́стинну богодарова́нное сокро́вище Волы́нстей земли́,/ но́ваго побо́рника ве́ры Правосла́вныя,/ и наро́ду росси́йскому пресла́вна и благоприя́тна./ Те́мже ны́не, плоды́ светоно́сных трудо́в твои́х/ в стране́ на́шей под се́нию Святы́я Це́ркве Правосла́вныя наслажда́ющеся,/ хва́лим Го́спода,/ дарова́вшаго тебе́ си́лу и кре́пость на сопроти́вныя,/ Его́же моли́ спасти́ оте́чество твое́,/ и держа́ве сро́дник твои́х богоуго́дней бы́ти,// и сыново́м росси́йским спасти́ся.

Перевод: Ты был как драгоценный росток из благочестивого корня, блаженный Феодор, ибо тебя явил Христос как истинно Богодарованное сокровище Волынской земли, нового удивительного защитника веры Православной, нужного российскому народу. Потому сейчас, наслаждаясь плодами несущих свет трудов твоих в стране нашей под сенью Святой Православной Церкви, хвалим Господа, даровавшего тебе силу и крепость против врагов, Его же моли о спасении Отечества твоего, да будет родная твоя страна угодна Богу и люди Российские спасутся.

Ин тропарь преподобному Стефану, игумену Печерскому, епископу Владимиро-Волынскому, глас 8

Правосла́вия наста́вниче,/ благоче́стия учи́телю и чистоты́,/ Волы́нския па́ствы свети́льниче,/ архиере́ев Богодухнове́нное удобре́ние,/ Стефа́не прему́дре,/ уче́ньми свои́ми вся просвети́л еси́, цевни́це духо́вная,// моли́ Христа́ Бо́га спасти́ся душа́м на́шим.

Перевод: Наставник православия, учитель благочестия и чистоты, светильник Волынской паствы, архиеерев Богодухновенное украшение, Стефан премудрый, учением своим все просветил ты, духовная лира, моли Христа Бога о спасении наших душ.

Ин тропарь преподобному Стефану, игумену Печерскому, епископу Владимиро-Волынскому, глас 2

Я́ко сый Богоно́снаго Феодо́сия учени́к/ и и́стинный жития́ его́ подража́тель,/ пе́рвый по нем бре́мя настоя́тельства понесы́й,/ те́мже и моще́й его́ честны́х самови́дец бы́ти сподо́бился еси́,/ я́же с про́чими святоле́пно прине́с,/ насле́дил еси́ с те́мже Ца́рство Небе́сное,/ Е́же получи́ти и нам, чту́щим тя, Стефа́не,// Го́сподеви моли́ся.

Перевод: Как Богоносный ученик Феодосия и настоящий последователь его жизни, первый после него понесший бремя настоятельства, потому и удостоившийся быть очевидцем его почитаемых мощей, которые ты вместе с другими достойно святости (этих мощей) принес, наследовал ты с ним Царство Небесное, о получении Которого и нами, почитающими тебя, Стефан, Господу молись.

Ин тропарь преподобномученику Макарию, архимандриту Каневскому, глас 4

Боже́ственным жела́нием весь сам себе́ от ю́наго во́зраста Го́сподеви возложи́в,/ яви́лся еси́ свети́льник све́тлый гра́ду твоему́,/ поуча́я всех и́стинней ве́ре и житию́ богоуго́дному,/ священному́чениче Мака́рие, О́вручская похвало́./ Сего́ ра́ди, я́ко а́гнец непоро́чный, гони́мый от распрелюби́вых враго́в,/ возше́л еси́ во оби́тель Ка́невскую,/ иде́же, я́ко па́стырь до́брый, ду́шу твою́ положи́л еси́ за о́вцы твоя́./ И ны́не ко всечестне́й ра́це многоцеле́бных моще́й твои́х/ мы, гре́шнии, со умиле́нием притека́юще,/ дар исцеле́ния прие́млем, многострада́льне:/ ты бо при́сно источа́еши боля́щим здра́вие, печа́льным утеше́ние/ и всем, чту́щим тя, вся́кое исполня́еши тре́бование,// моля́ся Христу́ Бо́гу спасти́ся душа́м на́шим.

Перевод: Устремляясь к Богу с юного возраста, всего себя ты посвятил Господу, и явился ярким светилом для города твоего, поучая всех истинной вере и богоугодной жизни, священномученик Макарий, слава города Овруч. Поэтому, как непорочный агнец, гонимый врагами - любителями раздоров, ты пришел в Каневский монастырь, где, как добрый пастырь, положил свою жизнь за овец (Ин.10:11). И сейчас к почитаемой всеми раке с подающими многие исцеления мощами твоими мы, грешные, в печалях приходя, получаем дар исцеления, много пострадавший, ибо ты всегда источаешь здоровье болеющим, утешение печальным и всем, почитающим тебя, подаешь всё необходимое, молясь Христу Богу о спасении наших душ.

Ин тропарь преподобномученику Макарию, архимандриту Каневскому, глас 8

Ко всечестне́й ра́це многоцеле́бных моще́й твои́х,/ преподобному́чениче Мака́рие,/ мы, гре́шнии, притека́юще, дар исцеле́ния прие́млем:/ ты бо при́сно источа́еши боля́щим здра́вие, печа́льным утеше́ние/ и всех, чту́щих тя, вся́кое исполня́еши тре́бование,// моля́щеся Христу́ Бо́гу спасти́ся душа́м на́шим.

Перевод: К почитаемой всеми раке с подающими многие исцеления мощами твоими, преподобномученик Макарий, мы, грешные, приходя получаем дар исцеления, ибо ты всегда ты всегда источаешь здоровье болеющим здоровье, утешение печальным и всем, почитающим тебя, подаешь всё необходимое, молясь Христу Богу о спасении наших душ.

Ин тропарь благоверному великому князю Андрею Боголюбскому, глас 3

Е́же во пло́ти житию́ твоему́ удиви́шася а́нгельстии чи́ни:/ ка́ко с те́лом к неви́димым сплете́нием изше́л еси́, пресла́вне,/ и уязви́л еси́ де́монския полки́./ Отону́дуже, Андре́е, Христо́с тебе́ воздаде́ бога́тыми дарова́ньми:// сего́ ра́ди, о́тче, моли́ спасти́ся душа́м на́шим.

Перевод: Житию твоему во плоти удивились ангельские воинства: как ты, в тело облеченный, вступил в борьбу с невидимым врагом и поразил демонов полки, всехвальный. За то, Андрей, Христос тебе богатыми дарованиями воздал; потому, отче, ходатайствуй [пред Христом Богом] о спасении душ наших.

Ин тропарь святителю Петру Московскому, митрополиту Киевскому и всея Руси чудотворцу, глас 4

Благове́рно пожи́в в ми́ре,/ житие́м чи́стым просвети́вся,/ уче́нием святи́тельства прия́т па́ству,/ апо́столом насле́дниче./ Тем прие́м дар чуде́с от Бо́га, о́тче Пе́тре,/ моли́ Христа́ Бо́га,// да спасе́т ду́ши на́ша.

Перевод:

Благочестиво прожив в мире, ты просиял чистой жизнью и принял паству как святитель, наследник апостолов. Потому получил дар чудотворений от Бога, отче Петр, моли Христа Бога о спасении душ наших.

Ин тропарь святителю Петру Московскому, митрополиту Киевскому и всея Руси чудотворцу, глас 8

Лику́й све́тло благосла́внейший гра́де Москва́,/ име́яй в себе́ архиере́я Петра́,/ я́ко зарю́ со́лнца, всю Росси́ю чудодея́нии озаря́юща,/ той бо не́мощи врачу́ет, и неду́ги я́ко тьму прого́нит от вопию́щих ему́:/ ра́дуйся, иера́рше Бо́га Вы́шняго,// тобо́ю сия́ па́стве твое́й соде́ловающаго.

Перевод:

Торжествуй светло, славный город Москва, имеющий у себя архиерея Петра, как сиянием солнца, всю Россию чудотворениями озаряющего, ибо он врачует болезни и прогоняет их, как тьму, от взывающих к нему: «Радуйся, иерарх Бога Вышнего, через тебя все это для паствы твоей Делающего».

Ин тропарь святителю Петру Московскому, митрополиту Киевскому и всея Руси чудотворцу, на перенесение мощей, глас 4

Наста́ днесь всечестны́й пра́здник/ пренесе́ния честны́х моще́й твои́х, святи́телю Пе́тре,/ веселя́ изря́дно твое́ ста́до,/ и ве́рное оте́чество, и лю́ди,/ о ни́хже не оскудева́й, моля́ся Христу́ Бо́гу,/ е́же от Него́ дарова́нней ти па́стве сохрани́тися от враг ненаве́тованней// и спасти́ся душа́м на́шим.

Перевод:

Сегодня настал почитаемый всеми праздник перенесения священных мощей твоих, святитель Петр, особо радующий твое стадо, и верное отечество, и людей, о которых не прекращай молиться Христу Богу, чтобы дарованной от Него тебе пастве сохраниться в безопасности от ухищрений врагов и спастись душам нашим.

Ин тропарь преподобному Нестору Летописцу, Печерскому, в Ближних пещерах, глас 4

Времена́ и ле́та достопа́мятных дея́ний,/ по́двиги и труды́ Богоно́сных оте́ц,/ Не́сторе прему́дре, напису́я,/ любо́вию возгоре́лся еси́ после́довати стопа́м первонача́льных,/ с ни́миже не преста́й моли́тися Христу́ Бо́гу,// спасти́ся душа́м на́шим.

Перевод: Времена и годы достойных памяти деяний, подвиги и труды Богоносных отцов, Нестор премудрый, описывая, любовью возгорелся ты последовать по стопам этих святых, с ними же не переставай молиться Христу Богу о спасении душ наших.

Ин тропарь преподобному Иову, игумену Почаевскому, на обретение мощей, глас 4

Возло́жь на ся и́го Христо́во от ю́ности,/ преподо́бне о́тче И́ове,/ многоле́тне свя́то подвиза́лся еси́/ на по́прище благоче́стия во оби́тели Уго́рницстей и на о́строве Ду́бенстем,/ и, прише́д к горе́ Поча́евстей,/ зна́менанней цельбоно́сною стопо́ю Пресвяты́я Богоро́дицы,/ в те́сней пеще́ре ка́менней/ богомы́слия ра́ди и моли́твы многокра́тно заключа́лся еси́,/ и, благода́тию Бо́жиею укрепля́яся,/ му́жественно потруди́лся еси́/ на по́льзу Це́ркве Христо́вы и оби́тели твоея́,/ ку́пно же и проти́ву враго́в Правосла́вия и благоче́стия христиа́нскаго,/ и, наста́вив сицево́му ополче́нию и́ночествующих,/ победи́тели тех предста́вил еси́ Влады́це и Бо́гу.// Того́ моли́ спасти́ся душа́м на́шим.

Перевод: Возложив на себя иго Христово с юности (Мф.11:29-30), преподобный отче Иов, многие годы ты свято подвизался на поприще благочестия в Угорницкой обители и на острове Дубенском и, прийдя к горе Почаевской, ознаменовавшейся исцеляющей стопой Пресвятой Богородицы, в тесной пещере каменной, ради богомыслия и молитвы ты многократно закрывался и, благодатью Божией укрепляясь, мужественно потрудился ты на пользу Церкви Христовой и обители твоей, а также против врагов Православия и благочестия христианского и, обучая тому же ряды монашествующих, ты привел их как победителей Владыке и Богу. Его моли о спасении наших душ.

Ин тропарь равноапостольному князю Владимиру, во Святом Крещении Василию, глас 8

Правове́рия наста́вниче/ и всея́ Руси́ просвети́телю,/ благочести́вый вели́кий кня́же Влади́мире,/ святы́м Креще́нием всех просвети́л еси́/ и це́ркви мно́ги сла́вны украси́л еси́,/ о прему́дре Васи́лие,// Христа́ Бо́га моли́ спасти́ся душа́м на́шим.

Перевод: Православия наставник и всей Руси просветитель, благочестивый великий князь Владимир, святым Крещением всех просветил ты и многие церкви чудесно украсил, о премудрый Василий, Христа Бога моли о спасении душ наших.

Ин тропарь равноапостольной княгине Ольге, во Святом Крещении Елене , глас 8

В тебе́, Богому́драя Еле́но, изве́стен спасе́ния о́браз бысть в Ру́сстей стране́,/ я́ко, прии́мши ба́ню свята́го Креще́ния, после́довала еси́ Христу́,/ творя́щи же и уча́щи, е́же оста́вити и́дольскую пре́лесть,/ восприя́ти же попече́ние о души́, ве́щи безсме́ртней,// те́мже и со А́нгелы ра́дуется, равноапо́стольная, дух твой.

Перевод: В тебе, Богомудрая Елена, точный образ спасения был для Русской страны, так как ты, приняв купель святого Крещения, последовала Христу, делом научая оставить идольское обольщение и взять попечение о душе, творении бессмертном, потому и с Ангелами радуется, равноапостольная, дух твой.

Ин тропарь равноапостольной княгине Ольге, во Святом Крещении Елене , глас 4

Оста́вивши лесть и́дольскую,/ после́довала еси́ Христу́, Безсме́ртному Жениху́, О́льго Богому́драя,/ в Его́же черто́зе ра́дующися,/ непреста́нно моли́ся// о чту́щих ве́рою и любо́вию святу́ю па́мять твою́.

Перевод: Оставив обман идолопоклонства, ты последовала Христу, Бессмертному Жениху, Ольга Богомудрая, в Его же чертоге радуясь, не переставая молись о почитающих с верой и любовью святую память твою.

Ин тропарь равноапостольной княгине Ольге, во Святом Крещении Елене, еллинский, глас 3

Свята́я равноапо́стольная избра́ннице Христо́ва, княги́не О́льго,/ наро́д твой слове́сным и чи́стым Христо́вым млеко́м напои́вшая,/ моли́ся Ми́лостивому Бо́гу,/ да прегреше́ний оставле́ние// пода́ст душа́м на́шим.

Перевод: Святая равноапостольная избранница Христова, княгиня Ольга, народ твой словесным и чистым Христовым молоком напоившая (1Пет.2:2), молись Милостивому Богу, да прегрешений прощение подаст душам нашим.

Ин тропарь Собору Волынских святых, глас 4

Приспе́ день све́тлаго торжества́,/ оби́тель Пече́рская ра́дуется/ и с не́ю благослове́нная Поча́евская Ла́вра ликовству́ет/ во псалме́х и пе́ниих, и пе́снех духо́вных,/ днесь бо, я́коже со́лнце незаходи́мое,/ всем возсия́ па́мять/ преподо́бных и Богоно́сных оте́ц Пече́рских,/ от ни́хже во́лею Бо́жиею изыдо́ша/ первонача́льницы и́ноческаго жития́ на горе́ Поча́евстей,/ и́хже моли́твами, Го́споди,/ зе́млю оте́чественную на́шу в Правосла́вии и ми́ре утверди́/ и поми́луй всех, иму́ще ку́пно о нас Моли́твенницу и Засту́пницу усе́рдную,/ Пречи́стую Ма́терь Свою́ Богоро́дицу,/ от лет дре́вних благода́тне сия́ющую в цельбоно́сней стопе́ Свое́й/ и чудотво́рней Свое́й ико́не во оби́тели Поча́евстей// в просвеще́ние и спасе́ние душ на́ших.

Перевод: Настал день светлого торжества, обитель Печерская радуется, и с ней благословенная Почаевская Лавра ликует в псалмопениях и песнопениях духовных, ибо сегодня, как незаходящее солнце, всем воссияла память преподобных и Богоносных отцов Печерских, от них же по воле Божией вышли первоначальники монашеской жизни на горе Почаевской, по их молитвам, Господи, землю нашего отечества в Православии и мире утверди и помилуй всех по молитвам Защитницы усердной, Пречистой Матери Своей Богородицы, издревле благодатью сияющей в подающей исцеления стопе Своей и чудотворной Своей иконе в обители Почаевской для просвещения и спасения душ наших.

Ин тропарь святителю Нифонту, епископу Новгородскому, глас 4

От мирска́го мяте́жа из млады́х ногте́й/ исше́д в ти́хое приста́нище,/ честны́я оби́тели Пече́рския дости́гл еси́/ и, та́мо яре́м Христо́в восприи́м на ся,/ ра́вно А́нгелом житие́ поживе́,/ отню́ду же прише́д, святи́телю Христо́в Ни́фонте, в вели́кий Но́вград,/ и архиере́йский престо́л восприя́л еси́/ и мно́ги лю́ди уче́нием свои́м ко Христу́ приве́л еси́,// Его́же моли́, святи́телю преподо́бне, спасти́ся душа́м на́шим.

Перевод: От мирской суеты с юности удалился в тихое пристанище почитаемой Печерской обители и там ярмо Христово взял на себя (Мф.11:29), прожил жизнь, подобную ангельской, оттуда же пришел, святитель Христов Нифонт, в Великий Новгород, принял архиерейский престол и многих людей учением своим ты привел ко Христу. Его же моли, святитель преподобный, о спасении наших душ.

Ин тропарь праведной Иулиании деве, княжне Ольшанской, глас 2

Де́вства добро́тами преочище́на/ и целому́дрия цветы́ венча́вшися,/ Богоблаже́нная де́во Иулиани́е,/ яви́лася еси́ ми́ру в нетле́ннем телеси́ твое́м,/ исто́чник исцеле́ний и даро́в духо́вных подаю́щи всем к тебе́ притека́ющим,/ и ны́не, я́ко свеща́ те́плая, благода́ти еле́ем возжже́нная,/ предстоя́щи Престо́лу Го́спода и Жениха́ твоего́ Небе́снаго,/ Того́ моли́, де́во чи́стая,/ изба́вити нас от вся́каго зла,// чту́щих па́мять твою́ ве́рою и любо́вию.

Перевод: Девства красотою совершенно очищена и целомудрия цветами увенчана, Богоблаженная дева Иулиания, явилась ты миру в нетленном теле твоем, источник исцелений и даров духовных подавая всем к тебе обращающимся, и сейчас, как горячая свеча зажженная елеем благодати, предстоя Престолу Господа и Жениха твоего Небесного, моли Его, дева чистая, об избавлении нашем от всякого зла, почитающих память твою с верой и любовью.

Ин тропарь святителю Киприану Московскому, митрополиту Киевскому и всея Руси, глас 4

Правосла́вия учи́телю,/ просвеще́ния ревни́телю,/ красото́ бо́лгарския страны́/ и Руси́ достосла́вный свети́льниче,/ святи́телю о́тче наш Киприа́не,/ моли́ Христа́ Бо́га// сохрани́ти нам ве́ру до сконча́ния ве́ка.

Перевод:

Православия учитель, просвещения поборник, украшение Болгарской страны и Руси достойный прославления светильник, святитель отче наш Киприан, моли Христа Бога о том, чтобы мы сохранили веру до конца жизни.

Ин тропарь преподобному Амфилохию Почаевскому, глас 4

О стра́ждущых лю́дех пла́менный моли́твенниче, посто́м, боре́ньми со страстьми́, бде́нием моли́твенным, дела́ми милосе́рдия любо́вь Цари́цы Небе́сной сниска́в. И́стинныя ве́ры сто́лп бы́л еси́ непоколеби́мый, и Правосла́вия яркий свети́льниче, многонедужным ско́рый помо́щниче и безме́здный цели́телю, по́лчищ де́монских неустраши́мый прогони́телю, в по́двизех вели́ких самому́ Подвигополо́жнику Христу́ и все́м святы́м подража́л еси́, в че́сть Святы́я Тро́ицы трие́х име́н носи́телю: Иа́кове, Ио́сифе и о́тче Амфило́хие, моли́ Всеми́лостиваго Бо́га да очи́стит сердца́ пораженныя грехо́м и твои́м предста́тельством спасе́т души́ на́ша.

Перевод:

О страдающих людях пламенный молитвенник, постом, борьбой со страстями, молитвенным бдением, делами милосердия любовь Царицы Небесной заслужил ты. Истинной веры ты был непоколебимым столпом и Православия ярким светильником, быстрым помощником страдающим многими болезнями и врачом безвозмездным, полчища демонские неустрашимо прогонявший, в подвигах великих самому Подвигоположнику Христу и всем святым подражал ты, в честь Святой Троицы трех имен носитель: Иаков, Иосиф и Амфилохий, моли Всемилостивого Бога да очистит сердца пораженные грехом и твоим представительством спасет души наши.

Кондак святителю Иннокентию, епископу Иркутскому, глас 4

Непоро́чности соиме́ннаго па́стыря,/ пропове́дника ве́ры в язы́цех Монго́льских,/ сла́ву и украше́ние Ирку́тския па́ствы,/ любо́вию восхва́лим вси́ ве́рнии:/ той бо есть храни́тель страны́ Сиби́рския// и моли́твенник о душа́х на́ших.

Перевод: Непорочности одноименного пастыря (Иннокентий от лат. Innocentius — «невинный»), проповедника веры среди народов Монголии, славу и украшение иркутской паствы, с любовью прославим все верующие, ибо он хранитель земли Сибирской и молитвенник о душах наших.

Кондак преподобному Феодору, князю Острожскому, Печерскому, в Дальних пещерах, глас 4

Красоты́ ри́зныя возгнуша́вшагося/ и бога́тства тле́ннаго со благодаре́нием отве́ргшагося,/ в ри́зу же безстра́стия обле́кшагося/ и бога́тому в щедро́тах Христу́ возсле́довавшаго,/ прииди́те, ве́рнии, восхва́лим Фео́дора достосла́вна,/ я́ко моля́щася непреста́нно// о душа́х на́ших.

Перевод: Красоту одежд презревшего и богатство тленное с благодарением отвергнувшего, в одеяние бесстрастия же облекшегося и богатому на милости Христу последовавшего, придите, верующие, прославим Феодора достойного, как молящегося непрестанно о душах наших.

Кондак преподобному Стефану, игумену Печерскому, епископу Владимиро-Волынскому, глас 6

Зави́дя враг честно́му ти житию́,/ изри́нул тя бя́ше злоко́знством свои́м от нача́льства па́ствы,/ но ты, изгна́н быв,/ и на ино́м ме́сте це́рковь Богоро́дицы воздви́гл еси́,/ за что и Та са́ном почте́ тя архиере́йства,/ в не́йже ты до́бре упа́с вруче́нная ти о́вцы,/ пре́йде во весе́лии ко Христу́, Стефа́не,// Ему́же моли́ся о нас, рабе́х твои́х.

Перевод: Враг (диавол), завидуя твоей почитаемой жизни, лишил тебя злыми своими кознями руководства паствой, но ты, будучи изгнан, и на другом месте воздвиг церковь Богородицы, за что Она почтила тебя архиерейским саном, в ней же ты хорошо упас врученных тебе овец, с радостью отойдя ко Христу, Стефан, Ему же молись о нас, рабах твоих.

Кондак преподобномученику Макарию, архимандриту Каневскому, глас 4

Нетле́нною красото́ю смире́ннаго жития́ твоего́/ Бо́га на земли́ просла́вил еси́/ и Боже́ственныя ве́ры чистоту́/ сохраня́ти лю́ди научи́л еси́,/ страда́льческими же по́двиги кончи́ну прие́м,/ от Бо́га просла́влен яви́лся еси́,// преподобному́чениче Мака́рие, о́тче наш.

Перевод: Нетленной красотой смиренной жизни твоей ты прославил Бога на земле и научил людей сохранять чистоту Божественной веры, приняв же смерть в мученическом подвиге ты был прославлен Богом, преподобномученик Макарий, отче наш.

Кондак святителю Фотию Московскому, митрополиту Киевскому и всея Руси, глас 8

Тро́ице сосу́д яви́ся честны́й твои́м житие́м, святи́телю Фо́тие,/ всегда́ зряй Святу́ю Тро́ицу,// Е́йже предстои́ши, моли́ся непреста́нно о всех нас.

Перевод:

Твоей жизнью ты стал почитаемым сосудом Троице (2Тим.2:21), святитель Фотий, всегда созерцая Святую Троицу, Ей же предстоишь, молись не переставая обо всех нас.

Кондак благоверному великому князю Андрею Боголюбскому, глас 8

В ми́ре сем благоче́стно и пра́ведно пожи́в,/ моли́твою, ми́лостынею и благострада́нием Бо́гу угоди́л еси́,/ сего́ ра́ди и Бог по убие́нии твое́м просла́ви тя нетле́нием и чудесы́,/ Его́же, свя́те Андре́е, моли́ сохрани́ти оте́чество твое́ // и всех люде́й, благоче́стно тебе́ почита́ющих.

Перевод: В мире этом благочестиво и праведно прожив, молитвой, милостыней и страданием угодил ты Богу, потому Он, после того как ты был убит, прославил тебя нетлением и чудесами, Его же моли, святой Андрей, сохранить Отечество твое и всех людей, благоговейно тебя почитающих.

Кондак святителю Петру Московскому, митрополиту Киевскому и всея Руси чудотворцу, глас 8

Взбра́нному и ди́вному на́шея земли́ чудотво́рцу,/ днесь любо́вию к тебе́ притека́ем, песнь Богоно́се плету́ще,/ я́ко име́я дерзнове́ние ко Го́споду,/ многообра́зных изба́ви нас обстоя́ний, да зове́м ти:// ра́дуйся, утвержде́ние гра́ду на́шему.

Перевод:

К славному и дивному нашей земли чудотворцу мы в сей день с любовью прибегаем, песнь тебе, богоносец, слагая; как имеющий дерзновение ко Господу, от многообразных превратностей избавь нас, да взываем тебе: «Радуйся, утверждение граду нашему!»

Кондак преподобному Варлааму, игумену Печерскому, в Ближних пещерах, глас 2

Оте́ческаго преще́ния не устраши́лся еси́,/ ласка́ниям того́ не повину́лся еси́,/ ниже́ ле́стию низложи́лся еси́ же́нскою, всече́стне Варлаа́ме,/ но непобеди́мь от тех пребы́л еси́,// наде́яся на Го́спода своего́, Ему́же моли́ся о душа́х на́ших.

Перевод: Отцовских запретов не устрашился ты, его уговорам не повиновался и перед женской хитростью устоял, всеми почитаемый Варлаам, и остался непобедимым, надеясь на Господа своего, Ему же молись о душах наших.

Кондак равноапостольному Кириллу Философу, учителю Словенскому, глас 2

Тве́рдым и богодохнове́нным уче́нием/ просвеща́я мир пресве́тлыми заря́ми,/ обтече́, я́ко мо́лния вселе́нную,/ Кири́лле блаже́нне,/ разсева́я пресве́тлое Бо́жие сло́во,/ на за́паде и се́вере и ю́зе// мир просвеща́я чудесы́.

Перевод: Просвещая мир преярким сиянием неизменного и Боговдохновенного учения, облетел ты, как молния, вселенную, Кирилл блаженный, рассеивая пресветлое Божие слово на западе и севере, и юге, просвещая мир учением, святой.

Кондак равноапостольным Киpиллу и Мефодию, учителем Словенским, глас 3

Свяще́нную дво́ицу просвети́телей на́ших почти́м,/ Боже́ственных писа́ний преложе́нием исто́чник Богопозна́ния нам источи́вших,/ из него́же да́же додне́сь неоску́дно почерпа́юще,/ ублажа́ем вас, Кири́лле и Мефо́дие,/ Престо́лу Вы́шняго предстоя́щих// и те́пле моля́щихся о душа́х на́ших.

Перевод:

Священную двоицу просветителей наших почтим, переводом Божественных писаний источник Богопознания нам источивших, из которого даже доныне обильно черпая, прославляем вас, Кирилл и Мефодий, Престолу Всевышнего предстоящих и усердно молящихся о душах наших.

Кондак преподобному и благоверному князю Олегу Брянскому, глас 4

Уподо́бился еси́ плодоно́сней ле́торасли/ от ко́рене честна́го,/ Оле́же благоро́дне,/ и́стину возлюби́в и нетле́нный Христо́в живо́т./ Те́мже моли́твою, бде́нием и поще́нием/ свети́льник вели́кий быв твои́м ученико́м,// просвети́, блаже́нне, оте́чество твое́ и спаси́ ду́ши на́ша.

Перевод: Уподобился ты плодоносной ветви из почитаемого корня, Олег благородный, истину возлюбив и нетленную жизнь во Христе. Потому молитвой, бдением и пощением ты стал великим светильником для своих учеников, просвети, блаженный, отечество твое и спаси души наши.

Кондак преподобному Нестору Летописцу, Печерскому, в Ближних пещерах, глас 2

Я́ко сый Богоно́снаго Феодо́сия учени́к/ и и́стинный жития́ того́ подража́тель,/ пе́рвый честны́х его́ моще́й самови́дец бы́ти сподо́бился еси́,/ я́же с про́чиими святоле́пно прене́с,/ насле́дил еси́ с те́миже Ца́рство Небе́сное,// е́же получи́ти и нам, чту́щим тя, Го́сподеви моли́ся.

Перевод: Как ученик Богоносного Феодосия и истинный подражатель его жизни, ты удостоился быть первым очевидцем его почитаемых мощей, которые вместе с другими достойно их святости перенес, ты наследовал вместе с ними Царство Небесное, получить которое и нам, почитающим тебя, Господу молись.

Кондак преподобному Иову, игумену Почаевскому, глас 4

Яви́лся еси́ и́стинныя ве́ры столп,/ ева́нгельских же за́поведей ревни́тель,/ горды́ни обличе́ние,/ смире́нным же предста́тель и науче́ние:/ те́мже и ублажа́ющим тя грехо́в отпуще́ние испроси́,/ и оби́тель твою́ невреди́му сохрани́,// И́ове о́тче наш, многострада́льному подо́бный.

Перевод: Ты явился столпом истинной веры и ревнителем евангельских заповедей, обличением гордости, имеющим же смирение - заступник и учитель, потому и прославляющим тебя испроси прощение грехов, и обитель твою сохрани невредимой, Иов отче наш, подобный многострадальному (Иову).

Кондак святителю Киприану Московскому, митрополиту Киевскому и всея Руси, глас 2

Необори́м столп Правосла́вия,/ ве́ре Христо́ве утвержде́ние,/ це́рквам украси́тель, прему́дрый учи́тель,/ се́рбское воспита́ние, ру́сское процвете́ние,/ Госпо́днею любо́вию распала́емь,/ Ду́ху Пресвято́му дом яви́ся/ и ду́шу, я́ко же́ртву непоро́чну, Го́сподеви принесе́,/ досточу́дне и всече́стне Киприа́не, святи́телю Христо́в,/ сего́ ра́ди всели́ся в широту́ ра́йскую,/ предстоя́ Христу́ в ли́це святы́х,/ Ему́же моли́ся и спаса́й град и лю́ди от пога́ных нахожде́ния, я́ко да зове́м ти:// ра́дуйся, о́тче Киприа́не, учи́телю прему́дрый.

Перевод:

Ты явился непобедимой крепостью Православия, утверждением веры Христовой, украсителем церквей, премудрый учитель, сербское воспитание и русское процветение, разжигаем любовью ко Господу, ты стал домом Духу Пресвятому и душу, как непорочную жертву, принес Господу, удивительный и почитаемый всеми Киприан, святитель Христов, потому вселился в просторы рая, предстоя Христу в собрании святых, Ему же молись и спасай город и людей от нападения язычников, да взываем к тебе: «Радуйся, отче Киприан, учитель премудрый».

Кондак благоверному князю Ярополку, в Крещении Петру, Владимиро-Волынскому, глас 3

Возсия́ днесь пресла́вная па́мять твоя́,/ благоро́дне страстоте́рпче Христо́в, Яропо́лче Богому́жне,/ созыва́ющи нас к похвале́нию Христа́, Бо́га на́шего./ Те́мже, к тебе́ днесь притека́юще,/ с любо́вию взыва́ем ра́достно:/ блаже́нна земля́, упи́тавшаяся кровьми́ твои́ми,/ и свя́та селе́ния, прии́мшая дух твой,/ иде́же в раи́, нетле́нныя пи́щи наслажда́яся,/ не забу́ди нас, воспева́ющих тя,/ но при́сно помина́й в моли́твах твои́х к Бо́гу,/ да изба́вимся от всех бед и скорбе́й,// и́же при́сно па́мять твою́ почита́ющи.

Перевод: Воссияла сегодня удивительная память твоя, благородный мученик Христов, Ярополк Богомудрый, собирая нас к прославлению Христа, Бога нашего. Потому сегодня к тебе обращаясь, с любовью взываем радостно: блаженна земля, напоенная мученической кровью твоей и святы селения, принявшие дух твой. Там в раю нетленной пищей наслаждаясь, не забывай нас, воспевающих тебя, но всегда вспоминай в молитвах твоих к Богу, да избавимся мы от всех бед и скорбей, всегда почитающие память твою.

Кондак равноапостольному князю Владимиру, во Святом Крещении Василию, глас 8

Подо́бствовав вели́кому апо́столу Па́влу в седи́нах, всесла́вне Влади́мире,/ вся я́ко младе́нческая мудрова́ния, я́же о и́долех тща́ния оста́вль,/ я́ко муж соверше́нный украси́лся еси́ Боже́ственнаго Креще́ния багряни́цею./ И ны́не Спа́су Христу́ в весе́лии предстоя́,// моли́ спасти́ся держа́вы Росси́йския нача́льником и мно́жеству владо́мых.

Перевод: Подобно великому Апостолу Павлу, в зрелых летах, всеславный Владимир, как детскую забаву, все мудрования и усердие к идолам оставив, ты, как муж совершенный, украсился порфирою Божественного крещения. И ныне Спасителю Христу в радости предстоя, моли о спасении в державе Российской начальствующих и множества ее граждан.

Кондак равноапостольному Мефодию, архиепископу Моравскому, глас 2

Боже́ственна и ве́рна Мефо́дия/ вси́ воспои́м лю́дие, и любо́вию ублажи́м,/ я́ко па́стыря вели́каго слове́ном,/ служи́теля Тро́ицы че́стна,/ прогони́теля е́реси,// мо́лит бо ся о всех нас.

Перевод: Святого и преданного Богу Мефодия все люди восхвалим пением и с любовью прославим, как пастыря великого славян, почтенного служителя Троицы и прогонителя ереси, так как он молится обо всех нас.

Кондак святителям Киприану, Фотию и Ионе Московским, митрополитам Киевским и всея Руси, на перенесение мощей, глас 8

Я́ко трие́ вели́цыи свети́ла, яви́стеся,/ озаря́юще всю подсо́лнечную/ богода́нною вам благода́тию чуде́с,/ и просвети́сте моли́твами свои́ми ве́рных сердца́,/ ва́шу па́мять чту́щих честна́го пренесе́ния./ И Влады́ку Христа́, всех Творца́, моли́те/ стране́ на́шей на враги́ побе́ду пода́ти,/ я́ко иму́ще дерзнове́ние,/ и нам проси́те ве́лия ми́лости, вопию́щим к вам:/ ра́дуйтеся, побо́рницы по Христо́ве Це́ркви// и многочестна́я свети́ла, святи́телие сла́внии.

Перевод:

Как три великих светила вы явились, озаряя все под солнцем данной вам от Бога благодатью чудес, и просветили молитвами своими сердца верующих, почитающих память перенесения мощей ваших. И Владыку Христа, всех Творца, молите стране нашей даровать победу над врагами, как имеющие дерзновение, и для нас просите великой милости, взывающих к вам: «Радуйтесь, защитники Христовой Церкви и многочтимые светила, святители прославляемые».

Кондак преподобному Николе Святоше, князю Черниговскому, Печерскому чудотворцу, в Ближних пещерах, глас 8

Вся кра́сная ми́ра сего́/ и тле́нное бога́тство нивочто́же вмени́в,/ обогати́лся еси́ мно́гими чудесы́ и зна́мении от Христа́ Бо́га,/ Ему́же в весе́лии предстоя́,/ помина́й нас, чту́щих любо́вию па́мять твою́, да зове́м ти:// ра́дуйся, Нико́ло пречу́дне.

Перевод: Все блага мира этого и тленное богатство посчитав ничем, обогатился ты многими чудесами и знамениями от Христа Бога, Ему же в радости предстоя, вспоминай нас, с любовью почитающих память твою, да взываем к тебе: «Радуйся, Никола удивительный».

Кондак святителям Московским, глас 3

Во святи́телех благоче́стно пожи́сте,/ и лю́ди к Богоразу́мию наста́висте, и до́бре Бо́гу угоди́сте,/ сего́ ра́ди от Него́ нетле́нием и чудесы́ просла́вистеся,// я́ко ученицы́ Бо́жия благода́ти.

Перевод:

Вы благочестиво прожили как святители и людей к познанию Бога направляли и хорошо послужили Богу, поэтому от Него прославились нетлением и чудотворением, наученные Божией благодатью.

Кондак преподобномученику Афанасию, игумену Брестскому, глас 4

Мона́шеского жития́ украше́ние и му́чеников красоту́/ яви́л себе́ житие́м твои́м, Афана́сие,/ и я́ко со́лнце пресве́тлое,/ лю́дям правосла́вным возсия́л еси́./ Те́мже и Христо́с да́ром чуде́с обогати́ тя,/ да чту́ще пресве́тлую па́мять твою́, зове́м ти:// помина́й ста́до твое́ моли́твами твои́ми, преподо́бне.

Перевод: Монашеского жития украшение и мучеников красоту явил ты житием своим, Афанасий, и как преяркое солнце воссиял православным людям. Потому и Христос обогатил тебя даром чудотворений, почитая пресветлую память твою, взываем к тебе: «Вспоминай стадо твое в молитвах твоих, преподобный».

Кондак равноапостольной княгине Ольге, во Святом Крещении Елене, глас 4

Воспое́м днесь Благоде́теля всех Бо́га,/ просла́вльшаго в Росси́и О́льгу Богому́друю:/ да моли́твами ея́/ пода́ст душа́м на́шим// грехо́в оставле́ние.

Перевод: Воспоем сегодня Благодетеля всех Бога, прославившего в России Ольгу Богомудрую, да по молитвам ее подаст душам нашим прощение грехов.

Кондак святителю Амфилохию Печерскому, Владимиро-Волынскому, глас 8

Звезду́ Волы́нскую, из пеще́рнаго мра́ка от Ки́ева возсия́вшую,/ и от Волы́ни второ́е пеще́ры заве́тныя житие́м свои́м/ и блаже́нною кончи́ною, и прославле́нием свои́м озари́вшаго,/ всеблаже́ннаго Амфило́хия, архипа́стыря Влади́миро-Волы́нскаго почти́м,/ прося́ще его́, да в ли́ке преподо́бных Пече́рских водворя́яся,// мо́лится ку́пно с ни́ми о душа́х на́ших.

Перевод: Звезду Волынскую, из пещерного мрака в Киеве воссиявшую, и от другой пещеры в Волыни житием своим и блаженной кончиной, и прославлением своим всех озарившего, всеблаженного Амфилохия, архипастыря Владимиро-Волынского прославим, прося его, чтобы он, пребывая в собрании преподобных Печерских, молился вместе с ними о душах наших.

Кондак Собору Волынских святых, глас 8

Избра́нным чудотво́рцам и изря́дным уго́дником Волы́нския земли́,/ похва́льная воспису́ем вам, святи́и:/ Яропо́лче святы́й, Стефа́не, Амфило́хие, Фео́доре,/ Иулиа́ние, И́ове и Мака́рие, присноблаже́ннии!/ Тем я́ко иму́щии благода́ть и ми́лость у Христа́ Бо́га на́шего,/ от вся́ких нас бед свободи́те/ да вы́ну ва́шею по́мощию избавля́емии, вопие́м вам благода́рне:// ра́дуйтеся, пресла́внии уго́дницы Бо́жии и земли́ Волы́нския украше́ние.

Перевод:

Избранным чудотворцам и особенным служителям Волынской земли, приносим вам похвальные молитвенные песнопения, святые: Ярополк святой, Стефан, Амфилохий, Феодор, Иулиания, Иов и Макарий, вечноблаженные! Как имеющие благодать и милость у Христа Бога нашего, от всяких нас бед освободите, чтобы мы, всегда избавляемые вашей помощью, взывали к вам благодарно: «Радуйтесь, прославляемые служители Божии и земли Волынской украшение».

Кондак святителю Нифонту, епископу Новгородскому, глас 5

Ре́вности дре́вних оте́ц/ в тве́рдом и́стинных догма́т хране́нии подо́бяся,/ крепкоу́мне Ни́фонте,/ не восхоте́л еси́ восхи́тившему самово́льне престо́л Митропо́лии Кли́му сослужи́тель бы́ти,/ избра́нному же на се от всех, поко́рся,/ священноле́пне с ним служи́л еси́/ и, жизнь свою́ сконча́в,// обре́л еси́ безконе́чное Ца́рство Христо́во.

Перевод: Уподобляясь ревности древних отцов в твердом хранении истинных догматов, непоколебимый умом Нифонт, не захотел сослужить самовольно похитившему престол митрополии Климу, покорился же избранному на престол ото всех, достойно святости (отцов древности) с ним ты служил и окончил свою жизнь, обретя бесконечное Царство Христово.

Кондак праведной Иулиании деве, княжне Ольшанской, глас 8

Храм Бо́жий одушевле́нный,/ де́вственною чистото́ю благоукра́шенный,/ ве́мы тя, свята́я и пра́ведная де́во, княжно́ Иулиани́е,/ те́мже, с лю́бовию пра́зднующе/ святы́х твои́х моще́й обре́тение, мо́лим тя,/ изве́стная жела́ний на́ших хода́таице:/ принеси́ за нас моли́твы твоя́ ко Го́споду/ и от вся́ких бед свобожда́й нас/ предста́тельством твои́м у Престо́ла Всевы́шняго, да зове́м ти:// ра́дуйся, де́во свята́я Иулиани́е, неве́сто Христо́ва прекра́сная.

Перевод: Как храм Божий одушевленный, девственной чистотой великолепно украшенный, знаем тебя, святая и праведная дева, княжна Иулиания, потому с любовью празднуя святых твоих мощей обретение, молим тебя, постоянная наших желаний посредница: «Принеси о нас молитвы твои ко Господу и от всяких нас бед освободи представительством твоим у Престола Всевышнего», да взываем к тебе: «Радуйся, дева святая Иулиания, невеста Христова прекрасная».

Кондак преподобному Амфилохию Почаевскому, глас 3

Я́ко ве́ры Правосла́вныя ревни́тель и благоче́стнаго жития́ учи́тель, в боле́знех и ско́рбех изря́дный помо́щник и защи́титель, пред Го́сподом предстои́ши преподо́бне Амфило́хие, сего́ ра́ди вопие́м ти́: сохрани́ оби́тель, в не́й же подвиза́лся еси́, и спаса́й на́с моли́твами твои́ми, о́тче блаже́нне.

Перевод: Как веры Православной ревнитель и благочестивой жизни учитель, в болезнях и скорбях прекрасный помощник и защитник, перед Господом предстоишь, преподобный Амфилохий, потому взываем к тебе: «Сохрани обитель, в которой подвизался ты, и спасай нас молитвами твоими, отче блаженный».

Ин кондак преподобному Стефану, игумену Печерскому, епископу Владимиро-Волынскому, глас 1

Проходя́, всеблаже́нне, доброде́тельми от си́лы в си́лу/ и всех, с тобо́ю су́щих, о́ными провозвыша́я,/ всем служи́л еси́, Стефа́не, и угожда́л,/ тем избра́н был еси́ всем,/ в дому́ Бо́жия Ма́тере су́щим, в старе́йшину./ Последи́ же и на степе́нь архиере́йства возведе́н был еси́,/ и, ста́до Христо́во до́бре упас,// моли́ Его́ о нас, ча́дех твои́х.

Перевод: Возрастая, преблаженный, в добродетелях от силы в силу (Пс.83:8) и всех, с тобой бывших, ими возвышая, всем служил ты, Стефан, и угождал, потому и избран был старшим для всех, бывших в доме Божией Матери. После же и в архиерейский сан был возведен и стадо Христово хорошо упас, моли Его о нас, детях твоих.

Ин кондак преподобному Стефану, игумену Печерскому, епископу Владимиро-Волынскому, глас 4

Стефа́н, испо́лнь ве́ры и благоче́стия,/ соверши́тель Бо́гом основа́нныя це́ркве Пече́рския,/ днесь, я́ко вели́кое свети́ло, всем возсия́,/ Христо́во ста́до богоуго́дно упа́с/ в неусы́пных стра́жех нощны́х./ Его́же чту́ще, прино́сим песнь/ еди́ному Тебе́, Христу́, всех Влады́це,/ моля́ще поми́ловати нас// того́ благоприя́тными моли́твами.

Перевод: Стефан, полный веры и благочестия, строитель Богом основанной церкви Печерской, сегодня, как великое светило, всем воссиял, Христово стадо угодно Богу упас в бдительных ночных стражах (молитвенных). Его же почитая, приносим песнь одному Тебе, Христу, всех Владыке, моля помиловать нас по его принимаемым Богом молитвам.

Ин кондак преподобномученику Макарию, архимандриту Каневскому, глас 2

По́стническое и равноа́нгельное житие́ твое́/ страда́льческими уясни́л еси́ по́двиги/ и А́нгелом совсе́льник, Богоблаже́нне, яви́лся еси́, Мака́рие,/ с ни́миже Христу́ Бо́гу моля́ся не преста́й// о всех нас.

Перевод: Постническую и подобную Ангелам жизнь твою ты прославил мученическим подвигом и поселился вместе с Ангелами, блаженствующий в Боге Макарий, с ними же не переставай молиться Христу Богу обо всех нас.

Ин кондак святителю Петру Московскому, митрополиту Киевскому и всея Руси чудотворцу, глас 4

Яви́ся днесь пресве́тлая па́мять твоя́,/ святи́телю преблаже́нне Пе́тре,/ в ми́ре све́тло сия́ющи/ и явля́ющи всем// Боже́ственное сия́ние.

Перевод:

Настал сегодня пресветлый день памяти твоей, святитель преблаженный Петр, в мире ярко сияющей и являющей всем Божественный свет.

Ин кондак святителю Петру Московскому, митрополиту Киевскому и всея Руси чудотворцу, на перенесение мощей, глас 8

Я́ко врача́ преизря́дна и исто́чника чудесе́м оби́льна,/ днесь соше́дшеся любо́вию, духо́вная твоя́ ча́да,/ в пренесе́ние честны́х моще́й твои́х,/ архиере́ю Пе́тре, мо́лим тя:/ моли́ Христа́ Бо́га дарова́ти честны́м твои́м пренесе́нием/ ве́рному во́инству на́шему на враги́ победи́тельная,/ да твои́ми к Бо́гу моли́твами находя́щих зол изба́вльшеся,/ ра́достною душе́ю и весе́лием се́рдца/ благода́рная ти воспое́м, глаго́люще:// ра́дуйся, о́тче Пе́тре, архиере́ев и всея́ Росси́йския земли́ удобре́ние.

Перевод:

Как врача превосходного и источника чудес обильных, сегодня собравшись с любовью, духовые чада твои, в честь перенесения почитаемых мощей твоих, архиерей Петр, молим тебя: моли Христа Бога даровать, благодаря почитаемому перенесению твоему, верному воинству нашему победу над врагами, чтобы мы по твоим молитвам к Богу избавились от настигающих нас бед и с радостной душой и ликующим сердцем воспели тебе благодарственные песнопения, взывая: «Радуйся, отче Петр, архиереев и всей Российской земли украшение».

Ин кондак равноапостольному Кириллу Философу, учителю Словенскому, на молебне, глас 2

Тве́рдаго и Богодохнове́ннаго уче́ния/ просвеща́я мир пресве́тлыми заря́ми,/ обтече́, я́ко мо́лния, вселе́нную, Кири́лле свя́те,/ разсева́я Бо́жие сло́во на за́паде, и се́вере, и ю́зе,// мир просвеща́я уче́нием, свя́те.

Перевод: Просвещая мир преярким сиянием неизменного и Боговдохновенного учения, облетел ты, как молния, вселенную, Кирилл святой, рассеивая Божие слово на западе и севере, и юге, просвещая мир учением, святой.

Ин кондак равноапостольному Кириллу Философу, учителю Словенскому, на молебне, глас 2

Пресве́тло житие́ возлюби́, свя́те,/ заря́ми трисо́лнечными Божества́ освеща́емь,/ прии́де, я́ко мо́лния, во всю вселе́нную,/ се́верную и ю́жную земли́ просвеща́я,/ за́падным же свет незаходи́м яви́ся./ Те́мже и ны́не мрак грехо́вный прогна́в, свя́те,/ свы́ше испроси́ благода́ть духо́вную,// и́маши бо дерзнове́ние к Бо́гу.

Перевод: Возлюбив пресветлую жизнь, святой, освещаемый ярким сиянием Божества, показался ты, как молния, во всей вселенной, просвещая страны Севера и Юга, и явившись немеркнущим светом для Запада. Потому и сейчас, разогнав мглу греха, святой, испроси свыше духовную благодать, поскольку ты имеешь дерзновение к Богу.

Ин кондак преподобному Иову, игумену Почаевскому, на обретение мощей, глас 8

Возсия́ от спу́да земна́го сокро́вище нетле́нное моще́й твои́х,/ уго́дниче Бо́жий,/ я́ко, благоче́стно пожи́в в ве́ре Христа́ Бо́га на́шего,/ дости́гл еси́ доброде́телей соверше́нства,/ и, оста́вль сла́дость жития́ преходя́щаго,/ в пеще́ре горы́ Поча́евския в поще́ниих, моли́твах и труде́х свя́то подвиза́лся еси́,/ и те́ми те́ло твое́ увяди́л еси́./ Ны́не же, преше́д к Бо́гу в безмяте́жный и ве́чный поко́й,/ мо́лишися о всех с ве́рою к тебе́ прибега́ющих./ Ра́дуйся, И́ове, пресла́вный уго́дниче Бо́жий// и оби́тели Поча́евския украше́ние.

Перевод: Воссияло скрытое под землей нетленное сокровище твоих мощей, угодник Божий, так как ты благочестиво жил с верой во Христа Бога нашего, достиг совершенства добродетелей и, оставив наслаждения временной жизни, в пещере Почаевской горы в посте, молитвах и трудах свято подвизался и этим тело твое иссушил. Сейчас же, перейдя к Богу в безмятежный и вечный покой, ты молишься обо всех с верой к тебе приходящих. Радуйся, Иов, прославляемый угодник Божий и украшение Почаевской обители.

Ин кондак святителю Киприану Московскому, митрополиту Киевскому и всея Руси, глас 6

Святи́телю Христо́в, па́стырю до́брый,/ учи́телю Небе́сныя му́дрости,/ свети́льниче све́та духо́внаго,/ Киприа́не досточу́дне,/ не преста́й моли́тися за па́ству свою́,/ за лю́бящих и чту́щих тя,// гра́да на́шего кре́пкий засту́пниче.

Перевод:

Святитель Христов, пастырь добрый (Ин.10:11), учитель Небесной мудрости, светильник духовного света, Киприан удивительный, не переставай молиться о пастве своей, о любящих и почитающих тебя, города нашего сильный заступник.

Ин кондак равноапостольному князю Владимиру, во Святом Крещении Василию, глас 8

Изря́дному воево́де и правове́рному,/ благода́рственная воспису́ет ти вся Русь, Васи́лие, иму́щи тя нача́льника и засту́пника,/ я́ко изба́вил еси́ нас от вся́кия скве́рны и ле́сти, те́мже ти вопие́м:// ра́дуйся, вели́кий кня́же Влади́мире преблаже́нне.

Перевод: Превосходному военачальнику и благочестивому, благодарственную песнь воспевает тебе вся Русь, Василий, имея тебя начальником и защитником, так как ты избавил нас от всякой скверны и обольщения, потому и взываем к тебе: «Радуйся, великий князь Владимир преблаженный».

Ин кондак равноапостольному князю Владимиру, во Святом Крещении Василию, глас 4

Оте́ческу пре́лесть, и́долы, я́ко су́етни, отве́рг,/ Христа́, всех и́стиннаго Бо́га, Царя́ и Благода́теля, позна́л еси́./ Те́мже и лю́ди, изря́дны Тому́, святы́м Креще́нием просвети́л еси́,/ пресла́вне Влади́мире./ Сего́ ра́ди почита́ем тя,/ я́ко Тро́ице служи́теля,// Христа́ моли́ дарова́ти нам ве́лию ми́лость.

Перевод: Отеческое обольщение, идолов, как пустое, ты отверг и Христа, истинного Бога всех, Царя и Благодетеля познал. Потому и много людей святым Крещением просветил ты, преславный Владимир. Поэтому почитаем тебя, как служителя Троицы, моли Христа даровать нам великую милость.

Ин кондак святителям Киприану, Фотию и Ионе Московским, митрополитам Киевским и всея Руси, глас 8

Я́ко крин, в пусты́ни дави́дски процве́тше, отцы́ святи́и,/ ны́не яви́стеся и к Вы́шнему тече́нию ра́достно устреми́стеся,/ иде́же с ли́ки святы́х Пресвяте́й Тро́ице предстоя́ще,/ моли́те сохрани́тися ста́ду ва́шему от враг ви́димых и неви́димых./ Мы же, свято́е ва́ше обре́тение пра́зднующе, вопие́м:// ра́дуйтеся, те́плии на́ши засту́пницы.

Перевод:

Как лилия в пустыне, по писанию, расцвели вы, отцы святые, сейчас явились и с радостью устремились к жизни Вышней, где, предстоя Пресвятой Троице в собрании святых, молитесь, чтобы спастись стаду вашему от видимых и невидимых врагов. Мы же, празднуя святое обретение ваше, взываем: «Радуйтесь, усердные заступники наши».

Ин кондак преподобномученику Афанасию, игумену Брестскому, глас 2

Я́ко по́стника благоче́стна и иску́сна,/ и страда́льца произволе́нием че́стна,/ и пусты́ни жи́теля сообра́зна,/ в пе́снех досто́йно хва́лим Афана́сия приснохва́льнаго// той бо зми́я попра́л есть.

Перевод: Как постника благочестивого и опытного, и добровольного мученика почитаемого, и подобного пустынножителям, в молитвенных песнопениях достойно восхвалим Афанасия всегда прославляемого, ибо тот победил диавола.

Ин кондак равноапостольной княгине Ольге, во Святом Крещении Елене, глас 4

Яви́ся днесь благода́ть всех Бо́га,/ просла́вльши в Руси́ О́льгу Богому́друю,/ моли́твами ея́, Го́споди,/ лю́дем пода́ждь// грехо́в оставле́ние.

Перевод: Явилась сегодня благодать Бога всех, прославив на Руси Ольгу Богомудрую, по молитвам ее, Господи, подай людям прощение грехов.

Ин кондак Собору Волынских святых, глас 4

Избра́ннии от родо́в уго́дницы Бо́жии,/ преподо́бнии Пече́рстии:/ Мерку́рие и Симео́не, Акинди́не же, Лукиа́не, Па́мво и Полика́рпе,/ Авраа́мие, Алекси́е, Евста́фие, Елла́дие, Ефре́ме, Иерони́ме,/ Луко́, Мела́дие, Они́симе, Пе́рсие, Па́вле, Се́ргие,/ Сисо́е и Фео́филе, Анато́лие же, Афана́сие, Иси́доре, Кассиа́не,/ Лавре́нтие, Пафну́тие, Пио́ре, Сисо́е вторы́й и Софро́ние/, от ни́хже изыдо́ша первонача́льницы/ и́ноческаго жития́ на горе́ Поча́евстей,/ вас не потаи́ла есть земля́,/ Не́бо же и ра́йския селе́ния отверзо́шася вам./ Те́мже мы, похва́льная пе́сни Бо́гу,/ просла́вльшему вас в па́мяти ва́шей, принося́ще/ и честны́й Собо́р ваш вселюбе́зно почита́юще,/ из глубины́ душе́вныя вопие́м вам:/ от всех бед ва́шими моли́твами заступа́йте нас, зову́щих,/ ра́дуйтеся, Пече́рстии чудотво́рцы// и оби́тели Поча́евския сла́ва и утвержде́ние.

Перевод: Избранные из народа служители Божии, преподобные Печерские: Меркурий и Симеон, Акиндин же, Лукиан, Памво и Поликарп, Авраамий, Алексий, Евстафий, Элладий, Ефрем, Иероним, Лука, Меладий, Онисим, Персий, Павел, Сергий, Сисой и Феофил, Анатолий же, Афанасий, Исидор, Кассиан, Лаврентий, Пафнутий, Пиор, Сисой второй и Софроний, из вас же вышли первоначальники монашеской жизни на горе Почаевской, вас не утаила земля, Небо же и райские селения открылись для вас. Потому мы, принося в день памяти вашей похвальные молитвенные песнопения Богу, прославившему вас, и достойное собрание ваше благоговейно почитая, из глубины душевной взываем к вам: от всех бед вашими молитвами защищайте нас, восклицающих, радуйтесь, Печерские чудотворцы и обители Почаевской слава и крепость.

Ин кондак святителю Нифонту, епископу Новгородскому, глас 8

Возложи́в себе́ от ю́ности Бо́гу, преподо́бне,/ мир тле́нных нивочто́же вмени́в/ и па́че всех Христа́ возлюби́в,/ Тому́ от всея́ души́ любо́вию после́довал еси́/ и, я́ко светоза́рное со́лнце,/ от Ки́ева просия́ во вся концы́ Ру́сския земли́ доброде́телию,/ и бысть па́стырь вели́кому Нову́гра́ду,/ и, до́бре упас ста́до Христо́во слове́сных ове́ц на па́житех духо́вных,/ к Бо́гу отше́л еси́,/ и ны́не со А́нгелы Влады́чню Престо́лу предстоя́,/ нас помина́й, раб свои́х, да зове́м ти:/ ра́дуйся, о́тче Ни́фонте,// святи́телем изря́дная похвало́.

Перевод: От юности посвятив себя Богу, преподобный, тленный мир ничем достойным не считая и больше всех возлюбив Христа, за Ним от всей души с любовью ты последовал и, как яркое солнце, от Киева просиял во все концы Русской земли добродетелью, и был пастырем Великого Новгорода, и хорошо упас стадо Христово разумных его овец на пастбищах духовных, отошел ты к Богу и сейчас, с Ангелами предстоя Престолу Владыки, вспоминай нас, рабов твоих, да взываем к тебе: «Радуйся, отче Нифонт, святителей особое прославление».

Ин кондак праведной Иулиании деве, княжне Ольшанской, глас 8

Приво́дим Ти, о Всеще́дре, Иулиани́ю,/ присносветя́щую свещу́, еле́ем благода́ти обдержи́мую,/ немощны́м цельбу́./ Ея́же моли́твами от вся́каго зла свободи́ нас и спаси́ всех,// и́же Тя с поклоне́нием велича́ют.

Перевод: Представляем Тебе, о Всещедрый, Иулианию, всегда светящую свечу, елеем благодати объятую, для немощных исцеление. Ее же молитвами от всякого зла освободи нас и спаси всех, кто Тебя с поклонением прославляет.

Ин кондак благоверному великому князю Андрею Боголюбскому, глас 8

Родочисленный Ца́рства Ру́сскаго насле́дниче, от благочести́ваго корня кня́зя Юрия плодитель первоначальствующих Ру́сских Самоде́ржцев, Боголю́бче кня́же Андре́е, му́жество и у́м в себе́ нося́щий, в пра́вде и и́стине пред Бо́гом ходя́щий, о, ве́лий единодержавный основа́телю государства но́ваго, моли́ся, да Бе́лая Ру́сь многолюдством правосла́внаго ро́да умно́жится, и све́том Христо́вым всему́ ми́ру ди́вно яви́тся, и сла́вою Бо́жией возвели́чится.

Перевод: Единородный Царства Русского наследник, от благочестивого корня князя Юрия родитель первоначальствующих русских самодержцев, Боголюбивый князь Андрей, мужеством и умом наделенный, в правде и истине перед Богом ходящий, о великий единодержавный основатель нового государства, молись, чтобы Белая Русь умножалась православными людьми, и удивительно явилась светом Христовым для всего мира, и возвеличилась славой Божией.

Молитва преподобному Феодору, князю Острожскому, Печерскому, в Дальних пещерах

Вои́нствование земно́е на духо́вную брань преложи́вый и о лю́дех свои́х до́брое попече́ние показа́вый, блаже́нне Фео́доре преподо́бне. К тебе́ в смяте́нии серде́ц на́ших днесь прибега́ем и твоея́ по́мощи стране́ на́шей и душа́м на́шим смире́нно проси́ти дерза́ем, ве́мы, уго́дниче Бо́жий, я́ко малоду́шие на́ше и ле́ность духо́вная дале́че от твоея́ па́жити ны отрева́ет и вся́каго омерзе́ния досто́йны ны соде́ловает, но милосе́рдие твое́ ко врага́м и преда́телем твои́м помина́юще, и́мже па́ки защи́тник яви́лся еси́, ра́внаго милосе́рдия твоего́ и нам, недосто́йным, мо́лим. Ты у́бо, уго́дниче Христо́в, от ага́рян разоре́нную зе́млю на́шу и от инове́рных подавля́ему жа́лостию и любо́вию объе́мля, па́ки к бо́дренному житию́ ве́рныя призва́л еси́, ели́ко во́инскими побе́дами, толи́ко и моли́твою и о́бразом жития́ своего́, а́ки све́щник златы́й, блиста́яся. Ты, мирска́го жития́ суету́ оста́вль, сам у́бо о душе́ свое́й попече́ние в пеще́рном уедине́нии преда́лся еси́, земли́ же на́шея попече́ние и исцеле́ние сла́вному ро́ду твоему́ запове́дал еси́, и та́ко преде́л свой еще́ на две́сте лет и вя́щше по кончи́не твоея́ от сете́й ерети́ческих огради́л еси́. Ты дале́че су́щее единокро́вное нам пле́мя че́шское ко Правосла́вней ве́ре приближа́ти тща́лся еси́ и от лати́нскаго наше́ствия огражда́л еси́. Ты и ны́не, на Небесе́х душе́ю со А́нгелы водворя́яся, нетле́нным же те́лом посреде́ нас почива́яй, на́ша не отри́ни гла́сы ско́рбныя, но моли́твенный плач согреша́ющих сыно́в земли́ на́шея услы́ши. Согреши́хом бо и непра́вдовахом и от заве́т Бо́жиих отступи́хом, в развраще́нныя обы́чаи зле впадо́хом, и е́же еди́но на потре́бу есть, душ на́ших спасе́ние, небреже́ние оста́вихом, тебе́ в Бо́зе пра́вда и сла́ва, о́тче преподо́бне, нам же стыде́ние лица́. Оба́че ели́ко грешне́йшии яви́хомся толи́ко вя́щшаго сострада́ния твоего́ тре́буем и в покая́нии зове́м ти си́це: твоея́ неистощи́мыя любве́ луч нам ниспосли́, гнев Бо́жий, пра́ведно на ны дви́жимый, моли́твою твое́ю от нас отведи́, спаси́тельную благода́ть Его́ к нам, недосто́йным, предста́тельством твои́м низведи́ и от грехо́вныя бе́здны к высоте́ покая́ния нас возведи́, да та́ко и мы житие́ свое́ испра́вити потщи́мся, кре́пость земли́ на́шея па́ки обновля́ти на́чнем, враго́в же ве́ры Христо́вы и злых преле́стников безбоя́зненно отража́ти сло́вом и житие́м возревну́ем и Спаси́теля на́шего со все́ми святы́ми благода́рно воспева́ти бу́дем, сла́вяще Его́ со Отце́м и Святы́м Ду́хом во ве́ки веко́в. Ами́нь.

Молитва преподобномученику Макарию, архимандриту Каневскому

О, пресла́вный преподобному́чениче Мака́рие, ско́рый помо́шниче и те́плый засту́пниче всех, притека́ющих к тебе́, предста́тельством свои́м пред Го́сподом умоли́ Спа́са на́шего, да обрати́т ду́ши на́ша к покая́нию и исправле́нию, да да́рует мир оте́честву на́шему и всей земли́ и да помо́жет всем нам тве́рдым бы́ти в ве́ре Правосла́вней и де́лех благи́х, да отжене́т от нас дух зло́бы и лука́вства и братолю́бие всели́т в нас, и да прино́сим плоды́ духо́вныя: любо́вь, бла́гость, милосе́рдие, ве́ру нелицеме́рную, кро́тость и воздержа́ние, и да, распя́вше на земли́ плоть на́шу со страстьми́ и похотьми́ и ду́хом живу́ще и ходя́ще, сподо́бимся жи́зни ве́чныя в ве́це гряду́щем, и, ра́йския сла́дости при́сно наслажда́ющеся с тобо́ю и со все́ми святы́ми, просла́вим Отца́, и Сы́на, и Свята́го Ду́ха, ны́не, и при́сно, и во ве́ки веко́в. Ами́нь.

Молитва святителю Петру Московскому, митрополиту Киевскому и всея Руси чудотворцу

О вели́кий святи́телю, пресла́вный чудотво́рче, Росси́йския Це́ркви первопресто́льниче, гра́да Москвы́ храни́телю и о всех нас усе́рдный моли́твенниче, о́тче наш Пе́тре! К тебе́ смире́нно припа́даем и мо́лимся: простри́ ру́це твои́ ко Го́споду Бо́гу и помоли́ся за ны, гре́шныя и недосто́йныя рабы́ Его́: да проба́вит нам ми́лость Свою́ и низпосле́т нам вся благопотре́бная к вре́менному житию́ и ве́чному спасе́нию на́шему дары́ бла́гости Его́, наипа́че же да огради́т нас ми́ром, братолю́бием и благоче́стием от всех искуше́ний врага́ диа́вола, и да́рует нам бы́ти ве́рными ча́дами твои́ми, не по и́мени то́кмо, но и все́м житие́м на́шим. Ей, уго́дниче Бо́жий! Услы́ши нас благоутро́бно, и бу́ди всем нам помо́щник и засту́пник во вся́ких беда́х и напа́стех, не забу́ди нас и в час кончи́ны на́шея, егда́ наипа́че твоего́ заступле́ния потре́буем, да, при по́мощи моли́тв твои́х святы́х, сподо́бимся и мы, гре́шнии, кончи́ну благу́ю улучи́ти и Ца́рствие Небе́сное унасле́дити, сла́вяще ди́внаго во святы́х Свои́х Бо́га на́шего, Отца́ и Сы́на и Свята́го Ду́ха, во ве́ки веко́в. Ами́нь.

Молитва равноапостольным Киpиллу и Мефодию, учителем Словенским

О, пресла́внии просвети́телие слове́нских язы́к, святи́и равноапо́стольнии Мефо́дие и Кири́лле, ва́ших письме́н и уче́ний све́том просвети́вшеся и в ве́ре Христо́вой наста́вльшеся, я́ко ча́да ко отце́м, усе́рдно ны́не прибега́ем и сокруше́нием серде́чным мо́лимся: а́ще и заве́т ва́ших не соблюдо́хом, о угожде́нии бо Бо́гу небрего́хом и от бра́тняго единомы́слия в ве́ре отпадо́хом, оба́че я́коже дре́вле в земно́м житии́ ва́шем, си́це и ны́не гре́шных и недосто́йных не отврати́те тщи, но, я́ко иму́ще ве́лие ко Го́споду дерзнове́ние, приле́жно Того́ моли́те, да обрати́т нас в путь спасе́ния, да умири́т раздо́ры единове́рных, да приведе́т к единомы́слию отпа́вших и всех нас ду́хом любве́ да соедини́т Еди́ней Святе́й, Собо́рней и Апо́стольстей Це́ркви! Ве́мы бо, я́ко мно́го мо́жет моли́тва пра́ведных по благосе́рдию Влады́ки. Не оста́вите у́бо нас, уны́лых и недосто́йных, чад ва́ших, и́хже ра́ди грехо́в па́ства ва́ша, враждо́ю разделя́ема и собла́знами иносла́вных прельща́ема, ума́лися, о́вцы же слове́сныя, разрыва́емы, восхища́ются во́лки губи́тельными. Пода́ждьте у́бо нам моли́твами ва́шими ре́вность Правосла́вия, я́ко да оте́ческая преда́ния до́бре сохрани́м, кано́ны церко́вные ве́рно соблюде́м, вся́ких лжеуче́ний стра́нных отбежи́м и, та́ко в житии́ богоуго́дном преспева́юще, жи́зни ра́йския на Небеси́ сподо́бимся, иде́же ку́пно с ва́ми просла́вим в Тро́ице Еди́наго Бо́га во ве́ки веко́в. Ами́нь.

Молитва преподобному и благоверному князю Олегу Брянскому

О, преподо́бне о́тче, благове́рне кня́же Оле́же, уго́дниче Христо́в усе́рдный, моли́твенниче ко Го́споду те́плый, защи́тниче в беда́х и уте́шителю в печа́лех неуста́нный! Воззри́, преблаже́нне, ми́лостиво на град твой и виждь ча́да твоя́, смире́нно ти припа́дающия и служи́ти тебе́ хотя́щия. Не отве́ргни тре́бующия твоея́ по́мощи, но я́ко благоде́тель и хода́тай, моли́ при́сно Го́спода Бо́га и Спа́са на́шего Иису́са Христа́, да благослови́т страну́ Росси́йскую, в ми́ре и благове́рии ю́ сохраня́я, гра́ды умножа́я, достоя́ние Свое́ соблюда́я. Вознеси́, богоно́сне о́тче наш, сие́ ма́лое моле́ние недосто́йных раб твои́х Влады́це Христу́, да утверди́т во святе́й Правосла́вней Це́ркви живы́й дух пра́выя ве́ры и любве́, благоче́стие непоколеби́мо, любому́дрие христопосле́довательно, да да́рует па́стырям ре́вность попече́ния о спасе́нии люде́й, во е́же неве́рующая просвети́ти, заблу́ждшия наста́вити, отпа́дшия обрати́ти и привлещи́. Изря́днее же, да вся ча́да Це́ркве Правосла́вныя чи́сты сохрани́т от мирски́х искуше́ний, по́хотей плотски́х, суему́дрия, суеве́рий и наважде́ний вра́жеских. Ей, уго́дниче Бо́жий, не пре́зри нас, моля́щихся тебе́, но помози́ нам ско́рым предста́тельством твои́м, да вся́ких бед, напа́стей и скорбе́й в сей жи́зни вре́менней избежа́вше, кончи́ну непосты́дну обрете́м, и та́ко на земли́ богоуго́дно пожи́вше, жи́зни ра́йския на Небеси́ сподо́бимся, иде́же вку́пе с тобо́ю просла́вим человеколю́бие и щедро́ты в Тро́ице сла́вимаго Бо́га, Отца́ и Сы́на и Свята́го Ду́ха, во ве́ки веко́в. Ами́нь.

Молитва святителю Киприану Московскому, митрополиту Киевскому и всея Руси

О, святи́телю Христо́в Киприа́не, от Афо́на возсия́вый и в Царьгра́де процветы́й, изволе́нием Бо́жиим на Русь прише́дый и на престо́л святи́тельский поста́вленный, бо́лгарская о́трасле и украше́ние преди́вное! Приими́ ны́не моли́тву на́шу, прите́кших ко гро́бу твоему́ росси́йских и бо́лгарских чад твои́х, и принеси́ Бо́гу усе́рдная моле́ния, да сохрани́т предста́тельством твои́м ве́ру правосла́вную, церкве́й правосла́вных едине́ние да укрепи́т, гра́ды на́ша и лю́ди от вся́ких бед и напа́стей, искуше́ний и скорбе́й да изба́вит, да да́рует нам неотъе́млемый мир, да утверди́т любо́вь христиа́нскую посреде́ нас и да собере́т всех нас в Ца́рствие Свое́, иде́же просла́вим пречестно́е и благослове́нное и́мя Отца́ и Сы́на и Свята́го Ду́ха, ны́не и при́сно, и во ве́ки веко́в. Ами́нь.

Молитва равноапостольному князю Владимиру, во Святом Крещении Василию

О, вели́кий и пресла́вный уго́дниче Бо́жий, богоизбра́нный и богопросла́вленный, равноапо́стольный кня́же Влади́мире, свято́е и великоде́йственное ору́дие всеблага́го Про́мысла о спасе́нии наро́да Росси́йскаго! Ты отри́нул еси́ злове́рие и нече́стие язы́ческое, уве́ровал еси́ во Еди́наго И́стиннаго Триипоста́снаго Бо́га и, восприя́в свято́е Креще́ние, просвети́л еси́ све́том Боже́ственной ве́ры и благоче́стия страну́ Росси́йскую. Сла́вяще у́бо благодаря́ще Премилосе́рдаго Творца́ и Спаси́теля на́шего, сла́вим и благодари́м тя, вели́кий па́стырю и о́тче наш, я́ко тобо́ю позна́хом спаси́тельную ве́ру Христо́ву и крести́хомся во и́мя Пресвяты́я и Пребоже́ственныя Тро́ицы, то́ю же ве́рою изба́вихомся от пра́веднаго осужде́ния Бо́жия, ве́чнаго ра́бства диа́воля и а́дова мучи́тельства, то́ю ве́рою восприя́хом благода́ть всыновле́ния Бо́гу и наде́жду насле́дования Небе́снаго блаже́нства. Ты еси́ перве́йший наш вождь к Нача́льнику и Соверши́телю на́шего ве́чного спасе́ния, Го́споду Иису́су Христу́, ты еси́ ближа́йший предста́тель пред Престо́лом Царя́ ца́рствующих и те́плый моли́твенник и хода́тай о стране́ на́шей и о всех лю́дех, ты еси́ перве́йший вино́вник благослове́ний и ми́лостей Бо́жиих, почива́ющих на нас. И что еще́ рече́м? Не мо́жет язы́к наш изобрази́ти вели́чие и высоту́ благодея́ний твои́х, излия́нных на нас недосто́йных. Но, о неразу́мия и ослепле́ния на́шего! Прие́мше толи́кая благодея́ния, ни во что же вмени́хом я́ и отщети́хомся спаси́тельных плодо́в твои́х. Омы́вшеся бо от греха́ в купе́ли Креще́ния и обле́кшеся в оде́жду чистоты́ и неви́нности, оскверни́хом сию́ благода́тную оде́жду сту́дными дея́нии и помышле́нии на́шими. Отре́кшеся сатаны́ и а́ггелов его́, па́ки порабоща́емся ему́, служа́ще и́долом страсте́й на́ших, ми́ру, пло́ти и злым обы́чаем ве́ка. Сочета́вшеся Христу́, вы́ну оскорбля́ем Его́ беззако́нии на́шими, многообра́зными я́звами го́рдости, за́висти, зло́бы, злосло́вия, невоздержа́ния и презо́рства ко Святе́й Це́ркви. Прилепи́хомся всеце́ло к су́етным бла́гом, а́ки мня́ще во ве́ки пребыва́ти на земли́, не помышля́ем о Не́бе, о душе́, о сме́рти, о суде́, о несконча́емей ве́чности. Сего́ ра́ди воздвиза́ем на ся пра́ведный гнев и осужде́ние Бо́жие, ку́пно же оскорбля́ем и преогорчева́ем твою́ о́тчую любо́вь и попече́ние о нас, ты бо просвети́л еси́ нас святы́м Креще́нием, во е́же спосо́бствовати нам к получе́нию Небе́снаго блаже́нства и земна́го благоде́нствия, мы же неразу́мнии злым произволе́нием на́шим са́ми себе́ подверга́ем а́довым му́кам и вре́менным бе́дствием! Но, о всеблаги́й о́тче и просвети́телю наш, ми́лостив бу́ди к на́шим не́мощем, долготерпели́в ко грехо́м и непра́вдам на́шим, умоли́ Премилосе́рдаго Царя́ Небе́снаго, да не прогне́вается на ны зело́ и не погуби́т нас со беззако́ньми на́шими, но да поми́лует и спасе́т нас, и́миже весть судьба́ми. Да всади́т в сердца́ на́ша спаси́тельный страх Свой, да просвети́т Свое́ю благода́тию ум наш, во е́же узре́ти нам бе́здну поги́бели, в ню́же стреми́мся, оста́вити стези́ нече́стия и заблужде́ний, обрати́тися же на путь спасе́ния и и́стины, неукло́нно исполня́ти за́поведи Бо́жии и уста́вы Святы́я Це́ркве. Моли́, благосе́рде, Человеколю́бца Бо́га, да яви́т нам вели́кую ми́лость Свою́, да изба́вит нас от наше́ствия иноплеме́нников, от вну́тренних нестрое́ний, мяте́жей и раздо́ров, от гла́да, смертоно́сных боле́зней, и от вся́каго зла, да пода́ст нам благорастворе́ние возду́ха и плодоно́сие земли́, да сохрани́т в су́дящих и нача́льствующих пра́вду и ми́лость, да даст духо́вным па́стырем непоро́чность жития́ и ре́вность о спасе́нии пасо́мых, всем же лю́дем усе́рдие в исполне́нии свои́х обя́занностей, взаи́мную любо́вь и единомы́слие, стремле́ние ко бла́гу оте́чества и Святы́я Це́ркве. Да распространи́т свет спаси́тельныя ве́ры в стране́ на́шей, во всех конце́х ея́, да обрати́т к правове́рию неве́рующих, да упраздни́т вся е́реси и раско́лы, да, та́ко пожи́вше в ми́ре на земли́, сподо́бимся с тобо́ю ве́чнаго блаже́нства, хва́ляще и превознося́ще Бо́га во ве́ки веко́в. Ами́нь.

Молитва преподобномученику Афанасию, игумену Брестскому

О, вели́кий уго́дниче Христо́в, святы́й преподобному́чениче Афана́сие! К тебе́ мы гре́шнии и смире́нии, я́ко те́плому на́шему засту́пнику и скоропослу́шнику, моли́твенно прибега́ем и из глубины́ се́рдца взыва́ем. При́зри на ны ско́ро и умоли́ человеколю́бца Бо́га, да не осу́дит нас гре́шных по беззако́ниям на́шим, но да сотвори́т с на́ми по вели́кой Свое́й ми́лости. Охрани́ нас заступле́нием от облежа́щего нас суему́дрия и неправове́рия, и я́ко па́стырь до́брый, упаси́ заблу́дшия о́вцы ста́да Христо́ва и во дворы́ Госпо́дни сия́ всели́. Огради́ нас от собла́зна, ересе́й и раско́лов и наста́ви тве́рдо в ве́ре Правосла́вней подвиза́тися. Потщи́ся, ско́рый о нас предста́телю, благоприя́тным хода́тайством умоли́ти Го́спода, да ниспосле́т нам ти́хое и богоуго́дное житие́, уврачу́ет Свое́ю благода́тию на́ша боле́зни душе́вныя и теле́сныя, согре́ет на́ша сердца́ любо́вию друг ко дру́гу и сотвори́т нас братолю́бны и единомы́сленны. Испроси́ та́кожде у Го́спода и всего́ потре́бнаго для жития́ на́шего теле́снаго: земли́ плодоро́дия, благорастворе́ния возду́хов и ми́рнаго устрое́ния. Страну́ на́шу и ве́си и гра́ды охрани́ моли́твами твои́ми от огня́, пото́па, тру́са, вра́жескаго наше́ствия и вну́тренних нестрое́ний. Егда́ же приспе́ет час кончи́ны на́шея, утверди́ в нас па́мять сме́ртную, да и мы, в и́стинном покая́нии и чи́стым све́дением со́вести на́шея предста́вшие ко Го́споду, сподо́бимся десна́го стоя́ния и со все́ми святы́ми воспое́м сла́ву Отцу́ и Сы́ну и Свято́му Ду́ху во ве́ки веко́в. Ами́нь.

Молитва преподобному Иову, игумену Почаевскому

О, преподо́бне о́тче И́ове, и́ноков трудолю́бнаго жития́ богому́дрый наста́вниче, кро́тости и воздержа́ния, чистоты́ и целому́дрия, братолю́бия и нищелю́бия, терпе́ния и бде́ния от ра́нней ю́ности до по́здней ста́рости неутоми́мый подви́жниче, ве́ры Правосла́вныя вели́кий ревни́телю и непреобори́мый побо́рниче, земли́ Волы́нския и Га́лицкия свети́ло благосве́тлое и святы́я Поча́евския оби́тели непобеди́мый защи́тниче! При́зри о́ком благоутро́бия твоего́ на нас недосто́йных чад твои́х, к тебе́ усе́рдно по вся дни прибега́ющих и на боголюби́выя лю́ди сия́, пред твои́ми духоно́сными и многоцеле́бными моща́ми собра́вшияся и благогове́йно к тем припа́дающия, и испроси́ предста́тельством твои́м ко Всевы́шнему Влады́це им и нам вся, я́же к животу́ и благоче́стию, поле́зная и благопотре́бная: боля́щия исцели́, малоду́шныя обо́дри, скорбя́щия уте́ши, оби́димыя заступи́, немощны́я подкрепи́ и пове́рженныя до́лу возста́ви, всем вся, благода́тию от Бо́га да́нною, да́руй, по коего́ждо ну́жде и потре́бе, во спасе́ние души́ и во здра́вие те́лу. Вознеси́ уго́дниче Бо́жий всемо́щную моли́тву твою́ о Росси́йской держа́ве, да бу́дет вы́ну мир и тишина́, благоче́стие и благоде́нствие, в суда́х пра́вда и ми́лость, в сове́тах му́дрость и благо́е преспе́яние, да утвержда́ется же во благи́х челове́цех ве́рность, в злых же страх и боя́знь, во е́же преста́ти им от зла и твори́ти до́брая, да та́ко в держа́ве Росси́йстей ца́рство Христо́во расте́т и мно́жится и да просла́вится в нем Бог, ди́вный во святы́х свои́х: Ему́же еди́ному подоба́ет вся́кая сла́ва, честь и поклоне́ние Отцу́ и Сы́ну, и Свято́му Ду́ху, ны́не и при́сно, и во ве́ки веко́в. Ами́нь.

Молитва преподобному Нестору Летописцу, Печерскому, в Ближних пещерах

О, преподо́бне о́тче, прему́дре наста́вниче и Боголюбе́зне подви́жниче Не́сторе Летописче! Предстоя́й со дерзнове́нием престо́лу Ве́чныя Сла́вы, не забу́ди на́с гре́шных и недосто́йных, бу́рями страсте́й отягче́нных, и хода́тайством твои́м непреста́нным защити́ страну́ на́шу, тебе́ при́сную, и соотчии твоя́ от вся́ких зо́л и скорбе́й. Утверди́ се́рдца на́ша в правосла́вней ве́ре, оте́чество свое́ научи́ люби́ти и в братолю́бии кре́пце пребыва́ти. Наста́ви на́с на стези́ спасе́ния, да моли́твами твои́ми, засту́пниче на́ш, вни́дем в ве́чное Ца́рство сла́вы, восхваля́юще Го́спода и прославля́юще твое́ заступле́ние во ве́ки веко́в. Ами́нь.

Молитва святителю Иннокентию, епископу Иркутскому

К тебе́, свя́тче Бо́жий, я́ко к ско́рому помо́щнику и моли́твеннику о спасе́нии мое́м, аз недосто́йный и гре́шный припа́дая молю́ся: не пре́зри мене́ уны́лаго, не́мощнаго, во мно́гая беззако́ния впа́дшаго, и по вся дни и часы́ согреша́ющаго, но вонми́ души́ мое́й, я́ко скорблю́, и умоли́ Го́спода Бо́га всея́ тва́ри Соде́теля, Ему́же ны́не предстои́ши в ра́дости святы́х и с ли́ки а́нгелов, поми́ловати мя и извести́ из темни́цы грехо́вныя ду́шу мою́, пре́жде да́же не отъиду́ отсю́ду и ктому́ не угото́в явлю́ся на суд Его́. Ей, о́тче! не посрами́ мене́, к тебе́ с ве́рою притека́ющаго, а́ще бо и недосто́ин есмь твоего́ хода́тайства и заступле́ния, но ты, быв подража́тель человеколю́бия Бо́жия, сотвори́ мя досто́йна чрез обраще́ние от злых дел к благо́му житию́, да та́ко душе́ю и те́лом здрав быв, сла́влю и пою́ ди́внаго во святы́х Свои́х Бо́га на́шего и твое́ те́плое заступле́ние, всегда́, ны́не и при́сно, и во ве́ки веко́в. Ами́нь.

Молитва преподобному Амфилохию Почаевскому

О, всеблаже́нне о́тче на́ш Амфило́хие, земны́й А́нгеле и небе́сный челове́че! Припа́даем к тебе́ с ве́рою и любо́вию и мо́лим ти́ ся́ приле́жно: яви́ на́м смире́нным и гре́шным свято́е свое́ заступле́ние; се́ бо гре́х ра́ди на́ших не и́мамы дерзнове́ния проси́ти о потре́бах на́ших Го́спода и Влады́ку на́шего, но тебе́, моли́твенника благоприя́тнаго, к Нему́ предлага́ем и про́сим тя́ со усе́рдием мно́гим: испроси́ на́м от бла́гости Его́ благопотре́бная да́ры душа́м и телесе́м на́шим, ве́ру пра́ву, любо́вь ко все́м нелицеме́рну, в злострада́ниих терпе́ние, тя́жкими боле́зньми одержи́мым – от неду́гов исцеле́ние, под бре́менем скорбе́й и напа́стей неудобоноси́мых па́дающих и жития́ своего́ отча́явшихся твои́ми моли́твами получи́ти ско́рое облегче́ние и избавле́ние.
Не забу́ди, блаже́нне о́тче, и оби́тель сию́ святу́ю, в не́й же подвиза́лся еси́, при́сно тя́ чту́щую, но соблюди́ ю́ и все́х живу́щих и подвиза́ющихся в не́й и на поклоне́ние в ню́ приходя́щих невреди́мыми от искуше́ний диа́вольских и вся́каго зла́. Егда́ же приспе́ет на́ше от вре́меннаго сего́ жития́ отше́ствие, и к ве́чности преселе́ние, не лиши́ на́с по́мощи твоея́ небе́сныя, но моли́твами твои́ми все́х на́с приведи́ в приста́нище спасе́ния и насле́дники яви́ на́с бы́ти всесве́тлаго Ца́рствия Христо́ва, да пое́м и сла́вим неизрече́нныя щедро́ты Человеколю́бца Бо́га Отца́ и Сы́на и Свята́го Ду́ха и твое́ вку́пе с преподо́бным И́овом оте́ческое заступле́ние во ве́ки веко́в. Ами́нь.

Молитва благоверному великому князю Андрею Боголюбскому

О, святы́й благове́рный вели́кий кня́же Боголю́бский Андре́е! Ра́бе Бо́жий ве́рный и Богославный, христиа́нине истовый и Богоревнивый, му́же доброде́тельный и Богому́дрый, во́ине всечестны́й и воево́до доброхва́льный, прави́телю держа́вный и дерзнове́нный! Ру́сь Святу́ю на уде́лы и кня́жества разобщенную, Бо́жиим хоте́нием хотя́щий во еди́ное Русское Ца́рствие собра́ти и единодержавно Е́ю пра́вити, да непреобори́ма пребу́дет от все́х вра́г ви́димых и неви́димых, возстаю́щих на правосла́вныя христиа́ны. Да не тщетны бу́дут твои́ святи́и дея́ния во сла́ву и че́сть Бо́га Христиа́нскаго, иде́же твое́ Богосве́тлое строе́ние Бо́гом люби́маго Ца́рства Правосла́внаго на Ру́сской Земле́ зри́м и велича́ем, егда́ сто́льный гра́д Влади́мир и Боголюби́вую оби́тель Пресвяте́й Богоро́дице воздви́гнувый, иде́же ты́ в не́й посреди́ но́щи неповинне злочестивыми и клятвопреступными свои́ми слуга́ми взя́тый и от ру́к и́х беззако́нно и жесточайшими меча́ми убие́нный, и честно́ю кро́вию свое́ю истекаемый, тве́рдое основа́ние Единодержавию Правосла́вной Руси́ та́ко положи́вый. И ны́не мы́, грешные рабы́ Бо́жии (имена́), в Богомощное небе́сное предста́тельство твое́ ве́руем, и́бо му́ченическим венце́м житие́ твое́ запечатлевшее, мо́лим тя́, да изба́вит на́с Госпо́дь от крамолы́ слу́г антихристовых и от кровавых жертвоприношений и жидовских обы́чаев, и да спасе́тся Земля́ Ру́сская от и́га сатани́нскаго, и́бо име́ем тя́, вели́каго уго́дника Бо́жия, неустрашимаго ра́тника Христо́ва, егда́ на поля́х земно́й бра́ни со мно́гими врага́ми за Ве́ру святу́ю и Оте́чество сражавыйся, и сто́ль ди́вную сла́ву Бо́жиих побе́д все́й Ру́сской Земле́ показу́ющий. И ты́, я́ко держа́вный воево́до и святы́й му́ченик, и всегда́ дерзнове́нный о на́с моли́твенник, Боголюби́вый и неуста́нный созидателю Свято́й Руси́, во святы́х мощах ди́вно просла́вленный, и в по́мощь и в заступле́ние на́м оста́вленный, возстани за на́с проти́ву иноплеме́нных, чужеземных и зловре́дных супоста́т, и противоста́ни и́м со мнозими святими князьями-воинами, и пе́рвее со святим равноапо́стольным вели́ким князе́м Влади́миром и свято́й равноапостольной вели́кой княгиней Ольгой, и с вели́кими благове́рными князьями первомучениками-страстотерпцами Бори́сом и Гле́бом, и со святы́м во́ином преподобному́чеником Игорем Черни́говским, и святы́м благове́рным вели́ким князе́м Георгием Всеволодовичем Владимирским, вку́пе же и с Богосве́тлыми сына́ми твои́ми князьями-му́чениками Гле́бом Владимирским и храбрым Изяславом, да и́х по́мощию не позыблем пребу́дет До́м Пресвяты́я Богоро́дицы, все́й Руси́ Держа́вной Влады́чицы, и да просла́вится и просияет тобо́ю, кня́же Андре́е, во вся́ ве́ки Земля́ Ру́сская и напо́лнится благочести́вым христиа́нским ро́дом по благослове́нию Богоро́дицы, и Благода́тию Ея́ многочудотворных ико́н Влади́мирской и Боголюбской, и па́ки угобзится и укрепи́тся сла́ва Руси́ Правосла́вной, и просияет Невеще́ственным и Животво́рным све́том Бо́га Отца́, Сы́на и Свята́го Ду́ха. Ами́нь.

Перевод: (имена́)

Молитва праведной Иулиании деве, княжне Ольшанской

О, свята́я пра́ведная де́во Иулиани́е, княжно́ Ольша́нская, помо́щнице всем жа́ждущим спасе́ния и исцеле́ния от боле́зней душ и теле́с, принеси́ моли́твы ко Го́споду на́шему Иису́су Христу́ и Пречи́стей Его́ Ма́тери и Присноде́ве Мари́и за вся наро́ды Вели́кия, Ма́лыя и Бе́лыя Росси́и. Умоли́ Спаса́ на́шего, да обратя́тся вси лю́дие к ве́ре Правосла́вней, да укрепя́т любо́вь взаи́мную и духо́вное еди́нство. Ты, му́драя де́во, ве́лию си́лу благода́ти Бо́жия в себе́ показа́вшая и в со́мне святы́х Пече́рских просла́вленная, укрепи́ испове́дников ве́ры Правосла́вныя, пода́ждь им тве́рдость и му́жество, обрати́ заблу́дших к покая́нию и исправле́нию, сохрани́ всю страну́ на́шу от гла́да, тру́са, пото́па, огня́, междоусо́бныя бра́ни и от всех враго́в ви́димых и неви́димых. О, свята́я а́гнице Бо́жия, я́ко име́яй дар мно́зи боле́зни цели́ти и от ко́зней враго́в огражда́ти, исцели́ у́бо на́ша страсти́ душе́вныя и облегчи́ тя́жкия боле́зни теле́сныя, отра́ду в скорбе́х да́руй и изба́ви нас от вся́ких бед и напа́стей. При́зри на вся предстоя́щия честны́м твои́м моще́м и прося́щия твоея́ по́мощи се́рдцем сокруше́нным и ду́хом смире́нным, да принесе́м во всем житии́ на́шем плоды́ духо́вныя: любо́вь, бла́гость, милосе́рдие, ве́ру, кро́тость, воздержа́ние, да сподо́бимся жи́зни ве́чныя и да любо́вию твое́ю огражда́еми пое́м просла́вльшему тя Го́споду Иису́су Христу́, Ему́же подоба́ет вся́кая сла́ва и честь со Безнача́льным Его́ Отце́м и с Пресвяты́м и Животворя́щим Его́ Ду́хом, ны́не, и при́сно, и во ве́ки веко́в. Ами́нь.

Молитва 1-я равноапостольной княгине Ольге, во Святом Крещении Елене

О, свята́я равноапо́стольная вели́кая княги́не О́льго, первоуго́днице Росси́йская, те́плая о нас пред Бо́гом хода́таице и моли́твеннице! К тебе́ прибега́ем с ве́рою и мо́лимся с любо́вию: бу́ди нам во всем ко бла́гу помо́щница и споспе́шница и, я́коже во вре́менней жи́зни тща́лася еси́ просвети́ти пра́отцы на́ша све́том святы́я ве́ры и наста́вити я́ твори́ти во́лю Госпо́дню, та́ко и ны́не, в Небе́сней пребыва́еши све́тлости, благоприя́тными твои́ми к Бо́гу моли́твами вспомоществу́й нам в просвеще́нии ума́ и се́рдца на́шего све́том Ева́нгелия Христо́ва, да преспева́ем в ве́ре, благоче́стии и любви́ Христо́ве. В нищете́ и ско́рби су́щия уте́ши, бе́дствующим пода́ждь ру́ку по́мощи, оби́димыя и напа́ствуемыя заступи́, заблу́дшия от пра́выя ве́ры и ересьми́ ослепле́нныя вразуми́ и испроси́ нам у Всеще́драго Бо́га вся блага́я и поле́зная жи́зни вре́менней и ве́чней, да та́ко благоуго́дне зде пожи́вше, сподо́бимся насле́дия благ ве́чных в безконе́чном Ца́рствии Христа́ Бо́га на́шего, Ему́же со Отце́м и Святы́м Ду́хом подоба́ет вся́кая сла́ва, честь и поклоне́ние всегда́, ны́не и при́сно и во ве́ки веко́в. Ами́нь.

Молитва 2-я преподобному Иову, игумену Почаевскому

О, всесвяты́й и пресла́вный уго́дниче Бо́жий, преподо́бне о́тче наш И́ове, при́сный о нас ко Го́споду моли́твенниче и те́плый предста́телю о душа́х на́ших, к тебе́ всеумиле́нно ны́не притека́ем и, помина́юще по́двиги и чудеса́ твоя́, я́же сотвори́л еси́ и твори́ши на земли́, про́сим и мо́лим твою́ благосты́ню: я́коже тве́рдо и неизме́нно потруди́лся еси́ в ве́ре Христа́ Бо́га на́шего, и, сию́ до конца́ в себе́ и во всех при́сных твои́х це́лу и невреди́му сохрани́вый от вся́ких прираже́ний вра́жиих и ересе́й тлетво́рных, си́це и нас в Правосла́вии и единомы́слии укрепи́, отгоня́я моли́твами твои́ми вся́кую тьму неве́рия и неправомы́слия от серде́ц и помышле́ний на́ших; послужи́вый Го́споду и Бо́гу твоему́ де́лы благи́ми и неизрече́нным самоотверже́нием в труде́х, бде́ниих и поще́ниих, наста́ви нас на путь вся́кия доброде́тели и благосты́ни, избавля́я от искуше́ний и грехо́в, удаля́ющих нас от Бо́га и поверга́ющих в бе́здну зла все житие́ на́ше; яви́выйся иногда́ с Пречи́стою Де́вою Богоро́дицею верху́ горы́ Поча́евския во спасе́ние оби́тели твоея́ от наше́ствия и обложе́ния ага́рянскаго, и ны́не ускори́ на по́мощь стране́ на́шей проти́ву всех враго́в на́ших, вне́шних и вну́тренних, утвержда́я мир и тишину́ в земли́ на́шей, да безмо́лвное житие́ поживе́м во вся́ком благоче́стии и чистоте́; и всем к тебе́ притека́ющим и припа́дающим к ра́це честны́х и многоцеле́бных моще́й твои́х и твоея́ по́мощи и заступле́ния тре́бующим неоску́дныя ми́лости незави́стно подава́яй, не оста́ви и нас, си́рых и безпо́мощных, тебе́ моля́щихся, избавля́я от вся́кия ско́рби, гне́ва и ну́жды, от гла́да, губи́тельства, тру́са, пото́па, огня́, меча́, наше́ствия иноплеме́нник и междоусо́бныя бра́ни. Ей, уго́дниче Бо́жий, при́зри ми́лостивно от Престо́ла Царя́ Сла́вы, Ему́же ты ны́не предстои́ши со Арха́нгелы и А́нгелы и со все́ми святы́ми, на оби́тель твою́ Поча́евскую, е́юже ты дре́вле му́дро пра́вил еси́, назда́в ю́ всехва́льным и ди́вным житие́м твои́м, и сохрани́ ю́ моли́твами твои́ми и вся́кий град, и страну́ и всех отовсю́ду, на мо́ре и на су́ши, в пусты́нях и в заключе́ниих многоразли́чных тебе́ призыва́ющих, от всех зол, ви́димых и неви́димых, да, та́ко твое́ю по́мощию и хода́тайством спаса́еми, в ве́це сем и по сконча́нии живота́ на́шего сподо́бимся ку́пно с тобо́ю сла́вити и воспева́ти всечестно́е и́мя Отца́, и Сы́на, и Свята́го Ду́ха во ве́ки веко́в. Ами́нь.

Молитва 2-я преподобномученику Афанасию, игумену Брестскому

О, уго́дниче Христо́в, о́тче наш Афана́сие! Принеси́ моли́тву на́шу к ми́лостивому и всеси́льному Бо́гу и испроси́ нам, раба́м Бо́жиим (имена), у бла́гости Его́ вся я́же на по́льзу душа́м и телесе́м на́шим, ве́ру пра́ву, наде́жду несумне́нну, любо́вь нелицеме́рну, во искуше́ниях му́жество, в злострада́ниях терпе́ние, во благоче́стии преспея́ние, да не во зло обрати́м дары́ Всеблага́го Бо́га. Не забу́ди, чудотво́рче святы́й, и святы́й храм (дом) сей и прихо́д наш: сохрани́ и соблюди́ их моли́твами твои́ми от вся́каго зла. Ей, свя́тче Бо́жий, сподо́би нас кончи́ну благу́ю улучи́ти и Ца́рствие Небе́сное унасле́дити, да просла́вим ди́внаго во святы́х Свои́х Бо́га, Ему́же подоба́ет вся́кая сла́ва, честь и держа́ва во ве́ки веко́в. Ами́нь.

Молитва 2-я равноапостольной княгине Ольге, во Святом Крещении Елене

О, вели́кая уго́дница Бо́жия, богоизбра́нная и богопросла́вленная, равноапо́стольная вели́кая княги́не О́льго! Ты отри́нула еси́ злове́рие и нече́стие язы́ческое, уве́ровала еси́ во Еди́ного И́стиннаго Триипоста́сного Бо́га, и восприя́ла еси́ свято́е Креще́ние, и положи́ла еси́ нача́ло просвеще́нию земли́ Росси́йския све́том ве́ры и благоче́стия. Ты еси́ духо́вная родонача́льница на́ша, ты по Христе́ Спаси́теле на́шем пе́рвая вино́вница просвеще́ния и спасе́ния ро́да на́шего. Ты еси́ те́плая моли́твенница и хода́таица о оте́честве Всеросси́йстем, во́инстве и всех лю́дех. Сего́ ра́ди смире́нно мо́лим тя: при́зри на не́мощи на́ша и умоли́ Премилосе́рдаго Царя́ Небе́снаго, да не прогне́вается на ны зело́, я́ко по не́мощем на́шим по вся дни согреша́ем, да не погуби́т нас со беззако́ньми на́шими, но да поми́лует и спасе́т нас по ми́лости Свое́й, да всади́т в сердца́ на́ша спаси́тельный страх Свой, да просвети́т Свое́ю благода́тию ум наш, во е́же разуме́ти нам пути́ Госпо́дни, оста́вити стези́ нече́стия и заблужде́ний, тща́тися же во стезя́х спасе́ния и и́стины, неукло́ннаго исполне́ния за́поведей Бо́жиих и уста́вов Святы́я Це́ркве. Моли́, блаже́нная О́льго, Человеколю́бца Бо́га, да проба́вит нам вели́кую ми́лость Свою́, да изба́вит нас от наше́ствия иноплеме́нных, от вну́тренних нестрое́ний, мятеже́й и раздо́ров, от гла́да, смертоно́сных боле́зней и от вся́каго зла, да пода́ст нам благорастворе́ние возду́ха и плодоно́сие земли́, да сохрани́т страну́ на́шу от всех ко́зней и наве́т вра́жиих, да соблюде́т в судия́х и прави́телех пра́вду и ми́лость, да даст па́стырем ре́вность о спасе́нии пасо́мых, всем же лю́дем споспеше́ние, о е́же усе́рдно слу́жбы своя́ исправля́ти, любо́вь ме́жду собо́ю и единомы́слие име́ти, да на бла́го оте́чества и Святы́я Це́ркве ве́рне подвиза́тися, да воссия́ет свет спаси́тельныя ве́ры в стране́ на́шей во всех конце́х ея́, да обратя́тся к ве́ре неве́рующии, да упраздня́тся вся е́реси и раско́лы. Да, та́ко пожи́вши в ми́ре на земли́, сподо́бимся с тобо́ю ве́чнаго блаже́нства на Небеси́, хва́ляще и превознося́ще Бо́га во ве́ки веко́в. Ами́нь.

Молитва 2-я благоверному великому князю Андрею Боголюбскому

О, вели́кий святы́й кня́же Андре́е, великому́чениче и страстоте́рпче, ты́ па́че мно́гих ины́х соплеменников ро́да твоего́ за благоче́стие и Богопочита́ние твое́ возлю́блен бы́сть Богоро́дицею, и пред Не́й непреста́нно хода́тайствуеши о вели́чии и сла́ве Свято́й Руси́. Моли́ся кре́пце о на́с гре́шных раба́х Бо́жиих (имена́), и о все́х правосла́вных чадах Земли́ Ру́сской, и я́коже Богому́дрый оте́ц и Держа́вный воево́до прему́дро возрасти́вший в стра́се Бо́жием и ве́ре Христо́вей сыновей свои́х, соде́лав и́х храбрыми воинами проти́ву супоста́тов, иде́же увенчанные златы́ми му́ченическими венца́ми на небесе́х све́тло Престо́лу Бо́га Жи́зни вку́пе с тобо́ю ны́не предстоя́т, поуча́яй та́кожде и на́с. Помога́я на́м бы́ти досто́йными воинами христо́выми, и а́бие собери́ на́с разрозненных воеди́но, я́коже собира́л еси́ вернопо́дданных свои́х и лю́бящих тя́ во еди́ное Христо́во ста́до, и́же тя́ в земно́м житии́ твое́м вси́ я́коже отца́ своего́ Держа́внаго почита́ху, та́ко и мы́, чти́м тя́, я́ко небе́снаго на́шего покрови́теля и Боголюби́ваго кня́зя, и всегда́ прославля́ем и велича́ем тя́. Помоли́ся ко Пресвяте́й Тро́ице и к Ма́тери Бо́жией, да сотвори́т Госпо́дь на́с нелицемерными, а Бо́гу преданными ча́дами Свято́й Руси́, да и мы́ в правосла́вней ве́ре сохрани́м вели́кое насле́дие Боголюбимой оби́тели Пресвято́й Богоро́дицы, Ея́ же, я́ко ве́лий да́р на́м Бо́г оста́ви. И я́коже ты́, мно́зи хра́мы Бо́гу Христу́ воздви́гнувый, в ни́х же мно́жится си́ла и сла́ва Ца́рства Божьего, та́ко воздви́гни и на́с от грехолюбия к благочести́вому боголюби́вому житию́. Мы́ же моля́щиеся гре́шнии рабы́ Бо́жии (имена́), смире́нно про́сим твоего́ предста́тельства и небе́сныя по́мощи: ве́ры правосла́вныя укрепле́ния, любы́ к Бо́гу и бли́жним соверше́ннаго достиже́ния. Испроси́ на́м та́кожде, святы́й вели́кий кня́же, от Го́спода Вседержи́теля, да пошлет Спаси́тель Госпо́дь пребогатые земные и небесные щедро́ты и ми́лости все́м обездоленным и во греха́х погиба́ющим душа́м и всему́ Оте́честву вели́каго Ца́рства Ру́сскаго, да возсия́ет повсю́ду ве́ра Бо́жия правосла́вная, да пода́ст Госпо́дь все́м заблудшим лю́дем: ве́ры Христо́вой приобще́ние, душа́м прозре́ние, покая́ние и отпуще́ние мно́гих и тя́жких грехо́в: клятвопреступле́ния, преда́тельства, человекоубийства, царененавистничества, братоубийства и вся́каго ро́да злоде́йства, иде́же пребыва́ет в наро́де Руси́ не просвященной Бо́гом Христо́м. Да исто́ргнет Госпо́дь Искупи́тель грехи́ на́ши российскии из все́й на́шей жи́зни, я́ко зло́е зе́лие, а на́с все́х чту́щих тя́ и лю́бящих Бо́га и Богоро́дицу и все́х ру́сских царе́й, да спасе́т Человеколюби́вый Госпо́дь Иису́с Христо́с из ру́к враго́в на́ших, и посе́м возста́вит на́м Богому́драго прави́теля Госуда́ря Самоде́ржца, пома́заннаго Ду́хом Святы́м по му́жеству и добро́те тебе́ подо́бнаго, и́же возмо́гл бы в ду́хе пра́вом, в чистоте́ и свя́тости ве́ру Христо́ву в лю́дех возроди́ти, умно́жити и удержа́ти, и упрочити Бо́гом возлю́бленное Оте́чество Русское, и к Небе́сному Оте́честву на́с провожда́ти все́х, я́ко свои́х вернопо́дданных, велегла́сно прославля́ющих тя́, кня́же Андре́е, во сла́ве Невече́рняго Огнезра́чнаго Све́та, Предстоя́щаго и сла́вящаго в со́нме святы́х Бо́га Отца́, Сы́на и Свята́го Ду́ха, ны́не и при́сно и во ве́ки веко́в. Ами́нь.

Перевод: (имена́)

Молитва 2-я равноапостольному князю Владимиру, во Святом Крещении Василию

О, вели́кий уго́дниче Бо́жий, богоизбра́нный и богопросла́вленный, равноапо́стольный кня́же Влади́мире! Ты́ отри́нул еси́ злове́рие и нече́стие язы́ческое, уве́ровал еси́ во Еди́наго И́стиннаго Триипоста́снаго Бо́га и, восприя́в Свято́е Креще́ние, просвети́л еси́ све́том Боже́ственныя ве́ры и благоче́стия всю́ страну́ Ру́сскую. Сла́вяще у́бо и благодаря́ще Премилосе́рдаго Творца́ и Спаси́теля на́шего, сла́вим, благодари́м и тя́, просвети́телю на́ш и о́тче, я́ко тобо́ю позна́хом спаси́тельную ве́ру Христо́ву и крести́хомся во И́мя Пресвяты́я и Пребоже́ственныя Тро́ицы: то́ю ве́рою изба́вихомся от пра́веднаго осужде́ния Бо́жия, ве́чнаго ра́бства диа́воля и а́дова мучи́тельства; то́ю ве́рою восприя́хом благода́ть всыновле́ния Бо́гу и наде́жду насле́дования Небе́снаго блаже́нства. Ты́ еси́ пе́рвый во́ждь на́ш к Нача́льнику и Соверши́телю на́шего ве́чнаго спасе́ния Го́споду Иису́су Христу́; ты́ еси́ те́плый моли́твенник и хода́тай о стране́ Ру́сской, о во́инстве и о все́х лю́дех. Не мо́жет язы́к на́ш изобрази́ти вели́чие и высоту́ благодея́ний, тобо́ю излия́нных на зе́млю на́шу, отце́в и пра́отцев на́ших и на на́с, недосто́йных. О всеблаги́й о́тче и просвети́телю на́ш! При́зри на не́мощи на́ша и умоли́ премилосе́рдаго Царя́ Небе́снаго, да не прогне́вается на ны́ зело́, я́ко по не́мощем на́шим по вся́ дни́ согреша́ем, да не погуби́т на́с со беззако́ньми на́шими, но да поми́лует и спасе́т на́с, по ми́лости Свое́й, да всади́т в се́рдце на́ше спаси́тельный стра́х Сво́й, да просвети́т Свое́ю благода́тию у́м на́ш, во е́же разуме́ти на́м пути́ Госпо́дни, оста́вити стези́ нече́стия и заблужде́ний, тща́тися же во стезя́х спасе́ния и и́стины, неукло́ннаго исполне́ния за́поведей Бо́жиих и уста́вов Святы́я Це́ркве. Моли́, благосе́рде, Человеколю́бца Го́спода, да проба́вит на́м вели́кую ми́лость Свою́, да изба́вит на́с от наше́ствия иноплеме́нных, от вну́тренних нестрое́ний, мяте́жей и раздо́ров, от гла́да, смертоно́сных боле́зней и от вся́каго зла́, да пода́ст на́м благорастворе́ние возду́ха и плодоно́сие земли́, да да́ст па́стырем ре́вность о спасе́нии пасо́мых, все́м же лю́дем споспеше́ние о е́же усе́рдно слу́жбы своя́ исправля́ти, любо́вь между́ собо́ю и единомы́слие име́ти, на бла́го же Оте́чества и Святы́я Це́ркве ве́рне подвиза́тися, да возсия́ет све́т спаси́тельныя ве́ры в стране́ на́шей во все́х конце́х ея́, да упраздня́тся вся́ е́реси и раско́лы, да та́ко пожи́вше в ми́ре на земли́, сподо́бимся с тобо́ю ве́чнаго блаже́нства, хва́ляще и превознося́ще Бо́га во ве́ки веко́в. Ами́нь.

Молитва 2-я святителю Иннокентию, епископу Иркутскому

Святи́телю, о́тче Инноке́нтие! При́зри на нас, раб Бо́жиих (имена), и на прихо́д (дом) сей; моли́ Христа́ Бо́га, да низпосле́т нам Ду́ха Своего́ Свята́го дар, во е́же умудри́ти нас ходи́ти пред Ним во вся́ком благоче́стии и чистоте́. Мы при́сно заблужда́ем от пути́ спасе́ния: руководи́ нас, ми́лостивый наш наста́вниче. Мы не́мощни есмы́ в ве́ре: утверди́ нас, правове́рия учи́телю. Мы зело́ убо́зи сотвори́хомся до́брых дел: обогати́ нас, благосе́рдия сокро́вище. Мы при́сно наве́туеми есмы́ от враг, ви́димых и неви́димых, и озлобля́еми: помози́ нам, безпо́мощных засту́пниче; да славосло́вяще и́мя Бо́жие во дни и в нощи́, сподо́бимся бы́ти насле́дницы жи́зни ве́чныя, и просла́вим Отца́ и Сы́на и Свята́го Ду́ха, ны́не и при́сно, и во ве́ки веко́в. Ами́нь.

Перевод:

(имена)

Молитва 2-я преподобному Феодору, князю Острожскому, Печерскому, в Дальних пещерах

О, преподо́бне о́тче Фео́доре, земли́ Волы́нския похвало́ и прибе́жище, святы́я же Ла́вры Пече́рския сла́во и украше́ние! При́зри на предстоя́щыя лю́ди, твоея́ по́мощи с ве́рою прося́щия и согреше́ния своя́ тебе́ испове́дающия, приими́ тех усе́рдныя моли́твы и от вся́кия ско́рби и ну́жды предста́тельством твои́м изба́ви. Помози́ нам, уго́дниче Бо́жий, в ми́ре и покая́нии житие́ на́ше зде проводи́ти, во благополу́чии памятова́ние о за́поведех Бо́жиих всеми́рно храни́ти, в беда́х же от ро́пота и уны́ния огражда́тися, оба́че и по́мыслом лу́чшим сердца́ на́ша испо́лни, да твоего́ благоутро́бия и я́же о ве́ре ре́вности подража́тели бы́вше, о́ных сподо́бимся ве́чных благ, и́миже днесь украша́яся, моли́твы о спасе́нии на́шем возно́сиши ко Го́споду, Ему́же сла́ва подоба́ет Отцу́ и Сы́ну и Свято́му Ду́ху, ны́не и при́сно и во ве́ки веко́в. Ами́нь.

Молитва 3-я благоверному великому князю Андрею Боголюбскому

О, святы́й благове́рный вели́кий кня́же Андре́е! Страстоте́рпче и му́чениче! Слуго́ Бо́жий ве́рный и Богославный, христиа́нине истовый и Богоревнивый, му́же любодобродетельный и Богому́дрый, во́ине всечестны́й и воево́до доброхва́льный, монарше Богоизбра́нный и Боголюбимый, прави́телю держа́вный и дерзнове́нный! Ру́сь Святу́ю, на уде́лы и кня́жества разобщенную, хоте́вый во еди́но ца́рствие собра́ти и единодержавно е́ю пра́вити, да непреобори́ма от вра́г и́стиннаго христиа́нства пребу́дет; за си́и дея́ния во сла́ву и че́сть Бо́га Христианского убие́нный и кро́вию свое́ю основа́ние Руси́ Свято́й с про́чими кня́зи-му́ченики укрепивший, да во ве́к незы́блема пребу́дет; даровавший Руси́ многочудныя ико́ны Богома́тери и То́ю па́че мно́гих ины́х за Благоче́стие и Богопочита́ние возлю́бленный. Сыновей возрасти́вший, и́же тя́, отца́ земна́го своего́, житие́м свои́м и Отца́ Небе́снаго кончи́ною свое́ю просла́виша. Оби́тель Боголюби́вую основа́вый и мно́зи хра́мы воздви́гнувый, в ни́х же досе́ле моля́щеся мы́, гре́шнии, про́сим твоего́ предста́тельства и Небе́сныя по́мощи; испроси́, свя́те Андре́е, у Го́спода Вседержи́теля ми́лости бога́тыя обездоленному ца́рствию ру́сскому и отпуще́ния мно́гих и тя́жких грехо́в народам христиа́нским, да да́рует Спаси́тель на́м прави́теля тебе́ подо́бнаго, и́же возмо́гл бы возроди́ти Оте́чествие на́ше земно́е и ко Оте́чествию Небе́сному привести́ на́с, иде́же ты́ ны́не, кня́же, во сла́ве Невече́рняго Све́та предстоя́ со все́ми святы́ми, восхваляеши в Тро́ице сла́вимаго Бо́га Отца́ и Сы́на и Свята́го Ду́ха, ны́не и при́сно и во ве́ки веко́в. Ами́нь.

Молитва 3-я равноапостольному князю Владимиру, во Святом Крещении Василию

О, вели́кий уго́дниче Бо́жий, равноапо́стольный кня́же Влади́мире! При́зри на не́мощи на́ши и умоли́ Премилосе́рдаго Царя́ Небе́снаго, да не прогне́вается на ны зело́ и да не погуби́т нас со беззако́ньми на́шими, но да поми́лует и спасе́т нас по ми́лости Свое́й, да всади́т в сердца́ на́ша покая́ние и спаси́тельный страх Бо́жий, да просвети́т Свое́ю благода́тию ум наш, во е́же оста́вити нам стези́ нече́стия и на путь спасе́ния обрати́тися, неукло́нно же за́поведи Бо́жия твори́ти и уста́вы Святы́я Це́ркве соблюда́ти. Моли́, благосе́рде, Человеколю́бца Бо́га, да яви́т нам вели́кую ми́лость Свою́: да изба́вит нас от смертоно́сных боле́зней и от вся́каго зла, да сохрани́т и спасе́т рабо́в Бо́жиих (имена) от всех ко́зней и наве́тов вра́жиих и да все мы сподо́бимся с тобо́ю ве́чнаго блаже́нства, хва́ляще и превознося́ще Бо́га во ве́ки веко́в. Ами́нь.

Перевод: (имена)

Молитва 3-я святителю Иннокентию, епископу Иркутскому

Свя́тче Бо́жий, па́стырю до́брый, де́лателю ве́рный виногра́да Христо́ва, святи́телю о́тче Инноке́нтие! При́зри на град сей и на лю́ди сия́! Моли́ Христа́ Бо́га, да сохрани́т па́ству твою́ от волко́в, гу́бящих ю́; да ниспо́слет Ду́ха Своего́ Свята́го во е́же умудри́ти нас ходи́ти пред Ним во вся́ком благоче́стии и чистоте́ во вся дни живота́ на́шего, да славосло́вяще и́мя Его́ всесвято́е во дни и в нощи́, сподо́бимся бы́ти насле́дницы жи́зни ве́чныя, и просла́вим Отца́, и Сы́на, и Свята́го Ду́ха, ны́не и при́сно и во ве́ки веко́в. Ами́нь.

Молитва 4-я равноапостольному князю Владимиру, во Святом Крещении Василию

Ка́ко похва́лим тебе́, в земны́х влады́ках прему́жественный, Влади́мире? Ка́ко ти благодаре́ние воздади́м, я́ко тобо́ю позна́хом Го́спода и ле́сти и́дольския избы́хом, я́ко твои́м повеле́нием по всей земли́ Христо́с сла́вится? Ка́ко ве́ровал еси́? Ка́ко взыска́л еси́ Христа́? Пове́ждь нам, рабо́м твои́м, отку́ду ти припахну́ воня́ Свята́го Ду́ха? Не ви́дел еси́ Христа́, ни ходи́л еси́ по Нем, ка́ко учени́к Его́ обре́теся? Не ви́дел еси́ апо́стола, прише́дша в зе́млю твою́, не ви́дел бе́сы изгоня́юща и́менем Христо́вым, боля́щих исцеля́юща, ме́ртвых воскреша́юща. Ди́вное чу́до! Ини́и ца́рие и власти́телие, ви́дяще вся сия́, быва́юща от святы́х муж, не ве́роваша, но па́че на стра́сти и му́ки преда́ша их, ты же, о блаже́нне, не ви́дя и не слы́ша всех сих, прите́кл еси́ ко Христу́, разуме́в, я́ко Еди́н есть Творе́ц неви́димым и ви́димым, Небе́сным и земны́м, и я́ко посла́ в мир, на́шего ра́ди спасе́ния, Возлю́бленнаго Своего́ Сы́на. И сия́ помы́слив, вшел еси́ во святу́ю купе́ль. И ны́не, проте́кшим ты́сящи ле́том от Креще́ния Руси́, при́зри на зе́млю твою́ виждь ча́да твоя́. Виждь лю́ди твоя́, ка́ко живу́т, ка́ко храни́ми суть Го́сподем, ка́ко благове́рие храня́т по преда́нию твоему́, ка́ко сла́вят Христа́, ка́ко покланя́ются и́мени Его́. Виждь и гра́ды, вели́чеством сия́ющия, виждь це́ркви цвету́щия, виждь христиа́нство расту́щее, виждь и град твой Ки́ев, толи́кими уго́дники Бо́жиими, во нетле́нии почива́ющими, блиста́ющийся, и фимиа́мом облагоуха́ем, и хвала́ми и боже́ственными пе́нии святы́ми оглаша́ем. И сия́ вся ви́дев, возра́дуйся и возвесели́ся и похвали́ Блага́го Бо́га, всем сим Строи́теля. Ви́дя, я́ко твое́ ве́рное се́яние твои́м хода́тайством и заступле́нием не изсуше́но бысть зно́ем неве́рия, но дожде́м Бо́жия поспеше́ния располо́жено бысть многопло́дне, ра́дуйся ду́хом, во влады́ках апо́столе, не ме́ртвая телеса́ воскреси́вый, но душе́ю ны, ме́ртвыя, воскреси́в! Ра́дуйся, уте́шителю наш и наста́вниче благове́рия! Ты бе, о честна́я главо́, наги́м одея́ние, а́лчным корми́тель, жа́ждущим утро́б охлажде́ние, вдови́цам помо́щник, стра́нным поко́ище, оби́димым засту́пник, убо́гим обогаще́ние. Сим благи́м дело́м на Небесе́х возме́здие прие́мля и зре́ния сла́дкаго лица́ Бо́жия насыща́яся, не преста́й моля́ся о земли́ твое́й и о ча́дех, в них же благове́рно влады́чествова, да сла́вится в земли́ на́шей вы́ну правове́рие и да не оста́вит нас Госпо́дь, а́ще и еще́ блужда́ем, толи́ким веко́м проте́кшим, а́ще и еще́ согреша́ем Го́споду и Влады́це на́шему, а́ки новоку́пленнии раби́, во всем неугодя́ще господи́ну своему́. К тебе́ ру́ки на́ша воздева́ем и мо́лим тя: помоли́ся Влады́це всех, да продли́т, доне́леже стои́т мир, ми́лость Свою́ на оте́чествии на́шем и лю́дех Свои́х, ра́тныя прогоня́я, мир утвержда́я, глад угобза́я, гра́ды разселя́я, Це́рковь Свою́ возраща́я, достоя́ние Свое́ соблюда́я, му́жи, и жены́, и младе́нцы спаса́я, да ми́лостию Его́ носи́ми, в едине́нии ве́ры вку́пе ве́село и ра́достно сла́вим Го́спода на́шего Иису́са Христа́, со Отце́м и со Пресвяты́м Ду́хом, Тро́ицу Неразде́льну Единобоже́ственну, ца́рствующу на Небесе́х и на земли́, ны́не, и при́сно, и во ве́ки веко́в. Ами́нь

Молитва 4-я благоверному великому князю Андрею Боголюбскому

О, вели́кий Русский кня́же, Боголю́бский Андре́е! За ве́ру Бо́жию и сла́ву Оте́чества Правосла́внаго Ру́сскаго оклеветанный и пре́данный слуга́ми лука́выми и людьми́ вражьими, но Христо́м Бо́гом просла́вленный и христиа́нами правосла́вными вельми́ почита́емый, не оста́ви предста́тельствовати за на́с пред Богоро́дицею и Спа́сом Ми́ра, не преста́ни заступа́ти за наро́д христиа́нский и Зе́млю Ру́сскую, возревну́й и защити́ и спаси́ от поруга́ний и расхищений святы́ни хра́мов Бо́жиих и огради́ от наве́тов вра́жиих и от люде́й злы́х святу́ю оби́тель ико́ны Боголюби́вой, вступись за Ру́сь Святу́ю и До́м Пресвяты́я Богоро́дицы, погуби́ пу́ть беззако́нных и́щущих разделе́ний и неправедной ку́пли и продажи Земли́ Ру́сской. Моли́ся спасти́ся на́м в ве́ре Христо́вой, и испроси́ на́м от Бо́га воево́ды Небе́снаго, да пода́ст на́м духовные си́лы и му́дрость противоста́ти диа́волу и ко́знем его́, да укрепи́т на́с бы́ти безстрашными исповедниками и́мени христиа́нскаго: я́ко пред си́льными ми́ра сего́, та́ко и пред все́ми нечести́выми, и пред лице́м анти́христа, и пред все́м ца́рством инове́рным. Сподо́би на́м бы́ти не то́кмо досто́йными христиа́нами, но и бы́ти досто́йными насле́дниками Богоспасаемой Держа́вы Ру́сской. Но па́че подвиза́й бы́ти на́м ве́рными и благослове́нными детьми́ Бо́жиими.
Испроси́ на́м от Го́спода: любы́ Бо́жией, си́лы Свято́й и му́дрости и кре́пости духо́вной, да неуста́нно бу́дем ревнова́ти о умножении Сла́вы Оте́чества Ру́сскаго, и да навы́кнем иску́сно владе́ти мече́м духо́вным, моли́твы святы́е непрестанные в се́рдце свое́м нося́, и помога́й на́м та́кожде на вся́кий ча́с бдити и храни́ти вве́ренное на́м и Бо́гом да́нное ору́жие проти́в враго́в Бо́жиих и все́х извергов ро́да челове́ча. И́бо мы́ земнородные, ча́сто быва́ем маломощны и неразу́мны, но тобо́ю водимые, мудрые и сильные, егда́ ча́ем с по́мощию твое́ю ско́ро дости́гнути Ца́рства Божьего в Ру́сской Земле́ и посе́м со дерзнове́нием прейти́ в Ца́рствие Небе́сное и ве́чное, при́сно с тобо́ю велегла́сно воспева́я Бо́га Отца́, Бо́га Сы́на и Бо́га Свята́го Ду́ха, Тро́ицу Единосу́щную и Неразде́льную во ве́ки веко́в. Ами́нь.

Величание святителям Московским

Велича́ем вас,/ святи́телие Христо́вы/ Пе́тре, Алекси́е, Ио́но, Фили́ппе и Ермоге́не,/ и чтим святу́ю па́мять ва́шу:/ вы бо мо́лите за нас// Христа́ Бо́га на́шего.

Величание равноапостольному князю Владимиру, во Святом Крещении Василию

Велича́ем тя,/ святы́й равноапо́стольный кня́же Влади́мире,/ и чтим святу́ю па́мять твою́,/ и́долы попра́вшаго// и всю Росси́йскую зе́млю святы́м Креще́нием просвети́вшаго.

Величание преподобному Иову, игумену Почаевскому

Ублажа́ем тя,/ преподо́бне о́тче наш И́ове,/ и чтим святу́ю па́мять твою́,/ наста́вниче мона́хов// и собесе́дниче А́нгелов.

Величание преподобному и благоверному князю Олегу Брянскому

Ублажа́ем тя, благове́рне кня́же Оле́же, и чтим святу́ю па́мять твою́, ты бо мо́лиши за нас Христа́ Бо́га на́шего.

Величание святителю Амфилохию Печерскому, Владимиро-Волынскому

Велича́ем тя, святи́телю о́тче Амфило́хие, и чтим святу́ю па́мять твою́, ты бо мо́лиши за нас Христа́ Бо́га на́шего.

Величание Собору Волынских святых

Велича́ем вас, вси святи́и в земли́ Волы́нстей, просия́вшии и чтим святу́ю па́мять ва́шу, вы бо мо́лите за нас Христа́ Бо́га на́шего.

Величание преподобному Николе Святоше, князю Черниговскому, Печерскому чудотворцу, в Ближних пещерах

Ублажа́ем тя, преподо́бне о́тче Нико́ло, и чтим святу́ю па́мять твою́, наста́вниче мона́хов и собесе́дниче а́нгелов.

Величание равноапостольным Киpиллу и Мефодию, учителем Словенским

Велича́ем вас,/ святи́и равноапо́стольнии Мефо́дие и Кири́лле,/ вся слове́нския страны́ уче́ньми свои́ми просвети́вшия// и ко Христу́ приве́дшия.

Величание равноапостольной княгине Ольге, во Святом Крещении Елене

Велича́ем тя,/ свята́я равноапо́стольная княги́не О́льго,/ я́ко зарю́ у́треннюю в земли́ на́шей возсия́вшую/ и свет ве́ры Правосла́вныя// наро́ду своему́ предвозвести́вшую.

Величание благоверному великому князю Андрею Боголюбскому

Велича́ем тя́, святы́й вели́кий благове́рный кня́же Андре́е Боголю́бский, и чте́м святу́ю па́мять твою́, я́ко ты́ сла́вне ра́товал во бране́х со врага́ми Спа́са Христа́ Бо́га на́шего.
И па́ки: Велича́ем тя́, святы́й страстоте́рпче и му́чениче кня́же Андре́е, и чте́м честны́я страда́ния твоя́, и́же за Ру́сь Святу́ю сме́рть претерпе́вый и Бо́га Христа́ просла́вивый.
И па́ки: Велича́ем тя́, святы́й великому́чениче кня́же Андре́е, и почита́ем святу́ю оби́тель Богоро́дицы, и́же ты́ пречу́дно на Ру́сской Земле́ воздви́гнувый, и Бо́гом Христо́м ди́вно просла́вленный.
И па́ки: Велича́ем тя́, святы́й вели́кий благове́рный Боголю́бче кня́же Андре́е, изря́дный страстоте́рпче и му́чениче, и чте́м святу́ю па́мять твою́, му́драго основа́теля свято́й оби́тели Боголюби́вой и мно́гих хра́мов Бо́жиих созда́телю.

Перевод: И па́ки:

Развернуть

Каноны и Акафисты

Развернуть

Проповедь дня

Свт. Лука (Войно-Ясенецкий). Слово в неделю 7-ю по Пятидесятнице и день памяти св. равноапостольного князя Владимира.
Слово в день памяти св. князя Владимира.

Прот. Глеб Каледа. В день памяти святителя Петра, митрополита Московского и всея России чудотворца.

Еп. Митрофан (Зноско-Боровский). Св. равноапостольная княгиня Ольга: «Я свет миру».

Свт. Иоанн (Максимович), архиеп. Шанхайский и Сан-Францисский.

Свт. Иоанн (Максимович), архиеп. Шанхайский и Сан-Францисский. В чем нравственная сила св. Великого князя Владимира?
Святые Евфимия и Ольга.
Святые Равноапостольные Кирилл и Мефодий.
Святые Кирилл и Мефодий.

Свт. Филарет Московский. Слово в день Святых триех Святителей Московских, при продолжении молитв о избавлении от губительныя болезни.

Митр. Сурожский Антоний. Равноапостольная княгиня Российская Ольга.
Равноапостольный князь Владимир.

Прот. Димитрий Смирнов. Память равноапостольного князя Владимира.
Перенесение мощей святителя Петра, митрополита Московского.

Перейти в раздел «Проповеди»

Развернуть

Книги, статьи, стихи, кроссворды, тесты

Юрий Рубан.

День историка. Память преподобного Нестора Летописца Печерского.

Крестители Русской земли.

Славянская библия в России. От Кирилла и Мефодия до Геннадия Новгородского.

Создатель русской культуры.

Егор Холмогоров.

Святая равноапостольная княгиня Ольга.

Ирина Лухманова.

День города: праздник московских святых.

Диакон Николай Солодов.

Кирилл и Мефодий: почему азбука названа именем младшего из братьев?

Свящ. Василий Секачев.

Князь Владимир: человек, который крестил Русь.

Александр Ракитин.

Митрополит Петр: Камень, на котором стоит Москва.

Ф. Пономарев.

Архиерей народов словенских.

Проф. И. И. Малышевский.

Святые Кирилл и Мефодий.

Лавров П. А.

Собрание славянских памятников, относящихся к жизни и деятельности равноапп. Кирилла и Мефодия.

Горожанский Я.

Святые Кирилл и Мефодий, просветители славян.

Куломзина С. С.

Просветители славян – святые равноапостольные Кирилл и Мефодий.

Свт. Димитрий Ростовский.

Жизнь и труды преподобных отцов наших Мефодия и Константина, в монашестве Кирилла, учителей славянских.

Проф. Ф. И. Успенский.

Кирилл и Мефодий.

Развернуть

Аудиокниги и фильмы

Житие святого равноапостольного князя Владимира, во Святом Крещении Василия. Издание осуществлено к 1000-летию со дня преставления Великого князя...

Житие святого равноапостольного князя Владимира.

«Киево-Печерский Патерик» был составлен в XIV–XV вв. как первый в Древней Руси, принявшей христианство, отечественный сборник жизнеописаний святых. Он посвящен подвижникам Киево-Печерской Лавры, являющейся колыбелью христианского монашества Руси и всемирно известной святыней Православия. В книгу вошли произведения, написанные в начальный период истории Лавры, в XI–XIII вв. Впоследствии «Патерик» неоднократно...

Патерик Печерский, или Отечник.

Случайный тест

«Нечувствие», каменность, мертвость души — от запущенных и не исповеданных вовремя грехов. Как облегчается душа, когда немедленно, пока больно, исповедуешь совершенный грех. Отложенная исповедь дает бесчувствие.

свящ. Александр Ельчанинов

Аудиокалендарь

Се, Жених грядет

Слезное моление прп. Ефрема Сирина в пнд. вечером

Православное радио

Слово Божие

Три друга

Размышления на каждый день месяца