Преподобный Олег (в иночестве Василий) Романович Брянский, князь

Служба преподобному и благоверному князю Олегу Брянскому

Текст службы утвержден решением Священного Синода от 14 июля 2018 года (журнал № 61)

Месяца септемврия в 20-й день

На велицей вечерни

На Господи, воззвах: стихиры на 8, глас 2:

Приидите, православных собори,/ восхвалим теплаго заступника Брянския земли,/ преподобнаго благовернаго князя Олега,/ измлада Христа Бога возлюбившаго,/ делами веры заповеди Его исполнившаго,/ монашеское жительство в пределех Брянских устроившаго/ и нам образ добродетели явившаго,/ празднственно почитающим святую память его.

Род правых благословится,/ рече праведный Давид./ Темже величаем днесь благовернаго князя Олега,/ прозябение благочестиваго корене князей Черниговских:/ Николы Святоши и Игоря страстотерпца,/ мученика Михаила и благовернаго Романа,/ сродника преподобныя Евфросинии Суждальския./ С нимиже ныне молися, преподобне,/ о спасении душ наших.

Егда бедство постиже землю Русскую/ и полчища агарянская разоряху ю,/ тогда, паче видимых, на невидимыя враги изшел еси/ и на молитвенней страже Отечества твоего стал еси,/ благоверне княже Олеже,/ воздевая преподобнеи руце к Богу,/ Единому спасти могущему/ и Спасу душ наших.

Первее в смиреннем сердцы обитель Богу сотворивый, преподобне,/ последи обитель первоверховных апостол во граде Брянске основал еси,/ идеже, добре во иноческих подвизех потрудився,/ нам мощи твоя честныя оставил еси,/ душею же во обителех Отца Небеснаго ныне ликовствуя,/ поминай верою и любовию воспевающих тя.

Богомудрый Петропавловския обители первоздателю,/ багряницу княжескую на власяницу иноческую вольне пременив,/ меч духовный мудре носил еси,/ Православие утверждая и вся душевредная посекая,/ ближним же и братии по образу Христову послужил еси,/ темже не престай присно покрывати/ град Брянск и обитель твою.

Слава, глас 8.

Подобен: О, преславнаго чудесе:

Преподобне княже Олеже,/ веры Православныя поборниче,/ благочестия истиннаго проповедниче/ и монахов известное правило,/ како славу мира сего презрел еси/ и узким путем Христу последовал еси?/ Темже и Господь нам тя дарова/ в скорбех скораго помощника/ и молитвенника тепла о душах наших.

И ныне, праздника.

Вход. Прокимен дне. Чтения три преподобническая.

На литии стихиры, глас 2:

Приидите, вернии людие,/ во обитель преподобнаго князя Олега/ и, духовный лик составльше, сице возопиим:/ радуйся, похвало наша и упование,/ и земли Брянския жертва Богу благоуханная,/ моли в мире пребывати всем,/ православно чтущим святую память твою.

Благоверия образ,/ в княжении милосердаго правителя,/ вдов и сирот предстателя,/ нищих питателя и скорбных утешителя,/ иноков правило и целомудрия забрало,/ богомудраго Олега воспоим./ Той бо, таланты богоданныя добре умножив,/ в радость Господа своего вниде/ и дерзновенно молится о душах наших.

Слава, глас 8:

На земли благочестно живя,/ в Горняя выну взирал еси,/ Олеже богоблаженне,/ ныне же с высоты Небесныя призри на нас,/ любовию тя призывающих,/ и споборствуй молитвами твоими,/ воинству же нашему победы на супостаты испроси,/ град твой и обитель, тобою созданную, от скорбей и бед лютых огради,/ молитвенниче наш усердный и скорый помощниче.

И ныне, праздника.

На стиховне стихиры, глас 4:

Мирския суеты Христа ради отрекся,/ первую в земли Брянстей обитель/ во имя первоверховных апостол основал еси,/ благоверный княже Олеже,/ та бо, яко камень краеугольный веры Православныя явися,/ на немже доныне утверждающеся,/ козни вражия заступлением твоим побеждаем.

Стих: Честна пред Господем/ смерть преподобных Его.

Мощи твоя честныя, преподобне княже Олеже,/ в годину безбожных гонений/ под спудом от поругания сохранишася,/ ныне же паки на свещнице обители твоея,/ яко богатое сокровище, нам явишася,/ освящающе и озаряюще благодатною помощию/ верою к ним притекающих.

Стих: Блажен муж, бояйся Господа,/ в заповедех Его восхощет зело.

От юности разум богопросвещенный стяжав/ чтением Божественных словес и писаний отеческих,/ подвигом святых подражати навыкл еси,/ учение правды, яко питие,/ делание же заповедей, яко пищу духовную имея,/ темже Безсмертныя трапезы ныне наслаждаешися.

Слава, глас 6:

Славу мира сего тленнаго/ непреложно отвергнув,/ о спасении людей, Богом ти врученных,/ сердцем отечески болезновал еси,/ молитвою же теплою/ милость Божию призывая/ и не себе угождая,/ апостольски ближних тяготы носил еси./ Темже достойно прославляешися,/ Олеже приснопамятне.

И ныне, праздника.

Тропарь, глас 8:

От юности возлюбив Христа всем сердцем, преподобне,/ славу земную, яко преходящу, оставил еси,/ и царство земное в ничтоже вменив,/ лику инок радостно причелся еси,/ и труды многими град Брянск, аки солнце, пресветло озарил еси:/ тем, быв Троицы украшение,/ моли, княже Олеже, Христа Бога,/ спастися душам нашим.

Ин тропарь, глас тойже:

От юности Христа возлюбив всем сердцем, преподобне,/ славу земную, яко преходящу, оставил еси/ и, царство земное нивочтоже вменив,/ лику иноческому радостно приобщился еси/ и, многими подвиги благодать Святаго Духа стяжав,/ град Брянск, аки солнце, пресветло озарил еси./ Темже моли, княже Олеже, Христа Бога,/ спастися душам нашим.

На утрени

По 1-м стихословии седален, глас 7:

Подвигом добрым подвизався,/ сосуд, благодати Божия исполненный, явился еси, преподобне княже Олеже./ Темже и уготовася тебе венец правды от Подвигоположника Христа Бога нашего./ Мы же, чада твоя, любовию чтуще святую память твою, со умилением зовем:/ молися о нас, святче Божий,/ да слезами покаяния очистим души наша/ и дерзновение улучим в день страшнаго испытания.

Слава, и ныне, праздника.

По 2-м стихословии седален святаго, глас 8:

Течение земное добре скончав,/ веру соблюл еси непорочну, святе Олеже,/ темже прослави тя Бог в чудесех,/ Егоже моли даровати нам грехов прощение,/ воинству нашему на враги победу,/ плененным свобождение, миру умирение/ и христианом в Православии единение.

Слава, и ныне, праздника.

Величание:

Ублажаем тя,/ преподобне благоверне княже Олеже,/ и чтим святую память твою,/ наставниче монахов/ и собеседниче ангелов.

Псалом избранный:

Блажен муж, бояйся Господа, в заповедех Его восхощет зело.

Сильно на земли будет семя его.

Закон Бога его в сердцы его и не запнутся стопы его.

Постави его господина дому своему и князя всему стяжанию своему.

Божии державнии земли зело вознесошася.

По полиелеи седален, глас 4:

Красуйся и ликуй, земле Брянская,/ и да играют чада твоя в тебе,/ светло торжествующе в памяти преподобнаго князя Олега,/ общаго отца нашего и молебника,/ всех бо, притекающих к нему, утешает/ и во благочестии утверждает.

Слава, и ныне, праздника.

Степенна, 1-й антифон 4-го гласа. Прокимен, глас 4: Честна пред Господем/ смерть преподобных Его. Стих: Что воздам Господеви о всех, яже воздаде ми? Всякое дыхание: Евангелие от Матфеа, зачало 43.

По 50-м псалме стихира, глас 6:

Яко добраго древа князей Русских благий плод,/ преподобне княже Олеже,/ стопам святых сродник твоих последовал еси,/ в княжении благоверие соблюдая,/ во иночестве добродетельми чистоту души являя,/ сего ради, яко имаши дерзновение ко Христу Богу,/ моли даровати Отечеству нашему мир/ и душам нашим велию милость.

Канон святаго, глас 4, егоже краегранесие: Заступника земли Брянския верою чтим.

Песнь 1

Ирмос: Моря чермную пучину/ невлажными стопами/ древний пешешествовав Израиль,/ крестообразныма Моисеовыма рукама,/ Амаликову силу в пустыни победил есть.

Припев: Святый благоверный княже Олеже, моли Бога о нас.

Заступника теплаго Брянския земли, князей похвалу и монахов удобрение, преподобнаго Олега воспоим, той бо силою Креста страсти и безплотныя враги победил есть.

Ангельски на земли пожил еси, княже Олеже, благаго корене князей Черниговских доброплодная отрасль быв, и яко воевода Небеснаго Царя, Отечество наше ныне ограждаеши.

Смирению Царя царствующих подражая, власть и честь, славу и богатство Христа ради во уметы вменил еси, и слезами постническими велиарову гордыню потопил еси.

Богородичен: Твоего Печерскаго образа в пределы Брянския пренесение ведая и родителя своего от слепоты исцеление зря, князь Олег воспеваше благодать Твою, Пречистая.

Песнь 3

Ирмос: Веселится о Тебе Церковь Твоя, Христе, зовущи:/ Ты моя крепость, Господи,/ и прибежище, и утверждение.

Утвердил еси землю и люди твоя в вере Православней, преподобне, княжением благозаконным и подвиги монашескими.

Первую в земли Брянстей обитель основал еси, святе Олеже, яко камень краеугольный веры, во имя апостол первоверховных.

Нивы новонасажденныя делатель усердный явился еси, блаженне, темже доныне плодами трудов твоих освящаемся.

Богородичен: Источник исцелений близ Свены реки открыся чудотворная икона Богоматере. Еяже благодатию укрепляемь, князь Олег мир конечне оставил есть.

Кондак и икос праздника, глас 4.

Седален святаго, глас 8:

Смиренномудренно царства земнаго удаливыйся, во иноцех тезоименством царским наречен был еси, княже Олеже, во знамение уготованнаго ти Небеснаго Царствия, идеже ныне, яко царское священие, добродетели возвещаеши Христа Бога, Призвавшаго тя в чудный Свой свет.

Слава, и ныне, праздника.

Песнь 4

Ирмос: Вознесена Тя видевши Церковь на Кресте,/ Солнце Праведное,/ ста в чине своем,/ достойно взывающи:/ слава силе Твоей, Господи.

Крест свой взем, себе и мира отверглся еси, преподобне, и вся козни вражия силою возлюбившаго тя Христа победил еси.

Агарян древле и зловерных нахождение паче меча молитвою отражал еси, и ныне Отечество наше от злых заступлением твоим избави.

Земля Брянская красуется древом, тобою насажденным при исходищих вод Православия, питающим нас и покрывающим.

Богородичен: Егда иноцы созданныя тобою, княже, святыя обители принесоша от Киева икону Пречистыя, тогда сила Ея в чудесех явися.

Песнь 5

Ирмос: Ты, Господи, мой Свет,/ в мир пришел еси,/ Свет Святый,/ обращаяй из мрачна неведения/ верою воспевающия Тя.

Меч Божий обоюдуострый именуем тя, святе, душевредная бо посекаеши: в княжении благоверием, во иночестве же преподобием.

Лице твое в час кончины просветися, богоблаженне Олеже, и яко благий раб и верный в радость Господа твоего вшел еси.

Избавляеши от бед в нощи греховней блуждающих, святче, неба церковнаго кроткая звездо и к Свету Невечернему путеводителю.

Богородичен: Благословенная Владычице, просвети нас светом Сына Твоего, якоже древле очи благовернаго князя Романа.

Песнь 6

Ирмос: Пожру Ти со гласом хваления, Господи,/ Церковь вопиет Ти,/ от бесовския крове очищшися,/ ради милости из ребр Твоих/ истекшею Кровию.

Русская Церковь днесь всех созывает к похвале угодника Христова, преподобнаго князя Олега, от земли Брянския Отечеству нашему возсиявшаго.

Явился еси, преподобне Олеже, Православныя веры правило, монахом образ, людем предстатель теплый, граду и обители твоей ограждение.

Наследие Небесное и чудес благодать, воздаяние от Бога приял еси, святе Олеже, темже не престай милостивно посещати тя почитающия.

Богородичен: Свенския иконы Богоматере явление чудное видев, блаже, купно со отцем твоим, освященным собором и людьми многими благодарение Богу возсылаше.

Кондак, глас 2:

Заступниче теплый Брянския земли,/ преподобне княже Олеже,/ купно со святыми сродники твоими/ Престолу Божию ныне предстоя,/ молитвами твоими Православие утверди,/ ереси и расколы разори,/ Отечеству нашему мир/ и душам нашим полезная испроси.

Икос:

Отверзи честная уста твоя, Олеже благородне, и тайно глаголи во ушеса сердец наших: како, трудом равноапостольнаго Владимира ревнуя, обитель первоверховных апостол во граде Брянске основал еси? Како, Николе Святоше и Игорю страстотерпцу подобяся, мира отверглся еси? Како, последуя прадеду Михаилу, безкровное мученичество в подвизех монашеских восприял еси и благочестие родителя твоего наследовал еси? О, цвете красный древа великаго князей Русских! Молитвами твоими Православие в земли нашей утверди, ереси и расколы разори, Отечеству нашему мир и душам нашим полезная испроси.

Песнь 7

Ирмос: В пещи авраамстии отроцы персидстей,/ любовию благочестия паче,/ нежели пламенем, опаляеми, взываху:/ благословен еси в храме славы Твоея, Господи.

Княжение и род оставил еси, огнем любве Божия распалаяся и крепко подвизаяся в чине монашестем, блаже. Темже и ныне с преподобных лики радуешися.

Избавитися езера огненнаго Человеколюбца Бога моли, преподобне, почитающим любовию святую память твою и добродетелем твоим подражающим.

Якоже злато огнем, душу и тело искусив воздержанием и молитвою, преподобне, в порфире чистоты над страстьми водворился еси.

Богородичен: Вся окрестныя земли, елика виде исцеленныма очима князь Роман, обители Твоей, Владычице, дарова, сын же его себе самаго в жертву Сыну Твоему принесе.

Песнь 8

Ирмос: Руце распростер, Даниил/ львов зияния в рове затче;/ огненную же силу угасиша,/ добродетелию препоясавшеся,/ благочестия рачители,/ отроцы, взывающе:/ благословите, вся дела Господня, Господа.

Елико велик в православном княжении был еси, толико в монашестем делании смирил еси себе, преподобне Олеже, темже и Бог тя превознесе и дарова ти чудес благодать.

Ревность велию показал еси ко благочестию, преизряден быв образ людем и учеником твоим, от младенства бо воспитався в законе Господни, чрез все житие волю Божию исполнити тщался еси.

Одеяния худость не омрачи девственныя красоты души твоея, блаженне, бдение же душевнеи твои очи просвети и труды тяжкия плоть твою духу покориша.

Богородичен: Юже древле избрала еси гору в пределех Брянских во обитель иноком и образом Твоим Свенским освятила еси, Пренепорочная, невредиму сохрани, да воспевается в ней Имя Сына Твоего во веки.

Песнь 9

Ирмос: Камень нерукосечный/ от несекомыя горы, Тебе, Дево,/ краеугольный отсечеся, Христос,/ совокупивый разстоящаяся естества./ Тем, веселящеся, Тя, Богородице, величаем.

Чаянием будущих благ веселяся, тесным и прискорбным путем шествовал еси, воздержанию же, кротости, смирению и послушанию навыкнув, лику святых совокупился еси.

Трудолюбное по Бозе житие от юности возлюбив, преподобне княже, в меру возраста Христова достигл еси и, яко клас зрелый, в Небесныя житницы пожался еси.

Имамы святыя мощи твоя, богоносне княже, яко сокровище неистощимое и утешение велие душам и телесем нашим, темже тя величаем.

Богородичен: Мати Божия Пречистая, молитвами преподобнаго князя Олега и святых сродник его спаси землю Русскую и верныя люди Твоя утеши, иже Тя достойно величают.

Светилен:

Утреневав к Богу выну, тьмы вечныя избегл еси, преподобне княже Олеже, сего ради в час кончины лице твое просветися, и мощи твоя честныя доныне сияют нетлением и чудесы.

Слава, и ныне, праздника.

На хвалитех стихиры, глас 5:

Преподобне княже Олеже,/ Церкве Русския похвало преславная,/ града Брянска стено необоримая,/ Отечества нашего крепкое ограждение,/ ты, богоугодными и добрыми делы/ на свещнице княжения возсиял еси/ и, совершен быти хотяй,/ себе и мира отверглся еси/ и Царствия Небеснаго достигл еси.

Хвала Богу благодействующу,/ глаголал еси, святе Олеже,/ на смертнем одре возлежа,/ зрю уже брег моря житейскаго,/ имже доселе ношашеся моя утлая ладия./ Тем и лице твое радостию Небесною просветися/ и скорбь учеников утешением сим растворися./ Мы же, очима веры зряще нетленную красоту души твоея,/ похвальная ти воспеваем.

Богоносне отче Олеже,/ блажен град твой и обитель, созданная тобою,/ идеже подвизатися изволил еси/ и по смерти мощи твоя святыя оставил еси,/ к нимже припадающе, усердно молим тя:/ не отступай от нас духом,/ побори борющия ны видимыя и невидимыя враги,/ да присно о тебе Бога хвалим.

Слава, глас 6:

Яко заря утренняя/ в земли Брянстей возсиял еси,/ преподобне Олеже,/ князей Русских украшение,/ евангельски два поприща скончал еси,/ в княжении благоверием,/ во иночестве же преподобием,/ тем и сугубый венец от Господа восприял еси,/ Емуже тепле молися о душах наших.

И ныне, праздника.

На Литургии

Блаженны от канона праздника песнь 3-я и святаго песнь 6-я. Прокимен, глас 5: Блажен муж, бояйся Господа,/ в заповедех Его восхощет зело. Стих: Сильно на земли будет семя его, род правых благословится. Апостол к Галатом, зачало 213. Аллилуиа, глас 8: Терпя потерпех Господа, и внят ми, и услыша молитву мою. Стих: Божии державнии земли зело вознесошася. Евангелие от Матфеа, зачало 81. Причастен: В память вечную будет праведник:

Молитва

О, преподобне отче, благоверне княже Олеже, угодниче Христов усердный, молитвенниче ко Господу теплый, защитниче в бедах и утешителю в печалех неустанный! Воззри, преблаженне, милостиво на град твой и виждь чада твоя, смиренно ти припадающая и служити тебе хотящая. Не отвержи требующих твоея помощи, но, яко благодетель и ходатай, моли присно Господа и Бога и Спаса нашего Иисуса Христа, да благословит землю Русскую, в мире и благоденствии сохраняя ю, грады умножая, достояние Свое соблюдая. Вознеси, богоносне отче наш, сие малое моление ко Владыце Христу, да утвердит во Святей Православней Церкви живый дух правыя веры и любве, благочестие непоколебимое, любомудрие, кротостию растворенное; да дарует пастырем ревность попечения о спасении людей, во еже неверующия просветити, заблуждшия наставити, отпадшия обратити и привлещи; изряднее же вся чада Церкве Православныя чисты да сохранит от мирских искушений, похотей плотских, суемудрия, суеверий и наваждений вражеских.

Ей, угодниче Божий, не презри нас, молящихся тебе, но помози нам скорым предстательством твоим, да, всяких бед, напастей и скорбей в сей жизни временней избежавше, кончину непостыдну обрящем и, тако на земли богоугодно поживше, жизни райския на Небеси сподобимся, идеже вкупе с тобою прославим человеколюбие и щедроты в Троице славимаго Бога, Отца и Сына и Святаго Духа, во веки веков. Аминь.