Собор Владимирских святых

Днесь све́тло красу́ется Пресвяты́я Богоро́дицы избра́нный град/ и с ним вси концы́ земли́ Влади́мирския торжеству́ют,/ па́мять соверша́юще богопросла́вленнаго вели́каго ли́ка святы́х,/ в по́двизех Правосла́вныя ве́ры издре́вле во уде́ле сем Бо́гу угоди́вших,/ и к ним с любо́вию вопию́т:/ о преди́внии Христу́ Бо́гу моли́твенницы,/ венцы́ пресве́тлыми от Него́ увенча́нныя,/ мир и благоде́нствие оте́честву ва́шему испроси́те// и душа́м на́шим ве́лию ми́лость.

Перевод: Сегодня светло радуется Пресвятой Богородицы избранный город и с ним все концы земли Владимирской торжествуют, празднуя память Богопрославленного великого собрания святых, в подвигах Православной веры издревле в уделе этом Богу угодивших, и к ним с любовью взывают: «О удивительные молитвенники ко Христу Богу, венцами преяркими от Него увенчанные, мир и благоденствие Отечеству вашему испросите и душам нашим великую милость».

Я́ко зве́зды пресве́тлыя Це́ркве Росси́йския,/ испове́данием Правосла́вныя ве́ры в той возсия́вшии,/ вси святи́и земли́ Влади́мирския:/ Богому́дрии святи́телие и благове́рнии кня́зи,/ преподо́бнии отцы́ и ма́тери,/ страстоте́рпцы и пра́ведницы,/ Христу́ Бо́гу усе́рдно моли́теся,/ грехо́в оставле́ние дарова́ти// любо́вию чту́щим святу́ю па́мять ва́шу.

Перевод: Как преяркие звезды Церкви Российской, исповеданием веры в ней воссиявшие, все святые земли Владимирской: Богомудрые святители и благоверные князья, преподобные отцы и матери, страстотерпцы и праведники, Христу Богу усердно молитесь даровать прощение грехов с любовью почитающим святую память вашу.

О, Небе́снаго Иерусали́ма гра́ждане, вси святи́и, по́двиги ве́ры и благоче́стия и мно́гими чудесы́ во Влади́мирстей земли́ просия́вшии! Воззри́те на нас ми́лостивно и к земли́ приве́рженных возведи́те к высоте́ Небе́сней. Вы горе́ на Небеси́ пребыва́ете, мы же на земли́ ни́зу, удалени́ су́ще от вас не толи́ко ме́стом, ели́ко грехми́ и беззако́нии на́шими, но к вам, я́ко нам сро́дным, прибега́ем и взыва́ем: наста́вите нас ходи́ти путе́м ва́шим, вразуми́те и руково́дствуйте на́ми, многогре́шными. Сво́йственно бо вам есть, святи́и, милосе́рдие и человеколю́бие: на земли́ живу́ще, не о свое́м то́кмо спасе́нии бысть вам попече́ние, но и о всех, к вам приходя́щих. Наставле́ния бо ва́ша бы́ша трость кни́жника скоропи́сца, на сердца́х христоимени́тых люде́й глаго́лы жи́зни начертава́ющаго. Не теле́сныя то́кмо врачева́ли есте́ боле́зни, но па́че душе́вных врачи́ изя́щнейшии яви́лися есте́, и все житие́ ва́ше бысть зерца́ло вся́кия доброде́тели. Предстоя́ще днесь Престо́лу Све́та непристу́пнаго, в нем зри́те вся на́ша ну́жды и проше́ния. Вы вку́пе со святы́ми А́нгелы, о еди́ном гре́шнице ка́ющемся ра́дующимися, водворя́етеся и дерзнове́ние мно́гое к Человеколю́бцу Бо́гу и́мате, не преста́ните у́бо о нас вопию́ще ко Го́споду, испроси́те предста́тельством ва́шим у Всеми́лостиваго Отца́ на́шего Небе́снаго мир Це́ркви Его́ Святе́й, под зна́мением Креста́ во́инствующей, согла́сие в ве́ре и единому́дрие, суему́дрия же и раско́лов истребле́ние, в деле́х благи́х утвержде́ние и благослове́ние, больны́м исцеле́ние, печа́льным утеше́ние, оби́женным заступле́ние, бе́дствующим по́мощь, не посрами́те нас, с ве́рою и любо́вию к вам притека́ющих. А́ще бо и недосто́йни есмы́ толи́каго достосла́внаго ли́ка хода́таев, но вы, подража́тели человеколю́бия Бо́жия бы́вше, сотвори́те нас досто́йны чрез обраще́ние от злых дел ко благо́му житию́. Вся Бо́гом просвеще́нная Росси́я, пресла́вными чудесы́ ва́шими испо́лненная и ми́лостьми облагоде́тельствованная, испове́дует вас бы́ти свои́х покрови́телей и засту́пников. Яви́те нам дре́вния ми́лости ва́ша, и́миже отце́м на́шим во благо́е вспомоществова́ли есте́, и не отри́нете нас, чад их, стопа́ми их к вам, святи́и, ше́ствующих. Ве́руем, я́ко ду́хом нам сопрису́тствуете, па́че же и нетле́нными мощми́ ва́шими с на́ми есте́. Сия́ бо, я́ко сокро́вище безце́нное, вручи́ нам И́же чуде́с Бог. Предстоя́ще им, вам, я́ко живы́м су́щим, припа́даем и мо́лимся, приими́те моле́ния на́ша и вознеси́те я́ на же́ртвенник милосе́рдия Бо́жия, да прии́мем ва́ми благода́ть и благовре́менную в ну́ждах на́ших по́мощь. Па́ству же ва́шу духо́вную не преста́ните управля́ти жезло́м духо́вныя му́дрости: подвиза́ющимся помози́те, разсла́бленныя возста́вите, споспеши́те нам и́го Христо́во нести́ во благоду́шии и терпе́нии, и всех нас упра́вите в ми́ре и покая́нии сконча́ти житие́ на́ше и пресели́тися со упова́нием во блаже́нная не́дра Авраа́мова, иде́же вы ра́достно по труде́х и по́двизех ны́не почива́ете, прославля́юще со все́ми святы́ми Бо́га, в Тро́ице сла́вимаго, Отца́, и Сы́на, и Свята́го Уте́шителя Ду́ха, ны́не и при́сно и во ве́ки веко́в. Ами́нь.