Образцы кратких молитв
Первое воздыхание грешной души к Сыну Божию
Иисусе, Сыне Божий, помилуй мя.
Изведи из темницы душу мою. исповедатися имени Твоему.
Привлецы мене, да прииду к Тебе.
В темнице заключен есмь, Господи, и тьма окружает мя: связан многими узами железными и несть ми ослабления.
Расторгни узы, да свободен буду.
Прожени тьму, да узрю свет Твой.
Изведи из темницы, да прииду к Тебе.
Даждь ми уши – слышати Тя.
Даждь ми очи – видети Тя.
Даждь ми нозе – приити к Тебе.
Даждь ми уста – глаголати о Тебе.
Даждь ми сердце – боятися и любити Тя.
Настави мя. Господи, на путь Твой, и пойду во истине Твоей. Ты бо еси путь, истина и живот.
Возьми мое от Мене, и даждь ми волю – творити волю Твою благую.
Отыми ветхое, и даждь ми новое.
Отыми сердце каменное, и даждь ми сердце плотяное, Тебе любящее, Тебе почитающее, Тебе последующее.
Даждь ми око, да узрю любовь Твою.
Даждь ми око, да узрю смирение Твое и последую ему.
Даждь ми око, да узрю кротост и терпение Твое и последую ему.
Рцы слово, и будет все, ибо слово Твое дело есть.
Верую, Господи, помози неверию моему!
Второе воздыхание грешной души ко Христу, Сыну Божию
Иисусе, Сыне Божий, помилуй мя.
Буди моей души пища и питие.
Буди источник жаждущей души моей.
Буди свет помраченной души моей.
Буди отрада в скорби моей.
Буди веселие в печали моей.
Буди избавление противу пленения моего.
Буди мир и покой противу злыя совести моей.
Буди премудрость противу безумия моего.
Буди ходатай противу клеветников моих.
Буди оправдание противу грехов моих.
Буди освящение противу нечистоты моей.
Буди победа противу неприятелей моих.
Буди щит противу гонителей моих.
Буди Ходатай мой противу гнева Божия.
Буди жертва за грехи моя.
Буди укрепление в слабости моей.
Буди живот противу смерти моея.
Буди совет противу недоумения моего.
Буди сила противу немощи моея.
Буди мне сиру Отец вечный.
Буди Судия противу оскорбляющих мя.
Буди вождь в пути моем.
Буди заступник в час смерти моей.
Буди покровитель по смерти моей.
Буди жизнь вечная по воскресении моем.
Иисусе, Сыне Божий, помилуй мя.
Даждь славу имени Твоему, мне же спасение вечное.
Не нам, Господи, не нам, но имени Твоему даждь славу. Аминь.