27 июня 2021

С высоты́ снизше́л еси́, Благоутро́бне,/ погребе́ние прия́л еси́ тридне́вное,/ да на́с свободи́ши страсте́й,// Животе́ и воскресе́ние на́ше. Го́споди, сла́ва Тебе́.

Перевод: С высоты сошел Ты, милосердный, благоволил пребыть три дня во гробе, чтобы нас освободить от страстей, – жизнь и воскресение наше, Господи, слава Тебе!

Воскре́с из гро́ба, уме́ршия воздви́гл еси́,/ и Ада́ма воскреси́л еси́,/ и Е́ва лику́ет во Твое́м воскресе́нии,/ и мирсти́и концы́ торжеству́ют// е́же из ме́ртвых воста́нием Твои́м, Многоми́лостиве.

Перевод: Восстав из гроба, умерших Ты воздвиг, и Адама воскресил, и Ева ликует о Твоем воскресении, и пределы мира торжествуют о Твоем восстании из мертвых, Многомилостивый.

Боже́ственною любо́вию от ю́ности распала́емь,/ вся, я́же в ми́ре кра́сная, возненави́дев,/ Христа́ Еди́наго возлюби́л еси́,/ и, сего́ ра́ди в пусты́ню всели́вся,/ в ней оби́тель сотвори́л еси́,/ и, собра́в и́нок мно́жество,/ прия́л еси́ от Бо́га чуде́с дар, о́тче Мефо́дие,/ и был еси́ о Христе́ собесе́дник и спо́стник преподо́бному Се́ргию,/ с ни́мже у Христа́ Бо́га испроси́ правосла́вным христиа́ном здра́вие, и спасе́ние,// и душа́м на́шим ве́лию ми́лость.

Перевод: Любовью к Богу с юности разжигаем, все мирские блага возненавидев, Христа Единого ты возлюбил и поэтому поселился в пустыни, создал в ней обитель и, собрав множество монахов, получил от Бога дар чудотворений, отче Мефодий, и был ты о Христе ревнитель и постник, как и преподобный Сергий, с ним же у Христа Бога испроси для православных христиан здоровья и спасения и душам нашим великую милость.

Послуша́ния до́брый рачи́тель быв,/ безпло́тныя враги́ сле́зными моли́твами твои́ми кре́пко посрами́л еси́/ и яви́лся еси́ Пресвяты́я Тро́ицы жили́ще,/ Ю́же зря, блаже́нне, я́сно,/ Богому́дре Мефо́дие преподо́бне,/ чуде́с дар от Нея́ прия́л еси́./ Те́мже исцеля́еши с ве́рою приходя́щих неду́ги,/ утоля́еши ско́рби// и мо́лишися непреста́нно о всех нас.

Перевод: Возлюбивший послушание, бесплотных врагов твоими слезными молитвами ты сильно посрамил и явился жилищем Пресвятой Троицы, Ее же ясно созерцая, блаженный, Богомудрый Мефодий преподобный, принял от Нее дар чудотворений. Потому исцеляешь болезни с верой приходящих, утоляешь скорби и молишься не переставая обо всех нас.

О, свяще́нная главо́, земны́й А́нгеле и Небе́сный челове́че, преподо́бне и Богоно́сне о́тче наш Мефо́дие! Припа́даем к тебе́ с ве́рою и любо́вию, и мо́лимся приле́жно: яви́ нам, смире́нным и гре́шным, свято́е оте́ческое твое́ заступле́ние: се бо грех ра́ди на́ших не и́мамы свобо́ды чад Бо́жиих, проси́ти о потре́бах на́ших Го́спода и Влады́ку на́шего, но тебе́, моли́твенника благоприя́тнаго к Нему́ предлага́ем, и про́сим тя со усе́рдием мно́гим, испроси́ нам у бла́гости Его́ благопотре́бныя да́ры душа́м и телесе́м на́шим: ве́ру пра́ву, наде́жду спасе́ния несомне́нну, любо́вь ко всем нелицеме́рну, в искуше́ниях му́жество, в злострада́ниих терпе́ние, в моли́твах постоя́нство, душе́ и телесе́ здра́вие, земли́ плодоно́сие, возду́ха благорастворе́ние, жите́йских потре́б дово́льство, ми́рное и безмяте́жное житие́, благу́ю христиа́нскую кончи́ну и до́брый отве́т на Стра́шном Суде́ Христо́ве. Испроси́, уго́дниче Бо́жий, у Царя́ ца́рствующих и Го́спода госпо́дствующих правосла́вным христиа́ном спасе́ние и на враги́ одоле́ние и всему́ оте́честву на́шему мир, тишину́ и благострое́ние. Не лиши́ нас по́мощи твоея́ Небе́сныя, но моли́твами твои́ми всех нас приведи́ в приста́нище спасе́ния и насле́дники яви́ нас бы́ти всесве́тлаго Ца́рствия Христо́ва, да пое́м и сла́вим неизрече́нныя щедро́ты Человеколю́бца Бо́га, Отца́ и Сы́на и Свята́го Ду́ха и твое́ свято́е оте́ческое заступле́ние во ве́ки веко́в. Ами́нь.

О, вели́кий уго́дниче Христо́в и пресла́вный чудотво́рче, преподо́бне о́тче наш Мефо́дие! При́зри на ны гре́шныя, обурева́емыя треволне́нием жите́йских страсте́й и к тебе́ вопию́щия: мы бо, ча́да твоя́ духо́вная и огра́ды твоея́ слове́сныя о́вцы, на тя, по Бо́зе и Богоро́дице, упова́ние на́ше возлага́ем, и тя со умиле́нием про́сим: хода́тайством ко Го́споду Бо́гу испроси́ нам мир, здра́вие, долгоде́нствие, возду́ха благорастворе́ние, земли́ плодоно́сие, дожди́ благовре́менны, и вся ны изба́ви от вся́ких бед: гра́да, гла́да, пото́па, огня́, меча́, вредоно́снаго че́рвия снеда́ющаго плоды́ земны́я, тлетво́рных ветро́в, смертоно́сныя я́звы и напра́сныя сме́рти, и во всех ско́рбех и печа́лех на́ших бу́ди нам уте́шитель благи́й и помо́щник ско́рый, сохраня́я нас моли́твами твои́ми от паде́ний грехо́вных и сподобля́я насле́дники бы́ти Ца́рствия Небе́снаго: да прославля́ем вку́пе с тобо́ю всех благ пода́теля, в Тро́ице сла́вимаго и покланя́емаго Бо́га, Отца́ и Сы́на и Свята́го Ду́ха, во ве́ки веко́в. Ами́нь.

Во пло́ти А́нгел,/ проро́ков основа́ние,/ вторы́й Предте́ча прише́ствия Христо́ва, Илия́ сла́вный,/ свы́ше посла́вый Елиссе́еви благода́ть/ неду́ги отгоня́ти/ и прокаже́нныя очища́ти,// те́мже и почита́ющим его́ то́чит исцеле́ния.

Перевод: Во плоти Ангел, пророков основание, второй Предтеча пришествия Христова, Илия славный, свыше пославший Елисею благодать недуги отгонять и прокаженных очищать, потому и почитающим его источает исцеления.

И́же во пло́ти А́нгел,/ и проро́ков нача́льнику свиде́тельствова, сла́вный Елиссе́е,/ ди́вны чудеса́ соде́лал еси́, проро́че,/ поспе́шеством Свята́го Ду́ха;/ си́лою Илиино́ю исцели́в во́дное естество́,/ зве́ри же погуби́, пожира́ющия,/ и Неема́на очи́сти,/ и вдови́ча сы́на воскреси́л еси́,// и всем чту́щим тя да́руй благода́ть и исцеле́ние.

Перевод: Во плоти Ангел и главенствующий по общему признанию пророк (4Цар.2:15), славный Елисей, удивительные чудеса ты сотворил, пророк, содействием Святого Духа, силою Илии обезвредив воду в источнике (4Цар.2:19-22), зверями же погубил, пожирающими (4Цар.2:23-24), и Неемана очистил (4Цар.5:14), и сына вдовы воскресил (4Цар.4:32-35), потому и всем почитающим тебя даруй благодать и исцеление.

Проро́к Бо́жий яви́лся еси́,/ сугу́бую благода́ть прие́мь,/ вои́стинну досто́йную тебе́, Елиссе́е блаже́нне:/ Илии́ бо был еси́ совсе́льник,// с ни́мже Христу́ Бо́гу моли́ся непреста́нно о всех нас.

Перевод: Ты явился пророком Божиим, приняв двойную благодать (4Цар.2:9), воистину достойную тебя, Елисей блаженный, ибо ты жил рядом со Илией, с ним же Христу Богу молись непрестанно обо всех нас.

Пра́вило ве́ры и о́браз кро́тости,/ воздержа́ния учи́теля/ яви́ тя ста́ду твоему́/ Я́же веще́й И́стина./ Сего́ ра́ди стяжа́л еси́ смире́нием высо́кая,/ нището́ю бога́тая,/ святи́телю Мефо́дие,/ моли́ Христа́ Бо́га// спасти́ся душа́м на́шим.

Перевод: Правилом веры и образом кротости, воздержания учителем явила тебя стаду твоему непреложная Истина. Потому ты приобрел смирением – высокое, нищетою – богатство. Святитель Мефодий, моли Христа Бога спастись душам нашим.

На земли́ подвиза́лся еси́, я́ко безпло́тный,/ и Небеса́ насле́довал еси́, Мефо́дие,/ я́ко изъясни́вый в конце́х ико́н поклоне́ние,/ в труде́х бо и боле́знех вя́щше пребы́в,/ не преста́л еси́ дерзнове́нием,// облича́я отмета́ющияся ико́ны Христо́вы.

Перевод: На земле подвизался, как бесплотный, и Небеса унаследовал, Мефодий, как разъяснивший во всех концах Земли поклонение иконам, потому что, будучи в страданиях и болезнях, не переставал дерзновенно обличать отвергающих иконы Христовы.

Ве́ры Правосла́вныя непоро́чный блюсти́телю/ и за́поведей Христо́вых усе́рдный исполни́телю,/ священному́чениче Влади́мире,/ Христа́ всем се́рдцем возлюби́в,/ па́ству твою́ до́бре упа́сл еси́,/ незло́биво му́ченическую смерть прия́л еси́./ Сего́ ра́ди в ве́чной сла́ве пребыва́я,// моли́ спасти́ся душа́м на́шим.

Перевод: Веры Православной непорочный блюститель и заповедей Христовых ревностный исполнитель, священномученик Владимир, Христа всем сердцем возлюбив, паству твою хорошо упас, кротко принял мученическую смерть. Потому в вечной славе пребывая, моли о спасении наших душ.

Ве́ру Правосла́вную непоро́чно соблю́д,/ по́двигом до́брым во святи́тельстве подвиза́лся еси́,/ священному́чениче о́тче Влади́мире,/ и убива́ющим тя рекл еси́:/ Госпо́дь да прости́т вас./ Сего́ ра́ди угото́вася ти вене́ц пра́вды от Христа́, Бо́га на́шего,/ Его́же, я́ко име́яй дерзнове́ние, моли́,/ оправда́ние дарова́ти нам в День Су́дный.

Перевод: Веру Православную непорочно сохранил, подвигом добрым ты подвизался как святитель, священномученик отче Владимир, и убивающим тебя сказал: «Господь, да простит вас». Потому приготовился тебе венец праведности (2Тим.4:8) от Христа Бога нашего, Его же, как имеющий дерзновение, моли даровать нам оправдание в Судный День.

О́браз Христо́ва милосе́рдия явля́я,/ покро́в и защище́ние па́стве твое́й был еси́,/ святи́телю о́тче Влади́мире,/ в кро́тости страда́ния прие́мля, безбо́жных мучи́телей,/ благословля́я, прости́л еси́.// Те́мже и нам испроси́ у Христа́ Бо́га дух ми́рен и ве́лию ми́лость.

Перевод: Являя образ Христова милосердия, ты был покровителем и защитой для своей паствы, святитель отче Владимир, с кротостью принимая мучения, безбожных мучителей, благословляя, ты простил. Потому и для нас испроси у Христа Бога дух мирный и великую милость.

О, священному́чениче и испове́дниче Христо́в Влади́мире! Услы́ши сле́зныя моли́твы чад твои́х и воздыха́ния, се́рдцем сокруше́нным и смире́нным тебе приноси́мыя. Се бо беззако́нии омрачи́хомся и того́ ра́ди беда́ми, я́ко ту́чами, обложи́хомся. Но ты, свя́те Влади́мире, понеси́ я́ко си́льный не́мощи на́ша, не отлуча́йся от нас ду́хом, да не разлучи́мся вконе́ц от любве́ Бо́жия. При́зри ми́лостивно на нас, предстоя́щих и моля́щихся пред свято́ю ико́ною твое́ю и вся проше́ния наша во благо́е испо́лни. Ве́руем бо, я́ко твои́х страда́ний ра́ди ве́лие дерзнове́ние ко Го́споду и́маши. Его́же умоли́, да укрепи́т ны в Правосла́вии и единомы́слии и непоколеби́мем да́же до сме́рти испове́дании ве́ры Христо́вы, страну́ на́шу да спасе́т от междоусо́бныя бра́ни, па́стырем на́шым да пода́ст духо́вное трезве́ние и ре́вность о спасе́нии пасо́мых, прави́телем же суд и пра́вду, оби́димым заступле́ние, неду́гующим душ и теле́с исцеле́ние. Мы же, гре́шнии, твои́м предста́тельством укрепля́еми, восхва́лим Го́спода Иису́са Христа́, Ему́же подоба́ет сла́ва, че́сть и поклоне́ние, со Безнача́льным Его́ Отце́м и Пресвяты́м Ду́хом, ны́не и при́сно, и во ве́ки веко́в. Ами́нь.

Измла́да яви́лся еси́, Богому́дре кня́же Мстисла́ве,/ Боже́ственный сосу́д, избра́н Бо́гови,/ благоче́стием воспита́н,/ ве́ру непоро́чну соблю́л еси́./ Те́мже предстоя́ Святе́й Тро́ице,/ моли́ся стране́ Росси́йстей сохране́нной бы́ти// и всем нам спасти́ся.

Перевод: С молодости явился ты, Богомудрый князь Мстислав, Божественным сосудом, избранный Богом, воспитанный в благочестии ты сохранил непорочную веру. Потому, предстоя Святой Троице, молись о том, чтобы стране Российской сохраниться и всем нам спастись.

Многому́дренно пожи́в в княже́нии твое́м/ в вели́ком Но́вегра́де сем,/ благове́рный кня́же Мстисла́ве,/ плод благи́й Бо́гови в жи́зни сей был еси́,/ присноцвету́щ доброде́тельми,/ того́ ра́ди получи́л еси́ жизнь ве́чную на Небесе́х,/ те́ло же твое́ нетле́нием просла́влено бысть на земли́./ Мы же, предстоя́ще ико́не твое́й, любо́вию вопие́м ти:// ра́дуйся, утвержде́ние гра́ду на́шему.

Перевод: Со многою мудростью прожив в княжении твоем в Великом Новгороде, благоверный князь Мстислав, ты был хорошим плодом Богу в этой жизни, всегда цветущим добродетелями, потому получил ты вечную жизнь на Небесах, тело же твое нетлением было прославлено на земле. Мы же, предстоя иконе твоей, с любовью взываем к тебе: «Радуйся, крепость города нашего».

Днесь церко́вная расширя́ются не́дра,/ прие́млюще бога́тство Бо́жия благода́ти,/ и ра́дуется Пресвяты́я Богоро́дицы избра́нная оби́тель,/ па́мять соверша́ющи многоимени́таго ли́ка святы́х Диве́евских,/ в Небе́снем Ца́рствии торжеству́ющих// и моля́щихся о душа́х на́ших.

Сосу́ди Ду́ха Свята́го яви́стеся честны́м ва́шим житие́м,/ усе́рднии служи́телие Пресвяты́я Богоро́дицы,/ в земли́ Диве́евской просия́вшии,// помяни́те нас у Престо́ла Бо́жия во Ца́рствии Небе́снем.

О, всечестни́и святи́и Диве́евские, избра́нницы Цари́цы Небе́сныя, при́снии Ея́ послу́шницы, по́двиги свои́ми в Ца́рствие Небе́сное возше́дшии! Се ны́не в день о́бщаго ва́шего торжества́ прино́сим вам сие́ хвале́бное пе́ние, ублажа́ем свято́е житие́, прославля́ем вели́кая чудеса́, восхваля́ем любо́вь и велича́ем по́двиги ва́ша. Вы бо, пре́лести ми́ра сего́ отве́ргшеся и взе́мше крест свой, усе́рдно после́довали есте́ Христу́, та́же и, плоть свою́ распина́юще со страстьми́ и похотьми́, терпе́нием и му́жеством до конца́ врага́ низложи́ли есте́ и, прему́дрость ве́ка сего́ посрами́вше, ра́зум Христо́в стяжа́ли есте́. Сего́ ра́ди мо́лим вас: о, святи́и сро́дницы на́ши! Не оста́вите нас, чад ва́ших духо́вных, споспешеству́йте нам ве́ру Правосла́вную тве́рдо содержа́ти, да спаси́тельное се́мя не изсуше́но бу́дет зно́ем неве́рия, но плод оби́льный принесе́т, я́ко да и мы в бу́дущем ве́це вку́пе с ва́ми услы́шим бла́женный глас Го́спода и Бо́га на́шего: прииди́те, благослове́ннии Отца́ Моего́, насле́дуйте угото́ванное вам Ца́рствие от сложе́ния ми́ра. Ами́нь.

И́же во всем ми́ре му́ченик Твои́х,/ я́ко багряни́цею и ви́ссом,/ кровьми́ Це́рковь Твоя́ украси́вшися,/ те́ми вопие́т Ти Христе́ Бо́же:/ лю́дем Твои́м щедро́ты Твоя́ низпосли́,/ мир жи́тельству Твоему́ да́руй,// и душа́м на́шим ве́лию ми́лость.

Перевод: Кровью пострадавших во всем мире мучеников Твоих как порфирою и виссоном облеченная, их устами Церковь Твоя к Тебе взывает, Христе Боже: «Милости Твои людям Твоим ниспошли, мир народу Твоему даруй и душам нашим великую милость!»

Я́ко нача́тки естества́, Насади́телю тва́ри,/ вселе́нная прино́сит Ти Го́споди богоно́сныя му́ченики./ Тех моли́твами в ми́ре глубо́це Це́рковь Твою́,// жи́тельство Твое́, Богоро́дицею соблюди́ Многоми́лостиве.

Перевод: Как первые плоды природы Насадителю всего творения вселенная приносит, Тебе, Господи, Богоносных мучеников. Их мольбами и ходатайством Богородицы, Церковь Твою – Твой народ в мире глубоком сохрани, Многомилостивый.

О, преблаже́ннии уго́дницы Бо́жии, вси святи́и, предстоя́щии Престо́лу Пресвяты́я Тро́ицы и наслажда́ющиися неизрече́ннаго блаже́нства! Се ны́не, в день о́бщаго ва́шего торжества́, ми́лостивно призрите на нас, ме́ньших бра́тий ва́ших, принося́щих вам сие́ хвале́бное пе́ние и хода́тайством ва́шим прося́щих ми́лости и отпуще́ния грехо́в у Преблага́го Го́спода: ве́мы бо, вои́стинну ве́мы, я́ко вся, ели́ка восхо́щете, испроси́ти у Него́ мо́жете. Те́мже у́бо смире́нно мо́лимся вам: моли́те ми́лостиваго Влады́ку, да пода́ст нам дух ва́шея ре́вности к хране́нию святы́х Его́ за́поведей, я́ко да те́кше по стопа́м ва́шим, возмо́жем земно́е по́прище в доброде́тельном житии́ без поро́ка прейти́ и в покая́нии дости́гнути пресла́вных селе́ний ра́йских, и та́мо ку́пно с ва́ми прославля́ти Отца́ и Сы́на и Свята́го Ду́ха, во ве́ки веко́в. Ами́нь.

Велича́ем вас,/ апо́столи, му́ченицы и проро́цы и вси святи́и,/ и чтим святу́ю па́мять ва́шу,// вы бо мо́лите о нас/ Христа́ Бо́га на́шего.

Умягчи́ на́ша зла́я сердца́, Богоро́дице,/ и напа́сти ненави́дящих нас угаси́/ и вся́кую тесноту́ души́ на́шея разреши́,/ на Твой бо святы́й о́браз взира́юще,/ Твои́м сострада́нием и милосе́рдованием о нас умиля́емся/ и ра́ны Твоя́ лобыза́ем,/ стрел же на́ших, Тя терза́ющих, ужаса́емся./ Не даждь нам, Ма́ти Благосе́рдная,/ в жестосе́рдии на́шем и от жестосе́рдия бли́жних поги́бнути,// Ты бо еси́ вои́стину злых серде́ц умягче́ние.

Перевод: Умягчи наши злые сердца, Богородица, и нападения ненавидящих нас отрази, и всякие душевные огорчения наши разреши, ибо, взирая на Твой святой образ, Твоим состраданием и милосердием к нам мы сердечно сокрушаемся и раны твои целуем, о стрелах же наших, терзающих Тебя, ужасаемся. Не дай нам, Милосердная Мать, погибнуть в жестокосердии нашем или от жестокосердия ближних, ибо Ты воистину умягчение злых сердец.

Благода́тию Твое́ю, Влады́чице,/ умягчи́ сердца́ злоде́ев,/ низпосли́ благоде́телей,/ соблюда́ющи их от вся́каго зла,/ благомоля́щимся Ти усе́рдно// пред честны́ми ико́нами Твои́ми.

Перевод: Благодатью Твоей, Владычица, умягчи сердца злодеев, ниспошли благодетелей, сохраняющих их от всякого зла, с благодарностью и усердием молящимся Тебе перед почитаемыми иконами Твоими.

О, Многоско́рбная Ма́ти Бо́жия, превы́шшая всех дще́рей земли́ по чистоте́ Свое́й и по мно́жеству страда́ний, Тобо́ю на земли́ пренесе́нных! Приими́ многоболе́зненная воздыха́ния на́ша и сохрани́ нас под кро́вом Твоея́ ми́лости, ина́го бо прибе́жища и те́плаго предста́тельства, ра́зве Тебе́, не ве́мы, но, я́ко дерзнове́ние иму́щи к И́же от Тебе́ Рожде́нному, помози́ и спаси́ ны моли́твами Свои́ми, да непреткнове́нно дости́гнем Ца́рствия Небе́снаго, иде́же со все́ми святы́ми бу́дем воспева́ти хвалу́ в Тро́ице Еди́ному Бо́гу, всегда́, ны́не, и при́сно, и во ве́ки веко́в. Ами́нь.