Псалтирь царя и пророка Давида художеством рифмотворным равномерно слоги и согласноконечно по различным стихов родом преложенная

Блажен муж, иже во злых совет не вхождаше,

ниже на пути грешных человек стояше.

Ниже на седалищех восхоте седети,

тех иже не желают блага разумети.

Но в законе Господни волю полагает,

тому днем и нощею себе поучает.

Будет бо, яко древо при водах сожденно,

еже даст во время си плод свой неизменно.

Лист его не отпадет, и все еже деет,

то желанию сердца онаго успеет.

Не тако нечестивый, ибо исчезает,

яко прах, его же ветр с земли развевает.

Тем же нечестивии не имут востати,

на суд ниже с грешницы совет правых стати.

Весть бо Господь путь правых тыя защищает,

путь паки нечестивых в конец погубляет.

Вскую язы́цы велми ся шаташа,

людие тщетным ум свой прилагаша.

Царие земли со князи предстаху,

на Бога и на Христа Его встаху.

Расторгнем узы онех глаголюще,

отвержим иго от нас тяжко суще.

Живый в небесех оным посмеется,

Господь всевидец им поругается.

Тогда в гневе к ним имать слати,

яростию си сердца их смущати.

Аз же поставлен в Сионе Царь быти,

повеление Господне явити.

Господь рече Ми: Ты Сын возлюбленный,

Мой еси, Мною Ты ныне рожденный.

Проси от Мене и дам Ти языки

в досточние вся концы вовеки.

Жезлом железным оны укротиши,

злые же, яко скудель, сокрушиши.

Днесь вы, царие, разум приимите,

судие земли вси ся накажите.

Со страхом Богу живу работайте,

трепетом Ему радостни бывайте.

Накажите ся, да не воз[ъ]ярится

Господь и з гневом на вы обратится.

От пути правды да не погибнете,

паче в милости Его да будете.

Блажени, иже в Бозе уповают,

надежду свою всю в Нем полагают.

Господи, всякую себе зело умножают,

иже стужающе ми люте на мя встают.

Глаголют души моей от числа их мнози:

несть спасения ему от Господе Бозе.

Ты же, Боже, заступник мой еси и слава,

Тобою возносится во честь моя глава.

Гласом аз ко Господу дерзах воззывати,

Он же от горы святы изволил ми вняти.

Аз уснух, спах и востах в Его благодати,

яко Он мя изволи от злых заступати.

Не имам ся тем людей обшедших страшити,

воскрес Господи, сам ся изволь защити.

Иже ми врази ту не быша поражени

Тобою и грешником зубы сокрушени.

от Тебе есть, Господи, мое спасение

и Твое есть на людех благословение.

Всегда возвах Тя Боже живый на небеси,

свидетелю правды им услышал мя еси.

И распространил в скорби и впредь да щедриши,

глас молитвы моея теплыя услыши.

Вы, сынове людстии, доколе живете

в тяжкосердии тщетных и ложных ищете.

Ведите, яко Господь щедрый удивил есть,

преподобна раба си и чудне хранил есть.

Внегда воззову к Нему изволит ми вняти,

от всех наветов ваших и впредь защищати.

Гневайтеся во сердцех, а не согрешайте,

яже в них глаголете, на ложех смывайте.

Пожрите жертву правды, в Бозе уповайте,

оставите лукавство, правду содевайте.

Глаголют нецыи: кто явит нам благая,

аще будем творити делеса правая.

Се знаменася на нас свет лица Ти Боже,

иже делес истинны мзду знати поможе.

Дал еси веселие до сердца моего,

от плод пшеницы, вина, елеа Своего.

Умножение взяша аз же имам спати,

во мире купно с ними и здраво востати.

Яко Ты мя в надежду, Боже, вселил еси,

егда о стяжании царства явил еси.

Глаголы моя изволи внушити,

ко званию ми уши приклонити.

Вонми молю гласу, Царю и Боже мой,

аз бо есмь раб Твой.

Яко аз к Тебе имамся молити,

Господи, утро изволи внушити.

Утро предстану Тебе, Ты узриши,

милость явиши.

Беззакония неси, Бог хотящий,

Ты, не близ Тебе будет зло творящий.

Ни лукавнуяй Тебе, приселится,

злый удалится.

Ты беззаконных, муж, ненавидиши,

глаголющия лжу, вся погубиши.

Мужа лсти крове Господь ся гнушает,

скоро отмщает.

Аз же на милость многу уповая,

вниду во дом Твой, поклон сотворяя.

К храму святому Твоему бояся,

сердцем страшася.

Правдою Ти мя, Господи, настави,

враг моих ради, путь мой весь исправи.

Яко от уст их, что право отметно,

сердце суетно.

Гортань их гробу точна отверзенну,

гноем смердящим с костми исполненну.

Языки мцаху, тщися им судити,

Боже, и мстити.

Да от мыслей си отпадут конечно,

по нечестию их отрини я вечно.

Господи, яко прогневаша Тебе

врази на себе.

Да веселятся, иже уповают

на Тя и вечну радость получают.

А Ты, Господи, Сам ся в них вселиши,

милость явиши.

И похвалятся весело о Тебе,

иже имя Тя чтимое на небе.

Любит праваго, Ты благословиши,

ибо любиши.

Ты сам, Господи, щитом Ти небесным,

благоизволом Твоим о нас десным.

Изволил еси торжество нам дати,

главы венчати.

Господи, не в ярости Твоей обличиши,

мене ни во гневе Ти за грехи казниши.

Но паче помилуй мя, ибо болен зело,

есмь исцели ми кости смущенны и тело.

И душа моя велми скорбна и смущенна,

доколе Тя, Боже мой, вижду отвращенна.

Обратися, Господи, изми душу мою

и спаси мя, являя многу милость Твою.

От ярости лютыя око ми смятеся,

посреде враг си лютых раб Твой состареся.

Отступите от Мене, творцы дела злаго,

Господь услыша глас мой плача усерднаго.

Услыша прошение, молитвы приял есть

Бог слез моих не презре, стенанию внял есть.

Вси убо врази мои скоро да вратятся

и смущени сердцы си зело да срамятся.

Господи Боже, на Тя уповаю,

от гонящих мя спаси, умоляю.

И избави мя да душы моея,

не хитит зубы челюсти своея.

Враг, яко же лев, никому же сущу,

во избаву ми ниже спасающу.

Господи Боже, аще творих сия,

достоин буду казнити лютыя.

Аще рукама деях неправая,

зло ми творящим, аще воздах злая.

Да буду от враг моих побежденны,

помощи всяки, от Тебе лишенны.

Да поженет враг и постигнет мою

душу и пленит во работу свою.

Живот мой в земли да может попрати

и славу мою с перстию смешати.

Воскресни, Боже, гневам воз[’]ярися,

в концех враг Твоих славно вознесися.

По завету Ти изволи востати,

и сонм Тя людей имать окрест стати.

Тем на высоту Твою возвратися,

Судия быти народов явися.

По правде моей изволи судити,

по незлобию моему щедр быти.

Да злоба грешных людей окончится,

муж же Тобою правый исправится.

Ты бо сам, Боже, живый на небеси,

сердца утробы совершенно веси.

Правы помощи сердце мое чает

от Бога, иже правыя спасет.

Бог судия прав крепкий и терпящий,

не на всякий день гнев Свой наводящий.

О врази, аще ся не обратите,

меч извлеченный от Бога узрите.

Напряже лук Свой, готов есть стреляти,

огненны стрелы на вы испущати.

Се неправдою враг мой разболеся,

и в сердце его зла болезнь зачнеся.

Беззакония зло чадо родил есть,

ров ископа ми сам, ся в онь встремил есть.

На главу его болезнь обрати[т]ся,

и на верх его неправда свалится.

Аз же Божию правду прославляти

буду и имя Его величати.

Господи Боже, коль чюдно есть Твое

по всей вселенной имя пресвятое.

Ибо лепота Твоя вознесеся

выше небесе.

Из уст младенец, еще сосца ссущих

свершил Ты хвалу ради врагов сущих.

Да местника зла скоро разрушиши,

врага смириши.

Яко небеса имам созерцати,

яже изволи рука Ти создати.

Луну и звезды и вся яже еси

создал в небеси.

Что человек есть, яко Ты помниши,

или человечь сын, яко и любиши.

Благоволиши его посещати,

милость являти.

Мало от ангел он есть умаленный,

славы и чести венцем украшенный.

Над делы рук ти Ты его постави,

зело прослави.

Покорил еси под нозе онаго,

овцы вся, волы и скота всякаго.

Птицы и рыбы, все, еже летает

и что плавает.

Господи, Господь наш, коль чюдно Твое

по всей вселенной имя пресвятое.

Весь сонм небесных оно прославляет,

песнь воспевает.

Господи, Тебе ся аз всем сердцем исповем

и вся чудеса Твоя мирови проповеди.

Возвеселюся в Тебе и радость имети

буду, внегда имени мне Твоему пети.

Егда нечестивый вспять враг мой возвратится,

от лица Ти погибнет, силы бо лишится.

Ты бо суд и прю мою изволил судити,

сед на престоле, правду мою проявити.

Запретил Ты языком, злый враг погубися,

имя его Тобою вечно потребися.

Врагу мечи Тобою велми умаленни

и крепции градове его разрушенни.

Память его погибе между человеки

со шумом, а Господь Бог жив есть во вся веки.

На Господа уповах суетно вам дерзати,

рещи ми, яко птице по горам превитати.

Яко врази, уже лук со стрелы напрязают,

да правыя душею во мраце состреляют.

Зане яже Ты, Боже, изволил совершити,

врази мои дерзнуша, зло люте разрушити.

Пред ним, что сотвори Господь Бог обитает,

в храме си Господь, в небе всем миром обладает.

Очи Его на люди убогия смотряют,

вежди Онаго сыны людския испытают.

Господь нечестиваго и права испытает,

любяй же муж неправду, душу си погубляет.

Бог на грешники сети потщится,

одождити огнь, жупел и дух бурей часть чаши

их творити.

Яко праведен Господь и правды есть любитель,

правая лице Его виде, Он мой спаситель.

Спаси мя, Господи мой, яко преподобна,

обрести человека вещь есть неудобна.

Истинна в человечих сынех умалися,

суетная друг другу рещи научися.

Устне летиве во сердцех своих содержаху,

ино с тобою, ино ко Мне глаголаху.

Господь же да потребит устне исполненны,

лсти язык велеречив буди потребленны.

Рекших возвеличим наш язык словесами,

уста наша при нас суть, кто Господь над нами.

Но страсти ради нищих и воздыхания

убогих не остави, Бог, си создания.

Днесь воскресну, глаголет, скорбным пособити

и не обинуяся от злых избавити.

Слово Господне чисто сребро разжженно,

седмь крат очищенное, земли искушенно.

Ты, Господи, от рода сего да храниши

нас во веки, рабы Ти, и Сам да снабд

и по высоте Твоей в число возрастают.

Доколе мя, Господи, в конец забдеши;

доколе отвращати лице Ти будеши?

Доколе печаль душу будет ми снедати

и болезнь сердцу во дни и в нощи стужати?

Доколе враг мой лютый на мя вознесется?

Призри на мя, Боже мой, да раб Твой спасется.

Просвети очи моя светом божественном,

да не когда усну в смерть сном невозбужденным.

Да не речет враг о мне, аз нам укрепихся,

аз бо помощи Твоей, Боже мой, вручихся.

Аще ся аз подвижу, то возвеселятся,

иже выну стужати души моей тщатся.

Аз же на милость Твою всегда уповаю,

о спасении Твоем веселия чаю.

Благо ли творшу Богу имам воспевати,

имя Бога вышняго вечно прославляти.

Муж буй в сердцы глаголаше,

несть Бог правый и не бяше.

Тем же врази вси ся тлиша,

в делех своих мерзцы быша.

Господь свыше призирает,

в сынех людских усмотряет.

Есть ли кто в них правду знаяй

или Бога воззываяй.

Вси ся на зло уклониша,

неключими вкупе быша.

Несть муж хотяй то творити,

что всем благо может быти.

Несть же в мире до едина

благостынна людска сына.

Ни ли убо разумеют,

иже люте злая деют.

Люди, яко хлеб снедают,

вины кроме поглощают.

Сами Бога не призваша,

Господь страх не бе трепеташа.

Яко Господь в правых роде,

посрамити вам бысть годе.

Совет нища, яко в Бога,

бе надежда ему многа.

Кто з Сиона спасение

Израилю даст в пение.

Егда плен наш возвратится,

весь Израиль осклабится.

Господи, кто в жилищи Твоем обитает

ли в святей горе Твоей место получает.

Ходяй кроме порока и правду творящий,

истинну в сердцы носяй языком нелстящий.

Иже искреннему си зла не содевает

и клевет на ближния сущих не внушает.

Пред ним же всяк лукавый муж уничижится,

бояй же ся Господа, человек славится.

Иже о нем же каятся ближнему [не] отметает,

сребра не даст в лихву и мзды не желает.

От люлей неповинных сице кто ли будет,

кроме подвижения, во веки пребудет.

Сохрани мя, Господи, царствующий в небе,

яко упование аз положих в Тебе.

Рех Господеви: Господь, Ты мой еси вечно,

яко не требуеши благ моих конечно.

Святым иже на земли Его обитают,

дивна вся хотения Господня бывают.

О коль многи немощи идол в мире быша,

к ним же нечестивии с жертвы ускориша.

Аз не имам собора с кровию собрати,

ни имене их в слове клятвы поминати.

Господь достояние часть есть Сам моего,

и чашы устроится оно ми от Него.

Господи, правду мою изволи слышати,

молению моему милостивно вняти.

Внуши молитву мою не от лстивых сущу,

устенной от сердца праваго текущу.

От лица Твоего суд на мя да ся творит,

раб Твой, видя правоту, тому ся покорит.

Ты сам изволил сердце мое искусити,

нощию смиренного раба посетити.

Ни обретеся во мне неправда да слово,

дел человечих идет из уст ми готово.

За словеса уст Твоих, Боже превысокий,

аз сохраних путь тесный и велми жестокий.

Изволи в стезях Твоих стопы ми свершити,

дабы им в течении и сподвижным быти.

Яко Ты мя услышал, аз паки звах к Тебе,

приклони ухо ко мне, Боже, живый в небе.

Внуши глаголы моя, милость удивиши,

иже надежных на Тя, спасенных твориши.

Яко зеницу ока, изволь мя хранити,

от хотяших деснице Твоей впреки быти.

В крове крилу Твоею да мя покрыеши,

от врагов острастших мя, яже Сам знаеши.

Врази мою душу ми люте удержаша,

тук свой затворше, усты гордость глаголаша.

Изгонящии мене, днесь мя обступиша,

очи сну клонити на землю сложиша.

Объяша мя, яко лев, готовый ловити,

и яко скимен, в тайных приобыкший жити.

Но воскресни, Господи, изволи запяти,

предваряй душу мою от злых враг от'яти.

Возми оружия Ти от рук врагов твоих,

раздели в животе их от малых раб Своих.

От сокровищ Ти они зело исполнени,

чад полни, останцы благ младым оставленни.

Возлюблю тя, Господи, Ты мой укрепитель,

твердость и прибежище, Ты мой избавитель.

Ты Бог мой и помощник, на Тя уповаю,

Ты защитник, Тя ми рог спасения знаю.

Бог мой заступник, хваля имам и призвати,

и спасение от враг моих восприяти.

Болезни даже к смерти мене обыдоша,

и неправды потоцы душу ми смятоша.

Болезни же аловы мене обступиша,

лютыя смерти сети мене предвариша.

И внегда скорбети ми призвах жива Бога,

ко Господу возсылах прошения многа.

Он от церкве святыя изволил ми вняти,

глас и вопль мой во уши Своя восприяти.

Трепетна бысть иногда земля и трясеся,

и основание гор великих смятеся.

Егда на египтяны Бог гневен явися,

даже во гневе Его мног дым воскурися.

И огнь от лица Его страшный воспланеся,

и углие от Него люте возгореся.

Преклонь небеса, сниде мрак, у ногу бяше,

взыде на Херувимы, на ветрех леташе.

Положи тму за кров си за жилище взяше,

темну воду, яже Ся в облацех держаше.

От блистания Его облацы пройдоша,

град же и огненное углие падоша.

Возгреме Господь с небес, глас Свой ниспустил есть,

пустив стрелы, разгнася молний, ми смутил есть.

Источницы воднии в мори ся явиша,

основания земли миру ся открыша.

От Твоего, Господи, бысть то прещения,

духа гнева Твоего от духновения.

Славу Божию небо поведает,

твердь руку Его дело возвещает.

День глагол славы дневи отрыгает,

нощь нощи разум Божий извещает.

Не суть язы́цы, им же не слышати

гласа их, что Бог вся весть управляти.

Изыде в мир весь онех вещание

и в концы земли их глаголание.

В солнце положи Свое селение,

его же светло есть исхождение.

Яко жених з чертога исходит,

весело, точне и оно восходит.

Яко исполин радостно путь деет,

от края небес исход его спеет.

Запад на ином краи содевает,

от зноя его никто ся скрывает.

Чист закон Божий, душы обращающ,

и глагол верен, дети умудряющ.

Оправдания Господня правдива,

веселящая сердца незлобива.

Заповедь светла очи просвящает,

страх Его чист есть вечно пребывает.

Судбы Господни верны оправданны,

паче чистаго злата суть избранны.

Паче камене честна многа драги

и паче сота медвеннаго благи.

Тем же ся раб Твой тщится соблюдати,

дабы сохранну мзду многу прияти.

Господь в день печали, царю, тя услышит,

Иаковля Бога, тя имя защитит.

Помощь от Святаго имать ти послати,

с небесна Сиона тебе заступати.

Всяку жертву твою в милости помянет,

всесожжение ти тучно пред Ним станет.

По сердцу твоему изволит ти дати

вся советы твоя делом исполняти.

О спасении ти мы возвеселимся,

о имени Бога велицы явимся.

Исполнит вся Господь твоя прошения,

надеждно да жденши спасения свыше.

Днесь познах, яко Бог, спася Христа Своего,

с небесе святаго вопль услышит Его.

Спасение в силах имать своих дати,

яже одесну си устрои стояти.

Сии в колесницах, в конех уповают,

наша уста в помощь Бога призывает.

Господи, силою Ти Царь возвеселится,

о спасении Твоем радостен явится.

Желание ему дал его сердца еси.

хотений устну его лишил его неси.

Благословением бо благости явися,

от Тебе венцем глава честным украсися.

Боже мой Боже, Вскую мя остави,

вонми ми ныне, милость Свою яви.

Словеса грехов моих суть далече,

от спасения то ми ся отвлече.

Боже мой, во дни имам Тя призвати,

Ты не хошеши молбе моей вняти.

Зову и в нощи, Ты мя не слышиши,

ко мне не в буйство сие обратиши.

Ты же во святем Сам граде живеши,

хвало людей Ти вся свято дееши.

На Тебе отцы наши уповаша,

тем же избаву от Тебе прияша.

К Тебе воззваша и быша спасени,

в надежде своей не суть постыждени.

Аз несмь человек, червь поношение,

есмь паче людем в уничижение.

Вси мя видевше, хулы глаголаша,

ругающеся, главы покиваша.

Рекуще: сей муж в Бозе уповает,

аще си любит, Бог да избавляет.

Ты мя из чрева матере моея

исторгл, Надежда мне от сосцу ся.

Тебе от ложесн ея привергохся,

внегда рожден есмь, Тебе припрягохся.

Боже мой, Ты еси, изволь же хранити,

во время скорби мя не отступити.

Яже близ есть, а несть помогаяй,

Ты мя един сам будеши спасаяй.

От Господа аз пасуся,

лишения не боюся.

В месте злачне мя вселяет,

у покойных вод питает.

Душу мою обратил есть,

на путь правый наставил есть.

За имя си пресвятое

содевает благо тое.

Аше смерти приближуся,

зла от нея не боюся.

Яко Ты сам при мне еси,

Боже, живый на небеси.

Жезл Твой мене утешает,

и палица защищает.

Ты трапезу пред очима

в лице врагов дал моима.

Маслом главу мастил мою

и дал еси чашу Твою.

Яже дивне упояет,

радость в сердце содевает.

Милость Твоя мне прибудет,

Дóндеже жив раб Твой будет.

Да в Господень дом вселюся,

в долготу дний веселюся.

Господня земля и все, что обретает

на ней, и живущими сам Он обладает.

Той земли на пучинах морских основал есть,

на быстротечных реках си уготовал есть.

Кто на гору Господню достоин путь взяти

или на месте святем служебно стояти.

Руце безвинны, сердце чисто сохранивый,

не любяй суетств и в лесть клятвы не творивый.

Той благословении достоин прияти

и милость от Бога си и Спаса стяжати.

Сей род, иже путь Божий тощно соблюдает

и лице Иаковля Бога обретает.

Возмите врата князи и вечныя двери,

возмите ся, видет в ня Царь славный без меры.

Кто убо сей Царь славы, Господь крепкий зело,

Господь силный во брани идет в ня весело.

Возмите врата князи, возмите ся двери,

вечныя внидет вами Царь славный без меры.

Кто же есть сей Царь славы, Царь сил в небе сущих,

есть Царь хвалы, песнь Ему вечно вопиющих.

Господи, к Тебе душу воздвигаю,

Боже мой, на Тя раб Твой уповаю.

Тем да не буду посрамлен вовеки

пред человеки.

Врагом незменене даждь ся смеяти,

терпящым Тебе, нелепо срам знати.

Беззаконицы, иже в злобе тщатся,

да постыдятся.

Ты пути Твоя изволи явити

и стезям Твоим мене научити.

На истинну Ти да мя наставиши

и научиши.

Ты Бог и Спас мой, терпех весь ден Тебе,

благости ради, яви щедра Себе.

Помяни милость яже есть от века

на человека.

Юности грехи и неведения

да покрыеши прахом забвения.

Помяни же мя по Твоей милости,

ради благости.

Благ и прав Господь, закон полагает,

слез, кто в пути семь грехи содевает.

Кроткия люди на суд наставляет,

путь Свой являет.

Милость и правда вси путие Его,

завет свидений ищущым от Него.

За имя Твое грех мой да чистиши,

иже мног зриши.

Кто муж есть иже Господа боится,

тому на пути закон положится.

Душа во благих его водворится,

дом внаследится.

Держава Господь боящимся Его,

не потаит им завета Своего.

Аз же ко Богу очи обращаю,

милости чаю.

Яко исторгнет нозе ми от сети,

помиловав мя, изволит призрети.

Яко нищ есмь аз и уединенный,

от всех лишенный.

Суди о мне, Господи, яко аз ходити,

не злобою моею тщахся и прав быти.

На Тебе уповая, силы не лишуся,

искуси и стяжи мя, да правдив явлюся.

Раждези сердце мое и утробы моя,

яко пред очимами выну милость Твоя.

И возлюбих истинну, не хотех аз быти

с сонмом суетных, с мужи злобными входити.

Возненавидех собор, лукаво живущих,

ни сяду среде сонма в нечестии сущих.

С неповинными руце желаю умыти

и на алтаре Твоем жертву положити.

Да слышу, Господи, глас Твоея хвалы

и повем чюдеса Ти достойная славы.

Благолепие дому возлюбих Твоего,

с местом славы Ти села от сердца моего.

Боже, души моея да не погубиши,

с нечестивыми людми, яже светло зриши.

Из живота моего с мужи кровопролийцы,

зло деющими, их же мзды полны десницы.

Аз же во незлобии тщался есмь ходити,

избави мя и милость изволи явити.

На правом пути сташе твердо нога моя,

аз во церкви воспою, Боже, хвалы Твоя.

Господь просвещение мое и Спаситель,

никого же боюся, Он бо защититель.

Есть животу моему, ниже устрашуся,

на всесилную помощь Его надеюся.

Егда зло творящии ко мне приближатся,

да си едят плоти моя, тогда посрамятся.

Оскорбляющие мя преизнемогоша,

и враждующие мне со срамом падоша.

Аще же на мене полк вражий ополчится,

и брань возстанет на мя, сердце не боится.

Ибо аз на Господа Бога уповаю,

едино же от Него просих и желаю.

Ежи ми в дому Его весь живот мой жити,

и красоты Господня очима ми зрети.

Церковь святую Его выну посещати,

и обеты Оному моя воздаяти.

Яко в день зла моего дал ми в храм Свой внити,

в тайне крова Своего от врагов покрыти.

На камень вознесе мя и ныне се главу

над враги вознес мою, облече мя в славу.

Церковь Его с хвалами радостно обыдох,

с восклицанием Ему жертвы моя пожрох.

И в грядущая лета имам воспевати,

пение псалмов Богу в честь возсылати.

Ты же услыши глас мой, Боже милостивый,

помилуй мя, яко же невинных любивый.

Господа взыщу, сердце мое глаголаше,

и лице мое Тебе, Боже мой, искаше.

Господи, к Тебе слезно воззываю,

даждь святый ответ, того ожидаю.

Аще Ты, Боже, аще Ты, Боже, глас Свой удержиши,

в гроб мя вселиши.

Услыши глас мой, егда Ти молюся,

и руце мои воздевати тщуся.

Ис церкви святей Ти, Боже мой, и к Тебе,

живущу в небе.

С грешники мене да не вмениши,

с творцы неправды да не погубиши.

И теми, иже мир усты вещают,

серцы прелщают.

Мзду им по делом их да сотвориши

и по лукавству мыслей их отмстиши.

Да по заслугам приимут от Тебе

казни на себе.

Яко дел Твоих не хотеша знати,

что мя хощеши Ты сам возвышати.

Тем же Тобою будут разорени,

ни воздвижени.

Благослвен Бог, молитвы внушивый,

мой пособитель, мене защитивый.

Нань сердце мое силно уповаше,

Он помощь даше.

Тем же моя плоть весела явися,

волею сердце пети устроися.

Господню славу Он же утверждает,

люди спасает.

Христа своего Господь защититель,

буди людем Ти, Боже, сам Спаситель.

В достоянии паси человеки

Сам во вся веки.

Сынове Бога жива Господу несите,

яко сыны овчия хвалу воздадите.

Имени Его славу несите премногу,

поклонитеся во дворе святем Его Богу.

Глас Господень на водах престрашен явися,

Бог славы возгремел, есть кто не устрашися?

Господь на водах многих волны возбудил есть,

егда в них фараона свои погрузил есть.

Глас Господень в крепости егда низхождаше,

глас во велелепоте егда закон даше.

Глас Господень велия кедры сокрушает,

и ливанския кедры Господь сотирает.

Силныя, яко телцы, на Ливане может

истнити, а противу кто стати возможет?

А иже бысть милости Его возлюбленный,

сыну единорога есть уподобленный.

Глас Господень пламени огня пресецает,

все густыя пустыни силно сотрясает.

И пустыня Каддийска онем сотресеся,

никто противный Ему никогда спасеся.

Глас Господень елени к роду совершает

и темныя дубравы светло открывает.

В церкви Его всяк славу должен глаголати,

Господь потоп на земли силен населяти.

Господь седит яко Царь преславно во веки,

ангелы обладая купно [с] человеки.

Господь крепость людем си имать даровати

и благословение с миром им подати.

Вознесу Тя, сый в небеси,

яко Ты мя подъял еси.

Не дав мене во утеху

врагом моим и к посмеху.

Воззвах к Тебе, бых исцелен,

во ад духом не преселен.

От сходящих воров темный

аз Тобою есмь спасенный.

Песнь святии Богу дайте,

память Его возвещайте.

Гневом кратким Он ярится,

в Его воли жизнь держтися.

Кого вечер ослезяет,

тому утро радость дает.

Аз повнегда обиловах,

не двигнуся, возглаголах.

Ты доброте моей еси

подал силу, Сый в небеси.

Лице Твое отвратится,

а дух во мне возмутится.

Что же имам аз творити,

токмо Бога Тя молити.

Кая полза может быти,

аще имам в тлю низити.

Егда персть Ти воздаст хвалу

или правде Твоей славу.

Бог изволи услышати,

нам немилость показати.

На Тя, Боже, уповах, да не постыждуся

и правдою Твоею от бед избавлюся.

Изволи ко мне ухо Твое приклонити,

еже из[’]яти мене, в помощь ускорити.

Буди ми, Бог, защитник и дом прибежища,

держава, еже спасти человека нища.

За имя Ти святое Ты мя наставиши

на путь и во скудости довле насытиши.

От сети яже ми есть, от враг сокровенна,

буди Тобою моя нога исторгненна.

Ты бо ми защититель, дух Ти мой вручаю,

Боже, Ты мя избави, на Тя уповаю.

Суетных хранители ненавистни Тебе,

аз на Бога уповах живущаго в небе.

Яко призрел мя еси, аз возвеселюся,

спасл еси душу мою от бед, радуюся.

Во руках мя вражиих Ты затворил неси,

на пространие нозе ми Сам поставил еси.

Помилуй мя, Господи, яко скорблю зело,

смяте ми ся за ярость око, душа, тело.

Даже во болезни мой живот исчезает,

век во воздыханиих тяжких погибает.

Нищеты ради крепость моя изнеможе,

смятошася кости ми дни, кто поможе.

Просвети лице Твое на раба Твоего,

спаси мя милостию от врага моего.

Да яко призвах Тебе, за то не стыждуся,

но паче помощию Твоею хвалюся.

Блажени, им же злобы суть прощенны,

и вся неправды Богом покровенны.

Блажен, кому Бог греха не вменяет,

и в устех его лесть не обитает.

Доколе тщахся грех мой потаити,

обетшах в костех, ни могох ходити.

Звавшу ми весь день грех моих защиты,

сердца болезни не могох избыти.

Ибо в день и нощь тяжка рука бяше

Твоя ми, Боже, яко терн бодяше.

Вратих ся на страсть, грех мой известил есмь,

беззакония тогда не таил есть.

Токмо рех: повем грехи моя Богу,

Ты простил еси злобу мою многу.

Тем преподобный всяк Ти помолится,

егда благое время прилучится.

Обаче потоп скорбей многих зело

не приближится ему, станет цело.

Ты прибежище мое, Боже еси,

от скорбей всяких царствуяй в небеси.

Ты моя радость, изволь избавити,

от обшедших мя и цела хранити.

Ты же изволил ко мне глаголати,

Аз вразумлю тя, буду наставляти.

На путь сей, им же хощеши ходити,

очи Ми на тя имам утвердити.

Яко конь и меск, ума суть лишени,

вы не быдите им уподоблени.

Радуйтеся, правии, о Господе Бозе,

правым хвала достоит в веселии мнозе.

В десятострунну псалтирь, в гусли ударяйте,

поюще Господеви, вси исповедайте.

Песни новыя Ему изрядно слагайте

и со восклицанием тыя воспевайте.

Яко слово Господне пребывает право,

вся дела Его верна, ничто же лукаво.

Любит Он суд, и милость тою исполняет,

всю землю юже сла[в]но море окружает.

Словом Господним небо висит утвержденно

и духом уст Его то светло украшенно.

Воды морския яко мех Он есть собираяй,

во сокровищех бездны чюдне полагаяй.

На всяко время имам аз благословити,

Бога усты моими на всяк день хвалити.

О правом Бозе душа моя похвалится,

всяк да услышит кроткий и возвеселится.

Да величит со мною Господа святого,

вознесем имя в купе Бога единаго.

Взысках Его и внят ми, от скорбей избави,

из сети врагов лютых изыти настави.

Приступите вси к Нему и просветитеся,

отвращением лица не постыдитеся.

Аз нищий, возвах и Бог благоволил вняти

и от всех скорбей моих нескосно из[’]яти.

Ангел Господень окрест боящихся Бога

ополчится и спасет от бедства премнога.

Вкусите и видит коль благ Бог бывает,

блажен, иже надежду в Оном полагает.

Вси святии Господа выну да боятся,

боящиися Его нуждных не лишатся.

Богатии, в нищету впадше, возалкаша,

ищущии же Бога, скудости не знаша.

Приидите со чада, мене послушайте,

страху Господню имам учити, внушайте.

Кто есть человек, хотяй благия дни жити,

да тщится язык от зла прилежно хранити.

Да блюдет устне свои лсти не глаголати,

не твори зла, но тщися благая деяти.

Ищи мира во мире, того да женеши,

да со нем вся благая удобь постигнеши.

Очи си на правыя Господь обращает,

и молитвы во уши Своя тех впущает.

Лице же еси на злыя обыкл есть вращати,

еже от земли память о нех истребляти.

Возваша праведницы, а Господь им внял есть,

от всех оных печалей щедротне из[’]ял есть.

Бог сокрушенныя сердым выну близ бывает

и смиренныя духом любезне спасает.

Суди, Господи, мя обидящыя,

возбрани, Боже, мене борющыя,

невинна суща.

Возми меч и щит, стани в помощь мою,

взем оружие, яви милость Твою,

запни гонящих.

Рцы души моей: аз есмь твой Спаситель,

сотвори, да всяк оные гонитель

посрамлен будет.

Злаго ми любцы вспять да возвратятся,

яко пред ветром прах да расточатся

в разныя страны.

Ангел Господень их да оскорбляет,

ангел Господень их да погоняет

во тме путем ползким.

Яко и сети пагубы сокрыша

и души моей всуе поносиша

зело досадно.

Ея же не весть в сеть враг да впадется,

в ловитву юже сокры да вплетется,

за свою прелесть.

Душа же моя да возвеселится

о Бозе Спасе, яко свободится

от сети ловчи.

Беззаконник грешити умыслил есть в себе,

несть пред очима его страх Сущаго в небе.

Лестно живе со мною пред очима Бога,

да в ненависти злая содеет ми многа.

Глаголы его злоба и ложь, еже лстити

не хоте знати, дабы благая творити.

Беззаконие в ложи своем помышляше,

на всякий путь неблагий ити готов бяше.

Не возненавиде зла, а Твоя, мой Боже,

милость небо высоко превзыти возможе.

Истинна Ти до облак самех достизает,

правда Твоя велики горы превышает.

Судбы Твоя суть бездна из лиха глубока,

ни от коея твари постижима ока человеки.

Человеки, Господи, и скоты спасеши

за множество милости блюдеши, пасеши.

Человецы в крове крил Твоих уповают,

яко птенцы под крилы матере витают.

Обилием дому Ти будут упоени

и потоком сладости довле услаждени.

Яко у Тебе жизни источник богатый

и в свете Твоем будем мы свет созерцати.

Пробави милость Твою, тым иже Тя знают

и правду Твою в сердцех своих соблюдают.

Мене же нога гордых да не попирает,

и рука грешна мужа да не подвизает.

Во ад беззаконником достойно подати,

изриновенным бывшим никогда востати.

Не ревнуй человеком зле в мире живущим,

ниже да завидиши неправду деющым.

Зане скоро погибнут, яко изсыхает

трава скоро и яко цвет злака спадает.

Уповай на Господа, благость да твориши,

насели землю плоды, дом твой насытиши.

Усладися Господем, и даст прошение

сердца твоего тебе во утешение.

Открый Господу путь твой, о Нем уповая,

и Той сотворит тебе по сердцу благая.

Изведет правду твою, яко свет сияти,

и судбу твою, яко полудне блистати.

Повинися Господу и молися Ему,

да грехопадению щедр будет твоему.

Не ревнуй человеку в пути си спеющу,

противная Божию закону деющу.

Господи, не во время ярости Твоея

обличи мя, ни во гневе казнь злобы моея.

Дей ибо стрелы Твоя во мне суть унзенны

и жезл руки Твоея на мне утвержденны.

Несть целость в моей плоти от гнева Твоего,

и мир несть в костех моих от греха моего.

Яко беззакония главу превзыдоша,

и тяжкое ми бремя дати возмогаша.

За безумие мое раны ми согниша,

и смрад обонянию мерзкий сотвориша.

Пострадах даже в конец и велми смирихся,

и весь день в ходжении сетуяй явихся.

Яко лядвия моя исполнь ругания,

быша и в плоти моей несть исцеления.

Озлоблен бых из лиха и велми смирихся

от воздыхания же, рыкаяй явихся.

Господи, пред Тобою мое желание

и не тайно Ти мое есть воздыхание.

Сердце мое смятеся, силы есмь лишенны,

свет очию моею мене отчужденны.

Друзи мои прямо мне, приближшеся, сташа,

ближним издалеча на мя возглядаша.

Души же ищущии нужду ми твориша,

злая ми глаголати прелстити мыслиша.

Аз же бех, яко глухий, ничесо же слышах

и подобне немому устен неотверзах.

И бых, яко человек, ушию лишенный

и отвещанием уст не сый украшенный.

Рех имам пути моя сохранити,

языком моим не хощу грешити.

Устам хранило мною положися,

егда муж грешный на мя устремися.

Смирився, нем бых и что подобаше,

право воздати дух мой умолчаше.

Но болезнь моя тогда обновися,

и сердце мое во мне возпалися.

В помышлении моем огнь палаше,

даже язык мой к Богу глаголаше.

Боже, скажи ми, когда конец века,

кое число дней бедна человека.

Да разумею, чесо аз лишихся,

коль еще долго на страсть оставихся.

Во терпении терпех свыше благодати,

Господь услыша молбы, изволил ми вняти.

Из рова страстей з блата глубокай избави,

нозе мои на твердом камени постави.

Исправи стопы моя и вложи песнь нову

в уста моя пение, еже пою Богу.

То узревше премнози, страхом убоятся,

уповати в Господе скоро обратятся.

Блажен, иже в имени Бога уповает,

неистовств ложных не зрит, суетств не смотряет.

Многа чюдеса, Боже, Тобою свершенна,

в мыслех Твоих не имать мир уподобленна.

Та мною глаголанна суть и возвещенна,

но паче числа в мире та суть умноженна.

Блажен есть разумеяй нища и убога,

во день лют избавится помощию Бога.

Господь да хранит его и да оживляет,

и блаженна на земли во всем да являет.

Да не предаст и в руце зла ему хотящим,

враждующим без вины и ненавидящым.

Господь в болезни его помощь да бывает,

ложе Его руками си да обращает.

Аз рех[:] Господи Боже, милость да явиши,

аз Ти согреших, Ты же душу исцелиши.

Врази мои злая мне яве глаголаху,

да умрет и с именем погибнет, вещаху.

Егда кто от них зрети мене прихождаше,

ложными мя глаголы скоро клеветаше.

Яко же елень, ловцы утружденный,

воды желает быти прохлажденный.

Тако аз, Боже, к Тебе воздыхаю,

зрети желаю.

Возжада душа моя ко жовому

Богу святому и Богу крепкому.

Когда прииду к Нему и явлюся,

возвеселюся.

Слезы ми вместо хлеба тогда быша,

егда день и нощь врази мя просиша.

Где Бог твой аще тебе не остави,

Того нам яви.

Сия помянух, та же веселихся,

яко в дом Божий ити известихся.

До крова дивна в гласе светла лика,

шума велика.

О душе моя, Вскую ты скорбиши,

мя смущаеши, на Бога да зриши.

Того исповем, Он ми Бог спаситель

и покровитель. Во мне смятеся зело душа моя

и воспомянух аз щедроты Твоя.

Яже Ты явил нам при Иордане,

в Ермонстей стране.

При горе мале, а скорбь скорбь глашает,

что бездна бездну хлябий ся решает.

Волны Божия по мне прейдоша,

всего сотроша.

Суди ми, Боже, прю да разсудиши,

от мужа лстива мя да свободиши.

И от языка мя не преподобна

и от мужа лукава, дей свободна.

Яко Ты, Боже, мне держава еси,

Вскую мя ринул, живый на небеси.

И Вскую хожду, духом унывая,

внегда стужает враг, ми досаждая.

Посли свет, Боже, и истинну Твою,

да ти наставят бедну душу мою.

Да возведут мя во святую гору

ко прежеланну и честну Ти двору.

Аз во жертвенник вниду божественный

к Богу, им же есмь в младости учрежденный.

И хощу славу в гуслех пети Тебе,

Боже мой, Боже, царствуяй на небе.

Вскую, о душе моя, ты скорбиши

и смущение в сердце ми родиши.

Уповай в Бозе, Он ми Бог спаситель,

Ему дам славу, Он ми покровитель.

Господи, мы ушима нашима слышахом

и от отец предварших в повести прияхом.

Дела, яже Ты в днех их изволил творити,

внегда Ти из Египта род наш изводити.

Рукою Ти силною язы́цы сотренни,

а во место их отцы наши насаждени.

Озлобил еси люди и изгнал ся еси,

Твое есть правительство в мире и в небеси.

Не оружием землю наши наследиша,

ни своею мышцею в спасении быша.

Но десница и мышца Твоя их спасаше,

и свет лица Твоего оны утверждаше.

Яко любил ся еси Ты сам о, мой Боже,

дал спасение отцем никто впреки може.

И мы о Тебе чаем враги победити,

востающия на ны Тобою смирити.

Не на лук мой надежду, Боже, полагаю,

ни оружием моим спасения чаю.

Ты от стужающих нам нас еси избавил

и ненавидящих ны во сраме оставил.

Отрыгну сердце мое, благо слово

глаголю, Царю, дело песни ново.

Трость скоро писца не тощно деет,

елико язык мой во хвале спеет.

Красен всех паче Царь наш добротою,

никто во мире равен будет с тою.

Во устнах твоих благодать вселися,

тем же Ты Богом в век благословися.

Оружие Ти потщися прияти,

силне по бедре Твоем поясати.

С добротою Ти лице, с красотою,

на ляцы взем лук во десницу Твою.

Успевай, царьствуй за кротость святую,

истины ради за правду верную.

Десница Твоя дивне Тя наставит,

торжествующа над всеми поставит.

Стрелы Ти силне зело изощренны,

в сердцы враг цаских будут водруженны.

Людие паки под тобою будут,

в послушании словес Ти пребудут.

Престол Твой, Боже, вечен имать быти,

жезл царствия Ти весть правость хранити.

Правду святую всегда Ты любиши,

беззакония Ты ненавидиши.

Тем же помаза елеем радости

Тя, Боже, Бог Твой за Твоя благости.

Паче сверстных ти от риз услаждает,

благовоние еже источает.

Смирна и с такти и сладка кассия

и из домов слоних вещи предрагия.

Из них же тебе превозвеселиша,

царьския дщери егда тебе чтиша.

Бог нам сила прибежище,

от волн скорбей пристанище.

Аще земля вся смутится,

наше сердце не боится.

Аще горы преложатся,

в сердце морско вовалятся.

Душа наша не смутится,

в Бозе силном утвердится.

Воды быша возмущенны,

горы Богом потрясенны.

Яже облак достизаху,

неподвижны от век бяху.

Град Господень веселится,

егда река близ точится.

И в нем Вышний освятил есть,

селение в нем же жил есть.

В среде града Бог витает,

тем недвижим той бывает.

Утро тщится в помощь ему,

яко дому Бог своему.

Язык роди ся смятоша

и царьствия упадоша.

Егда Вышний глас Свой даше,

люте земля трепеташе.

Нас Господь сил заступает,

Иаковля чада знает.

Семо роди приидите,

Бога чюдна дела зрите.

Яже в мире сотворил есть,

брань на земли утолил есть.

Лук сокрушит мечь сломити,

имать огнем щит спалити.

Приидите, разсмотряйте,

яко аз Бог, познавайте:

во языцех вознесуся

и на земли прославлюся.

Господ[и] сил с нами буди,

храни от бед Своя люди.

Бог Иаковль защититель,

наш в печалех утешитель.

Вси язы́цы весело руками плещите,

гласом радости Богу живу воскликните.

Яко Вышний есть страшен, над всеми царствует

и владетелствует.

Покорил нам есть люди и под наша ноги,

преклонил есть языки силою Ти многи.

Достояние благо Иаковле даше,

нам еже любяше.

Во воскликновении Бог на гору взыде,

Господь во гласе трубне на место си приде.

Пойте Богу нашему и Цареви пойте,

в службе Его стойте.

Яко Царь всей земли Бог, умно Ему пойте,

воцарися над роды, сладки гласы стройте.

Бог на святем престоле Своем почивает,

всяк да величает.

Князи людстии с Богом Авраамлим сташа,

вси ся Ему служити в сонм велий собраша.

Державнии Божии в мире вознесении

суть и прославлении.

Велий Господь во граде есть Бога нашего

и хвален зело в горе святей дому Его.

Зиждется во радости Сион окрест сущих,

сый ребра северова град Царя живущих.

Бог правый в домех Его имать познан быти,

егда благоволит и славно защити.

Се царие земстии вкупе ся снидоша,

видевше, дивишася и велми смятоша.

Подвизашася, трепет об’ят ся великий

и болезни родящей бывают колики.

Услышите вси, в мире живущии,

по всей вселенней язы́цы сущии

Земная чада и от человеков

жизнь приемиши сынове всех веков.

Слыши богатый и иже нищ еси

на слово мое равно слух твой неси.

Устами мудрость имут глаголати

и сердце мое уму поучати.

Приклони ухо в притчей вещание,

явлю в псалтири мое ганание.

Вскую боюся в день хотящ лют быти,

грех делес моих имать мя об’ити.

Безумни, иже в силе уповают,

или надежду в злате полагают.

Брат не избавит никто ин вовеки,

измена Богу несть за человеки.

Цена к избаву души человека

взята не будет до кончины века.

И многотрудник суетно трудится,

хотя жив быти, да не умертвится.

Умрет и мудрый и буй умирает,

равно смерть обу живота лишает.

Лих богатства чуждий хищает,

телу их гроби в жилища бывают.

Селения си тщатся назидати,

имена своя оным налагати.

Мняще яко та вечна имут быти

и тако в славе не престанут жити.

Бог Богов Господь людем глаголаше,

землю от восток до запад прозваше.

Благолепие красоты Онаго

от горы славны Сиона святаго.

Бог яве придет, немолчно явится,

пред лицем Его пламень возгорится.

Окрест же Его буря зелна будет,

никто без страха в то время пребудет.

Призовет с небес ангелы святыя

и с земли люди на оней жившыя.

Судити речет, да ся собирают,

иже жертв Моих завет завещают.

И небо имать правду возвестити,

яко судия Бог не знаяй льстити.

Людие Мои, глагол Мой внушите,

роде Авраамль, что реку, слышите.

Бог, Бог Твой есмь аз, иже обличати,

о жертвах твоих не имам начати.

Всесожжения твоя предо Мною,

выну суть, но не во любовь суть Мою.

Телцев от Тебе не имам прияти,

ни козлищ от стад твоих обоняти.

Яко Мои суть зверие в дубравах,

по горам скоти, волове на травах.

Знаю вся птицы и селныя плоды,

вся та Моя суть между всеми роды.

Аще возалчу, не реку аз тебе,

Мой бо есть мир весь и что имать в себе.

Помилуй мя, Боже, по Твоей милости,

по множеству щедрот сотри неправости.

От беззакония изволи омыти,

от греха моего мене очистити.

Беззакония бо, яже деях, знаю,

грех мой предо мною выну созерцаю.

Тебе единому, Боже, согрешил есмь,

злое пред Тобою дело сотворил есмь.

Помилуй мя, яко да ся оправдиши,

во словесех Твоих враги победиши.

Иже Тебе, Бога, ложно осуждают,

не оправдающа быти порицают.

Се в беззакониих зачат есмь и мати

не може без греха во мир мя издати.

Се бо Ты истинну изволил любити,

тайну ми мудрости Твоея явити.

Окропи иссопом мя и очищуся,

омый мя и паче снега убелюся.

Слуху моему даждь радостныя гласы,

да есть радость смирным костем по вся часы.

Силне в злобе, что блажиши,

злобу юже зле твориши.

Лесть язык твой умыслил есть,

равен бритве в оной был есть.

Злоба тебе возлюбленна,

благость паки есть презренна.

Лжю Ты избрал глаголати,

а неправду извещати.

Злый языче, что Тя губит,

те глаголы дух твой любят.

Сего ради, Бог правдивый,

буде тебе люте мстивый.

Имать тебе разрушити,

исторг з дому преселити.

И твой корень з земли живых

ради твоих дел вселстивых.

Что узревше, иже святи,

паче имут страх стяжати.

О казненном возсмеются,

ими слова та рекутся.

Сей человек помощь себе

не положил в Сущем в небе.

Но в богатстве уповаше

и в суетстве возмогаше.

Аз же, яко древо плодно,

туком масла Богу годно.

В дому Бога есмь живаго,

уповах аз на Онаго.

Познах милость превелику

ко мне бедну человеку.

Тем же во век хвалу Тебе

имам пети, Сущий в небе.

И терплю на имя Ттвое

с надеждою пресвятое.

Еже благо святым людем,

мы то выну пети будем.

Муж буй в сердцы глаголаше,

несть Бог правый и не бяше.

Тем же врази си ся тлиша,

в делех своих мерзцы быша.

Господь свыше Сам призрел есть,

в сынех людских Сам смотрел есть.

Есть ли кто в них правду знаяй

или Бога возыскаяй.

Вси ся на зло уклониша,

неключими вкупе быша.

Несть муж хотяй то творити,

что всем благо может быти.

Несть же в мире до елина

благостынна людска сына.

Ни ли убо разумеют,

иже люте злая деют.

Люди, яко хлеб снедают,

егда грабят, убивают.

Сами Бога не призваша,

где не бе страх трепеташа.

Яко Господь по правости

разсыпа их силы, кости.

И суть зело посрамлени,

яко Богом отвержени.

Кто з Сиона спасение

Израилю даст в пение.

Егда плен наш возвратится,

весь Израиль утешится.

Боже, во имя Твое мене да спасеши

и в силе Твоей судом от враг да измеши.

Боже, молитву мою потщися слышати

и глаголом уст моих милостивно вняти.

Яко чуждии на мя людие восташа,

врази крепцыи души моея взыскаша.

Пред очима си Бога Тя не предложиша,

без страха Ти убити мене умыслиша.

Но Божия десница помощь содевает,

Господь заступник души моей Сам бывает.

Врагом моим имать Он злая отвратити,

истинною Своею оны потребити.

Аз же волею пожру и имя святое,

исповем Твое, Боже, яко преблагое.

Тобою от печалей аз всех избавленны,

и враг мой оком моим в конец есть презренны.

Внуши молитву мою, Боже, благодати,

не презри мольб, услыши, изволи ми вняти.

Возскорбех аз в печали, от гласа смятохся,

врагов отстужения, грешнича слякохся.

Беззаконие на мя они уклониша

и во гневе си вражду люту ми твориша.

Сердце во мне смятеся, страх мя смерти яша,

от боязни все тело мое трепеташе.

И покры мя тма скорбей, глаголати,

кто ми, яко голуби, крил может дати.

Да полещу из града и могу почити,

предаятелства врагов злоковных избыти.

И се избег рук онех Богом удалихся,

во глубоцей пустыни с други водворихся.

Чаях Бога от страха, спаси мя, могуща

и от бурия недруга на смерть мя ищуща.

Смути сердца их, Боже, раздели языки,

видех бо в граде прекость и злобы велики.

Днем и нощию стены во граде обходят,

ищуще мя, труд и лесть и вся злобы родят.

От пути их лесть лихва не оскудеваше,

и аще ты мой недруг поносил ми бяше.

Терпел бых и аще бы хулы глаголати,

ненавидящу мене тщал бы ся гонзати.

Ты же, о человече, советен ми бяше,

друг знаемый хлеб купно со мною ядяше.

Единомышлением в храм Божий ходихом,

что развратился еси, не друзи ли быхом.

Помилуй мя, Боже, злым врагом попранна

и весь день борющим стужанию вданна.

В день всяк врази мои мене попирают,

мнози суть, иже мя свыше озлобляют.

В день лют аз без страха имам пребывати,

яко не престаю на Тя уповати.

Слово аз Господне в молбах прославляю,

в Нем упование мое полагаю.

Не к Тому имам аз сердцем ся бояти,

ничтоже ми может плоть зло содеяти.

Что либо глаголах словес ся гнушаху,

весь день помыслы их на мое зло бяху.

Во домех соборы на мене твориша,

новыми крыюще и пяту храниша.

Еже уловити, яко же терпеша,

душу ми от[’] яти от плоти хотяша.

За ничто ли оны целы оставиши,

ни нове гневе Твоем люди потребиши.

Боже, весь живот мой скорбный сказах Тебе,

Ты слезы видиши моя, Сый на небе.

Яко Ты ми обет Свой изволил дати,

тако врази мои будут вспять гонзати.

В онь же день аще Тя тощно призываю,

яко Бог мой еси, вскоре познаваю.

О Бозе хвалю всяк глагол и слово,

благодарствие уст и сердца готово.

На Бога уповах и не подвижуся,

что ми сотворит враг, того не боюся.

Помилуй мя, Боже мой, помилуй, глашаю,

на Тя всею душею, раб Твой, уповаю.

В тени крилу Твоею надеюся жити,

Дóндеже прейдет злоба в оней, хощу быти.

Воззову ко Господу, безначално бывшу,

ко Богу, благая ми из млада творившу.

Он посла ми благодать с небес высока

и спасе с ненависти вражескаго ока.

Попирающия мя дал в поношение,

иже ми промышляху жизни лишение.

Посла Бог милость Свою с правдою святою

от среды скимнов из[’]ят скорбну душу мою.

Поспах, смущен во скорбех, ибо вси сынове

мне человестии быша, яко лвове.

Зубы их оружия и стрелы мне бяху

языком, яко мечем острым, уязвляху.

Вознесися на небо, Боже наш, высоко,

по всей земли славу Ти да зрит всяко око.

Сеть ногам моим врази в тайне положиша,

озлоблен ми, душу ми из лиха смириша.

Яму пред лицем моим глубоку изрыша,

но Богу мстящу, сами в ону ся ввалиша.

За что, Боже мой, сердце мое есть готово

сладкое пети Тебе в хваление слово.

Востани, славо моя, псалтири, востани

купно с гусльми, во славу Господеви стани.

Востану рано, Божей, исповемся Тебе,

в людех Ти и в языцех, яко же есть требе.

Яко милость до небес Твоя возвысися,

истинна Твоя выше облак возрастися.

Вознесися на небо, Боже наш, высоко,

по всей земли славу Ти да зрит всяко око.

Аще истинно правду вы любите,

людсти сынове праведно судите.

Беззаконие в сердцы смышляете

и лесть вашими руки сплетаете.

Грешницы з ложен отчюждени быша,

правды из чрева еще заблудиша.

Лжу глаголаша, ярость их толика,

змий ядоносных вредность есть колика.

Яко же аспид уши затыкает,

егда волхв хитрый его заклинает.

Подобно они не хотят слышати,

того им, еже бы от злобы престати.

Но Бог во устех зубы им поломит,

членовныя лвом иже удобь томит.

Исчезнут, яко вода исчезает,

яже во скорбе мимо претекает.

Бог лук напряжет, даже истребити,

и, яко воску, тающу им быти.

Паде огнь на ня, невидяща солнца,

ярость Господня сотреся до конца.

Прежде и еже их терп в рамн совершится,

в надежде жизни гневом истребится.

Возвеселится егда узрит правый,

яко от мести паде враг лукавый.

Руце си в крови грешника умыет,

из уст человек сицев глас излиет.

Аще есть плод мзды праву человеку,

есть Господь, судяй настоящу веку.

Изми мя от враг моих, Боже милостиве,

и от воставших на мя избави правдиве.

От муж беззаконие изми мя творящих,

спаси мя от человек, кровь пити хотящих.

Се бо уловити мя, дом мой обыдоша,

крепцыи раби врага на мя нападоша.

Не беззаконновах им грехами, не знаю,

беззлобно текох и жизнь чинно направляю.

Возстани в сретение мене избавити,

Боже, и виждь, что врази хотят ми творити.

Услыши мя, языки, скоро посетити

и беззаконных мужей всех не ущедрити.

Вратятся кои в вечер и будут алкати,

мене, яко жив, граде имут мя искати.

Возглаголют усты си, аки никто слыша,

словеса же их мечи и копия быша.

Ты же вся та во посмех, Боже, обратиши

и языки злобны ся вся уничижиши.

Аз крепость мою имам в службу Ти хранити,

яко Ты заступник мой потщишися быти.

Боже мой, Твоя милость мене да предварит

и на вразех моих месть скоро ми да явит.

Обаче не потщися в конец их избити,

дабы людем закона моим не забыти.

Разжени ся в силе Ти и да низложиши,

защитниче мой, слово уст их упраздниши.

Во гордыни да будут своей врази ся Ти,

за лжу клятву да слышат, еже конец взяти.

Боже отринул еси нас за грехи наша

и низложил Ты люди, иже Тя гневаша.

По гневе паки милость явил еси,

еже Ти свойство, живый на небеси.

Стрясл еси землю, она из лиха смутится,

сокрушения ея целитель явися.

Подвиже бо ся жестота явленна,

людем Тобою чаша слез врученна.

Боящимся Тя знамя благоволил дати,

еже от лица лука мщения бежати.

Да ся избавят, яже Ты любиши,

десницею Ти спаси мя, услыши.

Бог во святыни Своей о мне глаголаше,

яко царства, блаженство мне дати хотяше.

Аз бо имам во радости быти,

земли Сикимски плен воем делити.

Юдоль жилищ размерю, Галаад Мой будет,

Манасий в службе Моей недвижно пребудет.

Крепость главы Ми Ефрем есть со Мною,

Иуда царь Мой по мне есть до бою.

Моав упование коноб есть Моего,

Идумею поперу с пособием его.

Инороднии Мне ся покориша,

Филистини бо подчинени быша.

Но кто Ми во град крепкий может ввожда быти

или до Идумеи Мене наставити.

Не Ты ли, Боже, отринувый люди,

Ты в силах наших Сам помощник буди.

Даждь нам в помощь в печали, ибо спасение

от человек суетно и есть смущение.

Бог сила наша имат вождь нам быти

и стужающих нам уничижити.

Услыши, Боже, моления моя,

молитвы в уши да впустиши Твоя.

От конец земля аз возопих к Тебе,

унывшу сердцу во тяжцей потребе.

Ты на камене мене вознесл еси,

от рва пропасти к свободы небеси.

Упование мое в Тебе бяше,

столпом крепости Ты ся мне творяше.

От лица врагов тем же аз вселюся

в сень Твою вовек и возвеселюся.

В крове крил Твоих Ты мя защитиши,

се бо молитвы Ты моя слышиши.

Достояние изволил Ты дати,

тщащимся Тебе выну ся бояти.

День ко дни, Боже, Царю приложиши,

лета в род и род его продолжиши.

Да пред Тобою вовек пребывет,

милость и правду Ти кто постизает.

Тем Тя вовеки имам воспевати,

молитвы моя в день всяк воздаяти.

Не Богу ли душа моя повинется,

им же спасение мое содеется.

Он бо Бог и Спас мой, Он мой заступитель,

не двигнуся ктому, Той ми утвердитель.

Доколе навет ми мног сотворяете,

убити мя туне вси промышляете.

Яко стена склонна и плоть риновенный,

хощете, да буду скоро изрващенный.

Цену ми от[’]яти должну совещаша,

жадно мя хотеша и лжу глаголаша.

Усты мне своими благо глаголаху,

а сердцем развратным люте проклинаху.

Обаче Богови душесповинися,

к Тому с терпением твоим обратися.

Ибо Той Бог Спас мой, Он мой заступитель,

не подвижуся в век, Той мой утвердитель.

В Бозе спасение мое есть и слава,

помощь моя, Господь надежда и хвала.

В Его милости сонм верных уповайте,

пред Ним сердца ваша в слезы изливайте.

Яко Бог, помощник наш, выну бывает,

от всяческих скорбей скоро избавляет.

Обаче суетни людие бывают,

в мерилех лстят, други купно себе льщают.

Но со человецы в лжи не уповайте,

на восхищение богатств не желайте.

Богатство, аще в дом чий скоро вплывает,

и той к нему сердца си да не прилагает.

Един крат, рече Бог, аз же слышах двое,

Твоя, Боже, крепость, милость дело Твое.

Яко Ты по делом имаши воздати,

злыя казнити, а добрыя миловати.

Боже мой, Боже, утро тщуся возстати,

еще Ти славу должну воздаяти.

Душа моя Тя многажды желаше,

подобие и плоть к Тебе воздыхаше.

Яко же пуста земля ни пр[о]ходна,

в ней же есмь жаждет яко есть безводна.

Тако во святем аз явихся Тебе,

силу Ти, славу зрети, Сущий в небе.

Паче живота милость Твоя блага,

тем от уст моих даст Ти ся песнь драга.

Во вся дни моя аз благословити,

имам Тя, руце к Тебе возносити.

Яко от тука дух мой насытится,

благодатию аще исполнится.

Радости устны уста моя Тебе

воспоют хвалу, Боже живый в небе.

Аз Тя на ложи тщахся поминати,

утро закон Твой во ум собирати.

Яко Ты помощь изволил ми дати,

в крове крил Твоих имам ликовати.

К Тебе ся душа моя прилепляет,

а рука Твоя мене соблюдает.

Тии же всуе мене наблюдают,

в ад преисподний снити вси да чают.

Телеса онех под меч предадятся,

от лисов гладных части их снедятся.

Аз же от Него царь сый поставленный,

о Бозе буду превозвеселенный.

И всяк, кто Его именем кленется,

в правду святую с хвалными почтется.

А неправыя уста загражденна

суть от Господа и в век посрамленна.

Услыши, Боже, глас мой, егда Ти молюся,

Тобою от вражия страха да измуся.

От сонма лукавых мя изволи покрыти,

от собора неправду смеющих творити.

Иже язык свой, яко меч зол, изостриша,

на лук свой, на вещь горку стрелы наложиша.

Еже непорочнаго в тайне состреляти,

состреляют си ниже, будут ся бояти.

Еже сеть скрыти слово в себе утвердиша,

лукаво кто узрит ю, с собою мыслиша.

Беззакония во мне из лиха искаша,

но исканием своим во исчезе сташа.

Приступил есть человек се сердце глубоко,

Бог же, разсыпав совет, взнесется высоко.

Тебе песнь, Боже, подобает пети

в Сионе святом Тебе и обети.

Во граде Твоем честно принетсутся,

свято пожрутся.

Молитву мою изволи внушити,

к Тебе плоть всяка имать приходити.

От стран различных славу Ти несущи

и дары чтущи.

Муж беззаконных слова нам стужиша,

делеса злая их нам силна быша.

А нечестия наша Ты простиши

и очистиши.

Блажен его же избрал еси Тебе

служити в храме во всяцей потребе.

Во дворы Твоя сицевый вселится,

возвеселится.

Дому Твоего в благих исполнимся,

свята Ти церковь, мы в ней помолимся.

И дивна в правде, что бо извещаше,

истинно бяше.

Вси земнии воспевайте,

Господеви славу дайте.

Имя Его возносите,

славу хвале воздадите.

Рцыте Богу, о коль Твое

всяко дело есть страшное.

В силе Твоей солгут Тебе

врази, Боже, живущ в небе.

Весь мир поклон пред Тобою

да положит си главою.

И поет Ти имя Твое,

воспевая всесвятое.

Людие вси приидите,

дела Бога жива зрите.

Коль есть страшен во советех,

паче всех вас и в ответех.

Море в сушу обращает,

в реках ногам пути дает.

Тогда о Нем веселие,

людем бяше превелие.

В силе своей Он вовеки

обладает человеки.

Очи Его обращенны

на языки помраченны.

Иже в гневе возбуждают,

да ся не превозношают.

Благо слово глаголите,

вси язы́цы, и служите.

Боже наш, ущедри ны, да благословиши

и милуя, лице Ти светло нам явиши.

Да мы путь Твой на земли возможем познати,

спасение в языцех Твое возвещати.

Да ся ти человецы вси исповедают,

и язы́цы ся в Тебе да возвеселяют.

Яко Ты правотою людем суд твориши

и языки на земли к правде наставиши.

Вси людие, Боже наш, Тя да прославляют,

вси человецы хвалу Ти да возсылают.

Яко земля даде плод, Ты же и вовеки,

благослови ны, Боже, Твоя человеки.

Благослови ны, Боже, по Твоей благости,

Боже наш, сподоби ны Твоея милости.

Да иже в концех земли всея обитают,

ужасни те ж будут, имя Твое знают.

Да воскреснет Бог, и вси врази расточатся,

иже Ему противни во мире творятся.

Ненавидящии си лица да гонзают,

яко исчезает дым, вси да исчезают.

Яко от лица огня воск истаевает,

тако от лица Бога грешник погибает.

И правии пред Богом да возвеселятся,

радостно веселием вси да насладятся.

Воспойте, раби, Богу, имя восхвалите,

возшедшу на запады путь благ сотворите.

Господь имя Ему есть, пред Ним ся радуйте,

похвалная пения Ему восписуйте.

Врази от лица Его вскоре да смятутся,

Он отец сирых, тии в Нем возрадуются.

Он судия вдовиц, есть в небе обитает,

в дом единомысленныя Господь Бог вселяет.

Он державу и силу подаст Своим людем,

мы, благословен Бог наш, выну пети будем.

Спаси мя, Боже, яко скорби ми стужают,

яже ми душу, яко воды заливают.

Углебох в тимения глубины велики,

и несть постояния мне со человеки.

Приидох во глубины моря злых гонений,

и буря потопи мя того треволнений.

Утрудихся, вопия, даже изнеможе

гортань мой от вопля, а никто ми поможе.

Очи ми, исчезосте, на небо смотрящу

да пособие в скорбех оттуду обрящу.

И се паче влас главы врази мнози быша,

иже ненавистию люте мя гониша.

И крепцы быша зело чесо аз не хищах,

тогда аки винен сый невинный воздаях.

Ты безумие мое все уведел еси и греси

Ти не тайни, Боже, сый в небеси.

Терпящии Тя, Боже, да не постыдятся,

мене ради все щедрени да посрамятся.

О мне Тя, ищущии, яко ради Тебе,

аз на поношение всего предах себе.

Боже, в помощь мою

посли руку Твою

Помощь ми дати, Господи, потщися,

дабы Тобою от враг мне спастися.

Даждь, да постыдятся

и вспять возвратятся

Вси иже ищут душу мою яти

и умышляют злая мне деяти.

Вспять да возвратятся,

люте да срамятся

Вси врази, иже желают ми злаго,

о мне глаголют, благо же нам благо.

Тя же ищущии

друзи ми сущии,

Боже преблагий, да возвеселятся

о Тебе, в радость да обогатятся.

Да глаголют Тебе

слава сущу в небе,

Им же любезно спасение Твое,

аз нищ и убог, зриши бедство мое.

Боже, помози ми

пред враги моими,

Не закосни же, Ты мой пособитель,

Боже мой, Ты мой от бед избавитель.

На Тя, Боже, уповах и не постыжуся,

правдою Ти изми мя, и возвеселюся.

Изволи ко мне ухо Твое приклонити

и от належащих бед спаситель ми быти.

В Бога защитителя в град ми крепок буди,

да спасуся Тобою, егда гонят люди.

Яко утвержение, Боже, еси мое,

Ты и прибежище мне един известное.

Боже, из рук грешнаго мужа мя избави,

от закона преступна свободна мя яви.

И от обидящаго, яко Ты ми еси,

терпение, Господи, царствуяй в небеси.

Ты ми упование с юности моея,

в Тебе утвержение есть ми жизни всея.

От чрева матере ми, Ты мой покровитель,

от утробы был еси души ми хранитель.

О Тебе мое выну устрою пение,

яко чюдо бых многим воздам хваление.

Да исполнятся уста моя хваления,

яко да славе Твоей дам сладкопение.

Боже, суд Твой цареви благоволи дати

и правду сыну царску еще разсуждати.

По правде Твоя люди и нищим творити

суд Твоим праведнейший, дабы злым не быти.

Да восприимут горы мир людем желанный,

холми правду, суд нищим будет им изданный.

Он спасет сыны нищих имать же смирити,

обыкшыя клеветы на правых творити.

Со солнцем имя Его на земли пребудет

и с луною в род и род страшно славно будет.

Снидет тихо, яко дождь, на руно нисходит,

яко капля на землю да та плоды родит.

В днех Его правда и мир в мире возсияет

и пребудет, Дóндеже луна в мире блистает.

От моря же до моря будет обладати,

от рек райских до кончин мира царствовати.

Пред Ним Ефиопляне с поклоном смирятся,

врази Его, лижуще землю, появятся.

Коль благ Господь Бог права сердца сущим

во Израили верно Его чтущым.

Аз убо близ вех поползновения,

в мале не страдах зла риновения.

Зря злыя люди начах ревновати,

яко им в мире дал Бог пребывати.

Яко живот свой не скоро кончают

и в ранах за грех кратко болезнь знают.

Человеческих трудов избавлени

и за вину язв они свобождени.

Его же ради до конца гордятся,

нечестием и лжею облачатся.

Из богатств многих неправда ся родит,

аки из тука велия исходит.

И в злобах своих возблаговолиша,

мысли и язык в лукавстве втопиша.

На Бога жива хулы глаголаху,

сами ся бози быти нарицаху.

Вскую, Боже, до конца нас отрекаеши,

на овцы Твоя ярость и гнев являеши.

Помяни сонм людей Ти и сперва стяжанный,

жезл достояния Ти из всех род избранный.

Помяни Сион-гору, юже Ты избрати,

изволи еже на ней в храме обитати.

Воздвигни руце Твои на гордыя люди,

отмститель врагом Твоим за их злобы буди.

О коль много зла в Твоей святыни твориша,

ненавидящии Тя в силе ся хвалиша.

Посреде праздника Ти знамения своя

возставляху на места высокая Твоя.

Яко победители, а никако знаша,

яко Ты подал силу за грехи им наша.

Яко в дубраве, в граде сечь многу твориша,

сечивый оскорды дверь стены ломиша.

Храм Твой святый, ах, горе огнем возжегоша,

жилище Ти осквернише, в пепел повергоша.

В сердцех своих мыслиша с ужики своими,

отставим вся праздники в Иерусалиме.

Тебе ся, Боже вечный, исповемы,

чудеса Твоя миру проповемы.

Имя святое будем призывати

и прославляти.

Егда кончины время имать быти,

Господь глаголет: сниду мир судити.

Тогда же воздам преблаго благому,

зло люте злому.

Смутится земля вся имать таяти,

и иже на ней будут обитати.

Но столпи ея, Мною утвержени,

будут храненни.

Рех беззаконным злаго не творите,

грешницы рога не превозносите.

Ни глаголите неправды на Бога,

смирите рога.

Ни бо от восток леть есть убежати,

ниже от запад судища гонзати.

Ни юг, ни север может утаити,

суда избыти.

Бог судил есть, миром обладает,

сего возносит, онаго смиряет.

Пленники силне златом увенчати,

скиптры вручати.

В Его руце есть чаша исполненна,

вина чистаго люте растворенна.

Сих овех поит, дрождие остает,

да грешным дает.

Аз же в радости имам воспевати,

Господу славу, а всех сокрушати.

Грешников роги вознесен же будет,

кто прав пребудет.

Иудеа Бога жива знает,

имя его Израиль лобзает.

И бысть в мире Его виталище,

ни Сионе избранном жилище.

Тамо крепость всяку Он сломил есть,

оружие, лук, щит, брань сокрушил есть.

От гор вечных Ты просвещаеши,

безумных же сердца смущаеши.

Иже богатств множество стяжаша,

невозбудно сон мертвенный спаша.

В руках своих ничто обретоша,

елма в страну вечности идоша.

Прещением Твоим, Боже, спаша,

иже на конь прежде возседаша.

Страшен еси Ты сый, Боже, в небе,

никто станет сопротивно Тебе.

Оттоле гнев Твой миру явленный

и суд, с небес данный, есть внушенный.

Земля за страх велий умолчаше,

яко Бога, на суд вставша, зряше.

Хотевшаго спасение дати,

кротость в мире любящим держати.

Гласом моим ко Богу воззвах умиленно,

и бысть ухо святое ко мне приклоненно.

В день печали моея и во скорбей нощи

воздевах руце к Нему, желая помощи.

Ин прелщен бых душа моя, не хотяше,

приимати что-либо, во утеху бяше.

Помянух Бога и бых тем возвеселенный,

размышлях славу, и быв дух мой ослабленный.

Прежде стражи востаях, смятохся языка,

не прострох во молитву до Бога велика.

Помыслих дни первыя, како Бог щедр бяше

вначале человеку, а за грех изгнаше.

Сия нощию мыслих, и дух мой тужил есть,

яко Бог согрешений наших не простил есть.

Мыслих, егда Господь ны отринет во веки,

ни приложит любити Своя человеки.

Или до конца милость Свою отложил есть,

слова блага от рода в роды ны лишил есть.

Егда забудет Господь сонм Свой ущедрити,

или хощет милость си в гневе заключити.

Людие мои, закону моему внемлите,

во глаголы уст моих ухо приклоните.

Во притчах уста моя хощу отверзати,

и ганания яже и сперва вещати.

Яже от отец наших вещавших слышахом,

не таивших от чад си в род ин восприяхом.

Хвалы и силы Бога, яже нам явленна,

и чюдеса, яже от Бога суть творенна.

Воздвиже свидение в Иаковле роде

и положи закон Свой в Израиле тем плоде.

Елика отцем нашим завеща сказати,

сыновом си да могут в роде ином знати.

Их же сынове своим потом да вещают,

да вси надежду свою в Бозе полагают.

И не забудут делес, Богом содеянных,

и заповедей взыщут, от Него поданных.

Да не будут строптиви, яко отцы бяху,

иже злобами Бога си огорчеваху.

Род, иже сердца, к Богу си не исправляше

и Его же Вышнему дух не вероваше.

язы́цы, о Боже правый,

в град Твоея впадше славы.

Святый храм Твой оскверниша,

град Сионский разориша.

Стражи плодов уравниша,

трупы раб Ти положиша.

Во снедь птицам плоть правдивых,

бысть во брашно зверй дивых.

Кровь на землю их пролиша,

трупов честных не храниша.

Быхом посмех окрест сущим,

ругание близ живущим.

Но доколе гнев Твой будет,

ярости огнь в нас пребудет.

Боже щедрый, изволь на ны

пролияти гнев Твой правый.

Иже Бога Тя не знают,

чести должны не воздают.

Имени Ти пресвятому,

но идолу проклятому.

Иже род наш поядоша,

грады, беси повергоша.

Грехи наша вся забуди,

в щедротах Ти варяй люди.

Яко зело обнищахом,

но на Тебе уповахом.

Помози нам, Боже правый,

имене Ти ради славы.

Тщися от бед нас из’яти,

отпуст грехов наших дати.

За имя Ти пресвятое,

от сил вышних славимое.

Да не слышим от языков,

где Бог есть сих человеков.

Паче да зрим отмщение,

в них за крове точение.

Мы же Твои люди суще,

пастыря Тя нам знающе.

Будем вечно Тя хвалити,

хвалу Твою всем вестити.

Пасый Израиля, вонми, иже люди града

святаго наставляеши, яко овец стадо.

Пред Ефремом, Манассием и Вениамином

явися в ответ благ, седяй выше херувимов.

И воздвигни силу Твою, приди да спасеши,

просвети лице спасенны, нас да содееши.

Боже сил, доколе гнев Твой на ны пролиеши,

на молитвы рабов Твоих не призираеши.

Доколе хлебом нас слезным будеши питати

и по мере грехов слезы в питие даяти.

В пререкание соседом есмы положени,

от Тебе враги нашими быхом зле дражненни.

Господи сил, обрати ны, яве лице Твое,

светло и спасени будем стадо плененное.

Виноград сей из Египта Ты изволил взяти,

изгнав языки, во святой земли насаждати.

Мы не отступим от Тебе, Ты ны оживиши,

мы имя Твое призовем, Ты милость явиши.

Господи сил, обрати ны, яви лице Твое,

светло и спасени будем стадо плененное.

Радость помощнику Богу проявите,

Богу Иаковлю светло воскликните.

Псалом приимите и тимпан дадите,

во псалтир и гусли персты ударите.

На новы месяцей трубами трубите,

дни праздников ваших весело святите.

То бо веление Бог изволил дати

Израилю и суд преступным сказати.

Свидение Свое дал есть роду тому,

егда изведеся из работы дому.

Тогда глас Господень страшный слышан бяше,

языка его же прежде он не знаше.

Тогда от бремене хребет свободил есть,

руце от работы в кошех очистил есть.

И рече: Ты в скорби мене призвал еси,

и Аз тя избавих, яко сам ты веси.

Слышите, людие, что вам повествую,

сети Израилю засвидетелствую.

Аще мя слушати по вся дни будеши,

инаго ти Бога никако взыщеши.

Бог ста во сонме судей разсудити,

како во людех тщатся суд творити.

Доколе ложный суд извещаете,

лица муж грешных права являете.

Сира и вдову право разсуждайте,

смиренна нища в правду оправдайте.

Нища убога от силных измите,

из рук грешничих правых избавите.

Но они сего в разум не впустиша,

лиц приятием помрачени быша.

Основания земли ся смущают,

вся развращенны во мире бывают.

Аз рех: вы есте Бози в человецех,

Вышняго чада в настоящих вецех.

Вы же, яко плоть, тлися общаете

и яко един от князь падаете.

Воскресни, Боже, земли да судиши,

яко в языцех всех Ты наследиши.

Боже, кто Ти подобен, тем да не молчиши,

еже отмстити врагом, дя ся не кротиши.

Яко се врази Твои мног шум вознесоша,

ненавидящии Тя главы воздвигоша.

Изволением на Твой сонм лукавноваху

и на святыя Твоя совет совещаху.

Реша тщитеся оны з земли истребити,

имени Израилску и в помин не быти.

Единомышлением на Тя совещаша,

мнози завет язы́цы злобы си издаша.

Идумеи, Исмаил, Моав Агаряне

Гевал, Аммон, Амалик Тира граждане.

Со иноплеменники Ассур с ними бяше,

купно сыны Лотовы ратно защищаше.

Ты, яко с Мадиамом, Сисаре с инеми,

с Иавимом в потоце Киссове и с ними.

Изволи сотворити, ибо побеждени,

ови суть в Аендоре и в гной превращени.

Коль возлюбленна села Твоя, крепкий Боже,

желая в дворы Твоя, дух мой изнеможе.

Сердце мое радости многи исполнися

о Бозе живе и плоть превозвеселися.

Птица обрете себе храмину, где жити,

горлица гнездо, где бы птенцы положити.

Мне же олтари Твои дом суть возлюбленный,

Царю мой и Боже мой, в них мой ум вселенный.

Блажени, иже в доме Твоем обитают,

во веки Тя восхвалят, яко Тя смотряют.

Блажен муж, ему же есть заступство от Тебе,

восхождения в сердцы положи о себе.

Во юдоли плачевней, в месте токов слезных,

ими же до радостей путь дан есть небесных.

Даст бо Законодавец благословение

за излияние слез возвеселение.

Пойдут от силы в силу, Дóндеже явится,

Бог Богов, иже в небе от ангел славится.

Возлюбил еси землю Твою, Боже,

десница Твоя плененным поможе.

Еже из плена им ся возвратити,

в отечестве жити.

Изволил еси людем Ти простити,

беззакония и грехи покрыти.

Укротил ярость, от гнева вратился,

щедр им явил[с]я.

Возврати, Боже, сердца наша к Тебе,

утоли ярость яже на ны в Себе.

Ярость, ея же не держиши ввеки

на человеки.

Егда к нам, Боже, Ты ся обратиши,

благодатию вся ны оживиши.

Людие Твои к Тебе обратятся,

возвеселятся.

Изволи милость Твою нам явити

и спасение Твое нам дарствити.

Его же выну от Тебе желаем

и ожидаем.

Услышу аз, что Бог о мне вещает,

мир людем Своим дати обещает.

И иже сердца к Нему обращают,

Того да чают.

Близ боящихся Его спасение

и славы в земли нашей вселение.

Яко истинна и милость явися,

в людех вселися.

Правда же с миром взаим ся лобзают,

тема людие Богу угождают.

Истинна с земли, егда возсияше,

свыш правда зряше.

Господь даст благость, земля плоды родит,

пред лицем Его везде правда ходит.

В путь стопы своя имать положити,

при Нем ходити.

Приклони, Господи, ко мне ухо Твое,

яко нищ есмь, внуши моление мое.

Храни душу мою, вины бо не знаю,

спаси мя, раба Ти, к Тебе уповаю.

Помилуй мя, яко весь день зову к Тебе,

возрадуй душу ми, царьствуяй на небе.

Яко ону к Тебе выну воздвизаю,

блага кротка, щедра всем Тя быти знаю.

Призывающим Тя, Господи, мя внуши,

глас моления ми впусти в Своя уши.

В день скорби моея дерзнух Тя призвати,

яко Ты изволил прежде мя слушати.

Никто Тебе в бозех точен может быти,

ни дел, яко же Ты, пречюдно творити.

Вси роди, яже Ты изволил создати,

с поклоны имя Ти будут прославляти.

Яко велий еси и творяй чюдеса,

Ты, Бог един, еси простерый небеса.

Восхвалю всем сердцем Тя пред человеки

и прославлю имя Твое во вся веки.

Сион славный на горах святых основанный,

любит Бог врата Его град он преизбранный.

Паче всех Иаковлих селений преславных,

честных во мире бывших в вецех онех давных.

Преславная о Тебе древле глаголанна,

граде Божий, и в книгах пророки преданна.

Помяну, глаголет Бог, Раав Вавилона,

знающия мя вси внидут до Сиона.

Се иноплеменницы и Тира граждане,

тамо быша с ними же и Ефиопляне.

Всякий человек речет: Сион ми есть мати,

он человеки Богу весть в себе раждати.

Вышний его основа Господь известити,

имать во книгах людей и князей явити.

Сих бывших в нем, яко всех есть жилище в Тебе,

веселящихся светло в мыслиом небе.

Господи мой и Спасе, к Тебе во дни, в нощи

возвах свыше, требуя Твоея помощи.

Молитву мою пред Тя изволи пустити,

к молению моему ухо приклонити.

Яко злых душа моя зело исполнися,

и живот мой темному аду приближися.

Бых подобен тым, иже в род глубок впадают

и от множества воды тамо исчезают.

Бых, яко же человек, помощи лишенный,

от Тебе и от людей в скорбех оставленный.

Их же токмо смертию мнюся свободити,

аще не потщишися Ты ми пособити.

Бых точен спящим в гробе, иже суть забвенни

и от руки Твоея суть отриновенни.

В рове мя преисподнем врази положиша,

в темных и сени смертней за си заключиша.

Гнев Твой, Боже, и ярость на мне утвердися,

яко вся волны на мя всяка скорбь свалися.

Изволил Ты искренния други удалити

от Мене и в страстех ми безпомощну быти.

Милости Твоя, Боже, во веки воспою,

усты моими повем всем истинну Твою.

Зане рекл еси вовек: милость утвердится,

на небесех истинна Ти уготовится.

Завет избранным моим благоволих дати,

рабу моему в клятве Давиду вещати.

До века семя Твое имам сохранити

и престол Твой в род и род созданны крепити.

О Боже, чюдеса Ти небеса вещати

будут, а правду в церкви вернии глашати.

Яко кто на небесех Тебе уравнится

или в сынех Божиих подобен явится.

Бог хвалимый от ангел, велий и стоящим

окрест страшен есть зело в трепет служащим.

Господи Боже, силам кто подобен Тебе,

Ты силен, правда Твоя окрест Тебе в небе.

Ты державу морскую рукою держиши,

волны возмущенныя на нем Ты кротиши.

Ты святый Израилев нам заступление,

Твое, Царя нашего, бысть нам спасение.

Господи, прибежище Ты во скорбех наших

был еси от рода в род, Ты ны защищаше.

Прежде всех гор на земли, светил на небеси,

прежде всех сущих вечно, Боже наш, Ты еси.

Человека во низость да не отвратиши

Ты и обращатися к благости учиши.

Тысяща лет у Тебе, яко день преходит

вчерашний или стража нощная отходит.

Лета человеческа, яко же ничтоже,

вменяются Тебе, о превечны Боже.

Яко же трава утро красно прозябает,

та же цветет на вечер падши изсыхает.

Тако век наш гневом бо Твоим исчезает,

яростию Твоею смущени бываем[т].

Боже, помощи Вышняго вручится,

в крове небесна Бога водворится.

Господу речет: заступник мой еси,

Ты ми надежда, живый на небеси.

Он Тя от сети ловящих избавит,

слово мятежно далече отставит.

Плещма своима будет осеняти,

крилы Своими от бед защищати.

Истина Его щитом тя покрыти,

от страха нощна имать и хранити.

От срелы, яже во дни прелетают,

от вещи, яже во тме прехождает.

От сряща и от полуденна врага,

токмо уповай на Бога все блага.

Тысяща падет от левыя страны,

тма отдесныя ты ни близу раны.

Ей очима ти будеши смотряти,

юже Бог имать мзду грешным воздати.

Яко рекл еси: Ты мой пособитель,

Боже, помощник, надежда, спаситель.

Не приидет зло к тебе, ни сближится

телу ти рана, Богом сохранится.

Ангелом завет изволит сказати,

еже тя во всех путех сохраняти.

На руках вземше, имут тя носити,

дабы о камень ноги не язвити.

Аспида и лва будеши ты прати,

по василиском и змием ступати.

Слыши бо, что Бог о тебе вещает,

яко он на мя выну уповает.

Избавлю его, имам покрывати,

яко потщася имя Мое знати.

Благо есть Богу хвалу возсылати,

имя Ти Вышний, песньми прославляти.

Зло утра милость Твою возвещати

и на всяку нощь правду ублажати.

В десятострунном псалтири с пением

и в доброгласных гуслех славлением.

Яко во твари Твоей веселие

сотворил еси мне Боже велие.

И в делех руку святую Твоею,

возрадуюся душею моею.

О коль делати, Боже наш, высока,

помышления велми суть глубока.

Муж их безумный не возможет знати

и не разуми, умом си пояти.

Грешницы, аще растут, процветают,

яко же трава во век исчезают.

Господь царствует, в светлость одеяся,

облеклся в силу и препоясася.

Ибо утверди весь мир, иже зрится,

ни подвижится.

Престол Твой, Боже, от век пребывает

и впредь кончины никогда познает.

Сам бо имаши вечно пребывати,

конца не знати.

Глас воздвигоша реки противныя

и волны от глас вод многих силныя.

Дивны вод волны во высоких, дивен

Бог яко силен.

Свидения Ти суть, Боже, известна,

яже речеши всячески нелестна.

Дому Ти святость выну подобает,

да всем сияет.

Бог, ему же достоит месть злым наносити,

Бог отмщений свободно изволил творити.

Воспряни, судяй земли, смири гордых выя,

воздаждь воздаяние десницы святыя.

Доколе ся грешницы будут восхваляти,

и беззаконницы лжу безстудно вещати.

Люди Твоя, Господи, из лиха смириша,

достояние Твое зело озлобиша.

Вдовицы и сирыя люте умориша,

странныя человеки без вины убиша.

И глаголаху в себе: Господь не смотряет,

Бог Иаковль здешних дел не разумевает.

Но иже в верных буи вы разум стяжите,

глупии в Израили, вы ся умудрите.

В радости сердца людие прийдите,

Господу Богу песни воскликните.

Предварим Его честь, хвалу несуще,

песни псаломски весело поюще.

Яко Бог велий, Господь паче сущих,

в небе Царь велий повсюду живущих.

В Его руце есть океан глубокий,

вси концы земли и горы высоки.

Его суть Он ся изволил творити,

на водах сушу дивно утвердити.

Грядите к Нему, достоль поклонимся,

припадше Ему, слезно помолимся.

Сотворшему нас да грехи оставит

и милость Свою над нами проявит.

Он Господь Бог наш, мы людие Его,

яко же овцы, пасемся от Него.

Днесь, аще вы глас Его услышите,

молю сердц ваших да не ожестите.

Яко же отцы ваши сотвориша,

егда в пустыни Бога искусиша.

В прогневании дела Его зряще,

обаче упор во сердцех держаще.

Даже рече Бог: терпех сему роду,

четыредесят лет, водя в породу.

И рех: се сии сердцы согрешают,

путей завета Моего не знают.

Тем кляхся в гневе, еже им не внити

в покой Мой, в нем бо недостойни жити.

Песни новы составляйте,

Господеви воспевайте,

Вси на земли живущии

и в небесех вси сущии.

Имя Его прославляйте,

спасение возвращайте

Во день всякий и чюдеса

возносите под небеса.

Славу в людех возносите,

во языцех возвестите,

Яко велий есть и хвален,

Господь в делех Своих славен.

Страшен есть над всеми боги,

яже мир сей имать многи.

Иже беси суть не бози,

во языцех зело мнози.

Господь же наш си руками

созда небо со звездами.

Красота честь пред ним яве,

дом Его леп свят и в славе.

Принесите вси язы́цы

честь и славу всех Владыце,

Имя Его прославляйте,

жертвы во честь приношайте.

В дворы Его приходите,

честь и поклон вси творите.

В дворе святом почитайте

Бога, Ему ся кланяйте.

Господь воцарися, земля да ликует,

островов множество да ся возрадует.

Примрак окрест Его правда утверж[д]ает,

и суд престол Его нань же возседает.

Огнь пред лицем Его имать предварити,

и вся враги Его окрест попалити.

Молния Онаго весь мир осветиша,

виде земля вси ся людие смутиша.

От лица Господня горы растаяша,

яко воск, пред Богом вся не постояша.

Небеса знаменми приход возвестиша,

люди славу Его вси светло видеша.

Да постыдятся вси, иже почитают

кумиры, и в них вся хвалити дерзают.

Богу вси ангели Его ся кланяйте,

Ему, яко Творцу, честь и славу дайте.

Сион церкве, слышав то, возвеселися,

сонм дщерей иудейских радостен явися.

Судеб Твоих ради, яко Твоя, Боже

Вышний, слава над вся Боги превозможе.

Любящии Бога зла ненавидите,

но любезну Ему благость возлюбите.

Воспойте нову песнь Богу святому,

Господу в делех Своих предивному.

Десница Его спасла есть онаго,

и мышца Его от мрака смертнаго.

Спасение си Господь проявил есть

и пред языки правду си открыл есть.

Помяну милость Иакову данну

словом и правду в род Его сказанну.

Вси концы земли спасение Бога

нашего зреша и чюдеса многа.

Тем вси земнии Богу вос[к]лицайте,

пойте в радости, сладко воспевайте.

Пойте во гуслех и в псаломстве гласе

утро и вечер и во всяцем часе.

В трубы кованы гласно вострубите

и труб рожаных гласом воскликните.

Пред Царем вечным да подвиг являет

море и весь мир и что в них витает.

Реки да плещут руками своими,

да радуются купно горы с ними.

Седяй на Херувимех, Господь воцарися,

да ярятся людие, земле подвигнися.

Господь, иже в Сионе чтим нами бывает,

велик есть над вся люди, небо превышает.

Имя Твое велие да будет славленно,

яко страшно есть свято и благословенно.

Честь Твоя царьска, Боже, суд любит правоты,

суд правда в Израили с Твоея доброты.

Возносите Господа вси, Бога нашего,

и подножию ногу кланяйтеся Его.

Яко и то свято есть от святаго Бога

и внутрь Себе содержит священная многа.

Мойсей со Аароном в жерцех Ему бяше,

в пророцех си хвалящих Самуил живяше.

Призываху Господа, и Той их слушаше,

во столпе к ним облачне ответы даяше.

Зане же свидения Онаго храняху

и ведения яже от Него прияху.

Земнии вси Богу восклицайте,

в веселии Ему работайте.

Во храм Его в радости внидите,

яко Господь есть Бог наш, ведите.

Он нас созда, никто есть собою,

яко овцы пасет ны рукою.

Во храм Его с хвалою входите,

в дворы Его в пениих тецыте.

Имя Его святое хвалите,

благодарну песнь Ему несите.

Яко благ есть, милость Его вечна,

и истина живет безконечна.

Милость Ти и суд, Боже, прославляю,

чист путь шествуя, пою да познаю.

Когда Ты ко мне хощеши приити,

тайны святыя рабу Ти явити.

Незлобно сердце храних в моем дому,

не желах вещи от[’]яти никому.

Иже закон Твой делы преступаху,

во ненависти тии моей бяху.

Сердце лукаво мне не прилепися,

презрех кто от нас, к злобе уклонися.

Иже ближних си тай оклеветаше,

из моих лика изгоним бываше.

Со гордым оком пищ не причастихся,

с несытым сердцем хлебом не сытихся.

Очеса моя верных муж искаху,

мне сицевии везде приседаху.

И непорочным кто путем хождаше,

сей в дворе моем раб мне честен бяше.

Творяй гордыню, нежли в дому моем,

лжи дому спети дах ни единому.

Грешныя тщахся скоро избивати

из земля, дабы им не постояти.

Вси, иже закон делы преступаху[ша],

з града Господня истреблени быша.

Господи, изволи молитву прияти

мою и вопль сердца слезный услышати.

Лица Ти от Мене да не отвратиши,

в онь же день возскорблю, но скоро услыши.

Ибо, яко дым, дни мои изчезоша

и яко сушило кости ми сосхоша.

Изсох, яко трава, сердце изсыхает,

даже хлеба ясти раб Твой забывает.

От воздыхания кость плоти слепися,

неясыти раб Твой точен сотворися.

Бых, яко вран нощный, в лишенном нырищи,

яко птица, над зевопусте жилищи.

Врази мои весь день мне ся поругаху

и хвалящии мя о мне ся кленяху.

Зане, яко пепел, хлеб мой мне снедати

и питие мое с плачем растворяти.

От лица гнева Ти ярости Твоея

низвергл от высоты мене Ты моея.

Дни мои, яко сень уклонени быша

мене, яко сено, сухо сотвориша.

Ты же, Боже, вечно Сам пребываеши,

память Ти в род и род соблюдаеши.

Ты воскрес имаши Сион ущедрити,

время бо есть милость оному явити.

Камение его Твои возлюбиша

раби и о земли все радостни быша.

Имене Твоего роди убоятся,

царие земстии славы Ти страшатся.

Яко ты Сиона имаши создати

и в славе велицей Сам Ся показати.

Призре на молитву рабов си смиренных,

Бог, ни уничижи прошений творенных.

Да пишется роду то хотящу быти:

будущии имут Господа хвалити.

Яко Бог с высоты изволи призрети,

яко Отец с небес на земныя дети.

Услышати вопль мног узы заключенных

и еже решити сыны умерщвленных.

Да в Сионе имя Его прославится,

в Иерусалиме хвала умножится.

Внегда соберутся людие хвалити

Его и царие Оному служити.

Отвеща оному: на пути крепости

из[’]яви ми число дней моих малости.

Душе моя, Господа да благословиши,

утробо моя, имя Его да славиши.

Благослови, о душе моя, Пресвятаго,

не забывай всех благих творений Онаго.

Иже беззакония твоя очищает

и вся недруги твоя скоро исцеляет.

От истления жизнь ти избавляющаго

милостию щедроты тя венчавшаго.

Иже ти желание в благих исполняет,

в юность тя, яко орла ветха, обновляет.

Творяй милостыню Бог, и суд обидимым,

от врагов нечестивых жестоко томимым.

Сказа пути Мойсею, си изволения,

сыном Израилевым Своя хотения.

Щедр и милостив Господь и долготерпящий

и кающимся милость многую творящий.

Не в конец гневается, ни вечно враждует,

не по беззаконием нашим казнь действует.

Ни по грехом нашим нам изволил воздати,

но елико от земля небу отстояти.

Утвердил есть милость си над страх имущими

и пресвятое имя Его почтущими.

Душе моя, Господа да благословиши,

Господи, коль велик Ты и страшен Ся зриши.

Во славу и лепоту еси облеченный,

яко ризою, светом многим обвиенный.

Ты небо, яко кожу, изволи пропяти,

превысприяя водами Своя покрывати.

Ты в восхождение Ти еси полагаяй

облаки и онеми аер претекаяй.

На крилех скоротечна ветра Ты ходиши,

не вещественны духи, ангелы сотвориши.

И во виде паляща огня служат Тебе

раби Твои, иже Тя песнословят в небе.

Тобою на тверди си земля основанна

и во веки не будет та поколебанна.

Ону, яко же риза, бездна одеваше

и на горах высоких вода везде бяше.

Но запрещением Ти воды низпадоша,

на глас грома Твоего в море низтекоша.

Горы быша велия поля ся постлаху,

идеже основу си и место прияху.

Предел водам изволил еси положити,

его же не возмогут вечно преступити.

Исповедь Господеви, людие, воздайте,

имя Его святое выну призывайте.

во языцех делеса Его возвестите,

воспойте Ему, песни сладки воскликните.

Вся чюдеса Онаго миру возвещайте,

о имени ся Его святом восхваляйте.

Да ищущих Господа сердце веселится,

взыщите и вы Его, сердце да твердится.

Взыщите лица Его, помяните дела

чюдесная, яже Он вас ради содела.

И судбы устну Его раби поминайте,

Авраамово семя Господа си знайте.

Сынове Иаковли, избраннии люди,

во сердцех ваших завет Божий всегда буди.

Той Господь Бог наш, по всей земли судбы Его,

не забы Он во веки завета Своего.

Слова еже в тысящу родов завещал есть,

еже ко Аврааму верно глаголал есть.

Помяну обет, иже Ему обещаше

и клятву Свою юже Исааку даше.

Исповедь Богу дайте, яко благ вовеки,

яко в век милость Его есть на человеки.

Кто доволен Господня силы известити,

слышаны хвалы Его миру сотворити.

Блажени, суд во всяко время хранящии

и правду в сожитии ближним творящии.

Помяни нас, Господи, в Твоей благодати,

какову отцем нашим изволил являти.

Спасением Твоим нас изволь посетити,

дабы с избранными Ти в радости нам быти.

Во веселие людей Твоих ся вселити,

с достоянием Твоим в Тебе ся хвалити.

Яко же отцы наши, и мы согрешихом,

беззаконная дела, неправду творихом.

Отцы наши в Египте чюдес Ти не знаша,

множества щедрот Твоих в уме не держаша.

Прешедше море чермно, абие согрешиша,

зане на началники ропот сотвориша.

Обаче Ты спасл еси да ся прославляет

имя Твое и сила везде познавает.

Запретил еси морю и сухо явися,

род наш, яко в пустыни, в бездне наставися.

Исповедь дайте Богу, яко благ вовеки,

яко в век милость Его есть на человеки.

В первых же да хвалят и иже избавлени

от руки враг и от стран чуждих свобожденни.

От востока, запада, севера и моря,

идеже расцветает и сгасает заря.

Иже в безводных лесех безвестно блудиша,

в град обителен пути не вземше ходиша.

От глада же и жажди плоть их изнеможе,

воззваша в скорби Ты же избавился, Боже.

От бед и на путь правый наставил ко граду,

обителну да внидут и имут отраду.

Да восхвалят за милость человецы Бога

и за чюдеса, иже содея им многа.

Яко душу гладную довле насытил есть,

алчную благих Своих щедро исполнил есть.

Во тме и сени смертней, иже заключенни,

нищии окованни, железом крепленни.

Яко словеса Бога си уничижиша,

совет Творца твоего злобы раздражниша.

И смирися сердце их во трудех велицех,

изнемогоша не бе помощь в человецех.

Готово сердце мое, Боже, Тя хвалити,

готов есмь в славе моей Тя Бога словити.

Востани, слово и псалтири моя

и гусли, встану утро от покоя.

И имам Тя, Господи, в людех прославляти

и во языцех песни Тебе воспевати.

Яко милость Ти небо превышшает,

истина Твоя облак достизает.

Вознесися, Боже наш, превыше всех небес,

и по всей земли слава Твоих будет чудес.

Да ся избавят, яже Ты любиши,

десницею Ти спаси мя, услыши.

Бог во святыни Своей о мне глаголаше,

яко царства, блаженство мне дати хотяше.

Аз убо имам в честь вознесен быти,

земли Скимски плен воем делити.

Юдоль жилищ размерю, Галаад Мой будет,

Манассий в службе Моей недвижно пребудет.

Крепость главы Ми Ефрем есть со Мною,

Иуда царь Мой, по Мне есть до бою.

Моав упования коноб есть Моего,

Идумею поперу с помощию Его.

Инороднии Мне ся покориша,

Филистини бо подчинени быша.

Но кто ми во град крепкий может ввожда быти

или до Идумеи Мене наставити.

Не ты ли, Боже, отринувый люди,

Ты в силах наших Сам помощник буди.

Даждь нам помощь в печали, ибо спасение

от человек суетной есть смущение.

Бог сила наша, имать Вождь нам быти

и враги наша вся уничижити.

Боже, хвалы моея да не премолчиши,

се бо уста грешнича и лстиваго зриши.

Отверзенна на мене лести глаголаша,

на мя ненавистными словесы обьяша.

И кроме вины всяки, люте мя боряху,

вместо любве должныя мене оболгаху.

Аз же молитву деях, а они ми злая

тщахуся воздаяти за моя благая.

И за возлюбление ненависть храниша

ко мне и что мог, за то ми зло твориша.

Постави нань грешника, да им обладает,

а демон от десныя ему да стужает.

На суде с суперником он да обвинится,

и молитва онаго во грех да вменится.

Дни его да суть мали и вместо онаго

епископство держати пустиши юнаго.

Сынове его сири да ся обретают,

а жена да вдовствует, вси ся да скитают.

Преселящеся из мест и да просят хлеба,

из даи да изженутся под кров всего неба.

Заимодавец во всех имениих его

да озлобляет долга, взыскуя своего.

Рече Господь моему Господеви слово:

седи одесну Мене, место Ти готово.

Дóндеже Ми вся враги Твоя положити,

подножие ногама Тебе сотворити.

Жезл силы от Сиона имать Ти послати,

Господь, и по среде враг власть Тебе подати.

С Тобою есть начало в день силы Твоея,

в светлостех святых Твоих державы Моея.

Прежде денницы Мною Ты из чрева родися,

клятся Господь, во жалость никако вратися.

Ты еси иерей Мой между человеки,

чином Мелхеседека во вся веков веки.

Господь одесную, Ти сущий месть явил есть,

во день гнева Своего царю сокрушил есть.

Имать же во языцех суд прав сотворити,

падения бывшая довле исполнити.

Многим на земли главы имать сокрушити,

от потока на пути скорбном воду пити.

Но сея вины ради вознесет си главу,

егда по смирении облечется в славу.

Всем сердцем моим исповемся Тебе,

в советех правых, Боже, живый в небе.

Яко милость Его на нас утвердися,

истина Господня вечна сотворися.

В хвалех, лепоте дело си являет,

а правда Его вечно пребывает.

Боящимся си пищу даровал есть,

юже Собою верным уготовал есть.

Еже отечество языков им дати,

в истинне в суде вся Он весть делати.

Яко в истинне быша сотворенны

и на правоте Богом укрепленны.

Имя Господне свято есть вовеки

и страшно везде между человеки.

Разум же благ всем, иже сотворяют,

со страхом дело, еже начинают.

Блажен муж, иже Господа боится,

заповедь Его соблюдати тщится.

Силно на земли будет его семя

на всяко время.

Род правых будет преблагословенный

и дом в богатство, в славу умноженный.

И правда его вечно пребывает,

Бог соблюдает.

Правым и во тме обыче сияти

свет, яко живут выну в благодати.

Бога всещедра и праведна суща,

их милующа.

Благий муж любит от своих даяти

и слово в суде умом разсмотряти.

Да не погрешит, но не движим будет,

в правде пребудет.

Во память вечну правый сохранится,

от слуха злаго он не убоится.

Готово сердце уповати его,

в Бога своего.

Утвержден сердцем сый не устрашится,

даже враг его поражен смирится.

Расточи нищим между человеки,

прав есть вовеки.

Рог же онаго в славе вознесется,

что грешник видя, гневом разжется.

Сохнущ поскрежещет, а чего желает,

все исчезает.

Отроцы песнми Господа хвалите,

и девы имя Его возносите.

Благословенно всегда имя буди

Господне вечно, да славят се люди.

От восток солнца и где запад знает,

всехвално имя Его да бывает.

Высок над всеми Господь наш языки,

и выше небес славим есть вовеки.

Кто равен Тому, иже обитает

в небе, а низу очи низпущает.

От земли мужа нища воздвизая,

во честь высоку дивне возвышая.

Он же есть силен от гноища взяти,

со князи людей в славе посаждати.

И неплодную во доме вселити

матерь, о чядех весело творити.

Егда Израиль з Египта идяше,

из людей варвар в Сион исхождаше.

Род Иудейский Богу освятися,

Израиль область Его сотворися.

Море видевше, побеже на двое,

Иордан вспяти стремление свое.

Горы ся, яко овни, возыграша,

холми же, яко агнцы стад, скакаша.

Что ти бысть море, яко разделися,

ты, Иордане, Вскую воспятися.

Вы, яко овни, горы возыграсте

и холмы, яко агнцы стад, скакасте.

От лица Бога земля подвиженна,

Его же воли вся суть покоренна.

Им же в езера камень обратися,

и несекомый в источник расплыся.

Не нам, Господи, ни нам сию славу,

но имени Ти сотвори и хвалу.

Милости ради и правды Твоея

Израиль радость да имать от нея.

Да не рекут же язы́цы, наш Боже,

где убо бог их, что оным поможе.

Бог же наш в небе елика хотяше,

вся и на земли по воли сделаше.

Идоли язык сребро суть и злато,

рук людских дело, иже сами блато.

Уста имуще, словес не вещают,

очи имуще, ничто созерцают.

Ушеса имут, ни могут слышати

и ноздрями си ничто обоняти.

Ручными персты ничто осязают,

ноги имуще, ходити не знают.

Гортань не может гласа испустити,

ни един от уд, что любо, творити.

Точни им да суть, иже ся творяют,

и в них надежду свою полагают.

Возлюбих, яко Господь гласу молитв вняти

моих, изволи ухо приклоненно дати.

Того аз выну имам в помощь призывати,

донележе дух в плоти будет пребывати.

Уже болезни смертны об’яли мя бяху,

беды адовы, мене обретше, стужаху.

Скорбь и болезнь лютую обретох убогий

и бех пред гонившим мя в конец изнемогий.

Призвах имя Господне, Боже, душу мою

избави от всех лютых за всеблагость Твою.

Господь же щедрый, правый милость проявляет,

иже яко младенцы просты соблюдает.

Смирихся и спасе мя, ты же, душе моя,

возвратися во сладость твоего покоя.

Яко благо сотвори благий Господь тебе

избави тя от смерти, живущий на небе.

Очи моя избави от слезточения,

нозе паки мои от поползновения.

Аз убо пред Господем благо угодити,

хощу во стране живых вечной си хвалити.

Веруях, тем ускорих суд изглаголати,

Господь же изволи мя до зела смиряти.

Аз во изтуплении моем издах слово,

всех человеков сердце солгати готово.

Что же воздам Господу за вся благодати,

потщуся спасения чашу восприяти.

Имя Его святое умилно призвати,

обеты моя Ему пред людми воздати.

Честна смерть пред Господем преподобных Его,

в покой ею преводит Он раба Своего.

О Господи, аз раб Твой, сын рабы Твоея,

еже служити Тебе рожденный от нея.

Ты разсторгл узы моя, аз дам хвалу Тебе,

имя Твое призову, славимое в небе.

Обеты моя яве имам Ти воздати,

в дворех Твоих в Сионе Тебе величати.

Хвалите Господа, вси мира язы́цы,

хвалите вси имя Его, человецы.

Яко милость Его на нас утвердися,

истинна Господня вечна сотворися.

Восхвалите Господа, яко благ вовеки,

яко милость есть Его на вся человеки.

Да речет: дом Иаковль, яко благ вовеки,

яко милость Его есть на вся человеки.

Да речет: дом Ааронь, яко благ вовеки,

яко милость Его есть на вся человеки.

Всяк бояйся Бога, рцы: яко благ вовеки,

яко милость Его есть на вся человеки.

От скорби призвах Бога, Он глас мой внушил есть,

обладание мое пространно явил есть.

Господь ми помощник есть и не убоюся,

что ми смертный сотворит, никако страшуся.

Господь Бог ми помощник, презрю враги моя,

укрепит мя десница, Господи мой, Твоя.

Благо есть на Господа Бога уповати,

неже в людех надежду свою полагати.

Благо есть на Господа Бога уповати,

неже в князех надежду свою полагати.

Блажени непорочно в путь свой ходящии,

во законе Господни ум свой держащии.

Иже в свидений Его тощно испытают,

не в путех Его, иже злая содевают.

Ты заповедь дал еси зело нам хранити,

даждь, Боже, в путех правды Твоея мне быти.

Тогда не постыждуся, егда душа моя

призрит, еже хранити заповеди Твоя.

И во правости сердца исповемся Тебе,

егда судбы правды Ти увем, яко требе.

Оправдания Твоя имам соблюдати,

Ты мене не изволи в конец оставляти.

В чесом юный человек путь свой исправляет,

аще словеса Твоя в сердцы сохраняет.

Аз же всем сердцем моим взысках Боже Тебе,

иерей от заветов Ти мене си от себе.

Во сердцы моем сокрых аз словеса Твоя,

да не согрешит к тому Тебе душа моя.

Ко Богу, внегда скорбех, дерзах воззывати,

Он благоволил есть глас мой услышати.

Избави мя, Господи, от устен неправых

и от лстива языка человек лукавых.

Что Ти языче лстивый за лесть приложится,

изощренными стрелы месть ми сотвори[т]ся.

От силнаго и угльми иже сожигают,

всяческая и пусты грады содевают.

Овы мне, яко странство мое продолжися,

со селы Кидарскими жити ми случися.

Идеже душа моя много странствоваше,

отнюдуже печаль ми превелика бяше.

Со ненавидящими, еже мирно жити,

аз в терпении мнозе тщахся мирен быти.

Егда им во кротости дерзах глаголати,

туне устремляхуся мене озлобляти.

Возведох очи моя в горы Твоя,

Боже, да снидет свыше помощь моя.

Помощь моя есть от Бога живаго,

небо и землю и вся создавшаго.

Он душе моя да не попущает

пасти ногам Ти, но да утверждает.

Ни да воздремлет, иже Ти блюститель,

не спит Израилск, ни дремлет хранитель.

Бог сохранит Тя, Господь покров тебе,

паче десницы во всякой потребе.

Во дни тя солнце не имать зноити,

ни луна в нощи мразом ознобити.

От всякаго зла Господь сохранит тя,

во нуждах твоих Он да защитит тя.

Вход твой и исход он да сохраняет,

отныне вовек тя да соблюдает.

Возвеселихся, внегда глас ми услышати,

во дом Господень внидем славу Ему дати.

Стояху, граде Божий, ноги в Твоих дворех

наша и во святыни Твоея притворех.

О Иерусалиме, яко град зиждемый,

согласием живущих преукрепляемый.

Ту взыдоша, колена, избранная Богу,

во святыни дати славу многу.

Ту престоли судиям градов поставлени,

да судят от Давида, иже суть рождени.

Вси Иерусалиму мира вопросите,

любящим Бога плодов обилства молите.

Буди мир в силах твоих, граде возлюбленный,

в столпех стен обилием буди утверженный.

Ради братий и ближних моих аз о тебе,

да мир имаши, молбы деях Сущу в небе.

Возведох очи моя к Тебе,

Боже, живущий в светлом небе.

Се яко очи разсмотряют,

в руку Господей пищи чают.

И яко раба весть вращати,

очи к госпоже дабы взяти.

Нуждная себе тако к Богу

зрим да обрящем милость многу.

Помилуй, Боже, Твоя люди,

помилуй, молим, щедр нам буди.

Во ничто есмы мы вменени,

уничижений исполнени.

Найпаче душа поношений

полна есть наша и презрений.

От человеков гобзующих,

сердцы своими гордых сущих.

Аще не бы был Господь с нами, да вещают,

иже ся Израиля чада нарицают.

Аще не бы был в нас Бог, внегда всташа на ны

живы убо пожерл бы ны народ поганый.

Егда в ярости гнева на ны наступиша

скорби ны, яко вода, потопили быша.

Воду непостоянну прейде, прейде душа моя

яко воды потока беды ны об’яша.

Благословен Бог, иже не изволил дати,

зубом их нас, яко лов, гладным растерзати.

Кто-либо в Бозе твердо уповает,

як Сион-гора недвижим бывает.

В граде Господнем, в яко окрест горы,

от бури хранят сущия в нем дворы.

Тако Бог люди Своя сохраняет,

стеною щедрот вечно ограждает.

И не оставит жезла муж лукавых

на жребии си, на всех людех правых.

Да праведницы рук не простирают,

в беззаконии Его не гневают.

Ублажи, Боже, вся сердцы правыя,

и благослови вся люди благия.

А иже деют сердец уклонение,

богомерзкое во развращение.

Погубит Господь с злыми человеки,

Мир Израилю буди во вся веки.

Егда от Вавилона

плен бывший из Сиона

изволил Бог вратити,

в радости дал нам быти.

Уста песнь воспеваху,

язы́цы то ж деяху,

Вси рекут во языцех:

Бог велик в человецех.

Сих явлен чудна дела

на земли в низ содела,

Велику вещь в нас яви,

в радости нас постави.

Господи, пленение

возврати в селение

Сиона, яко токи,

вод сладких, въюг жестокий.

Да иже в слезах сеют,

в радости жати спеют,

Ходяще бо хождаху

и слезы изливаху.

Семена метающе,

идяху рыдающе,

В радости да вратятся

снопы си, да тешатся.

Аще Господь не созиждет дому,

тщетно о нем есть пещися кому.

Аще града Бог не сохраняет,

всуе стража по стенам бывает.

Суетно есть вам утреневати,

возпочивше тщитеся встаяти.

Им же от труд есть препитание,

егда даст Бог людем си спание.

Се Господне есть достояние,

родителем сынов даяние.

Иже мзда суть чревеснаго плода

за благости в наследие рода.

Яко стрелы в руках мужественных,

тако чада мужей оттрясенных.

Блажен, иже си ми исполняет

желание, враги побеждает.

Ибо сии никого стыдятся,

егда на суд во вратех стадятся.

Но словесы супостат срамляют,

отцу честь си многу содевают.

Блажени, иже Господа боятся,

и в путех Его шествовати тщатся.

Благо ти аще труды твоя снеси,

тем блажен еси.

Жена ти в дому плодна имать быти,

яко обыче лоза плод родити.

Яко маслина лето расли родит,

тако приплодит.

Чад тебе любых, яже окружити,

трапезу имут тебе в радость быти.

Тако от Бога, кто Его боится,

благословится.

Да убо Господь благословит тебе

от Сион-града сущаго на небе.

Во благих Его даст блаженну быти,

Дóндеже жити.

И да узриши сынов твоих чада,

мир Израилю от Небесна града.

Его же тебе буди наследити,

вечно в нем жити.

Да речет днесь Израиль многажды со мною,

от юности моея врази работаю.

Деяша борба много от детства мя браша,

обаче надо мною победы не взяша.

На хребте моем они и язвы, и бремя,

тяжкое полагаху злобне долго время.

Господь же праведнейший сорекл грешных выя,

за беззаконие их погубил есть злыя.

Ненавидцы Сиона вси да постыдятся,

со студом нестерпимым вспять да возвратятся.

Да будут, яко трава на здех растущая,

прежде восторжения своего сохнущая.

Ей же живущий руки си не исполняет,

и лона рукояти иже собирает.

О ней же мимо ходя никто глаголаше,

жнущим благословенно да есть дело ваше.

О имени Господни вам благословляем,

обилия во плодех труд ваших желаем.

Из глубины из сердца возвах, Боже, к Тебе,

услыши глас мой, иже царствуеши в небе.

Да будут уши Твои ко мне приклоненны,

глас молитвы моея да буде внушенный.

Аще беззакония, Господи, назриши,

никто от нас постоит, яко Сам то зриши.

Яко очищение у Тебе самаго,

пречиста и пресвята, суща единаго.

Ради имене свята Твоего, мой Боже,

терпе Тя душа моя и не изможе.

Терпех слова Твоего, дух мой уповаше

на Господа, иже ми еже быти даше.

От стражи утренния до темныя нощи

да чает от Господа Израиль помощи.

Ибо Господь людем си милость изливает,

избавление много от Него бывает.

А Господь Израиля имать избавити

от беззаконий его и щедр ему быти.

Господи, сердце мое,

не бяше высокое,

Ни очи вознесенни

бяху ми, но смиренни.

Не тщахся велик быти

и дивен ся явити,

Аще же смиряхся

духом, но возношахся.

Да буду отдоенну,

подобен ослезенну,

Еже плачь изливает,

к матери возглядает.

На мне месть сия буди,

божии в Бозе люди

Выну да уповают,

Дóндеже пребывают.

Помяни, Господи всещедрый,

своего отрока Давыда и всю кротость его.

Яко клятся Тебе, Богу истинному,

во обете своем о здании дому.

В селение дому, рече, не вселюся,

на одре постели не упокоюся.

Не имам очима сна сладкого дати,

веждома дремоты с кранием лежати,

Дóндеже обрящу место всесвятому

Богу Иаковлю, село Его дому.

Се слышахом, яко во Ефрафе бяше,

во полях дубравы свят ковчег стояше.

Внидем в селения Его, поклонимся,

где стоясте нозе Его, помолимся.

Ты же, о Господи, воскресни в покой Твой

и кивот Твой святый да грядет во храм Свой.

Священницы Твои в правду облекутся,

и преподобнии Ти возрадуются.

Се, что толь добро или красно зрится,

яко в братии аще сохранится.

Любовь правая, еже вкупе жити,

друг друга чтити.

Яко же миро благовонно бяше,

еже из главы на браду схождаше.

Ааронову ина риз ометы

прекрасных цветы.

И яко роса, яже Аермона,

плоднаго творит и гору Сиона.

Благополезна тако есть благая,

любы святая.

Ибо, идеже та ся обретает,

ту вся благая Господь посылает.

И благословит жити человеки

долгия веки.

Господа раби днесь благословите,

иже на дворех Онаго служите.

Во дворех дому Бога истиннаго,

во дворех дому, мир создавшаго.

В нощех в святая руки воздвизайте,

имя святое вси благословляйте.

Он от Сиона вы благословит,

иже вся творит.

Хвалите имя Господне, хвалите,

раби Господа, Ему же служите.

Стояще в храме, величия Его,

во дворех дому Господа нашего.

Хвалите Его, яко благ всем людем,

а яко добро имя пети будем.

И яко избра Иакова Себе

в достояние, царьствуяй на небе.

И яко познах велика си быти,

боги языков вся превосходити.

Господь наш велий что-либо хотяше

в небе, на земли вся словом создаше.

Такожде в морях и в безднах глубоких,

и на воздушных странах превысоких,

От конец земля облаки возводит

и в дождь великий молнии изводит.

От сокровищ си ветры испущает,

аер чищая, землю оживляет.

Исповедь хвалы Господу несите,

яко благ, Бога всех богов хвалите.

Яко милость вовеки Его на человеки.

Исповедь хвалы Господеви дайте,

Господа, Его всем господем знайте.

Яко милость вовеки Его на человеки.

Иже чюдеса един сотворил есть,

велия никто точен Ему был есть.

Яко милость вовеки Его на человеки.

Иже разумом небо сотворил есть,

на водах многих землю утвердил есть.

Яко милость вовеки Его на человеки.

Иже светила велия создал есть,

луну и звезды в область нощи дал есть.

Яко милость вовеки Его на человеки.

Иже с первенцы Египт поразил есть,

Израиля же з того свободил есть.

Яко милость вовеки Его на человеки.

В крепости руки и в мышце высоце

и дал разделы во мори глубоце.

Яко милость вовеки Его на человеки.

Им же Израиль ведом свободися,

фараон с вои в Понте потопися.

Яко милость вовеки Его на человеки.

Иже в пустыни люди си провел есть,

цари велия пред онеми стерл есть.

Яко милость вовеки Его на человеки.

Иже крепкия цари посрамил есть,

Аморрейскаго Сигона убил есть.

Яко милость вовеки Его на человеки.

На реках Вавилонских седяще, плакахом,

егда град любезнейший Сион поминахом.

На вербии органы повесихом наша,

яко пленившии и ны из лиха стажаша.

О словеса пения, прилежно нудяще,

воспойте нам от песней Сионских веляще.

Мы же како воспоем песнь Бога живаго

на земли чуждей, в плене царя поганскаго.

Аще тя, граде Божий, дерзну аз забыти,

забуди рука моя дела си творити.

Прильпни язык гортани, аще поминати

не буду тя, Сионе, внегда ми в лик стати.

Помяни, крепкий Боже, что нам сотвориша,

сынове Едомстии, егда град плениша.

Вопияху свирепо: весь град истощайте,

до оснований его род зол истребляйте.

Но, о дщи Вавилона окоянна зело,

блажен, иже воздаст ти за ны равно дело.

Блажен, иже потщится твоя похищати

младенцы и о камень твердый разбивати.

Исповедь хвалы, Боже, всем сердцем дам Тебе,

пред ангелы дам Ти песнь зрящими Тя в небе.

Яко изволил еси милость мне явити,

вся глаголы уст моих в слух Твой припустити.

Ко церкви святей Твоей лицем обращуся,

имя Твое исповем, низу поклонюся.

За милость и истину, Тобою явленну,

о всем славу Ти зрит мир превозвеличенну.

Боже мой, воньже день Тя потщуся призвати,

да не отречеши мя скоро услышати.

Но да умножиши мя силою Твоею,

в души моей являя милость Ти над нею.

Господи и вси царие Тя да прославляют,

иже словеса уст Ти и дела внушают.

Да поют пути Твоя, яко превелика

слава Твоя над разум всяка человека.

Яко высок сый Господь, зрит на смиренныя

и знает издалеча превознесенныя.

Аще посреде скорбей случит ми ся быти,

Ты мя, всещедрый Боже, имаши живити.

Твоя на гнев враг моих рука распростреся

и десною Твоею живот мой спасеся.

Господь воздаст им за мя, Боже, Ты щедриши,

во век дела руку Ти мя да не презриши.

Боже, Ты искусил мя и познал мя еси,

Ты седание мое и встание веси.

Тобою издалеча мысли моя знанны,

уже мое и стези суть изследованны.

Вся пути моя, Боже, Ты светло провиде

и яко во языце моем несть лсти виде.

Ты, Боже, познал еси вся впред будущая

и яже преидоша и ныне сущая.

Ты мя созда, Ты же мя держиши рукою,

разум Твой удивляет весь ум и мысль мою.

И много превосходит, ни могу пояти

всех, яже Твоя мудрость изволи создати.

Камо пойду от Духа, Боже мой, Твоего,

камо бежу от лица скрытися от Него.

Аще взыду на небо, Ты тамо седиши,

аще и во ад сниду, Ты того держиши.

Аще бы ми и криле рано восприяти,

в последний предел моря скоро улетати.

И тамо рука Твоя имать наставляти,

десница Твоя мене в жизни держати.

И рех, е[г]да тма мене возможет сокрыти,

и нощь в сладостех моих не весть мя таити.

Яко тма пред Тобою ничто помрачает,

нощь Ти, Боже, яко день, вся светло являет.

Равна Ти тма нощная и свет в день сияющ,

Ты еси всевидящий выну и вся знающ.

Ты вся утробы моя изволил создати,

из чрева рождшия мя матере прияти.

Исповем Ти ся, яко удивил мя еси,

страшно и чюдна дела Твоя, Сый в небеси.

Яже потщится душа моя познавати,

елико изволиши разума ей дати.

Ни едина кость моя тайна Тебе бяше,

и состав егда еще в тме чрева лежаше.

Не свершенное мое Ты зрел совершенно,

вси написани в книзе Твоей неизменно.

Изми мя, Боже, от мужа лукава,

от человека избави неправа,

Иже в сердцех си лести умыслиша

и брани на мя по вся дни строиша.

Язык свой, яко змеин, изостриша,

ядом аспидским уста исполниша.

Храни мя, Боже, от рук нечестивых,

от человек мя изми неправдивых,

Иже стопы ми запяти смыслиша,

сети и ужа ногам моим скрыша.

При стези моей соблазн полагают,

но уста моя к Тебе восклицают.

Ты, Бог мой, еси, изволь мя внушити,

яко изволил в спасение быти.

В день брани силу на враги мои дая

и от тех главу мою покрывая.

Не даждь мя врагом, иже мя желают,

не остави мя, да ся невзношают.

Вождь обстоящих мя да возмутится,

совет уст лстивых в зло им да вратится.

Огнь да сожжется, Ты же низложиши,

в страстех отрады им не сотвориша.

Муж велеречив зде не исправится,

неправый во тлю злобы уловится.

Аз познах, яко Господь сотворити,

суд имать нищим, зло убогих мстити.

Праведнии, иже имут хвалу дати

имени Его и честь содевати,

За что пред лицем Господним вселятся

правии сердцем и возвеселятся.

Господи, звах к Тебе, Ты же мя услыши,

внегда призову Тя, глас молитвы внуши.

Да, яко кадило, Ты молитву мою

исправну имаши выну пред Тобою.

Воздеяние же руку ми, яко же

жертва вечерняя да есть Тебе, Боже.

Положи, Господи, устом хранения

моим и во устнах дверь ограждения,

Не даждь сердцу словес лукавых вещати

и о гресех моих вины непщевати.

Со беззаконными людми не сочтуся

и со избраными их не сообщуся.

Накажет мя прав муж и да обличает,

грешных елей главы да не намащает.

Паче же молюся аз на ня ко Богу,

да зло еже любят казнить по премногу.

При камени суд им твориши и падоша,

да слышат речи ми, яко возмогоша.

Яко толщи земли на ней положенны,

тако их при аде кости расточенны.

Яко к Тебе, Боже, очи обращаю,

не от[’]ими душу, на Тя уповаю.

От сети изволи мене сохранити,

юже потщахуся они составити.

Сохрани от соблазн делающих злая,

Тебе всеблагому Богу премерзская.

Грешнии людие впадут мрежу свою,

аз же уповаю на благодать Твою.

Яко особь буду, не имам лов быти

им, Дóндеже моим летом мимо ити.

Гласом моим ко Богу воззвах,

глас мой к Нему слезный возслах.

Пред Ним молбы пролияти,

имам печаль возвещати.

Внегда дух мой исчезаше,

Ты вся стези моя знаше.

На пути сем сети скрыша,

имже ноземи ходиша.

одесную смотрях тощно,

аще будет что помощно.

И не бе мене знаяй,

помощи ми руку даяй.

Бегство бедно к смерти бяше,

и никто мя воз[’]ис каше.

Тем же воззвах, Боже, к Тебе,

иже еси в светлом небе.

Ты надежда и часть моя,

в стране живых яже Твоя.

Моление мое внуши,

яко скорбна суща в души.

Избави мя от гонящих,

крепко мене обидящих.

Паче мене укрепленных,

в сердцах злобы исполненных.

Изведи мя из темницы,

да дам славу Ти деснице.

Ждут мя, яже правы зриши,

Дóндеже ми возмездиши.

Господи, молбу мою изволь услышати

и во истинне Твоей молению вняти.

Услыши в правде Твоей, не тщися в суд внити

с рабом Ти, ибо никто может ся явити.

Живый прав пред Тобою, вси бо согрешаем,

святыя заповеди Твоя преступаем.

Се погна душу мою и живот смирил есть,

в земли враг ненавистный вмале не убил есть.

Посадил мя есть в темных, яко мертвых веку,

смяте ми сердце и дух в скорбех человку.

Помянух дни древния, во всех поучихся

делех руку Твою и тым удивихся.

Воздех к Тебе руце ми, душа моя Тебе

яко земля безводна чает дождя себе.

Скоро мене изволи, Боже, услышати,

ибо дух мой видится уже исчезати.

Не отврати от Мене лица Ти святаго

да не уподоблюся сшедшим до рва злаго.

Подаждь ми скоро милость Твою услышати,

яко аз не престах на Тя уповати.

Скажи ми путь, им же бы выну мне ходити,

яко тщахся аз душу к Тебе возносити.

Изми мя от враг моих, притекох бо к Тебе,

даждь творити волю Ти, Ты ми Бог сый в небе.

Дух благ на землю праву Твой мя да наставит,

имя Твое святое жива мя да явит.

Душу мою с печали в правде изведеши,

милостию Ти враги мои попереши.

Ниже души моей дерзают стужати,

имаши погибели праведно предати.

Зане же аз, раб Твой, есмь бех и хощу быти,

Тебе, Господи, вечно желаю служити.

Благословен Господь Бог, руце научаяй

мои на бой и персты сна брань наставляяй.

Он мое прибежище, милость, избавитель,

Он мой заступник, в брани и спор защититель.

На него аз уповах, Он ми покорил есть

люди моя и вождя, им мя сотворил есть.

Боже, что есть человек, яко Ты оному

дал еси Тебе знати сущу мертвенному,

Или что сын человеч, яко его чтиши,

человек есть подобен суете, Сам зриши.

Дние его, яко сень, скоро претекают,

лето, яко же облак, мимо прелетают.

Господи, склони небо, сшед, горам коснися,

да воздымятся, страшен в молниих явися.

Блесни, а нечестивых полки разженеши,

посли стрелы острыя и врага смятеши.

Посли руку Ти свыше, изми мя, избави

от вод мног из рук чуждих, свободна постави.

Их же язык суету многу глаголаше,

и сила их десница неправости бяше.

Боже, песнь нову Тебе имам воспевати,

десятострунну псалтир персты пребывати.

Спасающу Ти цари и мене избавльшу

от меча люта силу в победу давшу.

Избави мя, изми мя из рук людей странных,

от хуления многа уст необузданных.

Их бо язык суету многу глаголаше,

и сила их десница неправости бяше.

Их же сынове, яко новосаждения,

в юности своей полни всеукрашения.

Их же дщери блистают зело удобренны,

яко холм красноцветный лепо украшенный.

Хранилища их полна, даже отрыгают,

овцы их многоплодны на полях играют.

Множащеся в тысящи во своих исходех

веселие творяще держащим о плодех.

Волове их суть толсти, стены не падают,

прохода никому же удобна подают.

В стогнах их рыдание и вопль не бывает,

всяк сице живущия блаженны вещает.

Но во правду блаженни людие бывают,

иже Бога праваго за Бога си знают.

Вознесу Тя, Боже мой, Царю мой, и Твое

вовеки благословлю имя пресвятое.

На всяк день буду Тебе аз благословити,

имя Твое святое в век века хвалити.

Велий Господь и хвален зело пребывает,

и величие Его пределов не знает.

Вси роди дела Твоя будут восхваляти

и силу Твою родом иным возвещати.

Величие славы Ти имут глаголати,

чюдеса Твоя чадом своим поведати.

И силу страшных Ти дел потщатся явити

и величие Твое людем возвестити.

Память благостынь Твоих и множества возславят

и правдою Твоею радостни ся явят.

Щедр и милостив Господь и долготерпелив,

и грешным человеком есть многомилостив.

Щедроты Его на всех делех пребывают,

тем вся Ти дела, Боже, хвалу да воздают.

Преподобнии Твои Тя да благословят,

славу царства Твоего и силу возсловят.

Еже сыновом людским силу Ти сказати,

величия царства Ти славу глаголати.

Царство Твое есть вечно, владычество явно,

во всех родех и родех имат быти славно.

Верен Господь в словесех Своих пребывает

и преподобен в делех Своих обитает.

Бог низпадающия люди утверждает,

и вся низверженныя паки возставляет.

Очи всех живых на Тя, Боже, уповают,

вси в благо время пищу от Тебе снедают.

Егда десницу Твою Ты отверзаеши,

благоволения Ти вся исполняеши.

Праведен Господь во всех путех пребывает

и преподобен в делех Своих обитает.

Близ есть Господь всем, иже Его призывают,

и во сердцех истину своих соблюдают.

Хвали, душе моя, Бога твари всея,

до конца си жизни восхвалю моея.

Песнь Богу моему имам воспевати,

Дóндеже в существе даст ми пребывати.

Надежды во князех вси не полагайте,

в сынех человечих вы не уповайте.

Яко спасение в них не обитает,

изшедшу бо духу плоть ся в прах вращает.

А помышления тогда исчезают,

ибо умышленных дел не содевают.

Блажен человек, есть ему же от Бога

Иаковля помощь и надежда многа.

На Господа жива, иже сотворил есть

небо, землю, море и вся исполнил есть.

На Господа во век истинну храняща

и суд обидимым людем си творяща.

Алчущым доволство пищу дающаго,

окованныя же люди решащаго.

Хвалите Бога, яко благ есть псалом Ему,

а возлюбится хвала Богови нашему.

Господь Иерусалим изволил создати,

Израиль расточенный во град Свой собрати.

Сердцы сокрушенныя люди исцеляет

и сокрушения их вяжет, исправляет.

Он есть всех множества звезд един и считаяй

и имена по свойству всем им нарицаяй.

Велий есть Господь Бог наш, крепость в нем велика,

разум несчислен, духи ни от человек[а].

Господь кроткия люди прием возвышает,

грешники же до земли во гробы смиряет.

Во исповедании Господу начните,

в гуслех Богу нашему песни воскликните.

Лице небес, облаки одевающему

и свыше дождь на землю посылающему.

На горах траву многу прозябающему,

зла в службу человеком щедро дающему.

Даждь, Иерусалиме, честь Богу Твоему,

неси хвалу, Сионе, Господу своему.

Яко верви твоих врат, Он укрепил есть

и сыны твоя в тебе облагословил есть.

Он пределы твоя мир сладкий полагает

и от тука пшенична тебе насыщает.

Он слово свое земли егда посылает,

немедленно делом ся оно исполняет.

Хвали, яко снег волну, в мире дающаго

и мглу попеловидну посылающаго.

Иже, яко же хлебы, голоть свой метает,

противу мразу Его стати кто дерзает.

Послет слово си, ота вся истаевают,

дунувшу теплому ветру, воды изтекают.

Он слово Иакову Свое из[’]явил есть,

Израилю судбы си и правды открыл есть.

Ни единому тако языку содея,

никому тако сказал есть воли Своя.

Бога с небес вси хвалите,

иже в вышних Его чтите.

Вси ангели восхваляйте,

вся си силы величайте.

Солнце хвали, свет ти давша,

и ты, луно, тя создавша.

Звезды и свет, хвалу Богу

принесите выну многу.

Небо небес и с водами,

яже выспрь суть между вами.

Богу славу возсылайте,

люди на ту возбуждайте.

Он изрече Свое слово

и бысть сей мир все готово.

Той повеле, и вся быша,

ни на мале умедлиша.

Постави Ся вечно быти,

изволил есть положити.

Веление еже будет,

твердо даже мир пребудет.

От земли же вы, змиеве,

от бездн морских вы, китове.

Богу славу возсылайте,

имя Его величайте.

Огнь, град, голоть, снег, ветр, слово,

яже есте в слух готова.

Горы, холми, древа плодна,

кедри и вся земнородна,

Звериев си скоти с ними,

гади с птицы пернатыми,

Сотворшаго вас хвалите,

силу Его всем вестите.

Царие вси и людие,

князи мира и судие,

И юноши со девами,

старцы купно с юнотами,

Имя Бога всесилнаго

чтите, яко единаго.

Его имя вознесенно,

паче имен всех почтенно.

Песнь нову Господеви сладце воспевайте,

во церкви преподобных славу Ему дайте.

Израиль о Творце си да возвеселится,

Сион со чады о Царе светел да творится.

Да хвалят имя Его в лице и тимпане,

и в псалтири да поют во всей земней стране.

Яко в людех си имать благоволение

и вознесет кроткия Господь в спасение.

Преподобнии в славе вечней восхвалятся,

на ложах своих честных превозвеселятся.

В гортанех их Божия будут хваления,

мечи обострении в руках отмщения.

Еже месть во языцех теми сотворити,

народы гонившия оны обличити.

Нечестивыя цари их путы связати,

славныя их железы ручными сковати.

Суд на ня написанный в правду сотворити,

святым же всем вечная слава имать быти.

Хвалите Бога в святых рабех Его

и в тверди небес, созданней от Него.

Хвалите Его в силах божественных

и величиих Его множественных.

Во гласе трубнем Онаго хвалите,

в псалтири, в гуслех честь Ему творите.

Хвалите Его в лице и тимпане,

хвалите Его в струнах и органе.

В доброгласных си кимвалех хвалите,

восклицания в кимвалех славите.

Всяк дух да хвалит вся создавша Бога,

везде и всегда слава Ему многа.

Аз во братии моей бех юнейший

и в дому отца моего малейший.

Пастырь бех стада овец мя родивша,

то ми вручивша.

Руце ми орган художне счиниша,

и персты моя псалтир составиша.

И кто Господу возвести моему

да служу Ему.

Сам мя услыша, изволи послати

ангела от стад отчих мя из[’]яти.

Елеем главу помазал есть мою

во службу Свою.

Братия мои добри и велицы,

в очесех людских бяху человецы.

Но не бе воля Богу их избрати,

силу прияти.

Аз в стретение иноплеменнику

изыдох смело, чуду превелику.

Иже проклят мя идолы своими

всепроклятыми.

Аз же исторг меч преострый от Него,

в силе Господней обезглавих его.

От Израиля от[’]ях ругание

и стенание.