Молитвы, составленные в заключении

Кондак 1

Возбранный Воеводо и Господи Иисусе Христе, Сыне Бога Живаго, мене, грехом умерщвленнаго, мене, тьмою страстей помраченнаго, просветити и оживити хотя, приклонив небеса, снизшел еси ко мне даже до смерти, смерти же крестныя. Пред сим неисповедимым величием любви Твоея Божественныя преклонялся, пред Крестом Твоим Честным, потоками Животочныя Крови Твоея изобильно напоенном, ниц распростирался, со благодарением многим, со умилением теплым, с молением слезным, с сердцем горящим, вопию Ти песнь сицевую, мольбу Ти приношу таковую: Господи Иисусе Христе, Сыне Божий, в несении креста спасительнаго, десницею Твоею мне низпосланнаго, укрепи мя, в конец изнемогающаго.

Икос 1

Ангелов Творче и Господи Сил, Ангел предста Ти, в саду Гефсиманстем, укрепляя и утешая Тя, егда бремя тяжкое грехов моих толико отяготе на рамех Твоих, яко скорбети Ти зело и ужасатися. В сию скорбь Твою Гефсиманскую со благоговением, со страхом и трепетом великим проникая, от души взываю Ти сице:

Господи мой, Господи, учеником Твоим в скорби рекий: «Молитеся, да не внидите в напасть», – се найде на мя напасть велия, се постиже мя скорбь лютая, молитвою неотступною удержи мя, молю, от отчаяния, молитвою слезною удержи мя, прошу, от роптания. / Иисусе мой, Сладчайший Иисусе, Петра и обоих сынов Зеведеевых, Иакова и Иоанна, в глубь Гефсимании взявый с Собою, да будут свидетелями вопля Твоего крепкаго, воздыханий неизглаголанных, слез молитвенных, возьми и мя, люто страждуща ныне, с Собою и соделай созерцателем честных страданий Твоих, да своя страдания с терпением перенесу аз малодушный. / Христе мой, Пресладкий Христе, в Гефсиманстей веси скорбевший, ужасавшийся и туживший, призри на мя, яко скорблю, яко ужасаюся, яко тужу; скоро услыши мя, вонми души моей и избави ю от туги сея горчайшия. / Сыне Божий Единородный, носяй всяческая глаголом силы Своея, в молитве за грехи моя падый лицем Своим Пречистым на самую землю, подыми мя падшаго, воззови долу поникшаго. / Господи Иисусе Христе, Сыне Божий, в несении креста спасительнаго, десницею Твоею мне низпосланнаго, укрепи мя, в конец изнемогающаго.

Кондак 2

Вижду Тя, Господи Боже мой, в вертоград Гефсиманский вшедшаго, на вержение камня от апостол отошедшаго, вижду, о Спасителю мой, колена преклоньшаго, молящагося, и со удивлением благоговейным вопию Ти: Аллилуиа.

Икос 2

Разум изумевает пред глубиною богатства премудрости и разума Твоего, Боже Спасителю мой: воистину неиспытаны суды Твои и неизследованы пути Твои в деле спасения падшаго человека. Темже взываю Ти, Благодетелю моему, гласом мольбы сицевыя:

Господи мой, Господи, в молитве Отцу Твоему сице воззвавый: «Отче Мой, мимо неси от Мене чашу сию», – се, припадая Tи, молюся аз, во искушении тяжцем сый: умилосердися надо мною, мимо неси от Мене чашу испытаний моих, да вера моя не оскудеет во мне. Иисусе мой, Сладчайший Иисусе, в молитве Гефсиманстей волю Свою в волю Отца всецело предавый, тако моливыйся: «Не якоже Аз хошу, но якоже Ты, обаче не Моя воля, но Твоя да будет», – услыши мя, слабаго и непостояннаго, в час испытания моего и невзгод моих, сице молящагося Ти: «Боже мой и Господи мой, аще угодно сие есть пред Тобою, да скорби, нужды и искушения обдержат мя отовсюду; аз грешный, всякия казни достойный, не смею противовещати Ти, но смиряюся под крепкую руку Твою: буди воля Твоя; не якоже аз хощу, но якоже Ты, да будет воля Твоя, благословен еси, Господи! / Христе мой, Пресладкий Христе, от туги тяжкия Гефсиманския весь изнемогающий в молитве, но николиже ослабевающий, неотступно прилежно в подвизе молитвенном пребывающий, даже до пота, каплями крове каплющаго на землю, Ты вдохни в мя, нерешительнаго, молюся, решимость подвигом добрым даже до смерти подвизатися, да не ктому себе живу, но Ты, Жизнь Безконечная, да живеши во мне, да и аз в Тебе. / Сыне Божий Единородный, от молитвы ко учеником Своим возвративыйся и обретый их спящими от печали, бяху бо очи их отяготели, се и аз отяготех от печали моея, страх и трепет прииде на мя, и покрыла мя есть чуждая тьма, окаяннаго; возбуди мя спящаго, воодушеви мертваго, помози безпомощному. Господи Иисусе Христе, Сыне Божий, в несении креста спасительнаго, десницею Твоею мне низпосланнаго, укрепи мя, в конец изнемогающаго.

Кондак 3

Сила моя во мне оскуде, Господи, Всемогущий Господи, се утрудихся зовый, изсше гортань мой, истомилися суть очи мои от ожидания Тебе, Христе мой, Христе мой! Се поношения поносящих Тя нападоша на мя: аз заключен и не могу выйти, изнеможе крепость моя, се жду соскорбящаго и – несть, и утешающих и – не обретаю, нищ и боляй есмь аз... Услыши мя, Иисусе, услыши, мене ради обнищавший, укрепи мя, мене ради изнемогший, спасение Твое, Боже, да приимет мя, да от души исцеленныя вопию Ти: Аллилуиа.

Икос 3

Имея пред очима моима, Иисусе, Спасе мой, преднаписанный Божественными Евангелистами образ Тебе, страждущаго, всего уязвленнаго, се прихожду к Тебе аз, страждущий, с неисцельными гноящимися язвами сердца моего страстнаго и, веруя несомненно, яко язвы Твоя – исцеление мое и болезни Твоя – здравие мое есть, сице вопию Ти:

Господи, мой Господи, от беззаконных уст оплеваемый, безчествуемый, унижаемый, умилосердися, воззри на мя: страсть греховная душу мою безсмертную – дыхание уст Твоих – безчестит, унижает: исхитити мя от плена страсти сея потщися, погибаю. / Иисусе мой, Сладчайший Иисусе, венчаяй землю цветами, тернием острым увенчанный, виждь, колико острых терний, нелепых помышлений, неподобных мечтаний терзает главу мою: исторгни их, молю, и цветами благих мыслей, святых чувствований украси мя. / Христе мой, Пресладкий Христе, одеяйся светом яко ризою, в ложную багряницу от области темныя облаченный, ризу мне подаждь светлу, яко лежу наг пред враты Твоими и срамляюся, стыждуся плоти своея. / Сыне Божий Единородный, на небесех от Ангел с трепетом священным и любовию огнепламенною присно окружаемый, на земли же страха ради всеми оставленный, исполни всего мя дерзновения и мужества, да никоего же убоюся страха человеческаго, никия муки, самыя лютейшия, да дерзновенно Тя исповедаю, Твое величие проповедуя: / Господи Иисусе Христе, Сыне Божий, в несении креста спасительнаго, десницею Твоею мне низпосланнаго, укрепи мя, вконец изнемогающаго!

Кондак 4

Буря страстей в сердце моем возшуме, се внидоша воды до души моея, углебох, приидох во глубины морския... се сниде дождь и приидоша реки, и возвеяша ветры греховнии, и нападоша ныне на храмину мою! Спасителю мой, бурь Утишителю, рцы бури моей, повели волнению моему: «Молчи, престани», – и по глаголу Твоему буди тишина велия, да в тишине сей благодарно зову Ти: Аллилуиа.

Икос 4

Слыша Петр, отвергийся Тебе, обличительный глас алектора и, изшед вон, плакася горько. Плачу ныне и аз горце, зря себе удаленным от Тебе, Источника всякия радости, Света, Утешения, и в плаче моем сице восклицаю Ти: Господи мой, Господи, от законник о учении Твоем истязуемый, не истязуй совесть мою о содеянных мною злых, яко безответен есмь; аще беззакония назриши, кто постоит? / Иисусе мой, Сладчайший Иисусе, от Каиафы лжесвидетельствуемый, оклеветаемый, како аз воззрю на Тя, егда возводимыя на мя клеветы и напраслины терпети не могу, смущаюся, раздражаюся. Твоим долготерпением мое нетерпение покрый, Долготерпеливе, Христе мой, Пресладкий Христе, от Ирода поругаемый и уничижаемый, что реку Ти и что возглаголю, егда на кийждо час зрю себе превозносящася, гордящася? Уничижением Твоим, смирением Твоим, победи, молю, ничим не победимую гордыню мою. / Сыне Божий Единородный, от Пилата неправедно судимый и зле осуждаемый, кий ответ Тебе дам, яко бервно, еже во очесе моем, не чую, сучец же, сущий во оце брата моего, всегда вижду, себе не сужду, иных же всегда осуждаю. О, Судие мой, научи мя всею душею, всею жизнию исполняти великую заповедь Твою: не судите, да не судимы будете! / Господи Иисусе Христе, Сыне Божий, в несении креста спасительнаго, десницею Твоею мне низпосланнаго, укрепи мя, в конец изнемогающаго!

Кондак 5

Боготочную Кровь Твою, на Кресте излиянную, в Божественней литургии дал еси мне, Агнче Божий, яко утешение превеликое во всех скорбех моих, яко сладость пресладкую во всех горестех моих, яко силу непобедимую во всех немощех моих, яко источник безсмертия в смертности моей. За сию милость Твою неизреченную, за сей дар безценный, за сию любовь Твою неизмеримую от всея души благодарныя вопию Ти: Аллилуиа.

Икос 5

Видев Пилат величие Твое в уничижении Твоем и невинность Твою в противу Тя обвинениях, Боже Спасителю мой, восхоте отпустити Тя, ко жестоковыйному народу глаголя: «Кого хощете от обою отпущу вам: Варавву ли или Иисуса, глаголемаго Христа?» Аз же, повинный весь, припадая Ти, Судии моему и Творцу моему, взываю Tи тако:

Господи мой, Господи, от народа неблагодарнаго, Тобою облагодетельствованнаго, слышавший глас неблагодарный, на вопрошение Пилатово ответствовавший: «Не Сего, но Варавву». / Колико много и аз неблагодарный забывах благодеяния Твоя, на мне недостойном, яко дождь благодатный изобильно излиянный, и сего ради тако много унывах. О, научи мя, Учителю Благий, присно памятовати прежния милости Твоя, да памятованием сим ободренный, николиже унываю в злостраданиях моих. / Иисусе мой, Сладчайший Иисусе! К распятию крестному криком беззаконных: «Распни, распни Его!» влекомый, распни волю мою мятежную, злую, яко несть мне мира от нея, несть покоя, несть отрады, но да будет во мне присно воля Твоя благая, совершенная, мир, покой и радость всей жизни моей дающая. / Христе мой, Пресладкий Христе! Носяй терновый венец и багряну ризу, Пилатом народу тако изведенный, даруй мне с радостию, и веселием, и благодарением носити поношение Твое, уничижение за Тебе. / Сыне Божий Единородный, Пилатом нареченный «Се, Человек», оком благосердным воззри на мя, се аз яко человек согреших, Ты же, яко Бог щедр, помилуй мя, видя немощь души моея. / Господи Иисусе Христе, Сыне Божий, в несении креста спасительнаго, десницею Твоею мне низпосланнаго, укрепи мя, в конец изнемогающаго.

Кондак 6

Проповедуют мне громогласно славу Твою небеса Твоя звездоокая, Создателю мой, творение же руку Твоею возвещает твердь, о любви Твоей безсмертной язвы Твоя пречистыя всегда со Креста вещают. Славлю славу Твою, величаю дивная творения Твоя, воспеваю любовь Твою, за мене распятую, поя Ти: Аллилуиа.

Икос 6

Возсияй, Свет сый Христе, от присносущнаго Света Твоего душе моей, страстьми оскверненней, горестию омраченней, да во свете Твоем узрю свет избавления, спасения и возстания моего, и возмогу пети и молитися сице:

Господи мой, Господи, на суде ответа судии неправедному не давый, яко агнец кроткий молчавый, се молчу, благоговею, ныне безмолвствую пред непостижимыми судьбами Твоими, скорбями, яко путем верным ко спасению мя ведущими. Иисусе мой Сладчайший, Иисусе, Пилату рекий: «Не имаши власти ни единыя на Мне, аще не бы ти дано свыше», научи мя в каждом шаге, в каждом слове жизни моея познавати вышнюю волю Твою, да под крепкую руку Твою всегда аз смиряюся. / Христе мой, Пресладкий Христе, егда бе пяток Пасце, час же яко шестый, от Пилата народу иудейскому провозглашенный: «Се, Царь ваш», молю Тя, Царю Небесный, / царствуй в уме моем дольнем, да мудрствует всегда горняя; царствуй в сердце моем хладном, да Тобою, Огнем поядаюшим, в любви Божественной воспламеняется; царствуй в воле моей непостоянной и слабой, да будет крепкой и постоянной в хождении пред Тобою. / Сыне Божий Единородный, народом Своим пред Пилатом с криком безумным: «Не имамы царя, токмо кесаря» отверженный, се аз, аще и изменяю Ти на всякий час, но Царем моим признаю Тя, Господом и Богом моим исповедую Тя, / темже и дерзаю просити Тя в скорби моей, в туге моей тяжцей: «Не отвержи мене, не остави до зела, яко отец мой и мати моя остависта мя, Ты же восприими мя». / Господи Иисусе Христе, Сыне Божий, в несении креста спасительнаго, десницею Твоею мне низпосланнаго, укрепи мя, в конец изнемогающаго.

Кондак 7

Хотя многажды путем заповедей Твоих ходити, Господи Боже мой, многажды паки совращахся с пути Твоего, падая и возставая, крепяся и изнемогая, моляся и леняся, подвизаяся и ослабевая. О, окаянный аз человек, вем со Апостолом, яко не живет во мне, сиречь в плоти моей, доброе, ибо хошу доброе и сие не творю, не хошу злое и сие содеваю. О Милостиве, Сам мя, Спасе, спаси от Мене самаго, да выну взываю Ти: Аллилуиа.

Икос 7

Дивлюся, Спасителю мой, видя, яко неся Крест Свой, изшел еси Ты на глаголемое Лобное место, еже глаголется еврейски Голгофа. О, снизхождения Твоего безмернаго, Создателю мой, о, долготерпения Tвоегo неизреченнаго, Владыко мой! Со страхом и радостию целуя стопы Твоя на Голгофском шествии Твоем, сице взываю Ти:

Господи мой, Господи, под тяжестию Креста толико изнемогавший, яко воином обрести некоего человека Киринейска именем Симона, емуже и задеша понести Крест Tвой, сподоби и мя малодушнаго крест жизни моея, яко малую ладию к Твоему Кресту, яко великому кораблю, присоединити, да силою сею по волнам носимый, безбедно преплыву пучину моря житейскаго. / Иисусе мой, Сладчайший Иисусе! Дщерем иерусалимским, плакавшим по Тебе, рекий: «Дщери иерусалимския, не плачите обо Мне, но плачите о себе и о детях ваших», услыши, услыши ныне плач мой сей: се бо плачу, о себе плачу, о убожестве моем, наготе моей, скудости моей плачу, о страстности моей, греховности моей. / Христе мой, Пресладкий Христе, к злодеям причтенный, со беззаконными вмененный, не вмени мне во грех малодушия и уныния моего. / Сыне Божий Единородный, надписание над главою Своею на Кресте от Пилата сицевое имевый: «Иисус Назорей, Царь Иудейский», напиши во мне имя Tвoe, паче меда и сота сладчайшее, да на всяк день и час уста моя исповедуют имя сие, ум мой мыслит именем сим, сердце чувствует жизнь и сладость имени сего. / Господи Иисусе Христе, Сыне Божий, в несении креста спасительнаго, десницею Tвоею мне низпосланнаго, укрепи мя, в конец изнемогающаго.

Кондак 8

Странен был еси Ты, Иисусе мой, не имея, где главу подклонити, дóндеже, странствуя, на Голгофу возшел еси, идеже на Кресте главу Свою преклонил еси, силам небесным со удивлением поющим Ти: Аллилуиа.

Икос 8

Всего Себе, Спасе, истощил еси, всего Ся предал еси, всего любовию объял еси мя, в страданиях Своих до конца возлюбивый мя, Иисусе мой, Любы неизреченная! Сею огненною любовию Твоею сердце мое воспламененное молитвенную песнь сицевую приносит Tи:

Господи мой, Господи, о егоже одежде воины меташа жребий, кто что возмет, в руку Твоею жребии мои суть. Научи мя, како взяти иго благое и бремя Твое легкое и сия терпеливо носити. / Иисусе мой, Сладчайший Иисусе, пречистыя руце Твои, имиже создал мя еси, прострый на Кресте, приими воздеяние руку моею, яко жертву вечернюю, во облегчение тяжестей многих грехопадений моих. / Христе мой, Пресладкий Христе, нозе Свои, слезами грешных орошенныя, имый гвоздьми пригвожденныя, направи стопы моя, во еже тесным тернистым путем Твоим неуклонно шествовати к вечному Царствию Твоему. Сыне Божий Единородный, от единаго от воин копием в ребра Своя прободенный, живым и действенным Словом Своим, острейшим паче всякаго меча обоюдоостраго, пронзи душу мою огрубевшую. / Господи Иисусе Христе, Сыне Божий, в несении креста спасительнаго, десницею Твоею мне низпосланнаго, укрепи мя, в конец изнемогающаго.

Кондак 9

Все естество ангельское, Небеса и вся Силы, со страхом и трепетом к распятому Ты на Кресте приникоша слышати молитву Твою, еюже молился еси, глаголя: «Отче, отпусти им, не ведят бо, что творят». Изумившеся толицей любви Твоей, взываху Ти: Аллилуиа.

Икос 9

Ветия, проповедник дивный всепрощающия любве Твоея явися разбойник благоразумный, егда на кресте с Тобою, Иисусе, уязвився, помолисяТи: «Помяни Мя, Господи, во Царствии Твоем», Ты же, отвещав, рекл еси: «Аминь глаголю тебе, днесь со Мною будеши в раи». И аз Ти глас сицевый приношу:

Господи мой, Господи, разбойнику рая двери отверзый, отверзи ми двери милости Твоея. Се толку в них, не затвори, Ты бо рекл еси: «Толцыте и отверзется вам». Иисусе мой, Сладчайший Иисусе, ошуюю хулимый, одесную благословляемый, наполни уста мои моления Твоего, яко да пою славу Твою, весь день благословляя Тя, мене Крестом благословляющаго. / Христе мой, Пресладкий Христе, и на Голгофе милующий, среди страданий благодеющий, вразуми мя во всех страданиях и бедствиях моих милость Твою познавати, благодеяния Твоя воспети. / Сыне Божий Единородный, на все вопли безумных не отвещавый и со Креста не сошедый, но на Кресте вся муки до конца претерпевый, стыждуся малодушия моего, яко от нетерпения многажды устремляхся сойти со креста моего, прости мя, Долготерпеливе. / Господи Иисусе Христе, Сыне Божий, в несении креста спасительнаго, десницею Твоею мне низпосланнаго, укрепи мя, в конец изнемогающаго.

Кондак 10

Спасти мя хотя, Спасителю Боже, изшел еси на искание мене, на землю пришел и тамо не обрете, и даже до ада снизшел еси. Слава Тебе, Искупителю мой, пою Ти: Аллилуиа.

Икос 10

Царю Превечный, превозносимый отцев Боже, во веки благословенный, от рабов на Крест вознесенный, мысль мою и сердце к Тебе, Искупителю моему, возношу, вопия Ти молитвенно сице:

Господи мой, Господи, Солнце правды сый, на запад Голгофы зашедый и последний луч любве Своея Божественныя Пречистей Матери и возлюбленному ученику посылаяй, посли свет Твой и истину Твою, да та мя настависта в гору святую Твою, яко да во свете лица Твоего пойду и о имени Твоем возрадуюся вовеки. / Иисусе мой, Сладчайший Иисусе, со Креста к Деве Благословенной, плакавшей и рыдавшей, во утешение воззвавый: «Жено! се, сын Твой», и ученику: «Се Мати твоя», / омофором пречистым Богоматере, из страданий Голгофских Ея сотканным, слезами Ея, яко жемчужинами драгоценными украшенным, покрый мя от всякого зла. / Христе мой, Пресладкий Христе, страданьми Твоими основания земли восколебавый, камни сокрушивый, сокруши окамененное сердце мое, безчувствие мое, да с царем-пророком предзрю и чувствую Тя всегда близ мене, да не подвижуся. / Сыне Божий Единородный, Страстию Твоею омрачивый свет солнечный, яко быти тме по всей земли от шестаго часа до девятаго, помрачи пред очесы моими вся скоротекущия красоты мира сего суетнаго, / да николиже вижду их, яко сор и прах да вменяю их, да умом, сердцем моим Тя всегда созерцаю, Единую Вечную Красоту. / Господи Иисусе Христе, Сыне Божий, в несении креста спасительнаго, десницею Твоею мне низпосланнаго, укрепи мя, в конец изнемогающаго.

Кондак 11

Пение мое, крепосте моя, спасение мое, радосте моя, избави мя от обышедших мя, Иисусе Сладчайший, скорое и известное даждь утешение рабу Твоему, приближися мне, везде сый, да и аз возмогу с псалмопевцем воспети песнь сию: «Аще бо пойду и посреде сени смертныя, не убоюся зла, яко Ты со мною еси». Аллилуиа.

Икос 11

Светоподательный светильник Твой, Свете тихий безсмертнаго Отца Небеснаго, глас Твой, Слове Божий, Предтеча «покайтеся!» вопиет людем «и предочиститеся, се бо предстоит Христос, Агнец Божий, вземляй грех всего мира». Се и аз покаянным гласом Тебе зову:

Господи мой, Господи, в девятом часе гласом велиим возопивый: «Или! Или! лама савахфани», еже есть: «Боже Мой! Боже Мой! вскую Мя еси оставил». / Молюся Ти, не остави мене, не отступи от Мене, прииди, да не отыду и ктому не буду, прииди, да до конца не погибну, спаси мя. / Иисусе мой, Сладчайший Иисусе, зноем страданий палимый, «Жажду!» возгласивый, возбуди во мне жажду общения с Тобой, Источником воды живыя, да упиюся от потока сладости Твоей, от прободеннаго ребра Твоего истекшаго. / Христе мой, Пресладкий Христе, оцтом и желчию напоенный и по сем воззвавый: «Совершишася», соверши во мне дело спасения Твоего, / всего мя обнови, возроди, ветхаго человека совлеки и в новаго, не по плоти, но по духу ходящаго, облецы. / Сыне Божий Единородный, Дух Свой Отцу со Креста предавый, рекий: «Отче, в руце Твои предаю дух Мой». И сия рек, главу преклони и издше. / Се, главу мою пред величием Твоим преклоняя, аз вручаю Ти, Промыслителю, дух мой, всю жизнь мою веди мя, камо хощеши, твори, како волиши. / Господи Иисусе Христе, Сыне Божий, в несении креста спасительнаго, десницею Твоею мне низпосланнаго, укрепи мя, в конец изнемогающаго.

Кондак 12

Благодать превеликая от Креста Твоего, Иисусе, изобильно подается всем, с верою поклоняющимся Кресту Твоему и с любовию лобызающим Его. Такожде благодатию велиею облекается всяк, иже благоговейно крестным знамением себе ограждает, есть бо сие оружие непобедимое, демонов трепет, Ангелов присно радование, хвала православным, вопиющим: Аллилуиа.

Икос 12

Поя страдания Твоя, поклоняюся и тридневному погребению Твоему, восхваляю и светоносное Воскресение Твое, верую со всеми мытарями и грешниками, благодатию Твоею спасенными, яко имея Тебе, Спасителя моего, николиже погибну, аще и быша были грехи мои, яко багряное, Ты же, яко волну, их убелищи, аще и умножися во мне грех мой, преизобилует во мне благодать Твоя. Тако жива будет душа моя и восхвалит Тя, и судьбы Твоя помогут мне. Сего ради и устам моим не возбрани, во еже звати Ти:

Господи мой, Господи, чрез созерцание страданий Твоих сотника к познанию Тебе, Премудросте Божия, приведый, во еже воскликнути ему: «Воистину Божий Сын бе Сей», / се и аз, созерцанием страданий Твоих умиленный, исповедую Тя с первоверховным Петром купно: «Ты еси Христос, Сын Бога Живаго». / Иисусе, Сладчайший Иисусе, от Иосифа благообразнаго и Никодима, ученика Твоего потаеннаго, плащаницею чистою повитый, со благоуханьми во гробе нове положенный и боголепно погребенный, да будут беды моя и скорби жертвою благоуханною пред Тобою, и слезы моя, яко миро на Гроб Твой, приими. Христе мой, Пресладкий Христе, печатию, яко сокровище безутешное [Т. е. своим погребением вызвавшее безутешную скорбь.], во гробе запечатанный, вем, яко вся невзгоды и тяготы, Тобою мне низпосылаемыя, печать Твоя святая суть. / Благодарю Тя, яко сею болезненною печатию Твоею запечатлеваемый, да тако запечатленный не утерян буду от Тебе, непрестаннаго Искания сердца моего. Сыне Божий Единородный, к егоже живоносному Гробу жены-мироносицы с миром течаху, плачущия горько и вопиющия: «Сия Суббота есть преблагословенная, в нейже Христос, уснув, воскреснет тридневен». / Се с ними и аз, аще ленив сый, обаче во след Тебе теку, аще и зело немощен сый, обаче в путь Твой шествую, аще и малодушен сый, обаче крест мой несу, Тебе моляся, вопию: / Господи Иисусе Христе, Сыне Божий, в несении креста спасительнаго, десницею Твоею мне низпосланнаго, укрепи мя, в конец изнемогающаго.

Кондак 13

О, Господи Иисусе Христе, Сыне Божий, се предстою пред Тобою со страхом и радостию, страхом убо недостоинства ради, радостию же милосердия ради, и из глубины души моея вопию Тя: «Не отвращай лица Твоего от Мене, Господи мой, Господи, поне же по грехом и мерзостем моим достоин отвращения сего, но образ есмь неизреченныя Твоея славы, аще и язвы ношу согрешений». Грешен есмь, но Твой есмь аз, спаси мя, заступи, сохрани, защити, помози, укрепи, в сени крил Твоих от зноя бед и страстей мя укрой, да Тобою хранимый, Тобою спасаемый, взываю Ты с воинствами Ангельскими, вопию Ты со пророками, возглашаю Ти со апостолами, проповедую Тя со страстотерпцами, молюся Ты от всего сердца со преподобными, поя, вопия, взывая и глаголя во веки неисчетно: Аллилуиа, Аллилуиа, Аллилуиа.

Этот кондак читается трижды, затем первый икос и первый кондак.

Акафист был написан еп. Серафимом во время заключения в Бутырской тюрьме в 1923 г.

У сего Акафиста в кондаках и икосах краестрочие: «Весь от страстей безмерных, яко во огне, сгораю аз, помилуй мя!» Акафист сей поется на 6-й глас, и в кондаках припев: «Помилуй...» глаголется трижды тако: первый раз возглашает читающий сей припев и поют тойжде людие, такожде и вторый и третий. На каждый припев: «Помилуй...» творити подобает метания.

Кондак 1

Возбранный Воеводо и Господи, нас ради в ад сшедый и Собою вся воскресивый, се ныне, во аде страстей моих весь сгорая, из глубины сердца моего взываю Ти: Иисусе, ада Победителю, победи ад души моея, воскреси мя, умерщвленнаго страстьми.

Икос 1

Еврейским отроком, в пещь огненную вверженным, и к Тебе, дивному во святых, воззвавшим, Ангела Твоего пославый и тем огнь в росу преложивый, вонми ныне воплю души моея, услыши стенание мое, во искушении бо зельнем болезненно Ти взываю:

Иисусе мой, Христе Многомилостиве, посли ми Ангела мирна, да утишит бурю страстей моих лютых. / Иисусе мой, Подателю просящим, подаждь ми Ангела верна наставника, да наставит мя на путь правый, в конец заблудившагося. Иисусе мой, Христе Многомилостиве, пристави ми Ангела хранителя души и тела моего, да сохранит мя от конечнаго падения, се бо уже низвергаюся в бездну греховную. Иисусе мой, Ангелов слава, огради мя ополчением Ангелов Твоих, всего от бесов расхищаемаго. / Иисусе, ада Победителю, победи ад души моея и воскреси мя, умерщвленнаго страстьми.

Кондак 2

Сыне Божий, Сыне Девы, Един Сый Святыя Троицы, спрославляемый Отцу и Святому Духу, помилуй мя, помилуй, помилуй падшее создание Tвoe, имене ради святаго Tвоего, ce бо с Давидом в покаянии Тебе зову: помилуй мя, Боже, помилуй мя.

Икос 2

От дел моих несть спасения, Спасителю Боже мой, ибо вся дела моя студна, нечиста, мерзка, гнила: вера моя вместо дел да вменится мне. Се верую, яко услышиши мя окаяннаго, и взываю Ти сице: Иисусе мой, Христе Многомилостиве, терпети не могу уже демонскаго стреляния, ускори избавити мя, Твой есмь аз. / Иисусе мой, искушенный по-всячески, помози ми, искушаемому искусителем лукавым, немощен бо есмь аз. / Иисусе мой, Христе Многомилостиве, повелевый апостолом именем Твоим бесы изгоняти, исцели мя, беснующагося неистовством греховным, грехолюбив бо есмь аз. / Иисусе мой, сатану, яко молнию, с небесе спадша видевый, угаси молниеносныя разжженныя стрелы его, всего мя разжигающия, страстен бо есмь аз. Иисусе, ада Победителю, победи ад души моея и воскреси мя, умерщвленнаго страстьми.

Кондак 3

Страстию Твоею, Христе, омрачивый солнце, помрачи предо мною всю призрачную светлость и сладость греха, да узрев мрачную и горькую тьму его, очи сердца моего к Тебе всегда возвожу, Солнцу Праведному, в покаянии взывая: помилуй мя, Боже, помилуй мя.

Икос 3

Ей, Господи Царю, из мертвых воскресый и сущим во гробех живот даровавый, призри на мя и услыши мя, вопию аз к Тебе таковая: Иисусе мой, Христе Многомилостиве, во гробе лежаща отчаяния моего, возбуди мя глаголом силы Твоея к надежде спасения. / Иисусе мой, Жизне вечная, оживи мя, мертвеца, Твоею жизнию. / Иисусе мой, Христе Многомилостиве, возсмердеша раны моя, согниша вся струпы моя, повели, да отвален будет камень грехопадений моих. / Иисусе мой, Лазаря Воскресителю, гласом велиим воззови уму моему, в могиле нечистых помыслов поверженному: «Гряди вон». / Иисусе, ада Победителю, победи ад души моея и воскреси мя, умерщвленнаго страстьми.

Кондак 4

Безмерных страстей моих проказа велия порази мя люто, тело осквернися, ум окаляся, сердце острупися, воля развратися, несть во мне места чиста, весь проказихся: всего от верху и до ногу объят язва гноящаяся. И что сотворю, Господи и Избавителю и Заступниче уповающим на Тя, аще не к Тебе паки возвращуся и постеню, и яко прокаженный воззову: «Господи, аще хощеши, можеши мя очистити». Се бо в покаянии Тe6e молюся: помилуй мя, Боже, помилуй мя.

Икос 4

Яко волны морския возсташа на мя беззакония моя, бездна последняя грехов обыде мя, и се кораблец мой близ потопления есть. Ионе подражая, вопию Ти:

Иисусе мой, Христе Многомилостиве, да будет по глаголу Твоему тишина велия в волнующемся сердце моем. Иисусе, Кормчий спасения моего, простри ми руку, яко Петрови, и спаси мя, утопающаго. / Иисусе, ада Победителю, победи ад души моея и воскреси мя, умерщвленнаго страстьми.

Кондак 5

Во огни пламенном предстоят Тебе, Господи, Серафими и многоочитии Херувими, пламенногорящии, шестокрылатии, и вся Силы Небесныя. Дивны огненных уст хвалы и песни, велелепной Славе Твоей возносимыя. Но, о Боже Саваофе, что Тебе аз принесу от моих бренных нечистых устен, кое возмогу хваление, блудный и прескверный душею и телом, како славословити Тя дерзну? Точию сию песнь Давидову в покаянии Ти воспеваю: помилуй мя, Боже, помилуй мя.

Икос 5

Смотряя пророк пришествие Твое, Христе, провозгласи: «Положил есм к нам твердую любовь, Господи: Единороднаго бо Сына, Благий, очищение в мир послал еси». Смотряя и аз милость Твою неизреченную и любовь безмерную ко грешником падшим, не отчаяваюся во спасении своем, окаянный, но сице с надеждою Ти взываю:

Иисусе мой, Христе Многомилостиве, аще и пался есмь аз падением лютым, но памятую глагол Твой: «Аще падеши, возстани и спасешися», се ныне возстаю, поддержи мя, изнемогающаго. / Иисусе, друже мытарей и грешников, от нихже первый есмь аз, приими и мене, кающагося. Иисусе мой, Христе Многомилостиве, с мытари и грешники ядый и пияй, сподоби мя неосужденно Плоть Твою ясти и Кровь Твою Животворящую пити во оставление всех грехов моих. / Иисусе, Судие Праведнейший, блудницу, слезившую у ног Твоих, не осудивый, не осуди и мене, паче блудницы блуднейшаго. / Иисусе, ада Победителю, победи ад души моея и воскреси мя, умерщвленнаго страстьми.

Кондак 6

Гряди, душе моя, гряди, не бойся: Господь мимоходит, зовый тя на покаяние, яко некогда Адама всеродна падшаго зовьш: «Адаме, где еси?» Возстани, что спиши? Иди, воззови к Отцу твоему: «Отче мой, согреших на небо и пред Тобою, несмь достоин нарещися сын Твой, приими мя возвращающагося, яко единаго от наемник Твоих, в покаянииТи вопиющаго: помилуй мя, Боже, помилуй мя».

Икос 6

Окаянный аз человек, разбойнику по злодейством своим уподобихся. Храм телесный, о немже Апостол Христов глаголет: «Не весте ли, яко храм Божий есте и Дух Божий живет в вас; аще кто растлит храм сей, того покарает Бог», храм сей аз, разбойник, растлих, оскверних, обезчестих, разорих, расхитих, опустоших. И ныне кары Твоея праведныя, Боже Правосудный, ожидая со страхом и трепетом, яко преступник, Царю моему вопию:

Иисусе мой, Христе Многомилостиве, пощади, пощади мя, много Тебе согрешившаго. / Иисусе мой, разбойника благоразумнаго во едином часе раеви сподобивый, помяни и мене, разбойника неблагоразумнаго, егда приидеши во Царствии Твоем. / Иисусе мой, Христе Многомилостиве, молитвами рождшия Тя Приснодевы Марии, милостив и благоуветлив буди мне, Суда Твоего праведнаго трепещущему. Иисусе мой, милости неизследимая пучина, отврати гнев Твой, на главу мою праведно движимый, избави мя от належащаго праведнаго Tвоего прещения и помилуй, помилуй, помилуй мя, тяжкаго преступника повелений Твоих. / Иисусе, ада Победителю, победи ад души моея и воскреси мя, умерщвленнаго страстьми.

Кондак 7

Разрушил еси смертию Твоею смерть, отверзл еси разбойнику рай, отверзи и мне милосердия Твоего двери, в темнице злых страстей заключенному, разруши твердыни греха, яко крепость обдержащия душу мою, Тебе бо согреших, но от Тебе не отступих, в покаянии моляся: помилуй мя, Боже, помилуй мя.

Икос 7

Юность мою всю во гресех иждих, в тине сластей и похотей плоти моея валяяся, омрачихся бо помышлением от младенчества даже и до ныне, никогдаже восхотех сотворити волю Твою святую, весь диаволу последовах всегда, смех и поругание демонов бых. Якоже отсюду, не видя себе спасения, с воплем крепким вопию Ти, Спасителю моему, исповедуя грехи моя:

Иисусе мой, Христе Многомилостиве, кий вид греха не сотворих аз, кое дело демонское не содеях? Кое деяние студное и блудное не с преимуществом и тщанием соверших? Отврати убо лице Tвoe от грех моих. / Иисусе мой, пленным Освободителю, всякий уд окаянныя моея плоти служите и работати греху аз продах, свобода мя от работы сея вражия. / Иисусе мой, Христе Многомилостиве, кто не возрыдает мене окаяннаго? Кто не восплачет мене осужденнаго? Аз бо един лукавое пред Тобою сотворих, превозшед и препобедив вся от века грешники, несравненно прегрешивый и непрощенно, не отвержи убо мене от лица Твоего и Духа Твоего Святаго не отыми от Мене. / Иисусе мой, нагих одеяние, наг и обнажен пред Тобой предстою, одей мя в ризу спасения Твоего. / Иисусе, ада Победителю, победи ад души моея и воскреси мя, умерщвленнаго страстьми.

Кондак 8

Аще беззакония назриши, Господи, Господи, кто постоит? Не постою и аз пред Судом Твоим праведным, прежде Суда осужденный моею совестию. Но понеже человеколюбив еси и ожидаеши человеческаго обращения, се, якоже пречистым Твоим ногам касаяся, из глубины души в покаянии Ти взываю: помилуй мя, Боже, помилуй мя.

Икос 8

Зрю себе, Господи, близ погибели суща, ибо, яко пчелы сот, обышедше обыдоша мя дуси нечистии, и несть мне ослабления, несть мира, несть покоя, несть отрады от стужений и борений лютых, понеже бо мнози борют мя с высоты, мнози возстают на мя, мнози глаголют души моей: «Несть спасения ему в Бозе его». Темже в борении сем находяся, яко безпомощен, взываю Ты о помощи: «Приими оружие и изостри, и возстани в помощь мою»:

Иисусе мой, Христе Многомилостиве, силою Креста Твоего запрети духу гордости и тщеславия, духу ненависти и злопамятования, духу зависти и лести, возмущающим мя. / Иисусе мой, сила моя, силою Креста Tвoeгo запрети духу нечистому, сластолюбивому, злосмрадному, любодейному, блудному, оскверняющему мя. / Иисусе мой, Христе Многомилостиве, силою Креста Tвoего запрети духу уныния, тоски, боязни, духу безнадежия и отчаяния, томящему мя. / Иисусе мой, Христе Многомилостиве, именем Твоим Божественным да угаснет всякое разжжение и движение плоти моея, от диавольскаго действа возбуждаемое. / Иисусе, ада Победителю, победи ад души моея и воскреси мя, умерщвленнаго страстьми.

Кондак 13

Помилуй мя, Святый Боже, яко образ есмь неизреченныя Твоея Славы, аще и язвы ношу прегрешений. Помилуй мя, Святый Крепкий, яко не токмо немощен есмь, но и Твое есмь создание. Помилуй мя, Святый Безсмертный, яко прах есмь и пепел, земля есмь и по глаголу Твоему в землю пойду, от неяже взят бых. Темже прежде, нежели возмеши мене отсюду и отыду, и к тому не буду, прежде конца моего устнам моим не возбраню, во еже взывати в покаянии Ти всегда: помилуй мя, Боже, помилуй мя!

Этот кондак читается трижды, затем первый икос и первый кондак 1.

В рукописи акафиста кондаки и икосы с 9 по 13 отсутствуют.

Господи, спаси мя, погибаю, се кораблец мой бедствует от искушения волн житейских и близ потопления есть. Но Ты, яко Бог Милосердный и сострадательный немощем нашим, властию убо Tвoeю всесильною запрети волнению бедствий, хотящих погрузите мя и низвести во глубину зол, и да будет тишина, яко ветры и море послушают Тебе.

Кондак 1

Возбранный Воеводо и Господи, Святыми Тайнами Твоими Ты ад в душе моей победил еси ныне. Святыми Тайнами Твоими Ты тяготу греховную с совести моея непостижиме ныне снял еси. Се аз, причастник Тайн Твоих недостойный, похвальная восписую Ти тако: Иисусе Сладчайший, Хлебе Живый, Хлебе Небесный, Хлебе Сладчайший, благодарю Тя за Тайны Святыя Твоя!

Икос 1

Ангели Божии, Серафими шестокрилатии, Херувими многоочитии, Престоли огнезрачнии, Господствия, Силы, Власти Божественныя, Начала, Архангели, Ангели вси! Вы лица своя закрываете пред Христовыми Страшными Тайнами, на Чашу с Боготворящей Кровию взираете со страхом великим и трепетом. Аз же, смрадный и грешный, к Чаше сей како дерзнух приступити, вами, огненнии служителие Божии, невидимою силою не отринутый? Сего ради, немолчным песнопениям вашим подражая, Божественному снисхождению удивлялся, Господу моему долготерпеливому благодарно вопию:

Иисусе, Серафимами яко Любы пламенно горящая таинственно зримый, благодарю Тя, яко мене недостойному любве Твоея безмерныя насладитися преизобильно в Пречистых Тайнах ныне даровал еси. / Иисусе, Херувимами, яко Премудрость, выну светящаяся, созерцаемый, благодарю Тя, яко пречистыми Твоими Тайнами ум мой к зрению невидимыя бездны судеб Твоих подвигл еси. / Иисусе, на Престолех огнезрачных странно почиваяй, благодарю Тя, яко во мне непотребнем Святыми Твоими Тайнами, яко на Престоле, почиваеши. / Иисусе, Горними чинами невидимо дориносимый, благодарю Тя, яко мне дольнему носити Тя во мне самом ныне благоволил еси. / Иисусе, всех Воинств Небесных непрестающее удивление, благодарю Тя, яко милости Твоея неисчетныя на мне ныне удивил еси. / Иисусе, Хлебе Живый, Хлебе Сладчайший, благодарю Тя за Тайны Святыя Твоя.

Кондак 2

Вижу аз ныне, яко святыми Тайнами Твоими искуплен есмь от проказы души моея, сего ради, прокаженному самарянину подобясь, падаю ниц при ногу Твоею, Иисусе Искупителю мой, со гласом велиим хвалу Тебе вознося: Аллилуиа.

Икос 2

Разум никийже, ни горний, ни дольний, постигнута может, како Невместимый Небом Небесе Святыми Тайнами Своими вмещается весь в мя. Сего Таинства несказаннаго не постигая, точию Тебе, Господа моего, в себе ныне ощущая, со трепетом взываю Тебе сицевая:

Иисусе, в Вифании в дом Марфы и Марии вшедый, благодарю Тя, яко в дом души моея падшия ныне премилостивно вшел еси. / Иисусе, с Мариею о единем на потребу беседовавый, благодарю Тя, яко со мною ныне сладце и пресладце беседуеши и сею сладкою беседою мене унылаго тепле утешаеши. / Иисусе, Лозо истинная, благодарю Тя, яко мене, розгу дикую и от Тебе отпадшую, паки к Себе привил еси. / Иисусе, Источниче бессмертия, благодарю Тя, яко мене, жаждою греховною исполненнаго, Кровию Твоею Честною ныне напоил еси. / Иисусе, от блудницы лобзанный, благодарю Тя, яко мене блудному в Святых Твоих Тайнах дал еси Тя целовати не точию устнами, но душею и сердцем и всею моею мыслию. / Иисусе, Хлебе Живый, Хлебе Небесный, Хлебе Сладчайший, благодарю Тя за Тайны Святыя Твоя.

Кондак 3

Силою крепкою всего мя исполнил еси, малодушнаго, причастием Тайн Пречистых Твоих, сими тако на враги моя видимыя и невидимыя укрепленный, победно пою Тебе: Аллилуиа.

Икос 3

Имеяй неизследимую милосердия бездну, с мытари и грешники ял и пил еси, и аз ныне, подобный им, Трапезы Твоея Тайныя странно насыщенный, Тебе, моему Благодетелю, умилением восклицаю:

Иисусе, друже мытарей и грешников, благодарю Тя, яко мене грешнаго на Вечери Твоей Тайной, яко друга Твоего, с Собою спосадил еси. / Иисусе, у Закхея мытаря милостивно витавый, благодарю Тя, яко во мне ныне окаянном премилостивне витаеши. / Иисусе, тельца упитаннаго Отцем блудному сыну заклавый (и сие) в притче изобразивый, благодарю Тя, яко мне блудному Самаго Себе в пишу ныне заклал еси. / Иисусе, во Евангелии Твоем рекий: «Не требуют здравии врача, но болящие », благодарю Тя, яко мене, всего боляща, язвами греховными изъязвлена, ныне Тайнами Твоими чудесно исцелил еси. / Иисусе, Пастырю добрый, благодарю Тя, яко мене, овча заблуждшее, ныне на рамена Твоя пречистыя милостивно подъял еси, руками Твоими тепле объял мя еси. / Иисусе, Хлебе Живый, Хлебе Небесный, Хлебе Сладчайший, благодарю Тя за Тайны Святыя Твоя.

Кондак 4

Буря страстей мою душу смущаше, Ты же, Господи, во Святых Твоих Тайнах вшед в мя, яко некогда морю волнующемуся, буре сей душевной запретил еси, глаголя: «Молчи, престани». И се ныне тишина велия, се ныне мир Твой во мне, всякий ум превосходящий. Темже душею умиренною Тебе вопию: Аллилуиа.

Икос 4

Слышу аз, Господи, ныне Пречистыя Твоя Тайны приявший, глас Твой сладчайший в сердце моем, безгласне гласящий всякую истину, всякую правду. Сего ради аз дерзаю тако возглашати Ти:

Иисусе, Учителю Благий, благодарю Тя, яко Тайнами Твоими Пречистыми учиши мя ныне смирению, кротости, любви, состраданию. / Иисусе, Плоть Твою, ко Кресту пригвожденную, в пищу мне давый, благодарю Тя, (яко) сею пищею плоть мою со страстьми и похотьми распинати мя укрепляеши. / Иисусе, со Крестом Твоим на Голгофу изшедый, благодарю Тя, яко мене, причастника Тайн Твоих, за врагов моих молитися призываеши. / Иисусе, Тело Tвoe и Кровь Твою подавый мне во оставление грехов, благодарю Тя, яко сими заповедуеши мне ныне оставляти вся прегрешения, вся обиды ненавидящим и обидящим мя. / Иисусе, Хлебе Живый, Хлебе Небесный, Хлебе Сладчайший, благодарю Тя за Тайны Святью Твоя.

Кондак 5

Боготворящую Кровь Твою Иоанн, ученик Твой возлюбленный, видев из прободеннаго ребра Tвoero истекшую, свидетельствует о сем яве во Евангелии. И аз ныне, видев сей источник безсмертия, во все существо мое истекший, свидетельствую о сем благодарственною песнию: Аллилуиа.

Икос 5

Видевше Тя Боговидцы Божественнии Моисей и Илия, ов убо камением, ов же милотию со страхом и трепетом себе покрываху, аз же окаянный, в себе ныне Тя созерцая, чим покрыюся? Разве токмо безмерною милостию Твоею, тако взывая:

Иисусе, пророками далече провиденный, благодарю Тя, яко зрети Тя близ мя сподобил еси во Святых Твоих Тайнах. / Иисусе, апостолами проповеданный, благодарю Тя, яко за Литургиею Божественною слух мой огласил сею безсмертною Твоею проповедаю: «Придите, ядите, сие есть Тело Мое, еже за вы ломимое во оставление грехов. Пиите от нея вси, сия есть Кровь Моя Новаго Завета, яже за вы и за многая изливаемая во оставление грехов»! / Иисусе, мучениками исповеданный, благодарю Тя, яко и мене пред чашею Твоею сице удостоил еси Тя исповедати: «Верую, Господи, и исповедую, яко Ты еси воистинну Христос, Сын Бога Живаго». / Иисусе, преподобными в молитвах присно призываемый, благодарю Тя, яко и во мне ныне, о чесом молитися не ведущему, Сам молишися воздыхании неизглаголанными, взывая: «Авва Отче!». / Иисусе, святителями и иереями на алтарях святых в Жертве Безкровней приносимый, благодарю Тя, яко мене самаго Алтарем Твоим страннолепно соделал еси. / Иисусе, Хлебе Живый, Хлебе Небесный, Хлебе Сладчайший, благодарю Тя за Тайны Святыя Твоя.

Кондак 6

Проповедую, Господи, Твою благодать, исповедую милость Твою, не таю благодеяний, ихже обильно ныне излиял еси на мя в Святых Твоих Тайнах, пою и вопию Тебе: Аллилуиа.

Икос 6

Возсия во мраце души моея солнце пресветлое от приятия ныне Пречистых Тайн Твоих. Сим светом Небесным озаренный, взываю Ти:

Иисусе, Свете Тихий, благодарю Тя, яко во тьме моей светло светиши, и тьма моя Тя не объят. / Иисусе, Сияние Славы Отчия, благодарю Тя, яко во свете Tвoeм зрю Свет Отца, Свет Духа Святаго. / Иисусе, прострый небо яко кожу, благодарю Тя, яко во мне самом небо таинственно ныне простерл еси. / Иисусе, егоже поет солнце, егоже славит луна, Емуже молятся звезды, благодарю Тя, яко Святыми Тайнами Твоими всего мя подвигл еси пети, славити Тя, молитися Тебе. / Иисусе, Женише Краснейший, в полунощи мудрыми девами со светильники горящими сретаемый, благодарю Тя, яко светильник сердца моего погасший паки возжегл еси. / Иисусе, Хлебе Живый, Хлебе Небесный, Хлебе Сладчайший, благодарю Тя за Тайны Святыя Твоя.

Кондак 7

Хошу, Господи, во Святых Твоих Тайнах Тебе ощутивый, николиже уже от Тебе разлучатися, всегда Тобою наслаждатися, всегда в Тебе пребывати, всегда благодарне Тебе воспевати: Аллилуиа.

Икос 7

Дивны, чудны, непостижимы Тайны Твоя Пречистыя, Господи! Мертв быв душею, ныне же сих причастившися, живу аз всем существом моим! Тебе же, Воскресителю моему, с велиим благодарением вопию:

Иисусе, Лазаря четверодневнаго из гроба воззвавый, благодарю Тя, яко и мене, грехом возсмердевшаго, из гроба моего смрадного ныне воззвал еси. / Иисусе, Источниче приснотекущий вечныя жизни, благодарю Тя, яко мене, нерадением от источника сего бедне отторгшагося, ныне паки с ним чудне возсоединил еси. / Иисусе, поток сый неизъяснимыя сладости, благодарю Тя, яко сладостйю сею вся внутренняя моя ныне наполнил еси. / Иисусе, Небесных чинов присное радование, благодарю Тя, яко Святыми Твоими Тайнами, всего мя, печалию подавленнаго, радости духовной и веселия Божественнаго наполнил еси и тако согбеннаго подъял мя еси. / Иисусе, скорбящих утешение, благодарю Тя, яко мене, скорбию всего соугнетеннаго и стесненнаго, на простор Твой широкий благодатный ныне извел еси. / Иисусе, Хлебе Живый, Хлебе Небесный, Хлебе Сладчайший, благодарю Тя за Тайны Святыя Твоя.

Кондак 8

Странно ныне, Христе, по глаголу Твоему во мне пребываеши, и аз пребываю в Тебе. Странно, якоже Симеон праведный, ныне держу Тя! О Господи, мой Господи! Что есмь аз, яко тако помниши мя! Что есмь аз, яко тако посещавши мя! Таковою славою и честию от Тебе венчанный, благодарне Тебе восклицаю: Аллилуиа.

Икос 8

Весь яко железо раскаленное, огнем проникаяся, ныне проникнут, наполнен, насыщен Тобою, Господи Боже! Ныне познах, яко воистину Твой есмь аз, и сего ради сице воспеваю:

Иисусе, Имже благодать и Истина бысть, благодарю Тя, яко от исполнения Tвоего и аз ныне приях благодать возблагодать. / Иисусе, Уме предвечный, благодарю Тя, яко Святыми Твоими Тайнами ум [мой] горняя мудрствовати возбудил еси. / Иисусе Прекрепкий, благодарю Тя, яко волю мою, грехом разслабленную, дивно ныне укрепил еси. / Иисусе, обновителю душ наших, благодарю Тя, яко мене, безместными деяньми обветшавшаго, чудне ныне обновил еси. / Иисусе, Хлебе Живый, Хлебе Небесный, Хлебе Сладчайший, благодарю Тя за Тайны Святыя Твоя.

Кондак 9

Все естество мое, Господи Иисусе Христе, от посещения Твоего милостивого ныне ликует, празднует, веселится, величает Тя и поет Тебе песнь победную: Аллилуиа.

Икос 9

Витийствовати не может язык человеческий, ниже ангельский, величия Тайн Пречистых Твоих, Господи, како под видом хлеба Телом Твоим Пречистым напитал мя еси, како под видом вина Кровь Твою боготворящую подал еси мне пити. О, Господи Живый, со трепетом Тебе вопию:

Иисусе, творяй чудеса Един, благодарю Тя, яко во мне самом чудо ныне превелие сотворил еси. / Иисусе, исполняющих волю Твою сродниками Твоими именовавый, благодарю Тя, яко мене приятием Тайн Твоих сокровным и сотелесным Тебе ныне соделал еси. / Иисусе, Боже Непостижимый, благодарю Тя, яко мне даровал быти ныне общником Божественнаго естества. / Иисусе, со апостолами Твоими в горнице Сионстей вечерявый, благодарю Тя, яко в душе моей убогой горницу Себе ныне устроил еси. Иисусе, нозе учеником на Вечери умывый, благодарю Тя, яко Тайнами Твоими всего мене от скверны плоти и духа омыл еси. / Иисусе, Хлебе Живый, Хлебе Небесный, Хлебе Сладчайший, благодарю Тя за Тайны Святыя Твоя.

Кондак 10

Спасителю Богу, Тайны Своя Пречистыя в пишу мне даровавшему и сими мя обожившему, пою: Аллилуиа.

Икос 10

Царю Небесный, смиривыйся смирению моему, хвалебную песнь Тебе недостойный аз приношу: Иисусе, егоже Царство – Царство всех веков, и владычество во вся роды и роды, благодарю Тя, яко Царствие Твое внутрь мене ныне устроил еси. / Иисусе Великодаровиты, благодарю Тя, яко правду, мир и радость Царствия Твоего восчувствовати сердцем моим ныне даровал ее и. / Иисусе Всещедрый, благодарю Тя, яко щедроты Твоя, яко дождь благодатный, обильный, на мя ныне в Тайнах Пречистых излиял еси. Иисусе, сокровище на Небеси искати повелевый, благодарю Тя, яко сокровище истиннейшее – Святыя Тайны Твоя – прияти ныне мене сподобил еси. / Иисусе, от волхвов поклонение и дары приявый, благодарю Тя, яко мне дал еси ныне поклонитися Тебе во Святых Твоих Тайнах. Иисусе, Хлебе Живый, Хлебе Небесный, Хлебе Сладчайший, благодарю Тя за Тайны Святыя Твоя.

Кондак 11

Пение таинственное, сокровенное, сладкое, ангельское слышу аз ныне в душе моей, Господи! Поет душа моя, Тобою исцеленная! Поет душа моя, Тобою вознесенная! Поет душа [моя], Тебе приявшая! Поет Тебе песнь: Аллилуиа.

Икос 11

Света Подателю и веков Творче, Господи, во свет Твой мя ныне призвал еси, сыном света страннолепно мя ныне соделал еси. Тебе, Свету мира, светло вопию аз:

Иисусе, одеяйся светом, яко ризою, благодарю Тя, яко ризу Твою светлую мне омраченному ныне подал еси. Иисусе, на горе Фаворстей во Свете преобразивыйся, благодарю Тя, яко всего мя ныне чудно преобразил еси. Иисусе, с Моисеем и Илиею на Фаворе беседовавый, благодарю Тя, яко со мною недостойным сладце и пресладце ныне беседуеши. / Иисусе, облаком пресветлым народ Свой древле водивый, благодарю Тя, яко мене Тайнами Твоими привел ныне в покой Твой желанный. / Иисусе, праведныя Твоя просвещаяй, яко солнце, благодарю Тя, яко мене просветил еси ныне к зрению всего убожества и ничтожества моего пред величеством неприступныя Славы Твоея. / Иисусе, Хлебе Живый, Хлебе Небесный, Хлебе Сладчайший, благодарю Тя за Тайны Святыя Твоя.

Кондак 12

Благодати Пресвятаго Духа, великия, пречудныя, преславныя, непостижимыя, от Даров Святых исходящия, грех ради моих не возбранил еси посетити мя! О Боже мой, благодать сию туне мне давый, приими от Мене песнь сию: Аллилуиа.

Икос 12

Поюще любовь Твою неизмеримую, во Святых Тайнах мне ныне явленную, благодарною мыслию, благодарным же сердцем, благодарными удесы моими души и тела моего поклоняюся, величаю и сице славословлю Тя, Боже мой:

Иисусе, учеником Твоим по Воскресении явивыйся, благодарю Тя, яко и мене окаянному во Святых Тайнах Твоих ныне явился еси. / Иисусе, апостолам Твоим мир преподавый, благодарю Тя, яко всю душу мою миром неизреченным ныне исполнил еси. / Иисусе, Лукою и Клеопою в преломлении хлеба познанный, благодарю Тя, яко и мене недостойному в Святых Твоих Тайнах дал мене познати сладость Твою, милость Твою, снизхождение Твое странне. / Иисусе, Фомою осязанный, благодарю Тя, яко мене маловерному дал ныне осязати Тя в Святых Твоих Тайнах, осязати ребра Твоя, нозе Твои, руце Твои. / Иисусе, Фомою Господом и Богом исповеданный, благодарю Тя, яко вся душа моя, все сердце мое, вся чувства моя, все существо мое, Тобою ныне объятое, с верою несомненною Тебе восклицает: «Господь мой и Бог мой!». / Иисусе, Хлебе Живый, Хлебе Небесный, Хлебе Сладчайший, благодарю Тя за Тайны Святыя Твоя.

Кондак 13

О! Иисусе мой, Хлебе Живый, Хлебе Небесный, Хлебе Сладчайший, Хлебе превожделенне, Тобою питаются Ангели на Небесех преизобильно! Благодарю Тя, яко и аз, странник и пришлец на земли сей, насытился ныне Тобою! О, Пище моя крепкая, Питие неисчерпаемое, Источниче безсмертия и жизни Подателю! О, Пасха Таинственная, Пасха всечестная, Пасха непорочная, Пасха великая, подавай мне истее Тебе причащатися в невечернем дни Царствия Твоего! Подавай мне пети Тебе в веки неисчетныя песнь великую, в Вышних трегубо песнословимую: Аллилуиа, Аллилуия, Аллилуия.

Этот кондак читается трижды, затем первый икос и первый кондак.

По словам монахини Таисии (Арцыбушевой), в 1930 г. Владыка подарил ей акафист своего сочинения (Благодарение по причащении Святых Христовых Тайн) и сделал на нем надпись, в которой были слова: «Для Божественной Литургии и солнце светит, и луна, и звезды тихий свет свой посылают, и земля дает плод свой, да будет Святой Агнец на престоле. Весь смысл жизни сей земной не в чем ином, как в постоянном приготовлении себя к принятию Святых Тайн Христовых в молитвенном подвиге, воздержании, чистосердечном покаянии. В таком приготовлении к Святым Тайнам и в самом причащении Святых Животворящих Тайн Христовых заключается весь смысл жизни христианина. Христианин должен причащаться наивозможно чаще».

Дарил Владыка этот акафист и приезжавшим в нему в ссылку духовным чадам, которые переписали его от руки во многих экземплярах. После кончины сщмч. Серафима акафист хранился у его келейницы, охотно дававшей его просившим разрешения переписать.

Кондак 1

Избранному Царем Славы и освященному крестною смертию Искупителя мира, чудодейственную силу имущему Древу составим, вернии, похвалу и радостно возопиим: Радуйся, Честное Древо, на нем бо совершися таинство всемирнаго искупления.

Икос 1

Ангельския силы, яко Божии служители окрест Креста Господня невидимо предстояще, ужасахуся и поносную на земле смерть Иисусову на Небеси воспеша. Мы же, недостойнии, знамением Честнаго Креста Господня освящающеся, радостно взываем:

Радуйся, Честное Древо, Кровию Богочеловека освященное. Радуйся, Честное Древо, прославившееся послушанием Христовым. / Радуйся, Честное Древо, свободившee нас от ада. / Радуйся, Честное Древо, низложение демонских полков. / Радуйся, Честное Древо, возглашение силы Иисусовой. / Радуйся, Честное Древо, на немже совершися таинство всемирнаго искупления.

Кондак 2

Видяще Тя на Кресте висяща, вся Силы Небесныя лица закрываху, хваляще, поюще Твое величие, Жизнодавче Христе. Мы же на земли со страхом и трепетом пред святым Твоим Крестом предстояще, воспеваем радостно песнь: Аллилуиа.

Икос 2

Разум неразуменный, знанием Честнаго и Животворящаго Креста Господня дивно просвещающийся, со страхом и любовию покланяется святому Древу и непрестанно воспевает сице:

Радуйся, Честный Кресте Христов, мертвыя воскрешающий. Радуйся, Честный Кресте Христов, проявляющий истину. Радуйся, Честный Кресте Христов, на нем бо Иисус волею распяся и гвоздьми бысть пригвожден. / Радуйся, Честный Кресте Христов, Древо всесильное. / Радуйся, Честное Древо, на немже совершися таинство всемирнаго искупления.

Кондак 3

Силою Честнаго Животворящаго Креста Господня бесы низлагаются, очищается нечистое житие наше. Того ради, с верою творя крестное знамение и с благоговением взирающе на изображение Страстей Христовых, поем Богу: Аллилуиа.

Икос 3

Имуще всегда пред очима нашима Крест Святый, осеняющий и освящающий святыя храмы христианския, охраняющий Святыню Господню, со слезами благодарения воспеваем сице:

Радуйся, Честное Древо, источниче благ вечных. Радуйся, Честное Древо, освященное Плотию и Кровию Богочеловека. Радуйся, Честное Древо, Древо чудодейственное. Радуйся, Честное Древо, Древо Треблаженное. / Радуйся, Честное Древо, Древо жизни и спасения. / Радуйся, Честное Древо, на немже совершися таинство всемирнаго искупления.

Кондак 4

Бурю страстей лютых силен угасити святый и всечестный Крест Христов, той бо есть меч духовный, щит верных, оружие всесильное и знамение всепобеждающее. Сего ради и мы недостойнии в веселии взываем Богу: Аллилуиа.

Икос 4

Слышаще учение Христово, веруем в Тайну спасительнаго Искупления, покланяемся Страстем Христовым, лобызаем Крест всесильный и радостно взываем сице:

Радуйся, Честный Кресте Христов, угасивший ярости пламень. / Радуйся, Честный Кресте Христов, поразивший богоотступников. / Радуйся, Честный Кресте Христов, победивший полчища вражия. / Радуйся, Честный Кресте Христов, отсекший главу змиеву. / Радуйся, Честный Кресте Христов, торжество веры и надежды христианския. Радуйся, Честное Древо, на немже совершися таинство всемирнаго искупления.

Кондак 5

Боготочный источник исцелений бысть нам Крест чудодейственный, на нем бо Христос волею пострада нашего ради спасения и Божественныя длани Своя распростер, любовию Отчею с Голгофы объят всю вселенную. Сего ради возопиим Ему, Богу нашему, песнь: Аллилуиа.

Икос 5

Видевше вси язы́цы величие славы Креста Господня и чудодейственную силу изображения и знамения его, увероваша в Святую Живоначальную и нераздельную Троицу и поклонишася Кресту Всечестному; сего ради взываем радостно:

Радуйся, Честное Древо, силою своею на добро нас вразумляющее. / Радуйся, Честное Древо, силою своею нас от болезней исцеляющее. / Радуйся, Честное Древо, славою своею вся вражия силы в бегство обращающее. Радуйся, Честное Древо, славою своею венценосных царей прославляющее. / Радуйся, Честное Древо, величием своим их царство возвышающее. / Радуйся, Честное Древо, на немже совершися таинство всемирнаго искупления.

Кондак 6

Проповедником богоносным явися Честное Древо, из негоже сооружен бысть Крест Христов, Крест четвероконечный: его бо земля чудодейственно израсти нетленно и зело благоухающе. Крест явися покров безпомощным, на немже Христос волею заклан бысть. Ему убо, Спасителю мира, приносим песнь: Аллилуиа.

Икос 6

Возсиял еси, яко солнце правды, Всечестный Кресте Христов, в недрах земли сокровенный, бездушными каменьми яко сокровище сберегаемый, и на радость всему миру обретенный, емуже велегласно возопиим:

Радуйся, Честный Кресте Христов, молитвами и усердием благочестивыя царицы Елены найденный. / Радуйся, Честный Кресте Христов, на высоту патриархом Макарием воздвигнутый для поклонения всем языком. / Радуйся, Честный Кресте Христов, посрамивший идолопоклонство и неверие. Радуйся, Честный Кресте Христов, призвавший хулителей к покаянию. / Радуйся, Честный Кресте Христов, яко ты еси Древо чудодейственное и христоносное. / Радуйся, Честное Древо, на немже совершися таинство всемирнаго искупления.

Кондак 7

Хотяй проявити милосердие Свое Спаситель мира к роду человеческому, волею приемлет поношение, присуждается к позорной смерти, к Кресту пригвождается и крестною смертию смерть попирает, тем убо и мы поем Ему: Аллилуиа.

Икос 7

Дивное зрелище является мирови: Богочеловек распинается, руце и нозе пригвождаются, ребра Его прободаются, страданием и уничижением Его раны греховнаго человечества очищаются, и тако Крест Христов Славы Божия торжество и победы знамение являет; сего ради взываем сице:

Радуйся, Честное Древо, смирения образе. / Радуйся, Честное Древо, апостолов похвало. / Радуйся, Честное Древо, преподобных утверждение. / Радуйся, Честное Древо, мучеников крепосте. / Радуйся, Честное Древо, пустынножителей ограждение. / Радуйся, Честное Древо, на немже совершися таинство всемирнаго искупления.

Кондак 8

Странное чудо, позорный крест превратися в Древо Жизни и Спасения, той бо вразумляет, освящает и от болезней душевных и телесных исцеляет с верою и любовию непрестанно вопиющих Богу: Аллилуиа.

Икос 8

Все греховное житие наше очищается чудодейственным Крестом Спасителя мира, послужившим к примирению Божества с преступным человечеством. Сего ради мы благодарно возопиим:

Радуйся, Честный Кресте Христов, являющий нам любовь и долготерпение Божие. / Радуйся, Честный Кресте Христов, имже совершися призвание языков. / Радуйся, Честный Кресте Христов, явление благости благоуповающим. Радуйся, Честный Кресте Христов, глубино упования душ, любящих Господа. / Радуйся, Честный Кресте Христов, сило и радосте всех христиан. / Радуйся, Честное Древо, на немже совершися таинство всемирнаго искупления.

Кондак 9

Всякая житейская буря сокрушается силою крестных страданий Богочеловека Иисуса, искупивших весь мир, тем убо и мы, чествующе Всечестнаго Креста Господня святое знамение, смиренно приносим Богу любве и славы радостную песнь: Аллилуиа.

Икос 9

Витийствующий язык не может изрещи достойныя похвалы Древу Всечестному, из негоже составлен бысть чудодейственный Крест Христов, благоухающий любовию Страдальца Иисуса Христа. Сего ради и мы, недоумеюще достойно его восхвалити, со слезами вопием:

Радуйся, Честное Древо, торжество Церкве Христовы. Радуйся, Честное Древо, освящение всех путей жизни нашея. / Радуйся, Честное Древо, всем христианом вспоможение. Радуйся, Честное Древо, всех немощных сило и подкрепление. Радуйся, Честное Древо, на немже совершися таинство всемирнаго искупления.

Кондак 10

Спасти хотя мир, длани Своя пречистыя Христос на древо вознесе, и древо преслушания заменися Древом Сыновняго Богу Отцу послушания. Рука невоздержания низверже Адама, руками Богочеловека, на Кресте распростертыми, Отец Небесный соединяет Своею любовию все концы мира. Темже и мы торжественно взываем победную песнь: Аллилуиа.

Икос 10

Стена еси, ограждающая нас от всех бед и напастей, Кресте Всечестный, цельбоносный источниче спасения всем языком, осеняющий всех святым твоим знамением во имя Отца и Сына и Святаго Духа. Сего ради с веселием взываем:

Радуйся, Честный Кресте Христов, Кровию Богочеловека обагренный. / Радуйся, Честный Кресте Христов, цветами райскими благоухающий. / Радуйся, Честный Кресте Христов, лучами веры нас озаряющий. / Радуйся, Честный Кресте Христов, лучами надежды нас подкрепляющий. / Радуйся, Честный Кресте Христов, лучами любви нас согревающий. Радуйся, Честное Древо, на немже совершися таинство всемирнаго искупления.

Кондак 11

Пение похвальное приносим ти, Божественное Животворящее Древо Креста Господня, верных осеняющее и всех нас ограждающее от всякаго врага и супостата. Сего убо ради вопием песнь: Аллилуиа.

Икос 11

Поюще твоя чудеса, всесильный Кресте Христов, с верою и благодарением преклоняем колена сердца нашего, со слезами лобызаем святыя нозе Страдальца, покланяемся Страстем Христовым и тако вопием: Радуйся, Честное Древо, скипетре царей христианских. Радуйся, Честное Древо, державо всей вселенной. Радуйся, Честное Древо, основание благочестия. Радуйся, Честное Древо, водам освящение. Радуйся, Честное Древо, полям и садам плодоносие. / Радуйся, Честное Древо, на немже совершися таинство всемирнаго искупления.

Кондак 12

Благодать Твою всесильную, Господи, являет нам Древо Треблаженное, той бо осияет ум наш, вразумляет и научает пети непрестанно победную песнь: Аллилуиа.

Икос 12

На гору Голгофскую водружен бысть Крест Честный, и Ты, Создателю мира, вознесен был еси на нем, яко в позор мирови. Мы же, вернии, лобызаем пречистыя язвы Твоя, покланяемся Честному Кресту Твоему, сице взывающе:

Радуйся, Честный Кресте Христов, предназначенный Богом для Таинства искупления. / Радуйся, Честный Кресте Христов, яко ты еси радостное знамение нашего спасения. / Радуйся, Честный Кресте Христов, знамение нашего свобождения. / Радуйся, Честный Кресте Христов, страстей наших умерщвление. / Радуйся, Честный Кресте Христов, совести нашея успокоение. / Радуйся, Честное Древо, на немже совершися таинство всемирнаго искупления.

Кондак 13

О Пречистое, Божественное и Животворящее Древо Креста Господня! Чудодейственною твоею силою огради мя грешнаго, осеняющаго с верою чело мое, перси моя и вся составы и уды моя святым твоим знамением, во имя Отца и Сына и Святаго Духа, во славу Святыя Троицы во Единице прославляемыя, благодарственно воспевающаго ти победную песнь: Аллилуиа.

Этот кондак читается трижды, затем первый икос и первый кондак.

Молитва Святому и Животворящему Кресту Господню

Дивный чудодейственною силою четвероконечный и трисоставный Кресте Христов! У подножия твоего в прахе распростертый, поклоняюся ти, Честное Древо, отгоняющее от нас всякое демонское стремление и свобождающее от всех бед, скорбей и напастей. Ты бо еси Древо Жизни, ты бо еси очищение воздухов, освящение святаго храма, ограждение нашего жилища, охранение одра моего, просвещение ума моего, сердца и всех моих чувств. Tвoe святое знамение ограждает мя со дня моего рождения, просвещает мя со дня моего крещения. Оно со мною и на мне во вся дни живота моего, на суше и на водах, оно же сопровождати мя будет до могилы, осенит прах мой. Святое знамение возвестит всей вселенной о часе всеобщаго воскресения мертвых и последняго страшнаго и праведнаго Суда Божия.

О, Кресте всечестный, осенением твоим вразуми, научи и благослови мя недостойнаго, всегда несомненно верующаго в непобедимую силу твою, огради мя от всякаго врага и супостата и исцели вся недуги моя, душевныя и телесныя. Господи Иисусе Христе, Сыне Божий, силою Честнаго и Животворящаго Креста Твоего помилуй и спаси мя грешнаго. Аминь.

О, Пречудный свете Михаиле, Небеснаго Воинства безплотный Архистратиже! В высоте недоведомой, среди светлостей ангельских, яко солнце сияющий, верный служитель тайны Троических судеб, неусыпный хранитель мира христианскаго! Сохрани мя благодушна и богопокорна до последняго издыхания моего среди тяжких искушений в суетной и многомятежной жизни. Не остави безпомощна во всех путех живота моего и даруй помощь сохранити память о покаянии, о последнем смертном часе, о Страшном Суде и вечных муках, ожидающих нераскаянных грешников во аде, и о блаженстве праведных во Царствии Небесном. В час кончины моей прииди с ликом Ангелов на исход души моея.

Праведная Фамарь возжигает в сердце любовь к Сладчайшему Господу Иисусу Христу.

Кондак 1

Избранной от рода Давидова и званием сестры по плоти Господа Иисуса Христа почтенной, и во след Его с любовию текшей, и от всего сердца Ему послужившей, Фамари блаженней, сице со умилением ныне вопием: Радуйся, праведная жено Фамаре, мироносице и сестро Господня.

Икос 1

Ангела, яко молнию, на камени сидяща, видела еси, святая и праведная жено Фамаре, егда с другими женами-мироносицами утру глубоку предстала гробу Живодавца. Сeгo ради похвальная вопием ти сице:

Радуйся, видением Ангела обрадованная. / Радуйся, сладчайшею вестию о Воскресении Христовом утешенная. Радуйся, утешение сие, яко миро благовонное, апостолом принесшая. / Радуйся, яко крепко веровати Воскресению Христову всех нас научающая. / Радуйся, праведная жено Фамаре, мироносице и сестро Господня.

Кондак 2

Видя издалече твое жительство, Фамаре блаженная, сестру тя прият Христос, премудрый Провидец, Емуже со ангельскими лики зовеши: Аллилуиа.

Икос 2

Разум изумевает от премножества любве Божия, на тя излиянней, Фамаре праведная: како Бога присносущнаго, братом своим по плоти имела еси; како беседовала Ему, егоже непрестанно славословят Ангели; како зрела лице Его, на Негоже многоочитии серафими зрети не могут? О судеб! О чудес Божиих! Все сие на тебе видяще, со страхом зовем ти:

Радуйся, Господу Иисусу тепле споследствовавшая. Радуйся, глаголы жизни вечныя из уст Его пречистых слышавшая. / Радуйся, доброту лица Его выну неизреченную созерцавшая. / Радуйся, от Господа Самаго тайнам Царствия Небеснаго наученная. / Радуйся, праведная жено Фамаре, мироносице и сестро Господня.

Кондак 3

Сила Божественная во учении Христовом действоваше, иудеи же ожесточеннии блажняхуся о Нем, в ослеплении своем сице друг друга вопрошая: «Не Сей ли есть тектонов сын? Не Мати ли Его нарицается Мариам, и братия, и сестры Его не вся ли в нас суть: откуду убо Сему сия вся?» Мы же купно с сестрою Господнею Фамарию славною исповедуем Христа, Божию Силу и Божию Премудрость, благодарно зовуще Ему: Аллилуиа.

Икос 3

Радуйся, от Царицы Небесной дщерью именованная. Радуйся, Царицу Небесную материю своею звавшая.Радуйся, на объятиях Ея Превечнаго Младенца держимаго видевшая. / Радуйся, Питателя жизни нашея, от Пречистыя Девы питаемаго, сладце созерцавшая. / Радуйся, праведная жено Фамаре, мироносице и сестро Господня.

Кондак 4

Буря помышлений сумнительных смущаше некогда отца твоего, целомудреннаго Иосифа, егда узре Деву Пречистую, во чреве имущую, и бракоокрадованную помышляя Ю, уведев же зачатие Ея от Духа Свята, рече: Аллилуиа.

Икос 4

«Слыши, Дщи, и виждь, и приклони ухо Tвoe, и возжелает Царь доброты Твоея», – тако возопи иногда Давид, праотец твой, Деву Марию предзря. Мы же вопием ти, Фамаре блаженная:

Радуйся, Иосифа Обручника дщи преславная. / Радуйся, Семейства Святаго отрасль пречестная. / Радуйся, святую Саломию, матерь Иоанна Богослова, сестрою имевшая. Радуйся, возлюбленнаго ученика и наперсника Христова сроднице ближайшая. / Радуйся, праведная жено Фамаре, мироносице и сестро Господня.

Кондак 5

Семизвездие святое, семизвездие пречудное, семизвездие пресветлое, узрим вернии на тверди родства Иисусова, четверицу апостолов, братьев Господних по плоти: Иакова, Иосию, Иуду, Симона и троицу святых жен-мироносиц, сестер Господних по плоти: Есфирь, Фамарь и Саломию, с ними Христу вопиим: Аллилуиа.

Икос 5

Видевшую Господа нашего Иисуса Христа лицем к лицу, Фамарь блаженную песньми тако почтим:

Радуйся, яко мнози пророцы восхотеша видети, яже ты видела еси, и не видеша. / Радуйся, яко мнози царие вожделеша слышати, яже ты слышала еси, и не слышаша. Радуйся, Солнцем правды осиянная. / Радуйся, светом Христовым озаренная. / Радуйся, праведная жено Фамаре, мироносице и сестро Господня.

Кондак 6

Проповедницы богоноснии Воскресения Христова явишася праведнии жены-мироносицы, с Фамарию блаженною, апостолом глаголаху: «Христос Воскресе! Пойте Ему: Аллилуиа».

Икос 6

«Возсия паки Солнце праведное, зашедшее иногда во Гроб», в радости вопияла еси с другими женами мироносицами, Фамаре праведная, воскресшаго видевши Господа. Мы же песнь воспеваем тебе сицевую:

Радуйся, лик мироносиц, яко сестра Иисусова, собою украсившая. / Радуйся, на Небесех с ними присно веселящаяся. Радуйся, со ангельскими Силами вечно ликующая. Радуйся, со всеми святыми о нас грешных молящаяся. Радуйся, праведная жено Фамаре, мироносице и сестро Господня.

Кондак 7

Хотя спасти род человеческий, Господь Иисус Христос, нося Крест Свой, изыде на место, глаголемое Лобное. Ты же, Фамаре блаженная, со иными дщерьми Иерусалимскими, со слезами многими, во след Его текла еси. Обращься же Иисус рече: «Дщери Иерусалимския, не плачитеся обо Мне, обаче себе плачите и чад ваших». О, даруй и нам, твоими молитвами, жено святая, плач покаянный, да плачем себе о гресех наших, да прощение от Господа получивше, вопием Ему: Аллилуиа.

Икос 7

Новое чудо и боголепное сподобилася еси зрети, Фамаре мироносице: камень отваленный; гроб истощенный; тлю, Животом попранную; ад низверженный. Сего ради воспоим ти песнь хвалебную:

Радуйся, чудес Божиих свидетельнице верная. / Радуйся, премногих исцелений Иисусовых зрительнице блаженная. Радуйся, милосердием неизреченным Господа к людям умиленная. / Радуйся, светлаго Воскресения Христова провозвестнице преславная. / Радуйся, праведная жено Фамаре, мироносице и сестро Господня.

Кондак 8

Странна Бога, плотию страдавша, и погребенна, и воскресшаго в третий день по Писанию, исповедуем, славословим, благодарим, вопиюще Ему с Фамарию песнь ангельскую: Аллилуиа.

Икос 8

Весь трепета священнаго и радости неизреченныя исполнися отец твой, приснопамятный Иосиф Обручник, егда в Вифлееме таинство славное и преславное виде: небо – вертеп, престол херувимский – Деву, ясли – вместилище, в нихже возлеже невместимый Христос Бог! Таковаго блаженнаго отца имевшая, приими от нас песнь сицевую:

Радуйся, дщи благословенная. / Радуйся, Богом избранная. Радуйся, благословение семейства благословеннаго на себе присно носившая. / Радуйся, Божие благословение тебе с верою молящимся низпосылающая. / Радуйся, праведная жено Фамаре, мироносице и сестро Господня.

Кондак 9

Всякия утоли болезни, печали и скорби наша, Христом Воскресшим утешенная мироносице праведная, да с тобою зовем Ему: Аллилуиа.

Икос 9

Вещавшая с иными мироносицами апостолом радоватися о Воскресении Христовом, исполни радости сея и нас всех, воспевающих тя:

Радуйся, пред Престолом Божиим призывающих тя, поминающая. / Радуйся, дерзновение велие пред Господом Иисусом имущая. / Радуйся, о наших гресех милосердие Его умоляющая. / Радуйся, к любве Его сладчайшей всех нас зовущая. / Радуйся, праведная жено Фамаре, мироносице и сестро Господня.

Кондак 10

Спасение нам, в бездне греховней погибающим, испроси у Спасителя Бога, Фамаре праведная, да с тобою вопием Ему: Аллилуиа.

Икос 10

Стена твердая буди нам, жено святая, от враг видимых и невидимых люте напаствуемым, да зовем ти сице:

Радуйся, утешительнице душ скорбящих. / Радуйся, умирительнице сердец смятенных. / Радуйся, крепосте малодушных. / Радуйся, бодросте унылых. / Радуйся, праведная жено Фамаре, мироносице и сестро Господня.

Кондак 11

Пение ангельское в горних высотах на Небесех ныне слышиши, мироносице праведная, еще на земли прежде, при Гробе Господнем сподобившаяся видети Ангелов, и с ними воспевати Воскресшему Христу: Аллилуиа.

Икос 11

Светоприемную свешу, Деву Пречистую, у Креста Сына Своего предстоящую, видела еси, Фамаре блаженная, егда с иными женами-мироносицами на Голгофе была еси и из уст Пренепорочной глаголы сия горькия слышала еси: «Увы Мне, Чадо Мое, увы Мне, Свете Мой и Утробо Моя возлюбленная. Симеоном бо предреченное слово днесь собысться: оружие сердце Мое пройде! » Сего ради во умилении сердечном взываем ти:

Радуйся, Матери Божией в скорби Ея Голгофской спострадавшая. Радуйся, от оставленнаго всеми Господа Иисуса Христа никакоже отступившая. / Радуйся, словесам Господним, со Креста глаголанным, со слезами внимавшая. / Радуйся, молитву покаянную разбойника благоразумнаго: «Помяни мя, Господи, -егда приидеши во Царствии Твоем», – слышавшая. / Радуйся, праведная жено Фамаре, мироносице и сестро Господня.

Кондак 12

Благодать Господню велию ощути в сердце своем сродник твой Клеопа апостол, егда с другим вкупе апостолом Лукою во Еммаус шествоваху, и Воскресший Господь идяше и беседоваше с ними и посем познан бысть йма в преломлении хлеба. Тогда возописта оба друг другу, глаголюще: «Не сердце ли наю горя бе в наю, егда глаголаше нама на пути и егда сказоваше нама писания?» Да ощутит и наше сердце Сладчайшаго Господа Иисуса молитвами твоими, Фамаре славная, да от избытка сердца глаголят и наша уста Ему победную песнь: Аллилуиа.

Икос 12

Поюще родство твое по плоти с Господом Иисусом Христом, восхваляем и любовь твою пламенную, еюже миро свое благовонное растворила еси, на Гроб Христа принесши, и взываем ти сице:

Радуйся, с мудрыми девами светильник свой елеем любве возжегшая. / Радуйся, Христа от Гроба, яко жениха, от чертога исходяща, сретившая. / Радуйся, со Христом на брак небесный вшедшая. / Радуйся, сладость пребывания во Христе Иисусе присно вкушающая. / Радуйся, праведная жено Фамаре, мироносице и сестро Господня.

Кондак 13

О, святая и праведная жено Фамаре, мироносице и сестро Господня, миро пламенныя любве своея Христу принесшая! Даруй и нам возлюбити Сладчайшаго Господа Иисуса Христа от всего сердца нашero, да во Христе Иисусе и друг друга возлюбим, в любви и согласии поживем, да едиными усты и единым сердцем славим и воспеваем пречестное и великолепое Имя Господне, поюще Ему: Аллилуиа, Аллилуиа, Аллилуиа!

Сей кондак глаголи 3, пасем паки икос 1.

О, святая и праведная жено, мироносице Фамаре блаженная: услыши нас, в час сей молящихся тебе! Ты сподобилася еси быти сродницею, сестрою Господнею по плоти: даруй и нам твоими молитвами, да и мы духом нашим и сердцем нашим тако сроднимся с Господом Иисусом Христом, яко пребывати Ему в нас присно, и нам в Нем такожде присно пребывати. Да насыщаемся, да исполняемся и преисполняемся непрестанно сладостию Иисусовою, Его благодатию, Его светом, Его миром глубочайшим, Его жизнию вечною, яко розга преисполняется соком от лозы своея. О, сроднице Господня избранная, твоими молитвами даруй нам тако сроднитися с Господом Иисусом Христом, тако возлюбити Его, нас ради распятаго, страдавшаго, погребеннаго и воскресшаго, яко да кроме Сладчайшаго Иисуса никоеяже да восхощем сладости, никоеяже возжелаем красоты, никоеяже да ищем утехи, или славы, или чести мира сего. Но вся сия ради Господа Иисуса Христа в сор и прах да вменяются нами, да Его Единаго приобрящем, ниже самая смерть да возможет нас разлучити от любве Его! Да тако на земли с Господом нашим Иисусом Христом сроднившеся, и на Небесех лицем к лицу Его узрим и воспоим и прославим со Безначальным Его Отцем, и Пресвятым и Благим и Животворящим Его Духом во веки веков. Аминь.

Тропарь

Сестра по плоти Господа Иисуса была еси, Фамаре блаженная; во след Его яко мироносица с любовию теплою текла еси. Тем же молим тя: огнем Христовы любве и наша сердца возгрей, да в путь заповедей Господних усердно течем.

Величание

Величаем тя, Фамаре блаженная, жено-мироносице праведная, и чтим святую память твою, ты бо миро благовонное на гроб Жизнодавца принесла еси.

Акафист св. Фамари блаженной (обладающей, по церковному преданию, особой благодатью споспешествовать возжиганию в сердце любви к Сладчайшему Господу Иисусу Христу) был написан для сестер и схиигумении Серафимо-Знаменского монастыря матушки Фамари (Марджановой). Он имеет такое надписание рукой сщмч. Серафима:

«Четыри сыны мужеска полу роди Иосиф: Иакова, глаголемаго малаго, и Иосию, Симона и Иуду, и дщери три: Есфирь, Фамарь и Саломию Заведеову (Синаксарь в неделю 3-ю по Пасце).

«Радуйся» в акафисте повторяется пять раз по числу пяти язв Господа Иисуса Христа, распятаго на Кресте, Ему же с Пресвятою Девою Мариею и с прочими женами мироносицами предстояла и праведная Фамарь, сии язвы Христовы видевшая.

†

Сей акафист сестре Господней по плоти Фамари блаженней составлен в 1919 году в киновии, в Неделю жен мироносиц, и вручается его составителем сестрам Серафимо-Знаменского скита с горячим молитвенным пожеланием, да будет каждая из них сестрою, по духу, Сладчайшаго Господа Иисуса Христа. А будете вы сестрами Господа Иисуса Христа тогда, когда будете любить друг друга, ибо в сем-то и заключается вся воля Божия, выраженная в Законе Божием, как говорит Апостол: «Весь Закон в одном слове заключается: люби ближняго твоего, как самого себя» (Гал. 5:14).

Итак любите, сестры, друг друга – чрез взаимную любовь станете вы исполнительницами воли Отца Небеснаго; и как таковых Господь Иисус Христос каждую из вас наречет сестрою Своею, по реченному Им в Евангелии: «Иже бо аще сотворит волю Отца Моего, Иже есть на небесех, той брат Мой, сестра, и мати Ми есть» (Мф. 12:50)».

У сего канона краестрочие в ирмосах и тропарях: «Чистая, чистоту даждь ми, боримому тяжко страстьми».

Высшей Небес и Чистейшей светлостей солнечных, Всемилостивейшей Владычице, Пресвятей Госпоже, Пречистей Деве Марии, Матери Божией, от человека кающагося, но не исправляющагося, боримаго страстьми и побороти страсти никак не могущаго, присно побеждаема, и отсюду беднаго, унывающаго и близ отчаяния сущаго.

Глас 3-й

Песнь 1

Ирмос: Чудо чудес, Благодатная чудо сотвори на непотребнем рабе Твоем, паче надежды спаси мя, треволнением отчаяния обуреваема, в покаянии же от души вопиющаго Ти и глаголюща: милостива буди мне, грешнику.

Пресвятая Богородице, прости, помози, возстави и спаси мя, грешника!

И что реку, и что возглаголю Тебе, Мати Пречистая Слова Превечнаго? Кую песнь воспою Тебе, Дево Всепетая? Связаны грехом имею устне, и песнь моя умолче! И слова несть у мене. Безответен, бездерзновенен, молчай пред Тобою предстою и точию гласом мытаревым Ты вопию: милостива буди мне, грешнику!

Пресвятая Богородице, прости, помози, возстави и спаси мя, грешника!

Согреших, Согреших, Нескверная, сосуду плоти моея люто досадих, помышленьми скверными ум оскверних, вожделеньми нечистыми сердце растлих, душу мою всю погубих, но в покаянии мя приими, согрешивша прости, вопиющаго Ти милостива буди мне, грешнику!

Слава: Ты боримых еси помоще, Владычице, падших возстание, крепость всех изнемогающих, се изнемогох аз в конец, укрепи мя, падшаго! Се от юности моея мнози борют мя страсти, помози ми, в покаянии Тебе вопиющему: милостива буди мне, грешнику!

И ныне: Аще зело грешен есмь, Дево Пресвятая, аще и всегда неисправлен пребываю, всегда побежден бываю, обаче спастися желаю, темже и мытаревым гласом Тебе от сердца взываю: милостива буди мне, грешнику!

Песнь 3

Ирмос: Яко камень краеугольный, Христа в ложеснах Твоих носила еси, Богородице: на камени Христовых заповедей колеблемое страстьми сердце мое утверди, несть бо у мене иныя помощи, ни иныя надежды, разве Тебе, Владычице!

Пресвятая Богородице, прости, помози, возстави и спаси мя, грешника!

Человек есмь, Богородительнице, и человек немощный, слабый: волю имый, яко трость присно ветром колеблемую; темже на всякий час согрешаю, возстаю и паки падаю: исправление обещаю и обет свой здеже нарушаю, спасаюся и паки погибаю. Но помози ми, несть бо у мене иныя помощи, ни иныя надежды, разве Тебе, Владычице!

Пресвятая Богородице, прости, помози, возстави и спаси мя, грешника!

И мене не остави, Милосердная Мати, яко не оставила еси многих подобных мне блудников, блудниц и грешников, к чистой жизни сих призвавши. Исправление им низпославши и мя, неисправимаго грешника, исправи, помилуй, спаси. Несть бо у мене иныя помощи, ни иныя надежды, разве Тебе, Владычице!

Слава: Скоропослушницею благоволила еси нарещися, Дево Обетованная, да никтоже из подобных мне закоснелых грешников в спасении своем отчаявается. О, Скоропослушнице! Пришел есть конец мой, прииде час погибели моея, отчаянием обдержимь весь от содеянных мною лютых. На помощь мою ускори: несть бо у мене иныя помощи, ни иныя надежды, разве Тебе, Владычице!

И ныне: Темная туча бесовская ныне душу мою покрывает, света Христова лишает, светильник сердца моего угашает... Неугасимая Лампадо, тьму мою просвети, тучи разгони, светильник мой возжги. Несть бо у мене иныя помощи, ни иныя надежды, разве Тебе, Владычице!

Песнь 4

Ирмос: О, Всепетая Мати, праотцы прообразованная, пророки предзримая, Давидом в Псалтири воспетая, слава Тебе, Препрославленная!

Пресвятая Богородице, прости, помози, возстави и спаси мя, грешника!

Твой образ, Владычице, с Предвечным на руку Твоею держимым Младенцем, пред очима моима имея всегда, взирати на лик Твой чистейший, Ангелом сладостный, человеком спасительный, не смею, страшуся, стыждуся... Како убо воззрю на Тя, Чистейшая светлостей солнечных? Аз же нечист есмь, продан под грех, скверен, пресквернен отовсюду. Но не возгнушайся моея смрадности, песнь Тебе приносящаго: слава Тебе, Препрославленная!

Пресвятая Богородице, прости, помози, возстави и спаси мя, грешника!

Уже терпети не могу демонскаго стреляния. Се разжженыя стрелы лукаваго сердце мое уязвиша, глубины водныя до души моея проидоша, огнем похоти все тело мое воспалиша; несть бо во мне целаго места, весь в язвах есмь, весь в струпиях греховных гноящихся. Исцели мя, Целительнице благая, да и аз, исцеленный, пою Тебе: слава Тебе, Препрославленная!

Слава: Дево Пречистая, Красотою Девства Твоего горния умы изумившая, Небеса возвеселившая, всю землю просветившая, молю Тя: от солнца Твоея красоты безобразию сердца моего единый луч удели, огнем Твоея чистоты нечистоту мою всю потреби, да чистым сердцем, очищенными усты воспою Тя: слава Тебе, Препрославленная!

И ныне: Анна неплодная изволением Божиим Тя, Дево Пресвятая, яко райскую ветвь возрасти. Ты же, Благодатная, Плод Благословенный, Христа, на спасение грешником вельми израстила еси. От сего Плода во Святых Тайнах вкушая, и аз, гладом греховным истаяваемый, дивно насыщаюся, разслабленный укрепляюся, темный просвещаюся, прокаженный очищаюся. Сего ради со благодарением зову Ти, Богородице: слава Тебе, Препрославленная!

Песнь 5

Ирмос: Живоносный источник вем Тя, Пресвятая Дево, воды целъбоносныя присно источающий, темже молюся: Ты изсохшему греховным пламенем сердцу моему каплю от вод животочных укани [Источи, буквально: капни.], да зноя страстей избежав, Архангельский глас вопию Ти: радуйся, Благодатная!

Пресвятая Богородице, прости, помози, возстави и спаси мя, грешника!

Диавол, враг прелукавый, лютыми напастьми томит мя, на кийждо час мне стужает и борет воспоминаниями нелепыми, помышлениями неподобными, и от Бога мой ум разлучает: зельно мне всегда досаждает, и неудержимым стремлением ко греху мя влечет. Сию жалобу Тебе, Помощнице боримых, аз приношу на борющаго мя, победы прошу: да не возможет враг надо мною, да не возьмет и мя погубит. Помози ми, Архангельский глас Тебе возношу: радуйся, Благодатная!

Пресвятая Богородице, прости, помози, возстави и спаси мя, грешника!

Мати Всемогущаго, десницею Твоею всемощною вражию бурю страстей в душе моей укроти, свирепыя волны всякия злобы, ненависти, вражды во мне угаси, да Архангельский глас в тишине вопию Тебе: радуйся, Благодатная!

Слава: Исполнихся грехопадений многих и лютых, тяготою слякохся безчинных страстей в ведении и неведении, в разуме и неразумии, в нощи и во дни согреших, в кал греховный впадох, вышнюю красоту погубих: се грехи за мною, смерть предо мною, Судия надо мною. О, Владычице, помози, еще потерпи. Твоею милостию мене обрадуй, обрадованная гласом Архангельским: радуйся, Благодатная!

И ныне: Блуднаго беса, всегда ум и сердце мое оскверняющаго, волю мою насилующаго, тело мое разжжением похотным разжигающа, срамом срамляюща, далече от Мене отжени, Возбранная Воеводо, огненным мечем молниеносныя молитвы Твоея, да Архангельский глас в чистоте вопию Тебе, Чистая: радуйся, Благодатная!

Песнь 6

Ирмос: Обыде мя последняя бездна, потопы страстей и воды искушений до души моея внидоша. И люто погружаюся согрешеньми моими, и несть избавляли; подаждь убо и мне, Госпоже, руку помощи, якоже Петрови Сын Твой, и из смертоносныя глубины возведи мя.

Пресвятая Богородице, прости, помози,возстави и спаси мя, грешника!

Раб есмь греха, Мати Христова, пленных душ Свободительнице, темже с болезнию сердца взываю Тебе: свобода мя от работы сея греховныя, горькия, нуждныя, постыдныя и из смертоносныя глубины возведи мя.

Пресвятая Богородице, прости, помози, возстави и спаси мя, грешника!

Исповедую Тебе грехи моя, Дево, лицу Твоему студ представляю: весь бо от безмерных страстей содержуся, вся чувства моя уязвих. Нечистым воззрением олюбодействовах очи, осудительных речей слушанием окалях ушеса, словесы праздными язык оскверних и вся имею студна, нечиста, мерзка и страшуся, да не пояст мене меч ярости Господни, но кающагося не презри мене, Благая, и из смертоносныя глубины возведи мя.

Слава: Молюся Тебе, Владычице, с болезнию и плачем сердца колена преклонь пред Тобою, и из глубины души моея стенания моя Тебе приношу; каюся, рыдаю, взываю: услыши глас мой болезненный, Дево, облегчи тяготу мою, устави болезнь мою нестерпимую и из смертоносныя глубины возведи мя!

И ныне: О, колика туга обдержит мя от стреляний бесовских, сколь велика скорбь, и стенание, и безнадежие, и отчаяние, и уныние: к Тебе взираю в беде моей. Заступнице моя усердная, Твоей помощи прошу: из смертоносныя глубины возведи мя!

Песнь 7

Ирмос: Моих страстей терния пред очи Твои предлагаю, Владычице, с несумненною верою, яко вся сия потребиши: Ты бо огнезрачный Престол еси, огненных чинов Творца на руку Твоею неопально носившая.

Пресвятая Богородице, прости, помози,возстави и спаси мя, грешника!

Угасе, Пречистая, от бури страстныя огнь молитвы в сердце моем, и се, хлад лютый постиже мя, окаяннаго. Возжги, молюся, во мне огнь молитвенный, спасительный, Дево Святая, да от мучительнаго онаго хлада согреюся. Ты бо огнезрачный Престол еси, огненных чинов Творца на руку Твоею неопально носившая.

Пресвятая Богородице, прости, помози, возстави и спаси мя, грешника!

Тело мое, храм Духа Всесвятаго, люто аз оскверних, Пречистая. Но обнови сей храм, подыми, возстави, очисти огненным очищением огнеобразной благодати Божия, да чистым жилищем Божиим будет. Ты бо огнезрачный Престол еси, огненных чинов Творца на руку Твоею неопально носившая.

Слава: Явятся егда мысли, намерения, дела сокровенная коегождо яве, тогда, Всемилостивая Богородице, Ты мя оправдай, защити, заступи, спаси и вечнаго неугасимого огня исхити. Ты бо огнезрачный Престол еси, огненных чинов Творца на руку Твоею неопально носившая.

И ныне: Жизнь Ипостасную родила еси, Владычице! Темже всего мя изгнивша от гноя страстей, смердящаго мертвеца оживи и камень нечувствия, на могиле сердца моего лежащий, огнем Твоим растопи. Ты бо огнезрачный Престол еси, огненных чинов Творца на руку Твоею неопально носившая.

Песнь 8

Ирмос: К Тебе, Пречистей Деве, Заступнице усердной, в болезни моей аз прибегаю, в скорби моей сице взываю: Владычице, помози, от страстей погибаю!

Пресвятая Богородице, прости, помози, возстави и спаси мя, грешника!

Обышедше обыдоша мя скорби многая, напасти злыя нападоша на мя, болезни же лютыя и греси тяжцыи одержаша мя, окаяннаго. Темже, Пречистая, в горести души моея сице Тя молю, Владычице: помози, от страстей погибаю!

Пресвятая Богородице, прости, помози, возстпави и спаси мя, грешника!

Соодолеваемь присно законом плоти, безмерная делаю беззакония: всестрастный, всегда оскверняюся, страстьми безчествуюся, студа безмернаго исполняюся и не смею возвести око мое к Тебе, Чистая, точию взываю, Владычице: помози, от страстей погибаю!

Слава: Тя знаю, Дево Пресвятая, Взыскание погибших: взыщи мя, в непроходимых дебрях греха блуждающаго и в безсилии своем к Тебе со слезами многими взывающаго: Владычице, помози, от страстей погибаю!

И ныне: Разреши мя, Разрешительнице клятвы Адама, от уз и пут железных, имиже по руку и ногу скова мя всего страсть моя неисцельная; разреши, свобода, с воплем крепким Тя умоляю: Владычице, спаси, от страстей погибаю!

Песнь 9

Ирмос: Ангели немолчно в вышних славят Тя, Херувим Славнейшую, Небеса небес превозносят Тя, Небеса Творца на руках Своих носившую. И аз Тя, Заступницу мою, Милосердную Матерь, бренными усты ублажаю, хвалю, благодарю, величаю.

Пресвятая Богородице, прости, помози, возстави и спаси мя, грешника!

Согрешающаго видела еси мя, Всевидящее Око родившая, но и кающагося ныне зриши мя, и се верую, яко грех мой простиши, сего ради Тя, Заступницу мою, Милосердную Матерь, бренными усты ублажаю, хвалю, благодарю, величаю.

Пресвятая Богородице, прости, помози,возстави и спаси мя, грешника!

Тьма преходит, егда солнце восходит; се верую, яко тьма души моея вскоре разсеется, егда Ты, Владычице, Заря Божия, в сердце моем Свой свет возсияеши, да и аз Тя, Заступницу мою, Милосердную Матерь, бренными усты ублажаю, хвалю, благодарю, величаю.

Слава: Мир Сына Твоего глубочайший, тишайший и всякий ум превосходящий, подаеши Ты, Владычице, душе, измученной борьбою и в веселии своем к Тебе прибегающей, и борьбу утишаеши, тишину в сердце водворяеши. За сей мир, за сию тишину аз Тя, Заступницу мою, Милосердную Матерь, бренными усты ублажаю, хвалю, пою, величаю.

И ныне: И ныне, и присно, и во веки веков, ради всех Твоих благодеяний, милостей, щедрот, бывших на мне, ради покрова Твоего небеснаго, от юности моея давно покрывающаго мя от конечныя погибели греховныя, Тя, Заступницу мою, Милосердную Матерь, бренными усты ублажаю, хвалю, пою, величаю.

Богу нашему слава!

Глас 8-й

Песнь 1

Ирмос: Воду прошед яко сушу и египетского зла избежав, израильтянин вопияше: Избавителю и Богу нашему поим.

Пресвятая Богородице, спаси нас!

Ты еси, Владычице, неоскудный источник милости, сего ради молю Тя, хотя каплю едину милости Твоея укани в изсохшее грехом сердце мое.

Пресвятая Богородице, спаси нас!

Пристанище сущим в бедах Ты, Владычице; от бед всяческих избави мя, молю Тя.

Слава: В молитвах неусыпающая Богородице, облегчение Твоя молитва есть всем, грехами обремененным. Облегчи бремя тяжкое, греховное души моея страстныя, молюся.

И ныне: Пречистая, Преблагословенная, вем Тя страстей отгнание, грехов разрешение и всяческих болезней исцеление, темже и припадаю Tи, моляся: болезни моя исцели, грехи прости, страсти моя вся искорени.

Песнь 3

Ирмос: Небесного круга Верхотворче Господи и Церкве Зиждителю, Ты мене утверди в любви Твоей, желаний краю, верных утверждение, едине Человеколюбче.

Пресвятая Богородице, спаси нас!

Ты еси, Пречистая, земнородным всем помощь, покров и прибежище. О Владычице, темже и молю Тя: покрый, соблюди мя от всякаго зла и помощь Твою низпосли ми, безпомощному грешнику.

Пресвятая Богородице, спаси нас!

Мнози мытари, блудницы и грешницы от уз страстей своих и прегрешений свободу улучиша Тобою, Богородице Дево. Разреши, молю Тя, Пречистая, узы и моих безчисленных согрешений.

Слава: Воистину Тя Матерь Божию и Деву Пренепорочную православно исповедую, Богоневесто, Зиждителя бо и Господа родила еси, Девою пребыла еси едина. От дел ми несть спасения, Владычице, вместо дел вмени мне исповедание сие православное.

И ныне:Тишина Ты еси, Богородице, Божественная, беззаконий моих лютыя потоки и сердца моего свирепыя бури и волны тишиною Твоею укроти, утиши, Преблагословенная.

Песнь 4

Ирмос: Услышах, Господи, смотрения Твоего таинство, разумех дела Твоя и прославих Твое Божество.

Пресвятая Богородице, спаси нас!

Честнейшая Херувим и Славнейшая без сравнения Серафим, много может ходатайство Tвoe пред Сыном Твоим и Богом: темже молю Тя, да ходатаиствуеши к Рождшемуся от Тебе о мне, непотребном рабе Твоем. О Владычице мира, буди мне ходатаица.

Пpecвятая Богородице, спаси нас!

Храм Тя Божий вем, Богородице, невместимаго Бога вместивый, сего ради молю Тя: бывша мя вертеп разбойников и всякой нечистоты вместилище, храм Божий соделай.

Слава: Одевающаго небо облаки, безсеменно рождшая Мати браконеискусная, ризу мне подаждь светлу, тьмою страстей омраченному.

И ныне: «Радуйся, Благодатная!» – великий Гавриил Тебе с небесе провозгласи, Дево Мати Марие. Темже радости исполни мое сердце, ядом горчайшим змииным преогорченное.

Песнь 5

Ирмос: Просвети нас повелении Твоими, Господи, и мышцею Твоею Высокою Твой мир подаждь нам, Человеколюбче.

Пресвятая Богородице, спаси нас!

О Дево, Мати Пречистая, в недоведомом Рождестве Твоем Сына Божия милость и истина сретостеся, правда и мир облобызастася; сего ради молю Тя, Владычице, милость Сына Твоего излей на страстную мою душу. Истиною Истины вечныя лукавое сердце мое исправи, правдою Превечнаго Бога ко страху Божию пригвозди мя всего и миром тишайшим Сладчайшаго Иисуса сердце мое умири.

Пресвятая Богородице, спаси нас!

Низпосли Божественный свет рабу Твоему, во тьме греховней сущему, Светоносная Сене Небесная, Неискусобрачная, рождшая Бога, изведшаго свет от тьмы, Чистая.

Слава: Моление теплое, Богородице, молитвы Твоя яко кадило благовонное к Богу всяческих восходят: темже злосмрадие греховное благоуханием молитв Твоих от души моея отжени, молюся Ти.

И ныне: Избавление нам родила еси без семене, Христа Спасителя, Пречистая: от вечныя погибели спаси мя, Владычице, от вечнаго пламене избави мя, Милосердная Мати.

Песнь 6

Ирмос: Молитву пролию ко Господу и Тому возвещу печали моя, яко зол душа моя исполнися и живот мой аду приближися, и молюся, яко Иона: от тли, Боже, возведи мя.

Пресвятая Богородице, спаси нас!

За премножество нечистоты моея не отрини мене, Пречистая, за премножество скверны моея не лиши мя покрова Своего Небеснаго, едина Нескверная.

Пресвятая Богородице, спаси нас!

Буди ми, Владычице, заблуждшему Путеводительница, потемненному страстьми – свет, умерщвленному грехом – жизнь.

Слава: Оком милостивым призри на мя, Всемилостивая, взирающаго со страхом и радостию, и надеждою на образ Твой пресвятый: виждь неисцельныя язвы души моея и исцели я.

И ныне: О Богородице, Мати Света, да будет Евангелие Сына Твоего светильник ногама моима, свет стезям моим да будут заповеди Его вечныя.

Песнь 7

Ирмос: От Иудеи дошедше отроцы, в Вавилоне иногда верою Троическою пламень пещный попраша, поюще: отцев Боже, благословен еси.

Пресвятая Богородице, спаси нас!

Мати неизследимыя Божия Мудрости Христа, умудри мя, молю Тя, да присно ум мой богомыслием спасительным преисполняется.

Пресвятая Богородице, спаси нас!

Благость Твою, Владычице, молю: и еще потерпи на мне, потерпи неисправность мою и Сама благодатию Твоею помози ми положити начало благое.

Слава: Падый, Владычице моя Богородице, падением лютым, ниц лежу аз, возстави мя падшаго, Возстание наше рождшая.

И ныне: Грех содевая, Владычице, не стыдяхся, ныне же в чувство пришед и наготу свою зря, стыждуся; покрый мя, обнаженнаго, молюся, покровом Твоим, грешников кающихся от вечнаго срама покрывающая.

Песнь 8

Ирмос: Царя Небесного, егоже поют вои Ангельстии, хвалите и превозносите во вся веки.

Пресвятая Богородице, спаси нас!

Владычице моя, благ всяких Подательнице, даруй мне едино высочайшее благо, еже Сына Твоего и Тебе всегда пред собою предзрети, в страсе Божием пожити, пред Богом ходити и тако непорочну быти.

Пресвятая Богородице, спаси нас!

Неизглаголанно, Чистая, млеком питала еси Дающаго пишу всякой плоти: егоже убо моли, да даст ми, алчущему, достойно вкушати пищи вечныя, Плоти Его. Моли, да не в суд ми будет, жаждущему, питие вечное, Кровь Его Пречистая, Честная.

Слава: Тебе припадаю, Благая, духовно ногам Твоим пречистым касаяся, от сердца всего молюся: помилуй мя, Владычице, коснися десницею Твоею всеисцеляющею души моея болящия, да исцелеет.

И ныне: Чистая Агнице, Дево Мати, Отроковице чистая, соделай мя чиста от страстей телесных, да чистым сердцем узрю в себе Сына Твоего и Бога.

Песнь 9

Ирмос: Воистину Богородицу Тебя исповедуем, спасеннии Тобою, Дево Чистая, с безплотными лики Тя величающе.

Пресвятая Богородице, спаси нас!

Надеждо моя, Богородице, крепко надеюся на Тя аз окаянный, яко взирая с молитвою и верою на образ Твой пречистый, никогдаже погибну, но спасуся всенепременно.

Пресвятая Богородице, спаси нас!

Разслабленным Ты еси сила, Владычице, болящим исцеление, мертвым оживление. Всем вся Ты еси, Пречистая; буди и мне, нищему, богатство, слава, сокровище, жизнь, едина радость, помощь, заступление, свет, сила, крепость, ограда, утешение, вся подавающая мне, Благая, еже к животу моему и благочестию.

Слава: Твой Божественный видя образ, Владычице, зрю в нем Тя, якоже яве мне присутствующую. Сего ради, ненавидя безумие еретиков на земли, отвергаюпщх почитание честнаго образа Tвoeгo, покланяюся святейшему зраку Твоему.

И ныне: Исцелений бездну и благодати пучину зрю Тя, Чистая: темже николиже унываю, аще и зело грешен есмь, веруя, яко вся грехи моя, яко песчинка малейшая, исчезнут в пучинах и бездне благодати Твоея. Аминь.

Молитвословия архимандрита Серафима, составленные по руководству богослужебных книг (Октоих, гласы 1 – 8)

Душе окаянная, бедная, душе моя страстная, грешная! Возстани! Воспряни! Что спиши? Конец ведь уже приближается, смутитися ты имаши! Возстани! Воспряни! От сна пробудись!

Душе окаянная, бедная, душе моя страстная, грешная! Обратись, возстени, возопий: «Сердцеведче, ущедри меня! Сердцеведче, помилуй меня! Сердцеведче, спаси Ты меня!»

Душе окаянная, бедная, душе моя страстная, грешная! Помни, помни всегда, что ожидает тебя час Господня Суда! Скорее же, скорее к Иисусу гряди, со слезами своими к Нему припади, греховные язвы Ему покажи, обратись, возстени, возопий: «Сердцеведче, ущедри меня! Сердцеведче, помилуй меня! Сердцеведче, спаси Ты меня!»

Душе окаянная, бедная, душе моя страстная, грешная! Грехи твои тайныя, мысли, от взоров сокрытыя, Бог назирает, Бог знает. Убойся! Покайся! Обратись, возстени, возопий: «Сердцеведче, ущедри меня! Сердцеведче, помилуй меня! Сердцеведче, спаси Ты меня!»

Душе окаянная, бедная, душе моя страстная, грешная! Уподоблю кому я тебя, злая творяшу всегда?

Уподоблю ль блуднице тебя? Но та при Христову ногу со слезами сложила греха тяготу. Ты же... не плачешь, ко Христу не идешь, у ног Его слезы не льешь, блудницы ты хуже, ты хуже!

Мытарю ль уподоблю тебя? Но тот, во смирении перси бия, «Боже, будь милостив мне!» вопил, прощенье от Бога себе получил. Ты ж не смиряешься, не сокрушаешься, только гордынею ты надмеваешься, мытаря хуже ты, хуже!

Разбойнику ль я уподоблю тебя? Но тот, на кресте со Иисусом вися, возопил: «В Царствии Твоем помяни Ты меня!» Ты же, живя на земле, предаешься всегда нерадению зле, разбойника хуже ты, хуже!

Душе окаянная, бедная, душе моя страстная, грешная! Уподоблю кому я тебя? Обратись, возстени, возопий: «Сердцеведче, ущедри меня! Сердцеведче, помилуй меня! Сердцеведче, спаси Ты меня!»

Душе окаянная, бедная, душе моя страстная, грешная! Как люты деянья твои, сколь мерзки пред Богом они! Воистину, паче ты всех согрешила: очима своима лукаво взирала, слухом своим клеветам ты внимала, языком ты всех осуждала, корила, на ближняго в сердце ты злобу питала, грехом ты все тело свое запятнала...

Душе окаянная, бедная, душе моя страстная, грешная! Убо что сотворишь? Ответ какой дашь? Обратись, возстени, возопий: «Сердцеведче, ущедри меня! Сердцеведче, помилуй меня! Сердцеведче, спаси Ты меня!»

Душе окаянная, бедная, душе моя страстная, грешная! Се, покаяния время: покайся! Се, чиста деланья время: очнися! Се, время светлаго дня: светла соделай дела! Тьмы страстей ты бежи, злато уныния сон отжени, да Света Божественна будешь причастна.

Душе окаянная, бедная, душе моя страстная, грешная! Обратись, возстени, возопий: «Сердцеведче, ущедри меня! Сердцеведче, помилуй меня! Сердцеведче, спаси Ты меня!»

Душе окаянная, бедная, душе моя страстная, грешная! В Божием слове читала ли ты, как верой, молитвой и доброю жизнию древле львы Даниил укротил? Веруй и ты, молись и трезвись, во Христа, как в броню, облекись! Видишь: демон коварный, как лев, рыкает, раскрыл уж свой зев, объять, поглотить тебя хочет. Веруй, молись и трезвись!

Душе окаянная, бедная, душе моя страстная, грешная! Обратись, возстени, возопий: «Сердцеведче, ущедри меня! Сердцеведче, помилуй меня! Сердцеведче, спаси Ты меня!»

Душе окаянная, бедная, душе моя страстная, грешная! Познай, познай, какого ты рода: дыхание уст Самого ты Бога! К отечеству ты зовешься нетленну: зачем же телу работаешь тленну? Как, скажи, неразумная, худшее побеждает всегда в тебе лучшее? Горния части еси! Тщися же горних ты достигати, а земнаго всего избегати.

Душе окаянная, бедная, душе моя страстная, грешная! Обратись, возстени, возопий: «Сердцеведче, ущедри меня! Сердцеведче, помилуй меня! Сердцеведче, спаси меня!»

Душе окаянная, бедная, душе моя страстная, грешная! Все ты скорбишь, унываешь, от скорби покоя не знаешь... Воззри на терпение Иова: все козни, прилоги лукаваго, как прах, разлетались о твердость его. Сему ты ревнуй, сему подражай, в любых скорбях никогдаж унывай!

Душе окаянная, бедная, душе моя страстная, грешная! Обратись, возстени, возопий: «Сердцеведче, ущедри меня! Сердцеведче, помилуй меня! Сердцеведче, спаси Ты меня!»

Душе окаянная, бедная, душе моя страстная, грешная! Как мне не плакать, как о тебе не рыдать: ты доброе любишь, а злое творишь; ты зло ненавидишь, добра же бежишь. Рвешься ты к небу, стремишься все к Богу. На самом же деле ползешь по земле. Бывает, возникнешь, поднимешься... В порыве взлетишь ты горе. Потом же... еще глубже низринешься, глубже в греховной валяешься бездне... Как это страшно, тяжко как, больно!..

Душе окаянная, бедная, душе моя страстная, грешная! Птице подобна ты, птице, попавшейся в сети!.. Враг эти сети расставил, грех тебя в сети запутал. О, обратись, возстени, возопий: «Сердцеведче, ущедри меня! Сердцеведче, помилуй меня! Сердцеведче, спаси Ты меня!»

Душе окаянная, бедная, душе моя страстная, грешная! Спишь ты все... спишь... И Божия света не видишь. Не видишь ты и своей наготы. Одежда белая, царская, Кровью Христовою купленная одета была на тебя при крещеньи твоем. Теперь же... посмотри на себя: одежду ты ту во что обратила? Греховною скверною ее запятнала, пороком ее разодрала... И лежишь ты... нагая! С Неба на тебя Господни очи смотрят, с Неба наготу твою Ангелы видят, а ты не стыдишься, спишь все и спишь!..

Обратись же скорей, возстени, возопий: «Сердцеведче, ущедри меня! Сердцеведче, помилуй меня! Сердцеведче, спаси Ты меня!»

Душе окаянная, бедная, душе моя страстная, грешная! Какими слезами оплачу тебя? Рыданьем каким над тобой возрыдаю? Когда я над жизнью твоей размышляю, вижу – нет истины в ней, вся она злобы, лукавства полна, затмил ее тьмою своей сатана. Вижу – твой град бесовский полк окружает, вижу – греховный смрад сердце твое изсушает. И стала подобна ты древу засохшему!..

Душе окаянная, бедная, душе моя страстная, грешная! Боюсь я, боюсь твоего посечения! Обратись, возстени, возопий: «Сердцеведче, ущедри меня! Сердцеведче, спаси Ты меня! Сердцеведче, помилуй меня!»

Душе окаянная, бедная, душе моя страстная, грешная! Вспомни ты, вспомни Давида царя: к Богу молитвой усердной горя, от веждей своих отревая всяк сон, о двух грехах как плакал он! Вспомни! Как омочал он слезами постелю, как с плачем свое питие растворял, как злую, порочную волю постом он до праха смирял. Вспомни: с пеплом вкушал он даже и хлеб, отринув заботы, веселье и смех.

Душе окаянная, бедная, душе моя страстная, грешная! Ты же тьмами грешила, слезы ж ни единой пролила, смеешься, не плачешь... Поста, воздержанья не знаешь. Обратись, возстени, возопий: «Сердцеведче, ущедри меня! Сердцеведче, помилуй меня! Сердцеведче, спаси Ты меня!»

Душе окаянная, бедная, душе моя страстная, грешная! Время твое скончавается. При дверях последний исход... Недолго... Уже приближается и к Богу Судье твой восход. Пока не затворятся двери, покаянья скорей плоды принеси, обратись, возстени и зови: «Сердцеведче, ущедри меня! Сердцеведче, помилуй меня! Сердцеведче, спаси Ты меня!»

Душе окаянная, бедная, душе моя страстная, грешная! Вспомни ты древняго Хама... Ему ты по жизни подобною стала: над отцом своим тот посмеялся и рабом стал у братьев скитаться. Убо что сотворишь, окаянная, страстей и грехов всех раба? Небеснаго ты не стыдишься Отца, Его оскорбляешь своими грехами, над Ним ты смеешься своими страстями...

О, обратись, возстени, возопий: «Сердцеведче, ущедри меня! Сердцеведче, помилуй меня! Сердцеведче, спаси Ты меня!»

Душе окаянная, бедная, душе моя страстная, грешная! Помнишь ты древняго Каина, убил как он, в зависти, Авеля? Ты и Каину стала подобна деяньми: сластолюбьем, грехами, страстями... Не иного кого – себя самое ты убила, благодать ты Божию в себе погубила...

О, обратись, возстени, возопий: «Сердцеведче, ущедри меня! Сердцеведче, помилуй меня! Сердцеведче, спаси Ты меня!»

Душе окаянная, бедная, душе моя страстная, грешная! Вспомни Иакова, вспомни Исава – воздержаньем Иаков первенство принял, невоздержаньем Исав старейшинство отдал. Смотри ж и учись: колико зло невоздержанье и коль велико воздержанье! От первого беги, второе бери... Беги подобия злу, подражай всегда лишь добру.

Обратись, возстени, возопий: «Сердцеведче, ущедри меня! Сердцеведче, помилуй меня! Сердцеведче, спаси Ты меня!»

Душе окаянная, бедная, душе моя страстная, грешная! Скажи: рабой ты зовешься кого? – Бога. – Скажи: к чему ты забыла Его, Преблагаго, Премилостива? Слышишь... стучит Он к тебе? «Отвори, отвори скорей Мне!» Ты же двери пред Ним затворила. На погибель свою греху их открыла. Стала усердно греху ты работать... Рабой тебя Божией как же назвать? Обратись, возстени, возопий: «Сердцеведче, ущедри меня! Сердцеведче, помилуй меня! Сердцеведче, спаси Ты меня!»

Душе окаянная, бедная, душе моя страстная, грешная! Видала ты труп разложившийся, добычу могильных червей, труп, всякого вида лишившийся, без плоти, без кожи – покрова костей. Труп страшный, зловонный... видала? Знай же: грехами своими, страстями своими этому трупу подобна ты стала. Где красота, скажи, твоя вышняя: смирение, кротость, любовь, чистота? Истлела, истлела во страсти она! И Божий образ все больше теряя, смердишь ты... тлеешь все... тлеешь... О, неужели навеки погибнешь!

Душе окаянная, бедная, душе моя страстная, грешная! Жутко как, страшно! Моли же, проси обновления у Христа Иисуса Безсмертнаго, во чрево нетленное вшедшаго. Обратись, возстени, возопий: «Сердцеведче, ущедри меня! Сердцеведче, помилуй меня! Сердцеведче, спаси Ты меня! »

Душе окаянная, бедная, душе моя страстная, грешная! Опомнись, опомнись, что ты сотворила? Льстивым глаголам врага зачем ты так сладко внимала? Знаешь... льстивый от Бога украл ведь тебя, соделавши снедь для себя!

Обратись, возстени, возопий: «Сердцеведче, ущедри меня! Сердцеведче, помилуй меня! Сердцеведче, спаси Ты меня!»

О, лейтеся, лейтеся слезы, из очей моих лейтеся вы. Подобно слезившей блуднице, вы ноги Христовы омыть дайте мне. Обнять эти ноги... обнять и лобзать, плакать над ними... рыдать все... рыдать, к язвам пречистым устами прильнуть и их горячо-горячо целовать! О, лейтеся, лейтеся слезы, из очей моих лейтеся вы!..

О, горе мне... горе мне! Увы мне... увы мне! Как омрачился умом, как согрешил я Тебе: во мне, окаянном, самом жить восхотел Ты, Христе: Ты Кровью Своею меня напоил, в пищу мне Плоть Свою дал. Пришел, просветил, обожил, обновил... Что ж, окаянный, Тебе я воздал? За любовь Твою, ею же мя возлюбил, я, Господь мой, Тебе изменил... Сердцем моим от Тебя я отпал, сластью плотскою Тайны Твои оскорбил и Тебя от себя страстями прогнал...

О, Спаситель, Спаситель, мой Бог, Искупитель! Прости мне, прости и паки причастника Таин Твоих укрепи! Спаси мя, спаси мя, Господи, Боже мой! Гибну я, гибну я в пучине греховной! Страстей жестокая буря смущает меня, беззаконий тяжелое бремя погружает меня. Рукою помощи и крепкою рукою Твоею всесильною удержи меня, как Петра, над волнами греха.

Господь мой! Творец мой! Создатель мой! Царь мой! Услыши! Услыши! Мне тяжко, мне больно: я скован цепями – моими страстями; лежу на земли, нет силы, нет воли воспрянуть к Тебе! Разбей эти цепи, греховныя узы сними, покаяньем меня Ты свяжи, да славлю Тебя, хвалю, воспеваю, пою и ныне [и присно,] вовеки, всегда!

Господь мой! Творец мой! Создатель мой! Бог мой! Боюсь, боюсь Суда Твоего! Нет там свидетелей: без них обличаюся. Нет там судей: без них осуждаюся. Книги раскроются совестныя, мысли и чувства узнаются тайныя пред взором Твоим всепроницающим. Ничто не укроется, все обнажится... О, прежде чем пред Тобою предстану с содеянным мною, очисти мя, Боже! Спаси и помилуй! По деяньям безместным, прегрешеньям безумным вертепом разбойников стал я. Но Ты, в вертепе убогом рождейся, добродетельми храмом Твоим покажи мя! Умертвил, убил меня льстивый страстьми, но, о Жизнодателю, мертваго мя покаянием Ты оживи!

В самое сердце уязвлен оружьем страстей я тлетворных, поруган, низвержен, унижен, низложен, от повелений отторгнут Твоих животворных. Нет уже силы... Отчаянья ров совсем поглотить меня уж готов... Господь мой, Владыка, не презри! Обращенья былием меня исцели! Прости мне, помилуй, спаси! О, что сотворю, Христе мой, Царю! Закон Твой – Небесный, святой, отверг я, безумный, я грешный, преступный, отверг... и боюся Суда Твоего! Помилуй, помилуй, молюся, помилуй раба Своего!

Ночь греха безотрадная. Ночь глубокая, темная, мрачная мысль мою, ум мой окутала, в сердце, в душу проникла. И темно... темно кругом. И совесть заснула тяжелым уж сном... О, мое Солнце, Христе, свет возсияй покаяния мне, зол моих ночь прогони, всего меня светом Твоим озари!

Древнему безумцу подобясь фарисею, вознесся высоко я мыслью своею, надмился, кичился, гордился и, о, как жестоко, как люто ниспался! Окаянный! Лежу теперь долу, и за пылью греховною умному взору Тебя уж, Сладчайшаго Света, не видно... И злостно-презлостно, зря это, льстивый надо мною смеется, о паденьи моем веселится. Спасителю, Царю мой Христе, смиривый врага на Кресте, смирившася ныне ущедри меня!

Братья! Земля у нас есть драгоценная, нами забытая, нераспаханная – сердце, земля та зовется! Ея умиления дождь не орошает, и засыхает она... засыхает... Терновник колючий, волчцы уже в изобилье на ней возросли. Выходят оттуда хулы, рвение, зависть, татьбы, гнев, вожделение, всякая ненависть, грех всякий, всякая страсть...

Возьмемся ж за рамо Христова познания, им ниву сердечную вспашем. Засеем пшеницей ее покаяния, да правды плоды о Христе мы покажем.

Леность мою, нерадение враг увидел коварный. Подметил мое разслабленье, как змий подполз ко мне льстивый... Ядом злосмрадным, тлетворным своим всю душу мою отравил... Трех показался мне сладким, зло за добро я принял и... низко, как низко я пал!..

О, мой Господь, возставь, подними, причащением Таин Твоих Пречистых, святых, дорогих горечь греха услади, помилуй, помилуй, спаси! Спаситель! Христе мой! Teбe я молюсь: приди! Помоги: в суете я кружусь, ум мой разсеян, нечист и безплоден, сердце безчувственно, оледенело... О, как Петру, мне дай покаяние! Как мытарю, мне дай воздыхание! Слезы блудницы дай мне! Да велиим гласом взываю Тебе: Благий, Святый, Милосердный Боже, спаси! Боже, помилуй!

Се Жених грядет! Со свещами зажженными – деяньми добрыми – навстречу изыдем Ему. Светлый, царский уж виден чертог. Слышите... Сам Бог призывает к нему! Скорей же, скорее, одежды украсим верой, надеждой, любовью, молитвой, да доброй душою и чистой Спасителя Господа сретим.

Господь мой и Царь мой! Лжец я, обманщик какой пред Тобой: молитвою многой Тебе я служу, хвалебныя песни Тебе приношу, но... лишь устами молитву творю, только языком и песни пою. Ум же мой безместная мыслит, а сердце все бьется земным. О, мой Христе! Мою душу исправи, сердце и ум, уста и язык согласно направи на славу, мольбу, пенье, хвалу одному лишь Тебе!

Никому Ты не хочешь погибнуть, Милосердый Господь мой, Создатель, – всех падших Ты хочешь воздвигнуть, зовешь всех к спасенью, Спаситель. О, Боже мой, Боже, воззри: от грехов я, страстей погибаю! Приди же, приди... помоги – в скорби к Тебе я взываю!

Путь спасительный, крестный, путь тернистый и тесный, Ты, Господи, в Слове Своем показал мне, чтобы, идя тем путем, скорее достиг я к Тебе. Я же... путь тернистый оставил, на путь пространный, греховный, вступил. Иду... все иду, иду по нему... И остановиться уже не могу. К самым вратам подошел уже смертным... О, мой Господь! Моя Жизнь! Удержи! Удержи! Запрети мне идти по пространну пути, на путь Твой возврати, помилуй, помилуй, спаси! Христе... Христе мой... Царю!

Отверз глухому Ты некогда двери... Прошу... прошу... Тебя и молю: помилуй, заглох слух моей души, глаголам Твоим не внемлет она, Твоих повелений не слышит, глухая... О, слух мой отверзи! Была чтоб слышна душе Твоя воля святая, благая!

Суровою, страшной пустынею, Десницею крепкою, Вышнею, древний Израиль водим был, жгучею жаждой томим. Боговидец, великий пророк Моисей, из глубины души своей к Тебе, Господь, тогда воззвал... И Ты молитве его внял: повелел... сказал, – и в скалу жезлом он ударил. О чудо! Живая вода из скалы потекла... Потоки собой наводнила... Воду из камня Израиль ту пил и жгучую жажду свою утолил.

Господь мой! Господь мой! Создатель! Подобно как древний Израиль, пустыней суровой, безплодной иду я, жаждой греховной весь изнуренный, весь истомленный... О Боже, Спасителю мой! Ты – Камень живой, копьем, как жезлом, прободенный. И не вода лишь одна, но и Кровь истекла из ребра Твоего. О, этим безсмертным питьем изнывшую душу напой, да в сердце усталом моем восчувствую Твой я покой.

Без гроба – в гробу бездыханен лежу, грехами убитый, в могилу зарытый, зловонный, растленный, всеми презренный... Спаситель! Спаситель! Надежда моя, Ты мой Искупитель, дыхание, жизнь Ты моя! Дыханьем Твоим Ты меня оживи, как Лазаря, словом всемощным Твоим из могилы греха подними! Помилуй! Помилуй! Спаси!

Плачу я, сетую горце: какими очами воззрю на Христа моего, когда взойдет Он, как яркое солнце, в час последний Суда Своего! Взойдет и осветит всю душу мою, всякую тайну объявит, ничто от Него не сокрою, ответа от дел не имею... Вина моя тяжка... Молить уж не смею... Участь последняя горька... О, Господи, прежде Суда Страшнаго, прежде пожатия смертнаго, прежде осужденья конечнаго, скрежета зубовнаго, огня неугасимаго – помилуй! Помилуй! Спаси!

Бесов полки ополчились на мя, в свои силки уловляют меня, низводят во адову пропасть. Уже раскрыла она свою страшную пасть, поглотить мою душу готова. Господь мой! Рукою Твоею всемопщою защити, сохрани, бесов отгони! Помилуй! Помилуй! Спаси!

О Господи, Господь мой, Создателю и Бог мой! Грешу я... грешу... Перестать не могу! Возстану – и снова лежу, снова усердно греху я служу... И нет от греха восклоненья, душе моей нет исправленья! Грех меня бьет, грех меня хлещет, бьет по сердцу, уму. Бьет по всему существу моему! Весь я в грехе, как в одежде какой! О, тяжко мне, трудно, Спасителю мой!

О, кто на суде судии не боится? Здоровья желая себе, врача кто когда сторонится? да, я... и Тебя, Господь мой, боюсь и злу навсегда предаюсь. Хочу исцелиться я от греха и от Тебя убегаю, Врача... Господь мой, Спаситель! Мой Бог, Исцелитель! На немощь мою снизойди! Помилуй! Помилуй! Спаси!

На одре я лежу согрешений моих. Сном тяжелым я сплю... И глаголов Твоих свет померк для меня. Тьма непроглядная... мрак от очей моих скрыли Тебя. И подходит к душе коварный мой враг... О Господь мой, Господь мой, приди! Приди, подними, разбуди! Помилуй! Помилуй! Спаси!

О, окаянный и бедный я человек! Безсловесным, постыдным страстям усердно работаю весь я свой век. Нечистым мирским похотям я душу и сердце продал. На погибель мой ум от Тебя удалил, все дары я Твои в блуде разбросал, богатство Твое все иждил. О, скорее, скорее меня призови, как блудного сына прими. За милость Твою объятья Твои распростри. Помилуй! Помилуй! Спаси!

Заповедь всякую уничтожил я истинную, страх Твой отринул святой. Духом не нищ я, паче же гордый, и... слез не найти у меня. Не кроткий, задорный, гневливый, правды не жажду, не алчу. Милость... давно ее черствость изгнала. Чистоту мою похоть растлила... И не только поношений, гонений, злословий не выносит надменное сердце мое – нет! Но и от малейших каких замечаний, внушений тотчас в раздраженье приходит оно. Почему и боюсь я... трепещу, боюсь Суда Твоего; посему и молюся, прошу: спаси мя, помилуй раба Своего!

Дела, что я в житии совершил, суть люта... лукава... Всякую мерзость я пред Тобой сотворил... И стыжуся... стыжуся Тебя, Божия Слова, стыжусь: безсловесным скотам подобен по жизни я стал... О Боже мой, Боже, Христе мой, Христе, покаяние искреннее даруй Ты мне! Прииди! Помоги! Помилуй! Помилуй! Спаси!

О, что сотворю, что сотворю, какую мольбу я Тебе принесу!.. Скажу ли: прости! Но паче прощенья мои прегрешенья... Скажу ли: смилуйся – я человек! Но... паче грешил человека, как никтоже от века. Укажу ли на немощь моего естества... Но выше, выше естества грехопаденья мои! О, что сотворю, что сотворю, какую мольбу я Тебе принесу!..

Повешен Ты на Кресте, Царю мой... Царю мой, Христе, весь Ты изъязвлен, изранен. Паче сынов человеческих Ты обезчещен. Тихо... тихо склонилась глава... Очи закрыты... Сомкнуты уста... Длани святыя гвоздями прибиты... Железные, острые гвозди жестоко впились и в пречистыя ноги... И самое сердце Твое нещадно пронзило копье! От палицы в язвах чело все Твое и Кровь... драгоценная Кровь на проклятую землю струится... О, что ж за бесценную эту любовь, что воздам я Тебе, Царю мой... Царю мой Христе!

О, как хотел бы я плакать... плакать... Дабы прегрешенья мои слезами омыть и прочее время жизни моей в покаяньи скончать и Тебе, мой Господь, угодить! Но... увы! Враг меня льстит, враг меня кружит, тяжкою борет борьбою бедную душу мою... О Господи, прежде даже до конца я не погибну от врага, помилуй! Помилуй! Спаси!

В страстях я телесных весь погружен От Тебя, мой Царю, я грехом удален. Надежда моя исчезает, унынье ко мне подступает... О, Господь мой, Творец мой! Даждь ми умиление, злых отчуждение, жизни моей исправление. Приими мя, приими! Помилуй! Помилуй! Спаси!

Ветрилом усердия все мы вперимся, к пристани спасения все устремимся. Смелее, смелее, без всякой боязни: с нами ведь Кормчий – веленья Господни!

Пусть буря бушует и море волнует, свирепо пусть ветры шумят... Они корабля не потопят: с нами ведь Кормчий – веленья Господни! Смелей же, смелее, без всякой боязни!

Спасе мой Иисусе, Иже блуднаго спасый, Спасе мой Иисусе, плач блудницы приемый, Спасе мой Иисусе, воздохнувша от сердца мытаря оправдавый, и меня, полна всяка греха, согрешивша без числа, прости... прости... приими! Помилуй! Помилуй! Спаси!

О Господи, Свете мой, Господи, Радость моя, не отлучайся, побуди со мной, не покинь, не остави меня в тяжкой скорби моей! С Тобою и скорбь походит на радость, без Тебя же и радость – одна только скорбь! О Господи, свете мой, Господи, радость моя, побуди... побуди со мной!

О, Господь мой, Господь мой... Тишина моя, мир мой, покой!.. От бури жестокой, от бури греховной пришел я к Тебе... Устал... изнемог я в борьбе, и силы уж нету во мне! Бедная тонет ладья моя, тонет... О, верю: десница Твоя поддержит меня, спасет, защитит, сохранит!

О, Господь мой, Господь... Тишина моя, мир мой, покой!.. Снедает, Господи, душу мою, как вещь сухую, злобный огнь. Снедает и жжет, покою мне не дает. И знаю: будущий огнь за сие меня ждет. О, Господи Человеколюбивый, Господи Долготерпеливый, росою милости Твоей огнь сей Ты угаси! Помилуй! Помилуй! Спаси!

Крыла есть два: крыло одно – молитва, любовь – крыло другое. И чудо дивное: едва ты их себе возьмешь, как на земле уже не будешь. На высоту они тебя поднимут, на небеса с собою унесут.

В разбойники лютые впал я, Христе. От них я уязвлен, изранен, раздет... Раны гноятся... больно от ран мне, и... помощи нет... исцеления нет!.. О Спасителю, Врач мой, скорей покаянья вино и елей Ты, Всещедрый, Милосердый, на раны больныя и струпы возлей! О Боже, Царю мой Христе, как я предстану Тебе на грозном и страшном Суде, весь непотребен, весь грешен, весь скверен! Руки мои я к Тебе простираю, благость, любовь я Твою умоляю: пощади меня, Боже, прости! Помилуй! Помилуй! Спаси!

О, тихий мой Свете, Царю мой, Христе, по деяньям безместным скотам безсловесным стал я подобен, Тебе не угоден... О, образ Твой во мне святой Ты, Господь мой, обнови! Помилуй! Помилуй! Спаси!

Смоковницей безплодной стал я, Господь мой. Пожди... еще пожди... Не посеки... Слезами напой мою душу, да плоды принесу покаянья Тебе, Царю мой... Царю мой Христе!

Владыка и Боже Всещедрый, имиже веси судьбами страх Твой спасительный в сердце моем Ты устави. Дай, чтоб далеко от меня были деянья лукаваго. Дай возлюбить мне Тебя от всей души, помышленья всего, творить мне дай волю Твою благую, спасительную: Ты бо ведь Бог наш, милость Твою изливаешь на нас, Ты бо ведь Бог наш, рекий: «Просите – приимите!» «Аз, – глаголеши, Господи, – рех: вы есте бози». А я... бесам стал смех, праведным слезы... Ангелам плач... человекам попранье... себе сам палач, греху отдав себя на поруганье. Стал я воздуху скверна, земли и водам. Стал я хуже неверна, по деяньям своим и грехам.

О, увы мне... увы мне... Боже, Царю мой Христе! Согрешил, согрешил я, прости! Помилуй! Помилуй! Спаси!

Новый блудник я явился, скверно живя на земле, сластным стремлениям весь поклонился и.„ от Тебя удалился, Христе! О, помилуй! Помилуй! Воззови! И спаси!

О, безсовестный я: за плотския хотенья, чтоб услаждали меня, Твои, Христе, повеленья презрел я... отверг, на землю все их поверг! И... се боюсь мучения, пламеннаго трепещу томления! От негоже, Господи, мя избави, милость Твою мне пробави. Помилуй! Помилуй! Спаси!

Господи! Господи! Ни умиления нет у меня, ни источника слезнаго, чтоб оплакать себя, ни сокрушенья сердечнаго, ни мытарева смирения, ни блудницы, ни блуднаго во мне нет покаяния... О, туне помилуй унылаго! Туне ущедри! Прости и спаси!