В туюжде неделю сырную вечера

стихословим предначинательный псалом, посем мирная ектения.

Стихословия не бывает.

На Го́споди воззва́х: поставим стихов 10. И поем 4 стихиры

покаянны от Осмогласника на ряду гласа, яже суть писаны две на стиховне вечерни и две на утренней стиховне в понедельник [Такожде и в прочия недели, даже до пятыя недели Святыя Четыредесятницы].

И Триоди 3 стихиры, глас 2.

Подобен: Егда́ от дре́ва:

Стих: Аще беззако́ния на́зриши, Го́споди, Го́споди, кто постои́т? / я́ко у Тебе́ очище́ние есть.

Воздержанием тело смирити вси потщимся, / божественное преходя́ поприще непорочнаго поста / и молитвами и слезами / Го́спода спаса́ющаго нас взы́щем, / и забве́ние зло́бы всеконе́чное сотвори́м, вопию́ще: / согреши́хом Ти, спаси́, / я́коже дре́вле ниневи́тяны, Христе́ Царю́, / и о́бщники ны сотвори́ Небе́снаго Ца́рствия, // Благоутро́бне.

Стих: Имене ра́ди Твоего́ потерпе́х Тя Го́споди, потерпе́ душа́ моя́ в сло́во Твое, / упова́ душа́ моя́ на Го́спода.

Себе́ отчаява́ю, помышля́я дела́ моя́, Го́споди, / вся́каго муче́ния досто́йная; / се бо презре́в честны́я Твоя́, Спа́се, за́поведи, / блу́дно мое́ житие́ ижди́х. / Те́мже молю́ся, / ту́чами мя покая́ния очи́стив, / посто́м и моле́нием, я́ко Еди́н Ми́лостивый, просвети́, / и не гнуша́йся мене́ // Благоде́телю все́х, и Преблаги́й.

Стих: От стра́жи у́тренния до но́щи, от стра́жи у́тренния, / да упова́ет Изра́иль на Го́спода.

По́стное вре́мя све́тло начне́м, / к подвиго́м духо́вным себе́ подложи́вше, / очи́стим ду́шу, очи́стим пло́ть, / пости́мся я́коже в сне́дех от вся́кия стра́сти, / доброде́тельми наслаждающеся духа: / в нихже совершающеся любовию, / да сподо́бимся вси ви́дети всечестну́ю страсть Христа́ Бо́га, / и Святу́ю Па́сху, // духо́вно ра́дующеся.

И Минеи стихиры рядовому святому, 3. Аще имать святый, Слава: стихиру самогласну. Аще ли несть, Слава, и ныне: Богородичен во глас Минеи, от менших. Вход с кадильницею. Све́те ти́хий:

Прокимен великий, глас 8:

Не отврати́ лица́ Твоего́ от о́трока Твоего́, я́ко скорблю́, ско́ро услы́ши мя. / Вонми́ души́ мое́й, и изба́ви ю.

Стих: Спасе́ние Твое́ Бо́же, да прии́мет мя. Стих: Да у́зрят ни́щии, и возвеселя́тся.

Стих: Взыщи́те Бо́га, и жива́ бу́дет душа́ ва́ша.

И паки высочайшим гласом: Не отврати́ лица́ Твоего́:

Таже, Сподо́би Го́споди: и ектения просительная.

На стиховне стихиры самогласны

Глас 4:

Возсия́ благода́ть Твоя́ Го́споди, / возсия́ просвеще́ние душ на́ших. / Се вре́мя благоприя́тное, се вре́мя покая́ния, / отложи́м дела́ тьмы́, / и облече́мся во ору́жие све́та; / я́ко да преплы́вше поста́ вели́кую пучи́ну, / в тридне́вное воскресе́ние дости́гнем, / Го́спода и Спа́са на́шего Иису́са Христа́, // спаса́ющаго ду́ши на́ша.

Стих: К Тебе́ воздвиго́х о́чи мои́, живу́щему на небеси́. Се я́ко о́чи раб в руку́ госпо́дий свои́х, я́ко о́чи рабы́ни в руку́ госпожи́ своея́; та́ко о́чи на́ши ко Го́споду Бо́гу на́шему, / до́ндеже уще́дрит ны.

Паки таже стихира.

Стих: Поми́луй нас, Го́споди, поми́луй нас, яко по мно́гу испо́лнихомся уничиже́ния; наипа́че напо́лнися душа́ на́ша поноше́ния гобзу́ющих / и уничиже́ния го́рдых.

Мученичен:

Прославля́емый в па́мяти святы́х Твои́х, Христе́ Бо́же, / от них умоля́емь, // низпосли́ нам ве́лию ми́лость.

Слава: святаго Минеи, аще есть. И ныне: Богородичен, по гласу Минеи. Аще же ни, Слава, и ныне: Богородичен, глас тойже:

Ангельстии чи́ни Тя Богома́ти прославля́ют: / Бо́га бо Всечистая родила еси, / Отцу и Духа соприсносущна, / и ангельская во́инства от не су́щаго хоте́нием поста́вивша. / Его́же моли́ от тли́ спасти́ / и просвети́ти ду́ши правосла́вных, // Тя воспевающих, Всечистая.

Ны́не отпуща́еши: Трисвятое: По Отче наш: Тропари, глас 4:

Богоро́дице Де́во, ра́дуйся, Благода́тная Мари́е, Господь с Тобою: / благословенна Ты в женах, и благословен́ Плод чре́ва Твоего́, // я́ко Спа́са родила́ еси́ душ на́ших.

И творим поклон един.

Слава: Крести́телю Христо́в, всех нас помяни́, / да изба́вимся от беззако́ний на́ших: // Тебе́ бо даде́ся благода́ть молитися за ны. Поклон един.

И ныне: Моли́те за ны святи́и апо́столи, святи́и вси, / да изба́вимся от бед и скорбе́й: // вас бо те́плыя предста́тели ко Спа́су стяжа́хом. Поклон един.

Под Твое́ благоутробие прибегаем, Богородице, / моления на́ша не пре́зри во обстоя́нии: // но от бед изба́ви ны, Еди́на Чи́стая, Еди́на Благослове́нная. Без поклона.

И абие чтец: Го́споди поми́луй, 40 раз, кротким и тихим гласом. Слава, и ныне: Честне́йшую херуви́м: Именем Госпо́дним благослови́ о́тче.

Священник: Сый благослове́н:

Чтец: Ами́нь. И молитву: Небе́сный Царю́, ве́ру утверди́, язы́ки укроти́, мир умири́, святы́й храм сей (святу́ю оби́тель сию́) до́бре сохрани́; пре́жде отше́дшия отцы́ и бра́тию на́шу в селе́ниих пра́ведных учини́, и нас в покая́нии и испове́дании приими́, я́ко благи́й и Человеколю́бец.

И творим три поклоны великия, и глаголет иерей молитву преподобнаго Ефрема Сирина:

Го́споди и Влады́ко живота́ моего́, дух пра́здности, уны́ния, любонача́лия, и праздносло́вия не даждь ми. Поклон.

Дух же целому́дрия, смиреному́дрия, терпе́ния, и любве́, да́руй ми рабу́ Твоему́. Поклон.

Ей Го́споди Царю́, да́руй ми зре́ти моя́ прегреше́ния, и не осужда́ти бра́та моего́, я́ко благослове́н еси́ во ве́ки веко́в, ами́нь. Поклон.

И глаголет предстоятель: Сла́ва Тебе́ Христе́ Бо́же, упова́ние на́ше, сла́ва Тебе́. И бывает совершенный отпуст.

По отпусте же творим по обычаю чин прощения. Глаголет предстоятель слово покаянное, и подходит кийждо ко Честному Кресту, и просит прощения у предстоятеля и братии во гресех своих. Мы же припеваем стихиры покаянны, кии да волиши.