Книга чинов присоединения к Православию. Часть 1

Архиере́й или́ иере́й, приходя́щаго да испыта́ет, ка́ко разуме́ет уче́ние ри́мско-лати́нския це́ркве: та́же пока́жет ему́ ра́знствие о́наго от уче́ния Правосла́вныя Це́ркве.

По дово́льнем же испыта́нии и наставле́нии, повели́т ему испове́дати вся́ грехи́, ели́ки от ю́ности своея́ па́мятствует. Разреше́ния, по и́споведи, не подае́т ему́. В ча́с же присоедине́ния поставля́ет его̀̀ при вхо́де в це́рковь. Архиере́й, оде́ян в ма́нтию, епитрахи́ль, омофо́р и ми́тру, или́ иере́й, оде́янный в епитрахи́ль и фело́нь, ста́нет бли́зь церко́вных двере́й, и жела́ющаго бы́ти правосла́вным христиани́ном вопроша́ет:

Хо́щеши ли отрещи́ся от погреше́ний и непра́востей ри́мско-лати́нскаго испове́дания?

Отве́т: Хощ̀у.

Вопроше́ние: Хо́щеши ли приити́ в соедине́ние ве́ры правосла́вно-кафоли́ческия?

Отве́т: Хощу́.

Тогда́ предстоя́тель благословля́ет его̀̀, глаго́ля:

Во и́мя Отца́, и Сы́на, и Святаго Ду́ха, Ами́нь.

И возложи́в ру́ку на приклоне́нную главу́ его̀̀, диа́кону ре́кшу: Го́споду помо́лимся, и кли́ру: Го́споди, поми́луй, чте́т моли́тву сию̀:

Го́споди Бо́же и́стины, призри́ на раба́ Твоего̀ (и́мярек)^*, и́щущаго прибе́гнути ко святе́й Твое́й правосла́вней Це́ркви и по́д кро́вом Ея́ сохрани́тися. Обрати́ его̀̀ от заблужде́ния пре́жняго пути́ его̀̀ ко и́стинней я́же в Тя́ ве́ре, и пода́ждь ему́ благода́ть, е́же ходи́ти в за́поведех Твои́х. Да бу́дут о́чи Твои́ взира́юще на него̀ ми́лостию вы́ну, и у́ши твои́, е́же слы́шати гла́с моле́ния его̀, и та́ко да сопричте́тся ко избра́нному Твоему́ стаду́. Тя́ бо пою́т вся́ си́лы небе́сныя, и Твоя́ е́сть сла́ва, Отца́ и Сы́на и Свята́го Ду́ха, во ве́ки веко́в. Ами́нь.

По моли́тве се́й, вопроша́ет прие́млимаго:

Отрица́ешися ли непра́ваго мне́ния, а́ки бы для изображе́ния догма́та о исхожде́нии Свята́го Ду́ха не довле́ет Самаго̀ Христа́ Спаси́теля изрече́ние: И́же от Отца́ исходит, и а́ки бы потре́бно к сему́ сло́ву Христо́ву прибавле́ние: и от Сы́на?

Отве́т: Отрица́юся.

Вопроше́ние: Отрица́ешися ли непра́ваго мне́ния, а́ки бы не довле́ет испове́дати Главо́ю Вселе́нския Це́ркве Го́спода на́шего Иису́са Христа́, и а́ки бы глава́ всея́ Це́ркве есть ри́мский епи́скоп?

Отве́т: Отрица́юся.

Вопроше́ние: Отрица́ешися ли непра́ваго мне́ния, а́ки бы святи́и апо́столи не ра́вную вла́сть духо́вную получи́ша от Го́спода на́шего Иису́са Христа́, но кня́зем и́х бя́ше святы́й апо́стол Пе́тр, и а́ки бы един ри́мский епи́скоп есть прее́мник его̀, и а́ки бы не су́ть ра́вни ри́мскому епи́скопу прее́мницы апо́стольстии, епи́скопи иерусали́мский, антиохи́йский, александри́йский и друзи́и?

Отве́т: Отрица́юсь.

Вопроше́ние: Отступа́еши ли от согла́сия с те́ми, и́же ри́мскаго па́пу мня́т вы́шша бы́ти Вселе́нских Собо́ров и непогреши́ма?

Отве́т: Отступа́ю от такова́го мне́ния.

Вопроше́ние: Отрица́ешися ли про́чих уче́ний лати́нскаго вероиспове́дания, дре́вних и но́вых, я́же сло́ву Бо́жию, и́стинному Преда́нию Церко́вному и определе́ниям Седми́ вселе́нских Собо́ров проти́вна су́ть?

Отве́т: Отрица́юся.

Вопроше́ние: Жела́еши ли у́бо соедини́тися Святе́й, Правосла́вней, Кафоли́честей, Восто́чней Це́ркви?

Отве́т: Жела́ю от всего̀ моего̀ се́рдца.

Вопроше́ние: Ве́руеши ли, и ка́ко, во Еди́наго Бо́га, в Тро́ице сла́вимаго, и поклоня́ешися ли Ему́?

Отве́т: Ве́рую во Еди́наго Бо́га, в Тро́ице сла́вимаго, Отца́ и Сы́на и Свята́го Ду́ха, и покланя́юся Ему́.

И сотвори́в земно́й покло́н, чте́т Си́мвол ве́ры.

Посе́м предстоятель глаго́лет:

Благослове́н Бо́г, просвеща́яй вся́каго челове́ка, гряду́щаго в ми́р.

И па́ки вопроша́ет:

Пра́вила апо́стольская и на седми́ Вселе́нских и девяти́ Поме́стных Собо́рех утвержде́нная, и про́чая Правосла́вныя Це́ркве преда́ния и уста́вы прие́млеши ли?

Отве́т: Прие́млю.

Вопроше́ние: Испове́дуеши ли, я́ко кни́ги Боже́ственнаго Писа́ния, по разуме́нию, е́же содержи́т о о́нех Правосла́вная Це́рковь, приима́ти и толкова́ти подоба́ет?

Отве́т: Испове́дую

Вопроше́ние: Прие́млише и сие́, я́ко се́дмь та́инств от Христа́ Го́спода уста́вленная, до́лженствуют бы́ти соверша́ема по чи́ну правосла́вныя Це́ркве, а не и́нако ве́рным преподава́ема?

Отве́т: Прие́млю и изъявля́ю, я́ко та́ко надлежи́т бы́ти.

Вопроше́ние: Ве́руеши ли, я́ко душа́м преста́вльшихся не о́гнь чисти́лищный что̀ по́льзует, и́же не существу́ет, но вели́кую осла́бу и отра́ду прино́сят ми́лостыни и моли́твы за ни́х, наипа́че же бескро́вная же́ртва?

Отве́т: Ве́рую и прие́млю.

Вопроше́ние: Испове́дуеши ли, я́ко Це́ркви Правосла́вно-Кафоли́честей Глава́ е́сть Госпо́дь на́ш Иису́с Христос, и поставля́емым от Ду́ха Свята́го па́стырем обеща́еши ли нелицеме́рное послуша́ние?

Отве́т: Испове́дую, и па́стырем Це́ркве Правосла́вныя повинова́тися обеща́ю.

Посе́м подае́т присоединя́емому кра́й омофо́ра, а́ще ли архиере́й, коне́ц епитрахи́ли, а́ще иере́й, и глаго́лет:

Вни́ди в Це́рковь Правосла́вную, и соверше́нно отри́нув заблужде́ния, в ни́хже бы́л еси́, чти́ Отца́̀ Вседержи́теля, Сы́на Его̀ Иису́са Христа́, и Ду́ха Свята́го, и́же от Отца́̀ исхо́дит, Тро́ицу единосу́щную и неразде́льную.

И та́ко вве́д, поста́вляет его̀̀ пре́д амво́ном, иде́же на столе́ положе́ни су́ть Кре́ст и Ева́нгелие. Иду́щим же им, пое́тся псало́м 66:

Бо́же, уще́дри ны̀ и благослови́ ны̀, просвети́ лице́ Твое́ на ны̀ и поми́луй ны̀: Позна́ти на земли́ пу́ть Тво́й, во все́х язы́цех спасе́ние Твое́. Да испове́дятся Тебе́ лю́дие, Бо́же: да испове́дятся Тебе́ лю́дие вси́. Да возвеселя́тся и да возра́дуются язы́цы: я́ко су́диши лю́дем правото́ю и язы́ки на земли́ наста́виши. Да испове́дятся Тебе́ лю́дие, Бо́же, да испове́дятся Тебе́ лю́дие вси́. Земля́ даде́ пло́д сво́й: благослови́ ны, Бо́же Бо́же на́ш, благослови́ ны, Бо́же: и да убоя́тся Его̀ вси́ концы̀ земли́.

Та́же предстоя́тель повели́т ему́ коле́на преклони́ти и глаго́лет са́м стихи́ сия́:

Посли́ Ду́х Тво́й, и сози́ждутся, и обнови́ши лице́ Земли́.

Спаси́ раба́ Твоего̀, Бо́же мо́й, упова́ющаго на Тя́.

Бу́ди е́му, Го́споди, сто́лп кре́пости от лица́ вра́жия.

Го́споди, услы́ши моли́тву мою̀, и во́пль мо́й к Тебе́ да прии́дет.

По изглаго́лании, диа́кону ре́кшу: Го́споду помо́лимся, и кли́ру: Го́споди, поми́луй, чте́т со умиле́нием моли́тву сию̀:

Го́споди Бо́же Вседержи́телю, согреша́ющим о́бразы покая́ния предлага́яй и заблу́ждшим пу́ть пра́вый показу́яй, во е́же бы ни еди́ному поги́бнути, но все́м мо́щно бе́ спасти́ся.

Благодари́м Тя́, я́ко и сему́ рабу́ Твоему́ (и́мярек) возсия́л еси́ све́т позна́ния Твоея́ и́стины, и сподо́бил еси́ его̀̀ ко святе́й Твое́й Правосла́вно-Кафоли́честей Це́ркви прибе́гнути. Да́ждь у́бо ему́ соедини́тися о́ней нелицеме́рно и невозвра́тно: сопричти́ его̀ избра́нному Твоему́ ста́ду: сотвори́ его̀ сосуд че́стен и жили́ще Свята́го Твоего̀ Ду́ха, я́ко да те́м всегда́ просвеща́емь и наставля́емь, спаси́тельныя за́поведи Твоя́ неруши́мо соблюде́т, и та́ко небе́сных Твои́х благи́х восприя́тия сподо́бится. Ты́ бо еси́ Бо́г ми́лости и щедро́т и человеколю́бия, и Тебе славу возсыла́ем, Отцу́ и Сы́ну и Свято́му Ду́ху, ны́не и при́сно и во ве́ки веко́в. Ами́нь.

По моли́тве повелева́ет ему возста́ти, глаго́ля:

Ста́ни до́бре, ста́ни со стра́хом, и пре́д Ева́нгелием и святы́м Кресто́м Спаси́теля утверди́ да́нное тобо́ю обеща́ние.

Он же, воста́в, ре́чет:

Ве́ру правосла́вно-кафоли́ческую, ю́же ны́не доброво́льне испове́дую, це́лу и ненаруши́му да́же до коне́чнаго моего̀ издыха́ния, Бо́гу помога́ющу, тве́рдо содержа́ти, и за́поведи ея́ раде́тельно и ра́достно исполня́ти потщу́ся, соблюда́я в непоро́чности, ели́ко мо́щно се́рдце мое́. Во увере́ние сего̀ моего̀ обеща́ния целу́ю словеса́ и Кре́ст Спаси́теля моего̀. Ами́нь.

По лобыза́нии, предстоя́тель глаго́лет:

Благослове́н Бо́г, хотя́й все́м челове́ком спасти́ся и в ра́зум и́стины приити́, сы́й благослове́н во ве́ки.

Клир: Ами́нь.

Посе́м глаго́лет:

Преклони́ коле́на Твоя́ пре́д Го́сподем Богом, его̀же испове́дал еси́, и прии́меши оставле́ние грехо́в твои́х.

Прекло́ншу ему́ коле́на и главу́, предстоя́тель разреша́ет его̀, си́це:

Го́сподь на́ш Иису́с Христо́с, ключи́ ца́рствия небе́снаго апо́столом вручи́вый, и да́вый и́м и и́х прее́мником вла́сть вяза́ти и реши́ти грехи́ челове́ков, чре́з мене́, недосто́йнаго архиере́я (или́ иере́я), проща́ет тя́, ча́до (и́мярек), и разреша́ет от связа́ния кля́твеннаго или́ запреще́ния, и от все́х грехо́в Твои́х. И а́з, да́нною мне́ от Него̀ вла́стию, присоединя́ю тя́ ко правосла́вней Це́ркви и привожду́ ко обще́нию боже́ственных Та́инств церко́вных, и благословля́ю тя́ И́менем Отца́ и Сы́на и Свята́го Ду́ха. Ами́нь.

Посе́м присоедине́нный ста́нет, ожида́я литурги́и, ил̀и, а́ще не бе́ миром зна́менан, миропома́зания.

По испыта́нии, наставле́нии, и и́споведи приходя́щаго, пре́жде разре́шения грехо́в ему́̀, поставля́ет его̀ предстоя́тель при дверя́х церко́вных и вопроша́ет:

Хо́щеши ли отрещи́ся от погреше́ний и непра́востей арме́нскаго вероиспове́дания?

Отве́т: Хощу́.

Вопроше́ние: Хо́щеши ли приити́ в соедине́ние ве́ры правосла́вно-кафоли́ческия?

Отве́т: Хощу́.

Тогда́ предстоя́тель благословля́ет его̀, глаго́ля:

Во имя Отца́, и Сы́на, и Свята́го Ду́ха, Ами́нь.

И возложи́в ру́ку на приклоне́нную главу́ его̀, диа́кону ре́кшу: Го́споду помо́лимся, и кли́ру: Го́споди, поми́луй, чте́т моли́тву сию̀:

Го́споди Бо́же и́стины, призри́ на раба́ Твоего̀̀ (и́мярек)*, и́щущаго прибе́гнути ко святе́й Твое́й правосла́вней Це́ркви и по́д кро́вом ея́ сохрани́тися. Обрати́ его̀ от заблужде́ния пре́жняго пути́ его̀ ко и́стинней я́же в Тя́ ве́ре, и пода́ждь ему́ благода́ть, е́же ходи́ти в за́поведех Твои́́х. Да бу́дут о́чи Твои́ взира́юще на него̀ ми́лостию вы́ну, и у́ши твои́, е́же слы́шати гла́с моле́ния его̀, и та́ко да сопричте́тся ко избра́нному Твоему́ стаду́. Тя́ бо пою́т вся́ си́лы небе́сныя, и Твоя́ е́сть сла́ва, Отца́ и Сы́на и Свята́го Ду́ха, во ве́ки веко́в. Ами́нь.

И вопроша́ет предстоя́тель приходя́щаго от арме́нского испове́дания:

Отрица́ешся ли непра́ваго мне́ния, а́ки бы в Го́споде на́шем Иису́се Христе́ не два́ су́ть естества́, Бо́жеское и челове́ческое, но еди́ное, поглоще́ну бы́вшу Бо́жеским е́стеству челове́ческому?

Отве́т: Отрица́юся.

Вопроше́ние: Жела́еши ли у́бо соедини́тися святе́й, правосла́вней, кафоли́честей, восто́чней Це́ркви?

Отве́т: Жела́ю от всего̀ моего̀ се́рдца.

Вопроше́ние: Ве́руеши ли, и ка́ко, во Еди́наго Бо́га, в Тро́ице сла́вимаго, и поклоня́ешися ли Ему́?

Отве́т: Ве́рую во Еди́наго Бо́га, в Тро́ице сла́вимаго, Отца́ и Сы́на и Свята́го Ду́ха, и покланя́юся Ему́.

И сотвори́в земно́й покло́н, чте́т Си́мвол ве́ры.

Посе́м предстоя́тель глаго́лет:

Благослове́н Бо́г, просвеща́яй вся́каго челове́ка, гряду́щаго в ми́р.

И па́ки вопроша́ет:

Чти́ши ли собо́ры Вселе́нския: Халкидо́нский, Константино́польский 2-ой, Константино́польский 3-й, Нике́йский 2-ой, и прие́млиши ли утвержде́нныя си́ми собо́ры догма́ты и пра́вила?

Отве́т: Почита́ю и прие́млю.

Вопроше́ние: Святе́йшему всеросси́йскому сино́ду [Патриа́рху] и правосла́вным архипа́стырем, я́ко прее́мником апо́стольским, от Свята́го Ду́ха поста́вленным, обеща́еши ли достодо́лжное почита́ние и в де́лех духо́вных послуша́ние?

Отве́т: Обеща́ю от и́скренняго се́рдца.

Посе́м предстоя́тель подае́т присоединя́емому а́ще архиере́й, кра́й омофо́ра, а́ще ли иере́й, коне́ц епитрахи́ли, и глаго́лет:

Вни́ди в Це́рковь Правосла́вную, и соверше́нно отри́нув заблужде́ния, в ни́хже бы́л еси́, чти́ Отца́ Вседержи́теля, Сы́на Его̀ Иису́са Христа́, и Ду́ха Свята́го, и́же от Отца́ исхо́дит, Тро́ицу единосу́щную и неразде́льную.

И та́ко вве́д, поставля́ет его̀ пре́д амво́ном, иде́же на столе́ поло́жени су́ть Кре́ст и Ева́нгелие. Иду́щим же им, пое́тся псало́м 66:

Бо́же, уще́дри ны̀ и благослови́ ны̀, просвети́ лице́ Твое́ на ны̀ и помилуй ны̀: Позна́ти на земли́ пу́ть Тво́й, во все́х язы́цех спасе́ние Твое́. Да испове́дятся Тебе́ лю́дие, Бо́же: да испове́дятся Тебе́ лю́дие вси́. Да возвеселя́тся и да возра́дуются язы́цы: я́ко су́диши лю́дем пра́востию и язы́ки на земли́ наста́виши. Да испове́дятся Тебе́ лю́дие, Бо́же, да испове́дятся Тебе́ лю́дие вси́. Земля́ даде́ пло́д сво́й: благослови́ ны, Бо́же Бо́же на́ш, благослови́ ны, Бо́же: и да убоя́тся Его̀ вси концы земли.

Та́же предстоя́тель повели́т ему́ коле́на преклони́ти и глаго́лет са́м стихи́ сия́:

Посли́ Ду́х Тво́й, и сози́ждутся, и обновиши лице Земли.

Спаси́ раба́ Твоего̀, Бо́же мо́й, упова́ющаго на Тя́.

Бу́ди ему́, Го́споди, сто́лп кре́пости от лица́ вра́жия.

Го́споди, услы́ши моли́тву мою̀, и во́пль мо́й к Тебе́ да прии́дет.

По изглаго́лании, диа́кону ре́кшу: Го́споду помо́лимся, и кли́ру: Го́споди, помилуй, чте́т со умиле́нием моли́тву сию̀:

Го́споди Бо́же Вседержи́телю, согреша́ющим о́бразы покая́ния предлага́яй и заблу́ждшим пу́ть пра́вый показу́яй, во е́же бы ни еди́ному поги́бнути, но все́м мо́щно бе́ спасти́ся. Благодари́м Тя́, я́ко и сему́ рабу́ Твоему́ (и́мярек) возсия́л еси́ све́т позна́ния Твоея́ и́стины, и сподо́бил еси́ его̀ ко святе́й Твое́й Правосла́вно-Кафоли́честей Це́ркви прибе́гнути. Да́ждь у́бо ему́ соедини́тися о́ней нелице́мерно и невозвра́тно: сопричти́ его̀ избра́нному Твоему́ ста́ду: сотвори́ его̀ сосу́д че́стен и жили́ще Свята́го Твоего̀ Ду́ха, я́ко да те́м всегда́ просвеща́емь и наставля́емь, спаси́тельныя за́поведи Твоя́ неруши́мо соблюде́т, и та́ко небе́сных Твои́х благи́х восприя́тия сподо́бится. Ты́ бо еси́ Бо́г ми́лости и щедро́т и человеколю́бия, и Тебе́ сла́ву возсыла́ем, Отцу́ и Сы́ну и Свято́му Ду́ху, ны́не и при́сно и во ве́ки веко́в. Ами́нь.

По моли́тве повелева́ет ему́ возста́ти, глаго́ля:

Ста́ни до́бре, ста́ни со стра́хом, и пре́д Ева́нгелием и святы́м Кресто́м Спаси́теля утверди́ да́нное тобо́ю обеща́ние.

О́н же, воста́в, ре́чет:

Ве́ру правосла́вно-кафоли́ческую, ю́же ны́не доброво́льне испове́дую, це́лу и ненаруши́му да́же до коне́чнаго моего̀ издыха́ния, Бо́гу помога́ющу, тве́рдо содержа́ти, и за́поведи ея́ раде́тельно и ра́достно исполня́ти потщу́ся, соблюда́я в непоро́чности, ели́ко мо́щно се́рдце мое́.

Во увере́ние сего̀ моего̀ обеща́ния целу́ю словеса́ и Кре́ст Спаси́теля моего̀. Ами́нь.

По лобыза́нии, предстоя́тель глаго́лет:

Благослове́н Бо́г, хотя́й все́м челове́ком спасти́ся и в ра́зум и́стины приити́, сы́й благослове́н во ве́ки.

Кли́р: Ами́нь.

Посе́м глаго́лет:

Приклони́ коле́на Твоя́ пре́д Го́сподем Бо́гом, его̀же испове́дал еси́, и прии́меши оставле́ние грехо́в твои́х.

Прикло́ншу ему́ коле́на и главу́, предстоя́тель разреша́ет его̀, си́це:

Го́сподь на́ш Иису́с Христо́с, ключи́ ца́рствия небе́снаго апо́столом вручи́вый, и да́вый и́м и и́х прее́мником вла́сть вяза́ти и реши́ти грехи́ челове́ков, чре́з мене́, недосто́йнаго архиере́я (иере́я), проща́ет тя́, ча́до (и́мярек), и разреша́ет от связа́ния кля́твеннаго или́ запрещения, и от все́х грехов Твои́х. И а́з, да́нною мне́ от Него̀ вла́стию, присоединя́ю тя́ ко правосла́вней Це́ркви и привожду́ ко обще́нию боже́ственных та́инств церко́вных, и благословля́ю тя́ И́менем Отца́ и Сы́на и Свята́го Ду́ха. Ами́нь.

Посе́м присоедине́нный ста́нет, ожида́я литурги́и, ил̀и, а́ще не бе́ миром зна́менан, миропома́зания.

Предстоя́тель по надлежа́щем испыта́нии и наставле́нии приходя́щаго, повели́т ему́ испове́дати вся́ грехи́, ели́ки по́мнит. Разреше́ния не подае́т ему́̀. В ча́с же присоедине́ния поста́вит его при вхо́де во хра́м и са́м, в ма́лем облаче́нии, ста́в пре́д ни́м, вопроша́ет его̀:

Хо́щеши ли отрещи́ся от погреши́тельных уче́ний лютера́нскаго испове́дания?

Отве́т: Хощу́.

Вопроше́ние: Хо́щеши ли приити́ в соедине́ние ве́ры правосла́вно-кафоли́ческия?

Отве́т: Хощу́.

Тогда́ предстоя́тель благословля́ет его̀, глаго́ля:

Во и́мя Отца́, и Сы́на, и Свята́го Ду́ха, Ами́нь.

И возложи́в ру́ку на приклоне́нную главу его̀, диа́кону ре́кшу: Го́споду помо́лимся,и кли́ру: Го́споди, поми́луй, чте́т моли́тву сию̀:

Го́споди Бо́же и́стины, призри́ на раба́ Твоего̀ (и́мярек)*, ищу́щаго прибе́гнути ко святе́й Твое́й правосла́вней Це́ркви и по́д кро́вом Ея́ сохрани́тися. Обрати́ его̀ от заблужде́ния пре́жняго пути́ его̀ ко и́стинней я́же в Тя́ ве́ре, и пода́ждь ему́ благода́ть, е́же ходи́ти в за́поведех Твои́х. Да бу́дут о́чи Твои́ взира́юще на него̀ ми́лостию вы́ну, и у́ши твои́, е́же слы́шати гла́с моле́ния его̀, и та́ко да сопричте́тся ко избра́нному Твоему́ ста́ду. Тя́ бо пою́т вся́ си́лы небе́сныя, и Твоя́ е́сть сла́ва, Отца́ и Сы́на и Свята́го Ду́ха, во ве́ки веко́в. Ами́нь.

По моли́тве се́й, вопроша́ет е́го:

Отрица́ешся ли непра́ваго уче́ния, а́ки бы для изображе́ния догма́та о исхожде́нии Свята́го Ду́ха не довле́ет Самаго̀ Христа́ Спаси́теля изрече́ние: И́же от Отца́ исхо́дит, и а́ки бы потре́бно к сему́ сло́ву Христо́ву прибавле́ние: и от Сы́на?

Отве́т: Отрица́юся.

Вопроше́ние: Отрица́еши ли непра́ваго мне́ния, а́ки бы в Та́инстве Евхари́стии хле́б не прелага́ется в Те́ло Христо́во и не пребыва́ет Те́лом Христо́вым, и вино̀ не прилага́ется в Кро́вь Христо́ву и не пребыва́ет Кро́вию Христо́вою?

Отве́т: Отрица́юся.

Вопроше́ние: Оставля́еши ли твое́ после́дование лжеучи́телем, и́же отверга́ют та́инства Миропома́зания, Покая́ния, Бра́ка, Елеосвяще́ния и са́маго Свяще́нства, бе́з него́же не́сть и чи́н священнослужи́тельский, и дерза́ют соверша́ти Креще́ние и Евхари́стию, не иму́ще прее́мственнаго от святы́х апо́стол иерархи́ческаго рукоположе́ния?

Отве́т: Оставля́ю таки́х лжеучи́телей.

Вопроше́ние: Отступа́еши ли от пре́жде бы́вших твои́х лжеучи́телей, и́же свяще́ннаго Преда́ния не прие́млют, святы́х уго́дников не чту́т и поминове́ние усо́пших отверга́ют?

Отве́т: Отступа́ю невозвра́тно от си́х лжеучи́телей и их лжеуче́ний.

Вопроше́ние: И про́чих непра́вых уче́ний, в лютера́нстем испове́дании содержи́мых, отрица́ешися ли?

Отве́т: Отрица́юся.

Вопроше́ние: Жела́еши ли соедини́тися Святе́й, Правосла́вней, Кафоли́честей, Восто́чней Це́ркви?

Отве́т: Жела́ю от всего̀ моего̀ сердца.

Вопроше́ние: Ве́руеши ли, и ка́ко, во Еди́наго Бо́га, в Тро́ице сла́вимаго, и поклоня́ешися ли Ему́?

Отве́т: Ве́рую во Еди́наго Бо́га, в Тро́ице сла́вимаго, Отца́ и Сы́на и Свята́го Ду́ха, и покланя́юся Ему́.

И сотвори́в земно́й покло́н, чте́т Си́мвол ве́ры.

Посе́м предстоя́тель глаго́лет:

Благослове́н Бо́г, просвеща́яй вся́каго челове́ка, гряду́щаго в ми́р.

И присоединя́емого вопроша́ет:

Апо́стольская пра́вила и друга́я, на седми́ Вселе́нских и девяти́ Поме́стных Собо́рех постановле́нная, и про́чая Правосла́вныя Це́ркви преда́ния и уста́вы прие́млиши ли?

Отве́т: Прие́млю.

Вопроше́ние: Обеща́ешися ли Свяще́нное Писа́ние по истолкова́нию, е́же преда́ша на́м Отцы̀ и Учи́телие Церко́внии, и е́же содержи́т Восто́чная Це́рковь, испы́товати и уразумева́ти?

Отве́т: Обеща́юся и потщу́ся.

Вопроше́ние: Ве́руеши ли, я́ко от Христа́ Го́спода к получе́нию спаси́тельныя благода́ти, в созда́нней И́м Це́ркви се́дмь та́инств уста́влена су́ть: Креще́ние, Миропома́зание, Причаще́ние, Покая́ние, Свяще́нство, Бра́к и Елеосвяще́ние?

Отве́т: Ве́рую и испове́дую.

Вопроше́ние: Ве́руеши ли, я́ко в Евхари́стии, по́д та́инственными ви́дами хле́ба и вина́, причаща́ются ве́рнии Те́ла и Кро́ве Го́спода на́шего Иису́са Христа́ во оставле́ние грехо́в и в жи́знь ве́чную?

Отве́т: Ве́рую и испове́дую.

Вопроше́ние: Ве́руеши ли, я́ко моли́твы святы́х де́йствуют пре́д Бо́гом во спасе́ние на́ше, и мо́щи их, нетле́нием и чудесы̀ просла́вленныя, досто́йны су́ть че́ствования?

Отве́т: Ве́рую и испове́дую.

Вопроше́ние: Обеща́еши ли ико́ны святы́е, в Правосла́вной Це́ркви прие́млемыя, по ра́зуму ея́ почита́ти, относя́ че́ствование и́м к первообра́зному, и́ми изобража́емому?

Отве́т: Обеща́ю че́ствовати, я́коже в Правосла́вней Це́ркви запове́дано.

Вопроше́ние: Ве́руеши ли, я́ко Христо́с е́сть Глава́ Це́ркви, и то́й да́л е́сть па́стырям Ея́ вла́сть вяза́ти и реши́ти грехи́ челове́ков, благода́тию Свята́го Ду́ха, ре́к апо́столом: Приими́те Ду́х Свя́т. И́мже отпустите́ грехи́, отпу́стятся и́м: и и́мже держите́, держа́тся?

Отве́т: Ве́рую, и послуша́ние священнонача́лию церко́вному обеща́ю.

Посе́м предстоя́тель подае́т присоединя́емому коне́ц омофо́ра, а́ще святи́тель, или коне́ц епитрахи́ли, а́ще иере́́й, и глаго́лет:

Вни́ди в Це́рковь Правосла́вную, и соверше́нно отри́нув заблужде́ния, в ни́хже бы́л еси́, чти́ Отца́ Вседержи́теля, Сы́на Его̀ Иису́са Христа́, и Ду́ха Свята́го, и́же от Отца́ исхо́дит, Тро́ицу единосу́щную и неразде́льную.

И та́ко вве́д, поста́вит его̀ пре́д амво́ном, и́деже на столе́ положе́ни су́ть Кре́ст и Ева́нгелие. Иду́щим же и́м, пое́тся псало́м 66:

Бо́же, уще́дри ны̀ и благослови ны̀, просвети́ лице́ Твое́ на ны̀ и помилуй ны̀: позна́ти на земли́ пу́ть Тво́й, во все́х язы́цех спасе́ние Твое́. Да испове́дятся Тебе́ лю́дие, Бо́же: да испове́дятся Тебе́ лю́дие вси́. Да возвеселя́тся и да возра́дуются язы́цы: я́ко су́диши лю́дем пра́востию и язы́ки на земли́ наста́виши. Да испове́дятся Тебе́ лю́дие, Бо́же, да испове́дятся Тебе́ лю́дие вси́. Земля́ даде пло́д сво́й: благослови́ ны̀, Бо́же Бо́же на́ш, благослови́ ны̀, Бо́же: и да убоя́тся Его̀ вси́ концы̀ земли́.

Та́же предстоя́тель повели́т ему́ коле́на преклони́ти и глаго́лет са́м стихи́ сия́:

Посли́ Ду́х Тво́й, и сози́ждутся, и обнови́ши лице́ земли́.

Спаси́ раба́ Твоего̀, Бо́же мо́й, упова́ющаго на Тя́.

Бу́ди ему́, Го́споди, сто́лп кре́пости от лица́ вра́жия.

Го́споди, услы́ши моли́тву мою̀, и во́пль мо́й к Тебе́ да прии́дет.

По изглаго́лании, диа́кону ре́кшу: Го́споду помо́лимся, и кли́ру: Го́споди, поми́луй, чте́т со умиле́нием моли́тву сию̀:

Го́споди Бо́же Вседержи́телю, согреша́ющим о́бразы покая́ния предлага́яй и заблу́ждшим пу́ть пра́вый показу́яй, во е́же бы ни еди́ному поги́бнути, но все́м мо́щно бе́ спасти́ся. Благодари́м Тя́, я́ко и сему́ рабу́ Твоему́ (и́мярек) возсия́л еси́ све́т позна́ния Твоея́ и́стины, и сподо́бил еси́ его̀ ко святе́й Твое́й Правосла́вно-Кафоли́честей Це́ркви прибе́гнути. Да́ждь у́бо ему́ соедини́тися о́ней нелицеме́рно и невозвра́тно: сопричти́ его̀ избра́нному Твоему́ ста́ду: сотвори́ его̀ сосу́д че́стен и жили́ще Свята́го Твоего̀ Ду́ха, я́ко да те́м всегда́ просвеща́емь и наставля́емь, спаси́тельныя за́поведи Твоя́ неруши́мо соблюде́т, и та́ко небе́сных Твои́х благи́х восприя́тия сподо́бится. Ты́ бо еси́ Бо́г ми́лости и щедро́т и человеколю́бия, и Тебе́ сла́ву возсыла́ем, Отцу́ и Сы́ну и Свято́му Ду́ху, ны́не и при́сно и во ве́ки веко́в. Ами́нь.

По моли́тве повелева́ет ему́ возста́ти, глаго́ля:

Ста́ни до́бре, ста́ни со стра́хом, и пре́д Ева́нгелием и святы́м Кресто́м Спаси́теля утверди́ да́нное тобо́ю обеща́ние.

О́н же, воста́в, ре́чет:

Ве́ру правосла́вно-кафоли́ческую, ю́же ны́не доброво́льне испове́дую, це́лу и ненаруши́му да́же до коне́чнаго моего̀ издыха́ния, Бо́гу помога́ющу, тве́рдо содержа́ти, и за́поведи ея́ раде́тельно и ра́достно исполня́ти потщу́ся, соблюда́я в непорочности, ели́ко мо́щно се́рдце мое́. Во увере́ние сего̀ моего̀ обеща́ния целу́ю словеса́ и Кре́ст Спаси́теля моего̀. Ами́нь.

По лобыза́нии, предстоя́тель глаго́лет:

Благослове́н Бо́г, хотя́й все́м челове́ком спасти́ся и в ра́зум и́стины приити́, сы́й благослове́н во ве́ки.

Кли́р: Ами́нь.

Посе́м глаго́лет:

Преклони́ коле́на Твоя́ пре́д Го́сподем Бо́гом, его̀же испове́дал еси́, и прии́меши оставле́ние грехо́в твои́х.

Прекло́ншу ему́ коле́на и главу́, предстоя́тель разреша́ет его̀, си́це:

Госпо́дь на́ш Иису́с Христо́с, ключи́ ца́рствия небе́снаго апо́столом вручи́вый, и да́вый и́м и и́х прее́мником вла́сть вяза́ти и реши́ти грехи́ челове́ков, чре́з мене́, недесто́йнаго архиере́я (иере́я), проща́ет тя́, ча́до (и́мярек), и разреша́ет от связа́ния кля́твеннаго или́ запреще́ния, и от все́х грехо́в Твои́х. И а́з, да́нною мне́ от Него̀ вла́стию, присоединя́ю тя́ ко правосла́вней Це́ркви и привожду́ ко обще́нию боже́ственных Та́инств церко́вных, и благословля́ю тя́ и́менем Отца́ и Сы́на и Свята́го Ду́ха. Ами́нь.

Посе́м присоедине́нный ста́нет, ожида́я миропома́зания.

По испыта́нии, наставле́нии и и́споведи, бе́з разреше́ния грехо́в присоединя́емаго, предстоя́тель, поста́вив его̀ при вхо́де во хра́м, вопроша́ет:

Хо́щеши ли отрещи́ся от непра́ваго вероиспове́дания реформа́тскаго?

Отве́т: Хощу́.

Вопроше́ние: Хо́щеши ли приити́ в соедине́ние ве́ры правосла́вно-кафоли́ческия?

Отве́т: Хощу́.

Тогда́ предстоя́тель благословля́ет его̀, глаго́ля:

Во и́мя Отца́, и Сы́на, и Свята́го Ду́ха, Ами́нь.

И возложи́в ру́ку на приклоне́нную главу́ его̀̀, диа́кону ре́кшу: Го́споду помо́лимся, и кли́ру: Го́споди, поми́луй, и предстоя́тель чте́т моли́тву сию̀:

Го́споди Бо́же и́стины, при́зри на раба́ Твоего̀̀ (и́мярек)*, и́щущаго прибе́гнути ко святе́й Твое́й правосла́вней Це́ркви и по́д кро́вом Ея́ сохрани́тися. Обрати́ его̀̀ от заблужде́ния пре́жняго пути́ его̀̀ ко и́стинней я́же в Тя́ ве́ре, и пода́ждь ему́ благода́ть, е́же ходи́ти в за́поведех Твои́́х. Да бу́дут о́чи Твои́ взира́юще на него̀ ми́лостию вы́ну, и у́ши твои́, е́же слы́шати гла́с моле́ния его̀, и та́ко да сопричте́тся ко избра́нному Твоему́̀ ста́ду. Тя́ бо пою́т вся́ силы небе́сныя, и Твоя́ е́сть сла́ва, Отца́̀ и Сы́на и Свята́го Ду́ха, во ве́ки веко́в. Ами́нь.

По моли́тве сей, вопрошает его̀̀:

Отрица́ешся ли непра́ваго уче́ния, а́ки бы для изображе́ния догма́та о исхожде́нии Свята́го Ду́ха не довле́ет Самаго̀ Христа́ Спаси́теля изрече́ние: И́же от Отца́ исхо́дит, и а́ки бы потре́бно к сему́ сло́ву Христо́ву прибавле́ние: и от Сы́на?

Отве́т: Отрица́юся.

Вопроше́ние: Отрица́ешися ли ло́жнаго уче́ния, а́ки бы предопределе́ние челове́ков ко спасе́нию, или́ отверже́ние и́х быва́ет не по боже́ственному предве́дению их ве́ры и до́брых де́л, или́ и́х неве́рия или́ нече́стия, но по не́коей непродоли́мей судьбе́?

Отве́т: Отрица́юся сего̀ лжеуче́ния.

Вопроше́ние: Отверга́еши ли непра́вое мне́ние, а́ки бы в та́инстве Евхари́стии хле́б и вино̀ не прелага́ются в те́ло Христо́во и в кро́вь Христо́ву, и суть то́кмо ви́димая зна́мения те́ла и кро́ве Христо́вых?

Отве́т: Отверга́ю сие́ непра́вое мне́ние.

Вопроше́ние: Оставля́еши ли после́дование лжеучи́телем, и́же отверга́ют пя́ть Та́инств: Миропома́зание, Покая́ние, Бра́к, Елеосвяще́ние и са́мое Свяще́нство, бе́з него́же не́сть и чи́н священнослужи́тельский, и не иму́ще хирото́нии, дерза́ют соверша́ти не то́кмо Креще́ние, но и Евхари́стию?

Отве́т: Оставля́ю та́ких лжеучи́телей.

Вопроше́ние: Отступа́еши ли от согла́сия с реформа́торскими лжеучи́тельми, и́же не прие́млют свяще́ннаго Преда́ния, не чту́т святы́х Бо́жиих и отверга́ют поминове́ние усо́пших?

Отве́т: Отступа́ю и обще́ния с си́ми лжеучи́тельми име́ти не бу́ду.

Вопроше́ние: Жела́еши ли соедини́тися Святе́й, Правосла́вней, Кафоли́честей, Восто́чней Це́ркви?

Отве́т: Жела́ю от всего̀ моего̀ се́рдца.

Вопроше́ние: Ве́руеши ли, и ка́ко, во Еди́наго Бо́га, в Тро́ице сла́вимаго, и поклоня́ешися ли Ему́?

Отве́т: Ве́рую во Еди́наго Бо́га, в Тро́ице сла́вимаго, Отца́ и Сы́на и Свята́го Ду́ха, и покланя́юся Ему́.

И сотвори́в земно́й покло́н, чте́т Си́мвол ве́ры.

Посе́м предстоя́тель глаго́лет:

Благослове́н Бо́г, просвеща́яй вся́каго челове́ка, гряду́щаго в ми́р.

И присоединя́емаго вопроша́ет:

Апо́стольская пра́вила и друга́я, на седми́ Вселе́нских и девяти́ Поме́стных Собо́рех постано́вленная, и про́чая Правосла́вныя Це́ркви преда́ния и уста́вы прие́млиши ли?

Отве́т: Прие́млю.

Вопроше́ние: Обеща́ешися ли Свяще́нное Писа́ние по истолкова́нию, е́же преда́ша на́м Отцы̀ и Учи́телие Церко́внии, и е́же соде́ржит Восто́чная Це́рковь, испы́товати и уразумева́ти?

Отве́т: Обеща́юся и потщу́ся.

Вопроше́ние: Ве́руеши ли, я́ко от Христа́ Го́спода, к получе́нию спаси́тельныя благода́ти, в созда́нней И́м Це́ркви се́дмь Та́инств уста́влена су́ть: Креще́ние, Миропома́зание, Причаще́ние, Покая́ние, Свяще́нство, Бра́к и Елеосвяще́ние?

Отве́т: Ве́рую и испове́дую.

Вопроше́ние: Ве́руеши ли, я́ко в Евхари́стии, по́д та́инственными ви́дами хле́ба и вина́, причаща́ются ве́рнии Те́ла и Кро́ве Го́спода на́шего Иису́са Христа́ во оставле́ние грехо́в и в жи́знь ве́чную?

Отве́т: Ве́рую и испове́дую.

Вопроше́ние: Ве́руеши ли, я́ко моли́твы святы́х де́йствуют пре́д Бо́гом во спасе́ние на́ше, и мо́щи и́х, нетле́нием и чудесы̀ просла́вленныя, досто́йны су́ть че́ствования?

Отве́т: Ве́рую и испове́дую.

Вопроше́ние: Обеща́еши ли ико́ны святы́е, в Правосла́вней Це́ркви прие́млемыя, по ра́зуму Ея́ почита́ти, относя́ че́ствование и́м к первообра́зному, и́ми изобража́емому?

Отве́т: Обеща́ю че́ствовати, я́коже в Правосла́вней Це́ркви запове́дано.

Вопроше́ние: Ве́руеши ли ты, что Христо́с е́сть Глава Це́ркви, и Он да́л е́сть па́стырям Ея́ вла́сть вяза́тии и реши́ти грехи́ челове́ков, благода́тию Свята́го Ду́ха, ре́к апо́столом: Приими́те Ду́х Свя́т. И́мже отпустите́ грехи́, отпу́стятся и́м: и и́мже держите́, держа́тся?

Отве́т: Ве́рую, и послуша́ние свяще́нноначалию церко́вному обеща́ю.

Посе́м предстоя́тель подае́т присоединя́емому коне́ц омофо́ра, а́ще святи́тель, или́ коне́ц епитрахи́ли, а́ще иере́й, и глаго́лет:

Вни́ди в Це́рковь Правосла́вную, и соверше́нно отри́нув заблужде́ния, в ни́хже бы́л еси́, чти́ Отца́ Вседержи́теля, Сы́на Его̀ Иису́са Христа́, и Ду́ха Свята́го, и́же от Отца́ исхо́дит, Тро́ицу единосу́щную и неразде́льную.

И та́ко вве́д, поставля́ет его̀̀ пре́д амво́ном, иде́же на столе́ положе́ни су́ть Кре́ст и Ева́нгелие. Иду́щим же и́м, пое́тся псало́м 66:

Бо́же, уще́дри ны̀ и благослови́ ны̀, просвети́ лице́ Твое́ на ны̀ и поми́луй ны̀: Позна́ти на земли́ пу́ть Тво́й, во все́х язы́цех спасе́ние Твое́. Да испове́дятся Тебе́ лю́дие, Бо́же: да испове́дятся Тебе́ лю́дие вси́. Да возвеселя́тся и да возра́дуются язы́цы: я́ко су́диши лю́дем правото́ю и язы́ки на земли́ наста́виши. Да испове́дятся Тебе́ лю́дие, Бо́же, да испове́дятся Тебе́ лю́дие вси́. Земля́ даде́ пло́д сво́й: благослови́ ны̀, Бо́же Бо́же на́ш, благослови́ ны̀, Бо́же: и да убоя́тся Его̀ вси́ концы̀ земли́.

Та́же предстоя́тель повели́т ему́ коле́на преклони́ти и глаго́лет сам стихи́ сия́:

Посли́ Ду́х Тво́й, и сози́ждутся, и обнови́ши лице́ Земли́.

Спаси раба́ Твоего̀̀, Бо́же мо́й, упова́ющаго на Тя́.

Бу́ди ему́, Го́споди, сто́лп кре́пости от лица́ вра́жия.

Го́споди, услы́ши моли́тву мою̀, и во́пль мо́й к Тебе́ да прии́дет.

По изглаго́лании, диа́кону ре́кшу: Го́споду помо́лимся, и кли́ру: Го́споди, поми́луй, чте́т со умиле́нием моли́тву сию̀:

Го́споди Бо́же Вседержи́телю, согреша́ющим о́бразы покая́ния предла́гаяй и заблу́ждшим пу́ть пра́вый показу́яй, во е́же бы ни еди́ному поги́бнути, но все́м мо́щно бе́ спасти́ся. Благодари́м Тя́, я́ко и сему́ рабу́̀ Твоему́̀ (и́мярек) возсия́л еси́ све́т позна́ния Твое́я и́стины, и сподо́бил еси́ его̀̀ ко святе́й Твое́́й Правосла́вно-Кафоли́честей Це́ркви прибе́гнути. Да́ждь у́бо ему́ соедини́тися о́ней нелицеме́рно и невозвра́тно: сопричти́ его̀ избра́нному Твоему́̀ ста́ду: сотвори́ его̀̀ сосу́д че́стен и жили́ще Свята́го Твоего̀̀ Ду́ха, я́ко да те́м всегда́ просвеща́ем и наставля́ем, спаси́тельныя за́поведи Твоя́ неруши́мо соблюде́т, и та́ко небе́сных Твои́х благи́х восприя́тия сподо́бится. Ты̀ бо еси́ Бо́г ми́лости и щедро́т и человеколю́бия, и Тебе́ сла́ву воссыла́ем, Отцу́ и Сы́ну и Свято́му Ду́ху, ны́не и при́сно и во ве́ки веко́в. Ами́нь.

По моли́тве повелева́ет ему́ возста́ти, глаго́ля:

Ста́ни добре, ста́ни со стра́хом, и пре́д Ева́нгелием и святы́м Кресто́м Спаси́теля утверди́ да́нное тобо́ю обеща́ние.

О́н же, воста́в, ре́чет:

Ве́ру правосла́вно-кафоли́ческую, ю́же ны́не доброво́льне испове́дую, це́лу и ненаруши́му да́же до коне́чнаго моего̀ издыха́ния, Бо́гу помога́ющу, тве́рдо содержа́ти, и за́поведи ея́ раде́тельно и ра́достно исполня́ти потщу́ся, соблюда́я в непоро́чности, ели́ко мо́щно се́рдце мое́. Во увере́ние сего̀ моего̀ обеща́ния целу́ю словеса́ и Кре́ст Спаси́теля моего̀. Ами́нь.

По лобыза́нии, предстоя́тель глаго́лет:

Благослове́н Бо́г, хотя́й все́м челове́ком спасти́ся и в ра́зум и́стины приити́, сы́й благослове́н во ве́ки.

Кли́р: Ами́нь.

Посе́м глаго́лет:

Преклони́ коле́на Твоя́ пре́д Господем Бо́гом, его́же испове́дал еси́, и прии́меши оставле́ние грехо́в твои́х.

Прекло́ншу ему́ коле́на и главу́, предстоя́тель разреша́ет его̀, си́це:

Госпо́дь на́ш Иису́с Христо́с, ключи́ ца́рствия небе́снаго апо́столом вручи́вый, и да́вый и́м и и́х прее́мником вла́сть вяза́ти и реши́ти грехи́ челове́ков, чре́з мене́, недо́стойнаго архиере́я (иере́я), проща́ет тя́, ча́до (и́мярек), и разреша́ет от связа́ния кля́твеннаго или́ запреще́ния, и от все́х грехо́в твоих. И а́з, да́нною мне́ от Него̀ вла́стию, присоединя́ю тя́ ко правосла́вней Це́ркви и привожду́ ко обще́нию боже́ственных Та́инств це́рковных, и благословля́ю тя́ И́менем Отца́ и Сы́на и Свята́го Ду́ха. Ами́нь.

Посе́м присоедине́нный ста́нет, ожида́я миропома́зания.

Перве́е изсле́довати подоба́ет, а́ще не бы́ша уже́ креще́ни, и а́ще и́стинно, спасе́ния ра́ди души́ своея́, а не прибы́тка ра́ди, или́ ины́я привре́менныя вины̀, креще́ния свята́го сподо́бится жела́ют. Извести́вся же несумне́нно, я́ко спасе́ния то́чию и́щут, архиере́й или иере́й оглаша́ет и́х и имена́ и́м христиа́нская нарица́ет.

Прише́дше у́бо хотя́щии огласи́тися с восприе́мники свои́ми, ста́нут пре́д две́рми церко́вными.

Святи́тель, вше́д во алта́рь и открове́нною главо́ю па́д ни́ц пре́д свято́ю трапе́зою, благодаре́ние воздае́т Бо́гови о обраще́нии и́х, и мо́лится, да да́руется ему́ самому́ благода́ть, во отверзе́нии у́ст, во е́же возмощи́ ему́ научи́ти и́х пути́ спаси́тельному. По моли́тве се́й, востае́т и на ма́нтию прие́млет епитрахи́ль и омофо́р, ми́тру на главу́, и вне́ алтаря́ же́зл в шу́ицу.

А́ще ли де́йствует иере́й, сицевы́м же о́бразом помоли́вся и возло́жь на ся́ епитрахи́ль и фело́нь, и целова́в святу́ю трапе́зу, исхо́дит к за́падным церко́вным две́рем. Кли́р же пое́т псало́м 33:

Благословлю̀ Го́спода на вся́кое вре́мя, вы́ну хвала́ Его̀ во усте́х мои́х. О Го́споде похва́лится душа́ моя́: да услы́шат кро́тцыи и возвеселя́тся. Возвели́чите Го́спода со мно́ю, и вознесе́м и́мя Его̀ вку́пе. Взыска́х Го́спода, и услы́ша мя́ и от все́х скорбе́й мои́х изба́ви мя́. Приступи́те к Нему́ и просвети́теся, и ли́ца ва́ша не постыдя́тся. Се́й ни́щий воззва́, и Госпо́дь услы́ша и́, и от все́х скорбе́й его̀ спасе́ и́. Ополчи́тся А́нгел Госпо́день о́крест боя́щихся Его̀ и изба́вит и́х. Вкуси́те и ви́дите, я́ко бла́г Госпо́дь: блаже́н му́ж, и́же упова́ет На́нь. Бо́йтеся Го́спода, вси́ святи́и Его̀, я́ко не́сть лише́ния боя́щымся Его̀. Бога́тии обнища́ша и взалка́ша: взыска́ющии же Го́спода не лиша́тся вся́каго бла́га. Прииди́те, ча́да, послу́шайте мене́, стра́ху Госпо́дню научу́ ва́с. Кто́ есть челове́к хотя́й живо́т, любя́й дни́ ви́дети бла́ги? Удержи́ язы́к тво́й от зла́ и устне́ твои́, е́же не глаго́лати льсти́. Уклони́ся от зла́ и сотвори́ бла́го: взыщи́ ми́ра и пожени́ и́. О́чи Госпо́дни на пра́ведныя, и у́ши Его̀ в моли́тву и́х. Лице́ же Госпо́дне на творя́щыя зла́я, е́же потреби́ти от земли́ па́мять и́х. Воззва́ша пра́веднии, и Госпо́дь услы́ша и́х и от все́х скорбе́й и́х изба́ви и́х. Бли́з Госпо́дь сокруше́нных се́рдцем, и смире́нныя ду́хом спасе́т. Мно́ги ско́рби пра́ведным, и от все́х и́х изба́вит я́ Госпо́дь. Храни́т Госпо́дь вся́ ко́сти и́х, ни еди́на от ни́х сокруши́тся. Сме́рть гре́шников люта́, и ненави́дящии пра́веднаго прегреша́т. Изба́вит Госпо́дь ду́шы ра́б Свои́х, и не прегреша́т вси́ упова́ющии на Него̀.

Ста́в же у две́рей вну́трь хра́ма, вопроша́ет оглаша́емаго:

Кто̀ еси́?

Отве́т: А́з е́смь, и́стиннаго Бо́га позна́ти жела́яй и спасе́ния ищя́й.

Вопроше́ние: Что̀ прише́л еси́ ко Святе́й Це́ркви?

Отве́т: Научи́теся от нея́ и́стинней ве́ре и к не́й присоедини́тися.

Вопроше́ние: Ку́ю по́льзу получи́ти наде́ешися от и́стинныя ве́ры?

Отве́т: Жи́знь ве́чную и блаже́нную.

Та́же священноде́йствуяй поуча́ет:

А́ще хо́щеши име́ти живо́т ве́чный, долженству́еши ве́ру правосла́вно-кафоли́ческую соблюсти́. Ве́ра же сия́ е́сть, я́ко да Бо́га еди́наго в Тро́ице, Отца́ и Сы́на и Свята́го Ду́ха, и Тро́ицу во Еди́нице испове́дуеши, не слива́я Ли́ц, ниже́ разделя́я Существо̀. Бо́г бо е́сть Оте́ц, Бо́г Сы́н, Бо́г Ду́х Свя́тый: оба́че не трие́ бо́зи, но еди́н Бо́г. И о воплоще́нии Го́спода на́шего Иису́са Христа да разуме́еши, я́ко Бо́г е́сть и Челове́к: Бо́г, Сы́н Единоро́дный от Бо́га Отца́ пре́жде все́х ве́к рожде́нный, Челове́к же, от Мари́и Присноде́вы пло́ть на́шу восприе́мый: пострада́ пло́тию и ра́спят на Кресте́ ра́ди на́шего спасе́ния, уме́рый и воскре́сый, вознесы́йся на небеса́ и се́дый одесну́ю Бо́га и Отца́: егда́ же прии́дет суди́ти, вси́ воскре́снут, и пра́ведницы жи́знь блаже́нную насле́дуют, зла́я же твори́вшии прии́мут му́ку ве́чную по дело́м свои́м. Сию̀ ве́ру пропове́даша апо́столи, свое́ю кро́вию запечатле́ша му́ченицы, провозвеща́ху Собори и вси́ отцы̀ и учи́телие Церко́внии. Та́ко и ты̀ ве́руя, до́лженствуеши и за́поведи Госпо́дни соблюда́ти: ве́ра бо бе́з де́л мертва́ е́сть. Дре́вния и бо́льшыя за́поведи сия́ су́ть: Возлю́биши Го́спода Бо́га Твоего̀ от всея́ души́ твоея́, и бли́жняго твоего̀, я́ко са́м себе́. Внуша́я на́м храни́ти сия́ обоя́, Христо́с Спаси́тель на́ш повеле́ на́м и враго́в люби́ти, и все́м оби́дящим добро̀ твори́ти, и вся́каго зла́ уклоня́тися. Коре́ния же зла́ сия́ су́ть: го́рдость, лихоима́ние, по́хоть пло́тская, за́висть, невоздержа́ние, гне́в и ле́ность. Ты̀ же, я́ко ца́рствия небе́снаго насле́дник бы́ти хо́щеши, побежда́й о́ныя доброде́тельми: го́рдость смире́нием, лихоима́ние милосе́рдием, по́хоть пло́ти целому́дрием, за́висть сора́дованием, невоздержа́ние тре́звостию и поще́нием, ле́ность усе́рдием к моли́тве, богослуже́нию и про́чим дело́м благоче́стия.

По оконча́нии сего̀ поуче́ния, быва́ет вопроше́ние:

Хо́щеши ли у́бо сию̀ святу́ю ве́ру се́рдцем твои́м прия́ти, и неотсту́пно, до кончи́ны жи́зни твоея́, содержа́ти, та́кожде и доброде́телем христиа́нским навы́кнути, и в ни́х по си́ле, при по́мощи Бо́жией, преуспева́ти?

Отве́т: И́стинно от всего̀ се́рдца моего̀ хощу́ ве́ру сию̀ святу́ю содержа́ти до после́днего моего̀ издыха́ния, доброде́тельному же ева́нгельскому житию̀ прилежа́ти, моля́ Бо́га о по́мощи.

Предстоя́тель глаго́лет к нему́:

Преклони́ коле́на твои́ пре́д Го́сподем Бо́гом на́шим.

О́н же, коле́на прекло́нь и ру́це крестообра́зно на пе́рсех сложе́ны име́я, пре́д дверми стои́т.

Предстоя́тель, зна́меная главу́ его̀ три́жды, глаго́лет:

Зна́менается ра́б Бо́жий (и́мярек) во и́мя Отца́, и Сы́на, и Свята́го Ду́ха.

Диа́кон: Го́споду помо́лимся.

Кли́р: Го́споди, поми́луй.

Архиере́й, или иере́й, стоя́ на́д оглаша́емым, чте́т моли́тву сию̀:

Благослове́н еси́, Го́споди, от все́х язы́к, призыва́яй лю́ди избра́нны, ревни́тели до́брых де́л. Ты̀ и ны́не прише́дшаго ко святе́й Твое́й Це́ркви раба́ Твоего̀ (и́мярек) благослови́: отве́рзи его̀ о́чи душе́вныя к разуме́нию чуде́с Твоего̀ о на́с промышле́ния, откры́й слу́х се́рдца его̀ ко прия́тию Боже́ственных слове́с Твои́х, да во вре́мя благоприя́тно сподо́бится ба́ни возрожде́ния и оде́жди нетле́ния. Ты̀ изя́л еси́ ду́шу сего̀ раба́ Твоего̀ от пре́лести лука́ваго: са́м у́бо сохрани́ ю̀ невреди́му от наве́т вра́жиих, и обита́лище благода́ти Твоея́ бы́ти удосто́й. Твое́ бо е́сть, е́же избавля́ти на́с от ко́зней лука́ваго, и Тебе́ сла́ву и благодаре́ние прино́сим, ны́не и во ве́ки веко́в.

Кли́р: Ами́нь.

После́дующие дни́ оглаша́емый пребыва́ет в поще́нии и моли́твах: приходя́ во хра́м Бо́жий к нача́лу слу́жб церко́вных, и та́мо при двере́х церко́вных стоя́, и с сокруше́нием серде́чным о свое́м пре́жнем омраче́нии воздыха́я, со слеза́ми мо́лится о е́же сподо́битися ему́ прия́тия Свята́го Креще́ния. Духовны́й же его̀ наста́вник поуча́ет его̀ ве́ре, изъясня́ет свяще́нные догма́ты, показу́ет си́лу святы́х Та́инств, внуша́ет ему́ повинове́ние за́поведем ева́нгельским и церко́вным, и на еди́не испыту́ет его̀, а́ще по чи́стому жела́нию се́рдца и бе́з лицеме́рия к ве́ре правосла́вней прихо́дит.

По дне́х дово́льнаго науче́ния, по вече́рни, предстоя́тель облачи́тся во свяще́нную оде́жду, я́коже предрече́ся, и поклони́вся три́жды пре́д престо́лом и целова́в кра́й его̀, исхо́дит от алтаря́ к две́рем церко́вным. Пое́тся же псало́м 8:

Го́споди Госпо́дь на́ш, я́ко чу́дно и́мя Твое́̀ по все́й земли́, я́ко взя́тся великоле́пие Твое́ превы́ше небе́с. Из у́ст младе́нец и ссу́щих соверши́л еси́ хвалу́, вра́г Твои́х ра́ди, е́же разру́шити врага́ и ме́стника. Я́ко узрю̀ небеса́, дела́ пе́рст Твои́х, луну́ и зве́зды, я́же Ты̀ основа́л еси́. Что̀ е́сть челове́к, я́ко по́мниши его̀? Или́ сы́н челове́чь, я́ко посеща́еши его̀? Ума́лил еси́ его̀ ма́лым чи́м от а́нгел, сла́вою и че́стию венча́л еси́: и поста́вил еси́ его̀ на́д де́лы руку́ Твое́ю, вся́ покори́л еси́ по́д но́зе его̀: О́вцы и волы̀ вся́, еще́ же и скоты̀ польски́я: пти́цы небе́сныя и ры́бы морски́я. Го́споди Госпо́дь на́ш, я́ко чу́дно и́мя Твое́ по все́й земли́.

Оглаша́емый же стои́т в па́перти, зря́ к храму. И глаго́лет предстоя́тель к нему́:

Се́, ча́до, вре́мя наставле́ния твоего̀ преста́. Те́мже, а́ще осо́бне и вопроша́емь бы́л еси́, любве́ ли ра́ди Христо́вы и спасе́ния души́ твоея́ христиани́н бы́ти хо́чеши: оба́че до́лженствуеши ны́не и пре́д церко́вным собра́нием сия́ изъяви́ти, пе́рваго лжеве́рия, в не́мже бы́л еси́, отре́щися, и ве́ру правосла́вную я́сно испове́дати.

Вопроше́ние: Отрица́ешися ли от всего̀ злове́рия иуде́ев, и от все́х хуле́ний и́х, я́же на Спаси́теля на́шего Иису́са Христа́, Сы́на Бо́жия, на Пречи́стую Ма́терь Его̀, на святы́е Его̀, и проклина́ний, я́ко лжи́вых, богопроти́вных и душепа́губных?

Отве́т: Отрица́юся от злове́рия иуде́ев, и от все́х хуле́ний и́х и проклина́ний, и всеконе́чне отметаю оная, я́ко богопроти́вная и душепа́губная.

Вопроше́ние: Отрица́ешися ли обреза́ния, суббо́тства, пра́здников и обря́дов иуде́йских, прише́ствием Христо́вым упраздне́нных, я́ко уже́ не по́льзующих?

Отве́т: Отрица́юся.

Вопроше́ние: Отрица́ешися ли богопроти́вных уче́ний, я́же иуде́йстие равви́ны, в кни́зе, нарица́емей Талму́д, и во ины́х дре́вних и но́вых писа́ниях изложи́ша?

Отве́т: Отрица́юся.

Вопроше́ние: Отрица́ешися ли ло́жнаго уче́ния иуде́ев, я́ко месси́я еще́ не прии́де, и тще́тнаго ожида́ния, что́ прии́дет?

Отве́т: Лжеуче́ния сего̀ отрица́юся, и ожида́ние оста́вил е́смь.

Вопроше́ние: Сочетава́ешися ли и́стинно, нелицеме́рно и ни в че́мже сумня́ся, все́ю душе́ю тве́ю, еди́ному и́стинному, в Тро́ице сла́вимому Бо́гу, и ве́руеши ли в Него̀?

Отве́т: Сочетава́юся и́стинно, нелицеме́рно и бе́з ко́его-ли́бо сумне́ния, от всея́ души́ моея́, еди́ному и́стинному, в Тро́ице сла́вимому Бо́гу, и ве́рую в Него̀.

Вопроше́ние: Испове́души ли, я́ко Оте́ц, Сы́н и Свя́тый Ду́х есть Бо́г еди́н, по существу́ неразде́льный, в тре́х же ли́цех разделя́емый? Ве́руеши ли в Него и покланя́ешися Ему́?

Отве́т: Си́це ве́рую, испове́дую и Бо́гу триеди́ному покланя́юся.

Вопроше́ние: Ве́руеши ли и испове́души, я́ко Иису́с Христо́с, единоро́дный Сы́н Бо́жий, от Отца́ пре́жде ве́к рожде́нный, воплоти́ся от Ду́ха Свята́го и Де́вы Мари́и, на́шего ра́ди спасе́ния, и бы́сть челове́к, сы́й вку́пе и Бо́г, во еди́ной ипоста́си, во дву́х же естества́х, бо́жестем и челове́честем, непрело́жно и несли́тно?

Отве́т: Си́це ве́рую, и сия́ та́ко испове́дую неумне́нно.

Вопроше́ние: Ве́руеши ли, я́ко Госпо́дь Иису́с Христо́с не ну́ждею, но во́лею, и́стинною, а не привиде́нием пло́тию пострада́ за на́с, божество́м же безстра́стен прибы́сть: я́ко челове́к умре́ и погребе́н бы́сть, си́лою Своего̀ Божества́ воскре́се, на небеса́ с пло́тию взы́де, и седи́т одесну́ю Отца́, отону́дуже па́ки прии́дет суди́ти живы́м и ме́ртвым, и ца́рствовати и́мать, и ца́рствию Его̀̀ не бу́дет конца́?

Отве́т: Та́ко се́рдцем ве́рую, и усты̀ нелицеме́рно вся́ сия́ испове́дую.

Вопроше́ние: Ве́руеши ли, я́ко Де́ва Мари́я, ро́ждшая Христа́ Бо́га на́шего, е́сть Присноде́ва и вои́стинну Богоро́дица, и того̀ ра́ди досто́йно е́сть почита́ти Ю̀, я́ко честне́йшую и вы́шшую си́л безпло́тных, и покланя́тися Е́й благогове́йно, я́ко перве́йшей о на́с к Бо́гу Хода́таице?

Отве́т: Вся́ сия́ о Присноде́ве Мари́и испове́дую, я́ко Бо́жию Ма́терь сию̀ почита́ю, и в моли́твах и́мам прибега́ти к Не́й.

Вопроше́ние: Ве́руеши ли, я́ко Кре́ст Го́спода на́шего Иису́са Христа́, на не́м распя́таго, не ктому́ прокля́тия и сме́ртныя ка́зни ору́дие е́сть, но спасе́ния и жи́зни ве́чныя зна́мение, е́же на себе́ изобража́юще, сете́й вра́жиих избега́ем?

Отве́т: Си́це о Кресте́ Госпо́дни ве́рую, и си́м спаси́тельным зна́мением огражда́ти себе́ от сете́й лука́ваго, со упова́нием, потщу́ся.

Вопроше́ние: Ве́руеши ли, я́ко в Це́ркви Свое́й Святе́й Госпо́дь на́ш Иису́с Христо́с учреди́л е́сть та́инств се́дмь, я́ко необходи́мых: креще́ние, миропома́зание, причаще́ние, покая́ние, свяще́нство, бра́к и елеосвяще́ние, чре́з ни́хже пода́емою благода́тию ве́рнии раби́ Христо́вы быва́ют насле́дницы жи́зни ве́чныя?

Отве́т: Си́це о святы̀х та́инствах ве́рую, и о́ныя се́дмь в Це́ркви Бо́жией, ко спасе́нию ча́д Ея́, необходи́мыми испове́дую.

Вопроше́ние: Ве́руеши ли, я́ко свяще́нное Писа́ние Ве́тхаго и Но́ваго Заве́та, Це́рковию содержи́мое, святи́и Бо́жии челове́цы изглаго́лаша, от Свята́го Ду́ха просвеща́еми, и того̀ ра́ди прие́млиши ли о́ное, я́ко богодухнове́нное и спасительное? От неприе́млющих же и ху́лящих е́ отмета́ешися ли?

Отве́т: Писа́ние свяще́нное, Це́рковию содержи́мое, я́ко богодухнове́нное и свято́е, и а́з прие́млю, я́ко слово Бо́жие, ко спасе́нию на́м да́нное: неприе́млющих же и ху́лящих о́ное отмета́юся.

Вопроше́ние: Апо́стольская и святы̀х оте́ц преда́ния, чиноположе́ния и моли́твословия, на́шей Це́рковию содержи́мая, вменя́еши ли душеспаси́тельна бы́ти и прие́млиши ли я́?

Отве́т: Вся́ сия́ душеспаси́тельна бы́ти ве́рую и после́довати о́нем, ели́ко от мене́ потре́бно, обещава́юся.

Вопроше́ние: Ве́руеши ли, я́ко апо́столи, му́ченицы и вси́ святи́и, и́хже Це́рковь на́ша чти́т и в мольбу́ призыва́ет, су́ть вои́стинну уго́дницы Бо́жии, со Христо́м во Ца́рствии небе́снем пребыва́ют и о на́с гре́шных мо́лятся?

Отве́т: Ве́рую, и святы̀х уго́дников Бо́жиих отны́не в мольбу́ призыва́ю.

Вопроше́ние: Честны́я ико́ны, я́же Христа́, Богома́тере и святы́х ли́ки изобра́жают, прие́млеши ли к почита́нию, я́коже в Це́ркве правосла́вней устано́влено е́сть, и ху́лящих я́ отрица́ешися ли?

Отве́т: Ико́ны честны́я прие́млю, во е́же по чи́ну церко́вному поклоня́тися изображе́нным на о́ных святы́м лико́м: ху́лящих же о́ныя отрица́юся.

Вопроше́ние: Сия́, я́же изре́кл еси́, от всея́ ли души́ твоея́̀ и от всего̀ помышле́ния твоего̀ испове́дуеши, не ну́ждею ли ко христиа́нстей ве́ре прихо́диши, и от свобо́днаго ли произволе́ния сподо́битися свята́го креще́ния жела́еши?

Отве́т: И́стинно вся́, я́же изреко́х, си́це испове́дую, и содержа́ти до конца́ жи́зни моея́ обеща́юся, от своего̀ произволе́ния, нелицеме́рно ко христиа́нстей ве́ре прихожду и спаси́тельное креще́ние прия́ти вседуше́вно жела́ю.

Предстоя́тель глаго́лет:

А́ще вои́стинну та́ко е́сть, я́коже ре́кл еси́, сия́ пре́д Це́рковию кля́твою утверди́.

Он же чте́т: а́ще ли не уме́ет, всле́д за чту́щим восприе́мником, или́ кли́риком, по еди́ному сло́ву сия́ глаго́лет:

А́з (и́мярек) от иуде́йства ко христиа́нстей ве́ре приходя́й, дне́сь пре́д Всеви́дящим Бо́гом кля́твою мое́ю известву́ю, я́ко не по принужде́нию или́ стра́ху, или́ чре́з притесне́ние от единове́рных ми́, и не коры́сти ра́ди, или́ ины́я ута́енныя мно́ю вины̀, иуде́йскаго лжеве́рия и все́х, я́же во о́нем, ересе́й и злохуле́ний отрица́юся, и ко спаси́тельней христиа́нстей ве́ре прихожду́: но то́чию ра́ди спасе́ния души́ своея́, бы́в са́мою и́стиною сея́ ве́ры побежде́н, и любо́вию се́рдца моего̀ ко Христу́ Спаси́телю влеко́мь, христиа́нином бы́ти хощу́ и креще́ния свята́го сподо́битися жела́ю. А́ще же сия́ с лицеме́рием ны́не испове́дую, а не от жела́ния се́рдца моего̀ ко Христу́ Бо́гу прихожду́, и по́слежде ве́ры христиа́нския отрещи́ся и па́ки в иуде́йство возврати́тися дерзну́, да пости́гнет мя́ гне́в Бо́жий и осужде́ние ве́чное. Ами́нь.

Посе́м иере́й ре́чет:

Благослове́н Бо́г, хотя́й все́м челове́́ком спасти́ся и в ра́зум и́стины приити́. Ами́нь.

Диа́кон: Оглаше́ннии, главы̀ ва́шя Господе́ви приклони́те.

Кли́р: Тебе́, Го́споди.

О́ному у́бо главу́ прикло́ншу, диа́кону ре́кшу: Го́споду помо́лимся, и кли́ру: Го́споди, поми́луй, и предстоя́тель чте́т моли́тву сию̀:

Бо́же вели́кий, первобы́тную тму́ просвети́вый и Сы́на Твоего̀ низпосла́вый во очище́ние па́дшаго естества́ на́шего, Са́м и раба́ Твоего̀ (и́мярек), подкло́ншаго Тебе́ главу́ свою̀, преведи́ от омраче́ния грехо́внаго к све́ту Твоего̀ богоразу́мия, очи́сти от скве́рны, изми́ от ко́зней сопроти́внаго, и сопричти́ его̀ избра́нному Твоему ста́ду, да́руя ему́ ча́сть и жре́бий в Це́ркви Твое́й святе́й. Ты̀ бо еси́ Бо́г на́ш, сы́й благослове́н во ве́ки.

Кли́р: Ами́нь.

Та́же зна́менав оглаше́ннаго и зря́ ко алтарю̀, диа́кону ре́кши: Го́споду помо́лимся, и кли́ру: Го́споди, поми́луй, глаго́лет моли́тву сию̀:

Бо́же вели́кий и ди́вный, призыва́яй заблу́ждших и ре́кий: Обрати́теся ко Мне́, и обращу́ся к ва́м, и обраща́ющагося прие́мляй, по сло́ву Твоему́: Гряду́щаго ко Мне́ не изжену́ во́н! Са́м и раба́ Твоего̀ сего̀ (и́мярек) приходя́щаго к Тебе́ от заблужде́ния пути́ Своего̀, приими́, предъусре́т его̀ благода́тию Твое́ю, введи́ его̀ во дво́р Тво́й Це́рковный: отве́рзи ему́ врата́ пра́вды, в ня́же вше́д, возмо́жет избега́ти вся́кия пре́лести, лжи́ и непра́вды: а́нгела ему́ посли́, сопу́тствующа на до́брем пути́, на не́мже обре́л е́сть Тебе́, Спа́са на́шего Бо́га: укрепи́ ве́ру его̀, наде́жду и любо́вь чи́стую, и яви́ лице́ Твое́ на не́м, я́ко да сподо́бится ба́ни пакибытия́ и оде́жди нетле́ния, и та́ко во обновле́нии жи́зни ходи́ти на́чнет. Твое́ бо е́сть, е́же ми́ловати, просвеща́ти и спаса́ти на́с, и Тебе́ сла́ву возсыла́ем, Отцу́ и Сы́ну и Свято́му Ду́ху, ны́не же и во ве́ки.

Кли́р: Ами́нь.

А́ще мно́зи су́ть оглаше́ннии, подоба́ет, иде́же потре́ба, именова́ти все́х: и ожида́ют свята́го Креще́ния по чи́ну Правосла́вныя Це́ркве.

Пе́рвее иссле́довати подоба́ет, а́ще не бы́ша уже креще́ни, и а́ще и́стинно, спасе́ния ра́ди души́ своея́, а не прибы́тка ра́ди, или́ ины́я привре́менныя вины̀, креще́ния свята́го сподо́битися жела́ют. Извести́вся же несумне́нно, я́ко спасе́ния то́чию и́щут, архиере́й или́ иере́й огла́шает и́х и имена́ и́м христиа́нская нарица́ет.

Прише́дше у́бо хотя́щии огласи́тися, с восприе́мники свои́ми, ста́нут пре́д две́рми церко́вными.

Святи́тель же, вше́д во алта́рь и открове́нною главо́ю па́д ни́ц пре́д свято́й трапе́зою, благодаре́ние воздае́т Бо́гови о обра́щении и́х, и мо́лится, да да́руется ему́ самому́ благода́ть, во отверзе́нии у́ст, во е́же возмощи́ ему́ научи́ти и́х пути́ спаси́тельному. По моли́тве се́й, востае́т, и на ма́нтию прие́млет епитрахи́ль и омофо́р, ми́тру на главу́ и вне́ алтаря́ же́зл в шу́ицу.

А́ще ли де́йствует иере́й, сицевы́м же о́бразом помоли́вся, и возло́жь на ся́ епитрахи́ль и фело́нь, и целова́в святу́ю трапе́зу, исхо́дит к за́падным церко́вным две́рем. Кли́р же пое́т псало́м 33:

Благословлю̀ Го́спода на вся́кое вре́мя, вы́ну хвала́ Его̀ во усте́х мои́х: о Го́споде похва́лится душа́: да услышат кротцыи, и возвеселятся. Возвеличите Го́спода со мною, и вознесем имя Его̀ вкупе. Взысках Го́спода, и услы́ша мя́, и от все́х скорбе́й мои́х изба́ви мя́. Приступи́те к Нему́ и просвети́теся, и ли́ца ва́ша не постыдя́тся. Се́й ни́щий воззва́, и Госпо́дь услы́ша и́, и от все́х скорбе́й его̀ спасе́ и́. Ополчи́тся а́нгел Госпо́день окре́ст боя́щихся Его̀ и изба́вит и́х. Вкуси́те и ви́дите, я́ко бла́г Госпо́дь: блаже́н му́ж, а́же упова́ет на́нь. Бо́йтеся Го́спода, вси́ святи́и Его̀: я́ко не́сть лише́ния боя́щимся Его̀. Бога́тии обнища́ша и взалка́ша: взыска́ющии же Го́спода не лиша́тся вся́каго бла́га. Прииди́те, ча́да, послу́шайте мене́, стра́ху Госпо́дню научу́ ва́с. Кто̀ е́сть челове́к хотя́й живо́т, любя́й дни́ ви́дети бла́ги? Удержи́ язы́к тво́й от зла́, и устне́ твои́ е́же не глаго́лати льсти́: Уклони́ся от зла́ и сотвори́ бла́го: взыши́ ми́ра и пожени́ и́. О́чи Госпо́дни на пра́ведныя, и у́ши Его̀ в моли́тву и́х: Лице́ же Госпо́дне на творя́щыя зла́я, е́же потреби́ти от земли́ па́мять и́х. Воззва́ша пра́веднии, и Госпо́дь услы́ша и́х, и от все́х скорбе́й изба́ви и́х. Бли́з Госпо́дь сокруше́нных се́рдцем и смире́нныя ду́хом спасе́т. Мно́ги ско́рби пра́ведным, и от все́х и́х изба́вит я́ Госпо́дь. Храни́т Госпо́дь вся́ ко́сти и́х, ни еди́на от ни́х сокруши́тся. Сме́рть гре́шников люта́, и ненави́дящии пра́веднаго прегреша́т: Изба́вит Госпо́дь ду́ши ра́б Свои́х, и не прегреша́т вси́ упова́ющии на Него̀.

Ста́в же у две́рей вну́трь хра́ма, вопроша́ет оглаша́емаго:

Кто̀ еси́?

Отве́т: А́з е́смь, и́стиннаго Бо́га позна́ти жела́яй и спасе́ния ищя́й.

Вопроше́ние: Что̀ прише́л еси́ ко святе́й Це́ркви?

Отве́т: Научи́тися от Нея́ и́стинней ве́ре и к Не́й присоедини́тися.

Вопроше́ние: Ку́ю пользу получи́ти наде́ешися от и́стинныя ве́ры?

Отве́т: Жи́знь ве́чную и блаже́нную.

Та́же священноде́йствуяй поуча́ет:

А́ще хо́щеши име́ти жи́знь ве́чную, до́лженствуеши ве́ру правосла́вно-кафоли́ческую соблюсти. Ве́ра же сия́ е́сть, я́ко да Бо́га еди́наго в Тро́ице, Отца́ и Сы́на и Свята́го Ду́ха, и Тро́ицу во Еди́нице испове́дуеши, не слива́я Ли́ц, ниже́ разделя́я Существо̀. Бо́г бо е́сть Оте́ц, Бо́г Сын, Бо́г Ду́х Святы́й: оба́че не трие́ бо́зи, но еди́н Бо́г. И о воплоще́нии Го́спода на́шего Иису́са Христа́ да разуме́еши, я́ко Бо́г е́сть и Челове́к: Бо́г, Сын Единоро́дный от Бо́га Отца́ пре́жде все́х ве́к рожде́нный, Челове́к же, от Мари́и Присноде́вы пло́ть на́шу восприемый: пострада́ пло́тию и распя́т на Кресте́ ра́ди на́шего спасе́ния, уме́рый и воскресы́й, вознесы́йся на небеса́ и се́дый одесну́ю Бо́га и Отца́: егда́ же прии́дет суди́ти, вси́ воскре́снут, и пра́ведницы жи́знь блаже́нную насле́дуют, зла́я же твори́вшии прии́мут му́ку ве́чную по дело́м свои́м. Сию̀ ве́ру пропове́даша апо́столи, свое́ю кро́вию запечатле́ша му́ченицы, провозвеща́ху Собо́ри и вси́ отцы̀ и учи́телие Церко́внии. Та́ко и ты̀ ве́руя, до́лженствуеши и за́поведи Госпо́дни соблюда́ти: ве́ра бо бе́з де́л мертва́ е́сть. Дре́вния и бо́льшыя за́поведи сия́ су́ть: Возлю́биши Го́спода Бо́га Твоего̀ от всея́ души твоея́̀, и бли́жняго твоего̀, я́ко са́м себе́. Внуша́я на́м хранити сия́ обоя́, Христо́с Спаси́тель на́ш повеле́ на́м и враго́в люби́ти, и все́м оби́дящим добро̀ твори́ти, и вся́каго зла́ уклоня́тися. Коре́ния же зла́ сия́ су́ть: го́рдость, лихоима́ние, по́хоть пло́тская, за́висть, невоздержа́ние, гне́в и ле́ность. Ты̀ же, я́ко ца́рствия небе́снаго насле́дник бы́ти хо́щеши, побежда́й о́ныя доброде́тельми: го́рдость смире́нием, лихоима́ние милосе́рдием, по́хоть пло́ти целому́дрием, за́висть сора́дованием, невоздержа́ние тре́звостию и поще́нием, ле́ность усе́рдием к моли́тве, богослуже́нию и про́чим дело́м благоче́стия.

По сконча́нии сего̀̀ поуче́ния, быва́ет вопроше́ние:

Хо́щеши ли у́бо сию̀ святую ве́ру се́рдцем твои́м прия́ти, и неотсту́пно, до кончи́ны жи́зни твоея́̀, содержа́ти, та́кожде и доброде́телем христиа́нским навы́кнути, и в ни́х по си́ле, при по́мощи Бо́жией, преуспева́ти?

Отве́т: И́стинно от всего̀ се́рдца моего̀ хощу́ ве́ру сию̀ святу́ю содержа́ти до после́днего моего̀ издыха́ния, доброде́тельному же ева́нгельскому житию прилежа́ти, моля́ Бо́га о по́мощи.

Предстоя́тель глаго́лет к нему́:

Преклони́ коле́на твои́ пре́д Го́сподем Бо́гом на́шим.

О́н же, коле́на прекло́нь и ру́це крестообра́зно на пе́рсех сложе́ны име́я, пре́д две́рми стои́т.

Предстоя́тель, зна́меная главу́ его̀ трижды, глаго́лет:

Зна́менается ра́б Бо́жий (и́мярек) во и́мя Отца́, и Сы́на, и Свята́го Ду́ха.

Диа́кон: Го́споду помо́лимся.

Кли́р: Го́споди, поми́луй.

Архиере́й, или́ иере́й, стоя́ на́д оглаша́емым, чте́т моли́тву сию̀:

Благослове́н еси́, Го́споди, от все́х язы́к, призыва́яй лю́ди избра́нны, ревни́тели до́брых де́л. Ты̀ и ны́не прише́дшаго ко святе́й Твое́й Це́ркви раба́ Твоего̀ (и́мярек) благослови́: отве́рзи его̀ о́чи душе́вныя к разуме́нию чуде́с Твоего̀ о на́с промышле́ния, откры́й слу́х се́рдца его̀ ко прия́тию Боже́ственных слове́с Твои́х, да во вре́мя благоприя́тно сподо́бится ба́ни возрожде́ния и оде́жди нетле́ния. Ты̀ изъя́л еси́ ду́шу сего̀ раба́ Твоего̀ от пре́лести лука́ваго: са́м у́бо сохрани́ ю̀ невреди́му от наве́т вра́жиих, и обита́лище благода́ти Твоея́̀ бы́ти удосто́й. Твое́ бо е́сть, е́же избавля́ти на́с от ко́зней лука́ваго, и Тебе́ сла́ву и благодаре́ние прино́сим, ны́не и во ве́ки веко́в.

Кли́р: Ами́нь.

После́дующие дни́ оглаша́емый пребыва́ет в поще́нии и моли́твах: приходя́ во хра́м Бо́жий к нача́лу слу́жб церко́вных, и та́мо при две́рех церко́вных стоя́, и с сокруше́нием серде́чным о свое́м пре́жнем омраче́нии воздыха́я, со слеза́ми мо́лится о е́же сподо́битися ему́ приятия Свята́го Креще́ния. Ду́ховный же его̀ наста́вник поуча́ет его̀ ве́ре, изъясня́ет свяще́нные догма́ты, показу́ет си́лу святы́х Та́инств, внуша́ет ему́ повинове́ние за́поведем ева́нгельским и церко́вным, и на еди́не испыту́ет его̀, а́ще по чи́стому жела́нию се́рдца и бе́з лицеме́рия к ве́ре правосла́вней прихо́дит.

По дне́х дово́льнаго науче́ния, по вече́рни, предстоя́тель облачи́тся во свяще́нную оде́жду, я́коже предрече́ся, и поклони́вся́ три́жды пре́д престо́лом и целова́в кра́й его̀, исхо́дит от алтаря́ к две́рем церко́вным. Пое́тся же псало́м 8:

Го́споди Госпо́дь на́ш, я́ко чу́дно и́мя Твое́ по все́й земли́, я́ко взя́тся великоле́пие Твое́ превы́ше небе́с. И́з у́ст младе́нец и ссу́щих соверши́л еси́ хвалу́, вра́г Твои́х ра́ди, е́же разруши́ти врага́ и ме́стника. Я́ко узрю̀ небеса́, дела́ пе́рст Твои́х, луну́ и зве́зды, я́же Ты̀ основа́л еси́. Что̀ е́сть челове́к, я́ко по́мниши его̀? Или́ сы́н челове́чь, я́ко посеща́еши его̀? Ума́лил еси́ его̀ ма́лым чи́м от а́нгел, сла́вою и че́стию венча́л еси́: и поста́вил еси́ его̀ на́д де́лы руку́ Твоею, вся́ покори́л еси́ по́д но́зе его̀: о́вцы и волы̀ вся́, еще́ же и скоты̀ польски́я: пти́цы небе́сныя и ры́бы морски́я. Го́споди Госпо́дь на́ш, я́ко чу́дно и́мя Твое́ по все́й земли́.

Оглаша́емый же стои́т в па́перти, зря́ к хра́му. И глаго́лет предстоя́тель к нему́:

Се́, ча́до, вре́мя наставле́ния твоего̀ преста́. Те́мже, а́ще осо́бне и вопроша́емь бы́л еси́, любве́ ли ра́ди Христовы и спасе́ния души твоея́̀ христианин бы́ти хочеши: оба́че до́лженствуеши ны́не и пре́д церко́вным собра́нием сия́ изъяви́ти, пе́рваго лжеве́рия, в не́мже бы́л еси́, отрещи́ся, и ве́ру правосла́вную я́сно испове́дати.

Вопроше́ние: Отрица́ешися ли ве́ры магомета́н и всего̀ и́х лжемудрова́ния, и оставля́еши ли о́ное всесоверше́нно?

Отве́т: Ве́ру магомета́н и лжемудрова́ние их отмета́ю и оставля́ю.

Вопроше́ние: Отрица́ешися ли Магоме́та, я́ко лжи́ваго проро́ка?

Отве́т: Вменя́ю его̀ бы́ти лжи́ваго проро́ка и отрица́юся его̀.

Вопроше́ние: Отрица́ешися ли кни́ги, имену́емыя Алкора́н, и все́х, содержи́мых во о́ней, ло́жных сказа́ний, законоположе́ний и преда́ний?

Отве́т: Отрица́юся Алкора́на, и все́х, я́же в не́м лжи́вых сказа́ний, законоположе́ний и преда́ний, и отмета́ю о́ныя, я́ко душевре́дная.

Вопроше́ние: Отверга́еши ли Магоме́тово установле́ние о путеше́ствии в Ме́кку, ра́ди поклоне́ния та́мо, я́кобы душеспаси́тельная?

Отве́т: Отверга́ю, я́ко суеве́рное.

Вопроше́ние: Отрица́ешися ли Магомета́нскаго бла́зненнаго уче́ния о многоже́нстве в се́й жи́зни, и о чу́вственнем услажде́нии в раи́ по сме́рти?

Отве́т: Отрица́юся, и уче́ние сие́̀̀̀̀, к плотоуго́дию измышле́нное, отверга́ю.

Вопроше́ние: Отрица́ешися ли все́х лжеслове́сий и хуле́ний, я́же магомета́не изрыга́ют на Христа́, Пречи́стую Ма́терь Его̀̀ и на христиа́ны?

Отве́т: Отрица́юся.

Вопроше́ние: Сочетаваешися ли и́стинно, нелицеме́рно и ни в че́м же сумня́ся, все́ю душе́ю твое́ю, еди́ному и́стинному, в Тро́ице сла́вимому Бо́гу, и ве́руеши ли в Него̀?

Отве́т: Сочетава́юся и́стинно, нелицеме́рно и бе́з ко́его-ли́бо сумне́ния, от всея́ души моея́, еди́ному, и́стинному, в Тро́ице сла́вимому Бо́гу, и ве́рую в Него̀.

Вопроше́ние: Испове́дуеши ли, я́ко Оте́ц, Сы́н и Святы̀й Ду́х е́сть Бо́г еди́н, по существу́ неразде́льный, в три́ех же Ли́цех разделя́емый? И ве́руеши ли в Него̀ и покланя́ешися ли Ему́?

Отве́т: Си́це ве́рую, испове́дую и Бо́гу триеди́ному покланя́юся.

Вопроше́ние: Ве́руеши ли и испове́дуеши, я́ко Иису́с Христо́с, единоро́дный Сы́н Бо́жий, от Отца́ пре́жде все́х ве́к рожде́нный, воплоти́ся от Ду́ха Свята́го и Де́вы Мари́и, на́шего ра́ди спасе́ния, и бы́сть челове́к, сы́й вку́пе и Бо́г, во еди́ней Ипоста́си, в дву́х же естества́х, Бо́жестем и челове́честем, непрело́жно и несли́тно?

Отве́т: Си́це ве́рую и та́ко испове́дую.

Вопроше́ние: Ве́руеши ли, я́ко Госпо́дь Иису́с Христо́с не ну́ждею, но во́лею, и́стинною, а не привиде́нием пло́тию пострада́ за на́с, божество́м же безстра́стен прибы́сть: я́ко челове́к умре́ и погребе́н бы́сть, си́лою Своего̀ Божества́ воскре́се, на небеса́ с пло́тию взы́де, и седи́т одесну́ю Отца́, отону́дуже па́ки прии́дет суди́ти живы́м и ме́ртвым, и ца́рствовати и́мать, и ца́рствию Его̀̀ не бу́дет конца́?

Отве́т: Та́ко се́рдцем ве́рую, и усты̀ нелицеме́рно вся́ сия́ испове́дую.

Вопроше́ние: Ве́руеши ли, я́ко Де́ва Мари́я, ро́ждшая Христа́ Бо́га на́шего, е́сть Присноде́ва и вои́стинну Богоро́дица, и того̀ ра́ди досто́йно е́сть почита́ти Ю̀, я́ко честне́йшую и вы́шшую си́л безпло́тных, и покланя́тися Е́й благогове́йно, я́ко перве́йшей о на́с к Бо́гу Хода́таице?

Отве́т: Вся́ сия́ о Присноде́ве Мари́и испове́дую, я́ко Бо́жию Ма́терь сию̀ почита́ю, и в моли́твах и́мам прибега́ти к Не́й.

Вопроше́ние: Ве́руеши ли, я́ко Кре́ст Го́спода на́шего Иису́са Христа́, на не́м распя́таго, не ктому́ прокля́тия и сме́ртныя ка́зни ору́дие е́сть, но спасе́ния и жи́зни ве́чныя зна́мение, е́же на себе́ изобража́юще, сете́й вра́жиих избега́ем?

Отве́т: Си́це о Кресте́ Госпо́дни ве́рую, и си́м спаси́тельным зна́мением огражда́ти себе́ от сете́й лука́ваго, со упова́нием, потщу́ся.

Вопроше́ние: Ве́руеши ли, я́ко в Це́ркви Свое́й Святе́й Госпо́дь на́ш Иису́с Христо́с учреди́л е́сть та́инств се́дмь, я́ко необходи́мых: креще́ние, миропома́зание, причаще́ние, покая́ние, свяще́нство, бра́к и елеосвяще́ние, чре́з ни́хже пода́емою благода́тию ве́рнии раби́ Христо́вы быва́ют насле́дницы жи́зни ве́чныя?

Отве́т: Си́це о святы̀х та́инствах ве́рую, и о́ныя се́дмь в Це́ркви Бо́жией, ко спасе́нию ча́д Ея́, необходи́мыми испове́дую.

Вопроше́ние: Ве́руеши ли, я́ко свяще́нное Писа́ние Ве́тхаго и Но́ваго Заве́та, Це́рковию содержи́мое, святи́и Бо́жии челове́цы изглаго́лаша, от Свята́го Ду́ха просвеща́еми, и того̀ ра́ди прие́млиши ли о́ное, я́ко богодухнове́нное и спасительное? От неприе́млющих же и ху́лящих е́ отмета́ешися ли?

Отве́т: Писа́ние свяще́нное, Це́рковию содержи́мое, я́ко богодухнове́нное и свято́е, и а́з прие́млю, я́ко слово Бо́жие, ко спасе́нию на́м да́нное: неприе́млющих же и ху́лящих о́ное отмета́юся.

Вопроше́ние: Апо́стольская и святы̀х оте́ц преда́ния, чиноположе́ния и моли́твословия, на́шей Це́рковию содержи́мая, вменя́еши ли душеспаси́тельна бы́ти и прие́млиши ли я́?

Отве́т:Вся́ сия́ душеспаси́тельна бы́ти ве́рую и после́довати о́нем, ели́ко от мене́ потре́бно, обещава́юся.

Вопроше́ние: Ве́руеши ли, я́ко апо́столи, му́ченицы и вси́ святи́и, и́хже Це́рковь на́ша чти́т и в мольбу́ призыва́ет, су́ть вои́стинну уго́дницы Бо́жии, со Христо́м во Ца́рствии небе́снем пребыва́ют и о на́с гре́шных мо́лятся?

Отве́т: Ве́рую, и святы̀х уго́дников Бо́жиих отны́не в мольбу́ призыва́ю.

Вопроше́ние: Честны́я ико́ны, я́же Христа́, Богома́тере и святы́х ли́ки изобра́жают, прие́млеши ли к почита́нию, я́коже в Це́ркве правосла́вней устано́влено е́сть, и ху́лящих я́ отрица́ешися ли?

Отве́т: Ико́ны честны́я прие́млю, во е́же по чи́ну церко́вному поклоня́тися изображе́нным на о́ных святы́м лико́м: ху́лящих же о́ныя отрица́юся.

Вопроше́ние: Сия́, я́же изре́кл еси́, от всея́ ли души́ твоея́̀ и от всего̀ помышле́ния твоего̀ испове́дуеши, не ну́ждею ли ко христиа́нстей ве́ре прихо́диши, и от свобо́днаго ли произволе́ния сподо́битися свята́го креще́ния жела́еши?

Отве́т: И́стинно вся́, я́же изреко́х, си́це испове́дую, и содержа́ти до конца́ жи́зни моея́ обеща́юся, от своего̀ произволе́ния, нелицеме́рно ко христиа́нстей ве́ре прихожду и спаси́тельное креще́ние прия́ти вседуше́вно жела́ю.

Предстоя́тель глаго́лет:

А́ще вои́стинну та́ко е́сть, я́коже ре́кл еси́, сия́ пре́д Це́рковию кля́твою утверди́.

Он же чте́т: а́ще ли не уме́ет, всле́д за чту́щим восприе́мником, или́ кли́риком, по еди́ному сло́ву сия́ глаго́лет:

А́з (и́мярек) от магомета́нства ко христиа́нстей ве́ре приходя́й, дне́сь пре́д Всеви́дящим Бо́гом кля́твою мое́ю известву́ю, я́ко не по принужде́нию или́ стра́ху, или́ чре́з притесне́ние от единове́рных ми́, и не коры́сти ра́ди, или́ ины́я ута́енныя мно́ю вины̀, магомета́нскаго лжеве́рия и все́х, я́же во о́нем, ересе́й и злохуле́ний отрица́юся, и ко спаси́тельней христиа́нстей ве́ре прихожду́: но то́чию ра́ди спасе́ния души́ своея́, бы́в са́мою и́стиною сея́ ве́ры побежде́н, и любо́вию се́рдца моего̀ ко Христу́ Спаси́телю влеко́мь, христиа́нином бы́ти хощу́ и креще́ния свята́го сподо́битися жела́ю. А́ще же сия́ с лицеме́рием ны́не испове́дую, а не от жела́ния се́рдца моего̀ ко Христу́ Бо́гу прихожду́, и по́слежде ве́ры христиа́нския отрещи́ся и па́ки в магомета́нство возврати́тися дерзну́, да пости́гнет мя́ гне́в Бо́жий и осужде́ние ве́чное. Ами́нь.

Посе́м иере́й ре́чет:

Благослове́н Бо́г, хотя́й все́м челове́́ком спасти́ся и в ра́зум и́стины приити́. Ами́нь.

Диа́кон: Оглаше́ннии, главы̀ ва́шя Господе́ви приклони́те.

Кли́р: Тебе́, Го́споди.

О́ному у́бо главу́ прикло́ншу, диа́кону ре́кшу: Го́споду помо́лимся, и кли́ру: Го́споди, поми́луй, и предстоя́тель чте́т моли́тву сию̀:

Бо́же вели́кий, первобы́тную тму́ просвети́вый и Сы́на Твоего̀ низпосла́вый во очище́ние па́дшаго естества́ на́шего, Са́м и раба́ Твоего̀ (и́мярек), подкло́ншаго Тебе́ главу́ свою̀, преведи́ от омраче́ния грехо́внаго к све́ту Твоего̀ богоразу́мия, очи́сти от скве́рны, изми́ от ко́зней сопроти́внаго, и сопричти́ его̀ избра́нному Твоему ста́ду, да́руя ему́ ча́сть и жре́бий в Це́ркви Твое́й святе́й. Ты̀ бо еси́ Бо́г на́ш, сы́й благослове́н во ве́ки.

Кли́р: Ами́нь.

Та́же зна́менав оглаше́ннаго и зря́ ко алтарю̀, диа́кону ре́кши: Го́споду помо́лимся, и кли́ру: Го́споди, поми́луй, глаго́лет моли́тву сию̀:

Бо́же вели́кий и ди́вный, призыва́яй заблу́ждших и ре́кий: Обрати́теся ко Мне́, и обращу́ся к ва́м, и обраща́ющагося прие́мляй, по сло́ву Твоему́: Гряду́щаго ко Мне́ не изжену́ во́н! Са́м и раба́ Твоего̀ сего̀ (и́мярек) приходя́щаго к Тебе́ от заблужде́ния пути́ Своего̀, приими́, предъусре́т его̀ благода́тию Твое́ю, введи́ его̀ во дво́р Тво́й Це́рковный: отве́рзи ему́ врата́ пра́вды, в ня́же вше́д, возмо́жет избега́ти вся́кия пре́лести, лжи́ и непра́вды: а́нгела ему́ посли́, сопу́тствующа на до́брем пути́, на не́мже обре́л е́сть Тебе́, Спа́са на́шего Бо́га: укрепи́ ве́ру его̀, наде́жду и любо́вь чи́стую, и яви́ лице́ Твое́ на не́м, я́ко да сподо́бится ба́ни пакибытия́ и оде́жди нетле́ния, и та́ко во обновле́нии жи́зни ходи́ти на́чнет. Твое́ бо е́сть, е́же ми́ловати, просвеща́ти и спаса́ти на́с, и Тебе́ сла́ву возсыла́ем, Отцу́ и Сы́ну и Свято́му Ду́ху, ны́не же и во ве́ки.

Кли́р: Ами́нь.

А́ще мно́зи су́ть оглаше́ннии, подоба́ет, иде́же потре́ба, именова́ти все́х: и ожида́ют свята́го Креще́ния по чи́ну Правосла́вныя Це́ркве.

Пе́рвее иссле́довати подоба́ет, а́ще не бы́ша уже́ креще́ни, и аще и́стинно, спасе́ния ра́ди души́ своея́, а не прибы́тка ра́ди, или́ ины́я привре́менныя вины̀, креще́ния свята́го сподо́битися жела́ют. Извести́вся же несумне́нно, я́ко спасе́ния то́чию и́щут, архиере́й или́ иере́й оглаша́ет их и имена́ им христиа́нская нарицает.

Прише́дше у́бо хотя́щии огласи́тися, с восприе́мники свои́ми, ста́нут пре́д две́рьми церко́вными.

Святи́тель же, вше́д во алта́рь и открове́нною главо́ю па́д ниц пре́д свято́й трапе́зою, благодаре́ние возда́ет Богови о обраще́нии их, и мо́лится, да да́руется ему́ самому́ благода́ть, во отверзе́нии у́ст, во е́же возмощи́ ему́ научи́ти их пути́ спаси́тельному. По моли́тве се́й, востае́т, и на ма́нтию прие́млет епитрахи́ль и омофо́р, ми́тру на главу́ и вне́ алтаря́ же́зл в шу́ицу.

А́ще ли де́йствует иере́й, сицевы́м же о́бразом помоли́вся, и возло́жь на себя́ епитрахи́ль и фело́нь, и целова́в святу́ю тра́пезу, исхо́дит к за́падным церко́вным две́рем. Кли́р же пое́т псало́м 33:

Благословлю̀ Го́спода на вся́кое вре́мя, вы́ну хвала́ Его̀̀ во усте́х мои́х: о Го́споде похва́лится душа́: да услы́шат кро́тцыи, и возвеселя́тся. Возвели́чите Го́спода со мно́ю, и возне́сем и́мя Его̀ вкупе. Взыска́х Го́спода, и услы́ша мя́, и от все́х скорбе́й мои́х изба́ви мя́. Приступи́те к Нему́ и просвети́теся, и ли́ца ва́ша не постыдя́тся. Се́й ни́щий воззва́, и Госпо́дь услы́ша и, и от все́х скорбе́й его̀ спасе́ и́. Ополчи́тся а́нгел Госпо́день окре́ст боя́щихся Его̀ и изба́вит и́х. Вкуси́те и ви́дите, я́ко бла́г Госпо́дь: блаже́н му́ж, и́же упова́ет на́нь. Бо́йтеся Го́спода, вси́ святи́и Его̀: я́ко не́сть лише́ния боя́щимся Его̀. Бога́тии обнища́ша и взалка́ша: взыска́ющии же Го́спода не лиша́тся вся́каго бла́га. Прииди́те, ча́да, послу́шайте мене́, стра́ху Госпо́дню научу́ ва́с. Кто̀ е́сть челове́к хотя́й живо́т, любя́й дни́ ви́дети бла́ги? Удержи́ язы́к тво́й от зла́̀, и устне́ твои́ е́же не глаго́лати льсти́: Уклони́ся от зла́̀ и сотвори́ бла́го: взыщи́ ми́ра и пожени́ и́. О́чи Госпо́дни на пра́ведныя, и у́ши Его̀ в моли́тву и́х: лице́ же Госпо́дне на творя́щыя зла́́я, е́же потреби́ти от земли́ па́мять и́х. Воззва́ша пра́веднии, и Госпо́дь услы́ша и́х, и от все́х скорбе́й изба́ви и́х. Бли́з Госпо́дь сокруше́нных се́рдцем и смире́нныя ду́хом спасе́т. Мно́ги ско́рби пра́ведным, и от все́х их изба́вит я́ Госпо́дь. Храни́т Госпо́дь вся́ ко́сти и́х, ни еди́на от ни́х сокруши́тся. Сме́рть гре́шников люта́, и ненави́дящии пра́веднаго прегреша́т: Изба́вит Госпо́дь ду́ши ра́б Свои́х, и не прегреша́т вси́ упова́ющии на Него̀.

Ста́в же у двере́й вну́трь хра́ма, вопроша́ет оглаша́емаго:

Кто̀ еси́̀?

Отве́т: А́з е́смь, и́стиннаго Бо́га позна́ти жела́яй и спасе́ния ищя́й.

Вопроше́ние: Что̀ прише́л еси́ ко святе́й Це́ркви?

Отве́т: Научи́тися от Нея́ и́стинней ве́ре и к Не́й присоедини́тися.

Вопроше́ние: Ку́ю по́льзу получи́ти наде́ешися от и́стинныя ве́ры?

Отве́т: Жи́знь ве́чную и блаже́нную.

Та́же священноде́йствуяй поуча́ет:

А́ще хо́щеши име́ти жи́знь ве́чную, долженству́еши ве́ру правосла́вно-кафоли́ческую соблюсти́. Ве́ра же сия́ е́сть, я́ко да Бо́га еди́наго в Тро́ице, Отца́ и Сы́на и Свята́го Ду́ха, и Тро́ицу во Еди́нице испове́дуеши, не слива́я Ли́ц, ниже́ разделя́я Существо̀. Бо́г бо е́сть Оте́ц, Бо́г Сы́н, Бо́г Ду́х Свя́тый: оба́че не трие́ бо́зи, но еди́н Бо́г. И о воплоще́нии Го́спода на́шего Иису́са Христа́ да разуме́еши, я́ко Бо́г е́сть и Челове́к: Бо́г, Сы́н Единоро́дный от Бо́га Отца́ пре́жде все́х ве́к рожде́нный, Челове́к же, от Мари́и Присноде́вы пло́ть на́шу восприе́мый: пострада́ пло́тию и ра́спят на Кресте́ ра́ди на́шего спасе́ния, уме́рый и воскре́сый, вознесы́йся на небеса́ и се́дый одесну́ю Бо́га и Отца́: егда́ же прии́дет суди́ти, вси́ воскре́снут, и пра́ведницы жи́знь блаже́нную насле́дуют, зла́я же твори́вшии прии́мут му́ку ве́чную по дело́м свои́м. Сию̀ ве́ру пропове́даша апо́столи, свое́ю кро́вию запечатле́ша му́ченицы, провозвеща́ху Собо́ри и вси́ отцы̀ и учи́телие Церко́внии. Та́ко и ты̀ ве́руя, до́лженствуеши и за́поведи Госпо́дни соблюда́ти: ве́ра бо бе́з де́л мертва́ е́сть. Дре́вния и бо́льшыя за́поведи сия́ су́ть: Возлю́биши Го́спода Бо́га Твоего̀ от всея́ души́ твоея́, и бли́жняго твоего̀, я́ко са́м себе́. Внуша́я на́м храни́ти сия́ обоя́, Христо́с Спаси́тель на́ш повеле́ на́м и враго́в люби́ти, и все́м оби́дящим добро̀ твори́ти, и вся́каго зла́ уклоня́тися. Коре́ния же зла́ сия́ су́ть: го́рдость, лихоима́ние, по́хоть пло́тская, за́висть, невоздержа́ние, гне́в и ле́ность. Ты̀ же, я́ко ца́рствия небе́снаго насле́дник бы́ти хо́щеши, побежда́й о́ныя доброде́тельми: го́рдость смире́нием, лихоима́ние милосе́рдием, по́хоть пло́ти целому́дрием, за́висть сора́дованием, невоздержа́ние тре́звостию и поще́нием, ле́ность усе́рдием к моли́тве, богослуже́нию и про́чим дело́м благоче́стия.

По оконча́нии сего̀ поуче́ния, быва́ет вопроше́ние:

Хо́щеши ли у́бо сию̀ святу́ю ве́ру се́рдцем твои́м прия́ти, и неотсту́пно, до кончи́ны жи́зни твоея́, содержа́ти, та́кожде и доброде́телем христиа́нским навы́кнути, и в ни́х по си́ле, при по́мощи Бо́жией, преуспева́ти?

Отве́т: И́стинно от всего̀ се́рдца моего̀ хощу́ ве́ру сию̀ святу́ю содержа́ти до после́днего моего̀ издыха́ния, доброде́тельному же ева́нгельскому житию̀ прилежа́ти, моля́ Бо́га о по́мощи.

Предстоя́тель глаго́лет к нему́:

Преклони́ коле́на твои́ пре́д Го́сподем Бо́гом на́шим.

О́н же, коле́на прекло́нь и ру́це крестообра́зно на пе́рсех сложе́ны име́я, пре́д дверми стои́т.

Предстоя́тель, зна́меная главу́ его̀ три́жды, глаго́лет:

Зна́менается ра́б Бо́жий (и́мярек) во и́мя Отца́, и Сы́на, и Свята́го Ду́ха.

Диа́кон: Го́споду помо́лимся.

Кли́р: Го́споди, поми́луй.

Архиере́й, или иере́й, стоя́ на́д оглаша́емым, чте́т моли́тву сию̀:

Благослове́н еси́, Го́споди, от все́х язы́к, призыва́яй лю́ди избра́нны, ревни́тели до́брых де́л. Ты̀ и ны́не прише́дшаго ко святе́й Твое́й Це́ркви раба́ Твоего̀ (и́мярек) благослови́: отве́рзи его̀ о́чи душе́вныя к разуме́нию чуде́с Твоего̀ о на́с промышле́ния, откры́й слу́х се́рдца его̀ ко прия́тию Боже́ственных слове́с Твои́х, да во вре́мя благоприя́тно сподо́бится ба́ни возрожде́ния и оде́жди нетле́ния. Ты̀ изя́л еси́ ду́шу сего̀ раба́ Твоего̀ от пре́лести лука́ваго: са́м у́бо сохрани́ ю̀ невреди́му от наве́т вра́жиих, и обита́лище благода́ти Твоея́ бы́ти удосто́й. Твое́ бо е́сть, е́же избавля́ти на́с от ко́зней лука́ваго, и Тебе́ сла́ву и благодаре́ние прино́сим, ны́не и во ве́ки веко́в.

Кли́р: Ами́нь.

После́дующие дни́ оглаша́емый пребыва́ет в поще́нии и моли́твах: приходя́ во хра́м Бо́жий к нача́лу слу́жб церко́вных, и та́мо при двере́х церко́вных стоя́, и с сокруше́нием серде́чным о свое́м пре́жнем омраче́нии воздыха́я, со слеза́ми мо́лится о е́же сподо́битися ему́ прия́тия Свята́го Креще́ния. Духовны́й же его̀ наста́вник поуча́ет его̀ ве́ре, изъясня́ет свяще́нные догма́ты, показу́ет си́лу святы́х Та́инств, внуша́ет ему́ повинове́ние за́поведем ева́нгельским и церко́вным, и на еди́не испыту́ет его̀, а́ще по чи́стому жела́нию се́рдца и бе́з лицеме́рия к ве́ре правосла́вней прихо́дит.

По дне́х дово́льнаго науче́ния, по вече́рни, предстоя́тель облачи́тся во свяще́нную оде́жду, я́коже предрече́ся, и поклони́вся три́жды пре́д престо́лом и целова́в кра́й его̀, исхо́дит от алтаря́ к две́рем церко́вным. Пое́тся же псало́м 8:

Го́споди Госпо́дь на́ш, я́ко чу́дно и́мя Твое́̀ по все́й земли́, я́ко взя́тся великоле́пие Твое́ превы́ше небе́с. Из у́ст младе́нец и ссу́щих соверши́л еси́ хвалу́, вра́г Твои́х ра́ди, е́же разру́шити врага́ и ме́стника. Я́ко узрю̀ небеса́, дела́ пе́рст Твои́х, луну́ и зве́зды, я́же Ты̀ основа́л еси́. Что̀ е́сть челове́к, я́ко по́мниши его̀? Или́ сы́н челове́чь, я́ко посеща́еши его̀? Ума́лил еси́ его̀ ма́лым чи́м от а́нгел, сла́вою и че́стию венча́л еси́: и поста́вил еси́ его̀ на́д де́лы руку́ Твое́ю, вся́ покори́л еси́ по́д но́зе его̀: О́вцы и волы̀ вся́, еще́ же и скоты̀ польски́я: пти́цы небе́сныя и ры́бы морски́я. Го́споди Госпо́дь на́ш, я́ко чу́дно и́мя Твое́ по все́й земли́.

Оглаша́емый же стои́т в па́перти, зря́ к храму. И глаго́лет предстоя́тель к нему́:

Се́, ча́до, вре́мя наставле́ния твоего̀ преста́. Те́мже, а́ще осо́бне и вопроша́емь бы́л еси́, любве́ ли ра́ди Христо́вы и спасе́ния души́ твоея́ христиани́н бы́ти хо́чеши: оба́че до́лженствуеши ны́не и пре́д церко́вным собра́нием сия́ изъяви́ти, язы́ческаго лжеве́рия, в не́мже бы́л еси́, отре́щися, и ве́ру правосла́вную я́сно испове́дати.

Вопроше́ние: Отрица́ешися ли ве́рования язы́ческаго, в не́мже тва́ри не́кия бога́ми нарица́ются, и и́м Бо́жеское воздае́тся че́ствование?

Отве́т: Отрица́юся язы́ческаго суеве́рия и́мже омраче́нии нарица́ют тва́ри бога́ми, и тва́рем, вме́сто и́стиннаго Бо́га, слу́жат.

Вопроше́ние: Отрица́ешися ли боготворе́ния веще́ственных извая́ний, поклоне́ния и́долом, принесе́ния и потребле́ния и́дольских же́ртв?

Отве́т: Отрица́юся вся́ких и́долов и поклоне́ния и́м, и же́ртвы и́дольския ни во что́же вменя́ю.

Вопроше́ние: Отрица́ешися ли и́дольских жрецо́в и ины́х язы́ческих волхвова́телей, и́х де́йствий суеве́рных и прорица́ний, я́ко лжи́вых и вредоно́сных?

Отве́т: Отрица́юся язы́ческих жрецо́в и волхвова́телей, де́йствия же и́х признаю̀ су́етным и душепа́губными.

Вопроше́ние: Сочетава́ешися ли и́стинно, нелицеме́рно и ни в че́мже сумня́ся, все́ю душе́ю твое́ю, еди́ному и́стинному, в Тро́ице сла́вимому Бо́гу, и ве́руеши ли в Него̀?

Отве́т: Сочетава́юся и́стинно, нелицеме́рно и́ бе́з ко́его-ли́бо сумне́ния, от всея́ души́ моея́, еди́ному, и́стинному, в Тро́ице сла́вимому Бо́гу, и ве́рую в Него̀.

Вопроше́ние: Испове́дуеши ли, я́ко Оте́ц, Сы́н и Святый Ду́х е́сть Бо́г еди́н, по существу́ неразде́льный, в трие́х же Ли́цех разделя́емый? И ве́руеши ли в Него̀?

Отве́т: Сице ве́рую, испове́дую и Бо́гу триеди́ному покланя́юся.

Вопроше́ние: Ве́руеши ли и испове́дуеши, я́ко Иису́с Христо́с, единоро́дный Сы́н Бо́жий, от Отца́ пре́жде все́х ве́к рожде́нный, воплоти́ся от Ду́ха Свята́го и Де́вы Мари́и, на́шего ра́ди спасе́ния, и бы́сть челове́к, сы́й вку́пе и Бо́г, во еди́ней Ипоста́си, в дву́х же естества́х, Бо́жестем и челове́честем, непрело́жно и несли́тно?

Отве́т: Сице ве́рую и сия́ та́ко испове́дую несумне́нно.

Вопроше́ние: Ве́руеши ли, я́ко Госпо́дь Иису́с Христо́с не ну́ждею, но во́лею, и́стинною, а не привиде́нием пло́тию пострада́ за на́с, божество́м же безстра́стен прибы́сть, си́лою Своего̀ Божества́ воскре́се, на небеса́ с пло́тию взы́де, и сиди́т одесну́ю Бо́га Отца́, отону́дуже па́ки прии́дет суди́ти живы́м и ме́ртвым, и ца́рствовати и́мать, и ца́рствию Его̀ не бу́дет конца́?

Отве́т: Та́ко се́рдцем ве́рую, и усты̀ нелицеме́рно вся́ сия́ испове́дую.

Вопроше́ние: Ве́руеши ли, я́ко Де́ва Мари́я, ро́ждшая Христа́ Бо́га на́шего, е́сть Присноде́ва и вои́стинну Богоро́дица, и того̀ ра́ди досто́йно е́сть почита́ти ю̀, я́ко че́стнейшую и вы́шшую си́л безпло́тных, и покланя́тися Е́й благогове́йно, я́ко перве́йшей о на́с к Бо́гу Хода́таице?

Отве́т: Вся́ сия́ о Присноде́ве Мари́и испове́дую, я́ко Бо́жию Ма́терь сию̀ почита́ю, и в моли́твах и́мам прибега́ти к Не́й.

Вопроше́ние: Ве́руеши ли, я́ко Кре́ст Го́спода на́шего Иису́са Христа, на не́м распя́таго, не ктому́ прокля́тия и сме́ртныя ка́зни ору́дие е́сть, но спасе́ния и жи́зни ве́чныя зна́мение, е́же на себе́ изобража́юще, сете́й вра́жиих избега́ем?

Отве́т: Си́це о Кресте́ Господни ве́рую, и си́м спаси́тельным зна́мением огражда́ти себе́ от сете́й лука́ваго, со упова́нием, потщу́ся.

Вопроше́ние: Ве́руеши ли, я́ко в Це́ркви Свое́й Святе́й Госпо́дь на́ш Иису́с Христо́с учреди́л е́сть та́инств се́дмь, я́ко необходи́мых: креще́ние, миропома́зание, причаще́ние, покая́ние, свяще́нство, бра́к и елеосвяще́ние, чре́з ни́хже подава́емою благода́тию ве́рнии раби́ Христо́вы быва́ют насле́дницы жи́зни ве́чныя?

Отве́т: Си́це о святы́х та́инствах ве́рую, и о́ныя се́дмь в Це́ркви Бо́жией, ко спасе́нию ча́д Ея́, необходи́мыми испове́дую.

Вопроше́ние: Ве́руеши ли, я́ко свяще́нное Писа́ние Ве́тхаго и Но́ваго Заве́та, Це́рковию содержи́мое, святи́и Божии челове́цы изглаго́лаша, от Свята́го Ду́ха просвеща́еми, и того̀ ра́ди прие́млиши ли о́ное, я́ко богодухнове́нное и спаси́тельное? От неприе́млющих же и хулящих е́ отмета́ешися ли?

Отве́т: Писа́ние свяще́нное, Це́рковию содержи́мое, я́ко богодухнове́нное и свято́е, и а́з прие́млю, я́ко сло́во Бо́жие, ко спасе́нию на́м да́нное: неприе́млющих же и хуля́щих о́ное отмета́юся.

Вопроше́ние: Апо́стольская и святы́х оте́ц преда́ния, чиноположе́ния и моли́твословия, на́шей Це́рковию содержи́мая, вменя́еши ли душеспаси́тельна бы́ти и прие́млиши ли я́?

Отве́т: Вся́ сия́ душеспаси́тельна бы́ти ве́рую и после́довати о́нем, ели́ко от мене́ потре́бно, обещава́юся.

Вопроше́ние: Ве́руеши ли, я́ко апо́столи, му́ченицы и вси́ святи́и, и́хже Це́рковь на́ша чти́т и в мольбу́ призыва́ет, су́ть вои́стинну уго́дницы Бо́жии, со Христо́м во Ца́рствии небе́снем пребыва́ют и о на́с гре́шных мо́лятся?

Отве́т: Ве́рую, и святы́х уго́дников Бо́жиих отны́не в мольбу́ призыва́ю.

Вопроше́ние: Честны́я ико́ны, я́же Христа́, Богома́тере и святы́х ли́ки изобража́ют, приемлеши ли к почита́нию, я́коже в Це́ркве правосла́вней устано́влено е́сть, и хуля́щих я́ отрица́ешися ли?

Отве́т: Ико́ны честны́я прие́млю, во е́же по чи́ну церко́вному поклоня́тися изображе́нным на о́ных святы́м ли́ком: хуля́щих же о́ныя отрица́юся.

Вопроше́ние: Сия́, я́же изре́кл еси́, от всея́ ли души́ твоея́ и от всего̀ помышле́ния твоего̀ испове́дуеши, не ну́ждею ли ко христиа́нстей ве́ре прихо́диши, и от свобо́днаго ли произволе́ния сподо́битися свята́го креще́ния жела́еши?

Отве́т: И́стинно вся́, я́же изреко́х, си́це испове́дую, и содержа́ти до конца́ жи́зни моея́ обеща́юся, от своего̀ произволе́ния, нелицеме́рно ко христиа́нстей ве́ре прихожду́ и спаси́тельное креще́ние прия́ти вседуше́вно жела́ю.

Предстоя́тель глаго́лет:

А́ще вои́стинну та́ко е́сть, я́коже ре́кл еси́, сия́ пре́д Це́рковию кля́твою утверди́.

О́н же чте́т: а́ще ли не уме́ет, всле́д за чту́щим восприе́мником, или́ кли́риком, по еди́ному сло́ву сия́ глаго́лет:

А́з (и́мярек) от язы́чества ко христиа́нстей ве́ре приходя́й, дне́сь пре́д Всевидящим Бо́гом кля́твою мое́ю известву́ю, я́ко не по принужде́нию или́ стра́ху, или́ чре́з притесне́ние от единове́рных ми́, и не коры́сти ра́ди, или́ ины́я утае́нныя мно́ю вины̀, язы́ческаго лжеве́рия отрица́юся, и ко спаси́тельней христианстей ве́ре прихожду́: но то́чию ра́ди спасе́ния души́ своея́, бы́в са́мою и́стиною сея́ ве́ры побежде́н, и любо́вию се́рдца моего̀ ко Христу́ Спаси́телю влеко́мь, христиани́ном бы́ти хощу́ и креще́ния свята́го сподо́битися жела́ю. Ами́нь.

Посе́м иере́й ре́чет:

Благослове́н Бо́г, хотя́й все́м челове́ком спасти́ся и в ра́зум и́стины приити́. Ами́нь.

Диа́кон: Оглаше́ннии, главы̀ ва́шя Госпо́деви приклони́те.

Кли́р: Тебе́, Го́споди.

О́ному у́бо главу́ прикло́ншу, диа́кону рекшу: Го́споду помо́лимся, и кли́ру: Го́споди, поми́луй, и предстоя́тель чте́т моли́тву сию̀:

Бо́же вели́кий, первобы́тную тму́ просвети́вый и Сы́на Твое́го̀ низпосла́вый во очище́ние па́дшаго естества́ на́шего, Са́м и раба́ Твоего̀ (и́мярек), подкло́ншаго Тебе́ главу́ свою̀, преведи́ от омраче́ния грехо́внаго к све́ту Твоего̀ богоразу́мия, очи́сти от скве́рны, изми́ от ко́зней сопроти́внаго, и сопричти́ его̀ избра́нному Твоему́ ста́ду, дару́я ему́ ча́сть и жре́бий в Це́ркви Твое́й святе́й. Ты̀ бо еси́ Бо́г на́ш, сы́й благослове́н во ве́ки.

Кли́р: Ами́нь.

Та́же зна́менав оглаше́ннаго и зря́ ко алтарю̀, диа́кону ре́кши: Го́споду помо́лимся, и кли́ру: Го́споди, поми́луй, глаго́лет моли́тву сию̀:

Бо́же вели́кий и ди́вный, призыва́яй заблу́ждших и ре́кий: Обрати́теся ко Мне́, и обращу́ся к ва́м, и обраща́ющагося прие́мляй, по сло́ву Твоему́: Гряду́щаго ко Мне́ не изжену́ во́н! Са́м и раба́ Твоего̀ сего̀ (и́мярек) приходя́щаго к Тебе́ от заблужде́ния пути́ Своего̀, приими́, предусре́т его̀ благода́тию Твое́ю, введи́ его̀ во дво́р Тво́й Церко́вный: отве́рзи ему́ врата́ пра́вды, в ня́же вше́д, возмо́жет избега́ти вся́кия пре́лести, лжи́ и непра́вды: а́нгела ему́ посли́, сопу́тствующа на до́брем пути́, на не́мже обре́л е́сть Тебе́, Спа́са на́шего Бо́га: укрепи́ ве́ру его̀, наде́жду и любо́вь чи́стую, и яви́ лице́ Твое́ на не́м, я́ко да сподобится ба́ни пакибытия́ и оде́жди нетле́ния, и та́ко во обновле́нии жи́зни ходи́ти на́чнет. Твое́ бо е́сть, е́же милова́ти, просвеща́ти и спаса́ти на́с, и Тебе́ сла́ву возсыла́ем, Отцу́ и Сы́ну и Свято́му Ду́ху, ны́не же и во ве́ки.

Кли́р: Ами́нь.

А́ще мно́зи су́ть оглаше́ннии, подоба́ет, иде́же потре́ба, именова́ти все́х: и ожида́ют свята́го Креще́ния по чи́ну правосла́вныя Це́ркве.

По соверше́нии предположе́нного чи́на, еди́н от иере́й, или́ протодиа́кон (а́ще святи́тель са́м соверша́ет сие́) взе́м сосу́д со святы́м ми́ром, и гу́бу, и суче́ц, и в ма́лом сосу́де во́ду те́плую ко е́же гу́бу омочи́в, места́ ми́ром пома́занная отира́ти, полага́ет я́ на угото́ваннем столе́, на не́мже поло́жено да бу́дет свято́е Ева́нгелие и животворя́щий кре́ст, к сему́ же и две́ свещи́ зажже́нныя свети́льницех да поставятся.

Си́м же си́це приугото́вленным, святи́тель (или́ иере́й) покланя́ется три́жды к восто́ку со все́ми предстоя́щими.

Диа́кону ре́кшу: Благослови́ влады́ко.

Иере́й глаго́лет: Благослове́но ца́рство Отца́, и Сы́на, и Свята́го Ду́ха ны́не и при́сно и во ве́ки веко́в.

Кли́р: Ами́нь.

И а́бие пою́т стихи́ру, гла́с 6:

Царю̀ Небе́сный, Уте́шителю, Душе́ и́стинны, и́же везде́ сы́й и вся́ исполня́яй, сокро́вище благи́х и жи́зни пода́телю, прииди́ и всели́ся в ны̀, и очи́сти ны̀ от вся́кия скве́рны, и спаси́, Бла́же, ду́ши на́ша.

По сконча́нии же пения, диа́кон а́бие глаго́лет ектению̀ свята́го миропома́зания:

Миром Го́споду помо́лимся.

Ли́к: Го́споди поми́луй.

О свы́шнем ми́ре и спасе́нии ду́ш на́ших Го́споду помо́лимся.

О ми́ре все́го ми́ра, благостоя́нии святы́х Бо́жиих церкве́й, и соедине́нии все́х, Го́споду помо́лимся.

О святе́йшем прави́тельствующем сино́де, и о преосвяще́ннем архиепи́скопе (или́ епи́скопе на́шем) (и́мярек), честне́м пресви́терстве, во Христе́ диа́констве, о все́м при́чте и лю́дех, Го́споду помо́лимся.

О благочести́вейшем, самодержа́внейшем, вели́ком Госуда́ре на́шем, импера́торе Никола́е Алекса́ндровиче всея́ Росси́и: о супру́ге его̀, благочести́вейшей Госуда́рыне императри́це Алекса́ндре Фео́доровне: о ма́тери его̀, благочести́вейшей Госуда́рыне императри́це Мари́и Фео́доровне, Го́споду помо́лимся.

О насле́днике его, благове́рном Госуда́ре цесаре́виче и вели́ком кня́зе Алекси́и Никола́евиче, и о все́м ца́рствующем до́ме: о все́й пала́те и вои́нстве и́х, Го́споду помо́лимся.

О е́же пома́занием всесвята́го, благоде́тельнаго, и всесоверши́тельнаго ми́ра, пода́тися си́ле Боже́ственней, ны́не Це́ркви святе́й собо́рней совоку́пленному рабу́ Бо́жию (и́мярек), в побежде́ние и попра́ние все́х сопроти́вных диа́вольских ко́зней, от пло́ти же и от ми́ра находя́щих бра́ней, Го́споду помо́лимся.

О е́же бы́ти ему́ хра́бру и победоно́сну во́ину Христа́ Бо́га на́шего, си́лою, де́йствием, благода́тию и прише́ствием Свята́го Ду́ха, пома́занием всесвята́го ми́ра, Го́споду помо́лимся.

О е́же тве́рдым и кре́пким и непоколеби́мым в правосла́вной ве́ре, любви́ же и наде́жди, пома́занием всесвята́го ми́ра, бы́ти ему́ во вся́ дни́ живота́ его̀, Го́споду помо́лимся.

О е́же пода́тися ему́ благода́ти пома́занием всесвята́го ми́ра, е́же со дерзнове́нием бе́з стра́ха непосты́дно испове́дати пре́д все́ми и́мя Христа́ Бо́га на́шего, и того̀ ра́ди страда́ти и умре́ти любо́вно всегда́ изво́лити, Го́споду помо́лимся.

О е́же возраста́ти ему́ во все́х доброде́телех, и преспева́ти в за́поведех Христа́ Бо́га на́шего, пома́занием всесвята́го ми́ра, Го́споду помо́лимся.

О е́же святи́тельным стра́хом в чистоте́ и пра́вде ду́шу его̀ соблюсти́ пома́занием всесвята́го ми́ра, Го́споду помо́лимся.

О е́же доспе́ти ему́ в му́жу соверше́нна, ме́ру во́зраста исполне́ния Христо́ва, си́лою, де́йством, благода́тию и наше́ствием Пресвята́го Ду́ха пома́занием всесвята́го и всесоверши́тельнаго ми́ра, Го́споду помо́лимся.

О е́же изба́витися ему́ и на́м от вся́кия ско́рби, гне́ва и ну́жды и дости́гнути все́м на́м в соедине́ние ве́ры и ра́зума Сы́на Бо́жия, Го́споду помо́лимся.

Заступи́, спаси́, поми́луй и сохрани́ его̀ и на́с, Бо́же, твое́ю благода́тию.

Пресвяту́ю, Пречи́стую Преблагослове́нную, сла́вную влады́чицу на́шу Богоро́дицу и Присноде́ву Мари́ю со все́ми святы́ми помяну́вше са́ми себе́ и дру́г дру́га, и ве́сь живо́т на́ш Христу́ Бо́гу предади́м.

Ли́к: Тебе́ Го́споди.

Иере́й возгла́с:

Я́ко подоба́ет Тебе́ вся́кая сла́ва, че́сть и поклоне́ние Отцу́ и Сы́ну и Свято́му Ду́ху, ны́не и при́сно и во ве́ки веко́в.

Ли́к: Ами́нь.

По сконча́нии же ектении́, ре́кшу диа́кону: Го́споду помо́лимся, и ли́ку: Го́споди поми́луй, святи́тель (или иере́й) глаго́лет моли́тву сию со вся́ким внима́нием велегла́сно:

Благослове́н еси́ Го́споди Бо́же Вседержи́телю, исто́чниче благи́х, со́лнце пра́вды, возсия́вый су́щим во тьме́ све́т спа́сения, явле́нием единоро́днаго Твоего̀ Сы́на и Бо́га на́шего, и дарова́вый на́м недосто́йным блаже́нное очище́ние во святе́й воде́, и боже́ственное освяще́ние в животворя́щем пома́зании: и́же и ны́не благоволи́л еси́ рабу́ Твоему́ сему́ (и́мярек), позна́ти Твою̀ и́стину и в покая́нии прибе́гнути к твоему́ благоутро́бию и соедини́тися свято́му твоему́ избра́нному ста́ду, и оставле́ние грехо́в, мною̀ недосто́йным рабо́м Твои́м, тому́ дарова́вый. Са́м Влады́ко, все́х Царю̀ благоутро́бне, да́руй ему́ печа́ть да́ра свята́го всеси́льнаго, и покланя́емаго Твоего̀ Ду́ха, и причаще́ние свята́го Те́ла и честны́я Кро́ве Иису́са Христа́ Твоего̀: Сохрани́ его̀ во Твое́м освяще́нии, утверди́ в правосла́вной ве́ре, изми́ от лука́ваго, и все́х ко́зней его̀, и спаси́тельным Твои́м стра́хом в чистоте́ и пра́вде ду́шу его̀ соблюди́: я́ко да во вся́ком де́ле и сло́ве благоугожда́я Тебе́, сы́н и насле́дник бу́дет пренебе́снаго Твоего̀ Ца́рствия. Я́ко Ты еси́ Бо́г на́ш, Бо́г е́же милова́ти и спаса́ти, и Тебе́ сла́ву возсыла́ем, Отцу́ и Сы́ну и Свято́му Ду́ху, ны́не и при́сно и во ве́ки веко́в.

Ли́к: Ами́нь.

По моли́тве же а́бие иере́й помазу́ет новосоедине́ннаго ми́ром святы́м, творя́ креста́ о́браз на челе́, и оче́сех, и но́здрех, и усте́х, и обо́их ушесе́х, и пе́рсех, и рука́х, и нога́х, глаго́ля: Печа́ть да́ра Ду́ха Свята́го, ами́нь.

Сему́ же соверши́вшуся диа́кону ре́кшу: Го́споду помо́лимся и кли́ру: Го́споди поми́луй, глаго́лет моли́тву сию̀:

Го́споди Бо́же на́ш, сподо́бивый соверше́нна показа́ти раба́ Твоего̀ сего̀ (и́мярек), ве́рою пра́вою, я́же в Тебе́, и печа́тию да́ра Свята́го Духа, во святе́м Твое́м и пренебе́снем пома́зании, Ты̀, Влады́ко все́х, и́стинную ве́ру в не́м соблюди́, воспита́й его̀ в пра́вде и и́стине, и все́ми дарова́нии Твоими украси́.

Я́ко ты̀ еси́ Бо́г на́ш, и Тебе́ сла́ву возсыла́ем, Отцу́ и Сы́ну и Свято́му Ду́ху, ны́не и при́сно и во ве́ки веко́в.

Ли́к: Ами́нь.

Взе́м же а́бие гу́бу, и омочи́в в те́плой воде́, отира́ет места́ ми́ром пома́занная, глаго́ля:

Оправда́лся еси́, просвети́лся еси, освяти́лся еси́ и́менем Го́спода на́шего Иису́са Христа́, и Ду́хом Бо́га на́шего, и ми́ром пома́зался еси́, во и́мя Отца́, и Сы́на, и Свята́го Ду́ха ны́не и при́сно и во ве́ки веко́в.

Ли́к: Ами́нь.

Посе́м святи́тель глаго́лет: Ми́р все́м.

Ли́к: И Ду́хови Твоему́.

Диа́кон: Главы̀ ва́ши Госпо́деви преклони́те.

Ли́к: Тебе́ Го́споди.

Все́м же главы̀ прекло́ншим, святи́тель глаго́лет вта́йне моли́тву сию̀:

Оде́явыйся (или́ оде́явшаяся) в тя́ Христа́ и Бо́га на́шего, подклони́ с на́ми гла́ву свою̀, его́же (или́ ю́же) сохрани́ непобеди́ма подви́жника (или́ непобеди́му подви́жницу) пребы́ти, на всу́е вражду́ подвиза́ющих на него̀ (или́ на ню̀) и на ны̀: твои́м же нетле́нным венце́м да́же до конца́ победи́тели все́х покажи́.

Возгла́с: Твое́ бо е́сть е́же милова́ти и спаса́ти, и Тебе́ славу возсыла́ем со безнача́льным твои́м Отце́м и пресвяты́м и благи́м и животворя́щим Твои́м Ду́хом, ны́не и при́сно и во ве́ки веко́в.

Кли́р: Ами́нь.

Посе́м ектения́: Поми́луй на́с, Бо́же:

Еще́ мо́лимся о благочести́вейшем, самодержа́внейшем, вели́ком Госуда́ре на́шем, импера́торе Никола́е Алекса́ндровиче всея́ Росси́и: о держа́ве, побе́де, пребыва́нии, ми́ре, здра́вии, спасе́нии его̀, Го́споду Бо́гу на́шему наипа́че поспеши́те и пособи́те ему́ во все́х, и покори́ти под но́зи его̀ вся́каго врага́ и супоста́та.

Еще мо́лимся о супру́ге его̀, благочести́вейшей Госуда́рыне императри́це Алекса́ндре Фео́доровне, о ма́тери его̀, благочести́вейшей Госуда́рыне императри́це Мари́и Фео́доровне, о насле́днике его, благове́рном Госуда́ре цесаре́виче и вели́ком кня́зе Алекси́и Никола́евиче, и о все́м ца́рствующем до́ме.

Еще мо́лимся о святе́йшем прави́тельствующем сино́де.

Еще мо́лимся о ми́лости, жи́зни, ми́ре, здра́вии, спасе́нии и оставле́нии грехо́в раба́ Бо́жия, (и́мярек), восприе́мника.

Еще мо́лимся о новопросвеще́ннем рабе́ Бо́жии (или́ о новопросвеще́нней рабе́ Бо́жией), (и́мярек), о е́же сохране́ну быти ему́ (или́ сохране́не бы́ти е́й) в ве́ре чи́стаго испове́дания, во вся́ком благоче́стии же, и исполне́нии за́поведей Христо́вых, во вся́ дни́ живота́ его̀ (или́ ея́).

Я́ко ми́лостив и человеколю́бец Бог еси́ и Тебе́ сла́ву возсыла́ем, Отцу́ и Сы́ну и Свято́му Ду́ху, ны́не и при́сно и во ве́ки веко́в.

Ли́к: Ами́нь.

Свяще́нник: Сла́ва Тебе́ Христе́ Бо́же, упова́ние на́ше, сла́ва Тебе́.

Сла́ва и ны́не: Го́споди поми́луй, три́жды. Благослови́.

И свяще́нник твори́т отпу́ст.

Миропома́занному же причасти́тися пречи́стым та́йнам Те́ла и Кро́ве Госпо́дни благословля́ет на литурги́и боже́ственней. Сия́ бо пре́д божественною литурги́ею соверша́ются.

Во сла́ву святы́я, единосу́щныя, животворя́щия и нераздели́мыя Трои́цы Отца́, и Сы́на, и Свята́го Ду́ха: при держа́ве благочести́вейшаго, самодержа́внейшаго, вели́каго Госуда́ря на́шего, импера́тора Никола́я Алекса́ндровича всея́ Росси́и: при супру́ге его̀̀, благочести́вейшей Госуда́рыне императри́це Алекса́ндре Фео́доровне: при ма́тери его̀, благочести́вейшей Госуда́рыне императри́це Мари́и Фео́доровне: при насле́днике его̀, благове́рном госуда́ре цесаре́виче и вели́ком кня́зе Алекси́и Никола́евиче: при благове́рном госуда́ре вели́ком кня́зе Михаи́ле Алекса́ндровиче: при благове́рной госуда́рыне вели́кой княги́не Мари́и Па́вловне: при благове́рных госуда́рех вели́ких князех Кирилле, Борисе и Андре́е Влади́мировичах: при благове́рной госуда́рыне вели́кой княги́не Елисаве́те Фео́доровне: при благове́рном госуда́ре вели́ком кня́зе Павле Алекса́ндровиче: при благове́рном госуда́ре вели́ком кня́зе Дими́трие Па́вловиче: при благове́рном госуда́ре вели́ком кня́зе Никола́е Константи́новиче: при благове́рной госуда́рыне вели́кой княги́не Елисаве́те Маври́киевне: при благове́рном госуда́ре вели́ком кня́зе Дими́трие Константи́новиче: при благове́рном госуда́ре вели́ком кня́зе Никола́е Никола́евиче: при благове́рном госуда́ре вели́ком кня́зе Петре́ Никола́евиче и при супру́ге его̀̀, благове́рной госуда́рыне вели́кой княги́не Ми́лице Никола́евне: при благове́рных госуда́рех вели́ких князех Никола́е и Михаи́ле Миха́йловичах: при благове́рном госуда́ре вели́ком кня́зе Гео́ргии Миха́йловиче и при супру́ге его̀̀, благове́рной госуда́рыне вели́кой княги́не Мари́и Гео́ргиевне: при благове́рном госуда́ре вели́ком кня́зе Алекса́ндре Миха́йловиче, и при супру́ге его̀̀, благове́рной госуда́рыне вели́кой княги́не Ксе́нии Алекса́ндровне: при благове́рном госуда́ре вели́ком кня́зе Се́ргии Миха́йловиче: при благове́рных госуда́рынях вели́ких княжна́х О́льге, Татиа́не, Мари́и и Анастаси́и Никола́евнах: при благове́рной госуда́рыне вели́кой княги́не О́льге Алекса́ндровне и при супру́ге ея́: при благове́рной госуда́рыне вели́кой княги́не Еле́не Влади́мировне и при супру́ге ея́: при благове́рной госуда́рыне вели́кой княги́не Мари́и Па́вловне: при благове́рных госуда́рынях: вели́кой княгине Мари́и Алекса́ндровне: при короле́ве е́ллинов О́льге Константи́новне: при вели́кой княги́не Анастаси́и Миха́йловне: благослове́нием святе́йшаго прави́тельствующего всеросси́йскаго сино́да напеча́тася сия́ ча́сть пе́рвая Кни́ги чино́в присоедине́ния к Правосла́вию в ца́рствующем гра́де свята́го Петра́, в синода́льной типогра́фии вторы́м тисне́нием в ле́то от сотворе́ния ми́ра ҂зук҃д. [7424], от рождества́ же по пло́ти Бо́га Сло́ва ҂ацє҃і. [1915], инди́кта д҃і. [14], ме́сяца септе́мврия.