Молитвы читаемые на молебнах


Молитвы Господу Богу, Пресвятой Богородице, святым угодникам Божиим, чтомые на молебнах и иных последованиях

Петроград, Синодальная типография, 1915 г.

Молитвы Господу Богу

Септембрия 8 и аугуста 15. Молитвы Софии, ипостасней премудрости Божией, Спасителю нашему Господу Иисусу Христу

Молитва 1

Премудрый и Всеблагий Господи, Спасителю наш, просветивый сиянием пришествия Твоего мiра концы и сопризвавый нас в Церковь Твою Святую, со обетованием наследия нетленных и вечных благ! Призри милостивно на нас, недостойных рабов твоих, и не помяни беззаконий наших, но по безмерному благосердию Твоему. Прости нам вся прегрешения наша, аще бо святую волю Твою и преступаем, но не отметаемся тебе, Бога и Спаса нашего: Тебе Единому согрешаем, но и Тебе Единому служим, в Тя Единаго веруем, к Тебе Единому прибегаем и Твои точию раби быти хощем. Помяни немощь естества нашего и обдержащыя повсюду искушения врага и прелести и соблазны мiра, ихже ради без Тебе, якоже рекл еси, не можем творити ничесоже. Сам очисти и спаси нас: Сам умы̀ нашя просветѝ, еже непоколебимо веровати в Тя, Единаго Спаса и Избавителя нашего: Сам сердца наша подвигни, еже всецело любити Тя, Единаго Бога и Творца нашего: Сам стопы̀ нашя, еже непреткновенно ходити во свете заповедей Твоих, направи. Ей, Господи Спасителю наш! Явѝ нам великую и богатую милость Твою: сотвори, да в преподобии и правде поживемя вся дни жизни нашея, и тако достойни будем во второе и славное пришествие Твое услышати от Тебе милостивое призывание во Царствие Небесное, еже и получити сподоби ны, грешныя и недостойныя рабы Твоя, и в наслаждении неизреченных красот его славити Тя вкупе со Безначальным Твоим Отцем и Присносущным Божественным Духом во веки веков.

Молитва 2

Непостижимая и Всепетая Премудросте Божия, сиречь Единородный Сыне и Слове Божий! Приими молебное сие пение от недостойных и скверных уст наших, аще и несть красна̀ песнь во устех грешничих. Обаче, якоже разбойник единым словом спасеся, и мытарь воздыханием оправдася, и дщи ханане́нна матерним прошением исцелися: тако и ныне милостив к мольбам нашым явися. Понеже ты, Господи, Благ и Человеколюбив сый, грядущаго в мiр просвещаеши, и грехи грешником отпущаеши, и разумом неразумныя наполняеши, и буяго умудряеши, и жаждущыя душы благих словес учением Твоим, якоже самаряны́ню водою жизни напая́еши, блудникѝ целому́дрены устроя́еши, разбойнику рай отверзаеши. Ты бо воистину еси всех благих Податель и Вразумитель, и жизни Хранитель, Христе Боже наш, и Тебе славу и хвалу, честь и благодарение и славословие возсылаем, и поклонение творим, со Безначальным Твоим Отцем, и со Пресвятым и Благим и Животворящым Духом, и со Пресвятою и Пренепорочною Твоею Ма́терию, Владычицею нашею Богородицею и Приснодевою Мариею, со всеми святыми Твоими, ныне и присно и во веки веков.

Тропарь, глас 1

На престоле огнезра́чнем в вышних седя́й со Отцем Безначальным и Божественным Твоим Духом, благоволил еси яви́тися на земли, яко человек, исполняя предвечный о нас Совет Святыя Троицы, Иисусе Христе: сего ради и пострадал еси плотию, да спасе́ши мiр и вознесе́ши избра́нныя Твоя, идеже присно, яко Бог, во славе царствуеши. Слава Всеблагому Твоему Совету: слава премудрому смотрению Твоему: слава неизреченному снисхождению Твоему, Едине Человеколюбче.

Тропарь, глас 8

Прему́дрость О́тчая, сия́ние сла́вы и о́бразе ипоста́си Его̀, в нача́ле небеса̀ и зе́млю основа́вый, благословѝ достоя́ние Твоѐ, сохранѝ в ми́ре импера́тора, церковь и гра́д Тво́й, и лю́ди Твоя̀ спасѝ.

Тропарь, глас 4

Велия и неизреченная Премудрости Божией сило, Софие Преименитая, пречестный храме, огнезрачный престоле Христа Бога нашего, в Тя бо вселися неизреченно Слово Божие и плоть бысть, Невидимый явися и Неприкосновенный из Тебе изыде и с человеки поживѐ, врага уловляя и человеки от клятвы древния свобождая! Молим тя, Владычице, отягченных нас во гресех наших помиловати и спасти душы нашя: яко человеколюбивая и милосердая Царице, призри на люди Твоя и умилосердися, заступи от напастей и скорбей лютых, и гра́ды на́шя невредимы сохранѝ, иде́же ныне имя Твое пресвятое боголепно славится.

Величания

1. Величаем Тя, Единородный Сыне Божий Иисусе Христе, вся премудостию Твоею в начале сотворшаго и человеческий падший род от вечныя смерти всемилостивно искупившаго

2. Величаем Тя, Сыне и Слове Божий, Премудросте Божия, яко нам Ведущим Тя разум подаваеши и премудрости исполняеши.

Септембрия 14. Молитвы Честному и Животворящему Кресту Господню

Молитва 1, из книги Акафисты с каноны

Господи Иисусе Христе, Сыне Бога Жива́го, Творче неба и земли, Спасителю мiра! Се аз недостойный и паче всех грешнейший, смиренно колена сердца моего пред славою величества Твоего преклоняя, воспеваю и величаю безмерное страдание Твое, и благодарение Тебе Царю̀ всех и Богу приношу, яко благоизволил еси сни́ти с небеснаго престола Твоего и воплотитися от Пречистыя Девы Марии, ради спасения человеческаго: бесплотен сый, плотское естество Божеству совокупил есѝ: богат сый, волею обнищал еси, да человека во Царствии Твоем обогати́ши: труды и всякия человеческия беды, яко человек, на Себе поне́сл еси, да всем во всяких печа́лех и ну́ждах пособствуеши: четыредесять дней пости́выйся, всем к воздержанию путь показал еси: мно́жицею от лукавых искушен был еси, всех от искушений всяких избавляя. Вем, Всесильный Владыко, яко вся сия Тебе непотребна бы́ша, но человеческаго ради спасения вся претерпел еси: предан был еси за тридесять сребреник, да человека иску́пиши от лютыя работы вражия: от немилостивых иудей, яко незлобивый Агнец, похищен был еси, род человеческий от поглощения волка мысленнаго исторгая: на суди́лищи пред Анною и Каиафою предстал еси, всех от осуждения огня вечнаго отводя̀: связан, поруган, оплева́н, от ложных свидетелей оклеве́тан и на поносительную смерть осужден был еси, человека от вся́кия напасти, мучения и от вечныя смерти свобожда́я: Пилату, нико́его зла соде́явый, предан был еси, и ко Ироду послан, и паки поруган, человека от злаго обстояния и от поруганий вражиих избавляя. Что убо воздам Тебе, Владыко Человеколюбче, о всех, яже претерпел еси мене ради грешнаго? Не вем, душа бо и тело и вся благая от Тебе суть, и вся моя Твоя суть, и аз Твой есмь: то́чию на безчисленное Твое милосердие, Благосерде Господи, наде́яся, пою Твое неизреченное долготерпение, величаю неисповедимое смотрение Твое, славлю Твою безмерную милость, имже преклонился еси мене ради осужде́ннаго, да аз оправда́н буду. К столпу̀, Спасе, привязан и без милости бие́н, милостив сый, разреши мя, молюся, от грехов моих: тернием венча́н, души моея̀ греховное терние искоренѝ: тростию бие́н по главѐ, сокруши главу змия уязвляющаго мя жалом греха: в багряну ризу оболче́н и мучителем предан, просвети ми, Царю Пресвятый, одеяние душевное, да вниду в чертог Твой всекрасный: с разбойники вменен и крест на раму Твоею понесый, разбойника врага, ищущаго душу мою убити, Твоим крестом прожени. Вем Тя, Иисусе долготерпеливе, люте уя́звлена: от верху̀ главы̀ Твоея Святыя, даже до стопы ножныя, не бе в Тебе места це́ла. Что же возглаголю о неизреченнем человеколюбии Твоем, Христе Спасителю; Точию в сокрушении сердца моего, поклоняяся Твоим пречистым страстем и вселюбезно тыя лобызая, вопию̀: помилуй мя, грешнаго. На кресте пригвздитися изво́ливый, пригвозди заповедем Твоим сердце мое: воздвижен со крестом на горе Голгофе, воздвигни мысли моя к небесѝ, да всегда горняя мудрствую: же́лчию со о́цтом напое́н, огорченное грехом сердце мое услади любовию Твоею, и жажадуща напой потоком сладости Твоея: руце Твои пречистеи распростры́й на приятие всех, приими мя грешнаго: но́зе пригвожде́ны име́вый, хотя всегда со грешники быти, буди со мною грешным, возбраняя ногам моим от всякаго пути лукаваго: сердце отве́рсто имевый, яви мне благодать Твою грешному: главу пречистую на кресте преклони́вый, услыши недостойныя молитвы моя. О пречудная и неизмеримая глубино милосердия, Христе Боже! за враги распинатели Твоя Богу Отцу моливыйся, даждь и мне грешному сию благодать, любити враги моя и молитися за них: разбойнику кающемуся рай отверзый,  воззри Свете мой, на мя грешнаго, подаждь покаяние, и отверзи ми двери милости Твоея, и помяни мя недостойнаго во Царствии Твоем. Наконец, дух Твой пресвятый предавый в руце Богу Отцу, приими, Создателю, дух мой во время кончины моея: со креста снят и во гроб яко мертв положе́н, Спасе, живый во свете неприступнем, возьми от мене тяжкое бремя греховное, и не возгнушайся, Человеколюбче, вселитися во гроб сердца моего недостойнаго, на умерщвление моего плотскаго мудрования: яко да не ктому себе бренное создание Твое, но Тебе Господеви и Богу моему живый, Твоим, о Всемилостиве, благосердием, сподоблюся видети Тебе Создателя и Спасителя моего, за приятие смерти крестныя, славою и честию венчаннаго, во свете неприкосновенныя Твоея славы: идеже со безначальным Твоим Отцем, и со Пресвятым и Благим и Животворящим и Единосущным Твоим Духом, царствуеши прежде век, ныне и присно и во веки веков.

Молитва 2, из книги Правило готовящымся к служению литургии святыя

О Всечестный и Животворящий Кресте Господень, кровию Христа Бога нашего освященный! Ты еси знамение победы на враги наша видимыя и невидимыя: ты имаши явитися в час страшнаго суда Христова. Тебе смиренно поклоняюся, честно прикасаюся и любезно тя лобызаю, нынешнее моление к распятому на тебе принося, да исцелит мя силою в тебе Своею от всех недугов душевных и телесных, и сохранит от врагов видимых и невидимых, и неосужденна на суде Своем одесную поставит. Ей,  Животворящий Кресте Святый! На тебе Спас, умирая за умершия грехми человеки, дух Свой яко человек испусти, кровь же и воду источи, и сими треми едино, еже паче всех есть на потребу, спасение нам содела, во славу источника вод живых Бога Отца, себе же от кровей девических воплощена Бога Сына, и Бога Духа Святаго, оживляющаго дух человечь: ихже триех во Едином Божестве славити и мне пособи от воды крещения восприятою верою непорочною, во Причастии же плоти и крови Господних надеждою несумненною, и в покаянии духом сокрушенным, и любовию нелицемерною, да тако не токмо в жизни сей плачевней, яко вода мимотекущей, но и в будущем блаженнем животе прославлю Господа пособием силы твоея, Кресте треблаженне, и поклоняюся Ему самым лица зрением верованному, одержанием же чаянному и наслаждением любимому, Единому в Троице славимому в безконечныя веки веков.

Молитва 3, из акафиста Божественным Страстем Христовым

Господи Иисусе Христе, Сыне Бога Живаго, Творче неба и земли, Спасителю мiра! Се аз недостойный и паче всех грешнейший, смиренно колена сердца моего пред славою величества Твоего преклонив, воспеваю Крест и страдания Твоя, и благодарение Тебе Царю всех и Богу приношу, яко благоизволил еси вся труды и всякия беды, напасти и мучения яко человек понести, да всем нам во всяких печалех, нуждах и озлоблениих состраждущий Помощник и Спаситель будеши. Вем, Всесильне Владыко, яко вся сия Тебе убо не быша потребна, но человечаскаго ради спасения, да всех нас иску́пиши от лютыя работы вражия, крест и страдания претерпел еси. Что убо воздам Тебе, Человеколюбче, о всех, яже пострадал еси мене ради грешнаго; Не вем: душа бо и тело и вся благая от Тебе суть, и вся моя Твоя суть, и аз Твой есмь. Точию на безчисленное Твое, Благосерде Господи, милосердие надеяся, пою Твое неизреченное долготерпение, величаю неисповедимое истощание, славлю Твою безмерную милость, поклоняюся пречистым страстем Твоим, и вселюбезно лобызая язвы Твоя, вопию: помилуй мя грешнаго, и сотвори, да не безплоден будет во мне крест Твой Святый, но да с верою страданием Твоим зде причащаяся, сподоблюся видети и славу Царствия Твоего на небеси.

Молитва 4, чтомая в Крестном Монастыре Арханглогородския епархии

Благодарю Тя, Господи Царю всех, царствующаго небом и землею и преисподнею: благодарю Тя, Безначальне, Всесильне Царю Вседержителю: благодарю Тя, преблагий, всемилостивый, наставниче заблуждшим, на землю с небес сошедый и воплотивыйся от Девы Марии, нашего ради спасения, и бывый един (.?.) и человек подобен мне, кроме страстей и всякаго греха, не привидением же, но истиною безстрастный неправедно от беззаконников пострадавый, да безстрастие мне осужденному за множество грехов моих подаси. Пою Твое неизреченное долготерпение, Господи: величаю неисповедимое смотрение Твое, славлю Твою безмерную милость, имиже преклонься, мене осужденнаго оправдал еси. Поклоняюся страстем Твоим, имиже аз же безчестнейший пременихся страстей: лоюбызаю Твой крест, имже мой грех осудил еси и от смертнаго осуждения мя свободил еси: лобызаю гвозди оныя, имиже клятвы потребил еси запрещение: целую язвы, имиже моего послушания уврачевашеся язвы. Целу́ю трость, еюже подписал еси свобождение и еюже строптиваго змия уязвил еси главу: целу́ю копие, мое рукописание растерзавшее и безсмертия источник отверзшее: целу́ю губу̀, напоенную оцта и ко пречистым Твоим принесенную устом, еюже преслушаения моего горькое во сладкое претворися. О неизмеримая глубино милосердия Твоего, Христе Спасителю наш! Темже смиренно со благодарением Ти припадаем, и Животворящему Твоему Кресту, имже нас спасл еси от работы врагу, любезно кланяемся. Исповедуем, яко Ты еси един Свят, един Крепкий и един Жизнодавец, и на всех имаши волю прикладну. Тобою, Господи, дается на диавола и на его воинство крепость, и тебе славу возсылаем, со Безначальным Твоим Отцем, и сПресвятым и Благим и Животворящим Твоим Духом, ныне и присно и во веки веков.

Декембрия 25. Молитва из молебствия на день Рождества Христова

Боже Великий и непостижимый, Отче Безначальный, собезначальный Сыне и Душе соприсносущный, осуществуяй не сущая, спасаяй погибающая, животворяй мертвыя, творяй по воле Твоей в силе небесней и в селении земнем, и дивным Твоим промыслом управляяй всяческая! Приклони ухо Твое с высоты святыя Твоея, и приими о нас смиренных и недостойных рабов Твоих, имиже велие Твое от бед и всегубительства спасение явил еси сердцем и усты возносимая тебе благодарственная сия моления, исповедания и славословия. Яко не по беззаконием нашым сотворил еси нам, Господи, ниже по грехом нашым воздал еси нам. Ты глаголал еси древле сыновом Израилевым, яко, аще не послушают гласа Твоего хранити и творити вся заповеди Твоя, наведеши на них язык безстуден лицем, иже сокрушит их во граде́х их, дондеже разорятся стены их: мы ведехом, яко прииде глагол страшный сей на ня и на отцы нашя: обаче, прещения Твоего не убоявшеся и о милосердии Твоем вознерадивше, оставихом путь правды Твоея и ходихом в волях сердец наших, и не искусихом имети в разуме и сердце Тебе Бога разумов и сердец: еще же и отеческая предания ни во чтоже вменивше, прогневахом Тя о чуждих. Ихже ради, якоже древле сынов Израилевых, тако и нас объят лютое обстояние, и о ихже ревновахом наставлениих, сих врагов имеяхом буиих и зверонравных. Но Ты, Господи Боже щедрый и милостивый, долготерпеливый и многомилостивый и истинный, и правду храняй, и творяй милость в тысящи, отъемляй беззакония и неправды и грехи, на время мало оставль нас, милостию велиею помиловал еси, и посетил жезлом неправды нашя, якоже щедрит отец сыны, тако ущедрил еси нас. Призрел бо еси на скорбь нашу и на потребление царствующаго града, в немже от лет древних призвася имя Твое, и на моления наша, яже не на нашя правды уповающе повергохом пред Тобою, но на щедроты Твоя многия, Господи: и дал еси нам хребет нечестивых сопостатов, благочестивейшаго же царя нашего Александра Павловича венчал еси оружием благоволения Твоего, да от лица Христа Твоего исчезающе исчезнут яко дым врази Твои, любящии же Тебе возсияют, яко восток солнца в силе своей. Видехом, Гоподи, видехом, и вси языцы видеша в нас, яко Ты еси Бог, и несть разве Тебе: Ты убиеши и жити сотворити, поразиши и исцелиши, и несть, иже изьмет от руку Твоею. Темже утвердися сердце наше во Господе нашем, вознесеся рог наш в Бозе нашем, возвеселихомся о спасении Твоем. Благодарим Тя, Господи, яко наказуя наказал еси ны вмале, да не смерти во веки предаси нас. Даждь нам, Господи, память сего славнаго Твоего посещения тверду и непрестанну имети в себе, яко да в Тебе утвержде́ни сыновним страхом и верою и любовию, и Твоею крепостию ограждени, всегда, якоже днесь, поем и славословим имя святое Твое. Утверди благословение Твое и на благочестивейшем, самодержавнейшем, великом государе нашем, императоре Николае Александровиче всея России, и Дух Твой Благий да почиет на нем выну. Подаждь во благочестивей державе его пастырем святыню, правителем суд и правду, народу мири тишину, законом силу и вере преспеяние. О Премилосердый Господи! пробави милость Твою ведущим Тя: но и не ищущим тебе явлен буди: еще и врагов наших сердца к Тебе обрати: и всем языком и поеменом во Единем Истиннем Христе Твоем познан буди. Да от Восток солнца до Запад, всеми убо языки, единем же сердцем, вси языцы восклицают Тебе гласом радования.

Возглашение

Слава Тебе Богу, Спасителю всех, во веки веков.

Молитва из молебнаго пения на новый год

Владыко Господи Боже наш, Источниче жизни и безсмертия, всея твари видимыя и невидимыя Содетелю, времена и лета во Своей власти положивый, и  управляяй всяческая премудрым и всеблагим Твоим промыслом! Благодарим о щедротах Твоих, яже удивил еси на нас в мимошедшее время жития нашего. Молим Тя, Всещедрый Господи: благослови венец наступающаго лета Твоею благостию: сохрани волзлюбленнаго раба Твоего, благочестивейшаго, самодержавнейшаго, великаго государя нашего, императора Николая Александровича всея России: и супругу его, Александру Феодоровну: матерь его, благочестивейшую государыню, императрицу Марию Феодоровну: наследника его, благовернаго государя цесаревича и великаго князя Алексия Николаевича, и весь царствующий дом. Умножи дни жития их в непоколебимем здравии, и во всех добродетелех преуспеяние им даруй. Подаждь свыше благая Твоя и всем людем Твоим, здравие же и спасение и во всем благое поспешение. Церковь Твою святую, град сей и вся грады и страны от всякаго злаго обстояния избави, мир и безмятежие тем даруй: Тебе Безначальному Отцу, со Единородным Твоим Сыном, Всесвятым и Животворящим Твоим Духом, во едином существе славимому Богу, всегда благодарение приносити и Пресвятое имя Твое воспевати да сподобиши.

Возглашение

Слава Тебе Богу, Блгодателю нашему, во веки веков.

Тропарь, глас 4

Благодарни суще недостойнии раби Твои, Господи, о Твоих великих благодеяниих на нас бывших, славяще Тя хвалим, благословим, благодарим, поем и величаем Твое благоутробие, и рабски любовию вопием Ти: Благодетелю Спасе наш, слава Тебе.

Слава, глас 3

Твоих благодеяний и даров туне, яко раби непотребнии, сподобльшеся, Владыко, к Тебе усердно притекающе, благодарение по силе приносим, и Тебе яко Благодетеля и Творца славяще, вопием: слава Тебе, Боже Прещедрый.

И ныне, глас 2

Всея твари Содетелю, времена и лета во Своей власти положивый, благослови венец лета благости Твоея, Господи, сохраняя в мире императора и град Твой, молитвами Богородицы, и спаси ны.

Иануария 6. Молитва на Великом освящении воды святых Богоявлений

Глаголемей от диакона ектений, священник тайно глаголет молитву сию:

Господи Иисусе Христе, Единородный Сыне, сый в недре Отчи, Истинный Боже, источниче жизни и безсмертия, свете от света, пришедый в мiр, еже просветити его! Озари нашу мысль Святым Твоим Духом, и приими нас, величество и благодарение Тебе приносящих, о яже от  века дивных Твоих велкодействиих, и еже в последния веки спасительнем Твоем смотрении, в немже в наше немощное и нищее одеявся смешение, и работным мерам снизшедый, иже всех Царю, еще и рабскою рукою во Иордане креститися претерпел еси, да водное естество освятив, Безгрешне, путесотвориши нам еже водою и Духом паки рождение, и к первому нас устроиши свобождению. Егоже Божественнаго Таинства воспоминание празднующе, молимся Тебе, Владыко Человеколюбче: воскропи и на ны недостойныя рабы Твоя, по Божественному Твоему обещанию, воду чисту, Твоего благосердия дар, во еже над водою сею прошению нас грешных благоприятну быти Твоею благостию, и благословению Твоему ею нам же и всем верным людем Твоим дароватися, во славу святаго и покланяемаго Твоего имени. Яко подобает Тебе всякая слава, честь и поклонение, со Безначальным Твоим Отцем, и Пресвятым и Благим и Животворящим Твоим Духом, ныне и присно и во веки веков.

И рек в себе: Аминь, диакону же исполныну ектению, начинает священник велегласно молитву сию:

Велий еси, Господи, и чудна дела Твоя, и не едино же слово довольно будет к пению чудес Твоих [трижды].

Ты бо, хотением от не сущих во еже быти приведый всяческая, Твоею державою содержи́ши тварь, и Твоим промыслом строиши мiр. Ты, от четырех стихий тварь сочинивый, четы́рьми времены круг лета венчал еси. Тебе трепещут умныя вся силы: Тебе поет солнце, Тебе славит луна, Тебе присутствуют звезды: Тебе слушает свет, Тебе трепещут бездны, Тебе работаю источницы. Ты простерл еси небо яко кожу: Ты утвердил еси землю на водах: Ты оградил еси море песком: Ты в дыханием воздух излиял еси. Ангельския силы Тебе служат, архангельстии лицы Тебе кланяются: многоочитии херувимы и шестокрилатии серафимы, окрест стояще и облетающе, страхом неприступныя славы Твоея покрываются. Ты бо, Бог сый неописанный, Безначальный же и неизглаголанный, пришел еси на землю, зрак раба приим, в подобии человечестем быв: не бо терпел еси, Владыко, милосердия ради милости Твоея, зрети от диавола мучима рода человеча, но пришел еси и спасл еси нас. Исповедуем благодать, проповедуем милость, не таим благодеяния: естества нашего роды свободил еси, девственную освятил еси утробу Рождеством Твоим: вся тварь воспевает Тя явльшагося. Ты бо Бог наш, на земли явился еси и с человеки пожил еси: Ты и иорданския струи освятил еси, с небесе низпослав Святаго Твоего Духа, и главы тамо гнездящихся сокрушил еси змиев.

И сие убо священник глаголя трижды, и воду рукою благословляет на кийждо стих:

Сам убо, Человеколюбче Царю, прииди и ныне наитием Святаго Твоего Духа, и освяти воду сию.

И даждь ей благодать избавления, благословение иорданово: сотвори ю нетления источник, освяшения дар, грехов разрешение, недугов исцеление, демонов губительну, сопротивным силам неприступну, ангельския крепости исполнену: да вси почерпающии и причащающиися имеют ю ко очищению душ и телес, ко исцелению страстей, ко освящению домов, и ко всякой пользе изрядну. Ты бо еси Бог наш, иже водою и Духом обновивый обетшавшее грехом естество наше: Ты еси Бог наш, водою потопивый при Нои грех: Ты еси Бог наш, иже морем свободивый от работы фараони Моисеом род еврейский: Ты бо еси Бог наш, разразивый камень в пустыни, и потекоша воды, и потоцы наводнишася, и жаждущия люди Твоя насытивый: Ты еси Бог наш, иже водою и огнем пременивый Илиею Израиля от прелести вааловы.

Сам и ныне, Владыко, оствяти воду сию, Духом Твоим Святым [трижды].

Даждь же всем прикасающимся ей и причащающымся и мажущымся ею освящение, здравие, очищение и благословение.

И спаси, Господи, раба Твоего, благочестивейшаго, самодержавнейшаго, великаго государя нашего, императора Николая Александровича всея России [трижды].

И супругу его, благочестивейшую государыню, императрицу Александру Феодоровну.

И матерь его, благочестивейшую государыню, императрицу Марию Феодоровну.

Наследника его, благовернаго государя цесаревича и великаго князя Алексия Николаевича, и весь царствующий дом.

Спаси, Господи, и помилуй святейший привительствующий Синод.

И сохрани их под кровом Твоим в мире, покори им всякаго врага и супостата, даруй им вся яже ко спасению прошения и жизнь вечную: да и стихиями и человеки, и ангелы, и видимыми и невидимыми, славится Твое пресвятое имя, со Отцем и Святым Духом, ныне и присно и вовеки веков.

Священник: мир всем.

Лик: И духови твоему.

Диакон: Главы ваша Господеви преклоните.

Лик: Тебе, Господи.

Священник прекло́нься молится:

Приклони, Господи, ухо Твое, и услыши ны, иже во Иордане креститися изволивый и освятивый воды: и благослови всех нас, иже преклонением своея выи назнаменующих работное воображение: и сподоби нас исполнитися освящения Твоего, воды сия причащением: и да будет нам, Господи, во здравие души и тела.

Возглашение

Ты бо еси освящение наше, и Тебе славу и благодарение и поклонение возсылаем, со Безначальным Твоим Отцем и Пресвятым и Благим и Животворящим Твоим Духом, ныне и присно и вовеки веков.

Молитва из последования в Неделю Православия

Всевышний Боже, Владыко и Содетелю всея твари, наполняяй вся величеством Твоим и содержай силою Твоею! Тебе вседаровитому Господу нашему мы недостойнии благодарение приносим, яко не отвращаешися нас беззаконий ради наших, но паче предваряеши ны щедротами Твоими. Ты ко избавлению нашему послал еси Единороднаго Твоего Сына, и благовестил безмерное Твое к роду человеческому снисхождение: яко хотением хощеши, и ожидаеши, еже обратитися нам к Тебе и спасенным быти: Ты снисходя к немощи нашего естества, укрепляеши нас всесильною Святаго Твоего Духа благодатию, утешаеши спасительною верою и совершенною надеждою вечных благ, и руководствуя избранных Твоих в горний Сион, соблюдаеши яко зеницу ока. Исповедуем, Господи, великое Твое и безприкладное человеколюбие и милосердие. Но видяще многих поползновения, прилежно Тя, Всеблагий Господи, молим: призри на Церковь Твою, и виждь, яко Твое спасительное благовестие аще и радостно прияхом, но терние суеты и страстей творит оное в некиих малоплодно, в некиих же и безплодно, и по умножению беззаконий овии ересьми, овии расколом противящеся Евангельской Твоей истине, отступают от достояния Твоего, отревают Твою благодать и повергают себе суду Твоего Пресвятаго слова. Премилосердый и Всесильный, не до конца гневаяйся Господи! буди милостив, молит Тя Твоя Церковь, представляющи Тебе Начальника и Совершителя спасения нашего Иисуса Христа: буди милостив нам, укрепи нас в правоверии силою Твоею, заблуждающым же просвети разумные очи светом Твоим Божественным, да уразумеют Твою истину: умягчи их ожесточение и отверзи слухи, да познают глас Твой и обратятся к Тебе Спасителю нашему. Исправи, Господи, иных развращение и жизнь несогласную христианскому благочестию: сотвори, да вси свято и непорочно поживем: и тако спасительная вера укоренится и плодоносна в сердцах наших пребудет. Не отврати лица Твоего от нас, Господи, воздаждь нам радость спасения Твоего: подаждь, Господи, и пастырем Церкви Твоея святую ревность, и попечение их о спасении и обращении заблуждающих духом евангельским раствори: да тако вси руководими достигнем, идеже совершение веры, исполнение надежды и истинная любовь: и тамо с лики чистейших небесных сил прославим Тебе Господа нашего, Отца и Сына и Святаго Духа, во веки веков.

Молитва по каноне покаянием. Из книги Правило готовящымся к служению Литургии Святыя

Владыко Христе Боже, иже страстьмя Твоими страсти моя исцеливый и язвами Твоими язвы моя уврачевавый! Даруй мне, много Тебе прегрешившему, слезы умиления: сраствори моему телу, от обоняния Животворящего тела Твоего, и наслади душу мою Твоею Честною Кровию, от  горести, еюже мя сопротивник напои: возвыси мой ум к Тебе, долу поникший, и возведи от пропасти погибели, яко не имам покаяния, не имам умиления, не имам слезы утешительныя, возводящия чада ко своему наследию. Омрачихся умом в житейских страстех, не могу воззрети к Тебе в болезни, не могу согретися слезами яже к Тебе Любве. Но, Владыко Господи Иисусе Христе, сокровище благих, даруй мне покаяние всецелое и сердце люботрудное во взыскание Твое: даруй мне благодать Твою и обнови во мне зраки Твоего образа. Оставих Тя, не остави мене: изыди на взыскание мое: возведи ко пажити Твоей, и сопричти мя овцам избраннаго Твоего стада: воспитай мя с ними от злака Божественных Твоих Таинств, молитвами Пречистыя Твоея Матере и всех святых Твоих.

Молитвы из Акафиста Иисусу Сладчайшему

Молитва 1

Согрешихом, беззаконновахом и неправдовахом пред Тобою, Преблагий Владыко: преступихом спасительные Твоя заповеди и священныя обеты наша, яже во святем Крещении пред святым Твоим жертвенником, пред Ангелы же и человеки сотворихом: преобидехом Честную Кровь завета Твоего, еюже освятихомся, общение искупления приемше: дух благодати обезчестихом, страшнаго же и преестественнаго сыноположения небрегохом: всякое писание, Божественный закон и учение богодухновенное, ударения возду́ха тщая, и вещания едина токмо, деяний пустая, в нас вменишася: именем токмо и словесы честное Евангелие истиннаго христианства окаяннии содержи́м: руце имамы ко всякому хищению и лихоимству прилежны, нозе же скоро и дерзостно ко всякой неправде зле текущя, готовы часть братнюю ивосхищати и попирати, снедающя убогих: уста, священных молитв и слова Божия орга́н, всякия нечистоты̀, суесловия и клятвопреступления, бесом сотворихом во орга́н: очи и вся наша чувства блужения и всякаго сквернения премножеством исполнихом: в нас царствующаго ума Божественное благодати семя поправше, и уды Твоя, Христе, блудничи уды сотворивше, вместо храма Божия, тли и всякия нечистоты̀ хранилище обретохомся. Сего ради, Преблагий Владыко, многое Твое человеколюбие в стужение претворихом окаяннии, и многая Твоя благая дарования в казнь безумно нам преложихом: отнюдуже нижѐ от сущих нам благих, нижѐ от болезней ближних лучши бывше, праведно на ны̀ сами Твоего праведнаго наказания язвы подвигохом. Но не яростю Твоею обличи нас, ниже гневом Твоим накажеши нас, Господи. Тебе Единому согрешихом, но Тебе Единому и покланяемся, и сокрушенным сердцем, яко жертву чистую, исповедание Ти приносим: ослаби, Человеколюбче Владыко, устави праведно наносимую рану: да победит множество щедрот Твоих, грехав наших лукавое собрание, и Твоея безчисленныя благости пучина да покрыет горькое слез наших море. Имамы в руках Твоего человеколюбия образ и величество: разбойника, мытаря, блудницу и блуднаго сына, иже вси паче нас в покаянии благоискусствующе, в Небесное Царство предвзыдоша. С ними убо и ны исповедающяся и припадающя Ти приими, Владыко: аще же и тех всяческаго обращения и покаяния множества отстоим, недоставшее да исполнит безмерная благость Твоя, паче же и все, понеже и всего воистину отстоим. Приносим Ти рыдания убогих и гласы младенцев, смиренную и препро́стую, всякаго возраста молящихся часть, достойную щедрот и прощения Твоего. Имаши к сему на милосердие и милость преклоняющыя Тя крест и вольную смерть, юже за ны неблагодарныя претерпел еси, подвиги ктому апостолов, преподобных, постников, и мучеников крови: пред всеми же общую всех надежду и спасение, паче сло́ва без семене рождшую Тя: ихже мольбы человеколюбно прием, услыши ны, Иисусе Сладчайший, молящыя Ти ся, и нижѐ токмо о нас самех, но и о нихже должни есмы: пособствуй благочестивейшему, самодержавнейшему, великому государю нашему, императору Николаю Александровичу всея Россиии и всему царствующему дому, всей палате, воинству и всей державе их, даруй на супостаты победу, и царство их миром огради. Спаси же и помилуй святейший правительствующий Синод, со всеми благочестивыми архиереи, и весь освященный чин и причет церковный, и даруй им цело, безмятежно, благоверно, право, по преданию святых апостол и святых отец, на вселенских соборах Духом Святым узаконенному, исправляти слово Твоея истины: заблуждшыя же от православныя веры еретики и отступники к познанию истины призови: неверныя просвети, да Тя уведят: грешныя к покаянию приведи: девствующим чистоту и воздержание даруй, брачным святыню: вдовицам и сирым даруй воспитание, нищим покров, странствующим возвращение, плавающим пристанище: кающимся прощение даруй, плачущим утешение, благим во благости пребывати, средним лучшым быти, согрещающим во исправление приходити. Ей, Иисусе Сладчайший, молимся Ти: даждь грехом нашым оставление, ума благопостояние, тела здравие, житию нуждная довольная, мир во днех наших, воздуха благорастворение, земли благоплодие, веры православныя возращение, и соединение святых Твоих церквей, низложение ересе́й, советов нечестивых разорение, огнь любве и всякаго благочестия, в молитве чистоту сердечную, в злоключении терпение и великодушие, в надежде веселие: и всякое душевному нашему и телесному здравию и спасению полезное, паче же великолепей Твоей славе подобающее прошение даруй, и исполни по неизмерным щедротам Твоим, избавляя ны от належащаго праведнаго прещения, губительства, труса, потопа, огня, меча и всякия смертоносныя язвы: и не хотяй смерти грешника, даруй нам время ко покаянию, яко да и настоящих зол и будущих вечных мук свободимся, благодатию и человеколюбием Безначальнаго Твоего Отца, с Нимже благословен еси, со Пресвятым, Благим и Животворящим Твоим Духом, ныне и присно и во веки веков.

Молитва 2

Господи Иисусе Христе, Боже мой, посещаяй тварь Свою, Емуже явле́ны страсти моя и немощь естества нашего человеческаго и крепость супостата нашего! Ты Сам покрый мя от злобы его, зане сила его крепка, естесто же наше страстно и сила наша немощна. Ты убо, о Благий, ведый немощь нашу и носяй неудобство безсилия нашего, сохрани мя от смущения помыслов и потопа страстей, и достойна сотвори мя службы Твоея святыя, да не како в страстех моих растлю сладость ея, и обрящуся безстуден пред Тобою и дерзостив. Господи, пресладкий мой Иисусе, помилуй и спаси мя.

Молитва 3

Владыко Господи Иисусе Христе, Боже наш, иже, неизреченнаго ради Твоего человеколюбия, на конец веков во плоть оболкийся от Приснодевы Марии! Славим о нас Твое спасительное промышление раби Твои, Владыко: песнословим Тя, яко Тебе ради Отца познахом: благословим Тя, егоже ради и Дух Святый в мiр прииде. Покланяемся Твоей по плоти Пречистей Матери, таковей страшней тайне послужившей: восхваляем Твоя ангельская ликостояния, яко воспеватели и слжители Твоего величествия: ублажаем Предтечу Иоанна, Тебе крестившаго, Господи: почитаем и провозвестившия Тя пророки: прославляем апостолы Твоя святыя: торжествуем же  мученики, священники же твоя славим, и покланяемся преподобным Твоим, и вся Твоя праведники пе́стунствуем. Таковаго и талико многаго и неизреченнаго лика Божественнаго в молитву приводим Тебе Всещедрому Богу раби Твои: и сего ради просим нашым согрешением прощения, еже даруй нам всех Твоих ради святых, изряднее же святых Твоих щедрот: яко благословен еси во веки [Молитвы 1‑я, 2‑я, 3‑я по книге Акафисты с каноны].

Молитва 4

Тебе, Господи, Единому Благому и непамятозлобному, исповедаю грехи моя: Тебе припадаю вопия недостойный: согреших, Господи, согреших, и несмь достоин воззрети на высоту небесную от множества неправд моих. Но, Господи мой, Господи, даруй ми слезы умиления, единый блаже и милостивый, яко да ими Тя умолю, очиститися прежде конца от всякаго греха: страшно бо и грозно место имам проити, тела разлучився, и множество мя мрачное и безчеловечное демонов срящет, и никтоже в помощь спутствуяй, или избавляяй. Тем припадаю Твоей благости, не предаждь обидящым мя, ниже да похвалятся о мне врази мои, Благий Господи, ниже да рекут: в руки нашя пришел еси и нам предан еси. Ни, Господи, не забуди щедрот Твоих, и не воздаждь ми по беззаконием моим, и не отврати лица Твоего от мене: но Ты, Господи, накажи мя, обаче милостию и щедротами, враг же мой да не возрадуется о мне но угаси его на мя прещения и все  упраздни его действо. И даждь ми к Тебе путь неукорный, Благий Господи, занеже и согрешив не прибегох ко иному врачу и не прострох рукѝ  моея к богу чуждему. Не отрини убо моления моего, но услыши мя Твоею благостию, и утверди мое сердце страхом Твоим: и да будет благодать Твоя на мне, Господи, яко огнь попаляяй нечистыя во мне помыслы. Ты бо еси, Господи, свет паче всякаго света: радость паче всякия радости: упокоение паче всякаго упокоения: жизнь истинная и спасение пребывающее во веки веков [По молитвослову полному].

Кондак, глас 8

Возбранный Воеводо и Господи, ада Победителю! Яко избавлься от вечныя смерти, похвальная восписую Ти, создание и раб Твой. Но яко имеяй милосердие неизреченное, от всяких мя бед свободи зовуща: Иисусе, Сыне Божий, помилуй мя.

Молитва Господу Богу от лица кающагося человека Святаго Иоанна Златоустаго

Господи, согрешихом на небо и пред Тобою! Приими обращение и покаяние наше, приими наше стенание и слезы, приими покаяние нас грешных, приими рыдание и вопль наш даже до смерти. Приими нас окаянных, живших безстудно: приими нас Человеколюбче, зело прогневавших Тя: приими нас Владыко, проведших всю жизнь в распутстве, во всяком лукавствии и нечистоте: приими нас, Господи Боже, преступивших заповеди Твоя: приими нас, Владыко, недостойных раб Твоих, и не воздай нам по делом рук наших. исповедаем Тебе, Владыко, яко по грехом нашим несмы достойни даже и жизни: исповедаем, Господи, яко несмы достойни даже воззрети на солнце сие, зане несть таков грех, несть ни едино таково злодеяние, егоже не совершилибыхом мы окаяннии. Но приими нас, Господи, якоже блуднаго сына, приими якоже разбойника, приими якоже блудницу и мытаря. Господи, обрати нас! Господи, вразуми нас, и не прогневайся на нас, но буди милостив ко грехом нашим! Ты еси Бог наш, и разве Тебе иного не знаем. Господи, исторгни нас то враг наших и не вниди в суд с рабы Твоими. Господи, Ты еси Бог, и мы людие Твои. Согрешихом, содеяхом беззаконие и неправду, сотворихом зло, погрешихом во всем, не послушахом заповедей Твоих, и того ради далече уклонихомся от Тебе. Но помилуй, Господи, дела рук Твоих: помилуй, Владыко, тыя, иже хитростию змия изгнани быша из рая: помилуй нас и облецы нас в хитон веселия и одежду спасения: помилуй нас, ихже диавол лешил есть помощи Твоея! Милосерде, помилуй тыя, иже оставиша Тя и служаху ему: помилуй заблуждшыя: помилуй не сохранивших заповедей Твоих и последовавших злодеянием демонов: помилуй осквернивших себе грехми: помилуй тыя, иже пребываху под властию диавола: помилуй осквернившихся распутством. Помилуй, Милосерде: помилуй, Блаже: помилуй, Долготерпеливе, зане руки нашя совершиша всякое зло, всякое осквернение, любостяжание и неправду. Осквернихом душу, юже создал еси по образу Твоему, осквернихом тело, осквернихом чувство. Язык наш явися якоже мечь остр, направлен противу ближняго, очи наши исторгают пламень, руки нашя полны крове, ноги нашя скоры на совершение зла, уста наша осквернена злословием, и, кратко рещи, осквернихом и землю и воздух. Воистину неправедная дела наша доидоша даже до небесе, хищения наша превысиша горы, любостяжание превыси облаки, пороцы наши достигоша небесе, греси наши суть непростительни, преступления наша не имут извинения, прегрешения наша суть неисправима, и се земля не может понести наших злодеяний. Темже, Господи, нужду имамы в милосердии Твоем. Ты веси немощь естества нашего: помилуй, Господи, творение рук Твоих. Се взываем к милосердию Твоему: не лиши нас помощи Твоея, низпосли нам недостойным милость Твою, даруй нам грешным заступление Твое, яви нам лице Твое, и спасемся.

Молитва на благословение ваиа в Неделю ваий

Господи, Боже наш, седяй на херувимех, возставивый силу и пославый Единороднаго Твоего Сына, Господа нашего Иисуса Христа, да спасет мiр крестом и погребением и Воскресением Своим: Егоже ныне пришедша во Иерусалим на волную смерть, людие седящии во тьме и сени смертней, приемше знамения победы, ветви древес и ваиа финик, Воскресение предвозвестиша! Сам, Владыко, и нас, по подражанию онем в предпразднственный сей день ваиа и ветки древес в руках носящих, соблюди, и якоже онии народи и дети, осанна Тебе приносящих сохрани: яко да и мы в песнех и пениих духовных сподобимся достигнути животворящаго и тридневнаго воскресения, во Христе Иисусе Господе нашем: с Нимже благословен еси, со Пресвятым и Благим и Животворящим Твоим Духом, ныне и присно и во веки веков.

Тропарь, глас 1

Общее воскресение прежде Твоея страсти уверяя, из мертвых воздвигл еси Лазаря, Христе Боже. Темже и мы, яко отроцы победы знамения носяше, Тебе Победителю смертивопием: осанна в вышних, благословен Грядый во имя Господне.

Молитвы из последования умовения ног

Молитва 1

По велицей ектении возглас:

Яко Ты еси очищение душ наших, и Тебе славу возсылаем, Отцу и Сыну и Святому Духу, ныне и присно и во веки веков.

И по амине молится велегласно предстоятель молитвою сею:

Боже Преблагий, неприступный Божеством, иже во зраце рабиислужителя образ восприемый, и, во изображение спасительнаго смирения, учеников Твоих ноги пречистыма рукама Твоима омывый и лентием отрый! Призри и ныне на нас недостойных раб Твоих, толикаго Твоего снизхождения подражающих преславная: и сподоби плотски́х скверн измытися нам, и душевныя нечистоты, воды сея прикосновением. Даруй нам Пресвятаго Духа невидимое наитие: утверди нас от блюдущаго нашу пяту змия льстиваго, да чисти бывше, послужим благоприятно Тебе, верху змиев и скорпий и всея силы вражия преходяще. Яко подобает Тебе всякая слава, честь и поклонение, ныне и присно и во веки веков.

Мир всем.

Главы вашя Господеви преклоните.

И молится предстоятель тайно:

Господи Боже наш, показавый нам меры смирения в Твоем превысоком снисхождении, и последняго изволением перваго нарек, облагодати нас в служении друг другу: вознеси нас Божественным смирением, соблюди ны скверны, омываемыя присно слезами, очищаемы просвещением чистительныя Твоея благодати: да истиною к Тебе всегда припадающе, обрящем милость и щедроты на страшнем Твоем судищи.

Возглас:

Яко Милостив и Человеколюбец Бог еси, и Тебе славу возсылаем, со Безначальным Твоим Отцем, и Всесвятым и Благим и Животворящим Твоим Духом, ныне и присно и во веки веков.

Молитва 2

По Евангелии глаголет предстоятель во услышание всем молитву сию:

Господи Боже наш, иже по мнозей милости Твоей истощившей себе и зрак раба приемый, иже во время спасительныя и животворящия и вольныя Твоея страсти вечеряти изволивый со святыми Твоими ученики и апостолы: и посем лентием препоясавый Себе, и омывый ноги учеников, образ дав им смиренномудрия и любве, еже друг ко другу, и рекий: якоже сотворих вам, такожде и вы творите друг другу! Сам и ныне, Владыко, посреде недостойных рабов Твоих, иже Твоему образу последующих, пришед омый всякую скверну и нечистоту душ наших, да отмывше прилепившийся нам от согрешений прах и лентием любве друг друга отерше, возможем благоугодити Тебе вся дни живота нашего и обрести благодать пред Тобою. Яко Ты еси благословляяй и освящаяй всяческая, Христе Боже наш, и Тебе славу возсылаем, со Безначальным Твоим Отцем, и Всесвятым и Благим и Животворящим Твоим Духом, ныне и присно и во веки веков.

Молитвы ко Господу Иисусу распятому. Из акафиста Божественным страстем Христовым

Молитва 1

За нас на кресте пригвожденный, Иисусе Христе, Единородный Бога Отца Сыне, милости, любве и щедрот неисчерпаемая Бездно! Вем, яко грехов ради моих, от неизреченнаго человеколюбия, кровь Твою пролияти на кресте изволил еси, юже аз, окаянный и неблагодарный, доселе скверными моими де́лы попирах и ни во чтоже вменях. Ныне убо из глубины беззакония и нечистоты моея умныма очима на распятаго Тя на кресте Искупителя моего воззрев, со смирением и верою во глубине Твоего милосердия себе повергаю, грехов прощения  сквернаго жития моего исправления прося. Милостив буди мне, Владыко и Судие мой, не отрини мя от лица Твоего, но всесильною Твоею рукою Сам мя к Тебе обрати и на путь истиннаго покаяния настави, да отныне положу спасения моего начало. божественными страданьми Твоими укроти моя плотския страсти: излиянною Твоею кровию очисти  моя душевныя скверны: распятием Твоим распни мя мiру и похотем его: крестом Твоим огради мя от невидимых враг, ловящих душу мою. Плотию пригвоздивыйся, пригвозди страху Твоему плоть мою, да уклонився от зла, творю благо пред Тобою. Преклонивый главу Твою на кресте, к земли смирения приклони вознесенную мою гордыню: желчь устнами вкусивый, положи хранение нечистым устом моим: отверстое копием имеяй сердце, сердце чисто во мне созижди: всеми Твоими язвами, всего мя сладце в любовь Твою уязви, да Тебе Господа моего возлюблю всею душею, всем сердцем, всею крепостию и всем помышлением. Яви мне Себе Всеблагаго, избавляющаго душу мою от смерти: яви Себе Всесладкаго, услаждающаго мя в скорбех и напастех Твоею любовию, да егоже первее ненавидех, прогневлях, от себе изгонях и аки ко кресту грехи моими пригвождах, сего ныне возлюблю, радуяся прииму, и сладце крест Его до конца жизни моея понесу. Не даждь отселе, о Всеблагий Искупителю мой, моей воли совершатися, понеже зла есть и непотребна, да не паки впаду в тяжкую работу царствовавшаго во мне греха: но Твоя воля благая, спасти мя хотящая, да совершается во мне всегда, ейже мя вручая, Тебе распятаго Господа моего умным очесем моего сердца представляю и молю из глубины души, да и в разлучении моем от бреннаго моего тела, Тебе Единаго на кресте Твоем узрю, в руце защищения Твоего мя приемлюща и от воздушных духов злобы храняща, вселяюща же со грешники, покаянием Тебе благоугодившими.

Молитва 2

Господи Иисусе Христе, Сыне Бога Живаго, Творче неба и земли, Спасителю мiра! Се аз недостойный и паче всех грешнейший, смиренно колена сердца моего пред славою величества Твоего преклонив, воспеваю Крест и страдания Твоя, и благодарение Тебе Царю всех и Богу приношу, яко благоизволил еси вся труды и всякия беды, напасти и мучения яко человек понести, да всем нам во всяких печалех, нуждах и озлоблениих состраждущий Помощник и Спаситель будеши. Вем, Всесильне Владыко, яко вся сия Тебе убо не быша потребна, но человечаскаго ради спасения, да всех нас иску́пиши от лютыя работы вражия, крест и страдания претерпел еси. Что убо воздам Тебе, Человеколюбче, о всех, яже пострадал еси мене ради грешнаго; Не вем: душа бо и тело и вся благая от Тебе суть, и вся моя Твоя суть, и аз Твой есмь. Точию на безчисленное Твое, Благосерде Господи, милосердие надеяся, пою Твое неизреченное долготерпение, величаю неисповедимое истощание, славлю Твою безмерную милость, поклоняюся пречистым страстем Твоим, и вселюбезно лобызая язвы Твоя, вопию: помилуй мя грешнаго, и сотвори, да не безплоден будет во мне крест Твой Святый, но да с верою страданием Твоим зде причащаяся, сподоблюся видети и славу Царствия Твоего на небеси.

Молитва Господу Иисусу воскресшему. Из акафиста живоносному гробу и воскресению Господню

Слава Тебе, Господи Иисусе Христе, Боже мой, яко паки сподобил еси мя недостойнаго, прешедша поприще святаго поста, поклонитися Божественным страстем Твоим и всерадостный день преславнаго Твоего из гроба Воскресения видети, воньже свободил еси сущия во аде от века связанныя души праведных. Сего убо Божественнаго свобождения, Спасителю мой, и аз желаю, да разрешиши мя, многими грехи связана, и да сотвориши возсияти живоносному свету Воскресения Твоего во мрачней души моей: вижду бо безчисленныя щедроты и неизреченное человеколюбие Твое, яко не точию от небытия в бытие мя привел еси, и образа Твоего подобием украсив, всея дольния твари владыку мя поставил еси, но и посем падша с высоты и врагу поработившася никакоже оставил еси, но, искупив мя безценною кровию Твоею, благодатию Крещения снабдил мя еси, да востеку на первое достояние. Обаче окаянный аз, умом плотским запят быв, обратихся вспять и паки раб греха есмь, доне́леже един по единому погубих вся дары благодати Твоея. И ныне убо, что сотворю, не вем: обаче помянув глаголы пречистых уст Твоих, яко не пришел еси призвати праведники, но грешники в покаяние, паки с верою и смирением прихожду к живоносному гробу Твоему, не миро, ниже ароматы благочестия носяй [наг бо есмь и пуст благих дел], но паче надежды не отторгийся прощение грехом моим от Тебе получити, нечистому же житию моему обновление. Призри убо на мя кающася и служити тебе хотяща, и не отрини от благодати Воскресения Твоего. Живоносную смерть и погребение изволивый, умертви моя лютыя страсти, да яко мертв и погребен мiру явлюся. Преславным возстанием Твоим мертвыя возставивый, воздвигни мою душу, умерщвленную грехми, и совесть мою пробуди, еяже ничтоже в мiре нужнейше есть. Вознесением Твоим путь на небеса роду человеческому обновивый, отторгни мя от суетных и душетленных благ земных, и сотвори мя горняя мудрствовати, яко да не ктому себе живя и угождая, но Тебе Господу и Богу моему служя и работая, сподоблен буду лицем к лицу Тя Искупителя моего видети, за приятие смерти крестныя славою и честию венчанна, и одесную величествия Твоего, со Архангелы и Ангелы и со всеми искупле́нными Тобою предстоя, воздам ти Славу и поклонение, со Отцем и Святым Духом, во веки веков.

Молитва на благословение артоса во святую Неделю Пасхи

Боже Всесильный и Господи Вседержителю, иже рабом Твоим Моисеом, во исходе израилевом от Египта и во освобождении людей Твоих от горькия работы фараоновы, агнца заклати повелел еси, прообразуя на кресте закланнаго волею нас де́ля Агнца, вземлющаго всего мiра грехи, возлюбленнаго Сына Твоего, Господа нашего Иисуса Христа! ты и ныне, смиренно моли Тя, призри на хлеб сей, и благослови и освяти его: ибо и мы раби Твои, в честь и славу и в воспоминание славнаго Воскресения тогожде Сына Твоего Господа нашего Иисуса Христа, имже от вечныя работы вражия и от адовых нерешимых уз разрешение, свободу и преведение получихои, пред Твоим величеством ныне во всесветлый сей, преславный и спасительный день Пасхи, сей приносим: нас же сего приносящих, и того лобзающих, и от него вкушающих, Твоему небесному благословению причастники быти сотвори, и всякую болезнь и недуг от нас, Твоею силою отжени, здравие всем подавая. Ты бо еси источник благословения и цельбам податель, и Тебе славу возсылаем, Безначальному Отцу, со Единородным Твоим Сыном, и Пресвятым и Благим и Животворящим Твоим Духом, ныне и присно и во веки веков.

Абие же иерей кропит артос священною водою, глаголя:

Благословляется и освящается артос сей, окроплением воды сея священныя, во имя Отца, и Сына и Святаго Духа, аминь. [Трижды.]

Молитва на раздробление артоса в субботу Светлыя Седмицы

Господи Иисусе Христе, Боже наш, хлебе ангельский, хлебе жизни вечныя, сошедый с небесе, напитавший нас во всесветлыя сия дни пищею духовною Твоих Боджественных благодеяний, тридневнаго ради и спасительнаго Воскресения! Призри и ныне, смиренно молим Тя, на мольбы и благодарения наши, и якоже благословил еси пять хлебов в пустыни, и ныне благослови хлеб сей, яко да вси, вкушающии от него, телеснаго и душевнаго благословения и здравия сподобятся, благодатию и щедротами Твоего человеколюбия. Ты бо еси освящение  наше, и Тебе славу возсылаем, со Безначальным Твоим Отцем, и Всесвятым и Благим и Животворящим Твоим Духом, ныне и присно и во веки веков.

В Неделю третию по Пасце. Молитвы пред иконою Спасителя Исцелителя расслабленнаго, чтомая в московской космодамианской, на покровке, церкви

Благий Человеколюбче, Премилосердый Господи, недуги наша понесый и ранами Твоими нас исцеливый! Пред Твоим величеством рабски припа́дающе, смиренно молимся: призри, Благосерде, на рабы Твоя, и якоже древле исцелил еси разслабленнаго, тридесять осмь лет в недузе своем лежавшаго, тако и ныне, Целителю Благий, милостию и щедротами Твоими рабы Твоя посети. Ты убо разслабленному древле рекл еси: востани, возьми одр твой и ходи. Темже и мы, грешнии и недостойнии раби Твои, на Божественная Твоя словеса сия надеющеся, пред Твоим же величеством смиренно припадающе, Твое Божественное милосердие и неизреченное человеколюбие умильно просим: отверзи нам двери милости Твоея и прости вся согрешения наша вольная и невольная, имиже Твою благость прогневахом и Твое человеколюбие раздражихом: уврачуй нашу болезнь греховную: недуги нашя душевныя и телесныя во здравие претвори, немощи в силу преложи, печали в радость и скорби во утешение премени: отими же от нас всякое уныние и забвение: ум наш укрепи и цель соблюди, во еже всегда в заповедех Твоих поучатися: вся уды нашя исправи, во еже волю Твою благую и совершенную творити. Ты бо еси Целитель Благий, воздвижение немощным, болящым врачь, недужным исцеление, здравым здравия хранитель, и Тебе славу возсылаем, со Безначальным Твоим Отцем, и Пресвятым и Благим и Животворящим Твоим Духом, ныне и присно и во веки веков.

Тропарь, глас 4

Призри с небесе, Господи Боже наш, услыши молитву раб Твоих, молящихся Тебе, и не отрини нас от лица Твоего, в скорбех и болезнех к Тебе прибегающих и вопиющих: помилуй нас согрешающих Тебе, и избави нас от всякаго озлобления и немощи, яко Ты Един еси душ и телес наших исцеление.

Молитвы чтомыя в навечерии Пятидесятницы

Молитва 1

Пречисте, Нескверне, Безначальне, Невидиме, Непостижиме, Неизследиме, Непременне, Непобедиме, Неисчетне, Незлобиве Господи, един имеяй безсмертие, во свете живый неприступнем, сотворивый небо и землю, и море, и вся созданная на них: прежде еже просити, всем прошения подаваяй! Тебе молимся и Тебе просим, Владыко Человеколюбче, Отца Господа и Бога и Спаса нашего Иисуса Христа, нас ради человеков и нашего ради спасения сшедшаго с небес, и воплотившагося от Духа Святаго и Марии Приснодевы и Преславныя Богородицы: иже первее убо словесы учя, последи же и делы показуя, егда спасительную страсть претерпе, подаде нам подписание смиренным и грешным и недостойным рабом Твоим, мольбы приносити Тебе, в выи и колен преклонениих, о своих гресех и о людских неведениих: Сам, Многомилостиве и Человеколюбче, услыши ны, воньже аще день призовем Тя, изряднее же в день сей пятдесятный, воньже, по Вознесении Господа нашего Иисуса Христа на небеса и седении одесную Тебе Бога и Отца, низпосла Святаго Духа и святыя Своя ученики и апостолы, иже и се́де на едином коегождо их, и исполнишася вси неистощимыя благодати Его, и глаголаша языки иными величия Твоя, и прорекоша. Ныне убо молящихся Тебе услыши нас, и помяни нас смиренных и осужденных, и возврати пленение душ наших, Твое милование имея о нас молящееся. Приими нас припадающих Тебе и вопиющих: согрешихом. К Тебе привержени есмы от утробы, от чрева матере нашея Ты еси Бог наш: но яко исчезоша в суете дние наши, обножихомся Твоея помощи, лешихомся всякаго ответа. Но дерзающе на щедроты Твоя, зовем: грехи юности нашеяи неведения не помяни, и от тайных наших очисти нас, и не отрини нас во время старости, внегда оскудети крепости нашей: не остави нас прежде даже нам в землю не возвратитися: сподоби к Тебе возвратитися, и вонми нам благоприятием и благодатию: возмери беззакония наша щедротами Твоими: сопротив поставив бездну щедрот Твоих множеству согрешений наших. Призри с высоты святыя Твоея, Господи, на предстоящия люди Твоя и чающия еже от тебе богатыя милости: посети нас благостию Твоею, избави нас от насильства диаволя: утверди живот наш святыми Твоими и священными законы: ангела верна хранителя пристави людем Твоим, всех собери в Твое Царствие: даждь прощениеуповающим на Тя, остави им и нам грехи: очисти нас действом святаго Твоего духа: разруши яже на нас козни вражия.

Присовокупляется же и сия молитва:

Благословен еси, Господи Владыко Вседержителю, просветивый день светом солнечным и нощь уяснивый зарями огненными, долготу дневную прейти нам сподобивый и прибли́житися начатком нощи! Услыши моления наша и всех людей Твоих, и всем нам простив вольныя и невольныя грехи, приими вечерняя наша моления, и низпосли множество милости Твоея и щедроты Твоя на достояние Твое: остени нас святыми ангелы Твоими: вооружи нас оружием правды Твоея: огради нас истиною Твоею: собдюди нас силою Твоею: избави нас от всякаго обстояния, всякаго навета сопротиволежащаго: подаждь же нам и настоящий вечер, с приходящею нощию, совершен, свят, мирен, безгрешен, безсоблазнен, безмечтанен, и вся дни живота ншего, молитвами Святыя Богородицы и всех святых, от века Тебе благоугодивших.

По скончании ектении возглас:

Твое бо есть еже миловати и спасати нас, Господи Боже наш, и Тебе славу возсылаем, Отцу и Сыну и Святому Духу, ныне и присно и во веки веков.

Молитва 2

Господи Иисусе Христе Боже наш, мир Твой подавый человеком и Пресвятаго Духа дар, еще в житии и с нами сый, в наследие неотъемлемое верным присно подаваяй: явленнейше же сию благодать Твоим учеником и апостолом днесь низпославый, и сих устне огненными утвердивый языки, имиже весь род человеческий боговедение своим языком в слух уха приимше, светом Духа просветихомся, и прелести якоже тьмы изменихомся, и чувственных и огненных язык раздаянием и преестественным действом еже в Тя веры научихомся, и Тебе благословити со Отцем и Святым Духом во Едином Божестве и силе и власти озарихомся! Ты убо, Отчее сияние, существа и естества Его неизменное и недвижимое начертание, источниче премудрости и благодати, отверзи и мне грешному устне, и научи  мя, како досто́ит и о ихже потреба молитися: Ты бо еси ведый многое грехов моих множество, но Твое благоутробие победит сих безмерное: се бо страхом предстою Ти, в пучину милости Твоея отчаяние души моея поверг. Окорми живот мой, словом всю тварь неизреченною премудрости силою управляяй, тихое обуревлемых пристанище, и скажи ми путь, воньже пойду. Дух премудрости Твоея моим подаждь помышлением, дух разума безумию моему даруяй: духом страха Твоего моя осени дела, и дух правый обнови утробе моей, и духом владычним мыслей моих попозновение утверди: да на всяк день Духом Твоим Благим к полезному наставляемь, сподоблюся творити заповеди Твоя и Твое присно памятствовати славное пришествие и истязательное содеянных нами. И да не презриши мя тленными сопрельщатися мiра сего красными, но будущих восприятию желати укрепи сокровищ. Ты бо рекл еси, Владыко, яко елика аще кто просит о Твоем имени, невозбранно приемлет от Твоего Присносущнаго Бога и Отца. Темже и аз грешный, в пришествии святаго Твоего Духа, Твою молю благость: елика просих, воздаждь ми во спасение. Ей, Господи, всякаго благодеяния богатый Дателю и Подателю Благий, яко Ты еси подаваяй преизобильно ихже просим! Ты еси сострадателен и милостивый, иже безгрешно быв плоти нашея общник и преклоняющым к Тебе колена преклоняяйся любоблагоутробне, очищение же быв грехов наших. Даждь убо, Господи, людем Твоим щедроты Твоя: услыши нас с небесе святаго Твоего: освяти нас силою спасительныя десницыТвоея: покрый нас кровом крылу Твоею: да не презриши дел руку Твоею. Тебе Единому согрешаем, но и Тебе Единому служим: не вемы кланятися богу чуждему, ниже простирати руки нашя, Владыко, к Богу иному. Остави нам согрешения, и приим наша коленопоклонная моления, простри всем нам руку помощи, приими молитву всех яко кадило приятное, восприемлемое пред Твоим преблагим Царством.

Присовокупляется же и сия:

Господи, Господи, избавлей нас от всякия стрелы летящия во дни, избави нас и от всякия вещи во тьме преходящия. Приими жертву вечернюю, рук наших воздеяние: сподоби же нас т нощное поприще без порока прейти, неискушены от злых: и избави нас от всякаго смущения и боязни, яже отдиавола нам прибывающия. Даруй душам нашым умиление и помыслом нашым попечение еже на страшнем и праведнем Твоем суде испытания. Пригвозди страху Твоему плоти нашя, и умертви уды нашя сущыя на земле, да и сонным безмолвием просветимся зрением суде́б Твоих. Отими же от нас всякое мечтание неподобное и похоть вредну: возстави же и нас во время молитвы утвержде́ны в вере и преспевающя в заповедех Твоих.

По скончании ектении возглас:

Благолепием и благостию Единороднаго Сына Твоего, с нимже благословен еси, с Пресвятым и Благим и Животворящим Твоим Духом, ныне и присно и во веки веков.

Молитва 3

Приснотекущий, животный и просветительный Источниче, соприсносущная Отцу содетельная сило, все смотрение за спасение человеческое прекрасне исполнивый, Христе Боже наш, смерти узы неразрешимыя и заклепы адовы расторгнувый, лукавых же духо́в множество поправый: приведый Себе о нас непорочное заколение, и тело давый Пречистое в жертву, всякаго греха неприкосновенное же и непроходное, и страшным сим и неисповедимым священнодействием живот нам вечный даровавый: во ад сшедый, и вереи вечныя сокрушивый, и во тьме седящым восход показавый: начало злобнаго же и глубиннаго змия богомудростным льщением уловивый, и веригами мрака свяхавый в та́ртаре и огнѝ негасимем, и во тьме кромешней неисчетносильною Твоею затвердивый крепостию: великоименитая премудросте Отчая, напаствуемым великий помощник явивыйся и просветивый седящыя во тьме и сени смертней! Ты, славы присносущныя Господи и Отца Вышняго Сыне возлюбленный, присносущный свете от присносущнаго света, солнце правды, услыши нас молящихся Тебе, и упокой души рабов Твоих, прежде усопших отец и братий наших, и прочих сродник по плоти, и всех своих в вере, о нихже и память творим ныне: яко в Тебе всех держава, и в ру́це Твоей содержи́ши вся концы земли. Владыко Вседержителю, Боже Отец и Господи милости, рода смертнаго же и безсмертнаго и всякаго естества человеческаго Содетелю, составляемаго же и паки разрешаемаго, живота же и скончания, еже зде пребывания и еже тамо преложения: лета измеряяй живым и времена уставляяй смерти: низводяй во ад: связуяй в немощи и отпущаяй в силе: настоящая потребне строяй и будущая полезно управляяй: смертным жалом уязвленных воскресения надеждами веселяяй! Сам убо, Владыко всех, Боже Спасителю наш, Надеждо всех концев земли и сущих в мори далече, иже, и в сей последний и великий спасительный день Пятидесятницы праздника, тайну Святыя и единосущныя и соприсносущныя и неразделимыя и несмянныя Троицы показавый нам, и наитие и пришествие Святаго и Животворящаго Твоего Духа в виде огненных язы́ков на святыя Твоя апостолы излиявый, и благовестники тех поставивый благочестивыя нашея веры, и исповедники и проповедники истиннаго богословия показавый: иже и в сей всесовершенный и спасительный праздник очищения убо молитвенная о иже во аде держимых сподобивый приимати, великия же подаваяй нам надежды ослабления содержимым отсодержащих я скверн, и утешению Тобою низпослатися: услыши нас смиренных и Твоих раб молящихся Ти, и упокой души рабов Твоих, прежде усопших, на месте светле, на месте злачне, на месте прохлаждения, отону́дуже отвержѐ всякая болезнь, печаль и воздыхание, и учини духи их в селениих праведных, и мира и олабления сподоби их: яко не мертвии восхвалят Тя, Господи, ниже сущии во аде исповедание дерзнут принести Тебе: но мы живии благословим Тя и молим, и очистительныя молитвы и жертвы приносим Тебе о душа́х их.

Присовокупляется же и сия молитва:

Боже великий и вечный, Святый, человеколюбивый, сподобивый нас в сей час стати пред неприступною Твоею славою на пение и хвалу чудес Твоих! Очисти ны недостойныя рабы Твоя, и подаждь благодать, еже сокрушенным сердцем, невозносительно приносити Тебе трисвятое славословие и благодарение великих Твоих даров, яже сотворил еси к нам и твори́ши всегда в нас. Помяни, Господи, немощь нашу, и да не погуби́ши нас со беззаконии нашими: но сотвори великую милость со смирением нашим, да греховныя тьмы избежавше, во дни правды ходити будем, и одеявшеся оружием всета, ненаветно пребудем от всякия козни лукаваго, и со дерзновением прославим о всех Тебе Единаго истиннаго и человеколюбца Бога. Твое бо яко воистину и великое ?????бресноту таинство, Владыко всех и Творче, временое разрешение Твоих тварей, и еже по сих совокупление, и упокоение еже во веки. Тебе благодать о всех исповедуем, о входех наших яже в мiр сей и исходех, иже надежды нам воскресения и жизни нетленныя Твоим неложным обещанием предобручают, яже приимем в будущем втором пришествии Твоем: Ты бо еси и воскресения нашего начальник, и поживших неумытный и человеколюбивый судия, и мздовоздаяния Владыка и Господь, иже и приобщивыйся нам приискренне плоти и крове, снисхождения ради крайняго: и нашя страсти неотметныя, внегда волею во искус поставити, приим за милосердие щедрот, и в нем же пострадал еси Сам искусився, искушаемым нам быв самообеща́нный помощник: темже и совозвел еси нас в Твое безстрастие. Приими убо, Владыко, мольбы и моления наша, и упокой вся отцы коегождо, и матере и чада, и братию и сестры, единородныя и купнородныя, и вся прежде почившыя душы в надежде воскресения жизни вечныя: учини духи их и имена в книзе животней, в недрех Авраама и Исаака и Иакова, в стране живых, во Царствии Небеснем, в раи сладости, светлыми ангелы Твоими вводя вся во святыя Твоя обители, совоздвизаяй и телеса наша в день, воньже определил еси по святым Твоим и неложным обетованием. Несть убо, Господи, рабом Твоим смерть, исходящым нам от тела и к Тебе Богу нашему приходящым, но преставление от печальнейших на полезнейшая и сладостнейшая, и на упокоение и радость. Аще же и что согрешихом к Тебе, милостив буди нам же и тем: зане ни един есть чист пред Тобою от скверн, ниже аще един день живота его есть, разве Ты точию един, на земли явивыйся безгрешный Господь наш Иисус Христос, имже вси уповаем милость получити и оставление грехов. Сего ради нам же и онем, яко благ и человеколюбец Бог, ослаби, остави, прости грехопадения наша, вольная и невольная, яже в ведении и в неведении, предъявленная и забываемая: яже в дея́нии, яже в помышлении, яже в словеси, яже во всех наших житиях и движениях. И отшедшым убо свободу и ослабу даруй, нас же, сущих зде, благослови, конец благий и мирный даруя нам же и всем людем Твоим, и милости и человеколюбия утробу отверзаяй нам на страшнем и ужаснем Твоем пришествии, и Царствия Твоего достойных нас сотвори.

Присовокупляется и сия молитва:

Боже Великий и Вышний, едине имеяй безсмертие, во свете живый неприступнем, всю тварь мудростию создавый, разделивый посреде света и посреде тьмы, и солнце убо положивый во область дне, луну же и звезды во область нощи: сподобивый нас грешных и в настоящий день предварити лиуе Твое во исповедании и вечернюю Тебе службу принести! Сам, Человеколюбче Господи, исправи молитву нашу яко кадило пред Тобою, и приими ю в воню благоухания: подаждь же нам настоящий вечер и приходящую нощь мирну: облецы ны оружием света, избави нас от страха нощнаго и от всякия вещи во тьме преходящия: и даруй нам сон, иже во упокоение немощи нашей даровал еси, от всякаго диавольскаго мечтания изменен. Ей, Владыко, всех благих подателю, яко да и на ложах наших умиляющеся, воспомя́нем и в нощи пресвятое имя Твое, и поучением Твоих заповедей озаряеми, в радости душевней возстанем к славословию Твоея благости, молитвы и моления Твоему благоутробию приносяще о своих гресех и о всех людех Твоих, ихже, молитвами Пресвятыя Богородцы, в милости посети.

По скончании ектении возглас:

Ты бо еси упокоение душ и телес наших, и тебе славу возсылаем, Отцу и Сыну и Святому Духу, ныне и присно и во веки веков.

Молитва, глаголемая от предстоятеля втай

Господи Боже наш, приклонивый небеса и сошедый на спасение рода человеческаго! Призри на рабы Твоя и на достояние Твое. Тебе бо страшному и человеколюбцу судии, Твои раби своя приклониша главы и своя покориша выи, не от человек ожидающе помощи, но Твоея ожидающе милости и Твоего чающе спасения: яже сохрани на всякое время, и в настоящем часе же и вечере, и в преходящую нощь, от всякаго сопротиволежащаго действа диавольскаго, помышлений суетных и воспоминаний лукавых.

Возглашение:

Буди держава Царствия Твоего благословенна и препрославлена, Отца и Сына и Святаго Духа, ныне и присно и во веки веков.

Отпуст

Иже от Отчих и Божественных недр истощивый Себе, и с небесе на землю сошедый, и наше все восприемый естество и обоживый ѐ, но сих же на небеса паки возшедый, и одесную седый Бога и Отца, Божественнаго же и  святаго и Единосущнаго и единосильнаго и единославнаго и соприснощущнаго Духа низпославый на святыя своя ученики и апостолы, и сим просветивый убо их, теми же всю вселенную, Христос истинный Бог наш, молитвами Пречистыя и Пренепорочныя Святыя Матере, святых славных, прехвальных богопроповедников, и духоносных апостолов, и всех святых, помилует и спасет нас, яко благ и человеколюбец.

Молитвы из Акафиста Пресвятей и Животворящей Троице

Молитвы Богу Отцу

Всемогущий Владыко, Премудрый и Всеблагий Господи, Светоначальнаго Сына и Пребезначальный Родителю и Животворящаго Духа Твоего вечный и присносущный самоизводителю, егоже величество неисчетно, и слава несказанна, и милость безмерна! Благодарим Тя, яко нас от небытия воззвал еси, и многоценным образом Твоим поче́т, даровал еси нам, недостойным, не точию познавати и любити Тя, но и отца нашего Тя нарицати. Благодарим Тя, Боже милосердия и щедрот, яко преступивших заповедь Твою не оставил еси нас посреде греха и сени смертныя, но благоволил еси единароднаго Твоего сына, имже и ве́цы сотворены суть, на землю нашего ради спасения послати, да вочеловечением Его и пречистою страстию и Воскресением от мучительства диаволя и тли смертныя свободимся. Благодарим Тя, Боже любве и сил, яко, по вознесении на небо Спасителя нашего, умоле́н быв крестом Его, низпослав еси и Духа Твоего Пресвятаго на избранныя Его ученики и апостолы, да словом учения Христова весь мiр просветится. Сам убо, человеколюбивый Владыко, услыши ныне смиренную молитву нас недостойных чад Твоих, и якоже создал еси нас по Твоей благости, и якоже искупил еси ны по велицей милости Твоей, тако и спасеши нас по безприкладному милосердию Твоему: зане от дел наших нижѐ сте́ни спасения имамы, но чаяние праведныя мести и отлучения от пресветлаго лица Твоего объемлет душы нашя. Аще бо и о единем празднем слове в день судный воздадят человецы: како о неисчетных наших беззакониих, имиже согрешихом пред Тобою, дати ответ возможем? Сего ради весьма от дел наших отчаявшеся оправдания, ко Твоей единей, всяк ум и всяко слово превосходящей, прибегаем благости, юже аки твердое основание надежды имуще, молим Тя: согрешихом, очисти, Господи! беззаконновахом, прости, Владыко! прогневахом Тя, примирися, долготерпеливе! И сохрани прочее ум, совесть и сердце наше от скверн мiрских, избави и спаси ны от многомятежныя бури страстей и грехопадений, вольных и невольных, ведомых и неведомых, и в тихое нас управи пристанище веры, любве же и жизни вечныя упования. Помяни нас в милости Твоей, Господи, даруй нам вся, яже ко спасению, прощения, паче чистое и безгрешное житие устрой нам: сподоби нас всем сердцем тебе любити и творити во всем волю Твою святую, молитвами Пречистыя Владычицы нашея Богородицы и всех святых Твоих. Яко Благ и человеколюбец Бог еси, и Тебе славу и благодарение и поклонение возсылаем, со Единородным Твоим Сыном, и со Пресвятым и Благим и Животворящим Твоим Духом, ныне и присно и во веки веков.

Молитвы Богу Сыну

Единородне Сыне и Слове Божий, изволивый нашего ради спасения воплотитися и смерть претерпети, ныне же, и со пречистою плотию Твоею,      на небесех на престоле со Отцем седяй и весь мiр в правде управляяй! Не забуди нас, долу сущих и многими напастьми и скорбьмѝ искушаемых, иже аще и весьма нечисти и недостойни есмы, но в Тебе Спасителя и Господа нашего веруем, и иного ходатая и надежды спасения не вемы. Подаждь, о Искупителю Всеблагий, память пречистых и страшных страстей Твоих, како даже до ада пречистою душею Твоею низшел еси, да нас от власти и мучительства адова свободиши. Сия убо вся в сердцах своих слагающе, да блюдемся от страстей и грехов наших, правду же и добродетель, яже всякаго дара Тебе в нас приятнейши есть, да возлюбим. Веси бо, о Всеблагий, коль вели́ка есть немощь духа и плоти нашея, враг же наш силен и злохитр, иже яко лев рыка́я ходит, иский кого поглотити: не остави убо нас Твоею всесильною помощию, и буди с нами всегда, храня и покрывая, наставляя и укрепляя, радуя и веселя дух наш. Мы же, на лоно любве и милосердия Твоего повергающеся, весь живот наш, временный и вечный, Тебе предаем, нашему Владыце, Искупителю и Господу, моляще из глубины души, да, имиже веси судьбами, сотвориши нам прейти безбедно мрачную жития сего земнаго юдоль и достигнути богокраснаго чертога Твоего, егоже обещал еси уготовати всем верующим во имя Твое и последующым божественным стопам Твоим.

Молитвы Богу Духу Святому

Царю Небесный, Утешителю Всеблагий, Душе Истинны, от Отца предвечно исходяй и в Сыне всегда почиваяй, независтный дарований божественных Источниче, разделяя их коемуждо, якоже хощеши, имже и мы недостойнии освятихомся, назнаменани в день крещения нашего бывше! Призри на молитву раб Твоих, прииди к нам, вселися в ны, и очисти душы нашя, да будем уготовани в жилище Пресвятыя Троицы. Ей, о Всеблагий! Не возгнушайся нашея нечистоты и ран греховных, но исцели я̀ всеврачующим помазанием Твоим. Просвети наш ум, да разумеем суету мiра и яже в мiре: совесть же нашу оживи, да неумолчно возвещает нам, яже подобает творити и ихже отметатися: сердце наше исправи и обнови, да не источает прочее помышлений злых и желаний неподобных: и пламень страстей наших росоносным дыханием Твоим угаси, да не помрачается в нас блаженный образ Божий. Дух праздности, уныния, любоначалия и празднословия отжени от нас, подаждь же нам дух любве и терпения, дух кротости и смиренномудрия, дух чистоты и правды, да, исправивше разслабленная сердца наша, неленостно по путизаповедей святых потщимся, и тако, всякаго греха уклоняющеся и всяку правду творяще, сподобимся кончину мирну и непостыдну получити и во Иерусалим небесный внити, и тамо поклонятися Тебе, купно со Отцем и Сыном, Троице Единосущней и нераздельней, во веки веков.

Молитва Пресвятей Троице

Пресвятаяй Троице, Единосущная Державо, всех благих вина! Что воздадим Тебе за вся, яже воздала еси нам грешным и недостойным, прежде неже в мiр сей родихомся, за вся, яже воздае́ши коемуждо от нас по вся дни и яже угото́вала еси всем нам в веце грядущем? Подобаше убо, за толикия благодеяния и щедроты, не словесы точию, но паче делы Тя благодарити, храняще и исполняюще заповеди Твоя: мы же, страстем нашим и злым обычаем внемше, в безчисленныя от юности низвергохомся грехи и беззакония. Сего ради, яко нечистым и оскверненным, не точию пред трисветлое лице Твое безстудно явитися, но нижѐ имени Твоего пресвятаго изрещи довлеяше нам, аще бы не Ты Сама во отраду нашу возвестити благоизволила, яко чистыя и праведныя любящи, и грешники кающыяся милуеши и с радостию приемлеши. Призри убо, о Пребожественная Троице, с высоты святыя славы Твоея на нас многогрешных, и благое произволение вместо благих дел приими, и подаждь нам дух истиннаго покаяния, да, всяк грехвозненавидевше, в чистоте и правде до конца дней наших поживем, творяще пресвятую волю Твою и славяще чистыми помыслы и благими деяньми пресвятое и великолепое имя Твое во веки веков.

Молитва Пресвятей Троице из полунощницы воскресныя

Всемогущая и Животворящая Святая Троице, и светоначальная, яже мiрную всякую и премiрную тварь за едину благость от не сущих приведый, и промышляя, и содержащи: иже, по прочих Твоих неизреченных о земнем роде благодеяниих, и покаяние нам ради плотскаго неможения до смерти даровавый! Не остави нас окаянных в лукавых наших деяниих умрети, нижѐ злоначальнику и завистцу и губителю посмешство быти.  Зриши бо, Благосерде, елик убо онаго на нас навет и вражда, елико же и наше страстование слабость и небрежение. Но неоскудныя Твоя благости соделай на нас, молим на всякий день и час прогневающии Тя̀, честных и животворных заповедей преступлением. И вся убо всего прешедшаго живота нашего и до нынешняго часа̀ согрешенная нами в деяниих, илѝ глаголаниих, илѝ в помышлениих, остави и пости. Сподоби же нас прочее скончати житие в покаянии и умилении и соблюдении святых Твоих повелений. Аще убо сладостию прельстившеся, многообра́зне согрешихом, илѝ мерзкими похотьмѝ неполезными и вредными обольстившеся препроводихом: аще гневом и яростию подвигшеся безсловесною, кого̀ брата нашего оскорбихом: аще языком неизбежных и стропотных и крепких сетей объяхомся: аще коим чувств наших или всеми, волею или неволею, ве́дуще или не ве́дуще, от восхищения или поучения безумно поползохомся: аще же лукавыми помыслы и суетными совесть осквернихом: аще ли коим другим образом прегрешихом, предприятия и обычая томи́ми злаго: прости нам и остави вся, Всещедре, Преблаже и Многомилостиве, и даруй нам прочее бодрость и силу, во еже творити вою Твою благу и благоугодну и совершенну: да нощнаго и мрачнаго зла световидным покаянием преме́ньшеся, и яко во дни благообразно ходяще, и очище́ни объяви́мся человеколюбию Твоему недостойнии, воспевающе Тя̀ и величающе во веки.

Иулия 10. Молитвы в день положения ризы Господни, чтомыя в ризположенской церкви града Москвы

Молитва 1

Благодарим Тя, Владыко Человеколюбче, Царя веков и Подателя благих, разруши́вшаго вражды̀ средостениеи мир подавшаго роду человеческому. Даруй и нам, рабом Твоим, мир  ризою Твоею честною: вкорени во всех страх Твой, и друг ко другу любовь утверди: угаси всякую распрю, рвения же и соблазны. Яко Ты еси мир наш, и Тебе славу возсылаем, со Отцем и Святым Духом, ныне и присно и во веки веков.

Молитва 2

О дивный Создателю наш, человеколюбивый Владыко, многомилостивый Господи! Ты нас ради человек и нашего ради спасения страшныя страсти, оплевания, биения и заушения, и крест и смерть претерпети изволил еси. Вся сия с верою нане воспоминаю, и со благоговением почитаю и многоцелебную ризу Твою, юже по плоти носити изволил еси, и сердцем сокрушенным и смиренным сице молю Тя: не возгнушайся грешнаго моления моего, не отрини слез моих и воздыхания, услыши мене, якоже хананею, не презри мене, якоже блудницу, яви и на мне грешнем великую милость человеколюбия Твоего, ризою Твоею честною защити, помилуй и подкрепи мя, да вся насылаемыя от Тебе беды́ и напасти со благодарением, в надежде вечных благ, претерплю: изряднее же печаль мою на радость претвори, да не во отчаяние впаду и погибну аз окаянный. Ты бо еси источник милости и непостыдная спасения нашего надежда, Христе Боже наш, и Тебе славу возсылаем, со Безначальным Отцем, и с Пресвятым и Благим и Животворящим Твоим Духом, ныне и присно и во веки веков.

Тропарь, глас 4

Днесь притецем, вернии, к божественней и цельбоносней ризе Спасителя нашего Бога, благоизволившаго сию плотию носити и на кресте святую Свою кровь излияти, еюже искупи нас от работы вражия. Тем благодаряще вопием Ему: спаси православнаго императора нашего Николая Александровича: и архиереи, и град, и вся люди честною Твоею ризою защити, и спаси душы нашя, яко человеколюбец.

Августа 1, в праздник Присхождения Честных Древ Животворящаго Креста Господня

Молитва 1, чтомая в москворецкой часовне града Москвы

Владыко Господи Святый, в вышних живый и всевидящим Твоим оком призираяй на всю тварь! Тебе преклоняем выю души и тела, Тебе молимся Святе святых: простри руку Твою невидимую от святаго жилища Твоего, и благослови вся ны, и прости нам всякое согрешение вольное и невольное, словом и ли делом содеянное. Даруй нам, Господи, умиление и слезы сокрушения во очищение многих грехов наших, даруй велию Твою милость мiру Твоему и нам недостойным рабом Твоим. Яко благословено и прославлено есть имя Твое, ныне и присно и во веки веков.

Молитва 2, Всемилостивому Господу Иисусу

Благий Человеколюбче, Премилосердый Господи, недуги наша понесый и ранами Твоими нас исцеливый! Пред Твоим величеством рабски припа́дающе, смиренно молимся: призри, Благосерде, на рабы Твоя, и якоже древле исцелил еси разслабленнаго, тридесять осмь лет в недузе своем лежавшаго, тако и ныне, Целителю Благий, милостию и щедротами Твоими рабы Твоя посети. Ты убо разслабленному древле рекл еси: востани, возьми одр твой и ходи. Темже и мы, грешнии и недостойнии раби Твои, на Божественная Твоя словеса сия надеющеся, пред Твоим же величеством смиренно припадающе, Твое Божественное милосердие и неизреченное человеколюбие умильно просим: отверзи нам двери милости Твоея и прости вся согрешения наша вольная и невольная, имиже Твою благость прогневахом и Твое человеколюбие раздражихом: уврачуй нашу болезнь греховную: недуги нашя душевныя и телесныя во здравие претвори, немощи в силу преложи, печали в радость и скорби во утешение премени: отими же от нас всякое уныние и забвение: ум наш укрепи и цель соблюди, во еже всегда в заповедех Твоих поучатися: вся уды нашя исправи, во еже волю Твою благую и совершенную творити. Ты бо еси Целитель Благий, воздвижение немощным, болящым врачь, недужным исцеление, здравым здравия хранитель, и Тебе славу возсылаем, со Безначальным Твоим Отцем, и Пресвятым и Благим и Животворящим Твоим Духом, ныне и присно и во веки веков.

Тропарь Всемилостивому Спасу, глас 8

С вышних призирая, убогия приемля, посети ны озлобленныя грехи, Владыко Всемилостиве, молитвами Богородицы даруй душам нашим велию милость.

Августа 6. Молитва во причещении гроздия

Господу помолимся.

Господи, помилуй.

Благослови, Господи, плод сей ло́зный новый, иже благорастворением воздушным, и каплями дожде́вными, и тишиною временною, в сей зре́лейший приити час благоволивый: да будет в нас от того рождения ло́знаго причащающихся в веселие, и приносити тебе дар во очищение грехов, священным и святым телом Христа Твоего, с ним же благословен еси, со Пресвятым и Благим и Животворящим Твоим Духом, ныне и присно и во веки веков.

Ведомо буди, яко, идеже не обретаются винограды, приносятся в сей день ко храму яблока, и глаголется сия молитва о приносящих начатки овощей:

Владыко Господи Боже наш, Твоя от Твоих приносити Тебе по предлжению комуждо повелевый и вечных Твоих благ воздаяние сим даруй, иже вдовы̀ по силе приношение благоугодно приемый, приими и ныне принесенная от раба Твоего [имярек], и в вечных Твоих сокровищих возложитися сим сподоби: даруй ему и мiрских Твоих благ обильное восприятие, со всеми полезными ему. Яко благословися Твое имя, и прославися Твое Царство, Отца и Сына Святаго Духа, ныне и присно и во веки веков.

Августа 16. Молитвы пред нерукотворным образом Спасителя

Молитва 1

О Преблагий Господи Иисусе Христе, Боже наш! Ты древле человеческаго естества Твоего лице пресвятое водою омыв и убрусом отер, чудесне оное на том же убрусе изобразити и Едесскому князю Авгарю во исцеление недуга его послати благоволил еси. Се и мы ныне, грешнии раби Твои, душевными и телесными недуги нашими одержимии, лица Твоего, Господи, ищем, и со Давидом во смирении душ наших зовем: не отврати лица Твоего от нас, и уклонися гневом от рабов Твоих: помощник нам буди, не отрини нас и не остави нас. О Всемилостивый Господи, Спасителю наш! Вообрази Сам Себе в душах наших, да во святыни и правде жительствующе, будем сынове Твои и наследницы Царствия Твоего, и тако тебе, Премилостиваго Бога нашего, купно со Безначальным Отцем Твоим и Пресвятым Духом, славити не престанем во веки веков.

 Молитва 2, чтомая в часовне Спасителя, во граде Святаго Петра

Господи щедре и милостиве, долготерпеливе и многомилостиве! Услыши молитву нашу и вонми гласу моления нашего: сотвори с нами знамение во благо: настави нас на путь Твой, еже ходити во истине Твоей: возвесели сердца наша во еже боятися имене Твоего святаго. Зане велий еси Ты и творяй чудеса, Ты еси Бог Един, и несть подобен Тебе в бозех, Господи, силен в милости и благ в крепости, во еже помогати и утешати и спасатився уповающыя на имя святое Твое. Яко Бог милости и щедрот и человеколюбия еси, и Тебе славу возсылаем, со Безначальным Твоим Отцем, и с Пресвятым и Благим и Животворящим Твоим Духом, ныне и присно и во веки веков.

Молитва 3, чтомая в Спасо-Всеградской церкви града Велкаго Устюга

Боже чудный в советах, великий в милости, в делах неисповедимый, неизреченный в мудрости! Кое благодарение, кую ли честь мы, бренное создание Твое, принесем Тебе, яко Единородный Сын Твой, сый сияние славы и образ ипостаси Твоея, нашего ради спасения, по Твоему отеческому благоволению, от небеснаго Своего жилища к нам сниде? Христе Спасителю, радосте мiра и сладосте Ангелов! Кую славу, кую ли хвалу воздадим Тебе грешнии раби Твои, Твоею божественною кровию из че́люстей ада и смерти избавленнии? Исповедуем сердцем, проповедуем усты, яко смерть Твоя, Спасе, есть жизнь наша, Воскресение же Твое есть духовное наше возрождение. И тако невидимою Твоею благодатию всегда с нами пребываеши, и сие сопребывание запечатлети восхотев, Пречистаго и Божественнаго лица Твоего зрак на убрусе чудесне изобразил еси, егоже, яко многочудесный и многоцелебный, благоговейно лобызающе, поклоняемся благосердию Твоему, всещедрый и всесладкий Иисусе и Господи наш, и колена сердца нашего преклоньше, молим всеусердною в Тя верою: даруй единомыслие Церкви Твоей Святей, сохрани под кровом милосердия Твоего помазанника Твоего, благочестивейшаго, самодержавнейшаго, великаго государя нашего, импратора Николая Александровича всея России и весь царствующий дом: сотвори мир и благоденствие во днех их: благослови их, купно же и нас всех, благословением Твоим благостынным. Да будет, о Всеблагий Творче, благодатию Твоею защищаемь и покрываемь от всякаго злаго обстояния град сей, егоже ради нынешнее наше от сердец приносим моление. Сотвори, да вси мы, святым заповедем Твоим поучающеся, сподобимся достойни быти вечнаго Твоего покоя, егоже уготовал еси любящым Тя во веки веков.

Молитва 4, чтомая в той же церкви

Господи Иисусе Христе, Спасителю наш! Пред чудотворною и нерукотворною иконою Твоею припадающе, всеусердно молим Тя: помилуй и спаси нас недостойных раб Твоих от глада, труса, потопа, огня, меча, мора, нашествия иноплеменник, междоусобныя брани, внезапныя смерти, человеческаго оклеветания: и от всякаго зла защити и помилуй нас, Господи. Яко Ты еси Бог наш, на Тя надеемся и Тобою хвалимся, святый Владыко, да не погуби́ши нас во веки веков.

Тропарь, глас 2

Пречистому образу Твоему покланяемся, Благий, просяще прощения прегрешений наших, Христе Боже: волею бо благоволил еси плотию взыти на крест, да избавиши, яже создал еси, от работы врагу. Темже благодарственно вопием Ти: радости исполнил еси вся, Спасе наш, пришедый спасти мiр.

Молитва из Последования малаго освящения воды

Господи Боже наш, великий в совете и дивный в делах, всея твари Содетелю, храняй завет Твой и милость Твою любящим Тя и соблюдающим повеления Твоя, всех в нуждах умиленныя приемляй сле́зы: сего бо ради пришел еси в рабии зраце, не привидении нас устрашая, но здравие телу истинное подаваяй и глаголяй: се здрав был еси, ктому не согрешай: но и от брения здравы очи соделал еси, и умытися повелев, свету вселитися сотворил еси словом: сопротивных страстей волны смущаяй, и жития сего сланое море изсушаяй, и тяжелоносныя сластей укрощаяй волны! Сам, Человеколюбче Царю, давый нам снегосветлою оде́ятися одеждою, от воды же и духа, и причастием же воды сея и окроплением Твое благословение нам низпосли, скверну страстей омывающее. Ей, молимся, посети нашу, Блаже, немощь, и исцели нашя недуги душевныя же и телесныя милостию Твоею: молитвами Всепречистыя, Преблагосовенныя Владычицы нашея Богородицы и Приснодевы Марии: силою Честнаго и Животворящаго Креста: предстательствы честных небесных сил безплотных: честнаго, славнаго пророка, Предтечи и Крестителя Иоанна: святых славных и всехвальных апостол: преподобных и богоносных отец наших: иже во святых отец наших, великих иерархов и вселенских учителей, Василия Великаго, Григория Богослова и Иоанна Златоустаго: иже во святых отец наших, Афанасия и Кирилла, патриархов Александрийских: иже во святых отца нашего Спиридона, Тримифунтскаго чудотворца: иже во святых отца нашего Николая, архиепископа Мирликийскаго, чудотворца: иже во святых отец наших, Мефодия и Кирилла, учитиелей слове́нских: святаго равноапостольнаго великаго князя Владимира: иже во святых отец наших всея России чудотворцев, Петра, Алексия, Ионы и Филиппа: святаго и славнаго великомученика Георгия Победоносца: святаго и славнаго великомученика Димитрия Мироточиваго: святых и добропобедных мучеников: святых и праведных богоотец Иоакима и Анны: святых и возглашение ты бо еси

славных чудотворцев, безсеребренников Космы и Дамиана, Кира и Иоанна, Пантелеимона и Ермолая, Самона и Диомида, Мокия и Аникиты, Фалалея и Трифона: и святаго [имярек], егоже и память совершаем, и всех святых Твоих.

И сохрани, Господи, раба Твоего, благочестивейшаго, самодержавнейшаго, великаго государя нашего, императора Николая Александровича всея России. [Трижды.]

И супругу его, благочестивейшую государыню императрицу Александру Феодоровну.

И матерь его, благочестивейшую государыню императрицу Марию Феодоровну.

Наследника его, благовернаго государя цесаревича и великаго князя Алексия Николаевича, и весь царствующий дом.

Спаси, Господи, и помилуй святейший правительствующий синод, даруй им душевное и телесное здравие, и работному Тебе сему христианскому жительству во всем милостив буди. Помяни, Господи, всякое еспископство православных, право правящих слово Твоея истины, и весь священнический и монашеский чин, и спасение их. Помяни, Господи, ненавидящих и любящих нас, служащих братий наших, предстоящих и благословною виною отшедших, и заповедавших нам недостойным молитися о них. Помяни, Господи, в пленении и скорбех сущих братий наших, и помилуй их по велицей милости Твоей, всякия ну́жды избавляяй. Яко, Ты еси источник исцелений, Христе Боже наш, и Тебе славу возсылаем, со безначальным Твоим Отцем, и с Пресвятым и Благим и Животворящим Твоим Духом, ныне и присно и во веки веков.

Мир всем.

Главы вашя Господеви приклоните.

Священник же глаголет тайно:

Приклони, Господи, ухо Твое:

Возглашение:
Ты бо еси освящение наше, и Тебе славу и благодарение и поклонение возсылаем, со Безначальным Твоим Отцем и Пресвятым и Благим и Животворящим Твоим Духом, ныне и присно и вовеки веков.

Молитвы на освящение воды

Молитва 1, службы пред иконою Пресвятыя Богородицы Боголюбскою

Боже великоименитый, творяй чудеса, имже несть числа! Прииди ныне к молящым Тя рабом Твоим, Владыко, и посли Духа Твоего Святаго, и освяти воду сию: [сия глаголя, благословляет воду десницею трижды:] и даждь пиющим от нея и приемлющым и кропящымся ею рабом Твоим пременение страстем, оставление грехов, болезнем исцеление, и освобождение от всякаго зла, утверждение же и освящение домом, и очищение от всякия скверны, и навета диавольскаго отгнание. Яко благословися и прославися пречестное и великолепое имя Твое, Отца и Сына и Святаго Духа, ныне и присно и во веки веков.

Молитва 2, из древния рукописныя службы

Боже великоименитый, творяй чудеса, имже несть числа! Прииди к молящымся рабом Твоим, Владыко: посли Духа Твоего Святаго, и освяти воду сию, и даждь ей благодать избавления и благословение Иорданово: сотвори ю источник нетления, освящения дар, грехом разрешение, недугов исцеление, бесо́м погибель, противным силам неприступну, ангельския крепости исполнену: яко да вси почерпающии ю и приемлющии от нея имеют на очищение души и тела, на исцеление вре́дом, во изменение страстем, во оставление грехов, во отгнение всякаго зла, на окропление и освящение домов и на всяку пользу подобну. И аще что в доме́х или на месте правоверно живущих сия вода окропит, да отимет всяку нечистоту, да избавит от всякаго вреда, нижѐ тамо да водворяется дух губительный, нижѐ возду́х вредя́й, да отбежит всякое мечтание и навет кры́ющагося врага, и аще не́что есть, еже или здравию живущих зави́дит, или покою, окроплением сея воды да отразится. Яко благословися и прославися пречестное и великолепое имя Твое, Отца и Сына и Святаго Духа, ныне и присно и во веки веков.

Молитва 3, чтомая в церкви села Сызранскаго нижняго хутора, Симбирския епархии

Господи Боже наш, Великий в совете и дивный в делех! Ты еси Бог освятивый Иорданския струи наитием Пресвятаго Твоего Духа. Тебе убо в час сей смиренно молим мы недостойнии раби Твои: прииди, Владыко, и освяти воду сию Духом Твоим Святым, и яви ю силою Твоею свыше быти пиющым от нея, мажущымся и кропящымся ею рабом Твоим в пременение страстей, во оставление грехов, во исцеление болезней и во отгнение всякаго зла, во освящение же и благословение домов и очищение всякаго места от всякия скверны. Яко Ты еси благословляяй и освящаяй всяческая, Христе Боже наш, и Тебе славу возсылаем, со Безначальным Твоим Отцем, и с Пресвятым и Благим и Животворящим Твоим Духом, ныне и присно и во веки веков.

Тропарь, глас 6

С небесе посли благодать, Жизнодавче, и воду сию освяти, и всем сквернам яви ю быти очищение.

Молитва из благодарственнаго молебствия о получении прошения

Господи Иисусе Христе Боже наш, Боже всякаго милосердия и щедрот, егоже милость безмерна и человеколюбия неизследимая пучина! Ко Твоему величеству припадающе со страхом и трепетом, яко раби недостойнии, благодарение Твоему благосердию о Твоих благодеяниих, на рабех Твоих [или на рабе Твоем] бывших, ныне смиренно приносяще, яко Господа, Владыку и Благодетеля славим, хвалим, поем и величаем, и припадающе паки благодарим, Твое безмерное и неизреченное милосердие смиренно моляще: да якоже ныне моления рабов Твоих прияти и милостивно исполнити сподобил еси, и во пре́дняя в Твоей и искренняго любви и во всех добродетелей преспевающих, Твоя благодеяния всех верных Твоих получити, Церковь Твою святую и град сей [или весь сию, или обитель сию] от всякаго злаго обстояния избавляя и мир и безмятежие тем даруя, Тебе со безначальным Твоим Отцем, и Пресвятым и Благим и Единосущным Твоим Духом, во едином существе славимому Богу, всегда  благодарение приносити и преблагая глаголати и воспети сподобиши.

И абие велегласнейше возглашает:

Слава Тебе Богу, Благодетелю нашему, во веки веков.

Молитва из молебствия на дни восшествия на престол и венчания на царство государя императора

Боже великий и дивный, неисповедимою благостию и богатым промыслом управляяй всяческая, егоже премудрыми, но неиспытанными судьбами разнообразныя пределы жизнь и сожительство человеческое приемлет! Благодарне исповедуем, яко не по беззаконием нашым сотворил еси нам, ниже по грехом нашым воздал еси нам. Согрешихом, Господи, и беззаконновахом, и крайняго Твоего отвращения достойни сотворихомся. Ты же, о неисчетная благостыня, милостивый и долготерпеливый, и каяйся о злобах человеческих Владыко, наказав нас кратким бывшия печали посещением, се изобильно исполнил еси велелия и радости сердца̀ наша, оправдав над нами царствовати возлюбленнаго Тобою раба Твоего, благочестивейшаго, самодержавнейшаго, великаго государя нашего, императора Николая Александровича всея России. Умудри убо и настави его непоползновенно проходити великое сие к Тебе служение: даруй ему разум и премудрость, во еже судити людем Твоим в правду, и Твое сие достояние в тишине и без печали сохранити. Покажи его врагом победительна, злодеем стра́шна, добрым милостива и благонаде́жна. Согрей сердце его к призрению нищим, ко приятию странным, к заступлению напаствуемым. Подчиненная же ему правительства управляя на путь истины и правды, и от лицеприятия и мздоприимства отражая, и вся от Тебе державе его врученныя люди в нелицемерней содержа верности: сотвори его отца о чадех веселящеся, и ла удивиши милости Твоя на нас. Умножи дни жития его в нерушимем здравии и непременяемем благополучии: даруй же во дни его и всем нам мир, безмолвие и благопоспешество, благорастворение воздуха, земли плодоносия, и вся ко временней и вечней жизни потребная. О Премилосердый Господи наш, Боже щедрот и Отче великия утехи! Не отврати лица Твоего от нас и не посрами нас от чаяния нашего, уповающе на Тя молимся Тебе, и молящеся на щедроты Твоя уповаем. Ты бо един веси, еже требуем, и прежде прошения подаеши, и дарования утверждаеши, и всякое даяние благо, и всяк дар совершен свыше есть, сходяй от Тебе Отца светов: Тебе слава и держава, со Единородным Твоим Сыном, и Всесвятым и Благим и Животворящим Твоим Духом, ныне и присно и во веки веков.

Молитва за царя на Литургии

Господи Боже наш, Великий и Милостивый! Во умилении сердец наших, смиренно молимся Тебе: сохрани под кровом Твоея благости от всякаго злаго обстояния благочестивейшаго государя нашего, императора Николая Александровича: огради его на всез путех его святыми Твоими Ангелы, да ничтоже успеет враг на него, и сын беззакония не приложит озлобити его: исполни его долготою дней и крепостию сил, да совершит вся во славу Твою и во благо людей своих. Мы же, всеблагому Твоему промышлению о нем радующеся, благословим и прославим всесвятое имя Твое, Отца и Сына и Святаго Духа, ныне и присно и во веки веков.

Молитва о ниспровержении крамолы̀, чтомая в конце Литургии во дни воскресныя и праздничныя

Боже сил, Царю царствующих и Господи господствующих! В Твоей руцѐ сердце царе́во и власть всея земли. Ты посаждаеши царей на престолы их и глаголеши о них: мною ца́рие царствуют, не прикасайтеся убо помазанным Моим. Призри милостивным оком Твоим на люте страждущую страну нашу, в нейже за беззакония наша нестроения и раздоры, междоусобия и противления царю нашему и властем, от него поставленным, зело умножишася. Еще же и мор, и глад, и болезни всякия постигоша ны, и несть мира, несть ослабы, несть успокоения в домех наших, ниже во граде́х и ве́сех наших. О Всеведущий и Премилосердый! Ты веси беду нашу, зриши озлобления, слышиши рыдания убогих, стенания сирых и вдовиц и гласы неповинных младенцев, во общену́ждии страждущих. Ты пощадил еси Ниневи́ю, град великий, беззакония исполненный, ради покаяния его и ради младенцев, иже десницы своея, ни шу́йцы своея не познаша: пощади нас грешных, умилосердися над отечеством нашим, пощади ради младенец наших, сирых и вдовиц, пред Тобою, о Милосердый, сле́зы своя проливающих! Видиши, Господи, како людие, имже несть разума, не точию глаголют в сердцах своих: несть Бог, но и в слух людей, паче же юных сущих, развращенная глаголют, и ме́ньшую братию от пути заповедей Твоих на пути стропотныя и погибельныя превратити тщатся. Но Тебе вся возможна суть, о Всемогущий Владыко! Якоже убо единым словом Твоим не точию слепыя, глухия и немыя исцеляеши, но и мертвыя воскрешаеши: тако возглаголи и ныне всесильным словом Твоим в сердцах сих сеятелей нечестия: просвети разум их, гордынею омраченный, пробудѝ совесть их суетными мудрова́ньми, завистью и страстьми пагубными усыпле́нную, обрати волю их ко исполнению животворящих Твоих заповедей, да и тии познают, коль сладка суть словеса Твоя сердцу человеческому, и коль благо иго Твое и бремя Твое легко есть. Да прославится убо имя Твое, Господи Спасителю наш, и в сих погибающих братиях наших, и да посрамится лукавый супостат наш диавол, сеяй плевелы на ниве Твоей, яже есть Церковь Твоя святая! О Господи, Боже Милосердый, Боже Премудрый, Боже Всемогущий! Паки и паки припадаем Тебе и слезно в покаянии и умилении сердца вопием: согреши́хом, беззако́новахом, непра́вдовахом пред Тобою, и воистинну праведно по делом нашым наказу́еми есмы. Помяни убо веру и смирение отец наших, услыши те́плая моления святых угодников Твоих, в земли нашей просиявших: помилуй землю русскую, утоли вся крамолы̀, раздоры и нестроения, умирѝ сердца, страстьмѝ обуреваемая, сохрани возлюбленнаго Тобою раба Твоего, царя нашего, огради престол его правдою и миром, возглаголи в сердце его благая и мирная о Церкви Твоей и о людей Твоих, посли ему советники мудростию исполненныя и волю его нелицеприятно творящия, соблюди суды его немздоимны, вдохни мужество в сердца нашея державы хранителей: а имже судил за веру, царя и отечество во дни скорби сея душу свою положити, тем прости вся согрешения их и венцы мученическими венчай во Царствии Твоем. Всех же нас озари светом закона Твоего Евангельскаго, возгрей сердца наша теплотою благодати Твоея, утверди волю нашу в воли Твоей, да якоже древле, тако и ныне на земли нашей, и в нас прославится всесвятое имя Твое, Отца и Сына и Святаго Духа, ныне и присно и во веки веков.

Молитвы из Последования освящения храма, иереем совершаемаго

Молитва 1

Боже и Отче Господа нашего Иисуса Христа, сый благословен во веки, иже завесою плоти Его обновил еси нам в первородных Церковь на небесех вписанных вход, идеже жительство празднующих и глас радования! Сам, Человеколюбче Владыко, призри на ны грешныя и недостойныя рабы Твоя, обновление празднующия честнаго храма [имярек], во образ святейшия Твоя Церкве, си́речь са́маго телесе нашего, еже убои храм Твой [и у́ды Христа Твоего] всехвальным апостолом Павлом именовати сподобил еси: и утверди его до скончания века непоколебима и пославлена в Тебе: и сподоби нас в нем хвалы и славословия незазорна приносити славе твоей, и Единородному Твоему Сыну, Господу нашему Иисусу Христу, и Святому Твоему Духу, в разуме и всяком чувстве, поклоняющымся Тебе во страсе Твоем, Божественных щедрот достойным показатися: и благоприятным Твоей благости быти мольбам сим, о нас и всех людех Твоих неизреченному Твоему благоутробию приносимым: молитвами Пречистыя Владычицы нашея Богородицы и Приснодевы Марии и всех святых.

Молитва 2

Господи Боже наш, иже тварь единым словом создавый и во еже быти приведый, неизреченными же образы различно сию украсивый, иже надносимый над ню Твой Дух собравый и солнечный сей свет на ню излиявый во обновления ея: иже угоднику Твоему Моисею вдохнувый хвалу некую изрядну приложити добрейшему Твоему созданию, и рещи видети Тебе свет яко добрый, и днем нарещи сей: его же убо и мы видяще, и светлейшее сие солнце, обновлябщее на всяк день тварь, Тя истиннаго дне славим Солнце, и свет Твой невечерний: иже Сыном Твоим нам заповедавый обновитися нашему естеству Святым Твоим Духом, яко и по дару сему праведным возсияти яко солнцу! Тебе молимся и Тебе просим, Отца Слова, Господа и Бога нашего: милосивным оком призри на ны грешныя и  недостойныя рабы Твоя, пребывающия в сем дому̀ небоподобнем, вселенныя похвале, жертвеннице истиннем неизреченныя Твоея славы, и низпосли Пресвятаго Твоего Духа на ны и на наследие Твое. И по божественному Давиду, обнови в сердцах наших Дух правый и Духом Владычним утверди нас: и благочестивейшему, самодержавнейшему, великому государю нашему, императору Николаю Александровичу всея России, победительная и победы на видимыя и невидимыя враги даруй: нам же единомыслие и мир. Сотворшим же здание сие и храма освящение, по любви к Тебе Богу тщательно, оставление согрешений подаждь: даруй им яже ко спасению прошения: возвигни я̀ к деланию заповедей Твоих: даруй им обновление дара Святаго Твоего Духа: да неосужденно покло́нятся Тебе Единому Истинному Богу, и Егоже послал еси, Иисусу Христу, молитвами Богородицы, [и егоже есть храм], и всех святых Твоих.

Тропарь, глас 3

Иже на камени веры создавый Церковь Твою, Блаже, в той исправи моления наша, и приими люди в вере вопиющыя Тебе: спаси ны, Боже наш, спаси ны.

Тропарь, глас 4

Якоже бывшия тверди благолепие, и нижнюю споказал еси красоту святаго селения славы Твоея, Господи: утверди сие во век века, и приими наша в нем непрестанно приносимая Тебе моления Богородицею, всех Животе и Воскресение.

Молитвы из Последования погребения священников

Молитва 1

Владыко Господи Боже наш, едине имеяй безсмертие, во свете живый неприступнем, убиваяй и оживотворяяй, низводяй во ад и возводяй! Ты премудростию создал еси человека, и паки в землю того возвращаеши, душевный долг истязуяй: Тебе молим, приими душу раба Твоего, и упокой его в недрех Авраама и Исаака и Иакова: и даждь ему венец правды Твоея, часть спасаемых, в славу избранных Твоих: да о нихже трудися в мiре сем имене Твоего ради, приимет богатное воздаяние во обителех святых Твоих, благодатию и щедротами и человеколюбием Единороднаго Сына Твоего, Господа нашего Иисуса Христа.

Молитва 2

Благодарим Тя, Господи Боде наш, якоТвое точию есть еже жити безсмертне, и слава непостижима, и человеколюбие неизреченно, и Царство непреемно, и лицемерия несть у Тебе: всем бо человеком общий жития счинил еси предел, житию исполньшуся. Темже Тя просим, Господи: раба Твоего и сослужителя нашего бывшаго имярек, в надежде воскресения жизни вечныя усопшаго, в недрех Авраама и Исаака и Иакова упокой: якоже на земли в Церкви служителя того поставил еси, тако и в небеснем Твоем жертвеннице покажи, Господи: понеже в чеовецех духовных достоинством сего украсил еси, и во ангельскую славу неосужденна того приими: Сам на земли жизнь прославил еси, Сам же и исход жития его во входе святых Твоих праведных вчини: дух его со всеми от века Тебе благоугодившими счислѝ. Яко Ты еси воскресение и живот и покой усопшаго раба Твоего имярек, Христе Боже наш, и Тебе славу возсылаем, со Безначальным Твоим Отцем, и Пресвятым и Благим и Животворящим Твоим Духом, ныне и присно и во веки веков.

Молитва 3

Господи сил, скорбящих радосте и плачущих утешение, и всех в малодушии сущих заступление сый! Плачем усопшаго содержимыя Твоим благоутробием утешив, всякую болезнь, слежащую в сердцах их, исцели, и раба Твоего имярек, в надежде воскресения жизни вечныя усопшаго, в недрех Авраамлих упокой. Яко Ты еси воскресение и живот и упокоение раба Твоего имярек, Христе Боже наш, и Тебе славу возсылаем, со Безначальным Твоим Отцем, и Пресвятым и Благим и Животворящим Твоим Духом, ныне и присно и во веки веков.

Молитва из службы общая Господу Иисусу Христу

На всяк день и час, в сокрушеннем и смиреннем сердце моем припа́дая, исповедаюся Тебе, Вседержителю, Господи Иисусе Христе Боже наш, пришедый в мiр взыскать заблуждшыя и спасти погибщыя, от нихже первый есмь аз: заблудих бо от пути праваго, ведущаго в жизнь, у уклонихся в дебрь любосластия, у углебох в тинебеззаконий моих, тернием дел моих избодохся: видя же мя враг боляща грехми, еще лютейшими вре́ды хощет поразити окаянную мою душу. Но Тебе Единаго Избавителя молю, Тебе Всемилостиваго Человеколюца на помощь призываю: не гнушайся мною, благоутробне Господи, и не отрини мя от Твоего лица, аще и вся злая пред Тобою сотворих: к Тебе бо прибегаю и вся моя исповедаю содеянныя грехи. Приступих вся заповеди Твоя, по́хотем безсловесным повинувся: работая плоти душу оскверних. На Твоя же пребогатыя уповая щедроты, приношу Ти грешный сие моление моя: послушая мене, Господи, обещавыйся полушати верно призывающих Тя: посли ми Ангела Твоего, да запретит всем духом злым борющымся со мною, да постыдятся и посра́мятся ищущии душу мою, и да потребит от моего сердца всякое подвизание, от неприязненнаго похртения возстающее, да будет всегда со мною храняй мя, и на вся дела добрая наставляяй, и на вск день недостойныя молитвы моя приносяй Тебе Богу и Творцу. Ты убо, Пресвятый Царю, от всея твари покланяемый, праведныя любяй, никогдаже отступающыя от Тебе, и грешныя милуяй, обращающыяся в покаянии к Тебе призывающему всех ко спасению, направи ноги моя к заповедем Твоим, пригвозди плоть мою страху Твоему, сердце очисти правоверием, уста исполни благодати, язык укроти смиренно глаголати, душу освяти Духом Святым, мысль исправи не прильпати земным, ум возвыси крило́ма благоразумия, и всего мя устрой недостойнаго, да явлюся пред Тобою достоин. И яко сподобил мя еси мимошедщыя дни преити, тако и грядущыя даруй ми, Человеколюбче, бех преткновения, мирно и благоугодно преходити: да в жизни сей поминая и величая имя Твое пресвятое, и тем просвещаемь, без всякаго омрачения пребуду даже до дне и часа исхода моего: и егда разлучитися душа моя от телесе, даждь ми, Создателю мой Преблагий, обрести радость пред величеством славы Твоея в жизни вечней, молитвами рождшия Тя Пречистыя Владычицы нашея Богородицы и Приснодевы Марии, и всех святых, от века Тебе благоугодивших: яко благословен и препрославлен еси во веки веков.

[Из книги Акафисты с каноны.]

Молитва из службы святым апостолом

Владыко Господи! Твой есть день и Твоя есть нощь, Тебе вся тварь работает, и всякое дыхание славит Тя: аз же окаянный, все житие мое скончав блудно, страхом одержимь есмь, яко помянух дни первыя, и доныне, в няже вся безместная сотворих злая: и того ради не имам к Тебе дерзновения, яко беззакония моя велика, и безмерни греси мои, врази же всегда стужают ми. Но, Господи мой, Господи, отверзый устне снемому, и моя уста отверзи, да голаголю в молитве угодная Тебе: се бо душа моя яко земля безводная оста, и не может приносити от себе плода: но даждь ми от семене Святаго Твоего Духа, и напой мя росою благодати Твоея, да принесу Тебе плод покаяния. Господи Иисусе Христе, хотяй всем человеком спастися, услыши молитву мою, моливами святых апостол Твоих, яко тии молятся за ны, и аз теми у Тебе прошу прощения, яко тех молитвы присно послу́шаеши: молением их спаси мя грешнаго, исцели болезни сердца моего, уврачуй струпы души моея, разжзи утробы моя  пламенем страха Твоего, да пояст терние грехов моих, и душу мою любовию прохлади: к Тебе бо желаю истинному свету и подателю света, у Тебе единаго прошу милости, спаси мя: насыти алчущую и напой жаждущую душу мою от потока безчисленнаго милосердия Твоего: покрый мя благодатию Твоего человеколюбия от всякаго зла, да Тобою хранимь, избавлюся от многих сетей лукаваго, по вся дни на мя пропинаемых, и да не похвалятся врази мои о мне рабе Твоем, уповающем на Тя: спаси мя по милости Твоей, да воздам обеты моя, до последняго издыхания каяйся  о своих согрешениях, и прославлю пресвятое имя Твое, со Отцем, и Святым Духом, ныне и присно и во веки веков.

[Из книги Акафисты с каноны.]

Молитва ко Господу Иисусу Христу, чтомая в часовне Спасителя близ Спасских врат во граде Москве

Господи святый, в вышних живый и на смиренныя призираяй и всевидящим оком Твоим призираяй на всю тварь! Тебе преклоняем колена душ и телес наших и молимся Тебе: простри десницу Твою невидимую от святаго жилища Твоего, благослови люди Твоя Тебе молящыяся и от Тебе великия и богатыя милости ожидающыя, и яко благ и человеколюбец, деоа рук наших исправи, даруя нам мiрная и премiрная благая Твоя. Яко Твое есть еже миловати и спасати нас, и Тебе славу возсылаем, со Безначальным Твоим Отцем, и Животворящим Твоим Духом, ныне и присно и во веки веков.

Рисунок икона Богородицы – не получилось скопировать

Молитвы ко Пресвятей Владычице нашея Богородице и Приснодеве Марии

Молитвы Пресвятей Богородице общыя

Молитва 1, из Часослова

О Пресвятая Госпоже Владычице Богородице! Вы́шши еси всех ангел и архангел, и всея твари честнейши: Помощница еси обидимых, ненадеющихся надеяние, убогих Заступница, печальных утешение, алчущих Кормительница, нагих одеяние, больных исцеление, грешных спасение, христиан всех поможение и заступление. О Всемилостивая Госпоже, Дево Богородице Владычице! Милостию Твоею спаси и помилуй благочестивейшаго, самодержавнейшаго, великаго государя нашего, императора Николая Александровича всея России: супругу его, благочестивейшую государыню императрицу Александру Феодоровну: матерь его благочестивейшую государыню императрицу Марию Феодоровну: наследника его, благовернаго государя цесаревича и великаго князя Алексия Николаевича, и весь царствующий дом. Спаси, Госпоже, и помилуй раб Твоих, святейший правительствующий синод, и преосвященныя митрополиты, архиепископы и епископы, и весь священнический и иноческий чин, и благоверных правительствующий синклит, и военачальники, градоначальники и христолюбивое воинство, и доброхоты, и вся православныя христианы ризою Твоею честною защити: и умоли, Госпоже, из Тебе без семене воплотившагося Христа Бога нашего, да препояшет нас силою Своею свыше на невидимыя и видимыя враги нашя. О Всемилостивая Госпоже Владычице Богородице! Воздвигни нас из глубины греховныя, и избави нас от глада, губительства, от труса и потопа, от огня и меча, от нахождения иноплеменных и междоусобныя брани, и от внезапныя смерти, и от нападения вражия, и от тлетворных ветр, и от смертоносныя язвы, и от всякаго зла. Подаждь, Госпоже, мир и здравие рабом Твоим, всем православным христианом, и просвети им ум и очи сердечныя, еже ко спасению: и сподоби ны, грешныя рабы Твоя, Царствия Сына Твоего, Христа Бога нашего: яко держава Его благослове́на и препросла́влена, со Безначальным Его Отцем, и с Пресвятым и Благим и Животворящим Его Духом, ныне и присно и во веки веков.

Молитва 2, из Часослова

Нескверная, неблазная, нетленнвя, чистая Дево, Богоневесто Владычице, яже Бога Слова человеком преславным Твоим Рождеством соединившая, и отринувшееся естество рода нашего небесным совокупльшая, яже ненадежных едина Надеждо и боримых Помоще, готовое заступление к Тебе притекающих, и всех христиан Прибежище! Не гнушайся мене грешнаго, сквернаго, скверными помыслы и словесы и деяньми всего себе непотребна сотворша, и разумом лености сластей жития раба бывша. Но яко человеколюбиваго Бога Мати, человеколюбне умилосердися о мне грешнем и блуднем, и приими мое еже от скверных устен приносимое тебе моление: и Твоего Сына и нашего Владыку и Господа, матернее Твое дерзновение употребляющи, моли, да отверзет и мне человеколюбныя утробы Своея благости, и презрев моя безчисленная прегрешения, обратив мя к покаянию, и Своих заповедей делателя искусна явит мя. И предстани мне присно, яко милостивая и милосердая и благолюбивая, в настоящем убо житии теплая Предстательница и Помощница, сопротивных нашествия отгоняющи, и ко спасению наставляющи мя, и во время исхода моего окаянную мою душу соблюдающи, и темныя зраки лукавых бесов далече от нея отгоняющи, в страшный же день суда вечныя мя избавляющи муки, и неизреченныя славы Твоего Сына и Бога нашего наследника мя показующи: юже и да улучу, Владычице моя, Пресвятая Богородице, Твоим ходатайством и заступлением, благодатию и человеколюбием Единороднаго Сына Твоего, Господа и Бога нашего Иисуса Христа, Емуже подобает всякая слава, честь и поклонение, со Безначальным Его Отцем, и Пресвятым и Благим и Животворящим Его Духом, ныне и присно и во веки веков.

Молитва 3, из Канонника

Приими Всеблагомощная, Пречистая Госпоже, Владычице Богородице, сия честныя да́ры, Тебе единей прикладныя, от нас недостойных рабов Твоих, от всех родов избранная, всех тварей небесных и земных вышшая явльшаяся. Понеже бо Тебе ради бысть Господь сил с нами, и Тобою Сына Божия познахом, и сподобихомся Святаго Тела Его и Пречистыя Крове Его. Темже блаженна еси в родех родов, Богоблаженная, херувимов светлейши и серафимов честнейши сущая. И ныне, всепетая Пресвятая Богородице, не престай молящися о нас недостойных рабех Твоих, еже избавитися нам от всякаго совета лукаваго и от всякаго обстояния, и сохранитися нам неврежденным от всякаго ядовитаго прилога диавольскаго. Но даже до конца молитвами Твоими неосужденных нас соблюди: яко Твоим заступлением и помощию спасаеми, славу, хвалу, благодарение и поклонение за вся в Троице Единому Богу и всех Создателю возсылаем, ныне и присно и во веки веков.

Молитва 4, из Канонника

Пресвятая Владычица моя Богородице! Святыми Твоими и всесильными мольбыми отженѝ от мене, смиреннаго и окаяннаго раба Твоего, уныние, забвение, неразумие, нерадение, и вся скверная, лукавая и ху́льная помышления от окаяннаго моего сердца и от помраченнаго ума моего, и погасѝ пламень страстей моих, яко нищь есмь и окаянен: и избави мя от многих и лютых воспоминаний и предприятий, и от всех действ злых свободи мя: яко благословена еси от всех родов, и славиться Пречестное имя Твое во веки веков.

Молитва 5, из книги Правило готовящымся к служению Литургии святыя

Царице моя Преблагая, Надеждо моя Богородице, прибежище сирых и странных Предстательнице, скорбящих Радосте, обидимых Покровительнице! Зри́ши мою беду, зри́ши мою скорбь: помозѝ ми яко не́мощну, направи мя яко стра́нна. Обиду мою ве́си,  разрешѝ ту, якоже во́лиши: яко не и́мам иныя помощи разве Тебе, ни ины́я Предстательницы, ни Благи́я Уте́шительницы, токмо Тебе, о Богомати, яко да сохрани́ши мя и покры́еши во веки веков.

Молитва 6, Петра инока Студийскаго, из тояже книги

К Тебе, Пречистей Божией Матери, аз окаянный припадая молюся: веси, Царице, яко непрестанно согрешаю и прогневляю Сына Твоего и Бога моего. и аще многажды каюся, ложь пред Богом обретаюся: каюся трепещя, да не како поразит мя Господь, и по мале паки таяжде творю. Ведущи сия, Владычице моя, Госпоже Богородице, молю, да помилуеши, да укрепиши мя, и благая творити да пода́си ми. Ты веси, о Владычице моя Богородице, яко имам в совершенней ненависти злая моя дела и всею мыслию люблю закон Бога моего. Но не вем, Госпоже Пречистая, откуда яже ненавижду, тая творю, а благая преступаю. Не попускай убо, Пречистая, воли моей совершатися, неугодна бо есть, но да будет во мне воля Сына Твоего и Бога моего, да мя спсет, и вразумит, и подаст ми благодать святаго духа, да бых аз отселе престал сквернодействуя и прочее пожил бых в повелениих Сына Твоего, Господа нащего Иисуса Христа, емуже подобает всякая слава, честь и поклонение, со Безначальным Его Отцем, и Пресвятым и Благим и Животворящим Его Духом, ныне и присно и во веки веков.

Молитва 7, из книги Акафисты с каноны

Нескверная, неблазная, нетленнвя, Пречистая Богородице, Пренепорочная Владычице, Небесная Царице, Мати Царя вышних сил, Творца небесе и земли, едина радости Ходатаице всему мiру, рождшая Господа нашего Иисуса Христа, земным всем Спасителя! Вопию Ти припадая: приими молебное сие пение благодарственное от недостойнаго раба Твоего и от скверных устен моих: не презри мене, Всегосподова́нная Царице. Ибо никтоже притека́яй к Тебе посра́млен бысть: или кто призываяй Тя не услышан от Тебе изыде? Яко вся стихии, небо и земля, воздух и море повинуются Тебе, и вси проти́внии дуси страхом обдержи́ми трепещут, боящеся имене святаго Твоего, ведуще Тя Матерь Божию. Кто паки надежду возложивый на Тя поги́бе? Точию отметающиися поклонятися образу Твоему написанному, егоже вся силы небесныя чтут: вся же колена земная, христианский род и всяк возраст верных, славословяще поклоняемся, Пречистая, благоговейно почитающе. Не и́мамы бо ина́го Бога, разве Сына Твоего, со Отцем присно и Духом Святым, во Единем Божестве, от всея твари славимаго и покланяемаго, и Тебе по Господе Бозе Госпожу Богородицу исповедуем, Истиннаго Бога нашего Матерь, и любезно вси почита́ем, Госпоже. Милостива убо нам Сына Твоего сотворѝ, паче же покажи на мне обычное Твое милосердие, можеши бо, елика хощеши: умоли о мне, яко удалихся от Него за безчисленная и скверная беззакония моя, и толико прогневах благосердие Его, и огорчих человеколюбную Его благость и многое милосердие и милость, яко несмь достоин от Него помилован бы́ти, аще не Ты умилостивиши Его о мне, Госпоже Царице и Богомати, яко вся Тебе от Него возможна суть. Сего ради к Тебе прибегаю, те́плей Помощнице и ско́рей Заступнице: не имам бо иныя разве Тебе к Нему Ходатаицы. Ей, Царице, моя Владычице, Пречистая Госпоже Богородице, несть ми ина́го высочайшаго на землѝ и на небесѝ, якоже Ты по Господе Бозе моем Иисусе Христе: и на Тя всю мою надежду имам, Пречистая Дево. Темже на Твой пресвятый образ взирая, яко истинную самую Тя зрю Богородицу: верою сердечною и любовию от души припадая, покланяюся Тебе с Превечным на руку̀ Твоею держимым Младенцем, Господем нашим Иисус Христом, благолепно почитая, и молебныя пения и молитвы принося Ти, ужасаюся, и трепещу за недостоинство мое, и вопию Ти: помилуй мя, Мати Божия, и покажи на мне убозем древния милости Твоя. Якоже иногда древле всесильным Твоим воеводством спасла еси царствующий град Твой от скифскаго воеводы зверообразнаго, лукаваго вепря, предстателя бесом, онаго прегордаго кагана: и разсвирепеющим морем тьмочисленная воинства потопила еси, вопиющая и нападающая на град Твой: и паки, с небесе одождением горящих камык, тьмы кораблей в мори вреющем разварила еси: и ныне едина Богомати, едина Ты таяжде сущи, яви на мне человеколюбное Твое заступление. Победи невидимыя полкѝ сатанины, душевный мой град распленившыя, и царствующую душу мою в нем стрелою беззекония уязвившыя, и всего мя мечмѝ любодействия изсекшыя, и греховным [увы̀!] копием прободшыя: ибо еле жи́ва оставиша, и в ро́ве греховнем затвориша мя нечувствия, и окаменение сердечное наложиша ми, яко едва ощущаюся, не моги́й от порабощения тех свободитися. Но к Тебе Матери Господа моего, рыданием слез зову: предстани ми в помощь скоро, да не до конца погибну: исхити мя из руки тех, и извлецы мя из греховнаго ро́ва: возстави паки душевный мой град, и ума Владыку в нем воцари, и над всеми чувствы укрепи, неприступна и страшна врагом покажи: да вси уве́дят, яко Тобою содержимь есмь. Спасающи спаси, Владычице Дево, душу мою, якоже Твой град иногда, на Тя уповающий, спасла еси, на славу и заступление верным, на посрамление же нечестивым, и во веки на безконечное их мучение, на величие же и похвалу от ро́да в ро́ды правоверному христианскому роду. Темже Твою помощь проповедую велегласно, и онаго Твоего великаго заступления страшное воеводство воспоминая, Тебе взбранной Воеводе победительная восписую раб Твой, Богородице, и молебное акафистово приношу благодарение: приими ѐ, и принеси Твоему Сыну и Богу, и о мне Царице, с небесными во́и и с лики святых всех, ему предложи. В день же судный не забу́ди мене, и недостойнаго моего моления, и веры моея, яже к Тебе: и все упование мое возложенное на Тя воспомяни. Уте́ши оскорбле́ннаго менѐ, и телесное облегчѝ озлобление, душевныя же болезни и страсти телесныя прежде всех потреби Твоим невидимым предстательством и ходатайством: да путь маловременнаго сего жития̀ до́бре и непреткновенно возмогу̀ прейтѝ, и вечная оная благая получу, и славословлю Твое твердое заступление: яко благословена еси, с рождшимся от Тебе Сыном и Богом ныне и в безконечныя веки.

Молитва 8, ко Господу нашему Иисусу Христу, из тояже книги

О Великий Царю, Вседержителю, милостивый Господи, Иисусе Христе Боже мой! Се на умоление к Тебе аз многогрешный предлагаю Матерь Твою всенепорочную, Пречистую Госпожу, Деву Богородицу, и Владычицу всемилостивую, во всем мiре Молитвенницу за род христианский, Тебе нам рождшую плотию Христа Бога нашего, неизреченныя ради милости Твоея, иже на нас. Тоя убо молитвами, Господи Иисусе Христе, Боже наш, покажи на мне убо́зем величия, благодать и милость Твою: оставление грехов даруй ми, и сподо́би мя быти наследника Царствия Твоего, со всеми святыми, в безконечныя веки веков.

Молитва 9, из тояже книги

Пренепорочная Госпоже, небесе и земли Царице, Пречистая Дево Богородице! Смиренно припа́дая молюся Тебе: помози ми, едина многомощная Владычице, единому грешному, приими недостойное мое моление, и принеси единородному Твоему Сыну, Богу моему, яко да милостив будет стра́стней и ско́рбней души моей: Сам бо за множество беззаконий моих не смею простретися и просити прощения, но Тебе предлагаю Ходатаицу и теплую Молитвенницу яко матернее к рождшемуся из Тебе Богу имаши дерзновение, и ничтоже Тебе невозможно, аще точию восхощеши. Не призри моих слез, не возгнушайся воздыхания моего, не отрини сердечныя моея болезни, оживи умерщвленнаго мя страстьми. Свет невечерний возсиявшая нам, душу мою, омраченную злодеяньми, просвети: Врача рождшая, уврачуй души моея неисцельныя язвы: волнующагося житейскою бурею, на стезю мя покаяния направи. Приими, Госпоже всемилостивая, молебную сию службу мою, и человеколюбивому Богу принеси. О прекрасная Палато Владычня, сотвори мя дом Божественнаго Духа: светоносная Сене небесная, духовную благодать во мне грешнем направи. Ру́це мои недостойныя воздеваю, и сердце и устнѐ скверныя ко хвалению Тебе, Всенепорочная, исправляю, да душетленных мя пакостей избавиши. Всякия нечистыя помыслы от сердца моего отженѝ, язык мой полезная глаголати исправи, очесе́м моим подаждь слезы, на омытие скверны греховныя, нозе мои устрой непреткновенно к деланию заповедей Божественных ходити. Руце мои соделай к вышнему на воздеяние благоприятное, слух мой отверзи ко усердному слышаниюзаповедей Божественнаго Евангелия, яко да и творити я̀ возмогу, Тобою, всесильная Царице, укрепляемь: и подаждь ми время покаяния и от внезапныя смерти свободи мя. На кончине же предста́ни ми, всемилостивая Мати, в разлучении души от страстнаго моего тела, от воздушных мытарей и князей темных изимающи мя, и рукописание многих грехов моих раздирающи, одесну́ю же блаженнаго стояния на Страшнем Суде сподоби мя. Ты свет омраченнаго ума моего, Ты утешение души моей, Ты упование спасения моего, Ты едина непостыдная Предстательница к Богу: Егоже милостива мне сотвори, Владычице, и присносущных благ наследника яви мя в будущей жизни, идеже есть всех веселящихся жилище: яко да и тамо Тя, премилостивая Молитвеннице, сподоблюся велича́ти, и сла́вити великолепое имя Сына Твоего, Христа Спасителя и Бога нашего, со Безначальным Его Отцем, и Всесвятым и Благим и Животворящим Духом, во веки веков.

Молитва 10

О Пресвятая Дево, Мати Господа вышних сил, небесе и земли Царице, гра́да и страны̀ нашея всемощная Заступнице! Приими хвалебное пение сие от нас недостойных раб Твоих, и вознеси молитвы нашя ко престолу Бога Сына Твоего, да милостив будет неправдам нашым и проба́вит благодать Свою чтущим всечестное имя Твое и с верою и любовию покланя́ющымся пречистому [или чудотворному] образу Твоему. Несмы бо достойни от Него помиловани быти, аще не Ты уми́лостивиши Его о нас, Владычице, яко вся Тебе от Него возможна суть. Сего ради к Тебе прибегаем, яко к несомне́нней и ско́рей Заступнице нашей: услыши нас молящихся Тебе, удиви над нами великия и богатыя милости Твоя, яви нам небесную помощь Твою и заступление, и испросѝ у Бога Сына Твоего пастырем нашым ревность и бдение о душах, градоправи́телем мудрость и силу, судия́м правду и нелицеприятие, наставником разум и смиренномудрие, супругам любовь и согласие, ча́дом послушание, обидимым терпение, обидящым страх Божий, скорбящым благодушие, радующымся воздержание: нам же всем низпосли дух разума и благочестия, дух милосердия и кротости, дух чистоты и правды. Ей, Госпоже Пресвятая! Умилосердися на немощны́я люди Твоя: разсеянныя собери, заблу́ждшыя на путь правый настави, неду́гующыя уврачуй, старость поддержи, юныя уцелому́дри, младенцы воспитай, и при́зри на всех нас призрением милостиваго Твоего заступления: воздвигни нас из глубины греховныя и просвети сердечныя очи наши ко зрению спасения. Милостива нам буди зде и на Страшнем Суде Сына Твоего: преста́вльшыяся же в вере и покаянии от жития сего отцы и братию нашу в вечней жизни со ангелы и со всеми святыми жити сотворѝ. Ты бо еси, Госпоже, слава небесных и упование земных, Ты по Бозе наша Надежда и Заступница всех притекающих к Тебе с верою. Тебе убо молимся, и Тебе, яко всемогущей Помощнице, сами себе и друг друга и всю жизнь нашу предае́м, ныне и присно и во веки веков.

Молитва 11

О Пресвятая Дево, Мати Христа Бога нашего, Царице небесе и земли! Вонми многоболезненному воздыханию душ наших, призри с высоты святыя Твоея на нас, с верою и любовию поклоняющихся пречистому [и чудотворному] образу Твоему. Се бо грехми погружаемии и скорбьми обуреваемии, взирающе на Твой образ, яко живей Тебе сущей с нами, приносим смиренная моления наша. Не имамы иныя помощи, ни инаго предстательства, ни утешения, токмо Тебе, о Мати всех скорбящих и обремененных! Помози нам немощным, утоли скорби нашя, настави на путь правый нас заблуждающих, уврачуй болезненная сердца наша и спаси безнадежных, даруй нам прочее время жития нашего в мире и покаянии проводити, подаждь христианскую кончину, и на Страшнем Суде Сына Твоего явися нам милосердая Предстательница, да всегда поем, величаем и славим Тя, яко благую Заступницу рода христианскаго, со всеми угодившими Богу, во веки веков.

Молитва 12

О Пресвятая Дево, Мати Господа Вышняго, Заступнице и Покрове всех к Тебе прибегающих! Призри с высоты святыя Твоея на мя грешнаго, припадающаго ко пречистому [и чудотворному] образу Твоему: услыши мою теплую молитву и принеси ю̀ пред возлюбленнаго Сына Твоего, Господа нашего Иисуса Христа: умоли Его, да озаритмрачную душу мою светом Божественныя благодати Своея, да избавит мя от всякия нужды, скорби и болезни, да низпо́слет мне тихое и мирное житие, здравие телесное и душевное, да умирит страждущее сердце мое и исцелит раны его, да наставит мя на добрая дела, ум мой убо от помышлений суетных да очистит, исполнению же заповедей Своих мя научив, от вечныя муки да избавит и Своего Небеснаго Царствия да не лишит мя. О Пречистая Богородице! Ты, всех скорбящих Радосте, услыши и мя скорбнаго: Ты, именуемая Утоление печали, утоли и мою печаль: Ты, Купино неопалимая, сохрани мiр и всех нас от вредоносных огненных стрел врага: Ты, взыскание погибших, не попусти и мне погибнути в бездне грехов моих, на Тя бо по Бозе вся моя надежда и упование. Буди мне в жизни временней Заступница и о жизни вечней пред возлюбленным Сыном Твоим, Господем нашим Иисусом Христом  Ходатаица. Научи мя убо Тому̀ с верою и любовию служити, Тебе же, Пресвятая Мати Божия, преблагословенная Марие, благоговейно чтити до скончания дней моих.

Молитва 13

О Пречистая Госпоже Владычице Богородице! Приимѝ недостойную молитву нашу, и сохрани нас от навета злых человек и от внезапныя смерти, и даруй нам прежде конца покаяние. На моление наше умилосе́рдися, и радость вместо печали да́руй. И изба́ви нас, Госпоже, от всякия беды̀ и напасти, скорби и болезни и от всякаго зла. И сподо́би ны, грешныя рабы Твоя, одесную ста́ти во втором пришествии Сына Твоего, Христа Бога нашего, и наследники быти Царствия Небеснаго и жизни вечныя со всеми святыми в безконечныя веки веков.

Молитва 14

К кому возопию, Влалычице? К кому прибегну в горести моей, аще не к Тебе, Царице Небесная? Кто плачь мой и воздыхание приимет, аще не Ты, Пренепорочная, Надеждо христиан и Прибежище? Кто паче Тебе в напастех защитит? Услыши убо стенание мое, и приклони ухо Твое ко мне, Влалычице Мати Бога моего, и не презри мене требующаго Твоея помощи, и не отрини мене грешнаго. Вразуми и научи мя, Царице Небесная: не отступи от мене раба Твоего, Владычице, за роптание мое, но буди мне Мати  Заступница. Вручаю себе милостивому покрову Твоему: приведи мя грешнаго к тихой и безмятежней жизни, да плачуся о гресех моих. К кому прибегну повинный аз, аще не к Тебе, упованию и прибежищу грешных, надеждою на неизреченную милость Твою и щедроты Твоя окриляемь; О Владычице Царице Небесная! Ты мне упование и прибежище, покров и заступление и помощь. Царице моя преблагая и скорая Заступнице: покрый Твоим ходатайством моя прегрешения, защити мене от враг видимых и невидимых: умягчи сердца злых человек, возстающих на мя. О Мати Господа моего Творца! Ты еси корень девства и неувядаемый цвет чистоты. О Богородительнице! Ты подаждь ми помощь немощствующему плотски́ми страстьми и болезнующему сердцем, едино бо Твое и с Тобою Твоего Сына и Бога нашего имам заступление: и Твоим пречудным заступлением да избавлюся от всякия беды и напасти, о Пренепорочная и Преславная Божия Мати Марие. Темже со упованием глаголю и вопию: радуйся Благодатная: радуйся Обрадованная: радуйся, Преблагословенная, Господь с Тобою.

Ке́домо буди, яко в некиих храмех молитва сия, или именуемая песнь Пресвятей Богородице, поется во гласе 5.

Молитва 15

К кому возопию̀, Влалычице? К кому прибе́гну в горести моей, аще не к Тебе, Царице Небесная? Кто плачь мой услышит и воздыхание приимет, аще не Ты, Пренепорочная, Надеждо христиан и Прибежище нам грешным? Кто паче Тебе в напа́стех защитит? Услыши стенание мое и приклони ухо Твое ко мне, Влалычице и Мати Бога моего. Не презри ищущаго Твоея помощи и не отри́ни мене грешнаго, Царице Небесная. Научи мене вою Сына Твоего исполня́ти и даруй желание Того святыя заповеди твори́ти. Роптания же моего ради, в скорбех бывшаго, не отступѝ от мене, но пребу́ди ми маловерному покров и заступление. Твоим ходатайством прегрешения моя покрый, от видимых и невидимых враг защити, сердца враждующих на мя умягчи и Христовою любовию сия согрей. Мне же немощному даруй Твою всесильную помощь, во еже греховныя моя страсти препобеди́ти, да покаянием и жития моего добрым исправлением очищен быв, прочее время земна́го странствия моего в послушании Церкви Сына Твоего без порока прейти сподоблюся. В час же кончины моея предста́ни мне, всех христиан упование сущи, и веру мою во оный тяжкий день утверди, а по отшествии моем всесильную молитву Твою о мне вознеси, да помилует мя Господь и причастна мя Его безконечных радостей да сотворит во веки веков.

Молитва 16

К кому возопию̀, Влалычице? К кому прибе́гну в горести моей, аще не к Тебе, Госпоже Богородице, Царице Небесная? Кто плачь мой и воздыхание прии́мет, аще не Ты, о Пренепорочная, Надеждо христиан и Прибежище нам грешным? Приклонѝ, о Пречистая Владычице, ушеса Твоя к молению моему. Мати Бога моего, не пре́зри мене требующа Твоея помощи, услыши стенание мое, и воплю сердца моего вонмѝ, о Госпоже Царице Богородице! И подаждь ми радость душевную, и подкрепи мя нетерпеливаго, унылаго и нерадиваго ко Твоему хвалению. Вразумѝ и научѝ мя, ка́ко Тебе моли́тися подобает, и не отступѝ от мене, Мати Бога моего, за роптание и нетерпение мое: но буди ми покров и заступление в жизни моей, и приведи мя к тихому пристанищу Божественнаго о́наго покоя, и сопричтѝ мя к лику избраннаго Твоего стада, и тамо удостой мя воспева́ти и сла́вити Тя во веки веков.

Молитва 17

О Чудная и Вышшая всех тварей Царице Богородице, Небеснаго Царя Христа Бога нашего Мати! Услыши ны грешныя и недостойныя рабы Твоя, в час сей молящыяся и припадающыя к Тебе со воздыханием и слезами и умильно глаголющыя: изведи нас от рова страстей, Владычице: избави нас от всякия скорби и печали, огради от всякия напасти и злых клевет и от неправеднаго и лютаго навета вражия. Можеши бо, о Благодатная Мати Божия, не точию от всякаго зла сохранити люди Твоя, но и всяким благодеянием снабдити их и спасти: разве Тебе иныя Предстательницы в беда́х и обстояниих и теплыя Ходатаицы о нас грешных не имамы к Сыну Твоему, Христу Богу нашему. Егоже умоли, Владычице, да, спасе́ннии Тобою, славим и в будущем ве́це всесвятое имя Сына Твоего и Бога нашего, купно со Отцем и Святым Духом, ныне и в безконечныя веки.

Молитва 18

О Всемилостивая Госпоже, Дево Богородице! Вонми смиренному молению нашему, и сокрушенно ныне предстоящих образу Твоему услыши глас. Вемы бо о Содетеля нашего Мати, яко Ты еси предстательство христиан непостыдное и ходатайство ко Творцу непреложное: вемы и сие, яко беззвконие наша превзыдоша главы нашя и яко бремя тяжкое отяготеша на нас, и уже не́смы достойни видети высоту небесную, ниже воззрети ко престолу славы Сына Твоего и Бога нашего, но достойни явихомся мук и вечнаго осуждения. Сего ради к Тебе припадаем, Тя просим умиленно, к Тебе со слезами взываем: вознеси к нему матернее Твое моление, да не отвержет нас грешных от лица Своего, но, яко милостив, да простит нам согрешения наша вольная и невольная, на путь спасения нас наставляя  и свяше силою ко творению заповедей Своих укрепляя: да сохранит нас от соблазнов мiра, от вожделений греховных, от козней диавольских и от нападения видимых враг: да благословит дела рук наших, подавая граду сему [или веси сей, или святей обители сей] и всякому граду и стране обилие благ земных: сохраняя здравие и утверждая скиптр благочестивейшаго императора нашегог Николая Александровича, да сотворит и всем нам дни благи и безмятежны: да оградит миром Церковь Свою святую, и разстоящаяся да соединит той, яко благ Господь, долготерпелив и многомилостив, от всея твари со Отцем и Святым Духом славимый во веки векв.

Молитва 19

Пресвятая Богородице, спаси нас!

О Пречистая Госпоже, Владычице моя Богородице, Небесная Царице! Спаси и помилуй мя, грешнаго раба Твоего, от напрасныя клеветы̀, от всякия беды и напасти и внезапныя смерти. Помилуй мя в дневных часех и утренниз и вечерних, и во всякое время сохрани мя: стояща, седяща соблюди, и на всяком пути ходяща, и в нощных часех спяща снабдѝ, покрый и заступѝ. Защити мя, Владычице Богородице, от всех враг моих видимых и невидимых и от всякаго злаго обстояния. На всяком месте и на всякое время буди ми, Мати Преблагая, стена необоримая и заступление крепкое.

О Пресвятая Госпоже, Владычице Дево Богородице! Приими недостойную молитву мою, и сохрани мя от внезапныя смерти, и даруй ми прежде конца покаяние.

Пресвятая Богородице, спаси нас!

Ты мне Хранительница жизни всея явися, Пречистая: Ты мене избави от бесов в час смерти: Ты и по смерти мене упокой.

Под Твою милость прибегаем, Богородице Дево: молений наших не презри в скорбех, но от бед избави нас, едина Чистая и Благословенная.

Пресвятая Богородице, спаси нас!

Молитва 20, благодарственная

Что Ти принесем, или что Ти воздадим, о Премилостивая Госпоже Владычице, Заступнице рода христианскаго, за вся Твоя неисчетная благодеяния, яже присно являеши всем призывающым имя Твое и Твоея помощи просящым? Кто бо притекаяй к Тебе посрамлен и неуслышан от Тебе отходит, о Премилосердая Мати? Вемы, Пречистая, яко, за множество грехов и беззаконий наших, не́смы достойни нижѐ имя Твое пресладкое нарещѝ, не точию песнопения от оскврене́нных усте́н Тебе приносити, и удо́бее есть нам молчание любити. Но да не явимся непа́мятливи и неблагода́рни пред Тобою, дерзаем приносити Тебе сие коленопреклоненное славословие: ты же, Примилосердая Мати, не невозгнушайся прияти ѐ, яко от избытка любщих Тя сердец возносимое. Сама Ты, Владычице, благодатию Твоею коснися сердец наших, да яко воск растаявша пролиются пред Тобою в слезных благодеяниих и славословиих. Благодарим Тя, Всепетая: не таим благодеяний Твоих, но велегласно возвещаем, да вси слышащии притекают к Тебе, единей и непостыдней Заступнице рода христианскаго, и да немолчно славословятТя, Всепетую, во веки веков.

Молитва 21, человека, сущаго в скорби и озлоблении

Царице моя Преблагая, Надеждо моя Пресвятая, Прибежище сирым и странным Заступнице, бедствующих Помоще и озлобляемых Покрове! Зри́ши мою напасть, зри́ши мою скорбь: отвсю́ду искушением одержимь есмь, и заступающаго несть у менѐ. Ты убо Сама помози ми яко немощну, направи мя яко странна, настави яко заблуждша, уврачуй и спаси яко безнадежна. Не и́мам бо иныя помощи, ни ина́го предстательства, ни утешения, токмо Тебе, о Мати всех скорбящих и обремененных! При́зри убо на мя грешнаго и во озлоблении сущаго, и покрый мя пресвятым омофором Твоим, да изба́влен буду от зол, мя обыше́дших, и восхвалю всегда препетое имя Твое.

Молитва 22, чтомая в Нижегородском Кафедральном соборе

О Пресвятая Богородице, вышшая херувим и славнейшая серафим, рождшая Христа Бога нашего, ангельское великое удивление, пророчествия исполнение, Богоизбранная Отроковице, Царице небесе и земли, всех скорбящих радосте, обидимых Заступнице, алчущих Питательнице, обуреваемых Пристанище, больных Посещение, немощных Покрове и Заступление, сирых Покровительнице, плавающих Тишино, путешетвующих Поспешение, труждающихся Покоище, нагих Одеяние, нищих Богатство неистощимое, матерей тихое Веселие, младенцев Крепосте, всем безпомощным готовое во всем Поможение, христианскаго рода нашего неложная Покровительнице! О Всемилостивая Дево Владычице Богородице! Тебе единей от Всевышняго дадеся во всем заступати нас и спасати: Ты еси верное и скорое Врачевство греховных наших страстей и Молитвенница первая ко Христу Богу нашему о прощении грехов наших. О Всепетая Мати, Дево Богородице! Услыши глас молящихся  раб Твоих, и чудотворней иконе Твоей предстоящих, и к ней, якоже к Тебе Самой с нами пребывающей, очи наши возводящих, и любовию от души припадающих, и сице тебе псаломски вопиющих: слыши, дщи, и виждь, и приклони ухо Твое, и услыши моление наше, якоже множества верных во вся времена Тобою услышани быша. Всяк бо по своей скорби просит у Тебе помощи, избавления и заступления, и Ты прошения их исполняеши, и радостию душы их услаждаеши. О Милостивая и Премилостивая Госпоже Царице Богородице! Ты, яже восхощеши, вся испросити от Сына Твоего Христа Бога нашего можеши: не отрини убо нас от Твоего заступления, прдаждь свобождение от бед и скорбей наших, и избави нас, Всенепорочная, от видимых и невидимых враг и от злых человек клевещущих на ны, и не попусти глада, труса, потопа, огня и меча на грады и веси нашя, буди нам помощь неотступная, и моли Сына Твоего и Бога нашего, яко да в страшный день Суда одесную поставит ны, ради Твоего предстательства. Тому слава и держава, со безначальным его Отцем и Святым Духом, ныне и присно и во веки веков.

Молитва 23, чтомая в неких храмех Полтавския епархии

Богородице Царице, Госпоже Дево Марие, Мати Бога нашего! Сын Твой и Бог всех не презрѐ грешных прибегающих к Нему, но вся спасѐ и в разум истинный приведе. Аз же окаянный Крещения оскверних обеты, заповедей Сына Твоего и Бога моего не сохраних. К Тебе убо, Госпоже, прибегаю: научи мя творити волю Его, да спасет мя и введет в разум истинный, и подаст благодать Пресвятаго Духа, да не объят буду сетьмѝ вражиими. Иныя бо помощи не обретох от юности моея разве Тебе, Госпоже моя Богородице. Аще и многажды прогневах тя, неблагодарен о Твоей милости быв окаянный, но Ты не возгнушалася еси мене. Во глубину безумия впадох, ум погубих, но к Тебе непрестанно вопию: помилуй, Владычице, и воздвигни мя из пропасти греховныя, подаждь ми руку помощи долу лежащему, укрепи немощнаго, очисти сквернаго, спаси погибающаго: да вси грешнии, видевше милосердие Твое на мне недостойнем, прибегнут под кров Твой и пославят Сына Твоего, со Отцем и Святым Духом, ныне и присно и во веки веков.

Молитва 24, чтомая в неких храмех Тульския епархии

О Пресвятая Владычице наша Богородице, Небесная Царице, наша Преблагая Надеждо, преизящная Отроковице, ненадеящымся надеяние, грешным спасение, сирым прибежище, странным Предстательнице, нагим одеяние, скорбящым утешение и радосте, обидимым Покровительнице и всем сущым в бедах и напастех вспоможение и заступление! О Всемилостивая Госпоже Дево Богородице! Зри́ши наша беды̀, ско́рби и напа́сти: помозѝ нам немощны́м, печальным и унылым, скорбным же и отчаянным, и всяку печаль отъимѝ от нас. Обиду нашу ты ве́си: разрешѝ ту, Всенепорочная, якоже во́лиши и мо́жеши: не даждь нам во отчаяние впа́сти. Не имамы бы иныя помощи, разве Сына Твоего, Христа Бога нашего, и Тебе, о Мати Божия, о Владычице наша! Темже на Твой пречистый образ  со воздыханием и с сокрушением сердца взираем, и колена до земли преклоняем, взыва́юще: при́зри благосердым оком, Всепетая Богородице, и услыши нас, предлагая: не отри́ни, но благоволи поми́ловати: не омерзѝ нашего воздыхания. Никтоже бо притека́яй к Тебе посра́млен от Тебе исходит, но просит благодати и приемлет дар на пользу прошения во веки веков.

Молитва 25, заупокойная, чтомая в Николаевской церкви села Тополевки, Саратовской епархии

О Пречистая Госпоже, Владычице Богородице! К Тебе прибегаем, Чистая: Ты бо еси Стена необоримая, предстательство и покров всем прибегающым к Тебе с верою и упованием. Молим Тя, Преблагословенная: услыши молитву недостойных раб Твоих и предстани за усопшыя рабы Твоя имярек. Ты присно хода́тайствуеши о православно чтущих Тя и прибегающих к покрову Твоему: обаче ходатайство Твое, Владычице, наипаче по смерти нашей нам благопотребно является. Темже молим Тя, о Пресвятая Богородице, Владычице мiра, Надеждо ненадежных: буди днесь Ходатаица к рождшемуся от Тебе за усопшыя рабы Твоя, и умоли Сына Твоего, Бога нашего, дати им прощение и оставление прегрешений: много бо может моление матернее ко благосердию Владыки. От Тебе Господь всяко слово прошения приемлет: приими убо и Ты нашя молитвы и моления о душах усопших раб Твоих. Помози им, Владычице, матерним Твоим ко Господу дерзновением достигнути тихаго пристанища в Небеснем Иерусалиме: помози им, Заступнице усердная, непостыдно предстати на страшнем втором пришествии Сына Твоего, идеже кийждо от своих дел или прославится, или постыдится: помози им, Благодатная, пред лицем седящего на престоле славы оправдитися, да не постыдятся пред ангелы и всеми святыми, ниже да будут бесом радование. О Всепетая Мати, Владычице Богородице! Молим Тя, заступи, спаси, сохрани и от будущия изьми муки усопшыя рабы Твоя имярек, да не погибнут во век, но да спасутся Твоими молитвами и прейдут от смертив живот: посли им, Благодатная, достигнути вожделеннаго отечества и узрети блага небесныя. Ты бо еси едина Благословенная в женах, многомощная Заступница, Надежда, Покров и Прибежище всем притекающим к Тебе, Ты еси мост преводяй сущих от земли на небо и райских дверей отверзение родом людей Твоих во веки веков.

Молитва 26, песнь Пресятей Богородице

Тебе Матерь Божию хвалим: Тя, Марие, Деву Богородицу исповедуем: Тя Превечнаго Отца Дщерь вся земля величает. Тебе вси Ангели и Архангели и вся начала смиренно служат: Тебе вся власти, престоли, господствия и вся превышния силы небесныя повинуютсяю Тебе Херувими и Серафими радующеся предстоят и нерестанным гласом вопиют: святая Богородице Мати, полны суть небеса и земля величества славы Плода чрева Твоего. Тебе преславный и ангельский лик Своего Творца Матерь восхваляет: Тебе мучеников множество Богородицу величает: Тебе преславный исповедников сонм Бога Слова Храм нарицает: Тебе господственные полцы̀ всего девства образ проповедают: Тебе вся небесная воинства Царицу Небесную восхваляют. Тебе по всей вселенней Церковь святая прославляет, Матерь Божию почитающи: Тя истиннаго Царя Небеснаго Отроковицу превозносит. Ты еси Ангелом Госпожа, Ты еси райская дверь, Ты лествица Царствия Небеснаго, Ты Царя славы чертог, Ты ковчег благочестия и благодати, Ты еси бездна щедрот, Ты еси прибежище грешных. Ты Мати Спасителева, Ты, свобождения ради пленнаго человека, Бога восприяла еси во чреве. Тобою попран бысть враг: Ты отверзла еси двери Царствия Небеснаго. Тыы одесную Бога стои́ши: Ты Бога за нас молиши, Дево Марие, иже будет судити живым и мертвым. Тя убо посим Заступницу пред Сыном Твоим и Богом, иже кровию Своею нас искупи, да мзду восприимем в вечней славе. Спаси люди Твоя, Богородице, и благослови достояние Твое, яко да будем причастницы наследия Твоего: упаси и соблюди нас даже до века. На всяк день, о Пресвятая, хвалити и ублажати Тя желаем сердцем и устна́ми. Подоби, Премилосердая Мати, ныне и всегда от греха сохранитися нам: помилуй нас, Заступнице, помилуй нас. буди милостьТвоя на нас, якоже на Тя уповахом во веки. Аминь.

[По рукописи Успенския церкве села Подъяблоннаго, Нижегородския епархии.]

Тропари общыя Пресвятей Богородице, глас 4

  1. К Богородице ныне прилежно притецем гре́шнии и смире́ннии, и припаде́м, в покаянии зовуще из глубины душѝ: Владычице, помози, на ны милосердовавши: потщися, погибаем от множества прегрешений: не отврати рабы Твоя тщы̀, Тя бо и едину надежду имамы.
  2. Не умолчим никогда, Богородице, силы Твоя глаголати недостойнии: аще бо Ты не бы̀ предстояла моля́щи, кто бы нас избавил от толиких бед? Кто же бы сохранил до ныне свободны? Не отступим, Владычице, от Тебе: Твоя бо рабы спасаеши присно от всяких лютых.

Месяц септембрий.

Септембрия 1 и априлиа 16. Молитва Пресвятей Богородице пред иконою Ея Черниговскою

О Пресвятая Дево, Мати Христа Бога нашего, Царице небесе и земли! Вонми многоболезненному воздыханию душ наших, призри с высоты святыя Твоея на нас, с верою и любовию поклоняющихся пречистому [и чудотворному] образу Твоему. Се бо грехми погружаемии и скорбьми обуреваемии, взирающе на Твой образ, яко живей Тебе сущей с нами, приносим смиренная моления наша. Не имамы иныя помощи, ни инаго предстательства, ни утешения, токмо Тебе, о Мати всех скорбящих и обремененных! Помози нам немощным, утоли скорби нашя, настави на путь правый нас заблуждающих, уврачуй болезненная сердца наша и спаси безнадежных, даруй нам прочее время жития нашего в мире и покаянии проводити, подаждь христианскую кончину, и на Страшнем Суде Сына Твоего явися нам милосердая Предстательница, да всегда поем, величаем и славим Тя, яко благую Заступницу рода христианскаго, со всеми угодившими Богу, во веки веков.

Септембрия 2. Молитва пред чудотворною иконою Пресвятыя Богородицы, именуемою Калу́женскою

О Пречистая Госпоже Владычице Богородице! Приими недостойную молитву нашу, и сохрани нас от навета злых человек и от внезапныя смерти, и даруй нам прежде конца покаяние. На моление наше умилосердися, и радость вместо печали даруй. И избави нас, Госпоже, от всякия беды̀ и напасти, скорби и болезни и от всякаго зла. И сподоби ны, грешныя рабы Твоя, одесную стати во втором пришествии Сына Твоего, Христа Бога нашего, и наследники быти Царствия Небеснаго и жизни вечныя со всеми святыми в безконечныя веки веков.

Септембрия 4. Молитвы пред чудотворною иконою Пресвятыя Богородицы, именуемою Неопалимая Купина

Молитва 1, из акафиста

О Пресвятая и Преблагословенная Мати Сладчайшаго Господа Иисуса Христа! припадаем и покланяемся Тебе пред святою и пречестною иконою Твоею, еюже дивная и преславная чудеса содеваеши, от огненнаго запаления и молниеноснаго грома жилища наша спасаеши, недужныя исцеляеши, и всяко благое прошение наше во благо исполняеши. Смиренно молим Тя, всесильная рода нашего Заступнице: сподоби ны немощныя и грешныя Твоего матерняго заступления и благопопечения. Спаси и сохрани, Владычице, под кровом милости Твоея благовернаго государя нашего, императора Николая Александровича всея России, Церковь святую, град сей [или весь сию, или обитель сию], всю страну нашу православную, и вся ны припадающыя к тебе с верою и любовию и со умиленными слезами Твоего заступления просящыя. Ей, Госпоже Всемилостивая! Умилосердися на нас обуреваемых грехи многими и не имущих дерзновения ко Христу Господу просити Его о помиловании и прощении: Тебе убо предлагаем к Нему на умоление, Матерь Его сущую. Прострик Нему, о Всеблагая, богоприимнеи ру́це Твои, и предстательствуй за нас пред Его благостию, просящи нам прощения прегрешений наших, благочестнаго мирнаго жития, благия христианския кончины и добраго ответа на Страшнем Суде Его. В час же грознаго посещения Божия, аще огнем возгорятся домове наши, аще ли молниеносным громом устрашаеми будем, явѝ нам милостивное Твое заступление и державное вспоможение: да, спасаеми всесильными Твоими ко Господу молитвами, временнаго наказания Божия зде избегнем, вечное же блаженство райское тамо унаследуем, и со всеми святыми воспоем пречестное и великолепое имя покланяемыя Троицы, Отца и Сына и Святаго Духа, и Твое велие к нам милосердие, во веки веков.

Молитва 2, из акафиста

О Пресвятая Дево, Мати Господа Вышняго, Заступнице и Покрове всех к Тебе прибегающих! Призри с высоты святыя Твоея на мя грешнаго, припадающаго ко пречистому [и чудотворному] образу Твоему: услыши мою теплую молитву и принеси ю̀ пред возлюбленнаго Сына Твоего, Господа нашего Иисуса Христа: умоли Его, да озаритмрачную душу мою светом Божественныя благодати Своея, да избавит мя от всякия нужды, скорби и болезни, да низпо́слет мне тихое и мирное житие, здравие телесное и душевное, да умирит страждущее сердце мое и исцелит раны его, да наставит мя на добрая дела, ум мой убо от помышлений суетных да очистит, исполнению же заповедей Своих мя научив, от вечныя муки да избавит и Своего Небеснаго Царствия да не лишит мя. О Пречистая Богородице! Ты, всех скорбящих Радосте, услыши и мя скорбнаго: Ты, именуемая Утоление печали, утоли и мою печаль: Ты, Купино неопалимая, сохрани мiр и всех нас от вредоносных огненных стрел врага: Ты, взыскание погибших, не попусти и мне погибнути в бездне грехов моих, на Тя бо по Бозе вся моя надежда и упование. Буди мне в жизни временней Заступница и о жизни вечней пред возлюбленным Сыном Твоим, Господем нашим Иисусом Христом  Ходатаица. Научи мя убо Тому̀ с верою и любовию служити, Тебе же, Пресвятая Мати Божия, преблагословенная Марие, благоговейно чтити до скончания дней моих.

Молитва 3, чтомая в Новгородском Юрьеве монастыре

Царице Небесная, Владычице наша, Госпоже вселенныя, Пресвятая Богородице, Нескверная, Неблазная, Нетленная, Пречистая, Чистая Приснодево, Марие Богоневесто, Мати Творца твари, Господа славы и Владыки всяческих! Тобою Царь царствующих и Господь господствующих прииде и на земли нам явися. Ты убо Божие милосердие воплощенное, Ты Мати Света и Живота сущи, якоже некогда во чреве Твоем носила еси Его, и на объятиях Твоих имела еси Младенца Слово Превечное, Бога, тако и всегда Того с Собою имаши. Сего ради мы по Бозе к Тебе прибегаем, яко к нерушимей стене и предстательству: призри благосердием, Всепетая Богородице, на лютое озлобление наше, и исцели душ и телес наших болезни: отжени от нас всякаго врага и супостата: избави от глада, мора, от язвы, от вод многих и возду́хов тлетворных, и от смерти внезапныя: и якоде три отроки в пещи вавило̀нстей, сохрани и соблюди нас, да, якоже древле людем Божиим, тако будут вся благая нам чтущим Тя: вразѝ же и вси ненавидящии нас да постыдятся и постра́мятся, и уразумеют вси, яко с Тобою Господь, о Владычице, и Тобою с нами Бог. Во дни осенѝ нас сению благодати Твоея, во тьме же нощней просвети светом свыше, всем полезная устрояющи: преложи горесть нашу во сладость, и сле́зы отрѝ согрешивших и бедствующих раб Твоих, исполня́ющи коего́ждо прошения вся во благо: вся бо можеши, елика хощеши Ты, Мати Слова и Живота. Тебе Отец венча  Дщерь, Сын Матерь Деву, Дух Святый Невесту, да царствуеши яко Царица, предстоящи одесную Святыя Троицы, и милуеши нас якоже хащеши, ныне и присно и во веки веков.

Тропари, глас 4

  1. Во огни купины   неопалимыя, древле Моисеем виденныя, тайну воплощения Своего от неискусобрачныя Девы Марии прообразовавый, Той и ныне, яко чудес Творе́ц и всея твари Создатель, икону Ея святую чудесы многимипрослави, даровав ю верным во исцеление от недугов и в защищение от огненнаго запаления. Сего ради вопием Преблагословенней: Надеждо христиан, от лютых бед, огня и грома избави на Тя уповающыя, и спаси душы нашя, яко милосерда.
  2. В купине, огнем горящей и несгараемей, показавый Моисеови Пречистую Твою Матерь, Христе Боже, огнь Божества неопальне во чреве приимшую и нетленну по Рождестве пребывшую: Тоя молитвами от пламене страстей избави нас, и от огненных запалений град Твой сохрани, яко многомилостив.

Септембрия 8. Молитвы пред иконою Рождества Пресвятыя Богородицы

Молитва 1

О Пресвятая Владычице Богородице! Призри с благосердием на моления нас грешных и смиренных рабов Твоих, и умолѝ Бога Сына Твоего, да ниспо́слет нам и всем притекающым к Тебе здравие душевное и телесное и вся к ве́чней и временней жизни потре́бная, да простит нам всякое согрешение вольное и невольное, да избавит нас от всяких скорбей и болезней, и напастей, и всякаго зла́го обстояния. Ей, Царице наша Преблагая, Надеждо наша несокрушимая и Заступнице необоримая! Не отвратѝ лица Твоего от нас за множество прегрешений наших: но прострѝ нам ру́це матерняго милосердия Твоего и сотвори с нами знамение во благо. Яви нам богатую помощь Твою и благопоспешѝ во всяком деле блазе: от всякаго же начинания греховнаго и помышления лукаваго отврати нас, да всегда славим пречестное имя Твое, и благодарне честному [или чудотворному] образу Твоему покланяющеся, величаем Бога Отца, и Единароднаго Сына Его, Господа нашего Ииисуса Христа, и Святаго Духа, со всеми святыми, во веки веков.

Молитва 2

Богорадованная Владычице, Препрославленная Мати щедрот и человеколюбия, Всемилостивая о всем мiре Хода́таице! Прилежно раби Твои, ко Твоему Божественному предстательству прибегающе и пречудному образу Твоему со умилением припадающе, молимся: молитву теплую Сыну Твоему и Богу нашему сотвори, о Всепетая Царице и Владычице, да от всяких болезней и печалей нас, Тебе ради, избавит, и от грехов всяких свободит, и Царствия Своего Небеснаго наследники ны покажет: велие бо и неизреченное, яко Мати, имаши дерзновение к Нему и вся можеши, елика восхощеши, едина Благая и Благословенная во веки веков.

Молитва 3, чтомая в Лукиановой пустыни, Влдимирския епархии

О Пресвятая Владычице Богородице, Царице небесе и земли, вышшая Ангел и Архангел и всея твари Честнейшая, Чистая Дево Марие, мiру Благая Помощнице и утверждение и всем во всяких нуждах избавление! Призри и ныне, Госпоже Всемилостивая, на рыбы Твоя, умиленною душею и сокрушенным сердцем Тебе молящыяся, и со слезами к Тебе припадающыя, Пречистому и цельбоносному образу Твоему покланяющыяся, Твоея же помощи и заступления во всяких скорбех, печалех и напастех усердно просящия. О Всемилостивая Дево, Богородице Чистая! Буди о нас Ходатаица к Сыну Твоему, Христу Богу нашему. Мы бо грешнии не имамы иныя помощи, разве Тебе, Владычице: Ты еси наше упование, Ты еси Заступница наша и Предстательница, Ты обидимым защищение, скорбящым радование, сирым прибежище, вдовам Хранительница, девам слава, слезящым веселие, больным посещение, немощным исцеление, грешным спасение. Сего ради, о Богомати, к Тебе прибегаем, и на Твой образ взираем, и с любовию покланяемся, молебное пение приносяще и вопиюще: помилуй нас, Мати Божия, и прошения наша исполни, вся бо суть возможна ходатайству Твоему пред Богом, Емуже подобает всякая слава, честь и поклонение, ныне и присно и во веки веков.

Тропарь, глас 4

Рождество Твое, Богородице Дево, радость возвести всей вселенней: из Тебе бо возсия Солнце правды, Христос Бог наш, и разрушив клятву, даде благословение, и упразднив смерть, дарова нам живот вечный.

Септембрия 8. Молитвы пред Курскою иконою Знамения Пресвятыя Богородицы

О Пресвятая Дево, Мати Христа Бога нашего, Царице небесе и земли! Вонми многоболезненному воздыханию душ наших, призри с высоты святыя Твоея на нас, с верою и любовию поклоняющихся пречистому [и чудотворному] образу Твоему. Се бо грехми погружаемии и скорбьми обуреваемии, взирающе на Твой образ, яко живей Тебе сущей с нами, приносим смиренная моления наша. Не имамы иныя помощи, ни инаго предстательства, ни утешения, токмо Тебе, о Мати всех скорбящих и обремененных! Помози нам немощным, утоли скорби нашя, настави на путь правый нас заблуждающих, уврачуй болезненная сердца наша и спаси безнадежных, даруй нам прочее время жития нашего в мире и покаянии проводити, подаждь христианскую кончину, и на Страшнем Суде Сына Твоего явися нам милосердая Предстательница, да всегда поем, величаем и славим Тя, яко благую Заступницу рода христианскаго, со всеми угодившими Богу, во веки веков.

Септембрия 14 и в неделю первую по 29 дни иуниа. Молитвы пред иконою Пресвятыя Богородицы Благодатною, чтомая в церкви села Бельчина, Волынския епархии

Царице моя Преблагая, Надеждо моя Богородице, прибежище сирых и странных Предстательнице, скорбящих Радосте, обидимых Покровительнице! Зри́ши мою беду, зри́ши мою скорбь: помозѝ ми яко не́мощну, направи мя яко стра́нна. Обиду мою ве́си,  разрешѝ ту, якоже во́лиши: яко не и́мам иныя помощи разве Тебе, ни ины́я Предстательницы, ни Благи́я Уте́шительницы, токмо Тебе, о Богомати, яко да сохрани́ши мя и покры́еши во веки веков.

Септембрия 17. Молитва пред иконою Пресвятыя Богородицы Макариевскою, чтомая в Макариево-Унженском монастыре, Костромския епархии

Преблагая Царице, Мати Господа небесе и земли, Ангелов Радосте, пророков Сладосте, апостолов Славо, святителей украшение, мучеников крепосте, преподобных радование, вселенныя Похвало, ненадежных Надеждо, скорбных утешение, болящих здравие, нищих неистощимое богатство, богатых некрадомое сокровище, грешников спасение, и всех христиан поможение и заступление! К Тебе, Богоневесто Владычице, мы грешнии раби Твои прибегаем, и о Тебе, Всеблагая Госпоже Богородительнице, скорыя помощи просим: озари наш ум светом истиннаго Богопознания, согрей сердца наша ко приятию спасительных заповедей Сына Твоего и Бога нашего: уврачуй, Владычице, язвы неисцельныя душ и телес наших всесильными Твоими молитвами, и подаждь нам, Всеблагая, вся полезная ко спасению: огради нас святыми Ангелы от всех бед: добрая и полезная де́яти нам даруй, да почее время жизни нашея в мире и покаянии поживем: христианскую же кончину жития нашего мирну и непостыдну исходатайствуй нам. Ей, Владычице, Царице Небесная! Услыши сей глас моления нашего: и по исходе от временныя жизни сея, помози нам безбедно преити вся воздушная мытарства мiродержителя тьмы века сего, и в райских обителех со избранными вселитися нам сподоби: да во светлостех святых, со всеми небесными силами, воспеваем великолепое имя Отца и Сына и Святаго Духа, ныне и присно и во веки веков.

Септембрия 18. Молитва пред иконою Пресвятыя Богородицы именуемою Целительница

Приими о Всеблагословенная и Всемощная Госпоже Владычице Богородице Дево, сия молитвы, со слезамиТебе ныне приносимыя от нас недостойных раб Твоих, ко Твоему цельбоно́сному образу пение возсыла́ющих со умилением, яко тебе Самой зде сущей и внемлющей молению нашему. По коемуждо бо прошению исполнение твори́ши, скорби облегча́еши, немощным здравие да́руеши, разслабленныя и недужныя исцеля́еши, от бе́сных бесы прогоняеши, обидимыя от обид избавля́еши, прокаженныя очищае́ши и малыя дети ми́луеши: еще же, Госпоже Владычице Богородице, и от уз и темниц свобождаеши и всякия многоразличныя страсти врачуеши: вся бо суть возможна ходатайством Твоим к Сыну Твоему, Христу Богу нашему. О Всепетая Мати, Пресвятая Богородице! Не престай моли́тися о нас недостойных рабех Твоих, славящих Тя и почитающих Тя, и покланяющихся со умилением пречистому образу Твоему, и надежду имущих невозвра́тну и веру несумне́нну к Тебе, Приснодеве Преславней и Непорочней, ныне и присно и во веки веков.

Тропарь общий Пресвятей Богородице

К Богородице ныне прилежно притеце́м гре́шнии и смире́ннии, и припаде́м, в покаянии зову́ще из глубины душѝ: Владычице, помозѝ, на ны милосе́рдовавши: потщи́ся, погиба́ем от множества прегрешений: не отвратѝ рабы Твоя тщы̀, Тя бо и еди́ну надежду и́мамы.

Септембрия 18 и априлиа 24. Молитва пред иконою Пресвятыя Богородицы Молченскою

О Пресвятая Дево, Мати Христа Бога нашего, Царице небесе и земли! Вонми многоболезненному воздыханию душ наших, призри с высоты святыя Твоея на нас, с верою и любовию поклоняющихся пречистому [и чудотворному] образу Твоему. Се бо грехми погружаемии и скорбьми обуреваемии, взирающе на Твой образ, яко живей Тебе сущей с нами, приносим смиренная моления наша. Не имамы иныя помощи, ни инаго предстательства, ни утешения, токмо Тебе, о Мати всех скорбящих и обремененных! Помози нам немощным, утоли скорби нашя, настави на путь правый нас заблуждающих, уврачуй болезненная сердца наша и спаси безнадежных, даруй нам прочее время жития нашего в мире и покаянии проводити, подаждь христианскую кончину, и на Страшнем Суде Сына Твоего явися нам милосердая Предстательница, да всегда поем, величаем и славим Тя, яко благую Заступницу рода христианскаго, со всеми угодившими Богу, во веки веков.

Месяц октоврий

Октоврия 1. Молитвы пред иконою Покро́ва Пресвятыя Богородицы. Из акафиста

Молитва 1

О Пресвятая Дево, Мати Господа Вышних сил, небесе и земли Царице, града и страны нашея всемощная Заступнице! Приимѝ хвалебное пение сие от нас недостойных раб Твоих, и вознесѝ молитвы нашя ко престолу Бога Сына Твоего, да милостив будет неправдам нашым и проба́вит благодать Свою чтущым всечестное имя Твое и с верою и любовию покланяющымся пречистому [или чудотворному] образу Твоему. Не́смы бо достойни от Него помиловани бы́ти, аще не Ты уми́лостивиши Его о нас, Владычице, яко вся Тебе от Него возможна суть. Сего ради к Тебе прибегаем, яко к несомне́нней и ско́рей Заступнице нашей: услыши нас молящихся Тебе, осенѝ нас вседержавным покровом Твоим, и испросѝ у Бога Сына Твоего пастырем нашым ревность и бдение о душах, градоправителем мудрость и силу, судия́м правду и нелицеприятие, наставником разум и смиренномудрие, супругом любовь и согласие, чадом послушание, оби́димым терпение, оби́дящым страх Божий, скорбящым багодушие, радующымся воздержание, намже всем дух разума и благочестия, дух милосердия и кротости, дух чистоты и правды. Ей, Госпоже Пресвятая! Умилосердися на немощыя люди Твоя: разсеянныя собери, заблуждшыя на путь правый наста́ви, старость поддержи, юныя уцелому́дри, младенцы воспитай, и при́зри на всех нас призрением милостиваго Твоего заступления: воздви́гни нас из глубины грехавныя и просвети сердечныя очи наши ко зрению спасения. Милостива нам буди зде и тамо, во стране земнаго пришельствия и на Страшнем Суде Сына Твоего: преставльшыяся же в вере и покаянии от жития сего отцы и братию нашу в вечней жизни со Ангелы и со всеми святыми жити сотворѝ. Ты бо еси, Госпоже, слава небесных и упование земных, Ты по Бозе наша Надежда и Заступница всех притекающих к Тебе с верою. Тебе убо молимся, и Тебе, яко всемогу́щей Помощнице, сами себе и друг друга и всю жизнь нашу по Христе Бозе предаем, ныне и присно и во веки веков.

Молитва 2, человека, сущаго в скорби и озлоблении

Царице моя Преблагая, Надеждо моя Пресвятая, Прибежище сирым и странным Заступнице, бедствующих Помоще и озлобляемых Покрове! Зриши мою напасть, зриши мою скорбь: отвсюду искушением одержимь есмь, и заступающаго несть у мене. Ты убо сама помози ми яко немощну, направи мя яко странна, настави яко заблуждша, уврачуй и спаси яко безнадежна. Не имам бо иныя помощи, ни инаго предстательства, ни утешения, токмо Тебе, о Мати всех скорбящих и обремененных! Призри убо на мя грешнаго и во озлоблении сущаго, и покрый мя пресвятым омофором Твоим, да избавлен буду от зол, мя обышедших, и восхвалю всегда препетое имя Твое.

Тропарь, глас 4

Днесь благовернии людие светло празднуем, осеняеми Твоим, Богомати, пришествием, и к Твоему взирающе пречистому образу, умильно глаголем: покрый нас честным Твоим покровом, и избави нас от всякаго зла, молящи Сына Твоего, Христа Бога нашего, спасти душы нашя.

Величание

  1. Достойно есть величати Тя, Богородице, Честнейшую Херувим и Славнейшую без сравнения Серафим.
  2. Величаем Тя, Пресвятая Дево, и чтем покров Твой честный: Тя бо святый Андрей ви́де на воздусе, за мiр Христу молящуюся.

Октоврия 9. Молитвы пред иконою Пресвятыя Богородицы Корсунскою

Молитва 1, чтомая в Петроградском Исаакиевском кафедральном соборе

О Пресвятая Дево, Мати Христа Бога нашего, Царице небесе и земли! Вонми многоболезненному воздыханию душ наших, призри с высоты святыя Твоея на нас, с верою и любовию поклоняющихся пречистому [и чудотворному] образу Твоему. Се бо грехми погружаемии и скорбьми обуреваемии, взирающе на Твой образ, яко живей Тебе сущей с нами, приносим смиренная моления наша. Не имамы иныя помощи, ни инаго предстательства, ни утешения, токмо Тебе, о Мати всех скорбящих и обремененных! Помози нам немощным, утоли скорби нашя, настави на путь правый нас заблуждающих, уврачуй болезненная сердца наша и спаси безнадежных, даруй нам прочее время жития нашего в мире и покаянии проводити, подаждь христианскую кончину, и на Страшнем Суде Сына Твоего явися нам милосердая Предстательница, да всегда поем, величаем и славим Тя, яко благую Заступницу рода христианскаго, со всеми угодившими Богу, во веки веков.

Молитва 2, чтомая в Угличском Богоявленском монастыре

О Пресвятая Госпоже Владычице Богородице! Приими недостойную молитву нашу, и сохрани нас от навета лукавых духо́в и злых человек и от внезапныя смерти, и даруй нам прежде конца покаяние. На моление наше умилосердися, и радость вместо печали даруй. И избави нас, Госпоже, от всякия беды̀ и напасти, скорби и болезни и от всякаго зла. И сподоби ны, грешныя рабы Твоя, одесную стати во втором пришествии Сына Твоего, Христа Бога нашего, и наследники быти Царствия Небеснаго и жизни вечныя со всеми святыми в безконечныя веки веков

Молитва 3, чтомая в Корсунской церкви града Углича

О Пресвятая Дево, Владычице Богородице, Единароднаго Бога Слова, всякия видимыя и невидимыя твари Творца и Владыку, Единаго от Троицы Господа, Бога же и человека, паче естества и слова рождшая, вместилище Божественное, всякия святыни и благодати Приемнице, в Нейже исполнение Божества пребывает, благословением Бога и Отца и действом Святаго Духа избранная от всея твари, славо и неизглаголанное веселие Ангелов, царский апостолов и пророков ве́нче, чудное и всехвальное мучеников мужество и страдальцев венчание, присносущных и нетленных воздаяний Ходатаице непреложная, преподобных честь и славо, незаблуднаго пути Учительнице, источниче света, милости неистощимая реко, всяких чудес и дарований духовных море неисчерпаемое! Тебе молимся и Тебе просим, милостивную Матерь Человеколюбца Владыки, помиловатися нам смиренным и недостойным рабом Твоим: призри милостивно на пленение наше и исцели сокрушение душ и телес наших, видимыя и невидимыя рати разори, и всяко столп крепости, оружие во бранех, Воевода и Поборница непобедимая буди нам недостойным от лица враг наших, покажи на нас древния милости и чудеса Твоя. Яко един есть Царь и Владыка Сын Твой и Бог, Ты же воистинну еси Богородица, от всех родов блажи́мая, истиннаго Бога по плоти рождшая, и того ради вся можеши и сильна̀ еси действовати, елика аще волиши на небеси и на земли. Исполни убо всякое прошение на пользу коемуждо, Владычице: подаждь недугующым цельбу, в мори плавающым тишину и управление, с путешествующими спутешествуй и соблюдай я, скорбящыя утешай, нищету и всякое телесное озлобление облегчи, душевныя же болезни и страсти телесныя прежде всех потреби Твоим невидимым предстательством и ходатайством, яко да путь временныя сея жизни добре и непреткновенно скончаем, и вечная оная блага Тебе ради во Царствии Небеснем получим. Вернаго же императора нашего Николая Александровича, на Твое предстательство уповающаго и Тебе яко Ходатаицу и Помощницу на обстоящыя враги призывающаго, невидимо укрепи: отъими болезни души и сердца его, державу его мирну и непоколебиму сохрани, и от бед избави, Владычице, молитвами Твоими. Изряднее же Тебе вручаемый град сей и всяк град и страну от глада, губительства, труса, потопа, огня и меча, от нахождения иноплеменных и междоусобныя брани и от напрасныя смерти избави, и всяк гнев праведно на ны движимый отврати, благоволением и благодатию единороднаго Сына Твоего, Емуже подобает всякая слава, честь и поклонение, со Безначальным Его Отцем и Присносущным и Животворящим Духом, ныне и присно и во веки веков.

Октоврия 12. Молитвы пред иконою Пресвятыя Богородицы Иерусалимскою

Молитва 1, чтомая пред чудотворною иконою Пресвятыя Богородицы Иерусалимскою в Кривоезерской пустыни, Костромския епархии

Пресвятая Госпоже, Владычице Богородице, упование всех уповающих на Тя, Заступнице печальных, Прибежище отчаянных, вдов и сирот Питательнице! Услыши и помилуй ны грешныя и недостойныя рабы Твоя, со умилениемко пречистому Твоему образу припа́дающыя: умоли, милосердая Владычице, Сына Твоего и Господа нашего Иисуса Христа, да отвратит праведный гнев Свой, да простит грехи и беззакония наша, яко да сподобимся благостию Его скончати житие наше в покаянии и получити милость его со всеми избранными Его: яко благословенна и препрславлена еси во веки веков.

Тропарь, глас 4, поемый в тойже пу́стыни:

Богорадованная Владычице, Препрославленная Мати щедрот и человеколюбия, Всемилостивая ко всем в мiре Хода́таице! Прилежно раби Твои ко Твоему предстательству прибегаем, и ко пречудному образу Твоему со умилением припадающе молимся: молитву теплую Сыну Твоему и Богу нашему сотвори, о Всепетая Царице Богородице, да от всяких болезней и печалей нас Тебе ради избавит, и от грехов всяких свободит, Царствия Своего Небеснаго наследники ны покажет: велие бо и неизреченное яко Мати к Нему дерзновение имаши, и вся от Него испросити можеши, едина бо во веки Преблагословенная.

Октоврия 13, фебруариа 12 и во вторник Светлыя седмицы. Молитвы пред иконою Пресвятыя Богородицы Иверскою

Молитва 1, из службы

О Пресвятая Дево, Мати Христа Бога нашего, Царице небесе и земли! Вонми многоболезненному воздыханию душ наших, призри с высоты святыя Твоея на нас, с верою и любовию поклоняющихся пречистому [и чудотворному] образу Твоему. Се бо грехми погружаемии и скорбьми обуреваемии, взирающе на Твой образ, яко живей Тебе сущей с нами, приносим смиренная моления наша. Не имамы иныя помощи, ни инаго предстательства, ни утешения, токмо Тебе, о Мати всех скорбящих и обремененных! Помози нам немощным, утоли скорби нашя, настави на путь правый нас заблуждающих, уврачуй болезненная сердца наша и спаси безнадежных, даруй нам прочее время жития нашего в мире и покаянии проводити, подаждь христианскую кончину, и на Страшнем Суде Сына Твоего явися нам милосердая Предстательница, да всегда поем, величаем и славим Тя, яко благую Заступницу рода христианскаго, со всеми угодившими Богу, во веки веков.

Молитва 2

К кому возопию̀, Влалычице? К кому прибе́гну в горести моей, аще не к Тебе, Госпоже Богородице, Царице Небесная? Кто плачь мой и воздыхание прии́мет, аще не Ты, о Пренепорочная, Надеждо христиан и Прибежище нам грешным? Приклонѝ, о Пречистая Владычице, ушеса̀ Твоя к молению моему. Мати Бога моего, не пре́зри мене требующа Твоея помощи, услыши стенание мое, и воплю сердца моего вонмѝ, о Госпоже Царице Богородице! И подаждь ми радость душевную, и подкрепи мя нетерпеливаго, унылаго и нерадиваго ко Твоему хвалению. Вразумѝ и научѝ мя, ка́ко Тебе моли́тися подобает, и не отступѝ от мене, Мати Бога моего, за роптание и нетерпение мое: но буди ми покров и заступление в жизни моей, и приведи мя к тихому пристанищу Божественнаго о́наго покоя, и сопричтѝ мя к лику избраннаго Твоего стада, и тамо удостой мя воспева́ти и сла́вити Тя во веки веков.

Молитва 3

О Пречистая Госпоже Владычице Богородице! Приими недостойную молитву нашу, и сохрани нас от навета злых человек и от внезапныя смерти, и даруй нам прежде конца покаяние. На моление наше умилосердися, и радость вместо печали даруй. И избави нас, Госпоже, от всякия беды̀ и напасти, скорби и болезни и от всякаго зла. И сподоби ны, грешныя рабы Твоя, одесную стати во втором пришествии Сына Твоего, Христа Бога нашего, и наследники быти Царствия Небеснаго и жизни вечныя со всеми святыми в безконечныя веки веков.

Молитва 4, чтомая пред чудотворною иконою Пресвятыя Богородицы Иверскою в Иверском Выксунском монастыре, Нижегородския епархии

К кому возопию̀, Влалычице? К кому прибе́гну в горести моей, аще не к Тебе, Царице Небесная? Кто плачь мой услышит и воздыхание приимет, аще не Ты, Пренепорочная, Надеждо христиан и Прибежище нам грешным? Кто паче Тебе в напа́стех защитит? Услыши стенание мое и приклони ухо Твое ко мне, Влалычице и Мати Бога моего. Не презри ищущаго Твоея помощи и не отри́ни мене грешнаго, Царице Небесная. Научи мене вою Сына Твоего исполня́ти и даруй желание Того святыя заповеди твори́ти. Роптания же моего ради, в скорбех бывшаго, не отступѝ от мене, но пребу́ди ми маловерному покров и заступление. Твоим ходатайством прегрешения моя покрый, от видимых и невидимых враг защити, сердца враждующих на мя умягчи и Христовою любовию сия согрей. Мне же немощному даруй Твою всесильную помощь, во еже греховныя моя страсти препобеди́ти, да покаянием и жития моего добрым исправлением очищен быв, прочее время земна́го странствия моего в послушании Церкви Сына Твоего без порока прейти сподоблюся. В час же кончины моея предста́ни мне, всех христиан упование сущи, и веру мою во оный тяжкий день утверди, а по отшествии моем всесильную молитву Твою о мне вознеси, да помилует мя Господь и причастна мя Его безконечных радостей да сотворит во веки веков.

Молитва 5, чтомая в Нижегородском Крестовоздвиженском монастыре

О Пресвятая Госпоже, Владычице, Дево Богородице! Приими недостойную молитву нашу, и сохрани нас от напрасныя смерти, и даруй нам прежде конца покаяние.

Молитва 6, чтомая в соборней церкви града Козельца̀, Черниговския епархии

О Пресвятая Мати Дево, Владычице Славная и Царице Преблагая, премiрных умов всекрасная Радосте, мiрных же неложная Наставнице, преукрашенная Божественною славою неизглаголанныя Твоея чистоты, седмопечатленная Книго, в нейже написася нам Преблагое Слово, Единородный Сын Божий! О сладкий милосердия ко всему мiру Источниче! О Светлосте Небесная! О Сладосте райская! О Преблагословенная Богородице Приснодево и Покрове всем к Тебе прибегающым, дев Славо и всех святых Веселие! Буди и мне грешному всегдашнее упование, неплоднаго же моего сердца исцели болезнь, и душевныма очима моима подаждь светлость. Тебе бо, Дево Госпоже препрославленная, предаю по Бозе всю жизнь мою и всех блажащих Тя, едину Богородицу Деву Чистую и Царицу Небесную, яко Ты благословена еси во веки веков.

Тропари, глас 1

  1. Дерзость ненавидящих образ Господень и держава нечестивых безбожно в Никею прииде, и по́сланнии безчеловечно вдовицу, благочестно чтущую икону Богоматере, истязуют. Но тая но́щию с сыном икону в море пусти, вопиющи: слава, Тебе, Чистая, яко непроходимое море плещы̀ Своя подаде: слава правошествию Твоему, едина Нетленная.
  2. О святыя иконы Твоея, о Владычице Богородице, исцеление и цельбы подаются обильно с верою и любовию приходящым к ней: тако и мою немощь посети, и душу мою помилуй, Благая, и тело исцели благодатию Твоею, Пречистая.

Величание

Величаем Тя, Пресвятая Дево, Богоизбранная Отроковице, и чтем образ Твой святый, имже точиши исцеления всем с верою притекающым.

Октоврия 17. Молитва пред чудотворною иконою Пресвятыя Богородицы, именуемая прежде Рождества и по Рождестве Дева, в Николо-Пешно́шском монастыре, Московския епархии

О Пресвятая Госпоже Владычице Богородице! Вы́шши еси всех ангел и архангел, и всея твари честнейши: Помощница еси обидимых, ненадеющихся надеяние, убогих Заступница, печальных утешение, алчущих Кормительница, нагих одеяние, больных исцеление, грешных спасение, христиан всех поможение и заступление. О Всемилостивая Госпоже, Дево Богородице Владычице! Милостию Твоею спаси и помилуй благочестивейшаго, самодержавнейшаго, великаго государя нашего, императора Николая Александровича всея России: супругу его, благочестивейшую государыню императрицу Александру Феодоровну: матерь его благочестивейшую государыню императрицу Марию Феодоровну: наследника его, благовернаго государя цесаревича и великаго князя Алексия Николаевича, и весь царствующий дом. Спаси, Госпоже, и помилуй раб Твоих, святейший правительствующий синод, и преосвященныя митрополиты, архиепископы и епископы, и весь священнический и иноческий чин, и благоверных правительствующий синклит, и военачальники, градоначальники и христолюбивое воинство, и доброхоты, и вся православныя христианы ризою Твоею честною защити: и умоли, Госпоже, из Тебе без семене воплотившагося Христа Бога нашего, да препояшет нас силою Своею свыше на невидимыя и видимыя враги нашя. О Всемилостивая Госпоже Владычице Богородице! Воздвигни нас из глубины греховныя, и избави нас от глада, губительства, от труса и потопа, от огня и меча, от нахождения иноплеменных и междоусобныя брани, и от внезапныя смерти, и от нападения вражия, и от тлетворных ветр, и от смертоносныя язвы, и от всякаго зла. Подаждь, Госпоже, мир и здравие рабом Твоим, всем православным христианом, и просвети им ум и очи сердечныя, еже ко спасению: и сподоби ны, грешныя рабы Твоя, Царствия Сына Твоего, Христа Бога нашего: яко держава Его благослове́на и препросла́влена, со Безначальным Его Отцем, и с Пресвятым и Благим и Животворящим Его Духом, ныне и присно и во веки веков.

Октоврия 17. Молитва пред иконою Пресвятыя Богородицы, именуемая Изба́вительница

Царице моя Преблагая, Надеждо моя Пресвятая, Прибежище сирым и странным Заступнице, бедствующих Помоще и озлобляемых Покрове! Зриши мою напасть, зриши мою скорбь: отвсюду искушением одержимь есмь, и заступающаго несть у мене. Ты убо сама помози ми яко немощну, направи мя яко странна, настави яко заблуждша, уврачуй и спаси яко безнадежна. Не имам бо иныя помощи, ни инаго предстательства, ни утешения, токмо Тебе, о Мати всех скорбящих и обремененных! Призри убо на мя грешнаго и во озлоблении сущаго, и покрый мя пресвятым омофором Твоим, да избавлен буду от зол, мя обышедших, и восхвалю всегда препетое имя Твое.

Октоврия 22 и иулиа 8. Молитвы пред иконою Пресвятыя Богородицы Казанскою

Молитва 1, из акафиста

О Пресвятая Госпоже, Владычице Богородице! Со страхом, верою и любовию пред честною [и чудотворню] иконою Твоею припа́дающе, молим Тя: не отврати лица Твоего от прибегающих к Тебе. Умоли, милосердая Мати, Сына Твоего и Бога нашего, Господа Иисуса Христа, да сохранит мирну страну нашу, да утвердит державу благочестивейшего, самодержавнейшаго, великаго государя нашего, императора Николая Александровича, Церковь же Свою святую непоколебиму да соблюдет, и от неверия, ересей и раскола да избавит. Не имамы бо иныя помощи, не имамы иныя надежды, разве Тебе, Пречистая Дево: Ты еси всесильная христиан Помощница и Заступница. Избави же и всех, с верою Тебе молящихся, от падений греховных, от навета злых человек, от всяких искушений, скорбей, болезней, бед и от внезапныя смерти. Даруй нам дух сокрушения, смирение сердца, чистоту помышлений, исправление греховныя жизни и оставление прегрешений, да вси, благодарне воспевающе величия и милости Твоя, являемыя над нами зде на земли, сподобимся и Небеснаго Царствия, и тамо со всеми святыми прославим пречестное и великолепое имя Отца и Сына и Святаго Духа во веки веков.

Молитва 2

О Пресвятая Госпоже Владычице Богородице! Вы́шши еси всех ангел и архангел, и всея твари честнейши: Помощница еси обидимых, ненадеющихся надеяние, убогих Заступница, печальных утешение, алчущих Кормительница, нагих одеяние, больных исцеление, грешных спасение, христиан всех поможение и заступление. О Всемилостивая Госпоже, Дево Богородице Владычице! Милостию Твоею спаси и помилуй благочестивейшаго, самодержавнейшаго, великаго государя нашего, императора Николая Александровича всея России: супругу его, благочестивейшую государыню императрицу Александру Феодоровну: матерь его благочестивейшую государыню императрицу Марию Феодоровну: наследника его, благовернаго государя цесаревича и великаго князя Алексия Николаевича, и весь царствующий дом. Спаси, Госпоже, и помилуй раб Твоих, святейший правительствующий синод, и преосвященныя митрополиты, архиепископы и епископы, и весь священнический и иноческий чин, и благоверных правительствующий синклит, и военачальники, градоначальники и христолюбивое воинство, и доброхоты, и вся православныя христианы ризою Твоею честною защити: и умоли, Госпоже, из Тебе без семене воплотившагося Христа Бога нашего, да препояшет нас силою Своею свыше на невидимыя и видимыя враги нашя. О Всемилостивая Госпоже Владычице Богородице! Воздвигни нас из глубины греховныя, и избави нас от глада, губительства, от труса и потопа, от огня и меча, от нахождения иноплеменных и междоусобныя брани, и от внезапныя смерти, и от нападения вражия, и от тлетворных ветр, и от смертоносныя язвы, и от всякаго зла. Подаждь, Госпоже, мир и здравие рабом Твоим, всем православным христианом, и просвети им ум и очи сердечныя, еже ко спасению: и сподоби ны, грешныя рабы Твоя, Царствия Сына Твоего, Христа Бога нашего: яко держава Его благослове́на и препросла́влена, со Безначальным Его Отцем, и с Пресвятым и Благим и Животворящим Его Духом, ныне и присно и во веки веков.

Молитва 3

Приими, Всеблагомощная, Пречистая Госпоже:

Молитва 4

Царице моя Преблагая, Надеждо моя Богородице, прибежище сирых и странных Предстательнице, скорбящих Радосте, обидимых Покровительнице! Зри́ши мою беду, зри́ши мою скорбь: помозѝ ми яко не́мощну, направи мя яко стра́нна. Обиду мою ве́си,  разрешѝ ту, якоже во́лиши: яко не и́мам иныя помощи разве Тебе, ни ины́я Предстательницы, ни Благи́я Уте́шительницы, токмо Тебе, о Богомати, яко да сохрани́ши мя и покры́еши во веки веков.

Молитва 5

О Пресвятая Дево, Мати Христа Бога нашего, Царице небесе и земли! Вонми многоболезненному воздыханию душ наших, призри с высоты святыя Твоея на нас, с верою и любовию поклоняющихся пречистому [и чудотворному] образу Твоему. Се бо грехми погружаемии и скорбьми обуреваемии, взирающе на Твой образ, яко живей Тебе сущей с нами, приносим смиренная моления наша. Не имамы иныя помощи, ни инаго предстательства, ни утешения, токмо Тебе, о Мати всех скорбящих и обремененных! Помози нам немощным, утоли скорби нашя, настави на путь правый нас заблуждающих, уврачуй болезненная сердца наша и спаси безнадежных, даруй нам прочее время жития нашего в мире и покаянии проводити, подаждь христианскую кончину, и на Страшнем Суде Сына Твоего явися нам милосердая Предстательница, да всегда поем, величаем и славим Тя, яко благую Заступницу рода христианскаго, со всеми угодившими Богу, во веки веков.

Молитва 6

О Пресвятая Дево, Мати Господа Вышняго, Заступнице и Покрове всех к Тебе прибегающих! Призри с высоты святыя Твоея на мя грешнаго, припадающаго ко пречистому [и чудотворному] образу Твоему: услыши мою теплую молитву и принеси ю̀ пред возлюбленнаго Сына Твоего, Господа нашего Иисуса Христа: умоли Его, да озаритмрачную душу мою светом Божественныя благодати Своея, да избавит мя от всякия нужды, скорби и болезни, да низпо́слет мне тихое и мирное житие, здравие телесное и душевное, да умирит страждущее сердце мое и исцелит раны его, да наставит мя на добрая дела, ум мой убо от помышлений суетных да очистит, исполнению же заповедей Своих мя научив, от вечныя муки да избавит и Своего Небеснаго Царствия да не лишит мя. О Пречистая Богородице! Ты, всех скорбящих Радосте, услыши и мя скорбнаго: Ты, именуемая Утоление печали, утоли и мою печаль: Ты, Купино неопалимая, сохрани мiр и всех нас от вредоносных огненных стрел врага: Ты, взыскание погибших, не попусти и мне погибнути в бездне грехов моих, на Тя бо по Бозе вся моя надежда и упование. Буди мне в жизни временней Заступница и о жизни вечней пред возлюбленным Сыном Твоим, Господем нашим Иисусом Христом  Ходатаица. Научи мя убо Тому̀ с верою и любовию служити, Тебе же, Пресвятая Мати Божия, преблагословенная Марие, благоговейно чтити до скончания дней моих.

Молитва 7

О Пречистая Госпоже Владычице Богородице! Приими недостойную молитву нашу, и сохрани нас от навета злых человек и от внезапныя смерти, и даруй нам прежде конца покаяние. На моление наше умилосердися, и радость вместо печали даруй. И избави нас, Госпоже, от всякия беды̀ и напасти, скорби и болезни и от всякаго зла. И сподоби ны, грешныя рабы Твоя, одесную стати во втором пришествии Сына Твоего, Христа Бога нашего, и наследники быти Царствия Небеснаго и жизни вечныя со всеми святыми в безконечныя веки веков.

Молитва 8

К кому возопию, Влалычице? К кому прибегну в горести моей, аще не к Тебе, Царице Небесная? Кто плачь мой и воздыхание приимет, аще не Ты, Пренепорочная, Надеждо христиан и Прибежище? Кто паче Тебе в напастех защитит? Услыши убо стенание мое, и приклони ухо Твое ко мне, Влалычице Мати Бога моего, и не презри мене требующаго Твоея помощи, и не отрини мене грешнаго. Вразуми и научи мя, Царице Небесная: не отступи от мене раба Твоего, Владычице, за роптание мое, но буди мне Мати  Заступница. Вручаю себе милостивому покрову Твоему: приведи мя грешнаго к тихой и безмятежней жизни, да плачуся о гресех моих. К кому прибегну повинный аз, аще не к Тебе, упованию и прибежищу грешных, надеждою на неизреченную милость Твою и щедроты Твоя окриляемь; О Владычице Царице Небесная! Ты мне упование и прибежище, покров и заступление и помощь. Царице моя преблагая и скорая Заступнице: покрый Твоим ходатайством моя прегрешения, защити мене от враг видимых и невидимых: умягчи сердца злых человек, возстающих на мя. О Мати Господа моего Творца! Ты еси корень девства и неувядаемый цвет чистоты. О Богородительнице! Ты подаждь ми помощь немощствующему плотски́ми страстьми и болезнующему сердцем, едино бо Твое и с Тобою Твоего Сына и Бога нашего имам заступление: и Твоим пречудным заступлением да избавлюся от всякия беды и напасти, о Пренепорочная и Преславная Божия Мати Марие. Темже со упованием глаголю и вопию: радуйся Благодатная: радуйся Обрадованная: радуйся, Преблагословенная, Господь с Тобою.

Ке́домо буди, яко в некиих храмех молитва сия, или именуемая песнь Пресвятей Богородице, поется во гласе 5.

Молитва 9, чтомая в Казанском девичем монастыре

О Пресвятая Владычице Богородице, Царице небесе и земли, вышшая Ангел и Архангел и всея твари Честнейшая, Чистая Дево Марие, мiру Благая Помощнице, и всем людем утверждение, и во всяких нуждах избавление! Призри и ныне, Госпоже Всемилостивая, на рабы Твоя, Тебе умиленною душею и сокрушенным сердцем молящыяся, со слезами к Тебе припадающыя и покланяющыяся пречистому и цельбоносному образу Твоему, и помощи и заступления Твоего просящыя. О Всемилостивая и Премилосердая Дево Богородице Чистая! Воззри, Госпоже, на люди Твоя: мы бо грешнии не имамы иныя помощи, разве Тебе и от Тебе рождшагося Христа Бога нашего. Ты еси Заступница и Предстательница наша, Ты еси обидимых защищение, скорбящым радование, сирым прибежище, вдовам Хранительница, девам слава, плачущым веселие, больным посещение, немощным исцеление, грешным спасение. Сего ради, о Богомати, к Тебе прибегаем, и на Твой пречистый образ с Предвечным на руку Твоею держимым Младенцем, Господем нашим Иисусрм Христом взирающе, умиленное пение Тебе приносим и вопием: помилуй нас, Мати Божия, и прошение наше исполни, вся бо суть возможна ходатайству Твоему: яко Тебе слава подобает ныне и присно и во веки веков.

Тропарь, глас 4

Заступнице усердная, Мати Господа Вышняго! За всех молиши Сына Твоего, Христа Бога нашего, и всем твориши спастися, в державный Твой покров прибегающым. Всех нас заступи, о Госпоже Царице и Владычице, иже в напастех и в скорбех и в болезнех, обремененных грехи многими, предстоящих и молящихся Тебе умиленною душею и сокрушенным сердцем, пред пречистым Твоим образом со слезами, и невозвратно надежду имущих на Тя, избавления всех зол. Всем полезная даруй, и вся спаси, Богородице Дево: Ты бо еси Божественный покров рабом Твоим.

Октоврия 24. Молитвы пред иконою Пресвятыя Богородицы Всех скорбящих радости

Молитва 1, из акафиста

О Пресвятая Владычице и Богородице, вышшая Херувим и честнейшая Серафим, Богоизбранная Отроковице, всех скорбящих радосте! Подаждь утешение и нам, в скорби сущым: разве бо Тебе иного прибежища и помощи не имамы. Ты едина еси радости нашея Ходатаица, и яко Мати Божия и Мати милосирдия, предстоящи у Престола Пресвятыя Троицы, моднши нам помощѝ: никтоже бо притекаяй к Тебе посрамлен отходит. Услыши убо и нас, ныне в день скорби пред Твоею иконою припабающих и со слезами Тебе молящихся: отжени от нас належащыя скорби и печали в сей временней жизни, не лише́ны же сотвори ны Твоим всесильным ходатайством и вечныя нескончаемыя радости во Царствии Сына Твоего и Бога нашего, Емуже подобает всякая слава, честь и поклонение, со Безначальным Его Отцем, и со Пресвятым и Благим и Животворящим Его Духом, ныне и присно и во веки веков.

Молитва 2, из акафиста

Царице моя Преблагая, Надеждо моя Богородице, прибежище сирых и странных Предстательнице, скорбящих Радосте, обидимых Покровительнице! Зри́ши мою беду, зри́ши мою скорбь: помозѝ ми яко не́мощну, направи мя яко стра́нна. Обиду мою ве́си,  разрешѝ ту, якоже во́лиши: яко не и́мам иныя помощи разве Тебе, ни ины́я Предстательницы, ни Благи́я Уте́шительницы, токмо Тебе, о Богомати, яко да сохрани́ши мя и покры́еши во веки веков.

Молитва 3

Надеждо ненадежных, Сило безпомощных, Пристанище обуреваемых, Покрове напаствуемых, Заступление обидимых, Небесная Манно, услаждающая алчущыя, питие небеснаго упокоения жаждущым, Мати Преблагословеннаго Христа Бога, Преблагословенная и Пренепорочная Дево! К Тебе усердно прибегаем, ко Твоему покрову вседушно колена преклоняем. Не презри убо плача и слез наших. Аще недостоинство наше и окаянство наших грехов нас ужасает, но цельбоносный сей святый Твой образ, на немже благодать Твою и силу, яко неисчерпаемое море, видим, паки надеждою спасения ны исполняет. Вемы бо на месте семслепыя прозревшя, глухия прежде послежде слышащя, нудугующыя исцеление приимшя, скорбящыя уте́шены, вся по всякому прошению благоизобильствующя. На оных помилования бывшая взирающе, сле́пи суще душевныма очи́ма и хро́ми душевными чувствы, ныне зде прибегохом. Просвети убо и исправи ны, Владычице: веси бо всякую нашу скорбь и всякую беду. Не презри молений наших, не возгнушайся нас грешных: вемы бо, яко вся можеши, елика волиши, о Преблагая наша Надеждо и Утешение! От юности нашея к Тебе привержени есмы: не остави убо нас, ниже отступи от нас ныне и присно и во веки веков.

Молитва 4

О Пресвятая Дево, Мати Христа Бога нашего, Царице небесе и земли! Вонми многоболезненному воздыханию душ наших, призри с высоты святыя Твоея на нас, с верою и любовию поклоняющихся пречистому [и чудотворному] образу Твоему. Се бо грехми погружаемии и скорбьми обуреваемии, взирающе на Твой образ, яко живей Тебе сущей с нами, приносим смиренная моления наша. Не имамы иныя помощи, ни инаго предстательства, ни утешения, токмо Тебе, о Мати всех скорбящих и обремененных! Помози нам немощным, утоли скорби нашя, настави на путь правый нас заблуждающих, уврачуй болезненная сердца наша и спаси безнадежных, даруй нам прочее время жития нашего в мире и покаянии проводити, подаждь христианскую кончину, и на Страшнем Суде Сына Твоего явися нам милосердая Предстательница, да всегда поем, величаем и славим Тя, яко благую Заступницу рода христианскаго, со всеми угодившими Богу, во веки веков.

Молитва 5

О Пречистая Госпоже Владычице Богородице! Приими недостойную молитву нашу, и сохрани нас от навета злых человек и от внезапныя смерти, и даруй нам прежде конца покаяние. На моление наше умилосердися, и радость вместо печали даруй. И избави нас, Госпоже, от всякия беды̀ и напасти, скорби и болезни и от всякаго зла. И сподоби ны, грешныя рабы Твоя, одесную стати во втором пришествии Сына Твоего, Христа Бога нашего, и наследники быти Царствия Небеснаго и жизни вечныя со всеми святыми в безконечныя веки веков.

Молитва 6

К кому возопию, Влалычице? К кому прибегну в горести моей, аще не к Тебе, Царице Небесная? Кто плачь мой и воздыхание приимет, аще не Ты, Пренепорочная, Надеждо христиан и Прибежище? Кто паче Тебе в напастех защитит? Услыши убо стенание мое, и приклони ухо Твое ко мне, Влалычице Мати Бога моего, и не презри мене требующаго Твоея помощи, и не отрини мене грешнаго. Вразуми и научи мя, Царице Небесная: не отступи от мене раба Твоего, Владычице, за роптание мое, но буди мне Мати  Заступница. Вручаю себе милостивому покрову Твоему: приведи мя грешнаго к тихой и безмятежней жизни, да плачуся о гресех моих. К кому прибегну повинный аз, аще не к Тебе, упованию и прибежищу грешных, надеждою на неизреченную милость Твою и щедроты Твоя окриляемь; О Владычице Царице Небесная! Ты мне упование и прибежище, покров и заступление и помощь. Царице моя преблагая и скорая Заступнице: покрый Твоим ходатайством моя прегрешения, защити мене от враг видимых и невидимых: умягчи сердца злых человек, возстающих на мя. О Мати Господа моего Творца! Ты еси корень девства и неувядаемый цвет чистоты. О Богородительнице! Ты подаждь ми помощь немощствующему плотски́ми страстьми и болезнующему сердцем, едино бо Твое и с Тобою Твоего Сына и Бога нашего имам заступление: и Твоим пречудным заступлением да избавлюся от всякия беды и напасти, о Пренепорочная и Преславная Божия Мати Марие. Темже со упованием глаголю и вопию: радуйся Благодатная: радуйся Обрадованная: радуйся, Преблагословенная, Господь с Тобою.

Ке́домо буди, яко в некиих храмех молитва сия, или именуемая песнь Пресвятей Богородице, поется во гласе 5.

Молитва 7

Приими о Всеблагословенная и Всемощная Госпоже Владычице Богородице Дево, сия молитвы, со слезамиТебе ныне приносимыя от нас недостойных раб Твоих, ко Твоему цельбоносному образу пение возсылающих со умилением, яко тебе Самой зде сущей и внемлющей молению нашему. По коемуждо бо прошению исполнение твориши, скорби облегчаеши, немощным здравие даруеши, разслабленныя и недужныя исцеляеши, от бесных бесы прогоняеши, обидимыя от обид избавляеши, прокаженныя очищаеши и малыя дети милуеши: еще же, Госпоже Владычице Богородице, и от уз и темниц свобождаеши и всякия многоразличныя страсти врачуеши: вся бо суть возможна ходатайством Твоим к Сыну Твоему, Христу Богу нашему. О Всепетая Мати, Пресвятая Богородице! Не престай молитися о нас недостойных рабех Твоих, славящих Тя и почитающих Тя, и покланяющихся со умилением пречистому образу Твоему, и надежду имущих невозвратну и веру несумненну к Тебе, Приснодеве Преславней и Непорочней, ныне и присно и во веки веков.

Молитва 8, чтомая в Скорбященской кладбищенской церкви града Рязани

О Пресвятая Владычице Богородице, Преблагословенная Мати Христа Бога Спасителя нашего, всех скорбящих Радосте, больных посещение, немощных Покрове и Заступнице, вдовиц и сирых Покровительнице, матерей печальных всенадежная Утешительнице, младенцев немощных крепосте, и всем безпомощным всегда готовая помоще и верное прибежище! Тебе, о Всемилостивая, дадеся от Всевышняго благодать во еже всех заступати и избавляти от скорби и болезней, зане Сама лютыя скорби и болезни претерпела еси, взирающе на больное страдание Сына Твоего возлюбленнаго и Того на Кресте распинаема зрящи, егда оружие симеоном предреченное сердце Твое про́йде. Темже убо, о Мати чадолюбивая, вонми гласу моления нашего, уте́ши нас в скорби сущих, яко верная радости Хода́таица. Предстоящи Престолу Пресвятыя Троицы, одесную Сына Твоего, Христа Бога нашего, можеши, аще восхощеши, вся намполезная испросити. Сего ради с верою сердечною и любовию от души припадаем к Тебе яко Царице и Владычице, и псаломски вопити Тебе дерзаем: слыши, Дщи, и виждь, и приклони ухо Твое, услыши моление наше, и избави нас от обстоящих бед и скорбей: Ты бо прошения всех верных, яко скорбящих радость, исполняеши, и душам их мир и утешение подае́ши. Се зриши беду нашу и скорбь: яви нам милость Твою, послѝ утешение уя́звленному печалию сердцу нашему, покажи и удиви на нас грешных богатство милосердия Твоего, подаждь нам слезы покаяния ко очищению грехов наших и утолению гнева Божия, да с чистым сердцем, совестию благою и надеждою несумненною прибегаем ко Твоему ходатайству и заступлению. Приими, Всемилостивая наша Владычице Богородице, усердное наше моление Тебе приносимое, и не отрини нас недостойных от Твоего благосердия, но подаждь нам избавление от скорби и болезни, защити нас от всякаго навета вражия и клеветы человеческия, буди нам Помощница неотступная во вся дни жизни нашея, яко да под Твоим Матерним покровом всегда пребудем це́ли и сохране́ни Твоим заступлением и молитвами к Сыну Твоему и Богу Спасителю нашему, Емуже подобает всякая слава, честь и поклонение, со Безначальным Его Отцем и Святым Духом, ныне и присно и во веки веков.

Молитва 9, чтомая в Нижегородском Крестовоздвиженском монастыре

О Пресвятая Госпоже Владычице Богородице! Со страхом многим и верою и любовию приносяще благодарственная пения, молимся Ти пред сею чудотворною иконою, дивными чудесы просиявшею: не затвори нам грешным щедрот Твоих, Всенепорочная, не отвержи нас прибегающих к Тебе, Милосердая. Умоли Твоего Сына и Бога, Господа нашего Иисуса Христа, да Своею благодатию возставит, устроит и хранит обитель сию ко спасению душ, Ему уневестившихся. Сама же, яко Благая Мати Вышняго, пребуди неотступна от обители сея, сущаго достояния Твоего, и всесильными Твоими мольбамипокрый и затупи зде подвизающыяся от всех бед и нужд душевных и телесных. Не имамы бо иныя помощи, не имамы иныя надежды, разве Тебе, Пречистая Дево. Темже смиренно припадающе, молим Тя, Преблагословенная Владычице: приими милостивно молитвы, прошения и благодарения всех с верою притекающих к честному Твоему образу, избавляй их от падения греховнаго, от навета злых человек, от скорбей и бед, от внезапныя смерти и вечных мук, и даруй им дух сокрушения, смирение сердца, чистоту ума и оставление прегрешений, да вси мы, благодарно Тя воспевающии, сподобимся Небеснаго Царствия, и тамо со всеми святыми да славим пречестное и великолепое им Отца и Сына и Святаго Духа во веки веков.

Молитва 10, чтомая в Высокогорской пустыни, Нижегородския епархии

О Всемилостивая и Премилосердая Госпоже Царице Богородице! Ты еже восхощеши, о всем упросити можеши Сына Твоего, Христа Бога нашего. Приими убо моление мое, и не отрини от Твоего заступления мене паче всех человек грешнейшаго: подаждь ми свобождение от бед и скорбей, избави мене, Всепречистая, от видимых и невидимых враг и от злых человек клевещущих на мя, не попусти мне погибнуги от глада, меча, труса, потопа и огня, и буди мне Помощница неоскудна, яко да под Твоим кровом всегда сохране́н буду и Твоим молением в Страшный день Суда неосужден предстану Сыну Твоему и Богу нашему, Емуже подобает слава и держава, со Безначальным Отцем и Святым Духом, ныне и в безконечныя веки веков.

[Из рукописнаго акафиста.]

Молитва 11, чтомая в Вознесенском соборе града Самары

О Пресвятая Владычице Богородице, Богоизбранная Отроковице, всех скорбящих Радосте! Подаждь утешение нам в скорби сущым: отжени от нас печали, болезни, искушения и всякия напасти вражия: услыши нас грешных, припадающих пред Твоею всечестною иконою с сокрушенным сердцем, и Твоим всесильным ходатайством сподоби нескончаемыя радости во Царствии Сына Твоего и Бога нашего во веки веков.

Молитва 12, чтомая в церкви села Мурзиц, Симбирския епархии

Владычице, Пресвятая Богородице, Небесная Царице, Преизрядная Отроковице, ненадеющымся надеяние, болящым исцеление, сирым Предстательнице, странным прибежище, нагим одеяние, скорбящым утешение и Радосте, обидимым Покровительнице и всем сущым в бедах и напастех скорое вспоможение и заступление! О Всемилостивая Госпоже, Дево Богородице! Зриши бе́ды нашя, скорби и напасти: помози нам бедным и страждущым, печальным и унылым, скорбящым и отчаянным, отъими от нас всякую печаль, управи нас яко странных. Обиды нашя ве́си, Непорочная, и помощѝ нам, аще во́лиши, мо́жеши. Не даждь убо Госпоже, нам во отчаяние впа́сти: не имамы бо иныя помощи, разве Сына Твоего, Превечнаго Бога, Спаса Христа, и иныя Предстательницы и Утешительницы, разве Тебе, о Владычице, о Заступнице, о Дево Богоизбранная, о Царице всея твари, Голубице Пречестная. Темже на Твой пречистый образ взирающе, со воздыханием и сокрушением сердца преклоняем главы и колена наша и молимся сице: призри благосердием, Всепетая Богородице, услыши, Преблагая, не отрини нас, но благоволи помиловати, и не отвержи наших воздыханий: никтоже бо притекаяй к Тебе посрамлен от тебе исходит, но просит благодати и приемлет милость. Умоли, Госпоже Царице Владычице, Дево Марие, Превечнаго Бога, Господа и Спаса нашего Иисуса Христа, о всех нас с верою Тебе покланяющихся и молящихся: соблюди же во здравии, долгоденствии и благополучнем пребывании благочестивейшаго, самодержавнейшаго, великаго государя нашего, императора Николая Александровича, престол его утверди в сиянии славы, яко солнце пред Тобою, и весь род его сохрани в наследии непрестаемем: державу царствия его миром огради и плодов земных изобилием обогати. Образ же сей лица Твоего да будет нам стена и забрало и утверждение, врагом же нашым страх и поражение: на негоже мы вми людие Твои взирающе, да приимем в недузех наших исцеление. Покрый же и избави нас от всякаго нахождения скорби и печали. Тебе молимся и мили ся деем, образ Твой святый целу́юще: помилуй, покрый и соблюди и огради Твоим заступлением, и настави на на путь спасения в сем ве́це, и в будущем вечныя изьми муки: яко благословена еси и препрославлена ныне, всегда и в безконечныя веки веков.

Молитва 12, чтомая в тойже церкви

О Пресвятая Госпоже, Владычице Дево Богородице, Небеснаго Царя Мати! Приими от нас приносимое Тебе сие малое похвальное пение: Ты бо еси Святейшая всех святых Ангел и Архангел и всея твари Честнейшая, ненадеющымся надеяние, болящым исцеление, сирым Предстательница, странным прибежище, нагим одеяние, скорбящым утешение и Радость, обидимым Покровительнице и всем сущым в бедах и напастех скорое поможение и заступление! Темже святей Твоей иконе покланяющеся, молимся Тебе, умильно взывающе: Владычице Пресвятая, избави ны грешныя и недостойныя рабы Твоя от всяких бед, напастей, скорбей же и недугов, и настави нас на путь спасения в нынешнем ве́це, в будущем же изьми муки вечныя, и сподоби ны Небеснаго Царствия Сына Твоего и Бога нашего: яко благословися и прославися имя Твое во веки веков.

Тропари общия Пресвятей Богородице, глас 4

  1. К Богородице ныне прилежно притецем гре́шнии и смире́ннии, и припаде́м, в покаянии зовуще из глубины душѝ: Владычице, помози, на ны милосердовавши: потщися, погибаем от множества прегрешений: не отврати рабы Твоя тщы̀, Тя бо и едину надежду имамы.
  2. Не умолчим никогда, Богородице, силы Твоя глаголати недостойнии: аще бо Ты не бы̀ предстояла моля́щи, кто бы нас избавил от толиких бед? Кто же бы сохранил до ныне свободны? Не отступим, Владычице, от Тебе: Твоя бо рабы спасаеши присно от всяких лютых.

Ин тропарь, глас 8, поемый в Московской Вознесенской, на Царицыной улице, церкви

Ко источнику приснотекущему милосердия, Пречистей Деве Богордице, притецем людие вси, царие и князи, священницы же и иноцы, мужие и жены и чада, богатии и нищии, здравии и болящии, в пркаянии вопиюще и умильно глаголюще: Владычице, помози грешным рабом Твоим, яви яко Благая славу Твою, присно потщися умилосердися на ны, испросити очищение душ и телес наших от источника жизни нашея Бога, Егоже родила еси, едина Благословенная.

Тропарь, глас 4, поемый в соборной Воскресенской, града Одоева, церкви

Днесь пресветло красуется славнейший град Москва, имея чудотворную икону Владычицы нашея Богородицы: Та бо верным являющи чудеса, низпосылает дары целебныя. Сего ради и мы с верою припадающе молимся, и на Тоя пречистый образ взирающе, яко истинную самую зрим Владычицу нашу Приснодеву Богородицу, и умильно глаголем: воззри, Мати Божия, оком милости, простри к наму ру́це Твои пречистыя, якоже на иконе Твоей сие зрится, и подаждь всем скорбящым радость, больным от всех недугов исцеление и от бед избавление, яко Ты еси скорая Предстательница о душах наших.

Стихира, глас 2, поемая на молебне вместо тропаря

Всех скорбящих Радосте, и обидимых Заступнице, и алчущих Питательнице, странных утшение, обуреваемых пристанище, больных посещение, немощных покрове и Заступнице, жезле старости, Мати Бога Вышняго Ты еси, Пречистая: потщися, молимся, спастися рабом Твоим.

Месяц ноембрий

Молитвы пред иконою Пресвятыя Богородицы, именуемою Скоропослушница

Молитва 1, из акафиста

Преблагословенная Владычице, Приснодево Богородице, Бога Слова паче всякаго слова на спасение наше рождшая, и благодать Его преизобильно паче всех приимшая, море неисчерпаемое Божественных дарований явльшаяся и чудес приснотекущая река, изливающая благость всем в верою к Тебе прибегающым! Твоему чудотворному образу припадающе, молимся Тебе, Всещедрей человеколюбиваго Владыки Матери: удивина нас пребогатыя милости Твоя, и прошения наша, приносимая Тебе, Скоропослушнице, исполнити ускори, вся яже на пользу, во утешение и спасение коемждо устрояющи. Посети, Преблагая, рабы Твоя благодатию Твоею, и подаждь недугующым це́льбу и совершенное здравие, обуреваемым тишину, плененным свободу, и различными образы страждущыя утеши. Избави, Всемилостивая Госпоже, всяк град и страну от глада, язвы, труса, потопа, огня, меча и иныя казни временныя и вечныя, матерним Твоим дерзновением гнев Божий отнас отвращающи: такожде и от душевнаго разслабления, обуревания страстей и грехопадений свободи рабы Твоя, яко да непоткновенно во всяком благочестии поживше в сем веце, и в будущем вечных благ сподобимся, благодатию и человеколюбием Сына Твоего и Бога, Емуже подобает всякая слава, честь и поклонение, со Безначальным Его Отцем и Пресвятым Духом, ныне и присно и во веки веков.

Молитва 2

О Пресвятая Дево, Мати Господа Вышняго, скоропослушная Заступнице всех, к Тебе с верою прибегающих! Призри с высоты Небеснаго величия Твоего на мя непотребнаго, ко святей иконе Твоей припа́дающа: услыши скоро смиренную молитву мене грешнаго и принеси ю̀ к Сыну Твоему: умоли Его да озарит мрачную душу мою светом Божественныя благодати Своея и очистит ум мой от помыслов суетных, да умирит страждущее мое сердце и исцелит раны его, да вразумит мя на добрая дела̀ и укрепит работати ему со страхом, да простит вся содеянная мною злая, да избавит от вечныя муки и не лишит Небеснаго Своего Царствия. О Преблагословенная Богородице! Ты благоизволила еси нарещися во образе Твоем Скоропослушница, повелевающи всем притекати к Тебе с верою: не презри убо мене скорбнаго и не попусти погибнути мне в бездне грехов моих. На Тя по Бозе все мое упование и надежда спасения, и Твоему покрову и предстательству вручаю себе во веки веков.

Тропарь, глас 4

К Богородице притецем  сущии в бедах, и ко святей иконе Ея ныне припаде́м, с верою зовуще из глубины души: скоро наше услыши моление, Дево, яко Скоропослушница нарекшаяся: Тебе бо раби Твои в нуждах готовую Помощницу имамы.

Ноембрия 21. Молитвы пред иконою Введение во храм Пресвятыя Богородицы

Молитва 1

О Пресвятая Госпоже Владычице Богородице! Вы́шши еси всех ангел и архангел, и всея твари честнейши: Помощница еси обидимых, ненадеющихся надеяние, убогих Заступница, печальных утешение, алчущих Кормительница, нагих одеяние, больных исцеление, грешных спасение, христиан всех поможение и заступление. О Всемилостивая Госпоже, Дево Богородице Владычице! Милостию Твоею спаси и помилуй благочестивейшаго, самодержавнейшаго, великаго государя нашего, императора Николая Александровича всея России: супругу его, благочестивейшую государыню императрицу Александру Феодоровну: матерь его благочестивейшую государыню императрицу Марию Феодоровну: наследника его, благовернаго государя цесаревича и великаго князя Алексия Николаевича, и весь царствующий дом. Спаси, Госпоже, и помилуй раб Твоих, святейший правительствующий синод, и преосвященныя митрополиты, архиепископы и епископы, и весь священнический и иноческий чин, и благоверных правительствующий синклит, и военачальники, градоначальники и христолюбивое воинство, и доброхоты, и вся православныя христианы ризою Твоею честною защити: и умоли, Госпоже, из Тебе без семене воплотившагося Христа Бога нашего, да препояшет нас силою Своею свыше на невидимыя и видимыя враги нашя. О Всемилостивая Госпоже Владычице Богородице! Воздвигни нас из глубины греховныя, и избави нас от глада, губительства, от труса и потопа, от огня и меча, от нахождения иноплеменных и междоусобныя брани, и от внезапныя смерти, и от нападения вражия, и от тлетворных ветр, и от смертоносныя язвы, и от всякаго зла. Подаждь, Госпоже, мир и здравие рабом Твоим, всем православным христианом, и просвети им ум и очи сердечныя, еже ко спасению: и сподоби ны, грешныя рабы Твоя, Царствия Сына Твоего, Христа Бога нашего: яко держава Его благослове́на и препросла́влена, со Безначальным Его Отцем, и с Пресвятым и Благим и Животворящим Его Духом, ныне и присно и во веки веков.

Молитва 2

К кому возопию̀, Влалычице? К кому прибе́гну в горести моей, аще не к Тебе, Царице Небесная? Кто плачь мой услышит и воздыхание приимет, аще не Ты, Пренепорочная, Надеждо христиан и Прибежище нам грешным? Кто паче Тебе в напа́стех защитит? Услыши стенание мое и приклони ухо Твое ко мне, Влалычице и Мати Бога моего. Не презри ищущаго Твоея помощи и не отри́ни мене грешнаго, Царице Небесная. Научи мене вою Сына Твоего исполня́ти и даруй желание Того святыя заповеди твори́ти. Роптания же моего ради, в скорбех бывшаго, не отступѝ от мене, но пребу́ди ми маловерному покров и заступление. Твоим ходатайством прегрешения моя покрый, от видимых и невидимых враг защити, сердца враждующих на мя умягчи и Христовою любовию сия согрей. Мне же немощному даруй Твою всесильную помощь, во еже греховныя моя страсти препобеди́ти, да покаянием и жития моего добрым исправлением очищен быв, прочее время земна́го странствия моего в послушании Церкви Сына Твоего без порока прейти сподоблюся. В час же кончины моея предста́ни мне, всех христиан упование сущи, и веру мою во оный тяжкий день утверди, а по отшествии моем всесильную молитву Твою о мне вознеси, да помилует мя Господь и причастна мя Его безконечных радостей да сотворит во веки веков.

Тропарь, глас 4

Днесь благоволения Божия предображение и человеков спасения проповедание: в храме Божии ясно Дева является и Христа всем предвозвещает. Той и мы велегласно возопиим: радуйся, смотрения Зиждителева исполнение.

Молитвы пред иконою Знамения Пресвятыя Богородицы, еже в Велицем Новеграде

Молитва 1, из акафиста

О Пресвятая и Преблагословенная Мати Сладчайшаго Господа нашего иисуса Христа! Припадаем и покланяемся Тебе пред святою чудотворною иконою Твоею, воспоминающе дивное знамение Твоего заступления. Великому Новуграду от нея явленное во дни ратнаго нань нашествия. Смиренно молим Тя, Всесильная рода нашего Заступнице: якоже древле Отцем нашым на помощь тогда ускори́ла еси, тако и ныне нас немощных и грешных Твоего матерняго заступления и благопопечения сподоби. Спаси и сохрани, Владычице, под кровом милости Твоея, благочестивейшаго государя нашего, императора Николая Алекстандровича всея России, и все христолюбивое его̀ воинство. Церковь святую утверди, град Твой, [обитель Твою] и всю страну нашу православную и всех нас, припадающих к Тебе с верою и любовию и умиленно просящих со слезами Твоего заступления, помилуй и сохрани. Ей, Госпоже Всемилостивая! Умилосердися на ны, обуреваемыя грехми многими, простри ко Христу Господу благоприимныя руце Твои и предстательствуй за нас пред благостию Его, просящи нам прощения прегрешений наших, благочестнаго мирнаго жития, благия христианския кончины и добраго ответа на Страшнем Суде Его: да спасаеми всесильными Твоими к Нему молитвами, блаженство райское унаследуем, и со всеми святыми воспоем пречестное и великолепое имя достопокланяемыя Троицы, Отца и Сына и Святаго Духа, и Твое велие к нам милосердие во веки веков.

Молитва 2

О Пресвятая Госпоже, Владычице наша Богородице, Небеснаго Царя Мати, наша же Затупнице и Помощнице, преизбранная Отроковице, ненадеющихся надеяние, больных исцеление, сирых Предстательнице, нагим одеяние, скорбящым утешение и радость, обидимым Покровительнице, всем сущым в бедах и напастех поможение и заступление! О Всемилостивая Госпоже, Дево Богородице Владычице! Ты зриши беды нашя, скорби и напасти: помози нам немощным, скверным и неисправленным, печальным и озлобленным: отъими от нас сию печаль, направи нас, яко странных: обиды нашя Ты веси, разреши их, якоже можеши и волиши. Не даждь, Госпоже, во отчаяние впасти: яко не имамы иныя Помощницы и Предстательницы, ни благия Утешительницы, токмо Тебе, о Владычице, Заступнице, Дево Богоизбранная, Царице всея твари! Темже на Твой пречестный образ Знамения с Предвечным Младенцем взирающе, целуем со воздыханием, и приклоняем главы и колена до земли. Призри благосердием, Всепетая Богородице: услыши Преблагая: не отрини, но благоволи помиловати: не отвержи нашего воздыхания. Никтоже бо, к Тебе притекаяй, посрамлен от Тебе исходит: но всяк просяй благодать и милость приемлет. Моли, Госпоже и Царице, Дево Марие, Мати Предвечнаго Младенца, Господа нашего Иисуса Христа, на руку Твоею держимаго, да Той спасет и соблюдет благовернаго императора нашего Николая Александровича и все наследие его, престол его миром да оградит, царство его плодов земных и всех благих изобилием обогатит, судом и правдою исправит, освятит и утвердит. Тебе молимся и мили ся деем, о Мати Всемилостивая: не презри моления рабов Твоих имярек, молящихся Тебе: помилуй, Владычице, покрый, соблюди, сохрани Твоим заступлением, и настави на путь спасения в сем ве́це, а в будущем вечныя изьми муки. Яко благословена и препрославлена еси ныне и всегда и в безконечныя веки веков.

Молитва 3

О Пресвятая Владычице Богородице! Призри с благосердием на моления нас грешных и смиренных рабов Твоих, и умолѝ Бога Сына Твоего, да ниспо́слет нам и всем притекающым к Тебе здравие душевное и телесное и вся к ве́чней и временней жизни потре́бная, да простит нам всякое согрешение вольное и невольное, да избавит нас от всяких скорбей и болезней, и напастей, и всякаго зла́го обстояния. Ей, Царице наша Преблагая, Надеждо наша несокрушимая и Заступнице необоримая! Не отвратѝ лица Твоего от нас за множество прегрешений наших: но прострѝ нам ру́це матерняго милосердия Твоего и сотвори с нами знамение во благо. Яви нам богатую помощь Твою и благопоспешѝ во всяком деле блазе: от всякаго же начинания греховнаго и помышления лукаваго отврати нас, да всегда славим пречестное имя Твое, и благодарне честному [или чудотворному] образу Твоему покланяющеся, величаем Бога Отца, и Единароднаго Сына Его, Господа нашего Ииисуса Христа, и Святаго Духа, со всеми святыми, во веки веков.

Молитва 4, чтомая в Новгородском Знаменском соборе

Пресвятая Дево, Мати Господа нашего, Царице небесе и земли! С верою и любовию пречистому образу Твоем покланяющеся, молим Тя: якоже Отцем нашым многажды в скорбех и напастех помощь Твою явила еси, тако и нас грешных сподоби Твоего матерняго покрова и заступления. Се вси мы, страстьми обуреваеми и грехми потопляеми, внечныя казни достойни есмы̀. Но на милость Твою уповающе, со слезами взываем Ти, о Мати всех скорбящых и обремененных: избави нас отпадений греховных, от козней лукаваго, от навета злых человек и от всяких бед, утоли нашя скорби и печали, болезни нашя уврачуй, даруй нам прочее время жития нашего в мире и покаянии скончати, и на Страшнем Суде Сына Твоего явися нам Милосердая  Заступница, да вси поем и величаем Тя со всеми благоугодившими Богу всегда, ныне и присно и во веки веков.

Молитва 5, чтомая в томже соборе

О Пресвятая Госпоже Владычице Богородице! С верою и любовию припадающе пред чудотворною и многоцелебною иконою Твоею, еюже дивную победу на сопротивныя граду Твоему даровала еси, молим Тя: якоже древле Отцем нашым на помощь ускори́ла еси, тако и нас немощных и грешных сподоби Твоего матерняго затупления. Не отврати лица Твоего от притекающих к Тебе: умоли, премилосердая Мати, Сына Твоего и Бога нашего, да сохранит под кровом Своим благовернаго государя нашего Николая Александровича, да утвердит в державе его мир, тишину и благочестие, Церковь же Свою святую непоколебиму да соблюдет, и от неверия, ересей и раскола да избавит. Не имамы бо иныя помощи, не имамы инаго предстательства, разве Тебе, Пресвятая Дево. Темже град Твой и всю страну православную и вся ны сохрани от глада, губительства, труса, потопа, огня, междоусобныя брани, от тлетворныз ветр и от смертоносныя язвы: даруй нам воздуха благорастворение и земли плодоносие. Спаси и помилуй, Госпоже, во всякой беде и нужде сущыя: скорбящыя уте́ши, малодушныя укрепи, страждущыя различными недуги уврачуй, стужаемыя от духов нечистых свободи, обидимыя от обид избави. Помяни рабы Твоя и не презри слез и воздыхания нашего. Умилостивися, Владычице, на немощныя люди Твоя: разсеянныя собери, заблуждшыя на путь правый настави, старость поддержи, юныя уцеломудри. Изряднее же спаси и защити нас, Владычице, от всех козней лукаваго и от всех навет вражиих: укрепи немощную волю нашу к деланию заповедей Божиих, умягчи окаменение сердец наших, даруй нам дух сокрушения, смирение сердца, чистоту помышлений и греховныя жизни исправление, да от грехавныя скверны очистившеся, сподобимся мирныя христианския кончины и добраго ответа на Страшнем Суде Сына Твоего. Ей, Всемилостивая Госпоже! И в страшный час смерти яви нам многомощное Твое заступление, ускори тогда на помощь нам безпомощным и державною рукою Твоею исхитѝ нас из власти лютаго мiродержца: преставльшыяся же во благочестии от жития сего отцы и братию нашу в вечней жизни со Ангелы и со всеми святыми жити сотвори. Ты бо еси, Госпоже, слава небесных и упование земных, ты по Бозе наша надежда и Заступленица всех притекающих к тебе и Твоея святыя помощи просящих. Темже на чудный образ Твой благоговейно взирающе, и пред ним, яко живей Ти сущей, со умилением припадающе, Тебе всю жизнь нашу по Христе Бозе предаем, ныне и присно и во веки веков.

Молитва 6, чтомая в Симеоновской церкви града Рязани

О Пресвятая Владычице Богородице, Небеснаго Царя Мати, Богоизбранная Отроковице, ненадежных надеяние, больных исцеление, сирым Предстательнице, скорбящым утешение и радость, обидимым Покровительнице и всем в бедах и напастех сущым скорое поможение и заступление! Помози, о Мати Божия, и нам грешным в скорби нашей, возвесели радостию сердца людей Твоих, управи в мире и тишине жизнь нашу, и не даждь нам во отчаяние впасти. Ты бо едина еси паче всех святых и паче всех горних умов Предстательница наша к Богу, яко Всеблагаго Царя Благая Мати. Темже мы грешнии, на пречистый Твой образ Знамения взирающе, умиленно преклоняемь колена, и благоговейно лобызающе, молим Тя, Благосердая Мати: не отрини смиреннаго моления нашего и яви нам знамение милости Твоея: никтоже бо, к Тебе прибегая со упованием, исходит от Тебе посрамлен, но просит благодати и приемлет дар к полезному прошению, прославляя Сына Твоего и Бога, и Тебе с Ним, во веки веков.

Тропарь, глас 4

Яко необоримую стену и источник чудес, стяжавше Тя раби Твои, Богородице Пречистая, сопротивных ополчения низлагаем. Темже молим Тя: мир граду Твоему даруй и душам нашым велию милость.

Ноембрия 27. Молитвы пред Царскосельскою чудотворною иконою Знимения Пресвятыя Богородицы

Молитва 1

О Пресвятая Дево, Мати Господа Вышних Сил, небесе и земли Царице, града и страны нашея Всемощная Заступнице! Приими благодарение и славу от нас недостойных раб Твоих, и вознеси молитвы нашя ко престолу Бога Сына Твоего, да яви́т нам знамение милосердия Своего и пробавит благодать свою чтущим всечестное имя Твое и с верою и любовию покланяющымся чудотворному образу Твоему. Не́смы бо достойни от Него помиловани быти, аще не Ты умилостивиши Его о нас, Владычице: Тебе же вся от Него возможна суть. Сего ради к Тебе прибегаем, яко к несомненней и ско́рей Заступнице нашей. Услыши нас молящихся Тебе, осени нас вседержавным покровом Твоим, и испроси от Господа Вседержителя благочестивейшему, самодержавнейшему, великому государю нашему, императору Николаю Александровичу всея России: супруге его, благочестивейшей государыне императрице Александре Феодоровне: матери его, благочестивейшей государыне императрице Марии Феодоровне: наследнику его, благоверному государю цесаревичу и великому князю Алексию Николаевичу, и всему царствующему дому, мир, здравие, спасение и во всем благое поспешение: пастырем же нашым ревность и бдение о душах, градоправителем мудрость и силу, судиям правду и нелицеприятие, наставником разум и смиренномудрие, супругом любовь и согласие, чадом послушание, ибидимым терпение, обидящым страх Божий, скорбящым благодушие, радующымся благословение, болящым здравие, напутствуемым заступление, нам же всем дух веры и благочестия, дух милосердия и кротости, дух чистоты и правды. Ей, Царице Преблагая! Умилосердися на немощныя люди Твоя: разсеянныя по распутием мiра собери, заблуждшыя на путь правый настави, старость укрепи, юныя уцеломудри, младенцы воспитай, и призри на всех нас призрением матерняго Твоего милосердия: воздвигни нас из глубины греховныя и просвети сердечныя очи наши ко зрению спасения. Милостива нам буди зде и тамо, во стране земнаго пришельствия и на Страшнем Суде Сына Твоего: преставльшыяся же в вере и покаянии от жития сего отцы и братию нашу в вечней жизни со Ангелы и со всеми святыми жити сотвори. Ты бо еси, Госпоже, слава небесных и упование земных, Ты по Бозе наша Надежда  и Заступница всех притекающих к Тебе с верою. Тебе убо молимся, и Тебе, яко Всемогущей Помощнице, сами себе и друг друга и всю жизнь нашу по Христе Бозе предаем, ныне и присно и во веки веков.

Молитва 2

О Пресвятая Владычице Богородице! Призри с благосердием на моления нас грешных и смиренных рабов Твоих, и умолѝ Бога Сына Твоего, да ниспо́слет нам и всем притекающым к Тебе здравие душевное и телесное и вся к ве́чней и временней жизни потре́бная, да простит нам всякое согрешение вольное и невольное, да избавит нас от всяких скорбей и болезней, и напастей, и всякаго зла́го обстояния. Ей, Царице наша Преблагая, Надеждо наша несокрушимая и Заступнице необоримая! Не отвратѝ лица Твоего от нас за множество прегрешений наших: но прострѝ нам ру́це матерняго милосердия Твоего и сотвори с нами знамение во благо. Яви нам богатую помощь Твою и благопоспешѝ во всяком деле блазе: от всякаго же начинания греховнаго и помышления лукаваго отврати нас, да всегда славим пречестное имя Твое, и благодарне честному [или чудотворному] образу Твоему покланяющеся, величаем Бога Отца, и Единароднаго Сына Его, Господа нашего Ииисуса Христа, и Святаго Духа, со всеми святыми, во веки веков.

Ноембрия 27. Молитвы пред Абалакскою иконою Знимения Пресвятыя Богородицы

Молитва 1

О Пресвятая Дево, Мати Христа Бога нашего, Царице небесе и земли! Вонми многоболезненному воздыханию душ наших, призри с высоты святыя Твоея на нас, с верою и любовию поклоняющихся пречистому [и чудотворному] образу Твоему. Се бо грехми погружаемии и скорбьми обуреваемии, взирающе на Твой образ, яко живей Тебе сущей с нами, приносим смиренная моления наша. Не имамы иныя помощи, ни инаго предстательства, ни утешения, токмо Тебе, о Мати всех скорбящих и обремененных! Помози нам немощным, утоли скорби нашя, настави на путь правый нас заблуждающих, уврачуй болезненная сердца наша и спаси безнадежных, даруй нам прочее время жития нашего в мире и покаянии проводити, подаждь христианскую кончину, и на Страшнем Суде Сына Твоего явися нам милосердая Предстательница, да всегда поем, величаем и славим Тя, яко благую Заступницу рода христианскаго, со всеми угодившими Богу, во веки веков.

Молитва 2

К кому возопию̀, Влалычице? К кому прибе́гну в горести моей, аще не к Тебе, Госпоже Богородице, Царице Небесная? Кто плачь мой и воздыхание прии́мет, аще не Ты, о Пренепорочная, Надеждо христиан и Прибежище нам грешным? Приклонѝ, о Пречистая Владычице, ушеса̀ Твоя к молению моему. Мати Бога моего, не пре́зри мене требующа Твоея помощи, услыши стенание мое, и воплю сердца моего вонмѝ, о Госпоже Царице Богородице! И подаждь ми радость душевную, и подкрепи мя нетерпеливаго, унылаго и нерадиваго ко Твоему хвалению. Вразумѝ и научѝ мя, ка́ко Тебе моли́тися подобает, и не отступѝ от мене, Мати Бога моего, за роптание и нетерпение мое: но буди ми покров и заступление в жизни моей, и приведи мя к тихому пристанищу Божественнаго о́наго покоя, и сопричтѝ мя к лику избраннаго Твоего стада, и тамо удостой мя воспева́ти и сла́вити Тя во веки веков.

Молитва 3, чтомая с Свято-Троицкой церкви града Вернаго, Туркестанския епархии

О Пресвятая Владычице наша, Госпоже Богородице! Спаси и помилуй благочестивейшаго государя нашего, императора Николая Александровича, самодержца всероссийскаго, супругу его благочестивейшую государыню императрицу Александру Феодоровну, матерь его благочестивейшую государыню императрицу Марию Феодоровну, наследника его благовернаго государя цесаревича и великаго князя Алексия Николаевича и весь царствующий дом: Россию и всех верноподданных его императорскаго величества ризою Твоею честною защити от всякия беды̀ и скорби: сохрани веру православную и люди русския, и всем православным христианом, прибегающым ко Твоему Божественному покрову, буди милостивая и скорая Послушница до скончания века.

Месяц декембрий.

Декембрия 9. Молитвы пред иконою Пресвятыя Богородицы Нечаянная радость именуемою.

Молитва 1, из службы со акафистом

О Пресвятая Дево, Всеблагаго Сына Мати Всеблагая, царствующаго града и святаго храма сего покрове, всех сущих во гресех и скорбех, бедах и же и болезнех верная Предстательнице и Заступнице! Приими молебное пение сие, от нас, недостойных раб Твоих, Тебе возносимое: и якоже древле грешника, на всяк день многажды пред честною иконою Твоею молившагося, не презрела еси, но нечаянную радость покаяния тому даровала еси, и усердным к Сыну Твоему ходатайством сего̀ ко прощению грешника преклонила еси, тако и ныне не презри моления нас, недостойных раб Твоих, но умоли Сына Твоего и Бога нашего, да и всем нам, с верою и умилением пред цельбоносным образом Твоим покланяющымся, по коегождо потребе нечаянную радость дарует: грешником, во глубине зол и страстей углебающым ― вседейственное вразумление, покаяние же и спасение: сущым в скорбех и печалех ― утешение: в бедах и озлоблениих пребывающым ― совершенное сих избытие: малодушным и ненадежным ― надежду и терпение: в радости и изобилии живущым ― непрестанное Благодетелю благодарение: бедствующым ― милость, сущым в болезни ― исцеление и укрепление: иждившым от недуга ум ― ума возвращение и обновление: отходящым в вечную и нескончаемую жизнь ― память смертную, умиление и о гресех сокрушение, дух бодр и твердую на милосердие Судии надежду. О Госпоже Пресвятая! Умилосердися ко всем чтущым всечестное имя Твое, и всем яви всемощный покров Твой и заступление: во благочестии, чистоте и честнем жительстве пребывающия до последняго их скончания во благости соблюди: злыя благи сотвори: заблуждшыя на путь правый настави: всякому делу благому и Сыну Твоему угодному споспешествуй: всякое злое и богопротивное начинание разруши: в нелоумении и злых обстояниих сущым незримую помощь и вразумление с небесе низпосли: от искушений, соблазнов и погибели спаси, от всех злых человек и от враг видимых и невидимых люди Твоя защити и сохрани: плавающым сплавай: путешествующым спутешествуй: сущым в ну́жде и гла́де буди питательница: неимущым  крова и пристанища буди покров и прибежище: нагим подаждь одеяние, обидимым и неправедно гонимым заступление: клевету, поношение и хуление терпящыя незримо оправдай: клеветники и хулители пред всеми обличи: ожесточенно враждующым подаждь примирение, и всем нам друг ко другу любовь и мир, благочестие же и здравие со долгоденствием. Супружества в любви и единомыслии сохрани: супруги, во вражде и разделении сущыя, умири: матерем, дети родящым, скорое подаждь разрешение: младенцы воспитай, юныя уцеломудри, отверзи им ум к восприятию всякаго полезнаго учения, страху Божию и воздержанию и трудолюбию настави: от домашния свары единокровныя люди миром и любовию огради: сирота̀м буди Мати, от всякаго порока и скверны отврати я̀, и всему благому и благоугодному Уте́шительница и Помощница, старости буди жезл: от внезапныя смерти без покаяния всех нас избави, и всем нам христианскую кончину жизни нашея безболезнену, непостыдну, мирну и добрый ответ на Страшнем Суде Христове даруй: преставльшыяся в вере и покаянии от жития сего со Ангелы и всеми святыми жити сотвори: скончавшымся внезапною смертию милостива быти сына Твоего умоли, и о всех усопшых , паче же о сих, иже не имут сродников, о упокоении их молящихся, сама буди непрестанная и теплая Молитвенница и Ходатаица: да вси на небеси и на земли ведят Тя, яко твердую и непостыдную Предстательницу рода христианскаго, и сие ве́дуще, славят Тя и Тобою Сына Твоего, со Безначальным Его Отцем и Единосущным Его Духом, ныне и присно и во веки веков.

Молитва 2

О Пресвятая Дево, Мати Господа вышних сил, небесе и земли Царице, гра́да и страны̀ нашея всемощная Заступнице! Приими хвалебное пение сие от нас недостойных раб Твоих, и вознеси молитвы нашя ко престолу Бога Сына Твоего, да милостив будет неправдам нашым и проба́вит благодать Свою чтущим всечестное имя Твое и с верою и любовию покланя́ющымся пречистому [или чудотворному] образу Твоему. Несмы бо достойни от Него помиловани быти, аще не Ты уми́лостивиши Его о нас, Владычице, яко вся Тебе от Него возможна суть. Сего ради к Тебе прибегаем, яко к несомне́нней и ско́рей Заступнице нашей: услыши нас молящихся Тебе, удиви над нами великия и богатыя милости Твоя, яви нам небесную помощь Твою и заступление, и испросѝ у Бога Сына Твоего пастырем нашым ревность и бдение о душах, градоправи́телем мудрость и силу, судия́м правду и нелицеприятие, наставником разум и смиренномудрие, супругам любовь и согласие, ча́дом послушание, обидимым терпение, обидящым страх Божий, скорбящым благодушие, радующымся воздержание: нам же всем низпосли дух разума и благочестия, дух милосердия и кротости, дух чистоты и правды. Ей, Госпоже Пресвятая! Умилосердися на немощны́я люди Твоя: разсеянныя собери, заблу́ждшыя на путь правый настави, неду́гующыя уврачуй, старость поддержи, юныя уцелому́дри, младенцы воспитай, и при́зри на всех нас призрением милостиваго Твоего заступления: воздвигни нас из глубины греховныя и просвети сердечныя очи наши ко зрению спасения. Милостива нам буди зде и на Страшнем Суде Сына Твоего: преста́вльшыяся же в вере и покаянии от жития сего отцы и братию нашу в вечней жизни со ангелы и со всеми святыми жити сотворѝ. Ты бо еси, Госпоже, слава небесных и упование земных, Ты по Бозе наша Надежда и Заступница всех притекающих к Тебе с верою. Тебе убо молимся, и Тебе, яко всемогущей Помощнице, сами себе и друг друга и всю жизнь нашу предае́м, ныне и присно и во веки веков.

Молитва 3

Приими о Всеблагословенная и Всемощная Госпоже Владычице Богородице Дево, сия молитвы, со слезамиТебе ныне приносимыя от нас недостойных раб Твоих, ко Твоему цельбоно́сному образу пение возсыла́ющих со умилением, яко тебе Самой зде сущей и внемлющей молению нашему. По коемуждо бо прошению исполнение твори́ши, скорби облегча́еши, немощным здравие да́руеши, разслабленныя и недужныя исцеля́еши, от бе́сных бесы прогоняеши, обидимыя от обид избавля́еши, прокаженныя очищае́ши и малыя дети ми́луеши: еще же, Госпоже Владычице Богородице, и от уз и темниц свобождаеши и всякия многоразличныя страсти врачуеши: вся бо суть возможна ходатайством Твоим к Сыну Твоему, Христу Богу нашему. О Всепетая Мати, Пресвятая Богородице! Не престай моли́тися о нас недостойных рабех Твоих, славящих Тя и почитающих Тя, и покланяющихся со умилением пречистому образу Твоему, и надежду имущих невозвра́тну и веру несумне́нну к Тебе, Приснодеве Преславней и Непорочней, ныне и присно и во веки веков.

Молитва 4, чтомая в Дмитровском Борисоглебском монастыре, московския епархии

О Пресвятая Дево, Всеблагаго Сына Мати Всеблагая, царствующаго града и святаго храма сего покрове, всех сущих во гресех и скорбех, бедах и же и болезнех верная Предстательнице и Заступнице! Приими молебное пение сие, от нас, недостойных раб Твоих, Тебе возносимое: и якоже древле грешника, на всяк день многажды пред честною иконою Твоею молившагося, не презрела еси, но нечаянную радость покаяния тому даровала еси, и усердным к Сыну Твоему ходатайством сего̀ ко прощению грешника преклонила еси, тако и ныне не презри моления нас, недостойных раб Твоих, но умоли Сына Твоего и Бога нашего, да и всем нам, с верою и умилением пред цельбоносным образом Твоим покланяющымся, по коегождо потребе нечаянную радость дарует: да вси на небеси и на земли ведят Тя, яко твердую и непостыдную Предстательницу рода христианскаго, и сие ведуще славят Тя и Тобою Сына Твоего, со Безначальным Его Отцем и Единосущным Его Духом, ныне и присно и во веки веков.

Тропарь, глас 4

Днесь вернии людие духовно торжествуем, Заступницу усердную рода христианскаго прославляюще, и ко Пречистому Ея образу притекающе, взываем сице: о Премилостивая Владычице Богородице, подаждь нам нечаянную радость, обремененным грехи и скорбьми многими, и избави нас от всякаго зла, молящи Сына Твоего, Христа Бога нашего, спасти души нашя.

Декембрия 20. Молитва пред иконою Пресвятыя Богородицы Леньковскою, именуемою Спасительница утопающих

Заступнице усердная, Мати Господа Вышняго! Ты еси всем христианом помощь и заступление, паче же в бедах сущым. Призри ныне с высоты святыя Твоея и на ны, с верою покланяющыяся пречистому образу Твоему, и яви, молим Тя, скорую помощь Твою по морю плавающым и от ветров бурных тяжкия скорби терпящым. Подвигни и вся православныя христианы на спасение в водах утопающих, и воздаждь подвизающымся о сем богатыя милости и щедроты Твоя. Се бо, на образ Твой взирающе, Тебе, яко милостивно сущей с нами, приносим смиренная моления наша. Не имамы бо иныя помощи, ни инаго предстательства, ни утешения, токмо Тебе, о Мати всех скорбящих и напаствуемых. Ты по Бозе наша надежда и Заступленица, и на Тя уповающе, сами себе, и друг друга, и всю жизнь нашу Тебе предаем во веки веков.

Декембриа 27. Молитвы ко Пресвятей Богородице пред иконою Ея, Трех радостей именуемою

Молитва 1, чтомая в Московской Троицкой, на Грязях, церкви

О Пресвятая Дево, Всеблагаго Сына Мати Всеблагая, царствующаго града и святаго храма сего покрове, всех сущих во гресех и скорбех верная Предстательнице и Заступнице! Не презри молнения нас, недостойных раб Твоих, но умоли Сына Твоего и Бога нашего, да всем нам, с внрою и умилением пред чудотворным образом Твоим покланяющымся, по коегождо потребе радость дарует: грешником ― вседейственное вразумление, покаяние же и спасение: сущым в скорбех и печалех ― утешение: в бедах и озлоблениих пребывающым ― совершенное сих избытие: малодушным и ненадежным ― надежду и терпение: в радости и изобилии живущым ― непрестанное Богу благодарение: сущым в болезни ― исцеление и укрепление. О Госпоже Пресвятая! Умилосердися ко всем чтущым всечестное имя Твое, и всем яви всемощный покров Твой и заступление: от враг видимых и невидимых люди Твоя защити и сохрани. Супружества в любви и единомыслии утверди: младенцы воспитай, юныя уцеломудри, отверзи им ум к восприятию всякаго полезнаго учения: от домашния свары единокровныя люди миром и любовию огради, и всем нам подаждь друг ко другу любовь, мир и благочестие и здравие со долгоденствием: да вси на небеси и на земли ведят Тя, яко твердую и непостыдную Предстательницу рода христианскаго, и сие ве́дуще, славят Тя и Тобою Сына Твоего, со Безначальным Его Отцем и Единосущным Его Духом, ныне и присно и во веки веков.

Молитва 2, чтомая в церкви села Марфина, Московския епархии

О Пречистая Госпоже Владычице Богородице! Приимѝ недостойную молитву нашу, и сохрани нас от навета злых человек и от внезапныя смерти, и даруй нам прежде конца покаяние. На моление наше умилосе́рдися, и радость вместо печали да́руй. И изба́ви нас, Госпоже, от всякия беды̀ и напасти, скорби и болезни и от всякаго зла. И сподо́би ны, грешныя рабы Твоя, одесную ста́ти во втором пришествии Сына Твоего, Христа Бога нашего, и наследники быти Царствия Небеснаго и жизни вечныя со всеми святыми в безконечныя веки веков.

Месяц иануарий

Иануариа 21 и августа 16. Молитва пред иконою пресвятыя Богородицы, именуемою Млекопитательница

Приими, Госпоже Богородительнице, слезная моления рабов Твоих, к Тебе притекающих. Зрим Тя на святей иконе, на руках носящую и млеком питающую Сына Твоего  и Бога нашего, Господа Иисуса Христа. Аще и безболезненно родила еси Его, обаче матерния скорби веси и немощи сынов и дщерей человеческих зриши. Темже тепле припадающе к цельбоносному образу Твоему и умиленно сей лобызающе, молим Тя, Всемилостивая Владычице: нас грешных, осужденных в болезнех родити и в печалех питати чада наша, милостивно пощади и сострадательно заступи, младенцы же нашя, такожде и родившыя их, от тяжкаго недуга и горькия скорби избави. Даруй им здравие и благомощие, да и питаемии от силы в силу возрастати будут, и питающыя их исполнятся радостию и утешением, яко да и ныне предстательством Твоим из уст  младенец и ссущих Господь совершит хвалу Свою. О Мати Сына Божия! Умилосердися на матери сынов человеческих и на немощныя люди Твоя: постигающыя нас болезни скоро исцели, належащыя на нас скорби и печали утоли, и не презри слез и воздыханий рабов Твоих. Услыши нас в день скорби пред иконою Твоею припадающих, и в день радости и избавления приими благодарная хваления сердец наших. Вознеси мольбы нашя ко престолу Сына Твоего и Бога нашего, да милостив будет ко грехом и немощем нашым и пробавит милость Свою ведущым имя Его, яко да и мы, и чада наша, прославим Тя, милосердую Заступницу и верную надежду рода нашего во веки веков.

Иануария 21. Молитва пред иконою Пресвятыя Богородицы, именуемою Отрада и утешение, чтомая в женской во имя сея иконы общине, Московския епархии

О Пресвятая Госпоже Богородице, Отрадо и Утешение наше! Воззри милостивно на люди предстоящия с верою и любовию и покланяющыяся пречистому образу Твоему: приими наше хвалебное пение и пролей теплую Твою молитву о нас грешных  ко Господу, да, презрев вся наша согрешения, спасет и помилует нас. о Предивная Владычице! Покажи на нас чудныя милости Твоя: сохрани и помилуй благочестивейшаго государя императора Николая Александровича и весь царствующий дом, даруй им здравие и спасение: сохрани пастырей Церкве и все христолюбивое воинство. Молим Тя умиленно, избави и всех нас от всякия скорби, настави на путь всякия добродетели и благрстыни, спаси от искушений, бед и болезней, изьми от нас оклеветания и свары, сохрани от молниеноснаго грома, от запаления огненнаго, от глада, труса, потопа и смртоносныя язвы: подаждь нам Твою милостивую помощь в пути, и в мори и на суши. Се бо, Всемилостивая Владычице, во уповании несомненнем Тебе нашу убогую молитву возносим. Не отрини наших слез и воздыханий, не забуди нас во вся дни жизни нашея, но всегда пребывай с нами, и Твоим заступлением и хадатайством у Господа подавай нам отраду утешение, защиту и помощь, да славим и величаем и ублажаем Тя во вся роды во веки веков.

Иануария 25. Молитвы пред иконою Пресвятыя Богородицы, именуемою Утоли моя печали

Молитва 1

Надеждо всем концем земли, Пречистая Дево, Госпоже Богородице, утешение наше! Не гнушайся нас грешных, на Твою бо милость уповаем: угаси горящий в нас пламень греховный и покаянием ороси изсохшая сердца наша: очисти ум наш от греховных помыслов: приими мольбы, от души и сердца со воздыханием Тебе приносимыя. Буди о нас Ходатаица к Сыну Твоему и Богу, и отврати гнев Его матерними Твоими молитвами. Душевныя и телесныя язвы исцелѝ, Госпоже Владычице: утоли болезни душ и телес: утишѝ бурю злых нападений вражеских, отъими бремя грехов наших, и не остави нас до конца погибнути, и печалию сокрушенная сердца наша уте́ши, да славим Тя до последняго издыхания нашего.

Молитва 2, святаго Ефрема Сирина, из службы со акафистом

Дево Владычице Богородице, паче естества и слова рождшая Единородное Божие Слово, Творца и Владыку всея видимыя и невидимыя твари, Единаго от Троицы Бога, и Бога и человека, обитель Божества явльшаяся, вместилище всякия святыни и благодати, в немже, по благоволению Бога и Отца, содействующу Святому Духу, вселися исполнение Божества телесне, царским и благлепным достоинством несравненно превознесенная и над всякою тварию преимущая, славо и утешение, и неизреченное веселие Ангелов, апостолов же и пророков царственных венче, мучеников преестественное и дивное мужество, Поборнице в подвизех и Подательнице победы, уготовляющая подвижником вецы и воздаяния вечная и боголепная, всякия чести превышшая, честь и слава преподобных, непогрешительная Путеуказательнице и Наставнице безмолвия, дверь откровений и духовных таин, источниче света, неистощимая реко милосердия, неисчерпаемое море всех боголепных дарований и чудес! Тебе посим и Тебе молим, сострадательнейшую Матерь Человеколюбиваго Владыки: буди милостива к нам смиренным и недостойным рабом Твоим, призри благосердием на пленение и смирение наше, уврачуй сокрушения душ и телес наших, разсей видимыя и невидимыя враги, буди нам недостойным столп крепок пред лицем враг наших, бранное оружие, сильное ополчение, Воевода и необоримая Поборница: яви ныне на нас древния и дивныя милости Твоя, да уведят беззаконнии врази наши, яко Сын Твой и Бог Един есть Царь и Владыка, яко Ты еси воистину Богородица, рождшая по плоти Истиннаго Бога, яко вся Тебе возможна суть, и елика аще восхощеши, Владычице, власть имаши вся сия совершитина небеси и на земли, и на всяко прощение даровати, елика коемуждо полезна суть: болящым здравие, в мори же сущым тишину и благое плавание. Путешествующым убо спутешествуй и сохраняй я̀, плененныя спасай от горькаго рабства, утешение печальныя, облегчи нищету и всякое иное телесное злострадание: всех свободи от душевных недуг и страстей невидимыми Твоими предстательствы и наставлении, яко да безпорочно и непреткновенно путь сея временныя жизни совершивше, насле́дим Тобою и оная вечная блага во Цирствии Небеснем. Верныя же цари нашя, иже страшным именем Единароднаго СынаТвоего почте́ни суть, и уповаютна Твое предстательство и на милость Твою, и во всех имут Тя свою Ходатаицу и Поборницу, укрепи невидимо противу обстоящих врагов: разсей облак уныния, души их облежа́щь: избави я̀ от душевнаго утруждения, вместо же онаго даруй им светлое благодушие и радость, паки утверждающи мир и безмятежие державы и царства их. Спаси молитвами Твыоими, Владычице, сию Тебе наипаче посвященную паству, всякий град и страну, от глада, труса, потопа, огня, меча, нашествия иноплеменников, междоусобныя брани, и всякий праведно на ны движимый гнев отврати, благоволением и благодатию Единороднаго Сына и Бога Твоего, Емуже подобает всякая слава, честь и поклонение, со Безначальным Его Отцем, и со Присносущным и Животворящим Его Духом, ныне и присно и во веки веков.

Молитва 3

Царице моя Преблагая, Надеждо моя Богородице, прибежище сирых и странных Предстательнице, скорбящих Радосте, обидимых Покровительнице! Зри́ши мою беду, зри́ши мою скорбь: помозѝ ми яко не́мощну, направи мя яко стра́нна. Обиду мою ве́си,  разрешѝ ту, якоже во́лиши: яко не и́мам иныя помощи разве Тебе, ни ины́я Предстательницы, ни Благи́я Уте́шительницы, токмо Тебе, о Богомати, яко да сохрани́ши мя и покры́еши во веки веков.

Молитва 4

Приими о Всеблагословенная и Всемощная Госпоже Владычице Богородице Дево, сия молитвы, со слезамиТебе ныне приносимыя от нас недостойных раб Твоих, ко Твоему цельбоно́сному образу пение возсыла́ющих со умилением, яко тебе Самой зде сущей и внемлющей молению нашему. По коемуждо бо прошению исполнение твори́ши, скорби облегча́еши, немощным здравие да́руеши, разслабленныя и недужныя исцеля́еши, от бе́сных бесы прогоняеши, обидимыя от обид избавля́еши, прокаженныя очищае́ши и малыя дети ми́луеши: еще же, Госпоже Владычице Богородице, и от уз и темниц свобождаеши и всякия многоразличныя страсти врачуеши: вся бо суть возможна ходатайством Твоим к Сыну Твоему, Христу Богу нашему. О Всепетая Мати, Пресвятая Богородице! Не престай моли́тися о нас недостойных рабех Твоих, славящих Тя и почитающих Тя, и покланяющихся со умилением пречистому образу Твоему, и надежду имущих невозвра́тну и веру несумне́нну к Тебе, Приснодеве Преславней и Непорочней, ныне и присно и во веки веков.

Молитва 5

О Пресвятая Дево, Мати Господа Вышних сил, небесе и земли Царице, града и страны нашея всемощная Заступнице! Приимѝ хвалебное пение сие от нас недостойных раб Твоих, и вознесѝ молитвы нашя ко престолу Бога Сына Твоего, да милостив будет неправдам нашым и проба́вит благодать Свою чтущым всечестное имя Твое и с верою и любовию покланяющымся пречистому [или чудотворному] образу Твоему. Не́смы бо достойни от Него помиловани бы́ти, аще не Ты уми́лостивиши Его о нас, Владычице, яко вся Тебе от Него возможна суть. Сего ради к Тебе прибегаем, яко к несомне́нней и ско́рей Заступнице нашей: услыши нас молящихся Тебе, осенѝ нас вседержавным покровом Твоим, и испросѝ у Бога Сына Твоего пастырем нашым ревность и бдение о душах, градоправителем мудрость и силу, судия́м правду и нелицеприятие, наставником разум и смиренномудрие, супругом любовь и согласие, чадом послушание, оби́димым терпение, оби́дящым страх Божий, скорбящым багодушие, радующымся воздержание, намже всем дух разума и благочестия, дух милосердия и кротости, дух чистоты и правды. Ей, Госпоже Пресвятая! Умилосердися на немощыя люди Твоя: разсеянныя собери, заблуждшыя на путь правый наста́ви, старость поддержи, юныя уцелому́дри, младенцы воспитай, и при́зри на всех нас призрением милостиваго Твоего заступления: воздви́гни нас из глубины грехавныя и просвети сердечныя очи наши ко зрению спасения. Милостива нам буди зде и тамо, во стране земнаго пришельствия и на Страшнем Суде Сына Твоего: преставльшыяся же в вере и покаянии от жития сего отцы и братию нашу в вечней жизни со Ангелы и со всеми святыми жити сотворѝ. Ты бо еси, Госпоже, слава небесных и упование земных, Ты по Бозе наша Надежда и Заступница всех притекающих к Тебе с верою. Тебе убо молимся, и Тебе, яко всемогу́щей Помощнице, сами себе и друг друга и всю жизнь нашу по Христе Бозе предаем, ныне и присно и во веки веков.

Тропарь, глас 5

Утоли болезни многовоздыхающия души моея, утолившая всяку слезу от лица земли: Ты бо человеков болезни отгоняеши и грешных скорби разрешаеши: Тебе бо вси стяжахом надежду и утверждение, Пресвятая Мати Дево.

Месяц февруарий

Февруариа 5. Молитвы пред иконою Пресвятыя Богородицы Взыскание погибших, или Избавление от бед страждущих

Молитва 1

О Владычице Преблагословенная, Защитнице рода христианскаго, прибежище и спасение прибегающих к Тебе! Вем, воистину вем, яко зело согреших, и прогневах, Премилостивая Госпоже, рожденнаго плотию от Тебе Сына Божия. Но и́мам многия образы прежде мене прогневавших Его милосердие: мытари, блудницы и прочыя грешники, имже даде́ся прощение грехов их, покаяния ради и исповедания. Тыя убо образы помилованных очесе́м грешныя души моея представляя, и на толикое Божие милосердие, оныя прие́мшее, взира́я, дерзну́х и аз грешный прибегнути с покаянием ко Твоему благосердию. О Всемилостивая Владычице! Подаждь ми руку помощи, и испросѝ у Сына Твоего и Бога, матерними и святейшими Твоими молитвами, тяжким моим грехом прощение. Верую и исповедую, яко той, Егоже родила еси, Сын Твой есть воистину Христос, Сын Бога Живаго, Судия живых и мертвых, воздаяй кому́ждо по делом его: верую же паки и исповедую Тебе быти истинную Богородицу, милосердия источник, утешение плачущих, сильную и непрестающую к Богу Ходатаицу, зело̀ любящую род христианский и Спору́чницу покаяния: воистину бо несть нам иныя помощи и покрова, разве Тебе, Госпоже Премилостивая, и никтоже, уповая на Тя, постыде́ся когда, и Тобою умоляя Бога, никтоже оставлен бысть. Того ради и аз Твою неисче́тную благость молю: отверзи двери милосердия Твоего мне заблуждшему и падшему в тиме́ние глубины, не возгнушайся мене сквернаго, не пре́зри грешнаго моления моего, не остави мене окаяннаго, яко в погибель злобный враг похитити мя ищет: но умоли о мне рожденнаго от Тебе Милосердаго Сына Твоего и Бога, да простит великия мои грехи и избавит мя от па́губы моея, яко да и аз, со всеми получившими прощение, воспою̀ и прославлю безмерное милосердие Божие и Твое непостыдное о мне заступление в жизни сей и в нескончаемем ве́це.

Молитва 2

О Пресвятая и Преблагословенная Дево, Владычице Богородице, Споручнице грешных и Взыскание погибших!  Призри милостивным Твоим оком на нас, предстоящих пред святою иконою Твоею и со умилением молящихся Тебе: воздвигни нас из глубины греховныя, просвети ум наш, омраченный страстьми, и уврачуй язвы душ и телес наших. Не имамы иныя помощи, не имамы иныя надежды, разве Тебе, Владычице: Ты веси вся немощи и согрешения наша. К Тебе прибегаем и вопием: не остави нас Твоею небесною помощию, но предстани нам присно, и Твоим неизреченым милосердием и щедротами спаси и помилуй нас погибающих. Даруй намисправление грехавныя жизни нашея и избави нас от скорбей, бед и болезней, от внезапныя смерти, ада и вечныя муки. Ты бо еси, Царице и Владычице, скорая Помощница и Заступница всем притекающым к Тебе и крепкое прибежище грешников кающихся. Подаждь убо нам, Преблагая и Всенепорочная Дево, христианский конец жизни нашея мирен и непостыден, и сподоби нас Твоим ходатайством вселитисяво обителех небесных, идеже непрестанный глас празднующих радостию славит Пресвятую Троицу, Отца и Сына и Святаго Духа, ныне и присно и во веки веков.

Молитва 3

Заступнице усердная, благоутробная Господа Мати! К Тебе прибегаю аз окаянный и паче всех человек грешнейший: вонми гласу моления моего, и вопль мой и стенание услыши. Яко беззаконя моя превзыдоша главу мою, и аз, якоже корабль в пучине, погружаюся в мори грехов моих. Но Ты, Всеблагая и Милосердая Владычице, не презри мене отчаяннаго и во гресех погибающаго: помилуй мя кающагося во злых де́лех моих, и обрати на путь правый заблуждшую окаянную душу мою. На Тебе, Владычице моя Богородице, возлагаю все упование мое. Ты, Мати Божия, спаси и сохрани мя под кровом Твоим, ныне и присно и во веки веков.

Молитва 4

Царице моя Преблагая, Надеждо моя Богородице, прибежище сирых и странных Предстательнице, скорбящих Радосте, обидимых Покровительнице! Зри́ши мою беду, зри́ши мою скорбь: помозѝ ми яко не́мощну, направи мя яко стра́нна. Обиду мою ве́си,  разрешѝ ту, якоже во́лиши: яко не и́мам иныя помощи разве Тебе, ни ины́я Предстательницы, ни Благи́я Уте́шительницы, токмо Тебе, о Богомати, яко да сохрани́ши мя и покры́еши во веки веков.

Молитва 5

О Пресвятая Дево, Мати Христа Бога нашего, Царице небесе и земли! Вонми многоболезненному воздыханию душ наших, призри с высоты святыя Твоея на нас, с верою и любовию поклоняющихся пречистому [и чудотворному] образу Твоему. Се бо грехми погружаемии и скорбьми обуреваемии, взирающе на Твой образ, яко живей Тебе сущей с нами, приносим смиренная моления наша. Не имамы иныя помощи, ни инаго предстательства, ни утешения, токмо Тебе, о Мати всех скорбящих и обремененных! Помози нам немощным, утоли скорби нашя, настави на путь правый нас заблуждающих, уврачуй болезненная сердца наша и спаси безнадежных, даруй нам прочее время жития нашего в мире и покаянии проводити, подаждь христианскую кончину, и на Страшнем Суде Сына Твоего явися нам милосердая Предстательница, да всегда поем, величаем и славим Тя, яко благую Заступницу рода христианскаго, со всеми угодившими Богу, во веки веков.

Молитва 6

О Пресвятая Владычице и Богородице, вышшая Херувим и честнейшая Серафим, избранная Отроковице, всех погибающих спасающая! Подаждь утешение и нам, в скорби сущым: разве бо Тебе иного прибежища и помощи не имамы. Ты едина еси радости нашея Ходатаица, и яко Мати Божия и Мати милосирдия, предстоящи у Престола Пресвятыя Троицы, моднши нам помощѝ: никтоже бо притекаяй к Тебе посрамлен отходит. Услыши убо и нас, ныне в день скорби пред Твоею иконою припабающих и со слезами Тебе молящихся: отжени от нас належащыя скорби и печали в сей временней жизни, не лише́ны же сотвори ны Твоим всесильным ходатайством и вечныя нескончаемыя радости во Царствии Сына Твоего и Бога нашего, Емуже подобает всякая слава, честь и поклонение, со Безначальным Его Отцем, и со Пресвятым и Благим и Животворящим Его Духом, ныне и присно и во веки веков.

Тропарь общий Пресвятей Богородице, глас 4:

К Богородице ныне прилежно притецем гре́шнии и смире́ннии, и припаде́м, в покаянии зовуще из глубины душѝ: Владычице, помози, на ны милосердовавши: потщися, погибаем от множества прегрешений: не отврати рабы Твоя тщы̀, Тя бо и едину надежду имамы.

Ин тропарь, глас тойже:

Взыщи нас погибающих, Пресвятая Дево, не по грехом бо нашым наказуеши нас, но по человеколюбию милуеши: избави нас от ада, болезни и ну́жды, и спаси нас.

Фебруариа 21. Молитва пред иконою Пресвятыя Богородицы Козельщанскою

Богородице Дево, Пренепорочная Мати Христа Бога нашего, всего рода христианскаго Заступнице! Чудотворней иконеТвоей благоговейно предстояще, молим Тя прилежно: услыши нас молящихся Тебе, приими благодарения наша недостойная о всех неизреченных Твоих к нам благодеяниих, в месте сем и во иных ве́сех и граде́х земли Российския явленных и являемых: Ты бо еси больных исцеление, скорбящих утешение, заблуждших исправление и вразумление. Буди всем нам покров и ути́шное пристанище от всяких зол, бед и обстояний, от глада, труса, потопа, огня, меча, нашествия иноплеменных, смертоносныя язвы и от злых человек озлобления. О Премилосердая Мати! Буди присно Молитвенница любвеобильная о благостоянии Святаго храма сего, о мире и тишине жительства святыя обители сея: укрепи священнодействующыя и служащыя во святем храме сем: осени вседержавным покровом Твоим строители и благотворители святыя обители сея, воздаждь им вечными дары щедрот Твоих: заступи от всякия напасти и сохрани с верою и благоговением притекающыя к чудотворней иконе Твоей и молящыяся Тебе с любовию зде и на всяком месте. Вознеси молитвы нашя, яко кадило благовонное, ко престолу Всевышняго, дарующаго нам здравие, долгоденствие и в трудех благочестивых поспешение, да Твоим водительством управляеми и покровом Твоим осеняеми, прославим Отца и Сына и Святаго Духа, и Твое матернее о нас заступление, всегда, ныне и присно и во веки веков.

Месяц март

Март 6. Молитвы пред иконою Пресвятыя Богородицы Ченстоховскою

Молитва 1. Чтомая в Кирилло-Мефодиевской церкви града Ченстохова

О  Всемилостивая Госпоже, Царице Богородице, от всех родов Избранная и всеми роды небесными и земными Ублажаемая! Воззри милостивно на предстоящыя пред святою иконою Твоею люди сия, усердно молящыяся Тебе, и сотвори предстательством Твоим и заступлением у Сына Твоего и Бога нашего, да никтоже изыдет отсюду тощь упования своего и посрамлен в надежде своей, но да приимет кийждо от Тебе вся по благому изволению сердца своего и по нужде и потребе своей, во спасение души и во здравие телу. Наипаче же осенѝ и оградѝ покровом Твоим, милосердая Мати, благочестивейшаго государя нашего, императора Николая Александровича, и весь царствующий дом его: отжени от него молитвами Твоими всякаго врага и супостата, утверди житие его в мире и тишине, да и мы вси тихое и безмолвное житие поживем во всяком блазе и чистоте: удержа́ви царство его, во еже быти в нем Царству Христову: управи пути и советы его, да возсияет во днех его правда и множество мира, и да возрадуется сердце его о сущих в державе его, якоже сердце отца о чадех своих веселящася: на сопротивныя же и лукавнующыя в сердцах своих послѝ пред лицем его ужас и трепет, да поне страхом вразумятся и престанут от лукавств своих. Моли, Милосердая Владычице, Пренебеснаго Бога, да присно соблюдет Церковь Свою святую во православии и твердей вере до конца веков. Призирай благосердием, Всепетая, и призрением милостиваго Твоего заступления на все царство всероссийское, царствующия грады нашя и град сей и святый храм сей, и на сия богатыя Твоя милости неоскудно изливай, Ты бо еси Всесильная Помощница и Заступница всех нас. Приклонися к молитвам раб Твоих и прошением их, услыши воздыхания и молитвы, имиже раби Твои молятся на святем месте сем. Аще иноверный, или иноплеменник, зде преходя̀, помо́лится, услыши и милостивно соделай, яже к помощи ему и ко спасению. О Всепетая Мати, Надеждо наша Преблагая! Собери разсеянныя, неверныя же и иноверныя во странах наших путь истинный настави, отпадшыя от благочестивыя веры паки возврати Святей Православней  Кафоличестей Церкве их сопричти: в домех наших мир утверди, старость поддержи, юныя настави, младенцы воспитай, си́рыя и вдови́цы заступѝ, плененныя свободи, болящыя уврачуй, на суде и в заключениих и к заточениих и в горьких работах сущыя помяни, ограждающи ны присно от всякаго зла благостию Твоею, и утеши милостивным Твоим посещением и вся благодеющыя нам. даруй же, благая, земли плодоносие, воздуху благорастворение и вся, яже на пользу нашу, дары благовременныя и благопотребныя молитвами избранных угодников, святых Кирилла и Мефодия, в ихже храме и предстоим вси. Прежде отшедшыя отцы и матери, братию и сестры нашя упокой в селениих святых, в месте злачне, в месте покойне, идеже несть печаль и воздыхание. Егда же приспеет и наше от жития сего отшествие и к вечней жизни преселение, предстани нам, Преблагословенная Дево, и даруй христианскую кончину жития нашего безболезнену, непостыдну и Святых Таин причастну, да и в будущем ве́це сподобимся вси, купно со всеми святыми, безконечныя жизни во Царствии возлюбленнаго Сына Твоего, Господа и Спаса нашего Иисуса Христа, Емуже подобает всякая слава, честь и поклонение, со Безначальным Отцем и Святым Духом, во веки веков.

Молитва 2, чтомая в церкви  села Забелина, Владимирския епархии

О Пресвятая Владычице наша Богородице, Небесная Царице, наша Преблагая Надеждо, преизящная Отроковице, ненадеящымся надеяние, грешным спасение, сирым прибежище, странным Предстательнице, нагим одеяние, скорбящым утешение и радосте, обидимым Покровительнице и всем сущым в бедах и напастех вспоможение и заступление! О Всемилостивая Госпоже Дево Богородице! Зри́ши наша беды̀, ско́рби и напа́сти: помозѝ нам немощны́м, печальным и унылым, скорбным же и отчаянным, и всяку печаль отъимѝ от нас. Обиду нашу ты ве́си: разрешѝ ту, Всенепорочная, якоже во́лиши и мо́жеши: не даждь нам во отчаяние впа́сти. Не имамы бы иныя помощи, разве Сына Твоего, Христа Бога нашего, и Тебе, о Мати Божия, о Владычице наша! Темже на Твой пречистый образ  со воздыханием и с сокрушением сердца взираем, и колена до земли преклоняем, взыва́юще: при́зри благосердым оком, Всепетая Богородице, и услыши нас, предлагая: не отри́ни, но благоволи поми́ловати: не омерзѝ нашего воздыхания. Никтоже бо притека́яй к Тебе посра́млен от Тебе исходит, но просит благодати и приемлет дар на пользу прошения во веки веков.

Марта 6. Молитва пред иконою Пресвятыя Богородицы Шестоковскою, чтомая в Шестоковском монастыре, тверския епархии

К кому возопию, Влалычице? К кому прибегну в горести моей, аще не к Тебе, Царице Небесная? Кто плачь мой и воздыхание приимет, аще не Ты, Пренепорочная, Надеждо христиан и Прибежище? Кто паче Тебе в напастех защитит? Услыши убо стенание мое, и приклони ухо Твое ко мне, Влалычице Мати Бога моего, и не презри мене требующаго Твоея помощи, и не отрини мене грешнаго. Вразуми и научи мя, Царице Небесная: не отступи от мене раба Твоего, Владычице, за роптание мое, но буди мне Мати  Заступница. Вручаю себе милостивому покрову Твоему: приведи мя грешнаго к тихой и безмятежней жизни, да плачуся о гресех моих. К кому прибегну повинный аз, аще не к Тебе, упованию и прибежищу грешных, надеждою на неизреченную милость Твою и щедроты Твоя окриляемь; О Владычице Царице Небесная! Ты мне упование и прибежище, покров и заступление и помощь. Царице моя преблагая и скорая Заступнице: покрый Твоим ходатайством моя прегрешения, защити мене от враг видимых и невидимых: умягчи сердца злых человек, возстающих на мя. О Мати Господа моего Творца! Ты еси корень девства и неувядаемый цвет чистоты. О Богородительнице! Ты подаждь ми помощь немощствующему плотски́ми страстьми и болезнующему сердцем, едино бо Твое и с Тобою Твоего Сына и Бога нашего имам заступление: и Твоим пречудным заступлением да избавлюся от всякия беды и напасти, о Пренепорочная и Преславная Божия Мати Марие. Темже со упованием глаголю и вопию: радуйся Благодатная: радуйся Обрадованная: радуйся, Преблагословенная, Господь с Тобою.

Ке́домо буди, яко в некиих храмех молитва сия, или именуемая песнь Пресвятей Богородице, поется во гласе 5.

Марта 7. Молитвы  пред иконою Пресвятыя Богородицы именуемою Споручница грешных

Молитва 1

О Владычице Преблагословенная, Защитнице рода христианскаго, прибежище и спасение прибегающих к Тебе! Вем, воистину вем, яко зело согреших, и прогневах, Премилостивая Госпоже, рожденнаго плотию от Тебе Сына Божия. Но и́мам многия образы прежде мене прогневавших Его милосердие: мытари, блудницы и прочыя грешники, имже даде́ся прощение грехов их, покаяния ради и исповедания. Тыя убо образы помилованных очесе́м грешныя души моея представляя, и на толикое Божие милосердие, оныя прие́мшее, взира́я, дерзну́х и аз грешный прибегнути с покаянием ко Твоему благосердию. О Всемилостивая Владычице! Подаждь ми руку помощи, и испросѝ у Сына Твоего и Бога, матерними и святейшими Твоими молитвами, тяжким моим грехом прощение. Верую и исповедую, яко той, Егоже родила еси, Сын Твой есть воистину Христос, Сын Бога Живаго, Судия живых и мертвых, воздаяй кому́ждо по делом его: верую же паки и исповедую Тебе быти истинную Богородицу, милосердия источник, утешение плачущих, сильную и непрестающую к Богу Ходатаицу, зело̀ любящую род христианский и Спору́чницу покаяния: воистину бо несть нам иныя помощи и покрова, разве Тебе, Госпоже Премилостивая, и никтоже, уповая на Тя, постыде́ся когда, и Тобою умоляя Бога, никтоже оставлен бысть. Того ради и аз Твою неисче́тную благость молю: отверзи двери милосердия Твоего мне заблуждшему и падшему в тиме́ние глубины, не возгнушайся мене сквернаго, не пре́зри грешнаго моления моего, не остави мене окаяннаго, яко в погибель злобный враг похитити мя ищет: но умоли о мне рожденнаго от Тебе Милосердаго Сына Твоего и Бога, да простит великия мои грехи и избавит мя от па́губы моея, яко да и аз, со всеми получившими прощение, воспою̀ и прославлю безмерное милосердие Божие и Твое непостыдное о мне заступление в жизни сей и в нескончаемем ве́це.

Молитва 2, чтомая в Московской Николаевской, в Хамовниках, церкви

Царице моя Преблагая, Надеждо моя Богородице, Споручнице грешных, прибежище сирых и странных Предстательнице, скорбящих Радосте, обидимых Покровительнице! Зри́ши мою беду, зри́ши мою скорбь: помозѝ ми яко не́мощну, направи мя яко стра́нна. Обиду мою ве́си,  разрешѝ ту, якоже во́лиши: яко не и́мам иныя помощи разве Тебе, ни ины́я Предстательницы, ни Благи́я Уте́шительницы, токмо Тебе, о Богомати, яко да сохрани́ши мя и покры́еши во веки веков.

Марта 9. Молитва пред Албазинскою иконою Пресвятыя Богородицы, именуемою Слово плоть бысть, чтомая в Кафедральном соборе града Благовещенска

Богородице Дево, Пренепорочная Мати Христа Бога нашего, Заступнице рода христианскаго! Пред чудотворною иконою Твоею предстояще, отцы наши моли́ша Тя, да явиши покров Твой и заступление стране приамурстей. Темже и мы ныне молим Тя: град наш и страну сию от нахождения иноплеменных соблюди и от междоусобныя брани сохрани. Даруй мирови мир, земли плодов изобилие, благоверному же императору нашему Николаю Александровичу и наследию его здравие и на враги одоление: сохрани во святыни пастырей наших, во святых храмех труждающихся: осенѝ вседержавным покровом Твоим строителей и благотворителей их. Утверди в правоверии и единомыслии братий наших: заблуждших же и отступльших от православныя веры вразуми и соедини Святей Церкви Сына Твоего. Буди всем притекающым к чудотворней икое Твоей покров, утешение и пристанище от всяких зол, бед и обстояний: Ты бо еси больных исцеление, скорбящих утешение, заблуждших исправление и вразумление. Приими моления наша и вознеси я̀ ко престолу Всевышняго, яко да Твоим предстательством соблюдаеми и покровом Твоим осеняеми, прославим Отца и Сына и Святаго Духа, ныне и присно и во веки веков.

Марта 14. Молитва пред иконою Пресвятыя Богородицы Феодоровскою

Молитва 1, из акафиста

О Пресвятая Владычице Богородице и Приснодево Марие, единая Надеждо нам грешным! К Тебе прибегаем и Тебе молим, якл велие имаши дерзновение к рождшемуся от Тебе по плоти Господу Богу и Спасителю нашему Иисусу Христу. Не презри слез наших, не возгнушайся воздыханий наших, не отрини скорби нашея, не посрами упования нашего на Тя, но матерними молении Твоими умоли Господа Бога, да сподобит нас, грешных и недостойных, свободитися от грехов и страстей душевных и телесных, и мiру убо умре́ти, а Ему Единому жити по вся дни жизни нашея. О Пресвятая Владычице Богородице! Путешествующым спутешествуй и ограждай  и охраняй оныя, избави плененных от пленения, свободи страждущих от бед, уте́ши сущих в печали, скорбех и напастех, облегчи нищету и всяко злострадание телесное, и даруй всем потребная к животу, благочестию и жизни временней. Благочестивейшаго же государя императора Николая Александровича и весь царствующий дом укрепи и утверди, и подаждь ему здравие и спасение и на враги победу и одоление. Спаси, Владычице, вся страны̀ и гра́ды и сию страну̀ и сей град, имже сия чудотворная икона Твоя дадеся во утешение и ограждение: [или: спаси, Владычице, сей град и святую обитель сию:] избави я̀ от гла́да, губительства, труса, потопа, огня, меча, нашествия иноплеменных, мождоусобныя брани, и отврати всякий гнев, на ны праведно движимый. Даруй нам время на покаяние и обращение, избави нас от внезапныя смерти, и во время исхода нашего предстани нам я́вльшися, Дево Богородице, и избави нас от воздушных мытарств князей века сего, сподоби на Страшнем Суде Христове стати одесную, и соделай нас наследники вечных благ, да славим великолепое имя Сына Твоего и Бога нашего, со Безначальным Его Отцем, и Святым и Благим и Животворящим его духом, ныне и присно и во веки веков.

Молитва 2, из акафиста

О Пресвятая Госпоже, Царице Богородице! Приими смиренное моление наше, и не отрини нас, заступление и прибежище наше, и не возгнушайся нас недостойных, но, яко Милосердая Мати, не престани молящи, Егоже родила еси, да дарует нам прощение многих согрешений наших, да спесет нас имиже весть судьбами. Помилуй нас, Владычице, помилуй нас, несть бо нам спасения от дел. Темже верно вопием Ти: помилуй рабы
Твоя, и неплодное сердце наше покажи плодоносно делы благими. Призри на нас  недостойных, Ты бо еси упование и покров наш, жизнь и свет сердцу нашему. Яко Невечерний Свет от чрева Твоего воздвигшая, озари душу нашу, и отжени всяку мглу от сердца нашего. даруй нам умиление, покаяние и сокрушение сердечное. Сподоби нас по вся дни жизни нашея творити волю Сына Твоего и Бога нашего и во всем благоугождати Ему Единому. О Богомати! Не престани молящи рождашагося от Тебе за вся притекающыя с верою святому [или чудотворному] образу Твоему, и подавай им скорую помощь и утешение в скорбех и напастех злостраданиих: избави их от клеветы и злобы человеческия, от враг видимых и невидимых и всякия нужды и печали. Спаси Отечество наше, царствующий град наш, град сей [или святую обитель сию] и вся грады и страны̀ от всяких бед и нужд, и сотвори милостива нам быти Бога нашего, отврати всякий гнев Его, на ны движимый, и избави ны от належащаго и праведнаго Его прещения. О Боголюбивая Владычице, Ангелов Украшение, мучеников Славо и всех святых Радосте! С ними моли Господа, да сподоьит нас в покаянии скончати жизни нашея течение. В смерти же час, Пресвятая Дево, избави нас от власти бесовския, и осуждения, и ответа, и страшнаго испытания, и мытарств горьких, и огня вечнаго, да сподобльшеся славнаго Царствия Божия, величаем Тя и славим воплощшагося от Тебе Христа Бога нашего, Емуже слава со Отце и Святым Духом, ныне и присно и во веки веков.

Молитва 3

О Пресвятая Владычице Богородице! Призри с благосердием на моления нас грешных и смиренных рабов Твоих, и умолѝ Бога Сына Твоего, да ниспо́слет нам и всем притекающым к Тебе здравие душевное и телесное и вся к ве́чней и временней жизни потре́бная, да простит нам всякое согрешение вольное и невольное, да избавит нас от всяких скорбей и болезней, и напастей, и всякаго зла́го обстояния. Ей, Царице наша Преблагая, Надеждо наша несокрушимая и Заступнице необоримая! Не отвратѝ лица Твоего от нас за множество прегрешений наших: но прострѝ нам ру́це матерняго милосердия Твоего и сотвори с нами знамение во благо. Яви нам богатую помощь Твою и благопоспешѝ во всяком деле блазе: от всякаго же начинания греховнаго и помышления лукаваго отврати нас, да всегда славим пречестное имя Твое, и благодарне честному [или чудотворному] образу Твоему покланяющеся, величаем Бога Отца, и Единароднаго Сына Его, Господа нашего Ииисуса Христа, и Святаго Духа, со всеми святыми, во веки веков.

Молитва 4

Царице моя Преблагая, Надеждо моя Богородице, прибежище сирых и странных Предстательнице, скорбящих Радосте, обидимых Покровительнице! Зри́ши мою беду, зри́ши мою скорбь: помозѝ ми яко не́мощну, направи мя яко стра́нна. Обиду мою ве́си,  разрешѝ ту, якоже во́лиши: яко не и́мам иныя помощи разве Тебе, ни ины́я Предстательницы, ни Благи́я Уте́шительницы, токмо Тебе, о Богомати, яко да сохрани́ши мя и покры́еши во веки веков.

Молитва 5, чтомая в Городецкой обители, Нижегородския епархии

К кому воззову, Владычице? К кому прибегну в печали моей? К кому принесу слезы и воздыхания моя, аще не к Тебе, Царице небесе и земли? Кто исторгнет мя из тины грехов и беззаконий, аще не Ты, о Мати Живота, Заступнице и Прибежище рода человеческаго? Услыши стенание мое, утеши мя и помилуй в горести моей, защити в бедах и напастех, избави озлоблений и скорбей и всяких недугов и болезней, от врга видимых и невидимых, умири вражду стужающих мне, да избавлен буду от клеветы и злобы человеческия: такожде от своея ми плоти гнусных обычаев свободи мя. укрый мя под сению милости Твоея, да обрящу покой и радость и от грехов очищение. Твоему матернему заступлению себе вручаю: буди мне Мати и надежда, покров и помощь и заступление, радость и утешение и скорая во всем Помощница. О чудная Владычице! Всяк притекаяй к Тебе без Твоея всесильныя помощи не отходит: сего ради и аз недостойный к Тебе прибегаю, да избавлен буду от внезапныя и лютыя смерти, скрежета забнаго и вечнаго мучения, Небесное же Царствие получити сподоблюся и Тебе во умилении сердца реку̀: радуйся, Мати Божия, Предстательнице и Заступнице наша усердная, во веки веков.

Тропарь, глас 4

Пришествием честныя Твоея иконы, Богоотроковице, обрадованный днесь богохранимый град Кострома, якоже древний Израиль к кивоту Завета, притекает ко изображению лица Твоего и воплотившагося от Тебе Бога нашего, да Твоим матерним к Нему предстательством присно ходатайствуеши всем, под сень крова Твоего прибегающым, мир и велию милость.

Марта 25. Молитва пред иконою Благовещения Пресвятыя Богородицы

Приими Всеблагомощная, Пречистая Госпоже, Владычице Богородительнице, сия честныя да́ры, Тебе единей прикладныя, от нас недостойных рабов Твоих, от всех родов избранная, всех тварей небесных и земных вышшая явльшаяся. Понеже бо Тебе ради бысть Господь сил с нами, и Тобою Сына Божия познахом, и сподобихомся Святаго Тела Его и Пречистыя Крове Его. Темже блаженна еси в родех родов, Богоблаженная, херувимов светлейши и серафимов честнейши сущая. И ныне, всепетая Пресвятая Богородице, не престай молящися о нас недостойных рабех Твоих, еже избавитися нам от всякаго совета лукаваго и от всякаго обстояния, и сохранитися нам неврежденным от всякаго ядовитаго прилога диавольскаго. Но даже до конца молитвами Твоими неосужденных нас соблюди: яко Твоим заступлением и помощию спасаеми, славу, хвалу, благодарение и поклонение за вся в Троице Единому Богу и всех Создателю возсылаем, ныне и присно и во веки веков.

Тропарь, глас 4

Днесь спасения нашего Главизна, и еже от века таинства явление: Сын Божий Сын Девы бывает, и Гавриил благодать благовествует. Темже и мы с ним Богородице возопиим: радуйся, Благодатная, Господь с Тобою.

В субботу 5‑я седмицы Великаго поста. Молитва пред иконою Пресвятыя Богородицы, именуемою Похвала Богоматери

К кому возопию, Влалычице? К кому прибегну в горести моей, аще не к Тебе, Царице Небесная? Кто плачь мой и воздыхание приимет, аще не Ты, Пренепорочная, Надеждо христиан и Прибежище? Кто паче Тебе в напастех защитит? Услыши убо стенание мое, и приклони ухо Твое ко мне, Влалычице Мати Бога моего, и не презри мене требующаго Твоея помощи, и не отрини мене грешнаго. Вразуми и научи мя, Царице Небесная: не отступи от мене раба Твоего, Владычице, за роптание мое, но буди мне Мати  Заступница. Вручаю себе милостивому покрову Твоему: приведи мя грешнаго к тихой и безмятежней жизни, да плачуся о гресех моих. К кому прибегну повинный аз, аще не к Тебе, упованию и прибежищу грешных, надеждою на неизреченную милость Твою и щедроты Твоя окриляемь; О Владычице Царице Небесная! Ты мне упование и прибежище, покров и заступление и помощь. Царице моя преблагая и скорая Заступнице: покрый Твоим ходатайством моя прегрешения, защити мене от враг видимых и невидимых: умягчи сердца злых человек, возстающих на мя. О Мати Господа моего Творца! Ты еси корень девства и неувядаемый цвет чистоты. О Богородительнице! Ты подаждь ми помощь немощствующему плотски́ми страстьми и болезнующему сердцем, едино бо Твое и с Тобою Твоего Сына и Бога нашего имам заступление: и Твоим пречудным заступлением да избавлюся от всякия беды и напасти, о Пренепорочная и Преславная Божия Мати Марие. Темже со упованием глаголю и вопию: радуйся Благодатная: радуйся Обрадованная: радуйся, Преблагословенная, Господь с Тобою.

В Великий Пяток. Молитва пред святою иконою, именуемою Плачь Богоматере, чтомая в церкви села Горностаева, Московския епархии

О Пресвятая Госпоже Владычице Богородице, нашего спасения Надеждо! Воззри милостивно на люди Твоя, с верою и любовию предстоящыя и пречистому образу Твоему покланяющыяся: приими наше хвалебное пение сие и пролей теплую Твою молитву о нас грешных ко Господу, да презрев вся наша согрешения, спсет и помилует нас. Еще же молим Тя умиленно: избави нас от всякия скорби и смертоносныя язвы, подай нам Твою милостивую помощь, не отрининаших слез и воздыханий, не забуди нас во вся дни жизни нашея: но всегда пребывай с нами, и Твоим заступлением и ходатайством у Господа подаждь нам отраду, утешение, защиту и помощь, да славим преблагословенное и всепетое имя Твое во веки веков.

Месяц априлий

Априлиа 12. Молитва пред чудотворною иконою Пресвятыя Богородицы Белыничскою, чтомая в Белыничском Богородицком монастыре, Могилевския епархии

О  Всемилостивая Госпоже, Царице Богородице, от всех родов Избранная и всеми роды небесными и земными Ублажаемая! Смиренно молимся Тебе: воззри милостивно на предстоящыя пред святою и чудотворною иконою Твоею люди сия, яко Тебе Самой ту̀ сущей, и приими молитвы и пение, со умилением Тебе ныне приносимыя от недостойных раб Твоих, и подаждь с верою просящым по коемуждо прошению исполнение. Ты, именуемая всех скорбящых радость, услыши нас скорбных: Ты, нарицаемая утоление печалей, утоли нашу печаль: Ты, купино неопалимая, сохрани мiр и всех нас от вредоносных огненных стрел врага: Ты, взыскание погибших, не попусти нам погибнути в бездне грехов наших: Ты, одигитрие, указуй нам правый путь ко спасению: Ты, неувядаемый цвете чистоты, подаждь, нам помощь, плотскою страстию обуреваемым, и сердца̀ наша уцеломудри: Ты, Боголюбивая скоропослушнице, услыши в час сей молитву нашу: Ты, Заступнице усердная, Мати Господа Вышняго и нашя Мати и Надеждо, облегчи скорбь нашу: немощным здравие даруй, разслабленныя и недужныя исцели и от одра болезни возстави, прокаженныя очисти, слепым зрение даруй, бесны́я от бесов свободи, обидимыя от обид избави, скорбящым утешение низпосли, вдовицы и сирыя защити, грешныя к покаянию призови и на путь спасения направи, кающымся прощение даруй, старость поддержи, юныя настави, малыя дети сохрани, в до́мех мир и дружелюбие утверди, путешествующым спутешествуй, в морях плавающым буди добрая кормчая, и благотишие даруй: благочестивейшему государю нашему императору Николаю Александровичу на враги победу и одоление даруй: ереси и расколы искорени, отпадшыя от благочестивыя веры на путь правый обрати: страну нашу миром огради: всех же нас от внезапныя смерти сохрани, земли благоплодие и всякое душевному нашему и телесному здравию и спасению полезное даруй, вся бо ходатайством  к Сыну Твоему, Христу Богу нашему, можеши. О Всепетая Мати, Пресвятая Дево Богородице! Не престай молитися о нас недостойных, ко пречистому образу Твоему со умилением припадающих и со страхом и любовию на сей взирающих: услыши нас, Владычице, на Тя по Бозе едину надежду имущих. Прежде же отшедшыя отцы и матери, братию и сестры нашя упокой в селениих святых, в месте злачне, в месте покойне, идеже несть печаль и воздыхание. Егда же приспеет и наше от жития сего отшествие и к вечней жизни преселение, предстани нам, преблагословенная надеждо наша, и даруй намхристианскую кончину безболезнену, непостыдну, мирну и Святых Таин причастну, да и в будущем веце сподобимся вси, купно со всеми святыми, безконечныя блаженныя жизни во Царствии возлюбленнаго Сына Твоего, Господа нашего Иисуса Христа, Емуже подобает всякая слава, честь и поклонение, со Безначальным Его Отцем, и Пресвятым и Благим и Животворящим Его Духом, ныне и присно и во веки веков.

Априлиа 14. Молитва пред Виленскою чудотворною иконою Пресвятыя Богородицы Одигитрии, чтомыя в Виленском Свято-Троицком монастыре

Молитва 1

К кому возопию, Влалычице? К кому прибегну в горести моей, аще не к Тебе, Царице Небесная? Кто плачь мой и воздыхание приимет, аще не Ты, Пренепорочная, Надеждо христиан и Прибежище? Кто паче Тебе в напастех защитит? Услыши убо стенание мое, и приклони ухо Твое ко мне, Влалычице Мати Бога моего, и не презри мене требующаго Твоея помощи, и не отрини мене грешнаго. Вразуми и научи мя, Царице Небесная: не отступи от мене раба Твоего, Владычице, за роптание мое, но буди мне Мати  Заступница. Вручаю себе милостивому покрову Твоему: приведи мя грешнаго к тихой и безмятежней жизни, да плачуся о гресех моих. К кому прибегну повинный аз, аще не к Тебе, упованию и прибежищу грешных, надеждою на неизреченную милость Твою и щедроты Твоя окриляемь; О Владычице Царице Небесная! Ты мне упование и прибежище, покров и заступление и помощь. Царице моя преблагая и скорая Заступнице: покрый Твоим ходатайством моя прегрешения, защити мене от враг видимых и невидимых: умягчи сердца злых человек, возстающих на мя. О Мати Господа моего Творца! Ты еси корень девства и неувядаемый цвет чистоты. О Богородительнице! Ты подаждь ми помощь немощствующему плотски́ми страстьми и болезнующему сердцем, едино бо Твое и с Тобою Твоего Сына и Бога нашего имам заступление: и Твоим пречудным заступлением да избавлюся от всякия беды и напасти, о Пренепорочная и Преславная Божия Мати Марие. Темже со упованием глаголю и вопию: радуйся Благодатная: радуйся Обрадованная: радуйся, Преблагословенная, Господь с Тобою.

Молитва 2

О Всемилостивая Госпоже, Царице Богородице, от всех родов Избранная и всеми роды небесными и земными Ублажаемая! Воззри милостивно на предстоящыя пред святою иконою Твоею люди сия, усердно молящыяся Тебе, и сотвори предстательством Твоим и заступлением у Сына Твоего и Бога нашего, да никтоже отъидет от места сего тощь упования своего и посрамлен в надежде своей, но да приимет кийждо от Тебе вся по благому изволению сердца своего, по ну́жде и потре́бе своей, во спасение души и во здравие телу. Наипаче же осени и огради покровом Твоим, Милосердая Мати, благочестивейшаго государя нашего, императора Николая Александровича, и весь царствующий дом его: отжени от него молитвами Твоими всякаго врага и супостата, утверди житие его в мире и тишине, да и мы вси тихое и безмолвное житие поживем во всяком бла́зе, благочестии и чистоте: удержа́ви царство его, во еже быти в нем Царству Христову: управи пути и советы его, да возсияет во днех его правда и множество мира, и да возрадуется сердце его о сущих в державе его, якоже сердце отца о чадех своих веселящася: на сопротивныя же и лукавнующыя в сердцах своих послѝ пред лицем его трепет, да поне страхом вразумятся и престанут отлукавств и противлений своих. Моли, Милосердая Владычице, Пренебеснаго Бога, да присно Церковь Свою Святую соблюдет, вышним Своим благословением архиереи нашя православныя укрепит, миром оградит, и Святей Своей Церкви целых, здравых, честных, долгоденствующих и право правящих слово Своея истины дарует, от всех же видимых и невидимых враг, со всеми православными христианы, милостивно избавит, и во православии и твердей вере до конца веков непоступно??? и неизменно сохранит. Призирай благосердием, Всепетая, и призрением милостиваго Твоего заступления на все царство наше Всероссийское, царствующыя грады нашя и град сей, святую обитель сию, храм сей и духовный вертоград зде сущий, и на сия богатыя Твоя милости неоскудно изливай, Ты бо еси Всесильная Помощница и Заступница всех нас. Приклонися к молитвам и всех раб Твоих, ко святей иконе Твоей зде притекающих, услыши воздыхания и гласы, имиже раби Твои молятся на святем месте сем. Аще же и иноверный и иноплеменник, зде преходя, помо́лится, услыши, чадолюбивая Госпоже, и сего человеколюбне, и милостивно соделай, яже к помощи ему и ко спасению. Ожесточенныя же и разсеянныя сердцы̀ своими во странах наших на путь истины настави: отпадшыя от благочестивыя веры обрати и паки святей православней кафоличестей церкви сопричти. В до́мех людей Твоих и во братии святыя обители сея мир огради и соблюди, в юных братство и смиренномудрие утверди, старость поддержи, отроки настави, в возрасте совершеннем сущыя умудрѝ, сирыя и вдовицы заступѝ, утесненныя и в ско́рбех сущыя уте́ши и охранѝ, младенцы воспитай, болящыя уврачу́й, плененныя свободѝ, ограждающи ны присно от всякаго зла благостию Твоею, и утеши милостивным Твоим посещением и вся благодеющыя нам. Даруй же, благая, земли плодоносие, воздуху благорастворение и вся, яже на пользу нашу, дары благовременныя и благопотребныя, всемощным Твоим предстательством пред Всесвятою Живоначальною Троицею, в Еяже храме предстоим вси, нам помогающи. Прежде отшедшыя отцы и матери, братию и сестры нашя, и вся от лет древних ко святей иконе Твоей сей припадавшыя, упокой в селениих святых, в месте злачне, в месте покойне, идеже несть печаль и воздыхание. Егда же приспеет и наше от жития сего отшествие и к вечней жизни преселение, предстани нам, Преблагословенная Дево, и даруй христианскую кончину жития нашего безболезнену, непостыдну, мирну и Святых Таин причастну, да и в будущем вѐце сподобимся вси, купно со всеми святыми, безконечныя блаженныя жизни во Царствии возлюбленнаго Сына Твоего, Господа и Спаса нашего Иисуса Христа, Емуже подобает всякая слава, честь и поклонение, со Отцем и Свяиым Духом, во веки веков.

Априлиа 25. Молитва пред чудотворною иконою Пресвятыя Богородицы Цареградскою, чтомыя в Елеазаровой пустыни, Псковской епархии

К Тебе, Пресвятая Госпоже Богородице, недостойнии раби Твои прибегаем: Ты бо, Преблагая, едина незлобивая еси и всемощная к Сыну Твоему, Христу Богу нашему, за ны грешныя Ходатаица и непостыдная Предстательница. Веси, яко благость Его преступлением Божественных Его заповедей зело преогорчихом: несть бо грех, егоже мы непотребнии не сотворихом, всяко страх Божий поправше: того ради и Духа благодати и дара преестественнаго сыноположения отвергохомся, и всякаго отвращения и казни достойни сотворихомся. Веси, Преблагая Заступнице, яко и Твоя милости и дарования мы безумнии забвению предахом, и Твоего милосердия недостойнии содеяхомся. Колькраты бо Тя, Госпоже Богородительнице, на умоление Сына Твоего и Бога нашего подвизающе, от злых исправление явити обещахом! Но солгахом окаяннии, и Твое матернее к Нему за ны грешныя предствтельство и заступление ни во чтоже вмени́хомся, и тако зело неблагодарнии и злонравнии явихомся, и ныне студ свой носяще и нижѐ воззрети на пречистый Твой образ достойни суще, в покаянии пред Ним предстахом. Темже и глаголем: ве́мы, Владычице, коли́ко может Твое матернее ко Христу Богу нашему дерзновение: ве́мы, яко никтоже, прибегаяй к Тебе, Благосердая, с покаянием и умилением, посра́млен от тебе бысть, или призыва́яй Тебе, Пречистая, не услышан от тебе изы́де: чтит бо Сын Твой Тя, Богоневесто, яко Матерь Свою, милостивно моления Твоя приемля. Умилосердися убо на ны непотребныя рабы Твоя и, и́миже ве́си судьба́ми, взыщи на погибшыя: просвети наш ум светом боговедения, да им озаре́ни бывше, всякое злое помышление и всяк безсту́дных деяний образ до конца отсече́м, всем же сердцем заповеди Господни возлюбим и в них непорочно ходи́ти на́чнем. Еще же, о Владычице, и еретическая возстания низложи, разсеянныя собери, заблуждшыя во едино Христово стадо возврати, старость поддержи, юныя вразуми, вдовицы и сирыя зашитѝ, болящыя исцелѝ и скорбящыя уте́ши. Благоверному и христолюбивому нашему царю крепость на враги даруй, царство же его миром огради и во веки незыблемо соблюди: нам же всем преспе́яние в вере и де́лех благих в долготу дний даруй. Прежде отшедшыя отцы и братию нашу во светлостех райских и селениих праведных упокой, с нимиже и нас всех в покаянии и исповедании приими, да и мы со всеми святыми прославим пречестное имя Отца и Сына и Святаго Духа во веки веков.

В пяток Светлыя Седмицы. Молитвы пред Билярскою чудотворною иконою Пресвятыя Богородицы, именуемою Живоносный источник, чтомыя в Михайло-Архангельской церкви пригорода Билярска, Казанския епархии

Молитва 1

О Пресвятая Госпоже Владычице Богородице! Вы́шши еси всех ангел и архангел, и всея твари честнейши: Помощница еси обидимых, ненадеющихся надеяние, убогих Заступница, печальных утешение, алчущих Кормительница, нагих одеяние, больных исцеление, грешных спасение, христиан всех поможение и заступление. О Всемилостивая Госпоже, Дево Богородице Владычице! Милостию Твоею спаси и помилуй благочестивейшаго, самодержавнейшаго, великаго государя нашего, императора Николая Александровича всея России: супругу его, благочестивейшую государыню императрицу Александру Феодоровну: матерь его благочестивейшую государыню императрицу Марию Феодоровну: наследника его, благовернаго государя цесаревича и великаго князя Алексия Николаевича, и весь царствующий дом. Спаси, Госпоже, и помилуй раб Твоих, святейший правительствующий синод, и преосвященныя митрополиты, архиепископы и епископы, и весь священнический и иноческий чин, и благоверных правительствующий синклит, и военачальники, градоначальники и христолюбивое воинство, и доброхоты, и вся православныя христианы ризою Твоею честною защити: и умоли, Госпоже, из Тебе без семене воплотившагося Христа Бога нашего, да препояшет нас силою Своею свыше на невидимыя и видимыя враги нашя. О Всемилостивая Госпоже Владычице Богородице! Воздвигни нас из глубины греховныя, и избави нас от глада, губительства, от труса и потопа, от огня и меча, от нахождения иноплеменных и междоусобныя брани, и от внезапныя смерти, и от нападения вражия, и от тлетворных ветр, и от смертоносныя язвы, и от всякаго зла. Подаждь, Госпоже, мир и здравие рабом Твоим, всем православным христианом, и просвети им ум и очи сердечныя, еже ко спасению: и сподоби ны, грешныя рабы Твоя, Царствия Сына Твоего, Христа Бога нашего: яко держава Его благослове́на и препросла́влена, со Безначальным Его Отцем, и с Пресвятым и Благим и Животворящим Его Духом, ныне и присно и во веки веков.

Молитва 2, из книги Правило готовящымся к служению Литургии святыя

Царице моя Преблагая, Надеждо моя Богородице, прибежище сирых и странных Предстательнице, скорбящих Радосте, обидимых Покровительнице! Зри́ши мою беду, зри́ши мою скорбь: помозѝ ми яко не́мощну, направи мя яко стра́нна. Обиду мою ве́си,  разрешѝ ту, якоже во́лиши: яко не и́мам иныя помощи разве Тебе, ни ины́я Предстательницы, ни Благи́я Уте́шительницы, токмо Тебе, о Богомати, яко да сохрани́ши мя и покры́еши во веки веков.

Молитва 3, Петра инока Студийскаго

К Тебе, Пречистей Божией Матери, аз окаянный припадая молюся: веси, Царице, яко непрестанно согрешаю и прогневляю Сына Твоего и Бога моего. и аще многажды каюся, ложь пред Богом обретаюся: каюся трепещя, да не како поразит мя Господь, и по мале паки таяжде творю. Ведущи сия, Владычице моя, Госпоже Богородице, молю, да помилуеши, да укрепиши мя, и благая творити да пода́си ми. Ты веси, о Владычице моя Богородице, яко имам в совершенней ненависти злая моя дела и всею мыслию люблю закон Бога моего. Но не вем, Госпоже Пречистая, откуда яже ненавижду, тая творю, а благая преступаю. Не попускай убо, Пречистая, воли моей совершатися, неугодна бо есть, но да будет во мне воля Сына Твоего и Бога моего, да мя спсет, и вразумит, и подаст ми благодать святаго духа, да бых аз отселе престал сквернодействуя и прочее пожил бых в повелениих Сына Твоего, Господа нащего Иисуса Христа, емуже подобает всякая слава, честь и поклонение, со Безначальным Его Отцем, и Пресвятым и Благим и Животворящим Его Духом, ныне и присно и во веки веков.

В пяток Светлыя Седмицы. Молитва пред иконою Пресвятыя Богородицы, именуемою презрение очес, чтомыя в Московской Трехсвятительской, на Кулишках,  церкви

О Пресвятая Госпоже Владычице Богородице! Приими недостойную молитву нашу, и сохрани всех нас, с верою и любовию покланяющихся пречистому образу Твоему, от навета злых человек и от внезапныя смерти, и даруй нам прежде конца покаяние. На моление наше умилосердися, и и радость вместо печали даруй нам. Се бо, на Твой образ взирающе, яко живей Ти сущей с нами, молим Тя усердно: избави нас, о Мати всех скорбящих и обремененных, от всякия беды и напасти, скорби, болезни и печали и от всякаго зла. И сподоби ны, недостойныя рабы Твоя, одесную стати Сына Твоего, Христа Бога нашего, во Втором и славнем Его Пришествии, и наследники быти Царствия Небеснаго и жизни вечныя со всеми святыми в безконечныя веки веков.

Месяц маий

Маиа 7. Молитвы пред чудотворною иконою Пресвятыя Богородицы, именуемою Любечскою. Из службы

О Пресвятая и Преблагословенная Мати Господа и Спаса нашего Иисуса Христа, Пречистая Приснодево, Богородице Марие! Припадаем и покланяемся Тебе пред святою и чудотворною иконою Твоею, юже от лет древних зде чудесы многими и исцеленьми неисчетными прославити благоизволила еси. Смиренно молимся Тебе, благой и милосердней Заступнице нашей: предстательством угодника Твоего, преподобнаго Антония Печерскаго, вонми гласу грешных молений наших, не презри воздыханий от души, виждь скорби и беды нас обышедшыя, и яко любвеобильная воистину Мати, потщися на помощь нам безпомощным, унылым, во многия и тяжкия грехи падшым и присно прогневляющым Господа и Создателя нашего, Егоже умоли, Предстательнице наша, да не погуби́т нас со беззаконии нашими, но да явит нам человеколюбную свою милость. Испроси нам, Владычице, у благости Его телесное здравие и душевное спасение, благочестное и мирное житие, земли плодоносие, воздуха благорастворение, дождѝ благовременны и благословение свыше на вся благая дела и начинания наша. Исходатайствуй, Госпоже, у Царя царствующих и Гспода господствующих, благочестивейшему, самодержавнейшему, великому государю нашему, императору Николаю Александровичу всея России, на вся враги его победу и одоление, всему же православному царству его милость Божию, благоустроение и во всех благих изобилие. О Царице Всепетая, Мати Божия Всеблагая! Простри богоноснии ру̀це Твои к возлюбленному Сыну Твоему и Богу нашему, умоли Его вся ны спасти и избавити от погибели вечныя. Якоже древле на месте сем отцем нашым милость Твою являла еси, Владычицне, сице и нам ныне яви, Богородице, Твоя щедроты: болящыя исцели, скорбящыя уте́ши, бедствующым помози: споспеши всем нам носити иго Христово в терпении и смиренномудрии, и сподоби нам благочестно житие сие земное скончати, христианскую же непостыдную кончину получити и Небесное Царствие унаследовати, матерним ходатайством Твоим к рождшемуся от Тебе Господу и Богу нашему Иисусу Христу, Емуже, со Безначальным Его Отцем и Пресвятым Духом, подобает всякая слава, честь и поклонение, ныне и присно и во веки веков.

Тропарь, глас 4

Преблагословенная Царице, Пречистая Дево Богородице, прославльшая град Любечь угодника Твоего преподобнаго Антония Печерскаго рождением и чудотворныя иконы Твоея явлением! Молим Тя, Всеблагая, моли за ны рождшагося от Тебе <…> Христа Бога нашего, и матерним Твоим к Нему предстательством избави нас от всякаго зла: недуги нашя исцели, печали нашя утоли и наследники яви нас Царствия Небеснаго, яко милосердна.

Маиа 21, иуниа 23 и августа 26. Молитвы пред иконою Пресвятыя Богородицы Владимирскою

Молитва 1, из акафиста

О Всемилостивая Госпоже Богородице, Небесная Царице, Всемощная Заступнице, непостыдное наше упование! Благодарим Тя о всех благодеяниих, российским людем от Тебе, бывших отдревле и доднесь от чудотворныя иконы Твоея явленных. И ныне, Преблагая Владычице, призри на ны грешныя и недостойныя рабы Твоя, яви нам милость Твою, и моли Сына Твоего, Христа Бога нашего, о еже избавитися нам от всякаго зла, и сохранитися царствующым градо́м, всякому граду и всей стране нашей от глада, губительства, труса, потопа, огня, меча, нашествия иноплеменник и междоусобныя брани. Испроси благочестивейшему, самодержавнейшему, великому государю нашему, императору Николаю Александровичу и всему царствующему дому благоденственное и мирное житие, здравие, долгоденствие, во всем благое поспешение и спасение. Сохрани и умудри пастырей Церкве, еже достойно пасти стадо Христово и пра́во пра́вити слово истины: укрепи Христолюбивое всероссийское воинство, подаждь дух совета и разума военачальником, градоначальником и всем, иже во власти суть: низпосли святое Твое благословение и всем православным христианом, покланяющымся Ти и молящымся  пред цельбоносною Твоею иконою. Буди нама Заступница и Ходатаица пред престолом Всевышняго, идеже предстоиши. К кому убо прибегнем, аще не к Тебе, Владычице? Кому принесем слезы и воздыхания, аще не Тебе, Пресвятая Богородице? Не имамы бо иныя помощи, не имамы иныя надежды, разве Тебе, Небесная Царице. Под Твой покров притекаем: молитвами Твоими низпосли нам мир, здравие, земли плодоносие, воздуха благорастворение, избави ны от всяких бед и скорбей, от всяких недугов и болезней, от внезапныя смерти и от всех озлоблений врагов видимых и невидимых. Вразуми и научи ны, о Всемилостивая Заступнице, путь земнаго сего жития безгрешно прейти. Ты веси немощи нашя, веси и согрешения наша, но и веру веси, и упование видиши: темже даруй нам исправление греховныя жизни и умягчи злая сердца наша. Укрнпи в нас правую веру, вложи в сердца наша дух страха Божия, дух благочестия, дух смирения, терпения и любве, в добрых де́лех преуспеяние: избави же нас от искушений, от пагубных душевредных учений, от неверия, развращения и погибели вечныя. Тебе убо просим, Пречистая Владычице, и припадающе пред святою Твоею иконою, молимся: умилосердися на ны и помилуй ны, в Страшный же день Суда ходатайством и заступлением Твоим сподоби ны стати одесную Сына Твоего, Христа Бога нашего, Емуже подобает всякая слава, честь и плоклонение, со Безначальным Его Отцем и Пресвятым и Благим и Единосущным Его Духом, ныне и присно и во веки веков.

Молитва 2

О Пресвятая Госпоже Владычице Богородице! Вы́шши еси всех ангел и архангел, и всея твари честнейши: Помощница еси обидимых, ненадеющихся надеяние, убогих Заступница, печальных утешение, алчущих Кормительница, нагих одеяние, больных исцеление, грешных спасение, христиан всех поможение и заступление. О Всемилостивая Госпоже, Дево Богородице Владычице! Милостию Твоею спаси и помилуй благочестивейшаго, самодержавнейшаго, великаго государя нашего, императора Николая Александровича всея России: супругу его, благочестивейшую государыню императрицу Александру Феодоровну: матерь его благочестивейшую государыню императрицу Марию Феодоровну: наследника его, благовернаго государя цесаревича и великаго князя Алексия Николаевича, и весь царствующий дом. Спаси, Госпоже, и помилуй раб Твоих, святейший правительствующий синод, и преосвященныя митрополиты, архиепископы и епископы, и весь священнический и иноческий чин, и благоверных правительствующий синклит, и военачальники, градоначальники и христолюбивое воинство, и доброхоты, и вся православныя христианы ризою Твоею честною защити: и умоли, Госпоже, из Тебе без семене воплотившагося Христа Бога нашего, да препояшет нас силою Своею свыше на невидимыя и видимыя враги нашя. О Всемилостивая Госпоже Владычице Богородице! Воздвигни нас из глубины греховныя, и избави нас от глада, губительства, от труса и потопа, от огня и меча, от нахождения иноплеменных и междоусобныя брани, и от внезапныя смерти, и от нападения вражия, и от тлетворных ветр, и от смертоносныя язвы, и от всякаго зла. Подаждь, Госпоже, мир и здравие рабом Твоим, всем православным христианом, и просвети им ум и очи сердечныя, еже ко спасению: и сподоби ны, грешныя рабы Твоя, Царствия Сына Твоего, Христа Бога нашего: яко держава Его благослове́на и препросла́влена, со Безначальным Его Отцем, и с Пресвятым и Благим и Животворящим Его Духом, ныне и присно и во веки веков.

Молитва 3, из Канонника

Приими Всеблагомощная, Пречистая Госпоже, Владычице Богородице, сия честныя да́ры, Тебе единей прикладныя, от нас недостойных рабов Твоих, от всех родов избранная, всех тварей небесных и земных вышшая явльшаяся. Понеже бо Тебе ради бысть Господь сил с нами, и Тобою Сына Божия познахом, и сподобихомся Святаго Тела Его и Пречистыя Крове Его. Темже блаженна еси в родех родов, Богоблаженная, херувимов светлейши и серафимов честнейши сущая. И ныне, всепетая Пресвятая Богородице, не престай молящися о нас недостойных рабех Твоих, еже избавитися нам от всякаго совета лукаваго и от всякаго обстояния, и сохранитися нам неврежденным от всякаго ядовитаго прилога диавольскаго. Но даже до конца молитвами Твоими неосужденных нас соблюди: яко Твоим заступлением и помощию спасаеми, славу, хвалу, благодарение и поклонение за вся в Троице Единому Богу и всех Создателю возсылаем, ныне и присно и во веки веков.

Молитва 4

Царице моя Преблагая, Надеждо моя Богородице, прибежище сирых и странных Предстательнице, скорбящих Радосте, обидимых Покровительнице! Зри́ши мою беду, зри́ши мою скорбь: помозѝ ми яко не́мощну, направи мя яко стра́нна. Обиду мою ве́си,  разрешѝ ту, якоже во́лиши: яко не и́мам иныя помощи разве Тебе, ни ины́я Предстательницы, ни Благи́я Уте́шительницы, токмо Тебе, о Богомати, яко да сохрани́ши мя и покры́еши во веки веков.

Молитва 5

О Пречистая Госпоже Владычице Богородице! Приимѝ недостойную молитву нашу, и сохрани нас от навета злых человек и от внезапныя смерти, и даруй нам прежде конца покаяние. На моление наше умилосе́рдися, и радость вместо печали да́руй. И изба́ви нас, Госпоже, от всякия беды̀ и напасти, скорби и болезни и от всякаго зла. И сподо́би ны, грешныя рабы Твоя, одесную ста́ти во втором пришествии Сына Твоего, Христа Бога нашего, и наследники быти Царствия Небеснаго и жизни вечныя со всеми святыми в безконечныя веки веков.

Молитва 6, чтомая в Богоявленском соборе града Княгинина, Нижегородския епархии

К кому возопием, Владычице? К кому прибегнем в горести нашей, аще не к Тебе, Царице Небесная? Кто плачь наш и воздыхание приимет, аще не Ты, Пренепорочная, Надеждо христиан и прибежище нам грешным? Кто паче Тебе в милости? Приклони ухо Твое к нам, Владычице, Мати Бога нашего, и не презри требующих Твоея помощи: услыши стенание наше, подкрепи нас грешных, вразуми и научи, Царице Небесная, и не отступи от нас раб Твоих, Владычице, за роптание наше, но буди нам Мати и Заступница, и вручи нас милостивому покрову Сына Твоего: устрой  о нас, како угодно будет святей Твоей воли, и приведи нас грешных к тихой и безмятежней жизни, да плачемся о гресех наших, да возрадуемся же с Тобою всегда, ныне и присно и во веки веков.

Молитва 7, чтомая в Корнилиево-Комельском монастыре, Вологодския епархии

О Пресвятая Владычице наша Богородице, Небесная Царице, наша Преблагая Надеждо, преизящная Отроковице, ненадеящымся надеяние, грешным спасение, сирым прибежище, странным Предстательнице, нагим одеяние, скорбящым утешение и радосте, обидимым Покровительнице и всем сущым в бедах и напастех вспоможение и заступление! О Всемилостивая Госпоже Дево Богородице! Зри́ши наша беды̀, ско́рби и напа́сти: помозѝ нам немощны́м, печальным и унылым, скорбным же и отчаянным, и всяку печаль отъимѝ от нас. Обиду нашу ты ве́си: разрешѝ ту, Всенепорочная, якоже во́лиши и мо́жеши: не даждь нам во отчаяние впа́сти. Не имамы бы иныя помощи, разве Сына Твоего, Христа Бога нашего, и Тебе, о Мати Божия, о Владычице наша! Темже на Твой пречистый образ  со воздыханием и с сокрушением сердца взираем, и колена до земли преклоняем, взыва́юще: при́зри благосердым оком, Всепетая Богородице, и услыши нас, предлагая: не отри́ни, но благоволи поми́ловати: не омерзѝ нашего воздыхания. Никтоже бо притека́яй к Тебе посра́млен от Тебе исходит, но просит благодати и приемлет дар на пользу прошения во веки веков.

Тропарь, глас 4

Днесь светло красуется сла́внейший град Москва, яко зарю солнечную восприемши, Владычице, чудотворную Твою икону, к нейже ныне мы притекающе и молящеся Тебе, взываем си́це: о Пречудная Владычице Богородице! Молися из Тебе воплощенному Христу  Богу нашему, да избавит град сей и вся грады и страны христианския невредимы от всех навет вражиих, и спасет души нашя, яко милосерд.

Маиа 21. Молитва пред чудотворною иконою Пресвятыя Богородицы Оранскою, чтомая в Оранском Богородицком монастыре, Нижегородския епархии

О Пресвятая Госпоже Владычице Богородице! Вы́шши еси всех ангел и архангел, и всея твари честнейши: Помощница еси обидимых, ненадеющихся надеяние, убогих Заступница, печальных утешение, алчущих Кормительница, нагих одеяние, больных исцеление, грешных спасение, христиан всех поможение и заступление. О Всемилостивая Госпоже, Дево Богородице Владычице! Милостию Твоею спаси и помилуй благочестивейшаго, самодержавнейшаго, великаго государя нашего, императора Николая Александровича всея России: супругу его, благочестивейшую государыню императрицу Александру Феодоровну: матерь его благочестивейшую государыню императрицу Марию Феодоровну: наследника его, благовернаго государя цесаревича и великаго князя Алексия Николаевича, и весь царствующий дом. Спаси, Госпоже, и помилуй раб Твоих, святейший правительствующий синод, и преосвященныя митрополиты, архиепископы и епископы, и весь священнический и иноческий чин, и благоверных правительствующий синклит, и военачальники, градоначальники и христолюбивое воинство, и доброхоты, и вся православныя христианы ризою Твоею честною защити: и умоли, Госпоже, из Тебе без семене воплотившагося Христа Бога нашего, да препояшет нас силою Своею свыше на невидимыя и видимыя враги нашя. О Всемилостивая Госпоже Владычице Богородице! Воздвигни нас из глубины греховныя, и избави нас от глада, губительства, от труса и потопа, от огня и меча, от нахождения иноплеменных и междоусобныя брани, и от внезапныя смерти, и от нападения вражия, и от тлетворных ветр, и от смертоносныя язвы, и от всякаго зла. Подаждь, Госпоже, мир и здравие рабом Твоим, всем православным христианом, и просвети им ум и очи сердечныя, еже ко спасению: и сподоби ны, грешныя рабы Твоя, Царствия Сына Твоего, Христа Бога нашего: яко держава Его благослове́на и препросла́влена, со Безначальным Его Отцем, и с Пресвятым и Благим и Животворящим Его Духом, ныне и присно и во веки веков.

Маиа 29. Молитва пред коною Пресвятыя Богородицы Мателикийскою

О Пресвятая Владычице и Богородице, вышшая Херувим и честнейшая Серафим, Богоизбранная Отроковице, всех скорбящих радосте! Подаждь утешение и нам, в скорби сущым: разве бо Тебе иного прибежища и помощи не имамы. Ты едина еси радости нашея Ходатаица, и яко Мати Божия и Мати милосирдия, предстоящи у Престола Пресвятыя Троицы, моднши нам помощѝ: никтоже бо притекаяй к Тебе посрамлен отходит. Услыши убо и нас, ныне в день скорби пред Твоею иконою припабающих и со слезами Тебе молящихся: отжени от нас належащыя скорби и печали в сей временней жизни, не лише́ны же сотвори ны Твоим всесильным ходатайством и вечныя нескончаемыя радости во Царствии Сына Твоего и Бога нашего, Емуже подобает всякая слава, честь и поклонение, со Безначальным Его Отцем, и со Пресвятым и Благим и Животворящим Его Духом, ныне и присно и во веки веков.

Маиа 29. Молитвы пред чудотворною иконою Пресвятыя Богородицы, Недремлющее око именуемою, чтомыя в Угличском Богоявленском монастыре, Ярославския епархии

Молитва 1

О Пресвятая Госпоже, Владычице моя Богородице, Небесная Царице! Ты веси скорбь сердца моего и печаль души моея. Молюся убо Тебе усердно: спаси и избави мя, грешнаго раба Твоего, от напрасныя клеветы, от всякия беды и напасти и внезапныя смерти. Помилуй мя и во всякое время сохрани мя, во дни труждающася и на пути ходяща, и в нощных часех спяща снабди, покрый и заступи. Защити мя, Владычице Богородице, от всех враг моих, видимых и невидимых, и от всякаго злаго обстояния. На всяком месте и на всякое время  беди ми, Мати Преблагая, стена необоримая и заступление крепкое всегда, ныне и присно и во веки веков.

Молитва 2

О Пресвятая и Преблагая Владычице Богородице, честнейшая Святаго Духа Приемнице и Непорочная Слова Божия Святилище! Радуйся, яко Ты еси радость Ангелом и человеком, сладчайшаго бо Иисуса Христа нашествием Духа Святаго родила еси плотию, и яко младенца Того пеленами повила еси, яко возлюбленнаго Сына млеком питала еси и обимающи лобзала еси. молим Тя, Великая Владычице: не отрини раб Твоих, сему чудотворному Твоему образу предстоящих и всю надежду свою по Бозе на Тя возложивших: Ты бо еси надежда и прибежище наше, жизнь и заступление наше, крепость наша и отрада. Умоли возлюбленнаго Сына Твоего, еже сохранитися отечеству нашему и всякой стране христианской в мире и безмятежии, и утвердитися державе благочестивейшаго царя нашего, соблюдатися же непоколебимей святей Православней Церкви нашей, неверию искоренитися, ересе́м и расколом упразднитися, пастырем нашым в ревности укрепитися, еже право правити слово истины. Паки умоли, Госпоже, возлюбленнаго Сына Твоего, да избавит всех нас от всякия нужды, скорби и болезни, да низпо́слет нам тихое и мирное житие, здравие телесное и душевное спасение, да умирит страждущая сердца наша и да исцелит сердечныя скорби, да вразумит нас на добрая дела, да очитстит умы от помыслов суетных и наставит ко исполнению заповедей Своих, и от вечныя муки да избавит, и да дарует нам Небесное Царствие, в немже возвеличим Тя, Преславную Владычицу нашу, и прославим пречестное и великолепое имя Великаго Бога, Отца и Сына и Святаго Духа, ныне и присно и в безконечныя веки веков.

Месяц иуний

Иуниа 8. Молитва пред коною Пресвятыя Богородицы Ярославскою

О Пресвятая Дево, Мати Господа Вышних Сил, небесе и земли Царице и града нашего Ярославля Всемощная Заступнице! Приими хвалебное пение сие от нас недостойных рад Твоих, и вознеси молитвы нашя ко престолу Бога и Сына Твоего, да миллостив будет неправдам нашым и пробавит благодать Свою чтущым свечестное имя Твое и с верою и любовию покланяющымся чудотворному образу Твоему. Не́смы бо досто́йнии от Него помиловани быти, аще не Ты умилостивиши Его о нас, Владычице, яко вся Тебе от Него возможна суть. Сего ради к Тебе прибегаем, яко несомненней и скорей Заступнице нашей, и Тебе, яко всемогущей Помощнице, сами себе и друг друга и всю жизнь нашу по Христе Бозе предаем, ныне и присно и во веки веков.

Иуниа 11. Молитвы пред коною Пресвятыя Богородицы Милующею, или Милостивою, или Достойно есть

Молитва 1, из акафиста

О Пресвятая и Премилостивая Владычице Богородице! Припадающе ко святей иконе Твоей, смиренно молимся Тебе: вонми гласу моления нашего, виждь скорби, виждь беды нашя, и яко любвеобильная Мати, потщися на помощь нам безпомощным: умоли Сына Твоего и Бога нашего, да не погуби́т нас за беззакония наша, но да яви́т нам человеколюбно Свою милость. Испроси нам, Владычице, у благости Его телесное здравие и душевное спасение и мирное житие, земли плодоносие, воздуха благорастворение, и благословение свыше на вся благая дела и начинания наша, православному же царю нашему Николаю Александровичу на вся враги победу и одоление. И якоже древле призрела еси милостивно на смиренное славословие послушника Афонскаго, воспевавшаго Тя пред пречистою иконою Твоею, и Ангела к нему послала еси, да научит его воспевати песнь небесную, еюже славословят Тя Ангели: тако и ныне приими наше усердное молитвословие, Тебе приносимое, о Царице Всепетая! Прострѝ ко Господу богоноснии Твои ру́це, имиже Богомладенца Иисуса Христа носила еси, и умоли Его избавити нас от всякаго зла. Яви, Владычице, Твою милость к нам: болящыя исцели, скорбящыя уте́ши, бедствующым помози, и сподоби нас благочестно житие сие земное совершити, христианскую непостыдную кончину получити и Небесное Царствие наследити, матерним ходатайством Твоим к рождшемуся от Тебе Христу Богу нашему, Емуже, со Безначальным Его Отцем и Пресвятым Духом, подобает всякая слава, честь и поклонение, ныне и присно и во веки веков.

Молитва 2

Достойно Славимая и праведно от всех горних чинов ублажаемая, яко без сравнения их превосходящая, Бога и Творца всяческих рождшая, паче всех возвеличенная, пречудная Владычице! Молися из Тебе воплоще́нному Христу Богу нашему, да призрит на ны люди безответныя, да сохранит нас невредимых от всех навет вражиих и злых клевет, много бо может Твоя матерняя молитва, по реченному: проси, Мати моя, не отвращуся, но вся прошения Твоя исполню. Сего ради, радостию о сем исполняемии, взываем Ти: спаси, Владычице, погибающыя рабы Твоя, просвети омраченныя суемудрствованьми века сего и приведи на ко Сладчайшему Иисусу, да вечно радующеся взываем: слава Отцу, слава Сыну, слава Святому Духу, слава и Тебе Преславней и Пренепорочней Деве Богоматери, ублажаемей и благословляемей в безконечныя веки веков.

Молитва 3

О Всепетая Владычице мiра, преукраше́нная Всецарице,  Честнейшая Херувим и Славнейшая без сравнения Серафим! Небо и земля ублажают Тя, яко в вечное примирение их предъизбранную от Животворящия Троицы: Тя величает всяк возраст и чин земнородных, без истления Бога Слова рождшую, сущую Богородицу: Архангели и Ангели боголепно воспевают Тя, яко превозлюбленную Дщерь Бога Отца: Херувими и Серафими с веселием славят Тя, яко Пречистую Невесту Бога Духа. Достойно есть, яко воистину, блажити Тя Богородицу, Присноблаженную и Пренепорочную и Матерь Бога нашего. Ты, о Всепетая Госпоже, по Бозе упование всех концев земли и сущих в мори далече, Ты сирых и убогих заступление, Ты безпомощных помощь, и непостыдное прибежище многопечальных и отчаянных, Ты едина, по гласу церковному, всеми презренных и отверженных не оставляеши Твоим покровом и благодатию. О Преблагословенная Иати щедрот и милосердия, помилуй и спаси мя, всенепотребнаго раба Твоего имярек, с сердцем сокрушенным припадающаго ко святому образу Твоему, пред нимже небесный благовестник радости, песненно ублажив Тя, научил есть нас и предаде всем блажити Тя, Милостивую Матерь Всемилостиваго Спаса нашего. Воплощением от Духа Святаго и Тебе, Марии Девы, Сын Твой послася от Отца исцелити сокрушенныя сердцем, дати пленным отпущение, слепым прозрение и отпустити сокрушенныя во отраду. Матернее убо дерзновение имущи, умилостиви Его, да отпустит мне страстьми плененному согрешения, да исцелит благодатию Своею мя сокрушеннаго, да просветит омраченнаго, да укрепит мя немощнаго  прочее время жития сего маловременнаго и многомятежнаго прейти в безмятежии и мире, в покании и чистоте, в поучении смертнем и всяком благоделании: христианский же конец непостыден даруй ми, и сподоби мя, недостойнаго, наследника быти вечныя и блаженныя жизни, да со избранными достойно и праведно ублажаю Тя Присноблаженную и величаю всех Владыку, нашего ради спасения из Тебе вочеловечшася, со Безначальным Его Отцем и Животворящим Его Духом, ныне и присно и во веки веков.

Молитва 4, чтомая в Бугульминском Аллександро-Невском монастыре, Самарския епархии

О Пресвятая Дево Богородице, в скорбех наших едино утешение! Тобою, Дево Богородице, пение послушника Афонскаго чудесно дополнися: восполни убо и нашя силы духовныя, яко да возможем достойно пети Тя, вистину рождшую Спасителя мiру. Вознеси моление к Сыну Твоему о нас, да не оскудеет вера в нас грешных, юже диавол исхити́ти тщится в рабех Твоих и во всем христианстем роде. О сих сокрушенным сердцем молимся. Помози нашему маловерию, еже в нас дела̀ злонравныя посеява́ет, самолюбие же и гордыню, сребролюбие и сластолюбие, невоздержание и пианство, от них же да избавимся предстательством Твоим, Пречистая, и да сподобимся спасение получити благодатию Господа нашего Иисуса Христа, Емуже подобает честь, благодарение и поклонение, со Безначальным Его Отцем, и со Святым и Единосущным Ему Духом, во веки веков.

Тропарь, глас 4

  1. Притеце́м, ве́рнии, со дерзновением к милующей Царице Богородице, и умиле́нно воззовем к ней: низпослѝ на ны̀ милости Твоя богатыя: благовернаго императора нашего во здравии и благоденствии соблюдѝ: град сей избави от всякаго обстояния: мир даруй мiрови и спасение душам нашым.
  2. Отцев всеафонское множество, соберитеся, верно празднующе, днесь радующеся и светло восклицающе вси в веселии: Божия бо милости ныне от Ангела преславно воспевается. Темже яко Богородицу присно сию славим.

Иуниа 18. Молитвы пред иконою Пресвятыя Богородицы Боголюбскою, или Боголюбивою

Молитва 1, из акафиста

О Пречистая Госпоже Богородице, Мати боголюбивая, надеждо нашего спасения! Воззри милостивно на люди сия, предстоящыя с верою и любовию и покланяющыяся пречистому образу Твоему: приими наше хвалебное пение сие и пролей теплую Твою молитву о нас грешных ко Господу, да презрев вся наша согрешения, спасет и помилует нас. О Предивная Владычице! Покажи на нас чудныя милости Твоя: сохрани и помилуй благочестивейшаго государя императора Николая Александровича и весь царствующий дом, даруй им здравие и спасение: сохрани невредимы и пастыри церковныя и все христолюбивое воинство. Молим Тя умиленно, избави нас от всякия скорби, настави на путь всякия добродетели и благостыни, спаси от искушений, бед и болезней, изьми от нас оклеветания и распри, сохрани нас от молниеноснаго грома, от запаления огненнаго, от глада, труса, потопа и смертоносныя язвы: подай нам милостивую твою помощь на пути, в мори и на суши, да не погибнем люте. О Всемилостивая, Боголюбивая Мати! Со упованием твердым возсылаем к Тебе нашу убогую молитву: не отрини наших слез и воздыханий, не забуди нас во вся дни жизни нашея, но всегда пребывай с нами, и Твоим заступлением и ходатайством у Господа подаждь нам отраду, утешение, защиту и помощь, да славим и величаем преблагословенное и всепетое имя Твое во веки веков.

Молитва 2, из службы

О Чудная и Вышшая всех тварей Царице Богородице, Небеснаго Царя Христа Бога нашего Мати! Услыши ны грешныя и недостойныя рабы Твоя, в час сей молящыяся и припадающыя к Тебе со воздыханием и слезами и умильно глаголющыя: изведи нас от рова страстей, Владычице: избави нас от всякия скорби и печали, огради от всякия напасти и злых клевет и от неправеднаго и лютаго навета вражия. Можеши бо, о Благодатная Мати Божия, не точию от всякаго зла сохранити люди Твоя, но и всяким благодеянием снабдити их и спасти: разве Тебе иныя Предстательницы в беда́х и обстояниих и теплыя Ходатаицы о нас грешных не имамы к Сыну Твоему, Христу Богу нашему. Егоже умоли, Владычице, да, спасе́ннии Тобою, славим и в будущем ве́це всесвятое имя Сына Твоего и Бога нашего, купно со Отцем и Святым Духом, ныне и в безконечныя веки.

Молитва 3, из древния рукописныя службы

Всечистая Владычице Богородице! Ты непрестанно руце Твои к Рождшемуся из Тебе плотию нашего ради спасения простираеши. Мы же грешнии Тя всегда воспеваем, и Заступницу всему мiру исповедуем, и Твое рождество славим. Днесь убо Тебе молимся и к Тебе прибегаем, иныя помощницы паче Тебе, Владычице, не ведуще. Дерзновение имуще всегда, моли, Госпоже, о нас Сына Твоего, Христа Бога нашего, да покровени будем десницею вышняго Содетеля и Промыслителя и Спасителя нашего всегда, ныне и присно и во веки веков.

Молитва 4

Царице моя Преблагая, Надеждо моя Богородице, прибежище сирых и странных Предстательнице, скорбящих Радосте, обидимых Покровительнице! Зри́ши мою беду, зри́ши мою скорбь: помозѝ ми яко не́мощну, направи мя яко стра́нна. Обиду мою ве́си,  разрешѝ ту, якоже во́лиши: яко не и́мам иныя помощи разве Тебе, ни ины́я Предстательницы, ни Благи́я Уте́шительницы, токмо Тебе, о Богомати, яко да сохрани́ши мя и покры́еши во веки веков.

Молитва 5, чтомая пред чудотворною иконою Пресвятыя Богородицы Боголюбскою, яже в Зимаро́ве, Рязанския епархии

О великое ангельское удивление, пророков исполнение, апостольская проповедь, мучеников веселие, и всех святых всежелательное и сладостное зрение, Преблагословенная Госпоже, Дево Богородице, Марие Боголюбивая! Воздвигни руце Твои к Сыну Твоему и Богу нашему Иисусу Христу, молящися Ему о нас грешных и недостойных рабех Твоих: удержи праведный Его гнев на нас движимый, и не даждь нам погибнути со беззаконьми нашими, умоли Его неизреченную благость, Дево Боголюбивая: се бо плоть и кровь есмы и дело пречистых рук Его: аще и согрешихом, но инаго Бога разве Сына Твоего не знаем. Призри убо, о Владычице Госпоже, на люди Твоя, пред святою Твоею иконою предстоящыя, и умильно на ню, яко на Самую Тя Матерь Бога нашего, взирающыя, и просящыя от Тебе великия и богатыя милости, о Мати чадолюбивая! Испроси у Сына Твоего, Христа Бога нашего, жития нашего исправление: се бо исчезаем от гнева Божия, понеже преогорчихом Его благость и многое милосердие, непрестанно распинающе Его скверными де́лы, завистию враждебною, гневом друг друга снедающе, убогия и сирыя обидяще, презирающе страх Божий: еще же блудом и нечистотами и пиянством вси осквернихомся, якоже безсловесная животная в тине смрадней валяющеся и боготканную одежду, приятую от Святаго Крещения, в конец раздирающе. Темже Твоего заступления честною ризою нас покрый, от гнева Божия нас спасающи, да не огнь сошед сожжет нас окаянных во гресех наших. но паче со всеми праведными пророки и апостолы и мученики и всеми святыми Твоими светлым призрением неизреченныя святыни Твоея̀ нас уте́ши, да вси Тебе со страхом зовем: радуйся Благодатная, Господь с Тобою, Благословенная Надеждо душ наших. О Боголюбивая Царице! Сподоби и ны, грешныя рабы Твоя, одесную стати во Втором пришествии Сына Твоего и наследники быти Царствия Небеснаго и жизни вечныя со всеми святыми: яко едина Его держава благогсловена и препрославлена во веки веков.

Тропарь, глас 1, из службы

  1. Боголюбивая Царице, неискусомужная Дево, Богородице Марие! Моли за ны Тебе возлюбившаго и рождшагося от Тебе Сына Твоего, Христа Бога нашего, подати нам оставление прегрешений, мiрови мир, земли плодов изобилие, императору нашему Николаю Александровичу и наследнику его здравие, на враги же одоление, пастырем святыню и всему человечу роду спасение. Грады нашя и всю землю Российскую от нахождения иноплеменных заступи и от междоусобныя брани сохрани. О Мати Боголюбивая Дево! О Царице Всепетая! Ризою Твоею покрый нас от всякаго зла, от видимых и невидимых враг защити, и спаси души нашя.
  2. Всепетая и Всеславная Царице Богородице, Мати всея твари Содетеля, христианская Надеждо и Заступнице, печальных утешение, ненадеющихся и отчаявшихся скорое надеяние! Молим Тя, милостива буди нам грешным, и не остави раб Твоих, и не отрини моления верных, в скорбех и бедах пред честным образом Твоим избавления требующих. О Владычице, Благая Помощнице! Ризою Твоею честною нас защити и от всех зол избави, молящи Сына Твоего, Христа Бога нашего, да спасет душы нашя, яко милосерд.

Величание

Величаем Тя, Пресвятая Дево, и чтем образ Твой святый, егоже благоверный князь Андрей нам на враги в победу и всем верным во спасение.

Иуниа 20. Молитва пред иконою Пресвятыя Богородицы Моденскою

О Пресвятая Госпоже Владычице Богородице! Приими недостойную молитву нашу, и сохрани всех нас, с верою и любовию покланяющихся пречистому образу Твоему, от навета злых человек и от внезапныя смерти, и даруй нам прежде конца покаяние. На моление наше умилосердися, и и радость вместо печали даруй нам. Се бо, на Твой образ взирающе, яко живей Ти сущей с нами, молим Тя усердно: избави нас, о Мати всех скорбящих и обремененных, от всякия беды и напасти, скорби, болезни и печали и от всякаго зла. И сподоби ны, недостойныя рабы Твоя, одесную стати Сына Твоего, Христа Бога нашего, во Втором и славнем Его Пришествии, и наследники быти Царствия Небеснаго и жизни вечныя со всеми святыми в безконечныя веки веков.

Иуниа 23. Молитва пред иконою Пресвятыя Богородицы Владимирскою Красногорскою

О Пресвятая Дево, Мати Христа Бога нашего, Царице небесе и земли! Вонми многоболезненному воздыханию душ наших, призри с высоты святыя Твоея на нас, с верою и любовию поклоняющихся пречистому [и чудотворному] образу Твоему. Се бо грехми погружаемии и скорбьми обуреваемии, взирающе на Твой образ, яко живей Тебе сущей с нами, приносим смиренная моления наша. Не имамы иныя помощи, ни инаго предстательства, ни утешения, токмо Тебе, о Мати всех скорбящих и обремененных! Помози нам немощным, утоли скорби нашя, настави на путь правый нас заблуждающих, уврачуй болезненная сердца наша и спаси безнадежных, даруй нам прочее время жития нашего в мире и покаянии проводити, подаждь христианскую кончину, и на Страшнем Суде Сына Твоего явися нам милосердая Предстательница, да всегда поем, величаем и славим Тя, яко благую Заступницу рода христианскаго, со всеми угодившими Богу, во веки веков.

Тропарь, глас 2

Радуйся, Святая Горо красная, Небесѝ подобная: слава бо Божия на Тебе возсия. Взыграйте, го́ры и хо́лми,  веселием, яко на сей святей горе икона Божия Матере, честнаго Ея умиления, прославися. Ликуйте, человецы, и веселитеся, яко нам даровася богатство неотъемлемое, исцелений сокровище: гласы якоже трубы̀ возшуми́те, прославляюще Ея чудеса преславная. И Ты, Чистая, радуйся, яко с Тобою Господь.

Иуниа 26. Молитва пред иконою Пресвятыя Богородицы Тихфинскою

Молитва 1, из службы

Благодарим Тя, о Преблагая и Пречистая, преблагословенная Дево Владычице, Мати Христа Бога нашего, о всех благодеяниих Твоих, яже показала еси роду человеческому, наипаче же нам, христоименитым людем российским, о нихже нижѐ самый ангельский язык к похвалению доволен будет. Благодарим Тя, яко и ныне удивила еси неизреченную Твою милость на нас, недостойных рабех Твоих, преестественным самопришествием пречистыя Твоея иконы, еюже всю просветила еси российскую страну. Темже и мы грешнии, со страхом и радостию покланяющеся, вопием Ти: о Пресвятая Дево, Царице и Богородице, спаси и помилуй благочестивейшаго, самодержавнейшаго, великаго государя нашего, императора Николая Александровича всея России и весь царствующий дом, святейший правительствующий синод, архиереи же и вся люди, и подаждь им победы на вся враги их, и сохрани царствующыя грады и вся грады и страны христианския, и сей святый храм, и от всякаго навета вражия избави, и всем вся на пользу даруй, ныне пришедшым с верою и молящымся рабом Твоим и покланяющымся пресвятому образу Твоему: яко благословена еси с рождшимся от Тебе Сыном и Богом, ныне и присно и во веки веков.

Молитва 2, из акафиста

О Пресвятая Дево, Мати Господа Вышних сил, небесе и земли Царице, града и страны нашея всемощная Заступнице! Приимѝ хвалебное пение сие от нас недостойных раб Твоих, и вознесѝ молитвы нашя ко престолу Бога Сына Твоего, да милостив будет неправдам нашым и проба́вит благодать Свою чтущым всечестное имя Твое и с верою и любовию покланяющымся пречистому [или чудотворному] образу Твоему. Не́смы бо достойни от Него помиловани бы́ти, аще не Ты уми́лостивиши Его о нас, Владычице, яко вся Тебе от Него возможна суть. Сего ради к Тебе прибегаем, яко к несомне́нней и ско́рей Заступнице нашей: услыши нас молящихся Тебе, осенѝ нас вседержавным покровом Твоим, и испросѝ у Бога Сына Твоего пастырем нашым ревность и бдение о душах, градоправителем мудрость и силу, судия́м правду и нелицеприятие, наставником разум и смиренномудрие, супругом любовь и согласие, чадом послушание, оби́димым терпение, оби́дящым страх Божий, скорбящым багодушие, радующымся воздержание, намже всем дух разума и благочестия, дух милосердия и кротости, дух чистоты и правды. Ей, Госпоже Пресвятая! Умилосердися на немощыя люди Твоя: разсеянныя собери, заблуждшыя на путь правый наста́ви, старость поддержи, юныя уцелому́дри, младенцы воспитай, и при́зри на всех нас призрением милостиваго Твоего заступления: воздви́гни нас из глубины грехавныя и просвети сердечныя очи наши ко зрению спасения. Милостива нам буди зде и тамо, во стране земнаго пришельствия и на Страшнем Суде Сына Твоего: преставльшыяся же в вере и покаянии от жития сего отцы и братию нашу в вечней жизни со Ангелы и со всеми святыми жити сотворѝ. Ты бо еси, Госпоже, слава небесных и упование земных, Ты по Бозе наша Надежда и Заступница всех притекающих к Тебе с верою. Тебе убо молимся, и Тебе, яко всемогу́щей Помощнице, сами себе и друг друга и всю жизнь нашу по Христе Бозе предаем, ныне и присно и во веки веков.

Молитва 3.

О Пресвятая Госпоже Владычице Богородице! Вы́шши еси всех ангел и архангел, и всея твари честнейши: Помощница еси обидимых, ненадеющихся надеяние, убогих Заступница, печальных утешение, алчущих Кормительница, нагих одеяние, больных исцеление, грешных спасение, христиан всех поможение и заступление. О Всемилостивая Госпоже, Дево Богородице Владычице! Милостию Твоею спаси и помилуй благочестивейшаго, самодержавнейшаго, великаго государя нашего, императора Николая Александровича всея России: супругу его, благочестивейшую государыню императрицу Александру Феодоровну: матерь его благочестивейшую государыню императрицу Марию Феодоровну: наследника его, благовернаго государя цесаревича и великаго князя Алексия Николаевича, и весь царствующий дом. Спаси, Госпоже, и помилуй раб Твоих, святейший правительствующий синод, и преосвященныя митрополиты, архиепископы и епископы, и весь священнический и иноческий чин, и благоверных правительствующий синклит, и военачальники, градоначальники и христолюбивое воинство, и доброхоты, и вся православныя христианы ризою Твоею честною защити: и умоли, Госпоже, из Тебе без семене воплотившагося Христа Бога нашего, да препояшет нас силою Своею свыше на невидимыя и видимыя враги нашя. О Всемилостивая Госпоже Владычице Богородице! Воздвигни нас из глубины греховныя, и избави нас от глада, губительства, от труса и потопа, от огня и меча, от нахождения иноплеменных и междоусобныя брани, и от внезапныя смерти, и от нападения вражия, и от тлетворных ветр, и от смертоносныя язвы, и от всякаго зла. Подаждь, Госпоже, мир и здравие рабом Твоим, всем православным христианом, и просвети им ум и очи сердечныя, еже ко спасению: и сподоби ны, грешныя рабы Твоя, Царствия Сына Твоего, Христа Бога нашего: яко держава Его благослове́на и препросла́влена, со Безначальным Его Отцем, и с Пресвятым и Благим и Животворящим Его Духом, ныне и присно и во веки веков.

Молитва 4

О Пресвятая Дево, Мати Христа Бога нашего, Царице небесе и земли! Вонми многоболезненному воздыханию душ наших, призри с высоты святыя Твоея на нас, с верою и любовию поклоняющихся пречистому [и чудотворному] образу Твоему. Се бо грехми погружаемии и скорбьми обуреваемии, взирающе на Твой образ, яко живей Тебе сущей с нами, приносим смиренная моления наша. Не имамы иныя помощи, ни инаго предстательства, ни утешения, токмо Тебе, о Мати всех скорбящих и обремененных! Помози нам немощным, утоли скорби нашя, настави на путь правый нас заблуждающих, уврачуй болезненная сердца наша и спаси безнадежных, даруй нам прочее время жития нашего в мире и покаянии проводити, подаждь христианскую кончину, и на Страшнем Суде Сына Твоего явися нам милосердая Предстательница, да всегда поем, величаем и славим Тя, яко благую Заступницу рода христианскаго, со всеми угодившими Богу, во веки веков.

Молитва 5

О Пречистая Госпоже Владычице Богородице! Приимѝ недостойную молитву нашу, и сохрани нас от навета злых человек и от внезапныя смерти, и даруй нам прежде конца покаяние. На моление наше умилосе́рдися, и радость вместо печали да́руй. И изба́ви нас, Госпоже, от всякия беды̀ и напасти, скорби и болезни и от всякаго зла. И сподо́би ны, грешныя рабы Твоя, одесную ста́ти во втором пришествии Сына Твоего, Христа Бога нашего, и наследники быти Царствия Небеснаго и жизни вечныя со всеми святыми в безконечныя веки веков.

Молитва 6

К кому возопию̀, Влалычице? К кому прибе́гну в горести моей, аще не к Тебе, Госпоже Богородице, Царице Небесная? Кто плачь мой и воздыхание прии́мет, аще не Ты, о Пренепорочная, Надеждо христиан и Прибежище нам грешным? Приклонѝ, о Пречистая Владычице, ушеса̀ Твоя к молению моему. Мати Бога моего, не пре́зри мене требующа Твоея помощи, услыши стенание мое, и воплю сердца моего вонмѝ, о Госпоже Царице Богородице! И подаждь ми радость душевную, и подкрепи мя нетерпеливаго, унылаго и нерадиваго ко Твоему хвалению. Вразумѝ и научѝ мя, ка́ко Тебе моли́тися подобает, и не отступѝ от мене, Мати Бога моего, за роптание и нетерпение мое: но буди ми покров и заступление в жизни моей, и приведи мя к тихому пристанищу Божественнаго о́наго покоя, и сопричтѝ мя к лику избраннаго Твоего стада, и тамо удостой мя воспева́ти и сла́вити Тя во веки веков.

Молитва 7

Приими о Всеблагословенная и Всемощная Госпоже Владычице Богородице Дево, сия молитвы, со слезамиТебе ныне приносимыя от нас недостойных раб Твоих, ко Твоему цельбоно́сному образу пение возсыла́ющих со умилением, яко тебе Самой зде сущей и внемлющей молению нашему. По коемуждо бо прошению исполнение твори́ши, скорби облегча́еши, немощным здравие да́руеши, разслабленныя и недужныя исцеля́еши, от бе́сных бесы прогоняеши, обидимыя от обид избавля́еши, прокаженныя очищае́ши и малыя дети ми́луеши: еще же, Госпоже Владычице Богородице, и от уз и темниц свобождаеши и всякия многоразличныя страсти врачуеши: вся бо суть возможна ходатайством Твоим к Сыну Твоему, Христу Богу нашему. О Всепетая Мати, Пресвятая Богородице! Не престай моли́тися о нас недостойных рабех Твоих, славящих Тя и почитающих Тя, и покланяющихся со умилением пречистому образу Твоему, и надежду имущих невозвра́тну и веру несумне́нну к Тебе, Приснодеве Преславней и Непорочней, ныне и присно и во веки веков.

Тропарь, глас 4

Днесь, яко Солнце Пресветлое, возсия нам на воздусе всечестная икона Твоя, Владычице, лучами милости мiр просвещающи: юже великая Россия, яко некий дар Божественный, свыше благоговейне восприемши, прославляет Тя, Богомати, всех Владычицу, и от Тебе рождшагося Христа Бога нашего величает радостно. Емуже молися, о Госпоже Царице Богородице, да сохранит вся грады и страны христианския невредимы от всех навет вражиих, и спасет верою покланяющихся Его Божественному и Твоему пречистому образу, Дево неискусобрачная.

Иуниа 28. Молитва пред иконою Пресвятыя Богородицы, именуемою Троеручица

Молитва 1, из акафиста

О Пресвятая и Преблагословенная Дево, Богородице Марие! Припадаем и покланяемся Тебе пред святою иконою Твоею, воспоминающе преславное чудо Твое, исцелением усеченныя десницы преподобнаго Иоанна Дамаскина от иконы сея явленное, егоже знамение доныне видимо есть на ней, во образе третия руки ко изображению Твоему приложенныя. Молимся Ти и просим Тя, всеблагую и всещедрую рода нашего Заступницу: услыши нас молящихся Тебе, и якоже блаженнаго Иоанна, в скорби и болезни к Тебе возопившаго, услышала еси, тако и нас скорбящих и болезнующих ранами страстей многоразличных не презри, усердно к Тебе от души сокрушенныя прибегающих. Ты зриши, Госпоже Всемилостивая, немощи нашя, озлобление наше, нужду, во Твоей помощи потребу, яко отвсюду врази окружают нас, и несть помогающаго, ниже заступающаго, аще не Ты умилосердишися о нас, Владычице. Ей, молим Ти ся, вонми гласу болезненному нашему и помози нам святоотеческую православную веру до конца дней наших непорочно сохранити, во всех заповедех Господних неуклонно ходити, покаяние истинное о гресех наших всегда Богу приносити, и сподобитися мирныя христианския кончины и добраго ответа на Страшнем Суде Сына Твоего и Бога нашего, Егоже умоли за нас матернею молитвою Твоею, да не осудит нас по беззаконием нашым, но да помилует нас по велицей и неизреченней милости Своей. О Всеблагая, услыши нас и не лиши нас помощи Твоея державныя, да Тобою спасение получивше, воспоем и прославим Тя на земли живых и рождшагося от Тебе Искупителя нашего, Господа Иисуса Христа, Емуже подобает слава и держава, честь и поклонение, купно со Отцем и Святым Духом, всегда, ныне и присно и во веки веков.

Молитва 2, чтомая в Московской Покровской, на Малой Ордынке, церкви

К кому возопию, Владычице? К кому прибегну в горести моей, аще не к Тебе, Богородице? Кто плач мой и воздыхание мое приимет, аже не ты, Пренепорочная, Надеждо христиан и прибежище мне грешному? Кто паче Тебе в милости? Приклони, о Пречистая Владычице, ушеса Твоя к молению моему. Мати Бога моего, не презри мене требующа Твоея помощи, услыши стенание и вопль сердца моего, и подаждь ми радость душевную, подкрпи мя унылаго, вразуми и научи мя, како подобает Тебе молитися, и не отступи от мене за нетерпнение мое, о Царице Небесная, но буди ми Покровительница и Заступница в жизни моей, да воспеваю и славлю Тя и от Тебе рожденнаго Христа Бога нашего во веки веков.

Молитва 3, чтомая в Шенкурском Свято-Троицком монастыре, Архангелогородския епархии

О Пресвятая Госпоже Владычице Богородице, велие чудо святому Иоанну Дамаскину явившая, яко веру истинную и надежду несумненную показавшему! Услыши нас грешных, пред чудотворною Твоею иконою усердно молящихся и просящих Твоея помощи: не отрини моления сего многих ради прегрешений наших, но, яко Мати милосердия и щедрот, избави нас от болезней, скорбей и печалей, прости содеянныя нами грехи, исполни радости и веселия всех чтущих святую икону Твою, да радостно воспоем и любовию прославим имя Твое: яко Ты еси от всех родов избра́нная, благословенная во веки веков.

Молитва 4, чтомая в томже монастыре

О Пресвятая Владычице и Богородице, вышшая Херувим и честнейшая Серафим, Богоизбранная Отроковице, всех болезнующих радосте! Подаждь утешение и нам, к Тебе прибегающым: разве бо Тебе инаго прибежища и помощи не имамы. Ты едина еси радости нашея ходатаица, и яко Мати Божия и Мати милосердия, предстоящи у престола Пресвятыя Троицы, може нам помощѝ: никтоже бо, притекаяй к Тебе, посрамлен отходит. Услыши убо и нас, ныне умиленно пред Твоею иконою припадающих и со слезами Тебе молящихся: отжени от нас належащыя на нас скорби и печали в сей временней жизни, не лише́ны же сотвори ны Твоим всесильным ходатайством  вечныя нескончаемыя радости во Царствии Сына Твоего и Бога нашего, Емуже подобает всякая слава, честь и поклонение, со Безначальным Его Отцем, и со Пресвятым и Благим  и Животворящим Его Духом, ныне и присно и во веки веков.

Тропари общыя Пресвятей Богородице, глас 4

1. К Богородице ныне прилежно притецем гре́шнии и смире́ннии, и припаде́м, в покаянии зовуще из глубины душѝ: Владычице, помози, на ны милосердовавши: потщися, погибаем от множества прегрешений: не отврати рабы Твоя тщы̀, Тя бо и едину надежду имамы.

2. Не умолчим никогда, Богородице, силы Твоя глаголати недостойнии: аще бо Ты не бы̀ предстояла моля́щи, кто бы нас избавил от толиких бед? Кто же бы сохранил до ныне свободны? Не отступим, Владычице, от Тебе: Твоя бо рабы спасаеши присно от всяких лютых.

Ин тропарь, глас 4

Днесь всемiрная радость возсия нам велия, даровася святей горе Афонстей цельбносная Твоя, Влвдычице Богородице, икона, со изображением тричисленно и нераздельно пречистых рук Твоих, в прославление Святыя Троицы: созываеши бо верных и молящихся Тебе о сем познати, яко двема имаши Сына и Господа держати, третию же яви на прибежище и покров чтущым Тя от всяких напастей и бед избавити, да вси, притекающии к Тебе верою, приемлют неоскудноот всех зол свобождение, от врагов защищение. Сего ради и мы вкупе со Афоном вопием: радуйся, Благодатная, Господь с Тобою.

Иуниа 29. Молитва пред чудотворною иконою Пресвятыя Богородицы Дуниловскою, чтомая в Сретенском соборе града Никольска, Вологодския епархии

О Пресвятая Госпоже, Владычице Богородице! Со страхом, верою и любовию пред честною [и чудотворню] иконою Твоею припа́дающе, молим Тя: не отврати лица Твоего от прибегающих к Тебе. Умоли, милосердая Мати, Сына Твоего и Бога нашего, Господа Иисуса Христа, да сохранит мирну страну нашу, да утвердит державу благочестивейшего, самодержавнейшаго, великаго государя нашего, императора Николая Александровича, Церковь же Свою святую непоколебиму да соблюдет, и от неверия, ересей и раскола да избавит. Не имамы бо иныя помощи, не имамы иныя надежды, разве Тебе, Пречистая Дево: Ты еси всесильная христиан Помощница и Заступница. Избави же и всех, с верою Тебе молящихся, от падений греховных, от навета злых человек, от всяких искушений, скорбей, болезней, бед и от внезапныя смерти. Даруй нам дух сокрушения, смирение сердца, чистоту помышлений, исправление греховныя жизни и оставление прегрешений, да вси, благодарне воспевающе величия и милости Твоя, являемыя над нами зде на земли, сподобимся и Небеснаго Царствия, и тамо со всеми святыми прославим пречестное и великолепое имя Отца и Сына и Святаго Духа во веки веков.

Иуниа 30. Молитва пред чудотворною иконою Пресвятыя Богородицы Балыкинскою, чтомая в Николаевской церкви села Балыкина, Черниговския епархии

Некогда от свеов град Твой защитившая, о Мати Божия, милосердие нам явила еси, праведный гнев и прещение Божие от земли Российския обративши, и тако во области северстей Твоего всечестнаго лика образ прославила еси, видимыя слезы о прадедех наших, от супостат воюемых, изливающи. Таже здравие слепым и бесным от сея иконы многащи подавала еси, и предстательством Твоим мор на человеки бывший и язю на скоты пришедшую прекратила еси. Ты и ныне струи милосердия всем с несумненною верою во Твою всесильную помощь прибегающым изливаеши. Вонми убо молению нашему, и путь нашего земнаго скитания управи, в жизнь вечную сей приводящи. Темже и люди церковныя от сетей лжепророков и лжеучителей, вземлющихся на разум Божий, сохрани, и всем нам чистоту помышлений подаждь. Аще бо слезы и моления наша не довлеют прегрешений наших очистити, но к сим да приложится Твое всесильное предстательство, на неже уповающе, воспеваем Отца и Сына и Святаго Духа, ныне и присно и во веки веков.

Тропарь, глас 4, поемый в той же церкви:

Заступнице земли Российския от нашествия Свейскаго и непрестанная за нас Молитвеннице, мир земли и душам нашым у Господа испроси, да святится в нас имя Божие во веки.

Месяц иулий

Иулиа 2. Молитвы пред иконою Пресвятыя Богородицы Ахтырскою

Молитва 1

О Пресвятая Госпоже Владычице Богородице! Вы́шши еси всех ангел и архангел, и всея твари честнейши: Помощница еси обидимых, ненадеющихся надеяние, убогих Заступница, печальных утешение, алчущих Кормительница, нагих одеяние, больных исцеление, грешных спасение, христиан всех поможение и заступление. О Всемилостивая Госпоже, Дево Богородице Владычице! Милостию Твоею спаси и помилуй благочестивейшаго, самодержавнейшаго, великаго государя нашего, императора Николая Александровича всея России: супругу его, благочестивейшую государыню императрицу Александру Феодоровну: матерь его благочестивейшую государыню императрицу Марию Феодоровну: наследника его, благовернаго государя цесаревича и великаго князя Алексия Николаевича, и весь царствующий дом. Спаси, Госпоже, и помилуй раб Твоих, святейший правительствующий синод, и преосвященныя митрополиты, архиепископы и епископы, и весь священнический и иноческий чин, и благоверных правительствующий синклит, и военачальники, градоначальники и христолюбивое воинство, и доброхоты, и вся православныя христианы ризою Твоею честною защити: и умоли, Госпоже, из Тебе без семене воплотившагося Христа Бога нашего, да препояшет нас силою Своею свыше на невидимыя и видимыя враги нашя. О Всемилостивая Госпоже Владычице Богородице! Воздвигни нас из глубины греховныя, и избави нас от глада, губительства, от труса и потопа, от огня и меча, от нахождения иноплеменных и междоусобныя брани, и от внезапныя смерти, и от нападения вражия, и от тлетворных ветр, и от смертоносныя язвы, и от всякаго зла. Подаждь, Госпоже, мир и здравие рабом Твоим, всем православным христианом, и просвети им ум и очи сердечныя, еже ко спасению: и сподоби ны, грешныя рабы Твоя, Царствия Сына Твоего, Христа Бога нашего: яко держава Его благослове́на и препросла́влена, со Безначальным Его Отцем, и с Пресвятым и Благим и Животворящим Его Духом, ныне и присно и во веки веков.

Молитва 2

Приими Всеблагомощная, Пречистая Госпоже, Владычице Богородице, сия честныя да́ры, Тебе единей прикладныя, от нас недостойных рабов Твоих, от всех родов избранная, всех тварей небесных и земных вышшая явльшаяся. Понеже бо Тебе ради бысть Господь сил с нами, и Тобою Сына Божия познахом, и сподобихомся Святаго Тела Его и Пречистыя Крове Его. Темже блаженна еси в родех родов, Богоблаженная, херувимов светлейши и серафимов честнейши сущая. И ныне, всепетая Пресвятая Богородице, не престай молящися о нас недостойных рабех Твоих, еже избавитися нам от всякаго совета лукаваго и от всякаго обстояния, и сохранитися нам неврежденным от всякаго ядовитаго прилога диавольскаго. Но даже до конца молитвами Твоими неосужденных нас соблюди: яко Твоим заступлением и помощию спасаеми, славу, хвалу, благодарение и поклонение за вся в Троице Единому Богу и всех Создателю возсылаем, ныне и присно и во веки веков.

Молитва 3

Царице моя Преблагая, Надеждо моя Богородице, прибежище сирых и странных Предстательнице, скорбящих Радосте, обидимых Покровительнице! Зри́ши мою беду, зри́ши мою скорбь: помозѝ ми яко не́мощну, направи мя яко стра́нна. Обиду мою ве́си,  разрешѝ ту, якоже во́лиши: яко не и́мам иныя помощи разве Тебе, ни ины́я Предстательницы, ни Благи́я Уте́шительницы, токмо Тебе, о Богомати, яко да сохрани́ши мя и покры́еши во веки веков.

Молитва 4

К Тебе, Пречистей Божией Матери, аз окаянный припадая молюся: веси, Царице, яко непрестанно согрешаю и прогневляю Сына Твоего и Бога моего. и аще многажды каюся, ложь пред Богом обретаюся: каюся трепещя, да не како поразит мя Господь, и по мале паки таяжде творю. Ведущи сия, Владычице моя, Госпоже Богородице, молю, да помилуеши, да укрепиши мя, и благая творити да пода́си ми. Ты веси, о Владычице моя Богородице, яко имам в совершенней ненависти злая моя дела и всею мыслию люблю закон Бога моего. Но не вем, Госпоже Пречистая, откуда яже ненавижду, тая творю, а благая преступаю. Не попускай убо, Пречистая, воли моей совершатися, неугодна бо есть, но да будет во мне воля Сына Твоего и Бога моего, да мя спсет, и вразумит, и подаст ми благодать святаго духа, да бых аз отселе престал сквернодействуя и прочее пожил бых в повелениих Сына Твоего, Господа нащего Иисуса Христа, емуже подобает всякая слава, честь и поклонение, со Безначальным Его Отцем, и Пресвятым и Благим и Животворящим Его Духом, ныне и присно и во веки веков.

Молитва 5

Царице моя Преблагая, Надеждо моя Пресвятая, Прибежище сирым и странным Заступнице, бедствующих Помоще и озлобляемых Покрове! Зри́ши мою напасть, зри́ши мою скорбь: отвсю́ду искушением одержимь есмь, и заступающаго несть у менѐ. Ты убо Сама помози ми яко немощну, направи мя яко странна, настави яко заблуждша, уврачуй и спаси яко безнадежна. Не и́мам бо иныя помощи, ни ина́го предстательства, ни утешения, токмо Тебе, о Мати всех скорбящих и обремененных! При́зри убо на мя грешнаго и во озлоблении сущаго, и покрый мя пресвятым омофором Твоим, да изба́влен буду от зол, мя обыше́дших, и восхвалю всегда препетое имя Твое.

Молитва 6

О Пресвятая Дево, Мати Господа Вышних сил, небесе и земли Царице, града и страны нашея всемощная Заступнице! Приимѝ хвалебное пение сие от нас недостойных раб Твоих, и вознесѝ молитвы нашя ко престолу Бога Сына Твоего, да милостив будет неправдам нашым и проба́вит благодать Свою чтущым всечестное имя Твое и с верою и любовию покланяющымся пречистому [или чудотворному] образу Твоему. Не́смы бо достойни от Него помиловани бы́ти, аще не Ты уми́лостивиши Его о нас, Владычице, яко вся Тебе от Него возможна суть. Сего ради к Тебе прибегаем, яко к несомне́нней и ско́рей Заступнице нашей: услыши нас молящихся Тебе, осенѝ нас вседержавным покровом Твоим, и испросѝ у Бога Сына Твоего пастырем нашым ревность и бдение о душах, градоправителем мудрость и силу, судия́м правду и нелицеприятие, наставником разум и смиренномудрие, супругом любовь и согласие, чадом послушание, оби́димым терпение, оби́дящым страх Божий, скорбящым багодушие, радующымся воздержание, намже всем дух разума и благочестия, дух милосердия и кротости, дух чистоты и правды. Ей, Госпоже Пресвятая! Умилосердися на немощыя люди Твоя: разсеянныя собери, заблуждшыя на путь правый наста́ви, старость поддержи, юныя уцелому́дри, младенцы воспитай, и при́зри на всех нас призрением милостиваго Твоего заступления: воздви́гни нас из глубины грехавныя и просвети сердечныя очи наши ко зрению спасения. Милостива нам буди зде и тамо, во стране земнаго пришельствия и на Страшнем Суде Сына Твоего: преставльшыяся же в вере и покаянии от жития сего отцы и братию нашу в вечней жизни со Ангелы и со всеми святыми жити сотворѝ. Ты бо еси, Госпоже, слава небесных и упование земных, Ты по Бозе наша Надежда и Заступница всех притекающих к Тебе с верою. Тебе убо молимся, и Тебе, яко всемогу́щей Помощнице, сами себе и друг друга и всю жизнь нашу по Христе Бозе предаем, ныне и присно и во веки веков.

Молитва 7

О Пресвятая Владычице и Богородице, вышшая Херувим и честнейшая Серафим, Богоизбранная Отроковице, всех скорбящих радосте! Подаждь утешение и нам, в скорби сущым: разве бо Тебе иного прибежища и помощи не имамы. Ты едина еси радости нашея Ходатаица, и яко Мати Божия и Мати милосирдия, предстоящи у Престола Пресвятыя Троицы, моднши нам помощѝ: никтоже бо притекаяй к Тебе посрамлен отходит. Услыши убо и нас, ныне в день скорби пред Твоею иконою припабающих и со слезами Тебе молящихся: отжени от нас належащыя скорби и печали в сей временней жизни, не лише́ны же сотвори ны Твоим всесильным ходатайством и вечныя нескончаемыя радости во Царствии Сына Твоего и Бога нашего, Емуже подобает всякая слава, честь и поклонение, со Безначальным Его Отцем, и со Пресвятым и Благим и Животворящим Его Духом, ныне и присно и во веки веков.

Молитва 8

Дево Владычице Богородице, паче естества и слова рождшая Единородное Божие Слово, Творца и Владыку всея видимыя и невидимыя твари, Единаго от Троицы Бога, и Бога и человека, обитель Божества явльшаяся, вместилище всякия святыни и благодати, в немже, по благоволению Бога и Отца, содействующу Святому Духу, вселися исполнение Божества телесне, царским и благлепным достоинством несравненно превознесенная и над всякою тварию преимущая, славо и утешение, и неизреченное веселие Ангелов, апостолов же и пророков царственных венче, мучеников преестественное и дивное мужество, Поборнице в подвизех и Подательнице победы, уготовляющая подвижником вецы и воздаяния вечная и боголепная, всякия чести превышшая, честь и слава преподобных, непогрешительная Путеуказательнице и Наставнице безмолвия, дверь откровений и духовных таин, источниче света, неистощимая реко милосердия, неисчерпаемое море всех боголепных дарований и чудес! Тебе посим и Тебе молим, сострадательнейшую Матерь Человеколюбиваго Владыки: буди милостива к нам смиренным и недостойным рабом Твоим, призри благосердием на пленение и смирение наше, уврачуй сокрушения душ и телес наших, разсей видимыя и невидимыя враги, буди нам недостойным столп крепок пред лицем враг наших, бранное оружие, сильное ополчение, Воевода и необоримая Поборница: яви ныне на нас древния и дивныя милости Твоя, да уведят беззаконнии врази наши, яко Сын Твой и Бог Един есть Царь и Владыка, яко Ты еси воистину Богородица, рождшая по плоти Истиннаго Бога, яко вся Тебе возможна суть, и елика аще восхощеши, Владычице, власть имаши вся сия совершитина небеси и на земли, и на всяко прощение даровати, елика коемуждо полезна суть: болящым здравие, в мори же сущым тишину и благое плавание. Путешествующым убо спутешествуй и сохраняй я̀, плененныя спасай от горькаго рабства, утешение печальныя, облегчи нищету и всякое иное телесное злострадание: всех свободи от душевных недуг и страстей невидимыми Твоими предстательствы и наставлении, яко да безпорочно и непреткновенно путь сея временныя жизни совершивше, насле́дим Тобою и оная вечная блага во Цирствии Небеснем. Верныя же цари нашя, иже страшным именем Единароднаго СынаТвоего почте́ни суть, и уповаютна Твое предстательство и на милость Твою, и во всех имут Тя свою Ходатаицу и Поборницу, укрепи невидимо противу обстоящих врагов: разсей облак уныния, души их облежа́щь: избави я̀ от душевнаго утруждения, вместо же онаго даруй им светлое благодушие и радость, паки утверждающи мир и безмятежие державы и царства их. Спаси молитвами Твыоими, Владычице, сию Тебе наипаче посвященную паству, всякий град и страну, от глада, труса, потопа, огня, меча, нашествия иноплеменников, междоусобныя брани, и всякий праведно на ны движимый гнев отврати, благоволением и благодатию Единороднаго Сына и Бога Твоего, Емуже подобает всякая слава, честь и поклонение, со Безначальным Его Отцем, и со Присносущным и Животворящим Его Духом, ныне и присно и во веки веков.

Молитва 9, чтомая в Ахтырском Покровском соборе, Харьковския епархии

Приими, Всеблагомощная, Пречистая Госпоже, Богородительнице Дево, сию молитву, Тебе приносимую от нас недостойных раб Твоих, и не престай молити Сына Твоего, Христа Бога нашего, еже избавитися нам от всякия скорби, гнева и нужды, от всякия болезни душевныя и телесныя, и сохранитися неврежденным от всякаго злаго обстояния,  но даже до конца молитвами Твоими неосужденных нас соблюди, яко да Твоим заступлением и помощию спасаеми, славу, хвалу, благодарение и поклонение за вся в Троице Единому Богу и всех создателю возсылаем, ныне и присно и во веки веков.

Иулиа 5. Молитвы пред иконою Пресвятыя Богородицы Афонскою, Домостроительница именуемою, чтомая в церкви села Соколова, Вятския епархии

О Пресвятая Дево Богородице, Премилостивая Владычице, вышшая Ангел и Архангел, Царице небесе и земли, страны нашея православныя твердое ограждение, благочестивейшаго государя нашего и всего царствующаго дома покрове и защищение, всякаго дома и семейства христианскаго благоустроительнице, труждающихся во благочестии благословении, нуждающихся неистощимое богатство, сирых и вдовиц кормительнице, девствующих чистото и  славо, матерей тихое веселие, отроков мудросте и научение, наставников и детоводителей совершенный разуме! Веруем в державный Твой покров над православным отечеством нашим и над благочестивейшим государем, емуже повелела еси царствовати, и над малейшим из нас, искупленным Божественною кровию Сына Твоего. Веруем, яко в сей иконе Твоей, в благословение от святыя горы Афонския нам данней, Сама Ты низпосылаеши Твое матернее благословение всем нашым и коемуждо дому на Тя упование имущему. Темже со благоговейным трепетом и с благодарным сердцем преклоняемся пред сим новым знамением великия любве Твоея, Владычице, к нам недостойным. Воспоминающе же Твое чудное явление преподобному Афанасию Афонскому, некогда в нужде и скорби бывшему и, яко пребудеши при́сная Домостроительница его обители, от Тебе милостивное обещание приимшему, смиренно молимся Тебе: о премилосердая Мати рода христианскаго! Буди и нам грешным и недостойным рабом Твоим мудрая Домостроительница, житие наше добре устрояющая. Благочестивейшаго государя нашего, императора Николая Александровича, исполни долготою дней и крепостию сил, благопоспеши ему во устроении мира и правды в державе его. Всякое же сообщество, всякий дом и семейство во благочестии и православии, единомыслии, послушании и довольстве соблюди: заблуждшыя на путь правый настави, старость поддержи, младенцы воспитай, всех вразуми приискренне повиноватися уставленным от Бога властем и вся повеленная соблюдати. Облегчи и возстави изнемогающыя, сохрани люди Твоя от всякия нужды, болезни, глада, губительства, града, огня, от всякаго злаго обстояния и всякаго нестроения. Дому сему и всякой души христианстей и всей стране нашей исходатайствуй мир и велию милость ныне и присно и во веки веков.

Тропарь, глас 4, поемый в той же церкви

Предстательство страшное и непостыдное, не презри, Благая, молитв наших, Всепетая Богородице, Милостивая верных Домостроительнице, утверди православных жительство, спаси благовернаго императора нашего Николая Александровича, емуже повелела еси царствовати, и подаждь ему с небесе победу, зане родила еси Бога, едина Благословенная.

Иулиа 9. Молитва пред иконою Пресвятыя Богородицы Колочскою

О Пресвятая Владычице Богородице, Царице небесе и земли, вышшая Ангел и Архангел и всея твари Честнейшая, Чистая Дево Марие, мiру Благая Помощнице, всех христиан поможение и утверждение, и всем во всяких нуждах избавление! Призри ныне, о Всемилостивая Госпоже, на рабы Твоя, умиленною душею и сокрушенным сердцем Тебе молящыяся, со слезами к Тебе припабающыя и пречистому и цельбоносному образу Твоему покланяющыяся, Твоея же помощи и заступления в скорбех и напастех своих просящыя. Буди за нас Ходатаица к Сыну Твоему, Христу Богу нашему: мы бо грешнии не имамы иныя Помощницы разве Тебе, Владычице. Ты еси, наша надежда и упование, Ты еси Заступница и Предстательница наша, Ты обидимым защищение, печальным утешение, скорбящым радование сирым прибежище, вдовам Хранительница, девам слава, слезящым веселие, больным посещение, немощным исцеление, грешным спасение. Сего ради, о Богомати, к Тебе прибегаем, и на Твой святый образ взирающе, с любовию покланяемся Тебе с Предвечным на руку Твоею держимым Младенцем, Господем нашим Иисус Христом, и молебное пение приносим, вопиюще: помилуй ны, Мати Божия, и прошения наша исполни во благо, вся бо возможна суть ходатайству Твоему к Сыну Твоему и Богу нашему, емуже подобает всякая слава, честь и поклонение и благодарение, со Безначальным Его Отцем и со Присносущным Его Духом, ныне и присно и во веки веков.

Иулиа 10. Молитва пред иконою Пресвятыя Богородицы Коневскою, из службы

О Всемилостивая Госпоже, Дево Богородице! Вонми смиренному молению моему, и сокрушенно ныне предстоящаго образу Твоему услыши глас. Вем бо, о Содетеля моего Мати, яко Ты еси предстательство христиан непостыдное и ходатайство ко Творцу непреложное: вем и сие, яко беззакония моя превзыдоша главу мою и яко бремя тяжкое отяготеша на мне, и уже несмь достоин видети высоту небесную, ниже воззрети ко престолу славы Сына Твоего и Бога нашего, но достоин явихся мук и вечнаго осуждения. Сего ради к Тебе [со предстоящими купно] припа́даю, Тя пршу умиленно, к Тебе со слезами взываю: вознеси к Нему матернее Твое моление, да не отвержет нас грешных от лица Своего, но, яко милостив, да простит нам согрешения наша вольная и невольная, на путь спасения нас наставляя и свыше силою ко творению заповедей Своих укрепляя: да сохранит нас от соблазнов мiра, от вожделений греховных, от козней диавольских и от нападения видимых враг: да благословит дела рук наших, подавая обители сей и всякому граду и стране обилие благ земных: сохраняя здравие и утверждая скиптр благочестивейшаго государя нашего Николая Александровича, да сотворит и всем нам дни благи и безмятежны: да оградит миром Церковь Свою Святую, и разстоящаяся да соединит Той, яко благ Господь, долготерпелив и многомилостив, от всея твари со Отцем и Святым Духом славимый во веки веков.

Тропарь, глас 1

Возсия нам, яко солнце светозарное от востока в велелепии, Твоя, Владычице, икона, озаряющи чудес сиянием преславно всех, непрестанно приходящих к ней с верою и любовию и молящихся усердно Твоему еже о Сыне Твоем и Бозе величию. Слава Богу, Арсением сию давшему нам: слава возвратившему ю от Новаграда: слава действующему то́ю всем исцеление.

Иулиа 23. Молитвы пред иконою Пресвятыя Богородицы Почаевскою

Молитва 1, из службы со акафистом

К Тебе, о Богомати, молитвенно притекаем мы грешнии, чудеса Твоя во святей Лавре Почаевстей явленная поминающе и о своих сокрушающеся прегрешениих. Вемы, Владычице, вемы, яко не подобание нам грешным чесого просити, токмо о еже Праведному Судии беззакония наша оставити нам. Вся бо, нами в житии претерпенная, скорби же и нужды и болезни, яко плоды падений наших прозябоша нам, Богу сия на исправление наше попущающу. Темже вся сия истиною и судом своим наведѐ Господь на грешныя рабы своя, иже в печалех своих к заступлению Твоему, Пречистая, притекоша, и во умилении сердец к Тебе взывает сице: грехов и беззаконий наших, Благая, не помяни, но паче всечестныя руце Твои воздвигши, к Сыну Твоему и Богу предстани, да люте содеянная нами отпустит нам, да, за премногая неисполненная обещания наша, лица Своего от рабов Своих не отвратит, да благодати Своея, спасению нашему пособствующия, от душ наших не отъимет. Ей, Владычице, буди спасению нашему Ходатаица, и малодушия нашего не возгнушавшися, призри на стенания наша, яже в бедах и скорбех наших пред чудотворным Твоим образом возносим. Просвети умиленными помыслы умы нашя, веру нашу укрепи, надежду утверди, любве сладчайший дар сподоби нас прияти. Сими убо, Пречистая, дарованьми, а не болезньми и скорбми живот наш ко спасению да возво́дится, но от уныния и отчаяния душы нашя ограждающи, избави нас маломощных от находящих на ны бед и нужд, и клеветы человеческия, и болезней нестерпимых. Даруй мир и благоустроение жительству христианскому предстательством Твоим, Владычице: укрепи скиптр благовернаго царя нашего, Твоему заступлению верующаго: утверди православную веру во стране нашей и во всем мiре. Церковь апостольскую и соборную умалению не предаждь, уставы святых отец на веки непоколебимы сохрани, и всех к Тебе притекающих от рова погибельнаго спаси. Еще же и ересию прельщенных братий наших, или веру спасительную во греховных страстех погубивших, паки ко истинней вере и покаянию приведи, да вкупе с нами Твоему чудотворному образу покланяющеся, Твое предстательство исповедят. Сподоби убо нас, Пресвятая Госпоже Богородице, еще в животе сем победу истины Твоим заступлением узрети: сподоби нас благодатную радость прежде кончины нашея восприя́ти, якоже древле насельники почаевския Твоим явлением победители и просветители агарян показала еси: да вси мы, благодарным сердцем вкупе со Ангелы и пророки и апостолы и со всеми святыми Твое милосердие прославляюще, воздадим славу, честь и поклонение в Троице певаемому Богу, Отцу и Сыну и Святому Духу, во веки веков.

Молитва 2, пред цельбоносною стопою Божия Матере в Почаевстей Лавре чтомая

О Пресвятая Дево, Владычице Богородице! Благодарю Тя от всего сердца моего, яко сподобила мя еси, грешнаго и недостойнаго раба Твоего, предстати зде и покланятися на святей горе Твоей. О коликих благ удостоихся тако многогрешный аз милосердием Твоим! Вижду, Пречистая, и ужасаюся, и истаевает дух мой, внегда зрети ми во очию многоцелебный сей источник благодати Твоея, егоже издревле во следе святыя стопы Твоея неизреченно явила еси. И всеблагоговейно покланяяся на месте, идеже стоясте нозе Твои, молю Тя, Благословенная Надеждо и спасение душ и телес наших: омый мя цельбоносною водою Твоею от всякия скверны плоти и духа, утоли благодатными струями Твоими вся страсти моя сердечныя, уврачуй каплями от приснотекущаго источника Твоего вся недуги моя телесныя, да Тобою наставляемь, врачуемь и избавляемь, воспеваю Тебе всеусердно: радуйся, Источниче радости непрестаемыя и доброты неизреченныя: радуйся, вожделений нечистых потопление: радуйся, скверн всяких измовение: радуйся, Струе Световиднейшая, во здравие верным от горы̀ преосене́нныя ча́щи благодать исцелений подавающая: радуйся, Росо Небесная, свыше токи премудрости жаждущим истиннаго познания низпосылающая: радуйся, Похвало Почаевская: спаси нас молящихся Тебе, Надеждо наша и утешение.

Тропарь, глас 5

Пред святою Твоею иконою, Владычице, молящиися исцелений сподобляются, веры истинныя познание приемлют, и агарянская нашествия отражают. Тем же и нам, к Тебе припадающым, грехов оставление испроси, помыслами благочестия сердца наша просвети, и к Сыну Твоему молитву вознеси о спасении душ наших.

Величание

Величаем Тя, Пресвятая Дево, и почитаем честную икону Твою, юже от лет древних на горе Почаевстей прославила еси.

Иулиа 28. Молитвы пред иконою Пресвятыя Богородицы Смоленскою, именуемою Одигитрия

Молитва 1, чтомая в Кафедральном соборе града Смоленска

О Пресвятая Дево, Мати Господа Вышних сил, небесе и земли Царице, града и страны нашея всемощная Заступнице! Приимѝ хвалебное пение сие от нас недостойных раб Твоих, и вознесѝ молитвы нашя ко престолу Бога Сына Твоего, да милостив будет неправдам нашым и проба́вит благодать Свою чтущым всечестное имя Твое и с верою и любовию покланяющымся пречистому [или чудотворному] образу Твоему. Не́смы бо достойни от Него помиловани бы́ти, аще не Ты уми́лостивиши Его о нас, Владычице, яко вся Тебе от Него возможна суть. Сего ради к Тебе прибегаем, яко к несомне́нней и ско́рей Заступнице нашей: услыши нас молящихся Тебе, осенѝ нас вседержавным покровом Твоим, и испросѝ у Бога Сына Твоего пастырем нашым ревность и бдение о душах, градоправителем мудрость и силу, судия́м правду и нелицеприятие, наставником разум и смиренномудрие, супругом любовь и согласие, чадом послушание, оби́димым терпение, оби́дящым страх Божий, скорбящым багодушие, радующымся воздержание, намже всем дух разума и благочестия, дух милосердия и кротости, дух чистоты и правды. Ей, Госпоже Пресвятая! Умилосердися на немощыя люди Твоя: разсеянныя собери, заблуждшыя на путь правый наста́ви, старость поддержи, юныя уцелому́дри, младенцы воспитай, и при́зри на всех нас призрением милостиваго Твоего заступления: воздви́гни нас из глубины грехавныя и просвети сердечныя очи наши ко зрению спасения. Милостива нам буди зде и тамо, во стране земнаго пришельствия и на Страшнем Суде Сына Твоего: преставльшыяся же в вере и покаянии от жития сего отцы и братию нашу в вечней жизни со Ангелы и со всеми святыми жити сотворѝ. Ты бо еси, Госпоже, слава небесных и упование земных, Ты по Бозе наша Надежда и Заступница всех притекающих к Тебе с верою. Тебе убо молимся, и Тебе, яко всемогу́щей Помощнице, сами себе и друг друга и всю жизнь нашу по Христе Бозе предаем, ныне и присно и во веки веков.

Молитва 2, чтомая в Московском Новодевичем монастыре

К кому возопию, Влалычице? К кому прибегну в горести моей, аще не к Тебе, Царице Небесная? Кто плачь мой и воздыхание приимет, аще не Ты, Пренепорочная, Надеждо христиан и Прибежище? Кто паче Тебе в напастех защитит? Услыши убо стенание мое, и приклони ухо Твое ко мне, Влалычице Мати Бога моего, и не презри мене требующаго Твоея помощи, и не отрини мене грешнаго. Вразуми и научи мя, Царице Небесная: не отступи от мене раба Твоего, Владычице, за роптание мое, но буди мне Мати  Заступница. Вручаю себе милостивому покрову Твоему: приведи мя грешнаго к тихой и безмятежней жизни, да плачуся о гресех моих. К кому прибегну повинный аз, аще не к Тебе, упованию и прибежищу грешных, надеждою на неизреченную милость Твою и щедроты Твоя окриляемь; О Владычице Царице Небесная! Ты мне упование и прибежище, покров и заступление и помощь. Царице моя преблагая и скорая Заступнице: покрый Твоим ходатайством моя прегрешения, защити мене от враг видимых и невидимых: умягчи сердца злых человек, возстающих на мя. О Мати Господа моего Творца! Ты еси корень девства и неувядаемый цвет чистоты. О Богородительнице! Ты подаждь ми помощь немощствующему плотски́ми страстьми и болезнующему сердцем, едино бо Твое и с Тобою Твоего Сына и Бога нашего имам заступление: и Твоим пречудным заступлением да избавлюся от всякия беды и напасти, о Пренепорочная и Преславная Божия Мати Марие. Темже со упованием глаголю и вопию: радуйся Благодатная: радуйся Обрадованная: радуйся, Преблагословенная, Господь с Тобою.

Ке́домо буди, яко в некиих храмех молитва сия, или именуемая песнь Пресвятей Богородице, поется во гласе 5.

Молитва 3, чтомая в Смоленской Богородицкой, над Днепровскими враты, церкви

К кому возопию̀, Влалычице? К кому прибе́гну в горести моей, аще не к Тебе, Госпоже Богородице, Царице Небесная? Кто плачь мой и воздыхание прии́мет, аще не Ты, о Пренепорочная, Надеждо христиан и Прибежище нам грешным? Приклонѝ, о Пречистая Владычице, ушеса̀ Твоя к молению моему. Мати Бога моего, не пре́зри мене требующа Твоея помощи, услыши стенание мое, и воплю сердца моего вонмѝ, о Госпоже Царице Богородице! И подаждь ми радость душевную, и подкрепи мя нетерпеливаго, унылаго и нерадиваго ко Твоему хвалению. Вразумѝ и научѝ мя, ка́ко Тебе моли́тися подобает, и не отступѝ от мене, Мати Бога моего, за роптание и нетерпение мое: но буди ми покров и заступление в жизни моей, и приведи мя к тихому пристанищу Божественнаго о́наго покоя, и сопричтѝ мя к лику избраннаго Твоего стада, и тамо удостой мя воспева́ти и сла́вити Тя во веки веков.

Молитва 4, чтомая в Галичской Богоотцевской церкви, Костромския епархии

Царице моя Преблагая, Надеждо моя Богородице, прибежище сирых и странных Предстательнице, скорбящих Радосте, обидимых Покровительнице! Зри́ши мою беду, зри́ши мою скорбь: помозѝ ми яко не́мощну, направи мя яко стра́нна. Обиду мою ве́си,  разрешѝ ту, якоже во́лиши: яко не и́мам иныя помощи разве Тебе, ни ины́я Предстательницы, ни Благи́я Уте́шительницы, токмо Тебе, о Богомати, яко да сохрани́ши мя и покры́еши во веки веков.

Молитва 5, чтомая в Кирилло-Белоезерском монастыре, Новгородския епархии

О Пречудная и Превышшая всех тварей Царице Богородице, Небеснаго Царя Христа Бога нашего Мати, Пресвятая Одигитрие Марие! Услыши ны грешныя и недостойныя, в час сей молящыяся и к Тебе со воздыханием и слезами пред пречистым образом Твоим припадающыя и сице умильно глаголющыя: изведи нас от рова страстей, Одигитрие Благая, избави нас от всякия скорби и печали, огради от всякия напасти и злых клевет и от неправеднаго навета вражия. Можеши бо, о Благодатная Мати наша, не точию от всякаго зла сохранити люди Твоя, но и всяким благодеянием снабдити и спасти: разве бо иныя Предстательницы в бедах и обстояниих и теплыя Ходатаицы о нас грешных к Сыну Твоему, Христу Богу нашему, не имамы. Егоже умоли, Владычице, спасти нас и Царствия Небеснаго сподобити, да спасе́ннии Тобою, славим Тя и в будущем веце, якоже спасения нашего Виновницу, и превозносим всесвятое и великолепое имя Отца и Сына и Святаго Духа, в Троице славимаго и покланяемаго Бога, во веки веков.

Молитва 6, чтомая в Костромском Богоявленском Анастаси́ином монастыре

О Пресвятая Госпоже Владычице Богородице! Со страхом многим и верою и любовию благодарственная пения Тебе приносяще, молимся Ти пред сею честною Твоею иконою, дивными чудесы просиявшею: не затвори нам грешным щедрот Твоих, Всенепорочная, не отвержи нас к Тебе прибегающих, Милосердая. Умоли Твоего Сына и Бога, Господа нашего Иисуса Христа, да Своею благодатию обитель сию ко спасению душ Ему уневестившихся в мире сохранит. Сама же, яко Благая сущи Мати Вышняго, пребуди неотступна от обители сей, яко жребия и достояния Твоего, и всесильными Твоими молитвами зде подвизающыяся покрый и заступи от всех бед и нужд душевных и телесных: не имамы бо иныя помощи, не имамы <…> надежды, разве Тебе, Пречистая Дево. Смиренно убо к Тебе припа́дающе, молим Тя, Преблагословенная Владычице: приемли милостивно молитвы, прошения и благодарения всех с верою притекающих к сему честному Твоему образу, приносящи я̀ Сыну Твоему: избавляй их от падения грехавнаго, от навета злых человек, от всяких искушений, скорбей же и бед, от внезапныя смерти и вечных мук: и даруй им дух сокрушения, смирение сердца, ума чистоту, исправление греховныя жизни и оставление прегрешений, да вси мы, благодарно вели́чия Твоя воспевающе, сподобимся Небеснаго Царствия и тамо со всеми святыми прославим пречестное и великолепое имя Отца и Сына и Святаго Духа, во веки веков.

Молитва 7, чтомая в Спасо-Всеградской церкви града Великаго Устюга

О Пресвятая Владычице Богородице, Царице небесе и земли, вышшая Ангел и Архангел и всея твари Честнейшая, Чистая Дево Марие, мiру Благая Помощнице и утверждение и всем во всяких нуждах избавление! Призри и ныне, Госпоже Всемилостивая, на рыбы Твоя, умиленною душею и сокрушенным сердцем Тебе молящыяся, и со слезами к Тебе припадающыя, и Пречистому и цельбоносному образу Твоему покланяющыяся, Твоея же помощи и заступления во всяких скорбех, печалех и напастех усердно просящия. О Всемилостивая Дево, Богородице Чистая! Буди о нас Ходатаица к Сыну Твоему, Христу Богу нашему. Мы бо грешнии не имамы иныя помощи, разве Тебе, Владычице: Ты еси наше упование, Ты еси Заступница наша и Предстательница, Ты обидимым защищение, скорбящым радование, сирым прибежище, вдовам Хранительница, девам слава, слезящым веселие, больным посещение, немощным исцеление, грешным спасение. Сего ради, о Богомати, к Тебе прибегаем, и на Твой образ взирающе, с любовию покланяемся Тебе с Предвечным на руку Твоею держимым Младенцем, Господем нашим Иисус Христом, и молебное пение приносяще, вопием: помилуй нас, Мати Божия, и прошения наша исполни, вся бо суть возможна ходатайству Твоему пред Богом, Емуже подобает всякая слава, честь и поклонение, ныне и присно и во веки веков.

Тропари общыя Пресвятей Богородице, глас 4

  1. К Богородице ныне прилежно притецем гре́шнии и смире́ннии, и припаде́м, в покаянии зовуще из глубины душѝ: Владычице, помози, на ны милосердовавши: потщися, погибаем от множества прегрешений: не отврати рабы Твоя тщы̀, Тя бо и едину надежду имамы.
  2. Не умолчим никогда, Богородице, силы Твоя глаголати недостойнии: аще бо Ты не бы̀ предстояла моля́щи, кто бы нас избавил от толиких бед? Кто же бы сохранил до ныне свободны? Не отступим, Владычице, от Тебе: Твоя бо рабы спасаеши присно от всяких лютых.

Иулиа 28. Молитвы пред иконою Пресвятыя Богородицы Смоленскою Полонскою, чтомая в Преображенской церкви погоста Верховья, Костромския епархии

О Пресвятая Госпоже Владычице Богородице! Со страхом многим и верою и любовию сие благодарственное пение Тебе приносяще, молимся Ти прилежно: не затвори нам грешным щедрот Твоих, Всенепорочная, не отвержи нас прибегающих, Милосердая, но всесильными Твоими молитвами покрый и заступи нас, от искушений и бед и скорбей, от внезапныя смерти и вечных мук избавляющи: не имамы бо иныя помощи, не имамы иныя надежды, разве Тебе, Пречистая Дево. Смиренно убо к Тебе припадающе, молим Тя, Преблагословенная Владычице: приими милостивно молитвы, прошения и благодарения всех с верою притекающих к сему честному Твоему образу, приносящи я̀ Сыну Твоему, да вси мы, благодарно величия Твоя воспевающе, сподобимся Небеснаго Царствия и тамо со всеми святыми прославим пречестное и великолепое им Отца и Сына и Святаго Духа, во веки веков.

Иулиа 28. Молитвы пред иконою Пресвятыя Богородицы Гребневскою

О Пречистая Госпоже Владычице Богородице! Приимѝ недостойную молитву нашу, и сохрани нас от навета злых человек и от внезапныя смерти, и даруй нам прежде конца покаяние. На моление наше умилосе́рдися, и радость вместо печали да́руй. И изба́ви нас, Госпоже, от всякия беды̀ и напасти, скорби и болезни и от всякаго зла. И сподо́би ны, грешныя рабы Твоя, одесную ста́ти во втором пришествии Сына Твоего, Христа Бога нашего, и наследники быти Царствия Небеснаго и жизни вечныя со всеми святыми в безконечныя веки веков.

Тропарь, глас 8

Днесь, яко Солнце Пресветло, просия в Российстей стране,в конце ея полуденнем, всечестная икона Твоя, Владычице, юже благоверный великий князь Димитрий в царствующий град Москву принесе. Светло празднуем, благовернии людие, честнаго образа пришествие, молящеся прилежно:  Владычице Богородице, молися Сыну Твоему, Христу Богу нашему, избавити царствующий град Москву невредимо и все православное христианство от варварскаго пленения и междоусобныя брани и всех навет вражиих: Тебе бое дину Заступницу имамы.

Иулиа 28. Молитвы пред иконою Пресвятыя Богородицы Умиление, пред нею моляшеся преподобный Серафим Саровский при кончине своей

Владычице Богородице, души моея услаждение, изсохшаго сердца моего Струѐ Боготечная, потемненнаго ума моего пресветлый Светильниче, ленивыя воли моея Путеводительнице, немощи моея Сило, наготы облечение, нищеты богатство, неисцельный ран мощное и скорое врачевание, слез осушение, рыданий утоление, бед претворение, болезней облегчение, уз разрешение, спасения Надеждо! Услыши молитву мою: даждь ми время покаяния, ревность спасения, силу в подвизех богоугождения: сохрани мя от напастей и всяких зол, во искушениих же и бедах простри Твою руку помощи, да возстану в падении и не погибну люте. Дондеже пребываю в сем многоболезненнем житии, не лиши мене даров Твоея милости. Ущедри благостынею Твоею всю христолюбивую братию, зде предстоящую и молящуюся. Младенцы воспитай, юныя настави, старыя поддержи, малодушныя утѐши, заблуждшыя вразуми, вдовицы и сирыя призри и защити, на всех любящих и ненавидящих нас излей богатую Твою милость. И при кончине жизни моея, во время исхода моего от телесе, буди ми Предстательница: болезнь смертную умягчи, тоску утоли и бедную мою душу  приведи к вечным обителем, да не во́зьмет мене темная сила, нижѐ ла увлече́т во глубину ада. Ей, Преблагая Владычице Богородице, души моея умиление! Согрей хладное в вере и любви сердце мое слезами умиления: низпосли ми, скорбящему и обремененному грехми, за молитвы преподобнаго отца Серафима, Твоего чтителя, потребную радость и утешение. Да не лишуся убо, Богоневесто, упования моего плода, но да сподоблюся в Бозе и Спасителе моем, возлюбленнем Сыне Твоем, Господе нашем Иисусе Христе, сей прияти. Тому слава и держава, честь и поклонение, со Безначальным Его Отцем, и Всесвятым и Благим и Животворящим Его Духом, ныне и присо и во веки веков.

Тропарь, глас 4, поемый в Серафимо-Дивеевском монастыре, Нижегородския епархии

К Богородице со умилением припаде́м, вси грехми обремененнии, чудотворную ея икону Умиления облобызающе и вопиюще со слезами: владычице приими моление недостойных раб Твоих, и подаждь нам просящым велию Твою милость.

Месяц Аугуст

Аугуста 8. Молитвы пред иконою Пресвятыя Богородицы Толгскою. Из акафиста

Молитва 1

О Пресвятая Госпоже, Дево Богородице, вышшая Херувим и Серафим и святейшая всех святых! Ты, Всеблагая, на Толге икону Твою многоцелебную блаженному святителю Трифону огневидно явити благоволила еси, и ею многая и неизреченная чудеса соделала еси, и ныне содеваеши, по Твоему неизреченному к нам милосердию. Тебе пред пречистым образом Твоим припада́ем и молимся, преблагословенная рода нашего Заступнице: во странствии сем земнем, многоскорбнем и многомятежнем, не лиши нас Твоего заступления и покрова державнаго. Спаси и защити нас, Владычице, от разжженных стрел луцкаваго врага спасения нашего. Укрепи немощную волю нашу к деланию заповедей Христовых, умягчи окаменелая сердца наша любовию к Богу и ближним нашым, даруй нам сокрушение сердечное и покаяние истинное, да очистившеся от скверны греховныя, возможем принести Творцу благоугодныя Ему плоды добрых дел и сподобитися мирныя христианския кончины и ответа праваго на Страшнем и нелицеприятнем Суде Его. Ей, Госпоже Всемилостивая! В час грозный оный смертный наипаче яви нам Твое многомощное заступление, ускорѝ тогда на помощь к нам безпомощным, и державною рукою Твоею исхитѝ нас из власти лютаго мiродержца, ибо воистину много может молитва Твоя пред лицем Господа, и ничтоже невозможно ходатайству Твоему, аще токмо восхощеши. Темже на святый образ Твой умиленно взирающе, и пред ним яко живей Ти сущей с нами покланяющеся, со упованием благим, сами себе и друг друга и всю жизнь нашу Тебе по Бозе молитвенно предаем, и Тя величаем с Рождшимся от Тебе Спасителем нашим, Господем Иисусом Христом, Емуже, со Безначальным Его Отцем и Пресвятым Духом, подобает всякая слава, честь и поклонение, ныне и присно и во веки веков.

Молитва 2

Приими о Всеблагословенная и Всемощная Госпоже Владычице Богородице Дево, сия молитвы, со слезамиТебе ныне приносимыя от нас недостойных раб Твоих, ко Твоему цельбоносному образу пение возсылающих со умилением, яко тебе Самой зде сущей и внемлющей молению нашему. По коемуждо бо прошению исполнение твориши, скорби облегчаеши, немощным здравие даруеши, разслабленныя и недужныя исцеляеши, от бесных бесы прогоняеши, обидимыя от обид избавляеши, прокаженныя очищаеши и малыя дети милуеши: еще же, Госпоже Владычице Богородице, и от уз и темниц свобождаеши и всякия многоразличныя страсти врачуеши: вся бо суть возможна ходатайством Твоим к Сыну Твоему, Христу Богу нашему. О Всепетая Мати, Пресвятая Богородице! Не престай молитися о нас недостойных рабех Твоих, славящих Тя и почитающих Тя, и покланяющихся со умилением пречистому образу Твоему, и надежду имущих невозвратну и веру несумненну к Тебе, Приснодеве Преславней и Непорочней, ныне и присно и во веки веков.

Тропарь, глас 4

Днесь, светло сияет на Толге образ Твой, Пречистая Дево Богородице, и яко солнце незаходимое всегда верным подадеся: егоже видев на воздусе, невидимо Ангелы яко инким держима, преосвященный епископ града Ростова Трифон течѐ ко явленному светящемуся столпу огненну, и по водам яко по суху пре́йде, и моляшеся Ти верно о пастве и о людех. И ны к Тебе притекающе, зовем: Пресвятая Дево Богородице верно Тя славящыя спасай, императора нашего Николая Александровича и архиереи и вся российския люди от всех бед избавляяй, по велицей Твоей милости.

Аугуста 13. Молитвы пред иконою Пресвятыя Богородицы Страстною

Молитва 1

О Пресвятая Госпоже Владычице Богородице! Вы́шши еси всех ангел и архангел, и всея твари честнейши: Помощница еси обидимых, ненадеющихся надеяние, убогих Заступница, печальных утешение, алчущих Кормительница, нагих одеяние, больных исцеление, грешных спасение, христиан всех поможение и заступление. О Всемилостивая Госпоже, Дево Богородице Владычице! Милостию Твоею спаси и помилуй благочестивейшаго, самодержавнейшаго, великаго государя нашего, императора Николая Александровича всея России: супругу его, благочестивейшую государыню императрицу Александру Феодоровну: матерь его благочестивейшую государыню императрицу Марию Феодоровну: наследника его, благовернаго государя цесаревича и великаго князя Алексия Николаевича, и весь царствующий дом. Спаси, Госпоже, и помилуй раб Твоих, святейший правительствующий синод, и преосвященныя митрополиты, архиепископы и епископы, и весь священнический и иноческий чин, и благоверных правительствующий синклит, и военачальники, градоначальники и христолюбивое воинство, и доброхоты, и вся православныя христианы ризою Твоею честною защити: и умоли, Госпоже, из Тебе без семене воплотившагося Христа Бога нашего, да препояшет нас силою Своею свыше на невидимыя и видимыя враги нашя. О Всемилостивая Госпоже Владычице Богородице! Воздвигни нас из глубины греховныя, и избави нас от глада, губительства, от труса и потопа, от огня и меча, от нахождения иноплеменных и междоусобныя брани, и от внезапныя смерти, и от нападения вражия, и от тлетворных ветр, и от смертоносныя язвы, и от всякаго зла. Подаждь, Госпоже, мир и здравие рабом Твоим, всем православным христианом, и просвети им ум и очи сердечныя, еже ко спасению: и сподоби ны, грешныя рабы Твоя, Царствия Сына Твоего, Христа Бога нашего: яко держава Его благослове́на и препросла́влена, со Безначальным Его Отцем, и с Пресвятым и Благим и Животворящим Его Духом, ныне и присно и во веки веков.

Молитва 2

Царице моя Преблагая, Надеждо моя Богородице, прибежище сирых и странных Предстательнице, скорбящих Радосте, обидимых Покровительнице! Зри́ши мою беду, зри́ши мою скорбь: помозѝ ми яко не́мощну, направи мя яко стра́нна. Обиду мою ве́си,  разрешѝ ту, якоже во́лиши: яко не и́мам иныя помощи разве Тебе, ни ины́я Предстательницы, ни Благи́я Уте́шительницы, токмо Тебе, о Богомати, яко да сохрани́ши мя и покры́еши во веки веков.

Тропарь, глас 4

Днесь возсия неизреченно царствующему граду нашему Москве икона Богоматере, и яко светозарным солнцем, пришествием тоя озарися весь мiр, небесныя силы и души праведных мысленно торжествуют радующеся, мы же на ню взирающе, к Богородице со слезами вопием: о Всемилостива Госпоже, Владычице Богородице, молися из Тебе воплощенному Христу Богу нашему, да подаст мир и здравие всем христианом, по велицей и неизреченней Своей милости.

Аугуста 14. Молитва пред иконою Пресвятыя Богородицы Беседною

О Пресвятая Владычице Богородице, небеси и земли Царице! Призри на ны грешныя и недостойныя рабы Твоя, и умоли Сына Твоего, Христа Бога нашего, да оградит ны свыше силою Своею, еже навсегда сохраненным быти нам от всех искушений вражиих и прелестей бесовских. Ты, о Всемилостивая Госпоже Дево Богородице, якоже древле всю Российскую страну удивила еси преславным по воздуху пречестныя Твоея со Предвечным Младенцем иконы хождением и святым тоя града Тихфина посещением, место же сие, пустынно сущее, истинным самошествием и пречудным Твоим со святителем Николаем явлением возвеличила еси: тако и ныне, о Всеблагая Мати Бога Вышняго, покрый ны всеблагим Твоим покровом, сподобивши ны невидимыя благодати Твоея. И такоже древле в богоизбраннем пустыни сея месте богоугоднаго и благоговейнаго мужа Божественный зрак неизреченнаго сияния Твоего видети удостоила еси и милостивно к тому возглаголала еси: тако и ныне благосердыма очима Твоима, о Всепетая Богомати, со обычною Ти любовию на ны и на вся усердно молящыяся Тебе и умильно просящыя Твоея всесильныя помощи и заступления воззревши, буди Всеблагая спасения душ и телес наших Ходатаица пред престолом Сына Твоего и Бога нашего. Спасай убо, о Пресвятая Дево Богородительнице, благовернаго императора нашего, обитель сию и весь род христианский и вся с верою приходящыя и покланяющыяся пречистей иконе явления Твоего, Пресвятую же Троицу, Отца и Сына и Святаго Духа славящыя, и Твое милостивное со святым Николаем предстательство почитающыя, ныне и присно и во веки веков.

Тропари общие Пресвятей Богородице, глас 4

  1. К Богородице ныне прилежно притецем гре́шнии и смире́ннии, и припаде́м, в покаянии зовуще из глубины душѝ: Владычице, помози, на ны милосердовавши: потщися, погибаем от множества прегрешений: не отврати рабы Твоя тщы̀, Тя бо и едину надежду имамы.
  2. Не умолчим никогда, Богородице, силы Твоя глаголати недостойнии: аще бо Ты не бы̀ предстояла моля́щи, кто бы нас избавил от толиких бед? Кто же бы сохранил до ныне свободны? Не отступим, Владычице, от Тебе: Твоя бо рабы спасаеши присно от всяких лютых.

Аугуста 15. Молитва пред иконою успения Пресвятыя Богородицы. Из службы со акафистом

Молитва 1

О Пресвятая Богородице, Дево Владычице, вышшая Ангел и Архангел, и всея твари Честнейшая, ангельское великое удивление, пророческая высокая проповедь, апостольская преславная Похвало, святителей изрядное украшение, мучеников крепкое утверждение, иноков спасительное наставление, постников неизнемогающее воздержание, действующих Чистото и Славо, матере тихое веселие, младенцев мудросте и вразумление, вдовиц и сирых Кормительнице, нагих одеяние, болящих здравие, пленников избавление, по морю плавающих тишино, обуреваемых небурное пристанище, блуждающих нетрудная Наставнице, путешестующих легкое прехождение, труждающихся благое покоище, в бедах сущым скорая Заступнице, обидимых покрове и прибежище, ненадеющихся надеяние, требующих помощнице, нищих неистощимое богатство, печальных присное утешение, ненавидимых любовное смирение, грешников спасение и к Богу присвоение, прпвоверных всех твердое ограждение, непобедимое поможение и заступление! Тобою нам, Владычице, невидимый видимь бысть, и Тебе мольбу приносим, Госпоже, грешнии раби Твои: о Премилостивая и Пречудная света умнаго Царице, рождшая Царя Христа Бога нашего, Живодавца всех, от небесных славимая и от земных хвалимая: ангельский уме, светозарная звездо, святых Пресвятейшая, Царице цариц, Владычице всех боголепная Девице, нескверная Невесто, Палато Духа Пресвятаго, огненный Престоле невидимаго Царя, небесный Кивоте, Носило Слова Божия, огнеобразная Колеснице, Покоище Живаго Бога, неизреченное  составление плоти Христовы: гнездо орла небеснаго, горлице богогласная , голубице кроткая, тихая и незлобивая, Мати чадолюбивая, милостей бездно, развергающая ту́чу гнева Божия, неизмеримая глубино, наизреченная тайно, неведомое чудо, нерукотворенная церковь Единаго Царя всех век, благоуханное кадило, честная багрянице, боготканная порфиро, душевный раю, живоноснаго сада отрасле, цвете прекрасный, процветный нам небесное веселие, грозде спасения нашего, чаше Царя Небесного, в нейже растворися от Духа Святаго вино неисчерпаемыя благодати, Ходатаице закона, зачало истинныя веры Христовы, непоколебимый столпе, еретиков пагубо, мечу ярости Божия на богопротивных, бесов устрашение, во бранех побеждение, христиан всех неложная Хранительнице и мiра всего известное спасение! О Всемилостивая Госпоже, Дево Владычице Богородице, услыши нас молящихся Тебе, и яви милость Твою на людех Твоих: моли Сына Твоего избавитися нам от всякаго зла, и сохрани обитель, и град и страну верных, и люди благочестно прибегающыя и призывающыя имя Твое святое, от всякия напасти, губительства, глада, труса, потопа, огня, меча, нашествия иноплеменников и междоусобныя брани, от всякия болезни и всякаго обстояния: да ни ранами, ни прещением, ни мором, ни всяким праведным гневом Божиим ума́лятся раби Твои: но соблюдай и спасай милостию Твоею, Госпоже, за ны молящися, и полезное воздуха благорастворение ко времени плоднаго приношения нам даруй: облегчи, возстави и помилуй, Премилостивая Владычице, Богородице Препетая, во всякой беде и нужде сущыя. Помяни рабы Твоя, и не презри слез и воздыхания нашего, и обнови нас благостию Твоея милости, да со благодарением утешаемся, обре́тши Тя Помощницу. Умилосе́рдися, Госпоже Пречистая, на немощныя люди Твоя, Надеждо наша: разсеянныя собери, заблуждшыя на путь правый настави, отпадшыя от благочестивыя отеческия веры паки возврати, старость поддержи, юныя вразуми, младенцы воспитай, и послави славящыя Тя: изряднее же Церковь Сына Твоего соблюди и сохрани в долготу дний. О Милостивая и Премилостивая Царице небесе и земли, Богородице Приснодево! Ходатайством Твоим помилуй благочестивейшаго, самодержавнейшаго, великаго государя нашего, императора Николая Александровича всея России и весь царствующий дом, палату и все воинство их, и вся православныя христианы, сохраняющи их под кровом милости Твоея, ризою Твоею честною защити: и моли из Тебе воплощшагося без семени Христа Бога нашего, да препояшет ны свыше силою на вся видимыя и невидимыя враги нашя, на иноплеменники и единоплеменники, воюющыя на нас и на веру нашу православную. Спаси же и помилуй, Госпоже, святейший правительствующий синод и преосвященныя митрополиты, архиепископы и епископы православныя, иереи же и диаконы, и весь причет церковный, и вся правоверныя люди, покланяющыяся и молящыяся пред честною Твоею иконою. Призри на всех нас призрением милостивнаго Твоего заступления, воздвигни нас из глубины греховныя, и просвети очи сердечныя ко зрению спасения: милостива нам буди зде, и на Страшнем Суде Сына Твоего о нас умоли: преставльшыяся во благочестии от жития сего рабы Твоя в вечней жизни со Ангелы и Архангелы и со всеми святыми причти, да одесную Сына Твоего и Бога предстанут: и молитвою Твоею сподоби вся православныя христианы со Христом жити и радости ангельския в небесных селениих наслаждатися. Ты бо еси, Госпоже, слава небесных и упование земных, Ты наша надежда и Заступница всех притекающих к Тебе и Твоея святыя помощи просящих, Ты Молебница наша теплая к Сыну Твоему и Богу нашему: Твоя матерняя молитва много может на умоление Владыки, и Твоим предстательством ко престолу благодати Пресвятых и Животворящих Его Таин приступати дерзаем, аще и недостойнии. Темже всечестный образ Твой и рукою Твоею держимаго Вседержителя видяще на иконе, радуемся грешнии, со умилением припа́дающе, и любовию сей целуем, чающе, Госпоже, Твоими святыми благоприятными молитвами доити небесныя безконечныя жизни и непостыдно стати в день Судный одесную Сына Твоего и Бога нашего, яко да славим Его, купно со Безначальным отцем, и Пресвятым, Благим, Животворящим и Единосущным Духом, во веки веков.

Молитва 2

Царице моя Преблагая, Надеждо моя Богородице, прибежище сирых и странных Предстательнице, скорбящих Радосте, обидимых Покровительнице! Зри́ши мою беду, зри́ши мою скорбь: помозѝ ми яко не́мощну, направи мя яко стра́нна. Обиду мою ве́си,  разрешѝ ту, якоже во́лиши: яко не и́мам иныя помощи разве Тебе, ни ины́я Предстательницы, ни Благи́я Уте́шительницы, токмо Тебе, о Богомати, яко да сохрани́ши мя и покры́еши во веки веков.

Тропарь, глас 1

В рождестве девство сохранила еси, во успении мiра не оставила еси, Богородице: преставилася еси к животу, Мати сущи Живота, и молитвами Твоими избавляеши души нашя.

Аугуста 15. Молитва пред чудотворною иконою Пресвятыя Богородицы Моздокскою, чтомая в Мозокском Успенском соборе, Владикавказския епархии

О Пресвятая Дево, Мати Христа Бога нашего, Царице небесе и земли! Вонми многоболезненному воздыханию душ наших, призри с высоты святыя Твоея на нас, с верою и любовию поклоняющихся пречистому [и чудотворному] образу Твоему. Се бо грехми погружаемии и скорбьми обуреваемии, взирающе на Твой образ, яко живей Тебе сущей с нами, приносим смиренная моления наша. Не имамы иныя помощи, ни инаго предстательства, ни утешения, токмо Тебе, о Мати всех скорбящих и обремененных! Помози нам немощным, утоли скорби нашя, настави на путь правый нас заблуждающих, уврачуй болезненная сердца наша и спаси безнадежных, даруй нам прочее время жития нашего в мире и покаянии проводити, подаждь христианскую кончину, и на Страшнем Суде Сына Твоего явися нам милосердая Предстательница, да всегда поем, величаем и славим Тя, яко благую Заступницу рода христианскаго, со всеми угодившими Богу, во веки веков.

Аугуста 19. Молитва пред иконою Пресвятыя Богородицы Донскою

К кому возопию, Влалычице? К кому прибегну в горести моей, аще не к Тебе, Царице Небесная? Кто плачь мой и воздыхание приимет, аще не Ты, Пренепорочная, Надеждо христиан и Прибежище? Кто паче Тебе в напастех защитит? Услыши убо стенание мое, и приклони ухо Твое ко мне, Влалычице Мати Бога моего, и не презри мене требующаго Твоея помощи, и не отрини мене грешнаго. Вразуми и научи мя, Царице Небесная: не отступи от мене раба Твоего, Владычице, за роптание мое, но буди мне Мати  Заступница. Вручаю себе милостивому покрову Твоему: приведи мя грешнаго к тихой и безмятежней жизни, да плачуся о гресех моих. К кому прибегну повинный аз, аще не к Тебе, упованию и прибежищу грешных, надеждою на неизреченную милость Твою и щедроты Твоя окриляемь; О Владычице Царице Небесная! Ты мне упование и прибежище, покров и заступление и помощь. Царице моя преблагая и скорая Заступнице: покрый Твоим ходатайством моя прегрешения, защити мене от враг видимых и невидимых: умягчи сердца злых человек, возстающих на мя. О Мати Господа моего Творца! Ты еси корень девства и неувядаемый цвет чистоты. О Богородительнице! Ты подаждь ми помощь немощствующему плотски́ми страстьми и болезнующему сердцем, едино бо Твое и с Тобою Твоего Сына и Бога нашего имам заступление: и Твоим пречудным заступлением да избавлюся от всякия беды и напасти, о Пренепорочная и Преславная Божия Мати Марие. Темже со упованием глаголю и вопию: радуйся Благодатная: радуйся Обрадованная: радуйся, Преблагословенная, Господь с Тобою.

Кедомо буди, яко в некиих храмех молитва сия, или именуемая песнь Пресвятей Богородице, поется во гласе 5.

Тропари общие Пресвятей Богородице

Ин тропарь, глас 4, поемый в Московском Донском монастыре

Заступнице верных преблагая и скорая, Пречистая Богородице Дево! Молим Тя пред святым и чудотворным образо Твоим, да якоже древле от него заступление Твое граду Москве даровала еси, тако и ныне нас от всяких бед и напастей милостивно избави, и спаси души нашя, яко милосердая.

Аугуста 22. Молитвы пред иконою Пресвятыя Богородицы Грузинскою

Молитва 1, из акафиста

К Тебе, Богоизбранная Отроковице, Пресвятая Дево Богородице, небесе и земли Царице, припадающе, вопием: услыши молений глас, и не отврати лица Твоего от нас недостойных. Приими, Всеблагая, от недостойных раб Твоих, чтущих всечестное имя Твое и с верою покланяющихся Тебепред чудотворным Твоим образом, приносимое ныне теплое моление наше: вознеси ѐ ко престолу Сына Твоего, Христа Бога нашего, да милостив будет к неправдам нашим и да не воздаст нам по делом нашым, но жда проба́вит щедроты Своя на ны. Вемы, яко не́смы досто́йни, по грехом нашым, от Него помилавани быти, аще не Ты, Владычице, умолиши Его о нас: вся бо можеши испросити у Него, матернее к Нему дерзновение имущи. Сего ради к тебе, яко всемощней и всеблагой Заступнице нашей, прибегаем, усердно молящеся: испроси у рождашагося от Тебе Единароднаго Сына Божия, Христа Бога нашего, всем нам в святоотеческой православной вере твердое, до конца дней наших, пребывание и во всех заповедех Господних неуклонное хождение, да прочее время жития нашего поживше во всяком благочестии и чистоте, сподобимся мирныя христианския кончины и добраго ответа на Страшнем Суде Сына Твоего и Бога нашего, и тако достигнем, под кровом Твоея помощи, жизни вечныя во Царствии Отца светов, Емуже, купно со Единородным Его Сыном и Святым Духом, подобает слава, честь и поклонение, нане и присно и во веки веков.

Молитва 2

О Пречистая Госпоже Владычице Богородице! Приимѝ недостойную молитву нашу, и сохрани нас от навета злых человек и от внезапныя смерти, и даруй нам прежде конца покаяние. На моление наше умилосе́рдися, и радость вместо печали да́руй. И изба́ви нас, Госпоже, от всякия беды̀ и напасти, скорби и болезни и от всякаго зла. И сподо́би ны, грешныя рабы Твоя, одесную ста́ти во втором пришествии Сына Твоего, Христа Бога нашего, и наследники быти Царствия Небеснаго и жизни вечныя со всеми святыми в безконечныя веки веков.

Молитва 3, чтомая в Московском Алексиевском монастыре

Приими, Всеблагомощная, Пречистая Госпоже, Владычице Богородительнице, сия честныя дары от нас недостойных раб Твоих, ко Твоему цельбоносному образу пение возсылающих со умилением, яко Тебе Самой зде сущей и послу́шающей моления наша и подаю́щей с верою просящым исполнение по коемуждо прошению. Скорбящым бо скорби облегчаеши, немощным здравие даруеши, разслабленныя и недужныя исцеляеши и от бесных бесы прогоняеши, обидимыя от обид избавляеши, грешныя прощаеши, прокаженныя очищаеши, малыя дети милуеши, и неплодныя от неплодства разрешаеши. Еще же, Госпоже Владычице, и от уз и темниц свобождаеши, и всякия многоразличныя страсти исцеляеши, и очныя болезни врачуеши, и от смертоносныя язвы избавляеши: вся бо возможна суть ходатайством Твоим к Сыну Твоему, Христу Богу нашему. О Всепетая Мати, Пречистая Богородице! Не престай молитися о нас недостойных рабех Твоих, славящих Тя и почитающих, и покланяющихся пречистому образу Твоему, и надежду имущих невозвратну и веру несумненну к Тебе, Приснодеве Преславней и Пренепорочней, ныне и присно и во веки веков.

Молитва 4, чтомая в Московской Грузинской, на Воронцовом поле, церкви

О Чудная и Пречудная Царице Богородице, Мати Христа Бога нашего! услыши ны грешныя и недостойныя рабы Твоя, в час сей припадающыя и прилежно вопиющыя: от бед избави нас, Владычице, и заступи: не презри слез и воздыхания нашего, и избави нас от всякия скорби и напасти, от злаго же и лютаго оклеветания: разве бо Тебе Предстательницы и Ходатаицы теплыя к Сыну Твоему, Христу Богу нашему, не имамы: Емуже молися, да спасет Тебе ради душы нашя ныне и присно и во веки веков.

Молитва 5, чтомая в Раифской пустыни, Казанския епархии

О Пресвятая Дево, Мати Христа Бога нашего, Царице небесе и земли! Вонми многоболезненному воздыханию душ наших, призри с высоты святыя Твоея на нас, с верою и любовию поклоняющихся пречистому [и чудотворному] образу Твоему. Се бо грехми погружаемии и скорбьми обуреваемии, взирающе на Твой образ, яко живей Тебе сущей с нами, приносим смиренная моления наша. Не имамы иныя помощи, ни инаго предстательства, ни утешения, токмо Тебе, о Мати всех скорбящих и обремененных! Помози нам немощным, утоли скорби нашя, настави на путь правый нас заблуждающих, уврачуй болезненная сердца наша и спаси безнадежных, даруй нам прочее время жития нашего в мире и покаянии проводити, подаждь христианскую кончину, и на Страшнем Суде Сына Твоего явися нам милосердая Предстательница, да всегда поем, величаем и славим Тя, яко благую Заступницу рода христианскаго, со всеми угодившими Богу, во веки веков.

Молитва 6, чтомая в Николаевской Золотокрестенской церкви града Вологды

О Пренебесная Царице, Богородице Марие, Божественнаго света Светоприемнице, Божия Слова Вместилище, пророческое зерцало, апостольская проповедь, мучеником страдания венче, святителем похвало, преподобным светлое песнопение и помощнице, и всем святым ликование, вселенския Церкве чудная похвало, царем православным державо непобедимая, архиереем светлый венче, и всего православнаго христианства Божественный покрове и помощнице, от всяческих зол избавление, грехов разрешение, к вечней жизни Наставнице и пред Христом о нас Ходатаице! Даруй, о Владычице Богомати, заступление и помощь Твоя неизреченная и дивная чудеса почитающым, и честныя Твоея иконы Знамения, на спасение и заступление последним родо́м являемая. Алчущая сердца наша напитай небесною пищею, и веселия духовнаго исполни, и мыслем нашым смирение даруй, страх Твой в сердца наша всади, и любовь нелицемерну утверди в душах наших, и на всяк путь Божественных заповедей настави, во еже ходити нам по заповедем Сына Твоего, Господа нашего Иисуса Христа, Емуже слава подобает, со Отцем и Святым Духом, ныне и присно и во веки веков.

Тропарь, глас 4

От святыя иконы Твоея, о Владычице Богородице, спасение и цельбы подаю́тся обильно всем с верою и любовию приходящым к ней. Тако и мою немощь посети, и душу мою помилуй, Благая, и тело мое исцели благодатию Твоею, Пречистая.

Ин тропарь, глас тойже:

Днесь светло красуется обитель красногорская, и с нею ликовствует Раифская пустыня, яко зарю солнечную, от востока возсиявшую, восприимши, Владычице, чудотворную Твою икону, еюже разгоняешимглу искушений и бед от вопиющих верно: избави обитель нашу и вся страны христианския от всех навет вражиих, и спаси души нашя, яко милосердая Заступница рода христианскаго.

Ин тропарь, глас 5:

Веселятся православнии народи, видяще, Владычице Дево Богородице, Твою пречудную и чудотворную икону, и приемлют врачевство душевное и телесное Твоею милостию всегда. Темже и мы, покланяющеся о́ней, усердно Тебе вопием: помилуй, Благая Мати, смиренныя рабы Твоя, и избави нас от всякагозла и навета вражия, молящи Сына Твоего Господа Иисуса, да, спасшеся зде, небесное жительство получим человеколюбием и благодатию Его.

Величание

Величаем Тя, Пресвятая Дево, Мати Христа Бога нашего, и чтем Твой образ святый, от негоже источяеши исцеления всем с верою к Тебе притекающым.

Аугуста 23. Молитва пред иконою Пресвятыя Богородицы Михайловскою, чтомая в Успенской церкви слободы Большой Пискаревки, Харьковския епархии

Царице моя Преблагая, Надеждо моя Богородице, прибежище сирых и странных Предстательнице, скорбящих Радосте, обидимых Покровительнице! Зри́ши мою беду, зри́ши мою скорбь: помозѝ ми яко не́мощну, направи мя яко стра́нна. Обиду мою ве́си,  разрешѝ ту, якоже во́лиши: яко не и́мам иныя помощи разве Тебе, ни ины́я Предстательницы, ни Благи́я Уте́шительницы, токмо Тебе, о Богомати, яко да сохрани́ши мя и покры́еши во веки веков.

Молитва пред иконою Пресвятыя Богородицы Ля́данскою, чтомая в Ля́данском Благовещенском монастыре, Минския епархии

К кому возопию, Влалычице? К кому прибегну в горести моей, аще не к Тебе, Царице Небесная? Кто плачь мой и воздыхание приимет, аще не Ты, Пренепорочная, Надеждо христиан и Прибежище? Кто паче Тебе в напастех защитит? Услыши убо стенание мое, и приклони ухо Твое ко мне, Влалычице Мати Бога моего, и не презри мене требующаго Твоея помощи, и не отрини мене грешнаго. Вразуми и научи мя, Царице Небесная: не отступи от мене раба Твоего, Владычице, за роптание мое, но буди мне Мати  Заступница. Вручаю себе милостивому покрову Твоему: приведи мя грешнаго к тихой и безмятежней жизни, да плачуся о гресех моих. К кому прибегну повинный аз, аще не к Тебе, упованию и прибежищу грешных, надеждою на неизреченную милость Твою и щедроты Твоя окриляемь; О Владычице Царице Небесная! Ты мне упование и прибежище, покров и заступление и помощь. Царице моя преблагая и скорая Заступнице: покрый Твоим ходатайством моя прегрешения, защити мене от враг видимых и невидимых: умягчи сердца злых человек, возстающих на мя. О Мати Господа моего Творца! Ты еси корень девства и неувядаемый цвет чистоты. О Богородительнице! Ты подаждь ми помощь немощствующему плотски́ми страстьми и болезнующему сердцем, едино бо Твое и с Тобою Твоего Сына и Бога нашего имам заступление: и Твоим пречудным заступлением да избавлюся от всякия беды и напасти, о Пренепорочная и Преславная Божия Мати Марие. Темже со упованием глаголю и вопию: радуйся Благодатная: радуйся Обрадованная: радуйся, Преблагословенная, Господь с Тобою.

Ке́домо буди, яко в некиих храмех молитва сия, или именуемая песнь Пресвятей Богородице, поется во гласе 5.

Молитва пред чудотворною иконою Пресвятыя Богородицы Подольскою, иже во граде Житомíре

О Всемилостиваго Бога милосердая Мати, Преблагословенная Владычице, Приснодево Богородице! Услыши стенание и вопль наш и вонми гласу моления нашего. Простири нам Твоим всемогущим предстательством руку помощи, да не погибнем со беззаконьми нашими, но в покаяние благовременне приидем. Веси бо нашу немощь и скорбь нашу, от страстей и бесов нам бываемую. Избави нас от нападений демонских и от наветов злых человек: Тобою бо демони попираются, и Тобою врази посрамляются. Исполни во благо прошения наша, Тебе приносимая: никто же бо, притекаяй к Тебе, посрамлен отходит. Умоли Сына Твоего и Бога, да милостив будет неправдам нашым и да не внидет в суд с рабы Своими, яко не оправдится пред Ним всяк живый. Вемы бо, яко много может матернее моление Твое ко благосердию Владыки, и вся Тебе от Него возможна суть. Исцели язвы телес наших, грехми оскверненных, и очисти души нашя, омраченныя страстьми. Направи ум наш на путь правый и утверди волю нашу ко исполнению дел благих и к соблюдению заповедей Сына Твоего, да милосердие Его неотступно будет от нас. паче же, о Всеблагая Владычице, покрый, соблюди и спаси всех сирых и безпомощных, к чудотворному Твоему образу припа́дающих, и всех нас днесь осени всемощным Твоим покровом. Но и в прочее время жития нашего Твоея милости и многия благости нас не лиши, и буди нам присно упование непостыдное в земнем житии и по преставлении нашем, да вси немолчными усты и чистым сердцем, со безплотными ангельскими гласы и со всеми святыми, славим, хвалим, поем и величаем Тя ныне и присно и во веки веков.

Молитвы ко Пресвятей Богородице на кийждо день седмицы. Подвижника Нило-Сорския пустыни, иеросхиманаха Нила

Молитва 1, в день Воскресный

О Всемилостивая Дево Богородице, Мати щедрот и человеколюбия, прелюбезная Надеждо и упование мое! О Мати пресладкаго, превожделеннаго и всяку любовь превосходящаго Спасителя, Иисуса Христа, человеколюбца и Бога моего, Свете помраченныя души моея! К Тебе аз многогрешный припа́даю, и Тебе молюся, Источниче милосердия, Дево Марие, бездну милосердия и пучину щедрот и человеколюбия рождшая: помилуй мя, вопию Ти болезненно, помилуй мя всего уязвленнаго, в лютыя разбойники впадшаго, и от одежды, в ню же облаче мя Отец, увы мне, обнаженнаго. Темже возсмердеша и согниша раны моя от лица безумия моего. Но, Владычице моя Богородице, молю Тя смиренно, воззри на мя милостивым Твоим оком, и не возгнушайся мене всего помраченнаго, всего оскверненнаго, всего в тине сластей и страстей погруженнаго, люте падшаго и возстати немогущаго: умилосердися на мя, и даждь ми руку помощи, во еже воздвигнути мя из глубины греховныя. О Радосте моя! Избави мя от обышедших мя: просвети лице Твое на раба Твоего, спаси погибающаго, возстави падшаго люте: можеши бо вся, яко Мати Бога Всемогущаго. Излей на мя елей милосердия Твоего, и вино умиления точи́ти ми подаждь: Тебе бо воистину едину надежду стяжах в житии моем. Не отрини убо мене к Тебе притекающаго, но виждь скорбь мою, Дево, и души желание, и сие приими и спаси мя, Ходатаице спасения моего.

Молитва 2, в понедельник

От скверных моих уст приими моление, О Нескверная, Чистая и Пречистая Дево Богородице! И не возгнушайся моих словес, о Радосте моя! Но призри на мя и помилуй мя, о Мати Зиждителя моего! Во время жития моего не остави мене: веси бо, Владычице, яко на тя всю мою надежду возлагаю, и все упование мое о Тебе есть. Темже и во время смерти моея предстани ми, Помощнице моя, Радосте и утешение мое: не остави мене тогда, Надеждо моя, и не посрами мене тогда. Вем бо, вем, Дево, яко о многих гресех повинен есмь окаянный, и трепещу помышляя час о́ный: но, Радосте моя, яви ми тогла лице Твое, удиви на мне милость Твою, Ходатаице спасения моего, изьми мя, Владычице, от лютости бесовския и страшнаго и грознаго испытания воздушных духов, и от злобы их избави, и всю скорбь дне того на радость преложи Твоим посещением, и сподоби безбедно прейти ми от начал и властей тьмы и достигнути поклонитися на престоле славы седящему Христу и Богу нашему, со Безначальным Его Отцем и Пресвятым Духом, во веки веков.

Молитва 3, во вторник

О Пресвятая Владычице моя Богородице, Ангелов и Архангелов, Херувимов и Серафимов пречестнейшая,  и всех святых пресвятейшая, Дево Мати Божия! Спаси мя смиренаго и грешнаго раба Твоего: Ты бо веси, Всемилостивая Госпоже, яко всю мою надежду по Бозе на Тя возлагаю, и несть ми инаго прибежища спасительнаго, токмо Ты, Всеблагая. Ты моя крепость, Владычице, Ты моя и сила, Ты мое радование в скорбех, Ты мое пристанище во искушениих, Ты мое исправление в падениих, Ты и спасение мое всенадежное, о Мати Зиждителя и Господа моего! Помози ми плавающему в пучине жития сего, люте обуреваемому и бедствующему от потопления грехавнаго. Даждь ми руку помощи, Помощнице моя,  и избави мя от тиме́ния глубины, да не погрязну в бездне отчаяния: буря бо грехов и страстей возста̀ на мя, и волны беззаконий погружают мя. Но Ты, Милосердая Мати, во пристанище безстрастия настави и спаси мя, безнадежных Надеждо и Ходатаице спасения моего.

Молитва 4, в среду

Богорлдице, Ты еси упование мое, Ты ми еси стена и благонадежное пристанище и спастельное прибежище, томимому страстей нахожденьми. Спаси мя от всех враг моих, гонящих душу мою и различными искуше́ньми сию уловля́ющих. На пути бо сем, по немуже хожду, многия сети сокрыша ми: мнози же соблазны, многия прелести, многия немощи душевныя и телесныя в падения греховная мя вовлекают: и что сотворю отчаянный аз, недоумею. Аще бо восхощу покаятися, нечувствием и ожесточением одержи́мь есмь: аще же плакати понуждаюся, не имам сокрушения сердечнаго и слез понѐ единыя капли. Увы окаянства моего! увы бедности моея! увы лишения моего! К кому убо прибегну повинный аз, аще не к Тебе, Благосердая Мати Господа и Спаса нашего, ненадежных Надеждо, Стено и Покрове к Тебе притекающих! Не отрини мене сквернаго: Тебе бое дину в жизни моей стяжах утеху, Дево Марие Богородице, и к Тебе единей во всякой нужде прибегаю со дерзновением: не остави убо мене в жизни сей, и во время смерти моея предстани в помощь, Помощнице моя, да узрят Тя вси врази мои и постыдятся, Тобою побежденнии, Владычице, Ходатаице спасения моего.

Молитва 5, в четверток

Кто тебе по достоянию ублажити может, Пресвятая Дево? Кая уста воспети Твоя величие, всяк смысл превосходящее, возмогут? Вся преславная от Тебе содеянная таинства, Богородице, выше смысла и слова суть. Красоте девства Твоего и пресветлей чистоте Твоей удивишася Херувими и ужасошася Серафими: чудесе же рождества Твоего нетаеннаго ни человеческий, ни ангельский язык изрещи может. От Тебе бо безлетный и Единородный Сын Божий, Бог Слово, неизреченно воплощься, родися и с человеки поживе, и Тя, яко Матерь Свою, зело возвеличи, Царицу Тя всея твари показа, нам же известное спасения пристанище. Темже вси под кров Твой притекающии, различными скорбьми и болезньми одержимии, богатное утешение и исцеление приемлют и Тобою от бед спасаются: Ты бо еси воистину Мати всех скорбящих и обремененных, печальных радость, больных Целительница, юных Хранительница, старости жезл, праведных похвала, грешных спасения надежда и к покаянию Путеводительница: всем бо всегда предстательством Твоим помогаеши, и всех с верою и любовию к Тебе прибегающих заступаеши. Ты и мне помози, отчаянному деяний моих ради. Заступнице усердная рода христианскаго, заступи мя, да не до конца погибну во гресех, ибо не имам инаго прибежища и покрова, разве Тебе, Владычице Мати Живота: не остави убо мене и не презри мя, но, имиже Сама веси судьбами, спаси мя, яко благословена еси во веки веков.

Молитва 6, в пяток

Тебе придаю в защищение жизнь мою, и по Бозе всю надежду спасения моего на Тя возлагаю, Владычице Дево Богородице. Молю же Тя раб Твой: не презри мя многия грехи сотворшаго, но виждь скорбь мою о сем и недоумение, и подаждь ми ослабу и утешение, да не до конца погибну окаянный. Простри десницу Трою, Чистая, изьми мя от тимения дел моих, и постави на чистую пажить заповедей Христа, Царя и Бога моего, да творю я̀ присно, Тобою укрепляемь. От грехов моих лютых избави мя, Владычице, и покаяние спасительное мне низпосли, ко Твоему Сыну и Богу матерним Твоим ходатайством. Свет неизреченный возсиявшая, просвети мою тьму душевную, от грехов ей прибы́вшую. Радосте моя, избави мя от обышедших мя невидимых врагов: греси бо мои мнози и тя́жцы суть, врази мои люти зело, смерть близ, совесть моя мя обличает, геенна огненная устрашает, червь неусыпаемый, скрежет зубовный, та́ртара тьма кромешняя в трепет мя приводит, ибо ожидают мя прия́ти, злых дел моих ради. Увы мне! Что сотворю тогда и к кому прибегну, да спасена будет душа моя? К Тебе единей, сладкая Марие Богородице, горесть смерти уповающим на Тя услаждающая и взывающих к Тебе от лютыя геенны избавляющая. Ты и мне помози, Всеблагая, не имущему иныя помощи, токмо Тебе, Всепетая. Спаси мя от ужасов смертнаго часа, и от лютости бесовския избави мя: спаси мя от властидухов злобных на мытарствах воздушных: яви, молюся Ти, яви ми тогда пресветлое лице Твое, Владычице, и не остави мя безпомощнаго. О милосердая Мати! Преклонися на милость ко мне лишенному милости от дел моих, и умоли Егоже родила еси плотию Христа, Спасителя и Бога нашего, нас ради на Кресте Пречистую Кровь Свою излиявшаго, да и аз получу грехов прощение и вечное спасение, и прославлю неизреченное милосердие Твое, Богородице, и Твое милостивное предстательство в безконечныя веки.

Молитва 7, в субботу

Радуйся, Дево Богородице, пристанище и предстательство убогия души моея, Надеждо сладкая спасения моего. Радуйся, всех Зиждителя во Твоих ложеснах носившая. Радуйся, Бога плотию рождшая, мiру же Спасителя. Радуйся, в рождестве девство нетленно сохраньшая. Радуйся, от волхвов дары приемшая, и поклонение их от Тебе Рождшемуся видевшая, и пастырей преславная о Нем словеса слышавшая, и в сердце Твоем сия слагавшая. Радуйся, Сына Твоего и Бога, во храме посреде законоучителей обретшая радостно. Радуйся, болезни лютыя во страдании, крестнем распятии и смерти Сына Твоего, Пресладкаго Иисуса, приемшая, Воскресением же Его тридневным обрадованная светло. Радуйся, Вознесение Сына Твоего и Бога во славе небесней со ученики Его видевшая. Радуйся, от Него низпосланнаго Духа Святаго, в горнице Сионстей в виде огненных язы́ков низшедшаго, со ученики Господними приемшая. Радуйся, на земли ангельски пожившая. Радуйся, чистотою и святынею вся ангельския чи́ны и всех святых лики превозшедшая. Радуйся, возвеличенная пришествием к Тебе Сына Твоего и Бога при успении Твоем. Радуйся, Того святым рукам душу Твою радостно предавшая. Радуйся, Твоим на небеса с телом возшествием славно Превознесенная. Радуйся, по преставлении Твоем боговидцем апостолом в третий день явльшаяся. Радуйся, на небесех от Отца и Сына и Духа Святаго диадимою Вечнаго Царствия увенчанная. Радуйся, от всех небесных сил Приснопеваемая. Радуйся, близ престола Пресвятыя Троицы на престоле славы возседящая. Радуйся, Бога и человековпримирения Виновнице. Радуйся, небесными и земными господствующая. Радуйся, яко ничтоже невозможно есть Твоему ходатайству. Радуйся, яко вси верно к Тебе притекающии спасаются. Радуйся, яко Тобою скорбящии утешение, болящии исцеление, бедствующии благовременную помощь получаюс. Радуйся,молю убо Тя, обрадованная Владычице, потреби и во мне печаль греховную, и даждь ми радость спасения, даждь ми слезы утешительныя, умиление всегдашнее, покаяние истинное и исправление совершенное. Не возгнушайся мене, Владычице, но приими милостивно сия гласы радостныя, мною убогим Тебе приносимыя, и предстни ми в помощь во время безпомощия моего в час страшный оный, егда душа моя от окаяннаго моего тела разлучитися имать: тогда, молю, предстани ми в помощь и избави мя повиннаго наказанию вечному, да не явлюся бесом радование, ни пища геенне огненней. Ей, Владычице моя, не попусти узрети души моея страшное и грозное прещение и истязание демонское, грешником уготованное, но предвари и спаси мя раба Твоего в час оный ужасный, да славлю Тя во веки, едина Надеждо моя и Ходатаице спасения моего.

Молитвы святым Ангелом и святым угодником Божиим

Молитвы общия

Молитва 1, ко святым Ангелом

К вам, яко заступником и хранителем жизни моея, яз окаянный припадая, молюся: подадие мне молитвами вашими, дневное пребываниебогоугодно и неискусно от злых деяний и помышлений прейти. Отверзите слух ушию моею, да услышу и уразумею дела и словеса Божия душеполезная, да прозю внутреннима очима, тьмою греховною одержимый. Молите за мя, по вся часы согрешающаго, да не пояст мене мечь ярости Господни: зело бо превзыдоша беззакония моя на главу мою, и яко бремя тяжкое отяготеша на мне. Ты же, Господи мой, Господи, призри на мя и помилуй мя, и изведи из темницы греховныя душу мою, прежде даже не отиду отсюду и не прииду на страшный оный суд Твой. Приими молящыяся за ны святыя Ангелы Твоя, иже окрест престола Твоего всегда со страхом предстоят, и тех молитвами, изряднее же Пречистыя Твоея Матере, избави мя от Страшнаго онаго и грознаго Суда Твоего: Ты бо еси Агнец Божий, вземляй всего мiра грехи, распятый на Кресте нашего ради спасения. Вонми молитве моей, и посли Ангела хранителя души моей и телу, да тем наставляемь, избавлюся от всяких врагов видимых и невидимых и сподоблюся получити Твою милость со всеми от века Тебе благоугодившими: яко Ты еси Бог наш, и к Тебе прибегаю, и на Тя надеюся: аще и согрещих паче человек, но от Тебе не отступих, ни руку мое́ю воздех ко иному богу. Тебе молюся, Господи Иисусе Христе, Тя благословлю, и Тебе поклоняюся от Троицы Единому, со Отцем и Святым Духом, ныне и присно и во веки веков.

[Из книги Акафисты с каноны]

Молитва 2, коемуждо святому

О святый угодниче Божий имярек! Подвигом добрым подвизався на земли, восприял еси на небесех венец правды, егоже уготовал есть Господь всем любящим Его. Темже взирающе на святый твой образ, радуемся о преславнем скончании жительства твоего м чтем святую память Твою. Ты же, предстоя престолу Божию, приими моления наша и ко Всемилостивому Богу принеси, о еже простити нам всякое прегрешение и помощѝ нам ста́ти противу кознем диавольским, да избавльшеся от скорбей, болезней, бед и напастей и всякаго зла, благочестно и праведно поживем в нынешнем веце и сподобимся предстательством твоим, аще и недостойнии есмы, видети благая на земли живых, славяще Единаго во святых своих славимаго Бога, Отца и Сына и Святаго Духа, ныне и присно и во веки веков.

Молитва 3, святителю единому

О пречестна́я и свяще́нная главо и благодати Святаго Духа испо́лненная, Спа́сово со Отцем обита́лище, великий архиере́е, теплый наш заступниче, святителю имярек! Предстоя̀ у престола всех Царя и наслаждаяся света Единосущныя Троицы и херуви́мски со Ангелы возглашая песнь трисвятую, великое же и неизследованное дерзновение имея ко Всемилостивому Влады́це, моли спасти́ся паствы Христовы людем, помозѝ во бранех благочести́вейшему, самодержа́внейшему, великому Государю нашему, императору Николаю Александровичу всея России, и покорѝ ему вся проти́вныя враги под но́зе его, мирно и безмятежно царствовати ему устрой: благостояние святых церквей утвердѝ: архиереи благолепием святительства украсѝ: монашествующыя к по́двигом до́браго течения укрепѝ: царствующий град и вся гра́ды и страны до́бре сохрани, и веру святую непорочну соблюсти умолѝ: мiр весь предстательством твоим умирѝ, от глада и пагубы избави ны, и от нападения иноплеме́нных сохрани, старыя уте́ши, юныя настави, безумныя умудрѝ, вдовицы помилуй, сиро́ты заступѝ, младенцы возрастѝ, плененныя возврати, немощствующыя исцели, и везде тепле призывающыя тя и с верою притекающыя к тебе и усердно припа́дающыя и молящыяся тебе от всяких напа́стей и бед ходатайством твоим свободѝ. Моли о нас всещедраго и человеколюбиваго Христа Бога нашего, да и в день страшнаго прише́ствия Его от шу́ияго стояния избавит нас, и радости святых причастники сотвори́т со всеми святыми во веки веков.

Молитва 4, преподобному единому

О священная главо, преподобне отче, преблаженне а́вво имярек! Не забуди убогих твоих до конца, но помина́й нас всегда во святых твоих и благоприятных молитвах к Богу. Помянѝ стадо Твое, еже сам упа́сл еси, и не забуди посещать чад твоих. Молѝ за ны, отче священный, за дети твоя духовныя, яко име́яй дерзновение к Небесному Царю: не премолчѝ за ны ко Господу, и не пре́зри нас, верою и любовию чтущих тя. Поминай нас недостойных у престола Вседержи́телева, и не преста́й моля́ся о нас ко Христу Богу: ибо дана тебе бысть благодать за ны моли́тися. Не мним бо тя су́ща мертва: аще бо телом и преста́вился еси от нас, но и по смерти жив сый пребыва́еши. Не отступа́й от нас духом, сохраняя нас от стрел вражиих и всякия пре́лести бесо́вския и ко́зней диавольских, па́стырю наш добрый. Аще бо и моще́й твоих ра́ка пред очи́ма на́шима ви́дима есть всегда, но святая твоя душа со ангельскими во́инствы, со безпло́тными лики, с небесными силами, у престола Вседержителева предстоя́щи, достойно весели́тися. Ве́дущи убо тя воистину и по смерти жива суща, тебе припадаем и тебе молимся: моли́ся о нас Всесильному Богу, о пользе душ наших, и испросѝ нам время на покая́ние, да невозбра́нно пре́йдем от земли на небо, от мытарств же горьких, бесо́в воздушных князей и от вечныя муки да избавимся, и Небеснаго Царствия насле́дницы да будем со всеми праведными, от века угоди́вшими Господу нашему Иисусу Христу: Емуже подоба́ет всякая слава, честь и поклонение, со Безначальным Его Отцем, и с Пресвятым и Благим и Животворящим Его Духом, ныне и присно и во веки веков.

Месяц септемврий

Сентемвриа 3 и ноемвриа 12. Молитвы блаженному Иоанну власатому, Ростовскому чудотворцу

Молитва 1

О всесвятый угодниче Христов, Иоанне Преблаженне, земный ангеле и небесный человече! Ты от юности твоея мiр суетный возненавидел еси, и иго Христово со тщанием нося, заповеди Того совершенне исполнил еси, и по многих трудех твоих к велелепному Божия славы престолу преселился еси. тому убо предстоя, моли Пресвятую Троицу подати благоверному императору нашему Николаю Александровичу мир и здравие и на враги победу, град же наш Ростов и вся грады и страны и вся православныя христианы избави от бед душевных и телесных. И якоже при честне́й ра́це твоей непрестанно содеваются чудеса, тако и впредь оными не оставляй нас, яко да всегда ти зовем: радуйся, Иоанне всеблаженне, скорый наш помощниче, и приим от нас приносимая тебе моления, испроси у Христа Бога обрести нам велию милость.

Молитва 2

О всеблаженне Иоанне чудотворче, человече Божий и верный ра́бе Господень! Ты еси праведник, яко финикс процветый, насажденный во дворе́х Господа своего, присно многоразличная благодатию Божиею чудеса источаяй. Твоим чудотворением град Ростов, в нем же трудолюбно житие твое скончал еси, во всех странах хва́лится. О всечестная главо, угодниче Божий, Иоанне всеблаженне, дивный чудотворче, скорый наш помощниче! Тебе послвляем и тебе величаем, яко надежду всех христиан, источник чудес, защи́тителя верных, болящым врача безмезднаго, вдов и сирот питателя и заступника, челомудрия хранителя и всем сущим в скорбех скораго предстателя и помощника. Услыши нас молящихся тебе и прибегающих под кров твой, яви на нас многую твою милость, и исходатайствуй нам от Всевышняго богоприятными твоими молитвами вся полезная ко спасению душ и телес наших: сохрани град наш Ростов и вся грады и страны христианския и люди живущыя в них от всякаго озлобления помощию твоею. Темже верою и любовию твою святую память чтуще и неотступно твоей пречестней раце предстояще, аще и грешни есмы̀, со умилением и теплыми слезами воспети тебе дерзаем сицевая: радуйся, яко измлада Всесвятыя Троицы чистое обиталище был еси и всеусердно во всей твоей жизни той поработал еси: радуйся, яко всем с верою приходящым реку чудес твоих изобильно излиял еси: радуйся, благоверному императору нашему скорый на враги помощниче: радуйся, христиан всех теплый к Богу молебниче: радуйся, граду нашему Ростову похвало и утверждение: и якоже ныне, тако и при кончине нашей испроси у Христа Бога обрести нам велию милость.

Тропарь, глас 4

Явися еси во граде яко в пустыни, во смиренномудрии и чистоте, и трудех и подвизех, и в терпении мнозе, преблаженне отче Ио́анне: взем же Крест Христов, последовал еси Ему, и в молитвах и псалмопении день и нощь пребывал еси, о спасении всего мiра и рода христианскаго иноязычная речения глаголя. Ныне же, по преселении твоем к Невечернему Свету, ко гробу твоему притекающе, вернии молятся Господеви, Богородице и Предтечи, и приемлют от Господа исцеления молитвами твоими. Присно за ны молися, блаженне Иоанне, спастися душам нашим.

Сентемвриа 4 и декемвриа 10. Молитвы святителю Иоасафу, епископу Белоградскому. Из акафиста

Молитва 1

О святителю Христов Иоасафе, чудотворче Белоградский! Веруем грешнии и недостойнии, яко очи Господни на праведных и уши их на молитву их, и Того ради к молитвам твоим прибегаем и ходатайства твоего за нас просим, по глаголу апостольскому уповающе, яко любы̀ твоя николиже отпа́дает. Во гресех и болезнех наших льну курящемуся и трости сокрушенней уподобихомся, и, аще живем, милостию Бога живем и за молитвы праведник Его. Приклони убо и ты, отче праведне, сердце твое к молению нашему, и предстательством твоим даждь роду христианскому от Господа мир и благословение. Православие укрепи, нападения же лукавнующих и беззаконных на Церковь Божию отжени. Умоли Отца Небеснаго избавитися нам от нашествия вражескаго, от междоусобий же и смятений народных, от губительных поветрий и смертоносныя язвы, от глада, огня, потопа и иных бед и обстояний. Испроси у Христа Бога душам нашым крепость и телесем нашым потребное здравие, болезнем же исцеление: хромым хождение, слепым прозрение, разслабленным утверждение, печальным утешение и от всех скорбей избавление. Отпадшыя же лозы̀ Христовы ветви паки с тою соедини, еяже и сам причастник быти сподобился еси, да тако прославится тобою пречестное и великолепое имя Бога нашего, Отца и Сына и Святаго Духа, ныне и присно и во веки веков.

Молитва 2, пред честными мощами  святителя глаголемая

О великий угодниче Божий и преславный чудотворче, святителю Иоасафе! От дальних и ближних градов и весей сошедшеся, во еже на месте подвигов твоих помолитися и многоцелебныя мощи твоя облобызати, из глубины сердца взываем к тебе: жезло́м благости, якоже пастырь добрый, упаси заблуждшыя овцы стада Христова, во дворы̀ Господни сия всели, огради нас от соблазна, ересей и расколов, научи во странствии сущих горняя мудрствовати: разсеянный ум наш просвети и на путь истины направи, охладевшее сердце согрей любовию ко ближнему и ревностию ко исполнению велений Божиих, грехом и нерадением ослабленную волю нашу оживотвори благодатию Духа Всесвятаго: да твоему пастырскому гласу последующе, сохраним в чистоте и правде душы нашя, и тако, Богу помогающу, Небеснаго Царствия достигнем, идеже купно с тобою воспрославим пречестное и великолепое имя Отца и Сына и Духа Святаго во веки веков.

Молитва 3, благодарственная

О великий святителю наш и чудотворче предивный Иоасафе, скорый помощниче к тебе припадающым! Милостивно призри на нас недостойных, со слезами умиления зде молящихся и благодарение тебе по силе приносящих. Благодарим тя, угодниче Христов, яко услышал еси моление нас недостойных и просимая нам изобильно даровал еси. Вемы и усты исповедуем, яко воистину Христу теплый о нас еси молитвенник и, по данней ти благодати и дару, во спасение всем нам потребная да́руеши: болящыя исцеляеши, стаждущыя утешаеши, мир и отраду скорбным сердцам изливаеши, плачущыя радоватися твориши, печальным ликовати содеваеши: родителем чада воздравляеши, супругом подружия от одра смертнаго возставляеши, враждующыя умиротворяеши, завистливыя твориши милостивы, и всякия неправды караеши, якоже и в житии твоем правды и милосердия мужественный ревнитель был еси. благодарим тя, святителю, за великая твоя и нам явле́нная благодеяния, и смиренно молимся тебе мы недостойнии: предстательствуй за нас у престола Христова, и помози нам память присную твоих благодеяний и щедрот на нас излиянных хранити, да во смирении сердца пречее совершим житие, и небесное да наследунм селение Божественное, молитвами твоими, во веки веков.

Молитва 4, о недугующих и страждущих

О великий угодниче Христов, святителю отче наш Иоасафе, скорый помощниче и дивный чудотворче! Призри милостивно на ны недугующыя. Вемы, угодниче Христов, вемы, и усты и сердцем исповедуем, яко по делом нашым беды̀ постигоша нас. С разбойником благоразумным исповедуем Господеви, яко достойная по делом нашым восприемлем и злая сия якоже раби неключимии терпим. Сими бо временными мученьми Господь милосердный сокрушает гордыню и жестоковыйное сердце наше, да вечныя избежим казни, грешником уготованныя: сеяхом бо семена жития своевольнаго, и жнем терния скорбей. Обаче, не́мощни су́ще, но в покаяние теплое пришедше, о сем молитися дерзаем, да гнев Господень на милость к на преложится, и тебе, святителю Божий и чудотворче, усердно просим: проли́й теплую молитву твою ко Христу Господу нашему, Емуже днесь предстоиши и молишися о почитающих тя с любовию и смиренным на твое предстательство упованием. Се бо в житиии твоем, святителю Христов, ни единаго же скорбяща и милости твоея просяща, грехи же своя исповедающа, николиже презрел еси. Умоли праведнаго Судию, да преложит гнев правды Своея на милование наше. Благодатию Его тебе данною, святителю милосердый, уврачуй нашя немощи, болезней лютых течение устави, смерти отъитѝ повели, и на покаяние силу нам даруй. Старость поддержи, младенцы воспитай, юность уцеломудри, супружества в чистоте и смирении утверди, нам же всем послушание трудолюбное и мирное жительство молитвою твоей даруй, да терпением течем на предлежащий нам подвиг жития сего временнаго, взирающе на Начальника веры и Совершителя Господа Иисуса, Емуже слава во веки веков.

Молитва 5, в день прославления святителя

В великий и празднственный день сей, день твоего на земли прославления, святителю отче наш Иоасафе, земли нашея славо и радование великое, приими сия смиренная и теплая моления наша. Днесь зрим исполнившийся глагол Господень: прославляющыя Мя прославлю. Се бо во дни земнаго жития твоего ничесоже искал еси, точию еже волю Божию исполня́ти и чада паствы Твоея управити во спасение, и того ради многия труды, скорби, болезни и путешествия подъял еси. По скончании же твоем прослави тя милосердый Господь, телеси твоему нетление и силы целебныя даровавый: темже токи исцелений молящымся источил еси, и призывающым тя недунующым и скорбящым мно́гажды являлся еси, утешение и цельбу̀ скорую тем подавая. Сего ради, якоже избранника Божественныя благодати тя ведущи, Церковь Христова днесь прославити тя якоже новаго чудотворца земли нашея сподо́бися. Благослови убо и помилуй, архиерею Истиннаго Бога, благочестивейшаго Государя нашего, императора Николая Александровича: супругу его, благочестивейшую государыню императрицу Александру Феодоровну: матерь его, благочестивейшую государыню императрицу Марию Феодоровну: наследника его, благовернаго государя цесаревича и великаго князя Алексия Николаевича, и весь царствующий дом. Даруй нам утешение сердца, отраду и мир и радость присную о Господе. Во дни жития их сохрани в мире державу Российскую, слуги царевы во истине утверди, воином мужество непоколебимое даруй, и вся люди безпечальны сохрани. Изжени всякую крамолу̀, и крамольных человек лукавая разрушѝ советования, паче же тех самых в покаяние приведи. Пастырем и архиереем подаждь премудрость, чистоту и праведное житие, якоже и сам сими украшался еси. Младенцем воспитание благое даждь, юныя научи, болящым и скорбящым здравие испроси. Сущым во трудех терпение и упование посли, богатым смиренномудрие и ко ближним милосердие даруй. Намже всем радость о Господе присную подаждь, да вси благодарне тя ублажаем, глаголюще тако: величаем тя, святителю отче Иоасафе, и чте́м святую память твою, ты бо мо́лиши за нас Христа Бога нашего.

Тропарь, глас 3

Святителю Христу Богу возлюбленне, правило веры и образ милосердия людем был еси, бдением же, постом и молитвою яко светильник пресветлый просиял еси, и прославлен от Бога явился еси: телом убо в нетлении почивая, духом же престолу Божию предстоя, чудеса преславная источаеши. Моли Христа Бога, да утвердит отечество наше в православии и благочестии и спасет душы нашя.

Ин тропарь, глас 2

Молитвенниче изде́тства преизрядный, богоизбранный святителю Христов Иоасафе, правило веры и образ милосердия благочестным житием всем являеши, и с верою к тебе притекающым обильно исцеления источаеши. Моли Христа Бога, да утвердит в державе Российстей правоверие, мир и благочестие и спасет душы нашя.

Сентемвриа 4 и иулиа 20. Молитва преподобному Афанасию, игумену Брестскому, чтомая в Леснинском монастыре, холмския епархии

О предивный страстотерпче и изрядный угодниче Христов, отче наш Афанасие! Со умилением ныне преклоняем колена сердца нашего и взываем ти: принеси молитву нашу к Милостивому и Всесильному Богу, и испроси нам у благости Его вся яже на пользу душам и телесем нашым, веру праву, надежду несумненну, любовь нелицемерну, во искушениих мужество, в злостроданиих терпение, во благочестии преспеяние, да не во зло обратим дары Всеблагаго Бога, но во славу имене Его святаго и в прославление о нас твоего ходатайства. Церковь же святую от расколов и ересей сохрани, верныя укрепи, заблуждшыя на путь правыя веры обрати: отечество твое сохрани от враг ненаветно и спобора́й оружию крестоноснаго воинства. Испроси, угодниче Христов, у Царя царствующих и Господа господствующих благодать и силу и благословение небесное верному императору нашему Николаю Александровичу: подаждь ему здравие и долгоденствие, на враги победу и одоление, и всему богохранимому царству его тишину и благоустроение. Не забуди, чудотворче святый, и святую обитель сию: сохрани и соблюди и молитвами твоими от всякаго зла. Ей, святче Божий, помяни и всех притекающих ко священней ра́це твоей, и сподоби их кончину благую улучити и Царствие Небесное унаследовати, да прославим дивнаго во святых своих Бога, покланяемаго в триех ипостасех, Емуже подобает всякая слава, честь и держава во веки веков.

Сентемвриа 7. Молитвы преподобномученику Макарию, Каневскому, Переяславскому и Обручскому чудотворцу

Молитва 1

О святый и всехвальный, многострадальный и преблаженный преподобне и богоносне отче Макарие, светильниче всесветлый, Духа Святаго сиянием горяй и светяй, и вся со усердием к тебе притекающыя просвещаяй, веры святыя некродомое сокровище, надежды несумненное богатство, любве неисчерпаемая пучино, чистоты непорочное зерцало, постников труждающихся крепосте, твердых подвигоположников украшение, любомудрия сладкопесенный проповедниче, смренномудрия премудрый учителю, иноков честное наставление, всем правоверным преизящное удобрение, призывающым же тя в беда́х и ско́рбех скорый помощниче и теплый сущым в нуждах предстателю! Услыши мя тебе днесь молящагося и с верою и любовию к многоцелебным и многочудесным моще́м твоим припа́дающаго. Яви на мне окаяннем неизреченое твое милосердие: даждь славу имени Божию и не остави мя грешнаго уповающаго на тя: вем бо, вем, человече Божий, яко много может молитва праведнаго поспешеству́ема во благое, и ка́я словесная и разумная тварь не исповесть тя, благолепно, свято и непорочно и праведно посреде рода человеча на земли пожившаго и на небеси прославляемаго? Ты бо, еще во плоти сый, не дал еси сна очи́ма твои́ма, ни ве́ждома твои́ма дремания, дондеже немерцающий свет Присносущныя и Нераздельныя Троицы узрел еси. Темже колена твоя изнемогоста от поста, и плоть твоя изменися елеа ради, яко да благоугодная и благоприятная жертва Господеви явишися. О неизглаголанная добро́то, бодрости светлый изъяснителю, Макарие святе! Возведи ныне очи твои к могущему спасти нас Всесильному Богу, и умоли Его, да отвратит праведный Свой гнев, движимый на ны за беззакония наша, и избавит храм сей, и всякий храм и град, ве́си и всякия страны, и люди Своя, от глада, губительства, труса, потопа, огня, меча, нашествия иноплеменников и мождоусобныя брани, паче же да воздвигнет к деланию заповедей Своих, и да не предаст нас погибнуги со беззаконии нашими. Ей, молимся тебе, богоносне отче Макарие, исцели немощи требующих твоея помощи, и буди нам в житии сем многомятежнем стена и забрало, крепость и утверждение, покров и заступление, и даждь нам во вся дни жизни нашея пожити в преподобии и правде и во всяком благочестии и чистоте. Даруй же нам святыми молитвами и яже ко спасению прошения, и исполни во благих желание наше: паче же в разлучении души от тленнаго и смертнаго телесе сего предстани нам в помощь скоро, умоляя за ны нелицеприятнаго, грознаго и страшнаго судию Христа Бога нашего, да избавит нас от воздушных мытарств и вечнаго томления, соединит же нас святому в вышних селению своему, яко да тамо купно с тобою жительствующе, сподобимся единем сердцем славити и воспевати пречестное и великое имя Отца и Сына и Святаго Духа в безконечныя веки веков.

Молитва 2

Боже, Едине в милости  богатый и щедрот неисчерпаемая Пучино! Пред Твоим величеством согрешихом, беззаконновахом, нечествовахом, вослед мысли нашея лукавыя ходи́хом: о Твоих заповедех спасительных небрегше, Возлюбленному Твоему поношение быхом: вси уклонихомся вкупе, и вси непотребни быхом. Темже затворихом щедроты Твоя и человеколюбие Твое и утробы милости Бога нашего злобы ради нашея, с неюже пожихом, и вемы, яко несмы достойни помилования. Но и еще, Господи, пощади нас, призри на немощь нашу, покрый бездну зол наших неизмеримою широтою милосердия Твоего: даждь нам, Владыко, да поне отселе к Тебе обратимся, настави нас на истину Твою, и исправи сердца наша к деланию заповедей Твоих, молитвами преподобномученика Макариа, и молитв его ради сотвори ны наследники Царствия  Твоего во веки веков.

Молитва 3

О всехвальный, преблаженный, многострадальный, преизящный, предивный чудотворче, преподобномучениче Макарие, скорый наш помощниче и теплый заступниче, духовнаго воинства Христова доблественный страдальче, вся враги душевредныя победивый! К тебе, яко истинному чудес источнику, мы грешнии припадающе, усердно молимся: помози, угодниче Божий, нам грешным и унылым в настоящем сем житии: умоли Господа Бога даровати нам оставление грехов наших, елико согрешихом от юности нашея во всем житии нашем, делом, словом, помышлением и всеми нашими чувствы: и во исходе душ наших помози нам окаянным, умоли Господа Бога, всея твари содетеля, избавити нас от воздушных мытарств и вечнаго мучения, да всегда прославляем Отца и Сына и Святаго Духа, и твое милостивное предстательство, ныне и присно и во веки веков.

Сентемвриа 7 и маиа 15. Молитва преподобному Серапиону Псковскому, ученику преподобнаго Евфросина, чтомая в Спасо-Елеазарове пустыни, Псковския епархии

О преблаженне отче наш Серапионе, Небеснаго Иерусалима граждание! Ты днесь предстоиши престолу Света Неприступнаго, и тамо якоже в зерцале зриши вся нужды и скорби нашя. Не отступай убо от нас духом, сохраняя нас от стрел вражиих и всякия прелести бесовския и козней диавольских, пастырю наш добрый. Воззри на нас милостивно, и к земли приверженныя возведи к высоте небесней: испроси предстательством твоим у Всемилостиваго Бога нашего мир Церкви Его, под знамением Креста  во́инствующей, согласие в вере и единомудрие, суемудрия же и расколов истребление, утверждение во благих де́лех, больным исцеление, печальным утешение, обидимым заступление, бедствующым помощь и от бед свобождение, грешным же всем от грехов отвращение и спасение. Не посрами нас, с верою к тебе притекающих: приими моления наша и вознеси я пред лице Господне, да приимем тобою благодать и благовременную в ну́ждах наших помощь: укрепи наше молодушие и утверди нас в вере, да вся благая от благосердия Владыки молитвами твоими прияти сподобимся. Еще же споспешѝ нам иго Христово во благодушии и терпении и радости духовней понести, присно же моли́тися нас научи, да непорочни сохранимся в пришествие Господа нашего Иисуса Христа, Емуже ты радостно по трудех и подвизех ныне предстоиши, прославляя со всеми святыми в Троице славимаго Отца и Сына и Святаго Духа во веки веков.

Сентемвриа 9 февруариа 5. Молитвы святителю Феодосию, архиепископу Черниговскому

Молитва 1

О связщенное главо, крепкий наш молитвенниче и заступниче, святителю Феодосие! Услыши нас, с верою призывающих тя и усердно припадающих к раце честных и многоцелебных мощей твоих [или ко святей иконе твоей]. Поминай нас у престола Вседержителева и не престай моляся о нас ко Христу Богу: тебе бо дадеся благодать молитися за ны. Испроси предстательством твоим у Всемилостиваго Бога нашего мир Церкви Его, пастырем ея силу ревностно подвизатися о спасении людей, благочестивейшему же государю нашему, императору Николаю Александровичу, благопоспешение во устроении царства его, и всему царствующему дому милость Божию и долгоденствие. Умоли Небеснаго Отца и всем нам подати дар коемуждо благопотребен, веру истинную, надежду твердую и любовь неоскудевающую, градов наших утверждение, мiра умирение, от глада и пагубы избавление, от нашествия иноплеменников сохранение, юным и младенцем благое в вере возрастание, старым и немощным утешение и подкрепление, болящым исцеление, сиротам и вдовицам милость и заступление, заблуждшым исправление, бедствующым благовременную помощь, и всех управи в мире и покаянии непостыдно скончати житие свое и Царствия Небеснаго наследники быти, идеже ты ныне водворяешися со Ангелы и всеми святыми, прославляя Бога в Троице славимаго, Отца и Сына и Святаго Духа, во веки веков.

Молитва 2, чтомая в Разрытовском Свято-Троицком Покровском монастыре, Черниговския епархии

Пастырю добрый стада Христова, святителю отче наш Феодосие! Припадающе ко святым и многоцелебным мощем твоим [или: ко святей иконе твоей], молим тя с вероюи любовию: буди нам помощник и покровитель в житии сем земнем многоскорбнем и многомятежнем, руководствуя нас невидимо к верному исполнению заповедей христовых и стяжанию добродетелей евангельских, нужных ко спасению душевному нашему. Буди заступник и хранитель Отечеству нашему, царству православно-российскому, и благочестивейшему, самодержавнейшему, великому государю нашему, императору Николаю Александровичу, и всему царствующему его дому, сохраняя и соблюдая их от враг видимых и невидимых. Буди предстатель и граду твоему, в немже святыми мощами твоими почивати благоизволил еси, и всем нам к тебе усердно притекающым и тя на помощь призывающым, ограждая нас покровом молитв твоих от всяких бед и скорбей и болезней и даруя нам вся яже на пользу душ и телес наших. Ей, чудотворче святый и милостивый! Веруем несомненно, яко вся сия можеши нам испросити у великодаровитаго Бога нашего и яко мощно есть предстательство твое пред лицем Его. Сего ради просим тя: умоли Его благость за ны грешныя и недостойныя, и подаждь нам твое святое архипастырское благословение, да оным осеняеми, тихое и богоугодное житие поживем, благую христианскую кончину получити сподобимся и вкупе с тобою Царствие Небесное наследуем, славяще великое милосердие Отца и Сына и Святаго Духа, в Троице славимаго и покланяемаго Бога, и твое святое заступление, во веки веков.

Тропарь, глас 4

Преудобре́н во архиереех, святителю Феодосие, был еси свети́ло твоему стаду, таже преставился еси в вечныя обители. Умоли у престола Царя славы, избавитися нам от находящих на ны зол и спастися душам нашым, святе, молитвами твоими.

Сентемвриа 9. Молитвы преподобному Иоасафу Волокаламскому. Из акафиста

Молитва 1

О великий православныя веры ревнителю и учителю, святе премудре Иоасафе! Приимѝ моление, от нас грешных тебе приносимое, теплым предстательством умоли в Троице славимаго Бога, да ниспослет он богатыя Своя милости нам грешным: да утвердит во святей Своей православней Церкви правую веру и благочестие: пастырем ея̀ святую ревность о спасении словеснаго стада да подаст, яко да верующыя соблюду́т, неверующыя же и отпадшыя от истинныя веры вразумят и обратят: благочестивейшему же, самодержавнейшему, великому государю нашему, императору Николаю Александровичу мужество и мудрость да да́рует, на враги же победу и одоление. Таже и всем нам испросѝ вся благопотребная во временнем сем житии и полезная к вечному спасению нашему. Помяни стадо твое, еже собрал еси, не забуди посеща́ти чад твоих и, яко чадолюбивый отец, не пре́зри, ниже отри́ни моления наша, но воздержи руце твои молитвенныя ко Господу Богу, да отложи́т праведный гнев Свой, движимый на ны, и избавит нас от враг видимых и невидимых, от глада, потопа, меча, смертоносныя язвы, нашествия иноплеменных и междоусобныя брани. Ей, премилосердый заступниче наш, преславный чудотворче! Всех нас упра́ви в мире и покаянии скончати житие наше и преселитися со упованием во блаженная недра Авраамова, идеже славословится всепетое имя Отца и Сына и Святаго Духа, во веки веков.

Молитва 2

О преблаженне и приснославне отче наш Иоасафе! Ве́дуще твое великое к Богу дерзновение и ко твоему твердому заступлению прибега́юще, в сокрушении се́рдца молим тя: озари нас светом дарова́нныя тебе благодати, и молитвами твоими помозѝ нам бурное море жития сего безмятежно прейти и пристанища спасения небла́зненно дости́гнути. Се бо, су́етными порабоще́ни су́ще, грехолюби́ви же и не́мощни от обышедших нас зол возникнути являющеся, к кому прибегнем, аще не к тебе, яви́вшему неоскудеваемое богатство милости в земнем житии твоем? Веруем же, яко и по отшествии твоем мно́жайшее стяжал еси дарование, еже о бедствующих милосердствовати. Темже убо, ныне ко гробу цельбоносному припа́дающе, умиле́нно просим тя, святче Божий: сам искушен быв, помози и нам искушаемым: постом и бдением поправый силу демонскую, и нас от нападений вражиих защити: препита́вый гладом погибающыя, и нам испроси у Господа изобилие плодов земных и вся ко спасению потребная: посрамивый еретическая мудрования, Церковь святую от ересей и расколов и смущений молитвами твоими огради, да тожде му́дрствуем вси, единым сердцем славяще Святую, Единосущную, Животворящую и Нераздельную Троицу, Отца и Сына и Святаго Духа, во веки веков.

Тропарь, глас 5

Яко постников удобрение и отцев красоту, милости подателя, разсуждения светильника, вси вернии сошедшеся восхвалим, кротости учителя и ересей посрами́теля, премудраго Иосифа, Российскую звезду, молящася Господу помиловатися душам нашым.

Сентемвриа 10. Молитва святому благоверному князю Иоасафу, чтомая в Вологодском Свято-Духове монастыре

О святый угодниче Христов, благоверный княже Иоасафе! Ты, измлада Бога и Христа возлюбив, вся долу влекущая плотская мудрования отвергл еси, благородствие, богатство, честь и славу княжеския ни во чтоже вменив, и вся красоты̀ мiра сего якоже суетныя презрев, к Богу Единому всею душею твоею прилепился еси, и благое иго Христово на ся взем, по пути спасительному неуклонно шествовал еси, ученик быв изряден Господа Иисуса Христа. сего ради Великий Мздовоздатель, подвиги трудов твоих видев, во юных ле́тех прия́т тя во Своя Небесная селения, и твою честную главу венцем славы и нетления венча, идеже ныне неизреченныя славы и радости насыщаяся, с лики святых в невечернем дни Царствия Христова торжествуюши. Темже молимся тебе, святче Божий, и с несомненною верою к нетленным твоим моще́м припа́дающе, смиренно просим: яко имеяй дерзновение ко Святей Троице, молися о нас гршных и непотребных рабе́х, и испроси нам молитвами твоими прещение грехов, исправление жития нашего, от болезней и всяких недугов исцеление, от наветов и козней диавольских избавление, паче же спасение душам нашым подаждь, и небесных благ восприятия сподоби, благодатию и человеколюбием Пресвятыя Живоначальныя Троицы, Отца и Сына и Святаго Духа, во веки веков.

Тропарь, глас 2

Насажденный при водах воздержания, струями слез твоих напоя́емь, яко леторасль??? живоносная в вертограде Церкве Божия процвел еси, блаженне Иоасафе, плоды добродетелей возраща́я и душы верующих питая: темже и Христос в Небесныя страны тя пресели. Но поминай нас, любовию святую память твою чтущих, благоверне кнчже, и моли Пресвятую Троицу, во еже спастися душам нашым.

Сентемвриа 11 и иуниа 28. Молитвы преподобным Сергию и Герману, Валаамским чудотворцем

Молитва 1, из службы

О велицыи отцы наши, Христовы угодницы и теплии предстатели ко Спасу о душах наших, Сергие и Германе! Вы в недузех целители явистеся, по морю плавающым кормчии, и утопающым благонадежное избавление, и от всякаго смертоноснаго нашествия хранители, паче же от духов нечистых свобождение и всяких наветов противу нас содержимых очищение и помощь. Молитеся убо ко Владыце Христу о нас грешных, яко да вашими молитвами сподобимся в день Судный деснаго предстояния и наслаждения во Царствии Божии во веки веков.

Молитва 2, из службы

О преподобнии, богоноснии, преблаженнии отцы наши Сергие и Германе, зрителие славы Божия в Небеснем Царствии! Не презрите нас грешных в нуждах и скорбех наших, но ускорити в помощь к вам прибегающым: приимите воздыхание и слезы, и вонмите смиренному молению нашему. Предстояще же Небесному Царю, о преблаженнии, молите благость Его, еже ущедрити место селения вашего и всякому граду и стране низпосылати обилие благ земных: благочестивейшему, самодержавнейшему, великому государю нашему, императору Николаю Александровичу на враги победу и одоление даровати и державу его в мире и тишине сохранити: нас же всех в вере и добродетелех утвердити, избавляти же присно от вожделений греховных и от нападения видимых и невидимых врагов: обидимыя защитити, болящыя уврачевати, от томительства злых духов свободити, на мори плавающыя сохранити, путешествующым спутешествовати, и всякому верному в нуждах способствовати: яко Того вси есмы творение, и Того есть Царство и сила и слава во веки веков.

Молитва 3, из акафиста

О преподобнии и богоноснии отцы наши Сергие и Германе, земнии Ангели и небеснии человецы, молитвенницы теплии и ходатаи за мiр непрестаннии, Валааму покровеи похвало и всем верным всегда готовое прибежище и заступление! С верою и любовию припадающе к раце честных мощей ващих, умиленно молим вас: не забудите чад своих, яже от молвы житейския в пустыни сей собрали есте: не отступите николиже от нас, но неусыпным предстательством вашим оградите нас от злых козней вражиих: утолите возстание страстей: укрепите немощь нашу в духовных бранех и подвизех, предлежащих нам: отжените всякое уныние и печаль греховную от сердец наших, и небесное утешение низпослите нам во трудех и скорбех наших. сохраните, о преподобнии, святую обитель вашу от всякаго оскудения, от огня и меча, от смертоносныя язвы и от всякаго обстояния. Молитеся, преблаженнии, усердно молим вас, за благовернаго императора нашего, за весь царствующий дом, за христолюбивое воинство и за всю державу Российскую: да сохранит их Господь в мире, здравии, во всех благих преспе́янии: да дарует нам на врати победу и во всякой добродетели да укрепит. Помяните в молитвах ваших, угодницы Божии, и окрестную страну сию Карельскую, юже светом Христовым просветили есте: да утвердится в ней вера православная, и да ничтоже успеют вси возстающии на малое стадо сие и от Церкве святыя отторгнути ѐ тщащиися. Услышите, милосерднии отцы наши, и всякаго человека, с верою приходящаго к вам и благодатныя помощи вашея требующаго: бу́дите сирым и обидимым заступницы, скорбящым утешение, болящым целители, изнемогающым укрепление, сущым в пути хранители, в мори плавающым управители и пристанище небурное. В страшный же час смертный предстаните всем нам, якоже блази́и ходатаи и темных зраков демонских дерзнове́ннии прогони́телие: да в мире и покаянии скончавше земное поприще наше, достигнем и вечных благ наслаждения, и купно с вами да воспоем и прославим всесвятое имя Отца и Сына и Святаго Духа ныне и присно и во веки веков.

Тропарь, глас 4

Евангелия Христова истиннии послушницы явистеся, преподобнии, мiр и вся яже в нем? Яко не сущая преобидевше любве ради Христовы, и в морский остров вселистеся, и трудолюбно в нем противу козней невидимых врагов пдвиза́стеся, постом, бдением же и всенощным стоянием плоти своя духу мудре повинули есте: сего ради от вседержительныя десницы достойныя венцы прияли есте. И ныне Пресвятей Троице предстояще, молитеся, преблаженнии отцы Сергие и Германе, сохранитеся в мире христоименитому императору нашему, и спастися душам нашым.

И тропарь, глас 1

От мирския молвы бегающе, безмолвия и благочестия рачители, в тихое пристанище Валаама от Востока приидосте, и в нем евангельски Христу добродетельми последовавше, на верх совершенства востекли есте: и ныне в торжестве премiрном богозрением наслаждающеся, преблаже́ннии отцы Сергие и Германе, человеколюбца Бога моли́те, еже спасти всех нас, благочестно вас почитающих.

Сентемвриа 12 и декемвриа 18. Молитва святому праведному Симеону Верхотурскому. Из службы со акафистом

О святый и праведный Симеоне, чистою душею твоею в небесных обителех в ли́це святых водворяяйся, на земли же телом твоим нетленно почиваяй! По данней ти благодати от Господа моли́тися о нас, милостивно призри на нас многогрешных, аще и недостойне, обаче с верою и упованием ко святым и цельбоносным мощем твоим притекающих, и испроси нам от Бога прощение согрешений наших, в няже впадаем множицею во вся дни жития нашего. И якоже прежде о́вым убо от о́чныя зельныя болезни ни мало зрети могу́щым исцеление оче́с, о́вым же близ смерти бывщым от лютых недугов врачевание, и иным иная многая преславная благодеяния даровал еси: сице избави и нас от недугов душевных и телесных и от всякия скорби и печали, и вся благая к настоящему житию нашему и к вечному спасению благопотребная нам от Господа испроси, да тако твоим предстательством и молитвами стяжавше вся нам полезная, аще  недостойнии, благодарне восхваляюще тя, прославим Бога, дивнаго во святых Своих, Отца и Сына и Святаго Духа, ныне и присно и во веки веков.

Тропарь, глас 4

Днесь радуется славная страна Сибирь, обре́тши святыя твоя мощи внутрь себе. Архиереи свяще́нницы, воеводы и весь сонм людски́й, духовне веселящеся, вопием ти: о, богомудре Симеоне, избави нас, к тебе прибегающих, от всех бед, прося пода́тися всем по коегождо прошению и избавитися стране сей и граду от огненнаго запале́ния и пога́нскаго нашествия и междоусобныя брани и от всякаго зла. Чтуще же ныне честных и многоцелебных мощей пренесение, новый целебниче, вси мы вопием: слава Давшему тобою всем исцеление.

Ин тропарь, глас тойже

Мирскаго мятежа бегая, все желание обратил еси к Богу, да в виде́ния восход обря́щеши горѐ, и та́ко не уклони́вся в лукавствия сердца, но очистив душу и тело, приял еси благодать точити цельбы верным и неверным, притека́ющым к ра́це мощей твоих, Симеоне праведне. Темже, по данному ти дару, испроси у Христа Бога исцеление нам болящым духовными страстьмѝ, и моли спасти душы нашя.

Сентемвриа 15. Молитвы святому великомученику Никите

Молитва 1, из акафиста

О великий страстотерпче Христов и чудотворче, великомучениче Никито! Припадающе ко святому и чудотворному образу твоему, подвиги же и чудеса твоя и многое сострадание твое к людем прославляюще, молим тя прилежно: яви нам смиренным и грешным святое и многомощное твое заступление. Се бо, грех ради наших, не имамы свободы чад Божиих, еже о потребах наших  Господа и Владыку нашего дерзновенно просити: но тебе молитвенника к Нему благоприятнаго предлагаем и о твоем предстательстве взываем: испроси нам у Господа благопотребныя да́ры душам и телесем нашым: веру правую, надежду несомненную, любовь же ко всем нелицемерную, во искушениих мужество, в злостраданиих терпение, в молитвах постоянство, душ и телес здравие, земли плодоносие, возду́ха благорастворе́ние, житейских потреб довольство, мирное и благочестное на земли житие, христианскую жития кончину и добрый ответ на Страшнем Суде Христове. Еще же, о страстотерпче Христов, у Царя Небеснаго испроси благочестивейшему царю нашему мир, здравие и спасение и на враги победу и одоление, всему же богохранимому царству его благоустроение, тишину и благоденствие. Христолюбивому воинству его буди сора́тай и помощник на враги, и всем людем православным яви твое святое заступление: болящыя исцели, скорбящыя уте́ши, бедствующым помозѝ. Ей, угодниче Божий и мучениче долготерпеливе! Не забуди святую обитель твою и вся живущыя в ней и подвизающыяся инокини же и мiрския, но поспеши им во смирении и терпении носити иго Христово, и от всяких бед и искушений милостивне избави. Всех убо нас приведи в тихое пристанище спасения, и наследники сподоби быти Пресветлаго Царствия Христова святыми твоими молитвами: да славим и поем великия щедроты Отца и Сына и Святаго Духа, в Троице славимаго и покланяемаго Бога, и твое святое заступление, во веки веков.

Молитва 2, чтомая в Московской Никитской, за Яузою, церкви

О великое светило, осиявающее всего мiра концы, страстотерпче Хртистов Никито! Днесь умиленно предстояще честней твоей иконе и припа́дающе и лобыза́юще сию, усердно молим тя: испроси нам у Христа Бога нашего оставление грехов, исправление жития, и вся благая ко временней и вечней жизни потребная. О пречестный и преславный страстотерпче Христов! Не презри моления нашего и не остави нас к тебе прибегающих, но милостивно воззри на ны и на земную юдоль нашу: помяни нас странствующих и пришельствующих, и дарованною тебе от Бога силою руководи нас к Небесному Отечеству: укрепи нашу немощь, огради нас от грехопадений, возгрей в нас святую любовь ко Господу, и ревность о спасении нашем подаждь нам: насади в сердцах наших страх Божественный, и направи стопы̀ нашя к деланию заповедей Христовых. Испроси же предстательством твоим у Всемилостиваго Бога нашего мир Церкви Его, людем в вере единомудрие, суемудрия же и расколов истребление и в делех благих утверждение: больным исцеление, печальным утешение, обиженным заступление, бедствующым помощь. Наипаче же молитвою твоею соделай всем нам, еже жити целомудренно и праведно и благочестно в нынешнем ве́це, присно же час смертный и страшное второе пришествие Господа и Бога нашего Иисуса Христа па́мятовати, да благодатию и человеколюбием Его соблюдаеми и спасаеми, мытарств горьких от бесов, воздушных князей, и вечныя муки избавимся, и в Небеснем Царствии поклонитися престолу Божию да сподобимся, благодарно и всерадостно прославляюще Пресвятиую и Пребожественную Троицу, Отца и Сына и Святаго Духа, во веки веков.

Молитва 3, чтомая в Каширском Никитском монастыре, Тульския епархии

К тебе, яко скорому и избранному спасения нашего ходатаю, богоизбранному воеводе, оружием Креста враги победившему, великомучениче Никито, вседушно прибегаем: не отвратися от нашея нищеты, молению нашему внемли, и от бед нас и обитель сию сохрани. Простри руку твою, скорую помощь подающую. Управи ум наш от пагубоносных разсеяний, и сердца наша оскверненная очисти, освяти и горѐ имети утверди. От враг видимых и невидимых нас сохрани, да над страстьми победители яви́мся, творяще святыню во стра́се Господнем, и всякое уныние поправше, радоватися о Господе начнем: и тако твоими ходатайствы, во смирении и простоте сердца, сподобимся до последняго издыхания боголепно Отца и Сына и Святаго Духа воспевати и твоя боговенчанныя подвиги и чудеса прославляти во веки веков.

Молитва 4, чтомая в некиих храмех Тульския епархии

О великомучениче Христов Никито! Храбр был еси во бранех, и врагом прогонитель, и обидимым заступник, всем же православным христианом предстатель. Помилуй мя грешнаго и недостойнаго, и заступи в беда́х и в ско́рбех и в печалех и во всякой злой напасти, и от всякаго злаго и обидящаго человека мя огради: тебе бо дана бысть таковая благодать от Бога, еже молитися за ны грешныя, в бедах и напастех зле страждущыя. Избави убо нас от обидящих и ненавидящих нас, буди нам всегда поборник крепок на вся видимыя и невидимыя враги нашя: благоверному же царю нашему на враги победу даруй, и во брани воинство его укрепи, яко да твоим крепким поборством посра́мятся вси творящии рабом твоим злая. О великий поборниче Никито! Не забуди нас, всегда молящихся тебе и просящих у тебе помощи и неоскудныя милости, и сподоби ны, грешныя и недостойныя, неизреченная благая от Бога получити, яже уготова любящым Его. Яко Тому подобает всякая слава, честь и поклонение, Отцу и Сыну и Святому Духу, ныне и присно и во веки веков.

Молитва 5, чтомая в Афанасиевской Никитской церкви града Вязьмы, Смоленския епархии

О великий Христов страстотерпче Никито! Услыши молитву нас грешных, молящихся тебе на всякий день и на всякий час: избави нас, святый страстотерпче, от всякия печали и находящия напасти, от внезапныя смерти и от всякаго зла: в час же разлучения души от тела отжени, страстотерпче, всякую лукавую мысль  и лукавыя бесы, яко да приимет души нашя с миром в место светло Христос Господь Бог наш, яко от него очищение грехов, и Той есть спасение душ наших, Емуже подобает всякая слава, честь и поклонение, со Отцем и Святым Духом, ныне и присно и во веки веков.

Тропарь, глас 4

Крест Христов яко некое оружие усердно восприим, и к борению врагов притекл еси, и за Христа пострадав, последи огнем священную твою душу Господу предал еси: отонудуже и даров исцеления от Него сподобился еси прияти, великомучениче Никито. Моли Христа Бога спастися душам нашым.

Сентемвриа 17. Молитвы святым мученицам Вере, Надежде, Любви и матери их Софии. Из акафиста

Молитва 1

О святыя достохвальныя мученицы Веро, Надеждо и Любы, и доблестных дщерей мудрая мати Софие! К вам ныне со усердною молитвою притекаем. Что бо паче возможет предстательствовати за ны пред Господем, аще не вера, надежда и любы, три сия добродетели пребывающыя, во ихже образ нареченныя, самою ве́щию о́ныя яви́сте? Умолите убо Господа, да в скорбех и напастех неизреченною благодатию Своею покрыет ны, и сохранит, и Того славу, яко Солнце Незаходимое, зрети да сподобит. Споспешествуйте нам во смиренных молениих наших, да простит Господь Бог грехи и беззакония наша, и да помилует нас грешных, и щедрот Своих да сподобит нас Христос Бог, Емуже славу возсылаем, со Безначальным Его Отцем, Пресвятым и Благим и Животворящым Его Духом, ныне и присно и во веки веков.

Молитва 2

Вас, святыя мученицы Веро, Надеждо и Любы, славим, величаем и ублажаем, купно с мудрою материю Софиею, ейже покланяемся, яко образ богомудраго попечения являющей. Умоли святая Веро, Творца видимых и невидимых, да веру крепку, неблазненну и нерушиму подаст нам. Ходатайствуй, святая Надеждо, пред Господем Иисусом за нас грешных, да упование на багая Своя не отженет от нас, и от всякия скорби и нужды да избавит ны. Исповеждь, святая Любы, Духу истины, Утешителю, напасти и печали нашя, да Той свыше сладость небесную ниспо́слет душам нашым. Помозите убо в бедах наших, святыя мученицы, и купно с мудрою матернию вашею Софиею, молите Царя царей и Господа господствующих, да сохранит под покровом Своим благочестивейшаго государя нашего и самодержца, императора Николая Александровича всея России, поспешение во благих ему даруя. Такожде и о всех нас вашего теплаго предстательства пред Богом усердно молим, да купно с вами и со всеми святыми превознесем и препрославим пресвятое и великое имя Отца и Сына и Святаго Духа Бога, Предвечнаго Владыки и благих Содетеля, ныне и присно и во веки веков.

Тропарь, глас 4

Мученицы Твоя, Господи, во страданиих своих венцы прияша нетленныя от Тебе Бога нашего: имущия бо крепость Твою, мучителей низложиша, сокрушиша и демонов немощныя дерзости. Тех молитвами спаси души нашя.

Сентемвриа 19. Молитва святому благоверному князю Феодору и чадом его Давиду и Константину, Смоленским и Ярославским чудотворцем. Из акафиста

О вели́цыи уго́дницы Божии и чудотво́рцы, святи́и и благове́рнии кня́зи Фео́доре, Дави́де и Константи́не! Ко святым и многоцелебным моще́м вашым припа́дающе, мо́лим вы̀ со смирением, верою и любовию: простри́те благоприятныя молитвы вашя ко Господу и Создателю нашему, и умоли́те Его благость, дарова́ти нам вся к вечному спасению потре́бная, таже и к житию̀ сему̀ временному ну́жная: ве́руем бо несомненно, яко вся возможна вам, яко и́стинным Его уго́дником. Того ра́ди и о сих мо́лимся вам: испроси́те нам у Царя царствующих и Господа господствующих царству нашему православно-российскому мир, тишину и благоустрое́ние, благочестивейшему, самодержавнейшему, великому государю нашему, императору Николаю Алекандровичу, здравие, долгоденствие и на врагѝ одоле́ние, царствующым градо́м, гра́ду нашему и всем гра́дом и ве́сем Российским благополучие, изобилие и от злых сохранение, всем же правоверным людем, почитающым вас и на поклонение моще́м вашым святым приходя́щым, милость Божию и благих проше́ний скорое исполнение. Ей, чудотворцы святии! Не посрами́те упования нашего, но молитвами вашими сотвори́те нас насле́дники быти Царствия Христова, да прославля́ем человеколюбие в Троице славимаго и покланяемаго Бога, Отца и Сына и Святаго Духа, и ваше святое заступле́ние, во веки веков.

Тропарь, глас 4

От юности вашея Христове любви прилепившеся, святии, усердно закон и оправдание Того сохранисте, отонудуже и чудесными дарованьми обогатившеся, исцеления источаете: Феодоре, Давиде и Константине, о верою вас почитающих молите Христа Бога, спастися душам нашым.

Сентемвриа 20 и февруариа 14. Молитва святым мучеником князю Михаилу и боярину его Феодору, Черниговским чудотворцем, чтомая в Московском Архангельском соборе

О святии великомученицы Христовы и истинныя веры исповедницы, благоверный княже Михаиле и боярине Феодоре! Храбри бысте в ратех, и врагом прогони́тели, и обидимым заступницы. Темже и ныне, воинству небесному о нас предстательствующему совокупльшеся, помилуйте ны грешныя и недостойныя, в бедах и скорбех и в печалех пребывающыя, и от всякия злыя напасти, от злаго же и обидящего человека нас охраните: ибо дана вам бысть таковая благодать от Бога, еже молитися о нас грешных, в бедах и напастех зле страждущих. Будите убо нам поборницы крепцыи на вся видимыя и невидимыя враги нашя. О великомученицы всехвальнии и исповедницы веры христовы, княже Михаиле и боярине Феодоре, предстоятели Небеснаго Царя! Не отвержите моления нашего и от всех православных христиан приносимаго, но от настоящих бед и скорбей и печалей, таже и от будущаго мучения избавите нас, верно вопиющих Богу: Алилуиа.

Тропарь, глас 4

Жизнь вашу мученически совершивше, испове́дания венцы украси́вшеся, к небесным востекосте, Михаиле премудре с до́блим Феодором: молите Христа Бога сохранити отечество ваше, императора же и люди, по велицей Его милости.

Сентемвриа 20. Молитва святому преподобному князю Олегу, Брянскому чудотворцу, чтомая в Брянском Петропавловском монастыре, Орловския епархии

О преподобне отче, преподобне княже Олеже, угодниче Христов усердный, молитвенниче ко Господу теплый, защитниче в бедах и утешителю в печалех неустанный! Воззри, преблаженне, милостивно на град твой и виждь чада твоя, смиренно ти припадающыя и служити тебе хотящая. Не отвержи требующих твоея помощи, но, якл благодетель и хадатай, моли присно Господа и Бога и Спаса нашего Иисуса Христа, да благословит помазанника Своего, благочестивейшаго государя императора Николая Александровича, царствующий дом и всю державу Российскую, в мире и благоверии я̀ сохраняя, князи и воеводы соделовая грозны врагом, бояры наставляя, граду умножая, достояние свое соблюдая. Вознеси, богоносне отче наш, сие малое моление нас грешных ко Владыце Христу, да утвердит во святей паравославней Церкви живый дух правыя вкры и любве, благочестие непоколебимое, любомудрие кротостию растворенное: да дарует пастарем ревность попечения о спасении людей, во еже неверующыя посетити, заблуждшыя наставити, отпа́дшыя обрати́ти и привлещѝ: изряднее же вся чада Церкве православныя чисты да сохранит от мiрских искушений, похотей плотских, суемудрия, суеверий и наваждений вражеских. Ей, угодниче Божий, не презри нас молящихся тебе, но помози нам скорым предстательством твоим, да всяких бед, напастей и скорбей в сей жизни вре́менней избежавше, кончину непосты́дну обря́щем, и тако на земли богоугодно поживше, жизни райския на небеси сподобимся, идеже в купе с тобою прославим человеколюбие и щедроты в Троице славимаго Бога, Отца и Сына и Святаго Духа, во веки веков.

Сентемвриа 21 и октовриа 28. Молитвы святителю Димитрию, митрополиту Ростовскому

Молитва 1, из службы с акафистом

О преблаженне святителю Димитрие, великий угодниче Христов, златоусте Российский! Услыши нас грешных молящихся тебе, и принеси молитву нашу к Милостивому и Человеколюбивому Богу, Емуже ты ныне в радости святых и в лики Ангел предстоиши: умоли Его благосердие, да не осудит нас по беззаконием нашым, но да сотворит с нами по милости Своей. Испроси нам у Христа Бога нашего мирное и безмятежное житие, здравие душевное и телесное, земли благоплодие, и во всем всякое изобилие и благоденствие, и да не во зло обратим благая, даруемая нам от щедраго Бога, но во славу Его и в прославление твоего заступления. Даруй нам богоугодно прейти поприще временныя жизни: избави нас от воздушных мытарств, и настави нас на путь ведущий в селения праведных, идежде празднующих глас непрестанный, зрящих Божия лица̀ неизрече́нную добро́ту: Церковь же святую от расколов и ересей сохрани, верныя укрепи, заблуждающыя обрати, и всем даруй вся, ко спасению и славе Божией подобающая: отечество твое сохрани от врагов ненаветно, но побора́й оружию крестоноснаго воинства: и подаждь нам всем твое архипастырское и святое благословение, да оным осеняеми, избавимся от козней лукаваго и избегнем от всякия беды̀ и напасти. Услыши моление наше, отче Димитрие, и моли нерестанно о нас Всесильнаго Бога, славимаго и покланяемаго в триех ипостасех, Емуже подобает всякая слава, честь и держава во веки веков.

Молитва 2

О предивный и преславный чудотвоче Димитрие, исцеляяй недуги человеческия! Ты неусыпно молиши Господа Бога нашего о всех грешных: молю убо тя, буди ми хадатай пред Господем и помощник на преоборение страстей ненасытныя плоти моея и на одоление стрел сопротивника моего диавола, имиже уязвляет немощное сердце мое и, аки гладный и лютый зверь, алчет погубити душу мою. Ты, святителю Христов, моя ограда, ты мое заступление и оружие. Ты, великий чудотворче, во дни подвигов твоих в мiре сем ревнуя о православной Церкви Божией, яко истинный и добрый пастырь, неблазненно обличал еси грехи и невежествия людския, и от стези правды в ереси и расколы уклонившыяся на путь истины наставлял еси. Споспе́шествуй убо и мне кратковременный путь жизни моея исправити, да непреткновенно пойду по стези заповедей Божиих и неле́ностно поработаю Господеви моему Иисусу Христу, яко Единому Владыце моему, Искупителю и Праведному Судии моему. К сим же припа́дая, молюся ти, угодниче Божий, егда изыти души моей от бреннаго сего телесе, избави ю̀ от те́мных мытарств: не имам бо добрых дел ко оправданию моему: не даждь сатане возгордитися победоб над немощно́ю душе́ю моею, избави ю от геенны, идеже плачь и скрежет зубов, исвятыми молитвами твоими сотвори мя причастника Небеснаго Царствия в Троице славимаго Бога, Отца и Сына и Святаго Духа, во веки веков.

Тропарь, глас 8

Православия ревнителю и раскола искоренителю, Российский целебниче и новый к Богу молитвенниче, спасаньми твоими бу́их уцеломудрил еси. Целебнице духовная, Димитрие блаженне, моли Христа Бога спастися императору нашему, Николаю Александровичу и всему наследию и державе его.

Сентемвриа 21. Молитва преподобному Иосифу Заони́киевскому, чтомая во Владимирской  Заони́киевской пустыни, Вологодския епархии

О великий угодниче, преславный чудотворче, Иосифе преблаженне, душею на небеси престолу Божию предстояй и троичныя славы наслажда́яйся, телом же на земли в Божественнем храме почива́яй и от Него данною ти свыше благодатию различная источа́яй чудеса! Призри милостивым оком на предстоящыя честне́й ра́це твоей люди, и яко стяжа́вый дерзновение у Господа, испросѝ оби́тели твоей благостоя́ние, возду́ха благорастворе́ние, земли плодоно́сие, нам же всем, с верою к тебе прибега́ющым и многоцеле́бныя мо́щи твоя благоче́стно почита́ющым, от всяких бед душевных и телесных избавле́ние: яко да твоими молитвами наставля́еми, путь маловре́меннаго жития нашего на земли безбе́дно совершим, и неконча́емый покой на небеси улучи́вше, прославим с тобою ку́пно всех благих Подателя, Единаго в Троице славимаго Бога, Отца и Сына и Святаго Духа, ныне и присно и во веки веков.

Сентемвриа 21. Молитвы преподобному Даниилу Шу́жгорскому, чтомыя в Преображенской на Шу́жгоре церкви, Новгородския епархии

Молитва 1

О преблагий наш пастырю и учителю, великий чудотворче Данииле! Услыши нас грешных молящихся тебе и имя твое святое призывающих. Виждь немощных, уловляемых отвсюду и всякаго блага лишенных и умом от малодушия помраченных. Потщи́ся, угодниче Божий, пленных нас свободити, и не остави нас грешных враго́м в радость быти и в лукавых наших дея́ниих умре́ти. Моли о нас грешных Содетеля нашего и Владыку, Емуже со безплотными лики предстои́ши: милостива сотвори Бога нашего, да не воздаст нам по дело́м нашым и по нечистоте сердец наших, но по Своей милости да сотворит нам. На твое бо милосердие уповаем, и тобою хвалимся, и имя твое святое на помощь призываем, и ко гробу твоему цельбоносному припа́дающе, исцеления просим: избави нас, светильниче Христов, от злых бед находящих на нас, и отвсюду возстающыя на ны волны укроти, да не обы́мет нас напасть до конца и не погрязнем в пучи́не греховней. О преподобне отче наш Данииле! Услыши нас грешных, в час сей моление тебе приносящих: помолися о нас ко Владыце Христу Богу, велие бо дерзновение к Нему стяжал еси, искренний молебниче о душах наших: умоли Небеснаго Царя отпусти́ти нам грехи, и сподоби ны безконе́чныя радости во веки веков.

Молитва 2

О преподобне и богоносне отче наш Данииле! Услыши мя недостойнаго, в час сей моление тебе принося́щаго:  помоли́ся Христу Богу отпустити моя согрешения, велие бо дерзновение ко Господу стяжал еси. Умоли Его, святе, молитвами твоими, от вечныя муки избавитися ми, и Небеснаго Царствия наследнику быти со всеми праведными, от века угодившими Госчподу нашему Иисусу Христу, Емуже подобает всякая слава, честь и поклонение, со Безначальным Его Отцем, и с Пресвятым и Благим и Животворящим Его Духом, ныне и присно и во веки веков.

Сентемвриа 22. Молитва преподобному Ионе Яшезе́рскому, чтомая в Яшезе́рской пустыни, Олонецкия епархии

О преподобне и богоносне отче наш Ионо! Ты порабо́тати Го́сподеви желая, зде вселился еси, и неленостно во трудех, во бдениих, в молитвах и постех подвизался еси, и был еси наставник монашествующым, всем же людем учитель ревностный. Ныне убо, по отшествии твоем от земных, Небесному Царю предстоя, моли благость Его, еже ущедрити место селения твоего, святую обитель сию, идеже духом любве Твоея неотступно пребываеши, и всем людем твоим, с верою к раце твоей припа́дающым, во благая прошения их исполнити. Испроси у Милостиваго Господа нашего, да ниспо́слет нам обилие благ земных, паче же яже на пользу душ наших да дарует нам, и скончати житие сие привременное в покаянии да сподобит, в день же Судный деснаго предстояния и наслаждения во Царствии Своем да удостоит во веки веков.

Сентемвриа 23. Молитвы святому Пророку, Предтечи и Крестителю Господню Иоанну

Молитва 1, из книги: Акафисты с каноны

Крестителю Христов, проповедниче покаяния! Кающагося не презри мене, но совокупляяся с во́и небесными, молися ко Влады́це за мене недостойнаго, унылаго, немощна́го и печальнаго, во многия беды̀ впадшаго, утрежденнаго бурными помыслы ума моего. Аз бо есмь вертеп злых дел, отню́д не имея конца греховному обычаю: пригвожде́н бо есть ум мой земны́м ве́щем. Что сотворю? Не вем. И к кому прибегну, да спасена будет душа моя? Токмо к тебе, святый Иоанне, благодати тезоимени́те, яко тя пред Го́сподем по Богородице вем бо́льша быти рожде́нных всех: ибо ты сподо́бился еси косну́тися верху̀ Христа Царя, взе́млющаго грехи мiра, Агнца Божия: Егоже моли за грешную мою душу, да поне отныне, в первыйна́десять час, понесу тяготу̀ благую и прииму мзду с последними. Ей, Крестителю Христов, честный Предтече, крайний пророче, первый во благодати мучениче, постников и пустынников наставниче, чистоты учителю и ближний друже Христов! Тя молю, к тебе прибегаю: не отрини мене от твоего заступления, но возстави мя па́дшагося многими грехи: обнови душу мою покаянием, яко вторым крещением, понеже обоих начальник еси, Крещением омываяй прародительный грех, покаянием же очищаяй коегождо от дел скверных. Очисти убо мя, грехмѝ оскверне́ннаго, и пону́ди внити, а́може ничтоже скверно входит, во Царствие Небесное.

Молитва 2

Святый Предтече и Крестителю Христов Иоанне! Проповедник сый покаяния, кающихся не презри нас, но молися ко Владыце Христу за нас недостойных рабов, унылых, немощны́х, во многия грехи впа́дших. Смерти убо чаем, о гресех же наших николиже поболехом и о Царствии Небеснем не попекохомся: но не презри нас, Крестителю Христов, честный Предтече, бо́лий рожде́нных всех, постником и пустынником наставниче, чистоты учителю и ближний друже Христов. Тя молим, к тебе прибегаем: не отрини нас просящих твоего заступления, обнови души нашя покаянием, еже есть второе крещение: твоим хода́тайством пред Господем испроси нам очищение грехов. Уста недостойная вопиют к тебе, и душа смиренная молится, сердце сокрушенное из глубины воздыхает: простри пречистую твою десницу и защити нас от враг видимых и невидимых. Ей, Господи Иисусе Христе! Молитвами святаго Иоанна Крестителя Твоего, изряднее же Пречистыя Твоея Матере, Владычицы нашея Богородицы, спаси нас грешных рабов Твоих, кающихся о гресех. Ты бо еси Бог кающихся, и на Тя Спасителя возлагаем надежду, славяще пресвятое имя Твое, со Безначальным Твоим Отцем, и со Пресвятым и Благим и Животворящим Твоим Духом, ныне и присно и во веки веков.

Молитва 3

Крестителю Христов, честный Предтече, крайний пророче, первый во благодати мучениче, постников и пустынников наставниче, чистоты учителю и ближний друже Христов! Тя молю, к тебе прибегаю: не отрини мене от твоего заступления, но возстави мя падшагося многими грехи: обнови душу мою покаянием, яко вторым крещением: очисти мя, грехмѝ оскверне́ннаго, и пону́ди внити, а́може ничтоже скверно входит, во Царствие Небесное.

Тропарь, глас 4

Первее нераждающая, неплоды, возвеселися: се бо зачала еси Солнца светильника яве, пресвещати имуща всю вселенную, слепотою недугующую. Ликуй, Захарие, вопия со дерзновением: пророк Вышняго есть хотяй родитися.

Сентемвриа 24. Молитвы преподобному Никандру Псоковскому. Из службы со акафистом

Молитва 1

О преподобне и достоблаженне отче наш Никандре, постниче терпеливоду́шный, безмолвия рачителю предо́блий, учителю спастися хотящым премудрый, наказателю ленивым претихий, разрешителю тлетворных страстей  незлобивый, му́жу желаний, прозорливства пророческаго испо́лненее, предвозгласная будущих благ цевни́це, адаманте веры во Христа несеко́мый, незыблемый терпения столпе, заповедей Творца твоего совершителю благопослушливый, плотоносный ангеле и Духа Святаго вместилище благовонное, жи́телю пустынный и бесов прогонителю, исполннителю всех добродетелей смиренномудрый, небесный человече и сожителю горним чиноначалием, кротостию духа землю кротких наследовавый, друже Христов и угодниче Пресвяты́я Богородицы, яже и ра́ку цельбоносных мощей твоих во храме своем просла́вити благоизво́ли, изобильно от нея чудесному дождю на верных изливатися повелевши! К нейже припадающе с любовию, молим тя, досточудне: не престай молити Пресвятую и Живоначальную Троицу, низпослати благоверному императору нашему здравие, тишину и долгоденствие, на враги же победу и одоление, и от навет вражиих воинству его сохранитися в мире: церквам согласие, и всем людем тишину и изобилие благих даровати. И угаси, блаженне, молитвами твоими, парящыя на ны разжже́нныя бесовския стрелы, да да не прико́снется нам злоба греховная. И всем вся милостивно даруя, призри и на мя смиреннаго раба: связан бо есмь люте пленни́цами прегрешений, и влеко́м, увы мне! в пучину страстнаго моря неодержа́нно. Сего ради прилежно молю святыню твою, пребогате, и припадаю к раце мощей твоих со слезами: предстани мне на пути бедственнаго жития сего: расторгни узы, отженѝ страсти, ослаби от греховных вериг, избави мя от належащия скорби и от всякаго зла, разреши мя от болезненных уз и спасение души умоли мне, яко да воспою и прославлю в Троице сла́вимаго Единаго Бога, Отца и Сына и Святаго Духа, ныне и присно и во веки веков.

Молитва 2

О преподобне и преблаженне отче наш Никандре, горняго Иерусалима гражданине, избранных во́ев небесных друже и споборниче, прославляяй непрестанно триипоста́снаго Бога! Воззри милостивно на ны, раце честных мощей твоих предстоящыя, аще и ко сластем века сего пригвожде́нныя помыслы своими, яже ко взысканию блаженств горних обрати. Ты вселяешися во обителех небесных с премiрными ду́хи Церкве торжествующия: мы же грешнии, в мiре сем пребывающии, отстоим от тебе не толико местом, елико грехми и беззаконьми, имиже прогневляем по всяк час Господа и саме́х себе приводим на пагубу. Но к тебе, яко нам соестественному, прибегаем и взываем с теплыми слезами: настави и вразуми нас ходити  по стопам твоим: буди на пути сем избранный вождь нам, якоже древле Моисей бяше людем Израилевым: свойственно бо есть тебе, отче наш, сострадание к скорбящым и человеколюбие ко всем, от тебе помощи в напастех и во благовремении требующым: живущу бо тебе на земли, не о твоем токмо спасении тщание твое приложися, но и о всех к тебе притекающих моление ко Всевышнему приносил еси, да не презрит дело рук Своих, ниже погубит ѐ со беззаконьми его. Сего ради отеческая наставления твоя, еже ходити по стопам заповедей Господних, прозябоша в сердцах сынов твоих, яко семя доброе, с плодоношением: таже и недужнии, разсла́бленнии же и боля́щии, скорбя́щии и озло́бленнии скорую твою помощь со славословием проповедают: и все житие твое бысть зерцало всяких добродетелей. Аще толи́к был еси, ученичѐ Христов, на земли: коли́к ныне еси на небеси! Ты всегда предстоиши престолу неприступнаго Бога, и в Нем, якоже в зерца́ле, зриши вся нашя нужды и прошения: ты свеселишися со Ангелы Божиими о едином гре́шнице кающемся, радостию велиею: и милосердие Божие, и любы Его к роду человеческому неоскудны, и твое дерзновение к Нему много. Испроси убо у Всемилостиваго Подателя всех благ мир и святыню Церкви Его, по знамением Креста во́инствующей, на невидимыя враги ея̀ победу и одоление, верным же в вере единомыслие: такожде и заблуждшыя от православия к познанию истины призови, неверныя светом Евангелия просвети, грешныя к покаянию приведи и обрати, девствующым чистоту и целомудрие даруй, брачным святыню: вдовицам и сирым буди препитание, нищым покров, странствующым возвращение, плавающым пристанище: кающымся прощение испросѝ, плачущым утешение, требующым помощь, напаствуемым заступление, болящым скорое исцеление, и всякому прошению во благих исполнгение. Не отри́ни нас, преподобне, с верою и любовию тебе призывающих! Аще бо и недостойни есмы толи́каго отца и хода́тая, оскверне́ни душею и телесе суще: но ты, быв подражатель человеколюбия Божия, соделай нас твоими молитвами достойны чрез покаяние. Новград и Псков, и вся Россиа, просвещенная твоим богоугодным житием и чудесы, проповедуют тя быти теплаго заступника. Яви убо и нам недостойным милости твоя! Веруем, яко духом нам соприсутствуеши, паче же и телом с нами пребываеши: се бо предлежат очесем нашым нетленныя и цельбоносныя твоя мощи, яже явлением многих чудес Господь прослави. Темже, предстояще нам, яко жи́ву тебѐ су́щу, припа́даем и смиренно молим: приими моления наша и вознеси я на жертвенник милосердия Божия, яко да низпослет нам всесильную благодать Свою, укрепляющую нас во благом житии, и благовременную и неоскудную в ну́ждах наших помощь: ума благопостояние, телесем здравие, житию благопотребная, мир во дне́х наших, возду́ха благорастворение, огнь любве и всякаго благочестия, в молитве чистоту сердечную, в злоключении терпение и упование, в надежде веселие, и время на покаяние, яко да и настоящих зол избе́гше, удостоимся пресели́тися во блаженныя обители небесныя, идеже ты ныне вселяешися со всеми Богу угодившими и прославляеши триипостаснаго Бога, Отца и Сына и Святаго Духа, ныне и присно и во веки веков.

Тропарь, глас 4

Глас Божественный, иже во Евангелии, услышав, преподобне отче Никандре: приидите ко мне вси труждающиися и обремененнии, и Аз упокою вы, и прием крест, последовал еси Христу. Мiр оставль, в пустыню вселился еси, пощением же и бдением небесный дар восприим, душы недужных, приходящих к тебе с верою, исцеляеши. Темже и со Ангелы срадуется, преподобне, дух твой.

Ин тропарь, глас 6

Светило Незаходимаго Света стране нашей явился еси, богоблаженне, доблественне претерпев вражия озлобления: биение и раны яко одежда нетления вменишася тебе: со зверьми же брался еси, и от человек злых прободения приим, о тех молился еси, глаголя: не постави им греха сего. Темже Влалыце Христу уподобился еси, достохвальне Никандре, отче наш: молися о душах наших.

Сентемвриа 24. Молитва преподобномученику Галактиону Вологодскому, чтомая в Вологодском Свято-Духове монастыре

О преподробне и богоблаженне отче наш Галактионе, крепкое страны нашея ограждение, христиан православных поборниче и теплый за нас грешный ко Всемилостивому Богу нашему Иисусу Христу и Пречистей Матери Его молитвенниче! Умиленно молимся тебе, чудотворней ра́це честны́х мощей твоих предстояще: не забуди нас грешных и недостойных, но яко заступник и ходатай усердный, призри милостивно на немощь нашу, и испроси молитвами твоими у Христа Бога нашего, да освятит благодатию твоею душы и телеса наша, ум наш да просветит светом богопознания, совесть нашу от мертвых дел да очистит, от греховных же помышлений и губительнаго уныния да оградит, и да дарует нам искреннее покаяние, сердец сокрушение, слезное умиление, воздержание же и трезвость, смиренномудрие и кротость, чистоту душевную и телесную, нищелюбие же и страннолюбие, и друг ко другу нелицемерную любовь. О преблаженне отче Галактионе! Сподоби нас шествовати путем спасения, да твоими молитвами Преблагий Христос Бог наш покажет на нас грешных благодать и милость Свою, и от всяческий зол и будущаго мучения нас да свободит, и да сподобит наследники быти Царствия Своего Небеснаго, славящыя и величающыя Его, купно со Безначальным Его Отцем, и Пресвятым и Благим и Животворящим Его Духом, ныне и присно и во веки веков.

Тропарь, глас 4

Днесь град наш тобою хвалится, преподобне: возсиял бо еси пресветло яко солнце, гра́ды и ве́си чудесы̀ твоими озаряя. И ныне, преподобномучениче Галактионе, Го́сподеви молися граду нашему от нахождения сопротивных избавитися, у Христа Бога прегрешений наших оставление испроси, и от всякия скорби избавление подаждь любовию чтущым тя и вопием верно: Бог наш с нами, прославивый угодника Своего, якоже благоволѝ.

Сентемвриа 25. Молитвы преподобному Сергию, Радонежскому чудотворцу. Из службы со акафистом

Молитва 1

О священная главо, преподобне и богоносне отче наш Сергие, молитвою твоею, и верою и любовию яже к Богу, и чистотою сердца, еще на земли во обитель пресвятыя Троицы душу твою устроивый, и ангельскаго общения и Пресвятыя Богородицы посещения сподобивыйся, и дар чудодейственныя благодати приемый, по отшествии же твоем от земных наипаче к Богу приближивыйся и небесныя силы приобщивыйся, но и от нас духом любве твоея не отступивый, и честны́я твоя мощи, яко сосуд благодати полный и преизлива́ющийся, нам оставивый! Велие имея дерзновение ко Всемилостивому Владыце, моли спасти рабы Его, сущей в тебе благодати Его верующыя и к тебе с любовию притекающыя. Помози благочестивейшему, самодержавнейшему, великому государю нашему, императору Николаю Александровичу всея России, да благоуправляемо будет царство его в мире и благостоянии, и да покорятся под ноги его вси сопротивнии. Испроси нам от Великодаровитаго Бога нашего всякий дар,  всем и коемуждо благопотребен, веры непорочны соблюдение, градов наших утверждение, мiра умирение, от глада и пагубы избавление, от нашествия иноплеменных сохранение, скорбящым утешение, недугующым исцеление, падшым возставление, заблуждающым а путь истины и спасения возвращение, подвизающымся укрепление, благоделающым в делех благих преспеяние и благословение, младенцем воспитание, юным наставление, неведующым вразумление, сирота́м и вдови́цам заступление, отходящым от сего временнаго жития к вечному благое уготовление и напутствие, отшедшым блаженное упокоение, и вся ны споспешеству́ющими твоими молитвами сподоби в день Страшнаго Суда шуия части избавитися, десныя же страны общники быти и блаженный оный глас Владыки Христа услышати: приидите, благослове́ннии Отца Моего, наследуйте угото́ванное вам Царствие от сложения мiра.

Молитва 2

О священная главо, преподобне отче, преблаженне а́вво Сергие Великий! Не забуди убогих твоих до конца, но помина́й нас всегда во святых твоих и благоприятных молитвах к Богу. Помянѝ стадо Твое, еже сам упа́сл еси, и не забуди посещать чад твоих. Молѝ за ны, отче священный, за дети твоя духовныя, яко име́яй дерзновение к Небесному Царю: не премолчѝ за ны ко Господу, и не пре́зри нас, верою и любовию чтущих тя. Поминай нас недостойных у престола Вседержи́телева, и не преста́й моля́ся о нас ко Христу Богу: ибо дана тебе бысть благодать за ны моли́тися. Не мним бо тя су́ща мертва: аще бо телом и преста́вился еси от нас, но и по смерти жив сый пребыва́еши. Не отступа́й от нас духом, сохраняя нас от стрел вражиих и всякия пре́лести бесо́вския и ко́зней диавольских, па́стырю наш добрый. Аще бо и моще́й твоих ра́ка пред очи́ма на́шима ви́дима есть всегда, но святая твоя душа со ангельскими во́инствы, со безпло́тными лики, с небесными силами, у престола Вседержителева предстоя́щи, достойно весели́тися. Ве́дущи убо тя воистину и по смерти жива суща, тебе припадаем и тебе молимся: моли́ся о нас Всесильному Богу, о пользе душ наших, и испросѝ нам время на покая́ние, да невозбра́нно пре́йдем от земли на небо, от мытарств же горьких, бесо́в воздушных князей и от вечныя муки да избавимся, и Небеснаго Царствия насле́дницы да будем со всеми праведными, от века угоди́вшими Господу нашему Иисусу Христу: Емуже подоба́ет всякая слава, честь и поклонение, со Безначальным Его Отцем, и с Пресвятым и Благим и Животворящим Его Духом, ныне и присно и во веки веков.

Молитва 3

О небеснаго Иерусалима гражданине, преподобне отче Сергие! Воззри на нас милостивно, и к земли приверженных возведи к высоте небесней. Ты горѐ на небесѝ пребываеши, мы же на земли ни́зу, удале́ни су́ще от тебе не толико местом, елико грехми и беззаконии нашими: но к тебе, яко нам сродному, прибегаем и взываем, настави нас ходити петем твоим, вразуми и руководствуй. Свействено есть тебе, отче наш, милосердие и человеколюбие: на земли живу́щу не о свем токмо спасении бысть тебе попечение, но и о всех к тебе притекающих. Наставления твоя бы́ша трость книжника скорописца, на сердцах людей глаголы жизни начертава́ющаго. Не телесныя токмо врачевал еси болезни, но паче душевных врач изящный явился еси: и все житие твое бысть зерцало всякия добродетели. Аще толи́к был еси, святче Божий, на земли: коли́к ныне еси на небеси! Ты днесь предстоиши престолу света неприступнаго, и в нем, якоже в зерцале, зриши вся нашя нужды и прошения: ты водворя́ешися вкупе со Ангелы, о едином гре́шнице кающемся радующимися. И человеколюбие Божие есть неистощимо, и твое к Нему дерзновение много: не престани убо о нас вопия̀ ко Господу. Испроси предстательством твоим у Всемилостиваго Бога нашего мир Церкви Его, под знамением Креста во́инствующей: согласие к вере и единомудрие, суемудрия же и расколов истребление, утверждение во благи́х де́лех: больным исцеление, печальным утешение, обиженным заступление, бедствующым помощь. Не посрами нас, с верою к тебе притекающих. Аще бо и недостойни есмы̀ толи́каго отца и хода́тая: но ты, быв подражатель человеколюбия Божия, сотвори нас достойны чрез обращение от злых дел ко благому житию. Вся Богопросвещенная Россия, твоими чудесы исполненная и милостьми облагоде́тельствованная, исповедует тя быти своего покровителя и заступника. Яви древния милости твоя, и ихже отцем спомоществова́л еси, не отрини и нас чад их, стопами их к тебе шествующих. Веруем, яко ду́хом нам сопрису́твствуеши. Идеже бо есть Господь, якоже слово Его учит нас, тамо и слуга Его будет. Ты верный еси раб Господень: и Богу везде су́щу, ты в нам еси, и Он в тебе есть, паче же и телом с нами еси. Се нетленныя и живоносныя твоя мо́щи, яко сокровище безценное, вручи нам чудес Бог. Предстояще им, яко тебе жи́ву су́щу, припа́даем и молимся: приими моления наша, и вознеси я̀ на жертвенник милосердия Божия, да приимет тобою благодать и благовременную в нуждах наших помощь. Укрепи наше малодушие, и утверди нас в вере, да несомненно уповаем получити вся благая от благосердия Владыки молитвами твоими. Паству же твою духовную, тобою собранную, не престани управля́ти жезло́м духовныя мудрости: подвизающымся помозѝ, разслабленныя возста́ви, споспеши иго Христово нести во благодушии и терпении: и всех нас управи в мире и покаянии сконча́ти жизнь нашу и пресели́тися со упованием во блаженная недра Авраа́мова, идеже ты радостно по труде́х и по́двизех ныне почива́еши, прославляя, со всеми святыми Бога, в Троице славимаго, Отца и Сына и Святаго Духа, ныне и присно и во веки веков.

Тропарь, глас 4

Иже добродетелей подвижник, яко истинный воин Христа Бога, на страсти вельмѝ подвизался еси в жизни вре́менней, в пе́ниих, бде́ниих же и поще́ниих образ быв твоим учеником: темже и вселися в тя Пресвятый Дух, Егоже действием светло укра́шен еси. Но яко имеяй дерзновение ко Святей Троице, поминай стадо, еже собрал еси мудре: и не забуди, якоже обещался еси, посещая чад твоих, Сергие преподобне, отче наш.

Сентемвриа 25. Молитва преподобней Евфросинии Суждальской. Из службы со акафистом

О преславная мати, скорая наша помощнице и заступнице и неусыпная о нас молитвеннице! Предстояще ра́це моще́й твоих и на сия со умилением, яко жи́вей ти сущей, взирающе, молимся тебе усердно: приими прошения наша и принеси я̀ ко престолу Милосердаго Отца Небеснаго, яко дерзновение многое к Нему имущая: испроси притекающым к тебе и всем православным христианом вечное спасение и временное благоденствие, на вся же благая дела и начинания наша щедрое благословение, и от всяких бед и скорбей скорое избавление. Ей, чадолюбивая мати наша! Тебе, предстоящей престолу Божию, ведомы суть нужды нашя духовныя и житейския: призри на ня̀ ма́терним оком, и твоими молитвами вся злая от нас отвратѝ, паже же злых и богопротивных обычаев умножение: утверди же во всех веры согласное ведение, взаимную любовь и единомыслие, да во всем житии нашем, словесы же и писании и делы, славится всесвятое имя Отца и Сына и Святаго Духа, Единаго Бога, в Троице покланяемаго, Емуже честь и слава во веки веков.

Тропарь, глас 8

В тебе мати, известно спасеся еже по образу: приимши бо крест, последовала еси Христу, и деющи учила еси презирати убо плоть, преходит бо, прилежати же о души, вещи безсмертней. Темже и со Ангелы срадуется, преподобная Евфросиния, дух твой.

Ин тропарь, глас 4

Святая твоя память Суждальскую страну веселит, верныя же вся созывает во всечестный храм твой, идеже ныне лежит всечестное тело твое, Евфросиние преподробная: моли Христа Бога спастися душам нашим.

Сентемвриа 26 и маиа 8. Молитвы святому апостолу и евангелисту Иоанну Богослову

Молитва 1, из акафиста

О великий апостоле, евангелисте громогласный, Богослове изящнейший, тайновидче неизреченных откровений, девственниче и возлюбленный наперстниче Христов Иоанне! Приими нас грешных, под твое сильное заступление прибегающих. Испроси у Всещедраго Человеколюбца Христа Бога нашего, иже пред очесы твоими Кровь Свою за ны непотребныя рабы Свою излиял есть, да не помянет беззаконий наших, но да помилует нас и сотворит с нами по милости Своей: да дарует нам здравие душевное и телесное, всякое благоденствие и изобилие, наставляя нас обращати оныя во славу Его, Творца, Спасителя и Бога нашего: по кончине же временныя жизни нашея, от немилосердых истязателей на воздушных мытарствах да избавит нас, и тако да достигнем, тобою водимии и покрываемии, горняго онаго Иерусалима, Егоже славу ты во откровении зрел еси, ныне же нескончаемыя радости наслаждаешися. О великий Иоанне! Сохрани вся грады и страны христианския, храм сей [твоему святому имени посвященный], служащих и молящихся в нем, от глада, губительства, труса и потопа, огня и меча, нашествия иноплеменных и междоусобныя брани: избави нас от всякия беды и напасти, и молитвами твоими от нас праведный гнев Божий, и Его милосердие нам испроси, да вкупе с тобою сподобимся прославляти в невечернем дни пресвятое имя Отца и Сына и Святаго Духа во веки веков.

Молитва 2

О великий и всехвальный апостоле и евангелисте Иоанне Богослове, наперстниче Христов, теплый наш заступниче и скорый помощниче! Умоли Господа Бога даровати нам оставление всех прегрешений наших, елико согрешихом от юности нашея во всем житии нашем делом, словом, помышлением и всеми нашими чувствы: во исходе же душ наших помози нам грешным избавитися от воздушных мытарств и вечнаго мучения, да твоим милостивным предстательством прославляем Отца и Сына и Святаго Духа ныне и присно и во веки веков.

Тропарь, глас 2

Апостоле, Христу Богу возлюбленне! Ускори избавити люди безответны: приемлет тя припадающа Иже падша на перси приемый. Егоже моли, Богослове, и належащую мглу языков разгнати, прося нам мира и велия милости.

Величание

Величаем тя, апостоле Христов и евангелисте Иоанне Богослове, и чтем болезни и труды твоя, имиже трудился еси во благовестии Христове.

Сентемвриа 28. Молитва на панихидах схимонаху Кириллу и схимонахине Марии, родителем преподобнаго Сергиа, чтомая в Покровском Хотькове монастыре, Московския епархии

О раби Божии, схимонаше Кирилле и схимонахине Марие! Внемлите смиренному молению нашему. Аще бо временное житие ваше скончали есте, но духом от нас не отступаете, присно по заповедем Господним шествовати нас научающе и крест свой терпеливо носи́ти посо́бствующе. Се бо вкупе со преподобным и богоносным отцем нашим Сергием, вашим возлюбленным сыном, дерзновение ко Христу Богу и ко Пречистей Его Матери стяжали естѐ. Темже и ныне будите молитвенницы и ходатаи  о нас недостойных, во святей обители вашей жительствующих. Будите Богом собра́нней дружине сей засту́пницы кре́пцыи, да вси на месте сем верою живущии, та́кожде и се́мо моли́тися приходящии, заступлением вашим сохраня́еми, невреди́ми от бесов и от человек злых пребудут, славяще Святую Троицу, Отца и Сына и Святаго Духа, ныне и присно и во веки веков.

Сентемвриа 30. Молитвы преподобному Григорию, иже на Пе́льшме рецѐ, Вологодскому чудотворцу. Из акафиста

Молитва 1

О священная главо, преподобне отче, преблаженне авво Григорие! Не забуди чад твоих, ихже богоугодными труды и молитвенными подвиги духовно породил еси: помилуй нас во святых твоих благоприятных молитвах и назидай предстательством твоим стадо твое, еже сам упасл еси: моли за ны отче священный, дети твоя духовныя, яко име́яй дерзновение к Небесному Царю: не премолчи за ны ко Христу, и не презри нас, верою и любовию чтущих тя.  Помилуй недостойных нас пред престолом Вседержи́теля, тебе бо дадеся благодать молитися за ны. Аще бо телом преставился еси от нас, но и по смерти жив во Христе пребываеши. Не отступи от нас духом, сохраняй нас от стрел вражиих, от прелести бесовския и козней диавольских, пастырю наш добрый. Се бо, ра́кою моще́й твоих пребывая с нами, святою твоею душею с небесными силами у престола Вседержи́телева предстоиши и тамо дастойно сла́виши Господа. Темже, припа́дающе со умилением, молимся тебе о спасении душ наших: испроси нам время на покаяние и невозбранно прейти от земли на небо чрез мытарства горьких бесов, да твоим предстательством от вечныя муки избавльшеся, Небесное Царствие наследовати сподобимся со всеми праведными, от века угодившими Христу Господу нашему: емуже подобаетвсякая слава, честь и поклонение, ныне и в безконечныя веки веков.

Молитва 2

О добрый наш пастырю и богомудрый наставниче, преподобне отче Григорие! Услыши нас молящихся тебе и призывающих в помощь скорое предстательство твое. Виждь нас грешных, в толицех обстояниих сущих: виждь нас немощных, отвсюду уловляемых, и всякаго блага лишенных, и умом от малодушия помраченных. Потщися, угодниче Божий, не остави нас во греховнем плену пребывати, да не будем в радость врагом нашым и не у́мрем в лукавых деяниих наших. Моли о нас недостойных Спаса Господа, Емуже ты со безплотными лики предстоиши. Милостива к нам сотвори Содетеля нашего в нынешнем ве́це и в будущем, да не воздаст нам по делом нашым и по нечистоте сердец наших: но по Своей благостида сотворит нам. на твое бо ходатайство уповающе, твоим предстательством хвалимся, твое заступление на помощь призываем, и к цельбоносному гробу твоему припа́дающе недостойнии, исцеления просим. Избави нас, угодниче Христов, от злых, находящих на ны̀, и укротѝ волны страстей и бед, возстающих на нас, да ради святых твоих молитв не объимет нас напасть, и не погрязнем в пучине греховней и в тине страстей наших. Моли, преподобне отче наш Григорие, Христа Бога нашего, да подаст нам мирное жительство, оставление грехов и душам нашым спасение и велию милость, ныне и во веки веков.

Тропарь, глас 8

Любовию Христовою, богомудре, просветився, добродетельми облистал еси: и всякое плотско́е наслаждение возненавидев, и в пустыню всели́вся, в ней вельмѝ подвизался еси в жизни сей временней, в пениих и во бдениих и в пощениих: сего ради и Христос даром чудес обогати тя. Но поминай нас чтущих пресветлую память твою, преподобне отче Григорие, и моли Христа Бога спастися душа́м нашым.

Месяц октоврий.

Октовриа 1. Молитвы преподобному Савве Ви́шерскому. Из акафиста

Молитва 1

О великий угодниче, преславный чудотворче и обители твоея богодухновенный наставниче, Савво преблаженне, душе́ю на небесѝ престолу всех Царя предстоя́й, телом же в обители сей почива́яй и различная чудеса повсюду молитвами твоими соверша́яй! При́зри ми́лостивно на люди предстоящыя и твоего ко Христу Богу хода́тайства во обдержа́щих ну́ждах прося́щыя: вси бо мы, по мно́жеству грехов наших, не смеем нижѐ возвестѝ оче́с наших на небо: ты же, яко стяжа́вый дерзновение, принесѝ за всех, ко честне́й ра́це твоей притекающих, те́плыя молитвы ко Господу, еже изба́витися нам от глада, потопа, труса, огня, меча и брани, от людей и от диавола быва́ющия, и от всякия душевныя и телесныя болезни: да сих избежа́вше и Господу, Емуже предстои́ши, рабо́тающе, вни́дем в некончаемый покой и прославим тамо с тобою всех благих Подателя Бога, всегда, ныне и присно и во веки веков.

Молитва 2

О преизящный и великий угодниче Господень Савво! Похваляем твоя славная чудотворения, прославляем житие твое святое. Никто́же возмо́жет исчестѝ терпение и погвиги твоя святыя: ты бо отечество и род твой оставил еси, в путыню же достиг и ученики собрав, обитель святую основал еси, и в ней столп водрузи́в, на том подвизался еси, сохраняя словесное твое стадо: темже непра́ведно не́когда наше́дшыя разбойники на обитель твою узрел еси, и еди́нем жезла̀ ударе́нием сия устрашил еси. И ныне устрашѝ, отче преподобне, вся враги возстаю́щыя на ны: помолися о благочестивейшем императоре нашем и о всем христолюбивом Российском воинстве: умоли милостиваго Бога, да отпустит нам прегрешения наша и сподобит нас наслаждатися радости вечныя купно со всеми святыми, ныне и присно и во веки веков.

Тропарь, глас 4

От юности твоея̀ весь Богу порабо́тился еси, блаженне, и Того̀ ради любвѐ, отечество и род оставил еси, в пустыню вселився: и в ней жестокое житие показав, чудес дарования от Господа приял еси. Савво преподобне, моли Христа Бога спастися душам нашым.

Октовриа 4. Молитвы святителю Гурию, архиепископу Казанскому

Молитва 1, святителя Димитрия Ростовскаго. Из службы

О архиерею Божий, Гурие святый, предстояй ныне престолу Христову в Церкви торжествующей! Не забуди нас, празднующих любовию святую память твою, от горняго возшествия нашу назирай худость. Отче благий, призирай милостивно на чада твоя: пастырю добрый, не пре́зри стада твоего, тобою Бо́гови приобре́теннаго. Аще и отлучен  еси от грешник святынею твоею, обаче не отлучайся от нас грешных милосердием, присутствуй нам твоими за ны к Богу молитвами. Виждь град, в немже много трудился еси, виждь народ, егоже просветил еси, и буди всем помощник, заступник, покровитель, защи́титель, промы́сленник же и упра́витель жизни нашея. Хода́таю теплый, не премолчѝ вопия̀ о нас ко Господу, испроси мир мíрови, тишину христианскому царству, держа́вствующему же одоление, и всем временная и вечная благая.

Молитва 2. Из службы

О священнейшая главо, первый пастыреначальниче и насадителю Казанския Церкве, Божественным апостолом и первейшым вселенским пастырем верный подражателю, присно предстояй Небесному Престолу Отца всех щедрот Бога и непрестанно наслаждаяйся Его присносущнаго света и любве! К тебе мы чада паствы твоея, яко не имущии дерзновения возносити мольбы нашя ко Господу Богу, усердно прибегаем, и молимся вознести богоприятныя о нас мольбы твоя ко Всевышнему, да дарует всем нам пе́рвее всего житиѐ по святым Его за́поведем и пощение грехов: потом же да избавит нас в кратком нынешнем ве́це от находящих на нас, по грехом нашым, неблагорастворе́ния стихий, безплодия, глада, смертоносныя язвы, огня, истребляющаго наша жилища, всяких крамо́л, нашествия иноплеменных, и всех сопроти́вных нам видимых и невидимых сил, да дарует же мирное со здравием благоденственное житие, правительству нашему да дарует прозоливость, нелицеприятие и праведный суд, священству твоея̀ паствы примерную святость, ве́дения чистыя истины, неохлажда́ющуюся и немздои́мную ревность к Божиим службам, слово зрелое, всегда готовое и со́лию растворе́нное, да непрестанно распространяется и укрепляется насажде́нная тобою вера православная, и да истребится богоненавистное заблуждение языческое, зловредное нечестие ага́рянское и вся ереси и расколы дущепагубнии: да везде во твоей прежней пастве возглашается и славится всесвятое имя нашего Господа Иисуса Христа, со Безначальным Его Отцем, и с Пресвятым и Благим и Животворящим Его Духом, ныне и присно и во веки веков.

Молитва 3, из акафиста

Святителю отче Гурие! Предстояще священней раце многоцелебных мощей твоих [или: честному образу твоему], молим тя усердно: буди всегда и повсюду наш хода́тай, заступник и покровитель. Исходатайствуй пастве твоей мир, тишину и благоденствие, здравие же и спасение. Буди присный наш заступник от всех враг видимых и невидимых: покрывай нас от нахождения всех бед, напастей и скорбей, паче же от искушений врага темнаго. Предстоящым же зде и молящымся испроси у Господа Бога вся, яже ко спасению своему тии просят у него в своих нуждах и скорбех, да вси мы с тобою прославляем всесвятое имя Отца и Сына и Святаго Духа, ныне и присно и во веки веков.

Тропарь, глас 3, общий святителем Гурию и Варсонофию

Первии учитилие прежде темному, ныне же светлому и новопросвещенному граду Казани, первии возвестителие пути спасительнаго, истиннии хранителие апостольских преданий, столпѝ непоколеби́мии, благочестия учи́телие и православия наста́вницы, Гурие и Варсонофие, Владыку всех моли́те мир вселенней дарова́ти и душа́м нашым велию милость.

Октовриа 4 и априлиа 11. Молитвы святителю Варсонофию, епископу Тферскому, чудотворцу Казанскому

Молитва 1, из акафиста

Приникни, святителю Варсонофие, с горних селений на притекающыя к ра́це мощей твоих, и вонми молению их: умоли Господа Бога даровати всем нам, еже ко спасению нашему мы просим у Него при святых моще́х твоих. Буди всем нам заступник и хода́тай в ну́ждах наших и проше́ниих, испросѝ благоденствие, долгоденствие, здравие же и спасение, и во всем благое поспеше́ние, благочестивейшему, самодержавнейшему, великому госуда́рю нашему, императору Николаю Александровичу всея̀ России: супруге его,  благочестивейшей государыне императрице Александре Феодоровне: матери его, благочестивейшей государыне императрице Марии Феодоровне: наследнику его, благоверному государю цесаревичу и великому князю Алексию Николаевичу, и всему царствующему дому. Умоли Господа Бога даровати во дни царства его крепкий и нерушимый мир, благочиние, просвещение умов и сердец, и земли плодоносие, пастырем святыню, законом правду и силу, военача́льником мудрость и непобедимое мужество, градонача́льником суд, воинству преданность вере, царю и Отечеству и неодолимую храбрость, всем же православным христианом здравие и благочестие. Сохраняй обитель твою святую от всех наветов вражиих, да словом и делом прославляется в ней всесвятое имя Отца и Сына и Святаго Духа, ныне и присно и во веки веков.

Молитва 2, чтомая в Спасском монастыре града Казани

О всехвальный и великий угодниче, святителю Христов, отче Варсонофие, от юности паче всего Бога возлюбивый и Господем возлюбленный! Призри с высоты небесныя на нас недостойных, просящых твоея̀ всесильныя помощи и заступления. Се бо грехми обуреваеми и скорбьми одержими, не смеюще взирати на высоту небесную от множества неправд наших, с сердцем сокруше́нным молитвенно к тебе взыва́ем, целителю наш преславный: нас немощных и унылых и во многая беззакония впа́дших уврачу́й, исцелѝ и возста́ви. Отжени от нас вся душетле́нныя страсти, обнови дух правый в нас заблуждших, всади страх Божественный в сердца наша, вразуми и научи нас ходи́ти по заповедем Господним. Не забу́ди нас, пастырю наш предобрый, предстоя̀ престолу Вседержителя. Аще бо и пресели́лся еси в небесная, духом всегда с намипребываеши, и вся, с верою и любовию притекающыя ко многоцелебней ра́це моще́й твоих, твоим попечением покрываеши. К тебе ныне припадаем, усердно моля́ще: святче Божий, крепкий столпе церковный, сосуде благодати предъизбранный, надеждо всех к тебе притекающих, умоли Великаго Бога, да сокрушит и низвергнет все богоху́льное ага́рянское нечестие, и неверныя к познанию истины да обратит, веру православную да укрепит и возвеличит, Церковь Свою святую це́лу и невреди́му от всех наве́т вражиих да сохранит, нас же, недостойных чад твоих, в любви и единомыслии да утвердит, и да избавит всех, о́крест ра́ки твоея̀ молитвенно предстоящих, от всяких недугов и соблазнов житейских, от всякаго ядови́таго прило́га диавольскаго и от всякаго зла, да твоим предстательством и заступлением мирное здѐ житиѐ поживе́м и Небеснаго Царствия прича́стницы сподо́бимся быти, непрестанно сла́вяще Отца и Сына и Святаго Духа, Единаго в Троице покланя́емаго Бога, ныне и присно и во веки веков.

Октовриа 5. Молитва святителю Алекси́ю, митрополи́ту Моско́вскому и всея России. Из службы

О пречестна́я и свяще́нная главо̀ и благодати Святаго Духа исполненная, Спа́сово со Отцем обита́лище, великий архиере́е, теплый наш заступниче, святителю Алекси́е! Предстоя̀ у престола всех Царя и наслажда́яся света Единосущныя Троицы и херуви́мски со Ангелы возглаша́я песньтрисвяту́ю, великое же и неизсле́дованное дерзновение имея ко Всемилостивому Влады́це, моли́ся па́ствы твоея̀ спастѝ люди, единоро́дный ти язык: помозѝ во бра́нех благочестивейшему, самодержавнейшему, великому госуда́рю нашему, императору Николаю Александровичу всея̀ России, и покорѝ ему вся проти́вныя врагѝ под но́зе его, мирно и безмятежно царствовати ему устро́й: благостояние святых церквей утвердѝ: архиере́и благоле́пием святительства украсѝ: мон́ашествующыя к подвиго́м добраго течения укрепѝ: царствующий град [сей и святую обитель сию] и вся гра́ды и страны́ до́бре сохранѝ, и веру святую непоро́чну соблюстѝ умолѝ: мир весь предстательством твоим умирѝ, от глада и па́губы избави ны, и от нападения иноплеменных сохранѝ: старыя уте́ши, юныя наста́ви, безумныя умудрѝ, вдовицы помилуй, сиро́ты заступѝ, младе́нцы возрастѝ, плененныя возвратѝ, немощству́ющыя исцели, и везде тепле призывающыя тя и с верою притекающыя к ра́це честны́х и многоцелебных моще́й твоих, усердно припа́дающыя и моля́щыяся тебе, от всяких напастех и бед хода́тайством твоим свободи, да зовем ти: радуйся, богоизбранный пастырю, звездо̀ всесветлая мысленныя тве́рди, тайнаго Сиона необори́мый сто́лпе, миродохновенный цве́те райский, всезлата́я уста слова, Московская похвало̀, всея России украшение! Моли о нас Всещедраго и Человеколюбиваго Христа Бога нашего, да и в день страшнаго пришествия Его от шу́иаго стояния избавит нас, и радости святых прича́стники сотворит со всеми святыми во веки веков.

Тропарь, глас 8

Яко апостолам сопрестольна, и врача предобра, и служителя благоприятна, к ра́це твоей честней ритекающе, святителю Алексие, богомудре чудотворче, сошедшеся любовию в память твою, светло празднуем, в песнех и пениих радующеся и Христа славяще, таковую благодать тебе даровавшего исцелений и граду твоему великое утверждение.

Ин тропарь, глас 4

Апостольских догмат опасна хранителя, Церкве Российския пастыря и учителя, преблаженнаго Алексия святителя память празднующе, славословим Христа Бога нашего пе́сньми достодо́лжными, даровавшаго нам угодника Своего, яко обильный источник точащь врачевания, граду же Москве похвалу и утверждение.

Октовриа 7. Молитвы преподобному Сергию Нуромскому. Из службы с акафистом

Молитва 1

О великий чудотво́рче, преподобне отче наш Се́ргие! Услы́ши моли́тву нас гре́шных моля́щихся тебе и имя твое святое на помощь призыва́ющих: не пре́зри нас чту́щих тя: молѝ о нас грешных Содетеля нашего Господа Бога, тебе бо даде́ся благода́ть моли́тися за нас. Не мним бо тя ме́ртва су́ща: аще бо те́лом и преста́вился еси от нас, и ра́ка твоя пред очи́ма на́шима ви́дима есть, но святая твоя душа со ангельскими лики предстои́т у престола Вседержи́телева. О пастырю наш, преподобне отче Се́ргие! Потщи́ся сохрани́ти нас от па́губных враго́в и от внеза́пныя смерти и от бесо́вскаго искуше́ния, умом от малоду́шия помраче́нных. Не оста́ви нас, свети́льниче Христов, плене́ных быти, но помозѝ нам моли́твами твоими от ве́чныя муки изба́витися и насле́дником Царствия Небеснаго бы́ти со всеми святыми от века угоди́вшими Господу Богу нашему Иисусу Христу, Ему́же подоба́ет че́сть, поклоне́ние, слава и держава, со Безнача́льным Его Отцем и Пресвятым и Благим и Животворящим Его Духом, ныне и присно и во веки веков.

Молитва 2

О преподобне и достоблаженне отче Сергие, добрый наш пастырю и учителю! Ты еще на земли сей раб прии́скренний Спаса Христа показался еси, и многия да́ры благодатныя от него прия́ти сподобился еси: по блаженнем же твоем успении престолу неприступныя Его славы предстоя, велие к нему дерзновение имаши. Сего ради моли и о нас, вла́ющихся в пустыни мiра сего и сует его. Огради нас предстательством твоим от всех враг наших видимых и невидимых, от тлетворных ветр, смертоносныя язвы, от глада, труса, потопа, огня, меча, нашествия иноплеменных и от всякаго зла. Наипаче же, святче Божий, пролей теплое твое моление ко Господу о богохранимей державе Российстей, да в мире, тишине и благоденствии жительствуем: моли, отче священный, Царя царствующих и Господа господствующих о благочестивейшем, самодержавнейшем, великом госуда́ре нашем, императоре Николае Александровиче и о всем царствующем доме его, да силою Божиею и всемо́щным заступлением твоим охраня́емь, долготою же дни́й и крепостию сил исполнен, многая благая во благо людей своих совершит: ограждай же молением твоим, преподобне, церковь Христову православную о ересе́й и расколов, ризу Христову раздрати тщащихся: испроси па́стырем святыню, пастве от спасении ревность, старцем крепость и благое напутствие в жизнь вечную, средним лучшим быти: юные уцелому́дри и послушанию научи. Нам же всем, угодниче Божий, время на покаяние испроси, да не во гресех наших у́мрем, но да молитвами твоими, плоды достойны покаяния принесшым, вечную присноблаженную жизнь и сопребывание со святыми  Его дарует нам Господь, да прославляем гла́сы немолчными Его неизреченное милосердие в безконечныя веки веков.

Тропарь, глас 8

Желанием духовным разгараяся, преблаженне, слез твоих течением душу твою напоил еси, и яже из глубины воздыханьми уязвляя сердце твое, бодренными молитвами и всено́щным предстоянием Владыце Христу многодобродетелен плод принесл еси сам себе: сего ради, яко Божий угодник, свектило мiру показался еси, сияя чудесы. Сергие преподобне, отче наш, теплый молитвенниче, Бога всегда моли, да спасет душы нашя.

Октовриа 7 и иануариа 12. Молитвы преподобному Мартиниа́ну Белоезе́рскому

Молитва 1

О преподо́бне и богоблаже́нне отче наш Мартиниа́не! Приимѝ ныне нас, к тебе усе́рдно моля́щихся и припа́дающих ко всечестно́му твоему гробу, иде́же святое твое и многотру́дное покоистя тело. Духом же на небесе́х предстоя̀ Святей Троице, со Ангелы и преподо́бных отец ли́ки, моли́ся о нас ча́дех твоих, отче, да избавимся от всяких скорбей, болезней, бед и обстояний и благочестно поживем в настоящем житии, ходя́ще в заповедех и оправда́ниих Господних безпоро́чно. Испросѝ нам грехов прощение, телесе́м здравие и душа́м вечное спасение, яко да твоим предстательством спаса́еми, славу возсыла́ти сподо́бимся в Троице славимому Богу, Отцу и Сыну и Святому Духу, ныне и присно и во веки веков.

Молитва 2

О богоблаженне и преподобне отче наш Мартиниа́не! Молимся тебе и от сердца с любовию вопием, да непотребных нас вразуми́ши, и просвети́ши, и твоими молитвами укрепи́ши некая похвальная словеса̀ принести в память твоего преставления: обаче сие не в мудрости словес дерзаем глаголати, но со многою верою и любовию к чадолюбивому отцу сия приносим. Ты убо, о преподобне отче наш Мартиниа́не, наших согрешений прощение испроси, да в дому̀ Пречистыя Владычицы нашея Богородицы, непреоборямыя верным ограды пребывающе, тобою благим предстателем нашим свобо́дни пред Богом яви́мся, и необладаеми от всех враг видимых и невидимых пребудем. О пастырю наш по Бо́зе добрый, истинный строите́лю винограда Христова, отцем славо и преподобным единонра́вие, и праведным совсе́льниче, и общаго жития соверши́телю изрядный! Ныне на небеси Святей Троице предстоя со всеми святыми, молися о нас: о сем бо, ко гробу твоему припадающе, яко чадолюбиваго отца усердно тя молим. Помяни твое стадо, еже сбрал еси мудре, и соблюди твоими молитвами Богом дарованную паству: не презри нас, чтущих пречестную и многорадостную твою память: очисти наша согрешения: отжени от нас о́блак страстей: просвети наши душевныя очи, и гугни́вый язык исправи, смысл очисти и разум освяти. Прииди посреде нас невидимо, и от всех нас моления Богови возсылаемая приими, и донеси сия хода́тайственне всех Творцу и Избавителю, в Троице Святей покланяемому Истинному Богу нашему, яко да согреше́нием нашым оставление получим, благодатию и человеколюбием Господа нашего Иисуса Христа: с Нимже Отцу слава со Святым Духом, ныне и присно и во веки веков.

Октовриа 8. Молитва преподобному Трифону Вятскому

О пречестная и священная главо, ангеле земный и человече небесный, преподобне и богоносне отче наш Трифоне, Вятския и Пермския страны просветителю и покровителю! К тебе с верою припа́даем и с любовию молимся: умоли Господа Бога, Емуже во страна́х сих праведным житием, христианския веры утверждением и обителей иноческих созиданием благоугодил еси, да сохранит в нас веру православную непоколебиму и от ересей и расколов, суеверия же и неверия невредиму: да укрепит державу благочестивейшаго царя нашего и утвердит в земли нашей мир, тишину и безмятежие: да тако неотступно веру Христову исповедающе, благоучрежденным же властем повинующеся и во всяком благочестии и чистоте живуще, достойнии будем надежды спасения и сподобимся любве Христовы, еюже ты преисполнен быв, всякия беды и злострадания претерпел еси и нам благий образ подал еси, еже не унывати в скорбех и болезнех. Предстательствуй убо, отче святый пред премолом Господа Вседержителя, да подаст нам вся потребная к вечному спасению и вся благая к настоящему житию нашему, егоже дни прочия в мире и покаянии скончати помози нам святыми твоими молитвами: да мирную кончину улучивше, сподобимся на Страшнем Суде услышати милосердный сладчайший глас Сына Божия, о еже со избранными одесную Праведнаго Судии предстати и по сих вкупе с тобою причастники и по сих вкупе с тобою причастники жизни вечныя явитися. Ей, отче благий! Не забуди нас чад твоих, прилежно молящихся тебе, но яви нам милость твою в жизни сей привременней и по смерти нашей, да всегда благодарим тя, усерднаго заступника нашего, и величаем неизреченное милосердие и человеколюбие Единаго Бога, в Троице славимаго, Отца и Сына и Святаго Духа, во веки веков.

Октовриа 9. Молитва святому апостолу Иакову Алфе́ову, чтомая пред чудотворною его иконою в Московской Ризоположе́нской церкви

О святый славный и всехвальный апостоле Иакове Алфеов, Христов ученичѐ, множайшыя люди ко истинней вере наставивый и от них проименованный божественное семя! Со́браннии днесь в сем храме твоем и к честны́м моще́м твоим усердно притекающии, святую память твою светло празднующии, со умилением тебе глаголем: ты, во многоразличных странах семя святыя веры труды апостольскими произрастив, из него сотворил еси плод мног, ныне в небесных сокровищих славно хранимый. Моли убо Божественнаго Сеятеля, Господа Иисуса Христа, да и мы, семя веры нашея в детельныя умноживше плоды, сподобимся на кончине жизни нашея прияти быти руками горних жителей, святых Ангел, в житницу небесную, славити тамо и воспевати пречестное и великолепое имя Отца и Сына и Святаго Духа во веки веков.

Октовриа 14. Молитва преподобней Параскеве Сербской

О прекрасная невесто Христова, чистая голубице, прозлащенная Духом Святым, девственная похвало и пустынножительная собеседнице Ангелом, на земли мысленный рай твоими добродетельми насадившая, преподобная мати Параскево! Что достойное в дар тебе принесем, кроме смиренных и грешных молений наших, яже прии́мши, очисти я̀ святыми твоими молитвами, и принеси к Жениху твоему, Христу Богу нашему. Ублажаем тя, рода сербскаго красото̀ и наша заступнице и хранительнице, е́юже хвалятся ца́рие и князи. Ты, яко храбрый воевода, крепостию, от Царя сил тебе данною, ли́ца врагов страны твоея со студо́м вспять обращала еси: темже и нашу страну Российскую силою молитв твоих оградѝ от всех наве́т видимых и невидимых врагов. Моли Бога о нас, о преподобная мати, да не яростию Своею обличит нас Господь, нижѐ гневом Своим накажет нас за премно́гия грехи нашя, но милостию Своею да оградит нас и да дарует нам время на покаяние и исправление. О преподобная Параскево! Всех собравшихся в сем храме [посвяще́ннем твоему имени] и с любовию чтущих святую память твою твоим заступлением осени, и испроси у Царя сил, Емуже со Ангелы предстоиши, коемуждо благопотребная во временней жизни сей, паче же помози нам Небеснаго Царства достигнути твоими теплыми молитвами и ходатайством ко Господу нашему Иисусу Христу, Емуже подобает всякая слава, честь и поклонение, со Отцем и Сыном и Святым Духом, ныне и присно и во веки веков.

Тропарь, глас 4

Пустынное и безмолвное житие возлюбивши, и вослед Христа Жениха твоего усердно поте́кши, и Того благое иго во юности взе́мши, крестным знамением к мысленным враго́м му́жески вооружи́вшися, по́стническими подвиги, постом и молитвами и сле́зными каплями, у́глие страстей угасила еси, достославная Параскево: и ныне в небеснем черто́зе с мудрыми де́вами предстоящи Христу, моли о нас почитающих честну́ю память твою.

Октовриа 15 и иуниа 8. Молитва святителем Феодору Ростовскому и Иоанну Су́ждальскому, Су́ждальским чудотворцам. Из акафиста

О велицыи угодницы Христовы и чудотворцы, святителие Феодоре и Иоанне! Се мы, недостойнии и грешнии, скорбьмѝ многими угнета́емии, к вам усердно прибегаем и со упованием крепким молимся: о отцы благоми́лостивии и богопослушли́вии, милостивно ныне услы́шите глас наш молебный, и потщитеся на помощь нашу, и якоже в житии вашем всем скорбя́щым и озло́бленным помощницы и уте́шителие бы́сте, тако и ныне любовь вашу к нам явите, благода́тным действом богоприя́тных молитв ваших претворя́юще скорбь нашу в радость, печаль же в утешение: вся бо можете о укрепля́ющем вас Христе, Егоже вернии служи́телие явистеся. От Негоже прии́мше вся обетованная благая, низпослите убо и нам великую и богатую милость Господню, да воспоем и прославим дивнаго во святых Своих Бога, Отца и Сына и Святаго Духа, ныне и присно и во веки веков.

Октовриа 20 и иуниа 23. Молитвы святому праведному Артемию Веркольскому.

Молитва 1, из службы со акафистом

Святый угодниче Божий, Артемие праведный, хранителю присный святыя обители, твоим именем украше́нныя, и всея̀ северныя страны̀ пред Богом заступниче! Призри милостивнона усердную молитву нас грешных, и твоим благомощным предстательством прощение согрешений наших у Господа испроси, преспеяние же в вере и благочестии, и от козней диавольских ограждение исходатайствуй нам. Наипаче же моли Господа, да во здравии и непременяемем благополучии сохранить благочестивейшаго, самодержавнейшаго, великаго госуда́ря нашего, императора Николая Александровича, да подаст же и всем людем, державе его врученным, мир, тишину и нелицемерное послушание, да сподобит всех нас по христианстей кончине Небесное Цаствие получити, идеже вси праведниикупно с тобою славят Отца и Сына и Святаго Духа во веки веков.

Молитва 2, из акафиста

О великий угодниче Божий, святый праведный Артемие, святыя обители, твоим именем красу́ющияся, покровителю, сильный о нас ко Господу хода́таю, зде живущих и́ноков твоея обители благодетелю, и всех с верою и любовию притекающих к ра́це чудотво́рных моще́й твоих добрый слы́шателю! Призри милостивно на убогую молитву нас грешных и непотребных, и твоим всемо́щным предстательством испроси нам у Господа прощение грехов, в вере и благочестии преспе́яние и от козней супостата, ищущаго нас погубити, ограждение. Даруй братству твоея обители смирение и кротость, любовь и послушание вседу́шное, служение и житие благоговейное и иноческаго общежития доброе соблюдение, да Го́сподеви непостыдно рабо́тающе, духом же горя́ще, и в непрестанней молитве о благотвори́телех на́ших живых и усопших преспева́юще, ве́рнии рабѝ Господа яви́мся. Моли Господа, да Церковь православная, яко вертоград благонасажденный, утверждается и множится, и богатны плоды веры и благочестия да сотворит. моли Господа, да хранит во здравии, душевнем спасении и во всем благопоспешении благочестивейшаго госуда́ря нашего, императора Николая Александровича и весь царствующий дом, нам благодеющий. Моли Господа о милости и благодатных щедротах святейшему правительствующему Синоду, и преосвященнейшему нашему [Архангелогоро́дскому епископу имярек], и всему священному причту, и всем православным христиа́ном, да хода́тайством и заступле́нием Преблагослове́нныя Владычицы нашея Богородицы мирное и богоугодное житие зде поживем, и по мирней христианстей кончине в преславнем Царствии милости Царя небесе и земли сподобимся, славити Отца и Сына и Святаго Духа, ныне и присно и во веки веков.

Молитва 3, чтомая в Московской Параске́виевской, на Пятницкой улице, церкви

О великославный угодниче Божий, о великий чудотворче, святый и праведный Артемие, херувиме земный, человече небесный, Ангелов собеседниче, небесный жителю! Призри с высоты небесныя светлым оком твоим, и низпослѝ нам лучы̀ Божия благодати. Свектильниче боговозжженнй, твоими святыми молитвами разжени мрак грехов наших, упроси у Отца светов свет благодати душам нашим, всех правоверных скорый быв помощник и заступник. Всяк бо, с верою под кров защищения твоего молитвенно притека́яй и заступления твоего у Господа  прося́й, а́бие посо́бствуем бывает, Божию же милость обретает и желания сердца своего не лишается: но просит благодати и приемлет дар на пользе прошения. Ты еси, праведный Артемие, вертогра́д Богом насажде́нный, в нем же цвет здравотво́рный процветѐ, еже исцеля́тися многим от зе́льнаго трясави́чнаго недуга. О коль мнози твоею чудесною помощию слепи́и прозреша, глуси́и слух прияша, хро́мии возскочи́ша и ходи́ша, немощни́и действо рук прия́ша, безу́мнии воуми́шася, разсла́бленнии в жилах укрепи́шася, сляче́ннии испра́вишася, и иму́щии бре́ды исцеле́ша! Еще же и скве́рнии демони молитвою твоею отгна́шася, и инии неисце́льнии неду́зи разреши́шася. Тако, святый праведный Артемие, всем всегда милостив являешися. Убо и о нас неисповеди́мую Божию благость умоли, да оставит нам Господь до́лги нашя, и да хранит царство Российское в мире и благоденствии, в крепости и обилии, и веру православную да укрепит, церковныя же расколы да утолит, и вся православныя христианы да спасет. Мы же твою память святую от рода в род честно праздновати будем, славяще прославльшаго тя Христа Господа, Емуже подобает всякая слава, честь и поклонение, со Безначальным Его Отцем, и со Пресвятым и Благим и Животворящим Духом, нне и присно и в безконечныя веки веков.

Тропарь, глас 3

Вышняго повелением тучено́сным облако́м небо помрачившым, и молниям блистающым, гро́му же возшуме́вшу с преще́нием, испустил еси душу твою в руце Господеви, премудре Артемие: и ныне предстои́ши престолу Владыки всех, всем с верою и любовию приходящым к ра́це твоей исцеление подая̀ неотложно и моляся Христу Богу спастися душам нашим.

Октовриа 22 и августа 4. Молитва святым седми отроком, иже во Ефесе: Максимилиану, Иамвлиху, Мартиниану, Иоанну, Дионисию, Езакустодиану и  Антонину. Из акафиста

О пречуднии святии седмочи́сленнии о́троцы, Ефеса града похвало и всея вселенныя упование! Воззри́те с высоты небесныя славы на нас, любовию память вашу чтущих, наипаче же на младе́нцы христианския, вашему заступлению от родителей своих препоруче́нныя. Низведите на ня благословение Христа Бога, рекшаго: оста́вите детей приходити ко Мне. Боля́щыя убо в них исцелите, скорбящыя уте́шите: сердца их в чистоте соблюдите, кротостию исполните я, и в земли сердец их зерно исповедания Божия насадите и укрепите, во еже от силы в силу им возрастати. И всех нас святей иконе вашей предстоящих, мощи же ваша с верою лобызающих и тепле вам молящихся, сподобите Царствие Небесное улучити и немолчными гласы радования тамо прославляти великолепое имя Пресвятыя Троицы, Отца и Сына и Святаго Духа, во веки веков.

Тропарь, глас 4

Велия веры чудесе! В пещере яко в черто́зе царском святии седмь о́троцы пребы́ша, и уморша без тлѝ, и по мно́зех вре́менех возсташа яко от сна, во уверение воскресения всех человеков. Тех молитвами, Христе Боже, помилуй нас.

Октовриа 22. Молитва на панихидах преподобным отце́м Фео́дору и Павлу, первострои́телем и основа́телем Борисоглебскаго монастыря, чтомая в Ростовском Борисоглебском монастыре, Ярославския епархии

О преподобнии отцы, пастырие и учитилие наши, блаженнии авво Фео́доре и авво Павле! В лета древняя путем заповедей Господних шествовати изволивше, привлекли естѐ в место пустынное, иде́же благословением и молитвами началовождя своего, преподобнаго и богоноснаго Сергиа, чудотворца Радонежскаго, преславную обитель святых страстотерпцев Бориса и Глеба возглрадили есте, во устроение благочестия иноческаго жительства, и противу невидимых врагов спасения нашего тамо подвизастеся, и тако угодницы бысте Богови, верою, надеждою и любовию благолепне украшающеся, постом же и бдением и молитвами Богу благоугождающе и во всяком благочестии ко временному житию и вечному спасению о́брази нам я́вльшеся. И ныне убо, преподобнии отцы наши, не забу́дите посещати чада своя, ко е́же отрази́ти от нас наве́ты вра́жия: наста́вите же и утверди́те нас в по́двизех до́брых, к жизни вечней душы нашя руково́дствующе. Молитеся милости Подателю и Господу вся́ческих, да спасет нас, и́миже весть судьба́ми, и наследники сотворит с вами вечнаго наслаждения, да непрестанно славим всесвятое имя Отца и Сына и Святаго Духа, в безконечныя веки веков.

Октовриа 23. Молитвы святому праведному Иоакову, чудотворцу Борови́чскому.

Молитва 1, из службы со акафиста

Святый великий праведниче и преславный чудотворче, богоблаженный угодниче Христов Иакове, дивно на небеси прославленный и на земли от Господа целебник и заступник нам данный! К тебе с верою и любовию благоговейно припа́даем и из глубины душѝ молимся: помози нам, Господа и Создателя нашего зело прогневавшым, покаятися, и испроси нам вся к житию временному и спасению вечному потребная: земли нашей плодоно́сие, возду́ху благорастворение, душам и телесем здравие, во благочестии преспеяние, веры православныя укрепление, суеверия посрамление, неверия искоренение, и всякаго благаго прошения нашего к Богу исполнение. Испроси благоверному императору нашему Николаю Александровичу на враги победу и одоление, и царству его в мире и благоденствии устроение. Услыши, угодниче Божий, всяку душу христианскую, в скорби и обстоянии тя молитвенно призывающую, ускори на помощь, облегчи скорби, уврачуй недуги и всем требующым твоего заступления явися скорый предстатель. Наипаче же в последний час жития нашего не закосни приити на помощь нам, и умоли Господа даровати нам кончину жизни нашея мирну, безмятежну, Святый Христовых Таин причастну и упования исполнену, да с надеждою спасения безбедно пре́йдем страшный путь воздушных мытарств и непреткновенно достигнем вожделеннаго о́наго Царствия, еже уготова Господь любящым Его. Ей, святче Божий! Услыши нас и не презри моления нашего, но сотвори нас соучастники быти блаженства вечнаго, да в купе с тобою спасе́ннии милосердием Христа Спасителя нашего воспоем и прославим Его со Отцем и Святым Духом, во веки веков.

Молитва 2

О пречестная главо, небеснаго Иерусалима  гражданине, святый праведный Иакове, благодати Святаго Духа исполнение Сраса со Отцем обиталище! Предстоя у престола всех Царя, и наслаждаяся света Единосущныя Троицы, и хурувимски со Ангелы возглашая песнь трисвятую, ты великое и неизсле́димое дерзновение ко Господу имаши. Темже, велие дарование, от Христа данное, в тебе храняй, молися Всемилостивому Владыце спасти благочестивейшаго, самодержавнейшаго, великаго Государя нашего, императора Николая Александровича всея России и вся люди православныя и проти́вныя враги под но́зе их покорѝ. Паче же святую веру нашу в чистоте соблюсти, гра́ды нашя утвердѝ, [обительсию и] весь мiр умири, от глада и паѓубы избави, и от нападения иноплеме́нных сохрани: старые уте́ши, юныя наста́ви, безумныя умудрѝ, вдови́цы помилуй, сироты̀ заступѝ, младе́нцы воспитай, и вся люди сохрани от всяких наветов вражиих. В день же Страшнаго Суда Божия, заступниче наш, от шуиих части молитвами твоими избави и со десными овца́ми вожделенный оный глас от Владыки Христа Бога нашегоуслышати сподоби: приидите, благословеннии Отца Моего, наследуйте уготованное вам Царствие от сложения мiра. Идеже да пребудем, непрестанно славяще Всесвятую Троицу, Отца и Сына и Святаго Духа, в безконечныя веки веков.

Молитва 3

О преподобный и богоносный угодниче Божий, святый и праведный Иакове! Услыши нас, в час сей тебе молящихся, и буди нам помощник в скорбех наших, и избави нас от напастей, за множество прегрешений на нас находящих. Умоли Всеблагаго Бога дарова́ти нам оставление всех согрешений, от ю́ности до настоя́щаго днѐ и часа̀ де́лом, словом и помышлением содеянных нами, и исходатайствуй нам невозбранный вход в Небесное Царствие, да прославляем от Ангел непрестанно славимую Всесвятую Троицу, Отца и Сына и Святаго Духа, и твое милостивное предстательство, во веки веков.

Тропарь, глас 1

Божественною благодатию просветився, и по смерти даруеши исцеления притекающым к раце мощей твоих, премудре Иакове: темже и мы ныне честным мощей твоим пренесение, веселяще вкупе душы и телеса. Тем вси вопие́м: слава Давшему ти крепость: слава Венчавшему тя: слава Действующему тобою всем исцеления.

Величание

Ублажаем тя, святый праведный Иакове, и чтем святую память твою: ты бо молиши за нас Христа Бога нашего.

Октовриа 26. Молитва святому великомученику Димитрию Мироточивому, Солунскому. Из акафиста

Святый и славный великомучениче Христов Димитрие, скорый помощниче и теплый заступниче с верою притекающих к тебе! Предстоя со дерзновением Небесному Царю, испроси у Него прощение согрешений наших, и еже избавитися нам от всегубительныя язвы, труса, потопа, огня, меча и вечныя казни. Моли благость Его, еже ущедрити град сей, [обитель сию] и всякую страну христианскую. Исходатайствуй у Царя царствующих на враги победу и одоление благочестивому императору нашему, всей же даржаве его мир, тишину, твердость в вере и преспеяние во благочестии: нам же, чтущим честную память твою, испроси благодатное укрепление на дела благия, да благоугодное Владыце нашему Христу Богу зде творяще, сподобимся молитвами твоими наследовати Царствие Небесное и тамо прославляти Его, со Отцем и Святым Духом, во веки веков.

Тропарь, глас 3

Вели́ка обре́те в беда́х тя поборника вселенная, страстотерпче, язы́ки побежда́юща. Якоже убо ли́еву низложил еси гордыню, на подвиг дерзновенна сотворил Нестора: тако, святе Димитрие, Христу Богу молися, даровати нам велию милость.

Величание

Величаем тя, страстотерпче святый Димитрие, и чте́м честная страдания твоя, яже за Христа претерпе́л есѝ.

Октовриа 27. Молитвы святому благоверному князю Андрею, Смоленскому и Переяславскому чудотворцу. Из службы

Молитва 1

О преизрядный и дивный в чудесех, прославляемый от Бога в небеси, делателю Христова винограда, жителю Вышняго Сиона, предустроеннаго града Иерусалима, княже Андрее благоверне, святых Ангел присная сый радость и человеком дивная благость, пречудных и дивных небесных селений бывый желатель, ныне же со всеми святыми тех сопричастник являяйся! Аще естеством был еси человек, но усердно в по́двизех потща́вся, в несконча́емем ве́це со Ангелы водвори́лся еси. Стра́нен и пришле́ц на земли был еси, того ради житие в небеси получил еси: оставив отечество земное и тленное, восприял еси нетленное и вечное. Сугубо тя Господь Бог увенча̀ и чудес тебе дар дарова̀, еже на земли недуги исцеляти и приходящыя к тебе с верою милостивно присещати: яви бо тя нам Господь Бог Милосердый предстателя, якоже Отец болящым чадом благосердый. Сего ради усердно молимся тебе, предстояще пред твоим многоцелебным гробом, да покры́еши нас грешных твоим предивным покровом, не от злата и сребра истканным, но от Бога ти во благодати пода́нным. Аще бо во гресе всяком осквернени есмы, но слезы покаяния изливающе, умильно к тебе взываем: помилуй нас, о свяиый и дивный благоверный княже Андрее, подаждь нам руку помощи и избави нас от всякаго навета вражия: буди нам милостивый защи́титель и от болезней наших скорый целитель: свободи нас от руки чужда́го и от всякаго прило́га зла́го. Се бо многими беда́ми есмы обстои́ми, всеми злыми скорбьмѝ сокрушѐннии, ко дверем смертным от скорби снидохом, и Бога грехми прогне́вахом, и от себе Его удали́хом. Темже буди нам вождь и заступник пред Го́сподем нашим Иисус Христом и Его Безначальным Отцем и Святым Духом, да получим мы грешнии грехов прощение и от Него милость многу. Буди же ходатай и молитвенник теплый о благочестивейшем, самодержавнейшем, великом государе нашем, императоре Николае Александровиче всея России, и о всем царствующем доме, и о всемих христолюбивом воинстве: буди, о святче Божий, споборник и заступник всему христолюбивому воинству на вся неправославныя и крестоненависныя злочестивыя и иноплеменныя враги и супостаты, да вси покорени будут под руку крестоносному императору  нашему, и память их злочестивыя веры да потребится: Русскую же страну нашу не забуди, но присно на ню̀ призира́й, и всякое изобилие плодов земных ей подати Бога умоля́й: и всем призывающым тя с верою во всяких скорбех, болезнех и напастех буди помощник и хода́тай, благодатию и щедротами и человеколюбием Господа Бога и Спаса нашего Иисуса Христа, Емуже от нас буди слава и поклонение ныне и во вся веки нескончаемых веков.

Молитва 2

Владыко человеколюбче, Царю Небесный, Господи Иисусе Христе, Боже наш, нас ради человек и нашего ради спасения на землѝ с плотию яви́выйся и с человеки поживый! Молим Тя, Вседержителю Господи, долготерпеливе и многомилостиве, даждь нам всегда пред Тобою имети мысль благу и Тебе благоугодну, да от нощнаго и мрачнаго зла диавола свободившеся, со всяким усердием поработаем Тебе в преподобии и правде и истине, со страхом и трепетом во вся дни жизни нашея, и до последняго издыха́ния воспева́ти Тя будем, ко славословию же Твоему всегда бо́дренно и тре́звенно потщимся: вся бо Ти возможна суть, и без Твоея воли ничтоже есть: твориши бо вся, елика хощеши творити и елика Твое неизреченное благоволит благосердие. Како убо умолчит язык наш, илѝ ки́ими песньми во хвалении не воспеваем о Твоем к нам великом милосердии, яко таковы́я радости нас грешных и веселия духовнаго исполнил еси? Ка́ко же возмо́жем воспе́ти язы́ки нашими илѝ усты̀ восхвали́ти и возвели́чити неизреченную Твою к нам благость, е́юже показал еси нам такова̀ праздника днесь? О Владыко человеколюбче, Боже наш, Господи Иисусе Христе! Услыши нас недостойных, молящихся Тебе, и посли в помощь нам праведнаго сего Твоего угодника, благовернаго князя Андреа, яко да молитвами его свободимся от всяких напастей душевных и телесных: ибо мы, прибегающе ко гробу его, покланяемся и целуем с верою святый его образ: подава́ет бо молящымся многая чудеса и исцеления. О дивный в чудесех, прославляемый от Бога на небесех, святый благоверный княже Андрее! Молися о нас грешных ко Христу Богу, яко да помилует нас всех, приходящих ко гробу твоему, и молящихся тебе с верою, и покланяющихся образу святому твоему, и с любовию целующих его, и тя на помощь во всяких ско́рбех и напа́стех призывающих: буди теплый вспомогатель и в болезнех скорый целитель: даруй здравие неоскудно и помощь неосла́бну нам молящымся тебе: буди же помощник и заступник сирота́м безпо́мощным и вдови́цам, и всем подаждь вся ко спасению и пользе просимая: и святыми твоими молитвами защити, соблюди и сохрани Российския грады и страны от всех зол, болезней, напастей и навет вражиих и от нахождения иноплеменных и мождоусобныя брани: и предстоя у престола Владычня, молися о нас грешных ко Христу Богу нашему, Емуже подобает всякая слава, честь, поклонение и великолепие, купно со Отцем и со Святым Духом, ныне и присно и во веки веков.

Тропарь, глас 8

  1. Блаженство Евангельское возлюбив, богомудре княже Андрее, чистоту сердца девством почтил еси, и суету мiра сего презрев, устремился еси зрети Бога, Иже тя прослави чудесы̀ во врачевании разли́чне страждующих. Сего ради, молим тя: проси нам у Христа Господа от всяких скорбей избавления и получения Царства Небеснаго.
  2. Град твой Смоленск яко чуждь имея, водворился еси во град Переяславль, и в дому святителя Николая жестоким житием временную жизнь совершив, востекл еси в горняя предстояти Христу. Того моли о творящих память твою, да вси вопием ти: радуйся, святе княже Андрее, Ангелом собеседниче и челове́ком помощниче.

Величание

Ублажаем тя, святый благоверный княже Андрее, и чтем святую память твою: ты бо молиши за нас Христа Бога нашего.

Октовриа 28. Молитвы святей мученице Параске́ве нареченней Пятнице

Молитва 1. Из акафиста

Святая невесто Христова, многострадальная мученице Параскево! Вемы яко от юности твоея ты всею душею твоею и всем сердцем твоим возлюбила еси Царя славы, Христа Спасителя, и Ему Единому уневе́стилася еси, неимущым вся имения твоя расточивши. Ты силою благочестия, целомудрием же и праведностию яко лучами солнечными просияла еси, посреде неверных свято поживши и безбоязненно тем Христа Бога проповедавши. Ты от дней юности твоея, от родителей научена бывши, дни искупительных страстей Господа нашего Иисуса Христа благоговейно чествовала еси, Егоже ради и сама волею пострадала еси. Ты, десницею Ангела Божия от неисцельных ран дивно исцеле́на бывши и восприе́мши неизреченную светлость, неверныя мучители удивила еси. Ты, именем Господа нашего Иисуса Христа и силою молитвы твоея в капище языческом вся идолы до́лу пове́ргши, во прах сокрушила еси. Ты, свеща́ми опаля́ема су́щи, единою молитвою твоею ко Всесильному Господу угасила еси огнь естественный, и темже пламенем, чудесне возжженным чрез Ангела Божия, неистовыя беззаконники попалила еси, и мног народ людей к познанию Истиннаго Бога привела еси. Ты, во славу Господа ме́чное усече́ние во главу̀ прии́мши, доблественно скончала еси страдальческий твой подвиг, и душе́ю твоею на небеса в чертог вожделеннаго твоего Жениха Христа, Царя славы, востекла̀ еси, иже тако о тебе возгласи́ти благоволѝ: радуйтеся, праведнии, яко мученица Параскева увенча́ся! Темже и мы, днесь во храм сей [твой] сошедшеся, поклонение ти радостно приносим, и взирающе на святую твою икону, со умилением вопием ти: о всечестна́я Параске́во! Вемы, яко ве́лие и́маши дерзновение ко Господу: умоли убо Его человеколюбца и о нас грешных, да терпение и благодушие в бедах и скорбных обстоя́ниих нам дарует, да подаст же благоденственное и мирное житие, здравие и спасение и во всем благое поспешение благочестивейшему, сомодержавнейшему, великому государю нашему, императору Николаю Александровичу, и всему царствующему дому: Отечеству же нашему да низпо́слет святое свое благословение и мир, и всем православным христианом да подаст твоиси святыми молитвами в вере и благочестии утверждение и в христианстей любви преспеяние: да очистит нас грешных от всякия скверны и порока: да оградит нас святыми своими Ангелы, да заступит, сохранит и помилует всех Своею благодатию, и наследники и причастники Небеснаго Своего Царствия вся ны да соделает, яко да твоими святыми молитвами, всеславная невесто Христова Параскево, спасение улучивше, прославим вси пресвятое и великолепое имя дивнаго во святых Своих Истиннаго Бога, Отца и Сына и Святаго Духа, всегда, ныне и присно и во веки веков.

Молитва 2, чтомая в Московской Параскевиевской, на Пятницкой улице, церкви

О святая и преблаженная мученице Христова Параскево, красото девическая, мучеников похвало, чистоты образе, великодушных зерцало, премудрых удивление, веры христианския хранительнице, идольския льстѝ обличительнице, Евангелия Божественнаго поборнице, заповедей Господних ревнительнице, сподобльшаяся приити ко пристанищу вечнаго покоя и в черто́зе Жениха твоего Христа Бога светло веселящаяся, сугу́бым венце́м девства и мученичества украше́нная! Молим тя, святая мученице: буди о нас печальница ко Христу Богу, Егоже преблаженнейшим зрением присно веселишися: моли Всемилостиваго, Иже словом о́чи слепым отве́рзе, да избавит нас от болезней оче́с наших, телесных вкупе и душевных: разжени твоими святыми молитвами темный мрак прибывший от грехов наших: испроси у Отца светов свет благодати душевным и телесным очесе́м нашым: просвети нас, омраченных грехми, светом Божия благодати, да твоих ради святых молитв дае́тся безоче́сным сладкое зрение! О великая угоднице Божия! О мужественнейшая дево! О крепкая мученице святая Параскево! Святыми твоими молитвами буди нам грешным помощница. Хадатайствуй и молися о окаянных и зело нерадивых гре́шницех, ускорѝ на помощь нам, яко зело̀ не́мощни есмы̀. Моли Господа, чистая девице, моли Милосердаго, святая мученице, моли Жениха твоего, непорочная Христова невесто, да твоими молитвами посо́бствовани, мрака же греховнаго избывше, во свете истинныя веры и деяний Божественных внидем во свет вечный дне невечерняго, во град веселия приснаго, в нем же ты ныне светло блистаеши славою и веселием безконечным, славословящии и воспевающии со всеми небесными силами Трисиятельное Единое Божество, Отца и Сына и Святаго Духа, ныне и присно и во веки веков.

Тропарь, глас 4

Премудрая и всехвальная Христова мученица Параскева, мужесткую крепость прие́мши, женскую же немощь отвергши, диавола победѝ и мучителя посрамѝ, вопию́щи и глаго́лющи: приидите, тело мое мечем сецы́те и огнем сожгите, аз бо ра́дующися иду ко Христу Жениху моему. Тоя молитвами, Христе Боже, спаси душы нашя.

Октовриа 28, маиа 6 и августа 28. Молитва преподобномуИову, игумену и чудотворцу Почаевскому. Из службы со акафистом

О преподобне отче Иове, иноков трудолюбнаго жития богомудрый наставниче, кротости и вездержания, чистоты и целомудрия, братолюбия и нищелюбия, терпения и бдения от ранния юности до поздния старости неутомимый подвижниче, веры православныя великий ревнителю и непреоборимый поборниче, земли Волы́нския и Га́лицкия светило богосветлое и святыя Почаевския обители непобедимый защитниче! Призри оком благоутробия твоего на нас недостойных чад твоих, к тебе усердно по вся дни прибегающих, и на боголюбивыя люди сия, пред твоими духоносными и многоцелебными мощами собравшыяся и благоговейно к тебе припадающыя, и испроси предстательством твоим ко Всевышнему Владыце им и нам вся, яже к животу и благочестию, полезная и благопотребная: болящыя исцелѝ, малодушныя ободрѝ, скорбя́щыя уте́ши, обидимыя заступѝ, немощны́я подкрепѝ и пове́рженныя до́лу возста́ви, всем вся, благодатию тебе от Бога данною, даруй, по коего́ждо ну́жде и потре́бе, во спасение души и во здравие телу. Вознеси угодниче Божий, всемощную молитву твою и о благочестивейшем государе императоре нашем Николае Александровиче и о всем царствующем его доме, да будет в его державе всегда мир и тишина, благочестие и благоденствие, в суде́х правда и милость, в сове́тех мудрость и благое преспе́яние, да утвержда́ется же во благих челове́цех верность, в злых же страх и болезнь, воеже преста́ти им от зла и твори́ти до́брая, да тако в державе Российстей Царство Христово расте́т и мно́жится и да просла́вится в нем Бог, дивный во святых Своих: Емуже Единому подобает всякая слава, честь и поклонение, Отцу и Сыну и Святому Духу, ныне и присно и во веки веков.

Тропарь, глас 4

Многострада́льнаго пра́отца долготерпение стяжав, Крести́телеву воздержанию уподобля́яся, боже́ственныя же ревности обою̀ приобщаяся, тех имена достойно прия́ти сподобился еси, и истинныя веры был еси проповедник безбоя́знен: темже монахов множество ко Христу привел еси, и вся люди в православии утвердил еси. И́ове преподобне отче наш, моли спастися душа́м нашым.

Октовриа 29. Молитва преподобномученице Анастасии Римляныни. Из службы

Де́вственниц похвало̀ и мучениц сла́во, Анастасие преподобная! К тебе во умилении сердец на́ших припа́даем и твоего заступления у Господа о нас молим. Аще бо чистоте твоей не поревнова́хом и безбоязненнаго исповедания твоего не приобщихомся, паче же многими прегрешеньми и лютыми паде́ньми и отсту́пствы гнев Божий привлеко́хом: но не хощем во гресех наших умрети, и на твоя му́жеския подвиги взирающе, па́ки на одоление страстей наших ополчимся. Сие же ведуще, яко кроме благодатныя помощи ничто́же благое сотвори́ти возмо́жем, ту́ю нам от Господа пода́ти тебе просим. Ты бо, преподобномученице преславная, ве́лие ко Влады́це дерзновение стяжала еси, яко прославившая Его в чистоте души твоей и в телесѝ твоем страда́льчестем, занѐ вся прельще́ния и преще́ния мучителя презревши, искоренение же зубов, и ногтей истерзание, и сосце́в и рук и ног отсечение сла́дце претерпе́вши, дерзновенно вопияла еси: Христос есть богатство мое и похвала. Темже от Того богатства и нашей нищете духовная подаждь дарования, и от безмерных прегрешений жизнь нашу соблюди, мир и безмятежие нам испроси, от ну́жды и уныния нас предстательством твоим огради, друг ко другу нас в послушании и братолюбии настави, и ко Господу очи сердец наших всегда возводѝ, во еже присно славити нам Отца и Сына и Святаго Духа державу, и твое теплое предстательство во веки веков.

Октовриа 29. Молитва преподобному Авра́мию, Ростовскому чудотворцу. Из акафиста

О преподобне отче наш Авра́мие! Не забу́ди нас грешных, но помина́й всегда во святых твоих молитвах стадо твое, еже сам собрал еси, и моли за ны̀, ча́да твоя, отче священный, яко име́яй дерзновение ко Господу: не мним бо тя ме́ртва су́ща, аще и преставился еси от нас, пастырю наш добрый. Се мощи твоя святыя очесе́м нашим предлежат, святая же твоя душа, со а́нгельскими безпло́тных ли́ки престолу всех Царя предстоя́щи, достойно веселится. Испросѝ убо нам время на покаяние, яко да возмо́жем невозбра́нно прейтѝ от земли на небо, и от вечныя муки изба́вльшеся, Небеснаго Царствия насле́дницы будем со всеми праведными, от века благоугодившими Господу нашему Иисусу Христу, Емуже подобает всякая слава, честь и поклонение, со Отцем и Сыном и Святым Духом, ныне и присно и во веки веков.

Тропарь, глас 1

Просветився Божественною благодатию, неверныя люди наставил еси к свету богоразумия: и по смерти сия́я светлостию жития твоего, источа́еши исцеления притекающим с верою к ра́це мощей твоих. Авра́мие отче наш, Христа Бога моли дарова́ти нам ве́лию милость.

Месяц ноемврий.

Ноемвриа 1. Молитвы святым безсре́бренником Космѐ и Дамиа́ну, чтомая в Московской Космодамианской, на Покровке, церкви

О чудотворцы славнии, вра́чеве безме́зднии, Космо̀ и Дамиа́не! Вы, от юности Христа Бога возлюбивше, не врачевания то́кмо искусство, но паче неоску́дную благодать исцеления всяких недугов от Бога прия́ли естѐ. Темже и нас, пред честною иконою вашею припа́дающих, скоро услы́шите. Юныя дети, вашея помощи во учении книжнем прося́щыя, молитвами своими наставите, да вашему житию ревну́юще, не земное то́чию приобрящут, но паче во благочестии и правей вере непрестанно да преспева́ют. На одре болезни лежащым, в человечестей помощи отчаявшымся, к вам же тепле с верою и усердною молитвою прибега́ющым, исцеление болезней вашим ми́лостивым чудоде́йственным посеще́нием да́руйте: такожде и от лютых недуг во уныние, малодушие и роптание пришедшыя данною вам от Бога благодатию в терпении утверди́те и наста́вите, да уразумеют волю о них Божию святую и совершенную, и причастницы соделаются Божия спасительныя благодати. Братию святаго храма сего, вашему святому заступлению от Бога вруче́нную, и всех к вам усердно прибегающих от болезней лютых невредимы сохраните, и от внезапныя Отца и Сына и Святаго Духа державу, и твое теплое предстательство во веки веков.смерти оградите, и мощным ходатайством вашим к Богу в правей вере тверды соблюдите, во благочестии же преспе́ющя, да с вами вкупе сподо́бятся в будущем ве́це присно воспевати и славити всесвятое и великолепое имя Отца и Сына и Святаго Духа во веки веков.

Тропарь, глас 8

Святи́и безсре́бренницы и чудотво́рцы Космо̀ и Дамиа́не, посети́те не́мощи нашя: ту́не прия́сте, ту́не дади́те нам.

Ноемвриа 4 и маиа 10. Молитва блаженному Симону, Христа ради юро́дивому, Ю́рьевецкому чудотворцу, чтомая в Богоявленской церкви града Ю́рьевца, Костромски́я епархии

О Всесвятыя Живоначальныя и Нераздельныя Троицы истинный угодниче и верный ра́бе, блаже́нне и приснопа́мятне Си́моне! О избранниче Божий, мiру яко юро́д бы́вый, но примудрыя житием твоим удивляяй! О преукраше́нный добродетельми дивный чудотворче Симоне! Се присно тя ублажаем и ублажати тя будем, предъублаже́ннаго Го́сподем нашим Иисус Христом. Ты бо, поревновав всех праведных блаженству, оставил еси вся мiра сего преходящая, и восле́д вечныя нашея радости и воскресения, Всесладча́йшаго Иисуса, потекл еси, и всесильною Того помощию даже горняго Сиона достигл еси, иде́же есть веселя́щихся жилище. Ублажающе убо тя, прилежно молим, праведный человече Божий: призри на ны̀, во многая искушения впа́дающыя: моли о нас неизреченную всех человек радость и упование, собезначальнаго Отцу и Духу, Единароднаго Сына и Слово Божие, да и нас, Того непамятозлобное милосердие прогневляющих, не оставит, и вся на пользу нам да устроит: паче же да утвердит ны во Своей православней, истинней и непорочней вере непоколебимы, и праведными Своими судьбами да спасет нас, нижѐ да попу́стит ны̀ искуси́тися па́че, не́же можем, от бед же и печалей, присно на ны̀ здѐ грех ради наших бывающих, милостивно нас да избавит. Ей, молим тя, ра́бе Христов: якоже в жизни твоей на тре́бующыя помощи призира́л еси, тако и ныне нас тебе молящихся не отврати, но предстани о нас ко Господу, и от лютых падений молитвами твоими изьмѝ нас: умоли Его, да град твой сей, в немже добродетельно пожи́в, Богу угодил еси, сохранит от всех навет вражиих, и люди в нем живущыя вечныя жизни достойны да покажет. Паки молим тя, блаженне Симоне: посещай нас тебе молящихся в ну́ждах наших, да тобою заступа́еми, непрестанно прославляем Христа Бога нашего, теплаго предста́теля нам тя даровавшего. Яко Тому подобает всякая слава, честь и поклонение, со Отцем и Святым Духом, ныне и присно и во веки веков.

Ноемвриа 5. Молитва святителю Ио́не, архиепископу Новгоро́дскому, О́тенскому чудотворцу, чтомая в Новгородском Отенском монастыре

О великий угодниче Божий, преславный чудотворче и скорый помощниче в беда́х сущым, святителю отче Ионо! Предстоя со Ангелы небесному престолу Великаго Царя, Господа нашего Иисуса Христа, велие дерзновение к нему, яко верный Тому подражатель и таи́нник Божий, и́маши. К тебе убо, яко многомощному предстателю нашему и усердному о нас молитвеннику, мы грешнии и недостойнии прибегаем. Моли благость Его, яко да отврати́т от нас гнев Свой, праведно по дело́м нашым на ны дви́жимый, и презрев безчисленная прегрешения наша, обратит нас на путь покая́ния, и на стезѝ за́поведей Своих десницею Своею да утвердит нас. Огради, святителю Христов, молитвами твоими жизнь нашу, и во всем благое поспешение испроси нам у великодаровитаго Бога нашего, вся к житию и благочестию потребная нам даруя. И якоже в земнем житии твоем ближним благоде́тельствовал еси, нищия питая, вдовицы и сироты̀ заступая и от губительства смертнаго паству твою молитвами твоми избавляя: тако и нас и обитель твою святую от всяких напастей и бед и смертоносных недугов предстательством твоим избави, и от всех враг видимых и невидимых молитвенным покровом твоим защити. Сохрани, угодниче Божий, в мире, здравии и долгоденствии благочестивейшаго государя нашего, императора Николая Александровича, и державе его и всему царству Российскому буди покровитель и заступник крепкий, яко да тихое и безмолвное житие поживем во всяком благочестии и чистоте, и тако в мире временное сие житие преше́дше, в вечный достигнем покой, иде́же сподо́бимся Небеснаго Царствия Христа Бога нашего, славяще Его, со Безначальным Его Отцем и Пресвятым Духом, во веки веков.

Тропарь, глас 4

Исправление веры и образ кротости, якоже сад посреде рая, преподобными делы твоими мiр просвещаеши. Сего ради к честне́й ра́це твоей любовию прикасаемся, и верно вопием: предстани в помощь воспевающым память твою светоносную, отче Ионо, и моли спастися душам нашым.

Ноемвриа 6. Молитвы преподобному Варлаа́му Ху́тынскому

Молитва 1, из акафиста

О преподобне и богоносне отче наш Варлааме! Услыши нас молящихся тебе, и буди нам помощник в скорбех наших, и избави нас от напастей, за множество прегрешений находящих на ны. Умоли, угодниче Христов, Всеблагаго Бога даровати нам оставление всех от юности нашея до настоящего дне и часа делом, словом, помышлением и всеми чувствы содеянных нами согрешений, и исходатайствуй нам невозбранный вход в Небесное Царствие, да прославляем непрестанно славимую от Ангел Всесвятую Троицу, Отца и Сына и Святаго Духа, и твое милостивное предстательство, в безконечныя веки веков.

Молитва 2

О священная главо, преподобне и преблаженне отче наш Варлааме Великий! Не забуди нас грешных, но поминай нас всегда во святых твоих и благоприятных молитвах к Богу, яко имеяй к Нему дерзновение, и не премолчѝ моли́тися о нас, верою и любовию чтущих тя: тебе бо дадеся благодать молитися о нас. Не мним бо тя ме́ртва бы́ти, но и по смерти ведуще тя жи́ва су́ща, тебе молимся: духом твоим не отступай от нас, но сохраняй нас от стрел вражиих и всякия прелести бесо́вския и козней диавольских. Пастырю наш добрый и светило Российское! Се образ твой пред очима нашима предстоит всегда, святая же твоя душа со безплотными небесными лики у престола Вседержителя предстоит веселящися. Тебе припадаем, отче святый Варлааме, и со слезами молимся: моли Всесильнаго Бога о нас и о пользе душ наших, испроси нам время покаяния и невозбранно проити от всех воздушных князей и избавитися от вечныя муки, и Царствия Христова причастниками быти, да спасени твоим ходатайством, прославим Господа нашего Иисуса Христа, со Безначальным Его Отцем и Пресвятым Духом, ныне и присно и во веки веков.

Тропарь, глас 3

На земле лега́нием [лежанием], пощением же и бдением тело твое изнуряя, преподобне, вся плотска́я мудрования умертивил еси, и исцелений струя̀ незави́стная явился еси верою притекающым к ра́це моще́й твоих: Варлааме отче наш, моли Христа Бога, спастися душа́м нашым.

Ноемвриа 6. Молитва святителю Герману, архиепископу Казанскому и Свияжскому. Из службы с акафистом

Молитва 1

О святителю Христов Германе, богомудрый обители сея̀ основателю, духовный иночествующих вождю, образом христоподражательнаго жития твоего вся верныя научаяй! К тебе прибегаем и тебе усердно молим: сотвори святыми твоими молитвами, да и мы благодатиею Божиеюсозиждемся во обитель Духа Святаго, последованию же житию твоему во образ преподобия и правды Христовы преобразимся, и силою богоприятных молитв твоих осеня́еми, плоды благих дел приносити непрестанно потщи́мся, Господу благоугождающе. Помози нам во свете лица Его ходити и исполняти святую волю Его, во благо ближним нашым служи́ти и всеме́рно спасение свое соде́ловати, в терпении же всякия тесноты, скорбей и лишений преспевати и Господа своего всем сердцем любити. Моли, святче Божий, о укреплении немощи нашея помощию свяше, да избавит нас Господь от враг видимых и невидимых, от огненнаго и воднаго потребления, от неблагорастворе́ния возду́ха и тлетво́рных ветр, а паче от душепагубнаго пламене страстей наших, да под кровом благости и милосердия Божия тихое и безмолвное житиѐ поживем, жду́ще блаженнаго явления Господа и Спаса нашего Иисуса Христа, Емуже со Отцем и Святым Его Духом честь и слава во веки веков.

Молитва 2

О святителю Германе, великий угодниче Христов, обители сея богомудрый основателю, монашествующих наставниче и града сего̀ неусы́пный блюстителю, святою душею твоею на небеси престолу Святыя Троицы предстояй, нетленным же телом зде во обители твоей почива́яй и многразличная чудеса̀ молитвами твоими соверщаяй! Призри на ны и на вся люди, к цельбоносному твоему гробу притекающыя и твоего ко Господу хада́тайства во обдержащих ну́ждах просящыя. Се вси мы, по множеству грехов наших, не точию недостойни есмы принести со дерзновением молебный глас, но ниже возвести очес наших на небо: ты же, яко стяжавый дерзновение, принеси за всех, к честней ра́це твоей приходящих, те́плыя молитвы ко Господу, еже изба́витися нам от глада, потопа, труса, огня, меча, брани, от людей и диавола бывающия, и от всякия душевныя и телесныя болезни: да изба́вльшеся от сих и работающе Господу, Емуже предстои́ши, внидем в нескончаемый покой и вкупе с тобою прославим всех благих Подателя Бога, всегда, ныне и присно и во веки веков.

Молитва 3

О великий угодниче Христов Германе, теплый о нас ко Господу молитвенниче, всем притекающым к тебе в ско́рбех предста́телю! Испросѝ нам помощь в немощех, утешение в скорбех, здравие в неду́зех душевных и телесных: умоли Господа даровати нам оставление всех, нлика согрешихом от юности нашея в житии сем делом, словом, помышлением и всеми нашими чувствы: и при кончине нашей испроси нам время покаяния, да искренним исповеданием грехов сию предвари́вше, безбедно пре́йдем воздушная мытарства, и избавимся от осуждения и муки, милостию Безначальнаго Отца, благодатию собезначальнаго Сына и освящением Присносу́щнаго Духа, во веки веков.

Ноемвриа 6, декемвриа 16 и иануариа 15. Молитва преподобному Варлаа́му Ке́ретскому, чтомая в церкви села керети, Архангелогоро́дския епархии

О преподобный отче наш Варлаа́ме! Яко имеяй дерзновение ко Творцу, Истинному Богу нашему, помяни нас в молитвах твоих, и всех нас моления Богу возсылаемая приими, и принеси я̀ хода́тайственне. Молим тя, избави нас от всяких напастей, и на мо́ри от зе́льнаго обурева́ния и от потопления морска́го невредимы сохрани, и от всех видимых и невидимых враг ненаветны соблюди, яко да твоими, святе, молитвами согрешений наших оставление получим и вечных благ сподобимся, благодатию и человеколюбием Господа нашего Иисуса Христа, Емуже слава, со Отцем и Святым Духом, ныне и присно и во веки веков.

Ноемвриа 8. Молитвы святым Архангелом: Михаилу, Гавриилу и Рафаилу

Молитва 1, святому Архангелу Михаилу. Из службы с акафистом

Святый и великий Архангеле Божий Михаиле, неисповедимыя и Пресущественныя Троицы первый во А́нгелех предстоятелю, рода же человеческаго приста́вниче и храни́телю, сокруши́вый с во́инствы своими главу прегордаго денни́цы на небеси и всегда пострамляяй злобу и коварства его на земли! К тебе с верою прибегаем и тебе с любовию молимся: буди щит несокрушимь и забрало твердо святей Церкви и православному Отечеству нашему, ограждая их молниеносным мечемтвоим от всех враг видимых и невидимых. Буди наставник премудр и споспе́шник благочестивейшему императору нашему, износя ему у престола Царя царствующих просвещение и силу, радость, мир и утешение. Буди вождь и сора́тай непобеди́мь христолюбивому воинству нашему, венча́я его славою и победами над супостаты, да познают вси противляющиися нам, яко с нами Бог и святии Ангели Его. Не остави же, о Архангеле Божий, помощию и заступлением твоим и нас, прославляющих днесь святое имя твое: се бо, яще и многогрешнии есмы, обаче не хощем в беззакониих наших погибнути, но еже обратитися ко Господу и оживленным быти от Него на дела благая. Озари убо ум наш светом Божиим, да возможем разуме́ти, что есть воля Божия о нас благая и совершенная, и ве́дети вся, яже подобает нам творити и яже презира́ти и оставля́ти. Укрепѝ благодатию Господнею слабую волю и немощно́е произволение наше, да утверди́вшеся в законе Господни, преста́нем прочее вла́ятися земными помыслы и похотьмѝ пло́ти и ради тленнаго и земнаго вечная и небесная безумне забыва́ти. Над всеми же сими испроси нам свыше дух истиннаго покаяния, нелицемерную печаль по Бо́зе и сокрушение о гресе́х наших, да остающее нам число дней временнаго жития нашего во изглаждении зол содеянных нами совершим. Егда же прибли́житися час скончания нашего и свобождения от уз бре́ннаго сего телесѐ, не остави нас, Архангеле Божий, беззащитных противу духов злобы поднебесных, обы́кших прегражда́ти душѝ челове́честей восход в го́рняя: да охраня́еми тобою, безпредкнове́нне достигнем о́ных преславных селений райских, иде́же несть печаль, ни воздыхание, но жизнь безконечная, и сподобимся узре́ти пресветлое лице Всеблагаго Господа и Владыки нашего и Тому возда́ти славу, со Отцем и Святым Духом, во веки веков.

Молитва 2, томуже Архангелу

О святый Михаиле Архангеле, светлообра́зный и грозный Небеснаго Царя воево́до! Прежде Страшнаго Суда осла́би ми покаятися от грехов моих, от сети ловя́щих избави душу мою и приведи ю̀ к сотво́ршему ю̀ Богу, седящему на Херувимех, и молися о ней прилежно, да твоим хода́тайством послет ю̀ в место покойное. О грозный воеводо небесных сил, предстателю всех у престола Владыки Христа, хранителю твердый всем человеком и мудрый ору́жниче, крепкий воеводо Небеснаго Царя! Помилуй мя грешнаго, требующаго твоего заступления, сохрани мя от всех видимых и невидимых враг, паче же подкрепи от ужаса смертнаго и от смущения диавольскаго, и сподоби мя непостыдно предстати Создателю нашему в час Страшнаго и Праведнаго Суда Его. О всесвятый великий Михаи́ле Архистрати́же! Не презри мене грешнаго, молящагося тебе о помощи и заступлении твоем в веце сем и в будущем, но сподоби мя тамо купно с тобою славити Отца и Сына и Святаго Духа во веки веков.

Молитва 3, святому Архангелу Гаврии́лу

О святый великий Архангеле Гаврии́ле, Божию престолу предстоя́й и озарением от Божественнаго света осиянный, ве́дением же непостижимых таин о превечней премудрости Его просвещенный! Всеусердно молю тя, настави мя к покаянию от злых дел и ко утверждению в вере моей, укрепи и огради душу мою от искушений прельстительных, и умоли Создателя нашего о отпущении грехов моих. О святый великий Гаврии́ле Архангеле! Не презри мене грешнаго, молящагося тебе о помощи и заступлени Твоем в ве́це сем и в будущем, но присно помощник мне яви́ся, да непрестанно славлю Отца и Сына и Святаго Духа державу и твое предстательство во веки веков.

Молитва 4, святому Архангелу Рафаи́лу

О святый великий Архангеле Рафаи́ле, престолу Божию предстоя́й! Ты благодатию от Всемогущаго Врача душ и телес наших тебе данною, праведнаго мужа Тови́та от слепоты̀ телесныя избавил еси, и сына его Тови́ю, спутешествуя ему, от злаго духа сохранил еси. всеусердно молю тя, буди мне путеводи́тель в жизни моей, сохрани от всех видимых и невидимых враг, исцели душевныя и телесныя болезни моя, управи жизнь мою к покаянию во гресех и ко творению добрых дел. О святый великий Рафаи́ле Архангеле! Услыши мене грешнаго молящегося тебе, и сподоби в здешней и будущей жизни благодарити и славити общаго Создателя нашего в безконечныя веки веков.

[Молитвы 2‑я, 3‑я и 4‑я из древния рукописи]

Тропарь, глас 4

Небесных воинств Архистрати́зи, молим вас присно мы недостойнии, да вашими молитвами оградитѐ нас кровом крил невеще́ственныя вашея славы, сохраня́юще ны припа́дающыя прилежно и вопию́щыя: от бед изба́вите ны, яко чинонача́льницы вышних сил.

Ноемвриа 11 и августа 13. Молитва блаженному Макси́му, Христа ради юро́дивому, Московскому чудотворцу

Угодниче Божий, молитвенниче наш теплый и скорый помощниче, блаженне Макси́ме! Припа́дающе к ра́це мощей твоих, прославляем многотру́дныя подвиги юро́дства твоего Христа ради. Возлюбив бо Единаго Бога от всея души твоея, мирски́ми красота́ми наслаждатися не восхотел еси, любвѐ сродников, богатства и славы временныя отре́клся еси, и безприютное житие возлюбил еси. Прилежав же о спасении души, плоть твою, наготою телесною, мра́зом и зноем, постом и бдением и на земли лежанием изнури́л еси, и вся страсти ея̀ ду́хови покорил еси, на земли небесно, во плоти же духовно пожил. Таже умом весь ко премiрным вземся, плотскую мудрость отри́нул еси, и быв мудр о Христе, юро́д мíрови показался, от неразумных многия обиды и биения благодушно претерпевая и многи нечестивыя на путь спасения наставляя. Темже по скончании твоих подвигов Всеправедный Судия нетлением честны́х твоих моще́й и многими чудесы̀ тя просла́ви, душу же твою святую в небесныя обители всели, иде́же предстоя̀ престолу неприступнаго Божественнаго Света, в Нем, якоже в зерцале, нашя ну́жды зриши, прошения слышиши, и якоже друг Христов, и́маши ве́лие к нему дерзновение молитися о нас. Сего ради усердно просим тя: помоли́ся Господу Богу о нас к земли приве́рженных, да и мы, в подражание твоему ангелоподо́бному на земли житию, в суетных житейских попечениих и в земных наслаждениих ника́коже погря́знем и душею ко тленным мiра сего бла́гом прилепля́тися не де́рзнем. Молися, угодниче Христов, да обратит Господь нашя мысли и желания в небесным и да укрепит будущих нетленных сокровищ жела́ти, да подаст нам силу к побежде́нию страстей, мыслей и желаний греховных, да плени́т наш ум в послуша́ние веры, да избавит от высокоумия, суемудрия, ложных пагубных учений, и мудрость духовную нам да́рует: таже окамене́нная сердца наша слезами умиления и о гресех сокрушения да растворит, и да согреет я̀ к нашему Создателю любовию и братолюбием ко ближним нашым. Молимся тебе, Максиме блаженне: испроси всем, во всякой нужде сущым и ко твоему заступлению прибегающым, всякий дар коемуждо благопотребен: больным исцеление, печальным утешение, бедствующым помощь, обиженным защищение. Принеси ко Господу святую молитву и о всех нас многогрешных, яко да не по грехам нашым возда́ст нам, нижѐ по беззаконием нашым нака́жет нас, но да отвратит всякий гнев, праведно движимый на ны̀, и да проба́вит милость Свою на нас, от всяких нужд, бед, напастей, скорбей и болезней избавляя, и и́миже весть судьбами да наста́вит нас на путь спасе́ния, и прочее время жития нашего в покаянии и благочестии прейтѝ нам да поможет, и да сподобит нас христианскую кончину неболе́знену, непосты́дну и мирну прия́ти и Небеснаго Царствия наследие получи́ти со всеми святыми во веки веков.

Тропарь, глас 5

Нагото́ю телесною и терпением обнажи́л еси вражия кова́рствия, обличая неподобное его деяние: зе́льне стражда̀ солнечный вар и ну́ждныя великия сту́дени, мра́за и огня не чу́л еси, Божиею помощию покрываемь, Максиме премудре. О верою творящих память твою честно, и усердно притекающих к ра́це мощей твоих, моли избавитися от бед и падения избежати.

Ноемвриа 11 и марта 1. Молитва преподобному Марти́рию, Зелене́цкому чудотворцу. Из службы

О пастырю добрый, наставниче наш, преподобне отче Мартирие! Услыши ныне к тебе приносимое моление наше: ве́мы бо, яко духом с нами пребываеши. Ты убо, преподобне, яко име́яй дерзновение ко Владыце Иисусу Христу, Богу нашему, и ко Пречи́стей Богоматери, буди ходатай и молитвенник теплый о обители сей, ю́же возградил еси, и о нас недостойных рабе́х, живущих в ней, ея́же ты просветитель еси и начальник, богособра́нному же твоему братству помощник и заступник присно являешися: яко да твоим предстательством и молитвами невреди́ми на месте сем пребудем, от бесо́в же и злых человек не наве́товани и от всех бед и напастей свободни сохранимся. Всем же отвсюду приходящым во святую обитель твою и молящымся тебе с верою и покланяющымся ра́це моще́й твоих, во еже изба́витися от всякия скорби, болезни и напасти, милостивне поспешѝ, даровати же православным мир, тишину, благоденствие и изобилие плодов земных: и о всех нас теплый предстатель ко Господу и помощник душа́м нашым буди, еже отпусти́тися нам согрешением нашым и молитвами твоими, святе, изба́витися нам от вечнаго мучения и сподобитися Небеснаго Царствия со всеми святыми, да славу, благодарение и поклонение возсылаем Единому Богу, в Троице славимому, Отцу и Сыну и Святому Духу, ныне и присно и во веки веков.

Тропарь, глас 2

От юности, богоблаженне, Христа возлюбив, Отечество оставил еси, и всех мiрских мяте́жей уклонився, в тихое пристанище пречестныя обители Богоматерни достигл еси: отню́дуже увидев непрохо́дную пустыню, крестови́дною заре́ю показанную, жела́тельне ю̀ обрел еси, и в ней вселився, иночествующих собрал еси, и сих уче́ньми своими, яко ле́ствицею восхо́дною на небо, трудолюбно тщался еси возводи́ти к Богу. Емуже молися, богомудре Марти́рие, дарова́ти благочестивейшему императору нашему Николаю Александровичу на врагѝ победы и душа́м нашым ве́лию милость.

Ноемвриа 12. Молитвы святителю Иоа́нну Ми́лостивому, патриарху Александрийскому

Молитва 1, чтомая в церкви Иси́доровскаго дома убогих, во граде святаго Петра

Святителю Божий Иоанне, милостивый защитниче си́рых и су́щих в напа́стех! К тебе прибегаем и тебе молимся, яко скорому покровителю всех ищущих от Бога утешения в беда́х и ско́рбех: не преста́й моля́ся ко Господу о всех с верою притекающих к тебе! Ты преисполнен быв Христовы любвѐ и благости, явился еси яко чудный чертог добродетели милосердия и стяжал еси себе имя милостивый: ты был еси яко река, непрестанно текущая щедрыми ми́лостьми и всех жаждущих обильно напая́ющая. Веруем, яко, по преселе́нии от земли на небо, усугу́бися в тебе дар благодати сея и яко соделался еси неисчерпаемый сосуд всякия благосты́ни. Сотвори убо твоим хода́тайством и заступлением пред Богом всякия уте́хи, да вси прибегающии к тебе обретают мир и безмятежие: даруй им утешение временных и пособие в ну́ждах житейских, всели в них надежду вечнаго упокоения во Царствии Небеснем. В житии твоем на землѝ ты был еси приста́нище всем су́щым во всякой беде и ну́жде, оби́димым и неду́гующым, и не един от притека́вших к тебе и проси́вших у тебе милости лишен бысть твоея благостыни: то́жде и ныне, царствуя со Христом Богом на небеси, яви всем покланя́ющымся пред честно́ю твоею иконою и моля́щымся о помощи и заступлении. Не то́чию сам ты творил еси милость безпомо́щным, но и сердца других воздвигал еси ко утешению немощных и ко призрению убогих: подви́гни убо и ныне сердца̀ верных к заступлению сирых, ко утешению скорбящих и успокоению неимущих, да не оскудева́ют в них да́ры милости, па́че да всели́тся в них и в дому̀ сем, призрева́ющем страждущих, мир и радость о Ду́се Свя́те, со славу Господа и Спаса нашего Иисуса Христа, во веки веков.

Молитва 2, чтомая в Угличском Богоявленском монастыре

О святителю Христов Иоанне милостиве, великий молитвенниче, сирых покровителю, в ну́ждах сущим помощниче, немощных целебниче и сущих в напастех защитниче! К тебе, яко скорому помощнику и великому хода́таю, с верою и любовию притекаем, и пред святыми твоими цельбоносными моща́ми и святою иконою тебе смиренно молимся. Ты на земли Христовы любвѐ и благости ко страждущым исполнен пребывал еси, и яко чудная сокровищница милосердия, имя милостивый себе стяжа́л еси. ты, преизоби́луя щедро́тами милостей твоих, яко непрестанно текущая многово́дная река явился еси, всех жаждущих обильно напая́ющая. Ты, преиспо́лнен сый любвѐ и благости, яко преизоби́льная житница чистыя питательныя пшеницы был еси, всех а́лчущих обильно насыщающая. Ты, богатство твое нищым и убогим расточив, неистощимое сокровище зла́та и сребра̀ показался еси, всех сущих в нищите снабдева́я и обидимых от немилосе́рдых заимода́вцев заступая: и тако ни еди́н от требующих твоих милостей и щедрот лише́н бысть твоея благостыни и снабде́ния. Ты был еси скорое вразумление, сердечное утешение и всемо́щное заступление всем человеком во всякой скорби и обиде, от злых людей по навету диаволю бываемым, и во всяком злоключении и испытании, по Божию попущению насылаемым, яко ни един же от притекавших к тебе лишен бысть твоего утешения и заступления. Ты, непрестанно в молитвах пребывая, стяжал еси богатство цельбоносныя молитвы, е́юже не то́чию сам ты всем милость творил еси, но и сердца̀ злых человек ко утешению скорбящих и озло́бленных, ко призре́нию немощны́х и убогих согрева́л еси. Темже веруем, благи́й святителю Христов, яко по преселе́нии твоем в небесныя обители великую мзду твоих молитв, подвигов и благотворения приял еси, па́че же усугу́бися в тебе благодатный дар милосердия, и оттолѐ сосуд неисчерпа́емь всякия благостыни соде́лался еси. Сотвори убо, угодниче Божий и милостивый помощниче, твоим хода́тайством и заступлением пред Господем Богом, да вси в молитвах прибега́ющии к тебе и пред святыми твоими моща́ми и благодатною твоею иконою покланя́ющиися мирное и безмятежное житие обря́щут, здравие же и спасение, любовь и единомыслие, во временных скорбех и печалех утешение, в житейских ну́ждах и лише́ниих помощь: всели в нас надежду вечных благ и во Царствии Небеснем упокоения, яко да вси, по твоему всемо́щному хода́тайству всякия да́ры милосердия прие́млюще, и сами любо́вию друг ко другу испо́лнятся, и да всели́тся в нас и во гра́де сем, во святей обители сей и во всех призывающих имя твое мир и радость о Ду́се Свя́те, Емуже подобает всякая слава, честь и поклоне́ние, со Безначальным Отцем и Единородным Его Сыном, всегда, ныне и присно и во веки веков.

Тропарь, глас 8

В терпении твоем стяжал еси мзду твою, отче преподобне, в молитвах непрестанно терпевый, нищая возлюбивый и сия удовли́вый: но молися Христу Богу, Иоанне милостиве блаженне, спастися душам нашым.

Ноемвриа 11 и иануариа 27. Молитвы святителю Христову Иоа́нну Златоу́стому

Молитва 1, из акафиста

О святителю великий Иоанне Златоу́сте! Ты многая различная дарования от Господа прия́л еси, и яко раб благи́й и верный, вся данныя тебе тала́нты до́бре умножил еси: сего ради вои́стину вселенский учитель был еси, яко всяк возраст и всяко звание от тебе поуча́ется. Се бо отроко́м послушания образ явился есѝ, юным ― целомудрия свети́ло, муже́м ― трудолюбия наставник, старым ― незлобия учитель, и́ноком ― воздержания правило, молящымся ― вождь от Бога вдохновенный, мудрости ищущим ― ума просветитель, вити́ям доброглаго́ливым ― слова жива́го источник неисчерпаемый, благотворящым ― милосердия звезда, начальствующым ― правления мудраго образ, правды ревнителем ― дерзновения вдохновитель, правды ра́ди гонимым ― терпения наставник: всем вся был еси, да всяко некия спасе́ши. Над всеми же сими стяжал еси любовь, яже есть соуз совершенства, и тою, яко силою Божественною, вся дарования в душѝ твоей во едино совокупил еси, и ту́южде любовь, разделе́нная примиряющую, в толковании слове́с апостольских всем верным проповедал еси. Мы же грешнии, по единому ки́йждо свое дарование иму́ще, единения духа в сою́зе мира не имамы, но бываем тщесл́авнии, друг друга раздража́юще, друг другу зави́дяще: сего ра́ди дарования наша разделе́нная не в мир и спасение, но во вражду и осуждение нам преложи́шася. Темже к тебе, святителю Божий, припадаем, раздором обурева́еми, и в сокрушении сердца просим: молитвами твоими отженѝ от сердец наших всяку гордость и зависть, нас разделя́ющыя да во мно́зех у́дех едино тело церковное невозбра́нно пребу́дем, да по словесѝ твоему молитвенному возлюбим друг друга и единомы́слием испове́мы Отца и Сына и Святаго Духа, Троицу Единосущную и Нераздельную, ныне и присно и во веки веков.

Молитва 2, чтомая во Успенской церкви града Углича, Ярославския епархии

О всесвятый и великий угодниче Христов, Иоанне Златоусте, началопа́стыря и архиере́а великаго, небеса прошедшаго, Господа нашего Иисуса Христа ученичѐ, ри́торе богоискусный и премудрый, обидимым великий заступниче и предстателю, больных немздоприе́мный целе́бниче, грешников ко спасению и покаянию истинный наставниче, нищих питателю, вдова́м и сирым помощниче и о всех теплый молитвенниче! Молим тя ныне, грешнии и недостойнии: моли о нас щедролюбиваго Бога, да подаст нам благодать Святаго Духа ко укреплению не́мощей наших, яко зело преогорчи́хом безмерную Его благость безчисленными нашими грехи, завистию, гордостию, гневом, братоненави́дением и иными грехѝ, и́хже и исчестѝ несть возможно: и уже не смеем на небо возвести очеса наша и призвати имя святое Его. Темже к тебе припадаем, молящеся со слезами: тебе бо дадеся от Бога молитися за ны. Подаждь убо ми, паче всех гре́шнейшему, руку твоея̀ помощи, понеже изнемо́же во мне крепость моя, и живот мой даже до ада прибли́жися, и весь сокруши́хся, яко скуде́ль, о камень отчаяния. Ускори, о архиере́ю великий, на помощь мою, и расто́ргни узы печали моея̀ святыми твоими молитвами, и подаждь ми лечьбу̀ покаяния: разженѝ о́блак темный страстей моих, посети мя милостию твоею, и неплодную душу мою благоплодну сотвори. Ты веси, о архиере́ю Божий, святе Иоанне Златоусте, горесть сердца моего: темже по благодати, тебе да́нней от Бога, потщи́ся преложити ю̀ на сладость всесильным твоим к Богу хода́тайством: можеши бо, яще восхо́щеши, помощѝ мне окая́нному, грешному, хульнику, распина́телем о́бщнику: несть бо грех, побежда́яй человеколюбие Божие, яко хоте́нием не хо́щет смерти грешника, но милостивно ожидает его покаяния и обращения. Бу́ди убо подо́бник Влады́це Христу, иже и блудницы слез не презрѐ: сице и ты, о трубо благогласная, и моего воздыхания не пре́зри, но возгремѝ ко мне гласом радования, и исполни недоста́точество мое и скудость от неоску́дных твоих сокровищ: бу́ди ми пастырь добрый, дале́че отгоняя от менѐ мы́сленныя волки жезло́м святых твоих молитв: направи стопы̀ моя тещѝ непреткнове́нно путем заповедей Господних: да достигну и а́з па́жити райския, иде́же есть Источник жизни и непрестанное веселие, и радость, и сладкий глас а́нгельскаго пения: еже да сподобимся вся мы получити, благодатию и человеколюбием Господа и Бога и Спаса нашего Иисуса Христа, Ему́же да будет от нас всякая слава, честь и поклонение, со Отцем и Святым Духом, ныне и присно и во веки веков.

Тропарь, глас 8

Уст твоих, я́коже светлость огня, возсия́вши благодать, вселенную просветѝ: не сребролю́бия мíрови сокровища сниска̀, высоту нам смиренному́дрия показа̀. Но твоими словесы̀ наказу́я, отче Иоанне Златоусте, молѝ Слова Христа Бога спастися душа́м нашым.

Ноемвриа 14. Молитвы преподобному Фили́ппу, Ира́пскому чудотворцу, чтомая в Фили́ппо-Ира́пской пустыни, Новгородския епархии

Молитва 1

Преподобне и богоблаже́нне отче наш Филиппе! Приимѝ ныне нас молящихся и припа́дающих ко всечестно́му и многоцеле́бному твоему гробу, иде́же святое твое и многотрудное покоится тело: зане духом твоим Святей Троице предстои́ши присно. Молися убо о нас ча́дех твоих, отче преподобне, да избавимся от всяких скорбей и болезней душевных и телесных, благоче́стно в настоящем житиѝ пожи́вше, в будущем ве́це молитвами твоими со всеми святыми покланя́тися сподо́бимся в Троице славимому Богу, Отцу и Сыну и Святому Духу, ныне и присно и во веки веков.

Молитва 2

О богоблаженне и преподобне отче наш Фили́ппе, Святыя Троицы верный угодниче, пустынный жителю, святых Ангелов равностоятелю, чудотворче милостивый! Услыши нас молящихся тебе днесь, и ко гробу твоему припа́дающих от твоея помощи не отри́ни. Вемы бо, яко аще пречестное тело твое и земная недра сокрыша, но богоугодная и чистая душа твоя у престола Влады́чня с лики святых предстоит дерзновенно. Якоже убо в жизни твоей многим руку помощи подал еси, блаженне, тако и ныне подаждь нам свыше твою помощь, отче преподобне, и буди помощник кому́ждо: в мо́ри плавающим буди упра́витель, в бедах страждущым скорый предстатель, сущим в боле́знех и неду́зех, печа́лех же и ско́рбех уте́шитель и изба́витель, и безпомощным помощь: спаси и ны чада твоя, от искушений лукаваго и от всякаго зла, присно на ны находящаго. О заступниче наш и предста́телю теплый Фили́ппе блаженне! Не забуди наследия твоего в конец, ниже разори завета, егоже обещал еси нам рабо́м твоим, и по преставле́нии твоем посещати ны. Аще убо в скудове́рии нашем и согреши́хом пред Богом, оба́че тя и́мамы отца себе и наставника, и хода́тая о спасении нашем. Сего ради ко гробу твоему припа́дающе молимся: подаждь нам благодать в нуждах и спасение вечное, да купно с тобою славити будем пречестное и великолепое имя Отца и Сына и Святаго Духа, ныне и присно и во веки веков.

Ноемвриа 15. Молитвы святым мучеником и исповедником Гу́рию, Само́ну и Ави́ву

Молитва 1, из акафиста

О преславнии мученицы Гу́рие, Само́не и Ави́ве! К вам яко скорым помощником и теплым моли́твенником, мы немощнии и недостойнии прибега́ем, усердно моля́ще: не пре́зрите ны, во многая беззакония впа́дшыя и по вся дни и часы согреша́ющыя: наста́вите на путь правый заблуждшыя, исцелите страждущыя и скорбящыя: соблюдите ны в непоро́чнем и целому́дреннем житии: и якоже древле, тако и ныне покровителие супру́жеств пребу́дите, в любви и единомыслии сия утверждающе и от всех злых и бедственных обстояний избавля́юще. Защитите, о многомощнии исповедницы, вся православныя христиа́ны от напастей, злых человек и козней демонских: оградите я от нечаянныя смерти, умоляюще Всеблага́го Господа, да вели́кия и бога́тыя милости нам смиренным рабом Своим проба́вит. Не́смы бо досто́йни нечи́стыми устна́ми призывати великолепое имя Создателя нашего, яще не вы святии мученицы, за ны̀ ходатаи будете: сего ради к вам прибегаем и предстательства вашего пред Господем о нас просим. Та́кожде избавите нас от града, потопа, огня, меча, нашествия иноплеменных, междоусобныя брани, смертоносныя язвы и всякаго душепа́губнаго обстоя́ния. Е́й, страстотерпцы Христовы, устро́йте нам молитвами вашими вся благая и полезная, да благоче́стно житиѐ временное преше́дше и кончину непосты́дну стяжа́вше, удостоимся теплым заступлнием вашим со всеми святыми одесную правосуднаго Бога Судии ста́ти и Того непрестанно сла́вити со Отцем и Сыном и Святым Духом во веки веков.

Молитва 3

О всеблаженнии и многострадальнии святии страстотерпцы, тричи́сленнии мученицы Гу́рие, Само́не и Ави́ве, веры православныя побо́рницы, безбожия и́дольскаго обличители, врагов прогони́тели, обидимых заступницы и всех христиан те́плии предста́телие! О велицыи страдальцы и угодницы Христовы, исповедницы всесветлии! Помилуйте нас грешных и недостойных, в беда́х, ско́рбех и печалех и во всякой злой напасти пребывающих: изба́вите нас от оби́дящих и ненави́дящих нас, от враг видимых и невидимых и от всякаго злаго человека: и якоже изба́висте отрокови́цу от горькия смерти, во гробе от злаго воина Го́тфина жи́ву затворе́нную, тако и ныне по данней вам от Бога благодати, в супружестве убо живущыя в любви и единомыслии соблюдите, всех же нас в вере и благочестии утвердите и от находящих на ны̀ зол во временней сей жизни изба́вите. О велицыи поборницы Гу́рие, Само́не и Ави́ве, во́ини Небеснаго Царя! Не забудите нас, всегда вам молящихся и помощи вашея просящих, но предстояще у престола Вседержителева, молитеся о нас грешных и недостойных, подати нам оставление грехов, да от вечнаго мучения избавльшеся, получим от Бога неизреченная блага, яже уготова Господь любящим Его. Яко подобает Ему всякая слава, честь и поклонение, Отцу и Сыну и Святому Духу, ныне и присно и во веки веков.

Тропарь, глас 5

Чудеса святых твоих му́ченик стену необори́му нам дарова́вый Христе Боже, тех молитвами советы язы́ков разорѝ, царства скиптры укрепи, яко Един благ и человеколюбец.

Ноемвриа 15. Молитва преподобному Гу́рию, Ша́лочскому чудотворцу, чтомая в Николаевском Моденском монастыре,  Новгородския епархии

О преподобне и богоносне отче наш Гурие! Услыши ныне нас, к тебе усердно моля́щихся и припа́дающих ко всечестному и многоцелебному твоему гробу, иде́же святое твое и многотрудное положи́ся тело. Ты же, духом на небесех Пресвятей Троице предстоя со Ангелы и преподобных отец лики, молися о нас чадех твоих, да изба́вимся от всяких скорбей, болезней, бед и обстояний, и благочестно поживе́м в настоящем житиѝ, ходя́ще в заповедех и оправда́ниих Господних безпоро́чно, и да яви́мся святаго твоего жития подража́тели. Испросѝ нам же и всем к тебе притекающым грехов прощение, телесем здравие, жития исправление и вечное спасение, яко да твоим теплым предстательством спаса́еми, славу возсыла́ти сподо́бимся в Троице славимому Богу нашему, Отцу и Сыну и Святому Духу, ныне и присно и во веки веков.

Ноемвриа 20. Молитвы преподобному Диодо́ру, Юрьего́рскому чудотворцу, чтомая в Троицкой на Ю́рьевой горѐ церкви, Архангелогоро́дския епархии

Молитва 1

О преподобне и достоблаже́нне Диодо́ре, отче наш, постниче терпеливоду́шный, безмолвия рачи́телю предо́блий, учителю духовный спасти́ся хотящым, разруши́телю тлетво́рных страстей незло́бивый, молитвенниче о бию́щих тя безвинно Христоподобный, прозорли́вства пророческаго испо́лненный, предвозгла́сная о будущих благих цевни́це, адаманте веры во Христа несекомый, столпе терпения незыблемый, заповедей Творца своего благопослу́шливый совершителю, плотоносный Ангеле и Духа Святаго вместилище, благоуханное, жителю пустынный несумни́тельный, смиренному́дрый небесный человече и сожи́телю го́рним чинонача́лием! Ты кро́тостию духа кротких землю наследовал есѝ, друг же и угодник в Троице славимому Богу нашему явился есѝ, иже и ра́ку цельбоно́сных моще́й твоих во храме своем покры́ти благоизво́ли. Ве́мы бо, преподобне, ка́ко Бог изобильно от ра́ки твоея̀ чудесному дождю̀ верным кропи́ти повелѐ. К ней убо припадающе, любезно молим тя, угодниче досточудный: не преста́й моля́ся Пресвятей и Живоначальней Троице, да низпо́слет царю нашему здравие, тишину и долгоденствие, на враги победу и одоление, це́рквам же согласие и всем людем смиренномудрие и изобилие благих. Угаси, блаженне, молитвами твоими паря́щыя на ны разжже́нныя бесо́вския стрелы, да не прико́снется нам злоба греховная, и всем всегда ми́лостивное даруй. Призри и на мя недосто́йнаго: свя́зан бо есмь лю́те плени́цами прегрешений моих и в пучи́ну стра́стнаго мо́ря влеко́м [увы мне!] неодержанно. Сего ради прилежно молю святыню твою, пребога́те, и припа́даю к ра́це мощей твоих со слезами, глаго́ля: предста́ни мѝ на пути напа́сти моея, расто́ргни у́зы, отженѝ стра́сти, ослаби от грехо́вных вери́г, избави мя от належа́щия скорби и от всякаго зла, да не сведе́н буду по дело́м моим в снедь лютому мiроде́ржцу врагу: разрешѝ мя от болезненных соу́з и спасе́ние да́руй ми, яко да спаса́емь молитвами твоими, воспою̀ и просла́влю от всея видимыя и невидимыя твари в Троице славимаго Бога нашему, Отца и Сына и Святаго Духа, ныне и в безконечныя веки веков.

Молитва 2

О преславный, богоукраше́нный, пресветлый свети́льниче, Небеснаго Царствия наследниче, безмолвия рачи́телю всеизря́дный, трудополо́жниче терпеливоду́шный! Ты древле непло́дную, ныне же тобою новопросвеще́нную Ю́рьеву гору светом Христовым озарил еси, на ней же и святую обитель воздв́игл еси, и богоугодными твоими труды̀ и по́двиги, различными добро́тами и благолепием сию украсил еси: и честны́м твоим и чудотворным и цельбоносным моще́м внутрь церкве Живоначальныя Троицы покрове́нным положи́тися изволил еси, и теми страну сию освятил еси, и бесо́вския полкѝ из нея̀ изгнал еси. помози мне грешному, о всеблаженне, Духа Святаго благодатию, путь жития спасительно ше́ствовати: просвети омраченную душу мою зарею богодарованныя ти благодати: даруй бога́тно неболе́зненным жительством пожи́ти: покажи вход невозбра́нен во ограду вечнаго пребывания: сохрани блужда́ющаго в пусты́ни жите́йстей: отженѝ от сердца моего душетли́тельную похоть: очисти скверну греховную молитвами твоими, язвы исцелѝ и спасение да́руй, да весело зову ти спаса́емь: радуйся, преподобне Диодо́ре отче наш, светило Незаходимаго Света, све́тло сияющая звездо̀ пресветлая, в сия последняя времена в северных странах возсиявшая: радуйся, благоверному царю нашему Российскому великое на супостаты поможение и заступление, во бра́нех крепкое одоление: радуйся, непоколеби́мый благочестия сто́лпе, иноческих преданий твердый хранителю и инокам наставниче духовный: радуйся, крепкий адама́нте и страшный бесо́м прогони́телю и победителю: радуйся, граду нашему и богозда́нней твоей обители светлая добро́то и Отечеству твоему похвало̀ вечная и нерестанная. Сподоби убо и мене всякия радости и Небеснаго Царствия быти причастника, ныне и присно и во веки веков.

Ноемвриа 22. Молитва святому благоверному великому князю Михаи́лу Ярославичу Тферско́му чудотворцу. Из акафиста

О дивный во страда́льцех, святый, благоверный, великий княже Михаи́ле! Вел и по́двизи и труды твои, яже за правове́рие, за Церковь Божию и за Отечество Твое, град Тферь, положил еси. Ты, возжела́в вышних, оставил еси тленную славу земную, и подвижником Христовым ревнуя, до́блественно противуста́л еси ярости царя нечестиваго и преще́нию зломы́шленнаго его воеводы. Ты, прием неправедное осуждение и заколение, восприял еси Небесное Царствие, и кро́вными каплями, яко пречу́дным ка́менем, украси́в на главе твоей венец, ныне на небесех престолу всех Владыки с ли́ки Ангел и со всеми святыми Его предстои́ши. Сего ради, к ра́це мощей твоих притекающе, сия сердцем и усты̀ лобызаем, и умильно к тебе взываем: о тезоимени́те небесному воеводе вы́шних сил, великий княже Михаи́ле! Молися непрестанно Христу Богу за град твой и люди и за вся православныя христианы. Буди споборник крепок на враги православия благочестивейшему, самодержавнейшему, великому государю нашему, императору Николаю Александровичу всея России и всему царствующему дому: испроси им предстательством твоим мир, здравие, долгоденствие и во всем благоспе́шество. Буди и нам помощник вся, яже ко спасению и пользе нашей, восприя́ти: охраняй нас от искушений и напастей, во временней жизни приходящих, и не лишѝ нас хода́тайства твоего ко Христу Богу, во еже получи́ти нам прегрешений прощение и сподо́битися небеснаго селения со избра́нными Его, яко да и в се́м славится пречестное и великолепое имя Его во веки веков.

Тропарь, глас 8

Возвысив ум твой к Богу, и жития со Ангелы возжелел еси, тленную славу оставил еси, блаженне, и положил еси душу твою за люди твоя, восприял есивенец противу трудов твоих, богомудре Михаиле. Моли Христа Бога о чтущих любовию святую память твою.

Ноемвриа 23. Молитва святому благоверному великому князю Алекса́ндру Не́вскому, во и́ноцей Алекси́ю. Из службы со акафистом

Скорый помощниче всех усердно к тебе прибегающих и теплый наш пред Господем предстателю, святый благоверный великий княже Алекса́ндре! Призри милостивно на ны недостойныя, многими беззако́нии непотре́бны себе сотво́ршыя, к ра́це мощей твоих [или ко святей иконе твоей] ныне притекающыя и из глубины сердца к тебе взывающыя. Ты в житии твоем ревнитель и защитник православныя веры был еси: и нас в ней теплыми твоими к Богу молитвами непоколебимы утвердѝ. Ты великое возложе́нное на тя служение тщательно проходил еси: и нас твоею помощию пребывати коегождо, в не́же при́зван есть, настави. Ты, победив полкѝ супостатов, от пределов Российских отгнал еси: и на нас ополча́ющихся всех видимых и невидимых врагов низложи. Ты, оставив тленный венец царства земнаго, избрал еси безмолвное житие, и ныне праведно венцем нетленным увенчанный на небесех царствуеши: исходатайствуй и нам, смиренно мролим тя, житие тихое и безмятежное, и к вечному Царствию шествие неукло́нное твоим предста́тельством устрой нам. Предстоя же со всеми святыми престолу Божию, молися о всех православных христиа́нех, наипаче же о  благочестивейшем, самодержавнейшем, великом государе нашем, императоре Николае Александровиче всея России, да сохранит их Господь Бог Своею благодатию в мире, здравии, долгоденствии и всяком благополучии в должайшая лета, да присно славим Бога в Троице Святей славимаго, Отца и Сына и Святаго Духа, ныне и присно и во веки веков.

Тропарь, глас 4

Яко благочести́ваго ко́рене пречестна́я о́трасль был еси, блаженне Александре: яви бо тя Христос, яко некое Божественное сокровище Российстей земли, новаго чудотворца, пресла̀вна и богоприя́тна. И днесь соше́дшеся в память твою верою и любовию, во псалме́х и пе́ниих ра́дующеся славим Господа, давшего тебе благодать исцелений: Егоже моли спасти град сей, и державе сродников твоих богоугодней быти, и сыновом Российским спастися.

Величание

Величаем тя, святый благоверный кня́же Александре, и чте́м святую память твою: ты бо мо́лиши о нас Христа Бога нашего.

Ноемвриа 23. Молитвы святителю Митрофа́ну, епископу Воро́нежскому. Из службы со акафистом

Молитва 1

О святителю отче Митрофа́не! Се бо гре́шнии, нетле́нием честны́х моще́й твоих и многими благодея́ньми, чудесно соде́янными и содева́емыми тобой, уверившеся исповедуем, яко и́маши ве́лию благодать у Господа Бога нашего, и всесмире́нно ко твоему благосердию припа́дающе, тебе мо́лимся сице: моли о нас Христа Бога нашего, да ниспо́слет всем чтущим святую память твою и усердно к тебе прибегающым богатыя милости Своя: да утверди́т во святей Своей православней Церкви живый дух правыя веры и благочестия, дух ве́дения и любвѐ, дух мира и радости о Ду́се Свя́те, да вся чада ея̀, чиста суща от мiрски́х искушений и плотски́х похоте́й и злаго действия злых духо́в, духом и истиною покланяются Ему, и усердно о соблюдении заповедей Его ко спасению душ своих да потщатся. Пастырем ея̀ да даст Господь святую ревность попечения о спасении людей, во е́же неве́рующыя просвети́ти, неве́дущыя наста́вити, сомня́щыяся вразумити, отпа́дшыя от православныя Це́ркве к ней возврати́ти, верующыя в вере соблюстѝ, грешныя на покаяние подви́гнути, ка́ющыяся уте́шити, и во исправлении жизни утверди́ти, и тако вся люди ко угото́ванному вечному Царству святых Его привести. Умоли Господа, угодниче Христов, благочестивейшему, самодержавнейшему, великому государю нашему, императору Николаю Александровичу мужество, мудрость, одоление на вся враги дарова́ти, благопоспеше́ние же во усроении царства его низпосла́ти, и всему царствующему дому долгоденстивие и спасение пода́ти: избра́нным же от царя начальником да низпо́слет Господь усердие, прозорли́вость, мудрость и верность: всем же в державе его лю́дем да да́рует Благи́й Бог наш мир, тишину, безмятежие и изобилие плодов земных, па́че же ко исполнению заповедей Его тща́ние неле́ностное: и да избавит царствующыя гра́ды, град сей, и вся иныя гра́ды царства его, и ве́си, от глада, труса, потопа, огня, меча, нашествия иноплеменных, междоусобныя брани, смертоносныя язвы и от всякаго зла. Ей, святителю Божий, да устро́иши молитвами твоими вся благая душам и телесе́м нашым: да и мы прославим в душах и телесех наших Господа и Бога нашего, Иисуса Христа, Емуже со Отцем и Святым Духом слава и держава во веки веков.

Молитва 2

О всехвальный святителю Христов и чудотворче Митрофа́не! Приимѝ сие малое моление от нас грешных к тебе прибега́ющих, и те́плым твоим предста́тельством умоли Господа и Бога нашего, Иисуса Христа, яко да призрев на ны ми́лостивно, подаст нам согрешений наших вольных и невольных прощение, и по вели́цей Своей милости избавит нас от бед, печалей, скорби и болезней душевных и телесных, обдержа́щих нас: да подаст земли плодоносие, и вся на пользу настоящаго жития нашего потребная: да дарует нам скончати житие сие привременное в покаянии, и да сподобит нас, грешных и недостойных, Небеснаго Царствия Своего, во еже со всеми славити Его безконечное милосердие, со Безначальным Его Отцем, и Святым и Животворящим Его Духом, во веки веков.

Тропарь, глас 4

Правило веры и образ кротости, словом и житием пастве твоей, отче смиренномудре Митрофа́не, был еси: темже и во све́тлостех святых солнца светлейше возсия́л еси, венце́м нетления и славы украша́емь. Моли Христа Бога, благочестивейшему императору нашему Николаю Александровичу, всей державе его и граду твоему в мире спастися.

Ноемвриа 24. Молитвы святитей великомученице Екатерине

Молитва 1. Из акафиста

О святая Екатерино, дево и мученице, истинная Христова невесто! Молим тя, яко наро́читую благодать, е́юже предварѝ тя Жених твой, Сладчайший Иисус, приимшую: якоже посрами́вши прельще́ния мучителя мудростию твоею, пятдесят витий победила еси, и напоивши их небесным учением, ко свету истинныя веры наставила еси, тако испроси и нам оную Божию мудрость, да и мы, вся козни адскаго мучителя расторгше, мiра же и плоти соблазны презре́вше, досто́йни яви́мся Божественныя славы, и к разшире́нию на́шея православныя веры сосу́ди достойни соде́лаемся, и с тобою в небесней скинии Господа и Владыку нашего Иисуса Христа, со Отцем и святым Духом, восхвалим и прославим во вся веки веков.

Молитва 1. Из инаго акафиста

О святая великомученице Екатерино, избра́нный чистоты̀ сосу́де, столпе православия, предстательнице наша благонаде́жная, подвижнице законная, святая на святей горе свято почивающая! Зане сама явила христиа́ном вину̀ к тебе моли́тися, прилежно молим тя: приникши свыше, вонмѝ гласу моления нашего, при́зри на бедствия нас грешных, просвети омрачение ума нашего, сотвори нас го́рняя му́дрствовати, а не земная. Поспеши нам молитвами твоими побежда́ти плотска́я похоте́ния, к мiру пристрастие и козни злых духо́в, на нас злобно воюющих: да твоим предста́тельством во дни жития сего свобо́дни яви́мся от враждебных их нападений и по исходе от воздушных их истяза́ний. О премудрая дево! Даруй нам вся яже к пользе прошения: мо́жеши бо многая испроси́ти у возлюбленнаго Жениха твоего, Христа Бога нашего. Мы ве́мы, яко много может молитва праведнаго, поспешеству́емая благостию Милосердаго Бога, Емуже слава, честь и благодарение всегда, ныне и присно и во веки веков.

Тропарь, глас 4

Доброде́тельми яко лучами солнечными просветила еси неверныя мудрецы, и якоже пресветлая луна ходя́щым в нощѝ, неверия тьму отгнала еси, и царицу уверила еси, вкупе же и мучителя обличила еси, богозванная невесто, блаженная Екатерино: желанием востекла еси в небесный чертог ко прекрасному Жениху Христу, и от Него царским венце́м венчалася еси: Емуже со А́нгелы предстоящи, за ны моли́ся, творящыя пречестну́ю память твою.

Ноемвриа 25. Молитва священномученику Кли́менту, папе Ри́мскому, чтомая в Никерманском святаго Кли́мента монастыре, Таврическия епархии

О великий чудотворче, священному́чениче Кли́менте! Ты ревностным пропове́данием Святыя Троицы и тайны Воскресения Господа Иисуса Христа, яко муж равноапо́стольный, еще жив сый, неведущих истиннаго Бога чудодейственно просвещал еси, и по блаже́ннем преставлении твоем благодатию от Бога тебе данною чудеса неоску́дно источа́л еси: преклони́ся убо и ныне к моим воздыха́нием сердечным, и твоею ми́лостию и теплым заступлением пред Всемогущим и человеколюбивым Богом нашим, просвещение развраще́ннаго ума и сердца моего испросѝ, и помозѝ ми во временнем житиѝ сем твори́ти вся в законе Божии предложе́нная, всякаго же греха отмета́тися. Ты, великий подвижниче, от юности твоея клеветы̀ претерпевый, многия же болезни душевныя и труды понесы́й, помолися ко Господу Богу о мне грешнем и недостойнем, да твоим предстательством и заступлением подаст Всеблаги́й и мне грешному силу и крепость во благодушии претерпева́ти клеветы̀ человеческия и яже на земли скорби и сохрани́ти заповеди Его. Ты, о великий чудотворче, на ко́еждо лето предивное чудо в мо́ри являл еси: и на мне грешнем и недостойнем чудо Божественныя помощи яви, да отступят волны страстей от душѝ моея, да очищуся покаянием, да прииму молитвами твоими здравие души и тела, и прославлю пречестное и великолепое имя Господа Бога и Его благодать, данную тебе, во веки веков.

Ноемвриа 26. Молитвы святому великомученику Гео́ргию Победоно́сцу. Из молебнаго пения со акафистом

Молитва 1

Святый, славный и всехвальный великому́чениче Христов Гео́ргие! Со́браннии во храме твоем и пред иконою твоею святою поклоняющиеся лю́дие молим тя, известный желаний наших хода́таю: моли с нами и о нас умоляемаго от Своего благосердия Бога, да милостивно услышит нас просящих Его благостыню, и не оставит вся наша ко спасению и житию ну́ждная проше́ния, и дарует благочесчтивейшему императору нашему победу на сопроти́вныя, да укрепит же данною тебе благодатию во бране́х православное воинство, и силы возстающих сраг наших да низложит, да постыдя́тся и посра́мятся, и дерзость их да сокрушится, и да уве́дят, яко мы и́мамы Божественную помощь: и всем в ско́рби и обстоя́нии су́щим многомощное яви твое заступление. Умоли Господа Бога, всея твари Создателя, изба́вити нас от вечнаго мучения, да всегда прославляем Отца и Сына и Святаго Духа, и твое исповедуем предста́тельство, ныне и присно и во веки веков.

Молитва 2

О всехвальный, святый великому́чениче и чудотворче Гео́ргие! При́зри на ны ско́рою твоею помощию, и умолѝ человеколюбца Бога, да не осудит нас грешных по беззаконием нашым, но да сотворит с нами по вели́цей Своей милости. Не през́ри моления нашего, но испросѝ нам у Христа Бога нашего тихое и богоугодное житие, здравие же душевное и телесное, земли плодородие и во всем изобилие, и да не во зло обратим благая, дару́емая нам тобою от Всещедраго Бога, но во славу святаго имени Его и в прославление крепкаго твоего заступления, да подаст Он православному императору и всему боголюбивому воинству на супостаты одоление, и да укрепи́т царство его непременя́емым миром и благословением: изря́днее же да оградит нас святых Ангел Своих ополче́нием, во еже изба́витися нам, по исходе нашем из жития сего, от козней лукаваго и тяжких воздушных мытарств его, и неосужде́нными предста́ти престолу Господа славы. Услыши нас страстотерпче Христов Гео́ргие, и моли за ны непрестанно Владыку всех Бога, да благодатию Его и человеколюбием, твоею же помощию и заступлением, обрящем милость, со Ангелы и Архангелы и всеми святыми одесную правосуднаго Судии стати, и Того непрестанно славити со Отцем и Святым Духом, ныне и присно и во веки веков.

Тропарь, глас 4

Днесь блажат тя мiра концы̀, Божественных чудес испо́лньшеся, и земля радуется, напи́вшися крови твоея: христоимени́тии же лю́дие града Киева, овящением Божественнаго храма, радостию возвесели́шася, страстоте́рпче Георгие, сосу́де избра́нный Святаго Духа, угодниче Христов. Его же молѝ, с верою и мольбою приходящым во святый твой храм да́ти очище́ние грехов, умири́ти мiр и спасти души нашя.

Ноемвриа 26. Молитвы святителю Инноке́нтию, епископу Ирку́тскому

Молитва 1, из службы

Святче Божий, пастырю добрый, делателю верный винограда Христова, святителю отче Инноке́нтию! При́зри на град сей и на люди сия̀, моли Христа Бога, да соханит паству твою от волков губя́щих ю̀, да низпо́слет Духа Своего Святаго дар, во еже умудри́ти нас ходити пред Ним во всяком благоче́стии и чистотѐ во вся дни жизни нашея: да славосло́вяще имя Его всесвятое во днѝ и в нощѝ, сподо́бимся бы́ти насле́дницы жизни вечныя, и прославим Отца и Сына и Святаго Духа, ныне и присно и во веки веков.

Молитва 2, ско́рбнаго и сокруше́ннаго сердца, из акафиста

К тебе, свя́тче Божий, яко скорому помощнику и молитвеннику о спасении моем, аз недостойный и грешный припа́дая молю́ся: не пре́зри мене уны́лаго, немощна́го, во многия беззако́ния впа́дшаго и по вся дни и часы согреша́ющаго, но вонмѝ души моей, яко скорблю, и умоли Господа Бога, всея твари Содетеля, Емуже ныне предстоиши в радости святых и с лики Ангел, поми́ловати мя и известѝ из темницы грехо́вныя ду́шу мою, прежде даже не отиду отсюду и ктому не готов явлюся на суд Его. Ей, отче! Не посрами мене, к тебе с верою притека́ющаго: аще бо и недостоин есмь твоего хода́тайства и заступле́ния, но ты, быв подража́тель человеколюбия Божия, сотворѝ мя достойна чрез обраще́ние от злых дел ко благо́му житию, да тако душею и телом здрав быв, славлю и пою ди́внаго во святых Своих Бога нашего, и твое теплое заступление, всегда, ныне и присно и во веки веков.

Молитва 3, из инаго акафиста

О великий Христов угодниче, святителю отче Инноке́нтие! Услыши нас, тебе молящихся. Ты веси нашя скорби и недуги, слышиши воздыхания множества к тебе притекающих: сего ради к тебе, яко отцу нашему, скорому помощнику и теплому молитвеннику, зовем: не оста́ви нас твоим у Бога хода́тайством. Мы присно блужда́ем от пути спасения: руководѝ нас, милостивый наш наставниче. Мы не́мощни есмы̀ в вере: утвердѝ нас, правоверия учителю. Мы зело убози сотворихомся добрых дел: обогатѝ нас, благосердия сокровище. Мы присно наве́туеми есмы̀ от враг видимых и невидимых и озлобля́еми: помозѝ нам, безпомощных засту́пниче. Гнев Божий, праведно движимый на ны за беззакония наша, отврати от нас твоим хода́тайством у престола Судии Бога, Емуже ты предстои́ши на небеси, отче иера́рше, архиереев похвало̀. Услыши, молим тя, великий Христов угодниче, и зде с молением тебе предстоя́щыя, и вся, на всяком месте, тебе с верою призыва́ющыя: и испроси молитвами твоими у Отца Небеснаго всем нам прощение грехов наших и от бед избавление. Ты бо еси свиде́тельствованный безчи́сленными чудесы̀ помощник, заступник и молитвенник и о тебе славу возсылаем Отцу и Сыну и Святому Духу, ныне и присно и во веки веков.

Тропарь, глас 3

Светильниче церкве пресветлый, озари́вый луча́ми добро́т твоих страну сию, исцеле́ньми многими притека́ющих к ра́це твоей с верою Бога просла́вивый, мо́лим тя, святителю отче Инноке́нтие, огражда́й молитвами твоими град сей от всех бед и печали.

Ноемвриа 27. Молитва святителю Иа́кову, епископу Росто́вскому

О пречудне и преблаженне отче, святи́телю Христов Иа́кове! С верою и любовию к тебе припа́дающе, мо́лим тя: нас святыми твоими молитвами от всякия беды̀, скорби и болезни и от всякаго гнева Божия, праведно на ны дви́жимаго: испросѝ нам тихое и безмятежное житие, во всяком благочестии и чистоте: помозѝ нам спасение получи́ти и Царствия Небеснаго дости́гнути. Ей, угодниче Божий и заступниче наш! не пре́зри усерднаго моления сего нашего, но при́зри на ны милостивно и умоли о нас всещедраго человеколюбца Бога, да не погибнем люте со беззаконии нашими, но да сподо́бимся с тобою и со всеми святыми сла́вити и воспева́ти всесвятое имя Его во веки веков.

Тропарь, глас 4

Избра́н от юности Бо́гови быв, святителю Иакове, и сего ра́ди архиерейства са́ном почте́н, упа́сл еси люди тебе Богом вруче́нныя: темже и по преставле́нии чудес дарования приял еси, исцеля́ти различныя неду́ги. Моли о нас соверша́ющих честну́ю память твою, да тебе непреста́нно велича́ем.

Ноемвриа 27, февруариа 11 и априлиа 22. Молитва святому благоверному князю Все́володу, во Святем Крещении Гаврии́лу, Пско́вскому чудотво́рцу. Из акафиста

О великий уго́дниче Божий и преславный чудотво́рче, святый благоверный княже Все́володе Гаврии́ле, града Пскова и всея державы Российския небесный засту́пниче и покрови́телю, и всех нас усердный пред Богом предста́телю и защи́тителю! Предстоя престолу великаго Царя и
Бога нашего, в Троице Святе́й славимаго и покланяемаго, ве́лие дерзновение к Нему и́маши, яко верный раб Его и угодник. К тебе убо, яко сро́дному нам и многомо́щному пред Го́сподем хода́таю, прибегаем мы грешнии и недостойнии, и умиленно просим тя: моли Всеблага́го Бога, да отвратит от нас гнев Свой, праведно по дело́м нашым на ны̀ дви́жимый, и презре́в безсчисленныя прегрешения наша, обрати́т нас на путь покаяния и спасения. Оградѝ молитвами твоими в мíре жизнь нашу, и во всем благое поспешение и вся к животу̀ и благочестию потре́бная нам дарова́ти испросѝ. И якоже древле град твой Псков от пленения и разорения ра́тнаго избавил еси, тако и ныне нас и вся грады и веси страны нашея от всяких напастей  и бед и внеза́пныя смерти предста́тельством твоим избави, и от всех враг видимых и невидимых покровом твоим защитѝ. Сохрани молитвами твоими в мире, здравии и долгоденствии благочести́вейшаго государя нашего, императора Николая Александровича, и державе его и всему царству Российскому бу́ди крепкое ограждение, да тихое и безмолвное житие поживем во всяком благоче́стии и чистотѐ, и тако в мíре временное сие житиѐ преше́дше, в вечный дости́гнем покой, и сподо́бимся Небеснаго Царствия, сла́вяще Отца и Сына и Святаго Духа, и твое святое заступление, во веки веков.

Тропарь, глас 4

Измла́да явился еси, богому́дре княже Гаврии́ле, Божественный сосуд, избра́н Бо́гови, благочестием воспита́н, веру непорочну соблю́д, и мно́ги святыя церкви устро́ив, изгна́ние претерпе́л еси от своих, якоже и целому́дрии прародители твои от брата убие́ние: с ни́миже предстоя̀ Святей Троице, моли́ся, державы Ро́сския начальником сохране́нным бы́ти и всем нам спастися.

Ноемвриа 23. Молитва святому апостолу Андрею Первозва́нному. Из акафиста

Первозва́нне апо́столе Бога и Спаса нашего Иисуса Христа, це́ркве последователю верхо́вный, всехва́льне Андре́е! Славим и величаем апостольския труды твоя, сла́дце поминаем твое благословенное к нам пришествие, ублажаем честная страдания твоя, яже за Христа претерпел еси, лобыза́ем священныя мо́щи твоя, чтим святую память твою и веруем, яко жив Господь, жива же и душа твоя, и с Ним во веки на небеси пребыва́еши, иде́же и нас любовию твоею не оставля́еши, я́коже возлюби́л есѝ отцы нашя, егда̀ Духом Святым прозре́л еси землѝ на́шея ко Христу обраще́ние. Веруем же, яко и мо́лиши о нас Бога, зря̀ во свете Его вся ну́жды нашя. Тако сию веру нашу во храме твоем испове́дуем, и Господа и Бога и Спаса нашего Иисуса Христа мо́лим, да молитвами твоими пода́ст нам вся потре́бная ко спасению нас грешных: да я́коже ты а́бие по гласу Господа, оста́вль мре́жи твоя, неуклонно Тому последовал еси, си́це и ки́йждо от нас не свои́х сѝ да ищет, но еже к созида́нию бли́жняго, и о го́рнем зва́нии да помышляет. Иму́ще же тя предста́теля и молитвенника о нас, упова́ем, яко молитва твоя много может пред Го́сподем и Спасителем нашим Иисусом Христом, Ему́же подобает всякая слава, честь и поклонение, со Отцем и Святым Духом, во веки веков.

Тропарь, глас 4

Яко апостолов первозва́нный и верхо́внаго сущий брат, Владыце всех, Андрее, молися, мир вселенней даровати и душам нашым велию милость.

Месяц декемврий

Декемвриа 3 и иануариа 19. Молитвы преподобному Савве, игумену Сторожевскому, Звенигородскому чудотворцу

Молитва 1, из службы

О пречестна́я и свяще́нная главо̀, Небеснаго Иерусалима граждани́не, Пресвяты́я Тро́ицы обита́лище, преподобне отче Са́вво! Ве́лие имея дерзновение ко Всеми́лостивому Влады́це, молися о стаде огра́ды твоея и о всех по духу ча́дех твоих: не премолчѝ вопия̀ за ны ко Господу, и не пре́зри верою и любовию чту́щих тя. Испросѝ предстательством твоим у Царя ца́рствующих мир Церкви, под зна́мением Креста во́инствующей: благоденствие в мíре и поможе́ние во бра́нех благочестивейшему императору нашему Николаю Александровичу: архие́реом святи́тельства благоле́пие: мона́шествующым доброе в по́двизех течение: царствующым градо́м, святей обители сей, граду сему и всем градо́м и страна́м охранение, мíру безмяте́жие и мир, от гла́да и па́губы избавление: старым и немощным утеше́ние и подкрепле́ние: ю́ным и младе́нцем благо́е в ве́ре возраста́ние, во Ева́нгельстем учении тве́рдое обучение и чистоте и целому́дрии пребывание: вдови́цам и сирота́м милость и заступление: плене́нным огра́ду и возвраще́ние: болящым исцеление, малоду́шным утверждение: заблу́ждшым исправление: согреша́ющым дух сокруше́ния: бе́дствующым и всем, благода́тныя помощи требующым, благовре́менную помощь. Не посрами нас, с верою к тебе притекающих: споспешеству́й, яко чадолюби́вый отец ча́дом, и нам понести иго Христово во благоду́шии и терпе́нии: и всех упра́ви в мире и покая́нии сконча́ти житиѐ своѐ непосты́дно и пресели́тися со упованием во обители небесныя, иже́же ты, по труде́х и по́двизех, ныне водворя́ешися со Ангелы и святыми, ви́дя и прославляя Бога, в Троице славимаго, Отца и Сына и Святаго Духа.

Молитва 2, чтомая в Звенигородском Саввино-Сторожевском монастыре, Московския епархии

О честна́я главо, преподобне и богоблаженне отче наш Савво! Не преста́й молитву творя̀ к человеколюбцу Богу о стаде твоем, еже от души возлюби́л есѝ и о немже труды мно́ги и по́ты и болезни претерпел есѝ. Ты ве́си отвсю́ду належащий нам страх, и ве́си и непременную бесовскую на ны̀ рать, ве́си телесное служение и злолю́тство, ве́си усердия нашего неможе́ние. Сего ради мо́лим тя: я́коже в труднем сем и многоболе́зненнем житии твоем братию зело̀ возлюби́л еси и наста́вник неусы́пен ей был есѝ ко спасению, та́ко и ныне престо́лу Божию предстоя̀, поминай ны ча́да твоя, яко да избавит нас Господь от тьмы страстей и всякаго обдержа́ния лукавых бесо́в и злых человек. Помянѝ, преподобне отче, и мене убо́гаго раба твоего имярек, да молитвами твоими в день страшнаго прещения Милостиваго Судию обря́щу, Господа нашего Иисуса Христа, Емуже слава и держава, со Отцем и Пресвятым Духом, ныне и присно и во веки веков.

Тропарь, глас 8

Пустыни явился доброе прозябе́ние, преподобне: от юности бо изволил еси чистое житие, духовному твоему учителю после́дуя, и того учением ум к небесным впери́в, стаду твоему премудр наставник показался еси: темже и Христос яко пресве́тла тя светильника, чудесы̀ обогатѝ. Савво отче наш, моли спастися душа́м нашым.

Декемвриа 4. Молитвы святей великомученице Варва́ре. Из службы со акафистом

Молитва 1

Святая славная и всехвальная великомученице Христо́ва Варва́ро! Со́браннии днесь во храме твоем божественнем люди, раце мощей твоих покланяющеся и любовию целу́юще, страдания твоя му́ченическая и в них Самаго Страстополо́жника Христа похвала́ми ублажа́ем, и тебе, известная желания нашего хода́таице, молим: моли с нами и о нас умоляемаго от Своего милосердия Бога, да ми́лостивно услышит нас, просящих Его благосты́ню, и не оставит от нас вся ко спасению и житию нужная прошения, христианскую же кончи́ну жития̀ нашего безболезненну, непостыдну мирну и Божественных Таин прича́стну да да́рует, и всем на всяком месте, во всякой скорби и обстоянии, требующим Его человеколюбия и помощи, великую Свою подаст милость, да благода́тию Божиею и твоим теплым предста́тельством, душе́ю и телом всегда здра́ви пребывающе, славим ди́внаго во святых Своих Бога Израилева, не удаля́ющего помощи Своея от нас, всегда, ныне и присно и во веки веков.

Молитва 2

Премудрая и всекра́сная святая великому́ченице Христо́ва Варва́ро! Блаженна еси, яко премирная мудрости Божия плоть и кровь не яви тебе, но Сам Бог Отец Небесный, иже тебе, веры ради от невернаго отца оставленную, и́згнанную и умерщвле́нную, в дщерь Себе возлюбленную прия́т: за тленное земна́го имения насле́дие, пло́ти нетление дарова̀: труды мученическия упокоением во Царствии Небеснем увенча̀: вре́менное твое житиѐ, смертию Его ради пресече́нное, сицево́ю возпросла́ви по́честию, яко душу с лики небесных вчинѝ духо́в, тело же, на земли во храме их Ангельском положе́нное, Ангелом запове́да сохрани́ти це́ло, че́стно и многочуде́сно. Блаженна еси, Христу̀ Сыну Божию, Жениху Небесному, уневе́щенная дево, Егоже добро́ты твоея Рачи́теля имет́и жела́ющи, всю себе страданием, ранами, удо́в ре́занием и са́мыя главы̀ отсечением, а́ки у́тварьми дража́йшими потща́лася еси украси́ти: да тако, яко жена ве́рна, главе своей, Мужу Христу, духом и телом соединишися неразлучно, глаголющи: обрето́х, Егоже возлюбѝ душа̀ моя, удержа́х Его, и не оста́вих Его. Блаженна еси, яко Святый Дух на тебе почи́л есть, имже духовными духо́вная разсуждати науче́на бы́вши, вся ду́хи лука́вствия во и́долех яко па́губныя отри́нула еси, и Единаго Бога Духа позна́вши, яко истинная покло́нница, ду́хом и и́стиною кла́нятися изво́лила еси, проповеднически глаголющи: Троицу чту̀, Еди́но Божество. Сию убо Святую Троицу, юже в житии и смерти испове́данием и страда́нием твоим прославила еси, умолѝ о мне, предста́тельнице моя, яко да и аз всегда тро́йственною, веры, любвѐ и надежды, Ту́южде Святую Троицу почитаю доброде́телию. И́мам светильник веры, но пра́зден благих дел еле́а: ты, мудрая дево, страда́льческую плоть твою, крове испо́лнену и ранами прелива́ющуся, а́ки светильник иму́щая, даждь от еле́а твоего, да тем душе́вную мою свещу̀ украси́в, сподоблюся по тебе внити в чертог небесный. Пресе́льник аз есмь на землѝ и пришле́ц, якоже вси отцы мои: ты убо, благ вечных насле́днице и блаже́нная обе́да во Царствии Небеснем прича́стнице, яко в стра́нстивии жития̀, трапезы Божественныя угоще́ния, сице и во исходе от мiра, жела́емаго сподо́би мя напу́тствования: и егда̀ в конец сном смерти начну усыпа́ти, сотвори, яко да благодатию Божественных Тела и Крове Таин укрепле́н, прейду̀ в крепости я́ди тоя̀ дале́кий путь смерти, даже до горы небесныя: и тамо, Егоже ты чрез три окна ба́нныя прежде верою Бога Троицу узре́ла еси, Сего ку́пно с тобою лицем к лицу да удосто́юся ви́дети и сла́вити Его в нескончаемыя веки.

Молитва 3

К тебе, яко ко и́стинному ско́раго исцеле́ния исцеления и многочуднаго врачевания источнику, святая дево Варва́ро великому́ченице, аз немощны́й прибегаю, и ко твоим святым моще́м усердно припа́дая, молю́ся: виждь раны греховныя и всетелесную язву, виждь неможение души моея, и сие, обычным твоим милосердием и благостию понуждаема, исцелити потщися. Вонми гласу моления моего, не презри от окаяннаго моего сердца приносимое стенание, и вопль мой услыши, яко ты еси мое прибежище. Святую, Единосущную и Нераздельную Троицу, Юже тремѝ о́кны в бани оте́честей созда́нными изобрази́ла еси, о мне грешнем и непотребнем молѝ, да поми́лует мя ныне и в день смерти моея. Помолися же Отцу Небесному, да мя, всеми грехми приклоне́ннаго и ни́зу пове́рженнаго, воздви́гнет на славословие Свое, и устроит мя всегда горѐ име́ти сердце, го́рняя мудрствовати, а не земная. Умоли Христа Сына Божия, Иже молитву твою страдальческую в темнице услы́ша, да мя, лени́ваго к молитвам и во уны́нии мно́зе а́ки в темнице седя́ща, к скорому течению путе́м заповедей Божиих наставит, и да подаст о еже непрестанно молитися усердное хотение. Призови и Духа Святаго, чистоты неизнуря́емаго Источника, в подвизе страдальчестем тя чистую деву укрепившаго и от студа̀ наготы̀ крило́ма Свои́ма защити́вшаго, яко да и мне сту́дному и нечи́стому сердце чисто сози́ждет, и дух прав обновит во утро́бе моей: паче же да пода́ст мне усердно подвиза́тися в житии чи́стем, и укрепи́т мя на творение благих дел. Верую, яко вся сия мо́жеши мне, о святая великому́ченице Варва́ро, у Пресвятыя Троицы исхода́тайствовати: и аще восхо́щеши, си́льна еси помощѝ мне, яко просла́вившая Бога во удесе́х твоих страдальческих. И вем, дево святая, яко ничто́же тебе невозмо́жно, то́кмо аще не пре́зриши слез и воздыха́ния моего: сего ра́ди к честне́й святых моще́й твоих чудотворных ра́це припа́даю, и тебе на небесѝ душею пребыва́ющей покланя́яся, дерза́ю молитвенно глаго́лати: да будут уши твои вне́млюще гласу молитвы моея, и твое святое предста́тельство да не даст ми без испове́дания и покая́ния умре́ти: ибо, аще в коем благоде́тельстве прославля́ема еси, но в сем наипа́че, яко всяк, име́яй надежду на тя и всегда в помощь призыва́яй тя, от внеза́пныя избежи́т смерти, от нея́же и мене окая́ннаго изба́ви, дево чистая,  великому́ченице Варва́ро, и всемо́щными твоими молитвами удосто́й мя одесну́ю Христа Сына Божия ста́ти и слы́шати глас глаголющий: благи́й рабе и верный, вни́ди в радость Господа твоего.

Тропарь, глас 8

Варва́ру святую почти́м: вра́жия бо се́ти сокрушѝ, и яко птица изба́вися от них помощию и оружием Креста, всечестна́я.

Ин тропарь, глас 4

А́гнице преблаженная Варва́ро, Боже́ственне озари́вшися светом Святыя Троицы трисо́лнечным и в купе́ли Крещения утверди́вшися, в побежде́ние ле́сти оте́ческия, веру исповедала еси Христову. Темже, всечестная, свыше благодать тебе дарова̀ Бог, исцеля́ти неду́ги и болезни вся: Его́же молѝ, великому́ченице, да спасет душы нашя.

Декемвриа 5. Молитва преподобному Са́вве Освяще́нному, Иерусали́мскому. Из акафиста

О преди́вный и всехва́льный угодниче Божий, преподобне отче Са́вво! Днесь во святе́м храме твоем, благогове́йно предстояще пред святою иконою твоею и радостно соверша́юще память твою, ублажа́ем тя, заступника нашего. Почита́юще же твое ве́лие дерзнове́ние пред Господем, смире́нно молим тя, преблаженне: приимѝ ми́лостивно от нас хвале́бное пение сие, от любвѐ и усердия тебе приноси́мое. И яко име́яй ве́лие дерзнове́ние ко Господу, потщи́ся богоприя́тным твоим хода́тайством испроси́ти у Царя царствующих и Господа госпо́дствующих, яко да проба́вит вели́кия и бога́тыя ми́лости Своя на нас грешных, да пода́ст нам дух пра́выя веры, дух ве́дения и любвѐ, дух мира и радости о Ду́се Свя́те, да избавит от бед и напастей, да низпо́слет вся полезная ко спасению душ наших. Благочести́вейшему же, самодержа́внейшему, великому государю нашему, императору Николаю Александровичу всея̀ России да да́рует долгоде́нствие и душе́вное спасение, на супоста́ты одоление, во устрое́нии царства благопоспеше́ние и на вся благая начинания благослове́ние, и всему царствующему дому премногую милость Свою и благоволе́ние. Святейшему же прави́тельствующему сино́ду да низпо́слет благодать Свою, пра́во пра́вити слово Христо́вы истины: начальником и судия́м да подаст мудрость и нелицеприятие. Всем же православным да низпо́слет мир, тишину, безмяте́жие, усердие ко исполнению заповедей Его, изобилие плодов земных: и да изба́вит всю Российскую страну от глада, губи́тельства, тру́са, потопа, огня, меча, нашествия иноплеме́нных и междоусо́бныя брани, смертоно́сныя язвы и от всякаго зла. Ей, угодниче Божий! Не пре́зри молений наших, но услы́ши нас моля́щихся тебе, и под кро́вом заступле́ния твоего сохрани нас [и обитель сию] ненаве́тны от враг видимых и невидимых, да сподо́бимся сконча́ти житиѐ наше в покаянии и восприи́мем вечная блага́я во Царствии Христа Бога нашего, иде́же восхва́лим с тобою и всеми святыми достопокланя́емое имя Пресвяты́я Троицы, Отца и Сына и святаго Духа, во веки веков.

Тропарь, глас 8

Сле́з твоих тече́ньми, пусты́ни безпло́дное возде́лал еси, и яже из глубины воздыха́ньми, во сто̀ трудов уплодоноси́л еси, и был еси свети́льник вселе́нней, сия́я чудесы̀, преподо́бне Са́вво, отче наш: молѝ Христа Бога спасти́ся душа́м нашым.

Декемвриа 5. Молитва святителю Гурию, архиепи́скопу Казанскому

О архиерею Божий, Гурие святый, предстояй ныне престолу Христову в Церкви торжествующей! Не забуди нас, празднующих любовию святую память твою, от горняго возшествия нашу назирай худость. Отче благий, призирай милостивно на чада твоя: пастырю добрый, не пре́зри стада твоего, тобою Бо́гови приобре́теннаго. Аще и отлучен  еси от грешник святынею твоею, обаче не отлучайся от нас грешных милосердием, присутствуй нам твоими за ны к Богу молитвами. Виждь град, в немже много трудился еси, виждь народ, егоже просветил еси, и буди всем помощник, заступник, покровитель, защи́титель, промы́сленник же и упра́витель жизни нашея. Хода́таю теплый, не премолчѝ вопия̀ о нас ко Господу, испроси мир мíрови, тишину христианскому царству, держа́вствующему же одоление, и всем временная и вечная благая.

Тропарь, глас 4, творение святителя Димитрия Ростовскаго

Пра́вило веры и образ целому́дрия, учи́теля добрых дел и наста́вника спасения, дадѐ тя Господь новопросвеще́нному граду Каза́ни, в не́мже приобре́л еси но́выя от язык люди, и приве́л еси я̀ Христо́ви. Сего ради в память твою радостно сошедшеся, честне празднуем святое твое успение: ты же, отче наш, святителю Христов Гурие, моли Христа Бога спастися душам нашым.

Декемвриа 6. Молитва святи́телю Николаю, архиепи́скопу Мирлики́йскому

Молитва 1, из службы со акафистом

О всехва́льный и всечестны́й архиере́ю, великий чудотво́рче, святи́телю Христов, отче Нико́лае, челове́че Божий и ве́рный ра́бе, му́жу жела́ний, сосу́де избра́нный, крепкий сто́лпе церко́вный, свети́льниче пресве́тлый, звездо̀ осиява́ющая и освеща́ющая всю вселенную! Ты еси праведник, яко фи́никс процветы́й, насажде́ный во дво́рех Го́спода своего: живы́й в Ми́рех, ми́ром благоуха́л есѝ, и ми́ро приснотеку́щее благода́ти Божия источа́еши: твоим шествием, пресвяты́й отче, море освяти́ся, егда̀ многочуде́сная твоя мо́щи ше́ствоваху во гра́д ба́рский, от Востока до Запада хвалити имя Господне. О преизя́щный и преди́вный чудотво́рче, скорый помо́щниче, те́плый засту́пниче, па́стырю предо́брый, спаса́яй слове́сное ста́до от всяких бед! Тебе прославля́ем и тебе велича́ем, яко надежду всех христиан, исто́чника чудес, защи́тителя ве́рных, прему́драго учи́теля, а́лчущих корми́теля, пла́чущих веселие, наги́х одеяние, боля́щих врача̀, по морю плавающих упра́вителя, пленников свободи́теля, вдов и сирот пита́теля и засту́пника, целому́дрия храни́теля, младенцев кро́ткаго наказа́теля, старых укрепле́ние, постников наста́вника, тружда́ющихся упокое́ние, нищих и убогих изоби́льное богатство. Услыши нас моля́щихся тебе и прибега́ющих под кров твой, явѝ предста́тельство твое о нас к Вышнему, и исхода́тайствуй твоими богоприя́тными молитвами вся поле́зная ко спасению душ и теле́с наших: сохранѝ святую обитель сию̀ [или храм сей], всякий гра́д и ве́сь, и всякую страну̀ христиа́нскую, и люди живу́щыя, от всякаго озлобле́ния по́мощию твое́ю. Ве́мы бо, ве́мы, яко много может молитва пра́веднаго, поспешеству́ющая во благо́е: тебе же пра́веднаго, по Преблагослове́нней Деве Марии, предста́теля ко Всеми́лостивому Богу и́мамы, и ко твоему, преблаги́й отче, те́плому хода́тайству и заступле́нию смире́нно притека́ем. Ты нас соблюдѝ, яко бо́дрый и до́брый па́стырь, от всяких врагов, губи́тельства, тру́са, гра́да, гла́да, пото́па, огня̀, меча̀, наше́ствия иноплеме́нников, и во всех беда́х и ско́рбех на́ших подава́й нам ру́ку по́мощи, и отве́рзи две́ри милосе́рдия Божия: поне́же недосто́йни есмы̀ зре́ти высоту небе́сную, от множества непра́вд наших: свя́зани есмы̀ у́зами грехо́вными, и николи́же воли Созда́теля нашего сотовори́хом, ни сохрани́хом повеле́ний Его. Те́мже преклоня́ем коле́на сокруше́ннаго и смире́ннаго се́рдца на́шего к Зижди́телю своему, и твоего̀ оте́ческаго заступле́ния к Нему про́сим: помозѝ нам, уго́дниче Божий, да не поги́бнем со беззако́нии на́шими: изба́ви нас от вся́каго зла и от вся́кия ве́щи сопроти́вныя, упра́ви ум наш, и укрепѝ сердце наше в пра́вой вере, в не́йже твоим предста́тельством и хода́тайством, ни ра́нами, ни преще́нием, ни мо́ром, ни ко́им гневом от Созда́теля своего ума́лени будем, но ми́рное зде поживе́м житиѐ, и да сподо́бимся ви́дети блага́я на земли живы́х, сла́вяще Отца и Сына и Святаго Духа, Единаго в Троице сла́вимаго и покланя́емаго Бога, ныне и присно и во веки веков.

Молитва 2, из тояже книги

О всесвяты́й Николае, угодниче преизря́дный Господень, теплый наш засту́пниче и везде в ско́рбех скорый помощниче! Помозѝ мне, грешному и унылому, в настоящем сем житиѝ: умолѝ Господа Бога дарова́ти ми оставле́ние всех моих грехов, ели́ко согреши́х от юности моея̀, во всем житиѝ моем, делом, словом, помышле́нием и всеми моими чу́вствы, и во исхо́де душѝ моея помозѝ ми окая́нному, умолѝ Господа Бога, всея твари Соде́теля, изба́вити мя от возду́шных мыта́рств и ве́чнаго муче́ния: да всегда прославляю Отца и Сына и Святаго Духа, и твое ми́лостивное предста́тельство, ны́не и при́сно и во ве́ки веко́в.

Молитва 3, из тояже книги

О всеблаги́й отче Нико́лае, па́стырю и учи́телю всех, ве́рою притека́ющих ко твоему заступле́нию и те́плою моли́твою тебе призыва́ющих! Скоро потщи́ся и изба́ви Христово ста́до от волко́в губя́щих ѐ: и всяку страну христианскую огради и сохрани святыми твоими молитвами от мирскаго мятежа, труса, нашествия иноплеменников и междоусобныя брани, от гла́да, пото́па, огня̀, меча̀ и внезапныя смерти. И якоже поми́ловал трие́х мужей в темнице седящих, и избавил еси их от царе́ва гнева и посече́ния ме́чнаго: та́ко поми́луй и менѐ, умом, словом и делом во тьме грехо́в су́ща, и изба́ви мя от гнева Бо́жия и ве́чныя ка́зни: яко да твоим хода́тайством и по́мощию, своим же милосе́рдием и благода́тию, Христос Бог тихое и безгрешное житиѐ даст ми пожи́ти в ве́це сем, и изба́вит мя от шу́ияго стояния, сподо́бит же десна́го со всеми святыми во веки веков.

Молитва 4

О па́стырю добрый, учи́телю и наста́вниче наш, святи́телю отче Нико́лае! Ты а́нгельски пожи́в на землѝ, по преставле́нии твоем яко а́нгел благи́й просия́л есѝ, моля́щымися тебе при́сный помо́щник явля́яся. Ве́руем от всея̀ душѝ и помышле́ния, я́ко твои́ми нело́жными хода́тайствы и благода́тию, оби́льно дарова́нною тебе от Господа Спаса нашего, нашему спасе́нию при́сно спосо́бствуеши. Убо и в час сей на́ша недосто́йная приимѝ моле́ния: свободѝ нас твои́м заступле́нием от облежа́щего нас суесло́вия м суему́дрия, неправове́рия и злове́рия челове́ческаго: моли́ся мир всем Дающему низпосла́ти мир це́рквам, расточе́нная же во еди́но собра́ти, и державу благочести́вейшаго, самодержа́внешаго импера́тора нашего Николая Александровича в мире и тишине сохрани́ти: молѝ ми́лостиваго Господа, да, и́миже ве́сть судьба́ми, спасе́т нас от прегреше́ний наших: молѝ бла́гость Его, о е́же ми́лостивно подати нам и всему мiру потребная, да непрестанно славим, хвалим, поем и величаем пречестно́е и великоле́пое имя Отца и Сына и Святаго Духа, ныне и присно и во веки веков.

Молитва 5, чтомая пред чудотворною иконою святителя Николая в селе Про́мзине, Симбирския епархии

О всехвальный великий чудотво́рче, святителю Христов, отче Нико́лае! Молим тя, бу́ди надежда всех христиан, верных защи́титель, а́лчущих корми́тель, плачущих веселие, болящих врач, по морю пла́вающих упра́витель, убогих и сирых пита́тель и всем скорый помощник и покровитель, да мирное здѐ поживем житиѐ и да сподо̀бимся видети славу избра́нных Божиих на небесѝ и с ними непрестанно воспева́ти Единаго в Троице покланя́емаго Бога во веки веков.

Молитва 6, чтомая в Покровским Медведевском Единоверческом монастыре, Нижегородския епархии

О великий заступниче, архиерею Божий, Нико́лае треблаже́нне, иже подсо́лнечную осия́вый чудесы, призыва́ющым же ты скорый услы́шатель явля́яйся, и́хже присно предваря́еши и спаса́еши, и избавля́еши, и от бед всяческих изъима́еши, от Бога данною ти чудес и даро́в благода́тию! Услыши мя недосто́йнаго, с верою тя призыва́юща и молебное тебе принося́ща пение: тебе бо хода́тая на умоление ко Христу предлага́ю. О пресловущий в чудесех, святителем высото! Яко имеяй дерзновение, скоро Владыце предстани, и преподобнии свои руце молебне к Нему простри о мне грешнем, и от Него щедроты благости подаждь ми, и приими мя в свое заступление, и от всех бед и зол мя избави, от нашествия врагов видимых и невидимых свобождая, и тех всех наветы и злохитрства погубляя, и борющих мя во всей жизни моей отражая: прегрешением же моим прощение испроси, и спасена мя Христу представи, и Царствия Небеснаго сподоби улучити за множество Того человеколюбия, Емуже подобает всяка слава, честь и поклонение, и со Безначальным Его Отцем, и с Пресвятым и Благим и Животворящим Духом, ныне и присно и во веки веков.

Молитва 7, чтомая в Николаевской Единоверческой церкви села Со́мовки, Нижегородския епархии

О добрый наш па́стырю и богомудрый наста́вниче, святи́телю Христов Нико́лае! Услы́ши нас грешных, моля́щихся тебѐ и призыва́ющих в помощь скорое предста́тельство твоѐ: виждь нас немощны́х, отвсю́ду уловля́емых, всякаго блага лише́нных и умом от малодушия помраче́нных: потщи́ся, уго́дниче Божий, не остави нас в грехо́внем плену быти, да не будем в радость враго́м нашым и не у́мрем в лука́вых деяниих наших. Молѝ о нас недостойных Соде́теля нашего и Влады́ку, Ему́же ты со безплотными ли́ки предстои́ши: ми́лостива нам сотворѝ Бога нашего в нынешнем житиѝ и в будущем ве́це, да не возда́ст нам по дело́м нашым и по нечистотѐ сердец наших, но по Своей благости воздаст нам. На твое хода́тайство уповающе, твоим предста́тельством хва́лимся, твое заступление на помощь призываем, и ко пресвятому о́бразу твоему припа́дающе, помощи просим: изба́ви нас, угодниче Христов, от зол находя́щих на нас, и укротѝ волны страстей и бед возстаю́щих на нас, да ради святых твоих молитв не обы́мет нас напа́сть и не погрязнем в пучи́не греховней и в тине страстей наших. Моли, святи́телю Христов Нико́лае, Христа Бога нашего, да пода́ст нам мирное житиѐ и оставление грехов, душа́м же нашым спасение и ве́лию милость, ныне и присно и во веки веков.

Тропарь, глас 4

Правило веры и образ кротости, воздержа́ния учителя явѝ тя стаду твоему Яже вещей Истина: сего ради стяжал еси смирением высокая, нищетою богатая. Отче священноначальниче Нико́лае, моли Христа Бога спастися душам нашым.

Декемвриа 7. Молитва преподобному Анто́нию Си́йскому. Из акафиста

Молитва 1

О предивный чудотво́рче и великий угодниче Божий, преподобне отче Анто́ние, пастырю наш добрый, теплый заступниче и скорый помощниче! Предстоя̀ престолу Пресвятыя Троицы, призри милостивым о́ком на ны и на вся люди, благоговейне притекающыя к честно́му гробу твоему, в немже лежащыя святыя мо́щи твоя, от дней древних нетле́нием цветущыя и благодатию Животворящаго Пресвятаго Духа благоуха́ющыя, исцеление от всяких недугов душевных и телесных неоску́дно источают: услыши нас молящихся тебе и чтущих святую память твою. Прострѝ ру́це твои ко Влады́це неба и земли, в твоих богоприятных молитвах поминай благочестивейшаго, самодержавнейшаго, великаго госуда́ря нашего, императора Николая Александровича всея̀ России и весь царствующий дом, святейший прави́тельствующий сино́д, святейшия вселенския патриа́рхи, преосвященныя митрополи́ты, архиере́и и епи́скопы, и весь свяще́ннический и монашеский чин, и весь при́чет церковный, и благоверных привительствующий синкли́т, военача́льники, градонача́льники, христолюбивое во́инство и вся православныя христианы, и испросѝ нам оставление прегрешений наших. Моли Милостиваго Бога отврати́ти от нас всякий гнев Его, праведно на ны дви́жимый, и сохрани не то́чию обитель нашу, но и вся гра́ды и ве́си, и вся страны̀ христианския, и люди живущия в них, от града и глада, от тру́са и потопа, от огня и меча, от нашествия иноплеме́нных и междоусо́бныя брани, от смертоно́сныя язвы и всякия па́губы и всякаго зла, дарова́ти же нам вся к жизни временней благопотребная и к вечному спасению полезная. Помозѝ нам святче Божий, избежа́ти пагубных сетей диавольских, препобеди́ти соблазны мíра и умертиви́ти у́ды нашя сущыя на землѝ: отвратѝ очи наши от суетных и преле́стных вещей земных, напра́ви же умы и мысли нашя ко зрению красоты Боже́ственныя, пренебесныя и нетленныя: сердца̀ наша, неду́гующия страстьми греховными, исцелѝ, да не прильпну́т сласте́м привременным и безме́стным: согрей же я̀ Боже́ственною любовию, да вожделе́ют истиннаго и непреходящаго блаженства, еже в Бо́зе. Укрепи нас во исполнение заповедей Господних, даждь нам покаяние сердечное и умиление сле́зное, молитву непрестанную и трудолюбие неосла́бное, бо́дренное трезве́ние ума и хранение сердца, мир по́мыслов, чистоту желаний, правоту̀ деяний, да изба́вльшеся тобою от всех враг видимых и невидимых, от всяких зол душевных и телесных, и соблю́дше веру пра́вую, надежду неотложную  и любовь нелицемерную, богоуго́дне скончаем житие наше на земли, и преше́дше в жизнь вечную, сподо́бимся зре́ти трисветлую зарю Трисияющаго Вечнаго Солнца, и в невечернем дни Небеснаго Царствия, купно с тобою и со всеми святыми, благодарне воспевати и благословля́ти Пресвятую Троицу, Отца и Сына и Святаго Духа, во веки веков.

Молитва 2

О богоблаже́нне и приснопа́мятне отче наш Анто́ние! Не мним тя ме́ртва су́ща: аще телом и преставился еси от нас, но жив в соборе Ангелов водворя́ешися. Молѝ за ны, избра́нниче Христов, и не пре́зри нас верою и любовию чтущих тя: помина́й нас недостойных у престола Царя Небеснаго, тебе бо даде́ся благодать молитися за ны. О заступниче и молитвенниче наш добрый! Се святых моще́й твоих ра́ка пред очи́ма на́шима ви́дима есть. Сохраняй убо нас всегда от сетей вражиих: моли́ся ко Господу о спасении душ наших, и испросѝ нам покаяния время и христианскую кончину безболе́зненну, непосты́дну, ми́рну, да невозбра́нно пре́йдем мыта́рства воздушных князе́й и сподобимся Небеснаго Царствия со всеми угоди́вшими Влады́це небеси и земли, Господу нашему Иисусу Христу, Ему́же подобает всякая слава, честь и поклонение, всегда, ныне и присно и во веки веков.

Тропарь, глас 1

Желанием духовным распали́вся и мяте́жи мирския отри́нул, ко Единому Богу любо́вию прилепи́лся еси, и Того вседу́шне взыску́я, во внутреннюю пустыню отше́л еси, при вода́х всели́вся: идеже во слезах и труде́х пребыва́я  многолетное время, в терпении мно́зем житие ангельское полходи́л еси, в наставлении Божественнаго разума: и множество монахов собрал еси, му́дре, и́хже посеща́я не оста́ви, Анто́ние преподобне отче наш, Пресвятей Троице моля́ся от зол всяческих изба́вити и спасти ду́ши нашя.

Деке́мвриа 7 и ма́иа 27. Молитвы преподобному Ни́лу, Столобе́нскому чудотворцу

Молитва 1, из службы

О великий уго́дниче, преславный чудотво́рче, со́браннаго зде о тебе стада
Христова бодрый пастырю и обители сея Богом данный нача́льниче, Ни́ле преблаженне! Душе́ю на небеси престолу Божию предстоя́й и Троичныя славы наслажда́яйся, телом же на земли в Божественнем храме почива́яй и от Него ти свы́ше благодатию разли́чная источа́яй чудеса, при́зри милостивым оком на предстоящыя  честне́й ра́це твоей люди и просящыя сильныя твоея помощи. Се бо мы, в безмерных согрешениих оскверни́вшиися и в ти́не страстей присно валя́ющиися, праведный гнев Божий на себе наведо́хом, и всякия милости недостойни сотвори́хомся: темже и не сме́юще возвестѝ оче́с наших к высоте небесней, нижѐ вознести молебный глас, сердцем сокрушенным и духом смиренным тебе в хода́тайство и пособие призываем. Ты убо, яко стяжа́вый дерзновение, воздви́гни горѐ преподобнии твои ру́це, якоже древле чудесный о́ный Моисей боговидец, амали́ка побежда́яй, и испросѝ скиптродержавному благочестивейшему императору нашему Николаю Александровичу, самоде́ржцу всея России, и всему царствующему дому, непреоборимую на невидимыя и видимыя враги победу, здравие нерушимое, лет долготу̀, мир во днех его, Церкви благостоя́ние, возду́ха благорастворе́ние, землѝ плодоносие. Изба́ви же всех, верою несумне́нною к Богу приходящих и многоцеле́бныя мо́щи твоя благоговейно почитающих, от всяких бед душевных и телесных, от всех томле́ний и прило́гов диавольских. Буди печальным уте́шитель, неду́гующим врачь, напа́ствуемым помощник, наги́м покровитель, вдови́цам заступник, си́рым защитник, младе́нцем питатель, ста́рым укрепитель, стра́нствующым путево́ждь, пла́вающым ко́рмчий, и исхода́тайствуй всем, крепкия помощи твоея усердне тре́бующым, вся ко спасению поле́зная. Яко да твоими молитвами наставляеми, путь маловременнаго жития нашего на земли безбедно совершим, и некончаемый покой на небеси улучивше, прославим купно с тобою всех благих Подателя, Единаго в Троице славимаго Бога, Отца и Сына и Святаго Духа, ныне и присо и во веки веков.

Молитва 2, чтомая в Ни́ловой пустыни, Тферски́я епархии

О преподобне и богоблаженне, па́стырю и начальниче, отче Ни́ле! Яко име́яй дерзновение ко Владыце Христу и ко Пречи́стей Его Матери, Пересвяте́й Богородице, бу́ди молитвенник и помощник и хода́тай о нас недостойных, живущих во святей обители сей, ея́же богоизбранней дружине ты начальник явля́ешися, и о приходящих с верою к цельбоносным моще́м твоим. Бу́ди помога́я и заступа́я от злаго нашего сопроти́вника, я́ко да твоими молитвами, пребывающии на месте сем, и приходящии с верою к ра́це моще́й твоих, и на всяком месте призывающии тя на помощь, невреди́ми будем от бесо́в и злых человек, славу и благодарение возсыла́юще Отцу и Сыну и Святому Духу, ныне и присо и во веки веков.

Тропарь, глас 4

Яко светильник всесве́тел явился еси во о́строве Селиге́ра е́зера, преподобне отче Ни́ле: ты бо, Крест Христов от юности твоея на ра́мо взе́м, усердно Тому последовал еси, чистотою Бо́гови прибли́жився, отону́дуже и чудес дарованием обогати́лся еси. Темже и мы, притекающе к раце мощей твоих, уми́льно глаго́лем: отче преподо́бне, моли Христа Бога спасти́ся душам нашым.

Декемвриа 8. Молитва преподобному Кири́ллу, Челмого́рскому чудотворцу, чтомая в Кири́лло-Челмого́рской пустыни, Олоне́цкия епархии

О пречестна́я и благодати Святаго Духа испо́лненая главо̀, сосу́де избранный Святыя Троицы, преподобне отче наш Кири́лле! Услыши нас грешных, предстоящих ныне пред честною ра́кою твоею и уми́льно молящихся тебе. Помолися о нас Всемилостивому Владыце Иисусу Христу, Богу нашему, и рождшей Его Матери, Владычице нашей Богородице и Присноде́ве Мари́и, о е́же отпусти́ти нам согрешения наша, яже соде́яхом. Ве́мы бо, отче наш, яко, а́ще плотию и в пе́рсти почива́еши, но духом здѐ с нами неотступно невидимо пребыва́еши, назира́я святую обитель твою сию̀, и по твоему нело́жному обещанию сию̀ назида́я, от всяких обстояний сохраняеши ю̀. И я́коже многое дерзновение ко Господу постническими твоими по́двиги стяжа́вый, умолѝ Его святыми твоими молитвами, подати мíрови мир, Церкви Его святей единомыслие, благочестивейшему же государю нашему, императору Николаю Александровичу, на врагѝ победу, служа́щым же зде друг ко другу любовь и согласие: и всем лю́дем с верою к тебе притекающым, вся к пользе душевней и телесней потребная у Господа испросѝ, во еже изба́витися нам всем в день судный от страшныя шуия части, ста́ти же одесну́ю со избра́нными Его в наследие Царствия Небеснаго. Яко Тому подобает всякая слава, честь и поклонение, со Безначальным Его Отцем, и со Пресвятым и Благим и Животворящым Его Духом, ныне и присно и во веки веков.

Деке́мвриа 12. Молитвы святителю Спиридо́ну, Тримифу́нтскому чудотворцу

Молитва 1, из акафиста

О великий и пречудный святи́телю Христов и чудотво́рче Спиридо́не, Керки́рская похвало̀, всея вселенныя свети́льниче пресве́тлый, те́плый к Богу моли́твенниче и всем к тебе притека́ющым и с верою моля́щымся скоропредста́тельный засту́пниче! Ты веру православную на Нике́йстем соборе посредѐ отце́в преславно изъяснил еси, ты единство Святыя Троицы чудесною силою показал еси и еретикѝ до конца посрамил еси. Услыши убо, Святителю Христов, нас грешных моля́щихся тебе, и сильным твоим предста́тельством у Господа изба́ви нас от всякаго злаго обстоя́ния: от глада, потопа, огня и смертоно́сныя я́звы. Ты убо во вре́менней жизни твоей от всех сих бедствий избавля́л еси люди твоя: от нашествия ага́рян и от глада страну твою сохранил еси, царя от неисце́льнаго недуга избавил еси, и многия гре́шники к покаянию приве́л еси, за святость же жития твоего Ангелы невидимо в Церкви пою́щия и сослужа́щия тебе имел еси. Си́це убо посла́ви тебе, вернаго раба Своего, Владыка Христос, яко и вся тайная челове́ческая деяния дарова̀ тебе разуме́ти, живущыя же неправедно облича́ти. Многим в ску́дости и недота́точестве живущым ты усе́рдно помагал еси, люди убогия изобильно во время глада напитал еси, и иная многая знамения силою в тебе живущаго Духа Божия сотворил еси. Сице и нас не остави, святителю Христов: поминай нас, чад твоих, у престолпа Вседержителя, и умоли Господа, да подаст многих наших грехов прощение, безбедное и мирное житие да дарует нам, кончины же живота непостыдныя и мирныя и блаженства вечнаго в будущем веце сподобит нас, да непрестанно возсылаем славу и благодарение Отцу и Сыну и Духу Святому, ныне и присно и во веки веков.

Молитва 2, чтомая в Петроградском Адмиралтейском соборе

О преблаже́нне святителю Спиридо́не, великий угодниче Христов и преславный чудотво́рче! Предстоя̀ на небеси престолу Божию с ли́ки Ангел, при́зри милостивым оком на предстоящыя здѐ люди и просящыя си́льныя твоея помощи. Умолѝ благосердие человеколюбца Бога, да не осудит нас по беззако́нием нашым, но да сотвори́т с нами по милости Своей. Испроси нам у Христа и Бога нашего мирное и безмятежное житие, здравие душевное и телесное, земли благоплодие и во всем всякое изобилие и благоденствие, и да не во зло обратим благая даруемая нам от щедраго Бога, но во славу Его и в прославление твоего заступления. Избави всех, верою несумненною к Богу приходящих, от всяких бед душевных и телесных, от всех томлений и диавольских наветов. Буди печальным уте́шитель, недугующым врачь, в напа́стех помощник, наги́м покровитель, вдови́цам заступник, си́рым защитник, младе́нцем питатель, ста́рым укрепитель, стра́нствующым путево́ждь, пла́вающым ко́рмчий, и исхода́тайствуй всем, крепкия помощи твоея усердне тре́бующым, вся ко спасению поле́зная, яко да твоими молитвами наставля́еми и соблюда́еми, достигнем вечнаго покоя и купно с тобою прославим Бога, в Троице Святей славимаго, Отца и Сына и Святаго Духа, ныне и присно и во веки веков.

Тропарь, глас 1

Собора перваго показа́лся еси побо́рник и чудотво́рец, богоно́сне Спиридо́не отче наш: темже мертвей ты во гробе возглашаеши, и змию̀ в зла́то претвори́л еси: и внегда пети тебе святыя молитвы, Ангелы сослужа́щия тебе имел еси, свяще́ннейший. Слава Давшему тебе кре́пость: слава Венчавшему тя: слава Действующему тобою всем исцеле́ния.

Деке́мвриа 12 и ма́иа 27. Молитвы преподобному Ферапо́нту, Мо́нзенскому чудотворцу

О преподобне отче, великий заступниче, скорый услышателю, угодниче Божий и чудотво́рче Ферапо́нт! Не забуди ны, якоже обещался еси, посещай ча́да твоя: аще бо и отше́л еси от нас телом, но духом присно с нами пребыва́еши. Мо́лим убо тя, о преподобне отче: изба́ви ны от огня и меча, от нашествия иноплеменных и междоусобныя брани и от тлетворных ве́тров и от внезапныя смерти и от всех прило́г вражиих, находящих на ны. Услыши ны грешныя, приимѝ молитву и моление наше, еже к тебе, яко кади́ло благовонное и яко жертву богоприятную, прино́сим. Умерщвле́нныя злыми де́лы, словесы̀ и помышле́ньми душы нашя, преподобне отче, оживѝ и возста́ви. И якоже многи приходя́щыя к цельбоно́сному твоему гробу с верою, всякими скорбьмѝ и боле́зньми лю́те страждущыя исцели́л еси, тако и нас исцелѝ от недугов душевных и телесных. Исторгни нас из глубины согрешений и на путь покаяния наста́ви, милостивым твоим предста́тельством от видимых и невидимых враг избавляя. Помозѝ нам в житиѝ сем и во исхо́де душ наших и в будущей жизни, во веки веков.

Тропарь, глас 4

Любовию Христовою, богомудре, просвети́вся, доброде́тельми Василию блаженному подража́л еси, всякое же наслаждение плотско́е возненавидев и в пустыню всели́вся, тамо вельмѝ подвиза́лся еси в пе́нии, во бде́нии и в поще́нии: темже и Христос да́ром чудес обогатѝ тебе. Поминай убо нас, чтущих пресветлую память твою, преподо́бне отче Ферапо́нте, и моли Христа Бога спастися душам нашым.

Деке́мвриа 13 и а́вгуста 14. Молитва преподобному Аркадию Новото́ржскому, чтомая в Новото́ржском Борисоглебском монастыре, Тферския епархии

О преподобне и богоносне отче наш Арка́дие! Услыши нас молящихся тебе, и бу́ди нам помощник в ско́рбех наших, и изба́ви нас от напастей, за множество прегрешений находя́щих на ны. Умолѝ, угодниче Христов, Всеблагаго Бога даровати нам оставление всех от юности нашея до настоящего днѐ и часа̀ делом, словом, помышлением и всеми чу́вствы содеянных нами согрешений, и исхода́тайствуй нам невозбра́нный вход в Небесное Царствие, да прославляем непрестанно славимую от Ангел Всесвятую Троицу, Отца и Сына и Святаго Духа, и твое милостивное предстательство, в безконечныя веки веков.

Тропарь, глас 4

От духовнаго наставника преподобнаго Ефрема наставля́емь, послушания добрый рачи́телю, отче Аркадие, от мирскаго мятежа удалился еси, и инок быв изрядный, добрым подвигом ревнуяй, от Христа Бога венец славы небесныя приял еси: и ныне вкупе со преподобным отцем Ефремому престола Вышняго предстоя, о нас молися, избавитися нам от всех бед и скорбей спастися душам нашым.

Декемвриа 15. Молитва святителю Стефа́ну исповеднику, архиепископу Суро́жскому. Из акафиста

О священная главо̀, крепкий наш молитвенниче и заступниче, святителю отче наш Стефа́не! Услыши нас, с верою и любовию призывающих тя. Поминай нас у престола Вседержителева и не преста́й моли́тися за нас. Испросѝ предстательством твоим у Всемилостивейшаго Спаса нашего мир Церкви Его, па́стырем Божиим ревность и силу, благочести́вейшему царю нашему мудрость и благопоспе́шество, православней странѐ нашей мир и спасение. Умоли Небеснаго Отца всем пода́ти коему́ждо благопотре́бен дар: веру и́стинную, надежду твердую, любовь неоску́дную, градо́в наших утвержде́ние, мíра умире́ние, от глада и губи́тельства избавление, от нашествия иноплеме́нных сохранение, юным благое в вере возрастание, старым и немощным утешение и укрепление, болящым исцеление, си́рым и вдовицам милость и заступление, бедствующым помощь. Не посрамѝ нас во уповании нашем, споспе́шествуй, яко отец чадолюбивый, и нам понестѝ благое иго Христово во благодушии и терпении, и всех нас упра́ви в мире и покаянии непостыдно живо́т свой сконча́ти и Царствия Божия наследники бы́ти, иде́же ты ныне водворя́ешися со Ангелы и всеми святыми, хваля Бога, в Троице славимаго, Отца и Сына и Святаго Духа, во веки веков.

Тропарь, глас 4

Яко святитель со безплотными единожи́тель был еси, священному́чениче Стефа́не: восприе́м бо крест яко оружие, и став крепко сопротив иконоукорителя и духобо́рцев, не покланяющихся Пречистому образу Христа Бога нашего, отсе́кл еси всяку ересь лукавых: того ра́ди прие́м мучения вене́ц, избавил еси град твой Суро́ж от всякия неприязни. И ныне молим тя, святе, да изба́виши нас от всяких злых искушений и бед и вечныя муки.

Деке́мвриа 15. Молитва преподобному Три́фону Пече́нгскому. Из акафиста

О Всесвятыя Троицы угодниче, о блаже́ннейший и равноапо́стольный пастырю, преподобне отче наш Три́фоне! Не забу́ди па́ствы твоея, но поминай нас во святых твоих и богоприятных молитвах: стадо же твое, е́же сам, по благовестию от Ангела, пришествием твоим собрал и упа́сл еси, сохрани и защити. Ве́мы бо, угодниче Божий, како в сро́дстве твоего мiрска́го жилища, во святей Церкви поющыя слышал еси: пусты́нным живо́т сокровенн есть, божественным раче́нием воскриля́ющымся. И того ради божественною любовию воспери́вся, дом и сро́дство оставил еси, и прише́д вскра́й северныя страны̀, просвети́л еси святым Крещением неведущий Творца Лопа́рский род, за еже, во утверждение христианския веры, многа изгнания и злоключения подъя́л еси: и близ реки Пече́нги в пустыню вселився, братию же из многих градо́в и ве́сей собрав, ве́лию обитель воздви́гл еси, и, при отшествии к небесным селе́нием, о посещении твоея обители проро́чествия дар от Бога восприял еси, по смерти же многа чудеса и цельбы̀ с верою просящым на мори и на суши сотворил еси и ныне твори́ши. Темже молим тя, не забу́ди присеща́ти чад твоих: моли за ны, преподобне отче, приходящыя к тебе с верою, и за вся христиа́ны, яко имеяй дерзновение к Безсмертному Царю Христу, всех Богу: не премолчѝ за ны ко Господу, и не пре́зри нас, верою и любовию чтущих тя и поминающих святую память твою. Аще бо телом и преста́вился еси от нас, но и по смерти, живый духом, всегда чудоде́йствуеши. Молитвами твоими сохраняй нас от стрел и ко́зней вражиих, и всякия прелести бесо́вския, и от враг видимых и невидимых. О пастырю наш добрый! Поне́же всегда славимому Богу при престоле Его непостижимаго вели́чествия, неотступно в молитвах предстои́ши, усердно к тебе прибегаем и просим: умолѝ и испрсѝ нам время к покаянию, да в час исхода души пре́йдем от земных к небесным, от мыта́рств же воздушных и вечныя муки избавимся, и Небесному Царствию насле́дницы будем со всеми от века угодившими. О преблаженне и преподобне отче наш Трифоне! Не пре́зри и ныне нас притекающих к тебе, яко да молитвами твоими и помощию спаса́еми, славу и благодарение, хвалу и поклонение за вся в Троице Единому Богу, всех Создателю возсылаем, Отцу и Сыну и Святому Духу, ныне и присно и во веки веков.

Деке́мвриа 18 и февруариа 26. Молитва преподобному Севастиа́ну Пошехо́нскому, чтомая Пошехо́нском Преображенском Севастиа́новском монастыре, Ярославския епархии

О святый преподобный отче, преблаже́нне Севастиа́не, пе́рвейший пустыни сия просвети́телю, и иноческаго в ней жития законоположи́телю, и сея обители основателю! Ты убо телом человек был еси, житием же яко Ангел явился еси: уста̀ бо твоя, яко серафи́мская, Бога день и нощь хвале́ньми прославля́ху, пресветлое же житие твое бысть чистоты и целомудрия зерца́ло. Се аз раб недостойный дерза́ю припа́дати к честны́м и цельбоно́сным моще́м твоим: не отри́ни мене, с верою и любовию тебе покланя́ющагося и тебе, угодниче Христов Севастиа́не, сице моля́щагося: буди ми учитель и просветитель, душевныя страсти утишая, и телесныя болезни исцеляя, и на путь спасения наставляя. О преблаженне отче Севастиа́не! Милостив буди скорбней и грешней души моей, и предста́ви ю̀ ко Господу спасе́ну, под кров твой притека́ющую, да твоим, отче, хода́тайством сохране́н буду от враг видимых и невидимых, и восхвалю̀ Бога, в Троице Святей прославля́емаго, Отца и Сына и Святаго Духа, ныне и присно и во веки веков.

Деке́мвриа 19. Молитва святому мученику Вонифа́тию, чтомая в Богоявле́нской церкви града Яросла́вля

О святый страстоте́рпче Христов, во́ине Царя Небеснаго, земная сладострастия презревый и к горнему Иерусалиму страданием возшедый, мучениче Вонифа́тие! Услыши мя грешнаго, приносящаго от сердца молебная пения, и умоли Господа нашего Иисуса Христа прости́ти вся моя согрешения, в ведении и в неведении мною соде́янная. Ей, мучениче Христов, образ покаяния собою показа́вый грешным! Буди ми на злаго сопротивника диавола твоими молитвами к Богу помощник и заступник: много бо порева́хся избе́гнути сетей его лукавых, но удицею греховною уловле́н и крепко влачи́мь от него, не могу избавитися, а́ще не ты предста́неши ми, во обстояниих го́рькая терпя́щему: и коли́ко покушахся пока́ятися, но ложь пред Богом бых. Сего ради к тебе прибегаю и молюся: спаси мя, святче Божий, от всех зол твоим предстательством, благодатию же всесилнаго Бога, в Троице Святей сла́вимаго и покланя́емаго, Отца и Сына и Святаго Духа, ныне и присно и во веки веков.

Деке́мвриа 20 и иануариа 29. Молитва святому священному́ченику Игна́тию Богоносцу. Из акафиста

О великий святителю, богоносне Игна́тие! К тебе припа́даем и молим тя: при́зри на ны грешныя, прибегающия ко твоему заступлению: умолѝ Господа, да простит нам вся согрешения наша. Ты му́ченически душу твою за веру положил еси: да́руй и нам мужество во всем подража́ти тебе. Ничто́же в жизни возмо́же отлучи́ти тя от любвѐ ко Господу, ни ле́стная обещания, ни преще́ния, нижѐ самыя муки: ты пред зверьмѝ на смерть лютую с радостию предста́л еси, и яко Ангел во обители Отца нашего Небеснаго возлете́л еси: и того ради молитва твоя много может пред Го́сподем. Буди убо нам, святый угодниче, предстатель у Господа: испросѝ благоде́нственное  и мирное житие, здравие и спасение и во всем благопоспеше́ние, на враги же победу и одоление благочестивейшему государю нашему, императору Николаю Александровичу и всему царствующему дому, да осени́т я̀ Господь Своею благода́тию и да сохранит царя нашего на всех путе́х его святыми Своими Ангелы. Помогай и всем православным христианом святыми твоими молитвами ко Всемогущему Богу, да изба́вит ны от гла́да, тру́са, гра́да, бездо́ждия и смертоно́сных болезней, и да да́рует нам здравие и спасение. Бу́ди нам помощник скорый во всякой скорби, наипа́че же в час кончины нашея яви́ся нам светлый защи́тник и хада́тай, и умолѝ Господа сподо́битися всем нам, тебе ныне тепле молящымся, получи́ти по христианстей кончине Небесное Царствие, иде́же вси святии вкупе с тобою славят Отца и Сына и Святаго Духа во веки веков.

Декемвриа 21. Молитва святителю Петру, митрополиту Киевскому и всея России. Из акафиста

О великий святителю, преславный чудотво́рче, Российския Церкве первопресто́льниче, града Москвы храни́телю и о всех нас усердный моли́твенниче, отче наш Пе́тре! К тебе смиренно припа́даем и молимся: простри руце твои ко Господу Богу и помолися за ны грешныя и недостойныя рабы Его, да проба́вит нам милость Свою и низпо́слет нам вся благопотре́бныя ко временному житию и вечному спасению нашему да́ры благости Его, наипа́че же да огради́т нас миром, братолюбием и благочестием от всех искушений врага диавола, и дарует нам бы́ти верным ча́дом твоим не по имени то́кмо, но и всем житием нашим. Молим тя, святителю Христов, сохрани предстательством твоим небесным благочестивейшаго, самодержавнейшаго, великаго государя нашего, императора Николая Александровича всея России, во здравии и благоденствии на мно́гая ле́та, покоряя под но́зе его вся враги и супоста́ты его, и да почи́ет на нем благословение твое, дре́вле пре́дку его, великому князю Иоанну, тобою данное. Ей, угодниче Божий! Услыши нас благосердно, и буди всем нам помощник и заступник во всяких беда́х и напа́стех, не забуди нас и в час кончины нашея, егда наипа́че твоего заступления потребуем: да молитвами твоими святыми сподобимся и мы грешнии кончину благую получи́ти и Царствие Небесное унаследовати, славяще дивнаго во святых Своих Бога нашего, Отца и Сына и Святаго Духа, во веки веков.

Тропарь, глас 4

Яже пре́жде безплодная землѐ, ныне веселися: се бо Христос светильника в тебе показа, я́ве сия́юща в мiре и исцелева́юща недуги и болезни нашя. Сего ради ликуй и веселися со дерзновением: святитель бо есть Вышняго сия соде́ловаяй.

Ин тропарь, глас 4

Лику́й светло, богосла́внейший гра́де Москва̀, име́яй в себе архиере́а Петра яко зарю̀ солнца, всю Россию чудодея́нии озаря́юща: той бо немощи врачу́ет и неду́ги яко тьму̀ прогоня́ет от вопию́щих ему: радуйся, иера́рше Бога Вышняго, тобою сия па́стве твоей соде́ловающаго.

Деке́мвриа 21 и иуниа 2. Молитва святей благоверней княгине Иулиани́и Вя́земской, чтомая в Новото́ржском Преображенском соборе, Тферския епархии

О блаженная госпоже, преславная Христова мученице, небесных Ангелов сожительнице, благоверная княги́не Иулиани́е, до́бре за чистоту подвизавшаяся, еяже ради и Боже́ственными да́ры обогати́вшися, во временней жизни лю́те от злоко́зненнаго врага пострадала еси, утешение же несконча́емое на небесѝ от Христа Бога получила еси, яко благими де́лы и кро́тостию украси́вшаяся, и сего ради кротких землю наследовала еси, благочестно в законе пожи́вшая и ныне чудесы̀ вельмѝ просиявшая! Ты, чистоты̀ ради твоея серде́чныя, свет Святаго Духа прияла еси, и всех благих дел сокровище на земли яви́лася еси, и сего ради благий конец мученичества улучи́вши, неизрече́ннаго света в вечных кро́вех небеснаго селения сподо́билася еси, и ныне со святыми собо́ры водворя́ешися и с му́ченик ли́ки весели́шися. Помяни убо и нас, доброде́тельное твое житиѐ и страдания твоя му́ченическая похваля́ющих и с духовною радостию память твою почитающих. При́зри на ны, волнами житейскими обурева́емыя, да твоими молитвами, до́бре поживше, диавольских избежим сете́й, и с тобою вечных благ сподо́лени будем. О преблаженная страстоте́рпице, всех Владыце и Бога благая и верная раба̀ яви́вшаяся! Днесь со́браннии во храме твоем, к ра́це моще́й твоих припа́дающе, умиле́нно вопие́м и молим тя: молѝ с нами и о нас умоляемаго от Своего благосердия Бога, да ми́лостивно услышит нас, просящих Его благостыню, и подаст нам вся ко спасению и житию̀ потре́бная проше́ния, и всем, на вском месте, во всякой скорби и обстоянии требующим Его человеколюбия и помощи, великую Свою да низпо́слет милость: да благодатию Божиею и твоим теплым хода́тайством здра́ви всегда душе́ю и телом пребыва́юще, славим ди́внаго во святых Своих Бога Израилева, не удаля́ющаго помощи Своея от нас, всегда, ныне и присно и во веки веков.

Тропарь, глас 2

Благочестно в зако́не пожи́вши и благими делы украси́вшися, яко крепкий адамант яви́лася еси целомудренная, святая благоверная княгине Иулиани́е: тленную бо славу и добро́тство телесное презре́вши, злоко́зненнаго врага победи́ла еси, и целому́дрия ра́ди мученическую смерть прия́ла еси. Сего ради от Христа Бога нетле́нным и вечным венце́м венча́вшися, ныне с ли́ки му́ченик лику́еши, и нам ве́лия чудеса, приходящым ко гробу твоему, обильно источа́еши. Темже ти вопием: молися Христу Богу о всех нас, с верою и любовию страдания твоя почита́ющих.

Деке́мвриа 22. Молитва святей великомученицеАнастаси́и, именуемей Узореши́тельнице. Из акафиста

О многострадальная и премудрая великомученице Христова Анастаси́е! Ты душе́ю на небеси у престола Господня предстои́ши, на земли же данною тебе благодатию, различная совершаеши исцеления. Призри убо милостивно на предстоящыя люди и молящыяся пред мощами твоими, просяшыя твоея помощи: простри ко Господу святыя молитвы твоя о нас, и испроси нам оставление согрешений наших, недужным исцеление, скорбящым и бедствующым скорую помощь: умоли Господа, да подаст всемнам христианскую кончину и добрый ответ на Страшнем Суде Своем, да сподобимся и мы купно с тобою славити Отца и Сына и Святаго Духа во веки веков.

Деке́мвриа 23 и иануариа 23. Молитва святителю Феокти́сту, архиепископу Новгоро́дскому, чтомая в Новгоро́дском Юрьеве монастыре

О святителю Феокти́сте, угодниче Господень преизря́дный, теплый наш заступниче и молитвенниче! Бу́ди в скорбех и болезнех нам послу́шатель и помощник: помозѝ нам грешным и унылым, се́мо приходящым и ра́це мощей твоих покланя́ющымся. В настоящем убо житиѝ умолѝ Господа Бога дарова́ти нам оставление всех наших грехов, ели́ка согреши́хом от юности нашея делом, словом, помышлением и всеми нашими чу́вствы: и во исходе душ наших помозѝ нам окая́нным. Умоли Господа Бога всея твари Содетеля, избавити нас от воздушных мытарств и вечнаго мучения, да всегда прославляем Отца и Сына и Святаго Духа, и твое милостивное предстательство, ныне и присно и во веки веков.

Деке́мвриа 27. Молитва святому апостолу, первомученику и архидиакону Стефану, чтомая в Стефа́новской церкви града Росто́ва, Яросла́вския епархии

Первый во диа́конех, первый и в му́ченицех показался еси, святый Стефа́не апо́столе! Испо́лнь бо веры и силы во учении и в зна́мениих вели́к явился еси, и никто́же возмо́же противуста́ти премудрости и духу, и́миже глаго́лал еси, лице же твое на со́нмище ви́дено бысть, яко лицѐ Ангела. Темже исполнен Святаго Духа быв, видел еси отве́рстое небо и славу Божию и Сына Челове́ча, Господа нашего Иисуса Христа, одесну́ю стоя́ща Бога Отца. Также и от жестоковы́йных и убийц иудеев ка́мением, пред лице́м преблагословенныя и молящияся о тебе Девы Матери Его, побива́емь, прекло́нь колена возопи́л еси гласом ве́лиим: Господи, не постави им греха сего! И тако дух твой Господу Иисусу радостно пре́дал еси. Сего ради молитвенника и предстателя тя стяжа́хом, и коле́на души и сердца нашего прекло́ньше, тя молим: воздежѝ ру́це твои ко Господу, и сподви́жи всему роду человеческому Предстательницу и Хода́таицу к Сыну Своему, Пресвятую Матерь Деву, и о нас, присно прегневляющих грехо́м и ле́ностию, моли Блага́го Спаса нашего, да пода́ст нам благодать во благовременную помощь к покаянию, и твоим предстательством и заступлением Пресвятыя Матери Своея̀, в день он страшный и праведный, да не поставит пред нами грехи нашя, но по щедротам Своим, тобою умоле́н быв, да речет души нашей: спасение ваше есмь Аз во веки веков.

Тропарь, глас 4

Подвигом добрым подвиза́лся еси, первому́чениче Христов и апо́столе, и мучителей обличи́л еси нечестие: ка́мением бо побие́н от рук беззаконных, вене́ц от яже свы́ше десни́цы приял еси, и к Богу взывал еси, вопия̀: Господи, не поста́ви им греха̀ сего̀.

Деке́мвриа 28. Молитва преподобному Игнатию, Спа́со-Ло́мскому чудотворцу, чтомая в Спа́со-Ло́мской церкви, Яросла́вския епархии

О святый преподобне отче, Игнатие, пе́рвейший ве́си сея просвети́телю, иноческаго зде жития законоположи́телю! Ты убо телом человек был еси, житием же яко Ангел явился еси: уста̀ бо твоя, яко серафи́мская, Бога день и нощь хвале́ньми прославля́ху, пресветлое же житие твое бысть чистоты и целомудрия зерца́ло. Се аз раб недостойный дерза́ю припа́дати к честны́м и цельбоно́сным моще́м твоим: не отри́ни мене, с верою и любовию тебе покланя́ющагося и тебе, угодниче Христов Севастиа́не, сице моля́щагося: буди ми учитель и просветитель, душевныя страсти утишая, и телесныя болезни исцеляя, и на путь спасения наставляя. О преблаженне отче Севастиа́не! Милостив буди скорбней и грешней души моей, и предста́ви ю̀ ко Господу спасе́ну, под кров твой притека́ющую, да твоим, отче, хода́тайством сохране́н буду от враг видимых и невидимых, и восхвалю̀ Бога, в Троице Святей прославля́емаго, Отца и Сына и Святаго Духа, ныне и присно и во веки веков.

В неделю по Рождестве Христове. Молитва святому праведному Ио́сифу, обручнику Пресвятыя Девы Марии

О святый праведный Иосифе! Ты, еще на земли сый, ве́лие имел еси дерзнове́ние к Сыну Божию, И́же благоизво́ли именова́ти тя отца Своего, яко обру́чника Своея Матери, и послу́шати тя: ве́руем, яко ныне, с ли́ки праведный во обителех небесных водворя́яся, услышан будешь во всяком твоем прошении к Богу и Спасителю нашему. Темже ко твоему покрову и заступлению прибега́юще, смиренно мо́лим тя: якоже сам от бури сомнительных помышле́ний избавлен был еси, си́це изба́ви и нас, волна́ми смущений и страстей обурева́емых: якоже ограждал еси Всенепорочную Деву от клеветы̀ человеческия, оградѝ и нас та́кожде от всякия клеветы̀ напрасныя: я́коже хранил еси от всякаго вреда и озлобления воплотившагося Господа, си́це сохраняй твоим заступлением Церковь Его православную и всех нас от всякаго озлобления и вреда. Ве́си, святче Божий, яко и Сын Божий во днех пло́ти Своея в телесных потребах нужду име́яше, и ты послужил еси им: того ради молим тя, и нашым вре́менным ну́ждам благопоспешѝ твоим хода́тайством, подая̀ нам вся благая, в житии сем потребная. Изря́днее же просим тя, исхода́тайтвуй нам оставление грехов прия́ти от нарече́ннаго ти Сына, Единороднаго же Сына Божия, Господа нашего Иисуса Христа, и достойны бы́ти наследия Царства Небеснаго нас предстательством твоим сотворѝ, да и мы, в горних селениих с тобою водворя́ющеся, прославим  Единаго Триипостаснаго Бога, Отца и Сына и Святаго Духа, ныне и во веки веков.

Тропарь, глас 2

Благовествуй, Иосифе, Давиду чудеса̀ Богоотцу: Деву видел еси рождшую, с па́стырьми славословил еси, с волхвы̀ поклонился еси, ангелом весть прие́м. Моли Христа Бога спасти ду́шы нашя.

Месяц иануарий

Иануариа 1. Молитва святи́телю Васи́лию Вели́кому, архиепи́скопу Кесари́и Каппадоки́йския

Молитва 1, из акафиста

О великий во иера́рсех, вселенныя учи́телю богомудрый, преблаже́нне отче Васи́лие! Ве́лии по́двизи и труды̀ твои, яже во славу святыя Церкве соверши́л еси. Ты испове́дник твердый и светильник веры Христовы на землѝ был еси, светом богове́дения ве́рныя озаря́яй, ложная учения попаля́яй и всему мiру слово спаси́тельныя истины возвеща́яй. Ныне же, ве́лие на небесех имея дерзновение ко Святей Троице, помози нам, со смирением к тебе припа́дающым, твердо и неизменно святую православную веру да конца жития нашего сохрани́ти, от маловерия же, сомнений и колебания в вере соблюдѝ, да непрельще́ни будем богопротивных и душепа́губных цчений словесы. Дух ревности святыя, еюже ты пламенел еси, о преславный Церкве Христовы пастырю, возгрей предстательством твоим и в нас, ихже Христос постави быти пастыри, да всеусердно пресвещаем и утверждаем в правей вере словесное стадо Христово. Умоли Царя царствующих, да возвысится десница покровителя веры святыя, благочестивейшаго государя нашего, императора Николая Александровича, и да дарует ему, и супруге его, матери его, наследнику цесаре́вичу и всему царствующему дому здравие, долгоденствие и во всем благое поспеше́ние. Испросѝ, о милосердный святи́телю, от Отца Светов и всем всякий дар, коему́ждо благопотре́бен: младенцем благое во стра́се Божии возрастание, юным целомудрие, старым и немощны́м укрепление, скорбящым утешение, неду́гующым исцеление, заблуждшым вразумление и исправление, оби́димым заступление, сирота́м и вдовицам защищение, искушаемым благодатное поможе́ние, отшедшым от сего временнаго жития отцем и братиям нашым блаженное успокое́ние. Ей, святче Божий, при́зри милостивно от обителей горних на нас смиренных, мно́гими собла́зны и напа́стьми обурева́емых, и к земли приве́рженных возведѝ к высоте небесней. Препода́ждь нам, преблагий отче, твое архипастырское и святое благословение, да о́ным осеняемии, в сие новое лето и во все прочее время жития нашего в мiре, покаянии и послушании святей православней Церкви поживем, заповеди Христовы усердно творяще, подвигом добрым веры подвиза́ющеся, и тако Царствия Небеснаго достигнем, иде́же с тобою и всеми святыми сподо́би Троицу Святую, Единосущную и Нераздельную, пе́ти и сла́вити во веки веков.

Молитва 2, из тояже книги

О великий и пресвятый святителю отче Василие, преславный вселенския Церкве учи́телю, славы Пресвятыя Троицы всеусердный поборниче, Матере Божия и Ея пренепоро́чнаго девства предъизбра́нный исповедниче, пресветлый чистоты, смирения и терпения о́бразе! Се аз многогре́шный и недосто́йный на высоту небесную взира́ти смиренно молю тя, о премудрый Церкве Христовы учи́телю: научѝ мя тако богобоязненно житие свое проводи́ти, да никогда же на путь, Божиим повеле́нием проти́вен, уклоню́ся или совраще́н буду. Соблюдѝ и изба́ви мя твоим многомощным предста́тельством от соблазнов мiра и ко́зней диа́вольских, я́коже избавил еси от них юношу, от Сладчайшаго Спастеля нашего отступи́вша и во власть сатаны впа́дша. Да́руй мне силу душевную, во еже бы́ти ми усердному подражателю доброде́телем твоим высоким: соде́лай мя в вере правей тве́рда и непоколебима, укрепѝ мя малодушнаго в терпении и уповании на Господа, возгре́й в сердце моем истинную Христову любовь, да небесных благ па́че всех желаю и ими услажда́юся. Испросѝ мне у Господа и́скреннее о гресе́х сокрушение, да прочее время  жития моего в мире, покаянии и исполнении заповедей Христовых провожда́ти буду. Егда̀ же час моего сконча́ния прибли́жится, ты, о преблагий отче, с Преблагословенною Девою Мариею, тогда ускорѝ на помощь, защитѝ мя от злобных наветов вражиих, и сподо́би мя наследника бы́ти райских селений, да ку́пно с тобою и со всеми святыми неприступнаго Божия величества престолу предстану, и Живоначальную, Единосущную же и Нераздельную Троицу прославляю и воспеваю, присно и в безконечныя веки.

Модлитва 3, из тояже книги

О великий и преславный святителю Христов, всея вселе́нския Церкве учителю богомудрый, православия твердый исповедниче и поборниче, преблаженне отче Васи́лие! При́зри от высот небесных на нас, смиренно к тебе припа́дающих, и умолѝ Господа Вседержителя, Его́же верный на земли служитель был еси, да да́рует нам веры правыя твердое и неизменное сохранение, Церкви святей послуша́ние, жития нашего исправление, и во всех ну́ждах, ско́рбех и искуше́ниих скорое поможе́ние, терпение же и укрепление. Подаждь нам твое святое благословение, да о́ным осеня́емии, в сие новое лето и во вся дни богоугодно, в мире и покаянии поживе́м, и во Царствии Небеснем сподо́бимся ку́пно с тобою и со всеми святыми Живоначальную Троицу, Отца и Сына и Святаго Духа, воспева́ти и сла́вити во веки веков.

Молитва 4, из службы

О пречестна́я и свяще́нная главо и благодати Святаго Духа испо́лненная, Спа́сово со Отцем обита́лище, великий архиере́е, теплый наш заступниче, святителю Васи́лие! Предстоя̀ у престола всех Царя и наслаждаяся света Единосущныя Троицы и херуви́мски со Ангелы возглашая песнь трисвятую, великое же и неизследованное дерзновение имея ко Всемилостивому Влады́це, моли спасти́ся паствы Христовы людем, помозѝ во бранех благочести́вейшему, самодержа́внейшему, великому Государю нашему, императору Николаю Александровичу всея России, и покорѝ ему вся проти́вныя враги под но́зе его, мирно и безмятежно царствовати ему устрой: благостояние святых церквей утвердѝ: архиереи благолепием святительства украсѝ: монашествующыя к по́двигом до́браго течения укрепѝ: царствующий град и вся гра́ды и страны до́бре сохрани, и веру святую непорочну соблюсти умолѝ: мiр весь предстательством твоим умирѝ, от глада и пагубы избави ны, и от нападения иноплеме́нных сохрани, старыя уте́ши, юныя настави, безумныя умудрѝ, вдовицы помилуй, сиро́ты заступѝ, младенцы возрастѝ, плененныя возврати, немощствующыя исцели, и везде тепле призывающыя тя и с верою притекающыя к тебе и усердно припа́дающыя и молящыяся тебе от всяких напа́стей и бед ходатайством твоим свободѝ. Моли о нас всещедраго и человеколюбиваго Христа Бога нашего, да и в день страшнаго прише́ствия Его от шу́ияго стояния избавит нас, и радости святых причастники сотвори́т со всеми святыми во веки веков.

Тропарь, глас 1

Во всю землю изы́де веща́ние твое, яко прие́мшую слово твое, и́мже боголепно научил еси: естество су́щих уясни́л еси, человеческия обычаи украси́л еси. Царское свяще́ние, отче преподобне, моли Христа Бога спасти́ся душа́м нашым.

Иануариа 2 и иулиа 19. Молитвы преподобному Серафи́му Саровскому

Молитва 1, из акафиста

О пречу́дный отче Серафи́ме, великий Саро́вский чудотворче, всем прибега́ющым к тебе скоропослу́шный помощниче! Во дни земнаго жития твоего никто́же от тебе тощь и неуте́шен отъи́де, но всем в сладость бысть виде́ние лика твоего и благоуве́тливый глас слове́с твоих. К сим же и дар исцелений, дар прозрения, дар немощны́х душ врачевания, обилен в тебе яви́ся. Егда же призва̀ тя Бог от земных трудов к небесному упокоению, николи́же любы̀ твоя преста̀ от нас, и невозможно есть исчи́слити чудеса твоя, умно́жившаяся яко зве́зды небесныя: се бо по всем конце́м земли нашея людем Божиим явля́ешися и да́руеши нам исцеления. Темже и мы вопие́м ти: о претихий и кроткий угодниче Божий, дерзновенный к Нему молитвенниче, николи́же призывающыя тя отрева́яй! Вознеси о нас благомо́щную твою молитву ко Господу сил, да укрепи́т державу благовернаго царя нашего, да да́рует нам вся благопотре́бная в жизни сей и вся к душевному спасению поле́зная, да огради́т нас от падений греховных и и́стинному покаянию да научит нас, во е́же безпреткнове́нно вни́ти нам в вечное Небесное Царство, иде́же ты ныне в незаходи́мей славе, и тамо воспева́ти со всеми святыми Живоначальную Троицу во веки веков.

Молитва 2, из акафиста

О великий угодниче Божий, преподо́бне и богоно́сне отче наш Серафи́ме! Призри от горния славы на нас смире́нных и немощны́х, обремене́нных грехмѝ многими, твоея̀ помощи и утешения прося́щих.  Прини́кни к нам благосердием твоим и помозѝ нам заповеди Господни непорочно сохраня́ти, веру православную крепко содержа́ти, покаяние во гресех наших усердно Богу приноси́ти, во благоче́стии христиа́нстем благодатно преуспева́ти и достойным быти твоего о нас молитвеннаго к Богу предста́тельства. Ей, святче Божий, услыши нас, моля́щихся тебе с верою и любовию, и не пре́зри нас, тре́бующих твоего заступле́ния: ныне и в час кончины нашея помозѝ нам, и заступѝ молитвами твоими от злобных наветов диавольских, да не облада́ет нами тех сила, но да сподо́бимся помощию твоею насле́довати блаже́нство оби́тели райския. На тя бо упование наше ныне возлагаем, отче благосердый: буди нам воистину ко спасению путевождь, и приведи нас к невечернему свету жизни вечныя богоприятным предстательством твоим у престола Троицы, да славим и поем со всеми святыми дотопокланяемое имя Отца и Сына и Святаго Духа во веки веков.

Молитва 3

О преподобне отче Серафи́ме, Бога Истиннаго усердный ревни́телю, Церкве православныя новое украшение, христиа́нскаго благочестия ди́вный подви́жниче! К тебе прибегаем, тебе приносим, тебе скорбных душ наших помышления отверза́ем. Моли Бога о людех, страстьми и суето́ю мiра сего обурева́емых: не преста́й молитися Ему о всех к тебе притека́ющих и помощи твоея просящих. Не пре́зри малаго умердия нашего, умно́жи сиѐ молитвою твоею. Да́руй нам благодатиею Божиею от скорбе́й избавление и от болезней исцеление, уврачу́й нашя недуги душевныя и телесныя, разум наш к познанию православныя веры напра́ви, и заповеди Божия вся соблюдати нам помозѝ. Ум православных людей от омрачения и неверия сохранѝ, всем же Христову любовь друг ко другу име́ти сотворѝ, да тако во благочестии Христове преспева́юще, в радости сердца восклица́ем тебе: радуйся помощниче наш: радуйся, исцеление наше: радуйся, утешение наше: радуйся радосте наша, преподобне отче Серафи́ме, и нас твоея радости сподо́би во веки веков.

Тропарь, глас 4

От юности Христа возлюбил еси, блаженне, и Тому Единому рабо́тати пла́менне вожделе́в, непреста́нною молитвою и трудом в пустыни подвиза́лся еси, умиле́нным же сердцем любовь Христову стяжа́в, избра́нник возлю́блен Божия Матере яви́лся еси. Сего ра́ди вопие́м ти: спаса́й нас молитвами твоими, Серафи́ме, преподобне отче наш.

Иануариа 7. Молитвы святому Пророку, Предтечи и Крестителю Господню Иоанну

Молитва 1, из книги: Акафисты с каноны

Крестителю Христов, проповедниче покаяния! Кающагося не презри мене, но совокупляяся с во́и небесными, молися ко Влады́це за мене недостойнаго, унылаго, немощна́го и печальнаго, во многия беды̀ впадшаго, утрежденнаго бурными помыслы ума моего. Аз бо есмь вертеп злых дел, отню́д не имея конца греховному обычаю: пригвожде́н бо есть ум мой земны́м ве́щем. Что сотворю? Не вем. И к кому прибегну, да спасена будет душа моя? Токмо к тьебе, святый Иоанне, благодати тезоимени́те, яко тя пред Го́сподем по Богородице вем бо́льша быти рожде́нных всех: ибо ты сподо́бился еси косну́тися верху̀ Христа Царя, взе́млющаго грехи мiра, Агнца Божия: Егоже моли за грешную мою душу, да поне отныне, в первыйна́десять час, понесу тяготу̀ благую и прииму мзду с последними. Ей, Крестителю Христов, честный Предтече, крайний пророче, первый во благодати мучениче, постников и пустынников наставниче, чистоты учителю и ближний друже Христов! Тя молю, к тебе прибегаю: не отрини мене от твоего заступления, но возстави мя па́дшагося многими грехи: обнови душу мою покаянием, яко вторым крещением, понеже обоих начальник еси, Крещением омываяй прародительный грех, покаянием же очищаяй коегождо от дел скверных. Очисти убо мя, грехмѝ оскверне́ннаго, и пону́ди внити, а́може ничтоже скверно входит, во Царствие Небесное.

Молитва 2

Святый Предтече и Крестителю Христов Иоанне! Проповедник сый покаяния, кающихся не презри нас, но молися ко Владыце Христу за нас недостойных рабов, унылых, немощны́х, во многия грехи впа́дших. Смерти убо чаем, о гресех же наших николиже поболехом и о Царствии Небеснем не попекохомся: но не презри нас, Крестителю Христов, честный Предтече, бо́лий рожде́нных всех, постником и пустынником наставниче, чистоты учителю и ближний друже Христов. Тя молим, к тебе прибегаем: не отрини нас просящих твоего заступления, обнови души нашя покаянием, еже есть второе крещение: твоим хода́тайством пред Господем испроси нам очищение грехов. Уста недостойная вопиют к тебе, и душа смиренная молится, сердце сокрушенное из глубины воздыхает: простри пречистую твою десницу и защити нас от враг видимых и невидимых. Ей, Господи Иисусе Христе! Молитвами святаго Иоанна Крестителя Твоего, изряднее же Пречистыя Твоея Матере, Владычицы нашея Богородицы, спаси нас грешных рабов Твоих, кающихся о гресех. Ты бо еси Бог кающихся, и на Тя Спасителя возлагаем надежду, славяще пресвятое имя Твое, со Безначальным Твоим Отцем, и со Пресвятым и Благим и Животворящим Твоим Духом, ныне и присно и во веки веков.

Молитва 3

Крестителю Христов, честны́й Предтече, крайний пророче, первый во благодати му́чениче, постников и пустынников наставниче, чистоты учителю и ближний дру́же Христов! Тя молю, к тебе прибегаю: не отри́ни мене от твоего заступления, но возста́ви мя па́дшагося многими грехи: обновѝ душу мою покаянием, яко вторым крещением: очисти мя, грехмѝ оскверне́ннаго, и пону́ди внити, а́може ничтоже скверно входит, во Царствие Небесное.

Тропарь, глас 2

Память праведнаго с похвала́ми, тебе же довле́ет свидетельство Господне, Предте́че: показал бо ся еси вои́стину и проро́ков честне́йший, яко и в струя́х крести́ти сподо́бился еси Поповеданнаго. Темже за истину пострада́в радуйся, благовестил еси и су́щим во аде Бога я́вльшагося пло́тию, вземлющаго грех мiра и подающаго нам велию милость.

Иануариа 9. Молитва святителю Филиппу, митрополиту Московскому и всея России

О пречестна́я и свяще́нная главо и благодати Святаго Духа испо́лненная, Спа́сово со Отцем обита́лище, великий архиере́е, теплый наш заступниче, святителю Филиппе! Предстоя̀ у престола всех Царя и наслаждаяся света Единосущныя Троицы и херуви́мски со Ангелы возглашая песнь трисвятую, великое же и неизследованное дерзновение имея ко Всемилостивому Влады́це, моли спасти́ся паствы Христовы людем, помозѝ во бранех благочести́вейшему, самодержа́внейшему, великому Государю нашему, императору Николаю Александровичу всея России, и покорѝ ему вся проти́вныя враги под но́зе его, мирно и безмятежно царствовати ему устрой: благостояние святых церквей утвердѝ: архиереи благолепием святительства украсѝ: монашествующыя к по́двигом до́браго течения укрепѝ: царствующий град и вся гра́ды и страны до́бре сохрани, и веру святую непорочну соблюсти умолѝ: мiр весь предстательством твоим умирѝ, от глада и пагубы избави ны, и от нападения иноплеме́нных сохрани, старыя уте́ши, юныя настави, безумныя умудрѝ, вдовицы помилуй, сиро́ты заступѝ, младенцы возрастѝ, плененныя возврати, немощствующыя исцели, и везде тепле призывающыя тя и с верою притекающыя к тебе и усердно припа́дающыя и молящыяся тебе от всяких напа́стей и бед ходатайством твоим свободѝ. Моли о нас всещедраго и человеколюбиваго Христа Бога нашего, да и в день страшнаго прише́ствия Его от шу́ияго стояния избавит нас, и радости святых причастники сотвори́т со всеми святыми во веки веков.

Тропарь, глас 2

Первопресто́льников прее́мниче, сто́лпе православия, истины побо́рниче, новый исповедниче, святителю Фили́ппе, положивый душу за па́ству твою: темже яко имея дерзнове́ние ко Христу, моли за императора православнаго, за град же и лю́ди, чту́щыя достойно память твою.

Иануариа 10. Молитва преподобному Па́влу Обно́рскому. Из акафиста

О добрый наш пастырю и богомудрый наставниче, преподобне отче Па́вле! Услыши нас молящихся тебе и призывающих в помощь скорое предстательство твое. Виждь нас грешных, в толицех обстояниих сущих: виждь нас немощных, отвсюду уловляемых, и всякаго блага лишенных, и умом от малодушия помраченных. Потщися, угодниче Божий, не остави нас во греховнем плену пребывати, да не будем в радость врагом нашым и не у́мрем в лукавых деяниих наших. Моли о нас недостойных Спаса Господа, Емуже ты со безплотными лики предстоиши. Милостива к нам сотвори Содетеля нашего в нынешнем ве́це и в будущем, да не воздаст нам по делом нашым и по нечистоте сердец наших: но по Своей благостида сотворит нам. на твое бо ходатайство уповающе, твоим предстательством хвалимся, твое заступление на помощь призываем, и к цельбоносному гробу твоему припа́дающе недостойнии, исцеления просим. Избави нас, угодниче Христов, от злых, находящих на ны̀, и укротѝ волны страстей и бед, возстающих на нас, да ради святых твоих молитв не объимет нас напасть, и не погрязнем в пучине греховней и в тине страстей наших. Моли, преподобне отче наш Па́вле, Христа Бога нашего, да подаст нам мирное жительство, оставление грехов и душам нашым спасение и велию милость, ныне и во веки веков.

Тропарь, глас 1

Божественною любовию от юности распаля́емь, Па́вле преподобне, вся я́же в мiре кра́сная возненави́дев, Христа Единаго возлюби́л еси, и сего ра́ди во вну́треннюю пустыню всели́лся еси, со зверьмѝ жи́ти, весь Христу: отону́дуже и всеви́дящее око, твоя труды видев, да́ром чудес и по преставле́нии обогатѝ тя. Темже вопие́м ти: моли непрестанно о всех нас, честну́ю память твою при́сно в пе́снех почита́ющих.

Иануариа 10. Молитва преподобному Мака́рию Пи́семскому, чтомая в Преображе́нской церкви пого́ста Мака́риевы пу́стыни, Костромски́я епархии

О пречестна́я и свяще́нная главо и благодати Святаго Духа испо́лненная, Спа́сово со Отцем обита́лище, великий архиере́е, теплый наш заступниче, святителю Мака́рие! Предстоя̀ у престола всех Царя и наслаждаяся света Единосущныя Троицы и херуви́мски со Ангелы возглашая песнь трисвятую, великое же и неизследованное дерзновение имея ко Всемилостивому Влады́це, моли спасти́ся паствы Христовы людем, помозѝ во бранех благочести́вейшему, самодержа́внейшему, великому Государю нашему, императору Николаю Александровичу всея России, и покорѝ ему вся проти́вныя враги под но́зе его, мирно и безмятежно царствовати ему устрой: благостояние святых церквей утвердѝ: архиереи благолепием святительства украсѝ: монашествующыя к по́двигом до́браго течения укрепѝ: царствующий град и вся гра́ды и страны до́бре сохрани, и веру святую непорочну соблюсти умолѝ: мiр весь предстательством твоим умирѝ, от глада и пагубы избави ны, и от нападения иноплеме́нных сохрани, старыя уте́ши, юныя настави, безумныя умудрѝ, вдовицы помилуй, сиро́ты заступѝ, младенцы возрастѝ, плененныя возврати, немощствующыя исцели, и везде тепле призывающыя тя и с верою притекающыя к тебе и усердно припа́дающыя и молящыяся тебе от всяких напа́стей и бед ходатайством твоим свободѝ. Моли о нас всещедраго и человеколюбиваго Христа Бога нашего, да и в день страшнаго прише́ствия Его от шу́ияго стояния избавит нас, и радости святых причастники сотвори́т со всеми святыми во веки веков.

Иануариа 11. Молитва преподо́бному Михаи́лу Кло́пскому. Из службы

О преподо́бне и преблаже́нне отче наш Михаиле! Ты, возжеле́в усердно ше́ствовати во след Господа нашего Иисуса Христа, вся плотска́я мудрования отри́нул еси: ты, отечество твое, род и временное благоро́дствие и земнаго царствия наследие оста́вив, монашества и юро́дства путь ко спасению и к наследию Царствия Небеснаго предъизбра́л еси: пришед же дивне во обитель сию Пресвятыя Троицы, в ней трудолю́бно и богоугодно подвиза́яся, по премно́гу ко устроению ея̀ споспешествова́л еси: и от всех бед, от гла́да, вра́жия нахожде́ния и о́гненнаго запале́ния и вся́каго зла о́ную сохраня́я, и защища́я живущыя в ней и к ней притека́ющыя, пути Господню поуча́л еси. Ты и ныне Прествятей Троице со всеми святыми предстоя̀ и непреста́нно насыща́яся зрения Божества Трисветлаго, помина́й чтущыя святую память твою: не премолчѝ, угодниче Христов, ко Господу моля́ся, да благода́тию Свое́ю святую обитель сию, в ней живу́щыя и тружда́ющыяся, ку́пно же и им благодею́щыя при́сно приосеня́ет, та́кожде и вся притека́ющыя ко священней ра́це твоей и мо́щи твоя усты̀ и сердцем лобыза́ющыя здра́вы и невреди́мы сохраняет и от всякия напа́сти свобожда́ет, путешествующым в пути благопоспе́шество подава́я, боля́щым же здравие и печальным утешение, си́рым и вдови́цам и всем напа́ствуемым скорое заступление и вспоможе́ние, и от вражиих наве́тов твердое ограждение и защищение: не преста́й же моляся и о христоименитей державе благочести́вейшаго, самодержа́внейшаго, великаго государя нашего, императора Николая Александровича, яко да твоим предстательством и молитвами сохраня́еми, возмо́жем по́двиг течения неблазненно соверши́ти, славяще святую Троицу, Отца и Сына и Святаго Духа, и твое заступление, ныне и присно и во веки веков.

Тропарь, глас 8

И́же на землѝ Христа ра́ди во́лею в буйство приложи́вся, мiра сего красоты̀ отню́д возненави́дел еси, и плотска́я игра́ния увяди́в посто́м и жа́ждею и на земли лега́нием [лежанием], от зноя и сту́дени, от дождя и снега, и от прочия воздушныя тя́гости никогда́же уклони́лся еси: душу же очистил еси доброде́тельми яко зла́то в горни́́ле, отче преподобне богоносне Михаиле, и ныне на небесех предстои́ши престолу Пресвятыя Троицы. Но яко имеяй дерзнове́ние многое, моли Христа Бога спастися душа́м нашым.

Иануариа 12. Молитвы святителю Са́вве, архиепископу Се́рбскому. Из акафиста

Молитва 1

О священная главо̀, преславный чудотво́рче, святителю Христов Са́вво, се́рбския земли первопресто́льниче, хранителю и просветителю, всех же христиан благонаде́жный пред Господем предста́телю! Тебе припа́даем и молимся: даждь нам бы́ти причастником любве твоея к Богу и ближнему, е́юже при жизни святая душа твоя преиспо́лнена бысть. Просветѝ ум и сердце наше светом Божественнаго учения, тебѐ же подража́ти ве́рно нас научѝ, во е́же Бога и ближняго нашего люби́ти и заповеди Господни неле́ностно соверша́ти, да не по имени токмо, но всем житие́м нашим чада твоя яви́мся. Па́че же моли́ся, святителю Божий, о святей православней Церкви и отечестве твоем земне́м, при́сно тя любовию чту́щем. При́зри благосе́рдно на вся́ку душу верный твоих чти́телей, милости и помощи твоея ищущих: буди всем нам во болезнех целитель, в ско́рбех уте́шитель, в печа́лех посетитель, в беда́х и ну́ждах помощник, в час же смертный милостивый покровитель и защи́титель, да молитвами твоими потщи́мся спасение вечное получи́ти и Царствие Христово унасле́довати да сподо́бимся! Ей, свя́тче Божий, не посрамѝ упования нашего, еже на тя крепко возлагаем, но явѝ нам твое многомощное заступление, да славим и поем ди́внаго во святых Своих Бога, Отца и Сына и Святаго Духа, всегда, ныне и присно и во веки веков.

Молитва 2

Во святи́телех великое украшение, богомудре отче Са́вво! Усе́рдно молимся и припа́дающе вопие́м ти: не остави твоих чад, отче, но буди всегда с нами, я́коже обеща́лся еси, да и мы по долгу воспое́м тя, ублажи́м тя и прославим величие и силу твою, и достойную песнь принесем ти, вопию́ще и глаго́люще: тебе ублажаем, святителю! тебе воспеваем, светильниче! тебе покланя́емся, отче Савво! Молѝ, мо́лимся тебе, спасти́ся пою́щым святую твою память.

Тропарь, глас 3

Путѝ, вводя́щаго в жизнь, наставник и первопресто́льник и учитель был еси: пе́рвее бо прише́д, святителю Савво, отечество твое просвети́л еси, и породи́в то́е Духом Святым, яко древа̀ ма́сленная в мы́сленнем раѝ насадил еси всеосвяще́нная твоя ча́да. Тем, яко апо́столом и святи́телем сопрестольна, чту́ще тя молим: моли Христа Бога дарова́ти нам ве́лию милость.

Иануариа 13. Молитва преподобному Ирина́рху, затворнику Ростовскому

Молитва 1, из службы преподобному

О великий угодниче Божий и преславный чудотворче, преподо́бне отче наш Ирина́рше! При́зри на ны грешныя, в ско́рбех и обстояниих наших усердно к тебе вопию́щыя и на тя по Бозе все упование наше возлага́ющыя. Просим тя со умиле́нием многим: твоим предста́тельством ко Господу Богу испросѝ нам мир, долгоденствие, братолюбие, земли плодоно́сие, возду́ха благорастворе́ние, дождѝ благовре́менны, и свы́ше благослове́ние на вся начинания наша благая низведѝ. Изба́ви же всех нас святыми твоими молитвами от всяких бед: гла́да, гра́да, пото́па, огня̀, меча̀, вредоноснаго че́рвия, тлетво́рных ве́тров, смертоно́сныя язвы и внеза́пныя смерти, и во всяких ско́рбех наших бу́ди нам уте́шитель и помощник, сохраня́я ны от падений греховных и сподобля́я наследники быти Царствия Небеснаго, да прославляем вку́пе с тобою всех благих Пода́теля, Триеди́наго Бога, Отца и Сына и Святаго Духа, во веки веков.

Молитва 2, из тояже книги

О преподобне отче Ирина́рше! Се мы, священней ра́це моще́й твоих многоцеле́бных предстоя́ще, молим тя усе́рдно: бу́ди хода́тай наш присный, испросѝ нам у Христа Бога мир, тишину̀, благоде́нствие, здравие и спасение, и от всех врагов ви́димых и неви́димых огражде́ние, покры́й же нас хода́тайством твоим от нахожде́ния всяких бед и скорбей, па́че же от искушений врага темнаго, да вси мы с тобою прославля́ем всесвятое имя Отца и Сына и Святаго Духа, ныне и присно и во веки веков.

Молитва 3, из тояже книги

О великий уго́дниче Христов, добропроизво́льный страда́льче, новопросия́вый чудесы̀, отче наш Ирина́рше, Российстей земли удобрение, граду Ростову похвало̀, обители сей украшение и утверждение! Кто не удиви́тся твоему самопроизво́льному и долголе́тнему страда́льческому терпению? Три́десять бо лет в тесней и хла́дней хижине себе заключи́л еси, хла́д, а́лчбу и изнуре́ние плоти Царствия ради Небеснаго поне́сл еси, к сему же и изгнание из обители, по наваждению вражию, безро́потно претерпел еси. Ве́мы же, яко последѝ умоле́н быв от братии, яко незло́бивый а́гнец, па́ки во обитель твою возврати́лся еси, и в ту́южде тесную хижину всели́лся еси, яко адама́нт твердый, на невидимая бесовская по́лчища и видимыя враги твоя терпением себе вооружи́в. Егда̀ же попуще́нием Божиим наидо́ша на обитель сию По́льстии ра́тницы, сих не убоялся еси смертнаго преще́ния, но уцелому́дрив я̀ словом, во своя си возврати́тися сотворил еси. Сего ра́ди Всеблагий Бог, видя твою веру и страдальческое долготерпение, дар прозорли́вства и исцеления тебе дарова̀: бесны́м во исцеление, хромы́м доброхожде́ние, слепым прозрение подавал еси, и ина́я многая с верою к тебе приходя́щым во благо даже до дне́сь чудоде́йствуеши. Мы же недостойнии, такова́я чудеса̀ ви́дяще и радости исполня́ющеся, взыва́ем к тебе си́це: радуйся, до́блественный страдальче и бесо́в победителю: радуйся, скорый наш помощниче и к Богу теплый моли́твенниче. Услы́ши убо и нас грешных, моля́щихся тебе и прибега́ющих под кров твой: явѝ милостивное предста́тельство твое о нас ко Всевышнему, и исхода́тайствуй твоими богоприятными молитвами вся полезная ко спасению душ и теле́с наших: сохранѝ святую обитель сию, вся́кий град и весь и всякую страну христиа́нскую от всех наве́т вражиих: в ско́рбех же и болезнех наших подава́й нам руку помощи, да твоим хода́тайством и заступлением, благодатию же и милосердием Христа Бога нашего, изба́вимся и мы недостойнии, по отше́ствии от жития сего, шу́ияго стояния, и да сподобимся десна́го со всеми святыми во веки веков.

Молитва 4, чтомая в Ростовском Борисоглебском Монастыре, Ярославския епархии

О великий уго́дниче Христов, добропроизво́льный страда́льче, предивный затворниче, преславный чудотворче, преподобне отче Ирина́рше! С верою и любовию к тебе припа́даем и мо́лимся прилежно: яви нам смиренным и грешным молитвенное твое заступление. Се бо, грех ра́ди наших, не и́мамы свободы чад Божиих проси́ти о потре́бах наших Господа и Создателя нашего, но тебе предста́теля благоприятнаго к Нему предлагаем, и про́сим тя со усердием многим. Испросѝ нам у благости Его вся благопотре́бныя да́ры душа́м и телесе́м нашым: веру праву, надежду спасения несомне́нну, любовь ко всем нелицеме́рну, благочестие непоколебимое, во искушениих мужество, в злострада́ниих терпение, в молитвах постоянство, душа́м и телесе́м здравие, землѝ плодоносие, возду́ху благорастворе́ние, дождѝ благовре́менны и благословение свы́ше на вся благая дела и начинания наша. Испроси, угодниче Божий, у Царя небесе и земли верному императору нашему Николаю Александровичу, самоде́ржцу всея России, здравие, спасение и на враги одоление, и всему богохрани́мому царству его мир, тишину, благостроение. Сохранѝ, чудотворче святый, обитель твою честну́ю, в нейже подвиза́лся еси люботру́дно, и вся живу́щыя в ней и на поклонение в ню̀ приходящыя невредимы от искушений диавольских и всякаго зла, и всем подаждь вся к житию̀ нужная, кончи́ну христианскую и добрый ответ на Страшнем Суде Христове: и молитвами твоими всех нас приведѝ во приста́нище спасе́ния, и наследники явѝ бы́ти всесветлаго Царствия Христова, да поем и славим человеколюбие и милость в Троице покланя́емаго Бога, Отца и Сына и Святаго Духа, и твое святое заступление, во веки веков.

Иануариа 13. Молитва преподобному Елеаза́ру А́нзерскому. Из службы и акафиста преподобному

О преподо́бне отче наш Елеаза́ре, безмо́лвнаго и́ноческаго жития̀ в пустыни сей богоизбра́нный начальниче и основателю! Мо́лим тя, мы смире́ннии и недосто́йнии, обстоя́ще священный гроб твой во храме Пресвятыя Троицы, и́мже место сие освяти́ся и су́щия ра́ди в тебе благодати пророческия просла́вися: испросѝ, угодниче Божий, у Вседержителя Бога, в Троице покланя́емаго, Ему́же в дерзновении с ли́ки святых предстои́ши, да да́рует благоверному императору нашему здравие и долгоденствие, на враги победу и одоление, державе его мир и утверждение, це́рквам благостоя́ние, и всем людем тишину и благоденствие и изобилие плодов земных. Угасѝ молитвами твоими разже́нныя на ны̀ стрелы диавольския, да не прико́снется нам злоба греховная, да благоче́стно сконча́вше временное житие, сподобимся насле́довати Царствие Небесное и ку́пно с тобою славити Отца и Сына и Святаго Духа во веки веков.

Тропарь, глас 3

Отверг пло́ти тленная, нетленных потща́лся еси дости́гнути, и мiра удали́вся, всели́лся еси в морски́й остров, и на нем усердно мно́га ле́та Господевѝ поработал еси: сего ра́ди и да́ры прозре́ния и чудес обогати́лся еси, отче преподобне Елеаза́ре. Христа Бога молѝ даро́вати нам мир и ве́лию милость.

Иануа́риа 14. Молитва святей равноапостольней Ни́не, просветительнице Грузии. Из акафиста

О всехвальная и предивная равноапо́стольная Ни́но, вои́стину великое Церкве православныя украшение и изрядная людем и́верским похвало̀, всю страну Грузинскую божественным учением просветившая и по́двиги апостольства врага нашего спасения победи́вшая, трудом и молитвами вертогра́д Христов зде насадившая и во плод мног его возрасти́вшая! Пра́зднующе днесь святую память твою, уми́льно тебе, яко при́сную предста́тельницу нашу, просим: нас у́бо от вражиих зол и скорбе́й оградѝ, враги же святыя Церкве Христовы и благочестия противники посрамѝ и вразумѝ, стадо твое, тобою упасе́нное, до́бре сохраня́ющи: и умолѝ Всеблагаго Бога Спасителя нашего, Ему́же ты ныне предстои́ши, да да́рует благочестивейшему императору нашему мир, долгоденстиве и во всем благое поспеше́ние, да и вся люди в Небесное Царствие приведет Господь, иде́же вси славословят всесвятое имя ныне и присно и во веки веков.

Тропарь, глас 4

Слова Божия служи́тельнице, во апо́стольстей проповеди первозва́нному Андрею и про́чым апо́столом подража́вшая, просвети́тельнице Иве́рии, и Духа Святаго цевни́це, святая равноапостольная Ни́но, моли Христа Бога спасти́ся душа́м нашым.

Иануа́риа 16. Молитва на поклонение честны́м вери́гам святаго апостола Петра. Из рукописи

О святы́й Пе́тре, великий апо́столе, самови́дче и сотаи́нниче Божий, всемо́щною десни́цею Учи́теля твоего из вод волнующихся прия́ный и от конечнаго потопле́ния свободи́выйся! Не забу́ди и нас убо́гих, в ти́не греховней погря́зших и волна́ми жите́йскаго моря обурева́емых: пода́ждь нам твою руку крепкую, помозѝ нам и удержѝ нас от потопле́ния  во страсте́х, по́хотех, лжа́х и клевета́х. Сотворѝ и ты с нами милость, тебе от Господа явле́нную, да не в сомнении и маловерии изги́бнем. Научѝ нас, учи́телю наш, пролия́ти сле́зы покаяния, да плачем горько о дея́ниих наших в ве́це сем. И яще твоя̀ сле́зы, в покаяние излия́нныя, милостию Свое́ю покры̀ Господь и Учитель твой, испросѝ и нам, со дерзнове́нием апо́стольским, прощение во гресѐ ежеча́снаго от Христа отрече́ния злы́ми по́мыслы и де́лы нашими. Царствующий град сей, ко святым стопа́м твоим пове́рженный, сохранѝ, и от прилуча́ющихся ко́зней лукавых врага спасения нашего оградѝ: воздвигни твои преподобные руце уо Господу за царя нашего, да тихое и безмолвное житие поживем в веце сем до часа, воньже имать призвати нас Владыка Господь, наш Судия нелицеприятный. Ты же, о всехвальный апостоле, не отвержи вопля нашего и стенаний к тебе, но заступи нас пред Христом твоим Учителем, да непрестанно славим Его милосердие к нам, со Отцем и Святым Духом, во веки веков.

Тропарь, глас 4

Ри́ма не оста́вль, к нам прише́л еси честны́ми вери́гами, яже носи́л еси, апо́столов первопресто́льниче: и́мже верою покланя́ющеся, мо́лимся: твоими к Богу молитвами да́руй нам ве́лию милость.

Иануариа 17 и иуниа 24. Молитва преподобному Анто́нию Ды́мскому. Из службы со акафистом

О па́стырю добрый, наста́вниче наш и святы́я сея обители Ды́мския нача́льниче, преподо́бне отче Анто́ние! Яко имеяй дерзновение ко Владыце Христу и ко Пречистей Его Матери, бу́ди о нас недостойных, во святе́й твоей обители живу́щих, и о всех с верою к ра́це моще́й твоих отвсю́ду притека́ющих, молитвенник теплый, заступа́я нас от всяких бед и напа́стей, да твоими молитвами невреди́ми от враг видимых и невидимых пребу́дем. Молѝ милосердие Бо́жие, да спасет нас от прегрешений наших, и́миже весть судьбами. Молѝ благость Его, еже милостивно обители сей и всему мiру потребная подава́ти, це́рквам мир низпосла́ти и расточе́нныя во едино собра́ти, держа́ву же благочестивейшаго императора нашего Николая Александровича в мире и тишине сохрани́ти, и всякому верному в доме и на пути и повсюду дни бла́ги и безмятежны дарова́ти, жизнь нашу умири́ти, и вся люди поми́ловати, я́коже у́бо здѐ предстоя́щыя, тако и благосло́вною вино́ю отшедшыя отцы и братию нашу, и спастѝ душы нашя, да непрестанно славим, хвалим, поем и величаем пречестно́е и великоле́пое имя Отца и Сына и Святаго Духа, ныне и присно и во веки веков.

Тропарь, глас 4

Доброде́телей ревни́телю, пустынный жи́телю, подви́жниче веры Христа Бога нашего, поще́нием и труды̀ умертви́вый плотска́я вожделе́ния, тезоимени́те Великому Антонию, его́же житию̀ поревновал еси и во его́же имя божественный храм воздви́гл еси! Купно с ним преподобне Анто́ние, молѝ Спасителя всех, да и нас сотвори́т победи́тели потски́х похоте́й и храмы Духа Святаго, по вели́цей Его милости.

Иануариа 18. Молитва святителем Афана́сию и Кири́ллу, архиепископам Александрийским, чтомая в Новгородском Мало-Кириллове монастыре

О всесвятии отцы Афана́сие и Кири́лле, теплии наши засту́пницы, ересе́й потреби́телие, благочестия защи́тители, неду́жным вра́чеве, в беда́х помо́щницы и всем притека́ющым ко святым мощем вашым теплии предста́телие! Помози́те нам грешным в сем житиѝ, и умоли́те Господа Бога дарова́ти нам грехов оставле́ние и Царствия Небеснаго насле́дие, да всегда прославляем Отца и Сына и Святаго Духа, и ваше ми́лостивное предстательство, ныне и присно и во веки веков.

Тропарь, глас 3

Де́лы возсия́вши православия, все погаси́вше злосло́вие, победи́телие победоно́сцы бы́сте: благочестием вся обогати́вше, Церковь вельмѝ украси́вше, достойно обрето́сте Христа Бога, да́рующаго нам ве́лию милость.

Иануариа 18. Молитва преподобному Афана́сию Ся́ндемскому, чтомая в Ся́ндемском монастыре, Олонецкия епархии

О преподобне и богоносне отче наш Афана́сие, Ангеле земны́й и челове́че небесный, изря́дный угодниче Христов, и Влады́чице нашея Богоро́дицы добрый чти́телю, всем же, с верою и любовию к тебе притека́ющым, изве́стный засту́пниче! Испросѝ нам вся к житию̀ сему̀ временному потре́бная и к вечному нашему спасению поле́зная. Посо́бствуй предста́тельством твоим, уго́дниче Божий, благочести́вейшему великому государю нашему, императору Николаю Александровичу всея̀ России, на врагѝ видимыя и невидимыя, да в мире глубо́це пребу́дет святая Церковь Христова, и Царство Российское во всяком благоче́стии и благострое́нии неруши́мо да сохрани́тся. Си́це же всем нам, чудотво́рче святый, бу́ди скорый во всякой ско́рби и обстоя́нии помощник, наипа́че же в час кончины нашея яви́ся нам заступник благосе́рдый, да не предани будем на мыта́рствах возду́шных власти злобнаго мiродержца, но да сподо́бимся непреткнове́ннаго восхо́да в Царствие Небесное. Ей, отче, молитвенниче наш при́сный, просия́вый заре́ю благодати Божия, украшение сый места сего! Не престани моляся, да николиже благодать Божия и покров Богоматере от места сего̀ отсту́пит, но да сподо́бимся вку́пе с тобою и со всеми святы́ми в селениих райских сла́вити величие, благодать и милость Единаго в Троице Бога, Отца и Сына и Святаго Духа, во веки веков.

Иануариа 18. Молитвы святому праведному Афана́сию На́волоцкому чудотворцу

Молитва 1, от единаго человека глаголемая

О преблагий великий угодниче, праведный Афана́сие! Услыши мя грешнаго, молящагося тебе и призывающаго имя твое святое. Виждь мя убогаго, в толицей беде погружаема: виждь мя немощна́го, отвсюду уловляема и всякаго блага лише́на и умом от малодушия помраче́на. Потщи́ся, свя́тче Божий, плене́ннаго мя свободи́ти, не оста́ви мя грешнаго враго́м в радость бы́ти и в лукавых моих дея́ниих умре́ти: молѝ о мне гре́шнем и блу́днем, и Соде́теля моего̀, Владыку и Господа, Ему́же ты со безпло́тными ли́ки предстои́ши, ми́лостива ко мне сотворѝ в ны́нешнем ве́це и бу́дущем, да не возда́ст по дело́м мои́м злым  и по нечистотѐ сердца моего, но по своей бла́гости да возда́ст ми. Се аз на твое предста́тельство упова́ю, и тобою хвалю́ся, и имя твое святое на помощь призыва́ю, и к цельбоно́сному твоему гробу припа́даю: изба́ви мя, светильниче Христов, от злых бед находящих на мя, и возстаю́щыя во́лны укротѝ, да не обы́мет мя напа́сть, и не погрязну в пучи́не глубо́цей и в тиме́нии грехо́внем: молѝ, пра́ведный Афана́сие, дарова́ти мне грешному от Господа Бога милость во веки веков.

Молитва 2, от многих лиц возносимая

Влады́ко Человеколю́бче, Царю Небесный, Го́споди Иисусе Христе, Боже наш! Услы́ши нас грешных, моля́щыхся тебе, и помилуй, и да́руй нам сего̀ пра́веднаго угодника твоего Афана́сия сла́вити и на помощь призыва́ти, образу его святому покланя́ющымся и ко святому гробу его с верою припа́дающым. О преди́вный в чудесе́х, святый и праведный Афана́сие! Моли́ся Христу Богу и нас грешных, и помилуй вся приходя́щыя и на помощь в ско́рбех тя призыва́ющыя, и бу́ди нам помощник и исцели́тель скор, и да́руй нам здравие неоску́дно и помощь его премно́гу: бу́ди наста́вник сиро́там и вдови́цам, и всем пода́ждь яже ко спасению прошения, сохранѝ и соблюди́ от всех зол и болезней и наве́т вражиих: и та́ко престо́лу Госпо́дню предстоя̀, моли непреста́нно о нас грешных Христа Бога нашего. Яко Тому̀ подобает всякая слава, честь и поклонение и велеле́пие, со Отцем и Святым Духом, ныне и присно и во веки веков.

Тропарь, глас 1

Боже́ственною благода́тию просвети́вся, и по смерти да́руеши исцеления притекающым к ра́це моще́й твоих, прему́дре Афана́сие: те́мже и мы ныне чтим честны́х моще́й твоих явление, веселя́ще вку́пе ду́шы и телеса̀. Темже вси вопие́м: слава Давшему ти крепость: слава Венчавшему тя: слава Действующему тобою всем исцеления.

Иануариа 19. Молитва святому Фео́дору Блаженному, Новгоро́дскому чудотворцу. Из рукописныя службы

О преблаженный и всечестны́й Христов угодниче, великий Фео́доре! Услы́ши нас грешных, моля́щыхся тебе и честно́му твоему образу покланя́ющихся и ко священней твоей ра́це притека́ющих. При́зри ми́лостивным оком на предстоя́щия честне́й твоей ра́це люди и прося́щыя си́льныя твоея по́мощи, и, яко име́яй дерзнове́ние ко Господу, испросѝ у Него всем нам мир, Церкви благостоя́ние, возду́ха благорастворе́ние и земли плодоно́сие. Изба́ви же всех, верою несумне́нною к Богу приходя́щих, от всяких бед: бу́ди печа́льным уте́шитель, неду́гующим врачь, напа́ствуемым помощник, наги́м покрови́тель, вдови́цам защитник, стра́нствующым путево́ждь, и исхода́тайствуй нам вся ко спасению проше́ния. Молѝ Святую Троицу за ны многогре́шныя, да твоими благоприя́тными молитвами полу́чим блага́я душа́м и телесе́м нашым, ныне и присно и во веки веков.

Иануариа 23. Молитвы преподобному Генна́дию Костромскому и Любимогра́дскому чудотворцу

Молитва 1, из службы с акафистом

Избра́нниче Божий и чудотво́рче, преподо́бне отче Генна́дие! От ю́ности твоея̀ духа премудрости и разума, духа же благочестия и страха Господня испо́лнен сый, оружия Божия апосто́льски прия́л еси, чре́сла твоя истиною препоя́сав и в броня̀ правды обо́лкся, но́зе же во угото́вание благовествова́ния мiра обу́в, и над всеми восрии́м щит веры, и сего ра́ди возмо́гл еси, яко добр воин Христов, вся стре́лы лукаваго разже́нныя угаси́ти. Темже с ли́ки безплотных сил во оби́телех Отца Небеснаго днесь водворя́яся, неувяда́емым венце́м увязе́н еси: и престолу Царя славы, Господа сил предстоя̀, и́маши дерзновение мольбы̀ и благохваления твоя к Нему возноси́ти. Мы же окая́ннии, из глубины̀ зол о́чи и сердца̀ наша к го́рнему Си́ону возводя́ще, молим тя, преподо́бне Геннадие: буди засту́пник и хода́тай наш пред Богом и Господем нашим, Судие́ю пра́веднейшим, Его́же непреста́нно прогневля́ем, пред ним согреша́юще. И якоже во дни пло́ти твоея̀ ди́вная и пресла́вная совершил еси, отче всехвальне, та́ко и ныне, прише́д от нас во обители Отца Небеснаго, удивѝ милость Господню на нас, да нече́стия и мiрски́х похоте́й отбе́гше, Бо́гови же благоугоди́вше, помощь его во время благопотре́бно и благослове́ние на дела̀ рук наших обря́щем, и да сподо́бит ны Господь насле́дити Царство Небесное и с ли́ки святых сла́вити и воспева́ти пресвятое и великолепое имя Отца и Сына и Святаго духа, ныне и присно и во веки веков.

Молитва 2, по ру́кописи Люби́мскаго Спасо-Генна́диева монастыря, Яросла́вския епархии

О блаженная и благодати Святаго Духа исполненная главо̀, преподобне отче наш Геннадие Всероссийский, па́че же Костромски́й и Любимогра́дский, дивный чудес исто́чниче, добро́то и похвало̀ всех, с верою к тебе приходящих и твоего предстательства в ну́ждах своих моли́твенне тре́бующих! Потщи́ся умоли́ти Владыку Христа, труды̀ и по́двиги твоя чудотворе́ньми поче́тшаго, яко да поми́лует и спасе́т раба Своего, благочести́вейшаго, самодержа́внейшаго, вели́каго госуда́ря нашего, императора Николая Александровича всея России, и царствующий дом его, и все их христолюби́вое воинство: помозѝ нам, угодниче Божий многомо́щным твоим хода́тайством вою́ющия на ны враги покори́ти. Це́рквам святым и всему христианству неотъе́млемый мир исхода́тайствуй: Святейший Правительствующий Сино́д, преосвяще́нныя митрополиты и епископы и весь священнический чин право пра́вити слово истины Евангельския наста́ви: еретико́м же и раско́льником в позна́ние истины приитѝ помозѝ. Людям страны̀ сея̀, в ней же от Лито́вския землѝ, из дому твоего изше́д, прилепи́лся еси, молитвами твоими помозѝ от глада, губительста, труса, потопа, огня, меча̀, нашествия иноплеме́нных и междоусо́бныя брани изба́витися, здра́вием же, долгоде́нстивием, пдодов земных изобилием ра́доватися сотворѝ, па́че же во благочести́вей христиа́нстей вере преуспея́ние пода́ждь. Оби́тель же твою снабдѝ, гра́ды утвердѝ, старыя уте́ши, юныя наста́ви, безумныя умудрѝ, болящыя исцелѝ, разслабленныя воздви́гни, плененныя изба́ви, у́зники свободѝ, вдови́цы помилуй, сироты̀ заступѝ, младенцы воспита́й, и вся православныя христианы сохранѝ от всех бед и напа́стей, ско́рбей же и нападе́ния вра́жия, и от смертоносныя язвы и тлетво́рных ветр и от всякаго зла. Паче же ныне с верою се́мо пришедшыя, и со страхом ко святому гробу твоему и в нем су́щым многоцеле́бным моще́м твоим припа́дающыя, и образ подобия твоего любезно  целующих, в день Страшнаго Суда от шу́ия части изба́ви, на десне́й же странѐ со избра́нными Божиими ста́ти сподоби, и прошением их испо́лнитися умолѝ. Всех же нас блаженный о́ный глас услы́шати сподоби: приди́те, благослове́ннии Отца Моего, насле́дуйте угото́ванное вам Царствие Небесное: яко да и мы вку́пе с тобою Христа Спаса нашего славим и величаем во веки веков.

Тропарь, глас 4

Яко пустыннолюби́вая го́рлица, от су́етнаго и многомяте́жнаго мiра в пустыню удали́вся, чистотою и гове́нием, молитвами и тружде́нием прославим еси Бога в душѝ и телесѝ твоем: и та́ко благоче́стно пожи́в, явился еси, преподобне, пусты́ни Любимогра́дския украшение, и́ноком честна́го жития̀ образ, и теплый молитвенник за всех, притека́ющих к ра́це твоей с верою.

Иануариа 25. Молитва святителю Моисе́ю, архиепископу Новгоро́дскому. Из службы со акафистом

О свяще́ннейший отче, святителю Христов Моисе́е, пастырю и учителю наш! не отри́ни нас, с верою притекающих к ра́це моще́й твоих и ко твоему заступлению и теплою молитвою тя призыва́ющих: но скоро потщи́ся помоли́тися Царю царствующих и Господу госпо́дствующих, да избавит стадо Свое от волков губя́щих ѐ: и всяку страну христианскую оградѝ и сохранѝ святы́ми твоими молитвами от мирска́го мяте́жа и труса, нашествия иноплеменников и междоусобныя бра́ни, от глада же и губительства, потопа и меча̀ и огня и внезапныя смерти. И якоже граду́щаго ку́плю де́яти от потопления поми́ловал еси, и от разбойников спасл еси святую обитель сию твою: тако помилуй и ны, умом, словом и делом во тьме грехо́вней су́щыя, и избави ны от гнева Божия и ве́чныя ка́зни: яко да твоим хода́тайством и помощию, своим же милосе́рдием и благода́тию, Христос Бог тихое и безгрешное житие даст нам пожи́ти в ве́це сем, и изба́вит нас от шу́ияго стояния, сподо́бит же десна́го со всеми святыми во веки веков.

Тропарь, глас 8

Чистоты̀ ра́ди жития̀ твоего, поще́ния же и молитв и трудов, сосуд благопотре́бен был еси Владыце Христу, Иже дарова̀ тя стаду твоему, яко сокровище неотъе́млемо, чудесы̀ всех обогаща́юща. Тем и мы, сошедшеся к ра́це моще́й твоих, верою и любовию вопие́м: моли о нас пречестны́й архиере́ю, Моисее отче наш.

Иануариа 28. Молитва преподобному Ефре́му Пече́рскому, епископу Переясла́вскому, первому строителю больниц на Руси, чтомая в Знаменской церкви Психиатрическия лечебницы во граде Полтаве

О великий угодниче Божий, святителю преподобне Ефре́ме! Се прино́сим тебе хвалебное пение мы грешнии и недостйнии, ча́да твоя, и велича́ем подвиги и добродетели твоя и мно́гую милость твою ко всем, с верою притека́ющым ко оте́ческому покрову твоему. Приимѝ с любовию приношение веры и любве нашея, и принесѝ ѐ Вседержителю Богу, от Него́же исходит всякое благо и всякий дар соверше́нный: и якоже в земне́м житии твоем всем твоея помощи иска́вшым благоде́йствовал еси, та́ко и ныне не лишѝ нас, отче благосердый, твоего пред Богом многомощнаго заступления, не остави же нас си́рых и безпо́мощных, но при́сно поминай нас во святых небесных твоих молитвах. Утвердѝ стопы̀ нашя твердо и непоколебимо ходи́ти путем заповедей Господних: утвердѝ руки нашя к воздея́нию моли́твенному и к совершению добрых дел: согре́й сердца нашя любовию ко Господу и ко ближним нашым. О милосердый святителю Ефре́ме! Испросѝ у Небеснаго Царя, Господа нашего, сему дому милосердия и в нем сооруже́нному храму благостоя́ние и сохране́ние от всякаго зла. Испросѝ, святителю Божий, у Небеснаго Врача, Христа Бога нашего, тружда́ющымся в доме сем и всем имя твое благогове́йно призыва́ющым, коему́ждо дар благопотре́бен: зде врачу́ющым и служа́щым дар врачевания, помощь же и терпение и укрепление, неду́гующым и душевно стра́ждущым исцеление, печальным утешение, бе́дствующым избавление, заблу́ждшым истины позна́ние, грешным исправление, подвиза́ющымся преспея́ние и всем вся к жизни вре́менней и ве́чней потре́бная, во славу ди́внаго во святых Своих Бога, Отца и Сына и Святаго Духа, в Троице сла́вимаго и покланя́емаго во веки веков.

Иануариа 28 и иуниа 11. Молитвы преподобному Ефре́му Новото́ржскому

Молитва 1, из акафиста

О священная главо, великий и предивный чудотворче, отче наш Ефре́ме! К тебе, ско́рому помощнику и усердному о нас моли́твеннику, смире́нно прибега́ем и молитвенно просим тя: нас скорбных и обремене́нных грехмѝ многими, не оста́ви помощию твоею святою и заступлением благодатным. Не забу́ди нас чад твоих, отче свяще́ннейший, но поминай нас при́сно в небесных богоприятных молитвах твоих у престола Пресвятыя Троицы, иде́же со Ангелы и всеми святыми предстои́ши, и зри́ши вся нашя нужды и беды̀, яко обурева́емся страстьмѝ и не и́мамы дерзнове́ния ко Творцу, проси́ти Его о поми́ловании и спасе́нии. Темже тебе предлагаем яко умилостиви́теля пред Го́сподем, и тобою уповаем милость Божию и прощение грехов нашых от Вседержителя получи́ти и спасение вечное унасле́довати, да славим и поем величие и благодать и человеколюбие Отца и Сына и Святаго Духа, и твое оте́ческое заступление, ныне и присно и во веки веков.

Молитва 2, из службы

О преславный Госпо́день угодниче и Богом собра́ннаго здѐ о тебе ста́да Христова предобрый па́стырю и наставниче, преподобне и богоносне отче наш Ефре́ме! Приимѝ убогое сие наше и малое, от любве душе́вныя приноси́мое тебе моление, и не пре́зри нас грешных, требующих твоея̀ помощи и заступления. Се бо мы, предстателя тя в ну́ждах непостыднаго стяжа́вше, верою несумне́нною тебе в хода́тайство призыва́ем: ты же, яко ве́лие име́яй дерзнове́ние ко Господу и Пречистей Его Матери, бу́ди молитвенник, и помощник и хода́тай о всех, со тща́нием в Божественный твой храм приходящих, честны́х же и многоцеле́бных моще́й твоих со страхом и благоговением прикаса́ющихся. Услы́ши ны, свя́тче Божий, и при́зри милостивым оком на предстоящыя цельбоно́сному твоему гробу люди. Ве́мы бо вои́стину, яко аще по отше́ствии твоем пло́тию от нас разлучи́лся еси, но духом неотступно с нами пребыва́еши: темже и вся нам, яже ко спасению поле́зная, усе́рдне просящым, моли́твами твоими пода́ти мо́жеши. Прострѝ убо преподобныя дла́ни твоя, о добрый и великий наш заступниче, и не преста́й моли́тися о державе благочестивейшаго и великаго госуда́ря нашего, императора Николая Александровича, самоде́ржца Всероссийскаго, и о всем царствующем доме, о Святейшем Правительствующем Синоде, и о преосвященном епископе нашем имярек, и о всех на всяком месте благоче́стно тебе на помощь призыва́ющих. Сохрани же царствующыя гра́ды, и град сей, и святую оби́тель сию̀, и вся гра́ды и страны̀ Российския от нашествия иноплеменных, междоусо́бныя брани, тлетво́рных ветр и от всякаго губительнаго зла. Кти́торы святыя оби́тели сия̀, и вся пребыва́ющыя и тружда́ющыяся в ней и благочестно притекающыя к честны́м моще́м твоим посетѝ, соблюдѝ и изба́ви от всяких бед и скорбе́й, яко да тобою управля́еми, многомяте́жное маловре́менное жития̀ сего мо́ре безбе́дне преплы́вше, достигнем в желаемое оное Небесное Пристанище, и прославим Всесвятую, Равночестную и Единосущную Троицу, Отца и Сына и Святаго Духа, ныне и присно и во веки веков.

Тропарь, глас 1

Божественною свыше просвети́вся благодатию, преподобне, многим терпением во временней жизни подвиг совершил еси: темже источаеши чудес благодать всем с верою приходящым к раце мощей твоих, Ефреме преблаженне. Сего ради зовем: слава Давшему ти крепость: слава Венчавшему тя: слава Действующему тобою всем исцеления.

Иануариа 28. Молитва преподобному Феодо́сию То́темскому. Из акафиста

О добрый наш пастырю и богомудрый наставниче, преподобне отче Феодо́сие! Услыши нас грешных, молящихся тебе и призывающих в помощь скорое предстательство твое. Виждь нас грешных, в толицех обстояниих сущих: виждь нас немощных, отвсюду уловляемых, и всякаго блага лишенных, и умом от малодушия помраченных. Потщися, угодниче Божий, не остави нас во греховнем плену пребывати, да не будем в радость врагом нашым и не у́мрем в лукавых деяниих наших. Моли о нас недостойных Спаса Господа, Емуже ты со безплотными лики предстоиши. Милостива к нам сотвори Содетеля нашего в нынешнем ве́це и в будущем, да не воздаст нам по делом нашым и по нечистоте сердец наших: но по Своей благостида сотворит нам. на твое бо ходатайство уповающе, твоим предстательством хвалимся, твое заступление на помощь призываем, и к цельбоносному гробу твоему припа́дающе недостойнии, исцеления просим. Избави нас, угодниче Христов, от злых, находящих на ны̀, и укротѝ волны страстей и бед, возстающих на нас, да ради святых твоих молитв не объимет нас напасть, и не погрязнем в пучине греховней и в тине страстей наших. Моли, преподобне отче наш Григорие, Христа Бога нашего, да подаст нам мирное жительство, оставление грехов и душам нашым спасение и велию милость, ныне и во веки веков.

Иануариа 29. Молитвы трие́м святителем: Гера́симу, Питири́му и Ио́не, епископам Пе́рмским, Устьвы́мским чудотворцем, что́мая Устьвы́мской Благове́щенской церкви, Вологодския епархии

Молитва 1

О свяще́нныя главы, преподобнии и преблаженнии, а́ввы ве́лии, Гера́симе, Питири́ме и Ио́но! Не забу́дите убогих своих до конца, но помина́йте нас всегда во святых своих и благоприя́тных молитвах к Богу. Помяни́те стадо свое, еже сами упаслѝ естѐ, и не забу́дите посеща́ти чад своих. Моли́те за ны, отцы свяще́ннии, за дети своя духо́вныя, яко иму́щии дерзнове́ние к Небесному Царю: не премолчи́те вопи́ти за ны̀ ко Господу, и не пре́зрите нас, верою и любовию чту́щих вы. Помина́йте нас недостойных у престола Вседержи́телева, и не преста́йте моля́щеся о нас ко Христу Богу: ибо дана̀ вам бысть благодать за ны̀ моли́тися. Не мним бо вас а́ки ме́ртвых: аще бо телесы и преста́вистеся от нас, но и по сме́рти жи́ви су́ще пребыва́ете. Не отступа́йте убо от нас духом, сохраня́юще нас от стрел вра́жиих и от всякия пре́лести бесо́вския и ко́зней диа́вольских, па́стырие наши до́брии. Аще бо и моще́й ваших раки пред очи́ма на́шима ви́димы суть всегда, но святыя вашя душы со ангельскими воинствы, со безплотными лики, с небесными силами, у престола Вседержителева предстоящя, достойно веселятся. Ведуще убо вас воистину и по смерти живых сущих, к вам припадаем и вам молимся: млитеся о нас Всесильному Богу, о пользе душ наших, и испросите нам время на покаяние, да невозбранно пре́йдем от земли на небо, от мытарств же горьких, бесов же воздушных князей и от вечныя муки да избавимся, и Небеснаго Царствия наследницы да будем со всеми праведными, от века угодившими Богу нашему Иисусу Христу: Емуже подобает всякая слава, честь и поклонение, со Безначальным Его Отцем, и Пресвятым и Благим и Животворящим Его Духом, ныне и присно и во веки веков.

Молитва 2

О преподобнии и преблаженнии отцы наши Гера́симе, Питири́ме и Ио́но! Услы́шите мя, в час сей к вам моля́щегося: помоли́теся о мне Владыце Христу Богу, много бо дерзнове́ние к Нему стяжа́ли естѐ, и́скреннии моле́бницы о нас су́ще. Умоли́те Господа отпусти́ти моя грехи и Небеснаго Царствия сподо́бити мя во веки веков.

Иануариа 30. Молитва трие́м вселе́нским учи́телем и святи́телем: Васи́лию Великому, Григо́рию Богослову и Иоа́нну Златоу́стому. Из акафиста трие́м святи́телем

О пресве́тлии свети́льницы Церкве Христовы, Васи́лие, Григо́рие и Иоа́нне, светом православных догма́тов вся концы̀ земли озари́вшии и мече́м слова Божия ху́льных смуще́ния и шата́ния ересе́й угаси́вшии! Припа́дающе к вашему милосердию, с верою и любовию из глубины̀ душѝ вопие́м: предстоя́ще престолу Пресвятыя, Единосущныя, Животворящыя и Нераздельныя Троицы, за Ню́же сло́вом, писа́нием и житие́м до́бре подвиза́стеся и ду́шы своя полага́сте, всегда моли́тесея Ей, да укрепи́т и ны в православии и единомыслии, и непоколеби́мем даже до смерти испове́дании веры Христовы, и во вседуше́внем послушании Его Церкви святей: да препоя́шет ны с высоты силою на вся невидимыя и видимыя враги нашя: да соблюде́т Церковь Свою незы́блему от неве́рия, суеве́рия, ересе́й и раско́ла: да дарует благочести́вейшему, самодержа́внейшему, вели́кому госуда́рю нашему, императору Николаю Александровичу здравие, долгоденствие и во всем благое поспеше́ние: па́стырем нашым да подаст духовное трезвение и ревность о спасении пасо́мых, правителем суд и правду, во́ином терпение, мужество и одоление на враги, си́рым и вдови́цам заступление, боля́щым исцеление, юным благое в вере возраста́ние, старцем утешение, оби́димым заступление, и всем вся ко временней и вечней жизни  потре́бная, яко да в мире и покаянии, желанием спасения горя́ще, Го́сподеви рабо́тающе, добрым подвигом подвиза́ющеся, течение наше скончаем и сподобимся в Небеснем Царствии ку́пно с вами всегда пе́ти и сла́вити пресвятое и великолепое имя Отца и Сына и святаго Духа во веки веков.

Тропарь, глас 4:

Яко апостолов единонра́внии и вселенныя учи́телие, Владыку всех моли́те мир вселенней дарова́ти и душа́м нашым ве́лию милость.

Иануариа 31 и априлиа 30. Молитва святителю Ники́те, епископу Новгоро́дскому

О архие́рею Божий, святителю Ники́те! Услыши нас грешных, днесь во священный храм сей сте́кшихся, и честно́му образу твоему покланя́ющихся, и ко священней твоей ра́це припа́дающих, и умиле́нно вопию́щих: якоже седя̀ на престоле святи́тельства в великом Нове́граде сем, и единою належа́щу бездо́ждию, дождь молитвою све́л еси, и па́ки гра́ду сему огненным пламенем обдержи́му, молитвою изба́ву пода́л еси, та́ко и ныне молим тя, о святи́телю Христов Ники́то: моли́ся ко Господу, еже изба́вити царствующыя гра́ды, Великий Но́вград сей и вся гра́ды и страны̀ христианския от тру́са, пото́па, гла́да, огня̀, гра́да, меча̀ и от всех врагов видимых и невидимых, яко да изря́дных ради молитв твоих спаса́еми, славим Пресвятую Троицу, Отца и Сына и святаго Духа, и твое ми́лостивное предста́тельство, ныне и присно и во веки веков.

Тропарь, глас 4

Насладився, богомудре, воздержания, и желание плоти твоея обуздав, на престоле святительства сел еси, и яко звезда многосветлая, просвещая верных сердца̀ заря́ми чудес твоих, отче наш святителю Никито: и ныне моли Христа Бога, да спасет душы нашя.

Месяц февруарий

Февруариа 1. Молитва святому мученику Три́фону

О святый мучениче Христов Три́фоне, скорый помощниче всем к тебе прибегающым, и моля́щымся пред святым твоим о́бразом скоропослу́шный предстателю! Услы́ши ныне и на всякий час моление нас, почитающых святую память твою во всечестне́м храме сем, [созда́ннем на похвалу святому имени твоему,] и предста́тельствуй о нас пред Го́сподем на всяком месте. Ты бо, уго́дниче Христов, святый му́чениче и чудотво́рче Три́фоне, в великих чудесе́х возсия́вый, прежде исхода твоего от жития сего тленнаго моли́лся еси за ны ко Господу и испроси́л еси у Него дар сей: аще кто в коей-либо ну́жде, бедѐ, печа́ли и боле́зни душевней или телесней призыва́ти на́чнет святое имя твое, той изба́влен будет от всякаго прило́га злаго. И якоже ты некогда дщерь царе́ву, во граде Риме от диавола му́чиму, исцелил еси: си́це и нас от лютых его козней сохранѝ во вся дни жития нашего, наипа́че же в день последняго нашего издыха́ния предстательствуй о нас. Бу́ди нам тогда помощник, и скорый прогони́тель лукавых духо́в, и к Царствию Небесному предводи́тель, иде́же ты ныне предстои́ши с ли́ки святых у престола Божия. Моли Господа, да сподо́бит и нас причастники бы́ти присносу́щнаго веселия и радости, да с тобою ку́пно удостоимся сла́вити Отца и Сына и Святаго Духа во веки веков.

Февруариа 3. Молитвы святому праведному Симео́ну Богоприи́мцу. Из акафиста

Молитва 1, о всех православных христианех

О великий угодниче Божий и богоприи́мче Симео́не! Предстоя̀ престолу Великаго Царя и Бога нашего Иисуса Христа, ве́лие дерзновение и́маши к Нему, на объя́тиих твоих нашего ра́ди спасения носи́тися изво́лившему. К тебе у́бо, яко многомо́щному предста́телю и кре́пкому о нас моли́твеннику, прибегаем мы грешнии и недостойнии. Моли благость Его, яко да отвратит от нас гнев Свой, праведно по делом нашым на ны движымый, и презрев безчисленная прегрешения нашя, обратит нас на путь покаяния и на стези заповедей Своих утвердит нас. Огради молитвами твоими в мире жизнь нашу, и во всем благом благое поспешение испроси, вся к животу и благочестию потребная нам даруя. И якоже древле Великий Но́вград, явлением чудотворныя иконы твоея, от губительства смертнаго избавил еси, тако и ныне нас и вся грады и веси и страны нашея от всяких напастей и бед и внезапныя смерти предстательством твоим избави, и от всех враг видимых и невидимых покровом твоим защити. Сохрани в мире и долгоденствии благочести́вейшаго госуда́ря нашего, императора Николая Александровича, и державе его и всему царству Российскому буди оплот тверд и укреплен, яко да тихое и безмолвное житие поживем во всяком благочестии и чистоте, и тако в мире временное сие житие прешедше, в вечный достигнем покой, идеже сподобимся Небеснаго Царствия Христа Бога нашего, Емуже всякая слава подобает, со Отцем и Пресвятым Его Духом, нне и присно и во веки веков.

Молитва 2, о и́ночествующих во оби́тели

О великий угодниче Божий и богоприи́мче Симео́не! Услыши нас грешных, моля́щихся тебе и ко святей иконе твоей припа́дающих и множества ра́ди грехов наших не отъими покров твой святый от оби́тели, в нейже от лет древних многими зна́меньми и чудесы̀ просла́вися святая сия и чудотворная икона твоя, но соблюдѝ ю̀ тве́рду и непоколеби́му от всех враг видимых и невидимых, и от всех напа́стей и бед невреди́му сохрани. Бу́ди помощник благи́й всем благоче́стно живущым и до́бре тружда́ющымся в ней, и изба́ви нас от неду́гов и гла́да, от потопле́ния и огня, от внеза́пныя смерти и смертоно́сныя я́звы и от всякаго зла. Отженѝ от нас мысленнаго волка губителя, и́щуща пожра́ти и во ад свестѝ душы на́шя, оградѝ нас от искушений и соблазнов мiрски́х и от по́мыслов су́етных и душевре́дных. Утвердѝ сердца̀ наша во смиренному́дрии, кротости, послушании, безмолвии, воздержании, терпении, непамятозло́бии и любви, яже о Христе Иисусе Господе нашем, и во вся́цем деле бла́зе и по́двизех иноческих укрепѝ. Упасѝ убо, яко пастырь добрый, на па́житех Христовых в мире вся словесныя о́вцы Христовы, во дворе твоем собра́нныя, яко да благоче́стно пожи́вше во оби́тели твоей на земли, с миром отъидем во обители Небеснаго Царствия, идеже сонм праведных и святых ку́пно с тобою непрестанно славят пресвятое и благословенное имя Отца и Сына и Святаго Духа, ныне и присно и во веки веков.

Молитва 3, о челове́це еди́нем,  скорби су́щем

О великий угодниче Божий и богоприи́мче Симео́не! При́зри на мя грешнаго, ко святей иконе твоей припа́дающа  и прося́ща твоего заступления и помощи. Скорбь бо обдержи́т мя от обстоя́щих мя ныне бед и зол, и утешения не имам многоболе́зненней душѝ моей. Иска́х бо помощи от человек, и не обре́теся. Вопия́х ко Господу и не услы́шах мя, зане прогне́вах пречистую благость Его беззако́ньми моими, и множеством многих грехов моих преогорчи́х благоутро́бную человеколю́бную утро́бу Его. И кто ми ныне помощь яви́т? Кто ми скорбь утоли́т? Кто даст отра́ду и успокое́ние многомяте́жней душѝ моей? К тебе великий угодниче Божий, прибега́ю грешный и недостойный аз, ве́дый, яко ве́лие дерзновение и́маши ко Христу Богу и многомо́щен предста́тель еси о всех, с верою к тебе прибега́ющих и твоего заступления и помощи тре́бующих. Моли убо человеколюбца Господа, яко да прости́в ми безчисленная моя прегреше́ния, не отврати́т милость Свою от мене, но яко благ и сострада́телен, яви́т и мне безконечное Свое милосердие, и в лю́тем напа́стей и бед моих озлобле́нии подаст ми всеси́льную помощь Свою, и преогорче́нней душѝ моей осла́бу, мир, укрепление, утешение и успокое́ние да́рует. Ей, великий угодниче Божий! Вознесѝ богоноснии ру́це твои ко Иже на объя́тиих твоих носитися изво́лившему Христу Богу нашему, и моли благость Его, да не отри́нет моле́ние сердца моего, недостоинства ради моего, но да яви́т мне благовременне милость Свою, во славу безконечных щедрот Своих и многомо́щнаго предста́тельства твоего, о немже подоба́ет Ему всякая слава и благодарение, ку́пно со Отцем и Пресвятым Его Духом, ныне и присно и во веки веков.

Февруариа 3. Молитва святому благоверному князю Рома́ну Владимировичу, У́гличскому чудотворцу

О святый благоверный княже Рома́не! Услы́ши нас, в час сей тебе моле́ния и похвалы̀ нашя во смире́нии сердец наших приносящих и вопию́щих такова́я: радуйся, благоверных родителей пречестна́я о́трасле: радуйся, князе́й Российских благовенча́нная красото̀: радуйся, Божий избра́нниче: радуйся, сосуде Пресвятаго Духа: радуйся, яко на небеси со Ангелы живеши: радуйся, яко и на земли чудесы твоими сияеши: радуйся, яко град твой Угличь и живущыя в нем люди от бед спасл еси: радуйся, благоверному царю нашему похвало и утверждение: радуйся, земли Российстей забрало нерушимое и всем притекающым ко гробу твоему исцелений неоскудное сокровище. Помолися убо, святый княже Романе, Владыце Христу Богу нашему, к Немуже многое дерзновение стяжал еси, да исцелит нашя недуги душевныя и телесныя, да простит наша прегрешения вольная и невольная, да избавит от будущия вечныя муки, и Небеснаго Царствия да сподобит, идеже с тобою вкупе прославим всесвятое имя Отца и Сына и Святаго Духа во веки веков.

Февруариа 4. Молитвы святому благоверному великому князю Гео́ргию Все́володовичу, Владимирскому чудотворцу

Молитва 1, из акафиста

О богоизбра́нный чудотворче, пресла́вный угодниче Христов, Це́ркве православныя побо́рниче, Царства Российскаго защи́тниче, вели́кий кня́же Гео́ргие! Усе́рдно мо́лим тя, при́зри на ны грешныя, прибегающия ко твоему заступлению: услы́ши сие ма́лое моление наше, и те́плым твоим предста́тельством умолѝ милостиваго Бога, Ему́же с лики Ангел и со всеми святы́ми предстои́ши, да сохрани́т нас во едине́нии православныя Церкве, и утверди́т в сердцах наших дух пра́выя веры и благоче́стия, и изба́вит нас от вся́каго злаго искуше́ния. По вели́цей любви твоей, е́юже бли́жния твоя возлюби́л еси, испросѝ у всеще́драго Господа отечеству нашему мир и благоустрое́ние, благочестивейшему государю императору нашему Николаю Александровичу и всему царствующему дому здравие, благоде́нствие и долголетие, нам же всем недостойным, усе́рдно к тебе припа́дающым, богоуго́дное и безмяте́жное жити́е. О святы́й заступниче наш! не оста́ви нас немощны́х и безпо́мощных: моли́ся за ны ко Господу и Пречи́стей Владычице Богородице, подви́гни с собою на молитву о нас богопросла́вленныя сро́дники твоя, святы́я кня́зи Андре́а и Гле́ба, с ни́миже вку́пе здѐ нетленными моща́ми почиваеши и на небеси у престола Царя Небеснаго предстои́ши, да вся к по́льзе вре́менней и ве́чней потребная нам да́рует, и да не воздаст нам по дело́м нашым, но по неизрече́нному человеколю́бию Своему да прости́т согрешения наша, да изба́вит же нас от вся́кия ну́жды и печа́ли,  ско́рби и боле́зни: да низпо́слет нам благое наме́рение и силу подвизатися во исправлении жития нашего, и в будущем веце  да сподобит нас внити во Царствие Небесное и славити всесвятое имя Отца и Сына и святаго Духа во веки веков.

Молитва 2, чтомая в Нижегоро́дском Михаи́ло-Арха́нгельском соборе

О всехва́льный, святый, великий княже наш Гео́ргие, создателю святаго Михаи́ло-Арха́нгельскаго храма, и сего града, благодарно нами обита́емаго, основа́телю! Взира́юще на сей твой лик, от чудотво́рных моще́й твоих к нам прише́дший, и в нем са́мую часть страда́льческаго твоего телесѐ очи́ма на́шима благоговейно зря́ще, мы недостойнии яко и́стиннаго сама́го тя посредѐ себѐ зри́м духо́вно. Темже с верою серде́чною и любо́вию к тебе припа́даем, и славим и величаем яко избра́ннаго воево́ды труды̀ и по́двиги твоя̀: сла̀дце же исхождѐния и вхождѐния твоя по ме́стом сим помина́ем: ублажа́ем страда́ния твоя и смерть, ю́же за Христа и Церковь Его прия́л еси. Ца́рие и святи́телие тя ублажи́ша: град твой и храм твой и вси храмы и обители града твоего о тебе радуются, и славныя во́ды, зде мимотеку́щыя, тя и во́и твоя носи́вшыя, о тебе веселя́тся. Благогове́йно убо лик твой вси лобыза́ем, и в нем святыя мо́щи твоя почита́ем, святу́ю память твою прославляем и мо́лим тя, да тобою пода́ст нам Господь вся потре́бная к вечному спасению нашему и ко благобытию̀ временному, да сподо́бит же нас в мире и покаянии сконча́ти жизнь нашу, и да упоко́ит пожи́вшыя во граде твоем и преста́вльшыяся во всяком чи́не и возрасте. Таже ку́пно со избра́нным небесных сил воево́дою, святым Архангелом Михаилом, и соиме́нным тебе победоно́сцем, посо́бствуй, святый княже и страстоте́рпче Гео́ргие, благочестивейшему государю нашему, императору Николаю Александровичу, царство его благоче́стием и ми́ром оградѝ, и христолюби́вому воинству его сора́тай непобеди́мь бу́ди, град твой и жительство его избавляя от належа́щаго праведнаго преще́ния, губительства, огня, междоусобия: бу́ди же в нем вдовицам и си́рым воспитание и покров, юношам и ча́дом охране́ние, старчеству подпо́ра, нищым утеше́ние, всему священному чину и церковному при́чту защитник и помощник. О святый княже наш Георгие! предстательством твоим благоустроя́й согреша́ющым нам исправление и покаяние, ка́ющымся грехов заглажде́ние, веры православныя возраста́ние и утвержде́ние, советов нечести́вых, лжеучений и соблазнов мно́жащихся разоре́ние, лжѝ, льстѝ и кова́рства всякаго посрамле́ние, во стра́се Божии и во всякой добродетели испросѝ и низпослѝ преспеяние: да тако избавимся от гнева Божия и муки, и с тобою, яко чада со отцем, славим Пресвятую Троицу, Отца и Сына и Святаго Духа, во веки веков.

Тропарь, глас 8

На высоте великаго княжения седя, явился еси благочестием и верою сияя отечеству своему яко солнце: по Святей Троице ревностию разжегся и за веру крепко пострадав, кровь твою пролтиял еси: тем и отсеченная твоя  за Христа глава свидетельствует яве о тебе, прилепшая по смерти к телеси твоему, с неюже и доднесь нетленны пребывают мощи твоя, от нихже источаеши исцеления душам и телесем нашым. Но яко дерзновение имея ко Христу, страстотерпче Георгие, непрестанно моли, державу твою и сродник твоих безвредну сохранити молитвами твоими.

Февруариа 4 и ноемвриа 7. Молитвы преподобному Кириллу, Новоезерскому чудотворцу

Молитва 1, из службы

О великий угодниче, пресла́вный чудотворче, Кирилле блаженне, душею на небеси престолу Божию предстоя́й и троичныя славы наслажда́яйся, телом же на земли в Божественнем храме почива́яй и от Него данною ти свыше благодатию различная источа́яй чудеса! Призри милостивым оком на предстоящыя честне́й ра́це твоей люди, и яко стяжа́вый дерзновение у Господа, испросѝ оби́тели твоей благостоя́ние, возду́ха благорастворе́ние, земли плодоно́сие, нам же всем, с верою к тебе прибега́ющым и многоцеле́бныя мо́щи твоя благоче́стно почита́ющым, от всяких бед душевных и телесных избавле́ние: яко да твоими молитвами наставля́еми, путь маловре́меннаго жития нашего на земли безбе́дно совершим, и неконча́емый покой на небеси улучи́вше, прославим с тобою ку́пно всех благих Подателя, Единаго в Троице славимаго Бога, Отца и Сына и Святаго Духа, ныне и присно и во веки веков.

Молитва 2

О богоизбра́нный, вы́шняго града, Небеснаго Иерусалима, небесный граждани́не, очище́нный Духом Святым у́ме, земны́й ангеле, небесный челове́че, чистаго девства добрый ревни́телю, досточу́днаго терпе́ния преизя́щный о́бразе, богохранимое Духа Святаго жилище, до́блественный Христов во́ине, Кири́лле преподобне! Просѝ у Христа Бога, Всеблага́го Творца нашего, дарова́ти здравие и долгоденствие благочести́вейшему, самодержа́внейшему, вели́кому госуда́рю нашему, императору Николаю Александровичу всея России: посо́бствуй ему победи́ти и покори́ти под но́зе свои вся́каго врага и супоста́та. Испросѝ же у Господа Бога мир це́рквам святым, людем же российским тишину и благоденствие и плодов земных изобилие: да сохранит же Господь отечество наше от всех напастей, бед и скорбей, от нападения вра́жия, от смертоно́сныя язвы и от всякаго зла. Нас же, стадо твое, во святей сей обители пребыва́ющее, и всех с верою и любовию ко всечестне́й ра́це многоцеле́бных мощей твоих припа́дающих и образ подо́бия твоего любезно целующих, и всех православных христиан к тебе приходящих, молитвами твоими соблюдѝ и ко Христу приведѝ, Ему́же, со Отцем и Святым Духом, подобает всякая слава, честь и поклонение, ныне и присно и во веки веков.

Тропарь, глас

Божиим Духом подвиза́емь, слез твоих тучами изсо́хшее напои́л еси, и безпло́тное в пустыни житие показал еси, и е́же из глубины се́рдца бо́дренными моли́твами и посто́м, благодея́ния труды̀ уплодоно́сил еси, и вселе́нную всю просветил еси сиянием чуде́с твоих: отче наш Кири́лле, молѝ Христа Бога спасти́ся душа́м нашым.

Февруариа 8 и иуниа 8. Молитва святому великомученику Фео́доре Стратила́те, чтомая в Феодоровском монастыре града Казани

О святый, сла́вный и всехвальный великомучениче Феодоре Стратилате! Собрание днесь во храме твоем и пред иконою твоею святою покланяющиися людие молим тя, известный желания нашего ходатаю: моли с нами и о нас умоляемаго от своего благосердия Бога, да милостивно услышит нас, благостыни у Него просящих, и вся наша ко спасению и житию нужная прошения да исполнит, да дарует же благочестивейшему императору Николаю Александровичу победу на сопротивныя и царство его в мире сохранит. Еще же молим тя, святый победоносче Феодоре Стратилате: укрепи данною тебе благодатию во бранех православное воинство наше, разруши силы возстающих на ны врагов, да постыдятся и посра́мятся от лица верных, и дерзость их да сокрушится, и да уведят яко присно Божественную помощь имамы. Такожде и всем, в скорби и обстоянии сущым, многомощное твое яви заступление. Умоли же Господа Бога, всея твари Создателя, избавити нас от вечнаго мучения, да всега прославляем Отца и Сына и Святаго Духа, и твое исповедуем предстательство, ныне и присно и во веки веков.

Тропарь, глас 4

Воинствосло́вием и́стинным, страстоте́рпче, Небеснаго Царя воево́да предо́брый был еси, Фео́доре: ору́жиями бо веры ополчи́лся еси му́дренно, и победи́л еси де́монов полки, и победоно́сный яви́лся еси страда́лец. Темже тя верою при́сно ублажаем.

Февруариа 10. Молитвы святому священномученику Харлампию

Молитва 1, из акафиста

О пречудный священномучениче Харла́мпие, страстотерпче непреодоле́нный, священниче Божий, о всем мире хода́тайствуяй! При́зри на моление нас, почитающих святую память твою. Испросѝ нам у Господа Бога прощение грехов наших, да не до конца прогневается на нас Господь: согреши́хом бо и недосто́йни яви́хомся милосердия Божия. Моли о нас Господа Бога, да ниспо́слет мир на гра́ды и ве́си нашя, да изба́вит нас от нашествия иноплеменников, междоусобныя брани и всяких раздоров и нестрое́ний. Утвердѝ, священному́чениче, веру и благочестие во всех ча́дех православныя христианския Церкви, и да изба́вит нас Господь Бог от ересе́й, раско́лов и вся́каго суеве́рия. О милосердый мучениче! моли́ся за ны ко Господу, да сохрани́т нас от глада и всяких болезней, и да пода́ст нам изоби́лие плодо́в земны́х, ското́в умноже́ние на потре́бу человеком и вся нам полезная: наипа́че же да сподо́бимся, молитвами твоими, Небеснаго Царствия Христа Бога нашего, Емуже честь и поклонение подобает, со Безначальным Его Отцем и Пресвятым Духом, ныне и присно и во веки веков.

Молитва 2

О священная и многострадальная главо̀, пастырю добрый словесных овец Христовых, священному́чениче Христов Харла́мпие, Магинси́йская похвало̀ и вселенныя сла́во, всемiрный светильниче, великий наш заступниче и в ско́рбех, беда́х и всяких ну́ждах благи́й помощниче! Услы́ши нас грешных, к тебе прибега́ющих и тебе моля́щихся, и изба́ви нас от всякаго злаго обстояния. Ты бо прия́л еси от Господа благодать и силу вели́ку за многая и тяжкая страдания твоя и терпение, еже всюду и во всем нам помога́ти, и наипа́че иде́же память твоя чти́тися будет. Сицева́я благодать даде́ся ти, священному́чениче Христов, от я́вльшагося ти Господа Царя славы, егда̀ на ме́чное тя усече́ние осуди́ша. Слышал бо еси превожделе́нный и сладча́йший о́ный глас, глаго́лющь тебе: прииди, Харла́мпие, друже Мой, многия муки имени ради Моего претерпе́вый, и проси у Мене, еже хо́щеши, и Аз дам ти. И тогда рекл еси Христу Господу: Го́споди мой, вели́ко мне есть от Тебе, Света Невечерняго, дарование сие: аще уго́дно есть величесту Твоему, молю Тя, благоволѝ даровати ми сицеву́ю милость Твою, да иде́же поло́жены будут мо́щи моя и почита́ема будет память страдания моего, не будет на месте том ни гла́да, ни мора, ни тлетворнаго возду́ха, погубля́ющаго плоды̀, но да будет паче на месте о́ном мир, здравие телесе́м и душа́м спасение, изобилие пшеницы, вина и елеа и умножение ското́в, яже на потре́бу челове́ком. И отвеща̀ тебе глас Господень: бу́ди по прошению твоему, преславный Мой во́ине. И а́бие по глаго́лании сем Господни, пре́дал еси душу твою прежде ме́чнаго посече́ния, и сия ко Господу взы́де, Ангелом сретаю́щым ю̀: и тако прия́л еси венец славы от Божественныя рукѝ Его с ли́ки святых, вечно славящих пресвято́е имя Господа. Тамо убо во славе небесней пребыва́я, при́зри угодниче Божий, и на нас грешных, моля́щихся тебе, и вспомни нас пред Господем, еже дарова́ти нам на потре́бу велия Его милости во веки веков.

Молитва 3, чтомая в церкви села Шекшова, Владимирския епархии

Святый священномучениче Харла́мпие, светильниче земны́й и небесная озаря́яй, Ангелов собеседниче, пророков сожителю, апостолом дру́же, мучеником совои́нственниче! Услыши молитвы нашя, якоже Господь услы́ша твоя, и приими словеса̀ усте́н наших, якоже и Господь словеса̀ уст твоих прия́т. Священниче Божий Харла́мпие, бла́гостию великий, о всем мiре хода́тайствуяй! мо́лим тя: якоже пред святою кончиною твоею Владыку Господа нашего о всех чту́щих память твою моли́л еси, тако и ныне, одесную престола Божия предстоя̀, не забу́ди нас грешных и повинных гневу Божию, но моли́ся о нас, память твою соверша́ющих: да не будет на месте нашем и всяком ино́м глад и мор, или тлетво́рный возду́х, погубля́яй плоды̀, ско́ты и человеки, но да будет на ме́стех тех, идеже призывается в хода́тайство ствятое имя  твое, мир и телесе́м здравие и душа́м спасение, изобилие же всякаго жи́та и всего, еже на потребу человеком. Моли́ся о нас, угодниче Божий, святый священному́чениче Харла́мпие, да оставит нам Господь вся прегрешения наша вольная и невольная, в слове и в деле нами соде́янная, да простит Господь вся грехи юности и неведения, праздности и уныния: прочее же время жития̀ нашего упра́ви святыми твоими молитвами ко спасению и жизни ве́чней, да вси в веселии и радовании со благодарным сердцем прославляем человеколюбиваго и благоуветливаго всех благ Подателя, в Троице славимаго Бога, всегда, ныне и присно и во веки веков.

Февруариа 10 и октовриа 16. Молитвы преподобному Ло́ггину Коря́жемскому. Из службы

Молитва 1

О великий угодниче, преславный чудотворче и обители твоея богодухнове́нный наста́вниче, Ло́ггине преблаженне, душе́ю на небесѝ престолу всех Царя предстоя́й, телом же в обители сей почива́яй и различная чудеса повсюду молитвами твоими соверша́яй! При́зри ми́лостивно на люди предстоящыя и твоего ко Христу Богу хода́тайства во обдержа́щих ну́ждах прося́щыя: вси бо мы, по мно́жеству грехов наших, не смеем нижѐ возвестѝ оче́с наших на небо: ты же, яко стяжа́вый дерзновение, принесѝ за всех, ко честне́й ра́це твоей притекающих, те́плыя молитвы ко Господу, еже изба́витися нам от глада, потопа, труса, огня, меча и брани, от людей и от диавола быва́ющия, и от всякия душевныя и телесныя болезни: да сих избежа́вше и Господу, Емуже предстои́ши, рабо́тающе, вни́дем в некончаемый покой и прославим тамо с тобою всех благих Подателя Бога, всегда, ныне и присно и во веки веков.

Молитва 2

О священная главо, преподобне отче, преблаженне а́вво Ло́ггине! Не забуди убогих твоих до конца, но помина́й нас всегда во святых твоих и благоприятных молитвах к Богу. Помянѝ стадо Твое, еже сам упа́сл еси, и не забуди посещать чад твоих. Молѝ за ны, отче священный, за дети твоя духовныя, яко име́яй дерзновение к Небесному Царю: не премолчѝ за ны ко Господу, и не пре́зри нас, верою и любовию чтущих тя. Поминай нас недостойных у престола Вседержи́телева, и не преста́й моля́ся о нас ко Христу Богу: ибо дана тебе бысть благодать за ны моли́тися. Не мним бо тя су́ща мертва: аще бо телом и преста́вился еси от нас, но и по смерти жив сый пребыва́еши. Не отступа́й от нас духом, сохраняя нас от стрел вражиих и всякия пре́лести бесо́вския и ко́зней диавольских, па́стырю наш добрый. Аще бо и моще́й твоих ра́ка пред очи́ма на́шима ви́дима есть всегда, но святая твоя душа со ангельскими во́инствы, со безпло́тными лики, с небесными силами, у престола Вседержителева предстоя́щи, достойно весели́тися. Ве́дущи убо тя воистину и по смерти жива суща, тебе припадаем и тебе молимся: моли́ся о нас Всесильному Богу, о пользе душ наших, и испросѝ нам время на покая́ние, да невозбра́нно пре́йдем от земли на небо, от мытарств же горьких, бесо́в воздушных князей и от вечныя муки да избавимся, и Небеснаго Царствия насле́дницы да будем со всеми праведными, от века угоди́вшими Господу нашему Иисусу Христу: Емуже подоба́ет всякая слава, честь и поклонение, со Безначальным Его Отцем, и с Пресвятым и Благим и Животворящим Его Духом, ныне и присно и во веки веков.

Тропарь, глас 1

От мятежа мiрска́го удали́вся, к немерцающему свету прите́кл еси, преподобне отче Ло́ггине, и ныне чи́сте зри́ши Святую Троицу, Ю́же молѝ за ны недостойныя, да спасет ду́ши нашя.

Февруариа 11. Молитва святому священномученику Вла́сию, епископу Севасти́йскому, чтомая в Новгородской Вла́сиевской церкви

Преблаженне и приснопа́мятне священному́ченику Вла́сие, дивный страдальниче и предстателю наш теплый, по отше́ствии твоем в жизнь вечную призывающым твое святое имя посо́бствовати и во всяких прошениих услы́шанным быти обеща́вый! Се ныне к тебе угоднику Божию, яко ко и́стинному хода́таю спасения, притека́ем и смиренно молимся: предстани нам в помощь, у́зами грехов связанным, подви́гнися на всемо́щныя твоя к Богу молитвы и помоли́ся о нас грешных: тя бо, недосто́йнии, призывати на заступление дерза́ем, и желаем от всех грехов наших тобою свобождение получи́ти. О святче Божий Власие! В сокрушении и смирении сердца нашего пред тобою припа́даем и мо́лимся: осия́й нас, омраче́нных наве́ты вражиими, светом благодати свыше, да в нем ходя́ще, не преткне́м о камень ног наших. Тя, яко сосуд в честь избра́нный и испо́лненный благодати Божия, мо́лим: сподоби нас грешных от исполнения твоего желаемое прия́ти, и исцелѝ нашя душевныя и телесныя язвы, грехом же нашым прощение и дешевному и телесному нашему здравию и спасению полезное у Господа испросѝ, да всегда прославляем Отца и Сына и Святаго Духа, и твое ми́лостивное предста́тельство и душах и телесех наших, ныне и присно и во веки веков.

Февруариа 11. Молитва преподобному Дими́трию Прилу́цкому. Из акафиста

О священная главо̀, предивный чудотворче, преподобне и богоносне отче наш Дими́трие! Усердно припа́дающе к тебе, молимся: яви нам смиренным и грешным многомо́щное твое заступление. Се бо грех ради наших не и́мамы дерзновения ко Господу, проси́ти Его даро́в нам благопотре́бных, но тебе молитвенника к Нему благоприятнаго предлагаем, и просим: умолѝ нам от Его благости вся, яже на пользу душа́м и телесе́м нашым: веру праву, надежду несомне́нну, любовь нелицеме́рну, во искушениих мужество, в злострада́ниих терпение, в молитвах постоянство, во благочестии преуспея́ние, вожделенное здравие, земли плодоносие, возду́ха благорастворе́ние, дожди благовре́менны, житейских потре́б дово́льство, мир во днех наших и благословение свыше на вся благая дела и начинания наша, и да не во зло обрати́м да́ры Его, но во славу имени Его свята́го и в прославление твоего о нас хода́тайства. Испросѝ, угодниче Христов, у Царя царствующих и Господа господствующих, благочести́вейшему, самодержа́внейшему, вели́кому госуда́рю нашему, императору Николаю Александровичу всея Россиии здравие, долгоденствие, на врагѝ же победу и одоле́ние, и всему богохранимому царству его тишину и благострое́ние. Не забу́ди, чудотворче святы́й, милостивно присеща́ти град твой и обитель твою и вся гра́ды и ве́си страны̀ нашея православныя, сохраняя и соблюдая их молитвами твоими от всякаго зла. Помянѝ всех, веру и любовь к тебе иму́щих, имя твое милостивно призывающих и на поклонение моще́м твоим святым приходящих, и вся во благи́х прошения их милостивно испо́лни, осеняя их свы́ше святооте́ческим твоим благословением. Ей, святче Божий! не лишѝ и нас грешных твоего многомо́щнаго заступления, но сподо́би нас кончину жития благу́ю улучи́ти и Царствие Небесное унасле́довати, да воспое́м и прославим ди́внаго во святых Своих Бога нашего,  Отца и Сына и Святаго Духа, во веки веков.

Тропарь, глас 1

Свыше от Бога, преподобне, благодать прия́л еси духовную, и от Него убо позна́лся еси, блаженне: Того ра́ди и ты духом познал еси лу́чшая Его, будущаго века пребывание, по́стнически испыта́вся во твоих обителех. И ныне со Ангелы ликовству́я, Спасу всех за ны моли́ся, святе Димитрие, да вси вопие́м: слава Давшему ти крепость: слава Венчавшему тя: слава Действующему тобою всем исцеления.

Февруариа 12. Молитва святителю Алексию, митрополиту Московскому и всея России

О пречестна́я и свяще́нная главо̀ и благодати Святаго Духа исполненная, Спа́сово со Отцем обита́лище, великий архиере́е, теплый наш заступниче, святителю Алекси́е! Предстоя̀ у престола всех Царя и наслажда́яся света Единосущныя Троицы и херуви́мски со Ангелы возглаша́я песньтрисвяту́ю, великое же и неизсле́дованное дерзновение имея ко Всемилостивому Влады́це, моли́ся па́ствы твоея̀ спастѝ люди, единоро́дный ти язык: помозѝ во бра́нех благочестивейшему, самодержавнейшему, великому госуда́рю нашему, императору Николаю Александровичу всея̀ России, и покорѝ ему вся проти́вныя врагѝ под но́зе его, мирно и безмятежно царствовати ему устро́й: благостояние святых церквей утвердѝ: архиере́и благоле́пием святительства украсѝ: мон́ашествующыя к подвиго́м добраго течения укрепѝ: царствующий град [сей и святую обитель сию] и вся гра́ды и страны́ до́бре сохранѝ, и веру святую непоро́чну соблюстѝ умолѝ: мир весь предстательством твоим умирѝ, от глада и па́губы избави ны, и от нападения иноплеменных сохранѝ: старыя уте́ши, юныя наста́ви, безумныя умудрѝ, вдовицы помилуй, сиро́ты заступѝ, младе́нцы возрастѝ, плененныя возвратѝ, немощству́ющыя исцели, и везде тепле призывающыя тя и с верою притекающыя к ра́це честны́х и многоцелебных моще́й твоих, усердно припа́дающыя и моля́щыяся тебе, от всяких напастех и бед хода́тайством твоим свободи, да зовем ти: радуйся, богоизбранный пастырю, звездо̀ всесветлая мысленныя тве́рди, тайнаго Сиона необори́мый сто́лпе, миродохновенный цве́те райский, всезлата́я уста слова, Московская похвало̀, всея России украшение! Моли о нас Всещедраго и Человеколюбиваго Христа Бога нашего, да и в день страшнаго пришествия Его от шу́иаго стояния избавит нас, и радости святых прича́стники сотворит со всеми святыми во веки веков.

Февруариа 14. Молитва преподобному Ма́рону Пустыннику

О возлюбленная и свяще́нная главо̀, преподобне и богоносне отче наш Ма́роне! Назира́й свыше милостивно нас грешных, и моли́ся Всещедрому Владыце и всех благ Подателю Богу о соблюдении державы и спасении благочести́вейшего, самодержа́внейшего, вели́кого госуда́ря нашего, императора Николая Александровича всея России: да пода́ст ему Господь Бог многоле́тное здравие, в снабде́ние и утверждение святыя христианския веры, и да сохранит царство его от всех врагов це́ло и неврежде́нно, во Господе нашем Иисусе Христе. Буди же моле́бник и о нас недостойных. Ко Всеблагому Господу честни́и твои ру́це прострѝ, и от него ми́лость и щедро́ты испросѝ, и́миже от всех бед и лютых болезней нас сохрани, и от всяких страстей свободи, та́кожде от нестерпимыя и неутиши́мыя огневи́цы и трясави́цы молитвами твоими изба́ви нас, и от нападения бесо́в, от видимых и невидимых врагов соблюдѝ, и согрешением нашым прощение испросѝ, и спасены Христу нас предста́ви, во еже, в день Страшнаго Суда, с радостию предста́ти нам пред лицем неизреченныя славы Его, и милостивное призвание в Царство Небесное от Него услы́шати, и в неизреченней радости преславную Его лица добро́ту узре́ти, благодатию и человеколюбием Господа Бога и Спаса нашего Иисуса Христа: яко держава Его благослове́на и препросла́влена, со Безначальным Его Отцем и с Пресвятым и Благим и Животворящим Его Духом, ныне и присно и во веки веков.

Тропарь, глас 2, на древней иконе преподобнаго, в Христорождественской церкви села Бубнова, Тферския епархии

Фарисе́йскаго тщеславия удаля́яся, преподобне отче наш Ма́роне, на гору высокую возше́л еси, и та́мо победу проказал еси на диавола: требище бо бесовское обре́т и Богу освяти́в, в нем пребыва́л еси, моли́твами твоими огневи́цу и трясови́цу утоля́я, и бе́сы прогоня́я, и от различных недуг свобожда́я. Того ради, свя́те, моли́ся Христу Богу, да спасет ду́шы нашя.

Февруариа 17 и маиа 12. Молитва святому священномученику Ермоге́ну, патриарху Московскому и всея России

О великий угодниче Христов, святителю отче наш Ермоге́не! К тебе, молитвеннику теплому и предстателю пред Богом непосты́дному, усе́рдно притека́ем, в ну́ждах и ско́рбех наших утешения и помощи прося́ще. В древнюю годи́ну искушений, внегда обыше́дше обыдо́ша страну нашу нечести́вии вразѝ, Господь яви тя Церкви Своей столпа̀ непоколеби́ма и людем российским па́стыря до́бра, душу свою за овцы положи́вша и лю́тыя во́лки дале́че отгна́вша. Ныне убо при́зри и на ны, недостойная чада твоя, умиле́нное душе́ю и сокрушенным сердцем тебе призыва́ющыя. Крепость бо наша в нас оскудѐ, и вражия ловле́ния и сети обыдо́ша нас. Помозѝ нам, заступниче наш! Утвердѝ нас в вере святей: научѝ нас всегда твори́ти заповеди Божия и вся преда́ния церковная, от отец нам запове́данная. Укрепѝ благовернаго царя нашего, Богом нам даннаго, и научи нас люби́ти его нелицеме́рно. Па́стырем на́шым бу́ди архипа́стырь, во́ином вождь духо́вный, боля́щым врачь, печальным уте́шитель, гони́мым заступник, юным наставник, всем же благосе́рдый отец и за вся теплый молитвенник: яко да молитвами твоими огражда́еми, непрестанно воспое́м и просла́вим всесвятое имя Живонача́льныя Троицы, Отца и Сына и Святаго Духа, во веки веков.

Тропарь, глас 4

Российския землѝ первопресто́льниче и неусыпный о ней к Богу моли́твенниче! За веру Христову и паству твою ду́шу положи́в, держа́ву царей наших утверди́л еси и страну нашу от нечестия избавил еси. Темже вопие́м ти: спаса́й нас молитвами твоими, священномучениче Ермоге́не, отче наш.

Февруариа 18. Молитва преподобному Космѐ игу́мену, Яхро́мскому чудотворцу, что́мая в Косминѐ монастыре, Влади́мирския епархии

О всечестная главо̀, преподобне о́тче, блаженне великий а́вво Космо̀! Не забу́ди убо́гих твоих до конца, но поминай нас всегда во святых твоих и благоприятных молитвах к Богу. Не забу́ди посеща́я чад твоих, соверша́ющих свяще́нную память твою, но молѝ за ны, отче благи́й, избра́нниче Христов, яко име́яй дерзнове́ние к Небесному Царю. Ты, возше́д на высоту добродетелей, яко фи́никс процве́л еси, и яко кедр, иже в Лива́не, собрал еси ча́да твоя, и мирское пристрастие от себе отве́ргл еси, и Царства Небеснаго достигла еси, и та́мо с ли́ки праведных предстои́ши Христу Богу ра́дуяся. Не премолчѝ убо за ны ко Господу, и не пре́зри нас, с верою и любовию чтущих тя. Помина́й нас недостойных у престола Вседержителева, непрестанно моля́ся ко Христу Богу: тебе бо дана бысть благодать моли́тися за ны. Преподо́бнии твои ру́це прострѝ молебне о нас грешных: испросѝ нам время на покаяние и о еже невозбра́нно прейтѝ нам от земли на небо, от горьких же мыта́рств возду́шных князе́й и от вечныя муки изба́витися, и Небеснаго Царствия наследником бы́ти со всеми пра́ведными, угоди́вшими Ему, Господу Богу нашему Иисусу Христу, Емуже подобает всякая слава, честь и поклонение, со Отцем и со Святым Духом, ныне и присно и во веки веков.

Тропарь, глас 4, поемый в том же монастыре

Горняго желая премирнаго жития, дольняя возненавидел еси, и взем крест, последовал еси Христу, и в пустыню вселился еси, досточудне, и в ней подвизался еси в пениих и бдениих и пощениих: сего ради в тя вселися Пресвятый Дух. Темже, яко имеяй дерзновение ко Христу  Богу, испроси благоверному императору нашему Николаю Александровичу здравие и спасение, и не забуди посещая чад твоих, соверша́ющих свяще́нную память твою, Космо преподобне, отче наш.

Февруариа 20. Молитва преподобному́ченику Корни́лию, Пско́во-Пече́рскому чудотворцу, что́мая в Пско́во-Пече́рском монастыре

О святый преподобному́чениче Корни́лие! Смире́нно к ра́це святых моще́й твоих припа́даем и уми́льно тя мо́лим: при́зри ми́лостивно на ско́рби нашя душевныя и телесныя, и изба́ву нам подаждь: помозѝ нам, святче Божий, изба́витися от наве́ты злых человек, от них же и сам ты неви́нно на землѝ пострадал еси: защити нас от насилия диавола, лю́те на нас вою́ющаго. Умолѝ Господа Бога и Пречистую Его Матерь, дарова́ти нам тихое и безгрешное житиѐ, братскую нелицемерную любовь и мирную христианскую кончи́ну, да чистою совестию предстанем нелицеприя́тному страшному суди́лищу Христову и во Царствии Его прославим Животворящую Троицу, Отца и Сына и Святаго Духа, во веки веков.

Тропарь, глас 6, поемый в томже монастыре

Псково-Печерская оби́тель, издре́вле сла́вная чудесы̀ иконы Богома́терни, многия и́ноки Бо́гови воспита̀: та́мо и преподобный Корни́лий подвигом добрым подвиза́ся, чудную Богома́терь славя, инове́рныя просвеща́я, и́ноки и многия люди спаса́я, обитель же свою ди́вно украша́я и огражда́я: та́мо и му́ченичества венец, по многих ле́тех па́стырства своего, до́блестне прия́т. Темже воспои́м, лю́дие, Христа Бога, и Пречистую Его Матерь возблагодари́м, яко дарова̀ нам преподобному́ченика сла́вна и молитвенника о душах наших достоблаже́нна.

Февруариа 23. Молитва преподобному Полика́рпу Бря́нскому, что́мая в Бря́нском Покро́вском собо́ре, Орло́вския епархии

О пастырю добрый, наставниче неусы́пный, преподобне о́тче Полика́рпе! Ты, от мяте́жа мiра сего изше́д, отвержением благ преходящих ева́нгельски Христу последовал еси, и равноа́нгельное житиѐ пожив, безплотных по́чести сподо́бился еси. Того ра́ди любовь твою к людем па́мятующе, яко ча́да ко отцу, к тебе прибегаем и молимся тебе со умиле́нием: бу́ди щит несокруши́мь святей Церкви православней и отечеству нашему: бу́ди хранитель и споспе́шник благочести́вейшему госуда́рю императору Николаю Александровичу, износя̀ ему от престола Царя славы силу, радость мир и утешение: воинству же его, яко сора́тник, споспешеству́й в победах над супоста́ты. Изба́ви, о преподобне уго́дниче Божий, от всякаго наве́та вражия гра́ды и ве́си страны̀ Российския, и не остави заступлением твоим нас немощны́х, грехмѝ и скорбьмѝ многими обремененных: умолѝ благость Христа Бога нашего дарова́ти нам по́мыслов мир, от пагубных страстей и всякия скверны воздержание, братолю́бие долготерпели́вое, багочестие же нелицеме́рное, да не во зло блага́я, нам свыше присно посыла́емая, обраща́ти будем. Озарѝ, преблаже́нне, ум наш светом лица Божия: укрепѝ благода́тию Госпо́днею произволе́ние наше, да в законе Христове утверди́вшеся, неле́ностно по пути заповедей святых потече́м: осенѝ го́рним твоим благослове́нием нас и всех в ско́рбех су́щих, боле́зньми душе́вными и теле́сными одержи́мых, исцеление, утешение и избавление тем да́руя: над всеми же си́ми испросѝ нам свыше дух кротости и смиреному́дрия, дух терпения и покаяния, да прочее время жития нашего в вере и сокруше́нии серде́чнем поживе́м, и тако в час сконча́ния нашего благодарне восхва́лим посла́вльшаго тя Господа, Безначальнаго Отца, Единороднаго Его Сына и Единосущнаго Всеблагаго Духа, Троицу Нераздельную, во веки веков.

Тропарь, глас 1

Ве́трилом креста̀ душевный корабль направив, жите́йская кра́сная оста́вил еси, и от мiрска́го мяте́жа изше́д, плотски́я по́хоти воздержанием многим, отче, умертвил еси, поще́нием  и слеза́ми, моли́твами и пе́сньми непрестанно прилепля́яся Богу: темже и жилище достойное Духа Пресвятаго показа́лся еси. Молѝ, Полика́рпе преподобне, Христа Бога оставление прегрешений дарова́ти нам и ве́лию ми́лость.

Февруариа 29. Молитвы преподобному Кассиа́ну Ри́млянину, что́мыя в Московском Даниловом монастыре

Молитва 1

Богоблаже́нне и приснопа́мятне отче наш Кассиане! От юности па́че всех Христа возлюбив, земная и временная презрел еси, и ангелоподо́бным житие́м твоим душу и тело от страстей очистив, безстрастия сокровище стяжа́л еси, и боже́ственными да́ры обогати́вся, в наставление и исправление и́ноком премудрыя зако́ны написал еси, и усердный де́латель в вертогра́де Христове яви́лся еси, сам заповеди Его творя̀ и ины́я словом и делом науча́я, и сего ра́ди сугубое восприя́л еси воздая́ние от Бога. Тому ныне с чинонача́лии ангельскими предстоя̀, при́зри на нас, жите́йских попече́ний волна́ми обурева́емых, и помозѝ нам, да не вовлече́т нас буря страстей наших в бездну грехо́вную. Услы́ши нас грешных, святую память твою ублажа́ющих, и моли́ся Христу Богу о нас немощны́х, мглою уныния омрача́емых и малоду́шием неду́гующих, да Боже́ственною благодатию Своею просветит омраче́ние ума нашего и укрепи́т нас на путѝ спасения, имже право ходя́ще, вни́дем в жизнь вечную. Ви́ждь, отче святы́й, не́мощь нашу душевную, сердечное озлобле́ние и неду́ги телесныя, по грехо́м нашым обдержа́щыя нас: ви́ждь, яко благи́ми де́лы обнища́хом зело̀. Но ты Человеколю́бца Бога ми́лостива сотворѝ нам молитвами твоими, да не возда́ст нам по злым дело́м на́шым, но да яви́т над нами непобеди́мое Свое человеколю́бие и милосе́рдие, и прощение прегрешений наших да да́рует нам, и да укрепи́т нас в по́двизех молитвы, воздержа́ния же и целому́дрия благода́тию Своею. Ве́мы, отче преподобне, яко даде́ся ти благода́ть, е́же от плод присноживо́тнаго уче́ния твоего̀ сердца̀ рачи́телей благоче́стия насыща́ти и услажда́ти: помозѝ и нам предста́тельством твоим терпели́вно и ра́достно благо́е и́го Христо́во понестѝ и во исправле́нии и обновле́нии жития̀ нашего до́бре подвиза́тися. Се бо, чудотво́рней иконе твоей покланя́ющеся и святое имя твое в помощь призыва́юще, яко хода́тая и засту́пника нашего, о сем тя мо́лим. Таже и сия глаго́лем: молѝ Господа Бога Спаси́теля мiра, да сохрани́т первопресто́льный град сей и святую обитель сию̀ от вся́кия беды̀ и напа́сти, от враг видимых и невидимых, да да́рует благочести́вейшему императору нашему здравие и долгоденствие, держа́ве его тишину и благостоя́ние, в православней вере преспея́ние, землѝ плодоно́сие и изоби́лие: и всех нас недосто́йных изба́ви моли́твами твои́ми от належа́щия нам ско́рби и ну́жды: испросѝ нам у великодарови́таго Господа вся́каго проше́ния исполне́ние и всех к житию вре́менному и ве́чному поле́зных подая́ние, благода́тию и человеколю́бием Господа нашего Иисуса Христа, Емуже подобает слава, честь и поклоне́ние, со Отцем и Святым Духом, во веки веков.

Молитва 2

О богоблаже́нне и приснопа́мятне отче наш Кассиа́не, Божественных Ангелов сожи́телю, понесы́й тяготу̀ дневну́ю, в нищитѐ пожи́вый, Божественными да́ры обогати́выйся! Ты, ныне с преподо́бных собо́ры водворя́яся, с пра́ведных ли́ки веселя́ся, помянѝ нас, доброде́тельное твое житиѐ похваля́ющих, и не оста́ви нас безпо́мощны пребыва́ти. При́зри на житиѐ наше, житейскими обурева́нии коле́блемое, да не потопи́т нас грехо́вная буря, нижѐ да пожре́т нас па́губнаго отча́яния глубина̀. Услы́ши молитву нас грешных, моля́щихся тебе, и не пре́зри моле́ния нас немощны́х, уловля́емых диа́вольскими сетьмѝ, всю́ду злы́ми угнета́емых, вся́каго бла́га лиша́емых, уны́нием омрача́емых и малоду́шием одержи́мых. Ви́ждь свя́те, яко смири́ся в пе́рсть душа̀ наша, и враго́м ненави́дящым нас бы́хом в пора́дование, лука́выми умерщвля́еми весь день: заблуди́хом бо вои́стину, яко о́вцы неиму́щыя па́стыря. Оба́че твоими благоприя́тными молитвами ми́лостива сотворѝ нам Еди́наго Человеколю́бца Бога, да не возда́ст нам по злы́м дело́м нашым и по нечистотѐ серде́ц наших, но да предваря́т ны благи́я Его щедро́ты, и в ми́ре, единоду́шии и благоче́стии да утверди́тся жизнь наша. Мы, о богоблаже́нне, на тя по Бо́зе упова́ем, тобою хва́лимся, твое святое имя на помощь призыва́ем, и ко твоему чудотво́рному о́бразу недосто́йнии припа́дающе, тя мо́лим: молѝ, отче наш Кассиа́не, Христа Бога, да изба́вльшеся от злых наших, с тобою ве́чных благ сподо́бимся, благода́тию и щедро́тами Господа нашего Иисуса Христа̀, су́ща благослове́нна со Безначальным Его Отцем и Пресвятым Духом во веки веков.

Тропарь, глас 8, поемый в Стрелецкой Николаевской, града Курска, церкви

По́стом предочи́стився, прему́дрости пости́гл еси разуме́ние, от пусты́нных же богоно́сных оте́ц научи́лся еси страсте́й обузда́нию. Того̀ ра́ди пода́ждь нам, твоими моли́твами, пло́ти на́шея духу послуша́ние: еси бо наста́вник, Кассиа́не преподо́бне, всем пою́щым о Христѐ твою память.

В Неделю Вторую святых посто́в. Молитвы преподо́бным Пече́рским отце́м

Молитва 1, преподо́бным Анто́нию и Феодо́сию Пече́рским, из акафиста сим преподо́бным

Преподо́бнии и богоноснии Анто́ние и Феодо́сие! К вам, яко к те́плым засту́пником и скорым помо́щником и изве́стным предста́телем, прибега́ем мы гре́шнии, смире́нно прося́ще ва́шея по́мощи и заступле́ния, в бе́здне зол и бед погружа́емии, яже на всяк день и час нам и от челове́к лука́вых приключа́ются, и от духо́в злобы поднебе́сныя, всегда̀ поги́бели ду́ш и теле́с наших и́щущих, нахо́дят на ны. Изве́стни же есмы̀ несумне́нно, коль вели́кое к Милосе́рдому Богу и́мате дерзнове́ние: еще́ бо на землѝ ме́жду стра́нствующими к го́рнему оте́честву пребыва́еши, ве́лию си́лу благода́ти Божия, ва́ми чудоде́йствующия, в себе показа́сте, я́ко и о́гнь с небесѐ, по подо́бию Илиину̀, на показа́ние ме́ста, на не́мже великая церковь Пече́рская стро́итися хотя́ше, низведо́сте, и ро́су, по о́бразу Гедео́нову, на очище́ние и вечное прославле́ние того́жде свята́го места призва́сте: та́кожде ве́мы, коль многое мно́жество муже́й и же́н, из ра́зных стран и народов, скорбя́щих и напа́ствуемых, или разли́чными тя́жкими боле́зньми одержи́мых, вашими молитвами и заступлением получи́ша себе ско́рое облегчение и избавление. А́ще у́бо вся та помоществования, ещѐ в сме́ртнем су́ще стра́нствовании, бе́дствующым ми́лостивно подава́сте, кольмѝ па́че днесь, егда̀ ужѐ Всемогу́щей предста́сте Тро́ице, и бо́льшее прия́сте дерзнове́ние, во еже моли́ти ю̀ о нашем недосто́инстве и в беда́х нас заступа́ти и защища́ти! Сего̀ ра́ди и мы, столь многими враждебными наве́ты, озлобле́ньми и кова́рными злоумышле́ньми отвсю́ду угрожа́емии и тесни́мии, вашему теплому и сильному по Бозе вруча́ем себѐ защище́нию, и усе́рдно мо́лим благосты́ню вашу: сохрани́те нас неврежде́нных от всех бед и зол, наипа́че же от бесо́вских ко́зней, да не будем им в поруга́ние и посмея́тельство, но та́ко их кре́пкою вашею по́мощию от нас отжени́те, якоже во дни о́ны от обители отгна́сте я̀, иногда пакости де́явшыя. Сицевая же их неполезная укротивше на ны возстания, тако нас утвержденных в вере, надежде и любви соделайте, да николи́же нами каковое недоумение или сумнение возобладает. Чувства наша душевная вкупе и телесная в таковом благоустроение и благолепней мерности на всяк день и час удержава́йте и снабдева́йте, да теми никогдаже Благаго и Человеколюбиваго Бога прогневаем. Разум уцеломудрите, да сей паче о Бозе, Его вездеприсутствии и благопромышлении помышляет, неже о временных печется. Развращенную волю нашу всегда исправляйте, да николиже хощет, еже хотению Божию сопротивляется, но теми да удовляется и в сих безмятежно и безпечально да пребывает, яже суть Богу угодна и приятна, человеку же спасительна и полезна. К сим же, о преподобнии отцы, и отечества вашего не забывайте, но в мирнем устроении пребывати ему у престола величества Божия непрестанно хадатайствуйте. Благочести́вейшего госуда́ря императора нашего, всю палату и воинство его, и вся люди сущыя в державе его, мирны и безпечальны сохраните и от всякаго злаго обстояния вскоре избавите. Егда же приспеет наше от временнаго сего жития отшествие и в вечности преселение, сице нам в помощь предстаните и от насилий вражиих свободите, якоже предстасте некогда Еразму монаху, в тяжком смертнем бедствии обретавшемуся, и тако сердца наша ко истинному покаянию и желанию о гресех подвигните, якоже и онаго сердце подвигосте, да и мы в чистем совести нашея свидетельстве, Пресвятей и Неразделимей представше Троице, прославляем ю купно с вами и всеми святыми в безконечныя веки веков.

Молитва 2, преподо́бным Анто́нию и Феодо́сию Пече́рским чудотворцем, из книги: Акафисты с каноны

Преблаженнии, преславнии, преподобнии отцы, святии первоначальницы Печерстии, Антоние и Феодосие, свяше Богом дарованнии, двоице благодатная, союзом совершенства, любовию к Богу и ближнему соединенная, не точию в жизни сей временней друголюбне трудившиися о пользе душевней иночествующих и в мiре благочестне живущих, но и по отшествии вашем в жизнь вечную обещавшийся пособствовати всем и молитися ко Господу Богу и Пресвятей Богородице о спасении всех, наипаче грешников, от них же первый есмь аз! К вам, угодником Божиим и Пресвятыя Богородицы, яко истинным ходатаем спасения притекая, смиренно молюся: предстаните мне в помощь, цзами грехов связанному, и помолитеся о мне. купно же и вся наследники богоугоднаго вашего жития и снаследники Царствия Небеснагоподвигните на многомогущыя молитвы: всех бо вас недостойный призывати на заступление дерзаю, желая от всех грехов моих вами свобождение получити. О преподобнии отцы Печерстии, богоугодно трудившиися и нетленно в пещерах почивающии, святии иерарси, священноначальницы [священноначальники], священнои́ноцы [священнои́ноки], постницы [постники], мученицы [мученики], девственницы [девственники], чудотворцы! Вы естѐ роди избра́н, царское священие, язык свят, людие обновления, известителие добродетелей из тьмы тленныя сея жизни призвавшаго вас в чудный свет: вас бо ни земля потаила есть, аще же киих и поталила под спудом почивающих, но верую, яко всех Небо прияло есть, и яко славы вашея испове́сти, тако и имен ваших исчестѝ мѝ невозможно есть, множеству бо звездному уподобистеся: разве сам исчитаяй множество звезд и всем им имена нарицаяй, исповеданный от вас на земли, Царь славы Христос, всех вас преподобных Своих, по имени написанных на небесех, исчитает и совершенно исповедует пред Отцем Своим Небесным. Помозите мне грешному, в сокрушении и смирении сердца моего припадая, молюся вам: свет суще мiру и светильницы из под спуда пещернаго поставлени душами на све́щнице небе́снем, осиявайте мя, омраченнаго наветы вражиими, светом благодати свыше, да в нем ходя, не преткну о камень ногѝ моея. Вы естѐ сосуди в честь избраннии, исполненнии благодати Божия обильно. Молю убо вас: сподобите мя грешнаго от исполнения вашего прияти. Вы естѐ соль земли, аз же есмь земля: будите мне соль, соблюдающе всецело душу и тело мое от согнития греховнаго. Вси вы, преподобнии Печерстии, врачеве благодатнии, исцеляющии всяк недуг и всяку язю в людех, молюся вам, святии: исцелити и моя душевныя и телесныя язвы, да достойно прославляю Бога в душѝ и телесѝ моем, всем вам благодарение возсылая: можете бо, преподобнии, о укрепляющем всех вас Иисусе Христе, великия милости людем даровати. Аще бо много может молитва единаго праведнаго, поспешеству́емая во благое, кольмѝ паче вас, прпаведных и преподобных многих, могут молитвы вся у Всемилостиваго Бога! Не два̀ или триѐ во имя Христово со́брани естѐ, и не два совещатися на земли проси́ти во имя Христово Отца Небеснаго, но велие множество вас, о преподобнии:  помолитися о мне едином от грешных: аз же верую, яко Бог, прославляемый в совете всех вас преподобных Своих, услышит прошение собранных и совещанных во имя Его. О достохвальнии преподобнии отцы Печерстии! вы естѐ радование Царя Небеснаго, вы благоприятная жертва Вышняго, вы граждане Новаго Иерусалима, вы наследницы Царствия Божия: так обо вси теко́сте, яко и желаемое пости́гнусте. Молю, и моим ногам благое течение в пути заповедей Господних соделайте, и желаемое постигнути грешнаго мене сподобите вашими многомощными ходатайствы: да вшед в дом Царствия Вечнаго, возрадуюся и возвеселюся, благодаря всех вас преподобных о таково́й любви вашей, и купно с вами восхвалю и возвеличу во хвалении Единаго в Троице Пресвятей, от всея твари на небеси и на земли хвалимаго, благословимаго и покланяемаго Всемилостиваго Бога, Отца и Сына и Святаго Духа, со Пречистою и присноблаженною Девою Богородицею, ныне и присно и во веки веков.

Молитва 3, темже преподобным

Преподо́бнии и богоноснии отцы наши Анто́ние и Феодо́сие и вси преподобнии Печерстии, светила земная пресветлая, от темных мест пещерных в земли Российстей славно просиявшии и сию многими светозарными ангеллонравнаго вашего жития звездами онебеси́вшии, всю же вселенную высоких добродетелей светлостьми и чудес Божественных блистаньми удивившии! Се вы ныне, смертным западом плотски на время во гроб зашедше, душами со Христом, Солнцем правды, пребываете, и суще праведницы [праведники], просвещаетеся, яко солнце во Царствии Небеснем. Тамо убо молитвенныя вашя к Богу свету лучы о отечестве своем простирающе, не забывайте и ны, присныя вашя молитвенники, яще и в нощи страстей и скорбей пребывабщыя, свыше благодатными призирати осиянии: яко да во свете добродетельнаго вашего жития право ходяще, сподобимся зрети свет неприкосновенныя славы Божия, хваляще Его купно с вами в нескончаемыя веки веков.

Тропарь, глас 4, преподобным Анто́нию и Феодо́сию Печерским

Двоицу начальных Российских светил почтим: Анто́ния, Богом посланнаго, и Феодо́сия, Богом дарованнаго. Тии бо первии, равноангельным в России житием просиявше от гор Киевских, осветиша отечествия нашего вся концы, и путь к небеси правый многим показаша, и первоотцы иноком бывше, лики спасаемых Богови приведоша, и ныне предстояще в вышних немерцаемому Божества свету, молятся о душах наших.

Ин тропарь, глас 2, преподобным Печерским отцем

Егда снидосте во гро́бы и саме́х себе заключи́сте, тогда страсти умертвивше плотския, спогребостеся Христу, богоноснии диавольския в подземных разрушисте ограды: сего ради Ангели венцы с небес вам подают.

Месяц март.

Марта 2 в Неделю первую по 29‑м дни иуниа. Молитвы святителю Арсению, епископу Тферскому. Из акафиста

Молитва 1

О великий угодниче Божий, святителю отче Арсе́ние! Се приносим тебе хвалебное пение мы грешнии и недостойнии, чада твоя, и величаем подвиги и добродетели твоя и многую милость твою ко всем, с верою притекающим ко отеческому твоему покрову. Приими милостивно молитву веры и любве нашея, и принеси ю Вседержителю Богу, от Негоже низходит всякое даяние благо и всякий дар совершенный: и якоже благодетельствовал еси в земнем житии твоем всем искавшым твоея помощи, тако и ныне не лиши нас, отче благосердый, твоего пред Богом многомощнаго заступления. Се бо нетленныя и многоцелебныя мощи твоя дарова нам Господь во уверение, яко велие дерзновение имаши к нему и яко много может предстательство твое пред престолом благости Его. Темже не остави нас сирых и безпомощных, но присно поминай нас во святых твоих молитвах. Укрепи нашя стопы твердо и непоколебимо ходити путем заповедей Господних: утверди руки нашя к воздеянию молитвенному и к совершению добрых дел: согрей сердца наша любовию ко Господу и к жизни вечней. Испроси у Царя Небеснаго   благочести́вейшему госуда́рю нашему, императору Николаю Александровичу, всея России, и всему царствующему дому долгоденственное и мирное житие, здравие и спасение, граду Тфери и святей обители твоей благостояние и всей стране Российстей милость Божию и сохранение от всякаго зла. Испроси, святителю Божий, и всем, с верою прибегающым к раце святых мощей твоих и имя твое благоговейно призывающым, коемуждо дар благопотребен: недугующым исцеление, бедствующым избавление, печальным утешение, заблуждающым истины познание, грешным исправление, подвизающымся преспеяние и всем вся к жизни временней и вечней потребная, во славу дивнаго во святых Своих Бога, в Троице славимаго и покланяемаго, Отца и Сына и Святаго Духа, ныне и присно и во веки веков.

Молитва 2

Призри от горних высот, святителю отче Арсе́ние, на нас смиренных и грешных, во умилении душ и сердец к тее прибегающих, верою крепкою на тя уповающих, любовию нелицемерною просящих у тебе заступления. Тебе бо молитвенника благоприятнаго вемы ко Всемилостивому Богу. Прлей о нас твоя святыя молитвы, и умоли Человеколюбца Господа не погубити нас со беззаконьми нашими, но обратити нас к покаянию и исправлению, да прочее время жития нашего земнаго не в работе греху и страстем, но в делании заповедей Его святых провождати будем и со благою надеждою кончины жития нашего достигнем. В час же смертный наипаче явися нам, отче, заступник благий, ускори тогда на молитву о нас безпомощных и помози нам со Причастием Таинств Божественных мирную и благую кончину улучити, грозная мытарства воздушная безбедно прейти и унастедовати горнее Царство. Ей, святителю Божий, не презри нас и не посрами упования нашего, но буди о нас предстатель немо́лчный к Богу. О пастырю наш добрый! Упаси нас бодренными твоими молитвами и сохрани ненаветны от всякаго зла, да славим неизреченное человеколюбие Бога нашего, •         Отца и Сына и Святаго Духа, и твое отеческое заступление, во веки веков.

Молитва 3

О всехвальный святителю Христов и чудотворче, отче Арсение! Не забуди нас, чад святыя обители твоея, и всех с верою и любовию прибегающих к раце честных и многоцелебных мощей твоих, но помилуй нас во святых твоих и благоприятных молитвах к Богу. Моли за вся христианы, отче святителю Арсение, и за святую сию обитель, юже вручи тебе Пречистая Владычица Богородица: мним бо тя присно предстояща Христу Богу нашему и Пречистей Его Матери и имуща велие к ним дерзновение. Аще бо телом и преставился еси от нас, но душею жив сый, неотсту́пен пребываеши с нами духом. Сохраняй нас твоим предсательством пред престолом Небеснаго Царя от козней вражиих, от соблазнов мiра, во зле лежащаго, и от всякия скорби и нужды. О преблагий пастырю и учителю наш, отче Арсение! К тебе припадаем и тебе молимся, молися Всесильному Богу о пользе душ наших, и испроси нам время на покаяние, да очистившеся от всякия скверны греховныя, Небеснаго Царствия наследницы сподобимся быти со всеми праведными, от века угодившими Господу нашему Иисусу Христу, Емуже подобает всякая слава, честь и поклонение, со Безначальным Его Отцем и с Пресвятым Духом, ныне и присно и во веки веков.

Тропарь, глас 8

Благочестно пожив во святительстве, люди просветил еси учением твоим, и о храме Пречистыя вельмѝ подвиза́вся, и любитель монахов быв, сего ради от Христа паствы твоея венец приял еси. Темже яко апостольскаго престола наместника и святителя великаго чтуще тя̀ молим, чада твоя, блаженне: от всех бед избави нас яже ко Христу молитвами твоими, святителю Христов Арсение, отче наш.

Марта 4 и августа 30. Молитва святому благоверному князю Даниилу Александровичу Московскому, чтомая в Московском Даниилове монастыре

О преизящный и предивный чудотворче Российския земли, преблвженне и преславне княже Данииле, скорый помощниче и теплый в беда́х заступниче, спасаяй нас, наследие твое, от всяких бед молитвами твоими! Тебе вси людие твои просим и молимся, и надежду на тя имуще, почитаем и прославляем тя, и твое великое о нас ко Господу предстательство величаем: таже исповедуем тебе быти изобильнаго чудес источника, скораго православным заступника, алчущым питателя, убогим благодетеля, вдов и сирот предстателя и заступника, нищих неоскудеваемаго богатителя, болящих врача непостыднаго, скорбящих уте́шителя и всем с верою тя призывающым крепкаго помощника. Убо и нам прибегающым под кров твой и молящымся тебе помози: вемы бо, воистину вемы, яко многоможет молитва праведнаго поспешеству́ема во благое. Тебе же праведнаго предстателя имуще и ко твоему теплому ходатайству и заступлению смирено притекающе, умильно просим тя: о преизрядный угодниче Христов, всехвальне княже Данииле! Многомощными твоими молитвами исходатайствуй здравие и спасение благочести́вейшему, самодержа́внейшему, вели́кому госуда́рю нашему, императору Николаю Александровичу всея России, супруге его, благочестивейшей государыне императрице Александре Феодоровне, матери его, благочестивейшей государыне императрице Марии Феодоровне, наследнику его, благоверному государю цесаревичу и великому князю Алексию Николаевичу и всему царствующему дому. Даруй им невидимым твоим предстательством на супостаты победу, и тишину во днех их подаждь, царство же их миром огради: царствующий же град, тобою осно́ванный и тобою созда́нный, и вся люди твоя молитвами твоими невредимы сохрани, и святую обитель сию до́бре утверди, юже сам возградил еси, и в ней подвиг добрый совершив, многоцелебныя твоя мощи по смертиоставил еси, и во всем сию богоугодну покажи. Услыши и нас молящихся тебе, и яви предстательство твое о нас к Вышнему, и помози нам, блаженне, во еже избавитися нам и невредимым быти от всех прилогов диавольских, и Небеснаго Царствия молитвами твоими наследие улучити, да с тобою купно Прославльшаго тя и Давшаго тебе чудес исцеления благодать, Господа нашего Иисуса Христа: Емуже подобает всякая слава, честь и поклонение, со Безначальным Его Отцем и с Пресвятым и Животворящим Его Духом, ныне и присно и во веки веков.

Марта 5. Молитва святому благоверному князю Феодору и чадом его Давиду и Константину, Смоленским и Ярославским чудотворцем

О вели́цыи уго́дницы Божии и чудотво́рцы, святи́и и благове́рнии кня́зи Фео́доре, Дави́де и Константи́не! Ко святым и многоцелебным моще́м вашым припа́дающе, мо́лим вы̀ со смирением, верою и любовию: простри́те благоприятныя молитвы вашя ко Господу и Создателю нашему, и умоли́те Его благость, дарова́ти нам вся к вечному спасению потре́бная, таже и к житию̀ сему̀ временному ну́жная: ве́руем бо несомненно, яко вся возможна вам, яко и́стинным Его уго́дником. Того ра́ди и о сих мо́лимся вам: испроси́те нам у Царя царствующих и Господа господствующих царству нашему православно-российскому мир, тишину и благоустрое́ние, благочестивейшему, самодержавнейшему, великому государю нашему, императору Николаю Алекандровичу, здравие, долгоденствие и на врагѝ одоле́ние, царствующым градо́м, гра́ду нашему и всем гра́дом и ве́сем Российским благополучие, изобилие и от злых сохранение, всем же правоверным людем, почитающым вас и на поклонение моще́м вашым святым приходя́щым, милость Божию и благих проше́ний скорое исполнение. Ей, чудотворцы святии! Не посрами́те упования нашего, но молитвами вашими сотвори́те нас насле́дники быти Царствия Христова, да прославля́ем человеколюбие в Троице славимаго и покланяемаго Бога, Отца и Сына и Святаго Духа, и ваше святое заступле́ние, во веки веков.

Тропарь, глас 8

Яко зве́зды многосве́тлыя от ю́ности возсия́вше, освяти́ли естѐ сердца̀ ве́рных пренесе́нием честны́х моще́й ваших, во пло́ти яко Ангелы на землѝ показа́стеся, поще́нием насажде́ни бы́сте яко древа̀ при вода́х воздержа́ния, напое́ни струя́ми слез ваших, и скве́рну омы́сте: сего̀ ра́ди яви́стеся прия́телища Божия Духа, Фео́доре и Дави́де и Константи́не. Моли́те Христа Бога спасти́ся душа́м нашым.

Марта 5. Молитва преподобномученику Адриану Пошехонскому. Из акафиста

Молитва 1

О священная и многострадальная главо, земный Ангеле и небесный человече, преподобномучениче и чудотворче Адриане! Припадаем к тебе с верою и любовию и молимся прилежно: яви нам смиренным и грешным святое твое заступление. Се бо, грех ради наших, не имамы свободы чад Божиих просити о потребах наших Господа и Владыку нашего, но тебе молитвенника благоприятнаго к Нему предлагаем, и просим тя со усердием многим. Испроси у благости Его благопотребныя да́ры душа́м и телесе́м нашым: веру праву, надежду несумненну, любовь же ко всем нелицемерную, во искушениих мужество, в злостраданиих терпение, в молитвах постоянство, душ и телес здравие, земли плодоносие, возду́ха благорастворе́ние, житейских потре́б довольство, мирное и безмятежное житие, благую христианскую кончину и добрый ответ на Страшнем Суде Христове. Испроси, угодниче Божий, у Царя небесе и земли благочести́вейшему, самодержа́внейшему, вели́кому госуда́рю нашему, императору Николаю Александровичу всея России здравие, спасение и на враги одоление, и всему богохранимому царству его мир, тишину и благоустроение. Не забуди, святче Божий, обитель святую, тобою созда́нную и присно тя чтущую, но соблюди ю и вся живущыя и подвизающыяся в ней и на поклонение в ню приходящыя невредимы от искушений диавольских и всякаго зла. Ей, преподобномучениче святый! Не лиши нас помощи твоея небесныя, но молитвами твоими всех нас приведи во пристанище спасения, и наследники яви нас быти всесветлаго Царствия Христова, да поем и славим неизреченныя щедроты Человеколюбца Бога, Отца и Сына и Святаго Духа, и твое святое заступление, во веки веков.

Молитва 2

Преподобне отче, преблаженне Адриане, пе́рвейший пусты́ни сея просветителю и монашескаго в ней жития основателю, пришедый в ню со Ангелом Господним и освятивый ю Пресвятыя Богородицы чудотворною иконою и благодатию, в нейже и явился еси подвиги твоими пресветлое целомудрия зерцало, пркрасный смиренномудрия образ, одушевленный терпения столп, известное воздержания правило, истинный нестяжания и нищеты любитель и всесовершенный Христов угодник! Се мы грешнии, смиренно припадающе, молим тя: приими моления наша и вознеси я на жертвенник милосердия Божия. Испроси нам предстательством твоим у Всемилостиваго Бога нашего мир мiру, Церкви святей утверждение, согласие в вере, преуспеяние во благочестии и добродетелех христианских, да достойни явимся щедрот и милостей Благосердаго Бога. Паству твою духовную и обитель твою святую непрестанно управляй жезлом мудрости духовныя. Подвизающымся помози, разслабленныя укрепи, падающыя возстави, споспеши всем нам иго Христово в терпении и благодушии понести, и всех нас управи в мире и покаянии житие наше скончати и со упованием спасения преселится во блаженная недра Авраамова, идеже ты радостно по трудех земных почивши, прославляя со всеми святыми Триипостаснаго Бога, Отца и Сына и Святаго Духа, в безконечныя веки веков.

Молитва 3

О великий угодниче Божий, преподобномучениче и чудотворче Адриане! Призри на нас грешных, к честней раце свяьых и многоцелебных мощей твоих припадающих и просящих твоего заступления и помощи. Скорбь нас обдержит, и не имамы помощи и утешения в море сем скоротечнем: но к тебе прибегаем, многострадальный угодниче Божий, яко сострадати нам могу́щему и велие дерзновение стяжавшему ко Христу Богу, к Немуже многомощен предстатель о всех с верою к тебе прибегающих и твоего заступления и помощи просящих являешися. Моли убо Человеколюбца Господа, яко да простив нам безчисленныя наша прегрешения, не отвратит милость Свою от нас, но, яко Благ и Милосерд, да явит нам безконечное Свое человеколюбие, и в бедах и напастех всесильную Свою помощь нам да подаст. Ей, угодниче Божий, воздвигни преподобнии руце твои и моли Христа Бога, Емуже верно послужил еси, да не отринет молений наших недостоинства ради нашего, но да явит нам благовременне помощь и милость Свою, да славим Его щедроты и твое святое предстательство ныне  и присно и во веки веков.

Тропарь, глас 4

Христову мучениеку тезоименит быв, преподобне, многия труды подъял еси в жизни временней, обитель иноческую созидая в пустыни, идеже от злых разбойников даже до крове пострадал еси и мученическую смерть от них приял еси, Адриане славне. Чудес благодатию обогатився, днесь предстоиши всех Царю, Христу Богу, егоже моли спастися душа́м нашым.

Марта 11. Молитва святителю Евфимию, архиепископу Новгородскому. Из службы с житием

Отче святителю Евфимие! Ты от юности твоея Христа возлюбил еси, и благодатию Его укрепляемь, вся плотская мудрования умертвил еси, чистым же житием и кротким нравом Господеви угодил еси, и по благодати Его на престоле святительства подвизался, явился еси пастве Христове Великаго Новаграда пастырь добрый, душу твою о стаде твоем полагаяй. Темже и по смерти твоей прослави тя Пастыреначальник Христос подаянием чудес, от тебе истекающих, образ добродетельнаго жития в тебе нам показуя. Темже и аз грешный и унылый, к раце мощей твоих припадая, молюся тебе усердно:даждь ми руку помощи, возвигни мя молитвами твоими из глубины греховныя: се бо волнами страстей плотских и иными тьмочисленными житейскими треволнении обуреваюся. Буди убо мне многогрешному теплый ко Христу предстатель и молитвенник, да и аз, от потопления греховнаго избавлен, ко пристанищу непорочнаго житияблагодатию Христовою достигну, и чистым житием прославлю Спасителя моего, кровию Своею мене искупившаго: и тако житие скончав, получу жизнь вечную во Царствии Небеснем, идеже славится пречестное и великолепое имя Отца и Сына и Святаго Духа, ныне и присно и во веки веков.

Тропарь, глас 4

Избран быв Богови от юности, святителю Евфимие, и сего ради архиерейства саном почтен быв, упасл еси люди, тебе Богом врученныя: темже и по преставлении чудес дарования от Господа приял еси, исцеляти различныя недуги. Того моли о нас, совершающих честную память твою, да тебе вси непрестанно ублажаем.

Марта 17. Молитва преподобному Алексию, человеку Божию. Из акафиста

О великий Христов угодниче, святый человече Божий Алексие, душею на небеси престолу Господню предстояй, на земли же ти данною свыше благодатию различная совершаяй чудеса! Призри милостивно на предстоящыя святей иконе твоей люди, умиленно молящыяся и просящыя от тебе помощи и заступления. Простри молитвенно ко Господу Богу честнии руце твои, и испроси нам от Него оставление согрешений наших вольных и невольных, в недузех страждущым исцеление, напаствуемым заступление, скорбящым утешение, бедствующым скорую помощь, всем же чтущым тя мирную и христианскую жития кончину и добрый ответ на Страшнем Суде Христове. Ей, угодниче Божий, не посрами упования нашего, еже на тя по Бозе и Богородице возлагаем, но буди нам помощник и покровитель во спасение: да твоими молитвами получивше благодать и милость от Господа, прославим человеколюбие Отца и Сына и Святаго Духа, в Троице славимаго и покланяемаго Бога, и твое святое заступление, ныне и присно и во веки веков.

Тропарь, глас 4

Возвысився на добродетель и ум очистив, к желанному и крайнему достигл еси: безстрастием же украсив житие твое, и пощение изрядное восприи́м совестию чистою, в молитвах яко безплотен пребывая, возсия еси яко солнце в мiре, преблаженне Алексие.

Марта 17 и маиа 26. Молитва преподобному Макарию Колязинскому. Из акафиста

О священная главо, преподобне отче, преблаженне а́вво Макарие! Не забуди убогих твоих до конца, но помина́й нас всегда во святых твоих и благоприятных молитвах к Богу. Помянѝ стадо Твое, еже сам упа́сл еси, и не забуди посещать чад твоих. Молѝ за ны, отче священный, за дети твоя духовныя, яко име́яй дерзновение к Небесному Царю: не премолчѝ за ны ко Господу, и не пре́зри нас, верою и любовию чтущих тя. Поминай нас недостойных у престола Вседержи́телева, и не преста́й моля́ся о нас ко Христу Богу: ибо дана тебе бысть благодать за ны моли́тися. Не мним бо тя су́ща мертва: аще бо телом и преста́вился еси от нас, но и по смерти жив сый пребыва́еши. Не отступа́й от нас духом, сохраняя нас от стрел вражиих и всякия пре́лести бесо́вския и ко́зней диавольских, па́стырю наш добрый. Аще бо и моще́й твоих ра́ка пред очи́ма на́шима ви́дима есть всегда, но святая твоя душа со ангельскими во́инствы, со безпло́тными лики, с небесными силами, у престола Вседержителева предстоя́щи, достойно весели́тися. Ве́дущи убо тя воистину и по смерти жива суща, тебе припадаем и тебе молимся: моли́ся о нас Всесильному Богу, о пользе душ наших, и испросѝ нам время на покая́ние, да невозбра́нно пре́йдем от земли на небо, от мытарств же горьких, бесо́в воздушных князей и от вечныя муки да избавимся, и Небеснаго Царствия насле́дницы да будем со всеми праведными, от века угоди́вшими Господу нашему Иисусу Христу: Емуже подоба́ет всякая слава, честь и поклонение, со Безначальным Его Отцем, и с Пресвятым и Благим и Животворящим Его Духом, ныне и присно и во веки веков.

Тропарь, глас 8

Плотская мудрования, отче Макарие, воздержанием и бдением умертвил еси: место бо, на немже ноты твоя излиял еси, яко труба вопиет к Богу, поведающи твоя исправления: и по смерти честныя твоя мощи источают исцеления. Темже вопием ти: моли Христа Бога, да спасет душы нашя.

Марта 20. Молитва преподобномученику Евфроси́ну Синеезе́рскому. Из службы

О святый преподобномучениче Евфроси́не! Услыши усердное наше приносимое тебе моление. Огради и сохранисвятыми молитвами твоими весь сию и вся веси и грады православнаго отечества нашего от глада, труса, потопа, огня, меча, нашествия иноплеменников, междоусобныя брани и смертоносныя язвы, от всякия беды, скорби и зла. Умоли Господа Бога и Спаса нашего даровати мир Церкви Его, под знамением Креста воинствующей, благочести́вейшему же, самодержа́внейшему, вели́кому госуда́рю нашему, императору Николаю Александровичу и всему царствующему дому благоденствие и во всем благое поспешение низпослати: архипастырем и пастырем нашым право правити слово истины Евангельския  ходатайством твоим помози, и всем православным христианом прощение согрешений их вольных и невольных испроси: в недузех же пребывающым подаждь предстательством твоим от недугов исцеление, да тебе ради славится пречестное и великолепое имя Пресвятыя Троицы, Отца и Сына и Святаго Духа, ныне и присно и во веки веков.

Тропарь, глас 4

От юности твоея вперив ум твой к Богу, блаженне Евфросине, мiра же отвергся, вселился еси в пустыню непроходимую, и тамо от Господа укрепляемь, в молитвах и пощениих доблественне пожил еси, и жизнь свою страдальчески убиением от сынов противления скончал еси: сего ради со преподобными и мученики венчался еси, с нимиже и ныне предстоиши престолу Пресвятыя Троицы. Сию моли, молим тя, оставление податисогрешений наших и даровати нам велию милость.

Морта 20. Молитва блаженней мученице игумении Анастасии и прочым с нею пострадавшым во граде Угличе, чтомая в Угличском Богоявленском монастыре, ярославския епархии

О блаженная мученице, Анастасие игумение! Со блаженными страдальцы: иереи, церковники и тридесятьми пятью инокинями твоея Богоявленския обители, вкупе же со двема̀ сто́ма чистых дев и шестию́десятьми жена́ми града Углича, многоразличная мучения претерпела еси, по главе биема и огнем жего́ма бы́вши, и ме́чное усечение прия́ла еси во имя Христа, жениха твоего, Егоже измлада возлюбила и Емуже истинно служила еси. И ныне, егда с сопострадавшим тебе сонмом дружины твоея престолу Вседержителя предстоиши и со безплотными небесными силами трисвятую поющи песнь ликовству́еши, помоли́ся о святей обители твоей, граде сем и о всяком граде и стране, во еже царю нашему, пастырем, военачальником, градоначальником и всем православным христианом утвердитися в мире, здравии, спасении и во всяцем благопоспешении, яко да спасе́ни душами и телесы, дастигнем вечныя блаженныя жизни и тамо прославим Господа небесе и земли, Отца и Сына и Святаго Духа во веки веков.

Марта 26 и иулииа 13. Молитва святому Архангелу Гавриилу. Из рукописнаго акафиста

О святый Архангеле Божий Гаврииле, присно предстояй престолу Всевышняго, прерадостный благовестниче и усердный споспешниче нашего спасения! С свойственным тебе милосердием приими сие хвалебное пение, от нас недостойных тебе приносимое. Исправи молитвы нашя, и принеси я яко фимиам на небесный олтарь кадильный: озари умы нашя светом познания таин спасительныя веры нашея: воспламени сердца наша любовию ко Христу Спасителю нашему, обрати и укрепи желания наша на спасительный путь Евангельских Его заповедей: да в сем веце тихо и благочестно поживем во славу Божию, в будущем же не лишимся вечнаго Царствия Божия, еже получити да сподобимся благодатию Христа Бога нашего, ходатайством Пречистыя Его Матери, Пренепорочныя Девы Марии и твоими многомощными ко Господу Богу о нас молитвами, и да прославим с тобою и прочими безплотными силами небесными и всеми святыми Единаго в Троице славимаго Бога, Отца и Сына и Святаго Духа, ныне и присно и во веки веков.

Тропарь, глас 4

Небесных воинств Архистрати́же, молим тя присно мы недостойнии, да твоими молитвами оградиши нас кровом крил невещественныя твоея славы, сохраняя ны припадающыя прилежно и вопиющыя: от бед избави ны, яко чиноначальник вышних сил.

Месяц априлий

Априлиа 1 и иулиа 4. Молитва преподобному Евфимию Суждальскому. Из акафиста

Преподобне и преблаженне отче наш Евфимие! Вонми нам, к тебе смиренно припадающым и твоего заступления тепле просящым. Веси немощи нашя, веси грехи нашя, но и усердие наше не утаится от тебе. Умоли милостиваго Спасителя нашего, Господа Иисуса Христа, даровати нам оставление многих согрешений наших и утвердити нас на пути деяния заповедей Его. Огради нас твоими молитвами от всех искушений и бед: отврати належащия нам скорби и напасти: даруй нам во здравии, мире, тишине и благоугождении Богу провождати дни жития нашего: испроси нам время на покаяние и ответ благоприятен на Страшнем Суде Христове, да с тобою и со всеми избранными славим Отца и Сына и Святаго Духа во веки веков.

Тропарь, глас 3

Яко светозарная звезда пришел еси от Востока на Запад, оставив отечество твое Нижний Новград, и дошед богоспасаемаго града Суждаля, в нем обитель сотворил еси, и собрал еси монахов множества: и прием дар чудес от Бога, отче Евфимие, был еси о Христе собеседник и спостник преподобному Сергию. С нимже у Христа Бога испроси благоверному императору нашему Николаю Александровичу здравие и спасение и душам нашым велию милость.

Априлиа 1, марта 6 и в неделю о разслабленнем. Молитва святому мученикуАврамию Болгарскому. Из службы со акафистом

Святый мучениче Аврамие, доблий воине Христа Царя Небеснаго, в скорбех и напастех преславный наш помощниче и защитниче! Ничтоже возможе отлучити тя от любве ко Господу Иисусу: ни лестная обещания благ временных, ни прещения, ни муки от злых врагов святейшия Христовы веры: ты, яко лев, изшел еси на брань противу волков мысленых, духов злобы, подвигших на тя, ради добраго твоего исповедания, единоплеменный тебе народ болгарский, и, яко огненная стрела, тех поразил еси силою благодати Святаго Духа и крепкия, яко смерть, любве твоея к Богу. Аще и пролиял еси кровь твою за Христа Бога нашего, погубив временную жизнь: обаче безсмертною душею, яко орел, воспарил еси в горния обители Отца нашего, и тамо вечную жизнь, славу и блаженство неизреченное восприял еси, нам же нетленныя мощи твоя, яко крин многоценный и благоуханный, оставил еси. веруем, страстотерпче святый, яко, предстоя со Ангелы и всеми святыми престолу славы Триипостаснаго Бога, усердныя и богоприятныя возносишь молитвы не токмо о нас и о святей обители сей и о граде нашем, но и о всех святей Христовей Церкви, и о православнем царстве Российстем, и о благочестивейшем царе нашем. Веруем, преславный чудотворче, яко ты, силою Всемогущаго Господа, чрез святыя мощи твоя, источаеши обилныя да́ры благодатныя помощи во спасение всем с верою к тебе притекающым, наипаче же испрошаеши кончину с покаянием тебе чтущым, и благосердно помогаеши немощным младенцем, да вси единодушно прославляем неисповедимое величие благости Божия. Темже верою и любовию ко святым мощем твоим припадающе и благоговейно оныя лобызающе, молим тя, добрый на небеси наш молитвенниче и заступниче: помогай нам грешным и смиренным твоими молитвами во всех ско́рбех, ну́ждах и обстояниих наших, сохрани нас, святую обитель сию и град сей от всякаго зла и всякия напасти, наипаче же споспешествуй вечному спасению нашему и всех просящих от тебе помощи и заступления. Ей, смиренно молим тя, угодниче Божий: моли христа Бога нашего, да даст Он мир и тишину всем православным христианом и да отвратит от нас всякий гнев, на ны движимый, да избавит нас от сетей вражиих, томления во узах греха и мучений адовых, и да сподобит нас недостойных одесную Себе стати на Суде Своем праведнем и внити в вечный покой святых Его, идеже празднующих глас непрестанный и неизреченная сладость зрящих добро́ту лица Его: и тако возможем с тобою и всеми святыми прославляти Отца и Сына и Святаго Духа, Троицу Единосущную и Нераздельную, во веки веков.

Тропарь, глас 4

Днесь, благовернии людие, сошедшеся восхвалим добляго сего мученика и страдальца Аврамия: сей бо, укрепляемь силою Божиею, душу свою положи за Христа, много пострадав от зловерных болгар. Сего ради от Господа венец прият, и ныне предстоит Ему и молится о граде сем и о всех нас, чтущих память его.

Априлиа 4. Молитва преподобным Иосифу Песнописцу и Георгию, иже в Малеи

Богоизбраннии и преподобнии отцы наши и угодницы Христовы Иосифе и Георгие, святостию жития вашего просиявшии, ныне же престолу Вседержителя предстоящии и велие дерзновение ко Христу Богу нашему имущии! Смиренно молим вас во умилении сердца: молите Господа, да пробавит Он милость Свою ко православному отечеству нашему и да дарует благочести́вейшему госуда́рю нашему, императору Николаю Александровичу, здравие и долгоденствие и во всем благое поспешение: па́стырем Це́ркве человеколюбие и ревность о спасении пасо́мых да пода́ст, градонача́льником и судиям страх Божий, правоту̀ и безкоры́стие, во́ином верность, мужество и на врагѝ одоле́ние, супру́гом взаи́мную любовь и единомыслие, ку́плю де́ющым честность и праводу́шие, земледе́льцем и всем тружда́ющымся трудолю́бие и тре́звенность, си́рым призре́ние, боля́щым исцеле́ние, оби́димым заступление, оклевета́емым оправда́ние и всем лю́дем вся ко вре́менней и ве́чней жизни потре́бная. Паче же молите Господа, молитвенницы [молитвенники] наши, да простит нам всякое согрешение вольное и невольное и очистит нас от всякия скверны плоти и духа, да избавит нас от козней диавольских и от клеветы человеческия, да утвердит нас в православней спасительней вере и нелицемернем благочестии и да научи́т нас горняя мудрствовати, а не земная. Молите, отцы наши, Всесвятаго и Божественнаго Духа, да водворится мир и тишина в земли нашей, да возсияет свет благодати Его всем братиям нашым по плоти, во тьме лжеверия и суемудрия седящым, и да познают вси Христа Бога Истиннаго, Единаго Спасителя всех человек, и да вразумятся и приидут иновернии братия наши во ограду Церкве православныя, в нейже единей вечное спасение содевается. Молите убо, преподобнии отцы, да в мире и единомыслии, желанием спасения горяще, Господеви поработаем, и друг друга тяготы носяще, добрым подвигом подвизаемся, и тако в тихое пристанище Небеснаго Царствия достигнем и прославим неизреченное человеколюбие и милосердие Спасителя нашего, Иисуса Христа, Сына Божия, со Безначальным Его Отцем и Пресвятым Духом, во веки веков.

Априлиа 7. Молитва преподобным Даниилу Переяславскому. Из акафиста

О преподобне и богоносне отче наш Данииле! Всесмиренно к тебе припадаем и тебе молимся: не отступай от нас духом твоим, но всегда поминай нас во святых и благоприятных мрлитвах твоих ко Господу нашему Иисусу Христу. Молися Ему, да не потопит нас бездна греховная, и да не будем врагом, ненавидящым нас, в радование: да простит Христос Бог наш твоим предстательством за нас вся согрешения наша, и Своею благодатию да водворит посреде нас единодушие и любовь, и да избавит нас от козней и наветов диавольских, от глада губительства, огня, всякия скорби и ну́жды, от болезней душевных и телесных и от внезапныя смерти: да сподобит Он нас, притекающих к раце мощей твоих, во истиней вере и покаянии пожити, христианския непостыдныя и мирныя кончины жития нашего достигнути, и наследовати Царство Небесное, и славити пресвятое имя Его, со Безначальным Его Отцем и Пресвятым Духом, во веки веков.

Тропарь, глас 4

От юности, блаженне, всего себе Господеви возложив, присно повинуяся Богу, противяся же диаволу, страсти греховныя победил еси: темже са́м храм Божий быв, и обитель красну во славу Пресвятыя Троицы воздвигнув, и собра́нное тобою в ней стадо Христово богоугодно упасл, преставился еси к вечным обителем. Отче Данииле, моли Триипостаснаго во Едином Существе Бога спастися душам нашым.

Априлиа 11. Молитвы священномученику Антипе, епископу Пергамскому

Молитва 1, из акафиста

О преславный священномучениче Антипо и скорый помощниче христианом в болезнех! Верую от всея души и помышления, яко дадеся тебе от Господа дар болящыя врачевати и разслабленныя укрепляти. Сего ради к тебе, яко благодатному врачу болезней, аз немощны́й [или немощна́я] прибегаю, и твой досточтимый образ со благоговением лобыза́я [илѝ лобыза́ющи], молюся: твоим предстательством у Царя Небеснаго испроси мне болящему [или болящей] исцеление от удручающия мя зубны́я болезни. Аще бо и недостоин [или недостойна] есмь тебе, благостнейшаго отца и приснаго заступника моего: но ты, быв подражатель человеколюбия Божия, сотвори мя достойна [или достойну] твоего заступления чрез мое обращение от злых дел ко благому житию: уврачуй обильно дарованною тебе благодатию язвы и струпы души и тела моего, даруй ми здравие и спасение и во всем благое поспешение, да тако, тихое и безмолвное житие пожив [или поживши] во всяком благочестии и чистоте, сподоблюся со всеми святыми славити всесвятое имя  Отца и Сына и Святаго Духа во веки веков.

Молитва 2

О архиерею Божий, священномучениче Христов Антипо преблаженне, апостолов сопрестольниче и святителей славо! Ты, архиерею великий, явился еси церковное светило и истинное веры утверждение, зане противу богоборцев дерзновенно Христа исповедал еси, и яко кадило благовонное в жертву Богу себе сама́го принесл еси, и яко агнец незлобивый к мучению приведен быв, в вола̀ разжже́ннаго вшел еси, молитвы благодарственныя в нем Богу возсылая, по сих же яко солнце просиял еси, и мучением твоим томителя лютаго велиара до конца сокрушил еси. сего ради Христос тя на земли и на небеси прослави и благодать тебе дарова, во еже всем страждущым от неутишимыя зубныя болезни це́льбы подавати, тя с верою непрестанно призывающым. Услыши убо и нас недостойных, в час сей молебное тебе приносящих пение, яко тебе ходатая и молитвенника к Богу предлагаем, и на твое заступление уповающе, Тому славу возсылаем,           Отцу и Сыну и Святому Духу, ныне и присно и во веки веков.

Молитва 3, чтомая в Петроградской Спасо-Боча́ринской церкви

О великий Христов угодниче и преславный целебниче, священномучениче Антипо, на небеси престолу Божию предстояй, триипостасныя Его славы наслаждаяйся и данною ти свыше благодатию различная источаяй чудеса! Призри милостивым твоим оком на предстоящыя люди и честней твоей иконе умильно молящыяся и просящыя у тебе целебныя помощи и заступления. Простри ко Господу Богу нашему теплыя твоя молитвы и испроси дцшам нашым прощение прегрешений. Се бо мы сердцем сокрушенным и духом смиренным тебе ходатая милостива ко Владыце и молитвенника за ны грешныя призываем, яко ты приял еси от Него благоать недуги отгоняти и страсти исцеляти. Тебе убо просим: не презри нас недостойных, молящихся тебе и твоея помощи требующих, и исходатайствуй всем вся ко спасению полезная, яко да твоими ко Господу Богу молитвами получивше благодать и милость, прославим всех благих Источника и Дароподателя, Бога Единаго, в Троице Святей славимаго, Отца и Сына и Святаго Духа, ныне и присно и во веки веков.

Тропарь, глас 4

Идольския лести упразднил еси, Антипо, и диавольскую поправ силу, пред богоборцы дерзновенно Христа исповедал еси: темже со ангельскими чины в вышних водворяяся, Владыце всех славословие принося, и о нас молебное благодарение предлагаеши, благодать цельбы̀ да́руя. Сего ради тя чтим, священномучениче Антипо: моли Христа Бога, да спасет душы нашя.

Априлиа 12, маиа 21, иуниа 10 и в Неделю всех святых. Молитва святителю Василию, епископу Рязанскому. Из службы

Богоизбранне первосвятителю наш и угодниче Христов Василие, святостию жития твоего, чудным по водам плаванием и нетлением мощей твоих препрославленне! Предстоя престолу Вседержителя и имея велие к Нему дерзновение, моли Его, да пробавит милость Свою к нам грешным и недостойным рабом Своим, и дарует благочести́вейшему госуда́рю нашему, императору Николаю Александровичу, здравие, долгоденствие и во всем благое поспешение: пастырем Церкве да подаст духовное трезвение и ревность о спасении пасомых: градоначальником и судиям страх Божий, правоту и безкорыстие: воином терпение, мужество и на врагов одоление: супрегам взаимную любовь, верность и единомыслие: ку́плю де́ющым праводушие, земледельцем трудолюбие и трезвенность, сирым призрение, болящым исцеление, обидимым заступление, оклеветаемым оправдание, и всем людем паствы твоея вся ко временней и вечней жизни потребная. Паче же моли Господа, молитвениче наш, да простит нам всякое согрешение вольное и невольное, и очистит от всякия скверны плоти и духа: да избавит от козней исконнаго врага, ненавистника и человекоубийцы, и сохранит от клеветы человеческия: да утвердит во истенней спасительней вере и нелицемернем благочестии: да соблюдет от суемудрия и душетленных учений духо́в лестчих, действующих в веце сем в сынех противления: да охранит сердца наша от прельщения красными мiра сего, и да научи́т огребатися от плотски́х похоте́й и страсте́й, горняя му́дрствовати, а не земная. Моли, отче наш, Всесятаго и Божественнаго Духа, да возсияет свет благодати Его братиям нашым по плоти, во тьме лжеверия седящым, и да познают Христа, Бога Истиннаго, Единаго Спасителя всех человек: да возсияет свет сей и блуждающым на распутиях раскола, да вразумятся и приидут во ограду православныя Церкве, в нейже единей несомненно содевается вечное спасение верных. О святителю Христов, молитвенниче наш! Моли Христа Бога и Пречистую Матерь Его, да упразднит вражды нашя и нестроения, соединит же вся ны богоподобною любовию, да в мире и единомыслии, желанием спасения горяще, Господеви работающе, друг друга тяготы̀ носяще, добрым подвигом подвизаемся, и течение скончавше, достигнев в тихое пристанище Небеснаго Царствия, и прославим неизреченное человеколюбие и милосердие Спасителя нашего, Иисуса Христа, Сына Божия, со Безначальным Его Отцем и Пресвятым Духом, во веки веков.

Тропарь, глас 4

Первее в Муроме святительством почтен был еси, из негоже неправедно изгоняемь, на мантию, яко на легкий корабль, возшел еси, на нейже паче естества, яко безплотен, по водам шествие творя, промышлением вышняго и заступлением Богоматере управляемь, богоспасаемаго града Рязани достигл еси, и в нем архиерейства престол восприим, богоданную паству рязанскую добре упасл еси, святителю отче наш Василие: моли Христа Бога спастися душам нашым.

всехвальная мученице Фомаидо! За чистоту супружества даже до крове подвизавшися и целомудрия ради душу свою положивши, достойна пред Господем обрелася еси, во еже в ли́це праведных дев почтенней тебе быти. Услыши нас молящихся тебе: и якоже древле боримии от плоти целительницу тя имеяху, по дарованней тебе от Бога благодати, сице и ныне прибегающым ко предстательству твоему подаждь отраду и свобождение от плотския брани, и целомудренное житие и незазорное в супружестве и девстве пребывание твоими благоприятными молитвами всем исходатайствовати потщися, яко да телеса наша храм живущаго в нас Святаго Духа будут. О преизбранная в женах и верная рабо Христова! Помози нам, да не погибнем со страстьми и похотьми нашими, но да управимся умом нашим и укрепимся сердцем нашим во всяком благочестии и чистоте, славяще твою помощь и предстательство, благодать же и милость Триединаго Бога, Отца и Сына и Святаго Духа, во веки веков.

Априлиа 14. Молитва святым мучеником Виленским: Антонию, Иоанну и Евстафию. Из службы

Святии мученицы [мученики] Антоние, Иоанне и Евстафие! Призрите с Небеснаго чертога на требующих вашея помощи и не отвергните прошений наших, но, яко приснии благодетели и ходатаи наши, молите Христа Бога, да, человеколюбив и многомилостив Сый, сохранит нас от всякаго лютаго обстояния: от труса, потопа, огня, меча, нашествия иноплеменников и междоусобныя брани. Да не осудит нас грешных по беззаконием нашым, и да не во зло обратим благая, даруемая нам от Всещедраго Бога, но во славу святаго имене Его и в прославление крепкаго вашего заступления. Да молитвами вашими даст нам Господь мир помыслов, от пагубных страстей воздержание и от всякия скверны удаление: и да укрепит во всем мiре Свою едину святую, соборную и апостольскую Церковь, юже стяжал есть честною Своею кровию. Молитеся прилежно, святии мученицы [мученики], да благословит Христос Бог помазанника Своего, благочести́вейшего госуда́ря императора Николая Александровича весь его царствующий дом и всю его державу, да утвердит во святей Своей православней Церкви живый дух правыя веры и благочестия: да вся чада ея, от суемудрия и суеверия свободившеся, духом и истиною покланяются Ему, и о соблюдении Его  заповедей усердно потщатся: да мы вси в мире и благочестии поживем в настоящем веце, и дотигнем блаженныя вечныя жизни на небеси, благодатию Грспода нашего Иисуса Христа, Емуже подобает всякая слава, честь и держава, со Отцем и Святым Духом, ныне и присно и во веки веков.

Тропарь, глас 4

Земных чести и славы отвергшеся, до́блии и честни́и страдальцы, веры ради крепко и мужественно муки претерпесте, на смерть себѐ давше за жизнь всех Владыку: темже и Христос преславно столпом облачным с небесе вас озарѝ, и по́честьми и венцы̀ от престола славы венча̀. Со Ангелы Тому предстояще, молите спастися душа́м нашым.

Ин тропарь, глас тойже:

От корене неплодна, преблаженнии, возрастивше православныя веры ветви, первомучеником тезоименити явистеся: злаго бо и нечестиваго князя ярости не убоястеся, повелевающа Христа отрешися. Сего ради мученическия венцы приемше и со Ангелы престолу Владычню предстояще, о нас молитеся, преблаженнии, православно чтущих святую память вашу.

Величание

Величаем вас, страстотерпцы святии Антоние, Иоанне и Евстафие, и чтем честная страдания ваша, яже за Христа претерпели есте.

Априлиа 20. Молитвы преподобному Александру, Ошевенскому чудотворцу

Молитва 1

О преподобне и богоносне отче наш, угодниче Божий Александре! Услыши нас грешных и недостойных чад твоих и всех умиленне к честно́му твоему образу и чудотворней ра́це твоей припадающих и тепле тебе молящихся. Бу́ди помощник и заступник благочестивейшему государю нашему, императору Николаю Александровичу всея России. Испроси у Всещедраго Господа Бога монашествующым и пастырем святыню, благоговение и страх Божий, пасомым же послушание, жития преспеяние и веры православныя нелестное хранение. Угаси силою святыя молитвы твоея раскола и ересей шатания, всех же нас под святым кровом твоим в миресоблюдая, исходатайствуй нам возду́ха благорастворение, плодов земных изобилие, телесем здравие и жития благоденствие. В час же исхода многогрешных душ наших предстани нам и мирно к невечернему руководи Царствию, от страшных воздушных истязателей нас свобождая, да вечно пребудем с тобою и славитисо всеми святыми сподобимся пречестное и великолепое имя Господне и твое милостивное заступление во веки веков.

Молитва 2

О преподобне и богоносне отче наш Александре! Велие имея к Богу дерзновение, молися непрестанно о всех нас, зане буря многих бед и скорбей обдержит ны: се бо неду́зи теле́снии, болезни душевныя, приражения вражия обуревают ны. Ходит бо враг наш, иский кого поглотити: мы же, о спасении нашем нерадяше, не́смы досто́йни ниже воззрети на высоту небесную, ни Господа в помощь свою призвати. Но ты буди нам помощник во спасение скорый и от зол избавитель неодолимый. Подаждь нам память смертную, слезы покаяния и надежду спасения, да не во отчаяние впадем, ниже дерзостным на милосердие Божие упованием, во гресех же пребыванием, в конец себѐ погуби́м: но да будет нам память грехов наших во источник теплых слез и сокрушения сердечнаго, милосердия же Божия и благодать Его во спасение наше, молитвами твоими, да подастся нам, твоим чадом, во веки веков.

Молитва 3

О преподобне и богоносне отче наш, угодниче Божий Александре! Предстоя̀ престолу Пресвятыя Троицы, молися непрестанно о благочести́вейшем, самодержа́внейшем, вели́ком госуда́ре нашем, императоре Николае Александровиче всея России, и о всем царствующем доме, о святейшем правительственном синоде, и о преосвященнейшем епископе нашем имярек, о всем священнем и иночестем чине, игумене же и братии обители твоея, о военачальницех и градоначальницех и всех православных христиа́нех: да ходим ки́йждо достойно звания нашего, в немже зва́ни бы́хом, и да будет земля наша земля добра̀, и вси живу́щии на ней род избра́н, царское священие, язык свят, людие обновления, ныне и присно и во веки веков.

Априлиа 20. Молитва святому мученику Гавриилу младенцу. Из службы

Младенческаго незлобия хранителю и мученическаго мужества носителю, Гаврии́ле блаже́нне, страны̀ нашея адама́нте драгоценный и иудейскаго нече́стия обличи́телю! К тебе, мы грешнии молитвенно прибегаем, и о гресе́х своих сокруша́ющеся, малодушия же своего стыдя́щеся, любовию зове́м ти: на́ших скве́рн не возгнуша́йся, чистоты̀ сый сокро́вище: нашего малодушия не омерзѝ, долготерпения учи́телю: но па́че сих, не́мощни нашя от небес видя, тех исцеления нам твоею подаждь молитвою, и твоея Христу верности подражатели нас быти научи. Аже же терпеливно крест искушений и злостраданий понести не возможем, обаче и тогда милостивыя твоея помощи не лиши нас, угодниче Божий, но свободу и ослабу нам у Господа испроси. Таже и молящыяся о чадех своих матери услыши, здравию и спасению младенцем от Господа податися умоляяй. Несть таковаго жестокаго сердца, еже слышанием о муках твоих, святый младенче, не умилится: и аще кроме сего умиленнаго воздыхания никоегоже благаго деяния принести возможем, но и таковым умиленным помыслом нашя умы и сердца, блаженне, просветив, на исправление жития нашего благодатию Божиею нас настви. Вложѝ в нас о спасении душѝ и о славе Божией ревность неустанную, и о часе смертнем память неусыпную храни́ти помозѝ нам, наипаче же в смертнем успении нашем терзания демонская и помыслы отчаяния от душ наших предстательством твоим отженѝ, и сия упованием Божественнаго прощения исполни, во еже и тогда и ныне славити нам милосердие Отца и Сына и Святаго Духа, и твое крепкое заступление, во веки веков.

Тропарь, глас 2

Святый младенче Гаврииле, ты, за Прободеннаго нас ради от иудей, лю́те от о́нехже в ребра прободен был еси, и, за Источившаго кровь Свою за нас, все тело твое на источение крове в лютыя язвы предал еси: ныне же во славе вечней с Ним вселился еси. Тем помяни и нас, молим, зде чтущих память твою, прося нам здравие телеси и спасение душам нашым.

Величание

Величаем тя, страстотерпче святый младенче Гаврииле, и чтем честная страдания твоя, яже за Христа претерпел еси.

Априлиа 23. Молитвы святому великомученику Георгию Победоносцу.

Молитва 1

Святый, славный и всехвальный великому́чениче Христов Гео́ргие! Со́браннии во храме твоем и пред иконою твоею святою поклоняющиеся лю́дие молим тя, известный желаний наших хода́таю: моли с нами и о нас умоляемаго от Своего благосердия Бога, да милостивно услышит нас просящих Его благостыню, и не оставит вся наша ко спасению и житию ну́ждная проше́ния, и дарует благочесчтивейшему императору нашему победу на сопроти́вныя, да укрепит же данною тебе благодатию во бране́х православное воинство, и силы возстающих сраг наших да низложит, да постыдя́тся и посра́мятся, и дерзость их да сокрушится, и да уве́дят, яко мы и́мамы Божественную помощь: и всем в ско́рби и обстоя́нии су́щим многомощное яви твое заступление. Умоли Господа Бога, всея твари Создателя, изба́вити нас от вечнаго мучения, да всегда прославляем Отца и Сына и Святаго Духа, и твое исповедуем предста́тельство, ныне и присно и во веки веков.

Молитва 2

О всехвальный, святый великому́чениче и чудотворче Гео́ргие! При́зри на ны ско́рою твоею помощию, и умолѝ человеколюбца Бога, да не осудит нас грешных по беззаконием нашым, но да сотворит с нами по вели́цей Своей милости. Не през́ри моления нашего, но испросѝ нам у Христа Бога нашего тихое и богоугодное житие, здравие же душевное и телесное, земли плодородие и во всем изобилие, и да не во зло обратим благая, дару́емая нам тобою от Всещедраго Бога, но во славу святаго имени Его и в прославление крепкаго твоего заступления, да подаст Он православному императору и всему боголюбивому воинству на супостаты одоление, и да укрепи́т царство его непременя́емым миром и благословением: изря́днее же да оградит нас святых Ангел Своих ополче́нием, во еже изба́витися нам, по исходе нашем из жития сего, от козней лукаваго и тяжких воздушных мытарств его, и неосужде́нными предста́ти престолу Господа славы. Услыши нас страстотерпче Христов Гео́ргие, и моли за ны непрестанно Владыку всех Бога, да благодатию Его и человеколюбием, твоею же помощию и заступлением, обрящем милость, со Ангелы и Архангелы и всеми святыми одесную правосуднаго Судии стати, и Того непрестанно славити со Отцем и Святым Духом, ныне и присно и во веки веков.

Тропарь, глас 4

Подвигом добрым подвизался еси, страстотерпче Христов Георгие, и веры ради обличил еси мучителей нечестие: жертва же благоприятна Богови прине́слся еси. Темже и венец прия́л еси победы, и молитвами, святе, твоими всем подае́ши прегрешений прощение.

Ин тропарь, глас 4

Яко пленных свободитель и нищих защи́титель, немощству́ющих врач, царей поборниче, победоносче великомучениче Георгие, моли Христа Бога спастися душа́м нашым.

Априлиа 23. Молитва святей мученице царице Александре. Из канона святей мученице

Церкве святыя укрепление и мучениц славо, преславная царице Александро! К тебе во умилении сердец наших припа́даем, и твоего затсупления у Господа о нас молим. Аще бо чистоте твоей не поревновахом, и безбоязненнаго исповедания твоего не приобщи́хомся, паче же многими прегреше́ньми и лютыми паде́ньми и отсту́пствы гнев Божий привлеко́хом: но не хоще́м во гресех наших умре́ти, и на твой подвиг взирающе, паки на одоление страстей наших ополчаемся. Сие же ве́дуще, яко кромѐ благодатныя помощи ничтоже благое сотворити возможем, ту́ю помощь нам от Господа подати тя просим. Ты бо, страстотерпице святая, велие ко Владыце дерзновение стяжала еси, яко прославившая его в чистоте души твоея̀ и в телесѝ твоем страдальчестем, отрекла́ся еси славы и чести мiра сего, возлюби́вши богатство и похвалу Христовы. Темже от того богатства и нашей нищите духовная подаждь дарования, и от безмерных прегрешений жизнь нашу соблюдѝ, мир и безмятежие нам испросѝ, от ну́жды и уныния нас предстательством твоим оградѝ, друг ко другу нас в послушании и братолюбии наста́ви, и ко Господу очи сердец наших всегда возводи, во еже сла́вити нам Отца и Сына и Святаго Духа державу, и твое теплое предстательство, во веки веков.

Тропарь, глас 4

Царства земнаго славу презревши, единаго Христа, нас ради распятаго, возлюбила еси, и того мужественне испове́дующи, венцем увенча́лася еси, всеблаженная царице Александро: темже и ныне престолу Царя славы на небесех предстоя́щи, молися о спасении душ наших.

Априлиа 25. Молитва преподобному Сильвестру игумену, Обнорскому чудотворцу, чтомая в церкви села Воскресенскаго на Обно́ре, Ярославския епархии

Избранниче Божий и чудотворче, преподобне отче Сильве́стре! Ты в пустыни доблестно подвиза́вся и веру соблю́д, неувядаемый венец славы от руки Господни приял еси. Сего ради к тебе притекаем, с верою молящеся. Да мо́лишися Христу Богу, еже дарова́ти вере преспея́ние, благоверному императору нашему здравие и благоденствие, державе Российстей мир и тишину, недужным же врачевание, си́рым и убогим помощь и утешение, всем людем жительство безмятежное и от бед и скорбей избавление, воззываемым от жизни сея временныя святое напутствие, преста́вльшымся же блаженное в Господе упокоение. Услыши, отче богоносне, глас молитвы нашея, и вознеси ю̀ ко Господу, да милостию Его ущедря́еми, прославляем в душах  и телесех наших всесвятое имя Отца и Сына и Святаго Духа, ныне и присно и во веки веков.

Априлиа 26. Молитва святителю Стефану, епископу Пермскому. Из службы со акафистом

О богоосвященный и равноапостольный святителю Христов Стефане, новый боговедения проповедниче и просветителю великопермских во идолопоклонстве живших людей, ко истинному Евангельскому свету путеводителю, пастырю добрый и учителю премудрый, Духа Святаго сосуде избранный, Христоподражательный к небесному Сиону наставниче и руководителю, образе благонравия всем благочестно жити желающым, благоискусный мысленнаго корабля, чрез море мiра сего к небесному пристанищу плавающаго, правителю, дивный во иерарсех, увенча́нный Божественною благодатию, всероссийский светильниче, великий чудотворче и молитвенниче теплый! К тебе, во умилении душ и сокрушении сердец наших, мы окаяннии и грешнии благонадежно притекаем, и пред чудотворным твоим гробом, в немже святыя мощи твоя почивают [или пред святым и чудотворным твоим образом], вопием, просяще смиреннии помощи твоея и теплаго ко Преблагому Богу ходатайства, да твоими благоприятными молитвами испро́сиши нам от Него человеколюбную милость, оставление многих наших согрешений, душа́м и телесе́м здравие со спасением: да благоволит же Господь твоими молитвами безбедно в мiре сем ходити нам до скончания жития нашего, во время же разлучения нашего от жизни сея дух  наш Ангелы Своими святыми в покаянии и мире милостивно да прии́мет, яко да от мрачных и злоковарных и лютых духо́в демонских на возду́се прошедше невозбра́нно, к Нему непостыдно предста́нем, и поклони́мся, и безсмертныя и блаженныя жизни сподобимся со всеми святыми во веки веков.

Тропарь, глас 4

Божественным желанием от юнаго возраста, Стефане премудре, разже́гся, яре́м Христов взял еси, и людей олядене́вшая древле неверием сердца̀, Божественое семя в них сеяв, евангельски духовно породил еси. Темже преславную твою память почитающе, молим тя: моли, Егоже проповедал еси, да спасет душы нашя.

Априлиа 29. Молитвы святым девяти мучеником Кизическим: Феогни́ду, Ру́фу, Антипа́тру, Феости́ху, Арте́ме, Ма́гну, Феодо́ту, Фаима́сию и Филимо́ну

Молитва 1, творение святителя Димитрия Ростовскаго, из службы сим мучеником

О всехвальнии святии мученицы, доблественнии раби Христовы: Феогни́де, Ру́фе, Антипа́тре, Феости́хе, Арте́мо, Ма́гне, Феодо́те, Фаима́сие и Филимо́не! Вы Христа ради от различных стран собра́стеся, и того совершеннаго Бога и Человека дерзновенно в кузнице пропове́дасте, и принуждаеми бывше пожре́ти кумиром, идолы попра́сте и князя посрами́сте, различных же томление и огненнаго прещения не убоя́стеся, и по различнем страдании острием меча посече́ни бысте, и кровь свою яко воду за Христа пролия́сте, и тою яко багряницею Церковь Христову украси́сте: темже и ныне, неувядаемым венцем безсмертныя славы увенча́ни, в неизглаголанней радости с лики ангельскими в небесных селениих водворяетеся, Божественным светом облистаеми и зрением Его добро́ты неизреченныя наслаждающеся. Сего ради и мы смиреннии к вам притекаем, и умиленно на святый ваш образ взирающе, молим вы: молите за ны Христа Бога, яко дерзновение к нему иму́щии, да вашими святыми молитвами от всякаго недуга и вреда душевнаго и телеснаго избавимся, вам бо от Бога даде́ся врачебный дар от всяких скорбей с верою к вам припадающыя цели́ти, якоже и онаго славнаго мужа от тряса́вичныя болезни уврачевасте: да и мы вернии, тожде получивше, почитаем вас, святии мученицы, толи́ка дарования имущих от Христа Бога, Емуже слава, купно со Отцем и Святым Духом, всегда, ныне и присно и во веки веков.

Молитва 2, чтомая в Кизическом монастыре града Казани

О всехвальнии святии мученицы: Феогни́де, Ру́фе, Антипа́тре, Феости́хе, Арте́мо, Ма́гне, Феодо́те, Фаима́сие и Филимо́не, вра́чеве страстей, великоименитии, светозарнии и Божественнии светильницы, полче священный, богособранное совокупление, доблественнии Христовы страдальцы, страшныя и многоразличныя муки за Христа претерпевшии и от Него благодать стяжавшии во еже паче естества чудодействовати! Смиренно припадаемк вам, от глубины сердца вопием и молимся: сохраните обитель сию, вам приусво́енную, от всякаго злаго обстояния. Не отрините нас от своего покрова и заступления, с верою и любовию притекающих к вам: аще бо и многогрешнии есмы, но не хощем погибнути. Избавите нас от страстей, воюющих на душу нашу: просветите нас светом истиннаго боговедения: молитеся о нас ко Спасу нашему, да поживем вси в мире и единодушии, да якоже вы, любовию о Христе совоку́плени, благодушно и неленостно понесем благое иго жития добродетельнаго, в добрый де́лех друг друга ободряюще. Укрепите ны во бра́нех, воздвизаемых на ны от враг видимых и невидимых, да не когда враг похитит, яко лев, душу нашу, не сущу избавляющу, ниже спасающу: скоро услышите ны, воньже аще день призовем вы. Исцелите ны и вся притекающыя во обитель сию от всякия болезни, паче же от тряса́вичнаго недуга: вас бо дарова Бог стране се целители недуга сего, да вси претекающии к вам получают оздравление и купно с нами славят Бога, Отца и Сына и Святаго Духа, и ваше милостивное о нас предстательство, всегда, ныне и присно и во веки веков.

Тропарь, глас 8

Святии девяточи́сленнии мученицы, от различных градов во един лик манием Божественным мужественно за Христа спострадати совокупившеся, невидимаго врага победи́сте, зловерныя князи и мучители посрамисте вашим терпением: огнем же любвѐ Божия разжиза́еми, вещественно вас огнь мучений во хлад преложисте. Темже дадеся вам от Христа Бога благодать тряса́вичнуюю болезнь, от нея́же и от многовидных страстей милостивно спасайте и нас предстательством вашим, молимся.

Месяц маий

Маиа 1. Молитва преподобному Пафнутию Боровскому. Из акафиста

О священная главо̀, земны́й ангеле, небесный челове́че, великий чудотворче, преподобне отче наш Пафну́тие! К тебе с верою и любовию усердно прибегаем и умиле́нно твоего заступления просим. Не дерза́ем, грех ради наших, с свободою чад Божиих Господа и Владыку нашего о помиловании и прощении проси́ти. Но тебе моли́твенника к Нему благоприя́тна предлагаем и мо́лим, испросѝ нам у благости Его дары̀ благопотре́бныя и спаси́тельныя душа́м на́шым: веру пра́вую, во благоче́стии крепкое стояние, грехов прощение, жития совершенное исправление, да обрати́вшеся от злых дел к благоугожде́нию, прочее не прогневля́ем Господа святых Его заповедей преступле́нием. Умолѝ, святче Божий, Всевышняго Творца дарова́ти мир и благоче́стие царству нашему православному, здравие же и спасение и на врагѝ одоление благочести́вейшему госуда́рю нашему и всея России. Сохранѝ, угодниче Христов, святую обитель твою, тобою созда́нную, и вся живу́щыя и подвизаю́щыяся в ней от всякаго зла ненаве́тны. При́зри ми́лостивно на люди, ра́це моще́й твоих предстоя́щыя, и вся проше́ния их во благо́е испо́лни. Нам же всем здравие душе́вное и теле́сное, землѝ плодоно́сие, тихое и богоугодное житиѐ, благу́ю христианскую кончи́ну и добрый ответ на Стра́шнем Суде у Всемилостиваго Бога исхода́тайствуй. Ей, отче, ве́мы, яко много может молитва твоя пред лице́м Вседержителя Господа, и ничто́же невозмо́жно есть хода́тайству твоему, аще то́кмо восхо́щеши: сего ра́ди кре́пце на тя упова́ем, и на твоя̀ святы́я молитвы вельмѝ надеемся, яко ты приведе́ши нас, предстательством твоим, в тихое приста́нище спасения и наследники яви́ши ны светлаго Царствия Христова. Не посрамѝ же упова́ния нашего, чудотворче святы́й, и сподо́би нас вку́пе с тобою блаженства ра́йскаго наслажда́тися, да сла́вим, хва́лим и велича́ем вели́кую ми́лость к нам человеколюбца Бога, Отца и Сына и Святаго Духа, и твое благое оте́ческое заступле́ние, во веки веков.

Тропарь, глас 4

Жития̀ светлостию посветив твое отечство, в молитвах и посте́х даровании Божественнаго Духа исполнился еси: и во временней сей жизни до́бре подвизався, милость благоутробия всем скорбящым отве́рзл еси, и нищым был еси заступник. Тем молим тя, отче Пафну́тие: моли Христа Бога, да спасет душы нашя.

Маиа 1. Молитва святому священномученику Макарию, митрополиту Киевскому, чтомая в церкви местечка Скрыгалова, Минския епархии

Владыко Господи Боже наш! Неизреченным твоим промышлением и многою благодатию, предуставляя святыя своя, измлада богоугодное житие избраннаго во иерарсех, дивнаго в мученицех предуведый, сего, яко святительство свято, всесожжение словесное, истиннаго  Евангелию Христову последователя прославил еси, прейтѝ же путь страдания и смертную от рук агарянских испи́ти чашу того сподобил еси. Темже того святую душу яко всеплодие жертвенное в вышния обители приял еси, иде́же со дерзновением предстоя̀ и в ли́це святых водворяяся, священномученик Макарий да поминает и нас, всечестным моще́м того покланяющихся. Ей, молися, отче священнейший, во еже изба́витися нам от враг видимых и невидимых и получити благодать и милость от Господа, Емуже со Отцем и Святым Духом слава, честь и поклонение во веки веков.

 Маиа 1. Молитва преподобному Герасиму Болдинскому

О до́брый наш па́стырю и богомудрый наста́вниче, преподо́бне о́тче Гера́симе! Услы́ши нас моля́щихся тебе и призыва́ющих в помощь скорое предстательство твое. Виждь нас грешных, в толи́цех обстоя́ниих су́щих: виждь нас немощны́х, отвсю́ду уловля́емых, и всякаго блага лише́нных, и умом от малодушия помраче́нных. Потщи́ся, угодниче Божий, не оста́ви нас во грехо́внем плену пребыва́ти, да не будем в радость враго́м нашым и не у́мрем в лукавых дея́ниих наших. Молѝ о нас недостойных Спаса Господа, Ему́же ты со безпло́тными лики предстои́ши. Ми́лостива к нам сотворѝ Соде́теля нашего в нынешнем ве́це и в будущем, да не воздаст нам по дело́м нашым и по нечистотѐ сердец наших: но по Своей благости да сотвори́т нам. на твое бо хода́тайство упова́юще, твоим предста́тельством хва́лимся, твое заступление на помощь призыва́ем, и к цельбоно́сному гро́бу твоему припа́дающе недостойнии, исцеле́ния про́сим. Избави нас, уго́дниче Христов, от злых, находящих на ны̀, и укротѝ во́лны страстей и бед, возстаю́щих на нас, да ради святых твоих молитв не объи́мет нас напасть, и не погря́знем в пучине греховней и в тине страстей наших. Молѝ, преподо́бне отче наш Григо́рие, Христа Бога нашего, да пода́ст нам ми́рное жительство, оставление грехов и душам нашым спасение и ве́лию милость, ныне и во веки веков.

Маиа 2 и иулиа24. Молитва святым благоверным князем Борису и Глебу, во святем крещении Роману и Давиду

О двоице священная, братие прекраснии, доблии страстотерпцы Боорисе и Глебе, от юности Хртисту верою, чистотою и любовию послужившии, и ковьмѝ вашими яко багряницею  украси́вшиися, и ныне со Христом царствующии! Не абудите и нас сущих на землѝ, но, яко теплии заступницы, вашим сильным ходатайством пред Христом Богом нас помилуйте: юныя убо во святей вере и чистоте, неврежде́ны от всякаго прилога неверия и нечистоты̀ сохрани́те, и всех нас молящихся от всякия скорби, озлоблений и внезапныя смерти избавите, укротите же всякую вражду и злобу, действом диавола от бли́жних и чужди́х воздвизаемую. Молим вас, христолюбивии страстотерпцы, споспешествуйте и благоверному госуда́рю нашему, императору Николаю Александровичу в победе на враги, испросите у великодаровитаго Владыки всем нам оставление прегрешений наших, единомыслие и здравие, избавление от нашествия иноплеменных, междоусобныя брани, язвы и глада. Снабдевайте заступлением вашим град сей [или весь сию, или святую обитель сию] и вся чтущыя святую память вашу, во веки веков.

Тропарь, глас 2

Правдивая страстотерпца и истинная Евангелиа Христова послушателя, целомудренный Романе с незлобивым Давидом, не сопроти́в ста́ста врагу су́щу брату, убивающему телеса ваша, душам же косну́тися не могу́щу. Да плачется убо злый властолюбец: вы же радующеся с лики ангельскими, предстояще Святей Троице, моли́теся о державе сродников ваших, богоугодней быти, и сыновом Российским спастися.

Маиа 2. Молитва святителю Афана́сию, патриарха Костантинопо́льскому, Лубе́нскому чудотворцу

О святителю Христов, угодниче Божий Афанасие! Велением Божиим жребий служения святительскаго восприим и Крест Христов на рамена своя возложив, был еси пастырь добрый, светильник всесветлый столп непоколебимый, Церкве служитель верный, иерархов начальник, православия защитник, нечестия искоренитель: сего ради и водварился еси в дому Господа твоего. Тебе убо просим: молися о нас, с верою и любовию притекающих к честным и многоцелебным мощем твоим: не отрини просящих у тебе помощи в ско́рбех и боле́знех. Молитвою твоею предстани бо Всевышнему Владыце, исхода́тайствуй яже на пользу душ и телес наших, и отверзи нам двери милосердия Божия. Хода́тайством твоим сохрани Церковь святую тверду и непоколебиму от навет вражиих. Моли Господа и Владыку о здравии и благоденствии благочестивейшаго, самодержа́внейшаго, вели́каго госуда́ря нашего, императора Николая Александровича всея России, и о всем царствующем доме, о всей палате и воинстве их: да тихое и безмолвное житие поживем во всяком благочестии и чистоте. Соблюди обитель сию, в нейже вселился еси, от всяких бед и напастей и от всех враг видимых и невидимых: и якоже в жизни критския люди от неправеднаго агарянскаго убие́ния избавил еси, тако и ныне на небесех непрестанно молися ко Господу избавитися нам от всякаго злаго обстояния. Подаждь руку помощи и всем православным христианом, притекающым к честным и нетленным мощем твоим и в молитвах своих тя призывающым. Ускорѝ на молитву и потщися на помощь, имиже веси  судьбами, да вси, безприкладное Божие милосердие видяще и чаемую помощь получи́вше, славят подавшаго тебе силу и славу,    Отца и Сына и Святаго Духа, во единем существе славимаго Бога, ныне и присно и во веки веков.

Молитва 2

О великий и дивный святителю Христов Афанасие богомудре, светильниче Церкве вселенския, Лубенский и всея России чудотворче и покровителю! Ты от юности вся житейская оставль, к Богу любовию и духовным благоразумием наставляемь, увещавал еси вся человеки, глаголя: что нам богатство, что нам злато, слава и могу́тство? дымове расходящиися по воздуху: вся та исчезнут, вся та понесет ветр! Многарачительно же в будущем веце да будет нам богатство. Тако поучая, сам щедр, благосерд, кроток, смирен и всем благоприступен был еси. темже и во успении твоем Всеблагий Господь тьмочисленными чудесы озари и прослави нетленныя мощи твоя. Имея убо ко Господу дерзновение, заступи и спаси твоим хода́тайством благочести́вейшего госуда́ря нашего, императора Николая Александровича, со всем царствующим домом и все хранимое тобою царство Российское и святую обитель сию. Моли Христа Бога, да отпустятся всем нам согрешения наша вольная и невольная, да избавимся от всех враг видимых и невидимых, от всяких бед и скорбей и всяких недугов. Моли, да милостив будет всем нам Господь и зде и в будущем веце, и преставльшыяся от нас отцы и братию, матери и сестры и чада наша, в лики святых вчинив, в месте светле упокоит: да предстояще и покланяющеся раце моще́й твоих, имамы тя неусыпающаго мрлитвенника и предстателя о нас ко Господу, и благодарне с любовию величаем просла́вльшаго и послу́шающаго тя, в Троице славимаго Бога, Отца и Сына и Святаго Духа, ныне и присно и во веки веков.

Тропарь, глас 8

Прему́дростию учений твоих царствующий град  просвети́в, тьму неведения еретическаго разгна́л еси, преблаженне: твое благословение землѝ Российстей прине́сл еси, отче наш святителю Афанасие, иде́же скончав течение твое, на кри́лех чистоты возлете́л еси в Небесное Царство. Моли Христа Бога непрестанно о душах наших.

Маиа 3 и августа 14. Молитва преподобному Феодосию, игумену Печерскому. Из акафиста преподобному

О священная главо̀, ангеле земны́й и челове́че небесный, преподобне и богоносне отче наш Феодо́сие, изря́дный слуго̀ Пресвяты́я Богородицы, во имя Ея̀ святое обитель пречу́дну на гора́х Пече́рских сооруди́вый и в ней чудес мно́жеством просия́вый! Мо́лим тя со усе́рдием мно́гим: моли́ся за нас ко Господу Богу и испросѝ нам от Него вели́кия и бога́тыя милости:  веру пра́ву, наде́жду спасе́ния несомне́нну, любовь во всем нелицеме́рну, благоче́стие непоколебимое, душ и теле́с здравие, житейских потре́б дово́льство, и да не во зло обрати́м блага́я, дару́емая нам от щедрода́тельныя Его десни́цы, но во сла́ву имени Его свята́го и во спасе́ние наше. Сохранѝ, уго́дниче Божий, предста́тельством твоим святым во здравии и долгоденствии благовернаго госуда́ря нашего, императора Николая Александровича всея России, и весь царствующий дом, покоря́я под но́зе его вся врагѝ и супоста́ты. Соблюдѝ, преподобне чудотво́рче, страну правослвно-российскую, царствующыя гра́ды ея̀, град твой и лавру твою невреди́мы от всякаго зла: и вся люди, притека́ющыя на поклоне́ние к честному твоему гро́бу и пребывающыя во святе́й оби́тели твоей, осенѝ небе́сным твоим благословением и от всяких зол и бед ми́лостивно изба́ви. Наипа́че же в час   кончи́ны нашея многомо́щное твое заступле́ние явѝ нам, да изба́вимся, моли́твами твои́ми ко Господу, от власти лю́таго мироде́ржца и сподо́бимся насле́дити Царство Небесное. Покажѝ нам, о́тче, благосе́рдие твое, и не оста́ви нас си́рых и безпо́мощных: да непреста́нно славосло́вим ди́внаго во святых Своих Бога, Отца и Сына и Святаго Духа, и твое святое заступле́ние, во веки веков.

Тропарь, глас 8

Возвы́сився на добродетель, измла́да возлюбив монашеское житие, к желанию до́блественне достиг, вселился еси в пещеру, и украси́в житие твое пощением и светлостию, в молитвах яко безплотен пребывал еси, в российстей земли яко светлое светило просияв, отче Феодосие: моли Христа Бога спастися душам нашым.

Маиа 5. Молитвы преподобному Иакову, игумену Железноборовскому. Из службы преподобному

Молитва 1

Преподобне и богоносне отче наш Иакове! Приими ныне нас, тебе усердно молящихся и припа́дающих ко всечестному и многоцелебному твоему гробу, иде́же святое и многотрудное покоится тело. Духом же на небесех предстоя̀ Святей Троице со Ангелы и преподобных отец ли́ки, молися о нас чадех твоих, отче, да избавимся от всяких скорбей, болезней, бед и обстояний, и благоче́стно поживем в настоящем житии, ходяще в заповедех и оправданиих Господних безпорочно, и да яви́мся последователи святому и равноангельному житию твоему. Ей, преподобне отче, молим тя, испросѝ нам же и всем, с верою к тебе притекающым, грехов прощение, телесем здравие, исправление жития и вечное спасение, яко да твоим предстательством спасе́ннии, славу возсыла́ти  сподобимся в Троице славимому Богу, Отцу и Сыну и Святому Духу,ныне и присно и во веки веков.

Молитва 2

Преподобне и богомудре отче наш Иакове! Вемы, яко с лики ангельскими и всеми святыми предстоиши присно престолу Господа Вседержителя и ве́лие и́маши к Нему дерзновение молитися о всех, с верою и умиленными слезами в помощь тя призывающих. Не премолчи убо, вопия̀ за ны недостойныя ко Господу Богу, да отвратит гнев Свой, праведно за беззакония наша на ны движимый, и да избавимся от всяких скорбей, бед же и напастей и злых обстояний, и благочестно поживем в нынешнем ве́це, ходя́ще в заповедех и оправданиих Господних непорочно. О преблаженне и боголюбезне отче наш Иакове! Умоли Господа, да не оскудеют во обители твоей и́стиннии ревни́телие иноческаго жития и подражателие святому и богоугодному житию твоему: сохрани предстательством твоим к Богу обитель и страну сию от огня, глада, меча, нашествия иноплеменных и от всякаго зла: и всем, с верою и любовию притекающым во твою обитель, испросѝ у Господа Бога грехов прощение, телесе́м здравие, исправление греховнаго жития и вечное спасение: да с тобою и всеми святыми сподобимся прославля́ти в Троице славимаго Бога, Отца и Сына и Святаго Духа, во веки веков.

Тропарь, глас 4

Небеснаго желая, земная возненавидел еси, и взем крест твой, последовал еси Христу, и от Него приял еси дарования чудес, исцеля́ти недужныя. Но яко име́яй дерзновение ко Святей Троице, испроси благоверному императору нашему Николаю Александровичу  здравие и спасение, на враги же победу, и не забуди посещая чад твоих, припа́дающих к целебному гробу твоему, Иакове преподобне, отче наш.

Маиа 7. Молитва преподобному Нилу, Сорскому чудотворцу

Молитва 1, из службы

Преподобне и богоблаженне отче Ни́ле, богомудрый наставниче и учителю наш! Ты любве ради Божия от мирских смущений удаляяся, в непроходней пустыни и в де́брех вселитися изволил еси, и яко лоза благоплодна, чада пустыни умножив, словом, писанием и житиемобраз всякия иноческия добродетели  явился еси: и яко ангел во пло́ти пожив на земли, ныне в селениих небесных, идеже празднующих глас непрестанный, водворяешися, и с лики святых Богу предстоя, Тому хвалы̀ и славословия непрестанно прино́сиши. Молим тя, богоблаженне, настави и нас, под кровом твоим жительствующих, непреткновенно по стопам твоим ходити и Господа Бога всем сердцем своим любити, Того единаго вожделети и о Том едином помышля́ти, мужественно же и благоискусно проти́ву долу влекущих помыслов и прилогов вражиих пра́тися и ты́я всегда побежда́ти: всякую же тесноту монашескаго жития возлюби́ти и красная мiра сего, любве ради Христовы, возненавидети помозѝ нам: всяку же добродетель, в нейже сам потрудился еси, в сердцах наших насадити нам пособствуй. Моли Христа Бога, да и всем православным христианом, в мiре живущым, просветит ум и очи сердечныя, еже ко спасению, утвердит я̀ в вере и благочестии и в делании заповедей Своих, сохранит же от лести мiра сего, и оставление грехов дарует всем христианом, таже и вся потребная ко временному житию всем приложи́т. Благочести́вейшего же госуда́ря нашего, императора Николая Александровича да венчает Господь оружием благоволения Своего, мышцу его да укрепит, глубокий и неотъемлемый мир ему да дарует, весь же царствующий дом его в любви, единомыслии и в долгоденствии да соблюде́т, и всякое начало и власть и все воинство его на путь правды и верности да упра́вит: тако всѝ христиане, в пустыни и в мiре жительствующии, тихое и безмолвное житие поживут во всяком благочестии и честности, и Христа усты̀ и сердцем прославят, купно со Безначальным Его Отцем и Пресвятым и Благим и Животворящим Его Духом, всегда, ныне и присно и во веки веков.

Молитва 2, чтомая в Ни́ло-Со́рской пустыни, Новгоро́дския епархии

О преподобне и богоблаженне отче наш Ни́ле! Приимѝ ныне нас, к тебе усе́рдно моля́щихся и припа́дающих ко всечестно́му твоему гробу, иде́же святое твое и многотру́дное покоистя тело. Духом же на небесе́х предстоя̀ Святей Троице, со Ангелы и преподо́бных отец ли́ки, моли́ся о нас ча́дех твоих, отче, да избавимся от всяких скорбей, болезней, бед и обстояний и благочестно поживем в настоящем житии, ходя́ще в заповедех и оправда́ниих Господних безпоро́чно. Испросѝ нам грехов прощение, телесе́м здравие и душа́м вечное спасение, яко да твоим предстательством спаса́еми, славу возсыла́ти сподо́бимся в Троице славимому Богу, Отцу и Сыну и Святому Духу, ныне и присно и во веки веков.

Тропарь, глас 4

Удалився бегая дави́дски мiра, и вся яже в нем яко уме́ты вменив, и в месте безмолвне вселився, духовныя радости исполнился еси, отче наш Ниле: и Единому Богу изволив служи́ти, процвел еси яко финикс, и яко лоза благоплодна умножил еси чада пустыни. Темже благодароственно вопием: слава Укрепившему тя в подвизе пустынножительства: слава Избравшему тя в России отшельником уставоположника изрядна: слава молитвами твоими и нас Спасающему.

Маиа 8. Молитва преподобному Арсению Великому. Из акафиста преподобному

О священная главо̀, земны́й ангеле, небесный челове́че, безмолвия рачителю, молчания любителю, преподобне и богоносне отче наш Арсение! Припадаем ти и молимся: помолися ко Господу Богу и Спасу нашему Иисусу Христу, да дарует нам, грешным и недостойным рабом Своим, вся ко спасению душевному благопотребныя да́ры Своя: веру пра́вую, надежду благу, любовь нелицемерну, благоче́стие непоколебимое, любомудрие христопоследовательное, и вся добродетели, во Святем Евангелии Им заповеданныя: да будем подражатели твоего богоугоднаго жития и вкупе с тобою сподобимся спасение вечное получити иЦарствие Небесное унаследовати. Ей, угодниче Божий! не пре́зри нас, но помози нам, небесным предстательством твоим, благочестно житие временное скончати, кончи́ну благую, мирную и непостыдную прия́ти и блаженства райскаго сподо́битися: да прославим человеколюбие и щедроты в Троице славимаго и покланяемаго Бога,  Отца и Сына и Святаго Духа, и твое святое заступле́ние, во веки веков.

Маиа 9. Молитва святителю Николаю, архиепископу Мирликийскому (см. молитвы декемвриа 6)

Молитва 1, из службы со акафистом

О всехва́льный и всечестны́й архиере́ю, великий чудотво́рче, святи́телю Христов, отче Нико́лае, челове́че Божий и ве́рный ра́бе, му́жу жела́ний, сосу́де избра́нный, крепкий сто́лпе церко́вный, свети́льниче пресве́тлый, звездо̀ осиява́ющая и освеща́ющая всю вселенную! Ты еси праведник, яко фи́никс процветы́й, насажде́ный во дво́рех Го́спода своего: живы́й в Ми́рех, ми́ром благоуха́л есѝ, и ми́ро приснотеку́щее благода́ти Божия источа́еши: твоим шествием, пресвяты́й отче, море освяти́ся, егда̀ многочуде́сная твоя мо́щи ше́ствоваху во гра́д ба́рский, от Востока до Запада хвалити имя Господне. О преизя́щный и преди́вный чудотво́рче, скорый помо́щниче, те́плый засту́пниче, па́стырю предо́брый, спаса́яй слове́сное ста́до от всяких бед! Тебе прославля́ем и тебе велича́ем, яко надежду всех христиан, исто́чника чудес, защи́тителя ве́рных, прему́драго учи́теля, а́лчущих корми́теля, пла́чущих веселие, наги́х одеяние, боля́щих врача̀, по морю плавающих упра́вителя, пленников свободи́теля, вдов и сирот пита́теля и засту́пника, целому́дрия храни́теля, младенцев кро́ткаго наказа́теля, старых укрепле́ние, постников наста́вника, тружда́ющихся упокое́ние, нищих и убогих изоби́льное богатство. Услыши нас моля́щихся тебе и прибега́ющих под кров твой, явѝ предста́тельство твое о нас к Вышнему, и исхода́тайствуй твоими богоприя́тными молитвами вся поле́зная ко спасению душ и теле́с наших: сохранѝ святую обитель сию̀ [или храм сей], всякий гра́д и ве́сь, и всякую страну̀ христиа́нскую, и люди живу́щыя, от всякаго озлобле́ния по́мощию твое́ю. Ве́мы бо, ве́мы, яко много может молитва пра́веднаго, поспешеству́ющая во благо́е: тебе же пра́веднаго, по Преблагослове́нней Деве Марии, предста́теля ко Всеми́лостивому Богу и́мамы, и ко твоему, преблаги́й отче, те́плому хода́тайству и заступле́нию смире́нно притека́ем. Ты нас соблюдѝ, яко бо́дрый и до́брый па́стырь, от всяких врагов, губи́тельства, тру́са, гра́да, гла́да, пото́па, огня̀, меча̀, наше́ствия иноплеме́нников, и во всех беда́х и ско́рбех на́ших подава́й нам ру́ку по́мощи, и отве́рзи две́ри милосе́рдия Божия: поне́же недосто́йни есмы̀ зре́ти высоту небе́сную, от множества непра́вд наших: свя́зани есмы̀ у́зами грехо́вными, и николи́же воли Созда́теля нашего сотовори́хом, ни сохрани́хом повеле́ний Его. Те́мже преклоня́ем коле́на сокруше́ннаго и смире́ннаго се́рдца на́шего к Зижди́телю своему, и твоего̀ оте́ческаго заступле́ния к Нему про́сим: помозѝ нам, уго́дниче Божий, да не поги́бнем со беззако́нии на́шими: изба́ви нас от вся́каго зла и от вся́кия ве́щи сопроти́вныя, упра́ви ум наш, и укрепѝ сердце наше в пра́вой вере, в не́йже твоим предста́тельством и хода́тайством, ни ра́нами, ни преще́нием, ни мо́ром, ни ко́им гневом от Созда́теля своего ума́лени будем, но ми́рное зде поживе́м житиѐ, и да сподо́бимся ви́дети блага́я на земли живы́х, сла́вяще Отца и Сына и Святаго Духа, Единаго в Троице сла́вимаго и покланя́емаго Бога, ныне и присно и во веки веков.

Молитва 2, из тояже книги

О всесвяты́й Николае, угодниче преизря́дный Господень, теплый наш засту́пниче и везде в ско́рбех скорый помощниче! Помозѝ мне, грешному и унылому, в настоящем сем житиѝ: умолѝ Господа Бога дарова́ти ми оставле́ние всех моих грехов, ели́ко согреши́х от юности моея̀, во всем житиѝ моем, делом, словом, помышле́нием и всеми моими чу́вствы, и во исхо́де душѝ моея помозѝ ми окая́нному, умолѝ Господа Бога, всея твари Соде́теля, изба́вити мя от возду́шных мыта́рств и ве́чнаго муче́ния: да всегда прославляю Отца и Сына и Святаго Духа, и твое ми́лостивное предста́тельство, ны́не и при́сно и во ве́ки веко́в.

Молитва 3, из тояже книги

О всеблаги́й отче Нико́лае, па́стырю и учи́телю всех, ве́рою притека́ющих ко твоему заступле́нию и те́плою моли́твою тебе призыва́ющих! Скоро потщи́ся и изба́ви Христово ста́до от волко́в губя́щих ѐ: и всяку страну христианскую огради и сохрани святыми твоими молитвами от мирскаго мятежа, труса, нашествия иноплеменников и междоусобныя брани, от гла́да, пото́па, огня̀, меча̀ и внезапныя смерти. И якоже поми́ловал трие́х мужей в темнице седящих, и избавил еси их от царе́ва гнева и посече́ния ме́чнаго: та́ко поми́луй и менѐ, умом, словом и делом во тьме грехо́в су́ща, и изба́ви мя от гнева Бо́жия и ве́чныя ка́зни: яко да твоим хода́тайством и по́мощию, своим же милосе́рдием и благода́тию, Христос Бог тихое и безгрешное житиѐ даст ми пожи́ти в ве́це сем, и изба́вит мя от шу́ияго стояния, сподо́бит же десна́го со всеми святыми во веки веков.

Молитва 4

О па́стырю добрый, учи́телю и наста́вниче наш, святи́телю отче Нико́лае! Ты а́нгельски пожи́в на землѝ, по преставле́нии твоем яко а́нгел благи́й просия́л есѝ, моля́щымися тебе при́сный помо́щник явля́яся. Ве́руем от всея̀ душѝ и помышле́ния, я́ко твои́ми нело́жными хода́тайствы и благода́тию, оби́льно дарова́нною тебе от Господа Спаса нашего, нашему спасе́нию при́сно спосо́бствуеши. Убо и в час сей на́ша недосто́йная приимѝ моле́ния: свободѝ нас твои́м заступле́нием от облежа́щего нас суесло́вия м суему́дрия, неправове́рия и злове́рия челове́ческаго: моли́ся мир всем Дающему низпосла́ти мир це́рквам, расточе́нная же во еди́но собра́ти, и державу благочести́вейшаго, самодержа́внешаго импера́тора нашего Николая Александровича в мире и тишине сохрани́ти: молѝ ми́лостиваго Господа, да, и́миже ве́сть судьба́ми, спасе́т нас от прегреше́ний наших: молѝ бла́гость Его, о е́же ми́лостивно подати нам и всему мiру потребная, да непрестанно славим, хвалим, поем и величаем пречестно́е и великоле́пое имя Отца и Сына и Святаго Духа, ныне и присно и во веки веков.

Молитва 5, чтомая пред чудотворною иконою святителя Николая в селе Про́мзине, Симбирския епархии

О всехвальный великий чудотво́рче, святителю Христов, отче Нико́лае! Молим тя, бу́ди надежда всех христиан, верных защи́титель, а́лчущих корми́тель, плачущих веселие, болящих врач, по морю пла́вающих упра́витель, убогих и сирых пита́тель и всем скорый помощник и покровитель, да мирное здѐ поживем житиѐ и да сподо̀бимся видети славу избра́нных Божиих на небесѝ и с ними непрестанно воспева́ти Единаго в Троице покланя́емаго Бога во веки веков.

Молитва 6, чтомая в Покровским Медведевском Единоверческом монастыре, Нижегородския епархии

О великий заступниче, архиерею Божий, Нико́лае треблаже́нне, иже подсо́лнечную осия́вый чудесы, призыва́ющым же ты скорый услы́шатель явля́яйся, и́хже присно предваря́еши и спаса́еши, и избавля́еши, и от бед всяческих изъима́еши, от Бога данною ти чудес и даро́в благода́тию! Услыши мя недосто́йнаго, с верою тя призыва́юща и молебное тебе принося́ща пение: тебе бо хода́тая на умоление ко Христу предлага́ю. О пресловущий в чудесех, святителем высото! Яко имеяй дерзновение, скоро Владыце предстани, и преподобнии свои руце молебне к Нему простри о мне грешнем, и от Него щедроты благости подаждь ми, и приими мя в свое заступление, и от всех бед и зол мя избави, от нашествия врагов видимых и невидимых свобождая, и тех всех наветы и злохитрства погубляя, и борющих мя во всей жизни моей отражая: прегрешением же моим прощение испроси, и спасена мя Христу представи, и Царствия Небеснаго сподоби улучити за множество Того человеколюбия, Емуже подобает всяка слава, честь и поклонение, и со Безначальным Его Отцем, и с Пресвятым и Благим и Животворящим Духом, ныне и присно и во веки веков.

Молитва 7, чтомая в Николаевской Единоверческой церкви села Со́мовки, Нижегородския епархии

О добрый наш па́стырю и богомудрый наста́вниче, святи́телю Христов Нико́лае! Услы́ши нас грешных, моля́щихся тебѐ и призыва́ющих в помощь скорое предста́тельство твоѐ: виждь нас немощны́х, отвсю́ду уловля́емых, всякаго блага лише́нных и умом от малодушия помраче́нных: потщи́ся, уго́дниче Божий, не остави нас в грехо́внем плену быти, да не будем в радость враго́м нашым и не у́мрем в лука́вых деяниих наших. Молѝ о нас недостойных Соде́теля нашего и Влады́ку, Ему́же ты со безплотными ли́ки предстои́ши: ми́лостива нам сотворѝ Бога нашего в нынешнем житиѝ и в будущем ве́це, да не возда́ст нам по дело́м нашым и по нечистотѐ сердец наших, но по Своей благости воздаст нам. На твое хода́тайство уповающе, твоим предста́тельством хва́лимся, твое заступление на помощь призываем, и ко пресвятому о́бразу твоему припа́дающе, помощи просим: изба́ви нас, угодниче Христов, от зол находя́щих на нас, и укротѝ волны страстей и бед возстаю́щих на нас, да ради святых твоих молитв не обы́мет нас напа́сть и не погрязнем в пучи́не греховней и в тине страстей наших. Моли, святи́телю Христов Нико́лае, Христа Бога нашего, да пода́ст нам мирное житиѐ и оставление грехов, душа́м же нашым спасение и ве́лию милость, ныне и присно и во веки веков.

Тропарь, глас 4

Приспѐ день светлаго торжества, град барский радуется, и с ним вселенная вся ликовству́ет пе́сньми и пе́ньми духовными: днесь бо священное торжество, в пренесение честны́х и многоцелебных мощей святителя и чудотворца Николая, якоже солнце незаходимое возсия светозарными лучами разгоняя тьму искушений же и бед от вопию́щих верно: спасай нас яко предстатель наш, великий Николае.

Маиа 10. Молитва святому апостолу Си́мону Канониту или Зилоту. Из акафиста

Святый славный и всехвальный апостоле Христов Си́моне, сподо́бивыйся прияти в дом твой в Кане Галимлейстей Господа нашего Иисуса Христа и Его Пречистую Матерь, Владычицу нашу Богородицу, и пресла́внаго чудесѐ Христова самовидец быти! Молим тя с верою и любовию: умоли Христа Господа претвори́ти грехолюбивыя душы нашя в достойныя сосуды благодати: сохрани и соблюди нас молитвами твоими от искушений диавольких и падений греховных, и испроси нам свыше помощь во время уныния, да не преткнемся о камень соблазна, но неуклонно шествуем спасительным путем заповедей Христовых, до́ндеже достигнем о́ных блаженных обителей райских, иде́же ты ныне водворяешися и веселишися. Ей, апостоле Спасов! не посрами нас, кре́пце на тя уповающих, но буди нам помощник и покровитель во всем житиѝ нашем, и помозѝ нам благочестно житие сие временное скончати, благую же и мирную христианскую кончину получити и добраго ответа сподобитися на Страшнем Суде Христове: да избежавше мытарств воздушных и власти лютаго мiродержца, унаследуем Царство Небесное и прославим великолепое имя Отца и Сына и Святаго Духа во веки веков.

Маиа 10. Молитвы святителю Си́мону, епископу Влади́мирскому и Су́ждальскому, Печерскому чудотворцу. Из акафиста

Молитва 1

О священная главо̀, великий угодниче Божий, святителю Христов и чудотворче, преподобне и богоносне отче Си́моне! К тебе небесному заступнику и теплому предстателю нашему, и со упованием всеусердно молим тя: яви милосердие твое нам смиренным и грешным, и пролей теплыя молитвы твоя о нас ко Господу, Емуже со Ангелы и всеми святыми на небеси во славе вечней предстои́ши. Вемы, святче Божий, яко свойственно есть тебе милосердие, ибо, еще на земли живущу ти, едино имел еси попечение, еже спасти от погибели греховныя душы человеческия: темже убо потщи́ся, благосе́рде, предстоя страшному престолу Господа славы, о нашем спасении ходатай быти, да не погибнем лю́те со беззако́нии нашими. Веруем, отче преблаженне, яко ты, иже во время земнаго жития Христовою любовию ближния твоя возлюбил еси, кольмѝ паче лю́биши вся ны о Господе, на небесех водворя́яся: темже всеусердно молим тя, яко отца нам суща, да присно соблюдаеши ны под покровом твоим от всякаго зла. Ты, отче преподобне, не точию сам верою правою и благи́ми де́лы до́бре угоди́вый Господеви, но и иныя научивый право веровати и волю Божию творити, по неложному обетованию Христову, ве́лий наречен еси во Царствии Небеснем: темже убо настави и нас, данною тебе от Господа благодатию, тако веровати и тако путем заповедей Господних шествовати, да не то́чию николи́же на погибельный путь неверия уклонитися восхо́щем, но паче и иныя во правоверии утвердити и на путь истиннаго благочестия наста́вити потщимся. Еще же припадающе молим тя, угодниче Христов: предстательствуй ко Всемилостивому Владыце и Царю царствующих, да сохранит под покровом Своея благости, во здравии и непременя́емем благополучии, благочести́вейшего госуда́ря нашего, императора Николая Александровича весь царствующий дом, и да избавит их от всякаго злаго обстояния: Церковь святую от ересей и расколов, державу же православно-российскую от всякаго мяте́жа, бра́ней и нестрое́ний да соблюде́т: да даст же пастырем Церкве святую ревность о спасении пасомых и просвещении неверных: да дарует начальствующым мудрость и силу, подчиненным усердие и благопокорливость, судиям прозорливость и нелицеприятие, супругам верность и единодушие, родителем разум и благочестие, чадом кротость и послушание, всем же лю́дем всяк дар коему́ждо благопотре́бен, вся́ку благовременну помощь во благих делех и вся ко спасению и славе Божией подобающая сохрани, отче преподобне, твоими богоприятными молитвами, царствующыя гра́ды, и вся гра́ды и ве́си державы российския, и град сей, от всякаго зла и нападений вра́жиих: вся же православныя люди, с любовию и упованием притекающыя к покрову твоему и благочестно покланяющыяся мощем твоим, осени небесным твоим благословением, и вся прошения их во благо исполни. Ей, угодниче Божий! не  презри молений наших, и не посрами нас от упования и чаяния нашего. Се бо мы недостойнии и смирении и многих грехов испо́лненнии, ведуще, яко грешники Бог не послушает, но аще кто богочтец есть и волю Его творит, того послу́шает, ко твоему прибегаем предстательству, да твоею помощию и заступлением, мирно и благочестно поживше на земли, сподобимся и небесных благ восприятия, славяще и превозносяще Отца и Сына и Святаго Духа, Единаго в Троице славимаго и покланяемаго Бога, и твое милостивное предстательство, во веки веков.

Молитва 2

О всехвальный и всечестный архиерею, святителю Христов, преподобне и богоносне отче Си́моне! Призри от высот небесных, идеже со Ангелы и всеми святыми Господу славы предстоиши, на нас недостойных и долу преклонных, смиренных же и грешных, ко многомощному предстательству твоему с верою, любовию и упованием притекающих. Простри молитвенно преподобнии руце твои ко Господу и Влады́це, и испросѝ от щедрода́тельныя Его благосты́ни и оставление согрешений наших вольных и невольных, здравие душевное и телесное, житие мирное и безмятежное, возду́ха благорастворе́ние, землѝ плодоно́сие, житейских потре́б дово́льство, во всем благое поспешение, и да не во зло обратим ддаруемая нам благая, но во славу пресвятаго имени Его и во спасение наше. Еще же припадающе молим тя: потщи́ся, благосерде, предстательствовати ко Господу Человеколюбцу, да избавит нас, по велицей Своей милости, от всяких бед и скорбей, от всяких недугов и болезней, от внезапныя смерти и от всех озлоблений, от всяких козней врагов видимых и невидимых и от всякаго зла: да укрепит в нас правую веру и благочестие нелицемерное, и да подаст нам крепость на преоборение страстей и похотей наших: да соблюдет нас от нечестивых и душепагубных учений неверия и суеверия, да всадит в сердца наша дух смиренномудрия и кротости, дух братолюбия и незлобия, дух терпения и целомудрия, дух святыя ревности о славе Божией и спасении ближних: да призрит благосердием на всяку душу, требующую благодатныя Его милости, и да дарует, по неизреченным щедротам Своего человеколюбия, болящым исцеление, скорбящым утешение, молодушным утверждение, унывающым одобрение, страждующым ослабу, бедствующым помощь, сирым покров, безприютным пристанище, обидимым защиту, злословимым терпение, уничиженным великодушие, гонимым заступление, оклеветаемым оправдание, и всем, во всяких ну́ждах и злостраданиих сущым, душевную отраду и скорое избавление. Ей, свя́тче Божий, бу́ди те́плый молитвенник и прилежный хода́тай ко Господу о всякой души верных, твоея помощи ищущих, да никтоже во уповании своем на тя посра́млен будет, но да обря́щут вси, предстательством твоим, во всяких обстояниих благодать и милость Всещедраго Бога, Емуже подобает всякая слава, честь и поклонение, ныне и присно и во веки веков.

Тропарь, глас 1

Житий преподобных отец Печерских синсателю известный, святителю Христов Симоне преблаженне, моли́ся прилежно с ними Христу Богу, да упра́вит в мире жизнь нашу, и в книги животныя да напишет ны, спасая душы нашя.

Маиа 11. Молитва святым равноапостольным Кириллу и Мефодию, первоучителем словенским. Из акафиста

О преславнии язык словенских учителие и просветителие, святии равноапостольнии Мефодие и Кирилле! К вам, яко чада ко отцем, светом учений и писме́н ваших просвеще́ннии и в вере Христове наста́вленнии, ныне усердно прибегаем и в сокрушении сердец наших молимся. Аще бо и завет ваших, яко чада непокори́вая, не соблюдо́хом, и о угождении Богу, якоже учи́сте, небрего́хом, и от единомыслия и любве, юже слове́ном, яко братиям в вере и по плоти, до́бре завеща́сте, отпадо́хом: оба́че, якоже дре́вле в житии вашем неблагода́рных и недосто́йных не отвраща́сте тщы, но благими за злая воздавасте, тако и ныне грешных и недостойных чад ваших молитвы не отврати́те, но яко ве́лие иму́щии дерзновение ко Господу, прилежно Того моли́те, да наставит и обратит нас на путь спасения, ра́спри же и раздо́ры, посредѐ единове́рных братий возника́ющыя, да умири́т, отпа́дшыя па́ки во единомы́слие приведе́т и всех нас единением духа и любве во единей, святей, соборней и апостольстей Церкви соединит. Вемы бо, вемы, яко много может молитва праведниче ко благосердию Владыки, аще и о грешных людех приноси́ма бывает. Не оста́вите убо нас унылых и недостойных чад ваших, ихже грех ради паства ваша, вами собра́нная, враждою разделяема и соблазны от иноверных прельща́ема, ума́лися, овцы же ея̀ словесныя разсеява́емы от волков мысленных вохищаются: дадите нам, молитвами вашими, о православии ревность, да ею возгрева́еми, оте́ческая предания до́бре сохраним, уставы и обычаи церковныя верно соблюда́ти потщи́мся, всяких лжеучений странных отбежим, и тако в житии богоугоднем на земли преспева́юще, жизни райския на небеси сподобимся, и тамо с вами вкупе Владыку всех, в Троице Единаго Бога, прославим во веки веков.

Тропарь, глас 4

Яко апостолом единонра́внии и словенских стран учи́телие, Кирилле и Мефодие богомудрии, Владыку всех молите, вся язы́ки словенския утвердити в православии и единомыслии, умири́ти мiр и спасти душы нашя.

Маиа 12. Молитва преподобному Дионисию, архимандриту Сергиевы Лавры, Радонежскому чудотворцу

От младых ногтей возлюбивый Христа, преподобне Дионисие! Сотворѝ молитвами твоими, да и наша сердца священным любве Божия огнем пламенеют, теплотою веры возжига́ема. Ты, яре́м евангельский на ся возложив и яко благ и ле́гок той обрет, до конца путь твой терпели́вно совершил еси, яко победитель венца̀ от Бога сподобился: помози убо и нам тяжкое бремя жития сего мужественно понести, и веру до конца соблюдшым, милосердаго от Бога воздаяния сподо́битися. Тщательный и ревностный звания своего исполнитель быв, помози и нам звания наша неослабно проходити. Многия козни и страдания от злокозненных врагов великодушно претерпевый, святе Дионисие, и нам, сетьмѝ вражиими уловля́емым и в различныя искушения впадающым, свыше помощь на попора́ние оных молитвами твоими испроси. Ты, всегда постом, молитвами и бдением плоть твою умерщвляя, душу твою оживил еси и сию храм Животворящаго Духа соделал еси: и нас тебе подражати научи и время к покаянию и оставлению грехов наших улучи́ти сотвори. Ты о славе Церкве и Отечества верный  ревнитель был еси: исходатайствуй убо и ныне мир Церкви, Отечеству благоденствие, самодержавному царю нашему благословение, храму же сему всемощный Господень покров, да прославляем Прославльшаго тя Господа ныне и присно и во веки веков.

Маиа 13. Молитва святей праведней деве Глике́рии, яже в Новеграде, чтома в Новгородской Фло́ровской церкви

О блаженная дево Глике́рие, угоднице Христова! Услыши нас грешных, моля́щихся тебе. Приими молитву нашу и принеси ю̀ к Милостивому и Человеколюбцу Богу, Емуже ты ныне в радости святых и с лики Ангел предстои́ши. Умоли Его благосердие, да не осудит нас по беззаконием нашым, но да сотворит с нами по милости Своей: и испросѝ нам у Христа и Бога нашего мирное и безмятежное житие, здравие душевное и телесное, земли благоплодие  и во всем всякое изобилие и благоденствие, и да не во зло обратим блага́я, дару́емая нам от Всещедраго Бога, но во славу Его и в прославление твоего заступления. Даруй нам без порока прейти поприще временныя жизни, избави нас от воздушных мытарств и настави нас на путь веду́щий к селению праведных, идеже празднующих глас непрестанный, зрящих лица̀ Божия добро́ту неизреченную. Услыши моление наше, де́во Глике́рие, и моли непрестанно о нас Всесильнаго Бога Триипостаснаго, Емуже подобает всякая слава, честь и поклонение во веки веков.

Тропарь, глас 8

Вы́шния красоты̀ жела́ющи, ни́жния сласти телесныя дале́че от себе отринула еси, и нестяжание паче су́етнаго мiра возлюбивши, ангельское житие провожда́ла еси, Гликерие, де́во блаженная: моли Христа Бога спастися душа́м нашым.

Маиа 14. Молитва святому Иси́дору, Христа ради юродивому, Ростовскому чудотворцу, чтомыя в Ростовской Вознесенской церкви, Ярославския епархии

Молитва 1

О преблаженный и великий угодниче Христов, святый праведный Иси́доре! Восхваляя равноа́нгельное житие твое и преславная от честны́х мощей твоих истека́ющая чудеса̀ прославляя, ко святому гробу твоему припа́даю смиренно и во умилении зову: радуйся, пресветлая звездо̀, от запада прите́кшая и на восто́це просия́вшая: радуйся, отри́нувый правове́рие, уставы же православия до конца соблюды́й: радуйся, бы́вый яко бу́ий пред очи́ма мiра греховнаго, Божия же премудрости некрадо́мое сокровище стяжавый: радуйся, су́етная и тле́нная поправый, да восприи́меши венец нетления: радуйся, терпением древнему Иову уподо́бивыйся: радуйся, воине Христов непобедимый, до́блестно диавола победи́вый и вся стрелы лукаваго разжже́нныя угаси́вый: радуйся, многия и дивныя цельбы от святаго гроба твоего источаяй: радуйся, смиренному́дрием богатеяй и чистоты сосуд избра́н яви́выйся: радуйся, с верою призыва́ющым тя скорый помощниче и заступниче: радуйся, яко течение до́бре скончал еси, и веру непорочну соблю́л еси, и враги безплотныя терпением твоим попра́л еси, и мiрская су́етства препобеди́л еси. Сего ради и святая твоя чистая душа на небеса востечѐ радующися, праведных же ли́цы срето́ша тя веселящеся, и небесная селения светло восприя́ша: блаженное же и честно́е тело твое на землѝ пребывает нетленно, верным исцеления подая̀. Темже молим тя, богомудре Исидоре, да хода́тайствуеши о нас у Христа Бога, еже пребы́ти граду сему непоколеби́му и безмяте́жну, правоверному же императору нашему Николаю Александровичу на супоста́ты победу и одоление дарова́ти, и всем православным христианом здравие и благопоспешение пода́ти, да сподобимся вси милости и благодати Господа нашего Иисуса Христа, Емуже подобает слава и держава, ку́пно со Безначальным Отцем и с Пресвятым и Благим и Животворящим Его Духом, ныне и присно и во веки веков.

Молитва 2

О великий угодниче Божий, святый праведный Иси́доре! Помози мне грешному, всегда страстию греховною побежда́емому: ты бо еси предстатель и заступник, и скорый помощник в скорбех моих, и усердный хода́тай спасения моего. Ты верою правою и трудом твоим вечныя славы и Царствия Небеснаго сподо́бился еси, и ныне у престола Владыки всех, Царя Христа, Бога нашего предстои́ши. Темже и молю тя, страстотерпче праведный: помянѝ мя окаяннаго, в тине греховней валяющагося: уже бо немогу возвести очи мои к го́рнему Сиону, занѐ связан есмь сетьмѝ диавольскими и попече́ньми житейскими. Изба́ви мя молитвами твоими от всех злых наветов вражиих и от всякаго греха, да прииму̀ исцеление от язв греховных, от вселюте́йшаго змия наложе́нных мне. Все житие мое окаянный аз во сласте́х мiра сего изнури́х, и не и́мам помощника, и не вем к кому прибе́гнути, да подаст ми руку помощи. Сего ради к тебе прибегаю и си́це молюся: о святый праведный Исидоре! Подаждь ми помощь в день Страшнаго Суда: егда прии́дет Сын Человеческий суди́ти всех, тогда умоли Того Страшнаго и Нелицемернаго Судию, да не осудит мя по беззаконием моим, но да поставит одесную Себе по велицей милости Своей. Помоли́ся Владыце Христу Богу, да и в нынешнем веце милостив будет нам грешным и недостойным рабом Своим, и да утвердит мысль нашу, еже обрати́тися нам от всякаго зла, и соблюда́ти спасительныя Его заповеди, и прочее время жития нашего прейтѝ в покаянии и соблюдении Божиих заповедей, да достигше небесных обителей, непрестанно славим Единаго Триипостаснаго Бога, Отца и Сына и Святаго Духа, ныне и присно и во веки веков.

Тропарь, глас 4

Просвети́вся Божественною благодатию, богомудре, целомудрием многим и терпением во временней жизни течение до́бре скончал еси. Тем и по смерти явѝ тя светлость жития твоего: источа̀еши бо исцелений благодать притекающым с верою ко святому твоему гробу, Иси́доре блаженне. Моли Христа Бога, да  спасет душы нашя.

Маиа 15. Молитва преподобному Евфроси́ну, Псковскому чудотворцу

О свяще́нная главо̀, преподобне отче, преблаже́нне а́вво Евфроси́не! Не забу́ди убогих твоих до конца, но помина́й нас всегда во святых твоих и благоприятных молитвах к Богу. Помянѝ стадо Твое, еже сам упа́сл еси, и не забуди посещать чад твоих. Молѝ за ны, отче священный, за дети твоя духовныя, яко име́яй дерзновение к Небесному Царю: не премолчѝ за ны ко Господу, и не пре́зри нас, верою и любовию чтущих тя. Поминай нас недостойных у престола Вседержи́телева, и не преста́й моля́ся о нас ко Христу Богу: ибо дана тебе бысть благодать за ны моли́тися. Не мним бо тя су́ща мертва: аще бо телом и преста́вился еси от нас, но и по смерти жив сый пребыва́еши. Не отступа́й от нас духом, сохраняя нас от стрел вражиих и всякия пре́лести бесо́вския и ко́зней диавольских, па́стырю наш добрый. Аще бо и моще́й твоих ра́ка пред очи́ма на́шима ви́дима есть всегда, но святая твоя душа со ангельскими во́инствы, со безпло́тными лики, с небесными силами, у престола Вседержителева предстоя́щи, достойно весели́тися. Ве́дущи убо тя воистину и по смерти жива суща, тебе припа́даем и тебе молимся: моли́ся о нас Всесильному Богу, о пользе душ наших, и испросѝ нам время на покая́ние, да невозбра́нно пре́йдем от земли на небо, от мытарств же горьких, бесо́в воздушных князей и от вечныя муки да избавимся, и Небеснаго Царствия насле́дницы да будем со всеми праведными, от века угоди́вшими Господу нашему Иисусу Христу: Емуже подоба́ет всякая слава, честь и поклонение, со Безначальным Его Отцем, и с Пресвятым и Благим и Животворящим Его Духом, ныне и присно и во веки веков.

Тропарь, глас 4

Изволением Божественнаго разума в пустыню вселился еси, преподобне отче Евфроси́не, и та́мо впери́в ум твой в небесная, равноангельное житие пожил еси, в молитвах, бде́ниих и поще́ниих образ быв твоим учеником: темже и Христос Бог наш, ви́дяй твоя труды и подвиги, в небесная селения прият тя. Ныне убо, яко имеяй ко Господу ве́лие дерзновение, поминай стадо твое, еже собрал еси, богомудре, и моли Христа Бога спастися душа́м нашым.

Маиа 15 и иуниа 3. Молитвы святому благоверному царевичц Димитрию Угличскому, Московскому чудотворцу

Молитва 1, из древния рукописи

О преславный и дивный в чудесех, красото̀ мучеников, страстотерпче царе́виче княже Димитрие! Скоро предста́ни Небесному Царю и мученическия твои руце о нас грешных молебне к нему прострѝ, яко имеяй дерзновение вели́ко: сохрани же твоими молитвами град сей, и вся гра́ды и ве́си православныя, и благочестиваго царя нашего и супругу и чада его, и святейшыя патриархи и преосвященныя митрополиты, архиепископы и епископы и весь священный чин церковный, и в палате братию нашу, и вся православныя христианы: всех нас приими во твое заступление, от всех бед и зол избавляя, и от нашествия видимых и невидимых борющих нас врагов свобождая, и тех всяк навет и злохи́трство погубляя и отгоняя: таже прегрешений наших прощение испроси, и в век будущий Небеснаго Царствия нас сподо́би и спасе́нных Богу предста́ви, благодатию и человеколюбием Господа и Спаса нашего Иисуса Христа, Емуже честь и поклонение подобает ныне и присно и во веки веков.

Молитва 2, из тояже рукописи

О великий и милостивый страстотерпче, царевичу княже Димитрие! Услыши нас грешных, моление со усердием тебе приносящих, и помозѝ нам в жизни сей, от грехов, бед и скорбей избавляя, и в будущем веце буди помощник и заступник, от мучений а́довых свобождая и сподобляя ку́пно с тобою покланя́тися и воспева́ти Всесвятую Троицу, Отца и Сына и Святаго Духа, ныне и присно и во веки веков.

Молитва 3

О святый мучениче, благоверный царевичу и княже Димитрие! Яко агнец незлобив от раба заколе́нный, венцем царским от Господа венчался еси, и сын царев быв, мученик непобеди́мь яви́лся еси, и вместо земных и тленных на небесѝ нетленная восприя́л еси. И ныне предстоя в радости Святей Троице, посещай творящыя верно твою светоносную память: соблюдай оте́чествие твое и град твой невреди́мь, тому бо еси утверждение: утвердѝ православных жительство в мире глубо́це: междоусобную брань укротѝ: возвы́си благовернаго императора нашего, и вся полезная да́руй всегда людем твоим молитвами твоими, да верою и любовию вопием ти: радуйся, свя́те Димитрие, верных людей теплый заступниче и прибежище и земли Российския украшение.

Тропарь, глас 4

Царскую диадиму обагрил еси кровию твоею, богомудре мучениче, за скиптр крест в руку приим, явился еси победоносец, и жертву непорочну Владыце принесл еси себе: яко бо агнец незлобив от раба заколен еси, и ныне радуяся предстои́ши Святей Троице. Молися о державе сродников твоих богоугодней быти, и сыновом Российским спастися.

Маиа 15. Молитва преподобному Пахомию, Не́рехтскому чудотворцу, чтомая в Троицкой церкви села Сыпановой Слободы, Костромския епархии

О преподобне отче и святче Божий Пахомие! Бо́гови предстоя со Ангелы и преподобными лики, во святых твоих молитвах и нас грешных не забуди, но, яко добрый пастырь и отец наш, молися о благочестивейшем государе нашем, императоре Николае Александровиче всея России и о всех православных христианех, да подаст Господь Бог свыше победу и одоление царю нашему на вся противныя враги его и супостаты, и да устроит царство его в мире и тишине, и всякаго благоденствия его да исполнит. Не забуди и нас, святче Божий, да соблюдет нас молитвами твоими Господь во временней жизни и грядущаго вечнаго жительства нас да сподобит о Христе Иисусе, Господе нашем, Емуже слава, честь и поклонение, со Отцем и Пресвятым Духом, ныне и присно и во веки веков.

Маиа 16 и сентемвриа 26. Молитва преподобному Ефре́му Переко́мскому, чтомая в Новгородском Перко́мском монастыре

О преподобне и богоносне отче Ефре́ме, великий чудотворче и заступниче наш верный! Услыши молебныя гла́сы нашя, тебе усердно приносимыя, и воззрѝ на ны милостивно. Подаждь нам скорое от бед избавление, отими от сердец наших скорбь и сетование греховное, уврачуй душевныя нашя и телесныя немощи, и испросѝ нам у Всемилостиваго Бога грехов отпущение, и вся благая молитвами твоими свыше нам низпослѝ: тебе бо даде́ся благодать молитися за ны, и никтоже, с верою притека́яй к раце мощей твоих, от тебе безпомощен исходит. Тобою дуси нечи́стии от человек прогоняются, тобою здравие разсла́бленнии приемлют, и различными недуги одержи́мии исцелева́ют: ты всем врачь изящный и предивный явля́ешися и всех благая хотения исполня́еши. Сотвори убо, угодниче Христов, да и мы во обители твоей живу́щии, и вси с верою и любовию к тебе ныне прите́кшии и чудотворней твоей ра́це предстоя́щии, мирно и благоде́нственно временное житиѐ поживем, и в будущем ве́це Царство Небесное насле́дим, и вку́пе с тобою прославим Единосущную Троицу, Отца и Сына и Святаго Духа, во веки веков.

Тропарь, глас 4

От юности твоея весь Бо́гови порабо́тился еси, блаже́нне: и того ради любве, отечество и род оставил еси, в пустыню вселився: в нейже жестокое житиѐ показав, чудес дарования от Бога прия́л еси, Ефре́ме преподобне. Моли Христа Бога, да спасет душы на́шя.

Маиа 19. Молитвы преподобному Корнилию Коме́льскому

Молитва 1, из акафиста преподобному

О свяще́нная главо̀, земный ангеле, небесный человече, великий чудотворче, преподобне отче Корни́лие! К тебе днесь с верою и любовию усердно прибегающе, умиле́нно тя небеснаго предстателя нашего просим: явѝ нам смиренным и грешным любовь твою отеческую и многомо́щное твое заступление: се бо, грех ради наших, не дерза́ем со свободою чад Божиих проси́ти Господа и Владыку нашего о нужных нам на потребу, но тебе молитвенника к Нему благоприятнаго предлагаем, верующе несомненно, яко вся благая мо́жеши нам испроси́ти у благости Его. Испроси убо нам, угодниче Божий, у Всещедраго и Человеколюбца Бога веру правую, благочестие непоколебимое, покаяние совершенное, жития исправление, да прочее не прогневляем Господа нарушением святых Его заповедей, но сподо́бимся прощение грехов наших от Него получи́ти. Умоли, чудотворче святый, Царя царствующих и Господа господствующих дарова́ти мир и благострое́ние царству нашему всероссийскому, здравие же, спасение и на враги одоление благочести́вейшему, самодержа́внейшему, вели́кому госуда́рю нашему, императору Николаю Александровичу, яко да позна́ют вси противля́ющиися ему, яко с нами Бог и святии угодницы Его. Сохрани, святче Божий, молитвами твоими Церковь Христову от ересе́й и расколов, суеверия и неверия человеческаго, да цветет в ней святое православие и благочестие. Соблюдѝ от всякаго зла и обитель твою созда́нную, и вся живущыя и подвизающыяся в ней по твоим уставом, да цели и невредими пребудут от искушений врага спасения человеческаго. При́зри милостивно и на предстоящыя ра́це моще́й твоих и молящыяся люди, и вся прошения их во благо исполни: болящым исцеление, скорбящым утешение, бедствующым вспоможение скоро подаждь. Нам же всем здравие душевное и телесное, земли плодоносие, тихое и богоугодное житие, благую христианскую кончину и добрый ответ на Страшнем Суде Христове у Всемилостиваго Бога исхода́тайствуй, яко воистину име́яй ве́лие к тому дерзновение. Ей, отче! вемы, яко много может молитва твоя пред лицем Вседержителя Господа: сего ради крепко на тя уповаем, и на твоя святыя молитвы зело̀ надеемся, яко ты преведе́ши нас предстательством твоим в небурное пристанище спасения и наследники пока́жеши нас всесветлаго Царствия Христова. Не посрами убо, преподобне отче наш, упования нашего, но сподоби нас вкупе с тобою блаженства райскаго наслажда́тися, да славим, хвалим и величаем великую милость к нам Человеколюбца Бога, Отца и Сына и Святаго Духа, и твое благое отеческое заступление, во веки веков.

Молитва 2, чтомая в Корни́леево-Коме́льском монастыре, Вологодския епархии

О свяще́нная главо̀, преподобне отче, преблаженне Корни́лие! Тебе прославляем и тебе величаем мы гре́шнии, яко надежду нашу, источника чудес и великаго о людех предстателя, и смиренно припа́дающе молим тя: не премолчѝ вопия̀ за ны ко Господу, и не през́ри нас, верою и любовию чтущих святую память твою. Помяни у престола Вседержителя вся благоде́ющыя обители твоей, и не престай молитеся ко Христу Богу даровати им безмятежие и мир, изобилие плодов земных и возду́х благорастворе́н: вемы бо, яко много может молитва праведнаго поспешеству́ема во благое. О преизрядный угодниче Божий, необоримый наш заступниче! Якоже прежде малыми бра́шны во время гла́дное мног народ во твоей обители препита́л еси, си́це и днесь буди ал́чущым питатель, бедным помощник, скорбным уте́шитель, немощным врачь, старым укрепитель, юным наставник: и тако, святче Божий, отверзи всем людем дверь милосердия Божия. Аще и не́смы досто́йни зре́ти высоту небесную от множества неправд наших, но милостию твоею и молитвою сохрани ны от всякаго зла и лукаваго обстояния: помози нам, да не погибнем со беззако́ньми нашими, и испроси нам время на покаяние, во еже избежати гнева Божия и вечныя муки: подаждь нам вся яже ко спасению прошения, яко да твоим хода́тайством и предстательством Пресвятыя Владычицы Богородицы, милосердием же и благостию Своею Христос Бог наш сподобит вся ны Небеснаго Царствия наследники быти и славити Его, со Безначальным Отцем и Пресвятым Духом, во веки веков.

Тропарь, глас 4

От юности горящим желанием Божественныя любвѐ разжига́емь, житейския молвы̀ оставил еси, преподобне, ревнитель Анто́нию Великому быв: безмолвием и жестоким пребыванием последуя Христу, бдением и молитвами и постом образ был твоим учеником. Темже моли́ся Господеви Корнилие блаженне, спастися душам нашым.

Маиа 19. Молитва преподобному Корнилию Палеостровскому. Из службы преподобному

О преподобне отче наш Корнилие, великий угодниче Божий и скорый в беда́х предстателю! Не забу́ди, якоже обещался еси, посеща́ти нас чад твоих: аще бо телом от нас и отше́л еси, но духом с нами пребыва́еши. Молимся убо тебе, о преподобне: бу́ди предстатель за ны грешныя ко Господу Иисусу Христу и Пречистей Его Матери, Владычице нашей Богородице, да избавимся от глада, губительства, труса, потопа, огня и меча, от нашествия иноплеменных и междоусобныя брани, от внезапныя смерти и от всех враг видимых и невидимых. О преподобне отче Корни́лие! услыши нас грешных, молящихся тебе, изря́днее же в час сей со слезами припа́дающих к ра́це твоей: не отрини нас от твоего заступления. Аще бо и гре́шни есмы̀, но с верою притекаем к честно́му твоему гробу, и с любовию облобыза́юще честну́ю твою икону, уми́льно зовем: приими от нас недостойных молитву сию, яко кади́ло благовонное, яко жертву благоприятную, и умерщвленныя злыми делы и помыслы нашя душы оживѝ, преподобне, и просвети наши очи сердечныя, якоже болящым очеса̀ исцелил еси и зрети я̀ сотвори́л еси: и якоже страждущему во сне явился еси, и от разслабле́ния здра́ва соде́лав, во и́ноческий образ приве́л еси его, такожде и нас содержимых узами вражиими, имиже связа̀ нас злое наше произволе́ние, исто́ргни из глубины прегрешений наших, и к пути покаяния настави, и от сети диа́воли разреши милостивным твоим предстательством на веки веков.

Тропарь, глас 5

От юности, премудре, прилежно подвиза́вся, от Бога наставляемь, отечество твое град Псков оставил еси, и вселився в пустыню, во ото́це вели́каго е́зера Оне́га, иноки мудре собрал еси, и извещением Святаго Духа обитель согради́л еси, иде́же храм Пресвятей Богородице в похвалу Рождества Ея создал еси: струя́ми же слез твоих безплотныя врагѝ потопив, жития твоего целомудрием со ангельскими лики совокупился еси, преподобне отче Корни́лие, с нимиже Христа Бога молѝ спастися душа́м нашым.

Маиа 20. Молитва святителю Алексию, митрополиту Московскому и всея России

О пречестна́я и свяще́нная главо̀ и благодати Святаго Духа испо́лненная, Спа́сово со Отцем обита́лище, великий архиере́е, теплый наш заступниче, святителю Алекси́е! Предстоя̀ у престола всех Царя и наслажда́яся света Единосущныя Троицы и херуви́мски со Ангелы возглаша́я песнь трисвяту́ю, великое же и неизсле́дованное дерзновение имея ко Всемилостивому Влады́це, моли́ся па́ствы твоея̀ спастѝ люди, единоро́дный ти язык: помозѝ во бра́нех благочестивейшему, самодержавнейшему, великому госуда́рю нашему, императору Николаю Александровичу всея̀ России, и покорѝ ему вся проти́вныя врагѝ под но́зе его, мирно и безмятежно царствовати ему устро́й: благостояние святых церквей утвердѝ: архиере́и благоле́пием святительства украсѝ: мон́ашествующыя к подвиго́м добраго течения укрепѝ: царствующий град [сей и святую обитель сию] и вся гра́ды и страны́ до́бре сохранѝ, и веру святую непоро́чну соблюстѝ умолѝ: мир весь предстательством твоим умирѝ, от глада и па́губы избави ны, и от нападения иноплеменных сохранѝ: старыя уте́ши, юныя наста́ви, безумныя умудрѝ, вдовицы помилуй, сиро́ты заступѝ, младе́нцы возрастѝ, плененныя возвратѝ, немощству́ющыя исцели, и везде тепле призывающыя тя и с верою притекающыя к ра́це честны́х и многоцелебных моще́й твоих, усердно припа́дающыя и моля́щыяся тебе, от всяких напастех и бед хода́тайством твоим свободи, да зовем ти: радуйся, богоизбранный пастырю, звездо̀ всесветлая мысленныя тве́рди, тайнаго Сиона необори́мый сто́лпе, миродохновенный цве́те райский, всезлата́я уста слова, Московская похвало̀, всея России украшение! Моли о нас Всещедраго и Человеколюбиваго Христа Бога нашего, да и в день страшнаго пришествия Его от шу́иаго стояния избавит нас, и радости святых прича́стники сотворит со всеми святыми во веки веков.

Тропарь, глас 2

Яко сокровище пребогатое, многоле́тно в земли сокровенное, честны́я мо́щи твоя обрето́шася чудотворя́щыя, всеблаженне отче святителю Алексие, от них же врачевство̀ приемлюще обогащаемся, и Христа славословим, глаголюще: слава Прославляющему святыя Своя.

Ин тропарь, глас 4

Ангельских преемников архиереев сопресто́льниче, России всея пастырю и учителю, всеблаженне отче Алексие, Владыце [Владыке] всех моли́ся, мир пастве твоей дарова́ти, и спасение душа́м , и велию милость.

Маиа 21. Молитва святым благоверным князе́м Константину и ча́дом его Михаилу и Феодору, Му́ромским чудотворцем. Из акафиста

О храбрый во́ине и избранный воево́до Небеснаго Царя Христа, победи́вый прелесть идолослужения силою Святаго Духа и просветивый град Муром святым Крещением, святый благоверный кня́же Константи́не! Усердно предстояще честне́й ра́це многоцелебных моще́й твоих, со слезами молим тя, прося́ще прияти нам твоим к Богу хода́тайством грехов оставление. Предста́ни, святе, яко имеяй дерзновение ко Святей Троице, и подвигни с собою на молитву преудобренныя своя две отрасли, благовернаго князя Михаила, послушнаго тебе до смерти и яко незлобиваго агнца за Христа заколе́на бы́вша, и благовернаго князя Феодора, ревнителя благочестию. Испросите вашими молитвами благочести́вейшему, самодержа́внейшему, вели́кому госуда́рю нашему, императору Николаю Александровичу всея России, и всему ца́рствующему дому ми́р, здра́вие, долгоде́нствие и на врагѝ побе́ду и одоле́ние. Еще со слезами смиренно молим: сохраните блаже́ннии, невреди́мь град сей, егоже возлюби́сте и свободи́сте от работы демонов: обитель же сию, и живущыя и тружда́ющыяся в ней, соблюдите невредимы от всех ко́зней и стрел демонских. Даруйте, святи́и, царствующым градо́м, граду сему, великому граду и стране мирное и немятежное житие и изобилие плодов земных. По морю плавающым и путешествующым, и к раце мощей ваших с верою прибегающым, безбе́днии правителие бу́дите: от злых свобождение, мирное и радостное в домы их возвращение молитвами вашими да́руйте, да вси прибегающии с верою к цельбоносней ра́це моще́й ваших, исцеление душам и телесем своим приемлюще, прославляют вы, нашя заступники, сла́вяще Отца и Сына и Святаго Духа, ныне и присно и во веки веков.

Тропарь, глас 4

Константин днесь весело ликовству́ет престолу Святыя Троицы, видя отечествие свое, ма́стию духовною сияющее: емуже после́доваша Михаил и Фео́дор, сы́нове его, и мо́лятся всѝ триѐ вкупе о душах наших.

Маиа 23. Молитва святителю Леонтию, епископу Ростовскому. Из акафиста

О священная главо, преславный чудотворче, первопастырю святыя Ростовския Церкве, святителю отче Леонтие! К  тебе припа́даем и молимся мы смире́ннии и гре́шнии, и яко отца человеколюбиваго просим: вселѝ в сердца наша любовь твою, е́юже к Богу и ближним твоим в житии твоем преисполнен был еси, яко и душу твою за паству твою положил еси, мученически от идолослужителей пострадав. Научи нас, отче, тебе подражати верно, Бога и ближния нашя люби́ти искренно и заповеди Господни совершати непогреши́тельно: да и мы не и́менем токмо, но и всем житием нашим ча́да твоя яви́мся. Молися, угодниче Божий, ко Христу Богу о Святей Православней Церкви и державе Российстей, да пребудут в мире и благостоя́нии и процветают во благогчестии христианстем непоколебимы. Сохрани молитвами твоими императора нашего Николая Александровича всея России во здравии и долгоденствии, покоряя под но́зе его вся враги и супостаты. Соблюди царствующыя грады, град твой и вся грады и ве́си страны Российския невредимы от всякаго зла. При́зри благосердно на всяку душу христианскую, милости и помощи от тебѐ и́щущую: буди всем нам в болезнех цели́тель, в ско́рбех уте́шитель, в печа́лех изба́витель, в бедах помощник, в час смертный покровитель, да сподобимся и мы грешнии молитвами твоими спасение вечное получити и Царствие Христово унасле́довати. Ей, святителю Христов, не посрамѝ упова́ния нашего, еже по Бо́зе и Пресвятей Богородице на тя крепко возлагаем, но яви нам твое многомощное заступление, да хвалим, славим и величаем великое человеколюбие дивнаго во святых Своих Бога, Отца и Сына и Святаго Духа, во веки веков.

Тропарь, глас 4

Апостолом сопричастник и к Богу молебник верен, доброде́тельми восше́д на небесная, и любовь возложил еси к любящему тя, и неверныя люди обратил еси в веру. Тем ныне со ангелы ликуя, предстои́ши престолу славы всех Царя, Христа Бога: молися, святителю Леонтие, да спасет душы нашя.

Маиа 23. Молитвы преподобней Евфросинии, княжне Полоцкой. Из службы со акафистом

Молитва 1

О преподобная и приснопамятная, всехвальная мати Евфроси́ние, ангеле во пло́ти, богоизбра́нный сосу́де Святаго Духа, Церкве Христовы похвало̀ и украшение, монашествующих славо и уверждение, обители твоей и всей стране нашей помоще, покро́ве и защи́тнице! Ты яко древо, насажде́нное при исхо́дищих вод, плоды добродетелей твоих и благодатными дарова́нии Святаго Духа украше́нная яви́лася еси, наставница же де́лом и сло́вом, избра́нная, непоро́чная и до́брая. Услыши ны молящыяся тебе и призывающыя имя твое: и́маши дерзновение у Господа. Испроси нам преспеяние в жизни добродетельней: огради сердца наша верою, надеждою и любовию и страхом Божиим. Подай нам помощь во труде́х и ско́рбех наших: и якоже попечение имела еси в житии твоем о обители твоей и иночествующих, тако и ныне потщи́ся о нас, благопоспеши́ти нам во всем: и обитель твою оградѝ миром и защити от враг видимых и невидимых, да преуспевает и процветает в добродетелех. Изьмѝ ны от всякия ну́жды и тесноты̀, от лю́тых болезней и от нечаянныя смерти, и приведи ны ко истинному покаянию при исходе от жизни сея̀: испроси нам у Господа Бога кончину мирну, безболе́зненну, непосты́дну, Святых Таин прича́стну: и приведи ны чрез мытарства воздушная, да не похитят нас истязателие гро́знии по грехо́м нашым, но да твоим заступлением и помощию возмо́жем  безбедно проитѝ истяза́ние возду́шное, и милость получити, и предстати неосужденно страшному престолу, и на Страшнем Суде сподо́битися одесную стати праведнаго судии, и наследовати праведных часть. Ей, госпоже, всечестная мати, преподобная Евфросиние! помози нам молитвами твоими: огради нас и заступи от всяких козней вражиих, да сподобимся прейтѝ время жизни сея̀ непреткновенно и спасение получи́ти молитвами твоими у Христа Господа, Егоже и сподобимся пе́ти и славосло́вити, со Безначальным Отцем и со Святым Духом, во веки веков.

Молитва 2

О преподобная и богоносная мати наша Евфросиние! Предстояще престолу Пресвятыя Троицы, молися непрестанно о благочести́вейшем, самодержа́внейшем, вели́ком госуда́ре нашем, императоре Николае Александровиче всея России: о супруге его, благочестивейшей государыне императрице Александре Феодоровне, о матери его, благочестивейшей государыне императрице Марии Феодоровне, о наследнике его, благоверном государе цесаревиче и великом князе Алексии Николаевиче, и о всем царствующем доме: о святейшем правительствующем синоде и епископе нашем имярек: о всем священнем и иночестем чине, игумении же и сестра́х обители твоея: о военача́льницех и градонача́льницех и всех православных христианех: да хо́дим кийждо достойно звания нашего, в немже зва́ни быхом, и да будет земля наша земля добра̀, и вси живущии на ней род избра́н, царское священие, язык свят, людие обновления, ныне и присно и во веки веков.

Тропарь, глас 4

Подражающи дванадесятоле́тна дванадесятоле́тну Христу, учившему во святилищи, Божию слову последовала еси, Евфросиние: славу временную и земнаго обру́чника оста́вльши, и вся мирская презре́вши, краснейшему паче всех Христу себе уневе́стила еси: крест вземши, путем ангельскаго жития шествующи, и многия к нему наставляющи, во благоухании мира, в небесный чертог востекла̀ еси: идеже моли, Егоже возлюбила еси, о чтущих благочестно память твою.

Маиа 23. Молитва преподобному Паисию Галичскому

О священная главо̀, преподобне отче, преблаженне а́вво Паи́сие! Не забу́ди убогих твоих до конца, но помина́й нас всегда во святых твоих и благоприятных молитвах к Богу. Помянѝ стадо Твое, еже сам упа́сл еси, и не забуди посещать чад твоих. Молѝ за ны, отче священный, за дети твоя духовныя, яко име́яй дерзновение к Небесному Царю: не премолчѝ за ны ко Господу, и не пре́зри нас, верою и любовию чтущих тя. Поминай нас недостойных у престола Вседержи́телева, и не преста́й моля́ся о нас ко Христу Богу: ибо дана тебе бысть благодать за ны моли́тися. Не мним бо тя су́ща мертва: аще бо телом и преста́вился еси от нас, но и по смерти жив сый пребыва́еши. Не отступа́й от нас духом, сохраняя нас от стрел вражиих и всякия пре́лести бесо́вския и ко́зней диавольских, па́стырю наш добрый. Аще бо и моще́й твоих ра́ка пред очи́ма на́шима ви́дима есть всегда, но святая твоя душа со ангельскими во́инствы, со безпло́тными лики, с небесными силами, у престола Вседержителева предстоя́щи, достойно весели́тися. Ве́дущи убо тя воистину и по смерти жива суща, тебе припадаем и тебе молимся: моли́ся о нас Всесильному Богу, о пользе душ наших, и испросѝ нам время на покая́ние, да невозбра́нно пре́йдем от земли на небо, от мытарств же горьких, бесо́в воздушных князей и от вечныя муки да избавимся, и Небеснаго Царствия насле́дницы да будем со всеми праведными, от века угоди́вшими Господу нашему Иисусу Христу: Емуже подоба́ет всякая слава, честь и поклонение, со Безначальным Его Отцем, и с Пресвятым и Благим и Животворящим Его Духом, ныне и присно и во веки веков.

Маиа 24. Молитва преподобному Никите Сто́лпнику, Переяславскому чудотворцу. Из акафиста

О священная главо̀, преподобне отче, преблаженне Никито преподобномучениче! Не забу́ди убогих твоих до конца, но помина́й нас всегда во святых твоих и благоприятных молитвах к Богу. Помянѝ стадо Твое, еже сам упа́сл еси, и не забуди посещать чад твоих. Молѝ за ны, отче священный, за дети твоя духовныя, яко име́яй дерзновение к Небесному Царю: не премолчѝ за ны ко Господу, и не пре́зри нас, верою и любовию чтущих тя. Поминай нас недостойных у престола Вседержи́телева, и не преста́й моля́ся о нас ко Христу Богу: ибо дана тебе бысть благодать за ны моли́тися. Не мним бо тя су́ща мертва: аще бо телом и преста́вился еси от нас, но и по смерти жив сый пребыва́еши. Не отступа́й от нас духом, сохраняя нас от стрел вражиих и всякия пре́лести бесо́вския и ко́зней диавольских, па́стырю наш добрый. Аще бо и моще́й твоих ра́ка пред очи́ма на́шима ви́дима есть всегда, но святая твоя душа со ангельскими во́инствы, со безпло́тными лики, с небесными силами, у престола Вседержителева предстоя́щи, достойно весели́тися. Ве́дущи убо тя воистину и по смерти жива суща, тебе припадаем и тебе молимся: моли́ся о нас Всесильному Богу, о пользе душ наших, и испросѝ нам время на покая́ние, да невозбра́нно пре́йдем от земли на небо, от мытарств же горьких, бесо́в воздушных князей и от вечныя муки да избавимся, и Небеснаго Царствия насле́дницы да будем со всеми праведными, от века угоди́вшими Господу нашему Иисусу Христу: Емуже подоба́ет всякая слава, честь и поклонение, со Безначальным Его Отцем, и с Пресвятым и Благим и Животворящим Его Духом, ныне и присно и во веки веков.

Тропарь, глас 4

Православным смыслом юношеская возжеления возненавидев и доблественныя нравы восприи́м, врага победил еси и во благоразу́мии Богу угодил еси: и свыше от Него прием дар чудес, бесы прогоняти, недуги исцеляти, Никито преславне, моли Христа Бога, да спасет душы нашя.

Ин тропарь, глас тойже

Христову мученику тезоименит был еси, преподобне, многи подвиги и труды претерпел еси Христа ради, Егоже ради вери́ги носил еси, блаженне: Того ныне о нас моли, Никито преподобне, душевныя нашя и телесныя страсти уврачева́ти, верою и любовию почитающих присно память твою.

Маиа 25. Молитвы святому Пророку, Предтечи и Крестителю Господню Иоанну

Молитва 1, из книги: Акафисты с каноны

Крестителю Христов, проповедниче покаяния! Ка́ющагося не пре́зри менѐ, но совокупляяся с во́и небесными, молися ко Влады́це за мене недостойнаго, унылаго, немощна́го и печальнаго, во многия беды̀ впадшаго, утрежденнаго бурными помыслы ума моего. Аз бо есмь вертеп злых дел, отню́д не имея конца греховному обычаю: пригвожде́н бо есть ум мой земны́м ве́щем. Что сотворю? Не вем. И к кому прибегну, да спасена будет душа моя? Токмо к тебе, святый Иоанне, благодати тезоимени́те, яко тя пред Го́сподем по Богородице вем бо́льша быти рожде́нных всех: ибо ты сподо́бился еси косну́тися верху̀ Христа Царя, взе́млющаго грехи мiра, Агнца Божия: Егоже моли за грешную мою душу, да поне отныне, в первыйна́десять час, понесу тяготу̀ благую и прииму мзду с последними. Ей, Крестителю Христов, честный Предтече, крайний пророче, первый во благода́ти мучениче, постников и пустынников наставниче, чистоты̀ учителю и ближний дру́же Христов! Тя молю, к тебе прибегаю: не отрини мене от твоего заступления, но возстави мя па́дшагося многими грехи: обнови душу мою покаянием, яко вторым крещением, понеже обоих начальник еси, Крещением омываяй прародительный грех, покаянием же очищаяй коегождо от дел скверных. Очисти убо мя, грехмѝ оскверне́ннаго, и пону́ди внити, а́може ничтоже скверно входит, во Царствие Небесное.

Молитва 2

Святый Предтече и Крестителю Христов Иоанне! Проповедник сый покаяния, кающихся не презри нас, но моли́ся ко Владыце Христу за нас недостойных рабов, унылых, немощны́х, во многия грехи впа́дших. Смерти убо чаем, о гресе́х же наших николиже поболехом и о Царствии Небеснем не попекохомся: но не презри нас, Крестителю Христов, честный Предтече, бо́лий рожде́нных всех, постником и пустынником наставниче, чистоты̀ учи́телю и ближний дру́же Христов. Тя молим, к тебе прибегаем: не отрини нас просящих твоего заступления, обнови души нашя покаянием, еже есть второе крещение: твоим хода́тайством пред Господем испроси нам очищение грехов. Уста недостойная вопиют к тебе, и душа смиренная молится, сердце сокрушенное из глубины воздыхает: простри пречистую твою десницу и защити нас от враг видимых и невидимых. Ей, Господи Иисусе Христе! Молитвами святаго Иоанна Крестителя Твоего, изряднее же Пречистыя Твоея Матере, Владычицы нашея Богородицы, спаси нас грешных рабов Твоих, кающихся о гресѐ́х. Ты бо еси Бог кающихся, и на Тя Спасителя возлагаем надежду, сла́вяще пресвятое имя Твое, со Безначальным Твоим Отцем, и со Пресвятым и Благим и Животворящим Твоим Духом, ныне и присно и во веки веков.

Молитва 3

Крестителю Христов, честный Предтече, крайний пророче, первый во благодати мучениче, постников и пустынников наставниче, чистоты учителю и ближний друже Христов! Тя молю, к тебе прибегаю: не отрини мене от твоего заступления, но возста́ви мя па́дшагося многими грехи: обнови душу мою покаянием, яко вторым крещением: очисти мя, грехмѝ оскверне́ннаго, и пону́ди внити, а́може ничтоже скверно входит, во Царствие Небесное.

Тропарь, глас 4

Яко Божественное сокровище сокрове́нное в землѝ, Христос откры̀ главу̀ твою нам, проро́че и предте́че: вси убо соше́дшеся в сея обре́тение, пе́сньми богоглаго́ливыми Спаса воспои́м, спасающа нас от тления молитвами твоими.

Маиа 27. Молитва преподобному Ферапонту Можайскому или Белоезерскому. Из акафиста

О всечестный и преблаженный отче наш Ферапо́нте! Тебе даде́ся благодать молитися о нас, и вемы, яко, предстоя̀ престолу Господа, присно яляеши любовь твою к нам непреста́нными о нас твоими хода́тайствы. Но поне́же мы, ежечасно умножающе грехи нашя, кайняго твоего отвращения достойни сотвори́хомся, сего ради в покаянии, со слезами припа́дающе, молим тя: не пременѝ твоея милости к нам за нечестия и скверны нашя на гнев, но яви нам милость твою до конца, и согрешающыя ны очисти твоими молитвами, к покаянию возведи, на дела же благая ны укрепи и в православии и во всякой святыни нас сохрани. Даруй нас пребыва́ти в мире, тишине и братолюбии, испроси нам времена безмятежна и изобилие плодов земных, избави от огня и от потопления и от лютых болезней и от смертоносныя язвы. Послѝ труждающымся плод благий, путешествующым путь безпреткновенный, в мори плавающым пристанище тихое, плене́нным ослабу и свобождение, сирым помощь и заступление. Подаждь императору нашему во всем благопоспеше́ние, воинству нашему верность, мужество и победу и всем нам вся полезная во временней и вечней жизни, да любо́вию твоею огражде́ннии, благодарственная всегда поем проставившему тебя Господу Иисусу Христу, Емуже подобает всякая слава и честь, со Безначальным Его Отцем и с Пресвятым и Животворящым Его Духом, во веки веков.

Маиа 29. Молитва святому Иоанну, Христа ради юродивому, У́стюжскому чудотворцу

О святый блаженне Иоанне! Припа́дающе смиренно молимся тебе: приимѝ наше малое моление и умоли Всемилостиваго господа Бога нашего, да пробавит милость Свою нам грешным и да дарует нам вся к житию и ко спасению благопотребная. О угодниче Христов! аще и зело̀ недостойни есмы, оба́че духом сокрушенным и сердцем смиренным па́ки припа́дающе молимся тебе: предстательством твоим ко Господу, благопоспеши во всем благочести́вейшему госуда́рю нашему императору Николаю Александровичу, да́руя ему на вся враги победу и одоление: царствующыя же грады, град твой Устюг и вся гра́ды и ве́си Российския соблюди от всякаго зла и от всякия напасти, губительства, глада, труса, потопа, огня, меча, нашествия иноплеменников и междоусобныя брани, от всякия болезни и от всякаго обстояния, да поем и величаем всесвятое и великолепое имя Божие, и твое милостивное о нас предстательство, во веки веков.

Тропарь, глас 5

Наготою телесною и терпением обнажи́л вси вражия коварствия, обличая неподобное его деяние: зе́льне стражда̀ солнечный вар и нуждныя великия сту́дени, мра́за и огня не чу́л еси, Божиею помощию покрыва́емь, Иоанне премудре. О верою творящих память твою че́стно, и усердно притекающих к ра́це моще́й твоих, моли избавитися от бед и падения избежа́ти.

Маиа 30. Молитва преподобному Исаа́кию Далма́тскому

Православия ревнителю и е́реси обличителю, Це́ркве поборниче и иноков похвало́, преподобне отче наш Исаа́кие! К тебе во умилении сердец наших притекаем и твоея помощи ко спасению нашему просим. Ты бо пророку Божию Илии поревновал еси и царя злочестиваго небоязненно обличил еси: ты к познанию веры православныя того увещевал еси и от него поругания и злострадания ра́дуяся претерпел еси. Вразуми убо и нас молитвами твоими Евангельское благовестие неизменно соблюдати и всякой ереси противостоя́ти, искушением же от многострастныя плоти нашея, от мiра сего и от диавола бывающым проти́витися. Научи нас во храмех Божиих неле́ностно собиратися и по вся дни покаяние Господеви приноси́ти. Веруем и уповаем, угодниче Божий, яко не вотщѐ благолепнейшая во стране Российстей  церковь в царствующем граде нашем волею Божиею во твое имя создася, но да вси православнии, от всея страны нашея во храм сей притекающии, на подвиг твой взирающе, вере твоей подражают. Испроси убо, преподобне отче Исаакие, благоверному царю нашему здравие и спасение, на супостаты же одоление, пастырем Церкве о спасении верных ревность, всем же православным христианом в вере единомыслие и в любви преспеяние, усопшым же блаженное упокоение, да сия вся молитвами твоими восприе́млюще, купно с тобою прославим Бога, дивнаго во святых Своих, в Троице славимаго, Отца и Сына и Святаго Духа, ныне и присно и во веки веков.

В праздник Вознесения Господня и во вторый пяток по 29 дни иуниа. Молитва преподобному Антонию Лео́хновскому

Преподобне отче наш Антоние! Ты от юности твоея путем креста шествовати возлюбил еси, в молитвах и трудех, в пощениих и бдении и в безмолвии на всякий день и час неусыпно подвиза́яся и верный образ вруче́нней тебе от Господа братии бывая: темже и всего себе в жертву живу, святу и благоугодну Ему принес, толиких чудес дарования от Него сподобился еси, яко и стихиям повелева́ти, болезни телесныя и душевныя отгоня́ти, о Церкви и Отечестве нашем во благое призира́ти и промышля́ти. Егда же по кончине твоей и благоустроенное место сие врагов безбожных злодействием разорению и запустению предано бысть, храм же и обитель огнем сожже́ни, и братия мече́м посече́ни бы́ша, ты, велие дерзновение к Царю Небесному имея, паки хода́тайством твоим возсозда́тися храму сему, еще же и моще́м твоим святым, яко сокровищу многоценному, в нем положитися сотворил еси. Темже и мы, с верою стека́ющеся во храм сей и священную ра́ку твою любезно целующе, молим тя, известный наш хода́таю: не престай моляся ко Господу Богу нашему о совершающих память твою, да погасит он росою благодати Своея пламень страстей наших, да укрепит и препоя́шет ны̀ силою Своею свыше на видимыя и невидимыя враги нашя, от всяких недугов душевных и телесных нас избавляя и от всех зол сохраняя: паче же да укрепит и да возвысит благословенное царство помазаннаго Своего, благочести́вейшаго, самодержа́внейшаго императора Николая Александровича, верою и благочестием утверждая, истиною и правдою сие устрояя, изобилием благ и славою венчая, миром же и благостоянием ограждая: да тако мы вси, мирно и безмятежно пребывающе во всяком благочестии и чистоте, вкупе прославим пресвятое имя Отца и Сына и Святаго Духа, и твое милостивное о нас ходатайство, ныне и присно и во веки веков.

Месяц иуний

Иуниа 1. Молитвы преподобному Дионисию Глушицкому. Из акафиста

Молитва 1

О священная главо̀, предивный подвижниче, преславный чудотворче, преподобне и богоносне отче Диони́сие! К тебе прибегаем с верою и молимся с любовию от души: помоли́ся за ны грешныя ко Господу Богу, Создателю и Промыслителю нашему, и испроси нам от Него великия и богатыя милости: здравие, благоденствие, земли плодоносие, возду́ха благорастворение, мирное и безмятежное во благочестии житие, веры православныя умножение, царствию Российскому утверждение, благоверному императору нашему Николаю Александровичу на враги победу и одоление, обители твоей святей благоустроение, и всем подвизающимся в ней и на поклонение приходящым милость Божию и спасение. И паки припа́дающе к тебе, яко ча́да твоя, отца нам суща, просим: святыми молитвами твоими приведи нас в тихое пристанище жизни вечныя, и сподоби нас житие сие временное благочестно и богоугодно сконча́ти, мирную христианскую кончину получи́ти и унасле́довати Царствие Небесное, человеколюбием, благостию и милостию Отца и Сына и Святаго Духа, в Троице славимаго Бога, твоим святым заступлением, во веки веков.

Молитва 2

О великий Христов угодниче, свяиый и многомощный наш предстателю и всея северныя Вологодския страны небесный покровителю, преподобне и преблаженне отче Диони́сие! Ты на небеси престолу Пресвятыя Троицы со Ангелы предстои́ши, зде же на земли, во всечестнем сем храме, святыми моща́ми твоими почива́еши, и данною ти свыше благодатию многоразличная соверша́еши чудеса, недужным исцеления подавая: ты святыя и преподобныя ученики стяжал еси на месте сем, Амфилохиа, Макариа, Тарасиа, Феодосиа, с ни́миже ныне радости нетленныя во обителех небесных наслаждаешися и на многомощныя молитвы за нас грешных сия вкупе с тобою подвизаеши. Призри убо милостивно на предстоящыя честне́й ра́це твоей люди, умиленно моля́щыяся и прося́щыя от тебе помощи и заступления. Прострѝ молитвенно ко Господу Богу преподобнии твои ру́це, и яко имеяй к нему велие дерзновение, испроси нам от него оставление согрешений наших вольных и невольных. В боле́знех страждущым да́руй исцеление, скорбящым утешение низпослѝ, бедствующым скорую помощь твою подаждь, всем же чтущым тя помилование и спасение и во всем благое поспешение исхода́тайствуй: да твоим святым предстательством получи́вше благодать и милость от Господа, Царствие Небесное унаследуем, и в купе с тобою и со ученики твоими прославим великое человеколюбие Триединаго Бога, Отца и Сына и Святаго Духа, во веки веков.

Молитва 3

О добрый наш пастырю и наставниче, святыя обители сея приснопомина́емый первоначальниче и основателю, преподобне отче Диони́сие! Па́мятующе любовь твою ко ученико́м твоим и твое попечение о их душевнем спасении, припа́даем ти и молимся: помозѝ и нам грешным, святыми молитвами твоими, покаянием очи́ститися от грехов наших и достойным явитися помилования и прощения от Господа и Создателя нашего. Соблюди предстательством твоим святую обитель твою и всю страну православно-российскую невредимы от всякаго зла, и вся люди, жительствующыя во обители твоей и на поклонение к тебе приходящыя во оную, осенѝ небесным твоим благословением, и в скорбех, беда́х и болезнех утешение, избавление и исцеление молитвенно им подаждь: да благодарно славим, хвалим и величаем Господа, дивнаго во святых Своих, чрез тебе нам благоде́тельствующаго и дивно в тебе прославльшагося Отца и Сына Святаго Духа, во веки веков.

Тропарь, глас 1

Божественною любовию от юности распаля́емь, Диони́сие преподобне, вся яже в мiре красная возненави́дев, Христа Единаго возлюбил еси: и сего ради во внутреннюю пустыню вселился еси, со зверьми живый, весь Христови. Отонудуже и всевидящее око, твоя труды видев, даром чудес и по преставлении обогатил тя есть. Темже вопием тѝ: молѝ непрестанно о всех нас, честну́ю память твою при́сно в пе́снех почитающих.

Иуниа 4 и в неделю жен мироносиц. Молитвы святым праведным Марфе  и Марии, сестра́м Лазаря. Из акафиста

Молитва 1

О святыя и всехвальныя ученицы Христовы, боголюбивыя Марфо и Марие! Умолите возлюбленнаго вами и вас возлюбившаго Сладчайшаго Иисуса, Егоже вы исповедали естѐ Христа Сына Божия, да даст и нам грешным грехов оставление, в вере пра́вей нелицемерное и твердое стояние. Вселите в сердца наша дух страха Божия, смиреннаго на Бога упования, терпения и ко ближним милосердия. Изба́вите нас молитвами вашими от искушений житейских, бед и напастей да тихое и мирное житие пожи́вше зде, с помыслы непорочными и сердцем чистым, со дерзновением веры и упования предстанем на оный Страшный Суд, и добрый ответ на нем возда́вше, радости неизреченныя во Царствии Небеснем сподобимся во веки веков.

Молитва 2, единыя жены молящыяся, наипаче в келлии наедине чтомая

О блаженныя и святыя жены, верою и любовию Христу Богу последовавшыя и во обители Отца Небеснаго вселившыяся! К вам ныне аз грешная имярек прибегаю и смиренно молю: научите мя и помозите ми ходити пред Богом путьмѝ вашими непреткновенно и вечную купно с вами жизнь наследовати. О Марфо праведная, твердым исповеданием веры твоея Христу угодившая, укрепи слабую веру мою. О службе Господу и братиям нелицемерне и всеусердне прилежавшая, помози и мне служение мое безропотне и вседушевне проходити. Сестру твою не́когда, в скорби су́щу, к Христу воззва́ла еси, о́тай ре́кши: Учитель пришел есть и глашает тя. Ныне убо предстани мне в трудный час испытания веры и любвѐ моея̀: и во глубине се́рдца возвестѝ ми, яко Господь Иисус грядет, да путем испытаний привлечет мя к Себе. Испроси мне, о мати святая, у Господа нашего силу и крепость, да, возставши скоро, притеку̀ к Нему, поклоню́ся Ему и во смиренней любви Его мир и спасение души обря́щу.

И ты, о богоглаголивая Марие, у ногу̀ Иисусову единое на потребу обретшая, помолися Ему благую часть спасаемых и мне грешней улучити. Ми́ро благовонное в дар благодарения Христу Жизнодавцу принесшая, умоли ныне Его и души моей пода́ти ми́ро молитвы и покаяния сле́зы, чистоты и добрых дел благоухание, яко да во обновле́нное всеми сими сердце мое Господь приидет и обитель Себе сотворит.

К вам, о святыя праведныя жены̀ Ма́рфо и Мари́е, припа́даю и смиренно молю: не оставите мя во дни тяжких испытаний, да не соблазню́ся тленными и красными мiра сего, наипаче же в час горький разлучения души моей с телом предста́ните мне, и общаго Владыку нашего умоли́те, да призрит на мя во оскудении сил моих милостивым оком, и простив вся согрешения моя, возста́вит мя к жизни нескончаемей во блаженных обителех Отца Небеснаго. Аминь.

Тропарь, глас 3

Праведнаго Ла́заря боголюбивыя сестры̀, Ма́рфо и Мари́е преславныя, чистым сердцем Христа в житии вашем возлюбили естѐ, мироносиц взе́мшя чин, и Его, яко Сына Божия, безбоязненно исповедали естѐ: сего ради ныне во обителех Отца Небеснаго со Ангелы и всеми святыми славно царствуете, умоли́те, Егоже возлюбили естѐ, и нам грешным в вере и любве Христове утверди́тися и Царствия Небеснаго сподо́битися.

Иуниа 4 и 14. Молитвы преподобному Мефо́дию Пе́шношскому. Из службы со акафистом

Молитва 1

О священная главо̀, земны́й ангеле и небесный человече, преподобне и богоносне отче наш Мефо́дие! Припа́даем к тебе с верою и любовию, и молимся прилежно: явѝ нам смиренным и грешным святое отеческое твое заступление: се бо, грех ради наших, не и́мамы свободы чад Божиих просити о потребах наших Господа и Владыку нашего, но тебе молитвенника благоприятнаго к Нему предлагаем, и со усердием многим тя просим: испросѝ у благости Его благопотре́бныя да́ры душа́м и телесе́м нашым: веру пра́ву, надежду спасения несомне́нну, любовь ко всем нелицеме́рну, во искушениих мужество, в злострада́ниих терпение, в молитвах постоянство, душ и телес здравие, землѝ плодоносие, возду́ха благорастворе́ние, житейских потреб довольство, мирное и безмятежное житие, благую христианскую кончи́ну и добрый ответ на Страшнем Суде Христове. Наипаче же испроси, угодниче Божий, у Царя царствующих и Госпда господствующих благочести́вейшему, самодержа́внейшему, вели́кому госуда́рю нашему, императору Николаю Александровичу всея России, здравие, спасение и на враги одоление, и всему богохрани́мому царству его мир, тишину, благостроение. Не забу́ди, святче Божий, и обитель твою святую, тобою созда́нную и присно тя чтущую, но соблюди ю и вся живущыя и подвизающыяся в ней и на поклонение в ню приходящыя от искушений диавольских и всякаго зла невредимы. Ей, преподобне отче! Не лиши нас помощи твоея небесныя, но молитвами твоими всех нас приведи во пристанище спасения и наследники яви нас быти всесветлаго Царствия Христова, да поем и славим неизреченныя щедроты Человеколюбца Бога, Отца и Сына и Святаго Духа, и твое святое отеческое заступление, во веки веков.

Молитва 2

О великий угодниче Христов и преславный чудотворче, преподобне отче наш Мефо́дие! При́зри на ны грешныя, обурева́емыя триволне́ньми житейских страстей и к тебе вопиющыя: мы бо, чада твоя духовная и ограды твоея словесныя овцы, на тя по Бозе и Богородице упование наше возлагаем, и тя со умилением просим: твоим хода́тайством к Господу Богу испроси нам мир, здравие, долгоденствие, воздуха благорастворение, земли плодоносие, дожди благовременны, и вся ны избави от всяких бед: града, глада, потопа, огня, меча, вредоноснаго че́рвия, снеда́ющаго плоды земныя, тлетво́нных ве́тров, смертоносныя язвы и нечаянныя смерти, и во всяких ско́рбех и печалех наших буди нам уте́шитель благий и помощник скорый, сохраняя нас молитвами твоими от падений греховных и сподобля́я наследники быти Царствия Небеснаго: да прославляем вкупе с тобою всех благ Подателя, в Троице славимаго и покланяемаго Бога, Отца и Сына и Святаго Духа, во веки веков.

Тропарь, глас 8

Божественною любовию от юности распаля́емь, вся яже в мiре красная возненавидев, Христа Единаго возлюбил еси, и сего ради в пустыню вселився, в ней обитель сотворил еси, и собрав инок множество, приял еси от Бога чудес дар, отче Мефо́дие, и был еси о Христе собеседник и спо́стник преподобному Сергию, с нимже у Христа Бога испроси благоверному императору нашему Николаю Александровичу здравие и спасение и душа́м нашым велию милость.

Иуниа 5 и 12. Молитва преподобным Вассиа́ну и Ио́не, Пертоминским чудотворцем. Из службы

О преподо́бнии и всечестни́и отцы Вассиа́не и Ио́но, угодницы Христовы блаженнии и чудотворцы пресла́внии! Постничеством Богу пе́рвее угодивше и де́лы благочестно на землѝ подвиза́вшеся, яко свети́ла светлая по смерти в мiре возсиявше, просвещающе верныя чудес светлостию, вы заступницы те́плии показа́стеся: многия бо в ско́рбех и беда́х страждущыя и погибнути имущыя, здравы сохранисте, не послу́шавшыя же завещания вашего и маловерующыя отмсти́тельне наказа́сте, и прежде заблуждшей женѐ путевождѝ бысте, и ослепшему паки прозрение даровасте, дерзостне же коснувшагося целебных мощей ваших внезапно отринусте, и разслаблением наказавше поми́ловасте. К сим же и иная преславная соде́ласте, и бывшее во обители вашей оскудение сугубо испо́лнисте, и сию доныне неразори́му соблюдо́сте. Молимся убо ныне вам, о преблаже́ннии отцы: услы́шите моление наше, не пре́зрите нас, в беда́х и ско́рбех призывающих вас верою, бу́дите помо́щницы нам ско́рии и покровителие вернии. Сохраните же во здравии и тишине православнаго императора нашего Николая Александровича молитвами вашими, и царство его непоколебимо соблюдите. К сим же и духовнаго о вас собрания не оста́вите, но моли́теся присно о нас к Господу, да молитвами вашими грехов прощение получим и Царствия Небеснаго сподобимся благодатию Его. Яко тому подобает всякая слава, честь и поклонение, ныне и присно и во веки веков.

Тропарь, глас 8

Прежде отвержением мiра, яко морска́го треволнения, избего́сте, отцы преподобнии: по́слежде же изволением Божиим в вода́х морских кончину блаженную прия́сте, и к неболезненному поко́ю преста́вистеся от земли ра́дующеся. Тем и по кончине от Христа Бога просла́вистеся чудесы обильно, те́плии в беда́х верным помощницы [помощники] показа́стеся. И ныне на небесех предстояще престолу Христову, Вассиа́не преблаженне и Ио́но преславне, моли́теся при́сно о душа́х наших.

Иуниа 6. Молитва преподобному Паисию У́гличскому

О преподобне отче наш Паисие: не забу́ди убогих твоих до конца, но помина́й нас всегда во святых твоих и благоприятных молитвах к Богу. Помянѝ стадо Твое, еже сам упа́сл еси, и не забуди посещать чад твоих. Молѝ за ны, отче священный, за дети твоя духовныя, яко име́яй дерзновение к Небесному Царю: не премолчѝ за ны ко Господу, и не пре́зри нас, верою и любовию чтущих тя. Поминай нас недостойных у престола Вседержи́телева, и не преста́й моля́ся о нас ко Христу Богу: ибо дана тебе бысть благодать за ны моли́тися. Не мним бо тя су́ща мертва: аще бо телом и преста́вился еси от нас, но и по смерти жив сый пребыва́еши. Не отступа́й от нас духом, сохраняя нас от стрел вражиих и всякия пре́лести бесо́вския и ко́зней диавольских, па́стырю наш добрый. Аще бо и моще́й твоих ра́ка пред очи́ма на́шима ви́дима есть всегда, но святая твоя душа со ангельскими во́инствы, со безпло́тными лики, с небесными силами, у престола Вседержителева предстоя́щи, достойно весели́тися. Ве́дущи убо тя воистину и по смерти жива суща, тебе припадаем и тебе молимся: моли́ся о нас Всесильному Богу, о пользе душ наших, и испросѝ нам время на покая́ние, да невозбра́нно пре́йдем от земли на небо, от мытарств же горьких, бесо́в воздушных князе́й и от вечныя муки да избавимся, и Небеснаго Царствия насле́дницы да будем со всеми праведными, от века угоди́вшими Господу нашему Иисусу Христу: Емуже подоба́ет всякая слава, честь и поклонение, со Безначальным Его Отцем, и с Пресвятым и Благим и Животворящим Его Духом, ныне и присно и во веки веков.

Иуниа 6. Молитва преподобному Ио́не, Кли́меницкому чудотворцу, чтомая в Свято-Троицком Кли́меницком монастыре, Оло́нецкия епархии

О преподобне и богоносне отче наш Ио́но! Ты, куплю житейскую еще совершая и по вода́м е́зера Оне́га плавая бурею на луду водну́ю извержен был еси, и на бре́зех сих тихое пристанище от волнений житейских обрел еси. Темже и неленостно во трудех, молитвах и слезах Господа ради подвизаяся, ку́плю духовную добре совершил еси, и купец премудр Царствия Небеснаго явился еси, и ныне во дво́рех небесных весели́шися, ду́хом твоим неотсту́пен от оби́тели Кли́меницкия пребывая, идеже многотрудное твое тело почи́ет. Темже и плавающым по водам онежским путь указуеши и от потопления воднаго избавляеши многажды чудесне призывающым тя являяся, и всем скорый помощник и теплый молитвенник бываеши. И ныне к раце мощей твоих смиренно припа́дающе, прилежно молим тя, угодниче Божий: призри на ны окаянныя и непотребныя, морем грехов потопляемыя, и бурею душетленных страстей волнуемыя, и с кораблем душетленным на луде злых обычаев сокрушаемыя. Буди о нас хода́тай ко Господу, к Немуже дерзновение доброе стяжал еси: пролей к Нему теплую молитву твою, да ути́шит бурю страстей наших, и хла́дная сердца наша огнем Божественныя любве Своея да согреет, и тако да сподобит нас теплое покаяние ему приносити, оста́нок же дней наших благоугодне пред Ним пожити, труды же и скорби жития сего терпеливно, безро́потне и со благодарением понестѝ: егда̀ же приспе́ет страшный час исхода нашего от сего жития, да поможет нам грозная мытарства воздушная неудержа́нно миновати, нижѐ рыка́ющым мысленным львом душы нашя поглоти́ти да попустит, но бездну грехов наших в мо́ри милосердия Своего да погрузит, и ради Своея неизрече́нныя любвѐ и милости в роду человеческому нас да помилует, причастники Своего Царствия соде́лав, и да сподобит тамо наслаждатися Его Божественною любовию, купно с тобою и со всеми святыми, во веки веков.

Иуниа 9. Молитвы преподобному Кири́ллу Белоезе́рскому

Молитва 1, из акафиста

О священная главо̀, преподобне и богоносне отче Кири́лле! Припа́даем к тебе с верою и любовию, и просим тя, небеснаго зступника нашего: яви велие милосердие твое нам смиренным и грешным, и пролей те́плыя молитвы твоя о нас ко Господу Богу. Свойственно есть тебе благосердие, святче Божий, ибо живущу ти на земли, едино бысть у тебе попечение, е́же спасати от погибели ду́шы челове́ческия, и вся твоя жизнь святая зерца́ло добрых дел явися, о нихже прославля́шеся в тебе Отец Небесный. К Тому велие дерзновение стяжав, испроси нам у благости Его веру правую, благочестие нелицемерное, покаяние истинное, братолюбие совершенное и преуспе́яние во всех благих де́лех. Исхода́тайствуй нам здра́вие душевное и телесное, земли плодоносие, возду́ха благорастворение, мирное и безмятежное житие, непостыдную христианскую кончину и добрый ответ на Страшнем Суде Христове. Сохрани Церковь святую и державу Российскую от бра́ней и нестроений. Посо́бствуй благочести́вейшему, самодержа́внейшему госуда́рю нашему, императору Николаю Александровичу, побежда́ти враги и супостаты его. Огради и обитель твою честну́ю от всякаго зла, и вся правоверныя люди, к тебе приходящыя и мощем твоим покланяющыяся, осенѝ небесным твоим благословением, и вся прошения их во благо исполни. Ей, отче, не пре́зри молитв наших, со умилением тебе возносимых, но буди о нас теплый предстатель ко Господу, и сподоби нас помощию твоею спасение вечное получити и Царствие Небесное унасле́довати, да славословим  велия щедроты и неизреченныя милости Отца Сына и Святаго Духа, в Троице покланяемаго Бога, и твое отеческое заступление, во веки веков.

Молитва 2, чтомая в Кирилло-Белоезерском монастыре, Новгородския епархии

О богоблаженне и преподобне отче наш Кири́лле, пастырю добрый и истинный строителю винограда Христова, отцем славо, преподобных совсе́льниче, иноком наставниче и общаго жития соверши́телю, ныне на небесѝ Святей Троице со всеми святыми предстоя́й! Молимся тебе при гробе твоем, яко человеколюбивому отцу нашему, и от сердца с любовию вопием: о преподобне отче Кири́лле, помяни стадо твое, еже му́дре собрал еси, и соблюди твоими молитвами Богом дарова́нную ти паству, и не пре́зри нас чтущих пречестную и многорадостную твою память: сохрани и соблюди нас от всех враг видимых и невидимых: очисти наша согрешения, и отженѝ от нас о́блак страстей, и просвети наши душевныя очи: гугни́вый язык наш исправи, смысл очисти и разум освяти: прииди посредѐ нас невидимо, и от всех нас моления Бо́гови возсылаемая приими, и донеси сия хода́тайственне всех Творцу и Изба́вителю, в Троице Святей покланяемому Богу нашему, яко да согрешений наших оставление получим, благодатию и человеколюбием Господа нашего Иисуса Христа, с Нимже Отцу и Святому Духу слава подобает, ныне и присно и во веки веков.

Тропарь, глас 1

Яко крин в пустыни Дави́дски процве́л еси, отце Кири́лле, злострастия терние искореня́я, и собрал еси в ней ученик множество, страхом Божиим и учением твоим наставляемых, ихже и до конца яко человеколюбивый отец не оставил еси посещая, да вси вопием: слава Давшему ти крепость,  слава Венчавшему тя, слава Действующему тобою всем исцеления.

Иуниа 11. Молитва преподобному Варнаве Ветлужскому, чтомая в Троицком соборе града Варна́вина, Костромския епархии

О преблаженне отче, преподобне Варна́во, теплый наш заступниче и всем с верою призывающым тя добрый помощниче! Избави нас молитвами твоими от всякаго обстояния бесо́вскаго: спаси нас окаянных от уст па́губнаго змия, ищущаго пожре́ти нас и свестѝ ко аду живот наш: исторгни нас от лютых страстей наших и всякия напа́сти, грех ради наших находя́щия: подаждь душа́м нашым утешение, всади в сердца наша страх Суда Божия, избави нас от враг видимых и невидимых: тебе бо теплаго молитвенника и заступника и́мамы о сущих в беда́х и во грехи впадших челове́цех. Явился бо еси столп благочестия, воздержания правило, смиренномудрия образ, целомудрия наставник, убогим и сиротам заступник и хранитель к тебе прибегающым. Кто бо по достоинству возможет равноангельное твое житие похвали́ти, или подвиги твоя и слезы ко Господу исчестѝ? Воистину яко солнца светлейша возсия́ша твоя исправления: ревнитель бо всем святым явился еси, праведных же учитель и благочестивому царю поборник и заступник. Всех убо нас в покаянии ко Господу приведи молитвами твоими, отче честне́йший, да и мы сподобимся вечных благ, идеже ты наслаждаешися небесныя славы желаемаго Иисуса Христа, Емуже подобает всякая слава, честь и поклонение, со Безначальным Его Отцем и со Пресвятым и Благим и Животворящим Его Духом, ныне и присно и во веки веков.

Иуниа 12. Молитвы преподобному Онуфрию Великому

Молитва 1

О преизящный и превеликий пустынножи́телю, преподобне отче Ону́фрие! Похваля́ю твоя неизреченныя чудотворения и житиѐ пресветлое, в немже от юности твоея даже и до старости подвизался еси: никтоже бо исчестѝ возможет подвиги твоя, прече́стне, но и преподобный Пафнутий твоему жесто́кому в путыни житию удиви́ся, вкупе же и зело возра́довася, обре́т тя толиких подвигов и совершенства су́ща образ. Сего ради и аз грешный славословие от недостойных усте́н моих тебе приношу: и друже Христов, ревнителю Илиѝ Фесви́тянину, Иоанну Крестителю наследниче, Египту умная красото̀, фиве́ом великое свети́ло, Ливи́и красная добро́то, фи́никсе красноцветущий, орлѐ высокопарный, в поднебесная вознося́йся, на небесех же гражданство обреты́й! Молю тя, пречудный святый ли́ков а́нгельских совсе́льниче: услыши мя грешнаго и недостойнаго в час сей, и приими сие малое моление мое, великий притекающым к тебе заступниче: рукописание дел моих скверных и нечистых молитвою твоею изгла́ди, твоим заступлением при́сно мя покрыва́й и ко угото́ванному верным пресветлому чертогу молитвами твоими приведѝ: ибо, по Преблагословенней Владычице нашей Богородице и Приснодеве Марии, тебе в теплейших помощницех и заступницех почитаю. Умолѝ убо Милостиваго Бога, да отпустит ми вся прегрешения моя вольная и невольная и вся злая дела̀ мною сотворе́нная, и да избавит мя твоим предстательством от вечных мук, и сподобит мя радости вечныя наслади́тися, купно со всеми святыми, во веки веков.

Молитва 2, чтомая в Яблочинском Свято-Онуфриевском монастыре, Холмския епархии

О пречудне и преблаженне угодниче Христов и а́вво наш, Ону́фрие Великий! Ты дивную любовь ко Господу твоему показал еси, и на дивныя подвиги благодатию Его укрепился еси, и сего ради ве́лия дерзновения к Нему сподобился еси: многа бо чудеса и знамения силы Божия людем о тебе яви́шася. Воззрѝ убо и ныне, отче предивный, благосердым о́ком любве твоея на ны недостойныя рабы̀, и да́руй всем по коего́ждо потре́бе, по вере же и упованию: скорбящыя обра́дуй, пла́чущыя уте́ши, неду́гующыя исцелѝ, тружда́ющымся помозѝ, борю́щыяся со страстьми и прило́ги вра́жиими укрепи и благослови, изнемогающыя поддержѝ, обитель твою и всех нас от враг видимых и невидимых и от всякаго зла сохрани. Возвели́чи веру святую православную во Отечествии нашем, обрати заблу́ждшыя, вразуми отпа́дшыя, утверди коле́блющыяся, умягчи упо́рствующыя, просвети неверныя, и вся приведи в тихое пристанище Отечествия Небеснаго. О предивная славо монашествующих и всех верных утешение! Славными подвиги твоими и сладким лицезрением чудотворнаго образа твоего и нас озари, и на всяк подвиг, труд и терпение укрепи во славу имени Божия, да спесе́ннии сподо́бимся с тобою и всеми святыми вечнаго и преблагослове́ннаго Царства славы Отца и Сына и Святаго Духа, ныне и присно и во веки веков.

Тропарь, глас 1

Желанием духовным пустыни достигл еси, богомудрие Ону́фрие, и яко безплотен в ней многоле́тне подвизался еси трудолю́бне, сревну́я пророком Илии и Крестителю: и от руку̀ а́нгельску таин Божественных насади́вся, ныне во свете Святыя Троицы купно с ними всели́шися. Моли спастися нам, твою память почитающым.

Иуниа 12. Молитва преподобному Ону́фрию Великому и Петру̀ Афо́нскому

Преподобнии и богоноснии отцы наши Ону́фрие и Пе́тре, светила земная пресветлая, от темных мест пещерных по всей земли славно просия́вшии, и сию многими светоза́рными подобонра́внаго себе жития звездами онебеси́вшии, и высоких добродетелей све́тлостьми и чудес Божественных блиста́ньми люди удиви́вшии. Се вы ныне, смертным за́падом плотски на время во гроб заше́дше, душами со Христом, Солнцем правды, пребыва́ете, и су́ще праведницы [праведники], просвеща́етеся яко солнце во Царствии Небеснем. Тамо убо моли́твенныя вашя к Богу свету лучы о всей вселенней простира́юще, не забывайте и ны, при́сныя вашя молитвенники, аще и в нощѝ страстей и скорбей пребывающыя, свыше благодатными призира́ти осия́нии: яко да во свете добродетельнаго вашего жития право ходя́ще, сподобимся зре́ти свет неприступныя славы Божия, хва́ляще Его купно с вами в нескончаемыя веки веков.

Иуниа 12. Молитва преподобному Арсе́нию Коне́вскому. Из службы преподобному

О преблаженне и богоносне Арсе́ние, отче наш! Сый во славе Небеснаго Царя Христа Бога, предстоя престолу Его со всеми Его святыми, не пре́зри нас до́лу сущих, грешных и недостойных, при честне́й ра́це твоей со слезами тебе молящихся, но приимѝ сердечное стенание и бренных усте́н моление сиѐ наше: тебѐ бо вси мо́лимся, о преподобне отче, и тебѐ умиленно просим, бу́ди о нас хода́тай и молитвенник теплейший ко Всеблагому Богу. Моли благость Его, от прегрешений наших, и́миже весть судьба́ми, спастѝ нас. моли́ся щедротам Его, еже подава́ти щедро оби́тели сей и всему мiру потребная. Молися Дающему всем мир, низпосла́ти мир це́рквам, собра́ти расточе́нная во еди́но, сохрани́ти державу благочести́вейшего императора нашего Николая Александровича в мире и тишине, и всякому верному в доме, и на пути, и на мо́ри, и повсю́ду дни бла́ги и безмятежны дарова́ти: благослови́ти труды отцев и братий наших, и прости́ти всех согрешения вольная и невольная: яко да сподо́бимся и мы грешнии вкупе с тобою сла́вити Отца и Сына и Святаго Духа, ныне и присно и во веки веков.

Тропарь, глас 1

Божественною любовию возгоре́вся, мiрская же пристрастия от души отри́нув, тесным путем постничества восле́д Христа невозвра́тным умом ше́ствовал еси, Арсе́ние преблаженне: от негоже и мзду трудов твоих на небесех восприи́м, поминай нас чтущих святую память твою и вопиющих: слава Давшему ти крепость, слава Венчавшему тя, слава Действующему тобою всем исцеления.

Ин тропарь, глас 4

Духом Божиим наставля́емь, возлюбил еси безмолвие, в Немже евангельски подвиза́ющуся, пречудный афонский дар, Богоматере икона, дарова́ся ти, преблаженне: и образ добродетелей быв стаду твоему, Арсение отче наш, к го́рнему торжеству возшел еси, идеже со Ангелы ликовствуя, моли Христа Бога спастися душам нашым.

Иуниа 12. Молитвы святей преподобней великой княгине Анне Кашинской

Молитва 1, из службы

О преподобная и преблаженная мати Анно! Смиренно припа́дающе к раце честных мощей твоих, молимся со слезами прилежно: не забуди убогих твоих до конца, но поминай нас всегда во святых твоих и благоприятных молитвах к Богу. О преблаженная великая княгине Анно! Не забуди посещати чад твоих: аще бо телом и преставился еси от нас, но и по смерти жива̀ пребываеши. Не отступай от нас духом, сохраняющи нас от стрел вражиих и всякия прелести бесовския и козней диавольских. Молитвеннице наша усердная! Не престай молящися за ны ко Христу Богу нашему: аще бо мощей твоих рака пред очима нашима видима есть всегда, но святая душа твоя, со ангельскими воинствы у престола Вседержителя предстоящи, достойно веселится. К тебе убо припа́даем и тебе молимся: молися, преблаженная Анно, Всемилостивому Богу нашему о спасении душ наших, и испроси нам время на покаяние, да невозбранно пре́йдем от земли на небо, от мытарств же горьких и от вечныя муки да избавимся, и Небеснаго Царствия наследницы да будем со всеми праведными, от века угодившими Госроду нашему Иисусу Христу, Емуже слава, со Безначальным Его Отцем, и с Пресвятым и Благим и Животворящим Его Духом, ныне и присно и во веки веков.

Молитва 2, чтомая в Петроградской Никольской Единоверческой церкви

Восхваляюще Господа Бога и Творца своего, прии́мшаго труды и подвиги угодницы Своея, благоверныя великия княгини Анны, немо́лчными усты̀ воспоем и восхва́лим: радуйся, преподобная и богоблаженная княгине А́нно, иже от юности своея̀ начал Богу работати и того святыя заповеди усердно в се́рдцы своем прияла еси, радуйся, пречестно́е селение и жилище Святаго Духа, иже всяку славу и честь и господство века сего оставила еси и до конца оплевала еси, и ни во чтоже яко уме́ты положила еси вся су́щая в мiре, и Христу Единому последовала еси, и его пресвятое иго на ра́ме носила еси, и многими добродете́льными де́лы угодила еси, радуйся, преподобная мати Анно, иже невозвратым путем шествовала еси по заповедем Владыки своего Христа, и ничтоже паче любве Его предпочтѐ: сего ради и Христос возлюбѝ тя, яко невесту прекрасную, и с мудрыми девами в черто́зе своем сочта́л тя есть, и по успении твоем соблюде пресвятое тело твое нетленно, душу же твою святую в премирная селения вселил, и многими чудесы обогатил тя есть, радуйся, крепкая помощнице отечеству своему и граду нашему и всей области великое утверждение, радуйся и веселися, угоднице
Христова, ты бо врачь показася всем приходящым с верою к цельбоносным мощем твоим и исцеля́еши страсти нашя неисце́льныя. Молися, святая, Христу Богу нашему, даровати благоверному царю нашему на враги победу и одоление, мiру спасение и всей Российской земли великое утвержение, яко да и мы молитвами твоими получим оставление грехов, житию исправление и Небеснаго Царствия наследницы будем, благодатию и человеколюбием Господа Бога и Спаса нашего Иисуса Христа, с нимже купно Отцу и Пресвятому и Животворящему Духу подобает всяка слава, честь и покланяние, ныне и присно и во веки веков.

Тропарь, глас 3

Днесь восхваляем тя, преподобная мати, великая княгине инокине А́нно: яко бо лоза̀ плодовита посредѐ терния, процвела еси во граде Кашине твоими добродетельми, всех удивила еси чудным твоим житием: темже Христу Богу угодила еси, и ныне радующися и веселящися пребываеши с лики преподобных жен, наслажда́ющися райския красоты̀ и весе́лия. Молим убо тя, моли о нас человеколюбца Христа Бога нашего, даровати нам мир и велию милость.

Иуниа 16. Молитва святителю Тихону, епископу Амафу́нтскому

О тричисленныя Троицы угодниче! О неистощимый источниче чудес! О небесныя добро́ты подобниче, святче Божий преблагий, избранниче Спасов, великий архиерею, преблаженне святителю Христов Тихоне, подсолнечную озаря́яй и удивляяй чудесы твоими! Всегда предстоя Святей Троице и моление принося о всем мiре, вся призыва́ющыя имя твое святое от всякаго недуга душевнаго и телеснаго исцели, испроси отпущение грехов их, греховныя мысли потреби, и всякую напасть и нашествие неприя́зненное диавола дале́че сотвори от молящихся тебе, и возста́ви ны от сна греховнаго, устрой ны, входящыя и во святый храм твой, здравы душа́ми и телесы, и добрыми делы сла́вящыя имя Пресвятыя Троицы, Отца и Сына и Святаго Духа, и твое молитвеное предстательство, всегда, ныне и присно и во веки веков.

Тропарь, глас 1

Пустынный житель, и в телеси ангел, и чудотворец явился еси, богоносне отче наш Ти́хоне: посто́м, бдением, молитвою небесная дарования прии́м, исцеля́еши недужныя и душы верою притекающих к тебе. Слава Давшему тебе крепость: слава Венчавшему тя: слава Действующему тобою всем исцеления.

Ин тропарь, глас 4

Образ был еси воздержания, Божественным Духом вся просвети́в, правоверием течение совершив, зловерныя обличил есѝ, отче наш святителю Ти́хоне: моли Христа Бога спастися душам нашым.

Иуниа 16. Молитва преподобному Тихоному, Калужскому чудотворцу. Из службы со акафистом

О священная главо̀, великий чудотворче, преподобне отче наш Ти́хоне, угодниче Христов преблаженне и преславне, Духа Святаго исполнение постников похвало, монашествующих славо, пустыни украси́телю, теплый о нас грешных молитвенниче! Ныне со ангельскими во́инствы предстоя у престола всех Царя славы Господа, и наслаждаяся света Единосущныя Троицы, и с го́рними силами трисвятую песнь воспевая, молися Всемилостивому Владыце спастѝ вся верующыя во имя его: испросѝ мир и тишину святым це́рквам низпосла́ти, вере православней укрепление, благочести́вейшему, самодержа́внейшему, вели́кому госуда́рю нашему, императору Николаю Александровичу, и всему наследию его здравие дарова́ти, и покори́ти им вся противныя язы́ки, брани хотящыя, видимыя и невидимыя враги низложи́ти, гра́ды нашя утверди́ти, мiр весь умири́ти. Моли Милостиваго Бога, да избавит твоим благоприятным хода́тайством вся православныя христианы от глада, губительства, труса, потопа, огня, меча, от нашествия иноплеменников и междоусобныя брани, старыя да подкрепит, юныя да наставит, немудрыя да умудрит, болящыя исцелит, плененныя и узники да свободит, сироты̀ засту́пит, младенцы воспитает, и вся люди от всех бед и напастей и от нападения вражия да сохранит, и от смертоносныя язвы и тлетворных ветр и от всякаго зла да избавит. Днесь же с верою приходящыя рабы Божия имярек, со страхом и любовию припа́дающыя ко святому гробу многоцелебных мощей твоих и образ подобия любезно целующыя, яко теплый наш заступник, сохранѝ, и в скорбных обстояниих им предста́ни, от душевных же и телесных страстей свободи: таже в день Страшнаго Суда от шу́иаго стояния избави, и с десны́ми овца́ми молитвами твоими стати сподоби и слышати блаженный о́ный глас Владыки Христа, Бога нашего: прииди́те, благословеннии Отца моего, наследуйте уготованное вам Царство от сложения мiра. Емуже подобает всякая слава, честь и поклонение, со Безначальным Его Отцем, и со Пресвятым и Благим и Животворящим Его Духом, ныне и присно и во веки веков.

Тропарь, глас 4

Яко светильник пресветлый явился еси в Российстей земли, преподобне отче наш Ти́хоне, в пустыни всели́вся, в нейже преходя̀ жестокое жительство, яко безплотен пожил еси: сего ради и чудес дарованием обогати тя Бог. Тем и мы, притекающе к ра́це моще́й твоих, умильно глаголем: отче преподобне, моли Христа Бога спастися душа́м на́шым.

Иуниа 16. Молитвы преподобному Ти́хону Лу́хскому

Молитва 1, из службы со акафистом

О священная главо̀, преподобне и достоблаженне отче Тихоне! Ты воистину муж желаний духовных и вторы́й Даниил показался еси. якоже бо оный древний пророк, высокою добродетелию и святостию жития своего, небесных видений и дивных откровений сподобися: сице и ты, преподобне, восхождения в сердце своем полагая, в добродетелех преспевал еси, и яко добрый и верный раб, в радость Господа твоего вшел еси. Темже и мы, яко духовная чада твоя, любовию побужда́еми, похвальная песнопения в честней памяти твоей тебе восписуем, и молитвенно на помощь нашей немощи призываем. К сим же смиренно молим тя, преподобне и преславне отче наш Тихоне: твоими благоприятными ко Господу молитвами заступѝ возлюбленную тобою пусты́ню сию̀, град же и весь: и вся, верою чтущыя святую память твою, от всякаго навета сопротивнаго, от всяких бед и напастей и всякаго зла сохрани. Молися, преподобне, о благочести́вейшем, самодержа́внейшем, вели́ком госуда́ре нашем, императоре Николае Александровиче всея России, о Христолюбивом его воинстве и о всей державе его. Умоли Милостиваго Бога и о нас смиренных и недостойных, да отпустит нам вся прегрешения наша, да спасет нас благодатию своею и сподобит радости вечныя наслаждатися в горнем оном Иерусалиме, иже есть ма́ти всем нам, купно с тобою и со всеми святыми, от века ему благоугодившими, в нихже в Троице славимый Бог благословен есть всегда, ныне и присно и во веки веков.

Молитва 2, чтомая в Николаевском Тихонове Лу́хском монастыре, Костромския епархии

О преподобне и богоблаженне отче Ти́хоне! Не забуди нас грешных чад твоих, во святую обитель твою притекающих и святыя и нетленныя мо́щи твоя присно чтущих. Се бо, цельбопода́тельный гроб твой взирающе, усердно к тому припа́даем, и с любовию целуем, и просим, да мо́лишися о нас грешных ко Пресвятей, Пречистей и Преблагословенней всех Царице, Матери Сына Божия, да хода́тайствует о нас Своими матерними к Сыну Своему молитвами. Но яко и сам предстои́ши у престола Владыки всех Царя, Христа Бога, прилежно тому молися, да избавит обитель и весь сию, град Лу́х всю Российскую страну от всяких бед и зол: удивѝ и на нас чудотворную милость твою, изба́ви и помилуй от всяких бед и зол присно вопию́щыя ти: радуйся, преподобне отче Ти́хоне, обители и веси сей и граду Лу́ху похвало и утверждение и России великое заступление, всегда, ныне и присно и во веки веков.

Тропарь, глас 4

Желанием духовным в пустыню всели́лся еси, и тамо невозвра́тно шествовав Божественными стезя́ми, достигл еси в небесныя обители: и ныне со Ангелы предстои́ши у престола всех Царя Христа Бога, Емуже прилежно молися помиловати обитель сию, град же и люди, верою празднующыя пречестную память твою, Тихоне преподобне, отче наш.

Иуниа 19. Молитва преподобному Варлаа́му Ва́жскому, чтомая в церкви Иоанно-Богословскаго прихода, Архангелогородския епархии

О преподобне отче, великий заступниче наш, скорый услы́шателю молящихся тебе, угодниче Божий и чудотворче Варлааме! Не забуди, якоже обещался еси, посещати чад твоих: аще бо телом и отше́л еси от нас, но духом присно с нами пребыва́еши. Молим убо тя, о преподобне отче: избави нас от огня и меча, от нашествия иноплеменных и междоусобныя брани, от тлетворных ветр и от внезапныя смерти и от всех прилог бесовских, находящих на ны. Услыши ны грешныя, и приимѝ сию молитву и моление наше в тебе, яко кади́ло благовонное и яко жертву благоприятную, ю́же мы недостойнии принесохом, и неисцельныя душ наших раны исцелѝ: и якоже дре́вле монаха твоея обители Никиту, от духов нечистых злѐ му́чима, вскоре уврачева́л еси, тако и нас, у́зами вражиими содержимых, молитвами твоими разрешѝ. Исто́ргни нас из глубины прегрешений, и на путь покаяния наста́ви, и от сети диаволи разреши милостивым твоим посещением, от видимых же и невидимых враг предстательством твоим нас избави: и помозѝ нам ныне в жизни сей, и во исходе душ наших, и в будущем ве́це, и во веки веков.

Иуниа 20. Молитвы святителю Гурию, архиепископу Казанскому

 Молитва 1, святителя Димитрия Ростовскаго. Из службы

О архиере́ю Божий, Гу́рие святый, предстояй ныне престолу Христову в Церкви торжествующей! Не забуди нас, празднующих любовию святую память твою, от горняго возшествия нашу назирай худость. Отче благий, призира́й милостивно на чада твоя: пастырю добрый, не пре́зри стада твоего, тобою Бо́гови приобре́теннаго. Аще и отлуче́н еси от грешник святынею твоею, оба́че не отлучайся от нас грешных милосердием, присутствуй нам твоими за ны к Богу молитвами. Виждь град, в не́мже много трудился еси, виждь народ, его́же просвети́л еси, и буди всем помощник, заступник, покровитель, защи́титель, промы́сленник же и упра́витель жизни нашея. Хода́таю теплый, не премолчѝ вопия̀ о нас ко Господу, испроси мир мíрови, тишину христианскому царству, держа́вствующему же одоле́ние, и всем временная и вечная благая.

Молитва 2. Из службы

О священнейшая главо̀, первый пастыренача́льниче и насадителю Казанския Це́ркве, Божественным апостолом и пе́рвейшым вселенским пастырем верный подражателю, присно предстояй Небесному Престолу Отца всех щедрот Бога и непрестанно наслаждаяйся Его присносущнаго света и любве! К тебе мы чада паствы твоея, яко не иму́щии дерзновения возноси́ти мольбы̀ нашя ко Господу Богу, усердно прибегаем, и мо́лимся вознести богоприятныя о нас мольбы твоя ко Всевышнему, да дарует всем нам пе́рвее всего житиѐ по святым Его за́поведем и прощение грехов: потом же да изба́вит нас в кратком нынешнем ве́це от находящих на нас, по грехом нашым, неблагорастворе́ния стихий, безплодия, глада, смертоносныя язвы, огня, истребляющаго наша жилища, всяких крамо́л, нашествия иноплеменных, и всех сопроти́вных нам видимых и невидимых сил, да дарует же мирное со здравием благоденственное житие, правительству нашему да да́рует прозоливость, нелицеприятие и праведный суд, священству твоея̀ паствы примерную святость, ве́дения чистыя истины, неохлажда́ющуюся и немздои́мную ревность к Божиим службам, слово зрелое, всегда готовое и со́лию растворе́нное, да непрестанно распространяется и укрепляется насажде́нная тобою вера православная, и да истреби́тся богоненави́стное заблуждение языческое, зловредное нечестие ага́рянское и вся е́реси и расколы дущепагубнии: да везде во твоей прежней пастве возглашается и славится всесвятое имя нашего Господа Иисуса Христа, со Безначальным Его Отцем, и с Пресвятым и Благим и Животворящим Его Духом, ныне и присно и во веки веков.

Молитва 3, из акафиста

Святителю отче Гу́рие! Предстояще священней раце многоцелебных моще́й твоих [или: честному образу твоему], молим тя усердно: буди всегда и повсюду наш хода́тай, заступник и покровитель. Исхода́тайствуй пастве твоей мир, тишину и благоденствие, здравие же и спасение. Бу́ди при́сный наш заступник от всех враг видимых и невидимых: покрывай нас от нахождения всех бед, напастей и скорбе́й, паче же от искушений врага те́мнаго. Предстоящым же зде и молящымся испросѝ у Господа Бога вся, яже ко спасению своему ти́и просят у него в своих ну́ждах и ско́рбех, да вси мы с тобою прославляем всесвятое имя Отца и Сына и Святаго Духа, ныне и присно и во веки веков.

Тропарь, глас 4, творение святителя Димитрия Ростовскаго

Яко крин благовонный, мироточи́выя твоя мо́щи от вертограда це́ркве Спасовы в вертоград це́ркве Богоро́дичны че́стне принесо́шася, святителю Гурие: якоже бо дар че́стен тя дарова̀ Христос Пречистей Матери Своей, и испо́лнися храм Ея святый благоухания твоего, и возра́довася архиерейский престол, приемый тя первоседа́теля своего. Возвеселися же собор верных со святителем и священноначальники о преславнем цельбоносных твоих моще́й пренесе́нии, еже мы радостно празднующе, мо́лим тя, угодниче Божий: моли Христа Бога пода́ти императору нашему на враги победу и мир, и душам нашым велию милость.

Иуниа 24. Молитвы святому пророку

Молитва 1, из книги: Акафисты с каноны

Крестителю Христов, проповедниче покаяния! Кающагося не презри мене, но совокупляяся с во́и небесными, молися ко Влады́це за мене недостойнаго, унылаго, немощна́го и печальнаго, во многия беды̀ впадшаго, утрежденнаго бурными помыслы ума моего. Аз бо есмь вертеп злых дел, отню́д не имея конца греховному обычаю: пригвожде́н бо есть ум мой земны́м ве́щем. Что сотворю? Не вем. И к кому прибегну, да спасена будет душа моя? Токмо к тебе, святый Иоанне, благодати тезоимени́те, яко тя пред Го́сподем по Богородице вем бо́льша быти рожде́нных всех: ибо ты сподо́бился еси косну́тися верху̀ Христа Царя, взе́млющаго грехи мiра, Агнца Божия: Егоже моли за грешную мою душу, да поне отныне, в первыйна́десять час, понесу тяготу̀ благую и прииму мзду с последними. Ей, Крестителю Христов, честный Предтече, крайний пророче, первый во благодати мучениче, постников и пустынников наставниче, чистоты учителю и ближний друже Христов! Тя молю, к тебе прибегаю: не отрини мене от твоего заступления, но возстави мя па́дшагося многими грехи: обнови душу мою покаянием, яко вторым крещением, понеже обоих начальник еси, Крещением омываяй прародительный грех, покаянием же очищаяй коегождо от дел скверных. Очисти убо мя, грехмѝ оскверне́ннаго, и пону́ди внити, а́може ничтоже скверно входит, во Царствие Небесное.

Молитва 2

Святый Предтече и Крестителю Христов Иоанне! Проповедник сый покаяния, кающихся не презри нас, но молися ко Владыце Христу за нас недостойных рабов, унылых, немощны́х, во многия грехи впа́дших. Смерти убо ча́ем, о гресех же наших николи́же поболе́хом и о Царствии Небеснем не попеко́хомся: но не презри нас, Крестителю Христов, честны́й Предтече, бо́лий рожде́нных всех, постником и пустынником наставниче, чистоты учителю и ближний друже Христов. Тя молим, к тебе прибегаем: не отри́ни нас просящих твоего заступления, обновѝ души нашя покаянием, еже есть второе крещение: твоим хода́тайством пред Господем испроси нам очищение грехов. Уста̀ недостойная вопиют к тебе, и душа смиренная мо́лится, сердце сокруше́нное из глубины воздыхает: прострѝ пречистую твою десницу и защити нас от враг видимых и невидимых. Ей, Господи Иисусе Христе! Молитвами святаго Иоанна Крестителя Твоего, изряднее же Пречистыя Твоея Матере, Владычицы нашея Богородицы, спаси нас грешных рабов Твоих, кающихся о гресех. Ты бо еси Бог кающихся, и на Тя Спасителя возлагаем надежду, славяще пресвятое имя Твое, со Безначальным Твоим Отцем, и со Пресвятым и Благим и Животворящим Твоим Духом, ныне и присно и во веки веков.

Молитва 3

Крестителю Христов, честный Предтече, крайний пророче, первый во благодати мучениче, постников и пустынников наста́вниче, чистоты̀ учителю и ближний дру́же Христов! Тя молю, к тебе прибегаю: не отрини мене от твоего заступления, но возста́ви мя па́дшагося многими грехи: обновѝ душу мою покаянием, яко вторым крещением: очисти мя, грехмѝ оскверне́ннаго, и пону́ди внити, а́може ничтоже скверно входит, во Царствие Небесное.

Тропарь рождеству Предтечи, глас 4

Пророче и Предтече пришествия Христова, достойно восхвали́ти тя недоуме́ем мы, любовию чту́щия тя: неплодство бо ро́ждшия и о́тчее безгласие разреши́ся славным и честны́м твоим рождество́м, и воплощения Сына Божия мíрови проповедуется.

Величание

Величаем тя, Предтече Спасов Иоанне, и чтем еже от неплодове преславное рождество твое.

Иуниа 24. Молитва святым праведным отроко́м Иоа́нну и Иа́кову, Меню́жским чудотворцем, чтомая в Менюжской церкви, Новгородския епархии. Из рукописнаго акафиста

О святии праведнии о́троцы Иоа́нне и Иа́кове, при́снии о предстоящих во храме сем молитвенницы [молитвенники]! Вы, от купели Святаго Крещения Богом избра́ни бывше, венце́м страдальческим от Христа украше́ни бы́сте: о нем во дивную кончину во младенчестве прияли естѐ. Молим убо вас, о святии: якоже некогда звероловцем, заблуждшым в чащи древе́с, путь правый указали естѐ и иноку болящему исцеление дарова́ли естѐ, тако и ны, ра́нами страстей болезненно одержи́мыя, от всякаго зла изба́вите. Внемли́те же горькому во́плю отцев и матерей, не́мощныя младенцы своя к честне́й ра́це моще́й ваших поверга́ющих, ускорите на помощь, облегчи́те скорби сердец их, недуги же теле́сныя, вкупе и душе́вныя уврачу́йте, и бу́дите стена̀ тве́рда и помощь кре́пка всем прося́щым вашего заступления. Храм же ваш святый от всякаго зла́го обстояния сохрани́те: обитателем ве́си сея хода́тайством вашим мир от Господа славы низпосли́те, изобилие же плодов земных и во трудех  наших благопоспе́шество нам подавайте: по кончине же Небесное Царствие получи́ти вся помощь вашу призыва́ющыя сподо́бите, иде́же всѝ пра́веднии вку́пе с вами хвалят пречестное и великолепое имя Отца и Сына и Святаго Духа во веки веков.

Тропарь, глас 1

Боле́зньми святых праведных о́троков Иоа́нна и Иа́кова, и́миже о тебе пострада́ша, умоле́н буди, Господи, и вся нашя недуги и страсти исцелѝ, Человеколюбче, мо́лимся.

Иуниа 25. Молитва святым благоверным князю Петру и княгине Февро́нии, Муромским чудотворцем. Из акафиста

О вели́цыи угодницы [угодники] Божии и преди́внии чудотворцы, благовернии кня́зе Пе́тре и княги́не Февро́ние, града Му́рома предстателие и хранителие, и о всех нас ко Господу усе́рднии молитвенницы [молитвенники]! К вам прибегаем и вам со упованием крепким молимся: вознеси́те о нас грешных святыя молитвы вашя ко Господу Богу, и испроси́те у благости Его вся благопотребная душа́м и телесе́м нашым: веру праву, надежду благу, любовь нелицемерну, благочестие непоколебимо, в добрых делех преуспеяние, мiра умирение, земли плодоносие, воздуха благорастворение, телесем здравие и душам нашым спасение. Исхода́тайствуйте у Царя Небеснаго благочести́вейшему, самодержа́внейшему, вели́кому госуда́рю нашему, императору Николаю Александровичу с долгоденствием душевное и телесное здравие, на враги же победу и одоление, Церкви святей и всей державе Российстей мир, тишину и благоустроение, и всем нам житие благополучное и добрую христианскую кончину. Оградите отечество ваше, град Муром, и вся гра́ды Российския от всякаго зла: и вся правоверныя люди, к вам приходящыя и святым моще́м вашым поклоня́ющыяся, осени́те благодатным действом благоприятных молитв ваших, и вся прошения их во благо испо́лните. Ей, чудотворцы святии! не пре́зрите молитв наших, со умилением вам днесь возносимых, но бу́дите о нас при́снии предста́телие ко Господу, и сподо́бите нас помощию вашею спасение вечное получи́ти и Царствие Небесное унаследовати: да славословим неизреченное человеколюбие Отца и Сына и Святаго Духа, в Троице покланяемаго Бога, во веки веков.

Тропарь, глас 8

Яко благочестиваго ко́рене пречестна́я о́трасль был есѝ, до́бре во благочестии пожи́в, блаженне Пе́тре: та́ко и с супру́жницею твоею, премудрою Феврониею, в мiре Богу угоди́сте, и преподобных житию̀ сподо́бистеся. С ни́миже моли́тися Господеви сохранити без вреда отечество ваше, да вас непрестанно почитаем.

Иуниа 27. Молитва преподобному Само́ну странноприимцу. Из акафиста преподобному

Молитва 1

О предстателю наш пред Господем и теплый молитвенниче, преподобне отче Само́не! Зри́ши с небесе, яко погибаем во обстояниих и скорбех: прилагается бо посреде нас неверие ко отсту́пству и разделению, оскудевает любы̀, умножаются же беззакония и соблазны, болезни и скорби множества бездомных, гладных и сирых. Откуду, отче, примем силы, да устоим проти́ву соблазнов мiра, сохраним в сердцах наших любовь и веру Христову и упование православных и приложи́м попечение о больных и бедных, аще не ты засту́пиши нас твоим предстательством теплым, прося нам помощи от Бога в не́мощех наших: сохрани убо молитвами твоими благомо́щие христолюбиваго государя нашего, императора Николая Александровича, крепость державы Российския, мир и безмятежие Святыя Це́ркве, всех же нас огради и сохрани непоколебимы посреде неверных, поносящих веру нашу хули́телей, огради от соблазнов, возбудѝ сердца имущих к милованию нищих, согреянию хладных, напитанию алчущих и призрению бездомных, утоли умножение скорбей и болезней, глада и прочих уязвляющих ны̀ бед, да́руй осла́бу страждущым младенцем, низпосли от Господа укрепление, утешение и отраду женам, в муках деторождения сущым, и всем, в тяжких работах, в больницах, в заточениих и темницах унывающым, да вси прославим в Троице славимаго Бога, Отца и Сына и Святаго Духа, во веки веков.

Молитва 2

Теплый молитвенниче, благостный отче, преподобне Само́не! Моли Бога о мне грешнем и низпослѝ от Всеблагаго Владыки помощь ми и избавление: привре́менна бо есть жизнь моя и исполнена труда, скорбей и болезней. Укрепѝ сердце мое, да возмогу понести тяготу̀ мою, и не попусти, да превозмо́гут искушения многая моя малыя силы, но споспешеству́й мне заступлением твоим, и посреде обстояний и бед управи путь мой в Царство Небесное, да славлю прославльшагося в тебе Господа во веки веков.

Тропарь, глас 8

В терпении твоем стяжал еси мзду̀ твою, отче преподо́бне, в молитвах непрестанно терпе́вый, нищыя возлюбивый и сия удобли́вый: но молися Христу Богу, Само́не милостивне блаженне, спастися душам нашым.

Иуниа 28 и иануариа 26. Молитва преподобному Ксенофонту Робе́йскому, чтомая в церкви Ксенофонтовы пустыни, Новгородския епархии

О преславне чудотворче, преподобне отче Ксенофонте, данною ти свыше благодатию различная источа́яй чудеса! При́зри милостивно на предстоящыя честне́й твоей ра́це люди и просящыя сильныя твоея̀ помощи, да твоими молитвами наставля́еми, маловременное житие совершим богоугодне и ненаве́тно от козней лукаваго диавола: и во исходе душ наших помози нам многогрешным изба́витися от воздушных мытарств и вечнаго мучения, и да улучим твоим хода́тайством небесная блага, верным угото́ванная, и прославим вкупе с тобою всех благих Подателя, Единаго Всесильнаго в Троице Святей прославляемаго Бога, Отца и Сына и Святаго Духа, и твое милостивное предстательство, ныне и присно и во веки веков.

Тропарь, глас 4

Пустыни явился еси доброе прозябе́ние, о́тче преподобне, от юности бо чистое житие изволил еси, духовному учителю последуя, и того учением ум твой к небесным впери́в, в пустыню вселился еси, и в ней обитель создал еси, и стаду твоему премудр наставник показался еси, великому же Новуграду похвала и утверждение: темже и Христос, яко пресве́тла светильника, чудесы обогати и прослави тя. Ксенофо́нте, о́тче наш, моли Христа Бога спастися душам нашым.

Иуниа 29. Молитва святым первоверховным апостолом Петру и Павлу

Молитва 1, из акафиста

О пресла́внии апо́столе Пе́тре и Па́вле, душы за Христа предавшии и кровию вашею па́жить Его удобрившии! Услышите чад ваших молитвы и воздыхания, сердцем сокрушенным ныне приноси́мыя. Се бо беззаконьми омрачи́хомся, и того ради беда́ми якоже тучами обложихомся, елеа же добраго жития обнищахом зело, и не возмо́жем проти́витися волко́м хищным, иже расхищати наследие Божие де́рзостно тщатся. О сильнии! Понесите немощи нашя, не отлучайтеся духом от нас, да не разлучи́мся в конец от любве Божия, но крепким заступлением вашим нас защити́те, да помилует Господь всех нас молитв ваших ради, да истребит же рукописание безмерных грехов наших, и да сподобит со всеми святыми блаженнаго Царствия и брака Агнца Своего, Емуже честь и слава, и благодарение и поклонение, во веки веков.

Молитва 2, из канонника Киевскаго 1732 года

Святый верховный апо́столе Пе́тре, ка́меню веры, на Христе краеугольнем Камени исповеданием назда́нный! Моли, да и аз, отныне умными помышлении и плотскими похотении не коле́блемый, на Томжде Христе, Камени живом, избра́ннем, честне́м, верою назда́н буду, и любовию во храм духо́вен да совершу́ся, во еже возносити жертвы духовныя Бо́гови Иисус Христом.

О святый верховный апостоле Павле, сосуде избранный Христов, благодати и славы Божия преисполнение! Моли имущаго власть над тва́рию Творца, да мя, ныне сосуд погубле́нный, сотворит себе сосуд в честь, освящен и благопотре́бен, на всякое дело благое угото́ван, во веки веков.

Молитва 3, из рукописныя службы

О первоверховнии апостоли: Петре, веры Христовы твердый изобразителю, и Павле, сладковеща́тельная ла́стовице учения Господня! Зрим вас аки многотеку́щую реку сказаний Христовых слове́с, от Господних недр истекающую и глубину кла́дязя истин богооткровенных нам открывающую: зрим вас аки светила, с небесѐ то́ки теплоты̀ любвѐ Божественныя нам уясняющыя. Ублажаем вас, яко труды и болезни поне́сших, во еже все́яти учений Божественных семена̀, и стопы̀ ног ваших, вся концы̀ землѝ обтека́вших. Умильно просим вас, святии апостоли: сотворите и нас в буести греховней преклоне́ны пред учителем нашим Господем, сотворите гордости нашея усекновение, и потщи́теся возвести нас непрестанными вашими молитвами к Царствию Небесному, да тамо прославим с ли́ки ангельскими и апостольскими дивнаго во святых Своих Отца всяческих, и Егоже посла в мiр Господа Иисуса Христа, и Единосущнаго им Святаго Духа, во веки веков.

Молитва 4, из рукописнаго акафиста Петропавловския церкве села Шапкина, Московския епархии

О святый верховный апо́столе Пе́тре, твердый исповеданием твоим ка́меню веры, недвижимое по Христе основание Церкве, па́стырю словеснаго стада Христова, ключарю̀ Царствия Небеснаго, ло́вче премудрый, из глубины неверия люди извлека́яй! Тебе молюся смиренно, да обы́мет мя Божественныя лови́твы твоея̀ мре́жа и да извлечет мя из глубины погибельныя. Вем, яко приял еси от Бога власть вяза́ти и реши́ти: разреши связана мя узами греховными, покажи на мне убозем милость твою, и оживи умерщвле́нную грехмѝ душу мою, якоже прежде Тави́фу из мертвых воскресил еси: возстави мя на течение благое, якоже в Красных врате́х хрома́го от чрева ма́терня возставил еси: и якоже сению твоею неду́жнии вси исцелева́ху, да осенит мя благодать данная ти от Бога, исцеля́ющи душевныя и телесныя болезни моя. Вся бо можеши, святе, силою Христовою, Егоже ради вся оставил еси и святым Его стопам последовал еси: темже помолися к Нему за мя окаяннаго, да избавит мя от всякаго зла твоими молитвами и да научи́т мя чистым сердцем славу возсыла́ти Отцу и Сыну и Святому Духу, ныне и присно и во веки веков.

Молитва 5, из тояже рукописи

О святый верхо́вный апо́столе Па́вле, сосу́де избранный Христов, небесных таин сказа́телю, всех языков учителю, церковная трубо̀, преслову́щий вети́е, мно́гия беды̀ за имя Христово претерпевый, море изме́ривый и зе́млю обше́дый и нас от лести и́дольския обративый! Тя молю и к тебе вопию: не гнушайся мене сквернаго, но возстави па́дшаго греховною леностию, якоже в а́встрех хромаго от чрева матерня возставил еси: и якоже Евти́ха ме́ртва бы́вша оживи́л еси, воскресѝ и менѐ от мертвых дел: и якоже молитвою твоею основание темницы некогда потря́сл еси и узники разрешил еси, си́це исторгни мя от сети вражия и укрепи мя творити волю Божию. Вся бо мо́жеши данною ти властию от Христа Бога, Емуже подобает всякая слава, честь и поклонение, со Безначальным Его Отцем, и со Пресвятым и Благим и Животворящим Его Духом, ныне и присно и во веки веков.

Тропарь, глас 4

Апостолов первопресто́льницы и вселенныя учи́телие, Владыку всех молите мир вселенней даровати и душам нашым велию милость.

Величание

Величаем вас, апо́столи Христовы, весь мир уче́ньми своими просвети́вшыя и вся концы̀ ко Христу̀ приве́дшыя.

Иуниа 30. Молитвы собору двунадесяти святых апостолов

Молитва 1, из Канонника Киевскаго 1732 года

Святии славнии и всехвальнии апо́столи, начальнейшаго Архиереа исповедания нашего Иисуса Христа избра́ннии ученицы̀ [ученики] и строи́телие таин Его: Пе́тре и Андре́е, Иа́кове и Иоа́нне, Фили́ппе и Варфоломе́е, Фомо̀ и Матфѐе, Иа́кове и Иу́до, Си́моне и Матфи́е! Молите Христа Бога, да от суетнаго в мiре сем пребывания сподобит мя десна́го во Царствии Своем предстоя́ния, и сына противления мя бывша ча́до послуша́ния сотворит, да и аз, ветхаго человека совле́кся, облеку́ся в новаго, созда́ннаго по Богу в правде и в преподобии истины, да в правоте веры ходя, доиду̀ к Отцу Небесному в наследие вечнаго достоинства, и та́мо, яже здѐ верою созерцаю, яснее во славе узрю̀, и прославлю Святую Троицу в безконечныя веки веков.

Молитва 2, из службы святым апостолом

Владыко Всемогущий, Господи Боже наш, избравый возлюбленныя своя ученики и апостолы на проповедь спасения всему мiру, да́вый им власть отпуща́ти грехи! Приимѝ хода́тайства их о роде человечестем, егоже и судити с ними и́маши: тех самых, яко друго́в твоих, нам зело честны́х, дерзаем недосто́йнии в предстательство к тебе, многопоспешеству́ющее ко спасе́нию душ наших, приводи́ти, моля́ще их усе́рдно.

Святии первоверховнии апо́столи Пе́тре и Па́вле, евангели́сти Христо́вы Иоанне Богослове и Матфее, первозванный ученичѐ Андрее, водружением креста Россию благословивый, апостоли святии Иакове, брате  Иоаннов, со другим Иаковом, Филиппе, Варфоломее, Фомо, Симоне, Иудо и Матфие! Вси святии богизбраннии апо́столи, изря́днейшии угодницы [угодники] Христовы, безбожия искорени́телие и веры истинныя насади́телие! Помози́те нам мощным вашим пред Господем ходатайством, изба́витися от всякаго зла и вражия лести, твердо же пре́данную вами веру православную сохраня́ти, в нейже вашим предстательством ни ранами, ни преще́нием, ни мором, ни коим гневом от Создателя нашего ума́лени будем, но мирное зде поживем житие, и сподобимся ви́дети благая  на земли живых, славяще Отца и Сына и Святаго Духа, Единаго в Троице славимаго и покланяемаго Бога, ныне и присно и во веки веков.

Иуниа 30. Молитвы преподобному Петру, царевичу Ордынскому, Ростовскому чудотворцу. Из акафиста

Молитва 1

О преподобне Пе́тре царевичу, Ростовский чудотворче! Якоже некогда из мрака языческаго во свет Евангельскаго учения Господь тя призва̀, та́ко и ныне умоли Его, да и нас, по Своей неизреченней благости и человеколюбию, и́зьмет из тьмы греховныя, и сердца̀ наша к деланию Его̀ Божественных заповедей да осия́ет. И якоже мяте́жа мiрски́х волнений избегл еси и ангелоподобнаго безпеча́льнаго жития сподо́бился еси дости́гнути, та́ко подаждь и нам грешным пучи́ну моря сего̀, страстьмѝ вла́емаго, безмятежно преплы́ти, иму́щым тя, отче, о Господе нашем ко́рмчаго, и тако чистым покаянием ко пристанищу спасения вечнаго дости́гнути нас сподоби. И я́коже имел еси споспе́шники тебе верхо́вныя апостолы Петра и Павла в создании обители твоея̀, та́ко и ныне тех помощь нам недостойным испросѝ, вкупе с ними о нас Христа умоляя. Веруем бо, яко аще мо́щи твоя святы́я и сокровены в земле, но духом твоим со избра́нными Божиими на небесѝ царствуеши: исхода́тайствуй убо, да и нам грешным молитвами твоими отве́рзется дверь Царствия Небеснаго на веки веков.

Молитва 2

О преподобне отче, Пе́тре царевичу! Ты душею на небесѝ престолу Божию предстои́ши и тро́ичныя славы наслажда́ешися, телом же на земли в Божественнем храме сем почиваеши и данною ти свыше благодатию различныя чудеса источаеши. Призри милостивым оком на предстоящыя честне́й ра́це твоей люди и просящыя умильно твоея помощи. Се бо мы безмерными согреше́нии праведный гнев Божий на себе наведо́хом, и всякия милости недостойни сотвори́хомся: темже не сме́юще возвести очес наших к высоте небесней, нижѐ вознести молебный глас ко Господу, се́рдцем сокрушенным и духом смиренным тебе в хода́тайство и на помощь призываем. Испроси у Господа славы благочести́вейшему, самодержа́внейшему, вели́кому госуда́рю нашему, императору Николаю Александровичу и всему ца́рствующему его дому и воинству на врагѝ побе́ду, здравие же и спасение, долготу лет во днех их, це́ркви благостояние, воздуха благорастворение, земли плодоносие. Избави же всех, верою несумне́нною к Богу приходящих и к ра́це моще́й твоих притекающих, от всяких бед душевных и телесных: буди печальным уте́шитель, неду́гующым врачь, напаствуемым помощник, вдовицам заступник, си́рым защитник, младенцем питатель, старым укрепитель, странствующым путево́ждь, плавающым ко́рмчий, и исхода́тайствуй всем, твоея помощи требующым, вся ко спасению полезная. Яко да твоими молитвами наставляеми, путь маловременнаго жития нашего на земли безбедно совершим, и вечный покой на небесѝ уличи́вше, прославим купно с тобою всех благи́х Пода́теля, в Троице славимаго Бога, Отца и Сына и Святаго Духа, ныне и присно и во веки веков.

В неделю первую по Пятидесятнице. Молитвы всем святым, от века Богу благоугодившым

Молитва 1, из акафиста всем святым

О преблаженнии угодницы [угодники] Божии, вси святи́и, престолу Пресвятыя Троицы предстоящии и неизреченнаго блаженства наслаждающиися! Се ныне, в день общаго вашего  торжества, милостивно призрите на нас, ме́ньших братий ваших, приносящих вам сие хвалебное пение и хода́тайством вашим просящих милости и отпущения грехов у Преблагаго Господа: вемы бо, воистину вемы, яко вся, ели́ка восхо́щете, испроси́ти у Него можете. Темже убо смиренно молимся вам: молите Милостиваго Владыку, да подаст нам дух вашея ревности ко хранению святых Его заповедей, яко да те́кше по стопам вашым, возмо́жем земное по́прище в добродетельнем житии без порока прейти, и в покаянии дости́гнути преславных селений райских, и тамо купно с вами прославля́ти Отца и Сына и Святаго Духа, во веки веков.

Молитва 2, из тояже книги

К вам, о святии вси, яко путеводным светильником, дея́ньми свои́ми освети́вшым путь небеснаго восхода, аз многогре́шный смире́нно коле́на се́рдца моего̀ преклоня́ю и из глубины души взываю: умолите о мне Человеколюбца Бога, да не попустит ми еще блужда́ти по распутием греха, но да просветит мой ум и сердце светом благодати Своея, яко да тою озаря́емь и подкрепля́емь, возмогу̀ прочее время земнаго жития правою стезею непреткновенно прейти, и хода́тайством вашим ко Преблагому Господу сподоблюся понѐ вмале причастник быти духовныя вашея трапе́зы в небеснем черто́зе [чертоге] Царя славы: Емуже, со Безначальным Его Отцем, и Пресвятым и Благим и Животворящим Духом, буди слава, честь и поклонение и во веки веков.

Молитва 3, из тояже книги

Преблаже́ннии и пресве́тлии ду́си [ду́хи], Архангелов и Ангелов и всех Небесных Сил пречестни́и чи́нове, всегда предстоящии Пресвятей и Пребожественней Троице и светом присносущныя славы озаря́емии, непрестанно славословящии имя Ея! К вам прибегаем с молитвою и молением: предста́тельствуйте за нас у престола Господа Вседержителя, и яко служителие благодати, всем хотящым наследовати спасение вспомоществу́ющии и о единем грешнице кающемся веселя́щиися, споспешеству́йте нам во благочестнем провождении временнаго жития нашего, и утверди́те стопы̀ на́шя на пути спасе́ния. Преславнии и богосветлии ду́си [ду́хи] праведных, святии Божии, на земли во плоти богоугодне жи́тельствовавшии и ныне на небеси со Ангелы ликовству́ющии: честни́и пророцы, предвозвести́вшии дни избавления нашего: Предтече Господень, пропове́давый Агнца Божия, вземлющаго грех мiра, и сподо́бивыйся крести́ти Источника святыни во струях Иорданских: апо́столи Христовы, богоутвержденнии столпи Церкве, весь мiр спасительным учением Христовым просветившии и богомудрыми и священными законы Церковь Христову неподвижно утвердившии: святи́телие и па́стырие стада Христова, молитвами и священнодействием святых и Божественных таин верныя вся освятившии и путем заповедей Господних ходити я̀ научившии: страстотерпцы Христовы и мученицы, пред владыками и цари Христа Бога благодерзновенно испове́давшии и честную кровь свою за Него пролия́вшии: преподобнии и праведнии, тесным и скорбным путем течение свое соверши́вшии и умерщвле́нием плоти и страсте́й Христу сраспе́ншиися! Молим вас, присноблаже́ннии: испроси́те нам у Христа Бога нашего оставление грехов, исправление жития и вся благая, ко временней и вечней жизни потребная. О пречестный и преславный соборе святых Божиих, безплотнии Ангели и во плоти пожившии и Богу угодившии, предстателие наши и молитвенницы [молитвенники]! Боголюбезно воззри́те на ны̀ и на земную юдоль нашу, помяните нас странствующих и прише́льствующих, и дарова́нною вам от Бога благодатию и силою руководите нас к Небесному отечеству: укрепите нашу немощь, оградите нас от искушений и соблазнов, сохраните от грехопадений, возбудите в нас святую любовь ко Господу и ревность о спасении нашем, насадите в сердцах наших страх Божественный, напра́вите стопы нашя к деланию заповедей Христовых и ко исполнению воли Божия благи́я и соверше́нныя. Сотворите, святии Божии, еже жити нам целомудренно и праведно и благочестно в нынешнем веце, присно же па́мятовати час смертный и страшное второе пришествие Господа Бога и Спаса нашего Иисуса Христа, да благодатию и человеколюбием Его соблюдаеми и спасаеми, и мы грешнии и недостойнии сподобимся в Небеснем Царствии купно с вами покланятися престолу Божию и благодарно и всерадостно славосло́вити Пресвятую, Животворящую и Нераздельную Троицу, Отца и Сына и Святаго Духа, во веки веков.

Молитва 4, из Канонника Киевскаго 1732 года

Боже Святый и на святых почиваяй, трисвятым гласом на небеси от Ангел воспеваемый и на земли от человек во святых Своих хвали́мый, да́вый святым Твоим Духом кому́ждо благодать  по мере дарования Христова и тою поста́вивый Церкви Твоей святе́й овы убо апостола, овы же пророки, овы же благовестники, овы же пастыри и учители, ихже словом проповеди, Тебе Самому действующу вся во всех, мно́зи соверши́шася святии в коемждо роде и роде, различными добродетельми благоугодившии Тебе, и образ нам добрых подвигов своих оставивше, в радости к Тебе прешедшии, готови су́ще, в немже сами искуше́ни быша, и нам напа́ствуемым помога́ти! Сих святых всех воспомина́юще и их богоуго́дное житиѐ похваля́юще, Тебе Самаго в них действовавшаго восхваля́ем, и о́нех благотворения Твоя дарования быти верующе, прилежно молим тя, Святе ствятых: даждь нам грешным последовати их учению, житию, любвѝ, вере, долготерпению, и их молитвенною помощию, паче же Твоею вседействующею благодатию Небесныя с ними сподобитеся славы, хва́лящым Пресвятое имя Твое, Отца и Сына и Святаго Духа, во веки веков.

Молитва 5, чтомая в Бежецкой Казанской церкви, Тферския епархии

Боже Вышний, Боже Превечный, Боже Безсмертный, Егоже вели́ко и кре́пко Царство, власть безконечна, милость в роды и роды, ея́же неоставляеши от людей Твоих, Авраама ради возлюбленнаго от Тебе, и Исаака раба Твоего, и Израиля святаго Твоего, и всех избранных от создания мiра угодников Твоих праведных! Сих всех на умоление тебе Премилостиваго Владыки аз, земля сый и пепел, призываю, да их ради возмогу̀ получи́ти милость Твою, во спасение окаянныя души моея̀. А́ще бо много может молитва еди́наго праведнаго поспешествуема, кольми паче много может молитва тьмы тем праведных всех святых Твоих, престол величествия Твоего окружающих: очи бо Твои, Господи, на праведныя, и уши Твои в молитву их. Имже вопию̀ си́це:

О святии достохвальнии патриа́рси, верою угодившии Богу и всем верным отцы сущии! Воистину блаже́ни вы и преблаже́ни естѐ, седите́ бо на трапе́зе блаженнаго обеда во Царствии Божии. Аз же, ве́руяй в Бога, молю вы, яко отцы: порадите и мне, яко чаду вашему, понѐ от крупиц падающих от трапезы вашея.

Святии великоимени́тии пророцы! Вси вы пророчествовасте, от части разумевше, и видесте Христа Господа яко в зерца́ле и гада́нии, ныне же разумеете Его соверше́нне и видите лицем к лицу. Моли́теся, да и аз гре́шный, зде от части Его разумева́я, сподоблюся та́мо с вами видети Его якоже есть.

Святи́и апо́столи Христовы! Вы естѐ сосу́ди, в честь освяще́ни и благопотре́бни Владыце, на всякое дело благо́е угото́вани, изоби́льно же испо́лнени благода́ти Божия. Молю̀, да от исполне́ния вашего и аз недосто́йный прия́ти сподо́блюся. Святии прехвальнии мученицы Господни! Вси вы̀ блаже́ни естѐ, претерпе́вше искушение, занѐ, искуше́ни бывше, прия́сте венец жизни. Помози́те и мне грешному, яко да прибу́ду в терпении соверше́н и всеце́л и ни в че́мже лише́н, и да искушение веры моея̀ в разли́чных напастех обря́щется в похвалу̀ и честь и славу во открове́нии Иисус Христове.

Святии иерарси, пастырие, жителие и наставницы! Вси вы свет мiру есте и светильницы, поставлени на све́щнице во храме вышнем нерукотворнем. Вы осветите мя, да исправлю стопы̀ моя к деланию заповедей Господних, и да не бу́дет путь мой тьма̀ и по́лзок, но да наста́влен буду на путь правый, вни́ти ми во град оби́тельный.

Святии преподобнии отцы, соверши́вшии труды ва́шя благия ради Христа Господа, иже бе во трудех от юности своея! Вси вы совершенную мзду трудов ваших восприя́сте, да вашим многотрудным угождением и аз окаянный, аще и во единонадеся́тый час прише́дый, прияти сподоблюся пе́нязь от Преблагаго Человеколюбца Бога. Святии девственницы, обруче́ннии Единому Жениху христу! Вси вы внидо́сте в чертог небесный с мудрыми девами. Помоли́теся и о мне недостойнем, яко да и аз того́жде чертога небеснаго не лишен буду.

Святии пусты́нницы [пусты́нники], по́стницы [по́стники], исповедницы [исповедники], чудотворцы и вси всякаго чина праведницы [праведники], и́хже нарещѝ и исчестѝ за велие множество яко звезд небесных невозможно есть, кроме Сама́го Бога, множество звезд исчита́ющаго, имже и имена ваша написана суть в книгу животную от сложения мiра! Аз немощный помощь вашу, ея́же от вас мнози бывают прича́стни, испове́дати и призыва́ти смиренно дерзаю: молите Спаса нашего, да подаст и мне, паче всех человек на земли грешну су́щу, вышних иска́ти, идеже есть Христос одесную Бога Отца седя̀.

Прочее же, ели́ка суть и́стинна, ели́ка честна, ели́ка правельна, ели́ка пречиста, ели́ка прелюбезна, ели́ка доброхвальна, а́ще ка́я добродетель и а́ще ка́я похвала̀, сия вся испросити ми у Милостиваго Человеколюбца Бога, исполняющаго вся прошения ваша, яко да благодарственно и аз недостойный не то́чию в сем ве́це, но и во грядущем безконечнем, сподоблюся с ли́ки вашими воспева́ти премудрость и славу и честь и силу и крепость Бога нашего, Единаго Вседержителя, во веки веков.

Тропарь всем святым, глас 4, из триоди цветныя

Во всем мiре мученик Твоих кровьмѝ, яко багряни́цею и ви́ссом, Церковь Твоя украси́вшися, те́ми вопиет Ти, Христе Боже: лю́дем Твоим щедроты
Твоя низпослѝ, мир жительству Твоему да́руй. И душам нашым велию милость.

Ин тропарь, глас тойже

Боже отец наших, творя́й присно с нами по Твоей кротости, не оста́ви милости Твоея от нас, но молитвами их в мире управи жизнь нашу.

Ин тропарь, глас 2

Апостоли, му́ченицы [мученики] и проро́цы [пророки], святи́телие, преподо́бнии и пра́веднии, до́бре подвиг совершившии и веру соблюдшии, дерзновение имуще ко Спасу, о нас того яко Блага молите спастися, молимся, душам нашым.

Величание

Величаем вас, апостоли, му́ченицы [мученики], проро́цы [пророки] и вси святи́и, и чтем святую память вашу: вы бо мо́лите о нас Христа Бога нашего.

В Неделю вторую по Пятидесятнице. Молитва преподобным и богоносным отцем, во Афоне постнически просиявшым

Молитва 1, из печатныя службы

О блаженнии и святи́и отцы, преподобнии, святителие, священномученицы и преподобномученицы, мироточи́вии и чудотво́рцы, земни́и ангелы и небе́снии человецы, сея святыя горы̀ насельницы и украсителие, по Богородице наши предстателие пред Господем, благодетелие и назирателие, царское победоносное ополчение в телесе́х победившее безтеле́сныя демоны, Царицы Небесныя Пречистыя Богородицы мироуха́ннии цве́ти, светлоплодовитая древеса̀ мысленнаго сего рая̀ Приснодевы, ре́ки приснотеку́щыя дарований духовных! Приими́те похвальная словеса̀ сия, яже вам приносим, якоже Господь прият вдовицы две ле́пте, и общее празднество, совершаемое нами в честь и память вашу, объими́те, яко воню̀ благоухания и жертву благоприя́тну: не и́мамы бо и́но что принести по долгу благодетелем нашым за вели́кая благодеяния, яже прия́хом и имамы прия́ти от вас. Ей, испове́дуем, яко мы грех ради наших не́смы досто́йни жити на месте сем и именова́тися сы́нове ваши: но вы по благосе́рдию вашему не отрица́йтеся бы́ти нам отцы̀. Не забыва́йте нас смиренных, но соблюдайте священныя монастыри вашя и вся скиты̀ и ке́ллии, и нас живущих в них сохраняйте и избавляйте от всякаго искушения и напасти в житиѝ сем, в будущем же ве́це да сподобимся святыми вашими молитвами блаженства ку́пно с вами, сы́нове со отцы̀ своими, стадо с пастырьми своими, ученицы со учители своими, и да услышим от вас о́ный блаженный глас ко Господу: се мы и дети, яже дал еси нам, Господи! и ра́дующеся воздади́м всякую славу, честь и поклонение Отцу и Сыну и Святому Духу, во веки веков.

Молитва 2, из рукописныя службы

О преподобнии и богоно́снии отцы̀ наши афо́нстии, светила земная пресветлая, от пустынных удо́лий святыя горы Афонския в Це́ркви православней славно просиявшии и святую гору вселения вашего жития добро́тами онебеси́вшии, всю же вселенную высоких доброде́телей светлостьмѝ и чудес Божественных блиста́ньми удиви́вшии! Се вы ныне, смертным за́падом пло́тски на время во гроб заше́дше, душа́ми вашими со Христом, Солнцем Правды, пребыва́ете, и су́ще праведницы, просвеща́етеся яко солнце во Царствии Небеснем. Та́мо убо молитвенныя вашя к Богу свету истинному лучы̀ простира̀юще, не забывайте и ны, ча́да ваша духовная, аще и в нощи страстей и скорбей пребывающыя, свыше благода́тными призира́ти осия́нии: яко да во свете добродетельнаго вашего жития путем заповедей Христовых право ходяще, сподобимся зрети свет неприкосновенныя славы Божия, хва́ляще купно с вами в Троице Святей славимаго и покланяемаго Бога, Отца и Сына и Святаго Духа, ныне и присно и во веки веков.

Тропарь, глас 1

Пустыни афо́нския отцы̀, ангелы во пло́ти, испове́дники вкупе и преподобныя, святители же и мученики в пе́ниих почтим, подражающе добродетелем их, зову́ще согласно и глаголюще: славы Проставльшему вы, слава Венчавшему вы, слава в беда́х предста́тели нам вы Показавшему.

Величание

Ублажаем вас, преподо́бнии отцы̀ афо́нстии, в горѐ сей пости́вшиися, и чтем святую память вашу, наставницы монахов и собеседницы Ангелов.

Месяц иулий

Иулиа 1. Молитва святым мучеником, безсеребренником Косме и Дамиану. Из акафиста

К вам, святии безсребреницы и чудотворцы Космо̀ и Дамиа́не, яко к скорым помощником и теплым молитвеником о спасении нашем, мы недостойнии прибегаем, и припа́дающе усердно вопием: не пре́зрите моления нас грешных, немощны́х, во многая беззакония впа́дших и по вся дни и часы согреша́ющих. Умоли́те Господа, да проба́вит нам, недостойным рабом Своим, великия и богатыя Своя милости: изба́вите нас от всякия скорби и болезни, занѐ неоскудную благодать исцелений от Господа и Спаса нашего Иисуса Христа прияли естѐ, твердыя ради веры вашея и мученическия ради кончины. Услышите убо нас молящихся, и благоприятным хода́тайством вашим испросите у Христа Бога благочести́вейшему, самодержа́внейшему, вели́кому госуда́рю нашему, императору Николаю Александровичу здра́вие и спасение, на врагѝ побе́ду и одоле́ние, и всему царствующему дому Божие благословение. Таже и всем нам от Господа вся благополезная в житии нашем вре́меннем, наипа́че же ко спасению вечному належащая испроси́ти, да сподобимся молитвами вашими кончину христианскую безболезнену, непосты́дну и ми́рну улучи́ти и да избавимся от козней диавольских и вечныя муки, безконечнаго же и блаженнаго Царствия Небеснаго наследницы да будем. Ей, угодницы Божии! не преста́йте молящеся за ны, с верою к вам притекающыя: аще бо по множеству грехов наших и не́смы досто́йни милосердия вашего, оба́че, вернии подражателие человеколюбия Божия су́ще, сотворите молитвами вашими, да плоды̀ достойны покаяния принося́ще, в вечный покой дости́гнем, хваляще и благословяще дивнаго во святых Своих Господа Бога и Спаса нашего Иисуса Христа, и Пречистую Матерь Его, и ваше теплое заступление, всегда, ныне и присно и во веки веков.

Тропарь, глас 8

Святии безсре́бреницы и чудотворцы Космо̀ и Дамиа́не, посети́те немощи нашя: туне прия́сте, туне дади́те нам.

Иулиа 3. Молитвы святым благоверным князем Василию и Константину, Ярославским чудотворцем

Молитва 1

Святии страстотерпцы Христовы и чудотворцы, благовернии кня́зи Васи́лие и Константи́не! Яко до́блии во́ини Христовы, до́блественне, в телесѝ суще, подвиза́стеся: верою же и благочестием и всеми де́лы благими, яко светильницы сияюще, лукаваго победи́сте и вся его разженныя стрелы угаси́сте. Сего ради, неувядаемый венец прии́мше, с ли́ки святых днесь престолу Божию предстоите, хвалу и благодарение Тому воздающе. Темже и мы, к ра́це вашей притека́юще, молимся: бу́дите хода́таи пред Богом и Господем нашим Иисусом Христом, да избавит  град сей и страну от всякаго лютаго обстояния и дарует нам вся благопотребная к житию: паче же да даст нам, по богатству славы Своея, во внутреннем челове́це утверди́тися, и да сподобит нам наследити Царство Небесное и славити Всесвятое имя Отца и Сына и Святаго Духа, ныне и присно и во веки веков.

Молитва 2

О святии благовернии кня́зи Васи́лие и Константи́не, благоверных родителей пречестна́я о́трасле, князей Российских боговенча́нная красото̀, во время жития̀ ва́шего грады утверждавшии, сиро́ты и вдови́цы пита́вшии, храмы святыя божественными иконами украша́вшии! К вам прибегаем, Божии избра́нницы, и во смирении сердца нашего молим вас: бу́дите хода́таи пред Всемилостивым Владыкою, да почи́ет благословение Его на храме сем, идеже вы нетленными телесы̀ вашими почива́ете, на граде нашем, его́же вы возлюби́сте, и на лю́дех обитающих в нем, да во правове́рии и чистотѐ утвердя́тся. Молитеся Христу Богу, святии Божии, да сохранит державу сродников ваших це́лу и неразде́льну, да да́рует же землѝ нашей мир и тишину, людем в вере и благочестии преспея́ние, да избавит же и нас, ко святей ра́це многоцелебных моще́й ваших с верою притекающих, от бед и напастей, недугов телесных и душевных, и да сподобит Царствия Своего Небеснаго во веки веков.

Иулиа 3. Молитва святым праведным Иоанну и Логгину, Яренгским чудотворцем, чтомая в церкви Яремгскаго прихода, Архангелогородския епархии

Святии и праведнии Иоа́нне и Ло́ггине, угодницы Христовы и чудотворцы пресла́внии! Вы в постничестве и в де́лех благочестия на земли подвизавшеся, Богу угоди́сте, таже яко два свети́ла све́тлая по смерти в мiре просия́ли естѐ, и верныя вся чудесы вашими аки све́тлою луче́ю просвещаете. Темже заступницы наши теплии на небеси показастеся, и ныне многи в скорбех сущыя, и в бедах страждущыя, и поги́бнути имущыя, здра́вы сохраняете молитвами вашими. И якоже прежде, дерзостне мощей ваших коснувшыяся внеза́пу отри́нувши и разслабле́нием наказавше, прикосновением святых моще́й ты́я помиловасте, та́ко и до днесь предивная чудеса во всем мiре от места положения многоцелебных моще́й ваших соде́ловаете. Сего ради во святый храм ваш приходя́щии людие мо́лятся, ко святым мощем вашым со благоговением и страхом Божиим припа́дающе, и просят получити здравие душам и телесе́м своим. Ныне убо, о преблаже́ннии угодницы Христовы и чудотворцы преславнии Иоа́нне и Ло́ггине, услы́шите моление нас грешных, с верою вас призывающих: бу́дите нам помо́щницы ско́рии и покрови́телие тепле́йшии в путешествии и в мореплавании и в домо́внем пребывании: и вся православныя христианы молитвами вашими освяти́те, в мире и тишине соблюдите, изоби́лием всяцем снабдите, и во всем благом жизнь сию препроводи́ти предста́тельствы вашими к Богу сподо́бите: да та́ко, молитвами вашими грехом нашым прощение получи́вше, Царствия Небеснаго причастницы быти сподо́бимся, благодатию и человеколюбием Бога нашего, Емуже подобает всякая слава, честь и поклонение, ныне и присно и во веки веков.

Иулиа 3 и октовриа 31. Молитва преподобному Никодиму Кожеезе́рскому

Молитва 1, из акафиста преподобному

О преподобне и богоносне отче наш Никоди́ме! Ве́лие имея к Богу дерзновение, молися непрестанно о всех нас, зане буря многих бед и скорбей обдержит ны: неду́зи теле́снии, болезни душевныя и приражения вражия  обуревают нас. Ходит бо враг наш, иский кого поглотити, и ежечасно от того уловля́емся. Темже аще, о спасении нашем нерадя́ще, не́смы достойни воззрети на высоту небесную, но ты буди нам помощник скорый и избавитель: и якоже сам от врага искушен быв, сего до́блественне победил еси, тако и нас вразуми, да разумеем того ко́вы и прираже́ния. Подаждь убо нам память смертную, слезы покаяния и надежду спасения: да не во отчаяние впаде́м, нижѐ де́рзостным на милосердие Божие упованием, во гресех же пребыванием в конец себе погуби́м, но да будет нам память грехов наших во источник теплых слез и сокрушения сердечнаго, милосердие же
Божие и благодать Его, молитвами твоими, во спасение наше, ныне и присно и во веки веков.

Молитва 2, из тогоже акафиста

О преподобне и богоносне отче наш Никоди́ме! Предстоя̀ престолу Пресвятыя Троицы, молися непрестанно о благочести́вейшем, самодержа́внейшем, вели́ком госуда́ре нашем, императоре Николае Александровиче всея России, и о всем царствующем доме, о святейшем правительствующем синоде и о преосвященнем епископе нашем имярек, о всем священнем и иночестем чине, игумене же и братии обители твоея, о военачальницех и градоначальницех и всех православных христианех: да ходим кийждо достойно звания нашего, в немже зва́ни бы́хом, и да будет земля наша благочестием цветущая, и вси живущии на ней род избра́н, царское священие, язык свят, лю́дие обновления, да явя́тся славящии Господа ныне и присно и во веки веков.

Молитва 3, чтомая в Кожеезерском монастыре, Архангелогородския епархии

О преподобне отче наш Никоди́ме! Услыши нас грешных, молящихся тебе, и к чудотворному твоему гробу притекающих, и святое имя твое от всего сердца в помощь и защищение призывающих. Милостив буди хода́тай о нас ко Вседержителю Господу Богу, Единому в триех ипоста́сех покланя́емому, и яко име́яй к нему дерзновение, моли за нас многогрешных и за весь православный христианский род, еже име́ти нам сердца̀ горѐ ко взысканию отечества небеснаго, уклоня́тися же от всяких обдержащих нас страстей, и изба́витися нам от бед и напастей и скорбей, да сотво́рше волю Божию во временней жизни сей, благоуго́дни ему будем и сподобимся Небеснаго Царствия, прославляюще Прославльшаго тя Царя Небеснаго и Бога Трисвятаго, ныне и присно и во веки веков.

Тропарь, глас 8

От царствующаго града и сущия в нем  вели́кия оби́тели пресе́льник явился еси, промышлением Божественнаго разума наставля́емь, к морским странам устремился еси, и та́мо в пустыню всели́лся еси, уклоня́яся мiрския молвы̀, силою же Святаго Духа вооружи́вся, кре́стным оружием враги твоя прогна́л есѝ, постом и непреста́нною молитвою жизнь твою соверша́я, ревну́я великим отце́м Анто́нию и Ону́фрию и Па́влу Фиве́йскому: с нимиже Господеви молися, отче Никоди́ме, спастися душам нашым.

Иулиа 5. Молитва преподобному Афанасию Афонскому. Из акафиста

О преподобне отче Афана́сие, изря́дный уго́дниче Христов и великий афо́нский чудотво́рче, во дни земнаго жития твоего многия  на путь правый наста́вивый и во Царствие Небесное му́дре руководи́вый, ско́рбныя уте́шивый, па́дающим руку помощи пода́вый, и всем любе́зен, ми́лостив и сострада́телен отец бы́вый! Ты и ныне, в небесней пребыва́я светлости, наипаче умножаеши любовь твою к нам немощны́м, в мо́ри житейстем разли́чне бедствующым, искушаемым духом злобы и страстьмѝ свои́ми, воюющими на дух. Сего ради смиренно мо́лим тя, святый отче: по данней тебе от Бога благодати помозѝ нам волю Господню в простоте сердца и смире́нии твори́ти, искушения же вражия победи́ти и свире́пое страстей море изсуши́ти: да та́ко немо́кренно прейдем житейскую пучину и предстательством твоим ко Господу сподо́бимся дости́гнути обетова́ннаго нам Царствия Небеснаго, славяще Безначальную Троицу, Отца и Сына и Святаго Духа, ныне и присно и во веки веков.

Тропарь, глас 3

Иже во пло́ти житию̀ твоему удиви́шася ангельстии чи́ни, ка́ко с телом к неви́димым сплетением изше́л еси, присносла́вне, и уязви́л еси де́монския полкѝ. Отону́дуже, Афанасие, Христос тебе воздадѐ бога́тыми дарова́ньми: сего ради, отче, моли спастися душам нашым.

Иулиа 5. Молитвы преподобному Сергию, Радонежскому чудотворчу

Молитва 1

О священная главо̀, преподобне и богоносне отче наш Се́ргие, молитвою твоею, и верою и любовию яже к Богу, и чистотою сердца, еще на земли во обитель Пресвятыя Троицы душу твою устро́ивый, и ангельскаго общения и Пресвятыя Богородицы посещения сподо́бивыйся, и дар чудодейственныя благодати прие́мый, по отшествии же твоем от земных наипаче к Богу прибли́живыйся и небесныя силы приобщи́выйся, но и от нас духом любвѐ твоея̀ не отступивый, и честны́я твоя мощи, яко сосуд благодати полный и преизлива́ющийся, нам оставивый! Велие имея дерзновение ко Всемилостивому Владыце, моли спасти рабы Его, сущей в тебе благодати Его верующыя и к тебе с любовию притекающыя. Помози благочести́вейшему, самодержа́внейшему, великому государю нашему, императору Николаю Александровичу всея России, да благоуправля́емо будет царство его в мире и благостоя́нии, и да покоря́тся под ноги его вси сопроти́внии. Испроси нам от Великодаровитаго Бога нашего всякий дар,  всем и коему́ждо благопотре́бен, веры непоро́чны соблюдение, градов наших утверждение, мiра умирение, от глада и пагубы избавление, от нашествия иноплеменных сохранение, скорбящым утешение, неду́гующым исцеление, падшым возставление, заблужда́ющым на путь истины и спасения возвращение, подвизающымся укрепление, благоде́лающым в де́лех благих преспеяние и благословение, младенцем воспитание, юным наставление, неведующым вразумление, сирота́м и вдови́цам заступление, отходящым от сего временнаго жития к вечному благое уготовле́ние и напутствие, отшедшым блаженное упокоение, и вся ны споспешеству́ющими твоими молитвами сподо́би в день Страшнаго Суда шуия части изба́витися, десны́я же страны̀ о́бщники быти и блаженный о́ный глас Владыки Христа услы́шати: прииди́те, благослове́ннии Отца Моего, наследуйте угото́ванное вам Царствие от сложения мiра.

Молитва 2

О священная главо, преподобне отче, преблаженне авво Сергие Великий! Не забуди убогих твоих до конца: но помина́й нас всегда во святых твоих и благоприятных молитвах к Богу. Помянѝ стадо Твое, еже сам упа́сл еси, и не забуди посещать чад твоих. Молѝ за ны, отче священный, за дети твоя духовныя, яко име́яй дерзновение к Небесному Царю: не премолчѝ за ны ко Господу, и не пре́зри нас, верою и любовию чтущих тя. Поминай нас недостойных у престола Вседержи́телева, и не преста́й моля́ся о нас ко Христу Богу: ибо дана тебе бысть благодать за ны моли́тися. Не мним бо тя су́ща мертва: аще бо телом и преста́вился еси от нас, но и по смерти жив сый пребыва́еши. Не отступа́й от нас духом, сохраняя нас от стрел вражиих и всякия пре́лести бесо́вския и ко́зней диавольских, па́стырю наш добрый. Аще бо и моще́й твоих ра́ка пред очи́ма на́шима ви́дима есть всегда, но святая твоя душа со ангельскими во́инствы, со безпло́тными лики, с небесными силами, у престола Вседержителева предстоя́щи, достойно весели́тися. Ве́дущи убо тя воистину и по смерти жива су́ща, тебе припа́даем и тебе мо́лимся: моли́ся о нас Всесильному Богу, о пользе душ наших, и испросѝ нам время на покая́ние, да невозбра́нно пре́йдем от земли на небо, от мытарств же горьких, бесо́в воздушных князе́й и от вечныя муки да избавимся, и Небеснаго Царствия насле́дницы да будем со всеми праведными, от века угоди́вшими Господу нашему Иисусу Христу: Емуже подоба́ет всякая слава, честь и поклонение, со Безначальным Его Отцем, и с Пресвятым и Благим и Животворящим Его Духом, ныне и присно и во веки веков.

Молитва 3

О небеснаго Иерусалима гражданине, преподобне отче Сергие! Воззри на нас милостивно, и к земли приверженных возведи к высоте небесней. Ты горѐ на небесѝ пребыва́еши, мы же на земли ни́зу, удале́ни су́ще от тебе не толи́ко местом, ели́ко грехми и беззако́нии нашими: но к тебе, яко нам сро́дному, прибега́ем и взываем, настави нас ходити путем твоим, вразуми и руководствуй. Свойственно есть тебе, отче наш, милосердие и человеколюбие: на землѝ живу́щу не о своем токмо спасении бысть тебе попечение, но и о всех к тебе притека́ющих. Наставле́ния твоя бы́ша трость кни́жника скоропи́сца, на сердцах людей глаголы жизни начертава́ющаго. Не телесныя то́кмо врачевал еси боле́зни, но паче душевных врач изящный явился еси: и все житие твое бысть зерца́ло всякия добродетели. Аще толи́к был еси, святче Божий, на земли: коли́к ныне еси на небеси! Ты днесь предстоиши престолу света неприступнаго, и в нем, якоже в зерцале, зриши вся нашя нужды и прошения: ты водворя́ешися вкупе со Ангелы, о едином гре́шнице кающемся ра́дующимися. И человеколюбие Божие есть неистощи́мо, и твое к Нему дерзновение много: не преста́ни убо о нас вопия̀ ко Господу. Испроси предстательством твоим у Всемилостиваго Бога нашего мир Церкви Его, под знамением Креста во́инствующей: согласие к вере и единомудрие, суемудрия же и расколов истребление, утверждение во благи́х де́лех: больным исцеление, печальным утешение, обиженным заступление, бедствующым помощь. Не посрами нас, с верою к тебе притекающих. Аще бо и недосто́йни есмы̀ толи́каго отца и хода́тая: но ты, быв подражатель человеколюбия Божия, сотвори нас достойны чрез обращение от злых дел ко благому житию. Вся Богопросвещенная Россия, твоими чудесы̀ исполненная и ми́лостьми облагоде́тельствованная, исповедует тя быти своего покровителя и заступника. Яви древния милости твоя, и ихже отцем спомоществова́л еси, не отри́ни и нас чад их, стопа́ми их к тебе ше́ствующих. Веруем, яко ду́хом нам сопрису́твствуеши. Иде́же бо есть Господь, якоже слово Его учит нас, та́мо и слуга̀ Его будет. Ты верный есѝ раб Господень: и Богу везде су́щу, ты в нас еси, и Он в тебе есть, па́че же и телом с нами еси. Се нетленныя и живоносныя твоя мо́щи, яко сокро́вище безценное, вручѝ нам чудес Бог. Предстояще им, яко тебе жи́ву су́щу, припа́даем и молимся: приимѝ моления наша, и вознеси я̀ на жертвенник милосердия Божия, да приимет тобою благодать и благовременную в ну́ждах наших помощь. Укрепѝ наше малодушие, и утверди нас в вере, да несомненно уповаем получи́ти вся благая от благосердия Владыки молитвами твоими. Паству же твою духовную, тобою собранную, не престани управля́ти жезло́м духовныя мудрости: подвиза́ющымся помозѝ, разсла́бленныя возста́ви, споспешѝ иго Христово нестѝ во благодушии и терпении: и всех нас управи в мире и покаянии сконча́ти жизнь нашу и пресели́тися со упованием во блаженная недра Авраа́мова, идеже ты радостно по труде́х и по́двизех ныне почива́еши, прославляя, со всеми святыми Бога, в Троице славимаго, Отца и Сына и Святаго Духа, ныне и присно и во веки веков.

Тропарь, глас 8

От юности восприял еси Христа в души твоей, преподо́бне, и паче всего возжеле́л еси мирскаго мятежа уклони́тися: му́жески в пустыню вселился еси, и ча́да послушания в ней, плоды смирения, возрастил еси. Тем быв Троице вселе́ние, чудесы твоими всех просветил еси, приходящих к тебе с верою, исцеления всем подая̀ обильно. Отче наш Сергие, моли Христа Бога, да спасет душы нашя.

Иулиа 7. Молитва святей благоверней великой княгине Московской Евдокии, во инокинях Евфросинии

О преподобная княгине Евфроси́ние, добрая в жена́х подвижнице, похвальная угоднице Христова! Приимѝ моление нас недостойных, с верою и любовию к ра́це моще́й твоих припа́дающих, и твоим теплым к Богу хода́тайством испросѝ граду твоему и лю́дем от бед и напа́стей сохранение, обители тобою созда́нней утверждение и благоспеяние: подвиза́ющымся же во обители твоей споспешествуй, яко чадолюбивая ма́ти, иго Христово во благодушии и терпении понестѝ и ко исправлению жития своего до́бре подвиза́тися: в мiре благочестно живу́щым испросѝ у Господа в вере твердость, во благочестии преспея́ние, и всем, с верою прибега́ющым к тебе и твоея просящым помощи и заступления, подавай всегда недугов исцеление, в ско́рбех утешение и во всем житии благопоспешение: наипа́че же умоли Господа в мире и покаянии земное житие прейти нам, от мытарств же горьких и мук вечных избавитися и Царство Небесное твоим хода́тайством получи́ти, иде́же ты со всеми святыми Господу предстоиши, да славим Отца и Сына и Святаго Духа, ныне и присно и во веки веков.

Тропарь, глас 8

По земнем вдовстве, Небесному Жениху себе уневе́стивши и в княжестем черто́зе  подвижнически пожи́вши, по́слежде и чертог и ча́да твоя Бога ради оставила еси, преподобная Евфроси́ние, и вше́дши во обитель тобою созданную, и во иночестем образе мно́ги по́двиги показала еси, и святое твое житие по благодати Божией блаженною кончи́ною увенча́ла еси. Ныне предстои́ши Христу Богу, моли спастися душам нашым.

Иулиа 8. Молитва святому Проко́пию, Христа ради юродивому, У́стюжскому чудотворцу. Из акафиста

О великий угодниче Божий и чудотворче, святы́й блаженый угодниче Проко́пие! Тебе мо́лимся и тебе про́сим: молися о нас ко Всемилостивому Богу и Спасу нашему Иисусу Христу, да проба́вит милость Свою нам недостойным и дарует нам вся к животу и благочестию потребная: веры и любвѐ преспеяние, благочестия умножение, мира утверждение, землѝ плодоносие, возду́хов благорастворение и во всем благое поспешение: благочести́вейшаго же, самодержа́внейшаго, вели́каго госуда́ря нашего, императора Николая Александровича всея России, да сохранит во здра́вии и долгоде́нствии, да́руя ему побе́ду и одоле́ние на враги видимыя и невидимыя. Бу́ди ему и всему царству его молитвами твоими благи́й помощник, покровитель и защи́титель. Царствующыя грады, град твой У́стюг и вся грады и ве́си Российския предстательством твоим соблюди невредимы от всякаго зла. Всем же православным христианом, тя молитвенно призыва́ющым, кому́ждо по нуждам его, потребная да́руй: болящым исцеление, скорбящым утешение, бедствующым поможение, унывающым ободрение, нищым снабдение, сирым призрение. Нам же всем дух покаяния и страха Божия испросѝ, да благоче́стно временное сие житие сконча́вше, сподобимся благую христианскую кончину получити и Царствие Небесное со избранными Божиими наследовати. Ей, праведниче Божий! не посрамѝ упования нашего, еже на тя смиренно возлагаем, но буди нам помощник и заступник в жизни, при смерти и по смерти нашей: да твоим предстательством спасение улучи́вше, купно с тобою прославим Отца и Сына и Святаго Духа, и твое крепкое о нас заступление, во веки веков.

Тропарь, глас 4

Просветився Божественною благодатию, богомудре, и весь разум и сердце от су́етнаго мiра сего к Зижди́телю неуклонно возложив, целомудрием и многим терпением во временней жизни течение до́бре скончал еси, и веру соблю́л еси непорочну. Темже и по смерти явися светлость жития твоего: источа́еши бо чудес источник неисчерпаемый с верою притекающым ко святому твоему гробу, Проко́пие преблаженне. Молѝ Христа Бога, да спасе́т ду́шы на́шя.

Иулиа 8. Молитва святому праведному Прокопию, У́сьянскому чудотворцу, чтомая в Керюжской Введенской церкви, Вологодския епархии

О великий чудотворче, святый праведный Прокопие! Услыши мя грешнаго, молящагося тебе и имя твое святое призывающаго. Виждь мя убогаго, в толицей беде сущаго: виждь мя немощнаго, отвсюду уловляема и всякаго блага лише́на и умом от малодушия помрачена. Потщи́ся, святче Божий, плененнаго мя свободити: не остави мя грешнаго врагом в радость бы́ти и в лукавых моих деяниих умрети. Моли о мне недостойнем Содетеля моего и Владыку, Емуже ты со безплотными лики предстои́ши: милостива ко мне сотвори Бога моего в нынешнем веце и в будущем, да не воздаст ми по делом моим злым и по нечистоте сердца моего, но по своей благости да сотворит ми. На твое бо хода́тайство уповаю, и тобою хвалю́ся, и имя твое святое на помощь призываю, и к цельбоносному гробу твоему припа́дая, помощи прошу. Избави мя, угодниче Христов, от зол находящих на мя, и отвсюду возстаю́щыя на мя во́лны укротѝ, да не обымет мя напасть до конца, и да не погря́зну в пучи́не греховней и в тине страстей моих. Моли, святый праведный Проко́пие, Христа Бога нашего, даровати мне грешному ве́лию милость, да славлю великое имя Отца и Сына и Святаго Духа ныне и присно и во веки веков.

Тропарь, глас 1

Божественною благодатию просвети́вся, и по смерти да́руеши исцеления притекающым к ра́це моще́й твоих, премудре Проко́пие: темже и мы ныне чтим честны́х моще́й твоих явление, веселя́ще вкупе ду́шы и телеса̀. Тем вси вопием: слава Давшему ти крепость: слава Венчавшему тя: слава Действующему тобою всем исцеления.

Иулиа10. Молитва преподобному Антонию Печерскому, иже в Киеве. Из акафиста преподобному

О добрый наш пастырю и наставниче, приснопоминаемый иноков Российских первоначальниче, преподобне и богоносне отче наш Анто́ние! Ты горѐ на небесѝ пребываеши, мы же на земли ни́зу, удале́ни суще от тебе не толи́ко местом, ели́ко греховною нечистотою нашею. Оба́че, отеческую любовь твою к лю́дем ти сродным па́мятующе, припа́даем и молимся тебе со умилением и верою: помози нам грешным очиститися покаянием и достойным быти помилования и прощения от Господа и Создателя нашего. умоли его благость дарова́ти нам великия и богатыя милости: земли плодоносие, воздуха благорастворение, мир глубок, братолюбие искреннее, благочестие нелицемерное, житейских потре́б довольство, и да не во зло обратим благая, да́руемая нам от щедродательныя Его десницы, но во славу имени Его святаго и во спасение наше. Сохрани, угодниче Божий, предстательством твоим святым, во здравии и долгоденствии благовернаго государя нашего, императора Николая Александровича всея России, и весь ца́рствующий дом его, покаря́я под но́зе его вся враги и супостаты. Соблюди, чудотворче святый, благомощными твоими молитвами царствующыя грады, обитель твою и всю страну православно-российскую невредимы от всякаго зла: и вся люди, во обители твоей жительствующыя и на поклонение в ню̀ приходящыя, осенѝ небеным твоим благословением, и в скорбех, бедах и болезнех утешение, избавление и исцеление им подаждь: да благодарно славим, хвалим и величаем прославльшаго тя Господа, чрез тебе  дивно нам благодетельствующаго, Безначальнаго Отца, Единороднаго Его Сына и Единосущнаго Его Духа, Троицу Живоначальную и Нераздельную, и твое святое заступление, во веки веков.

Тропарь, глас 4

От мiрска́го мяте́жа изшед, отвержением же мiра ева́нгельски Христу последовал еси: и равноаггельное житие пожив, в тихое пристанище святыя горы Афона дости́гл еси, отону́дуже благословением отцев в гору Киева прише́д, и та́мо трудолюбно жизнь совершив, отечество твое просветил еси, и множеству монашествующих стезю̀ ведущую к Небесному Царствию  показав, Христу сия привел еси: Егоже моли, Антоние преподобне, да спасет душы нашя.

Иулиа 11. Молитвы святей равноапостольней великой княгине Российстей Ольге

Молитва 1, из акафиста

О святая равноапостольная великая княги́не О́льго, первоуго́днице Российская, теплая о нас пред Богом хода́таице и моли́твеннице! К тебе прибегаем с верою и молимся с любовию: буди нам во всем ко благу помощница и споспешница, и якоже во временней жизни тща́лася еси просветити пра́отцы нашя светом святыя веры и наста́вити я̀ твори́ти волю Господню, та́ко и ныне, в небесней пребывающе све́тлости, благоприятными твоими к Богу молитвами, вспомоществу́й нам в просвещении ума и сердца нашего светом Евангелия Христова, да преспеваем в вере, благочестии и любви Христове. В нищитѐ и ско́рби сущыя уте́ши, бедствующым подаждь руку помощи, обидимыя и напаствуемыя заступи, заблуждшыя от правыя веры и ересьмѝ ослепленныя вразуми, и испроси нам у Всещедраго Бога вся благая и полезная жизни временней и вечней, да тако богоугодне здѐ поживше, сподобимся наследия благ вечных в безконечнем Царствии Христа Бога нашего, Емуже со Отцем и Святым Духом подобает всякая слава, честь и поклонение, всегда, ныне и присно и во веки веков.

Молитва 2. Из акафиста

О великая угоднице Божия, богоизбранная и богопрославленная равноапостольная великая княгине Ольго! Ты отринула еси зловерие и нечестие языческое, уверовала еси во Единаго Истиннаго Триипостаснаго Бога, и восприяла еси Святое Крещение, и положила еси начало просвещения земли Российския светом веры и благочестия. Ты еси духовная родоначальница наша, ты по Христе Спасители нашем первая виновница просвещения и спасения рода нашего. ты еси теплая молитвенница и хода́таица о царстве всероссийстем, о царе́х его, народоправителех, воинстве и о всех лю́дех. Сего ради смиренно молим тя: при́зри на не́мощи нашя и умоли премилосердаго Царя Небеснаго, да не прогне́вается на ны зело, яко по не́мощем нашым по вся дни согрешаем, да не погуби́т нас со беззако́ньми нашими, но да помилует и спасет нас по милости Своей, да всади́т в сердца̀ наша спасительный страх Свой, да просветит Своею благодатию ум наш, во еже разуме́ти нам путѝ Господни, оста́вити стезѝ нечестия и заблуждений, тща́тися же во стезя́х спасения и истины, неуклоннаго исполнения заповедей Божиих и уставов Святыя Церкве. Моли, блаженная О́льго, Человеколюбца Бога, да проба́вит нам великую милость Свою: да изба́вит нас от нашествия иноплеменных, от внутренних нестрое́ний, мяте́жей и раздо́ров, от глада, смертоносных болезней и от всякагог зла: да подаст нам благорастворение возду́ха и плодоносие земли: да сохранит и спасет благочести́вейшаго госуда́ря нашего, императора Николая Александровича, от всех козней и наветов вражиих: да дарует ему победу на врати, да исполнит вся благая желания его: да оградит престол его мудрыми и верными слуга́ми, да соблюдет в судиях и прави́телех правду и милость: да даст пастырем ревность о спасении пасо́мых, всем же людем споспеше́ние о еже усердно службы своя исправля́ти, любовь между собою и единомыслие име́ти, на благо отечества и Святыя Церкве верне подвизатися: да возсияет свет спасительныя веры в царстве нашем во всех конце́х его: да обратятся к вере неверующии: да упразднятся вся е́реси и расколы: да тако пожи́вше в мире на земли, сподобимся с тобою вечнаго блаженства на небеси, хваля́ще и превознося́ще Бога во веки веков.

Молитва 3

Величие ныне и похвала ты еси, О́льго богомудрая: тобою бо от лести и́дольския свободи́хомся и в веру Христову Святым Крещением улови́хомся. Ты закона наставница чистая и веры Христовы учительница людем явилася еси. Приими убо похвалу от нас недостойных, пред честно́ю твоею иконою покланяющися и смиренно просящих, да твоими молитвами и заступлением от напастей и бед и печалей лютых грехов свободи́мся: еще же и от будущих мук избави ны, честно творящыя святую память твою и славящыя просла́вльшаго тя Бога, во Святей Троице прославляемаго, Отца и Сына и Святаго Духа, ныне и присно и во веки веков.

Тропарь, глас 1

Крила́ми богоразумия впери́вши твой ум, возлетела еси превыше видимыя твари: взыскавши Бога и Творца всяческих, и того обретши, пакирождение крещением прияа еси: древа животнаго наслаждающися, нетле́нна во веки пребываеши, Ольго приснославная.

Величание

Величаем тя, блаженная и равноапостольная княгине О́льго, и чтем святую память твою, ид́олы попра́вшая и многия люди российския Святым Крещением просветившая.

Иулиа 12. Молитва преподобному Арсению Новгородскому

Угодниче Божий, преподобне отче Арсе́ние преблаженне, душею на небеси престолу Божию предстояй и тро́ичныя славы наслаждайтеся, тело же на земли в Божественнем храме почиваяй. При́зри милостивым оком на предстоящыя честне́й ра́це твоей люди и просящыя сильныя твое помощи. Яко стяжавый дерзновение пред Господем, испроси Церкви Его благостояние, воздуха благорастворение, земли плодоносие. Избави же всех, верою несумне́нною к Богу приходящих и память твою благоговейно почитающих, от всяких бед душевных и телесных, от всех томлений и прилогов диавольских. Яко да твоими молитвами наставля́еми, путь маловременного жития нашего на земли безбедно совершим, и нескончаемый покой на небесѝ улучивше, прославим ку́пно с тобою всех благих Подателя, Единаго в Троице славимаго Бога, Отца и Сына и Святаго Духа, ныне и присно и во веки веков.

Тропарь, глас 1

Божественною любовию возгоре́вся, вся мiрска́я пристрастия отринул еси, Крест же Христов на ра́мо взем, вослед Его изволил ходити: отечество твое оставив, Великаго Новаграда достигл еси, и работая Богови невозвратным помыслом, дарования чудотворений сподобился еси. Темже чтуще тя, преподобне Арсение, вопием: слава Давшему ти крепость, слава Венчавшему тя, слава Действующему тобою всем исцеления.

Иулиа 14. Молитва преподобному Стефа́ну Ма́хрищскому. Из службы

О преблаженне и преподобне отче Стефа́не, прославленный угодниче Пресвятыя Троицы! Престолу Ея предстоя с ли́ки святых Ангел и всех святых, помяни нас, в беда́х и ско́рбех к цельбоносному твоему гробу припадающих и молящихся тебе: услыши молитвы нашя и принеси я̀ ко престолу Триипостаснаго Бога, прося к Него нам богатыя милости, здравия душа́м и телесе́м нашым, наипаче же отпущения грехов, благодати и спасения. Ты бо, яко имеяй дерзновение к Нему, можеши умолити Его, да подаст нам в житии нашем благая и вся, на пользу нашу и во уготовление к вечней жизни потребная. О благий и верный рабе Божий, истинный учениче Христов, избранный сосуде Святаго Духа, чудотворче Стефа́не! Молитвами твоими сотвори и ны грешныя причастники быти благодатных дарований, и́миже Бог тя обогатѝ, и буди нам по Бозе к богоугодному житию наставник, утеши́тель бури страстей, помощник в ско́рбех и беда́х и от враг видимых и невидимых благий заступник: да и мы, путь жизни сея богоугодно преше́дше, наследницы Царствия Божия предстательством твоим яви́мся, и сподобимся вкупе с тобою предстоя́ти престолу Царя славы, Емуже подобает всякая слава, честь и держава во веки веков.

Тропарь, глас 8

Православия ревни́телю, благочестия наставниче и чистоты, ищущым спасения путеводи́тельный светильниче, монашествующих богодухновенное украшение, преподобнаго Сергия духовный собеседниче, Стефане премудре, уче́ньми и добродея́ньми твоими душы просветил еси и пустыни населил еси. Молѝ Христа Бога спасти́ся душа́м на́шым.

Иулиа 15. Молитва святым мучеником Ки́рику и Иули́тте, матери его

Молитва 1, чтомая в Московской Спасской, в Чигаса́х, церкви

О Преславнии, святии и многострадальнии мученицы Христовы Ки́риче и Иули́тто, цве́ти прекра́снии и благовоннии блаженнаго рая, ангелом собеседницы и купножи́телие, с нимиже удостоитеся ныне пети чистую песнь пред престолом Агнца, вземлющаго грех всего мiра, Господа Бога и Спаса нашего Иисуса Христа, иже нас ради на крестнем олтарѝ волею Своею душу Свою положи́ти благоизво́лил есть! Услышите ны грешныя и недостойныя рабы, во всечестнем храме сем молящыяся и святую многострадальную память вашу празднующыя. Испросите нам у Го́спода многомощными молитвами вашими благодать, яже ко спасению, и всех грехов содеянных нами прощение, земли благоплодие, мiру мирное устроение и от лютых диавольских ко́зней свобождение, христианскую кончину жития нашего и немятежное чрез воздушная мытарства к небеси прехождение: вы бо прияли естѐ благодать сию от Господа, еже молитися за ны, и аще восхощете помиловати нас, почитающих священную память вашу, вся можете сотвори́ти. Не презрите убо нас недостойных, святии мученицы Ки́риче, триле́тный незлобивый а́гнче, со многострадальною твое́ю материю, святою Иули́ттою. Испросите от Господа вся благая и полезная душам нашым, яко да и мы удостоимся купно с вами сла́вити и воспева́ти всесвятое и великолепое имя Его во премíрнем Царствии Небеснем, идеже есть всех святых жилище, во веки веков.

Молитва 2, чтомая в часовне при Старорусской Ми́нинской церкви, Новгоро́дския епархии

Дво́ице святая, страстоте́рпцы Христовы, преблаженне Ки́риче, в трилетнем возрасте пострадавый, с богомудрою материю Иули́ттою! Кровьмѝ вашими яко багряницею украси́вшеся и небесных черто́гов и ве́чнующыя славы сподобившеся, не забудите и нас на земли сущих, но теплым хода́тайством вашим пред Богом избавите всех нас от всякия скорби и болезни. Се бо, к честней и чудодейственней иконе вашей благоговейно припа́дающе и лобыза́юще ю̀, мы недостойнии и многогрешнии к вам, яко к скорым помо́щником и теплым моли́твенником нашым, прибегаем, и с сокрушенным и смиренным ду́хом вопием: не пре́зрите моле́ния нас грешных, немощны́х, во многая беззакония впадших, но, яко благодатию Божиею венча́ннии, очи́стите нас от недуг наших и испроси́те нам у Христа Бога нашего здравие душевное и телесное. Вы бо неоскудную благодать исцелений от Спаса нашего Иисуса Христа за веру вашу, муче́ньми запечатле́нную, прияли естѐ. Темже убо помозите всем в лютых немощех лежащым и в человечестей помощи отчаявшымся, к вам же тепле с верою прибегающым, и исцеление тем  подавайте неоску́дно: всем же верным грехов оставление и спросите, да славят дивнаго во святых Своих Господа Бога и Спаса нашего Иисуса христа, и Пречистую Матерь Его, и ваше теплое заступление, всегда, ныне и присно и во веки веков.

Молитва 3, чтомая в Ладвинском Боголюбском Ки́рико-Иули́ттинском монастыре, Олонецкия епархии

О преславнии и богомудрии страстотерпцы Христовы, святии мученицы [мученики] Ки́риче и Иули́тто! Вемы, яко, молитв ради ваших о нас грешных, Человеколюбец Господь, восхотев даровати людем благодать неоскудных исцелений и неизсяка́емых благ духовных источник, благоволи и сию чудотворную, от лет древних сущую икону вашу  прече́стне прославити. Того ради и мы грешнии, к цельбоносней святыни сей припа́дающе, многомощное предстательство ваше, о страстотерпцы, воспеваем, и крепкое заступление о нас грешных сла́вяще, смиренно вас молим и со слезами взываем си́це: вы, и́стиннии хода́таи спасения нашего суще, всем нам в помощь предстаните, и избавите нас от недугов и болезней, от глада и огня, от нечаянныя смерти и смертоносныя язвы и от всякаго зла: отжени́те от нас мысленнаго губи́теля змия, ищуща поглотити и свестѝ во ад душы нашя: оградите нас от искушений и соблазнов мiра сего: утверди́те сердца наша во смирении, кротости, послушании, в безмолвии же и в воздержании, в терпении и непамятозлобии и любвѐ, яже о Христе Иисусе Господе нашем: нас же, во обители живущих, во всех по́двизех иноческих утвердите. Вы есте сосуди, благодати Божия испо́лненнии: осиява́йте убо нас, наветы вражиими омраченных, светом благодати свяше просвещающе, да в нем ходяще, не преткнем о камень  ног наших. Вы естѐ вра́чеве благодатнии, исцеляющии всяк недуг и всяку язю в людех: исцелите убо и нашя недуги и телесныя язвы, да достойно прославим Бога в душа́х и телесе́х наших. вы естѐ радование вышняго: вы достославнии во́ини Царя Небеснаго: вы благоприятная жертва Богу: вы граждане Новаго Иерусалима: вы наследницы Царствия Небеснаго. Молим убо вас усе́рдно мы недостойнии, да и нам благое течение в путѝ заповедей Господних подади́те и желаемая получи́ти нас сподобите. Па́че же сохраняйте в мире, здравии и долгоденствии благочести́вейшаго госуда́ря нашего, императора Николая Александровича, и держа́ве его будите ограждение твердое, яко да благочестно и безпечально пожи́вши на земли, с миром в вечный покой достигнем, иде́же сподо́бимся Небеснаго Царствия Христа Бога нашего, Емуже всякая слава подобает, со Отцем и Святым Духом, ныне и присно и во веки веков.

Иулиа 15. Молитвы святому равноапо́стольному великому князю Владимиру. Из службы со акафистом

Молитва 1

О великий угодниче Божий, богоизбра́нный и богопросла́вленный, равноапостольный княже Владимире! Ты, зловерие и нечестие языческое отринув, во Единаго Истиннаго Триипостаснаго Бога уверовал еси, и восприи́м святое крещение, всю страну русскую светом божественныя веры и благочестия просветил еси. Темже Премилосердаго Творца и Спасителя нашего сла́вяще и благодаря́ще, славим и благодарим и тя, просветителю наш и отче, яко тобою спасительную веру Христову позна́хом и во имя Пресвятыя и Пребожественныя Троицы крести́хомся. Се́ю убо верою от праведнаго осуждения Божия изба́вихомся, от вечныя же работы диаволу и а́дова мучительства свободи́хомся: се́ю же верою благодать всыновления Богу и надежду наследования небеснаго блаженства прия́хом. Темже тя яко перваго язы́ка нашего путевождя̀ к Начальнику и Совершителю спасения нашего Господу Иисусу Христу прославляем, и предстателя тя пред престолом Царя царствующих о царстве всероссийстем познахом, о царех же Его, народоправителех, воинстве и о всех людех. Не возможет язык наш изобрази́ти величие и высоту благодеяний, тобою излия́нных на землю нашу, отцы и пра́отцы нашя и на ны недостойныя. О преблагий отче и просветителю наш! призри на не́мощи нашя и умолѝ премилосе́рдаго Царя Небеснаго, да не прогневается на ны зело, яко по не́мощем нашым по вся дни согрешаем, и да не погуби́т нас со беззаконьми нашими, но да помилует и спасет нас по милости Своей, да всади́т в сердца̀ наша покаяние и спасительный страх Божий, да просветит Своею благодатию ум наш, во еже оставити нам стезѝ нечестия и на путь спасения обратитися, неуклонно же заповеди Божия творити и уставы Святыя Церкве соблюдати. Моли, благосерде, Человеколюбца Бога, да яви́т нам вели́кую милость Свою: да избавит нас от нашествия иноплеменных, от мятежей и раздоров, от гла́да, смертоносных болезней и от всякаго зла: да подаст нам благорастворение воздуха и плодоносие земли: да сохранит и спасет благочести́вейшаго госуда́ря нашего, императора Николая Александровича от всех ко́зней и наветов вражиих: да дарует ему победу на враги, да исполнит вся благая желания его, и престол его мудрыми и верными слу́гами да огради́т: да соблюдет в судия́х и прави́телех правду и милость: да даст пастырем ревность о спасении пасо́мых, всем же людем любовь взаимную и единомыслие, о преспеянии же отечества и Святыя Церкве присное попечение: да умножит свет спасительныя веры в царстве нашем, неверующыя ко правоверию да обратит, е́реси же и раско́лы да низложит: да вси мы, та́ко в мире на землѝ поживше, сподобимся с тобою вечнаго  блаженства, хва́ляще и превозносяще Бога во веки веков.

Молитва 2

Како похва́лим тебе, в земных владыках премужественный Владимире? Как ти благодарение воздади́м, яко тобою Господа позна́хом и лести идольския избы́хом, яко твоим повелением по всей земли нашей Христос славится? Како веровал еси? како Христа взыскал еси? пове́ждь нам, ча́дом твоим, отку́ду облагоуха̀ тя воня̀ Святаго Духа? Не видел еси Христа, ни ходил еси по нем: како ученик Его обрелся еси? не видел еси апостола, прише́дша в землю твою, не видел бесы изгоняюща именем Христовым, болящих исцеляюща, мертвых воскрешающа. Дивное чудо! Ини́и ца́рие и власти́теле, видяще вся сия бывающа от святых мужей, не вероваша, но паче на страсти и муки предаша их: ты же, о блаженне, не видя и не слышя всех сих, ко Христу притекл еси, разумев, яко Един есть Творец видимым и невидимым, небесным и земным, и яко посла в мiр, нашего ради спасения, возлюбленнаго Сына Своего. И сия помыслив, вшел еси во святую купель.

И ныне, девятѝ стом летом и мно́жае проте́кшым, при́зри на землю твою, виждь ча́да твоя, виждь крася́щаго стол землѝ твоея благочестивейшаго госуда́ря императора Николая Александровича, возра́дуйся и возвесели́ся. Виждь люди твоя, како живут, како храни́ми суть Господем, како благоверие хранят по преданию твоему, како славят Христа, како покланя́ются имени Его. Виждь и гра́ды величеством сияющыя, виждь церкве цветущыя, виждь христианство растущее, виждь и град твой Киев толикими угодники Божиими, во нетле́нии почивающими, блистающийся, и фимиа́мом облагоуха́емь, и хвала́ми и божественными пе́нии святыми оглаша́емь.

Видя же, яко твое верное сияние твоим хода́тайством и заступлением не изсуше́но бысть зно́ем неверия, но дожде́м Божия поспешения плод изоби́льный принесѐ, радуйся духом, во владыках апостоле, не ме́ртвая телеса̀ возста́вивый, но душе́ю ны̀ ме́ртвыя воскреси́вый! Радуйся, уте́шителю наш и наста́вниче благове́рия!

Ты был еси, о честна́я главо̀, наги́м одеяние, а́лчущым кормитель, вдовицам помощник, странным поко́ище, обидимым заступник, убогим обогащение. Сим благим делом на небесе́х возмездие прие́мля и зрение сладкаго лица Божия насыщаяся, не престай моляся о земли твоей и о чадех, в нихже благоверно владычествовал еси, паче же о благочести́вейшем госуда́ре императоре Николае Александровиче, да сохранит я̀ в мире и благоверии, пре́даннем тобою, и да при́сно славится в землѝ нашей правоверие, и да не оставит нас Господь, а́ще и ещѐ блуждаем толи́ким веко́м проте́кшым, а́ще и ещѐ согреши́м Господу и Владыце нашему, а́ки новоку́пленнии рабѝ, не могу́щии угоди́ти господину своему. К тебе руки нашя воздева́ем и молим тя: помоли́ся Владыце всех, да продлит, доне́леже стои́т мiр, милость Свою на отечествии нашем и людех Своих, враги прогоняя, мир утверждая, от глада избавляя, царѝ нашя соделовая гро́зны супоста́том, боляры наставляя, гра́ды устрояя, Церковь Свою возраща́я, достояние Свое соблюдая, му́жи и жены̀ и младенцы спасая, да милостию Его храни́ми, во единении веры вкупе весело и радостно славим Господа нашего Иисуса Христа, со Отцем и со Пресвятым Духом, Троицу Нераздельную и Единобожественную, царствующую на небесех и на земли, ныне и присно и во веки веков.

Тропарь, глас 4

Уподобился еси купцу̀ и́щущему добраго би́сера, славнодержавный Влади́мире, на высоте стола седя̀ ма́тере градов, богоспасаемаго Киева, испыту́я же и посыла́я к царскому гра́ду уве́дети православную веру, и обрел еси безценный бисер, Христа, избравшаго тя яко втора́го Па́вла и отрясшаго слепоту во святей купе́ли, душевную вкупе и телесную: темже празднуем твое успение, лю́дие твоѝ су́ще. Моли спастися державы твоея Российския начальником, христолюбивому императору и множеству владо́мых.

Величание

Величаем тя, святый равноапостольный кня́же Влади́мире, и чтем святую память твою, и́долы попра́вшаго и всю Российскую землю Святым Крещением просветившаго.

Иулиа 17. Молитва преподобному Иринарху игумену, Соловецкому чудотворцу. Из службы

О преподобне отче Ирина́рше, угодиче Божий и молитвенниче о душа́х наших! услыши нас ныне молящихся тебе, яко иму́щему дерзновение ко Господу, да подаст нам вся, яже на пользу в сем житии нашем и во уготовле́ние к вечней жизни. Буди нам наставник в духовнем жительстве, ути́шитель бури страстей, помощник в ско́рбех и заступник от враг невидимых, борю́щих ны: да и мы, богоугодно преше́дше поприще сея̀ жизни, будем наследницы Царствия Небеснаго, и сподобимся вку́пе с тобою сла́вити Отца и Сына и Святаго Духа во веки веков.

Тропарь, глас 4

Постническое по Бозе житиѐ возлюбив, вся плотска́я мудрова́ния духу покорил еси, и воздержанием страсти умертви́л еси, во трудех и бдениих и молитвах образ быв добродетели: тем монашескаго жития наставник показался еси, отче преподобне Иринарше. Молѝ Христа Бога спасти́ся душа́м на́шым.

Иулиа 20. Молитвы святому пророку Божию Илии

Молитва 1, из акафиста

О прехвальный и пречудный пророче Божий Илиѐ, равноангельным житием твоим на землѝ просия́вый, пламене́ющею же ревностию по Господе Бозе Вседержители, та́же и зна́меньми и чудесы преславными просла́вивыйся, и в конец жития твоего на о́гненней колеснице с плотиею твоею на небо преесте́ственно восхище́нный, в новейшая же ле́та с преобразившимся на Фаворе Спасителем мiра беседовати сподо́бивыйся, и ныне в райских селениих всегда пребыва́яй и предстоя́й престолу Небеснаго Царя! Услыши нас грешных и непотребных, пред святою твоею иконою предстоящих и усердно к хода́тайству твоему прибегающих. Моли о нас Человеколюбца Бога, да подаст нам дух покаяния и сокрушения о гресе́х наших, и всесильною своею благодатию да поможет нам пути нечестия оставити, преспевати же во всяком деле бла́зе, и в борьбе со страстьмѝ и похотьмѝ нашими да укрепит нас: да всади́т в сердца наша дух смирения  кротости, дух братолюбия и незлобия, дух терпения и целомудрия, дух ревности ко славе Божией и спасении своем и ближних доброе попечение. Упразднѝ молитвами твоими, проро́че, злыя обычаи мiра, паче же погибельный и тлетворный дух века сего, род христианский от Божественной веры и уставов Святыя Церкве отвраща́ющь, и к родителем и власте́м предержащым непочитанием прельщя́ющь, и тако вся люди в бездну нечестия и погибели поверга́ющь. Отвратѝ от нас предстательством твоим праведный гнкв Божий, и избави вся грады и веси царства нашего от бездождия и гла́да, от тру́са же и смертоно́сных язв и болезней, от нашествия врагов и междоусобныя брани. Укрепѝ твоими молитвами, преславне, благочести́вейшаго госуда́ря нашего, императора Николая Александровича, благопоспе́шествуй ему во всех благих деяниих и начинаниих его. Пособствуй всероссийскому христолюбивому воинству во бра́ней со врагѝ нашими. Испросѝ, проро́че Божий, от Господа пастырем нашым святую ревность по Бозе, о спасении пасо́мых попечение, во учении и управлении мудрость, благочестие и во искушениих крепость: судия́м нелицеприятие и безкорыстие испроси, всем же начальствующым милость и правосудие, подчиненным же покорность и усердное о послушании своем рачение: да тако в мире и благочестии поживше в сем ве́це, сподобимся прича́стия вечных благ во Царствии Господа и Спаса нашего Иисуса Христа, Емуже подобает честь и поклонение, со Безначальным Его Отцем и Пресвятым Духом, во веки веков.

Молитва 2, во время бездождия, из акафиста

О великий и преславный пророче Божий Илиѐ, ревности ради твоея̀ по славе Господа Бога Вседержителя не терпевый зре́ти идолослужения и нечестия сынов израилевых, законопреступнаго царя Ахава обличивый и в наказание тех триле́тный глад на землю израилеву молитвою твоею от Господа испроси́вый, вдовицу саре́птскую во гладу пречудно препита́вый и сына ея̀ уме́рша молитвою твоею воскреси́вый, по прошествии же пронарече́ннаго времене глада, собранный на гору карми́льскую народ израильский в богоотступстве и нечестии укори́вый, таже огонь молитвою на жертву твою с небесѐ испроси́вый, и чудом сим Израиля ко Господу обрати́вый, сту́дныя же пророки ваа́ловы посрами́вый и умертви́вый, по сих же молитвою па́ки небо разреши́вый и обильный дождь на землю испросивый, и люди израилевы возвесели́вый! К тебе, предивный угодниче Божий, усердно прибегаем гре́шнии и смире́ннии, бездо́ждием и зно́ем томи́мии. Исповедуем, яко недосто́йни есмы̀ милости и благодеяний Божиих, достойни же паче лютых прещений гнева твоего. Не бо̀ ходи́хом во страсе Божии и в путе́х заповедей Его, но в по́хотех развраще́нных сердец наших, и всякий вид греха безстудне сотворихом: се бо беззакония наша превзыдо́ша главу нашу, и не́смы достойни явитися пред лице Божие и зрети на небо. Темже исповедуем смиренно, яко сего ради заключися небо и а́ки медя́но сотворися, занѐ первее заключися наше сердце от милосердия и истинныя любве: сего ради отвердѐ земля и соде́лася безплодна, яко Господу нашему плодов добрых дел не принесохом: сего ради не бысть дождь, нижѐ роса̀, яко слез умиления и животворныя росы̀ богомыслия не и́мамы: сего ради увядѐ всяк злак и трава се́льная, яко и́зсше в нас всякое благое чувство: сего̀ ради омрачи́ся возу́х, яко ум наш сту́дными помышленьми омрачися и сердце наше беззаконными похотеньми осквернися. Исповедуем, яко недосто́йни есмы̀ и тебе, пророче Божий, умоляти. Ты бо, подобострастен быв нам человек, Ангелом в житии твоем уподобился еси, и аки безплотный, на небо восхище́н еси: мы же сту́дными помыслы и дея́ньми нашими безсловесным ското́м уподо́бихомся, и душу нашу яко плоть сотворихом. Ты посто́м и бдением Ангелы и челове́ки удивил еси: мы же невоздержанию и сластолюбию предаю́щеся, ското́м несмысленным уподобляемся. Ты презе́льною ревностию о славе Божией непрестанно горел еси: мы же, о славе нашего Творца и Господа небрегу́ще, испове́довати достопокланяемое имя Его зле стыди́хомся. Ты нечестие и злыя обычаи искоренял еси: мы же духу века сего порабо́тахом, обычаи мiра паче заповедей Божиих и уставов церковных блюдуще. Кий убо грех и неправду не сотворихом мы окая́ннии! И тако беззаконьми нашими долготерпение Божие истощи́хом. Темже правосудный Господь праведно прогневася на нас, и во гневе Своем наказа̀ нас. Обаче, ведуще велие дерзновение твое пред Господем и на любовь твою к роду человеческому уповающе, дерза́ем моли́ти тя, прехвальне пророче: милостив буди к нам недостойным и непотребным, умоли Великодаровитаго и Всещедраго Бога, да не до конца прогневается на ны̀ и да не погуби́т нас со беззаконьми нашими, но да низпо́слет на жаждущую и изсохшую землю дождь обильный и мирный, да дарует ей плодоносие и благорастворение возду́ха: преклонѝ действенным твоим хода́тайством на милость Царя Небеснаго, не нас ради грешных и скверных, но ради избра́нных рабов Его, колена свои пред ваалом мiра сего не преклонивших, ради незло́бивых младенцев, ради безсловесных ското́в и птиц небесных, за наша беззакония страждущих и гладом, зноем и жаждою истаява́ющих. Испросѝ нам твоими благоприятными молитвами от Господа дух покаяния и сердечнаго умиления, дух кротости и воздержания, дух любве и терпения, дух страха Божия и благочестия, да тако, от стезѝ нечестия на правый путь добродетели возвратившеся, ходим во свете заповедей Божиих и достигнем обетова́нных нам благих, благоволением Безначальнаго Отца, человеколююием Единороднаго Сына Его и благодатию Всесвятаго Духа, ныне и присно и во веки веков.

Молитва 2, из рукописнаго акафиста, чтомая в церкви села Ильинскаго в Поречье, Ярославския епархии

О святый славный пророче Божий Илиѐ, великий закона Божия ревнителю! Ты изрядный и храбрый во убиении вааловых жрецов отмститель и идолослужения тех потребитель был еси: яко славу Божию не умаляему, но умножаему во веки ви́дети восхотел еси, и толи́ко многонароднаго их неистовства не убоялся еси, яко Иезаве́лины жрецы на пото́це [потоке] Ки́ссове ноже́м закла́л еси, последѝ же яко вихрем на огненней колеснице взят быв, на высоту небесную со славою возшел еси. сего ради мы недостойнии и грешнии смиренно молимся тебе, честны́й Божий пророче: сподоби ны достойно сла́вити и воспева́ти пречестно́е твое заступление, да обре́тше тя великаго хода́тая, бога́тыя милости  от Господа сподобимся. Темже и ныне, славно ублажа́юще тя, мо́лим: огради миром державу нашу, и избави нас от всякаго навета вражия, от глада и труса и огня мо́лниина, и не забу́ди ны̀ грешныя, пресветлую память твою празднующыя и непрестанно славящыя прославльшаго тя Господа во веки веков.

Тропарь, глас 4

Во пло́ти ангел, пророков основание, вторый предте́ча пришествия Христова Илиа̀ славный, свыше пославый Елиссе́еви благодать недуги отгоня́ти и прокаже́нныя очища́ти: темже и почита́ющым его то́чит исцеления.

Величание

Велича́ем тя, святы́й славный пророче Божий Илиѐ, и чтем е́же на небеса на колеснице о́гненней преславное восхождение твое.

Иулиа 20. Молитва преподобному Авра́мию Га́личскому, игумену Городецкому, Чухломскому чудотворцу. Из службы со акафистом

О пречестная и священная главо̀, отче преблаженне, а́вво Авра́мие! Не забуди убогих твоих до конца, но помина́й нас всегда во святых твоих и благоприятных молитвах к Богу. Помянѝ стадо твое, еже сам упа́сл еси, и не забуди посещать чад твоих. Молѝ за ны, отче священный, за дети твоя духовныя, яко име́яй дерзновение к Небесному Царю: не премолчѝ за ны ко Господу, и не пре́зри нас, верою и любовию чтущих тя. Поминай нас недостойных у престола Вседержи́телева, и не преста́й моля́ся о нас ко Христу Богу: ибо дана тебе бысть благодать за ны моли́тися. Не мним бо тя су́ща ме́ртва: аще бо телом и преста́вился еси от нас, но и по смерти жив сый пребыва́еши. Не отступа́й от нас духом, сохраняя нас от стрел вражиих и всякия пре́лести бесо́вския и ко́зней диавольских, па́стырю наш добрый. Аще бо и моще́й твоих ра́ка пред очи́ма на́шима ви́дима есть всегда, но святая твоя душа со ангельскими во́инствы, со безпло́тными лики, с Небесными Силами, у престола Вседержителева предстоя́щи, достойно весели́тися. Ве́дущи убо тя воистину и по смерти жива суща, тебе припадаем и тебе мо́лимся: моли́ся о нас Всесильному Богу, о пользе душ наших, и испросѝ нам время на покая́ние, да невозбра́нно пре́йдем от земли на небо, от мытарств же горьких, бесо́в воздушных князей и от вечныя муки да избавимся, и Небеснаго Царствия насле́дницы да будем со всеми праведными, от века угоди́вшими Господу нашему Иисусу Христу: Емуже подоба́ет всякая слава, честь и поклонение, со Безначальным Его Отцем, и с Пресвятым и Благим и Животворящим Его Духом, ныне и присно и во веки веков.

Тропарь, глас 4

О мiрска́го мятежа изше́д, в тихое пристанище, преподобнаго Сергия обитель, прите́кл еси, и та́мо равноа́нгельное житие пожи́в, во страну Га́личскую пришел еси, идеже веру Христову насаждая и новокрещенныя люди от суеверий поганских очищая, многи и велики подвиги подъял еси, и обители четыре создав, иноков лики добре упасл еси и ко Христу Спасу привел еси: Егоже моли, преподобне отче Авра́мие, спастѝ душы нашя.

Иулиа 22. Молитвы святей равноапостольней Марии Магдалине. Из акафиста

Молитва 1

Святая мироно́сице и всехвальная равноапостольная Христова ученице Магдали́но Марие! К тебе, яко ве́рней и мо́щней о нас к Богу хода́таице, мы грешнии и недостойнии ныне усердно прибегаем и в сокрушении сердец наших молимся. Ты в житии твоем страшныя ко́зни бесовския испытала еси, но благодатию Христовою явно от тех свободи́лася еси: и нас молитвами твоими от се́ти бесовския изба́ви, да всегда, во всем житии нашем, делом, словом, мыслию и тайными помышле́ньми сердец наших верно послужим Единому Святому Владыце Богу нашему. Ты паче всех благ земных Сладчайшего Господа Иисуса возлюбила еси и Тому чрез все житие до́бре последовала еси, Божественными учении Его и благодатию душу свою питающи и множество человек от тьмы языческия во Христа чудному свету приводя́щи. Сия убо ве́дуще, молим тя: испроси нам у Христа Бога благодать просвещающую и освящающую нас, да ею осеня́еми, в вере и благоче́стии, в по́двизех же любвѐ и самоотверже́ния преуспева́ти будем, и ближним служи́ти неле́ностно потщи́мся, твоего человеколюбия образ па́мятующе. Ты, о святая Марие, бодренно благодатию Божиею житие на земли прете́кши, во обители небесныя радующися отшла̀ еси: моли убо Христа Спаса, да и нас сподобит странствие наше в сей юдо́ли плача непреткновенно совершити и в мире и покаянии житие наше скончати, да тако во святости на земли поживше, вечныя блаженныя жизни на небеси сподобимся и тамо с тобою и всеми святыми вкупе восхвалим Троицу Нераздельную и воспоим Едино Божество Отца и Сына и Духа Всесвятаго во веки веков.

Молитва 2

О святая мироно́сице, равноапостольная Магдали́но Марие! Ты теплою любовию твоею ко Христу Богу злыя козни вражия попра́ла еси, и безценный бисер Христа обре́тши, Царства Небеснаго достигла еси. Сего ради к тебе припа́даю умиленною душею, и сокрушенным сердцем вопию ти: при́зри с высоты небесныя на мя, греховными искушеньми бори́маго: виждь, коль многими грехѝ и бедами на всяк день враг мя̀ запина́ет, погибели моей иски́й. Темже, о славная и всехвальная ученице Христова Марие, умоли Возлюбленнаго тобою и Возлюбившаго тя Христа Бога, да подаст ми оставление многих моих прегрешений, да укрепит мя благодатию Своею тре́звенно и бо́дренно ше́ствовати путе́м святых Его заповедей и храм Духа Святаго мя да соделает: да тако многотрудное житие мое на земли скончав, во светлыя и блаженныя обители рая небеснаго всели́тися сподоблюся, идеже ты со всеми святыми радостно славосло́виши Единосущную Троицу, Отца и Сына и Духа Всесвятаго, во веки веков.

Тропарь, глас 1

Христу нас ради от Девы ро́ждшемуся, честна́я Магдали́но Марие, последовала еси, того оправдания и законы храня́щи: темже днесь всесвятую твою память празднующе, грехов разрушение молитвами твоими приемлем.

Иулиа 22. Молитва преподобному Корнилию Переславскому, чтомая на панихидах пред гробницею преподобнаго в Смоленской града Переславля церкви, Владимирския епархии

О великий постниче  безмо́лвниче, в ско́рбех помощниче и в беда́х заступниче, преподобне отче наш Корни́лие! Услыши ны, в час сей молящыяся тебе, и не умолчѝ вопия̀ о нас ко Господу с ли́ки святых и преподобных: не забу́ди посеща́ти ны ча́да твоя, и не уме́дли в молитвах твоих о скорбных и бе́дне страждущих и о всех притекающих к ра́це моще́й твоих, ныне и присно и во веки веков.

Иулиа 25. Молитвы преподобному Макарию Желтоводскому, Унженскому чудотворцу

Молитва 1, из акафиста

О преподобне и богоносне отче наш Мака́рие! Те́пле веруем, яко ты, престолу Пресвятыя Троицы предстоя̀, ве́лие и́маши дерзновение в молитвах к Всемилостивому Господу Богу, иже тебе, вернаго раба и угодника своего, всегда послушает. Сего ради со умилением смиренно припа́даем к тебе, святче Божий, и молимся усердно: не премолчи за нас ко Господу Богу, в Троице покланяемому и славимому, моли́тися, да милостивно на ны̀ призрев, не попустит нам во гресе́х наших погибнути, но да возставит падшыя, и да подаст исправление злому и окаянному нашему житию, от грядущих грехопадений восхищая, и да простит нам вся, ели́ка согреши́хом мыслию, словом и делом, от рождения нашего до сего часа. Веси бо, отче наш Мака́рие, немощь естества нашего и тяжесть и скорбь времен настоящих: моли убо непрестанно Господа Бога, да николи́же неизреченное Его милосердиенас оставит, но да хранит нас от мирских искушений, от диавольских сетей и от плотски́х похоте́й, да прии́мем тобою от Господа Бога вся потребная в жизни временней, от бед и напа́стей осла́бу и терпение доброе до конца жития нашего. Испросѝ нам у Господа Бога в мире и покаянии сконча́ти жизнь нашу и невозбра́нно прейти от земли на небо, от мытарств же и бесов воздушных и вечныя муки избавитися, и сподобитися Царства Небеснаго с тобою и со всеми святыми, угодившими Господу Богу и Спасителю нашему Иисусу Христу, Емуже подобает всякая слава, честь и поклонение, со Безначальным Его Отцем, и с Пресвятым и Благим и Животворящим Его Духом, ныне и присно и во веки веков.

Молитва 2, из жития преподобнаго

О преподобне и богоблаженне отче наш Мака́рие, светильниче всемiрный, монахов и подвижников украшение, Га́личския страны и всея Российския земли заступниче, неусыпаемый и теплый ко Всемилостивому Спасу нашему и Богу Иисусу Христу и ко Пресвятей и Пречистей Матери Его, Владычице нашей Богородице и Приснодеве Марии, за ны̀ грешныя молитвенниче! Молим твою всечестну́ю святыню, недостойнии ученицы̀ [ученики] твои: не забу́ди ны̀ смиренныя ча́да твоя, но яко чадолюбивый отец, посещай духом присно душ наших немощь. Испроси молитвами твоими у Христа Бога нашего, яко да освятит нашя ду́шы и телеса̀, и просветит наш ум и смысл, и очистит совесть нашу от всякия скверны и от нечистых по́мыслов и лукавых умышлений и губительнаго уныния: да избавит же нас от всяких демонских непрестанных наветов и озлоблений дневных и нощных, и да да́рует нам искреннее покаяние, сокрушение сердца, слезы и умиление, воздержание и трезвость, смиренномудрие же и кротость и безмолвие, чистоту душевную вкупе и телесную, нищелюбие же и страннолюбие, и нелицемерную друг ко другу любовь и милосердие, и всякое иноческое благоговение. О преблаженне отче наш Мака́рие! Сподоби ны, по силе нашей, святому твоему и равноангельному житию последовати, яко да всемилостивым предстательством Преблагословенныя и Препрославленныя Богородицы и Приснодевы Марии, Небесныя Царицы, христианския заступницы и покровительницы, и твоими святыми молитвами, Преблагий Христос Бог наш покажет на нас грешных рабех Своих благодать и милость Свою, и от настоящих зол и будущих мук вечных да свободит нас, и да сподобит ны наследники быти Царствия Своего Небеснаго, славящыя и величающыя Его, купно со безначальным Его Отцем и Прнесвятым и Благим и Животворящым Его Духом, ныне и присно и во веки веков.

Тропарь, глас 5

Днесь град твой Га́личь тобою хвалится: в конце́х бо его пресветло яко ве́лие солнце возсиял еси, и чудесы̀ твоими, преподобне Мака́рие, вся озарил еси. и ныне моли́ся Господеви, изба́витися душам нашым от прелести вражия и спасти́ся граду твоему от пога́нскаго наи́тия.

Иулиа 26. Молитва святей преподобномученице Пераскеве. Из службы со акафистом

Святая и многострадальная преподобномученице Параске́во! К тебе а́ки те́плей за ны̀ к Богу молитвеннице припа́даем и прилежно молимся: умоли Господа и Владыку нашего проба́вити милость Свою к нам недостойным рабо́м Его, дарова́ти же нам душевное и телесное здравие, земли плодоносие, воздуха благорастворение, во благочестии христианстем преуспеяние, к житию временному нужная довольная, и вся ко спасению потребная: да мирно и благочестно поживше, сподобимся благую кончину христианскую улучи́ти и Царствие Небесное насле́дити. Ей, предстательнице наша благая! Не посрами упования нашего, еже по Бозе и Пресвятей Богородице крепко на тя возлагаем, но буди нам хода́таица во спасение, да сподобимся вку́пе с тобою и всеми святыми, в радости блаженства вечнаго, славити во твоем заступлении великую милость Бога нашего, Отца и Сына и Святаго Духа, ныне и присно и во веки веков.

Тропарь, глас 1

Тща́ние иму́щи сообразно имени твоему, тезоименитая, равноименуемую тебе веру в сожительство избрала еси, Параскево победоносная: темже излива́еши исцеления и мо́лишися о душах наших.

Иулиа 27. Молитвы святому великомученику и целителю Пантелеи́мону

Молитва 1, из службы со акафистом

О преславный мучениче и до́блий воине Небеснаго Царя, Пантелеи́моне преблаженне, Милостиваго Бога преизрядный подражателю, иже, Христа на земли дерзновенно исповедав и многообразныя за Него муки претерпев, неувядаемый приял еси венец на небесѝ, иде́же вечнаго наслаждаешися блаженства и со дерзновением престолу Трисолнечнаго Божества предстои́ши! Ко твоему христоподражательному состраданию по Бозе прибегаем мы грешнии, и всеусердно тя, теплаго заступника и предстателя нашего, молим: не престай призира́ти на нас, в ну́ждах и скорбных обстояниих сущих, но твоею молитвенною помощию и цельбоподательною силою избавляй нас присно от лютых зол, всегубительства и всякия иныя беды̀ и болезни. Ты бо приял еси, святе, неоскудную благодать исцелений от Спаса нашего Иисуса Христа за твердую к Нему веру, твоим непорочным житием запечатленную мученичеством же и многопобедною твоею кончиною увенча́нную, в нейже по да́нней ти благодати и от Христа Пантелеи́мон, милости тезоименит, наименован был еси. сего ради, ве́дуще тя милостиваго ко всем помощника и целителя, с верою к тебе взираем: твоим богоприятным хода́тайством подавай нам вся благопотребная в житии сем и нужная к вечному спасению. Мученическим же дерзновением твоим умоли Милостиваго Бога, да помилует нас грешных и недостойных по велицей милости Своей, да избавит от тру́са, потопа, огня, меча и всякаго праведнаго гнева и преще́ния, благовременне подвизая нас ко очистительному и умилостивительному во гресе́х наших покаянию, ради множества щедрот Своих: да подаст всем нам безбедное, тихое и богоугодное житие, правосавному же императору нашему Николаю Александровичу на вся врагѝ побе́ду и одоле́ние, и всех нас от враг видимых и невидимых да сохранит благодатию Своею и непобедимым ополчением Ангел Своих, имиже огражда́еми и наставля́еми да поживем в ве́це сем в покаянии, чистоте и в творении богоугодных дел: да сподобимся же твоим теплым предстательством христианскую кончину улучи́ти безболезнену, ми́рну, непосты́дну, и избавитися от козней воздушных князей тьмы и от вечныя муки, и наследницы безконечнаго, всеблаженнаго Царства Его быти. Ей, угодниче Божий! не престай моли́тися за ны̀ грешныя, да твоим хода́тайством от временных и вечных бед избавлени, величаем тя, заступника нашего и молитвенника, и вечно прославляем общаго Владыку и Господа нашего Иисуса Христа, Емуже подобает всякая слава, честь и поклонение, со Безначальным Его Отцем, и Пресвятым Духом, ныне и присно и во веки веков.

Молитва 2, из службы со акафистом

О великий Христов угодниче и преславный целе́бниче, великому́чениче Пантелеи́моне, душею на небеси престолу Божию предстояй и триипостасныя Его славы наслажда́яйся, телом же и ликом святым на земли в Божественных храмех пребыва́яй и данною ти свыше благодатию различная источа́яй чудеса! При́зри милостивым твоим оком на предстоящыя люди и честне́й твоей иконе умильно молящыяся и просящыя от тебе целебныя помощи и заступления: прострѝ ко Господу Богу нашему теплыя твоя молитвы и испроси душам нашым оставление согрешений. Се бо мы, за беззакония наша не сме́юще возвести оче́с наших к высоте небесней, сердцем сокрушенным и духом смиренным тебе ходатая милостива к Влабыце и молитвенника за ны грешныя призываем, яко ты приял еси благодать от Него неду́ги исцеля́ти и страсти отгоня́ти. Тебе убо просим: не пре́зри нас недостойных, молящыхся тебе и твоея помощи требующих. Буди нам в печа́лех утешитель, в неду́зех лютых страждующым врачь, напаствуемым скорый покровитель, очесы̀ недугующым прозрения податель, ссу́щым и младенцем в болезнех скорый предстатель и исцелитель: исхода́тайствуй всем вся ко спасению полезная, яко да твоими ко Господу Богу молитвами получивше благодать и милость, прославим всех благих Источника и Дароподателя Бога, Единаго в Троице Святей славимаго, Отца и Сына и Святаго Духа, ныне и присно и во веки веков.

Молитва 3

О святый великомучениче и целителю Пантелеи́моне, Бога Милостиваго подражателю! При́зри благосердием и услыши нас грешных, пред святою твоею иконою усердно молящихся. Испроси нам у Господа Бога, Емуже со Ангелы предстои́ши на небеси, оставление грехов и прегрешений наших: исцели болезни душевныя и телесныя рабов Божиих ныне поминаемых, здѐ предстоящых и всех христиан православных, ко твоему заступлению притекающых. Се бо, грех наших ради, люте одержи́ми есмы̀ многими неду́ги и не и́мамы помощи и утешения: к тебе же прибегаем, яко даде́ся ти благодать молитися за ны и целити всяк недуг и всяку болезнь. Да́руй убо всем нам святыми молитвами твоими здравие и благомощие души и тела, преспеяние веры и благочестия и вся к житию временному и ко спасению потребная, яко да сподобившеся тобою великих и богатых милостей, прославим тя и Пода́теля всех благ, ди́внаго во святых Бога нашего, Отца и Сына и Святаго Духа, во веки веков.

Молитва 4, наедине от лица болящаго чтомая

О великий угодниче Христов, страстоте́рпче и врачу̀ многомилостивый, Пантелеи́моне! Умилосердися надо мною грешным рабом, услыши стенание и вопль мой, умилостиви небеснаго, верховнаго Врача душ и теле́с наших, Христа Бога нашего, да дарует ми исцеление от недуга, мя гнетущаго. Приими недостойное моление грешнейшаго паче всех человек. Посети мя благодатным посещением. Не возгнушайся греховных язв моих, пома́жи ты́я еле́ем милости твоея и исцели мя: да здрав сый душею и телом, остаток дней моих, благодатию Божиею, возмогу̀ провести в покаянии и угождении Богу и сподоблюся восприяти благий конец жития моего. Ей, угодниче Божий! умоли Христа Бога, да предстательством твоим да́рует здравие телу моему и спасение души моей. Аминь.

Молитва 5, благодарственная, по исцелении от болезни

Святый великомучениче и, целителю и чудотворче Пантелеи́моне, всеизря́дный угодниче Божий и молитвенниче присный христиан православных! Достойно наречен еси Пантелеи́мон, си́речь всемилостивый, яко приемый от Бога благодать молитися за ны, болезни же цели́ти, и всем, к тебе притекающым, к жизни временней и ко спасению потребная подава́ти. Сего ради и мы недосто́йнии, твоея милости сподобившеся, па́ки пред святою твоею иконою к тебе припадаем, и тя, яко искренняго угодника Божия, нашего же вернаго молитвенника и исцелителя, усердно благодарим, и Подателя всех благ Господа Бога нашего о великих благодеяниих, от Него тобою нам бывших, славим. Приимѝ убо милостивно малое сие молитвенное благодарение наше, занѐ не и́мамы и́но что по достоянию возда́ти тебе: и прочее время жития нашего не лиши нас, немощны́х и грешных, твоея помощи и молитвеннаго хода́тайства у Господа Бога нашего, Емуже подобает всякая слава, благодарение и поклонение, Отцу и Сыну и Святому Духу, ныне и присно и во веки веков.

Тропарь, глас 3

Страстоте́рпче святый и целебниче Пантелеи́моне, моли Милостиваго Бога, да прегрешении оставление подаст душа́м нашым.

Величание

Величаем тя, страстоте́рпче святый и целебниче Пантелеи́моне, чтем честна́я страдания твоя, я́же за Христа претерпе́л еси.

Иулиа 27. Молитва блаженному Николаю Кочанову, Христа ради юродивому, Новгородскому чудотворцу

О преблаженне угодниче Христов Николае! Ты, еще во пло́ти сый, красная мира сего уме́ты Христа ради вменил еси, и на путь спасения люди словесы̀ и дея́ньми наствлял еси: был бо еси неимущым скорый помощник и молитвенник, богатя́щыхся же обличитель. И ныне в вышних Троице предстоя, и́маши сугубое дерзновение ко Владыце, освятѝ бо тя Господь Вышний яко Своего угодника. Блажен есть воистину Но́вград и место, на немже положе́но бысть честно́е тело твое. Сего ради молимся тебе: буди и нам помощник и заступник, избавляй нас от враг видимых и невидимых, та́кожде и всех, не то́кмо зде, в Велицем Нове́граде, но и всюду призывающих имя твое святое. При́зри, преблаженне Нико́лае, на нас многогрешных, ныне творящых память твоего преставле́ния, и милостив буди нам с верою притекающым к ра́це моще́й твоих, яко да спасе́ни будем твоими молитвами и непрестанно славим Пресвятую Троицу, Отца и Сына и Святаго Духа, ныне и присно и во веки веков.

Тропарь, глас 8

Го́рняя му́дрствуя, свято жительствуя и славы мiра отбе́гая, юродство Христа ради избрал еси, блаженне Нико́лае: и ныне в вышних Троице предстоя, нам честну́ю память твою сла́вящым и с верою к ра́це моще́й твоих приходящым, исцеление подае́ши, и мо́лиши Христа Бога спасти́ся душа́м на́шым.

Иулиа 28. Молитва святителю Питири́му, епископу Тамбо́вскому. Из службы святителю

Благословен и препрославлен Господь Бог, призва́вый тя, святителю отче наш Питири́ме, от перваго часа̀ делателя в виноград Свой, явивый в тебе послушание воли Его неуклонное, ревность Предте́чеву и любовь Па́влову, та́же и све́щник це́ркве Тамбовския тя поставивый и архиереа вели́ка тя показа́вый. Благодатию святительства укрепляемь и огнем любве Христовы распаляемь, не дал еси, пастырю наш добрый, сна очи́ма твои́ма, нижѐ ве́ждома дрема́ния, на всяк день тружда́яся, моля́ся и благовесту́я, неверныя просвеща́я, заблу́ждшыя вразумля́я, па́дшыя возставля́я, немощны́я укрепля́я, пла́чущыя утеша́я, всем быв вся, якоже и святый Павел, да всяко некия спасеши. Егда же время де́лания твоего в вертогра́де Домовладыки Христа исполнися и отше́л еси от земных в селения горняя прияти мзду трудов твоих, даде́ся ти, угодниче Божий, престолу Царя Славы с лики святых предстояти и отту́ду паству твою назира́ти, за ны грешныя молитися, немощи немощны́х носи́ти, недуги цели́ти, скорби утоля́ти. Сего ради от дне блаженнаго успения твоего ве́рнии не преста́ша притека́ти к теье в скорбех и болезнех, и овии прикосновением ризы твоея, овии от воды из кла́дезя твоего здравие и избавление от всяких бед улучаху. Темже и ныне, к цельбоносному гробу твоему сошедшеся, славим Бога, дивнаго во святых Своих, и тебе, отче священнейший, величаем и молим: не отступай от нас любовию твоею, сохраняй молитвами твоими Церковь Православную незыблему от неверия и раскола, державу же Российскую от бед и напастей защити, мир и безмятежие той даруя: благочести́вейшаго, самодержа́внейшаго императора нашего Николая Александровича от всяких врагов огради, пастырем Церкве Святыя благопоспешѝ, дела рук их испра́ви, и ревностию о спасении врученнаго им словеснаго ста́да сердца̀ их распалѝ, вся же ны в послушании спасительному благовестию Христову соблюди и дело спасения, яко едино на потребу, вменяти помозѝ, да купно с тобою еди́неми усты̀ и еди́нем сердцем вси на всяк день и час поем и славим Спаса Христа со Отцем и Святым Духом во веки веков.

Тропарь, глас 4

Веры и благочестия наставниче, Церкве светильниче, монашествующих о́бразе, святителю Питири́ме премудре, стадо твое благоче́стно упасл еси и ко Христу привел еси: темже в вышних венце́м славы украше́н, с нами на землѝ духом пребываеши, сияя чудесы̀. Молѝ Христа Бога спасти́ся душа́м на́шым.

Иулиа 30. Молитва святому мученику Иоанну Воину

Молитва 1, из акафиста

О преславный угодниче Христов Иоа́нне Во́ине! Храбр был еси в ра́тех, враго́м прогони́тель и обидимым заступник, ныне же и всем православным христианом скорый помощник явля́ешися. Помяни нас грешных и недостойных, и заступи нас в беда́х и ско́рбех и печалех и во всякой злой напасти и от всякаго злаго и обидящаго человека защити нас: тебе бо дана бысть от Бога благодать моли́тися за ны грешныя, зле страждущыя. Избави нас от обидящых нас, бу́ди нам поборник крепок на вся  видимыя и невидимыя враги нашя. Благочести́вейшему, самодержа́внейшему, вели́кому госуда́рю нашему, императору Николаю Александровичу на врагѝ победу да́руй, во бра́нех воинство его укрепляя: яко да твоею помощию и крепким предсательством и побо́рством посра́мятся вси являющии нам злая. О великий поборниче, Иоа́нне Во́ине! Не забуди нас грешных, молящыхся тебе и твоея помощи и неоскудныя милости просящих, и сподоби ны грешныя и недостойныя неизрече́нная благая от Бога получи́ти. Яко тому подобает всякая слава, честь и поклонение, Отцу и Сыну и Святому Духу, ныне и присно и во веки веков.

Молитва 2

О великий Христов мучениче Иоа́нне, правоверных поборниче, врагов прогонителю, христолюбиваго воинства покровителю и обидимых заступниче! Услыши нас, в беда́х и ско́рбех молящыхся тебе, яко дана ти бысть благодать от Бога печальныя утешати, немощны́м помога́ти, неповинныя от напрасныя смерти избавляти и за всех зле страждущих молитися. Буди убо нам поборник крепок на вся видимыя и невидимыя враги нашя, яко да твоею помощию и побо́рством по нас посра́мятся вси являющии нам злая. Умоли Господа нашего, да сподобит ны грешныя и недостойныя рабы Своя получтити от Него неизреченная благая, яже уготова любящым Его, в Троице Святей славимаго Бога, всегда, ныне и присно и во веки веков.

Молитва 3, чтомая в Шуйском Покровском соборе, Владимирския епархии

О великий страстотерпче Христов, Иоа́нне во́инственниче! Днесь умиленно предстояще честне́й и чудодейственней иконе твоей и припа́дающе и лобызающе ю̀, усердно молим тя: буди нам, к тебе притекающым, поборник крепок и защитник от враг видимых и невидимых: и якоже во днех пло́ти твоея веры ради подвизался еси мужески, тако и о нас, на тя по Бозе уповающих, силою молитв твоих подвизайся у Безсмертнаго Царя и Бога, Емуже истинно во́инствовал еси: тебе бо даде́ся от Него благодать молитися за ны грешныя и немощныя и от бед и напастей нас избавляти. О благий и истинный во́ине Христов! не пре́зри моления нашего, и не остави нас, к тебе яко защитнику и предстателю прибегающих. Православную веру нашу и царство наше утвердѝ силою молитв твоих. Благочести́вейшему вели́кому госуда́рю нашему, императору Николаю Александровичу всея России, на супоста́ты спобо́рствуй, ей, страстотерпче Христов! молим тя, не остави нас сущих в беда́х и ско́рбех, внегда̀ оскудева́ти крепости нашей: буди нам крепость и ограждение предстательством твоим пред Богом, Емуже подобает всякая слава, честь и поклонение, Отцу и Сыну Святому Духу, ныне и присно и во веки веков.

Молитва 4, чтомая в томже соборе

О всехвальный, святый великомучениче и чудотворче Иоа́нне Во́ине! Моли с нами и о нас Человеколюбца Бога, да не осудит нас по беззаконием нашым, но да сотворит с нами по вели́цей Своей милости. Испроси нам у Христа Бога  нашего тихое и богоугодное житие, здравие же и во всем благое поспешение, земли плодородие, во всем изобилие и вся ко спасению и житию временному потребная. О святый страстотерпче Иоанне! Нане пред честно́ю твоею иконою припа́дающе и покланя́ющеся тебе, молим тя: явѝ твое многомощное заступление всем сущым в напа́стех, скорбе́х и болезнех, и избави нас от всякаго зла и от обидящего человека. Моли Всещедраго Триипостаснаго Бога, да подаст благочести́вейшему государю нашему на супоста́ты одоление, и царство его да укрепит и благословит непременя́емым миром и благополучием, яко да твоею помощию и крепким поборством посра́мятся вси являющии нам злая. Огради нас святыми твоими молитвами во вся дни жизни нашея. Умоли Милостиваго Владыку всех, да дарует нам христианскую кончину жития нашего безболезненну, непостыдну, мирну, Божественных Таин прича́стну: по исходе же нашем из жития сего да оградит нас святых Ангел ополчением, во еже избавитися нам от ко́зней диавола и тяжких воздушных мытарств его, и неосужденным предстати престолу Господа Славы, и того со всеми святыми славити в Небеснем Царствии Его во веки веков.

Тропарь, глас 4

Всеблагаго Бога и Царя благоверный раб и воин явился еси, Иоа́нне чудодетелю: пострадав бо ради веры мужески, блаженно же скончав течение, зри́ши Всетворца Господа в небесех светлейше, от него же прием дарование чудес, страждущым человеком во всяких напастех помога́еши: укрепляеши воины в ра́тех: от врагов пленения, ран же и внезапных смерте́й и от бед лютых изъима́еши. Темже моли Владыку Христа, приснопа́мятне, да во всяком обстоянии сотворит нам милость, и не введет нас во искушения, но спасет ду́шы нашя, яко человеколюбец.

Ин тропарь, глас 8

Блаженство Евангельское возлюбив, богомудре Иоанне, чистоту̀ се́рдца девством почтил еси: темже суету мiра сего пренебрег, устремился еси зре́ти Бога, иже тя прослави чудесы̀ во врачевании различне страждущих. Сего ради молим тя, проси нам у Христа Господа от всяких скорбе́й избавления и получения Царства Небеснаго.

Иулиа 30. Молитва преподобному Герману, Соловецкому чудотворцу. Из службы преподобному

О преподобне и богоносне отче наш Ге́рмане, безмолвнаго и́ноческаго жития во острове Солове́цтем начальниче! Молим тя мы, недостойнии, обстояще честны́й гроб твой, имже, купно с чудотворными ра́ками преподобных отец наших Зоси́мы и Савва́тия, богоизбра́нное место сие освящается: бу́ди и ты, с сими угодники Божиими и всея Российския земли небесными предстательми, моли́твенник и хода́тай о нас грешных пред престолом Вседержителя Бога, Емуже в дерзновении со Ангелы и всеми святыми предстои́ши, да да́рует нам, яко Благий и Человеколюбивый, вся потребная к животу̀ и благочестию, душа́м и телесе́м нашым здравие, во всех благих преспея́ние и свою всесильную помощь во всяких искушениих, беда́х же и напа́стех, воздиза́емых на ны от враг спасения нашего: обители же твоей моли избавитися от всякаго злаго обстояния, и приходящым в ню̀ ближним и дальным вся к душевней и телесней пользе просимая получити. Наипаче же испросѝ, угодниче Христов, всем нам грехов отпущение, христианскую кончину жития и наследие Царства Небеснаго у Христа Бога нашего, Емуже подоба́ет всякая слава, честь и поклонение, со Безначальным Его Отцем, и со Пресвятым и Благим и Животворящим Его Духом, ныне и присно и во веки веков.

Тропарь, глас 8

Желанием духовным от юности распаля́емь, преподобне Ге́рмане, Христу тесным жития путем последовал еси, и в морски́й пустынный остров а́ки в тихое пристанище всели́вся, в нем многая ле́та по́стнически пожил еси, идеже блаженным отцем Зоси́ме и Савва́тию сожитель был еси: с ни́миже моли Христа Бога о нас, любовию чтущих святую память твою.

Месяц август

Августа 2. Молитвы блаженному Василию, Христа ради юродивому, Московскому чудотворцу

Молитва 1, чтомая в Московском Покровском Василиа Блаженнаго соборе

О великий угодниче Христов, истинный дру́же и верный ра́бе Всетворца Господа Бога, преблаженне Васи́лие! Услыши ны многогрешныя, ныне вопию́щыя к тебе и призывающыя имя твое святое: помилуй ны припа́дающыя днесь к ра́це моще́й твоих: приимѝ малое наше и недостойное сие моление, умилосердися над убожеством нашим, и молитвами твоими исцели всяк недуг и болезнь души и тела нашего грешнаго, и сподоби ны течение жизни сея невредимо от видимых и невидимых враг и безгрешно прейти, и христианскую кончину непостыдну, мирну, безмятежну, и Небеснаго Царствия наследие получити со всеми святыми во веки веков.

Молитва 2, чтомая в Нижегородском Крестовоздвиженском монастыре

О преблаженне Васи́лие! Ты, на высоту добродетелей восше́д, к Богу прибли́жился еси, и яко пресветлая звезда житием твоим возсия́в, всю страну нашу просветил еси, и любовь родительскую оставив, Единаго в Троице славимаго Бога возлюбил еси, и Тому невозвра́тным желанием последовав, и по апостолу юродственное жительство избрав, мiра сего кра́сная ни во чтоже вменил еси. Молим убо тя, преблаженне Василие: молися Владыце Христу Богу нашему, и испроси молитвами твоими благочести́вейшему, самодержа́внейшему, вели́кому госуда́рю нашему, императору Николаю Александровичу всея России, и всему царствующему дому здравие и спасение, и победы на вся язы́ки, бра́ни хотящыя. Святейшему правительствующему Синоду, и преосвященнейшему владыце нашему имярек, всем преосвященным митрополитом, архиепископом и епископом, архимандритом и игуменом, и всему священному и монашескому чину испроси душевное и телесное здравие, и царствующым градо́м нашым, и сему граду, и святей обители сей утверждение, и мiру всему умире́ние. Еще же и веру нашу непорочну молитвами твоими соблюди, от глада и па́губы избави нас и от нападения иноплеменных сохрани, старыя уте́ши, юныя наста́ви, безумныя умудрѝ, вдовицы и сироты помилуй, младенцы воспитай, и творящыя святую память твою люди сия сохрани от всяких бед и напастей. И сподоби ны̀ грешныя в день судный одесную Сына Божия ста́ти, твоими святыми молитвами ко Спасу и Пречистей Его Матери, Преблагословенней Владычце нашей Богородице, от всех родов ублажа́емей ныне и присно и во веки веков.

Тропарь, глас 8

Житие твое, Васи́лие, неложное, и чистота нескверна: Христа ради тело твое изнури́л еси постом и бдением, и мра́зом и теплотою солнечною, и слото́ю, и дожде́вным облаком, и просветися лицѐ твое яко солнце: и ныне приходят к тебе Российстии наро́ди, ца́рие же и кня́зи, и вси людие, прославляюще святое твое успение. Тем Христа Бога моли, да избавит ны от варварскаго пленения и междоусобныя брани, и мир мiрови подаст и душа́м нашым велию милость.

Августа 3. Молитва преподобному Анто́нию Ри́млянину, Новгородскому чудотворцу. Из акафиста

Па́стырю предобрый и наставниче наш, преподобне отче Анто́ние! Ты, во пло́ти еще сый, Божественным манове́нием управляемь, ветхий Рим, отечество твое, и род твой оставил еси, и оттуду чудесным по вода́м на ка́мени, яко на ле́гцем кораблѝ, пришествием твоим се́мо осветил еси град сей, и в нем храм Божией Матери воздвигл еси, труды̀ же и подвиги твоими просветил еси обитель сию (еяже основание тобою бысть), умножил еси в ней ча́да твоя, образом добрых дел и учением наставляя их: сего ради нетлением моще́й твоих и чудес сиянием просла́ви тя Бог, Емуже безплотен со Безплотными предстоя ра́дуешися, и, ра́дуяся, о притекающих к чудотворней ра́це твоей и мо́щи твоя усты̀ и сердцем лобыза́ющих мо́лишися. Ты и ныне, яко имеяй дерзновение ко Владыце Христу, буди молитвенник и хода́тай о предстоящих сих бед твоих, честны́м твоим моще́м покланяющихся и просящих от тебе милостиваго заступления. Ей, молим тя, слуго Христов и угодниче, главы̀ и сердца̀ наша преклоняюще тебе: не пре́зри убо́гаго сего моления нашего, по при́зри на ны милостивно, коего́ждо потребу исполняя, болящым здравие, путешествующым в пути благопоспе́шество, плавающым скорое и безбедное плавание да́руя: обитель же сию от всяких бед, внезапно находящых, сохрани, и в ней живущыя и тружда́ющыяся, купно же и им благоде́ющыя от всяких напастей свободѝ: да вси твоими молитвами на земле богоугодно поживем, и Небеснаго Царствия наследницы [наследники] будем, досто́йни славосло́вити Всесвятую Троицу Отца и Сына и Святаго Духа, ныне и присно и во веки веков.

Тропарь, глас 4

Ветхий Рим отечество твое оставив, на камень яко на легкий корабль возше́л еси, и на нем па́че естества а́ки безплотен по водам шествовал еси: промышлением Божественнаго разума направляемь, Великаго Нова́града достигл еси, и обитель в нем сотворив, тело твое в ней предложил еси, яко дар освяще́н. Тем молим тя, отче Анто́ние, моли Христа Бога, да спасет душы нашя.

Августа 6. Молитвы преподобному И́ову, Ущельскому чудотворцу

Молитва 1

Преподобне отче наш И́ове, молитвою твоею и верою и любовию и чистотою се́рдца еще на землѝ во обитель Предвечнаго Бога Слова душу твою устро́ивый и ме́чным от разбойник усечением главы̀ твоея̀ житие запечатлевый, по отшествии же твоем от земных наипаче к Богу прибли́живыйся, но и от нас духом любвѐ твоея̀ не отступивый, и честны́я твоя мо́щи, яко сосуд благодати полный, нам оставивый! Велие имеяй дерзновение ко Всемилостивому Владыце, моли Его спасти ны̀ верующыя и к тебе с любо́вию и теплою молитвою притека́ющыя. Помози благочести́вейшему, самодержа́внейшему, вели́кому госуда́рю нашему, императору Николаю Александровичу всея России, да благоуправля́емо будет царство его в мире и благостоянии, и да покорятся под но́зе его сопроти́внии. Испроси нам от Великодаровитаго Бога нашего всякий дар, коему́ждо благопотребен во спасение, веры непорочны соблюдение, градо́в наших утверждение, мiра умирение, от нашествия иноплеме́нных избавление, от гла́да и па́губы сохранение, младенцем воспитание, юным наставление, сирота́м и вдови́цам заступление, скорбящым утешение, по морю плавающым, хла́дныя пусты́ни и темныя де́бри преходя́щым верное ко пристанищу приведение, неду́гующым исцеление, бесным от демонскаго нашествия свобождение, падшым во грехи покаяние и возстание, от Церкве Христовы отпадшым вразумление и на путь спасения возвращение, подвизающымся укрепление, благоделающым в де́лех благих преспеяние и благословение, отходящым от сего временнаго жития к вечному благое напутствие, отшедшым блаженное упокоение. О священная главо̀! Посети место сие святое, дре́вле кровию твоею честно́ю обагре́нное и омове́нное: соблюди и укрепи молитвами твоими обитель твою, разширѝ ю̀, украсѝ добродетельми тоя̀ сестры, и вся притекающыя к тебе добре сохрани во веки веков.

Молитва 2

О преподобне и богоносне отче наш И́ове! Велие имея к Богу дерзновение, молися непрестанно о всех нас, занѐ буря многих бед и скорбей обдержи́т ны: се бо неду́зи теле́снии, болезни душевныя, приражения вражия обуревают ны. Ходит бо враг наш, иски́й кого поглоти́ти: мы же, о спасении нашем нерадя́ше, не́смы досто́йни нижѐ воззрети на высоту небесную, ни Господа в помощь свою призва́ти. Но ты бу́ди нам помощник во спасение скорый и от зол изба́витель неодолимый. Подаждь нам память смертную, слезы покаяния и надежду спасения, да не во отчаяние впадем, нижѐ де́рзостным на милосердие Божие упованием, во гресе́х же пребыванием, в конец себѐ погуби́м: но да будет нам память грехов наших во источник теплых слез и сокрушения сердечнаго, милосердия же Божия и благодать Его во спасение наше, молитвами твоими, да подастся нам, твоим чадом, во веки веков.

Молитва 3

О преподобне и богоносне отче наш, угодниче Божий И́ове! Предстоя престолу Пресвятыя Троицы, молися непрестанно о благочести́вейшем, самодержа́внейшем, вели́ком госуда́ре нашем, императоре Николае Александровиче всея России, и о всем царствующем доме, о святейшем правительственном синоде, и о преосвященнейшем епископе нашем имярек, о всем священнем и иночестем чине, игумене же и братии обители твоея, о военачальницех и градоначальницех и всех православных христианех: да ходим ки́йждо достойно звания нашего, в немже звани быхом, и да будет земля наша земля добра̀, и вси живущии на ней род избра́н, царское священие, язык свят, людие обновления, ныне и присно и во веки веков.

Августа 8. Молитвы преподобным Зосиме и Савватию, Соловецким чудотворцем

Молитва 1, из службы со акафистом

О преподобнии и богоноснии отцы наши Зоси́мо и Савва́тие, земнии ангели и небеснии человецы, ближнии дру́зи [други] Христовы и уго́дницы [угодники] Божии, обители вашея славо и украшение, всея же северныя страны, па́че и всего православнаго отечества нашего необоримая стено̀ и великое заступление! Се мы недостойнии и многогрешнии, со благоговейною любовию к ра́кам честны́х моще́й ваших припа́дающе, ду́хом сокрушенным и смиренным прилежно вас мо́лим: моли́те непрестанно Благосердаго Владыку и Господа нашего Иисуса Христа, яко дерзновение ве́лие к Тому иму́щии, да не отступит от нас Его вседействующая благодать, покров же и заступление Пресвятыя Владычицы нашея Богородицы на месте сем да пребудет, и да неоскудеют никогда́же и́стиннии ревнителие ангельскаго жития во святей обители сей, иде́же вы, богоно́снии отцы и начальницы, безмерными труды̀ и поще́ньми, то́ки же слез́ными и всемо́щными бдении, непрестанными молитвами и моле́ньми начало и́ноческому житию положи́сте. Ей, угодницы [угодники] святии, молитвенницы [молитвенники] к Богу благоприя́тнейшии! теплыми к Нему мольбами оградите и сохраните ны̀ и святою селение сие ваше от труса, потопа, огня и меча, нашествия иноплеменных и смертоносныя язвы, от вражды и всяких нестроений, от всякия беды̀ и ско́рби и от всякаго зла: да непрестанно на месте сем, в мире и безмолвии, благочестно славится пресвятое имя Господа и Бога, и обретают вечное спасение Его. О преблаженнии отцы наши Зоси́мо и Савва́тие! услы́шите ны̀ грешныя, во святей обители вашей и под кровом вашего защищения недостойно жительствующыя, и благомощными вашими к Богу хода́тайствы испросите душа́м нашым грехов оставление, жития исправление и вечных благ восприятие в Небеснем Царствии: всем же верующым, и́же на всяком месте и во всякой ну́жде призывают вас в помощь и заступление, и и́же со благоговейною любовию во обитель вашу притека́ют, не преста́ните излива́ти всякую благодать и милость, сохраняюще их от всякия сопроти́вныя силы, от всякия напасти и от всякаго злаго обстояния и подаю́ще им вся потребная к душевней и телесней пользе. Наипа́че же молите Премилосердаго Бога, да да́рует благочести́вейшему, самодержа́внейшему, вели́кому госуда́рю нашему, императору Николаю Александровичу, и всему царствующему его дому, здравие и долгоденствие, радость и спасение, на врагѝ победу и одоление и во всем благопоспешение: Церковь же свою Святую да утвердит, и все наше православное отечество в мире и тишине, в любви и единомыслии, во правоверии и благочестии да сохранит и соблюдет во веки веков.

Молитва 2

О преподобнии отцы, вели́цыи [великие] заступницы [заступники] и ско́рии услы́шателие молитв, угодницы [угодники] Божии и чудотворцы Зоси́мо и Савва́тие! Не забу́дите, я́коже обеща́стеся, посеща́ти ча́да ваша. Аще бо и отъидо́сте от нас телом, но духом присно с нами пребываете. Мо́лим убо вас, о преподо́бнии: изба́вите ны от огня и меча, от нашествия иноплеменников и междоусобныя брани, от тлетворных ве́тров и от внезапныя смерти и от всех прило́г бесовских, находящих на ны. Услышите нас грешных, и приимите молитву сию и моление наше, яко кади́ло благовонное, яко жертву благоугодную, и ду́шы нашя, злыми де́лы и советы и по́мыслы умерщвле́нныя, оживи́те. И я́коже умершую отроковицу возста́висте, и неисце́льныя ра́ны многих исцели́сте, и от духо́в нечистых злѐ му́чимыя изба́висте: та́ко и нас, содержимых во у́зах вражиих, изьми́те, и от сетей диавола изба́вите, из глубины прегрешений изведи́те, и милостивым вашим посещением и хода́тайством от враг видимых и невидимых огради́те ны, благодатию и силою Пресвятыя Троицы, всегда, ныне и присно и во веки веков.

Тропарь, глас 8

Яко свети́льницы яви́стеся всесве́тлии, во ото́це океана моря, праведнии отцы Зоси́мо и Савва́тие: вы бо Крест Христов на ра́мо взе́мше, усердно тому после́довасте, и чистото́ю Бо́гови прибли́жившеся, отону́ду силами чудес обогати́стеся. Темже и мы любезно притекаем к ра́кам честны́х моще́й ваших, и уми́льно глаго́лем: о преподобнии, моли́те Христа Бога спастися душам нашым.

Ин тропарь, глас 4

Постническое и равноангельное житие ваше, преподобнии отцы̀ Зоси́мо и Савва́тие, вселе́нней по́знаны сотворѝ вас: чудодея́нии различными, богоно́снии, просвещаете верою призывающыя вы̀ и чту́щыя честну́ю память вашу.

Августа 10. Молитва святому мученику и архидиакону Лаврентию, чтомая в Благовещенской церкви местечка Барышевки, Полтавския епархии

О пресвятый и предивный страстотерпче Христов, архидиа́коне Лавре́нтие! Восхваля́юще веру и страдания твоя, почита́ем победу и венценосное прехождение твое чрез горящее у́глие от тьмы века сего ко свету невече́рнему престола вели́чествия Божия. Темже убо молим тя: яко же дре́вле притека́вшыя с верою к покрову твоему чудесы̀ твоими утвердил еси, та́ко да прии́меши и нас под кров твой, и в боле́зни и в печа́лех наших заступник на да бу́деши: и якоже от слепоты̀ телесных оче́с Крискентиа́на приложением рук исцелил еси, та́ко да исцели́ши предстательством твоим у престола Божия и нашу душевную слепоту. При́зри на разслабление наше телесное и душевное, укрепѝ нас бо́дренностию проти́ву враг наших видимых и невидимых, удруча́ющих нас напа́стьми, да твоею помощию путь маловре́менныя жизни сея преше́дше, непобежде́ни от бед и скорбе́й и всякаго лютаго обстояния, дости́гнем неприступныя славы величествия Божия, идеже предстоя, мо́лишися со дерзновением за люди прибегающыя с верою к тебе и воспевающыя ди́внаго во святых Бога Израилева во веки веков.

Августа 10. Молитва блаженному Лаврентию, Христа ради юродивому, Калужскому чудотворцу

О святый и богопрославленный праведниче и чудотворче Лавре́нтие, скорый помощниче и усердный заступниче всех, с верою и любовию моли́твенно к тебе прибегающих! Се и мы смире́ннии и гре́шнии, обремене́ннии и́гом тяжким многих беззаконий наших, во умилении глубо́цем к тебе прибегаем, и припа́дающе ко многоцелебней ра́це святых моще́й твоих, молим и просим тя: помоли́ся за нас ко Господу Богу, да не погуби́т нас со беззаконии нашими, но обратит нас на стезю покаяния и спасения. Ве́мы бо, ве́мы, яко много может пред ним молитва праведнаго: тебе же, воистину праведника су́ща, на умоление к нему предлагаем, си́це уповающе, яко твоего ра́ди небеснаго предстательства пред Ним и мы недостойнии поми́ловани будем. Испроси нам у Создателя нашего великия и богатыя да́ры благости Его: земли плодоносие, возду́ха благорастворе́ние, дождѝ благовре́менны, мир во днех наших, благочестия умножение, болящым здравие, скорбящым утешение, унывающым ободрение, сирым призре́ние, убогим снабдение, подвизающымся преспея́ние, умирающым благую христианскую кончину и всем правоверующым вечное спасение. Благочести́вейшаго, самодержа́внейшаго, вели́каго госуда́ря нашего, императора Николая Александровича всея России, и все богохранимое царство его сохрани святыми молитвами твоими во благоденствии, невреди́мы от всякаго зла, и спобора́й оружию христолюбиваго его воинства во бра́нех со враги: град же твой и святую обитель твою блюдѝ в мире и благоустроении, яко страж и хранитель их неотступный. Ей, уго́дниче Божий! не посрамѝ упования нашего, но яви нам святое твое заступление, да величаем тя немо́лчно, яко великаго предстателя нашего, и прославляем неизреченное человеколюбие ди́внаго во святых Своих Триединаго Бога, Отца и Сына и Святаго Духа, во веки веков.

Августа 11. Молитвы преподобному Феодору, князю Острожскому, во иноцех же Феодосию, Киево-Печерскому чудотворцу. Из службы

Молитва 1

Во́инствование земное на духовную брань преложи́вый и о лю́дех твоих доброе попечение показа́вый, блаженне Фео́доре преподобне! К тебе во смятении сердец наших днесь прибегаем, и твоея помощи стране нашей и душа́м нашым смиренно проси́ти дерзаем. Ве́мы, угодниче Божий, яко малодушие наше и леность духовная дале́че от твоея па́жити ны отрева́ет и всякаго омерзения достойны ны соде́ловает: но милосердие твое ко врагом и предателем твоим помина́юще, и́мже па́ки защитник явился еси, равнаго милосердия твоего и нам недостойным мо́лим. Ты убо, угодниче Христов, от агаря́н разоренную землю нашу и от иноверных подавля́ему, жалостию и любовию объе́мля, паки к бо́дренному житию верныя призвал еси, ели́ко во́инскими победами, толи́ко и молитвою и образом жития твоего а́ки све́щник златы́й блистаяся: ты, мiрска́го жития̀ суету оста́вль, сам убо от душѝ твоей попечению в пещернем уедине́нии преда́лся еси, земли же на́шея попечение и исцеление славному роду твоему запове́дал еси, и та́ко предел твой еще на двесте лет и вя́щше по кончине твоей от сетей ерети́ческих оградил еси. Ты и далече сущее единокровное нам племя чешское ко православней вере приближа́ти тща́лся еси и от лати́нскаго нашествия ограждал еси. Ты и ныне, на небесех душе́ю со Ангелы водворя́яся, нетленным же телом посредѐ нас почива́я, не отри́ни нашя гла́сы скорбныя, но молитвенный плачь согрешающих сыно́в земли нашея услы́ши. Согреши́хом бо и непра́вдовахом и от Завет Бо́жиих отступи́хом, в развраще́нныя обы́чаи зле впадо́хом, и еже еди́но на потре́бу есть, душ наших спасение в небреже́нии оста́вихом. Тебе в Бозе правда и слава, отче преподобне, нам же стыде́ние лица̀. Оба́че ели́ко грешне́йшии яви́хомся, толи́ко вя́щшаго сострадания твоего требуем и в покаянии зове́м ти си́це: твоея неистощи́мыя любвѐ лучу̀ нам послѝ: гнев Божий, праведно на ны̀ дви́жимый, молитвою твоею от нас отведѝ, спасительную благодать Его к нам недостойным предстательством твоим низведѝ, и от грехо́вныя бе́здны к высотѐ покая́ния нас возведѝ, да та́ко и мы житие свое испра́вити потщи́мся, крепость земли нашея па́ки обновля́ти на́чнем, врагѝ же веры Христовы и злыя преле́стники безбоя́зненно отража́ти словом и житием возревну́ем, и Спасителя нашего со всеми святыми благодарно воспева́ти будем, сла́вяще Его, со Отцем и Святым Духом, во веки веков.

Молитва 2

О преподобне отче Фео́доре, землѝ волы́нския похвало и прибежище, святыя же Лавры Печерския сла́во и украше́ние! При́зри на предстоящыя люди, твоея̀ помощи с верою прося́щыя и согреше́ния своя тебе испове́дающыя: приимѝ тех усердныя молитвы, и от всякия ско́рби и ну́жды предстательством твоим изба́ви. Помозѝ нам, уго́дниче Божий, в мире и покаянии житиѐ наше здѐ проводи́ти, во благополучии па́мятование о заповедех  Божиих всемерно храни́ти, в беда́х же от ропота и уныния огражда́тися: оба́че и по́мыслом лучшим сердца̀ наша исполни, да твоего благосердия и яже о вере ревности подражатели бы́вше, о́ных сподо́бимся ве́чных благ, и́миже днесь украша́яся, молитвы о спасении нашем возно́сиши ко Господу, Емуже слава подобает, Отцу и Сыну и Святому Духу, ныне и присно и во веки веков.

Тропарь, глас 7

Преобразил еси земна́го княжения славу во и́ночества образ смиренный, и вместо врагов видимых на невидимыя ополчился еси, и обою̀ победитель красе́н явля́яся, един от чудотво́рец Печерских показался еси: темже и нам ревности Божия дар испросѝ, братолюбием сердца̀ наша просветѝ, и ко спасению вечному стезѝ нашя, Фео́доре блаже́нне, напра́ви.

Августа 13. Молитвы святителю Тихону, епископу Воронежскому, Задонскому чудотворцу. Из акафиста

О великий угодниче Божий и преславный чудотворче, святителю отче наш Ти́хоне! Со умилением к ра́це честны́х и многоцеле́бных моще́й твоих припа́дающе, хвалим, славим и величаем просла́вльшаго тя Бога и нам недосто́йным в тебе ве́лию милость показавшаго, и всеусердно верою и любовию святую память твою чтуще, молим тя: принеси молитву нашу ко вся содержащему и спасающему Человеколюбцу Господу, Емуже ты ныне с ли́ки Ангел и со всеми святыми предстои́ши, да дух правыя веры и благочестия во Святей Своей православней Церкви утвердит, па́стырем же ея святую ревность о спасении вве́ренных им людей да подаст, во еже им право верующыя соблюда́ти, слабыя и немощныя в вере укрепля́ти, неведущыя наставля́ти, противныя облича́ти. Благочести́вейшему же, самодержа́внейшему, вели́кому госуда́рю нашему, императору Николаю Александровичу да дарует с долгоденствием душевное же и телесное здравие и спасение, на супоста́ты одоление, ко устроению царства благопоспешение и на вся благая его начинания благословение, и всему царствующему дому премногую милость Свою и благоденствие: поставленным от него власте́м и судия́м во царстве его да ниспо́слет усердие, мудрость и нелицеприятие, да та́ко поживем тихое и безмолвное житие. Веруем бо, отче преподобне, яко ты, на небесе́х живы́й, лю́биши ны̀ то́юже любовию, е́юже вся ближния твоя возлюбил еси, всегда пребывати тебе на земли. Испроси убо у Всемилостиваго Господа и всем нам дар коему́ждо благопотре́бен и вся к жизни вре́менней и ве́чней полезная, мiра умирение, градов наших утверждение, земли плодоносие, от глада и па́губы избавление, от нашествия иноплеменных сохранение, скорбящым утешение, недугующым исцеление, падшым возставление, заблужда́ющым на путь истины возвращение, подвизающымся в де́лех благих укрепление, благоде́лающым преспея́ние, родителем благословение, ча́дом во стра́се Господни воспитание и научение, наставником ве́дение и благочестие, неведущым вразумление, сирым, неимущым и убогим помощь и заступление, отходящым от сего временнаго жития к вечному благое уготовление и напутствование, отшедшым блаженное упокоение. Сих всех, наипа́че, проси нам, святче Ти́хоне, у Щедрода́вца Бога, яко имы́й велие к Нему дерзновение: тебе бо стяжа́хом при́снаго заступника и теплаго молитвенника о нас пред Господем, Емуже подобает всякая слава, честь и поклонение, Отцу и Сыну и Святому Духу, ныне и присно и во веки веков.

Молитва 2

О всехвальный святителю и угодниче Христов, отче наш Тихоне! Ангельски на земли пожив, ты яко Ангел благий явился еси и в дивнем твоем прославлении. Веруем от всея души и помышления, яко ты, благосердый наш помощниче и молитвенниче, твоими неложными хода́тайствы и благодатию, от Господа обильно тебе дарова́нною, присно способствуеши нашему спасению. Приимѝ убо, ублажаемый угодниче Христов, и в час сей наша недостойная моления: свободи ны̀ твоим заступлением от облегающаго нас суесловия и суемудрия, неправоверия и зловерия человеческаго. Потщи́ся, скорый о нас предстателю, благоприятным твоим хода́тайством умоли́ти Господа, да пробавит Своя великия и богатыя милости на нас грешных и недостойных рабе́х Своих, да уврачует Своею благодатию неисце́льныя язвы и стру́пы растленных душ и телес наших, да растворит окаменелая сердца̀ наша слезами умиления и сокрушения о премногих согрешениих наших, и да избавит ны̀ от вечных мук и огня геенскаго: всем же верным людем Своим да да́рует в нынешнем ве́це мир и тишину, здравие и спасение и во всем благое поспешение, да та́ко, тихое и безмолвное житие пожи́вше во всяком благочестии и чистоте, сподо́бимся со Ангелы и со всеми святыми сла́вити и воспевати всесвятое имя Отца и Сына и Святаго Духа во веки веков.

Тропарь, глас 8

От юности возлюбил еси Христа, блаженне, образ всем был еси словом, житием, любовию, духом, верою, чистотою и смирением: темже и всели́лся еси в небесныя обители, иде́же предстоя престолу Пресвятыя Троицы, молѝ, святителю Ти́хоне, спасти́ся душам нашым.

Ин тропарь, глас 4

Православия наставниче, благочестия учи́телю, покаяния проповедниче, Златоу́стаго ревни́телю, па́стырю предобрый, новый России свети́льниче и чудотворче, паству твою до́бре упасл еси, и писа́ньми твоими вся ны̀ наставил еси: темже венце́м нетления украше́н от Пастыреначальника, моли Его спастися душа́м нашым.

Августа 15. Молитва преподобному Мака́рию Ри́млянину, Новгоро́дскому чудотворцу. Из службы преподобному

О священная главо̀, земный ангеле и небесный человече, преподобне и брогоносне отче наш Мака́рие! Припа́даем к тебе с верою и любовию и молимся прилежно: яви нам смиренным и грешным святое твое заступление. Се бо, грех ради наших, не и́мамы свободы чад Божиих проси́ти о потре́бах наших Господа и Владыку нашего, но тебе молитвенника благоприятнаго к Нему предлагаем, и просим тя̀ со усердием многим. Испроси у благости Его благопотребныя да́ры душа́м и телесе́м нашым: веру праву, надежду спасения несомненну, любовь ко всем нелицемерну, во искушениих мужество, в злостраданиих терпение, в молитвах постоянство, душ и теле́с здравие, земли плодоносие, возду́ха благорастворе́ние, житейских потреб довольство, мирное и безмятежное житие, благую христианскую  кончину и добрый ответ на Страшнем Суде Христове. Испроси, угодниче Божий, у Царя царствующих и Господа господствующих, благочести́вейшему, самодержа́внейшему, вели́кому госуда́рю нашему, императору Николаю Александровичу всея России, здравие, спасение и на враги одоление, всему же богохранимому царству его мир, тишину и благоустроение. Не забуди, преподобне отче, и пустынное место подвигов твоих, но благоволи о нем и прослави ѐ чудотворении твоими: и вся, приходящыя на поклонение моще́м твоим святым, от искушений диавольских и всякаго зла милостивно избави. Ей, чудотворче святый! Не лиши нас помощи твоея небесныя, но молитвами твоими вся ны приведи во пристанище спасения, и наследники яви нас Всесветлаго Царствия Христова, да поем и славим неизреченныя щедро́ты Человеколюбца Бога, Отца и Сына и Святаго Духа, и твое святое отеческое заступление, во веки веков.

Тропарь, глас 4

Рим отечество твое оставив, в пустыню вселился еси, и та́мо в пу́сте месте обрет жилище себе, отбе́гл еси суеты мiра сего, и в безмолвнем приста́нищи до́бре направлял еси себе ко Господу. Сего ради и мы чтущии тя, притека́юще к ра́це моще́й твоих и любезно ту́ю облобызающе, моли тя, отче Мака́рие: молѝ о нас Господа, да помилует нас в день судный.

Ин тропарь, глас тойже

Отечество твое ветхий Рим оставив, во страну Российскую пришел еси, преподобне, и в пустыни бла́тней всели́вся, та́мо приста́нище тихое ко спасению обре́л еси, и безмолвное житие богоугодно провожда́л еси, направляя себе ко Господу молитвами непрестанными: сего ра́ди Христос тя возлюбѝ и чудесы̀ прослави, отче Мака́рие, яви́в тя пастыря до́бра словеснаго ста́да Своего. Темже и мы, притекаю́ще к ра́це моще́й твоих, уми́льно глаголем: моли Просла́вльшаго тя, спасти́ся душа́м нашым.

Августа 18 и октовриа 19. Молитва преподобному Иоанну Рыльскому. Из пролога

О пречестна́я главо̀ и благодати Святаго Духа исполненная, Спа́сово со Отцем обита́лище! Предстоя̀ у престола всех Царя и наслажда́яся света Единосущныя Троицы и херуви́мски со Ангелы возглашая песнь трисвятую, великое же и неизследованное дерзновение имея, моли́ся о нас Всемилостивому Владыце. Помозѝ державному царю нашему Николаю Александровичу, и покорѝ ему вся противныя врагѝ под но́зе его. Веру святую непоро́чну соблюдѝ, гра́ды нашя утвердѝ, мiр весь предстательством твоим умирѝ, от гла́да и па́губы изба́ви ны̀, и от нападения иноплеменных сохранѝ ны: старыя уте́ши, юныя наста́ви, безумныя умудрѝ, вдовицы помилуй, сироты̀ заступи, младенцы воспитай: и вся люди твоя сохрани от всех напастей. И в день Страшнаго Суда, от шу́ия части избави ны, и с десными о́вцами быти молитвами твоими устрой нас, па́че же сподоби ны услы́шати блаженный оный глас от Владыки Христа: прииди́те, благословеннии Отца Моего, наследуйте уготованное вам Царствие от сложения мiра, во веки веков.

Тропарь, глас 1

Покаяния основание, прописание умиления, образ утешения, духовнаго совершения, ра́вно Ангелом житие твое бысть, преподобне: в молитвах убо и поще́ниих и в слезах пребывая, отче Иоанне, молѝ Христа Бога о душах наших.

Августа 21. Молитва преподобному Аврамию Смоленскому. Из акафиста

О великий отче Авра́мие, до́блий подвижниче Христов, в ско́рбех и напа́стех преславный наш помощниче и защитниче! Ничто́же возмо́же отлучи́ти тя от любве ко Господу Иисусу: ни гонения, ни клеветы̀, ни прещения врагов твоих. Ты яко лев, на брань проти́ву волко́в мысленных, духо́в злобы, изшел еси, иже за доброе твое исповедание единоплеме́нный тебе народ смоленский на тя воздвиго́ша: но сих, яко огненная стрела, порази́л еси, силою благодати Святаго Духа укрепляемь, и яко орел в го́рния обители Отца Небеснаго воспарил еси, вечную жизнь, славу и блаженство неизреченное та́мо наследовав. Веруем, святче Божий, яко, предстоя̀ со Ангелы и всеми святыми престолу славы Триипостаснаго Бога, усердныя и богоприятныя возно́сиши молитвы не то́кмо о святей обители сей, тобою устро́енней, и о гра́де нашем, но и о всей святей Христове Церкви, и о православнем царстве Российстем, и благочести́вейшем императоре нашем Николае Александровиче. Ве́мы, преславный чудотворче, ка́ко ты, силою Всемогущаго Господа Иисуса Христа, еще жив сый, жаждущую за грехи людей землю Смоленскую обильным дождем напои́ти умолил еси, и по успении твоем оби́льныя да́ры благодатныя по́мощи во спасение всем с верою к тебе прибегающым источа́еши, наипа́че же кончину с покаянием почитающым тя подае́ши, да всѝ единодушно неисповеди́мое величие благости Божия прославляем. Темже с верою и любовию припа́дающе и благоговейно святую икону твою лобыза́юще, молим тя, добрый наш на небесѝ молитвенниче и заступниче: помогай нам грешным и смиренным твоими молитвами во всех скорбех, нуждах и обстояниих наших, сохраняй нас и святую сию обитель твою и град сей Смоленск и вся православныя христианы Российския страны от всякаго зла и всякия напа́сти, наипа́че же вечному нашему спасению споспешеству́й, и всех просящих твоея помощи и заступления сохраняй. Та́же моли Христа Спасителя нашего, да всем православным христианом мир и тишину дарует, и да обратит от нас всякий гнев на ны̀ движимый, да избавит нас от сетей вражиих, томления во узах греха и мучений адовых, и да сподобит нас, недостойных и грешных, ста́ти одесную Его на Суде Его праведнем и внити в вечный покой святых Его, иде́же празднующих глас непрестанный и неизреченная сладость зря́щих добро́ту лица Его: и тако да возможем с тобою и всеми святыми безконечно славити Троицу Единосущную и Нераздельную во веки веков.

Тропарь, глас 8

Днесь возсия̀ нам память твоя, славне, яко солнце, светозарно лучами озаря́ющая мiр и тьму но́щи злых духо́в от нас отгоняющая: днесь Небесныя Силы святых Ангел и души праведных мысленно торжеству́ют ра́дующеся. Днесь и мы грешнии припа́дающе мо́лимся: отче преподобне Авра́мие, Христа Бога молѝ непрестанно, спасти град и люди, любезно тебе почита́ющыя.

Августа 24. Молитва святителю Петру, митрополиту Киевскому и всея России

О великий святителю, преславный чудотво́рче, Российския Це́ркве первопресто́льниче, града Москвы храни́телю и о всех нас усердный моли́твенниче, отче наш Пе́тре! К тебе смиренно припа́даем и мо́лимся: прострѝ ру́це твои ко Господу Богу и помоли́ся за ны грешныя и недостойныя рабы Его, да проба́вит нам милость Свою и низпо́слет нам вся благопотре́бныя ко временному житию и вечному спасению нашему да́ры благости Его, наипа́че же да огради́т нас миром, братолюбием и благочестием от всех искушений врага̀ диавола, и да́рует нам бы́ти верным ча́дом твоим не по имени то́кмо, но и всем житие́м нашим. Мо́лим тя, святителю Христов, сохрани предстательством твоим небесным благочестивейшаго, самодержавнейшаго, великаго государя нашего, императора Николая Александровича всея России, во здравии и благоденствии на мно́гая ле́та, покоряя под но́зе его вся врагѝ и супоста́ты его, и да почи́ет на нем благословение твое, дре́вле пре́дку его, великому князю Иоа́нну, тобою данное. Ей, угодниче Божий! Услыши нас благосердно, и буди всем нам помощник и заступник во всяких беда́х и напа́стех, не забу́ди нас и в час кончи́ны нашея, егда наипа́че твоего заступления потребуем: да молитвами твоими святыми сподо́бимся и мы грешнии кончину благую получи́ти и Царствие Небесное унасле́довати, сла́вяще ди́внаго во святых Своих Бога нашего, Отца и Сына и Святаго Духа, во веки веков.

Тропарь, глас 4

Наста̀ днесь всечестны́й праздник пренесе́ния честны́х моще́й твоих, святителю Пе́тре, веселя̀ изрядно твое ста́до и вернаго императора и люди: о нихже не оскудева́й моля́ся Христу Богу, еже от Него дарова́нней ти пастве сохрани́тися от враг ненаве́тованней и спастися душам нашым.

Августа 24. Молитва преподобному Арсению Комельскому. Из акафиста

О священная главо̀ преподобне отче, преблаженне а́вво Арсе́ние Великий! Не забу́ди убо́гих твоих до конца, но помина́й нас всегда во святых твоих и благоприятных молитвах к Богу. Помянѝ стадо Твое, еже сам упа́сл еси, и не забуди посещать чад твоих. Молѝ за ны̀, отче священный, за дети твоя духовныя, яко име́яй дерзновение к Небесному Царю: не премолчѝ за ны ко Господу, и не пре́зри нас, верою и любовию чтущих тя. Поминай нас недостойных у престола Вседержи́телева, и не преста́й моля́ся о нас ко Христу Богу: ибо дана тебе бысть благодать за ны моли́тися. Не мним бо тя су́ща мертва: аще бо телом и преста́вился еси от нас, но и по смерти жив сый пребыва́еши. Не отступа́й от нас духом, сохраняя нас от стрел вражиих и всякия пре́лести бесо́вския и ко́зней диавольских, па́стырю наш добрый. Аще бо и моще́й твоих ра́ка пред очи́ма на́шима ви́дима есть всегда, но святая твоя душа со а́нгельскими во́инствы, со безпло́тными ли́ки, с Небесными Силами, у престола Вседержителева предстоя́щи, достойно весели́тися. Ве́дущи убо тя воистину и по смерти жи́ва су́ща, тебе припа́даем и тебе мо́лимся: моли́ся о нас Всесильному Богу, о пользе душ наших, и испросѝ нам время на покая́ние, да невозбра́нно пре́йдем от земли на небо, от мытарств же горьких, бесо́в воздушных князей и от вечныя муки да избавимся, и Небеснаго Царствия насле́дницы да будем со всеми праведными, от века угоди́вшими Господу нашему Иисусу Христу: Емуже подоба́ет всякая слава, честь и поклонение, со Безначальным Его Отцем, и с Пресвятым и Благим и Животворящим Его Духом, ныне и присно и во веки веков.

Тропарь, глас 4

Удалився мiра, водворился еси в путыню, водворился еси в пустыню, и тамо подвизался еси добрым подвигом, постом и молитвами и многим терпением, и жив показал еси многая чудеса: и по преставлении твоем источаеши различная исцеления с верою приходящым к честному гробу твоему, Арсе́ние отче наш. моли Христа Бога спастися душам нашым.

Августа 26. Молитва святым мучеником Адриану и Наталии. Из акафиста

О священная дво́ице, святи́и му́ченицы Христовы Адриа́не и Ната́лие, блаже́ннии супру́зи и до́блии страдальцы! Услы́шите нас молящыхся вам со слезами, и низпосли́те на ны̀ вся благопотребная душа́м и телесе́м нашым, и молите Христа Бога, да помилует нас и сотворит с нами по милости своей, да не погибнем во гресе́х наших, ей, святии мученицы! Приими́те глас моления нашего, и избавите ны молитвами вашими от глада, губительства, труса, потопа, огня, града, меча, нашествия иноплеменников и междоусобныя брани, от внезапныя  смерти и от всех бед, печалей и болезней, да присно вашими молитвами и предстательством укрепляеми, прославим Господа Иисуса Хиста, Емуже подобает всякая слава, честь и поклонение, со Безначальным Его Отцем и Пресвятым Духом, во веки веков.

Августа 26. Молитва преподобному Адриа́ну Андру́совскому, чтомая в Андру́сово-Никола́евской пустыни, Олонецкия епархии

О преподобне отче Адриа́не, угодниче Божий, пусты́нный жи́телю, послу́шниче Христов! ты убие́ние от нечести́вых человек по науще́нию вражию претерпе́л еси, но Господь Бог десна́го стоя́ния Своего со святыми тя сподо́би. Сего ради к ра́це честны́х моще́й твоих припа́даем и мо́лим тя усердно: буди молитвенник к Господу Богу о нас грешных, святыми твоими молитвами сохрани нас от всякаго зла, огня, глада, потопа и от всякия болезни и внезапныя смерти: и умоли Господа Бога даровати нам оставление грехов, деснаго же стояния и нас сподо́бити, да непрестанно прославляем Пресвятую Троицу, Отца и Сына и Святаго Духа, во веки веков.

Августа 27. Молитва святому священномученику Кукше

О святый страстотерпче, священномучениче Ку́кше, подвиги апостольския совершивый посреде обитания соплеменник твоих, отец наших, ихже ты светом истиннаго богопознания просвещал еси, и по данней ти благодати Духа Святаго бесы прогнавый, дождь с небесѐ своди́вый, е́зеро изсуши́вый и сотвори́вый и́на многа чудеса̀, многострадальный же твой подвиг мученическою кончиною увенча́вый! Приимѝ от нас умиленныя и усердныя молитвы и вознеси я̀ ко престолу Святыя Троицы, идеже ты в ли́це святых предстои́ши, яко да твоим хода́тайством Милостивый Господь утвердит в мире и славе державу благочестивейшаго государя нашего, императора Николая Александровича, в чадех же святыя Православныя Церкве да укрепит дух веры и благочестия, в пастырех ея ревность к назиданию пасомых да умножит и да при́зрит милостивым оком на люди предстоящыя и прибегающыя ко твоей помощи. Ей, святый угодниче Божий! вемы, яко, ве́лиих ради страданий твоих, много может молитва твоя ко благосердию Владыки. Сего ради, яко чада твоя по вере, к ра́це честны́х и многоцеле́бных моще́й твоих припа́дающе, мо́лим тя духом сокрушенным и смиренным сердцем: не пре́зри молений наших, пред тобою излива́емых, но вознесѝ я̀ ко Всещедрому Богу, я́ко кади́ло благовонное, да твоим хода́тайством при́сно почи́ет благодать Его на граде сем, в немже чтится преславное имя твое, и люди живущии в нем да сохраня́тся от глада, огня, смертоносныя язвы и внезапныя смерти, от всяких бед и напастей. Споспе́шествуй, священномучениче Ку́кше, святыми твоими молитвами честно́му братству святаго храма твоего, да приумножится сие и процветает во славу Триединаго Бога, в похвалу твоего и́мене и во благо святыя Православныя Церкве, да тако всѝ, охраня́еми твоим предстательством, мирно и благочестно по́прище жития̀ сего пре́йдем, сла́вяще и благодаря́ще Единаго Истиннаго Бога, во Святей Троице славимаго, Отца и Сына и Святаго Духа, во веки веков.

Августа 29. Молитвы святому Пророку, Предтечи и Крестителю Господню Иоанну

 Молитва 1, из книги: Акафисты с каноны

Крестителю Христов, пропове́дниче покаяния! Ка́ющагося не пре́зри мене, но совокупля́яся с Во́и Небесными, моли́ся ко Влады́це за мене недостойнаго, унылаго, немощна́го и печальнаго, во многия беды̀ впа́дшаго, утружде́ннаго бурными по́мыслы ума моего. Аз бо есмь вертеп злых дел, отню́д не имея конца греховному обычаю: пригвожде́н бо есть ум мой земны́м ве́щем. Что сотворю? Не вем. И к кому прибе́гну, да спасе́на будет душа моя? То́кмо к тебе, святы́й Иоа́нне, благода́ти тезоимени́те, яко тя пред Го́сподем по Богородице вем бо́льша бы́ти рожде́нных всех: ибо ты сподо́бился еси косну́тися верху̀ Христа Царя, взе́млющаго грехи мiра, Агнца Божия: Его́же моли за грешную мою душу, да понѐ отны́не, в первыйна́десять час, понесу̀ тяготу̀ благую и прииму̀ мзду с последними. Ей, Крестителю Христов, честны́й Предте́че, крайний проро́че, первый во благода́ти му́чениче, постников и пустынников наставниче, чистоты̀ учителю и ближний дру́же Христов! Тя молю, к тебе прибегаю: не отри́ни мене от твоего заступления, но возста́ви мя па́дшагося мно́гими грехѝ: обновѝ душу мою покаянием, яко вторым Креще́нием, поне́же обо́их начальник еси, Крещением омываяй прародительный грех, покаянием же очища́яй коего́ждо от дел скверных. Очисти убо мя, грехмѝ оскверне́ннаго, и пону́ди внити, а́може ничто́же скверно входит, во Царствие Небесное.

Молитва 2

Святый Предте́че и Крести́телю Христов Иоа́нне! Проповедник сый покаяния, ка́ющихся не пре́зри нас, но моли́ся ко Владыце Христу за нас недостойных рабов, унылых, немощны́х, во многия грехи впа́дших. Смерти убо ча́ем, о гресе́х же наших николи́же поболе́хом и о Царствии Небеснем не попеко́хомся: но не пре́зри нас, Крестителю Христов, честны́й Предте́че, бо́лий [бо́льший] рожде́нных всех, постником и пустынником наставниче, чистоты учи́телю и ближний дру́же Христов. Тя мо́лим, к тебе прибегаем: не отри́ни нас просящих твоего заступления, обнови ду́ши нашя покаянием, еже есть второе Крещение: твоим хода́тайством пред Господем испросѝ нам очищение грехов. Уста недостойная вопию́т к тебе, и душа смиренная мо́лится, сердце сокруше́нное из глубины воздыхает: прострѝ пречи́стую твою десницу и защитѝ нас от враг видимых и невидимых. Ей, Господи Иисусе Христе! Молитвами святаго Иоа́нна Крести́теля Твоего, изря́днее же Пречистыя Твоея Матере, Владычицы нашея Богородицы, спаси нас грешных рабов Твоих, кающихся о гресе́х. Ты бо еси Бог ка́ющихся, и на Тя Спасителя возлага́ем надежду, славяще пресвятое имя Твое, со Безначальным Твоим Отцем, и со Пресвятым и Благим и Животворящим Твоим Духом, ныне и присно и во веки веков.

Молитва 3

Крестителю Христов, честны́й Предте́че, крайний проро́че, первый во благодати му́чениче, постников и пустынников наставниче, чистоты̀ учи́телю и ближний дру́же Христов! Тя молю, к тебе прибегаю: не отри́ни мене от твоего заступления, но возста́ви мя па́дшагося многими грехѝ: обновѝ душу мою покаянием, яко вторым Крещением: очисти мя, грехмѝ оскверне́ннаго, и пону́ди вни́ти, а́може ничтоже скверно входит, во Царствие Небесное.

Тропарь на усекновение главы Иоанна Крестителя, глас 2

Память праведнаго с похвала́ми, тебе же довле́ет свидетельство Господне, Предте́че: показал бо ся еси вои́стину и пророков честне́йший, яко и в струя́х крести́ти сподо́бился еси пропове́даннаго. Темже за истину пострадав ра́дуяся, благовестил еси и сущым во аде Бога я́вльшагося пло́тию, Вземлющаго грех мiра и Подающаго нам велию милость.

Величание

Величаем тя, Крестителю Спасов Иоанне, и почитаем вси честны́я твоея главы̀ усекновение.

Августа 30. Молитва святому благоверному великому князю Александру Невскому, во иноцех Алексию

Скорый помощниче всех усердно к тебе прибегающих и теплый наш пред Господем предстателю, святый благоверный великий княже Алекса́ндре! При́зри милостивно на ны недостойныя, многими беззако́нии непотре́бны себе сотво́ршыя, к ра́це моще́й твоих [или ко святей иконе твоей] ныне притекающыя и из глубины се́рдца к тебе взыва́ющыя. Ты в житии твоем ревни́тель и защитник православныя веры был еси: и нас в ней теплыми твоими к Богу молитвами непоколебимы утвердѝ. Ты великое возложе́нное на тя служение тщательно проходил еси: и нас твоею помощию пребыва́ти коего́ждо, в не́же при́зван есть, наста́ви. Ты, победив полкѝ супоста́тов, от пределов Российских отгна́л еси: и на нас ополча́ющихся всех видимых и невидимых врагов низложѝ. Ты, оставив тленный венец царства земнаго, избрал еси безмолвное житие, и ныне праведно венце́м нетленным увенча́нный на небесе́х царствуеши: исхода́тайствуй и нам, смиренно мо́лим тя, житие тихое и безмятежное, и к вечному Царствию шествие неукло́нное твоим предста́тельством устрой нам. Предстоя̀ же со всеми святыми престолу Божию, молися о всех православных христиа́нех, наипа́че же о  благочести́вейшем, самодержа́внейшем, великом государе нашем, императоре Николае Александровиче всея России, да сохранит их Господь Бог Своею благодатию в мире, здравии, долгоденствии и всяком благополучии в должа́йшая ле́та, да при́сно славим Бога в Троице Святей славимаго, Отца и Сына и Святаго Духа, ныне и присно и во веки веков.

Тропарь, глас 4

Яко благочести́ваго ко́рене пречестна́я о́трасль был еси, блаже́нне Алекса́ндре: яви бо тя Христос, яко некое Божественное сокровище Российстей земли, новаго чудотворца, пресла̀вна и богоприя́тна. И днесь соше́дшеся в память твою верою и любовию, во псалме́х и пе́ниих ра́дующеся славим Господа, давшего тебе благодать исцеле́ний: Его́же молѝ спастѝ град сей, и державе сродников твоих богоугодней быти, и сыново́м Российским спасти́ся.

Тропарь на перенесение мощей святаго, глас 4

Познай свою бра́тию, Российский Ио́сифе, не в Египте, но на небесѝ царствующий, благоверный княже Алекса́ндре, и приимѝ моления их, умножа́я жи́та людем плодоносием землѝ твоея, грады владычествия твоего ограждая моле́нием, и наследником твоим, благоверным императором нашым, на сопротивныя спобо́рствуя.

Августа 30. Молитва преподобному Александру Свирскому. Из акафиста преподобному

О священная главо̀, ангеле земный и человече небесный, преподобне и богоносне отче наш Александре, изрядный угодниче Пресвятыя и Единосущныя Троицы, многия милости живущым во святей обители твоей и всем, с верою и любовию притекающым к тебе, явля́яй! Испросѝ нам вся к житию сему временному благопотребная, паче же к вечному спасению нашему нужная. Посо́бствуй предстательством твоим, угодниче Божий, благочести́вейшему госуда́рю нашему, императору Николаю Александровичу всея̀ России, на врагѝ видимыя и невидимыя, да в мире глубо́це пребудет Святая Православная Церковь Христова, и во благострое́нии зи́ждется царство его, во всяком благочестии неруши́мо. Бу́ди всем нам, чудотворче святы́й, во всякой скорби и обстоянии скорый помощник. Наипа́че же в час кончины нашея яви́ся нам заступник благосердый, да не пре́дани будем на мыта́рствах воздушных власти злобнаго мiродержца, но да сподобимся непреткнове́ннаго восхода во Царствие Небесное. Ей, отче, молитвенниче наш присный! Не посрамѝ упования нашего, не презри смиренных молений наших, но присно о нас пред престолом Живоначальныя Троицы предста́тельствуй, да сподо́бимся вкупе с тобою и со всеми святыми, а́ще и недосто́йни есмы̀, в селе́ниих райских сла́вита величие, благодать и милость Единаго в Троице Бога, Отца и Сына и Святаго Духа, во веки веков.

Тропарь, глас 4

От юности, богомудре, желанием духовным в пустыню всели́вся, единаго Христа возжела́л еси усердно стопам вслед ходи́ти: темже и а́нгельстии чи́ни зря́ще тя удиви́шася, ка́ко с плотию к невидимым ко́знем подвиза́вся, прему́дре, победил еси полкѝ страстей воздержа́нием и явился еси  равноа́нгелен на землѝ, Алекса́ндре преподобне. Моли Христа Бога, да спасет ду́шы нашя.

Молитвы святому Ангелу хранителю

Молитва 1, из акафиста

О святый Ангеле, хранителю и покровителю мой благи́й! С сокрушенным сердцем и болезненною душею предстою тѝ, моля́ся: услыши мя грешнаго раба̀ твоего имярек, с воплем крепким и плачем горьким вопию́щаго: не помянѝ моих беззаконий и неправд, и́миже а́з окаянный прогневляю тя по вся дни и часы и мерзостна себе творю пред Создателем нашим Господем: яви́ся мне милосерд и не отлучайся менѐ сквернаго даже до кончи́ны моея̀: возбудѝ мя от сна греховнаго и пособствуй твоими молитвами прочее время жития моего без порока прейти и сотвори́ти плоды достойны покаяния: па́че же от смертных падений греховных соблюдѝ мя, да не погибну во отчаянии, и да не порадуется враг о погибели моей. Вем воистину и усты̀ исповедую, яко никто́же таков друг и предстатель, защититель и поборник, якоже ты, святый Ангеле: предстоя бо престолу Господню, мо́лишися о мне непотребнем и па́че всех грешнейшем, да не изъи́мет Преблагий душѝ моея в день нечаяния моего и в день творения злобы. Не преста́й убо умилостивляя Премилосердаго Господа и Бога моего, да отпустит согрешения моя, яже сотвори́х во всем житии моем делом, словом и всеми моими чу́вствы, и и́миже весть судьбами, да спасе́т мя: да накажет мя зде по Своей неизреченной милости, но да не обличи́т и не истя́жет мя она́мо по Своему нелицеприятному правосудию: да сподобит мя покаяние принестѝ, с покаянием же Божественное Причащение достойне прия́ти, о сем па́че молю̀ и таковаго дара всеусердно желаю. В страшный же час смерти неотступен бу́ди ми, благий хранителю мой, прогоняя мрачныя демоны, иму́щыя устраши́ти притре́петную душу мою: защи́ти мя от тех ловле́ния, егда̀ и́мам преходи́ти воздушныя мытарства, да храни́мь тобою, безбедно достигну рая̀ ми вожделе́ннаго, иде́же ли́цы святых и горних сил непрестанно восхволяют всечестное и великолепое имя в Троице славимаго Бога, Отца и Сына и Святаго Духа, Емуже подобает честь и поклонение во веки веков. Аминь.

Молитва 2, из канонника

Ангеле Христов святы́й! К тебе припа́дая молюся, хранителю мой святы́й, прида́нный мне на соблюдение души и телу моему грешному от Святаго Крещения. Аз же своею леностию и своим злым обычаем прогне́вах твою пречистую светлость и отгна́х тя от себе всеми сту́дными де́лы: лжа́ми, клеветами, завистию, осуждением, презорством, непокорством, братоненавидением и злопомне́нием, сребролюбием, прелюбодеянием, яростию, скупостию, объядением без сытости и опи́вством, многоглаголанием, злыми помыслы и лукавыми, гордым обычаем и блудным возбешением, имы́й самохотение на всякое плотское вожделение. О злое мое произволение, егоже и ско́ти безслове́снии не творят! Да ка́ко возмо́жеши воззре́ти на мя, или приступи́ти ко мне, аки ко псу смердя́щему? Которыма очи́ма, Ангеле Христов, воззри́ши на мя, опле́тшася злѐ во гнусных де́лех? Да ка́ко возмогу̀ отпуще́ния проси́ти горьким и злым моим и лукавым деянием, в ня́же впада́ю по вся дни и но́щи и на всяк час? Но молю́ся ти припа́дая, хранителю мой святый: умилосе́рдися на мя грешнаго и недостойнаго раба твоего имярек, буди ми помощник и заступник на злаго моего сопротивника, святыми твоими молитвами, и Царствия Божия причастника мя сотворѝ со всеми святыми, всегда и ныне и присно и во веки веков. Аминь.

Молитва 3, из тояже книги

Святый Ангеле, предстоя́й окая́нней моей душѝ и стра́стней моей жизни! Не остави мене грешнаго, нижѐ отступѝ от мене за невоздержание мое: не даждь места лукавому демону облада́ти мною наси́льством смертнаго сего телесѐ: укрепѝ бедствующую и худую мою руку и настави мя на путь спасения. Ей, святы́й Ангеле Божий, хранителю и покровителю окая́нныя моея души и тела! вся мне прости, ели́кими тя оскорбих во вся дни живота моего: и аще что согреши́х в прешедшую нощь сию, покрый мя в настоящый день: [или: и аще что согреши́х во дне́шний день, покрый мя в настоящую нощь:] и сохрани мя от всякаго искушения противнаго, да ни в коем гресѐ прогневаю Бога: и молися за мя ко Господу, да утвердит мя в страсе Своем и достойна покажет мя раба Своея благости. Аминь.

Молитва 4, из тоя́же книги

Ангеле Христов, хранителю мой святы́й и покровителю души и тела моего! вся ми прости, елика согреших во днешний день: и от всякаго лукавствия противнаго ми врага изба́ви мя, да ни в ко́емже гресѐ прогневлю̀ Бога моего: но молѝ за мя грешнаго и недостойнаго раба, яко да достойна мя покажеши благости и милости Всесвятыя Троицы, и Матере Господа моего Иисуса Христа, и всех святых. Аминь.

Тропарь, глас 6

Ангеле Божий, хранителю мой святы́й, живот мой соблюди во страсе Христа Бога, ум мой утвердѝ во и́стеннем пути, и к любвѝ горней уязвѝ душу мою, да тобою направля́емь, получу̀ от Христа Бога велию милость.

Дополнение

Молитвы Пресвятому Духу

Из книги: Правило молебное к божественному и покланяемому Паракли́ту Пресвятому Духу, творение инока Макси́ма Святого́рца

Молитва 1, святаго Симеона, Новаго Богослова, по третией песни канона

Прииди, Кристаллови́дный Животѐ и Вседержи́тельная Десни́це, Всесвятый и Животворящий и Соде́телю Ду́ше, во вла́стнем равноче́стии О́честем и Сыно́внем сый, Ихже есть в Трие́х Лицех то́ждество досто́инства и Божества, совета же согласие, и еже во еди́но воля. Приидѝ, Господи мой, Егоже вожделѐ и желает душа моя. Приид̀и, бывшее желание Сам во мне, сотво́ршее жела́ти Тя отню́д непристу́пнаго. Приидѝ, при́сная моя Радосте и Наслаждение и Славо. Прииди, мое Дыхание, Животе мой, Утешение душѝ моея̀. Буди со мной Един Дух, Преблагий Владыко, несме́сно, непрело́жно, неизменно сый над всеми Бог. Буди мне Сам вся во всех, Пища неизглаголанная и весьма неиждива́емая, вечно преизлива́ющаяся во устна́х душѝ моея и преистека́ющая во исто́чнице се́рдца моего: Одеяние блеща́щееся и попаля́ющее бе́сы: Очищение омывающее мя нетленными и святыми слезами, яже Твое пришествие да́рует, к нему́же приидеши. Буди ми Свет Невечерний и Солнце Незаходимое и Несокрываемое: где бо сокры́ешися, нигде́же име́яй ме́ста Твоему поко́ю? Или чесо̀ ради, яко не отвраща́ешися никого́же от всех? То́чию мы от Тебе при́сно кры́емся грехмѝ нашими, приитѝ к Тебе не хотя́ще. Отста́ви от мене, Господи, всякое пагубное превозноше́ние, и даждь ми целомудрие о́чию: вложѝ языку моему обузда́ние, представи слу́хи моя благопоко́ривы святы́м Твоим за́поведем: подаждь ми терпение в ско́рбех, вразуми и утверди сердце мое в долготерпении, в незлобии, в воздержании, в сострадании, в милостыни, в любви, во смиренномудрии, в тихости ко всем, во отвращении бесовскаго разлене́ния. Даждь ми разсуждение иску́сное в по́мыслех, ка́я досто́ит предпочита́ти: даждь ми разуме́ти ле́стныя козни диа́вольския, и сия̀ отрева́ти, и весьма свою волю отсека́ти, и возлага́ти я́же о себе на твой про́мысл, и отту́ду на полезное упова́ти: яко у Тебе есть жизнь моя, свет мой, спасение мое, и Тебе благославлю, и славлю и кланяюся со Безначальным Испусти́телем Твоим Отцем, и Присносущным и Соестественным Тебе Его Сыном, всегда, ныне и присно и во веки веков.

Молитва 2, по шестей песни канона

Приидѝ, Всечестны́й Вседетелю, Вседержителю Ду́ше, Всепосетителю, Премудрый, Всемощный, Всесильный, Непременный, Непреложный, Неописанный, Непостижымый, Недоведомый и Неизследимый, Неисчетнодаровитый, Преблагий, Исполнительный всего мiра по существу, Невместимый же по силе, Иже Сам Живот и Источник живота̀, Сам Мудрость и Источник мудрости, Сам Сила и Источник силы, Преблагий и Всещедрый Боже. Приидѝ, всем хотящым спасти́ся истинное Чаяние. Приидѝ, Един ко единому: занѐ един есмь, якоже ви́деши. Приидѝ и вселися в мя, и очисти мя от всякия скве́рны, и соблюди мя от всякаго прило́га и наве́та сопроти́внаго. Благословим Тя, препетый всех Царю Преблагий, яко от Тебе есть нам еже бы́ти, еже ды́хати, еже му́дрствовати, еже зна́ти Бога, Тебе Всесвятаго Духа, и Безначальнаго Отца, и Единороднаго Сына. Благословим Тя, яко от Тебе есть нам смотри́ти добро́ту небесную, солнечное течение, лунный круг, звезда́м украшение, и всех благосогласие и различное движение. Благословим Тя, яко от Тебе есть нам разуме́ти часово́м изменение, премене́ния време́н, премене́ния ве́тров, ле́том обхождения. Благодарим Тебе, яко от Тебе есть нам Царствия Небеснаго наде́ятися, А́нгелом равночестия, славы зрения, ныне яко в зерца́ле и гада́ниих, не по мно́зе же соверше́ннейше и чисте́йше. Благодарим Тебе, яко вся подае́ши нам: земледе́лания же и пита́ния, худо́жества, зако́ны, обы́чаи, доброде́тели и жи́тельства. Кий язык возглаго́лет величия Твоя, Владыко, яже па́че слова и разума великая и дивная? Ты бо чистоты̀ и святы́ни вечный Источник еси и непрестанный, премудрости же и силы премногая Бездна, неисчетная и непостижимая, жизни же и безсмертия безмерная и неопи́санная Пучина, разума и смысла неистощимое и неумаляемое Сокровище, благости и милосердия всемiрное и неизнуряемое Хранилище: Ты̀ во проро́ки вдохнул еси, и будущая провозвестиша, и Единароднаго воплощение  пропове́даша: ты ко Благодатней Марии пришед, нарече́нней прежде век быти Матери Божией, избра́нней от всех родов, яко Чи́стей и Пречи́стей, и освященную Ея утробу жилище Богу Слову сооружи́в, с Ним создал еси Его пресвятое восприятие: Ты со Словом Христом был еси, яко соестественнен Ему и единосущен и равночестен, и богозна́мения соделовал еси преди́вная: повнегда же взы́де на небеса и се́де боголепно с восприятым существом одесную Отца неразлучно яко Бог, Ты, на святыя Его ученики и апостолы пришед в виде́нии огненных язы́к, и слова и премудрости и дерзновения исполнив их, си́льны сотворил еси в зна́мениих. Тебе ныне молю́ся, Тебе припа́даю, Тебе мил ся де́ю: преклони́ся мне рабу Твоему, и благостию посети мя, и возведи из глубины прегрешений ведомых и неведомых, ихже не разумею: от всякия очисти мя скверны плоти и духа, освяти, умудри, вразуми, ко всякому разуму спасительному наста́ви, му́жественна покажѝ и неосла́бна проти́ву страстей, всякия противныя силы крепча́йша, облецы̀ же мя во утробы щедрот, кротость, долготерпение, истину, правоту̀, молчание и в воздержание, еже есть всех добродетелей основание: достойную славы Твоея сотвори мя церковь. Владычествуя буди во мне, храня̀ и вся бога́тыя Твоя да́ры подава́я: Ты бо совершенное действо еси всех благ, и Тебе со Отцем и Сыном по до́лгу пение приносим, всегда, ныне и присно и во веки веков.

Молитва 3, по стихи́рах и хвали́тех

Приими, Владыко, Преблагий Паракли́те, Един сый Святыя и Неразделимыя Троицы, худое сие моление, Емуже от человека грешнаго и осужденнаго благоволил еси проноси́му бывати Тебе: и простѝ ми согрешения моя вольная и невольная: от тайных моих очисти мя, и от чужди́х пощадѝ раба Твоего̀. Благоволѝ о мне грешнем и непотребнем, и немощи души моея посети благодатию Твоею, и исцелѝ сокрушение ея. Помилуй мя, Владыко Пара́клите, Боже, помилуй мя, освятѝ мою душу и тело, просвети ми разум, очисти совесть душевную от всякия скверны, по́мыслов же нечистых и умышле́ний лукавых, и разумений ху́льных, и от всякаго превозношения, гордости и кичения, высокоумия же и дерзости, и сатанинскаго шатания, и от всякаго фарисейскаго лицемерия и презорства: и от всякаго студнаго и лукаваго обычая моего изба́ви мя до конца, славы ради имене Твоего: и даруй ми и́скреннее покаяние, сердца сокрушение и смиренномудрие, кротость же и тихость, и всякое христианское благогове́инство, разум же и художество духовное, со всяким благоразумием, благодарением и терпением совершенным, Ей, Боже! славы ради, и́мене Твоего услыши мя грешнаго молящагося тебе, и сподоби мя в прочее время окаянныя жизни моея каятися искренне о моих беззакониих, со всяким смиренномудрием, целомудрием же и воздержанием истинным, от всякаго же сомнения, двоедушия и нечувствия отступи́ти помозѝ мне. И соблюдѝ мя, Владыко, во всяком благочестнем и православнем испове́дании веры христианския, да сподоблюся во вся дни жития моего без сомнения Господа пети, благослови́ти, славосло́вити и глаго́лати: Святый Боже, Отче Безначальный: Святый Крепкий, Сыне Его Собезначальный: Святый Безсмертный, Душе Святый, от Отца исходяй и в Сыне почиваяй: Троице Всесвятая, слава Тебе. Слава Тебе, Святая Троице Единосущная, Животворящая и Неразделимая, всех ради слава Тебе.

Слава Тебе, Мати Божия, верных прибежище, и избавление в лютых содержимым, и душѝ моея Божественное утешение: всеокая́нную ду́шу мою, о Богоблагодатная, стрелянии ратника уя́звленную, Твоему всесильному предстательству поручаю, ю́же соблюдай, покрывай и спасай от бесовских ко́зней невреди́му, да вопию Ти: радуйся, Невесто Неневестная.

Октовриа 30. Молитва Пресвятей Богородице пред иконою Ея Озерянскою. Из службы

От суеты̀ житейския возни́кше и ума своего по́мыслы во едино собра́вше, ко Твоей, Богородице, иконе очи душ и теле́с наших воздвиза́ем, и тебе взываем си́це: не остави, Пречистая, нас немощны́х во гресе́х наших растле́тися, не попустѝ злому демону ду́шы нашя от Сына Твоего в дебри страстей отгна́ти, но помози нам Того заповеди присно па́мятовати, да нижѐ блудным возбеше́нием себе предае́м, нижѐ друг друга зло́бою угрыза́ем, но я́коже днесь, святыни Твоей предстоя́ще, о направлении жития нашего ревностию распаля́емся, та́ко и от храма Твоего в домы своя отше́дше, сие доброе намерение сохрани́ти потщи́мся.

По сих же и телесныя нашя ну́жды утолѝ, и го́рести Твоею молитвою исцелѝ, Всепетая. Ве́мы, яко подоба́ше нам па́че вся сия благодушне претерпева́ти и то́чию о терпении в ско́рбех Господа проси́ти: но поне́же изнемога́ют в печа́лех ду́шы на́шя и по́мыслы уныния нашу коле́блют веру, сего ради в сокрушении сердец к тебе сице взыва́ем. Якоже безчисленныя боля́щыя страдальцы исцелила еси и скорбящыя уте́шила еси, та́ко и нас пред чудотворною Твоею иконою припа́дающих и в ско́рби Тебе молящихся услыши, и всех прошения во благое исполни, болящым здравие, скорбящым утешение подающи, во вражде су́щым мир от Бога низпосылающи, сомня́щымся же веры утверждение.

Услыши грешныя рабы̀ Твоя, Пречистая, воздви́гни нас на благодарственное Ти славословие, да умножится вера людей Твоих, да прославится в них Твое заступление, да та́ко Царствие Сына Твоего посредѐ нас утверди́тся, емуже подобает всякая слава, честь и поклонение, со Безначальным Его Отцем, со Пресвятым и Благим и Животворящим Его Духом, ныне и присно и во веки веков.

Тропарь, глас 3

Твоего предстательства увере́ние и милосердия Твоего явление икона Озеря́нская нам, Владычице, показася, пред не́юже ду́шы нашя в молитве излива́ем и верою тебе вопие́м: воззри́, Милосердая, на люди Твоя, вся скорби нашя и печали утолѝ, утешение благое в сердца нашя низпослѝ, и спасение вечное душа́м нашым, Пречистая, испросѝ.

Иануариа 21, Молитва пред иконою Пресвятыя Богородицы Ватопедскою. Из акафиста

О Пресвята́я Де́во, Мати Христа Бога нашего, Царице небесѐ и землѝ! Вонмѝ многоболезненному воздыха́нию душ наших, при́зри с высоты святы́я Твоея на нас, с верою и любовию поклоня́ющихся пречистому [и чудотворному] образу Твоему. Се бо грехмѝ погружа́емии и скорбьмѝ обурева́емии, взира́юще на Твой образ, яко жи́вей Тебе су́щей с нами, прино́сим смиренная моления наша. Не и́мамы ины́я по́мощи, ни ина́го предстательства, ни утешения, то́кмо Тебе, о Мати всех скорбящих и обремененных! Помозѝ нам немощны́м, утоли ско́рби нашя, наста́ви на путь правый нас заблужда́ющих, уврачу́й болезненная сердца̀ наша и спасѝ безнаде́жных, да́руй нам прочее время жития нашего в мире и покаянии проводи́ти, подаждь христианскую кончи́ну, и на Страшнем Суде Сына Твоего явися нам милосердая Предстательница, да всегда поем, величаем и славим Тя, яко благую Заступницу рода христианскаго, со всеми угодившими Богу, во веки веков.

Септемвриа 9. Молитва святым праведным богоотцем Иоакиму и Анне. Из акафиста

О присносла́внии Христовы пра́ведницы, святиѝ богоотцы̀ Иоаки́ме и А́нно, предстоя́щии небесному престолу Великаго Царя и ве́лие дерзновение к Нему иму́щии, яко от Преблагословенныя Дще́ри вашея, Пречистыя Богородицы и Приснодевы Марии, воплоти́тися Изволившему! К вам, яко многомо́щным предста́телем и усердным о нас молитвенником, прибега́ем мы грешнии и недостойнии. Моли́те благость Его, яко да отвратѝт от нас гнев Свой, по дело́м на́шым пра́ведно на ны̀ дви́жимый, и да безчисленная прегрешения наша презрѐв, обрати́т нас на путь покаяния, и на стезѝ за́поведей Своих да утверди́т нас. Таже молитвами вашими в мире жизнь нашу сохрани́те, и во всех благих благое поспешение испроси́те, вся к животу и благочестию потре́бная нам от Бога да́рующе, от всяких напа́стей и бед и внезапныя смерти предстательством вашим нас избавля́юще и от всех враг видимых и невидимых защища́юще, яко да тихое и безмолвное житие поживем во всяком благочестии и чистоте, и та́ко в мире временное сие житие преше́дше, в вечный достигнем покой, иде́же вашим святым умоле́нием да сподо́бимся Небеснаго Царствия Христа Бога нашего, Емуже, со Отцем и Пресвятым Духом, подобает всякая слава, честь и поклонение во веки веков.

Тропарь, глас 2

Праведных Твоих, Господи, память пра́зднующе, те́ми мо́лим тя: спасѝ ду́шы нашя.

Ин тропарь, глас 1

Иже в зако́нней благода́ти пра́ведни бы́вше, младенца богоданнаго породи́ша нам Иоаки́м и А́нна. Те́мже днесь светло торжеству́ет, ве́село пра́зднующи, Божественная Церковь честну́ю вашу память, сла́вящи Бога, воздви́гшаго рог спасения нам в дому̀ Дави́дове.

Тропари и величания дванадесятых праздников

Рождеству  Пресвятыя Богородицы:

Тропарь, глас 4: Рождество Твое, Богородице Дево, радость возвестѝ всей вселе́нней: из Тебѐ бо возсия̀ Солнце Правды Христос Бог наш, и разруши́в клятву, дадѐ благословение, и упраздни́в смерть, дарова̀ нам живот вечный.

Величание: величаем Тя, Пресвятая Дево, и чтем святых Твоих родителей, и всеславное славим Рождество Твое.

Воздвижению Креста Господня:

Тропарь, глас й: Спаси Господи, люди Твоя, и благословѝ достояние Твое, побе́ды благове́рному императору нашему Николаю Александровичу на сопроти́вныя да́руя, и Твое схраняя Крестом Твоим жи́тельство.

Величание: Величаем Тя, Живода́вче Христе, и чтем Крест Твой Святый, и́мже нас спасл еси от работы вра́жия.

Введению во храм Пресвятыя Богородицы:

Тропарь, глас 4: днесь благоволения Божия предображе́ние, и челове́ков спасения пропове́дание: в хра́ме Бо́жии ясно Дева является, и Христа всем предвозвеща́ет. Той и мы велегла́сно возопии́м: радуйся, смотре́ния Зижди́телева исполнение.

Величание: Величаем Тя, Пресвятая Дево, богоизбра́нная Отрокови́це, и чтем е́же в храм Господень вхождение Твое.

Рождеству Христову:

Тропарь, глас 4: Рождество Твое, Христе Боже наш, возсия̀ мiрове свет ра́зума: в нем бо звезда́м служа́щии, звездо́ю уча́хуся, Тебе кла́нятися Солнцу Правды и Тебе ве́дети с высоты Востока. Господи, слава Тебе.

Величание: Величаем Тя, Живода́вче Христе, нас ради ныне пло́тию ро́ждшагося от Безневестныя и Пречи́стыя Девы Марии.

Богоявлению Господню:

Тропарь, глас 1: Во Иордане креща́ющуся Тебе, Господи, Тро́ическое яви́ся поклонение: роди́телев бо глас свиде́тельствоваше Тебе, Возлюбленнаго Тя Сына имену́я: и Дух, в виде голуби́не, изве́ствоваше словесѐ утверждение. Явле́йся, Христе Бо́же, и мiр просвеще́й, слава Тебе.

Величание: величаем Тя, Живода́вче Христе, нас ради ныне пло́тию крести́вшагося от Иоанна в водах Иорданских.

Сретению Господню:

Тропарь, глас 1: радуйся, Благодатная Богородице Дево, из Тебе бо возсия̀ Солнце Правды Христос Бог наш, просвеща́яй су́щыя во тьме: весели́ся и ты, ста́рче праведный, прие́мый бо объя́тия Свободи́теля душ наших, Да́рующаго нам воскресение.

Величание: величаем Тя, Живода́вче Христѐ, и чтем Пречистую Матерь Твою, Е́юже по закону ныне прине́слся еси в храм Господень.

Благовещению Пресвятыя Богородицы:

Тропарь, глас 4: днесь спасения нашего глави́зна, и еже от века та́инства явле́ние: Сын Божий Сын Девы быва́ет, и Гаврии́л благодать благовеству́ет. Темже и мы с ним Богородице возопии́м: радуйся Благодатная, Господь с Тобою.

Входу Господню во Иерусалим:

Тропарь, глас 1: общее воскресение прежде Твоея стра́сти уверя́я, из мертвых воздви́гл еси Ла́заря, Христѐ Боже. Темже и мы яко о́троцы, побе́ды знамения нося́ще, Тебе Победителю смерти вопие́м: оса́нна в Вышних, благослове́н Грядый во имя Господне.

Величание: Величаем Тя, Живодавче Христѐ, оса́нна в Вышних, и мы Тебе вопие́м: благослове́н Грядый во имя Господне.

Вознесению Господню:

Тропарь, глас 4: возне́слся еси во сла́ве, Христе Боже наш, радость сотвори́вый ученико́м обетова́нием Святаго Духа, извеще́нным им бы́вшым благослове́нием, яко ты еси Сын Божий, Избавитель мiра.

Величание: Величаем Тя, Живодавче Христе, и почита́ем еже на небеса̀, с пречи́стою Твоею пло́тию, Божественное Вознесение.

В Неделю Пятидесятницы:

Тропарь, глас 8: благословен еси, Христе Боже наш, иже прему́дры ловцы̀ явле́й, ниспосла́в им Духа Святаго, и теми уловле́й вселенную: Человеколюбче, слава Тебе.

Величание: Величаем Тя, Живодавче Христе, и чтем Всесвятаго Духа Твоего, Егоже от Отца послал еси божественным учеником Твоим.

Преображению Господню:

Тропарь, глас 7: преобрази́лся еси на горѐ, Христе Боже, показа́вый ученико́м Твоим славу Твою, я́коже можа́ху: да возсия́ет и нам гре́шным свет Твой присносу́щный, молитвами Богородицы, Светода́вче, слава Тебе.

Величание: Величаем Тя, Живодавче Христе, и почита́ем пречи́стыя пло́ти Твоея преславное Преображение.

Успению Пресвтыя Богородицы:

Тропарь, глас 1: в Рождестве де́вство сохрани́ла еси, во Успении мiра не оста́вила еси, Богородице: преста́вилася еси к животу̀, Ма́ти су́щи Живота, и молитвами Твоими избавля́еши от смерти ду́ши нашя.

Величание: величаем Тя, Пренепорочная Мати Христа Бога нашего, и всеславное славим Успение Твое.

Тропари и величания общии

Господу Богу и Спасу нашему Иисусу Христу:

Тропарь, глас 2: пречи́стому о́бразу Твоему̀ покланяемся, Благи́й, прося́ще проще́ния прегреше́ний наших, Христе Боже: во́лею бо благоволи́л еси пло́тию взы́ти на Крест, да изба́виши, яже созда́л еси, от работы врагу̀. Темже благодарственно вопие́м ти: радости испо́лнил еси вся̀, Спа́се наш, прише́дый спасти мiр.

Пресвятей Богородице:

Тропари общия Пресвятей Богородице, глас 4

  1. К Богородице ныне прилежно притеце́м гре́шнии и смире́ннии, и припаде́м, в покая́нии зову́ще из глубины̀ душѝ: Влады́чице, помозѝ, на ны̀ милосе́рдовавши: потщи́ся, погиба́ем от множества прегреше́ний: не отвратѝ рабы̀ Твоя тщы̀, Тя бо и еди́ну наде́жду и́мамы.
  2. Не умолчи́м никогда, Богородице, си́лы Твоя глаго́лати недосто́йнии: а́ще бо Ты не бы̀ предстоя́ла моля́щи, кто бы нас избавил от толи́ких бед? Кто же бы сохранил до ныне свобо́дны? Не отсту́пим, Владычице, от Тебѐ: Твоя бо рабы̀ спаса́еши при́сно от вся́ких лютых.

Величание: достойно есть велича́ти тя, Богородице, Честне́йшую Херувим и Сла́внейшую без сравнения Серафим.

Святым Ангелом и прочим бесплотным:

Тропарь, глас 4: небесных воинств Архистрати́зи, мо́лим вас присно мы недосто́йнии, да вашими молитвами огради́те нас кровом крил невеще́ственныя ва́шея славы, сохраня́юще ны припа́дающыя приле́жно и вопию́щыя: от бед изба́вите ны, яко чинонача́льницы вы́шних сил.

Величание: величаем вас, Арха́нгели и А́нгели и вся воинства, Херуви́ми и Серафи́ми, сла́вящии Господа.

Или сие: величаем вас, Арха́нгели, А́нгели, Нача́ла, Вла́сти, Престо́ли, Госпо́дствия, Си́лы и Херуви́ми, стра́шнии Серафи́ми, прославля́ющии Господа.

Пророку:

Тропарь, глас 2: пророка Твоего имярек память, Господи, пра́зднующе, тем Тя молим: спасѝ ду́шы нашя.

Величание: величаем тя, проро́че Божий имярек, и чтем святую память твою: ты бо мо́лиши за нас Христа Бога нашего.

Апостолу единому:

Тропарь, глас 3: апо́столи святи́и, молѝ Милостиваго Бога, да прегреше́ний оставле́ние пода́ст душа́м на́шым.

Величание: величаем вас, апо́столи Христовы, весь мiр уче́ньми свои́ми просвети́вшыя и вся концы ко Христу приве́дшыя.

Святителю единому:

Тропарь, глас 4: пра́вило веры и образ кро́тости, воздержа́ния учи́теля а́ки тя ста́ду твоему яже веще́й истина: сего ра́ди стяжа́л еси смирением высо́кая, нището́ю бога́тая. Отче священнонача́льниче имярек, моли Христа Бога спастися душа́м нашым.

Величание: величаем тя, святителю отче имярек, и чтем святую память твою: ты бо мо́лиши за нас Христа Бога нашего.

Святителем:

Тропарь, глас 4: Боже отец наших, творя́й при́сно с нами по твоей кротости, не остави милости твоея от нас, но молитвами их в мiре упра́ви жизнь нашу.

Величание: величаем вас, святи́телие вели́цыи, и чтем святую память вашу: вы бо мо́лите за нас Христа Бо́га нашего.

Преподобному:

Тропарь, глас 8: к тебе, отче, известно спасе́ся еже по о́бразу: прии́м бо крест, последовал еси Христу, и де́я учил еси презира́ти убо плоть, прехо́дит бо, прилежа́ти же о душѝ ве́щи безсме́ртней. Темже и со Ангелы сра́дуется, преподобне имярек, дух твой.

Величание: ублажаем тя, преподобне отче имярек, и чтем святую память твою, наставниче монахов и собеседниче Ангелов.

Преподобным:

Тропарь, глас 4: Боже отец наших, творя́й при́сно с нами по твоей кротости, не оста́ви милости твоея от нас, но молитвами их в мiре упра́ви жизнь нашу.

Величание: ублажаем вас, преподо́бнии отцы̀, и чтем святую память вашу, наста́вницы монахов и собеседницы Ангелов.

Мученику:

Тропарь, глас 4: мученик Твой, Господи, имярек во страда́нии своем вене́ц прия́т нетленный от Тебе Бога нашего: име́я бо крепость твою, мучителей низложѝ, сокрушѝ и де́монов немощны́я де́рзости. Того моли́твами спасѝ ду́шы нашя.

Величание: величаем тя, страстоте́рпче святый имярек, и чтем честна́я страда́ния твоя, я́же за Христа претерпе́л еси.

Мучеником:

Тропарь, глас 4: му́ченицы [мученики] Твои, Господи, во страда́ниих своих венцы̀ прия́ша нетленныя от Тебе Бога нашего: иму́ще бо крепость твою, мучи́телей низложи́ша, сокруши́ша и демонов немощны́я де́рзости. Тех молитвами спасѝ ду́шы нашя.

Ин тропарь, глас 1: боле́зньми святы́х, и́миже от тебе пострада́ша, умоле́н бу́ди, Господи, и вся нашя болезни исцелѝ, человеколюбче, мо́лимся.

Величание: величаем вас, страстоте́рпцы святи́и, и чтем честна́я страда́ния ва́ша, я́же за Христа претерпе́ли естѐ.

Священномученику:

Тропарь, глас 4: и нравом прича́стник и престо́лом наме́стник апо́столом быв, дея́ние обре́л еси, богодухнове́нне, в виде́ния восход: сего ради Слово истины исправляя, и веры ради, пострада́л еси даже до кро́ве. Священномучениче имярек, моли Христа Бога спасти́ся душа́м на́шым.

Величание: величаем тя, священному́чениче имярек, и чтем святую память твою: ты бо мо́лиши за нас Христа Бога нашего.

Священномучеником:

Тропарь, глас 4: Боже отец наших, творя́й при́сно с нами по твоей кро́тости, не оста́ви милости твоея от нас, но молитвами их в мiре упра́ви жизнь нашу.

Величание: величаем вас, священному́ченицы Христовы, и чтем святую память вашу, вы бо мо́лите за нас Христа Бога нашего.

Преподобномученику:

Тропарь, глас 8: к тебе, отче, известно спасе́ся еже по образу: прии́м бо крест, последовал еси Христу, и де́я учил еси презира́ти убо плоть, прехо́дит бо, прилежа́ти же о душѝ ве́щи безсмертней. Темже и со Ангелы сра́дуется, преподо́бне имярек, дух твой.

Величание: ублажаем тя, преподобному́чениче имярек, и чтем святую память твою, наста́вниче монахов и собеседниче Ангелов.

Преподобномучеником:

Тропарь, глас 4: Боже отец наших, творя́й присно с нами по твоей кротости, не оста́ви ми́лости твоея от нас, но молитвами их в мiре упра́ви жизнь нашу.

Величание: ублажаем вас, преподо́бнии мученицы, и чтем святую память вашу, наставницы монахов и собеседницы Ангелов.

Мученице:

Тропарь, глас 4: а́гница Твоя Иисусе, имярек зовет ве́лиим гласом: Тебе, Женишѐ мой, люблю, и Тебе и́щущи страда́льчествую, и сраспина́юся, и спогреба́юся Креще́нию Твоему: и стражду̀ Тебе ради, яко да царствую в Тебе: и умираю за Тя: да и живу с тобою: но яко жертву непорочную приими мя, с любовию пожершуюся Тебе. Тоя̀ молитвами, яко Милостив, спасѝ ду́шы нашя.

Величание: величаем тя, страстоте́рпице Христова имярек, и чтем честно́е страдание твое, еже за Христа претерпел́а еси.

Мученицам:

Тропарь, глас 1: а́гницы слове́сныя, А́гнцу и Па́стырю приведо́стеся мучением ко Христу, течение сконча́вшя и веру соблю́дшя: темже днесь ра́достною душе́ю соверша́ем, досточу́дныя, святую вашу память, Христа велича́юще.

Величание: величаем вас, страстоте́рпицы святы́я, и чтем честна́я страдания ваша, еже за Христа претерпе́ли естѐ.

Преподобней женѐ:

Тропарь, глас 8: к тебе, мати, известно спасеся еже по образу: прии́мши бо крест, после́довала еси Христу, и де́ющи учи́ла еси презира́ти убо плоть, прехо́дит бо, прилежа́ти же о душѝ ве́щи безсмертней. Темже и со Ангелы сра́дуется, преподобная имярек, дух твой.

Величание: ублажаем тя, преподобная ма́ти имярек, и чтем святую память твою: ты бо мо́лиши за нас Христа Бога нашего.

Преподобным жена́м:

Тропарь, глас 2: истинному жаланию уневе́стившаяся, христосла́вныя, и временнаго обручника отве́ргшяся совокупления, и доброде́тельными по́двиги возра́стшя, на высоту востеко́сте нетления, красноду́шныя и многобога́тныя, столпѝ монашествующих жен и правило: темже о нас моли́те непрестанно, любовию вашу память празднующих.

Величание: ублажаем вас, преподобныя ма́тери, и чтем святую память вашу: вы бо мо́лите за нас Христа Бога нашего.

Преподобномученице:

Тропарь, глас 4: агница Твоя Иисусе, имярек зовет ве́лиим гласом: Тебе, Женишѐ мой, люблю, и Тебе и́щущи страда́льчествую, и сраспина́юся, и спогреба́юся Креще́нию Твоему: и стражду̀ Тебе ради, яко да царствую в Тебе: и умираю за Тя: да и живу̀ с тобою: но яко же́ртву непорочную приимѝ мя, с любовию поже́ршуюся Тебе. Тоя молитвами, яко Милостив, спасѝ ду́шы нашя.

Величание: величаем тя, страстотерпице святая имярек, и чтем святую память твою: ты бо мо́лиши за нас Христа Бога нашего.

Священноисповеднику и преподобноисповеднику:

Тропарь, глас 8: православия наста́вниче, благочестия учи́телю и чистоты̀, вселе́нныя свети́льниче, архиере́ев богодухнове́нное удобре́ние, имярек прему́дре, уче́ньми твоими вся просвети́л еси, цевни́це духовная: моли Христа Бога спастися душа́м на́шым.

Величание священноисповеднику: велича́ем тя, святи́телю отче имярек, и чтем святую память твою: ты бо мо́лиши за нас Христа Бога нашего.

Величание преподобноисповеднику: ублажаем тя, преподобне отче имярек, и чтем святую память твою: ты бо мо́лиши за нас Христа Бога нашего.

Безсре́бренником:

Тропарь, глас 8: святи́и безсре́бреницы и чудотво́рцы, посети́те не́мощи нашя: ту́не прия́сте, ту́не дади́те нам.

Величание: величаем вас, чудотворцы сла́внии имярек, и чтем честна́я страдания ваша, яже за Христа претерпе́ли естѐ.

Христа ради юродивому:

Тропарь, глас 1: глас апостола твоего Павла услы́шав, глаго́лющь: мы юро́ди Христа ради, раб Твой, Христе Боже, имярек юро́д бысть не землѝ тебѐ ради. Темже память его почита́юще, Тебе мо́лим, Господи, спаси ду́шы нашя.

Величание: ублажа́ем тя, святый пра́ведный имярек, и чтем святую память твою: ты бо мо́лиши за нас Христа Бога нашего.

Рекомендуем молитвы

«Азбука молитвы»
в Telegram.
t.me/azprayer