Глас 8
Пе́снь 1.
Ирмос: Колесницегони́теля фарао́ня погрузи́ чудотворя́й иногда́ Моисе́йский же́зл, крестообра́зно порази́в и раздели́в мо́ре, Изра́иля же беглеца́, пешехо́дца спасе́, пе́снь Бо́гови воспева́юща.
Припев: Святии преподобные отцы Афонстии, молите Бога о нас.
Бо́же все́х, да́р словесе́ пода́ждь ми́, Твоему́ рабу́, ны́не начина́ющему хвали́ти пе́сньми и́же во Афо́нстей Горе́ просия́вшия отцы́, Твою́ во́лю испо́лнившия.
Припев: Святии преподобные отцы Афонстии, молите Бога о нас.
Афо́нских отце́в свято́е собра́ние, су́щии во Афо́не, пе́сньми почти́м, дру́ги Пресвяты́я Де́вы и Христа́ Бо́га рачи́тельныя уго́дники, на́ша те́плыя предста́тели и моли́твенники непреста́нныя о спасе́нии ду́ш на́ших.
Припев: Святии преподобные отцы Афонстии, молите Бога о нас.
Вели́кия Ла́вры свяще́ннаго созда́теля в пе́снех почита́ю, Вели́каго Афана́сия, о́браз и начерта́ние бы́вшим во Афо́не отце́м, в виде́ниих вку́пе же и дея́ниих.
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
Богоро́дичен: Ра́дуйся, Пресвята́я Госпоже́, освяти́вшая Афо́н Твои́м прише́ствием; ра́дуйся, низложи́вшая та́мо и́долы; ра́дуйся, насади́вшая в Горе́ ве́ру и́стинную; ра́дуйся, неве́рие отту́ду отгна́вшая.
Пе́снь 3.
Ирмос: Небе́снаго кру́га Верхотво́рче, Го́споди, и Це́ркве Зижди́телю, Ты́ мене́ утверди́ в любви́ Твое́й, жела́ний кра́ю, ве́рных утвержде́ние, Еди́не Человеколю́бче.
Припев: Святии преподобные отцы Афонстии, молите Бога о нас.
Преподо́бнии отцы́ Афо́нстии, вы́, от Боже́ственныя благода́ти подви́гшеся, в Горе́ свяще́нныя огра́ды соста́висте и по́мощию Богома́тере мно́жества мона́шествующих в па́житех спасе́ния воспита́сте. Но и ны́не о на́с, ва́шем ста́де, моли́те, изба́витися на́м от вся́кия ну́жды и спасти́ся душа́м на́шим.
Припев: Святии преподобные отцы Афонстии, молите Бога о нас.
Богосло́ва вели́каго и свяще́нный орга́н Ду́ха Свята́го я́вльшагося, Григо́рия Пала́му воспева́ю, Све́та невече́рняго зри́теля, Богосло́вия ве́рным наста́вника нело́жнаго.
Припев: Святии преподобные отцы Афонстии, молите Бога о нас.
Пра́ведно е́сть восхвали́ти Григо́рия друга́го, в преде́лех ла́врских све́тло пости́вшагося, и соиме́ннаго тому́ Григо́рия Боже́ственнаго, оби́тель прехва́льну себе́ воздви́гшаго.
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
Богоро́дичен: Ра́дуйся, во жре́бий Себе́ Го́ру сию́ избра́вшая; ра́дуйся, Засту́пницею ме́ста сего́ бы́ти изво́лившая; ра́дуйся, ве́рным, пребыва́ющим зде́, Пода́тельнице земны́х бла́г; ра́дуйся, Спору́чнице ве́чнаго и́х спасе́ния.
Седа́лен, гла́с 4.
Ужасо́шася вку́пе вся́ А́нгелов во́инства, ви́дяще му́жество души́ и боре́ния ва́ша, я́же па́че естества́, отцы́ знаменоно́снии, ка́ко, те́лом веще́ственным обложе́ни су́ще, безпло́тныя враги́ победи́сте, и благода́рно пе́снь Го́сподеви побе́дную воспе́сте: сла́ва Тебе́, Го́споди, сла́ва Тебе́, укрепля́ющему ме́ртвенное челове́ков естество́.
Богоро́дичен: Ужаса́ет вся́к у́м человеколю́бие Твое́ мно́гое, Богоотрокови́це Мари́е, е́же показа́ла еси́ чи́ну и́ноческому зде́ постя́щихся: от всея́ бо земли́ собрала́ еси́ я́ в Го́ру сию́ вели́кую и я́ко Свое́ достоя́ние мона́хом сию́ дарова́ла еси́. Вели́ко вои́стинну е́же о на́с промышле́ние Твое́, Присноде́во.
Пе́снь 4.
Ирмос: Ты́ моя́ кре́пость, Го́споди, Ты́ моя́ и си́ла, Ты́ мо́й Бо́г, Ты́ мое́ ра́дование, не оста́вль не́дра О́тча и на́шу нищету́ посети́в. Те́м с проро́ком Авваку́мом зову́ Ти́: си́ле Твое́й сла́ва, Человеколю́бче.
Припев: Святии преподобные отцы Афонстии, молите Бога о нас.
Бо́га возлюби́вше от всея́ души́, преподо́бнии, вели́кия по́двиги соверши́ли есте́, та́же бли́жняго те́пле возлюби́вше, в разли́чных ме́стех Афо́на оби́тели воздви́гли есте́ и общежи́телей мно́жества в ты́я собра́ли есте́. Моли́теся у́бо, чадолюби́вии отцы́, и на́м любве́ исполни́тельми бы́ти и спасти́ся душа́м на́шим.
Припев: Святии преподобные отцы Афонстии, молите Бога о нас.
Пе́сньми почита́ю настоя́теля Ватопе́дскаго Евфи́мия, и́же свя́зан бы́сть вери́гами и погрузи́ся во глубине́ морсте́й, изобличи́ же у́мысл латиному́дренных и вене́ц муче́ния от руки́ Госпо́дни неувяда́емый прия́л е́сть.
Припев: Святии преподобные отцы Афонстии, молите Бога о нас.
Совоспева́ю и друга́го честна́го Евфи́мия, И́верския оби́тели созда́теля, я́ко, служа́щу ему́ не́когда Бо́гу, сто́лп узре́ся от су́щих с ни́м солнцеобра́зен. И Дохиа́рскаго созда́теля пою́, друга́го па́ки преподо́бнаго Евфи́мия.
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
Богоро́дичен: Ра́дуйся, те́плая Хода́таице о живу́щих во жре́бии Твое́м; ра́дуйся, ми́лость Сы́на Твоего́ до сконча́ния ве́ка ме́сту сему́ обеща́вшая; ра́дуйся, благода́ть Его́ неотсту́пну бы́ти предре́кшая; ра́дуйся, ра́досте и спасе́ние ду́ш на́ших.
Пе́снь 5.
Ирмос: Вску́ю мя́ отри́нул еси́ от лица́ Твоего́, Све́те Незаходи́мый, и покры́ла мя́ е́сть чужда́я тьма́, окая́ннаго, но обрати́ мя́ и к све́ту за́поведей Твои́х пути́ моя́ напра́ви, молю́ся.
Припев: Святии преподобные отцы Афонстии, молите Бога о нас.
Преподо́бнии отцы́ Афо́нстии, вы́, я́ко сла́вие сладкогла́снии, посреде́ де́брий Святы́я Го́ры живу́ще, спаси́тельным и́менем Иису́совым поуча́стеся при́сно, у́м сво́й просвеща́юще Боже́ственным све́том, се́рдца же услажда́юще отту́ду источа́ющеюся ра́достию, е́же моли́твами свои́ми и на́м подади́те, помина́ющим ва́с.
Припев: Святии преподобные отцы Афонстии, молите Бога о нас.
Иоаса́фа преподо́бнаго Диони́сиевы оби́тели в пе́сни похваля́ю, я́ко, ра́дуяся, кро́вь свою́ излия́л е́сть за любо́вь все́х Царя́ Христа́ и муче́ния вене́ц прия́л е́сть.
Припев: Святии преподобные отцы Афонстии, молите Бога о нас.
Подоба́ет вои́стинну Ка́ллиста вели́каго в пе́снех похвали́ти, му́дрый и Богодухнове́нный орга́н благода́ти, И́верския же оби́тели украше́ние и па́стыря сла́внаго.
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
Богоро́дичен: Ра́дуйся, Де́во, я́ко благослове́нием Твои́м осени́ Го́ру си́ла Вы́шняго; ра́дуйся, вертогра́д духо́вный благода́тию Бо́жиею в насле́дии Свое́м насади́вшая; ра́дуйся, я́ко удо́лия и де́бри его́ напо́лнишася и́ноки; ра́дуйся, я́ко просия́ во Афо́не мно́жество преподо́бных, моля́щихся о спасе́нии ду́ш на́ших.
Пе́снь 6.
Ирмос: Очи́сти мя́, Спа́се, мно́га бо беззако́ния моя́, и из глубины́ зо́л возведи́, молю́ся, к Тебе́ бо возопи́х, и услы́ши мя́, Бо́же спасе́ния моего́.
Припев: Святии преподобные отцы Афонстии, молите Бога о нас.
Преподо́бнии отцы́ Афо́нстии, вы́, многоразли́чныя по́двиги соверши́вше, си́ми от Горы́ сея́ возлете́сте в го́ры Небе́сныя и, жили́ще свое́ та́мо утверди́вше, ны́не упокоева́етеся душа́ми свои́ми, я́ко златы́я и вседо́брыя голуби́цы, иде́же помяни́те и на́с, восхваля́ющих вы́.
Припев: Святии преподобные отцы Афонстии, молите Бога о нас.
Ла́вры свяще́нное воспита́ние пе́сньми почти́м, безпло́тнаго во пло́ти, Богоно́снаго Макси́ма, от Боже́ственнаго Ду́ха бога́тый да́р проро́чества прие́мшаго.
Припев: Святии преподобные отцы Афонстии, молите Бога о нас.
Ватопе́дския оби́тели почита́ю Боже́ственныя о́трасли, Неофи́та сла́внаго, гла́с услы́шавша Чи́стыя Богоотрокови́цы, и в преподо́бных просия́вшаго Никоди́ма.
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
Богоро́дичен: Ра́дуйся, я́ко на насле́дие Твое́ при́сно призира́еши; ра́дуйся, я́ко благода́ти Бо́жия и ми́лости Своея́ сподобля́еши е́; ра́дуйся, на ка́мени за́поведей Христо́вых сердца́ рабо́в Твои́х утвержда́ющая; ра́дуйся, благослове́ние Сы́на Твоего́ на на́с низводя́щая.
Конда́к, гла́с 4.
Онебеси́вшия Го́ру сию́, и показа́вшия в не́й житие́ а́нгельское, и мно́жество мона́хов собра́вшия отцы́, прииди́те, благохва́лим вси́, к ни́м взыва́юще: вся́кия беды́ и искуше́ния на́с изба́вите, мно́жество преподо́бных, Афо́нская похвало́.
И́кос:
О, ко́ль добро́ соедине́ние ва́ше, отцы́ Богому́дрии! О, ко́ль красе́н и сла́док о́бщий се́й ва́ш пра́здник, в не́мже вси́ вы́, в Горе́ се́й просия́вшии святи́и, зна́емии ку́пно и безъиме́ннии, о́бщее хвале́ние, я́коже духо́вная бра́тия, прие́млете! Подоба́ше бо во еди́нем ме́сте Го́сподеви угоди́вшим во еди́н де́нь и пра́здновати. Сего́ ра́ди и мы́, и́же во Афо́не мона́си и мирсти́и, во еди́но собра́вшеся, по до́лгу ва́с ублажа́ем, но́вии– дре́вних и сы́нове– отце́в, согла́сно вопию́ще: ме́сто сие́, в не́мже пожи́сте, от вся́каго зла́ спаса́йте, мно́жество преподо́бных, Афо́нская похвало́.
Пе́снь 7.
Ирмос: О́троцы евре́йстии в пещи́ попра́ша пла́мень дерзнове́нно и на ро́су о́гнь преложи́ша, вопию́ще: благослове́н еси́, Го́споди Бо́же, во ве́ки.
Припев: Святии преподобные отцы Афонстии, молите Бога о нас.
Преподо́бнии отцы́, во Афо́не возсия́вшии, луча́ми доброде́телей и Боже́ственных дарова́ний озаря́ете Го́ру сию́, я́ко зве́зды многосве́тлыя, и Не́бо друго́е ме́сто по́двигов ва́ших показа́сте, разгна́вше лю́тый мра́к де́монский. Не преста́йте моля́щеся за ны́ ко Го́споду.
Припев: Святии преподобные отцы Афонстии, молите Бога о нас.
Еди́н от святы́х, и́же во Афо́не, показа́ся Ни́фонт Богоно́сный, и́же пти́чим житие́м живя́ше в преде́лех ла́врских и проро́ческий да́р от Бо́га прия́т.
Припев: Святии преподобные отцы Афонстии, молите Бога о нас.
Ни́л, ла́врский мирото́чец, и Никоди́м, Кавсокали́вский цве́т, от Христа́ возлю́блен бы́вый, но́вый му́ченик, в пе́снех и пе́ниих похвали́тася досто́йно.
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
Богоро́дичен: Ра́дуйся, вся́ких даро́в рабо́м Твои́м Всеще́драя Пода́тельнице; ра́дуйся, во бра́ни, в боле́знех и труде́х и́х премилосе́рдая Уте́шительнице; ра́дуйся, благоде́нственное житие́ на земли́ и всеблаже́нное на Небеси́ и́м устроя́ющая; ра́дуйся, наде́ждо и спасе́ние ду́ш на́ших.
Пе́снь 8.
Ирмос: Седмери́цею пе́щь халде́йский мучи́тель Богочести́вым неи́стовно разжже́, си́лою же лу́чшею спасе́ны, сия́ ви́дев, Творцу́ и Изба́вителю вопия́ше: о́троцы, благослови́те, свяще́нницы, воспо́йте, лю́дие, превозноси́те во вся́ ве́ки.
Припев: Святии преподобные отцы Афонстии, молите Бога о нас.
Афо́на насе́льницы и храни́телие, по Богоро́дице на́ши предста́телие и многообра́знии благоде́телие и назира́телие, столпи́ о́гненнии, стоя́щии с любо́вию и ра́достию о́крест Ма́тере Све́та, не преста́йте моля́щеся за ны́ ко Го́споду.
Припев: Святии преподобные отцы Афонстии, молите Бога о нас.
Молча́льником пе́рвейший во Афо́не Пе́тр почита́ется, пожи́вый жи́знию невеще́ственною и прогна́вый во пло́ти безпло́тныя де́моны, и́же на́г всю́ свою́ жи́знь прохожда́ше и даро́в Ду́ха Свята́го сподо́бися бога́тно, Богоро́дицы моли́твами.
Припев: Святии преподобные отцы Афонстии, молите Бога о нас.
Рома́на сла́вна, по́стников украше́ние и му́чеником Христо́вым весе́лие, почти́м в пе́снех, его́же ла́врская по́стница процвете́, я́ко шипо́к благоуха́нен.
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
Богоро́дичен: Ра́дуйся, Храни́тельнице на́ша в настоя́щем ве́це; ра́дуйся, Предста́тельнице и непосты́дное упова́ние в бу́дущем; ра́дуйся, всему́ благо́му вхо́д се́мо подаю́щая; ра́дуйся, прило́г вся́каго зла́ от жре́бия Своего́ отража́ющая.
Пе́снь 9.
Ирмос: Ужасе́ся о се́м Не́бо, и земли́ удиви́шася концы́, я́ко Бо́г яви́ся челове́ком пло́тски и чре́во Твое́ бы́сть простра́ннейшее Небе́с. Те́м Тя́, Богоро́дицу, А́нгелов и челове́к чинонача́лия велича́ют.
Припев: Святии преподобные отцы Афонстии, молите Бога о нас.
Преподо́бнии отцы́ Афо́нстии, Цари́цы Небе́сныя ополче́ние, нача́ла тьмы́ посо́бием Ея́ победи́вшии, пло́ть умертви́вшии и ду́х оживи́вшии, благода́ти прия́вшии Боже́ственное де́йство, не преста́йте моля́щеся за ны́ ко Го́споду.
Припев: Святии преподобные отцы Афонстии, молите Бога о нас.
Ра́дуйся, Ватопе́дская честна́я оби́тель, обогати́вшаяся двана́десятию страда́льцы преподо́бными, и́же изобличи́ша му́жественно царя́ Михаи́ла и патриа́рха Иоа́нна латиному́дренных, те́мже и пре́дани бы́ша сме́рти удавле́ния, и сугу́быя венцы́ от Бо́га восприя́ша.
Припев: Святии преподобные отцы Афонстии, молите Бога о нас.
Весели́ся, И́верская честна́я оби́тель, я́ко мно́ги принесла́ еси́ Бо́гу от твои́х ча́д преподобному́ченики, и́же ве́ржени бы́ша во глубину́ морску́ю, зане́ лжеслове́сие латиному́дренных мужему́дренне изобличи́ша.
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
Богоро́дичен: Ра́дуйся, Е́юже вся́ оби́тели Горы́ огражда́ются; ра́дуйся, Е́юже вся́ ко́зни вра́жия разруша́ются; ра́дуйся, на благоутро́бие к на́м Сы́на Своего́ приклоня́ющая: ра́дуйся, Е́юже и́мут дерзнове́ние к Нему́ раби́ Тво́й.
Свети́лен.
Ра́дуйся, Горо́ Афо́нская сла́вная, моли́твенники твоя́ иму́щи просия́вшия в тебе́ Богоно́сныя отцы́: дне́сь пра́здник ра́достен с насе́льники твои́ми сотво́рши, почита́й собо́р и́х.
Сла́ва, и ны́не: Ра́дуйся, Присноде́во, прорече́ние Твое́ ви́дящи испо́лнено, я́ко Гора́ сия́ свята́ бу́дет, и́бо подвиза́вшиися в не́й отцы́, и́хже дне́сь почита́ем, яви́шася вои́стинну свя́ти, де́лом запечатле́вше проро́чество Твое́, Отрокови́це.
Молитва всем преподобным отцам, во Святой Горе Афонской просиявшим
О, блаже́ннии и святи́и отцы́, преподо́бнии, святи́телие, священному́ченицы и преподобному́ченицы, мироточи́вии и чудотво́рцы, земни́и А́нгели и Небе́снии челове́цы, сея́ Святы́я Горы́ насе́льницы и украси́телие, по Богоро́дице на́ши предста́телие пред Го́сподем, благоде́телие и назира́телие, ца́рское победоно́сное ополче́ние, в телесе́х победи́вшее безтеле́сныя де́моны, Цари́цы Небе́сныя Пречи́стыя Богоро́дицы мироуха́ннии цве́ти, светлоплодови́тая древеса́ мы́сленнаго сего́ рая́ Присноде́вы, ре́ки приснотеку́щия дарова́ний духо́вных! Приими́те похва́льная словеса́ сия́, я́же вам прино́сим, я́коже Госпо́дь прия́т вдови́цы две ле́пте, и о́бщее пра́зднество, соверша́емое на́ми в честь и па́мять ва́шу, объими́те, я́ко воню́ благоуха́ния и же́ртву благоприя́тну: не и́мамы бо и́но что принести́ по до́лгу благоде́телем на́шим за вели́кая благодея́ния, я́же прия́хом и и́мамы приити́ от вас. Ей, испове́дуем, я́ко мы грех ра́ди на́ших не́смы досто́йни жи́ти на ме́сте сем и именова́тися сынми́ ва́шими, но вы за благосе́рдие ва́ше не отрица́йтеся бы́ти нам отцы́. Не забыва́йте нас, смире́нных, но соблюда́йте свяще́нныя монастыри́ ва́ша и вся скиты́ и ке́ллии и нас, живу́щих в них, сохраня́йте и избавля́йте от вся́каго искуше́ния и напа́сти в житии́ сем, в бу́дущем же ве́це да сподо́бимся святы́ми ва́шими моли́твами блаже́нства ку́пно с ва́ми, сы́нове со отцы́ свои́ми, ста́до с па́стыри свои́ми, ученицы́ со учи́тели свои́ми, и да услы́шим от вас о́ный блаже́нный глас ко Го́споду: се мы и де́ти, я́же дал еси́ нам, Го́споди! И, ра́дующеся, воздади́м вся́кую сла́ву, честь и поклоне́ние Отцу́ и Сы́ну и Свято́му Ду́ху во ве́ки веко́в. Ами́нь.