Октоих, Глас 7.7, Неделя, Канон воскресный
Глас 7
Песнь 1
Ирмос: Ма́нием Твои́м на земны́й о́браз преложи́ся, пре́жде удоборазлива́емое водно́е естество́, Го́споди: те́мже немо́кренно пешеше́ствовав Изра́иль, пое́т Тебе́ пе́снь побе́дную.
Припев: Сла́ва, Го́споди, свято́му воскресе́нию Твоему́.
Осуди́ся сме́ртное мучи́тельство Дре́вом, непра́ведною сме́ртию осужде́ну Ти́, Го́споди: отню́дуже кня́зь тьмы́ Тебе́ не одоле́в, пра́ведно изгна́н бы́сть.
Сла́ва Отцу́ и Сы́ну и Свято́му Ду́ху.
А́д Тебе́ прибли́жися, и зубы́ не возмо́г сте́рти те́ло Твое́, челюстьми́ сокруши́ся. Отню́дуже Спа́се, боле́зни разру́ш сме́ртныя, воскре́сл еси́ тридне́вен.
И ны́не и при́сно и во ве́ки веко́в. Ами́нь.
Богородичен: Разреши́шася боле́зни прама́тере Евы: боле́зни бо избежа́вше, неискусому́жно родила́ еси́. Отню́дуже я́ве Богоро́дицу, Пречи́стая, ве́дуще Тя́, вси́ сла́вим.
Песнь 3
Ирмос: В нача́ле небеса́ всеси́льным Сло́вом Твои́м утвержде́й, Го́споди Спа́се, и вседе́тельным и Бо́жиим Ду́хом всю́ си́лу и́х, на недви́жимем мя́ ка́мени испове́дания Твоего́ утверди́.
Припев: Сла́ва, Го́споди, свято́му воскресе́нию Твоему́.
Ты́ возше́д на Дре́во, о на́с боле́знуеши во́лею, благоутро́бне Спа́се, и терпи́ши я́зву, примире́ния хода́тайственну, и спасе́ния ве́рным: е́юже Твоему́, Ми́лостиве, вси́ примири́хомся Роди́телю.
Сла́ва Отцу́ и Сы́ну и Свято́му Ду́ху.
Ты́ мя очи́стив от я́звы, душе́ю уя́звленнаго зми́евым угрызе́нием, Христе́, и показа́л еси́ све́т, во тьме́ дре́вле мне́ слежа́щу и во тле́нии: кресто́м бо во а́д соше́д, мене́ совоскреси́л еси́.
И ны́не и при́сно и во ве́ки веко́в. Ами́нь.
Богородичен: Неискусому́жныя Твоея́ Ма́тере мольба́ми ми́р ми́рови пода́ждь, Спа́се, и несказа́нныя Твоея́ сла́вы славосло́вящыя Тя́ сподо́би.
Седален, глас 7
Жи́знь во гро́бе возлежа́ше, и печа́ть на ка́мени надлежа́ше, я́ко Царя́ спя́ща во́ини стрежа́ху Христа́: и а́нгели сла́вляху я́ко Бо́га безсме́ртна, жены́ же взыва́ху: воскре́се Госпо́дь, подая́ ми́рови ве́лию ми́лость. Сти́х: Воскресни́, Го́споди Бо́же мо́й, да вознесе́тся рука́ Твоя́, не забу́ди убо́гих Твои́х до конца́. Тридне́вным погребе́нием Твои́м плени́вый сме́рть, и истле́вша челове́ка живоно́сным воста́нием Твои́м воскреси́вый, Христе́ Бо́же, я́ко Человеколю́бец, сла́ва Тебе́.
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
Богородичен: Распе́ншагося на́с ра́ди, и воскре́сшаго Христа́ Бо́га на́шего, и низложи́вшаго сме́рти держа́ву, непреста́нно моли́, Богоро́дице Де́во: да спасе́т ду́шы на́шя.
Песнь 4
Ирмос: О́тча не́дра не оста́вль, и соше́д на зе́млю, Христе́ Бо́же, та́йну услы́шах смотре́ния Твоего́, и просла́вих Тя́, Еди́не Человеколю́бче.
Припев: Сла́ва, Го́споди, свято́му воскресе́нию Твоему́.
Своя́ плещи́ да́в, и́же от Де́вы вопло́щься, на ра́ны, рабу́ прегреши́вшу, бие́н быва́ет Влады́ка непови́нен, разреша́я моя́ согреше́ния.
Сла́ва Отцу́ и Сы́ну и Свято́му Ду́ху.
Предстоя́в суди́щу суди́й законопресту́пных, я́ко осуди́мый пови́нен быва́ет (истязу́ется), и зауша́ется бре́нною руко́ю, созда́вый челове́ка я́ко Бо́г, и судя́й пра́ведно земли́.
И ны́не и при́сно и во ве́ки веко́в. Ами́нь.
Богородичен: Я́ко вои́стинну Ма́ти Бо́жия, Творца́ Твоего́ и Сы́на моли́, к спаси́тельному напра́вити мя́ приста́нищу, Всенепоро́чная, сла́внаго Его́ хоте́ния.
Песнь 5
Ирмос: Но́щь не светла́ неве́рным, Христе́, ве́рным же просвеще́ние в сла́дости слове́с Твои́х: Сего́ ра́ди к Тебе́ у́тренюю, и воспева́ю Твое́ Божество́.
Припев: Сла́ва, Го́споди, свято́му воскресе́нию Твоему́.
За Твоя́ рабы́ продае́шися, Христе́, и по лани́те ударе́ние терпи́ши, свобо́де хода́тайственно пою́щым: к Тебе́ у́тренюю, и воспева́ю Твое́ Божество́.
Сла́ва Отцу́ и Сы́ну и Свято́му Ду́ху.
Боже́ственною Твое́ю си́лою, Христе́, не́мощию плотско́ю кре́пкаго низложи́л еси́, и победи́теля мя́ сме́рти, Спа́се, воскресе́нием показа́л еси́.
И ны́не и при́сно и во ве́ки веко́в. Ами́нь.
Богородичен: Бо́га родила́ еси́, Ма́ти Чи́стая, воплоще́ннаго из Тебе́ Боголе́пно, Всепе́тая: поне́же не позна́ла еси́ му́жеска по́ла, но от Свята́го ражда́еши Ду́ха.
Песнь 6
Ирмос: Пла́вающаго в молве́ жите́йских попече́ний, с корабле́м потопля́ема грехи́, и душетле́нному зве́рю примета́ема, я́ко Ио́на, Христе́, вопию́ Ти: из смертоно́сныя глубины́ возведи́ мя.
Припев: Сла́ва, Го́споди, свято́му воскресе́нию Твоему́.
Воспомина́ху Тя́ заключе́нныя во а́де ду́шы, и оста́вльшыяся пра́ведных, и от Тебе́ спасе́ния моля́хуся: е́же кресто́м, Христе́, по́дал еси́ преиспо́дним, прише́д я́ко Благоутро́бен.
Сла́ва Отцу́ и Сы́ну и Свято́му Ду́ху.
Ко одушевле́нному Твоему́ и нерукотворе́нному хра́му, разруше́ну бы́вшу страда́ньми, воззре́ти па́ки ли́к апо́стольский отча́яся: но па́че наде́жды покло́нься, воскре́сша повсю́ду пропове́да.
И ны́не и при́сно и во ве́ки веко́в. Ами́нь.
Богородичен: Неизрече́ннаго рождества́ Твоего́ всенепоро́чнаго о́браз, Де́во Богоневе́стная, и́же на́с ра́ди, кто́ от челове́к сказа́ти возмо́жет? Я́ко Бо́г неопи́санне, Сло́во соедини́вся Тебе́, пло́ть из Тебе́ бы́сть.
Кондак, глас 7
Не ктому́ держа́ва сме́ртная возмо́жет держа́ти челове́ки: Христо́с бо сни́де сокруша́я и разоря́я си́лы ея́. Связу́емь быва́ет а́д, проро́цы согла́сно ра́дуются: предста́, глаго́люще, Спа́с су́щым в ве́ре, изыди́те ве́рнии в воскресе́ние.
Икос
Вострепета́ша до́ле преиспо́дняя дне́сь, а́д и сме́рть Еди́наго от Тро́ицы: земля́ поколеба́ся, вра́тницы же а́довы ви́девше Тя́ ужасо́шася: вся́ же тва́рь со проро́ки ра́дующися пое́т Тебе́ побе́дную пе́снь, изба́вителю Бо́гу на́шему, разруши́вшему ны́не сме́ртную си́лу. Да воскли́кнем и возопии́м ко Ада́му, и к су́щым из Ада́ма: дре́во сего́ па́ки введе́. Изыди́те ве́рнии в воскресе́ние.
Песнь 7
Ирмос: Пе́щь о́троцы огнепа́льну дре́вле росоточа́щу показа́ша, Еди́наго Бо́га воспева́юще, и глаго́люще: превозноси́мый отце́в Бо́г, и препросла́влен.
Припев: Сла́ва, Го́споди, свято́му воскресе́нию Твоему́.
Дре́вом умерщвля́ется Ада́м, во́лею преслуша́ние соде́лав: послуша́нием же Христо́вым па́ки обновля́емь е́сть. Мене́ бо ра́ди распина́ется Сы́н Бо́жий, препросла́вленный.
Сла́ва Отцу́ и Сы́ну и Свято́му Ду́ху.
Тебе́ воскре́сшаго Христе́, из гро́ба, тва́рь вся́ воспе́: Ты́ бо жи́знь су́щым во а́де процве́л еси́, ме́ртвым воскресе́ние, и́же во тьме́, Све́т препросла́вленный.
И ны́не и при́сно и во ве́ки веко́в. Ами́нь.
Богородичен: Ра́дуйся, Дщи́ Ада́ма тле́ннаго. Ра́дуйся, еди́на Богоневе́сто. Ра́дуйся, е́юже тля́ изгна́на бы́сть, я́же Бо́га ро́ждши: Его́же моли́, Чи́стая, спасти́ся все́м на́м.
Песнь 8
Ирмос: Неопа́льная огню́ в Сина́и прича́щшаяся Купина́, Бо́га яви́ медленоязы́чному и гугни́вому Моисе́ови, и о́троки ре́вность Бо́жия три́ непребори́мыя во огни́ певцы́ показа́: вся́ дела́ Госпо́дня Го́спода по́йте, и превозноси́те во вся́ ве́ки.
Припев: Сла́ва, Го́споди, свято́му воскресе́нию Твоему́.
Пречи́стый А́гнец слове́сный за ми́р закла́н бы́в, преста́ви я́же по зако́ну приноси́мая, очи́стив сего́ кроме́ прегреше́ний я́ко Бо́г, при́сно зову́ща: вся́ дела́ Госпо́дня Го́спода по́йте, и превозноси́те во вся́ ве́ки.
Сла́ва Отцу́ и Сы́ну и Свято́му Ду́ху.
Нетле́нна не су́щи пре́жде стра́сти, восприя́тая от Созда́теля пло́ть на́ша, по стра́сти и воскресе́нии неприкоснове́нна тле́нию устро́ися, и сме́ртныя обновля́ет, зову́щыя: вся́ дела́ Госпо́дня Го́спода по́йте, и превозноси́те во вся́ ве́ки.
И ны́не и при́сно и во ве́ки веко́в. Ами́нь.
Богородичен: Твое́ чисто́тное и всенепоро́чное, Де́во, скве́рное и ме́рзское вселе́нныя очи́сти, и была́ еси́ на́шего примире́ния к Бо́гу вина́, Пречи́стая: те́мже Тя́, Де́во, вся́ дела́ благослови́м, и превозно́сим во вся́ ве́ки.
Песнь 9
Ирмос: Нетле́ния искуше́нием ро́ждшая, и всехитрецу́ Сло́ву пло́ть взаимода́вшая, Ма́ти неискусому́жная Де́во Богоро́дице: Прия́телище Нестерпи́маго, Село́ Невмести́маго Зижди́теля Твоего́, Тя́ велича́ем.
Припев: Сла́ва, Го́споди, свято́му воскресе́нию Твоему́.
И́же Божеству́ стра́сть прилага́ющии, заусти́теся вси́ чуждему́дреннии: Го́спода бо сла́вы пло́тию распя́та, не распя́та же естество́м Боже́ственным, я́ко во двою́ естеству́ Еди́наго велича́ем.
Сла́ва Отцу́ и Сы́ну и Свято́му Ду́ху.
И́же телесе́м воста́нию неве́рующии, ко Христо́ву ше́дше гро́бу, научи́теся: я́ко умерщвле́на бы́сть, и воскре́се па́ки пло́ть Жизнода́вца, во увере́ние после́дняго воскресе́ния, на не́же упова́ем.
И ны́не и при́сно и во ве́ки веко́в. Ами́нь.
Троичен: Не Боже́ств Тро́ицу, но Ипоста́сей, ниже́ еди́ницу Ли́ц, но Божества́ чту́ще, ссеца́ем же Сию́ деля́щих: слива́ем же па́ки, слия́ние дерза́ющих на Сию́, Ю́же велича́ем.
Комментировать