Октоих, Глас 4.7, Неделя, Канон воскресный
Глас 4
Песнь 1
Ирмос: Мо́ря чермну́ю пучи́ну невла́жными стопа́ми, дре́вний пешеше́ствовав Изра́иль, крестообра́зныма Моисе́овыма рука́ма Aмали́кову си́лу в пусты́ни победи́л е́сть.
Припев: Сла́ва, Го́споди, свято́му воскресе́нию Твоему́.
Возне́слся еси́ на пречи́стем дре́ве кре́стнем, на́ше отпаде́ние исправля́я, е́же на дре́ве исцеля́я всегуби́тельство, Влады́ко, я́ко Бла́г и Всеси́лен.
Сла́ва Отцу́ и Сы́ну и Свято́му Ду́ху.
Во гро́бе пло́тски, во а́де же с душе́ю, я́ко Бо́г: в раи́ же с разбо́йником, и на Престо́ле бы́л еси́, Христе́, со Отце́м и Ду́хом, вся́ исполня́я, Неопи́санный.
И ны́не и при́сно и во ве́ки веко́в. Ами́нь.
Богородичен: Без се́мене О́тчею во́лею от Боже́ственнаго Ду́ха Бо́жия зачала́ еси́ Сы́на, и пло́тию родила́ еси́: И́же из Отца́ без ма́тере, на́с же ра́ди, из Тебе́ без отца́.
Песнь 3
Ирмос: Весели́тся о Тебе́ Це́рковь Твоя́, Христе́, зову́щи: Ты́ моя́ кре́пость, Го́споди, и прибе́жище, и утвержде́ние.
Припев: Сла́ва, Го́споди, свято́му воскресе́нию Твоему́.
Дре́во живо́тное, мы́сленный и́стинный виногра́д, на Кресте́ ви́сит, все́м источа́я нетле́ние.
Сла́ва Отцу́ и Сы́ну и Свято́му Ду́ху.
Я́ко вели́к, я́ко стра́шен, я́ко а́дово низло́жь шата́ние, и я́ко Бо́г нетле́нен, ны́не пло́тски воскре́се.
И ны́не и при́сно и во ве́ки веко́в. Ами́нь.
Богородичен: Ты́ еди́на су́щым на земли́, я́же па́че естества́ благи́х Хода́таица, Ма́ти Бо́жия была́ еси́: те́мже Ти́, ра́дуйся, прино́сим.
Седален, глас 4
Воззре́вшя на гро́бный вхо́д, и пла́мене а́нгельскаго не терпя́щя мироно́сицы, с тре́петом дивля́хуся, глаго́лющя: егда́ укра́деся отве́рзый разбо́йнику ра́й; еда́ ли воста́, И́же и пре́жде стра́сти пропове́давый воста́ние; вои́стинну воскре́се Христо́с, су́щым во а́де подая́ живо́т, и воскресе́ние. Сти́х: Воскресни́, Го́споди Бо́же мо́й, да вознесе́тся рука́ Твоя́, не забу́ди убо́гих Твои́х до конца́. Во́льным Твои́м сове́том Кре́ст претерпе́л еси́, Спа́се: и во гро́бе но́ве челове́цы положи́ша Тя́ сме́ртнии, сло́вом концы́ соста́вльшаго. Те́мже свя́зан бы́сть чу́ждий: сме́рть лю́то пленя́шеся, и су́щии во а́де вси́ взыва́ху живоно́сному воста́нию Твоему́: Христо́с воскре́се, Жизнода́вец пребыва́яй во ве́ки.
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
Богородичен: Удиви́ся Ио́сиф, е́же па́че естества́ зря́, и внима́ше мы́слию и́же на руно́ до́ждь, в безсе́меннем зача́тии Твое́м, Богоро́дице, купину́ огне́м неопали́мую, же́зл Ааро́нов прозя́бший, и свиде́тельствуя обру́чник Тво́й и храни́тель, свяще́нником взыва́ше: Де́ва ражда́ет, и по рождестве́ па́ки Де́ва пребыва́ет.
Песнь 4
Ирмос: Вознесе́на Тя́ ви́девши це́рковь на Кресте́, Cо́лнце пра́ведное, ста́ в чи́не свое́м, досто́йно взыва́ющи: сла́ва си́ле Твое́й, Го́споди.
Припев: Сла́ва, Го́споди, свято́му воскресе́нию Твоему́.
Возше́л еси́, стра́сти моя́ исцеля́я, на Кре́ст стра́стию Пречи́стыя пло́ти Твоея́, в ню́же во́лею обле́клся еси́. Те́мже Ти́ взыва́ем: сла́ва си́ле твое́й, Го́споди.
Сла́ва Отцу́ и Сы́ну и Свято́му Ду́ху.
Безгре́шнаго сме́рть вкуси́вши, Животворя́щаго Те́ла Твоего́, досто́йно Влады́ко умертви́ся: мы́ же вопие́м Ти́, сла́ва си́ле Твое́й, Го́споди.
И ны́не и при́сно и во ве́ки веко́в. Ами́нь.
Богородичен: Неискусобра́чно родила́ еси́ Де́во, и по рождестве́ яви́лася еси́ де́вствующи па́ки: те́мже немо́лчными гла́сы, е́же ра́дуйся Тебе́, Влады́чице, ве́рою несумне́нною взыва́ем.
Песнь 5
Ирмос: Ты́, Го́споди мо́й, Све́т в ми́р прише́л еси́, Све́т Святы́й, обраща́яй из мра́чна неве́дения ве́рою воспева́ющыя Тя́.
Припев: Сла́ва, Го́споди, свято́му воскресе́нию Твоему́.
Ты́, Го́споди, к земли́ ми́лостивно соше́л еси́: Ты́ возне́сл еси́ па́дшее челове́ческое существо́, на дре́ве воздвиза́ем.
Сла́ва Отцу́ и Сы́ну и Свято́му Ду́ху.
Ты́ взя́л ми́ еси́, Христе́, прегреше́ний осужде́ние: Ты́ разруши́л еси́ боле́зни сме́ртныя, Ще́дре, Боже́ственным воскресе́нием Твои́м.
И ны́не и при́сно и во ве́ки веко́в. Ами́нь.
Богородичен: Тя́ ору́жие непобеди́мое на враги́ предлага́ем, Тя́ утвержде́ние, и наде́жду на́шего спасе́ния, Богоневе́сто, стяжа́хом.
Песнь 6
Ирмос: Пожру́ Ти со гла́сом хвале́ния, Го́споди, Це́рковь вопие́т Ти́, от бесо́вския кро́ве очи́щшися, ра́ди ми́лости от ре́бр Твои́х исте́кшею Кро́вию.
Припев: Сла́ва, Го́споди, свято́му воскресе́нию Твоему́.
Возше́л еси́ на Кре́ст, си́лою препоя́сався, и сопле́тся с мучи́телем я́ко Бо́г, с высоты́ све́ргл еси́, Ада́ма же непобеди́мою си́лою воскреси́л еси́.
Сла́ва Отцу́ и Сы́ну и Свято́му Ду́ху.
Воскре́сл еси́ блиста́яйся кра́сный из гро́ба, Христе́, и разгна́л еси́ вся́ враги́ Боже́ственною си́лою Твое́ю, и вся́ я́ко Бо́г, весе́лия испо́лнил еси́.
И ны́не и при́сно и во ве́ки веко́в. Ами́нь.
Богородичен: О чу́до все́х чуде́с нове́йшее! Я́ко Де́ва во утро́бе, вся́ческая обдержа́щаго неискусому́жно заче́нши, не тесновмести́.
Кондак, глас 4
Спа́с и Изба́витель мо́й, из гро́ба я́ко Бо́г воскреси́ от у́з земноро́дныя, и врата́ а́дова сокруши́, и я́ко Влады́ка воскре́се тридне́вен.
Икос
Воскре́сшаго из ме́ртвых, Христа́ Жизнода́вца тридне́вна из гро́ба, и врата́ сме́ртная дне́сь сокру́шшаго си́лою Свое́ю, и а́да умертви́вшаго, и жа́ло сме́ртное сте́ршаго, и Ада́ма со Е́вою свободи́вшаго, воспои́м вси́ земноро́днии, вопию́ще хвалу́ приле́жно: То́й бо я́ко Еди́н Кре́пкий, Бо́г и Влады́ка, воскре́се тридне́вен.
Песнь 7
Ирмос: В пещи́ Авраа́мстии о́троцы перси́дстей любо́вию благоче́стия па́че, не́жели пла́менем опаля́еми взыва́ху: благослове́н еси́ в хра́ме Сла́вы Твоея́, Го́споди.
Припев: Сла́ва, Го́споди, свято́му воскресе́нию Твоему́.
К нетле́нию челове́чество призва́ся, Боже́ственною измове́но Кро́вию Христо́вою, благода́рно воспева́ющее: благослове́н еси́ в хра́ме Сла́вы Твоея́, Го́споди.
Сла́ва Отцу́ и Сы́ну и Свято́му Ду́ху.
Я́ко Живоно́сец, я́ко рая́ красне́йший вои́стинну, и черто́га вся́каго ца́рскаго показа́ся светле́йший, Христе́, гро́б Тво́й, исто́чник на́шего воскресе́ния.
И ны́не и при́сно и во ве́ки веко́в. Ами́нь.
Богородичен: Вы́шняго освяще́нное Боже́ственное селе́ние, ра́дуйся, Тобо́ю бо даде́ся ра́дость, Богоро́дице, зову́щым: благослове́на Ты́ в жена́х еси́, Всенепоро́чная Влады́чице.
Песнь 8
Ирмос: Ру́це распросте́р Дании́л, льво́в зия́ния в ро́ве затче́: о́гненную же си́лу угаси́ша, доброде́телию препоя́савшеся, благоче́стия рачи́тели о́троцы, взыва́юще: благослови́те вся́ дела́ Госпо́дня Го́спода.
Припев: Сла́ва, Го́споди, свято́му воскресе́нию Твоему́.
Ру́це распросте́р на Кресте́, язы́ки вся́ собра́л еси́, и еди́ну яви́л еси́, Влады́ко, Це́рковь воспева́ющую Тя́, земну́ю и небе́сную, согла́сно пою́щым: благослови́те вся́ дела́ Госпо́дня Го́спода, по́йте и превозноси́те Его́ во ве́ки.
Сла́ва Отцу́ и Сы́ну и Свято́му Ду́ху.
Белообра́зен яви́ся жена́м, непристу́пным све́том воскресе́ния блиста́яйся а́нгел, что́ Жива́го во гро́бе, вопия́, и́щете я́ко ме́ртва; вои́стинну воста́ Христо́с, Ему́же вопие́м: вся́ дела́ по́йте Го́спода, и превозноси́те во вся́ ве́ки.
И ны́не и при́сно и во ве́ки веко́в. Ами́нь.
Богородичен: Ты́ Еди́на во все́х ро́дех, Де́во Пречи́стая, Ма́ти яви́лася еси́ Бо́жия: Ты́ Божества́ была́ еси́ жили́ще Всенепоро́чная, не опа́льшися огне́м Непристу́пнаго Све́та. Те́мже вси́ Тя благослови́м, Мари́е Богоневе́сто.
Песнь 9
Ирмос: Ка́мень нерукосе́чный, от несеко́мыя горы́ Тебе́, Де́во, краеуго́льный отсече́ся, Христо́с, совокупи́вый разстоя́щаяся естества́. Те́м веселя́щеся Тя́, Богоро́дице, велича́ем.
Припев: Сла́ва, Го́споди, свято́му воскресе́нию Твоему́.
Всего́ мя восприя́л еси́ ве́сь в совокупле́нии несли́тно, всему́ ми дая́, Бо́же мо́й, спасе́ние стра́стию Твое́ю, ю́же на Кресте́ претерпе́л еси́ теле́сне, благоутро́бия ра́ди мно́гаго.
Сла́ва Отцу́ и Сы́ну и Свято́му Ду́ху.
Твои́ ученицы́ зря́ще отве́рзен гро́б Тво́й, и богоно́сныя плащани́цы испражне́ны воскресе́нием Твои́м, со а́нгелом глаго́лаху: вои́стинну воста́ Госпо́дь.
И ны́не и при́сно и во ве́ки веко́в. Ами́нь.
Троичен: Еди́нице у́бо Боже́ственнаго Существа́, но Ипоста́сьми Тро́ице, вси́ ве́рнии покланя́ющеся, в неслия́нных Ипоста́сех Равноси́льную Единоче́стную ны́не благочту́ще велича́ем.
Комментировать