Минея, 8 Февраля.
Глас 8
Песнь 1
Ирмос: Во́ду проше́д, я́ко су́шу,/ и еги́петскаго зла избежа́в,/ изра́ильтянин вопия́ше:/ Изба́вителю и Бо́гу на́шему пои́м.
Припев: Святи́телю о́тче Са́вво, моли́ Бо́га о на́с.
Боже́ственными заря́ми и свяще́нными светосия́ньми/ при́сно мою́ ду́шу озари́, о́тче,/ сла́вяща твой пра́здник, иера́рше.
Припев: Святи́телю о́тче Са́вво, моли́ Бо́га о на́с.
Из коре́не блага́го блажа́йшая о́трасль прозя́бл еси́,/ Бо́жия ра́зума вода́ми напая́емь./ Тем и плод благоуха́нен яви́лся еси́ житие́м свои́м от ю́ности,/ веселя́я сердца́ и ду́ши пою́щих тя.
Припев: Святи́телю о́тче Са́вво, моли́ Бо́га о на́с.
Возлюби́в му́дрости нача́ло, страх Бо́жий,/ и за́поведем его́ при́сно поуча́яся,/ насади́лся еси́, а́ки дре́во, при исхо́дищих вод духо́вных,/ от ни́хже, о́тче, напая́емь,/ плод Христу́, Са́вво, прине́слся еси́ пресла́дкий.
Припев: Святи́телю о́тче Са́вво, моли́ Бо́га о на́с.
Всесве́тлую тя звезду́ Мы́сленное Со́лнце показа́,/ све́тлость твои́х доброде́телей просвети́ зе́млю на́шу,/ святи́телю Христо́в, о́тче Савво.
Припев: Святи́телю о́тче Са́вво, моли́ Бо́га о на́с.
Чистото́ю любве́ одержи́мь,/ благоро́дием души́ порабо́тил еси́ плотолю́бие,/ тем ны́не, венцы́ чистоты́ прие́мля, со А́нгелми у Христа́ весели́шися,/ Его́же моли́ за нас, о́тче Са́вво.
Сла́ва Отцу́ и Сы́ну и Свято́му Ду́ху.
Житие́, при́сно очище́нно и чи́сто/ и скве́рне несмеше́нно, яви́в,/ показа́лся еси́ на земли́ Христо́в свяще́нный сосу́д,/ прему́дре Са́вво блаже́нне.
И ны́не и при́сно и во ве́ки веко́в. Ами́нь.
Богородичен: Со Отце́м Сый Единоро́дный/ земны́я обожи́, Чи́стая,/ за мно́гия щедро́ты, я́ко Бог Преблаги́й.
Песнь 3
Ирмос: Небе́снаго кру́га Верхотво́рче, Го́споди,/ и Це́ркве Зижди́телю,/ Ты мене́ утверди́ в любви́ Твое́й,/ жела́ний кра́ю, ве́рных утвержде́ние,/ Еди́не Человеколю́бче.
Припев: Святи́телю о́тче Са́вво, моли́ Бо́га о на́с.
Сын дне и све́та яви́лся еси́, святи́телю, труда́ми твои́ми,/ ны́не же во све́тлостех святы́х я́сно сия́еши благода́тию.
Припев: Святи́телю о́тче Са́вво, моли́ Бо́га о на́с.
Свети́льник души́ своея́ слеза́ми украша́я/ и ра́но у́тренюя ко Христу́/ рук свои́х просте́ртием в моли́твах,/ свое́ те́ло, мы́сленнаго Амали́ка, умертви́л еси́/ и на го́ру безстра́стия возше́л еси́.
Припев: Святи́телю о́тче Са́вво, моли́ Бо́га о на́с.
Путь нечести́ваго искуше́ния обличи́л еси́ всем прельще́нным,/ приве́д их к Сло́ву Пастыренача́льнику,/ я́ко па́стырь слове́сный и спаси́тельный.
Припев: Святи́телю о́тче Са́вво, моли́ Бо́га о на́с.
Безстра́стия любо́вию подстрека́емь,/ плотска́я взыгра́ния изсуши́л еси́,/ ду́шу же свою́ Боже́ственными сия́ньми просвети́л еси́,/ те́мже мо́лимся и нам улучи́ти свет разу́мный, о́тче Са́вво.
Припев: Святи́телю о́тче Са́вво, моли́ Бо́га о на́с.
Благоро́дием высо́к, доброду́шием изя́щен/ и ра́зума му́дростию удивле́н был еси́, сия́я чистото́ю,/ я́ко цвет, украси́вся, Са́вво о́тче, све́тлым смире́нием.
Сла́ва Отцу́ и Сы́ну и Свято́му Ду́ху.
Правове́рно, преподо́бне, Це́рковь Христо́ву упа́сл еси́,/ отгна́в ерети́ческия пле́велы,/ ны́не же во Вы́шних водворя́ешися, преблаже́нне.
И ны́не и при́сно и во ве́ки веко́в. Ами́нь.
Богородичен: Разу́мно в купине́ огнепа́льней ви́де Тя Моисе́й,/ я́сно образу́ющей Бо́га, хотя́ща роди́тися из Тебе́ неизрече́нно, Богоро́дице Присноде́во.
Седален, глас 8
Украша́яся прему́дростию ра́зума,/ низложи́л еси́ горды́ню плотски́я тяготы́/ и был еси́ оби́тель Ду́ха Пресвята́го,/ непреста́нно простира́яся ра́зумом к лю́бящему Тя./ Тем, ре́вностию Божественно́ю разгара́яся, сла́вне,/ яви́лся еси́ сиро́там и убо́гим утвержде́ние/ и А́нгелом собесе́дник, Са́вво,/ моли́ Христа́ Бо́га грехо́в оставле́ние пода́ти/ чту́щим любо́вию святу́ю па́мять твою́.
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
Богородичен: На горе́ Сина́йстей дре́вле ви́де Моисе́й за́дняя Бо́жия/ и то́нкий Боже́ственный глас сподо́бися во мра́це и ви́хре слы́шати;/ ны́не же Симео́н воплоще́ннаго Бо́га непрело́жне нас ра́ди на ру́ки прия́т/ и ра́достно тща́шеся ити́ от су́щих зде к животу́ ве́чному./ Те́мже вопия́ше:/ ны́не отпуща́еши раба́ Твоего́, Влады́ко.
Песнь 4
Ирмос: Услы́шах, Го́споди,/ смотре́ния Твоего́ та́инство,/ разуме́х дела́ Твоя́/ и просла́вих Твое́ Божество́.
Припев: Святи́телю о́тче Са́вво, моли́ Бо́га о на́с.
Предве́дый Бог, блаже́нне, твоея́ души́ красоту́ и ра́зума чистоту́/ священнопропове́дника му́дра и учи́теля показа́ тя.
Припев: Святи́телю о́тче Са́вво, моли́ Бо́га о на́с.
Ду́хом просвеще́н сый, су́щия во тьме пре́лести просвеща́еши/ и твои́м сла́дким поуче́нием сы́ны дне соверша́еши, святи́телю Са́вво.
Припев: Святи́телю о́тче Са́вво, моли́ Бо́га о на́с.
От тем звере́й изба́вил еси́, ста́до твое́ растерза́ти и́щущих,/ но ты, я́ко бодр архипа́стырь, и ны́не ревну́еши о сохране́нии ро́да и оте́чества твоего́.
Припев: Святи́телю о́тче Са́вво, моли́ Бо́га о на́с.
Руко́ю вели́каго архиере́я Се́рбскаго Арсе́ния/ и освяще́ннаго собо́ра прие́млеши пома́зание архиере́йства/ и, Ду́хом воздвиза́емь, о́тче Са́вво,/ и па́стырь ро́ду Се́рбскому и оби́тели твое́й столп был еси́.
Припев: Святи́телю о́тче Са́вво, моли́ Бо́га о на́с.
Мир утверди́ся в оби́тели твое́й, иера́рше,/ и в твое́м ро́де и епи́скопстве моли́твами твои́ми,/ мо́лися приле́жно в ми́ре утверди́тися ми́ру, святи́телю Са́вво.
Сла́ва Отцу́ и Сы́ну и Свято́му Ду́ху.
Твои́ роди́телие бы́ша рачи́тели и те́пли подража́тели Христу́ Бо́гу,/ Ему́же созда́ша храм прекра́сный во и́мя пресла́внаго Вознесе́ния Госпо́дня./ Те́мже в хра́ме Его́ те́ло свое́ полага́еши,/ а́ки во дворы́ Спа́са своего́.
И ны́не и при́сно и во ве́ки веко́в. Ами́нь.
Богородичен: Име́я Тя Помо́щницу, кого́ убою́ся когда́ или́ страшу́ся?/ Кто же, хотя́ ско́рбная навести́ рабу́ Твоему́,/ не устраши́тся Тебе́, Пречи́стая, и не па́дает на но́зе?
Песнь 5
Ирмос: Просвети́ нас повеле́нии Твои́ми, Го́споди,/ и мы́шцею Твое́ю высо́кою/ Твой мир подаждь нам,/ Человеколю́бче.
Припев: Святи́телю о́тче Са́вво, моли́ Бо́га о на́с.
Прильпе́ любо́вию душа́ твоя́ ко Го́споду, святи́телю блаже́нне,/ те́мже те́ло твое́ честно́е/ в честне́м хра́ме Его́ нетле́нно во мно́гая ле́та соблюде́ся.
Припев: Святи́телю о́тче Са́вво, моли́ Бо́га о на́с.
Просла́ви тя Госпо́дь, Са́вво пребога́те,/ и те́ло твое́ соблюде́ на мно́гая ле́та нетле́нно,/ явля́я тя о́бщника рабо́м Свои́м,/ и́хже и по сме́рти досто́йно соублажа́ешися, блаже́нне.
Припев: Святи́телю о́тче Са́вво, моли́ Бо́га о на́с.
Красота́ гове́ния твоего́, е́же ко Го́споду,/ привлече́ благода́ть благоле́пию души́ твоея́, свяще́нне,/ и возведе́ тя вели́кому ро́ду Се́рбскому отца́,/ и архипа́стыря показа́ тя, преподо́бне.
Припев: Святи́телю о́тче Са́вво, моли́ Бо́га о на́с.
Пе́сньми почти́л еси́ па́мять иера́рха Са́ввы пе́рваго/ и хвала́ми, я́ко досто́йно, ублажи́л еси́ того́./ Ны́не же сам, иера́рше Са́вво, прича́ствуеши похвала́м его́/ и по сотворе́нию твоему́ к бли́жнему восприе́млеши.
Припев: Святи́телю о́тче Са́вво, моли́ Бо́га о на́с.
Приноси́мое а́ки честно́е возноше́ние Бо́гу пе́рвопрестольником Се́рбским Са́ввою/ твое́ свяще́нное па́стырства возведе́ние,/ я́ко пасу́щу ти Госпо́дни лю́ди, Са́вво святи́телю, преподо́бием и крото́стию.
Сла́ва Отцу́ и Сы́ну и Свято́му Ду́ху.
Возлюби́л еси́, архиере́е, свяще́нныя му́жи пе́сньми восхваля́ти,/ я́ко рачи́тель добро́ты их и подража́тель дея́ний Боголюбе́зных.
И ны́не и при́сно и во ве́ки веко́в. Ами́нь.
Богородичен: Низложи́, Влады́чице, враго́в моих шата́ние,/ Тя бо и́мам и Предста́тельницу, и наде́жду, и по́мощь кре́пкую,/ Ты мя соблюди́, Чи́стая, наве́та вра́жия и ла́яния их.
Песнь 6
Ирмос: Моли́тву пролию́ ко Го́споду/ и Тому́ возвещу́ печа́ли моя́,/ я́ко зол душа́ моя́ испо́лнися/ и живо́т мой а́ду прибли́жися,/ и молю́ся, я́ко Ио́на:/ от тли, Бо́же, возведи́ мя.
Припев: Святи́телю о́тче Са́вво, моли́ Бо́га о на́с.
Возвы́шенное смире́ние, чистоту́ ума́,/ любо́вь нелицеме́рну, ве́ру и наде́жду име́я и́стинну, Са́вво всесла́вне,/ Тро́ицы яви́лся еси́ жили́ще.
Припев: Святи́телю о́тче Са́вво, моли́ Бо́га о на́с.
Се, прему́дре, Ду́ха благода́тию быва́еши наста́вник слове́сных ове́ц,/ и́хже приво́диши к же́ртвеннику доброде́телей.
Припев: Святи́телю о́тче Са́вво, моли́ Бо́га о на́с.
Патриа́ршее седа́лище украси́ся тобо́ю,/ тя бо, прехва́льне, у́чит Дух Святы́й/ и тебе́ па́стыря руко́ю святи́тельскою соверша́ет.
Припев: Святи́телю о́тче Са́вво, моли́ Бо́га о на́с.
Весь у́бо ум впери́в к высоте́,/ земна́я же ни во что же вмени́в,/ смире́нием, достоблаже́нне Са́вво, высо́кая восприя́л еси́.
Припев: Святи́телю о́тче Са́вво, моли́ Бо́га о на́с.
Хвала́ми да почти́м треблаже́ннаго отца́,/ и́же Небе́сная возжела́в, земна́я же оста́вив,/ усе́рдно потече́, я́ко еле́нь на исто́чник,/ после́довав стопа́м роди́телей свои́х.
Сла́ва Отцу́ и Сы́ну и Свято́му Ду́ху.
Святи́тельства пра́вило святи́телем показа́лся еси́,/ де́тельнаго же подписа́ние./ Сло́во Твое́ обре́те о́браз виде́ния,/ Богосло́вия же твоего́ преде́л уче́нию яви́ся.
И ны́не и при́сно и во ве́ки веко́в. Ами́нь.
Богородичен: Сло́во О́тчее,/ предочи́стившися, о Чи́стая, Ду́хом слове́снаго естества́,/ на благодея́ние родила́ еси́.
Кондак, глас 8
Я́ко архиере́ем сопресто́льник/ и святи́телем изря́дный побо́рник был еси́, святи́телю Са́вво,/ сохраня́яй оте́чество, оби́тель, град же и лю́ди, почита́ющия тя ве́рою/ и честны́м твои́м моще́м покланя́ющияся,/ да велегла́сно тебе́ вопи́ем:/ ра́дуйся, Са́вво Богому́дре.
Икос
От чре́ва мате́рня хва́лит освяще́ннаго святи́теля Госпо́дня вся страна́ Се́рбская,/ преподо́бнаго Са́вву, своему́ оте́честву утвержде́ние,/ прие́мшаго благода́тныя да́ры Боже́ственныя сла́вы,/ к нему́ же притека́ем вси с ве́рою/ и любе́зно целу́ем ра́ку моще́й его́./ Те́мже мы, недосто́йнии и гре́шнии,/ наде́ющеся на моли́твы твоя́, святи́телю,/ я́же ко Влады́це и Пречи́стей Его́ Ма́тери,/ жела́ем, а́ки пси, прия́ти насыще́ние от крупи́ц,/ па́дающих от трапе́зы господе́й свои́х,/ и е́же в День су́дный улучи́ти облегче́ние соде́янных ра́ди зол,/ да велегла́сно тебе́ вопие́м:/ ра́дуйся, Са́вво Богому́дре.
Песнь 7
Ирмос: От Иуде́и доше́дше, о́троцы/ в Вавило́не иногда́/ ве́рою Тро́ическою пла́мень пе́щный попра́ша, пою́ще:/ отце́в Бо́же, благослове́н еси́.
Припев: Святи́телю о́тче Са́вво, моли́ Бо́га о на́с.
Процве́л еси́, я́ко фи́никс, во дво́рех Бо́жиих/ и до́лжным сном преподо́бных усну́л еси́,/ сего́ ра́ди гроб твой быва́ет наслажде́ние нам,/ и сам, пропове́дниче Са́вво, показу́еши чу́до ви́дящим.
Припев: Святи́телю о́тче Са́вво, моли́ Бо́га о на́с.
Самово́льне оста́вил еси́, о́тче наш Са́вво, вся сла́вная, и сро́дная, и подру́жная,/ после́довав Христу́ Бо́гу, по Ева́нгельскому глаго́лу.
Припев: Святи́телю о́тче Са́вво, моли́ Бо́га о на́с.
Вопло́щшагося Сло́ва слуга́ был еси́, Са́вво Богогла́се,/ мно́гия бо лю́ди изба́вил еси́ безслове́сия,/ я́ко Боже́ственный учени́к Возсия́вшаго.
Припев: Святи́телю о́тче Са́вво, моли́ Бо́га о на́с.
Тле́нная оста́вив, треблаже́нне, восприя́л еси́ нетле́нная,/ насыща́яся Боже́ственныя све́тлости во дво́рех Го́спода на́шего, Са́вво прему́дре.
Припев: Святи́телю о́тче Са́вво, моли́ Бо́га о на́с.
Лю́дие твои́, о́тче, и ча́да Ду́хом Святы́м порожде́нна,/ жа́лостная оста́вльше, ра́достная тебе́ воспева́ют пе́ния, вопию́ще:/ не оста́ви нас, свя́те, в ра́дости Го́спода твоего́,/ моля́ о душа́х на́ших.
Сла́ва Отцу́ и Сы́ну и Свято́му Ду́ху.
Насле́довав, я́ко сын возлю́бленный, оте́ческую му́дрость и доброде́тель,/ прие́мник был еси́ Боже́ственнаго престо́ла,/ стопа́м Евангели́ста после́дуя.
И ны́не и при́сно и во ве́ки веко́в. Ами́нь.
Богородичен: Свы́ше Тебе́ глас ра́достно возопи́, А́нгел, Богоро́дице,/ неизрече́нное Влады́ки возвеща́я Тебе́ зача́тие.
Песнь 8
Ирмос: Царя́ Небе́снаго,/ Его́же пою́т во́и А́нгельстии,/ хвали́те и превозноси́те во вся ве́ки.
Припев: Святи́телю о́тче Са́вво, моли́ Бо́га о на́с.
Вразумля́л еси́ неразу́мный,/ обраща́л еси́ прельще́нный,/ совраща́ющияся же, о́тче, спасл еси́,/ привед их к Бо́гу, пою́щия:/ благослове́н еси́, Го́споди Бо́же оте́ц на́ших.
Припев: Святи́телю о́тче Са́вво, моли́ Бо́га о на́с.
Ны́не лице́ Христо́во созерца́й, ты, о Са́вво,/ сою́зу бо теле́сному разре́шшуся,/ соедини́лся еси́ с твои́м жела́нием.
Припев: Святи́телю о́тче Са́вво, моли́ Бо́га о на́с.
Твое́ сло́во уподо́бися вои́стинну реце́, о Са́вво,/ наводня́ющей свои́м тече́нием сю́ду и сю́ду,/ злосла́вных же ухищре́ния отвраща́ющей.
Припев: Святи́телю о́тче Са́вво, моли́ Бо́га о на́с.
Хору́гвь Христо́ва, христиа́ном хвала́, по апо́столу, о́тче Са́вво, взыва́л еси́,/ ничи́м же хваля́ся, то́кмо о Кресте́ Го́спода на́шего Иису́са Христа́.
Припев: Святи́телю о́тче Са́вво, моли́ Бо́га о на́с.
Кро́ткое и молчали́вое нра́ва твоего́ восприи́м, Госпо́дь, блаже́нне,/ поста́ви тя па́стыря лю́дем Свои́м,/ на кого́ бо призира́ет, аще не на кро́ткаго, и молчали́ваго,/ и трепе́щущаго слове́с Его́.
Сла́ва Отцу́ и Сы́ну и Свято́му Ду́ху.
Уста́ вдови́ц благослови́ша тя,/ заступле́ния твоего́ сподо́бльшися, иера́рше блаже́нне,/ ты бо благоугожда́л еси́ Бо́гу по непоро́чному И́ову,/ изыма́вшему оби́димыя от наси́лия.
И ны́не и при́сно и во ве́ки веко́в. Ами́нь.
Богородичен: Боголе́пная Де́во,/ озло́бленную мою́ ду́шу грехо́м/ ублажи́ бла́гостию ро́ждшагося от Тебе́ Го́спода Бо́га.
Песнь 9
Ирмос: Вои́стинну Богоро́дицу,/ Тя испове́дуем,/ спасе́ннии Тобо́ю, Де́во Чи́стая,/ с Безпло́тными ли́ки Тя велича́юще.
Припев: Святи́телю о́тче Са́вво, моли́ Бо́га о на́с.
Я́ко свет, я́ко све́щник,/ я́ко вели́кое со́лнце, я́ко мо́лния, Христо́вы Це́ркве возсия́л еси́,/ и ве́рных ра́зумы просвети́л еси́,/ и в невече́рняя места́ всели́лся еси́,/ поя́ трисвяты́ми гла́сми Тро́ицу Несозда́нную.
Припев: Святи́телю о́тче Са́вво, моли́ Бо́га о на́с.
Во́здух у́бо освяти́ся благово́нием моще́й твои́х, Са́вво блаже́нне, Христо́в святи́телю,/ Це́рковь же и оби́тель твоя́ Патриархи́я, веселя́щися, вопие́т:/ благосло́вен Бог оте́ц на́ших.
Припев: Святи́телю о́тче Са́вво, моли́ Бо́га о на́с.
Пло́тию ми́ра кроме́ быв, святи́телю,/ и в прекра́сных чи́на своего́ обита́я,/ обогаща́еши род наш творе́нием све́тлым./ Те́мже па́мять твою́ ве́рою соверша́ем на земли́, Са́вво прему́дре.
Припев: Святи́телю о́тче Са́вво, моли́ Бо́га о на́с.
Ца́рский цвет Це́ркви цвете́т, Крест и́стинный,/ ты же, святи́телю Са́вво досточу́дне, вземь той крест,/ поте́кл еси́ ца́рским путе́м, вопия́:/ благослови́те, вся дела́ Госпо́дня, Го́спода.
Припев: Святи́телю о́тче Са́вво, моли́ Бо́га о на́с.
Земля́ те́ло твое́ блаже́нное скрыва́ет,/ я́ко исцеле́ния точа́щее ве́рным,/ не́бо же дух со избра́нными от ве́ка но́сит,/ Боже́ственными сия́ньми озаре́н вои́стину.
Сла́ва Отцу́ и Сы́ну и Свято́му Ду́ху.
Красно́ у́бо Це́рковь весели́тся в па́мяти твое́й, о святи́телю треблаже́нне Са́вво,/ Се́рбскии же ро́дове стека́ются, пра́зднственная тебе́ принося́ще/ и восхваля́юще Христа́, тебе́ просла́вльшаго.
И ны́не и при́сно и во ве́ки веко́в. Ами́нь.
Богородичен: Де́во Преблаже́нная,/ ублажа́ем Тя, ро́ди челове́честии,/ я́ко родила́ еси́ Спаси́теля душ на́ших.
Светилен
Чу́днаго и сла́внаго святи́теля Са́вву вели́каго,/ прииди́те, Се́рбстии ро́ди и собо́ри, пе́сньми Боже́ственными/ и свяще́нными гла́сми восхва́лим,/ я́ко сопресто́льна Патриархи́и Се́рбской/ и а́нгельским чино́м сослуже́бника.
Сла́ва Отцу́ и Сы́ну и Свято́му Ду́ху.
Сла́вно краси́тся днесь светоза́рное Се́рбское торжество́,/ и́же во све́те сла́вы Бо́жия предстоя́, святи́телю Са́вво блаже́нне,/ помяни́ нас, хва́лящих твою́ па́мять.
И ны́не и при́сно и во ве́ки веко́в. Ами́нь.
Богородичен: С Бо́гом упова́ние на Тя возложи́хом, Пречи́стая,/ И́же из Тебе́ проше́дшему сраспина́емся Христу́,/ Твои́ми же к Нему́ моли́твами невреди́ми да́же до конца́ сохрани́.