Минея, 18 Июля, Кано́н преподо́бнаго
Глас 3
Песнь 1
Ирмос: Во́ды дре́вле ма́нием Боже́ственным/ во еди́но со́нмище совокупи́вый/ и раздели́вый мо́ре изра́ильтеским лю́дем,/ Сей Бог наш препросла́влен есть,/ Тому́ еди́ному пои́м, я́ко просла́вися.
Припев: Преподо́бне о́тче Иоа́нне, моли́ Бо́га о на́с.
Во́ды жа́ждущим в пусты́ни лю́дем Твои́м иногда́ да́вый,/ и мне, Христе́ мой, жа́ждущему хвалу́ принести́ Тебе́, даждь во́ду благода́ти,/ да в па́мяти преподо́бнаго Твоего́ воспою́ песнь:/ я́ко просла́вися.
Припев: Преподо́бне о́тче Иоа́нне, моли́ Бо́га о на́с.
Те́сный путь и мно́гия ско́рби Ты Сам показа́л еси́, Го́споди, ше́ствующим к Ца́рствию Твоему́,/ его́же жела́я, преподо́бный Твой ра́достно ско́рби подъя́л есть в жи́зни сей,/ да та́мо возвесели́тся, поя́:/ я́ко просла́вися.
Припев: Преподо́бне о́тче Иоа́нне, моли́ Бо́га о на́с.
Глас всегда́шняго ра́дования и шум пра́зднующих непреста́нно помина́я, свя́те Иоа́нне,/ зову́щия к суете́ пре́лести оста́вль, Христо́в яре́м взял еси́ на ся/ и ле́гце той в наде́жди ско́раго премене́ния носи́л еси́, поя́ Бо́гу:/ я́ко просла́вися.
Сла́ва Отцу́ и Сы́ну и Свято́му Ду́ху.
Удали́вся стра́стнаго ми́ра, блаже́нне,/ прите́кл еси́, я́ко еле́нь, на Пече́рскую го́ру,/ иде́же струя́ми духо́внаго пото́ка, блаже́нных оте́ц, напои́в ду́шу, воспе́л еси́ Бо́гу:/ я́ко просла́вися.
И ны́не и при́сно и во ве́ки веко́в. Ами́нь.
Богородичен: С корабле́м потопля́емь душе́вным в мо́ри страсте́й, вопию́ Ти, Чи́стая:/ ми́лостию Твое́ю помози́ мне и от потопле́ния изба́ви,/ еси́ бо кора́бль хотя́щим спасти́ся/ и ти́хое приста́нище жите́йских пла́ваний.
Песнь 3
Ирмос: И́же от не су́щих вся Приведы́й,/ сло́вом созида́емая,/ соверша́емая Ду́хом,/ Вседержи́телю Вы́шний,/ в любви́ Твое́й утверди́ мене́.
Припев: Преподо́бне о́тче Иоа́нне, моли́ Бо́га о на́с.
Я́ко от не су́щия, мирски́я ве́щи избе́г,/ в ти́хое приста́нище и́ночествующих прите́кл еси́, о́тче,/ с ни́миже живы́й, Еди́наго любя́ Бо́га, воспе́л еси́:/ Христе́ мой, в любви́ Твое́й утверди́ мене́.
Припев: Преподо́бне о́тче Иоа́нне, моли́ Бо́га о на́с.
Пречи́стому и Непоро́чному А́гнцу после́довати хотя́ща тя в чистоте́, блаже́нне, ви́дя,/ враг скве́рный нападе́ на тя разжже́нием плотски́м,/ ему́же проти́ву стал еси́, смиря́я плоть свою́ посто́м и жа́ждею и в моли́тве поя́:/ Христе́ мой, утверди́ мене́.
Припев: Преподо́бне о́тче Иоа́нне, моли́ Бо́га о на́с.
Отпаде́ние Присносу́щнаго Све́та блуднико́м помина́я, преподо́бне,/ в те́мную всели́лся еси́ пеще́ру,/ и, при гро́бе вели́каго Анто́ния безмо́лвствуя, свой исхо́д помина́л еси́ при́сно,/ и та́ко обре́л еси́ мир в косте́х твои́х.
Сла́ва Отцу́ и Сы́ну и Свято́му Ду́ху.
Не смерть, но премене́ние на живо́т лу́чший святы́м Бо́жиим есть,/ и́бо а́ще и во гробе́х положе́ни суть,/ но Бо́гови живу́т при́сно и глас испуща́ют;/ я́коже и к тебе́, о́тче Иоа́нне, от гро́ба вели́каго Анто́ния глас бысть,/ на безмо́лвие тя призыва́яй.
И ны́не и при́сно и во ве́ки веко́в. Ами́нь.
Богородичен: Час Су́дный помина́ю,/ но премене́ния от страсте́й на живо́т безстра́стный не и́мам, Чи́стая Богоро́дице;/ моли́тв ра́ди преподо́бнаго де́вственника Иоа́нна от любве́ страсте́й отврати́/ и в любви́ Сы́на Твоего́ утверди́ мене́.
Седален, глас 8
Блаже́нству не оскверни́вшихся с жена́ми поревнова́в,/ да после́дуеши А́гнцу на горе́ Сио́нстей,/ поста́вил еси́ де́вство свое́ соблюсти́ нескве́рно/ и соблю́л еси́ е́ це́ло,/ мно́гими напа́стьми бесо́вскими невреди́мо;/ те́мже пое́ши песнь но́вую, преподо́бне Иоа́нне,/ и ра́дуется со А́нгелы дух твой.
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
Богородичен: Блаже́нству де́вственник не поревнова́х, окая́нный,/ оскверни́х креще́ния моего́ ри́зу блу́дными растле́нии/ и удали́хся благода́ти Твоея́, Нескве́рный А́гнче, Сы́не Бо́жий,/ страсте́й ра́ди святы́х Твои́х и Пречи́стыя Богоро́дицы/ даждь ми исправле́ние и поми́луй мя.
Песнь 4
Ирмос: Положи́л еси́ к нам тве́рдую любо́вь, Го́споди:/ Единоро́днаго бо Твоего́ Сы́на/ за ны на смерть дал еси́./ Те́мже Ти зове́м, благодаря́ще:/ сла́ва си́ле Твое́й, Го́споди.
Припев: Преподо́бне о́тче Иоа́нне, моли́ Бо́га о на́с.
Положи́л еси́ житие́ твое́ в те́мней пеще́ре, о́тче, неисхо́дно,/ до́ндеже стра́стная мгла во свет преложи́тся молча́нием/ и неви́дением чу́вственнаго све́та.
Припев: Преподо́бне о́тче Иоа́нне, моли́ Бо́га о на́с.
Мно́гия ско́рби подъя́л еси́, свя́те,/ со страстьми́ боря́ся, а́ки с лю́тыми зверьми́,/ жесто́кая тех нападе́ния посто́м и бде́нием в теле́снем соста́ве свое́м кре́пко обуздава́я.
Припев: Преподо́бне о́тче Иоа́нне, моли́ Бо́га о на́с.
Огне́м бесо́вских прило́г пали́мую плоть твою́ не моги́й устуди́ти, блаже́нне,/ наг изво́лил еси́ жи́ти в те́сне ме́сте,/ сту́дению к теплоте́ духо́вней та́мо подвиза́яся.
Сла́ва Отцу́ и Сы́ну и Свято́му Ду́ху.
Зве́ря лю́та и неукроти́ма, свирепе́ющее те́ло свое́, смири́ти хотя́,/ тя́жкими желе́зы связа́л еси́, преподо́бне, да не по́хотствует на ду́ха,/ но па́че да повину́ется ду́ху.
И ны́не и при́сно и во ве́ки веко́в. Ами́нь.
Богородичен: От мно́гаго невоздержа́ния востаю́щих на мя страсте́й не моги́й укроти́ти,/ к Тебе́ прибега́ю, Влады́чице:/ Ты, Пречи́стая, сих нечистоту́ смири́/ и спаси́ мя от тех нападе́ния.
Песнь 5
Ирмос: На земли́ Неви́димый яви́лся еси́/ и челове́ком во́лею сожи́л еси́, Непостижи́мый,/ и, к Тебе́ у́тренююще,/ воспева́ем Тя, Человеколю́бче.
Припев: Преподо́бне о́тче Иоа́нне, моли́ Бо́га о на́с.
На земли́ живы́й всяк, кто не удиви́тся терпе́нию твоему́, о́тче,/ и́бо, ископа́в себе́ ров и наг вшед, окопа́лся еси́ до ра́му,/ пе́рстию угнета́я плотско́е стремле́ние, от супоста́та врага́ дви́жимое.
Припев: Преподо́бне о́тче Иоа́нне, моли́ Бо́га о на́с.
Твое́ те́ло, пе́рстию угнета́емо, уныва́ше,/ но враг бо́дрствоваше, кре́пко востава́я бра́нию/ и напа́дая страхова́ньми, хотя́ та́ко одоле́ти тебе́,/ да не я́звен паде́т от Тебе́, преподо́бне.
Припев: Преподо́бне о́тче Иоа́нне, моли́ Бо́га о на́с.
Ум твой, всече́стне Иоа́нне, горя́щ к Бо́гу, ви́дя, диа́вол/ злохи́трым пла́менем со дна паля́ше у́ды твоя́ и утро́бу,/ но ты, о сей боле́зни неради́в,/ изво́лил еси́ Го́спода ра́ди сгоре́ти, не́же бы́ти поруга́н бе́сом.
Сла́ва Отцу́ и Сы́ну и Свято́му Ду́ху.
Я́дом а́спидным не моги́й сатана́ чистоты́ твоея́ порази́ти, блаже́нне,/ во змия́, огне́м ды́шуща, преобрази́ся,/ да поне́ та́ко устраши́в,/ победи́т тя, непобеди́маго во́ина Христо́ва.
И ны́не и при́сно и во ве́ки веко́в. Ами́нь.
Богородичен: Яд а́спиден, стра́стныя прило́ги, и́миже враг се́рдце ми уязвля́ет,/ цельбо́ю ми́лости Твоея́ уврачу́й, Безневе́стная Де́во,/ я́ко да спасе́н от сих, плод покая́ния принесу́ Ти всеце́лый.
Песнь 6
Ирмос: Бе́здна после́дняя грехо́в обы́де мя,/ и исчеза́ет дух мой;/ но простры́й, Влады́ко, высо́кую Твою́ мы́шцу,/ я́ко Петра́, мя, Упра́вителю, спаси́.
Припев: Преподо́бне о́тче Иоа́нне, моли́ Бо́га о на́с.
Бе́здна после́дняя отве́рзе горта́нь,/ нечи́стый во зми́я преобрази́выйся диа́вол воспе́нися,/ пламеноно́сными ды́ша зия́нии, хотя́ше поглоти́ти тя,/ но ты, о́тче, был еси́ а́ки столп недви́жимь, поя́:/ Бо́же мой, Упра́вителю, мя спаси́.
Припев: Преподо́бне о́тче Иоа́нне, моли́ Бо́га о на́с.
На ка́мени тве́рдыя ве́ры стоя́, преподо́бне, щито́м наде́жды покры́лся еси́,/ и, бу́рю злоко́зненнаго врага́ ни во что же вмени́в, на главу́ его́ обрати́л еси́,/ и, в горта́ни того́ сый, не устраши́лся еси́, зовы́й ко Христу́:/ Упра́вителю, мя спаси́.
Припев: Преподо́бне о́тче Иоа́нне, моли́ Бо́га о на́с.
Кит мы́сленный главу́ твою́, блаже́нне, в горта́нь свой вложи́,/ и опали́шася тебе́ власи́,/ но не опали́ся малоду́шием се́рдце твое́, о́тче, и́мже взыва́л еси́./ И Госпо́дь услы́ша тя, я́ко Добр Ко́рмчий, любоприима́тельне спаса́я.
Сла́ва Отцу́ и Сы́ну и Свято́му Ду́ху.
Моли́тва твоя́, Иоа́нне, бысть стре́лы мо́лниины на сопроти́внаго си́лу,/ рекл бо еси́:/ Бо́же мой, вску́ю мя еси́ оста́вил?/ И а́бие исчезе́ льсти́вый я́звен/ и ктому́ не прибли́жися уже́ к тебе́, Све́том Боже́ственным прогна́н.
И ны́не и при́сно и во ве́ки веко́в. Ами́нь.
Богородичен: Стре́лы мы́сленнаго супоста́та страстьми́ ура́ниша ми се́рдце,/ тем от го́рести души́ моея́ к тебе́ вопию́, Чи́стая:/ исто́ргни ты́я руко́ю Твое́ю, я́ко ро́ждшая Христа́, Цели́теля моего́.
Кондак, глас 2
Столп целому́дрия, вра́жиими боре́ньми непобеди́мь сый,/ а́ки столп, многострада́льное водруже́нно оста́вил еси́ нам те́ло твое́,/ всече́стне Иоа́нне,/ ему́же в не́мощех душе́вных и теле́сных покланя́ющеся,/ мо́лим тя, преподо́бне:/ моли́ Христа́ Бо́га непреста́нно о всех нас.
Икос
Возлюби́в, преподо́бне, Христо́вы Боже́ственныя за́поведи/ и возненави́дев ми́ра сего́ наслажде́ние,/ прише́л еси́ усе́рдно к Тому́/ и был еси́ свети́льник, просвеща́я концы́ блиста́нием духо́вным./ Тем, припа́дая, молю́ тя:/ просвети́ мои́ о́чи душе́внеи воспе́ти твоя́ по́двиги,/ поще́ние, и бде́ние, и сле́зы, боле́зни и изможде́ние те́ла/ блаже́нныя ра́ди бу́дущия жи́зни,/ ея́же ны́не наслажда́яся, моли́ непреста́нно о всех нас.
Песнь 7
Ирмос: Я́коже дре́вле/ благочести́выя три о́троки ороси́л еси́ в пла́мени халде́йстем,/ све́тлым Божества́ огне́м и нас озари́,/ благослове́н еси́, взыва́ющия,/ Бо́же оте́ц на́ших.
Припев: Преподо́бне о́тче Иоа́нне, моли́ Бо́га о на́с.
Я́коже прах от ве́тра и я́коже дым от тучено́снаго о́блака погиба́ет,/ та́ко и Све́ту Боже́ственному прише́дшу, исчезе́ лука́вый,/ ты же, о́тче, поклони́лся еси́ Го́сподеви, поя́:/ Бо́же, благослове́н еси́.
Припев: Преподо́бне о́тче Иоа́нне, моли́ Бо́га о на́с.
Близ Госпо́дь бысть призыва́ющу ти в по́мощь, свя́те,/ Его́же благода́ть ощути́в, ра́достною душе́ю из глубины́ се́рдца воспе́л еси́:/ Бо́же, благослове́н еси́.
Сла́ва Отцу́ и Сы́ну и Свято́му Ду́ху.
Я́коже прему́др господи́н кре́пкому рабу́ вели́кое налага́ет де́ло,/ та́ко и Госпо́дь попусти́ тебе́ терпе́ти дневны́й и нощны́й вар раздеже́ний плотски́х,/ ты же терпеливоду́шне поне́сл еси́ его́, поя́:/ Бо́же, благослове́н еси́.
И ны́не и при́сно и во ве́ки веко́в. Ами́нь.
Богородичен: Я́ко прему́др Влады́ка, Сын Твой, Де́во,/ на лени́ваго мя ле́гким страсте́м приити́ попуща́ет,/ но пре́жде да́же не приидо́ша о́ныя, аз изнемого́х,/ тем к Тебе́ вопию́:/ помози́ ми, о Ма́ти Сло́ва, Ты бо благослове́нна еси́.
Песнь 8
Ирмос: Нестерпи́мому огню́ соедини́вшеся,/ богоче́стия предстоя́ще, ю́ноши,/ пла́менем же неврежде́ни,/ Боже́ственную песнь поя́ху:/ благослови́те, вся дела́ Госпо́дня, Го́спода/ и превозноси́те во вся ве́ки.
Припев: Преподо́бне о́тче Иоа́нне, моли́ Бо́га о на́с.
В нестерпи́мем огни́ разжже́ний плотски́х/ повелева́ет тебе́, блаже́нне, свы́ше глас помоли́тися мертвецу́,/ могу́щему во страсте́х блу́дных помога́ти и про́чим,/ да пою́т Го́спода во ве́ки.
Припев: Преподо́бне о́тче Иоа́нне, моли́ Бо́га о на́с.
И́же бо́лее Ио́сифа сотвори́вый, внегда́, плене́н сый, скве́рней жене́ не повину́ся,/ той и тебе́, свя́те, посо́бствова хода́тайством к Бо́гу,/ И́мже избы́в страсте́й тле́нных, ны́не пое́ши Го́спода во ве́ки.
Припев: Преподо́бне о́тче Иоа́нне, моли́ Бо́га о на́с.
Твое́ великоду́шие, о́тче, тьма́ми светле́йшее со́лнца ви́дя Бо́жие О́ко,/ свет низпосла́ благода́ти, и мрак па́губнаго блуда́ от косте́й твои́х поги́бе весьма́./ Про́чее же пожи́в в тишине́,/ ны́не пое́ши Го́спода во ве́ки.
Сла́ва Отцу́ и Сы́ну и Свято́му Ду́ху.
Безстра́стным подая́й у́мное весе́лие Влады́ка,/ подаде́ и тебе́, преподо́бне Иоа́нне, по мно́гих труде́х,/ е́же от Све́та Боже́ственнаго прие́мь, возра́довался еси́/ и ны́не на Небеси́ весели́шися с пою́щими Го́спода во ве́ки.
И ны́не и при́сно и во ве́ки веко́в. Ами́нь.
Богородичен: Вне страсте́й заче́ншая, Де́во,/ и без по́хоти му́жеския ро́ждшая Бо́жие Сло́во,/ начина́ющияся во тьме лука́ваго прило́ги истреби́,/ да, грехолю́бия избы́в, сподо́блюся Го́спода пе́ти во ве́ки.
Песнь 9
Ирмос: Но́вое чу́до и Боголе́пное:/ деви́ческую бо дверь затворе́нную/ я́ве прохо́дит Госпо́дь, наг во вхо́де,/ и плотоно́сец яви́ся во исхо́де Бог,/ и пребыва́ет Дверь затворе́на;/ Сию́ неизрече́нно я́ко Богома́терь велича́ем.
Припев: Преподо́бне о́тче Иоа́нне, моли́ Бо́га о на́с.
Но́вую жизнь нача́л еси́,/ егда́ по мно́зем страда́нии страсте́й бу́ря в тебе́ ути́шися, о́тче,/ и пожи́л еси́ в тишине́ про́чее вре́мя, си́лу Бо́жию велича́яй.
Припев: Преподо́бне о́тче Иоа́нне, моли́ Бо́га о на́с.
На тве́рдем ка́мени терпе́ния стоя́,/ был еси́ а́ки столп кре́пок, проти́ву лица́ вра́жия,/ его́же стре́лы, прира́жшеся тебе́, сокруши́шася,/ тем тя, Иоа́нне, велича́ем.
Припев: Преподо́бне о́тче Иоа́нне, моли́ Бо́га о на́с.
Чист душе́ю и те́лом на земли́ пожи́в, отше́л еси́ к Небе́сным,/ с чи́стыми се́рдцем лице́ Бо́жие ви́дети,/ Его́же зре́нием наслажда́яся, моли́ся о нас, преподо́бне,/ да с тобо́ю Тро́ицу велича́ем.
Сла́ва Отцу́ и Сы́ну и Свято́му Ду́ху.
Блаже́нна жизнь твоя́, Иоа́нне, блаже́нна кончи́на,/ но блаже́ннейший живо́т в немерца́ющем све́те,/ его́же ра́ди мно́гия поне́сл еси́ ско́рби,/ ны́не, ра́дуяся, моли́ся о нас, чту́щих па́мять твою́, всему́дре.
И ны́не и при́сно и во ве́ки веко́в. Ами́нь.
Богородичен: Жи́зни Нача́льника от крове́й Твои́х ро́ждшая, Де́во, безсе́менно,/ моли́тв ра́ди де́вственника Иоа́нна/ нас, покланя́ющихся Тебе́, к жи́зни ве́чней упра́ви,/ да Тя, Исто́чника жи́зни ро́ждшую, велича́ем.
Светилен
Чистоты́ ра́ди своея́ ско́рбную ше́ствуя стезю́, се́ял еси́ мно́гия сле́зы;/ ны́не же с весе́лием жняй блаже́нныя рукоя́ти,/ моли́ся о нас, преподо́бне, со святы́ми отцы́,/ да и мы прича́стницы ва́шего блаже́нства бу́дем:/ мы бо ча́да ва́ша и о́вцы слове́сныя уче́ний ва́ших.
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
Богородичен: Чи́стая Де́во, Сло́ва врата́,/ Ма́ти Христа́ Бо́га на́шего,/ моли́ спасти́ся нам, рабо́м Твои́м.