Минея, 11 Февраля, Ин канон
Глас 4
Песнь 1
Ирмос: Несть Тебе́ подо́бен препросла́вленный Го́споди:/ руко́ю бо кре́пкою изба́вил еси́ лю́ди,/ я́же стяжа́л еси́, Человеколю́бче.
Припев: Святы́й благове́рный кня́же Всéволоде, моли́ Бо́га о на́с.
Несмь подо́бен, ка́ко воспе́ти от ча́сти/ Небе́сному Воево́де тезоимени́таго вели́каго кня́зя Все́волода,/ возсия́вша в словя́нех насе́льшихся,/ иде́же первозва́нный во апо́столех жезл водрузи́.
Припев: Святы́й благове́рный кня́же Всéволоде, моли́ Бо́га о на́с.
В ле́та вели́каго кня́зя Влади́мира ца́рскою диади́мою от Монома́ха че́стно почте́н, возсия́в,/ пе́рвому же вели́кому Влади́миру подража́в,/ я́ко от ко́рене их честна́ ветвь изра́сл еси́.
Сла́ва Отцу́ и Сы́ну и Свято́му Ду́ху.
Царя́ Небе́снаго, сла́вима в Тро́ице,/ из мла́да яви́лся еси́ сосу́д чист и непоро́чен./ Ему́же ны́не предстоя́ дерзнове́нно,/ о нас помоли́ся, блаже́нне кня́же Гаврии́ле.
И ны́не и при́сно и во ве́ки веко́в. Ами́нь.
Богородичен: Чи́стую Тя и непоро́чную Арха́нгел Гаврии́л я́ко узре́,/ ра́дуйся, Тебе́, Влады́чице, све́тло возопи́, Неискусобра́чная,/ челове́ком спасе́ние, князе́м и царе́м похвала́ и честносло́вие.
Песнь 3
Ирмос: Не му́дростию, и си́лою, и бога́тством хва́лимся,/ но Тобо́ю, О́тчею Ипоста́сною му́дростию, Христе́:/ несть бо свят, па́че Тебе́,/ Человеколю́бче.
Припев: Святы́й благове́рный кня́же Всéволоде, моли́ Бо́га о на́с.
Сла́внаго страстоте́рпца Гео́ргия храм и оби́тель прече́стну со блаже́нным Кириа́ком воздви́гл еси́,/ и в ней мно́жество и́нок о тебе́, Богому́дре, хва́лятся/ и мольбу́ Богови прино́сят.
Припев: Святы́й благове́рный кня́же Всéволоде, моли́ Бо́га о на́с.
Бори́са, целому́драго прароди́теля своего́, поревнова́в,/ зако́нное сочета́ние, я́коже вели́кий Моисе́й и Иса́йя име́ста, Боговиде́ния сподо́бистася,/ терпе́нием до конца́ блаже́нство и Бо́жие благослове́ние получи́ша.
Сла́ва Отцу́ и Сы́ну и Свято́му Ду́ху.
Всея́ Росси́и вели́кая княги́ня Богому́драя О́льга ви́де трисо́лнечныя лучи́, сия́юща на усть Пле́сковы,/ назна́менуя град и храм Пресвяты́я Тро́ицы,/ в нем бо и ты, досточу́дне, чудеса́ соде́я,/ с не́юже о нас моли́ся.
И ны́не и при́сно и во ве́ки веко́в. Ами́нь.
Богородичен: Сказу́я е́же дре́вле сокрове́нное та́инство, Отрокови́це,/ Тебе́ иногда́ Гаврии́л, взыва́я:/ ра́дуйся, Бо́жия пала́то,/ в ню́же всели́вся, вся челове́ки обожи́л есть, я́ко Милосе́рд.
Седален, глас 4
Благоволи́в благи́ми дея́нии,/ искуси́лся еси́, я́ко зла́то в пе́щи, напа́стьми, Все́володе сла́вне./ Те́мже и по сме́рти источа́еши бога́тно чудеса́, я́ко во́ды,/ и неду́ги исцеля́еши, о нас при́сно моля́ся,/ я́ко да согреше́ний проще́ние прии́мем.
Песнь 4
Ирмос: Неизсле́дный Бо́жий сове́т,/ е́же от Де́вы воплоще́ния/ Тебе́, Вы́шняго,/ проро́к Авваку́м усмотря́я, зовя́ше:/ сла́ва си́ле Твое́й, Го́споди.
Припев: Святы́й благове́рный кня́же Всéволоде, моли́ Бо́га о на́с.
По благослове́нию архиере́я со отце́м свои́м, Богому́дре, подви́гшеся,/ мног труд показа́ша, вели́кий Но́вград многому́дренно соде́ласта/ на утвержде́ние ве́рою зову́щим:/ сла́ва си́ле Твое́й, Го́споди.
Припев: Святы́й благове́рный кня́же Всéволоде, моли́ Бо́га о на́с.
Епи́скопа вели́каго Новагра́да свяще́нием це́рковь многочу́дну вели́кому Иоа́нну Предте́чи/ в па́мять сы́ну твоему́, прему́дре Гаврии́ле, воздви́гл еси́,/ с ни́мже поя́:/ сла́ва си́ле Твое́й, Го́споди.
Сла́ва Отцу́ и Сы́ну и Свято́му Ду́ху.
Генна́дия Патриа́рха Богосло́вию после́довал еси́, Богому́дре Гаврии́ле,/ Триипоста́снаго Существа́ в со́бствех, Отца́, и Сы́на, и Свята́го Ду́ха,/ во Еди́ном Божестве́ покланя́ема бы́ти, ве́ровав,/ Ему́же с ним поя́:/ сла́ва си́ле Твое́й, Го́споди.
И ны́не и при́сно и во ве́ки веко́в. Ами́нь.
Богородичен: Всю Тя, Ду́хом Гаврии́л очиствова́нну, Всенепоро́чная, разуме́в,/ вопие́т Ти я́вственно:/ о ра́дуйся, кля́твы избавле́ние и пра́отцев воззва́ние!
Песнь 5
Ирмос: Ны́не воста́ну, проро́чески рече́ Бог,/ ны́не просла́влюся, ны́не вознесу́ся,/ па́дшаго прие́м от Де́вы,/ и к све́ту у́мному вознося́й Моего́ Божества́.
Припев: Святы́й благове́рный кня́же Всéволоде, моли́ Бо́га о на́с.
Пско́ва гра́да и ла́дожане, избра́ннии людие, при́звани новогоро́дскими му́жи,/ умы́слившими на изгна́ние твое́, свя́те,/ сове́т их разверго́ша, возврати́ша тя, ра́достию мир подаю́ща.
Припев: Святы́й благове́рный кня́же Всéволоде, моли́ Бо́га о на́с.
Руко́ю твое́ю честно́ю написа́в, прему́дре Гаврии́ле,/ твоего́ строе́ния вели́каго Иоа́нна Крести́теля це́ркви,/ пребога́тое твоего́ пра́веднаго дая́ния законоположе́ние ве́чно,/ мир всем да́руя.
Сла́ва Отцу́ и Сы́ну и Свято́му Ду́ху.
Многоразсу́дное вселе́нских учи́телей о Це́ркви Христо́ве разсмотри́в,/ и твои́х святоле́пных прароди́телей зако́нное завеща́ние,/ и уста́вы судо́м оте́ческим, преда́в Царю́ сла́вы, Богому́дре,/ архиере́ом непоколеби́мо соблюда́ти.
И ны́не и при́сно и во ве́ки веко́в. Ами́нь.
Богородичен: Храм су́щи свяще́ния, Пренепоро́чная,/ веща́нием Гаврии́ла Арха́нгела, во святы́х почива́ющаго, родила́ еси́ Пресвята́го Бо́га,/ всех освяща́ющаго и лю́тых изыма́юща.
Песнь 6
Ирмос: Возопи́ша с весе́лием пра́ведных ду́си:/ ны́не ми́ру заве́т но́вый завеща́ется,/ и кропле́нием да обновя́тся лю́дие/ Бо́жия Кро́ве.
Припев: Святы́й благове́рный кня́же Всéволоде, моли́ Бо́га о на́с.
Бу́яго наро́да де́рзость на Су́ждаль,/ не послу́шавша святи́теля богонаказа́тельных слове́с чужда́го достоя́ния не жела́ти,/ ты же, пра́ведниче, пра́вду возлюби́в,/ в мир сих преложи́л еси́.
Припев: Святы́й благове́рный кня́же Всéволоде, моли́ Бо́га о на́с.
Умо́м разсуди́тельным/ оби́дящия достоя́ние, прему́дрости Бо́жия Це́ркве, инове́рныя язы́ки победи́в,/ и во гра́де Ю́риеве прароди́теля твоего́/ ве́ру правосла́вную па́ки предложи́л еси́.
Сла́ва Отцу́ и Сы́ну и Свято́му Ду́ху.
В челове́цех Боголюбе́зен, и ве́лий властоде́ржец,/ и це́ркве Пресвяты́я Тро́ицы строе́нию спосо́бник,/ и я́ко проуве́дев, в ней положи́тися,/ Е́йже предстоя́, сла́вне Гаврии́ле, о нас моли́ся.
И ны́не и при́сно и во ве́ки веко́в. Ами́нь.
Богородичен: Глаго́лом Боже́ственным послушли́ва Гаврии́ловым была́ еси́,/ Безнача́льнаго Сло́ва пло́тию породила́ еси́,/ всех освяща́ющаго и лю́тых изыма́юща.
Кондак, глас 8
Многому́дренно пресели́вся во град Псков, блаже́нне кня́же Гаврии́ле,/ плод благи́й Бо́гови в жи́зни сей был еси́,/ присноцвету́щ доброде́тельми и, я́коже Дави́д, незло́бием./ Того́ ра́ди получи́л еси́ жизнь ве́чную на Небесе́х,/ всегда́ зря Святу́ю Тро́ицу./ Моли́ изба́витися нам от вся́ких бед, да зове́м ти:/ ра́дуйся, утвержде́ние гра́ду на́шему.
Икос
Всечестну́ю па́мять почти́м уго́дника Христо́ва, вели́каго кня́зя Все́волода,/ оте́ческою диади́мою от ю́ности укра́шена,/ хра́браго во́ина на супоста́ты и вла́стеля благоути́шна,/ и ра́достныя глаго́лы от се́рдца воззове́м к нему́, си́це вопию́ще:/ ра́дуйся, я́ко из млады́х ногте́й Бо́га возлюби́в;/ ра́дуйся, я́ко за́поведей Его́ нело́жный храни́тель;/ ра́дуйся, земли́ слове́нстей украше́ние;/ ра́дуйся, церко́вный строи́телю и обогати́телю неску́дный;/ ра́дуйся, церква́м украше́ние и и́стинный побо́рниче;/ ра́дуйся, нело́жный прави́телю о́тческих преда́ний;/ ра́дуйся, благоче́стия столп, непоколеби́м вра́жиими прило́ги;/ ра́дуйся, я́ко во вре́мя вели́каго гла́да преизоби́льный ни́щим и си́рым пита́телю;/ ра́дуйся, бе́дным утеше́ние и засту́пник;/ ра́дуйся и весели́ся, я́ко сугу́бу мзду Небе́сную сугу́ба ра́ди изгна́ния от Бо́га обре́л еси́;/ ра́дуйся, я́ко сподо́бился еси́ восприя́тия/ сугу́быя благода́ти вене́ц пресве́тел и исто́чник исцеле́ния;/ ра́дуйся, пресла́вный кня́же Гаврии́ле, князе́м Росси́йским похвала́;/ ра́дуйся, утвержде́ние гра́ду на́шему.
Песнь 7
Ирмос: В нача́ле Безнача́льное Сло́во,/ со Отце́м и Ду́хом Сын Единоро́дный,/ благослове́н еси́ и превозноси́мый Бо́же оте́ц на́ших.
Припев: Святы́й благове́рный кня́же Всéволоде, моли́ Бо́га о на́с.
В ско́рбех па́ки пребыва́я, блаже́нне Гаврии́ле,/ от разсвире́пившихся муже́й, сове́тующих на тя на коне́чное изгна́ние,/ но в кре́пости души́ благода́рно поя́:/ благослове́н Бог оте́ц на́ших.
Припев: Святы́й благове́рный кня́же Всéволоде, моли́ Бо́га о на́с.
Песносло́вивша тя Богому́дренно по Христо́ве Це́ркви,/ Боже́ственная преда́ния и оте́ческий уста́в/ прие́м, вели́кий Но́вград содержи́т, поя́:/ благослове́н Бог оте́ц на́ших.
Сла́ва Отцу́ и Сы́ну и Свято́му Ду́ху.
Гри́вну зла́ту о твое́й вы́и нося́/ и вене́ц терпе́ния от Вседержи́теля восприе́мля,/ вы́ну зря у́мныма очи́ма,/ Тро́ичным све́том, Гаврии́ле, просвеща́ем, в весе́лии поя́:/ благослове́н Бог оте́ц на́ших.
И ны́не и при́сно и во ве́ки веко́в. Ами́нь.
Богородичен: Гаврии́л Архистрати́г по́слан бысть, ра́дость возвеща́ет Ти,/ Де́во Ма́ти Чи́стая,/ ея́же ра́ди печа́ль преста́, и кля́тва непло́ды бысть,/ благослове́ние же ве́рным князе́м процвете́ во ве́ки.
Песнь 8
Ирмос: Вся дела́ Божия/ и вся тварь, благослови́те Го́спода,/ преподо́бнии и смире́ннии се́рдцем, по́йте Его́/ и превозноси́те во вся ве́ки.
Припев: Святы́й благове́рный кня́же Всéволоде, моли́ Бо́га о на́с.
Го́рняго Иерусали́ма жела́я насле́довати, зва́нием почита́ем благонаро́читых люде́й,/ от Вышегра́да прише́л еси́ во град Псков,/ с ни́ми поя́, блаже́нне, и превознося́ Го́спода во ве́ки.
Припев: Святы́й благове́рный кня́же Всéволоде, моли́ Бо́га о на́с.
Раче́ние незло́биво ко изгна́вшим тя, блаже́нне,/ я́коже Дави́д ко Авессало́му показа́л еси́,/ жела́я в Вы́шних кро́тких зе́млю насле́дити, ве́чнаго селе́ния, Богому́дре, во ве́ки.
Сла́ва Отцу́ и Сы́ну и Свято́му Ду́ху.
Тобо́ю, Богоблаже́нне кня́же Гаврии́ле, град Псков вельми́ хва́лится:/ в не́м бо благоче́стно пожи́в, спасе́ние соде́лав,/ Тро́ицу чти́ти научи́л еси́ во Еди́ном Божестве́,/ и покланя́тися Той, и благосло́вити во ве́ки.
И ны́не и при́сно и во ве́ки веко́в. Ами́нь.
Богородичен: Предвозвести́тель ве́чныя та́йны/ Арха́нгел Гаврии́л, – е́же ра́дуйся! – Тебе́, Богоро́дице, взыва́я,/ тезоимени́тый же сему́ от земны́х князь/ Твоего́ успе́ния хра́му с Богому́дрым Ни́фонтом основа́ние полага́ют,/ благосло́вяще Тя во ве́ки.
Песнь 9
Ирмос: Сотвори́ держа́ву мы́шцею Свое́ю,/ низложи́ бо си́льныя со престо́л/ и вознесе́ смире́нныя Бог Изра́илев,/ в ни́хже посети́ нас Восто́к с высоты́/ и напра́вил ны есть на путь ми́ра.
Припев: Святы́й благове́рный кня́же Всéволоде, моли́ Бо́га о на́с.
Пи́щи безсме́ртныя, Те́ла и Кро́ве Христо́вы, сподо́бился еси́ причасти́тися, Богому́дре,/ проще́ние и мир всем дав,/ ду́шу твою́ Небе́сному Царю́ и Влады́це пре́дал еси́./ Ему́же со все́ми святы́ми предстоя́, всеблаже́нне, о нас моли́ся.
Припев: Святы́й благове́рный кня́же Всéволоде, моли́ Бо́га о на́с.
Нова́града наро́ди ми́рная устро́ивше и ско́ро ше́дше в Пле́сков,/ восхоте́ша взя́ти мо́щи твоя́, свя́те, но не возмого́ша:/ сугу́бо чудоде́йствие показа́в, ста́ша неподви́жими,/ и по́дал еси́ им от честны́я руки́ своея́ но́готь/ на исцеле́ние и в па́мять ве́чную.
Сла́ва Отцу́ и Сы́ну и Свято́му Ду́ху.
Ско́ро предва́рше свяще́нное ополче́ние,/ власти же, и наро́читии, и всяк во́зраст, в пресла́вную це́рковь Пресвяты́я Тро́ицы,/ и присту́пльше к чудотво́рней ра́це, вопие́м:/ о всеблаже́нне кня́же Гаврии́ле! Моли́ Царя́ Небе́снаго ве́рным лю́дем здра́вие пода́ти и во́ем побе́ду на враги́,/ гра́ду же и нам спасе́ние и исцеле́ние.
И ны́не и при́сно и во ве́ки веко́в. Ами́нь.
Богородичен: Господонача́льный Царю́, со Отце́м седя́й и Серафи́мы пое́мый,/ призри́ на мольбу́ раб Твои́х:/ Пречи́стыя же Твоея Ма́тере и уго́дника Твоего́, кня́зя Гаврии́ла, моле́нием/ спаси́ град и лю́ди и умно́жи плоды́ земны́я,/ пода́ждь ве́рным здра́вие и на проти́вныя побе́ды/ и очи́сти грехи́ на́ша И́мене Твоего́ ра́ди.
Светилен
Боже́ственною благода́тию просвети́вся,/ и по сме́рти показа́л еси́ све́тлость жития́ твоего́:/ источа́еши ми́рови благода́ть, притека́ющим к ра́це моще́й твои́х, всеблаже́нне Гаврии́ле,/ и моли́ спасти́ся чту́щим тя.
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
Богородичен: В Тя всели́ся, Присноде́во Богоро́дице, я́ве Соде́тель и Госпо́дь всех/ и Еди́ну Трисия́нну зра́ку Божества́ покланя́тися/ благочести́выми кня́зи в Росси́и челове́ческий род научи́ и просвети́.