Текст акафиста одобрен для употребления за богослужением и в домашней молитве на заседании Священного Синода 27 декабря 2024 года (журнал № 150).
Кондак 1
Избра́нный уго́дниче Бо́жий Дании́ле, / от ю́ности своея́ крест на ра́мо взем, / во мно́зех труде́х и по́двизех и́ноческих / оби́тель кра́сну во сла́ву Пресвяты́я Тро́ицы воздви́гл еси́, / в не́йже вы́ну пребыва́еши, и на́ша моле́ния к Бо́гу возно́сиши. / Мы же, чту́ще святу́ю па́мять твою́, / с ве́рою и любо́вию взыва́ем ти: / Ра́дуйся, уго́дниче Бо́жий, // Дании́ле чудотво́рче.
И́кос 1
Равноа́нгельно житие́ твое́, преподо́бне, измла́да показа́ся, и был еси́ сосу́д че́стен Бо́жия благода́ти, те́мже досто́йно блажи́м тя си́це:
Ра́дуйся, от ю́ности всего́ себе́ Го́сподеви преда́вый;
ра́дуйся, во всем во́лю Бо́жию соблюда́вый.
Ра́дуйся, к чте́нию и слу́шанию Боже́ственных Писа́ний прилежа́вый;
ра́дуйся, плоть свою́ со страстьми́ и похотьми́ распя́вый.
Ра́дуйся, ра́ди Бо́га роди́тели и бра́тию оста́вивый;
ра́дуйся, во и́ночестве стро́гий по́двиг благоче́стия показа́вый.
Ра́дуйся, без благослове́ния ста́рец духо́вных ничесо́же твори́вый;
ра́дуйся, на монасты́рския труды́ со вся́ким усе́рдием те́кий.
Ра́дуйся, в бде́ниих и поще́ниих непреста́нно пребыва́вый;
ра́дуйся, я́ко еле́нь на и́сточницы, к церко́вному пе́нию спеши́вый.
Ра́дуйся, чистоту́ душе́вную и теле́сную усе́рдно храни́вый;
ра́дуйся, от ю́ности мно́гими доброде́тельми процветы́й.
Ра́дуйся, уго́дниче Бо́жий, Дании́ле чудотво́рче.
Конда́к 2
Ви́дя ласкосе́рдие мирска́го су́етства и услы́шав житие́ Симео́на Дивного́рца, ка́ко он смиря́ше по́хоть пло́ти своея́ и предая́ше те́ло свое́ страда́нию, восхоте́л еси́, преподо́бне, подража́ти того́ восхожде́нию духо́вному, и пострада́ти та́кожде, я́коже и той, да просла́виши Бо́га по́двиги теле́сными, воспева́я Ему́ ду́хом: Аллилу́иа.
И́кос 2
Ра́зума духо́внаго от ю́ности испо́лнен был еси́, преподо́бне: измла́да бо избра́л еси́ тя́жкую и многоско́рбную стезю́ умерщвле́ния самовла́стия пло́ти. Сего́ ра́ди вопие́м ти:
Ра́дуйся, на путь у́зкий и приско́рбный зело́ ра́но вступи́вый;
ра́дуйся, и́го Христо́во с кро́тостию и смире́нием усе́рдно понесы́й.
Ра́дуйся, николи́же поста́ и моли́твы отлуча́выйся;
ра́дуйся, день и нощь зако́ну Госпо́дню поуча́выйся.
Ра́дуйся, целому́дрия цве́те неувяда́емый;
ра́дуйся, вы́ну в труде́х и бде́ниих пребыва́вый.
Ра́дуйся, любо́вь нелицеме́рну ко всем стяжа́вый;
ра́дуйся, бра́тии свое́й во всем благоугожда́вый.
Ра́дуйся, не вотще́ прие́мый благода́ть свяще́нства;
ра́дуйся, вы́ну возноси́вый горе́ свое́ се́рдце.
Ра́дуйся, Же́ртву Непоро́чную со благогове́нием и стра́хом приноси́вый;
ра́дуйся, сми́рению, чистоте́ и воздержа́нию нас науча́яй.
Ра́дуйся, уго́дниче Бо́жий, Дании́ле чудотво́рче.
Конда́к 3
Си́ла Вы́шняго осени́ тя и напра́ви взя́ти яре́м в ю́ности твое́й, оба́че роди́тели недомышля́ху о по́двизе твое́м и отку́ду есть боле́знь ча́ду. Ты же, во спасе́ние души́ своея́ умерщвля́я плоть, да уго́ден бу́деши Бо́гови, ду́хом воспева́ше Ему́ непреста́нно: Аллилу́иа.
И́кос 3
Име́я вся́ко тща́ние ко вся́кому де́лу бла́гу, обхожда́ше преподо́бный и́ноческия оби́тели и внима́ше благи́м обы́чаем и му́дрости святы́х подви́жников; егда́ же прии́де последи́ во оби́тель Пресвяты́я Богоро́дицы, я́же на Гори́цех, зде во́лею Бо́жиею водвори́ся на спасе́ние мно́гих. Мы же, чту́ще по́двиги преподо́бнаго Дании́ла, прославля́ем его́, вопию́ще:
Ра́дуйся, неразу́мныя му́дрыми словесы́ наказа́вый;
ра́дуйся, прегреше́ньми во отча́яние погруже́нныя иску́сно исцели́вый.
Ра́дуйся, мно́гих к покая́нию обрати́вый и от грех преста́ти научи́вый;
ра́дуйся, безчи́нно ходя́щия в ра́зум и́стины приведы́й.
Ра́дуйся, о стра́нницех, ни́щих и пове́рженных на распу́тиих усе́рдно промышля́вый;
ра́дуйся, я́коже Тови́т, в де́брех от мра́за изме́рзших и от ра́збойник убие́нных взыска́вый.
Ра́дуйся, ме́ртвыя, я́же бы́ша оста́влены на снеде́ние звере́м, на ра́менах свои́х в скуде́льницу приноси́вый;
ра́дуйся, внеза́пу почи́вших с вели́ким пла́чем лобыза́вый.
Ра́дуйся, пе́ние над ни́ми церко́вное Бо́гу возноси́вый;
ра́дуйся, по вся дни Боже́ственную Литурги́ю о упокое́нии их соверша́вый.
Ра́дуйся, страннолю́бче и пита́телю ни́щих;
ра́дуйся, дру́же уме́рших от напра́сныя сме́рти.
Ра́дуйся, уго́дниче Бо́жий, Дании́ле чудотво́рче.
Конда́к 4
Бу́рю сумни́тельных помышле́ний разгоня́я упова́нием на Про́мысл Бо́жий и о́чи серде́чныя просвеща́я нощны́ми бде́нии, взира́ше преподо́бный от ке́ллии своея́ на ме́сто скуде́льниче, ви́дев же над ним ди́вная зна́мения, умиля́шеся о прославле́нии Бо́гом ме́ста того́ и со слеза́ми взыва́ше Ему́: Аллилу́иа.
И́кос 4
Слы́шав от Свяще́нных Писа́ний, я́ко ве́лия есть по́льза душа́м уме́рших, егда́ прино́сится за них свята́я и стра́шная Же́ртва, непреста́нно размышля́ше и Бо́га вопроша́ше Дании́л, ка́ко устро́ити храм Госпо́день на скуде́льнице. Те́мже вопие́м ему́:
Ра́дуйся, любо́вь к Бо́гу с любо́вию к бли́жнему сочета́вый;
ра́дуйся, ра́вную любо́вь к живы́м и почи́вшим простира́вый.
Ра́дуйся, о почи́вших напра́сною сме́ртию сугу́бо прилежа́вый;
ра́дуйся, о тех, и́хже имена́ никому́же ве́домы, вы́ну мольбы́ приноси́вый.
Ра́дуйся, о́тче чадолюби́ве, о уме́рших промышля́вый;
ра́дуйся, ве́рный сы́не, Отца́ Небе́снаго дела́ми прославля́вый.
Ра́дуйся, в моли́твы Це́ркве о усо́пших тве́рду ве́ру име́вый;
ра́дуйся, от ве́чныя сме́рти моли́твами их избавля́вый.
Ра́дуйся, возноси́вый пе́ние, да всели́т Госпо́дь их в ме́сте све́тле и поко́йне;
ра́дуйся, утеша́вый скорбя́щих и пла́чущих сро́дников.
Ра́дуйся, о бога́тых и убо́гих, о си́рых и о стра́нницех моли́твенниче;
ра́дуйся, о всех уме́рших усе́рдный попечи́телю.
Ра́дуйся, уго́дниче Бо́жий, Дании́ле чудотво́рче.
Конда́к 5
Я́ко боготе́чную звезду́ прия́т преподо́бный сове́т трие́х стра́нников не начина́ти строе́ния церко́внаго ра́нее трие́х лет, да не хоте́ние челове́ческо, но Бо́жие де́йствует изволе́ние, и преда́в всего́ себе́ Бо́гови, вопия́ше Ему́: Аллилу́иа.
И́кос 5
Ви́девше боля́ре, и́же бя́ху во опа́ле ца́рстей, ка́ко гнев царе́в моли́твами преподо́бнаго преложе́н бысть на ми́лость, и ка́ко в пре́жнюю честь и сан приведе́ни бы́ша, дивля́хуся си́ле моли́тв его́, и взыва́ху:
Ра́дуйся, во пло́ти а́нгеле Бо́жий, благу́ю весть в печа́ли су́щим подава́яй;
ра́дуйся, Христо́во благоуха́ние, ско́рбная сердца́ возвеселя́яй.
Ра́дуйся, моли́твами свои́ми гнев царе́в утоляя́й;
ра́дуйся, кре́пкий хода́таю, на милосе́рдие Бо́жие упова́яй.
Ра́дуйся, нище́тою ду́ха бога́тая стяжа́вый;
ра́дуйся, благотвори́вый всем, и в отве́т воздая́ния не ожида́вый.
Ра́дуйся, ту́не прие́мый да́ры Ду́ха Свята́го, и ту́не плоды́ их подава́вый;
ра́дуйся, нивочто́же себе́ вмени́вый, и во всем сла́ву Бо́гу воздава́вый.
Ра́дуйся, ду́ши бли́жних к еди́ному на потре́бу обраща́вый;
ра́дуйся, к ве́чному животу́ всех тещи́ устремля́вый.
Ра́дуйся, к покая́нию и соблюде́нию за́поведей Бо́жиих приводи́вый;
ра́дуйся, благовре́менне и безвре́менне, скорбя́щих и ра́дующихся наставля́вый.
Ра́дуйся, уго́дниче Бо́жий, Дании́ле чудотво́рче.
Конда́к 6
Пропове́дницы си́лы моли́тв свята́го уго́дника, боля́ре обеща́хуся испо́лнити жела́ние се́рдца его́, и о поставле́нии це́ркве на скуде́льнице умоли́ти и самоде́ржца, и первосвяти́теля, да пое́тся на сем ме́сте надгро́бная песнь: Аллилу́иа.
И́кос 6
Возси́я но́вый свет упова́нию преподо́бнаго, егда́ востече́ сам в ца́рствующий град, и предста́виша его́ боля́ре самоде́ржцу, и испроси́ша гра́мату во е́же стро́ити но́ву це́рковь на скуде́льнице. Сего́ ра́ди вопие́м:
Ра́дуйся, я́ко ничто́же имы́й к созда́нию це́ркве, подви́глся еси́ к о́ному во упова́нии то́чию на Бо́га;
ра́дуйся, я́ко с ра́достию соверши́ тру́дное ше́ствие к ца́рствующему гра́ду.
Ра́дуйся, за не́мощию пло́ти не оставля́вый де́ла богоуго́днаго;
ра́дуйся, почи́вшим взыска́вый свята́го хра́ма божедо́мнаго.
Ра́дуйся, пред лице́м царя́ то́чию о бла́зе усо́пших глаго́лавый;
ра́дуйся, госуда́ря на ми́лостыню до́му убо́гих сподви́гнувый.
Ра́дуйся, благослове́ние первосвяти́теля и наставле́ние о храмозда́нии улучи́вый;
ра́дуйся, гра́маты пе́рвенствующих со смиренному́дрием прия́вый.
Ра́дуйся, ре́вностный моли́твенниче о тех, и́хже имена́ забве́ни бы́ша;
ра́дуйся, просветите́лю ме́ста того́, иде́же ти́и положе́ни бы́ша.
Ра́дуйся, ра́дование уме́рших;
ра́дуйся, отра́до живу́щих.
Ра́дуйся, уго́дниче Бо́жий, Дании́ле чудотво́рче.
Конда́к 7
Хотя́щу преподо́бному узре́ти ме́сто, на не́мже стро́ити це́рковь, сре́те его́ жена́, пла́чуща по роди́телех и сро́дницех свои́х, и́же бя́ху положе́ни на скуде́льнице, и сре́бреницы да́вши ему́, моля́ше, да сотвори́т па́мять о них; разуме́в же преподо́бный, я́ко от Го́спода бысть начина́ние сие́, воспе́ Ему́: Аллилу́иа.
И́кос 7
Но́вое чу́до слы́ша преподо́бный от рыболо́ва, ка́ко той мно́гажды ви́де со е́зера над скуде́льницею о́вогда свет в нощи́ светя́щийся, о́вогда же свещи́ мно́ги горя́щи. Прие́м же и от сего́ сребро́ в же́ртву о сро́дницех, удиви́ся ста́рец Бо́жию промышле́нию. Мы же, чу́до слы́шаще, вопие́м:
Ра́дуйся, Про́мыслом Бо́жиим управля́емый;
ра́дуйся, чу́дных виде́ний сподобля́емый.
Ра́дуйся, во всем во́ли Бо́жией повину́яйся;
ра́дуйся, вся́кое бла́го на по́льзу прие́мляй.
Ра́дуйся, с любо́вию творя́й поминове́ние усо́пших;
ра́дуйся, с ре́вностию исполня́яй о сем проше́ния живы́х.
Ра́дуйся, не ища́й мзды и ре́внуяй то́чию о спасе́нии отше́дших;
ра́дуйся, возжада́вый твори́ти приноше́ние о почи́вших.
Ра́дуйся, и́же зде пребыва́ющим и отше́дшим отсю́ду друг бя́ше;
ра́дуйся, и́же живы́я и уме́ршия в се́рдце свое́м вмеща́ше.
Ра́дуйся, его́же жела́ние Госпо́дь исполня́ет;
ра́дуйся, его́же моли́твами Бог це́рковь устроя́ет.
Ра́дуйся, уго́дниче Бо́жий, Дании́ле чудотво́рче.
Конда́к 8
Стра́нное виде́ние во́ин не́кий пове́да преподо́бному: я́ко егда́ спеши́ти ему́ на то́ржище до у́тренняго све́та, слы́ша на скуде́льнице глас свяще́ннаго пе́ния. Пристра́шен быв, проша́ше и во́ин моли́тв о почи́вших бли́зких, да́ры дая́. От сего́ тре́тияго виде́ния и тре́тияго приноше́ния позна́ преподо́бный, я́ко Пресвята́я Тро́ица благословляе́т жела́ние се́рдца его́, и со слеза́ми возгласи́ песнь: Аллилу́иа.
И́кос 8
Во вся ору́жия Бо́жия облеки́йся, я́ко возмощи́ ста́ти проти́ву ко́знем диа́вольским, со вся́ким смиренному́дрием приступи́ преподо́бный Дании́л к созида́нию це́ркве Божи́ей на скуде́льнице. Мы же, оби́тель сла́вну ви́дяще, возопии́м:
Ра́дуйся, кре́стным зна́мением бесо́в прогна́вый;
ра́дуйся, и́менем Христо́вым вра́жия кова́рства разруши́вый.
Ра́дуйся, оскорбле́ния и гоне́ния с ра́достию претерпе́вый;
ра́дуйся, о укроще́нии злых серде́ц моли́тву твори́вый.
Ра́дуйся, це́рковь во и́мя Всех Святы́х устро́ивый;
ра́дуйся, безымя́нных и неве́домых подви́жников сим почти́вый.
Ра́дуйся, це́рковь в похва́лу Пречи́стыя Богоро́дицы воздви́гнувый;
ра́дуйся, Ея́же хода́тайством по́мощь Бо́жию мно́гажды улучи́вый.
Ра́дуйся, благоволе́нием царе́вым ка́менный храм во сла́ву Пресвяты́я Тро́ицы созда́вый;
ра́дуйся, на тве́рдем ка́мени Ева́нгелия оби́тель и́ноческую основа́вый.
Ра́дуйся, до́брый па́стырю, пеки́йся о устро́енней оби́тели;
ра́дуйся, чи́на богослуже́бнаго и и́ноческих уста́вов стро́гий блюсти́телю.
Ра́дуйся, уго́дниче Бо́жий, Дании́ле чудотво́рче.
Конда́к 9
Вся́кое попече́ние прилага́я о устро́енней оби́тели, уте́шен бысть преподо́бный повестьми́ двух ста́рцев тоя́ оби́тели, и́же ви́деша в нощи́ мно́жество свеще́й горя́щих, и мно́жество свяще́ннаго чи́на люде́й, пою́щих и кадя́щих. Он же сия́ слы́шав, просла́ви Бо́га, вопия́: Аллилу́иа.
И́кос 9
Вети́и многовеща́ннии не возмо́гут воспе́ти всех дел твои́х, преподо́бне: а́ще бо и стар бя́ше, оба́че о оби́тели вельми́ печа́шеся, рука́ма свои́ма рабо́таше, больны́я и ни́щия утеша́ше, му́дрыя и простецы́ духо́вно по́льзоваше. Ели́ко есть произволе́ние, даждь и нам воспева́ти тебе́:
Ра́дуйся, о оби́тели свое́й и о по́льзе бра́тии попечи́телю неусы́пный;
ра́дуйся, я́ко бо́лий сый, бя́ше всем слуга́ и раб смиренному́дрый.
Ра́дуйся, не́мощи други́х долготерпели́во носи́вый;
ра́дуйся, бре́мене неудобоноси́маго ни на кого́же возлага́вый.
Ра́дуйся, бра́тию в ску́дости утеша́вый;
ра́дуйся, мона́хов к упова́нию на Про́мысл Бо́жий возбужда́вый.
Ра́дуйся, во вре́мя смуще́ния душе́внаго сове́тов ма́тере своея́ послу́шавый;
ра́дуйся, ча́дом о́браз послуша́ния свои́м роди́телем пода́вый.
Ра́дуйся, всех а́лчущих во вре́мя гла́да до́бре препита́вый;
ра́дуйся, твори́ти со стра́хом моли́тву церко́вную науча́вый.
Ра́дуйся, та́йная дея́ния люде́й ве́дый и ко исправле́нию их облича́вый;
ра́дуйся, о воскресе́нии, суде́ и насле́дии живота́ ве́чнаго наставля́вый.
Ра́дуйся, уго́дниче Бо́жий, Дании́ле чудотво́рче.
Конда́к 10
Спасе́ние себе́ содева́я, спаса́ше преподо́бный Дании́л и бра́тию свою́, и всех приходя́щих к нему́, о́браз быв им сло́вом, житие́м и любо́вию, ду́хом, ве́рою и чистото́ю, да вси прославля́ют Бо́га и вопию́т Ему́: Аллилу́иа.
И́кос 10
Стена́ был еси́, преподо́бне, всем ско́рбным и напа́ствуемым, призыва́ющим тебе́ в по́мощь: и́бо Небесе́ и земли́ Бог показа́ тя храм Ду́ха Свята́го, да научи́мся возглаша́ти тебе́:
Ра́дуйся, наста́вниче и помо́щниче и́ноком во вся́кой ну́жде душе́вней;
ра́дуйся, отгоня́яй ко́зни вра́жия, смуща́ющия в житии́ благоче́стнем.
Ра́дуйся, благослове́нием просты́я сне́ди в сла́достныя претворя́вый;
ра́дуйся, я́ко друг царе́в пови́нныя от сме́рти свобожда́вый.
Ра́дуйся, путеше́ствующих от напра́сныя сме́рти избавля́яй;
ра́дуйся, разбо́йники моли́твами твои́ми, я́ко во́инством, отгоня́яй.
Ра́дуйся, неисце́льныя боле́зни врачу́яй;
ра́дуйся, в ско́рби и тузе́ душе́вней мир подава́яй.
Ра́дуйся, ста́рцев благоле́пие и иерее́в благочи́ние;
ра́дуйся, оби́димых ско́рое заступле́ние.
Ра́дуйся, и́ноков, ста́ростию удруче́нных, умиле́ние;
ра́дуйся, боя́щихся часа́ сме́ртнаго утеше́ние.
Ра́дуйся, уго́дниче Бо́жий, Дании́ле чудотво́рче.
Конда́к 11
Пе́ние хвале́бное прино́сим ти, преподо́бне: не то́кмо о́трочество твое́, но и зре́лыя ле́та твоя́, и наипа́че ста́рость, вку́пе же все житие́ твое́ испо́лнь есть дел благи́х и любве́, я́же к Бо́гу и бли́жнему, вся́ дни веща́ют еди́ну песнь Бо́гови: Аллилу́иа.
И́кос 11
Светоза́рную свещу́ зрим тебе́, преподо́бне, сия́ющу луча́ми Бо́жия благода́ти, а́ще и оскуде́ в тебе́ свет вре́менныя жи́зни сея́: твои́м бо промышле́нием возблиста́ша от недр земны́х всесве́тлии мо́щи благове́рнаго кня́зя Андре́я. Сего́ ра́ди ра́дующеся вопие́м:
Ра́дуйся, в ста́рости до́брей пре́жде всех на церко́вное пе́ние приходи́вый;
ра́дуйся, до конца́ жи́зни своея́ за́поведи соблюда́ти наставля́вый.
Ра́дуйся, я́ко тобо́ю Ца́рствие Бо́жие распространя́ется;
ра́дуйся, я́ко тща́нием твои́м святи́и прославля́ются.
Ра́дуйся, ди́внаго во святы́х Свои́х Бо́га усе́рдный чти́телю;
ра́дуйся, сумни́тельных помышле́ний обличи́телю.
Ра́дуйся, искуша́ющих Ду́ха Свята́го я́ко гром устраша́яй;
ра́дуйся, из неве́рия в ве́ру несумне́нну приводя́й.
Ра́дуйся, до часа́ сме́ртнаго попече́ние о ни́щих име́вый;
ра́дуйся, и по сконча́нии свое́м немощны́х забо́тою не оставля́яй.
Ра́дуйся, да́ры Бо́жии оби́льно стяжа́вый;
ра́дуйся, во ве́ки благода́ти почива́ти во оби́тели предсказа́вый.
Ра́дуйся, уго́дниче Бо́жий, Дании́ле чудотво́рче.
Конда́к 12
Благода́ть Бо́жию прие́млюще, почита́юще честны́я и многоцеле́бныя мо́щи преподо́бнаго, возблагодари́м, ве́рнии, Бо́га, ди́внаго во святы́х, и возопии́м Ему́: Аллилу́иа.
И́кос 12
Пою́ще честно́е житие́ преподо́бнаго, прославля́ем и чу́дная дела́, я́же соверши́ по сконча́нии свое́м, сокрове́нно благотворя́ и самоли́чне явля́яся пою́щим ему́ сицева́я:
Ра́дуйся, чту́щим святы́я мо́щи твоя́ исцеле́ние от боле́зней подава́яй;
ра́дуйся, с ве́рою пию́щих от кла́дязя, тобо́ю ископа́ннаго, исцеля́яй.
Ра́дуйся, от лю́тых огне́вицы и тряса́вицы избавля́яй;
ра́дуйся, беснова́тых от ги́бели спаса́яй, и смысл им подава́яй.
Ра́дуйся, забы́вшим да́нныя Бо́гу обе́ты явля́яйся;
ра́дуйся, к исполне́нию обеща́ний их побужда́яй.
Ра́дуйся, ра́дость роди́телем об излече́нии их сыно́в и дще́рей низпосыла́яй;
ра́дуйся, ра́дость ча́дом о возвраще́нии сил отцо́в их и ма́терей подава́яй.
Ра́дуйся, о просве́щении Каза́ни зна́мение кре́стнику своему́ пода́вый;
ра́дуйся, бра́тию оби́тели твоея́ стра́хом Госпо́дним огражда́яй.
Ра́дуйся, милосе́рдным си́лу служи́ти бли́жним обновля́яй;
ра́дуйся, па́стырем Це́ркве по́мощь и му́дрость подава́яй.
Ра́дуйся, уго́дниче Бо́жий, Дании́ле чудотво́рче.
Конда́к 13
О пречу́дне и пресла́вне, треблаже́нне Дании́ле, приими́ ны́не сие́ ма́лое моле́ние на́ше и при́зри на оби́тель твою́ и на всех чту́щих тя, наста́ви всех нас на путь прав, да в ны́нешнем ве́це во сла́ву Пресвяты́я Тро́ицы пожи́вше, в бу́дущем ку́пно с тобо́ю открове́нным лице́м сла́ву Госпо́дню узре́вше, воспое́м во ве́ки: Аллилу́иа.
[Се́й конда́к глаго́лется три́жды.]
[Далее повторяем 1‑е икос и кондак:]
И́кос 1
Равноа́нгельно житие́ твое́, преподо́бне, измла́да показа́ся, и был еси́ сосу́д че́стен Бо́жия благода́ти, те́мже досто́йно блажи́м тя си́це:
Ра́дуйся, от ю́ности всего́ себе́ Го́сподеви преда́вый;
ра́дуйся, во всем во́лю Бо́жию соблюда́вый.
Ра́дуйся, к чте́нию и слу́шанию Боже́ственных Писа́ний прилежа́вый;
ра́дуйся, плоть свою́ со страстьми́ и похотьми́ распя́вый.
Ра́дуйся, ра́ди Бо́га роди́тели и бра́тию оста́вивый;
ра́дуйся, во и́ночестве стро́гий по́двиг благоче́стия показа́вый.
Ра́дуйся, без благослове́ния ста́рец духо́вных ничесо́же твори́вый;
ра́дуйся, на монасты́рския труды́ со вся́ким усе́рдием те́кий.
Ра́дуйся, в бде́ниих и поще́ниих непреста́нно пребыва́вый;
ра́дуйся, я́ко еле́нь на и́сточницы, к церко́вному пе́нию спеши́вый.
Ра́дуйся, чистоту́ душе́вную и теле́сную усе́рдно храни́вый;
ра́дуйся, от ю́ности мно́гими доброде́тельми процветы́й.
Ра́дуйся, уго́дниче Бо́жий, Дании́ле чудотво́рче.
Кондак 1
Избра́нный уго́дниче Бо́жий Дании́ле, / от ю́ности своея́ крест на ра́мо взем, / во мно́зех труде́х и по́двизех и́ноческих / оби́тель кра́сну во сла́ву Пресвяты́я Тро́ицы воздви́гл еси́, / в не́йже вы́ну пребыва́еши, и на́ша моле́ния к Бо́гу возно́сиши. / Мы же, чту́ще святу́ю па́мять твою́, / с ве́рою и любо́вию взыва́ем ти: / Ра́дуйся, уго́дниче Бо́жий, // Дании́ле чудотво́рче.
Моли́тва
О преподо́бне и богоно́сне о́тче наш Дании́ле, смире́нно к тебе́ припа́даем и тебе́ мо́лимся: не отступа́й от нас ду́хом твои́м, но всегда́ помина́й нас во святы́х и благоприя́тных моли́твах твои́х ко Го́споду на́шему Иису́су Христу́; моли́ся Ему́, да не потопи́т нас бе́здна грехо́вная, и да не бу́дем враго́м, ненави́дящим нас, в ра́дование; да прости́т Христо́с Бог наш твои́м предста́тельством за нас вся согреше́ния на́ша, и Свое́ю благода́тию водвори́т посреде́ нас единоду́шие и любо́вь, и да изба́вит нас от ко́зней и наве́тов диа́вольских, от гла́да, губи́тельства, огня́, вся́кия ско́рби и ну́жды, от боле́зней душе́вных и теле́сных и от внеза́пныя сме́рти; да сподо́бит Он нас, притека́ющих к тебе́, в и́стинней ве́ре и покая́нии пожи́ти, христиа́нския, непосты́дныя и ми́рныя кончи́ны жития́ на́шего дости́гнути, и насле́довати Ца́рство Небесно́е, и сла́вити вели́кое и́мя Святы́я Тро́ицы, Отца́ и Сы́на и Свята́го Ду́ха, во ве́ки веко́в. Ами́нь.
Комментировать