Текст акафиста утвержден для употребления за богослужением и в домашней молитве на заседании Священного Синода 24 июля 2025 года (журнал № 70).
Составлен иеромонахом Никоном (Скаргой), уставщиком Иоанно-Предтеченского скита Оптиной пустыни.
Кондак 1
Избра́нный испове́дниче О́птинский, благода́ти ста́рчества насле́дниче, во́ине духо́вный и мона́хов изря́дный наста́вниче, похва́льное прино́сим тебе́ пе́ние; ты же, я́ко име́я ко Христу́ ве́лие дерзнове́ние, моли́ся о нас, любо́вию тебе́ зову́щих: Ра́дуйся, испове́дниче Христо́в, Ни́коне богому́дре.
Икос 1
А́нгельскаго жития́ ревни́телю, от младе́нства твоего́ та́йну воскресе́ния пости́гл еси́, егда́ уме́ршу ти, о́тче му́дре, моли́твами ма́тере твоея́ па́ки к животу́ возвраще́н был еси́. Сего́ ра́ди, таково́му чудеси́ дивя́щеся, велегла́сно зове́м ти:
Ра́дуйся, моли́твами ма́тери твоея́ от сме́рти восхище́нный;
ра́дуйся, ра́дость воскресе́ния еще́ во младе́нчестве позна́вый.
Ра́дуйся, я́ко воскреше́нием твои́м си́ла Христо́ва яви́ся;
ра́дуйся, я́ко чу́дом сим благода́ть Его́ возвести́ся.
Ра́дуйся, я́ко два́жды избе́гл еси́ сме́рти горча́йшия;
ра́дуйся, я́ко сла́дости ра́йския сугу́бо ны́не причаща́ешися.
Ра́дуйся, велегла́сная трубо́ воскресе́ния;
ра́дуйся, сладкозву́чный орга́не безсме́ртия.
Ра́дуйся, испове́дниче Христо́в, Ни́коне богому́дре.
Кондак 2
Ви́дя жите́йскую суету́, мир оста́вил еси́, о́тче богому́дре, и я́ко го́рлица пустыннолю́бная, в скит О́птинский всели́вся, ко Христу́ любо́вию распала́емь, в же́ртву жи́ву прине́слся еси́ Бо́гови, взыва́я: Аллилу́иа.
Икос 2
Ра́зума боже́ственнаго иски́й, под криле́ богому́драго Варсоно́фия прите́кл еси, о́тче, и я́ко млеко́м слове́сным окормле́нием ста́рческим от того́ воспита́вся, в ме́ру во́зраста духо́внаго дости́гл еси́. Те́мже твое́ боголю́бие похваля́юще, глаго́лем си́це:
Ра́дуйся, весны́ духо́вныя иски́й;
ра́дуйся, зимы́ мирски́х страсте́й отбеги́й.
Ра́дуйся, Со́лнца Пра́веднаго луча́ми просвеще́нный;
ра́дуйся, зве́зды мы́сленныя пости́гнути жела́вый.
Ра́дуйся, под покро́в му́дрости ста́рческия притеки́й;
ра́дуйся, то́ю му́дростию окриле́н быв, в го́рняя востеки́й.
Ра́дуйся, небому́дренное житие́ в скиту́ обреты́й;
ра́дуйся, похоте́ний ю́ношеских избеги́й.
Ра́дуйся, испове́дниче Христо́в, Ни́коне богому́дре.
Кондак 3
Си́льнаго в му́дрости кла́дязя, ста́рца вели́каго, в скиту́ обре́л еси́, преподо́бне о́тче; писмоводи́телю же того́ тебе́ су́щу, в пи́сменех его́ сла́дость почерпа́л еси́ благода́тных слове́с, жа́жду духо́вную утоля́я и Бо́гови благода́рне взыва́я: Аллилу́иа.
Икос 3
Избра́ тя сотаи́нника себе́ богому́дрый ста́рец Варсоно́фий, души́ твоея́ прозре́в богообра́зную добро́ту, я́ко и́маши яви́тися прее́мник благода́ти ста́рческия; сего́ ра́ди воспева́ем ти похва́льная:
Ра́дуйся, прее́мниче даро́в сыноположе́ния;
ра́дуйся, ко отцу́ возлю́бльшему сыно́внее яви́вый любле́ние.
Ра́дуйся, сотаи́нниче прему́дрый богому́драго наста́вника;
ра́дуйся, а́гнче послушли́вый Варсоно́фиева ста́да.
Ра́дуйся, овне́, пасы́йся на па́житех уче́ний;
ра́дуйся, еле́не, жа́ждай воды́ упокое́ния.
Ра́дуйся, послу́шниче приле́жный ста́рческих воле́ний;
ра́дуйся, ревнова́вый А́нгелом пра́вым произволе́нием.
Ра́дуйся, испове́дниче Христо́в, Ни́коне богому́дре.
Кондак 4
Бу́рнаго дыха́ния испо́лнь Ду́ха, я́коже дождь на зе́млю жа́ждущу, сни́де на тя окормле́ние ста́рческое: те́мже изнесе́ земля́ се́рдца твоего́ цве́ты прекра́сныя благоче́стия, и фимиа́м благодаре́ния прине́сл еси́ Христу́, моли́твенно воспева́я Ему́: Аллилу́иа.
Икос 4
Послуша́нием огради́вся, преподо́бне, плоть увяди́л еси́, и ду́хом я́коже крин во юдо́ли пусты́нней процве́л еси́, целому́дрием и чистото́ю украси́лся еси́, богоблаже́нне; сего́ ра́ди пе́сненный исплете́ся тебе́ вене́ц:
Ра́дуйся, целому́дрия благоуха́нный кри́не;
ра́дуйся, мона́шества благово́нный ши́пок.
Ра́дуйся, многосве́тлая свеще́ пропове́дания;
ра́дуйся, прекрасноцве́тный ве́нче богомы́слия.
Ра́дуйся, розго́ апо́стольскаго преда́ния;
ра́дуйся, гро́зде Влады́чния любве́.
Ра́дуйся, я́ко тобо́ю де́вственнии ли́цы украша́ются;
ра́дуйся, я́ко тобо́ю и́ночестии чи́нове утвержда́ются.
Ра́дуйся, испове́дниче Христо́в, Ни́коне богому́дре.
Кондак 5
Богому́дрый ста́рец Варсоно́фий предрече́ тебе́, о́тче Ни́коне, испове́днический богосве́тлый вене́ц, и́же у́зами и сме́ртию страда́льческою я́ко ка́мением честны́м обложе́н есть; ты же, велеле́пной красоте́ его дивя́ся, Христу́, венча́ющему тя, возопи́л еси́: Аллилу́иа.
Икос 5
Вели́кия печа́ли испо́лнися се́рдце твое́, о́тче Ни́коне, егда́ ста́рец твой за́вистию диа́вола от оби́тели изгна́н бысть, оба́че осироте́л еси́ то́кмо лице́м, а не се́рдцем, я́ко сою́зом любве́ с наста́вником связу́ем был еси́. Сего́ ра́ди сыно́внюю любо́вь твою́ похваля́юще, си́це тебе вопие́м:
Ра́дуйся, послуша́ния рачи́телю изве́стнейший;
ра́дуйся, во́ли своея́ отсека́телю приле́жнейший.
Ра́дуйся, непоколеби́мый исполни́телю во́ли ста́рческия бы́вый;
ра́дуйся, пламене́ющую любо́вь к наста́внику яви́вый.
Ра́дуйся, отчесыно́вний сою́з любве́ богоподража́тельне показа́вый;
ра́дуйся, любвеоби́льный прее́мник ста́рчества благода́ти яви́выйся.
Ра́дуйся, я́ко ни гоне́ние, ниже́ смерть разлучи́ тя от ста́рца твоего́;
ра́дуйся, я́ко и по сме́рти с ним в ра́йских се́лех водворя́ешися.
Ра́дуйся, испове́дниче Христо́в, Ни́коне богому́дре.
Кондак 6
Плоды́ ста́рческаго окормле́ния наслажда́яся, я́коже в раи́ сла́дости в вертогра́де О́птинском пожи́л еси́, о́тче Ни́коне; те́мже благоиску́сно к подвиго́м испове́дническим угото́вал еси́ себе́, поя́ Изба́вителю всех Бо́гу: Аллилу́иа.
Икос 6
Возрасте́, я́ко кедр лива́нский, во оби́тели О́птинской, его́же не поколеба́ бу́ря безбо́жия, моли́твою бо досяза́ше небесе́, и смиренному́дрие, я́ко ко́рень, воглуби́л еси́ в души́. Сего́ ра́ди в се́ни поуче́ний твои́х поко́ящеся, похва́льная ти зове́м:
Ра́дуйся, неувяда́емая о́трасле О́птинскаго ста́рчества;
ра́дуйся, цветоно́сная ва́ие предпасха́льныя стра́сти.
Ра́дуйся, пло́де сладча́йший ста́рческаго окормле́ния;
ра́дуйся, благоуха́нный кри́не но́ваго испове́дания.
Ра́дуйся, терноно́сный ши́пок безбо́жным мучи́телем;
ра́дуйся, благоуха́нная розго́ а́лчущим и́стины.
Ра́дуйся, я́ко тобо́ю уничижи́ся го́рдость безбо́жная;
ра́дуйся, я́ко тобо́ю возвы́сися ве́ра правосла́вная.
Ра́дуйся, испове́дниче Христо́в, Ни́коне богому́дре.
Кондак 7
Христоподража́тельне Же́ртву Безкро́вную в Каза́нской це́ркви соверши́л еси́, о́тче Ни́коне, егда́ от безбо́жник затворя́еми бя́ху хра́ми оби́тели О́птинския, и сам себе́ угото́вал еси́ в же́ртву одушевле́нную, Христу́ поже́ршемуся нас ра́ди вопия́: Аллилу́иа.
Икос 7
Наде́ющеся кре́пость души́ твоея́ поколеба́ти, в темни́цу мра́чную мучи́телие тя вверго́ша: ты же тверд я́ко адама́нт пребы́л еси́, поя́ благода́рне псалмы́, те́мже и теснота́ узи́лища я́ко рая́ простра́нство тебе́ бысть; сего́ ра́ди вели́чию души́ твоея́ дивя́щеся, похва́льная ти зове́м:
Ра́дуйся, у́зы темни́чныя в приобре́тение себе́ вмени́вый;
ра́дуйся, похвалу́ Па́влову себе́ усво́ивый.
Ра́дуйся, апо́стольских преда́ний ве́рный блюсти́телю;
ра́дуйся, благове́стниче Христо́в всерачи́тельный.
Ра́дуйся, по вся дни по глаго́лу Па́влову умира́вый;
ра́дуйся, Бо́га Жи́ва в себе́ стяжа́вый.
Ра́дуйся, а́ки добр во́ин Христо́в злопострада́вый ве́рно;
ра́дуйся, я́ко по́двигом испове́дническим подвиза́лся еси́ зако́нно.
Ра́дуйся, испове́дниче Христо́в, Ни́коне богому́дре.
Кондак 8
Страда́ньми испове́дания укра́шен, из темни́цы изше́л еси́, я́ко от черто́га бра́чнаго, ви́ссон пра́ведности нося́й, Ни́коне добропобе́дне, и венце́м ве́рности от Христа́ увязе́н был еси́, поя́ Бо́гови: Аллилу́иа.
Икос 8
Возве́я гоне́ние на тебе́, я́ко дух бу́рен, ско́рбными бо обстоя́ньми от оби́тели изгна́н быв, в ладии́ теле́сней ле́гце премину́л еси́ во́лны безбо́жия, и блаже́ннаго приста́нища гони́мых Христа́ ра́ди дости́гл еси́. Сего́ ра́ди я́ко ти́хия во́лны приступа́ют к тебе́ хвалы́ сия́:
Ра́дуйся, ладии́ церко́вныя изря́дный управи́телю;
ра́дуйся, ти́хих моли́тв богодухнове́нное ветри́ло.
Ра́дуйся, о́вцы Христо́вы от потопле́ния грехо́внаго спасы́й;
ра́дуйся, па́ству твою́ от раско́ла церко́внаго изба́вивый.
Ра́дуйся, я́ко псалмопе́нием обезгла́сил еси́ трубы́ безбо́жия;
ра́дуйся, я́ко в приста́нище дости́гл еси́ безстра́стия.
Ра́дуйся, я́ко ше́ствие твое́ в мо́ри жите́йстем немо́кренно бысть;
ра́дуйся, я́ко сле́зы стра́ждущих в плачь по Бо́зе претвори́л еси́.
Ра́дуйся, испове́дниче Христо́в, Ни́коне богому́дре.
Кондак 9
Вои́стину сло́во Бо́жие по глаго́лу апо́стольскому во усте́х не вя́жется, оба́че во вся концы́ вселе́нныя богогла́сно возвеща́ется; сие́ сло́во на тебе́ сбы́сться, о́тче Ни́коне, я́ко по широте́ земли́ Ру́сския промче́ся богокра́сное испове́дание твое́, в не́мже пел еси́ Христу́, зовы́й: Аллилу́иа.
Икос 9
Во страны́ севе́рныя со́слан бысть, о́тче богоно́сне, и изгна́нничество сугу́бо претерпе́л еси́ в земли́ Арха́нгельской, житие́ показа́в равноа́нгельно, Ни́коне многострада́льне; сего́ ра́ди слы́шиши сия́ похвалы́:
Ра́дуйся, я́ко мно́ги ско́рби несмуще́нным ду́хом претерпе́л еси́;
ра́дуйся, я́ко поноше́ние ра́ди Го́спода Иису́са прия́л еси́.
Ра́дуйся, зе́млю освяти́вый, в гроб заше́д безве́стно;
ра́дуйся, на земли́ скита́выйся, не́бо же обреты́й отве́рсто.
Ра́дуйся, я́ко равноа́нгельную восприя́л еси́ сла́ву;
ра́дуйся, я́ко посрами́л еси́ безбо́жия держа́ву.
Ра́дуйся, странноле́пно на земли́ житие́ сконча́вый;
ра́дуйся, на небеси́ но́вое житие́ нача́вый.
Ра́дуйся, испове́дниче Христо́в, Ни́коне богому́дре.
Кондак 10
Светоно́сным просвети́ся благоче́стием твои́м чин и́ноческий, Це́рковь же Ру́сская испове́данием твои́м, я́ко ка́менем драги́м, украси́ся; сего́ ра́ди зрим тя, о́тче Ни́коне, богоразу́мием на тве́рди церко́вней сия́юща, и от души́ просла́вльшему тя Христу́ пое́м: Аллилу́иа.
Икос 10
Стено́ю па́стырскаго му́жества твоего́ загради́л еси́ уста́ безбо́жная, и о́вцы разсе́янныя ста́да Христо́ва на па́жити благоче́стия испове́данием твои́м воспита́л еси́; те́мже под кров твоего́ заступле́ния прибега́юще, от души́ уми́льно тебе́ вопие́м:
Ра́дуйся, раско́ла церко́внаго ве́рный врачева́телю;
ра́дуйся, еди́нства духо́внаго богому́дрый ревни́телю.
Ра́дуйся, па́стырю до́брый, за о́вцы слове́сныя ду́шу свою́ положи́вый;
ра́дуйся, а́гнче непоро́чный, по́двигом де́вства сласть любоде́йства попра́вый.
Ра́дуйся, я́ко ста́рческим окормле́нием лю́ди озло́бленныя уте́шил еси́;
ра́дуйся, я́ко богому́дрыми сове́ты свет во тьме духо́вней возсия́л еси́.
Ра́дуйся, сто́лпе кре́пкий правосла́вных догма́тов;
ра́дуйся, цевни́це благозву́чная благочести́вых нра́вов.
Ра́дуйся, испове́дниче Христо́в, Ни́коне богому́дре.
Кондак 11
Преди́вное благоуха́ние Христо́во бысть житие́ твое́, о́тче Ни́коне, в земли́ Ру́сской, богому́дрых рече́ний твои́х арома́ты испуща́ющее, и воня́ в смерть безбо́жным твое́ испове́дание позна́ся, и́мже прозябе́ния неве́рия увяди́л еси́; сего́ ра́ди песнь немо́лчную стяжа́л еси́ к Бо́гу, поя́ Тому́: Аллилу́иа.
Икос 11
Се́рдце я́ко скрижа́ль богопи́сану стяжа́л еси́, о́тче Ни́коне, ум я́коже не́бо я́сно, резце́м послуша́ния красоту́ мона́шества вообрази́в и сла́ву Бо́жию твои́м испове́данием возвести́в; сего́ ра́ди земли́ на́шея яви́лся еси́ похвала́ и утвержде́ние, в не́йже услы́ши приноси́мыя тебе́ песнопе́ния:
Ра́дуйся, испове́дников Це́ркве Ру́сския звездо́ светоза́рная;
ра́дуйся, мона́шествующих кро́ткий уте́шителю.
Ра́дуйся, сы́не ста́рческих благослове́ний;
ра́дуйся, исто́чниче богому́дрых рече́ний.
Ра́дуйся, некра́домое сокро́вище о́птинских преда́ний;
ра́дуйся, скрижа́ле, пи́санная богому́дрыми отцы́.
Ра́дуйся, я́ко отра́ду подае́ши во узи́лищих су́щим;
ра́дуйся, я́ко сше́ственник быва́еши гони́мым ра́ди Го́спода Иису́са.
Ра́дуйся, испове́дниче Христо́в, Ни́коне богому́дре.
Кондак 12
Благо́е тече́ние по́стное соверши́в, житие́ мона́шеское украси́л еси́ испове́данием, добропобе́дне Ни́коне, и сконча́в страда́льчески житие́ твое́, ле́ствицею доброде́телей небе́сный обре́л еси́ восхо́д, Бо́гу со мно́гим дерзнове́нием предста́в, песнь пресла́вную поя́: Аллилу́иа.
Икос 12
Позна́ся я́ко кимва́л доброгла́сен житие́ твое́, доброде́тельми кра́сно звяца́яй, и я́ко труба́ богогла́сная испове́дание твое́, о́тче Ни́коне, яви́ся; мы же дел любве́ отню́д не иму́ще, то́кмо медь есмы́ звеня́щая, оба́че на по́мощь твою́ наде́ющеся, любо́вию ти зове́м:
Ра́дуйся, правосла́вия тимпа́не громогла́сный;
ра́дуйся, Це́ркве немо́лчная и сла́дкая уста́.
Ра́дуйся, кифа́ро ста́рческих поуче́ний;
ра́дуйся, пе́сне кро́тости во и́ноческих ушесе́х.
Ра́дуйся, благовествова́вый Ева́нгелие, я́коже сын гро́мов;
ра́дуйся, пропове́давый покая́ние, я́коже глас в пусты́ни вопия́й.
Ра́дуйся, я́ко тобо́ю побежда́ем сопроти́вная по́лчища;
ра́дуйся, я́ко тобо́ю сликовству́ем новому́ченическому во́инству.
Ра́дуйся, испове́дниче Христо́в, Ни́коне богому́дре.
Кондак 13
О Ни́коне треблаже́нне, и́же путь на земли́ до́бре сконча́л и ве́ру соблю́л еси́, и тече́ние твои́х кра́сных ног устреми́л еси́ к не́бесному ше́ствию, испра́ви на́ша стези́ к де́ланию за́поведей Боже́ственных, да мимохо́дим се́тей диа́вольских, но о всем приклю́чшемся смиренному́дренно пое́м Бо́гу: Аллилу́иа.
[Се́й конда́к глаго́лется три́жды.][Далее повторяем 1‑е икос и кондак:]
Икос 1
А́нгельскаго жития́ ревни́телю, от младе́нства твоего́ та́йну воскресе́ния пости́гл еси́, егда́ уме́ршу ти, о́тче му́дре, моли́твами ма́тере твоея́ па́ки к животу́ возвраще́н был еси́. Сего́ ра́ди, таково́му чудеси́ дивя́щеся, велегла́сно зове́м ти:
Ра́дуйся, моли́твами ма́тери твоея́ от сме́рти восхище́нный;
ра́дуйся, ра́дость воскресе́ния еще́ во младе́нчестве позна́вый.
Ра́дуйся, я́ко воскреше́нием твои́м си́ла Христо́ва яви́ся;
ра́дуйся, я́ко чу́дом сим благода́ть Его́ возвести́ся.
Ра́дуйся, я́ко два́жды избе́гл еси́ сме́рти горча́йшия;
ра́дуйся, я́ко сла́дости ра́йския сугу́бо ны́не причаща́ешися.
Ра́дуйся, велегла́сная трубо́ воскресе́ния;
ра́дуйся, сладкозву́чный орга́не безсме́ртия.
Ра́дуйся, испове́дниче Христо́в, Ни́коне богому́дре.
Кондак 1
Избра́нный испове́дниче О́птинский, благода́ти ста́рчества насле́дниче, во́ине духо́вный и мона́хов изря́дный наста́вниче, похва́льное прино́сим тебе́ пе́ние; ты же, я́ко име́я ко Христу́ ве́лие дерзнове́ние, моли́ся о нас, любо́вию тебе́ зову́щих: Ра́дуйся, испове́дниче Христо́в, Ни́коне богому́дре.
Молитва
(утверждена Священным Синодом в составе службы)
О, священная главо, преподобне отче наш Никоне, старчества Оптинскаго светлый венче и новомучеников Церкве Русския благовонный цвете!
Ты первее постническими труды душу твою очистив, демонская полчища посрамил еси и послушанием, яко небовосходною лествицею, на высоту добродетелей востекл еси.
В годину же гонений безбожных, мужески терпением вооружився, яко пастырь добрый и истинный сын преподобных старцев Оптинских, люди страждущия, покаянием врачуя, утешал еси. Сего ради от богоборных многия скорби претерпел еси и на изгнание осужден был еси.
Но якоже тогда от паствы твоея духом не отлучился еси, пастырскою свирелию наставлений твоих овцы твоя упас, сице и ныне не остави нас, чад твоих, но духом присно с нами пребывай, да укрепляеми молитвами твоими, веру непреложну соблюдем, заповеди Божия сохранити потщимся и единое на потребу возлюбим, еже прилеплятися Христу Богу и Спасу нашему всем сердцем, всею душею и всем помышлением и выну прославляти всесвятое имя Отца и Сына и Святаго Духа ныне и присно и во веки веков. Аминь.
Молитва иная
(пи́санная в Пи́неге)
О преподо́бне о́тче наш Ни́коне, испове́дниче Христо́в! К тебе́ я́ко ско́рому помо́щнику и те́плому моли́твеннику мы немощни́и и недосто́йнии прибега́ем и усе́рдно мо́лим: по да́нной тебе́ от Бо́га благода́ти помози́ нам во́лю Госпо́дню в смире́нии твори́ти, ве́ру правосла́вную кре́пко содержа́ти и досто́йны бы́ти твоего́ о нас моли́твеннаго к Бо́гу предста́тельства, и в час сме́ртный заступи́ нас моли́твами твои́ми. Бу́ди Пи́нежскаго кра́я и всея́ земли́ Ру́сския кре́пкий засту́пник: умоли́, уго́дниче Христо́в, всеблага́го Бо́га дарова́ти нам оставле́ние всех соде́янных на́ми согреше́ний, от ю́ности и до настоя́щаго дне и часа́, де́лом, сло́вом и помышле́нием, и исхода́тайствуй нам невозбра́нный вход в Ца́рствие Небе́сное, да просла́вим ку́пно с тобо́ю Отца́ и Сы́на и Свята́го Ду́ха во ве́ки веко́в. Ами́нь.
Комментировать