Служба преподобному отцу нашему Серафиму, Вырицкому чудотворцу

Утверждена Священным Синодом
Русской Православной Церкви
19.03.2014 (журнал № 15).

Ме́сяца ма́рта в 21-й день
Преподо́бнаго Серафи́ма Вы́рицкаго

На вели́цей вече́рни

На Го́споди, воззва́х: стихи́ры, глас 5:

Ра́дуйся, Це́рковь Ру́сская,/ ты бо в го́ды гоне́ний безбо́жных/ со́нмом святы́х уго́дников украси́лася еси́,/ и́же Христу́ Спа́су ве́рность соблюдо́ша/ и ве́ры ра́ди гоне́ния лю́тая претерпе́ша,/ в ни́хже сия́ет преподо́бный Серафи́м Вы́рицкий,/ я́ко звезда́ пресве́тлая,/ те́плый пред Бо́гом моли́твенник// и до́брый па́стырь ста́да Христо́ва.

Ра́дуйся, Серафи́ме пречу́дне,/ ты бо, до́брую ку́плю в житии́ соверши́в,/ бога́тству земно́му никогда́же свое́ се́рдце прилага́л еси́,/ но от ю́ности сокро́вища нетле́нная собира́я,/ о́браз доброде́тели в ми́ре яви́л еси́,/ сло́ву же Госпо́дню после́дуя,/ име́ние оста́вил еси́/ и, и́го Христо́во восприе́м,// к соверше́нству ева́нгельскому поте́кл еси́.

Ра́дуйся, Серафи́ме пречу́дне,/ ты бо, от ю́ности послуша́нию навы́к,/ во́ли Бо́жией невозвра́тным по́мыслом после́довал еси́,/ те́мже па́стырь до́брый и му́дрый показа́вся,/ Ду́хом Бо́жиим па́ству твою́ усе́рдно упа́сл еси́/ и, волко́в хи́щных не убоя́вся,/ ду́шу за о́вцы слове́сныя положи́л еси́,// сего́ ра́ди ны́не ублажа́ешися.

Ра́дуйся, Серафи́ме пречу́дне,/ ты бо я́ко сосу́д Бо́жий избра́нный яви́лся еси́/ и, вся за́поведи Госпо́дни до́бре сохраня́я,/ ча́да твоя́ Тому́ Еди́ному угожда́ти научи́л еси́,/ благода́тию же Бо́жиею при́сно осиява́емь,/ све́тел лице́м, я́ко Моисе́й, показа́лся еси́./ Те́мже и всем притека́ющим к тебе́// исто́чник воды́ живо́тныя явля́ешися.

Ра́дуйся, преподо́бне Серафи́ме,/ ты бо в по́двизе кре́пцем поста́ и моли́твы/ предста́тель за всю зе́млю Росси́йскую яви́лся еси́,/ во бде́ниих ко Го́споду ру́це воздева́я,/ о избавле́нии от враг ви́димых и неви́димых хода́тайствовал еси́,/ утеша́я и исцеля́я боле́знующия те́лом и душе́ю./ Ны́не же, в селе́ниих ра́йских водворя́яся,// не премолчи́ за ны ко Го́споду.

Сла́ва, глас 1:

О ди́вное чу́до!/ Во мра́це безбо́жия и гоне́ний на Це́рковь Ру́сскую/ Серафи́м Вы́рицкий свет лю́дем быва́ет,/ па́стырь духо́вный и чадолюби́вый,/ моли́твенник пла́менный и дерзнове́нный,/ исто́чник утеше́ния и исцеле́ний,/ к нему́же с любо́вию возопии́м:/ испроси́ чту́щим с любо́вию па́мять твою́// мир и ве́лию ми́лость.

И ны́не, Богоро́дичен: Всеми́рную сла́ву:

Вход. Проки́мен дне. Чте́ния преподо́бническая.

На лити́и стихи́ры, глас 5:

Ра́дуйся, земле́ Петербу́ржская,/ се бо принесла́ еси́ Го́сподеви ве́лий сонм святы́х уго́дник:/ святи́тели и иере́и пра́ведныя,/ священному́ченики и испове́дники,/ с ни́миже и преподо́бныя отцы́,/ от ни́хже, я́ко цвет благоуха́нный,/ да восхва́лится днесь ста́рец преди́вный,// чудотво́рец Серафи́м достоблаже́нный.

Глас 6:

Глас моли́твенный в ве́си Вы́рицтей возно́сится,/ Серафи́м бо преподо́бный/ хода́тайствует пред Бо́гом о лю́дех правосла́вных,/ угнета́емых и убива́емых от власте́й безбо́жных,/ да не оскуде́ют ве́рою в Про́мысл Бо́жий/ и в терпе́нии, Христа́ Бо́га прославля́юще,// ве́рными ча́дами Це́ркве Правосла́вныя пребу́дут.

Сла́ва, глас 2:

Се, яви́ нам Влады́ка Христо́с ми́лость Свою́ бога́тую,/ не попусти́ бо оскуде́ти преподо́бному до конца́,/ ниже́ пра́ведному Своему́ ви́дети истле́ния,/ се бо ны́не преподо́бный Серафи́м,/ предстоя́ Престо́лу Святы́я Тро́ицы,// те́пле мо́лится о спасе́нии душ на́ших.

И ны́не, Богоро́дичен, глас то́йже:

Спаси́ от бед рабы́ Твоя́, Богоро́дице,/ я́ко вси по Бо́зе к Тебе́ прибега́ем,// я́ко неруши́мей Стене́ и Предста́тельству.

На стихо́вне стихи́ры, глас 8.

Подо́бен: О, пресла́внаго чудесе́:

О, преди́внаго чудесе́!/ Я́ко еди́н от дре́вних,/ подви́жник ве́ры и благоче́стия/ в Алекса́ндро-Не́встей ла́вре явля́ется/ и насле́дник благода́тных даро́в/ преподо́бнаго Варна́вы Гефсима́нскаго быва́ет,/ ему́же возопии́м с любо́вию:/ ра́дуйся, преподо́бне Серафи́ме,// те́плый наш пред Бо́гом моли́твенниче.

Стих: Честна́ пред Го́сподем/ смерть преподо́бных Его́.

О, пресла́внаго чудесе́!/ О, глубины́ про́мысла Бо́жия!/ Свети́льник ве́ры преди́вный/ в ма́лой ве́си Вы́рицтей/ от гоне́ний соблюда́ется/ и мно́гия лю́ди све́том Христо́вы ве́ры просвеща́ет,/ ему́же возопии́м с любо́вию:/ ра́дуйся, преподо́бне Серафи́ме,// кре́пкий наш пред Бо́гом предста́телю.

Стих: Восхва́лятся преподо́бнии во сла́ве/ и возра́дуются на ло́жах свои́х.

О, пресла́внаго чудесе́!/ Богому́дрый наста́вник/ и прови́дец бу́дущих/ Серафи́м Вы́рицкий быва́ет/ и оби́льныя да́ры благода́ти/ всем прося́щим источа́ет,/ ему́же возопии́м с любо́вию:/ ра́дуйся, преподо́бне Серафи́ме,// благода́тный наш пред Бо́гом засту́пниче.

Сла́ва, глас то́йже:

Мона́хов мно́жество,/ архиере́е, свяще́нницы и вси лю́дие,/ ны́не соше́дшеся, просла́вим преподо́бнаго Серафи́ма,/ пла́меннаго служи́теля Госпо́дня,/ миря́ном пра́вило изве́стнейшее/ и и́ноком честну́ю похвалу́,/ челове́ком до́браго наста́вника/ и А́нгелом преди́внаго собесе́дника./ К нему́же с любо́вию возопии́м:/ моли́ся, блаже́нне, Го́сподеви// поми́ловатися душа́м на́шим.

И ны́не, Богоро́дичен, глас то́йже:

Безневе́стная Де́во,/ Я́же Бо́га неизрече́нно заче́нши пло́тию,/ Ма́ти Бо́га Вы́шняго,/ Твои́х рабо́в мольбы́ приими́, Всенепоро́чная,/ всем подаю́щи очище́ние прегреше́ний,/ ны́не на́ша моле́ния прие́млющи,// моли́ спасти́ся всем нам.

Тропа́рь, глас 4:

Я́ко пресве́тлая звезда́ Росси́йския земли́,/ возсия́л еси́ в ве́си Вы́рицтей,/ преподо́бне Серафи́ме,/ и благода́тию Свята́го Ду́ха наставля́емь,/ све́том чуде́с твои́х страну́ на́шу озари́л еси́./ Те́мже ко гро́бу твоему́ притека́юще, уми́льно глаго́лем:// моли́ Христа́ Бо́га спасти́ся душа́м на́шим.

На у́трени

На Бог Госпо́дь: тропа́рь преподо́бнаго, два́жды. Сла́ва, и ны́не, Богоро́дичен: Е́же от ве́ка утае́ное:

По 1-й стихоло́гии седа́лен, глас 4:

Я́ко со́лнце, возсия́в,/ заря́ми блиста́еши всему́ ми́ру чудесы́ и по́двиги твои́ми,/ преподо́бне Серафи́ме Вы́рицкий чудотво́рче,/ светоно́сче, блаже́нне, земли́ на́шея похвало́.

Сла́ва, и ны́не, Богоро́дичен, глас то́йже:

Под кров Твой, Пречи́стая Де́во, прибега́ющих не пре́зри/ и мольбу́ принеси́ о нас Человеколю́бцу Бо́гу,/ спасти́ся рабо́м Твои́м.

По 2-й стихоло́гии седа́лен, глас 1:

Пра́ведно на земли́ пожи́в, о́тче богоно́се,/ ны́не со все́ми святы́ми лику́еши на Небесе́х./ Помина́й ны, творя́щия па́мять твою́,/ Серафи́ме преди́вне.

Сла́ва, и ны́не, Богоро́дичен, глас то́йже:

Непости́жно чу́до зача́тия/ и несказа́нен о́браз Рождества́ в Тебе́ позна́ся, Присноде́во Чи́стая,/ ужаса́ет ум и удивля́ет помышле́ние,/ сла́ва Твоя́, Богоро́дице, всем простре́ся во спасе́ние душ на́ших.

По полиеле́и седа́лен, глас 8:

Стра́сти плотски́я и душе́вныя послуша́нием и по́двигом укроти́в,/ сосу́д избра́нный ми́ра благоуха́ннаго испо́лнь,/ ду́шу свою́ непоро́чну Бо́гу соблю́л еси́,/ и прия́л еси́ от Спа́са благода́ть Свята́го Ду́ха/ исцеля́ти стра́ждущих телеса́ и ду́ши ве́рных просвеща́ти,/ сего́ ра́ди благода́рственно вопие́м ти:/ о́тче Серафи́ме, моли́ Христа́ Бо́га о спасе́нии душ на́ших.

Сла́ва, и ны́не, Богоро́дичен, глас то́йже:

Изли́й, Пресвята́я Де́во,/ от мно́гих щедро́т Сы́на Твоего́ ми́лости неизрече́нныя/ на тща́щихся прославля́ти уго́дники Его́,/ при́сно предста́тельствующи с ни́ми о спасе́нии душ на́ших.

Степе́нна, 1-й антифо́н 4-го гла́са. Проки́мен, глас 4: Честна́ пред Го́сподем/ смерть преподо́бных Его́. Стих: Что возда́м Го́сподеви о всех, я́же воздаде́ ми? Вся́кое дыха́ние: Ева́нгелие от Матфе́я, зача́ло 43.

По 50-м псалме́ стихи́ра, глас 6:

Возлю́блен бысть Бо́гом от ю́ности твоея́,/ преподо́бне о́тче Серафи́ме,/ еще́ в миру́ ти су́щу Го́споду угоди́л еси́,/ наипа́че же в священнои́ночестве Ду́ха Свята́го благода́ть приумно́жил еси́,/ предста́телю те́плый за зе́млю на́шу,/ и́ноком же́зле кре́пости и всем тре́бующим по́мощи чудотво́рный пода́телю,// испроси́ и нам от Христа́ мир и ве́лию ми́лость.

Кано́н, его́же краегране́сие:

Ка́ко воспое́м тя по до́лгу, Серафи́ме чу́дне.

Глас 2

Песнь 1

Ирмо́с: Во глубине́ постла́ иногда́/ фараони́тское всево́инство преоруже́нная си́ла,/ вопло́щшееся же Сло́во всезло́бный грех потреби́ло есть,/ препросла́вленный Госпо́дь,// сла́вно бо просла́вися.

Ка́ко возмо́жем досто́йно воспе́ти твое́ богоуго́дное житие́, Серафи́ме преподо́бне?/ От ю́ности бо Христу́ любо́вию уязви́вся,/ свети́льник пресве́тлый мно́гим яви́лся еси́./ Те́мже мо́лим тя:/ да́руй и нам просвеще́ние досто́йно тя сла́вити.

А́нгелом собесе́дник яви́лся еси́ изря́дный, свя́те,/ пре́жде бо жития́ и́ноческаго во́лю Бо́жию о себе́ исправля́я,/ в ми́ре благоче́стно пожи́л еси́/ и ду́шу Го́споду в сосу́д избра́нный угото́вал еси́.

К Бо́гу ум твой вперя́я, о́тче преподо́бне,/ стра́сти многоразли́чныя смире́нием и житие́м многотру́дным умертви́л еси́/ и в ра́дости всем тре́бующим твоея́ по́мощи послужи́л еси́.

Богоро́дичен: О Пречи́стая Де́во Богоро́дице,/ не пре́зри нас гре́шных, тре́бующих Твоея́ по́мощи и заступле́ния,/ и бу́ди нам Хода́таица,/ да покая́нием обря́щем отпуще́ние грехо́в и живо́т ве́чный.

Песнь 3

Ирмо́с: Процвела́ есть пусты́ня, я́ко крин, Го́споди,/ язы́ческая неплодя́щая це́рковь, прише́ствием Твои́м,// в не́йже утверди́ся мое́ се́рдце.

Ве́рным ча́дом преподо́бнаго ста́рца Варна́вы Гефсима́нскаго яви́лся еси́, свя́те,/ усе́рдно послуша́ние ему́ во всем явля́я./ Те́мже и сподо́бился еси́ от него́ бы́ти насле́дник благода́ти и даро́в духо́вных.

О́тче преподо́бне,/ ты попече́ние о убо́гих при́сно име́я,/ не возгнуша́лся еси́ послужи́ти о́ным твои́ма рука́ма,/ показу́я, я́ко всяк челове́к се́рдцу твоему́ возлю́блен есть.

Словеса́ а́ввы твоего́ Варна́вы до́бре исполня́я,/ на стра́сти вельми́ подвиза́лся еси́./ Сего́ ра́ди, мно́гими доброде́тельми от Бо́га укра́шен,/ дом Трисо́лнечнаго Све́та яви́лся еси́, преподо́бне.

Богоро́дичен: Преблагослове́нная, Всенепоро́чная Богоро́дице Мари́е,/ ро́ждшая нам Сло́во Бо́жие, от греха́ избра́нныя Своя́ изба́вившее,/ заступи́ и спаси́ ду́ши на́ша.

Седа́лен, глас 3:

Возра́дуйся, гра́де свята́го Петра́,/ и ма́лая ве́се Вы́рице, возвели́чися,/ се бо свети́льник ве́ры но́вый Серафи́м,/ пропове́дник любве́ и покая́ния явля́ется/ и, да́ры Боже́ственныя ще́дро источа́я,/ мо́лится о душа́х на́ших.

Сла́ва, и ны́не, Богоро́дичен:

Я́ко невозде́ланная, Де́во, Лоза́, красне́йший Грозд прозя́бла еси́,/ источа́ющ нам вино́ спасе́ния, всех веселя́щее ду́ши и телеса́./ Те́мже, я́ко вину́ Тя до́брых блажа́ще при́сно со А́нгелы, вопие́м Ти:/ ра́дуйся, Благода́тная.

Песнь 4

Ирмо́с: Прише́л еси́ от Де́вы, не хода́тай, ни А́нгел,/ но Сам, Го́споди, вопло́щься,/ и спасл еси́ всего́ мя челове́ка./ Тем зову́ Ти:// сла́ва си́ле Твое́й, Го́споди.

О́чи се́рдца ко Творцу́ вся́ческих впери́в/ и на Бо́га Еди́наго упова́ние возложи́в, преподо́бне Серафи́ме,/ и́ноческий о́браз восприя́л еси́/ и во дни гоне́ний ко́зни вра́жия му́жественне претерпе́л еси́.

Ева́нгельских за́поведей и́стинный после́дователь яви́лся еси́, преподо́бне,/ те́мже ле́ствицею доброде́телей к соверше́нству многотру́дне восходи́л еси́,/ вся́кое послуша́ние до́бре исполня́я и моли́тву в се́рдце непреста́нно соверша́я.

Мона́шеское житие́ в ми́ре взыску́я и жите́йских трудо́в не отвраща́яся,/ от ю́ности до́брый наста́вник всем яви́лся еси́, о́тче Серафи́ме,/ сего́ ра́ди са́на иере́йскаго от священному́ченика Вениами́на Петрогра́дскаго удосто́ился еси́.

Богоро́дичен: Тебе́, Де́во, еди́ну вси ве́рнии стяжа́хом Засту́пницу тве́рду,/ Ты бо Бо́га родила́ еси́ нам,/ сего́ ра́ди хвала́ми, Чи́стая, Тя ублажа́ем по глаго́лу Твоему́.

Песнь 5

Ирмо́с: Хода́тай Бо́гу и челове́ком был еси́, Христе́ Бо́же,/ Тобо́ю бо, Влады́ко, к Светонача́льнику Отцу́ Твоему́,/ от но́щи неве́дения,//приведе́ние и́мамы.

Я́ко свети́льник не мо́жет укры́тися, верху́ горы́ стоя́,/ та́ко труды́ и по́двизи твои́, преподо́бне Серафи́ме, я́же в ке́лии вта́йне соверша́л еси́, яви́ша тя ми́ру./ Сего́ ра́ди ла́врская бра́тия и мирсти́и лю́дие притека́ху к тебе́, наставле́ния взыску́я.

Посреде́ бу́ри тя́жких гоне́ний/ и лю́тых испыта́ний тверд и непоколеби́м пребы́л еси́, преподо́бне Серафи́ме,/ те́плую моли́тву непреста́нно ко Го́споду возсыла́я/ и науча́я всех твори́ти святу́ю во́лю Его́.

О́браз а́нгельский, вели́кую схи́му, прие́м, о́тче,/ и́менем преподо́бнаго Серафи́ма, уго́дника Саро́вскаго, нарече́н был еси́,/ его́же от ю́ности всем се́рдцем возлюби́в,/ по́двигом о́наго подража́ти потща́лся еси́.

Богоро́дичен: Ди́вно возсия́ сла́ва Твоя́, Богоро́дице Де́во,/ се бо Христа́ Бо́га неизрече́нно име́ла еси́ во чре́ве,/ я́коже не́когда Иса́ия провозгласи́,/ и вы́ше естества́ родила́ еси́ Спа́са душ на́ших.

Песнь 6

Ирмо́с: В бе́здне грехо́вней валя́яся,/ неизсле́дную милосе́рдия Твоего́ призыва́ю бе́здну:// от тли, Бо́же, мя возведи́.

Озаря́емь све́том Христо́вым свы́ше, богому́дре,/ и по преселе́нии твое́м к Бо́гу неоску́дно исцеле́ния источа́еши/ всем с ве́рою к тебе́ притека́ющим.

Любо́вию боже́ственною распала́емь,/ дух ми́рен стяжа́л еси́, о́тче преподо́бне,/ ду́хи же нечи́стыя изгоня́я,/ мно́гия лю́ди ко Христу́ приве́л еси́.

Гла́сом ти́хим и кро́тким/ притека́ющия к тебе́ любви́ и смире́нию наставля́л еси́, о́тче Серафи́ме,/ та́же и моли́тве непреста́нней, попаля́ющей вся́кий грех, науча́л еси́.

Богоро́дичен: Ужасо́шася А́нгелов во́инства и челове́ков собо́ри, Всенепоро́чная,/ ди́внаго и па́че ума́ Рождества́ Твоего́:/ ка́ко и Де́ва пребыла́ еси́/ и Ма́ти Бо́жия бы́ти сподо́билася еси́./ Сего́ ра́ди досто́йно Тя вси сла́вим.

Конда́к, глас 5:

Дре́вним отце́м подража́я,/ по́двигом до́брым подвиза́лся еси́/ и, благода́ть Ду́ха Свята́го оби́льно стяжа́в,/ Саро́вскому уго́днику уподо́бился еси́/ и мно́гим путь спасе́ния яви́л еси́./ Сего́ ра́ди зове́м ти:/ ра́дуйся, преподо́бне Серафи́ме,/ Алекса́ндро-Не́вския ла́вры ди́вный подви́жниче/ и Вы́рицкия ве́си сла́вная похвало́.

И́кос:

А́нгелов Творе́ц и Госпо́дь Сил предызбра́ тя от ю́ности, преподо́бне,/ бы́ти Ему́ служи́телем ве́рным/ и наста́вником на путь спасе́ния притека́ющим к тебе́./ Мы же, дивя́щеся таково́му о тебе́ промышле́нию, с любо́вию вопие́м:/ ра́дуйся, я́ко измла́да Бо́гу послужи́ти возжеле́л еси́;/ ра́дуйся, я́ко в ми́ре пребыва́я, доброде́тельным житие́м Бо́гу угожда́л еси́;/ ра́дуйся, я́ко уте́шитель стра́ждущих был еси́;/ ра́дуйся, я́ко пла́менную любо́вь ко Христу́ стяжа́л еси́;/ ра́дуйся, преподо́бнаго Варна́вы Гефсима́нскаго учениче́ приле́жный;/ ра́дуйся, ди́внаго Серафи́ма Саро́вскаго подража́телю усе́рдный;/ ра́дуйся, Алекса́ндро-Не́вския ла́вры чу́дное прозябе́ние;/ ра́дуйся, ве́си Вы́рицкия Бо́жие благослове́ние;/ ра́дуйся, ско́рый помо́щниче в ско́рбех и боле́знех;/ ра́дуйся, свети́льниче ве́ры правосла́вныя и благоче́стия;/ ра́дуйся, преподо́бне Серафи́ме, ми́лостивый наш предста́телю пред Го́сподем.

Песнь 7

Ирмо́с: Богопроти́вное веле́ние беззако́ннующаго мучи́теля/ высо́к пла́мень вознесло́ есть:/ Христо́с же простре́ богочести́вым отроко́м ро́су духо́вную,// Сый благослове́н и препросла́влен.

Серафи́му и Варна́ве преподо́бным подража́я,/ святы́ми их моли́твами укрепля́емь был еси́, свя́те,/ те́мже от Бо́га сподо́бился еси́ проро́ческаго да́ра:/ гряду́щая наро́ду на́шему и Це́ркви Росси́йстей предвозвеща́ти.

Еле́ню подо́бяся, устреми́лся еси́ душе́ю твое́ю к го́рним оби́телем, преподо́бне,/ Про́мыслом же Бо́жиим соблюда́емь,/ по́двигом до́брым непреста́нно подвиза́лся еси́, взыва́я:/ благослове́н еси́, Бо́же оте́ц на́ших.

Ру́це твои́ ко Го́споду со умиле́нием воздева́я/ и уго́днику Бо́жию Саро́вскому подража́я, о́тче Серафи́ме,/ моле́ние на ка́мени соверша́л еси́, поя́:/ благослове́н еси́, Бо́же оте́ц на́ших.

Богоро́дичен: А́нгельския Си́лы воспева́ют Тя немо́лчно, Богороди́тельнице,/ и мы гре́шнии взыва́ти дерза́ем:/ житие́ на́ше, Пречи́стая, к Твоему́ всети́хому приста́нищу напра́ви, зову́щих:/ благослове́н еси́, Бо́же оте́ц на́ших.

Песнь 8

Ирмо́с: Пещь иногда́ о́гненная/ в Вавило́не де́йства разделя́ше,/ Бо́жиим веле́нием халде́и опаля́ющая,/ ве́рныя же ороша́ющая, пою́щия:// благослови́те, вся дела́ Госпо́дня, Го́спода.

Фараони́ты мы́сленныя му́жески победи́в,/ чистоту́ серде́чную стяжа́л еси́, о́тче преподо́бне,/ сего́ ра́ди душе́вныма очи́ма Бо́га узре́в,/ с любо́вию воспева́л еси́:/ благослови́те, вся дела́ Госпо́дня, Го́спода.

Иму́ще тя, о́тче, моли́твенника те́пла и помо́щника изря́дна,/ от стрел вра́жиих спаса́емся и Бо́гу вопие́м:/ благослови́те, вся дела́ Госпо́дня, Го́спода.

Мно́гая чудеса́, преподо́бне,/ си́лою Бо́жиею, в тебе́ бога́тно де́йствующею, сотвори́л еси́:/ слепи́и бо прозрева́ху, неми́и глаго́лаху,/ одержи́мии же от духо́в зло́бы свобожда́хуся./ Сего́ ра́ди Бо́гу, ди́вному во святы́х Свои́х, пое́м:/ благослови́те, вся дела́ Госпо́дня, Го́спода.

Богоро́дичен: Естество́ челове́ческое из Тебе́ восприя́л есть, Влады́чице,/ всех Царь и Госпо́дь./ Сего́ ра́ди Тя, я́ко Богоро́дицу и Ма́терь Све́та, в пе́снех прославля́ем.

Песнь 9

Ирмо́с: Безнача́льна Роди́теля Сын, Бог и Госпо́дь,/ вопло́щься от Де́вы нам яви́ся,/ омраче́нная просвети́ти, собра́ти расточе́нная.// Тем Всепе́тую Богоро́дицу велича́ем.

Чи́сте зре́ти сподо́бился еси́ Цари́цу Небе́сную, преподо́бне,/ ско́рое отше́ствие твое́ от ми́ра сего́ ти возвести́вшую./ Те́мже ду́хом возра́довався, Бо́га просла́вил еси́.

Утверди́ сердца́ на́ша на пути́ за́поведей Госпо́дних, о́тче преподо́бне,/ да обря́щем ми́лость на Стра́шнем Суде́ Его́/ и просла́вим Отца́ на́шего, И́же есть на Небесе́х.

Душе́ю твое́ю, я́ко о́гненный Серафи́м, пламене́я,/ по́прище жи́зни твоея́ сверши́л еси́, о́тче преподо́бне./ Научи́ и нас и́стинней любви́ ко Го́споду/ и помози́ и́мя сладча́йшее Иису́са непреста́нно призыва́ти.

Недосто́йными усты́ песнь ны́не тебе́ принесо́хом, преподо́бне,/ сподо́би нас твоего́ оте́ческаго благослове́ния,/ да просла́вим Бо́га на́шего, ди́внаго во святы́х Свои́х.

Богоро́дичен: Его́же па́че естества́ родила́ еси́, Ма́ти Пренепоро́чная,/ моли́ о всех нас, правосла́вно воспева́ющих Тя,/ я́ко Ма́терь Бо́жию и Присноде́ву.

Свети́лен:

Благода́ть Свята́го Ду́ха, оби́льно все́льшаяся в тя,/ я́ко свети́льника многосве́тлаго, показа́ тя ве́рным, преподо́бне./ Освети́ омраче́нная сердца́ на́ша,/ да во све́те невече́рнем у́зрим Христа́, Бо́га на́шего.

Сла́ва, и ны́не, Богоро́дичен:

Честне́йши еси́ всея́ тва́ри, Богоро́дице Де́во, Христа́ ро́ждшая:/ Того́ у́бо моли́ сохрани́тися ста́ду Твоему́ невреди́му/ от вся́каго наве́та сопроти́внаго.

На хвали́тех стихи́ры, глас 4:

Притеце́м ны́не, вси ве́рнии,/ к преподо́бному и богоно́сному отцу́ на́шему,/ пресла́вному Серафи́му Вы́рицкому чудотво́рцу,/ от ю́ности Бо́га возлюби́вшему/ и на вся́ко вре́мя пра́ведно пред Ним ходи́вшему,/ по отше́ствии же свое́м непреста́нно моля́щемуся ко Го́споду,/ о и́же с ве́рою и любо́вию па́мять его́ почита́ющих.

Прииди́те ны́не, вси ве́рнии,/ припаде́м ко свети́льнику пресве́тлому,/ па́стырю до́брому слове́сных ове́ц,/ предста́телю те́плому пред Сладча́йшим Иису́сом,/ и хода́таю о всех скорбя́щих и озло́бленных,/ пла́менному моли́твеннику ко Го́споду,/ о и́же с ве́рою и любо́вию па́мять его́ почита́ющих.

Да лику́ет днесь земля́ Петербу́ржская,/ прославля́ющи вели́каго уго́дника Госпо́дня,/ Алекса́ндро-Не́вския ла́вры подви́жника,/ трудолю́бне восте́кшаго по ле́ствице доброде́телей/ к Небе́сному черто́гу Спа́са Христа́,/ иде́же мо́лится о душа́х на́ших.

Да ра́дуется Це́рковь Ру́сская,/ прославля́ющи преподо́бнаго Серафи́ма Вы́рицкаго,/ и́же во времена́ гоне́ний и безбо́жия/ пра́вило ве́ры и о́браз благоче́стия яви́вшаго,/ ны́не же Престо́лу Бо́жию предстоя́щаго/ и моля́щагося непреста́нно о душа́х на́ших.

Сла́ва, глас 8:

Просла́вим, ве́рнии, подви́жника ди́внаго,/ чудотво́рца Вы́рицкаго Серафи́ма но́ваго,/ сей бо, покая́нием ду́шу очи́стив,/ Ду́ха Бо́жия Уте́шителя бога́тно стяжа́/ и, сыно́внее насле́дие от Бо́га Отца́ по благода́ти получи́в,/ по стопа́м Христа́ в жи́зни земне́й после́дова/ и жизнь ве́чную, я́ко дар, улучи́./ Ны́не же, предстоя́ Престо́лу Святы́я Тро́ицы,// со все́ми святы́ми непреста́нно сла́ву возсыла́ет.

И ны́не, Богоро́дичен, глас то́йже:

Влады́чице,/ приими́ моли́твы раб Твои́х/ и изба́ви нас// от вся́кия ну́жды и печа́ли.

На Литурги́и

Слу́жба вся преподо́бническая.