Служба святителю Патрикию, просветителю Ирландии

Ме́сяца ма́рта в 17-й де́нь.

Слу́жба святи́телю Патрики́ю, просвети́телю Ирла́ндии.

(Творение Валерии Хекке. Одобрена РПЦЗ в 1984 г.)

На вечерни

[На Го́споди воззва́х..,] стихи́ры, гла́с 1:

Дубра́вы и хо́лми Ирския земли́, возвесели́теся, езе́ра и ре́ки, взыгра́йте, се́ бо прибли́жися ва́м благослове́ние и окропле́ние свы́ше благода́тию Бо́жиею, гряде́т бо к ва́м просвети́тель ва́ш и оте́ц духо́вный, ко апо́стольству Бо́гом призва́нный, и ревни́тель ве́ры Правосла́вныя, Патрики́й, во святи́телех сла́вный.

Вопие́т Патрики́й святы́й ко новопросвеще́нным христиа́ном: внемли́те, ча́да моя́ духо́вная, а́з ва́с роди́х Ева́нгельским сло́вом, обручи́х ва́с, я́ко неве́сту, Христу́ Бо́гу, сто́йте у́бо в ве́ре и испове́дайте ю́ небоя́зненно, противоборе́ния язы́ческаго не убо́йтеся, да Бо́г ва́м Помо́щник вели́кий и Покрови́тель яви́тся.

Ве́лия твоя́ ве́ра, святи́телю Патрики́е, се́ бо оте́чествие твое́ и страны́, Христо́м просвеще́нныя, оста́вль, в зе́млю, во тме́ язы́честей пребыва́ющую, поте́кл еси́, благове́стие Христо́во принося́ заблужда́ющим, и не отступи́л еси́, до́ндеже в ве́ру Правосла́вную зе́млю всю́ обрати́л еси́, те́мже тя́ досто́йно восхваля́ем.

Сла́ва, гла́с 8:

Кто́ изрече́т боле́зни и боре́ния, я́же претерпе́л еси́, Патрики́е, пропове́дуя сло́во Бо́жие во тме́ язы́честей седя́щимъ? Кто́ изочте́т ка́пли сле́зныя, я́же но́щию пролива́л еси́, в пусты́нном уедине́нии моля́ся, страхова́ния от звере́й ди́виих и наважде́ний диа́вольских прогоня́я си́лою Креста́ Госпо́дня? его́же над все́ю земле́ю Ирскою побе́дно водрузи́л еси́.

И ны́не, [богоро́дичен или́ крестобогоро́дичен,] гла́с то́йже. [Подо́бен: О, пресла́внаго чудесе́!

Что́ зри́мое виде́ние, е́же Мои́ма очи́ма ви́дится, о Влады́ко? Содержа́й всю́ тва́рь, на дре́во воздви́жен бы́в, и умира́еши, все́м дая́й жи́знь, — Богоро́дица, пла́чущися, глаго́лаше, егда́ узре́ на Кресте́ возноси́ма из Нея́ неизрече́нно возсия́вшаго Бо́га и Челове́ка.]

На стихо́вне [стихи́ры Трио́ди]. Сла́ва свята́го, гла́с 2:

Оте́чествие небе́сное возлюби́в и то́е дости́гнути жела́я, оте́чествие земно́е оста́вил еси́ и в земли́ чужде́й но́выя лю́ди духо́вно породи́л еси́, оте́ц и́стинный те́м явля́яся и Го́сподеви взыва́я: се́ а́з и де́ти, я́же ми́ да́л еси́.

И ны́не, [богоро́дичен,] гла́с то́йже:

Ма́ти Бо́жия и Ма́ти христиа́ном, на Твоя́ ча́да умилосе́рдися, а́ще бо и согреша́ем, но в покая́нии зове́м: не оста́ви на́с, си́рых, но ру́це Твоя́ простри́ на́м, изводя́щи на́с на пу́ть спасе́ния.

[Или́ крестобогоро́дичен. Подо́бен: Егда́ от дре́ва.

Егда́ нескве́рная Агница ви́де Своего́ Агнца, на заколе́ние, я́ко Челове́ка, во́лею влеко́ма, пла́чущи, глаго́лаше: безча́дствовати Мя́ ны́не тщи́шися, Христе́, ро́ждшую Тя́: что́ сие́ сотвори́л еси́, Изба́вителю вся́ческихъ? Оба́че воспева́ю и сла́влю Твою́, ю́же па́че ума́ и сло́ва, кра́йнюю бла́гость, Человеколю́бче.]

Тропа́рь, гла́с 3:

Святи́телю Патрики́е, равноапо́стольный чудотво́рче просвети́телю Ирския страны́, моли́ Ми́лостиваго Бо́га оставле́ния прегреше́ний дарова́ти душа́м на́шим ^[1].

На утрени

Кано́н свята́го Патрики́я, гла́с 4, его́же краегране́сие: Печа́ть твоего́ апо́стольства Ирстии лю́ди.

Пе́снь 1.

Ирмо́с: Воспою́ Тебе́, Го́споди Бо́же мой, я́ко изве́л еси́ лю́ди из рабо́ты еги́петския, покры́л же еси́ колесни́цы фарао́новы и си́лу.

Пропове́дниче равноапо́стольный, сло́вом богодухнове́нным и житие́м, сло́во утвержда́ющим, изве́л еси́ лю́ди Ирския, я́коже Моисе́й из Еги́пта, от тмы́ язы́ческия ко све́ту ве́ры Христо́вой.

Ереси Пела́гиевой противоста́в му́жественне, благода́тную си́лу Христо́ву явля́л еси́ лю́дем, просвеща́я цари́ и кня́зи, и вся́к во́зраст и чи́н, приводя́ же и́х во огра́ду церко́вную.

Что́ у́бо рече́м, Патрики́я свята́го воспомина́юще? Ре́вность ли его́ апо́стольскую восхва́лимъ? озлобле́ниям ли и преще́ниям, я́же претерпе́л е́сть, подиви́мся? труды́ ли, и по́двиги, и смиренному́дрия глубину́ воспое́мъ? Та́же Христа́ Бо́га, си́лу Свою́ избра́нному Своему́ к соверше́нию все́х си́х пода́вшему, просла́вим.

Богоро́дичен: Ааро́нов же́зл процветы́й, купина́ несгора́емая прообразова́ху Тя́, Неве́сто Неневе́стная, Де́во Богоро́дице, воплоще́нию Сло́ва Предве́чнаго послужи́вшую.

Пе́снь 3.

Ирмо́с: Утвержде́ние на Тя́ наде́ющихся, Христе́ Бо́же, в ве́ре правосла́вней Твое́й утверди́ на́с, я́ко Человеколю́бец.

Терпе́нием мно́гим доброде́тели стяжа́л еси́, де́лом сло́во про́поведи твоея́ утвержда́я во сла́ву Бо́жию.

Теле́сная озлобле́ния, и искуше́ния многоразли́чныя, и уничиже́ние претерпева́я, неуста́нно на ни́ве Христо́вой труди́лся еси́, Патрики́е, не отступа́я, ниже́ смуща́яся, но в ве́ре и наде́жди на по́мощь Бо́жию утвержда́яся.

Ве́ждем твои́м дрема́ния и те́лу упокое́ния не дава́л еси́, святи́телю, неуста́нно го́ры и до́лы земли́ Ирския преходя́, ве́ру и́стинную насажда́я и новообраще́нныя лю́ди наставля́я.

Богоро́дичен: Отра́да и Утеше́ние подвиза́ющихся, и апо́стольская немо́лчная уста́, Ты́ еси́, Влады́чице, но да́ждь на́м, ни́щим и убо́гим, Тебе́ даро́в досто́йных вме́сто пе́ние серде́чное приноси́ти.

Седа́лен, гла́с 7:

Писа́ний свяще́нных рачи́телю, в сло́ве Бо́жием поуча́лся еси́ неле́ностно, ду́шу твою́ от сего́ исто́чника Боже́ственнаго напоя́я и ра́зум му́дростию небе́сною пита́я, те́мже и препо́дал еси́ ученико́м твои́м Богооткрове́нную и́стину, я́же и в писа́ниях твои́х запечатле́л еси́.

[Сла́ва, и ны́не, богоро́дичен:

Превозшла́ еси́ си́лы небе́сныя, зане́ хра́м показа́лася еси́ Боже́ственный, Благослове́нная Богоро́дице, я́ко ро́ждшая Христа́ Спа́са ду́ш на́ших.

Или́ крестобогоро́дичен:

Кресто́м Сы́на Твоего́ при́сно соблюда́еми, Де́во, прило́г бесо́вских избега́ем. Те́мже Тя́ по до́лгу воспева́юще, сла́вим, Богоро́дице Всепе́тая.]

Пе́снь 4.

Ирмо́с: Твоего́ на земли́ явле́ния, Христе́ Бо́же, пропове́дая проро́к прише́ствие, с весе́лием вопия́ше: сла́ва си́ле Твое́й, Го́споди.

Еле́ню на гора́х арома́тских подо́бяся, го́ры и хо́лми обтека́л еси́, це́ркви созида́я и христиа́ны в ве́ре Правосла́вней наставля́я, в места́ же пусты́нная уединя́яся, непреста́нно моли́лся еси́, во е́же но́вому ста́ду твоему́ спасти́ся.

Грехолюби́вый ми́р от ю́ности твоея́ оста́вль, во оби́телех мона́шеских Марти́на сла́внаго и ученика́ его́ воспита́вся, в послуша́нии же и науче́нии ле́та мно́га пожда́в, же́зл па́стырский смире́нно прия́л еси́, взыва́я: сла́ва си́ле Твое́й, Го́споди.

Овцы па́жити твоея́ созыва́л еси́ гла́сом ева́нгельским и во дворы́ церко́вныя сия́ управля́л еси́, и́стинный па́стырь те́м явля́яся, и́же ду́шу свою́ за о́вцы своя́ полага́ет.

Богоро́дичен: Ангельское целова́ние прино́сим Ти́, Благослове́нная Богоро́дице: ра́дуйся, Благода́тная, Госпо́дь с Тобо́ю.

Пе́снь 5.

Ирмо́с: Возсия́вый све́т, и просвети́вый у́тро, и показа́вый де́нь, сла́ва Тебе́, сла́ва Тебе́, Иису́се Сы́не Бо́жий.

Просвети́л еси́, Патрики́е, зе́млю Ирскую све́том уче́ния Христо́ва, о новоизбра́ннем ста́де твое́м веселя́ся и Бо́гови сла́ву воздая́.

Отве́рзл еси́ о́чи у́мныя, пре́жде неве́рием ослепле́нныя, и́же во тме́ неве́жествия пребыва́ющих, и ты́я подви́гл еси́ со все́ми ве́рными Христа́ Спа́са сла́вити.

Сы́тости не зна́я, пропове́дал еси́ ве́ру правосла́вную, настоя́ и науча́я во вре́мени и безвре́мении со слеза́ми мно́гими, Христу́ Бо́гу, помога́ющему ти́, вопия́: сла́ва си́ле Твое́й, Сы́не Бо́жий.

Богоро́дичен: Тму́ отгна́вшая и Со́лнце Пра́вды ми́ру возсия́вшая, Богоро́дице Мари́е, злове́рия но́щь от ми́ра отжени́.

Пе́снь 6.

Ирмо́с: Возопи́, прообразу́я погребе́ние тридне́вное, проро́к Ио́на, в ки́те моля́ся: от тли́ изба́ви мя́, Иису́се, Царю́ сил.

Обижа́емь, не противуглаго́лал еси́, и уничижа́емь, смиря́лся еси́, о́браз явля́я ученико́м твои́м, те́мже и возвели́чи тя́ Госпо́дь, Патрики́е.

Льсти́вым ко́знем диа́вольским противобо́рствуя, не убоя́лся еси́ преще́ния волхво́в нечести́вых, Христо́ву ве́ру безбоя́зненно пропове́дуя и взыва́я: от се́тей и́х изба́ви мя́, Иису́се, Царю́ си́л.

Ско́рбь, и тесноту́, и го́рькое ра́бство в ю́ности твое́й претерпе́в, егда́ плене́н бы́л еси́, Патрики́е, по гла́су же Госпо́дню свобо́ду улучи́в, возопи́л еси́: сла́ва Тебе́, Иису́се, Царю́ си́л.

Богоро́дичен: Ты́ еси́ оби́димых Помо́щница, Ты́ еси́ плене́нных Свобожде́ние, Твои́ бо мольбы́, Присноде́во Влады́чице, прие́млет при́сно Сы́н Тво́й и Бо́г на́ш.

Конда́к, гла́с 4:

Показа́лся еси́ и́стинный лове́ц челове́ков, мре́жи бо благове́стия ева́нгельскаго просте́р, улови́л еси́ язы́ки во Ца́рствие Христо́во, креще́нием просвеща́я во тме́ поклоне́ния и́дольскаго пребыва́ющия и те́х сотворя́я ча́да Жива́го Бо́га; сего́ ра́ди мо́лим тя́: предста́тельствуй, о́тче Патрики́е, о чту́щих святу́ю па́мять твою́.

Пе́снь 7.

Ирмо́с: Авраа́мстии иногда́ в Вавило́не о́троцы пе́щный пла́мень попра́ша, пе́сньми взыва́юще: оте́ц на́ших Бо́же, благослове́н еси́.

Виде́ний богооткрове́нных зри́телю, Патрики́е святи́телю, после́довал еси́ призыва́ющему тя́ Бо́жию гла́су, и́же тя́ посла́ лю́ди но́выя ко и́стинней ве́ре обрати́ти.

Ангельский о́браз от ю́ности твоея́ восприи́м, ревнова́л еси́ о насажде́нии жития́ мона́шеского в новопросвеще́нной земли́, оби́тели мно́гия повсю́ду созида́я и Го́сподеви поя́: оте́ц на́ших Бо́же, благослове́н еси́.

Ирская земля́ тобо́ю хва́лится и па́мять твою́ чти́т, Патрики́е, но и мы́, от восто́ка прише́дше, усе́рдно тя́ в моли́твах призыва́ем, Го́спода о тебе́ благодаря́ще и вопию́ще: благослове́н еси́, Бо́же на́ш.

Богоро́дичен: Рабо́в Твои́х мольбы́ приими́ и ны́не, Всенепоро́чная, я́коже дре́вле моле́ния к Тебе́ прибега́ющих слу́шала еси́, Ты́ бо вчера́, и дне́сь, и в ве́це гряду́щем еди́на ми́лостивая Засту́пница явля́ешися.

Пе́снь 8.

Ирмо́с: Царя́ Христа́, Его́же испове́даша плене́ннии о́троцы, в пещи́, глаго́люще ве́лиим гла́сом: вся дела́, по́йте Го́спода.

Се́ятель до́брый яви́лся еси́, святи́телю Патрики́е, ни́ву благопло́дную Христо́ви возрасти́в и лю́ди новопросвеще́нныя науча́я вопи́ти: вся́ дела́, по́йте Го́спода.

Тве́рдое ве́ры Христо́вы основа́ние положи́в, созида́л еси́ без числа́ хра́мы и оби́тели и́ноческия, в ни́хже тружда́ющихся подвиза́л еси́ вопи́ти: вся́ дела́, по́йте Го́спода.

Иере́и Бо́жии поставля́л еси́ и по все́й земли́ посыла́л еси́ на служе́ние, я́ко да утвержда́ют в ве́ре, тобо́ю пропове́данной, лю́ди новоизбра́нныя, благода́рне зову́щия: вся́ дела́, по́йте Го́спода.

Богоро́дичен: Инове́рческия заблужде́ния и ерети́ческия шата́ния осуети́, ве́рныя же во и́стине утверди́, та́йно науча́ющи и́х, Влады́чице, Бо́га правосла́вно воспева́ти.

Пе́снь 9.

Ирмо́с: От земноро́дных ро́ждшися и Творца́ ро́ждшая, на́ша похвало́, Богоро́дице Чи́стая, Тя́, я́ко влады́чествующую тва́рьми, велича́ем.

Ле́тнюю па́мять твою́, Патрики́е, соверша́юще и апо́стольския труды́ твоя́ восхваля́юще, от восто́ка и за́пада соше́дшеся, единоду́шно тя́ велича́ем.

Юность твою́ Христо́ви в же́ртву прине́сл еси́ и до ста́рости Тому́ служи́л еси́, святи́телю, апо́столом поревнова́в и преподо́бным подража́я, те́мже тя́ велегла́сно велича́ем.

Дубра́вы и хо́лмы земли́ Ирския моли́твою твое́ю освяти́л еси́ и слеза́ми мно́гими новонасажде́нную ни́ву Христо́ву ороша́л еси́, да возрасте́т и стори́чный пло́д принесе́т, те́мже труды́ твоя́ и ре́вность по Бо́гу велича́ем.

Богоро́дичен: Ирскую зе́млю и вся́кую страну́ христиа́нскую попече́нием Твои́м не оставля́й, Богоро́дице, со Патрики́ем святы́м Сы́на Твоего́ Боже́ственнаго умоля́ющи, да вся́ поми́лует и спасе́т, непреста́нно Тя́ велича́ющих.

По свети́льне, Сла́ва, свята́го, гла́с 3:

Но́щь язы́ческую просвети́вый све́том Христо́вым, Патрики́е, во све́те невече́рнем ны́не пребыва́я, на Со́лнце Пра́вды взира́я, те́пле моля́ся, да возсия́ет во все́м ми́ре трисо́лнечный све́т Правосла́вия.

[Сла́ва, и ны́не, богоро́дичен:

Незаходи́маго Све́та носи́ло, Присноде́во, просве́щшаго седя́щих во тме́ неве́дения пре́лести, озари́ и на́м, гре́шным, све́т Сы́на Твоего́.]

Источник: Русский портал

Примечание

^[1] Тропарь и кондак приводятся по изданию: «Служба Святителю Патрикию, архиепископу Армагскому, просветителю Ирландии. СПб.: «Русский служитель», 2020, с. 5, 10», с восстановлением первоначальнаго текста: «Ирския страны».