Служба священномученику Митрофану, пресвитеру Пекинскому, и иже с ним пострадавшим

Текст службы утвержден на заседании Священного Синода 8 декабря 2020 года (журнал № 99).

Месяца июня в 10-й день

Священномученика Митрофана, пресвитера Пекинскаго, и иже с ним пострадавших

На велицей вечерни

На Господи, воззвах: стихиры на 8, глас 6:

О, дивный полче страстотерпец Христовых,/ от соплеменных буиих убиенных!/ О, мученицы мнози,/ за веру Православную живот свой положившии в царстве Китайстем безкрайнем!/ Кто возможет прославити страдания ваша,/ отче Митрофане богомудре со чады твоими духовными,/ мужие и жены, старцы с юнотами и младенец множество!/ Приидите, станите с нами/ и прославите Христа Подвигоположника.

О, малое стадо,/ емуже Отец Небесный дати Царство благоволи!/ Како не дивимся, зряще вы, рачители благочестия,/ обретшия многоценный бисер Православия в земли язычестей,/ идеже вера Христова вмале проповедана бе,/ взыскасте Господа и живы днесь души ваша,/ восхваляюще Христа Подвигоположника.

Глас пророка Исаии услышим, вернии, взываяй:/ се, сии издалеча приидут./ Ныне проречение сие исполнися,/ ныне чада Божия, благосветлая светила, от восток солнца приидоша,/ к горе Сиону и ко граду Бога живаго,/ к Церкви первородных на Небесех написанных,/ и духом праведник совершенных.

Како не дивимся, зряще тя, священне Митрофане,/ от млада проповедником Православия внимавша/ и от их устен, водою животочною, яко древо плодовитое, напояема;/ послежде, еще юну тебе сущу,/ братий твоих любомудренне просвещающа;/ по сем венец достоин трудов твоих/ благодать священства от десницы просветителя Японии, Николая славнаго, приемша/ и, по стопам его шествующа,/ служение свое добле совершивша,/ мученически страдавша и венчавшася.

Чада моя возлюбленная,/ вопияше священноучитель Митрофан,/ се, время испытания наста,/ никтоже от вас да убоится смерти лютыя,/ поминая, како словом и делом поучах вы Господеви работати,/ скорби и обиды от ближних благодушно терпети,/ наипаче же веру святую,/ аки дар небесный, даже до крове хранити.

О, мученицы Христовы единонравнии,/ коль светла страдания ваша,/ за веру Православную подъятая!/ Веру Христову, яко щит противу лица гонителей, твердо держали есте/ и тако, живот свой за Христа положивше,/ радующеся прехвальным страстотерпцем древним,/ равночестными тем явилися есте.

Слава, глас 8:

Днесь собор святых мученик,/ священнотаинником Митрофаном приводимый,/ духовную трапезу мучениколюбцем предлагает,/ верою Православною сияя аки звезды небесныя,/ никакоже Солнца Правды Христа отлучаяся,/ терпеливо поношения, оклеветания, мучения и смерть от рук мучителей приемлет,/ радуяся радостию Небесною.

И ныне, глас тойже, Богородичен: Царь Небесный за человеколюбие на земли явися:

Вход. Прокимен дне. Чтения три мученическая.

На литии стихиры, глас 5:

Приидите, вернии, воспоим священнаго Митрофана,/ единонравный лик страдалец Христу с собою приведшаго,/ кумиром не поклоньшихся/ и за веру святую обиды и безчестия,/ поношения, муки и смерть претерпевших./ Ихже молитвами, Христе Боже, помилуй нас.

Приидите, возславим дивный сонм/ мужей и жен, старцев и стариц, отроков и отроковиц,/ богомудрому Митрофану, аки овцы заколения, на страдания последовавших/ и тако узкими враты и тесным путем/ в живот вечный вшедших.

Слава, глас 1:

Светлою любовию ко Христу пламенеюще,/ веры Божественныя не отвергостеся/ и кумиром не поклонистеся,/ святии мученицы с пастырем вашим священнотаинником Митрофаном,/ и, о Христе укрепляеми, мучителей суровство низложисте./ Сего ради, венцы победы улучивше,/ Творцу всяческих молитеся,/ да спасет души наша.

И ныне, Богородичен.

На стиховне стихиры, глас 2.

Подобен: Доме Евфрафов:

Христа возлюбльше,/ во след мученик древних/ мужественне потекл еси,/ священнострадальче Митрофане/ с дружиною твоею.

Стих: Воззваша праведнии,/ и Господь услыша их.

Звезды, на Востоце возсиявшия,/ днесь восхвалим,/ лик страдальцев добропобедных,/ светом Православия/ Китай просветивших.

Стих: Многи скорби праведным,/ и от всех их избавит я Господь.

Первозваннии мученицы Китайстии,/ тьмою неведения/ окрест обстоими,/ светозарнии и добропобеднии/ в подвизе явистеся.

Слава, глас 4:

Мучеников святых воинство/ привел еси Христу, святче Митрофане,/ первый от китайского народа во иерея поставленный,/ не крепостию ратною и оружии изощренными гордящихся,/ но токмо немощию своею,/ Христом укрепляеми, сладце похваляющихся,/ посреде же их дивный отрок, сын твой Иоанн,/ егоже от главы до ног ранами злодеи уязвиша и огнем сожгоша./ Вси сии страдальцы добропобеднии/ Небесных селений достигоша,/ идеже плодов древа животнаго наслаждаются, досточуднии.

И ныне, Богородичен, глас тойже: Призри на моления Твоих раб Всенепорочная:

Тропарь, глас 4:

Мученицы Твои, Господи,/ в царствии Китайстем просиявшии,/ веру Христову, яко щит, держаще/ и кумиром не поклоньшеся,/ от единоплеменник обезумевших муки и смерть прияша,/ усты отрока страстотерпца воспевающе:/ болезни за Христа ни во чтоже вменяем,/ за жизнь временную жизнь вечную/ улучити желающе.

На утрени

По 1-м стихословии седален, глас 2:

Подворие Северное во граде Пекине почтим, процветшее честныя цветы, мученик двесте и множайшия, Христовы бисеры, иже злобныя мучители посрамиша, темже и венцы прияша, доблемудреннии.

Слава, и ныне, Богородичен:

Дивная и скорая Помощнице всем христианом, буди нам покров и заступление в скорбех и радостех земнаго жития, наставляющи ны присно на путь покаяния, наипаче же умоли Сына Твоего и Бога нашего, да праведных части явит ны причастники.

По 2-м стихословии седален, глас 2:

Страстотерпцы Христовы, во граде Пекине добропобедне пострадавшии, камением побиеннии, огнем сожженнии, мечем усеченнии, Царство Небесное в наследие приимше, молитеся ко Господу, да спасет души наша.

Слава, и ныне, Богородичен:

Мати Всенепорочная, новыя христолюбцы во граде Пекине при храме Успения Твоего возрастившая и тыя на подвиги мученическия утвердившая, укрепи и ны, грешныя, на невидимыя и видимыя враги душ наших.

Величание:

Величаем вас,/ священномучениче Митрофане и святии мученицы Китайстии/, и чтим честная страдания ваша,/ яже за Христа/ претерпели есте.

Псалом избранный: Бог нам Прибежище и Сила:

По полиелеи седален, глас 4:

Коль дивно Твое, Христе, благоутробие, на рабех Твоих смиренных бывшее, яко и немощнейшия сосуды Твоея благодати, убогия вдовицы и старцы, девы юныя и младенец множество, силою Креста Твоего возмогоша лесть идолобесия попрати и веру святую неколеблему соблюсти, во след Тебе с радостию текуще.

Слава, и ныне, Богородичен:

Дева днесь невидимо предстоит любящим Ю на месте, идеже сияше храм честнаго Успения Ея, сынами тьмы и зловерия сожженный, и благословляет чада Своя духовная не поклонитися кумиром, за веру Христову, радующеся, мужественне пострадати и венцев Небесных в Царствии Сына Ея сподобитися.

Степенна, 1-й антифон 4-го гласа. Прокимен, глас 4: Проидохом сквозе огнь и воду/ и извел еси ны в покой. Стих: Разжегл ны еси, якоже разжизается сребро. Всякое дыхание: Евангелие от Матфеа, зачало 36.

По 50-м псалме стихира, глас 6:

Се сонм мученик добропобедных,/ пастырю богомудрому Митрофану последующих,/ во врата Царствия Небеснаго течет, ликующе,/ мы же сим любовию возопиим:/ о, воини Христови всеблаженнии,/ молитеся Пастыреначальнику,/ да спасет души наша.

Канон святых, глас 2.

Песнь 1

Ирмос: Грядите, людие,/ поим песнь Христу Богу,/ раздельшему море и наставльшему люди,/ яже изведе из работы египетския,/ яко прославися.

Припев: Святии мученицы Китайстии, молите Бога о нас.

В песнех духовных воспоим с любовию мученик двоесотницу Христовых, ихже изнесе царство Китайское древнее, ихже воспиташа пастырие Церкве Русския и правнуцы плененных, в двухсотлетнем разсеянии веру Православную соблюдшии.

Радуйся, человече Божий Митрофане, первый из братий твоих в сане священства возсиявый! Перси твоя, от сынов беззаконных ископанныя, уподобишася соту пчелиному, мед сладости страданий за Христа нам точай. Темже воспеваеши, священномучениче: поим Господеви, славно бо прославися.

Сияет яко звезда на небеси супружница твоя Татиана, во дни живота своего жены светом Евангелиа просвещавшая и сих ко святей купели уготовлявшая; сия яви нам образ страданий за Христа, яко премнозе мучима, по стогнам влекома, обаче, веры Православныя не отрекшися, во главу усечена бе, якоже и сын твой Исаиа.

Кий язык восхвалит отрока Иоанна, инаго сына вашего, емуже мучителие длани отсекоша? Сей же, аки в чуждем телеси страждаше, яко агнец на заколение Христа ради идяше, радуяся.

Богородичен: Упование христианом, Дева Пренепорочная, Сына Твоего и Бога моли с мученики о воспевающих Тя.

Песнь 3

Ирмос: Лук сокрушися сильных/ державою Твоею, Христе,/ и силою немощствующии/ препоясашася.

Финикс благоплодный под финиксом во дворе дома Божия, аки плод зрелый Господеви принеслся еси, праведниче иерее Митрофане, сего ради ныне, ликовствуя, вопиеши: утвердися сердце мое во Господе, вознесеся рог мой о Бозе моем.

Павле премудре, апостолу языков в проповеди слова подражавый и сан иерея по малех днех прияти имевый! Ты, Христа всем сердцем возлюбив, мучений лютых не убоялся еси и, коленопреклоненно молився, руце же крестообразно сложив, во главу усечен был еси.

О, сродницы Павловы Сарро, Екатерино, Александро Иоанне и иная Александро! Вы, доблественне сему воину Христову спострадавше, венцы Небесныя улучили есте.

Иоакиме юный, сродниче Павлов, мучительми у стен града убиенный, ты первомученик христианом Китайским во дни скорби сея был еси.

Богородичен: Марие Преблагая, душу Твою оружие пройде, укрепи ны, слабыя и боязливыя, егда приидет час огненнаго испытания веры нашея.

Седален, глас 8:

В пустыни язычества сад Боговедения процвете, подворие Бейгуань православное, цветы красныя мученик множество Христу принесшее, ихже кровьми напитавшися, земля добрая плод красен израсти, люди новыя, святым Крещением просветившияся.

Слава, и ныне, Богородичен:

В пустыни горы Синайския купина неопально процвете, Приснодеву, огнь Божества приемшую, прообразующи, Юже мы любовию и благодарением воспеваем, веселящеся.

Песнь 4

Ирмос: Услышах, Господи,/ славное Твое смотрение/ и прославих, Человеколюбче,/ непостижимую Твою силу.

Господь Бог наш сила наша, тако утешал еси, отче Митрофане, чада твоя духовная, в трепете и смятении бывшая, и, яко птенцы под криле кокоша, в дому твоем собравшаяся.

Воспоим Иннокентия, во диакона избраннаго, иже седми первым диаконом подобяся, попечение о телесных нуждах братий своих с любовию и тщанием исполнил есть. Темже и Господь тело его, во кладязи камением от безумных побиенное, нетлением прослави.

Спрославим сему и жену его Елену, яже в кумирню приведенная, идолом кланятися воспротивися, сего ради, муки многообразныя претерпевши, душу свою чистую Богу предала есть.

Кую песнь принесем Евмению, Софии и Надежди, добле воспитанным чадом Иннокентия и Елены? Сих бо зверонравнии мучителие лютей смерти предаша и телеса их в кладязь ввергоша, обаче та по мнозе времени нетленна обретошася.

Богородичен: Радуйся, Обрадованная, радуйся, Всемилостивая, всем, в тяжких скорбех Тебе молящимся, Небесное утешение подающая.

Песнь 5

Ирмос: Света Подателю и веков Творче, Господи,/ во свете Твоих повелений настави нас:/ разве бо Тебе, иного бога не знаем.

От нощи скорбей лютых и болезней неисцельных к Свету невечернему утреннюет дух твой, священномучениче Митрофане.

Да почтится Мария юная, яже, в вере подражающи жениху своему Исаии, за Христа убиену, притече в дом иереов и рече: у церкве Пресвятыя Богородицы духовно рождена есмь, зде и умру. Темже по мале времени от рук злодеев смерть безбоязненно прият.

Небомудренную Ию восхвалим, наставницу дев и путеводительницу приходящих ко Христу. Сия двукраты смертныя муки от жестоковыйных претерпе: исперва бо, ножи изсечена бывши, аки мертва землею мало прикровена бе; послежде, стенанием ея услышанным, паки взята бе и тако венцем мученичества, радующися, увенчана бысть.

Блаженнии Мироне и Марие! Вы, чада ваша Марфу, Анастасию, Евдокию, Иннокентия, Савву, Нила, Марию и Елену в трудех, нищете и страсе Божии воспитавше, добре приуготовасте сих для Царствия Небеснаго, еже и улучиша, славнии, вкупе с вами за Христа убиеннии.

Богородичен: Преблагословенная Богородице, многия скорби на земли претерпевшая! Помози нам крест земнаго жития в терпении, благодарении и радовании до конца понести.

Песнь 6

Ирмос: Глас глагол молебных/ от болезненныя, Владыко, души услышав,/ от лютых мя избави:/ Един бо еси нашего спасения виновен.

Из сланаго моря многомятежнаго жития сего в вечный пренебесный покой, яко от кита Иона, вшел еси, священнотаинниче отче Митрофане.

Радуйся, Евфимие, от каменносердечных камением побиенный! Радуйтеся, Акилино, Анно, Павле со чады, в дому своем сожженнии! Радуйтеся, Ирино со чады Анною, Афанасиею, Евпраксиею, Прохором и Мариею, за врата града отведеннии и тамо, от Христа не отрекшеся, убиеннии!

Радуйся, Ирино иная, сердцем твоим кротким Иисуса кроткаго возлюбившая и службе церковней на всяк день прилежавшая, мучителем, рабов Божиих ищущим, не таящися рекшая: христиане есмы!

Радуйся, вдовице Капитолино, мрачную нощь отречения от Христа прешедшая и светлым утром покаяния, посем же подвигом мученичества грех свой омывшая!

Богородичен: Владычице, Богородице Пречистая! Ты зриши немощь нашу и разслабление духовное, темже настави ны на всяк час бдети и Сыну Твоему молитвы сердечныя возносити, да николиже отступим от Него.

Кондак, глас 2:

Яко сокровище многоценное,/ трилетне в земли сокровенное,/ обретошася мощи ваша, священнотаинниче Митрофане со овцы учений твоих,/ во граде Пекине просиявшими,/ благодать неоскудную подающе душам нашим./ Сего ради с радостию и любовию воззовем:/ молитвами страстотерпец, Христе Боже, помилуй нас.

Икос:

Подвигом и болезнем вашим дивящеся, достоблаженнии страстотерпцы Китайстии, в веселии сердечнем вопием вам:

Радуйтеся, Христа, Многоценный Бисер, в земли язычестей обретшии;

радуйтеся, ничтоже от земных сокровищ Ему предпочетшии.

Радуйтеся, добре Ему в уделех Китайских поработавшии;

радуйтеся, в час огненнаго испытания от Него не отступльшии.

Радуйтеся, за Него огнем сожженнии, камением побиеннии, мечем усеченнии;

радуйтеся, вся сия радостию и веселием претерпевшии.

Радуйтеся, яко нас подвизаете ко Господу взывати: молитвами страстотерпец, Христе Боже, помилуй нас.

Песнь 7

Ирмос: Образу златому, на поле Деире служиму,/ трие Твои отроцы небрегоша безбожнаго веления/ посреде же огня ввержени, орошаеми, пояху:/ благословен еси, Боже отец наших.

Храм Божий и строения церковная от мерзких идолопоклонник сожженная видев, многия скорби исполнися, страдальче отче Митрофане; обаче, в храм пренебесный вшед, воспел еси: благословен еси, Боже отец наших.

Афанасие блаженне, слячен от юности твоея, коленопреклоненне ходивый, низок телом, высок же душею бе; темже, часу испытаний наставшу, жену твою Варвару и триех чад увеща мук за Христа не устрашатися, но победне взывати: благословен еси, Боже отец наших.

Андрее святый, во единонадесятый час жития своего в виноград Христов пришедый, делания книжнаго, жестокосердым приближшимся, не остави и тако, на месте трудов своих, во славу Церкве подъятых, убиенный, со всеми, от перваго часа потрудившимися, воспевает: благословен еси, Боже отец наших.

Евфимие безстрашный, веру Христову пред мучителем исповедавый и онаго безумие обличивый, за сие мечем пронзенный и камением побиенный, песнь богокрасную воспевает: благословен еси, Боже отец наших.

Богородичен: Люди, во тьме и сени смертней седящия, Богородицею к Свету невечернему призвал еси и за Тя пострадати сподобил еси, Преблагословенный отцев Бог и препрославленный.

Песнь 8

Ирмос: В пещь огненную ко отроком еврейским снизшедшаго/ и пламень в росу преложшаго Бога,/ пойте, дела, яко Господа/ и превозносите во вся веки.

Да почтятся честнии страдальцы Афанасий, Лев и Никифор, Васса, Екатерина и Елена, Кирилл, Надежда и Ольга, Симеон, Виктор, Анна и инии мнози. Сии вкупе со иереем Митрофаном и прочими мученики воспевают: Господа пойте, дела, и превозносите Его во веки.

Многовидне потрудистеся в дому Божии, Клименте, Матфее, Симеоне, Иосифе, Алексие, Капитоне, многовидныя муки за Христа претерпевшии, ныне ликуете во цветнице Его, взывающе: благословите, вся дела Господня, Господа.

Измлада пении и песньми духовными прославлявшии Господа и Пречистую Матерь Его во храме честнаго Успения Ея, Афанасие и ин Афанасие, Сергие, Петре, Алексие, по славнем страдании вашем песнь новую и светлейшую возносите: благословите, вся дела Господня, Господа.

Правнуцы мужей ратных, древле из острога Албазинскаго в пленение Пекинское приведенных, веру Православную соблюдшии и за Христа живот свой положившии, ныне сподобистеся свободу славы чад Божиих улучити, воспевающе: благословите, вся дела Господня, Господа.

Богородичен: Дево Всепетая, во храмех пренепорочнаго Успения Твоего и во всей вселенней славимая, всемощным предстательством Твоим мирную кончину живота нашего нам низпосли.

Песнь 9

Ирмос: Весь еси желание, весь сладость,/ Слове Божий, Девы Сыне,/ Боже богов, Господи, святых Пресвятый,/ тем Тя вси с Рождшею Тя величаем.

Егоже возлюбили есте, Егоже возжелали есте, Егоже ради кровь свою излияли есте, молите Христа Бога, страстотерпцы, во царствии Китайстем просиявшии, да умножит веру Православную во Отечестве вашем и во всем мире Своем.

Святыя мощи доблих страдалец, по триех летех из земли извлеченныя и с честию во гробнице под храмом Всех святых мученик положенныя, подворие Северное, град Пекин и всю землю Китайскую благодатию облагоухаша.

Святый апостоле Боговидче Фомо, Евангелия Христова в земли Китайстей первый проповедниче, святителю отче Иоанне, светило Тобольское, святителю Иннокентие, града Иркутска похвало, вашим предстательством православнии, в Китае просиявшии, возмогоша Богу послужити преподобием и правдою во вся дни живота своего.

Богородичен: Мати Божия Пречистая, всю Сибирь и землю Китайскую иконою Твоею Албазинскою ограждающая, ейже празднование Промыслом Божиим в день святых мученик Севастийских уставлено, Ты еси мучеников крепость и веселие.

Светилен:

Звезды светлыя, на Востоце возсиявшия и всю землю лучами своими просветившия, мученицы Христовы двусотнии, не забудите Отечества вашего земнаго, мрак богопротивления отжените и веселие негиблющее всем нам, в бурех скорбей сущим, у Господа испросите.

Слава, и ныне, Богородичен:

Яже Свет невечерний рождшая, Присноблаженная и Пренепорочная Дево, светом любве Твоея омраченная сердца наша просвети и сподоби ны утешения и радости о Господе.

На хвалитех стихиры, глас 4:

Радуйся, Церкве Божия,/ украшаемая собором мученик Христовых./ Тии бо, священным Митрофаном предводимии,/ землю Китайскую кровьми своими освятиша/ и, Царствия Небеснаго достигше,/ молятся присно о земном Отечествии своем.

Солнце мысленное/ показа вы звезды Богосиянныя,/ небо восточное светом истинныя веры озарившия/ и во вся концы земныя лучи подвигов ваших испустившыя,/ святии мученицы Китайстии,/ молитеся за ны ко Господу,/ да укрепит теплохладную веру нашу.

Яко кадило благовонное,/ Подвигоположнику Христу Богу принеслися есте,/ святии мученицы Китайстии,/ надеждою бо несумненною на Небесное воздаяние утешаеми,/ огненное запаление, каменное побиение и мечное усечение мужественне претерпели есте./ Темже молитеся за ны ко Господу,/ да и нашу надежду тверду сотворит.

Любовию ко Господу укрепляеми,/ силу противоборцев попрали есте/ и, мучения лютая претерпевше,/ Небесная селения наследовали есте,/ идеже Древа жизни наслаждаетеся./ Темже молите, досточуднии, Владыку всех,/ да воспламенит любовию к Богу/ сердца единоплеменник ваших.

Слава, глас 6:

Что сей глас радования и веселия?/ Что пение и лики?/ Что собор православных во граде Пекинстем,/ по триех летех страданий доблих мученик Христовых?/ Се бо славный архиерей, пастыри и верных множество/ приидоша возславити мощи дивных страдалец многих,/ ихже с честию положиша/ во гробнице под храмом Всех святых мученик,/ в похвалу их созданнем./ Мы же им согласно воспоим:/ о святии страстотерпцы,/ Троице Святей помолитеся,/ да спасет души наша.

И ныне, Богородичен, глас тойже: Богородице, Ты еси Лоза истинная:

На Литургии

Блаженны от канона песнь 3-я и 6-я. Прокимен, глас 4: Святым, иже суть на земли Его,/ удиви Господь вся хотения Своя в них. Стих: Предзрех Господа предо мною выну, яко одесную мене есть, да не подвижуся. Апостол к Римляном, зачало 99. Аллилуиа, глас 4: Воззваша праведнии и Господь услыша их, и от всех скорбей их избави их. Стих: Многи скорби праведным, и от всех их избавит я Господь. Евангелие от Луки, зачало 67. Причастен: Радуйтеся, праведнии, о Господе, правым подобает похвала.