Служба преподобной Марфе Дивеевской

Текст службы утвержден на заседании Священного Синода 23-24 сентября 2021 года (журнал № 67).

Месяца августа в 21-день

Преподобныя Марфы Дивеевския

На малей вечерни

На Господи, воззвах: стихиры 4, глас 2:

Киими похвальными песньми/ воспоим преподобную Марфу,/ дивную начальницу обители Дивеевския,/ от юности благодать Святаго Духа стяжавшую,/ и ныне во Обителех Небесных/ молящуюся о спасении душ наших?

Киими недостойными усты/ восхвалим вселюбезную матерь нашу Марфу,/ чистотою, кротостию и послушанием совершенным/ в отрочестве Богу угодившую,/ Егоже молит о спасении душ наших?

Киими похвальными песньми/ ублажим дивную молчальницу,/ собеседницу великаго старца Серафима,/ в тайне хранившую того откровения о обители Дивеевстей/ и тепле молящуюся о спасении душ наших?

Слава, глас 6:

Приидите, вернии людие,/ во святую обитель Дивеевскую,/ яже земный жребий Божия Матере нарицается,/ ублажим верную рабу Пресвятыя Богородицы,/ преподобную Марфу,/ и, припадающе к ея честным и многоцелебным мощем,/ усердно возопиим:/ помяни нас, мати наша, во Царствии Небеснем.

И ныне, праздника.

На стиховне стихиры, глас 3:

Всех радостей Радость,/ Преблагословенная Богородица Дева,/ радости вечныя тя сподоби,/ мати наша Марфо,/ яко Свою служительницу верную.

Стих: Дивен Бог во святых Своих,/ Бог Израилев.

Пречистою Богородицею избранная/ и силою Божественною ограждаема,/ радостно на подвиги потекла еси,/ мати Марфо славная,/ молися о верою чтущих тя.

Стих: Честна пред Господем/ смерть преподобных Его.

Великий ангельский образ восприимши,/ начальница обители Дивеевския явилася еси,/ преподобная Марфо,/ молися о любовию чтущих тя.

Слава, глас 5:

Боголюбива и милостива,/ мудрованием смиренна и любве исполнена явилася еси,/ невесто Христова Марфо,/ ты бо, ангельски на земли поживши,/ кончину блаженную в юных летех прияла еси/ и венец нетленный улучити сподобилася еси,/ темже молися о спасении душ наших.

И ныне, праздника.

Тропарь писан на велицей вечерни

На велицей вечерни

На Господи, воззвах: стихиры на 8, глас 8:

Преподобная Марфо всехвальная,/ старца Серафима послушнице верная,/ ты, наставлением того твердо последующи,/ в молчании благодать Духа Святаго стяжала еси/ и славу обители Дивеевския,/ юже той в тайне возвеща ти, усердно хранила еси./ С нимже тепле молися ко Господу/ спастися душам нашим.

Преподобная Марфо богомудрая,/ ты, измлада Господа возлюбивши/ и заповеди Его усердно хранящи,/ непрестанную молитву стяжала еси/ и преподобным Серафимом начальница обители Дивеевския наречена быти сподобилася еси./ Ныне же духом с нами пребывающи,/ исцеления скоро источаеши,/ верою и любовию к тебе притекающим.

Преподобная мати наша Марфо,/ ты, издетска страху Божию навыкши,/ в молитве непрестанней присно пребывала еси/ и, разум богопросвещенный стяжавши,/ сердце твое со тщанием хранила еси,/ темже и Приснодевы служительница явилася еси./ Ейже о нас помолися,/ спастися душам нашим.

Преподобная мати наша Марфо,/ ты, Жениха Христа от юности возжелевши/ и благодатию Духа Святаго блистающи,/ свещу любве светло уготовала еси./ Ныне же, на Небесех Престолу Божию предстоящи/ и велие дерзновение ко Господу имущи,/ молися от бед избавитися/ верою и любовию тя величающим.

Слава, глас 1:

Веселися днесь обителе Дивеевская!/ Воистинну священный и радостный праздник наста,/ непорочная бо невеста Христова Марфа/ песньми духовными ублажается,/ небеса убо достойно веселятся,/ инокини, молитвами тоя хранимыя, радуются,/ вернии благодать исцелений обретают,/ совершающе светлое торжество.

И ныне, праздника.

Вход. Прокимен дне. И чтения три мученическая.

На литии стихира, глас 6:

Веселися днесь земле Нижегородская и Тамбовская/ и торжествуй обителе Дивеевская!/ Наста бо память Марфы преподобныя,/ яже, от юности мирскаго мятежа избегши,/ любовию Христовою уязвися/ и, сестре Лазаря праведнаго уподобившися,/ евангельски благую часть избра./ Темже, ныне похвальныя песни воспевающе/ и славу Богу воздающе,/ житию тоя вси подражати усердно потщимся.

На стиховне стихиры, глас 2:

Чистоту от юности сохранивши,/ добродетельми светло, Марфо досточудная, украсилася еси/ и, любовию божественною уязвившися,/ Христу добре угодила еси./ Помози и нам, богоблаженная мати, чистоту сердца соблюдати/ и любовь евангельскую друг ко другу стяжати.

Стих: Дивен Бог во святых Своих,/ Бог Израилев.

Отроковице дивная и монашествующих украшение,/ преподобная мати Марфо,/ ты, в молитве непрестанней имя Христово в сердце твоем носящи/ и в трудех бденных даже до смерти пребывающи,/ силою Божественнаго Духа совершенное безстрастие стяжала еси,/ темже и Обителей Небесных достигла еси,/ идеже молишися о спасении душ наших.

Стих: Честна пред Господем/ смерть преподобных Его.

Торжествуй, земле Нижегородская,/ в прославлении новыя о тебе молитвенницы!/ Веселися обителе Дивеевская,/ имущи в себе сокровище многоценное,/ честныя мощи Марфы досточудныя,/ идеже днесь вси усердно молимся,/ во еже спастися нам.

Слава, глас 5:

Яко звезда многосветлая,/ сиянии духовными землю нашу просветила еси,/ преподобная мати наша Марфо,/ тьму скорбей разгоняющи/ и недуги врачующи./ Темже молися ко Господу,/ мир мирови даровати/ и душам нашим велию милость.

И ныне, праздника.

Тропарь, глас 2:

Собеседнице преподобнаго Серафима,/ дивная отроковице и мати наша Марфо,/ равноангельное житие стяжавши,/ на Небесех жительства достигла еси,/ идеже молишися о спасении душ наших.

На утрени

По 1-м стихословии седален, глас 7:

Яко звезда утренняя и солнце светлое, возсия днесь память твоя, преподобная мати Марфо. Темже молим тя: ум наш, нерадением омраченный, просвети и подвигни сердца монашествующих к подражанию постническаго твоего жития.

Слава, и ныне, праздника.

По 2-м стихословии седален, глас 1:

Осияема ныне непрестанною славою Пресвятыя Троицы, мати наша Марфо, и Божественнаго веселия и радости исполнена, молися о нас тепле ко Господу, во еже избавитися нам муки вечныя.

Слава и ныне праздника.

Величание:

Ублажаем тя,/ преподобная мати наша Марфо,/ и чтим святую память твою,/ ты бо молиши о нас/ Христа Бога нашего.

Псалом избранный: Терпя, потерпех Господа:

По полиелеи седален, глас 1:

Невесто прекрасная Чертога Царскаго, преподобная Марфо,/ ты, послушанию, воздержанию и молитве навыкши,/ во обители Дивеевстей подвиги просияла еси и милость от Господа улучила еси./ Темже молися прилежно о спасении душ наших.

Слава, и ныне, праздника.

Степенна, 1-й антифон 4-го гласа. Прокимен, глас 4: Дивен Бог во святых Своих,/ Бог Израилев. Стих: В церквах благословите Бога, Господа от источник Израилевых. Всякое дыхание: Евангелие от Матфеа, зачало 104.

По 50-м псалме стихира, глас 6:

Марфо богоносная,/ чадо возлюбленное преподобнаго Серафима,/ ты, послушание и безмолвие от юности возлюбивши,/ в молитве и посте просияла еси,/ и скорби и болезни, Христа ради, даже до смерти понесла еси,/ венцем Небесным от Него украсившися./ Темже молися о чтущих святую память твою.

Канон, глас 8.

Песнь 1

Ирмос: Колесницегонителя фараоня погрузи/ чудотворяй иногда/ Моисейский жезл, крестообразно поразив,/ и разделив море,/ Израиля же беглеца, пешеходца спасе,/ песнь Богови воспевающа.

Подаждь ми, Господи, словесе дар, да песньми восхвалю, в земнем уделе Божия Матере просиявшую, отроковицу дивную, преподобную матерь нашу Марфу.

Подобает по достоянию восхвалити преподобную Марфу, отроковицу непорочную, в подвизех древним отцем поревновавшую и Господу угодившую.

Благословение Пресвятыя Девы исполнивши, Марфо досточудная, велия угодница Божия и теплая наша предстательница явилася еси, молящися непрестанно о спасении душ наших.

Богородичен: Радуйся, Пресвятая Госпоже, освятившая Дивеево Твоим пришествием; радуйся, насадившая веру истинную. Радуйся, собравшая монашествующих множество.

Песнь 3

Ирмос: Небеснаго круга Верхотворче, Господи,/ и Церкве Зиждителю,/ Ты мене утверди в любви Твоей,/ желаний краю, верных утверждение,/ Едине Человеколюбче.

Великое смотрение Божие от утробы матерни освяти тя, Марфо многоплодная, и сосуд благоприятен Духа Всесвятаго показа тя, темже и избранница Владычицы явилася еси.

Желание неизреченныя красоты Христовы в души твоей имущи, радостно с сестрою Параскевою к старцу Серафиму потекла еси.

Преподобный Серафим, целомудрие и чистоту души твоея провидя, во общину Дивеевскую отроковицу тя, тринадесяти лет сущую, жительствовати направи.

Богородичен: Радуйся, во удел Себе Дивеево избравшая; радуйся, верным, пребывающим зде, Подательнице благ земных. Радуйся, Споручнице вечнаго спасения.

Кондак и икос праздника.

Слава, седален, глас 2:

Преподобная мати наша Марфо,/ ты, вся красная мира сего презревши/ и небесных благ возжелевши,/ молчанием, кротостию и смирением от юности твоея образ равноангельнаго жития явила еси,/ обители Дивеевския начальнице.

И ныне, праздника.

Песнь 4

Ирмос: Ты моя крепость, Господи,/ Ты моя и сила,/ Ты мой Бог, Ты мое радование,/ не оставль недра Отча/ и нашу нищету посетив./ Тем с пророком Аввакумом зову Ти:/ силе Твоей слава, Человеколюбче.

Царствие Божие, внутрь тебе сущее, измлада познавши, житие твое краткое подвиги молитвенными украсила еси, любовию к Жениху Небесному горящи.

Молитву непрестанную творящи, в кротости небесней и молчании радостно пребывала еси, Марфо всехвальная, чадо возлюбленное преподобнаго Серафима.

Всею душею Бога возлюбивши, в молитве непрестанней дух твой ко Господу возносила еси, Марфо досточудная, и подвиги духовными всех удивила еси.

Богородичен: Радуйся, теплая Ходатаице о подвизающихся во обители Твоей; радуйся, милость Сына Твоего до скончания века нам обещавшая. Радуйся, Заступнице рода христианскаго.

Песнь 5

Ирмос: Вскую мя отринул еси/ от лица Твоего, Свете Незаходимый,/ и покрыла мя есть чуждая тьма, окаяннаго,/ но обрати мя и к свету заповедей Твоих/ пути моя направи, молюся.

Имя Господне присно возносящи и Единаго Христа, и Сего распята, ведущи, ум твой Светом Божественным просвещала еси и сердце умилением услаждала еси.

Песнословим тя, мати Марфо, болезни бо и скорби иноческаго жития в терпении и кротости мужески претерпела еси.

Собеседница добрая и послушница смиренная преподобнаго Серафима сущи, мати Марфо, изрядно во обители потрудилася еси и, в молчании непрестанно пребывающи, в тайне откровения того о обители Дивеевстей сохранила еси.

Богородичен: Радуйся, Дево, яко благословением Твоим осени Дивеево сила Вышняго; радуйся, яко обитель Твоя многия инокини воспита. Радуйся, яко просия зде множество преподобных, молящихся о спасении душ наших.

Песнь 6

Ирмос: Очисти мя, Спасе,/ многа бо беззакония моя,/ и из глубины зол возведи, молюся,/ к Тебе бо возопих, и услыши мя,/ Боже, спасения моего.

Труды постническими и непрестанною молитвою дух твой укрепляла еси, подвигу преподобныя Александры подражающи.

Безплотную во плоти видеша тя сестры твоя, во отрочестве паче стариц духовно просиявшую.

Многоразличныя подвиги во обители Дивеевстей совершивши, яко златая голубица, сими от земли воспарила еси во Обители Небесныя, идеже помяни и нас, тя восхваляющих.

Богородичен: Радуйся, Владычице, яко на наследие Твое присно призираеши; радуйся, яко благодати и милости Твоея нас сподобляеши. Радуйся, благословение Сына Твоего на нас низводящая.

Кондак, глас 8:

Кротостию и смирением украсившися/ и любве Божественныя исполнившися,/ радость Небесную стяжала еси,/ отроковице юная и мати наша Марфо,/ и, в ангельский образ от преподобнаго Серафима облекшися,/ с мудрыми девами в Чертог Небесный вселилася еси,/ идеже молишися о спасении душ наших.

Икос:

Силы Небесныя радостно сретоша душу твою, преподобная мати Марфо, в преселении твоем во Обители Небесныя, идеже ныне почиваеши, Пресвятую Троицу прославляющи. Темже, велие дерзновение ко Господу имущи, не забуди нас, земных чад твоих, и молися о спасении душ наших.

Песнь 7

Ирмос: Отроцы еврейстии в пещи/ попраша пламень дерзновенно,/ и на росу огнь преложиша, вопиюще:/ благословен еси, Господи Боже во веки.

Дивно долготерпение твое бысть, мати Марфо, велия бо скорби и болезни, яко дар Божий, восприяла еси. Укрепи и нас молитвами твоими, в малодушии изнемогающих, скорби житейския в терпении понести и живота вечнаго достигнути.

В полунощи бодренно пребывающи и в безсонии целонощно бдящи, молитву Иисусову непрестанно творила еси, преподобная, темже и мудрым девам уподобилася еси.

Преподобнаго Серафима верная послушница бывши, Марфо досточудная, любовь евангельскую в сердце твоем стяжала еси и Небесному Жениху уневестилася еси.

Богородичен: Радуйся, благих даров рабом Твоим Всещедрая Подательнице; радуйся, во брани, в болезнех и трудех их премилосердая Утешительнице. Радуйся, надеждо и спасение душ наших.

Песнь 8

Ирмос: Седмерицею пещь/ халдейский мучитель/ Богочестивым неистовно разжже,/ силою же лучшею спасены сия видев,/ Творцу и Избавителю вопияше:/ отроцы, благословите,/ священницы, воспойте,/ людие, превозносите во вся веки.

Всем сердцем Бога возлюбивши, мати преподобная, служение Марфы и Марии соединяла еси: яко Марфа, в послушании пребывши, и, яко Мария, выну при ногу Иисусову приседящи.

Плакаше преподобный Серафим, кончину блаженныя Марфы духом предуведевый, дондеже узре душу ея во Царствии Небеснем воспевающую: благословите Господа во веки.

Царица Небесе и земли по отшествии твоем, мати Марфо, прият тя в лик дев святых, ты бо усердием благим повеления Сына Ея добре сотворила еси. Ныне же, в радости Небесней пребывающи, непрестанно Того песнословиши.

Богородичен: Радуйся, Хранительнице наша в настоящем веце; радуйся, Предстательнице и непостыдное упование в будущем. Радуйся, прилог всякаго зла от удела Твоего земнаго отражающая.

Песнь 9

Ирмос: Ужасеся о сем Небо,/ и земли удивишася концы,/ яко Бог явися человеком плотски/ и чрево Твое бысть пространнейшее Небес./ Тем Тя, Богородицу,/ Ангелов и человек чиноначалия величают.

Преподобная мати наша Марфо, Царицы Небесныя истинная послушнице, ты, начала тьмы века сего пособием Ея победивши, плоть умертвивши и дух ожививши, благодати Божественное действо прияла еси. Не престай молящися за ны ко Господу, помиловатися душам нашим.

Стезею тесною шествовавши, тьмочисленная коварства вражия победила еси и Подвигоположнику спасения нашего угодила еси. От Негоже венец славы приемши, молися о нас, да возможем Господу последовати и победители греха явитися.

Рака мощей твоих честных, мати наша Марфо, благоухает паче иных аромат, сердца верных услаждающи, и источает благодать исцелений в молитве к ним прибегающим.

Богородичен: Песни благодарственныя приносим Ти, Мати Божия, яко спасаеши нас присно от всяких бед и скорбей и любовию врачуеши немощи наша.

Светилен:

Радуйся, славная обителе Дивеевская, молитвенницу имущи в тебе просиявшую, преподобную Марфу, молящуюся прилежно, о еже избавитися нам от бед и скорбей и помиловатися душам нашим.

Слава, и ныне, праздника.

На хвалитех стихиры, глас 5.

Подобен: Радуйся, Живоносный Кресте:

Радуйся, обители Дивеевския начальнице,/ преподобная мати наша Марфо!/ Яко небо светлыми звездами украшено,/ житие твое многими подвиги исполнися,/ ты бо, в юных летех духовною крепостию утвердившися,/ ангельски на земли пожила еси./ Помози и нам неленостно во спасение трудитися/ и Единому Богу послужити,/ Егоже моли даровати душам нашим мир и велию милость.

Радуйся, преподобная мати наша Марфо,/ безмолвия и целомудрия усердная хранительнице!/ Ты, от юности Христа возлюбивши,/ Тому единому всем сердцем послужила еси/ и любовь евангельскую в сердце твоем стяжала еси./ Испроси нам, притекающим к раце мощей твоих:/ печалей утоление и болезней исцеление,/ чистоту помыслов и послушания совершеннаго,/ и душам нашим мир и велию милость.

Радуйся, преподобная мати наша Марфо,/ Царицы Небесныя верная служительнице!/ Ты, повеления Сына Ея добре исполняющи,/ кончину блаженную в юных летех прияла еси/ и лику святых дев сочеталася еси./ Ныне, в радости Небесней пребывающи,/ молися о нас Христу Богу и Пречистей Его Матери/ даровати душам нашим мир и велию милость.

Слава, глас 6:

Приидите, вернии людие,/ во святую обитель Дивеевскую,/ яже земный жребий Божия Матере нарицается,/ ублажим избранницу Пресвятыя Богородицы,/ преподобную Марфу достославную,/ угодницу Божию и теплую молитвенницу/ и, припадающе к ея многоцелебным мощем, сице рцем:/ молися ко Господу, всечестная мати наша,/ даровати нам мир и велию милость.

И ныне, праздника.

На Литургии служба преподобным женам и праздника.

Молитва

О, богомудрая мати наша Марфо! Ты, в простоте сердца поживши, кротостию Небесною и чистотою просияла еси и благоплодная послушница преподобнаго Серафима явилася еси. Буди нам, мати всечестная, ходатаица непрестанная о спасении душ наших, да молитвами твоими в страсе Божии утвердимся и горняя мудрствуем, а не земная. Помози нам, изнемогающим, укрепитися в любви и единомыслии и верным Христу пребыти, Емуже со Отцем и Святым Духом подобает всякая слава, честь и поклонение, во веки веков. Аминь.