Служба преподобномученицам Анне и Матроне Алексиевским

Текст службы утвержден решением Священного Синода
от 26 декабря 2019 года (журнал № 163).

Месяца марта в 1-й день

Преподобномучениц Анны и Матроны (Макандиных) Алексиевских

На велицей вечерни

На Господи, воззвах: стихиры, глас 5.

Подобен: Радуйся:

Радуйся, святая обителе Алексиевская,/ новыя заступницы на Небесех обретши,/ яже вкупе с преподобным Алексием, человеком Божиим,/ молят о нас Владыку Христа./ Темже, воспевающе их святое торжество,/ припадем к ним с верою и любовию,/ утешения и милости просяще.

Радуйтеся, преподобныя Иулиание и Евпраксие,/ обители Алексиевския начальницы,/ видяще чада ваша духовная добродетельми сияющия,/ сия бо страданий не убоявшяся,/ пред богоборцы Христа дерзновенно исповедаша,/ и, даже до смерти верны Ему пребывшя,/ мученических венцев сподобишася.

Радуйся, святых жен сословие,/ приемших в небесный лик две сестре свои,/ преподобномученицы Анну и Матрону,/ яже, миро добродетелей Жениху Христу принесше/ и слезами покаяния стопы Его омывшя,/ нетленною красотою добродетелей украсишася./ Таже, молитвою страдания превозмогше/ и горе сердца возвысившя,/ познаша радость Креста/ и явишася причастницы Пасхи нетленныя/ в невечернем дни Царствия Божия.

Радуйся, земле Владимирская,/ покровом Богоматере осененная,/ издревле угодники святыми прославленная,/ в последняя же лета новыя мученицы в себе возрастившая,/ тыя бо, яко цвети краснии,/ в тебе дивно прозябоша,/ украсившя всю землю Русскую.

Радуйтеся, преподобномученицы Анно и Матроно,/ веры Православныя поборницы,/ к Богу о нас теплыя ходатаицы,/ елеем чистоты исполненныя/ и кровию страдания ризы своя обагрившия,/ вы бо общницы мудрым девам бысте/ и в чертозех светлых вселистеся./ И ныне молите о святей обители вашей/ и душам нашим испросите велию милость.

Слава, глас 4:

Всевышний Владыко,/ в Троице славимый и покланяемый,/ ущедри ны благоприятными мольбами новых мучениц Твоих,/ пред мучители дерзновенно исповедавших Тя,/ Единаго истиннаго Бога,/ и Твое, Сыне Божий,/ неизреченное от Матере Девы спасительное воплощение.

И ныне, Богородичен: Иже Тебе ради:

Вход. Прокимен дне. И чтения три мученическая.

На литии стихиры, глас 4:

Добротою благочестия/ украсившя себе, мученицы святыя,/ в ризу спасения одеястеся/ и, страдания похвалою увенчавшяся,/ в селения Небесная вселистеся,/ идеже ныне молитеся о святей обители вашей/ и о почитающих вас любовию.

Слава, глас тойже:

Слезы постническия и миро кровей/ многою верою и любовию Христу принесли есте,/ преподобномученицы всечестныя,/ и ныне дерзновение имате/ молитися об оставлении грехов наших,/ просяще нам велия милости.

И ныне, Богородичен:

Жезл силы стяжавшя,/ Крест Сына Твоего, Богородице,/ тем побеждаем врага соблазны,/ любовию Тя непрестанно величающе.

На стиховне стихиры, глас 8:

Агницы словесныя,/ на пажити Христовой упасшеся/ и Господу Пастыреначальнику верность сохранившя,/ любовию к Нему уязвистеся/ и, яко жертвы приятныя, Богу принесостеся./ Егоже молите, страстотерпицы всехвальныя,/ во еже спастися нам.

Стих: Дивен Бог во святых Своих,/ Бог Израилев.

Приидите, людие,/ восхвалим Господа на месте сем,/ идеже преподобныя сестры наша Анна и Матрона/ посреде сонма новомучеников Бутовских просияша,/ разгоняюще мрак нощный, аки лучами солнечными./ Тех молитвами, Христе Боже,/ спаси души наша.

Стих: Приведутся Царю девы/ в веселии и радовании.

Преподобныя Анно и Матроно,/ земли нашея заступницы,/ вы житием многотрудным Господа прославившя/ и разум духовный стяжавшя,/ Жениху Христу Богу соединистеся/ и, венцы победныя от Него приимше,/ в чертозех Небесных вселистеся,/ идеже в радости хвалу непрестанно воспеваете.

Слава, глас 4:

Девство свое соблюдше/ и благочестия свет в сердцы своем возжегше,/ яко светильницы лучезарнии явистеся,/ преподобномученицы славныя,/ и мудрость свыше восприемше,/ мученически за Христа пострадали есте./ Темже вас ублажаем, заступницы наша,/ любовию память вашу совершающе.

И ныне, Богородичен: Призри на моления:

Тропарь, глас 5:

Христа Господа Иисуса верныя ученицы,/ Церкве Русския избранныя агницы,/ обители Алексиевския славо и украшение,/ преподобныя страстотерпицы Анно и Матроно,/ легкое иго и язвы Его любовию носяще,/ лествицею мучений к Нему, яко Небесному Жениху, востекли есте,/ Егоже молите сохранити в благочестии люди земли Русския/ и спасти души наша.

На утрени

По 1-м стихословии седален, глас 4:

Господи, праведныя любяй и грешныя милуяй, помилуй ны, падшия во глубину множества прегрешений, предстательством святых преподобномучениц Анны и Матроны, праведное житие свое страданием запечатлевших.

Слава, и ныне, Богородичен, глас тойже:

Под кров Твой, Пречистая Дево, прибегаем, приими молитвы наша и, не престай молящи Человеколюбца, спасти души наша.

По 2-м стихословии седален, глас 4:

Богатством тленным пренебрегше, мирскую красоту, преподобныя, остависте и, воздержанием житие свое украсившя, напасти вражия победисте и светильницы миру разумнии явистеся. Молитеся, блаженныя, помиловати души наша.

Слава, и ныне, Богородичен, глас тойже:

Пресвятая Дево, предвари и избави нас от враг видимых и невидимых, и всякаго прещения, Ты бо еси наша Заступница.

Величание:

Величаем вас,/ страстотерпицы преподобныя матери Анно и Матроно,/ и чтим честная страдания ваша,/ яже за Христа претерпели есте.

Псалом избранный: Бог нам Прибежище и Сила:

Седален, глас 4:

Души ваша кротостию украсившя и тела язвами мучения удобрившя, Краснейшему добротою, паче сынов человеческих, предстали есте, преподобномученицы честныя, за Русь многострадальную молящеся.

Слава, и ныне, Богородичен:

От Анны праведныя процветши, Дево, родила еси Царя Христа и радость роду человеческому даровала еси. Сего ради рождеству Твоему срадуются благочестивых жен сословие земли нашея, козни гонителей славно препобедивших.

Степенна, 1-й антифон, 4-го гласа. Прокимен, глас 4: Проидохом сквозе огнь и воду,/ и извел еси ны в покой. Стих: Разжегл ны еси, якоже разжизается сребро. Всякое дыхание: Евангелие от Матфеа, зачало 104.

По 50-м псалме стихира, глас 6:

Днесь невесты Христовы,/ страстотерпицы Анна и Матрона славныя,/ кровьми мученическими украшенныя,/ яко голубицы кроткия,/ криле поста и молитвы имущия,/ в чертог Небеснаго Жениха возлетевшя,/ с лики святых новомучеников Церкве Русския/ Престолу Божию предстоят/ и славят Превечнаго Бога.

Канон, глас 8

Песнь 1

Ирмос: Поим Господеви,/ проведшему люди Своя сквозе Чермное море,/ яко Един славно прославися.

Припев: Святыя преподобномученицы Анно и Матроно, молите Бога о нас.

Приимите пение, Анно и Матроно благославныя, от почитающих любовию постническия и мученическия подвиги ваша.

От юности ко Христу любовию пламеневшя, во обитель Алексиевскую притекли есте, да Единому Богу поработаете.

Преподобныя Анно и Матроно, имуще сердца, молитвою и слезами очищенная, подвиг мученический смиренно приясте.

Богородичен: Тебе Предстательницу имуще, Пречистая, славныя жены, постом и страданием змиеву державу сокрушившя, славу Небесную обретоша.

Песнь 3

Ирмос: Ты еси утверждение/ притекающих к Тебе, Господи,/ Ты еси Свет омраченных,/ и поет Тя дух мой.

Во Отечестве земнем, безбожием помраченнем, чужды явистеся, преподобномученицы славныя, обаче к защитнику обители вашея, Алексию, человеку Божию, тепле молитвы возносили есте, да сподобит Господь Небесных обителей достигнути.

Доблественне Богови поработавшя, плоти ваша со страстьми и похотьми распяли есте, преподобномученцы святыя, и души ваша любве ради Христовы не пощадили есте.

Страданьми и исповеданием Христа, святыя преподобномученицы, в селения Небесная внидосте, темже сохраняйте Русь Святую, Отечество ваше земное, в мире и единомыслии.

Богородичен: Тебе, Богородительнице, предстоят честныя жены, пощением крепко подвизавшыяся и мужественне врага низложившыя.

Седален, глас 2:

Новыя страстотерпицы земли Русския, мученически поприще земное скончавшыя и страданьми дерзновение ко Господу стяжавшыя, молитеся Ему, вас Укрепльшему, да и мы, егда найдет на ны час испытания, мужества дар Божий восприимем.

Слава, и ныне, Богородичен, глас 4:

Пресвятая Дево, огради и избави нас от враг видимых и невидимых, и от всякаго зла, Ты бо еси наша Защитница.

Песнь 4

Ирмос: Услышах, Господи,/ смотрения Твоего таинство,/ разумех дела Твоя/ и прославих Твое Божество.

Алексию, человеку Божию, подражавшя, мира и плоти мудрования отвергостеся и, в добродетелех Христовых поучающяся, обитель вашу дивно украсисте и, яко крини благоуханнии, в ней процветосте.

Препобедившя постом страсти плотския, мучения стезю мужественне прошли есте и в Небесных селениих водворилися есте, богоблаженныя.

Божественную благодать приимшя, преподобномученицы Анно и Матроно, и страх смертный препобедившя, любовь к Богу даже до смерти сохранили есте.

Богородичен: Богомати Пречистая, Господь от Тебе неизреченно плоть прият, сего ради жен естество, иногда под клятвою бывшее, ныне возвеличися.

Песнь 5

Ирмос: Утренююще, вопием Ти:/ Господи, спаси ны,/ Ты бо еси Бог наш,/ разве Тебе иного, не вемы.

От юности Сладчайшему Жениху Христу обручившяся, молитвою к Нему горечь страдания услаждали есте, и нас научите имя Христово умом и сердцем присно призывати.

Егда враг рода человеча воздвиже во Отечестве нашем гонение лютое от безбожник, тогда вы, святыя страстотерпицы, явившя мужество необоримое, оружием Креста Господня победу восприяли есте.

Всю надежду на Господа возложившя, силою Духа Святаго врага низложили есте, в немощи бо вашей сила Божия совершися. И ныне молите за ны, да не прикоснется нас злоба греховная.

Богородичен: Тебе, Богородительнице, предстоят честныя жены, доблественне Богу поработавшыя и крестом мучения врага низложившыя.

Песнь 6

Ирмос: Ризу мне подаждь светлу,/ одеяйся светом, яко ризою,/ Многомилостиве, Христе Боже наш.

Обители и службы церковныя лишившяся, сердца своя храмы Бога Живаго соделали есте и, благодатию Божиею укрепляемы, присно хвалу Господу воспевали есте.

Евангелия исповедницы и Православия ревнительницы, невесты чистыя Христу Богу и украшение земли нашея явистеся, страстотерпицы славныя.

Пучину кровных страданий прошедшя, святыя преподобномученицы Анно и Матроно, Господа не отвергостеся, обаче, изгнания и бедствия мужественне претерпевающя, непобеждены пребысте.

Богородичен: Жены, постом и страданием Господу угодившыя, егда благочестие поношению предадеся в стране нашей, ныне непрестанно молятся Сыну Твоему, Пречистая, да утвердится Церковь Русская.

Кондак, глас 4:

Яко крини багряновиднии,/ посреде терний безбожия/ в земнем Отечестве вашем процвели есте,/ преподобномученицы Анно и Матроно честныя,/ подвиги воздержания страданием украсившя,/ востекли есте к Небесному Жениху Христу,/ Иже увенча вы красотою славы нетленныя.

Икос:

Како воспоем вы, Церкве Русския и обители Алексиевския похвалу, достоблаженныя преподобномученицы Анно и Матроно, от юности житейская попечения отринувшыя и благую часть и единое на потребу избравшыя, преподобие законным мучением запечатлевшыя и сего ради сподобльшыяся хранити и исполнити слово Христа Бога нашего, Иже увенча вы красотою славы нетленныя.

Песнь 7

Ирмос: Отроцы еврейстии в пещи/ попраша пламень дерзновенно/ и на росу огнь преложиша, вопиюще:/ благословен еси, Господи Боже, во веки.

Горькое изгнание в край северный претерпели есте, преподобныя Анно и Матроно, на всяком месте и на всякий час хвалу Богу возсылающя.

Радуйся, краю Архангелогородский в последняя лета многия мученики и исповедники приемый, тии бо, изгнание претерпевающе, подвиги своими, яко солнце, в тебе просияша, теплыми молитвами и слезами покаяния умягчающе твое суровство.

Все упование на Господа возложили есте, святыя преподобномученицы Анно и Матроно, всецело в руце Его себе предающя, и в страданиих сретившя Христа, в истканную от Вышния благодати одежду облекостеся.

Богородичен: Яко Бога рождшую плотию, Пречистая, нравом благочестным чтим Тя непрестанно, вкупе с честными женами, постом просиявшими и страданьми своими врага низложившими.

Песнь 8

Ирмос: Седмерицею пещь/ халдейский мучитель/ богочестивым неистовно разжже,/ силою же лучшею спасены, сия видев,/ Творцу и Избавителю вопияше:/ отроцы, благословите,/ священницы, воспойте,/ людие, превозносите во вся веки.

Во дни гонения безбожнаго, яко фимиам благовонный, принесосте Господу молитвы и подвиги ваша, преподобномученицы славныя, ныне же на месте страданий ваших Безкровная Жертва Богу приносится и торжествует Церковь земная и Небесная.

Во тьме греховней, землю нашу постигшей, исповеданием Христа возсияли есте, святыя преподобномученицы Анно и Матроно, темже молим вас, просветите нас светом благодати Божия.

Егда благочестие во Отечестве нашем оскуде, тогда попусти Господь гонение лютое и потекоша реки крове христианския. Молите убо о нас, святыя новомученицы, да пребудем верни Христу Спасителю нашему до скончания века.

Богородичен: С новомученики и исповедники Церкве Русския, Пречистая, и всеми святыми женами умоли Единаго во святых Почивающаго сохранити землю нашу, славословящую Тя во вся веки.

Песнь 9

Ирмос: Ужасеся о сем Небо,/ и земли удивишася концы,/ яко Бог явися человеком плотски/ и чрево Твое бысть пространнейшее Небес./ Тем Тя, Богородицу,/ Ангелов и человек чиноначалия величают.

В послушание облекшяся, вонями добродетелей обитель Алексиевскую облагоухали есте, тем воспеваем святую память вашу, невесты Христовы прекрасныя. Молите о нас Христа Человеколюбца, да омыет миром благодати души наша и усладит я росою любве.

Узы Христовы восприемшя, даже до смерти за Господом последовали есте, новомученицы славныя, гонителей лютых не убоявшеся. Молите убо Владыку Христа о спасении душ наших.

Чашу страданий на земли испившя, радость велию на Небесех прияли есте, идеже ныне ликовствуете в Невечернем дни Царствия Божия.

Богородичен: Тебе, Всепетую Владычицу, яко Всецарицу, Христу Царю предстоящую, вкупе с преподобномученицами Анною и Матроною достойно величаем.

Светилен:

Светлеется днесь Церковь Русская подвиги вашими, святыя новомученицы, и славит Христа, Солнце Правды, от Девы Возсиявшаго. Мы же со умилением вопием: молитвами преподобномучениц Анны и Матроны просвети ны, Господи, во тьме греховней сущия.

Слава, и ныне, Богородичен:

Не престай, Дево Богородице, молити о нас Сына Твоего, Человеколюбца Бога нашего, на Тя бо надежду возлагаем и Твоим предстательством избавляемся от бед, и страстей, и прегрешений, и болезней.

На хвалитех стихиры, глас 8.

Подобен: О, преславнаго чудесе:

О, преславнаго чудесе!/ В последняя времена возсиявают мученицы/ и мрак прелести отгоняют/ и нечестие низлагают,/ вера же христианская утверждается/ и вернии радости исполняются,/ праздник же новоявленным составляют,/ вопиюще Христу Богу:/ Ты еси мучеников похвала и победа.

О, преславнаго чудесе!/ Сестры единокровныя по плоти сущя,/ сестры духовныя пребыша/ и, во едину обитель иноческую водворившяся,/ единомысленне Господу послужиша/ и за Христа кровь купно пролияша./ Темже и нас научают/ в любви и единомыслии пребывати/ и Господа всем сердцем прославляти.

О, преславнаго чудесе!/ Жены немощныя сущя,/ крепость мужескую являют/ и, щитом веры и крестом вооружившяся,/ сопротивным силам непобедими бывают/ и демонская ополчения побеждают./ Ныне же, яко божественнии вои,/ со Ангелы на Небесех ликуют,/ и верныя молитвами своими заступают.

О, преславнаго чудесе!/ Страстотерпицы славныя Анна и Матрона,/ яко вдовица две лепте,/ все житие свое в сокровищницу Церкве Русския ввергоша,/ воздержание и страдание,/ молитву и чистоту душевную/ в дар Христу принесшя./ Ныне же, яко мудрыя девы,/ в чертозе Небеснем пребывают.

Слава, глас тойже:

Приидите, мучениколюбцы,/ приидите, составим лик,/ торжествующе и Бога прославляюще/ в праздник преподобномучениц Анны и Матроны,/ сия бо скорби не уклонишася,/ ниже темницы убояшася,/ гладом и хладом измождаемыя/ и многовидными муками умерщвляемыя,/ яко агницы незлобивыя, смерть прияша./ И ныне в радости святых/ молят Триединаго Бога о земнем Отечестве своем.

И ныне, Богородичен, глас 8.

Подобен: О, преславнаго чудесе:

О, преславнаго чудесе!/ Небесе и земли Царица,/ от святых сродников наших умоляемая,/ до ныне землю Русскую покрывает/ и лика Своего изображении милостивно обогащает./ О, Владычице Державная!/ Не престани и на будущее время/ во утверждение на Руси Православия/ милости и чудеса изливати до века. Аминь.

На Литургии

Блаженна от канона песнь 3-я и 6-я. Прокимен, глас 4: Дивен Бог во святых Своих,/ Бог Израилев. Стих: В церквах благословите Бога, Господа от источник Израилевых. Апостол к Коринфяном, зачало 181. Аллилуиа, глас 4: Воззваша праведнии, и Господь услыша их, и от всех скорбей их избави их. Стих: Многи скорби праведным, и от всех их избавит я Господь. Евангелие от Луки, зачало 33. Причастен: Радуйтеся, праведнии, о Господе, правым подобает похвала.

Молитва

О, всехвальныя преподобномученицы Анно и Матроно, кроткия Христовы агницы, обители Алексиевския цвети благоуханнии! Сестры единокровныя по плоти сущя, сестры духовныя бысте, во едину же обитель иноческую притекшя, любовию Христу последовасте и, благое иго заповедей Его терпеливо подъемшя, язвы же Его преподобне носящя, во дни гонений на Церковь Русскую мужественне во исповедании Православныя веры пребысте и, житие монашеское подвигом мученничества увенчавшя, в чертог Небеснаго Жениха водвористеся.

Темже молим вас, мученицы славныя: испросите у Всещедраго Бога Церкви нашей в мире и единомыслии пребывати, земному Отечеству вашему во благоденствии сохранитися; женам, подвиг иночества восприимшим, в добродетелех монашеских добре подвизатися.

Молитеся о святей обители Алексиевстей и о всех с верою и любовию к вам притекающих. Научите ны, святыя преподобномученицы, во смирении и любви неленостно Господу служити, духом горяще, в молитве пребывати и за вся Творца благодарити. Испросите нам время на покаяние и твердость во исповедании Православныя веры, да молитвами вашими сподобимся прославляти Имя Пресвятыя Троицы, Отца и Сына и Святаго Духа, во веки веков. Аминь.