Служба Пресвятой Богородице в честь Ее иконы «Свенская-Печерская», 17 августа
Текст утвержден Священным Синодом
Русской Православной Церкви
15 июля 2016 года (журнал № 70)
Ме́сяца а́вгуста в 17-й день
Пра́зднование Пресвяте́й Влады́чице на́шей Богоро́дице и Присноде́ве Мари́и
ра́ди ико́ны Ея́, имену́емыя «Све́нская-Пече́рская»
На вели́цей вече́рни
На Го́споди, воззва́х: стихи́ры на 8: пра́здника 3, Све́нския 5, глас 1.
Подо́бен: О ди́вное чу́до:
О, ди́вное чу́до!/ Блага́я Засту́пница/ усе́рдныя моли́твы ве́рных прие́мши,/ си́лою Свое́ю Боже́ственною/ и посо́бием Све́нскаго о́браза Своего́/ злове́рных супоста́т дале́че отгоня́ет,/ и град Брянск и окре́стныя ве́си весе́лия исполня́ющи,/ Е́йже возопии́м, ве́рнии,/ покро́вом Ея́ осеня́еми:/ Благода́тная, ра́дуйся,/ с Тобо́ю Госпо́дь,// подая́й чту́щим Тя ве́лию ми́лость.
Ни отку́ду наде́ющеся/ по́мощи улучи́ти,/ то́кмо Тебе́ моля́щеся, Пречи́стая,/ и А́нгелом гове́йную ико́ну Твою́/ по сто́гнам гра́да лю́дие обнося́ще,/ а́бие весть об избавле́нии/ от наше́ствия вра́жия получи́ша/ и благода́рно воспе́ша Ти:/ Благода́тная, ра́дуйся,/ с Тобо́ю Госпо́дь,// подая́й чту́щим Тя ве́лию ми́лость.
Твое́ сла́вят заступле́ние/ свяще́нных собо́ри,/ мона́си и мирсти́и,/ и во́ини христолюби́вии,/ ра́дуется земля́ Бря́нская,/ Све́нскою ико́ною Твое́ю крася́щися,/ к не́йже припа́дают ве́рнии,/ со Арха́нгелы и А́нгелы воспева́юще:/ Благода́тная, ра́дуйся,/ с Тобо́ю Госпо́дь,// подая́й чту́щим Тя ве́лию ми́лость.
Кре́пкое Предгра́дие/ и Сте́ну необори́му,/ обре́тше Тя, Влады́чице,/ при́сно на по́мощь призыва́ем:/ избавля́й нас от ви́димых и неви́димых враг,/ па́че же от страсте́й безче́стия,/ собери́ расточе́нныя воеди́но,/ правосла́вие соблюди́ непоколеби́мо./ Благода́тная, ра́дуйся,/ с Тобо́ю Госпо́дь,// подая́й чту́щим Тя ве́лию ми́лость.
Вертогра́д духо́вный,/ оби́тель Све́нскую,/ ме́сто, Тобо́ю избра́нное,/ иде́же мона́хов ли́цы/ обстоя́т всечестну́ю ико́ну Твою́,/ грехо́в разреше́ния прося́ще/ и жития́ исправле́ния,/ и прича́стия Боже́ственныя сла́вы Твоея́,/ не оста́ви, Всепе́тая,/ но благоутро́бно уще́дри,// да́рующи чту́щим Тя ве́лию ми́лость.
Сла́ва, и ны́не, пра́здника, глас 2. Я́же Небе́с вы́шшая су́щи:
Вход. Проки́мен дне. Чте́ния три Богоро́дицы.
Бытия́ чте́ние (глава́ 28):
Изы́де Иа́ков от студенца́ кля́твеннаго, и и́де в Харра́нь./ И обре́те ме́сто, и спа та́мо. За́йде бо со́лнце,/ и взят от ка́мения ме́ста того́, и положи́ возгла́вие себе́, и спа на ме́сте о́ном,/ и сон ви́де:/ И се ле́ствица утвержде́на на земли́, ея́же глава́ досяза́ше до небе́с,/ и А́нгели Бо́жии восхожда́ху и низхожда́ху по ней./ Госпо́дь же утвержда́шеся на ней, и рече́:/ аз Бог Авраа́мов, отца́ твоего́, и Бог Исаа́ков, не бо́йся:/ земля́, иде́же ты спи́ши на ней, тебе́ дам ю́, и се́мени твоему́./ И бу́дет се́мя твое́, я́ко песо́к земны́й, и распространи́тся на мо́ре, и ли́ву, и се́вер, и на восто́ки:/ и возблагословя́тся о тебе́ вся коле́на земна́я и о се́мени твое́м./ И се аз с тобо́ю, сохраня́яй тя на вся́ком пути́, а́може а́ще по́йдеши./ И возвращу́ тя в зе́млю сию́, я́ко не и́мам тебе́ оста́вити, до́ндеже сотвори́ти Ми вся, ели́ка глаго́лах тебе́./ И воста́ Иа́ков от сна своего́, и рече́:/ я́ко есть Госпо́дь на ме́сте сем, аз же не ве́дех./ И убоя́ся, и рече́: я́ко стра́шно ме́сто сие́;/ несть сие́, но дом Бо́жий, и сия́ врата́ Небе́сная.
Проро́чества Иезеки́илева чте́ние (главы́ 43 и 44):
Та́ко глаго́лет Госпо́дь:/ бу́дет от дне осма́го и про́чее, сотворя́т иере́и на олтари́ всесожже́ния ва́шего,/ и я́же спасе́ния ва́шего,/ и прииму́ вы, глаго́лет Адонаи́ Госпо́дь./ И обрати́ мя на путь врат святы́х вне́шних,/ зря́щих на восто́ки, и сия́ бя́ху затворе́на./ И рече́ Госпо́дь ко мне:/ врата́ сия́ затворе́на бу́дут и не отве́рзутся,/ и никто́же про́йдет сквозе́ их;/ я́ко Госпо́дь Бог Изра́илев про́йдет и́ми, и бу́дут затворе́на./ Я́ко игу́мен ся́дет в них сне́сти хлеб,/ по пути́ Ела́мских врат вни́дет, и по пути́ его́ изы́дет./ И введе́ мя по пути́ врат святы́х, су́щих к се́веру, пря́мо хра́му,/ и ви́дех, и се испо́лнь сла́вы храм Госпо́день.
Царств тре́тиих чте́ние (глава́ 8):
Бысть, я́ко соверши́ Соломо́н е́же созда́ти Дом Госпо́день./ И собра́ вся ста́рцы Изра́илевы в Сио́н,/ вознести́ киво́т заве́та Госпо́дня из гра́да Дави́дова: сей есть Сио́н./ И взя́ша свяще́нницы киво́т заве́та Госпо́дня,/ и ски́нию свиде́ния, и вся сосу́ды святы́я,/ я́же в Ски́нии свиде́ния./ И царь, и весь Изра́иль пред киво́том./ И внесо́ша свяще́нницы киво́т заве́та Госпо́дня на ме́сто его́,/ в дави́р хра́ма, во свята́я святы́х, под кри́ла Херуви́мов./ Я́ко Херуви́ми бя́ху распросте́рты крила́ми над ме́стом киво́та:/ и покрыва́ху Херуви́ми над киво́том/ и над свята́я его́ свы́шше./ И не бе в киво́те, кроме́ двух скрижа́лей заве́та,/ я́же положи́ та́мо Моисе́й в Хори́ве, я́же завеща́ Госпо́дь./ И бысть, я́ко изыдо́ша свяще́нницы от свята́го,/ и о́блак испо́лни дом./ И не возмого́ша свяще́нницы ста́ти служи́ти от лица́ о́блака:/ я́ко испо́лнися сла́вы Дом Го́спода Бо́га Вседержи́теля.
На лити́и стихи́ры, глас 3:
Воспо́йте Го́сподеви, до́ли и хо́лми,/ дубра́вы и ре́ки Бря́нския земли́,/ се бо Цари́ца Богоотрокови́ца/ Све́нским-Пече́рским о́бразом Свои́м,/ я́ко щито́м несокруши́мым/ наше́ствие злочести́вых отража́ет,/ и в бе́гство неудержи́мое тех обраща́ет,// спаса́ющи от лю́тых град и ча́да Своя́.
Держа́вное Твое́ заступле́ние/ от сопроти́вных нахожде́ния и ве́ры поруга́ния/ Све́нскою ико́ною нам дарова́нное/ досто́йно пра́зднующе, Влады́чице,/ приле́жно мо́лим Тя:/ моли́ о лю́дех Росси́йских,/ да николи́же ко́зньми вра́жиими от пра́выя ве́ры отвратя́тся// и в благоче́стии непоколеби́ми да пребу́дут.
Сла́ва, и ны́не, глас 8.
Подо́бен: О пресла́внаго чудесе́:
О пресла́внаго чудесе́!/ О Бо́жия к нам гре́шным долготерпе́ния!/ Гро́зное Боже́ственное преще́ние врази́ разуме́вше,/ благода́тию Све́нскаго о́браза Твоего́, Цари́це Небе́сная,/ стра́хом одержи́мии,/ в бе́гство внеза́пное обрати́шася,/ си́лою свы́ше гони́ми,/ град же Твой и лю́ди весе́лия испо́лнишася,// благода́рно Тя велича́юще.
На стихо́вне стихи́ры, глас 4:
Весели́тся днесь све́тло/ сла́вный град Брянск и Све́нская оби́тель,/ я́ко святу́ю Твою́ ико́ну, Влады́чице,/ Боже́ственными чудесы́ просла́вила еси́/ и полки́ вра́жия вспять обрати́ла еси́,// я́ко Возбра́нная Воево́да Непобеди́мая.
Стих: Помяну́ и́мя Твое́/ во вся́ком ро́де и ро́де.
Во́инства правосла́внаго благопоспеше́ние,/ борце́в му́жество, хра́брых Спобо́рнице,/ безпомо́щных Защи́тнице,/ мо́лим Тя кре́пость ору́жию на́шему дарова́ти,/ да низло́жатся ви́димыя и неви́димыя враги́,/ возстаю́щия на ны,// Тобо́ю бо побе́ды воздви́жутся.
Cтиx: Лицу́ Твоему́ помо́лятся/ бога́тии лю́дстии.
Зна́мение побе́дное от ико́ны Богома́тере ви́девше,/ пра́здник че́стен соста́вим,/ и ра́достно воспои́м Пресла́вную на́шу Засту́пницу,/ зе́млю Ру́сскую в достоя́ние Себе́ избра́вшую,/ и на вся́ком ме́сте благода́ть Свою́ явля́ющую,// да пребу́дут покро́в и ми́лость Ея́ над на́ми во ве́ки.
Сла́ва, и ны́не, пра́здника, глас 2: Всенепоро́чная Неве́ста:
На благослове́нии хле́бов тропа́рь Све́нския, два́жды,
и пра́здника, еди́ножды.
Тропа́рь, глас 5:
Пресвята́я Де́во Богоро́дице,/ земли́ Бря́нстей благослове́ние и покро́в/ Све́нский-Пече́рский о́браз Твой дарова́ла еси́,/ и́мже правосла́вие утвержда́еши,/ е́реси и раско́лы побежда́еши,/ исцеле́ния источа́еши,/ наше́ствия иноплеме́нных отража́еши/ и междоусо́бныя бра́ни умиря́еши,/ те́мже благода́рно воспева́ем Тя,// Оте́чества на́шего похвалу́ и заступле́ние.
На у́трени
На Бог Госпо́дь: тропа́рь пра́здника, два́жды. Сла́ва, и ны́не, Све́нския.
По 1-м стихосло́вии седа́лен, глас 2:
Егда́ приступи́ша ко гра́ду Бря́нску свире́пии ра́тницы,/ тогда́ лю́дие, Све́нский о́браз Твой по сто́гнам гра́да обнося́ще, со слеза́ми вопия́ху Тебе́:/ о Пречи́стая Влады́чице Богоро́дице,/ по грехо́м на́шим наидо́ша сия́ на ны,/ но да́руй нам вре́мя на покая́ние,/ не преда́ждь ча́да Твоя́ в ру́ки злове́рных,/ Твое́ бо есмы́ достоя́ние, спаси́ нас.
Сла́ва, и ны́не, пра́здника, глас 3: В Небе́сная мы́сленная Твоя́ душа́:
По 2-м стихосло́вии седа́лен, глас 4:
Днесь град Брянск побе́дным заступле́нием Твои́м хва́лится, Ма́ти Бо́жия,/ и благове́рнии лю́дие благогове́йно лобыза́ют Све́нский о́браз Твой, уми́льно зову́ще:/ о, кре́пкая на́ша Помо́щнице и ору́жие на враги́ непосты́дное,/ не забу́ди покрыва́ти христоимени́тыя рабы́ Твоя́,/ и неотсту́пно пребыва́й с на́ми во ве́ки.
Сла́ва, и ны́не, пра́здника, глас той́же: В ру́це нас ра́ди вочелове́чшагося:
Велича́ние:
Досто́йно есть/ велича́ти Тя,/ Богоро́дице,/ земли́ Ру́сския Засту́пницу Небе́сную,// Све́нский о́браз Свой в ней просла́вльшую.
И́но велича́ние:
Велича́ем Тя,/ Пресвята́я Де́во,/ и чтим о́браз Твой святы́й,/ и́мже от нахожде́ния злове́рных// град Твой изба́вила еси́.
Псало́м избра́нный:
1 лик: Освяти́л есть селе́ние Свое́ Вы́шний.
2 лик: Предста́ Цари́ца одесну́ю Тебе́.
1 лик: В ри́зах позлаще́нных оде́яна, и преиспещре́на.
2 лик: Вся сла́ва Дще́ре Царе́вы внутрь.
1 лик: Пресла́вная глаго́лашася о Тебе́, гра́де Бо́жий.
2 лик: Слы́ши, Дщи, и виждь, и приклони́ у́хо Твое́.
1 лик: И забу́ди лю́ди Твоя́ и дом отца́ Твоего́.
2 лик: И возжела́ет Царь добро́ты Твоея́, зане́ Той есть Госпо́дь Твой.
1 лик: Лицу́ Твоему́ помо́лятся бога́тии лю́дстии.
2 лик: Не удали́ по́мощь Твою́ от мене́, на заступле́ние мое́ вонми́.
1 лик: Во́ньже а́ще день призову́ Тя, ско́ро услы́ши мя.
2 лик: Спаси́ мя ми́лостию Твое́ю.
1 лик: Возвеселя́тся вси упова́ющии на Тя, и похва́лятся о Тебе́ лю́бящии и́мя Твое́.
2 лик: Помяну́ и́мя Твое́ во вся́ком ро́де и ро́де.
По полиеле́и седа́лен, глас 4:
Безпомо́щным По́моще и ненаде́ющимся Наде́ждо,/ правосла́вных похвало́, злосла́вных же посрамле́ние, Богоро́дице Де́во,/ я́коже дре́вле град Брянск от нахожде́ния супоста́т изба́вила еси́,/ си́це и ны́не Ма́терними Твои́ми щедро́тами посети́ чту́щих Све́нский о́браз Твой,/ Оте́чество на́ше укрепи́,/ Це́рковь Святу́ю непоколеби́му от ересе́й и раско́лов соблюди́,/ и Правосла́вие в ми́ре сохрани́.
Сла́ва, и ны́не, то́йже.
Степе́нна, 1-й антифо́н 4-го гла́са. Проки́мен, глас 4: Слы́ши, Дщи, и виждь,/ и приклони́ у́хо Твое́. Стих: Отры́гну се́рдце мое́ сло́во бла́го, глаго́лю аз дела́ моя́ царе́ви. Вся́кое дыха́ние: Ева́нгелие от Луки́, зача́ло 4.
По 50-м псалме́ стихи́ра, глас 6:
По грехо́м на́шим/ умно́жишася в нас безу́мнии,/ и́же глаго́лют в сердца́х свои́х, я́ко Бо́га несть/ и пропове́дуют уче́ния па́губная и развраще́нная,/ малоду́шныя от Святы́я Це́ркве отторга́юще,/ но, о Пречи́стая Богоро́дице,/ я́коже дре́вле о́чи благове́рнаго кня́зя Рома́на просвети́ла еси́/ и иноплеме́нных от гра́да Бря́нска отгнала́ еси́,/ си́це заблу́ждшия просвети́ и злосла́вныя устраши́,// и спаси́ ду́ши на́ша.
Кано́н пра́здника, кир Иоа́нна Дамаскина́. Глас 4.
И Све́нския кано́н, его́же краегране́сие:
Ра́дуйся, Благода́тная, Све́нская похвало́. Глас то́йже.
Песнь 1
Ирмо́с: Отве́рзу уста́ моя́,/ и напо́лнятся Ду́ха,/ и сло́во отры́гну Цари́це Ма́тери,/ и явлю́ся, све́тло торжеству́я,// и воспою́ ра́дуяся Тоя́ чудеса́.
Ра́дуйся, Бря́нская земле́, и весели́ся, Све́нская оби́тель,/ велегла́сно пою́ще пресла́вное заступле́ние Бо́жия Ма́тере,/ Я́же Све́нскою ико́ною Свое́ю ве́рныя лю́ди от супоста́т изба́ви.
А́ще не бы Твоя́ ми́лость к нам была́, Преблагослове́нная Влады́чице,/ вма́ле бы врази́ лю́тии град Твой разори́ли и святы́ни правосла́вныя поруга́нию пре́дали,/ но сих вспять обрати́ла еси́.
Днесь церко́вная разширя́ются не́дра, прие́млюще бога́тство благода́ти Де́вы Богоро́дицы,/ Све́нскою бо ико́ною Свое́ю правосла́вныя от ви́димых и неви́димых враг огражда́ет.
Ужасо́шася иноплеме́нных по́лчища и побего́ша, Боже́ственным преще́нием гони́ми,/ преложи́ся бо пра́ведный Бо́жий гнев на ми́лость к нам/ хода́тайством Пречи́стыя Богоро́дицы.
Песнь 3
Ирмо́с: Твоя́ песносло́вцы, Богоро́дице,/ Живы́й и Незави́стный Исто́чниче,/ лик Себе́ совоку́пльшия, духо́вно утверди́,// в Боже́ственней Твое́й сла́ве/ венце́в сла́вы сподо́би.
Спасе́ние правосла́вно велича́ющим Тя соде́лала еси́ посреде́ земли́ Бря́нския, Богоро́дице Де́во,/ воздви́женней бо ико́не Твое́й свяще́нных рука́ми,/ возду́х освяти́ся и полки́ бесо́вския отгна́шася.
Явле́нием ми́лости Твоея́, Ма́ти Бо́жия,/ да веселя́тся правосла́вных собо́ри, чту́щии чудотво́рный Све́нский о́браз Твой,/ ерети́ческое же со́нмище да посрами́тся и, я́ко прах, да возмете́тся от лица́ Бря́нския земли́.
Благослове́нная Влады́чице, десну́ю стопу́ Твою́ утвержде́ну на ка́мени на Све́нском о́бразе Твое́м зря́ще, приле́жно мо́лим Тя:/ на ка́мени пра́выя ве́ры рабы́ Твоя́ утверди́.
Ле́потою чуде́с облече́ся Све́нская ико́на Богома́тере,/ ю́же стра́хом и ра́достию лобыза́ем, бра́тие, ду́ши и телеса́ очи́стивше,/ то́ю бо Цари́ца Небесе́ и земли́ с на́ми пребыва́ет.
Конда́к и и́кос пра́здника.
Седа́лен, глас 1:
Прииди́те, ру́сстии собо́ри,/ восхва́лим сте́ну и забра́ло Правосла́внаго Оте́чества на́шего,/ Цари́цу Богоро́дицу,/ и Боже́ственное сокро́вище, Све́нскую ико́ну Ея́ иму́ще,/ е́юже град Брянск от нахожде́ния иноплеме́нных изба́вися,/ побе́ды над страстьми́ у Влады́чицы испро́сим,/ от Нея́ ро́ждшагося Бо́га сла́вяще.
Сла́ва, и ны́не, пра́здника, глас то́йже: Всечестны́й лик прему́дрых апо́стол:
Песнь 4
Ирмо́с: Седя́й в сла́ве, на Престо́ле Божества́,/ во о́блаце ле́гце,/ прии́де Иису́с Пребоже́ственный,/ нетле́нною дла́нию, и спасе́ зову́щия:// сла́ва, Христе́, си́ле Твое́й.
А́нгельстии чи́ни стра́хом слу́жат чу́дней Бо́жия Ма́тере ико́не,/ челове́цы благогове́йно покланя́ются, и вся тварь ра́дуется,/ сла́вящи си́лу непобеди́мую Пречи́стыя Влады́чицы.
Где суть де́рзости злочести́вых, всу́е хва́лящихся погуби́ти достоя́ние Твое́, Богоро́дице?/ Па́мять их поги́бнет с шу́мом, Твое́ же заступле́ние вси ро́ди сла́вят.
О́браз Све́нский Цари́цы Богоро́дицы гра́ду Бря́нску дарова́ся/ я́ко стена́ необори́мая и щит несокруши́мь,/ его́же ны́не обстоя́ще любо́вию, Первообра́зней сла́ву возсыла́ем.
Днесь ле́тнюю па́мять соверша́юще/ избавле́ния Бря́нския земли́ от супоста́т посо́бием Богома́тере,/ приле́жно мо́лимся Ей Правосла́вие утверди́ти, е́реси же и раско́лы разори́ти.
Песнь 5
Ирмо́с: Ужасо́шася вся́ческая/ о Боже́ственней сла́ве Твое́й:/ Ты бо, Неискусобра́чная Де́во,/ име́ла еси́ во утро́бе над все́ми Бо́га,/ и родила́ еси́ Безле́тнаго Сы́на,/ всем воспева́ющим Тя// мир подава́ющая.
А́ще и изощря́ют язы́к свой проти́ву Це́ркве Правосла́вныя еретицы́ и раско́льницы,/ и непра́вды сплета́ют рука́ми свои́ми, всу́е тружда́ются,/ я́ко паучи́ну разори́т сия́ Госпо́дь Бог, я́коже дре́вле сове́т супоста́тов моли́твами Богома́тере.
Твоего́ к нам благоволе́ния зало́г,/ Све́нскую-Пече́рскую ико́ну Твою́, Влады́чице,/ стра́жа неусы́пна и заступле́ние тве́рдо гра́ду Бря́нску дарова́ла еси́,/ на ню́же взира́юще, уны́ние отгоня́ем и весе́лия духо́внаго исполня́емся.
Наста́вница еси́ мона́хов, Присноде́во,/ те́мже при́зри на оби́тель Све́нскую, ю́же благочести́вый князь Рома́н/ на ме́сте, Тобо́ю избра́ннем, созда́, я́ко киво́т чудотво́рныя ико́ны Твоея́,/ и при́сно сию́ соблюда́й, подвиза́ющихся же в ней спаса́й.
Арха́нгельский глас прино́сим Ти, Всепе́тая:/ Ра́дуйся, Благода́тная, Све́нская похвало́, с Тобо́ю Госпо́дь и Тобо́ю с на́ми,/ Его́же, я́ко Ма́тернее дерзнове́ние иму́щи, моли́ти не преста́й,/ о́вцы па́жити Твоея́ от лю́тых волко́в сохрани́ти невреди́мы.
Песнь 6
Ирмо́с: Боже́ственное сие́ и всечестно́е/ соверша́юще пра́зднество,/ Богому́дрии, Богома́тере,/ прииди́те рука́ми воспле́щим,// от Нея́ ро́ждшагося Бо́га сла́вим.
Явле́ние Бо́жия благода́ти, Правосла́вней Це́ркви прису́щия,/ зрим в чу́днем заступле́нии гра́да Бря́нска Све́нския ра́ди ико́ны Богома́тере/ от нахожде́ния вои́телей злосла́вных.
Сотвори́ ны досто́йны бы́ти такова́го да́ра ми́лости Твоея́, Всепе́тая Богоро́дице,/ обраще́нием от злых дел к благо́му житию́, па́че же правосла́вием неруши́мым.
Воззови́те вельми́, свяще́нных уста́, че́стне почита́юще одушевле́нный Госпо́день Киво́т,/ и на́ша моле́ния к Пречи́стей вознеси́те, благода́рно Ея́ бла́гость прославля́юще.
Ели́цы благочести́вии, прииди́те, поклони́мся Све́нстей Бо́жия Ма́тере ико́не,/ подае́т бо певце́м чудотво́рнаго Ея́ о́браза/ кре́пость на бори́теля диа́вола и грехо́в оставле́ние.
Конда́к, глас 8:
Взбра́нней Воево́де победи́тельная,/ я́ко изба́вльшеся от супоста́т благода́тию Све́нскаго Твоего́ о́браза,/ благода́рственная воспису́ем Ти, раби́ Твои́, Богоро́дице,/ но я́ко иму́щая держа́ву непобеди́мую/ от вся́ких нас бед свободи́, да зове́м Ти:// ра́дуйся, Неве́сто Неневе́стная.
И́кос:
Егда́ по грехо́м на́шим воста́ша язы́цы го́рьции и бо́рзии,/ ходя́щии по широта́м земли́ Ру́сския, е́же насле́дити селе́ния чу́ждая,/ и святы́ни правосла́вныя поруга́нию предаю́щии,/ и на град Брянск устреми́шася,/ тогда́ сих свире́пство превозмо́же моли́тва Пречи́стыя Богома́тере/ и дре́вних чуде́с подо́бие нам яви́ся:/ Сия́ бо лю́ди ка́ющияся и к ико́не Ея́ припа́дающия напра́сныя сме́рти изба́ви,/ град же Свой и окре́стныя ве́си от огня́ и меча́ сохрани́,/ по́лчища иноплеме́нныя вспять обрати́вши,/ сего́ ра́ди немо́лчно зове́м Е́й:/ ра́дуйся, Неве́сто Неневе́стная.
Песнь 7
Ирмо́с: Не послужи́ша тва́ри Богому́дрии/ па́че Созда́вшаго,/ но о́гненное преще́ние му́жески попра́вше,/ ра́довахуся, пою́ще:// препе́тый отце́в Госпо́дь и Бог, благослове́н еси.
Не мо́щно нам отве́рсти уста́, Ма́ти Бо́жия,/ греси́ на́ши, я́ко огнь пе́щи вавило́нския, превзыдо́ша на́ша главы́,/ но в покая́нии приими́ нас, благословя́щия Сы́на Твоего́ и Бо́га оте́ц на́ших.
Сни́ди в пещь страсте́й на́ших, Пренепоро́чная,/ и пла́мя по́хоти в дух росы́ шумя́щ чистоты́ преложи́,/ да благода́рно зове́м Ти: благослове́нна еси́, Ро́ждшая Бо́га оте́ц на́ших.
Ка́ко воспое́м чу́до заступле́ния Твоего́, Благослове́нная Богоро́дице?/ Ты бо сле́зныя мольбы́ и сокруше́ние серде́ц чад Твои́х прие́мши,/ я́ко же́ртву чи́стую Сы́ну Твоему́ принесла́ еси́,/ и пра́ведный гнев Его́ угаси́ла еси́, ро́ждшая Бо́га оте́ц на́ших.
А́ще и согреши́хом, но не отступи́хом от Тебе́, Влады́чице,/ – уми́льно вопия́ху лю́дие пред Све́нскою ико́ною Твое́ю,/ – не оста́ви на поруга́ние злове́рным град Твой, благословя́щий Сы́на Твоего́ и Бо́га отец на́ших.
Песнь 8
Ирмо́с: О́троки благочести́выя в пещи́,/ Рождество́ Богоро́дичо спасло́ есть,/ тогда́ у́бо образу́емое,/ ны́не же де́йствуемое,/ вселе́нную всю воздвиза́ет пе́ти Тебе́:/ Го́спода по́йте, дела́,// и превозноси́те Его́ во вся ве́ки.
Я́ко столпо́м о́блачным, Све́нскою ико́ною Твое́ю, град Твой покрыва́еши, Пречи́стая,/ и я́ко столпо́м о́гненным ви́димыя и неви́димыя враги́ опаля́еши,/ ве́рныя же просвеща́еши, превознося́щия Сы́на Твоего́ во ве́ки.
Просла́вим благоче́стно благодея́ния Присноде́вы, честны́й Ея́ о́браз обстоя́ще любо́вию,/ Та бо лю́ди Своя́, пла́менне Ю́ призыва́ющия, ми́лостию Свое́ю ороси́,/ злочести́выя супоста́ты от града Бря́нска дале́че отгна́вши,/ те́мже Засту́пницу на́шу превозно́сим во ве́ки.
Огне́м откры́ется и искуси́тся коего́ждо де́ло, яково́ же есть,/ и а́ще пребу́дет, мзду прии́мем, а́ще же сгори́т, отщети́мся./ Убои́мся у́бо, бра́тие, потопле́ния о́гненнаго/ и под кров Богоро́дицы притеце́м, превознося́ще Сы́на Ея́ во ве́ки.
Хвра́стие ересе́й и раско́лов, и собла́знов церко́вных/ Боже́ственным огне́м любве́ Бо́жия попали́, Цари́це Небе́сная,/ его́же Сын Твой прии́де воврещи́ на зе́млю,/ правосла́вныя же я́ко зла́то в горни́ле испыта́ний очи́сти, превознося́щия Го́спода во ве́ки.
Песнь 9
Ирмо́с: Всяк земноро́дный/ да взыгра́ется Ду́хом просвеща́емь,/ да торжеству́ет же Безпло́тных умо́в естество́,/ почита́ющее свяще́нное торжество́ Богома́тере,/ и да вопие́т:/ ра́дуйся, Всеблаже́нная Богоро́дице,// Чи́стая Присноде́во.
Всепе́тая Богоро́дица на Небеси́ с Сы́ном и Бо́гом Свои́м ца́рствующи,/ на земли́ су́щих благоутро́бно посеща́ет,/ па́че же те́пле призыва́ющим Ея́ ско́рая Помо́щница явля́ется,/ те́мже и град Брянск от наше́ствия супоста́т изба́вила есть.
Анто́ния и Феодо́сия Пече́рских, мона́хов ру́сских первонача́льников,/ преподо́бный Али́пий предстоя́щими Тебе́ изобрази́, мона́шескаго чи́на Влады́чице,/ зна́менуя при́сное их к Тебе́ о нас моле́ние, с ни́миже Тя велича́ем.
Лику́й и красу́йся, Бря́нская земле́,/ иму́щи в себе́ неоску́дный исто́чник благода́ти, Све́нскую ико́ну Пречи́стыя Де́вы,/ Ея́же ра́ди ви́димыя и неви́димыя враги́ прогоня́ются, еретицы́ посрамля́ются,/ ве́рнии же любо́вию неизче́тныя Ея́ ми́лости велича́ют.
О вели́кая на́ша Засту́пнице и похвало́, Пресвята́я Богоро́дице,/ честне́йшая Херуви́м и сла́внейшая без сравне́ния Серафи́м,/ правосла́вия щи́те и ору́жие на враги́ непобеди́мое,/ по достоя́нию воспе́ти Тя не могу́ще, во смире́нии се́рдца велича́ем.
Свети́лен:
Ма́ти Бо́жия, при́зри благосе́рдно на благода́рно чту́щия Све́нскую ико́ну Твою́,/ е́юже град Брянск от нахожде́ния злове́рных изба́вила еси́,/ и умоли́ Ро́ждшагося от Тебе́ дарова́ти Це́ркви Правосла́вней утвержде́ние,/ Оте́честву на́шему на враги́ одоле́ние и душа́м на́шим спасе́ние.
Сла́ва, и ны́не, пра́здника: От земли́ на Небеса́ преста́вльшися:
На хвали́тех стихи́ры пра́здника 3, глас 6.
И Све́нския стихи́ры, глас 2.
Подо́бен: Ки́ими похва́льными венцы́:
Ки́ими благода́рными усты́/ воспое́м Богоро́дицу?/ Све́нским-Пече́рским о́бразом Свои́м/ град Брянск и всю зе́млю Ру́сскую обогати́вшую/ и неотсту́пно с на́ми пребыва́ющую,/ ны́не же в Боже́ственнем торжестве́/ святы́я Своея́ ико́ны/ подаю́щую притека́ющим к Ней// вели́кия ми́лости.
Ки́ими досто́йными пе́сньми/ восхва́лим Богоро́дицу?/ Земли́ Ру́сския Цари́цу Небе́сную,/ правосла́вия утвержде́ние,/ злосла́вия же посрамле́ние,/ в беда́х су́щим ско́рое поможе́ние,/ Ея́же ра́ди Све́нския ико́ны/ шата́ния иноплеме́нных на град Брянск Христо́с низложи́,// име́яй ве́лию ми́лость.
Ки́ими по́двиги благоче́стия/ обра́дуем Богоро́дицу?/ Све́нскою ико́ною Свое́ю/ благострое́нию держа́вы Росси́йския служа́щую/ и междоусо́бныя бра́ни умиря́ющую,/ не пе́сньми то́кмо сла́вяще,/ но де́лы ве́ры пра́выя сла́ву воздаю́ще,/ да не отврати́т Лица́ Своего́ от нас грех ра́ди на́ших,// иму́щи ве́лию ми́лость.
Сла́ва, и ны́не, пра́здника, глас 3: Прииди́те, вси концы́ земни́и:
Славосло́вие вели́кое. Тропа́рь Све́нской.
Сла́ва, и ны́не, пра́здника. И отпу́ст.
На Литурги́и
Блаже́нна от обою́ кано́нов пра́здника, песнь 3-я, на 4, и от кано́на Све́нския, песнь 6-я, на 4.
По вхо́де тропа́рь пра́здника и Све́нския. Сла́ва, конда́к Све́нския: И ны́не, пра́здника. И про́чая слу́жба вся Богоро́дицы.
Моли́тва
О, Всеми́лостивая Ма́ти, Пречи́стая Де́во Богоро́дице, Возбра́нная Воево́до правосла́вных! Благода́рным се́рдцем и усты́ славосло́вим Тя при́сно пред Све́нскою ико́ною Твое́ю, ю́же я́ко Боже́ственное украше́ние Це́ркве Ру́сския и зало́г ми́лости Твоея́ ве́рным лю́дем дарова́ла еси́. Се́ю бо ико́ною благо́дать Бо́жию, Правосла́вней Це́ркви прису́щую, явля́еши, егда́ то́чиши исцеле́ния, напа́стей избавля́еши, бесо́в прогоня́еши, наше́ствия иноплеме́нных отража́еши. Те́мже приле́жно мо́лим Ти ся, Богома́ти, проба́ви и на пре́дняя вели́кия ми́лости Твоя́ любо́вию чту́щим Тя, Правосла́вие утверди́, отпа́дшия от пра́выя ве́ры к позна́нию и́стины напра́ви и уста́ нечести́вых, ху́лящих Святу́ю Це́рковь, загради́. Оте́честву на́шему мир и на враги́ побе́ды да́руй, огради́ нас от нахожде́ния супоста́т, междоусо́бныя бра́ни и вся́каго зла, па́че же от душегуби́тельных страсте́й свободи́, во е́же умре́ти ми́ру и жи́ти Сы́ну и Бо́гу Твоему́ в соблюде́нии за́поведей Его́. И сподо́би нас, Предста́тельнице на́ша непосты́дная, на Стра́шнем Суде́ одесну́ю Престо́ла Бо́жия ста́ти и с ли́ки А́нгелов и святы́х та́мо восхваля́ти пречестно́е и́мя Сы́на Твоего́, со Безнача́льным Его́ Отце́м и Пресвяты́м Ду́хом во ве́ки. Ами́нь.
