Священномученик Влади́мир Панькин, пресвитер

Ревностию по Бозе распалаемь,/ священномучениче Владимире прехвальне,/ гонителей безбожных не убоялся еси/ и, Христу даже до смерти последовав,/ сын верный Церкве Русския явился еси,/ и ныне, Престолу Божию предстоя,// моли спастися душам нашим.

Восхвалим, вернии,/ во священницех изряднаго/ и в мученицех преславнаго,/ Владимира богомудраго,/ иже, лишений и мучений не убоявся,/ в годину лютых гонений священство, яко дар, восприят/ и, смерти от безбожных невинно предан быв,/ землю Казахстанскую кровию своею обагри./ Темже к нему с любовию возопиим:/ моли Христа Бога/ в вере Православней нам утвердитися// и спастися душам нашим.

О, угодниче Христов, священномучениче Владимире, пастырю земли Казахстанския! Ты в годину гонений безбожных на Церковь Русскую веру неколеблему сохранил еси и паству, тебе врученную, паче жизни земныя возлюбил еси, темже и кончину от безбожных чрез многия раны и язвы претерпел еси. Не остави и нас, ныне память твою почитающих, и не престай молитися ко Господу, да подаст нам веры укрепление, терпеливное креста приятие, Слова Божия разумение и любве друг ко другу умножение. Помози пастырем нашим подвигом добрым подвизатися, да в чистоте соблюдается вера Православная в стране нашей Казахстанстей, да умножаются храмы и обители наша и да сохраняется в них стадо Христовых словесных овец. Умоли Господа Бога, да сподобит и нас без порока прейти поприще жития земнаго, да купно с тобою сподобимся прославляти во Царствии Небеснем Отца и Сына и Святаго Духа. Аминь.