Святитель Никола́й (Велимирович), епископ Сербский, Охридский и Жичский

Златоу́стый пропове́дниче Воскре́сшаго Христа́,/ путеводи́телю ро́да Се́рбскаго крестоно́снаго в века́х,/ благогла́сная ли́ро Ду́ха Свята́го,/ славо и любы́ мона́хов, ра́дованье и похвало́ свяще́нников,/ учи́телю покая́ния, предводи́телю богомо́льна во́инства Христо́ва/ святы́й Нико́лае Се́рбский и всеправосла́вный:/ со все́ми святы́ми Небе́сныя Се́рбии моли́ Еди́наго Человеколю́бца// да да́рует мир и едине́ние ро́ду на́шему.

Се́рбскаго Лелича рожде́ние,/ архипа́стырем во Охриде свята́го Нау́ма был еси́,/ от престо́ла святи́теля Са́ввы в Жичу предста́л еси́,/ науча́я и просвеща́я лю́ди Бо́жия Святы́м Ева́нгелием./ Мно́гия к покая́нию и любве́ ко Христу́ приве́л еси́,/ Христа́ ра́ди стра́сти в Дахау претерпе́л еси́,/ и сего́ ра́ди, свя́те, от О́него же просла́влен еси́,// Нико́лае, Бо́жий новоявле́нный уго́дниче.

О, златоу́стый святителю Христо́в Нико́лае, Се́рбския страны́ покрови́телю, и всех правосла́вных христиа́н просвети́телю, за нас же, гре́шных, благонаде́жный пред Го́сподем предста́телю! К тебе́ прибега́ем с ве́рою и мо́лимся с любо́вию: при́зри на не́мощи на́ша и услыши прошения наша со благогове́нием тебе́ приноси́мая, и умилосе́рдися о нас, обремене́нных и разсла́бленных грехи́ ве́лиими, и умоли́ Христа́ Бо́га о все́х скорбя́щих и озло́бленных, по́мощи Его́ тре́бующих. Не оста́ви такожде, о архиере́ю Госпо́день, всемо́щным твои́м заступле́нием всех от Правосла́вныя ве́ры отступи́вших, в неве́рии, злове́рии и суеве́рии пребывающих, да некреще́ннии крестя́тся, невенча́ннии венча́ются и да храня́т плод утро́бы своея́.
Ей, свя́тче вели́кий и но́вый уго́дниче Бо́жий, вторы́й Нико́лае ми́лостивый! Яви́ предста́тельство твое́ о нас, гре́шных, к Вы́шнему и хода́тайствуй пред Ним твои́ми богоприя́тными моли́твами, да покаемся во гресех наших и сотворим плоды достойны покаяния: смирение и воздержание, целомудрие и нищелюбие, трезвение и простоту, да отринем иго страстей всегубительных и свободимся рабо́ты вра́жия.
О, святы́й влады́ко Нико́лае, Це́ркве Се́рбския и Вселе́нския велеле́пое украше́ние, оте́ческаго Правосла́вия кре́пкое утвержде́ние! Моли́ Еди́наго Человеколю́бца, да вси мы, лю́дие слове́нстии, сою́зом бра́тския любве́ связу́еми, поживе́м во вся́цем благоче́стии и ми́ре, па́че же, моли́твами твои́ми и тве́рдым твои́м покро́вом сподо́бимся Небе́сное Ца́рствие улучи́ти, иде́же ты ны́не в незаходи́мем сия́еши све́те, ку́пно с со́нмом новому́чеников и испове́дников се́рбских и ру́сских, и всех святы́х от ве́ка угоди́вших Бо́гу, Отцу́ и Сы́ну и Свято́му Ду́ху, ны́не и при́сно, и во ве́ки веко́в. Ами́нь.