Преподобный Некта́рий Казанский

Подвигшася к Богу добре, блаженнии земная остависта и небесная восприяста. Монаха два, един единаго родивый, в граде новопросвещеннем пастырю дивному верно послуживша. И по смерти его веру к нему держаста не сумненну, храмину каменну над гробом соградиста: в той же и сам близ него погребошася, и многим нетлением от Бога почтени бывше. Преподобнии Ионо и Нектарие со святителем Гурием, молите Христа Жизнодавца, да спасет души наша.

Преподобных отец двоица единонравная, богомудренно преселистася во град Казань, и яко луча возсияста в новом Отечестве, зарями сияя солнца, блаженнии, пречуднаго Гурия, земли Казанския просветителя, тем же вы почитаем, Ионо и Нектарие, чудотворцы преславнии и преподобных украшение.

О, преподобнии отцы наша Ионо и Нектарие! Услышите ныне нас, к вам усердно молящихся и предающих зде, на земли, к раце честных мощей ваших. Вы же духом на Небесех Пресвятей Троице предстоя со святителем Гурием, молитеся о нас грешных, да избавимся от всяких болезней и объстояний, и благочестно поживем в настоящем житии, да явимся святаго вашего жития подражатели. Умолите Христа Бога даровати нам оставление грехов наших, елико согрешихом от юности нашея делом, словом, помышлением; да своею благодатию водворит Господь среди нас единодушие и любовь. Оградите неусыпными молитвами вашими град Казань, в нем же добродетельно поживше, Богу угодили есте, от всех навет вражеских; а вся люди в нем живущия от бед и скорбей: яко да не востанут чада на родителей своя и не погубят их междоусобныя распри, и да не оскудеют в богохранимом граде сем ревнители иноческаго благочестия. Испросите же нам у Господа вечнаго спасения, яко да вашим теплым предстательством спасаеми, славу возсылати сподобимся в Троице славимому Богу нашему – Отцу и Сыну, и Святому Духу, ныне и присно и во веки веков. Аминь.